Property:DescriptionTib
From Bodhicitta
This is a property of type Text.
A
སྐུ་ཞབས་ཨརྚ་ཨེང་གྷེལ་མཆོག་ནས། སློབ་དཔོན་ཐོགས་མེད་ཀྱིས་མཛད་པའི་གཞུང་། བྱང་ཆུབ་སེམས་དཔའི་ས་ཞེས་པ་དབྱིན་སྐད་དུ་བསྒྱུར་ཅིང་དཔར་སྐྲུན་ཞུས་རྗེས་བསྩལ་བའི་གསུང་བཤད་ཀྱི་བརྙན་འཕྲིན་རིམ་པ་ ༣ གྱི་ ༡། +
གསང་ཆེན་ནོར་གླིང་(སྤེན་)ནས་གོ་སྒྲིག་ཞུས་ཤིང་གསོལ་བ་བཏབ་པ་བཞིན། སྤྱི་ལོ་ ༢༠༢༢ ཟླ་ ༣ ཚེས་ ༢༠ ཉིན། ༸སྐྱབས་རྗེ་འཁོན་གདུང་ཨ་སང་གྷ་བཛྲ་རིན་པོ་ཆེ་མཆོག་གིས་དགེ་བཤེས་གླང་རི་ཐང་པས་ (༡༠༥༤–༡༡༢༣) མཛད་པའི་བློ་སྦྱོང་ཚིགས་བརྒྱད་མའི་ཁྲིད་ལུང་དྲ་ཐོག་ཐད་གཏོང་གནང་བའི་བརྙན་འཕྲིན་འདི་ཉིད། སྤེན་སྐད་དང་། ཕ་རན་སི། འཇར་མན་སྐད་བཅས་སུ་བསྒྱུར་ཡོད་པ་དང་། ས་སྐྱ་མཛའ་གྲོགས་ཚོགས་པས་ཆོག་མཆན་ཞུས་ཏེ་རྒྱ་སྐད་དང་། ཝིཏ་ནམ། བལ་པོ། སོག་པོ། ཧུང་གྷ་རི། ཨུ་རུ་སུ། ཨི་ཊ་ལི། པོར་ཅུ་གྷལ་བཅས་ཀྱི་སྐད་དུ་ཡང་གསུང་སྒྱུར་ཞུས་ཡོད། ༈ ༸སྐྱབས་རྗེ་འཁོན་གདུང་ཨ་སང་གྷ་བཛྲ་རིན་པོ་ཆེ་མཆོག་ནི་དཔལ་ས་སྐྱའི་གདུང་བརྒྱུད་འཛིན་ཅིང་། འབྱུང་འགྱུར་ས་སྐྱ་ཁྲི་འཛིན་གྱི་འོས་སྤྲུལ་ལས་གཅིག་ཡིན། +
༈ བློ་སྦྱོང་དོན་བདུན་མར་གྲགས་པ་ནི། ཉིན་རེའི་འཚོ་བའི་ཁྲོད་ཐེག་པ་ཆེན་པོའི་ལམ་ཉམས་སུ་ལེན་ཚུལ་བསྟན་པའི་སྙིང་པོའི་གདམས་ངག་ཅིག་ཡིན། འདི་ཉིད་ཐོག་མར་བོད་དུ་འཆད་པ་པོ་མཉམ་མེད་ཇོ་བོ་རྗེ་(༩༨༢—༡༠༥༤)ཡིན་པ་དང་། སྔ་མོའི་དུས་སུ་གདམས་པ་འདི་ཉིད་སློབ་མ་བྱེ་བྲག་པ་ལ་ཆིག་བརྒྱུད་ཙམ་མ་གཏོགས་ཚོགས་ཆོས་སུ་གནང་སྲོལ་མེད། ཕྱིས་སུ་དགེ་བཤེས་འཆད་ཁ་བས་ཡིག་གེར་བྲིས་པས། བོད་ཀྱི་ཆོས་བརྒྱུད་ཡོངས་ལ་དར་ཁྱབ་ཤིན་ཏུ་ཆེན་པོར་གྱུར། གདམས་པ་འདི་ལ་བརྟེན་ནས་མཐར་འབྲས་ངེས་ལེགས་མངོན་དུ་གྱུར་བ་མ་ཟད། གནས་སྐབས་ཚེ་འདིར་ཡང་དགྲ་གཉེན་བར་གསུམ་ཡོངས་ལ་དག་སྣང་དང་བྱམས་བརྩེའི་སྒོ་ནས་རང་བློ་ཆོས་དང་མཐུན་ཅིང་། ཚེ་འདིའི་རྐྱེན་ངན་ཐ་དག་བྱང་ཆུབ་ཀྱི་ལམ་དུ་བསྒྱུར་ཐུབ། གདམས་འདི་ཡི་རྩ་ཚིག་རྣམས་ཚིགས་བསྡུས་ཤིང་དོན་ཤིན་ཏུ་ཟབ་པས། ཉམས་མྱོང་དང་ལྡན་པའི་བླ་མའི་མན་ངག་ལ་ངེས་པར་བརྟེན་དགོས།
༈ ༸སྐྱབས་རྗེ་འཁོན་གདུང་ཨ་སངྒ་བཛྲ་རིན་པོ་ཆེ་མཆོག་ནི་འབྱུང་འགྱུར་ས་སྐྱ་ཁྲི་འཛིན་གྱི་འོས་སྤྲུལ་ལས་གཅིག་ཡིན། སྤྱི་ལོ་༡༩༩༩ ཟླ་བ་༤ ཚེས་༠༡ ཉིན་བྱང་ཨ་རིར་སྐུ་འཁྲུངས། གུང་ལོ་ལྔ་པའི་ཐོག་བལ་ཡུལ་ཐར་ལམ་དགོན་པར་བྱོན་ནས་ནས་བསླབ་པ་སློབ་གཉེར་གནང་འགོ་བརྩམས། དགུང་ལོ་བཅུ་གཉིས་ཐོག་རྒྱ་གར་རྒྱལ་ས་སྡེ་ར་སྡུན་གྱི་ས་གནས་ར་ཛ་པུར་དུ་རྡོ་རྗེ་ཕུར་པའི་གྲུབ་མཚམས་ཀྱི་རྒྱུགས་སྤྲོད་ལ་ཞུགས། རྒྱུགས་འབྲས་ཨང་རིམ་དང་པོ་ཐོབ། ད་ལྟ་རྒྱ་གར་ས་པཎ་བཤད་གྲྭར་མུ་མཐུད་སློབ་གཉེར་གནང་ཞིང་། ཞོར་དུ་དད་ལྡན་མི་དམངས་རྣམས་ལ་མདོ་སྔགས་ཀྱི་གསུང་ཆོས་ཀྱང་ཟབ་རྒྱས་བཀའ་དྲིན་བསྐྱངས་དང་སྐྱོང་བཞིན་པ་ནི་སྐུ་ཡི་རྣམ་ཐར་མདོ་ཙམ་མོ།། +
མདོ་སྡེ་འདི་ནི་བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་བཞུགས་ཏེ། འཁོར་གྱི་གཙོ་བོ་བྱང་ཆུབ་སེམས་དཔའ་བློ་གྲོས་རྣམ་པར་དག་པ་ལ་གསུངས་པ་ཡིན་ལ། འདི་ཡི་བརྗོད་བྱ་གཙོ་བོ་ནི། མེ་ཏོག་དང་། བདུག་སྤོས་དང་། མར་མེ་ལ་སོགས་པ་མཆོད་པའི་ཡོ་བྱད་ཀྱིས། དེ་བཞིན་གཤེགས་པའི་མཆོད་རྟེན་དག་ལ་ཕྱག་བྱ་དང་འདུད་ཀྱིས་བཀུར་སྟི་བྱས་པ་ལས་བྱུང་བའི་ཕན་ཡོན་གྱི་བྱེ་བྲག་རྒྱས་ཤིང་རྒྱས་པར་བཤད་ཡོད། +
«འཕགས་པ་སྤྱན་རས་གཟིགས་དབང་ཕྱུག་གི་རྣམ་པར་ཐར་པ་» ཞེས་པ་འདི་ནི་སྡོང་པོ་བཀོད་པའི་མདོའི་ལེའུ་སུམ་ཅུ་པ་ཡིན། དེའི་ནང་དུ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་རི་བོ་པོ་ཏ་ལ་ཀར་ནོར་བཟང་ལ་ཆོས་སྟོན་པའི་ཚེ། འཕགས་པ་རང་ཉིད་ཀྱིས་སྙིང་རྗེ་ཆེན་པོའི་སྒོ་ཐོགས་པ་མེད་པ་ཞེས་བྱ་བའི་བྱང་ཆུབ་སེམས་དཔའི་རྣམ་པར་ཐར་པ་ཐོབ་པ་དང་། ཐོབ་པ་དེ་ལ་བརྟེན་ནས་སེམས་ཅན་ཐམས་ཅད་གཡང་ས་དང་། རྒྱུད་དང་། མགོ་རྨོངས་པ་དང་། བཅིང་བ་དང་། སྲོག་ལ་བབ་པ་དང་། ཡོ་བྱད་ཀྱིས་ཕོངས་པ་དང་། འཚོ་བ་མེད་པ་དང་། གྲགས་པ་མེད་པ་དང་། འཁོར་བ་དང་། འཁོར་དུ་བག་ཚ་བ་དང་། འཆི་བ་དང་། ངན་སོང་དང་། ལམ་མུན་པས་ཉམ་ང་བ་དང་། སྐལ་བ་མི་མཉམ་པ་དང་འགྲོགས་པ་དང་། སྡུག་པ་དང་བྲལ་བ་དང་། མི་སྡུག་པ་དང་འགྲོགས་པ་དང་། ལུས་ལ་མི་བདེ་བ་དང་། སེམས་ལ་མི་བདེ་བ་ལ་སོགས་པའི་འཇིགས་པ་དག་ལས་རྣམ་པར་འགྲོལ་བར་མཛད་ཚུལ་གསུངས་ཡོད། རྣམ་པར་ཐར་པ་འདི་ཉིད་སློབ་དཔོན་ཞི་བ་ལྷས་བསླབ་བཏུས་སུ་དྲངས་ཤིང་། དེ་ལ་བརྟེན་ནས་དགེ་རྩ་གཞན་དོན་དུ་བསྔོ་བའི་རྣམ་གཞག་གསུངས་ཡོད། སྤྱན་རས་གཟིགས་དབང་ཕྱུག་གི་རྣམ་པར་ཐར་པ་འདི་བོད་ཀྱི་བཀའ་འགྱུར་ནང་སྡོང་པོ་བཀོད་པའི་མདོའི་ལེའུ་ཞིག་ཡིན་པ་མ་གཏོགས་ཟུར་དུ་བཞུགས་མེད། +
ཐེག་པ་ཆེན་པོའི་མདོ་འདི་དང་ཞལ་བྱང་མཚུངས་པ་ཞིག་ཐེག་པ་འོག་མའི་ལུགས་སུའང་པ་ལིའི་སྐད་དུ་བཞུགས་ཡོད། འདི་ནི་བཅོམ་ལྡན་འདས་མཉན་ཡོད་དུ་བཞུགས་པའི་ཚེ། མཉན་ཡོད་ཀྱི་བྱང་ཕྱོགས་ན། བྲམ་ཟེའི་བུ་འཇིག་རྟེན་ཐམས་ཅད་ཀྱིས་བལྟ་ན་སྡུག་པ་ཞེས་བྱ་བ། གཟུགས་བཟང་ཞིང་ཤིན་ཏུ་བལྟ་ན་སྡུག་པ་ཞིག་ཡོད་པ་དེ་ཉིད་ལོག་པའི་བཤེས་གཉེན་ནོར་བུ་བཟང་པོས་མི་སྟོང་གསད་ན་དངོས་གྲུབ་ཐོབ་ཅེས་བསླུས་པ་བཞིན། བསད་པའི་མི་རོ་རེ་རེ་ལས་སོར་མོ་རེ་བླངས་ཏེ་ཕྲེང་བར་བྱས་ནས་མགུལ་ཏུ་བཏགས་པས་སོར་མོའི་ཕྲེང་བ་ཅན་དུ་གྲགས་ཤིང་། མཐར་སོར་མོ་གཅིག་གིས་སྟོང་མ་ལོན་པའི་ཚེ། ཐབས་ཟད་ནས་རང་གི་མ་གསད་པར་བརྩམས་པ་བཅོམ་ལྡན་འདས་ཀྱིས་མངོན་པར་ཤེས་པས་མཁྱེན་ནས། ཁོ་མཚམས་མེད་ཀྱི་ལས་དེ་ལས་སྐྱོབ་པའི་ཕྱིར་ཐུགས་སྙིང་རྗེ་ཆེན་པོས་དེའི་དྲུང་དུ་བྱོན་པ་ན། སོར་ཕྲེང་གིས་ཨ་མ་བཞག་ནས་བཅོམ་ལྡན་འདས་གསད་པའི་ཕྱིར་རྗེས་སུ་དེད་ཚེ། བཅོམ་ལྡན་འདས་དལ་བར་གཤེགས་རུང་ཁོས་རྗེས་མ་ཟིན་པས། ཡ་མཚན་སྐྱེས་ནས་སེམས་ཀྱི་ཁོང་ཁྲོ་རིམ་གྱིས་ཞི། དད་པའི་སྤུ་ལོང་གཡོས། འགྱོད་སེམས་བཟོད་གླགས་མེད་པས་རལ་གྲི་ས་ལ་ལྷུང་སྟེ། མིག་གཉིས་མཆི་མས་གང་བཞིན་དུ་བཅོམ་ལྡན་འདས་ལ་རྗེས་སུ་གཟུང་བར་གསོལ་བ་བཏབ་པས། ཐུགས་སྙིང་རྗེ་ཆེན་པོས་དེ་ལྟར་གནང་སྟེ་རྗེས་སུ་བཟུང་བས་རིང་པོར་མ་ཐོགས་པར་མཆོག་གི་འབྲས་བུ་ཐོབ་པའི་གཏམ་རྒྱུད་ཅིག་ཡིན།
(ལོ་རྒྱུས་ཞིབ་གཟིགས་འདོད་ན་འདིར་ནོན། [https://buddhanature.tsadra.org/index.php/Books/The_Jewel_Ornament_of_Liberation_(Konchog_Gyaltsen)/The_Story_of_Angulimala here])
ཐེག་ཆེན་གྱི་ལུགས་ལ། སོར་ཕྲེང་ལ་ཕན་པའི་མདོ་འདི་ཉིད་དེ་བཞིན་གཤེགས་པའི་སྙིང་པོ་བསྟན་པའི་མདོ་ཡི་ཁོངས་སུ་གཏོགས་ཤིང་། དེ་ནི་ཕལ་ཆེར་མདོ་འདི་ཉིད་དུ་སོར་ཕྲེང་ཅན་དང་འཇམ་པའི་དབྱངས་དབར་ཟབ་མོ་སྟོང་པ་ཉིད་དང་འབྲེལ་བའི་གསུང་གླེང་རྒྱ་ཆེ་བྱུང་བས་ཡིན་ངེས་ལ། མཁས་པ་ལ་ལས་སོར་ཕྲེང་ལ་ཕན་པའི་མདོ་འདི་ཉིད་གཞན་སྟོང་དབུ་མའི་ལྟ་བ་སྟོན་པའི་མདོ་སྔ་ཤོས་ཀྱི་གྲས་སུ་ངོས་འཛིན་མཛད་ཡོད། +
<<ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པས་>>ཀྱང་ཤེར་མདོ་སྤྱི་ལྟར་བརྗོད་བྱ་སྟོང་པ་ཉིད་དེ། ཆོས་ཉིད་ཀྱི་གནས་ལུགས་དོན་དམ་པའི་བདེན་པ་སྟོན། དེང་རབས་མཁས་པས་མདོ་འདི་ཕལ་ཆེར་སྤྱི་ལོ་སྔོན་གྱི་དུས་རབས་ ༡ ནས་ ༢ པའི་བར་བྱུང་བ་དང་། ཤེར་མདོ་གཞན་དག་གི་རྩ་བར་གྱུར་པའི་མདོ་སྡེ་སྔ་ཤོས་ཡིན་པར་ངོས་འཛིན། ཡོངས་གྲགས་སུ་མདོ་འདི་སངས་རྒྱས་ཀྱིས་ཞལ་ནས་གསུངས་པའི་བཀའ་ཡིན་པ་དང་། འཕགས་པ་ཀླུ་སྒྲུབ་ཀྱིས་ས་འོག་ཀླུ་ཡུལ་ནས་མི་ཡུལ་དུ་གདན་དྲངས་པར་འདི་ཉིད་ཀྱི་རྗེས་འབྲང་རྣམས་ཀྱིས་བཞེད། མཚན་གཞན་ལ་<<ཡུམ་བསྡུས་པ་>>ཞེས་ཀྱང་བྱ། དེ་ཡང་ཤེར་ཕྱིན་ལས་འཕགས་པ་གསུམ་པོ་སྐྱེ་བས་ཡུམ་དང་། ཡུམ་རྒྱས་པ་<<ཤེར་ཕྱིན་འབུམ་པ་>>དང་བར་མ་<<ཉི་ཁྲི་ལྔ་སྟོང་>>པའི་བསྡུས་དོན་ཡིན་པས་བསྡུས་པ་ཞེས་གསོལ། ཨེ་ཤི་ཡ་དང་དེ་ལས་བརྒལ་བའི་ཡུལ་གྲུ་མང་པོར་དར་ཁྱབ་ཆེ་ཞིང་འགྱུར་ཡང་སྐད་རིགས་མར་པོར་བཞུགས། བོད་དང་ཧི་མ་ལ་ཡའི་ལྗོངས་སུ་མདོ་འདི་ཉིད་ཤིན་ཏུ་སྙན་གྲགས་ཆེ་ཞིང་འདི་གླེགས་བམ་འབེལ་བ་ཡོད། མདོར་ན། མདོ་འདི་སྟོན་པ་ཤཱཀྱ་ཐུབ་པ་དང་། རབ་འབྱོར་དང་། ཤཱ་རིའི་བུ་སོགས་དང་། གཞན་ཡང་ལྷའི་དབང་པོ་བརྒྱ་བྱིན་དང་། གངྒཱའི་ལྷ་མོ་ལ་སོགས་ཀྱི་དབར་ཕན་ཚུན་དྲི་བ་དྲིས་ལན་རྒྱ་ཆེར་མཛད་པ་ལས་གྲུབ་པ་ཞིག་ཡིན། ལེའུ་མཐའ་མའི་སྐབས་འཕགས་པ་རྟག་ཏུ་ངུས་དཀའ་སྤྱད་དུ་མས་བྱང་ཆུབ་སེམས་དཔའ་ཆོས་འཕགས་ལས་ཤེར་ཕྱིན་ཞུས་པའི་གཏམ་རྒྱུད་ངོ་མཚར་ཅན་ཡང་བཞུགས་ཤིང་། འདི་ཉིད་སེམས་ཀྱི་རང་བཞིན་འོད་གསལ་སྟོན་པའི་ཐེག་ཆེན་གྱི་མདོ་སྔ་ཤོས་ཡིན་པར་མངོན། +
B
སྨན་མདོ་ཆེ་ཆུང་ནས་འབྱུང་བའི་བཻཌཱུརྱའི་གཟུངས་དོན་དང་། གསོ་དཔྱད་བཤད་རྒྱུད་སོགས་ནས་འབྱུང་བའི་སྨན་བླའི་གཟུངས་དོན་ཐད་བསྒྱུར་དུ་དང་འཁྲུགས་བསྡེབས་གཉིས་ཀར་བཤད་པ་འདི་ནི། བླ་མའི་བཀའ་ཤོག་སྤྱི་བོར་ཕེབས་པ་བཞིན། དགེ་སློང་དྷརྨ་བྷ་དྲས་དབེན་གནས་དངུལ་ཆུའི་རི་ཕུག་ཏུ་བསྒྱུར་ཅིང་། རང་དབོན་དབྱངས་ཅན་གྲུབ་པའི་རྡོ་རྗེས་ཡི་གེར་བཀོད་པའོ།། +
སྨན་བླ་བདེ་གཤེགས་བདུན་གྱི་མདོ་ཆོག་ཉམས་སུ་ལེན་ཚུལ་སྙིང་པོ་གསལ་བར་བསྟན་པ་ཡིན་བཞིན་གྱི་ནོར་བུ་ཞེས་པ་འདི་ནི་གཞན་ཕན་གྱི་བློས། ཆོས་སྨྲ་བ་བློ་བཟང་ཆོས་ཀྱི་རྒྱལ་མཚན་གྱིས་ཆོས་གྲྭ་ཆེན་པོ་བཀྲ་ཤིས་ལྷུན་པོའི་གཟིམས་ཁང་དུ་སྦྱར་བའོ༎ +
རྒྱ་ཆེར་རོལ་པའི་མདོ་ལས་བྱུང་བའི་སངས་རྒྱས་ཤཱཀྱ་ཐུབ་པའི་རྣམ་ཐར་ལ་གཞི་བྱས་ཏེ་བདག་ཅག་གི་སྟོན་པའི་མཛད་པ་ལ་བསྟོད་པ་འདི་ནི་༧རྒྱལ་མཆོག་དང་པོ་༧རྒྱལ་བ་དགེ་འདུན་གྲུབ་པས་(༡༣༩༡–༡༤༧༤) མཛད་པའོ།། +
བདག་གཞན་མཉམ་པ་དང་བརྗེ་བའི་བློ་སྦྱོང་གི་དམིགས་སྐོར་སྤྱོད་འཇུག་བསམ་གཏན་ལེའུ་སོགས་སུ་གསུངས་པ་དུ་མ་ཡོད་ཀྱང་། འདི་ནི་ཤར་སྒོམ་ཐུན་གཅིག་གི་སྐྱོང་ཚུལ་ཙམ་ཞིག་གྱུར་རུ་ལུགས་སུ་སྦྱར་བ་ཞིག་གོ། +
འཇུ་མི་ཕམ་རྣམ་རྒྱལ་རྒྱ་མཚོས་མཛད་པའི་གཞུང་ཆུང་འདིར། འཁོར་བའི་རྩ་བ་ཕུང་པོ་ལ་བརྟེན་ནས་ངའོ་སྙམ་དུ་འཛིན་པའི་ངར་འཛིན་ནམ་གང་ཟག་གི་བདག་ཏུ་འཛིན་པ་ནི་མ་བརྟག་མ་དཔྱད་པའི་ངོར་ཡོད་སྙམ་ཙམ་ལས་དོན་དུ་མ་གྲུབ་པ་ཐག་ཁྲ་ལ་སྦྲུལ་དུ་འཛིན་པ་ལྟ་བུ་དང་། གདགས་གཞི་ཕུང་པོ་རྣམས་ཀྱང་དུ་མ་དང་མི་རྟག་པ་ཡིན་པས་མིང་རྐྱང་བཏགས་ཡོད་ཙམ་ལས་དོན་དུ་མ་གྲུབ་པར་གཏན་ལ་ཕབ་ནས། དེ་ལྟར་དགག་བྱ་གང་ཟག་དང་ཆོས་བུམ་པ་ལ་སོགས་པ་རང་བཞིན་གྱིས་མ་གྲུབ་པའམ་བདེན་པར་མ་གྲུབ་པའི་གནས་ལུགས་སོ་སོ་རང་རིག་པའི་ཡུལ་དུ་གྱུར་པའི་ཆོས་དབྱིངས་དེ་ཉིད་ཚུལ་བཞིན་རྟོགས་པ་ལ། སྒྲ་དང་ཚིག་གི་རྗེས་སུ་འབྲང་བའི་ཁ་ཕྱིར་བལྟས་ཀྱི་རིགས་པས་དཔྱད་པ་ཙམ་མིན་པར་བླ་མའི་མན་ངག་དང་ལྡན་པའི་སེམས་ཀྱི་བཞག་ཐབས་ལ་མཁས་པའི་སྒོ་ནས་བདེ་བླག་ཏུ་རྟོགས་པར་བྱེད་པ་ལམ་གྱི་གནད་མ་ནོར་བ་ཡིན་ཚུལ་གསུངས་ཡོད། +
རྒྱ་གར་དང་བོད་ཀྱི་ཆོས་འབྱུང་འདི་སྤྱི་ལོ་ ༡༣༢༢ ལོར་བོད་ཀྱི་མཁས་པ་བུ་སྟོན་རིན་ཆེན་གྲུབ་ཀྱིས་བརྩམས། ཞལ་བྱང་རྒྱས་པར་བདེ་བར་གཤེགས་པའི་བསྟན་པའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་ཅེས་གྲགས། སྤྱི་ལོ་ ༡༩༣༡ ནས་ ༡༩༣༢ བར་བོད་ཀྱི་དགོན་སྡེ་ཁག་ཏུ་སློབ་གཉེར་གནང་བའི་སོག་པོའི་དགེ་འདུན་པ་འགའ་དང་མཉམ་ལས་ཀྱིས་སྐུ་ཞབས་ཨོ་བྷར་མི་ལར་གྱིས་བསྒྱུར་བའི་དབྱིན་འགྱུར་ཡིག་ཆ་དག་གི་ཁོངས་སུ་ཆོས་འབྱུང་འདི་ཡི་དབྱིན་འགྱུར་ཡང་གཏོགས། འདིར་ཆོས་འབྱུང་དང་བོད་ཀྱི་བཀའ་བསྟན་གྱི་དཀར་ཆག་གཉིས་གཅིག་ཏུ་སྡེབས་པ་ནི་འདི་ཡི་གཞན་དང་མི་འདྲ་བའི་ཁྱད་ཆོས་ཡིན། ལེའུ་དང་པོར་རྣམ་བཤད་རིག་པ་ལ་བརྟེན་ནས་གསུང་རབ་ལ་འཆད་ཉན་བྱེད་ཚུལ་སྤྱིར་བསྟན། ལེའུ་གཉིས་པར་སྲོལ་རྒྱུན་གྱི་ཆོས་འབྱུང་ལྟར། མི་ཡུལ་དུ་དམ་པའི་ཆོས་དར་ཚུལ། ཆོས་འཁོར་རིམ་པ་གསུམ། བཀའ་བསྡུའི་རིམ་པས་རྒྱལ་བའི་གསུང་རྣམས་སྡུད་ཚུལ། སྟོན་པ་འདས་འཁྲུངས་ཀྱི་ལོ་ཚིགས། སྟོན་པའི་རྗེས་བྲངས་སློབ་མ་དང་། རྒྱ་གར་དུ་བསྟན་པ་ཇི་ལྟར་ནུབ་ཚུལ་སོགས་བསྟན། བོད་དུ་བསྟན་པ་དར་ཚུལ་གྱི་ལོ་རྒྱུས་ལ་བསྟན་པ་སྔ་དར་དང་ཕྱི་དར་གྱི་ས་བཅད་གཉིས་སུ་བགོས་ཡོད། བོད་འགྱུར་བཀའ་བསྟན་གྱི་དཀར་ཆག་སྤྱི་བཤད་སྐབས། ཐོག་མར་འགྱུར་ཐམས་ཅད་མདོ་དང་རྒྱུད་ཀྱི་སྡེ་གཉིས་སུ་ཕྱེ་ཞིང་། དེ་ཡང་བཀའ་དང་བསྟན་བཅོས་གཉིས་སུ་ཕྱེ་ཡོད་ལ། བཀའ་རྣམས་ཆོས་འཁོར་རིམ་པ་གསུམ་གྱི་སྒོ་ནས་དབྱེ་བ་ཕྱེ་ཞིང་ཐེག་པ་ཆེན་པོའི་མདོ་སྡེའི་ས་བཅད་ཟུར་དུ་བཀོད་ཡོད། བསྟན་བཅོས་ཀྱི་ཐད་ལ། བཀའ་སོ་སོའི་དགོངས་འགྲེལ་ (འདི་ཡང་ཆོས་འཁོར་གསུམ་གྱི་སྒོ་ནས་ཕྱེ་བ) དང་། བསྟན་བཅོས་སྤྱིའི་རྣམ་བཞག་དང་། བསྟན་བཅོས་ཐོར་བུ་བཅས་སུ་དབྱེ་བ་ཕྱེ་ཡོད། དེ་ལྟར་རྒྱུད་སྡེ་རྣམས་ཀྱང་བཀའ་དང་བསྟན་བཅོས་གཉིས་སུ་ཕྱེ་ཞིང་། དེ་དག་ཀྱང་བྱ་བ་དང་། སྤྱོད་པ། རྣལ་འབྱོར། རྣལ་འབྱོར་ཆེན་པོའི་རྒྱུད་དེ་རྒྱུད་སྡེ་བཞིའི་སྒོ་ནས་དབྱེ་བ་ཕྱེ་ཞིང་། རྒྱུད་ཕྱི་མ་ལ་ཡང་ཐབས་ཀྱི་རྒྱུད་དང་། ཤེས་རབ་ཀྱི་རྒྱུད་དང་། གཉིས་ཀའི་རྒྱུད་དུ་དབྱེ་བ་ཕྱེ་ཡོད།
མཁས་གྲུབ་དགེ་ལེགས་དཔལ་བཟང་གི་རྒྱུད་སྡེ་སྤྱིའི་རྣམ་བཞག་ནང་། གཞི་རྩ་བུ་སྟོན་གྱི་གསུང་གཞིར་བཟུང་ཡིན་ན་ཡང་། རྣལ་འབྱོར་ཆེན་པོའི་དབྱེ་བ་རྣམས་རྗེ་ཙོང་ཁ་པའི་བཞེད་སྲོལ་ལྟར་བླ་མེད་རྣལ་འབྱོར་གྱི་རྒྱུད་ཀྱི་ཁོངས་སུ་བསྡུས་ཤིང་། རྒྱུད་ཀྱི་འགྲེལ་པ་རྣམས་ཀྱང་རྣམ་བཞག་དེ་ག་རང་གི་རྗེས་སུ་འབྲངས་ནས་བསྒྲིགས་ཡོད། +
ཡིད་ཆེས་ཤིང་ཁུངས་བཙུན་པའི་ལོ་རྒྱུས་དང་། དད་པ་བསྐྱེད་པར་བྱ་བའི་ཕྱིར་ཕན་ཡོན་དང་། མདོ་སྔགས་ཀྱི་ཁྱད་པར་དང་ལོག་རྟོག་གི་བསླད་ཞུགས་པ་རྣམས་ལ་དཔྱད་དེ་འཁྲུལ་པ་བསལ་བ་དང་། ཉམས་སུ་བླང་བྱའི་ཆོ་ག་དངོས་བཤད་པ་བཅས་རྩ་བའི་ས་བཅད་བཞི་ཡི་སྒོ་ནས་ལེགས་པར་གཏན་ལ་ཕབ་པའི་ལེགས་བཤད་དེ། འོ་སྐོལ་སྙིགས་མའི་འགྲོ་བ་རྣམས་ལ་ལྷག་པར་ཐུགས་རྗེ་ཆེ་བ་བཅོམ་ལྡན་འདས་སྨན་གྱི་བླ་བདེ་བར་གཤེགས་པ་བརྒྱད་ཀྱི་མཆོད་པའི་ཆོ་ག་འདི་ནི། ༧གོང་ས་ལྔ་པ་ཆེན་པོ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས། རང་བྱུང་འཕགས་པ་འཇིག་རྟེན་དབང་ཕྱུག་གི་གཙུག་ལག་ཁང་ཕོ་བྲང་དམར་པོ་རིར་སྦྱར་བའོ།། +
གདུང་སེལ་བདུད་རྩིའི་ཐིགས་པ་ཞེས་པའི་བསྟན་བཅོས་འདི་ནི། ཡོངས་འཛིན་རིན་པོ་ཆེ་ཡེ་ཤེས་རྒྱལ་མཚན་ནས་བདེ་ལམ་གྱི་ཁྲིད་གནང་བ་རྗེ་བཙུན་དཀོན་མཆོག་བསྟན་པའི་སྒྲོན་མེ་དཔལ་བཟང་པོས་ཟིན་བྲིས་སུ་གནང་བ་ཡིན། +
བེའུ་བུམ་སྔོན་པོ་ཞེས་པ་འདི་ནི་རྒྱལ་བ་འབྲོམ་སྟོན་པ་དང་དགེ་བཤེས་པོ་ཏོ་བ་ཡབ་སྲས་ཀྱི་བརྒྱུད་པ་ལས་བྱུང་བའི་ལམ་རིམ་གྱི་ཞལ་གདམས་རྣམས་ཕྱོགས་གཅིག་ཏུ་བསྡུས་པའི་གླེགས་བམ་ཞིག་ཡིན། དེ་ཡང་བཀའ་གདམས་པའི་སྟོན་པ་སྔ་རབས་པ་དག་གིས་རང་གི་ཞལ་གདམས་རྣམས་ཡི་གེར་མ་བཀོད་ཀྱང་། ཕྱིས་ཀྱི་སློབ་བརྒྱུད་དག་གིས་གོང་མའི་ཞལ་གདམས་རྣམས་ལམ་རིམ་དང་། བསྟན་རིམ་དང་། བློ་སྦྱོང་བཅས་སྡེ་ཚན་གསུམ་དུ་བསྡུས་ནས་མི་རབས་གཉིས་ཙམ་གྱི་རིང་ལ་ཡི་གེར་བཀོད་པ་དེ་དང་དུས་མཚུངས་སུ། སྲོལ་རྒྱུན་སློབ་མ་བྱེ་བྲག་པ་ལ་གནང་བའི་ལྐོག་ཆོས་རྣམས་ཀྱང་འཁོར་འདུས་པ་མང་པོར་ཚོགས་ཆོས་སུ་གནང་བའི་འགོ་ཚུགས། དེས་ན་བེའུ་བུམ་སྔོན་པོ་འདི་ནི་བཀའ་གདམས་པའི་ཞལ་གདམས་རྣམས་ཆུགས་མེད་གཅིག་ཏུ་བསྒྲིགས་པའི་ཆོས་ཀྱི་མཛོད་ཆེན་དང་། གདམས་པ་རྣམས་མང་ཚོགས་སུ་ཁྱབ་སྤེལ་གཏོང་བའི་ཆ་རྐྱེན་བླ་ན་མེད་པ་ཞིག་ཏུ་ངོས་འཛིན་ཞུས་ཀྱང་ཆོག་པ་ཡིན། འདི་དང་དཔེ་ཆོས་རིན་ཆེན་སྤུངས་པ་ཞེས་པའི་བཀའ་གདམས་པའི་གཞུང་གཉིས་གོང་གསལ་གནས་བབ་གཅིག་གི་འོག་ཏུ་དུས་མཉམ་དུ་བྱུང་ཞིང། བཀའ་གདམས་བརྒྱུད་པའི་ཕྱག་སྲོལ་ལ་གླེགས་བམ་འདི་གཉིས་བརྒྱུད་པའི་རྩ་གཞུང་ལྟ་བུར་ངོས་འཛིན་མཛད་ཅིང་། བེའུ་འབུམ་དུ་ལམ་རིམ་གྱི་ཞལ་གདམས་རྣམས་དོན་གྱི་སྒོ་ནས་བསྟན་ལ། དཔེ་ཆོས་སུ་དེ་ཉིད་དཔེ་སྣ་ཚོགས་ཀྱི་སྒོ་ནས་བསྟན་པས་ཕན་ཚུན་གསལ་བྱེད་དུ་གྱུར་བ་ནི་གཞུང་གཉིས་ཀྱི་འབྲེལ་བའོ།། +
ཉི་ཧོང་གི་སྐད་དུ། (辯顯密二教論) 《བེན་ཁེན་མི་ཚུ་ནི་ཀྱོ་རོན་》ཞེས་པའི་བསྟན་བཅོས་འདི་ཡི་མཚན་དོན་བོད་སྐད་དུ་དོན་འགྱུར་བྱས་ཚེ། 《ལྐོག་ཆོས་དང་ཚོགས་ཆོས་རྣམ་འབྱེད་》ཅེས་པར་གྱུར། བསྟན་བཅོས་འདི་ཉིད་དུས་རབས་དགུ་པའི་སྟོད་དུ་ཉི་ཧོང་གི་སྔགས་འཆང་བ་སློབ་དཔོན་ཁཱུ་ཁི་(Kūkai)ཞེས་བྱ་བས་མཛད། ཚིགས་ཚོགས་བསྡུས་ཤིང་ནང་དོན་ཟབ་པའི་ཁྱད་ཆོས་ལྡན་ཞིང་། མཚན་བསྡུས་པ་ཀྱོ་རོན་(Nikyōron)ཏེ་ཆོས་ཚུལ་གཉིས་ཀྱི་བསྟན་བཅོས་ཞེས་ཀྱང་བྱ། བསྟན་བཅོས་འདི་ཡི་བརྗོད་བྱ་གཙོ་བོ་ནི་མཚན་དོན་ནང་གསལ་ལྟར་ལྐོག་ཆོས་ཏེ་སྔགས་ལམ་དང་། ཚོགས་ཆོས་ཏེ་མདོ་ལམ་གཉིས་ཀྱི་ཁྱད་པར་རྣམ་པར་ཕྱེ་ནས། མདོ་ལས་སྔགས་ཁྱད་པར་དུ་འཕགས་ཚུལ་གཏན་དབབ་པ་ཡིན། བསྟན་བཅོས་འཆད་ཚུལ་ལ། ཐོག་མར་གླེང་གཞི་བསྡུས་པ་ཞིག་གིས་མཚམས་སྦྱར་ནས། བར་དུ་དྲི་བ་དྲིས་ལན་གྱི་རིམ་པ་དང་། མཐར་མཇུག་བསྡུའི་གཏམ་ཉུང་བསྡུས་བཅས་རྩ་བའི་ས་བཅད་གསུམ་གྱི་སྒོ་ནས་བཤད། མདོ་མཚན་ཉིད་ཐེག་པའི་ཆོས་ནི་སངས་རྒྱས་སྤྲུལ་པའི་སྐུས་གདུལ་བྱའི་ཁམས་དབང་ལ་ལྟོས་ཏེ་དྲང་དོན་དུ་གསུངས་པ་ཡིན་པ་དང། དེ་ལས་གཞན་དུ་གསང་སྔགས་རྡོ་རྗེ་ཐེག་པའི་ཆོས་ནི་སངས་རྒྱས་ཆོས་ཀྱི་སྐུས་གསུངས་པ་ངེས་དོན་མཐར་ཐུག་ཡིན་པར་འདོད། ལོངས་སྤྲུལ་གཉིས་མ་ཟད་ཆོས་སྐུས་ཀྱང་ཆོས་ཀྱི་འཁོར་ལོ་བསྐོར་ཚུལ་མདོ་ལང་ཀར་གཤེགས་པའི་ལུང་ལ་བརྟེན་ནས་སྒྲུབ་ཅིང་། དེ་ཡང་རྣམ་སྣང་མངོན་བྱང་སོགས་ནས་གསུངས་ལྟར་ངོ་བོ་གསང་བའི་གསུང་ཡིན་པར་བཤད། སངས་རྒྱས་སྤྲུལ་པའི་སྐུས་ལམ་ཕ་རོལ་ཏུ་ཕྱིན་པ་དྲུག་གིས་བསྡུས་པའི་ཆོས་ཚུལ་གསུངས་ལ། ཆོས་སྐུ་རྣམ་པར་སྣང་མཛད་ཀྱིས་སྐུ་གསུང་ཐུགས་ཀྱི་གསང་བ་གསུམ་གྱི་སྒོ་ནས་གསང་སྔགས་ཀྱི་ཆོས་རྣམས་ཕྱག་རྒྱ་དང་། སྔགས་དང་། དཀྱིལ་འཁོར་གྱི་ངོ་བོར་སྣང་བར་མཛད་པ་ཡིན་ཅེས་འདོད། སློབ་དཔོན་ཁཱུ་ཁི་རང་ཉིད་ཀྱི་བརྩམས་ཆོས་སྔ་མ་རྣམས་དང་མཚུངས་པར་བསྟན་བཅོས་འདིར་ཡང་། རྒྱ་ནག་ནས་ཉི་ཧོང་དུ་གདན་དྲངས་པའི་གསང་སྔགས་ཀྱི་ཆོས་ཚུལ་གསར་པ་འདི་ཉིད་ཆོས་ཁུངས་བཙུན་ཚུལ་ལུང་དང་རིགས་པའི་རྣམ་གྲངས་དུ་མས་བསྒྲུབས་ཤིང་འཆད་སྤེལ་རྒྱ་ཆེར་མཛད་པ་དེ་ནི་ཁོང་གི་མཛད་རྗེས་གཙོ་བོ་ཡིན་པར་མངོན། བསྟན་བཅོས་འདི་ལ་སློབ་དཔོན་སེའི་སེན་(༡༠༢༥-༡༡༡༥)། ཡཱུ་ཁཱའི་(༡༣༤༥-༡༤༡༦)། ཁའི་ཇོ་(༡༧༥༠-༡༨༠༥) སོགས་ཀྱིས་མཛད་པའི་འགྲེལ་པ་ཡང་མི་ཉུང་བ་ཡོད། +
འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ཆེན་པོའི་བཤད་སྦྱར་སློབ་དཔོན་བདག་ཉིད་ཆེན་པོ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པ་འདིར། གཞུང་གི་བརྗོད་བྱ་ཐ་དག་དེ་བཞིན་གཤེགས་པ་རྣམས་ལ་ཕྱག་འཚལ་བ་དང་། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། དེ་བཞིན་གཤེགས་པ་རྣམས་བཞུགས་པར་གསོལ་བ་དང་། དགེ་བའི་རྩ་བ་ཡོངས་སུ་བསྔོ་བ་དང་། དེའི་རབ་ཏུ་དབྱེ་བ་དང་། མཐར་ཐུག་པ་དང། ཕན་ཡོན་བཅས་དོན་བཅུར་བསྡུས་ཤིང་། དེ་ལས་དོན་བརྒྱད་པ་རབ་ཏུ་དབྱེ་བ་ལས་འཕྲོས་ཏེ་གཞུང་གི་ལུས་ཡོངས་སུ་རྫོགས་པ་དོན་གྱི་རྣམ་པ་བཅུ་དྲུག་ཏུ་ཕྱེ་སྟེ་བཤད་སྦྱར་མཛད་ཅིང། བཅུ་དྲུག་པོ་དེ་ཡང། བྱང་ཆུབ་ཀྱི་སེམས་མི་བརྗེད་པ་བསྟན་པ། མ་གོས་པའི་སྦྱོར་བ་བསྟན་པ། སེམས་ཅན་ལ་ཕན་པ་བསྟན་པ། སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པ་དང་། སེམས་ཅན་གྱི་སྤྱོད་པ་དང་མཐུན་པར་འདུག་པ་དང་། དམ་པའི་ཆོས་རབ་ཏུ་སྦྱིན་པའི་སྒོ་ནས་གོ་ཆ་བསྟན་པ། སྐལ་བ་མཉམ་པའི་བྱང་ཆུབ་སེམས་དཔའ་དང་ཕྲད་པ་བསྟན་པ། དགེ་བའི་བཤེས་གཉེན་མཉེས་པར་བྱེད་པ་བསྟན་པ། དེ་བཞིན་གཤེགས་པ་མངོན་དུ་གྱུར་པ་བསྟན་པ། དམ་པའི་ཆོས་ཡོངས་སུ་འཛིན་པ་བསྟན་པ། མི་ཟད་པའི་མཛོད་ཐོབ་པ་བསྟན་པ། འཇུག་པ་བསྟན་པ། སྟོབས་བསྟན་པ། གཉེན་པོ་བསྟན་པ། ལས་བསྟན་པ། རྗེས་སུ་སློབ་པ་ཡོངས་སུ་ཕྱེ་བ་བསྟན་པ། བསྡུ་བ་བསྟན་པ་བཅས་ཡིན་ནོ།། +
བོད་ཀྱི་ལོ་ཙཱ་བ་དགེ་སློང་ཡེ་ཤེས་སྡེས་མཛད་པའི་བཟང་སྤྱོད་ཀྱི་འགྲེལ་པ་འདིར། རྒྱ་གར་གྱི་སློབ་དཔོན་དིག་ནཱ་ག་དང་། ཤཱཀྱ་མི་ཏ་དང་། བུདྡྷ་ཀཱིརྟི་དང་། བྷ་དྲ་བ་ཧ་སྟི་ཀ་རྣམས་ཀྱིས་མཛད་པའི་འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོའི་འགྲེལ་རྣམ་པ་བཞིའི་སྙིང་དོན་རྣམས་བསྡུས་ཤིང་། འཕྲལ་དུ་མཁན་པོ་དག་ལས་ཐོས་པ་དང་། མདོ་སྡེ་དག་ལས་བྱུང་བ་དང་ཡང་སྦྱར་ཏེ་བཤད་བརྡ་ཕྲད་སླ་བ་བརྗེད་བྱང་མཛད་ཡོད། འགྲེལ་པ་བརྗེད་བྱང་མ་འདི་ཡི་བརྗོད་བྱ་གཙོ་བོ་ནི། དེ་བཞིན་གཤེགས་པ་རྣམས་ལ་ཕྱག་འཚལ་བ་དང་། མཆོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། དེ་བཞིན་གཤེགས་པ་རྣམས་བཞུགས་པར་གསོལ་བ་དང་། དགེ་བའི་རྩ་བ་ཡོངས་སུ་བསྔོ་བ་དང་། དེའི་རབ་ཏུ་དབྱེ་བ་དང་། མཐར་ཐུག་པ་དང། ཕན་ཡོན་བཅས་ཡན་ལག་བཅུ་དང་། ཡན་ལག་བརྒྱད་པ་རབ་ཏུ་དབྱེ་བ་ལས་འཕྲོས་པའི་དོན་བཅུ་དྲུག་སྟེ། བྱང་ཆུབ་ཀྱི་སེམས་མི་བརྗེད་པ་དང་། མ་གོས་པའི་སྦྱོར་བ་དང་། སེམས་ཅན་ལ་ཕན་པའི་སྦྱོར་བ་སོགས། འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ན་བསྟན་པའི་བརྗོད་བྱ་གཙོ་བོ་རྣམས་ཀྱི་ནང་དོན་དང་། དེ་དག་སྒོམ་པས་ཉམས་སུ་ལེན་ཚུལ་རྣམས་གསལ་བར་བསྟན་ཡོད། +
འཕགས་པ་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ཞེས་བྱ་བ་འདི་ནི་བྱང་ཆུབ་སེམས་དཔའི་སྡེ་སྣོད་ཀྱི་ནང་ཚན་ཕལ་པོ་ཆེའི་སྡོང་པོ་བརྒྱན་པ་ཞེས་བྱ་བའི་ཆོས་ཀྱི་རྣམ་གྲངས་ནོར་བཟང་གིས་དགེ་བའི་བཤེས་གཉེན་བསྙེན་བཀུར་བའི་སྤྱོད་པ་ཕྱོགས་གཅིག་པའི་ལེའུ་ལས་ཟུར་དུ་ཕྱུང་བ་ཞིག་ཡིན། སྨོན་ལམ་གྱི་རྒྱལ་པོ་འདི་ཉིད་ཀློག་འདོན་ཐེག་ཆེན་ཆོས་བརྒྱུད་ཡོངས་ལ་དར་སོ་ཆེ་ཞིང་། འདི་ཡི་འགྱུར་ཡང་རྒྱ་ནག་དང་། ཉི་ཧོང་། ཀོ་རི་ཡ་སོགས་ཀྱི་སྐད་རིགས་མང་པོར་བཞུགས་ཡོད། དབྱིན་སྐད་སོགས་ནུབ་ཕྱོགས་ཀྱི་སྐད་རིགས་འགར་ཡང་བསྒྱུར་ཡོད་པས། དེ་དག་གཟིགས་པར་འདོད་ན་དྲ་ཚིགས་ཀྱི་སྦྲེལ་ཐག་འདིར་[https://www.lotsawahouse.org/words-of-the-buddha/samantabhadra-aspiration-good-actions Lotsawa House] སྣུན་མཛོད།
བཟང་པོ་སྤྱོད་པའི་སྨོན་ལམ་གྱི་རྒྱལ་པོ་འདི་ཡི་ནང་དོན་མདོར་བསྡུ་ན་དོན་རྣམ་པ་བཅུ་སྟེ། དེ་བཞིན་གཤེགས་པ་རྣམས་ལ་ཕྱག་འཚལ་བ། དེ་ལ་མཆོད་པ། སྡིག་པ་བཤགས་པ། བསོད་ནམས་ལ་རྗེས་སུ་ཡི་རང་བ། ཆོས་ཀྱི་འཁོར་ལོ་བསྐོར་བར་བསྐུལ་བ། དེ་བཞིན་གཤེགས་པ་རྣམས་བཞུགས་པར་གསོལ་བ། དགེ་བའི་རྩ་བ་ཡོངས་སུ་བསྔོ་བ། དེའི་རབ་ཏུ་དབྱེ་བ། དེའི་མཐར་ཕྱིན་པ། དེའི་ཕན་ཡོན་བཅས་ཡིན་ནོ།། +
