Texts/Saddharmasmṛtyupasthānasūtra/Full text/Volume 71 (sha), part 1

Source	Kangyur, RKTSK 287
Read this text with translation by adding the Dharmamitra Chrome extension to your browser: Dharmamitra

71-1b

༄༅༅། །གཞན་ཡང་ལས་དང་འབྲས་བུ་རྣམ་པར་སྨིན་པ་ཤེས་པའི་དགེ་སློང་དེ་མཚེ་མ་པའི་ལྷ་རྣམས་ལ་ཕན་པའི་དོན་དུ་ལྷ་རྣམས་ཀྱི་ས་ལ་ལྟ་བར་བྱེད་པ་ན། དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་ལྷ་རྣམས་ཀྱི་ས་བདེ་བ་རབ་ཏུ་འཕེལ་བ་དང་ལྡན་པ་ཞེས་བྱ་བ་ཇི་ལྟར་ཡོད་པ་མཐོང་བར་གྱུར་ཏོ། །ས་དེར་ཡང་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་སྟེ། སྐྱེས་བུ་དམ་པ་གང་གིས་དགེ་ལེགས་སུ་གྱུར་པའི་སེམས་ཀྱིས་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་། མ་བྱིན་པར་ལེན་པ་རྣམས་སྤངས་པར་གྱུར་པ་ནི་སྔ་མ་བཞིན་ནོ། །འདོད་པ་ལ་ལོག་པར་གཡེམ་པ་རྣམས་ཀྱང་ཤིན་ཏུ་ཕྲ་བ་ཡང་སྤོང་བར་བྱེད་དེ་དཔེར་ན་ཡུད་ཙམ་ཅིག་ཀྱང་བུད་མེད་སྐྱེས་པ་དང་བཅས་པར་མངོན་པར་བྲིས་པ་རྣམས་ལ་ཡང་ཚུལ་བཞིན་མ་ཡིན་པ་ཡིད་ལ་བྱེད་པས་སྐྱེད་པར་གྱུར་པས་དེ་ལ་འདི་རྟོག་པར་མི་བྱེད། བརྣབ་སེམས་སུ་མི་བྱེད་དོ། །རོ་མྱོང་བར་མི་བྱེད་ཅིང་ཚུལ་བཞིན་མ་ཡིན་པ་ཡིད་ལ་

71-2a

བྱེད་པའི་སེམས་རྙོག་པ་ཅན་དུ་བྱེད་པ་ཉོན་མོངས་པར་བྱེད་པ་འཇིགས་པ་དང་བཅས་པར་གྱུར་པ་ཚངས་པར་སྤྱོད་པ་ཀུན་ཏུ་སུན་འབྱིན་པར་བྱེད་པ་རྣམས་ཀྱི་ས་དང་། གང་ཡང་གཞན་དག་རབ་ཏུ་རྟོག་པར་བྱེད་པའམ། ལྟ་བར་བྱེད་པ་ཡང་རུང་སྟེ། ཚུལ་བཞིན་མ་ཡིན་པ་ཡིད་ལ་བྱེད་པས་སེམས་ཀུན་ནས་སུན་འདོན་པར་བྱེད་པ་དེ་དག་རྣམས་འདིས་རབ་ཏུ་འགོག་པར་བྱེད་དོ། །ཕྱིར་ལ་ཟློག་པར་བྱེད་དོ། །ལས་ཀྱི་འབྲས་བུ་རྣམས་ཀྱང་སྟོན་པར་བྱེད་པ་ཡིན་ཏེ། ཇི་ལྟར་མི་འདོད་པ་དང་མི་དགའ་བ་དང་ཡིད་དུ་མི་འོང་བར་འགྱུར་བ་ནི་འདོད་པ་ལ་ལོག་པར་གཡེམ་པ་སྟེན་པ་འདིའི་འབྲས་བུ་ཡིན་པས་དེས་ན་དེ་ལྟར་མི་བྱའོ། །འདི་དག་ནི་ཞི་བར་འགྱུར་བའི་ལམ་མ་ཡིན་ནོ། །དགའ་བ་མ་ཡིན། ཡིད་དུ་འོང་བ་མ་ཡིན། དམ་པ་རྣམས་ཀྱིས་མངོན་པར་འདོད་པ་ཡང་མ་ཡིན་ནོ། །ཤིན་ཏུ་ཕྲ་བའི་འབྲས་བུ་རྣམས་སྟོན་པར་བྱེད་པ། ཚུལ་ཁྲིམས་དང་ལྡན་པ་ཚངས་པར་སྤྱོད་པ་རྣམ་པར་དག་པ་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བ་དེ་དག་ནི་ལུས་ཞིག་ནས་ཤི་བའི་འོག་ཏུ་བདེ་འགྲོ་མཐོ་རིས་མཚེ་མའི་ལྷ་རྣམས་ཀྱི་བདེ་བ་རབ་ཏུ་འཕེལ་བ་དང་ལྡན་པའི་ས་འདི་ལ་སྐྱེ་བར་འགྱུར་རོ། །དེ་ལ་སྐྱེས་པ་རྣམས་ནི་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པས་དེ་དག་དགའ་བའི་ལས་ཀྱི་འབྲས་བུ་རྣམས་ལ་སྤྱོད་པར་བྱེད་དོ། །འདི་ལྟ་སྟེ་ནགས་རྣམས་དང་ཉེ་བའི་ནགས་རྣམས་དང་ཁྲུས་ཀྱི་རྫིང་བུ་རྣམས་དང་། གསེར་གྱི་རིའི་རྩེ་མོ་རྣམས་དང་འབབ་ཆུ་དང་རིན་པོ་ཆེའི་རང་བཞིན་གྱི་འབབ་ཆུ་རྣམས་ལ་བལྟ་བར་སྡུག་པའི་བྱ་རྣམས་ཀྱིས་ཀུན་ནས་སྒྲ་འདོན་པ་དང་། གཞལ་ཡས་ཁང་གི་རྩེ་མོ་རྣམས་ཀྱང་རིན་པོ་ཆེ་བདུན་གྱི་རང་བཞིན་ལ་ནོར་བུས་ཆ་ཤས་རྣམས་རྣམ་པར་བཀྲ་

71-2b

བར་བྱས་པ་དང་། པད་མའི་རྫིང་བུ་རྣམས་ཀྱང་བཻ་ཌཱུརྱ་དང་ཨིན་དྲ་ནཱི་ལ་དང་གསེར་གྱི་རང་བཞིན་རྣམས་ཀྱི་ཆ་ཤས་རྣམ་པ་སྣ་ཚོགས་པ་ལ་གཟུགས་དང་སྒྲ་དང་ཁ་དོག་དང་དབྱིབས་རྣམ་པ་སྣ་ཚོགས་པ་ལ་ལྟ་བར་དགའ་བའི་བུང་བའི་ཚོགས་རྣམས་ཀྱི་སྒྲ་བདེ་བ་སྐྱེད་པ་ཀུན་ཏུ་སྒྲོགས་པ་དང་ལྡན་པ་རྣམས་ལ་མངོན་པར་རྩེ་བར་བྱེད་དོ། །རིག་པ་དང་ལས་རྣམས་ཐམས་ཅད་ཀྱི་བདེ་བ་རབ་ཏུ་འཕེལ་བ་དང་ལྡན་པའི་ནགས་ཚང་ཚིང་རྣམས་དང་གཞན་ཡང་རྡོ་རྗེ་དང་བཻ་ཌཱུརྱ་དང་ཨིན་དྲ་ནཱི་ལ་དང་ཤེལ་གྱི་རང་བཞིན་གྱི་བྲག་རྣམས་ཆ་ཤས་དང་ཆ་ཤས་སུ་ཕྱེ་བའི་འོད་ཟེར་རྣམས་ཀྱིས་རྣམ་པར་བཀྲ་བར་གྱུར་པ་རྣམས་ལ་དགའ་བར་བྱེད་དོ། །འབབ་ཆུ་སྣ་ཚོགས་པའི་སྒྲ་བདེ་བ་སྐྱེ་བར་བྱེད་པའི་སྒྲ་སྙན་པ་དང་ལྡན་པ་རྣམས་ལ་དགའ་བར་བྱེད་དོ། །ཇི་ལྟར་འདོད་པ་བཞིན་དུ་བྱེད་པ་རང་དབང་ཅན་རྣམས་དཔེ་མེད་པར་གྱུར་པའི་ལྷ་རྫས་ཀྱི་འདོད་པ་རྣམས་ལ་སྟེན་པར་བྱེད་དོ། །ལྷའི་བུ་མོའི་ཚོགས་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ནས་ཆེས་འཕགས་པར་གྱུར་པའི་བདེ་བ་རྣམས་འཕེལ་བ་དང་ལྡན་པའི་འདོད་པ་རྣམས་ལ་ཉེ་བར་ལོངས་སྤྱོད་པ་ཡིན་ཏེ། དེ་ཡང་རྣམ་པར་རྟོག་པ་དུ་མ་རྣམས་སུ་དཔེ་མེད་པར་གྱུར་པའི་ལྷ་རྫས་ཀྱི་བདེ་བ་རྣམས་ལ་ལོངས་སྤྱོད་པར་བྱེད་དོ། །རི་དང་རྩེ་མོ་རྣམས་གསེར་གྱི་རང་བཞིན་དང་བཻ་ཌཱུརྱའི་རང་བཞིན་རྣམས་ལ་དེ་དག་ནམ་མཁའ་ལ་ལན་བརྒྱ་ཕྲག་དུ་མར་འགྲོ་བར་བྱེད་པ། རྣམ་པ་སྣ་ཚོགས་པའི་གཟུགས་དང་ཆ་བྱད་དང་རྒྱན་རྣམས་ཕུན་སུམ་ཚོགས་པ། སྒྲིན་པོ་རྣམས་ཀྱི་རྒོད་པ་དང་གླུ་དང་གར་གྱིས་ཀུན་ནས་བརྒྱན་པར་གྱུར་པའི་ཞབས་འབྲིང་རྣམས་ཀྱིས་རྣམ་པར་བརྒྱན་ཅིང་རོལ་པའི་གཟུགས་དཔེ་མེད་པ་དང་ལྡན་པའི་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས། ཉེ་འཁོར་ཀུན་ནས་རྩེ་དགའ་བར་གྱུར་པས་རྣམ་པར་རྒྱུ་བར་བྱེད། རང་གི་འོད་དང་ལྡན་པའི་ལྷའི་བུ་མོ་རྣམས་ཀྱིས་ཡོངས་སུ་བསྐོར་ནས། དེ་ལྷ་རྫས་ཀྱི་འདོད་པའི་ཡོན་ཏན་གྱི་ཡུལ་ལྔ་ལ་རྣམ་པར་ཆགས་པས། གཟུགས་གང་དང་གང་ཉིད་མཐོང་བར་གྱུར་པ་དེ་དང་དེ་ཉིད་ཀྱང་རྣམ་པར་རྟོག་པ་དུ་མ་དང་ལྡན་པའི་ལྷ་རྫས་སྙིང་འགུལ་བར་བྱེད་པ་དཔེ་མེད་པའི་བདེ་བ་རྣམས་ལེགས་

71-3a

པར་སྟོན་པར་བྱེད་པ་མཐོང་ངོ་། །ཇི་ལྟར་འདོད་པ་བཞིན་དུ་སྤྱོད་པར་བྱེད་པ་དེ་ལྟར་མིག་གིས་གཟུགས་རྣམས་མཐོང་བར་འགྱུར་རོ། །དེ་བཞིན་དུ་རྣ་བས་སྒྲ་རྣམས་ཐོས་པར་གྱུར་པ་ཡང་། ཐོས་ནས་བདེ་བར་འགྱུར་བ་དང་ཇི་ལྟར་འདོད་པ་བཞིན་དུ་རྣམ་པ་དུ་མར་རྣམ་པ་སྣ་ཚོགས་པར་གྱུར་པ་དང་ཀུན་ཏུ་རྟོག་པ་རྣམས་སྐྱེད་པར་བྱེད་པ་དང་མཆོག་ཏུ་གྱུར་པའི་ལྷའི་བུ་མོ་རྣམས་ཀྱིས་ལེགས་པར་བསྐྱེད་པའི་རྒོད་པ་དང་འགྱིང་བག་དང་རྩེད་མོ་རྩེ་བར་བྱེད་པ་རྣམས་སོ། །དེ་བཞིན་དུ་སྣས་ཀྱང་ལྷ་རྫས་ཀྱི་དཔེ་མེད་པ་དང་ལྡན་པའི་དྲི་རྣམས་སྣོམ་པར་བྱེད་དེ། རྣམ་པར་རྟོག་པ་དུ་མར་དཔེ་མེད་པར་གྱུར་པ་རྣམས་ལ་འདི་ལྟ་སྟེ། པད་མའི་རྫིང་བུ་རྣམས་ཀྱི་དྲི་ཤིན་ཏུ་ཞིམ་པར་གྱུར་པའི་དྲི་རྣམས་མངོན་པར་འདོད་པའི་རླུང་གིས་ལེགས་པར་བཏབ་པ་རྣམས་ལ་དང་། དྲི་གཞན་ཡང་དེ་ཁོ་ན་བཞིན་དུ་དྲི་ཤིན་ཏུ་ཞིམ་པ་དཔེ་མེད་པར་གྱུར་པའི་ལྷ་རྫས་རྣམ་པ་དུ་མ་རྣམས་མངོན་པར་འདོད་པའི་རླུང་གིས་རི་དང་སྨན་ལྗོངས་རྣམས་དང་བང་རིམ་རྣམས་དང་། རི་ཁྲོད་རྣམས་དང་ནགས་ཀྱི་ནང་རྣམས་ནས་བཏབ་པར་གྱུར་པའི་ཤིན་ཏུ་དྲི་ཞིམ་པ་དང་ལྡན་པའི་མེ་ཏོག་དུ་མ་དྲི་བླ་ལྷག་པར་གྱུར་པ་རྣམས་སྣོམ་པར་བྱེད་དོ། །དེ་བཞིན་དུ་ལྕེས་ཀྱང་རོ་རྣམས་མྱོང་བར་བྱེད་དོ། །དེ་ནི་འདོད་པའི་བདེ་བ་རྣམས་ཐམས་ཅད་ཕུན་སུམ་ཚོགས་པ་ཡིན་ཏེ། ལྷ་རྫས་ཀྱི་རོ་རྣམ་པ་དུ་མར་གྱུར་པ་སྐྱུར་བ་དང་། ལན་ཚྭ་དང་། ཚ་བ་དང་། ཁ་བ་དང་། བསྐ་བ་དང་། རྩུབ་པ་རྣམས་དང་། རྣམ་པ་དུ་མ་རྣམས་དང་། དཔེ་མེད་པར་གྱུར་པ་རྣམས་དང་། རྫས་དུ་མ་རྣམས་ལས་སྐྱེས་པ་དང་ཇི་ལྟ་བ་ཉིད་དུ་ཇི་ལྟར་འདོད་པའི་དུས་སུ་མཁོ་བ་རྣམས་དེ་དག་གིས་ཟ་བར་བྱེད་དོ། །དེ་ལྟར་ལྕེས་རོ་རྣམས་མྱོང་བར་བྱེད་དོ། །དེ་བཞིན་དུ་ལུས་ཀྱིས་ཀྱང་རེག་བྱ་རྣམ་པ་དུ་མ་རྣམས་ལ་རེག་པར་བྱེད་པ་ནི། བདེ་བའི་རེག་པར་བྱ་བ་བརྒྱད་དང་ལྡན་པར་གྱུར་པ་རྣམས་ལ་བསིལ་བར་གྱུར་པ་དང་། དྲོ་བ་དང་དྲོ་བར་གྱུར་པ་དང་བསིལ་བའི་རེག་བྱ་རྣམས་དང་ལྡན་པ་དང་དེ་བཞིན་དུ་འཇམ་པ་དང་ཕྲ་བ་དང་། ཚགས་དམ་པ་དང་མ་བཏགས་པ་དང་རྣམས་ཏེ་ཁ་དོག་དུ་མ་དང་ལྡན་པའི་གོས་རྣམས་སོ། །དེ་བཞིན་དུ་མཐོ་རིས་

71-3b

ཀྱི་རྗེས་སུ་འཐུན་པའི་རྒྱན་གྱི་རྣམ་པ་རྣམས་ཀྱང་སྟེ། རིན་པོ་ཆེ་དུ་མའི་འོད་ཟེར་སྣང་བ་བྱེད་པ་དང་ལྡན་པ་རྣམས་ལ་དཔག་ཚད་བཅུ་དང་ཉི་ཤུ་དང་སུམ་ཅུ་དང་བཞི་བཅུ་དང་ལྔ་བཅུ་དང་དྲུག་ཅུ་དང་དེ་བཞིན་དུ། དཔག་ཚད་བརྒྱའི་བར་དུ་འོད་དང་ལྡན་པའི་ནོར་བུ་རྣམས་ཀྱི་རེག་བྱ་རྣམས་ཀྱང་ཉེ་བར་ལོངས་སྤྱོད་པར་བྱེད་དོ། །དེ་བཞིན་དུ་རྒྱན་གྱི་རྣམ་པར་གྱུར་པའི་མེ་ཏོག་བདེ་བའི་རེག་བྱ་དང་དྲི་དང་ལེགས་པར་འབྲེལ་པས་བསྒོས་པར་གྱུར་པ་རྣམ་པ་སྣ་ཚོགས་པ་རྣམས་ལྷ་རྫས་ཀྱི་ནགས་ཀྱི་གསེབ་ནས་རླུང་གིས་བདས་པའི་བདེ་བའི་རེག་བྱ་དང་ལྡན་པ་རྣམས་ཀྱི་རེག་བྱ་ལ་རྗེས་སུ་ལོངས་སྤྱོད་པར་བྱེད་པ་སྟེ། ལུས་ཀྱི་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པར་གྱུར་པ། རང་གིས་ལེགས་པར་བྱས་པའི་ལས་རྣམས་ཀྱིས་འདོད་པ་སྡུག་པ་ཡིད་དུ་འོང་བ་འཕགས་པ་དགྱེས་པ་ཡིན་གྱི། མ་བྱས་པ་རྣམས་ཀུན་ཏུ་འོང་བར་འགྱུར་བ་ནི་མ་ཡིན་ནོ། །འདོད་རྒྱལ་བ་རྣམས་ནི་མ་ཡིན་ནོ། །བྱས་པ་ཆུད་ཟ་བར་འགྱུར་བ་ནི་མ་ཡིན་ནོ། །རྒྱུ་མེད་པ་ནི་མ་ཡིན་ནོ། །གཞན་བག་མེད་པ་རྣམས་ཀྱིས་བྱས་པ་ནི་མ་ཡིན་ནོ། །ལས་དང་འབྲས་བུ་རྣམས་དང་ཆ་མི་འདྲ་བར་གྱུར་པའི་རྒྱུ་རྐྱེན་རྣམས་ཀུན་ཏུ་ཚོགས་པ་ནི་མ་ཡིན་ནོ། །འདི་དག་ནི་འབྲས་བུ་དང་བཅས་པར་སྨིན་པར་ལེགས་པར་མཐོང་བ་རྣམས་དང་ཆ་འདྲ་བའི་ལས་རྣམས་ཀྱི་འབྲས་བུ་ལ་ཉེ་བར་ལོངས་སྤྱོད་པ་ཡིན་ནོ། །ཚུལ་ཁྲིམས་ལ་སྤྱོད་པར་གྱུར་པ་དེ་དེ་བཞིན་དུ་ཡིད་ཀྱིས་ཀྱང་གང་འདོད་པའི་འདོད་པ་རྣམས་ལ་སྟེ། འདོད་པའི་ཡིད་དུ་འོང་བའི་ལྷ་རྫས་ཀྱི་གཟུགས་མང་ཞིང་རྒྱ་ཆེན་པོར་གྱུར་པ་རྣམས་དང་། ཕྲ་བ་རྣམས་དང་བར་མ་རྣམས་དང་ཀུན་ནས་འཕེལ་བར་འགྱུར་བའི་དུས་སུ་བྱུང་བ་རྣམས་དང་། དེ་བཞིན་དུ་མར་འབྲི་བའི་དུས་སུ་དང་བར་མའི་དུས་སུ་ཐོབ་པ་རྣམས་ལོངས་སྤྱོད་པར་བྱེད་པ་ན། དེ་ལྟར་ཡང་སེམས་བསྐྱེད་པ་ཉིད་ཀྱིས་མངོན་པར་འདོད་པར་གྱུར་པའི་ཉེ་བར་ལོངས་སྤྱད་པར་བྱ་བ་རྣམ་པ་དུ་མའི་བདེ་བའི་ཆོས་རྣམས་ལ་མངོན་པར་འཚལ་བས་ཉེ་བར་ལོངས་སྤྱོད་པར་བྱེད་དོ། །ཚུལ་ཁྲིམས་ལ་སྤྱད་པའི་སྐྱེས་བུ་དེ་དག་རྣམས་དེ་ལྟར་ཁྱད་པར་དུ་ཡང་ལྷ་རྣམས་ནི་ཡུལ་དྲུག་གི་མེ་ལ་རྣམ་པར་

71-4a

ཆགས་པར་གྱུར་ཅིང་། འདོད་པའི་ཆུ་བོ་རྣམས་ཀྱིས་ཁྱེར་བར་གྱུར་པས་དེ་དག་ནགས་ནས་ནགས་རྣམས་དང་རིའི་རྩེ་མོ་ནས་རིའི་རྩེ་མོ་རྣམས་ལྷ་རྫས་ཀྱི་རིན་པོ་ཆེའི་ཁམས་རྣམས་ཀྱི་འབྱུང་ཁུངས་དང་ལྡན་པ་རྣམས་ནས་རིན་པོ་ཆེའི་ཁམས་རྣམས་ཀྱི་འབྱུང་ཁུངས་དང་ལྡན་པ་རྣམས་སུ་ཀུན་ཏུ་ཉེ་བར་འགྲོ་བར་བྱེད་ཅིང་། ནགས་དང་ཉེ་བའི་ནགས་ཀྱི་ཚལ་རྣམས་དང་། འབབ་ཆུའི་སྒྲ་རྣམས་ཀུན་ནས་ལེགས་པར་གྲག་པ་དང་ཁ་དོག་དང་དབྱིབས་དང་རིགས་དང་། སྡེ་ཚན་མི་འདྲ་བ་བརྒྱ་ཕྲག་གི་བྱ་རྣམས་ཀྱི་སྒྲ་སྙན་པར་འབྱིན་པས་ཡིད་དགའ་བར་གྱུར་པ་རྣ་བ་དག་ལ་གཏད་པས་དབྱངས་ཀྱིས་ཀུན་ནས་འཁྲིད་པ་དང་རྒྱན་དང་ལེགས་པར་ལྡན་པའི་དགའ་བས་ཡིད་འཕྲོག་པར་གྱུར་པ་རྣམས་དེ་ལྟར་དེ་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་དེ་ལེགས་པར་ཉེ་བར་འགྲོའོ། །མང་པོ་རྣམས་ཉིད་ཀྱང་གཟུགས་དང་ཆ་བྱད་དང་། རྒྱན་དང་ལེགས་པར་གནས་པ་རྣམས་ཀྱི་ཡོན་ཏན་དུ་མ་རྣམས་དང་ལྡན་པའི་ཆ་བྱད་ཅན་རྣམས་བསྒྲིན་པ་དང་། འགྱིང་བས་འདོད་པའི་མེ་རྣམས་ལེགས་པར་སྐྱེད་པར་བྱེད་པ་རྣམས་ཀྱིས་ཡོངས་སུ་བསྐོར་ནས་གནས་རྣམ་པ་དུ་མ་རྣམས་ཉེ་བར་སྟོན་པར་བྱེད་དོ། །ལྷ་རྫས་ཀྱི་ཕྲེང་བ་མཆོག་རྣམས་ཀྱིས་བརྒྱན་པ་དང་། མེ་ཏོག་གི་ཕྲེང་བ་དང་ཕྱེ་མ་དང་བྱུག་པ་རྣམས་ཀྱིས་རྣམ་པར་བརྒྱན་པས་གསེར་གྱི་རང་བཞིན་དང་བཻ་ཌཱུརྱ་དང་གསེར་འབར་བའི་རང་བཞིན་གྱི་རྩེ་མོ་རྣམས་ལ་སྟེན་པར་བྱེད་དོ། །སེམས་བསྐྱེད་པ་དང་ལྷན་ཅིག་ཉིད་དུ་འདོད་པ་དུ་མ་རྣམས་ཉེ་བར་བསྟེན་ནས། ལྷན་ཅིག་སྤྱོད་པ་རྣམས་དང་བཅས་པས། གལ་ཏེ་ཤེད་ན་ཉེ་བའི་ནགས་གཞན་རྣམས་ཉེ་བར་སྟེན་པར་བྱེད་དོ། །མཉམ་པ་དང་མི་མཉམ་པའི་སའི་ཆ་ཤས་རྣམས་དགའ་བར་གྱུར་པའི་གསེར་དང་བཻ་ཌཱུརྱའི་རང་བཞིན་དང་གསེར་བཟང་པོའི་རང་བཞིན་དང་དངུལ་དང་ཨིན་དྲ་ནཱི་ལ་དང་མུ་ས་རའི་རང་བཞིན་རྣམས་ལ་དྲིལ་བུ་གཡེར་ཀ་སྒྲ་སྒྲོགས་པའི་དྲ་བའི་སྐད་ཕུན་སུམ་ཚོགས་པས་རྣམ་པར་བརྒྱན་པའི་སྒྲ་རྣམས་དང་། བྱའི་ཚོགས་རྣམ་པ་སྣ་ཚོགས་པ་རྣམས་ཀྱིས་རྣམ་པར་བརྒྱན་པ་རྣམས་ལ། ལན་བརྒྱ་ཕྲག་རྣམས་སུ་

71-4b

རྣམ་པར་རྒྱུ་བར་བྱེད་པ་གང་གི་ཚེ། བག་མེད་པས་བག་མེད་པར་རྣམ་པར་སྤྱོད་པར་བྱེད་པ་དེའི་ཚེ། དེ་དག་རྣམས་མངོན་པར་ཀུན་ཏུ་མཐོང་ནས་བག་ཡོད་པ་ཞེས་བྱ་བའི་བྱས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འཆད་པ་ཇི་ལྟར། གསར་པའི་ལས་ཀྱང་ཟད་འགྱུར་ལ། །རྙིངས་པ་ཡོངས་སུ་སྤྱོད་པ་ཡིན། །དེ་ཟད་པས་ནི་རྟག་ཏུ་ལྟུང་། །མཐོ་རིས་ལྷ་ཡི་ཆོས་འདི་དག །རྟག་ཏུ་ལས་ཀྱིས་ལྷུང་བ་ཡིན། །དེ་བཞིན་འཚོ་བ་སྐད་ཅིག་སྟེ། །འཆི་བདག་མྱུར་བར་འོང་བ་ཡང་། །བྱིས་པ་རྣམས་ཀྱིས་རིག་པའང་མིན། །ཁྱོད་ཀྱིས་འདི་མིན་འདིའི་ཡང་ཁྱོད། །མིན་ཡང་ཆགས་པས་མ་ཤེས་སོ། །དུས་འགྲོ་རྟག་པར་ཤིན་ཏུ་མྱུར། །ལྟུང་འགྱུར་དེ་ཡང་ཉེ་བར་འོང་། །ཐོབ་པ་དང་ནི་འཇིག་པའི་རྒྱུ། །ཡུལ་དུ་མ་ལ་ཆགས་པ་ཡིན། །གནོད་དང་བཅས་པ་དེ་ལ་ཁྱོད། །བློ་ངན་རྟག་ཏུ་ཅི་སྟེ་འགྲོ། །གང་ཕྱིར་ལེགས་པར་བྱས་པའི་ལས། །དེ་ལྟར་ཁྱོད་ཀྱིས་བདེ་ལོངས་སྤྱད། །ཡང་ནི་ཅི་ཕྱིར་ལེགས་བྱས་པའི། །ལས་རྣམས་དག་ནི་ཅིས་མི་བྱེད། །ཡུལ་རྣམས་ལ་ནི་གང་ཆགས་པ། །དེ་ནི་སྲིད་པའི་རྒྱ་མཚོར་ནུབ། །གང་ཡང་དེ་ལས་རྣམ་གྲོལ་བ། །དེ་ནི་སྡུག་བསྔལ་མཚོ་ལས་གྲོལ། །ཡུལ་གྱི་རླབས་ཀྱི་ཤུགས་པོ་ཆེ། །སྲིད་པའི་ཆུ་ཀླུང་ལས་ཀུན་བྱུང་། །མྱང་འདས་གྲོང་ཁྱེར་འགྲོ་བ་ཡིན། །དཔའ་བོས་དེ་ནི་སྤང་བར་གྱིས། །བརྟན་པ་དེ་ཉིད་ཚོལ་རྣམས་ཀྱིས། །ཡུལ་རྣམས་ངེས་པར་བཟློག་པར་གྱིས། །དེས་བསྐྱེད་ཡུལ་གྱི་སྲེད་པ་རྣམས། །སྲིད་པ་གསུམ་དུ་འཇུག་ཅིང་འགྲོ། །ཡུལ་རྣམས་ངེས་པར་བཟློག་པར་གྱིས། །བདག་ཅག་དེ་ཡིད་བྱས་ལ་རེ། །ཀིམ་པ་ཀ་དང་འདྲ་བ་དང་། །ཕྱི་ནས་རྣམ་སྨིན་རྩུབ་པ་ཡིན། །མི་སེམས་བདེ་ལ་ཀུན་ཏུ་ཆགས། །ཡུལ་རྣམས་ལ་ནི་རྒྱུག་པར་བྱེད། །དེས་ནི་མི་དགེའི་ལས་རྣམས་སོག །བློ་གྲོས་ངན་པས་གང་རྒྱུག་པའི། །གཡོ་བ་མི་བཟད་རྩུབ་པ་ལས། །དེ་ཕྱིར་སེམས་ནི་རྟག་ཏུ་སྲུངས། །རྟག་ཏུ་ཡུལ་ལ་ཀུན་ཆགས་པ། །སྲིད་པའི་ཡུལ་གྱིས་གཡོགས་པ་ཡི། །ཡུལ་རྣམས་ལ་ནི་རྒྱུག་བྱེད་པ། །བྲེལ་ཕོངས་དེ་དག་མ་གོའོ། །

71-5a

ཕྱི་ནས་བྲེལ་ཕོངས་ཐོབ་པས་ཀྱང་། །ལས་ཀྱི་འབྲས་བུ་རིག་པར་གྱུར། །ཤེས་ནས་ཀྱང་ནི་ལས་འདི་དང་། །རྟག་ཏུ་ཡུལ་རྣམས་སྐྱོན་དེ་དང་། །འགྲོ་བ་མ་ལུས་བཅིངས་གྱུར་པའི། །སྐྱོན་གཞན་ཡང་ནི་རྟག་ཏུ་སྤོངས། །དེ་ལྟར་བག་ཡོད་པར་གྱུར་པའི་བྱ་དེས་བག་མེད་པས་བག་མེད་པར་རྣམ་པར་རྒྱུ་བའི་ལྷ་དེ་དག་རྣམས་ལ་ལེགས་པར་སྒྲོགས་སོ། །དེ་གཏན་ཚིགས་ཀྱིས་བརྗོད་ཀྱང་དེ་དག་རྣམས་ཀུན་ནས་རྟོགས་པ་ཡང་མ་ཡིན་ཏེ། ཡུལ་ལ་ཀུན་ཏུ་འཆུམས་པར་གྱུར་པས་དེས་དེ་དག་ལ་བརྩི་བགྲང་མེད་པར་སླར་ཡང་དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པར་གྱུར་པའི་བློས་འཁོར་བའི་དགོན་པ་ལྟ་བུར་གྱུར་པ་དང་། ཤིན་ཏུ་སྡུག་བསྔལ་སྐྱེད་པར་བྱེད་པའི་རྒྱུར་བྱེད་པ་དེ་ལྟར་སེམས་དང་འགྲོ་བ་དང་རབ་ཏུ་སྤྱོད་པར་བྱེད་པ། རྟག་ཏུ་ཡང་ཡུལ་གྱི་གནས་སྐབས་རྣམས་ལ་འགྲོས་བྱེད་པར་མཚུངས་པའི་གནས་སྐབས་རྣམས་སུ་རྗེས་སུ་ཆགས་པར་བྱེད་པ་གནས་པ་མེད་པའི་འགྲོས་དང་། རབ་ཏུ་རྒྱུ་བས་ཀུན་ཏུ་གནས་པར་བྱེད་པ། རྟག་ཏུ་ཡང་སྐྱེས་པ་གཅིག་ཅིག་ཚོལ་བ་ལ་ཞུགས་པ་དག་དང་། མཚོན་ཆ་དང་མེ་དང་གཡང་ས་རྣམས་དང་། ཡིད་མཚུངས་པ་མི་རྣམས་ཐམས་ཅད་སྲེག་པར་བྱེད་པའི་ནགས་ཀྱི་མེར་གྱུར་པ་སྡུག་བསྔལ་རྣམས་ཐམས་ཅད་ཀྱི་རྒྱུ་མཚན་དུ་གྱུར་པའི་ལྷའི་བུ་མོ་དེ་དག་རྣམས་ཉིད་དང་དེ་ལྷན་ཅིག་ཏུ་རྩེ་དགའ་བར་བྱེད་དོ། །གང་ཞིག་བདེ་བ་རྣམས་ཐམས་ཅད་འདོད་པ་དང་བློ་དང་ལྡན་པ་དང་བདེ་བ་རྣམས་རྗེས་སུ་ཚོལ་བར་བྱེད་པ་དང་འཁོར་བའི་འཇིགས་པ་རྣམས་ཀྱིས་འཇིགས་པ་རྣམས་ནི་འདི་དག་རྣམས་ཀྱི་དྲུང་ན་གནས་པ་ནི་འཇིགས་པ་ཡིན་པར་བྱའོ། །ཐམས་ཅད་ཀྱིས་ཀྱང་བརྩོན་པར་བྲོས་པར་བྱའོ། །དེ་དག་ཉིད་ལ་ཀུན་ཏུ་རྨོངས་པའི་ཡིད་ཅན་རྣམས་འདོད་ཆགས་ཀྱིས་དམུས་ལོང་དུ་བྱས་པའི་ཡིད་ཅན་རྣམས་ནི་དེ་དག་རྣམས་ཀྱི་མཐུ་སྟོབས་ལས་བྱུང་བའི་སྡུག་བསྔལ་རྣམས་ཤེས་ཀྱང་དེ་དག་རྣམས་ཉིད་དང་ལྷན་ཅིག་ཏུ་དགའ་བར་བྱེད་དོ། །བྱིས་པ་རྣམས་ཐམས་ཅད་ནི་འཁོར་བའི་འདམ་རྫབ་ཏུ་གྱུར་པའི་མཚན་ཉིད་ཀྱིས་ལོང་བ་འདོད་ཆགས་ཞེ་སྡང་གཏི་མུག་རྣམས་ཀྱིས་

71-5b

ལོང་བར་གྱུར་པའི་འཆི་བདག་རྣམས་ཐམས་ཅད་དང་རྩེ་དགའོ། །དེ་ལྟར་དེ་དག་རྣམས་དང་དེ་ཡང་ལྷན་ཅིག་ཏུ་སྤྱོད་པར་བྱེད་པ་ལ་ཡང་དེ་བཞིན་དུ་ཡང་མི་རྩིའོ། །གང་རྣམ་པ་དུ་མས་ཕན་པར་གྱུར་པ་དེ་ཁོ་ན་ཉིད་དང་། ངན་སོང་ལས་ཟློག་པར་བྱེད་པའི་ཚིག་ཡིན་ཡང་དེ་ཁོ་ན་བཞིན་དུ་དེའི་སེམས་ཡོངས་སུ་བསླུས་པས། དེ་ཁོ་ན་ཉིད་དེ་མངོན་པར་མ་ཤེས་པས་ནགས་དང་ཉེ་བའི་ནགས་དེ་དག་རྣམས་སུ་དགའོ། །སྲེད་པའི་ཞགས་པ་ལེགས་པར་བསྐྱེད་པ་དེ་དག་རྣམས་ཉིད་དང་ལྷན་ཅིག་ཏུ་སྟེ། འཕགས་པ་མ་ཡིན་པ་རྣམས་དང་ལྷན་ཅིག་ཏུ་དགའ་བར་བྱེད་དོ། །དེ་གསེར་དང་བཻ་ཌཱུརྱ་དང་ཨིན་དྲ་ནཱི་ལ་དང་ནཱི་ལ་ཆེན་པོ་དང་མུ་ས་ར་གལྦ་ལ་སོགས་པའི་རིན་པོ་ཆེ་རྣམས་ཀྱིས་ཡོངས་སུ་གང་བ་རྣམས་ལེགས་པར་རྣམ་པར་ཕྱེ་བའི་ས་གཞིའི་ཆ་ཤས་རྣམ་པ་དུ་མ་རྣམས་ཀུན་ལ་རྣམ་པར་རྒྱུ་བར་གྱུར་པ་ན། བརྒྱ་ལ་ཞིག་ན་ཆེན་པོར་གྱུར་པའི་སྐད་ཀྱི་གདངས་ཐོས་ན་བདེ་ཞིང་ཡིད་དགའ་བར་བྱེད་པ། ལྷ་རྫས་ཀྱི་ཡོན་ཏན་རྣམས་དང་ལྡན་པ་ཐོས་པར་འགྱུར་རོ། །དེས་ཐོས་ནས་འདི་སྙམ་དུ་སེམས་ཏེ། སྒྲ་འདི་དག་གང་གི་ཡིན་སྙམ་ནས། དེ་ངོ་མཚར་བར་གྱུར་པའི་ཡིད་ཀྱིས་ལྷན་ཅིག་རྗེས་སུ་སྤྱོད་པའི་འཁོར་དང་བཅས་ནས་གང་ན་སྒྲ་འདི་ཡོད་པ་དེར་ལེགས་པར་ཉེ་བར་འགྲོའོ། །དེ་ནས་འགྲོ་བར་བྱེད་པ་ཉིད་ན་གང་ན་ཤིན་ཏུ་ངར་ཆེ་བར་གྱུར་པ་ཡི་གེ་རྣམས་གསལ་བར་གྱུར་པ་གླུའི་སྒྲ་དེ་དང་དེ་དག་རྣམས་ཉིད་ཤིན་ཏུ་སྙན་པའི་མཆོག་ཏུ་ཕྱིན་པ་ཡན་ལག་ལྔ་དང་ལྡན་པའི་རྔ་སྒྲ་རྣམས་ཀྱིས་ཕུན་སུམ་ཚོགས་པ་དེ་དག་རྣམས་ནི་ཤིན་ཏུ་བར་ཡང་ཡོན་ཏན་རྣམས་ཕུན་སུམ་ཚོགས་པ་དཔེ་མེད་པར་གྱུར་པའི་སྔར་ཐོས་མ་མྱོང་བའི་སྒྲ་འདི་དག་དེ་དག་ཏུ་ཐོས་པར་གྱུར་ཏོ། །ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་ནས་ནགས་དེར་ཉེ་བར་རྒྱུག་སྟེ། རིན་པོ་ཆེའི་རང་བཞིན་གྱི་ཤིང་རྣམ་པ་དུ་མ་རྣམས་ཕུན་སུམ་ཚོགས་པ། དགའ་བ་ཆེན་པོའི་ནགས་ཚལ་ཞེས་བྱ་བ་རྒྱ་ཁྱོན་དུ་དཔག་ཚད་བརྒྱ་པ་ཞེང་དུ་དཔག་ཚད་ཉི་ཤུ་པ་ནགས་དེ་ན་ནི་ནགས་ཆེན་པོར་གྱུར་པས། ཤིང་རྣམས་ཕུན་སུམ་ཚོགས་པ་ཡོན་ཏན་ཆེན་པོ་དང་ལྡན་པ་བརྒྱ་ཕྲག་དུ་མ་རྣམས་དང་སྟོང་ཕྲག་དུ་མ་རྣམས་ཀྱི་

71-6a

ལྷའི་ཚོགས་རྣམས་གནས་པ་ཡང་གླུ་ལེན་པར་བྱེད་པ་དང་། རྩེ་དགའ་བར་བྱེད་པ་དང་གར་ཡང་བྱེད་དོ། །དེ་ནས་ལྷ་གསར་དུ་སྐྱེས་པ་དེས་ནགས་དེ་མཐོང་བར་གྱུར་ནས་ཞུགས་པར་གྱུར་པ་དང་། ནགས་རྣམས་ཐམས་ཅད་གསེར་གྱི་རང་བཞིན་གྱི་ཤིང་བཻ་ཌཱུརྱའི་རང་བཞིན་གྱི་ལོ་མ་ལྷའི་རྫས་ལས་རབ་ཏུ་བྱུང་བ་དྲི་དང་མེ་ཏོག་རྣམས་སོ། །དེ་དག་དང་འདྲ་བའི་ཡོན་ཏན་གྱི་ཕྲེང་བ་རྣམས་དང་། མདོག་དང་དབྱིབས་རྣམ་པ་དུ་མར་གྱུར་པ་དེ་དག་རྣམས་དེས་ཡང་དག་པར་མཐོང་ནས་གཞན་ཡང་གཞན་རྣམས་ལ་ལྟ་བར་བྱེད་དེ། ཤིང་བཻ་ཌཱུརྱའི་རང་བཞིན་ལ་ཨིན་དྲ་ནཱི་ལའི་ཡལ་ག་རྣམས་དང་། གསེར་གྱི་རང་བཞིན་གྱི་འདབ་མ་རྣམས་དང་། དངུལ་གྱི་ཁ་དོག་གི་འབྲས་བུ་རབ་ཏུ་སྨིན་པར་གྱུར་པ་རྣམས་ལྷ་རྫས་ཀྱི་རོའི་ཡོན་ཏན་རྣམས་ཕུན་སུམ་ཚོགས་པའོ། །ཨིན་དྲ་ནཱི་ལའི་མདོག་གི་ཡལ་ག་རྣམས་ཀྱིས་མངོན་པར་བསྐོར་བ་ལ་རྣམ་པ་སྣ་ཚོགས་པའི་ཁ་དོག་དང་ལྡན་པའི་མེ་ཏོག་རྣམས་ཀྱིས་མངོན་པར་བསྐོར་བ་རྣམས་དང་། ཤིང་གཞན་དག་རྣམས་ཀྱང་མཐོང་བ་ལ་འདི་ལྟ་སྟེ། ཨིན་དྲ་ནཱི་ལའི་རྩ་བ་གསེར་གྱི་མདོག་གི་ཡལ་ག་བཻ་ཌཱུརྱའི་རང་བཞིན་གྱི་འདབ་མ་དང་ལྡན་པ་རྣམས་ལ་མདོག་དང་དབྱིབས་རྣམ་པ་དུ་མ་རྣམས་དང་ལྡན་པའི་བུང་བའི་ཚོགས་རྣམས་ཀྱིས་ཉེ་བར་མཛེས་པར་གྱུར་པ། ཤིན་ཏུ་སྙན་པའི་སྒྲ་རྣམས་ཀྱིས་མིག་དང་ཡིད་འཕྲོག་པར་བྱེད་པ་རྣམས་སོ། །དེ་བཞིན་དུ་ལྷ་གསར་དུ་སྐྱེས་པ་དེས་གཞན་དག་རྣམས་ཀྱང་མཐོང་བ་ལ་ལྷ་རྫས་ཀྱི་མེ་ཏོག་ཁ་ཕྱེ་བ་དང་མིག་ཟུམ་པ་རྣམས་ཀྱང་མཐོང་ན་དགའ་བར་འགྱུར་བའི་རིན་པོ་ཆེ་བདུན་གྱི་རང་བཞིན་རྣམ་པར་འདྲེས་པའི་ཆ་ཤས་རབ་ཏུ་རྣམ་པར་ཕྱེ་བ་མཆོག་ཏུ་ངོ་མཚར་བར་གྱུར་པ། སྒྲའི་རྣམ་པ་ཐོས་པར་དགའ་བ་རྣམས་ཀྱིས་ཡིད་མངོན་པར་དགའ་བར་བྱེད་པ་རྣམས་སོ། །དེ་བཞིན་དུ་གཞན་དག་འཁྲི་ཤིང་གི་ཁང་པ་རྣམས་གསེར་གྱི་འཁྲི་ཤིང་རྣམས་ཀྱི་ལོ་མ་འགུལ་བ་རྣམས་ལ་འདབ་མ་རྣམས་ལེགས་པར་ཁྱབ་པར་གྱུར་པ་བུང་བའི་ཚོགས་ཀྱི་ཁྱད་པར་བརྒྱ་སྟོང་རྣམས་ཀྱི་སྒྲའི་བྱེ་བྲག་སྙན་པར་དགའ་བ་རྣམས་མཐོང་ངོ་། །དེ་བཞིན་དུ་འཁྲི་ཤིང་གི་ཁང་པ་གཞན་དག་ཀྱང་བཻ་ཌཱུརྱའི་རང་བཞིན་གྱི་

71-6b

ཡལ་ག་རྣམས་ཀྱིས་རྣམ་པར་བརྒྱན་པ། ཨིན་དྲ་ནཱི་ལ་ཆེན་པོའི་འདབ་མ་རྣམས་ཀྱིས་ལེགས་པར་གཡོགས་པ་རབ་ཀྱི་མཆོག་གི་ནོར་བུ་མདོག་རྣམ་པར་བཀྲ་བ་རྣམས་ཀྱིས་བརྒྱན་པ་ལ་བྱ་རྣམས་ཀྱིས་ཀུན་དུ་སྟེན་པར་བྱེད་པ་རྣམས་ནགས་དེ་འཇམ་པ་མནན་ན་ནེམ་ལ་བཏེག་ན་འཕར་བའི་ས་གཞིའི་ཆ་ཤས་ལེགས་པར་ཕྱེ་བ་རྣམས་དང་། ལྷ་རྫས་ཀྱི་དྲི་རྣམས་ཀྱིས་བསྒོས་པ་ལྷའི་བུ་མོའི་ཚོགས་རྣམས་དང་བཅས་པ་མཐོང་བར་གྱུར་ཏོ། །དེ་བཞིན་དུ་གནས་གཞན་དག་རྣམས་ཀྱང་མཐོང་བར་གྱུར་པ་ལ་ལྷ་གསར་དུ་སྐྱེས་པ་དེས། གང་འགའ་ཞིག་སྔར་མ་མཐོང་བ་སའི་རྣམ་པའི་ཆ་ཀུན་ཡང་ཡོངས་སུ་ཚོགས་པ་བཞིན་དུ་ལྷ་རྫས་ཀྱི་ཁ་དོག་གི་རིན་པོ་ཆེ་བདུན་གྱི་རང་བཞིན་རྣམས་ཀྱིས་ལེགས་པར་རྣམ་པར་གཡོགས་པ། ཤིན་ཏུ་དགའ་བ་དང་ལེགས་པར་མཉམ་པའི་ས་ཕྱོགས་ཀྱི་ཆ་མཆོག་ཏུ་དགའ་བ་རྣམས་ཕྱི་བཞིན་རྗེས་སུ་འབྲང་བའི་འཁོར་དང་བཅས་པ་རྣམས་མཆོག་ཏུ་ངོ་མཚར་བས་རྣམ་པར་གཡེངས་པའི་མིག་གིས་མཐོང་བར་འགྱུར་རོ། །ནགས་དེར་ལྷ་དེས་གང་དག་ཁོ་ན་མཐོང་བར་གྱུར་པ་དེ་དག་ཁོ་ན་འདོད་པ་སྡུག་པ་ཡིད་དུ་འོང་བ་མཐོང་བར་འགྱུར་རོ། །གང་དག་ཁོ་ན་ཐོས་པ་དེ་དག་ཉིད་འདོད་པ་སྡུག་པ་ཡིད་དུ་འོང་བ་ཡིད་མངོན་པར་དགའ་བ་རྣམས་ཐོས་པར་འགྱུར་རོ། །དེས་གང་དང་གང་ཉིད་སྣོམ་པར་བྱེད་པ་ན་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་སྣོམ་པར་བྱེད་དོ། །རྣམ་པ་དུ་མ་དེ་དག་རྣམས་ལས་དེས་གང་ཁོ་ན་སེམས་པར་བྱེད་པ་དེ་དག་ཉིད་འདོད་པ་དགའ་བ་ཡིད་དུ་འོང་བ་རྣམས་མྱོང་བར་བྱེད་པ་ཡིན་ནོ། །རབ་ཀྱི་ཕུལ་གྱི་ལྷ་རྫས་ཀྱི་རོའི་རོ་གཅིག་ཕུན་སུམ་ཚོགས་པ་ལས་ཀྱང་། དེ་གང་ཁོ་ན་ཉན་པར་བྱེད་པ་དེ་དང་དེ་ཉིད་རྣམ་པ་དུ་མར་དགའ་བ་ཡིད་དུ་འོང་བ་རྣམས་ཐོས་པར་འགྱུར་རོ། །དེ་གང་དང་གང་ལ་རེག་པར་བྱེད་པའམ། གང་དང་གང་ཉིད་སེམས་པར་བྱེད་པ་དེ་དང་དེ་ཉིད་འདོད་པ་དགའ་བ་ཡིད་དུ་འོང་བ་རྣམས་འདིའི་སེམས་བསྐྱེད་པ་དང་དུས་གཅིག་ཁོ་ནར་འདི་ལ་ཕུན་སུམ་ཚོགས་པར་འགྱུར་རོ། །དེ་ལྟར་འདི་འདོད་པ་རྣམས་ཐམས་ཅད་ཀྱི་འཆིང་བས་བཅིངས་ནས་རབ་ཏུ་རྒྱ་ཆེ་བའི་བདེ་བ་

71-7a

དང་ལྡན་པ་ནི། དེ་ལ་ཕྱི་བཞིན་རྗེས་སུ་འགྲོ་བའི་འཁོར་རྣམས་དང་བཅས་ནས་རྣམ་པ་དུ་མ་དང་། རྣམ་པར་རྟོག་པ་དུ་མའི་སའི་ཆ་རྣམས་ལ་ལྷ་ཡུལ་གྱི་བྱའི་ཚོགས་ཀྱིས་ཁྱད་པར་གྱི་སྒྲ་འདོན་པའི་ནགས་ཚལ་ཆེན་པོ་དེ་ལ་ཞུགས་པར་གྱུར་ཏོ། །དེ་ཞུགས་པར་གྱུར་པ་ན་པད་མའི་རྫིང་བུ་རྣམ་པ་སྣ་ཚོགས་པར་མཛེས་པ་རྣམས་དང་། ས་གཞིའི་ཆ་ཤས་ལེགས་པར་རྣམ་པར་ཕྱེ་བ་རྣམས་དང་། དེ་ལས་ཤིན་ཏུ་ཆེས་ལྷག་པར་བསྟར་བའི་ས་ཕྱོགས་ཀྱི་ཆ་གཞན་རྣམས་ཉིད་ཀྱང་རབ་ཏུ་མཐོང་ངོ་། །པད་མའི་རྫིང་བུ་དེ་དག་རྣམས་ཀྱི་མཛེས་པར་གྱུར་པ་རྣམས་ནི། འདི་ལྟ་སྟེ་པད་མ་ལ་ལ་ནི་བཻ་ཌཱུརྱའི་ཡུ་བ་གསེར་གྱི་འདབ་མ་རྡོ་རྗེའི་རང་བཞིན་གྱི་ཟེ་འབྲུ་དེ་བཞིན་དུ་ཨིན་དྲ་ནཱི་ལའི་རང་བཞིན་གྱི་ལྟེ་བ་རྣམས་ཡིན་ཏེ་ཤིན་ཏུ་འཇམ་པ་རྣམས་ཡིན་ནོ། །དེ་བཞིན་དུ་གཞན་དག་རྣམས་ཀྱང་བཻ་ཌཱུརྱའི་འདབ་མ་དང་། གསེར་གྱི་རང་བཞིན་གྱི་ཡུ་བ་དང་། དངུལ་གྱི་རང་བཞིན་གྱི་སྙིང་པོ་དང་། པད་མ་རཱ་གའི་ཟེ་བ་དང་ལྡན་པ་རྣམས་ལ་རྣམ་པ་སྣ་ཚོགས་པའི་བུང་བའི་ཚོགས་རྣམས་ཀྱི་རྣམ་པར་བརྗོད་པའི་སྒྲ་འབྱིན་པར་ཉན་པར་འོས་པར་སྙན་པས་དགའ་བར་གྱུར་པ་རྣམས་དང་། འདབ་མ་རྣམ་པར་བཀྲ་བར་གྱུར་པའི་པད་མའི་འདབ་མ་རྣམས་ནི་རིན་པོ་ཆེ་བདུན་གྱིས་རྣམ་པར་སྤྲས་པ་དང་། གསེར་གྱི་འདབ་མ་རྣམས་ཀྱང་ལེགས་པར་རྣམ་པར་ཕྱེ་བ་དང་། ལྟེ་བ་རྣམས་ཀྱང་དེ་ཁོ་ན་བཞིན་དུ་སྣ་ཚོགས་པར་ལེགས་པར་རྣམ་པར་ཕྱེ་བ་རྣམས་ཀྱང་འདི་ལྟ་སྟེ། ཨིན་དྲ་ནཱི་ལ་དང་། པད་མ་རཱ་ག་དང་། བཻ་ཌཱུརྱ་དང་། གསེར་དང་། མུ་ས་ར་གལ་བ་དང་། ཤེལ་དང་། མཧཱ་ནཱི་ལ་རྣམས་ཀྱི་ཁ་དོག་སྣ་ཚོགས་པའི་ཁ་དོག་དེ་དག་རྣམས་དང་ཆ་འདྲ་བའི་འོད་ཟེར་གྱིས་ཉེ་བར་གསལ་བར་བྱས་པའི་བདག་ཉིད་ཅན་རྣམས་ཡིན་ནོ། །དེ་ལ་སྙིང་པོ་རྣམས་ཀྱང་འདི་ལྟ་སྟེ་གཅིག་ཇི་ལྟ་བ་བཞིན་དུ་མ་རྣམས་ཀྱང་དེ་བཞིན་དུ་རྣམ་པ་སྣ་ཚོགས་པའི་ཁ་དོག་དང་དབྱིབས་དང་ལྡན་པའི་ཁ་དོག་ཅན་རྣམས་ཡིན་ནོ། །དེས་པད་མའི་རྫིང་བུ་དེ་དག་རྣམས་མཐོང་བ་དང་། གཟུགས་དེ་དག་རྣམས་མཐོང་བ་དེ་ལྟ་བར་བྱེད་པ་ཉིད་ཀྱིས་ངོམས་པར་མི་འགྱུར་རོ། །དེས་

71-7b

ཇི་ལྟ་ཇི་ལྟར་ཡུལ་དེ་དག་རྣམས་མངོན་པར་མཐོང་བར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམ་པར་འཕེལ་བར་འགྱུར་ཏེ། མར་བཏབ་པར་གྱུར་པའི་མེ་བཞིན་དུ་ངོམས་པ་སྐྱེ་བར་འགྱུར་བ་མ་ཡིན་ནོ། །ཚིམ་པ་མེད་པ་རྣམས་ལ་ཡང་བདེ་བ་ག་ལ་ཡོད། བདེ་བ་དང་བྲལ་བ་རྣམས་ལ་ཡང་ཞི་བ་ག་ལ་ཡོད། སྲེད་པ་དང་བཅས་པ་རྣམས་ལ་ནི་གར་ཡང་ཞི་བ་སྐྱེ་བར་མི་འགྱུར་རོ། །དེ་ཇི་ལྟ་ཇི་ལྟར་བདེ་བ་རྣམས་ཐོབ་པར་གྱུར་པ་དེ་ལྟ་དེ་ལྟར་འདིའི་སྲེད་པ་རྣམས་རྣམ་པར་འཕེལ་བར་འགྱུར་བ་ཡིན་ཞིང་། དེ་ལྟ་དེ་ལྟར་སྲེད་པ་རྣམས་གོང་དུ་ཁྱད་པར་དུ་འགྱུར་རོ། །ཇི་ལྟ་ཇི་ལྟར་ཡང་ཚིམ་པ་མེད་པར་གྱུར་པ་དེ་ལྟ་དེ་ལྟར་རྣམ་པར་ངོམས་པ་མེད་པས་ཁྱད་པར་དུ་སྡུག་བསྔལ་བར་འགྱུར་རོ། །དེ་སྡུག་བསྔལ་བ་ལ་བདེ་བར་མངོན་པར་ང་རྒྱལ་བའི་འདོད་པའི་མེ་རྣམས་ཀྱིས་བསྲེགས་པར་གྱུར་པས། ཕྱིར་ཡང་ནགས་དེ་ཉིད་དུ་འཇུག་པར་བྱེད་པ་ན་ནགས་ཚལ་གྱི་ནང་ན་ཚང་ཚིང་གི་ཁྱད་པར་རབ་ཏུ་མང་པོ་རྣམས་དེས་མཐོང་བར་གྱུར་པ་ལ་རྣམ་པར་འདྲེས་པའི་འོད་ཟེར་ཀུན་ནས་འབར་བར་གྱུར་པ་རྣམས་སོ། །ཁ་ཅིག་ནི་ལྷའི་ཁ་ཅིག་ནི་མེ་ཏོག་གི་འོད་ཀྱིས་ཀུན་ཏུ་གསལ་བར་བྱེད་པ་སྟེ། ཁ་དོག་རྣམས་མངོན་པར་མཐོང་ནས་ཉེ་འཁོར་ཀུན་ཏུ་མིག་རྒྱང་བསྲིངས་པས་དེ་ཡུལ་ལྔའི་མེ་ཏོག་རྣམས་ཀྱི་ནང་དུ་འགྲོ་བར་བྱེད་དོ། །འདོད་པའི་བདེ་བ་རྣམས་ཀྱིས་ཚིམ་པ་མེད་པར་སླར་ཡང་ནགས་དེ་ཉིད་དུ་འཇུག་པར་བྱེད་པ་ན། དེས་ནོར་བུའི་རང་བཞིན་གྱི་གཅལ་རྣམས་དང་། གསེར་དང་། ཤེལ་གྱི་རང་བཞིན་གྱི་མདོག་དང་། འཇམ་པ་ཆུ་བལ་དང་། རྣམ་པར་བྲལ་བའི་མདོག་དང་། འཇམ་པ་ཤིན་ཏུ་འཇམ་པར་གྱུར་པའི་མྱུ་གུ་ལྔ་འབྱུང་བར་འགྱུར་བའི་ཆུ་ཀླུང་ན་རྣམ་པ་སྣ་ཚོགས་པ་ཟབ་པ་རྣམས་མཐོང་བར་གྱུར་ཏོ། །གཞན་ཡང་ཡུལ་ཕྱོགས་གཞན་དག་རྣམས་ལ་ཡང་མཐོང་སྟེ། མཚོ་རབ་ཏུ་དང་བར་གྱུར་པ་དངུལ་གྱི་རང་བཞིན་ཉིད་ཀྱི་ཆུས་ཡོངས་སུ་གང་བར་གྱུར་པ་རིན་པོ་ཆེའི་རང་བཞིན་གྱི་གཅལ་རྣམས་ལེགས་པར་བཀྲམ་པ་འོད་ཟེར་རྣམས་ཀྱང་རྟག་ཏུ་འབྱིན་པར་གྱུར་པས་ཉེ་བར་མཛེས་པར་བྱས་པ་དེ་ན་ངང་པ་དང་། ཀཱ་རཎྜ་བ་དང་ཙཀྲ་བཱ་ཀ་རྣམས་ཀྱིས་ཉེ་བར་མཛེས་པར་བྱས་པ་དང་། ཉེ་

71-8a

འཁོར་རྣམས་ན་ཡང་པད་མའི་རྫིང་བུ་རྣམས་ཀྱིས་ཉེ་བར་མཛེས་པ། འགྲམ་དུ་སྐྱེས་པའི་ལྗོན་ཤིང་རྣམས་ཀྱིས་ཀྱང་ཉེ་འཁོར་རྣམས་རབ་ཏུ་ཁྱབ་པར་གྱུར་པ་ཡང་ནགས་ཀྱི་གསེབ་རྣམས་རྣམ་པར་རྒྱུ་བར་བྱེད་པའི་རྣམ་པ་སྣ་ཚོགས་པའི་རབ་ཀྱི་ཕུལ་དུ་ཕྱིན་པ་སྒྲ་རྣམས་དང་ལྡན་པའི་བྱ་རྣམས་ཀྱིས་ཉེ་བར་མཛེས་པར་བྱས་པས་ཀྱང་མཚོ་འདི་ནི་མཛེས་པར་གྱུར་པ་ཡིན་ནོ། །མཛེས་པར་གྱུར་པ་དེ་དག་རྣམས་མངོན་སུམ་དུ་མཐོང་བར་གྱུར་ནས། གཞན་ཡང་རབ་ཏུ་ཞུགས་པར་གྱུར་པ་ན་ལྷ་གསར་དུ་སྐྱེས་པས་ནགས་དེ་ན་མཐོང་བ་རྣམས་ལ་ཨུད་པ་ལའི་ཚལ་རྣམས་ལྷའི་བུང་བས་ཉེ་བར་མཛེས་པར་གྱུར་པ་རྣམས་དང་། རིན་པོ་ཆེ་བདུན་གྱི་རང་བཞིན་གྱི་སྒྲོ་རྣམ་པར་བཀྲ་བ་ཆུ་ལ་རྒྱུ་བ་རྣམ་པ་སྣ་ཚོགས་པའི་བྱ་རྣམས་ཀྱིས་བསྟེན་པར་བྱས་པ་ལེགས་པར་རབ་ཏུ་བརྩོན་པ་རྣམས་ཀྱིས་འདམ་དང་ངེས་པར་བྲལ་བའི་ཆུ་ཡན་ལག་བདུན་གྱི་ཡོན་ཏན་ཕུན་སུམ་ཚོགས་པ་དང་། ཙཀྲ་བཱ་ཀའི་ཡོན་ཏན་ཕུན་སུམ་ཚོགས་པ་དང་། ཙཀྲ་བཱ་ཀའི་ཚོགས་རྣམས་ཟུང་དུ་གྱུར་པ་རྣམས་ཀྱིས་ཡོངས་སུ་གང་བ་དང་། ཉེ་འཁོར་ན་ཡང་ཀླུང་དུ་སྐྱེས་པར་གྱུར་པ་མཆོག་ཏུ་དྲི་ཞིམ་པ་དབྱིབས་སྣ་ཚོགས་རྣམས་སུ་སྐྱེས་པའི་འདབ་མའི་ཤིང་གིས་ཉེ་བར་མཛེས་པ་སྟེ། དེ་དག་རྣམས་ཀྱིས་ཨུད་པ་ལའི་ཚལ་འདི་དག་རྣམས་མང་པོར་ལྷང་ངེར་གྱུར་པ་ཡིན་ནོ། །གཞན་ཡང་ལྷ་གསར་དུ་སྐྱེས་པ་དེ་ནགས་དེ་ཉིད་དུ་ཞུགས་པར་གྱུར་པ་ན་ལྷ་རྫས་ཀྱི་བདུད་རྩིས་རབ་ཏུ་གང་བའི་ཆུ་བོ་ཉེ་འཁོར་ན་ལེགས་པར་འབབ་པ་མཐོང་བར་གྱུར་ཏེ། གཞན་ཡང་ཞུགས་པར་གྱུར་པ་ན་ལྷ་གསར་དུ་སྐྱེས་པས་དེ་དག་ཉིད་ལས་གཞན་པ་རྣམས་མཐོང་བ་ལ་དེ་བཞིན་དུ་རྣམ་པ་སྣ་ཚོགས་པའི་ཁ་དོག་གི་བདུད་རྩི་དེ་དག་རྣམས་འདམ་གྱིས་ཤིན་ཏུ་གཙང་བ་སྒྲ་སི་ལི་ལི་སྒྲོགས་པའི་བཏུང་བའི་ཆུ་བོ་བརྒྱ་ཕྲག་རྣམས་དང་ཅི་སྟེ་ན་སྟོང་ཕྲག་རྣམས་ཀྱང་ཉེ་འཁོར་དག་ན་རབ་ཏུ་འབབ་པ་དང་། བཏུང་བ་མྱོས་པར་འགྱུར་བ་རྣམས་ལ་ཀུན་ཏུ་ཆགས་པའི་བྱ་རྣམས་ཀྱིས་ཉེ་བར་མཛེས་པ་རྣམས་ཡིན་ནོ། །གཞན་ཡང་རབ་ཏུ་ཞུགས་པར་གྱུར་པ་ཉིད་ན་ལྷ་གསར་དུ་སྐྱེས་པ་དེ་མ་ཡིན་པ་རྣམས་རབ་ཏུ་མཐོང་བ་ནི། ཐང་ལ་སྐྱེས་པར་གྱུར་པ་རྣམ་པ་སྣ་ཚོགས་པ་

71-8b

གཟུགས་དང་། དབྱིབས་དང་། འདབ་མ་དང་། སྙིང་པོ་དང་། དྲི་དང་ཁ་དོག་རྣམས་དང་ལྡན་པ་བུང་བ་རྣམས་ཀྱིས་ཉེ་བར་མཛེས་པར་བྱས་པའི་མེ་ཏོག་གི་ནགས་ཆེན་པོའི་ཁྱད་པར་དུ་བརྒྱན་པ་ལྟ་བུར་གྱུར་པ་ཡིན་ནོ། །ནགས་དེ་དག་ནི་རང་བཞིན་གྱིས་ཀྱང་ཤིན་ཏུ་དྲི་ཞིམ་པ་ཡིན་པ་དེ་དག་རྣམས་ཀྱི་དྲིས་ཕྱིར་ཞིང་ཤིན་ཏུ་ལྷག་པར་ཡང་དྲི་མཆོག་ཏུ་ཞིམ་པར་བྱེད་དོ། །གཞན་ཡང་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་དང་བཅས་པ་རྣམས་ཀྱིས་རབ་ཏུ་མཐོང་བར་གྱུར་པ་དག་ལ། ནགས་ཀྱི་ནང་དག་ན་མཐོན་པོར་གྱུར་པ་རིའི་རྩེ་མོ་རྣམས་རིན་པོ་ཆེ་སྣ་ཚོགས་པ་རྣམས་ཀྱི་འབྱུང་ཁུངས་རྣམས་ཀྱིས་རྣམ་པར་བཀྲ་བ་འབབ་ཆུ་བརྒྱ་སྟོང་ཕྲག་ལེགས་པར་འབྱུང་བ་རྣམས་ཀྱིས་སྣང་བར་བྱེད་པ་དང་ལྡན་པས་རིའི་རྩེ་མོ་རྣམས་རྟག་པར་ཡང་མཛེས་པར་གྱུར་པ་དང་ཤིང་གེལ་པ་རྣམས་ཀུན་ནས་དུད་པས་རྣམ་པར་གསལ་ཞིང་འབར་བར་བྱེད་དོ། །ཁུ་བྱུག་གི་སྒྲ་དགའ་བར་འགྱུར་བ་རྣམས་དང་རྣམ་པ་སྣ་ཚོགས་པའི་རིན་པོ་ཆེ་མཆོག་ཏུ་འབར་བ་ཀུན་ཏུ་སྣང་བར་བྱེད་པའི་འོད་ཟེར་དང་ལྡན་པའི་བྱ་བརྒྱ་སྟོང་ཕྲག་དུ་མ་རྣམས་བལྟ་བར་སྡུག་ཅིང་རྣམ་པར་བརྗོད་པའི་སྒྲ་མཉན་པར་འོས་པ་རྣམས་དང་། དེ་བཞིན་དུ་དྲི་དང་ལྡན་པའི་མེ་ཏོག་བརྒྱ་སྟོང་ཕྲག་དུ་མ་རྣམས་དང་ལྡན་པའི་རིའི་ཁྲོད་རྣམས་ཀྱིས་ཀྱང་ཇི་ལྟར་འཛམ་བུའི་གླིང་ན་རང་གི་འོད་ཟེར་གྱི་གཟི་བརྗིད་ཀྱིས་ནམ་མཁའི་དཀྱིལ་བརྟོལ་བ་བཞིན་དུ་ལངས་ནས་གནས་པའི་ཉི་མ་དང་། ཟླ་བ་འདི་དག་གིས་རྣམ་པར་མཛེས་པར་བྱེད་པ་དེ་བཞིན་དུ་ཀུན་ཏུ་གསལ་བར་བྱེད་དེ། འོད་ཟེར་རྣམས་ཐམས་ཅད་ཀྱང་དུ་མར་རྣམ་པར་བཀྲ་བའི་འོད་ཟེར་རྣམས་ཡིན་པས་འཐབ་བྲལ་བའི་ས་རྣམས་ལས་འོད་ཟེར་གོང་དུ་འཕེལ་བའི་ཁྱད་པར་གྱིས་ཕྱིར་ཞིང་ཉིད་དུ་ཤིན་ཏུ་ཆེས་ལྷག་པར་གསལ་བར་བྱེད་དོ། །རྣམ་པར་བཀྲ་བའི་འོད་ཟེར་དུ་མ་རྣམས་ཆ་ཤས་སུ་རྣམ་པར་ཕྱེ་བ་དེ་དག་རྣམས་ཀྱང་ལྷ་གསར་དུ་སྐྱེས་པ་དེས་ལེགས་པར་མཐོང་ཞིང་། རིའི་རྩེ་མོ་དེ་དག་རྣམས་ཀྱང་ལེགས་པར་མཐོང་ནས་ཕྱིར་ཉིད་ཀྱང་ལྷན་ཅིག་སྤྱོད་པ་རྣམས་དང་བཅས་ཏེ་མང་དུ་རྣམ་པར་བཀྲ་བའི་ནགས་དེར་འཇུག་པར་བྱེད་དོ། །དེ་ནགས་དེར་ཇི་ལྟ་ཇི་ལྟར་རབ་ཏུ་འཇུག་པར་བྱེད་པ་དེ་ལྟ་དེ་ལྟར་ཆེས་དགའ་བར་འགྱུར་བ་རྣམས་

71-9a

མཐོང་བར་འགྱུར་རོ། །དེ་ན་ཡང་དེ་ལས་གཞན་པའི་ཡོན་ཏན་གྱི་ཚོགས་དུ་མ་རྣམས་ཕུན་སུམ་ཚོགས་པ་ལ། སྒྲ་འཕང་མཐོ་བར་རུང་བ་དང་སྙན་ཞིང་རིང་ལ་འཁྱིམ་པ་དང་མི་ཐོན་པ་ལྟར་བརྒྱལ་བ་ལ་སོགས་པའི་སྒྲ་དབྱངས་མང་པོ་ཕུན་སུམ་ཚོགས་པ་རྣམས་སོ། །ཇི་ལྟར་སྒྲ་འདི་དག་རྣམས་དང་ཉེ་བར་གྱུར་ཅིང་དེས་སྒྲ་དེ་དག་རྣམས་ཐོས་པར་གྱུར་པས་ཤིན་ཏུ་ལྷག་པར་ཡིད་ཆེས་རབ་ཏུ་དགའ་བར་གྱུར་པས་རིངས་པ་ཉིད་དུ་ལེགས་པར་ཞུགས་པ་ན། ལྷའི་ཚོགས་སྔར་མ་མཐོང་བ་རྣམས་ཀྱི་ཅ་ཅོའི་སྒྲས་མིག་རབ་ཏུ་རྣམ་པར་གདངས་ནས། དེ་གང་གི་ཚེ་ཉེ་འཁོར་རྣམས་སུ་ལེགས་པར་ཞུགས་པ་དེའི་ཚེ་ན་ཤིན་ཏུ་ལྷག་པར་གྱུར་པའི་ནགས་ཚལ་གྱི་ཕྲེང་བ་མཛེས་པ་རྣམས་མཐོང་བ་ནི་རབ་ཏུ་རྣམ་པར་གྱེས་པའི་བཻ་ཌཱུརྱའི་ལྗོན་ཤིང་མཆོག་ཏུ་འབར་བ་རྣམས་ཀྱིས་ཉེ་བར་མཛེས་པ་དང་། དེ་བཞིན་དུ་ཨིན་དྲ་ནཱི་ལའི་ཤིང་གི་ཚོགས་རྣམས་ཀྱིས་ཉེ་བར་མཛེས་པར་བྱས་པ་རྣམས་ཀྱིས་ཀྱང་རིའི་ཚོགས་རྣམས་རྣམ་པར་མཛེས་པར་བྱེད་པ་ཡིན་ནོ། །གཞན་ཡང་ལྷ་དེ་ཉིད་ཀྱིས་ལེགས་པར་མཐོང་བ་རྣམས་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པ་པད་མའི་རྫིང་བུ་རྣམས་ཀྱིས་ཉེ་བར་མཛེས་པའི་ནགས་ཀྱི་རྒྱལ་པོ་རྣམ་པར་མཛེས་པ་རྣམས་སོ། །དེ་དག་རྣམས་ཐམས་ཅད་ན་ཡང་རྟག་པར་རྒྱུན་མི་འཆད་པར་ཀུན་ཏུ་རྟོག་པ་རྣམ་པ་སྣ་ཚོགས་པའི་ཆེས་ལྷག་པ་རྣམས་ཀྱི་རྒྱན་དང་ཆ་བྱད་རྣམས་དང་ལྡན་པ་དཔེ་མེད་པར་གཟུགས་དང་ལང་ཚོ་ལ་བབ་ཅིང་རྒྱན་དང་ཆ་བྱད་རྣམས་དང་ལྡན་པའི་ལྷ་དང་ལྷ་མོའི་ཚོགས་བརྒྱ་སྟོང་གིས་ཡོངས་སུ་གང་བས་རྣམ་པར་མཛེས་པའི་ཚོགས་པ་རྣམས་ལ་ལྷ་རྣམས་འགའ་ཞིག་ནི་ཀུན་ནས་གནས་ཏེ་མྱོས་བྱེད་ཀྱི་སྐྱོན་དང་། རྣམ་པར་བྲལ་བར་གྱུར་པའི་ལྷ་རྫས་ཀྱི་རོ་དང་དྲི་དང་རེག་བྱའི་བདེ་བ་རྣམས་སྐྱེད་པར་བྱེད་པའི་མྱོས་བྱེད་དེ་དག་རྣམས་འཐུང་བར་བྱེད་ཅིང་རྒྱགས་པ་ལ་དོན་གཅིག་པར་གྱུར་པའི་ལྷན་ཅིག་སྤྱོད་པའི་འཁོར་རྣམས་དང་བཅས་ནས་ཁ་དོག་རྣམ་པ་སྣ་ཚོགས་པར་གྱུར་པའི་ནགས་ཀྱི་ཕྲེང་བ་མཛེས་པ་རྣམས་ལ་རྩེ་དགའ་བར་བྱེད་དོ། །ཚོགས་པ་གཞན་རྣམས་ཉིད་ནི་རྣམ་པར་འདྲེས་པའི་འོད་ཟེར་གྱིས་

71-9b

ལེགས་པར་གསལ་བར་བྱས་པའི་ནགས་མཛེས་པ་ཆ་ཤས་རྣམ་པར་བཀྲ་བ་རྣམས་ལ་འཚེར་བག་དང་ལྡན་པའི་ལུས་ཅན་རྣམས་རྩེ་དགའ་བར་བྱེད་དོ། །ལྷ་གཞན་དག་རྣམས་ཀྱང་དེ་ཁོ་ན་བཞིན་དུ་ལྷན་ཅིག་སྤྱོད་པ་རྣམས་དང་བཅས་པས་རང་དང་གཞན་རྣམས་ལ་ཡང་མཆོག་ཏུ་དགའ་བར་འགྱུར་བའི་ལྗོན་ཤིང་གིས་རབ་ཏུ་གང་བའི་ནགས་ཀྱི་ཕྲེང་བ་མཛེས་པ་རྣམས་ལ་རོལ་མོའི་ཆ་བྱད་རྣམས་དང་གར་དང་རྔ་སྒྲ་དང་བཅས་པའི་ལྷ་རྫས་ཀྱི་འདོད་པའི་ཡོན་ཏན་ལྔ་རྣམས་ཀྱི་ལྷ་རྫས་རྣམས་དང་ཉེ་བར་ལྡན་ནོ། །དེ་བཞིན་དུ་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་གཞན་དག་རྣམས་ཀྱི་ཚང་ཚིང་རྣམས་དང་བར་རྣམས་སུ་སོང་བར་གྱུར་ནས་དེ་ཁོ་ན་བཞིན་དུ་དགའ་བར་བྱེད་དེ། རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་དེ་དག་རྣམས་ལ་ཡིད་སོང་བ་དེ་དག་རྣམས་རྗེས་སུ་ཆགས་ཤིང་རྗེས་སུ་འགྲོ་བ་དཔེ་མེད་པའི་ལྷ་རྫས་ཀྱི་བདེ་བ་རྣམས་ལ་ཀུན་ནས་ཆགས་པར་གྱུར་པ་ལྷན་ཅིག་རྒྱུ་བར་བྱེད་པའི་འཁོར་རྣམས་དང་བཅས་པས་རྔ་སྐད་ཡན་ལག་ལྔ་དང་ལྡན་པ་གླུ་དང་སྤྲུགས་པའི་རོལ་མོ་ལ་ཡིད་ཀུན་ནས་ཆགས་པར་གྱུར་པ། བདེ་བས་སྙིང་ཀུན་ཏུ་གང་བ་ཉིད་ཀྱིས་རྩེ་དགའ་བར་བྱེད་པས་ཀྱང་ཚིམ་པ་མེད་པའི་འབྲས་བུའི་སྲེད་པ་རྣམས་ལ་རྣམ་པར་ཆགས་པའི་ཡིད་ཅན་རྣམས་འཐུན་པས་སྙིང་ཀུན་ཏུ་རྒྱས་པར་རྩེ་དགའ་བར་བྱེད་པའི་འདོད་པ་རྣམས་ཉིད་ཀྱིས་ཀྱང་ངོམས་པ་མེད་པ། སྲེད་པས་རྣམ་པར་འཆེལ་བའི་ཡིད་ཅན་རྣམས་སྒོ་ལྔ་ལ་རབ་ཏུ་རྟེན་པར་བྱེད་པ་གང་ཡིན་པའི་འདོད་པའི་ཆུ་བོ་རྣམས་སུ་ནུབ་པ་ཡིན་ནོ། །དེ་བཞིན་དུ་པད་མའི་ནགས་གཞན་རྣམས་ལ་ལྷན་ཅིག་ཏུ་སྐྱེས་པར་གྱུར་པའི་པད་མའི་འདབ་མའི་ལྡེབས་རྣམས་སུ་ལེགས་པར་གནས་པར་བྱས་ནས་མྱོས་བྱེད་འཐུང་བར་བྱེད་དེ། འོན་ཀྱང་མྱོས་བྱེད་ཀྱི་ཉེས་པ་རྣམས་ཀྱིས་ཀྱང་ཀུན་ཏུ་གོས་པར་ནི་མི་འགྱུར་རོ། །དྲི་ཞིམ་པོ་དང་རེག་བྱ་དང་ཁ་དོག་རྣམས་དཔེ་མེད་པར་གྱུར་པའི་བཏུང་བ་དེ་དག་རྣམས་ཀྱིས་ཡིད་ལེགས་པར་ཆགས་པས་བསྒོས་པ་ཡིན་ནོ། །ཡང་གཞན་དག་རྣམས་ནི་སྣ་ཚོགས་པའི་འབབ་ཆུ་རྣམས་ཀྱི་ངོས་གཉིས་སུ་ལྷ་དེ་དག་རྣམས་ཕན་ཚུན་དུ་གྲོགས་སུ་གྱུར་པས་དཔེ་མེད་པའི་

71-10a

ལྷ་རྫས་ཀྱི་བདེ་བ་རྣམ་པ་དུ་མ་རྣམས་ལ་ཉེ་བར་ལོངས་སྤྱོད་པར་བྱེད་དོ། །གཞན་ཡང་ལྷ་གསར་དུ་སྐྱེས་པ་དེས་མཐོང་བར་གྱུར་པ་རྣམས་ལ། གསེར་དང་བཻ་ཌཱུརྱའི་རང་བཞིན་རྣམས་ལ་ནོར་བུའི་སྟེགས་བུ་རྣམས་སུ་དང་། ཁང་བུའི་ཕྲེང་བ་རྣམས་ལ་ཡང་དགའ་བར་བྱེད་དོ། །དགའ་བར་བྱེད་པ་ཡང་ཕན་ཚུན་དུ་གྲོགས་སུ་གྱུར་པ་སྟེ། འདོད་པ་རྣམས་ལ་དོན་གཅིག་པ་ལེགས་པར་བྱས་པའི་ལས་རྣམས་ཀྱིས་དམན་པ་དང་བར་མ་དང་ཁྱད་པར་དུ་འཕགས་པར་གྱུར་པའི་གཟུགས་དང་ལང་ཚོ་དང་བདེ་བ་རྣམས་ལ་ལས་རྣམས་དབང་པོར་གྱུར་པས་མཆོག་ཏུ་ལེགས་པར་ཞུགས་པ་རྣམས་ཁྱད་པར་མཚུངས་པ་མེད་པའི་ཡན་ལག་ལྔ་པའི་བདེ་བ་རྣམས་ཀྱིས་ཉེ་བར་འཚོ་བར་བྱེད་དོ། །དེ་ནས་ལྷ་དེས་སྔར་མཐོང་མ་མྱོང་བའི་རྣམ་པ་དུ་མར་དགའ་བར་གྱུར་པ་དེ་དག་རྣམས་ནི་སྔར་བཞིན་ནོ། །ཡང་ལྷ་དེ་ཉེ་འཁོར་རྣམས་ན་རྩེ་བར་གྱུར་པ་ལས་མི་མཉམ་པའི་བདེ་བ་ཕུན་སུམ་ཚོགས་པ་རྣམས་དང་ལྡན་པའི་ལྷ་རྣམས་གང་ཡིན་པ་དེའི་ཚོགས་དེར་རབ་ཏུ་དགའ་བར་གྱུར་པའི་ཡིད་ཀྱིས་ལྷན་ཅིག་སྤྱོད་པ་རྣམས་དང་བཅས་པ་མྱུར་བར་འགྲོ་བར་བྱེད་དོ། །ལྷ་རྣམས་ཀྱིས་ཀྱང་ཕུལ་དུ་བྱུང་བའི་རྒྱན་དང་ཆ་ལུགས་དང་གཟུགས་ཕུན་སུམ་ཚོགས་པར་གྱུར་པའི་སྔ་ན་མ་མཐོང་བ་དེ་ལ་ངོ་མཚར་བར་གྱུར་པས་མིག་ཤིན་ཏུ་ཁྱད་པར་དུ་ཧར་ཧར་པོར་བྱེད་དོ། །ལྷ་དེ་ཡང་ལྷ་དེ་དག་རྣམས་ལ་ཉེ་བར་བརྟེན་ནས་ཡིད་ཆེས་རབ་ཏུ་དགའ་བར་འགྱུར་རོ། །དེ་དག་རྣམས་ཀྱིས་ཀྱང་ཕན་ཚུན་དུ་ཉེ་བར་རྟེན་པར་བྱེད་དེ། ཕན་ཚུན་དུ་ངེས་པར་གནོན་པ་མེད་པར་ཉེ་བར་འགྲོ་བའི་ཡིད་དང་། ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་ཀྱང་རྗེས་སུ་ཆགས་པར་གྱུར་པའི་ཡིད་ཀྱིས། རྣམ་པར་མཛེས་པའི་ནགས་ཀྱི་རྒྱལ་པོ་རྣམས་ནས་རྣམ་པར་མཛེས་པའི་ནགས་ཀྱི་རྒྱལ་པོ་རྣམས་དང་། ནགས་ལས་ནགས་རྣམས་སུ་དང་གསེར་གྱི་རང་བཞིན་གྱི་རི་དང་རི་བོའི་རྩེ་མོ་རྣམས་ལ་རི་དང་རི་བོའི་རྩེ་མོ་རྣམས་སུ་དང་པད་མའི་ཚལ་རྣམས་ནས་པད་མའི་ཚལ་རྣམས་སུ་དང་ཟས་ཀྱི་ཆུ་བོ་རྣམས་ནས་ཟས་ཀྱི་ཆུ་བོ་རྣམས་ལ་དང་། དེ་བཞིན་དུ་འབབ་ཆུ་རྣམས་

71-10b

ནས་འབབ་ཆུ་རྣམས་ལ་ཆུ་བོ་དག་ཏུ་ཡང་ཀུན་ནས་ཉེ་བར་འགྲོ་བར་བྱེད་དེ། གཞན་དང་འདྲ་བ་མ་ཡིན་པ་རྣམས་དཔེ་རྣམས་ཀྱིས་ཇི་ལྟ་བ་བཞིན་དུ་བརྗོད་པར་སླ་བ་ཡང་མ་ཡིན་ནོ། །དེ་ལྟར་ལྷའི་ཚོགས་དེ་དག་རྣམས་ཐམས་ཅད་ཀྱང་དགའ་རངས་པར་བྱེད་དོ། །དེ་ལྟར་དེ་དག་ཏུ་དུས་ཤིན་ཏུ་རིང་བར་རྩེས་པར་གྱུར་ནས་གང་ན་ཐམས་ཅད་ཀྱི་སྙིང་པོ་ཞེས་བྱ་བའི་རི་ཡོད་པ་དེར་ཀུན་ཡང་ཉེ་བར་འགྲོ་བར་བྱེད་དོ། །རི་དེ་ཡང་རིའི་ཐམས་ཅད་ནས་གསེར་གྱི་ཁམས་དང་ལྡན་པ་འབབ་ཆུ་དང་པད་མའི་ཚལ་དང་ཁྲུས་ཀྱི་རྫིང་བུ་རྣམ་པ་དུ་མ་རྣམས་ཕུན་སུམ་ཚོགས་པ་ནགས་དང་ཉེ་བའི་ནགས་རྣམས་དང་། ལྷ་དང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྟག་ཏུ་ཡང་རོལ་མོ་དང་རྔ་སྒྲ་དང་གླུ་རྣམས་ཀུན་བརྗོད་པའི་སྒྲ་སྒྲོགས་པ་དང་ཐམས་ཅད་ལས་ཀྱང་ཡིད་མངོན་པར་དགའ་བའི་རི་ལ་ཆུ་ཀླུང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་གང་བ། ཁང་པའི་ཕྲེང་བ་བརྒྱ་སྟོང་ཕྲག་དུ་མ་རྣམས་ཀྱིས་མངོན་པར་དགའ་བ་དང་། ཉེ་འཁོར་ཀུན་ནས་པད་མ་རྣམས་ཀྱིས་ཡོངས་སུ་ཁེབས་པར་ལྡན་པ་དང་། འཇུག་ངོགས་བརྒྱ་སྟོང་གིས་བརྒྱན་པ། རབ་ཏུ་གསལ་བར་བྱེད་པའི་ལྗོན་ཤིང་རྣམས་བཞིན་དུ་ཉེ་འཁོར་རྣམས་ན་དཔག་བསམ་གྱི་ལྗོན་ཤིང་རྣམས་ཀྱིས་ཉེ་བར་མཛེས་པ་སྐྱེད་པ་རྣམས་ཀྱང་དེ་ལྟ་བུའི་རྣམ་པ་འདི་དག་རྣམས་མཐོང་ན་དགའ་བར་འགྱུར་བ་དང་ཉེ་འཁོར་རྣམས་ན་ཡང་ལྷ་རྣམས་ཀྱི་མཐོང་ན་ཤིན་ཏུ་ངོ་མཚར་བ་སྐྱེ་བའི་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་ཡིན་ནོ། །དེའི་ངོས་གཅིག་ནི་བཻ་ཌཱུརྱའི་རང་བཞིན་ནོ། །གཞན་ཅིག་ནི་གསེར་གྱི་རང་བཞིན་ནོ། །གཞན་ཅིག་ནི་ཨིན་དྲ་ནཱི་ལའི་རང་བཞིན་ནོ། །གཞན་ཅིག་ནི་ནཱི་ལ་ཆེན་པོའི་རང་བཞིན་ནོ། །རིན་པོ་ཆེའི་རང་བཞིན་གྱི་ལོགས་ཆ་ཤས་ལེགས་པར་རྣམ་པར་ཕྱེ་བའི་རིའི་མཆོག་དེའི་ཉེ་འཁོར་རྣམས་ན་ཆེན་པོ་རྣམས་ལ་འོས་པར་གྱུར་པའི་བང་རིམ་རྣམས་དང་། རིའི་ཕུག་དང་སྨན་ལྗོངས་དང་། ནགས་ཀྱི་ཕྲེང་བ་ཕུན་སུམ་ཚོགས་པ་རྣམས་ལ་རེག་པར་བྱ་བའི་དོན་དུ་དང་རྩེད་མོ་ལ་རྣམ་པར་རྒྱུ་བས་དང་། དེ་ཁོ་ནར་དགའ་བར་བྱ་བའི་ཆེད་དུ་ཀུན་ནས་འཛེག་པར་བྱེད་དེ། ལན་བརྒྱ་ཕྲག་དང་ཅི་སྟེན་སྟོང་

71-11a

ཕྲག་སུ་ཡང་ཕྱི་བཞིན་རྗེས་སུ་སྤྱོད་པའི་འཁོར་དང་བཅས་པས་ལྷ་རྫས་ཀྱི་རྔ་སྐད་ཡན་ལག་ལྔ་དང་ལྡན་པ་རབ་ཏུ་ཆགས་པ་མཚུངས་པ་དང་རྗེས་སུ་ཆགས་པར་བྱེད་པ་དང་སྙན་པ་དང་རྣམ་པ་དུ་མ་རྣམས་ཡང་དག་པར་ལྡན་པས་དགའ་བར་བྱེད་ཅིང་རྩེ་བར་ཡང་བྱེད་དེ། ཕལ་ཆེ་བའི་འདུས་པ་རྣམས་ནགས་དང་ཉེ་བའི་ནགས་རྣམས་དང་ཁྲུས་ཀྱི་རྫིང་བུ་དང་འབབ་ཆུ་རྣམས་སུའོ། །དེ་ནས་ལྷ་དེ་དག་རྣམས་ཇི་ལྟ་ཇི་ལྟར་མངོན་པར་འཛེག་པར་བྱེད་པ་དེ་ལྟ་དེ་ལྟར་ཆེས་དགའ་བ་རྣམས་མཐོང་བར་འགྱུར་ཏེ། ཐམས་ཅད་ལས་ཀྱང་འདོད་པ་ཐམས་ཅད་ཀྱི་བདག་ཉིད་ཀྱི་ལྷ་རྫས་ཀྱི་ཤིང་བརྒྱ་སྟོང་གིས་ཉེ་བར་མཛེས་པར་གྱུར་པ། འོད་ཟེར་རྣམས་མཆོག་ཏུ་འབར་བའི་རིན་པོ་ཆེའི་རང་བཞིན་གྱི་འོད་ཟེར་དང་ལྡན་པའི་པད་མའི་ཚལ་རྣམས་མཆོག་ཏུ་འབར་བ་དང་པད་མའི་ཚལ་གྱི་ཕྲེང་བས་ཉེ་བར་མཛེས་པར་གྱུར་པ་རྣམས་ཡིན་ནོ། །སྔར་ཇི་སྐད་དུ་བཤད་པ་དེ་དག་རྣམས་བཞིན་དུ་ལྷ་དེ་དག་རྣམས་རྩེ་དགའ་བ་དང་གར་དང་གླུ་ལེན་པར་བྱེད་དོ། །གླུ་ལེན་པར་བྱེད་པ་དང་གར་བྱེད་པར་གྱུར་པས་ཀྱང་དལ་གྱིས་དལ་གྱིས་རི་དེ་ལ་ཀུན་ནས་བགྲོད་པར་བྱེད་དེ། ཕན་ཚུན་དུ་གྲོགས་སུ་གྱུར་པ་དང་རང་གིས་བྱས་པའི་ལས་རྣམས་གྲོགས་སུ་གྱུར་པ་དེའི་ལམ་ནས་འགྲོ་བར་བྱེད་པ་དང་། དེས་ལེགས་པར་བྱས་པའི་ལས་རྣམས་ཀྱིས་རང་ཉིད་འོད་དང་ལྡན་པ་དང་། ཤ་དང་རུས་པ་དང་ཆུ་སེར་རྣམས་ངེས་པར་མེད་པ་དང་ཕན་ཚུན་དུ་གནོད་པ་མེད་པར་ཟས་ཀྱི་ཀླུང་རྣམས་ལ་དང་བཏུང་བའི་ཀླུང་རྣམས་ལ་དང་བདུད་རྩིའི་ཀླུང་ལ་ཡང་རང་གིས་བྱས་པ་རྣམས་དང་། ཆ་འདྲ་བར་མདོག་དང་རོ་དང་དྲི་དང་རེག་བྱ་ཕུན་སུམ་ཚོགས་པ་རྣམས་སྣོད་བཟང་པོ་ཕུན་སུམ་ཚོགས་པ་རྣམས་ཀྱིས་འོས་སུ་གྱུར་པ་རྣམས་ལ་ཉེ་བར་ལོངས་སྤྱོད་པར་བྱེད་ཅིང་ཡུལ་ལྔ་ལ་རྣམ་པར་ཆགས་པར་གྱུར་པའི་ཡིད་ཅན་རྣམས་ཡིན་ཏེ། ཕན་ཚུན་རྣམས་ཀྱིས་ཀྱང་ཀུན་ནས་ཆགས་པ་སྐྱེད་པར་བྱེད་པ་དང་། ཡིད་ཀྱང་དེ་ལ་སོང་བར་གྱུར་པ་དང་རྟག་པར་རྒྱུན་དུ་ཡང་བཞིན་རབ་ཏུ་དང་བར་གྱུར་པས་ཀྱང་རྩེ་དགའ་བར་བྱེད་དོ། །འདོད་པ་རྣམས་ཐམས་ཅད་རྟག་ཏུ་ཡང་ཕུན་སུམ་

71-11b

ཚོགས་པར་གྱུར་པ། སྔ་ན་མེད་པ་རྣམས་དང་མཉམ་པ་མེད་པ་རྣམས་དང་རྣམ་པ་དུ་མ་རྣམས་ཀྱི་བདེ་བ་རྣམས་ཀྱིས་ཉེ་བར་འབད་པར་བྱེད་དོ། །རི་དེ་ལ་ཀུན་ཏུ་འཛེག་པར་གྱུར་པ་དེ་དག་རྣམས་ནི་ཤིན་ཏུ་ངོ་མཚར་བར་གྱུར་པའི་དགའ་བ་རྒྱ་ཆེན་པོ་རྣམས་ཀྱིས་དེ་དག་རྣམས་ཡོངས་སུ་རྒྱས་པར་གྱུར་པ་ན། ལུས་ཀྱི་ཁྱད་པར་རྣམས་མཐོང་བར་གྱུར་པའི་ལྷའི་ཚོགས་རབ་ཏུ་ཆགས་ཤིང་བདེ་བར་གྱུར་པ་རྣམས་ཀྱིས་ཉེ་འཁོར་རྣམས་ཀུན་ན་ཡང་མཚུངས་པ་མེད་པ་རྣམས་མཐོང་བར་གྱུར་པའི་རི་བོའི་མཆོག་དེའི་རྒྱབ་དེ་དག་རྣམས་སུ་ཀུན་ནས་གནས་པར་གྱུར་ནས། རྩེད་མོའི་རི་བོ་ཞེས་བྱ་བའི་རི་དེ་ཡང་ཤིན་ཏུ་ཡང་དགའ་བར་གྱུར་པ་ཡིན་ཏེ། རིན་པོ་ཆེའི་རང་བཞིན་རྣམ་པ་དུ་མ་སྣ་ཚོགས་པའི་རྩེད་མོའི་རི་ལ་མཐོང་བ་རྣམས་ནི་ལྗོན་ཤིང་དང་ཆུ་ཀླུང་དང་པད་མའི་ཚལ་དང་ཨུད་པ་ལའི་ཚལ་རྣམས་ཀྱིས་ཀུན་ཏུ་གང་བ་ཡིན་ནོ། །དེའི་རྒྱབ་ན་དཔལ་རྣམས་ཀུན་གྱིས་ཡོངས་སུ་གང་བར་གནས་པ་ཡིད་ལ་འདོད་པ་རྣམས་ཐམས་ཅད་ཕུན་སུམ་ཚོགས་པ་ཡིན་ཏེ། དེར་གང་དང་གང་ཁོ་ན་སེམས་པར་བྱེད་པ་དེ་དང་དེ་དག་རྣམས་ཉིད་ཕུན་སུམ་ཚོགས་པར་འགྱུར་ཏེ་རྣམ་པ་དུ་མར་འདོད་པ་དགའ་བ་ཡིད་དུ་འོང་བ་དང་གཞན་རྣམས་དང་ཐུན་མོང་མ་ཡིན་པ་རྣམས་འབྱུང་བ་ཡིན་ནོ། །ཡིད་ཀྱི་རྗེས་སུ་འཐུན་པ་རྣམས་ཀྱང་རྣམ་པ་དུ་མ་ཉེ་བར་གནས་སོ། །ཡོན་ཏན་ལྷག་མ་རྣམས་ཉིད་ནི་བརྗོད་ཟིན་ཏོ། །བདེ་བ་ལ་ལྷ་རྣམས་དུས་ཤིན་ཏུ་རིང་དུ་རྩེ་བར་བྱེད་དོ། །དེ་ལྟར་དེ་དག་རྣམས་རྩེ་བར་གྱུར་ཅིང་དགའ་བར་ཡང་གྱུར་ལ་རི་དེ་དག་རྣམས་ཀྱང་སོ་སོ་དང་སོ་སོར་ཀུན་ཏུ་ལྟ་བར་བྱེད་པ་ན། གལ་ཏེ་ནམ་ཞིག་ན་འཁྲི་ཤིང་ལེགས་པར་འཁྲིལ་བ་རྣམས་ཀྱིས་ཀུན་ནས་གཡེངས་པར་གྱུར་པ། རིན་པོ་ཆེ་རྣམས་ཀྱི་རང་བཞིན་གྱི་འོད་ཟེར་གྱིས་ཀུན་ནས་གསལ་བར་བྱེད་པའི་རི་ལེགས་པར་ལངས་པ་རྣམས་ཀྱིས་ཉེ་འཁོར་རྣམས་ཀུན་ནས་ཡོངས་སུ་བསྐོར་བ། ས་གཞི་རྣམས་རིན་པོ་ཆེ་བདུན་གྱི་རང་བཞིན་གྱི་རབ་ཀྱི་ཕུལ་དུ་གྱུར་པ་ཞི་བར་གྱུར་པའི་བྱ་རྣམས་ཀྱི་བརྗོད་པའི་ཁྱད་པར་ཆེས་དགའ་བར་འགྱུར་བའི་སྒྲ་རྣམས་དང་ལྡན་པ། རབ་ཏུ་ཞི་བའི་མཆོག་ཏུ་གྱུར་པའི་ཕུག་རྣམས་ཀྱིས་ཀྱང་ཉེ་

71-12a

བར་འཁོར་བ་རྣམས་ནས་ཡོངས་སུ་བསྐོར་བར་གྱུར་པའི་མཚོ་རབ་ཏུ་ཞི་བའི་སྤྱོད་པས་རྒྱུ་བ་རྣམས་ཀྱི་གནས་ཞེས་བྱ་བའི་རིའི་ཁྲོད་ན་གནས་པ་ཡིན་ནོ། །མཚོ་དེར་ཡང་གང་དག་གིས་རབ་ཏུ་ཞི་བ་སྐྱེ་བ་གཞན་དུ་སྤྱོད་པར་གྱུར་པ་དང་། འོན་ཀྱང་ཚུལ་ཁྲིམས་རྣམས་ཡོལ་ཡང་སྤྱད་པ་མ་ཡིན་པ་དང་། སྙིང་ལ་ཆོས་ལེགས་པར་འཛིན་པར་བྱེད་པའི་བདག་ཉིད་ཅན་ནི་ཡིན་པ་དང་ཁྲོ་བར་གྱུར་པ་དང་། ཇི་སྐད་སྨྲས་པ་དེ་ལྟར་མི་བྱེད་པ་དང་གར་མཁན་དང་ཆོས་མཚུངས་པར་གྱུར་པའི་ཆོས་སྨྲ་བ་དེ་དག་རྣམས་དམྱལ་བ་དང་ཡི་དགས་རྣམས་ནས་དཀའ་བས་ཤི་འཕོས་པ་རྣམས་ཡིན་ནོ། །གལ་ཏེ་ཞིག་དེ་དག་རྣམས་ལན་གྲངས་གཞན་ལ་མྱོང་བར་གྱུར་པའི་ལས་ཀྱི་རྒྱས་བཅུས་པའི་སྲེད་པས་མཚོ་དེར་སྐྱེ་བར་འགྱུར་ལ་རབ་ཏུ་ཞི་བ་སྐྱེ་བ་གཞན་དང་གཞན་ལ་སྤྱད་པའི་དབང་གིས་མཚོ་དེའི་ཡང་ངང་པ་རྣམས་སུ་ཕལ་ཆེར་སྐྱེ་བར་འགྱུར་ཏེ། བྱ་དེ་དག་རྣམས་ནི་རིན་པོ་ཆེ་བདུན་གྱི་རང་བཞིན་གྱི་སྒྲོ་དག་དང་ལྡན་པར་འགྱུར་བ་དང་། སྐྱེ་བ་ཉིད་ཀྱི་མཐུ་སྟོབས་ཀྱིས་སྒྲ་སྙན་པར་འགྱུར་བ་དང་ལྷ་རྫས་ཀྱི་པད་མའི་ཟས་དང་ལྡན་པར་ལྷན་ཅིག་སྤྱོད་པ་རྣམས་དང་བཅས་པ་རྩེ་དགའ་བར་ཡང་བྱེད་དོ། །ངང་པའི་རྒྱལ་པོ་བྱང་ཆུབ་སེམས་དཔའ་དུས་བཟངས་ཞེས་བྱ་བ་ཡང་ཕལ་ཆེར་མཚོ་དེ་ན་གནས་ཏེ། ཕུག་དེ་དག་ན་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དང་ཆོས་དང་ལྡན་པའི་གཏམ་བྱེད་དོ། །བྱའི་ཚོགས་དེ་དག་རྣམས་ཆོས་ཀྱི་གཏམ་དེ་དག་ཉན་པར་བྱེད་དོ། །དེ་ནས་ལྷ་དེ་དག་རྣམས་རྩེ་དགའ་ཞིང་དགའ་དགུར་སྤྱོད་པར་བྱེད་པ་ལས་གལ་ཏེ་ཤེད་ན་ཚོམས་གཉིས་སུ་འགྱུར་ཏེ། གང་དག་ལེགས་པར་བྱས་པའི་ལས་རྣམས་ཀྱིས་བསྐུལ་བར་གྱུར་ཅིང་སྐྱེ་བ་གཞན་ལ་ཡང་ལེགས་པར་བྱས་པ་རྣམས་སྤྱད་པ་དེ་རྣམས་ནི་གང་ན་མཚོ་དེ་ཡོད་པར་གྱུར་པ་དེར་འགྲོ་བར་བྱེད་དོ། །གང་དག་གིས་མ་སྤྱད་པ་དེ་དག་རྣམས་ནི་གང་ན་བག་མེད་པ་རྣམས་སྤྱོད་པ་ཞེས་བྱ་བའི་ནགས་དེར་སོང་ནས་རྩེ་དགའ་བས་གནས་པར་འགྱུར་རོ། །ཇི་ལྟར་སྐྱེ་བ་གཞན་རྣམས་སུ་རབ་ཏུ་ཞི་བ་སྤྱད་པ་དེ་དག་རྣམས་ནི་མཚོའི་གནས་སུ་སོང་བར་གྱུར་ནས་དེ་དག་རྣམས་དང་ཀུན་ནས་འདྲེ་བར་གྱུར་

71-12b

པ་ཉིད་ན་ཀུན་བརྗོད་པ་དང་ལྡན་པ་ཞེས་བྱ་བའི་ངང་པ་དེ་དག་གིས་ཚིགས་སུ་བཅད་པ་རྣམས་བརྗོད་པ། ཇི་ལྟར། གང་གིས་ཇི་སྐད་སྨྲས་པའི་མིས། །དེ་ཚེ་དེ་ལྟར་མི་བྱེད་པ། །དེ་ནི་རྨོངས་པ་སྟོང་པ་སྨྲ། །སྡུག་བསྔལ་རྣམས་ནི་མཐར་བྱེད་མིན། །གང་ཞིག་གཞན་ལ་ཆོས་སྨྲ་ཞིང་། །ཆོས་ལ་ཡང་ནི་མི་འཇུག་པ། །ཚིག་གི་སྙིང་པོའི་སྐྱེས་བུ་དེ། །རྟག་ཏུ་སེམས་ནི་སྟོང་པར་འདོད། །བག་མེད་ལས་ནི་འདོད་ཆགས་སྐྱེ། །འདོད་ཆགས་ཀྱིས་ནི་ཞེ་སྡང་སྒྲུབ། །དང་པོ་སྐྱོན་དེ་དང་ལྡན་པས། །དམྱལ་བའི་རྗེས་སུ་ཉེ་བར་རྒྱུག །འདས་པའི་བདེ་བ་གང་ཡིན་དེར། །དེ་ལ་ཁྱོད་ནི་ཀུན་འཇུག་མིན། །མ་འོངས་པ་ཡི་བདེ་གང་ཡང་། །དེས་ནི་ད་ལྟར་བདེ་བ་མིན། །དུས་གཅིག་ལ་ནི་བག་མེད་གང་། །ཀུན་རྨོངས་ལོངས་སྤྱོད་ལ་འཆུམས་པ། །རང་གི་ལས་ཀྱིས་བསླུས་པ་ཡིས། །ལྷ་དེ་དམྱལ་བར་འགྲོ་བ་ཡིན། །སྲེད་པས་དུས་གསུམ་སླུ་བྱེད་ཅིང་། །རྟག་ཏུ་འཐུན་པར་མི་བྱེད་པས། །བློ་ལྡན་དེ་ལ་ཡིད་མ་རྟོན། །དེ་ནི་འཁོར་བའི་འཆིང་བ་ཡིན། །དགྲ་ནི་གཉེན་བཞིན་བྱིས་པས་མཐོང་། །དགྲ་བཞིན་དུ་ཡང་གཅོད་པར་བྱེད། །ཤེས་ལྡན་དེ་ལ་ཡིད་མ་བརྟན། །དེ་ནི་འཇིག་རྟེན་འཆིང་བ་ཡིན། །ལྕགས་དང་ཤིང་གི་འཆིང་བ་ནི། །གཅད་པར་ནུས་པ་དེ་བཞིན་དུ། །རྟག་ཏུ་འདོད་པ་ལ་ཞེན་པའི། །སྲེད་པའི་འཆིང་བ་གཅད་མི་ནུས། །བདེ་བ་ཟད་མེད་འདོད་པ་གང་། །གང་ཞིག་འཆིང་བ་གཞིག་འདོད་འདི། །དེ་ནི་སྲེད་པའི་ཡུལ་ལས་གྲོལ། །ཤེས་རབ་ཡུལ་དུ་འགྲོ་བ་ཡིན། །ཡེ་ཤེས་སྣང་བ་བདེ་བའི་འོད། །སྡུག་བསྔལ་སྲེད་པའི་མུན་པར་བརྗོད། །དེ་ཕྱིར་སྣང་བ་ལ་གནོས་ལ། །མཁས་པས་མུན་པ་རྗེས་སུ་སོལ། །ཤེས་རབ་མཚོན་ཆ་རྣོན་པོ་ཡིས། །སྲེད་པའི་ཤིང་གཅོད་དེ་བཞིན་དུ། །རྩད་ནས་ཤིང་གཅོད་སྐྱེས་བུས་ནི། །བདེ་བ་བླ་ན་མེད་པ་འཐོབ། །རྟག་ཏུ་འབབ་ཆུའི་ཀླུང་གང་བའི། །སྐྱོན་གྱི་ནགས་ནི་གཅད་པར་གྱིས། །སྐྱོན་གྱི་ནགས་དེ་བཅད་པ་ལས། །མཁས་པས་སྲིད་པ་ལས་གྲོལ་འགྱུར། །སྲེད་པའི་ཆུ་བོ་ལམ་གསུམ་འགྲོ། །བག་མེད་སྤྱོད་པས་རྒལ་བར་དཀའ། །ཤེས་རབ་གྲུ་ལ་བརྟེན་ནས་ཀུན།

71-13a

སྐྱོན་གྱི་ཕ་རོལ་འགྲོ་བར་འགྱུར། །ཤེས་རབ་རི་ཡི་རྩེར་སོང་ནས། །ཚུལ་ཁྲིམས་ཕུག་ནི་མཛེས་པ་ལས། །སྲིད་པའི་སྐྱོན་ནི་འདི་དག་ཀུན། །གཞལ་དུ་མེད་པའི་མིག་གིས་མཐོང་། །སྐྱེས་བུ་ཆོས་སྤངས་པ་དེ་ནི། །ཕྱི་དང་ནང་ཡང་སྟོང་པ་ཡིན། །གང་དག་ཆོས་ནི་མི་འདོད་པ། །དབུ་བ་བཞིན་དུ་སྙིང་པོ་མེད། །ཕྱི་དང་ནང་ཡང་སྙིང་པོ་དེ། །སྐྱེས་བུ་རྡོ་རྗེ་ལྟར་བརྟན་པ། །གང་དག་ཞི་བའི་ཆོས་སྤྱོད་པ། །སེམས་ཅན་གཞན་ལ་ཕན་པ་ཡིན། །བག་མེད་འདམ་དུ་བྱིང་བ་ཡི། །མི་གང་ཡུལ་ལ་སྤྱོད་པ་ནི། །རྨོངས་པ་དེ་ནི་སྲིན་བུས་ཟོས། །བདེ་བ་མཆོག་གི་སྐལ་ལྡན་མིན། །དེ་ཕྱིར་བདེ་དོན་གཉེར་སྐྱེས་བུས། །བག་མེད་རྗེས་སུ་བསྟེན་མི་བྱ། །བག་མེད་འཇིགས་པ་དང་བྲལ་བར། །གནས་པའི་བདེ་བ་དཔག་ཏུ་མེད། །དཔྱོད་པ་པོས་ནི་བག་མེད་ལ། །རྗེས་སུ་ཡིད་བརྟན་མ་བྱེད་ཅིག །དེས་བལྟས་པ་ཡི་མི་རྣམས་ནི། །འགྲོ་བ་ལྔར་ནི་འཁོར་བ་ཡིན། །དེ་ལྟར་དེ་དག་གིས་ལྷ་དེ་དག་རྣམས་ལ་རྗེས་སུ་གདམས་པར་བྱེད་པའི་ཚིགས་སུ་བཅད་པ་རྣམས་ཀྱིས་རྗེས་སུ་འདོམས་པར་བྱེད་དོ། །དེ་ལྟར་རྟོགས་པར་བྱེད་པར་གྱུར་ན་ཡང་ཀུན་ཏུ་རིག་པ་ཡང་མ་ཡིན་ཏེ། དེ་དག་འདོད་པའི་བདེ་བ་རྣམས་ཀྱིས་ཀུན་ཏུ་མི་རྟོགས་སོ། །དེ་དག་རྣམས་ཀྱིས་དེ་དག་རྣམས་ལ་བརྩི་བགྲངས་མ་བྱས་པས་ཕྱིར་ཡང་དེ་ཁོ་ན་ལྟར་གར་བྱེད་པར་གྱུར་ཅིང་འདོད་པའི་དགའ་བ་རྣམས་ལ་རྣམ་པར་ཆགས་པར་གྱུར་ཏོ། །དེ་ནས་བློ་རྟག་ཏུ་མཉམ་པར་བཞག་པ་སེམས་ཅན་རྣམས་ཐམས་ཅད་ལ་གཅིག་ཏུ་ཕན་པ་བྱེད་པ། གཅིག་པུ་ལ་བློ་མཉམ་པར་བཞག་པའི་བྱང་ཆུབ་སེམས་དཔའ་དུས་བཟངས་དེ་ངང་པ་དེ་དག་གི་ནང་དུ་སོང་བར་གྱུར་ཏོ། །དེ་གལ་ཏེ་ན་སྐལ་བ་འཐུན་པར་གྱུར་པ་ཉིད་ཀྱི་ཕྱིར་བྱ་དེ་དག་གི་དབུས་སུ་དགའ་བར་བྱེད་དོ། །གལ་ཏེ་ན་ཕུག་བཟང་པོ་དེར་རང་ཉིད་གཅིག་པུ་ཞིག་བློ་ལེགས་པར་མཉམ་པར་བཞག་པས་ཆོས་སེམས་པར་བྱེད་དོ། །དེ་ལྟར་བྱའི་རྒྱལ་པོ་དུས་བཟངས་འདི་རྩེ་དགའ་བར་བྱེད་པ་ཉིད་དང་ལྷན་ཅིག་རྗེས་སུ་སྤྱོད་པའི་ངང་པ་གཞན་རྣམས་ཆོས་ཀྱི་གཏམ་རྣམས་ཀྱང་བྱེད་དོ། །བྱའི་ཚོགས་དེ་དག་

71-13b

རྣམས་ཀྱི་ནང་དུ་འོངས་པར་གྱུར་པའི་ལྷ་དེ་དག་རྣམས་རབ་ཏུ་དགའ་བའི་ཡིད་ཀྱིས་ཕན་ཚུན་གྲོགས་སུ་གྱུར་པས་དགའ་བར་བྱ་འདོད་ནས་འོངས་པ་རྣམས་ཀྱིས་མཚོ་དེ་མངོན་པར་མཐོང་བར་གྱུར་པ་ན་ཐམས་ཅད་ལས་ཀྱང་མངོན་པར་དགའ་བར་གྱུར་པ་མཆོག་ཏུ་ཡང་མིག་དང་ཡིད་འཕྲོག་པར་བྱེད་པ་ཀུན་ནས་འཕེལ་བར་བྱེད་པའི་ལྗོན་ཤིང་དང་འབྲས་བུ་རྣམས་ཀྱིས་ཉེ་བར་མཛེས་པར་གྱུར་པ་སྟེ། དེ་དག་རྣམས་མངོན་པར་མཐོང་ནས་ལྷ་དེ་དག་རབ་ཏུ་དགའ་བར་གྱུར་པའི་ཡིད་ཀྱིས་ཉེ་འཁོར་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་འཁོར་དང་བཅས་པས་ཡོངས་སུ་བཟུང་ཞིང་གར་དང་གླུ་དང་རྒོད་པ་དང་འགྱིང་བག་གི་བྱ་བ་རྣམས་བཅུ་འགྱུར་ལས་ཀྱང་ལྷག་པར་བྱེད་པར་རྩོམ་མོ། །དེ་ལྟར་མཚོ་དེ་ན་ལྷ་དེ་དག་རྣམས་དགའ་བར་བྱེད་ཅིང་རྩེ་བར་ཡང་བྱེད་དོ། །དེ་ནས་དེ་དག་རྣམས་ཀུན་ཏུ་མཐོང་ནས་བྱང་ཆུབ་སེམས་དཔའ་མཆོག་ཏུ་ཡོངས་སུ་སྨིན་པའི་བློ་དང་ལྡན་པ་དེས་ཚིགས་སུ་བཅད་པ་འདི་དག་འཆད་པར་བྱེད་པ། ཇི་ལྟར། བག་མེད་པ་ནི་བག་ཡོད་པས། །གང་ཚེ་མཁས་པས་སྤང་བར་གྱིས། །ཤེས་རབ་ཁང་བཟངས་རྩེར་བྱུང་བ། །བདེ་ལེགས་ཐོབ་པ་བླ་ན་མེད། །གང་ཞིག་བག་མེད་རྣམས་སྤོང་བའི། །ལམ་འདི་དག་ནི་ཞི་བ་མཆོག །ལམ་འདི་ཡིས་ནི་མྱ་ངན་འདས། །ཆེན་པོར་མཁས་པར་འགྲོ་བ་ཡིན། །ལམ་གྱི་གེགས་ནི་མི་བཟད་པ། །སེམས་རྒྱུད་སུན་འབྱིན་བྱེད་པ་པོ། །ཆོས་ཀྱི་ཟམ་རྣམས་གཅོད་པ་ནི། །བག་མེད་པར་ནི་ཡོངས་སུ་བསྒྲགས། །དྲན་པ་སུན་འབྱིན་མ་བགྲུངས་པ། །ཐར་པའི་ལམ་ནི་འཇིག་པ་པོ། །ཕ་རོལ་ངན་སོང་རྣམས་སུ་ཁྲིད། །བག་མེད་པས་ནི་ཀུན་ཏུ་འཇུག །འདི་ཡིས་ཡིད་དཀྲུགས་པ་ཡིས་ནི། །བདག་གིས་ཕན་པ་མི་ཤེས་སོ། །ཤི་བ་ཡི་ནི་རོ་བཞིན་དུ། །ཚིག་མིན་དོན་ཡང་རིག་པ་མིན། །དེ་ཕྱིར་འདི་ནི་ཕྱུགས་མཚུངས་པའི། །ལྷ་ཡི་ལུས་ནི་འཛིན་པ་ཡིན། །བག་མེད་པས་ནི་ཉེར་བཅོམ་པའི། །རྨོངས་པ་གར་དང་རྒོད་པ་ཡང་། །སྐྱེ་དང་འཆི་འཕོ་བ་གཞན་གྱིས། །འཇིག་འགྱུར་བ་དང་དངངས་པར་བྱེད། །གང་ཞིག་བག་མེད་རྗེས་སུ་རྒྱུག །སྲིད་

71-14a

གསུམ་འབྱུང་པོ་ཐམས་ཅད་རྣམས། །སྐྱོན་རྣམས་ཐམས་ཅད་སྐྱེད་བྱེད་པ། །འཆིང་དང་སྡིག་པའི་ལས་རྣམས་དང་། །ཆོས་ཀུན་དྲན་པ་ཉམས་བྱེད་པར། །བག་མེད་དགྲ་ནི་རབ་ཏུ་འཇུག །ནང་གི་བདག་ཉིད་ལས་རྣམས་དང་། །ཕྱི་རོལ་ཇི་ལྟར་ཡང་མིན་ཏེ། །བག་མེད་ཉེར་བཅོམ་སྐྱེ་བོ་རྣམས། །ཆུད་ཟོས་ཡིད་ནི་སྐྱེད་པར་བྱེད། །གང་ཡང་འདི་ནི་སུས་འདོན་ལས། །དེ་ནི་བག་མེད་པས་འགོགས་སོ། །ཁྲིམས་བྲལ་ངོ་ཚ་མེད་པ་ཡི། །མིག་ནི་བག་མེད་པས་ཉེར་བཅོམ། །རྩེད་མོ་ཡིས་ནི་ཡིད་བྲེལ་བས། །གར་རོལ་གླུ་སྙན་པ་ཡིས་གཡེངས། །ལྷ་རྫས་ཡུལ་གྱིས་ངོམས་པ་མེད། །མཐོ་རིས་གནས་ནས་ཉམས་པར་འགྱུར། །འཇིགས་པའི་གནས་ལ་དགའ་བ་དེ། །བག་མེད་པས་ནི་རྣམ་རྨོངས་སོ། །ལམ་ལ་ལམ་དུ་མི་རིག་པའི། །མི་ནི་དམུས་ལོང་དང་མཚུངས་སོ། །དེ་ལྟར་གཞན་ལ་ཕན་པ་བྱེད་པའི་དུས་བཟངས་དེས་ལྷ་དེ་དག་རྣམས་མངོན་པར་མཐོང་ནས། ཀུན་ནས་བརྗོད་པ་དང་ལྡན་པའི་བྱ་དེ་དག་རྣམས་ཀྱི་དབུས་སུ་སོང་ཞིང་མཆོག་ཏུ་མིག་དང་ཡིད་འཕྲོག་པར་བྱེད་པའི་ངང་པ་དེ་དག་རྣམས་ཀྱི་ནང་དུ་ཕྱིན་པར་གྱུར་ནས་ཀྱང་རྗེས་སུ་འདོམས་པར་བྱེད་པའི་ཚིགས་སུ་བཅད་པ་འདི་རྣམས་ཇི་ལྟ་བར་བརྗོད་ཀྱང་འགགས་པའི་ཡིད་བཞིན་དུ་ལྷ་དེ་དག་རྣམས་ཀྱིས་ཐོས་པར་ཡང་མི་འགྱུར་རོ། །དེ་ལྟར་བརྩི་བགྲང་ཡང་མི་བྱེད་པར་གར་དང་རྒོད་པ་དང་བཅས་ནས་རྔ་སྐད་ཡན་ལག་ལྔ་དང་ལྡན་པ་མཚུངས་པ་དང་སྙན་པ་དང་ཐམས་ཅད་ཀྱི་སེམས་དང་ཡིད་འཕྲོག་པར་བྱེད་པ་རྣམས་ཀྱིས་ཀུན་ནས་འཁྲིད་པར་འགྱུར་ཏེ། ཡུལ་གཞན་ལྔ་པོ་རྣམས་ལ་ཡང་ཡིད་ཤིན་ཏུ་རྣམ་པར་ཆགས་པའི་ཕྱིར་ན་ཐོས་པར་མི་འགྱུར་རོ། །དེ་ལྟར་ཡང་མཚོ་དེ་ཀུན་ཏུ་བསྐོར་ནས་གནས་པར་བྱེད་དོ། །དེ་ཁོ་ན་བཞིན་དུ་ཡུལ་རྣམས་ལ་རྣམ་པར་ཆགས་པའི་ཡིད་ཅན་རྣམས་བག་མེད་པས་བག་མེད་པར་གནས་པའི་འཐབ་བྲལ་བའི་ལྷ་རྣམས་ལ་ཆོས་སྟོན་པར་བྱེད་པ་ནི་དགེ་བ་ཆེན་པོ་རྣམས་དང་ལྡན་པའི་སེམས་ཅན་གསུམ་པོ་འདི་དག་རྣམས་ཡིན་པས་ན། འདི་ལྟ་སྟེ། མུ་སུ་ལུན་དྷ་དེ་དང་ངང་པའི་རྒྱལ་པོ་དུས་བཟངས་དང་རྨ་བྱའི་རྒྱལ་པོ་

71-14b

རྣམ་པར་བཀྲ་བ་གསུམ་པོ་དེ་དག་རྣམས་ནི་གཞན་རྗེས་སུ་འཛིན་པ་ལ་རབ་ཏུ་ཞུགས་པས་ཆོས་སྟོན་པར་བྱེད་པ་ཡིན་ཏེ། ཁ་ཅིག་ནི་རང་སངས་རྒྱས་ཀྱི་བྱང་ཆུབ་ལ། ཁ་ཅིག་ནི་ཉན་ཐོས་ཀྱི་བྱང་ཆུབ་ལ་རབ་ཏུ་འགོད་པར་བྱེད་པ་ཡིན་ནོ། །དེ་ལྟར་ངེས་པར་གནས་པ་རྣམས་ནི་དེ་དག་དགེ་ལེགས་དང་ལྡན་པ་རྣམས་ཡིན་ཏེ། བདུད་ཀྱི་ཡུལ་ལས་བྲོས་པར་འདོད་པ་རྣམས་ཡིན་ནོ། །དེ་ནས་བདུད་སྡིག་ཅན་དེ་ཉིད་འདི་སྙམ་དུ་སེམས་ཏེ། ཇི་ལྟར་བདག་གནས་པའི་ཡུལ་སྟོངས་པར་བྱེད་པ་རྣམས་ནི་མིའི་འཇིག་རྟེན་ན་དགེ་སྦྱོང་གིས་སོ། །རྒྱལ་ཆེན་རིས་བཞི་ནི་རྒྱལ་པོ་ཆེན་པོ་བཞི་ཡིན་ནོ། །སུམ་ཅུ་རྩ་གསུམ་ན་ནི་ཀཽ་ཤི་ཀ་ཡིན་ནོ། །མཚེ་མ་ན་ནི་མུ་སུ་ལུན་དྷ་དང་དུས་བཟངས་དང་རྣམ་པར་བཀྲ་བ་རྣམས་ཡིན་ནོ། །དགའ་ལྡན་ན་ནི་རབ་ཏུ་ཞི་བ་ཡིན་ནོ། །ལྷན་ཅིག་སྤྱོད་པའི་འཁོར་དེ་དག་རྣམས་གང་ཡིན་པ་ཐམས་ཅད་ཀྱིས་ཀྱང་ཐོས་པར་མི་འགྱུར་བ་ཡུལ་རྣམས་དང་བདག་གི་ལྷ་དང་མི་རྣམས་ཀྱང་གཏི་མུག་གིས་རྨོངས་པར་བྱའོ། །འཕྲུལ་དགའ་བ་ཞེས་བྱ་བ་གང་ཡིན་པ་རྣམས་ནི་མ་གཏོགས་པ་རྣམས་ཀྱིས་མི་ཐོས་པར་བྱའོ། །བདག་གི་ས་པའི་ཤིན་ཏུ་སྟོབས་དང་ལྡན་པ་དེས་ཀྱང་བདག་གིས་ཕྱིར་བཟློག་པའི་བཀོད་པ་བྱ་བ་ནུས་ཀྱིས། ཐ་མར་གྱུར་ན་ཡང་ངས་གང་ན་འཐབ་བྲལ་བའི་ལྷ་རྣམས་ཡོད་པ་དེར་ཤེས་རབ་དང་ཕ་རོལ་གནོན་པས་མཚུངས་པར་གྱུར་པའི་འཁོར་བཙལ་ལ་གཏང་བར་བྱའོ། །དེ་ནས་དེ་ལྟར་བདུད་སྡིག་ཅན་དེས་རིག་ནས་བློན་པོ་དང་ལྷན་ཅིག་ཏུ་བགྲོས་ནས། མུ་སུ་ལུན་དྷ་དེ་དང་དུས་བཟངས་དེ་དང་རྣམ་པར་བཀྲ་བ་དེ་དང་ཡང་བརྩད་པར་བྱ་བའི་དོན་དུ་ཕོ་ཉ་བཏང་བ་རྣམས་བློ་གྲོས་མཁས་པ་དང་སྤྲུལ་པ་ལ་མཁས་པ་དང་གཟི་བརྗིད་ཆེ་བ་རྣམས་འདི་ལྟ་སྟེ། དགའ་བ་དང་བག་མེད་པ་དང་རྣམ་པར་རྨོངས་པར་བྱེད་པ་རྣམས་སོ། །ཀྱེ་ཁྱེད་རྣམས་མཚེ་མའི་ལྷ་རྣམས་ཀྱི་ནང་དུ་སོང་ལ་མུ་སུ་ལུན་དྷ་དང་དུས་བཟངས་དང་རྣམ་པར་བཀྲ་བ་རྣམས་ཆོས་སྟོན་པའི་བར་ཆད་གྱིས་ཤིག །དེ་ནས་དེའི་ཚིག་ཐོས་པར་གྱུར་ནས་གང་ན་འཐབ་བྲལ་བའི་ལྷའི་རིགས་ཡོད་པ་དེར་ངེས་པར་བབས་པར་འགྱུར་རོ། །ཞུགས་པར་གྱུར་ནས་ཀྱང་གང་ན་

71-15a

བྱའི་རྒྱལ་པོ་དུས་བཟངས་ཡོད་པ་དེར་ཀུན་ནས་ཉེ་བར་སོང་ངོ་། །ཀུན་ནས་ཉེ་བར་འོངས་པ་ཡང་མཐོང་བར་གྱུར་ནས། ལྷ་དེ་དག་རྣམས་ལ་བརྟེན་པ་དང་རྣམ་པར་གསལ་བ་དང་རྒྱ་ཆེ་བར་གྱུར་པའི་རྗེས་སུ་བསྔགས་པར་བྱེད་པའི་ཚིགས་སུ་བཅད་པ་རྣམས་བཤད་པ། འདི་ལྟ་སྟེ། བག་མེད་པ་ཡི་དུས་འདི་མིན། །དགའ་བའི་དུས་ནི་ནམ་ཡང་མིན། །རྣམ་རྨོངས་སྐྱེད་པ་འདི་དག་ཀྱང་། །འཆི་བདག་སྟོབས་པོ་ཆེ་ཡི་དུས། །དགའ་བ་དུ་བ་བག་མེད་མེས། །ལྷ་རྣམས་ཀུན་ནི་སྲེག་པ་ཡིན། །ཡུལ་ལ་གཏི་མུག་གིས་རྨོངས་པ། །མིག་མེད་པས་ཀྱང་མ་རིག་གོ། །ལུས་ཅན་རྣམས་ཀྱི་འདུ་བྱེད་ནི། །རྣམ་པར་ཆད་པ་མེད་པར་མཐོང་། །དེ་ལྟར་ཡུལ་ལས་ཀུན་རྨོངས་པས། །གང་ཕན་པ་ནི་རྟོགས་པ་མིན། །དེ་ཡིས་དེའི་ཚིག་རྣམས་ཐོས་ནས་འཐབ་བྲལ་བའི་ལྷ་རྣམས་ཉིད་དང་འདྲ་བར་བྱས་ནས་བག་མེད་པས་སྨྲས་པ། ཀུན་དགའ་མཆོག་གི་མཐའ་ཡས་པ། །བག་མེད་དགའ་བ་སྐྱེད་བྱེད་པ། །བདེ་ཀུན་རབ་ཏུ་འཕེལ་བྱེད་པ། །དེ་ཁྱོད་ཅི་ཡི་ཕྱིར་མི་འཆད། །དུས་བཟངས་ཀྱིས་རབ་ཏུ་བརྗོད་པ། ཀུན་དགའ་བག་མེད་པ་འདིས་ནི། །བདེ་བ་ཐམས་ཅད་འཇོམས་པར་བྱེད། །བག་མེད་སྡུག་བསྔལ་སྐྱེད་པ་པོ། །དེ་ཕྱིར་རྟག་ཏུ་དེ་ཁྱོད་འཆད། །བག་མེད་པས་སྨྲས་པ། བདེ་བ་ཡི་ནི་ཡུལ་རྣམས་དང་། །བག་མེད་ལྷ་ཡི་བུ་མོ་དང་། །དེ་བཞིན་དུ་ནི་གླུ་རྣམས་ཀྱང་། །བག་མེད་བདེ་བ་ཡིན་པར་བཤད། །དུས་བཟངས་ཀྱིས་བརྗོད་པ། མི་རྣམས་ཡུལ་ནི་གང་སྐྱེས་པ། །སྡུག་བསྔལ་ཡུལ་ནི་སྐྱེས་པ་ཡིན། །དེ་ཡི་རྩ་བ་གཅོད་བྱེད་པ། །གང་གིས་མི་ནི་འོག་ཏུ་འགྲོ། །བག་མེད་པས་སྨྲས་པ། ནགས་དང་ཉེ་བའི་ནགས་དང་བྲག །ཁྲུས་ཀྱི་རྫིང་བུ་པད་མའི་ཚལ། །ཁང་བཟངས་རྩེ་དང་ཀུན་དགའ་ཚལ། །བདག་ནི་བག་མེད་པ་ཡིས་དུས། །དུས་བཟངས་ཀྱིས་སྨྲས་པ། དགོན་པ་དང་ནི་ཞི་བའི་ཚལ། །རི་དང་ནགས་ཀྱི་ནང་དུ་ཡང་། །བག་ཡོད་དགའ་བ་ཞི་བ་ཡིས། །བཅིངས་ལས་ཐར་པར་འགྲོ་བ་ཡིན། །སེམས་རྨོངས་པ་ཡི་མི་གང་དག །བག་མེད་པས་ནི་དམྱལ་བར་འགྲོ། །དེ་བཞིན་དུ་ནི་

71-15b

དུད་འགྲོར་ཡང་། །ཡི་དགས་སུ་ཡང་སྐྱེ་འགྱུར་ཏེ། །དེ་ལྟར་དུས་བཟངས་ཀྱིས་བརྗོད་པ་ཡིན་ཏེ། བདུད་ཀྱི་ཕྱོགས་ཀྱི་བག་མེད་པ་དང་དྲི་བ་དང་ཕྱིར་ལན་འདེབས་པ་རྣམས་བརྗོད་ནས། ཇི་སྲིད་དུ་རིན་པོ་ཆེའི་འོད་ཀྱིས་ཉེ་བར་གསལ་བའི་ཕུག་གང་ཡིན་པ་དེའི་ནང་དུ་ཞུགས་པའི་བར་དུ་སྟེ། དེ་ནི་ཡང་ཕལ་ཆེར་ནི་མུ་སུ་ལུན་དྷ་དེ་བག་མེད་པ་སྤང་བར་བྱ་བསྒོམ་པར་བྱེད་དོ། །གང་ཡང་ལྷ་གཞན་དག་དེའི་ལྷན་ཅིག་སྤྱོད་པར་གྱུར་པ་དེ་དག་རྣམས་ནི་རྒྱུ་མཚན་དེ་དག་གིས་ལྷ་ཉིད་ཀྱང་བརྒྱ་སྟོང་ཕྲག་དུ་མ་རྣམས་ཀྱིས་ཡོངས་སུ་བསྐོར་ཅིང་གར་དང་གླུ་དང་རོལ་མོ་རྣམས་ཀྱི་སྒྲ་དང་ལྡན་པས་ནམ་མཁའི་དཀྱིལ་མ་ལུས་པ་རྣམས་ཀུན་ཏུ་གང་བར་གྱུར་པས་མཚོ་ཆེན་པོ་དེར་འོངས་པར་གྱུར་ཏོ། །གང་ཡང་ལྷ་གཞན་དག་རྣམས་ནི་དེ་དག་གི་རྗེས་སུ་འགྲོ་བར་གྱུར་ནས་དེ་དག་རྣམས་དེ་ན་བག་མེད་པ་བྱེད་དོ། །གང་ཡང་སེམས་མཉམ་པར་བཞག་པ་དེ་དག་རྣམས་ཀྱང་ཤིན་ཏུ་མྱུར་བར་འོང་བར་གྱུར་ཏེ། ཇི་སྲིད་དུ་བྱའི་རྒྱལ་པོ་དུས་བཟངས་དང་བདུད་ཀྱི་ཕྱོགས་ཀྱི་བག་མེད་པ་དག་དྲི་བ་དང་ལན་བྱས་ཟིན་པར་མ་གྱུར་གྱི་བར་དུའོ། །དེ་ནས་མུ་སུ་ལུན་དྷ་དེས་དེ་དག་རྣམས་ཐམས་ཅད་དུས་བཟངས་ལས་ཐོས་པར་གྱུར་ཏེ་སྔ་མ་བཞིན་ནོ། །དེ་ནས་མུ་སུ་ལུན་དྷ་དེའི་ཡིད་ཀྱིས་རིག་པར་གྱུར་ནས་བག་མེད་པ་ལ་འདི་སྐད་བརྗོད་དོ། །ཁྱོད་ནི་གདོན་མི་ཟ་བར་བདུད་སྡིག་ཏོ་ཅན་གྱི་ཕྱོགས་སུ་གྱུར་པའི་བག་མེད་པ་འདི་ཡིན་ཏེ་འོང་གིས་དེའི་ཡང་ཕྱོགས་བྱེད་པའི་འཁོར་གསུམ་ཡིན་པར་བདག་ཅག་གིས་ལྷ་གཞན་དག་གི་དྲུང་ནས་ཐོས་སོ། །འདི་ལྟ་སྟེ་བག་མེད་པ་དང་རྒོད་པ་དང་རྣམ་པར་རྨོངས་པའོ། །འཇིག་རྟེན་རྨོངས་པ་རྣམས་ཕྱིར་ཞིང་ཉིད་དུ་ཆེས་ལྷག་པར་རྨོངས་པར་བྱེད་དོ། །གང་ཆུངས་ཀྱང་བདག་གིས་འདི་དག་དང་རྒོད་པ་དང་མ་བསྡམས་པ་ལ་སོགས་པ་རྣམས་ཀྱི་ལན་དྲི་བ་དང་ཕྱིར་ཞིང་དྲི་བ་དང་ལན་གྱི་ཆོས་ཀྱི་རྣམ་གྲངས་ཆེན་པོ་བཅུ་གཅིག་པ་ཞེས་བྱ་བ་ཆོས་དང་ལྡན་པས་བརྩད་པར་བྱའོ། །དེ་ནས་འཐབ་བྲལ་བ་རྣམས་ཀྱི་མངའ་བདག་གིས་དེ་ལྟར་རིག་ནས་དུས་བཟངས་དེ་དང་ཡང་ལྷན་ཅིག་ཏུ་འགྲོ་བར་བྱས་པར་གྱུར་ཏེ། ནམ་མཁའི་དཀྱིལ་དུ་འཕགས་ནས་

71-16a

པད་མའི་སྙིང་པོ་ལ་ཉེ་བར་གནས་ཏེ་བག་མེད་པ་ལ་མངོན་པར་དགའ་བའི་ལྷ་བརྒྱ་ཕྲག་མང་པོ་རྣམས་ཀྱིས་ཡོངས་སུ་བསྐོར་ནས་འདི་སྐད་ཅེས་བརྗོད་དོ། །དྲི་བ་དང་ཕྱིར་ཞིང་དྲི་བ་དང་ལན་ཞེས་བྱ་བའི་ཆོས་ཀྱི་རྣམ་གྲངས་བཅུ་གཅིག་པ་ཞེས་བྱ་བའི་ཆོས་བཤད་པར་བྱ་ཡིས་མཉན་པར་གྱིས་ཤིག །བག་མེད་པ་གང་བཅོམ་ལྡན་འདས་འོད་སྲུང་གིས་གསུངས་པ་རྣམས་བག་ཡོད་པ་ལ་མངོན་པར་དགའ་བ་བཀྲ་ཤིས་ཞེས་བྱ་བའི་སྔོན་གྱི་ལྷ་ལ་བདག་གིས་ཐོས་པའི་ཆོས་ཀྱི་རྣམ་གྲངས་གང་ཡིན་པ་དེ་ལེགས་པར་རབ་ཏུ་ཡིད་ལ་བྱས་ཏེ་ཉོན་ཅིག །ལྷ་རྣམས་ཐམས་ཅད་དང་དུས་བཟངས་ཐོག་མར་གྱུར་པའི་ཀུན་ནས་བརྗོད་པ་དང་ལྡན་པའི་བྱ་རྣམས་ཐམས་ཅད་དང་བག་མེད་པར་ཉན་ནོ། །བདུད་ཀྱི་ཕྱོགས་རྣམས་ཀྱང་ཉན་ཏེ། ཕྱིན་ཅི་ལོག་ཏུ་སྨྲ་བ་འཇིག་རྟེན་པ་རྣམས་ལ་ཕན་པ་མ་ཡིན་པ་བྱེད་པ་བདུད་ཀྱི་ཕྱོགས་རྣམས་ཀུན་ཏུ་གནས་སོ། །དྲི་བ་དང་ཕྱིར་ཞིང་དྲི་བ་དང་ལན་གྱི་ཆོས་ཀྱི་རྣམ་གྲངས་བཅུ་གཅིག་པ་དེ་དག་རྣམས་ཀྱང་གང་ཞེ་ན་འདི་ལྟ་སྟེ། ཆོས་བཅུ་གཅིག་པོ་འདི་དག་རྣམས་ནི་ཆོས་བཅུ་གཅིག་གིས་རབ་ཏུ་སྤང་བར་བྱ་སྟེ། ཡང་དག་པ་ཇི་ལྟ་བ་བཞིན་དུ་འདོད་པ་དང་མྱ་ངན་ལས་འདའ་བར་འགྲོ་བར་བྱེད་པ་དང་། བདུད་ཀྱི་ཡུལ་རྣམས་ལ་གནས་པར་མི་འདོད་པ་དང་། འཁོར་བའི་འཆིང་བ་རྣམས་ཀྱི་འཇིགས་པས་དང་། དགོན་པ་ཞི་བ་རྣམས་སུ་གནས་པས་དང་། གཅིག་ཏུ་དགའ་བ་རྣམས་ཀྱིས་དང་། ཡང་དག་པ་ཇི་ལྟ་བ་ལ་རེ་བར་གྱུར་པ་དང་། གཏི་མུག་གཞོམ་པར་འདོད་པ་དེ་དག་རྣམས་ཀྱིས་ཡིན་ནོ། །བཅུ་གཅིག་པོ་རྣམས་ཀྱིས་རབ་ཏུ་སྤོང་བར་བྱེད་པ་དང་། ཆོས་བཅུ་གཅིག་པོ་དེ་དག་རྣམས་གང་ཡིན་པ་ཡང་གང་དག་ཞེ་ན། འདི་ལྟ་སྟེ་རྒོད་པ་ནི་འདུལ་བས་སོ། །མ་བསྡམས་པ་ནི་སེམས་རྩེ་གཅིག་པས་སོ། །ཚུལ་ཁྲིམས་འཆལ་པ་ནི་སྐྱེས་བུ་དམ་པ་ལ་རྟེན་པས་སོ། །ལེ་ལོ་ནི་བརྩོན་འགྲུས་བརྩམས་པས་སོ། །གྲོང་དང་གྲོང་ཁྱེར་རྣམས་སུ་རབ་ཏུ་འཇུག་པའི་སྤྱོད་པ་ལ་དགའ་བ་ནི་གཅིག་པུ་དགོན་པར་གནས་པས་སོ། །འདོད་ཆེན་པོ་ནི་ཆོག་ཤེས་པས་སོ། །གཉེན་འདུན་ལྟ་བ་ལ་མངོན་པར་དགའ་བ་རྣམས་ནི་འགྲོན་པོར་ཡུན་རིང་

71-16b

དུ་གནས་པ་ལ་མངོན་པར་དགའ་བས་སོ། །དོན་མེད་པར་སྨྲ་བ་ནི་ངག་ཡང་དག་པར་བསྡམས་པས་སོ། །རྩབ་ཧྲལ་ཉིད་ནི་བརྟན་པས་སོ། །དབུལ་པོ་རྣམས་ཀྱང་སྦྱིན་པས་སོ། །མི་ཤེས་པ་ནི་ཤེས་པས་སོ། །ཆོས་བཅུ་གཅིག་པོ་དེ་དག་རྣམས་ནི་ཀུན་ནས་ཉོན་མོངས་པ་རྣམས་ཀྱི་དྲི་མ་དང་ཀུན་ནས་ཉོན་མོངས་པ་ཅན་གྱི་འཆིང་བར་གྱུར་པ་བག་མེད་པར་གྱུར་པའི་ལྗོན་ཤིང་རྣམས་ཀྱི་ཡལ་ག་རྒྱས་པར་གྱུར་པ་ཡིན་པས་བདུད་ཀྱི་ཡུལ་ལས་འདའ་བར་འདོད་པ་རྣམས་དང་འཁོར་བའི་འཇིགས་པས་སྐྲག་པ་རྣམས་དང་བག་མེད་པ་ཕམ་པར་བྱ་འདོད་པ་རྣམས་ཀྱིས་སྤང་བར་བྱའོ། །འཁོར་བ་རྣམས་ཐམས་ཅད་ནི་བག་མེད་པའི་རྩ་བ་ལས་ཡིན་ནོ། །བག་ཡོད་པའི་རྩ་བ་ལས་ནི་ཐར་པ་ཡིན་ནོ། །འཁོར་བ་ལས་འབྲོས་པར་འདོད་པ་རྣམས་ཐམས་ཅད་ལ་འདི་ཉིད་བཅོམ་ལྡན་འདས་ཀྱིས་གསུངས་པ་ཡིན་ནོ། །དེ་ལ་འདུལ་བ་ལ་མངོན་པར་དགའ་བ་རྣམས་དང་། འདུལ་བ་འདོད་པ་རྣམས་དང་། སེམས་ཅན་རྣམས་ཐམས་ཅད་སྡུག་པ་དང་འཐུན་པ་དང་ཡིད་དུ་འོང་བར་གྱུར་པ་དེ་དག་རྣམས་ཐམས་ཅད་ཀྱིས་ཀྱང་ཞེ་ལྡོག་པར་ལྟ་བའི་ཆོས་རྒོད་པ་ཞེས་བྱ་བ་གང་དག་ཞེ་ན། འདུལ་བ་ལ་མངོན་པར་དགའ་བ་དེ་དག་དང་དེ་དག་རྣམས་ཀྱིས་ཀྱང་སྡིག་པའི་ཆོས་འདི་དག་རབ་ཏུ་སྤང་བར་བྱའོ། །དེ་ལ་རྒོད་པ་ཡང་རྣམ་པ་ལྔ་ཡིན་ནོ། །འདི་ལྟ་སྟེ་གྲོང་དང་གྲོང་ཁྱེར་དུ་འཇུག་པ་རྣམས་ལ་མགྱོགས་པར་ལམ་དུ་འགྲོ་བ་དང་། འགྲོ་བར་བྱེད་པ་ན་ཡང་ཀུན་ནས་མ་བསྡམས་པ་དང་། ཁ་ཅིག་ནི་ལམ་དུ་འགྲོ་བ་ན་གོས་ཚགས་ལྷོད་པ་དང་། ཁ་ཅིག་ནི་ལམ་ན་གོས་རྣམ་པར་འཕྱར་བར་བྱེད་པ་དང་། འཁྲུལ་པ་ཡང་དང་ཡང་དུ་འབྱུང་བའམ་སེམས་མཉམ་པར་མ་བཞག་པའོ། །རྣམ་པ་དེ་ལྟ་བུ་དེ་དག་རྣམས་གཞན་གྱིས་མཐོང་བར་གྱུར་ན། དེ་མ་ཐག་ཏུ་རྣམ་པར་སྡང་བར་འགྱུར་རོ། །དེ་ལྟར་འགྲོ་བར་བྱེད་པ་རྣམས་ཀྱི་ཀུན་ནས་མ་བསྡམས་པའི་འགྲོས་འདི་ཡང་གང་ལས་ཡིན་ན། ཆུང་དུ་ན་འདི་ནི་རྒྱགས་པའམ་ཡིད་ལ་བྱེད་པ་དང་བྲལ་བ་ཡིན་ཏེ། །དེ་བཞིན་དུ་རྒོད་པ་རྣམས་ནི་རྣམ་པ་དུ་མ་ལས་ཡིན་ནོ། །དེ་དག་རྣམས་ཀྱང་ཀུན་ནས་བསྡམས་པའི་

71-17a

སྤྱོད་ལམ་གྱི་འགྲོས་ཀྱིས་དང་། གཉའ་ཤིང་གང་ཙམ་དུ་ལྟ་ཞིང་འགྲོ་བ་དང་། གོས་རྣམས་ཀྱི་ཚགས་བསྡམས་པ་དང་། མི་འཕྱར་བས་ཀྱང་སྟེ་པུས་མོ་ལས་སོར་བཞི་ཙམ་གྱིས་ལྷག་པར་བླ་གོས་རིང་བ་ཡིན་པ་དང་། དཔུང་པ་གཉིས་མི་བསྐྱོད་པས་ལྷའི་འཇིག་རྟེན་གྱི་བག་མེད་པ་རྣམས་ནི་བག་ཡོད་པས་འཇོམས་པར་འགྱུར་རོ། །དགེ་སློང་ངམ་དེ་ལྟ་བུའི་རིགས་ཅན་རྣམས་ཀྱིས་རབ་ཏུ་གཞོམ་པར་བྱ་བའི་བག་མེད་པ་བཞི་ལས་གཞན་ལྷག་པར་གྱུར་པ་ཡང་གང་ཞེ་ན། གང་ཅུང་ཟད་ཅིག་སྨྲ་བར་གྱུར་པ་ན་ཡང་ལེགས་པར་མ་བརྟགས་པར་བྱེད་པ་ཡིན་ནོ། །གང་གི་ཚོད་ཀར་གྱུར་པ་དེའི་ཚོད་ཀ་རྣམས་ཀྱང་ཀུན་ནས་རིག་པར་མི་འགྱུར་རོ། །དེ་སྦྱིན་པ་པོ་དང་སྦྱིན་བདག་གི་ཁྱིམ་དུ་སྒྲས་ལེགས་པར་འཇུག་པར་བྱེད་པ་རྣམས་ནི་སྡོམ་པར་བྱེད་པ་ཡིན་ཏེ། སེ་གོལ་གྱི་སྒྲ་མ་བྱས་པར་འཇུག་པར་བྱེད་པ་ཡིན་ནོ། །སྟན་ཡང་ངན་པར་འཛིན་པར་བྱེད་དོ། །བསྡམས་པ་མེད་པ་དུ་མ་རྣམས་སྨྲ་བ་ཡིན་གྱི། སྨྲ་བ་དང་མི་སྨྲ་བ་རྣམས་ཀྱི་ཚོད་རིག་པར་འགྱུར་བ་ནི་མ་ཡིན་ནོ། །འདུག་པ་ཉིད་ན་སྐད་འཕང་མཐོན་པོས་སྨྲ་བར་འགྱུར་བ་ཡིན་ནོ། །བུད་མེད་རྣམས་ལ་རྟོག་དཔྱོད་འཇུག་པར་བྱེད་དོ། །བབ་ཆོལ་དུ་རྒོད་པར་བྱེད་དོ། །བབ་ཆོལ་དུ་ཁྲོ་བར་བྱེད་དོ། །འཁོར་རྣམས་ལ་ཡང་སྔ་ཕྱིར་ལྟ་བར་མི་བྱེད་དོ། །དེ་ལྟར་རྒོད་བག་ཏུ་སྤྱོད་པ་ཀུན་ནས་མ་བསྡམས་པར་འཇུག་པར་བྱེད་པའི་དགེ་སློང་རྣམས་ནི་མི་སྡུག་པ་དང་། ཡིད་དུ་མི་འོང་བར་འགྱུར་ཞིང་འདི་དག་རྣམས་ལས་གཞན་པ་རབ་ཏུ་ཞི་བའི་ཆ་བྱད་དང་། སྤྱོད་ཚུལ་ཅན་ཡོད་དམ་ཞེས་རྗོད་པར་ཡང་བྱེད་དོ། །ཇི་ལྟར་སྐྱེས་པ་རྣམས་སམ་དེ་ལས་གཞན་དེའི་རིགས་ཅན་རྣམས་ཀྱང་རུང་སྟེ། ཀྱེ་མ་དགེ་སློང་འདི་དག་ནི་རྒོད་བག་ཅན་ཡིན་ནོ། །ཡང་གང་གི་ཚེ་ངག་ཀུན་ནས་ལེགས་པར་བསྡམས་པར་གྱུར་པ་ན་སྔ་ཕྱི་ཚིག་རྣམས་ཀུན་ལེགས་པར་འབྲེལ་པར་རྗོད་པར་བྱེད་དོ། །སྐྱེས་བུ་གཞན་དག་རྣམས་མཐོང་བར་གྱུར་པའམ་དེ་ཉིད་མཐོང་བར་གྱུར་ཀྱང་རུང་། སྦྱིན་པ་པོ་དང་སྦྱིན་བདག་རྣམས་སམ་དེའི་རིགས་ཅན་གཞན་དག་རྣམས་ཀྱང་རུང་སྟེ། ཡུལ་དང་དུས་སུ་རིགས་པ་དང་འགལ་

71-17b

བ་མེད་པར་དལ་བུས་སྨྲ་བར་བྱེད་དོ། །ཞི་བ་དང་གོ་བར་གྱུར་པ་དང་ཆོས་ཉིད་དང་མི་འགལ་བའི་ངག་རྣམས་ཇི་ལྟར་རྗོད་པར་བྱེད་པ་དེ་བཞིན་དུ་སྒྲུབ་པར་ཡང་བྱེད་དོ། །བུད་མེད་རྣམས་ལ་རྟོག་དཔྱོད་མི་བྱེད་དོ། །སེ་གོལ་གྱི་སྒྲ་བྱས་ནས་ལེགས་པར་འཇུག་པར་ཡང་བྱེད་དོ། །དུས་ཀྱང་རིག་པར་འགྱུར་རོ། །ཕྱིར་འབྱུང་བར་འགྱུར་བའི་ངོ་བོ་ཡང་ཤེས་པར་འགྱུར་བ་དང་ཟུར་གྱིས་གོ་བར་ཡང་འགྱུར་རོ། །ཆོས་གོས་རྣམས་ཀྱང་རྣམ་པར་འཕྱར་བར་མི་བྱེད་དོ། །དཔུང་པ་དག་བསྐྱོད་པར་ཡང་མི་བྱེད་དོ། །གློ་དྲག་པོར་ལུ་བར་ཡང་མི་བྱེད་དོ། །ངག་གིས་འཕྱ་བར་ཡང་མི་བྱེད་དོ། །དྲིས་པ་དང་གཞན་དག་གུས་པར་གྱུར་པས་ཕྱི་ནས་ཚིག་རྗོད་པར་བྱེད་དོ། །དལ་བ་དང་སྙན་པ་དང་ཆོས་དང་ལྡན་པ་རྣམས་ཀྱིས་ཀྱང་སྟེ། དེ་ལྟར་རྒོད་བག་ནི་འདུལ་བས་འཇོམས་པར་བྱེད་དོ། །གཞལ་ཡང་འདུལ་བས་རྒོད་པ་ཀུན་ནས་འཇོམས་པར་བྱེད་དོ། །འདི་ཡང་གང་དག་ཡིན་ཞེ་ན་འདི་ལྟ་སྟེ་ཁྱིམ་རྣམས་སུ་དེ་འཇུག་པར་བྱེད་པ་ན་དེ་ན་གླུ་དང་གར་དང་རོལ་མོའི་སྒྲ་རྣམས་དང་གད་མོ་དང་འགྱིང་བག་དང་ཡོངས་སུ་སྤྱོད་པ་དང་གཞན་དག་གིས་རྗོད་པ་དང་ཕན་ཚུན་དུ་དགོད་པ་རྣམས་ལ་ཉན་པར་མི་བྱེད་དོ། །རོ་མྱོང་བར་ཡང་མི་བྱེད་དོ། །དེ་དག་རྣམས་ལ་སེམས་རབ་ཏུ་སྨོན་པར་མི་བྱེད་དོ། །ཚོགས་པ་འདུས་པ་ལ་མངོན་པར་དགའ་བར་མི་འགྱུར་རོ། །ཁྱིམ་གཞན་དག་རྣམས་ཀྱི་སྤྱོད་ཚུལ་གཞན་དག་ཏུ་རྗོད་པར་མི་བྱེད་དོ། །ཤིན་ཏུ་མྱུར་བར་འགྲོ་བ་དང་འོང་བ་དང་རབ་ཏུ་འཇུག་པ་མང་བ་མ་ཡིན་ནོ། །ཧ་ཅང་སློང་བར་བྱེད་པའི་རང་བཞིན་ཅན་མ་ཡིན་ནོ། །དེ་ལྟ་བུར་ཡང་དགེ་སློང་དེ་གཞན་གྱི་ཁྱིམ་དུ་འཇུག་སྟེ། སྦྱིན་པ་པོ་དང་སྦྱིན་བདག་དང་གཞན་ཡང་དེ་ལྟ་བུའི་རིགས་ཅན་རྣམས་ཀྱི་ཁྱིམ་དུ་འཇུག་པ་ནི་རྒོད་བག་རྣམས་ནི་འདུལ་བས་ཀུན་ནས་འཇོམས་སོ། །འཇིག་པར་བྱེད་དོ། །རྣམ་པར་འབྱེད་དོ། །གཞན་ཡང་གལ་ཏེ་ཁྱིམ་རྣམས་སུ་ཞུགས་པར་གྱུར་ནས་དགེ་སློང་གིས་སྦྱིན་པ་པོ་དང་སྦྱིན་བདག་རྣམས་དང་གཏམ་ལ་ཞུགས་པར་གྱུར་པ་ན། ཆོས་དང་ལྡན་པའི་གཏམ་རྣམས་བཞག་ནས་འདོད་པ་རྣམས་ཀྱི་གཏམ་བྱེད་དོ། །ཡུལ་ལྗོངས་ཀྱི་གཏམ་རྣམས་

71-18a

བྱེད་དོ། །མཐོ་རིས་ཀྱི་གཏམ་བྱེད་དོ། །གར་མཁན་དང་གར་དང་རོལ་མོ་བསྟན་པའི་གླུའི་གཏམ་རྣམས་བྱེད་དོ། །གྲོང་ཁྱེར་རྣམས་སམ་གཞན་གྱི་ཡང་རུང་སྟེ་ཀུན་ནས་ཉོན་མོངས་པ་ཅན་གྱི་གཏམ་རྣམས་བྱེད་དོ། །བུད་མེད་རྣམས་དང་ཀུན་ནས་འདྲེ་བར་གནས་པར་བྱེད་ཅིང་རྣམ་པར་བཀྲ་བར་བྱས་པའི་ཆ་བྱད་ཀྱིས་ཀྱང་ཁྱིམ་རྣམས་སུ་རྒྱུ་བར་བྱེད་དོ། །དགེ་སློང་རྣམས་སམ་གཞན་ཡང་དེའི་རིགས་ཅན་རྣམས་ལ་རྒོད་བག་དེ་ལྟ་བུ་དག་ཀྱང་འབྱུང་བ་ཡིན་ནོ། །རྒོད་བག་དེ་ལྟ་བུས་རབ་ཏུ་ཞུགས་པར་གྱུར་པ་རྣམས་འདུལ་བ་ཇི་ལྟ་བ་རྣམས་ཀྱིས་ཉེ་བར་སྤོང་བ་ཡིན་ན། འདི་ལྟ་སྟེ་དགེ་སློང་ངམ་གཞན་དག་དེའི་རིགས་ཅན་རྣམས་ཀྱང་རུང་སྟེ། ཁྱིམ་དུ་ལེགས་པས་ཉེ་བར་ཞུགས་པར་གྱུར་པ་ན་ལེགས་པ་ལ་རྟེན་པའི་གཏམ་རྣམས་བྱེད་པར་འགྱུར་བ་ཡིན་ནོ། །དཔེར་བྱ་ན་སྦྱིན་པའི་གཏམ་དང་། ཚུལ་ཁྲིམས་ཀྱི་གཏམ་དང་། ཡེ་ཤེས་རབ་ཏུ་བསྔགས་པར་བྱ་བའི་གཏམ་རྣམས་དང་། ལོག་པར་ལྟུང་བའི་གཏམ་དང་། རྒས་པའི་གཏམ་དང་། ནད་ཀྱི་གཏམ་དང་། རྣམ་པར་འབྲལ་བར་འགྱུར་བའི་གཏམ་དང་། ལས་བདག་གིར་བྱ་བའི་གཏམ་དང་། རྒུད་པར་འགྱུར་བའི་གཏམ་དང་། འཆི་བའི་གཏམ་རྣམས་དང་། ཡང་དག་པར་མགུ་བར་བྱ་བའི་གཏམ་དང་། ལེགས་པ་ལ་བརྟེན་པར་བྱ་བའི་གཏམ་དང་། སྡུག་བསྔལ་གྱི་གཏམ་དང་། ཀུན་འབྱུང་བའི་གཏམ་དང་། འགོག་པའི་གཏམ་དང་། ལམ་གྱི་གཏམ་རྣམས་དང་། ས་རྣམས་ཀུན་ཏུ་བགྲོད་པར་བྱ་བའི་གཏམ་རྣམས་དང་། ཚུལ་ཁྲིམས་རབ་ཏུ་བསྔགས་པ་དང་དང་པོ་བྱུང་བའི་གཏམ་རྣམས་དང་། འདོད་ཆགས་དང་བྲལ་བའི་གཏམ་རྣམས་དང་། སེར་སྣ་ཡོངས་སུ་གཞིག་པར་བྱ་བའི་གཏམ་རྣམས་དང་། གཟུགས་ཀྱི་རྒྱགས་པས་མྱོས་པ་རྣམས་ལ་གཟུགས་ཚད་མེད་པ་བརྗོད་པའི་གཏམ་རྣམས་དང་། བསླུ་བར་གྱུར་པའི་གཏམ་རྣམས་དང་། ལང་ཚོ་ལ་བབ་པ་ལ་སོགས་པ་རྣམས་ཀྱང་རྒ་བས་ངེས་པར་སླུ་བར་བྱེད་པའི་གཏམ་རྣམས་ཏེ། སྦྱིན་པ་པོ་དང་སྦྱིན་བདག་རྣམས་ཀྱི་བསམ་པ་ཀུན་ཏུ་རིག་པར་བྱས་ལ་དེ་ཁོ་ན་བཞིན་དུ་གཏམ་བྱའོ། །དེ་ལྟར་ན་དགེ་སློང་གིས་

71-18b

རྒོད་བག་རྣམས་འདུལ་བས་ཉེ་བར་སྤོང་བ་ཡིན་ནོ། །གཞན་ཡང་རྒོད་པ་རྣམས་ནི་འདུལ་བས་ཉེ་བར་འཇོམས་པར་བྱེད་དེ། གང་ལ་ཟས་དང་སྐོམ་མང་བར་གྱུར་པ་དེ་དག་གིས་ཕེའུ་བཏབ་པར་གྱུར་ལ་དེར་ཡང་ལེགས་པར་ཉེ་བར་ཕྱིན་པ་ཡིན་ནོ། །གཞན་ཡང་གང་དག་འདོད་པ་ཆེ་བར་གྱུར་པ་རྣམས་ཀྱང་རོ་ལ་མངོན་པར་དགའ་བའི་ཕྱིར་ན་ཕལ་ཆེ་བ་རྣམས་སུ་རབ་ཏུ་འཇུག་པར་བྱེད་དེ། བསྟེན་གྲོགས་པ་དེ་དག་ཏུ་ཉེ་བར་འགྲོ་བར་བྱེད་ལ། བསྟེན་གྲོགས་བྱ་བའི་དོན་དུ་ཡང་གང་དག་གིས་ཉེ་བར་སྒྲུབ་པར་བྱེད་དོ། །རྣམ་པ་གང་དག་གིས་ཉེ་བར་སྒྲུབ་པར་བྱེད་པ་དང་ཇི་སྲིད་དུ་ཉེ་བར་སྒྲུབ་པར་བྱེད་པ་དེ་སྲིད་དུ་ཆོས་གོས་དང་བསོད་སྙོམས་དང་གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ཀུན་ནས་དགའ་བར་བྱེད་དོ། །གང་གིས་འདིའི་བདེ་བ་རྣམས་ལ་ཀུན་ཏུ་དྲན་པར་མི་བྱེད་ཅིང་རོ་མྱོང་བར་ཡང་མི་བྱེད་དོ། །རྣམ་པར་རྟོག་པར་ཡང་མི་བྱེད་དེ་ཡང་དེ་ལྟར་གཅིག་ཏུ་རྣམ་པར་རྒྱུ་བ་དང་ལེགས་པ་ལ་བརྟེན་ནས་རྣམ་པར་རྒྱུ་བ་དང་ཀུན་ནས་བསྡམས་ནས་རྣམ་པར་རྒྱུ་བ་ནི་འདུལ་བ་དང་ལྡན་པ་ཡིན་ནོ། །དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། དེ་ལྟར་རྒོད་པ་རྣམས་འདུལ་བས་ཉེ་བར་འཇོམས་པ་ཡིན་ནོ། །རྒོད་པ་རྣམས་ཐམས་ཅད་ཀྱང་བག་མེད་པ་ལས་རབ་ཏུ་འཕེལ་བར་འགྱུར་བ་ཡིན་ནོ། །དོན་མ་ཡིན་པའི་ཚོགས་རྣམས་ཐམས་ཅད་ཀྱང་བག་མེད་པའི་རྩ་བ་ལས་ཡིན་ནོ། །དེའི་ཕྱིར་ན་མྱ་ངན་ལས་འདས་པ་ཚོལ་བར་བྱེད་པ་རྣམས་ཐམས་ཅད་ཀྱིས་བག་མེད་པ་ཁོ་ན་གཞོམ་པར་བྱ་བ་ཡིན་ནོ། །དེ་ལྟར་མུ་སུ་ལུན་དྷ་འདིས་སྔོན་གྱི་ལྷའི་དྲུང་དུ་ཐོས་པ་གང་ཡིན་པའི་ཆོས་དེ་དག་དང་ངང་པའི་རྒྱལ་པོ་དུས་བཟངས་དེ་དང་བདུད་ཀྱི་ཕྱོགས་སུ་གྱུར་པའི་བག་མེད་པ་དེ་དག་གི་མདུན་དུ་སྟོན་པར་བྱེད་དོ། །བཅོམ་ལྡན་འདས་འོད་སྲུང་གིས་གསུངས་པ་དྲི་བ་བཅུ་གཅིག་པའི་མདོ་ལས་དྲི་བ་གཅིག་རྫོགས་སོ།། །།

ཇི་ལྟར་དྲི་བ་གཉིས་པ་ཡིན་ན། འདི་ལྟ་སྟེ། མ་བསྡམས་པ་རྣམས་ནི་སེམས་རྩེ་གཅིག་པ་ཉིད་ཀྱིས་ཏེ་མ་བསྡམས་པ་རྣམས་ཀྱང་རྣམ་པ་གཉིས་ཡིན་ཏེ། འཇིག་རྟེན་པ་དང་།

71-19a

འཇིག་རྟེན་ལས་འདས་པའོ། །བསྡམས་པ་ཡང་མདོར་བསྡུ་ན་སེམས་རྩེ་གཅིག་པས་འཛིན་པར་བྱེད་པའོ། །དེ་ལ་སྡོམ་པ་ཡང་རྣམ་པ་དུ་མ་ཡིན་ནོ། །མདོར་བསྡུ་ན་ནི་རྣམ་པ་གཉིས་ཡིན་ཏེ། རང་བཞིན་གྱི་ཁ་ན་མ་ཐོ་བ་དང་བཅས་པའི་ཁ་ན་མ་ཐོ་བའོ། །དེ་ལ་རང་བཞིན་གྱི་ཁ་ན་མ་ཐོ་བ་ཉམས་པ་རྣམས་ནི་དགེ་སློང་མ་ཡིན་ཞིང་འོད་སྲུང་བ་ཡང་མ་ཡིན་ཏེ། སྲོག་གཅོད་པ་དང་། མི་ཚངས་པར་སྤྱོད་པ་དང་། མ་བྱིན་པར་ལེན་པ་ཡང་ཡོངས་སུ་རྫོགས་པ་ནི་ཀཱར་ཥཱ་པ་ཎ་གསུམ་གྱི་བློར་གྱུར་པས་ཆོས་དང་ལྡན་ན་ཡང་རུང་སྟེ་ཕྲོགས་ནས་ཡོངས་སུ་ལོངས་སྤྱོད་ན་ནི། ཡུལ་གྱིས་དང་གཉེན་འབྲེལ་གྱི་མ་ཡིན་པ་དང་གནད་ལ་བསྒོ་བས་ཀྱང་རུང་སྟེ། དགེ་སློང་མ་ཡིན་ཞིང་འོད་སྲུང་བའི་མ་ཡིན་ནོ། །རུལ་པར་གྱུར་པ་མ་རུངས་པ་རྫུན་པ་རྟགས་འབའ་ཞིག་འཛིན་པར་བྱེད་པ་ཡིན་ནོ། །དེ་ལྟར་རང་བཞིན་གྱི་ཁ་ན་མ་ཐོ་བ་ཚུལ་ཁྲིམས་འཆལ་པར་གྱུར་པ་དེ་ཡང་བག་མེད་པས་བྱས་པ་ཡིན་ནོ། །དེའི་ཕྱིར་ན་འོད་སྲུང་རབ་ཏུ་བརྩོན་པ་རྣམས་ཀྱིས་ཀྱང་བག་མེད་པ་ཡོངས་སུ་སྤང་བར་གྱིས་ཤིག །དེ་ལྟར་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་འོད་སྲུང་གིས་གསུངས་པའི་མདོ། བྱང་ཆུབ་སེམས་དཔའ་དུས་བཟངས་དང་སྨྲ་བ་པོར་གྱུར་པའི་ངང་པ་རྣམས་དང་། བདུད་ཀྱི་ཕྱོགས་ཀྱི་བག་མེད་པ་རྣམས་ལ་ཆོས་སྟོན་པར་བྱེད་ཅིང་པད་མའི་སྙིང་པོ་ལ་ཡང་དག་པར་གནས་ནས་བཤད་དོ། །གཞན་ཡང་བཅས་པའི་ཁ་ན་མ་ཐོ་བ་རྣམས་ནི་མདོར་བསྡུ་ན་རྣམ་པ་དགུ་ཡིན་ནོ། །མི་གཙང་བ་རྣམ་པ་དགུ་པོ་རྣམས་ཀྱང་གང་ཞེ་ན། །གཅིག་སྤྱོད་པ་དང་། བཤགས་པས་ལྡང་བ་སྤྱོད་པ་དང་། བག་མེད་པས་བག་མེད་པ་སྤྱོད་པ་དང་། ཕྱེད་སྤྱོད་པ་དང་། ཕལ་ཆེར་སྤྱོད་པ་དང་། བཤགས་པ་དང་ལྡང་བ་ཡང་བར་སྤྱོད་པ་དང་། ལམ་སྟོན་པར་བྱེད་པ་དང་བསྒྲགས་པས་སྤྱོད་པ་དང་། རླག་པར་སྤྱོད་པ་དང་ཐམས་ཅད་སྤྱོད་པའོ། །དེ་ལྟར་དགེ་སྦྱོང་རྣམས་སམ་གཞན་དག་དེའི་རིགས་ཅན་རྣམས་ཀྱང་རུང་སྟེ། བག་མེད་པའི་དབང་གིས་བྱིས་པའི་སྐྱེ་བོ་རྣམས་ཐམས་ཅད་བློ་ཉམས་པར་གྱུར་པ་དང་། ཇི་སྲིད་དུ་ཆོས་འདུལ་བ་མ་བསླབས་པ་རྣམས་ཀྱི་མདོར་

71-19b

བསྡུ་ན་ཁ་ན་མ་ཐོ་བ་རྣམ་པ་དགུ་ཡིན་ནོ། །ཁ་ཅིག་སྤྱོད་པ་ཇི་ལྟ་བུ་ཡིན་ཞིང་ཇི་ལྟར་ན་བཅས་པའི་ཁ་ན་མ་ཐོ་བ་ཡིན་ན། འདི་ན་བསླབ་པ་གང་དག་ཡང་མོར་གྱུར་པ་རྣམས་དང་ལྡང་བ་ཡང་བར་གྱུར་པ་དེ་དག་རྣམས་འདིས་ཁྱད་དུ་བསད་པར་གྱུར་ནས་བག་མེད་པའི་དབང་གིས་རྒལ་བར་བྱེད་དེ། ཇི་ལྟར་བདག་གིས་འདི་དག་ལས་རྒལ་བར་བྱས་ལ་ཕྱི་ནས་ནི་བདག་གིས་ཀུན་ནས་ལྡང་བར་བྱའོ་སྙམ་པའོ། །དཔེར་ན་ས་རྐོ་བར་བྱེད་པ་དང་རྩྭ་གཅོད་པར་བྱེད་པའོ། །འདི་ནི་གཅིག་སྤྱོད་པ་ཞེས་བརྗོད་དེ། དགེ་སྦྱོང་ངམ་གཞན་ཡང་དེའི་རིགས་ཅན་རྣམས་ཀྱང་རུང་ངོ་། །ཡང་ཇི་ལྟར་ན་བག་མེད་པ་སྤྱོད་པ་རྣམས་བཤགས་པས་ལྡང་བ་སྤྱོད་པ་ཡིན་ན། འདི་ན་དགེ་སྦྱོང་དག་བསླབ་པའི་གཞི་གཅིག་གམ་བསླབ་པའི་གཞི་གཉིས་སམ་གསུམ་ལ་སྤྱོད་པ་ལས་འདའ་བར་བྱེད་དོ། །ཇི་ལྟར་དེ་སྙེད་ཅིག་ལས་འདས་པར་བྱེད་ཅིང་། འདའ་བར་བྱས་ནས་ཀྱང་ཁོ་བོས་ཕྱིས་ཡང་ལྡང་བར་བྱའོ་ཞེས་པ་སྟེ། དེ་རིམ་པ་དེ་ཉིད་ཀྱིས་དང་དེ་ཁྱད་དུ་གསོད་པར་བྱེད་པས་ཀྱང་རྟག་ཏུ་བཅས་པའི་ཁ་ན་མ་ཐོ་བ་རྣམས་བྱེད་དོ། །དེ་དག་ནི་ཆོས་ལ་གུས་པར་སྤྱོད་པ་ཉིད་ཀྱང་མ་ཡིན་ནོ། །བག་དང་ལྡན་པ་ཡང་མ་ཡིན་ནོ། །རྟག་ཏུ་ཡང་རྣམ་པར་གཡེངས་པ་དང་བཅས་པའི་སེམས་སུ་འགྱུར་རོ། །འདི་ལ་ནི་བཤགས་པས་ལྡང་བར་སྤྱོད་པ་ཞེས་བྱའོ། །ཇི་ལྟར་ན་བག་མེད་པས་བག་མེད་པ་ཡོངས་སུ་འཕེལ་བར་སྤྱོད་པ་ཡིན་ན། འདི་ན་སེམས་ཡང་བར་འགྱུར་ཞིང་སེམས་སྟོབས་ཀྱང་ཡང་བ་རྣམས་ཀྱིས་བསླབ་པའི་གཞི་རྣམས་ཀྱི་བཤགས་པར་བྱ་བ་རྣམས་ཀྱང་མངོན་པར་ཤེས་པར་འགྱུར་བ་མ་ཡིན་ནོ། །སྙིང་པོ་དང་སྙིང་པོ་མེད་པ་རྣམས་བཤགས་པར་བྱ་བ་དང་། ལྡང་བ་ཡང་མངོན་པར་མི་ཤེས་པ་ཡིན་ནོ། །དེ་ལ་ནི་བསླབ་པའི་གཞི་བཅས་པའི་ཁ་ན་མ་ཐོ་བ་རྣམས་གང་ཡིན་པ་རྣམས་ཤིན་ཏུ་ཡང་མང་བར་འགྱུར་རོ། །དེ་དག་རྣམས་ཀྱང་འཛིན་པར་བྱེད་ཅིང་ཡང་གང་དག་དུས་ཤིན་ཏུ་རིང་བ་ན་དཀའ་བླས་ཆེན་པོས་ལྡང་བར་འགྱུར་ཏེ། དེ་དག་ཀྱང་འཛིན་པར་བྱེད་པ་ཡིན་ནོ། །ཡང་གང་དག་ཁ་ན་མ་ཐོ་བ་ཆུང་བར་གྱུར་པ་དེ་དག་ནི་

71-20a

ལེགས་པར་འཛིན་པ་ཡང་མ་ཡིན་ནོ། །ཆོས་ལ་གུས་པར་གནས་པའི་རང་བཞིན་ཅན་མ་ཡིན་ནོ། །དགེ་སྦྱོང་རྣམས་སམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། འདི་དག་ནི་བག་མེད་པས་བག་མེད་པ་རབ་ཏུ་འཕེལ་བར་སྤྱོད་པར་བརྗོད་པ་ཡིན་ནོ། །ཡང་ཇི་ལྟར་ན་ཕྱེད་ལ་སྤྱོད་པ་ཡིན་ནོ། །འདི་ལ་བསླབ་པའི་གཞི་གང་དག་ཡང་བ་རྣམས་སམ་ལྕི་བར་གྱུར་པ་རྣམས་ཀྱང་རུང་སྟེ། དགེ་སློང་གིས་ཀུན་ནས་ལྡང་བ་འབའ་ཞིག་བྱེད་དུ་འགྲོ་བ་འམ། གལ་ཏེ་ན་འཛིན་པར་བྱེད་པ་འམ། གལ་ཏེ་ན་ཤིན་ཏུ་བསྲབས་པར་གྱུར་ཏེ་ལྡང་བར་འགྱུར་བ་ཡིད་ལ་བྱས་ནས། དེ་རིགས་འཐུན་པའི་ཆ་རྣམས་མ་ལུས་པ་ཁོ་ན་ཕྱིར་ཟློག་པར་བྱེད་དེ། འདི་ནི་ཕྱེད་ལ་སྤྱོད་པ་ཞེས་བརྗོད་དོ། །གང་གི་ཕྱིར་ཕྱེད་ལ་ནི་སྤྱོད་པར་བྱེད་ལ་ཕྱེད་ལ་ནི་སྤྱོད་པར་བྱེད་པ་ཉིད་ཀྱང་མ་ཡིན་ཏེ་རིམ་པ་འདི་དག་གིས་ན་ཕྱེད་ལ་སྤྱོད་པ་བྱ་བ་ཡིན་ནོ། །བག་མེད་པ་རྣམས་ཀྱིས་བག་མེད་པར་རྣམ་པར་རྒྱུ་བ་བག་མེད་པའི་དབང་གིས་འགྲོ་བ་བག་མེད་པའི་ཡུལ་ལ་གནས་པ་འདི་ནི་དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། ཕལ་ཆེར་སྤྱོད་པར་བྱེད་པ་ཡིན་ནོ། །བསླབ་པའི་གཞི་རྣམས་ཡོངས་སུ་རྫོགས་པར་འཛིན་པར་བྱེད་པ་དགེ་སྦྱོང་མ་དང་། དགེ་ཚུལ་དང་། དགེ་བསྙེན་རྣམས་ཀྱང་རུང་སྟེ། ཤིན་ཏུ་མྱུར་བར་མྱ་ངན་ལས་འདས་པར་འགྲོ་བར་འགྱུར་བ་འདི་དག་དང་། རྣམ་པ་དེ་ལྟ་བུ་རྣམས་དང་། ཚུལ་མི་འཐུན་པ་དེ་དང་དེ་དག་ལ་རྒྱབ་ཀྱིས་ཕྱོགས་པར་གྱུར་པའི་ཕལ་ཆེར་སྤྱོད་པ་རྣམས་ཇི་ལྟ་བུ་ཞེ་ན། འདི་ན་བཅས་པའི་ཁ་ན་མ་ཐོ་བའི་བསླབ་པའི་གཞི་རྣམས་ཤིན་ཏུ་ཕལ་ཆེར་འཛིན་པར་བྱེད་པ་རྣམས་མ་ཉམས་པ་དང་། མ་རལ་བ་དང་། མ་ཟགས་པ་དང་། མི་བརྟན་པ་དང་། སྙིང་པོ་མེད་པ་དང་། གཅིག་ཏུ་ལྷག་མ་མེད་པ་མ་ཡིན་པར་གལ་ཏེ་ཤེད་ན་འཛིན་པར་བྱེད་དོ། །གལ་ཏེ་ཤེད་ན་མི་འཛིན་པར་བྱེད་དོ། །དགེ་སྦྱོང་དང་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། འདི་ནི་ཕལ་ཆེར་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བཤགས་པ་དང་ལྡང་བ་ཡང་བར་སྤྱོད་པ་ཡིན་ན། འདི་ན་བག་མེད་པའི་དབང་གིས་སམ། སྡིག་པའི་གྲོགས་པོ་ལ་རྟེན་པའི་དབང་གིས་

71-20b

ཀྱང་གལ་ཏེ་ན་བསླབ་པའི་གཞི་རྣམས་ཉམས་པར་བྱེད་དོ། །དེ་མྱུར་བར་སོ་སོར་རིག་ནས་འགྱོད་པར་འགྱུར་བ་དང་། སེམས་རབ་ཏུ་དང་བར་གྱུར་པས་སམ། དམྱལ་བའི་འཇིགས་པས་འཇིགས་པར་གྱུར་པས་ཀྱང་རུང་སྟེ། བཤགས་པར་བྱེད། དགེ་འདུན་ལ་ཡང་མཐོལ་བར་བྱེད་དོ། །ཇི་ལྟར་ན་བདག་གི་བསླབ་པའི་གཞི་ཉམས་པར་བྱས་པ་ནི་བདག་གིས་མཛེས་པ་མ་བྱས་ཀྱིས་དགེ་འདུན་རྣམས་ཀྱིས་དེ་ལས་ལྡང་བར་མཛད་དུ་གསོལ་ཞེས་བཤགས་པ་ལ་འཁོད་པར་བྱ་བ་དང་། གཉེན་པོས་ཀྱང་མཐོལ་ཞིང་བཤགས་པར་བྱེད་པ་དང་ལྡང་བར་བྱེད་པ་ཞེས་བྱ་བས་ཀྱང་འཇིགས་པ་ཡིན་ནོ། །དེའི་ཕྱིར་དགེ་སློང་འདི་ནི་བཤགས་པ་དང་ལྡང་བ་ཡང་བར་སྤྱོད་པ་ཞེས་བརྗོད་པ་ཡིན་ནོ། །ཇི་ལྟར་ན་དགེ་སློང་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཡིན་ན། འདི་ན་དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། བརྒྱ་ལ་ཞིག་ན་བག་མེད་པའི་དབང་གིས་ཁ་ན་མ་ཐོ་བ་མང་པོར་གྱུར་པ། སྡུག་བསྔལ་གྱི་རྩ་བ་གཅོད་པར་བྱེད་པའི་བསླབ་པའི་གཞི་རྣམས་ལས་འདའ་བར་བྱེད་པའམ། ཉམས་དམས་པར་བྱས་པར་གྱུར་ན་ཡང་དེ་དག་བླ་མ་རྣམས་ལ་རྗོད་པར་བྱེད་དོ། །དགེ་འདུན་རྣམས་ལ་ཡང་གསོ་སྦྱོང་གི་དུས་ཀྱི་ཚེ་ནའོ། །དེ་ལ་དགེ་འདུན་རྣམས་ཀྱིས་ལམ་འདོམས་པར་མཛད་ཅིང་དཀའ་བླས་རྣམས་ཀྱང་ཉེ་བར་སྟོན་པར་མཛད་ལ་ལྡང་བའི་འཇིགས་པ་རྣམས་ཀྱང་འགྲོ་བར་བྱེད་དོ། །དེ་དག་རྣམས་ཀྱང་ཐོས་ཤིང་གོ་བར་བྱས་ཏེ་ལངས་པ་ཡིན་ནོ་ཞེ་ནས། ཕྱི་ནས་ཡང་ནི་བསླབ་པའི་གཞི་རྣམས་ལས་འདའ་བར་མི་བྱེད་དེ། དམྱལ་བ་དང་། ཡི་དགས་དང་། དུད་འགྲོ་རྣམས་ཀྱིས་འཇིགས་པའི་ཕྱིར་རོ། །དུས་བཟངས་འདི་ནི་ལམ་སྟོན་པར་བྱེད་པ་དང་བསྒྲགས་པས་སྤྱོད་པ་ཞེས་བརྗོད་དོ། །ཡང་ཇི་ལྟར་ན་བརླག་པར་སྤྱོད་པ་ཡིན་ན། རྒ་བ་དང་། འཆི་བའི་དབང་དུ་སོང་བའོ། །འདི་ན་ཆོས་འདུལ་བ་རྣམས་བསླབས་པར་གྱུར་པ། བསམ་གཏན་གྱིས་བསམ་གཏན་དུ་མི་བྱེད་པར། བྱ་བ་དང་བྱེད་པ་རྣམས་ལ་མངོན་པར་དགའ་བར་གྱུར་ནས། རྟག་ཏུ་ཡང་ཁྱིམ་ནས་ཁྱིམ་རྣམས་སུ་དང་། གནས་ནས་གནས་རྣམས་སུ་དང་།

71-21a

སྦྱིན་བདག་གི་ཁྱིམ་རྣམས་ནས་སྦྱིན་བདག་གི་ཁྱིམ་རྣམས་སུ་ཟས་དང་གོས་ཀྱི་དོན་ཁོ་ནར་རྒྱུ་བར་བྱེད་དོ། །ལེགས་པར་འགྲོ་ལ་ཞབས་འབྲིང་ཡང་བྱེད་དོ། །ཁྱིམ་པ་རྣམས་ཉིད་ཉེ་བར་སྟེན་པར་བྱེད་དོ། །འདི་ནི་བརླག་པར་སྤྱོད་པ་ཞེས་བརྗོད་དོ། །རྐུན་མ་དེ་ནི་ཤི་བའི་འོག་ཏུ་དམྱལ་བའི་མཐར་ཐུག་པར་འགྱུར་རོ། །དུས་བཟངས་ཡང་ཇི་ལྟར་ན་ཐམས་ཅད་སྤྱོད་པ་ཡིན་ན། ཆོས་འདུལ་བ་རྣམས་ཐམས་ཅད་ལ་དད་པར་བྱེད་དོ། །རྗོད་དོ། །བྱེད་པར་འགྱུར་རོ། །གལ་ཏེ་ཤེད་ན་བསླབ་པའི་གཞི་གཅིག་གམ་གཉིས་ཀྱི་ཡང་རུང་སྟེ། ཁ་ན་མ་ཐོ་བ་ཅུང་ཟད་ཅིག་བྱུང་ན་ཡང་གོམས་པ་མེད་པ་དང་། ཆོས་ལ་གུས་པའི་དབང་གིས་འཛིན་པར་བྱེད་མི་ནུས་པར་གྱུར་ནས། དེ་དག་ལས་ལྡང་བར་བྱེད་པ་ཡིན་ནོ། །དུས་བཟངས་འདི་ནི་ཐམས་ཅད་བཤགས་ཤིང་སྤྱོད་པ་ཞེས་བརྗོད་དོ། །དགེ་སློང་ངམ་རྣམ་པ་དེ་ལྟ་བུ་གཞན་དག་རྣམས་ཀྱང་རུང་སྟེ། ཁ་ན་མ་ཐོ་བ་ཉུང་བ་རྣམས་ཀྱང་ཕྱི་ནས་འདི་དག་བསླབ་པའི་གཞི་གང་དག་ལས་འདའ་བར་བྱེད་པ་འདི་དག་ཀྱང་བག་མེད་པའི་ཉེས་པ་ཡིན་ནོ། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ནས། སྨྲ་བ་པོའི་ངང་པ་དེ་དག་རྣམས་དང་བདུད་ཀྱི་རིགས་ཀྱི་བག་མེད་པ་དེ་ལ་ཡང་ཆོས་བསྟན་ཏོ། །དེ་ནས་དེའི་དུས་ན་མུ་སུ་ལུན་དྷ་དེས་ཚིགས་སུ་བཅད་པ་བརྗོད་པ། ཇི་ལྟར། སྐྱེས་བུ་བག་མེད་པས་ལོང་བ། །བག་མེད་དུག་ནི་སྟེན་པ་པོ། །བག་མེད་ཞགས་པས་བཟུང་ནས་ནི། །དམྱལ་བར་རྗེས་སུ་ཉེ་བར་འཁྲིད། །བག་མེད་སྐྱེས་བུ་འཇིག་རྟེན་པའི། །གཤེ་བ་ཐམས་ཅད་ཐོབ་པར་འགྱུར། །ངག་རྣམས་དོན་མེད་འགྱུར་བ་དང་། །དམྱལ་བར་ཡང་ནི་འདྲེ་བར་བྱེད། །རྨོངས་པ་ཉིན་མེད་མཚན་མེད་དང་། །ལམ་དུ་འགྲོ་དང་བརྗོད་པ་ནའང་། །བག་མེད་སྐྱེས་བུ་སྐད་ཅིག་ཀྱང་། །བདེ་བའི་སྐལ་བ་ཡོད་མ་ཡིན། །འཁོར་ལོ་བཞིན་དུ་འགྲོ་བ་ལྔར། །གང་དག་འདོད་པའི་ཁམས་ན་འཁོར། །གང་ཡང་བསམ་གཏན་ལས་ལྟུང་བ། །དེ་ཡང་བག་མེད་པས་བྱས་སོ། །གཟུགས་མེད་པ་ཡི་གནས་བཞི་ཡང་། །འཇིག་རྟེན་པ་ནི་གང་ཐོབ་པ། །སྲིད་ན་འཕྱང་ཉུག་འཁོར་བ་ནི། །

71-21b

དེ་ཡང་བག་མེད་པས་བྱས་སོ། །ཁམས་གསུམ་འདི་དག་མ་ལུས་པ། །བག་མེད་འཆིང་བས་བཅིངས་པ་ཡི། །སྲིད་པའི་ཞགས་པས་བསྡམས་བྱས་པ། །བློ་མེད་པས་ཀྱང་མི་རིག་གོ། །དེ་ལྟར་མུ་སུ་ལུན་དྷ་དེས་སྔོན་གྱི་ལྷ་རྣམས་ཀྱི་དྲུང་ནས། བཅོམ་ལྡན་འདས་འོད་སྲུང་གིས་གསུངས་པའི་མདོ་བཤད་པར་བྱ་བའི་གནས་སྐབས་སུ་བབ་པས། ངང་པའི་རྒྱལ་པོ་དུས་བཟངས་དེ་དང་། སྨྲ་བ་པོར་གྱུར་པའི་ངང་པ་དེ་དག་རྣམས་དང་། བག་མེད་པ་དང་། རྒོད་པ་དང་། རྒྱགས་པ་དང་བཅས་པའི་བདུད་ཀྱི་རིགས་དེ་དག་རྣམས་ལ་ཆོས་བཅུ་གཅིག་པོ་རྣམས་ལས་ཆོས་གསུམ་པ་བསྟན་ཏོ། །དེ་རྣམས་གང་དག་ཞེ་ན། འདི་ལྟ་སྟེ། རྒོད་པ་ན་འདུལ་བས་རབ་ཏུ་འཇོམས་པར་བྱེད་དོ། །མ་བསྡམས་པ་ནི་སེམས་རྩེ་གཅིག་པས་ཡིན་ལ། ཚུལ་ཁྲིམས་འཆལ་པ་རྣམ་པ་སྣ་ཚོགས་པ་རྣམས་ལས་རང་བཞིན་གྱི་ཁ་ན་མ་ཐོ་བ་ནི་སྐྱེས་བུ་དམ་པ་ལ་བསྟེན་ནས་ཕྱི་ནས་དགེ་བའི་རྩ་བ་རྣམས་ཀྱིས་ཏེ། ཚུལ་ཁྲིམས་འཆལ་པར་བརྗོད་པར་བྱ་བའི་རང་བཞིན་གྱི་ཁ་ན་མ་ཐོ་བ་རྣམས་ཀྱང་སྐྱེས་བུ་དམ་པ་ལ་ལེགས་པར་བསྟེན་གྲོགས་བྱས་པས་འཁོར་བ་ལས་གྲོལ་བར་འགྱུར་ན། བཅས་པའི་ཁ་ན་མ་ཐོ་བ་རྣམས་ལྟ་སྨྲོས་ཀྱང་ཅི་དགོས། དེས་ན་རབ་ཏུ་བརྩོན་པས་ཀྱང་སྐྱེས་བུ་དམ་པ་ལ་བསྟེན་པར་བྱ་བ་ཡིན་ནོ། །སྤང་བར་བྱ་བ་གང་དག་ཞེ་ན། འདི་ལྟ་སྟེ། ལེ་ལོ་ནི་བརྩོན་འགྲུས་བསྐྱེད་པས་སོ། །ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བར་འགྱུར་ཏེ། ཡང་ཇི་ལྟར་བག་མེད་པ་ནི་དོན་མ་ཡིན་པ་རྣམས་ཐམས་ཅད་ཀྱི་དང་དགེ་བའི་བཤེས་གཉེན་སྟེན་པ་ནི་ཆོས་འདུལ་བ་རྣམས་ཀྱི་ཕུལ་དུ་ཕྱིན་པའི་རྩ་བ་ཡིན་ནོ། །གཞན་ཡང་ཆོས་བཞི་པ་ཆོས་བཞི་པས་ངེས་པར་འཇོམས་ཤིང་སྤོང་ལ་སྤང་བར་བྱ་བ་རྣམས་གང་ཞེ་ན། དེ་ནི་འདི་ལྟ་སྟེ། ལེ་ལོ་ནི་བརྩོན་འགྲུས་བསྐྱེད་པས་ཏེ། ལེ་ལོ་རྣམས་ནི་ཐམས་ཅད་ཀྱང་བརྩོན་འགྲུས་བསྐྱེད་པས་འཇོམས་པར་འགྱུར་རོ། །དཔེར་ན་སྣང་བས་མུན་པ་འཇོམས་པར་བྱེད་པ་དེ་བཞིན་དུ། ལེ་ལོ་རྣམས་ཐམས་ཅད་ཀྱང་བརྩོན་འགྲུས་བསྐྱེད་པས་སྤོང་བ་ཡིན་ནོ། །དེ་ལ་ལེ་ལོས་ནི་ཆོས་རྣམས་ཐམས་ཅད་ཀྱི་བར་

71-22a

ཆད་བྱེད་པ་པོ་ཡིན་ཏེ། དཔེར་ན་ཇི་ལྟར་བྱས་པ་དེ་ལྟ་དེ་ལྟར་མངོན་པར་འཕེལ་བ་ཡིན་ཞིང་འཇིག་རྟེན་པ་དང་འཇིག་རྟེན་ལས་འདས་པའི་ཆོས་རྣམས་ཀྱི་བར་ཆད་བྱེད་པར་འགྱུར་རོ། །འཇིག་རྟེན་འདི་དང་འཇིག་རྟེན་ཕ་རོལ་རྣམས་སུ་ཡང་བདེ་བར་འགྱུར་བ་མ་ཡིན་པ་མང་པོ་དེ་དག་རྣམས་ཀྱི་མིང་ཡང་གཟུང་བར་སླ་བ་མ་ཡིན་ནོ། །ལེ་ལོ་ཅན་ཞེས་བྱ་བ་ནི་བརྩོན་འགྲུས་ཞན་པ་སྟེ། གཞན་གྱིས་ཉེ་བར་འཇོམས་པར་བྱེད་དོ། །གཞན་རྣམས་ཀྱི་ཞེ་ཟློགས་པར་འགྱུར་རོ། །གཞན་གྱིས་ཕམ་པར་བྱེད་ཅིང་ཚར་གཅོད་པར་འགྱུར་ཏེ། ལེ་ལོ་ཅན་རྣམས་ནི་ཤིན་ཏུ་ཉེ་བར་འཇོམས་པས་ཤིན་ཏུ་དབུལ་བར་འགྱུར་རོ། །ལས་ཀྱི་མཐའ་རྣམས་ལ་སྒྲུབ་པར་མི་བྱེད་དོ། །ཁེ་སྤོགས་རྣམས་མི་བྱེད་དོ། །ཞིང་ལས་མི་བྱེད་དོ། །ཁྱིམ་གྱི་གཞིའི་བྱ་བ་གཞན་རྣམས་ཀྱང་མི་བྱེད་དོ། །སྐྱེས་བུ་ལ་སྟེན་པར་མི་བྱེད་ཀྱི་སྙོམ་ལས་ཀྱི་བསམ་གཏན་གྱིས་བཟུང་བ་ཡིན་ནོ། །སྐྱེ་བོ་རྣམས་ཐམས་ཅད་ཀྱིས་མཚོན་པར་འགྱུར་རོ། །ཡེ་ཤེས་ལ་སྦྱོར་བར་མི་བྱེད་དོ། །དེ་ནི་མཁས་པ་མ་ཡིན་ནོ། །མཁས་པའི་རང་བཞིན་ཅན་རྣམས་ཀྱང་མ་ཡིན་ནོ། །ཡུལ་དང་དུས་ཤེས་པ་མ་ཡིན་ནོ། །བདག་དང་གཞན་རྣམས་ཀྱི་ཁྱད་པར་ཤེས་པ་མ་ཡིན་ནོ། །རང་གི་སྟོབས་རྣམས་དང་གཞན་གྱི་སྟོབས་རྣམས་ཀྱི་ཁྱད་པར་ཤེས་པ་མ་ཡིན་ནོ། །དུས་སུ་ལེགས་པར་དགོས་པ་རྣམས་སྒྲུབ་པ་མ་ཡིན་ཏེ། དེའི་བྱ་བ་རྣམས་ཐམས་ཅད་ལ་བར་ཆད་འབྱུང་བར་འགྱུར་རོ། །གང་གི་ཚེ་འཇིག་རྟེན་འདི་དང་འཇིག་རྟེན་ཕྱི་མ་རྣམས་ཀྱི་ཡང་ལེ་ལོ་དེ་དག་རྣམས་ཉིད་བརྩོན་འགྲུས་བསྐྱེད་པས་བཅོམ་པར་གྱུར་པ་དེའི་ཚེ་འདི་ལ་འཇིག་རྟེན་པ་རྣམས་ཀྱིས་མངོན་པར་བགྲོད་པར་བྱ་བར་འགྱུར་རོ། །སྔ་བར་ལངས་པར་བྱེད་པ་དང་། ངལ་དུབ་ལས་བརྒྱལ་བ་དང་། གཉིད་ལས་བརྒྱལ་ཞིང་ལེགས་པར་སད་པ་དང་། དུས་སུ་ལངས་པ་དང་། དུས་སུ་སྐྱོ་བ་སྐྱེ་བ་དང་། ལྟོས་པ་དང་བྲལ་བས་བྱ་བ་རྣམས་རྩོམ་པར་བྱེད་དོ། །དེ་ལུས་ཀྱི་བརྩོན་འགྲུས་བརྟན་པ་དང་ལྡན་པས་ལེ་ལོའི་དྲི་མ་དེ་དག་རྣམས་དག་པར་བཀྲུས་པའི་བརྩོན་འགྲུས་ལེགས་པར་རྩོམ་པ་དེ་ནི་དོན་རྣམས་

71-22b

ཐམས་ཅད་དྲི་མ་དང་ཀུན་ནས་བྲལ་བར་སྒྲུབ་པར་བྱེད་དོ། །དོན་རྣམས་ལ་བགེགས་བྱུང་བར་གྱུར་ན་ཡང་སྐྲག་པར་མི་འགྱུར་ལ་སྐྱོ་བ་སྐྱེ་བར་མི་འགྱུར་རོ། །གཞན་རྣམས་ཀྱིས་བར་ཆད་བྱེད་པ་ཡང་མ་ཡིན་ནོ། །རབ་ཏུ་བརྟན་པས་བྱ་བ་རྣམས་ཀྱང་རྩོམ་པར་བྱེད་དོ། །བརྩོན་འགྲུས་དང་ལྡན་པས་གང་དག་སྒྲུབ་པར་བྱེད་པ་རྣམས་ནི་ཀུན་ནས་ཉམས་པར་ཡང་མི་འགྱུར་རོ། །གཞན་གྱི་དབང་གིས་བྱ་བ་རྣམས་ཀུན་ཏུ་རྩོམ་པ་ཡང་མ་ཡིན་ནོ། །མི་རྣམས་ཀྱི་ཁྱད་པར་ཡང་ཤེས་པར་འགྱུར་རོ། །བདག་གི་དཔུང་དང་གཞན་གྱི་དཔུང་རྣམས་ཀྱི་ཁྱད་པར་ཤེས་པར་འགྱུར་རོ། །དེ་དེ་དག་རྣམས་ཀྱིས་ཀྱང་བསྔགས་པར་འགྱུར་རོ། །སྐྱེ་བོའི་ཚོགས་ཆེན་པོ་རྣམས་ཀྱིས་མཆོད་པར་ཡང་འགྱུར་རོ། །རྒྱལ་པོ་དང་རྒྱལ་པོའི་བློན་པོ་དག་གིས་ཀྱང་མཆོད་པར་བྱེད་དོ། །རྟག་ཏུ་ནོར་དང་ལྡན་པར་ཡང་འགྱུར་རོ། །སེམས་སྟོབས་དང་སྟོབས་རྣམས་ཀྱང་ཉམས་པ་མེད་པར་འགྱུར་རོ། །གང་དག་དང་ལྷན་ཅིག་ཏུ་འགལ་བར་གྱུར་པ་དེ་དག་རྣམ་པར་ཕམ་པར་འགྱུར་རོ། །གང་གི་ཕྱིར་བརྩོན་འགྲུས་དང་ལྡན་པ་རྣམས་དང་ནི་ལྷན་ཅིག་ཏུ་འགལ་བར་བྱ་བར་མི་ནུས་སོ། །མཛའ་བོ་དག་ཀྱང་རྗེས་སུ་སྒྲུབ་པར་བྱེད་ལ། དེས་ཀྱང་འདིའི་མཛའ་བོ་རྣམས་མངོན་པར་འཕེལ་བར་འགྱུར་རོ། །དེ་གྲོགས་པོ་མང་བ་དང་མཆོག་ཏུ་བདེ་བ་དང་མཆོག་ཏུ་སྟོབས་དང་ལྡན་པར་ཡང་འགྱུར་རོ། །གྲོང་ཁྱེར་གཞན་དག་ན་ཡང་མངོན་པར་དགའོ། །བྱེས་ན་ཡང་སྐྱེ་བོ་མང་པོ་རྣམས་ཀྱིས་མངོན་པར་ཤེས་པར་འགྱུར་རོ། །དེ་དེའི་ཕྱིར་གང་དག་དང་བསྟེན་གྲོགས་བྱེད་པར་གྱུར་པ་དེ་དག་རྣམས་ཀྱིས་མཆོད་པར་བྱེད་དོ། །འཇིག་རྟེན་དག་ན་ཡང་འདི་ཀུན་གྱིས་ཤེས་པར་འགྱུར་རོ། །ལེ་ལོ་རྩ་བ་ནས་རྣམ་པར་སྤངས་པའི་སྐྱེས་བུ་རྣམས་ཀྱིས་ནི་ཡོན་ཏན་དུ་མ་ཐོབ་པར་འགྱུར་རོ། །དེ་ནས་བདག་ཉིད་ཆེན་པོ་དེ་ཉིད་ཀྱིས་ཀྱང་གོ་ཆ་བརྟན་པོ་དེ་ལྟ་བུ་རྣམས་དང་། རྙོག་པ་དང་རྣམ་པར་བྲལ་བས་བདུད་ཀྱི་དཔུང་རྣམས་ངེས་པར་འཇོམས་པར་བྱེད་དོ། །འཁོར་བ་ཕྱིར་ཟློག་པའི་གཡུལ་ཤོམ་པ་སྐྱེ་བོ་དམ་པ་རྣམས་ཐམས་ཅད་དགའ་བ་དང་། བརྩོན་འགྲུས་རྩོམ་པ་དང་བཅས་པ་གང་གིས། འཇིག་

71-23a

རྟེན་ལས་འདས་པ་ཟག་པ་མེད་པ་ཁ་ན་མ་ཐོ་བ་མེད་པ་མྱ་ངན་ལས་འདས་པའི་ནམ་མཁའ་ལེགས་པར་འཐོབ་པའི་དགོས་པ་ཀུན་ནས་རྩོམ་པར་བྱེད་དོ། །དེ་དང་པོ་ཁོ་ནར་རེ་ཞིག་ཤིན་ཏུ་བརྟན་པས་མཆོག་ཏུ་དཀའ་བར་གྱུར་པ། ཁྱད་པར་དུ་རོའི་གནས་དམན་པ་རྣམས་ལས་དཀའ་བས་དགྲོལ་བ་འདི་ནི་འཁོར་བ་པ་རྣམས་ཐམས་ཅད་ཀྱི་འཆིང་བ་ཡིན་ཏེ། ཁྱིམ་ན་གནས་པ་བུ་དང་། ཆུང་མ་དང་། སྲིང་མོ་དང་། བྲན་ཕོ་དང་། བྲན་མོ་དང་། ཞིང་དང་། འབྲུ་དང་བང་མཛོད་རྣམས་ཀྱིས་གང་བའི་སྲེད་པའི་ཆུ་བོའོ། །བརྩོན་འགྲུས་བརྩམས་པའི་གྲོགས་དང་ལྡན་པ་གང་དག་གིས་འཁོར་བའི་འཇིགས་པས་འཇིགས་པ་རབ་ཏུ་འཇོམས་པ་དེ་དག་གིས་ནི། རྣམ་པ་དེ་ལྟ་བུའི་ཁྱིམ་གྱི་གནས་རྣམས་བཏང་ནས་གོས་རྣམས་ངུར་སྨྲིག་ཏུ་བགོས་ཏེ། བརྩོན་འགྲུས་དང་ལྡན་པ་གང་ཡིན་པ་དེ་ཁྱིམ་གྱི་གནས་ནས་ངེས་པར་བྱུང་ངོ་། །ཁྱིམ་གྱི་གནས་ཀྱི་འཆིང་བ་རྣམས་ལས་གྲོལ་བས། ཐར་པ་མཐར་ཕྱིན་པའི་ལམ་ཐོབ་ནས་བསམ་གཏན་དང་། ཁ་ཏོན་དག་ལ་བརྩོན་པ་དང་ལྡན་པ། བརྩོན་འགྲུས་ཕ་རོལ་གནོན་པ་རྣམས་མོས་པ་ཇི་ལྟ་བ་བཞིན་དུ་ཐར་པ་ལ་འཇུག་པར་བྱེད་དོ། །དེ་ལ་ལེགས་པར་སྟོན་པ་བརྩོན་འགྲུས་དང་ལྡན་པ་དུས་རབ་ཏུ་ཤེས་པ་ལུས་དང་ངག་གི་དེ་ཁོ་ན་ཉིད་ཀྱི་མཚན་ཉིད་དང་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། རང་གི་མཚན་ཉིད་ཀྱི་དེ་ཁོ་ན་ཉིད་ཤེས་པ། ཕུང་པོ་རྣམས་ཀྱི་སྐྱེ་བ་དང་འཇིག་པའི་དེ་ཁོ་ན་ཉིད་ཤེས་པ། ཉིན་དང་མཚན་དུ་ཡང་བརྩོན་པ་མི་འདོར་བ་དེས་རབ་ཏུ་བརྩོན་པས་ཀྱང་སློབ་དཔོན་ལ་ལེགས་པར་རྟེན་པས་དང་། ཡེ་ཤེས་མང་དུ་སྤེལ་བས་ཀྱང་ཀུན་ནས་རྩོམ་པར་བྱེད་དོ། །བརྟུན་པར་བྱེད། རབ་ཏུ་འབད་པར་བྱེད། ལམ་གོམས་པར་བྱེད། སྐྱོན་སྤོང་བར་བྱེད་དེ། ཐོག་མ་མེད་པའི་དུས་ནས་ཞུགས་པར་གྱུར་པ་འཁོར་བའི་འཆིང་བར་གྱུར་པ། དོན་མེད་པ་རྣམས་ཐམས་ཅད་བྱེད་པ། མུན་པར་བྱེད་པའི་འོས་སུ་གྱུར་པ། དོན་མ་ཡིན་པ་རྣམས་ཐམས་ཅད་ཀྱི་རྒྱུར་གྱུར་པ། སྲོག་ཆགས་རྣམས་ལ་ཤིན་ཏུ་འཐས་པར་གྱུར་པ། དེ་དག་རྣམས་ཀུན་ནས་བརྩམས་པའི་བརྩོན་འགྲུས་

71-23b

ཀྱིས་སྤོང་བར་བྱེད་དོ། །དེ་ཇི་ལྟ་ཇི་ལྟར་ལམ་རྣམས་ཐོབ་པར་གྱུར་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་སྤྲོ་བ་སྐྱེ་བར་བྱེད་པ་ཡིན་ནོ། །བརྩོན་འགྲུས་ཤིན་ཏུ་བརྩམས་པས་བྲལ་བའི་འབྲས་བུ་རྣམས་ཅི་ནས་ཀྱང་འབྱུང་བར་བྱེད་དོ། །ཀུན་ནས་ཉོན་མོངས་པའི་ཆོས་འཆིང་བར་གྱུར་པ། བྱིས་པའི་སྐྱེ་བོ་རྣམས་ཐམས་ཅད་ཀྱི་ཡིད་ཀུན་ནས་འཕྲོག་པར་བྱེད་པའི་ཡུལ་རྣམས་ལ་ཆགས་པར་མི་བྱེད་དོ། །འདི་ལྟ་སྟེ། འདོད་པའི་རྗེས་སུ་འཐུན་པར་གྱུར་པ་སྒྲ་དང་། རེག་བྱ་དང་རོ་དང་། གཟུགས་དང་དྲི་རྣམས་ཀྱིས་དགེ་བའི་རྫས་གང་ཡིན་པ་རྣམས་རྐུ་བ་འདྲིད་པའི་ཆོས་ཅན་རྣམ་པར་སླུ་བའི་ཆོས་ཅན་དོན་མ་ཡིན་པ་རྣམས་ཐམས་ཅད་བྱེད་པ་མི་འདོད་པའི་རྣམ་པར་སྨིན་པར་འགྱུར་བ་མི་འདོད་པའི་འཆིང་བའི་ཆོས་སུ་གྱུར་པའི་བྱིས་པ་སོ་སོའི་སྐྱེ་བོ་ཡོངས་སུ་མ་སྦས་པ་རྣམས་ཐམས་ཅད་ཀྱི་སེམས་རྣམ་པར་གཡེང་བར་བྱེད་པ་དང་། རྣམ་པར་རྨོངས་པར་བྱེད་པའི་ཡུལ་གྱི་དགྲ་དེ་དག་རྣམས་ཐམས་ཅད་སྤོང་བར་བྱེད་དོ། །རོ་མྱོང་བར་མི་བྱེད་པ་དང་། ཐར་པའི་ལམ་སྒོམ་པར་བྱེད་དོ། །སེམས་དྲི་མ་མེད་པར་བྱེད་དོ། །དེ་ཇི་ལྟ་ཇི་ལྟར་དྲི་མ་རྣམས་མེད་པར་བྱེད་པ། དེ་ལྟ་དེ་ལྟར་བརྩོན་འགྲུས་དང་ལྡན་པ་དང་དྲན་པ་དང་ལྡན་པ་དང་། ངོ་མཚར་བར་གྱུར་པ་ཤེས་བཞིན་ཅན་དགྲ་རབ་ཏུ་བཅོམ་པར་འགྱུར་རོ། །གཞན་ཡང་བརྩོན་འགྲུས་དེ་ཉིད་ཀྱིས་སྤྲོ་བ་དང་བཅས་པ་གང་ཡིན་པས་འདོད་ཆགས་ཞེ་སྡང་གཏི་མུག་རྣམས་རབ་ཏུ་འཇོམས་པར་བྱེད་དོ། །རྣམ་པར་བྲལ་བར་བྱེད་དོ། །རྒྱལ་བར་བྱེད་དོ། །ཡང་སྲིད་པ་མི་འབྱུང་ངོ་། །དགྲ་རྣམས་ལས་རྒྱལ་བ་མི་འཐུན་པ་རྣམས་ལས་རྒྱལ་བ་དེ་ནི་དྲི་མ་མེད་པའི་ནམ་མཁའ་བཞིན་དུ་དང་རབ་ཏུ་དང་བའི་ཆུ་བཞིན་དུ་དང་སྤྲིན་གྱི་ཚོགས་རྣམས་དང་བྲལ་བར་གྱུར་པས། དྲི་མ་མེད་པའི་ཟླ་བ་བཞིན་དུ་དང་། ན་བུན་དང་བྲལ་བའི་འཛམ་བུའི་གླིང་གི་ཉི་མ་བཞིན་དུ་སྟེ་དེ་ལྟ་དེ་ལྟར་རྣམ་པར་སྣང་ངོ་། །ཇི་ལྟ་ཇི་ལྟར་ནད་པ་ནད་རྣམས་ལས་གྲོལ་བ་བཞིན་དུ་དང་། དབུལ་པོ་རྣམས་ཀྱིས་རབ་ཏུ་ནོར་རྙེད་པ་བཞིན་དུ་དང་། མིག་མེད་པ་རྣམས་ལམ་སྟོར་ནས་ནགས་ཁྲོད་དུ་ཞུགས་པ་ལས་ལམ་དུ་བགྲོད་པར་བྱེད་པ་དེ་དག་རྣམས་བཞིན་དུ་འདིས་མཐར་

71-24a

ཐུག་པའི་ཚུལ་ཁྲིམས་ཤིས་པ་གང་ཡིན་པ་ཉེ་བར་ཐོབ་པའི་དབང་དུ་བྱས་ནས་བསྙེན་པར་རྫོགས་པར་བྱས་ཏེ་གནས་སོ། །ཇི་ལྟར་བདག་གི་སྐྱེ་བ་རྣམས་ནི་ཟད་དོ། །ཚངས་པར་སྤྱོད་པ་ནི་སྤྱད་དོ། །བདག་གི་འདི་ལས་སྲིད་པ་གཞན་ནི་མི་ཤེས་སོ། །དེ་ལྟར་འདིའི་སྡིག་པ་རྣམས་རྣམ་པར་བྲལ་བ། འཆིང་བའི་ཞགས་པ་རྣམས་ཐམས་ཅད་ལས་གྲོལ་བ། ཆུ་ཀླུང་གི་ཕ་རོལ་ཏུ་ཕྱིན་པར་གྱུར་ནས་རྣམ་པར་རྒྱལ་ཞིང་མཛེས་སོ། །བརྩོན་འགྲུས་བརྩམས་པ་དང་ལྡན་པ་གང་གིས་བརྟན་པ་རྣམས་ཀྱི་དེ་དག་རྣམས་ཐམས་ཅད་ཡིན་ནོ། །དེའི་ཕྱིར་ན་ཐམས་ཅད་ཀྱིས་ཀྱང་རབ་ཏུ་འབད་པས་བརྩོན་འགྲུས་བརྩམ་པར་བྱའོ། །འཁོར་བའི་འཆིང་བར་གྱུར་པའི་ལེ་ལོ་དང་བག་མེད་པ་རྣམས་ཀྱང་སྤང་བར་གྱིས་ཤིག །དེ་ནས་དེའི་ཚེ་ན་མུ་སུ་ལུན་དྷས་བཅོམ་ལྡན་འདས་འོད་སྲུང་གིས་གསུངས་པའི་ཚིགས་སུ་བཅད་པ་བརྗོད་པ། ཇི་ལྟར། བརྩོན་འགྲུས་བརྩམས་པ་དྲན་ལྡན་པ། །དེ་ཚེ་གཅིག་ཏུ་མངོན་པར་དགའ། །སྡིག་པའི་ཆོས་ལས་རྣམ་པར་གྲོལ། །མཁས་པས་ཐར་པ་ཐོབ་པར་འགྱུར། །བརྩོན་འགྲུས་རྩོམ་པ་དང་ལྡན་པ། །གང་གིས་ལེ་ལོའི་དྲི་མ་སྤོང་། །ངན་འགྲོ་འཇིགས་ལས་རྣམ་པར་གྲོལ། །སྐྱེ་བོ་དེ་ནི་མཐོ་རིས་འགྲོ། །ལེ་ལོ་ཆོས་རྣམས་ཐམས་ཅད་ཀྱི། །བར་ཆད་བྱེད་པ་ཡིན་པར་འདོད། །སྐྱོན་དེས་ཉེ་བར་བཅོམ་པ་ཡི། །མི་ནི་སྡུག་བསྔལ་སྐལ་ལྡན་ཡིན། །འདི་དང་ཕ་རོལ་བདེ་དོན་གཉེར། །དེ་ཡིས་དེ་ནི་སྤང་བར་གྱིས། །དེ་ཕྱིར་དེས་ཟིན་སྐྱེས་བུ་དེ། །བཀྲ་ཤིས་དང་ཡང་དེ་མཚུངས་འདོད། །དེ་ལྟར་འཐབ་བྲལ་བ་རྣམས་ཀྱི་མངའ་བདག་དེས་སྨྲ་བ་པོའི་ངང་པ་དེ་དག་རྣམས་དང་། ངང་པའི་རྒྱལ་པོ་དུས་བཟངས་དེ་དང་བདུད་ཀྱི་རིགས་ཀྱི་བག་མེད་པ་དེ་དག་རྣམས་ལ་བཅོམ་ལྡན་འདས་འོད་སྲུང་གིས་གསུངས་པའི་མདོ་གང་ཡིན་པ་སྔོན་གྱི་ལྷ་ལས་དེས་ཐོས་པ་རྣམས་སྟོན་པ་ཡིན་ནོ། །གཞན་ཡང་ཉོན་མོངས་པ་དྲི་མ་ཅན་གྱི་ཆོས་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ། གྲོང་དང་གྲོང་ཁྱེར་དུ་འཇུག་པ་ལ་དགའ་བའི་སྤྱོད་པ་རྣམས་སྤོང་བ་ནི་ཐམས་

71-24b

ཅད་གཅིག་ཏུ་དགོན་པ་ན་གནས་པས་སོ། །གྲོང་དང་གྲོང་ཁྱེར་ན་སྤྱོད་པ་ལ་དགའ་བར་བྱེད་པ་གཅིག་ཏུ་གོམས་པར་གྱུར་པ་ནི། དགེ་སློང་ལ་གཅིག་ཏུ་བར་ཆད་བྱེད་པར་འགྱུར་རོ། །ཇི་ལྟར་གྱུར་པས་ཞེ་ན། དགེ་སློང་གི་བྱ་བ་ཉིད་དུ་གྱུར་པ་བསམ་གཏན་དང་ཁ་ཏོན་ཡོངས་སུ་སྤངས་ནས་གྲོང་ངམ་གྲོང་ཁྱེར་དུ་འཇུག་པར་བྱེད་ཅིང་གནས་པར་ཡང་བྱེད་དོ། །ཁྱིམ་དེ་དང་དེ་དག་རྣམས་ལ་བློ་ཤིན་ཏུ་ལྷག་པར་ཆགས་པར་གྱུར་ནས། བུད་མེད་རྣམས་དང་ངམ་སྐྱེས་པ་དང་བཅས་པ་དང་ཡང་རུང་སྟེ། རྒྱུན་མི་འཆད་པར་འདུ་འཚོག་ཡང་བྱེད་པར་འགྱུར་རོ། །དེ་གལ་ཏེ་བུད་མེད་དང་ལྷན་ཅིག་ཏུ་འཆིང་བར་འགྱུར་བ་རྣམས་ཐམས་ཅད་བྱེད་དོ། །དོན་ཐམས་ཅད་ལས་ཡོངས་སུ་ཉམས་པར་འགྱུར་ཞིང་། ཡིད་འདོད་ཆགས་ཀྱི་དབང་དུ་འགྱུར་བར་ཀུན་ནས་སྐྱེད་པར་བྱེད་དོ། །རྒྱུ་གང་གིས་བུད་མེད་ནི་མེ་དང་འདྲ་བ་ཡིན་ཏེ། ཇི་ལྟར་གང་མེ་ལ་ཉེ་བ་ཉིད་དུ་གནས་པ་དེ་ནི་ཉེ་བར་སྲེག་པར་འགྱུར་རོ། །དེ་བཞིན་དུ་ཡང་གང་བུད་མེད་རྣམས་དང་ཉེ་བར་གནས་པར་བྱེད་པ་དེའི་སེམས་རྣམ་པར་འཁྲུལ་བར་འགྱུར་རོ། །རྒྱུ་མཚན་དེའི་ཕྱིར་ན་དགེ་སློང་གིས་གྲོང་དང་གྲོང་ཁྱེར་རྣམས་སུ་འཇུག་པར་མི་བྱའོ། །གལ་ཏེ་སྐྱེས་པ་དག་དང་ལྷན་ཅིག་ཏུ་འདུ་འཚོག་པའམ་གཞན་རྣམས་དང་ཡང་ཀུན་རྗོད་པར་བྱེད་པ་དེ་དག་ནི་བྱ་བ་རྣམས་ཐམས་ཅད་ལས་ཡོངས་སུ་ཉམས་པར་འགྱུར་རོ། །འདིའི་སེམས་ཟག་པ་མེད་པའི་ཆོས་རྣམས་ལ་ཡང་དག་པར་རབ་ཏུ་དང་བར་འགྱུར་བ་ཡང་མ་ཡིན་ནོ། །དགེ་སློང་གྲོང་དང་གྲོང་ཁྱེར་རྣམས་སུ་འཇུག་པ་ལ་དགའ་བའི་སྤྱོད་པའི་དབང་གིས་བར་ཆད་ཆེན་པོར་གྱུར་པ་གཞན་རྣམས་ཉིད་ཀྱང་འབྱུང་བར་འགྱུར་ཏེ། དེ་ལ་འདི་དག་རྣམས་ཀྱང་གང་ཞེ་ན། འདི་ལྟ་སྟེ། ཁྱིམ་ནས་ཁྱིམ་རྣམས་སུ་འཇུག་པའི་དགེ་སློང་ནི་སེམས་རྣམ་པར་གཡོས་པར་འགྱུར་རོ། །ཁྱིམ་རྣམས་ཀྱི་ཉེ་བར་སྤྱོད་པར་བྱ་བ་རྣམས་ཡོངས་སུ་རྟོགས་ཤིང་ཟས་དང་སྐོམ་གྱི་ལོངས་སྤྱོད་དག་མངོན་པར་མཐོང་ནས་སྤངས་ཀྱང་དེ་ནམ་ཞིག་ན་སླར་ཡང་མི་མཉམ་པ་རྣམས་ལ་འཇུག་པར་རྩོམ་སྟེ། ནགས་ཀྱི་ནང་ནས་ཅི་ནས་ཀྱང་ཁྱིམ་པར་འགྱུར་རོ། །ནགས་ན་གནས་པའི་དགའ་བ་

71-25a

ལས་ཡོངས་སུ་ཉམས་པར་གྱུར་ནས། དེ་ཕྱིར་ཡང་ཁྱིམ་གྱི་གནས་ཀྱི་འཆིང་བའི་སྐྱོན་དེ་ཉིད་ཀྱིས་ཀུན་ནས་བཅིངས་པར་གྱུར་ནས། འདོད་ཆགས་དང་ཞེ་སྡང་དང་གཏི་མུག་རྣམས་ལ་སྤྱོད་དོ། །དེ་ཉེས་པ་དེ་དག་རྣམས་ཀྱི་སྐྱོན་གྱིས་ཕྱིར་ཡང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བ་ཡིན་ནོ། །སྡུག་བསྔལ་དེ་དག་རྣམས་ཀྱི་རྩ་བ་ཡང་གྲོང་དང་གྲོང་ཁྱེར་དུ་འཇུག་པའི་སྤྱོད་པ་ལ་དགའ་བ་ཡིན་ནོ། །དེའི་ཕྱིར་ཡང་དག་པའི་དགེ་སློང་ཡིན་པར་འདོད་པས་དེ་དག་རྣམས་ཡོངས་སུ་སྤོངས་ཤིག །རྣམ་པ་དེ་ལྟ་བུའི་སྐྱོན་དེ་དག་རྣམས་ཀྱང་གང་གིས་སྤོང་ན། གཅིག་ཏུ་དགོན་པ་ན་གནས་པས་སོ། །དགོན་པ་ན་གནས་པ་དེ་ཡང་མཐར་ཐུག་པའི་ཡོན་ཏན་རྣམས་ཐམས་ཅད་ཀྱི་རྟེན་དུ་གྱུར་པ་མཆོག་ཏུ་བཟང་བ་ཡིན་ནོ། །གཅིག་པུ་དགོན་པ་ན་གནས་པར་དགའ་བའི་དགེ་སློང་ནི་དབང་པོ་རྣམས་ཞི་བ་དང་སེམས་ཤིན་ཏུ་རབ་ཏུ་དང་བ་དང་། བློ་ལེགས་པར་བཏུལ་བའི་གསེར་དང་མཚུངས་པ་དང་། མཆོག་ཏུ་ཞི་བ་དང་དབང་པོ་རྣམས་མཆོག་ཏུ་བསྡམས་པ་དང་འཇིགས་པའི་དྲི་མ་རྣམས་དང་རྣམ་པར་བྲལ་བ་དང་། མཆོག་ཏུ་གཙང་བར་གྱུར་པའི་ཟག་པ་མེད་པའི་བདེ་བ་རྣམས་གང་ཡིན་པ་འཐོབ་པར་བྱེད་དོ། །བདེ་བ་དེའི་ཁྱད་པར་རྣམས་ཀྱིས་ན་འདོད་པ་ན་སྤྱོད་པའི་ལྷའི་རིགས་དྲུག་པོ་འདི་དག་རྣམས་ཐམས་ཅད་ཀྱིས་ཀྱང་ཡང་དག་པའི་ལེགས་པ་དང་ལྡན་པར་གྱུར་ཅིང་ཀུན་གྱིས་ཀྱང་གང་སྔོན་ལས་རྣམས་གཅིག་ཏུ་བྱས་པར་གྱུར་ལ། དེ་ཡང་འདོད་པ་སྡུག་པ་ཡིད་དུ་འོང་བ་མཆོག་ཏུ་མཚུངས་པ་མེད་པའི་ལྷ་གཅིག་གི་རྣམ་པར་སྨིན་པའི་འབྲས་བུར་གྱུར་ཅིང་འདོད་པ་ན་སྤྱོད་པ་འདི་དག་རྣམས་ཀྱི་བདེ་བ་རྣམས་དང་ཀུན་ནས་ལྡན་པར་གྱུར་པ་གང་ཡིན་པ་དེས་ཀྱང་། ཟག་པ་ཟད་པའི་བདེ་བ་གཅིག་གི་ཆར་ཡང་མི་ཕོད་ཅིང་དཔེར་ཡང་མི་བཟོད་དོ། །དཔྱད་པར་གྱུར་པ་ན་ཐམས་ཅད་དུ་དཔེར་ཡང་མི་ཆོག་གོ། །དེའི་ཕྱིར་གང་འགའ་ཞིག་དོན་དམ་པའི་བདེ་བ་འདོད་པ་དེས་གྲོང་དང་གྲོང་ཁྱེར་དུ་འཇུག་པ་ལ་དགའ་བའི་བདེ་བ་དེ་དག་རྣམས་མཐོང་ལ་བསམ་གཏན་དང་སྙོམས་པར་འཇུག་པའི་བདེ་བ་རྣམས་དོན་དུ་གཉེར་ཞིང་རྟག་ཏུ་གཅིག་པུ་ཉིད་

71-25b

མངོན་པར་དགའ་བས་རི་ཁྲོད་དང་རིའི་ཕུག་དང་དགོན་པ་རྣམས་སུ་རྩྭ་སོག་གི་སྟན་ལ་གཅིག་ཏུ་གནས་པར་འགྱུར་བར་གྱིས་ཤིག །ཟག་པ་མེད་པའི་བདེ་བ་ལ་མངོན་པར་དགའ་བས་གནས་པའི་དགེ་སློང་རྣམས་ནི་གྲོགས་པོ་དང་གཉེན་འབྲེལ་དང་རང་གི་སྐྱེ་བོ་རྣམས་ལྟ་བར་བྱེད་པས་རྣམ་པར་རྒྱུ་བ་སྟེན་པར་འགྱུར་བ་ནི་མ་ཡིན་ནོ། །དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་ལ་ལྟ་བས་རྣམ་པར་རྒྱུ་བ་བསྟེན་པར་གྱུར་ན། དེ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་འཕྲད་པ་ལས་བྱུང་བའི་བདེ་བ་རྣམས་ནི་འཇིག་པ་དང་མི་བརྟན་པ་དང་མི་རྟག་པ་དང་མཐར་རྣམ་པར་འབྲལ་བ་དེ་དག་རྣམས་ནི་མཆོག་ཏུ་མཐར་ཕྱིན་པ་མ་ཡིན་ནོ། །ཉོན་མོངས་པ་རྣམས་དང་བཅས་པ་དང་དེ་ནི་དྲི་མ་དང་སྐྱོན་དང་གནོད་པ་དང་བཅས་པ་དང་གཅིག་ཏུ་ངེས་པ་མ་ཡིན་པ་འཇིགས་པ་དང་བཅས་པར་གཅིག་ཏུ་ངེས་པ་དཔེ་མེད་པ་རྣམས་ལས་རྣམ་པར་མ་གྲོལ་བ་ཡིན་ནོ། །དེའི་ཕྱིར་ན་བློ་གྲོས་དམན་པར་གྱུར་པ་གང་འགའ་ཞིག་གིས་དོན་དམ་པའི་བདེ་བ་རྣམས་ཀུན་ནས་དོར་ནས་ཟག་པ་དང་བཅས་པའི་བདེ་བ་ཚུལ་དང་འཐུན་པ་མ་ཡིན་པ་སྡུག་བསྔལ་རྣམས་ཚོལ་བར་བྱེད་དོ། །དེ་ནི་འོད་བོར་བར་གྱུར་ནས་མུན་པ་ཚོལ་བར་བྱེད་པ་ཡིན་ནོ། །དེ་ལས་ཀྱང་འཁྱམ་པར་གྱུར་ཏེ། བློ་དང་མི་ལྡན་ཞིང་ཡོན་ཏན་དང་ཡོན་ཏན་མ་ཡིན་པ་དང་སྐྱོན་གྱི་མཚན་ཉིད་ལ་བློ་གྲོས་ལྡོངས་པའི་ཕྱིར་རོ། །དེའི་ཕྱིར་གྲོང་དང་གྲོང་ཁྱེར་དུ་འཇུག་པར་དགའ་བའི་སྤྱོད་པ་རྣམས་སྤོངས་ལ། རྟག་པར་གཅིག་པུ་དགོན་པ་ན་གནས་པ་ལ་མངོན་པར་དགའ་བར་འགྱུར་བར་གྱིས་ཤིག །དེ་ལྟར་ན་ཀུན་ནས་ཉོན་མོངས་པ་རྣམས་སྤངས་པ་ཤིན་ཏུ་མཐར་ཕྱིན་པའི་བདེ་བ་རྣམས་འཐོབ་པ་ཡིན་ནོ། །ཆོས་ལྔ་པ་དྲི་མ་དང་བཅས་པ་འདི་ནི་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །བདེ་བ་འདོད་པ་རྣམས་དང་བདུད་ཀྱི་ཡུལ་ལ་མངོན་པར་མི་དགའ་བ་རྣམས་དང་དེའི་ས་ལ་འདུག་པར་མི་འདོད་པ་ཉིད་ཀྱིས་དེ་ལྟར་དྲི་མ་དང་བཅས་པའི་ཆོས་དེ་དྲི་མ་མེད་པའི་ཆོས་ཀྱིས་རབ་ཏུ་གཞོམ་པར་བྱའོ། །དེ་ལྟར་མུ་སུ་ལུན་དྷ་འདིས་ཀུན་ནས་བརྗོད་པ་དང་ལྡན་པའི་ངང་པ་དེ་དག་རྣམས་ཀྱི་བློ་ཡང་རྟོགས་པས་

71-26a

དང་དགེ་བའི་མཐའ་དང་ལྡན་པ་མཆོག་ཏུ་རྒྱ་ཆེ་བའི་བློ་གྲོས་ཅན་གྱི་བྱང་ཆུབ་སེམས་དཔའ་དུས་བཟངས་གཞན་ལ་ཕན་པ་ལ་རབ་ཏུ་ཞུགས་པ་དེ་དང་། བདུད་ཀྱི་ཕྱོགས་སུ་གྱུར་པའི་བག་མེད་པ་དེ་འཁོར་རྒྱགས་པ་དང་སྨྱོ་བ་དང་བཅས་པ་རྣམས་དང་། དེ་དག་རྣམས་ཀྱི་བསམ་པ་རིག་ནས་བཅོམ་ལྡན་འདས་འོད་སྲུང་གིས་གསུངས་པའི་མདོ་འདི་ཡུལ་དང་དུས་སུ་རིགས་པར་བསྟན་ནོ། །དེ་ལ་ཆོས་བཅུ་གཅིག་པོ་རྣམས་ལས་ཆོས་ལྔ་པ་བསྟན་པ་ཡིན་ནོ། །ལྷག་མ་དྲུག་པ་དེ་ཡང་ཡུལ་དང་དུས་སུ་འོས་པར་ངས་བསྟན་པར་བྱ་ཡིས་ཁྱེད་རྣམས་ཡིད་རྩེ་གཅིག་པ་དང་ཡང་དག་པར་ལྡན་པར་གྱིས་ཤིག །གང་གི་ཕྱིར་དལ་འབྱོར་ཕུན་སུམ་ཚོགས་པ་ཐོབ་པར་གྱུར་ནས། གང་དག་ཆོས་སྟོན་པར་མི་བྱེད་པ་དང་གང་ཡང་ཉན་པར་མི་བྱེད་པ་དེ་དག་ནི་ཤིན་ཏུ་མི་ཁོམ་པ་ཐོབ་པ་ཡིན་ནོ། །དེའི་ཕྱིར་ན་ཇི་སྲིད་དུ་དལ་འབྱོར་ཕུན་སུམ་ཚོགས་པ་དང་དབང་པོ་ཀུན་ཚང་བར་གྱུར་པ་དེ་སྲིད་དུ་ཆོས་བསྟན་པར་བྱའོ། །གང་གི་ཕྱིར་ངན་སོང་གི་ས་གསུམ་པོ་དམྱལ་བ་དང་ཡི་དགས་དང་དུད་འགྲོ་རྣམས་ནི་ཤིན་ཏུ་སྡུག་བསྔལ་བའི་ཕྱིར་རོ། །དམྱལ་བ་ནི་ཇི་ལྟར་ཆོས་ཉན་པར་འགྱུར། དེ་བཞིན་དུ་ཡི་དགས་དང་དུད་འགྲོ་རྣམས་ན་ཇི་ལྟར་ཆོས་འདུལ་བ་རྣམས་ཡོད། ཕན་ཚུན་དུ་གསོད་པར་བྱེད་པ་དང་སྐོམ་པ་དང་ལྟོགས་པའི་སྐྱོན་དང་ལྡན་པའི་ཕྱིར་རོ། །ལྷ་དང་མི་རྣམས་ཁོ་ན་ནི་ཆོས་སྒྲོགས་པ་ཡོད་པ་ཡིན་ཏེ། གང་དག་བག་མེད་པ་མ་ཡིན་ཞིང་བག་མེད་པར་རྒྱུ་བ་མ་ཡིན་པ་རྣམས་ཀྱིས་སོ། །དེ་ལ་བདག་གིས་བག་མེད་པ་སྤངས་ལ། ཁྱེད་དད་པའི་མོས་པ་དང་ལྡན་པ་དགེ་བའི་བསམ་པ་ཅན་རྣམས་ཉིད་ལ་ངས་ཆོས་བསྟན་པར་བྱ་ཡིས། དེ་ཁྱེད་རྣམས་ཀྱིས་རབ་ཏུ་གུས་པར་གྱིས་ལ་མཉན་པར་གྱིས་ཤིག །དེ་ལྟར་ཆོས་འདུལ་བ་ནི་ཤིན་ཏུ་དཀོན་པ་དང་དལ་འབྱོར་ཕུན་སུམ་ཚོགས་པ་ཡང་ཤིན་ཏུ་རྙེད་པར་དཀའ་བ་ཡིན་ནོ། །གཞན་ཡང་ཆོས་དྲི་མ་ཅན་མི་གཙང་བ་དང་བཅས་པ་གཞན་རྣམས་སླུ་བར་བྱེད་པ་ཡང་གང་ཞེ་ན། འདི་ལྟ་སྟེ་འདོད་པ་ཆེ་བའོ། །ཆོས་དེ་ཡང་མཆོག་ཏུ་དྲི་མ་ཅན་དུ་གྱུར་པ་འདོད་པ་ཆེ་བས་བྱིན་གྱིས་བརླབས་པ་གང་གིས་གཞོམ་པར་

71-26b

བྱ་ན། འདི་ལྟ་སྟེ་ཆོག་ཤེས་པས་སོ། །འདོད་པ་ཆེ་བ་ཞེས་བྱ་བ་ནི་ཁྱིམ་པ་རྣམས་དང་རབ་ཏུ་བྱུང་བ་རྣམས་ཀྱང་བདེ་བར་རྒྱུ་བ་མ་ཡིན་ཏེ། གང་གི་ཕྱིར་འདོད་པ་ཆེ་བར་གྱུར་པ་རྣམས་ནི་ཁྱིམ་པའམ་རབ་ཏུ་བྱུང་བ་ཡང་རུང་སྟེ། ཉིན་མོ་དང་མཚན་མོར་ཡང་དེ་དག་རྣམས་བདེ་བར་མི་འགྱུར་རོ། །རྫས་རྣམས་ཐོབ་པར་གྱུར་པས་ཀྱང་ཞི་བ་ཐོབ་པར་མི་འགྱུར་རོ། །ནོར་གང་རྙེད་པར་གྱུར་ཡང་དེས་མཐར་ཐུག་པའི་ཚིམ་པ་འབྱུང་བར་མི་འགྱུར་རོ། །འདོད་པ་ཆེ་བར་གྱུར་པ་དེ་ཡང་ཁྱིམ་གྱི་གནས་ནས་ངེས་པར་འབྱུང་བའི་རབ་ཏུ་བྱུང་བ་རྣམས་ལ་ཇི་ལྟ་བར། དེ་ལྟར་ཁྱིམ་པ་རྣམས་ཀྱི་བར་ཆད་བྱེད་པར་ནི་མི་འགྱུར་རོ། །གང་གི་ཕྱིར་རབ་ཏུ་བྱུང་བ་འདོད་པ་ཆེ་བར་གྱུར་པ་གང་ཡིན་པ་དེ་ནི་ཁྱིམ་པ་ཡིན་གྱི་རབ་ཏུ་བྱུང་བ་ནི་མ་ཡིན་ནོ། །རབ་ཏུ་བྱུང་བ་ཞེས་བྱ་བ་ནི་རྒྱགས་པ་དང་ང་རྒྱལ་དང་འགྱིང་བ་དང་རྨོངས་པ་དང་ཕྲག་དོག་རྣམས་བཅོམ་པ་དང་འདོད་པ་ཆེ་བ་དང་ཡང་རྣམ་པར་བྲལ་བ་ཡིན་ནོ། །སྤྱིར་སྐྱོན་དེ་དག་རྣམས་ཉིད་ལས་ཀྱང་དགེ་སློང་འདོད་པ་ཆེ་བའི་མིང་ཅན་རྣམས་ལ་ནི་གཞན་ཐམས་ཅད་འཕྱ་བར་འགྱུར་རོ། །གང་ཡང་འདོད་པ་ཆེ་བའི་བློ་ཅན་གྱི་དགེ་སློང་ནི། རྟག་ཏུ་བློ་ནོར་ལ་སོང་བར་གྱུར་པས་ཉིན་མཚན་མེད་པར་དེའི་སེམས་དགེ་བའི་ཆོས་རྣམས་ལ་ལེགས་པར་རབ་ཏུ་དང་བར་མི་འགྱུར་རོ། །དེའི་བློ་རབ་ཏུ་མ་དང་བ་དང་དབང་པོ་རབ་ཏུ་མ་དང་བ་དང་བྱ་བ་རྣམས་རབ་ཏུ་མ་དང་བ་གང་ཡིན་པའི་གོམ་པ་འབོར་བར་གྱུར་པའམ་དགེ་འདུན་གྱི་ས་ལ་འཆག་པར་བྱེད་ཀྱང་དེར་དམྱལ་བར་ཉེ་བར་འགྱུར་ན། གནས་མལ་དང་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ནི་དང་པོ་ཁོ་ནར་བར་ཆད་བྱེད་པ་འབྱུང་བར་འགྱུར་བ་ཡིན་ནོ། །དེ་དམྱལ་བ་འབའ་ཞིག་ཏུ་འཚེད་པར་བྱེད་དེ། གང་ཚུལ་ཁྲིམས་འཆལ་བར་གྱུར་པ་འདོད་པ་ཆེ་བ་སྡིག་པའི་ཆོས་ཅན། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེས་པ། སེང་གེའི་པགས་པ་ཀུན་ནས་གྱོན་པའི་ཅེ་སྤྱང་སྒྱུ་མའི་ཟོང་དང་མཚུངས་པ། དུང་གི་སྒྲ་དང་མཚུངས་པར་སྤྱོད་པ་མཆོག་ཏུ་སྟོང་པ་ཤིན་ཏུ་སླུ་བ་ཤིན་ཏུ་ཆད་པར་གྱུར་པ་ཡིན་ནོ། །གང་འགའ་ཞིག་འདོད་པ་ཆེ་བར་གྱུར་པ་ཇི་ལྟར་ང་ནི་

71-27a

དགེ་སློང་ཡིན་ཏེ་འོད་སྲུང་བ་ཡིན་ནོ། །འོད་སྲུང་གི་ཆོས་འདུལ་བ་ལ་རབ་ཏུ་བྱུང་བ་ཡིན་ནོ་ཞེས་དེ་ལྟར་དམ་འཆའ་བརྗོད་པར་བྱེད་པ་ན། འདོད་པ་ཆེ་བར་གྱུར་པ་དེ་ལྟར་མེས་ནི་མི་སྲེག་གོ། །ཇི་ལྟར་འདོད་པ་ཆེ་བས་བློ་གྲོས་ཆུང་བ་རྣམས་ན་བར་བྱེད་པ་དེ་ལྟར་དུག་གིས་ལྷང་ཀྱོག་མི་བྱེད་དོ། །ཇི་ལྟར་འདོད་པ་ཆེ་བའི་རྒས་པས་རྒས་པར་བྱེད་པ་དེ་ལྟར་རྒ་བས་རྒས་པར་མི་བྱེད་དོ། །ཇི་ལྟར་དགེ་བའི་ལྗོན་ཤིང་རྣམས་འདོད་པ་ཆེ་བའི་མཚོན་གྱིས་རྩ་བ་ནས་གཅོད་པར་བྱེད་པ་དེ་ལྟར་མཚོན་གྱིས་ནི་རྩ་བ་ནས་མི་གཅོད་དོ། །ཇི་ལྟར་འདོད་པ་ཆེ་བའི་ནད་རྣམས་ཀྱིས་ཉེ་བར་འཇོམས་པར་བྱེད་པ་དེ་ལྟར་ནད་རྣམས་ཀྱིས་ནི་ཉེ་བར་འཇོམས་པར་མི་བྱེད་དོ། །ཇི་ལྟར་འདོད་པ་ཆེ་བའི་དགྲས་ནང་དུ་གསེབ་ཏུ་ཉེ་བར་སོང་ནས་སྙིང་ལ་ཀུན་ཏུ་གནས་ཏེ་སྲོག་འཇིག་པར་བྱེད་པ་དེ་ལྟར་དགྲ་བོ་གླགས་ཚོལ་བ་རྣམས་ནང་གི་གསེབ་ཏུ་ཞུགས་ཏེ། རྟག་ཏུ་ཉེ་བར་གླགས་སྐབས་ཚོལ་བ་རྣམས་ཀྱང་སྲོག་གཅོད་པར་མི་བྱེད་དོ། །དེའི་ཕྱིར་སྐྱོན་དེ་དག་རྟོགས་པར་གྱིས་ལ་གཉིས་འཇིག་པར་བྱེད་པའི་སྐྱོན་ཅན་དགེ་སློང་འདོད་པ་ཆེ་བ་རྣམས་ཀྱིས་འཇིག་རྟེན་གཉི་ག་འཇིག་པར་བྱེད་པ་དང་། དྲི་མ་རྣམས་དང་ལྡན་པ་དང་སྡིག་པའི་རྩེ་མོར་གྱུར་པ་ཡིན་པས་རྣམ་པར་སྤང་བར་གྱིས་ཤིག །དེ་སྤྱད་པར་གྱུར་པ་ན་ཡང་ཉིན་མོའམ་མཚན་མོ་ཡང་རུང་སྟེ་འགའ་ཞིག་ཀྱང་བདེ་བར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་དེས་བཅོམ་ལྡན་འདས་འོད་སྲུང་གིས་གསུངས་པའི་ཚིགས་སུ་བཅད་པར་བརྗོད་པ། ཇི་ལྟར། འདོད་པ་ཆེ་བའི་མཚོན་ཆེན་ནི། །གང་གིས་གཏུབ་པ་བྱིས་པ་རྣམས། །དེ་ཕྱིར་མཚོན་ཆ་བཞིན་དེ་སྤོངས། །མིག་མེད་པ་ནི་དེས་བཅིངས་ནས། །འདོད་ཆེན་རྨ་ནི་མི་བཟད་པ། །གང་གི་སྙིང་ལ་སྐྱེ་བར་འགྱུར། །ཉིན་དང་མཚན་མོ་མེད་པར་ཡང་། །འདོད་ལྡན་དེ་ནི་བདེར་མི་འགྱུར། །ཀུན་རྟོག་བུད་ཤིང་ལས་བྱུང་བའི། །སྲེད་པའི་རླུང་གིས་ཀུན་ཏུ་སྤར། །འདོད་ཆེན་རང་བཞིན་མེ་ཡིས་ནི། །མི་རྣམས་སྙིང་ནི་སྲེག་པར་བྱེད། །འདོད་པ་ཡིས་ནི་བསྐོར་བའི་ཡིད། །སེམས་ནི་ཡང་མོའི་

71-27b

སྐྱེས་བུ་ནི། །ནོར་ལ་སྲེད་པར་གྱུར་པ་ཡིས། །གསོན་པའི་སྙིང་པོ་འཇོམས་པར་བྱེད། །གང་ཡང་སྡིག་པའི་ལས་རྣམས་ནི། །སྐྱེས་བུ་ཐ་ཤལ་གྱིས་བྱེད་དོ། །དེ་ཀུན་ནོར་སྲེད་ལས་ཡིན་པར། །མཁས་པས་རབ་ཏུ་བརྗོད་པ་ཡིན། །འབར་བ་གང་དུ་རྣམ་པར་འཇུག །གང་གིས་མི་རིགས་པར་བྱེད་པ། །དེ་ཀུན་འདོད་པའི་སྐྱོན་གྱིས་ནི། །བདག་ལ་ཕན་མིན་བྱེད་པ་ཡིན། །འཁྲུག་པ་རྣམ་པ་སྣ་ཚོགས་དང་། །མཚོན་ཆའི་སྡུག་བསྔལ་ཤིན་ཏུ་ཡང་། །བསྟེན་པའི་སྐྱེས་བུ་རྨོངས་པ་གང་། །དེ་ཡི་རྒྱུ་ཡང་འདི་ཡིན་ནོ། །འདོད་པའི་སྐྱོན་ལས་ཀུན་བྱུང་བའི། །ཉེར་འཚེ་འདི་དག་གོ་བར་གྱིས། །དེ་བསྟེན་ཕན་པ་བྱེད་མིན་པར། །ལམ་རིག་པས་ནི་ཡོངས་སུ་གསུངས། །དེ་ལྟར་མུ་སུ་ལུན་དྷ་དེས་སྨྲ་བ་པོའི་ངང་པ་དེ་དག་དང་ངང་པའི་རྒྱལ་པོ་དུས་བཟངས་དེ་དང་བག་མེད་པས་མགོ་དྲངས་པའི་བདུད་ཀྱི་རིགས་སུ་གྱུར་པ་གསུམ་པོ་རྒྱགས་པ་དང་སྨྱོ་བ་དང་དེ་དག་རྣམས་ལ་བཤད་དོ། །རྣམ་པ་དེ་ལྟ་བུའི་སྐྱོན་ཆེན་པོ་རྣམས་དགེ་བའི་ཆོས་གང་དག་གིས་རབ་ཏུ་གཞོམ་པར་བྱ་བ་ཡིན་ན། འདི་ལྟ་སྟེ་འདོད་པ་ཆུང་བ་ཞེས་བྱ་བས་སོ། །འདོད་པ་ཆུང་བ་ཞེས་བྱ་བ་ནི་འདི་ལྟ་སྟེ། བདེ་བ་རྣམས་ཐམས་ཅད་འབྱུང་བའོ། །དེ་གང་ལ་ཡོད་པའི་སྐྱེས་བུ་དེ་ནི་རྟག་ཏུ་བདེ་བའི་མཆོག་རྣམས་དང་ལྡན་པ་ཡིན་ལ། དེ་ལ་མེ་དང་རྒྱལ་པོ་དང་ཆོམ་རྐུན་དང་ཆུ་ལ་སོགས་པ་རྣམས་ཀྱི་འཇིགས་པ་མེད་དོ། །འདི་ནོར་གྱི་སྲེད་པ་རྣམས་ཀྱིས་རྣམ་པར་བསྲེགས་ནས་ཁྱིམ་ནས་ཁྱིམ་དག་ཏུ་བསྟེན་པར་བྱ་བའི་དོན་དུ་སྨྲ་བར་མི་བྱེད་དོ། །བསྟེན་གྲོགས་རྣམས་ནི་རྐུན་མའི་བསྟེན་གྲོགས་ཡིན་ནོ། །དམན་པའི་གནས་རྣམས་ཀྱི་ཁྱིམ་སྒོར་གནས་པ་ཡང་མ་ཡིན་ནོ། །རྫུན་གྱིས་བསྟེན་གྲོགས་ཀྱི་ཚིག་དག་ཀྱང་སྨྲ་བར་མི་བྱེད་དོ། །གར་དང་རྒོད་པ་དང་འགྱིང་བག་རྣམས་ཞབས་འབྲིང་གི་དོན་དུ་བྱེད་པ་ཡང་མ་ཡིན་ནོ། །ཚིག་རྣམས་སྨྲ་བར་མི་བྱེད་ཅིང་དོན་དག་ཀྱང་མི་བྱེད་དོ། །ནོར་གྱི་འདོད་པའི་མེ་རྣམས་ཀྱིས་མི་སྲེག་གོ། །གཞན་དག་དང་མཉམ་དུ་འགྲོགས་པ་ལ་སྤྲོ་བར་གྱུར་པ་རྣམས་ཀྱི་དབུགས་འབྱིན་པ་མེད་པའི་སྡུག་བསྔལ་མང་པོར་མི་འགྱུར་

71-28a

རོ། །ནོར་གྱི་འདོད་པས་སྡིག་པའི་གྲོགས་པོ་རྣམས་སྟེན་པར་མི་བྱེད་དོ། །རྟག་ཏུ་དོགས་པ་དང་བཅས་པར་མི་འགྱུར་ཞིང་ལམ་དུ་འགྲོ་བར་གྱུར་པ་ན་ཆོམ་རྐུན་པའི་འཇིགས་པ་མེད་དོ། །གྲོགས་པོ་མ་ཡིན་པ་རྣམས་མང་བར་མི་འགྱུར་ཞིང་། སྐྱེ་བོ་རྣམས་ཐམས་ཅད་ཀྱིས་རྟོག་དཔྱོད་བྱེད་པར་མི་འགྱུར་རོ། །ཆད་པའི་འཇིགས་པས་ཀྱང་རྣམ་པར་མི་འཇིགས་སོ། །དེ་ལྟར་ཁྱིམ་པར་གྱུར་ཀྱང་འཇིགས་པ་རྣམས་མེད་པར་འགྱུར་རོ། །སྐྱོན་གྱི་འཇིགས་པ་རྣམས་ཀུན་ཏུ་འགགས་པ་དང་ཐམས་ཅད་དུ་སོ་གསོད་པར་གནས་པ་དང་གང་ཡང་ཁྱིམ་པ་རྣམས་ཀྱང་སྐྱོན་ལས་ཀུན་ཏུ་རྒལ་བ་ཡིན་ན་ནགས་ན་གནས་པ་རྣམས་ལ་ལྟ་ཅི་སྨོས། དེ་ཉིད་སླར་ཡང་འདོད་པ་ཆེ་བར་བྱེད་ན་ནི་དེ་སྐྱུགས་པ་ཟ་བ་དང་མཚུངས་པར་འགྱུར་རོ། །དགེ་སྦྱོང་གི་མཆོད་པའི་མཆོག་རྣམས་ནི་འདི་ལྟ་སྟེ། འདོད་པ་ཆུང་བ་ཞེས་བྱ་བ་ཡིན་ནོ། །འདོད་པ་ཆུང་ཞིང་ཆོག་ཤེས་པའི་དགེ་སློང་རྣམས་ནི་གང་གི་ཕྱིར་ཤིན་ཏུ་ཡང་མཛེས་ཤིང་གསལ་ལ་རྣམ་པར་སྣང་ངོ་། །གདན་གཅིག་པ་འབའ་ཞིག་དང་། ཕྱག་དར་ཁྲོད་པ་འབའ་ཞིག་དང་། གཅིག་པུ་ཁོ་ན་རྒྱུ་བ་དང་། རིའི་ཁྲོད་དང་ཕུག་དག་དང་རྩྭའི་ཕུང་པོ་དང་། དུར་ཁྲོད་འབའ་ཞིག་དུ་གནས་པ་དང་། གསུས་པའི་སུམ་ཆ་འབའ་ཞིག་གིས་ཆོག་ཤེས་པ་དང་། སུ་ཡང་མི་ཤེས་པ་འབའ་ཞིག་གིས་ཡུལ་ལྗོངས་རྒྱུ་བར་བྱེད་པ་དང་། གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་ཡང་བསོད་སྙོམས་འབའ་ཞིག་པ་དང་། ལྷུང་བཟེད་གོག་པོ་ཅིག་འབའ་ཞིག་འཆང་བར་བྱེད་པ་དང་། ཤེས་རབ་ཀྱིས་ཕྱིན་ཅི་ལོག་འབའ་ཞིག་ཡོངས་སུ་སྤོང་བར་བྱེད་པ་དང་། ཡུལ་གང་ན་མཆོད་པར་བྱེད་པའི་ཡུལ་དེ་ཡོངས་སུ་སྤོང་བར་བྱེད་པ་དང་། ལམ་འབའ་ཞིག་ལ་ལེགས་པར་ལྟ་བ་དང་། གཉའ་ཤིང་གང་ཙམ་དུ་ལྟ་བ་དང་། གཞན་དུ་མིག་མི་གཡེང་བ་དང་། རོ་ཞིམ་པོ་འབའ་ཞིག་ཟ་བ་ལ་སྟེན་པ་སྤོང་བ་དང་། ཆུ་ཞག་དུ་མ་བསྒྲངས་པ་འབའ་ཞིག་གི་བཏུང་བ་འཐུང་བ་དང་། ཡུལ་ལྗོངས་དང་གྲོང་དག་ཏུ་ཞག་གསུམ་དང་ཞག་བདུན་འབའ་ཞིག་གནས་པར་བྱེད་པ་དང་། གསེར་དང་འཁར་བ་དང་དངུལ་

71-28b

གྱིས་མཛེས་པར་བྱས་པའི་ཉལ་ཁྲི་འཛིན་པར་མི་བྱེད་པ་ཁོ་ན་དང་། སྔོན་གྱི་ཁྱིམ་དང་གྲོགས་པོ་དང་གཉེན་བཤེས་ཀྱི་ལམ་ཀུན་ཏུ་ལྟ་བར་བྱེད་པ་སྤོང་བར་བྱེད་པ་འབའ་ཞིག་དང་། མཆོག་ཏུ་གྱུར་པའི་རྒྱལ་པོའི་བསོད་སྙོམས་དང་མལ་སྟན་དང་རྒྱལ་པོའི་སྒོར་སྟེན་པར་བྱེད་པ་རྣམས་སྤོང་བ་ཁོ་ནར་སྤྱོད་པ་དང་། རིགས་ཀྱིས་ཆོག་ལས་རབ་ཏུ་བྱུང་བར་ཀུན་ནས་སྒྲོགས་པ་རྣམས་སྤོང་བ་ཁོ་ནར་བྱེད་པ་དང་། དེ་དང་རང་བཞིན་མཚུངས་པ་འབའ་ཞིག་དང་བརྗོད་པ་དང་གསོང་གསལ་དང་ཀུན་རྗོད་པར་བྱེད་པ་ཡིན་ནོ། །རྣམ་པ་དེ་ལྟ་བུར་གྱུར་པའི་དགེ་སློང་གི་སྡོམ་པ་དང་དཀའ་ཐུབ་ནི་རྙོག་པ་རྣམ་པར་སྤངས་པ་མཆོག་ཏུ་ཆོག་ཤེས་པ། མཆོག་ཏུ་འདོད་པ་ཆུང་བས་ནི་བདུད་ཀྱི་འཆིང་བ་རྣམས་གཅོད་པར་ནུས་སོ། །འདོད་པ་ཆེ་བ་རྣམས་ནི་སྡུག་བསྔལ་གྱི་ཚུལ་ཁྲིམས་དང་ལྡན་པ་དགེ་སློང་གི་ཆ་བྱད་འཛིན་པ་ནད་དང་འདྲ་བ་རྐུན་མ་ཡིན་ཏེ། ལྷ་དང་བཅས་པའི་མིའི་ཚོགས་ཀྱི་སྐྱེ་དགུ་རྣམས་ཉེ་བར་མགུ་བར་མི་བྱེད་པའི་སྡིག་པ་ཅན་ཡིན་ནོ། །དགེ་སློང་རྣམས་ཀྱང་ཆོག་ཤེས་པ་དང་ལྡན་པ་དང་འདོད་པ་ཆུང་བའི་དགེ་སློང་ནི་དགེ་སློང་ཡིན་ནོ། །སྒྲ་དང་རེག་བྱ་དང་རོ་དང་གཟུགས་དང་དྲི་དང་ཡུལ་རྣམས་ལ་དེའི་དབང་པོ་རྣམས་རྒྱུ་བར་མི་བྱེད་དོ། །ཕྱི་ཁྱམས་དག་ཏུ་ཉལ་བ་དང་སེམས་ཅན་ཐམས་ཅད་ལ་ཕན་པར་གནས་པའི་ལུས་དང་ཆོས་དང་ཚོར་བ་དང་སེམས་རྣམས་ལ་དྲན་པ་ཉེ་བར་གཞག་པ་རྗེས་སུ་རྟོགས་པ་དང་། ཀུན་ནས་མཆོག་ཏུ་བློ་རྣམ་པར་བསྡུས་པ་དང་། འཁོར་བའི་ཚོགས་རྣམས་ལས་དབང་པོ་གཅིག་ཏུ་བསྡམས་པ་དང་། ཆོག་ཤེས་པ་ནི་དགེ་སློང་དུ་བརྗོད་པ་ཡིན་ཏེ། ཇི་སྲིད་དུ་འདོད་པ་ཆུང་བར་གྱུར་པ་དེ་དག་རྣམས་ནི་ཁྱིམ་པའམ་རབ་ཏུ་བྱུང་བ་ཡིན་ཡང་རུང་སྟེ་བག་མེད་པར་མི་འགྱུར་རོ། །དེ་ནས་དེའི་ཚེ་ན་འཐབ་བྲལ་གྱི་བདག་པོ་དེས་ཚིགས་སུ་བཅད་པའི་དབྱངས་བརྗོད་པ། ཇི་ལྟར། བག་ཡོད་འབྲས་བུ་ཐར་པ་ཡིན། །དམྱལ་བར་མི་རྣམས་བག་མེད་པས། །བག་ཡོད་བག་མེད་པ་དག་གི། །འདིས་ནི་ཁྱད་པར་བརྗོད་པ་ཡིན། །གང་ཡང་བཅིངས་དང་ཐར་པ་ཡི། །ཁྱད་པར་གང་ནི་ཟླ་དང་མུན། །བག་ཡོད་བག་

71-29a

མེད་དེ་དག་གི། །ཁྱད་པར་འདི་ཉིད་ཁོ་ན་ཡིན། །བདེ་བ་འདོད་པ་ཆུང་ལ་མཐོང་། །སྡུག་བསྔལ་འདོད་ཆེན་མི་རྣམས་ཡིན། །བདེ་སྡུག་མཚན་ཉིད་འདི་ཡིན་པར། །ཡོངས་སུ་རྟོག་པར་བྱེད་པས་བཤད། །རྟག་ཏུ་འདོད་ཆེན་མི་རྣམས་ཀྱི། །མེ་ནི་སྙིང་གནས་རང་བཞིན་ཡིན། །གང་དུ་འདོད་མེད་ཁྲུས་བྱེད་པའི། །འདོད་པ་ཆུང་བ་བསིལ་བའི་མཚོ། །ཇི་ལྟར་མེ་ནི་བུད་ཤིང་གིས། །རབ་ཏུ་ཞི་བར་འགྱུར་མ་ཡིན། །དེ་བཞིན་འདོད་ཆེན་མི་རྣམས་ནི། །ནོར་གྱིས་གང་བར་འགྱུར་མ་ཡིན། །འདོད་པ་ཅན་ལ་ཉིན་དང་ནི། །མཚན་མོ་མེད་པར་བདེ་མི་འགྱུར། །སྐྱེས་བུ་འདོད་པ་ཆེ་བ་གང་། །སྲེད་པའི་ཟུག་རྔུས་རྣམ་པར་གནས། །རྒྱལ་པོ་ནོར་གྱིས་ངོམས་མེད་པར། །བྱེ་བ་ཕྲག་ཏུ་ཤི་ཞིང་སོང་། །གཞན་ཡང་མང་པོར་འགྲོ་བར་འགྱུར། །དེ་ཕྱིར་འདོད་པ་ཆུང་བ་བདེ། །དེ་ལྟར་འཐབ་བྲལ་གྱི་མངའ་བདག་དེ་པད་མའི་སྙིང་པོ་ལ་ལེགས་པར་གནས་ཏེ། །དུས་བཟངས་དེ་དང་སྨྲ་བ་པོའི་ངང་པ་དེ་དག་རྣམས་ལ་འཆད་པར་བྱེད་དོ། །གཞན་ཡང་འཐབ་བྲལ་གྱི་བདག་པོ་དེ་ཉིད་ཀྱིས་བག་མེད་པ་དེའི་སྐྱོན་རྣམས་གཟུང་བར་བྱ་བའི་དོན་དུ་སྨྲ་བ་པོའི་བྱ་དེ་དག་རྣམས་ཀྱི་མདུན་དུ་དང་དུས་བཟངས་དེའི་སྔོན་དུ་ཡང་། བཅོམ་ལྡན་འདས་འོད་སྲུང་གིས་གསུངས་པའི་མདོ་སྔོན་གྱི་ལྷའི་དྲུང་ནས་ཐོས་པ་རྣམས་འཆད་པ་ནི་ཇི་ལྟར་ཆོས་དྲི་མ་ཅན་རྣམས་བསྟན་པ་གང་ཡིན་པ་དེ་ནི་དཀར་པོའི་ཆོས་རྣམས་ཀྱིས་རབ་ཏུ་གཞོམ་པར་བྱའོ། །དེ་ལ་དྲི་མ་ཅན་གྱི་ཆོས་བདུན་པ་བསྟན་པར་བྱ་བ་རྣམས་དང་། དཀར་པོའི་ཆོས་རྣམས་ཀྱིས་གཞོམ་པར་བྱ་བ་དང་། འདི་དག་ཀྱང་གང་དག་ཞེ་ན། འདི་ལྟ་སྟེ་གཉེན་བཤེས་བལྟ་བ་ལ་མངོན་པར་དགའ་བ་ནི་བྱེས་སུ་ཡུན་རིང་པོར་གནས་པས་སོ། །དེ་ལྟར་ཡང་གཉེན་བཤེས་དང་གྲོགས་པོ་དང་། རང་གི་སྐྱེ་བོ་རྣམས་དང་ཕྲད་པ་ལ་མངོན་པར་དགའ་བའི་དགེ་སློང་ནི། བློ་དེ་ལ་སོང་བར་གྱུར་པ་དང་དེ་རྗེས་སུ་སྒྲུབ་པར་བྱེད་པ་དང་དེ་ལས་རབ་ཏུ་འབྱམས་པར་གྱུར་པ་དང་དེས་བྲེལ་དོག་ཏུ་གྱུར་ནས། ཉིན་མོ་དང་མཚན་མོ་མེད་པར་ཡང་བསམ་གཏན་བློ་ལ་བྱེད་པ་ཡང་མ་ཡིན་ནོ།

71-29b

ཁ་ཏོན་ཡང་མི་བྱེད་ཅིང་བླ་མ་ལ་ལེགས་པར་བསྟེན་པའི་དབང་གིས་གནས་པ་ཡང་མ་ཡིན་ནོ། །དཀོན་མཆོག་གསུམ་ལ་མཆོད་པ་རྗེས་སུ་སྒྲུབ་པར་མི་བྱེད་དོ། །འཇིག་རྟེན་ཕ་རོལ་གྱི་ལུས་ཀྱི་ལས་སུ་བྱ་བ་རྣམས་རྗེས་སུ་དྲན་པར་བྱེད་པ་དང་གཞན་ལ་སྟོན་པ་དང་། ངག་གི་ལས་དང་ཡིད་ཀྱི་ལས་དང་རྣམ་པ་གསུམ་བྱེད་པ་མ་ཡིན་གྱི། བློ་དེ་ལ་སོང་བ་འབའ་ཞིག་ཏུ་ཟད་དོ། །ཇི་ལྟ་བ་བཞིན་དུ་ང་དང་ངའི་གཉེན་བཤེས་རྣམས་དང་གྲོགས་པོ་དང་རང་གི་སྐྱེ་བོ་རྣམས་མ་མཐོང་ན། དེ་དག་རྣམས་ཀྱི་ཁྱིམ་གྱི་བྱ་བ་ནི་ཅི་དང་ཅི་ལྟར་གྱུར་རམ་ཡང་དེ་དག་གི་གསོན་པ་རྣམས་ཀྱང་ཇི་ལྟར་གྱུར་རམ་ཞེས། དེ་དེ་ལྟར་ཡིད་ལ་བྱས་ནས་མྱ་ངན་གྱིས་གཟིར་བར་འགྱུར་ཏེ། གང་གི་དོན་དུ་དེ་ལྟ་བུ་རྣམས་ལས་ངེས་པར་གྲོལ་བར་བྱ་བའི་དོན་དུ་ནགས་སུ་གནས་པར་གྱུར་པ་ལས་དེ་ཉིད་ལ་རྗེས་སུ་འཇུག་པར་བྱེད་དོ། །བློ་གྲོས་ངན་པར་གྱུར་པ་མི་གཡོ་བའི་མི་མྱ་ངན་ཅན་སྐྱེ་བ་དང་རྒ་བ་དང་། ན་བ་དང་འཆི་བས་བྱས་པའི་རང་གི་མྱ་ངན་རྣམས་ཡོངས་སུ་བཏང་ནས། གཞན་གྱི་མྱ་ངན་གྱིས་མྱ་ངན་དུ་བྱེད་པ་དང་། དེ་མི་མཉམ་པ་དང་མཉམ་པའི་རང་གི་སྐྱེ་བོ་རྣམས་དང་གཉེན་བཤེས་རྣམས་དང་ཕྲད་པའི་དྲ་བ་འདིར་ངེས་པར་འཇུག་པར་བྱེད་དོ། །དེ་ནས་ཡང་དེས་གཉེན་བཤེས་དེ་རྣམས་མངོན་པར་མཐོང་ནས་གདུང་བས་གདུངས་ཤིང་གཞན་གྱི་ཟས་བསོད་པ་རྣམས་ཟ་བས། ཁྱིམ་ནས་ཁྱིམ་རྣམས་སུ་ཕེའུ་འདེབས་པའི་སྟོན་མོ་རྣམས་ལ་མངོན་པར་དགའ་བར་འགྱུར་རོ། །ཁྱིམ་དེ་དང་འབྲེལ་པར་གྱུར་པའི་དོན་དག་ནི་བྱེད་ལ་ཉན་པར་ཡང་བྱེད་དོ། །དེས་དེ་དག་རྣམས་ཡིད་ལ་བྱས་ནས་དེ་དག་རྣམས་ལས་གཞན་ཡང་བྱེད་དོ། །དེ་ཁྱིམ་གྱི་འཚོ་ཆིས་རྣམས་བྱེད་པས་རང་གི་དོན་རྣམས་ལས་ཡོངས་སུ་ཉམས་པར་འགྱུར་རོ། །འཇིག་རྟེན་ཕ་རོལ་ཏུ་གྱུར་པ་རྣམས་ཀྱི་འཇིགས་པ་དག་སེམས་པར་མི་བྱེད་དོ། །དམྱལ་བ་དང་ཡི་དགས་དང་དུད་འགྲོའི་འགྲོ་བ་པ་རྣམས་སུ་འཆི་འཕོ་བ་དང་སྐྱེ་བ་རྣམས་སེམས་པར་མི་བྱེད་དོ། །འདིའི་འཇིགས་པ་རྣམས་ཀྱང་སེམས་པར་མི་བྱེད་དེ། རྒ་བ་དང་ན་བ་དང་འཆི་

71-30a

བ་དང་སྡུག་པ་རྣམས་དང་བྲལ་བ་དང་མི་སྡུག་པ་རྣམས་དང་ཕྲད་པ་དང་། སྡུག་པ་དང་ཡིད་དུ་འོང་བ་རྣམས་ཐམས་ཅད་ཀྱང་ཐ་དད་དུ་འགྱུར་བ་མེད་པར་འགྱུར་བ་རྣམ་པར་འབྲལ་བ་སོ་སོར་གནས་པ་རྣམས་སེམས་པར་མི་བྱེད་དོ། །དེ་སྲིད་པ་དེ་སྲིད་དུ་གཉེན་དང་གྲོགས་པོ་རྣམས་ཀུན་ཏུ་སྟེན་པར་བྱེད་དོ། །གཉེན་བཤེས་དང་གྲོགས་པོ་རྣམས་ལྟ་བར་བྱེད་པ་མངོན་པར་འདོད་པ་འཐུན་པར་བྱེད་པ་གཞན་གྱི་ཟས་ཟ་བ་གཞན་གྱི་ཁྱིམ་སྒོ་སྟོན་པར་བྱེད་པ་གང་ཡིན་པ་རྣམས་ནི་ལུས་ཞིག་ནས། ངན་སོང་དང་ངན་འགྲོ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །ཡི་དགས་ཀྱི་ཡུལ་རྣམས་དང་དུད་འགྲོའི་སྐྱེ་གནས་རྣམས་སུ་ཡང་ངལ་དུབ་དང་བཅས་པའི་འགྲོས་བླ་ལྷག་པར་གྱུར་པས་དེ་སྲིད་དུ་ཡོངས་སུ་འཁྱམ་མོ། །དམྱལ་བ་རྣམས་སུ་སྐྱེས་པ་ན་ཡང་ཚོར་བ་དྲག་པོ་རྣམས་ཀྱིས་ཟིལ་གྱིས་མནན་པ་རྣམས་ལ་གྲོགས་པོས་མ་ཡིན་ཞིང་གཉེན་བཤེས་རྣམས་ཀྱིས་ཀྱང་བསིལ་བར་གྱུར་པའི་དངོས་པོ་རྣམས་ནི་ཅུང་ཟད་ཀྱང་མི་བྱེད་དོ། །དེའི་ཕྱིར་ན་དགེ་སློང་རྣམས་ཐམས་ཅད་ཀྱིས་ཚུལ་རྣམས་ཐམས་ཅད་ནས་དམྱལ་བ་དང་ཡི་དགས་དང་དུད་འགྲོའི་འགྲོ་བ་པའི་འཇིགས་པས་འཇིགས་པ་རྣམས་ཀྱིས་ཀྱང་གཉེན་བཤེས་དང་གྲོགས་པོ་རྣམས་དང་ཕྲད་པར་འདོད་པར་མི་བྱའོ། །དེ་དག་རྣམས་དང་འདུ་འཚོག་བྱས་པས་ཀྱང་ནི་དོན་མ་ཡིན་པ་དྲག་པོ་རྣམས་བྱེད་པར་འགྱུར་རོ། །དེ་ལ་དམིགས་པར་བྱེད་པ་དང་། དོན་དེས་ཀྱང་གང་གི་ཕྱིར་སྲེད་པ་རྣམས་ཟད་པར་བྱ་བའི་དོན་དུ་རབ་ཏུ་བྱུང་བ་ལས་སྲེད་པ་དེ་ཉིད་ལ་སྲེད་པས་སྟེན་པར་བྱེད་པ་ན། དེ་ནི་མཆོག་ཏུ་ཡང་བྱིས་པར་གྱུར་པ་རྣམས་ཀྱིས་བསྟེན་པ་ཡིན་ནོ། །གང་དག་ཁོ་ན་བཅོམ་ནས་རབ་ཏུ་བྱུང་བ་ཡང་དྲ་བ་དེ་ཉིད་དུ་བློ་འཇུག་པ་ནི་བློ་གྲོས་དམན་པ་ཡིན་ཏེ། ཡང་འགའ་ཞིག་ཇི་ལྟར་མེའི་འཇིགས་པ་སྤངས་པ་ལས་མེ་དེ་ཉིད་དུ་ཉེ་བར་སྟེན་པར་བྱེད་དོ། །དེ་བཞིན་དུ་ཁྱིམ་གྱི་གནས་རྣམས་འཇིགས་ནས་སྤངས་པ་ཡང་འཇིགས་པ་དེ་ཉིད་དུ་ཉེ་བར་འཇུག་པར་བྱེད་དོ། །དེ་བཞིན་དུ་གང་འགའ་ཞིག་གཉེན་བཤེས་རྣམས་ཀྱི་ཀླུང་ཆེན་

71-30b

པོར་ཉེ་བར་འགྲོ་ཞིང་། སླར་ཡང་དེ་དག་རྣམས་ཉིད་ལ་ཉེ་བར་སྟེན་པར་བྱེད་པ་དེ་དག་རྣམས་ནི་མིག་མེད་པ་དང་བློ་གྲོས་བཀབ་པ་དང་དབང་པོ་རྣམས་ཀུན་ནས་མ་བསྡམས་པ་ཡིན་ནོ། །དེ་ལྟར་ཀུན་ནས་ཉོན་མོངས་པ་ཅན་གྱི་ཆོས་འདི་དག་ཆོས་གང་གིས་རབ་ཏུ་གཞོམ་པར་བྱ་ན། འདི་ལྟ་སྟེ་གང་ཤེས་རབ་ཅན་རྣམས་ཀྱིས་ཀྱང་སྤང་བ་དང་གཟུང་བར་ཡང་ནུས་པ་མ་ཡིན་ཏེ། དེ་ཡུན་རིང་དུ་བྱེས་ན་གནས་པ་ལ་མངོན་པར་དགའ་བ་རྣམས་ཀྱིས་ནི་རབ་ཏུ་གཞོམ་པ་དང་གཟུང་བར་ཡང་ནུས་པ་ཡིན་ནོ། །རིང་དུ་འགྲོ་ན་ལམ་ལ་གནས་པ་ཡང་འདི་ལྟ་སྟེ་བློ་གྲོས་ཞན་པ་རྣམས་དང་གཉེན་པོ་གཞན་གྱིས་ཀྱང་གཉེན་བཤེས་དང་གྲོགས་པོ་དང་རང་གི་སྐྱེ་བོ་རྣམས་ལ་གདུང་སེམས་སོ་སོར་བཟློག་པར་བྱ་བར་མི་ནུས་ཀྱིས། དེ་ཡང་ཡུན་རིང་དུ་འགྲོན་དུ་འགྲོ་བར་གྱུར་པས་ཐ་མར་ནི་གདུང་སེམས་དེ་དག་རྣམས་རབ་ཏུ་འཇོམས་ཏེ། བརྩེ་བའི་སེམས་ནི་གནས་སྐབས་རྣམས་ཐམས་ཅད་དང་ཐམས་ཅད་དུ་མ་ཕྲད་པས་རབ་ཏུ་འཇོམས་པ་ཇེ་དང་པོར་ནི་གདུང་སེམས་དེ་ཉིད་ཀྱི་གཉེན་པོ་རྣམས་གནས་སྐབས་ཐམས་ཅད་དུ་རིག་པར་འགྱུར་བ་འདི་ནི་འདི་ལྟ་སྟེ། འདུས་པ་རྣམས་ཐམས་ཅད་ཀྱི་མཐའ་ནི་འབྲལ་བ་སྟེ། འཆི་བའི་ཡུལ་དང་དུས་རྣམས་སུ་འགའ་ཞིག་གིས་ཀྱང་འགའ་ཞིག་དམིགས་པར་འགྱུར་བའམ་ཡོངས་སུ་སྐྱོབ་པར་འགྱུར་བ་ཡང་མ་ཡིན་ནོ། །འཆི་བའི་ཡུལ་དང་དུས་རྣམས་སུ་ནི་ལས་ཉིད་ཁོ་ན་གནས་སྐབས་རྣམས་ཐམས་ཅད་དུ་ཡོངས་སུ་སྐྱོབ་པར་བྱེད་པ་ཡིན་ནོ། །སྐྱེ་བ་གཞན་དག་བརྒྱ་སྟོང་དུ་མ་རྣམས་སུ་ཡང་ལས་ཉིད་སྐྱབས་སུ་འགྱུར་ཏེ། རྣམ་པ་ཐམས་ཅད་ཀྱི་ཐམས་ཅད་དུ་གཉེན་བཤེས་རྣམས་བཞིན་དུ་འགྱུར་རོ། །གཉེན་བཤེས་རྣམས་ཀྱིས་མ་ཡིན་ཞིང་རྩད་འབྲེལ་རྣམས་སམ་གཞན་དག་རྣམས་ཀྱིས་ཀྱང་མ་ཡིན་ནོ། །གཉེན་བཤེས་རྣམས་གང་འགའ་ཞིག་གིས་ཀྱང་སྐྱོབ་པར་བྱེད་པ་མ་ཡིན་པས་གཅིག་ཏུ་མངོན་པར་དགའ་ཞིང་། གཉེན་བཤེས་ཀྱི་དབང་དུ་བྱ་བའམ་རང་གི་སྐྱེ་བོ་རྣམས་ཀྱི་དབང་དུ་བྱས་ནས་དེ་ལྟར་དཔྱོད་པར་བྱེད་དོ། །དེའི་ཕྱིར་ན་ཀུན་ནས་ཉོན་མོངས་པ་ཅན་གྱི་ཆོས་གཞན་འདི་ནི་གཅིག་

71-31a

པུ་མངོན་པར་དགའ་བའི་དགེ་སློང་གིས་རབ་ཏུ་གཞོམ་པར་བྱ་བ་ཡིན་ནོ། །འཆི་བའི་ཡུལ་དང་དུས་རྣམས་སམ་ན་བའི་དུས་དང་རྒས་པའི་དུས་ན་ཡང་འགའ་ཞིག་ཀྱང་འགའ་ཞིག་ལ་ཅུང་ཟད་ཀྱང་མི་བྱེད་དོ། །ཡོངས་སུ་སྐྱོབ་པར་བྱེད་པ་ནི་སུ་དག་ཀྱང་མ་ཡིན་ནོ་ཞེས་དེ་ལྟར་སེམས་པར་བྱེད་དོ། །དགེ་སློང་འདིའི་རང་གི་སྐྱེ་བོ་རྣམས་ཀྱིས་བྱས་པའི་བརྩེ་གདུང་གང་ཡིན་པ་འདི་ལས་དེ་དག་རྣམས་ཐམས་ཅད་དུ་ཉམས་པར་འགྱུར་བའམ་མགོ་སྨད་པར་འགྱུར་རོ། །དེ་ལྟར་དགེ་སློང་གཉེན་བཤེས་ལ་ཕྲད་པའི་བརྩེ་གདུང་རྣམས་ནི་བྱེས་སུ་འགྲོ་བས་རབ་ཏུ་འབྲལ་བར་འགྱུར་རོ། །གཞན་ཡང་ཀུན་ནས་ཉོན་མོངས་པ་ཅན་གྱི་ཆོས་ངེས་པར་འབྱུང་བས་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དོན་མེད་པར་སྨྲ་བ་སྟེ། ཁྱིམ་པ་ཡིན་ཡང་རུང་གང་དང་གང་སྐྱེ་བོ་ཐམས་ཅད་ཀྱང་རྩྭ་དང་འདྲ་བ་ཁོ་ནར་འགྱུར་རོ། །འདི་ལྟ་སྟེ་གང་གི་ཕྱིར་ངག་གི་ཚིག་རྣམས་ནི་ནོར་ཡིན་གྱི་ནོར་གཞན་ནི་ཐ་མ་ཡིན་ནོ། །སྐྱེས་བུ་རྣམས་ནི་ངག་གིས་སྙིང་པོ་ཅན་དུ་འགྱུར་རོ། །དེ་དང་རྣམ་པར་བྲལ་བ་ནི་སྙིང་པོ་མེད་པ་དང་ནོར་དང་ཀུན་ནས་བྲལ་བར་འགྱུར་ཏེ། གསོག་གསོབ་སྙིང་པོ་མེད་པ་ཕྱུགས་རྣམས་དང་མཚུངས་པར་འགྱུར་རོ། །ངག་གི་ནོར་རྣམས་དང་བྲལ་བ་ངག་དང་བྲལ་བའི་སྐྱེ་བོ་རྣམས་ནི་སྐྱེས་བུའི་མིང་ཅན་གྱི་ཕྱུགས་རྣམས་ཡིན་ནོ། །མཁས་པའི་སྐྱེ་བོ་རྣམས་ཐམས་ཅད་ཀྱིས་སྤངས་པ་དང་། བཙོག་པར་གྱུར་པ་དང་ཤིན་ཏུ་ཡང་ཐ་ཤལ་ཡིན་ནོ། །རྣམ་པ་དེ་ལྟ་བུ་བྱེད་པའི་ཆོས་རྣམས་ཆོས་གང་དག་གིས་རབ་ཏུ་གཞོམ་པར་བྱ། དོན་མེད་པར་སྨྲ་བའི་ཆོས་དེ་ཡང་རབ་ཏུ་གཞོམ་པར་བྱའོ། །ཆོས་གང་དག་གིས་ཞེ་ན། འདི་ལྟ་སྟེ་ངག་བསྡམས་པས་སོ། །ངག་བསྡམ་པ་ཡང་རྣམ་པ་གཉིས་ཡིན་ཏེ། འདི་ལྟ་སྟེ་གང་ཡང་ཅང་མི་སྨྲ་བའམ་སྡོམ་པ་རྣམ་པ་བཞི་དག་པའོ། །གང་དག་ཞེ་ན། འདི་ལྟ་སྟེ་རྫུན་གྱི་རང་བཞིན་དང་ཕྲ་མ་དང་ཚིག་རྩུབ་པོ་དང་འབྲེལ་པ་མེད་པར་སྨྲ་བར་བྱེད་པ་རྣམས་རྣམ་པར་སྤངས་པས་ངག་ཀུན་ནས་བསྡམ་པར་བྱའོ། །

71-31b

དེ་ལྟར་ན་ཡང་ཡང་མོར་མི་འགྱུར་རོ། །དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱང་རུང་སྟེ། རྒྱུ་དྲུག་གིས་སྐྱེས་བུ་རྣམས་སྐད་ཅིག་ལ་ཡང་མོ་དང་རྣམ་པར་ཞེ་སྡང་བར་ཡང་འགྱུར་རོ། །གང་དག་ཞེ་ན་འདི་ལྟ་སྟེ། དོན་མེད་པར་སྨྲ་བར་བྱེད་པས་དང་ཇི་ལྟར་རབ་ཏུ་ཞུགས་པར་བྱེད་པ་དང་ཡང་དང་ཡང་དུ་ཟས་ལ་དགའ་བ་དང་རྒན་པོའི་སྟན་ཆེན་པོ་ལ་ཉེ་བར་གནས་པ་དང་གསོང་གསལ་རྗོད་པ་དང་ལབ་ལོབ་བྱེད་པ་དང་རྒྱུ་དེ་དག་གིས། དེ་ལྟར་མི་རྣམས་ཐམས་ཅད་ཀྱང་དར་ཅིག་ལ་ཡང་མོར་འགྱུར་ཞིང་རབ་ཏུ་དགའ་བར་ཡང་མྱུར་བར་འགྱུར་རོ། །དེའི་ཕྱིར་ན་དགེ་སློང་ངམ་ཁྱིམ་པ་རྣམས་ཀྱིས་ཀྱང་ཆོས་དེ་རྣམ་པར་སྤང་བར་བྱའོ། །ཡང་ཆོས་གཞན་ཡང་ཤིན་ཏུ་དྲི་མ་ཅན་དུ་གྱུར་པ་ཀུན་ནས་ཉོན་མོངས་པ་ཅན་རྣམས་དཀར་པོའི་ཆོས་ཀྱིས་རབ་ཏུ་གཞོམ་པར་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་རྐོ་ཏྲོག་ནི་བརྟན་པས་སོ། །གང་གི་ཕྱིར་རྐོ་ཏྲོག་གི་ཆོས་རྣམས་ནི་རབ་ཏུ་གཞོམ་པར་བྱ་སྟེ། རྐོ་ཏྲོག་གིས་ཀྱང་ཆོས་རྣམས་ཐམས་ཅད་ཀྱི་བར་དུ་གཅོད་པར་འགྱུར་བའི་ཕྱིར་རོ། །རང་བཞིན་གྱིས་ཀྱང་སེམས་རྩབ་ཧྲལ་ཅན་དུ་གྱུར་པ་དེ་སླར་ཡང་ཆེས་གཡོ་བར་སོན་པའི་ཕྱིར་ན་ཆོས་འདི་དག་རྣམས་ཐམས་ཅད་ལ་ཡང་དེ་ཀུན་ནས་ཡིད་ཆེས་པ་མ་ཡིན་ནོ། །སོ་སོར་རྟོགས་པ་མེད་དོ། །བརྟན་པར་འཛིན་པ་མེད་དོ། །རབ་ཏུ་དགག་པར་བྱ་བ་ཡང་མེད་དོ། །སྤྱོད་པ་བསྡམ་པར་བྱ་བ་ཡང་མེད་དོ། །མངོན་པར་བརྗོད་པར་བྱ་བ་མེད་དོ། །སྡོམ་པ་འཐོབ་པ་མ་ཡིན་ནོ། །མངོན་པར་རྟོགས་པ་དང་འཇིག་རྟེན་པ་རྣམས་ཀྱང་མེད་དོ། །འཇིག་རྟེན་པའི་ལམ་རྣམས་ཐམས་ཅད་བཀྲ་བར་བྱེད་པ་ལ་སོ་སོར་རྟོགས་པ་མེད་དོ། །ལས་སུ་རུང་བ་མ་ཡིན་ནོ། །རྩབ་ཧྲལ་ཅན་ནི་བག་མེད་པ་ཡིན་པ་དེའི་ཕྱིར་རྩབ་ཧྲལ་དེ་སྐྱོན་དང་བཅས་པར་གོ་བར་བྱས་ལ། དོན་རྣམས་ཐམས་ཅད་ཆུད་གཟོན་པར་བྱེད་པ་པོ་འདི་དང་ཕྱི་མར་ཡང་ཕན་པ་མ་ཡིན་པར་བྱེད་པའི་མཆོག་ཡིན་པས། དགེ་སློང་ངམ་གཞན་ཡང་དེའི་རིགས་ཅན་རྣམས་ཀྱིས་ཀྱང་རབ་ཏུ་གཞོམ་པར་བྱའོ། །གང་གིས་དེ་རབ་ཏུ་སྤོང་

71-32a

ཞེ་ན། འདི་ལྟར་དགེ་བའི་ཆོས་གང་ཡིན་པས་ཏེ། འདི་ལྟར་བརྟན་པར་གྱུར་པས་སོ། །བརྟན་པར་གྱུར་པ་ནི་དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ། སྐྱེ་བོ་རྣམས་ཐམས་ཅད་ཀྱིས་མཆོག་ཏུ་ཡང་མཆོད་པར་འགྱུར་རོ། །བརྟན་པའི་ཚུལ་ཁྲིམས་དང་བརྟན་པའི་ཤེས་རབ་དང་བློ་གྲོས་བརྟན་པ་དང་བློ་བསྡམས་པ་དང་གཅིག་ཏུ་རྒྱུ་བ་རྣམས་ཀྱིས་ནི་བདུད་ཀྱི་ཡུལ་རྣམས་རབ་ཏུ་འཇོམས་པར་བྱེད་དོ། །མྱ་ངན་ལས་འདས་པའི་གྲོང་ཁྱེར་དུ་ཕྱིན་པར་བྱེད་པ་འདིའི་དགེ་བའི་ཆོས་རྣམས་ཕུན་སུམ་ཚོགས་པར་འགྱུར་རོ། །འཇིག་རྟེན་པའི་དོན་རྣམས་ལ་ཡང་བརྟན་པར་གྱུར་པའི་སྐྱེས་བུ་ནི་མཁས་པ་རྣམས་ཀྱིས་རབ་ཏུ་བསྔགས་པར་བྱེད་དོ། །དེས་ཀྱང་འཇིག་རྟེན་པའི་དོན་དེ་དག་རྣམས་བསྒྲུབ་པར་ནུས་པ་ཡང་ཡིན་ནོ། །ཐམས་ཅད་དུ་ཡང་སྐྱེ་བོ་རྣམས་ཐམས་ཅད་ཀྱིས་ཤིན་ཏུ་ཡང་མཆོད་པར་འགྱུར་རོ། །རབ་ཏུ་བསྟོད་པར་ཡང་འགྱུར་རོ། །མིང་རྣམ་པར་ཐོས་པས་ཀྱང་ཐམས་ཅད་དུ་ཡང་བདེ་བ་དང་ལྡན་པར་འགྱུར་རོ། །དོན་གང་དང་གང་རྩོམ་པར་བྱེད་པ་དེ་དང་དེ་དག་འགྲུབ་པར་འགྱུར་རོ། །དེའི་ཕྱིར་བློ་གཅིག་ཏུ་ངེས་པ་དང་བློ་ཀུན་ནས་བསྡམས་པ་དང་བློ་གྲོས་བརྟན་པ་དང་ལྡན་པར་གྱུར་པའི་སྐྱེས་བུ་དེ་དག་ནི་འཇིག་རྟེན་པ་ལ་ཡང་རབ་ཏུ་བསྔགས་པ་ཡིན་ནོ། །དེ་ལྟ་བས་ན་སྐྱེས་བུ་རྣམས་སམ་དགེ་སློང་གིས་ཀྱང་རུང་སྟེ། རྩབ་ཧྲལ་སྤངས་ལ་བློ་གྲོས་བརྟན་པ་དང་དཔའ་བ་དང་ཤེས་རབ་དང་ལྡན་པར་བྱའོ། །གཞན་ཡང་མུ་སུ་ལུན་དྷ་དེ་ཉིད་ཀྱིས་སྨྲ་བ་པོའི་ངང་པ་དེ་དག་རྣམས་དང་ངང་པའི་རྒྱལ་པོ་དུས་བཟངས་དེ་དང་། བདུད་ཀྱི་རིགས་ཀྱི་བག་མེད་པ་དང་སྨྱོ་བ་དེ་ལ་ཡང་། བཅོམ་ལྡན་འདས་འོད་སྲུང་གིས་མདོ་འདི་སྔོན་གྱི་ལྷའི་དྲུང་ནས་ཐོབ་པར་གྱུར་པ་ཕན་པའི་དོན་དུ་སྟོན་པར་བྱེད་པ་ལས་འདི་ལྟ་སྟེ། སྨྲེ་བར་གྱུར་པའི་ཆོས་གཞན་དྲི་མ་ཅན་མཁས་པའི་སྐྱེ་བོ་རྣམས་ཐམས་ཅད་ཀྱིས་སྤངས་པ་དག་རབ་ཏུ་གཞོམ་པར་བྱའོ། །འདི་ཡང་གང་ཞེ་ན། འདི་ལྟ་སྟེ་དབུལ་བོའོ། །དབུལ་བོར་གྱུར་པ་ཞེས་བྱ་བ་ཡང་རྣམ་པ་གཉིས་ཏེ།

71-32b

ཤེས་རབ་ཀྱིས་དབུལ་བ་དང་ཚུལ་ཁྲིམས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། སྦྱིན་པས་དབུལ་བ་དང་བློ་གྲོས་ཀྱིས་དབུལ་བའོ། །གཞན་ཡང་རྣམ་པ་གཉིས་ཏེ། རིགས་ཀྱིས་དབུལ་བ་དང་ལྟ་བས་དབུལ་བའོ། །གཞན་ཡང་རྣམ་པ་གཉིས་ཏེ། སྡོམ་པ་ལ་བརྩོན་པས་དབུལ་བ་དང་བླ་མས་དབུལ་བའོ། །གཉེན་བཤེས་དང་རང་གི་སྐྱེ་བོ་རྣམས་ཀྱིས་དབུལ་བའོ། །དེ་ལ་དབུལ་པོ་དེ་དག་རྣམས་ཐམས་ཅད་ཀྱང་མཆོག་ཏུ་ཞེ་ཟློག་པ་ཡིན་ཏེ། རིགས་ཀྱི་བུའམ་རིགས་ཀྱི་བུ་མོའམ་རིགས་ཀྱི་བུའི་ཉེ་གནས་ཀྱིས་ཀྱང་མ་ལུས་པ་རྣམས་སྤང་བར་བྱའོ། །གང་གིས་འདི་དག་ཐམས་ཅད་རབ་ཏུ་འཇོམས་པར་བྱེད་ཅེ་ན། འདི་ལྟ་སྟེ་སྦྱིན་པས་སོ། །སྦྱིན་པ་ཉིད་གཅིག་པུ་ཞིག་གིས་དབུལ་བ་རྣམས་ཐམས་ཅད་འཇོམས་པར་འགྱུར་རོ། །དཔེར་ན་མར་མེ་རྣམས་ཐམས་ཅད་ཀྱིས་ཀྱང་མུན་པ་རྣམས་ཐམས་ཅད་རབ་ཏུ་བསལ་བར་བྱེད་པར་འགྱུར་རོ། །ཤེས་རབ་རྣམས་ཐམས་ཅད་ཀྱིས་ཀྱང་མི་ཤེས་པ་རྣམས་ཀུན་ཏུ་འཇོམས་པར་འགྱུར་རོ། །ལྟ་བ་རྣམས་ཐམས་ཅད་ནི་ཡང་དག་པའི་ལྟ་བས་ཉེ་བར་འཇོམས་པར་བྱེད་དོ། །དེ་ལ་མཆོག་ཏུ་མཛེས་པར་གྱུར་པའི་ཆོས་མཆོག་ཏུ་རྒྱ་ཆེ་བ་དང་ལྡན་པ་མཁས་པའི་སྐྱེ་བོ་རྣམས་ཐམས་ཅད་ཀྱིས་ཡོངས་སུ་བཟུང་བ། ངན་འགྲོ་ཐམས་ཅད་སྤོང་བར་བྱེད་པ། བདག་ཅག་གི་འཇིག་རྟེན་ནས་འཇིག་རྟེན་ཕ་རོལ་ཏུ་ལེགས་པར་སྒྲོལ་བར་བྱེད་པའི་ཆོས་ཀྱི་མཆོག་འདིས་འཇོམས་པར་བྱེད་དོ། །གང་དག་གིས་འཇོམས་ཞེ་ན། འདི་ལྟ་སྟེ་སྦྱིན་པས་སོ། །སྦྱིན་པ་ཡང་རྣམ་པ་མང་དུ་ཡོད་དོ། །འདི་ལྟ་སྟེ་ཤེས་པའི་སྦྱིན་པ་དང་། ཚུལ་ཁྲིམས་ཀྱི་སྦྱིན་པ་དང་། ཆོས་ཀྱི་སྦྱིན་པ་དང་། བློ་བསྲོ་བའི་སྦྱིན་པ་དང་། ལམ་ཉེ་བར་སྟོན་པའི་སྦྱིན་པ་དང་། ལམ་གྱིས་ཉོན་མོངས་པ་རྣམས་ལ་ཁྲུས་ཀྱི་རྫིང་བུའི་སྦྱིན་པ་དང་། བྱ་བའི་སྦྱིན་པ་དང་། སྲོག་གི་སྦྱིན་པ་དང་། ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། བདེན་པའི་སྦྱིན་པ་དང་། ཐེ་ཚོམ་གཅོད་པའི་སྦྱིན་པ་དང་། སྦྱིན་པ་ལྔ་ལ་ཉོན་མོངས་པ་མེད་པའི་སྦྱིན་པ་དང་།

71-33a

རབ་ཏུ་དབྱུང་བའི་སྦྱིན་པ་དང་། དེ་བསྙེན་པར་རྫོགས་པའི་སྦྱིན་པ་དང་། ནད་པ་ལ་སྨན་གྱི་སྦྱིན་པ་དང་མིག་གི་སྦྱིན་པ་སྟེ། རྣམ་པ་དེ་ལྟ་བུའི་སྦྱིན་པ་རྣམས་ནི་འཇིག་རྟེན་ཕ་རོལ་ལེགས་པར་སྒྲོལ་བར་བྱེད་པ་སྦྱིན་བདག་ཐམས་ཅད་ལ་རྟག་ཏུ་མ་དང་ཕ་དང་འདྲ་བ་ཡིན་ནོ། །དེ་ཡང་སེམས་རྣམས་ཀྱིས་དང་སེམས་ཀྱིས་ལེགས་པར་བསྒོམས་ནས་བྱིན་པར་གྱུར་པས་དབུལ་བ་རྣམས་ཐམས་ཅད་བཅོམ་ཞིང་ངན་འགྲོ་རྣམས་ཐམས་ཅད་ཀྱང་བཅད་ནས། ལྷ་དང་མི་གཉིས་ཀྱི་བདེ་བ་ལ་ཉེ་བར་ལོངས་སྤྱད་པར་གྱུར་ནས། ཐ་མར་ཇི་སྲིད་དུ་མྱ་ངན་ལས་འདས་པ་ཐོབ་པར་འགྱུར་ཏེ། སྐྱེས་བུ་དེས་རྟག་ཏུ་དེ་ལྟ་བུའི་ལས་བྱའོ། །དེ་བས་ན་དབུལ་བ་ཞེས་བྱ་བའི་ཆོས་གཞན་འདི་མཆོག་ཏུ་དགེ་བ་རྣམས་དང་མཁས་པའི་སྐྱེ་བོ་རྣམས་ལ་མཆོག་ཏུ་དགའ་བ་དག་གིས་རབ་ཏུ་གཞོམ་པར་བྱའོ། །འདི་ལྟ་སྟེ་སྦྱིན་པ་དང་སེམས་དང་དངོས་པོ་དང་ཞིང་རྣམས་ཕུན་སུམ་ཚོགས་པས་སོ། །གཞན་ཡང་ཆོས་ཐམས་ཅད་དང་འཁོར་བ་ཐམས་ཅད་ཀྱི་འཆིང་བའི་རབ་ཏུ་གྱུར་པ་ཆོས་རྣམས་ཐམས་ཅད་ཀྱི་མུན་པ་ལྟ་བུར་གྱུར་པའོ། །འདི་ཡང་གང་ཞེ་ན། འདི་ལྟ་སྟེ་མི་ཤེས་པའོ། །དེ་ལ་ཇི་སྲིད་དུ་མ་རིག་པའི་མུན་པ་ཡིན་པའི་བར་དུ་མི་ཤེས་པ་རྣམ་པ་དུ་མ་ཡིན་ཏེ། འཁོར་བ་ཐམས་ཅད་ཀྱི་འཆིང་བས་མུན་པ་ཐམས་ཅད་ཀྱི་ཚོགས་སུ་གྱུར་པའི་མུན་ནག་གི་ཞེན་པའི་རྡུལ་དུ་གྱུར་པའི་འཆིང་བ་དང་། ཤིན་ཏུ་འཆིང་བར་བྱེད་པས་མཚོན་ཆ་དང་དུག་དང་མེ་དང་མཚུངས་པའི་མི་ཤེས་པ་རྣམས་ཐམས་ཅད་ནི་མ་རིག་པ་དང་འདྲ་བ་ཐམས་ཅད་མ་རིག་པས་ཀུན་ནས་བསླང་བ། དམྱལ་བ་དང་ཡི་དགས་དང་དུད་འགྲོ་རྣམས་ཐམས་ཅད་དུ་ཡོངས་སུ་འཁྱམ་པ། འཆིང་བ་གང་ཁོ་ནས་ངེས་པར་བཅིངས་ནས་སེམས་ཅན་འདི་དག་རྣམས་འོབས་ན་ཡོངས་སུ་འཁོར་རོ། །རྣམ་པ་དེ་ལྟ་བུའི་དགྲར་གྱུར་པའི་དྲི་མ་འདི་དག་རྣམས་རྣམ་པ་ཅི་ལྟ་བུ་དག་གིས་རབ་ཏུ་འཇོམས་པར་འགྱུར་ན། འདི་ལྟ་སྟེ་སྒྲོན་མར་རུང་བ་སྐྱབས་སུ་གྱུར་པ་སྐྱོབ་པར་གྱུར་པ་ཡོངས་སུ་འདྲེན་པར་གྱུར་པ། སེམས་ཅན་

71-33b

རྣམས་ཐམས་ཅད་ཀྱི་ཡང་མ་དང་ཕ་ལྟ་བུར་གྱུར་པ་དང་། སྨན་པ་དང་སྨན་ལྟ་བུར་གྱུར་པའི་ཟག་པ་མེད་པའི་ཡེ་ཤེས་སུ་གྱུར་པས་འཆིང་བ་རྣམས་ཐམས་ཅད་གཅོད་པར་བྱེད་པར་གྱུར་པའི་ཡེ་ཤེས་ཀྱིས་རབ་ཏུ་འཇོམས་པར་འགྱུར་རོ། །མ་རིག་པ་རབ་ཏུ་སྤངས་པ་རྣམས་ནི་སླར་ཉིད་ཀྱང་རབ་ཏུ་འབྱུང་བར་འགྱུར་བ་ནི་མ་ཡིན་ཏེ། དཔེར་ན་ལྗོན་ཤིང་རྩ་བ་ནས་བཏོན་པ་རྣམས་ནི་སླར་ཡང་རབ་ཏུ་སྐྱེ་བར་འགྱུར་བ་ནི་མ་ཡིན་ནོ། །ཇི་ལྟར་མེས་ཚིག་པར་གྱུར་པའི་ཤིང་རྣམས་ནི་སླར་ཡང་ལེགས་པར་སྐྱེ་བར་མི་འགྱུར་རོ། །ཇི་ལྟར་ཆུ་ཀླུང་གི་ཆུར་སོང་བ་རྣམས་སླར་ཡང་ཕྱིར་ལོག་ནས་འོང་བ་ནི་མེད་དོ། །དེ་བཞིན་དུ་ཟག་པ་མེད་པའི་ཡེ་ཤེས་ཀྱིས་བསྲབས་པ་རྣམས་ཡང་ཕྱིར་འབྱུང་བར་མི་འགྱུར་རོ། །དེའི་ཕྱིར་ན་རབ་ཏུ་བརྩོན་པ་ཁོ་ནས་ཐམས་ཅད་ཀྱིས་གནས་སྐབས་ཐམས་ཅད་དང་དུས་ཐམས་ཅད་དུ་མི་ཤེས་པ་ཐམས་ཅད་ཀྱང་ཡེ་ཤེས་ཐམས་ཅད་ཀྱིས་རབ་ཏུ་གཞོམ་པར་བྱའོ། །ཆོས་བཅུ་གཅིག་པ་དེ་དག་རྣམས་ཐམས་ཅད་ཀྱང་། བག་མེད་པའི་རྩ་བ་ཅན་དང་བག་མེད་པའི་གནས་སྐབས་དང་བག་མེད་པའི་རིགས་ཅན་ཡིན་ནོ། །དེའི་ཕྱིར་ན་གནས་སྐབས་རྣམས་ཐམས་ཅད་དུ་དང་། རྣམ་པ་རྣམས་ཐམས་ཅད་ཀྱིས་བག་མེད་པ་ཉིད་རེ་ཞིག་ཡོངས་སུ་སྤང་བར་བྱ་བ་ཡིན་ནོ། །བག་མེད་པ་རྣམས་ཀྱི་རྩ་བ་ལས་ཀྱང་ཐམས་ཅད་གནས་སྐབས་ཐམས་ཅད་དུ་དོན་མ་ཡིན་པར་འགྱུར་ཏེ། དེ་ཡོད་པའི་ལས་འབྱུང་བ་ཡིན་ནོ། །དེ་མེད་པ་ལས་ནི་མི་འགྱུར་རོ། །དཔེར་ན་ས་གཞིས་ནི་སྨན་རྣམས་ཐམས་ཅད་དང་རྩྭ་དང་ནགས་ཚལ་དང་། ཆུ་དང་འབྲུ་དང་ཆུ་ཀླུང་དང་། རི་དང་མཚོའི་མཆོག་དང་། གྲོང་ཁྱེར་གྱི་མཆོག་དང་། གྲོང་དང་ནགས་དང་ཉེ་བའི་ནགས་དང་རི་རབ་ལྷུན་པོ་ཡང་ཀུན་ཏུ་འཛིན་པར་བྱེད་པ་ཡིན་ནོ། །དེ་བཞིན་དུ་དམྱལ་བ་དང་ཡི་དགས་དང་དུད་འགྲོའི་འགྲོ་བ་པའི་རིགས་རྣམས་ཀྱི་སྡུག་བསྔལ་ཐམས་ཅད་ཀྱི་རྩ་བ་གཅིག་པོ་ནི་བག་མེད་པ་ཡིན་ནོ། །དེའི་ཕྱིར་ན་སྐྱེས་བུ་དམ་པ་རྣམས་ཀྱིས་དེ་ཉིད་རེ་ཞིག་སྤང་བར་བྱའོ། །དེ་ནས་དེའི་ཚེ་འཐབ་བྲལ་བ་རྣམས་

71-34a

ཀྱི་བདག་པོ་མུ་སུ་ལུན་དྷ་དེས་ཚིགས་སུ་བཅད་པ་རྣམས་བརྗོད་པ། ཇི་ལྟར། རྒས་པས་མནན་ནས་གཉེར་མས་གང་། །རྗུད་པ་དབྱུག་པ་ལག་ན་ཐོགས། །གང་ཞིག་མཆོག་ཏུ་ཆོས་མི་སྤེལ། །དེ་ནི་བག་མེད་བྱེད་པས་ཡིན། །ལུས་རྣམས་ནད་ཀྱིས་ཞིག་པ་དང་། །མལ་སྟན་སྤྱོད་ལ་ཆེད་ཆེར་བྱེད། །ཤིན་ཏུ་སྐྱོ་བར་མི་འགྱུར་བ། །དེ་དག་གཏི་མུག་འདི་ཡི་འབྲས། །བཀྲེས་པའི་སྲེད་པས་འཇིགས་མཐོང་བར། །གང་དེ་འོག་གི་གནས་སུ་འགྲོ། །སླར་ཡང་སྐྱོ་བ་མི་སྐྱེ་བ། །བག་མེད་བྱེད་པས་དེ་བྱས་སོ། །མི་རྣམས་སྡུག་པ་དང་བྲལ་བའི། །སྙིང་ལ་སྡུག་བསྔལ་གང་སྐྱེ་བ། །དེ་ནི་བག་མེད་སྟེན་པ་ལས། །ཡིན་པར་དེ་བཞིན་གཤེགས་པས་གསུངས། །སྡུག་བསྔལ་གང་དག་འགྲོ་བ་ལྔར། །དུ་མ་རྣམས་ནི་ལོངས་སྤྱོད་པ། །བག་མེད་པ་ཡི་སྲོག་ཆགས་ཀྱི། །རྟག་ཏུ་དེ་དག་རྨོངས་པས་བྱས། །སྐྱེ་དགུ་འཁོར་བར་རྨོངས་པ་རྣམས། །ཀྱེ་མ་ཀྱི་ཧུད་སྐྱོ་བ་སྐྱེ། །ལས་ཀྱི་འཁོར་ལོ་ཆེན་པོ་ཡིས། །འཁོར་བར་འགྱུར་བ་ཡང་དང་ཡང་། །རྙོག་པ་མེད་པར་གང་བརྟགས་པའི། །བདེ་དེ་སྲིད་པ་གསུམ་ན་མེད། །དེ་ལྟ་ན་ཡང་ཀུན་རྨོངས་པས། །ངེས་པར་བྱིས་རྣམས་སྐྱོ་མི་འགྱུར། །ཡུལ་དགའ་བ་ལ་ཞེན་པ་ཡི། །རྨི་ལམ་བཞིན་དུ་འདི་དག་གཡོ། །འགྲོ་འདི་ཐམས་ཅད་སྡུག་བསྔལ་བ། །མིག་མེད་པས་ཀྱང་མ་མཐོང་ངོ་། །གང་ལ་ཕྱིར་བཅོས་ཐབས་མེད་པའི། །འཆི་བདག་འཇིགས་པར་སྲེད་པས་འགྱུར། །དེ་ལྟ་ན་ཡང་ཀུན་རྨོངས་པས། །བག་མེད་པས་ནི་མི་རྣམས་བཅོམ། །ཚུལ་བཞིན་མ་ཡིན་ཡིད་བྱེད་པས། །སེམས་ནི་རྣམ་པར་གཡེང་བྱས་པའི། །འཆི་བདག་རྒྱལ་པོས་འདྲེན་པ་ན། །འཇིག་རྟེན་པས་ཀྱང་གོ་བ་མིན། །ནོར་རྣམས་དང་ནི་བུ་དག་དང་། །ཤིན་ཏུ་སྡུག་པའི་སྲོག་ཀྱང་ནི། །གསོན་པ་དེ་ནི་འཕྲོག་བྱེད་པས། །འཆི་བདག་རྒྱལ་པོ་འདི་ཡིས་འདྲེན། །བག་མེད་མྱུ་གུ་ལས་བྱུང་བའི། །གང་གིས་སྐྱེ་དགུ་འདི་འཇོམས་པའི། །འཇིག་རྟེན་དོན་མིན་ཡང་གསུམ་སྟེ། །ནད་དང་རྒ་དང་

71-34b

འཆི་བའོ། །ཚོལ་ཁྲོས་མི་རྣམས་ཉེ་བར་བཅོམ། །ལྷ་རྣམས་བག་མེད་པས་ཉེར་བཅོམ། །ཡི་དགས་བཀྲེས་སྐོམ་དག་གིས་གཡེངས། །ཚོར་བ་དྲག་པོས་དམྱལ་བ་རྣམས། །ཕན་ཚུན་ཀུན་ཏུ་གསོད་བཙོག་པ། །དུད་འགྲོ་གཏི་མུག་དཔུང་གཉེན་ཡིན། །དེ་ལྟར་འཇིག་རྟེན་རྣམ་དུ་མར། །བྲེལ་དོག་དེ་དང་དེས་དཀྲུགས་སོ། །བག་མེད་པས་ནི་རྨོངས་པ་ཡིས། །འོན་ཀྱང་ཆོས་ལ་དགའ་བ་མིན། །སྨན་དང་རྩྭ་སོགས་ཐམས་ཅད་ཀྱང་། །ཇི་ལྟར་ས་གཞི་ལས་རབ་སྐྱེ། །དེ་བཞིན་བག་མེད་ལས་ཉོན་མོངས། །རྣམ་པ་ཐ་དད་རབ་འཕེལ་བྱེད། །དེ་ནི་བདུད་ཀྱི་དམག་ཚོགས་ཀྱི། །རྗེ་དཔོན་དབང་ཕྱུག་མཆོག་འདི་ཡིན། །ཉི་མའི་འོད་ཀྱིས་མུན་པ་ལྟར། །ཡེ་ཤེས་རྡོ་རྗེས་གཞོམ་པར་བྱ། །སྐྱོན་ཡོན་ཡོངས་ཤེས་དེ་དག་ནི། །རེ་ཞིག་དང་པོར་བསྟན་པ་ཡིན། །བག་མེད་པ་རྣམས་རྟག་སྡུག་བསྔལ། །བག་ཡོད་འབྲས་བུ་བདེ་བ་ཡིན། །དེ་ལྟར་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་རྣམ་པ་དུ་མ་རྣམས་སུ་དང་རྣམ་པར་རྟོག་པ་དུ་མ་རྣམས་ཀྱིས་ཀྱང་བག་མེད་པ་དེའི་སྐྱོན་རྣམས་དང་། བག་ཡོད་པའི་ཡོན་ཏན་རྣམས་ཀྱང་མངོན་པར་བརྗོད་དོ། །འཆི་བདག་ནད་དང་རྒ་སྡུག་བསྔལ། །མི་འཐུན་པ་དང་ཕྲད་པ་དང་། །གཞན་ཡང་སྡུག་བསྔལ་དྲག་པོ་དང་། །འཁོར་བ་འདི་ནི་ལྡན་པ་ཡིན། །མ་འོངས་སྡུག་བསྔལ་འཆོས་པ་ནི། །ཕན་པ་དང་ནི་བདེ་བ་ཡིན། །སྡུག་བསྔལ་སྡིག་པའི་རྒྱུ་ལས་སྐྱེ། །སྡིག་མེད་བྱེད་པ་བདེ་ཡིན་ནོ། །ཉོན་མོངས་ཟད་ལས་བདེ་བའི་མཆོག །ཡིན་པར་མཁས་པས་གསུངས་པ་ཡིན། །འདི་ནི་མྱ་ངན་འདས་འགྲོའི་ལམ། །ཡིན་པར་དེ་ཉིད་གཟིགས་པས་གསུངས། །ཀུན་ནས་བསྡམས་དང་བག་ཡོད་དང་། །ཞི་བ་དང་ནི་ནགས་ན་རྒྱུ། །འདོད་ལ་བརྐམ་མིན་བརྟན་པ་ཡི། །མྱ་ངན་འདས་པ་རིང་བ་མིན། །གྲོགས་དང་གྲོགས་མིན་དང་རབ་བྲལ། །སྲིད་པའི་འདོད་ཆགས་རྣམ་པར་སྤངས། །ཡུལ་རྣམས་ལ་ཡང་བག་ཡོད་པའི། །ཤིན་ཏུ་མྱ་ངན་འདས་རིང་མིན། །དགེ་དང་སྡིག་ལ་ཆགས་པ་མེད། །བྱམས་དང་སྙིང་རྗེ་སྒོམ་པ་པོ། །འཁོར་

71-35a

བའི་འཇིགས་པས་འཇིགས་པ་ནི། །ཤིན་ཏུ་མྱ་ངན་འདས་རིང་མིན། །ཉོན་མོངས་ཟད་པའི་ཐབས་ཤེས་དང་། །ཡེ་ཤེས་བཏུང་བས་ཚིམ་པ་དང་། །ལེ་ལོའི་དྲི་མ་དང་བྲལ་བའི། །ཤིན་ཏུ་མྱ་ངན་འདས་རིང་མིན། །ལྷག་པར་ཐེག་པ་ཆེ་ལ་མོས། །སེམས་ཅན་ཐམས་ཅད་ལ་ཕན་དང་། །སྟོང་ཉིད་དོན་ནི་རབ་རྟོགས་པའི། །ཤིན་ཏུ་མྱ་ངན་འདས་རིང་མིན། །དེ་ནི་སྐྱོན་གསུམ་འགོག་པ་ཡི། །འཕགས་པའི་བདེན་པ་བཞི་སྟེན་པ། །དབང་གྱུར་དབང་པོ་ཞི་བ་ཡི། །མྱ་ངན་འདས་པ་ཤིན་རིང་མིན། །དབུགས་དང་དབུགས་འབྱུང་རྣམ་པ་ཤེས། །མཚན་ཉིད་འགག་པ་སྟེན་པ་དང་། །ཤེས་དང་ཤེས་བྱའི་རྣམ་པ་ཤེས། །ཤིན་ཏུ་མྱ་ངན་འདས་རིང་མིན། །རྟག་ཏུ་བློ་དང་ལྡན་པ་དང་། །ཉོན་མོངས་རྣམས་ཀྱིས་སེམས་མི་འཚེ། །སྐྱོན་བཅས་འཇིགས་པ་ལས་གྲོལ་བའི། །ཐུབ་པ་ཕ་རོལ་ཕྱིན་པར་བརྗོད། །དེ་ལྟར་འཐབ་བྲལ་གྱི་མངའ་བདག་དེས་སྨྲ་བ་པོ་དེ་དག་རྣམས་དང་ངང་པའི་རྒྱལ་པོ་དུས་བཟངས་དེ་ལ་ཆོས་བསྟན་ཏེ། བཅོམ་ལྡན་འདས་འོད་སྲུང་གིས་གསུངས་པའི་མདོ་བག་མེད་པ་ལ་རྣམ་པར་གཤེ་བར་བྱེད་པ་རྣམས་བསྟན་ཏོ། །དེ་ལྟར་རྣམ་པ་དུ་མར་བཅོམ་ལྡན་འདས་ཀྱིས་གསུངས་པའི་དམ་པའི་ཆོས་འདུལ་བ་དེ་དབྱངས་སྙན་པ་དང་དུལ་བའི་བློ་རྒྱ་ཆེན་པོས་སྟོན་པར་བྱེད་དོ། །ཇི་ལྟར་གཅིག་ཏུ་དམ་པའི་ཆོས་ཀྱི་རོར་གྱུར་པའི་ཚིག་འདི་དག་རྣམས་ཐོས་ནས། བདུད་ཀྱི་རིགས་ཀྱི་བག་མེད་པ་དེ་འདི་སྙམ་དུ་སེམས་ཏེ། ཇི་ལྟར་རྣམ་གྲངས་འགའ་ཞིག་གི་སྒོ་ནས་ཀྱང་བདག་གིས་འཐབ་བྲལ་བ་རྣམས་ཀྱི་བདག་པོ་འདི་དམ་པའི་ཆོས་འདུལ་བ་དེ་དག་ལས་གཡོ་བར་བྱ་བར་མི་ནུས་ཏེ། དེ་ལྟར་དམ་པའི་ཆོས་ལ་བློ་ཡོངས་སུ་མཐར་ཐུག་པ་ཡིན་ནོ། །དེ་ལྟར་རྟོགས་ནས་བག་མེད་པ་སྐྱེད་པ་མཁའ་ལ་འགྲོ་བར་བྱེད་དེ། ཇི་ལྟར་མུ་སུ་ལུན་དྷ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་པས་བདག་ཅག་གི་ཆོས་ཀྱི་ལམ་ལ་བདག་ཅག་རྣམས་ཀྱིས་གོམ་པ་བསྒུལ་བར་ཡང་མི་ནུས་སོ། །དེ་ནས་ཐམས་ཅད་ཀྱང་ཡིད་གཅིག་ཏུ་གྱུར་ཅིང་ཕ་རོལ་གནོན་པའི་སྟོབས་ཆེན་པོ་དང་ཡིད་ལ་སྨོན་པ་དང་

71-35b

གཟི་བརྗིད་རྣམས་ཉེ་བར་བཅོམ་པར་གྱུར་ཏོ། །ཡིད་ཀྱི་རྒྱལ་སྲིད་ཕབ་པར་བྱས་པ་དང་། ནམ་མཁའི་དཀྱིལ་དུ་འཕགས་ནས་དེ་མྱུར་དུ་འགྲོ་བ་ཡིན་པས་དུས་མི་རིང་བ་དང་། གང་ན་གཞན་འཕྲུལ་དབང་བྱེད་ན་འདོད་པའི་ཁམས་པ་རྣམས་ཀྱི་དབང་ཕྱུག་བདུད་སྡིག་ཅན་ཡོད་པ་དེར་ཐམས་ཅད་ཀྱིས་ཕྱིན་ནོ། །དེ་ནས་བདུད་ཀྱིས་དེ་དག་ལ་འདི་སྐད་ཅེས་བརྗོད་དེ། བདུད་རྣམས་བྱ་བ་འགའ་ཞིག་བྱས་སམ། ཡིད་ལ་རེ་བ་དེ་དག་ཉིད་ཐམས་ཅད་ཡོངས་སུ་རྫོགས་ནས་ངའི་དྲུང་དུ་ཁྱེད་ཀྱིས་སླེབ་པ་ཡིན་ནམ། དེ་ལྟར་ཐོས་ནས་དེས་བདུད་དེའི་དྲུང་དུ་འདི་སྐད་ཅེས་བརྗོད་དེ། ལྷ་ལགས་ཕར་ལ་གནོན་པའི་སྟོབས་རྣམས་ནི་ཇི་ལྟ་བ་བཞིན་དུ་ཉམས་ནས་བདག་ཅག་ལྷའི་རིགས་འདིར་རྗེས་སུ་སླེབ་པར་གྱུར་ཏོ། །འཐབ་བྲལ་གྱི་བདག་པོ་དེ་གོམ་པ་གཅིག་ཀྱང་བསྐྱོད་པར་བདག་ཅག་གིས་བདག་ཅག་ལ་མ་ནུས་ཏེ། དེ་བཞིན་དུ་འདི་དམ་པའི་ཆོས་ལ་ངེས་པར་དགའ་བའི་བློ་དང་ལྡན་པའི་ལྷན་ཅིག་སྤྱོད་པ་དེ་ལ་བདག་ཅག་གིས་ཅི་བྱར་ཡོད། བདུད་སྡིག་ཅན་གྱིས་དེ་ལྟར་ཐོས་པར་གྱུར་ནས་དེ་འདི་སྙམ་དུ་སེམས་ཏེ། གང་བག་མེད་པའི་ལྷ་ཆོས་ཐམས་ཅད་ལ་རབ་ཏུ་ཞུགས་པ་རྣམས་ངས་འདོད་པའི་སྤྱོད་པ་རྣམས་ལ་རབ་ཏུ་དགོད་པར་བྱའོ། །དེ་ལ་ཡང་བག་ཡོད་པ་དེ་དག་རྣམས་ཀྱི་དབང་གིས་འདི་རྣམས་ཉིད་ཐམས་ཅད་ཀྱི་ཕ་རོལ་གནོན་པའི་སྟོབས་རྣམས་ཉེ་བར་བཅོམ་ནས་ངའི་དྲུང་དུ་ཉེ་བར་འོངས་པ་ཡིན་ནོ། །དེ་ནས་འདི་དག་རྣམས་གོ་ནས་འདི་སྐད་ཅེས་བརྗོད་དེ། དུས་འདས་ནས་བྱེད་པའི་ཚིག་རྣམས་ཇི་ལྟར་དུས་གཞན་དུ་བདག་ཅག་གིས་བག་མེད་པར་ནུས་ཀྱི་འཐབ་བྲལ་གྱི་བདག་པོ་མུ་སུ་ལུན་དྷ་དེ་ལ་སོ་སོའི་ཐབས་རྣམས་བདག་གིས་བྱའོ། །དེའི་ཕྱིར་ན་ཁྱེད་མ་རིངས་ཅིག་བདག་ཅག་ཐམས་ཅད་ཀྱིས་དུས་གཞན་ན། ཕྱིར་བཟློག་པར་བྱའོ་ཞེས་དེ་ལྟར་སྡིག་ཅན་དེས་དུས་གཞན་འཕེན་པར་བྱེད་པའི་ཚིག་རྣམས་བརྗོད་ནས་རྣམ་པར་གནས་ཏེ། མཚུངས་པ་མེད་པའི་ལྷ་རྫས་ཀྱི་འདོད་པ་རྣམས་ལ་རབ་ཏུ་ཆགས་པར་གྱུར་པས་བདེ་བར་གནས་སོ། །བག་མེད་པའི་ས་རྣམས་ལས་སླར་ཡང་རབ་ཏུ་སྤེལ་བར་མི་འགྱུར་བའི་

71-36a

ཕྱིར་ན་རྣམ་པ་དུ་མར་རྒྱུ་བའི་ལྷ་རྣམས་དང་། འཐབ་བྲལ་བ་རྣམས་ཀྱི་བདག་པོ་དང་དུས་བཟངས་དེ་དང་སྨྲ་བ་པོའི་ངང་པ་དེ་དག་རྣམས་དང་གཞན་ཉིད་ཀྱང་ཆོས་ཀྱི་གཏམ་རྣམ་པ་དུ་མ་རྣམས་བྱེད་དོ། །དེ་དག་རྣམས་ན་ཇི་ལྟར་བདུད་ཀྱི་རིགས་རྣམས་ཀུན་ནས་བྲལ་བ་དང་དོན་མེད་པ་རྣམས་ཐམས་ཅད་ཀྱི་རྩ་བར་གྱུར་པ་བག་མེད་པ་དེ་ཀུན་ནས་སོང་བས་ན། ལྷ་རྣམས་དང་བྱ་དེ་དག་རྣམས་བྱ་བ་བྱས་པ་བཞིན་དུ་རྣམ་པར་གནས་སོ། །དེ་ནས་དེ་ལྟ་དེ་ལྟར་བརྗོད་ནས་དེ་དག་ལས་ལྷ་གང་དག་རྩེད་མོས་ཡིད་བྲེལ་བར་གྱུར་པ་དེ་དག་རྣམས་ནི་རབ་ཏུ་དགའ་བས་རྩེ་བར་བྱེད་དེ། སྐྱེད་མོས་ཚལ་དང་ཁང་བཟངས་དང་ཀུན་དགའ་ར་བ་དང་ནགས་དང་ཉེ་བའི་ནགས་ཀྱི་ཡུལ་དེ་དག་རྣམས་སུ་ཉེ་བར་སོང་ནས་རྩེ་བར་འགྱུར་རོ། །གང་འཐབ་བྲལ་བ་རྣམས་ཀྱི་བདག་པོ་དེ་དུས་བཟངས་དང་ལྷན་ཅིག་ཏུ་བརྗོད་པ་དང་ལྡན་པའི་ངང་པ་རྣམས་དང་རྒྱུ་བར་བྱེད་དོ། །དེ་ནས་འཐབ་བྲལ་བ་རྣམས་ཀྱི་བདག་པོ་དེ་ལྷ་དེ་དག་རྣམས་མངོན་པར་མཐོང་ནས་དུས་བཟངས་ལ་སྨྲས་པ། ཇི་ལྟར་ཉེ་བར་གནས་པའི་ལྷ་གང་ཡིན་པ་འདི་དག་རྣམས་ནི་རྩེད་མོའི་གཞན་དབང་དུ་སོང་ནས་བག་མེད་པ་ཡིན་པས་བདག་ཅག་ཀྱང་གང་ན་ནགས་དང་ཉེ་བའི་ནགས་རབ་ཏུ་ཞི་བར་ཡོད་པར་འགྲོ་བར་བྱའོ། །དེ་ལྟར་རིག་ནས་ནམ་མཁའི་ཁམས་སུ་འཕགས་པར་གྱུར་ཏོ། །ལྷ་བག་མེད་པར་སྤྱོད་པ་དེ་དག་ཀྱང་འདོད་པའི་ཡོན་ཏན་ལྔ་དང་ཡང་དག་པར་ལྡན་པའི་ནགས་དང་ཉེ་བའི་ནགས་དང་རྫིང་བུ་རྣམས་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བའི་ལས་བྱས་ཤིང་བསགས་པའི་ལས་ཟད་པར་མ་གྱུར་པ་དེ་སྲིད་དུ་རྩེ་དགའ་བར་བྱེད་དོ། །གང་གི་ཚེ་ཟད་པར་གྱུར་པ་དེའི་ཚེ་རང་གིས་བྱས་པའི་ཟས་བཟང་པོ་རྣམས་ཟོས་ནས་སླར་ཉིད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ། །གང་ཡང་མི་རྣམས་དང་སྐལ་བ་འཐུན་པར་གྱུར་པ་མིར་སྐྱེས་པར་གྱུར་ན། དེ་མཆོག་ཏུ་ཕུན་སུམ་ཚོགས་པ་དང་། མཆོག་ཏུ་རྒྱ་ཆེ་བར་ཡང་འགྱུར་ཏེ། རྒྱལ་པོ་རྣམས་སམ་རྒྱལ་པོའི་བློན་པོ་རྣམས་སུ་གྱུར་ནས། སྐྱེ་བོ་ཐམས་ཅད་དགའ་བ་དང་

71-36b

མཆོག་ཏུ་སྐྱིད་པ་དང་ལས་དེའི་རྒྱུ་འཐུན་པས་ཡུལ་གྱི་མི་རྣམས་ཐམས་ཅད་བྱམས་པར་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་རྣམས་ལ་ཀུན་ཏུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཇི་ལྟར་ཡོད་པའི་འཐབ་བྲལ་བ་རྣམས་ཀྱི་ལྷའི་ས་གཅིག་ཏུ་དགའ་བ་ཞེས་བྱ་བ་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་ན། ཇི་ལྟར་སྐྱེས་བུ་དམ་པ་གང་གིས་བྱ་བར་གྱུར་པའི་དོན་བྱས་པ་ཚུལ་ཁྲིམས་དང་ལྡན་པར་གྱུར་ནས། སྲོག་གཅོད་པ་དང་མ་བྱིན་པར་ལེན་པ་དག་སྤངས་པར་གྱུར་པ་ནི་སྔ་མ་བཞིན་ནོ། །འདོད་པ་ལ་ལོག་པར་གཡེམ་པ་ཡང་མཆོག་ཏུ་སྤང་བར་དཀའ་བ་དང་ཁྱད་པར་དུ་དོར་བར་དཀའ་བ་རྣམས་ཀྱང་རབ་ཏུ་འགོག་པར་བྱེད་པ་ཡིན་ཏེ། ཇི་ལྟར་བྱ་དང་བྱ་དག་ལྷན་ཅིག་ཏུ་སྤྱོད་པར་གྱུར་པ་རྣམས་དང་། རི་མོ་ལ་ཕན་ཚུན་དུ་གྱུར་པ་རྣམས་དང་། དེ་བཞིན་དུ་ཕན་ཚུན་དུ་གྱུར་པ་མཐོང་བ་དེ་དག་རྣམས་ཀྱང་ཡོངས་སུ་སྤོང་བར་བྱེད་དོ། །ཡིད་ཀྱིས་ཀྱང་ཀུན་ཏུ་རྟོག་པར་མི་བྱེད་དོ། །ཉེ་བར་སྒོམ་པར་མི་བྱེད་དེ། འདོད་པ་ལ་ལོག་པར་གཡེམ་པའི་རྣམ་པར་སྨིན་པའི་ཕྱིར་རྒོལ་བ་རྣམས་ཀྱི་འཇིགས་པས་ཐམས་ཅད་ཀྱང་གནས་སྐབས་རྣམས་ཐམས་ཅད་དུ་སྤོང་བར་བྱེད་དོ། །གཞན་དག་རྣམས་བྱེད་པར་གྱུར་པ་ན་ཡང་རབ་ཏུ་འགོག་པར་བྱེད་དོ། །ཆོས་འདུལ་བ་ལ་རབ་ཏུ་འགོད་པར་བྱེད་ཅིང་འདོད་པ་ལ་ལོག་པར་གཡེམ་པའི་ལས་ཀྱི་འབྲས་བུ་རྣམ་པར་སྨིན་པ་རྣམས་སྟོན་པར་བྱེད་དོ། །རྣམ་པ་དུ་མར་ཡང་ལོག་པར་ལྟུང་བར་གྱུར་པའི་ཆོས་རྣམས་སྟོན་པར་བྱེད་དེ། ཇི་ལྟར་འདོད་པ་ལ་ལོག་པར་གཡེམ་པས་ནི་ཐམས་ཅད་དུ་ཡང་མི་འདོད་པ་མི་སྡུག་པ་ཡིད་དུ་མི་འོང་བ་དམྱལ་བ་ཀུན་ནས་འཕེལ་བར་བྱེད་པའི་འབྲས་བུ་རྣམ་པར་སྨིན་པ་ཅན་དུ་འགྱུར་རོ། །དེ་བདག་ཉིད་ཀྱིས་ཀྱང་མི་བྱེད་དོ། །གཞན་དག་རྣམས་བྱེད་པ་ན་ཡང་རབ་ཏུ་འགོག་པར་བྱེད་དོ། །རང་དང་གཞན་ལ་ཕན་པའི་ཡོན་ཏན་ལ་རབ་ཏུ་

71-37a

ཞུགས་པར་གྱུར་པ་དགེ་ལེགས་དང་ལྡན་པའི་སེམས་ཅན་དེ་ནི་ལུས་ཞིག་པར་གྱུར་ནས་ཤི་བའི་འོག་ཏུ་བདེ་འགྲོའི་མཐོ་རིས་ཀྱི་འཇིག་རྟེན་ལས་འཐབ་བྲལ་བ་རྣམས་ཀྱི་ས་གཅིག་ཏུ་དགའ་བ་ལ་སྐྱེ་བར་འགྱུར་རོ། །དེར་སྐྱེས་པ་ན་ཡང་འདིས་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པས། བདེ་བ་རྒྱ་ཆེན་པོ་ལ་སོགས་པ་བདེ་བ་དུ་མ་རབ་ཏུ་འཕེལ་བར་གྱུར་པའི་ས་དེར་སྐྱེས་པ་རྣམས་ནི་ནགས་དང་ཉེ་བའི་ནགས་རྣམས་ན་ལྷག་པར་གནས་པ། འདོད་པ་རྣམས་ཐམས་ཅད་འདོད་པ་བཞིན་གྱི་ཡོན་ཏན་དང་ལྡན་པའི་བདེ་བ་རྣམས་ལ་ཉེ་བར་ལོངས་སྤྱོད་པས་ནགས་དང་ཉེ་བའི་ནགས་དག་སྟེན་པར་བྱེད་དོ། །དེ་རྒྱུ་བའི་དུས་ན་ནགས་འདི་དག་རྣམས་ཡིན་ཏེ། འདི་ལྟ་སྟེ་འོད་ཟེར་མངོན་པར་དགའ་བ་ཞེས་བྱ་བ་དང་། འབབ་ཆུ་རྣམས་ཀྱིས་མངོན་པར་དགའ་བ་ཞེས་བྱ་བ་དང་། གཞལ་ཡས་ཁང་གི་རི་བོ་ཞེས་བྱ་བ་དང་། རྣམ་པར་བཀྲ་བའི་ཆུའི་པད་མའི་རྫིང་བུ་རྣམས་ཞེས་བྱ་བ་དང་། དྲི་འཐུལ་བ་ཞེས་བྱ་བའོ། །ནགས་དང་ཉེ་བའི་ནགས་དང་རྫིང་བུ་རྣམས་དང་གཞན་དག་ཀྱང་རིར་གྱུར་པ་རྣམས་ཀྱི་ལྷ་རྫས་ཀྱི་ཡོན་ཏན་གྱི་ཕུན་སུམ་ཚོགས་པ་རྣམས་ནི་གྲངས་ཀྱང་མི་དམིགས་སོ། །དེ་ལ་ནགས་གང་དག་དང་མཚོ་གང་དག་ནི་མཆོག་ཏུ་དགའ་བར་གྱུར་པ་ཡིན་ནོ། །གང་དག་ལ་འདི་དག་རྣམས་དགའ་བར་བྱེད་པ་འདི་དག་རྣམས་ནི་བྱིངས་ཆེ་བ་དང་ལྡན་པ་ཡིན་ནོ། །འདི་ལྟ་སྟེ་ནོར་བུའི་སྟེགས་བུ་ཞེས་བྱ་བའི་མཚོ་ན་བྱ་ཕལ་པོ་ཆེ་རྣམས་ཀྱིས་མངོན་པར་དགའ་བ་དང་། རྟག་པར་ཡང་ཤིན་ཏུ་རངས་པའི་ལྷ་རྣམས་ཀྱིས་སྟེན་པར་གྱུར་པ་དོགས་པ་མེད་པར་གྱུར་པས་མཐོང་བར་འགྱུར་བ་ཡིན་ནོ། །མཚོ་དེ་དག་གི་ཉེ་འཁོར་རྣམས་ན་ལྷ་རྫས་ཀྱི་སྒྲ་དང་མདོག་དང་ཚད་དང་མཆོག་ཏུ་ལྡན་པའི་བྱ་དག་གིས་ཡོངས་སུ་གང་བར་གྱུར་པ་དང་། ངོས་གཉི་ག་ན་ཡང་དཔག་བསམ་གྱི་ཤིང་རྣམས་ཀྱིས་ཡོངས་སུ་གང་བར་གྱུར་པ་ཡིན་ནོ། །

ཡོན་ཏན་དུ་མ་དང་ལྡན་པ་དེ་དག་རྣམས་ལ་ལེགས་པར་བྱས་པའི་ལས་ཀྱི་མཐའ་ལ་སྤྱོད་པ་ནི་འདོད་པའི་ཡོན་ཏན་ལྔ་རྣམས་ལ་ལྷའི་བུ་མོ་དུ་མ་རྣམས་

71-37b

ཀྱིས་ཀྱང་ཡོངས་སུ་བསྐོར་ནས་དགའ་བར་བྱེད་དེ། ལྷ་རྫས་ཀྱི་གཟུགས་དང་ལྡན་པ་རྣམས་དང་དེའི་འདུན་པའི་རྗེས་སུ་འཇུག་པར་བྱེད་པ་དང་། རྟག་ཏུ་རྒྱུན་མི་འཆད་པར་བདེ་བ་ལ་ཆེད་ཆེར་བྱེད་པ་དང་མཆོག་ཏུ་བདེ་བ་ལ་རབ་ཏུ་ཆགས་པ་དང་། ལྷ་རྫས་ཀྱི་བདེ་བ་གཞན་དང་གཞན་རྣམ་པ་དུ་མ་རྣམས་ཀྱིས་དེ་དག་རྣམས་མཚོ་དེར་ལེགས་པར་བསྟེན་ནས་ཕྱིར་ཞིང་ཉིད་ཀྱང་འདོད་པའི་ཡོན་ཏན་ལྔའི་ཉེ་བར་ལོངས་སྤྱད་པ་རྣམས་ཀྱིས་ངོམས་པ་མེད་པས་སྲེད་པའི་ཟུག་རྔུ་རྣམས་ཀྱིས་རབ་ཏུ་འབྲེལ་བར་གྱུར་ནས། སླར་ཡང་རྗེས་སུ་འབྲང་བ་དེ་དག་རྣམས་ཉིད་ཀྱིས་ཡོངས་སུ་བསྐོར་བ་རྣམས་ནོར་བུའི་ཆ་ཤས་རྣམས་ཀྱིས་རྣམ་པར་བཀྲ་བ་ཞེས་བྱ་བའི་མཚོ་དང་པད་མའི་རྫིང་བུ་དག་གིས་ཉེ་བར་མཛེས་པར་བྱས་པའི་རི་དེ་ལ་འཁོད་པར་བྱེད་དེ། སྐྱེད་མོས་ཚལ་གྱི་ལྟད་མོའི་དབང་དུ་བྱས་ནས་ལྷ་རྫས་ཀྱི་བདུད་རྩིའི་པད་མའི་ཡུ་བ་དག་གིས་ཉེ་བར་མཛེས་པར་གྱུར་པ་དང་། ལྷ་རྫས་ཀྱི་གོས་རྣམས་གྱོན་པ་དང་ལྷ་རྫས་ཀྱི་ཡུལ་ལྔ་པོ་རྣམས་སྟེན་པར་བྱེད་པས་ཀྱང་། ནོར་བུའི་ཆ་ཤས་སྣ་ཚོགས་པས་བཀྲ་བ་མཐོང་ན། མཆོག་ཏུ་ཡིད་འཕྲོག་པར་བྱེད་པའི་རི་དེ་ལ་རྩེ་དགའ་བར་འདོད་པས་མཉམ་པར་འཁོད་པར་བྱེད་དོ། །དེ་ནས་དེའི་རྩེ་མོ་གཞན་ལ་རིའི་ཁྲོད་དགའ་བ་ཞེས་བྱ་བ་དེ་ན་དགའ་ལྡན་གྱི་ལྷའི་རིགས་སུ་གྱུར་པའི་ལྷ་གཞན་ལྷ་རྫས་ཀྱི་ཕྲེང་བ་དང་གོས་དང་ལྡན་པ་གསེར་གྱི་རང་བཞིན་རྣམ་པ་དུ་མར་དགའ་བའི་ནགས་སུ་བརྒྱ་ཕྲག་དང་དེ་ནས་སྟོང་ཕྲག་དང་ཐམས་ཅད་ཉིད་བབས་ནས་རྩེད་མོའི་མཆོག་རྣམས་བྱེད་དོ། །ལྷ་དེ་དག་རྣམས་མངོན་པར་མཐོང་བར་གྱུར་ནས་ལྷ་གསར་དུ་སྐྱེས་པ་དེ་ལྷན་ཅིག་སྤྱོད་པ་རྣམས་ལ་བརྗོད་པ། ཇི་ལྟར་གང་དག་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་རྩེ་ཞིང་འགྲོ་བར་འགྱུར་བའི་ལྷ་དེ་དག་རྣམས་དང་། མ་ཐང་ཡང་གང་བདག་ཀྱང་དེ་དག་དང་ཉེ་བར་གྱུར་མོད། དེ་ནས་དེ་དག་རྣམས་ཐམས་ཅད་ཀྱིས་ཀྱང་དེའི་དྲུང་ནས་ཚིག་དེ་ཉེ་བར་ཐོས་ནས་འདི་སྐད་ཅེས་བརྗོད་དོ། །ལྷ་དེ་ཇི་ལྟར་མངོན་པར་འདོད་པར་གྱུར་པ་དེ་ལྟར་བདག་ཅག་རྣམས་ཀྱིས་དེ་བཞིན་དུ་བྱའོ། །དེ་ནས་དེ་ལྟར་རིག་ནས་ལྷ་གསར་

71-38a

དུ་སྐྱེས་པ་དེ་ལྷན་ཅིག་སྤྱོད་པར་བྱེད་པ་རྣམས་ཀྱིས་ཡོངས་སུ་བསྐོར་ནས། ལྷ་རྫས་ཀྱི་རྔ་སྐད་ཡན་ལག་ལྔ་དང་ལྡན་པ་རྣམས་ཉེ་བར་བསྒྲགས་པར་གྱུར་པས། གང་ན་ལྷ་དེ་དག་རྣམས་ཡོད་པ་དེ་དང་ཉེ་བར་གྱུར་ཏོ། །དེ་ནས་ཕན་ཚུན་དུ་འདྲེས་པར་གྱུར་པའི་ལྷ་དེ་དག་རྣམས་ཕན་ཚུན་དུ་རྣམ་པར་འདྲེས་པས་རབ་ཏུ་ཆགས་པར་གྱུར་པའི་སྙིང་ངོམས་པ་མེད་པ་རྣམས་ལ། རིའི་གཙུག་ན་ནོར་བུ་ཞེས་བྱ་བའི་བྱས་ཚིགས་སུ་བཅད་པའི་དབྱངས་བརྗོད་པ། ཇི་ལྟར། ལས་ཀྱི་སྙིང་པོའི་འཇིག་རྟེན་དང་། །ལྷ་ནི་ལས་ཀྱི་སྙིང་པོ་ཅན། །འདུས་བྱས་ལྷ་ཡི་འཇིག་རྟེན་པ། །ལས་ཟད་ནས་ནི་ལྟུང་བ་ཡིན། །འཐུན་པར་འགྲོགས་པའི་འཇིག་རྟེན་ནི། །འབྲལ་བས་རྟག་ཏུ་འཐུན་པ་མིན། །འདུས་པའི་མཐའ་ནི་འབྲལ་བ་ཡིན། །དེ་བཞིན་གཤེགས་ཀྱིས་ཆོས་ཉིད་འདི། །བདེ་ལ་ཀུན་ཏུ་ཆགས་པའི་ཡིད། །ཡུལ་གྱིས་བདག་ཉིད་བསླུས་པ་ཡིན། །ཡིད་ཤུགས་དང་མཚུངས་རྣམས་ཀྱི་ནི། །ལྷ་རྣམས་ཚེ་ནི་ཟད་པར་འགྱུར། །རྒ་དང་ན་དང་སྨད་པ་དང་། །འབྲལ་བས་ལུས་ཅན་ཐམས་ཅད་ལ། །འབྱུང་བ་ཡང་ནི་ཀུན་རྨོངས་པས། །ཡུལ་གྱིས་ཁྲིད་ནས་རིག་པ་མིན། །རྒ་བའི་ཆད་པ་སྔུན་བསར་ནས། །འཆི་བདག་འདིས་ནི་ཀུན་ཏུ་སྲེག །ནད་ཀྱི་དཔུང་གིས་འདི་རྣམས་འབྲལ། །བློ་གྲོས་མེད་པས་མཐོང་བའང་མིན། །དྲུག་གིས་འཇིག་རྟེན་རྣམ་པར་འཇོམས། །ཕྱུགས་བཞིན་དུ་ཡང་འཇོམས་པར་བྱེད། །གོལ་བའི་ལམ་དུ་ཞུགས་པ་ནི། །འཁྲི་ཤིང་བཞིན་དུ་ཡོངས་སུ་བསྐོར། །གང་འདིའི་བློ་ནི་རྟག་པར་ཡང་། །རྒྱུ་དང་འབྲས་ལ་ལེགས་པར་གནས། །དེ་ནི་རྒྱུ་འབྲས་ལེགས་ལྟ་བས། །ཕྱི་ནས་གདུང་བས་མི་འཇོམས་སོ། །ཡུལ་རྣམས་ཀྱིས་ནི་འཇོམས་མིན་ཏེ། །དྲང་པོར་ལྟ་བ་བརྐམ་ཆགས་མེད། །དེས་ནི་ཤིན་ཏུ་མི་བཟད་པའི། །དགའ་བའི་ཡུལ་ཀུན་མྱུར་དུ་འདོར། །སྐྱོན་ལས་རྣམ་གྲོལ་ངམ་གྲོག་དང་། །དྲི་མའི་འཇིགས་པ་ལས་རྣམ་གྲོལ། །བག་མེད་མེ་གང་དེས་རྟོགས་ནས། །ཐམས་ཅད་དུ་ནི་

71-38b

ཡོངས་སུ་སྤངས། །འཇིགས་པ་ལྔ་པོ་འདི་ཡིས་གང་། །དང་པོར་འཇིག་རྟེན་འདི་གསོད་པ། །རྒ་དང་ན་དང་འཆི་བ་དང་། །རྣམ་པར་འབྲལ་དང་གང་གི་ལས། །དེ་ལྟར་རི་གཙུག་ན་ནོར་བུ་ཞེས་བྱ་བའི་བྱ་ནི་རྣམ་པར་བཀྲ་བ། གཙང་བ་དག་གི་རྨ་བྱའི་རྒྱལ་པོ་བྱང་ཆུབ་སེམས་དཔའི་ལྷན་ཅིག་ཏུ་སྤྱོད་པ་དང་གཉི་གའི་ཡང་སྨོན་ལམ་གྱི་དབང་གིས་རྨ་བྱའི་སྐྱེ་གནས་སུ་སྐྱེས་པར་གྱུར་པ་ཡིན་ནོ། །དེ་དག་ཀྱང་རྨ་བྱ་རྣམས་དང་འཐབ་བྲལ་གྱི་ལྷ་རྣམས་ལ་བག་མེད་པ་དང་བྲལ་བར་བྱ་བའི་དོན་དུ་ཆོས་སྟོན་པར་བྱེད་དོ། །དེ་ནས་ལྷ་དེས་སྔ་ན་མེད་པའི་ལྷ་དེ་དག་མངོན་པར་མཐོང་བར་གྱུར་པས། སླར་ཉིད་ཀྱང་ཆེས་མཆོག་ཏུ་དགའ་བར་གྱུར་པའི་ཡིད་ཀྱིས་ལེགས་པར་བཤད་པ་དེ་དག་རྣམས་ལ་བརྩི་བགྲང་མ་བྱས་པར་བག་མེད་པའི་དབང་གིས། རབ་ཏུ་རྩེ་བར་བྱེད་པ་དང་གར་བྱེད་པ་དང་རྒོད་པར་ཡང་བྱེད་ཅིང་རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་རྣམ་པ་དུ་མར་དགའ་བར་བྱེད་དེ། དཔེ་མེད་པའི་ནགས་དང་ཉེ་བའི་ནགས་རྣམས་དང་རི་དང་རིའི་ལྗོངས་རིན་པོ་ཆེ་ཀུན་ཏུ་འབར་བའི་འོད་ཟེར་གསལ་བར་སྣང་བ་རྣམས་དང་དཔག་བསམ་གྱི་ཤིང་གི་ནགས་རྣམས་དང་ལྡན་པ་རྣམས་དང་དགའ་བའི་བྱ་དང་ལྡན་པ་རྣམས་དང་རིའི་ཆུ་ཀླུང་བརྒྱ་ཕྲག་དང་ལྡན་པ་རྣམས་དང་པད་མའི་ནགས་དང་ལྡན་པ་རྣམས་ལ་ལྷན་ཅིག་སྤྱོད་པ་རྣམས་དང་བཅས་ཤིང་འདོད་པ་རྣམས་ཐམས་ཅད་ཕུན་སུམ་ཚོགས་པ་ལྷ་རྫས་ཀྱི་བདེ་བ་རྣམས་དང་ལྡན་པས་རྣམ་པ་དུ་མར་ལྷ་རྣམས་རྩེ་དགའ་བར་བྱེད་དོ། །དེ་ལྟར་རྩེ་བར་གྱུར་པའི་ལྷ་དེ་རྣམས་རིམ་གྱིས་ནོར་བུའི་ཆ་ཤས་རྣམ་པར་བཀྲ་བ་ཞེས་བྱ་བའི་རི་དེ་ལ་འཁོད་དོ། །རི་དེ་ལ་ཡང་དཔག་བསམ་གྱི་ཤིང་གི་ནགས་རིན་པོ་ཆེ་བདུན་གྱི་རང་བཞིན་གྱི་ཤིང་རྣམས་ཀྱིས་ཉེ་བར་མཛེས་པར་གྱུར་པ་སྟེ། དཔག་ཚད་ལྔ་བརྒྱ་ཡོད་པ་ཡིན་ནོ། །ནགས་ཆེན་པོ་དེ་ནི་ཤིན་ཏུ་བཀྲ་བས་རྣམ་པར་བཀྲ་བར་གྱུར་པའི་རྨ་བྱའི་རྒྱལ་པོ་རབ་ཏུ་གནས་པས། བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་ཆོས་སྟོན་པར་བྱེད་དོ། །ལྷ་རྣམས་ཀྱང་ཆོས་ལ་རྗེས་སུ་འཇུག་པར་བྱ་བའི་དོན་དུ་ཡང་སྟོན་པར་

71-39a

ཆེད་ཆེར་བྱེད་དོ། །ནགས་དང་ཉེ་བའི་ནགས་རྣམས་དང་པད་མའི་རྫིང་བུ་རྣམ་པ་སྣ་ཚོགས་པ་རྣམས་དང་ཆུ་ཀླུང་དང་འབབ་ཆུ་རྣམ་པ་སྣ་ཚོགས་པ་རྣམས་དང་རིན་པོ་ཆེའི་ཁམས་རྣམས་དང་ལྡན་པའི་རིའི་རྩེ་མོ་རྣམ་པར་བཀྲ་བ་རྣམས་དང་། བྱ་བརྒྱ་སྟོང་ཕྲག་ངོས་ན་སྒྲ་ཀུན་ཏུ་སྒྲོགས་པས་དགའ་བར་གྱུར་པ་རྣམས་དང་ལྷའི་ཚོགས་རྣམས་ཀྱིས་ཉེ་བར་མཛེས་པ་དང་ལྷ་མོའི་ཚོགས་རྣམས་ཀྱིས་རྣམ་པ་སྣ་ཚོགས་པར་ཆེས་དགའ་བར་གྱུར་པ་ལ་ལྷ་དེ་དག་ཕན་ཚུན་གྲོགས་སུ་གྱུར་པས་དགའ་བར་བྱེད་དོ། །རྣམ་པ་སྣ་ཚོགས་པའི་འདོད་པའི་བདེ་བའི་རྒྱགས་པས་མྱོས་པ་དང་། རང་གིས་བྱས་པའི་ལས་ཀྱི་འབྲས་བུ་རྣམས་ལ་ལོངས་སྤྱོད་པས་ཐམས་ཅད་ཉིད་དགའ་བར་བྱེད་པ་དང་རྣམ་པ་དུ་མ་དང་རྣམ་པར་རྟོག་པ་དུ་མས་ཀྱང་ལྷ་རྫས་ཀྱི་དཔེ་མེད་པ་རྣམས་ལ་རྩེད་མོ་དག་ཀྱང་རྩེ་བར་བྱེད་དོ། །དེ་ནས་ལྷ་དེ་དག་རྣམས་ཀྱིས་བག་མེད་པའི་བདེ་བ་དེ་དག་ཉེ་བར་རྙེད་ནས། ནོར་བུའི་ཆ་ཤས་རྣམ་པར་བཀྲ་བའི་རི་དེ་ནས་དགའ་བས་རྩེ་བར་འགྱུར་བ་རྣམས་ལ། རྨ་བྱའི་རྒྱལ་པོ་དེས་ཚིགས་སུ་བཅད་པའི་དབྱངས་བསྙད་པ། ཇི་ལྟར། གཟུགས་ལ་སོགས་པའི་ཡུལ་རྣམས་ཀྱིས། །ཚིམ་པར་མ་གྱུར་འགྱུར་བ་མིན། །སོལ་མེའི་མེ་ཡིས་བསྲེགས་པ་རྣམས། །སླར་ཡང་ཡུལ་ལ་འདོད་པ་རྣམས། །ཡང་དང་ཡང་དུ་ལྷའི་འཇིག་རྟེན། །འཆི་འཕོ་དང་ནི་སྐྱེ་བར་འགྱུར། །ལས་ཀྱི་ཉ་རྒྱས་བཟུང་ནས་ནི། །སླར་ཡང་དམྱལ་བར་འགྲོ་བ་ཡིན། །དམྱལ་དང་ཡི་དགས་དུད་འགྲོ་ནི། །སྡུག་བསྔལ་མང་གནས་སྐལ་བ་ཅན། །རྒྱུ་དང་འབྲས་ཀྱི་སྐལ་ལྡན་པས། །སེམས་ཅན་འགྲོ་བ་ལྔ་ན་འཁྱམ། །ལུས་ཅན་རྣམས་ཀྱི་ལས་རྣམས་ནི། །སྣ་ཚོགས་མང་པོ་འདིར་བྱས་ནས། །འབྲས་བུ་སྣ་ཚོགས་དེ་དག་ཉིད། །དུ་མའི་སྒོ་ནས་ལྷ་རྣམས་སྤྱོད། །བྱུང་ཞིང་འཛད་པའི་ཆོས་ཅན་ནི། །ཟད་ནས་ཀྱང་ནི་རྟག་ཏུ་ལྟུང་། །དེ་ཉིད་བཞིན་དུ་མཁས་པ་ཡིས། །ལྷ་རྣམས་ཀྱི་ནི་འཆི་འཕོ་མཐོང་། །འཆི་བདག་འདི་ནི་ཀུན་འབྱུང་བས། །མི་རྣམས་གསོན་པའི་བར་ཆད་བྱེད། །ཐམས་ཅད་ཡུལ་གྱིས་བག་མེད་

71-39b

པས། །རྨོངས་པ་ཡིས་ཀྱང་རིག་པ་མིན། །བདག་ཉིད་ཚོལ་བར་བྱེད་པའི་ངག །དུ་མ་རྗེས་སུ་བསྔགས་པར་འགྱུར། །ལྷ་རྣམས་བདེ་བས་རྨོངས་པ་ཡིས། །འདོད་པ་རྣམས་ནི་རྣམ་མི་སྤོང་། །ཆོས་ལྡན་དགེ་བའི་ངག་གིས་ནི། །འདི་དང་ཕྱི་མར་བདེ་བ་འབྱུང་། །རྨོངས་དག་གང་ཞིག་མི་འཛིན་པ། །དེ་ནི་ཕྱི་ནས་གདུང་བར་འགྱུར། །མང་པོར་རྗེས་སུ་གདམས་གྱུར་པའི། །དེ་ཉིད་དོན་ནི་གསལ་བྱེད་པ། །བག་མེད་པས་ཕྲོགས་ལྷ་ཡིས་ནི། །གང་ཕན་པ་ནི་མི་རྟོགས་སོ། །སྲོག་གི་བར་ཆད་བྱེད་པའི་དགྲ། །བསྲན་པར་མི་བཟོད་སྟོབས་པོ་ཆེ། །འགོར་བ་མེད་པར་ཤུགས་པོ་ཆེ། །འདིར་ནི་འཆི་བདག་ཁྱེད་ལ་འབྱུང་། །ལྷ་ཀླུ་དྲི་ཟ་ཤ་ཟ་དང་། །ལྟོ་འཕྱེ་དང་ནི་སྲིན་པོས་ཀྱང་། །དེ་ཡི་སྟོབས་ནི་གཞིག་ནུས་པའི། །དེ་སྟོབས་རྣམ་པ་དེ་འདྲ་མེད། །སྟོབས་དང་སྟོབས་མེད་རྣམ་པར་ཤེས། །ལས་རྣམས་དེ་ཉིད་མཐོང་བ་པོ། །སྡིག་པའི་ཆོས་ཀྱིས་མི་གོས་ཤིང་། །དེ་ནི་ངན་འགྲོར་འགྲོ་མི་འགྱུར། །དགེ་བ་གྱིས་དང་མི་དགེའི་དུག །དེ་ནི་སྤངས་པ་ཉིད་དུ་ཡང་། །བྱས་ན་འདི་ཡི་ཚེ་ལ་ནི། །སྡུག་བསྔལ་རྗེས་སུ་རྒྱུགས་པ་མིན། །ཆོས་རྗེས་འབྲང་དང་དད་པ་ནི། །བརྩོན་འགྲུས་ཀྱིས་ནི་ཡོངས་སུ་སྤེལ། །ཐེག་ཆེན་སྟོབས་ལ་བརྩོན་དང་ལྡན། །མ་བཞིན་དུ་ནི་ཕན་པར་བྱེད། །དེ་ནི་སྐྱེས་བུ་ཐམས་ཅད་ཀྱིས། །འགྲོ་བ་ལྔར་ནི་དབུགས་འབྱིན་འགྱུར། །དེ་ལ་ཕ་དང་མ་མེད་པར། །འགྲོ་ཞིང་རྗེས་སུ་འགྲོ་བ་མིན། །ཆོས་རྗེས་འབྲང་དང་དད་པ་ཅན། །ཇི་ལྟར་བདེ་བ་འབྱུང་བར་འགྲོ། །ངན་སོང་ལས་ནི་ཀུན་འཛིན་པའི། །སྡུག་བསྔལ་སྟོབས་ནི་ཆེ་བ་ཡི། །མུན་པའི་དེ་ཡང་མར་མེར་རུང་། །ནད་པ་རྣམས་ཀྱི་འདི་ནི་སྨན། །དམུས་ལོང་རྣམས་ཀྱི་མིག་གྱུར་དང་། །དེ་ནི་དབུལ་པོའི་ནོར་ཆེན་ཡིན། །སྲིད་པའི་ཆུ་བོས་ཁྱེར་རྣམས་ཀྱི། །རྒྱལ་བར་གྱུར་པའི་བདེ་བ་འཁྱེར། །བག་མེད་རྒྱགས་པས་རྒྱགས་རྣམས་ཀྱི། །དེ་ནི་བག་མེད་འཇོམས་པ་པོ། །འཆི་བདག་དུས་ནི་ཉེར་བྱུང་ལ། །སྲིད་པའི་ཆུ་བོ་འཇོམས་བྱེད་དེ། །གང་ཡང་གོ་འཕང་ཞི་གང་དེ། །

71-40a

སྔོན་གྱི་ཐུབ་པས་རྣམ་འཛིན་པ། །ཡང་དག་ལྟ་བས་སྔོན་འགྲོ་བ། །དེ་ནི་ངལ་བ་མེད་པར་འཐོབ། །བག་ཡོད་དེ་བཞིན་དད་པ་དང་། །བརྩོན་འགྲུས་རྩོམ་པ་དེ་བཞིན་འཛིན། །ཡེ་ཤེས་གོམས་པ་དམ་པ་བསྟན། །ཐར་པ་ཡི་ནི་སྐྱེ་མཆེད་དྲུག །སྦྱིན་དང་ཚུལ་ཁྲིམས་དུལ་དང་བཟོད། །བྱམས་པར་གྱུར་པས་འཚེ་བ་མེད། །སྙིང་རྗེ་དགའ་བ་བཏང་སྙོམས་ནི། །ཞི་བ་ལེགས་འཐོབ་རྒྱུ་རྣམས་ཡིན། །རྩབ་ཧྲལ་ཅན་དང་སྡིག་ལ་འདྲེ། །ཁྲོན་མ་དེ་བཞིན་མིན་པའི་ཚིག །ལོག་ལྟ་དང་ནི་བག་མེད་ཀྱང་། །དམྱལ་བའི་རྒྱུ་ཡི་རྩེ་མོ་རྣམས། །སེར་སྣ་དང་ནི་ཕྲག་དོག་ངག་རྩུབ་བག་མེད་པ། །བསྟེན་པ་ལ་ནི་མངོན་པར་དགའ་དང་མི་དགེ་དང་། །སེམས་ཅན་འཚེ་ལ་མངོན་པར་དགའ་བའི་ཡིད་དང་ནི། །འདི་དག་ཡི་དགས་ལམ་དུ་འཕགས་པ་དག་གིས་གསུངས། །བློ་གྲོས་བླུན་པོ་དང་ནི་རྨོངས་པ་སྟེན་པ་དང་། །དམ་པའི་ཆོས་ལ་སྨོད་དང་འཁྲིག་པ་ལ་ཡང་དགའ། །ཟས་ལ་ཆགས་པ་དང་ནི་གཉིད་ལ་ཕལ་ཆེ་བ། །དུད་འགྲོ་རྣམས་སུ་སྐྱེ་བའི་རྒྱུ་རྣམས་ཡིན་པར་སྨྲ། །ལུས་དང་ངག་དང་ཡིད་རྣམས་ཀྱིས། །མི་དགེ་རྣམ་པ་གསུམ་ཆེར་བྱས། །སྐྱེས་བུ་བློ་གྲོས་དམན་པ་ནི། །དམྱལ་བར་སྐྱེ་བར་འགྱུར་བ་ཡིན། །རྒྱུ་རྣམས་ཅི་འདྲ་བ་ཡི་ནི། །འབྲས་བུ་དེ་དང་འདྲ་བ་མཐོང་། །འབྲུ་འབྲས་འབྲུ་དང་འདྲ་བ་གང་། །དེ་མེད་པར་ཡང་འབྱུང་མ་ཡིན། །འཁོར་བར་སྡུག་བསྔལ་རྒྱུ་མང་པོ། །མང་པོ་ལེགས་པར་མཐོང་བ་ཡིན། །དེ་ལྟ་ན་ཡང་དེས་རྨོངས་པས། །ལྷ་རྣམས་ཀྱིས་ནི་མི་གོའོ། །དང་པོ་བག་མེད་བདེ་དང་ལྡན། །ཕྱི་ནས་སྡུག་བསྔལ་ལྡན་པར་འགྱུར། །ཕྱིས་གང་སྡུག་བསྔལ་རྒྱུར་གྱུར་པ། །དེ་ནི་མཁས་པས་སྤོང་བར་བྱེད། །ཇི་སྲིད་མྱ་ངན་འདས་མི་གཞོལ། །དེ་སྲིད་བདེ་བ་ཐོབ་མི་འགྱུར། །རྣམ་གྲོལ་སྐྱེས་བུ་ཐམས་ཅད་ནི། །རྟག་ཏུ་བདེ་དང་ལྡན་པར་འགྱུར། །བདེ་གང་བརྟེན་པར་མིན་པ་དང་། །དེ་ནི་བདེ་བར་རབ་མ་བསྒྲགས། །གང་ཡང་བརྟན་པ་དེ་ལ་ནི། །དེ་འདི་བདེ་བ་ཞེས་བརྗོད་དོ། །གོང་ནས་གོང་དུ་ལེགས་འབྲེལ་བའི། །

71-40b

ལས་རྣམས་ལེགས་པར་སྟོན་པར་བྱེད། །འབྲས་བུ་རྣམས་ཀྱང་ལེགས་འབྲེལ་བ། །དེ་ནི་གོང་ནས་གོང་ཉིད་དོ། །དེ་ཕྱིར་ལས་འབྲས་གོ་བ་དང་། །བག་མེད་པ་ཡང་རྣམ་པར་སྤོངས། །བདེ་ལེགས་ཀྱི་ནི་བློ་གྱིས་དང་། །དེ་དག་བདེ་བ་བླ་ན་མེད། །དེ་ལྟར་རྨ་བྱ་རྣམས་ཀྱི་མངའ་བདག་དེས་དེ་དག་རྣམས་ལ་བག་མེད་པ་དང་བྲལ་བར་བྱ་བའི་དོན་དུ་རྣམ་པ་དུ་མར་ཆོས་སྟོན་པར་བྱེད་དེ། བརྟན་ཞིང་གསལ་ལ་སྙན་པ་རྒྱ་ཆེ་བའི་སྐད་རྣམ་པ་དེ་ལྟ་བུ་དག་གིས་གང་ལྷ་དེ་དག་རྣམས་ཀྱི་གླུ་དེ་དག་རྣམས་ཐམས་ཅད་ཉེ་བར་བཅོམ་ནས་དགེ་བའི་ཆོས་ཀྱིས་དཔག་ཚད་སྟོང་ཕྲག་ཉི་ཤུར་སྒྲ་དབྱངས་བཟང་པོ་རྣམས་ཀྱིས་ཀུན་ཏུ་བསྒྲགས་སོ། །ཐོས་པའི་བདེ་བ་དང་ཆོས་ཡོངས་སུ་སྨིན་པའི་བདེ་བ་རྣམས་དང་ཡང་ལྡན་པ་ཡིན་ནོ། །དེ་ནས་ལྷ་གང་དག་དགའ་ལྡན་གྱི་ལྷའི་རིས་ནས་འབབ་པར་བྱེད་པ་དེ་དག་རྣམས་ནི་ནམ་མཁའི་དཀྱིལ་ནས་རྒྱུ་བར་འགྱུར་ཏེ། །ཇི་ལྟར་རྒྱལ་ཆེན་རིས་བཞིའི་ལྷ་རྣམས་རྒྱུ་བར་བྱེད་པ་དེ་ལྟར་དེ་དག་རྣམས་ཀྱང་རྒྱུ་བ་ཡིན་ནོ། །གལ་ཏེ་ཤེད་ན་དེ་དག་རྣམས་ཀྱིས་རྣམ་པར་རྟོག་པ་དུ་མར་གྱུར་པའི་དབྱངས་སྙན་པ་དེ་ཐོས་པར་འགྱུར་རོ། །དེ་ནས་ཐོས་པར་གྱུར་པ་དང་ལྷ་ཉིད་སྟོང་ཕྲག་བདུན་ཅུས་ཏེ། དམ་པའི་ཆོས་ལ་གུས་པ་དང་བག་མེད་པ་ཡང་ཤས་ཆུང་བར་གྱུར་པས་གང་ན་འཐབ་བྲལ་རྣམས་ཀྱི་ལྷའི་ས་ཡོད་པའི་གང་ལ་རྨ་བྱའི་རྒྱལ་པོ་རྣམ་པར་བཀྲ་བ་འདིའི་ལེགས་པར་བཀྲ་བ་དང་བཅས་ནས་ཆོས་སྟོན་པར་བྱེད་པར་བབས་པར་གྱུར་ཏོ། །དེ་ནས་དགའ་ལྡན་གྱི་ལྷ་རྣམས་བབས་པར་རིག་ནས་རྨ་བྱའི་རྒྱལ་པོ་དེ་ཆེས་རབ་ཏུ་དགའ་བར་གྱུར་པའི་ཡིད་ཀྱིས་རྗོད་པར་བྱེད་པ་ཇི་ལྟ་བ་བཞིན་དུ་བདེ་བར་འོངས་སམ། ཀྱེ་ཡེ་ཡང་དག་པའི་ལྷ་རྣམས་འདིར་འོངས་པ་རྣམས་ནི་བག་མེད་པ་རྣམས་ཆུང་བས་རྣམ་པར་རྒྱུ་བ་དང་། འདི་དང་ཕ་རོལ་རྗེས་སུ་དཔྱོད་པར་བྱེད་པ་དང་ཆོས་རྣམ་པ་དུ་མ་ཉན་པས་བབས་པར་གྱུར་པ་ཡིན་མོད་ཀྱི། ཁྱེད་རྣམས་ཇི་ལྟ་བར་བདག་ཅག་གི་ཆོས་ཉོན་དང་དེ་བཞིན་དུ་བདག་གིས་བསྟན་པར་བྱའོ། །ཤིས་པ་ཐབས་སུ་

71-41a

གྱུར་པ་མྱ་ངན་ལས་འདས་པའི་གྲོང་ཁྱེར་ལེགས་པར་འཐོབ་པར་བྱེད་པ་ཐམས་ཅད་ཀྱིས་སྔར་མ་མཐོང་བ་གང་བདག་སྐྱེ་བ་གཞན་ཞིག་ཏུ་མིར་གྱུར་པ་ན། བཅོམ་ལྡན་འདས་འཁོར་བ་འཇིག་གི་སྤྱན་སྔ་ནས་ཐོས་པ་དེ་སྐྱེ་བ་གཞན་རྗེས་སུ་དྲན་པ་དང་སྨོན་ལམ་གྱི་དབང་གིས་ངས་ད་རུང་དྲན་ཞིང་། གཞན་དག་རྣམས་ལ་ཡང་ཉེ་བར་སྟོན་པར་བྱེད་དོ། །དེ་ནས་དགའ་ལྡན་གྱི་ལྷ་དེ་དག་རྣམས་ཀྱིས་རྨ་བྱའི་རྒྱལ་པོ་དེའི་དྲུང་ནས་ཚིག་དག་ཉེ་བར་ཐོས་ནས་ནམ་མཁའི་དཀྱིལ་ནས་བབས་ཏེ། དམ་པའི་ཆོས་ལ་གུས་པས་ཚིམ་པར་གྱུར་པའི་ཡིད་ཀྱིས་ཐམས་ཅད་ཉིད་ཀྱང་རི་དེའི་རྩེ་མོ་འབབ་ཆུ་དང་རྫིང་བུ་ཕལ་ཆེ་བ་དང་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་དང་པད་མའི་རྫིང་བུ་དང་རིན་པོ་ཆེའི་ཁམས་རྣམས་དང་ཡང་དག་པར་ལྡན་པ་དང་བྱ་བརྒྱ་སྟོང་དུ་མས་རྣམ་པར་རྗོད་པར་བྱེད་པས་མངོན་པར་དགའ་བ་དང་། རིན་པོ་ཆེའི་ཁམས་ཀྱི་འབྱུང་ཁུང་རྣམས་དང་ལྡན་པའི་ནོར་བུའི་ཆ་ཤས་ཀྱིས་རྣམ་པར་བཀྲ་བའི་རིའི་རྩེ་མོ་དེ་ལ་ལྷ་དེ་དག་གིས་རྨ་བྱའི་རྒྱལ་པོ་དེ་ཡོངས་སུ་བསྐོར་ནས་ཀུན་ཏུ་གནས་སོ། །གཟུགས་དང་བརྟན་པ་དང་རྒྱ་ཆེན་པོར་གྱུར་པ་ཕུན་སུམ་ཚོགས་པའི་ངོ་བོ་རྣམས་ཐམས་ཅད་ལས་འདི་ལྷག་པར་གྱུར་པས་འཐབ་བྲལ་གྱི་ལྷ་དེ་དག་གི་དྲུང་ན་ཆེས་ལྷག་པར་གྱུར་པ་ནི། ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་(ཀྱིས་,གྱིས་)འཐབ་བྲལ་བ་རྣམས་ཐབས་ཐམས་ཅད་ཀྱིས་བླ་ལྷག་པ་ཡིན་ནོ། །དེ་བཞིན་དུ་དགའ་ལྡན་གྱི་ལྷ་དེ་དག་རྣམས་འཐབ་བྲལ་བའི་དྲུང་ན་བླ་ལྷག་པར་གྱུར་པ་ཡིན་ནོ། །དེ་ནས་འཐབ་བྲལ་བ་དེ་དག་གིས་དགའ་ལྡན་པ་དེ་དག་རྣམས་མངོན་པར་མཐོང་ནས་གཟུགས་ཀྱི་རྒྱགས་པ་དང་དབང་ཕྱུག་དང་རྒྱ་ཆེན་པོ་ཉེ་བར་བཅོམ་པར་གྱུར་པས། གང་ན་རྨ་བྱའི་མངའ་བདག་ཡོད་པར་གྱུར་པ་དེར་ཉེ་བར་འགྲོའོ། །འགའ་ཞིག་དང་འགའ་ཞིག་ནི་རྩེ་བ་ལ་དགའ་བར་གྱུར་པས་ནགས་དང་ཉེ་བའི་ནགས་དག་ཏུ་ཞུགས་སོ། །ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་གྱིས་འཐབ་བྲལ་བ་རྣམས་ཚུལ་ཐམས་ཅད་ཀྱིས་ཁྱད་པར་དུ་འཕགས་པ་ཡིན་ལ། དེ་ལྟར་

71-41b

དགའ་ལྡན་གྱི་ལྷ་དེ་དག་རྣམས་འཐབ་བྲལ་བ་དེ་དག་གི་དྲུང་ན་ཡང་བླ་ལྷག་པ་ཡིན་ནོ། །ཁ་ཅིག་ནི་མ་མཐོང་བའི་ཕྱིར་དང་ངོ་མཚར་བར་གྱུར་པའི་ཕྱིར་ཡང་དགའ་ལྡན་གྱི་ལྷ་དེ་དག་རྣམས་ཉིད་ལ་ཀུན་ནས་མངོན་པར་ལྟ་ཞིང་གནས་པར་གྱུར་ཏོ། །ཁ་ཅིག་ནི་སླར་ཉིད་ཀྱང་རིའི་རྩེ་མོ་དེ་དག་ཉིད་ལ་རྩེ་བའི་དོན་དུ་མངོན་པར་འཁོད་པར་བྱེད་དོ། །དེ་ནས་དགའ་ལྡན་པ་དེ་དག་དང་འཐབ་བྲལ་བ་དེ་དག་རྣམས་ཀྱིས་རྨ་བྱའི་རྒྱལ་པོ་དེ་ལ་ཡོངས་སུ་བསྐོར་ནས་དེ་ན་གནས་སོ། །དེ་ནས་བྱང་ཆུབ་སེམས་དཔའ་དེས་དེ་དག་ལ་འདི་སྐད་ཅེས་སྨྲས་སོ། །ལྷ་དག་ཇི་ལྟར་ཆོས་ལ་གུས་པ་ལ་གོམས་པའི་དབང་གིས་ལྷ་དང་མི་རྣམས་ལ་ཕན་པའི་དོན་གང་ཡིན་པ་དང་མཆོག་ཏུ་བདེ་བ་དང་སེམས་ཅན་རྣམས་ཐམས་ཅད་ལ་ཕན་པ་དང་སེམས་ཅན་ཐམས་ཅད་ལྷ་དང་མི་རྣམས་ལ་ཡང་དག་པར་འགོད་པ་ནི་འདི་ལྟ་སྟེ། ཆོས་ཉི་ཤུ་རྩ་གཉིས་པོ་འདི་དག་རྣམས་ཀྱིས་ནི་ལྷ་དང་མི་རྣམས་འཇིག་རྟེན་འདི་དང་ཕ་རོལ་ཏུ་ཡང་ཕན་པ་དང་བདེ་བ་དང་སྡུག་པ་དང་ཡིད་དུ་འོང་བ་གང་ཡིན་པར་འགྱུར་རོ། །ཆོས་ཉི་ཤུ་རྩ་གཉིས་པོ་གང་གིས་བག་མེད་པ་རྣམས་ཀུན་ནས་འདོར་བ་དང་། ཆུད་གསོན་པར་བྱེད་པ་དང་མེད་པར་བྱེད་པ་དང་དེ་དང་བྲལ་བས་ཀྱང་བདེ་བ་མཐའ་ཡས་པར་གྱུར་པ་ལྷ་དང་མི་རྣམས་མྱ་ངན་ལས་འདས་པའི་མཐར་ཐུག་པར་བྱེད་པ་དང་། ཇི་ལྟར་མས་མ་ཡིན་ཞིང་ཕས་ཀྱང་མ་ཡིན་པ་རྣམས་ཆོས་ཀྱིས་དེ་བཞིན་དུ་ཕན་པར་འགྱུར་བ་དེ་དག་གང་ཞེ་ན་འདི་ལྟ་སྟེ། འགྱོད་པ་དང་ངན་སོང་གི་འཇིགས་པ་དང་བཟོད་པ་དང་བརྩོན་འགྲུས་དང་། ཆོས་སྟོན་པ་དང་སྙིང་རྗེ་དང་སེམས་རབ་ཏུ་འདུལ་བ་དང་རབ་ཏུ་རྟེན་པ་དང་ལས་ལ་དད་པ་དང་ལྡན་པ་དང་། གྲགས་པ་མ་ཡིན་པས་འཇིགས་པ་དང་མངོན་པར་ཞེན་པ་མེད་པ་དང་གཅིག་པུར་དགའ་བ་དང་སེམས་རྣམ་པར་མ་གཡེངས་པ་དང་འཆི་བ་རྗེས་སུ་དྲན་པ་དང་གཟུགས་དང་དབང་ཕྱུག་དང་རིགས་དང་ནད་མེད་པའི་རྒྱགས་པ་དང་བྲལ་བ་དང་མི་གནས་པས་ཉེ་བར་བཅོམ་པ་དང་བརྟན་པ་དང་ངག་འཇམ་པོ་དང་། སེམས་ཅན་ཐམས་ཅད་

71-42a

ལ་མཉམ་པ་ཉིད་དང་ཆོག་ཤེས་པ་དང་ཡུལ་རྣམས་ལ་འཇིགས་པར་ལྟ་བ་དང་སེམས་ལ་ཡིད་ཆེས་པར་མི་བྱེད་དོ། །དེ་ལ་ཆོས་ཉི་ཤུ་རྩ་གཉིས་པོ་དེ་དག་རྣམས་ཇི་ལྟ་བ་བཞིན་དུ་བརྟེན་པར་གྱུར་པ་ན་ལྷའམ་མི་རྣམས་ཀྱང་རུང་སྟེ་ངན་སོང་གི་ས་རྣམས་ལ་སྐྱེ་བར་མི་འགྱུར་རོ། །མྱ་ངན་ལས་འདས་པར་ཡང་མྱུར་བར་ཐོབ་པར་བྱེད་དོ། །དེ་ལ་ཇི་ལྟར་འགྱོད་པར་བྱེད་པར་བྱ་བ་ཡིན་ཞིང་། ཇི་ལྟར་ན་ཐམས་ཅད་ཀྱང་བདེ་ལེགས་ལ་ལེགས་པར་སྤྱོད་པ་ཡིན་ན། ཡིད་ལ་གཅགས་པ་རྣམས་རྣམ་པ་ཐམས་ཅད་དུ་བྱས་པར་གྱུར་ན་ནི། དགེ་བའི་ཆོས་རྣམས་ཀུན་ནས་འཇོམས་པར་བྱེད་དོ། །དེ་ལ་འདི་ཇི་ལྟར་བྱས་པར་གྱུར་ནས་ཡིན་ན། གལ་ཏེ་ཡང་འདི་ན་གཞན་འགའ་ཞིག་མི་དགེ་བ་རྣམས་ལུས་དང་ངག་དང་ཡིད་ཀྱིས་ཀྱང་བྱེད་པར་གྱུར་པ་ན་ནི། དེས་དགེ་སློང་འདི་སྐྱུག་བྲོ་བར་བལྟ་བར་བྱ་བ་དང་། རྣམ་པར་སྨོད་པར་བྱེད་པ་དང་གང་ཡིད་ལ་གཅགས་པར་གྱུར་པ་བྱེད་པ་དེ་དང་ལྷན་ཅིག་ཏུ་གནས་པར་ཡང་མི་བྱེད་དོ། །དེ་ནས་ཡང་གལ་ཏེ་བདག་ཉིད་ཀྱིས་ཇི་ཞིག་ལྟར་རྐྱེན་གྱི་དབང་གིས་བྱས་པར་གྱུར་ཏམ་སེམས་ལ་ཡང་རྣམ་པར་རྟོག་པ་ཀུན་ཏུ་སྐྱེས་པར་གྱུར་ན། དེ་སྐྱེས་པར་གྱུར་པ་ཙམ་ཉིད་ན་ཡང་རབ་ཏུ་འཇོམས་སོ། །ཕྱིར་ཉིད་ཀྱང་རོ་མྱོང་བར་མི་བྱེད་དོ། །གང་དག་གིས་ཕྲོགས་པར་གྱུར་ན་ཡང་གཞན་དག་གི་དྲུང་དུ་མཐོལ་བར་བྱེད་དོ། །འདི་འབྱུང་བར་མི་འགྱུར་བ་ལ་ཡང་ཀུན་ནས་འབད་པར་བྱེད་ཅིང་སེམས་ཀྱིས་འབད་པར་བྱེད་དོ། །དེ་ཁོ་ན་བཞིན་དུ་ཕྱིར་ཞིང་དང་དེ་དག་ཉིད་ལ་སླར་ཡང་དང་སེམས་རབ་ཏུ་གནས་པར་མི་བྱེད་དོ། །དེས་མི་དགེ་བའི་ཆོས་རྣམ་པར་རྟོག་པ་དེ་དག་རྣམས་དེ་ལྟར་སྨེ་བར་བྱེད་དེ། དཔེར་ན་རྟུག་པ་དང་། ཁྱིའི་རོ་མགུལ་པར་བཅིངས་པའམ་མི་གཙང་བ་རྣམས་འགའ་ཞིག་ཏུ་བཅུག་པར་གྱུར་ན། མི་གཙང་བ་དེ་དག་རྣམས་དང་། ཁྱིའི་རོ་དེ་དག་ལ་ཡང་གཙང་མ་འདོད་པའི་སྐྱེས་བུ་རྣམས་སྐྱུག་ལོག་པར་བྱེད་དོ། །དེ་ལྟར་དགེ་སློང་མི་དགེ་བའི་ཆོས་ཡིད་ལ་བྱེད་པ་ལ་སྐྱུག་བྲོ་བར་བྱེད་དོ། །རྣམ་

71-42b

པར་གཤེའོ། །འགྱོད་པར་ཡང་བྱེད་པ་ཡིན་ནོ། །དཔེར་ན་ཡང་སྐྱེས་བུ་གཞན་འགའ་ཞིག་གཙང་མ་འདོད་པ་གཙང་མ་ལ་བསྟེན་པ་གཙང་མ་རྣམས་ལ་སོ་སོར་སྐྱབས་སུ་སོང་བ་དག་བརྒྱ་ལ་ཞིག་ན་བཤང་བ་ཟ་བར་བྱེད་པ་ཡིན་ཏེ། གལ་ཏེ་ཤེད་ན་མི་ཤེས་པས་སམ་བྱིས་པར་གྱུར་པས་གཞན་གྲོགས་པོ་མ་ཡིན་པ་དག་གིས་ཟར་བཅུག་པར་གྱུར་ཀྱང་རུང་སྟེ། དེས་མི་གཙང་བ་དེ་རྣམ་པར་སྨོད་པར་བྱེད་ཅིང་སྨེ་བར་བྱེད་ལ་ཕྱིས་ཀྱང་ཀུན་ནས་ཟ་བར་མི་བྱེད་པར་དེས་ཀྱང་འགྱོད་པར་བྱེད་དོ། །དེ་ཁོ་ན་བཞིན་དུ་དགེ་སློང་ངམ་དེའི་རིགས་ཅན་གཞན་དག་རྣམས་ཀྱང་རུང་སྟེ་གང་འགའ་ཞིག་དགེ་བ་རྗེས་སུ་ཚོལ་བ་རྣམས་ལ་ཅི་ཞིག་ལྟར་མི་དགེ་བའི་ཡིད་ལ་བྱེད་པའི་རྣམ་པར་རྟོག་པ་དག་སྐྱེས་པར་གྱུར་ན་ཡང་རྣམ་པར་སྨོད་པར་བྱེད་དོ། །སྨེ་བར་བྱེད་དོ། །གང་དག་གིས་ཁྲིད་པར་གྱུར་པ་ན་དེ་དག་ན་ཡང་མི་སྐྱེ་བར་བྱ་བའི་དོན་དུ་སེམས་སྐྱེད་པར་བྱེད་ཅིང་དགེ་བ་ལ་ཡང་སྤྱོད་པར་བྱེད་དོ། །འདི་ནི་བག་མེད་པ་རྣམ་པར་འཇོམས་པ་དང་། བག་མེད་པ་རླག་པར་བྱེད་པ་དང་བག་མེད་པ་རྣམས་འཇིག་པར་བྱེད་པའི་ལྷ་དང་མི་རྣམས་ཀྱི་ཆོས་དང་པོ་ཡིན་ནོ། །དེའི་ཕྱིར་སྐྱེས་བུ་དམ་པ་དེ་ཁོ་ན་ཉིད་ཚོལ་བ་རྣམས་དང་། འཁོར་བའི་འཇིགས་པས་འཇིགས་པ་གང་ཡིན་པ་རྣམས་ཀྱིས་འདི་ལྟར་བསླབ་པར་བྱ་སྟེ། མི་དགེ་བའི་རྣམ་པར་རྟོག་པ་ཕྲ་བའི་ཕྲ་བ་ཡིད་ལ་སྐྱེས་པར་གྱུར་ན་ཡང་འགྱོད་པར་བྱའོ། །འདིར་ནི་བག་ཡོད་པར་བྱ་བ་ཡིན་ཏེ། སྐད་ཅིག་ཀྱང་བག་མེད་པར་ནི་མི་བྱའོ། །དེ་ལྟ་བས་ན་མི་དགེ་བའི་ཆོས་རྣམས་ཀྱི་རྩ་བ་གཅིག་པུར་གྱུར་པ་ནི་འདི་ལྟ་སྟེ། རོ་མྱོང་བར་བྱེད་པ་དང་ཡིད་ལ་གཅགས་པར་བྱེད་པ་སྟེ་ཆོས་དང་པོ་ཡིན་ནོ། །ཆོས་གཞན་ཡང་དགེ་བ་ཀུན་ཏུ་འཕེལ་བ་བྱེད་པ་དག་ཡོད་དེ། འདི་ལྟར་ངན་སོང་གིས་འཇིགས་པའོ། །ངན་སོང་གིས་འཇིགས་པ་ཞེས་བྱ་བ་ནི་ཐེག་པ་ཆེན་པོའི་ཆོས་ཡིན་ཏེ། འདིར་ངན་སོང་གིས་འཇིགས་པའི་ལྷ་དང་མི་རྣམས་ཐམས་ཅད་ཀྱི་ཡང་བག་མེད་པ་རྣམས་རླག་པར་བྱེད་པ་དང་། བག་མེད་པ་

71-43a

རྣམ་པར་འཇོམས་པར་བྱེད་པ་ཡིན་པས། དགེ་སློང་དག་གམ་དེ་དག་དང་མཚུངས་པར་གྱུར་པ་གཞན་རྣམས་ཀྱང་རུང་སྟེ། ཐབས་མ་ཡིན་པ་ལ་འཇིགས་པ་རྣམས་ནི་མི་དགེ་བ་རྩོམ་པར་མི་བྱེད་དོ། །གཞན་དག་རྣམས་བྱེད་པ་ན་ཡང་རྗེས་སུ་ཡི་རང་བར་མི་བྱེད་དོ། །མི་དགེ་བའི་ལས་འདི་དག་རྣམས་ཀྱིས་ནི་ཇི་ལྟ་བ་བཞིན་དུ་དམྱལ་བ་དང་ཡི་དགས་དང་དུད་འགྲོ་རྣམས་སུ་སེམས་ཅན་རྣམས་སྐྱེ་བ་ཡིན་ནོ་ཞེས་ཤེས་པ་ཡང་ཡིན་པས། བདག་གིས་མི་དགེ་བའི་ཆོས་དེ་བྱ་བ་མ་ཡིན་ཏེ། གང་གི་ཕྱིར་སྡིག་པའི་འབྲས་བུ་དེས་ཀྱང་ཐབས་མ་ཡིན་པ་རྣམས་སུ་ལྟུང་བར་འགྱུར་རོ། །མི་དགེ་བ་ཆུང་ངུ་ཡང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་རྒྱུ་གང་གིས་སྲོག་ཆགས་རྣམས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་དགེ་སྦྱོང་དང་བྲམ་ཟེ་དང་གཞན་ཡང་དེའི་རིགས་ཅན་རྣམས་ཀྱིས་འདི་ལྟར་བསླབ་པར་བྱ་སྟེ། ངན་སོང་རྣམས་ཀྱིས་འཇིགས་པ་རྣམས་ཀྱིས་རྟག་ཏུ་ཡང་མི་དགེ་བའི་ཆོས་རྣམས་ལ་འཇིགས་པར་བྱའོ། །གང་གི་ཕྱིར་མི་དགེ་བའི་ལས་མཐའ་དག་གི་འབྲས་བུ་རྣམ་པར་སྨིན་པ་རྣམས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་ཉེ་བར་ལོངས་སྤྱོད་པར་བྱེད་པ་ཡིན་པས། བག་མེད་པ་རྣམས་བག་མེད་པར་རྒྱུ་བར་བྱེད་པའི་ལྷ་བློ་དམན་པ་རྣམས་ཀྱིས་དེ་ལྟར་ངན་སོང་ལ་འཇིགས་པར་བྱའོ། །ངན་སོང་རྣམས་ལ་འཇིགས་པའི་ཕྱིར་བག་མེད་པ་ཀུན་ཏུ་སྙེན་པར་མི་བྱེད་དོ། །ལུས་དང་ངག་དང་ཡིད་ཀྱི་མི་དགེ་བའི་ལས་རྣམ་པ་གསུམ་པོ་རྣམས་མི་བྱེད་དོ། །དེ་ཉིན་གཅིག་བཞིན་དུ་རྟག་པར་ཡང་དགེ་བ་རྣམས་ནི་བྱེད་པའང་ཡིན་ལ་མི་དགེ་བ་ཡང་སྤོང་བར་བྱེད་དོ། །དེ་དེ་ལྟར་ན་ངན་སོང་གིས་འཇིགས་པ་རྣམས་ཀྱིས་རྣམ་པར་འཇིགས་པ་ཡིན་ནོ། །ཇི་ལྟར་སྐྱེས་བུ་འགའ་ཞིག་རང་གི་སྟོབས་དང་གཞན་གྱི་སྟོབས་རྣམས་ཀྱི་དེ་ཁོ་ན་ཉིད་མཐོང་བ། དུག་དང་གཅན་གཟན་དང་མེ་དང་མཚོན་ཆ་དང་གཡང་ས་དག་དང་སྲོག་གི་བར་ཆད་བྱེད་པར་འགྱུར་བ་རྣམས་ལས་རྣམ་

71-43b

པར་གཞིག་པར་བྱེད་པ་ཡིན་ནོ། །དེ་བཞིན་དུ་ཐབས་མ་ཡིན་པ་རྣམས་ཀྱིས་འཇིགས་པའི་ཕྱིར་ནི་འབྱུང་བར་འགྱུར་བའི་ཆོས་རྣམས་ལས་རྣམ་པར་གཞིག་པར་བྱེད་དོ། །རྟག་ཏུ་ཡོངས་སུ་སྤོང་བར་བྱེད་པ་དང་། མི་དགེ་བ་རྣམས་ལས་ཕྲ་མོ་ཙམ་ཡང་མི་བྱེད་དོ། །བག་མེད་པ་དག་ལ་ཡང་མི་སྟེན་ནོ། །དེ་ཡོངས་སུ་སྤངས་པར་གྱུར་པ་ལས་ཀྱང་ལྷ་དང་མི་རྣམས་སུ་ལོངས་སྤྱོད་རྣམས་ལ་རྗེས་སུ་སྤྱད་ཅིང་མྱ་ངན་ལས་འདས་པའི་གྲོང་ཁྱེར་རྗེས་སུ་བཙལ་ནས་འདི་ཡང་མྱ་ངན་ལས་འདས་པར་ཅི་ནས་ཀྱང་འགྲོ་བར་འགྱུར་རོ། །དྲི་མ་མེད་པ་མི་གཡོ་བ་ཟག་པ་མེད་པའི་བདེ་བའི་མཆོག་རྣམས་ཐོབ་པར་བྱེད་དོ། །དེའི་ཕྱིར་ན་རྟག་ཏུ་ཡང་ངན་སོང་གིས་འཇིགས་པར་བྱའོ། །དེ་ལྟར་བྱས་པར་གྱུར་ན་དགེ་སྦྱོང་ངམ་བྲམ་ཟེའམ་དེ་དང་འདྲ་བ་རྣམས་ཀྱང་རུང་སྟེ། གོ་འཕང་གི་མཆོག་ཐོབ་པར་འགྱུར་རོ། །འདི་ལ་ཡང་ཚིགས་སུ་བཅད་པའི་དབྱངས་ཀྱིས་བསྙད་པ། སྐྱེས་བུ་ཐབས་མིན་པས་འཇིགས་པ། །བག་མེད་སྟོབས་ནི་སྤོང་བ་པོ། །དགེ་བ་སྤྱོད་ཅིང་ཡོན་ཏན་ཚོལ། །མྱ་ངན་འདས་པ་རྟོགས་པར་འགྱུར། །གང་ཞིག་ཐབས་མིན་པས་འཇིགས་པ། །དེ་ཡི་སེམས་ནི་རྣལ་དུ་གནས། །མཉམ་པར་བཞག་པའི་སེམས་ཀྱིས་ནི། །བདེ་བ་ནས་ནི་བདེ་བ་འཐོབ། །གང་ལ་ངན་སོང་འཇིགས་པ་མེད། །དེ་ནི་སྡིག་པ་མང་པོ་བྱེད། །དེ་ནི་སྡིག་པའི་མེས་བསྲེགས་ནས། །ཕྱི་ནས་དམྱལ་བ་ཐོབ་པར་འགྱུར། །མེ་སྟག་ཤིན་ཏུ་ཕྲ་བས་ཀྱང་། །ཇི་ལྟར་རུང་བར་སྲེག་པ་ཡིན། །དེ་བཞིན་སྡིག་པ་ཆུང་ངུས་ཀྱང་། །སྡིག་པའི་བློ་མེད་དམྱལ་བར་འགྲོ། །དེ་ཕྱིར་བདེ་བ་འདོད་པ་ཡིས། །ངན་སོང་གིས་ནི་འཇིགས་པར་བྱ། །དེས་ཀྱང་མི་རྣམས་ཀུན་ཏུ་སྐྱོབ། །སྡིག་ལས་བདེ་བ་འབྱུང་བ་མིན། །དེ་ལྟར་ཆོས་གཞན་འདི་བྱ་སྟེ། ལྷ་དང་མི་རྣམས་སམ་དགེ་སྦྱོང་དང་བྲམ་ཟེའམ་དེ་དག་དང་འདྲ་བ་གཞན་རྣམས་ཀྱིས་ཀྱང་རུང་སྟེ་ཆོས་གཞན་པོ་འདི་དག་རྣམས་བྱའོ། །གང་དག་འཇིགས་པར་གྱུར་པ་རྣམས་ནི་དེའི་ཡིད་ལས་སྐྱེས་པར་གྱུར་པའི་སྡིག་

71-44a

པ་ཆུང་ངུ་ན་རྣམས་ཀྱང་དུས་དེ་ཉིད་དུ་བཤགས་པར་བྱེད་དོ། །རྗེས་སུ་ཡི་རང་བ་མི་བྱེད་ཅིང་ཕྱིས་ཀྱང་མི་བྱེད་དོ། །སེམས་པར་ཡང་མི་བྱེད་དེ། དེའི་འབྲས་བུ་དམྱལ་བ་དང་ཡི་དགས་དང་དུད་འགྲོའི་སྡུག་བསྔལ་རྣམས་ཡིད་ལ་བྱས་ཤིང་རྟོགས་པ་ཡིན་ནོ། །དེ་ལྟར་ངན་སོང་གིས་འཇིགས་པ་རྣམ་པ་གསུམ་པོ་དེ་དག་རྣམས་བཅུར་ཕྱེ་བས་ནི་མི་དགེ་བ་བཅུའོ། །རྣམ་པར་སྤོང་བར་བྱེད་ཅིང་བྱེད་པ་ཡང་མ་ཡིན་ནོ། །རྗེས་སུ་ཡི་རང་བར་མི་བྱེད་དོ། །དེ་བྱེད་པ་རྣམས་དང་ལྷན་ཅིག་ཏུ་འདྲེ་བར་མི་བྱེད་དོ། །དེ་ནི་སྡིག་པ་རྣམས་ཐམས་ཅད་རྣམ་པར་སྤངས་པའི་སྐྱེས་བུ་དམ་པ་དགེ་བར་སྤྱོད་པ་རྣམ་པར་དག་པར་སྤྱོད་པ་དྲི་མ་མེད་པ་བག་མེད་པ་རྣམ་པར་སྤངས་པ། སྡིག་པ་རྣམས་ཀྱིས་བྱས་པའི་སྲིད་པའི་བརྗེ་བསོར་མི་དགེ་བའི་ལས་རྣམས་ཐམས་ཅད་ནས་སོ་སོར་སྤངས་པ་སྐྱོན་ཐམས་ཅད་ལས་ཡོངས་སུ་གྲོལ་བ་ཡིན་ནོ། །སྐྱོན་ཐམས་ཅད་ལས་ཡོངས་སུ་གྲོལ་བ་རྣམས་དང་། ཉོན་མོངས་པ་རྣམས་ཐམས་ཅད་ལས་རྣམ་པར་གྲོལ་བ་རྣམས་དང་རྣལ་དུ་གནས་པའི་རྣོན་པོ་རྣམས་ནི་སྲིད་པའི་ཆུ་བོའི་ཕ་རོལ་ཏུ་འགྲོ་བར་འགྱུར་རོ། །དེའི་ཕྱིར་འདི་ལྟར་བསླབ་པར་བྱ་སྟེ། རྟག་ཏུ་ངན་སོང་གིས་འཇིགས་པ་རྣམས་གོ་བར་བྱའོ། །ཆོས་གཞན་འདི་ནི་འདོད་པ་སྡུག་པ་ཡིད་དུ་འོང་བ་སེམས་ཅན་རྣམས་ཐམས་ཅད་ཀྱང་མྱ་ངན་ལས་འདས་པའི་མཐར་ཐུག་པར་བྱེད་པ་ཡིན་ནོ། །གཞན་ཡང་བཅོམ་ལྡན་འདས་དེ་ཉིད་ཀྱིས་ལྷ་དང་མི་རྣམས་ལ་ཕན་པ་དང་བདེ་བའི་དོན་དུ་བག་མེད་པ་རབ་ཏུ་གཞོམ་པར་བྱ་བ་དང་། མྱ་ངན་ལས་འདས་པ་ཐོབ་པར་བྱ་བའི་དོན་དུ་ཡང་ཆོས་བསྟན་པ་བདག་མིར་གྱུར་པ་ན་ཐོས་པ་གང་ཡིན་པ་དེ་དག་ངས་དྲན་པ་དང་རྗེས་སུ་འབྲེལ་པ་རྣམས་ལྷ་རྣམས་ལ་བསྟན་པར་བྱ་བའོ། །འདི་ཡང་གང་ཞེ་ན། འདི་ལྟ་སྟེ་བཟོད་པའོ། །བཟོད་པ་ཞེས་བྱ་བའི་ཆོས་རྣམས་ནི་མཆོག་ཏུ་དགེ་བ་དང་། ཤིན་ཏུ་བདེ་ལེགས་སུ་གྱུར་པ་དང་། མཆོག་ཏུ་སངས་རྒྱས་ཀྱིས་བསྔགས་པ་ཡིན་ནོ། །བཟོད་པ་དེ་

71-44b

ཡང་རྣམ་པ་གཉིས་ཡིན་ཏེ། གང་ཡང་ཆོས་མཉམ་པ་ཉིད་ཀྱི་ལམ་དུ་འགྲོ་བའི་བསམ་གཏན་པ་རྣམས་ཀྱི་དཀར་པོའི་ཆོས་རྣམས་ལ་ངེས་པར་བསྟེན་པའི་ཕྱིར་ཆོས་ཉིད་ལ་བརྟན་པར་གྱུར་པ་རྣམས་བསམ་གཏན་གྱི་ལམ་གྱི་དགེ་བའི་ཁྱད་པར་གྱིས་ཀྱང་བཟོད་པ་བྱེད་པའི་བཟོད་པ་ནི། དེ་ལྟར་འདིར་ཡང་བྲག་དང་ནགས་དང་ནགས་ཚང་ཚིང་དུ་མ་དང་བཅས་པའི་འཇིག་རྟེན་མ་ལུས་པ་འདི་དག་རྣམས་ས་གཞིའི་སྟེང་ན་གནས་པར་གྱུར་པ་ཡང་བཟོད་པར་བྱེད་དོ། །འབྱིང་བར་ཡང་མི་འགྱུར་རོ། །དེ་བཞིན་དུ་བཟོད་པས་ཀྱང་མྱ་ངན་ལས་འདས་པའི་ཆོས་རྣམས་ཐོབ་པར་བྱེད་པའི་ཆོས་རྣམས་ཐམས་ཅད་ལ་བརྟན་པ་དང་སྙིང་པོ་དང་ཆོས་ཉིད་དང་ཁྱད་པར་དུ་དང་། གཙོ་བོ་དང་དཀར་པོའི་ཆོས་རྣམས་དང་མྱ་ངན་ལས་འདས་པའི་ལམ་ཐོབ་པར་འགྱུར་བ་རྣམས་ཀྱིས་ཀྱང་བཟོད་པར་བྱེད་དོ། །བཟོད་པ་འདི་དག་ཉིད་བརྟན་པ་དང་ལྡན་པའི་ལམ་མདུན་དུ་བསར་བའི་འཇིག་རྟེན་ལས་འདས་པ་ཡིན་པ་གང་གི་ཕྱིར་མྱ་ངན་ལས་འདས་པ་ཐོབ་པར་བྱེད་པ་ཡིན་ནོ། །གཞན་ཡང་བཟོད་པ་གཉིས་པ་ཡོད་དོ། །འདི་ལྟ་སྟེ་གང་འགའ་ཞིག་དགེ་སྦྱོང་ངམ་བྲམ་ཟེའམ་རྣམ་པ་དེ་ལྟ་བུ་གཞན་དག་རྣམས་ཀྱང་ཁྲོ་བ་སྐྱེས་པར་གྱུར་པའི་དུག་འཇོམས་པར་བྱེད་དོ། །ཁྲོ་བའི་འབྲས་བུ་རིག་པར་གྱུར་ནས་ཁྲོ་བ་དེའི་གོ་སྐབས་འབྱེད་པར་མི་བྱེད་དོ། །དེ་ལ་ཁྲོ་བ་ཉིད་སྐྱེས་པར་གྱུར་ན་དེ་སྲིད་དུ་སྐྱེས་བུ་རང་ཉིད་ཀྱི་རྟེན་སྲེག་པར་བྱེད་དོ། །བཞིན་འགྱུར་བར་བྱེད་དོ། །ཁྲག་རྣམས་ངོར་ལྡོག་པར་བྱེད་དོ། །གཞན་ལ་བག་མེད་པ་གོ་བར་བྱེད་དོ། །འཇིག་རྟེན་པ་འཇིགས་པ་སྐྱེད་པར་བྱེད་དོ། །ཡུལ་ལྗོངས་པ་རྣམས་ཐམས་ཅད་དང་ཡང་མི་འཐུན་པ་དང་ཡིད་དུ་མི་འོང་བ་དང་སྨེ་བར་ཡང་བྱེད་པར་འགྱུར་རོ། །ཕྱི་ནས་ལུས་ཞིག་པར་གྱུར་ནས་ཀྱང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བའོ། །གང་དག་ཁྲོ་བས་ཟིལ་གྱིས་མནན་པའི་སྐྱེས་བུ་རྣམས་ཀུན་ཏུ་སྤྱོད་པར་བྱེད་པ་ལས་བྱ་བ་མ་ཡིན་པ་གཞན་དེ་ནི་ཡོད་པ་མ་ཡིན་ཞིང་བྱེད་པ་ཡང་མ་ཡིན་ནོ། །དེའི་ཕྱིར་ཁྲོ་བ་

71-45a

འདི་དག་མེ་བཞིན་དུ་བརྟན་པ་དག་གིས་ཡོངས་སུ་སྤང་བར་གྱིས་ཤིག །ཕན་པ་བྱེད་པའི་སྐྱེས་བུ་དེ་དག་རྣམས་ཀྱིས་ནི་རྣམ་པ་དེ་ལྟར་སྐྱོན་གྱི་འབྲས་བུ་རྣམས་རྟོགས་ནས་རང་ལ་ཕན་པ་དང་གཞན་རྣམས་ལ་ཕན་པ་ལ་རབ་ཏུ་ཞུགས་པས་བཟོད་པ་བྱེད་ཅིང་འཇིལ་བར་བྱེད་དེ། ཇི་ལྟར་སྐྱེས་བུ་འགའ་ཞིག་གི་ཁྱིམ་ལ་མེ་ཤོར་བར་གྱུར་ན་མེ་ཞི་བར་བྱེད་པ་ལྟར། ཡེ་ཤེས་ཀྱི་ཆུ་དག་གིས་བློ་དང་ལྡན་པ་རྣམས་ཁྲོ་བ་ཀུན་ནས་ཞི་བར་བྱེད་པའི་བཟོད་པ་ཕུན་སུམ་ཚོགས་པ་མཆོག་ཏུ་དགེ་བའི་ཡིད་ཅན་དང་། བཟོད་པ་དང་ལྡན་པ་ཁྲོ་བ་རྣམ་པར་སྤངས་པའི་སྐྱེས་བུ་ལ་སྐྱེ་བོ་རྣམས་ཐམས་ཅད་དང་འཐུན་པར་འགྱུར་རོ། །ཡིད་དུ་འོང་བ་དང་མཐོང་ན་དགའ་བར་ཡང་འགྱུར་རོ། །མཆོག་ཏུ་ཡིད་ཆེས་པའི་ས་དང་བཞིན་གྱི་མདངས་རབ་ཏུ་དང་བ་དང་སེམས་རབ་ཏུ་དང་བར་ཡང་འགྱུར་རོ། །སེམས་ཤིན་ཏུ་ལེགས་པར་གནས་པ་དང་མཆོག་ཏུ་དགེ་བའི་བསམ་པ་དང་ལྡན་པར་འགྱུར་རོ། །ལུས་ཀྱི་ཉེས་པ་དང་བྲལ་བ་དང་། ངག་གི་སྐྱོན་དང་བྲལ་བ་དང་། ཡིད་ཀྱི་གདུང་བ་དང་བྲལ་བ་དང་། ངན་འགྲོའི་འཇིགས་པ་དང་བྲལ་བ་དང་། ཞེ་འགྲས་པའི་སྐྱེ་བོ་རྣམས་དང་བྲལ་བ་དང་། དགྲ་རྣམས་དང་བྲལ་བ་དང་། མི་སྙན་པའི་དྲི་མ་རྣམས་དང་བྲལ་བ་དང་། གནོད་སེམས་དང་བྲལ་བ་དང་། སྙིང་ལ་ཀུན་ཏུ་གཅགས་པ་དང་བྲལ་བ་དང་། རྒྱལ་པོའི་ཆད་པའི་འཇིགས་པ་རྣམས་དང་བྲལ་བ་དང་། མ་བསྒྲུངས་པའི་ཚིག་ངན་པ་རྣམས་བརྗོད་པའི་འཇིགས་པ་དང་བྲལ་བ་དང་། ཀུན་ནས་འགྱོད་པའི་འཇིགས་པ་དང་བྲལ་བ་དང་། ཀུན་ནས་བརྗོད་པའི་འཇིགས་པ་དང་བྲལ་བ་དང་། རྙེད་པའི་འཇིགས་པ་དང་བྲལ་བ་དང་། སྡུག་བསྔལ་གྱི་འཇིགས་པ་དང་བྲལ་བ་དང་། རྒྱགས་པའི་འཇིགས་པ་རྣམས་དང་བྲལ་བའི་སྐྱེས་བུ་ཡོན་ཏན་ཐམས་ཅད་དང་ལྡན་པར་འགྱུར་རོ། །འགྲོ་བ་ཐམས་ཅད་དུ་འདི་སྙན་པར་གྲགས་པ་དང་ཡང་མི་འབྲལ་བར་འགྱུར་རོ། །འཇིག་རྟེན་འདི་དང་ཕ་རོལ་གཉིས་ཀར་སོང་བ་ན་ཡང་སྐྱིད་པར་ཡང་འགྱུར་རོ། །

71-45b

སྐྱེ་བོ་རྣམས་ཐམས་ཅད་ཀྱི་ཡང་མ་དང་ཕ་དག་ཏུ་རུང་བར་འགྱུར་རོ། །ཀུན་གྱིས་འདྲུལ་འཇུག་བྱ་བར་ཡང་འགྱུར་རོ། །སྐྱེས་བུ་དམ་པ་བཟོད་པ་དང་ལྡན་པར་ཡང་འགྱུར་རོ། །དེའི་ཕྱིར་ཁྲོ་བ་གཞན་འདི་ནི་བཙན་དུག་དང་མཚོན་ཆ་དང་རླུང་ཚུབ་དང་མཚུངས་པའི་ཁྲོ་བ་གང་ཡིན་པ་རྣམས་བཟོད་པས་ཞི་བར་བྱེད་དོ། །མཐོལ་བར་བྱེད་པ་དང་བཟོད་པར་བྱེད་པ་དང་སྡོམ་པར་ཡང་བྱེད་དོ། །བཟོད་པ་དེ་ཡང་སྐྱེས་བུ་དམ་པ་དགེ་བར་འདོད་པ་རྣམས་ཀྱིས་ཡིད་ལ་བྱ་སྟེ། རིན་པོ་ཆེ་བཞིན་དུ་ཡོངས་སུ་སྐྱོངས་ཤིག །དེ་ཡང་ཕ་རོལ་ཁྲོ་བས་རྣམ་པར་བསྲེགས་པ་རྣམས་དང་ཁྲོ་བའི་མུན་པ་ན་ཀུན་ནས་གནས་པ་དེ་དག་རྣམས་ལ། དམ་པའི་ཆོས་ཀྱི་སྒྲོན་མ་རབ་ཏུ་སྦོར་བར་བྱེད་པ་དང་། དམུས་ལོང་རྣམས་ཀྱི་ནི་མིག་ཏུ་གྱུར་པའོ། །དམ་པའི་ཆོས་ཀྱིས་ཕོངས་པ་རྣམས་ལ་ནི་ཆོས་ཀྱི་རྫས་སོ། །ལོག་པའི་ལྟ་བས་དབུལ་བ་རྣམས་ནི་འཇོམས་པར་བྱེད་པ་ཡིན་ནོ། །མ་དང་ཕས་སྤངས་པ་རྣམས་ལ་ནི་མ་དང་ཕར་གྱུར་པ་ཡིན་ནོ། །ཁྲོ་བའི་ཆུར་རབ་ཏུ་བྱིང་བར་གྱུར་པ་རྣམས་ཀྱི་རྐྱལ་བར་གྱུར་པས་རྟག་ཏུ་ཕན་འདོགས་པར་བྱེད་པ་ཡིན་ནོ། །ངན་སོང་དུ་རབ་ཏུ་ལྟུང་བ་རྣམས་ལ་ནི་ལག་པ་བརྐྱང་བས་ཤིན་ཏུ་བརྟན་པོས་ལེགས་པར་འདྲེན་པར་བྱེད་པའོ། །སེམས་ཅན་ཁྲོ་བས་ཟིན་པས་དམྱལ་བའི་མེ་མདག་ཏུ་རབ་ཏུ་ལྷུང་བར་གྱུར་པ་རྣམས་ལ་ནི་ཆུའི་བྱ་བ་བྱེད་པ་ཡིན་ནོ། །ཡི་དགས་ཀྱི་འཇིག་རྟེན་དུ་རབ་ཏུ་རྒྱུགས་པར་གྱུར་པའི་སྐྱེས་བུ་ཕྲག་དོག་དང་ལྡན་པ་རྣམས་བཀྲེས་པ་དང་སྐོམ་པའི་སྡུག་བསྔལ་གྱིས་རྣམ་པར་བཅོམ་པ་རྣམས་ལ་ནི་ཟས་དང་སྐོམ་བཞིན་དུ་བྱེད་པ་ཡིན་ནོ། །དུད་འགྲོའི་འགྲོ་བ་དང་རབ་ཏུ་འབྲེལ་བ་དང་ལྡན་པའི་སེམས་ཅན་རྣམས་ཕན་ཚུན་དུ་གསོད་པར་མངོན་པར་དགའ་བ་རྣམས་ལ་ནི་གསོན་པ་ལེགས་པར་སྦྱིན་པར་བྱེད་པ་རྣམས་བཟོད་པ་བསྟེན་ཅིང་བསྒོམས་ལ་ལན་མང་དུ་བྱས་པ་ལས་ཡིན་པས། དེའི་ཕྱིར་ངན་སོང་གི་འཇིགས་པས་འཇིགས་པར་གྱུར་པའི་སྐྱེས་བུ་དགེ་བ་རྣམས་ཀྱིས་རབ་ཏུ་བརྩོན་པ་མཆོག་གིས་ཡིད་ལ་བྱའོ། །དེ་ནས་

71-46a

དུས་དེའི་ཚེ་ན་རྨ་བྱའི་བདག་པོ་དེས་གཙུག་ལག་གི་ཚིགས་སུ་བཅད་པ་བརྗོད་པ། ཇི་ལྟར། བཟོད་པས་བརྒྱན་པའི་སྐྱེས་བུ་ལ། །ནོར་གྱིས་བརྒྱན་པས་བསྒྲུན་དུ་མེད། །ནོར་རྣམས་འཕྲོག་པར་བྱེད་ན་ཡང་། །བཟོད་པ་ཉིད་ནི་ནམ་ཡང་མིན། །བཟོད་པ་དང་ལྡན་སྐྱེས་བུ་ལ། །ལུས་ཅན་ཐམས་ཅད་དགའ་བར་འགྱུར། །ཕྱི་ནས་བདེ་ལེགས་ལ་སྦྱོར་རོ། །དེ་ཕྱིར་བཟོད་པ་དཀའ་ཐུབ་མཆོག །བཟོད་དང་ལྡན་པའི་སྐྱེས་བུ་ནི། །ཁྲོ་བའི་སྐྱོན་རྣམས་ཐམས་ཅད་སྤངས། །སྐྱེ་བ་འདི་དང་གཞན་དུ་ཡང་། །དགེ་ལེགས་ལ་ནི་རབ་ཏུ་སྦྱོར། །བཟོད་པའི་ནོར་དང་ཚུལ་ཁྲིམས་ནོར། །ཤེས་རབ་ཀྱང་ནི་ནོར་ཉིད་ཡིན། །ནོར་དེ་རྣམས་ནི་བསྔགས་པ་ཡིན། །དབྱིག་ལ་སོགས་པ་ནམ་ཡང་མིན། །བཟོད་དང་ལྡན་པའི་སྐྱེས་བུ་ནི། །རྟག་ཏུ་དམ་པས་མཆོད་པར་བྱེད། །སྙན་གྲགས་ལ་ཡང་སྦྱོར་བར་འགྱུར། །དེ་ཕྱིར་ཀུན་ནས་བཟོད་པ་མཆོག །ཁྲོ་བའི་དུག་གི་སྨན་མཆོག་ཏུ། །བཟོད་པ་འདི་ནི་འདོད་པ་ཡིན། །ཁྲོ་བ་བཟོད་པས་ངེས་བཅོམ་པ། །སླར་ཡང་སྐྱེ་བར་མི་འགྱུར་རོ། །མུན་པས་རབ་ཏུ་ཟིལ་མནན་པའི། །བྱིས་པ་རྣམས་ལ་ཁྱད་པར་དུ། །བཟོད་པའི་ལམ་ནི་རབ་སྟོན་པའི། །སྒྲོན་མའི་བྱ་བ་བྱེད་པ་ཡིན། །དམ་ཆོས་ནོར་དང་བྲལ་བ་རྣམས། །འགྲོ་བ་ལྔར་ནི་འཁྱམ་པ་ཡིན། །གང་དག་བཟོད་པ་འདི་ཡི་རྫས། །དེ་དག་འཇིག་རྟེན་ནོར་ལྡན་དྲན། །ཁྲོ་བ་ཡི་ནི་མུན་པའི་ཚོགས། །རྒལ་དཀའ་བ་ཡི་འབྲོག་དགོན་པར། །བཟོད་པའི་ལམ་ཟས་ཟ་མཐོང་བ། །ཡིད་ཅན་རྣམས་ནི་ངེས་པར་སྒྲོལ། །དམ་ཆོས་ལམ་ནི་སྟོན་རྣམས་ལ། །སྟེན་པར་བྱེད་པ་བཟོད་པ་མཆོག །ངན་སོང་འཇིགས་པས་འཇིགས་རྣམས་ལ། །འཇིགས་པ་མེད་པ་བཟོད་པར་བརྗོད། །སྡུག་བསྔལ་རྣམ་པར་འཇོམས་པ་དང་། །མི་རྣམས་བདེ་བ་རྟག་ཏུ་འབྱུང་། །རྟག་ཏུ་བདེ་ལེགས་ཀུན་ཐོབ་པ། །བདེ་ལེགས་མིན་སྤངས་བདེ་ལེགས་ཡིན། །དེ་ལ་དམ་པ་རྣམས་རྟག་དགའ། །ཡིད་ཆེས་ཡོན་ཏན་བྱེད་

71-46b

པ་ཡི། །དགེ་བ་བཟང་པོ་འབྱུང་བྱེད་དང་། །མི་དགེ་བ་རྣམས་རྣམ་པར་སྤོང་། །སྐྱེས་བུའི་ཐར་པ་ལེགས་སྟོན་དང་། །འཁོར་བའི་འཇིགས་པས་འཇིགས་པར་བྱེད། །མཐོ་རིས་ཐེམ་སྐས་གྱུར་པ་དེས། །དམྱལ་བའི་མེ་ནི་རྣམ་པར་འཇོམས། །ཡི་དགས་འཇིག་རྟེན་ལ་སྐྱོབ་དང་། །དུད་འགྲོའི་སྐྱེ་གནས་དེས་དེ་བཞིན། །ཡོན་ཏན་ཚོགས་ཀྱིས་རྟག་གང་བའི། །ལུས་ཅན་དེ་རྣམས་ཤིས་པར་འགྱུར། །རབ་བསྔགས་བདེ་བ་དེས་ཐོབ་པ། །བཟོད་པ་རབ་ཏུ་བརྩོན་པས་ཐོབ། །དེ་ལྟར་བཟོད་པ་ཞེས་བྱ་བའི། །ཆོས་གཞན་འདིར་ནི་བསྟེན་པར་གྱིས། །མཆོག་ཏུ་བདེ་བ་འབྱུང་བར་འགྱུར་བ་དང་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ། །མྱ་ངན་ལས་འདས་པ་ཡང་ཐོབ་པ་ཡིན་ནོ། །དེའི་ཕྱིར་བག་མེད་པ་དང་བྲལ་བར་བྱ་བའི་དོན་དུ་དང་ལྷ་དང་མིའི་འགྲོ་བ་རྣམས་སུ་སྐྱེ་བར་བྱེད་པ་རྣམས་ཀྱིས་བཟོད་པར་བྱའོ། །གཞན་ཡང་དགེ་ལེགས་ཀྱི་ཆོས་བག་མེད་པའི་དུག་རྣམ་པར་འཇོམས་པར་བྱེད་པ་རྣམས་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བར་གྱུར་པ་གཞན་དག་རྣམས་ཀྱིས་ཀྱང་བྱའོ། །འདི་ཡང་གང་ཞེ་ན་འདི་ལྟ་སྟེ། བརྩོན་འགྲུས་སོ། །བརྩོན་འགྲུས་ནི་མཆོག་ཏུ་དགེ་ལེགས་ཀྱི་ཆོས་དགེ་བ་དང་ཡང་དག་པར་ལྡན་པ་ཡིན་ཏེ། ཐར་པའི་ལམ་དུ་འཁྲིད་པའི་བརྩོན་འགྲུས་ཡང་དག་པར་བྱས་ནས། ཡུལ་དང་དུས་སུ་རིགས་པར་བྱས་པར་གྱུར་པ་རྣམས་ཀྱིས་ནི་ཤིས་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པ་རྣམས་ལ་ཡང་རིགས་པ་དང་འགལ་བ་མེད་པ་དང་མཐར་ཐུག་པར་སྟེན་པར་གྱུར་པའི་དགེ་སྦྱོང་དང་བྲམ་ཟེ་རྣམས་འཇིག་རྟེན་དང་འཇིག་རྟེན་ལས་འདས་པའི་ཆོས་རྣམས་ལ་ཡང་དག་པར་བརྩོན་པ་དང་ལྡན་པས་ཤིས་པར་འགྱུར་རོ། །དུས་སུ་ལྡང་བ་དང་དུས་སུ་ངལ་སོ་བར་བྱེད་པའི་གང་ཡུལ་དང་དུས་ཀྱི་ཐབས་ཤེས་པ་གང་ཡིན་པ་དེ་དག་ནི་དགེ་ལེགས་ཀྱི་སྐལ་བ་དང་ལྡན་པར་འགྱུར་རོ། །བརྩོན་འགྲུས་དེས་སྙོམ་ལས་རྣམས་ཐམས་ཅད་ཉེ་བར་

71-47a

བཅོམ་ནས་ངེས་པར་གནས་སོ། །ཉོན་མོངས་པ་གཞོམ་པ་ལ་བརྩོན་པ་དང་ལྡན་པའི་དགེ་སྦྱོང་དང་བྲམ་ཟེ་དེ་དག་རྣམས་ནི། མཉན་བྱ་དང་རེག་བྱ་དང་རོ་དང་བསྣམ་པ་དང་བལྟ་བར་བྱ་བ་དེ་དག་རྣམས་ལས་བརྩོན་འགྲུས་དང་ལྡན་པར་གྱུར་ནས་ཡིད་ངེས་པར་ཟློག་པར་བྱེད་དོ། །དེ་རྐྱེན་རྣམས་ལས་སྐྱེས་པར་གྱུར་ན་ཡང་ཡིད་ཀྱི་རྣམ་པར་དཔྱོད་པར་བྱེད་ཅིང་སྡོམ་པར་བྱེད་དོ། །གྲོགས་གཉིས་པ་བརྩོན་འགྲུས་དང་ལྡན་པར་གྱུར་པས། ཡུལ་རྣམས་ཐམས་ཅད་ལས་སེམས་ངེས་པར་ཟློག་པར་བྱེད་དོ། །ཆེས་ཤིན་ཏུ་མྱུར་བར་སེམས་ཀྱི་ཤུགས་འབྱུང་ཞིང་འབྱུང་བར་གྱུར་པ་རྣམས་དགེ་བའི་བརྩོན་འགྲུས་ཀྱིས་སོ་སོར་རྣམ་པར་སྤོང་བར་བྱེད་དོ། །ཀུན་ཏུ་སྡུད་པར་བྱེད་ཅིང་རབ་ཏུ་འགོག་པར་བྱེད་དོ། །ངེས་པར་སྡོམ་པར་བྱེད་དོ། །གང་གི་ཕྱིར་བརྩོན་འགྲུས་ནི་ཆོས་རྣམས་ཐམས་ཅད་ཀྱི་རྩེ་མོར་གྱུར་པའི་ཆོས་ཡིན་ནོ། །དེ་དང་འགྲོགས་པའི་དགེ་བའི་ཆོས་གང་ཡིན་པ་རྣམས་ནི་ཤིན་ཏུ་བརྟན་པ་དང་ཉམས་པ་མེད་པ་དང་། འབྲས་བུ་དང་བཅས་པར་འགྱུར་རོ། །བརྩོན་འགྲུས་མདུན་དུ་བདར་བའི་དགེ་བའི་སེམས་ཀྱི་ཡོན་ཏན་ནི། ཡང་དག་པར་རྫོགས་པའི་བྱང་ཆུབ་ཀྱི་མཐར་ཐུག་པར་འགྱུར་རོ། །དེས་ན་ཡོན་ཏན་རྣམས་རྟོགས་པར་བྱས་ལ་ཐེག་པ་ཆེན་པོ་ལ་ཡང་དག་པར་གནས་ནས། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པར་འདོད་པའི་དགེ་སྦྱོང་ངམ་བྲམ་ཟེ་དེ་དག་རྣམས་ཀྱིས་ཀྱང་དེ་རྗེས་སུ་འཐུན་པའི་བརྩོན་འགྲུས་ལ་གོམས་པར་བྱའོ། །འཇིག་རྟེན་པ་དང་འཇིག་རྟེན་ལས་འདས་པའི་དོན་རྣམས་ལ་ཡང་བརྩོན་འགྲུས་ཉིད་ལྷག་པར་འགྱུར་རོ། །སྐྱེས་བུ་འཇིག་རྟེན་པའི་དོན་གང་དག་རྩོམ་པར་བྱེད་པ་ན་ཡང་དེ་དག་རྣམས་ཐམས་ཅད་ཀྱང་ཤིན་ཏུ་བརྟན་པའི་བརྩོན་འགྲུས་ཀྱིས་བརྩམས་པར་བྱས་ནས་ནི་འབྲས་བུ་མེད་པར་མི་འགྱུར་རོ། །དུས་རིང་དུ་གནས་པ་དང་གཞན་རྣམས་ཀྱིས་ཉེ་བར་མི་ཆོམས་པ་དང་འཆི་བའི་མཐར་ཐུག་པར་བྱེད་པའི་འཇིག་རྟེན་པའི་འཇིགས་པ་ཆེན་པོ་དང་

71-47b

བཅས་པ་མ་ལུས་པ་རྣམས་བྱུང་དུ་ཟིན་ཀྱང་བརྩོན་འགྲུས་དང་ལྡན་པའི་སྐྱེས་བུ་རྣམས་ནི་སེམས་སྨས་པར་མི་འགྱུར་རོ། །གཡོས་པར་མི་བྱེད་ཅིང་ན་ཚ་མེད་དོ། །རང་དང་གཞན་གྱི་དོན་རྣམ་པར་ཉམས་པ་ཆེན་པོ་རྣམས་བྱུང་བར་གྱུར་ན་ཡང་ཡི་མུག་པར་མི་འགྱུར་ཞིང་ཡང་དང་ཡང་དུ་དོན་དེ་ཉིད་རྩོམ་པར་བྱེད་དོ། །རྒྱགས་པར་བྱེད་དོ། །དགྲ་བོ་རྣམས་ཀྱིས་ཀྱང་གདུལ་དཀའ་བར་འགྱུར་རོ། །འདི་དག་གི་དོན་འགའ་ཞིག་གྲུབ་པ་ལ་འཇོམས་པར་མི་འགྱུར་རོ། །དོན་གང་དང་གང་བརྩམས་པ་དེ་དག་རྣམས་རྒྱས་པར་འགྱུར་རོ། །དེ་ལྟར་རེ་ཞིག་འཇིག་རྟེན་པའི་དོན་རྣམས་ལ་ཡང་དེ་ཤེས་པར་གྱུར་པའི་མཁས་པ་རྣམས་ཀྱིས་བསྔགས་པར་བྱེད་ན། འཇིག་རྟེན་ལས་འདས་པའི་དོན་ཡང་དག་པའི་ཤེས་པ་སྔོན་དུ་བྱེད་པ་རྣམས་ལ་བརྩོན་འགྲུས་གཙོ་བོར་གྱུར་པ་ལ་ལྟ་ཅི་སྨོས། དེའི་ཕྱིར་ཐམས་ཅད་ལ་གནས་སྐབས་ཐམས་ཅད་དང་དུས་ཐམས་ཅད་དུ་ཡང་ཤེས་པ་སྔོན་དུ་བཏང་བས་ཡུལ་དང་དུས་སུ་འཚམ་པ་དང་རིགས་པ་དང་ལྡན་པས་བརྩོན་འགྲུས་བརྩམ་པར་བྱའོ། །དེ་ལས་མཐར་ཐུག་པའི་བདེ་བ་རྣམས་འབྱུང་བར་འགྱུར་རོ། །བཟློག་པ་ལས་ནི་བདེ་བ་མ་ཡིན་པ་འབྱུང་བ་དང་དོན་མ་ཡིན་པ་དུ་མ་རྣམས་སུ་འགྱུར་རོ། །དེའི་ཕྱིར་ན་ལོག་པའི་ཤེས་པ་སྔོན་དུ་བཏང་བའི་བརྩོན་འགྲུས་རྣམས་ནི་བརྩོན་འགྲུས་མ་ཡིན་པར་རིག་པར་བྱའོ། །དེ་ནས་དེའི་ཚེ་རྨ་བྱའི་མངའ་བདག་དེས་གཙུག་ལག་གི་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། ཡུལ་དང་དུས་སུ་རིག་པ་ཡི། །བྱ་བའང་རབ་ཏུ་བརྩོན་ལྡན་པ། །བརྩོན་འགྲུས་རིགས་པས་བརྩམས་གྱུར་པའི། །འབྲས་བུ་འབྲས་དང་བཅས་པར་འགྱུར། །རིགས་པ་ཡུལ་དང་བྱ་བ་བྲལ། །ཆོས་ཀྱིས་ཡོངས་སུ་སྤངས་པ་ཡི། །བྱ་བ་བྱེད་པ་ཉམས་པར་འགྱུར། །བརྩོན་འགྲུས་ཀྱིས་ནི་ཡོངས་སྤངས་པས། །རིགས་པས་བརྩོན་འགྲུས་རྩོམ་པ་ནི། །མཁས་པ་ཐར་པར་འགྲོ་བ་ཡིན། །ནམ་མཁའ་ལ་ནི་མདའ་འཕངས་བཞིན། །ལྷ་ཡི་འཇིག་རྟེན་དུ་ཡང་འགྲོ། །སྟོབས་

71-48a

དང་སྐྱེས་བུ་བརྩོན་འགྲུས་ཅན། །དགོས་པ་གང་དག་བརྩམ་གྱུར་པ། །དེ་དག་དེ་ནི་རབ་འགྲུབ་ཅིང་། །རྣམ་བྱང་བར་ཡང་འགྱུར་བ་ཡིན། །འཇིག་རྟེན་འདས་པའི་དོན་འགའ་ཞིག །ལྷ་ཡི་འཇིག་རྟེན་ལས་འདོད་པ། །དེ་ནི་བརྩོན་འགྲུས་ཀྱིས་རབ་འགྲུབ། །བརྩོན་འགྲུས་བྲལ་བས་ནམ་ཡང་མིན། །སྙིང་ལས་ཆུང་ཞིང་བརྩོན་འགྲུས་བྲལ། །ཆོས་ཀྱང་ཡོངས་སུ་སྤངས་པ་ཡི། །མི་ལ་དཔལ་ནི་རྒྱས་མིན་ཏེ། །ཞིམ་པོར་ཟ་ཞིང་ཟས་ཀྱི་བཞིན། །འཕགས་པའི་ལམ་ནི་ཡན་ལག་བརྒྱད། །ཤེས་པ་ལེགས་པར་ཡོངས་སུ་བསྐྱངས། །བརྩོན་འགྲུས་ལྡན་པ་སྤྲོ་བ་ཆེ། །འགྲོ་བའི་མཆོག་ཏུ་འགྲོ་བར་འགྱུར། །བརྩོན་འགྲུས་ཀྱིས་ཀྱང་བྱང་ཆུབ་འཐོབ། །བརྩོན་པས་དེ་བཞིན་མཐོ་རིས་དང་། །སངས་རྒྱས་ཉིད་ཀྱང་བརྩོན་ལྡན་པས། །བརྩོན་འགྲུས་དང་མཚུངས་འགྲོ་བ་མེད། །དེ་ཕྱིར་ཡོན་ཏན་དེ་རྟོགས་ལ། །བརྩོན་འགྲུས་ལྡན་པས་དབང་པོ་ཁྲིད། །བརྩོན་འགྲུས་བརྩམས་པའི་བློ་གྱིས་དང་། །བརྩོན་འགྲུས་མཚུངས་པའི་ནོར་ཡོད་མིན། །དེ་ལྟར་རྣམ་པར་བཀྲ་བ་ཞེས་བྱ་བའི་རྨ་བྱའི་རྒྱལ་པོ་དེས་དགའ་ལྡན་པའི་ལྷ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་སྐྱེ་བ་གཞན་རྗེས་སུ་དྲན་པར་གྱུར་པས་གཙུག་ལག་གི་ཆོས་རྣམས་སྟོན་པར་བྱེད་དོ། །ལྷ་དེ་དག་ཉིད་ཐམས་ཅད་ཀྱང་གཙུག་ལག་གི་ཆོས་དེ་དག་རྣམས་ཐོས་པར་གྱུར་པ་དང་། བག་མེད་པ་རྣམས་དང་བྲལ་བ་དང་རྣ་བ་ཀུན་ནས་ལྷགས་ཤིང་ཡིད་ཀྱང་རྩེ་གཅིག་ཏུ་གྱུར་པས་རྣལ་དུ་ཕེབས་པའི་ལྷ་དེ་དག་རྣམས་ཀྱི་ཡིད་རྣམས་རྟོགས་ནས། །རྨ་བྱའི་མངའ་བདག་དེ་གཞན་ཡང་ཤིན་ཏུ་ལེགས་པར་བརྩམས་པའི་བློ་དང་ལྡན་པས་ཤིན་ཏུ་རབ་ཏུ་རངས་པར་གྱུར་པས་ཆོས་གཞན་སྟོན་པར་བྱེད་པ་ནི། ཐབས་སུ་གྱུར་པ་དང་ལེགས་པ་དང་ཤིས་པ་དང་མྱ་ངན་ལས་འདས་པར་འགྲོ་བར་འགྱུར་བ་རྣམས་ལྷ་དེ་དག་རྣམས་ལ་ཕན་པའི་དོན་དང་བདེ་བའི་དོན་དུ་སྟེ། གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་

71-48b

དཔའ་གཞན་ཡང་ཆོས་ཆེན་པོ་གཞན་ལྔ་པ་ལྷ་དང་མི་རྣམས་ཀྱི་དོན་དང་ཕན་པ་དང་བདེ་བར་འགྱུར་བའོ། །འདི་ཡང་གང་ཞེ་ན། འདི་ལྟ་སྟེ་ཆོས་སྟོན་པའོ། །ཆོས་སྟོན་པ་ནི་གང་གི་ཕྱིར་སྦྱིན་པ་ཐམས་ཅད་ཀྱི་ནང་ནས་བླ་ལྷག་པ་ཡིན་ཏེ། རྒོད་པ་འདི་དག་ཐམས་ཅད་འཇོམས་པར་བྱེད་པ་ནི། འདི་ལྟ་སྟེ་ཆོས་སྟོན་པར་བྱེད་པའོ། །ཆོས་སྟོན་པ་དང་ཉན་པ་དང་། ཆོས་སྟོན་པ་ལ་གུས་པ་དང་། ཆོས་སྟོན་པ་ལ་དང་བ་དང་། ཆོས་སྟོན་པ་ལ་གཅེས་པར་བྱེད་པ་དང་། ཆོས་སྟོན་པ་ལ་སྒྲུབ་པ་དང་། ཆོས་སྟོན་པ་རྒྱུན་མི་འཆད་པར་བྱེད་པ་དང་། དེ་བཞིན་གཤེགས་པས་ཀྱང་ཆོས་བླ་མར་མཛད་པ་ཡིན་ན་གཞན་ཉན་ཐོས་དང་རང་སངས་རྒྱས་རྣམས་ལ་ལྟ་སྨོས་ཀྱང་ཅི་དགོས། གང་གི་ཕྱིར་ཡོན་ཏན་བཅུ་གཅིག་དང་ལྡན་པར་གྱུར་པའི་ཆོས་སྟོན་པ་ནི་གཅེས་པར་འགྱུར་བ་ཡིན་ནོ། །ཡོན་ཏན་བཅུ་གཅིག་གང་ཞེ་ན། འདི་ལྟ་སྟེ་ཡུལ་དང་དུས་སུ་རིགས་པ་དང་གོ་བར་འགྱུར་བ་དང་། འགལ་བ་མེད་པ་དང་གསལ་བ་དང་རྙེད་པ་དང་བཀུར་སྟིའི་རྩ་བས་མ་ཡིན་པ་དང་། གདུལ་བྱའི་སེམས་ཀྱི་རྗེས་སུ་འཐུན་པར་ཆོས་སྟོན་པ་དང་། སྦྱིན་པའི་འབྲས་བུ་སླུ་བ་མེད་པར་སྟོན་པ་དང་། ཐེག་པ་ཆེན་པོ་དང་ཡང་དག་པར་ལྡན་པ་དང་འཁོར་བའི་ཉེས་དམིགས་ཀྱི་ཆོས་སྟོན་པ་དང་། མཐོ་རིས་སུ་འབབ་པར་འགྱུར་བའི་ཆོས་སྟོན་པ་དང་། ལས་དང་འབྲས་བུ་ཀུན་ཏུ་སྟོན་པར་བྱེད་པས་སྟོན་པ་སྟེ། དེ་ལྟར་རྣམ་པ་བཅུ་གཅིག་གིས་ཆོས་སྟོན་པར་བྱེད་པ་ནི་ཉན་པ་པོ་རྣམས་དང་རབ་ཏུ་སྨྲ་བར་བྱེད་པ་རྣམས་ལ་ཡང་གཅེས་པར་འགྱུར་བའི་ཆོས་རྣམས་ཡིན་ནོ། །དོན་དུ་བྱེད་པ་དང་ཡོན་ཏན་དུ་བྱེད་པ་དང་བདེ་བར་བྱེད་པ་དང་མྱ་ངན་ལས་འདས་པའི་མཐར་ཐུག་པར་བྱེད་པ་རྣམས་ཇི་ལྟ་ཇི་ལྟར་ཡོངས་སུ་སྔོ་བར་བྱེད་པ་དེ་ལྟ་དེ་ལྟར་འགྱུར་བ་ཡིན་ནོ། །ཆོས་སྨྲ་བ་ནི་གང་གི་ཕྱིར་རྣམ་པ་སྣ་ཚོགས་པའི་སྦྱིན་པ་འདི་དག་རྣམས་ཐམས་ཅད་ཀྱི་དྲུང་ན་ཡང་དམ་པའི་ཆོས་སྟོན་པའི་སྦྱིན་པ་ནི་ཤིན་ཏུ་ལྷག་པ་ཡིན་ནོ། །ལུས་ཅན་རྣམས་ཐམས་ཅད་ལ་ཡང་མྱ་ངན་ལས་འདས་པའི་མཐར་

71-49a

ཐུག་པའི་བདེ་བ་རྣམས་དང་ལྡན་པར་འགྱུར་རོ། །དམ་པའི་ཆོས་སྟོན་པར་བྱེད་པ་དང་ཉན་པའི་ཡོན་ཏན་གཞན་ཡང་ཡོད་དེ། གང་འགའ་ཞིག་ཆོས་སྒྲོགས་པ་ལ་དད་པ་དང་རབ་ཏུ་དད་པ་དང་ལྡན་པ་དབང་པོ་ཁ་ཕྱེ་བ་བློ་གཙང་བ་གཅིག་ཏུ་དཀོན་མཆོག་གསུམ་ལ་རབ་ཏུ་དང་བའི་བློས་ཁྱིམ་པའམ་རབ་ཏུ་བྱུང་བ་ཡང་རུང་སྟེ། དམ་པའི་ཆོས་ཉན་པར་འདོད་པས་ཁྱིམ་ནས་བྱུང་ནས་ལྷ་ཁང་ངམ་ཀུན་དགའ་ར་བར་འགྲོ་བར་བྱེད་པ་ན། དེ་གོམ་པ་འབོར་བ་དང་གོམ་པ་འབོར་བ་ལ་ཚངས་པའི་བསོད་ནམས་འབྱུང་བར་འགྱུར་རོ། །ཡང་གང་དག་ཆོས་དང་ཆོས་སྨྲ་བ་ལ་ནོར་དག་གིས་མཆོད་པར་བྱེད་པ་དེས་ནི་དངོས་སུ་སངས་རྒྱས་ལ་མཆོད་པར་འགྱུར་རོ། །དེ་ཇི་ལྟ་ཇི་ལྟར་མཆོད་པ་དེ་དག་ཡོངས་སུ་སྔོ་བར་བྱེད་པ་ན། དེ་ལྟ་དེ་ལྟར་ཡོངས་སུ་སྨིན་པར་འགྱུར་རོ། །དེ་ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་འགྱུར་བ་ཡིན་ནོ། །ཆོས་སྟོན་པ་པོ་མཆོད་པར་བྱེད་པ་གང་ཡིན་པ་སྟེ། དེ་ཅིའི་ཕྱིར་ཞེ་ན། ཆོས་བསྒྲགས་པ་ལས་སེམས་ལས་སུ་རུང་བར་འགྱུར་བའི་ཕྱིར་རོ། །དེ་ལས་སུ་རུང་བར་བྱས་པ་ལས་ཀྱང་ཐོག་མ་མེད་པའི་དུས་ནས་ཞུགས་པར་གྱུར་པའི་མུན་པ་རྣམས་འཇོམས་པར་བྱེད་པའི་ཕྱིར་རོ། །དེ་ལས་གཞན་འགའ་ཞིག་གིས་ཀྱང་སེམས་ལས་སུ་རུང་བར་བྱེད་པ་ནི་མ་ཡིན་ཏེ། ཆོས་སྨྲ་བ་རྣམས་ཇི་ལྟ་བ་བཞི་པོ་རྣམས་ཀྱི་ཡང་ཕན་པ་ལ་ལན་གྱིས་གླན་པར་སླ་བ་མ་ཡིན་ནོ། །བཞི་པོ་གང་དག་ཞེ་ན་འདི་ལྟ་སྟེ། མ་དང་ཕ་དང་སངས་རྒྱས་དང་ཆོས་སྟོན་པ་པོའོ། །དེ་དག་རྣམས་ལ་བྱིན་པ་ནི་གཞལ་དུ་མེད་པར་འགྱུར་རོ། །རྒྱུ་དང་འབྲས་བུ་ལ་ཀུན་ཏུ་རྨོངས་པ་རྣམས་ནི་ཆོས་བསྟན་པ་ཐོས་ནས་རྒྱུ་དང་འབྲས་བུ་ལ་དད་པ་དང་ལྡན་པར་འགྱུར་རོ། །ལོག་པའི་ལྟ་བ་ལ་སེམས་ཀུན་ཏུ་ཞུགས་པ་རྣམས་ནི་ཡང་དག་པའི་ལྟ་བ་དང་ལྡན་པར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་མི་ཚངས་པར་སྤྱོད་པ་ལ་དགའ་བ་རྣམས་ནི་ཆོས་བསྟན་པ་དག་ཐོས་ནས་དེ་དག་

71-49b

རྣམས་སྤོང་བར་འགྱུར་རོ། །དེ་དག་རྣམས་ལ་ཆོས་བསྟན་པ་དེས་ཀྱང་ལས་སུ་རུང་བར་བྱས་ནས། མྱ་ངན་ལས་འདས་པའི་མཐར་ཐུག་པར་འགྱུར་རོ། །དེ་ལ་རྒྱུ་དེ་དག་གིས་ན་ཆོས་སྟོན་པར་བྱེད་པ་པོས་ཕན་བཏགས་པ་ལ་ལན་གླན་པར་སླ་བ་མ་ཡིན་ནོ། །ལུས་སྦྱིན་པར་བྱེད་པ་པོའི་མ་དང་ཕ་དག་ལ་ཡང་ལན་གླན་པར་བྱ་མི་ནུས་ཏེ། གསོ་སྐྱེད་བྱེད་པ་པོ་དེ་དག་ཆོས་ལ་རབ་ཏུ་བཀོད་པར་གྱུར་པ་ནི་མ་གཏོགས་ཏེ། གང་གི་ཚེ་བུས་མ་དང་ཕ་དག་ཆོས་ལ་རབ་ཏུ་འགོད་པར་བྱེད་པར་གྱུར་པ་དེ་ལྟར་ན་ཅུང་ཟད་ཅིག་ཕན་བཏགས་པར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཁམས་གསུམ་ན་ཆེས་ཁྱད་པར་དུ་འཕགས་པ་འཁོར་བ་ལས་ངེས་པར་ཐར་པའི་འཕགས་པ་ལ་ཡང་ལན་གླན་པར་བྱ་བར་མི་ནུས་པ་སྟེ། དེ་རྟོགས་ཤིང་བསྒྲུབ་པ་ལ་ཀུན་ཏུ་དགའ་བའི་རྒྱུས་ལན་གློན་པ་རྣམས་ནི་མ་གཏོགས་སོ། །དེ་བཞིན་གཤེགས་པ་ལ་ཡང་བྱ་བ་བྱས་པར་འགྱུར་ལ་བདག་ཉིད་ཀྱང་བདེ་ལེགས་ལ་སྦྱར་བར་འགྱུར་རོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་གཙུག་ལག་གི་ཚིགས་སུ་བཅད་པའི་དབྱངས་བརྗོད་པ། ཇི་ལྟར། བདེ་ལེགས་མྱ་ངན་འདས་འགྲོ་བའི། །གང་ཡང་ཆོས་ནི་སྟོན་བྱེད་པ། །དེ་ནི་འབྲེལ་བ་ཀུན་གཅོད་པའི། །ལུས་ཅན་རྣམས་ཀྱི་བླ་མ་ཡིན། །གཏི་མུག་རང་བཞིན་ཞགས་བཅད་ནས། །ཤིས་པ་གཞན་ནི་སྟོན་པར་བྱེད། །ཆོས་རྣམས་རབ་ཏུ་སྟོན་པ་དང་། །ལམ་སྟོན་པར་ནི་དེ་རབ་བརྗོད། །ཆོས་གང་གིས་ནི་མི་རྣམས་ཀྱང་། །སྲིད་པའི་རྒྱ་མཚོ་ལས་གྲོལ་བ། །དམ་ཆོས་མཆོག་རབ་ཡིན་པར་བརྗོད། །གང་ཡང་འཇིག་རྟེན་ཆོས་མ་ཡིན། །གང་ཡང་ལུས་ཅན་རྣམས་ལ་ནི། །ཞིང་ནི་བཞི་པོ་འདི་རྣམས་ཡིན། །ཐེག་པ་མཆོག་ཏུ་བླ་མེད་དང་། །དབང་པོ་ཚང་བ་དེ་རྙེད་པ། །དེ་ཡི་སྐྱེ་འདི་འབྲས་བཅས་པར། །ལམ་སྟོན་མཛད་པས་གསུངས་པ་ཡིན། །མི་གང་ཆོས་ལ་མི་དགའ་བ། །དེ་ནི་ཕྱི་ནས་འགྱོད་པར་འགྱུར། །རྟག་ཏུ་རྣམ་པར་ཆགས་པའི་ཡིད། །རྟག་ཏུ་འདོད་པ་རྗེས་སུ་

71-50a

ཚོལ། །བུ་དང་ཆུང་མ་ལ་རབ་ཆགས། །ལུས་ཅན་རྣམས་ལ་མཐར་བྱེད་འབྱུང་། །ཀུན་ནས་ཉོན་མོངས་རྟག་ཏུ་འཐུག །སྐྱོན་ནི་དེ་དང་དེ་ཡིས་གང་། །ངན་སོང་ལ་ནི་སེམས་འབབ་ཅིང་། །ལུས་ཅན་རྣམས་ནི་སེམས་ཀྱིས་བཅིངས། །གདུལ་བར་དཀའ་དང་དབྱུག་པ་གསུམ། །རྟག་ཏུ་ཡང་ནི་གླགས་གཅོད་པ། །དེ་ཡང་མི་རྣམས་དགྲར་གྱུར་པའི། །སེམས་ཀྱི་དབང་དུ་མ་འགྲོ་དང་། །དགྲ་བོ་ཤིན་ཏུ་མིག་རྣོ་དེས། །རྣམ་པ་དུ་མར་སྒོམ་པར་བྱེད། །རྨུ་རྒོད་རྟ་ནི་ཇི་ལྟ་བར། །སེམས་དེ་ཆོས་ཀྱིས་ཡང་དག་བྱོས། །དེ་ལྟར་མཆོག་ཏུ་ཟབ་པར་གྱུར་པའི་ཞིང་གི་ཡོན་ཏན་རྣམས་རབ་ཏུ་བསྔགས་ཏེ། ཤེས་པས་ལྷ་དེ་དག་རྣམས་ལ་ཕན་པར་འདོད་པའི་བྱང་ཆུབ་སེམས་དཔའ་དེ་སྨོན་ལམ་གྱི་དབང་གིས་དེར་སྐྱེས་ནས་གཞན་ལ་ཕན་པ་ལ་རབ་ཏུ་ཞུགས་པས། རྣམ་པ་དུ་མར་ཆོས་བསྟན་པར་གྱུར་ཅིང་ཆོས་ཀྱི་ཡོན་ཏན་རྣམས་ཀྱང་རབ་ཏུ་བསྒྲགས་པར་གྱུར་ཏོ། །ཆོས་འདུལ་བ་དེ་དག་ཐོས་པར་གྱུར་ནས་ཀྱང་ལྷ་དེ་དག་ཡིད་ཆེས་པར་རབ་ཏུ་དང་བ་དང་ཐམས་ཅད་ཀྱང་ཡིད་རྩེ་གཅིག་ཏུ་གྱུར་པས་ཉན་པར་བྱེད་པ་དང་གཏམ་རྗོད་པར་ཡང་བྱེད་དེ། ཇི་ལྟར་འགལ་བ་མེད་པར་ཆོས་འདི་དག་སྟོན་པར་བྱེད་དོ། །གང་བྱའི་རྒྱལ་པོ་འདིས་བདག་ཅག་དགའ་ལྡན་པ་རྣམས་ལ་སྟོན་པ་དེ་ནི། དགའ་ལྡན་གྱི་མངའ་བདག་ཉེ་བར་ཞི་བའི་ཆོས་དེ་དང་འདི་ལ་ཡང་འགལ་བར་ཅུང་ཟད་ཀྱང་མེད་ཅིང་ཐ་དད་དུ་བྱ་བ་ཡང་ཅུང་ཟད་ཀྱང་མེད་དོ། །སོ་སོ་དང་ཁྱད་པར་དུ་བྱ་བ་ཡང་ཅུང་ཟད་ཀྱང་མེད་དོ། །ཆོས་འདུལ་བ་འདི་ཐམས་ཅད་ནས་ཡོངས་སུ་བརྟགས་པར་གྱུར་པ་ནི། ཐོག་མ་དང་བར་དང་ཐ་མར་དགེ་བ་དང་མཆོག་ཏུ་རབ་ཏུ་དང་བ་དང་མཆོག་ཏུ་དགེ་ལེགས་སུ་གྱུར་པ་དང་། མཆོག་ཏུ་བདེ་ལེགས་ཀུན་ཏུ་འཐོབ་པ་དང་ལྷ་དང་མི་རྣམས་ཐམས་ཅད་ལ་ཕན་པར་བྱེད་པ་དང་ཤིས་པར་བྱེད་པ་ཡིན་ནོ། །དེ་ནས་ལྷ་དེ་དག་གིས་དེ་སྐད་ཅེས་བརྗོད་ནས་སླར་ཉིད་ཀྱང་ཇི་ལྟར་བདག་ཅག་རྣམས་ཐམས་ཅད་ལ་ཕན་པ་དང་བདེ་བ་དང་མྱ་ངན་ལས་འདས་པའི་མཐར་ཐུག་

71-50b

པར་འགྱུར་བར་ཉི་ཤུ་རྩ་གཉིས་པར་གྱུར་པའི་ཆོས་ཀྱི་རྣམ་གྲངས་འདི་རྨ་བྱའི་མངའ་བདག་གིས་བཤད་དུ་གསོལ། ལྷ་དེ་དག་གི་དྲུང་ནས་ཐོས་པ་དང་། ཕྱིར་ཞིང་ཉིད་ཀྱང་ཆེས་རབ་ཏུ་རངས་པར་གྱུར་པའི་ཡིད་ཀྱིས་ཏེ། སེམས་རབ་ཏུ་དང་བ་དང་སེམས་ཅན་རྣམས་ཐམས་ཅད་ལ་སྙིང་རྗེས་བརླན་པའི་བློ་དང་ལྡན་པ་དང་། གཞན་ལ་ཕན་པ་ལ་རབ་ཏུ་ཞུགས་པར་གྱུར་པས་སླར་ཉིད་ཀྱང་ཉི་ཤུ་རྩ་གཉིས་པར་གྱུར་པའི་ཆོས་ཀྱི་རྣམ་གྲངས་མཆོག་ཏུ་ཟབ་པའི་ཐེག་པ་ཆེན་པོ། མཆོག་ཏུ་རྒྱ་ཆེ་བའི་བདེ་ལེགས་ཀུན་ནས་ཐོབ་པར་བྱེད་པ་ལ་སྟོན་པར་བྱེད་པ་ལ་འདི་ལྟ་སྟེ། ཆོས་གཞན་འདི་ནི་མཆོག་ཏུ་ཐར་པར་བྱེད་པ་ཡིན་ཏེ་མཆོག་ཏུ་རྒྱ་ཆེ་བ་དང་། སྐྱེ་བོ་རྣམས་ཐམས་ཅད་དགའ་བར་བྱེད་པ་ནི་འདི་ལྟ་སྟེ་སྙིང་རྗེ་བའོ། །སྙིང་རྗེ་ཞེས་བྱ་བའི་ཆོས་ནི་སྐྱེ་བོ་རྣམས་ཐམས་ཅད་ཀྱི་ཡིད་དུ་འོང་བ་དང་སྐྱེ་བོ་རྣམས་ཐམས་ཅད་ཀྱིས་ཡིད་ཆེས་པར་བྱེད་པ་དང་། འཁོར་བའི་འཇིགས་པས་འཇིགས་པ་རྣམས་ཀྱི་ཡིད་ཆེས་པའི་ས་གཞི་དང་། ལེགས་པར་བསྡམས་པའི་ཡིད་ཅན་རྣམས་ཀྱི་མྱ་ངན་ལས་འདས་པ་དང་། སྐྱོབ་པ་མེད་པ་རྣམས་ཀྱི་སྐྱབས་ཀྱི་ས་ཡིན་ནོ། །གང་ལ་སྙིང་རྗེ་ཡོད་པ་དེ་ལ་མྱ་ངན་ལས་འདས་པ་ཧ་ཅང་རིང་བ་མ་ཡིན་ནོ། །གཡོ་ཡང་ཡོད་པ་ཉིད་མ་ཡིན་ཏེ། ཁྲོ་བའི་སེམས་ལས་མངོན་པར་འདས་པ་དང་། ཁྲོ་བ་དང་རྣ་རྣམ་པར་བྲལ་བའི་སྙིང་ལ་སྙིང་རྗེས་ཞུ་བའི་སེམས་དང་ལྡན་པའི་སྐྱེས་བུ་རྣམས་ནི་སྙིང་རྗེ་ཞེས་བྱ་བའི་རྒྱན་ཆེན་པོ་རྣམས་ཀྱིས་བརྒྱན་པ་ཡིན་ནོ། །སྙིང་རྗེ་ཞེས་བྱ་བ་ཡང་གང་གི་ཕྱིར་གནོད་སེམས་ཀྱི་ཉེས་པ་རྣམ་པར་འཇོམས་པར་བྱེད་པའི་ཆོས་ཀྱི་སྙིང་རྗེ་འགྲོ་བ་ལྔར་སྐྱེས་པར་གྱུར་པའི་སེམས་ཅན་རྣམས་ལ་བྱ་བར་བྱའོ། །དེ་ལ་རེ་ཞིག་ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔས་དམྱལ་བ་པ་རྣམས་ཀྱི་དབང་དུ་བྱས་པའི་སྙིང་རྗེ་བསྒོམ་པར་བྱའོ། །ཇི་ལྟར་ཞེ་ན་སེམས་ཅན་དེ་དག་རྣམས་ནི་རང་གི་ལས་ཀྱིས་ཅོ་དྲིས་པ་དང་། སེམས་དགྲར་གྱུར་པས་ཡོངས་སུ་བསླུས་པ་དང་། དཔེ་མེད་པར་གྱུར་པ་རྣམ་པ་དུ་མའི་ཕུར་པ་དང་འགྱུར་བྱེད་དང་། ཐོ་བ་དང་

71-51a

ཟངས་ཀྱི་ཁུ་བ་དམར་པོ་དང་གཏུན་ཤིང་དང་ཆུ་ཀླུང་རབ་མེད་དུ་བྱ་རྒོད་དང་བྱ་རོག་གིས་འདྲེན་པར་བྱེད་པ་དང་། ནགས་ཚལ་རལ་གྲི་ལོ་མར་འཇུག་པར་བྱེད་པ་དང་། འགྱུར་བྱེད་ཀྱི་ཆུ་ཀླུང་ལ་སོགས་པའི་ཚོར་བ་དྲག་པོ་རྩུབ་པ་དཔེ་མེད་པ་རྣམས་ཀྱིས། ཡང་སོས་དང་ཐིག་ནག་དང་བསྡུས་འཇོམས་དང་ངུ་འབོད་དང་ངུ་འབོད་ཆེན་པོ་དང་ཚ་བ་དང་རབ་ཏུ་ཚ་བ་དང་མནར་མེད་པའི་མཐར་ཐུག་པའི་ཉེ་འཁོར་གྱི་དམྱལ་བ་རྣམས་དང་། དམྱལ་བ་བརྒྱ་སུམ་ཅུ་རྩ་དྲུག་གི་བརྒྱ་ཕྲག་རྣམས་ལ་འཚེད་པར་བྱེད་གཤག་པར་བྱེད་འབྱེད་པར་བྱེད་འཆུར་བར་བྱེད་དེ། རང་གི་ལས་ཀྱིས་བསླུས་པ་ལས་ཀྱི་ཞགས་པས་བཟུང་བར་གྱུར་པ་སྲེད་པའི་མེས་ཡོངས་སུ་གང་བའི་ཕྱིར། སྐྱོབ་པར་བྱེད་པ་རྗེས་སུ་ཚོལ་བ་དང་སྐྱབས་རྩད་གཅོད་པར་གྱུར་པས་ཐམས་ཅད་དུ་ཀུན་ནས་རྒྱུག་པར་བྱེད་པ་རྣམས་ལ་འདི་ལྟར་སེམས་བསྐྱེད་པར་བྱ་སྟེ། ཅིས་འདི་དག་རྣམས་བདེ་བར་འགྱུར། ཇི་ལྟར་ན་སྐྱབས་སུ་འགྱུར་བ་ཡིན་ན། གང་གི་ཚེ་འདི་དག་རྣམས་ཀྱི་མཆོག་ཏུ་རྩུབ་པའི་སྡུག་བསྔལ་གྱི་རྒྱ་མཚོ་ཆེན་པོ་ལས་བདག་གིས་སྒྲོལ་བར་བྱེད་པར་འགྱུར་ཏེ། སེམས་ཅན་དེ་དག་ལ་དེ་ལྟར་སྙིང་རྗེ་བར་བྱེད་དོ། །སྙིང་རྗེ་དང་ལྡན་པ་དེ་ཡང་གང་གི་ཚེ་ཤི་བར་གྱུར་པ་དེའི་ཚེ་ལྷ་རྣམས་ཀྱི་མངའ་བདག་ཏུ་འགྱུར་རོ། །མི་རྣམས་ཀྱི་ཡང་སྟེ་འཁོར་ལོས་སྒྱུར་བའི་རྒྱལ་པོར་འགྱུར་རོ། །སེམས་ཅན་རྣམས་ཐམས་ཅད་ལ་ཡང་འདོད་པ་དང་སྡུག་པ་དང་ཡིད་དུ་འོང་བ་དང་དགེ་བའི་ཆོས་རྣམས་ལ་རྗེས་སུ་དགའ་བར་ཡང་འགྱུར་རོ། །དེ་ལྟར་དམྱལ་བར་གྱུར་པའི་སེམས་ཅན་རྣམས་ཀྱི་གཟེར་ཟུག་དེ་དང་དེ་དག་རྣམས་དམིགས་ཏེ་སྙིང་རྗེ་བསྐྱེད་པར་བྱའོ། །དེ་ལྟར་ན་མང་དུ་ཆེན་པོར་གྱུར་པ་དང་རྣམ་པ་དུ་མ་རྣམས་སུ་ཡང་ཚངས་པའི་བསོད་ནམས་མངོན་པར་འཕེལ་བར་འགྱུར་རོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔར་གྱུར་པ་དགེ་སྦྱོང་ངམ་བྲམ་ཟེའམ་བློ་དེ་དག་དང་མཚུངས་པར་གྱུར་པ་གཞན་ཡང་རུང་སྟེ། བསྐུལ་བའི་བློས་སེམས་ཅན་རྣམས་ལ་ཕན་པ་ལ་གཅིག་ཏུ་མངོན་པར་

71-51b

དགའ་བས། ཡི་དགས་ཀྱི་དབང་དུ་བྱས་ལ་སྙིང་རྗེ་བསྐྱེད་པར་བྱའོ། །སེམས་ཀྱང་འདི་ལྟར་བསྐྱེད་པར་བྱ་སྟེ། ཇི་ལྟར་ཡི་དགས་འདི་དག་རྣམས་ནི། ཡི་དགས་ཀྱི་སྐྱེ་གནས་སུ་སྐྱེས་པར་གྱུར་པ། རྣམ་པ་སྣ་ཚོགས་པའི་བཀྲེས་པ་དང་སྐོམ་པས་བསྲེགས་པར་གྱུར་པའི་ལུས་ཅན། ནགས་ཚིག་པ་དང་འདྲ་བའི་ལུས་དང་ལྡན་པ་རྣམས། ཕན་ཚུན་དུ་ཁ་མངོན་དུ་ཕྱོགས་པར་གྱུར་ནས་མངོན་པར་རྒྱུག་པར་བྱེད་དེ། འབར་བའི་ཕྲེང་བས་རབ་ཏུ་འབར་བར་གྱུར་པའི་ལུས་ཅན་རྣམས། ཐམས་ཅད་དུ་སྐྱབས་རྩད་གཅོད་པར་བྱེད་པས་ཕྱོགས་བཅུར་རྒྱུག་ཀྱང་དེ་དག་རྣམས་ཀྱི་སྐྱབས་ནི་འགའ་ཞིག་ཀྱང་མེད་དོ། །སྡུག་བསྔལ་དེ་དག་རྣམས་ལས་དགྲོལ་བར་བྱ་ན། ཀྱེ་མ་འདི་དག་རྣམས་བཀྲེས་པ་དང་། སྐོམ་པའི་རང་བཞིན་གྱི་སྡུག་བསྔལ་རྣམ་པ་སྣ་ཚོགས་དེ་དག་རྣམས་ལས་ནམ་ཞིག་ཐར་པ་འབྱུང་བར་འགྱུར། དེ་ལྟར་ཡང་ཡི་དགས་ཀྱི་འཇིག་རྟེན་དུ་སྐྱེས་པའི་སེམས་ཅན་རྣམས་ཀྱི་དབང་དུ་བྱས་ནས་སྙིང་རྗེ་སྐྱེད་པར་བྱེད་དོ། །གཞན་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པ་དེ་ཉིད་ཀྱིས་བྱང་ཆུབ་ཀྱི་སེམས་མངོན་དུ་བྱེད་པས། དུད་འགྲོ་རྣམས་མཐོང་ནས་ཀྱང་སྙིང་རྗེ་སྐྱེད་པར་བྱེད་དོ། །ཡི་དགས་རྣམས་ནི་སྡུག་བསྔལ་རྣམ་པ་དུ་མ་དང་ལྡན་པས་ཕན་ཚུན་ཆེས་ལྷག་པར་ལྷང་ཀྱོག་གིས་གསོད་པ་ལ་མངོན་པར་དགའ་བར་གྱུར་པ་ཡིན་ལ། དུད་འགྲོ་ཡང་གནས་གསུམ་དུ་སོང་བ་རྣམས་ལ་འདི་ལྟ་སྟེ། བར་སྣང་དང་ཆུ་དང་ས་གཞི་ལ་རྒྱུ་བའོ། །ཕན་ཚུན་དུ་ཟ་བར་བྱེད་པའི་དབང་དུ་བྱས་ནས་དེ་དག་རྣམས་ཀྱི་སྲོག་གཏོང་བར་བྱེད་པའི་ཚུལ་ནི་རྣམ་པ་དུ་མ་ཡིན་ནོ། །ཀྱེ་མ་གང་གི་ཚེ་དེ་དག་རྣམས་སྡུག་བསྔལ་རྣམ་པ་དུ་མ་དེ་དག་ལས་གྲོལ་བར་འགྱུར་ཞེས། དེ་ལྟར་དུད་འགྲོར་སྐྱེས་པའི་སེམས་ཅན་རྣམས་ཀྱི་དབང་དུ་བྱས་ནས་སྙིང་རྗེ་སྐྱེད་པར་བྱེད་དོ། །སེམས་བསྐྱེད་པ་དང་ལྷན་ཅིག་ཉིད་དུ་ཚངས་པའི་བསོད་ནམས་འཕེལ་བར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཆོག་ཏུ་དགེ་བར་གྱུར་པའི་སེམས་དང་ལྡན་པ། སེམས་ཅན་ཐམས་ཅད་ལ་སྙིང་

71-52a

རྗེ་དང་ལྡན་པས་དུད་འགྲོ་རྣམས་ལ་སྙིང་རྗེ་སྐྱེད་པར་གྱུར་ཅིང་། ཤིན་ཏུ་ཉེས་པར་སྤྱོད་པའི་ལས་ཀྱི་འབྲས་བུའི་ས་པ་རྣམས་མཆོག་ཏུ་སྡུག་བསྔལ་བ་མཆོག་ཏུ་རྩུབ་པར་གྱུར་པའི་འགྲོ་བ་གསུམ་པོ་རྣམས་ལ་སྙིང་རྗེ་བསྐྱེད་ནས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་དབང་དུ་བྱས་ནས་སྙིང་རྗེ་བསྐྱེད་པར་བྱའོ། །ལྷ་རྣམས་ཀྱིས་ཀྱང་རི་དང་སྨན་ལྗོངས་རྣམས་ལ་དང་ནགས་དང་ཉེ་བའི་ནགས་རྣམས་ལ་ཡང་དཔེ་མེད་པའི་མཐོ་རིས་བདེ་བ་རྣམ་པ་དུ་མ་རྣམས་ཉེ་བར་ལོངས་སྤྱོད་ཅིང་པད་མའི་རྫིང་བུ་དང་ནགས་རྣམས་ལ་བུད་མེད་དང་ལྷན་ཅིག་ཏུ་རྩེ་དགའ་བརྒྱ་སྟོང་ཉེ་བར་ལོངས་སྤྱད་ནས་ལས་ཟད་པར་གྱུར་པ་ན་འཆི་འཕོ་བའི་སྡུག་བསྔལ་འབྱུང་ངོ་། །དེའི་རྗེས་ཐོགས་ལ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་འཁོར་བ་འདིར་ཤིན་ཏུ་ཐོ་བཙམས་པར་གྱུར་པ་དག་སྲོག་ཆགས་རྣམས་ཀྱིས་ཉེ་བར་ལོངས་སྤྱོད་པར་བྱེད་དེ། སྲེད་པའི་འཆིང་བ་རྣམས་ཀྱིས་ཤིན་ཏུ་དམ་པར་བཅིངས་ནས་སྔོན་གྱི་མཐའ་དང་ཕྱི་མའི་མཐའ་རྣམས་སུ་ཀུན་ཏུ་རྒྱུག་པར་བྱེད་ཀྱང་། འདི་དག་གིས་ལམ་དམ་པ་ཚོལ་བར་བྱེད་པ་ཡང་མ་ཡིན་ནོ། །དེ་ལྟར་ལྷ་རྣམས་ལ་ཡང་འཆི་འཕོ་བའི་སྡུག་བསྔལ་རྣམས་ལ་ཉེ་བར་དམིགས་ནས་སྙིང་རྗེ་སྐྱེད་པར་བྱེད་དོ། །དེ་བཞིན་དུ་མི་རྣམས་ལ་ཡང་སྙིང་རྗེ་སྟེ། རྣམ་པ་སྣ་ཚོགས་པའི་ལམ་གྱི་འབྲས་བུར་སྐྱེས་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་བདེ་བ་དང་སྡུག་བསྔལ་གྱི་འབྲས་བུ་དག་ཉེ་བར་ལོངས་སྤྱོད་པར་བྱེད་པ་རྣམས་དམན་པ་དང་བར་མ་དང་ཁྱད་པར་དུ་འཕགས་པའི་ལས་ལ་ཉེ་བར་ཞུགས་པ་རྣམས་སྤྱོད་པ་དང་རབ་ཏུ་རྒྱུ་བར་སྣ་ཚོགས་པ་དང་བསམ་པ་དང་མོས་པ་སྣ་ཚོགས་པ་དང་དབུལ་བས་གཟིར་བ་རྣམས། སྐྱབས་མེད་པ་རྣམས་གཞན་གྱིས་ཟིལ་གྱིས་མནན་པས་ཤིན་ཏུ་ཡང་གཟིར་བར་གྱུར་པ་རྣམས་ཡོངས་སུ་ཚོལ་བའི་སྡུག་བསྔལ་གྱི་མཆོག་ཏུ་ཡོངས་སུ་ལོངས་སྤྱོད་པར་བྱེད་པའི་མིའི་འཇིག་རྟེན་དེ་མངོན་པར་མཐོང་ནས་སྙིང་རྗེ་སྐྱེད་པར་བྱེད་དོ། །འདི་ཡང་མཆོག་ཏུ་དགའ་བར་གྱུར་པ་དང་མྱ་ངན་ལས་འདས་པའི་ཐར་བར་འགྱུར་བའི་ཆོས་ཡིན་

71-52b

ནོ། །དེ་ལ་དེ་ལྟར་འགྲོ་བ་ལྔའི་སེམས་ཅན་རྣམས་ལ་སྡུག་བསྔལ་ལྔ་ཉེ་བར་དམིགས་པས་ན། ཐེག་པ་ཆེན་པོ་ལ་ཀུན་ནས་རབ་ཏུ་གནས་པ་གང་ཡིན་པའི་དགེ་སྦྱོང་ངམ་བྲམ་ཟེ་དག་གིས་ཀྱང་སྙིང་རྗེ་སྐྱེད་པར་བྱེད་པ་རྣམས་ནི་ཐམས་ཅད་དུ་ཡང་བདེ་ལེགས་སུ་གྱུར་པའི་མྱ་ངན་ལས་འདས་པ་འཐོབ་པར་འགྱུར་རོ། །དེ་ནས་དེའི་དུས་འདིར་རྨ་བྱའི་རྒྱལ་པོ་དེས་འཁོར་བ་འཇིག་གི་ཚིགས་སུ་བཅད་པའི་དབྱངས་བརྗོད་པ། ཇི་ལྟར། ཀྭ་ཡེ་ཐེག་ཆེན་ལ་རྟག་ཏུ། །གང་གི་སེམས་ནི་ལེགས་གནས་པ། །དེ་ཡི་སྙིང་རྗེ་རྗེས་འབྲེལ་བ། །མ་ལ་བུ་ནི་ཇི་བཞིན་ནོ། །གང་གིས་སེམས་ཀྱང་མྱོང་མིན་པའི། །སྙིང་རྗེ་ཡིས་ནི་རྣམ་བརྒྱན་པ། །དེ་ཡི་གྲོགས་པོར་འཇིག་རྟེན་འདིར། །འགྱུར་རོ་སྙན་པས་ཀུན་ཏུ་ཁྱབ། །སྙིང་རྗེས་བརླན་དང་སྐྱོན་དང་བྲལ། །དབང་པོ་ལེགས་པར་གཏད་པ་དང་། །ཡང་དག་ལྟ་བ་རབ་ལྡན་པའི། །ཤིན་ཏུ་མྱ་ངན་འདས་མི་རིང་། །གང་ཞིག་སྙིང་རྗེས་རྣམ་བརྒྱན་དང་། །མི་ཡི་འཇིག་རྟེན་ན་དེ་ལྷ། །སྙིང་རྗེ་ཡིས་ནི་གང་དབུལ་བ། །དེ་ནི་ཤིན་ཏུ་དབུལ་པོར་འདོད། །གང་ཡང་བསམ་པ་འཇམ་པ་ནི། །མི་བཟངས་གསེར་དང་འདྲ་བ་ཡིན། །སྙིང་རྗེ་རིན་པོ་ཆེ་འདི་ནི། །གང་དག་ཡིད་ལ་འཇུག་གྱུར་པ། །སེམས་ཅན་གང་ཡང་རྟག་བརྩོན་ལྡན། །རྟག་ཏུ་ཆོས་ལ་གཞོལ་གྱུར་པ། །དེ་དག་སྙིང་རྗེའི་སྒྲོན་མ་ཡིས། །སྙིང་ནི་ལེགས་པར་རབ་གསལ་བྱ། །གང་དག་དམ་ཆོས་ཆུ་བོ་ནི། །ཉིན་མཚན་མེད་པར་ལྡོག་པ་མེད། །དེ་དག་གནས་སྐབས་ཐམས་ཅད་དུ། །སྙིང་རྗེས་མངོན་པར་དགའ་བའི་ཡིད། །སྙིང་རྗེས་བསིལ་བར་གྱུར་པ་ཡིན། །སེམས་ཅན་ཀུན་ལ་ཕན་དགའ་བས། །བདེ་བ་དཔེ་མེད་ལོངས་སྤྱད་ནས། །ཕྱི་ནས་མྱ་ངན་འདས་པར་འགྲོ། །སྙིང་རྗེ་ཐུབ་པས་བསྔགས་པ་ཡིན། །སྙིང་རྗེ་དྲི་མེད་སྙིང་པོ་ཡིན། །སྙིང་རྗེ་སྐྱོན་རྣམས་འཇོམས་པ་པོ། །སྙིང་རྗེ་ཟད་པ་མེད་པའི་གཏེར། །ཡོན་ཏན་རྒྱན་རྣམས་ཀྱི་ཡང་མཆོག །སྐྱོན་རྣམས་ཐམས་ཅད་རྣམ་འཇོམས་སོ། །སྙིང་རྗེས་བརླན་ཕྱིར་ཐུབ་རྣམས་ཀྱིས། །གོ་འཕང་བླ་ན་

71-53a

མེད་པར་འགྲོ། །སྙིང་རྗེའི་བཞོན་མ་གང་ལ་ཡོད། །དེ་ནི་མཆོག་གི་འོ་མ་ལྡན། །ཁྲོ་བས་སྲེག་དང་མི་ལྡན་པར། །སྙིང་ལ་ལེགས་པར་རབ་ཏུ་འཇུག །ཐེག་ཆེན་རྐྱལ་པ་ལ་ཞོན་པའི། །བརྩེ་བའི་སྙིང་རྗེ་ལེགས་གནས་ནས། །སྐྱོན་གསུམ་རླབས་ནི་ཤུགས་པོ་ཆེའི། །སྲིད་པའི་རྒྱ་མཚོ་ལས་སྒྲོལ་བྱེད། །ཡོན་ཏན་རྒྱ་ཆེན་རྣམས་ཀྱི་གཙོ། །ནོར་ནི་མ་ཡིན་པ་ཡི་རྒྱན། །བཟང་པོ་རྣམས་ཀྱིས་རྟག་བརྩེ་བ། །འདིར་ནི་སྙིང་རྗེར་བརྗོད་པ་ཡིན། །དེ་ལྟར་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །ཐོག་མ་དང་བར་དང་ཐ་མར་དགེ་བར་གྱུར་པ་དང་། ཐམས་ཅད་དུ་འགལ་བ་མེད་པ་དང་རབ་ཏུ་བསྔགས་པ་དང་ཤིས་པ་དང་ལྷ་རྣམས་ཐམས་ཅད་ཉེ་བར་འཕེལ་བར་བྱེད་པར་འགྱུར་རོ། །གཞན་ཡང་བཅོམ་ལྡན་འདས་དེས་བསྟན་པར་གྱུར་པའི་ཆོས་གཞན་གང་དག་ཡིན་ཞིང་། །ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་གང་དང་ཡང་དག་པར་ལྡན་པས་སྐྱེས་བུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་བ་འདི་ཡང་གང་དག་ཞེ་ན། འདི་ལྟ་སྟེ་དུལ་བའོ། །དུལ་བའི་ཆོས་ཀྱང་གང་གི་ཕྱིར་ཡང་བར་གྱུར་པའི་སྐྱོན་རྣམས་ཡོངས་སུ་སྤངས་པ་དང་ཡོན་ཏན་རྣམས་འཛིན་པར་བྱེད་པ་ཡིན་ནོ། །བསམ་པ་འཇམ་པོ་དང་ལྡན་པའི་སྐྱེས་བུ་ལ་ཡང་དྲི་མ་རྣམས་ཐམས་ཅད་ཡོངས་སུ་སྤངས་པའི་མྱ་ངན་ལས་འདས་པ་ལག་ཏུ་འོང་བར་འགྱུར་རོ། །བསམ་པ་འཇམ་པོའི་སྐྱེས་བུ་ཡང་གཅིག་ཏུ་དགེ་བ་བྱེད་པར་གྱུར་པ་དང་། སྐྱེ་བོ་རྣམས་ཐམས་ཅད་ཡིད་ཆེས་པར་བྱེད་པར་འགྱུར་རོ། །སྙིང་རྩུབ་པར་གྱུར་པའི་སྐྱེས་བུ་ནི་རྡོ་རྗེ་དང་རྡོ་བ་དང་མཚུངས་པ་མཁྲེགས་པའི་འཁོན་དམ་པོ་རྣམས་བློ་ལ་བསྡམས་པ་དང་ཀུན་ནས་མ་བསྡམས་པར་རྒྱུ་བ་སྐྱེ་བོ་རྣམས་ཐམས་ཅད་དང་མི་འཐུན་པར་འགྱུར་རོ། །མི་སྡུག་པ་དང་ཡིད་དུ་མི་འོང་བར་འགྱུར་ཏེ། གང་དང་གང་དག་བཟུང་བར་གྱུར་པ་དེ། དེ་དག་འདིའི་སྙིང་ལས་ཡོངས་སུ་མི་འཕོའོ། །གཅིག་ཏུ་དགའ་བར་མི་འགྱུར་ཞིང་།

71-53b

བསམ་གཏན་གྱིས་ཀུན་དགའ་ར་བ་ན་རྒྱུ་བར་མི་འགྱུར་རོ། །དམ་པ་དང་ཀུན་ཏུ་འདྲེ་བར་འགྲོ་བ་མ་ཡིན་ནོ། །དེ་ལ་ཆོས་འདུལ་བ་རྣམས་ལེགས་པར་འདོད་པར་མི་བྱེད་དེ། ཇི་ལྟར་གཞན་གྱི་ས་བོན་བཞིན་དང་། ཇི་ལྟར་བྱེ་མ་རྣམས་ལས་འབྲུ་མར་མི་འབྱུང་བ་བཞིན་དུ། དེ་ལྟར་སྐྱེས་བུ་ཁྲོན་མའི་རང་བཞིན་ཅན་སེམས་རྩུབ་པ་དེ་ལ་ཆོས་རྣམས་དེ་ལྟར་མི་འབྱུང་ངོ་། །ཇི་ལྟར་བ་ལང་གི་རྭ་ལས་འོ་མ་དང་ཟླ་བ་དྲོ་བ་དང་མོ་གཤམ་ལ་བུ་དང་ནམ་མཁའ་ལ་མེ་ཏོག་ཡོད་པ་མ་ཡིན་ནོ། །དེ་བཞིན་དུ་ཁྲོན་མའི་རང་བཞིན་ཅན་དང་། ཁྲོ་བའི་ལས་ཅན་མཆོག་ཏུ་གཡོ་དང་ལྡན་པ་དང་གཡོ་ཅན་གྱི་རིགས་སུ་གྱུར་པ། བློ་གྲོས་དམན་པ། བདག་ཉིད་ངལ་བར་བྱེད་པ། གཞན་དག་སླུ་བར་བྱེད་པ་སྲིད་པའི་འདམ་དུ་བྱིང་བ་མི་དགེ་བ་རྣམས་སྟེན་པར་བྱེད་པ། དཀོན་མཆོག་གསུམ་སྤངས་པར་གྱུར་པ། ཐེག་པ་ཆེན་པོ་ལས་ཁ་ཕྱིར་ཕྱོགས་པ། དམུས་ལོང་དུ་གྱུར་པ་དམ་པའི་ཆོས་ཀྱི་ཉི་མ་མིག་གིས་མ་མཐོང་བ། མཆོག་ཏུ་མྱ་ངན་བྱེད་པར་གྱུར་པའི་སྐྱེ་བ་དང་རྒ་བ་དང་འཆི་བ་དང་མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་བ་དང་ཡིད་མི་བདེ་བའི་དགོན་པར་འཁྱམས་པ། མཐའ་ཡས་པའི་སྡུག་བསྔལ་རྣམས་འཇོམས་པར་བྱེད་པའི་བདུད་རྩི་སྤངས་པའི་སྐྱེས་བུ་ངན་པ་སྡུག་བསྔལ་གྱི་ཆུ་བོར་བྱིང་བར་གྱུར་པ་ལ་ནི། མྱ་ངན་ལས་འདས་པ་ཉིད་ཡོད་པར་མི་འགྱུར་རོ། །དེ་ཅིའི་ཕྱིར་ཞེ་ན། གང་གི་ཕྱིར་འདིས་མྱ་ངན་ལས་འདས་པ་རྟོགས་པར་འགྱུར་བ་ལེགས་པར་འཐོབ་པར་བྱེད་པའི་ལམ་གྱི་རྒྱུ་ལ་ཡང་མི་འཇུག་པའི་ཕྱིར་རོ། །དེའི་ཕྱིར་འདི་བདེ་བའི་སྐལ་བ་ཅན་དུ་མི་འགྱུར་རོ། །གང་ཡང་འདུལ་བ་དང་ལྡན་པར་གྱུར་པ་འཇམ་པོའི་ཡིད་ཅན་དེ་དག་རྣམས་ཐམས་ཅད་ནི་མྱ་ངན་ལས་འདས་པ་འཐོབ་པའི་སྐལ་བ་ཅན་དུ་གྱུར་པ་རྣམས་ནི་དེ་དག་ཡིན་ནོ། །དཔེར་ན་ཏིལ་ལས་ནི་ཏིལ་མར་རོ། །ཉི་མ་ལས་ནི་འོད་ཟེར་རོ། །ཟླ་བ་ལས་ནི་བསིལ་བའོ། །མེ་ལས་ནི་དྲོ་བའོ། །ས་གཞི་ནི་བརྟན་པ་ཡིན་ནོ། །རྒྱ་མཚོ་ལས་ནི་ཧ་ཅང་མི་གཡོ་བའི་ཆུའོ། །བཏུང་ཆུ་ནི་བསིལ་བའོ། །

71-54a

འབྱུང་བ་ཆེན་པོ་བཞི་པོ་རྣམས་ནི་བློ་ཀུན་ཏུ་གནས་པར་འགྱུར་བ་ཡིན་ནོ། །སེམས་འཇམ་པོ་རྣམས་ཀྱང་དེ་ཁོ་ན་བཞིན་དུ་ཡིན་ཏེ། སེམས་ལས་སུ་རུང་བ་དང་དད་པ་དང་ལྡན་པ་དང་རབ་ཏུ་བརྩོན་པ་དང་ལྡན་པ་དང་ཕྱིན་ཅི་མ་ལོག་པར་སྟོན་པར་བྱེད་པ་དང་རྒྱུ་དང་འབྲས་བུ་ལ་དད་པ་དང་ལྡན་པ་ལ་ནི་མྱ་ངན་ལས་འདས་པ་མདུན་ཉིད་ན་གནས་སོ། །དེ་ནས་དུས་དེར་རྨ་བྱའི་རྒྱལ་པོ་དེས་གཙུག་ལག་གི་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། གང་གི་སྙིང་ནི་བཏུལ་བྱས་པ། །ཞུ་བར་གྱུར་པའི་གསེར་བཞིན་ནོ། །དེ་ནས་ངེས་པར་ཕན་དགེ་བའི། །སྡུག་བསྔལ་ལས་ནི་མྱུར་དུ་འགྲོ། །ཀུན་ནས་ཉོན་མོངས་བཏུལ་བ་ཡིས། །གང་གི་སེམས་ནི་སྣོད་དུ་བྱས། །དེ་ལ་བདེ་ལེགས་སྐྱེ་འགྱུར་ཏེ། །ཞིང་རྣང་གི་ནི་སཱ་ལུ་བཞིན། །སེམས་ཀྱི་ཁྱིམ་གྱི་གཏེར་ལྡན་པ། །ལུས་ཅན་ཀུན་ལ་དེ་མི་བཟད། །མི་རྣམས་གཡོ་སྒྱུ་ཆེན་པོ་ཡིས། །དབུལ་བ་ཀུན་ནས་འཇོམས་པར་བྱེད། །དབང་པོ་རྣོ་ཞིང་ཞི་བ་དང་། །རྟག་ཏུ་བསམ་གཏན་གྱིས་གནས་ཤིང་། །ཡུལ་རྣམས་ལ་ཡང་བག་དང་ལྡན། །སྡུག་བསྔལ་དག་གིས་གནོད་པའང་མེད། །དེ་ལྟར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ་ལ་འཐབ་བྲལ་བའི་ལྷ་དང་དགའ་ལྡན་པའི་ལྷ་དེ་དག་རྣམས་ཀྱང་ངོམས་པ་མེད་པས། སླར་ཡང་ཆོས་འདུལ་བ་དེ་ཉིད་ཉན་པར་འདོད་པས་ཐལ་མོ་ཁ་སྦྱར་ཏེ། དམ་པའི་ཆོས་ལ་གུས་པར་འགྱུར་ཞིང་། སླར་ཡང་ཆོས་ཉན་པར་འདོད་པས་རབ་ཏུ་སྨྲས་པ། འཕགས་པས་བཤད་དུ་གསོལ། རྨ་བྱའི་མངའ་བདག་གིས་བསྟན་དུ་གསོལ། སེམས་དཔའ་ཆེན་པོ་བདག་ཅག་རྣམས་སླར་ཉིད་ཀྱང་གཉིས་ཀྱིས་ལྷག་པའི་ཆོས་ཀྱི་རྣམ་གྲངས་ཉི་ཤུ་པ་འདི་དག་གང་ཐོས་པར་གྱུར་ནས་བདག་ཅག་རྣམས་མཆོག་ཏུ་བདེ་ལེགས་རྣམས་ཐོབ་པར་འགྱུར་བ་ལགས་སོ། །དེ་ནས་རྨ་བྱའི་མངའ་བདག་རྣམ་པར་བཀྲ་བ་དེ་ཉིད་སླར་ཉིད་ཀྱང་ལྷ་དེ་དག་རྣམས་ཉིད་ལ་ཆོས་ཀྱི་རྣམ་གྲངས་གཉིས་ཀྱིས་ལྷག་པའི་ཉི་ཤུ་པ་དེ་ཉིད་འཆད་པར་བྱེད་དོ། །འདི་ལྟ་སྟེ་ཆོས་གཞན་

71-54b

འདི་ཡང་ཐེག་པ་ཆེན་པོ་ལ་ལེགས་པར་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བ་རྣམས་ཀྱིས་ཀྱང་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་རབ་ཏུ་རྟེན་པའོ། །རབ་ཏུ་རྟེན་པ་ཞེས་བྱ་བའི་ཆོས་ནི་ཐམས་ཅད་ནས་ཐམས་ཅད་ལ་མཛེས་སོ། །དེ་དང་ཡང་དག་པར་ལྡན་པའི་དགེ་སྦྱོང་ངམ་བྲམ་ཟེའམ་དེ་དག་དང་རང་བཞིན་མཚུངས་པར་གྱུར་པ་གཞན་རྣམས་ཐམས་ཅད་དང་། ཁྱིམ་པའམ་རབ་ཏུ་བྱུང་བའམ་གཞན་དག་ཀྱང་བྱིས་པའམ་རྒན་པོ་ཡང་རུང་སྟེ། དེ་དག་དང་ཡང་དག་པར་ལྡན་པར་གྱུར་ཅིང་། དེས་རབ་ཏུ་གཡོགས་པ་རྣམས་ནི་མཛེས་པ་ཡིན་ནོ། །དེ་དང་མི་ལྡན་པའི་སྐྱེས་བུ་རྣམས་ནི་ཅེ་སྤྱང་དང་ཁྭ་ཏ་དང་མཚུངས་པ་རྣམ་པར་གྱུར་པ་འདྲ་བ་མ་ཡིན་པ་རྣམས་ཡིན་ནོ། །རེ་ཞིག་རབ་ཏུ་རྟེན་པ་འདི་ཡང་རབ་ཏུ་བྱུང་བས་ཇི་ལྟར་བྱ་ཞེ་ན། རེ་ཞིག་དང་པོ་ཁོ་ནར་རབ་ཏུ་བྱུང་བ་རྣམས་ཀྱིས་རབ་ཏུ་བརྟེན་པར་བྱའོ། །དེ་ནི་རྣམ་པ་བདུན་ཏེ། རྣམ་པ་བདུན་པོ་འདི་དག་ཀྱང་གང་ཞེ་ན། འདི་ལྟ་སྟེ་ཡུལ་གྱི་རྗེས་སུ་འཐུན་པར་གྱུར་པའི་ཕྱག་དར་ཁྲོད་ཡུལ་གང་དང་གང་ན་ཇི་ལྟ་བུའི་གོས་དང་ཁྱིམ་པ་རྣམས་གྱོན་པར་བྱེད་པ་དེ་ཆེད་དུ་བོར་བར་གྱུར་པ་དང་། དུར་ཁྲོད་ན་གནས་པ་དེ་དག་ཀྱང་རབ་ཏུ་བྱུང་བས་བླང་བར་བྱའོ། །དེའི་ཕྱིར་གང་ཡང་དྲི་མ་ཅན་དང་ཧྲུལ་པོ་དང་སྦོམ་པ་དེ་དག་བླང་བར་བྱའོ། །འདི་ནི་ཆོས་གོས་ཀྱི་རབ་ཀྱི་རྟེན་ཡིན་ནོ། །གཞན་ཡང་ལྟ་བ་ལ་རབ་ཏུ་རྟེན་པ་ནི་མིག་རབ་ཏུ་ལྟ་བར་བྱེད་པ་རྣམ་པ་ཇི་ལྟ་བུ་ཡིན་ན། འདི་ན་གང་དགེ་སློང་དག་གཉའ་ཤིང་གང་ཙམ་དུ་ལམ་དུ་ལྟ་བར་བྱེད་པ་དང་། སྦྱིན་པ་པོ་དང་སྦྱིན་བདག་རྣམས་ཀྱི་ཁྱིམ་དུ་རྗེས་སུ་ཞུགས་པ་ན་ཡང་ས་ལ་ལྟ་བར་བྱེད་དོ། །དེ་ཡང་ན་སངས་རྒྱས་ཀྱི་སྐུ་གཟུགས་ལ་གཅིག་ཏུ་དྲན་པ་ཉེ་བར་གནས་པར་བྱེད་དོ། །དབང་པོ་གཅིག་ཏུ་བསྡམས་པ་དང་། ལུས་ཐམས་ཅད་ཤིན་དུ་ལེགས་པར་བསྡམས་པ་དང་། དབུགས་དབྱུང་བ་དང་རྔུབ་པ་བགྲང་བར་གྱུར་པས་ལུས་ཀྱི་དབང་དུ་བྱས་ནས་ཀྱང་དྲན་པ་དང་ལྡན་པས་རྒྱུ་བར་བྱེད་ཀྱི། སྦྱིན་བདག་གི་ཁྱིམ་དུ་རྣམ་པ་ཐམས་ཅད་དུ་ཡང་ཉེ་བར་མཁོ་བའི་སྣོད་སྤྱད་རྣམས་ཡོངས་

71-55a

སུ་སྤྱད་ནས་ལྟ་བར་མི་བྱེད་དོ། །མིག་རིག་རིག་པོར་མི་བྱེད་ཅིང་བུད་མེད་དག་ལ་རབ་ཏུ་རྟོག་པར་མི་བྱེད་དོ། །བྱིས་པ་ལ་འཁྱུད་པར་མི་བྱེད་ཅིང་ཡང་དང་ཡང་དུ་རྐང་པ་དག་བསྐུམ་པར་མི་བྱེད་དོ། །ལག་པ་དག་རྣམ་པར་བསྐྱོད་པར་མི་བྱེད་དོ། །སྟན་ལས་རབ་ཏུ་བསྐྱོད་པར་མི་བྱེད་པ་དང་། ལག་པ་ལ་རང་གི་མགོ་བོ་བྱི་བྱད་མི་བྱེད་ལ་ཡང་དང་ཡང་དུ་ཆོས་གོས་དག་བསྐྱོད་པར་མི་བྱེད་དོ། །ལག་པས་ལག་པ་གནོན་པར་མི་བྱེད་ཅིང་སོར་མོ་བསྐྱོད་པར་མི་བྱེད་དོ། །འདི་ནི་རབ་ཏུ་རྟེན་པ་གཉིས་པ་ཡིན་ཏེ། རྣམ་པ་དེ་ལྟ་བུའི་དགེ་སློང་ནི་ལྟ་བར་བྱེད་པ་ལ་རྟེན་པ་རབ་ཡིན་ནོ། །གཞན་ཡང་རབ་ཏུ་རྟེན་པ་གསུམ་པ་ཡོད་དེ། དགེ་སློང་སྦྱིན་པ་པོ་དང་ཁྱིམ་བདག་གི་ཁྱིམ་དུ་ཞུགས་པར་གྱུར་ནས། རྐང་པ་གཉིས་བཀྲུས་ལ་ལག་པ་གཙང་མར་བྱས་ཏེ་ལྷུང་བཟེད་བྱི་དོར་བྱའོ། །བྱི་དོར་བྱས་ནས་ཀྱང་དམན་ཞིང་དམན་པའི་སེམས་ཀྱིས་སྟན་ལ་འདུག་པར་བྱའོ། །བསྡད་ནས་ཀྱང་གང་ཡང་རྐང་པ་གཉིས་ཀྱི་བར་ཙམ་གྱི་མདུན་དུ་ལྷུང་བཟེད་ཀྱི་ལྕུག་ཀོར་ལ་ལྷུང་བཟེད་གཞག་པར་བྱའོ། །ལག་པ་གཡས་པས་ཀྱང་ལྷུང་བཟེད་བསྲིངས་ལ་ལེགས་པར་བྱ་སྟེ། བསོད་སྙོམས་བྱིན་ལེན་བྱའོ། །བླངས་ནས་ཀྱང་དེའི་རྗེས་ལ་སྨན་བཞིན་དུ་དང་ཁམ་ཡང་ཧ་ཅང་ཆེ་བར་མི་བྱའོ། །དེ་ཡང་ཁ་ཧ་ཅང་གདངས་ནས་ཁར་གཞུག་པར་མི་བྱའོ། །སྒྲ་ཆེ་བས་བཟའ་བར་མི་བྱ་ཞིང་མཆུ་ཧ་ཅང་བསྐྱོད་པར་མི་བྱའོ། །གསུས་པའི་སུམ་ཆ་ཙམ་གྱིས་ཆོག་ཤེས་པར་གྱུར་པར་བྱའོ། །གཞན་དག་གི་ལྷུང་བཟེད་ལ་ཀུན་ཏུ་བལྟ་བར་མི་བྱའོ། །ཟས་གང་ལ་བརྐམ་ཆགས་བསྐྱེད་པར་གྱུར་པ་དེ་ཡང་བཟའ་བར་མི་བྱའོ། །དེ་ཟོས་པ་གང་གིས་བག་མེད་པ་གཞན་རྣམས་བྱེད་པར་མི་འགྱུར་བ་རྣམས་སོ། །སྟོན་མོའི་ཡུལ་དང་དུས་ངེས་པར་རྫོགས་པ་དང་གང་གིས་དབང་པོ་རབ་ཏུ་དང་བར་གྱུར་པ་དང་། ཤིན་ཏུ་མཉམ་པར་བཞག་པར་གྱུར་པའི་ཡིད་ཀྱིས་ཆོས་བསྟན་པར་བྱ་སྟེ། བློ་མཉམ་པར་བཞག་པས་དང་ཤིན་ཏུ་མྱུར་བར་མ་ཡིན་པ་དང་བུལ་བ་མ་ཡིན་པ་དང་དྲང་བ་མ་ཡིན་པ་དང་ཀྱོག་པོ་

71-55b

མ་ཡིན་པ་དང་རིང་བ་མ་ཡིན་པ་དང་ཡུལ་དང་དུས་མངོན་པར་བལྟས་ཏེ། སྦྱིན་བདག་གི་སེམས་རྗེས་སུ་བསྲུངས་པར་འགྱུར་བར་བྱའོ། །ཇི་ལྟར་འདི་བག་མེད་པ་རྣམས་ཀྱིས་འཇིགས་པར་མི་འགྱུར་བར་བྱའོ། །འདི་ནི་རབ་ཏུ་རྟེན་པ་གསུམ་པ་ཡིན་ནོ། །གལ་ཏེ་ཡང་ཟས་ཐོབ་པར་གྱུར་པ་འདིས་ཅུང་ཟད་ཅིག་མཐོང་བར་གྱུར་པ་གྲོང་ངམ་གྲོང་ཁྱེར་རམ་ཚོང་འདུས་རྣམས་ལ་དེས་དེ་ཡིད་ལ་མི་བྱའོ། །འདོད་པར་ཡང་མི་བྱའོ། །དེ་ལ་སེམས་སྤྲོ་བ་བསྐྱེད་པར་ཡང་མི་བྱའོ། །ས་མཚམས་རིགས་པ་མ་ཡིན་པར་ཀུན་ཏུ་གོ་བར་བྱེད་པའི་གནས་མལ་རྣམས་ལ་བརྟགས་ཏེ་འདུག་པར་མི་བྱ་བ་འདི་ཉིད་ནི་རབ་ཏུ་རྟེན་པ་བཞི་པ་ཡིན་ནོ། །གཞན་ཡང་ངེས་པར་ཆགས་པ་མེད་པ་རབ་ཀྱི་རྟེན་ཡོད་དེ། དོན་རྣམས་ཐམས་ཅད་ལ་ལུས་དང་སྲོག་གཉིས་ལ་ཡང་ལྟོས་པ་མེད་པར་གྱུར་པའོ། །ཡོ་བྱད་དང་སྣོད་སྤྱད་མང་པོ་རྣམས་ཐོགས་ཤིང་ཁྱེར་བར་གྱུར་པ་ནི་དགེ་སློང་མ་ཡིན་པ་དང་། ཀུན་ཏུ་རྩོམ་པས་ཡུལ་ལྗོངས་རྒྱུ་བ་ལ་མངོན་པར་དགའ་བ་མ་ཡིན་པའི་དགེ་སློང་དུ་གྱུར་པ་དང་། གཞན་གྱི་རྟགས་དང་ཆ་བྱད་འཛིན་པ་མ་ཡིན་པ་དང་། ཕེའུ་བཏབ་པ་ལ་ཆེད་ཆེར་བྱེད་པ་མ་ཡིན་པ་དང་། ཁྱིམ་གཅིག་ཏུ་རབ་ཏུ་འཇུག་པ་ལ་མངོན་པར་དགའ་བར་གྱུར་པ་མ་ཡིན་པ་དང་། འདི་ནི་རབ་ཏུ་རྟེན་པ་ལྔ་པ་ཡིན་ནོ། །གཞན་ཡང་ངེས་པར་ཆགས་པ་མེད་པའི་རབ་ཏུ་རྟེན་པ་ཡོད་པ་ནི་ཤིང་དང་རྩྭ་དང་ས་གཅོད་པར་གྱུར་པ་མ་ཡིན། ལྷམ་ཁྲ་བོ་དང་གོས་ཁྲ་བོ་གྱོན་པར་འགྱུར་བ་མ་ཡིན། ཤིན་ཏུ་ཚུལ་ཁྲིམས་འཆལ་པ་རྣམས་ལ་ཡང་གཤེ་བར་བྱེད་པ་མ་ཡིན། རྒྱལ་པོའི་བསོད་སྙོམས་ལ་ལྟོས་པ་མཆོག་ཏུ་བྱེད་པ་མ་ཡིན། ཀུན་ཏུ་རྩོད་པས་གཟིར་བ་དང་ལྡན་པའི་དགེ་སློང་ལ་རྗེས་སུ་སྟེན་པར་བྱེད་པ་མ་ཡིན་པ་འདི་ནི་རབ་ཏུ་རྟེན་པ་དྲུག་པ་ཡིན་ནོ། །གཞན་ཡང་རབ་ཏུ་རྟེན་པ་དག་ཡོད་པ་ལ་ཇི་ལྟར་དགེ་སློང་གང་སེམས་མཉམ་པ་ལ་རྟེན་པ་དེ་ནི། རབ་ཀྱི་རྟེན་དེ་དང་དེས་རྗེས་སུ་བསྟེན་པས་ཕན་པ་བཞིན་དུ་གྱུར་པ། བདུད་ཀྱི་ཡུལ་ལས་འབྲོས་པ་ལ་བརྩོན་པ་ལ་ཆེད་ཆེར་བྱེད་པ་དང་། ཞི་བ་དང་།

71-56a

དབང་པོ་དུལ་བ་རྣམས་ཀྱིས་རྗེས་སུ་སྟེན་པར་བྱེད་པ་ནི། རི་ཁྲོད་དང་རིའི་ཕུག་དང་བླ་གབ་མེད་པ་དག་ཏུ་རྒྱུ་བ་དང་། རྟག་ཏུ་ཡང་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་ལ་གནས་པར་གྱུར་པ་འདི་ནི་རབ་ཏུ་རྟེན་པ་བདུན་པ་ཡིན་ནོ། །དེ་ལྟར་ན་དགེ་སློང་གིས་རྣམ་པར་འཇོམས་པ་དང་། འཆིང་བ་རྣམས་ཐམས་ཅད་ལས་རྣམ་པར་གྲོལ་བར་ཡང་འགྱུར་རོ། །དེ་ནས་དེའི་དུས་འདིར་རྨ་བྱའི་མངའ་བདག་གིས་ཚིགས་སུ་བཅད་པ་གཞན་དག་བསྙད་པ། ཇི་ལྟར། ཇི་བཞིན་རབ་ཏུ་རྟེན་སྤྱོད་ལྡན། །ཡེ་ཤེས་སྤྱོད་ཡུལ་རྟེན་པའོ། །འཁོར་བའི་སྐྱོན་གྱིས་འཇིགས་པ་ཡི། །རབ་ཏུ་བྱུང་བ་འབྲས་བཅས་འདོད། །བསླབ་པའི་གཞི་ནི་ཉམས་མེད་དང་། །སྔོན་བདེ་བ་ལ་ཡང་སྤྲོ་མེད། །ཕུང་པོའི་རྒྱུན་གྱིས་འཇིགས་པ་ཡི། །ནགས་སུ་བསྟེན་པ་འབྲས་དང་ལྡན། །ངག་འཇམ་པ་དང་ཞི་བ་དང་། །མྱ་ངན་འདས་ལའང་ཁ་ཕྱོགས་པ། །ལུས་ནི་ཚུལ་ཁྲིམས་ཀྱིས་བརྒྱན་པའི། །རབ་ཏུ་བྱུང་བ་འབྲས་བཅས་འདོད། །བདག་གི་དངོས་དང་གཞན་དངོས་ལ། །གང་གི་བློ་ནི་རྨོངས་མེད་པ། །ལས་ཀྱི་རྣམ་པར་སྨིན་པས་མིན། །ལམ་དང་ལམ་མིན་དེ་བཞིན་ཉིད། །བདེ་དང་སྡུག་བསྔལ་འཇིགས་པ་དང་། །སྒྲིབ་པ་དང་ཡང་མི་ལྡན་ལ། །ཁྱིམ་གྱི་ཞགས་པ་རྣམ་གྲོལ་བས། །སྡུག་བསྔལ་ཉིད་ན་གནས་པ་མིན། །དེ་ལྟར་རབ་ཏུ་རྟེན་པའི་ཡོན་ཏན་རྣམ་པ་དུ་མ་རྣམས་སུ་རྨ་བྱའི་མངའ་བདག་འདིས་ལྷ་དེ་དག་རྣམས་ལ་བརྗོད་དེ་ལྷ་དེ་དག་རྣམས་སླར་ཡང་དད་པ་སྐྱེད་པར་བྱེད་པའི་ཕྱིར་རོ། །དེའི་ཚེ་ལྷ་དེ་དག་རྣམས་ཐམས་ཅད་ཀྱང་ཆོས་འདུལ་བ་རྣམ་པ་དུ་མར་བརྗོད་པར་གྱུར་པ་ན་མཉམ་པར་གཞག་པའི་རྣ་བའི་བུག་པས་ཉན་པར་བྱེད་དོ། །དེ་ནས་གཞན་ཡང་རྨ་བྱའི་མངའ་བདག་དེ་སྤྲོ་བ་ལྡོག་པ་མེད་པར་གྱུར་པས་སླར་ཡང་ཆོས་དེ་ཉིད་སྟོན་པར་བྱེད་དེ། འཐབ་བྲལ་གྱི་ལྷ་དེ་དག་རྣམས་དང་ཀུན་ཏུ་ལྷགས་པར་གྱུར་པའི་དགའ་ལྡན་གྱི་ལྷ་དེ་དག་རྣམས་ལ་དམ་པའི་ཆོས་སྒྲོགས་པ་ལ་གུས་པས་ཕྱིར་ཡང་རྨ་བྱའི་བདག་པོ་དེ་ཉིད་ཀྱིས་ཆོས་སྟོན་པར་བྱེད་

71-56b

དོ། །ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་ལ་ཡང་ཇི་ལྟར་གཅེས་པར་བྱ་བར་གྱུར་པའི་ཆོས་གཞན་དེ་ཡང་གང་ཞེ་ན། འདི་ལྟ་སྟེ། ལས་ལ་དད་པ་དང་ལྡན་པའོ། །ལས་དང་འབྲས་བུ་ལ་དད་པ་དང་ལྡན་པ་ཞེས་བྱ་བའི་ཆོས་ནི་ཆེན་པོར་གྱུར་པ་ཡིན་ནོ། །གང་ཡང་དགེ་སྦྱོང་ངམ་བྲམ་ཟེའམ་དེ་དག་དང་མཚུངས་པར་གྱུར་པ་རྣམས་ཀྱང་རུང་སྟེ། ལས་དང་འབྲས་བུ་ལ་དད་པ་དང་ལྡན་པར་གྱུར་པའི་ཡིད་ཅན་དེས་ནི་ལུས་ཀྱི་ཉེས་པ་སྤྱོད་པར་བྱེད་པ་ན་ཤེས་པར་བྱེད་དེ་ཇི་ལྟར། ལུས་ཀྱི་ཉེས་པར་སྤྱད་པ་འདི་བསྟེན་ཅིང་བསྒོམས་ལ་ལན་མང་དུ་བྱས་པས་ནི། མི་འདོད་པ་མི་སྡུག་པ་ཡིད་དུ་མི་འོང་བའི་རྣམ་པར་སྨིན་པ་རྣམས་བདག་ལ་འབྱུང་བར་འགྱུར་བ་ཡིན་ཏེ། དམྱལ་བ་དང་ཡི་དགས་དང་དུད་འགྲོའི་འགྲོ་བའི་ཡུལ་རྣམས་ལ་འབྲས་བུ་མི་འདོད་པ་མི་སྡུག་པ་ཡིད་དུ་མི་འོང་བའི་སྡུག་བསྔལ་རྣམས་སོ་སོར་མྱོང་བར་འགྱུར་ཏ་རེ། དེ་བཞིན་དུ་རང་ཉིད་ངག་གི་ཉེས་པར་སྤྱོད་པ་རྣམས་སྤྱོད་པ་ན་ཡང་འདི་ལྟར་ཡིད་ལ་བྱེད་དོ། །ཇི་ལྟར་བདག་གི་ངག་གི་ཉེས་པར་སྤྱོད་པ་འདི་ཉིད་བསྟེན་ཅིང་བསྒོམས་ལ་ལན་མང་དུ་བྱས་པས་ནི། མི་འདོད་པ་མི་སྡུག་པ་ཡིད་དུ་མི་འོང་བའི་འབྲས་བུ་རྣམ་པར་སྨིན་པ་འབྱུང་བར་འགྱུར་ཏེ། དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་སུ་མི་དགེ་བའི་ལས་ཀྱིས་སྐྱེ་བ་རབ་ཏུ་མྱོང་བར་འགྱུར་རོ། །དེ་བཞིན་དུ་ཡིད་ཀྱིས་ཉེས་པར་སྤྱོད་པ་ཡང་བྱེད་པ་དང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི། མི་སྡུག་ཅིང་ཡིད་དུ་མི་འོང་ལ་མི་འདོད་པ་མི་སྡུག་པ་ཡིད་དུ་མི་འོང་པའི་འབྲས་བུ་དམྱལ་བ་དང་ཡི་དགས་དང་དུད་འགྲོའི་ཡུལ་རྣམས་སུ་འབྱུང་བར་འགྱུར་ཏེ། དགེ་སྦྱོང་ངམ་བྲམ་ཟེའམ་དེ་དག་དང་མཚུངས་པར་གྱུར་པ་གཞན་རྣམས་སམ། གང་ཡང་དེ་དག་དང་འདྲ་བར་གྱུར་པ་རྣམས་ཀྱིས་གང་སྔོན་གྱི་དུས་ན་སྡིག་པའི་ལས་བྱས་པར་གྱུར་པ་རྣམས་དྲན་པར་བྱས་ནས་བཤགས་པར་བྱེད་དོ། །འགྱོད་པར་ཡང་བྱེད་དོ། །སངས་རྒྱས་ལ་རྗེས་སུ་སྟེན་པར་བྱེད་དོ། །ཇི་ལྟར་བདག་ཅག་གི་ལས་ཀྱི་འབྲས་བུ་ཉེས་པར་བྱས་པ་

71-57a

རྣམས་ལས་གྲོལ་བར་འགྱུར་ཞེས། དེ་དག་རྣམས་ནི་ཡོངས་སུ་འདྲི་བའི་རང་བཞིན་ཅན་དུ་འགྱུར་རོ། །དེ་ནས་དེ་རྒན་པོ་ཤེས་ཉེན་དང་ལྡན་པ་དུལ་བ་ལ་སྤྲོ་བར་བྱས་ནས་ལྟུང་བ་འདི་དག་བཤགས་པར་བྱེད་དོ། །འདི་ལས་ལངས་པས་དེ་སྲིད་ཀྱི་སྡིག་པའི་ལས་རྣམས་ཟད་པར་འགྱུར་རོ། །དེ་ལྟར་རེ་ཞིག་གང་སྔོན་གྱི་དུས་ན་ལས་བྱས་པར་འགྱུར་བ་དམ་པ་མ་ཡིན་པའི་ལས་ཉེ་བར་བྱས་པ་དེ་དག་ཕྱིས་ཡང་མི་བྱེད་དོ། །ལྡང་བར་ལ་ཡང་སྤྱོད་པར་བྱེད་དོ། །དེས་མི་དགེ་བའི་ལས་འདི་དག་ཐམས་ཅད་ནས་ཐམས་ཅད་དུ་རབ་ཏུ་བྲལ་བར་འགྱུར་བའམ། དེ་དག་མགོ་སྨད་པར་འགྱུར་རོ། །དེ་བཞིན་དུ་ད་ལྟར་བའི་དུས་སུ་ཉེས་པར་བྱས་པའི་ལས་བྱས་པར་གྱུར་པ་ལུས་ཀྱི་དང་ངག་གི་དང་ཡིད་ཀྱིས་ཀྱང་སྟེ། རྣམ་པ་གསུམ་པོ་སེམས་ཡང་མོར་ཡོངས་སུ་འཇུག་པས་གལ་ཏེ་བྱས་པར་གྱུར་ན་ཡང་། དུས་འཇུག་པ་ཡུན་ཐུང་ངུས་དེ་མ་ཐག་ཏུ་གང་དག་སེམས་ཀྱིས་ཡོངས་སུ་བཏང་ནས་བཤགས་པར་བྱེད་དོ། །

འགྱོད་པ་སྐྱེད་པར་བྱེད་ཅིང་ཕྱིས་ཡང་མི་བྱེད་དོ། །དེ་དེ་བཞིན་དུ་རབ་ཏུ་འགྱོད་པར་བྱེད་པར་གྱུར་པ་ཡིན་ན། གང་ལ་ལས་དེའི་ཕྱི་བཞིན་ལྟ་བར་བྱེད་པར་མི་འགྱུར། སྡིག་པའི་ལས་རྣམས་ཡོད་པ་མ་ཡིན་ལྡན་པ་མ་ཡིན་ནོ། །དེ་ཐམས་ཅད་ནས་ཐམས་ཅད་དུ་མེད་པར་འགྱུར་བའམ་ཟད་པར་བྱེད་པའམ་ཉམས་སྨོད་པར་ཡང་འགྱུར་རོ། །ཇི་ལྟར་ལས་ཀྱི་འབྲས་བུ་རྣམ་པར་སྨིན་པ་ཤེས་པའི་དགེ་སྦྱོང་ངམ་བྲམ་ཟེའམ་གཞན་ཡང་དེ་དང་འདྲ་བ་རྣམས་དཔྱོད་པར་བྱེད་དེ། ཇི་ལྟར་གལ་ཏེ་བདག་གིས་ལུས་ཀྱིས་ཉེས་པར་སྤྱོད་པའམ་ངག་གིས་ཉེས་པར་སྤྱོད་པ་འདི་དག་རྣམས་བྱས་ཤིང་གོམས་པར་བྱས་པར་གྱུར་ན། དེས་བདག་དམྱལ་བ་དང་ཡི་དགས་དང་དུད་འགྲོའི་འགྲོ་བའི་ཡུལ་རྣམས་སུ་འབྲས་བུ་རྩུབ་པོ་འབྱུང་བར་འགྱུར་བས་ན། དེ་མི་དགེ་བའི་ལས་ཀྱི་འབྲས་བུ་མ་སྐྱེས་པ་དེ་རྣམས་མི་སྐྱེ་བར་བྱ་བའི་དོན་དུ་འབད་ཅིང་རྩོལ་ལ་བརྩོན་འགྲུས་རྩོམ་པར་བྱེད་དོ། །དེ་ལྟ་དེ་ལྟར་འདས་པའི་དུས་ཀྱི་ལས་ཀྱི་འབྲས་བུ་རྣམས་ལ་དད་པའི་སྟོབས་དང་ལྡན་པའི་དགེ་སྦྱོང་ངམ་བྲམ་ཟེ་

71-57b

རྣམས་ཀྱིས་ཀྱང་རུང་སྟེ། དེ་དག་རྣམས་ཀྱི་དམྱལ་བ་མྱོང་བར་འགྱུར་བའི་ལས་དུས་རིང་དུ་ཀུན་ཏུ་མྱོང་བར་གྱུར་པ་ཆེས་འཇིགས་པར་གྱུར་པའི་ཚོར་བ་གང་ཡིན་པ་དེ་ཡང་དུས་ཐུང་བ་དང་ཤིན་ཏུ་ཞན་པའི་ཚོར་བར་གྱུར་པའམ། ཐམས་ཅད་ཀྱི་ཐམས་ཅད་དུ་ཡང་མེད་པར་འགྱུར་རོ། །དེ་དེ་ལྟར་གཞན་ཡང་སྤྱོད་པར་བྱེད། འབད་པར་བྱེད། བརྩོན་འགྲུས་རྩོམ་པར་བྱེད་པས་ནི་གང་དེ་ཡི་དགས་སུ་སྐྱེ་བར་བྱེད་པའི་ལས་ངན་པ་རྣམས་དུས་རིང་དུ་མྱོང་བར་འགྱུར་བ་དང་། བཀྲེས་པ་དང་སྐོམ་པའི་རང་བཞིན་གྱིས་ཆེས་དྲག་པ་ཡོད་པ་དེ་དག་རྣམས་དམན་པར་འགྱུར་རོ། །དུས་ཐུང་བར་འགྱུར་བའམ་ཐམས་ཅད་ཀྱི་ཐམས་ཅད་དུ་ཡང་མེད་པར་འགྱུར་རོ། །དེ་དེ་བཞིན་དུ་དགེ་སྦྱོང་ངམ་བྲམ་ཟེ་རྣམས་དང་གང་ཡང་དེ་དག་དང་འདྲ་བར་ལས་དང་འབྲས་བུ་ལ་དད་པ་དང་ལྡན་པ་རྣམས་གང་ཡིན་པ་རྣམས། དེ་དག་གིས་དུད་འགྲོར་སྐྱེ་བར་འགྱུར་བའི་ལས་ཆེས་འཇིགས་པ་རྣམས་བྱས་པས། དེ་དག་ཕན་ཚུན་དུ་ཟ་བར་བྱེད་པ་དུས་རིང་བར་མྱོང་བར་འགྱུར་བ་དེ་དག་རྣམས་ཀྱང་ཤིན་ཏུ་ཆུང་བ་དང་། ཕན་ཚུན་དུ་ཟ་བ་མི་མྱོང་བར་འགྱུར་བ་དང་། དུས་ཐུང་བ་དང་ཐམས་ཅད་ནས་ཐམས་ཅད་དུ་ཡང་མེད་པར་འགྱུར་རོ། །གང་བྱས་ཤིང་བསགས་ལ་ངེས་པ་ཁོ་ནར་སོ་སོར་མྱོང་བར་འགྱུར་བའི་ལས་ཀྱི་འབྲས་བུ་གང་དང་གང་ལ་འཕེན་པར་བྱེད་པའི་དམྱལ་བ་དང་ཡི་དགས་དང་དུད་འགྲོའི་འགྲོ་བའི་ལུས་རྣམས་ནི་མ་གཏོགས་སོ། །གཞན་ཡང་ལས་ཀྱི་འབྲས་བུ་དེ་ཉིད་ལ་དད་པ་དང་ལྡན་པ་ཡིན་ཏེ། འདི་ལྟར་ལས་དེ་ནི་ཤིན་ཏུ་རྟོགས་པར་དཀའ་བ་དང་མཆོག་ཏུ་ཕྲ་བར་གྱུར་པའི་ལས་ཀྱི་འབྲས་བུ་རྣམས་ལ་དཔྱོད་པར་བྱེད་དོ། །དེ་ལ་མི་དགེ་བའི་ལས་རྣམ་པ་གསུམ་པོ་དེ་དག་བྱས་པར་གྱུར་པ་རྣམས་དེ་སོ་སོར་བཤགས་པར་བྱེད་པ་དང་། ཁ་ན་མ་ཐོ་བ་དེ་དག་རྣམས་རབ་ཏུ་སྤངས་པར་བྱེད་པ་དེ་ལ། གང་ཁོ་ན་ངེས་པར་མྱོང་བར་འགྱུར་བ་རྣམས་ལས་དུད་འགྲོའི་འགྲོ་བ་མྱོང་བར་འགྱུར་བ་དེ་དག་འདི་ལྟར་སེམས་ཀྱིས་ལེགས་པར་བསྒོམས་ཤིང་ཡོངས་སུ་དག་པས་དེ་སྤོང་བར་བྱེད་དོ། །དེ་ལ་གང་དམྱལ་བ་

71-58a

མྱོང་བར་འགྱུར་བ་དང་ཡི་དགས་དང་དུད་འགྲོའི་འགྲོ་བ་མྱོང་བར་འགྱུར་བ་དང་ལན་གྲངས་གཞན་ལ་མྱོང་བར་འགྱུར་བ་རྣམས་སེམས་ཀྱིས་རྣམ་པར་འགྱོད་པར་བྱེད་པ་དང་། གཉེན་པོ་དཀར་པོའི་ཆོས་རྣམས་ཀྱིས་ཉེ་བར་བཅོམ་པའི་དབང་གིས་ཀྱང་རྣམ་པ་ཐམས་ཅད་དུ་མི་འགྱུར་བའམ། ཉམས་སྨོད་པར་བྱེད་པའམ་ལས་དེ་ཉིད་ཀྱིས་གང་ཆེས་སྡུག་བསྔལ་བའི་དུད་འགྲོའི་སྐྱེ་གནས་སོ་སོར་རབ་ཏུ་མྱོང་བར་འགྱུར་བ་ཡང་རུང་སྟེ། ཉེས་པར་བྱས་པ་དེ་བཤགས་པ་ལས་ལངས་པས་སམ། ཆོས་ཤིན་ཏུ་དཀར་བར་གྱུར་པའི་ལེགས་པར་བྱས་པའི་ལས་རྣམས་ཀྱིས་ཀྱང་། གང་དུད་འགྲོར་ཚེ་རིང་པོར་འཚེད་པར་བྱེད་པ་རྣམས་ཉེ་བར་བཅོམ་པས་དེ་ཚེ་ཐུང་ངུ་དང་སྡུག་བསྔལ་ཆུང་བར་ཡོངས་སུ་འཚེད་པའམ་ཐམས་ཅད་དུ་མེད་པར་བྱེད་དོ། །དེ་ལ་རྒྱུ་བ་འདི་དང་མཚན་མ་འདི་དག་གིས་ལས་དང་འབྲས་བུ་ལ་དད་པ་དང་ལྡན་པ་ཉིད་དུ་བྱའོ། །དགེ་སྦྱོང་ངམ་བྲམ་ཟེའམ་དེ་དག་དང་འདྲ་བར་གྱུར་པ་གཞན་རྣམས་ཀྱང་རུང་སྟེ། གང་ཡང་ལས་དང་འབྲས་བུ་ལ་དད་པ་དང་ལྡན་པ་དེ་ནི། ཆུ་ཀླུང་གི་ངོས་དང་བཅས་ནས་ཚད་ཡོད་པར་འཁོར་བ་ན་འཁོར་བ་ཡིན་ནོ། །དེ་ཅིའི་ཕྱིར་ཞེ་ན། གང་འགྲོ་བ་ལྔ་ན་དགེ་བ་དང་མི་དགེ་བའི་ལས་རྣམས་ཀྱིས་མ་བསྐྱེད་པའི་འབྲས་བུར་གྱུར་པ་གང་ཡིན་པའི་སྐྱེ་བ་ནི་ཅུང་ཟད་ཅིག་ཀྱང་ཡོད་པ་མ་ཡིན་ནོ། །དེའི་ཕྱིར་དེ་ཁོ་ན་བཞིན་དུ་སྐྱེས་བུའི་སྙིང་པོ་ནི་གང་ལས་དང་འབྲས་བུ་ལ་དད་པ་དང་ལྡན་པ་ཞེས་བྱ་བ་ཡིན་ཏེ། སྲོག་ཆགས་རྣམས་ནི་ཐམས་ཅད་ཀྱང་ལས་རྣམས་ཐམས་ཅད་ཀྱི་འབྲས་བུའི་བགོ་སྐལ་ལ་སྤྱོད་པ་ཡིན་ནོ། །དེའི་ཕྱིར་ན་བུད་མེད་དམ་སྐྱེས་པ་རྣམས་ཀྱིས་ཀྱང་རུང་སྟེ། ཐམས་ཅད་ཀྱིས་ཀྱང་རབ་ཏུ་བརྩོན་པས་ཉིན་མོ་དང་མཚན་མོར་ཡང་བདག་ཉིད་ཐམས་ཅད་ཀྱིས་ལས་དང་འབྲས་བུ་ལ་དད་པའི་སྟོབས་བསྐྱེད་པར་བྱའོ། །འདིར་རེ་ཞིག་འཁོར་བའི་སྲོག་ཆགས་རྣམས་ལ་དེ་དག་སྙིང་པོར་གྱུར་པའོ། །ཆོས་གཞན་ཡང་དགེ་སྦྱོང་ངམ་བྲམ་ཟེའམ་གཞན་ཡང་དེ་དང་རང་བཞིན་མཚུངས་པ་རྣམས་ཀྱིས་ཡིད་ལ་བྱའོ། །འདི་ཡང་གང་ཞེ་ན། འདི་ལྟ་སྟེ་མི་གནས་པས་ཉེ་བར་

71-58b

བཅོམ་པ་ཉིད་དོ། །མི་གནས་པས་ཉེ་བར་བཅོམ་པ་ནི་གང་གི་ཕྱིར་དགེ་སྦྱོང་ངམ་བྲམ་ཟེ་རྣམས་གང་དག་ཡིན་ཡང་རུང་སྟེ། དེ་དག་རྣམས་ནི་བློ་གྲོས་དམན་པ་རྣམས་ཡིན་ནོ། །མི་གནས་པས་ཉེ་བར་བཅོམ་པར་གྱུར་པའི་སྐྱོན་དེས་སེམས་ཆགས་པར་བྱེད་དོ། །མི་གནས་པ་དེ་ཉིད་ཀྱིས་ཀུན་ཏུ་འཁོར་བར་བྱེད་དེ། དགེ་འདུན་གྱི་ཀུན་དགའ་ར་བ་དང་གཙུག་ལག་ཁང་དང་གྲོང་དང་ཡུལ་དང་གྲོང་ཁྱེར་དང་གཞན་དག་ཏུ་ཡང་རུང་སྟེ། རྟག་ཏུ་ཡང་ལེ་ལོ་ཅན་དུ་འགྱུར་རོ། །དེ་དང་དེ་ཉིད་ལ་དགའ་བར་འགྱུར་རོ། །དེ་ཞི་བའི་དགོན་པ་རྣམས་དང་ཞི་བའི་གནས་གཞན་དག་རྣམས་སུ་ཡང་མངོན་པར་དགའ་བར་མི་འགྱུར་རོ། །ལེགས་པར་འགྲོ་བའི་རང་བཞིན་ཅན་མ་ཡིན་ཏེ། འགྲོན་ལམ་དུ་འགྲོ་བའི་དབང་དུ་བྱས་པ་ན་ཡང་དེ་ནི་རབ་ཏུ་བྱུང་བ་ཡང་མ་ཡིན་ལ་ཁྱིམ་པ་ཡང་མ་ཡིན་ནོ། །དེ་ཐམས་ཅད་དུ་རིགས་མཚུངས་པར་འགྱུར་རོ། །ཡུལ་ཕྱོགས་གཅིག་པོ་དེ་ཉིད་ལ་གནས་པས་ཀྱང་དུས་འདའ་བར་བྱེད་དོ། །དེ་གང་གི་དོན་དུ་རབ་ཏུ་བྱུང་བར་གྱུར་པའི་བསམ་གཏན་གྱིས་བདེ་བར་གནས་པར་བྱ་བ་དེ་ཉིད་ནི་མི་བྱེད་དེ། ཀུན་ཏུ་གནས་པའི་སྐྱོན་གྱིས་ཉེ་བར་བཅོམ་པའི་ཕྱིར་རོ། །གང་ཡང་མི་ཚུགས་པའི་སྐྱོན་དེ་རིག་པར་གྱུར་ནས་དགེ་སྦྱོང་ངམ་བྲམ་ཟེའམ་གཞན་ཡང་དེ་དང་རང་བཞིན་འདྲ་བ་དག་ལ་སྦྱིན་པ་པོ་དང་སྦྱིན་བདག་རྣམས་ཁ་དྲག་པར་འགྱུར་རོ། །འདི་དང་ཕྲད་པའི་དོན་དུ་ཐམས་ཅད་དུ་ཉེ་བར་འོང་བར་ཡང་མི་འགྱུར་རོ། །འདི་ལ་གང་སྦྱིན་པ་པོ་དང་སྦྱིན་བདག་རྣམས་དབང་དུ་མི་འགྱུར་བར་དབང་ཆེན་པོར་འགྱུར་རོ། །འདི་དག་གི་ཚིག་ཉན་པར་མི་འགྱུར་ཞིང་། དེ་གཙོ་བོར་བྱས་ནས་སྦྱིན་པ་རྣམས་གཏོང་བར་མི་བྱེད་དོ། །ཤིན་ཏུ་སེམས་སྟོབས་ཡང་བར་གྱུར་པ་འདུག་པའི་ས་མི་ཟིན་པས་ཉེ་བར་བཅོམ་པ་རྟག་ཏུ་འཕྲད་པར་བྱེད་པ་རྟག་ཏུ་ཞབས་འབྲིང་བྱེད་པ་ཡིན་ནོ། །དེ་ཀུན་ཏུ་གནས་པས་ཉེ་བར་བཅོམ་པའི་སྐྱོན་གྱིས་ཉེ་བར་བཅོམ་པར་གྱུར་པ་ལ་བཞད་གད་དུ་བྱེད་དོ། །ཁྱིམ་པ་དག་ཕན་ཚུན་དུ་གླེང་བརྗོད་ཀྱང་བྱེད་དེ། ཇི་ལྟར་དགེ་སྦྱོང་ངམ་བྲམ་ཟེ་ཆེ་གེ་མོ་ཞེས་བྱ་བ་གར་ཡང་མི་ཆགས་པས་

71-59a

ཉེ་བར་བཅོམ་པས་དེ་དང་དེ་ཉིད་ལ་དགའོ། །དགོན་པ་ཞི་བ་རྣམས་སུ་ནི་མ་ཡིན་གྱི། རྟག་ཏུ་ཚོལ་སོག་བྱེད་པའི་རང་བཞིན་ཅན་རྟག་ཏུ་ཁྱིམ་པ་རྣམས་ལྟ་བར་འདོད་པ་དང་། ཞབས་འབྲིང་གི་དངོས་པོར་ཡང་འགྲོ་བ་དང་བྲན་བཞིན་དུ་ཁྱིམ་པ་རྣམས་ཀྱི་གཡོག་བྱེད་དོ། །གཡོག་བྱེད་པར་གྱུར་པས་དེ་དག་གིས་ཁ་ཉེན་པར་བྱེད་དོ། །དེ་ཉིད་ཀྱིས་ཁྱིམ་པ་ཀུན་ཆུབ་པར་མི་འགྱུར་ལ། རབ་ཏུ་བྱུང་བར་ཡང་མི་འགྱུར་ཏེ་མི་གནས་པའི་སྐྱོན་གྱིས་ཉེ་བར་བཅོམ་པའི་ཕྱིར་རོ། །གང་ལ་ཡང་སྐྱོན་འདི་དག་རྣམས་མེད་པ་དེ་ནི་སྐྱེ་བོ་རྣམས་ཐམས་ཅད་ཀྱིས་འབྱོར་བར་བྱེད་དོ། །གང་ཀུན་ཏུ་གནས་པས་ཉེ་བར་བཅོམ་པའི་སྐྱོན་གྱིས་སྦྱིན་པ་པོ་དང་སྦྱིན་བདག་རྣམས་ཁ་མི་དྲག་པར་མི་འགྱུར་བ་ནི་འགའ་ཡང་ཡོད་པ་མ་ཡིན་ནོ། །གནས་པ་མེད་པར་ཀུན་ཏུ་ལྟ་བར་བྱེད་པའི་སྐྱོན་གྱིས་ཡང་མོར་འགྱུར་ཞིང་། དགེ་སྦྱོང་དང་བྲམ་ཟེ་གང་འགའ་ཞིག་ཀུན་ཏུ་གནས་པས་ཉེ་བར་བཅོམ་པར་གྱུར་པ་རྣམས་ལ་ནི། ཇི་སྲིད་དུ་རྣམ་པ་དེ་ལྟ་བུ་དང་སྐྱོན་གཞན་དག་རྣམས་ཀྱང་འབྱུང་བར་འགྱུར་རོ། །དེའི་ཕྱིར་དགེ་སྦྱོང་དང་བྲམ་ཟེ་རྣམས་དང་དེ་དག་དང་མཚུངས་པ་གཞན་རྣམས་ཀྱིས་ཀྱང་གཅིག་བྱ་བར་བྱ་སྟེ། རྟག་ཏུ་ཆགས་པ་མེད་པའི་བློ་དང་། རྟག་ཏུ་གཅིག་པུ་མངོན་པར་དགའ་བ་དང་། ཤིང་དྲུང་པ་དང་། དུར་ཁྲོད་པ་དང་། ཕུག་གི་ནང་དུ་བསམ་གཏན་བྱེད་པ་དང་། རི་ཁྲོད་སྟེན་པ་དང་། གཅིག་ཏུ་རྣམ་པར་རྒྱུ་བས་གནས་སྐབས་ཐམས་ཅད་དུ་ཇི་སྲིད་འཚོ་བའི་བར་དུ་མི་གནས་པས་ཉེ་བར་བཅོམ་པ་ཉིད་ཡོངས་སུ་སྤང་བར་བྱའོ། །གཅིག་པུ་ཞིག་འགའ་ཞིག་དང་ཡང་མངོན་པར་ཆགས་པར་མི་བྱའོ། །ཆགས་པ་རྣམས་ཐམས་ཅད་ཡོངས་སུ་སྤང་བར་བྱའོ། །ཆགས་པ་རྣམས་ཐམས་ཅད་ཡོངས་སུ་སྤངས་པ་ལས་ཐར་པ་ཐོབ་པར་འགྱུར་རོ། །དེ་ནི་མི་གནས་པས་ཉེ་བར་བཅོམ་པ་ཡིན་ནོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། ཀུན་ནས་ཉེར་བཅོམ་དགེ་སློང་ནི། །མི་རྣམས་ཀྱི་ནི་བྲན་བཞིན་མཐོང་། །རྩྭ་བཞིན་དུ་ནི་ཡང་མོར་

71-59b

འགྱུར། །རང་དོན་ལས་ཀྱང་ཉམས་པར་འགྱུར། །གནས་ཀྱིས་ཉེར་བཅོམ་དགེ་སློང་ནི། །ཁྱིམ་པ་མ་ཡིན་ནགས་གནས་མིན། །བསམ་གཏན་བསྒོམ་པར་བྱ་བ་ལ། །ཡིད་ཆེས་ཉིད་ནི་རབ་མི་འཇུག །མི་གནས་ཉེར་བཅོམ་དགེ་སློང་ནི། །རྟག་ཏུ་ཚོལ་སོག་ལ་བརྩོན་ནོ། །ཚོལ་སོག་ལ་ནི་བྲེལ་བའི་ཡིད། །ཚེ་ཡང་ཡོངས་སུ་ཉམས་པར་འགྱུར། །སྐད་ཅིག་ཤིན་ཏུ་མྱུར་འཇུག་པའི། །གསོན་པ་གོ་བ་ཉིད་མ་ཡིན། །བདེ་བ་གཞན་དུ་ལོངས་སྤྱད་པ། །གང་བྱས་པ་ནི་རིག་པའང་མིན། །གནས་ཀྱིས་ཉེ་བར་བཅོམ་དགེ་སློང་། །སྐྱེ་བོ་ལ་ལྟ་ཆེད་ཆེར་བྱེད། །རྟག་ཏུ་སྡིག་པས་འགྲོ་བ་ཡིན། །དེས་ཀྱང་ངན་སོང་གནས་སུ་འགྲོ། །ཡིད་ནི་མངོན་པར་ཞེན་པ་མེད། །ཆགས་པ་མེད་པའི་ལུས་ཅན་རྣམས། །ཆགས་པ་ཀུན་ལས་རྣམ་གྲོལ་བ། །དགེ་སྦྱོང་འབྲས་དང་བཅས་པར་འདོད། །རི་ཡི་ཁྲོད་དང་ཤིང་གི་དྲུང་། །རྟག་ཏུ་བསམ་གཏན་གྱིས་གནས་པ། །དགེ་བ་རབ་ཏུ་དད་པ་དང་། །ཡེ་ཤེས་སྐྱོན་དེ་ཡོངས་སུ་སྤངས། །ཆགས་པ་ཀུན་ལས་ངེས་རྣམ་གྲོལ། །ཡུལ་རྣམས་ཀྱིས་ཀྱང་བསླུས་མིན་པའི། །སྐམ་པོའི་ཤིང་ལ་མེ་བཞིན་དུ། །དགེ་སློང་དེ་ཡིས་ཉོན་མོངས་སྲེག །གཅིག་པུ་དགའ་བས་དགར་གྱུར་པའི། །དགེ་སློང་དབང་པོ་ལྔ་བསྡམས་པ། །ལུས་ཀྱི་མཚན་ཉིད་དེ་ཉིད་ཤེས། །མྱ་ངན་འདས་པ་རྟོགས་པར་འགྱུར། །བརྩོན་འགྲུས་ལྡན་ཞིང་དྲན་དང་ལྡན། །རྟག་པར་སྐྱོན་རྣམས་རྣམ་པར་སྤངས། །འགྱིང་བག་དོན་གྱི་སྐྱེད་ཚལ་བཞིན། །མྱ་ངན་འདས་པ་ལྷག་པར་འགྲོ། །མྱ་ངན་འདས་ལ་རྟག་མངོན་དགའ། །སྲིད་གསུམ་ཆུ་བོས་ཀྱང་འཇིགས་པ། །ཀུན་གནས་ཀྱིས་ནི་མ་བསླུས་པའི། །དག་པའི་བདག་ཉིད་དགེ་སློང་ཡིན། །དེ་ལྟར་མི་གནས་པས་ཉེ་བར་བཅོམ་པའི་སྐྱོན་རྣམས་དང་ལྡན་པས་དགེ་སློང་གང་དག་ཤིན་ཏུ་ཡང་སོ་སོར་རྒྱུག་པར་བྱེད་དོ། །དེའི་ཕྱིར་གཅིག་པུ་ཉིད་སྙིང་པོར་བྱེད་པ་རྣམས་ཀྱིས་མི་གནས་པར་ཉེ་བར་བཅོམ་པ་དགེ་སྦྱོང་རྣམས་ཡོངས་སུ་སྤང་བར་བྱའོ། །ཁྱིམ་པ་རྣམས་ཀྱིས་ཤིན་ཏུ་ཆུང་བར་ཉེ་བར་བཅོམ་པ་རྣམས་དང་། དགེ་སློང་གནས་

71-60a

ཀྱི་ཉེ་བར་བཅོམ་པ་ལས་རེ་ཞིག་ཁྱིམ་པ་ལ་ཡང་སྐྱོན་དེ་དག་རྣམས་སུ་འགྱུར་ན། ཁྱིམ་གྱི་གནས་ནས་ངེས་པར་བྱུང་བའི་དགེ་སློང་ལ་སྐྱོན་རྣམས་ཐམས་ཅད་ཀྱི་སྐལ་བ་ཅན་དུ་འགྱུར་བ་ལ་ལྟ་སྨོས་ཀྱང་ཅི་དགོས། འདི་ལྟ་སྟེ། བརྟན་པས་ནི་དགེ་བའི་ཆོས་རྣམས་ཐམས་ཅད་འཐོབ་པར་འགྱུར་རོ། །དེའི་ཕྱིར་ཀུན་ཏུ་མི་གནས་པས་ཉེ་བར་བཅོམ་པ་རབ་ཏུ་བརྩོན་པས་ཀྱང་སྤང་བར་བྱའོ། །གཞན་ཡང་དགའ་ལྡན་པ་དེ་དག་རྣམས་དང་འཐབ་བྲལ་བའི་ལྷ་དེ་དག་རྣམས་ལ། རྨ་བྱའི་མངའ་བདག་དེས་བཅོམ་ལྡན་འདས་དེ་ཉིད་ཀྱི་མདོ་འཆད་པར་བྱེད་པ་ལ། ཇི་ལྟར་ཆོས་གཞན་ཡང་འདོད་པ་སྡུག་པ་ཡིད་དུ་འོང་བ་མྱ་ངན་ལས་འདས་པ་ཐོབ་པར་འགྱུར་བ་ཡོད་དོ། །དེ་ཡང་གང་ཞེ་ན། འདི་ལྟ་སྟེ། བརྟན་པ་དང་ལྡན་པའི་དགེ་སློང་རྣམས་ནི་རིགས་ཀྱི་དགེ་བའི་ཆོས་ཀྱི་ཁུར་ཁྱེར་བར་འགྱུར་རོ། །འཇིག་རྟེན་པ་རྣམས་ཀྱིས་ཤིན་ཏུ་ཡང་རབ་ཏུ་བསྔགས་པར་འགྱུར་རོ། །བརྟན་པ་ནི་འཇིག་རྟེན་པ་དང་འཇིག་རྟེན་ལས་འདས་པའི་ལམ་རྣམས་ལ་ཡང་རྒྱན་དུ་གྱུར་པ་ཡིན་ནོ། །སྐྱོན་རྣམས་ཐམས་ཅད་ལས་ཀྱང་རྣམ་པར་འགྲོལ་ལོ། །བརྟན་པ་སྐྱོན་ཐམས་ཅད་ལས་ངེས་པར་རྣམ་པར་གྲོལ་བ་ཡང་གང་གི་ཕྱིར་འདི་ནི་ཐོག་མ་མེད་པའི་དུས་ནས་རབ་ཏུ་འཇུག་པའི་སྐྱོན་གྱི་དྲ་བ་རྣམ་པ་དུ་མ་རྣམས་རབ་ཏུ་འཕྲོ་བ་དམ་ཞིང་ཤིན་ཏུ་བརྟན་པོར་སེམས་ཀྱི་རྗེས་སུ་འབྲེལ་བ་དེ་དག་རྣམས་དུས་ཅུང་ཟད་ཙམ་དང་། བརྩོན་འགྲུས་ཆུང་ངུ་དང་ཏིང་ངེ་འཛིན་དང་བརྟན་པ་ཡང་ཅུང་ཟད་ཙམ་གྱིས་གཞོམ་པར་མི་ནུས་ཤིང་། སེམས་ཀྱི་ས་གཞི་ལ་རྣམ་པར་ཞེན་ནས་གནས་པའི་སྐྱོན་གྱི་དྲ་བ་དེ་དག་རྣམས་ནི་དགེ་སློང་གིས་འཁོར་བ་ལས་འགྲོལ་བར་བྱེད་པའི་བརྟན་པ་མ་གཏོགས་པ་གཞན་རྣམས་ཀྱིས་ནི་ཆོད་པ་མ་ཡིན་ནོ། །དེ་དང་ཡང་དག་པར་ལྡན་པའི་རྣལ་འབྱོར་སྤྱོད་པ་རྣམས་ཀྱིས་ནི་རྐྱེན་རྣམས་ལས་ཉེ་བར་སྐྱེས་པའི་ཞེན་པ་མི་དགེ་བ་རྣམས་བློ་གྲོས་བརྟན་པོ་དག་གིས་ཡོངས་སུ་སྤོང་བར་བྱེད་པའི་ཕྱིར་རོ། །དེ་ལ་ཀུན་ཏུ་ཆགས་པར་ཡང་མི་བྱེད་དེ། བདག་ཉིད་ཐམས་ཅད་ཀྱིས་ཀྱང་བརྩོན་འགྲུས་བརྟན་པོར་

71-60b

བྱས་ནས། མི་དགེ་བའི་ཆོས་རྣམས་ཀྱི་འཇིགས་པས་འཇིགས་པའི་ཕྱིར་ཡོངས་སུ་སྤོང་བར་བྱེད་དོ། །འདོད་ཆགས་སྐྱེས་པར་གྱུར་ན་ཡང་དགེ་སློང་དག་བརྟན་པའི་བློས་མི་སྡུག་པ་སྒོམ་པར་བྱེད་དོ། །དེ་དེ་དང་ཡང་དག་པར་ལྡན་ཞིང་དཔུང་གཉེན་དུ་གྱུར་པས་ནི་མུན་པར་གྱུར་པའི་འདོད་ཆགས་ཀྱི་རྐྱེན་གྱིས་སྐྱེ་བར་གྱུར་པའི་མི་དགེ་བའི་སེམས་རྣམས་ཡོངས་སུ་སྤོང་བར་བྱེད་དོ། །དེས་ཀུན་ཏུ་འཁྲིད་པར་མི་འགྱུར་རོ། །དེ་བཞིན་དུ་ཞེ་སྡང་དང་ལྷན་ཅིག་འགྲོགས་པར་གྱུར་པའི་སེམས་སྐྱེས་པར་གྱུར་ན་ཡང་དེས་འཕྲོགས་པར་མི་འགྱུར་ཏེ། བརྟན་པ་དང་ལྡན་པར་གནས་པའི་བྱམས་པའི་གཉེན་པོ་གྲོགས་སུ་གྱུར་པའི་ཕྱིར་རོ། །དེ་བཞིན་དུ་གཏི་མུག་དང་ལྡན་པའི་སེམས་ཀུན་ཏུ་སྐྱེས་པ་རྣམས་ལ་ཡང་རྟེན་ཅིང་འབྲེལ་བར་འགྱུར་བའི་གཉེན་པོས་སྒྲུབ་པར་བྱེད་དོ། །དེ་ནས་དུས་འདིར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ། ཇི་ལྟར། ཀུན་གནས་པས་ཀྱང་གང་ཆགས་པ། །དེ་ནི་སྲེད་པས་རྟག་ཏུ་ཆགས། །སྲེད་པའི་འཆིང་ལས་གྲོལ་མིན་རྣམས། །འཇིག་རྟེན་འདིར་མིན་ཕ་རོལ་མིན། །དེ་ལྟར་རྨ་བྱའི་མངའ་བདག་དེས་དགའ་ལྡན་གྱི་ལྷ་དེ་དག་དང་འཐབ་བྲལ་བ་རྟག་ཏུ་གཅིག་ཏུ་དགའ་བ་རྣམས་ལ་ཀུན་ཏུ་གནས་པའི་སྐྱོན་རྣམ་པ་དུ་མ་སྟོན་པར་བྱེད་དོ། །དེ་ནས་ལྷ་དེ་དག་འཇིག་རྟེན་གཉིས་ལ་ཕན་པའི་ཆོས་དེ་དག་རྣམས་རྣམ་པ་དུ་མར་ཉན་པར་གྱུར་ཀྱང་རྣམ་པ་ཐམས་ཅད་དུ་ངོམས་པ་མེད་པས། སླར་ཡང་རྨ་བྱའི་མངའ་བདག་ལ་བརྗོད་པ། ཇི་ལྟར་ཁྱོད་ཀྱིས་བདག་ཅག་ལ་མཆོག་ཏུ་ངོ་མཚར་བར་གྱུར་པ་མཆོག་ཏུ་ཟབ་པའི་ཆོས་དེ་དག་རྣམས་བསྟན་པ་གང་ཡིན་པ་ནི་ཐོག་མ་དང་བར་དང་ཐ་མར་དགེ་བ་མྱ་ངན་ལས་འདས་པའི་མཐར་ཐུག་པ་རྣམ་པར་རྟོག་པ་དུ་མར་འཁོར་བ་ལ་སྐྱོ་བར་བྱེད་པའི་ལམ་གྱི་མཆོག་དེ་སླར་ཉིད་ཀྱང་བདག་ཅག་རྣམས་ལ་རྗེས་སུ་བརྗོད་པའི་རིམ་པས་ཆོས་བསྟན་དུ་གསོལ། བདག་ཅག་ཐམས་ཅད་ཀྱང་སེམས་རྩེ་གཅིག་པས་མཉན་པར་བགྱིའོ། །རང་དང་གཞན་ལ་ཕན་པ་ལ་རབ་ཏུ་ཞུགས་པའི་ཆོས་ཀྱི་ལམ་དེ་དག་རྣམས་ལྷ་

71-61a

དེ་དག་གི་དྲུང་ནས་ཐོས་པར་གྱུར་ནས། སླར་ཉིད་ཀྱང་རྨ་བྱའི་བདག་པོ་དེས་ལྷ་དེ་དག་རྣམས་ཐམས་ཅད་ཉིད་ཀྱང་སེམས་རྩེ་གཅིག་ཏུ་གྱུར་པས་ཇི་ལྟ་བ་བཞིན་དུ་ཆོས་ཉན་པར་བྱེད་པའི་ལྷ་དེ་དག་རྣམས་ཀྱི་ཡིད་དེ་དག་ཀྱང་ཀུན་ཏུ་རྟོགས་པས། བདག་གིས་ཕྱིར་ཞིང་ཉིད་ཀྱང་ཆེས་རབ་ཏུ་རངས་པར་གྱུར་པའི་ཡིད་དུ་གྱུར་པས་སླར་ཉིད་ཀྱང་དེ་དག་རྣམས་ལ་བསྟན་པར་བྱའོ། །དེ་ནས་ཕྱིར་ཡང་སེམས་རྟོགས་ནས་སླར་ཡང་ཆོས་དེ་ཉིད་རྣམ་པ་དུ་མ་རྣམས་སུ་སྒྲ་དབྱངས་བརྟན་ཞིང་རྒྱ་ཆེ་བ་དང་མཆོག་ཏུ་སྙན་པར་གྱུར་པ་དང་། གཞན་ལ་ཕན་པ་ལ་རབ་ཏུ་ཞུགས་པའི་སྙན་པས་སྟོན་པར་བྱེད་དེ། ཀྱེ་ཧེ་ལྷ་དག་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་དེ་དག་དང་འདྲ་བ་རྣམས་ཀྱིས་ཆོས་ཡིད་ལ་བྱ་ཞིང་། དེ་ལ་རབ་ཏུ་བརྩོན་པས་ཀྱང་འཇིགས་པར་བྱའོ། །འདི་ཡང་གང་ཞེ་ན། འདི་ལྟ་སྟེ། གྲགས་པ་མ་ཡིན་པས་འཇིགས་པ་ཉིད་དོ། །གྲགས་པ་མ་ཡིན་པས་འཇིགས་པའི་དགེ་སློང་ནི་གཅིག་ཏུ་ངེས་པའི་བློར་འགྱུར་རོ། །དེ་སྐྱོན་འདི་དག་རྣམས་གྲགས་པ་མ་ཡིན་པ་ལ་འཇིགས་པས་སྤོང་བར་བྱེད་དེ། ཇི་ལྟར་རྩབ་ཧྲལ་ཅན་གྱི་བུད་མེད་ཀྱི་སྐྱོན་གྱི་དྲི་མ་ཕལ་ཆེ་བར་གྱུར་པའི་ཁྱིམ་དུ་འཇུག་པར་མི་བྱེད་ཅིང་འདྲེ་བར་ཡང་མི་བྱེད་དོ། །ཆང་འཚོང་དང་ལྷན་ཅིག་ཀུན་བརྗོད་པར་མི་བྱེད་ཅིང་མི་སྲུན་པ་རྣམས་དང་མ་ཡིན་ནོ། །རྐུན་མ་དང་ཡང་མ་ཡིན་ལ་སྡིག་པ་བྱེད་པ་རྣམས་དང་མ་ཡིན་ནོ། །རྒོད་བག་ཅན་དང་མ་ཡིན་ཞིང་ཀུན་ཏུ་འགྱེད་པ་རྣམས་དང་ཡང་མ་ཡིན་ནོ། །རྟགས་གཞན་པ་རྣམས་དང་རྟགས་གཞན་པ་ལ་སོ་སོར་འབྲང་བ་རྣམས་དང་མ་ཡིན་ནོ། །ཆོ་ལོ་བ་རྣམས་དང་མ་ཡིན་ཞིང་རྟོག་མི་རྣམས་དང་ཡང་མ་ཡིན་ནོ། །བྱིས་པ་དང་མ་ཡིན་ཞིང་བུད་མེད་ཀྱིས་འཚོ་བ་རྣམས་དང་ཡང་མ་ཡིན་ནོ། །རྐོ་ཏྲོག་ཅན་རྣམས་དང་མ་ཡིན་ཞིང་ཁ་མི་འཚམ་པ་རྣམས་དང་མ་ཡིན་ནོ། །ཤིན་ཏུ་བརྐམ་ཆགས་ཅན་རྣམས་དང་མ་ཡིན་ཞིང་འཇལ་བ་ལ་སྒྱུ་བྱེད་པས་སླུ་བ་རྣམས་དང་ཡང་མ་ཡིན་ནོ། །འཇིག་རྟེན་པ་རྣམས་དང་འགལ་བར་གྱུར་པའི་ཚོང་པ་དང་མ་ཡིན་ཞིང་ཆུ་ཀླུང་

71-61b

གི་ངོས་ལ་བཅོམ་ནས་སྒྲོལ་བ་རྣམས་དང་མ་ཡིན་ནོ། །མ་ནིང་རྣམས་དང་མ་ཡིན་ཞིང་ལམ་དུའང་བུད་མེད་དང་གོམ་པ་གཅིག་ཀྱང་ལྷན་ཅིག་ཏུ་འགྲོ་བར་བྱེད་པ་མ་ཡིན་ནོ། །གླང་པོ་ཆེ་འདུལ་བ་རྣམས་དང་མ་ཡིན་ནོ། །མི་འདུལ་བ་རྣམས་དང་མ་ཡིན་ནོ། །རྟ་འདུལ་བ་རྣམས་དང་མ་ཡིན་ནོ། །མེད་པར་སྨྲ་བ་རྣམས་དང་མ་ཡིན་ནོ། །དཀོན་མཆོག་གསུམ་ལ་ཁ་ཕྱིར་ཕྱོགས་པ་རྣམས་དང་མ་ཡིན་ནོ། །ཐེག་པ་ཆེན་པོ་ལ་ཞེ་སྡང་བར་གྱུར་པ་རྣམས་དང་མ་ཡིན་ནོ། །སྡོམ་པ་མ་ཡིན་པ་ལ་གནས་པ་རྣམས་དང་མ་ཡིན་ནོ། །རིགས་ངན་པ་རྣམས་དང་མ་ཡིན་ཏེ། རྣམ་པ་དེ་ལྟ་བུའི་སྡིག་པའི་ལས་ཅན་རྣམས་དང་ལྷན་ཅིག་ཏུ་དགེ་སློང་གནས་པར་མི་བྱེད་དོ། །དེ་ཅིའི་ཕྱིར་ཞེ་ན། ལྷན་ཅིག་ཏུ་གནས་པའི་བྱེད་པ་གང་གི་ཕྱིར་དགེ་སློང་ཆུད་ཟ་བར་འགྱུར་ལ། དེ་བཞིན་དུ་འཇིག་རྟེན་པས་ཀྱང་གོ་བར་འགྱུར་རོ། །ཇི་ལྟར་འདིའི་དྲི་མ་ཅན་གྱི་ལས་ཡིན་པ་དེ་ཁོ་ན་ལྟར་དགེ་སློང་ལ་ཡང་རྟོག་པར་བྱེད་དོ། །གང་ཡང་ཡིད་ཅན་རྣམས་ཐམས་ཅད་རྣམ་པ་ཅི་ལྟ་བུ་དང་ལྷན་ཅིག་ཏུ་འདྲེ་བར་བྱེད་པ་ན། དེ་དག་རྣམ་པ་དེ་ཁོ་ན་བཞིན་དུ་སྐྱེ་བོ་རྣམས་ཀྱིས་ཡང་རྟོགས་པར་འགྱུར་རོ། །དེའི་ཕྱིར་གྲགས་པ་མ་ཡིན་པས་འཇིགས་པ་རྣམས་ཀྱིས་དྲི་མ་ཅན་གྱི་ལས་ཅན་རྣམས་དང་ལྷན་ཅིག་ཏུ་གོམ་པ་གཅིག་ཀྱང་འགྲོགས་པར་མི་བྱའོ། །དེ་ནས་དེའི་དུས་འདིར་རྨ་བྱའི་མངའ་བདག་དེས་བཅོམ་ལྡན་འདས་ཀྱིས་གསུངས་པའི་ཚིགས་སུ་བཅད་པ་བརྗོད་པར་བྱེད་པ། ཇི་ལྟར། མ་རྣགས་རྣག་དང་འདྲེ་བྱེད་པ། །རྣག་ཉིད་ཉེ་བར་སྐྱེ་བར་འགྱུར། །དེ་ཕྱིར་རྣག་དང་འདྲེ་མ་བྱེད། །རྣག་མེད་བྱ་བར་འོས་པ་ཡིན། །སྐྱེས་བུ་ཅི་འདྲ་བ་དག་ལ། །མཚུངས་པར་རྟེན་གྲོགས་རྟག་བྱས་ནས། །དགེ་དང་གལ་ཏེ་མི་དགེ་ཡང་། །དེ་དང་འདྲེ་ལས་དེ་འདྲར་མཐོང་། །སྐྱེས་བུ་བདེ་དོན་གཉེར་ཀུན་གྱིས། །དགེ་བ་ཁོ་ན་རྗེས་སུ་བསྟན། །དེས་འདིར་བདེ་བ་འཐོབ་འགྱུར་གྱི། །དགེ་བས་སྡུག་བསྔལ་བྱེད་པ་མིན། །ཀུན་འདྲེས་ཡོན་ཏན་སྐྱེ་བར་མཐོང་། །འདྲེ་ལས་སྐྱོན་སྐྱེ་དེ་བཞིན་ཏེ། །ཡོན་ཏན་སྐྱོན་གྱི་མདོར་བསྡུས་པའི། །མཚན་ཉིད་

71-62a

འདིར་ནི་བརྗོད་པ་ཡིན། །རྟག་ཏུ་བཟང་པོ་དང་འགྲོགས་པའི། །དགེ་སློང་སྙན་གྲགས་དང་ལེགས་ལྡན། །ངན་པ་དང་ནི་འགྲོགས་པ་ནི། །སྐྱེས་བུ་ངན་པར་མྱུར་དུ་འགྲོ། །གང་དག་ངན་པ་རྣམ་སྤོང་བའི། །དེ་དག་སྙིང་པོ་རྟག་ཏུ་གྱིས། །ལེགས་རྟག་ལྷན་ཅིག་གནས་པ་དང་། །མ་རུངས་པ་ཡང་སྤང་བར་གྱིས། །དེ་ལྟར་རྨ་བྱའི་བདག་པོ་འདིས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གྲགས་པ་མ་ཡིན་པས་འཇིགས་པར་གྱུར་པའི་དགེ་སློང་རྣམས་ཀྱང་ཡོན་ཏན་བདུན་དང་ཡང་དག་པར་ལྡན་པར་འགྱུར་བ་ལ། འདི་ལྟ་སྟེ། སྡིག་པ་ཅན་གྱི་སྐྱེ་བོ་རྣམས་ལ་མི་སྟེན་ནོ། །རྙེད་པ་དང་བཀུར་སྟི་རྣམས་ལ་མངོན་པར་དགའ་བར་མི་འགྱུར་རོ། །ཆོག་ཤེས་པ་དང་ལྡན་པ་རྣམས་ལ་སྦྱིན་པ་པོ་དང་སྦྱིན་བདག་རྣམས་རབ་ཏུ་དང་བར་འགྱུར་རོ། །རིའི་ཁྲོད་རྣམས་སུ་སྟེན་པར་འགྱུར་རོ། །དེ་དག་ནི་དགེ་ལེགས་ཀྱི་སྐལ་བ་ཅན་དུ་འགྱུར་རོ། །མང་དུ་ཀུན་བརྗོད་པར་མི་འགྱུར་རོ། །གྲོང་དུ་རྒྱུ་བར་མི་འགྱུར་ཞིང་། འཐུང་བ་དག་གི་ཁང་པར་ཡང་མི་འཇུག་གོ། །ཉོ་བ་དང་འཚོང་བར་ཡང་མི་བྱེད་དོ། །དེ་དེ་ལྟ་བུའི་ཡོན་ཏན་རྣམས་དང་ཡང་དག་པར་ལྡན་པ་ལེགས་པར་རྒྱུ་བའི་དགེ་སློང་ནི་ཆུད་འཛའ་བར་མི་འགྱུར་རོ། །སྐྱེ་བོའི་ཚོགས་མང་པོ་རྣམས་ཀྱང་གུས་པ་དང་བཅས་པར་འགྱུར་རོ། །དེའི་ཕྱིར་བག་མེད་པའི་རྒྱུའི་རྩེ་མོ་ནི་འདི་ཡིན་ཏེ། འདི་ལྟར་དགེ་སློང་གྲགས་པ་མ་ཡིན་པ་རྣམས་ཀྱིས་འཇིགས་པ་མེད་པའོ། །གང་ཡང་དགེ་སློང་གྲགས་པ་མ་ཡིན་ནས་འཇིགས་པ་མེད་པ་དེ་ཁྱིམ་པ་རྣམས་ཀྱི་དྲུང་ན་ཡང་ཤིན་ཏུ་ལྷག་པ་ཡིན་ཏེ། སྐྱོན་རྣམས་ལས་དེ་ཅི་དགའ་བར་སྤྱོད་པར་བྱེད་པ་དང་། ཅི་རུང་བར་སྨྲ་བ་དང་ངོ་ཚ་མེད་པ་དང་ཁྲེལ་མེད་པ་དང་། ཚུལ་ཁྲིམས་འཆལ་པ་མང་དུ་བྱེད་པར་འགྱུར་རོ། །དེ་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གྲགས་པ་མ་ཡིན་པས་འཇིགས་པ་ནི་གཅིག་པུ་རྒྱུ་བར་འགྱུར་བ་དང་ཁྱིམ་རྣམས་སུ་སྟེན་པར་མི་བྱེད་དོ། །དེ་དག་ནི་རྟག་ཏུ་ཡང་རི་དང་དགོན་པར་གནས་པར་འགྱུར་ཞིང་ཆོག་ཤེས་པར་

71-62b

ཡང་འགྱུར་རོ། །འདོད་པ་དང་བརྣབ་སེམས་ལ་སྟེན་པར་མི་བྱེད་དོ། །ཡུལ་ལྗོངས་ཀྱི་སྐྱོན་རྣམས་ཐམས་ཅད་སྤོང་བར་བྱེད་དོ། །ཁ་ན་མ་ཐོ་བ་ཅུང་ཟད་ཙམ་ལ་ཡང་འཇིགས་པར་ལྟ་བར་འགྱུར་རོ། །དེ་ལྟར་འཇིག་རྟེན་ན་གྲགས་པ་མ་ཡིན་པ་རྣམས་ཀྱིས་འཇིགས་པར་གྱུར་པ་གང་ཡིན་པ་དེ་ནི་དགེ་སློང་ཡིན་ནོ། །དེ་ནི་དགེ་བའི་སྐལ་བ་ཅན་ཡིན་ནོ། །གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སློང་རྣམས་ལ་གཅེས་པར་གྱུར་པའི་ཆོས་ཡོད་དོ། །འདི་ཡང་གང་ཞེ་ན། འདི་ལྟ་སྟེ། མངོན་པར་ཞེན་པ་མེད་པའོ། །མངོན་པར་ཞེན་པ་མེད་པ་ཞེས་བྱ་བའི་ཆོས་ནི་མཆོག་ཏུ་དགའ་བར་གྱུར་པ་ཡིན་ནོ། །འདི་ནི་དགེ་སློང་དག་མངོན་པར་ཞེན་པ་མེད་པ་ནི་དག་པ་དང་འབའ་ཞིག་པ་དང་ཀུན་ཏུ་ཆགས་པ་མེད་པའི་བློ་དང་ལྡན་པ་དང་། གཅིག་ཏུ་ངེས་པར་རྒྱུ་བ་དང་བློ་ལེགས་པར་གནས་པར་གྱུར་པ་དང་། འཚོ་བ་དག་པ་རྣམས་མཆོག་ཏུ་མྱ་ངན་དང་བྲལ་བར་འགྱུར་བ་ཡིན་ནོ། །མཆོག་ཏུ་རྣལ་དུ་ཕེབས་པའི་ཡིད་འཛིན་པ་ཡིན་ནོ། །དེ་སྡུག་བསྔལ་བས་ཞུམ་པར་མི་འགྱུར་རོ། །ཁྲོ་བ་དང་འཁྲུག་པ་འབྱུང་བར་མི་འགྱུར་རོ། །དགའ་བ་ཡ་ཡ་བོའི་གནས་རྣམས་ལ་དགའ་བར་ཡང་མི་འགྱུར་རོ། །འཇིགས་པའི་གནས་རྣམས་ལ་ཡང་རྣམ་པར་མི་འཇིགས་སོ། །གཉེན་བཤེས་རྣམས་ལ་སྙིང་ཉེ་བར་ཆགས་པར་གྱུར་ནས་རང་གི་དོན་རྣམས་ལས་ཡོངས་སུ་ཉམས་པ་མ་ཡིན་ནོ། །གྲོང་ཁྱེར་པ་རྣམས་ཀྱིས་བགད་པ་དང་འགྱིང་བག་བྱས་པ་དང་རྩེས་པ་དང་ཡོངས་སུ་སྤྱད་པ་རྣམས་ལ་ཡང་མངོན་པར་ཞེན་པར་མི་བྱེད་དོ། །ཉེ་བར་འགྲོ་བའི་རང་བཞིན་ཅན་མ་ཡིན་ནོ། །གྲོང་ནས་གྲོང་དང་གྲོང་ཁྱེར་ནས་གྲོང་ཁྱེར་དང་། ཚོང་འདུས་ནས་ཚོང་འདུས་རྣམས་དང་། ཁྱིམ་ནས་ཁྱིམ་ཀུན་ཏུ་ཆགས་པ་མེད་པའི་བློས་གཅིག་ཏུ་བདེ་བར་ཉལ་བ་དང་རབ་ཏུ་སད་པར་ཡང་འགྱུར་རོ། །དེའི་བློས་མངོན་པར་ཆགས་པ་མེད་པ་དང་རྣམ་པར་དག་པ་ཡིན་ནོ། །ཀུན་ཏུ་སྤྱོད་པ་རྣམ་པར་དག་པ་དེ་ནི་བདུད་དམ་སྒྲ་དང་རེག་བྱ་དང་། རོ་དང་གཟུགས་དང་དྲི་དང་དེ་དག་གིས་ཀྱང་ཕྲོགས་པར་མི་འགྱུར་རོ། །རྙེད་པ་དང་བཀུར་

71-63a

སྟི་རྣམས་ལ་མངོན་པར་དགའ་བར་མི་འགྱུར་རོ། །དེས་ཐོབ་པ་རྣམས་སམ་གཞན་ཡང་ཇི་ལྟར་སྐྱེས་པའི་ཡིད་ཀྱི་རྣམ་པར་རྟོག་པ་རྣམས་འཇོམས་པར་བྱེད་དོ། །ཡོངས་སུ་སྤོང་བར་བྱེད་དོ། །མི་དགེ་བའི་རྣམ་པར་རྟོག་པ་དེ་དག་མི་སྐྱེ་བར་བྱ་བའི་དོན་དུ་རབ་ཏུ་འབད་པར་བྱེད་ཅིང་བརྩོན་འགྲུས་རྩོམ་པར་བྱེད་དོ། །ཇི་ལྟར་ལམ་འདི་དག་བསྐྱེད་པས་ནི་མི་དགེ་བ་ཡིད་ལ་བྱེད་པའི་རྣམ་པར་རྟོག་པ་དེ་རྣམས་ཇི་ལྟར་ཕྱི་ནས་ཡང་བདག་གི་སེམས་རྣམ་པར་དཀྲུག་པའི་ངོ་བོར་མི་བྱེད་པ་དེ་ལྟར་བདག་གིས་གཞོམ་པར་བྱའོ་ཞེས་དེ་རེ་ཞིག་རྣམ་པར་རྟོག་པའི་རྐྱེན་གྱིས་སྐྱེས་པའི་མི་དགེ་བ་གཅིག་པོ་དེ་ཉིད་མི་སྐྱེད་པར་བྱ་བའི་དོན་དུ་འབད་རྩོལ་བརྩོན་འགྲུས་རྩོམ་པར་བྱེད་པ་ཡིན་ན། མངོན་པར་ཞེན་པའི་ཆོས་རགས་པར་གྱུར་པ་འཇིག་རྟེན་པ་རྣམས་མི་བྱེད་པ་ལ་ལྟ་ཅི་སྨོས། གང་དག་རྣལ་འབྱོར་སྤྱོད་པར་གྱུར་པ་རྣམས་ཀྱིས་ཆོས་གསུམ་པོ་འདི་དག་ནི་བྱ་བ་ཡིན་ནོ། །གསུམ་གང་ཞེ་ན་འདི་ལྟ་སྟེ། སེམས་ཀྱི་རྒྱུན་རབ་ཏུ་སུན་འབྱིན་པར་བྱེད་པ་སྐྱེས་པར་གྱུར་པའི་མི་དགེ་བའི་ཆོས་རྣམས་རྣམ་པ་ཐམས་ཅད་དུ་མི་སྐྱེ་བར་བྱ་བའི་དོན་དུ་དང་། མ་སྐྱེས་པ་རྣམས་མི་བསྐྱེད་པར་བྱ་བའི་དོན་དུ་དང་། དེ་བཞིན་དུ་འདས་པའི་ཆོས་མི་དགེ་བ་རྣམས་དྲན་པར་བྱས་ལ་རབ་ཏུ་བརྩོན་པར་བྱ་སྟེ། དགེ་སློང་ཡིད་ཤིན་ཏུ་མཉམ་པར་བཞག་པ་དང་སྤྱོད་པ་རྣམ་པར་དག་པ་རྣམས་དང་རྣམ་པ་ཐམས་ཅད་དུ་བློ་མངོན་པར་ཞེན་པ་མེད་པ་རྣམས་དང་། རྣམ་པར་དག་པར་སྤྱོད་པར་བྱེད་པ་རྣམས་དང་། གཅིག་ཏུ་སྲེད་པ་ཟད་པར་འདོད་པ་རྣམས་དང་། འདོད་ཆགས་དང་བྲལ་བར་འདོད་པ་རྣམས་དང་། བདེ་བ་འདོད་པ་རྣམས་ཀྱིས་ཀྱང་མངོན་པར་ཞེན་པ་མེད་པའི་བློ་བསྐྱེད་པར་བྱའོ། །ཡང་དགེ་སློང་གང་དག་བློ་མངོན་པར་ཆགས་པ་མེད་པར་གྱུར་པ་རྣམས་ནི། མཆོག་ཏུ་བདེ་བ་དང་ལྡན་པ་ཆེས་བདེ་བའི་གོ་འཕང་འཐོབ་པ་ཡིན་ནོ། །དེ་ནས་དུས་འདིར་རྨ་བྱའི་མངའ་བདག་དེས་འཁོར་བ་འཇིག་གིས་གསུངས་པའི་ཚིགས་སུ་བཅད་པ་བརྗོད་པ། ཇི་ལྟར། རྟག་པར་ཀུན་ཏུ་ཆགས་མེད་བློ། །བསམ་གཏན་གྱིས་ནི་རྟག་ཏུ་གནས། །ཡིད་ནི་རྟག་

71-63b

ཏུ་རྣམ་པར་དག །རྩེ་གཅིག་ཡིད་ལ་མངོན་པར་དགའ། །སེམས་གང་ཤིན་ཏུ་རྩེ་གཅིག་པ། །དེ་ནི་སྐྱོན་གྱིས་འཆིང་བ་མེད། །སྐྱོན་བཅས་འཇིགས་ལས་ངེས་གྲོལ་བ། །འདི་ལ་རང་བཞིན་གནས་ཞེས་བརྗོད། །རྩེ་གཅིག་ལ་ནི་མངོན་དགའི་སེམས། །རྣམ་རྟོག་ཉིད་ཀྱིས་སྒྲུབ་པ་མིན། །རྣམ་པར་རྟོག་ལས་རྣམ་གྲོལ་དེ། །མཛེས་པར་རང་བཞིན་གནས་པར་འགྱུར། །གང་གི་སེམས་ནི་རྟག་ཏུ་ཞི། །རྒྱུན་དུ་མྱ་ངན་འདས་མངོན་དགའ། །དེ་ནི་མི་དགེའི་རྒྱུ་རྣམས་ཀྱི། །དབང་སྐྱེས་སྐྱོན་ནི་འགྱུར་མ་ཡིན། །གང་ཡང་བསམ་གཏན་གྱིས་བྱས་བདེ། །གང་ཡང་ཏིང་འཛིན་ལས་སྐྱེས་བདེ། །དེ་ཀུན་རྩེ་གཅིག་བློ་ཡི་ནི། །རྟག་ཏུ་ལུས་ཅན་རྣམས་ལ་འགྱུར། །རྩེ་གཅིག་དགའ་བའི་སྡོམ་བརྩོན་གྱི། །བདེ་གང་སྙིང་ལ་སྐྱེ་བ་ནི། །དེ་འདིར་བདེ་བར་རྣམ་ཤེས་ཀྱིས། །འཇིག་རྟེན་པ་ཡི་བདེན་མིན་འདོད། །རྩེ་གཅིག་སེམས་ལ་མངོན་པར་དགའ། །རྣམ་པར་དག་པ་བྱས་ཉིད་དེ། །སྐྱོན་དྲི་ལས་ནི་རྣམ་གྲོལ་བའི། །དེས་ནི་ཞི་བ་རྟོགས་པར་འགྱུར། །རྟག་ཏུ་ཡིད་ནི་གཅིག་ཏུ་ངེས། །དབང་པོ་ལྔ་རྣམས་ཀུན་ཏུ་བསྡུས། །སྲེད་པའི་མེས་སྲེག་མི་བཟད་པ། །བློ་ཡི་ཡེ་ཤེས་ཆུ་ཡིས་འཇོམས། །སྲེད་པ་དང་ནི་ལྡན་མིན་ཏེ། །རྣམ་པར་དག་པའི་བདེ་འདོད་པ། །ཟད་མེད་འགྲིབ་པ་མེད་ཉིད་ཀྱི། །གོ་འཕང་མདུན་ན་གནས་དང་འདྲ། །རྣམ་པར་རྟོག་པ་གྱ་གྱུའི་སེམས། །གང་དང་གང་ལ་སྐྱེ་འགྱུར་བ། །གཅིག་ལ་དམིགས་པ་དང་ལྡན་པའི། །ཏིང་འཛིན་དེ་ཡིས་འཛིན་པར་བྱེད། །དེ་ཕྱིར་ཆོས་དེ་དག་གི་མཆོག །མྱ་ངན་འདས་གྲོང་འགྲོ་བ་ཡི། །གང་ནི་རྩེ་གཅིག་ཡིད་བྱས་ལ། །བདུད་ཀྱི་སྒྲུབ་བྱེད་གཞོམ་པར་གྱིས། །རབ་བརྟན་ཡེ་ཤེས་འོད་ཟེར་གྱིས། །ཡིད་ཀྱི་རྟ་ནི་བཏུལ་བཟུང་ནས། །མྱ་ངན་ཉོན་མོངས་བཅོམ་པ་ཡི། །མཆོག་གི་གནས་སུ་འགྲོར་འགྱུར་ཏེ། །སྙིང་པོ་དེ་ནི་བརྟན་རྣམས་ཀྱིས། །རྣལ་འབྱོར་མཆོག་ཏུ་འགྲོ་རྣམས་ཀྱིས། །རྩེ་གཅིག་ཡིད་ནི་གང་བྱས་པས། །གོ་འཕང་འཕོ་བ་མེད་པར་འགྲོ། །དེ་ལྟར་རྨ་བྱའི་བདག་པོ་དེས་རྣམ་པ་དུ་མར་ཆོས་སྟོན་

71-64a

པར་བྱེད་པ་ནི་ལྷ་དེ་དག་རྣམས་ལ་བདེ་བའི་དོན་དུ་དང་ཕན་པར་བྱ་བའི་དོན་དུ་ཡིན་ནོ། །དེ་ནས་རྨ་བྱ་རྣམས་ཀྱི་མངའ་བདག་དེས་འཐབ་བྲལ་བ་དེ་དང་དགའ་ལྡན་པ་དེ་དག་རྣམས་ལ་སླར་ཡང་ཆོས་དེ་ཉིད་སྟོན་པར་བྱེད་དེ། མ་སྐྱེས་པ་ན་དགའ་བར་བྱེད་པ་དགེ་བ་དང་མྱ་ངན་ལས་འདས་པར་འགྲོ་བའོ། །ཡང་ཆོས་གཞན་ཡང་སྟོན་པར་བྱེད་དེ། ཀྱེ་ཧེ་ལྷ་དག་ཇི་ལྟར་ཆོས་གཞན་དག་ཉོན་དང་ཇི་ལྟར་དགེ་བའི་ཆོས་རྣམས་ཐམས་ཅད་ཀྱི་ཉིང་ཁུ་ནི་འདི་ཡིན་ཏེ། འདི་ལྟར་གཅིག་པུ་དགའ་བའོ། །དགེ་སློང་གཅིག་པུ་ལ་དགའ་བ་ཡང་ཤིན་ཏུ་ཀུན་ནས་བསྡམས་པར་རྒྱུ་བ་དང་། ཤིན་ཏུ་ཀུན་ནས་བསྡམས་པར་སྤྱོད་པ་དང་། ལེགས་པར་བསྡམས་པས་རྣམ་པར་གནས་པ་དང་མཆོག་ཏུ་ཞི་བ་དང་མཆོག་ཏུ་གཙང་བར་འགྱུར་རོ། །འདི་ལྟ་སྟེ། གཅིག་པུ་དགའ་བས་མངོན་པར་དགའ་བའི་དགེ་སློང་རྣམས་ནི། གཅིག་ཏུ་ཀུན་ནས་བསྡམས་པར་ལེགས་པར་སྤྱོད་པ་དང་། ཞི་བ་དུལ་བ་ཤིན་ཏུ་བརྟན་པས་གཅིག་པུ་དགའ་བས་དགའ་བ་རྣམས་ནི་ཐམས་ཅད་དུ་དགའ་བར་འགྱུར་ཏེ། ཞི་བའི་གནས་སུ་གྱུར་པའི་རི་ཁྲོད་དག་དང་རིའི་ཕུག་དང་དུར་ཁྲོད་དང་སོག་མའི་ཕུང་པོ་རྣམས་དང་ཐམས་ཅད་ལ་ཡང་མཚུངས་པར་བློ་ཀུན་ནས་བསྡམས་པར་འགྱུར་རོ། །གཅིག་པུ་རྣམ་པར་རྒྱུ་བ་གཅིག་པུ་དགའ་བའི་དགེ་སློང་ལ་ཡང་ཆོས་བདུན་གཅེས་པར་བྱེད་པར་འགྱུར་བ་ཡིན་ཏེ། གང་ཞེ་ན། འདི་ལྟ་སྟེ། རྟག་ཏུ་ཡིད་རབ་ཏུ་བདེ་བར་འགྱུར་རོ། །རྟག་ཏུ་ཡང་སེམས་རབ་ཏུ་དང་བར་འགྱུར་རོ། །འཇིག་རྟེན་པ་རྣམས་ཀྱིས་ཀྱང་འདི་མཉན་པར་བྱེད་ཅིང་། ལྷ་དག་གིས་ཀྱང་འདི་མངོན་པར་སྲུང་བར་བྱེད་དོ། །དྲི་མ་རྣམས་དང་ཡང་ཡོངས་སུ་བྲལ་བར་འགྱུར་རོ། །དགེ་བའི་ཆོས་རྣམས་ཀྱང་མངོན་པར་འཕེལ་ལོ། །དེའི་སེམས་ཤིན་ཏུ་མཉམ་པར་བཞག་པའི་མཆོག་ཏུ་འགྱུར་ཞིང་། རབ་ཏུ་དང་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་རྣམས་ཀྱིས་ཐར་པའི་ལམ་མངོན་སུམ་དུ་བྱེད་པར་འགྱུར་རོ། །དྲི་མ་རྣམས་ཀྱང་འདིས་རིང་དུ་བྱེད་པར་འགྱུར་རོ། །ཐ་མར་ཡང་འདིའི་དཀར་པོའི་ཆོས་རྣམས་ཀྱི་ཐ་སྙད་ཀྱིས་འཇིག་རྟེན་པ་རྣམས་དང་ལྷན་ཅིག་ཏུ་

71-64b

མངོན་པར་དགའ་བར་འགྱུར་རོ། །རྣམ་པ་དུ་མ་རྣམས་སུ་ཐོག་མ་མེད་པའི་དུས་ནས་མང་དུ་རབ་ཏུ་འཇུག་པའི་ཉོན་མོངས་པའི་དགྲ་རྣམས་ཀུན་ནས་འཇོམས་པར་བྱེད་དོ། །དེའི་ཕྱིར་གཅིག་པུ་མངོན་པར་དགའ་བའི་དགེ་སློང་ནི་ཤིན་ཏུ་ལེགས་པར་བསྡམས་པས་རྒྱུ་བ་དང་། ཉོན་མོངས་པ་རྣམས་ཀྱིས་འཇིགས་པས་ཁ་ན་མ་ཐོ་བ་ཕྲ་རབ་ཙམ་རྣམས་ལ་ཡང་འཇིགས་པར་ལྟ་བ་དང་། རྟག་ཏུ་བརྩོན་པ་དང་ལྡན་པ་དང་། ངེས་པར་གྲོལ་བ་དང་ཀུན་ཏུ་སྤྱོད་པ་རྣམས་ཤིན་ཏུ་དྲི་མ་མེད་པ་དང་རབ་ཏུ་ཞི་བ་ལ་དགའ་བར་འགྱུར་རོ། །དེ་ནས་དུས་དེའི་ཚེ་རྨ་བྱའི་མངའ་བདག་དེས་ལྷ་རྣམས་ལ་ཕན་པར་བྱ་བའི་དོན་དུ་ཚིགས་སུ་བཅད་པ་བརྗོད་པ། ཇི་ལྟར། མི་བཟད་པ་དང་གཡོ་དང་དྲག །བཟོད་པར་དཀའ་དང་སྟོབས་པོ་ཆེ། །བརྟན་གང་སེམས་ལས་ངེས་རྒྱལ་བ། །འཇིག་རྟེན་པ་དེ་བདེ་ལྡན་འདོད། །གང་གིས་འཇིག་རྟེན་འདི་སྲེག་པའི། །སྐྱོན་ནི་རྣམ་པ་གསུམ་པོ་སྤོངས། །མེ་དེ་རྣམས་ནི་ཡེ་ཤེས་ཆུས། །ཞི་བར་བྱས་པས་བདེ་བར་འགྱུར། །གང་དག་ཆོས་ནི་མི་འདོད་པའི། །མི་དེ་རྣམས་ནི་མི་མ་ཡིན། །གྲོང་ཁྱེར་མྱ་ངན་འདས་འགྲོ་བའི། །དེ་ཉིད་ལམ་ལ་གནས་པ་མིན། །ཆེན་པོར་གྱུར་པའི་བདེ་ལེགས་གནས། །མི་ཡིས་གང་ཕྱིར་ཐོབ་པར་འགྱུར། །ཐེག་ཆེན་རྐྱལ་པ་ལ་ཞོན་པས། །སྲིད་པའི་མཚོ་ལས་སྒྲོལ་བར་འགྱུར། །གློག་དང་ཟོ་ཆུན་རྒྱུན་མོ་འདྲ། །དྲི་ཟའི་གྲོང་ཁྱེར་དང་མཚུངས་པར། །ཤིན་ཏུ་སྡུག་པ་རྟག་མྱུར་བ། །ལུས་ཅན་ཀུན་གྱི་གསོན་པ་ཡིན། །ལུས་ཞེས་བྱ་བའི་མྱུ་གུ་ནི། །རྟག་ཏུ་སྐད་ཅིག་འཇིག་པ་ཡིན། །ཤིན་ཏུ་གཡོ་ཞིང་སྙིང་པོ་མེད། །རྒ་ཤི་འཇིགས་པ་ཆེན་པོ་ཡིས། །ནད་ཀྱིས་གྲོང་ཁྱེར་འདི་དག་རྣམས། །མྱ་ངན་ཁོར་ཡུག་ཆེན་པོ་སྟེ། །དགེ་མི་དགེ་ཡི་ཞིང་ལ་ཡང་། །ལུས་སུ་མངོན་པར་བརྗོད་པ་ཡིན། །སྦྱིན་དང་ཚུལ་ཁྲིམས་ཡིད་ཀྱིས་གང་། །རྟག་ཏུ་ལུས་ནི་རྣམ་བརྒྱན་པ། །སེམས་ཅན་དེ་ནི་སྙིང་པོ་གཅིག །ལུས་ནི་འབྲས་བུ་དང་བཅས་འདོད། །གང་ལ་སྙིང་པོ་བདུན་ཡོད་པ། །སངས་རྒྱས་ཡིན་པར་དེ་ཡོངས་བསྒྲགས། །བརྩོན་འགྲུས་སྦྱིན་པ་དེ་བཞིན་ཁྲིམས། །ཡེ་ཤེས་བྱམས་པ་

71-65a

བཟོད་དང་དུལ། །གང་ཡང་གྲངས་མེད་འགྱུར་བ་ཡི། །ཐེག་ཆེན་དང་ཡང་ཡང་དག་ལྡན། །ཕ་རོལ་ཕྱིན་དྲུག་ལས་རྒལ་བའི། །དེ་ནི་སངས་རྒྱས་ཡིན་པར་བསྒྲགས། །འདོད་པ་ཡོངས་སུ་སྤོང་བ་གང་། །དེ་དག་ས་གསུམ་སྙིང་པོ་ཡིན། །འདོད་པ་ཐམས་ཅད་ཡོངས་བཏང་བས། །རྟག་ཏུ་བདེ་ཞེས་འདིར་བརྗོད་དོ། །འདོད་པ་རྣམས་ལ་ཆགས་ཡོད་གང་། །དེ་ཡི་སྡུག་བསྔལ་འདི་མདུན་གནས། །དེ་དག་ཉེས་དམིགས་ཤེས་བྱས་ལ། །དེ་ཕྱིར་དེ་དག་ཡོངས་སུ་སྤོངས། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་པ་དེ་དག་རྣམས་དང་འཐབ་བྲལ་གྱི་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །གཞན་ཡང་རྨ་བྱའི་མངའ་བདག་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དེ། ཇི་ལྟར་ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ། སེམས་རྣམ་པར་གཡེང་བ་མེད་པའོ། །སེམས་རྣམ་པར་མི་གཡེང་བའི་དགེ་སློང་ཡང་བློ་ཤིན་ཏུ་མཉམ་པར་བཞག་པ་དང་། གཅིག་ཏུ་ངེས་པར་རྒྱུ་བར་བྱེད་པ་དང་རྟག་ཏུ་ཚངས་པར་སྤྱོད་པ་ལ་མངོན་པར་དགའ་བ་དང་རྟག་ཏུ་བརྩོན་པ་དང་ལྡན་པར་ཡང་འགྱུར་རོ། །བདེ་ལེགས་རྣམས་ཐོབ་པར་འགྱུར་རོ། །ངན་སོང་གི་འཇིགས་པ་རྣམས་ཐམས་ཅད་ལས་ཀྱང་གྲོལ་བར་འགྱུར་རོ། །གཅིག་པུ་དགའ་བའི་དགེ་སློང་ནི་དབང་པོ་དྲུག་ལེགས་པར་བསྡམས་པ་དང་ཡུལ་རྣམས་ཐམས་ཅད་ཡོངས་སུ་སྤངས་པ་དང་། འཁོར་བའི་འཇིགས་པ་རྣམས་ཀྱིས་སྐྲག་པར་གྱུར་པས་དགེ་བའི་ཆོས་རྣམས་ཐམས་ཅད་ཡོངས་སུ་སྤོང་བར་མི་བྱེད་པ་དང་། མི་དགེ་བ་རྣམས་ཐམས་ཅད་ཡོངས་སུ་སྤོང་བར་བྱེད་པ་དང་། རྟག་པ་ཉིད་དུ་ཡང་བདེ་བར་རྒྱུ་བར་འགྱུར་རོ། །གང་དག་གི་བློ་རྣམ་པར་གཡེང་བར་མ་གྱུར་པ་རྣམས་ནི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ལ་རྟག་པ་ཁོ་ནར་ཡང་དེའི་སེམས་མཉམ་པར་བཞག་པར་འགྱུར་རོ། །དེའི་སེམས་མཉམ་པར་བཞག་པའི་ཕྱིར་ན་དགེ་བའི་ཆོས་རྣམས་མངོན་པར་འཕེལ་བར་འགྱུར་རོ། །དེ་དག་རྣམས་ཉིད་ལ་དགའ་བར་འགྱུར་རོ། །འཁོར་

71-65b

བ་ལ་ནི་དགའ་བར་འགྱུར་བ་མ་ཡིན་ནོ། །རྟག་ཏུ་བརྩོན་པ་དང་ལྡན་པར་གྱུར་པས། ཏིང་ངེ་འཛིན་ལ་མཉམ་པར་བཞག་པའི་ཡིད་དེ་ལ་ལམ་མྱུར་དུ་སྐྱེ་བར་འགྱུར་རོ། །རྟག་ཏུ་ལམ་ལ་སྟེན་པར་བྱེད་ཅིང་སྒོམ་པར་ཡང་བྱེད་དོ། །ལན་མང་དུ་བྱེད་དོ། །དེ་ནི་ལམ་དེ་དག་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་ལས་ལམ་མངོན་དུ་འགྱུར་རོ། །རྟག་པར་རྒྱུན་དུ་ཡང་ལམ་དེ་ཉིད་སྒོམ་པར་བྱེད་པ་ཡིན་ནོ། །དེ་ལམ་གྱི་རྗེས་སུ་རྟོགས་པའི་བློ་སྟེན་པར་བྱེད་ཅིང་། དེ་སྟེན་པར་གྱུར་པ་ལས་ཀྱང་ཀུན་ཏུ་སྦྱོར་བ་རྣམས་དང་བྲལ་བར་འགྱུར་རོ། །བག་ལ་ཉལ་རྣམས་ནི་འདུལ་བར་འགྱུར་རོ། །འདིའི་ཀུན་ཏུ་སྦྱོར་བ་གང་དག་དང་ཡོངས་སུ་བྲལ་བར་གྱུར་ན། འདི་ལྟ་སྟེ། རྗེས་སུ་ཆགས་པའི་ཀུན་ཏུ་སྦྱོར་བ་དང་། ཁོང་ཁྲོ་བའི་ཀུན་ཏུ་སྦྱོར་བ་དང་། མ་རིག་པའི་ཀུན་ཏུ་སྦྱོར་བ་དང་། ང་རྒྱལ་གྱི་ཀུན་ཏུ་སྦྱོར་བ་དང་། ཕྲག་དོག་གི་ཀུན་ཏུ་སྦྱོར་བ་དང་། སེར་སྣའི་ཀུན་ཏུ་སྦྱོར་བ་སྟེ། དེའི་ཀུན་ཏུ་སྦྱོར་བ་དེ་དག་རྣམས་དང་རབ་ཏུ་བྲལ་བ་ཡིན་ནོ། །འདི་ནི་བག་ལ་ཉལ་རྣམས་གང་དག་རུལ་བར་གྱུར་པ་ཡིན་ན། འདི་ལྟ་སྟེ། འདོད་པའི་འདོད་ཆགས་ཀྱི་བག་ལ་ཉལ་བ་དང་། ཁོང་ཁྲོ་བའི་བག་ལ་ཉལ་དང་། སྲིད་པའི་འདོད་ཆགས་ཀྱི་བག་ལ་ཉལ་དང་། མ་རིག་པའི་བག་ལ་ཉལ་དང་། ང་རྒྱལ་གྱི་བག་ལ་ཉལ་དང་། ལྟ་བའི་བག་ལ་ཉལ་དང་། ཐེ་ཚོམ་གྱི་བག་ལ་ཉལ་དང་རྣམས་རུལ་ཅིང་མྱགས་པར་འགྱུར་རོ། །དེ་ལ་འགྲོ་བ་རྣམས་ཐམས་ཅད་དུ་བརྗེ་བསོར་བྱེད་པ་པོར་གྱུར་པ་ཁམས་གསུམ་གྱིས་བསྡུས་པའི་སྟོབས་པོ་ཆེ་དེ་དག་རྣམས་ནི། རྣམ་པར་གཡེང་བ་མེད་པའི་སེམས་ཀྱིས་ནི་མི་ནུས་པ་ཡིན་ཏེ། མཐོང་བ་དང་སྒོམ་པའི་ལམ་དག་གིས་སོ། །དེ་ལྟར་ན་སེམས་རྩེ་གཅིག་ཏུ་བྱེད་པར་གྱུར་པ་ནི་དགེ་སྦྱོང་དང་བྲམ་ཟེ་རྣམས་ལ་གཅེས་པ་ཡིན་ཏེ། གང་གི་ཕྱིར་གལ་ཏེ་ན་དགེ་བར་གྱུར་པ་རྣམས་སམ། གལ་ཏེ་ན་མི་དགེ་བར་གྱུར་པ་རྣམས་ཀྱང་རུང་སྟེ། ཆོས་ཐམས་ཅད་ནི་སེམས་ཀྱི་རྩ་བ་ལས་ཡིན་པའི་ཕྱིར་རོ། །དེའི་ཕྱིར་སྲིད་པའི་འཇིགས་པའི་སྐྱོན་འདི་དག་རྣམས་ཀྱིས་འཇིགས་པས་དེ་ལྟར་རབ་ཏུ་བརྩོན་པས་ལམ་སྟེན་པར་བྱེད་པ་རྣམས་

71-66a

ཐམས་ཅད་ཀྱིས་ཀྱང་རབ་ཏུ་འབད་པས་སེམས་རྩེ་གཅིག་ཏུ་བྱའོ། །དེ་ལྟར་ན་ཉོན་མོངས་པ་རྣམས་ཟད་པར་བྱ་བར་ནུས་པ་ཡིན་གྱི། གཞན་དུ་ན་ཐོག་མ་མེད་པའི་དུས་ནས་འཇུག་པའི་ཉོན་མོངས་པའི་ཚོགས་གང་ཡིན་པ་རྣམས་གཞོམ་པར་ནུས་པ་ཡང་མ་ཡིན་ནོ། །དེ་ནས་དུས་དེར་རྨ་བྱའི་མངའ་བདག་གིས་ཚིགས་སུ་བཅད་པ་ཐམས་ཅད་མཁྱེན་པས་གསུངས་པ་འཆད་པ། ཇི་ལྟར། ཡིད་ནི་རྩེ་གཅིག་གྱུར་པ་ཡི། །སྐྱོན་གྱིས་འཇིགས་པའི་རྣལ་འབྱོར་པ། །ཡིད་ཉིད་ཀྱི་ནི་པད་མ་བཞིན། །ཡིད་ལ་ཟག་མེད་ཆོས་རྣམས་སྐྱེ། །རྩེ་གཅིག་གྱུར་པའི་ཡིད་ཀྱིས་ནི། །དགེ་བའི་ལམ་ནི་སྒོམ་པར་བྱེད། །ཉི་མ་ཤར་བས་མུན་བསལ་ལྟར། །མི་དགེའི་ཆོས་རྣམས་འཇོམས་པར་བྱེད། །གང་གི་ཡིད་ནི་རྩེ་གཅིག་པ། །རྟག་ཏུ་ཞི་ཞིང་མཉམ་བཞག་པས། །དུག་ལ་བྱ་ཁྱུང་ཇི་ལྟ་བར། །སྐྱོན་རྣམས་ལ་ནི་དེ་འཇིགས་མིན། །གཡོ་བར་གྱུར་པའི་སེམས་འདི་ནི། །རླུང་ཆེན་ཤུགས་དང་འདྲ་བ་ཡིན། །འདུལ་མཁན་ཇི་བཞིན་འཛིན་པ་ཡིས། །ཇི་ལྟར་བར་ནི་བརྟན་པས་འདུལ། །ཡེ་ཤེས་ཚུལ་ཁྲིམས་ཏིང་འཛིན་གྱིས། །སྐྱོན་གྱི་ནགས་ནི་གཏན་ནས་སྲེག །རླུང་དང་བཅས་པ་གང་གིས་ནི། །ནགས་སྐམས་པ་ལ་མེ་བཞིན་ནོ། །དེ་ཕྱིར་ཤེས་པ་རྟག་ཏུ་སྟེན། །མི་ཤེས་པ་ཡང་ཡོངས་སུ་སྤོངས། །སྐྱེ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །སེམས་གང་རྩེ་གཅིག་འགྱུར་བ་ཡི། །དེ་ནི་རབ་ཏུ་བརྩོན་པར་གྱིས། །དེ་ནི་དུལ་བའི་དབང་གྱུར་པས། །སྐྱོན་སྐྱེད་བྱེད་པ་མིན་པར་འདོད། །རྟག་ཏུ་གཡོ་བའི་ཡུལ་རྣམས་ནི། །བརྟན་པར་ཡོངས་སུ་བསྡུས་གྱུར་ན། །ལག་ན་རྟེན་པའི་དུག་འདྲ་བའི། །ཆགས་སོགས་ཀྱིས་ནི་གནོད་མི་འགྱུར། །དེ་ཕྱིར་བརྩོན་དང་བརྟན་སོགས་པའི། །ཡོན་ཏན་གྱིས་ནི་ཡིད་མྱུར་ཁྲིད། །སྲེད་ཆུ་ལམ་གསུམ་འགྲོ་བ་ལས། །འགོར་བ་མེད་པར་རྒལ་བར་གྱིས། །དེ་ལྟར་རྨ་བྱ་རྣམས་ཀྱི་མངའ་བདག་དེས་གཅིག་ཏུ་སྤྱོད་པའི་དགའ་ལྡན་གྱི་ལྷ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་རྣམ་པ་དུ་མ་རྣམས་སུ་ཕན་པར་གྱུར་པའི་དོན་དུ་ཡང་ཆོས་དེ་དག་སྟོན་པར་བྱེད་དོ། །ལྷ་དེ་དག་

71-66b

རྣམས་ཀྱང་ཡིད་ཤིན་ཏུ་ལེགས་པར་བསྡམས་པ་དང་། ཡིད་ཤིན་ཏུ་མཉམ་པར་བཞག་པས་བདེ་བའི་ཡུལ་དེ་དག་རྣམས་ཐམས་ཅད་ཡོངས་སུ་སྤངས་ནས་ཆོས་དེ་ཉིད་ཁོ་ན་ཉན་པར་བྱེད་དེ། འཁོར་བས་འཇིགས་པར་གྱུར་པ་དེ་དག་རྣམས་ཀྱི་ཡིད་དེ་དག་རྟོགས་ནས། སླར་ཉིད་ཀྱང་ཆོས་དེ་དག་ཉིད་སྟོན་པར་བྱེད་པ་ནི་ཇི་ལྟར་འདོད་པ་སྡུག་པ་ཡིད་དུ་འོང་བ། བག་མེད་པ་རྣམས་ཐམས་ཅད་ཀྱི་ལྕགས་ཀྱུ་ལྟ་བུར་གྱུར་པའི་ཆོས་གཞན་ཡང་ཐེག་པ་ཆེན་པོ་ལ་ལེགས་པར་གནས་པ་རྣམས་ཀྱིས་ཡིད་ལ་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ། འཆི་བ་རྗེས་སུ་དྲན་པའོ། །གང་གི་ཡིད་ལ་འཆི་བ་རྗེས་སུ་དྲན་པ་ཡོད་པར་གྱུར་ཞིང་། རྟག་ཏུ་ཡང་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་ན། ཇི་ལྟར་སྡུག་བསྔལ་འདི་དག་ནི་ལུས་ཅན་རྣམས་ཐམས་ཅད་ལ་སོ་སོར་མཚུངས་པ་ཡིན་ཏེ། ཕྱིར་བཟློག་ཏུ་མེད་པ་སྐྱེས་པ་རྣམས་ཐམས་ཅད་ལ་ནི་ཅི་ནས་ཀྱང་འབྱུང་བར་འགྱུར་བ། བདེན་ངེས་པར་འབྱུང་བ་རྣམས་ནི་འཐུན་ཞིང་ཡིད་དུ་འོང་བ་ཐམས་ཅད་ཀྱང་ཐ་དད་དུ་འགྱུར་བ་མེད་པར་འགྱུར་བ་རྣམ་པར་འགྱེས་པ་རྣམ་པར་བྲལ་བ་རྣམ་པར་བྱེ་བར་འགྱུར་བ་ཡིན་ནོ། །བདག་ཅག་ནི་འཇིག་རྟེན་འདི་ནས་ཤི་འཕོས་པར་གྱུར་ནས་གཞན་རྣམས་སུ་སྐྱེ་བར་འགྱུར་བ་ཡིན་ལ། གལ་ཏེ་ཤེད་ན་བདེ་བ་དང་སྡུག་བསྔལ་རྣམས་ཀུན་ཏུ་འཐོབ་པར་འགྱུར་ཏེ། ལས་ལ་ཞོན་པར་གྱུར་པའི་སེམས་ཅན་དེ་དག་རྣམས་རང་གི་ལས་ཀྱི་འབྲས་བུ་རྣམས་ཀྱི་ལམ་གྱི་ཟས་ཟ་བར་བྱེད་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །འདི་ནི་སྐྱེ་བ་དང་འཆི་བའི་དུས་བྱུང་བར་གྱུར་པ་ན་འགའ་ཞིག་ལ་ཡང་འགའ་ཞིག་གི་ཡང་གྲོགས་མེད་དོ། །དེ་ལ་དགེ་བ་དང་མི་དགེ་བའི་ལས་དེ་དག་རྣམས་གང་གི་ཕྱིར་དུས་དེ་ནི་གྲོགས་སུ་གྱུར་པ་ཡིན་ནོ། །གང་གི་ཕྱིར་ལེགས་པར་བྱས་པ་རྣམས་ཀྱིས་ནི་མ་དང་ཕ་ལྟ་བུར་གྱུར་པ་ཡིན་ནོ། །ཉེས་པར་བྱས་པ་རྣམས་ཀྱིས་ནི་དགྲ་བོ་ལྟ་བུར་གྱུར་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་བྱེད་པར་འགྱུར་རོ། །དེའི་ཕྱིར་ལེགས་པར་སྤྱད་པ་རྣམས་ནི་རྟག་ཏུ་གྱིས་དང་། ཉེས་པར་སྤྱད་པ་རྣམས་ནི་སྤང་བར་བྱ་བ་ཡིན་ནོ། །དེས་འཆི་བ་རྗེས་སུ་དྲན་

71-67a

པ་གང་ཡིན་པ་དེ་དེ་ལྟར་བཤད་པ་ན། དེའི་ཚེ་ན་འདིའི་ཡིད་སྐྱོ་བར་གྱུར་པས་ཡུལ་རྣམས་ལ་ཐོག་རྡུངས་སུ་འཇུག་པ་མ་ཡིན་ནོ། །འདོད་ཆགས་དང་ཞེ་སྡང་དང་གཏི་མུག་རྣམས་ཀྱིས་ཀྱང་འཕྲོགས་པར་མི་འགྱུར་རོ། །བུ་དང་ཆུང་མ་དང་རང་གི་སྐྱེ་བོ་རྣམས་ཀྱི་དོན་དུ་མི་དགེ་བའི་ལས་རྣམས་མི་བྱེད་དོ། །འཆི་བའི་འཇིགས་པས་སྐྲག་པར་གྱུར་པའི་ཁྱིམ་པ་རྣམས་ཐམས་ཅད་ཀྱང་ཡིད་རབ་ཏུ་ཞི་བར་འགྱུར་ན། རབ་ཏུ་བྱུང་བ་རྣམས་ལྟ་སྨོས་ཀྱང་ཅི་དགོས། རབ་ཏུ་བྱུང་བ་ཡང་འཆི་བ་རྗེས་སུ་དྲན་པར་བྱེད་པ་ལས་བརྒྱ་ལ་ཞིག་ལ་ཡང་ཚུལ་ཁྲིམས་འཆལ་བར་མི་འགྱུར་རོ། །ཡུལ་རྣམས་ལ་དགའ་བར་མི་འགྱུར་རོ། །ཡུལ་ལྗོངས་རྣམས་སུ་རྒྱུ་བར་མི་བྱེད་དོ། །ལྗོངས་རྣམས་རྒྱུ་བར་བྱེད་པས་ཀྱང་སེམས་རྣམ་པར་གཡེང་བར་བྱེད་པ་ཡིན་པ་དང་། འདུ་འཛི་དེ་དག་རྣམས་ཐམས་ཅད་ཀྱི་རྩ་བར་གྱུར་པ་ཡང་བུད་མེད་ཀྱི་འགྲོ་བ་རྣམས་ཡིན་པ་དང་། ཐམས་ཅད་ཀྱི་ཡང་སྐྱེ་མཆེད་དུ་གྱུར་པ་དེ་ནི་དགེ་སློང་འདིས་སྤོང་བར་བྱེད་དོ། །འཆི་བ་རྗེས་སུ་དྲན་པ་དེ་ལྟར་སེམས་པར་བྱེད་དོ། །ཇི་ལྟར་ལྗོངས་རྒྱུ་བ་ལ་མངོན་པར་དགའ་བ་རྣམས་ཡང་དགེ་བའི་ཆོས་རྣམས་ལས་འགའ་ཞིག་ཀྱང་སེམས་ལ་མེད་ལ། འཆི་བའི་ཡུལ་དང་དུས་སུ་ཡང་དེ་དག་རྣམས་ཐམས་ཅད་བདག་ལ་ཕན་པ་མ་ཡིན་པ་དང་བདེ་བ་མ་ཡིན་པར་འགྱུར་རོ། །གང་གི་ཚེ་བདག་ལ་གྲོག་མ་པ་དང་ཁབ་ལ་སོགས་པའི་རླུང་རྣམས་ཀྱིས་འཆི་བའི་ཡུལ་དང་དུས་སུ་རབ་ཏུ་འདེབས་པར་བྱེད་པ་དེའི་ཚེ་ན་བདག་ལ་སྐྱབས་སམ་སྐྱོབ་པ་གང་ཞིག་འབྱུང་བར་འགྱུར་བ་རང་རང་གི་ལས་ཀྱི་ཞགས་པས་ཀུན་ཏུ་བཅིངས་ནས་འདི་ནས་འཇིག་རྟེན་ཕ་རོལ་ཏུ་འཁྲིད་པར་བྱེད་པ་ན། འདི་ན་མའམ་ཕའམ་སྤུན་ཟླའམ་རང་གི་སྐྱེ་བོའམ་གྲོགས་པོ་དང་གཉེན་བཤེས་ཀྱི་ཚན་པར་གྱུར་པའི་སྐྱབས་མཆི་བའི་ཡུལ་དང་དུས་བྱུང་བར་གྱུར་པ་ནི་མེད་དོ། །དེས་འཆི་བ་རྗེས་སུ་དྲན་པ་ཡང་དེ་ལྟར་སྒོམ་པར་བྱེད་དོ། །དེའི་ཚེ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་ལ་མངོན་པར་དགའ་བར་འགྱུར་རོ། །དེ་ལྟར་ལེགས་པར་བྱེད་པར་གྱུར་པ་དེ་རྣམས་ཀྱི་དགེ་བའི་ལས་མངོན་པར་འཕེལ་བར་འགྱུར་རོ། །མི་དགེ་བའི་ལས་རྣམས་དང་ཡོངས་སུ་འབྲལ་བར་འགྱུར་རོ། །

71-67b

དེ་ལས་དེ་དག་རྣམས་ཀྱིས་ལྷ་དང་མི་རྣམས་སུ་བདེ་བ་ལ་ལོངས་སྤྱད་ནས་ཕྱི་ནས་མྱ་ངན་ལས་འདས་པ་ཐོབ་པར་འགྱུར་རོ། །དེའི་ཕྱིར་ན་ཡོན་ཏན་དེ་དག་རྣམས་གོ་བར་བྱས་ལ་བུད་མེད་དམ་སྐྱེས་པའམ། ཁྱིམ་པའམ་རབ་ཏུ་བྱུང་བའམ་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རྟག་པར་འཆི་བ་རྗེས་སུ་དྲན་པ་བསྒོམ་པར་གྱིས་ཤིག །རྗེས་སུ་དྲན་པར་གྱུར་ན་ནི་འཆི་བདག་གི་འཇིགས་པས་འཇིགས་པའི་སྐྱེས་བུ་ནི་མི་དགེ་བའི་ལས་རྣམས་ཐམས་ཅད་མི་བྱེད་དོ། །ཡིད་ཀྱིས་ཀྱང་སྒོམ་པར་བྱེད་པ་ལ་དེ་བཞིན་དུ། སེམས་ཅན་ཐམས་ཅད་འཆི་བར་འགྱུར་ཏེ། ལྷ་དང་མི་དང་དམྱལ་བ་དང་ཡི་དགས་ཀྱི་ཡུལ་དང་དུད་འགྲོ་རྣམས་ན་ཡང་གང་དག་འཆི་བདག་གི་དབང་དུ་མི་འགྲོ་བའི་གནས་དེ་ནི་ཡོད་པ་མ་ཡིན་ནོ། །དེ་དེ་ལྟར་སྒོམ་པར་བྱེད་པ་ན་འཇིག་རྟེན་ཕ་རོལ་གྱི་འཇིགས་པས་འཇིགས་པའི་སེམས་སྒྲ་དང་རེག་བྱ་དང་རོ་དང་གཟུགས་དང་དྲི་ལ་རབ་ཏུ་རྒྱུག་པར་མི་འགྱུར་རོ། །རྟག་པ་དང་བརྟན་པ་དང་ཐེར་ཟུག་གི་བློར་ཡང་མི་འགྱུར་རོ། །དེ་མི་རྟག་པ་དང་སྡུག་བསྔལ་བ་དང་སྟོང་པ་ཉིད་དང་བདག་མེད་པ་རྣམས་ཀྱི་ཡང་བློར་འགྱུར་རོ། །དེ་གང་གི་ཚེ་འཆི་བ་རྗེས་སུ་དྲན་པར་གྱུར་པ་དེ་ལ་ནི་སྐྱོན་རྣམས་ཐམས་ཅད་ཀྱིས་གནོད་པར་མི་འགྱུར་ཞིང་། རྟག་པར་རྒྱུན་མི་འཆད་པར་ཡང་དགེ་བ་ལ་སེམས་པར་འགྱུར་རོ། །ཡིད་ལ་བྱེད་པ་རྣམས་ཀྱང་མངོན་པར་འཕེལ་བར་འགྱུར་རོ། །འཆི་བ་རྗེས་སུ་དྲན་པ་རྟག་པར་རྒྱུན་དུ་བསྟེན་ཅིང་བསྒོམས་ལ་ལན་མང་དུ་བྱེད་པར་གྱུར་པ་དེ་ལ་ནི་ཡིད་ལ་བྱེད་པའི་དམིགས་པ་རྟག་ཏུ་སྐྱེ་བར་འགྱུར་རོ། །ཇི་ལྟར་འོག་དང་ཐད་ཀ་རྣམས་ན་ཡང་གང་དག་མ་ཞིག་པ་དང་། མ་ལྷུང་བ་དང་། བྱེ་བར་མ་གྱུར་པ་དང་། རྣམ་པར་འགྱུར་བའི་ཆོས་སུ་མ་གྱུར་པ་ནི་འདི་ན་གནས་ཡོད་པ་མ་ཡིན་ཏེ། རིའི་ཁྲོད་དགའ་བར་གྱུར་པ་བརྒྱ་སྟོང་རྣམས་ལས། ཇེ་ཐོག་མར་རི་ཐམས་ཅད་ཀྱི་རྒྱལ་པོ་རི་རབ་ལྷུན་པོ་ཡང་བསྐལ་པའི་མེས་ཉེ་བར་བཅོམ་ནས་མེད་པར་འགྱུར་ན། ཨེ་མའོ་བདག་གི་ལུས་གནས་པར་འགྱུར་རམ་ཅི། མཐའ་ཡས་པའི་རྒྱ་མཚོ་ཆུ་ཀླུང་རྣམས་ཐམས་ཅད་ཀྱི་བདག་པོར་གྱུར་པ། ཀླུ་རྣམས་ཐམས་ཅད་ཀྱི་གནས་དང་ལྷ་མ་ཡིན་རྣམས་ཡང་སྟེ། ཉི་མ་བདུན་

71-68a

གྱིས་ངེས་པ་ཁོ་ནར་ཉེ་བར་སྐམས་པར་འགྱུར་བ་ཡིན་ན། བདག་གི་ལུས་ལ་ལྟ་སྨོས་ཀྱང་ཅི་དགོས་མདོར་བསྡུ་ན་འདོད་པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་དང་ཁམས་གསུམ་པོ་དེ་དག་རྣམས་ཐམས་ཅད་ཀྱང་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་ཡོངས་སུ་རྣམ་པར་འགྱུར་བའི་ཆོས་ཅན་ཡིན་ན། བདག་གི་ལུས་དང་སྲོག་ནི་མི་རྟག་པ་དང་མི་བརྟན་པ་དང་ཐེར་ཟུག་མ་ཡིན་པ་དང་། རྣམ་པར་འགྱུར་བའི་ཆོས་ཅན་དུ་འབྱུང་བར་འགྱུར་བ་ལྟ་སྨོས་ཀྱང་ཅི་དགོས། དེ་གང་གི་ཚེ་དེ་ལྟར་རྟག་པར་རྒྱུན་དུ་ཤིན་ཏུ་མཉམ་པར་བཞག་པའི་ཡིད་ཀྱིས་གཅིག་ཏུ་ངེས་པར་དགེ་བ་ཡིད་ལ་བྱེད་པར་གྱུར་པའི་བློས་དེ་དག་སྒོམ་པར་བྱེད་པ་དེའི་ཚེ་འདི་འགའ་ཞིག་ལ་ཡང་མངོན་པར་ཞེན་པར་མི་འགྱུར་རོ། །ཀུན་ཏུ་ཆགས་པ་མེད་པར་གྱུར་པའི་བློས་ནི་འདོད་ཆགས་རྣམས་འགའ་ཞིག་གམ་ཞེ་སྡང་གིས་ཀྱང་འཆིང་བར་མི་འགྱུར་རོ། །དེའི་འདོད་ཆགས་དང་ཞེ་སྡང་དག་རྟག་པར་རབ་ཏུ་བཅོམ་པས་གཏི་མུག་ཀྱང་མེད་པར་འགྱུར་རོ། །དེ་རྣམས་སྐྱོན་མ་ལུས་པ་ལས་གྲོལ་བར་གྱུར་པས་མཆོག་ཏུ་འཆི་བ་མེད་པ་དང་རྒ་བ་མེད་པ་དང་ཟད་པ་མེད་པའི་གོ་འཕང་ཐོབ་པར་འགྱུར་རོ། །དེའི་ཕྱིར་ན་འཆི་བ་རྗེས་སུ་དྲན་པ་དེ་དག་ལ་དམིགས་པར་བྱའོ། །དེའི་ཕྱིར་དྲན་པ་རྣམས་ཐམས་ཅད་ཀྱི་མཆོག་ཏུ་གྱུར་པ་འདི་ནི། འདི་ལྟ་སྟེ། འཆི་བ་རྗེས་སུ་དྲན་པའོ། །གཞན་ཡང་འཆི་བ་རྗེས་སུ་དྲན་པ་སྒོམ་པར་བྱེད་པ་རྣམས་ལ་ཡོན་ཏན་གཞན་ཡང་ཡོད་དོ། །དགེ་སྦྱོང་ངམ་བྲམ་ཟེ་ཡང་རུང་སྟེ། གང་གི་ཚེ་དེ་ཉིད་སྒོམ་པར་བྱེད་པ་དེའི་ཚེ། ལུས་པོ་སྡུག་བསྔལ་གྱི་སྒྲོམ་བུ་ལྟ་བུར་གྱུར་པ་ལ་སོ་སོར་རྟོག་པར་བྱེད་དོ། །ཇི་ལྟར་སྡུག་བསྔལ་རྣམས་རིག་པར་གྱུར་པ་ཡིན་ན། ཇི་ལྟར་བདག་གི་ལུས་འདི་དག་ལ་ལུས་ནི་ནད་རྣམས་ཀྱིས་དང་འཆི་བདག་ཉེ་བར་འོངས་པས་ཀྱང་ཡིད་ཉེ་བར་འཇོམས་པར་འགྱུར་རོ། །འཆི་བདག་གི་ཞགས་པ་དེས་བདག་ཉིད་ཀུན་དུ་བཅིངས་པར་གྱུར་པས་ངས་ཅི་ཞིག་བྱར་ཡོད། །སྦྱིན་པ་དང་ཚུལ་ཁྲིམས་དང་ཤེས་རབ་ཀྱང་བདག་གིས་བསྒོམ་པར་ནི་མི་ནུས་སོ། །དེའི་ཕྱིར་ན་ཇི་སྲིད་དུ་འཆི་བདག་དེ་ཡིད་ལ་འོངས་པར་མ་

71-68b

གྱུར་པ་དེ་སྲིད་དུ་སྦྱིན་པ་དང་ཚུལ་ཁྲིམས་དང་ཤེས་རབ་རྣམས་བསྒོམ་པར་བྱའོ། །སེམས་ཅན་རྣམས་ཐམས་ཅད་ཀྱི་སྲོག་འཇོམས་པར་བྱེད་པ་པོའི་འཆི་བདག་རིང་པོ་མི་ཐོགས་པར་འོང་བར་འགྱུར་རོ། །དགེ་སྦྱོང་དང་བྲམ་ཟེ་དེ་དག་གང་ཁོ་ན་འཆི་བ་རྗེས་སུ་དྲན་པ་གཅིག་ཏུ་སེམས་ལ་བྱེད་པ་རྣམས་ལ་ནི། དེ་ལས་འདིའི་ཡིད་ལ་བྱེད་པ་རྣམས་འབྲས་བུ་ཡོད་པ་དང་མྱ་ངན་ལས་འདའ་བའི་མཐར་ཐུག་པར་ཡང་འགྱུར་རོ། །གཞན་ཡང་རྣམ་པ་གཞན་གྱི་སྒོ་ནས་ཀྱང་འཆི་བ་དེ་ཉིད་རྗེས་སུ་དྲན་པར་བྱེད་དེ། གང་ཞེ་ན་འདི་ལྟ་སྟེ། གཟུགས་ཀྱི་ཕུང་པོ་འདི་ནི་སྟོང་པ་ཉིད་དོ། །ལུས་འདི་ནི་སྟོང་པ་མི་རྟག་པའོ། །འདུས་བྱས་ཀྱི་ཆོས་འདི་དག་རྣམས་ཐམས་ཅད་ཀྱང་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ཏེ། སྐད་ཅིག་མྱུར་བར་འཇུག་པས་ཤིན་ཏུ་གཡོ་བ་རབ་ཏུ་ཉམས་པར་འགྱུར་བའི་ཆོས་ཅན་མེད་པ་ཆད་པ་སྟོང་པ་སྙིང་པོ་མེད་པ་ཟོ་ཆུན་འཁོར་བ་དང་དྲི་ཟའི་གྲོང་ཁྱེར་དང་འདྲ་བར་གྱུར་པའོ། །ཀྱེ་མ་ཇི་ལྟར་འདུས་བྱས་ཀྱི་ཆོས་འདི་དག་རྣམས་ཐམས་ཅད་པ་དེ་དག་དང་ལུས་འདི་དང་སྲོག་ཀྱང་དབུ་བ་དང་ཆུའི་ཆུ་བུར་དང་འདྲ་བར་སྙིང་པོ་མེད་པ་དྲི་ཟའི་གྲོང་ཁྱེར་དང་འདྲ་བ་ཡིན་ནོ། །གནས་སྐབས་རྣམས་ཐམས་ཅད་ཀྱི་ཐམས་ཅད་དུ་ཡང་བདག་འཆི་བར་འགྱུར་བའི་འཇིགས་པའི་གནས་ཆེན་པོར་དེ་དག་རྣམས་འབྱུང་ངོ་། །དེའི་ཕྱིར་ན་སྙིང་པོ་བླང་བར་གྱིས་དང་དགེ་བ་ནི་རྣམ་པ་གསུམ་མོ། །མི་དགེ་བ་ཡང་རྣམ་པ་གསུམ་ཉིད་ནི་ཡོངས་སུ་སྤང་བར་བྱའོ། །དེ་བཞིན་དུ་ཡང་འཆི་བ་རྗེས་སུ་དྲན་པར་བྱའོ། །དེ་ནི་དགེ་སྦྱོང་ངམ་བྲམ་ཟེ་རྣམས་ལ་གཅེས་པར་གྱུར་པ་ཡིན་ནོ། །རང་གི་སེམས་ལ་བསྒོམས་པས་ཡིད་ལ་བྱའོ། །དེ་ནས་དེའི་དུས་འདིར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ། ཇི་ལྟར། གང་གིས་འཇིག་རྟེན་འདིར་འཇོམས་པའི། །འཇིགས་པ་ཆེན་པོའི་དགྲ་བོ་དྲུག །རྒ་དང་ན་དང་འཆི་བདག་དང་། །འདོད་ཆགས་ལ་སོགས་དྲི་མ་གསུམ། །དགེ་བའི་རྫས་ནི་འཕྲོག་པ་ཡི། །རྐུན་མ་ཡང་ནི་ཡུལ་ལྔ་ཡིན། །དགྲ་རྣམས་གྲོགས་པོའི་གཟུགས་ཀྱིས་ནི། །སྲིད་པའི་ངམ་གྲོག་དག་ན་རྒྱུ། །བག་མེད་པས་ནི་གང་བའི་

71-69a

སེམས། །ཡུལ་རྣམས་ཀྱིས་ནི་འཕེལ་བར་བྱེད། །སྐྱེས་བུ་མྱུར་དུ་གཞོམ་པ་ནི། །དམྱལ་དང་ཡི་དགས་རིགས་རྣམས་ལ། །སྡུག་བསྔལ་ལ་སོགས་བདེན་པ་ཡང་། །གང་ཚེ་ཤེས་པས་རྟོགས་པ་ཡི། །དེ་ཚེ་སྐྱེས་བུ་བླ་མེད་ཀྱིས། །བདེ་ལེགས་ཤིས་པའི་གནས་ཐོབ་འགྱུར། །སྐྱོན་རྣམས་རྩད་ནས་གདོན་པ་དང་། །ཡོན་ཏན་སྤེལ་ལ་ཀུན་ཏུ་སྤྱོད། །སྡིག་པའི་གྲོགས་པོ་མི་བྱ་ཞིང་། །ལེ་ལོ་ཅན་ཁ་ཕྱིར་ཕྱོགས་(གྱིས,ཀྱིས)། །བརྩོན་འགྲུས་བརྩམས་ཤིང་དྲན་དང་ལྡན། །དགེ་སྦྱོང་ཤེས་རབ་དཔུང་གཉེན་ཅན། །རྒ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །དབང་པོ་དང་ནི་དབང་དོན་ཡང་། །གང་ཚེ་དེ་ཉིད་ཁོ་ན་རིག །དེ་ཚེ་ཤེས་རབ་ལ་བརྟེན་ནས། །སྲིད་པའི་རྒྱ་མཚོ་ལས་རྒལ་ལོ། །ང་རྒྱལ་ཅན་དང་ལེ་ལོ་ཅན། །ཐམས་ཅད་ལ་ནི་རྟག་དོགས་ཅན། །ཁེངས་དང་སྡིག་བློ་ཅན་རྣམས་ནི། །མཁས་པས་གྲོགས་པོ་བྱ་བ་མིན། །ཤིན་ཏུ་བརྩོན་ལྡན་རང་བཞིན་འཇམ། །ཆོས་ལ་གནས་དང་སྐྱོན་སྤངས་པ། །ཡང་དག་ལྟ་དང་རྩབ་ཧྲལ་མེད། །གྲོགས་པོར་བསྟེན་གྱིས་མཛེས་པ་ཡིན། །སྡིག་ཅན་གྲོགས་པོའི་སྣོད་མ་ཡིན། །སྣོད་ནི་བླ་མེད་སྐྱེས་བུ་ཡིན། །བླ་མེད་སྣོད་དུ་བྱས་པ་ན། །སྐྱོན་རྣམས་ཀྱིས་ནི་འཇིགས་པ་མེད། །སྐད་ཅིག་ཐང་ཅིག་ཡུད་ཙམ་དང་། །ཉིན་དང་མཚན་མོ་དེ་བཞིན་དུས། །འཆི་བ་སོམས་དང་བརྟན་པ་རྣམས། །དེ་ལས་བཟློག་ཐབས་མེད་པ་ཡིན། །གང་འདི་འཆི་བ་འབྱུང་བ་ནི། །དྲན་པའི་མཆོག་ཏུ་རབ་ཏུ་བསྔགས། །དེ་བསྟེན་པ་ནི་ཞི་བའི་མཆོག །རྙོག་དང་བྲལ་བར་འགྲོ་བ་ཡིན། །འཆི་བདག་འཇིགས་པ་དྲན་ནས་ནི། །སྐྱོན་ལ་ཇི་ལྟར་ཡིད་རྒྱུག་འགྱུར། །སྐྱོན་མེད་པས་ཀྱང་དྲི་མ་རྣམས། །ཐམས་ཅད་རྟག་ཏུ་ཞི་བར་འགྱུར། །བག་ཡོད་གོ་འཕང་འདི་མཆོག་ཏུ། །དེ་བཞིན་གཤེགས་པ་རྣམས་ཀྱིས་གསུངས། །གང་ཡང་འཆི་བདག་རྟག་དྲན་དང་། །མི་དགེ་རྣམས་ཀྱང་སྤང་བར་གྱིས། །ཞེས་བྱའོ། །དེ་ལྟར་རྨ་བྱ་རྣམས་ཀྱི་མངའ་བདག་དེས་དགའ་ལྡན་གྱི་ལྷ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་ཆོས་སྟོན་པར་བྱེད་དོ། །ཆོས་

71-69b

གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་དང་བྲམ་ཟེ་རྣམས་ལ་གཅེས་པར་གྱུར་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ། གཟུགས་དང་རིགས་དང་བཙན་ཕྱུག་གི་རྒྱགས་པ་དང་ཀུན་ཏུ་བྲལ་བར་བྱེད་པའོ། །གཟུགས་དང་རིགས་དང་བཙན་ཕྱུག་གི་རྒྱགས་པ་ལ་ཆགས་པས་ཀྱང་བྱིས་པ་རྣམས་ལུས་ཀྱིས་ཉེས་པར་སྤྱད་པ་རྣམས་སྤྱོད་དོ། །ལུས་ཇི་ལྟ་བ་དེ་བཞིན་དུ་ངག་དང་ཡིད་ཀྱིས་ཀྱང་སྤྱོད་པར་བྱེད་དོ། །རྒྱུ་དེ་དང་རྐྱེན་དེས་ཀྱང་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དུད་འགྲོའི་སྐྱེ་གནས་དང་དེ་བཞིན་དུ་ཡི་དགས་ཀྱི་ཡུལ་རྣམས་ལ་ཡང་སྟེ། དེ་དང་དེ་དག་རྣམས་ལ་དེའི་སྐྱེ་བ་བརྗེ་བསོར་བྱེད་པར་གྱུར་པ་ན། རྣམ་པར་རྟོག་པ་དུ་མར་སྡུག་བསྔལ་རྣམ་པ་མང་པོ་རྣམས་སྐྱེ་བར་འགྱུར་བ་དེ་དག་རྣམས་གང་ཡིན་པའི་མིང་ཙམ་ཡང་ཤེས་པར་སླ་བ་མ་ཡིན་ནོ། །དེའི་ཕྱིར་སྐྱོན་གྱི་འཇིགས་པ་འདི་དག་རྣམས་ཤེས་པར་གྱིས་ལ་གཟུགས་དང་རིགས་དང་དབང་ཕྱུག་གི་རྒྱགས་པ་དང་བྲལ་བར་འགྱུར་ཞིང་གྱུར་པ་གང་ཡིན་པ་དེ་ནི་ལུས་དང་ངག་དང་ཡིད་ཀྱི་ཉེས་པར་སྤྱོད་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་གྱུར་པས། ལྟ་བར་བྱེད་པ་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པའི་རྣམ་པ་རྣམས་སུ་དང་། གསོག་གསོབ་སྙིང་པོ་མེད་པ་དང་མི་གཙང་བ་རྣམས་ཀྱི་སྣོད་དུ་གྱུར་པ་སྐྲ་དང་། སྤུ་དང་། སེན་མོ་དང་། སོ་དང་། ཁྲག་དང་། པགས་པའི་ཚོགས་ལ་སོགས་པར་གྱུར་པ་རུས་པའི་འཁྲུལ་འཁོར་དུ་མ་དང་། རྒྱུས་པ་དང་། ཞག་དང་། གཅིན་དང་། རྟུག་པ་རྣམས་ཀྱིས་ཀུན་ཏུ་གང་བར་གྱུར་པའི་བདག་གི་གཟུགས་འདི་དང་པོར་གཙང་བ་མ་ཡིན། བར་དུ་མ་ཡིན། །ཐ་མར་མ་ཡིན་ཏེ། ལས་དང་ཉོན་མོངས་པ་དུ་མ་རྣམས་ཀྱིས་ཀུན་ཏུ་སྐྱེས་པ་འདི་ནི་སྙིང་པོར་གྱུར་པ་ནི་ཅུང་ཟད་ཀྱང་ཡོད་པ་མ་ཡིན་ནོ། །རྟག་པ་ཡང་མ་ཡིན་ཞིང་བདག་དང་བཅས་པ་ཡང་མ་ཡིན་ནོ། །བདག་འཆི་བར་གྱུར་པའི་ཡུལ་དང་དུས་ཀུན་ཏུ་བྱུང་བ་ན་ལུས་འདི་གོམ་པ་གང་ཡང་འགྲོ་བ་དང་རྗེས་སུ་འགྲོ་བར་འགྱུར་བ་ཡང་མ་ཡིན་ནོ། །དུར་ཁྲོད་དུ་ཡང་མེས་སྲེག་པར་བྱེད་པ་འབྱུང་བར་

71-70a

འགྱུར་ཞིང་། ཀུན་ཏུ་དྲངས་ནས་བྱ་རྒོད་དང་འུག་པ་དང་ཅེ་སྤྱང་དང་ཁྭ་ཏ་ལ་སོགས་པ་རྣམས་ཀྱིས་ཀྱང་ཟ་བར་བྱེད་པར་འགྱུར་གྱིས་ཞེས་དེ་ལྟར་སྒོམ་པར་བྱེད་པའི་སྐྱེས་བུ་དམ་པ་དེའི་གཟུགས་དང་བཙན་ཕྱུག་གི་རྒྱགས་པ་གང་ཡིན་པ་འདི་དག་དེས་ཐམས་ཅད་ནས་ཐམས་ཅད་དུ་བྲལ་བར་འགྱུར་བའམ་མགོ་གནོན་པར་འགྱུར་རོ། །གཞན་ཡང་གང་གི་ཚེ་ཇི་ལྟ་ང་ནི་བཟང་པོའི་རིགས་སུ་སྐྱེས་པ་ཡིན་ནོ་ཞེས་དགེ་སྦྱོང་དང་བྲམ་ཟེ་འདི་དག་རྣམས་ལ་རིགས་ཀྱི་རྒྱགས་པ་སྐྱེས་པར་གྱུར་ན། དེའི་ཚེ་གལ་ཏེ་ན་གང་ཁོ་ན་རིགས་ཡིན་པ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དེ། དོན་དམ་པར་ན་རིགས་ནི་ཡོད་པ་མ་ཡིན་གྱི། ཀུན་ཏུ་བརྟགས་པ་འབའ་ཞིག་ཙམ་ཁོ་ན་ལ་བྱིས་པ་རྣམས་ཀྱིས་འདི་དག་ཏུ་གོ་བར་ཟད་དོ། །ཇི་ལྟར་རིགས་འདི་དག་རྣམས་ནི་རིགས་མེད་པ་ཡིན་ཏེ་རྒྱུ་མེད་པའི་ཕྱིར་རོ། །དེ་བཞིན་དུ་རུས་ཀྱང་མེད་པ་ཡིན་ནོ། །དགེ་བའི་རྒྱུ་རྣམས་ཀྱིས་གཞན་ཉིད་ཁོ་ན་རིགས་ཡིན་ནོ། །གང་དག་ཞེ་ན། འདི་ལྟ་སྟེ། གང་ལ་བདེན་པ་དང་ཚུལ་ཁྲིམས་དང་སྦྱིན་པ་དང་ཤེས་རབ་དང་རབ་ཏུ་ཞི་བ་དང་དུལ་བའི་ཡོན་ཏན་རྣམས་ཡིན་ནོ། །གང་དག་རིགས་ངན་པར་གྱུར་ན་ཡང་ཆེན་པོའི་རིགས་སུ་ལེགས་པར་སྐྱེས་པ་ཡིན་ནོ། །རྒྱུ་གང་གི་ཕྱིར་ཡོན་ཏན་རིགས་ཡིན་པའི་ཕྱིར་དང་སྐྱེ་བ་ནི་རྒྱུ་མཚན་མ་ཡིན་པའི་ཕྱིར་རོ། །དེ་ལྟ་བས་ན་དགེ་སྦྱོང་ངམ་བྲམ་ཟེའམ་དེའི་རིགས་ཅན་གཞན་དག་རྣམས་ཀྱིས་ཀྱང་དེ་ལྟར་སྐྱེ་བ་དང་རིགས་དང་བཙན་ཕྱུག་གིས་རྒྱགས་པར་མི་བྱའོ། །གཞན་ཡང་དེའི་ཚེ་ན་དགེ་སྦྱོང་ངམ་བྲམ་ཟེའམ་དེ་དག་གི་རིགས་ཅན་གཞན་རྣམས་ཀྱིས་ཀྱང་གཟུགས་གང་ཡིན་པ་དེ་ཁོ་ན་ཡང་དག་པ་ཇི་ལྟ་བར་རྣམ་པ་གཞན་གྱི་སྒོ་ནས་སོ་སོར་རྟོག་པར་བྱེད་དོ། །ཇི་ལྟར་བདག་གི་གཟུགས་འདི་ནི་ཇི་ལྟ་བུའི་རྣམ་པར་བདག་བྱིས་པ་ཕྱིས་རྒན་ན་ཉལ་བར་གྱུར་པའི་རྣམ་པ་དེ་ལྟ་བུ་ནི་གོག་འགྲོས་བྱེད་པར་གྱུར་པ་ན་མ་ཡིན་ལ། གོག་འགྲོས་བྱེད་པའི་རྣམ་པ་དེ་ལྟ་བུ་ནི་ཇི་སྲིད་གཙུག་པུད་བཞག་པ་ན་མ་ཡིན་ཏེ། གཙུག་པུད་ཀྱི་དེ་ལྟར་ནི་ཇི་སྲིད་དུ་ལང་ཚོ་ལ་བབ་པའི་བདག་གི་གཟུགས་འབྱུང་བར་མི་འགྱུར་རོ། །

71-70b

བར་མའི་ན་ཚོད་ཀྱི་རྣམ་པ་ཇི་ལྟ་བུའི་རྣམ་པ་དེ་ལྟ་བུར་ནི་བདག་གློ་བུར་དུ་འཆི་བའི་དུས་མ་ཡིན་ནོ། །རྣམ་པ་དེ་ལྟ་བུའི་ནི་ཡུན་རིང་བ་ནི་འཆི་བ་ན་ཡང་མ་ཡིན་ནོ། །བདག་གི་གཟུགས་འདི་རོར་གྱུར་ནས་སྦྲང་མ་ལ་སོགས་པ་དག་གིས་ཟ་བར་བྱེད་པ་འབྱུང་བར་འགྱུར་རོ། །དེ་ལས་ཀུན་ཏུ་བྱུང་བའི་འབུ་གཞན་དག་གིས་ཀྱང་ཟ་བར་བྱེད་ལ་དེ་ལྟ་བུ་རྣམས་འབྱུང་བར་འགྱུར་རོ། །རླུང་དང་ཉི་མ་དང་ཆར་པས་ཀྱང་ཐམས་ཅད་ནས་ཐམས་ཅད་དུ་ཉམས་པར་འགྱུར་བར་འབྱུང་བ་ཡིན་ནོ། །དེ་ཡང་ཕྱོགས་བཅུ་རྣམས་སུ་ཆ་ཤས་ཐ་དད་པར་འབྱུང་བར་འགྱུར་རོ། །གཞན་དག་རྣམས་ཀྱིས་བདག་དུར་ཁྲོད་དུ་ཀུན་ནས་དྲངས་ཤིང་ལུས་འདི་རྣམ་པ་དུ་མར་ཆ་ཤས་ཐ་དད་པར་བྱེད་པར་འགྱུར་རོ། །གཞན་དག་གིས་རུས་པ་རྣམས་དྲངས་ནས་ཁྱེར་བར་བྱེད་དོ། །གཞན་དག་གིས་ནི་མགོའི་ཐོད་པའོ། །གཞན་དག་གིས་ནི་མཇིང་པའི་རུས་པའོ། །གཞན་དག་གིས་ནི་སྣའི་སྟེ། གཞན་དག་གིས་ནི་ལག་པའི་གྲུ་མོ། གཞན་དག་གིས་ལུས་ཀྱི་དཔུང་པ། གཞན་དག་རྣམས་ཀྱིས་ནི་སོར་མོའི་ཐུར་མ། གཞན་དག་རྣམས་ཀྱིས་ནི་སེན་མོའོ། །གཞན་དག་རྣམས་ཀྱིས་ནི་རྩིབ་ལོགས། གཞན་དག་རྣམས་ཀྱིས་ནི་རྒྱབ་ཀྱི་རུས་པ། གཞན་དག་གིས་ནི་ཨན་ཏོང་བའི་རུས་པའོ། །གཞན་དག་གིས་ནི་བརླ། གཞན་དག་གིས་ནི་རྐང་པའི་རུས་པ། གཞན་དག་གིས་ནི་རྐང་པའི་སོར་མོ་རྣམས་ཀྱི་ཚོགས་སོ། །དེ་ལྟར་བདག་ཉིད་ཀྱི་གཟུགས་དེ་ཡང་དག་པ་ཇི་ལྟ་བར་སོ་སོར་རྟོག་པར་བྱེད་པ་རྣམས་ནི་གཟུགས་ཀྱིས་རྒྱགས་པར་མི་འགྱུར་རོ། །ཇི་ལྟར་ན་བཙན་ཕྱུག་གི་རྒྱགས་པ་རྣམས་ལ་ཡང་དག་པ་ཇི་ལྟ་བ་ཉིད་དུ་ལྟ་བར་བྱེད་པ་དང་། ཤེས་པར་བྱེད་ན་མེད་པར་འགྱུར་བ་ཡིན་ཞེ་ན། གང་གི་ཚེ་སྐྱེ་དགུ་དེ་དག་རྣམས་ཐམས་ཅད་ཀྱང་ཡང་དག་པ་ཇི་ལྟ་བ་བཞིན་དུ་རྟོགས་ཏེ། ཇི་ལྟར་འདི་དག་རྣམས་ཐམས་ཅད་ནི་གཞན་གྱི་དབང་དུ་གྱུར་པ་དང་རང་དབང་མེད་པ་ཡིན་ནོ། །སྐྱེ་དགུ་རྣམས་ནི་རྣམ་པ་དུ་མར་ཡང་གཞན་གྱི་དབང་དུ་གྱུར་པ་ཡིན་ན། དེ་ལ་ཇི་ལྟར་ན་འདི་རང་དབང་ཅན་དུ་འགྱུར་བ་ཡིན། གཞན་གྱི་དབང་དུ་གྱུར་པའི་འདུས་བྱས་ཀྱི་ཆོས་འདི་དག་རྣམས་ནི་གཞན་གྱི་སྐྱེ་མཆེད་ཀྱིས་རབ་

71-71a

ཏུ་འཇུག་པ་ཡིན་ཏེ། རྒྱུ་དང་རྐྱེན་རྣམས་ལས་ཀུན་ཏུ་བྱུང་བ་ཡིན་ནོ། །ཇི་ལྟར་ཁང་པ་ལ་ཡང་རྣམ་པ་དུ་མ་རྣམས་སུ་བསྐོར་བ་ལ་སོགས་པའི་ཚོགས་པ་རྣམས་ཕན་ཚུན་གྱི་དབང་གིས་དང་། ཕན་ཚུན་ལ་ཀུན་ཏུ་བརྟེན་ནས་ཁང་པ་ཞེས་བྱ་བའི་ཐ་སྙད་དུ་འགྱུར་ལ། དེ་བཞིན་དུ་ལུས་ཀྱི་ཐ་སྙད་ཅན་གྱི་གཟུགས་ཕུང་འདི་ཡང་པགས་པ་དང་། ཤ་དང་། རུས་པ་དང་། ཚིལ་དག་གི་ཚོགས་སུ་གྱུར་པ་དབང་ཕྱུག་མེད་པ་བྱེད་པ་པོ་རྣམས་དང་། རྣམ་པར་བྲལ་བའི་གཟུགས་ཕུང་ལ་གཟུགས་ཀྱི་ཐ་སྙད་ཡིན་ནོ། །དེ་ལ་འདིར་ཇི་ལྟར་དགེ་སྦྱོང་ངམ་བྲམ་ཟེ་འམ་གཞན་ཡང་དེའི་རིགས་ཅན་དག་གིས་དེ་ལྟར་རྗེས་སུ་འཇལ་བ་ལ་བརྟེན་ནས་གང་དག་གཟུགས་ཡང་དག་པ་ཇི་ལྟ་བར་རྣམ་པར་ཕྱེ་བ་འདི་དག་རྣམས་ནི་གཟུགས་དང་རིགས་དང་དབང་ཕྱུག་གི་རྒྱགས་པ་དེ་ཐམས་ཅད་དང་རབ་ཏུ་བྲལ་བར་འགྱུར་བའམ་མགོ་སྨད་པར་འགྱུར་རོ། །གཞན་ཡང་ཇི་ལྟར་བདག་ནི་མངོན་པར་མཐོ་བའི་རིགས་སུ་སྐྱེས་སོ་ཞེས་དེ་ལྟར་གང་གི་ཚེ་འདིའི་རིགས་ཀྱིས་རྒྱགས་པར་གྱུར་པ་ནི་ཡང་དག་པ་ཇི་ལྟ་བ་བཞིན་དུ་མཐོང་བ་མ་ཡིན་ལ། ཕྱི་ནས་ནི་ཡང་དག་པ་ཁོ་ནར་མཐོང་བ་ཡིན་ཏེ། ཇི་ལྟར་རིགས་ཞེས་བྱ་བ་ནི་ཀུན་ཏུ་བརྟགས་པ་འབའ་ཞིག་ཙམ་ཁོ་ན་ལ་མིག་མེད་པ་རྣམས་ཀྱིས་འདི་དག་ཡོངས་སུ་རྟོགས་པར་བྱེད་པ་ཡིན་ནོ། །ཤེས་རབ་དང་ཚུལ་ཁྲིམས་དང་སྦྱིན་པ་རྣམས་ནི་མཐོང་བ་ཡིན་ཏེ། དེ་ལྟ་བུ་རྣམས་ནི་རྣམ་པར་དག་པའི་རིགས་དང་ལེགས་པར་ལྡན་པ་ཡིན་ནོ། །མེད་པ་ལ་བྱིས་པ་རྣམས་ཀྱིས་ང་རྒྱལ་དུ་བྱས་པ་འབའ་ཞིག་ལ་འདི་དག་ཏུ་རྟོགས་པ་ཁོ་ན་ཡིན་ནོ། །དཔེར་ན་དགེ་སྦྱོང་ངམ་བྲམ་ཟེའམ་དེའི་རིགས་ཅན་གཞན་དག་རྣམས་ཀྱང་རུང་སྟེ། ཡང་དག་པ་ཇི་ལྟ་བ་བཞིན་དུ་དེ་ལྟར་རིགས་རྣམས་རྟོགས་པ་ནི། དེའི་ཚེ་འདིའི་རིགས་ཀྱི་རྒྱགས་པ་གང་ཡིན་པ་དེ་དག་རྣམས་ཐམས་ཅད་ཀྱི་ཐམས་ཅད་དུ་རབ་ཏུ་འབྲལ་བར་འགྱུར་རོ། །མགོ་སྨད་པར་འགྱུར། དེ་ནས་དེའི་ཚེ་རྨ་བྱའི་རྒྱལ་པོ་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། གཟུགས་དང་བཙན་ཕྱུག་རིགས་རྒྱགས་པ། །ལུས་ཅན་གང་ལ་དམིགས་པ་ནི། །དེ་མྱོས་གླང་ཆེན་

71-71b

སྨྱོན་པ་འདྲ། །རབ་ཏུ་ལྟུང་ཞིང་མཐོང་བ་མིན། །རྒོད་པའི་སྐྱེས་བུ་ཐམས་ཅད་ནི། །བག་མེད་པས་ནི་དབང་པོ་དཀྲུགས། །ཡང་མོར་འཇིག་རྟེན་འདིར་སོང་ནས། །ཕྱི་མར་ངན་སོང་དག་ཏུ་འཚེད། །གཟུགས་དང་དབང་ཕྱུག་རྒྱགས་པ་ཡིས། །ལོང་བའི་མིག་གང་སྡིག་བྱེད་པ། །དེ་དག་བདེ་བ་ལེགས་རྙེད་མིན། །ཕྱི་མར་ངན་སོང་རྣམས་སུ་མཐོང་། །གཟུགས་དང་དབང་ཕྱུག་རིགས་ཀྱིས་དྲིས། །གང་དེ་དེ་ཉིད་སྐལ་ལྡན་མིན། །དེ་ཉིད་རྟོགས་མིན་བྱིས་པ་རྣམས། །སྲིད་པའི་མཚོ་ལས་རྒལ་མི་འགྱུར། །གང་ཡང་རིགས་དང་ཕུན་ཚོགས་དང་། །གཞན་ཡང་བདེ་བར་འདོད་པ་གང་། །དེ་དག་ཐམས་ཅད་མི་རྟག་པས། །དེ་ཕྱིར་འདི་ལ་བློ་མ་གཏོད། །ཤེས་རབ་ཚུལ་ཁྲིམས་ངེས་བྲལ་བའི། །རིགས་ནི་མཁས་པས་བསྔགས་པ་མིན། །གང་དག་ཤེས་རབ་དང་ཚུལ་ཁྲིམས། །དེ་ནི་ཆེན་པོའི་རིགས་ལ་གནས། །ཤེས་རབ་དང་བྲལ་དབང་ཕྱུག་མིན། །རིགས་མིན་ལེགས་པའི་སྲོལ་ཡང་མིན། །དེ་ཕྱིར་ཤེས་རབ་འདི་རིགས་ཡིན། །ཤེས་རབ་དང་བྲལ་རིགས་མེད་ཡིན། །སྤྱོད་པ་དྲི་མེད་གང་དག་གི། །ཚུལ་ཁྲིམས་བསིལ་བའི་མཚེའུ་བཞིན་ནོ། །དེ་ནི་ཆེན་པོའི་རིགས་སུ་སྐྱེ། །དྲི་མ་ཅན་གཞན་རིགས་མིན་ནོ། །ཚུལ་ཁྲིམས་དཀའ་ཐུབ་བསམ་གཏན་སྦྱིན། །བདེན་དང་བརྟན་དང་ཕ་རོལ་གནོན། །རིགས་གང་ཡང་དག་ལྡན་པ་དེའི། །ཆོས་གང་རྣམ་པར་སྤངས་པ་ཡི། །སྐྲ་བྲེགས་དགེ་སྦྱོང་མིན་པར་མཐོང་། །སྐྱེ་རིགས་ཉིད་ལས་བྲམ་ཟེ་མིན། །ཤེས་རབ་ཚུལ་ཁྲིམས་རང་བཞིན་གང་། །དགེ་སྦྱོང་བྲམ་ཟེ་ཡང་དེ་ཡིན། །རྒ་བས་གཟུགས་ནི་འཇོམས་པར་བྱེད། །འཆི་བདག་མི་རྣམས་སྲོག་མཐར་བྱེད། །རྒུད་པས་ནོར་ནི་འཇོམས་བྱེད་པས། །རྟག་པ་ཉིད་དུ་རྣམ་པར་གནས། །ནད་ཀྱང་ནད་མེད་འཇོམས་པར་ནི། །ལུས་ཅན་རྣམས་ལ་རབ་ཏུ་འཇུག །མཁས་པའི་སྐྱེས་བུས་ཐམས་ཅད་དུ། །བཙན་ཕྱུག་རྒྱགས་པས་འདིར་མ་ལྟུང་། །འཁོར་བའི་ཉེར་འཚེ་གོ་གྱིས་ལ། །སྐྱེས་བུ་རྒྱགས་ལྡན་མ་བྱེད་ཅིག །དེ་ཕྱིར་འདིར་ནི་སྒྲིན་པོ་ཡིས། །གཟུགས་

71-72a

རྒྱགས་དབང་ཕྱུག་ལ་མ་ལྟ། །ལེགས་པར་སྤྱད་པས་ཆོས་ལ་སྤྱོད། །དེ་ལྟར་སྡུག་བསྔལ་གྱིས་མི་འཇོམས། །དེ་ལྟར་རྨ་བྱ་རྣམས་ཀྱི་མངའ་བདག་འདིས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །ཆོས་གཞན་ཡང་དགེ་སྦྱོང་དང་བྲམ་ཟེ་ཐེག་པ་ཆེན་པོ་ལ་ཡང་དག་པར་རབ་ཏུ་གནས་པ་རྣམས་ཀྱིས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་མཉམ་པ་ཉིད་དོ། །སེམས་ཅན་ཐམས་ཅད་ལ་མཉམ་པ་ཉིད་ཅེས་བྱ་བའི་ཆོས་ནི་སེམས་ཅན་དུ་གྱུར་པ་རྣམས་ཐམས་ཅད་ལ་སྟེ། དགེ་སྦྱོང་དང་བྲམ་ཟེ་དེ་དང་དེའི་རིགས་ཅན་གཞན་དག་རྣམས་ཀྱང་མཆོག་ཏུ་བདེ་བ་དང་ལྡན་པར་འགྱུར་རོ། །སེམས་ཅན་རྣམས་ཐམས་ཅད་ཀྱི་འཐུན་པར་བྱེད་པར་ཡང་འགྱུར་རོ། །ལུས་ཞིག་པར་གྱུར་ནས་ཀྱང་ཤི་བའི་འོག་ཏུ་ཡང་མཐོ་རིས་ཀྱི་འཇིག་རྟེན་དུ་སྐྱེའོ། །དགེ་སྦྱོང་དང་བྲམ་ཟེ་དག་གིས་ཇི་ལྟར་ན་སེམས་ཅན་རྣམས་ཐམས་ཅད་ལ་མཉམ་པ་ཉིད་དུ་བསྒོམ་པར་བྱ་ན། གང་ཡང་དགེ་སྦྱོང་དང་བྲམ་ཟེ་དག་ཀུན་ཏུ་རྩོད་པར་བྱེད་པ་རྣམས་ཡོངས་སུ་སྤོང་བར་བྱེད་དོ། །གང་འགའ་ཞིག་དང་ཡང་ཀུན་ཏུ་རྩོད་པར་མི་བྱེད་དོ། །ཀུན་ཏུ་རྩོད་པ་རྣམ་པར་སྤངས་པ་དེ་ནི་སེམས་ཅན་རྣམས་ཐམས་ཅད་ལ་ཡང་ཡིད་མཉམ་པ་ཉིད་དུ་འགྱུར་རོ། །དེའི་ཕྱིར་རེ་ཞིག་དང་པོ་ཁོ་ནར་ཐམས་ཅད་ཀྱིས་གནས་སྐབས་ཐམས་ཅད་དུ་ཐམས་ཅད་ཀྱིས་ཀྱང་དགེ་སྦྱོང་དང་བྲམ་ཟེ་རྣམས་ཀྱིས་ཀུན་ཏུ་རྩོད་པར་བྱེད་པ་རྣམས་ཡོངས་སུ་སྤང་བར་བྱའོ། །དེ་ལྟར་ན་སེམས་ཅན་རྣམས་ཐམས་ཅད་ལ་ཡང་མཉམ་པ་ཉིད་དུ་འགྱུར་རོ། །ཡང་གཉེན་པོ་གཞན་དག་གིས་ཀྱང་དགེ་སྦྱོང་དང་བྲམ་ཟེ་རྣམས་སེམས་ཅན་ཐམས་ཅད་ལ་མཉམ་པ་ཉིད་ཀྱི་བློར་འགྱུར་རོ། །ཇི་ལྟ་བ་བཞིན་དུ་སེམས་ཅན་རྣམས་ཐམས་ཅད་ཀྱི་སྡུག་བསྔལ་ལ་རྟོག་པར་བྱེད་པ་ནི། གྲོགས་པོ་རྣམས་ལ་ཡང་ཇི་ལྟ་བ་དེ་ཁོ་ན་བཞིན་དུ་གྲོགས་པོ་མ་ཡིན་པ་རྣམས་ལ་ཡང་སྟེ། འཁོར་བར་ཀུན་ཏུ་ཆུད་པར་གྱུར་པའི་སྲོག་ཆགས་འདི་རྣམས་ཐམས་ཅད་ཀྱང་སྐྱེ་བའི་རིགས་ཀྱི་ཆོས་རྣམས་ནི་རིགས་ཀྱི་ཆོས་ཉིད་ཀྱིས་བྲལ་བ་ཡིན་ལ། དེ་དག་གི་སྐྱེ་བ་རྣམས་བདེན་པས་ནི་རྒ་བ་དང་། ནད་དང་།

71-72b

འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་ངལ་དུབ་ཏུ་འགྱུར་བ་ཡིན་ནོ། །གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། གསོད་པ་དང་། འཆི་བ་དག་གིས་སྐྱེ་བ་ཡིན་ནོ། །མི་སྡུག་པ་རྣམས་དང་ཕྲད་པ་དང་། སྡུག་པ་དང་བྲལ་བའི་སྡུག་བསྔལ་གྱི་ཁྱད་པར་རྣམས་འབྱུང་བར་འགྱུར་རོ། །དེ་དེ་ལྟ་བུ་ཉིད་དུ་གྲོགས་པོའི་སྡུག་བསྔལ་རྣམས་ཀྱང་ལ་འུར་ལྟ་བར་བྱེད་དོ། །དེ་ཁོ་ན་བཞིན་དུ་གྲོགས་པོ་མ་ཡིན་པ་ཡང་ངོ་། །དེ་དེ་ལྟར་སྒོམ་པར་བྱེད་པ་ན་དགེ་སྦྱོང་ངམ་བྲམ་ཟེ་རྣམས་ཀྱང་སེམས་ཅན་ཐམས་ཅད་ལ་མཉམ་པ་ཉིད་ཀྱི་བློར་འགྱུར་རོ། །གཞན་ཡང་དགེ་སྦྱོང་ངམ་བྲམ་ཟེ་དག་གིས་འདི་ལྟར་སེམས་པར་བྱེད་དེ། ཀྱེ་མ་སེམས་ཅན་འདི་དག་རྣམས་ནི་སྡུག་བསྔལ་ཤིན་ཏུ་གནེམས་པའི་སྡུག་བསྔལ་མྱོང་བར་འགྱུར་རོ། །དེ་གང་དག་ཞེ་ན། འདི་ལྟ་སྟེ། ནད་ཅེས་བྱ་བའོ། །སེམས་ཅན་རྣམས་ཐམས་ཅད་ནི་ནད་ཀྱིས་འཇོམས་པར་འགྱུར་རོ། །དེ་དག་གི་ལུས་དང་ཡིད་ཀྱང་ནད་ཀྱིས་གཟིར་བར་གྱུར་པ་རྣམས་ཤིན་ཏུ་སྡུག་བསྔལ་བར་འགྱུར་རོ། །དེ་ཇི་ལྟ་བ་བཞིན་དུ་གྲོགས་པོ་ལ་སེམས་པར་བྱེད་པ་ཁོ་ན་བཞིན་དུ་དགྲ་བོ་རྣམས་ལ་ཡང་སེམས་པར་བྱེད་དོ། །དེ་དེ་ལྟར་མཉམ་པ་ཉིད་དུ་གྱུར་པའི་བློས་སེམས་རབ་ཏུ་དང་བར་འགྱུར་རོ། །དེའི་སེམས་རབ་ཏུ་དང་བར་གྱུར་པ་ལས་བརྗོད་པ་རྣམས་ཀྱང་རབ་ཏུ་དང་བར་འགྱུར་རོ། །ཁྲག་ཀྱང་རབ་ཏུ་དང་བས་བཞིན་གྱི་མདོག་ཀྱང་རབ་ཏུ་དང་ངོ་། །དེའི་དབང་པོ་རྣམས་ཐམས་ཅད་ཀྱང་རྟག་པར་རྒྱུན་དུ་ཀུན་ནས་རབ་ཏུ་དང་བར་འགྱུར་རོ། །འདི་ནི་དེའི་མཐོང་བའི་ཆོས་ཀྱི་འབྲས་བུ་ཡིན་ཞིང་། སྐྱེ་བོ་རྣམས་ཐམས་ཅད་ཀྱི་ཡང་འདོད་པ་སྡུག་པ་ཡིད་དུ་འོང་བར་འགྱུར་རོ། །དེ་ལྟར་ཡང་སེམས་ཅན་རྣམས་ཐམས་ཅད་ལ་བྱམས་པར་གྱུར་པ་དེ་ནི་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་པ་ལྷ་རྣམས་སུ་སྐྱེ་བར་འགྱུར་རོ། །ཡང་རྣམ་པ་གཞན་གྱིས་ཀྱང་དགེ་སྦྱོང་ངམ་བྲམ་ཟེ་རྣམས་སེམས་ཅན་ཐམས་ཅད་ལ་བློ་མཉམ་པ་ཉིད་དུ་འགྱུར་བ་ནི། འདི་ལྟ་སྟེ་གྲོགས་པོ་

71-73a

རྣམས་ཀྱི་ལ་སེམས་པར་བྱེད་ཅིང་དེ་ཁོ་ན་བཞིན་དུ་དགྲ་བོ་རྣམས་ཀྱི་ལ་ཡང་སྟེ། ཇི་ལྟར་སྲོག་ཆགས་འདི་དག་རྣམས་ཐམས་ཅད་ནི་འཆི་བའི་ཆོས་ཅན་འཆི་བའི་ཆོས་ཉིད་ལས་རྣམ་པར་མ་གྲོལ་བ་ཡིན་ནོ། །སྐྱེ་བ་དང་བཅས་པར་གྱུར་པ་འདི་དག་རྣམས་ཐམས་ཅད་ཀྱང་འཆི་བར་འགྱུར་བ་ཡིན་ནོ། །རང་རང་གི་ལས་རྣམས་ཀྱིས་སེམས་ཅན་འདི་དག་རྣམས་དམྱལ་བ་དང་ཡི་དགས་དང་དུད་འགྲོར་སྐྱེ་བས་སེམས་ཅན་འདི་དག་ནི། ཀྱེ་མ་རིང་བར་འགྱུར་རོ། །དེ་དེ་ལྟར་སྒོམ་པར་བྱེད་པ་དང་སེམས་ཅན་རྣམས་ཐམས་ཅད་ལ་ཡང་ཕན་པར་འདོད་པ་དེ་ནི་མཆོག་ཏུ་ཁྲག་རབ་ཏུ་དང་བར་འགྱུར་རོ། །ཁྲག་རབ་ཏུ་དང་བར་གྱུར་པས་བཞིན་གྱི་མདོག་དང་ངོ་། །དེའི་བཞིན་གྱི་མདོག་རབ་ཏུ་དང་བས་བལྟ་ན་མཛེས་པར་འགྱུར་རོ། །དེས་སེམས་ཅན་རྣམས་ཐམས་ཅད་དགའ་བར་འགྱུར་ཏེ་མཐོང་བའི་ཆོས་ལ་ཡིན་ནོ། །རྣམ་པར་སྨིན་པས་ནི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ། །དེ་ལྟར་ཡང་དགེ་སློང་རྣམས་སེམས་ཅན་ཐམས་ཅད་ལ་མཉམ་པ་ཉིད་ཀྱི་དབང་དུ་བྱས་ནས་དགེ་བའི་ལས་ཆེན་པོ་རྣམས་བྱེད་པར་འགྱུར་རོ། །ཡང་རིམ་པ་གཞན་གྱིས་ཀྱང་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་སྒོམ་པར་བྱེད་དེ། ཇི་ལྟར་སེམས་ཅན་འདི་དག་རྣམས་ཐམས་ཅད་ནི་ལས་ཀྱི་བགོ་སྐལ་ལ་སྤྱོད་པ། ལས་ཀྱི་སྐྱེ་གནས་པ་ལས་བདག་གིར་བྱེད་པར་གྱུར་པས་ཇི་ལྟར་ལས་བྱས་པར་གྱུར་པ་དགེ་བའམ་སྡིག་པ་ཅན་ཡང་རུང་སྟེ་ལས་དེ་དང་དེའི་སྐལ་བ་ཅན་དུ་འགྱུར་བ་ཡིན་ནོ། །ལེགས་པར་བྱས་པ་རྣམས་ཀྱིས་ནི་ལྷ་དང་མི་རྣམས་ཀྱི་ནང་དུའོ། །ཉེས་པར་བྱས་པ་རྣམས་ཀྱིས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དགེ་སྦྱོང་དང་བྲམ་ཟེའམ་གཞན་ཡང་དེའི་རིགས་ཅན་དེ་དག་རྣམས་ཀྱིས་དེ་ལྟར་སྒོམ་པར་བྱེད་པ་ན། དེའི་ཚེ་འདིའི་སེམས་ཅན་གྱི་དབང་དུ་བྱས་པའི་སེམས་རབ་ཏུ་དང་བར་གྱུར་པས་བཞིན་གྱི་ཁ་དོག་རབ་ཏུ་དང་བར་འགྱུར་རོ། །བཞིན་གྱི་མདོག་རབ་ཏུ་དང་བར་གྱུར་པས་ཀྱང་སེམས་ཅན་རྣམས་ཐམས་ཅད་

71-73b

ཀྱི་འདོད་པ་སྡུག་པ་ཡིད་དུ་འོང་བར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་པ་ལྷ་རྣམས་སུ་སྐྱེ་བར་འགྱུར་ལ། ཐ་མར་ཡང་ཡོངས་སུ་མྱ་ངན་ལས་འདའ་བ་ཡིན་ནོ། །དེའི་སེམས་རབ་ཏུ་དང་བར་གྱུར་པ་དང་། སེམས་ཅན་རྣམས་ཐམས་ཅད་ལ་མཉམ་པ་ཉིད་དུ་གྱུར་པའི་དགེ་སྦྱོང་དང་བྲམ་ཟེ་དག་རྣམས་ཀྱི་ཡང་འབྲས་བུ་དེ་ལྟ་བུར་འགྱུར་བ་ཡིན་ནོ། །ཡང་རིམ་པ་གཞན་གྱིས་དགེ་སྦྱོང་ངམ་བྲམ་ཟེ་རྣམས་ཀྱང་སེམས་ཅན་རྣམས་ཐམས་ཅད་ལ་མཉམ་པ་ཉིད་སྒོམ་པར་བྱེད་དོ། །གང་ཞེ་ན་འདི་ལྟ་སྟེ། སེམས་ཅན་རྣམས་ཐམས་ཅད་ལ་ཡང་སེམས་ཅན་རྣམས་ཐམས་ཅད་ནི་སྡུག་པ་དང་ཡིད་དུ་འོང་བ་རྣམས་དང་ཐ་དད་དུ་འབྲལ་བར་འགྱུར་རོ། །མེད་པར་འགྱུར་རོ། །རྣམ་པར་འཐོར་བར་འགྱུར་རོ། །རྣམ་པར་འབྲལ་བར་འགྱུར་རོ། །སོ་སོར་འབྱུང་བར་འགྱུར་རོ། །འཁོར་བར་གཏོགས་པའི་སེམས་ཅན་རྣམས་ཐམས་ཅད་ལ་ཡང་སྡུག་པ་ཡིད་དུ་འོང་བ་འདོད་པ་རྣམས་ཐམས་ཅད་དང་ཡང་ལྷན་ཅིག་ཏུ་བྲལ་བར་མ་གྱུར་ཅིང་འབྲལ་བར་མི་འགྱུར་བ་རྣམས་ནི་འདི་ན་འགའ་ཞིག་ཀྱང་ཡོད་པ་མ་ཡིན་ནོ། །སྡུག་པ་རྣམས་དང་རབ་ཏུ་རྣམ་པར་བྲལ་བ་ནི་ཤིན་ཏུ་ཡང་སྡུག་བསྔལ་བ་ཡིན་ནོ། །དེ་དེ་ལྟར་སྒོམ་པར་བྱེད་པས་སེམས་རབ་ཏུ་དང་བར་འགྱུར་ཞིང་སེམས་ཀུན་ནས་རབ་ཏུ་དང་བས་གདོང་གི་མདངས་གསལ་བར་འགྱུར་རོ། །དེའི་བཞིན་གྱི་མདངས་གསལ་བར་གྱུར་པས་ཀྱང་མངོན་པར་དགའ་བའི་གཟུགས་སུ་འགྱུར་རོ། །དེའི་གཟུགས་བཟང་བས་སྐྱེ་བོ་རྣམས་ཐམས་ཅད་རབ་ཏུ་དང་བར་འགྱུར་རོ། །འདོད་པ་དང་སྡུག་པ་དང་ཡིད་དུ་འོང་བར་ཡང་འགྱུར་རོ། །དེ་སེམས་ཅན་རྣམས་ཐམས་ཅད་ལ་མཉམ་པ་ཉིད་ཀྱི་མཐུ་སྟོབས་ཀྱི་མཐོང་བའི་ཆོས་ཀྱི་འབྲས་བུ་ནི་འདི་དག་ཡིན་ནོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་དུ་ལྷ་རྣམས་སུ་སྐྱེ་བར་འགྱུར་རོ། །ལས་ཀྱི་ལྷག་མ་རྣམས་ཀྱིས་ཀྱང་ཡོངས་སུ་མྱ་ངན་ལས་འདའ་བར་འགྱུར་རོ། །ཡང་རྣམ་གྲངས་གཞན་གྱིས་ཀྱང་དགེ་སྦྱོང་ངམ་བྲམ་ཟེ་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་བསྒོམ་པར་བྱ་བ་ཡིན་ནོ། །

71-74a

གང་དག་ཞེ་ན་འདི་ལྟ་སྟེ། གང་གི་ཕྱིར་ཡང་མོར་མྱུར་དུ་འཇུག་པའི་ཕྱིར་ན་སེམས་ནི་ཀུན་ཏུ་གནས་པ་མེད་པ་ཡིན་པས་དགེ་སྦྱོང་དང་བྲམ་ཟེ་དེ་དག་རྣམས་ཡང་གལ་ཏེ་འདོད་ཆགས་དང་བཅས་པར་གྱུར་པའི་སེམས་སྐྱེས་པར་གྱུར་ན་དེས་མི་སྡུག་པ་སྒོམ་པར་བྱེད་དོ། །གལ་ཏེ་ཞེ་སྡང་དང་བཅས་པར་གྱུར་ན་དེས་བྱམས་པ་སྒོམ་པར་བྱེད་དོ། །གལ་ཏེ་གཏི་མུག་དང་བཅས་པའི་སེམས་སྐྱེས་པར་གྱུར་ན། དེས་རྟེན་ཅིང་འབྲེལ་པར་འབྱུང་བ་རྣམས་སྒོམ་པར་བྱེད་དོ། །དེ་དེ་ལྟར་སེམས་ཀྱི་གཉེན་པོར་གྱུར་པའི་གཉེན་པོ་གསུམ་པོ་རྣམས་སེམས་པར་བྱེད་པས་སེམས་ཅན་ཐམས་ཅད་ལ་མཉམ་པ་ཉིད་དུ་འགྱུར་རོ། །དེ་ནི་གྲོགས་པོ་དང་དགྲ་བོ་རྣམས་དང་རབ་ཏུ་བྲལ་བ་དང་མཉམ་པ་དང་ཡང་བ་དང་རབ་ཏུ་དང་བའི་བློ་གྲོས་ཅན་ཐམས་ཅད་དུ་དོགས་པ་མེད་པར་འགྲོ་ཞིང་རྣམ་པར་རྒྱུ་བ་དང་། མཆོག་ཏུ་རྣམ་པར་དག་པ་བདེ་བར་གནས་པ་ཡིན་ནོ། །བདེ་བར་མཚན་མོ་ཉལ་བར་འགྱུར་བ་དང་། བདེ་བར་ཡང་ཉིན་མོ་རབ་ཏུ་སད་པར་འགྱུར་ལ། ལྷ་རྣམས་ཀྱིས་ཀྱང་འདི་དག་ལ་མངོན་པར་སྲུང་བར་བྱེད་དོ། །དེ་ནི་དབང་ཆེ་བར་ཡང་འགྱུར་རོ། །མཐུ་སྟོབས་ཆེ་བར་ཡང་འགྱུར་རོ། །དེ་དེ་ལྟར་རབ་ཏུ་ཡིད་རབ་ཏུ་དང་བས་ཁྲག་རབ་ཏུ་དང་བར་འགྱུར་རོ། །ཁྲག་རབ་ཏུ་དང་བས་བཞིན་གྱི་མདོག་རབ་ཏུ་དང་ངོ་། །དེའི་མདོག་རབ་ཏུ་དང་བས་བལྟ་ན་མཛེས་པའི་གཟུགས་སུ་འགྱུར་རོ། །རབ་ཏུ་མཛེས་པ་དང་སྐྱེ་བོ་རྣམས་ཐམས་ཅད་ལ་འདོད་པ་དང་སྡུག་པ་དང་འཐུན་པ་དང་ཡིད་དུ་འོང་བར་ཡང་འགྱུར་རོ། །དེ་སེམས་ཅན་ཐམས་ཅད་ལ་མཉམ་པ་ཉིད་དུ་གྱུར་པའི་ལས་ཀྱི་འབྲས་བུ་རྣམ་པར་སྨིན་པས་ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་སུ་སྐྱེ་བར་འགྱུར་རོ། །ཀུན་ཏུ་ལྷག་པར་གྱུར་པའི་ལས་ཀྱིས་ཀྱང་ཇི་ལྟར་མོས་པ་བཞིན་དུ་ཡོངས་སུ་མྱ་ངན་ལས་འདའ་བར་འགྱུར་རོ། །དེ་ནས་དེའི་ཚེ་རྨ་བྱའི་རྒྱལ་པོ་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། གྲོགས་དང་གྲོགས་མིན་ཐམས་ཅད་ལ། །གང་བློ་ཀུན་ཏུ་ཆགས་མེད་པར། །ཕྱོགས་འཛིན་མེད་པར་ཆོས་ཤེས་

71-74b

པའི། །ཤེས་ལྡན་ཐུབ་པར་བརྗོད་པ་ཡིན། །སྐྱོན་གྱི་འདམ་གྱིས་ཡིད་གང་ལ། །ནམ་ཡང་གོས་པ་མེད་པ་དང་། །གཅིག་པུར་རྒྱུ་བར་དགའ་བ་དང་། །གང་དག་ཆགས་བྲལ་ཐུབ་པར་བརྗོད། །ང་ཡིར་མེད་དང་སྤྱོད་དྲི་མེད། །རྙོག་པའི་དྲི་མ་ཀུན་དང་བྲལ། །ཡུལ་རྣམས་ཉོན་མོངས་ཐམས་ཅད་ཀྱིས། །ཀུན་ཏུ་ཕྲོགས་མེད་ཐུབ་པར་བརྗོད། །མི་རྟག་ལ་སོགས་བདེན་པ་ནི། །ཇི་ལྟ་བཞིན་དུ་རྗེས་སུ་མཐོང་། །འཇིག་རྟེན་འཇིག་རྟེན་མུན་ཉིད་ཀྱང་། །བརྟན་པ་དེ་ནི་ཐུབ་པར་བརྗོད། །འཇིག་རྟེན་ཆོས་ཀྱིས་ནམ་ཡང་ནི། །རྗེས་སུ་སྐྱོ་བར་འགྱུར་མ་ཡིན། །བདེ་སྡུག་མཚུངས་པའི་ཤེས་རབ་ནི། །དྲི་མེད་ཐུབ་པར་བརྗོད་པ་ཡིན། །རྟག་ཏུ་ཀུན་དགའ་མཆོག་གིས་ནི། །རྟག་ཏུ་འདོད་པ་རྣམ་པར་སྤངས། །སྲེད་པ་མེད་དང་ཉུང་ངུས་འཚོ། །གཙང་བ་འདི་ནི་ཐུབ་པར་བརྗོད། །གང་དག་དེ་དང་འགྲོགས་པ་ཡིས། །གང་ལ་དེ་ལ་རྗེས་འགྲོ་མིན། །གཅིག་པུ་རྒྱུ་ཞིང་བློ་གྲོས་བརྟན། །བསྲུང་མཚམས་དང་ལྡན་ཐུབ་པར་བརྗོད། །འཇིགས་དང་རྒ་བ་ལས་རྣམ་གྲོལ། །སྲེད་པའི་ཤུགས་ཀྱིས་འཇོམས་མིན་གང་། །རབ་ཏུ་ཞི་བའི་དབང་དག་སེམས། །རོ་ལ་ཞེན་མེད་ཐུབ་པར་བརྗོད། །སེམས་ཅན་རྣམས་ལ་མཉམ་ཉིད་གང་། །མི་མཉམ་པ་ལ་རྟག་ཏུ་མཉམ། །ཐམས་ཅད་ལ་ནི་མཉམ་པ་ཉིད། །ཤེས་རབ་ལྡན་པ་ཐུབ་པར་བརྗོད། །དགེ་མི་དགེ་རྣམས་ཐམས་ཅད་ཀྱི། །ལས་དང་འབྲས་བུའི་དེ་ཉིད་རིག །དགེ་དང་མི་དགེ་ཡོངས་སྤངས་པའི། །འཇིག་རྟེན་འདི་ནི་ཐུབ་པར་བརྗོད། །ཤིན་ཏུ་སྐྱོན་རྣམས་འཇོམས་ལ་བརྩོན། །རྟག་ཏུ་ལུས་གཏོགས་པ་ཡི་དྲན། །ཚོར་བ་ལ་སོགས་དེ་ཉིད་ཤེས། །ཤེས་རབ་ལྡན་པ་ཐུབ་པར་བརྗོད། །ཡུལ་དུས་བྱ་བར་རྩོམ་པ་དང་། །རིགས་པ་སྨྲ་ཞིང་དབང་པོ་དུལ། །འཁོར་བའི་འཇིགས་པས་འཇིགས་པ་ཡི། །རབ་ཞི་གང་ཡིན་ཐུབ་པར་བརྗོད། །དེ་ལྟར་རྨ་བྱའི་མངའ་བདག་དེས་དགའ་ལྡན་པ་དེ་དག་རྣམས་དང་འཐབ་བྲལ་བ་དེ་དག་རྣམས་ལ་རྣམ་པ་དུ་མར་ཆོས་སྟོན་པར་བྱེད་དོ། །དེ་ལ་དེ་དག་རྣམས་ཐམས་ཅད་ཀྱང་ཡིད་ཤིན་ཏུ་མཉམ་པར་བཞག་པ་ཡིན་ཏེ།

71-75a

ཐམས་ཅད་དུ་ཡུལ་གྱི་བདེ་བ་དེ་དག་རྣམས་ཐོབ་ཀྱང་གཅིག་ཏུ་དགེ་བའི་ཆོས་ཀྱི་བཏུང་བས་ཡིད་ངོམས་པར་གྱུར་པ་ཡིན་ནོ། །དེ་ནས་ལྷ་དེ་དག་རྣམས་ཀྱི་ཡིད་ཞུ་བར་གྱུར་པ་ཉེ་བར་རྙེད་པ་དང་། གཞན་ཡང་རྨ་བྱའི་རྒྱལ་པོ་དེ་གཙུག་ལག་གི་ཆོས་ཉིད་སྟོན་པར་བྱེད་པ་ལ་ཇི་ལྟར་ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པར་གྱུར་པའི་དགེ་སྦྱོང་ངམ་བྲམ་ཟེའམ་དེ་ལྟ་བུའི་རིགས་ཅན་གཞན་རྣམས་ཀྱིས་ཀྱང་ཡིད་ལ་བྱའོ། །བྱས་ནས་ཀྱང་ཀུན་ཏུ་སྤྱད་པར་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ་ཆོག་ཤེས་པའོ། །ཆོག་ཤེས་པ་ཞེས་བྱ་བའི་ཆོས་ནི་མཆོག་ཏུ་གཅེས་པར་བྱ་བ་ཡིན་ཏེ་བདེ་བར་བྱེད་པ་ཡང་ཡིན་ནོ། །ལུས་དང་སེམས་ཐམས་ཅད་ཚིམ་པར་ཡང་འགྱུར་རོ། །ཆོག་ཤེས་པའི་གྲོགས་པོ་དང་ལྡན་པ་དང་ཆོག་ཤེས་པའི་དཔུང་གཉེན་དང་ལྡན་པའི་དགེ་སྦྱོང་དང་བྲམ་ཟེ་རྣམས་ནི་མཆོག་ཏུ་གྱུར་པའི་བདེ་བ་རྣམས་ལ་ལོངས་སྤྱོད་དོ། །ཐམས་ཅད་དུ་ཡང་ཐམས་ཅད་ཀྱིས་ཆོག་ཤེས་པ་དེ་དག་རྣམས་ཐམས་ཅད་ནི་བདེ་བའི་མཆོག་རྣམས་ལ་ཉེ་བར་ལོངས་སྤྱོད་པར་བྱེད་པ་ཡིན་ནོ། །འདོད་པ་སྡུག་པ་ཡིད་དུ་འོང་བའི་གཟུགས་དུ་མ་རྣམས་ལ་མིག་གིས་མངོན་པར་ཞེན་པར་མི་བྱེད་དོ། །དོན་དུ་གཉེར་བར་ཡང་མི་བྱེད་ཅིང་ཀུན་ཏུ་རྟོག་པར་ཡང་མི་བྱེད་དོ། །མིག་གི་ཡུལ་དུ་གྱུར་པའི་གཟུགས་དེ་དག་རྣམས་ལ་ཀུན་ཏུ་རྟོག་པར་མི་བྱེད་དོ། །སེམས་ཀྱིས་བསམས་ཏེ་སྨོན་པར་མི་བྱེད་དོ། །ཕྱིར་ཞིང་དོན་དུ་གཉེར་བར་མི་བྱེད་དོ། །འདོད་པ་སྡུག་པ་དང་ཡིད་དུ་འོང་བར་གྱུར་པའི་འདས་པའི་གཟུགས་དེ་དག་རྣམས་ལ་ཀུན་ཏུ་རྟོག་པར་མི་བྱེད་དོ། །དེས་བྱས་པའི་འདུན་པའི་འདོད་ཆགས་སྐྱེད་པར་མི་བྱེད་དོ། །དེ་ཉིད་ལ་དྲན་པར་བྱས་ནས་སྨོན་པར་མི་བྱེད་དོ། །རྣམ་པར་འཕེལ་བར་འཆེལ་བར་མི་བྱེད་དོ། །བདག་ཉིད་རང་གིས་བདག་ཉིད་མཆོག་ཏུ་དགའ་བར་བྱེད་པའི་དགེ་སྦྱོང་ངམ་བྲམ་ཟེ་རྣམས་ནི་རྟག་པ་ཉིད་དུ་ཡང་སྐྱིད་པར་འགྱུར་རོ། །དེ་བཞིན་དུ་རྣ་བས་འདོད་པ་སྡུག་པ་ཡིད་དུ་འོང་བའི་སྒྲ་རྣམས་ཐོས་པར་གྱུར་པ་ན་ཀུན་ཏུ་རྟོག་པར་མི་བྱེད་དོ། །ཡིད་ཀྱིས་རབ་ཏུ་སྨོན་པར་མི་བྱེད་དོ། །འདས་

71-75b

པའི་ཡུལ་དེ་དག་རྣམས་ལ་འདུན་པའི་འདོད་ཆགས་སྐྱེད་པར་མི་འགྱུར་རོ། །ཀུན་ཏུ་རྟོག་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་གྱུར་པས་སྒྲ་རྣམས་ལ་སོ་སོར་རྟོག་པར་ཡང་བྱེད་དོ། །སྒྲ་འདི་དག་ནི་རྟག་པ་མ་ཡིན། བདེ་བ་མ་ཡིན། བདག་དང་བཅས་པ་མ་ཡིན་གྱི། ཀུན་ཏུ་རྟོག་པ་འབའ་ཞིག་གིས་བཅོམ་པར་གྱུར་པའི་བྱིས་པའི་སྲོག་ཆགས་རྣམས་ཀྱིས་ཇི་ལྟར་བདེ་བར་ཀུན་ནས་སྒྱུར་བར་བྱེད་པ་པོར་དེ་ལྟར་ཡོངས་སུ་བརྟགས་ཤིང་ཞེན་པ་རྣམས་ལ་སྒྲ་རྣམས་རྣ་བའི་ཡུལ་དུ་འགྱུར་བས་སེམས་ཀུན་ནས་དཀྲུག་པར་བྱེད་པ་ཡིན་ནོ། །དེ་ལ་ཇི་ལྟ་བ་བཞིན་དུ་རྣམ་པ་དུ་མར་ཚུལ་བཞིན་ཡིད་ལ་བྱེད་པས་ཡང་དག་པ་ཇི་ལྟ་བ་བཞིན་དུ་མཐོང་བས་འདིས་ཇི་ལྟ་བ་བཞིན་དུ་ཀུན་དགའ་བར་བྱེད་པ་ན། སྒྲ་དེ་དག་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། ཇི་ལྟར་སྒྲ་འདི་ནི་ཆང་པ་སྟོང་པ་དང་རྒྱུན་འཆད་པ་དང་སྙིང་པོ་མེད་པ་ཡིན་ཏེ། འདི་ནི་སྙིང་པོ་ཅུང་ཟད་ཅིག་ཀྱང་ཡོད་པ་ནི་མ་ཡིན་གྱི། འཁོར་བར་རྟོག་པ་འབའ་ཞིག་གིས་ཀུན་ཏུ་ཕྲོགས་པའི་བྱིས་པ་སོ་སོའི་སྐྱེ་བོ་རྣམས་ཡིན་ནོ། །དེ་གང་གི་ཚེ་སྒྲ་དེ་ཉིད་ལ་ཀུན་ཏུ་ལྟ་བར་བྱེད་པ་ན། དེའི་ཚེ་ཐམས་ཅད་ཀྱང་སྙན་པ་འདོད་པ་སྡུག་པ་ཡིད་དུ་འོང་བར་གྱུར་པའི་ཁྱད་པར་ཐམས་ཅད་དང་ལྡན་པའི་སྒྲ་རྣམས་ཐམས་ཅད་ཀྱིས་ཀྱང་ཕྲོགས་པར་མི་འགྱུར་རོ། །ཆོག་ཤེས་པ་དེས་ནི་བདེ་བའི་མཆོག་རྣམས་ཐོབ་པར་འགྱུར་རོ། །གཞན་ཡང་དགེ་སྦྱོང་ངམ་བྲམ་ཟེ་རྣམས་དང་དེའི་རིགས་ཅན་གཞན་རྣམས་ཀྱིས་ཀྱང་སྣས་དྲི་རྣམས་སྣོམ་པར་མི་བྱེད་ཅིང་ཀུན་ཏུ་རྟོག་པར་ཡང་མི་བྱེད་དོ། །ཡིད་ཀྱིས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པས་སེམས་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་སྣས་དྲི་འདི་དག་རྣམས་སྣོམ་པར་བྱེད་པ་རྣམས་ཀྱིས་ནི་ཡང་དག་པ་ཇི་ལྟ་བར་མཐོང་བར་བྱེད་པ་ཡིན་ཏེ། ཇི་ལྟར་དྲི་འདི་དག་རྣམས་ནི་རྟག་པའམ་བརྟན་པའམ། ཐེར་ཟུག་གམ་རྣམ་པར་མི་འགྱུར་བའི་ཆོས་ཅན་ནི་མ་ཡིན་གྱི་དྲི་གང་ལ་ཀུན་ཏུ་ཆགས་པར་བྱེད་པ་དང་། དེས་རྨོངས་པར་བྱེད་པ་དང་ཚུལ་བཞིན་མ་ཡིན་པའི་ཡིད་ལ་བྱེད་པས་སེམས་ཀྱི་རྒྱུན་དཀྲུགས་པ་དྲི་ལ་ཆགས་པ་གང་ཡིན་པ་རྣམས་ནི། མི་

71-76a

རྟག་པ་དང་འདི་དག་ནི་སྙིང་པོ་མེད་པ་དང་གསོག་དང་གསོབ་ཡིན་ནོ། །དེ་ལྟར་ཆོག་ཤེས་པར་གྱུར་པའི་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ནི་ཤིན་ཏུ་ཆོག་ཤེས་པར་གྱུར་པ་ཡིན་ནོ། །དེ་ནི་སྣའི་སྲེད་པ་དེ་དག་གིས་ཀུན་ཏུ་མི་ཕྲོགས་སོ། །དེ་ཇི་ལྟ་ཇི་ལྟར་རྗེས་སུ་ལྟ་བར་བྱེད་པ་དེ་ལྟ་དེ་ལྟར་ཆེས་བདེ་བར་འགྱུར་ཏེ། ཆོག་ཤེས་པ་དེ་མཆོག་ཏུ་རྣམ་པར་དག་པར་གྱུར་པ་བསྟེན་ཅིང་བསྒོམས་ལ། ལན་མང་དུ་བྱས་པའི་ཕྱིར་མཆོག་ཏུ་བདེ་བར་འགྱུར་རོ། །གཞན་ཡང་དགེ་སྦྱོང་དེ་ཉིད་དམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་ལྕེས་རོ་མྱངས་པར་གྱུར་ནས་ཀུན་ཏུ་ཆགས་པར་མི་འགྱུར་རོ། །ཀུན་ཏུ་རྟོག་པར་ཡང་མི་བྱེད་དོ། །སྔོན་གྱི་དུས་སུ་མྱངས་པར་གྱུར་པའི་རོ་སྔ་མ་དག་རྗེས་སུ་དྲན་པར་མི་བྱེད་དོ། །ཚུལ་བཞིན་མ་ཡིན་པ་ཡིད་ལ་བྱེད་པས་ཀྱང་སེམས་པར་མི་བྱེད་དོ། །ཕྱིར་ཞིང་ཡང་དང་ཡང་དུ་རོ་དེ་ཉིད་མྱང་བ་ལ་དོན་དུ་གཉེར་བར་མི་བྱེད་དོ། །ཆོག་ཤེས་པ་ཉིད་ཀྱིས་ཀུན་ཏུ་བདེ་བར་འགྱུར་རོ། །ཆོག་མི་ཤེས་པ་ཉིད་ཀྱིས་ཀུན་ཏུ་འཁྲིད་པར་མི་འགྱུར་རོ། །དེ་ལ་ནང་དུ་མངོན་པར་ཞེན་པར་མི་བྱེད་དོ། །ཡང་དག་པ་ཇི་ལྟ་བར་ཡང་རོ་དེ་ཡིད་ཀྱིས་རྟོག་པར་བྱེད་དེ། ཇི་ལྟར་རོ་འདི་དག་རང་བཞིན་གྱིས་སྙིང་པོ་འམ་བརྟན་པའམ། ཐེར་ཟུག་གམ་རྣམ་པར་མི་འགྱུར་བའི་ཆོས་ཅན་ནི་མ་ཡིན་གྱི། འདི་ནི་ཀུན་ཏུ་རྟོག་པའི་འདོད་ཆགས་ཀྱིས་ཕྲོགས་པ་འབའ་ཞིག་གི་སེམས་ཅན་རྣམས་ཀྱིས། ཇི་ལྟར་རོ་ནི་མཛེས་པ་ཁོ་ནའོ་ཞེས་རྟོགས་པར་ཟད་དེ། གང་གི་ཚེ་ཡང་དག་པ་ཇི་ལྟ་བ་བཞིན་ཏུ་རོ་དེ་དག་ལ་སོ་སོར་རྟོག་པར་བྱེད་པ་ན། དེའི་ཚེ་རོ་དེ་རྣམས་ལ་ཆགས་པར་མི་འགྱུར་རོ། །རྙོག་པ་ཅན་དུ་མི་འགྱུར་ཞིང་འདིའི་ཡིད་ཀྱིས་རོའི་སྲེད་པ་ལས་བྱུང་བས་རོ་རྣམས་ལ་མྱོང་བར་མི་བྱེད་དོ། །ཆོག་ཤེས་པ་ཉིད་ཀྱིས་དགའ་བར་འགྱུར་རོ། །དེ་ནི་རོས་ཀུན་ཏུ་འཁྲིད་པར་འགྱུར་བ་ཉིད་ཀྱང་མ་ཡིན་ནོ། །གཞན་ཡང་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་རེག་བྱ་ལ་རེག་པར་གྱུར་པ་ན་ཀུན་དགའ་བས་ཆོག་ཤེས་པ་དྲན་པ་དང་ལྡན་པ་རྣམས་རེག་བྱ་ལ་རེག་པར་གྱུར་ནས་ཡང་དག་པ་ཇི་ལྟ་བ་

71-76b

བཞིན་དུ་ཀུན་ཏུ་ལྟ་བར་བྱེད་པ་ན། ཇི་ལྟར་རེག་བྱ་འདི་དག་རྣམས་རང་བཞིན་ཉིད་ཀྱིས་རྟག་པའམ་བརྟན་པའམ། ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་གསོག་གསོབ་སྙིང་པོ་མེད་པ་ཡིན་ཏེ། རེག་བྱ་འདི་དག་ནི་བྱུང་ནས་མེད་པར་འགྱུར་བ་དང་། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེས་ཡང་དག་པ་ཇི་ལྟ་བ་བཞིན་དུ་རེག་བྱ་འདི་དག་རྣམས་ལ་ལྟ་བར་བྱེད་དོ། །རྣམ་པར་རྟོག་པར་མི་བྱེད་དོ། །འདས་པའི་རེག་བྱ་རྣམས་ལ་དྲན་པས་རྗེས་སུ་འབྲེལ་བར་མི་བྱེད་དོ། །སྲེད་པ་རྣམས་སྐྱེད་པར་མི་བྱེད་ཅིང་རེག་བྱ་དེ་དག་རྣམས་ལ་ཆགས་པར་ཡང་མི་བྱེད་དོ། །ཕྱིར་ཞིང་ཡང་དང་ཡང་དུ་རེག་བྱ་གཞན་རྣམས་དོན་དུ་གཉེར་བར་མི་བྱེད་དོ། །ཅི་ཡང་རུང་བའི་རེག་བྱ་དེ་དག་གིས་ཀྱང་ཆོག་ཤེས་པར་ཡང་འགྱུར་རོ། །ཇི་ལྟ་བ་བཞིན་དུ་འདུན་པའི་འདོད་ཆགས་དང་རྣམ་པར་བྲལ་བའི་རེག་བྱ་དག་གིས་ཆོག་ཤེས་པར་བྱེད་དོ། །འདི་ནི་རེག་བྱས་ཆོག་ཤེས་པ་ཞེས་བྱ་བར་ཡང་བརྗོད་དོ། །གཞན་ཡང་དགེ་སྦྱོང་ངམ་བྲམ་ཟེའམ་དེ་དག་གི་རིགས་ཅན་གཞན་རྣམས་ཀྱིས་ཀྱང་ཡིད་ཀྱིས་ཆོས་འདོད་པ་རྣམས་དང་མི་འདོད་པ་རྣམས་དཔྱད་པར་གྱུར་ནས་ཡང་དག་པ་ཇི་ལྟ་བ་བཞིན་དུ་རྗེས་སུ་ལྟའོ། །ཆོས་འདི་དག་ནི་རྟག་པའམ་བརྟན་པའམ། ཐེར་ཟུག་གམ་ཡོངས་སུ་མི་འགྱུར་བའི་ཆོས་ཅན་ནི་མ་ཡིན་གྱི། འདི་དག་རྣམས་ནི་སྟོང་པ་དང་མེད་པ་དང་སྙིང་པོ་མེད་པ་ཡིན་ནོ། །འདི་དག་ནི་མི་རྟག་པ་དང་སྡུག་བསྔལ་བ་དང་སྟོང་པ་དང་བདག་མེད་པ་ཡིན་ཏེ། མེད་པར་གྱུར་ནས་ཀྱང་འབྱུང་བར་འགྱུར་ལ། བྱུང་ནས་ཀྱང་ཕྱིར་ལྡོག་པར་འགྱུར་བ་ཡིན་ནོ། །དེ་དག་རྣམས་ཐམས་ཅད་ཀྱང་རྣམ་པར་ཉམས་པར་འགྱུར་བའི་ཆོས་ཅན་གྱི་འདོད་པ་དང་མི་འདོད་པའི་ཆོས་དེ་དག་རྣམས་བསམས་ནས་ཀུན་ཏུ་དགའ་བའི་མཆོག་ཏུ་གྱུར་པས་མི་འདོད་པ་རྣམས་ཀྱིས་རྣམ་པར་ཉམས་པར་མི་འགྱུར་ཞིང་། འདོད་པ་རྣམས་ལ་ཆགས་པར་ཡང་མི་འགྱུར་རོ། །འདས་པ་རྣམས་ལ་ཡང་དྲན་པར་གྱུར་ནས་རྗེས་སུ་འབྲེལ་བར་མི་བྱེད་དོ། །འདས་པ་རྣམས་ཀྱི་རོ་མྱོང་བར་ཡང་མི་བྱེད་དོ། །དེ་ལྟར་ཡིད་ཀྱིས་ཆོས་རྣམས་ལ་ཚུལ་བཞིན་

71-77a

དུ་ཡིད་ལ་བྱེད་པས་མངོན་པར་ཞེན་པར་མི་བྱེད་དོ། །ཆོས་རྣམས་ཐམས་ཅད་ཀྱང་ཡིད་ཀྱིས་རོ་མྱོང་བར་མི་བྱེད་དོ། །སྲེད་པ་རྣམས་ཀྱིས་ཀྱང་ཕྲོགས་པར་མི་འགྱུར་རོ། །དེ་ལྟར་སྲེད་པ་དྲུག་གི་ཚོགས་རྣམས་ལས་ཀུན་ནས་རྣམ་པར་གྲོལ་བའི་དགེ་སྦྱོང་ངམ་བྲམ་ཟེའམ་དེ་དག་དང་རིགས་འདྲ་བར་གྱུར་པ་རྣམས་ཀྱང་ཆོག་ཤེས་པ་ཡིན་ནོ། །དེ་ནས་དུས་དེའི་ཚེ་ན་རྨ་བྱའི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། སྲེད་པ་དྲུག་གི་ཡུལ་གྲོལ་བའི། །ཆོག་ཤེས་པ་ཡང་སྐྱོབ་པ་ཡིན། །སྤྲོ་མེད་རོ་ལ་ཞེན་མེད་པའི། །མཐར་ཐུག་པ་ཡི་བདེ་བར་འདོད། །དེ་ལྟར་གྱུར་པའི་གཟུགས་ལ་ནི། །གང་གིས་མཉམ་པར་བཞག་ལྟ་བ། །གཟུགས་ཀྱི་རང་བཞིན་སྲེད་པ་རྣམས། །དེ་ཡི་སེམས་ལ་རབ་འཇུག་མིན། །རྣ་བས་སྒྲ་རྣམས་ལ་རེག་ནས། །ཡིད་ནི་རབ་ཏུ་སྦྱོར་མི་བྱེད། །དེ་ཡི་རྣ་བའི་རང་བཞིན་གྱིས། །འདོད་ཆགས་སྙིང་ཉིད་ལ་རྒྱུག་མིན། །སྣ་ནི་ཡུལ་དང་ཡང་དག་ལྡན། །གང་ཕྱིར་དེ་ཁོ་ནར་རིག་པ། །གང་ཕྱིར་དེ་ཡི་ཡིད་ཀྱང་ནི། །སྣ་ཡང་སྐྱོན་གྱིས་འཆིང་བ་མིན། །བརྟན་པར་རོ་རྣམས་མྱངས་ནས་ཀྱང་། །ཡང་དག་པར་དེ་རྗེས་སུ་རྟོགས། །དེ་ཡི་ཡིད་ཀྱི་ཁང་པར་ནི། །རོ་སྐྱེས་སྐྱོན་གྱིས་ཉམས་མི་བྱེད། །རྣམ་པ་སྣ་ཚོགས་རེག་བྱ་རྣམས། །ལུས་ཀྱིས་རེག་ནས་རྨོངས་མི་འགྱུར། །རེག་བྱའི་ཐབས་བླག་ཤེས་པ་དེའི། །བདེ་བ་མཐའ་ནི་ཡས་པར་འགྱུར། །འཐུན་དང་མི་འཐུན་ཡིད་གང་ལ། །འགའ་ཞིག་ཆོས་རྣམས་ལ་བཟོད་པ། །རབ་ཏུ་བརྟན་པ་བྲག་འདྲ་བར། །དེ་ཡི་ཡིད་ནི་ཡོངས་སུ་བསྒྲགས། །ཞེས་བྱ་བའོ། །དེ་ལྟར་དགེ་སྦྱོང་དང་བྲམ་ཟེ་ཡང་སྲེད་པ་ལས་ཀུན་ནས་རྣམ་པར་གྲོལ་བ་དེ་དག་རྣམས་ནི་ཆོག་ཤེས་པར་ཡོངས་སུ་བསྒྲགས་པ་ཡིན་ནོ། །དེ་ལྟ་དེ་ལྟར་རྨ་བྱའི་མངའ་བདག་དེ་ཉིད་ཀྱིས་འཐབ་བྲལ་བ་དེ་དག་དང་དགའ་ལྡན་པ་དེ་རྣམས་ལ་གཙུག་ལག་གི་ཆོས་རྣམས་སྟོན་པར་བྱེད་དོ། །ཆོས་གཞན་ཡང་ཐེག་པ་ཆེན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེ་རྣམས་ཀྱིས་ཀྱང་ཡིད་ལ་བྱའོ། །འདི་དག་ཀྱང་གང་ཞེ་ན། འདི་ལྟ་སྟེ། ཡུལ་རྣམས་

71-77b

ལ་འཇིགས་པར་ལྟ་བ་ཞེས་བྱ་བའོ། །བདེ་བའི་མཆོག་རྣམས་འབྱུང་བར་བྱེད་པའོ། །དགེ་སྦྱོང་ངམ་བྲམ་ཟེ་རྣམས་ཡུལ་གང་ཡིན་པ་ལས་ཀྱང་བཞིན་གཞན་དུ་ལྟ་བར་བྱེད་དོ། །གང་གི་ཚེ་མིག་གིས་གཟུགས་རྣམས་རྗེས་སུ་མཐོང་བར་གྱུར་ན། དེའི་ཚེ་མིག་གི་རྣམ་པར་ཤེས་པ་སྐྱེས་པ་ལ་ཡིད་ཀྱི་རྣམ་པར་ཤེས་པས་ཉམས་སུ་མྱོང་བར་གྱུར་པ་ན་རྣམ་པར་འབྱེད་པར་བྱེད་དེ། ཇི་ལྟར་འདིར་འོངས་པའི་ཡུལ་འདི་ལ་ནི་འདུན་པའི་འདོད་ཆགས་ཀྱང་སྤང་བར་བྱའོ། །བདག་རབ་ཏུ་འཆིང་བར་བྱེད་པ་པོའི་ཡུལ་འདི་ལ་འདུན་པའི་འདོད་ཆགས་ལས་ཀུན་ཏུ་སྐྱེས་པའི་འཇིགས་པ་རྣམས་འབྱུང་བར་འགྱུར་བས། འདུན་པའི་འདོད་ཆགས་རབ་ཏུ་གཞོམ་པར་བྱའོ། །སྲེད་པ་རྣམས་ནི་བསྐམ་པར་བྱའོ། །ཚུལ་བཞིན་མ་ཡིན་པའི་ཡིད་ལ་ཡང་སྤང་བར་བྱའོ། །ཡུལ་མཐོང་བ་དང་ལྷན་ཅིག་ཉིད་དུ་ཇི་ལྟར་ཀུན་ཏུ་རྟོག་པ་སྐྱེས་པར་གྱུར་པས་དེ་ལྟར་ཡང་རྣམ་པར་ཤེས་པ་སྐྱེ་བ་ཡིན་ནོ། །དེ་ཡང་འདོད་ཆགས་དང་ལྷན་ཅིག་འགྲོགས་པར་གྱུར་པའམ། དེ་ཡང་ཞེ་སྡང་དང་ལྷན་ཅིག་ཏུ་འགྲོགས་པ་དེ་དག་འདིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཉོན་མོངས་པ་ཅན་གྱི་མཐར་ཐུག་པའི་ཡིད་ལ་བྱེད་པ་འདི་དག་བདག་ལ་སྐྱེས་ལ། དེ་དག་གིས་ཀྱང་བདག་ལ་ཕན་པ་མ་ཡིན་པ་རྣམས་འབྱུང་བར་འགྱུར་རོ། །འཇིག་རྟེན་འདི་དང་ཕ་རོལ་ཏུ་ཡང་བདེ་བར་མི་འགྱུར་ལ། ཉོན་མོངས་པས་ནི་བདག་གི་དོན་དུ་མི་འགྱུར་ཞིང་བདེ་བར་ཡང་མི་འགྱུར་རོ། །འདི་དག་རྣམས་ནི་སེམས་ཅན་ཐམས་ཅད་ཀྱི་འཆིང་བར་གྱུར་པ་ཡིན་ཏེ། དེ་ཡང་གང་གི་ཚེ་དགེ་སྦྱོང་ངམ་བྲམ་ཟེ་རྣམས་ཀྱིས་ཡུལ་རྣམས་དེ་ལྟར་ཡོངས་སུ་རྟོག་པར་བྱེད་པ་དེའི་ཚེ་འདིའི་སྙིང་ལ་འདུན་པའི་འདོད་ཆགས་ཀུན་ཏུ་སྐྱེས་པར་གྱུར་པ་གང་ཡིན་པ་དེ་དག་རྣམས་ཐམས་ཅད་ཀྱི་ཐམས་ཅད་དུ་རབ་ཏུ་བྲལ་བར་འགྱུར་བའམ་བསྐྱུངས་པར་འགྱུར་རོ། །དེ་ཇི་ལྟ་བ་ཁོ་ནར་མིག་གིས་གཟུགས་རྣམས་ཡང་དག་པ་ཇི་ལྟ་བར་སོ་སོར་རྟོག་པར་བྱེད་པ་དེ་ཁོ་ན་བཞིན་དུ་རྣ་བའི་སྒྲ་རྣམས་སྐྱེས་པ་ཡང་སོ་སོར་རྟོག་པར་བྱེད་དེ། རྣ་བའི་རྣམ་པར་ཤེས་པ་འདི་སྐྱེས་པ་ནི་རྣ་བའི་རྐྱེན་དང་དེ་སྐྱེད་པ་ཡིད་ལ་

71-78a

བྱེད་པའི་རྐྱེན་གྱིས་བདེ་བར་ཀུན་ཏུ་ཚོར་བའམ། སྡུག་བསྔལ་གྱི་ཚོར་བའམ། དེ་ལས་སྐྱེས་པའི་རྣམ་པར་ཤེས་པའི་དབང་དུ་བྱས་པ་རྣམ་པ་དེ་ལྟ་བུའི་ཡིད་ལ་བྱེད་པ་རྣམས་བདག་ལས་སྐྱེས་སོ། །འདོད་ཆགས་ལྷག་པར་གྱུར་པའམ། ཞེ་སྡང་ལྷག་པར་གྱུར་པའམ། གཏི་མུག་ལྷག་པར་གྱུར་པ་ཡང་རུང་སྟེ། རྣམ་པར་ཤེས་པ་དེ་མར་མེའི་འོད་བཞིན་དུ་འདྲ་བར་གྱུར་པ་རྒྱུད་དང་ཀུན་ཏུ་འབྲེལ་བའི་རྣམ་པར་ཤེས་པ་གཞན་གྱིས་དེ་རྣམ་པར་ཤེས་པར་བྱེད་པ་ནི། ཇི་ལྟར་བདག་ལ་མི་དགེ་བའི་ཡིད་ལ་བྱེད་པ་འདི་སྐྱེས་སོ་ཞེས་དེས་ཡིད་ལ་བྱེད་པ་མི་དགེ་བ་དེ་དེ་ཉིད་དུ་མངོན་པར་ཤེས་སོ། །དེ་ཇི་ལྟ་བ་བཞིན་དུ་སོ་སོར་ཤེས་ཤིང་རྐྱེན་གྱིས་བྱུང་བའི་མི་དགེ་བ་རྣམས་སྤོང་བར་བྱེད་དོ། །དེ་གང་གི་ཚེ་མི་དགེ་བའི་ཆོས་རྣམས་ཡོངས་སུ་སྤོང་བར་བྱེད་པ་དེའི་ཚེ་ན་དགེ་བའི་ཆོས་གཞན་རྣམས་ཀྱིས་ཀྱང་ཡོངས་སུ་གང་བར་ཡང་འགྱུར་རོ། །འདིར་ཡང་དག་པ་ཇི་ལྟ་བ་བཞིན་དུ་ཡུལ་རྣམས་ལྟ་བར་བྱེད་པ་ན་ཡང་ཚུལ་བཞིན་ཡིད་ལ་བྱེད་པ་རྣམས་ནི་རབ་ཀྱི་སྟོབས་དང་ལྡན་པར་འགྱུར་ལ། ཚུལ་བཞིན་མ་ཡིན་པ་ཡིད་ལ་བྱེད་པ་རྣམས་ནི་མི་འབྱུང་བར་འགྱུར་རོ། །དགའ་བའི་འདོད་ཆགས་དང་ལྷན་ཅིག་འགྲོགས་པར་གྱུར་པ་འདིའི་སྲེད་པའི་ཡང་འབྱུང་བ་ཅན་གྱི་སྲེད་པ་དང་ལྡན་པར་མི་འགྱུར་རོ། །དེ་དེ་ཟད་པར་གྱུར་པས་རྣམ་པར་དག་པར་འགྱུར་རོ། །ཉོན་མོངས་པའི་རྙོག་པ་རྣམས་དང་བྲལ་བ་དང་། དེ་མི་དགེ་བའི་དྲི་མ་རྣམས་དང་བྲལ་བར་འགྱུར་ཞིང་ཐམས་ཅད་དུ་ཡང་བདེ་བར་འགྱུར་རོ། །དེ་དག་གི་ཕྱིར་ན་ཡང་དགེ་སྦྱོང་ངམ་བྲམ་ཟེའམ་གཞན་དག་རྣམས་ཀྱིས་ཀྱང་དང་པོ་ཁོ་ནར་ཡུལ་རྣམས་ལ་འདུན་པའི་འདོད་ཆགས་སྐྱེས་པར་གྱུར་པའི་མི་དགེ་བ་རྣམས་རབ་ཏུ་གཞོམ་པར་བྱའོ། །དགེ་བ་རྣམས་ཀྱང་རྟག་པར་མང་དུ་སོ་སོར་དཔྱད་པར་བྱའོ། །སྡིག་པ་མི་དགེ་བར་གྱུར་པའི་ཆོས་རྣམས་ཐམས་ཅད་ཀྱང་རབ་ཏུ་གཞོམ་པར་བྱའོ། །དེ་བཞིན་དུ་རྣ་བས་ཀྱང་སྒྲ་རྣམས་ཐོས་ནས་ཡང་དག་པ་ཇི་ལྟ་བ་ཁོ་ནར་དགེ་བའི་རྣམ་པར་ཤེས་པ་རྣམས་སོ་སོར་བསྐྱེད་པར་བྱའོ། །གཞན་ཡང་

71-78b

དགེ་སྦྱོང་ངམ་བྲམ་ཟེ་དང་དེ་དག་ཉིད་དང་དེའི་རིགས་ཅན་རྣམས་ཀྱིས་ཀྱང་སྣས་དྲི་རྣམས་བསྣམས་ནས་ཇི་ལྟར་ཤེས་པར་བྱེད་པ་ཡིན་ན། འདི་ན་སྣའི་རྐྱེན་དང་དྲིའི་རྐྱེན་ལས་ཀྱང་སྣའི་རྣམ་པར་ཤེས་པ་སྐྱེ་བར་འགྱུར་ལ། དེ་སྐྱེས་པའི་ཡིད་ལ་བྱེད་པའི་རྐྱེན་གྱིས་ཀྱང་གང་གི་ཚེ་མི་དགེ་བའི་ཡིད་ལ་བྱེད་པ་སྐྱེས་པར་གྱུར་པ་དེའི་ཚེ། དགེ་སྦྱོང་ངམ་བྲམ་ཟེ་འདི་དག་གིས་རྣམ་པར་ཤེས་པ་ཡིན་ཏེ། ཇི་ལྟར་མི་དགེ་བའི་ཆོས་སྡིག་པ་ཅན་འདི་དག་སྐྱེས་པར་གྱུར་ཏོ། །དེས་ཀྱང་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བ་མ་ཡིན་པ་འདི་དག་བདག་གིས་ཡོངས་སུ་སྤང་བར་བྱའོ། །དེ་གང་གི་ཚེ་མི་དགེ་བའི་ཡིད་ལ་བྱེད་པ་དེ་དག་རྣམས་ཡོངས་སུ་སྤོང་བར་བྱེད་པ་དེའི་ཚེ། འདི་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དོ། །དེའི་ཚེ་འདི་ལ་ཚུལ་བཞིན་ཡིད་ལ་བྱེད་པ་རྣམས་ལེགས་པར་སྐྱེ་བར་འགྱུར་རོ། །དེ་ཚུལ་དང་འཐུན་པའི་ཡིད་ལ་བྱེད་པ་དེ་དང་ཡང་དག་པར་ལྡན་པས་དགའ་བའི་འདོད་ཆགས་དང་ལྡན་པའི་སྲེད་པ་རྣམས་རབ་ཏུ་འཇོམས་པར་བྱེད་དོ། །དེ་སླར་ཡང་དྲི་དེ་ཉིད་ལ་སོ་སོར་རྟོག་པར་བྱེད་དེ། དེ་ལྟར་སོ་སོར་རྟོགས་པར་གྱུར་པ་ན་དེ་ཐམས་ཅད་དུ་དྲི་རྣམས་ཐམས་ཅད་ལ་མངོན་པར་ཆགས་པར་མི་འགྱུར་རོ། །དེ་རབ་ཏུ་བཅོམ་པ་ལས་ཀྱང་སྐྱིད་པར་འགྱུར་རོ། །དེ་ཇི་ལྟ་ཇི་ལྟར་ཡང་དག་པར་ཇི་ལྟ་བར་ཡུལ་རྣམས་མངོན་པར་ཤེས་པར་གྱུར་པ་དེ་ལྟ་དེ་ལྟར་ཤིན་ཏུ་མཐར་ཐུག་པ་མཆོག་གི་བདེ་ལེགས་རྣམས་འཐོབ་པར་འགྱུར་རོ། །དེ་ལྟར་སྣས་ཀྱང་དྲི་རྣམས་བསྣམས་ནས་ཡང་དག་པ་ཇི་ལྟ་བ་བཞིན་དུ་ལྟ་བས་དྲི་དེ་དག་རྣམས་ལ་ཀུན་ཏུ་ཆགས་པར་མི་འགྱུར་རོ། །གཞན་ཡང་དགེ་སྦྱོང་དང་བྲམ་ཟེ་དེ་དག་རྣམས་ཉིད་ཀྱི་ལྕེས་རོ་རྣམས་མྱངས་པར་བྱས་པ་ན་ཡང་། གང་དེ་ལ་མི་དགེ་བའི་འདུན་པའི་འདོད་ཆགས་སྐྱེས་པར་གྱུར་པ་དེ་དག་རྣམས་ཀྱང་འདིས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། ཇི་ལྟར་ལྕེའི་རྐྱེན་གྱིས་དང་རོའི་རྐྱེན་གྱིས་ཀྱང་ལྕེའི་རྣམ་པར་ཤེས་པ་སྐྱེ་བར་འགྱུར་ཞིང་། དེ་སྐྱེད་པའི་ཡིད་ལ་བྱེད་པའི་རྐྱེན་ལས་ཀྱང་ལྕེའི་རྣམ་པར་ཤེས་པ་སྐྱེ་བ་ཡིན་ནོ། །རྣམ་པ་དེ་ལྟ་བུ་རྣམས་ཀྱི་མཚན་ཉིད་ལས་

71-79a

སྐྱེས་པའི་ལྕེའི་རྣམ་པར་ཤེས་པ་ལ་དེ་མངོན་པར་ཞེན་པར་མི་བྱེད་དོ། །དེ་ལ་ཀུན་ཏུ་ཆགས་པར་ཡང་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་ཡང་ལྕེའི་རྣམ་པར་ཤེས་པ་དེ་ཤེས་སོ། །དེ་གང་གི་ཚེ་ཡང་དག་པར་ཤེས་པ་དེའི་ཚེ་རོ་ལ་དམིགས་པའི་རྣམ་པར་ཤེས་པ་དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པས་མི་འཆིང་ངོ་། །དེ་དེ་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཇི་ལྟ་ཇི་ལྟར་ཡུལ་རྣམས་ཡང་དག་པ་ཇི་ལྟ་བ་བཞིན་དུ་མངོན་པར་ཤེས་པར་གྱུར་པ་ན་ཡང་། དེ་ལྟ་དེ་ལྟར་དྲི་མའི་རྙོག་མ་རྣམས་དང་རྣམ་པར་བྲལ་བའི་མཐར་ཕྱིན་པའི་བདེ་བ་རྣམས་འཐོབ་པའོ། །དེ་ལྟར་དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པ་རྣམས་ཀྱིས་ཀུན་ཏུ་མི་འཆིང་ངོ་། །ཡང་དག་པ་ཇི་ལྟ་བ་བཞིན་དུ་དེས་ལྕེའི་རོ་རྣམས་ཐམས་ཅད་དང་། གནས་སྐབས་ཐམས་ཅད་དུ་ཇི་ལྟ་བ་བཞིན་དུ་རྟོགས་ནས། ལུས་ཀྱི་རེག་བྱའི་ཡུལ་རྣམས་ལ་ཀུན་ཏུ་ལྟ་བར་བྱེད་དེ། དེ་ལ་ལུས་ཀྱི་རྐྱེན་དང་རེག་བྱའི་རྐྱེན་དང་དེ་སྐྱེད་པའི་ཡིད་ལ་བྱེད་པའི་རྐྱེན་ལས་ཀྱང་རེག་བྱའི་རྣམ་པར་ཤེས་པ་སྐྱེ་བར་འགྱུར་རོ། །གསུམ་པོ་རྣམས་འདུས་པ་ལས་ནི་རེག་བྱའོ། །རེག་བྱ་དང་ལྷན་ཅིག་འགྲོགས་ནས་ཚོར་བ་དང་འདུ་ཤེས་དང་སེམས་པའོ། །དེ་ཡང་དགེ་སྦྱོང་དང་བྲམ་ཟེ་འདི་དག་གིས་ཡང་དག་པ་ཇི་ལྟ་བར་རེག་བྱ་དེ་ཉིད་ལ་ཀུན་ཏུ་ལྟ་བར་བྱེད་དེ། རེག་བྱ་འདི་དག་ནི་རྟག་པ་དང་བརྟན་པ་དང་ཐེར་ཟུག་པ་མ་ཡིན་ནོ། །གང་འདི་ལ་བདག་གིས་ཚུལ་བཞིན་མ་ཡིན་པ་ཡིད་ལ་བསྐྱེད་པར་གྱུར་ན། ཚུལ་བཞིན་མ་ཡིན་པར་ཡིད་ལ་བྱེད་པ་དེས་བདག་ལ་དོན་མ་ཡིན་པ་རྣམས་འབྱུང་བར་འགྱུར་རོ། །བདེ་བར་མི་འགྱུར་ཞིང་ཕན་པར་ཡང་མི་འགྱུར་རོ། །དེ་གང་གི་ཚེ་རེག་བྱ་དེ་ཡང་ཇི་ལྟ་བ་བཞིན་དུ་ཀུན་ནས་རྟོགས་པར་འགྱུར་ཞིང་ཚུལ་བཞིན་དུ་ཡིད་ལ་བྱེད་པས་སོ་སོར་རྟོག་པར་བྱེད་པ་ན། དེའི་ཚེ་འདི་དགའ་བའི་འདོད་ཆགས་དང་ལྡན་པར་གྱུར་པའི་སྲེད་པས་གནོད་པར་མི་འགྱུར་རོ། །ཡུལ་གྱི་སྟོབས་ཀྱིས་ཀྱང་ཀུན་ཏུ་སྦྱོར་བར་མི་བྱེད་དོ། །ཐབས་རྣམས་ཐམས་ཅད་ཀྱིས་ལུས་ཀྱི་རེག་བྱ་རྣམས་ཇི་ལྟ་བ་བཞིན་དུ་ཀུན་ཏུ་

71-79b

བརྟགས་པར་གྱུར་ནས་ཡིད་ཀྱིས་ཀྱང་ཆོས་ལ་ཀུན་ཏུ་ལྟ་བར་བྱེད་དེ། ཇི་ལྟར་ཡིད་ཀྱི་ཆོས་རྣམས་ཡིན་ན། འདི་ན་ཡིད་ཀྱི་རྐྱེན་དང་ཆོས་ཀྱི་རྐྱེན་ལས་ཀྱང་ཡིད་ཀྱི་རྣམ་པར་ཤེས་པ་དགེ་བའམ་མི་དགེ་བའམ་ལུང་དུ་མ་བསྟན་པ་ཡང་སྐྱེ་བར་འགྱུར་རོ། །དེ་ལ་གང་གི་ཚེ་མི་དགེ་བ་ལ་དམིགས་པར་གྱུར་པའི་ཡིད་ཀྱི་རྣམ་པར་ཤེས་པ་ཚུལ་བཞིན་མ་ཡིན་པ་འབྱུང་བར་འགྱུར་བ་དེའི་ཚེ། རིག་པར་འགྱུར་ཏེ་ཇི་ལྟར་བདག་ལས་སྐྱེས་པ་འདི་ནི་མི་དགེ་བའི་ཆོས་ཀྱི་དབང་དུ་བྱས་པའི་ཡིད་ཀྱི་རྣམ་པར་ཤེས་པ་སྐྱེས་པ་ཡིན་ལ། དགའ་བའི་འདོད་ཆགས་དང་ཀུན་ཏུ་ལྡན་པའི་སྲེད་པ་ཡིད་ལ་བྱུང་བས་ནི་བདག་དོན་མེད་པར་འགྱུར་རོ། །ཕན་པར་མི་འགྱུར་ཞིང་བདེ་བར་ཡང་མི་འགྱུར་རོ། །གང་དེ་ཁོ་ན་ལྟར་ཆོས་རྣམས་ཀྱི་འབྱུང་བ་དཔྱོད་པར་བྱེད་ཅིང་། དེ་ལྟར་ཆོས་རྣམས་ལ་ཆོས་ཀྱིས་རྗེས་སུ་ལྟ་བས་གནས་པར་གྱུར་པ་ནི། ཆོས་རྣམས་ཐམས་ཅད་ཀྱི་ཡང་རང་གི་མཚན་ཉིད་དང་། སྤྱིའི་མཚན་ཉིད་ལ་ཇི་ལྟ་བ་བཞིན་དུ་རྗེས་སུ་ལྟ་བས་དགའ་བའི་འདོད་ཆགས་དང་ལྷན་ཅིག་མཚུངས་པར་ལྡན་པའི་སྲིད་པ་ཡང་འབྱུང་བ་ཅན་གྱི་སྲེད་པ་རྣམས་ཀྱིས་འཆིང་བར་མི་འགྱུར་རོ། །དེ་དགའ་བའི་འདོད་ཆགས་ཀྱིས་བྱས་པའི་སྲེད་པ་དེ་དག་རྣམས་ལས་གྲོལ་བས་མཆོག་ཏུ་བདེ་བ་དང་ལྡན་པར་འགྱུར་རོ། །ཆོས་རྣམས་ཀྱི་ཡང་འཕེལ་བ་དང་འགྲིབ་པ་ཤེས་པར་འགྱུར་རོ། །དེ་ལྟར་གང་གི་ཚེ་ཇི་ལྟ་བ་བཞིན་དུ་ཡུལ་རྣམས་ཐམས་ཅད་ལ་ཡང་སོ་སོར་རྟོག་པར་བྱེད་པ་དེའི་ཚེ་འདི་ལ་ཡང་དག་པའི་ཤེས་པ་སྐྱེ་བར་འགྱུར་རོ། །དེའི་ཡང་དག་པའི་ཤེས་པ་དེས་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་ཟད་པས་ཀྱང་ཟག་པ་མེད་པའི་ཡེ་ཤེས་སྐྱེ་བར་འགྱུར་རོ། །དེ་དེ་དང་ཡང་དག་པར་ལྡན་པས་གོ་འཕང་གི་མཆོག་འཐོབ་པར་འགྱུར་རོ། །དེ་ལྟར་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་རྟག་པ་ཉིད་དུ་ཡུལ་རྣམས་ལ་ཡིད་ཆེས་པར་མི་བྱའོ། །དགྲ་ལྟ་བུར་གྱུར་པ་ཡིན་པ་གང་གི་ཕྱིར་ཡུལ་རྣམས་ནི་བཏང་སྙོམས་སུ་གཞག་པར་བྱ་སྟེ། སྲོག་ཆགས་རྣམས་ཐམས་ཅད་ཐུལ་འོག་ཏུ་འཇུག་པར་བྱེད་པ་ཡིན་ནོ། །དེའི་ཕྱིར་

71-80a

ཇི་སྲིད་དུ་ཟག་པ་མེད་པའི་ཡེ་ཤེས་སྐྱེས་པར་མ་གྱུར་པ་དེ་སྲིད་དུ་ཡུལ་རྣམས་ལ་ནམ་ཡང་འགའ་ཞིག་ལ་ཡང་ཡིད་ཆེས་པར་མི་བྱའོ། །རྐོ་ཏྲོག་ཅན་དེ་དག་ནི་གྲོགས་པོའི་གཟུགས་སུ་འཆོས་པའི་དགྲ་བོ་རྣམས་ཡིན་ཞིང་། འཁོར་བའི་འཆིང་བ་རྣམས་ཐམས་ཅད་ཀྱང་དེ་དག་རྣམས་ཡིན་ནོ། །དེ་ནས་དེའི་དུས་དེར་རྨ་བྱའི་མངའ་བདག་དེས་ཚིགས་སུ་བཅད་པ་བརྗོད་པ། ཇི་ལྟར། ཡུལ་གྱི་དེ་ཉིད་མཐོང་བ་ཡིས། །ཡེ་ཤེས་ལྕགས་ཀྱུས་འཛིན་པར་བྱེད། །དེས་མ་བཟུང་བས་མི་བཟད་གཡོ། །དོན་མིན་ཐམས་ཅད་བྱེད་པར་འདོད། །ཡུལ་གྱི་བསམ་པ་རྨོངས་པ་རྣམས། །ཀུན་ཏུ་རྟོག་པ་སྙིང་ལ་སེམས། །འཚོ་བའི་བསམ་པ་ཀུན་སྡོམ་པའི། །འཆི་བདག་ཞགས་པ་འདིར་འོང་འགྱུར། །ཡང་མོའི་སེམས་ཀྱི་སྲོག་ཆགས་རྣམས། །ཡུལ་རྣམས་ཀྱིས་ནི་ཡོངས་སུ་དྲངས། །གཏི་མུག་གིས་ནི་ཡོངས་བསླུས་པས། །ཀུན་རྨོངས་ཀྱིས་ཀྱང་ཤེས་པ་མིན། །གཡོ་བས་ཡུལ་རྣམས་ཐམས་ཅད་ནི། །དྲི་ཟའི་གྲོང་ཁྱེར་འདྲ་བ་ཡིན། །སྡུག་བསྔལ་ཀུན་ཏུ་སྤེལ་བྱེད་དེ། །དམྱལ་བ་ཡི་ཡང་རྒྱུ་རྣམས་ཡིན། །འདོད་པས་རྣམ་རྨོངས་བྱིས་པ་རྣམས། །ཡུལ་རྣམས་མེ་ཡིས་སྲེག་པར་བྱེད། །སྲེག་བཞིན་དུ་ཡང་མི་གོ་བར། །དེ་ཉིད་ལ་ནི་ཡོངས་སུ་འཇུག །ཀུན་རྟོག་ལས་ནི་འདོད་ཆགས་སྐྱེ། །ཆགས་ལས་ཁོང་ཁྲོ་རབ་ཏུ་འཇུག །ཁྲོ་བས་གཟིར་བའི་སྐྱེས་བུ་ནི། །དམྱལ་བའི་རྗེས་སུ་རྒྱུག་པར་འགྱུར། །དེ་ཕྱིར་འདོད་པ་ཡོངས་སུ་སྤོངས། །མཁས་པས་ཁྲོ་བ་ཞི་བར་གྱིས། །གཏི་མུག་མྱུར་དུ་ཡོངས་སྤངས་ནས། །མྱ་ངན་འདས་པ་མངོན་དུ་འགྱུར། །དགྲ་བོ་བཞིན་དུ་ཡུལ་ཤེས་བྱ། །གྲོགས་པོ་དང་འདྲ་མྱ་ངན་འདས། །མྱང་འདས་ཡུལ་ཅན་བརྟན་པ་ནི། །མྱ་ངན་འདས་པ་རྟོགས་པར་འགྱུར། །དེ་ལྟར་རྨ་བྱ་རྣམས་ཀྱི་བདག་པོ་དེས་ལྷ་དེ་དག་རྣམས་ལ་གཙུག་ལག་གི་མདོ་དེ་དག་སྟོན་པར་བྱེད་དོ། །ཆོས་གཞན་ཡང་ལེགས་པར་བསྲུང་བར་བྱ་བ་གཅེས་པར་གྱུར་པ་ཡོད་དོ། །འདི་ཡང་གང་ཞེ་ན། འདི་ལྟ་སྟེ། སེམས་ལ་ཡིད་ཆེས་པར་མི་བྱའོ། །འདི་

71-80b

ན་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་ཀྱང་ཇི་སྲིད་འཚོའི་བར་དུ་དེ་ལྟར་སེམས་ལ་ཡིད་ཆེས་པས་བགྲོད་པར་མི་བྱའོ། །དེ་དག་ཀྱང་གང་གི་ཕྱིར་ཀུན་ཏུ་གཡོ་བར་གྱུར་པ་བཟློག་ཏུ་མེད་པའི་རང་བཞིན་གྱ་གྱུས་རྣམ་པར་གནས་པ་མེད་པ་ཡུལ་རྣམས་ལ་བརྐམ་པར་གྱུར་པ་ཡོངས་སུ་སྐྱེས་པར་བྱེད་པ་འདིས་ཀྱང་བྱིས་པ་སོ་སོའི་སྐྱེ་བོ་རྣམས་ཐམས་ཅད་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་འགྲོ་བ་ལ་རྣམ་པ་དུ་མར་ཡོངས་སུ་འཁྱམ་པར་བྱེད་དོ། །ནམ་ཞིག་ཀྱང་འདི་དག་དང་ཡོངས་སུ་འདྲིས་པར་འབྱུང་བར་མི་འགྱུར་ཏེ། ཡུལ་འགྱུར་ཟློག་ཅན་འདི་དག་རྣམས་ཀྱིས་ཀུན་ཏུ་རྨོངས་པར་གྱུར་པས། བྱིས་པ་སོ་སོའི་སྐྱེ་བོ་རྣམས་ཐམས་ཅད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་ལན་ཅིག་དང་ཕྱོགས་གཅིག་མ་ཡིན་པར་ཡོངས་སུ་འཁོར་བར་བྱེད་དོ། །དེ་ལྟ་ན་ཡང་སྐྱོ་བ་སྐྱེ་བར་ཡང་མི་འགྱུར་རོ། །དེ་ལྟར་དེ་དག་ནི་ཐམས་ཅད་འཇིག་པར་བྱེད་པའི་དྲག་ཅིང་རྩུབ་པར་གྱུར་པའི་སྡུག་བསྔལ་ཅན་ནི་འཁོར་བ་ཡིན་ནོ། །དེའི་ཕྱིར་ཤིན་ཏུ་མི་བཟད་ཅིང་མཆོག་ཏུ་དྲག་པར་གྱུར་པའི་སེམས་འདི་ལ་ཇི་སྲིད་དང་ཇི་སྲིད་དུ་འཕགས་པའི་རྒྱས་མ་བཏབ་པ་དེ་སྲིད་དུ་ཡིད་ཆེས་པར་མི་བྱའོ། །ཇི་སྲིད་དུ་རྒྱུན་དུ་ཞུགས་པའི་འབྲས་བུ་ཐོབ་པར་མ་གྱུར་གྱི་བར་དུ་སྟེ། ཕྱི་ནས་ནི་ངན་སོང་གི་སྒོ་བཅད་པར་འགྱུར་རོ། །གཞན་དུ་ན་ནི་འགྲོ་བ་རྣམས་ཐམས་ཅད་དུ་རྒྱུ་བ་དང་སྡུག་བསྔལ་རྣམས་ཐམས་ཅད་དང་བཅས་པར་འགྱུར་རོ། །འཆིང་བ་རྣམས་ཐམས་ཅད་ཀྱིས་བཅིངས་པར་གྱུར་པ་རྗེས་སུ་འབྲེལ་པ་རྣམས་ཐམས་ཅད་དང་ཀུན་ནས་ལྡན་པ་མཆོག་ཏུ་བསྒྲུབ་པར་དཀའ་བ་མཆོག་ཏུ་གདུལ་བར་དཀའ་བར་གྱུར་པ་ཡིན་ནོ། །དེའི་ཕྱིར་ཐེག་པ་ཆོན་པོ་ལ་རབ་ཏུ་གནས་པའི་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་ཀྱང་རུང་སྟེ། བརྒྱ་ལ་ནམ་ཞིག་ཀྱང་ཡིད་ཆེས་པར་མི་བྱའོ། །དེ་ནས་དེའི་ཚེ་རྨ་བྱ་རྣམས་ཀྱི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། རྒལ་དཀའ་མྱུར་དུ་དྲི་བྲལ་དང་། །སེམས་ཅན་ཀུན་ལ་འགྱུར་བ་ཆེ། །སེམས་ནི་སྐྱེ་དགུ་ཐམས་ཅད་ལ། །རྒྱལ་པོ་བཞིན་

71-81a

དུ་རབ་ཏུ་འཇུག །མཐོང་བ་མེད་དང་འཇིགས་བཅས་པའི། །ལས་ཀྱིས་དམྱལ་བ་གཡོ་བ་འདི། །གང་གི་སེམས་འཛིན་དེ་ཤེས་རབ། །དེ་ནི་འགྲོ་བའི་མཆོག་ཏུ་འགྲོ། །དེ་བཞིན་བདེ་བའི་གནས་སུ་གཞོལ། །དེས་ནི་ངན་འགྲོ་དག་ཏུ་འབབ། །དེ་ཉིད་བཏུལ་བས་དྲི་མེད་པའི། །མྱ་ངན་འདས་པ་རྟོགས་པར་འགྱུར། །བདེ་དང་སྡུག་བསྔལ་བྱེད་པ་སེམས། །དེ་བཏུལ་བ་ལས་བདེ་བ་འབབ། །ལས་རྣམས་རྣམ་པ་སྣ་ཚོགས་པ། །སེམས་ཀྱི་འཕེན་པའི་རྗེས་སུ་འཇུག །དེ་ཕྱིར་སེམས་ནི་རྟག་ཏུ་སྲུངས། །དེ་བཏུལ་བས་ཀྱང་བདེ་བ་འབྱུང་། །གང་གི་ཡིད་ནི་རབ་ཞི་བ། །དབང་པོ་སྤྱོད་ཡུལ་ལས་རབ་ཞི། །སྐྱེ་དང་མྱ་ངན་བྲལ་བའི་དེ། །གོ་འཕང་ནད་མེད་དག་ཏུ་སོང་། །དེ་ལྟར་རྨ་བྱ་རྣམས་ཀྱི་མངའ་བདག་དེས་འཐབ་བྲལ་གྱི་ལྷ་དེ་དག་རྣམས་དང་། དགའ་ལྡན་པ་རྣམས་ལ་བཅོམ་ལྡན་འདས་འཁོར་བ་འཇིག་གིས་གསུངས་པའི་གཙུག་ལག་གི་མདོ་དེ་བཤད་དོ། །དེ་ནས་ལྷ་དེ་དག་ཉིད་ཐམས་ཅད་ཀྱིས་ཀྱང་དེ་ཡོངས་སུ་བསྐོར་ནས་ཀུན་ཏུ་གནས་ནས་ཆེས་རབ་ཏུ་རངས་པར་གྱུར་པའི་ཡིད་ཀྱིས་དེ་ལ་འདི་སྐད་ཅེས་བརྗོད་དོ། །ལེགས་སོ་ལེགས་སོ་སྐལ་བ་ཆེན་པོ་ཆོས་འདི་ནི་མཛེས་པ་ལགས་སོ། །ཐོག་མ་དང་བར་དང་ཐ་མར་མཛེས་པར་གྱུར་པ་མྱ་ངན་ལས་འདས་པའི་མཐར་ཐུག་པར་གྱུར་པ་ཁྱོད་ཉིད་ཀྱིས་བདག་ཅག་ལ་བཤད་དོ། །དེ་ནས་ལྷ་དེ་དག་རྣམས་ལ་སླར་ཡང་རྨ་བྱའི་རྒྱལ་པོ་དེས་བརྗོད་པ། ཇི་ལྟར། གང་བདག་ཉིད་ཀྱིས་ལྷག་པའི་ཆོས་ཉི་ཤུའི་ཆོས་ཀྱི་རྣམ་གྲངས་བཅོམ་ལྡན་འདས་ཀྱི་སྤྱན་སྔ་ནས་ཐོས་པ་དེ་དག་བདག་གིས་ཁྱེད་ལ་བསྟན་པ་ཡིན་ཏེ། དོན་དང་ལྡན་པ་དང་ཕན་པའི་དོན་དུ་དང་བདེ་བའི་དོན་དུ་དང་མྱ་ངན་ལས་འདས་པའི་མཐར་ཐུག་པར་འགྱུར་བར་བདག་གིས་མཆོག་ཏུ་ཕན་པར་འགྱུར་བའི་ཆོས་འདུལ་བ་འདི་ཁྱེད་རྣམས་ལ་བསྟན་པ་ཡིན་ནོ། །དེ་ནས་ལྷ་དེ་དག་རྣམས་ཐམས་ཅད་ཀྱིས་ཀྱང་བཤད་པ་དེ་ལ་མངོན་པར་བསྟོད་ནས། རྨ་བྱའི་རྒྱལ་པོ་དེ་མཆོད་ཅིང་མངོན་པར་ཕྱག་འཚལ་བར་གྱུར་ནས་ཡང་། གང་དག་འཐབ་བྲལ་བ་དེ་དག་རྣམས་ནི་ནགས་དང་ཉེ་བའི་ནགས་

71-81b

དང་རྫིང་བུ་དང་པད་མའི་རྫིང་བུ་རྣམས་སུ་རྩེད་མོའི་དོན་དུ་རབ་ཏུ་ཞུགས་པར་གྱུར་ཏོ། །དགའ་ལྡན་གྱི་ལྷ་གང་ཡིན་པ་དེ་དག་རྣམས་ཀྱང་ནམ་མཁའི་དབྱིངས་ནས་གང་ན་དགའ་ལྡན་གྱི་ལྷ་རྣམས་ཡོད་པ་དེར་དེ་དག་རྣམས་ཕྱིར་སོང་ངོ་། །ཆོས་ཀྱི་རྣམ་གྲངས་ཉི་ཤུ་རྩ་གཉིས་པར་གྱུར་པ་རྫོགས་སོ།། །།

དེ་ནས་འཐབ་བྲལ་གྱི་ལྷ་དེ་དག་རྣམས་ནགས་དང་ཉེ་བའི་ནགས་དེ་དག་ལ་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་ངེས་པར་མྱོང་བར་འགྱུར་བའི་ལས་རྣམས་ཟད་པར་མ་གྱུར་གྱི་བར་དེ་སྲིད་དུ་དགའ་བར་བྱེད་རྩེ་བར་བྱེད་དོ། །དེ་ནས་རང་གིས་བྱས་པའི་ལས་ལ་ལོངས་སྤྱོད་པས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །ཡང་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་སུ་སྐྱེས་པར་གྱུར་ན། དེ་རྟག་ཏུ་ཆོས་ལ་གནས་པར་འགྱུར་ཞིང་ཆེན་པོའི་རིགས་དང་མདངས་དང་། དབང་ཕྱུག་གི་ཡོན་ཏན་རྣམས་ཕུན་སུམ་ཚོགས་པར་གྱུར་པའི་ཡུལ་བཟང་པོ་རྣམས་སུ་རྒྱལ་པོའམ་རྒྱལ་པོའི་བློན་པོར་ཡང་ལེགས་པར་བྱས་པའི་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བའི་ལྷ་རྣམས་ཀྱི་ས་ལ་ཀུན་ཏུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་པས་སམ་ལྷའི་མིག་གིས་ཇི་ལྟར་ཡོད་པའི་འཐབ་བྲལ་བ་རྣམས་ཀྱི་ས་མཐོང་བར་གྱུར་པ་ནི་རཱ་ཛ་ནི་ན་རྒྱུ་བ་ཞེས་བྱ་བའོ། །ས་དེ་ལ་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བ་ནི། སེམས་ཅན་ཆེན་པོ་སྐྱེས་བུ་དམ་པ་དགེ་ལེགས་སུ་སྤྱོད་པ་དྲང་པོ་དྲང་པོའི་རིགས་ཅན་གང་དག་གིས་རྟག་ཏུ་ཡང་ཚུལ་ཁྲིམས་དང་ལྡན་པར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡོངས་སུ་སྤངས་པར་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་ཡོངས་སུ་སྤངས་པར་གྱུར་པ་ནི་བུད་མེད་ཀྱི་ཡུལ་རྣམས་ལ་རྩིག་པ་ལས་གྱུར་པ་ཡང་རུང་སྟེ། རྣམ་པ་ཐམས་ཅད་དུ་བག་ཙམ་ཅིག་ཀྱང་ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པ་འདོད་ཆགས་དང་ལྷན་ཅིག་འགྲོགས་པས་ཀུན་ཏུ་ལྟ་བར་མི་བྱེད་དོ། །གཞན་དག་བྱེད་པར་གྱུར་པ་རྣམས་ཀྱང་རབ་ཏུ་འགོག་པར་

71-82a

བྱེད་དོ། །ཚུལ་ཁྲིམས་ལ་རབ་ཏུ་འགོད་པར་བྱེད་དོ། །ཆོས་རྣམས་ཀྱང་ལན་ཅིག་དང་ལན་ཅིག་མ་ཡིན་པར་སྟོན་པར་བྱེད་དོ། །དེ་དག་ལ་ཡང་རབ་ཏུ་འགོད་པར་བྱེད་དོ། །སེམས་ཅན་རྣམས་ཐམས་ཅད་ལ་ཡང་འདོད་པ་ལ་ལོག་པར་གཡེམ་པའི་སྐྱོན་རྗོད་པར་བྱེད་དོ། །ལས་ཀྱི་འབྲས་བུ་རྣམ་པར་སྨིན་པ་སྟོན་པར་བྱེད་དོ། །ཇི་ལྟར་གང་འགའ་ཞིག་འདོད་པ་ལ་ལོག་པར་གཡེམ་པར་གྱུར་པའི་སེམས་ཅན་དམན་པ་དེ་དག་ནི་ལུས་ཞིག་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེའི་ཕྱིར་ན་དམྱལ་བའི་ལས་ཀྱི་རྣམ་པར་སྨིན་པ་མཆོག་ཏུ་རྩུབ་པ་ཤིན་ཏུ་སྡུག་བསྔལ་བ་རྣམས་ཡིད་ལ་གྱིས་ལ། འདོད་པ་ལོག་པར་གཡེམ་པར་མ་བྱེད་ཅིག་ཕྱི་ནས་འགྱོད་པར་མ་བྱེད་ཅིག །སྡུག་བསྔལ་རྣམས་ཀྱང་ནི་དྲག་པ་དང་རྩུབ་པ་དང་ཚ་བར་གྱུར་པ་ཡིན་ནོ་ཞེས་དེ་ལྟར་འདོད་པ་ལ་ལོག་པར་གཡེམ་པའི་རྣམ་པར་སྨིན་པ་རྣམས་གཞན་དག་ལ་ཡང་སྟོན་པར་བྱེད་དོ། །དེ་དག་ལ་ཡང་སོ་སོར་ཀུན་ཏུ་འཇུག་པར་བྱེད་དེ། ངན་འགྲོ་རྣམས་སུ་འགྲོ་བར་འགྱུར་བའི་འཇིགས་པ་རྣམས་ཀྱིས་སྐྲག་པར་བྱེད་དོ། །དགེ་ལེགས་སུ་གྱུར་པའི་སེམས་ཅན་དེ་རང་དང་གཞན་ལ་ཕན་པ་ལ་རབ་ཏུ་ཞུགས་པ། ཚུལ་ཁྲིམས་དང་ལྡན་པ་ཚུལ་ཁྲིམས་ལ་རབ་ཏུ་གནས་པ་ཚུལ་ཁྲིམས་དེ་ཉིད་ལ་ཀུན་ཏུ་བརྟེན་ནས་ཇི་སྲིད་འཚོའི་བར་དུ་མ་ཉམས་པ་དང་རྒྱུན་མ་ཆད་པ་དང་མ་རྡོལ་བར་འཛིན་པར་བྱེད་པ་དེ་ནི་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་ནང་གི་རཱ་ཛ་ནི་ན་རྒྱུ་བའི་སར་སྐྱེ་བར་འགྱུར་རོ། །དེར་ཉེ་བར་སྐྱེས་པ་ན་ཡང་འདིའི་བདེ་བ་མཉམ་པ་མེད་པ་རྣམས་ཕུན་སུམ་ཚོགས་ཤིང་མཚུངས་པ་མེད་པའི་ལོངས་སྤྱོད་རྣམས་དང་ཡང་དག་པར་ལྡན་པ་ལ་བདེ་བ་འདི་དག་རྣམས་ཡིན་ཏེ། རཱ་ཛ་ནི་ན་ཞེས་བྱ་བའི་རྫིང་བུ་དཔག་ཚད་ལྔ་བརྒྱ་པར་གྱུར་པ། བསིལ་བའི་ཆུ་རབ་ཏུ་དང་བ་ལྟེམ་པར་གྱུར་པའི་ཆུའི་འོད་ཀྱིས་ཡུལ་འགའ་ཞིག་དུ་ཡང་གསལ་བར་བྱས་པ། ཉེ་འཁོར་དག་ན་ཡང་གསེར་དང་བཻ་ཌཱུརྱའི་རང་བཞིན་ལ་གསེར་བཙོ་མའི་འདབ་མ་དང་ཨིན་དྲ་ནཱི་ལའི་རང་བཞིན་གྱི་

71-82b

ཡལ་གས་ཡོངས་སུ་གང་བའི་ཤིང་ལྗོན་པ་རྣམས་ཀྱིས་ཉེ་འཁོར་ཡོངས་སུ་གང་བ། དཔག་ཚད་ལྔ་བརྒྱར་གྱུར་པའི་རྫིང་བུ་པད་མ་རྣམས་ཀྱིས་ཡང་ཉེ་འཁོར་ཀུན་ཏུ་གང་བ་རྣམས་ལ་བཻ་ཌཱུརྱའི་ཡུ་བ་ཅན་རྣམས་ལ་ནི་གསེར་གྱི་འདབ་མ་རྣམས་སོ། །གསེར་གྱི་ཡུ་བ་ཅན་རྣམས་ལ་ནི་བཻ་ཌཱུརྱའི་ཟེ་བ་རྣམས་སོ། །པད་མ་གཞན་འགའ་ཞིག་ནི་རིན་པོ་ཆེ་བདུན་གྱི་རང་བཞིན་ཡིན་ཏེ། རྣམ་པ་སྣ་ཚོགས་ཤིང་རྣམ་པར་བཀྲ་བའི་པད་མ་རྣམས་ཀྱིས་ཀྱང་ཐམས་ཅད་ནས་ཡོངས་སུ་ཁྱབ་པར་གྱུར་པའོ། །རྫིང་བུ་དེའི་ཉེ་འཁོར་རྣམས་ན་ཡང་བྱ་ཁ་དོག་རྣམ་པ་སྣ་ཚོགས་པ་དང་ལྡན་པར་གྱུར་པ། རིན་པོ་ཆེ་བདུན་དང་ཆ་འདྲ་བའི་ཁ་དོག་གི་ལུས་ཅན་གྱི་བྱ་རྣམས་ཀྱིས་ཀུན་ནས་ཉེ་བར་མཛེས་པ་མཆོག་ཏུ་སྙན་པར་འགྱུར་བའི་དབྱངས་ཀྱིས་ཀུན་ཏུ་གང་བ་ཡིན་ཏེ། རཱ་ཛ་ནི་ནའི་རྫིང་བུ་དེ་ཡང་ལྷ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་ཡིན་ཏེ། འདི་གང་ཡིན་པ་ལ་ལྷ་ཉིད་བརྒྱ་ཕྲག་དུ་མ་རྣམས་ཀྱིས་ཀྱང་ཡོངས་སུ་མ་བསྐོར་བའི་ལྷ་རྣམས་ནི་མེད་དོ། །ལྷ་མོ་དེ་དག་རྣམས་དང་ལྷ་དེ་དག་རྣམས་ཀྱང་ལྷན་ཅིག་ཏུ་རྔ་སྐད་ཡན་ལག་ལྔ་དང་ལེགས་པར་ལྡན་པས་རྫིང་བུ་དེ་ན་དགའ་དགུར་སྤྱོད་ཅིང་རྩེ་བར་བྱེད་པས་རང་གི་ལས་ཀྱི་འབྲས་བུ་རྣམས་ཟ་བར་བྱེད་དོ། །གཞན་ཡང་རྫིང་བུ་དེ་ཉིད་ཀྱི་འགྲམ་ན་ཡོངས་སུ་བསྐོར་བའི་ཉེ་འཁོར་རྣམས་ན་མཆོག་ཏུ་དགའ་བར་གྱུར་པའི་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱིས་ཡོངས་སུ་བསྐོར་ནས་ཡིད་དགའ་བ་ཞེས་བྱ་བའི་ནགས་ཀུན་ཏུ་གནས་སོ། །དེ་ན་ཡང་དགའ་བར་གྱུར་པའི་བྱའི་ཚོགས་རྣམས་ཀྱིས་མངོན་པར་དགའ་བར་གྱུར་པའི་འབབ་ཆུ་བརྒྱ་སྟོང་ཕྲག་དུ་མས་ཀུན་ཏུ་བརྒྱན་པ། རིན་པོ་ཆེའི་ཁམས་རྣམས་ཀྱིས་རྣམ་པར་བརྒྱན་པར་གཞན་དག་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་དཔེ་མེད་པའི་ལྷ་རྫས་ཀྱི་དབང་པོ་ལྔ་མངོན་པར་དགའ་བའི་ཡུལ་རྣམས་དང་ཡང་དག་པར་ལྡན་པས་ཡིད་དགའ་བའི་ནགས་དེ་ན་ལྷ་རྣམས་དགའ་བར་བྱེད་དོ། །ལྷ་དེ་དག་རྣམས་ཀྱང་རཱ་ཛ་ནི་ནའི་རྫིང་བུར་ཡང་རྩེད་མོ་སྣ་ཚོགས་པ་རྣམས་ཀྱིས་ལྷན་ཅིག་ཏུ་རྩེ་བར་བྱེད་དོ། །དེ་ནས་ལྷ་གང་དག་ལེགས་པར་བྱས་པའི་

71-83a

ལས་ཀྱིས་དེར་སྐྱེས་པ་དེ་དག་རྣམས་འདི་ལྟར་འགྱུར་ཏེ། སྔ་ན་མེད་པའི་གླུའི་སྒྲ་དེ་དག་ཐོས་པའི་དཔེ་མེད་པ་དེ་དག་གིས་དྲངས་པར་གྱུར་པས། ཀླུང་དུ་སྐྱེས་པའི་ཤིང་རིན་པོ་ཆེ་བདུན་གྱི་རང་བཞིན་གྱི་ལྗོན་ཤིང་རྣམས་ཀྱི་ནགས་དེ་དག་གི་ནང་གང་ན་ཡོད་པ་དེར་ལེགས་པར་ཉེ་བར་འགྲོ་བར་བྱེད་དོ། །དེ་ནས་ལྷ་གཞན་གང་དག་ལྷའི་རིགས་དེ་ནས་འཆི་འཕོས་པར་གྱུར་ནས་རཱ་ཛ་ནི་ན་རྒྱུ་བའི་ས་དེར་སྐྱེས་པར་གྱུར་པའི་ལྷ་གསར་དུ་སྐྱེས་པ་དེ་དག་ལྷ་རྫས་ཀྱི་ཕྲེང་བས་ཀུན་ཏུ་བརྒྱན་པའི་ལྷའི་བུ་མོ་གང་ཡིན་པ་དེ་དག་རྣམས་ཀྱིས་མངོན་པར་མཐོང་ཞིང་། རྗེ་དཔོན་དེ་མངོན་པར་མཐོང་བར་གྱུར་ནས་ཀྱང་མངོན་པར་རྒྱུག་གོ། །ལྷའི་རིགས་དེར་ལས་ཀྱི་འབྲས་བུ་རྣམ་པར་སྨིན་པ་འདི་དག་ནི་ཇི་ལྟར་སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་རྣམ་པར་སྤངས་པས་དེ་ལ་སྐྱེ་བར་འགྱུར་བ་ཡིན་ནོ། །འདོད་པ་ལ་ལོག་པར་གཡེམ་པ་རྣམ་པར་སྤངས་པས་དེ་དག་རྣམས་ཀྱི་ལྷ་མོ་ནི་གཞན་ལ་མི་འཕོའོ། །མ་སྤངས་པ་དེ་དག་རྣམས་ཀྱི་ནི་ལྷ་མོ་རྣམས་ནི་གཞན་ལ་ཀུན་ཏུ་ཉེ་བར་འཕོ་བར་འགྱུར་རོ། །རྒྱལ་ཆེན་བཞིའི་རིས་ཀྱི་ལྷ་དང་སུམ་ཅུ་རྩ་གསུམ་པ་རྣམས་ནི་ལྷ་གང་དག་གིས་འདོད་པ་ལ་ལོག་པར་གཡེམ་པ་ཡོངས་སུ་མ་སྤངས་པར་གྱུར་པ་རྣམས་ནི། དེ་ལས་འཆི་འཕོ་བར་གྱུར་པ་ན་ལྷ་གཞན་དེ་དག་ལྷ་མོ་རྣམས་ཀྱི་ནང་དུ་སྐྱེའོ། །དེ་དག་རྣམས་ཀྱིས་ཀྱང་འོད་ཉམས་པར་གྱུར་པའི་མར་མེ་དང་འདྲ་བའི་ཚེ་འགག་པར་འགྱུར་བ་སྤངས་ནས་གསར་དུ་སྐྱེས་པའི་ལྷ་དེ་དག་ལ་སྟེན་པར་བྱེད་དོ། །དེ་དང་ལྷན་ཅིག་ཏུ་རྩེ་བར་བྱེད་དགའ་བར་བྱེད་ཡོངས་སུ་སྤྱོད་པར་བྱེད་དོ། །དེ་ནས་འཆི་འཕོ་བར་གྱུར་པའི་ལྷ་གང་ཡིན་པ་འདི་ལ་འཆི་འཕོ་བར་འགྱུར་བས་བྱས་པའི་ཕྲག་དོག་གིས་དེ་ལ་སྡུག་བསྔལ་སྐྱེ་བར་འགྱུར་རོ། །འདི་ནི་དམྱལ་བའི་ཡང་སྡུག་བསྔལ་ཆེན་པོ་ཡིན་ཏེ། སེམས་ཀྱི་སྐྱོན་ཕུལ་དུ་ཕྱིན་པ་དེས་དམྱལ་བར་སྐྱེ་བར་འགྱུར་རོ། །ལྷ་དེ་འཆི་འཕོ་བ་དེའི་འབྲས་བུ་རྣམ་པར་སྨིན་པ་འདི་ནི་འཐབ་བྲལ་བའི་ལྷ་རྣམས་ལ་མེད་པ་ཡིན་ཏེ། དེ་དག་ནི་ཕལ་ཆེར་འདོད་པ་ལ་ལོག་པར་གཡེམ་པ་རྣམས་མ་སྤངས་པ་རྣམས་

71-83b

དེ་དག་ཏུ་སྐྱེ་བར་འགྱུར་རོ། །རྒྱུ་མཚན་དེས་ན་ལྷ་གསར་དུ་སྐྱེས་པ་དེ་སྔུན་གྱི་ལྷ་མེད་པར་ལྷ་མོ་དེ་དག་རྣམས་ཀྱིས་ལྷ་གསར་དུ་སྐྱེས་པ་དེ་ལ་ཉེ་བར་སྙེན་པར་བྱེད་དོ། །ཉེ་བར་འདྲེས་ནས་ཀྱང་ཀུན་ནས་དེ་ཡོངས་སུ་བསྐོར་ཅིང་གང་ན་ནགས་ཆེན་པོ་ཡོད་པ་དེར་ཉེ་བར་འགྲོ་བར་བྱེད་དོ། །རྒྱགས་པ་ལ་དོན་གཅིག་པས་བདེ་བར་རྒྱུ་བས་དེ་དག་རྣམས་ཐམས་ཅད་ཀྱང་གང་ན་ལྷའི་ཚོགས་དེ་དག་ཡོད་པ་དེར་ལེགས་པར་ཉེ་བར་འགྲོའོ། །དེ་ནས་ལྷའི་ཚོགས་དེ་དག་རྣམས་ཀྱིས་ལྷ་གསར་དུ་སྐྱེས་པ་དེ་མངོན་པར་མཐོང་ནས་ཆེས་རབ་ཏུ་དགའ་བར་གྱུར་པའི་ཡིད་ཀྱིས་ལྷན་ཅིག་སྤྱོད་པའི་འཁོར་རྣམས་དང་བཅས་ནས་རྫིང་བུ་དེ་ཉིད་དུ་ཕྱིན་པར་གྱུར་ཏོ། །བརྒྱ་ཕྲག་དང་དེ་ནས་སྟོང་ཕྲག་རྣམས་སུ་ཡང་སྟེ་ནགས་དང་ཉེ་བའི་ནགས་རྣམས་དང་ལྡན་པ་དང་། དཔག་བསམ་གྱི་ཤིང་རྣམས་དང་ལྡན་པ་ལ་བྱའི་ཚོགས་རྣམ་པ་དུ་མས་ཡོངས་སུ་གང་བ་རྣམས་དང་པད་མའི་རྫིང་བུ་བརྒྱ་སྟོང་གིས་རབ་ཏུ་བརྒྱན་པ་རྣམས་དང་། རྒྱགས་པའི་ཀ་རཎྜ་བ་དང་། ངང་ངུར་དག་གིས་ཉེ་བར་མཛེས་པ་རྣམས་དང་། ཡོན་ཏན་དུ་མ་བརྒྱ་སྟོང་འདི་དག་རྣམས་ཀྱིས་བརྒྱན་པས་དགའ་བར་འགྱུར་བའི་རྫིང་ཆེན་པོ་དེར་དེ་དག་རྣམས་དུས་རིང་དུ་སྟེ། རྔ་སྐད་ཡན་ལག་ལྔ་པ་དང་ལྷ་རྫས་ཀྱི་འདོད་པའི་ཡོན་ཏན་ལྔས་དུས་ཤིན་ཏུ་རིང་བར་ཡུལ་རྣམས་ལ་རྗེས་སུ་ལོངས་སྤྱད་ནས་སླར་ཡང་ཡུལ་དེ་དག་ཉིད་ཀྱིས་ངོམས་པར་མ་གྱུར་པས་ནགས་དེ་ཉིད་དུ་རྣམ་པར་རྒྱུ་བར་བྱེད་པ་ལས། གང་ན་ཉེ་འཁོར་ཀུན་ཏུ་སྣང་བར་བྱེད་པ་ཞེས་བྱ་བའི་རི་བོ་ཡོད་པ་དེར་ལེགས་པར་ཉེ་བར་འགྲོའོ། །བདེ་བར་རྒྱུ་བའི་དོན་གྱིས་གར་བྱེད་པར་གྱུར་པ་དང་། རྒོད་པར་གྱུར་པས་པད་མའི་རྫིང་བུ་ནས་པད་མའི་རྫིང་བུ་རྣམས་དང་། ནགས་ནས་ནགས་རྣམས་སུ་དང་། ཉེ་བའི་ནགས་ནས་ཉེ་བའི་ནགས་རྣམས་སུ་དང་། འབབ་ཆུ་ནས་འབབ་ཆུ་རྣམས་སུ་དང་། རིའི་མཐོ་ས་ནས་རིའི་མཐོ་ས་རྣམས་སུ་དང་། རིའི་བང་རིམ་ནས་རིའི་བང་རིམ་རྣམས་ལ་དང་། རིའི་གསེབ་ནས་རིའི་གསེབ་རྣམས་སུ་དང་། འཁྲི་ཤིང་གི་ཚང་ཚིང་ནས་འཁྲི་ཤིང་གི་ཚང་ཚིང་རྣམས་ལ་དང་། མེ་ཏོག་གི་ནགས་ནས་མེ་ཏོག་གི་ནགས་རྣམས་སུ་

71-84a

དང་། འབབ་ཆུ་ནས་འབབ་ཆུ་རྣམས་སུ་དང་། ཆུ་ཀླུང་དང་ཚང་ཚིང་ནས་ཆུ་ཀླུང་དང་ཚང་ཚིང་རྣམས་སུ་དང་། དཔག་བསམ་གྱི་ཤིང་གི་ནགས་ནས་དཔག་བསམ་གྱི་ཤིང་གི་ནགས་རྣམས་སུ་དང་། འཁྲི་ཤིང་གི་ཁང་པ་ནས་འཁྲི་ཤིང་གི་ཁང་པ་རྣམས་དང་། རིན་པོ་ཆེའི་ཁམས་སྣ་ཚོགས་པ་རྣམས་དང་ལྡན་པའི་རིའི་གསེབ་ནས་རིའི་གསེབ་རྣམས་སུ་རྩེད་མོ་རྩེ་བར་གྱུར་པས་ཐམས་ཅད་ཀྱང་རྔ་སྐད་ཡན་ལག་ལྔ་དང་ལྡན་ཞིང་དཔེ་མེད་པར་གྱུར་པའི་འདོད་པའི་ཡོན་ཏན་ལྔ་པོ་རྣམས་ཀྱང་རང་གི་ལས་ཀྱི་འབྲས་བུ་རྣམས་དང་འདྲ་བར་ཡང་དག་པར་ལྡན་པས་ཐམས་ཅད་ཀྱང་ཉེ་འཁོར་ཀུན་ནས་སྣང་བ་ཞེས་བྱ་བའི་རི་བོ་འདི་གང་ན་ཡོད་པ་དེར་ཉེ་བར་འགྲོ་བར་བྱེད་དོ། །གླུའི་སྒྲ་དེ་དག་ཐོས་ནས་ངོ་མཚར་བ་ཀུན་ཏུ་སྐྱེས་པའི་ཡིད་ཀྱིས་ལྷ་དེ་དག་རྣམས་མྱུར་བར་རི་བོ་དེ་གང་ན་ཡོད་པར་འཁོད་དེ། དེ་ཀུན་ཏུ་ལྟ་བ་ལ་ཆེད་ཆེར་གྱུར་པའི་ཕྱིར་རོ། །དེ་ནས་རིའི་མཆོག་དེ་ལ་འཁོད་པར་གྱུར་པའི་ལྷ་དེ་དག་རྣམས་གང་ཡིན་པ་རྣམས་ཀྱིས་ཉེ་འཁོར་རྣམས་ལས་ཀུན་ཏུ་སྣང་བར་བྱེད་པའི་རིའི་མཆོག་དེ་ལ་ལེགས་པར་གནས་ནས་ལྷ་དེ་དག་གིས་མངོན་པར་མཐོང་བར་གྱུར་ཏོ། །མཆོག་ཏུ་དགའ་བར་གྱུར་པས་སླར་ཡང་བྱ་བཞིན་དུ་ནམ་མཁའི་དཀྱིལ་དུ་འཕགས་ཏེ་རྒྱན་དང་ཆ་བྱད་དུ་མ་རྣམས་དང་། རང་གི་འོད་ཀྱིས་འབར་བར་གྱུར་པས་ཕན་ཚུན་དུ་ལྟ་བ་ལ་ཆེད་ཆེར་བྱེད་པར་འགྱུར་ཞིང་འདྲེས་པར་གྱུར་པས་དེ་དག་ཐམས་ཅད་ཀྱང་རི་བོའི་མཆོག་དེ་ན་དགའ་བར་གྱུར་པའི་ཆུ་ཀླུང་དང་འབབ་ཆུ་དང་རྫིང་བུ་དང་པད་མའི་ཚལ་དང་འཁྲི་ཤིང་གི་ཁང་པ་དང་དཔག་བསམ་གྱི་ཤིང་རྣམས་རིན་པོ་ཆེ་བདུན་རབ་ཏུ་འབར་བའི་འོད་དང་ལྡན་པ་དེ་དང་དེ་ན་ལྷ་རྣམས་ཐམས་ཅད་རཱ་ཛ་ནི་ན་རྒྱུ་བ་ན་དགའ་བར་བྱེད་པ་དང་རྩེ་བར་བྱེད་དེ། ཁ་ཅིག་ནི་པད་མའི་ཚལ་དུའོ། །ཁ་ཅིག་ནི་ཆུ་ཀླུང་དང་ཚང་ཚིང་དུའོ། །ཁ་ཅིག་ནི་ཨུད་པ་ལའི་ཚལ་དུའོ། །ཁ་ཅིག་ནི་དཔག་བསམ་གྱི་ཤིང་གི་ནགས་སུའོ། །ཁ་ཅིག་ནི་རིའི་ཁོང་པ་ནའོ། །ཁ་ཅིག་ནི་ནམ་མཁའི་དཀྱིལ་དུ་ཀུན་ནས་འཕགས་ནས་གང་ན་ལྷ་གཞན་རྣམས་ཡོད་པ་དེར་འགྲོ་བར་བྱེད་དོ། །ཁ་ཅིག་ནི་གླུ་མཁན་དང་བཅས་

71-84b

པས་རྒྱགས་པ་ལ་དོན་གཅིག་པའི་བུད་མེད་རྣམས་ཀྱིས་ཡོངས་སུ་བསྐོར་ནས་མྱོས་བྱེད་ཀྱི་བཏུང་བ་ཀུན་ཏུ་སྟེན་པར་བྱེད་དེ། མྱོས་པའི་སྐྱོན་རྣམས་དང་བྲལ་བར་གྱུར་པ་རབ་ཏུ་དགའ་བའི་ལྷ་རྣམས་ཕྱིར་ཞིང་ཕྱིར་ཞིང་དེ་ཉིད་ཀྱིས་རབ་ཏུ་དགའ་བ་ཀུན་ཏུ་སྐྱེད་པར་བྱེད་པ་འབའ་ཞིག་ཡིན་ནོ། །ཡོན་ཏན་དེ་ལྟ་བུ་རྣམས་དང་ལྡན་པའི་ཡུལ་གྱིས་རབ་ཏུ་དགའ་བའི་དུ་བ་དང་མེས་སླར་ཡང་ཉིས་འགྱུར་དུ་སྲེག་པར་བྱེད་དོ། །དེ་ནས་དེ་ལྟར་ཀུན་ཏུ་གནས་པའི་ལྷ་དེ་དག་རྣམས་ལ། དེ་ཁོ་ན་ཉིད་རིག་པ་ཞེས་བྱ་བའི་བྱས་ཚིགས་སུ་བཅད་པ་འདོན་པར་བྱེད་པ་ལ། ཇི་ལྟར། འབར་བ་ལྔ་ལ་རབ་ཆགས་པའི། །སྲེད་པའི་རླུང་གིས་བདས་པ་ཡི། །བག་མེད་མེ་ཡིས་ལྷ་རྣམས་ནི། །འདོད་པས་རྨོངས་ནས་སྲེག་པར་བྱེད། །སྔ་མའི་ལས་ནི་ཟད་པར་འགྱུར། །གསར་པ་ཉིད་ཀྱང་ཉེར་མི་སྤེལ། །དེ་ཟད་ནས་ནི་ལྟུང་བར་ཡང་། །ལྷ་རྣམས་ཐམས་ཅད་མཐོང་བ་ཡིན། །འཆི་བའི་དུས་ནི་ཉེར་བྱུང་ན། །སྡུག་བསྔལ་གྱིས་ནི་སེམས་ཉེར་བཅོམ། །གང་ཡང་དགེ་བ་མ་གཏོགས་པ། །སྐྱབས་གཞན་རྣམས་ནི་ངས་མ་མཐོང་། །བུད་མེད་ཆེད་ཆེར་ལྟ་བ་དང་། །རྙེད་དང་ལོངས་སྤྱོད་ལ་རབ་ཆགས། །རང་གི་སེམས་ཀྱིས་བསླུས་པ་ཡི། །ཐ་མའི་གནས་སུ་མྱུར་འགྲོ་འགྱུར། །གསོན་པ་འཆི་བའི་མཐའ་ཡིན་པ། །དེ་དག་རྣམས་ཀྱིས་གོ་འམ་ཅི། །འདོད་པ་རྣམས་ནི་རབ་འཇིག་ཅིང་། །རྟག་པ་ལ་ཡང་འཐད་པ་མེད། །ཡུལ་གྱིས་རྣམ་པར་བཤིག་པ་དང་། །རང་ལས་ཀྱིས་ཀྱང་བསླུས་པ་ཡིན། །སྲེད་པས་ཉེ་བར་བཅོམ་པའི་སེམས། །ལྷ་རྣམས་ཚེ་ནི་འགྲོ་བ་ཡིན། །རྩིག་པ་ཞིག་པ་ཇི་བཞིན་དུ། །རི་མོའི་ལས་ཀུན་རབ་ཏུ་འཇིག །ལས་རྣམས་ཟད་པས་དེ་བཞིན་དུ། །ལྷ་རྣམས་འཇིག་པར་འགྱུར་བ་ཡིན། །དབང་པོ་རྣམས་ཀྱང་ཡུལ་རྣམས་ཀྱིས། །ངོམས་པ་ནམ་ཡང་ཡོད་མ་ཡིན། །མར་སར་བླུགས་པར་གྱུར་པ་ཡི། །འབར་བའི་རིམ་པ་ཇི་བཞིན་ནོ། །དེ་ལྟར་བྱ་དེས་ལྷ་དེ་དག་རྣམས་ཀྱི་བག་མེད་པའི་ཡིད་འཇོམས་པ་ཆོས་དང་ལྡན་པས་ཀུན་ཏུ་རྟོགས་པར་བྱེད་པའི་ཚིགས་སུ་

71-85a

བཅད་པ་རྣམས་བྱས་པ་ཡིན་ནོ། །དེ་ནས་ལྷ་དེ་དག་རྣམས་ཀྱིས་དེ་དག་ཐམས་ཅད་རྩིས་བཏབ་མ་བྱས་པར་བག་མེད་པས་རྣམ་པར་རྨོངས་པའི་ཕྱིར། ལྷ་མོ་དེ་དག་ཉིད་ཀྱིས་ཡོངས་སུ་བསྐོར་ནས་རབ་ཏུ་དགའ་བའི་ཡིད་ཀྱིས་སྡེ་ཚན་དུ་གྱུར་པའི་ཚོགས་རྣམས་ཀྱིས་ནི་ཁ་ཅིག་གོ། །ཁ་ཅིག་ནི་རང་གི་འཁོར་རྣམས་དང་ངོ་། །ཁ་ཅིག་ནི་ནམ་མཁའི་དཀྱིལ་དུ་འཕགས་པར་གྱུར་ནས་རི་དེ་ལ་འཁོད་པར་བྱེད་དོ། །དེ་དག་རྣམས་འཁོད་པར་གྱུར་པ་ནི་ཉི་མ་བརྒྱ་སྟོང་བས་ཆེས་ལྷག་པར་གྱུར་པའི་གཟི་བརྗིད་ཀྱི་འོད་དང་ལྡན་པའི་རི་དེའི་ཉེ་འཁོར་རྣམས་ན་རིན་པོ་ཆེའི་འོད་ཟེར་གྱིས་ཀུན་ནས་སྣང་བར་བྱས་པའི་རྩེ་མོ་རྣམས་ནི་ཆེས་མཆོག་ཏུ་ཡང་འོད་ཀྱིས་ཀུན་ནས་རབ་ཏུ་གསལ་བར་བྱེད་དོ། །རི་དེ་ལ་ནགས་དུ་མ་རྣམས་ཡོད་པ་ཡང་རིན་པོ་ཆེ་སྣ་ཚོགས་པའི་རང་བཞིན་གྱི་ཤིང་ལྗོན་པས་ཉེ་བར་མཛེས་པར་གྱུར་པ་དེ་དག་རྣམས་ཀྱིས་ཀྱང་ཤིན་ཏུ་ཆེས་བླ་ལྷག་པར་ལྷ་དེ་དག་གི་འོད་ཟེར་རྣམས་བཅུ་འགྱུར་དུ་སྐྱེད་པར་བྱེད་དོ། །ཡང་ལྷ་གཞན་གང་དག་ནགས་རྣམས་དང་པད་མའི་ཚལ་རྣམས་དང་འཁྲི་ཤིང་གི་ཁང་པ་རྣམས་དང་རིན་པོ་ཆེ་སྣ་ཚོགས་པའི་འོད་ཟེར་གྱིས་གསལ་བར་གྱུར་པ། དེ་དག་རྣམས་ལ་རྩེ་བར་བྱེད་ཅིང་དགའ་དགུར་ཀུན་ཏུ་སྤྱོད་པར་བྱེད་པ་ན། དེས་ཀྱང་འོད་དེ་དག་མཐོང་ནས་མཆོག་ཏུ་ངོ་མཚར་བ་དང་ལྡན་པར་གྱུར་ཏེ། དེ་ན་རི་བོའི་མཆོག་འདི་ཇི་ལྟ་བ་བཞིན་དུ་མཛེས་པར་གྱུར་པའི་ཕྱིར་རོ། །དེ་ནས་ནགས་དང་ཉེ་བའི་ནགས་དེ་དག་རྣམས་ན་རྩེ་བར་བྱེད་པ་གང་ཡིན་པ་དེ་དག་རྣམས་ཀྱང་འདི་དག་རྣམས་ནས་འོངས་ནས་རཱ་ཛ་ནི་ནའི་རྫིང་ཆེན་པོ་དེའི་རིའི་མཆོག་གི་རི་བོ་དེ་ལ་རྩེ་བར་འདོད་པ་ཡིན་ཏེ། དེ་དག་ཐམས་ཅད་མཉམ་དུ་འགྲོགས་ནས་ཕན་ཚུན་དུ་གྲོགས་སུ་གྱུར་ཅིང་། ཕན་ཚུན་དུ་རྫི་བ་མེད་པར་སྙིང་ལ་བདེ་བ་རྣམས་ལེགས་པར་སྐྱེས་པས་ཕན་ཚུན་དུ་བདེ་བ་བསྐྱེད་པ་ཉེ་བར་འབྱིན་པས་འཐུན་པར་གྱུར་པས། རིན་པོ་ཆེ་བདུན་གྱི་འོད་ཕྲེང་བས་ཀུན་ཏུ་སྣང་བར་བྱས་པའི་རི་དེ་ལ་དལ་བུ་དལ་བུས་ཀུན་ཏུ་འཁོད་པར་བྱེད་དེ་རོལ་མོ་སྣ་ཚོགས་པ་རྣམས་དང་། གླུ་དང་གར་དང་རྒོད་པ་དང་འགྱིང་བ་དང་རྩེ་བ་དང་

71-85b

བཅས་པར་འགྱུར་ཞིང་། ནད་ཀྱི་འཇིགས་པ་དང་མྱ་ངན་གྱི་འཇིགས་པ་དང་ལྐོག་ཏུ་གྱུར་པའི་སྐྱོན་རྣམས་དང་བྲལ་བ་དང་རང་ཇི་ལྟར་འདོད་པ་བཞིན་དུ་འགྲོ་བ་དང་རྒྱུ་བར་བྱེད་པ་མཆོག་ཏུ་བདེ་བ་དང་ལྡན་པར་གྱུར་པ་རྣམས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་པས་རི་ཆེན་པོ་དེ་ལ་ཇི་ལྟར་འདོད་པའི་ཁ་ཟས་རྩི་དག་འཐུང་བར་བྱེད་དོ། །བདུད་རྩི་ཡང་མིད་པར་གྱུར་པས་ནི་མཆོག་ཏུ་དགའ་བ་དང་ལྡན་པ་སྐྱེས་པར་གྱུར་ནས་དགེ་བར་བྱེད་དེ། རང་གི་ལས་དང་འདྲ་བའི་བདེ་བ་རྣམས་དང་ཡང་དག་པར་ལྡན་པར་གྱུར་པས། དེ་དེ་ལྟར་དགའ་བར་གྱུར་ནས་དེ་ཁོ་ན་བཞིན་དུ་བདེ་བ་ལ་ལོངས་སྤྱོད་པར་གྱུར་པ་ལས་དུས་ནམ་ཞིག་ན་གང་ན་མཐོང་ན་ཀུན་དགའ་བ་ཞེས་བྱ་བའི་པད་མའི་རྫིང་བུ་དེར་ཉེ་བར་འགྲོ་བར་བྱེད་དོ། །པད་མའི་རྫིང་བུ་དེ་ཡང་དཔག་ཚད་བཅུར་ཡངས་པ་དཔག་ཚད་ལྔར་རྒྱ་ཆེ་བར་གྱུར་པ་མཆོག་ཏུ་ཉེ་འཁོར་ཀུན་ནས་དགའ་བ་རྣམས་ལ་པད་མའི་རྫིང་བུ་འདིའི་དགའ་བ་དེ་ཉིད་ནི་ངང་པ་དང་ཀཱ་རཎྜ་བ་དང་ངང་ངུར་རྣམས་ཀྱིས་ཉེ་བར་མཛེས་པ་འདིའི་ཉེ་འཁོར་རྣམས་ན་ཡང་གསེར་བཙོ་མའི་མདོག་གི་པད་མས་ཉེ་བར་མཛེས་པར་གྱུར་པ། འདིའི་ཉེ་འཁོར་རྣམས་ཀུན་ནས་ཡང་དགའ་བར་གྱུར་པའི་གསེར་རྣམས་དང་བཻ་ཌཱུརྱ་དང་སྔོན་པོ་དང་སྔོན་པོ་ཆེན་པོ་དང་པད་མ་རཱ་གའི་རང་བཞིན་དུ་གྱུར་པའི་སྡུག་པ་དག་གིས་ཉེ་བར་མཛེས་པར་སྤྲས་པས་ཤིན་ཏུ་ཡང་མཛེས་པར་གྱུར་པ་ཀླུང་དུ་སྐྱེས་པའི་ཤིང་ལྗོན་པ་རྣམས་ཀྱིས་ཀྱང་ཉེ་འཁོར་ཀུན་ནས་མཛེས་པ་རྫིང་བུ་དེ་ཡོངས་སུ་བསྐོར་ནས་ཀུན་ཏུ་གནས་པ་ལ་འདི་ལྟ་སྟེ། གསེར་གྱི་རང་བཞིན་ལ་དངུལ་གྱི་འདབ་མ་དང་དངུལ་གྱི་རང་བཞིན་གྱི་ཡལ་ག་རྣམས་ལ་ནི་གསེར་གྱི་འདབ་མའོ། །ཨིན་དྲ་ནཱི་ལའི་ཡལ་ག་རྣམས་ལ་ནི་པད་མ་རཱ་གའི་འདབ་མའོ། །ཤེལ་གྱི་རང་བཞིན་གྱི་ཡལ་ག་རྣམས་ལ་ནི་བཻ་ཌཱུརྱ་དང་གསེར་དང་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་སོ། །བཻ་ཌཱུརྱའི་སྡོང་བུ་ཅན་རྣམས་ལ་ནི་གསེར་དང་དངུལ་དང་ཨིན་དྲ་ནཱི་ལའི་རང་བཞིན་གྱི་འདབ་མའོ། །སྔོན་པོ་ཆེན་པོའི་རང་བཞིན་གྱི་སྡོང་བུ་རྣམས་ལ་ནི་ཤེལ་དང་ཨིན་དྲ་ནཱི་ལའི་ཡལ་ག་རྣམས་ལ་གསེར་བཙོ་

71-86a

མའི་རང་བཞིན་གྱི་ལོ་མའོ། །གསེར་གྱི་སྡོང་བུ་དང་སྡོང་བུ་ཕྱེད་བཻ་ཌཱུརྱ་རྣམས་ལ་ནི་སྔོན་པོ་ཆེན་པོའི་ཡལ་ག་རྣམས་ལའོ། །གསེར་བཙོ་མ་དང་མུ་ས་རའི་འདབ་མའོ། །ཁ་ཅིག་ནི་ཐམས་ཅད་དུ་གསེར་གྱི་སྡོང་བུ་དང་གསེར་གྱི་འདབ་མ་དང་གསེར་གྱི་ཡལ་ག་དང་ལྡན་པ་ཉི་མ་བས་ལྷག་པར་གཟི་བརྗིད་ཀུན་ཏུ་སྣང་བར་བྱེད་དོ། །ཤིང་ལྗོན་པ་གཞན་ཁ་ཅིག་ལ་ནི་བཻ་ཌཱུརྱའི་ཡལ་ག་དང་བཻ་ཌཱུརྱའི་འདབ་མ་དང་ལྡན་པ་ཡིན་ཏེ། སྤྲིན་གྱི་ཕུང་པོ་དང་འདྲ་བར་ཐེན་འཁོར་ཀུན་ནས་རྣམ་པར་མཛེས་པར་བྱེད་དོ། །ཁ་ཅིག་ནི་གསེར་བཙོ་མའི་རང་བཞིན་གྱི་སྡོང་བུ་དང་གསེར་བཙོ་མའི་རང་བཞིན་གྱི་ཡལ་ག་དང་གསེར་བཙོ་མའི་རང་བཞིན་གྱི་འདབ་མ་སྤེལ་བའི་མེའི་ཕུང་པོའི་མདོག་དང་མཚུངས་པར་ཀུན་ནས་སྣང་བར་བྱེད་དོ། །ཁ་ཅིག་ནི་དངུལ་གྱི་འདབ་མ་དང་དངུལ་གྱི་ཡལ་ག་དང་དངུལ་གྱི་སྡོང་བུ་རྣམས་ཀྱིས་ཟླ་བ་དང་འདྲ་བར་ཀུན་ཏུ་སྣང་བར་བྱེད་དོ། །ཁ་ཅིག་ནི་ཨིན་དྲ་ནཱི་ལའི་རང་བཞིན་གྱི་སྡོང་བུ་དང་ཨིན་དྲ་ནཱི་ལའི་རང་བཞིན་གྱི་འདབ་མ་ལ་ཨ་ག་རུ་ནག་པོའི་དུ་བའི་མདོག་ཏུ་ཀུན་ནས་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་འཁྲི་ཤིང་སྣ་ཚོགས་པ་རྣམས་ཀྱིས་ཡོངས་སུ་བསྐོར་བ་ཡིན་ཏེ། གང་དག་གསེར་བཙོ་མའི་རང་བཞིན་ཡིན་པ་དེ་དག་ནི་སྔོན་པོ་མཆོག་ཏུ་གསལ་བའི་ཁ་དོག་དང་ལྡན་པའི་ཨིན་དྲ་ནཱི་ལའི་རང་བཞིན་གྱི་འཁྲི་ཤིང་གིས་ཉེ་བར་བཏུད་ནས་ལམ་མེ་སྣང་བར་བྱེད་དོ། །ལྗོན་ཤིང་གཞན་ཁ་ཅིག་ནི་གསེར་དང་དངུལ་གྱི་རང་བཞིན་དུ་གྱུར་པ་རྣམས་སོ། །ལྗོན་ཤིང་གཞན་ཁ་ཅིག་ནི་མེ་ཏོག་ཕུན་སུམ་ཚོགས་པ་རྣམས་ཀྱི་ཁ་དོག་སྣ་ཚོགས་པའི་མེ་ཏོག་རྣམས་ཀྱིས་ཉེ་བར་མཛེས་པར་གྱུར་པའོ། །ལྗོན་ཤིང་གཞན་ཁ་ཅིག་ནི་མན་དཱ་ར་བའི་རང་བཞིན་ནོ། །གཞན་དག་རྣམས་ཁ་ཅིག་ལ་ནི་པད་མ་ཀུ་ཤེ་ཤ་ཡའི་འདབ་མ་ཀུན་ཏུ་སྣང་བར་གྱུར་ཏོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་དྲིལ་བུ་གཡེར་ཀའི་དྲ་བས་ཀུན་ནས་སྦྲེལ་བ་རྣམས་ཀྱི་སྒྲ་འཁྲོལ་བར་གྱུར་པ་གསེར་དང་དངུལ་གྱི་རང་བཞིན་གྱི་འཁྲི་ཤིང་གིས་ཉེ་བར་ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤེལ་གྱི་རང་བཞིན་དང་གསེར་དམར་པོའི་རང་བཞིན་གྱི་འཁྲི་ཤིང་གིས་

71-86b

ཕུབ་པར་གྱུར་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་པད་མ་རཱ་གའི་རང་བཞིན་དང་དངུལ་གྱི་རང་བཞིན་གྱི་འཁྲི་ཤིང་དག་གིས་ཡོངས་སུ་བསྐོར་ནས་གནས་པའོ། །ལྗོན་ཤིང་གཞན་དག་རྣམས་ཁ་ཅིག་ལ་ཡང་དྲིལ་བུ་གཡེར་ཀའི་དྲ་བ་བརྒྱངས་པའི་སྒྲ་འཁྲོལ་བའོ། །ལྗོན་ཤིང་གཞན་དག་རྣམས་ཁ་ཅིག་ལ་ནི་ཤིང་ཐོག་རྣམས་སྨིན་པར་འགྱུར་བ་ལ་འདི་ལྟ་སྟེ། ཁུ་བའི་འབྲས་བུ་རྣམས་ལས་ནི་འབྲས་བུ་དེ་དག་རྣམས་ལས་རྣམ་པ་དེ་ལྟ་བུའི་ཁུ་བ་དག་རབ་ཏུ་འབབ་པར་འགྱུར་བ་གང་ཡིན་པའི་ཁྱད་པར་གྱིས་ལྷ་རྫས་ཀྱི་མྱོས་བྱེད་དེ་དག་རྣམས་ཀྱི་རོ་ཡང་ཅུང་ཟད་ཀྱང་མ་ཡིན་ནོ། །ལྗོན་ཤིང་གཞན་དག་འགའ་ཞིག་ནི་མེ་ཏོག་གི་ཤིང་ཡིན་ཏེ། གང་དག་གི་དྲི་རྣམས་ཇི་སྲིད་དུ་དཔག་ཚད་བརྒྱར་ཡང་རླུང་གིས་རབ་ཏུ་འདེབས་པར་བྱེད་དོ། །ལྗོན་ཤིང་གཞན་དག་རྣམས་ཁ་ཅིག་ནི་སྒྲའི་ཤིང་ཡིན་ཏེ། གང་དག་རླུང་འཇམ་པོས་རབ་ཏུ་བསྐྱོད་པར་གྱུར་པ་རྣམས་རྣམ་པ་དེ་ལྟ་བུའི་འདབ་མ་ཀུན་ཏུ་བསྐྱོད་པ་ལས་སྐྱེས་པའི་མཆོག་ཏུ་སྙན་པར་གྱུར་པ་གླུ་མཁན་གྱི་ལས་ཆེས་ལྷག་པར་གྱུར་པའི་སྒྲར་འགྱུར་རོ། །ལྗོན་ཤིང་གཞན་འགའ་ཞིག་ནི་གཅིག་ཏུ་ལྟ་བ་མངོན་པར་དགའ་བ་ཡིན་ནོ། །གང་དག་རྣམ་པ་དེ་ལྟ་བུའི་གཟུགས་དག་ཡིན་ཏེ། གང་དག་གི་ཁྱད་པར་གྱིས་ཁ་དོག་སྣ་ཚོགས་པ་རྣམས་ཀྱིས་རྣམ་པར་བཀྲ་བའི་ནགས་ཀྱི་རྒྱལ་པོ་དག་གིས་ཀྱང་བཅུ་དྲུག་ཁོ་ནའི་ཆ་འབའ་ཞིག་ཏུ་ཆོག་པ་ཡང་མ་ཡིན་ནོ། །བདུག་པའི་ཤིང་ལྗོན་པ་གཞན་ཁ་ཅིག་ནི་རྣམ་པ་སྣ་ཚོགས་པའི་བདུག་པའི་དྲི་རྣམས་གང་དག་གིས་འཐུལ་བར་བྱེད་པ་སྟེ། མཆོག་ཏུ་དྲི་ཞིམ་པར་གྱུར་པའི་དྲི་གང་གིས་བསྣམས་པ་ན་ལྷ་རྣམས་ཀྱང་དགའ་བར་བྱེད་པ་ཡིན་ནོ། །རྣམ་པ་དེ་ལྟ་བུའི་ཤིང་ལྗོན་པ་ཡོན་ཏན་མཚུངས་པ་མེད་པ་གཞན་དག་རྣམས་ཀྱིས་ཀྱང་པད་མའི་རྫིང་བུ་མཐོང་ན་ཀུན་དགའ་བ་ཞེས་བྱ་བ་ཡོངས་སུ་ཁྱབ་པར་གྱུར་པ་ཡིན་ནོ། །དེ་ནས་ལྷ་དེ་དག་རྣམས་ཀྱིས་རྣམ་པ་དེ་སྲིད་མངོན་པར་མཐོང་བར་གྱུར་ཏེ། ངོ་མཚར་བ་རྣམས་མཐོང་ཞིང་མཚུངས་པ་མེད་པར་ཉེ་བར་ལོངས་སྤྱོད་པར་བྱ་བ་རྣམས་མངོན་དུ་ལེགས་པར་མཐོང་ནས། རཱ་ཛ་ནི་ན་རྒྱུ་བའི་ལྷ་དེ་དག་རྣམས་ཁ་ཅིག་ནི་

71-87a

འབྲས་བུ་རྣམས་ཟ་བ་ཡིན་ནོ། །ཁ་ཅིག་ནི་འབྲས་བུའི་ཁུ་བ་རྣམས་འཐུང་ངོ་། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་མེ་ཏོག་གི་རྩེད་མོ་བྱེད་དོ། །ཁ་ཅིག་ནི་ནགས་ཀྱི་ནང་གི་ས་དག་ལ་ཉེ་བར་གནས་ནས་རྣམ་པ་སྣ་ཚོགས་པའི་མྱོས་བྱེད་རྣམས་འཐུང་ཞིང་གླུ་ཡང་ལེན་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་གླུ་དབྱངས་དག་ལེན་པར་བྱེད་དོ། །ཁ་ཅིག་ནི་གར་བྱེད་དོ། །ཁ་ཅིག་ནི་པད་མའི་རྫིང་བུ་ལ་འབོག་པར་བྱེད་དོ། །ཁ་ཅིག་ནི་བདུད་རྩི་མིད་པར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །གཞན་དག་ཁ་ཅིག་ནི་རིན་པོ་ཆེ་བདུན་གྱི་རང་བཞིན་གྱི་ཁང་བུར་ཞུགས་ནས་ལྷའི་བུ་མོའི་ཚོགས་རྣམས་ཀྱིས་ཀུན་ནས་ཡོངས་སུ་བསྐོར་ནས་རྣམ་པ་སྣ་ཚོགས་པའི་འདོད་པའི་ལོངས་སྤྱོད་ལ་རྗེས་སུ་སྤྱོད་པར་བྱེད་དོ། །དེ་ལྟར་ལྷ་དེ་དག་རྣམས་པད་མའི་རྫིང་བུ་དེ་ན་དགའ་བར་བྱེད་དོ། །འདོད་པའི་ཡོན་ཏན་ལྔ་དང་ཡང་དག་པར་ལྡན་པས་དགའ་བར་བྱེད་པ་དང་རྩེ་བར་བྱེད་ཀྱང་ཡུལ་རྣམས་ཀྱིས་ཉེ་བར་ལོངས་སྤྱོད་པས་ངོམས་པར་ཡང་མི་འགྱུར་རོ། །སྲེད་པ་དང་ལྡན་པ་རྣམས་ནི་ངོམས་པར་འགྱུར་བ་ནམ་ཡང་ཡོད་པ་མ་ཡིན་ཏེ། དཔེར་ན་མར་གྱིས་ལེགས་པར་བཏབ་པར་གྱུར་པའི་ཤིང་རྣམས་ཀྱིས་མེ་ལ་ངོམས་པའི་མཐར་ཐུག་པ་མེད་དོ། །དེ་བཞིན་དུ་སྲེད་པ་དང་ལྡན་པའི་མི་རྣམས་ཀྱང་ཡུལ་རྣམས་ཀྱིས་ཡིན་ནོ། །དེ་ནས་རྫིང་བུ་དེའི་པད་མའི་ངོས་ཀྱི་དབུས་ཀྱི་པད་མའི་ནགས་མཆོག་ཏུ་དགའ་བ་དང་མཆོག་ཏུ་བདེ་བ་དང་མཆོག་ཏུ་རྒྱ་ཆེ་བར་གྱུར་པ་སྣ་ཚོགས་པའི་བྱའི་ཚོགས་རྣམས་ཀྱིས་ཀུན་ཏུ་གང་བར་གྱུར་པ་ན། རང་གི་སྨོན་ལམ་གྱིས་སྐྱེས་པའི་བྱང་ཆུབ་སེམས་དཔའ་དུས་བཟངས་ཞེས་བྱ་བའི་ངང་པའི་རྒྱལ་པོ་ངང་པ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་ནི། ཇི་ལྟར་འཛམ་བུའི་གླིང་གི་གཟའ་དང་སྐར་མ་རྣམས་ཀྱིས་ཟླ་བ་ལ་བཞིན་ནོ། །དེ་བཞིན་དུ་དེ་ཡང་ཉེ་འཁོར་རྣམས་ཀུན་ཏུ་སྣང་བར་བྱེད་དོ། །པད་མའི་ཚལ་རྣམས་ཀྱང་བུང་བའི་ཚོགས་རྣམས་ཀྱིས་ཀུན་ནས་ཉེ་བར་མཛེས་པར་གྱུར་པའོ། །ཉེ་འཁོར་

71-87b

ཀུན་ནས་ཡོངས་སུ་བསྐོར་བའི་ལྷ་དེ་དག་རྣམས་ལེགས་པར་མངོན་པར་མཐོང་ནས་གཞན་ལ་ཕན་པ་ལ་རབ་ཏུ་ཞུགས་པས་ཚིགས་སུ་བཅད་པ་བརྗོད་པ། ཇི་ལྟར། འགྲོ་བ་དང་ནི་གནས་ཉིད་དང་། །རྩེ་བ་དང་ནི་རྒོད་པ་ཡང་། །བཟོད་པར་མི་ནུས་ཤུགས་པོ་ཆེ། །མི་བཟད་པ་ཡི་འཆི་བདག་འབྱུང་། །གང་ལ་འདི་ཡིས་མི་སྒྲུབ་པའི། །འདི་དང་ཕྱི་མར་གནས་དེ་མེད། །དེ་ལྟ་ན་ཡང་ཀུན་རྨོངས་པས། །འགྲོ་བ་འདི་དག་གིས་མི་རྟོགས། །དབུལ་པོ་དང་ནི་དབུལ་མིན་དང་། །གཞོན་པ་དང་ནི་གནས་བརྟན་དང་། །ཁྱིམ་པ་དང་ནི་ཁྱིམ་པ་མིན། །གང་ཡང་འདི་ཡིས་མི་འཇོམས་མེད། །སྐྱིད་དེན་པ་དང་སྡུག་ཕོངས་དང་། །ཡོན་ཏན་ཅན་དང་དེ་ལས་གཞན། །སྤོང་ལ་གནས་དང་སྤོང་གནས་མིན། །གང་ཡང་འདི་ཡིས་མི་འཁྲིད་མེད། །ཚུལ་ཁྲིམས་འཆལ་དང་ཚུལ་ཁྲིམས་ལྡན། །ཤེས་རབ་ཅན་དང་རྨོངས་པ་དང་། །རྒྱལ་པོ་དང་ནི་དེ་ལས་གཞན། །གང་དག་འདིས་ནི་མི་འཁྲིད་མེད། །ལྷ་རྣམས་དང་ནི་དམྱལ་བའམ། །ཡི་དགས་དུད་འགྲོ་སྐྱེས་དེ་བཞིན། །བག་མེད་པ་དང་བག་ཡོད་དང་། །གང་དག་འདི་ཡིས་མི་འཁྲིད་མེད། །འདོད་པའི་ཁམས་སུ་སྐྱེས་པའམ། །གཟུགས་ཀྱི་ཁམས་ཀྱང་དེ་བཞིན་དེ། །གཟུགས་མེད་པར་ཡང་སྐྱེས་པའམ། །གང་དག་འདི་ཡིས་མི་འཁྱེར་མེད། །ལས་ཀྱི་ཞགས་པས་རྒ་བའི་ཆད། །ནད་ཀྱི་ལུས་སོ་སྟོབས་པོ་ཆེ། །སྲིན་པོ་ལྟ་བུའི་འཆི་བདག་འདིས། །སེམས་ཅན་བླངས་ནས་འགྲོ་བ་ཡིན། །དེ་ལྟར་འཇིགས་སུ་རུང་བ་ཡི། །འཆི་བདག་མཆོག་ཏུ་མི་བཟད་པ། །འདོད་པས་རྣམ་པར་རྨོངས་པའི་ལྷ། །ངུ་བར་འོས་ལ་དགའ་བར་བྱེད། །ཇི་ལྟ་ཇི་ལྟར་བསྟེན་བྱས་པ། །འདོད་པ་སྡུག་བསྔལ་རྒྱུ་རྣམས་ནི། །དེ་ལྟ་དེ་ལྟར་རྣམ་འཕེལ་བ། །མར་བླུགས་པ་ཡི་མེ་ཇི་བཞིན། །མི་དགེ་དེ་དག་སླུ་བྱེད་ཡིན། །བྱས་པ་ཆུད་གཟོན་སྡུག་བསྔལ་རྒྱུ། །དང་པོར་མངར་བར་འདོད་པ་ནི། །ཡོངས་སུ་སྨིན་ནས་མི་བཟད་པ། །འདོད་པས་དང་པོར་བདེ་ལེགས་དང་། །བར་དང་ཐ་མར་

71-88a

བྱེད་པའང་མིན། །ཞི་ཡིད་རྗེས་སུ་ཐོབ་པར་མིན། །ཉམས་དང་ཞི་བའི་རྒྱུ་རྣམས་ནི། །དབང་པོ་དང་ནི་དབང་དོན་ལ། །རྨོངས་ནས་རྣམ་པ་ཐ་དད་པར། །བྱིས་པའི་ཡིད་འཕྲོག་འདོད་པ་འདིས། །དམྱལ་བར་འགྲོ་བར་བྱེད་པ་ཡིན། །གང་དང་ལྷན་ཅིག་བྱིས་པ་དགའ། །དེ་ཉིད་འདི་ནི་མི་བཟད་མཆོག །དགྲ་བོ་གྲོགས་པོའི་གཟུགས་ཀྱིས་ནི། །ཁྱད་པར་གྱིས་ནི་རབ་ཏུ་རྒྱུ། །དེ་ལྟར་དུས་བཟངས་དེས་བག་མེད་པ་བག་མེད་པར་སྤྱོད་པ་རྣམས་མངོན་པར་མཐོང་ནས་ཚིགས་སུ་བཅད་པ་བརྗོད་དོ། །དེ་ནས་ལྷ་དེ་དག་འདོད་པ་དེ་དག་གིས་རྣམ་པར་རྨོངས་པའི་ཕྱིར་ཕན་པར་འགྱུར་བ་གང་ཡིན་པ་དེ་བརྗོད་པ་ན་ཀུན་ཏུ་མི་རྟོགས་སོ། །དེ་ནས་སླར་ཉིད་ཀྱང་པད་མའི་རྫིང་བུ་དེ་ཉིད་ཀྱི་འགྲམ་དུ། རཱ་ཛ་ནི་ན་རྒྱུ་བའི་ལྷ་དེ་དག་རྣམས་ནགས་དང་ཉེ་བའི་ནགས་རྣམས་དང་། པད་མའི་རྫིང་བུ་དག་དང་འཁྲི་ཤིང་འཕྱར་བར་ལེགས་པར་ཀུན་ཏུ་གཡོགས་པའི་མཆོག་ཏུ་དྲི་ཞིམ་པའི་འཁྲི་ཤིང་གི་ཁང་པ་རྣམས་ལ་བུང་བ་བརྒྱ་སྟོང་དུ་མ་སྐད་སྙན་པ་རྣམས་འདོན་པས་རྣ་བར་སྙན་པ་རྣམས་ལ། ལྷ་དེ་དག་རྣམས་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་ཅིང་རྩེ་བར་བྱེད་དེ། །རྔ་སྐད་ཡན་ལག་ལྔ་དང་ལྡན་པས་ཤིན་ཏུ་སྙན་པ་དང་བརྒྱུད་མར་དམའ་ཞིང་སྙན་པ་དང་། མཐོན་པོར་འཇམ་ཞིང་སྙན་པའི་སྒྲ་དང་ཡང་དག་པར་ལྡན་པར་དཔེ་མེད་པ་རྣམས་ཀྱིས་དགའ་བར་བྱེད་དོ། །གཞན་དག་ནི་ཁང་བུའི་སྟེང་ན་ཀུན་ཏུ་གནས་ཏེ་མཆོག་ཏུ་དགའ་བའི་པད་མའི་རྫིང་བུ་དེ་ཉིད་ལ་ཀུན་ཏུ་ལྟ་བར་བྱེད་དོ། །རཱ་ཛ་ནི་ན་རྒྱུ་བའི་ལྷ་དེ་དག་རང་གི་ལས་ལ་སྤྱོད་པས་རྗེས་སུ་འབྲང་བ་རྣམས་དང་བཅས་པས་ཉེ་འཁོར་ཀུན་ཏུ་ལྟ་བར་བྱེད་དོ། །དེ་ནས་ཀུན་ཏུ་ལྟ་བར་བྱེད་པ་དེ་དག་རྣམས་ལ་གཞན་ཡང་དུས་བཟངས་དེ་འདི་སྙམ་དུ་སེམས་ཏེ། ལྷ་དེ་དག་རྣམས་ཀྱི་ཡིད་ལ་ཅི་ཞིག་ཡོད་པར་གྱུར་ན། ངེས་པར་ཉམས་སུ་མྱོང་བར་འགྱུར་བའི་སྡུག་བསྔལ་འབྱུང་བར་འགྱུར་བ་རྣམས་གང་ཡིན་པ་གང་དག་གིས་གོ་བར་མི་འགྱུར་བ། ལྷ་རྣམས་འཆི་བའི་དུས་ན་འཇིགས་པ་ནི་ལྔ་ཡོད་དེ། ལྔ་པོ་རྣམས་གང་ཞེ་ན།

71-88b

འདོད་པ་སྡུག་པ་འཐུན་པ་ཡིད་དུ་འོང་བའི་བུད་མེད་རྣམས་ཐམས་ཅད་དང་། ལྷའི་རིགས་ཀྱི་སྐལ་བ་འཐུན་པ་དེ་ཉིད་དུ་སླར་ཡང་ཀུན་ཏུ་མི་ཕྲད་པ་སྟེ། དེ་ལ་འདི་ནི་རྣམ་པར་འབྲལ་བས་བྱས་པའི་སྡུག་བསྔལ་ཆེན་པོ་དང་པོ་ཡིན་ནོ། །གཞན་ཡང་ལྷ་རྣམས་འཆི་འཕོ་བར་གྱུར་པའི་དུས་ན་སྡུག་བསྔལ་གཉིས་པ་འདི་ལྟ་སྟེ། འདོད་པ་སྡུག་པ་ཡིད་དུ་འོང་བའི་ལྷ་རྫས་ཀྱི་ཡུལ་རྣམས་དང་ཕྱི་ནས་ཡང་མི་ཕྲད་པ་ཞེས་བྱ་བ་འདི་ནི་ལྷ་རྣམས་འཆི་འཕོ་བའི་དུས་ན་སྡུག་བསྔལ་ཆེན་པོ་གཉིས་པ་ཡིན་ནོ། །གཞན་ཡང་ལྷ་རྣམས་ལ་སྡུག་བསྔལ་གསུམ་པ་ཡོད་དེ། ལྷ་གཞན་གང་དག་དང་རྩེ་བར་བྱེད་པ་ན་དེ་དག་གིས་འདིའི་མངོན་སུམ་དུ་གྱུར་པ་གང་གི་ཚེ། སྣུམ་ཟད་པའི་མར་མེ་འཆི་བ་བཞིན་དུ་མཐོང་བར་འགྱུར་རོ། །དེའི་ཚེ་དེ་ལ་སྡུག་བསྔལ་གང་དག་སྐྱེ་བར་འགྱུར་བ་དེ་དག་འདི་ལྟར་འབྱུང་བ་ཡིན་ཏེ། ངེས་པའི་ལས་ཀྱི་རླུང་གིས་བདག་ངེས་པར་བརླག་པར་འགྱུར་བ་ཡིན་ནོ་ཞེས་དེ་ལ་རྣམ་པར་འབྲལ་བར་བྱས་པའི་སྡུག་བསྔལ་སྐྱེ་བ་གང་ཡིན་པ་དེ་དམྱལ་བའི་སྡུག་བསྔལ་གྱིས་ཀྱང་ཆར་མི་བཟོད་དོ། །གཞན་ཡང་ལྷ་རྣམས་ཀྱི་སྡུག་བསྔལ་བཞི་པ་ཡོད་དེ། གང་གི་ཚེ་འཆི་འཕོ་བར་གྱུར་པ་དང་ཉེ་བར་གྱུར་པ་ན། འགྲོ་བ་གང་ནས་སྐྱེ་བར་འགྱུར་བ་དང་། གང་ལ་འདི་སྐྱེ་བ་འབྱུང་བར་འགྱུར་བ་དམྱལ་བ་དང་ཡི་དགས་དང་དུད་འགྲོ་རྣམས་ཀྱི་འགྲོ་བ་དེ་དེས་ཇི་ལྟ་བ་བཞིན་དུ་མཐོང་བར་གྱུར་པ་ན། དེའི་ཚེ་འདི་འགྱོད་པར་གྱུར་པས་བྱས་པའི་མེར་འོས་པ་རྣམ་པ་དུ་མའི་སྡུག་བསྔལ་འབྱུང་བར་འགྱུར་རོ། །གཞན་ཡང་ལྷ་རྣམས་ལ་སྡུག་བསྔལ་ཆེན་པོ་ལྔ་པ་ཡོད་དེ། གང་དག་དགེ་བའི་བཤེས་གཉེན་དུ་གྱུར་པ་རྣམས་ཀྱིས་ཆོས་བསྟན་པར་གྱུར་པ་ན་དེ་ཡང་ཉན་པར་མི་བྱེད་པ་དང་། དམ་པའི་ཆོས་རྗེས་སུ་སྒྲུབ་པར་མི་བྱེད་པར་བག་མེད་པས་བག་མེད་པར་རྒྱུ་བ་ཡུལ་གྱིས་ཀུན་ནས་ཕྲོགས་པར་གྱུར་པའི་སེམས་ཀྱིས་ཏེ། འཆི་འཕོ་བར་འགྱུར་བའི་དུས་དེའི་ཚེ་དེ་ཡང་རྗེས་སུ་དྲན་ནས། ཧཱ་མི་བཟད་པའི་སྡུག་བསྔལ་ངས་ཅི་ཞིག་བྱས་ན། ཆོས་གང་ཡིན་པ་ནི་མ་མཉན་ནོ། །ཚུལ་ཁྲིམས་ལ་ཡང་རྗེས་སུ་མ་བསྒྲུབས་

71-89a

པས་ཤེས་རབ་ཀྱང་གོམས་པར་མ་བྱས་པ་དེའི་སེམས་དང་པོ་ཁོ་ནར་རྣམ་པར་འགྱོད་པར་འགྱུར་བའི་མེས་སྲེག་པར་བྱེད་དོ། །རང་ལས་ཀྱི་ཞགས་པ་དེས་དབང་མེད་པར་ངེས་པར་བཅིངས་ནས་བག་མེད་པའི་དགྲས་བསླུས་པ་ཡིན་ཏེ། ལྷ་རྣམས་ལ་སྡུག་བསྔལ་ཆེན་པོ་ལྔ་པོ་འདི་རྣམས་ཡོད་དོ། །སྡུག་བསྔལ་དེ་དག་རྣམས་ལྷ་རྣམས་ཀྱིས་མི་ཤེས་ཏེ། བག་མེད་པའི་དགྲ་རྣམས་ཀྱིས་ཅོ་དྲིས་པའི་ཕྱིར་དང་། བསླུས་པའི་ཕྱིར་དང་རྣམ་པར་ཉམས་པར་བྱས་པའི་ཕྱིར་རོ། །དེ་ནས་དེ་ལྟར་རིག་ནས་ངང་པ་རྣམས་ཀྱི་མངའ་བདག་དེ་གཅིག་ཏུ་ངེས་པའི་བློ་དང་ལྷན་ཅིག་ཏུ་ངེས་པར་བློ་བཞག་པར་གྱུར་ནས་ཐབས་རྣམས་གང་ཡིན་པ་དཔྱོད་པར་བྱེད་དེ། གང་གིས་འདི་དག་ལེགས་པར་བྱེད་པར་འགྱུར་བའི་ཐབས་གང་དག་གིས་ལྷ་འདི་དག་རྣམས་ལ་བདག་གིས་ཆོས་བསྟན་པར་བྱ། དེ་ནས་དེ་ལྟར་དུས་རིང་བ་ན་རྟོགས་ནས་ངང་པ་རྣམས་ཀྱི་བདག་པོ་དེ་གཞན་ལ་ཕན་པ་ལ་རབ་ཏུ་ཞུགས་པས། སེམས་ཅན་དེ་དག་རྣམས་ལ་ཕན་པར་བྱ་བའི་དོན་དུ་ཚིགས་སུ་བཅད་པ་བརྗོད་པ། ཇི་ལྟར། རྟག་ཏུ་སྦྱིན་དང་ཚུལ་ཁྲིམས་ལྡན། །སེམས་ཅན་ཐམས་ཅད་ལ་རྗེས་བརྩེ། །ཀུན་ཏུ་བསམས་པ་ཐམས་ཅད་འགྲུབ། །དེ་ཕྱིར་ཚུལ་ཁྲིམས་མཆོག་ཡིན་ནོ། །བྱམས་དང་སྙིང་རྗེ་དང་ལྡན་ཞིང་། །འདོད་པ་ཟད་པའི་ལུས་ཅན་རྣམས། །གཞན་དག་རྗེས་སུ་འཛིན་ལྡན་པའི། །ལུས་འགྲུབ་པ་ནི་རྟག་ཏུ་གནས། །ཆོག་ཤེས་པ་དང་བག་ཡོད་པའི། །སེམས་ཅན་ཀུན་ལ་ཕན་པར་འདོད། །འདོད་ཆགས་ཞེ་སྡང་ལས་རྣམས་གྲོལ། །ལུས་འགྲུབ་པ་ནི་རྟག་ཏུ་གནས། །གྲོགས་དང་དགྲ་དང་བྲལ་བ་དང་། །ལུས་ཅན་རྣམས་ལ་སྙོམས་པའི་སེམས། །ངན་སོང་འགྲོ་བས་འཇིགས་པ་ཡི། །ལུས་འགྲུབ་པ་ནི་རྟག་ཏུ་གནས། །བསླུ་བ་མེད་དང་བརྟན་པ་དང་། །ཆོས་སྦྱིན་པ་ལ་དགའ་བ་དང་། །སེར་སྣ་ཕྲག་དོག་རྣམ་གྲོལ་བའི། །ལུས་འགྲུབ་པ་ནི་རྟག་ཏུ་གནས། །སྡོམ་ལ་གནས་དང་ཞི་བ་དང་། །བླ་མ་མཆོད་ལ་དགའ་བ་དང་། །དོན་དང་དོན་མིན་

71-89b

ཐབས་བླག་ཤེས། །དོན་གྲུབ་པ་ནི་རྟག་ཏུ་གནས། །གཡོ་མེད་ཤིན་ཏུ་མཁས་པ་དང་། །རྟག་པར་ཡང་ནི་སྙན་པའི་ངག །མགོན་མེད་རྣམས་ལ་སྡོམ་བརྩོན་ལྡན། །དོན་གྲུབ་པ་ནི་རྟག་ཏུ་གནས། །ཡུལ་དུས་རྣམ་པར་ཤེས་པ་ཡི། །བསྒྲུབ་དང་སྒྲུབ་མིན་རྣམ་པར་ཤེས། །སྡིག་པའི་སྦྱང་ཐབས་ཤེས་ནུས་པའི། །ལུས་འགྲུབ་པ་ནི་རྟག་ཏུ་གནས། །དེ་ལྟར་ངང་པ་རྣམས་ཀྱི་མངའ་བདག་དེས་རིག་པར་གྱུར་ནས། ཇི་ལྟར་འདི་དག་རྣམས་ཆོས་བྱེད་དུ་འགྱུར་བ་དང་། ཆོས་སྟོན་པར་འགྱུར་བར་ཡང་བྱེད་དེ། གཞན་དག་རྗེས་སུ་འཛིན་པར་བྱེད་པ་ལ་སྦྱོར་བ་གང་ཡིན་པ་དེ་དག་རྣམས་ནི། ཀུན་ཏུ་བསམས་པ་རྣམས་ཐམས་ཅད་འགྲུབ་པར་དེས་རིག་པའི་ཕྱིར་རོ། །དེ་ནས་ལྷ་དེ་དག་རྣམས་བག་མེད་པ་བག་མེད་པར་རྒྱུ་བས་རྣམ་པར་རྒྱུ་བར་བྱེད་པ་ཡིན་ན། དེ་ལ་གང་གིས་འདི་དག་རྣམས་ཀྱི་བག་མེད་པ་དང་འབྲལ་བར་འགྱུར་བར་ཇི་ལྟར་བདག་གིས་དེ་དག་རྣམས་ལ་ཆོས་བསྟན་པར་བྱ། དེ་ནས་ཡེ་ཤེས་སྟོབས་པོ་ཆེས་ལེགས་པར་སྤྱད་པ་རྣམས་རིག་ཅིང་སྐྱེ་བ་གཞན་དྲན་པ་དང་དྲན་པར་གྱུར་ན། ཇི་ལྟར་སྔོན་བདག་མིར་གྱུར་ནས་འཛམ་བུའི་གླིང་དུ་སྐྱེས་པ་ན། བཅོམ་ལྡན་འདས་གསེར་ཐུབ་ཀྱི་སྤྱན་སྔར་ཆོས་ཐོས་པར་གྱུར་པ་དེའི་དུས་ནི་ཆུང་ངུ་ན་ཡང་ངེས་པར་འདི་ཡིན་ལ། བཅོམ་ལྡན་འདས་དེས་ནི་དུས་འདི་དག་མཁྱེན་ནས་བདག་ལ་ཆོས་བསྟན་པ་ཡིན་ཏེ། ཇི་ལྟར་ཚོང་དཔོན་གཙོ་བོའི་བུ་ཨུད་པ་ལ་སྦྱིན་ཞེས་བྱ་བ་འདི་ཤི་བར་གྱུར་ནས། འཐབ་བྲལ་བའི་ལྷ་རྣམས་ཀྱིས་རཱ་ཛ་ནི་ན་རྒྱུ་བར་ངང་པར་སྐྱེ་བ་གཞན་ལ་སྐྱེ་བར་འགྱུར་རོ། །དེས་བདག་གི་ཆོས་འདི་དག་རྣམས་བག་མེད་པས་བག་མེད་པར་རྣམ་པར་རྒྱུ་བར་བྱེད་པའི་ལྷ་དེ་དག་རྣམས་ལ་སྟོན་པར་བྱེད་དོ་ཞེས་བྱ་བ་ཆོས་དེའི་དུས་དེ་ནི་དེ་རིང་འདིར་བྱུང་བ་ཡིན་པས། ཅི་ནས་ཀྱང་བདག་གིས་ཆོས་དེ་དག་བསྟན་པར་བྱ་བ་ཡིན་ནོ། །ངང་པ་རྣམས་ཀྱི་མངའ་བདག་དེས་དེ་ལྟར་རིག་ནས། གཞན་ལ་ཕན་པ་ལ་རབ་ཏུ་ཞུགས་པ་སྙིང་རྗེ་དང་ལྡན་པར་གྱུར་ཅིང་། བྱམས་པ་དང་སྙིང་རྗེ་མང་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡིད་

71-90a

ལ་བྱས་ནས། གང་ན་རྔ་སྐད་ཡན་ལག་ལྔ་དང་ལྡན་པས་ལྷ་དེ་དག་རྣམས་རྩེ་བར་བྱེད་པ་དེར་ཉེ་བར་འགྲོའོ། །ངང་པའི་ཚོགས་ཆེན་པོ་རྣམས་ཀྱིས་ཡོངས་སུ་བསྐོར་ནས་ཉེ་བར་ཕྱིན་པར་གྱུར་ནས་མཐོང་བ་ནི། ལྷ་དེ་དག་རྣམས་ཁ་ཅིག་ནི་ནགས་ཚལ་གྱི་གསེབ་ལ་རྩེ་བར་བྱེད་དོ། །ཁ་ཅིག་ནི་པད་མའི་རྫིང་བུ་རྣམས་ལའོ། །ཁ་ཅིག་ནི་འཁྲི་ཤིང་གི་ཁང་པ་རྣམས་སུའོ། །ཁ་ཅིག་ནི་ནམ་མཁའི་དཀྱིལ་ན་ཁང་བུ་ལ་ལེགས་པར་ཀུན་ཏུ་གནས་ནས་རྩེ་བར་བྱེད་དོ། །ཁ་ཅིག་ནི་ལྷན་ཅིག་སྤྱོད་པ་རྣམས་དང་བཅས་ནས་བདུད་རྩི་ཟ་བར་བྱེད་དོ། །དེ་ནས་དུས་བཟངས་འདི་སྙམ་དུ་སེམས་ཏེ། ཇི་ལྟར་བག་མེད་པས་བག་མེད་པར་རྒྱུ་བ་འདི་དག་རྣམས་ཉིད་ལ་ཆོས་བསྟན་པའི་དབང་དུ་བྱས་པའི་དུས་ནི་འདི་ཡིན་ཏེ། གང་ཐ་མར་གྱུར་ཡང་བདག་གིས་རྣམ་པ་ཇི་ལྟ་བུའི་དབྱངས་སྙན་པའི་དབྱངས་རྣམས་ཀྱིས་ཆོས་ཀྱི་ཚིགས་སུ་བཅད་པའི་དབྱངས་ཀྱིས་འདི་དག་ལ་བསྙད་པར་བྱ་སྟེ། བདག་གིས་དབྱངས་ཀྱི་གདངས་ཤིན་ཏུ་སྙན་པ་གང་ཡིན་པས་ལྷ་དེ་དག་རྣམས་ཀྱི་དང་ལྷ་མོ་དེ་དག་རྣམས་ཀྱི་སྙན་པ་དང་ལྡན་པའི་གླུ་དབྱངས་དེ་དག་ཐམས་ཅད་ཉེ་བར་བཅོམ་ནས། ངའི་དབྱངས་དེ་ལ་ཀུན་ཏུ་གནས་པ་ཁོ་ནས་ལྷ་དེ་དག་རྣམས་དབྱངས་ཀྱིས་ཀུན་ཏུ་ཕྲོགས་པས་རྣ་བའི་རྣམ་པར་ཤེས་པ་གཏད་ནས་ཉན་པར་འགྱུར་རོ། །གཞན་དུ་ན་འདོད་པའི་ལོངས་སྤྱོད་རྣམས་ཀྱིས་བག་མེད་པས་ཉན་པར་མི་འགྱུར་རོ། །དེ་ནས་དེ་དག་ལ་བློ་ཀུན་ནས་གནས་པར་བྱས་ནས། ངང་པའི་རྒྱལ་པོ་དེས་ཚངས་པའི་དབྱངས་དེ་ཡིད་ལ་བྱས་ཤིང་། སངས་རྒྱས་ཀྱི་ཡོན་ཏན་དེ་དག་རྣམས་ཀྱང་རྗེས་སུ་དྲན་པར་བྱས་ཏེ། བྱམས་པ་དང་སྙིང་རྗེའི་བློ་མང་དུ་བསྐྱེད་པར་གྱུར་ནས། རིན་པོ་ཆེ་བདུན་གྱིས་རྣམ་པར་བརྒྱན་པའི་རིའི་རྩེ་མོ་ལ་མངོན་པར་གནས་ཏེ། ངང་པ་དེ་དག་རྣམས་ཉིད་དང་ལྷན་ཅིག་ཏུ་དཔག་ཚད་བརྒྱ་སྟོང་ཕྲག་བཅུར་ཁྱབ་པར་གྱུར་པ་དང་། མཚུངས་པ་མེད་པའི་དབྱངས་སྙན་པ་རྣམས་ཀྱིས་ཚིགས་སུ་བཅད་པ་བཤད་པ། ཇི་ལྟར། གསོན་པ་རེ་བ་རྣམ་འཇིག་པའི། །འཆི་བ་ཇི་སྲིད་མ་བྱུང་བ། །ཕྱི་ནས་འགྱོད་པར་མི་འགྱུར་བར། །དེ་སྲིད་དུ་ནི་བསོད་

71-90b

ནམས་ཀྱིས། །རྟག་ཏུ་བག་མེད་སྟེན་པ་གང་། །འདི་ནི་འཆི་བདག་གོ་འཕང་ཡིན། །བག་ཡོད་པ་ནི་ངེས་བསྟེན་པས། །འཆི་བ་མེད་པའི་གོ་འཕང་མཆོག །གང་དག་བག་མེད་པས་རྨོངས་པའི། །ལམ་འདི་ཤིས་པར་རབ་བརྗོད་མིན། །བག་ཡོད་པ་ལ་མཉམ་རྟེན་ནས། །མཁས་པ་མྱ་ངན་འདས་པར་འགྲོ། །གནས་དེ་དག་ནི་ཆུད་གཟོན་པའི། །བག་མེད་པ་ལ་དགའ་མ་བྱེད། །ཞི་མིན་གོ་འཕང་བླངས་ནས་ནི། །དམྱལ་བར་རྗེས་སུ་རྒྱུག་ལ་རེ། །རབ་ཞིག་རབ་ཏུ་ཆུད་ཟོས་གང་། །ལུས་ཅན་རབ་ཏུ་ཆུད་འཛར་འགྱུར། །དེ་དག་བག་མེད་སྐྱོན་ཡིན་པར། །དེ་བཞིན་གཤེགས་པ་གསུང་བར་མཛད། །དེ་ཕྱིར་ཐམས་ཅད་ཀྱིས་ཐམས་ཅད། །བརྩོན་པ་ཀུན་གྱིས་ཐམས་ཅད་ཀྱི། །བག་མེད་ཡོངས་སུ་སྤོང་བ་ཡི། །ལྷ་རྣམས་འདིར་ནི་ཞི་བར་བརྗོད། །དེ་ལྟར་ངང་པ་རྣམས་ཀྱི་མངའ་བདག་དེ་རིའི་རྩེ་མོ་དེ་ལ་ལྷག་པར་གནས་ནས་རྣམ་པ་དེ་ལྟ་བུའི་དབྱངས་ཀྱིས་རྗོད་པར་བྱེད་དོ། །དེ་ལྟ་བུར་སྙན་པ་དང་དེ་ལྟ་བུར་གསལ་བ་དང་དེ་ལྟ་བུར་ཡིད་འཕྲོག་པའི་དབྱངས་གང་གི་ཁྱད་པར་གྱིས་ནི་ལྷ་དེ་རྣམས་ཀྱི་གླུའི་དབྱངས་དེ་དག་གིས་ཐམས་ཅད་དུ་སྐྱོ་བ་སྐྱེ་བར་འགྱུར་རོ། །དེ་ནས་ལྷ་དེ་དག་རྣམས་ཐམས་ཅད་ཀྱང་སྒྲ་དེས་དྲངས་པར་གྱུར་ནས་གང་ན་རི་དེའི་རྩེ་མོ་ཡོད་པ་དེར་ཉེ་བར་འགྲོ་བར་བྱེད་དེ། མཆོག་ཏུ་སྙན་པ་ཤིན་ཏུ་རྒྱ་ཆེ་བར་གྱུར་པའི་རྣམ་པ་ཇི་ལྟ་བུའི་དབྱངས་དེ་ལྷ་རྣམས་ཀྱིས་ནམ་ཡང་སྔར་མ་ཐོས་པའི་བློ་ལྷ་དེ་དང་དེ་དག་རྣམས་ལ་སྐྱེ་སྟེ། ཇི་ལྟར་གླུའི་སྒྲ་འདི་དག་རྣམས་འདོད་པར་གྱུར་པས་དེ་དག་ཀུན་ཏུ་དྲངས་པ་ཡིན་གྱི་ཆོས་ལ་གུས་པ་ནི་མ་ཡིན་ནོ། །དེ་ནས་རིའི་རྩེ་མོ་དེ་ལ་འཁོད་ནས་མཐོང་བར་གྱུར་པ་ངང་པའི་རྒྱལ་པོ་དུས་བཟངས་དེས་ཚིགས་སུ་བཅད་པ་རྗོད་པར་བྱེད་པ་ནི་ཇི་ལྟར་སྔར་བཞིན་ནོ། །དེ་ནས་ལྷ་དེ་དག་དང་ལྷ་མོ་དེ་དག་རྣམས་ཐམས་ཅད་ཀྱང་སྙན་པ་དང་རྒྱ་ཆེ་བར་གྱུར་པ་མཆོག་གི་དབྱངས་དེས་བཀུག་པའི་ཕྱིར་ཐམས་ཅད་ཀྱིས་ཀྱང་དུས་བཟངས་དེ་ཡོངས་སུ་བསྐོར་ནས་གནས་ཏེ། རབ་ཏུ་དང་བ་རྩེ་གཅིག་པའི་ཡིད་ཀྱིས་དབྱངས་དེ་འབའ་ཞིག་ཉན་པར་བྱེད་དོ། །ཚིགས་སུ་བཅད་པ་

71-91a

འདི་དག་རྣམས་ལས་སྙན་པར་གྱུར་པའི་ཚིག་རྣམས་ཉེ་བར་འཛིན་པར་བྱེད་དོ། །དེ་ནས་ལྷ་དེ་དག་རྣམས་ཀྱི་ཡིད་རྩེ་གཅིག་ཏུ་གྱུར་པ་ངང་པའི་རྒྱལ་པོ་དེས་རིག་ནས། དེ་མིར་གྱུར་པ་ན་ཇི་ལྟར་གཙོ་བོར་གྱུར་པའི་བུའི་མིང་ཡང་ཨུད་པ་ལ་སྦྱིན་དུ་གྱུར་ཅིང་། གྱུར་པ་ན་བཅོམ་ལྡན་འདས་གསེར་ཐུབ་ཀྱི་སྤྱན་སྔར་ཐོས་པའི་ཆོས་དེ་གང་ཡིན་པ་འདི་ལས་བརྩམས་ནས་སྙན་ཞིང་མཆོག་ཏུ་རྒྱ་ཆེ་བར་གྱུར་པའི་དབྱངས་དེ་ཉིད་ཀྱིས་ཡིད་རྩེ་གཅིག་ཏུ་གྱུར་པ་རྣམས་ཉིད་ལ་རང་དང་འདྲ་བར་སྟོན་པར་བྱེད་པ་ཡིན་ཏེ། དེ་ལྟར་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བའི་ལྷ་དེ་དག་རྣམས་ལ། ཇི་ལྟར་བག་མེད་པས་བག་མེད་པར་རྣམ་པར་མི་རྒྱུ་བར་ལྷ་དག་གིས་གནས་པར་བྱ་བ་དང་། ཆོས་ཀྱང་བག་ཡོད་པས་ཉན་པར་བྱ་བ་དང་། སྐྱེས་བུ་དམ་པ་ཕན་པར་བྱེད་པ་རྣམས་ཀྱི་དྲུང་དུ་དམ་པའི་ཆོས་ཉན་པར་གྱུར་པ་ན། དམ་པའི་ཆོས་སྒྲོགས་པ་ལ་གུས་པ་དང་ལྡན་པའི་སྐྱེས་བུ་དམ་པ་རྣམས་ནི་མྱ་ངན་ལས་འདས་པའི་མཐར་ཐུག་པར་འགྱུར་རོ། །དགའ་བ་དང་ཡིད་བདེ་བ་མང་བར་འགྱུར་རོ། །ཟག་པ་རྣམས་ཟད་པར་འགྱུར་རོ། །འཇིག་རྟེན་གཉིས་པོ་འདི་དག་ཏུ་སྐྱེས་བུ་དམ་པས་ཚངས་པའི་བསོད་ནམས་སྐྱེད་པར་འགྱུར་རོ། །ཚུལ་བཞིན་དུ་གྱུར་པས་ཀྱང་འཛིན་པར་བྱེད་དོ། །ཟག་པ་དག་ཟད་པར་བྱེད་དོ། །དེ་ལ་གང་ཡང་དམ་པར་བྱས་ཏེ། ཆོས་སྟོན་པར་བྱེད་པ་དང་། གང་ཡང་དམ་པའི་ཆོས་ཏེ་ཉན་པར་བྱེད་པ་གང་གིས་དེ་ལ་དེ་དག་མ་དང་ཕ་གཉིས་དང་མཚུངས་པར་འགྱུར་བ་ཡིན་ན། གང་དག་འཁོར་བ་ནས་ངེས་པར་འབྱུང་བར་འགྱུར་བར་ཆོས་སྟོན་པར་བྱེད་པས་ཏེ། མཐར་ཐུག་པ་དང་དགེ་བའི་ཆོས་རྣམས་འཕེལ་བར་འགྱུར་བའི་ཆོས་སྟོན་པ་པོ་དེ་ནི་ཆོས་ཉེ་བར་འཕེལ་བ་དེ་ཡིས་མ་དང་ཕ་དང་མཚུངས་པར་འགྱུར་རོ། །དེ་ལ་དམ་པའི་ཆོས་སྟོན་པར་བྱེད་པ་ནི་ཆོས་སྟོན་པ་པོ་སྦྱིན་པ་པོ། ཆོས་ཀྱི་སྦྱིན་བདག་དུ་གྱུར་པ། ཉན་པ་པོ་རྣམས་ལ་ཆོས་སྒྲོགས་པས་ཉན་པར་བྱེད་དུ་འཇུག་པ་སྟེ་ཆོས་སྒྲོགས་པར་བྱེད་པ་པོ་ཡིན་ནོ། །དེ་ལ་ཆོས་བསྒྲགས་པ་ཉན་པ་རྣམས་ཀྱིས་ནི་རབ་ཏུ་བརྩོན་པ་དང་

71-91b

ལྡན་པ་དང་། སེམས་དྲང་པོའི་རང་བཞིན་དུ་གྱུར་པ་དང་། དམ་པའི་ཆོས་ལ་གུས་པ་དང་ལྡན་པས་ཆོས་སྒྲོགས་པ་རྣམས་ལས་ཆོས་ཉན་པར་འདོད་པ་ནི་ཡོན་ཏན་སུམ་ཅུ་ཐམ་པ་དང་ཡང་དག་པར་ལྡན་ནོ། །སུམ་ཅུ་ཐམ་པ་པོ་གང་དག་རྣམས་དང་ལྡན་ཞེ་ན། ཆོས་སྒྲོགས་པ་པོ་ཆོས་སྨྲ་བ་པོ་གཅིག་ཏུ་ཆོས་ཀྱི་སྦྱིན་བདག་ཏུ་གྱུར་པ་མ་དང་ཕ་དང་མཚུངས་པ་འཁོར་བའི་རྒྱུ་མ་ཡིན་པའི་དྲུང་ནས་ནི། འདི་ལྟ་སྟེ། མ་ཐོས་པའི་ཆོས་རྣམས་ཐོས་པར་འགྱུར་བ་དང་། ཐོས་པ་རྣམས་སོ་སོར་རིག་པར་བྱེད་པ་དང་། སོ་སོར་རིག་པར་བྱས་པས་ཀྱང་རྣམ་པར་དཔྱོད་པར་བྱེད་པ་དང་། རྣམ་པར་དཔྱད་ནས་ཀྱང་རབ་ཏུ་སྒྲུབ་པར་བྱེད་པ་དང་། རབ་ཏུ་ཞུགས་པར་གྱུར་ནས་བདག་ཉིད་རབ་ཏུ་གནས་པར་བྱེད་དོ། །རབ་ཏུ་གནས་པར་གྱུར་ནས་གཞན་དག་རྣམས་ཀྱང་རབ་ཏུ་འགོད་པར་བྱེད་དོ། །དེ་དང་ལྷན་ཅིག་ཏུ་ཆོས་ཉན་པར་གྱུར་པ་ལས་རྣམ་པར་དཔྱོད་པར་བྱེད་དོ། །རྒུད་པར་གྱུར་པས་ཀྱང་ཀུན་ནས་རབ་ཏུ་གཡོ་བར་མི་འགྱུར་རོ། །དགེ་བའི་རྩ་བ་མ་བསྐྱེད་པ་རྣམས་ལ་སྐྱེད་པར་བྱེད་པ་དང་གོང་དུ་རྣམ་པར་སྨིན་པར་བྱེད་དོ། །ཡོངས་སུ་སྨིན་པ་རྣམས་ནི་ཐར་བར་བྱེད་དོ། །ལོག་པར་ལྟ་བ་ཅན་རྣམས་ཡང་དག་པའི་ལྟ་བ་ཅན་དུ་བྱེད་དོ། །སྐྱེས་པར་གྱུར་པའི་མི་དགེ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །དགེ་བའི་སེམས་ཀུན་ཏུ་སྐྱེས་པ་རྣམས་ལེགས་པར་འཕེལ་བར་བྱེད་དོ། །རྐྱེན་གྱིས་བྱུང་བའི་མི་དགེ་བ་རྣམས་ཡོངས་སུ་སྤོང་བར་བྱེད་དོ། །བག་དང་ལྡན་པར་འགྱུར་རོ། །སྐྱེས་བུ་དམ་པ་རྣམས་ལ་རྗེས་སུ་སྟེན་པར་བྱེད་དོ། །གཡོ་དང་སེར་སྣ་རྣམས་དང་བྲལ་བར་བྱེད་དོ། །མ་དང་ཕ་ལ་གུས་པ་དང་ལྡན་པར་འགྱུར་རོ། །ལས་དང་འབྲས་བུ་རྣམས་ཀུན་ཏུ་ཤེས་སོ། །འདིས་ནི་ཚེ་རིང་བ་འཕེལ་བར་བྱེད་པའི་ལས་རྣམས་ཡང་མངོན་པར་འཕེལ་བར་བྱེད་དོ། །འཇིག་རྟེན་པ་རྣམས་ཀྱིས་ཀྱང་བསྔགས་པར་འགྱུར་རོ། །ལྷ་རྣམས་ཀྱིས་ཀྱང་འདི་དག་མངོན་པར་སྲུང་བར་བྱེད་དོ། །འདིས་ཀུན་ཏུ་བསམས་པ་རྣམས་ཀྱང་ཕུན་སུམ་ཚོགས་པར་འགྱུར་རོ། །ཆོས་དང་ལྡན་པའི་ལོངས་སྤྱོད་དག་ཐོབ་པར་འགྱུར་རོ། །

71-92a

ལེ་ལོ་མེད་པར་ཡང་འགྱུར་རོ། །བརྩོན་འགྲུས་བརྩམས་པ་དང་བྱས་པ་ཤེས་པར་ཡང་འགྱུར་རོ། །རྟག་པར་རྒྱུན་དུ་ཡང་འཆི་བ་རྗེས་སུ་དྲན་པ་སྒོམ་པར་བྱེད་དོ། །འཆི་བའི་དུས་ན་འགྱོད་པ་མེད་པར་ཡང་འགྱུར་རོ། །མཐར་ཡང་ཡོངས་སུ་མྱ་ངན་ལས་འདས་པར་འགྱུར་རོ། །དེ་ལྟ་བུའི་ཡོན་ཏན་སུམ་ཅུ་ཐམ་པ་ཡིན་ཏེ། ཆོས་དང་ལྡན་པའི་འཆད་པ་པོ་མ་དང་ཕ་དང་མཚུངས་པར་གྱུར་པའི་ཆོས་ཀྱི་སྦྱིན་བདག་ཆོས་སྒྲོགས་པ་པོའི་དྲུང་ནས་ཆོས་ཐོས་པ་ལས་ཡིན་ནོ། །དེ་ནི་མཐར་ཐུག་པ་དང་མཐའ་ཡས་པའི་ཕན་པ་བྱེད་པའི་ཕྱིར་ཕ་ཡིན་ཏེ། གང་གིས་རྙོག་པ་མེད་པ་དང་། ཡིད་རབ་ཏུ་རྣམ་པར་དང་བར་གྱུར་པ་དང་། ཕན་པ་བྱེད་པ་དང་། ངེས་པར་རྟོགས་པར་བྱེད་པས་ཀྱང་ཆོས་སྟོན་པར་བྱེད་པ་དེ་ནི། དོན་དེ་ལས་སངས་རྒྱས་དང་ཆོས་དང་དགེ་འདུན་གྱི་བྱ་བ་བྱེད་པ་ཡིན་ནོ། །འཁོར་བ་ལས་སྒྲོལ་བར་བྱེད་དོ། །འདི་ན་ཆོས་སྒྲོགས་པ་པོ་ཆོས་བརྗོད་པའི་དྲུང་ནས་གང་གི་ཚེ་ཆོས་ཉན་པར་བྱེད་པ་ན། དང་པོ་ཉིད་དུ་དེ་འཁོར་བ་ཐོག་མ་མེད་པའི་དུས་ནས་འཇུག་པ་ལས། གལ་ཏེ་ཤེད་ན་འགའ་ཞིག་ལས་ཆོས་ཐོས་པར་འགྱུར་ཏེ། དེ་ཆོས་སྒྲོགས་པ་དེའི་དྲུང་ནས་མ་ཐོས་པའི་ཆོས་རྣམས་ཐོས་པར་གྱུར་ནས་ངོ་མཚར་བ་སྐྱེ་བར་འགྱུར་རོ། །ཇི་ལྟར་སྐྱེས་པ་ནས་ལོང་བར་གྱུར་པའི་མིག་གི་ཉེས་པ་རྣམས་སྨན་པ་ཆེན་པོས་གང་གི་ཚེ་ཀུན་ནས་བསལ་བར་གྱུར་པ་ན། དེས་དུ་མ་སྣ་ཚོགས་པར་གྱུར་པའི་ས་གཞི་འདི་མཐོང་ནས་མཆོག་ཏུ་དགའ་ཞིང་རངས་པར་འགྱུར་རོ། །སྔ་ན་མེད་པ་དང་སྔར་མ་ཐོས་པ་རྣམ་པ་སྣ་ཚོགས་པའི་དགའ་བར་གྱུར་པའི་གཟུགས་མངོན་པར་མཐོང་བར་འགྱུར་རོ། །དེ་བཞིན་དུ་འདིའི་ཐོག་མ་མེད་པའི་དུས་ནས་རབ་ཏུ་ཞུགས་པ་རྣམས་ཀྱང་དམ་པའི་ཆོས་སྒྲོགས་པ་རྣམས་འཛིན་པའི་དོན་གྱིས་གང་གི་ཚེ་བྱང་ཆུབ་ཀྱི་ཡན་ལག་གི་ས་གཞི་སྣ་ཚོགས་པའི་དགེ་བའི་སྙིང་པོ་དགའ་བར་གྱུར་པ་སྔ་ན་མེད་པའི་མདོའི་དོན་རྣམས་རྗོད་པར་བྱེད་པས་གསལ་བར་གྱུར་པ་མཐོང་བར་འགྱུར་རོ། །དེའི་ཚེ་ཤིན་ཏུ་བར་ཡང་རབ་ཏུ་རངས་པར་འགྱུར་ཏེ། དམུས་ལོང་བཞིན་དུ་གཟུགས་རྣམས་

71-92b

མངོན་པར་མཐོང་ནས་རབ་ཏུ་དགའ་བར་འགྱུར་རོ། །འདི་ནི་ཡོན་ཏན་དང་པོ་ཡིན་ནོ། །དམ་པའི་ཆོས་སྒྲོགས་པར་བྱེད་པ་རྣམས་ལས་དེས་ཐོས་ནས་ཆོས་དེ་དག་རྣམས་རབ་ཏུ་རིག་པར་འགྱུར་རོ། །དམ་པའི་ཆོས་ཉན་པར་བྱེད་པས་ཆོས་དེ་དག་ཐོས་པར་གྱུར་ནས་ཡིད་ཀྱིས་རབ་ཏུ་རྟོགས་པར་བྱེད་དོ། །བཤད་པ་དེའི་དོན་ཅི་ཞིག་ཡིན་པ་ཡང་གང་གི་ཚེ་བདག་ཉིད་ཀྱིས་ཀུན་ནས་མ་རིག་པ་ན་དེ་གཞན་དག་རྣམས་ལ་ཡོངས་སུ་འདྲི་བར་བྱེད་དོ། །བཤད་པ་དེ་དག་གི་དོན་ཅི་ཡིན་ཞེས་བྱ་བར་དེ་དག་དང་གཞན་དག་རྣམས་ཀྱི་དྲུང་ནས་ཀྱང་དེ་ཐོས་ནས་ཡིད་ཀྱིས་རབ་ཏུ་རིག་པར་བྱེད་དོ། །སེམས་པར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །སྔ་མ་དང་ཕྱི་མའི་དོན་དག་དང་བཤད་པ་དེ་དག་སྦྱོར་བར་བྱེད་དོ། །ཡིད་ལ་བྱེད་དོ། །ཡིད་ལ་བྱས་ནས་ཀྱང་ཡང་དང་ཡང་དུ་དོན་རྣམས་ལ་ཀུན་ཏུ་ལྟ་བར་ཡང་བྱེད་དོ། །ཀུན་ཏུ་བལྟས་པས་ཀྱང་དགའ་བ་ཐོབ་པར་འགྱུར་རོ། །ཇི་ལྟ་ཇི་ལྟར་ཀུན་ཏུ་ལྟ་བར་བྱེད་པ་ན་ཡང་། དེ་ལྟ་དེ་ལྟར་དོན་ཟབ་མོ་རྣམས་ཀྱང་ཡིད་ཀྱིས་སོ་སོར་རྣམ་པར་ཕྱེད་པར་འགྱུར་རོ། །འདི་ནི་ཆོས་སྒྲོགས་པ་ལ་ཉན་པ་རྣམས་ཀྱིས་མ་ཐོས་པ་དག་ལེགས་པར་བཤད་པ་ཡིད་ལ་བྱས་པའི་ཡོན་ཏན་གཉིས་པ་ཡིན་ནོ། །གཞན་ཡང་ཡོན་ཏན་གསུམ་པ་ཡོད་པ་ནི། ཆོས་སྒྲོགས་པ་རྣམས་ཀྱང་སོ་སོར་རིག་པར་བྱས་ནས་རྣམ་པར་དཔྱོད་པར་བྱེད་དོ། །འདིའི་དོན་ནི་འདི་ཡིན་ནོ། །འདིའི་དོན་ནི་འདི་ཡིན་ཏེ། དགོངས་པ་འདི་དག་གིས་བཤད་པ་ཡིན་ནོ། །དེ་དག་གིས་སྤྱིའི་དོན་ནི་འདི་དག་ཏུ་རིགས་པ་ཡིན་ཏེ། གདུལ་བྱ་རྣམས་ཀྱི་དབང་གིས་དོན་འདི་བཅོམ་ལྡན་འདས་ཀྱིས་གསུངས་པ་ཡིན་ནོ། །དོན་དེ་དག་རྣམས་ཐོས་ནས་དཔྱོད་པར་བྱེད་དོ། །འདི་དག་དང་ལྷན་ཅིག་ཏུ་བཅས་ནས་གང་དག་གིས་སེམས་པར་བྱེད་པ་ཡིན་ནོ། །སྔ་ཕྱི་དེས་རྣམ་པར་སྤྱོད་པར་བྱེད་པ་ནི་གཅེས་པར་གྱུར་པ་ཡིན་ནོ། །མྱ་ངན་ལས་འདས་པའི་མཐར་ཐུག་པར་ཡང་བྱེད་དོ། །འདི་ནི་དམ་པའི་ཆོས་སྒྲོགས་པར་བྱེད་པ་ལ་ཉན་པའི་ཡོན་ཏན་གསུམ་པ་ཡིན་ནོ། །གཞན་ཡང་ཡོན་ཏན་བཞི་པ་ཡོད་པ་ནི། དམ་པའི་ཆོས་བསྒྲགས་པ་རྣམས་རྣམ་

71-93a

པར་དཔྱོད་པར་གྱུར་པ་ན་བཤད་པ་དེའི་སྔ་མ་དང་ཕྱི་མའི་དོན་དེ་དག་རྣམས་ཕྱི་ནས་རིག་པར་གྱུར་ནས་སྒྲུབ་པར་བྱེད་དོ། །བསྒྲུབ་པ་ཞེས་བྱ་བ་ཡང་ཇི་ལྟར་བཤད་པ་དེའི་དོན་ཡིན་པ་ལས། ཇི་ལྟར་ལུས་དང་ངག་དང་ཡིད་ཀྱི་ལས་ཀྱིས་རབ་ཏུ་སྒྲུབ་པར་བྱེད་པ་ཡིན་ཏེ། དགེ་བ་རྣམ་པ་གསུམ་བྱེད་པ་ཡིན་ནོ། །སྒོམ་པར་བྱེད་དོ། །ལན་མང་དུ་བྱེད་དོ། །བཤད་པ་དེ་ལ་རབ་ཏུ་སྒྲུབ་པར་བྱེད་དོ། །བློ་རབ་ཏུ་དང་བར་གྱུར་པས་ཚིག་ནས་ཚིག་རྣམས་དང་དབང་སྐལ་ནས་དབང་སྐལ་རྣམས་དང་། འབྲེལ་བ་ནས་འབྲེལ་བ་རྣམས་སུ་རྣམ་པར་དཔྱོད་པར་བྱེད་དོ། །དེས་ཇི་ལྟ་ཇི་ལྟར་རྣམ་པར་དཔྱད་པར་འགྱུར་བ་དེ་ལྟ་དེ་ལྟར་དོན་ལས་མི་ཉུང་བར་འགྱུར་རོ། །དེས་སྔ་ན་མེད་པའི་དོན་རྣམས་རྙེད་པར་འགྱུར་བའི་ཕྱིར་ཉོན་མོངས་པ་རྣམས་ལ་འབད་པར་བྱེད་དོ། །དེ་ཀུན་ཏུ་སྦྱོར་བ་རྣམས་དང་རྗེས་སུ་འབྲེལ་བ་རྣམས་ལ་ཡང་འབད་པར་བྱེད་པ་དང་། ཡོན་ཏན་དུ་མ་རྣམས་དང་ཚུལ་ཁྲིམས་དང་ཤེས་རབ་དང་སྦྱིན་པ་ལ་དེ་ལྟ་དེ་ལྟར་རྗེས་སུ་སྒྲུབ་པར་ཡང་བྱེད་དོ། །གལ་ཏེ་ན་བསམ་པའི་ཁྱད་པར་གྱིས་དང་། སྦྱིན་པ་དང་ཚུལ་ཁྲིམས་དང་ཤེས་རབ་རྣམས་ལ་སྟེ། འདི་ནི་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་བཞི་པ་ཡིན་ནོ། །གཞན་ཡང་དམ་པའི་ཆོས་སྒྲོགས་པ་ལ་ལེགས་པར་ཉན་ཅིང་ལེགས་པར་རབ་ཏུ་ཞུགས་པར་གྱུར་པའི་ཡོན་ཏན་ལྔ་པ་ཡོད་དེ། ལས་རྣམ་པ་གསུམ་པོ་རྣམས་ཀྱིས་ཕྱི་ནས་བདག་ཉིད་ཤིན་ཏུ་བརྟན་པར་བྱེད་པ་ཡིན་ནོ། །ཆོས་འདུལ་བ་དེ་ལ་རབ་ཏུ་འགོད་པར་བྱེད་དོ། །ཇི་ལྟར་ཡང་དགེ་སྦྱོང་ངམ་བྲམ་ཟེའམ་ཁྱིམ་པ་རྣམས་ཀྱིས་ཀྱང་འདི་ལྟར་རྗོད་པར་བྱེད་དེ་ཇི་ལྟར་རིགས་ཀྱི་བུ་ཆེ་གེ་མོ་ཞིག་ཆོས་འདུལ་བ་ལ་ལེགས་པར་གནས་པར་གྱུར་ཏེ། དེ་ནི་ཇི་སྐད་བརྗོད་པ་དེ་ལྟར་བྱེད་པ་ཡིན་ནོ་བྱ་བའོ། །དེ་ལྟར་བདག་ཉིད་དང་གཞན་དག་ཀྱང་ཆོས་འདུལ་བ་དེ་ལ་རབ་ཏུ་གནས་པར་བྱེད་དོ། །དེས་ཇི་ལྟ་ཇི་ལྟར་རབ་ཏུ་འགོད་པར་བྱེད་པ་དེ་ལྟ་དེ་ལྟར་འཁོར་བའི་སྐྱེ་བ་བརྒྱ་སྟོང་ཕྲག་བྱེ་བ་ཁྲག་ཁྲིག་དང་། བསྐལ་པ་བརྒྱ་སྟོང་ཕྲག་བྱེ་བ་ནས་བྱེ་བ་རྣམས་འཇོམས་པར་བྱེད་དོ། །འཇིག་པར་

71-93b

བྱེད་དོ། །སྐྱེ་བ་གཞན་གང་དག་བརྒྱ་སྟོང་རྣམས་སུ་དམྱལ་བ་དང་ཡི་དགས་རྣམས་སུ་སྐྱེ་བར་འགྱུར་བ་རྣམས་འགོག་པར་བྱེད་དོ། །འདི་ཡང་དམ་པའི་ཆོས་བསྒྲགས་པ་ཉན་ཅིང་བསྟེན་པ་ལ་བསྒོམས་ཤིང་རྣམ་པར་དཔྱད་པ་རྣམས་ཀྱི་ཡོན་ཏན་ཆེན་པོ་གཞན་ཡིན་ནོ། །ཆོས་ཉན་པར་བྱེད་པ་རྣམས་ལ་དམ་པའི་ཆོས་སྒྲོགས་པ་རྣམས་ནི་ཤིན་ཏུ་གཅེས་པར་གྱུར་པ་ཡིན་ནོ། །མྱ་ངན་ལས་འདས་པ་ཉེ་བར་སྟོན་པར་བྱེད་པའི་ཕྱིར་ན་དོན་གྱིས་ན་སངས་རྒྱས་ཡིན་ནོ། །གང་གིས་ཆོས་ཀྱི་དབང་དུ་བྱས་ནས་རབ་ཏུ་འགོད་པར་བྱེད་པའི་དམ་པའི་ཆོས་སྨྲ་བ་པོ་དེ་ལ་བླ་ལྷག་ཏུ་འཐུན་པར་འཛིན་པ་དང་གུས་པ་ཆེན་པོ་དང་རབ་ཏུ་དང་བར་གྱུར་པ་རྣམས་གཡོ་མེད་པས་སྟོན་པ་བཞིན་དུ་བྱའོ། །འདི་ནི་དམ་པའི་ཆོས་ཉན་པའི་ཡོན་ཏན་ལྔ་པ་ཡིན་ནོ། །གཞན་ཡང་དམ་པའི་ཆོས་སྒྲོགས་པའི་ཡོན་ཏན་དྲུག་པ་འདི་དག་ཀྱང་གང་ཞེ་ན། འདི་ལྟ་སྟེ། རང་རབ་ཏུ་གནས་པར་གྱུར་ནས་གཞན་ཡང་རབ་ཏུ་གནས་པར་བྱེད་ཅིང་། གཞན་དག་རྣམས་ཀྱང་རབ་ཏུ་དད་པར་བྱེད་དོ། །གང་དག་གི་སྐྱེ་བ་གཞན་བརྒྱ་སྟོང་དུ་དམྱལ་བ་དང་ཡི་དགས་སུ་སྐྱེས་པར་གྱུར་པའི་སྡུག་བསྔལ་དུ་མ་རྣམས་བཅོམ་ནས་སྣོད་དུ་བྱེད་དོ། །འཁོར་བ་ལས་སྐྱོ་བ་སྐྱེད་པར་བྱེད་དོ། །བདེ་ལེགས་ཡང་དག་པར་སྟོན་པར་བྱེད་དོ། །སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་རྣམས་ཀྱི་གཏམ་བྱེད་དོ། །དེ་གཉིས་ཀའི་རྒྱུད་ལས་བསོད་ནམས་རབ་ཏུ་འབྱུང་བར་བྱེད་དོ། །དེ་རང་གི་རྒྱུད་ལ་ཡང་སྟེ། དེ་ནི་བདག་གཞན་ལ་ཕན་པར་བྱེད་པ་ཡིན་པས་བསོད་ནམས་ཆེན་པོ་རབ་ཏུ་འབྱུང་བར་འགྱུར་རོ། །ཇི་ལྟ་ཇི་ལྟར་དམ་པའི་ཆོས་སྒྲོགས་པ་ཉན་པར་བྱེད་པ་དེ་ལྟ་དེ་ལྟར་ཤེས་རབ་མངོན་པར་འཕེལ་བར་འགྱུར་རོ། །

དེ་ལྟ་དེ་ལྟར་ཉོན་མོངས་པ་རྣམས་ཟད་པར་བྱེད་དོ། །དེ་ཉོན་མོངས་པ་རྣམས་ཟད་པས་ཡོངས་སུ་མྱ་ངན་ལས་འདའ་བར་འགྱུར་རོ། །དམ་པའི་ཆོས་སྒྲོགས་པའི་ཡོན་ཏན་ནི་དེ་དག་རྣམས་ཡིན་ནོ། །གཞན་ཡང་དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་བདུན་པ་ཡོད་དོ། །འདི་ཡང་ཞེ་ན། འདི་ལྟ་སྟེ། རྒུད་པས་

71-94a

སེམས་ཞུམ་པར་མི་འགྱུར་རོ། །ལས་ཀྱི་འབྲས་བུ་རྣམ་པར་སྨིན་པ་རྣམས་ཐོས་ནས་རྒུད་པས་ཞུམ་པར་མི་འགྱུར་རོ། །བྱ་བ་མ་ཡིན་པ་རྣམས་མི་བྱེད་དོ། །བརྗོད་པར་བྱ་བ་མ་ཡིན་པ་རྣམས་རྗོད་པར་ཡང་མི་བྱེད་དོ། །བསམ་པར་བྱ་བ་མ་ཡིན་པའི་བསམ་ཁྲལ་རྣམས་སེམས་པར་མི་བྱེད་དོ། །འདིའི་སེམས་ཀྱི་དཔའ་རབ་ཏུ་ཉམས་པར་ཡང་མི་འགྱུར་རོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་བདུན་པ་ཡིན་ནོ། །གཞན་ཡང་དམ་པའི་ཆོས་བསྒྲགས་པའི་ཡོན་ཏན་བརྒྱད་པ་ནི། ཡང་གཞན་དག་ལ་ཤེས་པའམ་ཐོས་པའམ་ཚུལ་ཁྲིམས་སམ་ཤེས་རབ་བམ་ལུང་གིས་ལྷག་པ་མཐོང་བར་གྱུར་ནས་ང་རྒྱལ་དང་ལྡན་པར་མི་བྱེད་པར་དེ་དག་དང་ལྷན་ཅིག་ཏུ་ཆོས་ཀྱི་མཚན་ཉིད་ལ་རྣམ་པར་དཔྱོད་པར་བྱེད་དོ། །བཤད་པ་དེ་དང་དེ་དག་གི་དོན་རྣམ་པར་འདྲེས་པར་འགྱུར་བ་རྣམས་ཀྱང་གསལ་བར་བྱེད་དོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་བརྒྱད་པ་ཡིན་ནོ། །དགེ་བའི་རྩ་བ་མ་སྐྱེས་པ་རྣམས་སྐྱེད་པར་བྱེད་དེ། གང་གི་ཕྱིར་དམ་པའི་ཆོས་བསྒྲགས་པ་ཐོས་པར་གྱུར་ནས་དགེ་བའི་རྩ་བ་མ་བསྐྲུན་པ་རྣམས་སྐྲུན་པར་བྱེད་དོ། །དམ་པའི་ཆོས་སྒྲོགས་པ་རྣམས་འདོད་པས་དགེ་བའི་རྩ་བ་རྣམས་སྐྱེད་པར་བྱེད་པ་ནི་འདི་ལྟ་སྟེ། ཞིང་གི་རྣང་ལ་ས་བོན་ཀུན་ནས་སོ་སོར་བཏབ་པར་གྱུར་པས་མྱུ་གུ་རྣམས་རབ་ཏུ་སྐྱེ་བར་ནུས་པར་འགྱུར་རོ། །དེ་ཁོ་ན་བཞིན་དུ་བརྩོན་འགྲུས་དྲག་པ་རྣམས་ཀྱི་དགེ་བའི་རྩ་བ་ཡང་ཆོས་ཉན་པ་པོ་རྣམས་ཀྱིས་ཆོས་སྒྲོགས་པར་ཕྱིན་ཞིང་ཆོས་སྨྲ་བའི་དྲུང་ནས་དགེ་བའི་རྩ་བའི་ས་བོན་རྣམས་རྣ་བའི་བུ་ག་ནས་ཞུགས་ནས་ཡིད་ཀྱི་ཞིང་རྣང་ལ་ལེགས་པར་སྐྱེའོ། །ཆོས་ཀྱི་ས་བོན་རྣ་བའི་ཞིང་རྣང་ལ་རྗེས་སུ་ཞུགས་པ་དེ་དུས་གཞན་དུ་འབྲས་བུ་རྣམ་པར་རྒྱས་པར་གྱུར་པས་དམྱལ་བ་དང་ཡི་དགས་དང་དུད་འགྲོའི་འགྲོ་བའི་སྡུག་བསྔལ་གྱི་མུ་གེའི་འཇིགས་པ་རྣམས་ལས་ཡོངས་སུ་སྐྱོབ་པར་བྱེད་དོ། །དེའི་ཕྱིར་དེ་དག་རྣམས་ལས་ཡོངས་སུ་བསྐྱབ་པར་བྱས་ཤིང་སྡུག་བསྔལ་དེ་དག་རྣམས་ཐམས་ཅད་ཀྱང་རབ་ཏུ་གཞོམ་པར་བྱས་ལ། ངམ་གྲོག་རྣམས་ཐམས་ཅད་ཀྱང་བཅད་ཅིང་འཇིགས་པ་རྣམས་ཐམས་ཅད་ལས་

71-94b

གྲོལ་བར་བྱས་ནས། ཞི་བའི་གོ་འཕང་བླ་ན་མེད་པར་གྱུར་པའི་བར་དུ་འཇུག་པར་བྱེད་དོ། །དེ་ནས་ནི་མྱ་ངན་ལས་འདས་པར་ཞུགས་པར་འགྱུར་བ་ཡིན་ནོ། །དམ་པའི་ཆོས་སྒྲོགས་པར་བྱེད་པ་དེ་ནི་དོན་དེ་དག་གི་ཕྱིར་ན་སངས་རྒྱས་ཀྱི་མཛད་པ་བྱས་པ་ཡིན་ནོ། །དེའི་ཕྱིར་དམ་པའི་ཆོས་སྒྲོགས་པར་བྱེད་པ་དེའི་ཡོན་ཏན་གཞན་འདི་དག་ཡིན་ཏེ། གང་དམ་པའི་ཆོས་རྟག་ཏུ་སྒྲོགས་པ་ལ་འགྲོ་བ་དང་བསྙེན་བཀུར་བྱེད་པ་དང་སྒྲུབ་པར་བྱེད་པ་དེ་དག་རྣམས་ནི་སྐྱབས་ཡིན་ཞིང་འཁོར་བ་ལས་ངེས་པར་འབྱུང་བར་བྱེད་པའི་སྒོ་ཡིན་ནོ། །དམ་པའི་ཆོས་སྒྲོགས་པར་བྱེད་པ་རྣམས་ལ་ནི་ཡོན་ཏན་གཞན་དག་ཀྱང་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ་གོང་དུ་སྐྱོང་བར་བྱེད་པའོ། །དགེ་བའི་རྩ་བ་རྣམས་རྒྱ་ཆེན་པོར་གོང་དུ་ཡོངས་སུ་སྨིན་པར་བྱེད་དོ། །གང་འགའ་ཞིག་ཆོས་སྒྲོགས་པ་ལ་རྟག་ཏུ་ཉན་དུ་འགྲོ་བར་བྱེད་པའི་བརྩོན་འགྲུས་དྲག་པོ་དང་ལྡན་པ་དེའི་དགེ་བའི་རྩ་བ་རྣམས་ནི་ཕྱི་ནས་ཡོངས་སུ་སྨིན་པར་འགྱུར་རོ། །དཔེར་ན་ཞིང་གི་རྣང་ལ་ས་བོན་རབ་ཏུ་བཏབ་པར་གྱུར་པ་ལས་དུས་ཕྱིས་ཉི་མའི་འོད་ཟེར་གྱིས་དང་དུས་ཀྱི་འགྱུར་བ་ལས་ཡོངས་སུ་སྨིན་པར་འགྲོའོ། །དེ་བཞིན་དུ་ཕྱི་ནས་དགེ་བའི་རྩ་བ་རྣམས་ཤེས་རབ་ཀྱི་ཉི་མས་ཡོངས་སུ་སྨིན་པར་བྱེད་དོ། །དེའི་ཕྱིར་རྟག་པར་རྒྱུན་མི་འཆད་པར་དམ་པའི་ཆོས་བསྒྲགས་པར་འགྱུར་རོ། །མཉན་པར་ཡང་བྱའོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ། ཡོངས་སུ་སྨིན་པ་ངེས་པར་གྲོལ་བར་བྱེད་དོ། །གང་གི་ཚེ་སེམས་ལ་དགེ་བའི་རྩ་བ་རྣམས་ཡོངས་སུ་སྨིན་པར་གྱུར་པ་དེའི་ཚེ། འདི་ཁོ་ན་ལ་རྟག་ཏུ་འགྲོ་བ་དང་འཛིན་པ་དང་རྣམ་པར་དཔྱོད་པ་དང་སྒྲུབ་པར་བྱེད་པའི་རྒྱུས་སེམས་ཀྱི་རྒྱུད་དེ་ཡོངས་སུ་སྦྱང་བ་བྱས་པའི་ཕྱིར་ཉོན་མོངས་པ་རྣམས་འཇོམས་པར་བྱེད་དོ། །ཉོན་མོངས་པ་རྣམས་ཟད་པས་ཡོངས་སུ་འགྲོལ་བར་འགྱུར་རོ། །ངེས་པར་རྣམ་པར་གྲོལ་བ་རྣམས་ནི་ཆགས་པ་མེད་པར་འགྱུར་བས། དེ་འདི་སྙམ་དུ་སེམས་ཏེ་བདག་གི་སྐྱེ་བ་རྣམས་ནི་ཟད་དོ། །ཚངས་པར་སྤྱོད་པ་ནི་སྤྱད་དོ། །བྱ་བ་རྣམས་ནི་བྱས་སོ། །

71-95a

བདག་གི་སྲིད་པ་གཞན་རྣམས་ནི་རབ་ཏུ་མི་ཤེས་སོ། །དེ་ལ་ཡོན་ཏན་དེ་དག་རྣམས་ཐམས་ཅད་ཀྱང་དམ་པའི་ཆོས་བསྒྲགས་པ་ལས་ཡིན་ནོ། །དེའི་ཕྱིར་ན་རྒྱུན་མི་འཆད་པར་ཆོས་མཉན་པར་བྱའོ། །ཡང་ཐབས་གཞན་གྱིས་ངེས་པར་གྲོལ་བར་བྱེད་པའི་རྒྱུའི་ཡོན་ཏན་གཞན་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ། ལོག་པའི་ལྟ་བ་ཅན་རྣམས་ཡང་དག་པའི་ལྟ་བ་ཅན་དུ་བྱེད་དོ། །གང་ཡང་ཐོག་མ་མེད་པའི་དུས་ནས་འཁོར་བའི་བྱ་བ་ངན་པ་རྣམས་ཀྱིས་ཕྱིན་ཅི་ལོག་ལ་རབ་ཏུ་ཞུགས་པའི་འགྲོ་བ་རྣམས་ཐོས་པ་ངན་པ་རྣམས་ལ་ཀུན་ཏུ་འཇུག་པར་འགྱུར་བ་ཡིན་ནོ། །ཐོས་པ་ངན་པས་ཀྱང་དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་སུ་སྐྱེ་བར་འགྱུར་བ་ཡིན་ནོ། །གང་གི་ཚེ་དམ་པའི་ཆོས་ཉན་པར་བྱེད་པ་དང་། དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་ན། དེའི་ཚེ་ལོག་པར་ལྟ་བ་དེ་དག་སྟེན་ཅིང་སྒོམ་ལ་ལན་གྲངས་མང་དུ་བྱེད་པར་ཡང་མི་འགྱུར་རོ། །དེའི་ཚེ་འདི་ལ་བདེ་བ་རྣམས་ཀྱི་མཆོག་ཏུ་གྱུར་པ་དང་། སླུ་བ་མེད་པའི་ཡང་དག་པའི་ཡེ་ཤེས་འཆར་བར་འགྱུར་རོ། །དེའི་ཕྱིར་ན་དམ་པའི་ཆོས་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་ཡོན་ཏན་གཞན་ཡང་འདི་དག་ཡོད་དོ། །འདི་ཡང་གཞན་གང་དག་ཞེ་ན། འདི་ལྟ་སྟེ། སྐྱེས་པར་གྱུར་པའི་མི་དགེ་བའི་རྩ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །ཡང་དམ་པའི་ཆོས་བསྒྲགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་འདི་དག་ནི་གཞན་ཡིན་ནོ། །འདི་ཡང་གང་ཞེ་ན། འདི་ལྟ་སྟེ། མི་དགེ་བའི་རྣམ་པར་རྟོག་པ་ཉུང་ངུ་ཙམ་ཞིག་ཡིད་ལ་སྐྱེས་པར་གྱུར་ཀྱང་། དེའི་ཚེ་མི་དགེ་བ་གཉེན་པོས་ངེས་པར་འཇོམས་པར་བྱེད་པ་ལ་འདི་ལྟ་སྟེ། གང་གི་ཚེ་འདོད་ཆགས་ཀྱི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་མི་སྡུག་པའི་གཉེན་པོས་ངེས་པར་འཇོམས་པར་བྱེད་དོ། །གང་གི་ཚེ་ཞེ་སྡང་གི་རྣམ་པར་རྟོག་པ་སྐྱེས་པར་གྱུར་པ་ན། དེའི་ཚེ་བྱམས་པའི་གཉེན་པོས་འཇོམས་པར་བྱེད་དོ། །གལ་ཏེ་གཏི་མུག་གི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་རྟེན་ཅིང་

71-95b

འབྲེལ་པར་འབྱུང་བའི་གཉེན་པོས་འཇོམས་པར་བྱེད་དོ། །དེ་ལ་གཉེན་པོ་དེ་དག་རྣམས་ནི་དམ་པའི་ཆོས་སྒྲོགས་པ་ལ་ཉན་པ་ལས་ཡིན་ནོ། །དེ་ལ་མ་ཐོས་པ་རྣམས་ཀྱིས་ནི་རེ་ཞིག་མི་དགེ་བའི་རྩ་བ་གསུམ་པོ་རྣམས་ཀྱི་རྣམ་པར་རྟོག་པ་ཡང་རྣམ་པར་འཇོམས་པར་བྱེད་པ་མ་ཡིན་ནོ། །གང་དག་ཕྲ་བར་གྱུར་པ་ཉེ་བའི་ཉོན་མོངས་པ་གཞན་དེ་དག་རྣམས་ཀྱི་སོ་སོར་འཇོམས་པར་འབྱུང་བར་མི་འགྱུར་བ་ལ་ལྟ་སྨོས་སུ་ཅི་ཞིག་ཡོད་ནས། དེའི་ཕྱིར་དམ་པའི་ཆོས་སྒྲོགས་པའི་ཡོན་ཏན་འདི་ཡང་གཞན་ཡིན་ནོ། །དམ་པའི་ཆོས་ཀྱིས་ཀྱང་མི་དགེ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །གང་གི་ཚེ་ཉི་མས་མུན་པ་རྣམས་འཇོམས་པར་བྱེད་པ་ཡིན་ལ། དེ་བཞིན་དུ་ཤེས་རབ་ཀྱིས་ཀྱང་ཉོན་མོངས་པའི་མུན་པ་རྣམས་ཐམས་ཅད་འཇོམས་པར་བྱེད་པ་ཡིན་ཏེ། དམ་པའི་ཆོས་ཀྱི་ཕྱོགས་ནི་སྟོབས་དང་ལྡན་པ་ཡིན་ལ། ཉོན་མོངས་པའི་ཕྱོགས་ནི་སྟོབས་ཞན་པ་ཡིན་པའི་ཕྱིར་རོ། །དེ་ཡང་དམ་པའི་ཆོས་སྒྲོགས་པ་མ་གཏོགས་པའི་གཞན་རྣམས་ཀྱིས་ནི་གཞོམ་པར་མི་ནུས་སོ། །འདི་ནི་དམ་པའི་ཆོས་སྒྲོགས་པའི་ཡོན་ཏན་གཞན་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན། འདི་ལྟ་སྟེ། དགེ་བའི་སེམས་སྐྱེས་པ་རྣམས་འཕེལ་བར་བྱེད་པའོ། །འདི་ནི་དམ་པའི་ཆོས་སྒྲོགས་པའི་ཡོན་ཏན་གཞན་ཡིན་ཏེ། མི་དགེ་བ་རྣམས་རབ་ཏུ་འཇོམས་པར་བྱེད་པ་འབའ་ཞིག་ནི་མ་ཡིན་གྱི། དགེ་བའི་རྣམ་པར་རྟོག་པ་སྐྱེས་པ་རྣམས་འཕེལ་བར་བྱེད་དོ། །གང་གི་ཚེ་འདི་ལ་དགེ་བའི་རྣམ་པར་རྟོག་པ་རྣམས་སྐྱེས་པར་གྱུར་པ་དེའི་ཚེ་འཕེལ་བར་བྱེད་པ་ནི་འདི་ལྟར་ཤེས་རབ་ཀྱིས་ཡིན་ནོ། །དཔེར་ན་མེ་ཆུང་ངུ་ཙམ་ཞིག་སྐྱེས་པར་གྱུར་པ་ལ། གང་གི་ཚེ་རྩྭ་དང་ཤིང་བུ་ལ་སོགས་པ་རྣམས་དང་རླུང་དང་བཅས་པར་གྱུར་ཅིང་ལྷན་ཅིག་ཏུ་འདུས་ཤིང་ཚོགས་པར་གྱུར་པ་དེའི་ཚེ་འཕེལ་བར་འགྱུར་རོ། །དེ་བཞིན་དུ་དགེ་བའི་རྩ་བ་ཆུང་ངུ་སྐྱེས་པར་གྱུར་པ་ཡང་ཤེས་རབ་ཀྱིས་ཀུན་ཏུ་འཕེལ་བར་བྱེད་དེ། དམ་པའི་ཆོས་བསྒྲགས་པ་རྣམས་ལས་གང་དག་ཐོས་པའི་དོན་དང་ལྡན་པར་གྱུར་པའི་དགེ་བའི་སེམས་བསྐྱེད་པ་

71-96a

གཅིག་ཀྱང་བསྐལ་པ་བརྒྱ་སྟོང་དུ་མ་རྣམས་སུ་ཡང་ཆུད་ཟ་བར་མི་འགྱུར་རོ། །མི་སྐྱེ་བར་བྱ་བའི་དོན་ཡང་བྱེད་དོ། །དེའི་ཕྱིར་ཡོན་ཏན་དེ་དག་གོ་བར་གྱིས་ལ་རབ་ཏུ་བརྩོན་པས་ཀྱང་ཆོས་ཉན་པར་བྱའོ། །ཆོས་ལས་སྐྱོབ་པར་བྱེད་པ་གཞན་ནི་མེད་དོ། །ཆོས་ཐོས་པ་ལས་སྦྱིན་པ་བཏང་བར་གྱུར་པས་སྦྱིན་བདག་ཏུ་འགྱུར་བ་ཡིན་ནོ། །ཆོས་རྣམས་ཐོས་ནས་ཆོས་བསྲུངས་པ་ལས་མཁས་པར་འགྱུར་བ་ཡིན་ནོ། །ཆོས་ཐོས་ནས་ཤེས་རབ་དང་ལྡན་པར་འགྱུར་རོ། །དེའི་ཕྱིར་ཡོན་ཏན་དེ་དག་རྣམས་ཐོས་ཤིང་ལེགས་པར་མཐོང་བར་གྱུར་ནས་འཁོར་བ་ཐམས་ཅད་ལས་ངེས་པར་འབྱུང་བའི་རྒྱུར་གྱུར་པའི་ཆོས་ལ་རབ་ཏུ་བརྩོན་པས་ཀྱང་ཇི་སྲིད་འཚོའི་བར་དུ་རབ་ཏུ་བརྩོན་པས་མཉན་པར་བྱའོ། །དེ་དག་ནི་སྐྱོབ་པ་རྣམས་ཀྱི་མཆོག་ཡིན་ཞིང་། དམ་པའི་ཆོས་སྒྲོགས་པ་གང་ཡིན་པས་ནི་སྲིད་པའི་སྡུག་བསྔལ་རྣམས་ལས་ངེས་པར་འབྱུང་བར་བྱེད་པའི་ཕྱིར་དེ་དག་ནི་མཆོག་ཏུ་གྱུར་པ་ཡིན་ནོ། །ཡང་དམ་པའི་ཆོས་སྒྲོགས་པ་ལ་ནི་ཡོན་ཏན་གཞན་ཡོད་དོ་འདི་ཡང་གང་ཞེ་ན་འདི་ལྟ་སྟེ། མི་དགེ་བ་རྣམས་ཡོངས་སུ་སྤོང་བའོ། །རྐྱེན་གྱི་མི་དགེ་བ་རྣམས་འོངས་པར་གྱུར་ན་ཡོངས་སུ་སྤོང་བར་བྱེད་དོ། །གང་གི་ཚེ་མི་དགེ་བའི་རྐྱེན་གྱིས་སྐྱེས་པར་གྱུར་པ་ན། དེའི་ཚེ་ངན་སོང་གི་འཇིགས་པ་རྣམས་ཀུན་ནས་མཐོང་བར་གྱུར་ནས་ཡོངས་སུ་འདོར་བར་བྱེད་དོ། །ཡོངས་སུ་སྤྱོད་པར་བྱེད་པ་པོ་འཁོར་བའི་འཇིགས་པ་རྣམས་ཀྱིས་འཇིགས་པར་གྱུར་པ་དེ་ཁོ་ན་ཉིད་ཡོངས་སུ་རྟོག་པ་པོས་རྐྱེན་གྱིས་མི་དགེ་བ་སྐྱེས་པ་རྣམས་ཀྱང་ཡོངས་སུ་སྤོང་བར་བྱེད་དོ། །དེ་ལ་འཇུག་པར་མི་བྱེད་དོ། །དེ་མི་སྐྱེད་པར་བྱ་བའི་དོན་དུ་དེ་དག་ལ་ཚུལ་ཁྲིམས་དང་ལྡན་པ་དང་ཤེས་རབ་དང་ལྡན་པར་འགྱུར་རོ། །གང་གི་ཚེ་རྙེད་པ་དང་བཀུར་སྟི་ལ་དད་པ་ཆེ་བར་གྱུར་པ་ན། དེ་སྦྱིན་པས་རབ་ཏུ་འཇོམས་པར་བྱེད་དོ། །སེར་སྣའི་དྲི་མ་རྣམས་ནི་འདོད་པ་མེད་པས་རབ་ཏུ་འཇོམས་སོ། །ཀུན་ཏུ་མི་ཤེས་པ་ནི་ཤེས་རབ་ཀྱིས་སོ། །རྣམ་པར་རྟོག་པ་རྣམས་ནི་ཡང་དག་པ་ཇི་ལྟ་བའི་དོན་མཐོང་བས་སོ། །མུ་སྟེགས་པའི་ངག་རྣམས་ནི་རིགས་པ་དང་ལྡན་པའི་ངག་གིས་སོ། །ཡང་དག་པ་མ་ཡིན་པའི་རྣམ་པར་

71-96b

རྟོག་པ་རྣམས་ནི་ཡང་དག་པའི་རྣམ་པར་རྟོག་པས་སོ། །བདེ་བའི་རྣམ་པར་རྟོག་པ་རྣམས་ནི་སྡུག་བསྔལ་གྱི་རྣམ་པར་རྟོག་པས་སོ། །སྟོང་པ་མ་ཡིན་པའི་རྣམ་པར་རྟོག་པ་རྣམས་ནི་སྟོང་པའི་རྣམ་པར་རྟོག་པས་སོ། །བདག་གི་རྣམ་པར་རྟོག་པ་རྣམས་ནི་བདག་མེད་པའི་རྣམ་པར་རྟོག་པས་སོ། །དེ་ལྟར་ཡང་དག་པར་གྱུར་པའི་གཉེན་པོར་གྱུར་པ་རྣམས་ཀྱི་གཉེན་པོའི་རྣམ་པར་རྟོག་པར་འགྱུར་བ་དེ་རྣམས་ཀྱིས་ཡོངས་སུ་སྤོང་བར་བྱེད་དོ། །རྐྱེན་ལས་བྱུང་བའི་ཡང་ཤིན་ཏུ་ཕྲ་བའམ་རགས་པའམ་བར་མ་ཡང་ཡོངས་སུ་སྤོང་བར་བྱེད་དོ། །དེ་ཐམས་ཅད་ལ་གནས་སྐབས་ཐམས་ཅད་དུ་མི་དགེ་བའི་རྐྱེན་རྣམས་དམ་པའི་ཆོས་ཐོས་ནས་སྤོང་བར་བྱེད་ཀྱི་མ་ཐོས་པར་ནི་མ་ཡིན་ནོ། །དམ་པའི་ཆོས་བསྒྲགས་པ་ནི་བདེ་ལེགས་རྣམས་ཐམས་ཅད་ཀྱི་གཞིར་གྱུར་པ་ལྟ་བུ་ཡིན་ནོ། །ཡང་དམ་པའི་ཆོས་བསྒྲགས་པ་ལ་ཡོན་ཏན་གཞན་ཡོད་དོ། །འདི་ཡང་གང་ཞེ་ན་འདི་ལྟ་སྟེ། བག་ཡོད་པར་གྱུར་པའོ། །གང་གི་ཚེ་རྣམ་པར་རྟོག་པ་རྣམས་ཡོངས་སུ་སྤོང་བར་བྱེད་པ་དེའི་ཚེ་བག་ཡོད་པར་འགྱུར་རོ། །དེས་ནི་བདེ་ལེགས་རྣམས་ཐམས་ཅད་འཐོབ་པར་འགྱུར་རོ། །བག་མེད་པ་དེ་ཡང་གང་གིས་མེད་པར་འགྱུར་བ་ཡིན་ན། དམ་པའི་ཆོས་བསྒྲགས་པ་འབའ་ཞིག་གིས་ཡིན་ཏེ། གང་གི་ཕྱིར་བག་མེད་པའི་སྐྱོན་རྣམས་ཐོས་ནས་ཡོངས་སུ་སྤོང་བར་བྱེད་དོ། །དམ་པའི་ཆོས་བསྒྲགས་པ་ལས་གྱུར་པས་བག་ཡོད་པ་དེའི་དབང་པོ་ལྔ་པོ་རྣམས་དབང་དུ་འགྱུར་རོ། །དབང་པོ་ལྔ་ཀུན་ཏུ་བསྡུས་པ་དེའི་བློ་ནི་ཚུལ་བཞིན་མ་ཡིན་པ་ཡིད་ལ་བྱེད་པས་གནོད་པར་མི་འགྱུར་རོ། །རྟག་པར་རྒྱུན་དུ་ཡང་ཚུལ་བཞིན་ཡིད་ལ་བྱེད་པ་སྟེན་པར་བྱེད་དོ། །དེས་ཚུལ་བཞིན་ཡིད་ལ་བྱེད་པ་དེ་མགུ་བར་བྱས་པར་གྱུར་ན་མཆོག་ཏུ་བདེ་བར་གྱུར་པ་རྣམས་འཐོབ་པར་འགྱུར་རོ། །གང་གི་ཕྱིར་བག་མེད་པའི་རྩ་བ་ལས་ཉོན་མོངས་པའི་ཚོགས་རྣམས་ཐམས་ཅད་ཡིན་ནོ། །དེ་བཞིན་དུ་བག་ཡོད་པའི་གཞི་ལས་ཀྱང་རྣམ་པར་བྱང་བའི་ཕྱོགས་རྣམས་ཡོད་དོ། །དེའི་ཕྱིར་བག་མེད་པ་རྣམས་ཀྱི་གཉེན་པོར་གྱུར་པ་ཡིན་པས་དམ་པའི་ཆོས་ཅི་ནས་ཀྱང་བསྒྲགས་པར་བྱ་བ་ཁོ་ན་ཡིན་ནོ། །ཡང་དང་ཡང་དུ་བསྒོམ་པར་བྱའོ། །ལན་

71-97a

མང་དུ་བྱའོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ། སྐྱེས་བུ་དམ་པ་ལ་ཉེ་བར་སྟེན་པར་བྱེད་པའོ། །དམ་པའི་ཆོས་ཐོས་ནས་ཀྱང་སྐྱེས་བུ་དམ་པ་ཉིད་ལ་སྟེན་པར་བྱེད་དོ། །དགའ་བར་ཡང་སྐྱེས་བུ་དམ་པ་དང་བྱེད་དོ། །སྐྱེས་བུ་དམ་པ་རྣམས་དང་ལྷན་ཅིག་ཏུའོ། །དགའ་བར་གྱུར་པ་རྣམས་ཀྱི་ནི་མཆོག་འདི་ལྟ་སྟེ། སེམས་མཉམ་པ་ཉིད་དོ། །ཡོན་ཏན་གྱི་མཆོག་རྣམས་སྐྱེས་བུ་དམ་པ་དང་བསྟེན་པ་ལས་འབྱུང་བར་འགྱུར་རོ། །སྐྱེས་བུ་དམ་པ་དང་སྟེན་པ་ནི་ཡོན་ཏན་རྣམས་ཀྱི་མཆོག་ཡིན་ནོ། །དེ་བཞིན་དུ་སྐྱོན་རྣམས་ཀྱི་ཡང་རྩེ་མོ་ནི་སྐྱེས་བུ་དམ་པ་མ་ཡིན་པ་དང་འགྲོགས་པ་ཡིན་ནོ། །སྐྱེས་བུ་དམ་པ་ལ་སྟེན་པར་བྱེད་པ་དེ་ཡང་དམ་པའི་ཆོས་ལ་སྟེན་པ་མ་གཏོགས་པ་གཞན་དུ་ནི་མ་ཡིན་ནོ། །དེའི་ཕྱིར་འདི་ནི་ཚངས་པར་སྤྱོད་པའི་མཆོག་ཡིན་ཏེ། འདི་ལྟར་སྐྱེས་བུ་དམ་པ་ལ་སྟེན་པར་བྱེད་པའོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་གང་ཞེ་ན། འདི་ལྟ་སྟེ། གཡོ་དང་སེར་སྣ་རབ་ཏུ་འཇོམས་པར་བྱེད་པའོ། །སྐྱེས་བུ་དམ་པ་ལ་རྗེས་སུ་སྟེན་པར་བྱེད་པ་རྣམས་ཀྱི་ཡོན་ཏན་གང་དག་འཐོབ་པར་འགྱུར་བ་ཡིན་ན། གལ་ཏེ་ཡང་སྐྱེས་བུ་དམ་པ་ལ་བསྟེན་པས་ཡོན་ཏན་དུ་མ་རྣམས་ཡོད་པ་ཡིན་གྱིས་ཀྱང་། ཡོན་ཏན་འདི་ནི་རབ་ཏུ་ཁྱད་པར་དུ་འཕགས་པ་ཡིན་ཏེ། འདི་ལྟ་སྟེ། ཆོས་རྣམས་ཀྱི་འབྲས་བུ་རྣམ་པར་སྨིན་པ་ཐོས་པར་གྱུར་ནས་གཡོ་དང་སེར་སྣ་རབ་ཏུ་འཇོམས་པར་བྱེད་པའོ། །འདིའི་གཡོ་དང་སེར་སྣ་དག་གིས་ཇི་ལྟར་འགྱུར་བ་ཡིན་ན། དེའི་ལུས་ཞིག་པར་གྱུར་ནས་ཤི་བའི་འོག་ཏུ་ངན་སོང་ལོག་པར་ལྷུང་ནས་ཡི་དགས་སམ་དམྱལ་བ་རྣམས་སུ་སྐྱེ་བར་འགྱུར་རོ། །དེས་གལ་ཏེ་དམ་པའི་ཆོས་བསྒྲགས་པ་ལས་ལས་རྣམས་ཀྱི་འབྲས་བུ་ཐོས་པར་གྱུར་ནས་གཡོ་དང་སེར་སྣ་མང་བར་གྱུར་པ་ཡིན་ན་དེས་རབ་ཏུ་འཇོམས་པར་བྱེད་དོ། །སྨེ་བར་བྱེད་དོ། །གལ་ཏེ་ཐ་མལ་པ་ཡིན་པར་གྱུར་ན་སྨོད་པར་བྱེད་ཅིང་སྨེ་བར་བལྟའོ། །བཤགས་པར་བྱེད་དོ། །གཞན་དག་གཡོ་དང་སེར་སྣ་དང་ལྡན་པར་

71-97b

གྱུར་ན་ཡང་རབ་ཏུ་འགོགས་པར་བྱེད་དོ། །སྨོད་པར་བྱེད་དོ། །བཤགས་སུ་འཇུག་གོ། །དགེ་ཞིང་ལེགས་པའི་ལམ་དམ་པར་འགོད་པར་བྱེད་དོ། །དེ་ལ་ཡོན་ཏན་དེ་དག་རྣམས་ནི་དམ་པའི་ཆོས་བསྒྲགས་པ་དང་ཉན་པ་ལས་ཡིན་ནོ། །དེའི་ཕྱིར་ན་མི་རྣམས་ཀྱི་སྙིང་པོ་ནི་གང་དམ་པའི་ཆོས་སྒྲོགས་པར་བྱེད་པ་དེ་དག་ཡིན་ནོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ། མ་དང་ཕ་ལ་གུས་པ་དང་ལྡན་པར་གྱུར་པའོ། །དམ་པའི་ཆོས་ཐོས་པར་གྱུར་པ་གང་གི་ཕྱིར་ལས་རྣམས་ཀྱི་རྣམ་པར་སྨིན་པ་དང་ཞིང་གི་ཡོན་ཏན་རྣམས་ཀུན་ཏུ་རིག་པར་འགྱུར་ཏེ། ཇི་ལྟར་མཆོག་ཏུ་གྱུར་པའི་ཞིང་དེ་དག་ནི། འདི་ལྟ་སྟེ། མ་དང་ཕ་དག་ཡིན་ནོ། །དེ་གང་གི་ཚེ་ལས་ཀྱི་འབྲས་བུ་ལ་ཡིད་ཆེས་པ་མངོན་པར་སྐྱེས་པར་གྱུར་ན་དེའི་ཚེ་སེམས་ལ་བསྒོམས་ནས་མ་དང་ཕ་དག་ལ་མཆོད་པར་བྱེད་དོ། །རབ་ཏུ་ཕལ་ཆེ་བར་གྱུར་པའི་ནད་ཀྱི་རྐྱེན་སྨན་དང་ཡོ་བྱད་རྣམས་ཀྱིས་ལེགས་པར་སྦྱོར་བར་བྱེད་དོ། །དེ་ཇི་ལྟ་ཇི་ལྟར་མ་དང་ཕ་དག་ལ་མཆོད་པར་བྱེད་པར་གྱུར་པ་དེ་ལྟ་དེ་ལྟར་ཚངས་པའི་བསོད་ནམས་འབྱུང་བར་འགྱུར་རོ། །དེ་དག་གིས་མྱ་ངན་ལས་འདས་པ་ཐོབ་པར་འགྱུར་རོ། །དམ་པའི་ཆོས་བསྒྲགས་པ་ལས་མ་དང་ཕ་ལ་མཆོད་པ་བྱེད་པར་གྱུར་ན་ཡོན་ཏན་གཞན་འདི་ཡང་ཡོད་དེ། སྐྱེ་བོ་རྣམས་ཐམས་ཅད་ཀྱིས་བསྔགས་པར་འགྱུར་བའོ། །མཐོང་བའི་ཆོས་ཉིད་ལ་མ་དང་ཕ་ལས་བསྔགས་པར་གྱུར་ལ། ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོ་ལྷའི་འཇིག་རྟེན་དུ་སྐྱེ་བར་འགྱུར་རོ། །རྒྱུ་དེ་ཉིད་དང་རྐྱེན་དེ་དག་གིས་ཀྱང་མཐར་ཡོངས་སུ་མྱ་ངན་ལས་འདའ་བར་འགྱུར་རོ། །དེའི་ཕྱིར་ཡོན་ཏན་དེ་དག་མངོན་པར་མཐོང་བར་གྱུར་པའི་སྐྱེས་བུ་མཁས་པ་རྣམས་ནི་ཇི་སྲིད་འཚོའི་བར་དུ་མ་དང་ཕ་དག་ལ་གུས་པར་འགྱུར་རོ། །བློ་གཞན་མ་ཡིན་པ་དང་། སྤྱོད་པ་གཞན་མ་ཡིན་པ་དང་། བློ་གྲོས་མཉམ་པར་བཞག་པར་གྱུར་པས་སྤྱོད་པ་རྣམས་ཀྱང་བསྡམས་པར་འགྱུར་རོ། །གཞན་ཡང་དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །

71-98a

འདི་ཡང་གང་ཞེ་ན། འདི་ལྟ་སྟེ། ལས་ཀྱི་འབྲས་བུ་ཀུན་ཏུ་རིག་པའོ། །ལས་དང་འབྲས་བུའི་དེ་ཁོ་ན་ཉིད་གང་ཟག་གིས་མཐོང་བར་འགྱུར་བ་ནི་དམ་པའི་ཆོས་སྒྲོགས་པ་མ་གཏོགས་པ་གཞན་གྱིས་མ་ཡིན་ནོ། །དེ་ལ་གང་གི་ཚེ་མི་དགེ་བའི་སེམས་དང་ལྡན་པའི་མི་དགེ་བ་ལ་དམིགས་པར་གྱུར་ན་དེའི་ཚེ་མི་དགེ་བའོ། །ཞེས་སོ་སོར་མངོན་པར་ཤེས་སོ། །གང་གི་ཚེ་དགེ་བའི་སེམས་ཀུན་ཏུ་སྐྱེས་པར་གྱུར་པ་ན། དེའི་ཚེ་དགེ་བའོ་ཞེས་སོ་སོར་རབ་ཏུ་ཤེས་པར་འགྱུར་རོ། །དེས་ཇི་ལྟ་བ་བཞིན་དུ་ལས་ཀྱི་འབྲས་བུ་རྣམས་ཀུན་ཏུ་ཤེས་སོ། །ཇི་ལྟ་བ་ཉིད་དུ་མི་དགེ་བའི་སེམས་བདག་ལ་སྐྱེས་པར་གྱུར་པའི་མི་དགེ་བའི་སེམས་དེ་དག་གིས་ནི་ཕྱི་ནས་མི་འདོད་པ་མི་སྡུག་པའི་འབྲས་བུ་རྣམ་པར་སྨིན་པ་དམྱལ་བ་དང་ཡི་དགས་དང་དུད་འགྲོ་རྣམས་སུ་བདག་ལ་འབྱུང་བར་འགྱུར་རོ། །གང་གི་ཚེ་ངག་གི་ཉེས་པར་སྤྱོད་པ་རྣམས་བྱས་པར་གྱུར་པ་དེའི་ཚེ་འདི་སྙམ་དུ་སེམས་པར་འགྱུར་ཏེ། ཇི་ལྟར་མི་དགེ་བའི་ལས་སྐྱེས་པ་འདི་དག་རྣམས་ཀྱིས་བདག་ལ་མི་འདོད་པ་དང་། མི་སྡུག་པ་དང་ཡིད་དུ་མི་འོང་བ་དང་དམྱལ་བ་དང་ཡི་དགས་དང་དུད་འགྲོ་རྣམས་འབྱུང་བར་འགྱུར་རོ། །གང་གི་ཚེ་ལུས་ཀྱི་ཉེས་པར་སྤྱོད་པར་བྱེད་པ་རྣམས་བྱེད་པར་གྱུར་པ་དེའི་ཚེ་འདི་སྙམ་དུ་སེམས་ཏེ། ཇི་ལྟར་མི་དགེ་བའི་ལས་སྐྱེས་པ་དང་བྱས་པ་འདི་དག་གིས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་བདག་ལ་རྣམ་པར་སྨིན་པ་མི་འདོད་པ་རྣམས་འབྱུང་བར་འགྱུར་རོ། །དེ་ལ་ལས་ཀྱི་རྣམ་པར་སྨིན་པ་རྣམ་པ་གསུམ་པོ་འདི་དག་རྣམས་ཀྱང་དམ་པའི་ཆོས་སྒྲོགས་པ་མ་གཏོགས་པ་གཞན་གྱིས་ནི་ཤེས་པར་འགྱུར་བ་མ་ཡིན་ནོ། །དེའི་ཕྱིར་ན་སྐྱེས་བུ་དམ་པ་རྣམས་ཀྱིས་ཇི་སྲིད་འཚོའི་བར་དུ་དམ་པའི་ཆོས་སྒྲོགས་པ་དང་མཉན་པར་ཡང་བྱའོ། །གང་གི་ཚེ་དམ་པའི་ཆོས་སྒྲོགས་པ་རྣམས་རྗེས་སུ་ཉན་པར་བྱེད་པ་དེ་ནི་ལེགས་པར་སྤྱོད་པར་བྱེད་པ་ཡིན་ནོ། །ཉེས་པར་སྤྱོད་པ་རྣམས་ནི་ཡོངས་སུ་སྤོང་བར་བྱེད་དོ། །གཞན་ཡང་དམ་པའི་ཆོས་སྒྲོགས་པར་བྱེད་པ་ལ་ཡོན་ཏན་ཡོད་དོ། །འདི་ཡང་གང་ཞེ་ན། འདི་ལྟ་སྟེ། ཚེ་རིང་པོ་ཀུན་ཏུ་འཕེལ་བར་བྱེད་པའི་

71-98b

ལས་རྣམས་ཀྱང་འདི་ལ་མངོན་པར་འཕེལ་བར་འགྱུར་ཏེ། དེ་གང་གི་ཚེ་དམ་པའི་ཆོས་སྒྲོགས་པར་བྱེད་པ་ལ་ཆེད་ཆེར་གྱུར་པ་ན། དེའི་ཚེ་ལས་ཀྱི་འབྲས་བུའི་དེ་ཁོ་ན་ཉིད་མཐོང་བར་གྱུར་ནས་སྲོག་གཅོད་པ་ལ་སོགས་པའི་མི་དགེ་བའི་ལས་རྣམས་མི་བྱེད་དོ། །རྒྱུན་དུ་ཡང་དགེ་བའི་ལས་རྣམས་བསྟེན་ཅིང་བསྒོམས་ལ་ལན་མང་དུ་བྱེད་པར་ཡང་འགྱུར་རོ། །དེ་དགེ་བའི་ལས་དེ་དག་གི་རྣམ་པར་སྨིན་པས་ལྷ་དང་མི་རྣམས་སུ་ཚེ་རིང་བར་འགྱུར་ཏེ། དེས་དེ་ལྟར་དམ་པའི་ཆོས་བསྟེན་ཅིང་བསྒོམས་ལ་ལན་མང་དུ་བྱས་པའི་ཕྱིར་རོ། །དེའི་ཕྱིར་དམ་པའི་ཆོས་བསྒྲགས་པའི་ཡོན་ཏན་འདི་ནི་གཞན་ཡིན་ཏེ། འདི་ལྟ་སྟེ་ཚེ་རིང་པོར་འགྱུར་བའི་ལས་འདིས་ཀུན་ཏུ་སྤེལ་བར་བྱེད་པའོ། །དམ་པའི་ཆོས་བསྒྲགས་པའི་ཡོན་ཏན་གྱི་རྒྱུ་འདིས། དེ་དག་ཐོས་ནས་ཀྱང་ལྷ་དང་མི་རྣམས་སུ་སྐྱེ་བར་འགྱུར་རོ། །མིའི་འཇིག་རྟེན་དུ་སྐྱེས་པར་གྱུར་ནས་ཀྱང་དེ་གལ་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་ན་ཚེ་རིང་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཁྱད་པར་དུ་ཡང་མདོག་དང་གཟུགས་དང་འོད་དང་རྩེད་མོས་རྣམ་པར་རྒྱུ་བ་དང་ལྡན་པར་འགྱུར་རོ། །དམ་པའི་ཆོས་བསྒྲགས་པ་དེས་གལ་ཏེ་མི་རྣམས་སུ་སྐྱེས་པར་གྱུར་ན་ཡང་། དེའི་རིགས་དང་གཟུགས་དང་ཕུན་སུམ་ཚོགས་པ་དང་ཡོན་ཏན་དང་ཚེ་ཡང་རིང་བར་འགྱུར་རོ། །ཡུལ་ལྗོངས་བཟང་པོར་ཡང་འདི་སྐྱེ་བར་འགྱུར་རོ། །དེ་ཡང་དག་པའི་ལྟ་བ་ཅན་དུ་ཡང་འགྱུར་རོ། །དམ་པའི་ཆོས་དེ་བསྟེན་ཅིང་བསྒོམས་ལ་ལན་མང་དུ་བྱས་པ་འདི་ནི་སྡུག་བསྔལ་ལས་ངེས་པར་འབྱུང་བ་གཞན་ཡིན་ཏེ། འདི་ལྟ་སྟེ་རབ་ཏུ་དང་བའི་ཡིད་ཀྱིས་དམ་པའི་ཆོས་བསྒྲགས་པ་ལ་གོམ་པ་འདོར་བས་ཚངས་པའི་བསོད་ནམས་རབ་ཏུ་འབྱུང་ངོ་། །དམ་པའི་ཆོས་སྒྲོགས་པ་ལས་གང་དག་གིས་དམ་པར་བྱས་ཏེ་འགྲོ་བར་བྱེད་པ་ན། དེ་དག་ནི་ལུས་ཀྱི་ལེགས་པར་སྤྱོད་པ་རྣམས་ལ་ཡང་དག་པར་སྦྱོར་བ་ཡིན་ནོ། །གང་དག་གིས་ཐོས་པའི་བློ་དེས་དེ་དག་གིས་ལེགས་པར་སྤྱོད་པ་དང་ཡང་དག་པར་ལྡན་པར་འགྱུར་རོ། །གང་ཐོས་པར་གྱུར་ནས་ཡིད་རབ་ཏུ་དད་པ་སྐྱེས་པར་གྱུར་པས་ནི། དེས་ཡིད་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པར་

71-99a

འགྱུར་རོ། །དེ་ལྟར་ཆོས་བསྒྲགས་པ་རྣམས་ལེགས་པར་སྤྱོད་པ་གསུམ་དང་ཡང་དག་པར་ལྡན་པར་གང་གི་ཚེ་གྱུར་པ་ན། དེའི་ཚེ་ལྷ་དང་མི་རྣམས་ཀྱི་ནང་དུ་སྐྱེས་པར་གྱུར་ནས་མཆོག་ཏུ་སྐྱིད་པར་འགྱུར་རོ། །ཚེ་རིང་བ་དང་ལྡན་པར་ཡང་འགྱུར་རོ། །དེ་ཡོངས་སུ་མྱ་ངན་ལས་འདའ་བར་ཡང་འགྱུར་རོ། །ཡོན་ཏན་རྣམས་ཐམས་ཅད་ནི་ཆོས་བསྒྲགས་པས་འཐོབ་པར་འགྱུར་གྱི་གཞན་རྣམས་ཀྱིས་ནི་མ་ཡིན་ནོ། །དེའི་ཕྱིར་བདེ་ལེགས་རྣམས་ཀྱི་རྩེ་མོ་རྣམས་སུ་འགྱུར་བ་ནི་གང་དམ་པའི་ཆོས་བསྒྲགས་པ་ལས་ཡིན་ནོ། །གཞན་ཡང་དམ་པའི་ཆོས་བསྒྲགས་པའི་ཡོན་ཏན་ཡོད་དོ། །འདི་ཡང་གང་ཞེ་ན་འདི་ལྟ་སྟེ། འཇིག་རྟེན་པ་རྣམས་ཀྱིས་རབ་ཏུ་བསྔགས་པར་འགྱུར་བ་ཡིན་ནོ། །ཐམས་ཅད་ཀྱང་ཆོས་བསྒྲགས་པ་ལས་ཡིན་ཏེ། ཚུལ་ཁྲིམས་དང་ལྡན་པ་དང་ཡོན་ཏན་དང་ལྡན་པ་དང་མང་དུ་ཐོས་པ་དང་རྣམ་པར་དུལ་བ་དང་བློ་གྲོས་རྒྱ་ཆེན་པོར་གྱུར་པ་དང་སྐྱེ་བོ་རྣམས་ཐམས་ཅད་ཀྱིས་ཀྱང་མངོན་པར་བརྗོད་པར་བྱ་བ་དང་། ཕྱག་འཚལ་བ་དང་སྙན་པར་སྨྲ་བའི་རང་བཞིན་དུ་འགྱུར་བ་དང་དྲང་པོ་དང་དྲང་པོའི་རང་བཞིན་ཅན་དུ་འགྱུར་བ་དང་ཐམས་ཅད་ཀྱང་ཆོས་སྒྲོགས་པ་ལས་ཡིན་ནོ། །དེ་ཡོན་ཏན་དེ་ལྟ་བུ་རྣམས་དང་ལྡན་པ་ནི་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བའི་ཕྱིར་སྐྱེ་བོ་རྣམས་ཐམས་ཅད་ཀྱང་གྲོགས་པོར་འགྱུར་རོ། །ཐམས་ཅད་ཀྱིས་ཀྱང་འདི་རབ་ཏུ་བསྔགས་པར་བྱེད་དོ། །འདི་ལ་འཇིགས་པའམ་སྡུག་བསྔལ་བྱུང་བ་རྣམས་ཐམས་ཅད་ཀྱིས་ཀྱང་གྲོགས་བྱེད་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་རྣམས་འཇིག་རྟེན་པས་རབ་ཏུ་བསྔགས་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་དེ་དག་རྣམས་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། ལྷ་རྣམས་ཀྱིས་འདི་དག་ལ་མངོན་པར་སྲུང་བར་བྱེད་པ་ཡིན་ནོ། །དེ་ལ་ཡོན་ཏན་དེ་ལྟ་བུ་དང་ལྡན་པར་གྱུར་པའི་ཆོས་སྒྲོགས་པ་པོ་ནི་ལུས་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པའི་ཕྱིར་ན་ལྷ་རྣམས་ཀྱིས་མངོན་པར་སྲུང་བར་བྱེད་དོ། །ཇི་ལྟར་འདི་ཡོན་ཏན་དང་ལྡན་པར་གྱུར་པ་དང་འདི་དག་རྣམས་ཀྱིས་མངོན་པར་བསྲུངས་པས་སྐྱེ་བོའི་ཚོགས་ཆེན་པོ་རྣམས་ཀྱིས་ཀྱང་ཡོན་ཏན་བྱེད་པར་འགྱུར་རོ། །སྐྱེ་བོའི་ཚོགས་ཆེན་

71-99b

པོ་རྣམས་ཀྱིས་འདིའི་བར་དུ་གཅོད་པ་ཡང་ནུབ་པར་འགྱུར་ལ། དེ་བདུད་ཀྱི་ཕྱོགས་རྣམས་ཀྱིས་མི་འཛིན་ལ་གཟུང་དུ་མེད་པར་ཡང་འགྱུར་རོ། །དམ་པའི་ཆོས་ཀྱི་ཕྱོགས་རྣམས་ནི་ཤིན་ཏུ་མཐོང་བར་འགྱུར་བ་ཡིན་ནོ། །རྒྱུ་འདི་དང་ཡང་དག་པར་ལྡན་པ་མངོན་པར་མཐོང་ནས་ཀྱང་འདི་དག་ལྷ་རྣམས་ཀྱིས་བསྲུང་བར་འགྱུར་ཏེ། ཉིན་མོ་དང་མཚན་མོ་དང་སྒྲོགས་པ་ན་ཡང་ཕྱི་བཞིན་ཀུན་ཏུ་རྗེས་སུ་འབྲང་བར་འགྱུར་རོ། །དགོས་པ་གང་འགའ་ཞིག་རྗེས་སུ་རྩོམ་པར་བྱེད་པ་ན་ནི་འདིའི་དེ་དང་དེ་དག་ཀྱང་ཕུན་སུམ་ཚོགས་པར་འགྱུར་ཏེ། ལྷ་དེ་དག་རྣམས་རབ་ཏུ་དད་པར་གྱུར་པས་དང་ལེགས་པར་བྱས་པའི་ལས་རྣམས་ཀྱིས་ཀྱང་ངོ་། །ཕན་ཚུན་རྒྱུར་གྱུར་པའི་ཕྱིར་ན་གང་གི་ཚེ་དེའི་དོན་རྣམས་གྲུབ་པར་གྱུར་པ་ན་དེའི་ཚེ་ཤིན་ཏུ་ཕྱིར་ཞིང་ཆེས་དགེ་བར་བྱེད་དོ། །དེ་ལྟ་དེ་ལྟར་ཡང་འདིའི་ལེགས་པར་བྱས་པའི་ལས་རྣམས་ཀྱིས་ཐམས་ཅད་དུ་འགྲུབ་པར་འགྱུར་རོ། །ཇི་ལྟ་ཇི་ལྟར་མངོན་པར་འགྲུབ་པར་གྱུར་པ་དེ་ལྟ་དེ་ལྟར་རབ་ཏུ་ཕལ་ཆེ་བར་གྱུར་པའི་ལེགས་པར་སྤྱོད་པ་རྣམས་བྱེད་དོ། །དེ་ལྟར་འདི་བདེ་བ་བརྒྱུད་པས་འཇིག་རྟེན་གཉིས་སུ་ཕན་པ་རྣམས་སུ་བྱེད་པར་འགྱུར་རོ། །ས་གཞི་ལྟ་བུར་གྱུར་པའི་དམ་པའི་ཆོས་བསྒྲགས་པ་འདིའི་ཡོན་ཏན་རྣམས་ནི་དེ་ལྟ་བུ་ཡིན་ནོ། །དེའི་ཕྱིར་བདེ་ལེགས་ཀྱི་མཆོག་ཏུ་གྱུར་པའི་གཏེར་དེ་དག་ནི་འདི་ལྟ་སྟེ། དམ་པའི་ཆོས་སྒྲོགས་པ་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་དག་ཀྱང་གང་ཞེ་ན་འདི་ལྟ་སྟེ། འདིའི་ཀུན་ཏུ་བསམས་པ་ཡང་ཕུན་སུམ་ཚོགས་པར་འགྱུར་རོ། །དེ་ལྟ་དེ་ལྟ་བུར་གྱུར་པའི་ཆོས་དང་ལྡན་ཞིང་ཆོས་ལ་རབ་ཏུ་རྗེས་སུ་ཞུགས་པ་ཤེས་པ་དང་ལྡན་པ་དང་ཚུལ་ཁྲིམས་དང་ལྡན་པ་དང་སྦྱིན་པ་དང་ལྡན་པར་གྱུར་པ་ནི་མཐོང་བའི་ཆོས་ཀྱི་ཀུན་ཏུ་བསམས་པ་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འདིའི་རྩོམ་པ་རྣམས་ཐམས་ཅད་ཕུན་སུམ་ཚོགས་པར་མི་འགྱུར་བ་གང་དག་འདིའི་བརླག་པར་འགྱུར་བའི་དོན་དེ་དག་རྣམས་ཐམས་ཅད་ཀྱང་དེའི་རབ་ཏུ་བརྩོན་པ་ཉིད་ཀྱིས་རབ་ཏུ་འགྲུབ་པར་འགྱུར་རོ། །ཉོན་མོངས་པར་མ་ཡིན་ཞིང་ཆོས་དང་ལྡན་པར་ཡང་འགྱུར་ལ། དོན་ལ་རྗེས་སུ་ཆགས་པའི་འཇིགས་པ་ལྔ་ཡོངས་སུ་སྤངས་པ་དང་ཡང་དག་པར་ཉེ་བར་འཚོ་བ་དང་ཐུན་མོང་

71-100a

མ་ཡིན་པར་འགྱུར་བ་དང་། ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་ལྷར་སྐྱེ་བར་འགྱུར་རོ། །དམ་པའི་ཆོས་བསྒྲགས་པ་འདིའི་ཡོན་ཏན་གཞན་ཡིན་ཏེ། འདི་ཡང་གང་དག་ཞེ་ན་འདི་ལྟ་སྟེ། འདི་ཡང་ཆོས་དང་ལྡན་པའི་ལོངས་སྤྱོད་ཅན་དུ་འགྱུར་བའོ། །དེ་ལྟ་དེ་ལྟ་བུའི་ཡོན་ཏན་དང་ལྡན་པའི་ཆོས་སྒྲོགས་པ་སྐྱེ་བོ་གང་ཚུལ་ཁྲིམས་དང་བཅས་པ་དེ་ལ་ཉེ་བར་སྟེན་པར་བྱེད་དོ། །དེ་ཚུལ་ཁྲིམས་ཀྱིས་ཕན་ཚུན་དུ་ཆ་སྐལ་སྦྱིན་པར་བྱེད་དོ། །དེ་དག་ཀྱང་གཞན་རྗེས་སུ་བཅོམ་པ་མ་ཡིན་ཞིང་གཞན་རྣམས་ངོ་མཚར་བར་བྱས་པ་མ་ཡིན་པར་ཆོས་པ་རྣམས་ཀྱི་དྲུང་ནས་རྙེད་པའི་སྐལ་བ་དེ་ཆོས་པ་དག་ལ་རབ་ཏུ་སྦྱིན་པར་བྱེད་པས་དེ་དག་རྣམས་གོང་ནས་གོང་དུ་ཁྱད་པར་དུ་འཕེལ་བར་འགྱུར་རོ། །འཇིག་རྟེན་གཉིས་ལ་ཕན་པ་དང་འཇིག་རྟེན་གཉིས་སུ་བདེ་བར་ཡང་འགྱུར་རོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་གཞན་ཡིན་ལ། དམ་པའི་ཆོས་བསྒྲགས་པའི་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། ལེ་ལོ་མེད་པར་གྱུར་པའོ། །མཁས་པའི་རང་བཞིན་གྱི་སྐྱེས་བུ་དག་གང་གི་ཚེ་ཆོས་བསྒྲགས་པ་ཉན་པར་བྱེད་པ་དེའི་ཚེ་ལེ་ལོའི་སྐྱོན་གྱིས་ཉན་པར་བྱེད་ན། གང་གི་ཚེ་གང་འཇིག་རྟེན་པ་དང་འཇིག་རྟེན་ལས་འདས་པའི་དོན་མི་འགྲུབ་པའོ། །དེ་དག་ཐམས་ཅད་ཀྱང་ལེ་ལོའི་སྐྱོན་གྱིས་ཡིན་ལ། ལེ་ལོའི་སྐྱོན་ཐོས་པར་གྱུར་ནས་ཡོངས་སུ་སྤོང་བར་བྱེད་དོ། །བརྩོན་འགྲུས་བརྩམས་པ་དང་དྲན་པ་དང་ལྡན་པར་འགྱུར་བ་དང་ཤེས་བཞིན་དང་ལྡན་པ་དང་དོན་རྣམས་ཐམས་ཅད་ལ་ཡང་ལེ་ལོ་དང་རྣམ་པར་བྲལ་བས་མྱུར་བར་བྱེད་པ་དང་དུས་སུ་བྱེད་པར་འགྱུར་བ་དང་སྡིག་པ་མེད་པར་བྱེད་པ་དང་འདོར་བ་མེད་པར་བྱེད་པ་ནི་དོན་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འཇིག་རྟེན་གཉིས་ལ་ཕན་པར་བྱེད་པ་པོ་ལེ་ལོ་དང་བྲལ་བ་པོ་རྟག་ཏུ་གྲིམས་པར་གྱུར་པ། བརྩོན་འགྲུས་བརྩམས་པ་རྣམས་ནི་དོན་རྣམས་ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་རོ། །རྩོམ་པ་ཐམས་ཅད་ཀྱང་ཡང་དག་པར་འཛིན་པར་བྱེད་དོ། །གལ་ཏེ་ཡང་འདི་ལ་བརྒྱ་ཞིག་ལ་ལེ་ལོས་སྙིང་ལ་ཞུགས་པར་གྱུར་ན་དམ་པའི་ཆོས་བསྒྲགས་པ་གང་ཡིན་པ་དེ་དེས་ཐོས་ནས། ལེ་ལོའི་སྐྱོན་དེ་དག་རྣམས་དེས་

71-100b

དྲན་པས་རྟག་ཏུ་ཡོན་ཏན་འཛིན་པར་འགྱུར་ཞིང་སྐྱོན་རྣམས་ལ་རྣམ་པར་སྡང་བས་ལེ་ལོ་མེ་བཞིན་དུ་སྤོང་བར་བྱེད་དོ། །མཚོན་ཆ་བཞིན་དུ་ཡང་ཡོངས་སུ་སྤོང་བར་བྱེད་དོ། །ཡང་ཇི་ལྟར་འགའ་ཞིག་གི་དོན་རྣམས་ཉམས་པ་ཉེ་བར་འབྱུང་ན་ཡང་ཐམས་ཅད་ལེ་ལོའི་སྐྱོན་གྱིས་ཡིན་ནོ། །ལེ་ལོ་མེད་པ་དེའི་ཐོས་པའི་དོན་དང་ཐོས་པའི་དོན་རྣམས་འགྲུབ་པའོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་གཞན་ཡིན་ནོ། །དམ་པའི་ཆོས་བསྒྲགས་པའི་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། བྱས་པ་ཤེས་པར་གྱུར་པའོ། །ཆོས་གཞན་ཡང་གཞན་རྣམས་ཐོས་པར་གྱུར་ནས་བྱས་པ་རིག་པ་དང་དེ་ཁོ་ན་ཉིད་ཤེས་པ་དང་བྱས་པ་ཤེས་པའི་ཡང་ཡོན་ཏན་རྣམས་ཐོས་ནས་ཆོས་སྒྲོགས་པ་ལས་རྟག་པ་ཉིད་དུ་བྱས་པ་ཤེས་པར་འགྱུར་རོ། །བྱས་པ་ཤེས་པ་བྱས་པ་རིག་པར་གྱུར་པ་དེའི་གྲོགས་པོ་ཐམས་ཅད་ཤིན་ཏུ་བརྟན་པར་འགྱུར་རོ། །སྐྱེས་བུ་གང་དག་གིས་འདི་ལ་ཡང་གྲོགས་པོར་ཁས་མ་བླངས་པར་གྱུར་པ་དེ་དག་རྣམས་ཐམས་ཅད་ཀྱང་གྲོགས་པོ་ཉིད་དུ་འགྱུར་རོ། །ཡོན་ཏན་དང་ལྡན་པ་འདི་ཞེས་བྱས་ནས་གང་དག་ལ་འདི་ལ་ཕན་པ་ཆུང་ངུས་བྱས་པར་གྱུར་པ་དེ་ཡང་དྲན་པར་བྱེད་དོ། །དེ་བྱས་པ་ཤེས་པ་དེ་དང་ལྡན་པར་གྱུར་པས་ཡོན་ཏན་ཆེན་པོ་རྣམས་ཐོབ་པར་འགྱུར་ཏེ་ཐམས་ཅད་མཁྱེན་པ་ཉིད་དོ། །དམ་པའི་ཆོས་བསྒྲགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་ཞེ་ན་འདི་ལྟ་སྟེ། རྟག་ཏུ་འཆི་བ་རྗེས་སུ་དྲན་པར་བྱེད་པའོ། །རྗེས་སུ་དྲན་པ་དེ་དག་རྣམས་ཀྱི་མཆོག་ཏུ་གྱུར་པ་ནི་འདི་ལྟ་སྟེ། འཆི་བ་རྗེས་སུ་དྲན་པའོ། །འཆི་བ་དཔྱད་པས་ཟིལ་གྱིས་མནན་པས་ནི་སེམས་ཅན་རྣམས་ཐམས་ཅད་འཇིགས་པ་དང་བཅས་པར་འགྱུར་རོ། །འཇིགས་པ་དང་བཅས་པར་གྱུར་ནས་ནི་དོན་མ་ཡིན་པ་རྣམས་ནི་མི་བྱེད་དོ། །མིག་གིས་གཟུགས་རྣམས་མཐོང་ནས་ཀུན་ཏུ་ཆགས་པར་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །རྣ་བས་སྒྲ་རྣམས་ཐོས་པར་གྱུར་ནས་ཀུན་ཏུ་ཆགས་པར་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །ལྕེས་རོ་རྣམས་མྱངས་པར་གྱུར་ནས་ཀུན་ཏུ་ཆགས་པར་མི་འགྱུར་ཞིང་ཀུན་ཏུ་རྟོག་པར་ཡང་མི་བྱེད་

71-101a

དོ། །ལུས་ཀྱིས་རེག་བྱ་རྣམས་ལ་རེག་པར་གྱུར་ནས་ཀུན་ཏུ་ཆགས་པར་མི་འགྱུར་ཞིང་ཀུན་ཏུ་རྟོག་པར་ཡང་མི་བྱེད་དོ། །ཡིད་ཀྱིས་ཆོས་རྣམས་རིག་པར་གྱུར་ནས་ཀུན་ཏུ་ཆགས་པར་མི་བྱེད་ལ་ཀུན་ཏུ་རྟོག་པར་ཡང་མི་བྱེད་དོ། །དེ་ལྟར་སྲིད་པའི་དྲ་བ་འདི་དག་རྣམས་ཐམས་ཅད་ཀྱང་ཀུན་ཏུ་གཅོད་པར་བྱེད་དོ། །སྐྱེས་བུ་འཆི་བའི་འཇིགས་པས་འཇིགས་པར་འགྱུར་བ་དེས་འཇིགས་ན་འདི་དག་རྣམས་ཐམས་ཅད་ལ་ཡང་སྙིང་པོ་ཐམས་ཅད་མེད་པར་མཐོང་ངོ་། །ཐམས་ཅད་ཀྱང་སྡུག་བསྔལ་དུ་མཐོང་ངོ་། །ཐམས་ཅད་བདག་མེད་པར་མཐོང་ངོ་། །ཐམས་ཅད་སྟོང་པར་མཐོང་ངོ་། །ཡང་དག་པ་ཇི་ལྟ་བ་བཞིན་དུ་མཐོང་བ་དེས་འགའ་ཞིག་ལ་ཡང་ཆགས་པ་མེད་པས་ལྷའི་འཇིག་རྟེན་རྣམས་ལ་ཆགས་པ་དང་མི་ལྡན་ནོ། །མིའི་འཇིག་རྟེན་རྣམས་ལ་ཡང་ཆགས་པར་མི་འགྱུར་རོ། །ཅིའི་ཕྱིར་དམྱལ་བ་དང་ཡི་དགས་དང་དུད་འགྲོ་རྣམས་ལ་འབྱུང་། དེ་ནི་འགྲོ་བ་ལྔ་ལས་ཆགས་པ་རྣམས་ལས་རྣམ་པར་གྲོལ་བ་ཡིན་ནོ། །ཐམས་ཅད་ལས་ངེས་པར་བྱུང་བ་ཐམས་ཅད་ལ་འཇིགས་པ་འཆི་འཕོ་དང་སྐྱེ་བས་བྱས་པའི་སྡུག་བསྔལ་རྣམས་ཀྱིས་ཡིད་འབྱུང་བར་འགྱུར་རོ། །འདོད་ཆགས་དང་རྣམ་པར་བྲལ་བ་དེ་རྣམ་པར་གྲོལ་བར་འགྱུར་རོ། །རྣམ་པར་གྲོལ་བ་ལས་ཀྱང་རྣམ་པར་གྲོལ་བའི་ཡེ་ཤེས་ཉིད་འབྱུང་བ་ཡིན་ཏེ། ཇི་ལྟར་ངའི་ཚངས་པར་སྤྱོད་པ་ནི་སྤྱད་དོ་བྱ་བ་ནི་བྱས་སོ། །བདག་གི་སྲིད་པ་གཞན་ནི་རབ་ཏུ་མི་ཤེས་སོ། །དེ་ལྟར་བསྟན་པའི་ཡོན་ཏན་དེ་དག་རྣམས་ཇི་ལྟར་ངའི་ཚངས་པར་སྤྱོད་པ་ནི་སྤྱད། བྱ་བ་རྣམས་ནི་དམ་པའི་ཆོས་ཉན་པ་དང་དགེ་བའི་བཤེས་གཉེན་སྟེན་པར་བྱེད་པ་མ་གཏོགས་པར་གཞན་གྱིས་ནི་མ་ཡིན་ནོ། །དེའི་ཕྱིར་ཐམས་ཅད་ཀྱིས་རབ་ཏུ་བརྩོན་པ་ཐམས་ཅད་ཀྱིས་གནས་སྐབས་ཐམས་ཅད་དུ་དམ་པའི་ཆོས་སྒྲོགས་པ་མཉན་པར་བྱའོ། །འཁོར་བ་ན་འཇིག་རྟེན་གཉིས་སུ་ཕན་པ་དེ་དག་རྣམས་ཐམས་ཅད་ནི་འདི་ལྟ་སྟེ། དམ་པའི་ཆོས་སྒྲོགས་པ་རྣམས་དང་དགེ་བའི་བཤེས་གཉེན་བསྟེན་པ་ཡིན་ལ། འདི་དག་གཉིས་སྲིད་པ་གཉིས་སུ་བདེ་ལེགས་རྣམས་འཐོབ་པར་འགྱུར་རོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་ཞེ་ན་འདི་ལྟ་སྟེ།

71-101b

འཆི་བའི་དུས་ན་ཡང་འགྱོད་པ་མེད་པར་འགྱུར་བའོ། །དམ་པའི་ཆོས་སྒྲོགས་པ་ཐོས་པའི་དོན་གྱིས་སྐྱེས་བུ་དམ་པ་རྣམས་ཐམས་ཅད་ཀྱང་འཆི་བ་རྗེས་སུ་དྲན་པ་སྒོམ་པར་བྱེད་དོ། །སྐྱོན་གང་དག་གིས་སེམས་ཅན་རྣམས་སྐྱེ་བར་འགྱུར་བའི་སྐྱོན་དེ་ཡོངས་སུ་སྤང་བར་བྱ་བ་འདོད་ཆགས་དང་ཞེ་སྡང་དང་གཏི་མུག་དང་དྲི་མ་གསུམ་པོ་དེ་དག་ཀྱང་འཁོར་བའི་རྒྱུ་རྣམས་ཡིན་ནོ། །དེ་དག་རྣམས་ཡོངས་སུ་བཅད་པར་གྱུར་ན་ནི་སླར་ཡང་མི་སྐྱེའོ། །འཆི་བར་མི་བྱེད་དོ། །འཆི་འཕོ་བར་མི་འགྱུར་རོ། །ངེས་པར་སྐྱེ་བར་མི་འགྱུར་རོ། །དེ་ལ་ཡོན་ཏན་དེ་དག་རྣམས་ནི་དམ་པའི་ཆོས་ཉན་པ་ལས་མ་གཏོགས་པར་གཞན་དག་ལས་ནི་མ་ཡིན་ནོ། །དེའི་ཕྱིར་ཡང་མཆོག་ཏུ་བདེ་ལེགས་ཀྱི་རྩ་བ་ཁོ་ནར་གྱུར་པ་དུས་བཟངས་འདིས་བཅོམ་ལྡན་འདས་གསེར་ཐུབ་ཀྱིས་གསུངས་པའི་མདོ་ལྷ་དེ་དག་རྣམས་ལ་བཤད་དོ། །དམ་པའི་ཆོས་སྒྲོགས་པ་དང་ལྡན་པ་ལ་དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། འཆི་བའི་དུས་སུ་མི་འགྱོད་པའོ། །གང་ཡང་དམ་པའི་ཆོས་བསྒྲགས་པ་ཐོག་མའི་དོན་དང་ལྡན་པ་དང་དེ་བྱེད་པ་དང་དེ་དག་ཀྱང་འཆི་བའི་དུས་ན་འགྱོད་པར་མི་འགྱུར་རོ། །གང་འགའ་ཞིག་གིས་ལེགས་པར་བྱ་བ་བྱས་པར་གྱུར་པ་དེ་དག་ནི་འཆི་བའི་དུས་ན་རབ་ཏུ་རྣམ་པར་འགྱོད་པར་མི་འགྱུར་རོ། །གང་དང་གང་གིས་དམ་པའི་ཆོས་བསྒྲགས་པ་འདིའི་དོན་འདི་ཐོས་པར་གྱུར་པ་དེ་ཡང་གང་གི་ཚེ་འདི་ལ་མངོན་དུ་འགྱུར་རོ། །དེའི་ཚེ་མངོན་སུམ་དུ་མཐོང་བར་གྱུར་པ་དེ་དག་མངོན་པར་མཐོང་ནས་སངས་རྒྱས་དང་ཆོས་དང་དགེ་འདུན་རྣམས་ལ་ཕྱིར་ཞིང་ཉིད་ཀྱང་ཤིན་ཏུ་ལྷག་པར་ཀུན་ནས་རབ་ཏུ་དང་བར་འགྱུར་རོ། །དེ་ལ་འདིའི་སེམས་རབ་ཏུ་དང་བར་གྱུར་པས་མཆོག་ཏུ་ཁྲག་ཀུན་ནས་རབ་ཏུ་དང་བར་འགྱུར་རོ། །དེ་རབ་ཏུ་དང་བར་གྱུར་པས་བཞིན་གྱི་མདོག་རབ་ཏུ་དང་བར་འགྱུར་རོ། །དེའི་སེམས་རབ་ཏུ་དང་བར་གྱུར་པས་ལུས་ཀྱང་རབ་ཏུ་དང་བར་མཐོང་ངོ་། །གང་དག་སྣང་བ་ཁོ་ནར་མཐོང་བ་དེ་དག་ནི་དཀར་པོ་ནས་དཀར་པོ་སྣང་བ་དགའ་བར་འགྱུར་བའི་ལྷའི་འཇིག་རྟེན་དུ་སྐྱེ་བར་འགྱུར་རོ། །དེས་དེ་དག་རྣམས་མངོན་པར་མཐོང་ནས་ཕྱིར་ཉིད་ཀྱང་ཤིན་ཏུ་ལྷག་པར་ཇི་ལྟ་བར་རབ་ཏུ་དང་བར་འགྱུར་ཏེ། ཇི་ལྟ་ཇི་

71-102a

ལྟར་སངས་རྒྱས་དང་ཆོས་དང་དགེ་འདུན་རྣམས་ལ་རབ་ཏུ་དང་བར་གྱུར་པ་དེ་ལྟ་དེ་ལྟར་ཆེས་ལྷག་པའི་ལྷའི་རིགས་རྣམས་སུ་སྐྱེ་བར་འགྱུར་རོ། །གལ་ཏེ་རྒྱལ་ཆེན་བཞིར་སྐྱེ་བ་ཀུན་ཏུ་འཕེན་པར་འགྱུར་བའི་ལས་བྱས་པར་གྱུར་ན། དེའི་སེམས་རབ་ཏུ་དང་བར་གྱུར་པ་ཉིད་ལས་སུམ་ཅུ་རྩ་གསུམ་པ་རྣམས་སུ་སྐྱེ་བར་འགྱུར་རོ། །སུམ་ཅུ་རྩ་གསུམ་པ་རྣམས་སུ་སྐྱེ་བར་འགྱུར་བའི་ལས་བྱས་པར་གྱུར་ན། དེ་འཐབ་བྲལ་བ་རྣམས་སུ་སྐྱེ་བར་འགྱུར་རོ། །དེ་བཞིན་དུ་གལ་ཏེ་དགའ་ལྡན་དུ་སྐྱེ་བར་འགྱུར་བའི་ལས་བྱས་པར་གྱུར་ན་དེ་འཕྲུལ་དགའ་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་བཞིན་དུ་ཇི་སྲིད་དུ་གཞན་འཕྲུལ་དབང་བྱེད་པ་རྣམས་ཀྱི་ནང་དུ་སྐྱེ་བར་འགྱུར་རོ། །དེ་ལྟར་སེམས་ཀྱི་འཕེན་པ་དང་རབ་ཏུ་དང་བར་གྱུར་པའི་དབང་གིས་ཇི་སྲིད་དུ་དེས་ཤིས་པའི་གནས་འདི་དག་རྣམས་འཐོབ་པར་འགྱུར་རོ། །དེ་དག་རྣམས་ཐམས་ཅད་ཀྱང་ཐོས་པ་ལས་ཡིན་གྱི་མ་ཐོས་པས་ནི་མ་ཡིན་ནོ། །ཐོས་པ་དེ་ཡང་དམ་པའི་ཆོས་བསྒྲགས་པ་ལས་ཡིན་གྱི། གཞན་རྣམས་ལས་ནི་མ་ཡིན་ནོ། །འདི་ནི་ཡོན་ཏན་གཞན་ཡིན་ཏེ། དམ་པའི་ཆོས་སྒྲོགས་པ་ནི་འཆི་བའི་དུས་ན་སྐྱོབ་པར་གྱུར་པ་དང་སྐྱབས་སུ་གྱུར་པ་དང་ངེས་པར་འབྱུང་བར་འགྱུར་བ་རྣམས་ནི་དམ་པའི་ཆོས་སྒྲོགས་པ་ལས་ཡིན་ནོ། །དམ་པའི་ཆོས་སྒྲོགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། མཐར་ཡང་ཡོངས་སུ་མྱ་ངན་ལས་འདའ་བར་བྱེད་པའོ། །ཡོན་ཏན་གཞན་རྣམས་ཐམས་ཅད་ཀྱི་སྟེང་དུ་འཕགས་པ་ཡིན་ནོ། །འདི་ཡང་གང་ཞེ་ན་འདི་ལྟ་སྟེ། ཡོངས་སུ་མྱ་ངན་ལས་འདའ་བའོ། །ཆོས་ཐོས་པ་དེ་ཉིད་བསྟེན་ཅིང་བསྒོམས་ལ་ལན་མང་དུ་བྱས་པས་ཇི་སྐད་བརྗོད་པ་དེ་བཞིན་དུ་བྱེད་པར་འགྱུར་བས་ལེགས་པར་རང་བཞིན་དུ་གནས་པར་གྱུར་པའི་སྐྱེས་བུ་དམ་པ་རྣམས་ཀྱིས་ངེས་པ་ཁོ་ནར་ཉོན་མོངས་པ་རྣམས་ཟད་པར་བྱས་ནས་མྱ་ངན་ལས་འདས་པ་ཀུན་ཏུ་ཐོབ་པར་འགྱུར་རོ། །དེ་ལྟར་ངང་པ་རྣམས་ཀྱི་མངའ་བདག་དུས་བཟངས་འདིས་བག་མེད་པ་རྣམས་ཀྱིས་བག་མེད་པར་རྒྱུ་བའི་ལྷ་དེ་དག་རྣམས་ཀྱང་ངོ་མཚར་བར་བྱེད་པའི་དབྱངས་མཚུངས་པ་མེད་པར་གྱུར་པས་གཙུག་ལག་གི་ཆོས་སྟོན་པར་བྱེད་དོ། །དེ་ནས་ལྷ་དེ་

71-102b

དག་རྣམས་ཀྱིས་གཙུག་ལག་གི་ཆོས་དེ་ཐོས་པར་གྱུར་ནས། རབ་ཏུ་རྣམ་པར་དང་བར་གྱུར་པའི་ཡིད་ཐམས་ཅད་ལ་སྐྱེས་ནས་དེ་ལ་དེ་དག་རྣམས་ཀྱིས་འདི་སྐད་ཅེས་བརྗོད་དེ། ཡང་ཇི་ལྟར་ཁྱོད་ཁོ་ན་འདི་ན་ལྷ་ཡིན་ཏེ། གང་ལ་ཡང་རྣམ་པ་འདི་འདྲ་བའི་བློ་དང་སྒྲུབ་པ་མེད་པའི་ཕྱིར་རོ། །བདག་ཅག་རྣམས་ནི་དུད་འགྲོ་ཡིན་ཏེ་བག་མེད་པས་རྣམ་པར་བཅོམ་པ་དང་ཡུལ་རྣམས་ལ་དཔུང་གཉེན་དུ་བྱེད་པས་རྟག་ཏུ་ཡང་སྲེད་པས་ཉེ་བར་བཅོམ་པའི་སེམས་གང་ལ་ཡང་རྣམ་པ་དེ་ལྟ་བུ་ཉིད་ནི་མེད་དེ། བདག་ཅག་རྣམས་ཐམས་ཅད་ཀྱིས་གུས་པ་ཐམས་ཅད་ཀྱིས་གླུ་བླངས་པར་གྱུར་ཀྱང་རྣམ་པ་ཇི་སྲིད་པར་གྱུར་པའི་དབྱངས་དེ་དག་རྣམས་ནི་མི་འབྱུང་ངོ་། །དེ་ནས་དེའི་དུས་འདིར་ངང་པ་རྣམས་ཀྱི་མངའ་བདག་དེས་ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། དམ་ཆོས་བྱིན་རླབས་དང་ལྡན་པ། །ཆོས་བསྒྲགས་གནས་པའི་དབང་ཇི་བཞིན། །དམ་ཆོས་བསྒྲགས་པ་ཐོས་ནས་ནི། །སྡིག་པ་རྣམ་སྤོང་སྐྱེས་བུ་དེ། །དགའ་བས་ལེགས་པར་རབ་ཏུ་བསྒྲུབ། །རྟག་པར་ཡང་ནི་སྐྱེད་པར་བྱེད། །དམ་ཆོས་བསྒྲགས་པ་ཐོས་ནས་ནི། །ཡིད་ནི་ཚིམ་པར་འགྱུར་བ་ཡིན། །དགེ་བའང་ཤིན་ཏུ་ཆེན་པོ་ནི། །རྒྱུད་ལ་ཀུན་ནས་རབ་ཏུ་འཇོག །ཐོས་ནས་ཆོས་ནི་འཛིན་པར་འགྱུར། །ཐོས་ནས་སྡིག་པ་མི་བྱེད་དོ། །ཐོས་ནས་ལས་དང་འབྲས་བུ་ཤེས། །དེ་ནི་མྱ་ངན་འདས་པར་འགྲོ། །ཐོས་ནས་ཆོས་ལ་རྟོགས་པ་དང་། །ཐོས་ནས་སངས་རྒྱས་ལ་རབ་དང་། །ཐོས་ནས་སྡུག་བསྔལ་རྣམ་གྲོལ་བའི། །མི་གང་དེ་ནི་མཁས་པ་ཡིན། །ཆོས་བསྒྲགས་དེ་ཉིད་ཤེས་པ་ནི། །ཐོས་པས་ཡིད་ཅན་རྣམས་ལ་འགྱུར། །དེ་ཕྱིར་རབ་འབད་ཐོས་པའི་བློ། །རབ་ཏུ་བརྩོན་པས་བྱ་བར་གྱིས། །ཐོས་ནས་འཁོར་བ་ལས་ཁ་ཕྱིར། །གཏམ་ནི་བདེ་བར་གཤེགས་པས་གསུངས། །སྲིད་པ་རྣམ་པ་གསུམ་བཅོམ་ནས། །གོ་འཕང་ཉམས་པ་མེད་པར་འགྲོ། །རབ་ཏུ་བརྩོན་པ་རྣམ་བཞི་ཡིས། །སྐྱེ་འགག་མེད་པའི་ཆོས་རྣམས་ནི། །ཐོས་ནས་ས་བོན་ཐམས་ཅད་པ། །དེ་ཐོས་སྐྱེས་བུས་རྣམ་པར་བསྒོམ། །ཕུང་པོ་སྐྱེ་མཆེད་ཁམས་རྣམས་ཀྱི། །གང་ཕྱིར་མཚན་ཉིད་དེ་གཉིས་དག །ཐོས་ནས་ཀྱང་ནི་ཐམས་ཅད་ཤེས། །དེ་ཕྱིར་ཤེས་

71-103a

རབ་མཆོག་ཡིན་ནོ། །གང་ཡང་འཁོར་བར་ཀུན་འཆིང་བའི། །རབ་ཀྱི་སྟོབས་ལྡན་སྐྱོན་དེ་དག །དམ་ཆོས་ཐོས་པ་རྣམས་ཀྱིས་ནི། །དེ་ནི་ལྷག་མ་མེད་པར་འཇོམས། །སྐད་ཅིག་མ་ལུས་པར་རབ་འཇུག །ལྷག་མ་མ་ལུས་པར་ཡང་ལྡོག །ཐོས་དང་ལྡན་པས་རབ་ཏུ་ཤེས། །དེ་ཕྱིར་ཐོས་པ་བླ་ན་མེད། །འཆི་བའི་དུས་སུ་ཕྱིན་པ་ཡི། །ཚོར་བས་གཟིར་བའི་ལུས་ཅན་རྣམས། །ཇི་ལྟར་ཐོས་པ་ལ་དམིགས་ཏེ། །ཅུང་ཟད་སྙིང་ལ་སྐྱེས་པ་ཡིན། །ཐོས་པའི་མེ་ཡིས་མ་ལུས་ཀུན། །ཉོན་མོངས་ཤིང་ནི་གང་བསྲེགས་པའི། །དེ་དག་སླར་ཡང་འབྱུང་བ་ནི། །ནམ་ཡང་དམིགས་པ་མ་ཡིན་ནོ། །བག་ཡོད་པ་ཡིས་བསྲེགས་པའི་ཡང་། །བདེ་ལས་བདེ་བ་ཐམས་ཅད་འབྱུང་། །ཐོས་པའི་གཞི་ལས་བདེ་ལེགས་ཡིན། །དེ་ཕྱིར་ཐོས་པ་མཆོག་ཡིན་ནོ། །དམ་ཆོས་བསྒྲགས་པ་མཉན་ནས་ནི། །སྤེལ་ལ་ཉེར་བསྟེན་མཁས་པ་ཡང་། །རྒ་དང་འཆི་བ་སྤངས་པ་ཡི། །བླ་ན་མེད་པའི་གནས་སུ་འགྲོ། །ཐོས་པས་སྡིག་པ་མི་བྱེད་ཅིང་། །ཐོས་པས་ཆོས་ལ་འཇུག་པར་བྱེད། །ཐོས་ནས་སྡུག་བསྔལ་ལས་རྣམ་གྲོལ། །དེ་ཕྱིར་ཐོས་པ་གཙོ་བོ་ཡིན། །ལུས་ངག་ཡིད་གསུམ་དག་པ་ནི། །ལུས་ཅན་རྣམས་ཀྱི་ཐོས་པས་ཡིན། །དེ་ཕྱིར་ལེགས་པར་དག་འདོད་གང་། །དེས་ནི་གུས་པར་མཉན་པར་བྱ། །ཐོས་པའི་གྲུ་ལ་ལེགས་བརྟེན་ནས། །བརྩོན་འགྲུས་བརྟན་པོས་ཕ་རོལ་གནོན། །རྣམ་པ་སྣ་ཚོགས་ཆེ་རྒྱས་པར། །སྐྱེས་བུ་མྱུར་དུ་སྒྲོལ་བར་འགྱུར། །ཐོས་པས་ཕྱུག་པའི་སྐྱེས་བུ་ནི། །ནོར་རྣམས་ཀུན་ཏུ་ལྡན་པར་བརྗོད། །ཐོས་མེད་དོན་གྱི་ནོར་ལྡན་པ། །དེ་དབུལ་རབ་ཏུ་སངས་རྒྱས་གསུང་། །དམ་ཆོས་ནོར་ནི་ཉམས་པ་དང་། །བླ་མ་ཡང་ནི་སྤངས་པ་ཡི། །གསོན་པའི་འབྲས་བུ་མེད་པ་དང་། །སྡིག་པས་ཀྱང་ནི་བཅོམ་པར་འདོད། །བག་མེད་པ་དང་ལེ་ལོ་ཅན། །སྡིག་པའི་གྲོགས་ཀྱི་ལུས་ཅན་རྣམས། །གསོན་པ་འབྲས་མེད་མིག་གི་ནི། །འབྲས་བུ་གཞན་གྱིས་བཏོན་པ་བཞིན། །ཐོས་པའི་མིག་དང་རྣམ་བྲལ་བ། །དམུས་ལོང་ཞེས་ནི་མངོན་པར་བརྗོད། །གང་ཡང་ཆོས་ནི་ཡོངས་བོར་ནས། །ཆོས་མིན་པ་ལ་རྗེས་གནས་པ། །དེ་ནི་སྨན་རྣམས་ཡོངས་བོར་ནས། །ནད་ཉིད་ཉེ་བར་སྟེན་པ་

71-103b

ཡིན། །བསྟེན་པ་ཉིད་ཀྱང་སྐྱེས་བུ་དེས། །ཆོས་ནི་རྣམ་པ་དུ་མར་སྤེལ། །ཆར་རྣམས་དང་ནི་ཚོགས་པ་ལས། །ཆུ་ཀླུང་རབ་ཏུ་འཇུག་པ་ལྟར། །ཆོས་ལ་སྤྱོད་པ་རབ་ཞིའི་བདག །དུས་སུ་ལྡང་དང་མཉམ་པར་བཞག །ངེས་པར་བདེ་བའི་སྐལ་ལྡན་འགྱུར། །བག་མེད་པས་ཀྱང་བསླུས་པ་མིན། །དེ་ཕྱིར་ཤེས་རབ་ཡོན་ཏན་དུ། །ཤེས་ཀྱིས་མཁས་པས་ཤེས་རབ་སྟེན། །ཤེས་མིན་གང་དག་ལེགས་ལྡན་པའི། །བདེ་བའི་སྐལ་ལྡན་སྐྱེ་འགག་མེད། །དེ་ལྟར་དུས་བཟངས་དེས་ལྷ་དེ་དག་རྣམས་ཀྱི་དགེ་བའི་རྩ་བ་དེ་སྙིང་ལ་ལེགས་པར་འཇུག་པར་བྱེད་དོ། །རབ་ཏུ་འགོད་པར་བྱེད་དོ། །ལན་ཅིག་དང་ཕྱོགས་གཅིག་མ་ཡིན་པར་ཡང་ཕན་པར་གྱུར་པ་རྣམས་ཉེ་བར་སྡུག་པར་བྱེད་ལ། མི་ཕན་པ་རྣམས་དང་བྲལ་བར་བྱེད་དོ། །རྫོགས་པའི་སངས་རྒྱས་ཀྱིས་གསུངས་པའི་གཙུག་ལག་གི་ཆོས་རྣམས་སྟོན་པར་བྱེད་དོ། །དེ་ནས་ལྷ་དེ་དག་གིས་དེའི་དྲུང་ནས་ཆོས་དེ་དག་ཐོས་པར་གྱུར་ནས་གུས་པ་ལེགས་པར་སྐྱེས་པས་ཚིམ་པར་གྱུར་པའི་ཡིད་ཀྱིས་སླར་ཉིད་ཀྱང་བག་མེད་པ་ཞེན་པར་གྱུར་པའི་ལུས་ལྷན་ཅིག་པའི་སྐྱོན་གྱིས་རྩེད་མོ་རྩེ་འདོད་པས་གཞན་དུ་འགྲོ་བར་བྱེད་དོ། །དུས་བཟངས་ཀྱང་བཅོམ་ལྡན་འདས་གསེར་ཐུབ་ཀྱིས་གསུངས་པའི་དམ་པའི་ཆོས་སྒྲོགས་པའི་སྙིང་པོ་ཞེས་བྱ་བའི་མདོ་ཡོན་ཏན་དུ་མ་དང་ལྡན་པ་དེ་བཤད་ནས་ཡུལ་གཞན་ལ་ཆོས་ཁོ་ན་སེམས་པར་བྱེད་པས་ཀུན་ཏུ་གནས་སོ། །བཅོམ་ལྡན་འདས་གསེར་ཐུབ་ཀྱིས་གསུངས་པའི་མདོ་ཡོན་ཏན་སུམ་ཅུ་དང་ཡང་དག་པ་ལྡན་པའི་དམ་པའི་ཆོས་སྒྲོགས་པའི་སྙིང་པོ་ཞེས་བྱ་བ་རྫོགས་སོ།། །།

འཐབ་བྲལ་བ་རྣམས་ཀྱི་ས་རཱ་ཛ་ནི་དེ་ན་རྒྱུ་བར་བྱེད་པའི་ལྷ་དེ་དག་རྣམས་ཀྱང་ཇི་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པར་གྱུར་པའི་ལས་དེ་ཟད་པར་མ་གྱུར་གྱི་བར་དེ་སྲིད་དུ་རྔ་སྐད་ཡན་ལག་ལྔ་དང་ལྡན་པ་དང་ལྷ་རྫས་ཀྱི་འདོད་པའི་ཡོན་ཏན་ལྔས་དགའ་བར་བྱེད་དོ། །གང་གི་ཚེ་དེ་དག་ཟད་པར་གྱུར་པ་དེའི་ཚེ་ཉེས་པར་བྱས་པའི་ལས་རྣམས་ཀྱིས་སླར་ཉིད་ཀྱང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །གང་ཡང་མི་

71-104a

རྣམས་དང་སྐལ་བ་འཐུན་པར་གྱུར་པ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མིར་སྐྱེས་པར་གྱུར་ན། དེ་ཕུན་སུམ་ཚོགས་པར་གྱུར་ལ་མཆོག་ཏུ་སྐྱིད་པའི་སྐལ་བ་ཅན་དང་། མཆོག་ཏུ་བདེ་བར་གྱུར་པ་དང་། རྒྱུན་དུ་དམ་པའི་ཆོས་རྣམས་མཉན་པར་འདོད་པ་དང་། ཆོས་པའི་མཆོག་ཏུ་གྱུར་པ་དང་། ཡིད་གཞུངས་པ་དང་། ཡང་དག་པའི་ལྟ་བ་ཅན་དང་། རྒྱལ་པོའམ་རྒྱལ་པོའི་བློན་པོར་ཡང་ལས་དེའི་རྒྱུ་འཐུན་པས་འགྱུར་རོ། །རཱ་ཛ་ནི་ན་རྒྱུ་བ་ཞེས་བྱ་བའི་ས་རྫོགས་སོ།། །།གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱིས་ལ་ཀུན་ཏུ་ལྟ་བར་བྱེད་དེ། དེས་ཐོས་པ་ལས་བྱུང་བའི་རང་བཞིན་གྱི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱིས་རྣམ་པ་སྣ་ཚོགས་པར་རྣམ་པར་བཀྲ་བ་ཞེས་བྱ་བ་ཇི་ལྟར་ཡོད་པ་དེ་མཐོང་ངོ་། །ས་དེར་ཡང་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་། དེས་ཇི་ལྟ་བ་བཞིན་དུ་མཐོང་བ། སྐྱེས་བུ་དམ་པ་གང་གིས་དགེ་ལེགས་བྱེད་པར་གྱུར་པས། ལུས་དང་། ངག་དང་། ཡིད་ཀྱི་ལས་རྣམས་དགེ་བ་ལ་རབ་ཏུ་ཞུགས་པ་ཚུལ་ཁྲིམས་དང་ལྡན་པར་གྱུར་པ་དང་། གཞན་གྱིས་བཀྲི་བར་མི་འགྱུར་བ་དང་། ཡང་དག་པའི་ལྟ་བ་དང་། ཡང་དག་པའི་འཚོ་བ་དང་ལྡན་པས་ཉེ་འཁོར་ཀུན་ནས་མཆོག་ཏུ་དྲི་མ་མེད་པར་སྤྱོད་པར་གྱུར་ཅིང་། དྲང་པོ་དང་དྲང་པོའི་རང་བཞིན་ཅན་དུ་གྱུར་པས། སེམས་ཅན་རྣམས་ལ་མངོན་པར་ཞེན་པར་གྱུར་པའི་བློར་གྱུར་པས། སྲོག་གཅོད་པ་དང་མ་བྱིན་པར་ལེན་པ་རྣམས་ནི་སྤངས་པར་གྱུར་ཅིང་། འདོད་པ་ལ་ལོག་པར་གཡེམ་པ་ཡང་སྤངས་པར་གྱུར་པ་ལ་འདི་ལྟ་སྟེ། རྨི་ལམ་ན་ཡང་བུད་མེད་མཐོང་བར་གྱུར་ནས་མངོན་པར་ཞེན་པར་མི་བྱེད་དོ། །དེ་དང་ལྷན་ཅིག་ཏུ་བགྲོད་པར་ཡང་མི་བྱེད་དོ། །ཉིན་མོ་ཡང་གཞན་རྣམས་དང་ཡིད་ཀུན་ཏུ་རྙོག་པ་དང་བཅས་པས་ཡོངས་སུ་རྣམ་པར་རྟོག་པར་མི་བྱེད་དོ། །ཇི་ལྟ་བར་བདག་གིས་འདོད་པ་རྣམས་ལ་ལོག་པར་གཡེམ་པ་དག་དེ་ལྟར་ཡོངས་སུ་སྤང་བར་བྱས་པར་

71-104b

གྱུར་ན། ཇི་ལྟར་མཆོག་ཏུ་རྣམ་པར་དག་པའི་འབྲས་བུ་རྣམས་བདག་ལ་འབྱུང་བར་འགྱུར་ཏེ། ང་ཉིད་ཀྱིས་འདོད་པ་ལོག་པར་གཡེམ་པ་འདི་རྣམ་པར་སྤངས་པའི་རྒྱུས་བདག་ལྷར་ཡང་འགྱུར་ལ་ལྷ་གཞན་དག་རྣམས་སུ་ཡང་རུང་སྟེ། དེས་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་བར་བདག་འབྱུང་བར་འགྱུར་ཞིང་། ལྷའི་ཡང་བུད་མེད་ཀྱི་མཆོག་རྣམས་ལ་བདག་ཉེ་བར་ལོངས་སྤྱོད་པར་འགྱུར་གྱི་མིའི་ནི་མ་ཡིན་ནོ། །དེ་ལྷའི་བུ་མོ་རྣམས་གང་ཡིན་པ་ཁོ་ནའི་བསམ་པས་དེ་ནི་རྙོག་པ་དང་བཅས་པའི་ཚངས་པར་སྤྱད་པ་སྤྱོད་པར་འགྱུར་རོ། །ཇི་ལྟར་བདག་ལ་ལྷ་དེ་ཉིད་ཀྱིས་ཀྱང་བྱ་བ་མེད་ཀྱི། གལ་ཏེ་འདིར་བདག་གིས་འདོད་པ་ལ་ལོག་པར་གཡེམ་པ་རྣམ་པར་སྤངས་པར་མ་གྱུར་པ་ནི། ཇི་ལྟར་གང་དག་གིས་བུད་མེད་རྣམས་དང་། སྔོན་ཡང་ལྷན་ཅིག་ཏུ་བགད་ཅིང་བསྒྱིངས་ལ་རྩེས་པ་དང་ཡོངས་སུ་སྤྱོད་པ་དེ་དག་རྣམས་ནི་ཡང་དག་པའི་འགྲོ་བར་སྐྱེ་བར་འགྱུར་བའི་ལེགས་པ་མ་ཡིན་ནོ། །དེ་གང་གི་ཚེ་སྔོན་བུད་མེད་རྣམས་དང་ཉེ་བར་ལོངས་སྤྱད་པར་གྱུར་པའི་ལྷན་ཅིག་ཏུ་བགད་པ་དང་བསྒྱིངས་པ་དང་རྩེས་པ་དེ་ཡང་ཡིད་ཀྱིས་རོ་མྱོང་བར་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །འདུན་པའི་འདོད་ཆགས་ཡིད་ལ་སྐྱེས་པར་གྱུར་ན་ཡང་འགོག་པ་ལ་བརྩོན་པར་བྱེད་དོ། །དེའི་ཚེ་འབད་པར་བྱེད་དེ། བགད་པ་དང་བསྒྱིངས་པ་དང་ཡོངས་སུ་སྤྱོད་པར་གྱུར་པའི་རྣམ་པར་རྟོག་པ་རྙིང་པ་གང་ཡིན་པ་བདག་ལ་སྐྱེས་པ་རྣམས་དང་། སོ་སོར་ཉེ་བར་ལོངས་སྤྱད་པའི་བུད་མེད་རྙིང་པ་རྣམས་ལ་ཡང་རྣམ་པར་རྟོག་པས་རྟོག་པར་མི་བྱེད་དེ། སྐྱེས་པ་རྣམས་ལ་ཡང་ངེས་པར་བརྩོན་པར་བྱེད་དོ། །སྐྱེས་བུ་དམ་པ་དེ་ལས་དེ་དག་གིས་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་རྣམ་པ་སྣ་ཚོགས་པ་རྣམ་པར་བཀྲ་བའི་ས་ལ་སྐྱེ་བར་འགྱུར་རོ། །དེར་སྐྱེས་པ་འདི་ཡང་ལེགས་པར་བྱས་པའི་ལས་ཀྱི་མཐའ་ལ་སྤྱོད་པར་གྱུར་པའི་ལེགས་པར་སྨིན་པའི་དགེ་བའི་ལས་རྣམས་ཀྱི་འབྲས་བུ་ལ་ཉེ་བར་ལོངས་སྤྱོད་པས། འདོད་པའི་ཡོན་ཏན་ལྔ་

71-105a

དང་ཡང་དག་པར་ལྡན་པ་ཇི་ལྟར་གང་ཁོ་ནར་ལྷ་དེ་སྐྱེས་པར་གྱུར་པ་རྣམས་ལས། རེ་ཞིག་དང་པོ་ཁོ་ནར་ཐམས་ཅད་ནས་རིན་པོ་ཆེའི་འོད་ཟེར་གྱིས་ཐམས་ཅད་རྣམ་པར་བཀྲ་བར་གྱུར་པ་དེའི་མཐོ་རིས་ཀྱི་ཡུལ་དེ་དག་ཡིན་ནོ། །དེ་ལ་ལྷ་དེའི་ལེགས་པར་བྱས་པའི་ལས་ཀྱིས་གསར་དུ་རིན་པོ་ཆེ་འདི་དག་རྣམས་རབ་ཏུ་འབྱུང་བ་ཡིན་ནོ། །འདི་ལྟ་སྟེ། ཉེ་འཁོར་རྣམས་ན་རྡོ་རྗེ་རྣམ་པ་དུ་མ་དང་། རིའི་རྩེ་མོ་ལ་རྣམ་པ་སྣ་ཚོགས་པའི་འོད་ཟེར་གྱི་ཕྲེང་བ་དང་ལྡན་པ་རྣམས་ལ། ཇི་ལྟར་བཻ་ཌཱུརྱ་དང་སྔོན་པོ་དང་སྔོན་པོ་ཆེན་པོ་དང་ཤེལ་དང་མུ་སཱ་ར་གལྦ་དང་པད་མ་རཱ་ག་དང་མ་ར་ག་ཏ་མཆུ་ལྟུང་བ་རྣམས་དང་། དེ་བཞིན་དུ་གཞན་དག་ཀྱང་ལྷ་རྫས་ཀྱི་ལས་ཀྱི་ཁྱད་པར་རྣམས་ཀྱིས་ཁྱད་པར་དུ་སྐྱེས་པར་གྱུར་པའི་རིན་པོ་ཆེའི་རྣམ་པ་བརྒྱ་སྟོང་ཕྲག་རྣམས་ཀྱི་འོད་ཀྱིས་གནས་དེར་ཤིན་ཏུ་ཡང་ཁྱབ་པར་གྱུར་ཏོ། །དེ་རེ་ཞིག་དང་པོ་ཉིད་ཁོ་ནར་ཁ་དོག་སྣ་ཚོགས་པའི་འོད་རྣམ་པར་རྒྱས་པ་རྣམས་ཡང་དག་པར་མངོན་པར་མཐོང་ནས་མིག་གི་རྣམ་པར་ཤེས་པ་ཀུན་ཏུ་འཇུག་པར་བྱེད་དོ། །གང་དག་དེས་སྔོན་ནམ་ཡང་མ་མཐོང་བ་དེ་ལ་དེའི་མིག་གི་རྣམ་པར་ཤེས་པ་ཤིན་ཏུ་འཕེན་པར་བྱེད་དོ། །དེའི་རྗེས་ཐོགས་ལ་རྣམ་པ་སྣ་ཚོགས་པར་གྱུར་པ་མཚུངས་པ་མེད་པའི་ལྷ་རྫས་རྣམས་ཀྱི་གླུ་དང་རྔ་དང་རོལ་མོའི་སྒྲ་རྣམས་ཀྱི་སྒྲ་ཉན་པར་བྱེད་དོ། །དེའི་རྗེས་ཐོགས་ལ་འདི་ལྷ་རྫས་ཀྱི་དྲི་རྣམ་པ་སྣ་ཚོགས་པ་དཔེ་མེད་པའི་རྣམ་པ་རྣམས་ལ་སྣ་ཀུན་ཏུ་འཇུག་པར་ཡང་བྱེད་དོ། །དང་པོར་སྐྱེས་པ་དེ་གསུམ་གྱིས་ཐོག་མ་ཁོ་ནར་ཀུན་ཏུ་གཡེང་བར་ཤེས་པར་བྱ་སྟེ། སྔ་ན་མ་མཐོང་བ་དང་མཚུངས་པ་མེད་པ་རྣམས་ཀྱིས་བག་མེད་པའི་ས་ལ་ཀུན་ནས་འཇུག་པར་བྱེད་དོ། །དེ་དག་རྣམས་མངོན་པར་མཐོང་ནས་གང་དག་ལྷ་ཉིད་དུ་གྱུར་པ་དེ་དག་ནི་སྐལ་བ་དང་ལྡན་པ་ཡིན་པས་ལེགས་པར་བྱས་པའི་ལས་ཀྱིས་རྩེ་མོར་གྱུར་པ་དེ་དག་ནི་ནགས་ཀྱི་ནང་གི་གསེབ་དག་ནས་ཀུན་ཏུ་འོང་བར་བྱེད་དོ། །ནགས་དེ་ཡང་འོད་སྣང་བ་ཞེས་བྱ་བ་སྟེ་ཉེ་འཁོར་ཀུན་ན་འོད་ཟེར་རྣམ་པ་སྣ་ཚོགས་པ་མཚུངས་པ་མེད་པ་རྣམས་རབ་ཏུ་སྣང་བར་བྱེད་དོ། །ནགས་དེ་ལ་ལྷ་དེ་དག་གིས་ཀུན་ནས་བགྲོད་ནས་གང་ན་ལྷ་གསར་དུ་སྐྱེས་པ་ཡོད་པ་དེར་ཉེ་བར་རྒྱུགས་པར་བྱེད་པ་རྣམས་ནི། ཆ་བྱད་སྣ་

71-105b

ཚོགས་པ་འཆང་བ་གཟུགས་སྣ་ཚོགས་པ་དང་ལྡན་པ་རྣམ་པ་སྣ་ཚོགས་པའི་གླུ་དང་རྔ་སྒྲ་དང་རོལ་མོའི་སྒྲ་སྙན་པ་རྣམས་དང་གླུ་ཀུན་ཏུ་སྒྲོགས་པར་བྱེད་པ་དང་གླུ་དབྱངས་སྙན་པ་དཔེ་མེད་པ་དགའ་བར་གྱུར་པ་རྣམས་ཉེ་བར་བྱུང་ནས་སྐད་རྣམས་ཀུན་ཏུ་འདོན་ནོ། །དེ་ནས་ལྷ་དེ་ཡང་དེ་དག་རྣམས་མངོན་པར་མཐོང་བ་དང་ཐོག་མ་མེད་པའི་དུས་ནས་གོམས་པར་གྱུར་པའི་འདོད་ཆགས་ཀྱི་བློས་ཀུན་ནས་འཕངས་པས། གང་ན་ལྷ་དེ་དག་ཡོད་པ་དེར་རབ་ཏུ་དགའ་བའི་ཡིད་ཀྱིས་འདྲེ་བར་བྱེད་དོ། །དེ་དག་རྣམས་ཀྱང་གང་ན་ལྷ་འདི་ཡོད་པ་དེར་ཉེ་བར་རྒྱུ་སྟེ། ཁ་ཅིག་ནི་ནམ་མཁའི་དཀྱིལ་དུ་ཤིན་ཏུ་འཕགས་པར་གྱུར་ནས་པི་བང་ལག་ན་ཐོགས་པས་གླུ་ལེན་པར་གྱུར་པས་སོ། །གཞན་དག་ཁ་ཅིག་ནི་ཁང་བུའི་སྟེང་ན་ཆེས་རབ་ཏུ་རྒོད་པར་བྱེད་པའི་མིག་གིས་མེ་ཏོག་ཀུན་ཏུ་སྦྲེལ་བས་མཚུངས་པ་མེད་པ་རྣམས་ཀྱི་དྲི་སྣོམ་པར་བྱེད་དོ། །ལྷ་གཞན་དག་རྣམས་ཁ་ཅིག་ནི་ས་གཞི་ཉིད་ལ་ཚོགས་པ་འདུས་པ་རྣམས་ཀྱིས་སྣ་ཚོགས་པའི་རོལ་མོ་དང་ལག་ན་མེ་ཏོག་ཐོགས་པར་གྱུར་པས་གང་ན་ལྷ་འདི་ཡོད་པ་དེར་རྒྱུག་པར་བྱེད་དོ། །ལྷ་གཞན་དག་ཁ་ཅིག་ནི་ལག་ན་མེ་ཏོག་རྣམས་ཐོགས་པས་གང་ན་ལྷའི་བུ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །ལྷ་གཞན་དག་ཁ་ཅིག་གིས་ནི་སྣ་ཚོགས་པའི་ཁ་དོག་དང་རོ་དང་དྲི་ཕུན་སུམ་ཚོགས་པར་གྱུར་པའི་མྱོས་བྱེད་མྱོས་པའི་སྐྱོན་དང་བྲལ་བ་དག་ཐོགས་ནས་གང་ན་ལྷ་འདི་ཡོད་པ་དེར་ཉེ་བར་རྒྱུག་པར་བྱེད་དོ། །དེ་ནས་ལྷ་གང་དག་གིས་མྱོས་བྱེད་དེ་བཟུང་ནས་རྒྱུག་པར་བྱེད་དེ་བཟུང་ནས་རྒྱུག་པར་བྱེད་པ་དེ་དག་གི་ལག་པ་དག་ལ་དེས་ཀུན་ཏུ་འཇུས་ནས་ལྷ་འདི་མྱོས་བྱེད་དེ་དག་བླངས་ནས་ལྷའི་ཁ་དོག་དང་རོ་ཕུན་སུམ་ཚོགས་པར་གྱུར་པ་རྣམས་འཐུང་བར་བྱེད་དོ། །དེ་ནས་འཐུངས་པར་གྱུར་ནས་དེ་བཅུ་འགྱུར་གྱི་བླ་ལྷག་པར་རབ་ཏུ་དགའ་བ་འཐོབ་པར་འགྱུར་རོ། །དེ་ཡུལ་བཞི་པས་ཀྱང་རྣམ་པར་གཡེངས་པ་ཡིན་ཏེ། སྔར་ནི་གཟུགས་དང་སྒྲ་དང་དྲི་རྣམས་ཀྱིས་ཡིན་ལ་ཕྱི་ནས་ནི་རོས་ཀྱང་ཀུན་ནས་གཡེངས་པར་གྱུར་ཏོ། །ལུས་ཀྱིས་ཀྱང་རྣམ་པ་སྣ་ཚོགས་པར་གྱུར་པའི་མཆོག་ཏུ་བདེ་བ་དང་ལྡན་པའི་ཡིད་ཀྱི་རྗེས་སུ་འཐུན་པར་བྱེད་པའི་རེག་བྱ་རྣམས་ལ་རེག་པར་བྱེད། ཡིད་ཀྱིས་ཀྱང་གང་ཁོ་ན་ཀུན་ཏུ་རྟོག་པར་བྱེད་པ་

71-106a

དེ་ཁོ་ན་འབད་པ་མེད་ཅིང་ངལ་བ་མེད་པའི་ཕུན་སུམ་ཚོགས་པར་ལྷན་ཅིག་ཉིད་དུ་འབྱུང་བར་འགྱུར་རོ། །དེ་ལྟར་ལྷ་གསར་དུ་སྐྱེས་པ་དེ་སྲེད་པའི་ཚོགས་དྲུག་གིས་རྣམ་པར་འབྱེད་པར་བྱེད་དོ། །དེ་ནས་ལྷ་གསར་དུ་སྐྱེས་པ་ལྷ་དེ་དག་རྣམས་དང་ལྷན་ཅིག་ཏུ། གང་ན་ལྷ་གཞན་དག་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པར་གྱུར་པས་དགའ་བར་བྱེད་པ་འདོད་པ་རྣམས་ཐམས་ཅད་རྗེས་སུ་འཐུན་པའི་ནགས་ཞེས་བྱ་བའི་ནགས་དེར་ལྷ་འདི་ཉེ་བར་འདྲེ་བར་བྱེད་དོ། །དེ་ནས་ལྷ་གསར་དུ་སྐྱེས་པར་གྱུར་པ་དེ་ལྷ་དེ་དག་གིས་ཡོངས་སུ་བསྐོར་བ་ཉིད་ཀྱིས་རྣམ་པ་སྣ་ཚོགས་པའི་རྩེད་མོ་རྣམས་ཀྱིས་རྩེ་བར་གྱུར་པའི་ལྷ་དེ་དག་རྣམས་ཉིད་མཐོང་བ་ལ། ཁ་ཅིག་ནི་པད་མའི་རྫིང་བུ་རྣམས་ན་རྩེ་བར་བྱེད་དོ། །ཁ་ཅིག་ནི་འཁྲི་ཤིང་གི་གསེབ་ཏུ་སོང་ནས་རྩེ་བར་བྱེད་དོ། །ཁ་ཅིག་ནི་རིའི་རྩེ་མོ་རྣམས་ཀྱི་གསེབ་ཏུ་སོང་ནས་རྔ་སྐད་ཡན་ལག་ལྔ་དང་ལྡན་པ་རྣམས་ཀྱིས་རྩེ་བར་བྱེད་དོ། །ལྷ་གཞན་ཁ་ཅིག་ནི་སྲེད་པ་དྲུག་གི་ཚོགས་རྣམས་ཀྱིས་རྣམ་པར་འབྱེད་དོ། །དེ་ནས་ལྷ་གསར་དུ་སྐྱེས་པར་གྱུར་པ་དེ་ལྷ་དེ་དག་རྣམས་དང་ལྷན་ཅིག་ཏུ་གྱུར་པས། གང་ན་ལྷ་གཞན་དག་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཅིང་ནམ་མཁའི་དཀྱིལ་ན་ཁང་བུའི་རྒྱབ་ཏུ་སོང་ནས་སྣ་ཚོགས་པའི་རིན་པོ་ཆེ་རྣམས་ཀྱིས་རྣམ་པར་བརྒྱན་པའི་ལུས་ཅན་རྣམས་རྩེ་བར་བྱེད་པ་དང་། ལྷ་གཞན་དག་ཁ་ཅིག་ནི་ལྗོན་ཤིང་གི་ཡལ་ག་ལ་ཀུན་དུ་བབས་ནས་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཏེ་གར་དག་བྱེད་པ་དང་རྒོད་པར་ཡང་བྱེད་པ་དང་རྔ་སྐད་ཡན་ལག་ལྔ་པས་འགྱིང་བར་ཡང་བྱེད་དོ། །དེ་ནས་ལྷ་གསར་དུ་སྐྱེས་པ་དེས་ལྷ་དེ་དག་རྣམས་མངོན་པར་མཐོང་བར་གྱུར་ནས་རབ་ཏུ་ཆེས་དགའ་བར་གྱུར་པའི་ཡིད་ཀྱིས། ལྷ་དེ་དག་རྣམས་ཉིད་ཁོ་ནས་ཡོངས་སུ་བསྐོར་ནས་རྣམ་པར་འདྲེ་བར་འགྱུར་རོ། །ལྷ་དེ་རྣམས་དང་ལྷ་དེ་དག་ཀྱང་ཕན་ཚུན་དུ་ལྷན་ཅིག་ཏུ་གྱུར་ཅིང་ལྷ་དེ་དག་རྣམས་དང་ལྷན་ཅིག་ཏུ་གྱུར་པ་གང་ཡིན་པའི་ལྷ་དེ་དག་རྣམས་དང་ལྷ་གསར་དུ་སྐྱེས་པ་དེ་དང་བཅས་པ་རྣམས་ནགས་དེར་རྗེས་སུ་ཞུགས་པར་གྱུར་ཏོ། །དེ་དེ་ལ་བདེ་བར་རྣམ་པར་རྒྱུ་བར་གྱུར་པས་རྔ་སྐད་ཡན་ལག་ལྔ་དང་ལྡན་

71-106b

པ་དང་འདོད་པའི་ཡོན་ཏན་ལྔ་པོ་རང་གི་ལས་དང་འདྲ་བ་རྣམས་ལ་དུས་རིང་དུ་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་ནས་དུས་ཤིན་ཏུ་རིང་དུ་ནགས་དེ་ལ་བགྲོད་པར་གྱུར་ནས་འབབ་ཆུ་རྣམ་པ་སྣ་ཚོགས་པ་དང་ལྡན་པ་ཞེས་བྱ་བའི་རི་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པ་ལ་རྩེ་བར་གྱུར་པས་ལྷག་པར་འཁོད་པར་བྱེད་དོ། །དེ་ལྟར་ཕན་ཚུན་དུ་མྱོས་པ་ལ་གྲོགས་སུ་གྱུར་པ་རྣམས་རང་གི་ལས་ཀྱི་འབྲས་བུ་རྣམས་ལ་ལོངས་སྤྱོད་པ་རྣམས་དེ་དང་དེ་ལ་ཡང་རྩེ་བར་བྱེད་པ་ཡིན་ཏེ། ལྗོན་ཤིང་རྣམས་ཀྱི་བར་དག་ཏུ་གྱུར་པའི་འབབ་ཆུ་རྣམས་ལ་དང་། རྣམ་པ་སྣ་ཚོགས་པའི་རྡོ་རིན་པོ་ཆེ་རྣམས་ཀྱིས་རྣམ་པར་བརྒྱན་པ་རྣམས་དང་། རབ་ཏུ་དང་ཞིང་བསིལ་བར་གྱུར་པ་རྣམས་ལ་དང་། མཆོག་ཏུ་བསིལ་བའི་དྲི་མ་མེད་པར་གྱུར་པའི་རིའི་འབབ་ཆུ་སྣ་ཚོགས་པ་དང་ལྡན་པ་དེ་དག་རྣམས་ལ་ཡང་དགའ་བར་བྱེད་དོ། །དེ་ནས་ལྷ་བག་མེད་པ་དེ་དག་རྣམས་ནི་མངོན་པར་མཐོང་བར་གྱུར་ནས། འབབ་ཆུ་ལ་རྒྱུ་བ་ཞེས་བྱ་བ་ལྷ་རྣམས་རྩེ་བར་བྱེད་པའི་བྱ་དག་གིས་ཚིགས་སུ་བཅད་པ་བརྗོད་པ། ཇི་ལྟར། ལས་རྣམས་གང་ཕྱིར་རྣམ་དག་གི། །འབྲས་བུ་བདེ་བར་ཀུན་ནས་གནས། །དེ་ཟད་ནས་ནི་སླར་ལྟུང་བར། །ལྷ་ཡི་འཇིག་རྟེན་ལ་འབྱུང་འགྱུར། །བདེ་བ་ད་ལྟ་བས་རྨོངས་ནས། །མདུན་གྱི་འཇིགས་པ་མཐོང་བ་མིན། །ལས་ཟད་སྡུག་བསྔལ་ཀུན་ཐོབ་པ། །ཕྱི་ནས་ཤེས་པར་འགྱུར་བ་ཡིན། །བདེ་མིན་བདེ་བའི་གཟུགས་ཀྱིས་ནི། །བག་མེད་ཀུན་ནས་རབ་ཏུ་འཇུག །ལས་ཟད་ནས་ནི་རྣམ་ལྟུང་བ། །དེ་ནི་ཕྱི་ནས་ཡོངས་གདུང་འགྱུར། །ལས་གང་ཆུད་ཟ་བར་འཇུག་པའི། །བག་མེད་དུག་བཞིན་དུ་ནི་སྤོངས། །བག་མེད་པས་ནི་ཉེར་བཅོམ་ལྷ། །ཕྱི་ནས་དམྱལ་བའི་སྐལ་ལྡན་ཡིན། །འདུ་བ་ལ་ནི་བློ་དགའ་ཞིང་། །བྲལ་བ་ལ་ཡང་རྗེས་སུ་གདུང་། །འདུས་པའི་མཐའ་ནི་འབྲལ་འགྱུར་བར། །ཆོས་ཉིད་འདི་ནི་རྣམ་པར་གནས། །ཤེས་གང་འཇིག་པར་མི་འགྱུར་བའི། །གནས་དེ་དམིགས་པ་མ་ཡིན་ནོ། །རྣམ་པར་འཇིག་དང་འབྱུང་བ་ཉིད། །ཆོས་རྣམས་བྱུང་ཞིང་འཇིག་པ་ཡིན། །ཇི་ལྟ་ཇི་ལྟར་ལྷ་རྣམས་ཀྱང་། །བདེ་བ་རྒྱུ་བར་མཐོང་བ་ཡང་། །དེ་ལྟ་དེ་ལྟར་

71-107a

བག་མེད་པའི། །དུག་གིས་རྨོངས་ནས་རབ་ཆུད་འཛའ། །བག་མེད་ལྷ་རྣམས་ཐམས་ཅད་ཀྱིས། །སྔར་ནི་དགའ་བ་བཞིན་དུ་མཐོང་། །ཕྱི་ནས་སྡུག་བསྔལ་མཐོང་ནས་ནི། །མི་རྣམས་ལ་ནི་དགྲ་བཞིན་སྐྱེ། །བུད་མེད་དང་འདྲེ་བློ་ལྡན་གྱིས། །བག་མེད་རྣམས་ལས་ལྷག་པར་བརྗོད། །དེ་དང་འདྲེ་ལས་ལྷ་རྣམས་འཇིག །ལྷ་མིན་ལྟོ་འཕྱེ་ཆེན་པོ་ཡང་། །བུད་མེད་དང་འབྲེལ་ཆང་འཐུང་དང་། །རྩེད་མོ་ཡུལ་དང་ལྷན་ཅིག་ཏུ། །རྩབ་ཧྲལ་དེ་ནས་ལེ་ལོ་དང་། །དེ་དག་བག་མེད་མྱུ་གུ་ཡིན། །དེ་དག་བྱ་དེས་ལྷ་དེ་དག་རྣམས་མངོན་པར་མཐོང་ནས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་རྣམས་བརྗོད་དོ། །དེ་ནས་ལྷ་དེ་དག་ལ་དེ་ལྟར་ཕན་པ་རྣམས་བརྗོད་པར་གྱུར་པ་ན་ཡང་རྟོགས་པར་མི་འགྱུར་བར། ཡུལ་རྣམས་ཀྱིས་ཉེ་བར་བཅོམ་ནས་དེ་ཁོ་ན་བཞིན་དུ་གར་བྱེད་པར་གྱུར་ཅིང་རྒོད་པར་གྱུར་པ་དང་རྩེ་བར་ཡང་གྱུར་པས། སླར་ཡང་འཁྲི་ཤིང་ལྗོན་ཤིང་གིས་ཀུན་ནས་ཁྱབ་པའི་ནགས་འོད་སྣང་བ་དེ་ཉིད་དུ་རབ་ཏུ་འཇུག་པར་བྱེད་དོ། །ནགས་དེ་ན་ནི་མཆོག་ཏུ་དགའ་བར་གྱུར་པ་རྣམ་པ་སྣ་ཚོགས་པའི་ཤིང་དང་འཁྲི་ཤིང་དང་ལྗོན་ཤིང་དང་པད་མའི་རྫིང་བུ་དང་ཁྲུས་ཀྱི་རྫིང་བུ་དང་འབབ་ཆུ་རྣམས་ལ་དགའ་བ་རྣམ་པ་སྣ་ཚོགས་པའི་བྱའི་ཚོགས་བརྒྱ་ཕྲག་གི་སྒྲ་འབྱིན་པ་རྣམས་དང་། མེ་ཏོག་བརྒྱ་སྟོང་ཕྲག་ཁ་བྱེ་བས་དགའ་བར་གྱུར་པ་མན་དཱ་ར་བ་ཀུན་ནས་དུད་པའི་ལྗོན་ཤིང་དང་མྱུ་གུ་ལ་ལྷ་བརྒྱ་ཕྲག་གིས་གང་བས་དགའ་བ། ལྷ་རྫས་ཀྱི་རྔ་སྐད་ཡན་ལག་ལྔ་པའི་སྒྲ་སྒྲོགས་པར་གྱུར་པའི་སྒྲས་ལྷ་དེ་དག་ལྷ་གསར་དུ་སྐྱེས་པ་དེ་དང་ཡང་དག་པར་ལྡན་པས་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་ལ་ལྷ་གང་དག་སྐྱེས་ནས་རིང་དུ་ལོན་པ་དེ་དག་རྣམས་ལན་ཅིག་དང་ལན་ཅིག་མ་ཡིན་པར་རྣམ་པ་དུ་མར་ནགས་དེ་དག་དང་ནགས་ཀྱི་བཀོད་པ་དག་རྣམས་ལ་དང་འཇུག་ངོས་དེ་དག་དང་པད་མའི་རྫིང་བུ་དེ་དག་དང་ས་གཞིའི་ཆ་དེ་དག་དང་འཁྲི་ཤིང་གི་ཁང་པ་དེ་དག་དང་། ནགས་ཀྱི་གསེབ་དེ་དག་དང་དཔག་བསམ་གྱི་ཤིང་དེ་དག་དང་ནགས་ཁྲོད་ཀྱི་གསེབ་རིན་པོ་ཆེ་བདུན་གྱི་འོད་ཀུན་ནས་འབར་བའི་འོད་ཟེར་དང་ལྡན་པ་དང་ཁང་བུ་སྔ་ན་མ་མཐོང་བ་དེ་དག་རྣམས་ཀྱིས་དེ་ལྟར་

71-107b

ཀུན་དུ་འཁྲིད་པར་བྱེད་དོ། །དེ་བཞིན་དུ་ལྷ་གསར་དུ་སྐྱེས་པ་འདི་ཡང་ཐམས་ཅད་དུ་རྣམ་པར་ལྟ་བར་གྱུར་པས་ཀུན་དུ་འགྲོ་བར་བྱེད་དོ། །ངོ་མཚར་བས་ཡིད་ཀུན་དུ་གཡོས་པར་གྱུར་པའི་བློས་ལྷ་དེ་དག་ཉིད་ཀྱིས་ཡོངས་སུ་བསྐོར་ནས། དེ་ཡུལ་གསར་པ་རྣམས་ཀྱི་སྲེད་པས་གདུངས་པའི་འདོད་པའི་མེ་དང་བག་མེད་པའི་དུད་པས་བསྲེགས་པར་གྱུར་པས་གྱུར་ཅིང་ཡང་དང་ཡང་དུ་བསྲེགས་པར་གྱུར་པས་ལྷ་དེ་དག་རྣམས་ཉིད་ཀྱིས་ཡོངས་སུ་བསྐོར་ནས། ནགས་ཀྱི་ནང་གི་གསེབ་ཏུ་ཡུལ་རྣམས་ཀྱི་སྲེད་པའི་ཤུགས་དུ་མས་བསྲེགས་པར་གྱུར་པས་རྟག་པར་རྒྱུན་དུ་འགྲོ་བར་བྱེད་དོ། །དུས་རིང་དུ་རྒྱུ་བར་གྱུར་པ་ལས་དེ་གལ་ཏེ་ཤེད་ན་ལྷ་དེ་དག་གིས་ཡོངས་སུ་བསྐོར་ནས་གང་ན་རྣམ་པ་སྣ་ཚོགས་པར་བཀྲ་བ་ཞེས་བྱ་བའི་པད་མའི་རྫིང་བུ་ཡོད་པ་དེར་ཀུན་དུ་འགྲོ་བར་བྱེད་དོ། །རྣམ་པ་སྣ་ཚོགས་པར་བཀྲ་བའི་པད་མའི་རྫིང་བུ་དེའི་ཡང་མཚུངས་པ་མེད་པར་གྱུར་པའི་མཛེས་པ་འདི་དག་ཡིན་ཏེ། དཔེར་ན་པད་མ་དེ་ལྟ་བུའི་གཟུགས་རྣམ་པར་བཀྲ་བར་གྱུར་པ་རྣམས་ལ་འདི་ལྟ་སྟེ། བཻ་ཌཱུརྱའི་འདབ་མ་དང་གསེར་གྱི་ཡུ་བ་དང་། པད་མ་རཱ་ག་དང་། གསེར་བཟང་པོའི་སྙིང་པོ་དང་། དངུལ་གྱི་མདོག་དང་མཚུངས་པའི་ཟེ་འབྲུ་དང་ལྡན་པ་རྣམས་ལ་ཨིན་དྲ་ནཱི་ལའི་རང་བཞིན་གྱི་བུང་བ་རྣམས་ཀྱིས་ཉེ་བར་མཛེས་པར་གྱུར་པ་དང་། པད་མ་གཞན་ཁ་ཅིག་ནི་དངུལ་གྱི་རང་བཞིན་གྱི་ཡུ་བ་དང་། ཨིན་དྲ་ནཱི་ལའི་འདབ་མ་དང་། གསེར་གྱི་ཟེ་འབྲུ་ལ་མུ་ས་ར་གལྦ་དང་། ཤེལ་དང་། གསེར་གྱི་མདོག་གི་བུང་བ་རྣམས་ཀྱིས་ཉེ་བར་མཛེས་པར་བྱས་པའོ། །པད་མ་གཞན་ཁ་ཅིག་ནི་གསེར་གྱི་ཡུ་བ་ལ་ཨིན་དྲ་ནཱི་ལའི་འདབ་མ་དང་པད་མའི་ཟེ་འབྲུ་དངུལ་གྱི་སྙིང་པོ་ལ་པད་མ་རཱ་ག་དང་མདོག་མཚུངས་པའི་བུང་བ་རྣམས་ཀྱིས་ཉེ་བར་མཛེས་པའོ། །པད་མ་གཞན་ཁ་ཅིག་ནི་ཡུ་བ་དང་། འདབ་མ་དང་། ཟེ་འབྲུ་དང་། སྙིང་པོ་རྣམས་ཐམས་ཅད་དམར་པོ་ཡིན་ཏེ། དེ་བཞིན་དུ་བུང་བ་ཡང་དམར་པོ་རྣམས་ཀྱིས་ཉེ་བར་མཛེས་པར་བྱས་པའོ། །གཞན་ཡང་པད་མ་གཞན་དག་ནི་ཡུ་བ་དང་། འདབ་མ་དང་། ཟེ་འབྲུ་དང་། སྙིང་པོ་རྣམས་ཐམས་ཅད་ཀྱང་དངུལ་དང་མཚུངས་པར་གྱུར་པ་ལ་བུང་བ་རྣམས་ཀྱང་ཁ་དོག་གཅིག་པའོ། །པད་མ་གཞན་ཁ་ཅིག་ནི་ཨུད་པ་ལ་

71-108a

དང་ཆ་འདྲ་བ་དང་། ཡུ་བ་དང་། འདབ་མ་དང་། ཟེ་འབྲུ་དང་། སྙིང་པོ་རྣམས་ཐམས་ཅད་ནས་སྔོན་པོར་གྱུར་པ་ལ་བུང་བའི་ཚོགས་རྣམ་པར་སྒྲོགས་པ་རྣམས་ཀྱིས་ཉེ་བར་མཛེས་པའོ། །གཞན་ཡང་པད་མ་གཞན་རྣམས་རྣམ་པར་མཛེས་པར་གྱུར་པ་པད་མའི་རྫིང་བུ་དེ་ཉིད་ན་ཁ་དོག་རྣམ་པར་བཀྲ་བའི་པད་མ་རྣམས་ལ་འདི་ལྟ་སྟེ། པད་མ་གཅིག་ཀྱང་རིན་པོ་ཆེ་བདུན་གྱི་རང་བཞིན་གྱིས་རྣམ་པར་བཀྲ་བ་དང་དབྱིབས་རྣམ་པ་སྣ་ཚོགས་པ་དང་རྣམ་པ་སྣ་ཚོགས་པར་རབ་ཏུ་སྐྱེས་པར་གྱུར་པའི་པད་མ་རྣམས་ཡིན་ཞིང་། རྣམ་པ་སྣ་ཚོགས་པའི་དྲི་དང་ལྡན་པ་དང་འདབ་མ་ཁ་དོག་སྣ་ཚོགས་པས་ཉེ་བར་མཛེས་པར་གྱུར་པ་རྣམས་ལ་འདི་ལྟ་སྟེ། སྔོན་པོ་དང་། སེར་པོ་དང་། དཀར་པོ་དང་། དམར་པོ་དང་། ནག་པོ་དང་། རྣམ་པར་འདྲེས་པའི་འདབ་མས་ཉེ་བར་མཛེས་པར་བྱས་པའི་པད་མའི་རྫིང་བུ་ལས་སྐྱེས་པ་ལས་བུང་བའི་ཚོགས་རྣམས་ཀྱིས་མཛེས་པར་གྱུར་པའོ། །རྣམ་པ་དེ་སྲིད་པ་རྣམས་ཉིད་ཀྱིས་ཉེ་བར་མཛེས་པར་གྱུར་པས་པད་མའི་གསེབ་རྣམས་རབ་ཏུ་གསལ་ལོ། །རྣམ་པ་དེ་ལྟ་བུར་རྣམ་པར་བཀྲ་བར་གྱུར་པའི་པད་མའི་རྫིང་བུ་དེ་ན་མཆོག་ཏུ་དགའ་བར་གྱུར་པ་རབ་ཏུ་དང་བའི་ཆུ་བསིལ་ཞིང་མངར་བའི་ཆུ་ལ་མཆོག་ཏུ་དགའ་བའི་ལྷ་རྫས་ཀྱི་མདོག་དང་། དྲི་དང་། དབྱིབས་དང་ལྡན་པའི་པད་མས་ཉེ་བར་མཛེས་པར་གྱུར་པ་འདི་ན། ལྷ་གསར་དུ་སྐྱེས་པ་དེ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ཅིང་ལྷན་ཅིག་ཏུ་ལྷ་རྫས་ཀྱི་འདོད་པའི་ཡོན་ཏན་ལྔ་དང་ལྡན་པར་གྱུར་ནས་རྔ་སྐད་ཡན་ལག་ལྔ་པས་རྩེ་བར་བྱེད་ཅིང་རྒོད་པར་བྱེད་དོ། །རྣམ་པ་སྣ་ཚོགས་པར་རྣམ་པར་བཀྲ་བའི་པད་མའི་རྫིང་བུ་དེའི་མཐའ་མ་ན་ཡང་། ལྷ་རྫས་ཀྱི་འགྲམ་ནས་སྐྱེས་པར་གྱུར་པའི་ལྗོན་ཤིང་གི་རིགས་ཡོད་པ་རྣམས་ནི་གང་དག་གིས་པད་མའི་རྫིང་བུ་དེ་བརྒྱ་འགྱུར་དུ་ཡང་རྣམ་པར་མཛེས་པར་བྱེད་པ་སྟེ། ནམ་ཟླ་ཐམས་ཅད་དུ་རབ་ཏུ་ཁ་བྱེ་བར་གྱུར་པའི་མེ་ཏོག་གི་ཚན་ཀ་ཀུན་ནས་དུད་པ་རྣམས་ཀྱིས་ཡོངས་སུ་བསྐོར་བ་རྣམས་ལ་འདི་ལྟ་སྟེ། ཤིང་གི་ཚོགས་སུ་གྱུར་པ་རྣམས་ལ་ཤིང་གང་དག་གི་མཛེས་པ་འདི་དག་ཡིན་ཏེ། འདི་ལྟར་རྩ་བ་ནས་བཟུང་ནས་སྔོན་པོ་དང་། སེར་པོ་དང་། དཀར་པོ་དང་། ནག་པོ་དང་། དམར་

71-108b

པོའི་མདོག་གི་མེ་ཏོག་རྣམས་ཀྱིས་ཉེ་བར་མཛེས་པ་དང་ལྡན་པའི་ལྗོན་ཤིང་རྣམས་ཡིན་ནོ། །པད་མའི་རྫིང་བུ་དེ་ན་གང་དག་ཡོན་ཏན་བརྒྱ་འགྱུར་དུ་གྱུར་པའི་འོད་དང་ལྡན་པའི་བྱའི་ཚོགས་རྣམས་ཀྱིས་དཔག་ཚད་བཅུར་ཉེ་བར་མཛེས་ཤིང་སྐད་སྙན་པ་རྣམས་ཀྱིས་ཉེ་འཁོར་ཀུན་ནས་རྣམ་པར་མཛེས་པར་བྱེད་དོ། །གཞན་ཡང་པད་མའི་རྫིང་བུ་དེ་ཉིད་ན་ཤིང་ལྗོན་པ་འགྲམ་ནས་སྐྱེས་པ་གཞན་དག་ཁང་བུའི་ཤིང་ལྗོན་པ་རྣམས་ཡོད་པ་འདི་དག་ནི་ལྟ་རྣམས་ཀྱི་ལེགས་པར་བྱས་པའི་ལས་ཀྱི་གཟི་བརྗིད་ཡིན་ནོ། །གང་གི་ཚེ་ལྷ་དེ་དག་པད་མའི་རྫིང་བུ་དེ་ན་རྩེ་བར་བྱེད་པ་དེའི་ཚེ་གལ་ཏེ་ན་ཤིང་ལ་རྣམ་པར་འཛེག་པར་གྱུར་ནས་འདི་ལྟར་སེམས་པར་བྱེད་དོ། །ཇི་ལྟར་ཁང་བུ་རྣམས་ཀྱང་བདག་ཅག་ལ་འདིར་བྱུང་བར་གྱུར་ན་རུང་སྙམ་པ་དེའི་ཚེ་ཁང་བུའི་ཤིང་དེ་དག་རྣམས་ལ་བུང་བ་རྣམས་ཚིམ་པར་བྱེད་པའི་མེ་ཏོག་རྣམས་དང་བརྗོད་པ་པ་དང་། དེ་དག་རྣམས་ཐམས་ཅད་ཀྱང་ལྷ་དེ་དག་གི་ལེགས་པར་བྱས་པའི་ལས་ཀྱིས་ཏེ། རིན་པོ་ཆེ་བདུན་གྱི་འོད་རྣམས་དང་ལྡན་པ་དང་རབ་ཏུ་ཕལ་ཆེ་བར་གྱུར་པའི་ཆུ་ཀླུང་དང་། རྫིང་བུ་དང་། ནགས་དང་། ཉེ་བའི་ནགས་དང་། རིའི་རྩེ་མོ་རྣམས་དང་། རིན་པོ་ཆེ་བདུན་གྱིས་ཉེ་བར་སྤྲས་པ་དང་བཅས་པ་རྣམས་གང་ཡིན་པ་དེ་དག་ཁང་བུའི་ནང་དུ་ཕུན་སུམ་ཚོགས་པར་འབྱུང་ངོ་། །དེ་དག་ཁང་བུར་ཞུགས་པར་གྱུར་ཅིང་རྣམ་པ་སྣ་ཚོགས་པའི་རྒྱན་དང་། ཆ་བྱད་ཅན་གྱི་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་རྩེ་བར་གྱུར་ཅིང་རྒོད་པར་གྱུར་ལ་གླུ་ཡང་ལེན་པར་གྱུར་པས། ནམ་མཁའི་དཀྱིལ་དུ་འཕགས་ནས་འཐབ་བྲལ་བའི་ལྷ་རྣམས་ཀྱིས་གཞན་ལ་ཇི་ལྟར་འདོད་པར་ཀུན་དུ་ལྟ་བར་བྱེད་དོ། །ཡོན་ཏན་དེ་ལྟ་བུ་རྣམས་དང་ལྡན་པའི་འགྲམ་སྐྱེས་ཀྱི་ཤིང་ཞེས་བྱ་བ་གང་དག་ཁང་བུའི་ལྗོན་ཤིང་འདི་དག་རྣམས་ཀྱི་མཐུ་ཡིན་ནོ། །གཞན་ཡང་པད་མའི་རྫིང་བུ་དེ་ཉིད་ཀྱི་འགྲམ་ན་ཡོད་པའི་ཤིང་ལྗོན་པ་རྣམས་ལ། རྣམ་པ་སྣ་ཚོགས་པར་རྣམ་པར་བཀྲ་བའི་མེ་ཏོག་དང་འབྲས་བུ་རྣམ་པ་སྣ་ཚོགས་པར་རྣམ་པར་བཀྲ་བའི་བྱ་རྣམས་ཀྱིས་ཉེ་བར་མཛེས་པར་གྱུར་པས་རྣམ་པར་གསལ་བར་གྱུར་པ་ཡིན་ནོ། །ནོར་བུའི་སྒྲ་ཞེས་བྱ་བ་གང་དག་གི་མཐུ་སྟོབས་ནི་འདི་ཡིན་ཏེ། གང་གི་ཚེ་ལྷ་དེ་དག་

71-109a

རྣམས་པད་མའི་རྫིང་བུ་དེ་ཉིད་ན་རྩེ་བར་བྱེད་པ་ན་དེའི་ཚེ་ཤིང་དེ་དག་རླུང་འཇམ་པོ་རྣམས་ཀྱིས་རབ་ཏུ་བསྐྱོད་པར་གྱུར་པས་ཕན་ཚུན་དུ་འདྲུད་པར་བྱེད་དོ། །ཀུན་དུ་འདྲུད་པར་གྱུར་པ་དེ་དག་རྣམས་ཀྱི་ཕན་ཚུན་དུ་སྙན་པར་གྱུར་པ་དང་ཕན་ཚུན་དུ་ཡིད་དུ་འོང་བ་དང་སྒྲ་རྒྱ་ཆེན་པོ་རྣམ་པ་སྣ་ཚོགས་པ་རྣམས་རབ་ཏུ་འབྱུང་བར་འགྱུར་རོ། །ལྷ་རྫས་ཀྱི་ནོར་བུའི་ཕུང་པོ་ཡང་མཆོག་ཏུ་ཡང་བར་གྱུར་པ་དག་མེ་ཏོག་བཞིན་དུ་རབ་ཏུ་འབབ་པའོ། །གང་དག་ནོར་བུ་རྣམས་ཀྱིས་དེའི་ཚེ་ན་ནམ་མཁའ་མ་ལུས་པར་ཀུན་དུ་སྣང་བར་བྱེད་པ་རྣམས་ལ། དཔེར་ན་ཉི་མ་དང་ཟླ་བ་འདི་དག་གིས་འཛམ་བུའི་གླིང་རབ་ཏུ་སྣང་བར་བྱེད་པ་དེ་བཞིན་དུ་ནོར་བུ་དེ་དག་རྣམས་ཀྱིས་རབ་ཏུ་གསལ་བར་བྱེད་དོ། །དེའི་ཚེ་ནམ་མཁའི་རང་བཞིན་རབ་ཏུ་གསལ་བར་བྱེད་པ་ཡང་ཡིན་ནོ། །ལྗོན་ཤིང་གཞན་ཡང་པད་མའི་རྫིང་བུ་དེ་ཉིད་ཀྱི་ངོས་ན་ཡོད་པ་རྣམས་ལ། འདི་ལྟ་སྟེ་སྐྱེ་བོ་མི་གཡོ་བ་ཞེས་བྱ་བའི་ཤིང་ལྗོན་པའོ། །པད་མའི་རྫིང་བུ་དེ་དག་ཉིད་ན་ལྷ་དེ་དག་རྣམས་རྩེ་བར་བྱེད་པ་ན། དེའི་ཚེ་ལྗོན་ཤིང་དེ་དག་ལས་ལྷ་དེ་དག་རྣམས་ཉིད་ཀྱིས་ལེགས་པར་བྱས་པའི་ལས་རྣམས་ཀྱི་འབྲས་བུ་ཁ་དོག་དཀར་བར་གྱུར་པའི་ཁུ་བའི་རྩི་ལྷ་རྫས་ཀྱི་དྲི་དང་རོ་དང་ཁ་དོག་དང་རེག་བྱ་ཅན་དེ་དག་རབ་ཏུ་འབྱུང་ངོ་། །དེའི་ཚེ་ལྷ་དེ་དག་རྣམས་འཐུང་བར་བྱེད་དོ། །དེས་བཅུ་འགྱུར་གྱིས་ཀྱང་ལྷག་པར་ཡིད་ཆེས་རབ་ཏུ་རངས་པར་འགྱུར་རོ། །མྱོས་པའི་སྐྱོན་རྣམས་དང་ནི་བྲལ་བ་ཡིན་ནོ། །ལྷན་ཅིག་སྤྱོད་པར་བྱེད་པ་དེ་དག་རྣམས་ཀྱིས་ཡོངས་སུ་བསྐོར་ནས་གར་དང་རྒོད་པར་ཡང་བྱེད་དོ། །བཟའ་བ་ཡང་བདུད་རྩིའི་རང་བཞིན་རྣམས་རབ་ཏུ་ཟ་བར་བྱེད་དོ། །དེ་ལྟར་ཤིང་དེ་དག་རྣམས་ཉིད་ལས་ལྷ་དེ་དག་རྣམས་ཀྱི་ལས་ཇི་ལྟ་བུ་རྣམས་དང་འདྲ་བར་འགྱུར་རོ། །གཞན་ཡང་པད་མའི་རྫིང་བུ་དེ་ཉིད་ན་རྣམ་པ་སྣ་ཚོགས་པར་རྣམ་པར་བཀྲ་བའི་དྲི་དང་ཁ་དོག་ཅེས་བྱ་བ་འགྲམ་ན་སྐྱེས་པའི་ཤིང་ལྗོན་པ་གཞན་དག་ཡོད་དོ། །གང་གི་ཚེ་ན་ལྷ་དེ་དག་རྣམས་པད་མའི་རྫིང་བུ་དེ་ན་རྩེད་མོ་རྩེ་བར་བྱེད་པ་ན། དེའི་ཚེ་ལྷ་དེ་དག་རྣམས་ཉིད་ཀྱི་ལེགས་པར་བྱས་པའི་ལས་ཀྱིས་བདེ་བའི་རེག་པའི་རླུང་འཇམ་པོ་རབ་ཏུ་འཕྱུར་རོ། །རླུང་དེ་དག་གིས་ཀྱང་ལྗོན་ཤིང་དེ་

71-109b

དག་རྣམས་ཀྱི་འདབ་མ་དེ་དག་འདྲུད་པར་བྱེད་དོ། །ཕན་ཚུན་ཀུན་དུ་འདྲུད་པར་གྱུར་པ་དེ་དག་རྣམས་ལས་མཆོག་ཏུ་ཡིད་དུ་འོང་བར་གྱུར་པའི་སྒྲ་རབ་ཏུ་འབྱུང་བ་རྣམས་ལ། འདི་ལྟ་སྟེ་ལྷ་དེ་དག་རྣམས་ཉིད་ཀྱི་རོལ་མོར་གྱུར་པ་མཉམ་པ་དང་ཆགས་པར་འགྱུར་བ་དང་སྙན་པར་གྱུར་པའི་རྣམ་པ་དེ་ལྟ་བུ་རྣམས་ལས་རབ་ཏུ་འབྱུང་བར་འགྱུར་རོ། །དེ་བཞིན་དུ་པད་མའི་རྫིང་བུ་རྣམ་པ་སྣ་ཚོགས་པར་རྣམ་པར་བཀྲ་བ་དེ་ཉིད་ན་འགྲམ་ན་སྐྱེས་པའི་ཤིང་ལྗོན་པ་གཞན་དག་ཡོད་པ་ནི་བྱས་དགའ་བ་ཞེས་བྱ་བའོ། །དེ་དག་གི་མཐུ་ནི་འདི་ལྟ་བུ་ཡིན་ཏེ། འདི་ལྟར་བྱ་གང་དག་ཡིན་པ་དེ་དག་ལྗོན་ཤིང་དེ་དག་རྣམས་ལ་སོ་སོར་གནས་སོ། །ཇི་ལྟར་ལྷ་དེ་དག་རྣམས་སོང་བར་གྱུར་ནས་པད་མའི་རྫིང་བུ་དེ་ཉིད་དུ་ཡུན་རིང་དུ་རྩེད་མོ་རྣམས་བྱས་ཤིང་རྔ་སྐད་ཡན་ལག་ལྔ་པས་དགའ་བར་བྱས་ནས། ལྗོན་ཤིང་དེ་དག་རྣམས་ལ་ལྷག་པར་འཁོད་པར་བྱེད་པ་དང་། དགའ་བར་གྱུར་པ་རྣམས་ལ་ལྟ་བར་འདོད་པའི་ཕྱིར་བྱ་དེ་དག་རྣམས་ཀྱི་ཡང་རྒྱབ་ཏུ་ཞོན་པར་བྱེད་དེ། གང་གིས་རྣམ་པ་ཇི་ལྟ་བུ་དག་གིས་ནམ་མཁའི་དཀྱིལ་དུ་འཕགས་ནས་ས་རྣམས་ཇི་ལྟ་བ་བཞིན་དུ་ཀུན་དུ་བལྟ་བར་འདོད་པའི་རྣམ་པ་དེ་ལྟ་བུར་བྱ་དེ་དག་ལྷ་རྣམས་ཀྱི་སེམས་བསྐྱེད་པ་ཙམ་གྱིས་འགྱུར་རོ། །ཡང་ན་དེར་ཁང་བུ་དག་འགྱུར་ཞིང་ཕལ་ཆེ་བར་གྱུར་པའི་འབབ་ཆུ་དང་། རྫིང་བུ་དང་། ནགས་དང་། ཉེ་བའི་ནགས་དང་། འཁྲི་ཤིང་གི་ཁང་བུ་ཕུན་སུམ་ཚོགས་པ་རྣམ་པ་སྣ་ཚོགས་པར་བལྟ་ན་མཛེས་པར་གྱུར་པའི་བཞོན་པ་རྣམས་ལ་ཞོན་ནས་ལྷ་རྣམས་ཀྱི་ས་ལ་དེ་དག་ཀུན་དུ་ལྟ་བར་བྱེད་དོ། །གཞན་ཡང་བྱ་གཞན་དག་གིས་ཚིགས་སུ་བཅད་པའི་དབྱངས་བརྗོད་པ། ཇི་ལྟར། ཚུལ་ཁྲིམས་བསྲུངས་པའི་མི་རྣམས་འཆི་བ་མཆོག་ཡིན་གྱི། །ཁྲིམས་འཆལ་རྣམས་ནི་ཡུན་རིངས་གསོན་པའང་འདིར་མཆོག་མིན། །མི་ཡིས་ཡོངས་སུ་ཟིལ་གྱིས་མནན་ནས་གནས་ཕྱིར་མིན། །འཆི་འཕོས་ན་ཡང་མ་ཡིན་དམྱལ་བ་རྣམས་སུ་གནས། །སྔ་ཕྱི་རིམ་པར་བློ་ལྡན་རྣམས། །སྐད་ཅིག་རེ་རེ་ཉུང་ངུ་ན་ཉུང་། །གར་པ་དང་ནི་ཁྲུས་མཁན་ཡང་། བྱི་དོར་འབྲས་བུའི་བདག་ཉིད་ཡིན། །དེ་ནས་ཡང་བཅོམ་ལྡན་འདས་རྒྱལ་པོའི་ཁབ་ཀྱི་ནཱ་ལ་

71-110a

ཏིའི་བྲམ་ཟེའི་གྲོང་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལུས་དྲན་པ་ཉེ་བར་གཞག་པ་ཞེས་བྱ་བ་ངས་བཤད་པར་བྱ་སྟེ། དང་པོར་དགེ་བ་བར་དུ་དགེ་བ་ཐ་མར་དགེ་བ་དོན་བཟང་པོ་ཚིག་འབྲུ་བཟང་པོ་འབའ་ཞིག་པ་ཡོངས་སུ་རྫོགས་པ་ཡོངས་སུ་དག་པ་ཡོངས་སུ་བྱང་བ་ཚངས་པར་སྤྱོད་པ་ངས་བཤད་པར་བྱའོ། །འདི་ལྟ་སྟེ་ལུས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་སོ། །དེ་ལེགས་པར་རབ་ཏུ་ཡིད་ལ་བྱས་ཏེ་ཉོན་ཅིག་བཤད་པར་བྱའོ། །དེ་སྐད་ཅེས་བཀའ་སྩལ་པ་དང་། དགེ་སློང་དེ་དག་བཅོམ་ལྡན་འདས་ཀྱི་ལྟར་ཉན་ཏོ། །དེ་དག་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགེ་སློང་དག་ལུས་དྲན་པ་ཉེ་བར་གཞག་པ་ཞེས་བྱ་བའི་ཆོས་ཀྱི་རྣམ་གྲངས་འདི་ཡང་གང་དག་ཡིན་ཞེ་ན། འདི་ལྟ་སྟེ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པའི་དགེ་སློང་ནི་བདུད་ཀྱི་ཡུལ་ལ་མི་གནས་སོ། །ཉོན་མོངས་པ་རྣམས་ཀྱང་སྤོང་བར་བྱེད་དོ། །ཡང་དག་པ་ཇི་ལྟ་བ་བཞིན་དུ་ལུས་མཐོང་ངོ་། །ཡེ་ཤེས་མངོན་སུམ་དུ་བྱས་པར་གྱུར་ནས་མྱ་ངན་ལས་འདས་པ་ཡང་མཐར་བྱེད་པར་ང་གསུང་ངོ་། །འདི་ན་དགེ་སློང་ལུས་ལ་ཡང་དག་པར་ལྟ་བར་བྱེད་པ་རྣམས་ནི་ཚུལ་བཞིན་མ་ཡིན་པ་ཡིད་ལ་བྱེད་པས་མི་འཕྲོགས་པ་དང་། ཀུན་ནས་ཉོན་མོངས་པ་རྣམས་དང་ཡང་བྲལ་བར་འགྱུར་རོ། །ནང་གི་བདག་ཉིད་ཀྱི་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་དང་། ཕྱི་རོལ་གྱི་གཟུགས་དང་། རོ་དང་། དྲི་དང་། རེག་བྱ་དང་། སྒྲ་དང་། ཆོས་རྣམས་ཀྱང་ལུས་ཡིན་ནོ། །ནང་གི་བདག་ཉིད་ཀྱིས་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་གྱུར་ན་མཐར་མྱ་ངན་ལས་འདས་པར་འགྱུར་རོ། །འདི་ན་དགེ་སློང་དག་མིག་གིས་གཟུགས་རྣམས་མཐོང་བ་ན་ཀུན་དུ་རྟོག་པར་མི་བྱེད་ཅིང་། དགའ་བའི་འདོད་ཆགས་དང་མཚུངས་པར་ལྡན་པའི་སེམས་ཀྱིས་ཡང་དག་པ་ཉིད་དུ་ལྟ་བར་མི་བྱེད་ཀྱིས། ལུས་འདི་ལ་ཡོད་པ་རྣམས་ནི་སྐྲ་དང་། སྤུ་དང་། སེན་མོ་དང་། སོ་དང་། རུས་པ་དང་། པགས་པ་དང་། ཁྲག་དང་། རྒྱུས་པ་དང་། ཟས་དང་། སྨིན་པ་དང་། བད་ཀན་དང་། མཁྲིས་

71-110b

པ་དང་། རླུང་དང་། རྒྱུ་མ་དང་། གཉེ་མ་དང་། བཤང་བ་དང་། གཅི་བ་དང་། གློ་བ་དང་། མཁལ་མ་དང་། ཤ་དང་། ཚིལ་དང་། ཁུ་ཆུ་དང་། ཆུ་སེར་དང་། སྣབས་དང་། གླད་རྒྱས་དང་། གླད་པ་རྣམས་སོ། །དེ་གང་གི་ཚེ་དེ་ལྟར་ལུས་ལ་ལུས་ཀྱི་རྗེས་སུ་འབྲེལ་བར་དྲན་པར་གྱུར་པ་ན། དེའི་ཚེ་གཟུགས་དང་། རོ་དང་། དྲི་དང་། རེག་བྱ་དང་། སྒྲ་དང་། ཆོས་དང་ཕྱི་རོལ་གྱི་ཆོས་རྣམས་ཀྱིས་ཀྱང་འཕྲོགས་པར་མི་འགྱུར་རོ། །མིག་གིས་ཀྱང་གཟུགས་རྣམས་དང་པོ་ཉིད་ནས་ཡང་དག་པ་ཇི་ལྟ་བ་བཞིན་དུ་མཐོང་ངོ་། །རྣལ་འབྱོར་སྤྱོད་པ་རྣམས་ཀྱིས་ཡང་དག་པ་ཇི་ལྟ་བ་བཞིན་དུ་ནང་གི་བདག་ཉིད་ཀྱི་མིག་ཤའི་གོང་བུ་འབྱུང་བ་ཆེན་པོ་བཞི་ལས་གྱུར་པ་ཇི་ལྟར་མཐོང་བ་ཡིན་ན། ནང་གི་བདག་ཉིད་ཀྱི་ཤའི་གོང་བུའི་མིག་འདི་དག་ལ་གང་ཅུང་ཟད་ཅིག་སྲ་ཞིང་མཁྲང་བར་གྱུར་པ་ཟིན་པར་གྱུར་པ་དེ་དག་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་སའི་ཁམས་ཞེས་བརྗོད་དོ། །དེ་ལ་ནང་གི་བདག་ཉིད་ཀྱི་ཤའི་གོང་བུའི་མིག་འདི་དག་ཉིད་སོ་སོའི་བདག་ཉིད་ལ་ཆུ་དང་ཆུ་རྣམས་ནི་དེ་དག་རླན་ཞིང་རླན་པར་འབབ་པ་དེ་ལ་བརྟེན་ནས་གཤེར་བར་གྱུར་པ་ཟིན་པར་གྱུར་པ་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་ཆུའི་ཁམས་ཞེས་བརྗོད་དོ། །དེ་ལ་ནང་གི་བདག་ཉིད་ཀྱི་ཤའི་གོང་བུའི་མིག་འདི་ཉིད་སོ་སོའི་བདག་ཉིད་ལ་མེར་གྱུར་པ་ནི་དྲོ་བ་དང་དྲོ་བར་གྱུར་པ་ཟིན་པར་གྱུར་པ་ཉེ་བར་ལེན་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་མེའི་ཁམས་ཞེས་བརྗོད་དོ། །དེ་ལ་ནང་གི་བདག་ཉིད་ཀྱི་ཤའི་གོང་བུའི་མིག་འདི་ཉིད་སོ་སོའི་བདག་ཉིད་ལ་རླུང་དང་རླུང་དུ་གྱུར་པ་རྣམས་ནི་ཡང་ཞིང་ཀུན་དུ་གཡོ་བ་ཉིད་དུ་གྱུར་པ་འདི་ནི། ནང་གི་བདག་ཉིད་ཀྱི་ཤའི་གོང་བུའི་མིག་གི་རླུང་གི་ཁམས་ཞེས་བརྗོད་དོ། །ཇི་ལྟར་མིག་ལ་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་པ་དེ་ལྟར་ན། རྣ་བ་དང་། སྣ་དང་། ལྕེ་དང་། ལུས་རྣམས་ལ་ཡང་སོ་སོར་རྟོག་པར་བྱེད་ཅིང་། ལུས་ལ་ལུས་ཀྱི་རྗེས་སུ་ལྟ་བའི་དགེ་སློང་ནི། དགའ་བའི་འདོད་ཆགས་དང་ལྷན་ཅིག་གནས་པའི་སྲེད་པས་འཆིང་བར་མི་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་

71-111a

ཞིང་གནས་ཏེ། ངའི་ལུས་འདི་ནི་སྐད་ཅིག་དང་སྐད་ཅིག་ལ་སྐྱེ་བ་དང་། རྒས་པ་དང་། འཆི་བ་དང་། ཤི་འཕོ་བ་དང་། སྐྱེ་བར་ཡང་འགྱུར་བས། འདི་ནི་སྒྱུ་མ་ལྟ་བུ་དང་གསོག་གསོབ་སྙིང་པོ་མེད་པ་དབུ་བ་དང་ཆུ་བུར་རྡོས་པ་ལྟ་བུར་གྱུར་པ་སྡུག་བསྔལ་དང་། སྡུག་བསྔལ་རྣམས་སྐྱབས་གནས་སུ་གྱུར་པ་དང་། སྡུག་བསྔལ་གྱི་སྐྱེ་གནས་ཀྱི་ལུས་ཡིན་ནོ། །སྡུག་བསྔལ་མ་ཡིན་པར་འགྱུར་བའམ། མི་རྟག་པ་མ་ཡིན་པ་དང་། ཡོངས་སུ་འགྱུར་བའི་ཆོས་ཉིད་མ་ཡིན་པ་དང་། འཇིག་པའི་ཆོས་ཉིད་མ་ཡིན་པ་གང་ཡིན་པའི་གནས་སྐབས་ནི་ལུས་འདི་ལས་ཅུང་ཟད་ཅིག་ཀྱང་ཡོད་པ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། སྐྱབས་ནི་གང་ཡིན་སྐྱོབ་པ་ནི་གང་ཡིན། འདི་ན་ནི་ཇི་ལྟར་ཞེས་དེས་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རྟོག་པར་བྱེད་དོ། །དེ་དག་ནི་འདི་ལྟར་ཡིན་ཏེ། ལུས་འདི་ནི་ལས་ཀྱི་རྩ་བ་ལས་ཡིན་ཞིང་ལས་ཀྱི་སྐྱབས་གནས་པ་ལས་ཀྱི་སྐྱོབ་པ་ཡིན་པས། དགེ་བའི་ལས་རྣམས་དང་ལྡན་ན་ལྷ་དང་མི་རྣམས་སུའོ། །མི་དགེ་བའི་ལས་རྣམས་དང་ལྡན་ན་དམྱལ་བ་ཡི་དགས་དུད་འགྲོ་རྣམས་སུའོ། །ལུས་འདི་ལ་ནི་རྫས་སམ་གཙང་བའམ་སྙིང་པོའམ་རྟག་པའམ། བརྟན་པར་གྱུར་པ་ནི་མེད་དོ་ཞེས་དེས་འདི་ཡང་དག་པར་སོ་སོར་རྟོག་པར་བྱེད་པ་གང་ཡིན་པ་ལས་དགའ་བའི་འདོད་ཆགས་དང་ལྷན་ཅིག་གནས་པའི་སྲེད་པ་ཡང་འབྱུང་བ་ཅན་གྱི་སྲེད་པ་རྣམས་ཡོངས་སུ་སྤོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་མིག་དེ་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། ཇི་ལྟར་འཛམ་བུའི་གླིང་པ་རྣམས་ཀྱི་མིའི་མིག་གིས་གཟུགས་རྣམས་སྣང་བ་དང་། ནམ་མཁའ་དག་ལས་རྗེས་སུ་འཐུན་པ་མཐོང་བར་འགྱུར་བ་དེ་ཁོ་ན་བཞིན་དུ་གནས་གཞན་ན་གནས་པའི་མིའི་མིག་གིས་གཟུགས་རྣམས་མཐོང་བ་ཡིན་ནམ་ཞེས་བྱ་བར་ཏེ། དེ་ནས་ལེགས་པར་བསམས་ཤིང་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཀྱང་ཀུན་དུ་ལྟ་བར་བྱེད་པ་ལ་ཇི་ལྟར་འཛམ་བུའི་གླིང་པ་རྣམས་ཀྱི་མིག་དང་གཟུགས་དང་སྣང་བ་དང་ནམ་མཁའ་དང་ཡིད་ལ་བྱེད་པའི་རྐྱེན་དེ་དག་རྣམས་ལས་གཟུགས་རྣམས་

71-111b

ལེགས་པར་མཐོང་བ་ཡིན་ནོ། །དེ་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་སྐྱེས་བུ་སོང་ཞིང་ནམ་མཁའ་ལ་གནས་ནས་གཟུགས་རྣམས་མཐོང་བ་ཡིན་ཏེ། དཔེར་ན་ཆུ་ན་ཆུ་ལ་སྤྱོད་པའི་ཉ་ལ་སོགས་པ་རྣམས་ཀྱི་གཟུགས་མཐོང་བ་དེ་བཞིན་དུ་བྱང་ཕྱོགས་སྒྲ་མི་སྙན་པའི་སྐྱེས་བུ་རིས་བསྒྲིབས་པར་གྱུར་པའི་གཟུགས་རྣམས་ཀྱང་མཐོང་ངོ་། །གཞན་ཡང་རྣལ་འབྱོར་སྤྱོད་པ་བདག་ཉིད་འཛམ་བུའི་གླིང་པའི་ལུས་ཀྱིས་བྱང་གི་སྒྲ་མི་སྙན་པའི་ལུས་ལ་སོ་སོར་རྟོག་པར་བྱེད་དེ། ཇི་ལྟ་བུ་ཁོ་ནར་བདག་གི་རྣ་བས་མི་འདོད་པའི་སྒྲ་དང་རབ་ཏུ་གསལ་བ་རྣམས་ཐོས་ལ། བར་ཆོད་པ་རྣམས་ནི་མ་ཡིན་ཞིང་དེ་བཞིན་དུ་སྒྲ་ཆེན་པོ་རྣམས་ནི་བདག་ཅག་གིས་ཐོས་པ་ཡིན་ན། དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཡིན་ནམ་ཅི་སྟེ་མ་ཡིན་ཞེས། དེ་ཡང་དག་པ་ཇི་ལྟ་བ་བཞིན་དུ་རྣ་བས་སོ་སོར་རྟོག་པར་བྱེད་དེ། ཐག་ཉེ་བ་རྣམས་དང་། རྒྱང་རིང་བ་རྣམས་དང་། དམན་པ་རྣམས་དང་། སྙན་པ་རྣམས་དང་། མི་སྙན་པའི་སྒྲ་རྣམས་ཀྱང་ཆོས་ཉིད་ཀྱི་ཁྱད་པར་གྱིས་བྱང་ཕྱོགས་སྒྲ་མི་སྙན་པའི་སྐྱེས་བུས་ཐོས་པ་ཡིན་ཏེ། ཇི་ལྟར་ཉི་མས་ཐག་ཉེ་བ་དང་། རྒྱང་རིང་བ་དང་། ཕལ་ཆེ་བ་དང་། གཟུགས་དམན་པ་དང་། གཙང་བ་དང་། མི་གཙང་བ་རྣམས་ཀྱང་གསལ་བར་བྱེད་དོ། །དེ་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་ཀྱང་སྒྲ་ཐོས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་སྣའི་དབང་པོ་དེ་ཁོ་ན་བཞིན་དུ་བྱང་གི་སྒྲ་མི་སྙན་པ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་སོ་སོར་རྟོག་པར་བྱེད་དེ། སྣས་དྲི་ཞིམ་པོ་རྣམས་ནི་སྣོམ་པར་བྱེད་ལ་དྲི་ཞིམ་པོ་མ་ཡིན་པ་རྣམས་སྣོམ་པར་མི་བྱེད་དེ་ཆོས་ཉིད་ཀྱི་ཁྱད་པར་གྱིས་ཇི་ལྟར་འོ་མ་དང་ཆུ་དག་འདྲེས་པར་གྱུར་པ་ལ་ངང་པས་ཆུ་མི་འཐུང་བར་འོ་མ་འཐུང་བར་བྱེད་པ་ཡིན་ནོ། །དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱིས་དྲི་ཞིམ་པོ་སྣོམ་པར་བྱེད་ཅིང་དྲི་མི་ཞིམ་པ་རྣམས་ནི་མི་སྣོམ་མོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་རོ་མྱོང་བར་བྱེད་པ་དེ་ཁོ་ན་བཞིན་

71-112a

དུ་བྱང་ཕྱོགས་སྒྲ་མི་སྙན་པ་རྣམས་ཀྱི་ཡིན་ནམ་ཅི་སྟེ་ན་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་རྣམ་པར་དག་པས་མཐོང་བར་གྱུར་པ། འཛམ་བུའི་གླིང་པ་རྣམས་ཀྱི་ལུས་ནི་རྣམ་པ་དུ་མ་རྣམས་སུ་དམན་པ་དང་བར་མ་དང་ཁྱད་པར་དུ་འཕགས་པའི་ཟས་ཅན་ཡིན་ལ། དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ནི་མ་ཡིན་ཏེ། དེ་དག་རྣམས་ནི་ངའི་བ་མེད་པ་དང་རྟག་པ་ཁོ་ནར་དགེ་བའི་ལས་རྣམས་སྤྱད་པས་ཀྱང་དེ་དག་རྣམས་ནི་ངའི་བ་མེད་པ་དང་རོ་རྣམས་ཀྱང་གཅིག་པ་ཡིན་གྱི། ཇི་ལྟར་འཛམ་བུའི་གླིང་པའི་མི་རྣམས་ཀྱི་ལྟར་ནི་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱི་ལུས་ཀྱི་གཟུགས་རྣམ་པ་དུ་མ་ཡིན་པ་དེ་ཁོ་ན་བཞིན་དུ་བྱང་ཕྱོགས་སྒྲ་མི་སྙན་པ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཇི་ལྟར་འཛམ་བུའི་གླིང་པ་རྣམས་ཀྱི་ལུས་ནི་རྣམ་པ་དུ་མ་ཡིན་གྱི། དེ་ལྟར་བྱང་ཕྱོགས་སྒྲ་མི་སྙན་པ་རྣམས་ནི་མ་ཡིན་ཏེ། དེ་དག་ནི་གང་གི་ཕྱིར་ལས་མཚུངས་པ་རྣམས་ཀྱིས་ལྷན་ཅིག་ཏུ་འོངས་པ་རྣམས་ཡིན་པའི་ཕྱིར་ལུས་མཉམ་པ་ཁ་དོག་མཉམ་པ་འཛམ་བུ་ཆུ་བོའི་གསེར་འདྲ་བ་དེ་དག་རྣམས་ནི་རྒྱ་ཆེ་ཞིང་གྱོང་བ་ནི་མ་ཡིན་ལ། འཇམ་ཞིང་མཛེས་པའི་ལུས་ཅན་རྣམས་ཡིན་ནོ། །དེ་ལྟར་འཛམ་བུའི་གླིང་པའི་མི་རྣམས་ནི་མ་ཡིན་ཏེ། འདི་དག་རྣམས་ནི་ལས་གཅིག་གིས་ཉེ་བར་འགྲོ་བ་མ་ཡིན་ཞིང་ལུས་གཅིག་ཀྱང་མ་ཡིན་ལ་གཟུགས་གཅིག་གིས་འགྲོ་བ་པ་མ་ཡིན་ནོ། །དེ་མིའི་གནས་གཉིས་ཀྱི་ལུས་ལ་ལུས་ཀྱི་རྗེས་སུ་བལྟ་བར་གྱུར་ནས། མིའི་གནས་གསུམ་པར་གྱུར་པ་ཤར་གྱི་ལུས་འཕགས་པོ་ཞེས་བྱ་བ་ལ་རྣམ་པར་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཇི་ལྟར་འཛམ་བུའི་གླིང་གི་མི་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱི་སྐྱེ་མཆེད་ཡིན་པ་དེ་བཞིན་དུ་ཤར་གྱི་ལུས་འཕགས་པོ་རྣམས་ཀྱང་སྟེ། དེ་དག་རྣམས་ཀྱི་མིག་གིས་གཟུགས་མཐོང་བ་ནི་ཇི་ལྟར་འཛམ་བུའི་གླིང་པའི་སྣང་བ་ལ་རྒྱུ་བའི་ཁྱི་དང་། སྟག་དང་། སྲིན་བྱ་དང་།

71-112b

བྱི་ལ་ལ་སོགས་པ་རྣམས་འཇིགས་པས་སྣང་བ་མེད་པར་མཐོང་བ་ཡིན་ལ། དེ་ལྟར་ཤར་གྱི་ལུས་འཕགས་པོའི་སྐྱེས་བུ་རྣམས་ཀྱིས་ཀྱང་མུན་པ་ལ་གཟུགས་མཐོང་བ་ཡིན་ཏེ། ཕྲ་བ་དང་རགས་པ་རྣམས་དང་། ཇི་ལྟར་མིག་གི་ཡུལ་དུ་འགྲོ་བ་རྣམས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱིས་སྒྲ་ཉན་པར་བྱེད་པ་ནི་སྔར་བཞིན་ཏེ། དེ་བཞིན་དུ་ཤར་གྱི་ལུས་འཕགས་པོ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་ནས་རྣམ་པར་ལྟ་བར་བྱེད་དེ། ཇི་ལྟར་འཛམ་བུའི་གླིང་པ་དང་བྱང་གི་སྒྲ་མི་སྙན་པའི་མི་རྣམས་སྒྲ་ཉན་པར་བྱེད་པ་དེ་ལྟར་ཤར་གྱི་ལུས་འཕགས་པོ་དེ་དག་རྣམས་ནི་མ་ཡིན་ཏེ། ཤར་གྱི་ལུས་འཕགས་པོ་དེ་དག་ནི་མདའ་ལྟུང་བའི་ཚད་ཙམ་ཅིག་ཏུ་རྣ་བའི་རྣམ་པར་ཤེས་པས་སྒྲ་ལ་འཇུག་གི་ཆོས་ཉིད་ཀྱི་ཁྱད་པར་གྱིས་ལྷག་པར་སྒྲ་འཛིན་པ་ནི་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་མིའི་གནས་གསུམ་གྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱིས་སྣའི་རྣམ་པར་ཤེས་པ་དྲི་ལ་འཇུག་པར་འགྱུར་བ་དེ་བཞིན་དུ་ཤར་གྱི་ལུས་འཕགས་པོ་རྣམས་ཀྱི་ཡང་ཡིན་ནམ་ཅི་སྟེ་མ་ཡིན་ཞེས། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ནི་ཆོས་ཉིད་ཀྱི་ཁྱད་པར་གྱིས་ཉིན་མོ་སྣའི་རྣམ་པར་ཤེས་པས་དྲི་རྣམས་སྣོམ་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱི་ལྕེའི་རྣམ་པར་ཤེས་པ་ཀུན་དུ་འཇུག་པར་འགྱུར་བ་དེ་ལྟར་ཤར་གྱི་ལུས་འཕགས་པོའི་མི་རྣམས་ཀྱི་ལྕེའི་རྣམ་པར་ཤེས་པ་ཀུན་ནས་འཇུག་པ་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ནི། སཱ་ལུ་ཀའི་ཟས་གཅིག་ཟོས་པས་འདི་དག་རྣམས་ཞག་གསུམ་དུ་ལུས་འཚོ་བར་འགྱུར་རོ། །ཆོས་ཉིད་ཀྱི་ཁྱད་

71-113a

པར་གྱིས་དེ་དག་རྣམས་ལ་མི་འཆི་བའི་བར་དུ་ནད་ཀྱང་མེད་པ་ཡིན་ལ། དུས་གང་གི་ཚེ་ཉི་མ་ལྔ་ན་འཆི་བ་འབྱུང་བར་འགྱུར་བའི་དུས་དེའི་ཚེ་ན་ནད་འོང་བ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པའི་མི་རྣམས་ཀྱི་ལུས་ཡིན་པ་དེ་ཁོ་ན་བཞིན་དུ་ཤར་གྱི་ལུས་འཕགས་པོའི་མི་རྣམས་ཀྱི་ཡང་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཤར་གྱི་ལུས་འཕགས་པོའི་མི་རྣམས་ཀྱི་ལུས་ནི་ནྱ་གྲོ་དྷ་དང་ཆ་འདྲ་བའི་ཉེ་འཁོར་ཀུན་ནས་ཡོངས་སུ་འགྲིབས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། མིའི་གནས་གསུམ་པོ་རྣམས་ཡང་དག་པར་སོ་སོར་བརྟགས་ནས། སྐྱེས་བུའི་གནས་བཞི་པར་གྱུར་པ་བ་ལང་སྤྱོད་ཅེས་བྱ་བ་ལ་སོ་སོར་ཀུན་ནས་རྟོག་པར་བྱེད་དོ། །ཇི་ལྟར་བ་ལང་སྤྱོད་པ་རྣམས་ཀྱི་མིག་འཇུག་པར་འགྱུར་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བ་ལང་སྤྱོད་པའི་མི་རྣམས་ནི་ནམ་མཁའ་མེད་པར་ཡང་མིག་གིས་རྣམ་པར་ཤེས་པ་འཇུག་པ་ཡིན་ཏེ། རིས་ཀྱང་སྒྲིབ་པར་མི་འགྱུར་ཏེ། ཇི་ལྟར་འཛམ་བུའི་གླིང་པའི་མི་རྣམས་ཀྱིས་ཤེལ་གྱིས་བསྒྲིབས་པའི་གཟུགས་རྣམས་མཐོང་བར་འགྱུར་བ་དེ་བཞིན་དུ་ཆོས་ཉིད་ཀྱི་ཁྱད་པར་གྱིས་བ་ལང་སྤྱོད་པ་རྣམས་ཀྱིས་རིས་བསྒྲིབས་པའི་གཟུགས་རྣམས་ཀྱང་མཐོང་བར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པའི་མི་རྣམས་དང་བྱང་གི་སྒྲ་མི་སྙན་པ་རྣམས་དང་། ཤར་གྱི་ལུས་འཕགས་པོ་རྣམས་ཀྱི་སོ་སོར་རྣ་བའི་རྣམ་པར་ཤེས་པ་རབ་ཏུ་འཇུག་པ་དེ་ཁོ་ན་བཞིན་དུ་བ་ལང་སྤྱོད་པའི་མི་རྣམས་ཀྱི་ཡང་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་ནི་མིག་ཉིད་ཀྱིས་ཐོས་པ་ཡིན་ཏེ། ཇི་ལྟར་འཛམ་བུའི་གླིང་པ་རྣམས་ཀྱི་མིག་གིས་ཐོས་པ་སྦྲུལ་ཡིན་པ་དེ་བཞིན་དུ་བ་ལང་སྤྱོད་པའི་མི་རྣམས་ཀྱི་མིག་ཉིད་ཀྱིས་ཐོས་པ་ཡིན་ཞིང་། ཇི་ལྟར་རིས་བསྒྲིབས་པའི་གཟུགས་རྣམས་ཉིད་མཐོང་བ་དེ་བཞིན་དུ་སྒྲ་རིས་བསྒྲིབས་པར་

71-113b

གྱུར་པ་ཡང་ཐོས་པ་ཡིན་ཏེ། ཆོས་ཉིད་ཀྱི་ཁྱད་པར་གྱིས་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པ་རྣམས་དང་ཤར་གྱི་ལུས་འཕགས་པོའི་མི་རྣམས་ཀྱི་སྣའི་རྣམ་པར་ཤེས་པ་འཇུག་པར་འགྱུར་བས་མི་རྣམས་ཀྱི་གནས་གསུམ་ན་མིག་ལ་སོགས་པ་རྣམས་སོ་སོར་ཐ་དད་པར་འཇུག་པ་ཡིན་པ་དེ་ཁོ་ན་བཞིན་དུ་བ་ལང་སྤྱོད་པ་རྣམས་ཀྱི་སྣའི་རྣམ་པར་ཤེས་པ་ཡང་འཇུག་པ་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དེས་ན་གང་དག་མེ་ཏོག་རྣམས་སམ་གཞན་ཡང་རུང་སྟེ། དངོས་པོ་མིག་གིས་མཐོང་བ་རྣམས་དེས་དྲི་ཡང་འཛིན་པར་བྱེད་དོ། །འདི་ལྟ་སྟེ། ཆོས་ཉིད་ཀྱི་ཁྱད་པར་གྱིས་མཐོང་བའི་དངོས་པོ་རྣམས་ཀྱི་དྲི་འཛིན་པར་བྱེད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལང་སྤྱོད་པ་རྣམས་ཀྱི་ལྕེའི་རྣམ་པར་ཤེས་པ་འཇུག་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་དག་ན་སཱ་མ་ཀཱའི་ཟས་ཟ་བ་དང་བ་ལང་གི་འོ་མ་དང་ཞོ་དང་དར་བ་རྣམས་ཀྱིས་རྟག་ཏུ་ཡང་སྐོམ་གྱི་བྱ་བ་བྱེད་དེ། ཇི་ལྟར་འཛམ་བུའི་གླིང་པ་རྣམས་བུ་རམ་ཆང་དང་རྒུན་ཆང་དང་མངར་ཆང་དང་ཟན་ཆང་རྣམས་ཡིན་པ་དེ་ལྟར་བ་ལང་སྤྱོད་པ་རྣམས་ཀྱི་བ་ལང་གི་འོ་མ་དང་ཞོ་དང་དར་བ་རྣམས་ཡིན་ནོ། །ཇི་ལྟར་འབྲས་ཤ་ལི་ཡིས་ཚིམ་པར་གྱུར་པ་དེ་ལྟར་བ་ལང་སྤྱོད་པ་རྣམས་སཱ་མ་ཀཱ་ཡིས་ཚིམ་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལང་སྤྱོད་པ་རྣམས་ཀྱི་ལུས་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་ནི་ཏ་ལ་ཙམ་དུ་མཐོ་བར་གྱུར་པ་ཡིན་ཏེ། རང་གི་ལས་ཀྱིས་ཡིན་པས་ཇི་ལྟར་ལས་རྣམས་དང་འདྲ་བའི་གཟུགས་ཡིན་ནོ། །གཞན་ཡང་རྣལ་འབྱོར་སྤྱོད་པས་སྐྱེས་བུའི་གནས་བཞི་ན་མཚུངས་ཤིང་འདྲ་བར་གྱུར་པའི་ཡིད་དང་མཚུངས་ཤིང་འདྲ་བར་གྱུར་པའི་སྐྱེ་བ་དང་མཚུངས་ཤིང་འདྲ་བར་གྱུར་པའི་རྟེན་རྣམས་ཀྱང་ཕན་ཚུན་དུ་བལྟས་པར་གྱུར་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་

71-114a

གིས་ཤེས་པས་ཀྱང་སྐྱེས་བུ་གཅིག་ཀྱང་ཡོད་པར་མ་མཐོང་ངོ་། །སྐྱེས་བུའི་གནས་བཞི་པའི་རྣམས་ན་གང་དག་ཕན་ཚུན་དུ་མཚུངས་ཤིང་འདྲ་བར་གྱུར་པའི་ཡིད་དང་མཚུངས་ཤིང་འདྲ་བར་གྱུར་པའི་སྐྱེ་བ་དང་མཚུངས་ཤིང་འདྲ་བར་གྱུར་པའི་རྟེན་རྣམས་ཐམས་ཅད་ཀྱང་འདྲ་བར་གྱུར་པ་མ་ཡིན་པ་དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཅི་སྐྱེས་བུའི་གནས་བཞི་པོ་འདི་དག་རྣམས་ན་སྐྱེས་བུ་གང་དག་ལས་ཀྱི་བགོ་སྐལ་ལ་སྤྱོད་པ་དང་། ལས་ཀྱི་སྐྱེ་གནས་པ་དང་། ལས་ཀྱི་སྐྱབས་གནས་པའི་ཆོས་སུ་གྱུར་པ་མ་ཡིན་པ་ཕན་ཚུན་གྱི་གནས་དང་། གྲོང་རྡལ་རྣམས་ན་འགའ་ཞིག་ཡོད་དམ། ལས་ཀྱི་སྐྱེ་གནས་པ་དང་། ལས་ཀྱི་བགོ་སྐལ་ལ་སྤྱོད་པ་དང་། ལས་བརྟན་པར་བྱས་པར་གྱུར་པ་མ་ཡིན་པ་གང་ཡིན་པའི་སྐྱེས་བུ་དེ་ནི་གཅིག་ཀྱང་མ་མཐོང་ངོ་། །དགེ་བའམ་སྡིག་པར་གྱུར་པ་ཡང་རུང་སྟེ་ལས་གང་དག་བྱེད་པར་འགྱུར་བ་དེ་དང་དེ་དག་ཉིད་ཀྱི་ལས་རྣམས་ཀྱི་བགོ་སྐལ་ལ་སྤྱོད་པར་འགྱུར་རོ། །གང་ཡང་མཛའ་བོ་དང་། མཛའ་བོ་མ་ཡིན་པ་དང་། བར་མའི་ཕུང་པོ་རྣམས་སུ་མ་གྱུར་པ་ནི་མེད་དོ། །དེ་ལྟར་ལུས་ལ་ལུས་ཀྱི་རྗེས་སུ་ལྟ་ཞིང་རྣལ་འབྱོར་སྤྱོད་པ་གནས་པ་ཡིན་ནོ། །ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པའི་ལྷ་རྣམས་ཀྱི་ལུས་ནི་ཇི་ལྟ་བུ་ཡིན་ཞིང་། ཇི་ལྟར་ན་ལྷ་རྫས་ཀྱི་འདོད་པའི་ཡོན་ཏན་ལྔ་ལ་སྤྱོད་པར་གྱུར་ཅིང་ཡང་དག་པར་ལྡན་པས་ལྷ་རྣམས་གནས་པ་ཡིན་ནོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་པོ་ཆེན་པོ་བཞིའི་རིས་ཀྱི་ལྷར་སྐྱེས་པའི་སེམས་ཅན་རྣམས་ལྷ་རྫས་ཀྱི་ལྷའི་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པ་རྣམས་ལ་འདི་ལྟ་སྟེ། ལྷ་རྣམས་ཀྱི་མིག་ལྷ་རྫས་ཀྱི་གཟུགས་རྣམས་ཀྱིས་ཚིམ་པར་མི་འགྱུར་བའི་ལྷ་རྫས་ཀྱི་གཟུགས་ཕྲ་བ་དང་རགས་པ་རྣམས་ཐམས་ཅད་ཀྱང་ལྷན་ཅིག་སྐྱེས་པའི་ལྷའི་མིག་གིས་དཔག་ཚད་སྟོང་ཕྲག་བཅུར་མཐོང་ངོ་། །གལ་ཏེ་རྫུ་འཕྲུལ་བྱས་ནས་མིག་འཕྲུལ་བར་གྱུར་ན་ནི་དེས་དཔག་ཚད་སྟོང་ཕྲག་རབ་ཏུ་མང་པོ་རྣམས་རབ་ཏུ་མཐོང་བར་འགྱུར་རོ། །དེ་ལྟར་དགེ་སློང་

71-114b

གིས་ལེགས་པར་བྱས་པའི་ལས་ཀྱི་མཐའ་རྣམས་ལ་སྤྱད་པའི་མཐུ་སྟོབས་དང་ལྡན་པའི་ལྷ་རྣམས་ཀྱི་ནང་ནས། རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་གང་ཡིན་པ་མཐོང་སྟེ། དེ་དག་ཀྱང་འདོད་པ་དང་། དགའ་བ་དང་། ཡིད་དུ་འོང་བར་མཐོང་ངོ་། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་རྒྱལ་ཆེན་རིས་བཞིའི་ལྷ་རྣམས་ཀྱི་རྣ་བས་སྒྲ་ཐོས་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། ལྷ་རྣམས་ཀྱིས་སྒྲ་གང་དང་གང་དག་ཁོ་ན་ཐོས་པ་དེ་དང་དེ་དག་རྣམས་ནི་འདོད་པ་སྡུག་པ་ཡིད་དུ་འོང་བ་རྣམས་ཐོས་པ་ཡིན་ཏེ། ལྷན་ཅིག་སྐྱེས་པར་གྱུར་པའི་རྣ་བས་ནི་དཔག་ཚད་སུམ་སྟོང་གི་སྒྲ་རྣམས་ཐོས་སོ། །གལ་ཏེ་རྫུ་འཕྲུལ་བྱས་ནས་རྣ་བ་སྤྲུལ་པར་གྱུར་ན་ནི་དེས་དཔག་ཚད་སྟོང་ཕྲག་ཉི་ཤུར་ཐོས་པར་འགྱུར་ཏེ། གང་དག་ཐོས་པར་འགྱུར་བ་དེ་དག་རྣམས་ཀྱང་འདོད་པ་སྡུག་པ་ཡིད་དུ་འོང་བ་རྣམས་ཐོས་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་རྒྱལ་ཆེན་རིས་བཞིའི་ལྷ་རྣམས་ཀྱི་སྣས་དྲི་སྣོམ་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་ཆེན་རིས་བཞིའི་ལྷ་རྣམས་ཀྱི་སྣས་ནི་དྲི་དཔག་ཚད་ཉིས་བརྒྱར་དྲི་རྣམས་སྣོམ་པར་བྱེད་དོ། །གལ་ཏེ་རྫུ་འཕྲུལ་བྱས་ཏེ་སྣ་སྤྲུལ་པར་གྱུར་ན་ནི་དཔག་ཚད་སྟོང་ཕྲག་བརྒྱའི་བར་དུ་དེས་དྲི་འཛིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་ལྷ་རྣམས་ཀྱིས་ལྕེའི་དབང་པོ་རོས་ཚིམ་པར་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱལ་ཆེན་རིས་བཞིའི་ལྷ་རྣམས་ཀྱི་ལྕེའི་དབང་པོས་ནི་མི་དམན་པ་དང་ཡིད་དུ་འོང་ཞིང་ཡིད་དུ་འོང་བའི་རོ་རྣམས་ཀྱི་བདེ་བ་དང་ལྡན་པ་ཡིན་ཏེ། རོ་རྣམས་ནི་ཇི་ལྟར་ལེགས་པར་བྱས་པའི་ལས་བྱས་པ་རྣམས་ཀྱིས་ལྷ་རྣམས་རོས་ཚིམ་པ་མེད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཕྲ་བ་དང་། རགས་པ་དང་། མྱུར་བ་ཉིད་དུ་ཡང་འགྱུར་བའི་ལྷ་རྣམས་ཀྱི་བདག་ཉིད་ཀྱི་

71-115a

དངོས་པོའི་ལྷ་རྣམས་ཀྱི་ལུས་ཇི་ལྟ་བུ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ། པད་མ་གཅིག་ཉིད་ལ་ལྷ་ལྔ་བརྒྱ་གནས་པར་གྱུར་ན་ཡང་ཕན་ཚུན་ལུས་ཀུན་དུ་ཐུག་པར་འགྱུར་བ་དང་། གཟེར་ཟུག་ཀྱང་འབྱུང་བར་མི་འགྱུར་བ་དེ་སྲིད་དུ་ལུས་རྣམས་ཤིན་ཏུ་ཕྲ་བར་གྱུར་པ་ཡིན་ཏེ། གང་གི་ཕྱིར་ལྷ་རྣམས་ཀྱི་ལྷ་རྫས་ཀྱི་གཟི་བརྗིད་ཡིན་པའི་ཕྱིར་རོ། །དཔེར་ན་ཁང་པ་གཅིག་གི་ནང་དུ་མར་མེ་ལྔ་བརྒྱ་ལེགས་པར་སྦར་བར་གྱུར་ཀྱང་། འོན་ཀྱང་མར་མེའི་འོད་རྣམས་ཕན་ཚུན་དུ་ཟུག་གཟེར་དུ་གྱུར་པ་ནི་མེད་པ་ཡིན་ལ། ཀུན་དུ་རེག་པར་འགྱུར་བ་ཡང་མ་ཡིན་ནོ། །དེ་ལྟར་ལྷ་རྣམས་ཀྱི་གཞལ་ཡས་ཁང་གི་མཆོག་ན་གནས་པ་རྣམས་ལ་ཕན་ཚུན་དུ་གནོད་ཟུག་མེད་པ་ཡིན་ཞིང་ཐུག་པ་ཡང་མེད་པ་ཡིན་ནོ། །གལ་ཏེ་ཡང་ལྷ་རྣམས་རགས་པའི་ལུས་སྤྲུལ་པར་བྱེད་ན། དེས་དཔག་ཚད་བརྒྱ་ཕྲག་མང་པོ་རྣམས་སུ་གྱུར་པའི་གཟུགས་བྱེད་པ་དང་། བལྟ་ན་སྡུག་པའམ། བལྟ་ན་མི་སྡུག་པའམ། འཇིགས་པར་བྱེད་པའམ། འཇིགས་པར་མི་བྱེད་པ་རྣམས་ཀྱང་བྱེད་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ལྷ་རྣམས་ཇི་ལྟར་ན་མགྱོགས་པར་འགྲོ་བ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ལྷ་རྣམས་ཀྱང་རེ་ཞིག་མགྱོགས་པར་འགྲོ་བ་ཡིན་ནོ། །རྫུ་འཕྲུལ་བྱས་པར་གྱུར་ན་གང་དག་མིག་བཙུམས་པ་ཙམ་ལ་ཡང་དཔག་ཚད་བརྒྱ་སྟོང་ཕྲག་མང་པོ་རྣམས་སུ་འགྲོ་བར་བྱེད་ཅིང་སླར་ཡང་འོང་བར་འགྱུར་བ་ཡིན་ནོ། །གང་དང་གང་ལ་ལྷ་རྣམས་འགྲོ་བར་འདོད་པར་གྱུར་པ་དེ་དང་དེ་དག་རྣམས་ཉིད་ལ་ཀུན་དུ་ཐོགས་པ་མེད་པར་འགྲོ་བར་འགྱུར་རོ། །ལྷ་རྣམས་འདོད་པ་གང་དང་གང་དག་དོན་དུ་གཉེར་བར་གྱུར་པ་དེ་དག་རྣམས་ཉིད་དེ་བཞིན་དུ་འདིར་ཕུན་སུམ་ཚོགས་པར་འགྱུར་ཏེ། ཐོབ་པ་རྣམས་ནི་གཞན་གྱིས་ཕྲོགས་པར་མི་ནུས་པ་དང་། དབང་དུ་གྱུར་པ་ཡང་ཡིན་ནོ། །ཐོབ་པར་གྱུར་པའི་རང་གི་དོན་རྣམས་ལ་ཕྱིས་ཡང་འདི་དག་རྣམས་གཞན་དག་འགའ་ཞིག་ལ་འཇིགས་པར་འགྱུར་བ་ཡང་མ་ཡིན་ནོ། །

71-115b

མཐོ་འཚམ་པ་ཡང་མེད་དོ། །རང་གི་ཡུལ་གྱི་ལྷ་རྫས་རྣམས་ཀྱིས་ཉིན་དང་མཚན་དུ་འཕེལ་བར་བྱེད་དོ། །ལེགས་པར་བྱས་པའི་ལས་བྱས་པ་རྣམས་ནི་འདོད་པའི་ཡོན་ཏན་ལྔ་འབྱོར་ཞིང་རྫོགས་པ་རབ་ཏུ་ལྡན་པར་གྱུར་པ་ཡིན་ཏེ། དེ་དག་རྣམས་ནི་ཐམས་ཅད་དུ་འགྱུར་བ་ཡིན་ནོ། །དེ་ལྟར་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་སུམ་ཅུ་རྩ་གསུམ་པའི་ལྷ་རྣམས་ཀྱི་ལུས་ཡིན་ཞིང་ཡུལ་རྣམས་ལ་ཡང་ཇི་ལྟར་འཇུག་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ཇི་ལྟར་རྒྱལ་ཆེན་བཞིའི་ལྷ་རྣམས་ཀྱི་ཡུལ་གྱི་བདེ་བ་དེ་དག་རྣམས་ལས་སུམ་ཅུ་རྩ་གསུམ་པའི་ལྷ་རྣམས་ཀྱི་འདོད་པར་གྱུར་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ནི་སྟོང་འགྱུར་དུ་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་ཆེན་རིས་བཞིའི་ལྷ་རྣམས་ཀྱི་དྲུང་ན་སུམ་ཅུ་རྩ་གསུམ་པ་རྣམས་ཀྱིས་ནི་ཤིན་ཏུ་འདོད་པར་གྱུར་པ་དང་། ཤིན་ཏུ་ཕལ་ཆེ་བ་དང་། རབ་ཏུ་དགའ་བར་གྱུར་པ་དང་། མཆོག་ཏུ་ཡིད་དུ་འོང་བ་དང་། ཁྱད་པར་དུ་འཕགས་པའི་ལས་རྣམས་སུམ་ཅུ་རྩ་གསུམ་པའི་ལྷས་བྱས་པའི་ཕྱིར་རོ། །དེ་ཅིའི་ཕྱིར་ཞེ་ན། སུམ་ཅུ་རྩ་གསུམ་པའི་ལྷ་རྣམས་ནི་ལེགས་པར་བྱས་པའི་ཕུལ་དུ་བྱུང་བ་ཡིན་པའི་ཕྱིར་ན་རྒྱལ་ཆེན་རིས་བཞི་པ་རྣམས་ཀྱིས་ནི་སུམ་ཅུ་རྩ་གསུམ་གྱི་ལྷ་རྣམས་ཀྱི་བདེ་བའི་དབང་དུ་བྱས་ནས་མཉམ་པར་ནུས་པ་ཡང་མ་ཡིན་ནོ། །དེ་ལྟར་རྣལ་འབྱོར་སྤྱོད་པ་པ་ཞིབ་མོར་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་དམྱལ་བ་པའི་སྐྱེ་བོ་རྣམས་ཀྱི་ལུས་ཡིན་ན། ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པ་དང་། དམྱལ་བ་ཆེན་པོ་རྣམས་དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མི་འདོད་པ་དང་། མི་སྡུག་པ་དང་། ཡིད་དུ་མི་འོང་བར་གྱུར་པའི་ལས་རྣམ་པ་གསུམ་པོ་ལུས་ཀྱིས་དང་ངག་

71-116a

གིས་དང་ཡིད་ཀྱིས་བྱས་ཤིང་བསགས་པས་དམྱལ་བ་རྣམས་སུ་སྐྱེ་བར་འགྱུར་རོ། །གང་གི་ཕྱིར་བྱས་ཤིང་བསགས་པའི་ཉེས་པར་བྱས་པའི་ལས་རྣམས་མ་མྱོང་གི་བར་དུ་འགྲོལ་བར་འགྱུར་བ་ནི་མེད་དོ། །དེ་ལྟར་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། ལས་གང་དག་གིས་དམྱལ་བ་འདི་དག་རྣམས་གང་དུ་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་བམ། ལྷའི་མིག་གིས་མཐོང་བར་གྱུར་པ་སྲོག་གཅོད་པ་ཤིན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི་དམྱལ་བ་ཡང་སོས་སུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་ཡང་ཤིན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་ཉིས་འགྱུར་གྱི་ལས་ཀྱིས་ཐིག་ནག་ཏུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པས་ལོག་པར་གཡེམ་པ་རྣམས་ཤིན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ན། དམྱལ་བ་ཆེན་པོ་བསྡུས་འཇོམས་སུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལ་ལོག་པར་སྤྱོད་པ་དང་བརྫུན་དུ་སྨྲ་བ་རྣམས་ཤིན་ཏུ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པས་ནི་ངུ་འབོད་དུ་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་སྤྱོད་པ་དང་བརྫུན་དུ་སྨྲ་བ་དང་འབྲུ་དང་བཅོས་པའི་ཆང་སྡོམ་པ་འཛིན་པ་ལ་སྐོམ་དུ་བྱིན་པར་གྱུར་ན་ངུ་འབོད་ཆེན་པོར་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་དང་། བརྫུན་དུ་སྨྲ་བ་དང་འབྲུ་དང་བཅོས་པའི་ཆང་སྡོམ་པ་བཟུང་བ་ལ་སྐོམ་དུ་བྱིན་པར་གྱུར་པ་དང་ལོག་པར་ལྟ་བ་ཅན་དུ་གྱུར་ན་ཚ་བའི་དམྱལ་བ་ཆེན་པོར་སྐྱེ་བར་འགྱུར་རོ། །སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་སྤྱོད་པ་དང་བརྫུན་དུ་སྨྲ་བ་དང་འབྲུ་དང་བཅོས་པའི་ཆང་སྡོམ་པ་འཛིན་པ་ལ་འཐུང་དུ་བཅུག་པ་རྣམས་དང་ལོག་པར་ལྟ་བ་དང་སྡོམ་པ་འཛིན་པའི་དགེ་སློང་དང་དགེ་སློང་མ་ཡང་རུང་སྟེ་སུན་ཕྱུང་བར་གྱུར་པས་ནི་རབ་ཏུ་ཚ་བའི་དམྱལ་བ་ཆེན་པོར་སྐྱེ་བར་འགྱུར་རོ། །དམྱལ་བ་ཆེན་པོ་ཀུན་ནས་འགྲུབ་པར་གྱུར་པའི་ལས་ལྔས་མནར་མེད་པར་སྐྱེ་བར་འགྱུར་བ་ནི་འདི་ལྟ་སྟེ། ཕ་དང་མ་དང་དགྲ་

71-116b

བཅོམ་པ་རྣམས་སྲོག་གཅོད་པར་བྱེད་པ་དང་དགེ་འདུན་འབྱེད་པར་བྱེད་པ་དང་། སངས་རྒྱས་བཅོམ་ལྡན་འདས་ལ་ངན་སེམས་ཀྱིས་ཁྲག་འབྱིན་པར་བྱེད་པ་དང་ལས་དེ་རྣམས་ཀྱིས་མནར་མེད་པའི་དམྱལ་བ་ཆེན་པོར་སྐྱེ་བར་འགྱུར་རོ། །དེས་དམྱལ་བ་པ་རྣམས་ཀྱི་ལས་ཀྱི་རྣམ་པར་སྨིན་པ་རྣམས་ལ་བསམས་ནས་སེམས་ཅན་རྣམས་ལ་རྗེས་སུ་སྙིང་བརྩེ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེས་ཡི་དགས་ཀྱི་འགྲོ་བར་གཏོགས་པའི་སེམས་ཅན་རྣམས་ཇི་ལྟར་མཐོང་བ་ཡིན་ཞེ་ན། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེར་སྣ་རྣམ་པ་དུ་མས་སྐྱེས་པའི་ཡི་དགས་རྣམས་སམ་དཔག་ཚད་ལྔ་བརྒྱའི་ས་འོག་ཉིད་དུ་སྐྱེས་པར་གྱུར་པ་རྣམས་ལ་རྣམ་པ་དུ་མར་ཡང་ཟས་མེད་པ་ཤིན་ཏུ་སྨེ་བར་གྱུར་པ་ཕན་ཚུན་དུ་ཟས་སུ་གྱུར་པ་ལྟོགས་པ་དང་སྐོམ་པས་ཉམ་ཐག་པས་ཤིན་ཏུ་སྡུག་བསྔལ་བར་གྱུར་པ་རྣམས་མེའི་ཆར་འབབ་པས་སྲེག་པར་བྱེད་པ་རྣམས་ནི། ལས་ཇི་ལྟ་བ་བཞིན་དུ་ཉེ་བར་འགྲོ་བ་དང་ལས་ཀྱི་བགོ་སྐལ་ལ་སྤྱོད་པ་དང་ལས་ཀྱི་སྐྱབས་གནས་པ་རྣམས་ཡིན་ཏེ། ཤིན་ཏུ་ཡང་སྡུག་བསྔལ་བར་གྱུར་པའི་ཡི་དགས་དེ་དག་རྣམས་མཐོང་ནས། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་དུད་འགྲོའི་འགྲོ་བར་གཏོགས་པ་རྣམས་ལ་ཀུན་དུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། རྣམ་པ་དུ་མར་གྱུར་པ་རྣམས་མཐོང་བ་ཡིན་ནོ། །མདོར་བསྡུ་ན་གནས་གསུམ་ན་རྒྱུ་བ་རྣམས་ལ་འདི་ལྟ་སྟེ། ཆུ་ལ་རྒྱུ་བར་བྱེད་པ་རྣམས་ནི་ཉ་ལ་སོགས་པའོ། །ཐང་ལ་རྒྱུ་བར་བྱེད་པ་རྣམས་ནི་གླང་པོ་ཆེ་དང་། རྟ་དང་། བ་ལང་དང་། མ་ཧི་ཥ་དང་། རི་དགས་དང་། ཕག་པ་ལ་སོགས་པ་རྣམས་སོ། །ནམ་མཁའ་ལ་རྒྱུ་བ་རྣམས་ཀྱང་རྣམ་པ་དུ་མའོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། མཐོང་བ་དང་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ཇི་ལྟར་སྐྱེ་གནས་ལས་སྐྱེ་བའི་

71-117a

དུད་འགྲོ་རྣམས་མཐོང་བ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་སྐྱེ་གནས་བཞི་ལས་སྐྱེ་བར་འགྱུར་བའི་དུད་འགྲོ་རྣམས་མཐོང་སྟེ། མངལ་ལས་སྐྱེ་བ་ནི་ཕག་པ་དང་། བ་ལང་དང་། མ་ཧི་ཥ་དང་། གླང་པོ་ཆེ་དང་། རྟ་ལ་སོགས་པ་རྣམས་སོ། །སྒོ་ང་ལས་སྐྱེ་བ་ནི་སྦྲུལ་དང་། ངང་པ་དང་། བྱ་ལཱ་བ་ཀཱ་དང་། ཁྱིམ་བྱ་དང་། བྱ་རོག་ལ་སོགས་པ་རྣམས་སོ། །དྲོད་གཤེར་ལས་སྐྱེ་བ་ནི་ཤིག་དང་འདྲེ་ཤིག་པ་ལ་སོགས་པ་རྣམས་སོ། །བརྫུས་ཏེ་སྐྱེ་བ་ནི་ཕལ་ཆེར་གདོང་རིངས་ཀྱི་ཀླུ་ལ་སོགས་པ་རྣམས་སོ། །དེས་དུད་འགྲོ་རྣམས་གང་ཡིན་པ་ཡང་དག་པ་ཇི་ལྟ་བ་བཞིན་དུ་མཐོང་ངོ་། །དེ་ལ་གནས་སྐབས་གསུམ་པོ་ཐམས་ཅད་ན་ཡང་འདོད་པ་དང་ཡིད་དུ་འོང་བ་རྣམས་ཐ་དད་དུ་འགྱུར་བ་དང་། མེད་པར་འགྱུར་བ་དང་། འབྲལ་བར་འགྱུར་བ་དང་། འགྱེས་པར་འགྱུར་བ་རྣམས་སུ་གང་དག་མི་འགྱུར་བའམ་གང་ལ་སྲོག་ཆགས་རྣམས་ཐམས་ཅད་ཀྱིས་ཀྱང་ལྷན་ཅིག་ཏུ་མཛའ་བོ་དང་། མི་མཛའ་བ་དང་། བར་མའི་ཕུང་པོ་རྣམས་ཐམས་ཅད་རྣམ་པར་གཞག་པ་བྱས་པར་མ་གྱུར་པའམ། གང་ལ་ཡང་འཆི་འཕོ་བ་དང་སྐྱེ་བར་འགྱུར་བ་རྣམས་བྱས་ཤིང་བྱས་པར་མ་གྱུར་པ་ནི། དམྱལ་བའི་གནས་རྣམས་དང་ཡི་དགས་ཀྱི་གནས་རྣམས་དང་། དུད་འགྲོའི་གནས་རྣམས་དང་། གནས་ཀྱིས་བསྡུས་པ་རྣམས་ན་ཅུང་ཟད་ཀྱང་མེད་དོ། །དགེ་སློང་དག་འཁོར་བ་འདི་ནི་འདོད་པར་བྱ་བ་མ་ཡིན་ནོ། །ཇི་སྲིད་དུ་དགའ་བ་མ་ཡིན་པ་དེ་ལྟར་ཡིད་དུ་འོང་བ་མ་ཡིན་ཏེ། དེ་ལྟར་མི་འཐུན་པ་དང་དེ་ལྟ་དེ་ལྟར་སླུ་བ་དང་དེ་ལྟར་རབ་ཏུ་འཇིག་པའི་ཆོས་ཅན་དང་། དེ་ལྟར་སེམས་ཅན་རྣམས་ཐམས་ཅད་ནི་ཐུན་མོང་མ་ཡིན་པར་སྡུག་བསྔལ་བར་གྱུར་པ་ཡིན་ནོ། །དེའི་ཕྱིར་དགེ་སློང་དག་འཁོར་བའི་གནས་ལ་འདོད་ཆགས་དང་བྲལ་བར་གྱིས་ཤིག །དོན་མེད་པ་སླུ་བ་རྣམ་པར་འཇིག་པའི་ཆོས་ཅན་མི་རྟག་པ་སྡུག་བསྔལ་བ་མུན་ནག་ཏུ་བྱེད་པ་མནོག་ཆུང་བ་འདི་དག་ལས་ཤིན་ཏུ་མྱུར་བར་རྣམ་པར་གྲོལ་བར་གྱིས་ཤིག །དེ་ལྟར་ནཱ་ལ་ཏིའི་གྲོང་གི་བྲམ་ཟེ་དང་། ཁྱིམ་བདག་རྣམས་དང་། དགེ་སློང་རྣམས་ཀྱང་ནང་གི་བདག་ཉིད་ཀྱི་ལུས་ཀྱིས་ཕྱི་རོལ་

Ātman - Though it can simply be used as the expression "I" or "me", in Indian thought the notion of self refers to a permanent, unchanging entity, such as that which passes from life to life in the case of people, or the innate essence (svabhāva) of phenomena. Skt आत्मन्  Tib བདག་  Ch 我;灵魂  

Go to the page with the definition of 'བདག་'

Kṣaṇasaṃpad - These are the eighteen qualities specifically related to a precious human rebirth. Skt क्षणसंपद्  Tib དལ་འབྱོར་  Ch 刹那具足  

Go to the page with the definition of 'དལ་འབྱོར་'