Texts/Saddharmasmṛtyupasthānasūtra/Full text/Volume 70 (la), part 2

Source	Kangyur, RKTSK 287
Read this text with translation by adding the Dharmamitra Chrome extension to your browser: Dharmamitra

70-158b

ཡིན་ནོ། །དེ་དེ་ལ་ཡང་ལོག་པར་སྨྲ་བར་འགྱུར་རོ། །དེ་ལུས་ཞིག་ནས་ཤི་བར་གྱུར་པའི་འོག་ཏུ་ངན་སོང་དུ་ལོག་པར་ལྷུང་ནས་དམྱལ་བ་རྣམས་སུ་སྐྱེ་བར་འགྱུར་ཏེ། ཚོགས་པ་འདུས་པ་འདིའི་ཡལ་ག་གྱེས་པ་རྣམས་ནི་སྐྱོན་ཆེན་པོ་མང་བར་འགྱུར་རོ། །དེ་ནས་དེའི་དུས་ན་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། འཆིང་བ་དུ་མའི་ཚིག་རྐང་ལྡན། །ཡིད་ནི་རྣམ་པར་གཡེང་བྱེད་པ། །ཚངས་པར་སྤྱོད་པ་ཆུད་གཟོན་པའོ། །མྱ་ངན་འདས་འགྲོ་སུན་འདོན་པའོ། །རྟེན་ཅིང་རྟག་ཏུ་སྦྱོར་བྱེད་པ། །རང་བཞིན་གྱིས་ནི་ཚུལ་ཁྲིམས་སྤངས། །བསམ་གཏན་མངོན་དགའ་དེ་ཉིད་མཐོང་། །རྟག་ཏུ་དེ་ནི་ཡོངས་སུ་སྤངས། །རྒོད་པའི་རྩ་བ་གཅིག་ལས་ནི། །ཡིད་ལ་བྱེད་པ་རབ་ཆུད་གཟོན། །མྱ་ངན་འདས་པ་གསལ་སྟོན་པའི། །ཚངས་པར་སྤྱོད་པ་ཆུད་གཟོན་པའོ། །སྡུག་བསྔལ་ལས་ནི་ཟློག་བྱེད་པ། །མཐོ་རིས་ལམ་ལས་ཉམས་བྱེད་པོ། །ཕོ་ཉ་ཡི་དགས་འཇིག་རྟེན་གྱིས། །དུད་འགྲོའི་སྐྱེ་གནས་སུ་སྐྱུར་བ། །འཁོར་བ་མ་ལུས་ཀུན་གྱི་མ། །ཚོགས་པ་འདུས་པའི་མིང་ཡང་སྤོངས། །བསམ་གཏན་སྙོམས་འཇུག་ཡང་དག་ལྡན། །དགེ་སློང་ཡིད་ནི་དག་རྣམས་ཀྱིས། །དེ་ལྟར་བཅོམ་ལྡན་འདས་འོད་སྲུང་དྲང་སྲོང་གི་མཆོག་དེས་ཚོགས་པ་འདུས་པའི་སྐྱོན་འདི་དག་རྣམས་གསུངས་སོ། །གཞན་ཚོགས་པ་འདུས་པ་མ་ཡིན་པའི་ཡོན་ཏན་རྣམས་སྟོན་པར་མཛད་དེ། དགེ་སློང་གང་དག་སེམས་ཤིན་ཏུ་མཉམ་པར་བཞག་པར་གྱུར་པ་དམ་པའི་ཆོས་འབའ་ཞིག་ལ་མངོན་པར་དགའ་བ། དམ་པའི་ཆོས་འབའ་ཞིག་སྟོན་པར་བྱེད་པ། དམ་པའི་ཆོས་ཉིད་སེམས་པར་བྱེད་པ། དམ་པའི་ཆོས་རྟོགས་པར་འགྱུར་བ། སངས་རྒྱས་ལ་རབ་ཏུ་འདུད་པར་བྱེད་པའི་རང་བཞིན་ཅན་དུ་གྱུར་པ་དེ་དག་རྣམས་ཀྱིས་ནི་གང་བལྟ་བར་བྱ་བའི་ཞབས་དྲུང་དེ་དག་ཉིད་མཐོང་བར་འགྱུར་རོ། །ཚོགས་པ་འདུས་པའི་སྲིད་པ་རྣམས་ལས་གྲོལ་བ། རྩེ་གཅིག་ཏུ་དགའ་བར་གྱུར་པ། གཅིག་ཏུ་འཁོར་བའི་འཇིགས་པ་རྣམས་ཀྱིས་སྐྲག་པ། གཞན་དུ་ན་དེ་དག་རྣམས་ཀྱི་ངག་གི་ངལ་བ་འབྲས་བུ་དང་བཅས་པ་ནི་གང་འཕགས་

70-159a

པའི་བདེན་པ་བཞིའོ། །འཕགས་པའི་བདེན་པ་བཞི་པོ་རྣམས་ཀྱི་གཏམ་ཡང་རྗོད་པར་བྱེད་དོ། །དེ་དག་རྣམས་ཀྱི་ལུས་ངལ་བ་དོན་ཡོད་པ་ནི་གང་སངས་རྒྱས་དང་། ཆོས་དང་། དགེ་འདུན་རྣམས་ལ་ཐལ་མོ་སྦྱོར་བའི་ལས་ཀྱིས་རབ་ཏུ་བཏུད་དེ་ལུས་ཀྱིས་ཀྱང་སྐྱོ་བ་སྐྱེའོ། །དེ་དག་རྣམས་བདག་ཉིད་ངལ་བའི་ཡིད་ཀྱི་ངལ་བ་འབྲས་བུ་དང་བཅས་པར་གྱུར་པ་ནི་རང་གི་མཚན་ཉིད་དང་། སེམས་ཀྱི་སྤྱིའི་མཚན་ཉིད་རྣམས་ལ་ཡིད་འབྱུང་བར་བྱེད་པའོ། །དེ་དག་རྣམས་ཀྱི་ཡོངས་སུ་ངལ་བ་འབྲས་བུ་དང་བཅས་པ་རྣམ་པ་གསུམ་པོ་རྣམས་ཀྱིས་ཇི་ལྟར་ན་མྱ་ངན་ལས་འདས་པ་དང་ཉེ་བར་འཇུག་པ་ཡིན་ཞེ་ན། གང་དག་ཡོངས་སུ་གོམས་པར་བྱེད་པའི་ཐབས་ཐམས་ཅད་ཀྱིས་ཚོགས་པ་འདུས་པ་ལ་དགའ་བར་མི་བྱེད་ཅིང་སྡིག་པའི་གྲོགས་པོ་རྣམས་སྟེན་པར་མི་བྱེད་པ། ཡིད་ལེགས་པར་སྡོམ་པར་བྱེད་པ་དང་། ཡིད་ཤིན་ཏུ་བར་ཡང་མཉམ་པར་གཞག་པར་ཡང་གསུམ་གྱིས་ཏེ། འདི་དག་རྣམས་ཀྱིས་ནི་ཇི་ལྟ་བ་བཞིན་དུ་མྱ་ངན་ལས་འདའི། གསུམ་པོ་རྣམས་གང་ཞེ་ན། འདི་ལྟ་སྟེ། དབུགས་རྔུབ་པ་དང་། འབྱུང་བ་དྲན་པ་དང་། མི་སྡུག་པ་དང་། ཁམས་ཀྱི་རབ་ཏུ་དབྱེ་བའོ། །དེ་ལ་ཐམས་ཅད་ཉིད་ཀྱང་ལམ་དེ་དག་རྣམས་ལས་སེམས་མཉམ་པར་བཞག་པར་འགྱུར་རོ། །སེམས་མཉམ་པར་བཞག་པ་མ་ཡིན་པ་རྣམས་དང་། སེམས་མཉམ་པར་འཇོག་པར་མི་བྱེད་པ་ཡང་ཚོགས་པ་འདུས་པ་སྟེ། ལམ་གསུམ་སུན་འདོན་པར་བྱེད་པ་ཡང་ཡིན་ནོ། །དམྱལ་བ་དང་། ཡི་དགས་དང་། དུད་འགྲོ་རྣམས་སུ་འགྲོ་བར་བྱེད་པའི་ཞགས་པར་གྱུར་པ་ཐབས་མ་ཡིན་པས་ཀུན་ནས་བཅིངས་ནས་སྐྱེས་བུ་དམྱལ་བ་རྣམས་སུ་རྒྱུག་པར་བྱེད་དོ། །ཡི་དགས་དང་། དུད་འགྲོའི་འགྲོ་བ་ཡང་སྟེ། དེ་དག་རྣམས་ནི་ཚོགས་པ་འདུས་པ་ལ་དགའ་བས་བསླུས་པ་ཡིན་ནོ། །དེའི་ཕྱིར་ཚོགས་པ་འདུས་པ་ནི་དུག་དང་། མཚོན་ཆ་དང་། མེ་དང་། གཅན་གཟན་ཁྲོ་བོ་དང་། གཡང་ས་རྣམས་བཞིན་དུ་བློ་དང་ལྡན་པའི་དགེ་སློང་བསམ་གཏན་ལ་སྙོམས་པར་འཇུག་པ་རྣམས་ཀྱིས་

70-159b

རྟག་ཏུ་ཡོངས་སུ་སྤང་བར་བྱའོ། །བག་མེད་པའི་སྐྱེས་བུ་མང་པོ་རྣམས་ཚོགས་པ་འདུས་པ་གང་ཡིན་པས་བསླུས་ཏེ། དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །དེ་དག་རྣམས་བག་མེད་པར་གྱུར་པ་ཡང་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་གར་དང་གར་བྱེད་པ་རྔ་ཛྷ་ལ་ལ་ཀ་དང་། གླུ་མཁན་དུ་གྱུར་པ་གཞན་གྱི་ཁྱིམ་གྱི་སྒོར་བཀྲེན་པར་གྱུར་པའི་སློངས་མོ་ནན་དང་བྲལ་བས་སྲང་དང་སྒོར་ཡོན་གྱིས་འཚོ་བར་འགྱུར་བ་ཡིན་པས་ན་ཚོགས་པ་འདུས་པ་ནི་སྦྲུལ་མཐོང་བ་དུག་ཅན་དང་། ཚོགས་པ་འདུས་པ་ནི་མེས་སྲེག་པ་དང་། ཚོགས་པ་འདུས་པ་ནི་དོང་དུ་ལྷུང་བ་དང་། ཚོགས་པ་འདུས་པ་ནི་གཏི་མུག་གིས་རྣམ་པར་རྨོངས་པ་དང་། ཚོགས་པ་འདུས་པ་ནི་འདོད་ཆགས་ཀྱིས་ཀུན་ཏུ་འདོད་ཆགས་པ་དང་། ཚོགས་པ་འདུས་པ་ནི་ཟོ་ཆུན་རྒྱུད་མོ་རྣམ་པར་འཕྲུལ་པ་དང་། ཚོགས་པ་འདུས་པ་ནི་རྣམ་པར་རྨོངས་པར་བྱེད་པ་དང་། ཚོགས་པ་འདི་ནི་མུན་པའི་ཕུང་པོ་བཞིན་དུ་དུ་མར་རྣམ་པར་རྒྱལ་བ་མ་ཡིན་པར་བྱེད་པ་ཡིན་པས་འཇིགས་པ་གཅིག་པོ་དང་། གཅིག་ཏུ་སྲིད་པས་འཇིགས་པར་གྱུར་པ་རྣམས་དང་། གཅིག་ཏུ་དེ་ཁོ་ན་ལ་ལྟ་བ་ལ་མངོན་པར་བརྩོན་པ་རྣམས་ཀྱིས་དེའི་ཕྱིར་འདི་ལྟར་བསླབ་པར་བྱ་སྟེ། རབ་ཏུ་ཞི་བའི་དགོན་པ་རྣམས་ལ་དང་། སྒྲའི་ཅ་ཅོ་རྣམས་སྤངས་པས་རབ་ཏུ་ཞི་བར་གྱུར་པ་རྣམས་སུ་དང་། ཤེས་བྱ་ཉི་མ་སྟེན་པར་བྱེད་པ་རྣམས་སུ་དང་། རིའི་མཐོངས་རྣམས་སུ་དང་། ཤིང་གི་དྲུང་རྣམས་སུ་དང་། ཕུག་གི་སྒོ་རྣམས་ལ་དང་། བསོད་ནམས་སུ་གྱུར་ཅིང་བསོད་ནམས་སུ་གྱུར་པའི་སྒྲ་མེད་པ་རྣམས་སུ་གཅིག་པུ་ཞིག་དབེན་པར་སོང་ལ། ཀུན་ནས་གསུམ་པའི་ཡིད་རྩེ་གཅིག་གིས་ཉོན་མོངས་པའི་མཆོག་རྣམས་ལས་ཀྱང་ངེས་པར་རྣམ་པར་རྒྱལ་བར་གྱིས་ཤིག །དེ་ལྟར་ཁྱེད་རྣམས་ཡིད་ལེགས་པར་ལས་སུ་རུང་བར་གྱིས། ཡིད་ཤིན་ཏུ་རབ་ཏུ་ཞི་བར་གྱུར་པ་དང་། ཚོགས་པ་འདུས་པ་ཐམས་ཅད་ལས་རྣམ་པར་གྲོལ་བ་དང་། རང་གི་སྐྱེ་བོ་དང་། གྲོགས་བཤེས་དང་། གཉེན་

70-160a

འབྲེལ་རྣམས་འགྲོ་བ་དང་། འོང་བས་ཀུན་ཏུ་ཕྲད་པའི་ཚོགས་པ་འདུས་པའི་ཞེན་པ་དང་རྣམ་པར་བྲལ་བ་དང་། སྤྲོ་བ་མེད་པར་གཅིག་པུ་དགའ་བ་དང་། བསམ་གཏན་ལ་བསམ་པ་གཏན་པར་དང་། གནས་པས་ཕྱིན་ཅི་ལོག་བཞི་དང་བྲལ་བ་དང་། དབུགས་འབྱུང་བ་དང་རྒྱུ་བ་རྣམ་པ་བཅུ་དྲུག་དྲན་པའི་ངང་ཚུལ་གྱིས་ཉིན་མེད་མཚན་མེད་དུ་ཡང་ཤིན་ཏུ་ལེགས་པར་བརྩམས་པས་འཁོར་བའི་འཆིང་བ་ལས་འབྲོས་པར་བྱེད་པའི་ཕྱིར་ཡང་སྟེ། དེ་ལྟ་བུ་དེས་གོ་འཕང་གི་མཆོག་འཐོབ་པར་གྱུར་པ་ནི་གང་ཤིན་ཏུ་སྔབ་ནས་ཀྱང་མཐོང་མ་མྱོང་བའི་བདེ་ལེགས་སུ་གྱུར་པ་ཡིན་ལ། ཚོགས་པ་འདུས་པ་ལ་མངོན་པར་དགའ་བས་ཀྱང་ནི་མ་ཡིན་ནོ། །ཐོས་པ་དང་མི་ལྡན་པ། བློ་བརྟན་པོ་མ་ཡིན་པ་བརྟན་པོར་རྒྱུ་བ་མ་ཡིན་པ། དགེ་སྦྱོང་མ་ཡིན་པར་དགེ་སྦྱོང་དུ་ཁས་འཆེས་པ། ལེ་ལོ་ཅན་དུ་གྱུར་པ་རྣམས་དེ་ལྟར་ཆོས་གཅིག་པོ་འདི་གཞོམ་པར་གྱིས་དང་། འདི་ལྟ་སྟེ། ཚོགས་པ་འདུས་པ་ཞེས་བྱ་བའོ། །གཉིས་པ་ཡང་རབ་ཏུ་སྤང་བར་བྱ་ཞིང་སྤྱད་པར་ནི་མི་བྱའོ། །འདི་ཡང་གང་ཞེ་ན། འདི་ལྟ་སྟེ། སྨན་པ་བྱེད་པའོ། །དགེ་སློང་དག་བསམ་གཏན་བྱེད་པར་གྱུར་པ་ན་བར་དུ་གཅོད་པར་འགྱུར་རོ། །དེ་སྨན་པ་བྱེད་པར་གྱུར་པ་ན་གཞན་དུ་བྱེད་ཅིང་གཞན་དུ་སྨྲ་བར་འགྱུར་རོ། །དེ་ནད་པ་རྣམས་ལ་སེམས་སྟེར་བར་མི་བྱེད་དོ། །བློ་དེ་ལ་སོང་བ་ཡིན་ནོ། །དེ་དེ་ལྟར་བྱེད་པ་ན་འདོད་པ་རབ་ཏུ་སྟོབས་དང་ལྡན་པར་འགྱུར་རོ། །དེ་འདོད་པས་ཟིལ་གྱིས་མནན་པར་གྱུར་ནས་སེམས་ཀྱིས་སྤྱོད་པར་བྱེད་པ་སྟེ། ཇི་ལྟར་ཕྱིར་ཞིང་ཉིད་ཀྱང་ནད་རྣམ་པ་དུ་མར་སྟོབས་དང་ལྡན་པར་གྱུར་ན་དེས་སེམས་ཅན་རྣམས་ལ་གཟེར་ཟུག་བྱེད་དོ། །གཞན་ཡང་རྣམ་པ་མང་དུ་ང་ལ་རྙེད་པ་དང་བཀུར་སྟི་འོང་བར་འགྱུར་རོ། །དེས་བདག་གིས་གྲོང་རྣམས་ནས་གྲོང་དུ་དང་། གྲོང་ཁྱེར་རྣམས་ནས་གྲོང་ཁྱེར་དུ་དང་། ཡུལ་ཆུང་རྣམས་ནས་ཡུལ་གྱི་ལྗོངས་རྒྱུ་བའི་སྒོ་ནས་ངས་མང་དུ་བསྡུ་བར་བྱའོ་ཞེས་དེ་ལྟར་བསམས་པར་གྱུར་པས་བརྣབ་སེམས་འཕེལ་བར་འགྱུར་རོ། །དེ་བརྣབ་སེམས་ཀྱིས་

70-160b

ཟིལ་གྱིས་མནན་པར་གྱུར་པའི་ཡིད་ཅན་དྲི་མ་རྣམས་ཤིན་ཏུ་དཔྱོད་པར་བྱེད་པ་པོ་ཡིན་གྱི་བསམ་གཏན་ལ་སྙོམས་པར་འཇུག་པ་སེམས་པ་པོར་ནི་མི་འགྱུར་རོ། །དགེ་བ་རྣམས་ལ་སྤྱོད་པར་མི་འགྱུར་རོ། །གཞན་ཡང་སྨན་པ་བྱེད་པ་ན་སྐྱོན་ཆེན་པོ་རྣམས་ཡོད་དེ། དགེ་སློང་མ་ཡིན་པ་དགེ་སློང་དུ་དམ་འཆའ་བ་གང་གི་ཚེ་རླུང་ལ་སོགས་པའི་ནད་རྣམས་ཀྱིས་སྲོག་ཆགས་རྣམས་ཟིལ་གྱིས་མནན་པར་གྱུར་པ་ན་དེའི་ཚེ་རྫས་ལུང་འབོགས་པར་བྱེད་དེ། ཇི་ལྟར་མྱུར་བར་གྱུར་པར་མར་ནག་ལ་མར་ནག་གི་སྐོལ་སྦྱོར་བྱེད་དོ། །གལ་ཏེ་མེད་པར་གྱུར་ན་དེས་ཏིལ་ཀུན་ནས་བཙིར་ཞིང་ཏིལ་རྣམས་ཀུན་ཏུ་འཚིར་བར་བྱེད་དོ། །ཏིལ་ཀུན་ཏུ་བཙིར་བར་གྱུར་པ་ལས་ཀྱང་སྲོག་གཅོད་པ་ཆེན་པོ་འབྱུང་བར་འགྱུར་ཏེ། སྲིན་བུའི་ཚོགས་ཆེན་པོ་ཁ་བཏག་པར་འགྱུར་རོ། །འདི་ནི་སྐྱོན་གཞན་ཡིན་ཏེ། དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་པོས་ནད་རྣམས་མ་གཏོགས་པར་ཤ་བཀའ་སྒོ་བར་བྱེད་དོ། །གསར་པར་གྱུར་པ། མཚོན་གྱིས་བསད་པ། ཤིན་ཏུ་ཚིལ་ཅན་མ་ཡིན་པ། ཤི་བ་མ་ཡིན་པ། ནད་དང་གཅོང་གིས་ཤིན་ཏུ་བཅོམ་པ་མ་ཡིན་པ། ནད་དང་གཅོང་གིས་ཉེ་བར་ཉམས་པ་མ་ཡིན་པ། དུག་གིས་ཤི་བ་མ་ཡིན་པ། གཅན་གཟན་གྱིས་བསད་པ་མ་ཡིན་པ། སྐམ་པོ་མ་ཡིན་པ། རྗུད་པ་མ་ཡིན་པ་དེ་ལྟ་བུ་རྣམས་སུ་སྒོ་བར་བྱེད་དོ། །བཀའ་སྒོ་བར་བྱེད་པའི་དོན་གྱིས་སྲོག་གཅོད་པ་བདག་ལ་འབྱུང་ངོ་། །གང་གིས་སྲོག་གཅོད་པ་བཀའ་སྒོ་བར་བྱེད་པ་དང་། གང་བྱེད་པ་དང་། དེ་གཉིས་ཀ་ཡང་ལས་མཉམ་པའི་ཕྱིར་ན་དང་། བརྣབ་སེམས་དང་། གནོད་སེམས་ཀྱི་སྐྱོན་གྱིས་དམྱལ་བ་ཡང་སོས་སུ་འགྲོ་བར་འགྱུར་བ་ཡིན་ནོ། །དེ་ལྟར་ཡིན་པས་ཀྱང་སྨན་པ་མི་བྱའོ། །ཡང་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་གདོན་དུ་གྱུར་པ། རྐུན་མ་སྐྱེས་བུ་སྡིག་ཅན་སྨན་པའི་སྐྱོན་གཞན་ནི་གང་ནད་རྣམས་ཤིན་ཏུ་སྟོབས་དང་ལྡན་པར་གྱུར་པ་ན་དེའི་ཚེ་གང་ཡང་གྲོང་གཞན་དང་གཞན་སོ་སོ་ཐ་དད་པ་རྣམས་ཀྱི་ཤིང་ལྗོན་པ་དང་། འཁྲི་ཤིང་དང་། ཤིང་གེལ་པ་རྣམས་ཀྱང་དེས་ནོར་གྱི་དོན་དུ་སྟེ། སེམས་ཅན་གྱི་གནས་ཀྱིས་ཀུན་ཏུ་བསྡུས་པ།

70-161a

ནང་ན་ཉེ་བར་གནས་པའི་སྲིན་བུ་རྣམས་ཀྱིས་རྟེན་དུ་གྱུར་པ་རྣམས་ནོར་གྱི་དོན་དུ་དང་པོ་ཁོ་ནར་རྐོ་བར་བྱེད་པའམ། གཅོད་པར་བྱེད་པ་ཡང་བྱེད་དོ། །དེས་བརྐོས་པར་གྱུར་པ་ན་ས་ལ་གནས་པར་གྱུར་པའི་སྲོག་ཆགས་ཤུན་པ་དང་རྩ་བ་ལ་རྟེན་པ་རྣམས་འཛིན་པར་བྱེད་པ་དང་། ཚད་རྣམས་ཀྱང་རབ་ཏུ་བཤིག་པར་བྱེད་དོ། །གཅོད་པས་ནི་དེའི་ནང་ན་གནས་པའི་སྲིན་བུ་རྣམས་ཀྱང་གསོད་པར་བྱེད་དོ། །དེའི་ཚེ་རྟེན་པར་གྱུར་པའི་སྲོག་ཆགས་རྣམས་ཀྱང་གསོད་པར་འགྱུར་རོ། །འདི་ནི་སྨན་པ་བྱེད་པ་རྣམས་ཀྱི་སྐྱོན་གཞན་ཡིན་ནོ། །དེ་དེ་ལྟར་འཚོ་བ་ངན་པར་གྱུར་པ་ཆོས་མ་ཡིན་པ་དང་། ཡང་དག་པར་ལྡན་པའི་ཡིད་ཅན་རྣམས་ནི་བསམ་གཏན་ལ་སྙོམས་པར་འཇུག་པ་ལ་ཇི་ལྟར་དགའ་བར་འབྱུང་བར་འགྱུར་ཏེ། དེ་ནི་རྗེས་སུ་ཆགས་པའི་ཡིད་ཅན་ཡིན་ནོ། །གཞན་ཡང་སེམས་ངན་པ་ལ་སྐྱོན་སྟོབས་དང་ལྡན་པར་འགྱུར་ཏེ། དེ་བཞིན་དུ་བསམ་པ་ངན་པ་ལ་སེམས་པའི་སྡིག་པ་ཅན་དེ་ཡང་ཆོས་མ་ཡིན་པ་ཡུལ་འཁོར་འཇོམས་པ་སེམས་པར་བྱེད་དོ། །ཇི་ལྟར་སེམས་ཅན་རྣམས་ཡུལ་ལྗོངས་རྣམས་འཇོམས་པར་འབྱུང་བར་འགྱུར་བ་དེའི་ཚེ། དེ་ལས་བདག་ལ་མཆོད་པར་འགྱུར་བ་དང་། རྫས་དང་། ཟས་དང་། སྐོམ་དང་། སྟན་དང་། གནས་མལ་དང་། རབ་ཏུ་ཕལ་ཆེ་བའི་རྙེད་པ་དང་བཀུར་སྟི་འབྱུང་བར་འགྱུར་རོ། །འདོད་པས་ཉེ་བར་བཅོམ་པར་གྱུར་པའི་བློ་དེ་དགེ་བ་རྣམས་ལ་སེམས་པར་མི་བྱེད་དོ། །བསམ་གཏན་ལ་སྙོམས་པར་འཇུག་པའི་རང་བཞིན་ཅན་ཡང་མ་ཡིན་ནོ། །བླ་མ་དག་ལ་ཉེ་བར་སྟེན་པར་མི་བྱེད་དོ། །དགེ་བའི་བཤེས་གཉེན་རྣམས་དང་འགྲོགས་པར་མི་བྱེད་དོ། །སངས་རྒྱས་ལ་ཕྱག་འཚལ་བའི་རང་བཞིན་ཅན་མ་ཡིན་ནོ། །བྱ་བ་ངན་པ་བྱེད་པ་དེ་ལུས་ཞིག་ནས་ངན་སོང་ངན་འགྲོ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་དེ་ལས་འཆི་འཕོས་ནས་གལ་ཏེ་ལན་གྲངས་གཞན་ལ་མྱོང་བར་འགྱུར་བའི་ལས་ལེགས་པར་བྱས་པ་རྣམས་ཀྱིས་མིར་སྐྱེས་ན་ཡང་སྨན་པ་ངན་པ་དེའི་ལས་རྣམས་ཀྱི་མཐུས་དེ་རྟག་ཏུ་ནད་པ་དབུལ་པོ་དང་ཚེ་ཐུང་བར་ཡང་འགྱུར་རོ། །སྨན་པ་བྱེད་པའི་སྐྱོན་གཞན་

70-161b

རྣམས་ནི་ཡང་རླུང་དང་། མཁྲིས་པ་དང་། བད་ཀན་དེ་དག་རྣམས་ནི་གང་གི་ཕྱིར་ཐ་མལ་པ་ཡིན་པའི་ཕྱིར་ན་བསྒྲུབ་པར་བླ་བ་ཡིན་ལ་ཐོག་མ་མེད་པའི་དུས་ནས་འཇུག་པར་འགྱུར་བ་ལུས་དང་ལྷན་ཅིག་ཏུ་འགྲོགས་པར་གྱུར་པའི་ངན་སོང་དུ་འགྲོ་བ་རྣམས་ནི་རྟོགས་པར་ཡང་མི་འགྱུར་རོ། །སོ་སོའི་སྐྱེ་བོ་ཐོས་པ་དང་མི་ལྡན་པ། དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་དེ་ནི་འཇིགས་པར་འགྱུར་བའི་ལུས་འཆོས་པར་བྱེད་ཀྱི། སྐྲ་དང་ཁ་སྤུ་བྲེགས་ནས་གོས་ངུར་སྨིག་བགོས་ཏེ། རབ་ཏུ་བྱུང་བར་གྱུར་པ། གང་གི་དོན་དུ་རབ་ཏུ་བྱུང་བར་གྱུར་ནས་ཀུན་ནས་སྤོང་བས་འདོད་ཆགས་ཞེ་སྡང་གཏི་མུག་གིས་ཐོག་མ་མེད་པའི་དུས་ནས་འཇུག་པའི་ལུས་སྲེག་པ་འཆོས་པར་མི་བྱེད་དོ། །གང་གིས་ཀྱང་འདི་དག་སྲེག་པར་འགྱུར་བ་དེས་ཀྱང་གང་གི་ཕྱིར་ལུས་རྣམས་བསྲེགས་པས་ཤིན་ཏུ་སྲེག་པར་བྱེད་པ་དང་། རྣམ་པར་ཆུད་གཟན་ཞིང་རྣམ་པར་ཆུད་གཟོན་པར་བྱེད་དོ། །ཕྱི་བཞིན་རྗེས་སུ་འབྲེལ་ནས་ལམ་དུ་འགྲོ་བ་ན་འགྲོགས་པར་བྱེད་པའི་སྐྱོན་ཆེན་པོ་གསུམ་པོ་འདོད་ཆགས་ཞེ་སྡང་གཏི་མུག་དེ་དག་རྣམས་ཡོངས་སུ་བཏང་ནས་གཞན་རྣམས་ལ་ཀུན་ཏུ་འཕོ་བར་བྱེད་པ་དེའི་རབ་ཏུ་བྱུང་བ་དོན་མེད་པར་འགྱུར་རོ། །གསོ་བ་ངན་པའི་སྐྱེས་བུ་རང་གི་སེམས་ཀྱིས་ཡོངས་སུ་བསླུས་པ་སྐྱེས་བུ་གཏི་མུག་ཅན་བསླུས་པར་གྱུར་པ་ཡང་ཡིན་ཏེ། དཔེར་ན་བློ་གྲོས་དམན་པའི་སྐྱེས་བུ་འགའ་ཞིག་རྩ་བ་མེད་པ། གྲོགས་མེད་པ། ནོར་མེད་པར་སྟོབས་དང་ལྡན་པའི་དགྲ་ཞིག་འོངས་པར་གྱུར་ན་དགྲ་དེ་ནི་འདིས་བརྩད་པར་བྱ་བ་དག་གིས་བྱ་བར་མི་ནུས་སོ། །སྟོབས་ཀྱིས་ཀྱང་བཟློག་པར་མི་ནུས་ཏེ། དགྲ་བོ་འདི་ནི་ཤིན་ཏུ་སྟོབས་དང་ལྡན་པས་དེ་བརྟན་པ་དང་ལྡན་པར་འགྱུར་རོ། །ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་དེ་རྣམས་ཀྱིས་དགྲ་དེའི་འཇིགས་པ་མ་བརྩིས་པར་དམན་པའི་སྐྱེས་བུ་གཞན་དགྲ་འཇིགས་པས་སྐྲག་ཅིང་ལྷན་ཅིག་ཏུ་དབང་དུ་གྱུར་ནས་འགྲོགས་པར་བྱེད་དོ། །དེ་དེ་ལྟར་དྲན་པ་ངན་པ་ཤེས་རབ་འཆལ་བ། ལེ་ལོ་ཅན་སྐྱེས་བུ་བག་མེད་པར་གྱུར་པ། སོང་ཞིང་འཐུངས་པར་བྱེད་པ་ཇི་སྲིད་དུ་གཞན་གྱི་ཆུང་མ་དང་བག་མེད་པ་

70-162a

རྣམས་སྟེན་པར་བྱེད་པ་འདི་དག་ནི་དགེ་སློང་ངན་པ་དགེ་སློང་དུ་ཁས་འཆེས་པ་རང་གི་དགྲ་རྣམས་བཟོད་པར་བྱེད་དོ། །སྟོབས་ཆེན་པོས་བརྩོན་པ་དུ་མས་ཀྱང་འཇིག་རྟེན་ལས་འདས་པའི་ཕྱི་བཞིན་རྗེས་སུ་འབྲང་བར་འགྱུར་བས་ཟིལ་གྱིས་མནན་ནས་དེས་ཤིན་ཏུ་སྤྲོ་བའི་གནས་ལ་འདྲིས་པར་བྱེད་ཅིང་རྣམ་པར་རྟོག་པ་དང་མཉམ་པར་འཇུག་པ་གང་ཆེས་སྟོབས་དང་ལྡན་པས་རྗེས་སུ་འབྲང་བ། འདོད་ཆགས་ཞེ་སྡང་གཏི་མུག་རྣམས་བཟོད་པར་བྱས་ནས་གང་དག་ལུས་རབ་ཏུ་བྱུང་བར་གྱུར་པ། རང་གི་སྐྱེ་བོ་དང་། གྲོགས་པོ་དང་། བུ་མོ་རྣམས་ཡོངས་སུ་སྤངས་པས་རབ་ཏུ་བྱུང་བའི་ཡིད་བོར་ཏེ། རྫས་ཀྱི་རྒྱུས་གཞན་དག་གི་དབང་གིས་ལྷན་ཅིག་ཏུ་འགྲོ་བར་བྱེད་དོ། །ཇི་ལྟར་ང་ནི་ཁྱེད་རྣམས་ལ་རླུང་དང་། བད་ཀན་དང་། མཁྲིས་པ་རྣམས་དགྲར་འདོད་དོ། །དེ་དག་རྣམས་བདག་ཅག་གིས་འདི་ལྟར་གོ་བར་བྱ་སྟེ། ཡིད་རྣམ་པར་དཀྲུག་པར་བྱེད་པ་དང་། འཆི་བདག་གི་རྒྱལ་པོ་ཡང་གསུམ་དུ་འགྲོ་བའི་དགྲ་གསུམ་པོ་འདི་དག་རྣམས་ཡིན་ཏེ། བཟློག་པར་དཀའ་བའི་འདོད་ཆགས་ཞེ་སྡང་གཏི་མུག་གང་ཡིན་པ་འདིས་འདོད་པའི་ཐག་པས་བཅིངས་ནས་ཤིན་ཏུ་བག་མེད་པར་འཇིག་རྟེན་ཕ་རོལ་ཏུ་འཁྲིད་པར་བྱེད་དོ། །དོན་གྱི་མཆོག་ལ་བག་མེད་པ་ནོར་གྱི་འདོད་པ་རབ་ཏུ་སྟོབས་ཆེ་བ་རྣམས་ཀྱིས་བློ་སྡུག་བསྔལ་བར་བྱེད་པ་ཡིན་པ་དེའི་ཕྱིར་སྐྱོན་དེ་དག་རྣམས་གོ་བར་གྱིས་ལ་སྨན་པ་མ་བྱེད་ཅིག །གལ་ཏེ་འགའ་ཞིག་འཆོས་པའི་སྨན་པ་བྱེད་ན་གང་གཞན་དག་རྣམས་སུ་དེ་བདེ་བར་མི་འགྱུར་རོ། །དེ་ནས་དེའི་ཚེ་བཅོམ་ལྡན་འདས་དེས་ཚིགས་སུ་བཅད་པ་གསུངས་པ། ཇི་ལྟར། བད་ཀན་ལ་སོགས་སྐྱོན་མ་ཡིན། །སྐྱོན་གཞན་འདོད་ཆགས་ལ་སོགས་འདོད། །བད་ཀན་སོགས་ཀྱིས་ངན་སོང་དུ། །ཡིད་ཅན་སྐྱེ་བར་འགྱུར་མ་ཡིན། །སེམས་ཀྱི་སྐྱོན་རྣམས་འདི་དག་གིས། །ངན་སོང་སྟོན་པར་བྱེད་པ་ཡིན། །དེ་ཕྱིར་དེ་དག་ཞི་བ་ཉིད། །མཆོག་ཡིན་བད་ཀན་སོགས་འདིར་མིན། །ཐོག་མཐར་མཆོག་ཏུ་ལེགས་པར་ནི། །ཆགས་ལ་ཀུན་བསྟན་འཐོབ་པ་མིན། །གང་སེམས་སྨན་པ་དེ་སྨན་པ། །ལུས་ཀྱི་སྨན་པ་སྨན་པ་མིན། །ཡིད་འཆོས་པ་ནི་ཤེས་པར་དཀའ། །དེ་བཞིན་མིན་འདོད་འཇིག་

70-162b

རྟེན་པའི། །དེ་ལྟར་བཅོམ་ལྡན་འདས་འོད་སྲུང་གིས་རྒྱུ་འདིས་ན་རབ་ཏུ་བྱུང་བས་སྨན་པ་མ་བྱེད་ཅིག་ཅེས་གསུངས་སོ། །སྨན་པ་བྱེད་པ་ལ་སྐྱོན་གཞན་ཡང་ཡོད་པ་ནི་འདི་ལྟ་སྟེ། སྨན་པ་བྱེད་པ་ན་སྐྱོན་དུ་མ་འཕེལ་བར་འགྱུར་ཏེ། འདོད་པས་ཟིལ་གྱིས་གནོན་པར་བྱེད་དོ། །ཕྱིར་རྩོད་པར་བྱེད་པར་འགྱུར་ལ་སྨན་པ་གཞན་དེ་ལ་སྨད་ར་ཡང་སྨྲ་བར་བྱེད་དོ། །འཚོ་བ་རྣམས་ཡང་ཉེ་བར་འཇོམས་སོ། །དེ་ལ་འདི་དག་རབ་ཏུ་སྐྱེ་སྟེ། ཤིན་ཏུ་ཡང་ཡི་དགས་སུ་སྐྱེ་བའི་རྒྱུ་བྱེད་དོ། །དེ་ལྟར་དྲི་མ་རྣམས་ཀྱིས་ཟིལ་གྱིས་གནོན་པར་འགྱུར་བའི་སེམས་གཡོ་བས་གཏི་མུག་སྟོབས་ཆེ་བར་འགྱུར་རོ། །དེ་གཏི་མུག་གིས་ཟིལ་གྱིས་མནན་པས་བུད་མེད་ཀྱི་འགྲོ་བ་ལེགས་པར་མངོན་པར་མཐོང་ན་ཚུལ་བཞིན་མ་ཡིན་པ་ཡིད་ལ་བྱེད་པས་འཁྲིད་པར་འགྱུར་རོ། །བློ་གྲོས་རྨོངས་པ་དེ་བུད་མེད་དག་མངོན་པར་མཐོང་ནས་འདོད་ཆགས་ཀྱི་ཟིལ་གྱིས་གནོན་ནོ། །སྐྱོན་དེ་དག་རྣམས་བད་ཀན་ལ་སོགས་པ་དེ་དག་ལ་མེད་དོ། །འདོད་ཆགས་ལ་སོགས་པའི་སྐྱོན་རྣམས་ལ་བཅོས་གྱིས་དང་། དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་ཀྱི་རྒྱུར་གྱུར་པའི་སྟོབས་ཆེ་བ་ཡིན་གྱིས། དེ་ཡང་དེ་ལྟར་གྱུར་པས་བུད་མེད་ཀྱི་འགྲོ་བ་མཐོང་ནས་ཚུལ་བཞིན་མ་ཡིན་པ་ཡིད་ལ་བྱེད་པས་འཁྲིད་པར་འགྱུར་རོ། །དྲན་པ་རྨོངས་པ་དེ་བུད་མེད་དག་མཐོང་ནས་འདོད་ཆགས་ཀྱི་ཟིལ་གྱིས་གནོན་པར་འགྱུར་རོ། །རབ་ཏུ་བྱུང་བ་རྣམས་ཀྱིས་འདོད་ཆགས་ལ་སོགས་པ་རྣམས་རྟག་ཏུ་རྟོགས་པ་ལ་རབ་ཏུ་བརྩོན་པར་བྱའི་བད་ཀན་ལ་སོགས་པ་རྣམས་ནི་མ་ཡིན་ནོ། །འདི་དག་ནི་ཆོས་གཞན་གཉིས་པ་ཡིན་ཏེ། དགེ་སྦྱོང་མྱ་ངན་ལས་འདས་པ་ལ་ཁ་ཕྱོགས་པས་མི་བྱ་སྟེ། བསམ་གཏན་ལ་སྙོམས་པར་ཞུགས་པ་ན་རྣམ་པར་སྲེག་པར་བྱེད་པའི་ཕྱིར་རོ། །གཞན་ཡང་ཆོས་གསུམ་པ་ཡོངས་སུ་སྤང་བར་བྱའོ། །འདི་ཡང་གང་ཞེ་ན། འདི་ལྟ་སྟེ། རི་མོའི་ལས་བྱེད་པའོ། །རི་མོའི་ལས་བྱེད་པའི་རབ་ཏུ་བྱུང་བ་རྣམས་ནི་འདོད་ཆགས་ཀྱིས་རབ་ཏུ་འབྱུང་བར་བྱ་བ་ཡིན་ཏེ། ཁ་དོག་གི་འདུ་ཤེས་ཅན་གྱིས་འདོད་ཆགས་གཞན་སྐྱེད་པར་བྱེད་པ་ཡིན་ནོ། །ལས་རྣམ་པ་སྣ་ཚོགས་པ་

70-163a

རྣམས་ཀྱིས་འཇིག་རྟེན་འདི་བོར་ནས་ཁ་དོག་སྣ་ཚོགས་པར་གྱུར་པ་གཞན་རྣམས་བྱེད་དོ། །སེམས་རྣམ་པར་བཀྲ་བ་རྣམས་མངོན་པར་མི་ཤེས་པར་གཞན་ཁ་དོག་རྣམ་པ་སྣ་ཚོགས་པ་རྣམས་དེ་བྱེད་དོ། །དེ་ལ་རབ་ཏུ་བྱུང་བ་རྣམས་ཀྱིས་རྟག་པ་ཁོ་ནར་ལས་རྣམ་པ་སྣ་ཚོགས་པ་རྣམས་ཤེས་པར་བྱ་སྟེ། སེམས་རི་མོ་མཁན་གྱིས་དོན་དམ་པའི་ཚོན་ཆེན་པོ་ལྔས་འགྲོ་བ་ལྔ་ཚོན་གྱིས་བསྒོ་བར་བྱེད་དོ། །ཇི་ལྟར་སེམས་རི་མོ་མཁན་དང་། ཚོན་ཆེན་པོ་ལྔ་པོ་རྣམས་གང་ཞེ་ན། མཆོག་ཏུ་རྒྱ་ཆེ་བའི་དད་པ་ལ་སོགས་པ། དཀར་པོའི་ལས་རྣམས་ཤིན་ཏུ་སྦྱངས་པའི་ཁ་ནས་དང་། འདུན་པས་རབ་ཏུ་སྦྱིན་པ་མདུན་དུ་བྱས་པས་མཆོག་ཏུ་རྒྱ་ཆེ་བར་གྱུར་པ་དྲི་མ་རྣམས་དང་། སེར་སྣའི་དྲི་མ་དང་རྣམ་པར་བྲལ་བར་གྱུར་པ། མཆོག་ཏུ་དགའ་བའི་ཡིད་ཀྱིས་ཚུལ་ཁྲིམས་ཀྱི་རི་ལ་ལེགས་པར་ལངས་པའི་ཚུལ་ཁྲིམས་ཀྱིས་ལྷ་རྣམས་རྣམ་པར་བཀྲ་བར་སེམས་རི་མོ་མཁན་གྱིས་བྲིས་པའོ། །གཞན་ཡང་དགེ་སྦྱོང་གིས་སེམས་ཀྱི་ལས་འདི་དག་ཉེ་བར་གཟུང་བར་བྱའོ། །འདི་ལྟ་སྟེ། མི་རྣམས་ནི་དམན་པ་དང་། བར་མ་དང་། ཁྱད་པར་དུ་འཕགས་པའི་ལས་རྣམས་ཀྱི་ཚོན་མང་པོས་རྣམ་པར་བཀྲ་བར་བྱས་སོ། །དེ་ལ་གང་དག་ནོར་རྣམས་དང་ལྡན་པ་དང་། མཆོག་ཏུ་ཚུལ་ཁྲིམས་དང་ལྡན་པ་དེ་དག་རྣམས་ཀྱང་མཆོག་ཏུ་དཀར་བའི་ལས་ཀྱི་ཚོན་རྣམས་ཀྱིས་རྣམ་པར་བཀྲ་བར་བྱས་སོ། །གང་ཡང་མཆོག་ཏུ་ནོར་རྣམས་དང་ལྡན་པ། ཚུལ་ཁྲིམས་དང་ལྡན་པ་དེ་དག་ནི་ནག་པོ་དང་དཀར་པོ་གཉིས་ཀྱི་ཚོན་གྱིས་རྣམ་པར་བཀྲ་བར་བྱས་སོ། །གང་དག་ནོར་ཆུང་བ་ཚུལ་ཁྲིམས་དང་ལྡན་པ་དེ་དག་ནི་དཀར་པོ་དང་དམར་བའི་ཚོན་གཉིས་ཀྱིས་རྣམ་པར་བཀྲ་བར་བྱས་སོ། །གང་དག་དབུལ་པོ་ཚུལ་ཁྲིམས་འཆལ་བ་དེ་ནི་ནག་པོའི་ཚོན་གྱིས་རྣམ་པར་བཀྲ་བར་བྱས་སོ། །གང་དག་བརྩོན་འགྲུས་དམན་པ་འདོད་ཆགས་སྟོབས་ཆེ་བ་དེ་ནི་ནག་པོ་དང་དབུལ་པོའི་ཚོན་དག་གིས་རྣམ་པར་བཀྲ་བར་བྱས་སོ། །གང་དག་གཟུགས་དང་ལྡན་པ་མཆོག་ཏུ་རིགས་བཟང་བར་གྱུར་པ་དེ་རབ་ཏུ་དང་བའི་ཚོན་དཀར་པོས་མངོན་པར་བྲིས་སོ། །གང་དག་བར་མའི་རིགས་སུ་སྐྱེས་པ་དེ་དག་ནི་དམར་

70-163b

པོའི་ཚོན་གྱིས་མངོན་པར་བྲིས་སོ། །གང་དག་ཉུང་བར་གྱུར་པ་དེ་དག་ནི་ནག་པོའི་ལས་རྣམས་ཀྱི་ཚོན་གྱིས་སེམས་རི་མོ་མཁན་གྱིས་མངོན་པར་བྲིས་སོ། །གང་ཡང་རྒྱལ་པོའམ་རྒྱལ་པོའི་བློན་པོ་ལེགས་པར་བྱས་པའི་ལས་རྣམས་འདས་ནས་མདུན་དུ་མི་དགེ་བ་མང་པོ་རྣམས་བྱེད་པར་གྱུར་པ་དེ་དག་རྣམས་ཀྱི་དཀར་པོའི་མདོག་འདི་དག་རྣམས་ནི་ཉམས་ནས་ཀྱང་ནག་པོ་ཉེ་བར་འཕེལ་བར་འགྱུར་རོ། །གང་ཡང་དབུལ་པོར་གྱུར་པ་རིགས་ཤིན་ཏུ་དམན་པར་སྐྱེས་པ་དེའི་ཁ་དོག་ནག་པོའི་ལས་བྱས་པ་རྣམས་ནི་ནུབ་པར་གྱུར་ནས་ཀྱང་དཀར་པོའི་མདོག་རྣམས་ཀྱང་རབ་ཏུ་འབྱུང་བར་འགྱུར་རོ། །གང་ཡང་བར་མའི་རིགས་སུ་གྱུར་པ་གཟུགས་ཕུན་སུམ་ཚོགས་པ་དང་། ལས་ཀྱང་བར་མ་རྣམས་བྱེད་པར་གྱུར་པ་དེ་དག་རྣམས་ནི་སེམས་རི་མོ་མཁན་གྱིས་དཀར་པོ་དང་དམར་པོ་དག་གིས་བཀྲ་བར་བྱས་སོ། །དེ་ལྟར་ཚོན་དུ་མ་རྣམས་ཀྱིས་མིའི་འཇིག་རྟེན་མཆོག་ཏུ་བཀྲ་བར་གྱུར་པས་མཆོག་ཏུ་བཀྲ་བར་མངོན་པར་བྲིས་སོ། །གཞན་ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་དག་ཅེ་ན། འདི་ལྟ་སྟེ་དམྱལ་བའི་འོ་དམྱལ་བ་རྣམས་ཡང་སེམས་རི་མོ་མཁན་གྱིས་གཉིས་ཀྱིས་མངོན་པར་བྲིས་པར་གྱུར་པ་ལ་འདི་ལྟ་སྟེ། སེར་པོ་དང་ནག་པོས་ཀྱང་ངོ་། །དེ་ལ་ཇི་ལྟར་སེར་པོས་ཡིན་ན་འདི་ལྟ་སྟེ། ཞེ་སྡང་ངོ་། །ཚོན་ནག་པོས་ཡང་འདི་ལྟ་སྟེ། ཕྲག་དོག་གོ། །དམན་པ་དང་བར་མར་གྱུར་པའི་དམྱལ་བར་སྐྱེས་པ་རྣམས་ནི་མདོག་གཉིས་ཉིད་ཁོ་ནས་རྣམ་པར་བཀྲ་བར་བྱས་པར་གྱུར་པ་འདི་ལྟ་སྟེ། སྔོན་པོ་དང་ནག་པོ་དག་གིས་སོ། །དེ་ལྟར་དམྱལ་བ་རྣམས་ཚོན་རྣམས་ཀྱིས་རྣམ་པར་བཀྲ་བར་བྱས་པ་ངེས་པར་རྟོགས་པར་གྱུར་པ་དང་། ཡང་འགྲོ་བ་གཞན་ལ་རྣམ་པར་བལྟ་བར་བྱ་སྟེ། གང་ཞེ་ན། འདི་ལྟ་སྟེ། ཡི་དགས་རྣམས་སོ། །ཡི་དགས་རྣམས་ཀྱང་མཆོག་ཏུ་སྡུག་བསྔལ་བར་གྱུར་པ་སྟེ། ཕྲག་དོག་དང་སེར་སྣ་དག་གིས་རྣམ་པར་བཀྲ་བར་གྱུར་པའོ། །དེ་དག་རྣམས་ནི་ནག་པོའི་ཚོན་རྣམས་ཉིད་ཀྱིས་ཀྱང་རྣམ་པར་བཀྲ་བར་བྱས་ཏེ། ཁ་དོག་ནག་པོར་གྱུར་པའི་མུན་པ་རྣམས་ན་རྒྱུ་ཞིང་སྤྱོད་པར་འགྱུར་རོ། །བཀྲེས་པ་དང་སྐོམ་པས་བསྲེགས་པའི་ཡི་དགས་རྣམས་ནི་ལས་ནག་པོ་དང་ནག་པོའི་ལུས་དེ་དག་ཐམས་ཅད་ཉིད་ཀྱང་ལས་གཅིག་གི་ཚོན་གྱིས་རྣམ་

70-164a

པར་བཀྲ་བར་བྱས་པའོ། །གཞན་ཡང་དུད་འགྲོ་རྣམས་ཀྱང་ལས་གང་དག་གི་ཚོན་གྱིས་རྣམ་པར་བཀྲ་བར་བྱས་པ་ཡིན་ན། ནག་པོ་དང་དམར་པོའོ། །དེ་ལ་གང་དག་མཆོག་ཏུ་སྡུག་བསྔལ་བར་གྱུར་པ་ཕན་ཚུན་དུ་འཇིགས་པས་འཇིགས་པར་གྱུར་པ་དེ་དག་རྣམས་ནི་ནག་པོའི་ཚོན་ཉིད་ཀྱིས་རྣམ་པར་བཀྲ་བར་བྱས་སོ། །གང་ཡང་ཕན་ཚུན་དུ་འཇིགས་པས་འཇིགས་པར་གྱུར་པ་དེ་ནི་དམར་པོའི་ཚོན་རྣམས་ཉིད་ཀྱིས་སེམས་རི་མོ་མཁན་གྱིས་བཀྲ་བར་བྲིས་སོ། །དེ་དག་རྣམས་ཀྱང་གཞལ་དུ་མེད་པའི་དུད་འགྲོ་རྣམས་ཡིན་ཏེ། ཕན་ཚུན་དུ་གསོད་པ་དང་འཆིང་བས་འཇིགས་པར་གྱུར་པ་དེ་དག་རྣམས་ཀྱང་མདོར་བསྡུ་ན་ནམ་མཁའ་ལ་རྒྱུ་བར་གྱུར་པ་རྣམས་ལས་གང་དག་ཤ་ཟ་བར་བྱེད་པ་ཡང་འདི་ལྟ་སྟེ། རྨ་བྱ་དང་། བྱེའུ་ལཱ་བ་ཀ་དང་། ངང་པ་ལ་སོགས་པའོ། །ས་གཞི་ལ་སྤྱོད་པ་ཡང་བ་ལང་དང་། མ་ཧེ་ཥཱ་དང་། ཕག་པ་དང་། ནགས་ཕྱུགས་ལ་སོགས་པའོ། །ཆུ་ལ་རྒྱུ་བ་ཡང་ཉ་ལ་སོགས་པ་སྟེ། དེ་དག་རྣམས་ནི་ནག་པོའི་ཚོན་གྱིས་རྣམ་པར་བཀྲ་བར་བྱས་སོ། །གང་དག་གསོད་པའི་འཇིགས་པ་ཅན་མ་ཡིན་པ་དེ་དག་རྣམས་ནི་དམར་པོའི་ཚོན་གྱིས་བཀྲ་བར་བྱས་ཏེ། དཔེར་ན་མཐོ་རིས་ཀྱི་བྱ་རྣམས་སོ། །དེ་ལྟར་འགྲོ་བ་ལྔ་པོ་དེ་དག་ཕལ་ཆེར་ཚོན་སྣ་ལྔས་བཀྲ་བར་བྱས་སོ། །ཀྱེ་མ་དེ་ཉིད་དཔྱོད་པར་བྱེད་པས་ཉམ་ཐག་པར་ཆུད་པའི་མཆོག་ཏུ་སྡུག་བསྔལ་བ་སྡུག་བསྔལ་སྔར་ནུབ་པར་གྱུར་པ། བག་མེད་པར་རྗེས་སུ་ཚོལ་བར་གྱུར་པས་ཕན་ཚུན་དུ་གནོད་པར་བྱེད་པས། བཀྲེས་པ་དང་སྐོམ་པས་བྱས་པའི་སྡུག་བསྔལ་རྣམས་ཀྱིས་ཉེ་བར་བཅོམ་པར་གྱུར་པའོ། །དེས་དེ་ལྟར་རྣམ་པར་ངོ་མཚར་བ་རྣམས་ལ་མ་སྤྱད་པར་ཉམས་སྨད་པ་དང་། ལེ་ལོ་ཅན་དུ་གྱུར་པ་བསམ་གཏན་སྒོམ་པའི་རང་བཞིན་ཅན་མ་ཡིན་ལ། སེམས་རི་མོ་མཁན་མི་ཤེས་པར་རང་གི་སྐྱེ་བ་ལས་གཞན་དུ་གྱུར་པའི་རི་མོ་རྣམས་སེམས་པར་བྱེད་དོ། །རབ་ཏུ་བྱེད་དོ། །དེ་ལ་མཆོག་ཏུ་ཡང་རྣམ་པར་བཀྲ་བར་གྱུར་པ་དེ་དག་ཉིད་ནི་འདི་ལྟ་སྟེ། འཁོར་བའི་སྐྱེ་བ་དང་། རྒ་བ་དང་། འཆི་བ་དང་། མི་སྡུག་པ་རྣམས་དང་ཕྲད་པ་དང་། སྡུག་པ་རྣམས་དང་འབྲལ་བ་དང་། གྲང་བ་དང་། ཚ་བ་དང་། བཀྲེས་པ་དང་། སྐོམ་པ་དང་། ཕན་ཚུན་མི་དགའ་བར་བྱེད་པ་དང་། དགའ་བར་བྱེད་

70-164b

པའི་རྟག་ཏུ་གར་བྱེད་པར་གྱུར་པའི་བདེ་བ་དང་སྡུག་བསྔལ་རྣམས་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་སུ་སྣ་ཚོགས་པའི་ལས་ཀྱི་གོ་འཕང་བྲིས་པར་གྱུར་པའི་འཁོར་བ་ངོ་མཚར་བ་དེ་དོན་དུ་གཉེར་བ་ཡང་མ་ཡིན་ནོ། །ཡིད་ལ་མི་བྱེད་པས་སྐྱོ་བ་མི་སྐྱེའོ། །ཇི་སྲིད་དུ་གཞན་བསམ་གཏན་ལ་སྙོམས་པར་འཇུག་པ་ན་རྣམ་པར་འཚིག་པར་འགྱུར་བའི་རི་མོ་གཞན་བྱེད་དོ། །དགེ་སྦྱོང་རྣམ་པར་འཚིག་པར་གྱུར་པའོ། །གཞན་ཡང་རིམ་པ་གཞན་དག་གིས་མཆོག་ཏུ་རྣམ་པར་བཀྲ་བའི་འཁོར་བ་ལ་དཔྱོད་པར་བྱེད་དེ། ཇི་སྲིད་ཚོན་གཞན་རྣམས་ཀྱིས་རྣམ་པར་བཀྲ་བར་བྱས་པ་ལ་དཔྱོད་པར་བྱེད་དོ། །འདི་ལྟ་སྟེ། རྣམ་པར་བཀྲ་བར་གྱུར་པའི་ཡུལ་རྣམས་དང་ཉེ་བར་འབྲེལ་བར་གྱུར་པ་གང་གིས་བཅིངས་པའི་སེམས་དུས་ཡུན་རིང་དུ་དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་ལ་ཡོངས་སུ་འཁྱམ་མོ། །ཇི་ལྟར་ཞེ་ན། འདི་ལྟ་སྟེ། གང་གི་ཚེ་མིག་གིས་གཟུགས་སྡུག་པ་ཡིད་དུ་འོང་བར་གྱུར་པ་ཡུལ་གྱི་འདོད་ཆགས་སྐྱེད་པར་བྱེད་པ་རྣམས་མཐོང་བར་གྱུར་ན་དེ་དེ་དག་རྣམས་ལ་ཆགས་པར་འགྱུར་རོ། །དེ་དག་ནི་ནག་པོའི་ཚོན་གྱིས་བྱུགས་པ་ཡིན་ནོ། །དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །གང་གི་ཚེ་གཟུགས་དེ་དག་ཉིད་མིག་གིས་མངོན་པར་མཐོང་བར་གྱུར་ནས། འདི་ལྟར་སེམས་པར་བྱེད་དེ། ཇི་ལྟར་གཟུགས་འདི་དག་རྣམས་ནི་མི་རྟག་པ་མི་བརྟན་པ་ཡོངས་སུ་མི་འགྱུར་བའི་ཆོས་མ་ཡིན་པས་ན་ཆོས་ཙམ་དུ་གྱུར་པའི་འཁོར་བ་འདི་ལ་འདོད་ཆགས་པར་མི་བྱའོ། །དེའི་ཚེ་དཀར་པོའི་ཚོན་རྣམས་ཀྱིས་བསྐུས་ནས་ལྷ་དང་མིར་སྐྱེ་བར་འགྱུར་བ་དང་། གང་མྱ་ངན་ལས་འདས་པར་འགྲོ་བར་ཡང་འགྱུར་རོ། །དེ་ལྟར་མིག་གིས་རྣམ་པར་ཤེས་པར་བྱ་བ་རྣམས་ལ་མི་ཆགས་སོ། །རབ་ཏུ་རྟོག་པར་མི་བྱེད་དོ། །སྤྲོ་བར་མི་བྱེད་དོ། །འདུན་པའི་འདོད་ཆགས་སུ་མི་བྱེད་དོ། །མཆོག་ཏུ་དཀར་པོར་གྱུར་པའི་ལས་རྣམས་ཀྱིས་ལྷ་ལས་ཀྱང་ཆེས་ལྷར་གྱུར་པ་རྣམས་དང་མི་རྣམས་སུ་བདེ་བར་འགྱུར་རོ། །དེ་ལྟར་ཡང་དགེ་སྦྱོང་ངན་པར་གྱུར་པ་འདིས་སྤྱོད་པར་མི་བྱེད་དོ། །བསམ་གཏན་དུ་མི་བྱེད་དོ། །དེ་བཞིན་དུ་མིག་གིས་རྣམ་པར་ཤེས་པར་བྱ་བའི་ཡུལ་རྣམས་ལ་གང་གི་ཚེ་

70-165a

འདི་ཆགས་པར་གྱུར་ནས་ཡང་དག་པ་ཇི་ལྟ་བ་ཡིན་པར་གོ་བར་བྱེད་པར་གྱུར་པ་དེའི་ཚེ་ནག་པོའི་ལས་རྣམས་བྱེད་པར་འགྱུར་རོ། །དེས་ནག་པོའི་ལས་རྣམས་མ་རྟོགས་པར་བློ་དམན་པ་དེ་ཚོན་རྣམས་ཀྱིས་རྣམ་པར་བཀྲ་བར་བྱེད་དོ། །དེའི་ཕྱིར་ན་བསམ་གཏན་ལ་སྙོམས་པར་འཇུག་པ་ན་རྣམ་པར་སྲེག་པར་འགྱུར་བའི་ལས་རྣམས་མི་བྱའོ། །བྱས་པར་གྱུར་པ་རྣམས་ཀྱང་དགེ་སྦྱོང་གིས་ཡིད་ལ་མི་བྱའོ། །གང་དག་ཅེ་ན། འདི་ལྟ་སྟེ། རྣ་བས་རྣམ་པར་ཤེས་པར་བྱ་བའི་སྒྲ་ཡིད་དུ་འོང་བ་རྣམས་ཡང་སྟེ། དེ་ལ་ཡིད་དུ་འོང་བ་རྣམས་ལ་གང་གི་ཚེ་ཆགས་པར་གྱུར་པ་ན་ཡང་དག་པ་ཇི་ལྟ་བ་བཞིན་ཀུན་ནས་ལྟ་བར་བྱེད་དེ། ཇི་ལྟར་སྒྲ་འདི་དག་རྣམས་ནི་མི་བརྟན་པ། མི་རྟག་པ། རབ་ཏུ་རྣམ་པར་ཉམས་པར་འགྱུར་བའི་ཆོས་ཅན་ནོ་ཞེས་དེ་ལྟར་རྣམ་པར་ཤེས་པ་ཆགས་པར་མི་བྱེད་དོ། །ཀུན་ཏུ་སྤྲོ་བར་མི་བྱེད་དོ། །རབ་ཏུ་རྟོག་པར་མི་བྱེད་དོ། །དེའི་ཚེ་འདིས་དཀར་པོའི་མཐའ་རྣམས་བྱས་པར་གྱུར་པ་ཡིན་ནོ། །མཆོག་ཏུ་རྒྱ་ཆེ་བའི་ཚོན་དེས་ཀྱང་ལྷ་དང་མི་རྣམས་སུ་སྐྱེ་བར་འགྱུར་བར་མཆོག་ཏུ་རྣམ་པར་བཀྲ་བར་བྱས་པར་གྱུར་པ་ཡིན་ནོ། །དེ་ལ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་སྒྲ་རྣམ་པར་བཀྲ་བ་དེ་ལ་དཔྱོད་པར་མི་བྱེད་པ་ནས་ཇི་སྲིད་དུ་རི་མོའི་ལས་གཞན་རྣམས་བྱེད་པས་བསམ་གཏན་ལ་སྙོམས་པར་ཞུགས་པ་ན་རབ་ཏུ་སྲེག་པར་འགྱུར་རོ། །གཞན་ཡང་སྒྲ་དེ་ཉིད་ཐོས་པར་གྱུར་ནས་སྨན་པ་བློ་རབ་ཏུ་དམན་པ་ཐོས་པ་དང་མི་ལྡན་པ། བྱིས་པ་སོ་སོའི་སྐྱེ་བོ་དེ་ལྟར་རབ་ཏུ་འཇུག་པར་བྱེད་དོ་ཇི་ལྟར་ཡིད་དུ་འོང་བའི་སྒྲ་ཚིམ་པ་སྐྱེད་པར་བྱེད་པ། ཡིད་འཕྲོག་པར་གྱུར་པ་དེ་ཉིད་ཀྱི་དེ་ཚུལ་བཞིན་མ་ཡིན་པ་ཡིད་ལ་བྱེད་པས་རབ་ཏུ་རྟོག་པར་བྱེད་དོ། །འདུན་པ་སྐྱེད་པར་བྱེད་དོ། །དེ་ལ་ཆགས་པ་དང་ལྡན་པ་འགྱུར་རོ། །དེ་དག་ནི་ནག་པོའི་ཚོན་དང་ལྡན་པས་སེམས་རི་མོ་མཁན་གྱིས་དམྱལ་བ་དང་། ཡི་དགས་དང་། དུད་འགྲོ་རྣམས་ཉེ་བར་བྲིས་པ་ཡིན་ནོ། །དགེ་སྦྱོང་ངན་པ་འདི་ལས་རྣམ་པར་བཀྲ་བ་དེ་དག་བཏང་ནས་གཞན་དག་ཉིད་དུ་རི་མོ་བཀྲ་བར་བྱེད་དོ། །བསམ་གཏན་ལ་སྙོམས་པར་འཇུག་པ་ན་རྣམ་པར་སྲེག་པར་

70-165b

འགྱུར་རོ། །གཞན་ཡང་འཁོར་བ་རྣམ་པར་བཀྲ་བར་གྱུར་པ་དེ་མ་བསམས་པར་དགེ་སྦྱོང་ངན་པ་གཞན་ཉིད་དུ་རི་མོ་བཀྲ་བར་བྱེད་དོ། །གང་ཞེ་ན། འདི་ལྟར་དབང་པོའི་ཡུལ་གྱིས་ཉེ་བར་ཀུན་ནས་བཅིངས་པར་གྱུར་པའི་འཁོར་བ་འདི་ཡིད་དུ་འོང་བར་བྱེད་པའི་ཡུལ་གྱིས་འཇོམས་པར་བྱེད་དོ། །ཇི་ལྟར་ཞེ་ན། འདི་ལྟར་སྣའི་རྣམ་པར་ཤེས་པས་དྲི་རྣམས་ལའོ། །དེ་གང་གི་ཚེ་སྐྱེས་བུ་དམ་པ་རྣམས་ནི་སྣས་དྲི་ཞིམ་པོའམ་མི་ཞིམ་པ་རྣམས་ཀྱང་མི་འཛིན་ནོ། །དེ་མི་མཛེས་པ་རྣམས་ལ་ཡང་ཀུན་ཏུ་མི་ཆགས་སོ། །ཚུལ་བཞིན་མ་ཡིན་པ་ཡིད་ལ་བྱེད་པས་མི་འཕྲོགས་སོ། །དེ་བཞིན་དུ་དྲི་འདི་དག་རྣམས་ནི་མི་རྟག་པ། མི་བརྟན་པ། ཐེར་ཟུག་མ་ཡིན་པ་ཡོངས་སུ་འགྱུར་བའི་ཆོས་ཅན་དང་། ཆོས་རྣམས་འབྱུང་བར་མི་འགྱུར་བ་དང་། བྱུང་ནས་ཀྱང་ཕྱིར་ལྡོག་པར་འགྱུར་རོ། །དེ་ལྟར་གང་གི་ཚེ་ཡང་དག་པ་ཇི་ལྟ་བར་གྱུར་པ་ན་དྲི་རྣམས་སྣོམ་པས་དེ་ལྟར་དེ་ཆགས་པར་མི་འགྱུར་རོ། །ཀུན་ཏུ་སྤྲོ་བར་མི་བྱེད་དོ། །དེའི་ཚེ་དཀར་པོའི་ཆོས་རྣམས་ཡང་དག་པར་འཕེལ་བར་འགྱུར་རོ། །ཁ་དོག་གིས་ཤིན་ཏུ་འབར་བར་ཡང་མི་འགྱུར་རོ། །ཡང་དག་པ་ཇི་ལྟ་བས་དང་ཡོངས་སུ་ཤེས་པར་གྱུར་པ་དེ་དག་གིས་ལྷ་དང་མི་རྣམས་སུ་སྟེ། དེ་དགེ་སྦྱོང་ངན་པ་འདིས་ལས་རྣམ་པར་བཀྲ་བ་དེ་དག་བོར་ནས་གཞན་དག་རྣམས་ཉིད་དུ་རི་མོའི་ལས་རྣམས་བྱེད་པས་བསམ་གཏན་སྒོམ་པ་ན་རྣམ་པར་སྲེག་པར་བྱེད་དོ། །གཞན་ཡང་དྲི་ཞིམ་པ་དང་མི་ཞིམ་པའི་དྲི་དེ་དག་རྣམས་ཉིད་སྣོམ་པར་བྱེད་པ་ན་དྲི་དེ་དག་རྣམས་ཉིད་ལ་ཆགས་པར་བྱེད་དོ། །སྦྱོར་བར་བྱེད་དོ། །སྤྲོ་བར་བྱེད་དོ། །ཚུལ་བཞིན་མ་ཡིན་པར་ཡིད་ལ་བྱེད་པས་འདི་འཕྲོག་པར་འགྱུར་རོ། །གཤེ་བར་བྱ་བའི་གནས་སུ་གྱུར་པ་དེ་ནག་པོའི་ལས་རྣམས་ཀྱིས་བྱུགས་པར་གྱུར་ནས་དམྱལ་བ་དང་། ཡི་དགས་དང་། དུད་འགྲོར་འཁོར་བར་བྱེད་པ་གང་ཡིན་པའི་ལས་རྣམ་པར་བཀྲ་བ་གཞན་དེ་དག་རྣམས་ཉིད་དགེ་སྦྱོང་ངན་པ་འདིས་སྤངས་ནས་རི་མོས་རྣམ་པར་བཀྲ་བའི་ལས་རྣམས་བྱེད་དོ། །བསམ་གཏན་སྒོམ་པ་ན་རྣམ་པར་སྲེག་པར་འགྱུར་རོ། །གཞན་ཡང་ལས་རྣམ་པར་བཀྲ་བ་རྣམས་ལ་འདི་

70-166a

ལྟ་སྟེ། ལྕེའི་རྣམ་པར་ཤེས་པས་རོ་ཡིད་དུ་འོང་བས་ཡིད་དུ་འོང་བར་འགྱུར་བའི་རོ་རྣམས་མྱངས་པར་གྱུར་ན་ཡང་དགའ་བར་མི་བྱེད་དོ། །ཁྲོ་བར་མི་བྱེད་དོ། །འཆིང་བར་མི་འགྱུར་རོ། །ཚུལ་བཞིན་དུ་ཡིད་ལ་བྱེད་པ་དང་ལྡན་པས་རོ་དེ་ཉིད་རྣམ་པར་འབྱེད་པར་བྱེད་པ་སྟེ། ཇི་ལྟར་རོ་འདི་དག་རྣམས་ནི་བྱུང་ནས་ཀྱང་མེད་པར་འགྱུར་རོ། །ལག་པའི་མཐིལ་གྱིས་བཅུག་པར་གྱུར་པའི་ཟས་འདི་དག་རྣམས་ནི་ལྕེ་ལ་འབབས་སོ། །དེ་རྣམས་ལ་མངར་མྱོས་ཞེས་བྱ་བའི་སྲིན་རྣམས་ཀྱིས་ཀྱང་རེག་ནས་ལྷན་ཅིག་ཏུ་མྱོང་བར་བྱེད་པ་ཉིད་ན་གླད་པ་ལས་སྣབས་ཞེས་བྱ་བའི་བློ་འབྱུང་བའི་གླད་པ་རྣམས་རབ་ཏུ་ཟགས་ནས། སྣའི་སྦུབས་ནང་ན་མར་རབ་ཏུ་འབབས་པར་འགྱུར་ལ། རབ་ཏུ་ཟགས་པའི་རྣག་གི་ཐིགས་པ་དེ་དག་རྣམས་དང་ལྷན་ཅིག་ཏུ་ལྕེས་གཡུགས་ཤིང་། འགྲམ་སོའི་རང་ཐག་གི་དབུས་སུ་ཕྱེ་མར་བཏགས་པ་རྣམས་ལྕེས་མྱོང་བར་བྱེད་པ་གང་གིས་བྱིས་པ་འདི་དག་རྣམས་འཆིང་བར་བྱེད་པ་ཡིན་ནོ། །རོ་དེ་དག་རྣམས་ཉིད་ཡང་དག་པ་ཇི་ལྟ་བ་བཞིན་དུ་འདིས་སེམས་པར་བྱེད་དོ། །དེས་ཚུལ་བཞིན་ཡིད་ལ་བྱེད་པས་རྣམ་པར་འབྱེད་པར་ཡང་བྱེད་དོ། །འདི་ནི་དཀར་པོའི་ཁ་དོག་རྣམས་དང་ཡང་དག་པར་ལྡན་པས་ལྷ་དང་མི་རྣམས་སུ་མཆོག་ཏུ་སྐྱིད་པར་འགྱུར་རོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ལས་རྣམ་པ་སྣ་ཚོགས་པ་རྣམས་ཀྱིས་འཇིག་རྟེན་འདི་རྣམ་པར་བཀྲ་བར་བྱས་པ་དེ་དག་རྣམས་མི་རིག་པར་བསམ་གཏན་བསམ་པར་བྱེད་པ་ན་བར་དུ་གཅོད་པའི་རི་མོ་བཀྲ་བ་གཞན་དག་རྣམས་ཉིད་བྱེད་པ་ཡིན་ནོ། །གཞན་ཡང་ལྕེ་ལ་བབས་པར་གྱུར་པའི་རོ་དེ་དག་ཉིད་ལ་སྲིན་མངར་མྱོས་ཀྱིས་རེག་པར་གྱུར་པ་རྣམས་ལ་མྱོང་བར་བྱེད་པ་ན་བློ་གྲོས་དམན་པའི་ཕྱིར་ན། ཀྱེ་མ་ཟས་འདི་དག་ནི་ཤིན་ཏུ་དགའ་བར་གྱུར་པ། མཆོག་ཏུ་བསོད་པ། མཆོག་ཏུ་མཛེས་པ། མཆོག་ཏུ་རྒྱ་ཆེ་བའི་མདོག་དང་། རོ་དང་། དྲི་དང་ལྡན་པར་གྱུར་པ། མཆོག་ཏུ་གཙང་བར་གྱུར་པ་ཞེས་ཟས་དེའི་རྒྱགས་པས་རྒྱགས་ནས། ལུས་དང་། ངག་དང་། ཡིད་ཀྱིས་ཉེས་པར་སྤྱད་པ་རྣམས་སྤྱོད་པ་འདི་དག་རྣམས་ནི་ཚོན་ནག་པོས་རྣམ་པ་སྣ་ཚོགས་པར་བྱས་ནས་དུད་འགྲོར་སྐྱེ་བར་འགྱུར་རོ། །ཚུལ་བཞིན་མ་ཡིན་པ་ཡིད་ལ་བྱེད་པར་

70-166b

ཀུན་ནས་འཁྲིད་པར་བྱེད་དོ། །དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་ལས་རྣམ་པ་སྣ་ཚོགས་པ་དེ་དག་རྣམས་བོར་ནས་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་ཐ་མལ་པའི་ལས་གཞན་རྣམས་ཉིད་བྱེད་དོ། །གཞན་ཡང་རྣམ་པར་བཀྲ་བར་གྱུར་པའི་ལས་གང་དག་གིས་འཇིག་རྟེན་འདི་དག་རྣམས་རྣམ་པར་བཀྲ་བར་བྱས་པ་ཡིན་ནོ། །དཔེར་ན་འཇིག་རྟེན་དབང་པོ་རྟུལ་པོ་རྣམས་ནི་ཡུལ་རྣམས་ཀྱིས་འཁྲིད་པར་བྱེད་དོ། །འདི་ལྟ་སྟེ། ལུས་ཀྱི་རྣམ་པར་ཤེས་པར་བྱ་བ་རེག་བྱའོ། །དེ་ལ་གང་དག་ཡང་དག་པ་ཇི་ལྟ་བ་ཁོ་ནར་ཚུལ་བཞིན་ཡིད་ལ་བྱེད་པས་འཁྲིད་པར་བྱེད་དེ། ཇི་ལྟར་ཡང་རེག་བྱ་ཞེས་བྱ་བའི་དོན་འདི་ཡང་རེག་བྱ་ནི་གསུམ་འདུས་པས་ཀུན་དུ་སྐྱེས་པ་ཡིན་ཏེ། འདི་ནི་རྟག་པ་མ་ཡིན། བརྟན་པ་མ་ཡིན། ཐེར་ཟུག་མ་ཡིན། བྱེད་པ་པོ་མ་ཡིན་གྱི། འདི་ནི་མདོག་ཙམ་འབའ་ཞིག་གིས་ཡིད་དགའ་བར་གྱུར་པ་དང་། ལུས་འདི་ནི་དབང་པོའི་རྗེས་སུ་འཐུན་པ་ཙམ་འབའ་ཞིག་ཏུ་གཙང་བ་ཡིན་གྱི་རྟག་པ་ནི་མ་ཡིན་ནོ། །བདེ་བ་མ་ཡིན། བདག་དང་བཅས་པ་ཡང་མ་ཡིན་གྱི། འདི་ནི་ཚོགས་པ་འདུས་པ་ཙམ་འབའ་ཞིག་ཡིན་ཏེ། འབྱུང་བ་ཆེན་པོ་བཞི་ལས་བྱུང་བའི་ཟ་མ་ཏོག་ཏུ་གྱུར་པའོ། །ཟུག་རྔུར་གྱུར་པ་རྟག་ཏུ་ཉེ་བར་འཚེ་བར་བྱེད་པ། རྟག་པ་ཁོ་ནར་ཡང་ནད་ཀྱིས་ཉེ་བར་འཚེ་བར་བྱེད་པ། ཉེ་བར་འཚེ་བ་ཐམས་ཅད་ཀྱིས་འཁྲིད་པར་བྱེད་པ་ཡིན་ནོ། །དེ་གང་དག་ཁོ་ནས་ཡང་དག་པ་ཇི་ལྟ་བར་ལུས་དེ་ཉིད་དང་རེག་བྱ་ལ་ཡང་སོ་སོར་རྟོག་པར་བྱེད་དོ། །དེའི་ཚེ་འདི་རེག་བྱས་འདི་འཁྲིད་པར་མི་འགྱུར་རོ། །རེག་བྱ་འདི་ནི་གཞན་མ་ཡིན་གྱི། རེག་བྱ་འདི་ནི་བློ་བུར་འབའ་ཞིག་གོ། །འདི་ནི་ཉེ་བར་འཚེ་བ་དང་བཅས་པའོ། །རང་དབང་མེད་པ་ཡིན་ནོ་ཞེས་གང་དག་དེ་བཞིན་དུ་ཚུལ་བཞིན་ཡིད་ལ་བྱེད་པས་དཔྱོད་པར་བྱེད་དོ། །དེ་དག་རྣམས་ནི་དཀར་པོའི་ཚོན་གྱིས་རྣམ་པར་བཀྲ་བར་བྱས་ནས། ལྷ་དང་མིར་སྐྱེ་བར་འགྱུར་བ་དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དཔྱོད་པར་མི་བྱེད་དོ། །སེམས་རི་མོ་མཁན་གྱིས་འཇིག་རྟེན་པ་འདིའི་ལས་རྣམས་རྣམ་པར་བཀྲ་བར་བྱས་པར་གྱུར་པ་དེ་འདིས་བཏང་ནས། བསམ་གཏན་ལ་སྙོམས་པར་འཇུག་པ་ན་བར་ཆད་བྱེད་པའི་ཐ་མལ་པའི་ཚོན་རྣམས་ཀྱིས་རི་མོས་

70-167a

བཀྲ་བའི་ལས་གཞན་རྣམས་ཉིད་བྱེད་དོ། །གཞན་ཡང་རེག་བྱ་དེ་ཉིད་ལ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་བློ་གྲོས་དམན་པ་རྣམས་ཀྱིས་རེག་བྱ་དེ་གཞན་ཉིད་དུ་རྣམ་པར་རྟོག་པར་བྱེད་དོ། །ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པས་ཇི་ལྟར་བདག་གི་རེག་བྱ་འདི་དག་ནི་མཆོག་ཏུ་བདེ་བར་གྱུར་པ། མཆོག་ཏུ་ལུས་རྒྱས་པའི་རྒྱུ་འདིས་བདག་ཚིམ་པར་བྱས་པ་དག་གིས་བདག་བདེ་བར་གནས་པར་བྱའོ། །དེ་བཞིན་དུ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་གང་ཡིན་པ་དེ་དག་རྣམས་ཀྱིས་རེག་བྱ་ལ་ཚུལ་བཞིན་མ་ཡིན་པའི་ཡིད་ལ་བྱེད་པས་དཔྱོད་པར་བྱེད་དོ། །འདི་དག་རྣམས་ནི་ཚོན་ནག་པོ་དང་ཀུན་ནས་ལྡན་པར་གྱུར་པས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །དེ་ནི་ཚོན་ནག་པོས་རྣམ་པར་བཀྲ་བར་བྱས་པ་ཡིན་ནོ། །དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དཔྱོད་པར་མི་བྱེད་ཅིང་། ལས་རྣམ་པར་བཀྲ་བ་དེ་དག་སྤངས་ནས་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་རྣམ་པར་བཀྲ་བ་གཞན་ཉིད་དུ་གྱུར་པ་འཇིག་རྟེན་པའི་ཚོན་གཞན་ཉིད་ཀྱིས་རྣམ་པར་བཀྲ་བར་བྱེད་དོ། །གཞན་ཡང་དགེ་སྦྱོང་དུ་ཁས་འཆེས་པ་འཇིག་རྟེན་པའི་ལས་རྣམས་ལ་མངོན་པར་དགའ་བར་གྱུར་པས་ཡིད་ཀྱིས་དམ་པའི་ཆོས་རྣམས་སེམས་པར་མི་བྱེད་དོ། །འཕགས་པའི་བདེན་པ་བཞིར་འགོག་པ་དང་། ལམ་རྣམ་པ་བཅུ་དྲུག་དབུགས་འབྱུང་བ་དང་རྔུབ་པ་དྲན་པ་དང་། བསམ་གཏན་བཞི་དང་། ཚངས་པའི་གནས་པ་བཞི་དང་། འབྲས་བུ་བཞི་དང་། ཆོས་དེ་དག་རྣམས་སྤངས་ནས་རང་བཞིན་གྱིས་མི་ཤེས་པར་གྱུར་པ། ཆགས་པས་བདག་གི་སེམས་ཀུན་ནས་བསྒོ་བར་བྱེད་པ་འབའ་ཞིག་ཏུ་གྱུར་པ་གཞན་ཉིད་བྱེད་དེ། བསམ་གཏན་སྒོམ་པ་ན་བར་དུ་གཅོད་པར་བྱེད་པར་གྱུར་པ་གཞན་དུ་ན་ཀུན་ནས་ཉོན་མོངས་པར་གྱུར་པ་ཤེས་པ་མ་ཡིན་པའི་རྣམ་པར་བཀྲ་བའི་ལས་གཞན་རྣམས་ཉིད་བྱེད་དོ། །གང་གི་རྒྱུས་ཚུལ་བཞིན་མ་ཡིན་པའི་ཡིད་ལ་བྱེད་པ་རྣམས་འཕེན་པར་གྱུར་པས་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་ཆེན་པོར་གྱུར་པ་གང་གི་ཚེ་བུད་མེད་རྣམས་མངོན་པར་འདྲིད་པར་བྱེད་པ་ནི་དམྱལ་བར་འགྲོ་བར་འགྱུར་བའི་རྒྱུ་ཡིན་ཏེ། མཛེས་པར་གྱུར་པ། རྒྱན་དང་ཆ་བྱད་སྣ་

70-167b

ཚོགས་པ་དང་ལྡན་པ་མཐོང་ན་སྡུག་པར་གྱུར་པའི་གཟུགས་བྱིས་པ་སོ་སོའི་སྐྱེ་བོ་རྣམས་ཡིད་འཕྲོག་པར་བྱེད་པའི་ལུས་མངོན་པར་མཐོང་ནས་ཀྱང་དེ་དག་རྣམས་ཡིད་འཕྲོག་པར་འགྱུར་བ་དང་། ཡིད་འདོད་ཆགས་སུ་ཆུད་པར་ཡང་འགྱུར་ན་གང་དག་འདིར་བུད་མེད་དངོས་སུ་ཡོད་པ་རྣམས་ལ་ལྟ་ཅི་སྨོས། གཞན་དག་རྣམས་དང་བདག་ཉིད་ཀྱང་ཀུན་དུ་འདོད་ཆགས་པར་བྱེད་པ་པོའི་ལུས་ཞིག་པར་གྱུར་པ་ན་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། ལས་ཀྱིས་བཀྲ་བ་མ་བསམས་པར། །གང་ཞིག་རི་མོ་ལ་འཇུག་པ། །རི་མོའི་ལས་ཀྱིས་དེ་བསྲེགས་ནས། །དམྱལ་བའི་རྗེས་སུ་རྒྱུག་པ་ཡིན། །གང་ཞིག་བདེ་ལེགས་མི་སེམས་པར། །ཟག་བཅས་ལ་ནི་ཉེར་ཆགས་པ། །སྙིང་ལ་ཆགས་ཅན་རྨོངས་པ་དེ། །གཡང་སའི་རྗེས་སུ་རྒྱུག་པ་ཡིན། །ལོང་བ་ལ་བརྟེན་སྐྱེས་བུ་གང་། །བསམ་གཏན་སྒོམ་པར་བྱེད་པ་ན། །རང་ཉིད་བཀྲ་བ་དེ་བཏང་ནས། །དེ་ལ་བྱིས་རྣམས་རབ་ཏུ་ཆགས། །རི་མོའི་ལས་ལ་རྣམ་སྤྱོད་པའི། །རི་མོའི་ཞགས་པས་བྱིས་པ་དེ། །རི་མོའི་ལས་ཀྱིས་རྨོངས་པ་ཡིས། །དབང་མེད་པར་ནི་དམྱལ་བར་ཁྲིད། །ཚོན་གྱི་རི་མོ་བཀྲར་གྱུར་ཡང་། །སེམས་ཀྱི་རི་མོའི་དཔེར་མི་ཕོད། །ཆར་གྱིས་རི་མོ་དེ་རབ་འཇིག །ལས་ཀྱི་རི་མོ་འདི་འཇིག་མིན། །ཤིན་ཏུ་བཀྲ་བའི་རི་མོ་གང་། །རི་མོ་དམ་པར་དེ་མི་འདོད། །ལས་ཀྱི་རི་མོའི་རི་མོ་ཆེ། །ཁམས་གསུམ་གོ་འཕང་བཀྲ་བར་བྱས། །སྣ་ཚོགས་རི་མོའི་གཟུགས་ཀྱིས་གང་། །སེམས་ཅན་འགྲོ་བ་ལྔ་ན་འཁྱམ། །ལས་རྣམས་སྣ་ཚོགས་དེ་དག་ཀུན། །རི་མོ་མཁན་གྱིས་རྣམ་པར་བྲིས། །རི་མོ་མཁན་གྱི་སེམས་འདིས་ནི། །ལས་ཀྱི་དྲ་བ་རྣམ་བཀྲར་བྱས། །གང་འདི་དྲ་བས་བཅིངས་ནས་ནི། །འགྲོ་བ་འཁྲུལ་བ་རྣམ་པར་རྨོངས། །ཆར་ཚད་རྡུལ་དང་དུ་བ་ཡིས། །ཚོན་སྐྱེས་རི་མོ་འཇིག་པ་ཡིན། །བསྐལ་པ་བྱེ་བ་སྟོང་དུ་ཡང་། །སེམས་ཀྱི་རི་མོ་འཇིག་མི་འགྱུར། །ས་གཞི་རྣམས་ནི་འཇིག་འགྱུར་ཞིང་། །རྒྱ་མཚོ་ཡང་ནི་སྐམ་འགྱུར་ཡང་། །སེམས་ཀྱིས་བྱས་པའི་རི་མོ་གང་། །དེ་ནི་ཉམས་སུ་མྱོང་བར་གནས། །རང་གི་ལས་ཀྱི་རི་མོ་ཡང་། །རྣམ་པར་རྨོངས་པས་མ་མཐོང་ངོ་། །

70-168a

ཇི་སྲིད་དུ་ནི་ནོར་འདོད་པས། །རི་མོ་གཞན་ནི་རབ་ཏུ་བྱེད། །དེའི་ཕྱིར་ན་བསམ་གཏན་སྒོམ་པར་བྱེད་པ་ན་བར་དུ་གཅོད་པར་གྱུར་པ་སྐྱོན་དུ་མ་ཀུན་དུ་རྟོགས་པར་འགྱུར་བ། མ་གུས་པར་འགྱུར་བ་ལ་སྟེན་པར་བྱེད་པའི་རི་མོའི་ལས་རྣམས་དགེ་སློང་གིས་མི་བྱའོ། །དེ་དག་ལ་རྣམ་པར་གཡེང་བར་གྱུར་པའི་ཡིད་ཀྱིས་བདེ་ལེགས་ཐོབ་པར་མི་འགྱུར་རོ། །དགེ་བའི་ལས་རྣམས་ལས་གཅིག་ཀྱང་ཡིད་ལ་བྱས་ཏེ་སྒོམ་པར་མི་བྱེད་དོ། །དེའི་ཕྱིར་ན་བདེ་ལེགས་ལག་ཏུ་འོང་བར་འདོད་པ་རྣམས་དང་། ལས་ཀྱི་འཇིགས་པས་འཇིགས་པར་གྱུར་པ་རྣམས་ཀྱིས་འདི་ལྟར་བསླབ་པར་བྱ་སྟེ། ཚོན་གྱིས་བསྒོ་བར་མི་བྱེད་པའོ། །རྗེས་སུ་གཟུང་བ་སྟེ། འདི་ནི་བདག་ཅག་རྣམས་ལ་རྗེས་སུ་གདམས་པའོ། །སྐྱོན་དེ་དག་རྣམས་རིག་པར་བྱས་ལ་ཆོས་གསུམ་པ་འདི་དགེ་སྦྱོང་གིས་མི་བྱའོ། །གཞན་ཡང་ཆོས་བཞི་པ་དགེ་སྦྱོང་གིས་མི་བྱ་སྟེ། འདི་ཡང་གང་ཞེ་ན། ཐོས་པ་ངན་པ་སྙན་དངགས་སྡེབ་པའོ། །འདི་ན་དགེ་སློང་གང་དག་བུ་དང་། བུ་མོ་དང་། རང་གི་སྐྱེ་བོ་རྣམས་དང་། སྤུན་དང་། ཕ་དང་། གཉེན་བཤེས་རྣམས་ཀྱང་སྤངས་ནས་རབ་ཏུ་བྱུང་སྟེ། ཉོན་མོངས་པ་སྤང་བའི་དོན་དུ་བསམ་གཏན་སྒོམ་པར་བྱེད་པར་གྱུར་ཅིང་། ཉོན་མོངས་པ་རྣམས་ཀྱང་ཡིད་རྩེ་གཅིག་པས་གཞོམ་པར་བྱ་བ་ཡིན་གྱི། རྣམ་པར་གཡེང་བའི་ཡིད་ཀྱིས་ནི་མ་ཡིན་ནོ། །གང་དག་སྙན་དངགས་བྱེད་པར་གྱུར་པ་དེ་དག་རྣམས་ནི་སྣ་ཚོགས་པ་རྣམས་ལ་བརྟེན་ནས་བློ་རྣམ་པར་གཡེང་བར་འགྱུར་རོ། །དེའི་ཡིད་རྣམ་པར་གཡེང་བར་གྱུར་པས་ནི་དགེ་བའི་ཆོས་རྣམས་ཀྱི་བར་དུ་གཅོད་པར་བྱེད་པར་འགྱུར་རོ། །བསམ་གཏན་སྒོམ་པར་མི་བྱེད་དོ། །བསམ་གཏན་དུ་མི་བྱེད་དོ། །བླ་མ་ལ་སྟེན་པར་མི་བྱེད་དོ། །དམ་པའི་ཆོས་ཉན་པ་ལ་མངོན་པར་དགའ་བར་མི་འགྱུར་རོ། །དཀོན་མཆོག་གསུམ་མཆོད་པ་ལ་མངོན་པར་དགའ་བར་མི་འགྱུར་རོ། །ངེས་པར་འབྱུང་བའི་ལམ་ལ་མངོན་པར་དགའ་བའི་རང་བཞིན་ཅན་དུ་མི་འགྱུར་རོ། །རྟག་པར་རྒྱུན་དུ་ཡང་སྙན་དངགས་སྡེབ་པ་ལ་མངོན་པར་དགའ་བར་འགྱུར་རོ། །དེ་སྙན་དངགས་དེའི་རྟེན་གྱི་དོན་དུ་ཐོས་པ་ངན་པ་རྣམ་པ་སྣ་ཚོགས་པ་རྣམས་ཉན་པར་བྱེད་དོ། །གང་དག་ཆོས་ཉིད་ལས་འདས་པར་གྱུར་པ་ཉན་པ་ལ་དགའ་བར་

70-168b

འགྱུར་བ་ཙམ་འབའ་ཞིག་པ་ཚུལ་བཞིན་མ་ཡིན་པའི་ཡིད་ལ་བྱེད་པ་ཀུན་དུ་སྐྱེད་པར་བྱེད་པ་འབྲེལ་པ་མེད་པ་རྣམས་རྗོད་པར་བྱེད་པ་དང་ལྡན་པར་གྱུར་པ་དེ་དག་ལ་ཡང་དགེ་སྦྱོང་ངན་པ་འདི་དད་པར་བྱེད་དོ། །དེ་ཡང་དང་ཡང་དུ་ཉན་པར་བྱེད་པས་ཐོས་པ་ངན་པའི་ལམ་དེ་ཉིད་ཀྱིས་འཁྲིད་པར་བྱེད་དོ། །དེས་ཁྲིད་པར་གྱུར་པས་སླར་ཉིད་ཀྱང་ཁྱིམ་པར་འགྱུར་རོ། །དེ་ཡང་དམ་པའི་ཆོས་ལས་ཀྱང་ཡོངས་སུ་ཉམས་པར་འགྱུར་རོ། །དེ་ནི་སྙན་དངགས་ལ་མངོན་པར་དགའ་བ་ཉིད་ཀྱིས་དགའ་བར་གྱུར་པ་དེ་སྡེབས་བྱེད་པར་གྱུར་གྱི། དེ་བསམ་གཏན་སྒོམ་པ་ལ་ནི་ལེ་ལོ་ཅན་དུ་འགྱུར་ཞིང་དགེ་འདུན་གྱི་ནང་དུ་འཇུག་པ་དང་ལྡན་པ་ཡང་མ་ཡིན་ནོ། །ཟས་དང་གནས་ལ་ལོངས་སྤྱོད་པ་རྣམས་ཐམས་ཅད་ཀྱིས་ཀྱང་དེའི་བར་དུ་གཅོད་པར་འགྱུར་རོ། །གང་དག་ལེ་ལོ་ཅན་དུ་གྱུར་པ་རྣམས་དང་པོ་ཁོ་ནར་ཚུལ་ཁྲིམས་འཆལ་བས་ནི་དགེ་འདུན་གྱི་ནང་དུ་འཇུག་པར་མི་བྱ་ན་གནས་མལ་རྣམས་དང་། ནད་ཀྱི་རྐྱེན་སྨན་གྱི་ཚད་དུ་གྱུར་པ་དང་། གཞན་རྣམས་ལྟ་བརྗོད་ཀྱང་ཅི་དགོས་ནས། གསོང་པོར་སྨྲས་པ་དང་། ཕྱག་བྱས་པས་ཀྱང་ལེ་ལོ་ཅན་གྱི་བར་ཆད་བྱེད་པར་འགྱུར་རོ། །བསམ་གཏན་དུ་བྱ་བ་ལས་སྙན་དངགས་གང་བསྡེབས་པར་གྱུར་པ་ལ་ཆེད་ཆེར་བྱེད་པས་བརྩམ་པར་འོས་པའི་སྙན་དངགས་དེ་དག་བྱེད་ལ་དེ་དག་འབའ་ཞིག་ཏུ་ནི་མ་ཟད་ཀྱི། ཡང་དང་ཡང་དུ་དེ་ལ་འགྲོ་བ་ཁོ་ན་དང་། དེའི་ཚེ་དེ་ལ་རྟེན་པ་ལ་སེམས་མངོན་པར་དགའ་བ་དང་། རྣམ་པ་སྣ་ཚོགས་པའི་ཐབས་རྣམས་ཀྱི་བློ་རྣམ་པ་སྣ་ཚོགས་པ་དང་། རྣམ་པར་རྟོག་པ་དུ་མ་རྣམས་ཀྱིས་ཀུན་ནས་བཅོམ་པ་དང་། རྣམ་པ་སྣ་ཚོགས་པའི་རོ་རྣམས་སྐྱེད་པར་བྱེད་པའི་སྙན་དངགས་བྱེད་དོ། །དེས་དེའི་ཡིད་རྣམ་པར་དཀྲུགས་པར་གྱུར་པས་ཚེའི་འདུ་བྱེད་རྣམས་ནི་ཟད་པར་གྱུར་ལ། འཆི་བདག་གི་རྒྱལ་པོ་ནི་ཉེ་བར་འོངས་པར་གྱུར་པས་བྱ་བ་རྣམས་མ་བྱས་པར་ཡང་གྲོགས་མེད་ཅིང་། འཇིག་རྟེན་འདས་པའི་ལམ་དང་རྣམ་པར་བྲལ་བ་གང་ཡིན་པའི་ཕྱོགས་སུ་འགྲོ་བར་བྱ་དགོས་སོ། །དེ་ཡང་སྙན་དངགས་ཀུན་དུ་སྡེབ་པ་དེ་ལ་བློ་སོང་བར་གྱུར་པ་ཡིན་ནོ། །སྐྱེས་བུ་འདི་ནི་དེས་རྨོངས་པར་གྱུར་ནས་བར་དུ་གཅོད་པ་ཆེན་པོ་རྣམས་ཀྱིས་བསླུས་པའི་མཆོག་ཐོབ་པར་འགྱུར་རོ། །གྱ་རྒུད་

70-169a

ཀྱིས་མི་ཐོབ་པར་གྱུར་ཅིང་དབང་པོ་རྣམས་ཚང་བ་དང་། རབ་ཏུ་བྱུང་བར་གྱུར་པ་དང་། མཆོག་ཏུ་དགའ་བ་དེ་དག་ཐོབ་ནས་ཀྱང་ཅིའི་ཕྱིར་སྙན་དངགས་སྡེབ་པས་བསླུས་ནས་དུས་བྱེད་པར་འགྱུར་བ་ནི་རང་གི་དོན་ལས་ཉམས་པ་ཡིན་ནོ། །སྙན་དངགས་བྱེད་པར་གྱུར་པ་ན་སྐྱོན་གཞན་ཡང་ཡོད་དེ། དེ་ཡང་ཕལ་ཆེར་རྣམ་པར་རྟོག་པས་ཉེ་བར་བཅོམ་པའི་སེམས་དྲི་མ་ཅན་དྲི་མ་ཅན་གྱི་ཀུན་ཏུ་སྤྱོད་པ་དག་གིས་སྙན་དངགས་བྱེད་དོ། །རྣམ་པར་རྟོག་པ་དེ་ཉིད་ལས་གཞན་རྣམ་པར་རྟོག་པ་དེ་ལྟ་བུའི་རྣམ་པ་ནི་འགའ་ཡང་མི་འབྱུང་ངོ་། །ཇི་ལྟར་བུད་མེད་ཀྱི་རྣམ་པར་རྟོག་པ་རྣམས་ནི་དགེ་སློང་གིས་མི་བྱའོ། །རྣམ་པར་རྟོག་པ་དེས་ཀྱང་རང་ཉིད་སྲེག་པར་བྱེད་དོ། །མེ་ཇི་ལྟ་བར་རང་གི་རྣམ་པར་རྟོག་པས་སྲེག་པར་འགྱུར་རོ། །དེ་ལྟར་བུད་མེད་ཀྱི་རྣམ་པར་རྟོག་པ་རྣམས་ཀྱང་བྱིས་པའི་སྐྱེ་བོའི་ཚོགས་རྣམས་ཐམས་ཅད་ཉིད་ལ་སྐྱེ་བ་གཞན་བརྒྱ་སྟོང་གི་བར་དུ་ཡང་མཐོང་བ་ཡིན་ནོ། །སྙན་དངགས་རྣམས་ཀྱང་དང་པོ་ཁོ་ན་བུད་མེད་རྣམས་ལ་ཅི་ནས་ཀྱང་འབབ་པ་ཡིན་ནོ། །དེ་བུད་མེད་ཀྱི་རྣམ་པར་རྟོག་པས་ཉེ་བར་བཅོམ་པར་གྱུར་པས་ཇི་སྲིད་དུ་རྐང་པ་ནས་མགོ་བོའི་བར་རྣམས་ལ་དེ་སྲིད་དུ་རྣམ་པ་དུ་མའི་ཚུལ་བཞིན་མ་ཡིན་པ་ཡིད་ལ་བྱེད་པ་སྐྱེད་པར་འགྱུར་བ་བྱིས་པའི་སྐྱེ་བོ་རྣམས་ཐམས་ཅད་ཀྱི་ཡིད་འཕྲོག་པར་བྱེད་པར་སྙན་དངགས་ཀྱིས་བུད་མེད་ཀྱི་ལུས་ཀྱི་ཆ་རྣམས་དེས་རབ་ཏུ་བསྔགས་པར་བྱེད་དོ། །མཆོད་པར་བྱེད་དོ། །ཡིད་ལའང་རབ་ཏུ་འཇོག་པར་བྱེད་དོ། །གཙང་མ་ཡིན་པར་རབ་ཏུ་སྟོན་ནོ། །དེ་བདག་ཉིད་ཐམས་ཅད་ཀྱིས་ཚུལ་བཞིན་མ་ཡིན་པ་ཡིད་ལ་བྱེད་པས་འཁྲིད་པར་འགྱུར་ལ་གཞན་དག་རྣམས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པ་དེ་ལ་རབ་ཏུ་འགོད་པར་བྱེད་དོ། །རང་དང་གཞན་ཡོངས་སུ་ཉམས་པར་བྱེད་པ་པོ་དེ་ནི་ཤི་བར་གྱུར་ནས་ལུས་ཞིག་པའི་འོག་ཏུ་ངན་སོང་ལོག་པར་ལྟུང་བ་ཐབས་མ་ཡིན་པས་ཀུན་དུ་བཅོམ་པའི་དམྱལ་བར་སྐྱེའོ། །ཐོས་པ་ངན་པ་སྙན་དངགས་སྡེབ་པར་བྱེད་པ་དེའི་སྐྱོན་ནི་འདི་ཡིན་ནོ། །གཞན་ཡང་ཐོས་པ་ངན་པ་སྙན་དངགས་རྣམས་སྡེབ་པར་བྱེད་པའི་སྐྱོན་ཆེན་པོ་ནི་འདི་ལྟ་སྟེ། དགེ་སྦྱོང་ངན་པ་དེ་སྙན་དངགས་སྡེབ་པར་བྱེད་པས་རྒྱགས་ཤིང་མུན་པར་གྱུར་ཏེ། བློ་ཤིན་ཏུ་ལོང་བར་གྱུར་པའི་ཕྱིར་

70-169b

ཐོས་པ་མ་ཡིན། མཐོང་བ་མ་ཡིན། གཞན་དག་རྣམས་ཀྱི་དྲུང་ན་ཉན་པ་ཡང་མ་ཡིན་ནོ། །དེ་ལ་འདི་སྙན་དངགས་སྡེབ་པར་བྱེད་པར་འདོད་པས་ཀྱང་ངེས་པར་འཆིང་བར་འགྱུར་རོ། །རབ་ཏུ་གནས་པར་བྱེད་དོ། །གཞན་དག་རྣམས་ཀྱང་རྣམ་པ་སྣ་ཚོགས་པའི་ཚིག་གི་རྐང་པ་རྗོད་པ་རྣམས་ཀྱིས་ཉེ་བར་འབྲེལ་བར་བྱེད་དོ། །ཇི་ལྟར་སྐྱེ་བར་འགྱུར་བ་དེ་བཞིན་དུ་དེ་ཉིད་ཀྱིས་དོན་དེ་དག་རྣམས་དངོས་སུ་མཐོང་བར་གྱུར་ནས་དེ་དག་གིས་སྐྱེས་བུ་ངན་པ་དེ་དེ་བཞིན་དུ་འཇོམས་པར་འགྱུར་རོ། །རང་གི་སེམས་ཀྱིས་ཀུན་ནས་སློང་བས་ཡོངས་སུ་བསྡེབས་པའི་རྫུན་དེ་དག་རྣམས་ཀྱི་སྐྱོན་དེས་ལུས་ཞིག་ནས་ཤི་བའི་འོག་ཏུ་ཐབས་མིན་པའི་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །སྙན་དངགས་སྡེབ་པར་བྱེད་པའི་སྐྱོན་གྱིས་གཞན་ཡང་སྐྱོན་ཆེན་པོར་འགྱུར་རོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྣམས་ཀྱི་ནི་འདི་ལྟ་སྟེ། ཐོས་པ་ངན་པ་སྙན་དངགས་སྡེབ་པ་ལ་མངོན་པར་དགའ་བར་གྱུར་པས་སྙན་དངགས་གཞན་དག་རྣམས་རྙེད་པ་ཡང་ཉན་པར་བྱེད་དོ། །དེས་དེ་དག་རྣམས་ཐོས་ནས་ཀྱང་རང་གི་རྣམས་སྒྲུབ་པའི་དོན་དུ་རབ་ཏུ་ཞེ་སྡང་བར་བྱེད་པ་དང་། སྔོན་གྱི་སྙན་དངགས་པ་རྣམས་ལ་འཕྱ་བར་བྱེད་དོ། །མཛེས་པར་གྱུར་པའི་སྙན་དངགས་ལ་རབ་ཏུ་ཞེ་སྡང་བར་བྱེད་པའི་དགེ་སྦྱོང་ངན་པ་དེ་ནི་དེ་ལྟར་བསམ་གཏན་སྒོམ་པས་སྟོང་པར་གྱུར་ནས་གནོད་སེམས་མངོན་པར་འཕེལ་བར་འགྱུར་རོ། །དྲི་མ་ཅན་གྱི་ལས་རྣམས་ནི་ཀུན་ནས་རབ་ཏུ་བསགས་པར་འགྱུར་ལ། འདིའི་དཀར་པོའི་ཆོས་རྣམས་ནི་ཟད་པར་འགྱུར་བས་འཇིག་རྟེན་ཕ་རོལ་ཏུ་བདེ་བར་བྱེད་པའི་གྲོགས་ཚངས་པ་མཚུངས་པར་སྤྱོད་པ་རྣམས་དེ་ལྟར་གཤེ་བར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་རྟག་ཏུ་བག་མེད་པ་ལ་སེམས་པ་རྣམས་ལ་ནི་གཞན་ཡང་སྐྱོན་ཆེན་པོ་ཡོད་དེ། ཐོས་པ་ངན་པ་སྙན་དངགས་རྣམས་སྡེབ་པ་ལ་ཆེད་ཆེར་བྱེད་པ་རྣམས་ནི་ཉིན་མེད་མཚན་མེད་དུ་དེ་ལ་བློ་བཟོད་བླགས་མེད་པར་གྱུར་ནས་སྙན་དངགས་སྡེབ་པ་ལ་ཤིན་ཏུ་ཆེད་ཆེ་བར་འགྱུར་རོ། །དེ་དམ་པའི་ཆོས་སེམས་པར་བྱེད་པ་ཉིད་མ་ཡིན་ནོ། །སྒོམ་པར་མི་བྱེད་དོ། །ཉོན་མོངས་པ་རབ་ཏུ་ཞི་བར་བྱ་བའི་ཆེད་དུ་མི་འཇུག་གོ། །དེ་ཉན་པ་ལ་བློ་ཞུགས་པར་གྱུར་ན་ཡང་དམ་པའི་ཆོས་

70-170a

འབྱུང་བར་དོན་མེད་དེ་ཕྱིར་ལོག་ནས་འགྲོའོ། །གང་བསྐལ་པ་སྟོང་ཕྲག་བརྒྱར་ཡང་རྙེད་པར་མི་འགྱུར་བ་གང་ཡིན་པ་དེ་དག་རྣམས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དེ་ལྟར་ཉམས་པར་བྱེད་དོ། །ཐོས་པ་ངན་པ་སྙན་དངགས་སྡེབ་པར་བྱེད་པ་ལ་ནི་གཞན་ཡང་སྐྱོན་ཆེན་པོ་ཡོད་དེ། སྐྱེས་བུ་ངན་པ་དེ་སྙན་དངགས་ཀྱི་འདོད་པ་དང་། ཐོས་པ་ངན་པ་དག་གི་བསྟོད་པས་ཀྱང་ཕྱིན་ཅི་ལོག་ཏུ་སྨྲ་བར་བྱེད་དོ། །དེ་ཀུན་དུ་སྤྱོད་པར་གྱུར་པ་རྣམས་ལ་སྟེན་པར་བྱེད་དོ། །སྨྱོན་པ་བཞིན་དུ་གནས་རྣམས་ཐམས་ཅད་ལ་རབ་ཏུ་གཡོ་བའི་བློ་དང་ལྡན་པར་འགྱུར་རོ། །ལོག་པར་རྗོད་པར་བྱེད་པ་རྣམས་ཀྱིས་བཅིངས་པར་གྱུར་པའི་བསྟོད་པ་བསྡེབས་པ་རྣམས་ལ་ནི་དོན་མེད་པ་ཡིན་ནོ། །འདུ་བྱེད་ཐམས་ཅད་ཡོངས་སུ་ཟད་པར་འགྱུར་བ་ཡིན་པའི་ཕྱིར་ཡང་འདི་ལ་དོན་མེད་པ་ཡིན་ནོ། །སྙན་དངགས་ཀྱི་རྒྱགས་པས་ཟིན་པར་གྱུར་པ་དེ་དག་རྣམས་ནི་ཧ་ཅང་ཐལ་ཆེས་པར་ཤིན་ཏུ་ཉམས་པར་གྱུར་ནས་ཆང་གི་བཏུང་བ་སྟེན་པར་བྱེད་དོ། །དེ་ལ་སྟེན་པར་གྱུར་པའི་བློ་རྣམ་པར་གཡེང་བས་ཀྱང་ཕན་ཚུན་དུ་དོན་བྱེད་དོ། །ཆང་གིས་ཀུན་ནས་གཡེངས་པར་གྱུར་པའི་བློས་དོན་ཆུང་ཟད་ཅིག་བྱེད་པར་འགྱུར་བ་ཡང་མ་ཡིན་ནོ། །སེམས་ཀྱང་རྣམ་པར་གཡེང་བར་བྱེད་པར་འགྱུར་བ་ཡིན་པའི་ཕྱིར་དང་། དོན་མ་ཡིན་པ་རྣམས་ལ་འཇུག་པ་པོ་ངན་སོང་གི་སྒོར་གྱུར་པའི་ཆང་སྟེན་པར་བྱེད་པ་ཡིན་ནོ། །དེ་ཆང་གིས་ཟིན་པས་མི་དགེ་བ་རྣམས་ཐམས་ཅད་བྱེད་དོ། །བུད་མེད་དག་མངོན་པར་མཐོང་ནས་ཚུལ་བཞིན་མ་ཡིན་པའི་ཡིད་ལ་བྱེད་པས་འཁྲིད་པར་འགྱུར་རོ། །དེ་ཉེ་བར་ཁྲིད་པར་གྱུར་ནས་དགེ་སྦྱོང་ངན་པ་མི་ཚངས་པར་སྤྱོད་པར་བྱེད་དོ། །དེ་ནི་རྒྱུད་ཚིག་པར་གྱུར་པ། ནང་རུལ་བར་གྱུར་པ། ཐོས་པ་དང་མི་ལྡན་པ། སྲེད་པའི་རིགས་སུ་གྱུར་པ། བི་དུ་ལའི་མེ་ཏོག་བཞིན་དུ་འབྲས་བུ་མེད་པའོ། །བྲིས་པའི་མར་མེ་བཞིན་དུ་འོད་མེད་པ་བྲིས་པའི་ཟླ་བ་བཞིན་དུ་གྱུར་པ། གྲང་བ་བཞིན་དུ་རྣམ་པར་སྨད་པར་བྱ་བ་དེ་ནི་དེ་དག་རྣམས་ཁོ་ན་བཞིན་དུ་གྱུར་པས་འདི་ནི་གོས་ཀྱིས་གཡོགས་པ་ཙམ་འབའ་ཞིག་ཡིན་ནོ། །དགེ་སྦྱོང་གི་གཟུགས་དགེ་སྦྱོང་མ་ཡིན་ནོ། །ཐོས་པ་ངན་པ་སྙན་དངགས་བསྡེབས་པར་གྱུར་པའི་སྐྱོན་གྱི་རྩ་བ་དེ་ལས་ལུས་ཞིག་

70-170b

པར་གྱུར་ནས་ངན་སོང་ལོག་པར་ལྟུང་བ་དམྱལ་བར་སྐྱེའོ། །དེའི་ཕྱིར་གང་དག་དགེ་སྦྱོང་ཡིན་པར་གྱུར་པ་དེ་དག་རྣམས་ཀྱིས་ཐོས་པ་ངན་པ་སྙན་དངགས་སྡེབ་པར་མི་བྱའོ། །གལ་ཏེ་བྱེད་པར་གྱུར་ན་ཡང་དེས་དམ་པའི་ཆོས་གསལ་བར་བྱེད་པར་འགྱུར་བ་རྣམས་གང་ཡིན་པ་དང་། ཅི་སྟེ་ཡང་དམ་པའི་ཆོས་རྣམས་ཡོངས་སུ་རྟོགས་པར་འགྱུར་བ་སངས་རྒྱས་ལ་བསྟོད་པ་བྱའོ། །དཀོན་མཆོག་གསུམ་ལ་བསྟོད་པར་བྱའོ། །དམ་པའི་ཆོས་ཤིན་ཏུ་གསལ་བར་བྱེད་པའི་སྙན་དངགས་བྱའོ། །དེ་ལས་མྱ་ངན་ལས་འདས་པའི་མཐར་ཐུག་པར་འགྱུར་རོ། །ངལ་བ་འབྲས་བུ་དང་བཅས་པར་འགྱུར་རོ། །དེ་དག་གིས་དེ་རབ་ཏུ་བསྔགས་པར་ཡང་འགྱུར་རོ། །ལུས་ཞིག་པར་གྱུར་ནས་ཤི་བའི་འོག་ཏུ་ལྷ་རྣམས་སུ་སྐྱེ་བར་འགྱུར་རོ། །ཡང་དག་པའི་སྙན་དངགས་བསྡེབས་པར་གྱུར་པ་དང་། །དམ་པའི་ཆོས་གསལ་བར་འགྱུར་བ་བསྡེབས་པ་དག་གིས་ཏེ། དེས་ཀྱང་དེ་ལྟར་བྱ་བ་ཡིན་གྱི་གཞན་དུ་ན་བར་ཆད་བྱེད་པར་འགྱུར་རོ། །གཞན་ཡང་ཆོས་ལྔ་པ་དགེ་སྦྱོང་དག་བསམ་གཏན་སྒོམ་པ་ན་བར་དུ་གཅོད་པར་བྱེད་པ་ཡིན་ཏེ། འདི་དག་རྣམས་ཀྱང་གང་ཞེ་ན། འདི་ལྟ་སྟེ། རྒྱུ་སྐར་འགྲང་བ་དང་སེམས་པར་བྱེད་པའོ། །དགེ་སྦྱོང་དག་དགེ་སྦྱོང་དུ་ཁས་འཆེས་པ་རྣམས་ཀྱིས་གནས་སྐབས་ཐམས་ཅད་དུ་ཡང་རྒྱུ་སྐར་བགྲང་བ་དང་བསམ་པར་ཡང་མི་བྱའོ། །དེ་ལས་ཀྱང་དགེ་སྦྱོང་ལ་འཇིག་རྟེན་པ་རྣམས་ཀྱིས་རྣམ་པར་སྨོད་པར་འགྱུར་རོ། །བསམ་གཏན་སྒོམ་པར་བྱེད་པ་ན་བར་དུ་གཅོད་པར་འགྱུར་རོ། །དེ་བསམས་པས་ཀྱང་བསོད་ནམས་དང་ཚེའི་འདུ་བྱེད་རྣམས་ནུབ་པར་འགྱུར་རོ། །བདེ་ལེགས་རྣམས་ཀྱང་འཐོབ་པར་མི་འགྱུར་རོ། །ཚེ་ཟད་པར་གྱུར་པ་དེ་བྱ་བ་མ་ཡིན་པ་བྱེད་པའི་ཕྱིར་ནད་ལས་དང་། རྒ་བ་ལས་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་དང་། ངལ་བ་རྣམས་ལས་ཡོངས་སུ་གྲོལ་བར་མི་འགྱུར་རོ། །དུས་ཡུན་རིང་པོར་འཁོར་བར་ཡོངས་སུ་འཁྱམ་པར་འགྱུར་རོ། །འདི་ལ་རྒྱུ་སྐར་བགྲངས་པ་རྣམས་ཀྱིས་ཀྱང་ཅུང་ཟད་ཀྱང་མི་བྱེད་དོ། །བདག་ལ་མ་ཡིན་ཞིང་། གཞན་རྣམས་ལ་ཡང་སྐྱོབ་པ་ནི་རྒྱུ་སྐར་རྣམས་མ་ཡིན་ནོ། །དེ་ཅིའི་ཕྱིར་ཞེ་ན། ལས་ཀྱིས་དེ་དག་རྣམས་འཇུག་པར་བྱེད་

70-171a

པ་ཡིན་གྱི། རྒྱུ་སྐར་རྣམས་ནི་སྐྱབས་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་སྐར་གཅིག་ཉིད་ལ་ཡང་བདེ་བ་ཅན་རྣམས་དང་། སྡུག་བསྔལ་ཅན་རྣམས་དང་། སྐྱེ་གཟུགས་ངན་པ་དང་། གཟུགས་བཟང་བ་དང་། རིགས་དང་ལྡན་པ་དང་། རིགས་དམན་པ་དང་། ཆོས་པ་དང་། ཆོས་མ་ཡིན་པ་དང་། དབུལ་པོ་དང་། ཕྱུག་པོ་དང་། རྐུན་མ་དང་། རྒྱལ་པོ་དང་། ཆོམ་རྐུན་དང་། མཁས་པ་དང་། རྨོངས་པ་དང་། བུད་མེད་དང་། སྐྱེས་པ་དང་། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དང་། བརྩོན་འགྲུས་བརྩམས་པ་དང་། ལེ་ལོ་ཅན་དང་། འཇིག་རྟེན་པ་སྡུག་པར་འཛིན་པ་དང་། དེ་དག་ལ་སོགས་པ་གཞན་རྣམས་ཀྱང་རྒྱུ་སྐར་གཅིག་ལ་སྐྱེའོ། །གལ་ཏེ་ཡང་རྒྱུ་སྐར་རྣམས་རྒྱུ་མཚན་ཡིན་པར་གྱུར་ན། དེ་ལ་གང་དག་རྒྱུ་སྐར་གཅིག་ལ་སྐྱེས་པར་གྱུར་པ་དེ་དག་རྣམས་ཐམས་ཅད་ཀྱང་མཚུངས་པར་འགྱུར་རོ། །སྐྱེས་བུ་རྣམས་ཀྱིས་ཇི་སྐད་བཤད་པའི་རྒྱུ་སྐར་རྣམས་ནི་བགྲང་བར་མི་བྱ་སྟེ། སྔོན་གྱི་སྐྱོན་དང་ཡོན་ཏན་དང་བཅས་པ་རྣམས་མངོན་པར་མི་ཤེས་པའི་ཕྱིར་རོ། །དགེ་བ་དང་མི་དགེ་བར་གྱུར་པའི་དུས་རྣམས་སུ་སྐར་མར་གྱུར་པའི་རྒྱུ་སྐར་རྣམས་འགྲང་བར་བྱེད་དོ། །གཞན་ཡང་རྒྱུ་སྐར་འདི་དག་རྣམས་འགྲང་བ་དང་དཔྱོད་པར་བྱེད་པ་ནི་འདི་ལྟ་སྟེ། རྒྱུ་སྐར་རྣམས་མ་ཤར་བ་དང་། གང་གི་ཕྱིར་མདུན་དུ་བྱས་པར་གྱུར་པས་རྣམ་པར་དག་པ་རྣམས་ཀྱང་ཉུང་བ་དང་། ལྷག་པར་འགྱུར་བ་དང་། མངོན་པར་གསལ་བ་ཡིན་པ་དང་། རྒྱུ་སྐར་གྱིས་རྒྱུ་སྐར་གཞན་རྣམས་ཟིལ་གྱིས་ཀྱང་གནོན་ནོ། །གཞན་ཡང་གཟའ་སྐར་དེ་ཉིད་ཀྱང་དུས་གཞན་ན་ཟིལ་གྱིས་གནོན་པར་འགྱུར་རོ། །དེ་དག་རྣམས་ལས་རྒྱུ་སྐར་གྱི་མཛེས་པ་དང་། མཛེས་པ་མ་ཡིན་པ་རྣམས་དཔྱོད་པར་བྱེད་པ་ཡིན་ནོ། །གང་སེམས་པར་བྱེད་པ་དང་འགྲང་བར་བྱེད་པའི་རྒྱུ་སྐར་རྣམས་ཀྱི་དབང་གིས་བདེ་བ་དང་སྡུག་བསྔལ་བ་ཡིན་ན། གང་གིས་ཇི་ལྟར་བདག་ཉིད་ལ་སྟོབས་དང་ལྡན་པར་འགྱུར་ཞིང་བདེ་བ་དང་། སྡུག་བསྔལ་གྱི་དབང་དུ་བྱས་ནས་གང་གིས་ཟིལ་གྱིས་གནོན་པར་འགྱུར། ཇི་ལྟར་ན་གཞན་རྣམས་ཀྱིས་སྡུག་བསྔལ་དང་བདེ་བ་བྱེད་པར་འགྱུར་བ་ཡིན། དེའི་ཕྱིར་

70-171b

ལས་རྣམས་ཉིད་ཁོ་ན་ལས་དགེ་ལེགས་དང་དགེ་ལེགས་མ་ཡིན་པའི་འབྲས་བུ་རྣམས་ཡིན་ནོ། །རྒྱུ་སྐར་རྣམས་དང་། གཟའ་རྣམས་ཀྱང་གང་གི་ཚེ་གཟའ་གཞན་དང་འཁྲུགས་པར་གྱུར་པ་ན། དེའི་ཚེ་དེ་དག་རྣམས་ལ་ཡང་གཟེར་ཟུག་འབྱུང་ངོ་། །ཇི་ལྟར་ཉི་མ་དང་ཟླ་བ་དག་ཀྱང་གཟའ་སྒྲ་གཅན་འཛིན་གྱིས་སྡུག་བསྔལ་བར་བྱེད་དོ། །དེ་ལ་གང་དག་བདག་ཉིད་ཀྱི་ལ་ནུས་པ་མེད་པ་དེ་ཇི་ལྟར་གཞན་རྣམས་ཀྱི་ལ་ནུས་པ་འབྱུང་བར་འགྱུར། དེའི་ཕྱིར་གཟའ་དགུ་པོ་རྣམས་ཀྱི་དཔྱད་ར་ནི་དགེ་སྦྱོང་གིས་མི་བྱའོ། །དགེ་སྦྱོང་དུ་ཁས་འཆེས་པ་རྣམས་ཀྱིས་མི་བྱའོ། །འཛིན་པར་བྱེད་པ་གཟའ་ཆེན་པོ་རྣམས་ནི་གསུམ་པོ་འདི་དག་རྣམས་ཡིན་ནོ། །འདི་ལྟ་སྟེ། རྒ་བ་དང་། ན་བ་དང་། འཆི་བ་རྣམས་ཡིན་ཏེ། གང་ཞིག་རྟག་ཏུ་འཇིག་རྟེན་པ་རྣམས་ལ་གནས་པར་གྱུར་པ་ཐ་མར་འཛིན་པར་བྱེད་པའི་གཟའ་ཆེན་པོ་གསུམ་པོ་རྣམས་སེམས་པར་མི་བྱེད་པར་ནི་ཇི་སྲིད་དུ་དགེ་སྦྱོང་ངན་པ་དགེ་སྦྱོང་དུ་དམ་བཅའ་བས་གཟའ་གཞན་འཇིག་རྟེན་པ་རྣམས་ཉིད་དཔྱོད་པར་བྱེད་དོ། །བློ་གྲོས་མེད་པ། ཐོས་པ་དང་མི་ལྡན་པའི་བྱིས་པར་གྱུར་པས་སྐྱོན་དང་བཅས་པར་གྱུར་པའི་འཇིག་རྟེན་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་དཔྱོད་པར་བྱེད་དོ། །གང་ཞིག་རྣམ་པར་དཔྱད་པར་འགྱུར་ཞིང་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པར་གྱུར་ན་མྱ་ངན་ལས་འདས་པའི་གྲོང་ཁྱེར་དུ་ལེགས་པར་འཇུག་པར་བྱེད་པའི་འཇིག་རྟེན་ལས་འདས་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་ནི་དཔྱོད་པར་མི་བྱེད་དོ། །དེ་དག་རྣམས་ཀྱང་གང་ཞེ་ན། འདི་ལྟ་སྟེ། ཕུང་པོ་ལྔ་པོ་རྣམས་དང་། ཉེ་བར་ལེན་པའི་ཕུང་པོ་ལྔ་པོ་རྣམས་དང་། ཁམས་བཅྭ་བརྒྱད་པོ་རྣམས་སོ། །དེ་དག་རྣམས་དཔྱོད་པར་གྱུར་པས་ནི་མྱ་ངན་ལས་འདའ་བར་འགྱུར་རོ། །ཡང་དག་པ་ཇི་ལྟ་བར་འདོད་ཆགས་འགོག་པར་བྱེད་པ་དང་། ཀུན་ནས་སྡོམ་པ་དང་། འདུལ་བར་བྱེད་པས་ཀྱང་མྱ་ངན་ལས་འདའ་བ་ཡིན་ནོ། །དགེ་སློང་རྒྱུ་སྐར་སེམས་པར་བྱེད་པ་རྣམས་ནི་ཡང་རིམ་པ་གཞན་གྱིས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ཀྱིས་ཟླ་བ་བཅུ་གཉིས་འགྲང་བར་བྱེད་དོ། །དེ་དག་རྣམས་བགྲངས་པ་ལས་

70-172a

ཀྱང་དོན་མ་ཡིན་པར་འགྱུར་རོ། །ཉོན་མོངས་པ་རྣམས་སྤོང་བར་མི་བྱེད་པ་དང་། མྱ་ངན་ལས་འདའ་བར་ཡང་མི་འགྱུར་རོ། །འཁོར་བའི་སྐྱེ་མཆེད་བཅུ་གཉིས་འགྲང་བར་བྱེད་པ་རྣམས་ཀྱིས་གང་དག་ལེགས་པར་སྡོམ་པ་དང་། ཡང་དག་པའི་དོན་ཡོངས་སུ་ཤེས་པར་བྱེད་པ་དང་། འདོད་ཆགས་དང་བྲལ་བ་དང་། ལེགས་པར་ཀུན་ནས་སྡོམ་པར་གྱུར་པ་རྣམས་ཀྱིས་ཀྱང་མྱ་ངན་ལས་འདའ་བ་ཡིན་ནོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པས་དེ་དག་རྣམས་མ་རྩེས་པར་ཀུན་ནས་ཉོན་མོངས་པར་གྱུར་པ་གཞན་རྣམས་དཔྱོད་པར་བྱེད་དོ། །ཡང་གང་ཞིག་དཔྱད་པར་གྱུར་ནས་ནད་དང་། རྒས་པ་དང་། འཆི་བ་རྣམས་ལས་ཡོངས་སུ་འགྲོལ་བར་མི་འགྱུར་བའི་རིམ་པ་གཞན་གྱིས་ངན་པ་རྣམས་སེམས་པར་བྱེད་པའི་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་ཀུན་ནས་ཉོན་མོངས་པ་ཅན་དུ་གྱུར་པའི་དུས་དྲུག་པོ་རྣམས་དཔྱོད་པར་བྱེད་དོ། །གང་དག་རྣམས་དཔྱད་པར་གྱུར་ཅིང་། ཡང་དག་པ་ཇི་ལྟ་བར་སོ་སོར་རྣམ་པར་དཔྱད་ཅིང་རྣམ་པར་གནས་པར་གྱུར་ནས། དེ་དག་རྣམས་མྱ་ངན་ལས་འདའ་བར་འགྱུར་བའི་དགོས་པ་དང་བཅས་པས་ཀུན་ནས་ཉོན་མོངས་པ་ཅན་ཉེ་བར་འཚེ་བ་དང་བཅས་པར་གྱུར་པའི་སུམ་ཅུ་རྩ་དྲུག་གིས་ལུས་དཔྱོད་པར་མི་བྱེད་དོ། །ཡང་རིམ་པ་གཞན་གྱིས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་འཇིག་རྟེན་པའི་དུས་ཀྱིས་བྱས་པའི་ལྟས་སུ་གྱུར་པ་རྣམས་ལ་དཔྱོད་པར་བྱེད་དེ། །ཇི་ལྟར་དཀར་པོའི་དུས་ཀྱི་ལྟས་རྣམས་ནི་མཛེས་པའོ། །དཀར་པོ་མ་ཡིན་པ་ནི་མི་མཛེས་པའོ། །ཆེ་གེ་མོ་ཞིག་གི་དུས་ན་ལྟས་འདི་དག་རྣམས་འབྱུང་བར་ཆེ་གེ་མོ་གཅིག་གི་དུས་ན་ནི་མ་ཡིན་ནོ། །རྣམ་པ་དེ་ལྟ་བུར་གྱུར་པའི་བསམ་ཁྲལ་ངན་པ་རྣམས་སེམས་པར་བྱེད་ཀྱི། གང་དག་ཤེས་པར་གྱུར་པ་རྣམས་དང་། ཕ་རོལ་ཏུ་བདེ་བར་གྱུར་པ་རྣམས་དང་། མྱ་ངན་ལས་འདའ་བར་འགྱུར་བ་དང་། མྱ་ངན་ལས་འདའ་བའི་མཐར་ཐུག་པར་འགྱུར་བ་སེམས་ཀྱི་དམིགས་པའི་མཚན་ཉིད་དུ་གྱུར་པའི་དགེ་བ་དང་། མི་དགེ་བ་དང་། ལུང་དུ་མ་བསྟན་པར་གྱུར་པའི་ལྟས་དང་ལྟས་མ་ཡིན་པ་རྣམས་ཀྱི་དཔྱད་ར་དཔྱོད་པར་མི་བྱེད་དོ། །ཇི་ལྟར་དགེ་བའི་སེམས་དང་ལྡན་པར་གྱུར་པའི་དགེ་བ་དམིགས་པའི་ལྟས་

70-172b

ལས་མཛེས་པར་གྱུར་པའི་བདེ་བར་འགྲོ་བའི་འགྲོ་བ་བདག་ལ་འབྱུང་བར་འགྱུར་རོ། །མྱ་ངན་ལས་འདའ་བར་འགྲོ་བར་འགྱུར་བའི་དགེ་བའི་སེམས་ཆེ་གེ་མོ་ཅིག་ལ་དམིགས་པ་བདག་ལ་སྐྱེས་སོ། །མི་དགེ་བ་ཀུན་ནས་ཉོན་མོངས་པ་ཅན་དེས་ནི་བདེ་བ་མ་ཡིན་ཞིང་ཤེས་པ་མ་ཡིན་ནོ། །བདག་བདེ་འགྲོར་འགྲོ་བར་ཡང་མི་འགྱུར་རོ། །ལུང་དུ་མ་བསྟན་པ་ལ་དམིགས་པའི་བདག་གི་སེམས་ཆེ་གེ་མོ་ཅིག་སྐྱེས་པར་གྱུར་ཏེ། དེ་ནི་རྣམ་པར་སྨིན་པ་ལུང་དུ་མ་བསྟན་པ་ཡིན་ནོ། །གཞན་ཡང་དགེ་སྦྱོང་ངན་པ་དགེ་སྦྱོང་གི་གཟུགས་བརྙན་དེ་འཇིག་རྟེན་པའི་ལམ་གྱིས་སྐད་ཅིག་དང་། ཐང་ཅིག་དང་། ཡུད་ཙམ་དང་། ཉི་མ་དང་། ཟླ་བ་ཕྱེད་དང་། ཟླ་བ་དང་ཡང་དག་པར་ལྡན་པའི་དགེ་བ་དང་། མི་དགེ་བའི་དུས་ཀྱི་མི་རྣམས་ཀྱི་ཚེའི་དུས་རྣམས་སེམས་པར་བྱེད་ཀྱི་བདག་གི་ཚེའི་འདུ་བྱེད་རྣམས་ནི་སྐད་ཅིག་པ་ཡིན་ཏེ། ཇི་ལྟར་འདི་དག་རྣམས་ནི་སྐད་ཅིག་པ། ཐང་ཅིག་དང་། ཡུད་ཙམ་དང་། ཉི་མ་དང་། ཟླ་བ་དང་། ཟླ་བ་ཕྱེད་པར་འགོར་བ་མེད་པར་ཟད་པར་འགྱུར་བས་ཅིས་ཀྱང་བཟློག་ཏུ་མེད་པ་སྟོབས་ཆེན་པོ་དང་ལྡན་པའི་འཆི་བའི་དུས་སུ་གྱུར་པའི་འདུ་བྱེད་རྣམས་འཛད་པར་འགྱུར་བའི་དུས་ལ་ནི་དཔྱོད་པར་མི་འགྱུར་རོ། །བསམ་གཏན་བྱེད་པ་ན་བར་དུ་གཅོད་པར་གྱུར་པ་འཇིག་རྟེན་པའི་རིམ་པ་གཞན་ཀུན་ནས་ཉོན་མོངས་པ་ཅན་རྣམས་ཀྱིས་ཀྱང་རྒྱུ་སྐར་གྱི་དཔྱད་ར་རྣམས་དཔྱོད་པར་བྱེད་དོ། །སྒོམ་པར་བྱེད་དོ། །ལན་མང་དུ་བྱེད་དོ། །སེམས་ཀྱིས་རབ་ཏུ་སྒོམ་པར་བྱེད་དོ། །རབ་ཏུ་འཇོག་པར་བྱེད་དོ། །གཞན་དག་རྣམས་ལ་ཡང་སྦྱིན་པར་སྟོན་ནོ། །ཇི་ལྟར་རྒྱུ་སྐར་ཆེ་གེ་མོ་གཟའ་ཆེ་གེ་མོས་ཉེ་བར་གཟིར་བར་གྱུར་ནས་མནར་བར་བྱེད་དོ། །འདོད་པར་གྱུར་པའི་ཀུན་དུ་སྦྱོར་བའི་རྒྱུ་སྐར་གཟིར་བར་བྱེད་དོ། །དེ་བསམས་པར་གྱུར་པ་ན་ནད་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་རྣམས་ལས་སྒྲོལ་བར་བྱེད་པ་པོ་འཁོར་བ་ལས་འདྲེན་པར་བྱེད་པ་པོ་རྣམས་ནི་དེ་ལྟར་དཔྱོད་པར་ནི་མི་བྱེད་ན། རྒྱུ་སྐར་ལ་ཇི་ལྟ་བ་བཞིན་དུ་དེ་ཉིད་ནི་ཆོས་ཀྱི་གཟར་གྱུར་པའི་ཆོས་གཞན་རྣམས་ཀྱིས་ཟིལ་གྱིས་གནོན་པར་འགྱུར་རོ། །འདི་ལྟ་སྟེ། སྐྱེ་བའི་རྒྱུ་སྐར་རྣམས་

70-173a

ནི་འཆི་བའི་གཟའ་རྣམས་ཀྱིས་ཉེ་བར་འཛིན་ནོ། །ནད་མེད་པའི་རྒྱུ་སྐར་རྣམས་ནི་ནད་ཀྱི་གཟའ་རྣམས་ཀྱིས་ཉེ་བར་འཛིན་ནོ། །ལང་ཚོའི་རྒྱུ་སྐར་རྣམས་ནི་རྒས་པའི་གཟའ་རྣམས་ཀྱིས་ཉེ་བར་འཛིན་ནོ། །འཐུན་པ་དང་ཀུན་དུ་ཕྲད་པའི་རྒྱུ་སྐར་རྣམས་ནི་འཐུན་པ་དང་བྲལ་བའི་གཟའ་རྣམས་ཀྱིས་ཉེ་བར་ཟིན་ནོ། །ལྷའི་འཇིག་རྟེན་དུ་སྐྱེས་པའི་རྒྱུ་སྐར་རྣམས་ནི་འཆི་འཕོ་བའི་གཟའ་རྣམས་ཀྱིས་ཉེ་བར་ཟིན་ནོ། །མིར་སྐྱེས་པའི་རྒྱུ་སྐར་རྣམས་ནི་ཚོལ་ཁྲོའི་སྡུག་བསྔལ་གྱི་གཟའ་རྣམས་ཀྱིས་ཉེ་བར་ཟིན་ནོ། །བདེ་བའི་ཚོར་བའི་རྒྱུ་སྐར་རྣམས་ནི་སྡུག་བསྔལ་གྱི་ཚོར་བའི་གཟའ་རྣམས་ཀྱིས་ཉེ་བར་ཟིན་ནོ། །དགེ་བའི་སེམས་བསྐྱེད་པའི་རྒྱུ་སྐར་རྣམས་ནི། མི་དགེ་བའི་སེམས་བསྐྱེད་པའི་གཟའ་རྣམས་ཀྱིས་ཉེ་བར་ཟིན་ནོ། །མི་སྡུག་པའི་རྒྱུ་སྐར་རྣམས་ནི་ཞེ་སྡང་གི་གཟའ་རྣམས་ཀྱིས་ཉེ་བར་ཟིན་ནོ། །ཤེས་པའི་རྒྱུ་སྐར་རྣམས་ནི་གཏི་མུག་གི་གཟའ་རྣམས་ཀྱིས་ཉེ་བར་ཟིན་ནོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པར་གྱུར་པ་དེ་རང་ཉིད་ཀྱི་བསམ་ཁྲལ་རྣམས་སེམས་པར་མི་བྱེད་དོ། །འཇིག་རྟེན་ལས་འདས་པའི་ཡོངས་སུ་དཔྱད་པར་བྱ་བའི་དཔྱོད་པ་རྣམས་སེམས་པར་མི་བྱེད་དོ། །འཇིག་རྟེན་པའི་དེ་དག་རྣམས་དང་། འཇིག་རྟེན་ལས་འདས་པའི་ཡང་ཇི་སྐད་དུ་བཤད་པའི་རྒྱུ་སྐར་དཔྱད་པར་བྱ་སྟེ། སྔ་མ་བཞིན་ནོ། །ཚུལ་བཞིན་ཡིད་ལ་བྱེད་པས་ཡང་དག་པ་ཇི་ལྟ་བ་བཞིན་སོ་སོར་བརྟག་པར་བྱའོ། །ཇི་སྐད་དུ་བཤད་པའི་གཟའ་རྣམས་ཀྱང་སྔར་བཞིན་དུ་ཡང་དག་པ་ཇི་ལྟ་བར་གཟའ་རྣམས་བསམ་པར་བྱའོ། །བསྒོམ་པར་བྱའོ། །ཡང་དག་པ་ཇི་ལྟ་བ་བཞིན་དུ་གྱུར་པ་ཤེས་པའི་ལམ་ཡན་ལག་བརྒྱད་ཀྱིས་སོ་སོར་བརྟག་ན་ནི་གཟའ་དང་རྒྱུ་སྐར་གྱི་དཔྱད་ར་རྣམས་འབྲས་བུ་དང་བཅས་པར་འགྱུར་རོ། །མྱ་ངན་ལས་འདའ་བར་ཡང་འགྱུར་བ་དང་། ཤིས་པར་འགྱུར་བ་དང་། བདེ་བར་འགྱུར་བ་ཡང་ཡིན་ནོ། །ཐ་མལ་པའི་འཇིག་རྟེན་པའི་གཟའ་རྣམས་དཔྱད་པ་དང་། རྒྱུ་སྐར་རྣམས་ཀྱང་དཔྱད་པར་གྱུར་པའི་སྐྱེས་བུ་ནི་བརྒྱ་སྟོང་དུ་མ་རྣམས་སུ་འགྲོས་ནོར་ནས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །འཇིག་རྟེན་པ་དེ་དག་རྣམས་ནི་འཁོར་བར་ཀུན་ནས་འཇུག་པར་བྱེད་

70-173b

པ། འདོད་ཆགས་ཞེ་སྡང་གཏི་མུག་རྣམས་ཀུན་ནས་སྐྱེད་པར་བྱེད་པ་ཡིན་ནོ། །གང་ཡང་དུས་དང་། གཟའ་དང་། རྒྱུ་སྐར་དེ་དག་རྣམས་འཇིག་རྟེན་ལས་འདས་པའི་ལམ་གྱིས་བསམ་པར་བྱ་བར་བཤད་པ་དེ་དག་རྣམས་རྣལ་འབྱོར་དཔྱོད་པས་བསམས་ཤིང་བསྒོམས་ཏེ། ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པས་རྒ་བ་དང་། ན་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་སྟོང་ཕྲག་བརྒྱ་ལས་རྣམ་པར་གྲོལ་བའི་གོ་འཕང་འཐོབ་པར་འགྱུར་ཏེ། རྟག་ཏུ་རྒས་པ་མེད་པ་དང་། འཆི་བ་མེད་པ་དང་། ཟག་པ་མེད་པའི་མྱ་ངན་ལས་འདས་པའི་མཆོག་དེ་ལྟ་བུ་དེ་དག་རྣམས་ལ་བསླབ་པར་བྱའོ། །དགེ་སྦྱོང་རྣམས་དང་། དགེ་སྦྱོང་དུ་དམ་བཅས་པ་རྣམས་དང་། སྡུག་བསྔལ་ཟད་པར་འདོད་པ་རྣམས་ཀྱིས་འཁོར་བའི་སྡུག་བསྔལ་ཟད་པར་འགྱུར་བའི་རྒྱུ་སྐར་རྣམས་ལ་དཔྱད་པ་བསྒོམ་པར་བྱའོ། །དུས་དཔྱོད་པ་ཡང་རང་བཞིན་ཇི་ལྟ་བུ་མ་ཡིན་པའི་ཀུན་ནས་ཉོན་མོངས་པ་ཅན་གྱི་ཤེས་པ་རྣམས་དང་བདེ་བའི་མཐར་ཐུག་པར་འགྱུར་བ་མ་ཡིན་ནོ། །ཤེས་པར་འགྱུར་བ་མ་ཡིན། མྱ་ངན་ལས་འདས་པའི་མཐར་ཐུག་པར་འགྱུར་བ་ཡང་མ་ཡིན་གྱི། དགེ་སློང་དེས་བསམ་གཏན་སྒོམ་པར་གྱུར་པ་ན་རྣམ་པར་སྲེག་པར་བྱེད་པ་འབའ་ཞིག་ཏུ་གྱུར་པ་དང་། རྒྱུ་སྐར་འགྲང་བ་དང་སེམས་པར་བྱེད་པ་ན་དགེ་སློང་ལ་རྣམ་པར་གཤེ་བར་བྱེད་པར་ཡང་འགྱུར་རོ། །གཞན་ཡང་ཆོས་དྲུག་པར་གྱུར་པ་བསམ་གཏན་སྒོམ་པ་ན་བར་དུ་གཅོད་པར་བྱེད་པ་རྣམས་ནི་དགེ་སྦྱོང་དང་དགེ་སྦྱོང་དུ་ཁས་འཆེས་པ་རྣམས་ཀྱིས་བསམ་པར་ཡང་མི་བྱའོ། །འདི་ཡང་གང་ཞེ་ན། འདི་ལྟ་སྟེ། རྒྱུ་མཚན་སེམས་པ་དགེ་སྦྱོང་གིས་མི་བྱའོ། །འཇིག་རྟེན་པ་ཀུན་ནས་ཉོན་མོངས་པ་འདོད་ཆགས་དང་། ཞེ་སྡང་དང་། གཏི་མུག་རྣམས་ཀུན་དུ་གསལ་བར་བྱེད་པར་གྱུར་པ་དགེ་བའི་ཆོས་རྣམས་ཀྱི་བར་དུ་གཅོད་པར་བྱེད་པ་རྣམས་ཀུན་དུ་འཕེལ་བར་བྱེད་པ་ནི་རྒྱུ་མཚན་སེམས་པ་ལས་ཡིན་ཏེ། དེ་ལ་ས་གཡོ་བ་འབྱུང་བ་རྣམས་ཉིན་མོ་དང་། མཚན་མོར་ཡང་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ནི་ཀུན་ནས་ཉོན་མོངས་པའི་ས་གཞི་ལས་ཀྱི་རྒྱུ་མཚན་ཉེ་བར་

70-174a

མཚོན་པར་བྱེད་དོ། །ཇི་ལྟ་བར་རྒྱུ་མཚན་འདི་དག་རྣམས་འབྱུང་བར་འགྱུར་ཏེ། འདི་ལྟར་ཆུ་ཀུན་དུ་གནས་པའི་རྫིང་བུ་དག་རླུང་གིས་དཀྲུགས་པར་བྱེད་ལ། ཇི་སྲིད་དུ་རབ་ཏུ་གཡོས་པར་གྱུར་པས་རྙོག་པ་ཅན་དུ་འགྱུར་རོ། །ལྷའི་ཆར་འབབ་ན་གྲོག་མ་རྣམས་གཟེར་ཟུག་གིས་ཕྱིར་འབྱུང་བར་འགྱུར་རོ། །ཟླ་བ་གཟས་འཛིན་པར་འགྱུར་ན་ཆུར་མར་ནག་འབྱིང་བར་འགྱུར་རོ། །བྱ་རྣམས་དམའ་བ་ནས་འགྲོ་ན་ཡང་ནམ་མཁའ་ལ་ཉི་མ་གཟས་འཛིན་པར་འགྱུར་རོ། །ཕྱོགས་རྣམས་ལ་འདོད་ཆགས་དང་བྲལ་བར་ཉེ་བར་དམིགས་པར་འགྱུར་རོ། །དགེ་བ་ལ་ནི་འདི་དག་རྣམས་འབྱུང་བར་འགྱུར་ཏེ། ཇི་ལྟར་འཇམ་པོར་གྱུར་པའི་རླུང་རྣམས་རབ་ཏུ་རྒྱུ་བར་འགྱུར་རོ། །ཕྱོགས་རྣམས་ཤིན་ཏུ་དྲི་མ་མེད་པར་གྱུར་པ་དང་། མཛེས་པའི་བྱ་དག་གཡས་ཕྱོགས་ནས་བསྐོར་བར་ཀུན་དུ་མཐོང་བར་འགྱུར་རོ། །མི་དགེ་བ་འབྱུང་བར་གྱུར་ན་དམར་རེངས་དང་ཕྱོགས་ཀྱི་མདོག་རྣམས་རྩུབ་པར་མཐོང་ངོ་། །རླུང་རྩུབ་མོ་དག་རབ་ཏུ་རྒྱུ་བར་འགྱུར་རོ། །སྐྱ་རེངས་དམར་པོ་ཁྲག་གི་མདོག་ཏུ་འགྱུར་བ་དང་། ཀུན་ནས་དེའི་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་སོ། །དེ་ལྟར་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པར་བྱེད་པ་འདིས་བསམ་གཏན་སྒོམ་པའི་བར་དུ་གཅོད་པར་བྱེད་པའི་རྒྱུ་མཚན་རྣམས་མཚོན་པར་བྱེད་དོ། །རྒྱལ་པོ་དག་ལ་ཡང་སྟོན་པར་བྱེད་དོ། །རྙེད་པ་དང་བཀུར་སྟིའི་དོན་དུ་རྒྱལ་བ་དང་འཕམ་པར་འགྱུར་བ་རྣམ་པར་དཔྱོད་པར་བྱེད་དོ། །དེས་དེ་བཞིན་དུ་རྒྱལ་པོ་རྒྱལ་བ་དང་འཕམ་པ་འདོད་པར་གྱུར་པས་འདོད་ཆགས་དང་། ཞེ་སྡང་དང་། གཏི་མུག་རྣམས་ཡིད་ལ་ཀུན་ཏུ་སྐྱེ་སྟེ། དེ་དག་གི་རྩ་བ་ལས་ནི་གཏི་མུག་ཡིན་པས་སྐྱོན་གསུམ་པོ་འདིས་གཡོགས་པར་གྱུར་པ་དེ་ནི་དགེ་སྦྱོང་མ་ཡིན་ལ་ཁྱིམ་པ་ཡང་མ་ཡིན་ནོ། །དེའི་ཕྱིར་དགེ་སྦྱོང་དང་དགེ་སྦྱོང་དུ་དམ་བཅས་པར་གྱུར་པ་རྣམས་ཀྱི་རྒྱུ་མཚན་གྱི་དཔྱད་ར་མི་བྱའོ། །འདི་དག་ནི་ཀུན་ནས་ཉོན་མོངས་པ་ཡིན་ནོ། །ཡང་རིམ་པ་གཞན་གྱིས་མ་རུངས་པའི་རྒྱུ་མཚན་འདི་དཔྱོད་པར་གྱུར་པ་ལ། ཇི་ལྟར་གང་འགའ་ཞིག་རྒྱུ་མཚན་ཅན་ཡིན་པར་གྱུར་པ་དེ་རྒྱལ་པོས་ཅི་ནས་ཀྱང་ལྟད་མོའི་དུས་ན་ལྟད་མོ་འཛུགས་པར་འགྱུར་རོ། །

70-174b

རྒྱལ་པོ་དག་ཕན་ཚུན་དུ་ཀུན་དུ་འཇོམས་པར་གྱུར་པ། སྐྱེ་བོ་ཐམས་ཅད་འཁྲུག་པར་བྱེད་པའི་འཁྲུག་པའི་ལྟད་མོ་ལས་སེམས་ཅན་བརྒྱ་སྟོང་དུ་མ་རྣམ་པར་ཉམས་པར་འགྱུར་རོ། །གསོད་པར་བྱེད་པ་དང་། འཛིན་པར་བྱེད་པས་ཀྱང་ཡུལ་ལྗོངས་དང་། ཡུལ་འཁོར་དང་། གྲོང་ཆུང་རྣམས་ཕན་ཚུན་དུ་སྟོངས་པར་བྱེད་དོ། །སྲོག་ཆགས་བརྒྱ་སྟོང་དུ་མ་རྣམས་ཀྱང་སྡུག་བསྔལ་བར་འགྱུར་རོ། །དེའི་ཚེ་རྒྱལ་པོ་དག་ཕན་ཚུན་དུ་འགྲས་པར་གྱུར་པས་ཏེ། དེ་ལ་མདོར་བསྡུ་ན་སྐྱེ་བོའི་ཚོགས་ཆེན་པོ་འདི་དག་རྣམས་ཀྱི་ནི་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པས་ལྟད་མོ་བཙུགས་པ་ཡིན་ནོ། །རྒྱལ་པོ་གཅིག་རྣམ་པར་རྒྱལ་བར་གྱུར་པས་རྒྱལ་པོ་གཞན་ལ་དབང་ཆེ་བའི་རྒྱུ་མཚན་ཉེ་བར་མཚོན་པར་བྱས་ནས་དེ་འདི་སྙམ་དུ་ཉེ་བར་སེམས་ཏེ། གལ་ཏེ་རྒྱལ་པོ་འདི་རྣམ་པར་རྒྱལ་བར་གྱུར་ན་དེ་ལས་བདག་ཆེན་པོར་འགྱུར་བ་དང་། རྒྱལ་པོའི་སྤྱན་སྔ་ནས་རྙེད་པ་དང་བཀུར་སྟི་ཡང་བདག་ལ་ཆེན་པོ་འབྱུང་བར་འགྱུར་རོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་དེ་ཉིད་ཀྱི་དགེ་བ་གང་ཡིན་པའི་ཆོས་དེ་ནུབ་པར་འགྱུར་རོ། །བསམ་གཏན་ལ་སྙོམས་པར་ཞུགས་པ་ན་ཡང་དགེ་བ་མངོན་པར་མི་འཕེལ་ལོ། །རྒྱལ་བ་དང་མི་རྒྱལ་བ་རྣམས་ཀུན་དུ་རྟོག་པར་བྱེད་པ་པོ་ཞི་བར་གྱུར་པའི་ཆོས་རྣམས་ཀྱང་མ་བསམས་པས་ལུས་ཞིག་པར་གྱུར་པ་ན་ཤི་བའི་འོག་ཏུ་ངན་སོང་ལོག་པར་ལྟུང་བ་དམྱལ་བར་སྐྱེའོ། །རྒྱུ་མཚན་འདི་དག་གི་ཕྱིར་ན་དགེ་སྦྱོང་རྣམས་དང་དགེ་སྦྱོང་དུ་ཁས་འཆེས་པས་རྒྱུ་མཚན་གྱི་དཔྱད་ར་འཇིག་རྟེན་པ་མི་བྱའོ། །འཇིག་རྟེན་པའི་དཔྱད་ར་གང་ཡིན་པ་འདི་ནི་སྐྱོན་གསུམ་སྐྱེད་པར་བྱེད་པ་ཡང་འདི་ཡིན་ཏེ། དགེ་བའི་ཆོས་རྣམས་ཀྱི་བར་དུ་གཅོད་པར་བྱེད་པ་ཡིན་ནོ། །དེ་ལ་སྐྱོན་གསུམ་པོ་དེ་དག་རྣམས་ལ་རིམ་གྱིས་ངེས་པར་རྣམ་པར་གྲོལ་བར་འགྱུར་བའི་འཇིག་རྟེན་ལས་འདས་པའི་སྒྲུབ་པ་དཔྱད་པར་བྱའོ། །གང་ཞེ་ན་འདི་ལྟ་སྟེ། ཇི་ལྟར་འདིས་ས་གཞི་གཡོ་བ་ཉེ་བར་མཚོན་པར་བྱེད་པ། ཉིན་མོ་དང་མཚན་མོར་ཡང་ཇི་ལྟར་ས་གཡོ་བ་འབྱུང་བར་འགྱུར་རོ་ཞེས་དེ་ཁོ་ན་ལྟར་ནི་ནམ་ཡང་དཔྱོད་པར་མི་བྱེད་དེ། ཉིན་དང་མཚན་དུ་ཡང་སེམས་ཀྱི་ས་གཞི་གཡོ་བ་འབྱུང་བར་འགྱུར་བའི་ཕྱིར་རོ། །དཔེར་ན་ས་གཞི་འདི་ཀུན་ནས་གཡོ་བར་གྱུར་ན་ནགས་དང་།

70-175a

ཉེ་བའི་ནགས་དང་། རི་དང་། ཆུ་ཀླུང་དང་། ཤིང་དང་། གྲོང་དང་། ཚོང་འདུས་སུ་བཅས་པའི་འཇིག་རྟེན་འདི་དག་རྣམས་འཇིག་པ་འབྱུང་བར་འགྱུར་རོ། །དེ་ཁོ་ན་བཞིན་དུ་སེམས་ཀྱི་ས་གཞི་འདི་རབ་ཏུ་གཡོས་པར་གྱུར་ན། དེ་ལ་བརྟེན་པ་དེ་དག་རྣམས་ཐམས་ཅད་ལས་འཇིག་རྟེན་ལས་འདས་པ་སྒྲུབ་པར་བྱེད་པའི་ཆོས་དགེ་བའི་ས་ཆེན་པོ་པ་དང་བཅས་པ་རྣམས་མ་གཏོགས་པ་གཞན་དག་རྣམས་ནི་རབ་ཏུ་གཡོ་བར་འགྱུར་རོ། །དེའི་ཕྱིར་དང་པོ་ཁོ་ནར་དགེ་སྦྱོང་དགེ་སྦྱོང་དུ་དམ་བཅས་པ་རྣམས་ཀྱིས་ས་གཞི་བཞིན་དུ་སེམས་ཀྱི་ས་གཞི་གཡོ་བ་རྣམས་ལ་སོ་སོར་བརྟག་པར་བྱའོ། །གང་གི་ཕྱིར་འཁོར་བར་བྱེད་པ་དང་། སེམས་ཀྱི་ས་གཞི་རབ་ཏུ་གཡོ་བར་ཡང་བྱེད་དོ། །གསུམ་གྱིས་སེམས་ཀྱི་ས་གཞི་རྣམས་རབ་ཏུ་གཡོ་བར་ཡང་བྱེད་དོ། །འདི་ལྟ་སྟེ། འདོད་ཆགས་དང་། ཞེ་སྡང་དང་། གཏི་མུག་གིས་རབ་ཏུ་གཡོ་བར་བྱེད་དེ། ཇི་ལྟར་ཡང་ས་གཞི་དག་གཡོ་བ་འབྱུང་བར་འགྱུར་བ་ན་ཆུ་མཉམ་པ་དང་ལྡན་པ་རྣམས་རླུང་གིས་དཀྲུགས་པར་བྱེད་དོ། །སོ་སོའི་སྐྱེ་བོའི་སེམས་ཀྱང་དེ་ཁོ་ན་བཞིན་དུ་འབྱུང་བར་འགྱུར་ཏེ། འདོད་ཆགས་སམ། ཞེ་སྡང་ངམ། གཏི་མུག་ཀྱང་སྐྱེས་པར་གྱུར་པ་ན་སྙོམས་པར་གནས་པ་ལས་སྙིང་དང་བཞིན་གྱི་མདངས་ཀྱང་དམར་བའམ། བཞིན་གྱི་མདངས་མི་གསལ་བ་འབྱུང་བར་འགྱུར་རོ། །དེའི་ཕྱིར་དགེ་སྦྱོང་རྣམས་དང་། དགེ་སྦྱོང་དུ་ཁས་འཆེས་པ་མྱ་ངན་ལས་འདས་པ་ལ་མངོན་དུ་ཕྱོགས་པ་རྣམས་དང་། དགེ་སྦྱོང་དུ་ཁས་འཆེས་པ་རྣམས་ཀྱི་རྒྱུ་མཚན་དེ་དག་རྣམས་ཉེ་བར་གཟུང་བར་བྱའོ། །རྒྱུ་མཚན་དེ་དག་རྣམས་ཀྱི་རྒྱུ་མཚན་གྱིས་ཉེ་བར་རྟོག་པ་རྣམས་ནི་ནམ་ཡང་སྡུག་བསྔལ་བར་མི་འགྱུར་རོ། །སེམས་ཀྱི་ས་གཞིའི་རྒྱུ་མཚན་དུ་གྱུར་པ་འདི་དག་རྣམས་ནི་འཇིག་རྟེན་ལས་འདས་པ་ཡིན་ནོ། །གཞན་ཡང་གལ་ཏེ་ཐ་མལ་པའི་རྒྱུ་མཚན་འདི་དག་གིས་ཉེ་བར་མཚོན་པར་བྱེད་དེ། ཇི་ལྟར་གྲོག་མ་རྣམས་ཚང་ནས་ཕྱིར་འབྱུང་བར་འགྱུར་བ་དེ་བཞིན་དུ་ལྷའི་ཆར་འབབ་པར་འགྱུར་ལ། དེ་ཁོ་ན་བཞིན་དུ་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་འཇིག་རྟེན་ལས་འདས་པ་འདི་དག་བརྟག་པར་བྱ་སྟེ། ཇི་ལྟར་གྲོང་དང་། གྲོང་ཁྱེར་དང་། ཚོང་འདུས་དག་ལས་སྦྱིན་

70-175b

པ་པོ་དང་། སྦྱིན་བདག་རྣམས་དང་། དགེ་སྦྱོང་དང་། བྲམ་ཟེ་རྣམས་ཀྱིས་དང་། ཁྱིམ་བདག་རྣམས་ཀྱིས་ཁྱིམ་ཡང་བཤིག་ནས་གང་ན་སངས་རྒྱས་བཞུགས་པ་དེར་འོང་ངོ་། །དེའི་ཚེ་ཡང་དག་པའི་རྒྱུ་མཚན་དུ་གྱུར་པ་སྟོན་པར་མཛད་པའི་རྒྱུ་མཚན་རྣམས་ཀྱང་དགེ་སྦྱོང་དང་བྲམ་ཟེ་རྣམས་ཀྱིས་འདི་ལྟར་ཉེ་བར་མཚོན་པར་འགྱུར་རོ། །ཇི་ལྟར་ཆུང་དུ་ན་འདིར་སངས་རྒྱས་བཅོམ་ལྡན་འདས་ཀྱི་ལེགས་པར་བསྟན་པའི་གསུང་གིས་དམ་པའི་ཆོས་དག་གི་ཆར་འབེབས་པར་འགྱུར་ཏེ། སྦྱིན་པ་པོ་དང་། སྦྱིན་བདག་རྣམས་དང་། དགེ་སྦྱོང་དང་། བྲམ་ཟེ་དང་། ཁྱིམ་བདག་རྣམས་གང་དག་ཡིན་པ་དེ་དག་རྣམས་གང་ན་བཅོམ་ལྡན་འདས་སྤྲིན་དང་ལྡན་པར་གྱུར་པས་ཆར་མངོན་པར་འབེབས་པར་མཛད་པ་དེར་ཉེ་བར་ལེགས་པར་འགྲོ་བར་བྱེད་དོ་ཞེས་པའི་རྒྱུ་མཚན་འདི་དག་ནི་མཆོག་ཡིན་གྱི་ཐ་མལ་པའི་ཆར་འབབ་པར་འགྱུར་བའི་རྒྱུ་མཚན་ནི་མ་ཡིན་ནོ། །གཞན་ཡང་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདི་དག་གིས་ཟླ་བ་གཟས་འཛིན་པའི་རྒྱུ་མཚན་ཉེ་བར་རྟོག་པར་བྱེད་དོ། །མ་ཐ་ཡང་ཟླ་བ་གཟས་འཛིན་པ་འབྱུང་བར་འགྱུར་ཏེ། ཇི་ལྟར་ཆུར་མར་ནག་ནུབ་པར་འགྱུར་རོ། །རྒྱུ་མཚན་དེ་དག་རྣམས་ནི་མཛེས་པ་མ་ཡིན་ཞིང་ཞི་བར་འགྱུར་བ་ཡང་མ་ཡིན་ནོ། །དགེ་སྦྱོང་གིས་གང་མཛེས་པར་གྱུར་པའི་རྒྱུ་མཚན་འཇིག་རྟེན་ལས་འདས་པ་འདི་དུ་མ་རྣམས་དཔྱད་པར་བྱའོ། །ཆུང་དུ་ན་དུས་ཐ་མར་གྱུར་པ་རྩོད་ལྡན་གྱི་དུས་ན་དམ་པའི་ཆོས་ཟླ་བ་གཟས་འཛིན་པ་འབྱུང་བར་འགྱུར་ཏེ། ཇི་ལྟར་དམ་པའི་ཆོས་ཀྱི་མར་ནག་འདི་དག་རྣམས་ལོག་པར་ལྟ་བའི་སྐྱེ་བོ་རྣམས་ཀྱི་སྙིང་ལ་ནུབ་པར་འགྱུར་རོ། །འབྱིན་པར་མི་བྱེད་དོ། །རྒྱུ་མཚན་འདི་དག་རྣམས་མཆོག་ཡིན་གྱི་འཇིག་རྟེན་པའི་ཟླ་བ་གཟས་འཛིན་པའི་རྒྱུ་མཚན་ནི་མ་ཡིན་ནོ། །གཞན་ཡང་གལ་ཏེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདི་འཇིག་རྟེན་པའི་ཟླ་བ་གཟས་འཛིན་པ་མཆོག་ཡིན་པའི་རྒྱུ་མཚན་རྣམས་ཉེ་བར་མཚོན་པར་བྱེད་དོ། །ཇི་ལྟར་ཟླ་བ་གཟས་འཛིན་པར་འགྱུར་ཏེ། ཇི་ལྟར་བྱ་འདི་དག་རྣམས་ཀྱང་ནམ་མཁའ་ལ་དམའ་བ་ནས་འཕུར་རོ་ཞེས་ཉེ་བར་འཛིན་པའི་རྒྱུ་མཚན་འདི་ནི་མཛེས་པ་མ་ཡིན་ནོ། །དགེ་སྦྱོང་རྣམས་དང་དགེ་སྦྱོང་དུ་ཁས་འཆེས་པ་རྣམས་ཀྱིས་མཛེས་པར་གྱུར་པ་འཇིག་རྟེན་ལས་འདས་པའི་རྒྱུ་མཚན་

70-176a

འདི་དག་ཉེ་བར་བརྟག་པར་བྱ་སྟེ། ཇི་ལྟར་དུས་ཀྱིས་དམ་པའི་ཆོས་ཀྱི་ཟླ་བ་གཟས་འཛིན་པ་ཇི་ལྟ་བར་འབྱུང་བར་འགྱུར་བ་ན་ཇི་ལྟར་དམ་པའི་ཆོས་ཀྱི་ལམ་དུ་ཞུགས་པར་གྱུར་པ་མཆོག་ཏུ་དགེ་བ་དང་ལྡན་པའི་དགེ་སྦྱོང་རྣམས་དམའ་བར་འགྲོ་བར་འགྱུར་རོ། །བྱ་བཞིན་དུ་དམའ་ཞིང་དམའ་བ་ནས་ཀུན་དུ་སྤྱོད་པར་བྱེད་པའི་ལོག་པར་ལྟ་བ་ཅན་རྣམས་ཀྱི་སྒོ་ནམ་མཁའ་ལྟ་བུར་གྱུར་པ་ནས་དམན་པ་དམན་པའི་ཚིག་རྣམས་བརྗོད་པར་འགྱུར་རོ། །དུས་ཀྱི་སྐྱོན་དུ་གྱུར་པ་རྒྱུ་མཚན་གྱི་མཆོག་འདི་དག་རྣམས་ཉེ་བར་གཟུང་བར་བྱའོ། །དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་ཐ་མལ་པའི་ཟླ་བ་གཟས་འཛིན་པ་ནི་མ་ཡིན་ནོ། །གཞན་ཡང་རྒྱུ་མཚན་གང་གི་ཕྱིར་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདི་ཉི་མ་གཟས་འཛིན་པའི་རྒྱུ་མཚན་ཉེ་བར་རྟོག་པར་བྱེད་དེ། འཇིག་རྟེན་པའི་ཇི་ལྟར་འབྱུང་བར་འགྱུར་བ་རྣམས་ལ་ཉི་མ་གཟས་བཟུང་བར་གྱུར་པ་ན་ཕྱོགས་རྣམས་ལེ་བརྒན་གྱི་མདོག་ཏུ་རྟོགས་པར་གྱུར་ན་འདིར་དགེ་བ་དག་འབྱུང་བར་འགྱུར་རོ། །རླུང་འཇམ་པོ་རྣམས་རབ་ཏུ་འབྱུང་བར་འགྱུར་རོ། །ཕྱོགས་རྣམས་དངས་པ་དང་ལྡན་པ་དང་མཛེས་པ་དག་གིས་གཡས་ཕྱོགས་ནས་བསྐོར་བར་འགྱུར་བ་མཐོང་ངོ་། །བསམ་གཏན་སྒོམ་པ་ལ་བར་དུ་གཅོད་པར་འགྱུར་བས་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱི་རྒྱུ་མཚན་འདི་དག་ནི་མཛེས་པ་མ་ཡིན་ནོ། །འཇིག་རྟེན་པ་འདི་དག་རྣམས་ནི་འདིར་ཤེས་པ་མ་ཡིན་ནོ། །བདེ་བར་གྱུར་པ་ཡང་མ་ཡིན་ནོ། །དེ་ཁོ་ན་བཞིན་དུ་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་ཀྱིས་ཤིས་པར་བྱེད་པའི་རྒྱུ་མཚན་གཞན་རྣམས་བཟུང་བས་འཇིག་རྟེན་ལས་འདས་པ་རྣམས་ཉེ་བར་མཚོན་པར་བྱའོ། །ཇི་ལྟར་ཆུང་དུ་ན་བྱང་ཆུབ་སེམས་དཔའི་ཉི་མ་ལ་ཐམས་ཅད་མཁྱེན་པ་ཉིད་དུ་བྱང་ཆུབ་པའི་གཟས་འཛིན་པར་འགྱུར་བ་འབྱུང་སྟེ། བསྐལ་པ་གཅིག་གམ། བསྐལ་པ་གཉིས་སམ། བསྐལ་པ་གསུམ་ཉིད་ཀྱིས་ཀྱང་སྟེ། བྱང་ཆུབ་སེམས་དཔའ་འབྱུང་བ་འདི་ནི་དགེ་སྦྱོང་དག་འཇིག་རྟེན་ལས་འདས་པའི་རྒྱུ་མཚན་ཡིན་ནོ། །ཇི་ལྟར་འདིའི་བརྩོན་འགྲུས་དང་། སྦྱིན་པ་དང་། ཐོས་པ་དང་། ཡེ་ཤེས་རྣམས་ལ་ཆགས་པ་ཆགས་པར་གྱུར་པའི་མདོག་གིས་སེམས་ཅན་ཐམས་ཅད་ལ་སྙིང་རྗེ་དང་བྱམས་པས་ཆགས་པ་དང་ལྡན་པའི་ལུས་ཀྱི་

70-176b

ཕྱོགས་རྣམས་ཀྱིས་མཚོན་པར་གྱུར་པ་ན་དགེ་བ་འདི་དག་རྣམས་འབྱུང་བར་འགྱུར་རོ། །གལ་ཏེ་ཡོན་ཏན་རབ་ཀྱི་ཕུལ་དང་ལྡན་པའི་བྱང་ཆུབ་སེམས་དཔའ་འདི་འབྱུང་བར་གྱུར་པ་ན་མ་འོངས་པ་ན་བྱའི་ལྟས་སུ་གྱུར་པའི་ཉན་ཐོས་དང་། རང་སངས་རྒྱས་དང་། དགྲ་བཅོམ་པར་གྱུར་པའི་བྱ་རྣམས་འཇུག་པར་འགྱུར་བའི་རྟགས་རྣམས་ཀྱང་མཐོང་བར་འགྱུར་རོ། །གཡས་ཕྱོགས་ནས་བསྐོར་བ་ནི་ཡང་དག་པའི་གོ་འཕང་ཡིད་ལ་བྱེད་པ་གཡས་ནས་བསྐོར་བ་དེའི་ཚིག་བླ་དགས་ཡིན་ནོ། །གཞན་ཡང་འདིའི་ཇི་ལྟ་བ་ཉིད་དུ་འཇིག་རྟེན་པའི་རྒྱུ་མཚན་རྣམས་ལ་རབ་ཏུ་ལྟ་བར་བྱེད་དེ། ཇི་ལྟ་བར་དགེ་བར་འབྱུང་བར་མི་འགྱུར་བ་ནི་སྐྱ་རེངས་དམར་པོ་དང་ཕྱོགས་རྣམས་ཀྱང་རྩུབ་པར་རབ་ཏུ་མཐོང་ངོ་། །རླུང་རྩུབ་མོར་གྱུར་པས་རླུང་རྣམས་རབ་ཏུ་རྒྱུའོ། །སྐྱ་རེངས་དམར་པོ་དེའི་ཀུན་དུ་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་པར་འགྱུར་རོ། །ཇི་ལྟར་དགེ་སྦྱོང་ངན་པ་འདི་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་འཇིག་རྟེན་པའི་རྒྱུ་མཚན་ཉེ་བར་རྟོག་པར་བྱེད་དོ། །དེ་བཞིན་དུ་ཡང་དགེ་སྦྱོང་བཟང་པོས་འཇིག་རྟེན་ལས་འདས་པའི་རྒྱུ་མཚན་དད་པ་ཅན་ཐམས་ཅད་ལ་ཀུན་དུ་སྟོན་པར་བྱེད་པར་འགྱུར་ཏེ། ཇི་ལྟར་མི་མཛེས་པར་གྱུར་པ་རྣམས་འབྱུང་བར་འགྱུར་ན། དེ་ལ་ཅི་ཞིག་མི་མཛེས་པར་འབྱུང་བར་འགྱུར་བ་འདི་ལྟ་སྟེ། དམ་པའི་ཆོས་རྣམས་ནུབ་པར་འགྱུར་བའོ། །ཇི་ལྟར་རྒྱུ་མཚན་འདི་དག་རྣམས་མཐོང་བ་ཡིན་ཏེ། ཕྱོགས་ཀྱི་ཁ་དོག་རྩུབ་པ་ཞེས་བྱ་བ་ནི་དམ་པའི་ཆོས་ནུབ་པར་འགྱུར་བའི་ཚིག་རྩུབ་དང་། བརྫུན་དུ་སྨྲ་བ་དང་། ཕྲ་མ་བྱེད་པ་དང་། སྲོག་གཅོད་པ་དང་། མ་བྱིན་པར་ལེན་པར་འགྱུར་བ་རྣམས་ལ་དགའ་བའི་སྐྱེས་བུ་དག་ཕྱོགས་སུ་འབྱུང་བར་འགྱུར་རོ། །རླུང་རྩུབ་མོ་རྣམས་རབ་ཏུ་རྒྱུ་བ་ཞེས་བྱ་བ་ནི་མི་སྙན་པའི་ཚིག་བླ་དགས་ཡིན་ནོ། །གང་གི་ཚེ་དམ་པའི་ཆོས་རྣམས་ནུབ་པར་གྱུར་པ་ན་སེམས་ཅན་ཆོས་དང་ལྡན་པ་མ་ཡིན་པ་རྣམས་འབྱུང་བར་འགྱུར་རོ། །དེའི་ཚེ་མི་སྙན་པར་གྱུར་པའི་རླུང་རྣམས་ཕྱོགས་དག་ཏུ་འཕྱུར་བར་འགྱུར་རོ། །ཇི་ལྟར་སེམས་ཅན་འདི་དག་རྣམས་མཛེས་པ་མ་ཡིན་པར་གྱུར་པའི་སྡིག་པ་རྣམས་བྱེད་པར་གྱུར་པ་དེ་ལྟར་མི་སྙན་པའི་རླུང་རྣམས་རྒྱུ་བར་འགྱུར་རོ། །གཞན་ཡང་དེ་ཁོ་ན་ལྟར་འཇིག་རྟེན་པའི་རྒྱུ་མཚན་དུ་གྱུར་པ་དམར་རེངས་

70-177a

ཀྱི་མདོག་གི་ཀུན་དུ་ཆ་བྱད་ཀྱིས་ཉི་མ་ནམ་མཁའ་ལ་ཤར་ནས་གནས་པར་རབ་ཏུ་མཐོང་བར་གྱུར་པ་དེ་བཞིན་དུ་འཇིག་རྟེན་ལས་འདས་པའི་རྒྱུ་མཚན་འདི་དག་རྣམས་ཀྱང་ཕྱིས་ཀྱི་རྒྱུ་མཚན་དུ་མཐོང་བ་ཡིན་ཏེ། དམར་རེངས་ཀྱི་མདོག་ནི་དགེ་སྦྱོང་ངན་པ་དང་། བྲམ་ཟེ་ངན་པའི་འཁོར་རྣམས་ཀྱི་ཀུན་དུ་ཆ་བྱད་ཅན་གྱི་ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་མངོན་པར་ང་རྒྱལ་བའི་ལོག་པར་ལྟ་བ་ཅན་རྣམས་ཀྱི་ཉི་མ་ངན་པ་ཡིན་ལ། ཐམས་ཅད་མཁྱེན་པ་མ་ཡིན་པར་ཐམས་ཅད་མཁྱེན་པར་ཁས་འཆེས་པ་རིགས་ངན་པའི་རིགས་སུ་གྱུར་པ་རྣམས་ནམ་མཁའ་ལ་ཤར་ནས་གནས་པ་ཡིན་ནོ། །དེ་ལ་རྣམ་པ་འདི་ལྟ་བུའི་ལོག་པར་ལྟ་བའི་ཉི་མ་ཤར་བར་གྱུར་པས་རྩྭ་དང་། ནགས་དང་། ནགས་ཚང་ཚིང་དང་། སྨན་རྣམས་ཐམས་ཅད་སྐམ་པར་འགྱུར་རོ། །འདིས་ནི་སྐྱེས་བུ་རྣམས་ཀྱི་དགེ་བ་ཐམས་ཅད་དང་ཡང་དག་པའི་ལྟ་བ་སྨན་རྣམས་རྩྭ་བཞིན་དུ་སྐེམས་པར་འགྱུར་རོ། །དེ་བཞིན་དུ་འདི་ཡང་འཇིག་རྟེན་ལས་འདས་པའི་བསམ་གཏན་སྒོམ་པ་ན་ཀུན་དུ་གསལ་བར་བྱེད་པ། དོན་དམ་པའི་དེ་ཁོ་ན་ཉིད་གསལ་བར་བྱེད་པ། མཆོག་ཏུ་གྱུར་པའི་བློ་གྲོས་འཇིག་རྟེན་ལས་འདས་པའི་རྒྱུ་མཚན་མཚོན་པར་བྱེད་དོ། །ཉེ་བར་མཚོན་ནས་ཀྱང་སྟོན་པར་བྱེད་དོ། །དེ་དག་ཏུ་གྱུར་པ་གང་ཡིན་པ་རྣམས་ཀྱང་གང་དག་ཅེ་ན། དད་པ་ཅན་གྱི་བྲམ་ཟེ་དང་ཁྱིམ་བདག་དེ་དག་རྣམས་ལ་སྟོན་པར་བྱེད་དོ། །ཇི་སྲིད་དུ་དམ་པའི་ཆོས་ཀྱི་ཉི་མ་ཤར་བར་གྱུར་པ་དེ་སྲིད་དུ་བདེ་བའི་ལས་རྣམས་ལ་རབ་ཏུ་འབད་པར་བྱའོ། །ཕྱི་ནས་ཆོས་ཐམས་ཅད་ནུབ་པར་གྱུར་ནས་ལོག་པར་ལྟ་བའི་ཉི་མ་ཤར་བར་གྱུར་པ་ན་དགེ་སྦྱོང་དགེ་སྦྱོང་དུ་ཁས་འཆེས་པ་རྣམས་དང་། བྲམ་ཟེ་བྲམ་ཟེར་ཁས་འཆེས་པ་རྣམས་ཐམས་ཅད་མཁྱེན་པ་དང་། ཐམས་ཅད་མཁྱེན་པར་ཁས་འཆེས་པའི་དགེ་སྦྱོང་ངན་པ་དང་བྲམ་ཟེའི་ཆ་བྱད་ཅན་རྣམས་ཀྱིས་སྡུག་བསྔལ་བར་བྱས་པར་གྱུར་ཏ་རེ། བློ་མཆོག་རྒྱ་ཆེ་བར་གྱུར་པ་རྣམས་ཀྱི་དེ་ཁོ་ན་ཉིད་ཀྱི་རྒྱུ་མཚན་རྣམས་ནི་ཐམས་ཅད་མཁྱེན་པའི་བསྟན་པའི་མཆོག་འདི་ཡིན་ནོ་ཞེས་དེ་དག་གིས་དེ་ལྟར་སྟོན་པར་བྱེད་དོ། །དེ་བཞིན་དུ་རྒྱུ་མཚན་གྱི་སེམས་རྣམས་ནི་བར་དུ་གཅོད་པར་བྱེད་པ་ཡིན་ནོ། །བསམ་གཏན་སྒོམ་པར་གྱུར་པ་ན་འདི་དག་

70-177b

རྣམས་དང་གཞན་ཡང་འཇིག་རྟེན་པ་རྣམས་ཀྱིས་ནི་བར་ཆད་བྱེད་པར་འགྱུར་རོ། །དེ་ལ་འཇིག་རྟེན་པའི་བར་ཆད་འདི་ཡིན་ཏེ། འཇིག་རྟེན་ལས་འདས་པའི་ལམ་འདི་ལས་འཁོར་བར་མངོན་པར་འཇུག་པར་བྱེད་པ་ནི་འཇིག་རྟེན་པའོ། །འཇིག་རྟེན་ལས་འདས་པས་ནི་མྱ་ངན་ལས་འདས་པའི་མཐར་ཐུག་པར་བྱེད་པ་ཡིན་ནོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། བསམ་གཏན་སྒོམ་དང་རྣམ་པར་བྲལ། །རྒྱུ་མཚན་ལ་ནི་རྟག་ཏུ་དགའ། །དགེ་བའི་ཆོས་ནི་རྣམ་པར་སངས། །ངན་འགྲོར་འགྲོ་བར་རིངས་པ་ཡིན། །དེ་ནི་རང་གི་ཆོས་སྤངས་ནས། །གཞན་གྱི་ཆོས་ལ་དགའ་བར་བྱེད། །དེ་ནི་ཆོས་གཉིས་ལས་ཉམས་ནས། །ལོག་པར་ལྟུང་བའི་འོས་ཡིན་ནོ། །རང་གི་ཁྱིམ་ནི་ཡོངས་སྤངས་ནས། །གཞན་གྱི་ཁྱིམ་ནི་སྲུང་བ་ཡིན། །དེ་ནི་རྒོད་དང་ཡང་མོར་འགྱུར། །ནོར་མེད་པར་ཡང་མྱུར་དུ་འགྱུར། །ཇི་ལྟར་བློ་ངན་རྨོངས་པ་གང་། །རྒྱལ་འདོད་མཁས་པའི་ང་རྒྱལ་ཅན། །རང་གི་ཆོས་ནི་རྣམ་སྤངས་ནས། །གཞན་གྱི་ཆོས་ཀྱིས་འཕེལ་བར་བྱེད། །ཆོས་མིན་པ་དང་སྙན་མིན་པའི། །གཞན་གྱི་རྟགས་ཀྱིས་ཉེ་བར་འཚོ། །རྩྭ་བཞིན་འགྲོ་བའི་འཇིག་རྟེན་ཡང་། །ཕྱི་མར་ངན་འགྲོར་འཚེད་པ་ཡིན། །གང་ཞིག་ཞི་བའི་ཡུལ་ལ་གནས། །སྡིག་པའི་ལས་ལས་ལྡོག་བྱེད་པ། །སྡུག་བསྔལ་ཚོགས་ནི་དེས་མི་མཐོང་། །ཞི་བའི་མཐའ་ལ་འཇུག་པ་ནི། །སྤྲོ་མེད་ཞེ་སྡང་སྤངས་པ་དང་། །འདོད་པ་སྤྱོད་ལས་ཤིན་ཏུ་འདས། །བརྩོན་འགྲུས་བརྩམས་དང་ཆོག་ཤེས་དང་། །བསམ་གཏན་པ་འདིར་དགེ་སློང་བརྗོད། །འདོད་ལས་གྲོལ་མིན་ཆགས་ཅན་གང་། །རྟག་ཏུ་ཟས་ལ་སྤྱོད་ལྡན་པ། །ལུས་ངག་བསྡམས་པའི་རྐུན་མ་འདི། །འདིར་ནི་དགེ་སྦྱོང་མིན་པར་བརྗོད། །རྒྱུ་མཚན་སྟོན་པའི་སྦྱིན་པ་དང་། །རྒྱུ་སྐར་བགྲང་བའི་སེམས་བྲལ་ཅན། །རྒྱལ་པོ་སྟེན་དང་བག་མེད་དང་། །འདིར་ནི་འདི་ལ་ནག་འོས་མིན། །སྨན་པ་རི་མོའི་ལས་བྱེད་དང་། །དེ་བཞིན་ཐོས་ངན་སྙན་དངགས་སྡེབ། །འདྲེས་པར་གནས་དང་ཞབས་འབྲིང་བྱེད། །དགེ་སློང་རབ་ཏུ་ཉམས་པར་འགྱུར། །བསམ་གཏན་སྒོམ་ལ་ཞེ་སྡང་ཞིང་། །ཚོགས་པ་འདུས་ལ་དགའ་བ་དང་། །རྙེད་དང་བཀུར་

70-178a

སྟི་ལ་ཆགས་པར། །བྱེད་པའི་དགེ་སློང་རབ་ཆུད་འཛའ། །གསེར་གྱི་ཁམས་དང་ཡང་དག་ལྡན། །གྲོགས་མང་ལ་ཡང་དགའ་བ་གང་། །གཞན་གྱི་རྙེད་ལ་ཆགས་པས་ཀྱང་། །དགེ་སློང་བསྟན་པ་ལས་ལྟུང་ངོ་། །གང་ཡང་ཚོགས་པ་རྣམ་སྤངས་ཤིང་། །སྡིག་པའི་ཚོགས་པ་མི་སྟེན་པར། །ཕྱེ་དང་ཆུས་ཀྱང་ཆོག་ཤེས་པ། །དགེ་སློང་དེ་ནི་ནད་མེད་ཡིན། །འབར་བ་ལྟ་བུའི་ཡུལ་རྣམས་ནི། །འོངས་པ་ཐམས་ཅད་སྤོང་བར་བྱེད། །ནོར་བུ་བཞིན་དུ་སྐྱོན་རྣམས་དག །དགེ་སློང་འདི་ནི་དགེ་སློང་བརྗོད། །ནང་ཡང་རྣམ་པར་དག་པ་དང་། །ཡེ་ཤེས་སྣང་བས་མངོན་པར་བརྒྱན། །དེ་ནི་ཚུལ་ཁྲིམས་གོས་ཀྱིས་གཡོགས། །སྤྱོད་ལྡན་དགེ་སློང་ཡིན་པར་བརྗོད། །འཇིག་རྟེན་ཆོས་ལས་རྣམ་འདས་གང་། །བརྟན་པས་རི་རབ་བཞིན་མི་གཡོ། །ཞི་བ་འཇིག་རྟེན་ཐམས་ཅད་བྱམས། །མཆོག་འགྲོ་དགེ་སློང་ཡིན་པར་བརྗོད། །གྲོང་ཁྱེར་རམ་ནི་ཚོང་འདུས་སུ། །མཚན་མོ་གསུམ་གནས་གཅིག་པུ་གནས། །རི་ཕུག་སྟེ་ན་པར་བྱེད་པ་ཡང་། །རྣམ་གྲོལ་དགེ་སློང་ཡིན་པར་བརྗོད། །སྡིག་པས་འཇིགས་དང་འདུ་འཛི་མེད། །ཤིན་ཏུ་མཉམ་བཞག་ལེགས་པར་བསྡམས། །ཡེ་ཤེས་སྟེན་དང་རྒྱུད་བརྟན་པ། །གཅིག་པུ་དགེ་སློང་ཡིན་པར་བརྗོད། །མི་གཡོ་སྙན་པར་སྨྲ་བ་དང་། །སྡིག་པའི་གྲོགས་པོ་རྣམ་སྤངས་པ། །བྱ་བ་ཀུན་ལ་ཆགས་མེད་པའི། །གྲོལ་བ་དགེ་སློང་ཡིན་ཞེས་བརྗོད། །དེ་ལ་དགེ་སློང་འདི་ནི་སྲིད་པའི་སྐྱོན་ལས་གྲོལ། །མཆོག་དང་མཆོག་མིན་རྣམ་ཤེས་ཏིང་འཛིན་ལ་ཆགས་མེད། །ཡེ་ཤེས་དེ་ལ་མངོན་དགའ་དགེ་བ་རྣམ་པར་དག །སྐྱེ་རྒའི་འཇིགས་པ་ལས་ནི་རྣམ་པར་གྲོལ་བ་ཡིན། །དེ་ལྟར་དེ་དག་ནི་དགེ་སློང་དུ་འོས་པ་ཡིན་ནོ། །བཟློག་པ་རྣམས་ནི་མིང་ཙམ་དགེ་སློང་དུ་གྱུར་པ་ཡིན་ཏེ། བར་དུ་གཅོད་པར་བྱེད་པ་ཉིད་ཀྱིས་བདག་ཉིད་རབ་ཏུ་ལྟུང་བས་རབ་ཏུ་ལྟུང་བར་གྱུར་པ་ཡིན་ནོ། །བསམ་གཏན་བྱེད་པ་ན་བར་དུ་གཅོད་པར་བྱེད་པའི་ཆོས་དྲུག་པ་འདི་ནི་འདིར་དགེ་སྦྱོང་གིས་མི་བྱའོ། །གཞན་ཡང་དགེ་སྦྱོང་དང་དགེ་སྦྱོང་དུ་དམ་བཅས་པ་རྣམས་ཀྱིས་ཆོས་བདུན་པ་མི་བྱའོ། །འདི་དག་གང་ཞེ་ན། འདི་ལྟ་

70-178b

སྟེ། འཇིག་རྟེན་པ་གཞན་རྣམས་ཀྱི་རྙེད་བཀུར་དང་དུ་ལེན་པའོ། །འདི་ནི་བརྣབ་སེམས་དང་། གནོད་སེམས་མང་བར་གྱུར་པ་བསམ་གཏན་བསྒོམ་པ་རྣམས་ཐམས་ཅད་དང་བྲལ་བར་གྱུར་པ་སྟན་འབའ་ཞིག་ཉེད་པར་བྱེད་པ། དགེ་སློང་གི་རྟགས་ཙམ་གྱིས་དགེ་འདུན་གྱི་མལ་སྟན་དང་། ནད་ཀྱི་རྐྱེན་སྨན་དང་། ཡོ་བྱད་རྣམས་ལ་ལོངས་སྤྱད་པ། ཁྱིམ་གྱི་ལས་རྣམས་ཀྱི་འཇིགས་པས་འཇིགས་པར་གྱུར་པ། ལེ་ལོ་ཅན་ཟས་འབའ་ཞིག་ལ་མངོན་པར་དགའ་བ་གཞན་རྣམས་ཀྱི་དགའ་བ་ལྟ་བ་ལ་ཆེད་ཆེར་བྱེད་པ། ཡུལ་ལ་ཆེད་ཆེར་བྱེད་པར་གྱུར་པའི་དགེ་སློང་ལ་དེ་སྲིད་ཅིག་ན་འབྱུང་བར་འགྱུར་བ་ནི་འཆི་བདག་འོང་བར་འགྱུར་ཏེ། བསམ་གཏན་བསྒོམ་པར་བྱ་བ་ལས་དེ་ལྟར་དགེ་སློང་འཆི་བར་ནི་ཚུལ་ཁྲིམས་ལས་ཡོངས་སུ་ཉམས་པ་བཞིན་དུ་ལུས་རྣམ་པར་འཇིག་པའི་འཆི་བ་ཡང་ཁྱད་པར་ཅན་མ་ཡིན་ནོ། །ཚུལ་ཁྲིམས་འཆལ་པ་དེས་ནི་དགེ་བའི་ཆོས་རྣམས་ཐམས་ཅད་ཡོངས་སུ་བཏང་བར་གྱུར་ནས་བསྟན་འབའ་ཞིག་ཉེད་པར་བྱེད་པ། དགེ་སློང་གི་རྟགས་འབའ་ཞིག་འཛིན་པར་གྱུར་པ། སྡོམ་པ་དང་རྣམ་པར་བྲལ་བར་གྱུར་པ་ཡིན་ནོ། །བསྡམ་པར་བྱ་བ་ཡང་ཡིད་ཀྱིས་ལེགས་པར་སྡོམ་པའོ། །དེ་ཡང་འདིས་བྱ་བར་མི་ནུས་སོ། །དེ་ལ་སྡོམ་པ་ནི་རྣམ་པ་བདུན་ནོ། །འདི་ལྟ་སྟེ། ངག་སྡོམ་པར་གྱུར་པ་སྟེ། དགེ་སློང་དུས་གཅིག་ཏུ་བདག་གིས་དགེ་སློང་གཞན་དང་ངམ། ཁྱིམ་པ་དང་ཡང་རུང་སྟེ། ལྷན་ཅིག་ཏུ་གླེང་བརྗོད་པར་མི་བྱའོ། །བུད་མེད་ཀྱི་སྐྱེ་བ་པ་རྣམས་དང་རྣམ་པ་ཐམས་ཅད་དུ་དགེ་སློང་གིས་མངོན་པར་བརྗོད་པས་མངོན་པར་བརྗོད་པ་སྤང་བར་བྱའོ། །བསོད་སྙོམས་པ་རྣམས་ཀྱིས་ཀྱང་གཞན་སྦྱིན་པར་བྱེད་པ་རྣམས་དང་བྲལ་བར་གྱུར་ནས་ཡང་དེ་དག་ལ་མའམ་སྲིང་མོ་ཞེས་བྱ་སྟེ། རང་གི་རྐང་རྩེ་གཉིས་ལ་མིག་ཕབ་སྟེའོ། །དེའི་བདེ་བའམ་ཆ་བྱད་དུ་གཏོགས་པ་རྣམས་སམ། རྒྱན་རྣམས་ཀྱང་རུང་སྟེ། དགེ་སློང་གིས་བུད་མེད་དེ་དག་རྣམས་ལ་བལྟ་བར་ཡང་མི་བྱའོ། །དེ་ནས་དེའི་དུས་ན་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། རླུང་གིས་སྤར་ལ་ལེགས་བརྟེན་ནས། །དུས་རིང་ཞིག་ནས་མེ་ཡིས་སྲེག །བུད་མེད་ལྟ་བས་ཀུན་བསླང་བའི། །མེ་འདིས་མྱུར་

70-179a

བར་སྲེག་པར་བྱེད། །དེའི་ཕྱིར་འདོད་ཆགས་ཀྱི་མེ་བསྲེག་པར་འགྱུར་བའི་སྐྱོན་གྱིས་འཇིགས་པ་རྣམས་ཀྱིས་འཇིགས་པའི་དགེ་སློང་གིས་བུད་མེད་ཀྱི་སྐྱེ་བོ་རྣམས་དང་མངོན་པར་མ་སྨྲ་ཞིག་འདི་ནི་སྡོམ་པ་གཅིག་ཡིན་ནོ། །གཞན་ཡང་སྡོམ་པ་གཉིས་པར་གྱུར་པ་ནི་འདི་ལྟ་སྟེ། སྡིག་པའི་གྲོགས་པོ་དང་འགྲོགས་པའོ། །གནས་གཅིག་ཏུ་དུས་རིང་བ་དང་ལྡན་པར་མངོན་པར་དགའ་བར་བྱ་བ་མ་ཡིན་པ་རྙེད་པ་དང་བཀུར་སྟི་ཕལ་ཆེ་བར་གྱུར་པ་རྣམས་སྤང་བར་བྱ་བ་དང་། ནད་པ་རྣམས་ཡོངས་སུ་མི་གཏོང་བ་དང་། བུ་དང་བུ་མོ་རྣམས་བལྟ་བ་དང་། གང་ན་ཤིན་ཏུ་ཡང་རྩིས་ཆེ་བར་བྱེད་པའི་ས་དེ་སྤང་བ་དང་། འདྲེ་བར་འགྱུར་བའི་འཇིགས་པའི་དོན་དུ་ཚུལ་ཁྲིམས་འཆལ་པ་རྣམས་དང་ལྷན་ཅིག་གནས་པར་སྟེན་པ་དང་ཕྲད་པར་བྱེད་པ་ཡང་རབ་ཏུ་དགག་པར་བྱ་བ་ཡིན་ནོ། །དེ་སྡོམ་པ་རྣམ་པ་བདུན་པོ་རྣམས་སྤངས་ནས་གཅིག་ཏུ་ཟས་ལ་ཆེད་དུ་བྱེད་པར་གྱུར་པ་ཕ་རོལ་གཞན་རྣམས་ཀྱི་རྙེད་པ་དང་བཀུར་སྟི་མཐོང་བར་གྱུར་ནས་སམ། དེ་ཐོས་ནས་ཀྱང་མཆོག་ཏུ་ཡིད་མི་བདེ་བ་སྐྱེ་བར་འགྱུར་རོ། །དེའི་ཐབས་རྣམས་ཀྱང་སེམས་པར་བྱེད་དེ། གང་ཞིག་འདིའི་རྙེད་པ་དང་བཀུར་སྟིར་གྱུར་པ་དེ་དག་རྣམས་ངས་ཐབས་གང་ཞིག་བྱས་པས་ང་དེ་དག་རྣམས་ཀྱི་སྐལ་བ་ཅན་དུ་འགྱུར་ན་ཞེས་དེ་ལྟར་སེམས་ཀྱིས་སེམས་པར་བྱེད་ཅིང་རྣམ་པར་རྟོག་པར་བྱེད་པས་དེའི་སེམས་ཀུན་ནས་རྙོག་པ་ཅན་དུ་འགྱུར་རོ། །རྩོམ་པ་དེ་དག་གིས་བརྣབ་སེམས་མང་བ་རྣམ་པར་རྒྱུ་བར་འགྱུར་རོ། །དགེ་སྦྱོང་ངན་པ་དེའི་ཐོས་པ་ཐམས་ཅད་ཀྱང་ངན་པས་ཉིན་མོ་བདེ་བར་གནས་པ་མ་ཡིན་ཞིང་མཚན་མོ་ཡང་མ་ཡིན་ནོ། །དགེ་སློང་ཚུལ་ཁྲིམས་དང་ལྡན་པར་ཡང་སྦྱིན་པ་པོ་དང་སྦྱིན་བདག་རྣམས་ཀྱི་ཁྱིམ་དུ་སོང་ནས་ཚུལ་འཆོས་པའི་ཆ་བྱད་འཛིན་པར་འགྱུར་ཏེ། དལ་བུས་སྨྲ་བར་བྱེད། ཁད་ཀྱིས་འགྲོ་བར་བྱེད། ནང་ན་མ་ཞི་བར་ཡང་ཕྱི་རོལ་ཞི་བར་རང་ཉིད་ཀྱིས་རབ་ཏུ་སྟོན་ནོ། །གོས་སུ་ཚེམ་བེར་གྱོན་པར་བྱེད། །ལྷན་ཅིག་སྐྱེས་པའི་ཚུལ་ཁྲིམས་ཀྱིས་ཡོངས་སུ་ཁྱབ་པར་གྱུར་པ། དུང་གི་སྒྲ་དང་མཚུངས་པར་སྤྱོད་པའི་སྡིག་པའི་ཆོས་ཅན་དེ་དག་དང་ལྷན་ཅིག་ཏུ་དེ་ཁྱིམ་དག་ཏུ་སོང་ནས་བདག་ཉིད་ཀྱི་ཚུལ་ཁྲིམས་རབ་ཏུ་སྟོན་ནོ། །ཇི་ལྟ་ཇི་ལྟར་ཀུན་དུ་འགྲོ་བར་བྱེད་

70-179b

པས་དེ་ལ་སྦྱིན་པ་པོ་དང་། སྦྱིན་བདག་རྣམས་ཀྱིས་ཀྱེ་མ་དགེ་སློང་འདི་ནི་མཆོག་ཏུ་ཚུལ་ཁྲིམས་དང་ལྡན་པ་ཞེས་བྱ་བ་དེ་ལྟར་བདག་ཉིད་རབ་ཏུ་གནས་པར་བྱེད་པས་སྤྱོད་པ་དེ་དག་དང་། དེའི་རྗེས་སུ་སྤྱོད་པ་རྣམས་དང་ལྷན་ཅིག་ཏུ་ཡང་དང་ཡང་དུ་ཁྱིམ་དེ་ཉིད་དུ་ལེགས་པར་འགྲོའོ། །གལ་ཏེ་གང་ཞིག་ནས་ཕྱིན་ནས་དེས་དམ་པའི་ཆོས་ཀྱི་ཚིག་ཐོས་པར་གྱུར་ན། སྦྱིན་བདག་དང་སྦྱིན་པ་པོ་དེ་དག་རྣམས་ཀྱི་འཁོར་གཡོག་དང་བཅས་པ་ལ་དེ་འཆད་དོ། །ཇི་ལྟ་ཇི་ལྟར་བདག་གི་འདི་དག་རྣམས་ཀྱིས་དགེ་སློང་གང་དེའི་རྙེད་པ་དང་བཀུར་སྟི་དེ་རྣམས་བདག་ལ་འགྱུར་རོ། །སྡིག་པ་འདི་དག་གིས་དེ་ནི་དགེ་སློང་གི་གཟུགས་ཀྱི་རྐུན་མ་གཞན་གྱི་རྙེད་པ་དང་བཀུར་སྟི་རྗེས་སུ་འཕྲོག་པས། ཁྱིམ་རྣམས་སུ་འགྲོ་བར་བྱེད་པ་གཞན་རྣམས་ལ་གནོད་པར་བྱེད་པ་ལ་མངོན་པར་དགའ་བ་དེ་ཉིད་ཀྱི་གང་བར་ཆད་བྱེད་པར་མི་འགྱུར་བ་ནི་མིག་ཕྱེ་བ་དང་བཙུམས་པ་ཙམ་ཡང་ཡོད་པ་མ་ཡིན་ནོ། །གལ་ཏེ་མེད་པས་ཀྱང་ཐང་ཅིག་མ་ཡིན་པ་དང་། ཡུད་ཙམ་དུ་མ་ཡིན་པ་དང་། མཚན་མོར་མ་ཡིན་པ་དང་། ཉིན་མོ་མ་ཡིན་པ་ཡང་ཚུལ་ཁྲིམས་འཆལ་པ་གང་ཡིན་པའི་བསམ་གཏན་བསྒོམ་པ་སྤངས་པའི་དགེ་སློང་ངན་པ་དེ་དག་དམྱལ་བར་ཡང་མ་ཡིན་པའམ། ཡི་དགས་སུ་མི་སྐྱེ་བའམ། དུད་འགྲོའི་སྐྱེ་གནས་རྣམས་སུ་མི་འགྲོ་བར་འགྱུར་བ་ནི་མ་ཡིན་ནོ། །གཞན་ཡང་དགེ་སློང་འདི་ལྷན་ཅིག་པའི་སྐྱེ་བའི་སྐྱེ་བོ་ཀུན་དང་བཅས་ནས་ཀྱང་། སྔོན་དགེ་སློང་ཚུལ་ཁྲིམས་དང་ལྡན་པ་གཞན་དེས་ཉེ་བར་ཕྱིན་པའི་ཁྱིམ་དེར་འཁོར་རྣམས་ལ་རྗོད་པར་བྱེད་པའམ། ཡང་ན་དེས་འདིའི་ཚུལ་ཁྲིམས་སུན་འདོན་པར་བྱེད་དོ། །ཡང་ན་དེས་འདི་སྤྱོ་བ་སྟེ། དེ་ལྟར་ཡང་འདིས་དགེ་སློང་གང་ཁྱེད་ཅག་གི་ཁྱིམ་འདིར་ཞུགས་པར་གྱུར་པ་དེ་ནི་ཚུལ་ཁྲིམས་འཆལ་པར་གྱུར་པ། ལེ་ལོ་ཅན་ཤིན་ཏུ་དམན་པར་གྱུར་པ། བྱ་བཞིན་རྨོངས་པ་བློ་གྲོས་དམན་པར་གྱུར་པའོ་ཞེས་དེ་ལྟར་ཤིན་ཏུ་སྤྱོ་བར་བྱེད་པ་ལ་མངོན་པར་དགའ་བར་གྱུར་ཅིང་རྟག་ཏུ་བརྩོན་པ་དང་ལྡན་པ་རྣམས་རྣམ་པ་དེ་ལྟ་བུར་གྱུར་པའི་ཆོས་ཀྱི་སྤྱོད་ཡུལ་ཅན་རྣམས་ལ་ཇི་ལྟར་ན་བསམ་གཏན་བསྒོམ་པ་ལ་འཇུག་པར་འགྱུར་བ་དེ་ནི་གསོག་ཏུ་གྱུར་པ། གསོ་བ། སྙིང་

70-180a

པོ་མེད་པ་ཡིན་པ་གང་གི་ཕྱིར་དེའི་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། སྐྱེས་བུ་ཡང་དག་ཡིན་བརྗོད་པ། །སེམས་ཅན་ཐམས་ཅད་ཉེར་འཇོམས་པོ། །མུན་པའི་ཚོགས་དང་འདྲ་བ་སྟེ། །གསོན་དག་ཏུ་ཡང་ཤི་དང་མཚུངས། །ཇི་ལྟར་ལྟུང་མིན་ལྕེ་ལ་ནི། །ངག་གིས་མཚོན་ནི་བྱེད་པ་པོ། །གང་ཞིག་བརྫུན་དུ་སྨྲ་བྱེད་པས། །ཡང་དག་ཡོན་ཏན་འཇིག་བྱེད་པོ། །ཁ་ནི་གཅན་གཟན་ཉེ་བ་དང་། །ཁ་ནི་ཁྱི་ལ་ཉེ་བ་ཡིན། །གང་ཞིག་བརྫུན་དུ་སྨྲ་བྱེད་པ། །ཁ་ནས་མེ་ནི་རབ་ཏུ་འབར། །ངག་དུག་འདིར་ནི་དུག་ཏུ་བརྗོད། །ཞིང་དང་འགྲོ་བ་དུག་མ་ཡིན། །ངག་དུག་གིས་བཅོམ་སེམས་ཅན་རྣམས། །དམྱལ་བའི་མཆོག་ཏུ་འགྲོ་བ་ཡིན། །རང་གི་ཁ་ནས་རྣག་ལྷུང་བ། །ལྕེ་ཡི་ལས་ཀྱིས་དབྱུང་བ་ཡིན། །གང་ཞིག་བརྫུན་དུ་སྨྲ་བྱེད་པ། །ཕྱི་ས་དང་ནི་ཡང་ན་མེད། །དེ་དག་ལེགས་བསྡམས་ཞགས་པ་ཡིས། །དམྱལ་བའི་ཕོ་ཉའི་མཆོག་ཡིན་ནོ། །ཆོས་ཀྱི་ཟམ་པ་གཅོད་པ་ལའང་། །བརྫུན་གྱི་ཚིག་ནི་རབ་ཏུ་འཇུག །དེ་ལ་མ་མེད་ཕ་ཡང་མེད། །སངས་རྒྱས་རྣམས་དང་སྡོམ་པའང་མེད། །སྡིག་པའི་ལས་ཀྱིས་གང་ལྷུང་ནས། །བརྫུན་དུ་སྨྲ་བའི་ཚིག་བརྗོད་པ། །སྐབས་མིན་བར་ནི་ཡང་མོར་འགྲོ། །དམ་པ་ཡང་ནི་ཡོངས་སུ་སྤོང་། །གང་དག་བརྫུན་གྱི་ཚིག་སྨྲ་བ། །ལྷ་རྣམས་ཀྱིས་ཀྱང་སྤོང་བ་ཡིན། །ངག་རྣམས་ཡོངས་སུ་འཛིན་མེད་དང་། །མྱུར་བར་ཡང་ནི་ཁྲོ་བ་དང་། །མི་བརྟན་པ་དང་སྐལ་བ་ཆུང་། །སྡུག་བསྔལ་མཐའ་ནི་ཡས་པར་གནས། །སེམས་ཅན་ཐམས་ཅད་ཉེར་འཇོམས་པའི། །གཞན་གྱི་བདེ་ལ་སུ་ཞེ་སྡང་། །གཞན་གྱི་སྡུག་བསྔལ་སྐབས་ཚོལ་བའི། །སྐྱེས་བུ་དམྱལ་བར་འགྲོ་བ་ཡིན། །དེ་ལྟར་བཅོམ་ལྡན་འདས་འོད་སྲུང་འདིས་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་ཆོས་བདུན་པ་བསྟན་ནོ། །གང་གི་ཚེ་སྡིག་པ་ཅན་གྱི་སྐྱེས་བུ་དེ་གཞན་ཚུལ་ཁྲིམས་དང་ལྡན་པ་དེའི་རྙེད་པ་དང་། བཀུར་སྟི་རྣམས་དང་དུ་བླང་བའི་

70-180b

དོན་དུ་ཉེ་བར་འཇོམས་པར་བྱེད་པར་གྱུར་པ་དེའི་ཚེ་ལྷ་དག་གིས་ཡོངས་སུ་སྤོང་ངོ་། །གང་ཞིག་གཞན་གྱི་ཡང་དག་པའི་ཡོན་ཏན་རྣམས་ཆུད་གཟན་ནས། ཡང་དག་པ་མ་ཡིན་སྐྱོན་གྱི་ཚིག་རྣམས་བདག་ཉིད་ཀྱི་ཕྱིར་རྗོད་པར་བྱེད་པ་དེ་དག་རྣམས་ཀྱི་ཁ་ནས་ནི་སྤུ་གྲི་ངེས་པར་འབྱུང་བ་ཡིན་ནོ། །རྙེད་པ་དང་བཀུར་སྟི་རྣམས་བདག་རང་ལ་འོང་བར་བྱེད་པའི་རྒྱུས་དེ་དེ་ལྟར་སེམས་པར་བྱེད་པའི་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་གང་བརྫུན་སྨྲ་བའི་བསམ་པ་དེ་ཡིན་ནོ། །དེ་ནི་སྡིག་པ་ཅན་གྱི་སྤྱོད་པ་ཡིན་པར་གྱུར་ཀྱང་སྡིག་པའི་སྤྱོད་པ་ཡིན་པར་མ་གོ་ཞིང་། ཆོས་མ་མཐོང་བར་སྦྱིན་པ་པོ་དང་། སྦྱིན་བདག་རྣམས་ཀྱི་ཁྱིམ་དུ་མྱུར་བར་འགྲོའོ། །དེའི་ཕྱིར་ན་དགེ་སློང་རྣམས་ཀྱིས་ཆོས་བདུན་པོ་འདི་སྤང་བར་བྱའོ། །འདི་ལྟ་སྟེ། གཞན་གྱི་རྙེད་པ་དང་བཀུར་སྟི་དང་དུ་ལེན་པའོ། །གཞན་ཡང་དགེ་སློང་རྣམས་བསམ་གཏན་སྒོམ་པར་གྱུར་པ་ན་བར་དུ་གཅོད་པར་བྱེད་པའི་ཆོས་བརྒྱད་པ་ཡོད་དེ། འདི་དག་ཀྱང་གང་ཞེ་ན། འདི་ལྟ་སྟེ། གསེར་འགྱུར་གྱི་ཤ་ཟ་ཞེས་བྱ་བའོ། །འདི་ན་དགེ་སློང་དག་གིས་སྐྲ་དང་ཁ་སྤུ་རྣམས་བྲེགས་ནས་གོས་ངུར་སྨྲིག་བགོས་ཏེ། ཡང་དག་པ་ཁོ་ནའི་དད་པས་ཀྱང་ཁྱིམ་ནས་ཁྱིམ་མེད་པར་རབ་ཏུ་བྱུང་བར་གྱུར་པ་ནི་འཁོར་བའི་འཇིགས་པ་རྣམས་ཀྱིས་འཇིགས་པར་གྱུར་པའི་ཕྱིར་ཡིན་ལ། དེ་ལ་འཁོར་བ་རྣམས་ན་ནི་སྡུག་བསྔལ་མང་བར་གྱུར་པ་ལས་མདོར་བསྡུ་ན་སྡུག་བསྔལ་གཉིས་ཡིན་ཏེ། ཕུང་པོ་དང་། ཁམས་དང་། སྐྱེ་མཆེད་ལ་རྟེན་པའི་ཁམས་གསུམ་པ་ཡིན་ནོ། །རྒྱས་པར་བྱ་ན་ནི་འགྲོ་བ་ལྔ་པོ་རྣམས་སུ་ཡིན་ནོ། །གཞན་ཡང་རྒྱས་པར་བྱ་ན་ནི་དམྱལ་བ་བརྒྱད་པོ་རྣམས་དང་། ཡི་དགས་རྣམས་དང་། དུད་འགྲོའི་འགྲོ་བ་རྣམས་དང་། འདོད་པ་ན་སྤྱོད་པའི་ལྷའི་རིས་དྲུག་པོ་རྣམས་དང་སྟེ། འདོད་པའི་ཁམས་པ་རྣམས་ལ་ཡང་དེ་ལྟར་རྣམ་པ་དུ་མར་བསྲན་པར་མི་ནུས་པའི་རབ་ཏུ་དབྱེ་བ་ཡོད་དོ། །གཟུགས་ཀྱི་ཁམས་རྣམས་ཀྱང་སྡུག་བསྔལ་བ་ཡིན་ཏེ། འཆི་འཕོ་བའི་དུས་ན་ཡིད་སྡུག་བསྔལ་བར་འགྱུར་རོ། །འཆི་འཕོ་བར་འགྱུར་བའི་དུས་ཀྱི་ཚེ་ན་ཏིང་ངེ་འཛིན་རྣམ་པར་འཁྲུག་པར་འགྱུར་བའི་ཕྱིར་ན་གཟུགས་མེད་པའི་ཁམས་པ་རྣམས་

70-181a

ཀྱང་ཡིན་ནོ། །དེ་ལྟ་བུའི་ཡིད་ཀྱིས་རྣམ་པ་མང་པོར་དང་རྣམ་པར་རྟོག་པ་དུ་མར་ཡང་བསྲན་པར་མི་ནུས་པའི་སྡུག་བསྔལ་ཀུན་ནས་མཐོང་བས་ངལ་བར་གྱུར་ནས་རིགས་ཀྱི་བུ་དག་སྐྲ་དང་ཁ་སྤུ་བྲེགས་ནས་ཡང་དག་པའི་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །དེ་ལྟར་གྱུར་པ་ནི་ཕྱོགས་གཅིག་གིས་འཇིགས་པ་ཡིན་ནོ། །གཞན་ཡང་སྡུག་བསྔལ་རྣམས་མཐོང་བར་གྱུར་པས་དགེ་སྦྱོང་གི་དངོས་པོར་འགྱུར་བ་རྣམས་གང་དག་ཅེ་ན། དེ་བཞིན་དུ་འདི་ལྟ་སྟེ། ལུས་ཀྱང་འདོད་པའི་ཁམས་དང་། གཟུགས་ཀྱི་ཁམས་དང་གཉིས་ན་ཡོད་པ་ཡིན་ལ་གང་གི་ཕྱིར་གང་ན་ལུས་ཡོད་པ་དེ་ནི་ཚོར་བའོ། །དེ་ལ་ཀུན་ནས་སློང་བ་པོའི་ཚོར་བ་ཇི་ལྟར་གཟུགས་ཀྱི་ཁམས་ན་ཡོད་ན་སྡུག་བསྔལ་ནི་གང་གི་ཚེ་བསམ་གཏན་གྱིས་དུབ་པར་གྱུར་པ་ན་དེའི་ཚེ་སྐྱོ་བས་ལྡང་བར་འགྱུར་ཏེ། ལུས་ཀྱང་ཉོན་མོངས་པར་འགྱུར་རོ། །འཆི་འཕོ་བའི་དུས་ན་ཡང་ལུས་ཀྱི་འོད་རྣམས་ཡོངས་སུ་ཉམས་པར་འགྱུར་རོ། །རླུང་དག་གིས་ཀྱང་ནང་དུ་ཀུན་ནས་རེག་པར་འགྱུར་རོ། །དེས་རེག་པར་གྱུར་པས་ཀྱང་སྔོན་མེད་པའི་ཚོར་བ་རྣམས་འདིའི་ལུས་ལ་སྐྱེ་བར་འགྱུར་ཏེ། མིག་གི་འདུས་ཏེ་རེག་པའི་རྐྱེན་གྱིས་ཚོར་བ་ནི་མ་གཏོགས་པ་སྟེ། བདེ་བ་ལུང་དུ་བསྟན་པ་དེ་བཞིན་དུ་སྒྲུབ་པར་བྱེད་པ་ཡིན་ནོ། །ཚོར་བ་གཟུགས་ལས་ཀུན་འབྱུང་བ་ཡིན་པར་རིགས་ཀྱི་བུ་དེས་ཐོས་པར་གྱུར་ནས་འཁོར་བ་འདི་མཐའ་དག་སྡུག་བསྔལ་གྱི་རང་བཞིན་དུ་གྱུར་པའི་ཁམས་དང་། སྐྱེ་མཆེད་དང་། ཕུང་པོ་དང་ཀུན་དུ་ལྡན་པའི་སྡུག་བསྔལ་མང་པོ་རྣམས་ཀྱི་རྟག་པར་ཟིལ་གྱིས་མནན་པར་གྱུར་པའི་འཁོར་བའི་སྡུག་བསྔལ་རྣམས་ཀུན་དུ་མཐོང་ནས་རབ་ཏུ་འབྱུང་ངོ་། །རབ་ཏུ་བྱུང་བ་དེ་ལ་གལ་ཏེ་ཤེད་ན་སྐྱེས་བུ་དམ་པ་རྣམས་དང་འགྲོགས་པར་བྱེད་དོ། །གལ་ཏེ་ན་དམ་པ་མ་ཡིན་པ་དང་སྟེ། དེ་དང་འགྲོགས་པས་ཀྱང་དེའི་རང་བཞིན་དུ་གྱུར་ནས་ཁམས་རྣམས་བསྐྱེད་པ་ལ་བརྩོན་པར་འགྱུར་རོ། །ཁམས་གཞན་གང་དག་གི་འཇིགས་པ་རྣམས་ཐོས་ནས་དེས་རབ་ཏུ་བྱུང་བ་ལ་ཁམས་གཞན་རྣམས་འབྱུང་བ་ཐོས་པར་གྱུར་ནས་ཏེ། དེ་ཡང་གསེར་གྱི་ཁམས་རྣམས་དང་དག་པའི་དངུལ་གྱི་ཁམས་རྣམས་སམ། དེ་ཡང་རིན་པོ་ཆེའི་ཁམས་རྣམས་ཀུན་དུ་རྐོ་བར་གྱུར་པ་དེ་དག་རྣམས་དེས་དེ་ལྟར་ཐོས་ནས་འདོད་པ་ཆེ་བར་གྱུར་ཅིང་

70-181b

འདོད་པའི་མེས་སྲེག་པར་བྱེད་དོ། །དེ་བསྲེགས་པར་གྱུར་པས་སྡིག་པའི་གྲོགས་པོ་དེ་དང་ལྷན་ཅིག་ཏུ་རི་རྣམས་ནས་རི་རྣམས་དང་། རི་བོ་རྣམས་ནས་རི་བོར། རྩེ་མོ་ནས་རྩེ་མོ་དང་། རིང་བ་རྣམས་ནས་རིང་བར་འགྲོའོ། །འདོད་པའི་མེ་དག་གིས་དེ་བསྲེགས་པར་གྱུར་པས་ཉིན་མོ་བདེ་བ་རྙེད་པར་མི་འགྱུར་ལ་མཚན་མོར་ཡང་མ་ཡིན་ནོ། །དེའི་སེམས་བརྒྱ་ལ་ཞིག་ན་འདི་ལྟར་འགྱུར་ཏེ། ཁམས་འདི་དག་རྣམས་ནི་དཔྱད་པར་མི་བྱའོ་ཞེས་སོ། །གང་དག་གི་དོན་དུ་རབ་ཏུ་བྱུང་བའི་ཁམས་དེ་དག་རྣམས་ནི་བོར་བར་གྱུར་ནས་ཀྱང་ཁམས་གཞན་དག་རྣམས་དཔྱོད་པར་བྱེད་དོ། །འདི་ལྟ་སྟེ། ལུས་ཀྱི་ཁམས་རྣམས་ལ་སེམས་པར་བྱེད་དེ་སྔོན་བཞིན་ནོ། །དེ་ནི་འདི་ལྟར་སེམས་ལེགས་པར་མ་བསྡམས་པ་དང་། རྣམ་པར་གཡེང་བའི་སེམས་སུ་གྱུར་པས་བསམ་གཏན་སྒོམ་པར་བྱེད་པ་ལས་ཡོངས་སུ་ཉམས་པར་འགྱུར་རོ། །དགེ་བའི་ཆོས་རྣམས་ལས་ཀྱང་ཡོངས་སུ་ཉམས་པར་འགྱུར་རོ། །དེ་ནི་དགེ་སྦྱོང་མ་ཡིན་ནོ། །ཁྱིམ་པ་ཡང་མ་ཡིན་ཏེ། མྱ་ངན་ལས་འདས་པ་ཐོབ་པར་བྱ་བ་ལས་རབ་ཏུ་བྱུང་བ་དེ་ཤ་ཟའི་འདོད་པས་ཁྲིད་པར་གྱུར་ཅིང་འདོད་པའི་ཞགས་པས་བཅིངས་ནས་འདོད་པས་དམྱལ་བར་འགྲོའོ། །དེ་ནས་དེའི་དུས་ན་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་པ། ཇི་ལྟར། ཁམས་རྣམས་འབྱུང་གནས་འདི་ཐམས་ཅད། །ལུས་ཡིན་པ་ནི་སྤོང་བར་བྱེད། །ལུས་ཀྱི་ཁམས་ཀྱི་ཚོགས་ནི་འདི། །དེ་བསྒྲལ་བ་ལས་ཐར་བ་ཡིན། །ལུས་ཀྱི་ཁམས་རྣམས་སྤང་བྱས་ནས། །ཁམས་གཞན་ལ་ནི་དགའ་བྱེད་པ། །ཁམས་ལ་སེམས་ཅན་དེ་རྨོངས་ནས། །ཤིན་ཏུ་སྡུག་བསྔལ་ལས་འགྲོལ་མིན། །དབྱིག་གི་ཁམས་ནི་དེ་བཞིན་དུ། །སྡུག་བསྔལ་འཇོམས་པར་འཇུག་པ་ཡིན། །ལུས་ཁམས་དེ་ཉིད་ཇི་བཞིན་ཤེས། །སྡུག་བསྔལ་ལས་ནི་རབ་ཏུ་འགྲོལ། །སྡུག་བསྔལ་སྡུག་བསྔལ་འབྱུང་བ་ཀུན། །སྡུག་བསྔལ་ལས་ནི་ཡོངས་སུ་འགྲོལ། །རྫས་ལ་རྒྱལ་པོ་ཆོམ་རྐུན་ཆུ། །མེ་འཇིགས་ཐམས་ཅད་ཀྱིས་ཉེར་འཚེ། །དེ་ཕྱིར་དོན་མིན་ལྡན་རྟག་ཏུ། །རིང་དུ་དེ་ནི་ཡོངས་སུ་སྤོངས། །བདེ་ལས་མི་བཟད་ཀུན་སྟོན་པ། །སྐྱེས་བུ་སྡུག་བསྔལ་ལྡན་པར་བརྗོད། །ལུས་ཁམས་དེ་ཉིད་ཤེས་པ་ནི། །ཁམས་ཀྱི་མཚན་ཉིད་དེ་ཉིད་ཤེས། །བསམ་གཏན་སྒོམ་དང་ལེགས་ལྡན་པ། །

70-182a

ཉོན་མོངས་རི་བོས་སྲེག་པར་བྱེད། །དེ་ཕྱིར་ལུས་སྐྱེས་པ་ཡི་ཁམས། །མཁས་པ་ཡིས་ནི་སོ་སོར་རྟོགས། །དེ་དག་རང་མཚན་ཤེས་ནས་ནི། །ལུས་ཅན་རྣམས་ནི་གྲོལ་བར་འགྱུར། །དེ་ཁོ་ན་བཞིན་དུ་ཁམས་དེ་དག་རྣམས་རབ་ཏུ་བརྩོན་པས་རིག་པར་བྱ་སྟེ། མཁས་པ་རྣམས་ཀྱིས་དབྱིག་དང་། དངུལ་དང་། རིན་པོ་ཆེའི་ཁམས་རྣམས་འབྱུང་བའི་དོན་དུ་དགའ་བར་ནི་མི་བྱ་སྟེ། གང་གི་རྩ་བ་ལས་སྡུག་བསྔལ་ཐམས་ཅད་འབྱུང་བར་འགྱུར་བའི་ཕྱིར་རོ། །རབ་ཏུ་བྱུང་བ་བརྩོན་པ་མེད་པ་རྣམས་ལ་ཡིན་ན་ནི་ཁྱིམ་པ་རྣམས་ལ་ལྟ་ཅི་སྨོས། དེའི་ཕྱིར་ན་དེ་ལ་རབ་ཏུ་འབྲེལ་བར་གྱུར་པ་ལས་འཇིགས་པ་ཐམས་ཅད་བྱེད་པར་འགྱུར་རོ། །ཇི་ལྟར་དོན་མ་ཡིན་པའི་བྱ་བ་རྣམས་བྱེད་པར་འགྱུར་བ་ཡིན་ནོ། །ཇི་ལྟར་ཐ་མལ་པའི་དོན་འདིས་ནི་བདེ་བ་ཐམས་ཅད་རབ་ཏུ་འབྱུང་བར་འགྱུར་བ་རྣམས་ཀྱང་དོན་མེད་པར་བྱེད་པ་ཡིན་ན་གསེར་འགྱུར་གྱི་ནོར་རྗེས་སུ་ཚོལ་བར་བྱེད་པ་རྣམས་ལ་ལྟ་སྨོས་ཀྱང་ཅི་དགོས། འདི་ལ་ཆགས་པར་གྱུར་པ་གང་ཡིན་པ་རྣམས་ནི་བསམ་གཏན་དང་འདོན་པ་རྩེ་གཅིག་པ་དག་ལ་རབ་ཏུ་བརྩོན་པར་མི་བྱེད་དོ། །དེ་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེའི་ཕྱིར་རབ་ཏུ་བྱུང་བ་རྣམས་ཀྱིས་བསམ་གཏན་བསྒོམ་པར་བྱའི་ནོར་བསྒྲུབ་པར་མི་བྱའོ། །དེའི་ཚེ་རྒྱ་ཆེན་པོའི་སྲེད་པ་འཕེལ་བར་འགྱུར་བའི་ཕྱིར་རོ། །དེའི་ཕྱིར་ནོར་ལ་ཆོག་ཤེས་པར་གྱིས་དང་། ནོར་རྣམས་ཀྱི་མཆོག་ཡིན་གྱིས་སེམས་ཅན་རྣམས་ནི་རྫས་ཀྱི་ནོར་རྣམས་ཀྱིས་དོན་མེད་པར་འགྱུར་བ་ཡིན་ནོ། །བསམ་གཏན་སྒོམ་པ་ན་བར་དུ་གཅོད་པར་བྱེད་པའི་ཆོས་བརྒྱད་པ་གཞན་འདི་ནི་དགེ་སྦྱོང་གིས་ཡོངས་སུ་སྤང་བར་བྱའོ། །གཞན་ཡང་བསམ་གཏན་ལ་བསམ་གཏན་དུ་བྱེད་པ་ན་བར་དུ་གཅོད་པའི་ཆོས་དགུ་པ་ཡོངས་སུ་སྤང་བར་བྱའོ། །འདི་གང་ཞེ་ན། འདི་ལྟ་སྟེ། དགེ་སྦྱོང་གིས་རྒྱལ་པོའི་ཞབས་འབྲིང་ནི་གནས་སྐབས་ཐམས་ཅད་དུ་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ལ་སྟེན་པར་གྱུར་ན་ཡུལ་ལྗོངས་པ་རྣམས་ཐམས་ཅད་ཀྱིས་མཆོད་པར་མི་འགྱུར་རོ། །རྒྱལ་པོ་ལ་སྟེན་པ་དང་ཡང་དག་པར་ལྡན་པའི་དགེ་སྦྱོང་ངན་པས་ནགས་ཀྱི་རིགས་རྣམས་སམ། གྲོང་

70-182b

ཁྱེར་རམ། གྲོང་ངམ། ཚོང་འདུས་སམ། གཞན་ཡང་རྣམ་པ་དེ་ལྟ་བུ་རྣམས་དེས་གལ་ཏེ་དེས་དོན་དུ་གཉེར་བར་བྱེད་པ་ཡིན་ན་གཞན་ཅི་ཞིག་ཚོལ་བར་མི་བྱེད། དེ་ལྟར་ན་ཡང་དགེ་སློང་འདོད་པ་ཆེ་བར་མི་འགྱུར་རམ། གལ་ཏེ་ཚོལ་བར་མི་བྱེད་ན་ཡང་སྤྱད་པ་རྣམས་དོན་མེད་པར་ཉོན་མོངས་པར་འགྱུར་རོ། །བསམ་གཏན་ལ་བསམ་གཏན་དུ་བྱེད་པ་ལས་ཀྱང་ཡོངས་སུ་ཉམས་པར་འགྱུར་རོ། །དེའི་ཐར་པའི་ལམ་ལ་ཡང་དག་པར་གནས་པ་ལས་འཆིང་བའི་ལམ་རྣམས་ལ་རྗེས་སུ་འགྲོའོ། །དེ་ལྟར་ན་དགེ་སློང་རྣམས་ཀྱིས་རྒྱལ་པོ་ལ་བསྟེན་པར་མི་བྱའོ། །ཡང་ཇི་ལྟར་བསྟེན་པར་མི་བྱ་ཞེ་ན། དེ་ལ་སྟེན་པར་མི་བྱེད་པ་རྣམས་ཀྱིས་ཀྱང་ཡང་དག་པ་མ་ཡིན་པའི་འདུ་འཛི་རྣམས་ཡོངས་སུ་སྤང་བར་བྱའོ། །འདུ་འཛི་རྣམས་ཡོངས་སུ་སྤང་བ་ཡང་གང་དག་ཏུ་བྱ་ཞེ་ན། འདི་ལྟ་སྟེ། སྡིག་པའི་གྲོགས་པོ་དང་། ཀུན་ནས་ཉོན་མོངས་པའི་ཡུལ་ལྔ་པོ་སྒྲ་དང་། རེག་བྱ་དང་། རོ་དང་། དྲི་དང་། གཟུགས་རྣམས་ལ་ཚུལ་བཞིན་མ་ཡིན་པར་ཡིད་ལ་བྱེད་པ་དང་། གཉིད་དང་། རྨུགས་པ་དང་། མཐའ་འཁོབ་ཀྱི་གྲོང་དུ་གནས་པ་བསྟེན་པར་མི་བྱའོ། །ལེ་ལོ་ཅན་དང་ལྷན་ཅིག་གནས་པར་མི་བྱའོ། །ཚུལ་འཆོས་ཅན་རྣམས་དང་འགྲོགས་པར་མི་བྱའོ། །སྟན་བཟང་པོ་ཅན་དང་ལྷན་ཅིག་གནས་པར་མི་བྱའོ། །ཚོང་པ་དང་ལྷན་ཅིག་འདྲི་རྨེད་ཀྱང་མི་བྱའོ། །གཞན་སྡུག་བསྔལ་བར་བྱས་པས་འཚོ་བ་རྣམས་དང་མ་ཡིན། རང་བཞིན་གྱིས་དྲི་མ་ཅན་དང་མ་ཡིན། ལྟ་བ་ལོག་པ་དང་མ་ཡིན། རྐོ་ཏྲོག་ཅན་དང་མ་ཡིན། ང་རྒྱལ་ཅན་དང་མ་ཡིན། ཁེངས་པ་དང་མ་ཡིན། ལྷུང་བར་གྱུར་ནས་ལངས་པ་དང་མ་ཡིན། རྒྱན་པོས་འཚོ་བ་དང་མ་ཡིན། ཆང་འཚོང་བ་དང་མ་ཡིན། འཐབ་ཀྲོལ་ཅན་དང་མ་ཡིན། བུད་མེད་ལ་དད་ཆེ་བ་དང་མ་ཡིན། ཉོ་ཚོང་གིས་ཉེ་བར་འཚོ་བ་དང་མ་ཡིན། དུད་པའི་མིག་ཅན་དང་མ་ཡིན། སྐྱེས་བུ་ཉུལ་མ་དང་མ་ཡིན། བྱ་བ་མང་བ་དང་མ་ཡིན། སྤྲོས་པ་ཅན་རྣམས་དང་མ་ཡིན། མུ་སྟེགས་ཅན་ཞུགས་པ་དང་མ་ཡིན། སྐྱེ་བོ་ཐམས་ཅད་དང་ཞེ་འགྲས་པ་རྣམས་དང་མ་ཡིན་ཏེ། ལྷན་ཅིག་ཏུ་འགྲོགས་པ་དང་། ངག་བརྗོད་པའམ། ལམ་དུ་འགྲོགས་པ་ཡང་

70-183a

དགེ་སློང་གིས་མི་བྱའོ། །དེ་ཅིའི་ཕྱིར་ཞེ་ན། རྣམ་པར་དག་པའི་སྐྱེས་བུ་ལ་ཡང་གང་གི་ཕྱིར་གཞན་གྱི་སྐྱོན་རྣམས་སྲིད་པར་འགྱུར་བར་སྐྱེ་བོ་མང་པོ་དོགས་ཏེ། ཇི་ལྟར་ཆུང་དུ་ན་འདི་ཡང་དེ་ལྟ་བུའི་རང་བཞིན་ཅན་རྣམས་དང་སྟེན་པའམ། འགྲོགས་པར་བྱེད་དོ་ཞེས་དེ་གཞན་གྱི་སྐྱོན་དེས་ཉེ་བར་གོས་པར་འགྱུར་རོ། །དེའི་ཕྱིར་དེ་ཉིད་ཀྱིས་དེ་དག་རྣམས་མི་བྱའོ། །རྒྱལ་པོ་སྟེན་པ་དེས་ཀྱང་ཅི་ཞིག་བྱ། རྣམ་པ་ཐམས་ཅད་དུ་གཤེ་བར་བྱ་བ་ཡིན་ནོ། །དེ་ནས་དུས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། དགེ་སློང་ནགས་ན་གནས་རྣམས་ལ། །རྒྱལ་པོ་སྟེན་པས་གཤེ་བ་ཡིན། །ངུར་སྨྲིག་ཅི་ཡིན་གསོད་གསལ་ཅི། །མི་གཙང་བས་འཚེ་སྤང་བར་གྱིས། །ལྷ་དང་ལྷ་མོས་ཡང་སྟེན་གང་། །དགེ་སློང་ཞབས་འབྲིང་འོས་མ་ཡིན། །དད་པ་རོ་དང་འགྲོགས་མིན་ཏེ། །མི་གཙང་སྟེན་ལ་འཕྱ་བར་འགྱུར། །ང་ཡི་མེད་དང་སྙིང་པོ་མེད། །སྤྲོ་བའང་མེད་པའི་ལུས་ཅན་རྣམས། །འཁོར་བའི་འཇིགས་པས་སྐྲག་པ་ཡིས། །རྒྱལ་པོ་སྟེན་པ་མཛེས་མ་ཡིན། །ནགས་དང་དགོན་པ་དུར་ཁྲོད་དང་། །ཤིང་རྩྭའི་བན་བུན་ས་ཕྱོགས་རིང་། །གནས་པའི་དགེ་སློང་རབ་ཏུ་མཛེས། །རྒྱལ་པོའི་ཁྱིམ་སྒོ་སྟེན་པ་མིན། །རྒྱལ་པོ་སྟེན་པ་ནི་དེ་ལྟར་ཐབས་དུ་མས་སྨད་པ་ཡིན་ལ། གྲོགས་ཚངས་པ་མཚུངས་པར་སྤྱོད་པ་རྣམས་ཐམས་ཅད་ཀྱིས་ཀྱང་རྣམ་པར་གཤེའོ། །གལ་ཏེ་ན་དགེ་སློང་རྣམས་ཀྱིས་བྱེད་ན་ཡེ་ཤེས་ཀྱི་རྒྱལ་པོ་ལ་བསྟེན་པར་བྱའོ། །དེ་བསྟེན་པས་ནི་ཤིས་པ་མཐར་ཐུག་པར་འགྱུར་བ་ཡིན་ནོ། །གང་དག་ཡེ་ཤེས་སྟེན་པར་འགྱུར་བ་འདིས་ནི་བདེ་ལེགས་ཀྱི་མཆོག་ཐོབ་པར་འགྱུར་བ་ཡིན་ནོ། །དེ་བསྟེན་པ་ནི་ཐབས་སུ་འགྱུར་བ་ཡང་ཡིན་ཏེ། འདི་ལྟར་བརྩོན་འགྲུས་བརྟན་པར་འགྱུར་བ་དང་། ལས་གཞན་མི་བྱེད་པ་ཉིད་དང་། བླ་མ་ལ་སྟེན་པར་བྱེད་པ་དང་། ཆོག་ཤེས་པར་འགྱུར་བ་དང་། དེ་ལ་རབ་ཏུ་རྟེན་པ་དང་། རྟག་ཏུ་སེམས་འདོད་པ་ལ་སྲེད་པ་མེད་པ་དང་། དེ་ལས་ཀྱང་དེ་བླ་མ་ལ་འདྲི་བ་ལ་རབ་ཏུ་སྟེན་པ་དང་། འཛིན་པ་དང་། ལེགས་པར་བགྲང་བ་དང་། སྙིང་ལས་ཆུང་བ་དང་། གྲོགས་ཚངས་པ་མཚུངས་པར་

70-183b

སྤྱོད་པ་དང་སྟེན་པར་བྱེད་པ་དང་། དགེ་སློང་ཡེ་ཤེས་ཀྱི་རྒྱལ་པོ་སྟེན་པ་རྣམས་ཀྱི་ཐབས་དེ་སྙེད་ཅིག་ཏུ་འགྱུར་རོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་གིས་ཚིགས་སུ་བཅད་པ་གསུངས་པ། ཇི་ལྟར། གོམས་པ་བླ་མ་ལས་ལེགས་ཉན། །དེ་བཞིན་སྡོམ་པ་རྒྱ་ཆེན་ཡིན། །ཡེ་ཤེས་རྒྱལ་པོ་བསྟེན་པས་ནི། །དྲན་བཞིན་དུ་ནི་ཚུལ་ཁྲིམས་སྟེན། །ལྷ་དང་བཅས་པའི་འཇིག་རྟེན་གྱི། །རྒྱལ་གང་བདེ་ལེགས་སྟོན་པ་པོ། །ཐ་མལ་རྒྱལ་མིན་ཤེས་བྱ་སྟེ། །སྲེད་པའི་འཆིང་བའི་སྡུག་བསྔལ་ཅན། །གང་ལ་སྡུག་བསྔལ་མི་དམིགས་པ། །དེ་ནི་འདིར་ནི་རྒྱལ་པོ་ཡིན། །གང་ཡང་སྡུག་བསྔལ་གྱིས་གཡོགས་དེ། །རྒྱལ་སྒྲ་ཇི་ལྟར་འདིར་འོས་ཡིན། །དེ་ལྟར་ཡེ་ཤེས་ཀྱི་རྒྱལ་པོ་དགེ་སློང་གིས་བསྟེན་པར་བྱའི་ཐ་མལ་པ་ནི་མ་ཡིན་ནོ། །ཀུན་ཏུ་སྟེན་པར་བྱེད་པ་ལས་བསམ་གཏན་སྒོམ་པ་ན་ཡོངས་སུ་ཉམས་པར་འགྱུར་རོ། །དེ་ཡོངས་སུ་ཉམས་པར་གྱུར་པས་སླར་ཡང་དམྱལ་བ་དང་། ཡི་དགས་དང་། དུད་འགྲོར་སྐྱེ་བར་འགྱུར་རོ། །གང་ལ་རྒྱལ་པོ་དེ་ལས་གྱུར་པའི་ཡུལ་གྱི་སྐྱོན་དེ་དག་སེམས་ཅན་རྣམས་ལ་ཡིན་པ་གང་གི་ཕྱིར་དགེ་སློང་གིས་གནས་སྐབས་ཐམས་ཅད་དུ་རྒྱལ་པོ་ལ་བསྟེན་པར་མི་བྱའོ། །ནགས་ན་གནས་པ་འདི་དག་རྣམས་ལ་རྣམ་པར་གཤེ་བའི་ཕྱིར་རོ། །དེའི་ཕྱིར་ཆོས་དགུ་པ་འདི་རྣམ་པར་སྨད་པར་བྱ་བ་བསམ་གཏན་སེམས་པ་ན་བར་ཆད་བྱེད་པ་ཡིན་ནོ། །གཞན་ཡང་ཆོས་བཅུ་པ་རྣམ་པར་སྨད་པ་བསམ་གཏན་སྒོམ་པ་ནི་བར་དུ་གཅོད་པར་བྱེད་པ་འདི་ཡང་གང་ཞེ་ན། འདི་ལྟ་སྟེ། བདེ་བར་ཕེའུ་འདེབས་པ་ཞེས་བྱ་བ་རོ་རྣམས་བྱེད་པ་པོ་ཡིན་ནོ། །གལ་ཏེ་དུས་རིང་བ་ནས་ཡུལ་ལ་འགྲོ་བས་རབ་ཏུ་རྒྱུ་བ་སྤངས་པར་གྱུར་པ་རྣམས་ལྗོངས་རྒྱུ་བས་ཉེ་བར་འགྲོ་བར་བྱེད་པ་ན་དགའ་བར་འགྱུར་བའི་ནགས་སམ། གནས་ཀྱང་ཀུན་ཏུ་བཏང་ནས་ཡུལ་དག་ཏུ་རྒྱུན་མི་འཆད་པར་ཉེ་བར་ཀུན་ཏུ་འགྲོའོ། །དེ་དེ་དག་རྣམས་ཀུན་ཏུ་འགྲོ་བ་ན་བག་མེད་པའི་སྤྱོད་པས་སྟེན་པར་བྱེད་པས་དེ་ཁྱིམ་ནས་ཁྱིམ་རྣམས་སུ་དང་། གྲོང་ནས་གྲོང་དང་། ཚོང་འདུས་ནས་ཚོང་འདུས། གྲོང་ཆུང་ནས་གྲོང་ཆུང་། གྲོང་ཁྱེར་ནས་གྲོང་ཁྱེར་རྣམས་སུ་ཀུན་ཏུ་འགྲོ་བར་བྱེད་དེ། ཇི་ལྟར་ཡུལ་ལྗོངས་རྣམས་སུ་ཚོགས་པ་

70-184a

འདུ་བར་བྱེད་པ་པོ་རང་གི་སྐྱེ་བོ་རྣམས་ལྟ་བ་ལ་དགའ་བར་གྱུར་པ། གཏམ་རྣམས་ལ་དགའ་བ། །དེ་ཕ་དང་། གཉེན་དང་། གྲོགས་བཤེས་དང་། རང་གི་སྐྱེ་བོ་རྣམས་ཀྱིས་ཕེའུ་འདེབས་སོ། །དེ་རོ་ལ་སྲེད་པར་གྱུར་པས་གང་དག་རྣམས་ལ་གང་དང་ཅི་ཡང་རུང་སྟེ། རོ་ལ་སྲེད་པར་གྱུར་པས་ཟ་བར་བྱེད་དོ། །ནགས་ཀྱི་བདེ་བ་རྣམས་དེས་བརྗོད་པར་གྱུར་ཅིང་བསམ་གཏན་བསྒོམ་པ་དང་ཡང་རྣམ་པར་བྲལ་བར་གྱུར་ནས་བག་མེད་པ་པོ་བག་མེད་པར་གྱུར་པས། ཟས་ལ་རྣམ་པར་རྒྱུ་བར་བྱེད་པ་ལ་ཅོ་འདྲི་བར་གྱུར་ནས་ལྷ་རྣམས་ཀྱིས་སྟེན་པར་མི་བྱེད་དོ། །གསོན་པའི་ཞིང་ས་རྣམས་ཟད་པར་འགྱུར་ཡང་བདེ་བར་ཕེའུ་འདེབས་པར་བྱེད་པ་དེ་དག་རྣམས་ལ་ཞེན་པར་གྱུར་པ་གང་གི་ཚེ་ཡང་དགེ་སློང་དེ་མ་བསྡམས་པར་རྒྱུ་བས་སྤྱོད་པ་ཡིན་ནོ། །དགེ་སློང་དེ་ཡང་མིག་གི་གཟུགས་རྣམས་མངོན་པར་མཐོང་བར་གྱུར་ནས་ཆགས་པར་འགྱུར་ཞིང་འདུན་པ་སྐྱེད་པར་ཡང་བྱེད་དོ། །གནོད་སེམས་སྐྱེད་པར་བྱེད་དོ། །དེ་ཉིད་ལ་ཕྱིར་ཞིང་ཉིད་ཀྱང་ཆགས་པར་འགྱུར་རོ། །དེ་རྒྱུན་ཏུ་ལྗོངས་རྒྱུ་བར་བྱེད་པས་རྒྱུ་བར་གྱུར་པ་ན་རང་གི་དོན་ལས་ཡོངས་སུ་ཉམས་པར་འགྱུར་རོ། །བསམ་གཏན་བསྒོམ་པ་ལས་ཡོངས་སུ་ཉམས་པར་འགྱུར་རོ། །ཡོངས་སུ་ཉམས་པ་དེ་མཆོག་ཏུ་རོ་ལ་ཞེན་པར་འགྱུར་རོ། །གཞན་གྱི་ཁྱིམ་རྣམས་སུ་ཡང་ལན་ཅིག་མ་ཡིན་ཕྱོགས་གཅིག་མ་ཡིན་པར་ཉེ་བར་འགྲོ་བར་བྱེད་དོ། །དེའི་མིག་གིས་གཟུགས་རྣམས་མངོན་པར་མཐོང་བར་གྱུར་ནས་འདུན་པ་སྐྱེད་པར་བྱེད་དོ། །གནོད་སེམས་སྐྱེད་པར་བྱེད་དོ། །དེ་ཁོ་ན་བཞིན་དུ་རྣ་བས་སྒྲ་རྣམས་ཐོས་པར་གྱུར་པ་ན་འདུན་པ་སྐྱེད་པར་འགྱུར། གནོད་སེམས་སྐྱེད་པར་འགྱུར་རོ། །དེ་བཞིན་དུ་སྣས་དྲི་རྣམས་བསྣམས་པར་གྱུར་པ་ན་འདུན་པ་སྐྱེད་པར་འགྱུར། གནོད་སེམས་སྐྱེད་པར་འགྱུར་རོ། །དེ་ནི་ཡུལ་རྣམས་ཐམས་ཅད་ལ་རབ་ཏུ་འཇུག་པར་གྱུར་པས་འཆིང་བ་ཐམས་ཅད་ཀྱིས་བཅིངས་པ། ཞགས་པའི་འཆིང་བ་ཐམས་ཅད་ཀྱིས་བཅིངས་པར་གྱུར་པ་དེ་འདོད་པ་ཐམས་ཅད་ཀྱི་རྗེས་སུ་འབྲང་བས་ཁྱིམ་པར་འགྱུར་གྱི་རབ་ཏུ་བྱུང་བ་ནི་མ་ཡིན་ནོ། །དེ་ལུས་ཞིག་པར་གྱུར་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་

70-184b

འགྱུར་ཏེ། བདེ་བར་ཕེའུ་འདེབས་པར་གྱུར་པའི་སྐྱོན་དང་པོས་སོ། །དེའི་ཕྱིར་སྐྱོན་འདི་མངོན་པར་མཐོང་བར་བྱས་ལ་དགེ་སློང་གིས་ལན་ཅིག་མ་ཡིན་ཞིང་འོར་ཅིག་མ་ཡིན་པར་ལྗོངས་རྒྱུ་བར་མི་བྱའོ། །དེས་ཡུལ་ལྗོངས་རྣམས་ཆུད་གཟོན་པར་འགྱུར་རོ། །གལ་ཏེ་ཡང་རྒྱུ་ན་དེ་འདོད་པའི་ཡོན་ཏན་ལྔ་ལ་རྒྱུའོ། །འདི་ལྟ་སྟེ། ནད་ཀྱི་རྐྱེན་སྨན་དང་། ཡོ་བྱད་རྣམས་དང་། དེ་བཞིན་དུ་བླ་མའི་དོན་དུ་ལྗོངས་ཡུལ་རྒྱུ་བས་རྒྱུ་བར་བྱའོ། །དེ་བཞིན་དུ་གལ་ཏེ་མཆོད་རྟེན་གྱིར་རམ། དགེ་སློང་རྣམས་ཀྱིས་གོས་ཧྲུལ་བར་གྱུར་པ་དེའི་འོག་ཏུ་ཡང་ཡུལ་ལྗོངས་སུ་རྒྱུ་བར་བྱ་ལ་རག་གོ། །དེ་བཞིན་དུ་དགེ་འདུན་གྱི་དབང་དུ་བྱས་ནས་ལྗོངས་རྒྱུ་བ་རྣམས་ཀྱིས་རྒྱུ་བར་བྱ་སྟེ། གང་དག་གིས་དགེ་འདུན་ལ་ཕན་པར་འགྱུར་བ་རྣམས་སོ། །དེ་བཞིན་དུ་གལ་ཏེ་རྒྱལ་པོ་གཞན་དག་གི་ཡུལ་འཁོར་རྣམས་འཇོམས་པར་བྱེད་པའམ། ལྗོངས་བཅོམ་པར་གྱུར་པ་ན་རྒྱལ་པོ་དེའི་དྲུང་དུ་ལྗོངས་རྒྱུ་བས་འགྲོ་བར་བྱའོ། །དེ་ལྟ་བུ་རྣམས་ནི་འབྲས་བུ་དང་བཅས་པར་འགྱུར་གྱི་གཞན་དུ་གལ་ཏེ་རྒྱལ་པོ་རྒྱུ་བར་གྱུར་ན་དེ་དོན་མེད་པར་རྒྱུ་བར་བྱེད་པ་ཡིན་ནོ། །བསམ་གཏན་སྒོམ་པ་དང་བྲལ་བར་གྱུར་ནས་རྒྱུའོ། །དེ་རྒྱུ་བར་གྱུར་པས་ནད་དང་། རྒ་བ་དང་། འཆི་བ་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། ཡིད་མི་བདེ་བ་རྣམས་ལས་ཡོངས་སུ་མི་འགྲོལ་ལོ། །དགེ་སྦྱོང་ངན་པ་དགེ་སྦྱོང་དུ་ཁས་འཆེས་པར་གྱུར་པ་འདིའི་རབ་ཏུ་བྱུང་བ་ནི་དོན་མེད་པ་ཡིན་ནོ། །དེའི་ཕྱིར་གང་དག་སྲེད་པའི་འདུན་པ་རྣམས་ཞི་བར་འགྱུར་བར་རྩོམ་པར་འདོད་ན་དེ་ལ་དེས་ཡིད་མཉམ་པར་གཞག་པར་འགྱུར་ཞིང་དབང་པོ་རྣམས་རབ་ཏུ་དང་བར་གྱུར་པས་དཀོན་མཆོག་གསུམ་པོ་དེ་ལ་ཡིད་བཏང་བར་གྱུར་ན། དེ་དག་གི་རྩ་བ་ལས་གྱུར་པའི་ཉོན་མོངས་པ་རྣམས་བག་ལ་ཉལ་དང་བཅས་ནས་རྩ་བ་ནས་བཅད་ནས་འདོན་པར་བྱའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། བསམ་གཏན་སྒོམ་པ་རྣམ་པར་སྤངས། །ཟས་འབའ་ཞིག་གི་བློ་དང་ལྡན། །དགེ་སློང་འདི་ནི་འདིར་ཤེས་བྱ། །ཤ་ཟ་དང་ནི་མཚུངས་པའི་ཡིད། །བསམ་གཏན་ལས་ནི་སྦྱིན་བདེ་མིན། །ཞེས་ནི་མཁས་པས་རབ་ཏུ་གསུངས། །བསམ་གཏན་བདེ་བ་

70-185a

ལས་གཞན་ན། །བདེ་བ་ནམ་ཡང་ཡོད་མ་ཡིན། །བསམ་གཏན་བདེ་བ་བླ་མེད་གང་། །སྐྱེ་བོ་ཐ་ཤལ་དེ་སྤངས་ནས། །བྱིས་པ་རོ་ལ་དགའ་བྱེད་པ། །རྨོངས་པ་དེ་ནི་རྣམ་པར་བཅོམ། །ཡུལ་ལ་ཀུན་ནས་འཁྱིམ་པ་ཡི། །འདི་ཡིད་རྟག་ཏུ་དེ་ལ་སོང་། །འཇིག་རྟེན་ཕ་རོལ་འདྲེན་བྱེད་པའི། །མི་དགེའི་ཆོས་ནི་འཕེལ་བར་བྱེད། །བསམ་གཏན་བསྒོམ་དང་ངེས་པར་བྲལ། །སྦྱིན་དང་ཚུལ་ཁྲིམས་རྣམ་སྤངས་པ། །རྒོད་བག་རྩུབ་དང་རྨོངས་པ་ནི། །གསོན་པ་ན་ཡང་ཤི་དང་མཚུངས། །འཇིག་རྟེན་འདིར་ནི་གསོན་པ་ནའང་། །ཆོས་གཞན་ལ་ནི་རྗེས་སུ་འཇུག །ཆོས་སྤངས་རྟག་ཏུ་རྨོངས་པ་ནི། །གསོན་པ་ན་ཡང་ཤི་དང་མཚུངས། །མི་ཡི་པགས་པས་གཡོགས་པ་ཡི། །བྱིས་པ་རྣམས་ནི་ཕྱུགས་ཡིན་ནོ། །གང་གི་ཡེ་ཤེས་མར་མེ་ཡིས། །སྙིང་ནི་གསལ་བར་མ་བྱས་པའི། །སྐྱེས་བུ་འདི་སྲིད་དུ་ཡིན་ཏེ། །གང་ཞིག་ཚུལ་ཁྲིམས་རྗེས་འཇུག་པའི། །ཚུལ་ཁྲིམས་ཀྱིས་དགའ་སྐྱེས་པ་ཀུན། །རང་དང་མཚུངས་པར་ཕ་རོལ་གནོན། །སྐྱེས་བུ་སྦྱིན་ཉམས་འདོད་ལྡན་དང་། །སྡིག་ལས་ཀྱང་ནི་དབང་རྒྱལ་མིན། །འདི་ནི་མི་མིན་ཤེས་བྱ་སྟེ། །འདི་ནི་ཡི་དགས་ལུས་དང་ལྡན། །ཤེས་དང་ཚུལ་ཁྲིམས་རྣམ་བྲལ་ཞིང་། །སྦྱིན་པ་རིན་ཆེན་རྣམ་པར་སྤངས། །སྐྱེས་བུ་གསོན་པ་ཉིད་ན་ཡང་། །ཤི་བ་ཡིན་པར་མངོན་པར་བརྗོད། །སྦྱིན་དང་ཚུལ་ཁྲིམས་དཀའ་བསམ་གཏན། །བརྟན་དང་དྲན་པ་ཏིང་འཛིན་ལྡན། །སྐྱེས་བུའི་སྐྱེས་བུར་གྱུར་པ་སྟེ། །ལྷ་རྣམས་ཀྱིས་ཀྱང་ཕྱག་བྱེད་དོ། །ཡོན་ཏན་ལྡན་པ་སྐྱེས་བུ་ཡིན། །ཡོན་ཏན་མེད་པ་ཕྱུགས་དང་མཚུངས། །ཡོན་ཏན་ཡོད་མེད་རྣམ་པ་ཤེས། །གང་དེ་ལྷ་ཡིན་ཞེས་བརྗོད་དོ། །དེ་བཞིན་ཡོན་ཏན་ཡོན་ཏན་མིན་རྣམས་ཤེས། །སྐྱེས་བུ་ཐམས་ཅད་དུ་ནི་བདེ་བར་འགྱུར། །གང་ཡང་རྟག་ཏུ་བློ་དང་རྣམ་བྲལ་བ། །འདིར་ནི་སྡུག་བསྔལ་ཅན་དུ་འགྱུར་བ་ཡིན། །དེའི་ཕྱིར་ཡོན་ཏན་དེ་དག་རྣམས་མཉན་ལ་དགེ་སློང་གིས་བརྐམ་ཞིང་ཆགས་པར་མི་བྱའོ། །དེ་ལྟར་བསམ་གཏན་བསྒོམ་པ་ན་བར་དུ་གཅོད་པར་བྱེད་པའི་ཆོས་བཅུ་པོ་འདི་རྣམས་གལ་ཏེ་དེ་དགེ་སྦྱོང་འཁོར་བའི་འཇིགས་པས་འཇིགས་པར་གྱུར་ན་ཡོངས་སུ་སྤང་

70-185b

བར་བྱའོ། །གཞན་ཡང་ཆོས་བཅུ་གཅིག་པས་ནི་བསམ་གཏན་བསྒོམ་པ་ན་བར་དུ་གཅོད་པར་བྱེད་པ་དང་། དགེ་སློང་རྣམས་ཀྱང་ཤིན་ཏུ་སྡུག་བསྔལ་བར་འགྱུར་བ་ཡིན་ནོ། །འདི་གང་ཞེ་ན། འདི་ལྟ་སྟེ། འདྲི་བར་མི་བྱེད་པའོ། །འདིས་འདིར་བློ་དམན་པ་རྣམས་ལ་བར་དུ་གཅོད་པར་འགྱུར་རོ། །ཁ་ཟུམ་པ་མ་ཡིན་པའི་བློ་གྲོས་ཅན་དུ་ཡང་བདག་ཉིད་ཕྱི་རོལ་ཏུ་སྟོན་པར་བྱེད་ལ་དེ་བཞིན་དུ་ཡང་བདག་ནི་བསྟན་བཅོས་ཐམས་ཅད་འཛིན་པ་ཡིན་པ་དང་། ང་ནི་རྗོད་པར་བྱེད་པ་ཉིད་དང་། དོན་རྣམས་ཀྱིས་དང་། ང་དང་མཚུངས་པ་ནི་འགའ་ཡང་ཡོད་པ་མ་ཡིན་ནོ། །ང་ནི་མ་ལུས་པར་ཤེས་པའི་ཚོགས་རྣམས་ཁ་ཏོན་དུ་བྱེད་པ་ཡིན་ནོ་ཞེས་དོན་ཆེན་པོ་བརྒྱ་སྟོང་ཕྲག་དུ་མ་རྣམས་ཀྱིས་ལྷན་ཅིག་ཏུ་འགྲོགས་པ་རྣམས་དང་ཉེ་བར་གནས་རྣམས་ལ་ཡང་ངེས་པར་སྟོན་པར་བྱེད་དོ། །དེ་བཞིན་དུ་གཞན་དག་རྣམས་ལ་ཡང་བགྲོ་བར་བྱེད་དོ། །ངེས་པར་རྟོགས་པར་འགྱུར་བར་བྱེད་དོ། །སེམས་ལ་རབ་ཏུ་གནས་པར་བྱེད་དེ། དེ་ནི་ཤེས་པའི་མངོན་པའི་ང་རྒྱལ་འབའ་ཞིག་ཏུ་ཟད་པར་གྱུར་པ། སེམས་ཅན་རྣམས་ཐམས་ཅད་ལ་རང་གི་ཡོན་ཏན་རིག་པར་བྱེད་པ། སྐྱེ་བོ་ཐམས་ཅད་ཀྱིས་ལེགས་པར་གོ་བར་འགྱུར་བ་དེ་ཁོ་ན་བཞིན་དུ་འདི་ཤེས་པ་ཐམས་ཅད་ལས་ཕ་རོལ་དུ་སོན་པ་དེ་དང་བགྲང་བར་མཚུངས་པ་རྣམས་འགའ་ཡང་ཡོད་པ་མ་ཡིན་པ་དེ་ལྟར་འཇིག་རྟེན་པ་རྣམས་ལ་རྗོད་པར་བྱེད་དོ། །དེ་ཡང་ཤིན་ཏུ་ཐོས་པ་ཆུང་བར་གྱུར་པ། ནང་རྣམས་ནི་སྟོང་པར་གྱུར་པ་དང་། གསོག་ཏུ་གྱུར་པ། གསོབ་ཏུ་གྱུར་པ། སྣོད་སྟོང་པ་རྣམས་དང་མཚུངས་ཤིང་འདྲ་བར་གྱུར་པ། སྟོན་ཀའི་སྤྲིན་དག་དང་འདྲ་བ། བསམ་གཏན་ལ་བསམ་གཏན་དུ་བྱེད་པ་ཕྱི་རོལ་ཏུ་བྱས་པ། མི་ཐམས་ཅད་ཀྱིས་མཆོད་པ་དེ་ནི་གང་གི་ཚེ་བསམ་གཏན་བསྒོམ་པའི་རང་བཞིན་སྤངས་པ་ཡིན་ནོ། །བརྩོན་འགྲུས་བརྩམས་པར་གྱུར་པ་དམིགས་པའི་རང་བཞིན་ཅན་ཐོས་པ་རྒྱ་ཆེན་པོར་གྱུར་པ། རིག་པ་རབ་ཏུ་རྟེན་པ་ཤིན་ཏུ་སྦྱངས་པའི་རྒྱན་གྱིས་བརྒྱན་པ། །སངས་རྒྱས་ཀྱི་བསྟན་པ་ལ་ཤིན་ཏུ་གཅེས་པར་འཛིན་པ། སྤྲོ་བ་ལྡོག་པ་མེད་པར་གྱུར་པ། ཤེས་རབ་ཆེན་པོའི་དྲིས་རྒྱུད་བསྒོས་པར་གྱུར་པས་དགའ་བར་གནས་པའི་དགེ་སྦྱོང་གཞན་དེ་དག་

70-186a

རྣམས་ལ་ཡང་ནང་སྟོང་པར་གྱུར་པ་གསོག་དང་གསོབ་ཏུ་གྱུར་པ་འདི་སྙམ་དུ་སེམས་ཏེ། གལ་ཏེ་བདག་དགེ་སློང་དེ་དག་དང་སྨྲས་པར་གྱུར་ན་འདི་དག་གིས་ཇི་ལྟ་བར་ཉེ་བར་བསྟན་པས་བདག་ཟིལ་གྱིས་གནོན་པར་འགྱུར་རོ། །གང་ཡང་སྦྱིན་པ་པོ་དང་སྦྱིན་བདག་དེ་རྣམས་ཀྱིས་བདག་ལ་མཆོད་པར་བྱེད་པ་ལས་དེ་དག་དྲུང་ནས་དེ་དག་རྣམས་ཀྱང་འབྱུང་བར་མི་འགྱུར་རོ། །བདག་ལ་དབང་ཆེ་བར་བྱེད་པར་ཡང་འགྱུར་རོ། །སྦྱིན་པ་པོ་དང་སྦྱིན་བདག་རྣམས་ནི་བདག་ང་རྒྱལ་གྱིས་བཟུང་བས་རང་ཉིད་ཀྱི་ཤེས་རབ་ཀྱིས་དོན་རྣམས་གོ་བར་མི་འགྱུར་རོ། །གཞན་གྱི་ཟིལ་གྱིས་མནན་པར་འགྱུར་བའི་འཇིགས་པས་འདྲི་བར་མི་བྱེད་དོ། །གལ་ཏེ་ཡིན་མོད་འདི་དག་རྣམས་ཁ་ཅིག་ནི་སངས་རྒྱས་བཅོམ་ལྡན་འདས་རང་ཉིད་ལ་ཐོས་པ་ཡིན་པའམ། མ་ཡིན་པའམ་ཞེས་དེ་ནི་དེ་དག་རྣམས་ཀྱིས་ནང་སྟོང་པར་གྱུར་པ། གཞན་གྱི་ཟིལ་གྱིས་གནོན་པས་འཇིགས་པ་སྟེ། དེ་རང་ཉིད་ཕམ་པར་འགྱུར་བའི་འཇིགས་པས་སྐྲག་པའི་ཕྱིར་འདྲི་བར་མི་བྱེད་དོ། །དེ་དེ་ལྟར་ལོག་པར་སྨྲ་བར་བྱེད་པས་བསླབ་པའི་གཞི་ལྔ་ལས་འདས་པར་འགྱུར་ཏེ། འདི་ལྟ་སྟེ། བརྫུན་དུ་སྨྲ་བར་འགྱུར་བ་ནི་དེ་ལ་ཤེས་ཉེན་གྱི་རྟོགས་པ་ཡང་ཡོད་པ་མ་ཡིན་ལ། འོན་ཀྱང་སྨྲ་བར་ཡང་བྱེད་པའི་ཕྱིར་ན་བསླབ་པའི་གཞི་དང་པོ་ལས་འདས་སོ། །ཡང་བསླབ་པའི་གཞི་གཞན་ལས་འདས་པ་གང་ཞེ་ན། འདི་ལྟ་སྟེ། མ་བྱིན་པར་ལེན་པའོ། །གང་ཤེས་རབ་དང་ལྡན་པ་ཞེས་བྱས་ནས་སྦྱིན་པ་པོ་དང་སྦྱིན་བདག་རྣམས་ཀྱིས་བྱེད་པའི་མཆོད་པར་འོས་པ་ཡང་མ་ཡིན་ནོ། །ཉེ་འཁོར་ན་ཉན་པ་རྣམས་ལས་དེས་ལེན་པར་བྱེད་པས་ནི་བློ་དམན་པ་དེ་ལ་བར་དུ་གཅོད་པར་བྱེད་པར་འགྱུར་རོ། །མ་བྱིན་པར་ལེན་པ་འདིས་ནི་བསླབ་པའི་གཞི་གཞན་རྣམ་པར་འདས་པའོ། །གཞན་ཡང་བསླབ་པའི་གཞི་ལས་འདས་པ་འདི་གང་ཞེ་ན། འདི་ལྟ་སྟེ། གང་གི་ཚེ་དགེ་སློང་རབ་ཏུ་བྱུང་བར་གྱུར་པ་དེའི་ཚེ། བསླབ་པའི་གཞི་ཡོངས་སུ་བཟུང་བར་གྱུར་པ་རྣམས་ཇི་ལྟར་ཚུལ་ཁྲིམས་ལ་ཀུན་ནས་བརྟེན་ཞིང་ཚུལ་ཁྲིམས་རབ་ཏུ་གནས་པར་བྱ་བ་དང་ཚུལ་ཁྲིམས་དམིགས་པར་བྱས་ནས་ངས་ཁྱིམ་གྱི་གནས་ཡོངས་སུ་གཏང་བར་བྱའོ་ཞེས་བྱས་པའི་ཡང་དག་པའི་ཚུལ་ཁྲིམས་གང་ཡིན་

70-186b

པ་རྣམས་ཀྱང་དེས་ཐོས་པ་ཡོད་པ་ཡང་མ་ཡིན་ནོ། །ངས་ཐོས་པ་ཡིན་ནོ་ཞེས་གཞན་དག་རྣམས་ལ་ཡང་གོ་བར་བྱེད་དོ། །འདི་ནི་བསླབ་པའི་གཞི་ལས་ཤིན་ཏུ་འདས་པ་གཞན་ཡིན་ནོ། །གཞན་ཡང་བསླབ་པའི་གཞི་ལས་འདས་པར་གྱུར་པ་ནི་འདི་ལྟ་སྟེ། གཞན་གྱིས་དྲི་བ་དང་། ཕྱིར་ཞིང་འདྲི་བས་འཕགས་པར་གྱུར་པའི་ཟིལ་གྱིས་གནོན་པར་འགྱུར་བའི་འཇིགས་པས་འཇིགས་ནས་ཇི་སྲིད་དུ་ཆོས་གཞན་རྣམས་རྗོད་པར་བྱེད་དོ། །ཆོས་འདི་ནི་མཆོག་ཏུ་སྡུག་བསྔལ་བར་གྱུར་པ་དང་། འདི་ནི་ཤིན་ཏུ་སྡིག་པ་ཅན་ནོ། །གཞན་ཡང་བསླབ་པའི་གཞི་ལས་རྣམ་པར་འདས་པར་གྱུར་པ་མཆོག་ཏུ་དཀའ་བླས་ཆེ་བ་འདི་གང་ཞེ་ན། འདི་ལྟ་སྟེ། གང་གི་ཚེ་དམ་པའི་ཆོས་མི་ཤེས་པར་གྱུར་པ་དེས་གཞན་དག་དམ་པའི་ཆོས་ལ་དཔྱད་པར་གྱུར་པ་རྣམས་ལ་རྗོད་པར་བྱེད་པ་ནི་དེའི་དོན་རྣམས་ཟབ་པ་ཡིན་པས་ཡང་དག་པ་ཇི་ལྟ་བ་བཞིན་དུ་སངས་རྒྱས་ཀྱི་གསུང་གི་ཚིག་རྣམས་ཁྱོད་ཀྱིས་ཐོས་པ་མ་ཡིན་ནོ་ཞེས་དེས་དགེ་འདུན་ལ་བརྙས་པར་བྱེད་དེ། ང་ཁོ་ནས་འདིའི་ཚིག་རྣམས་ཇི་ལྟ་བ་བཞིན་དུ་ཤེས་པ་ཡིན་གྱི། བཙུན་པ་རྣམས་ཀྱིས་ནི་མ་ཡིན་ནོ་ཞེས་དགེ་འདུན་ལ་སྐུར་པ་འདེབས་པར་བྱེད་དོ། །ཁ་ཞན་པར་འགྱུར་བའི་འཇིགས་པས་སྐྲག་ནས་ཆོས་ཀྱང་འཆད་པར་བྱེད་དོ། །ཇི་ལྟར་ཆོས་འདི་ནི་དམ་པའི་ཆོས་མ་ཡིན་ཏེ། དམ་པའི་ཆོས་ཀྱི་ཡོན་ཏན་རྣམས་འཇིག་པར་བྱེད་པ་པོ་བརྫུན་མཆོག་ཏུ་སྨྲ་བ་ནི་ལུས་ཞིག་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །འདྲི་བར་མི་བྱེད་པ་ལས་གཞན་ཡང་སྐྱོན་མཆོག་ཏུ་ཆེ་བ་ཡོད་དོ། །འདྲི་བར་མི་བྱེད་པ་འདི་ཉིད་ལ་འདི་ལྟར་གལ་ཏེ་ཇི་ལྟར་ང་རྒྱལ་དེ་ཁོ་ན་ཉིད་ཀྱིས་ཟིལ་གྱིས་གནོན་པར་འགྱུར་བའི་འཇིགས་པས་འཇིགས་ནས་ནགས་སུ་འཇུག་པར་བྱེད་དོ། །ལམ་དམ་པའི་གདམས་ངག་སྟོན་པར་བྱེད་པ་པོ་རྣམས་ལ་མ་དྲིས་པར་ཡང་འདིར་ལམ་ཇི་ལྟར་འབྱུང་བར་འགྱུར། དམིགས་པ་ཡང་ཇི་ལྟ་བུར་ཡིད་ལ་བྱ་བ་ཡིན། རྣམ་པ་གང་དག་གིས་དམིགས་པ་ལས་ཉམས་པར་འགྱུར་བ་ཡིན། ཕྱིར་ཡང་ཡིད་འཇོག་པར་ནི་བྱེད་དེ། །ང་རྒྱལ་གྱི་སྐྱོན་གྱིས་དེ་ལྟ་ན་ཡང་གཞན་རྣམས་ལ་མི་འདྲིའོ། །དེས་དེ་ལྟར་ལམ་རྙེད་པར་མ་གྱུར་པས་ཡིད་ཤིན་ཏུ་སྐྱོ་བར་འགྱུར་རོ། །དེ་སླར་ཡང་སྐྱིལ་མོ་ཀྲུང་ལས་ལྡང་བར་གྱུར་ནས་འདི་སྙམ་

70-187a

དུ་སེམས་ཏེ། ཇི་ལྟར་བདག་གིས་ཁེངས་པར་བྱས་པ་དེ་དག་རྣམས་ནི་དོན་མེད་དོ་ཞེས་སྐྱོ་བ་སྐྱེ་བར་གྱུར་ནས་འདི་ནི་ལམ་མེད་དོ། །བསམ་གཏན་མེད་དོ། །སྙོམས་པར་འཇུག་པ་མེད་དོ་ཞེས་དེ་བསམ་གཏན་གྱི་འབྲས་བུ་དང་། ཏིང་ངེ་འཛིན་གྱི་འབྲས་བུ་རྣམས་ལ་ང་རྒྱལ་གྱི་སྐྱོན་གྱིས་དང་ཟིལ་གྱིས་གནོན་པའི་འཇིགས་པས་སྐྲག་པས་སྐུར་པ་འདེབས་པར་བྱེད་དེ་ཡོངས་སུ་མ་དྲིས་པའི་ཕྱིར་རོ། །ལོག་པར་ལྟ་བ་ཅན་དེ་ལུས་ཞིག་པར་གྱུར་ནས་ཤི་བའི་འོག་ཏུ་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། བདག་ཉིད་ཤེས་ཤིང་ང་རྒྱལ་བྲལ། །དེ་བཞིན་བླ་མ་ལ་འདྲི་བ། །དགེ་སློང་ཤིན་ཏུ་བརྩོན་ལྡན་པ། །མྱ་ངན་འདས་པ་རྟོགས་པ་ཡིན། །དེ་ལྟར་ཇི་ཙམ་ཐོས་གྱུར་པ། །དེ་ཙམ་ཞིག་ནི་འཆད་པར་བྱེད། །བདག་ཉིད་ཤེས་དང་ང་རྒྱལ་བྲལ། །དེ་ཉིད་རིག་པའི་དགེ་སློང་ཡིན། །ང་རྒྱལ་ཤིན་ཏུ་ང་རྒྱལ་བྲལ། །གང་དག་ཡེ་ཤེས་ལམ་ལ་མཁས། །རང་གཞན་བདག་ཉིད་ཐབས་ཤེས་པས། །ཆོག་ཤེས་གང་ཡིན་དགེ་སློང་བརྗོད། །ང་རྒྱལ་ཅན་དང་ཁྲོ་བའི་ཡིད། །རྐོ་ཏྲོག་ཅན་དང་བློ་ཆུང་བ། །རྙེད་དང་བཀུར་སྟི་ཡིད་ཅན་ལ། །ཅི་ཕྱིར་ཞི་བ་འབྱུང་བར་འགྱུར། །འདྲི་བར་མི་བྱེད་པ་ཉིད་ཀྱི་ང་རྒྱལ་ཅན་ཁྲོ་བའི་ཡིད་དུ་གྱུར་པ་བསམ་གཏན་སྒོམ་པར་མི་བྱེད་པ་རྣམས་ནི་གཞན་གྱི་ཟས་ཟ་བར་བྱེད་པ་རྣམས་བུ་ལོན་དུ་འགྱུར་རོ། །ཆ་བྱད་འབའ་ཞིག་ཙམ་འཛིན་པར་གྱུར་པ་རྣམས་ཀྱིས་དགེ་སློང་གི་བདག་ཉིད་ཅི་ཞིག་འཐོབ་པར་གྱུར་ནས་ལུས་ཞིག་པར་གྱུར་ཅིང་ཤི་བའི་འོག་ཏུ་ང་རྒྱལ་གྱི་སྐྱོན་དང་འདྲེ་བར་མི་བྱེད་པའི་ཕྱིར་ན་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །དེའི་ཕྱིར་ན་འདི་ལྟར་བསླབ་པར་བྱ་སྟེ། ཇི་སྲིད་འཚོའི་བར་དུ་ཡོངས་སུ་འདྲི་བའི་རང་བཞིན་ཅན་གྱི་དགེ་སློང་རྣམས་ནི་བདེ་བ་དང་ཡིད་བདེ་བར་འགྱུར་རོ། །ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་མཐོ་རིས་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ང་རྒྱལ་དེ་བཅོམ་པར་གྱུར་པའི་ཡོན་ཏན་གྱིས་དེ་ལས་ཕྱི་མར་ཡང་མྱ་ངན་ལས་འདས་པ་འབྱུང་བར་འགྱུར་རོ། །གཞན་ཡང་ཆོས་བཅུ་གཉིས་པ་བསམ་གཏན་བསྒོམ་པ་ན་བར་དུ་གཅོད་པར་བྱེད་པ་འདི་ཡང་གང་ཞེ་ན། འདི་ལྟ་སྟེ། གྲོགས་པོ་མང་བར་གྱུར་པ་ཞེས་བྱ་

70-187b

བས་དོན་མ་ཡིན་པ་ཐམས་ཅད་བྱེད་པར་འགྱུར་རོ། །དགེ་སློང་རྣམས་ངེས་པར་སྲེག་པ་འབའ་ཞིག་ལ་འཇུག་པར་བྱེད་པ་ཡིན་ནོ། །གང་གི་ཚེ་གྲོགས་པོ་མང་པོ་ཡོད་པར་གྱུར་པ་དེའི་ཚེ། དགེ་སློང་རྣམ་པར་གཡེང་བ་མང་བར་འགྱུར་ལ་བྱ་བ་མང་བས་རྣམ་པར་གཡེང་བར་འགྱུར་བའི་བློ་ལ་ཡང་བསམ་གཏན་མེད་ཅིང་བསམ་གཏན་དུ་བྱ་བ་ཡང་མེད་པར་འགྱུར་རོ། །ཁྱིམ་གྱི་གནས་ནས་ངེས་པར་བྱུང་བར་གྱུར་པ་རྣམས་ཀྱི་གྲོགས་པོ་དང་། དགྲ་བོ་མ་ཡིན་པ་རབ་ཏུ་སྤངས་པ་རྣམས་ཀྱིས་རེ་ཞིག་གྲོགས་པོ་གཅིག་ཉིད་ཀྱང་བྱ་བ་མ་ཡིན་ན་གྲོགས་པོ་མང་པོ་རྣམས་ལ་ལྟ་སྨོས་ཀྱང་ཅི་དགོས་ཏེ། གང་གི་ཚེ་ལེ་ལོ་ཅན་མིང་ཙམ་གྱི་དགེ་སློང་དུ་གྱུར་ནས་གཞན་གྱི་ཁྱིམ་རྣམས་སུ་རྗེས་སུ་རྒྱུ་བར་བྱེད་པ་ཡིན་ཏེ། དེའི་ཚེ་ན་འདིས་མཐོང་བ་ཙམ་ཉིད་ཀྱིས་བློ་རྣམ་པར་གཡེང་བར་འགྱུར་རོ། །མིག་གིས་གཟུགས་རྣམས་མཐོང་བར་གྱུར་པས་གཞན་དུ་འགྱུར་རོ། །མིག་གི་རྣམ་པར་ཤེས་པ་ཞི་བར་མི་འགྱུར་རོ། །དམིགས་པ་ལ་ཞི་བར་མི་འགྱུར་རོ། །ཡིད་ལ་བྱེད་པ་ཉེ་བར་གནས་པ་མ་ཡིན་ནོ། །མཉམ་པར་གཞག་པ་མ་ཡིན་ནོ། །དུས་རྣམས་ཐུང་བར་བྱེད་པ་མ་ཡིན་ནོ། །གྲོགས་པོ་རྣམས་ལ་ལྟ་བ་ལ་ཆེད་ཆེ་བ་ཡིན་ནོ། །དེ་བཞིན་དུ་སྒྲ་རྣམས་ཐོས་ནས་ཀྱང་མཉམ་པར་གཞག་པར་མི་འགྱུར་ཏེ། དམིགས་པར་མི་བྱེད་དོ། །དེ་ཡིད་ལ་བྱེད་པ་གཞན་རྣམས་ལ་ཞུགས་པ་ན་ཞི་བར་མི་འགྱུར་རོ། །མ་ཞི་བའི་ཡིད་ལ་བྱེད་པ་རྣམས་ལ་དམིགས་པ་ནི་ཟད་ཅིང་ལྟུང་བར་འགྱུར་ལ། གང་གི་ཚེ་གྲོགས་པོ་དེ་དག་ལ་ལྟ་བར་བྱེད་པ་དེས་ནི་དམིགས་པའི་བར་དུ་གཅོད་པར་བྱེད་པར་འགྱུར་རོ། །དེའི་ཕྱིར་དགེ་སྦྱོང་གིས་གྲོགས་པོ་གཅིག་ཀྱང་མི་བྱ་ན་གྲོགས་པོ་མང་པོ་ནི་དང་པོར་མ་ཡིན་ནོ། །གྲོགས་པོ་ལ་འཆེལ་བར་གྱུར་པའི་དགེ་སློང་ཡུལ་ལྗོངས་རྣམས་ནས་ཡུལ་ལྗོངས་སུ་རྒྱུ་བར་གྱུར་པས་ཉེ་བར་འགྲོ་བར་བྱེད་པ་ན་ཚེའི་འདུ་བྱེད་རྣམས་ནི་ཟད་པར་འགྱུར་བ་དང་། དགེ་བའི་ཕྱོགས་ཡོངས་སུ་ཉམས་པར་འགྱུར་ཏེ། དགེ་བའི་ཕྱོགས་ཉམས་པར་གྱུར་པ་རྣམས་ཀྱིས་ཀྱང་འགྲོ་བའི་མཆོག་འཐོབ་པ་མ་ཡིན་ནོ། །སྐད་ཅིག་ཙམ་ཡང་བསམ་གཏན་དང་འདོད་པ་རྩེ་གཅིག་པ་གཉིས་ཡིད་ལ་བྱ་བར་ནུས་པ་ཡང་མ་ཡིན་ནོ། །དེའི་ཕྱིར་འདི་ལྟར་བསླབ་པར་བྱ་སྟེ། དགེ་སློང་གིས་ཀུན་ནས་ཉོན་མོངས་པ་ཅན་གྱི་སྲེད་པ་རྣམས་འཕེལ་བར་བྱེད་པ་པོའི་ཁྱིམ་པའི་གྲོགས་པོ་མི་བྱའོ། །

70-188a

འདི་དང་ཕ་རོལ་དུ་མྱ་ངན་ལས་འདས་པའི་ལམ་སྟོན་པར་བྱེད་པ་དང་། མྱ་ངན་ལས་འདས་པའི་ལམ་ཉེ་བར་སྟོན་པར་བྱེད་པ་དང་། བསམ་གཏན་གྱི་གྲོགས་བྱེད་པར་འགྱུར་བའི་དགེ་བའི་གྲོགས་པོ་བྱ་བར་བྱའོ། །གང་དང་ལྷན་ཅིག་ཏུ་གྱུར་པས་ཉོན་མོངས་པ་རྣམས་ཟད་པར་བྱས་ནས་མྱ་ངན་ལས་འདས་པའི་གྲོང་ཁྱེར་དུ་འཇུག་པར་བྱེད་པ་དེ་དག་ནི་གྲོགས་པོའི་མཆོག་ཡིན་ནོ། །གཞན་དུ་ན་ནི་གྲོགས་པོའི་གཟུགས་བརྙན་གྱི་དགྲ་བོ་ཡིན་ཏེ། གང་དག་དོན་དམ་པ་མ་ཡིན་པ་དེ་དག་གིས་ནི་གྲོགས་པོར་འགྱུར་བ་མ་ཡིན་ནོ། །གང་དང་ཕྲད་ནས་ཀུན་བརྗོད་པ་དང་གནས་པའི་ལས་སུ་གྱུར་པས་གང་ཡང་འཇིག་རྟེན་ཕ་རོལ་གྱིར་འགྱུར་བ་དེ་ནི་གྲོགས་པོ་ཡིན་ཏེ། གང་ཡང་ཚངས་པ་མཚུངས་པར་སྤྱོད་པ་རྣམས་ཀྱིས་ཉེ་བར་སྟོན་པ་དང་། བྱེད་དུ་འཇུག་པའམ། འཇིག་རྟེན་ཕ་རོལ་གྱི་འཇིགས་པ་སྟོན་པར་བྱེད་པའམ། དམྱལ་བ་དང་། ཡི་དགས་དང་། དུད་འགྲོའི་འགྲོ་བར་སྐྱེ་བའི་འཇིགས་པ་ལེགས་པར་སྟོན་པ་རྣམས་ཀྱང་རུང་སྟེ། ཇི་ལྟར་ལུས་དང་། ངག་དང་། ཡིད་ཀྱིས་ཉེས་པར་སྤྱོད་པ་རྣམས་ཀྱིས་ངན་སོང་དུ་འཇུག་པར་འགྱུར་བ་རྣམས་མི་བྱའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། གྲོགས་གང་འཇིག་རྟེན་ཕ་རོལ་གྱི། །གྲོགས་པོ་དེ་ནི་གྲོགས་པོར་བརྗོད། །གང་ཞིག་སྡིག་ལས་ཟློག་པ་དང་། །འཆི་འཕོ་ལས་ཀྱང་སྲུང་བྱེད་པ། །ཕ་རོལ་དུ་ནི་གང་ཕན་པའི། །ཕན་པ་རྟག་ཏུ་རབ་ཏུ་བརྗོད། །མི་རྣམས་གྲོགས་ནི་དེ་ཡིན་ཏེ། །གྲོགས་གང་གིས་ནི་འདོད་པ་འཐོབ། །དེ་ནི་གྲོགས་པོ་རྣམས་ཀྱི་མཆོག་ཡིན་ཏེ། གང་གིས་རྣམ་པ་དུ་མ་དང་། རྣམ་པར་རྟོག་པ་དུ་མས་ཀྱང་། ཆོས་ཉེ་བར་སྟོན་པར་བྱེད་པའོ། །འོན་ཀྱང་གང་དག་ཟས་ཕལ་པོ་ཆེ་རྣམས་མངོན་པར་རྗོད་པར་བྱེད་པ་དང་། ཁྱིམ་རྣམས་སུ་འཇུག་པར་བྱེད་པ་དང་། སྡུག་པའི་སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་སྟེན་པ་ཉེ་བར་སྟོན་པར་བྱེད་པ་རྣམས་ནི་མ་ཡིན་ཏེ། རྣམ་པ་དེ་སྲིད་ཀྱི་གྲོགས་པོ་འདི་དག་ནི་གཅིག་ཀྱང་གྲོགས་པོར་བྱ་བ་མ་ཡིན་ན་སྐྱོན་དུ་མ་རྣམས་སྐྱེད་པར་བྱེད་པའི་གྲོགས་པོ་མང་པོ་མི་བྱ་བ་ལྟ་ཅི་སྨོས། གང་དག་གིས་འཇིགས་པ་དང་བཅས་པར་འགྱུར་བ་འཇིག་རྟེན་ཕ་རོལ་དུ་ཕན་པ་མ་ཡིན་པ་བྱེད་པར་འགྱུར་བ་དེ་དག་རྣམས་ནི་

70-188b

གྲོགས་པོའི་གཟུགས་ཀྱི་དགྲ་བོ་རྣམས་ཡིན་ནོ། །དགེ་སློང་གང་དག་རབ་ཏུ་ཆགས་པར་གྱུར་པ་རྣམས་ནི་རང་གི་བྱ་བ་ལས་ཡོངས་སུ་ཉམས་པར་བྱེད་པ་དང་། དགེ་སྦྱོང་བསམ་གཏན་སྒོམ་པར་བྱེད་པ་ན་བར་དུ་གཅོད་པར་བྱེད་པར་འགྱུར་བ་ཡིན་ནོ། །གཞན་ཡང་ཆོས་བཅུ་གསུམ་པ་བསམ་གཏན་སྒོམ་པར་བྱེད་པ་ན་ཉམས་པར་བྱེད་པ་ཡིན་ནོ། །འདི་ཡང་གང་དག་ཡིན་ཞེ་ན། འདི་ལྟ་སྟེ། ཀུན་དུ་འདྲེ་བར་གནས་པའོ། །དགེ་སློང་རྣམས་ཐམས་ཅད་ཀྱང་བསམ་གཏན་བསྒོམ་པ་ན་ཉམས་པར་བྱེད་པར་འགྱུར་བའོ། །ཀུན་དུ་འདྲེ་བར་གནས་བདེ་ཡང་རྣམ་པ་ལྔ་ཡིན་ནོ། །འདི་གང་དག་ཡིན་ཞེ་ན། འདི་ལྟ་སྟེ། ཚུལ་ཁྲིམས་དང་ལྡན་པ་མཆོག་ཏུ་དགེ་བའི་ཆོས་ཅན་དྲང་པོར་གྱུར་པ་དྲང་པོའི་རང་བཞིན་ཅན་རྣམས་མཆོག་ཏུ་ཚུལ་ཁྲིམས་འཆལ་པ་རྣམས་དང་ལྷན་ཅིག་ཏུ་གནས་པར་འགྱུར་བ་སྟེ། གཞན་གྱི་དབང་དུ་གྱུར་པའི་སྐྱོན་འདི་ནི་ཀུན་དུ་འདྲེ་བར་གནས་པ་གཅིག་ཡིན་ནོ། །གཞན་ཡང་འདྲེ་བར་གནས་པའི་སྐྱོན་གཉིས་པ་ཡོད་དོ། །འདི་ལྟ་སྟེ། གཞན་གྱི་དབང་དུ་གྱུར་པའི་སྐྱོན་གྱིས་སམ། རང་འདོད་པར་གྱུར་པས་ཀྱང་ལོག་པར་ལྟ་བ་ཅན་རྣམས་དང་ལྷན་ཅིག་ཏུ་གྲོང་དང་། གྲོང་ཁྱེར་དང་། གྲོང་རྡལ་དང་། ཚོང་འདུས་རྣམས་སུ་གནས་པར་བྱེད་པ་འདི་ནི་ཀུན་ཏུ་འདྲེ་བར་གནས་པ་གཉིས་པ་ཡིན་ནོ། །གཞན་ཡང་ཀུན་ཏུ་འདྲེ་བར་གནས་པ་གསུམ་པ་ཡོད་དོ། །འདི་ལྟ་སྟེ། གཉེན་བཤེས་དང་། གྲོགས་པོ་དང་། རང་གི་སྐྱེ་བོ་རྣམས་དང་། ཕྲད་པར་འདོད་པར་གྱུར་ཅིང་ལྟ་བ་ལ་སྲེད་པར་གྱུར་པས་ཉེ་བར་འགྲོའོ། །དེས་དེ་དང་ལྷན་ཅིག་ཏུ་སྔོན་གྱི་ཁྱིམ་ལ་གོམས་པས་སླར་ཡང་དེ་ཁོ་ན་བཞིན་དུ་གནས་པར་བྱེད་དོ། །འདི་ནི་ཀུན་ཏུ་འདྲེ་བར་གནས་པ་གསུམ་པ་ཡིན་ནོ། །གཞན་ཡང་ཀུན་ཏུ་འདྲེ་བར་གནས་པ་བཞི་པ་ཡོད་པ་ནི་འདི་ལྟ་སྟེ། ཀུན་དུ་དགའ་བར་གྱུར་པས་ཕན་ཚུན་དུ་བསྟན་བཅོས་ཀྱིས་ཀུན་དུ་བརྗོད་པ་དག་གིས་དགའ་བར་གྱུར་པས་རྒྱལ་པོའི་ཁྱིམ་དུ་ཆུད་པར་དགེ་སློང་གནས་པར་བྱེད་དེ། གཞན་ཟིལ་གྱིས་མནན་པར་བྱ་བའི་བསམ་པས་སོ། །འདི་ནི་ཀུན་དུ་འདྲེ་བར་གནས་པ་བཞི་པ་ཡིན་ནོ། །གཞན་ཡང་ཀུན་དུ་འདྲེ་བར་གནས་པ་ལྔ་པ་ཡོད་དེ། འདི་ལྟ་སྟེ། བློ་རྣམ་པར་གཡེང་བར་གྱུར་པའི་དགེ་སློང་སྤྱོད་པ་ཀུན་དུ་མ་བསྡམས་པ་སྔོན་གང་དག་ཟོས་པ་

70-189a

དང་། འཐུངས་པ་དང་། གྲོང་པའི་ཆོས་བསྟེན་པར་གྱུར་པའམ། སྒྲ་དང་། རེག་བྱ་དང་། རོ་དང་། གཟུགས་དང་། དྲིས་བྱས་པར་གྱུར་པ་དེ་དག་རྣམས་ཀྱང་རྗེས་སུ་དྲན་པར་བྱེད་དོ། །དེ་དག་རྣམས་ལ་རྣམ་པར་རྟོག་པར་བྱེད་དོ། །དེ་རྣམ་པར་རྟོག་པས་ཉེ་བར་བཅོམ་པར་གྱུར་པས་མཆོག་ཏུ་ཀུན་དུ་འདྲེས་པར་གྱུར་ནས་ཤིན་ཏུ་རྩུབ་པར་གྱུར་པ་རྣམས་ཀྱིས་ཤིན་ཏུ་སྡུག་བསྔལ་བར་གྱུར་པ་དང་ལྷན་ཅིག་པའི་ཡུལ་མི་འདོད་པ་མི་སྡུག་པ་ཡིད་དུ་མི་འོང་བ་རྣམས་དང་ལྷན་ཅིག་ཏུ་གནས་པར་བྱེད་དོ། །འདི་ནི་ཀུན་ཏུ་འདྲེ་བར་གནས་པ་ལྔ་པ་ཡིན་ཏེ། ཡུལ་གྱི་རྣམ་པར་རྟོག་པ་རྣམས་ཀྱིས་ཉེ་བར་བཅོམ་པར་གྱུར་ནས་ཀུན་དུ་འདྲེ་བར་གནས་པ་ཡིན་ནོ། །ཀུན་དུ་འདྲེ་བར་གནས་པ་རྣམས་ཐམས་ཅད་ཡོངས་སུ་སྤང་བར་ནུས་ཀྱི་ཡིད་ཀྱི་རྣམ་པར་རྟོག་པ་རྣམས་ནི་ཡོངས་སུ་སྤང་བར་མི་ནུས་སོ། །ཡུལ་དང་ཀུན་ནས་འདྲེ་བར་གྱུར་པ་ནི་བསམ་གཏན་སྒོམ་པར་བྱེད་པ་རྣམས་ཐམས་ཅད་ལ་ཤིན་ཏུ་བར་དུ་གཅོད་པར་བྱེད་པ་ཡིན་ནོ། །གང་གི་ཕྱིར་ཀུན་དུ་འདྲེས་པར་གནས་པ་ཐམས་ཅད་ནི་ཡོངས་སུ་སྤང་བར་ནུས་ལ། ཡུལ་གྱི་ཉེ་བར་ལོངས་སྤྱོད་པ་ལ་རང་གི་སེམས་རྩབ་ཧྲལ་ཅན་གྱིས་བསླང་བའི་ཀུན་ཏུ་རྟོག་པ་རྣམས་ཀྱིས་ཀུན་ཏུ་འདྲེ་བར་གནས་པ་རྣམས་ནི་སྤང་བར་མི་ནུས་ཏེ། བསམ་གཏན་དང་། སྙོམས་པར་འཇུག་པ་དང་། ཤིན་ཏུ་སྦྱངས་པ་དང་། ལེགས་པར་སྡོམ་པ་དང་། ཚུལ་བཞིན་དུ་ཡིད་ལ་བྱེད་པ་རྣམས་ཀྱིས་རྗེས་སུ་དྲན་པར་བྱེད་པ་རྣམས་ཀྱིས་ནི་མ་གཏོགས་པའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། ཚུལ་བཞིན་མ་ཡིན་ཡིད་བྱེད་པས། །མེ་གང་ཀུན་དུ་སྤར་གྱུར་པ། །ཚུལ་བཞིན་མ་ཡིན་ཡིད་བྱེད་དེའི། །ཆར་གྱིས་རབ་ཏུ་འཇོམས་པར་བྱེད། །མུན་པ་ཡུན་རིང་གིས་བསླང་གང་། །མ་རིག་ལས་བྱུང་མི་རྣམས་ཀྱི། །དེ་ནི་ཅུང་ཟད་དུ་སྐྱེས་པའི། །ཤེས་རབ་མར་མེས་འཇིག་པར་བྱེད། །བློ་གྲོས་རྨོངས་པ་དམྱལ་བར་ནི། །ཆགས་དང་རྨོངས་པས་སྲེག་པར་བྱེད། །ཤེས་རབ་ཅན་ནི་འཇོམས་མིན་ཏེ། །མྱ་ངན་འདས་པའི་ལམ་དུ་འགྲོ། །ཤེས་རབ་སྣང་བས་ལུས་ཅན་གྱི། །བཅུ་གསུམ་པོ་རྣམས་འཇོམས་པར་བྱེད། །དེ་ཕྱིར་སྐྱོན་གཞོམ་

70-189b

རྗེས་སུ་བཙལ། །ཤེས་དང་ཚུལ་ཁྲིམས་རྟག་བསྒོམས་པས། །ལུས་ཅན་རྣམས་ཀྱི་བཅུ་གསུམ་པོ། །རྩ་བ་མེད་པར་ཀུན་རབ་འཇོམས། །ཡེ་ཤེས་མེས་ནི་ཉོན་མོངས་པའི། །བུད་ཤིང་ཆེན་པོ་ཆེར་འབར་བྱེད། །དེ་ལྟར་ཀུན་དུ་འདྲེ་བར་གནས་པ་རྣམས་ནི་ཐམས་ཅད་ཀྱིས་གནས་སྐབས་ཐམས་ཅད་དུ་མི་བྱའོ། །ཁྱིམ་གྱི་གནས་ལས་ངེས་པར་བྱུང་བ་གཅིག་ཏུ་རྒྱུ་བར་གྱུར་པའི་དགེ་སྦྱོང་རྣམས་ཀྱིས་ཀུན་ཏུ་རྟོག་པའི་རང་བཞིན་ཅན་དུ་མི་བྱའོ། །ལེ་ལོ་ཅན་དུ་མི་བྱའོ། །གྲོང་དང་། གྲོང་ཁྱེར་དང་། གྲོང་ཆུང་དང་། ཚོང་འདུས་རྣམས་ཉམས་སུ་མྱོང་བར་བྱེད་པའི་རྣམ་པར་རྟོག་པའི་རང་བཞིན་ཅན་དུ་མི་བྱའོ། །སྤྲོ་བ་ཆེན་པོར་གྱུར་པས་ལྷན་ཅིག་ཏུ་གནས་པ་དང་། ལྟ་བ་ལ་ཆེད་ཆེར་མི་བྱ། སློབ་མ་སྡུད་པ་ལ་ཆེད་ཆེར་མི་བྱའོ། །སྡིག་པའི་གྲོགས་པོ་དང་འགྲོགས་པའི་རང་བཞིན་ཅན་དུ་མི་བྱའོ། །སྒྲ་དང་། རེག་བྱ་དང་། རོ་དང་། གཟུགས་དང་། དྲི་རྣམས་ལ་ཆེད་ཆེ་བར་གྱུར་ནས་མངོན་པར་ཞེན་པས་ཀུན་ཏུ་ཆགས་པར་གྱུར་པའི་སེམས་སུ་མི་བྱའོ། །འགྲོ་བ་དང་སྤྱོད་པ་རྣམས་ཀུན་དུ་མ་བསྡམས་པར་མི་བྱའོ། །སེམས་ཤིན་ཏུ་མྱུར་བར་བརྐམ་པར་མི་བྱའོ། །བསོད་སྙོམས་དང་། མལ་ཆ་དང་། སྟན་དང་། ནད་ཀྱི་རྐྱེན་སྨན་དང་། ཡོ་བྱད་རྣམས་ལ་མངོན་པར་དགའ་བར་མི་བྱའོ། །ཆོས་གོས་བཀྲ་བ་དང་། འཇོ་སྒེག་དང་། ཁྲུས་དང་། མཉེ་བསུག་དང་། སྒེག་ཆོས་སུ་བརྗོད་པའི་རང་བཞིན་ཅན་དུ་མི་བྱའོ། །ཐོག་མ་མེད་པའི་དུས་ནས་མུན་པའི་ཚོགས་སུ་གྱུར་པའི་ཉོན་མོངས་པའི་ཚོགས་འདི་དག་རྣམས་བསྲེག་པར་བྱ་ནུས་པ་མ་ཡིན་ན། ཀྱེ་མ་ཤིན་ཏུ་སྡུག་བསྔལ་བར་འགྱུར་བའི་འཁོར་བ་གང་ཡིན་པ་འདིར་འགྲོ་བ་ལྔའི་སྒོར་ཡུལ་དྲུག་གི་འོད་ཟེར་གྱི་རྣམ་པར་རྟོག་པས་སྡུག་བསྔལ་འབྱུང་བར་འགྱུར་བས་དེ་དག་རྣམས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་ཉི་མ་རེ་རེ་ཞིང་བྱིས་པའི་སྐྱེ་བོ་འདི་དག་ཐམས་ཅད་ཐམས་ཅད་དུ་འཚེད་པར་བྱེད། སྲེག་པར་བྱེད། རྣམ་པར་རླག་པར་བྱེད་པས་སྡུག་བསྔལ་གྱི་རྒྱ་མཚོ་རྣམས་སུ་ལྷུང་བར་གྱུར་ཅིང་ཡང་དང་ཡང་དུ་དེ་ལྟར་འཇུག་པར་འགྱུར་ཡང་སྐྱོ་བ་སྐྱེ་བར་འགྱུར་བ་ཡང་མ་ཡིན་ནོ། །དེ་ལ་རྣམ་པ་དེ་ལྟ་བུའི་ཚུལ་ཁྲིམས་

70-190a

རྣམས་ཡོངས་སུ་སྤངས་ནས་གང་ལྷར་སྐྱེས་པར་གྱུར་པ་རྣམས་ནི་མཆོག་ཏུ་བག་མེད་པར་རྒྱུ་བར་འགྱུར་རོ། །དེ་ཡང་ལྷའི་འཇིག་རྟེན་རྣམས་ལས་ཉམས་ནས་དེད་དཔོན་གྱི་མཆོག་ལས་དེ་བཞིན་དུ་དེད་དཔོན་དམྱལ་བ་དང་། ཡི་དགས་དང་། དུད་འགྲོའི་འགྲོ་བ་རྣམས་སུ་སྐྱེ་བར་འགྱུར་བས་ཤིན་ཏུ་སྡུག་བསྔལ་བར་གྱུར་པའི་འགྱོད་པའི་མེས་སྲེག་པར་བྱེད་དོ། །འདི་ལ་སྐྱོབ་པར་བྱེད་པ་རྣམས་ཀྱང་འགའ་ཞིག་ཀྱང་མེད་དོ། །བག་མེད་པར་གྱུར་པ་བརྒྱའི་བག་མེད་པ་རྣམས་ཀྱིས་ཉེ་བར་བཅོམ་པར་གྱུར་པས་འགྱོད་པའི་མེས་བསྲེགས་པར་གྱུར་ནས་དམྱལ་བ་དང་། ཡི་དགས་ཀྱི་ས་གཞིར་སྐྱེ་བར་འགྱུར་རོ། །དེའི་ཕྱིར་ཇི་སྲིད་དུ་འཆི་འཕོ་བའི་དུས་ཀྱི་སྣང་བ་འོངས་པར་མ་གྱུར་པ་དེ་སྲིད་དུ་དམ་པའི་ཆོས་ཡིད་ལ་བྱ་བའི་སྟེང་དུ་ཡང་སངས་རྒྱས་དགྲ་བཅོམ་པ་རྣམས་ཐམས་ཅད་ཀྱི་བསྟན་པ་གང་ཡིན་པ་འདི་ལ་དེ་དག་རྣམས་ཐམས་ཅད་ཉི་མ་རེ་རེ་ཞིང་ལན་ཅིག་མ་ཡིན། ཕྱོགས་གཅིག་མ་ཡིན་པར་བྱ་བ་ཁོ་ནའོ། །བག་མེད་པས་མཆོག་ཏུ་བག་མེད་པར་གྱུར་པ་གང་ཡིན་པའི་ལྷ་དེ་དག་རྣམས་ལྷར་སྐྱེས་པར་གྱུར་པ་ནི་མིར་གྱུར་པ་ཐམས་ཅད་ཀྱིས་ཀྱང་ཚུལ་ཁྲིམས་ལེགས་པར་བསྒོམས་ཤིང་ལེགས་པར་ལས་སུ་བྱས་པ་དང་། སེམས་བཟང་པོར་བྱས་པར་གྱུར་པས་དེ་ཤི་ནས། སྐྱེས་བུ་ལུས་ཞིག་པར་གྱུར་ཏེ། ཤི་བའི་འོག་ཏུ་ལྷ་རྣམས་སུ་སྐྱེའོ། །ཅི་བདག་ཅག་རྣམས་ལས་ཆུང་ངུན་གྱིས་སྐྱེས་པ་ཞིག་ཡིན་ནམ་ཞེས་དེ་ལྷ་རྣམས་ཀྱིས་ཤེས་པ་མ་ཡིན་པ་དེ་དག་བསྟན་པར་བྱ་བའི་དོན་དུ་ཆོས་བཅུ་གསུམ་པོ་འདི་གསུངས་པ་ཡིན་ནོ། །མིའི་འཇིག་རྟེན་པའི་སྐྱེས་བུ་རྣམས་དང་ལྷ་རྣམས་ཕན་ཚུན་དུ་རྒྱུར་གྱུར་པ་ཡིན་ཏེ། ལྷ་རྣམས་དང་སྐྱེས་བུ་རྣམས་ཀྱང་ཚུལ་ཁྲིམས་དང་ལྡན་པ་ནི་ཤི་ནས་ལྷར་སྐྱེའོ། །ལྷའི་བག་མེད་པ་རྣམས་ཤི་འཕོས་ནས་མི་རྣམས་སུ་སྐྱེའོ། །དེ་ལ་རྒྱུ་འདི་དག་རྣམས་ཀྱིས་ལྷ་དང་མི་རྣམས་ལ་ཕན་པ་དང་། བདེ་བ་དང་། མཐར་མྱ་ངན་ལས་འདའ་བར་འགྱུར་བ་དང་། འཇིག་རྟེན་པའི་ཕན་པ་རྣམས་ཀྱང་མཛད་པའི་བཅོམ་ལྡན་འདས་འོད་སྲུང་དེས་མདོ་འདི་དག་གསུངས་པ་ཡིན་ནོ། །དེ་ནས་མུ་སུ་ལུན་དྷ་ལ་སོགས་པའི་ལྷ་དེ་དག་རྣམས་འདོད་པ་ལ་མཆོག་

70-190b

ཏུ་ཡིད་བྱུང་བར་གྱུར་པས་འདོད་པ་རྣམས་མ་ཡིན་ཞིང་འདོད་པའི་མཐའ་ལ་ཡང་མི་འཇུག་གོ། །བཅོམ་ལྡན་འདས་དང་བཅོམ་ལྡན་འདས་ཀྱི་མཆོད་རྟེན་དེ་ལ་ཡང་རབ་ཏུ་དང་བའི་ཡིད་དང་ལྡན་པའི་མགོ་བོས་ཕྱག་འཚལ་ནས་ཐམས་ཅད་ཇི་ལྟར་འོངས་པ་དེ་ལྟར་ཕྱིར་སོང་ངོ་། །བཅོམ་ལྡན་འདས་འོད་སྲུང་གི་མདོ་རྫོགས་སོ།། །།མདོ་དྲུག་པ་དང་ཚོགས་པ་རྒྱུ་བ་ན་རྣམ་པར་རྒྱུ་བའི་ས་ཡང་རྫོགས་སོ།། །།

དེ་ནས་ལྷ་དེ་དག་རྣམས་བཅོམ་ལྡན་འདས་འོད་སྲུང་གི་མཆོད་རྟེན་དེ་ལས་ཕྱིར་འོངས་པར་གྱུར་པ་གང་གི་ཚེ་དེ་མུ་སུ་ལུན་དྷ་ལ་འདྲིའོ། །ལྷ་ཇི་ལྟར་རྣམ་པ་གང་གིས་ཁྱོད་ཀྱིས་མཆོད་རྟེན་དེ་མཐོང་། དེ་ནས་ལྷ་དེ་རྣམས་ཀྱི་དྲུང་ནས་ཐོས་པར་གྱུར་ནས་མུ་སུ་ལུན་དྷ་དེས་འདི་སྐད་ཅེས་སྨྲས་ཏེ། ངས་རྣམ་པ་གང་དག་དང་། རྒྱུ་མཚན་དང་བཅས་པས་མཆོད་རྟེན་དེ་དག་མཐོང་བར་གྱུར་པ་ཇི་ལྟ་བ་བཞིན་དུ་མཉན་པར་གྱིས་ཤིག། དེ་ལ་སྔོན་ལྷའི་འཇིག་རྟེན་དུ་ང་སྔོན་སྐྱེས་ནས་བག་མེད་པ་སྤྱོད་པ་ཡུལ་ལ་ཆེད་ཆེར་བྱེད་པ་འདོད་པ་ལྔའི་ཞགས་པས་ཀུན་ནས་བཅིངས་པར་གྱུར་པས་ངས་འཐབ་བྲལ་དེ་དག་རྣམས་ཐམས་ཅད་ཕྱིར་ཞིང་ལྟ་བར་བྱེད་དེ། རྩེ་བར་གྱུར་ཅིང་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པས་རྩེ་བ་དང་ཀུན་ཏུ་སྤྱོད་པར་བྱེད་དེ། ནགས་ནས་ནགས་དང་། རི་བོའི་ངོས་ནས་རི་བོའི་ངོས་རྣམས་དང་པད་མའི་རྫིང་བུ་ནས་པད་མའི་རྫིང་བུ་དང་། བུང་བ་རྒྱ་ཆེ་བ་ནས་བུང་བ་རྒྱ་ཆེ་བར་ལྷ་མོ་བརྒྱ་སྟོང་དུ་མས་ཡོངས་སུ་བསྐོར་བ་དེ་བཞིན་དུ་རྒྱན་དང་ཆ་བྱད་དང་ལྡན་པའི་ལྷ་བརྒྱ་སྟོང་གིས་ཀུན་དུ་གང་བར་གྱུར་པས་མདུན་ན་གར་བྱེད་པར་གྱུར། གླུ་ལེན་པར་གྱུར། རྒོད་པར་བྱེད་པར་གྱུར། འགྱིང་བར་བྱེད་པར་གྱུར་པས་ཡོངས་སུ་བསྐོར་བས་ལྷའི་འཇིག་རྟེན་འདི་ཐམས་ཅད་དུ་བདག་ཅག་འགྲོ་སྟེ། ཡུལ་རྣམས་ལ་དད་ཆེ་བར་གྱུར་པ། འདོད་པའི་ཡོན་ཏན་ལྔ་ལ་དགའ་བའི་སྲེད་པས་འཁྲིད་པར་གྱུར་པ་སྟེ། དེ་ལ་དེ་དག་ངོམས་པ་མེད་པར་གྱུར་ནས་འགྲོ་བ་དང་། སྤྱོད་པར་བྱེད་པའི་འགྲོས་ཐོགས་པ་མེད་པར་གྱུར་པ་ལ་འདི་ལྟ་སྟེ། ཆུ་ལ་ངང་པའི་རྒྱབ་ནས་ངང་པའི་རྒྱབ་དང་། ཀཱ་རཎ་ཌ་བའི་རྒྱབ་ནས་ཀཱ་རཎ་ཌ་བའི་རྒྱབ་དང་། བལ་ལཱི་ནིའི་རྒྱབ་ནས་བལ་ལཱི་ནིའི་རྒྱབ་དང་། པད་མའི་

70-191a

ནང་ནས་པད་མའི་ནང་དང་། རླབས་ནས་རླབས་གཞན་རྣམས་ལ་ཡང་ང་རྩེ་བར་བྱེད་དེ། ཇི་ལྟར་འདོད་པར་འདོད་པ་རྣམས་ལ་སྤྱོད་པ་ཐམས་ཅད་དུ་འབྱིང་བ་མེད་པར་འགྲོ་བ་ཐམས་ཅད་དུ་འགྱིང་བ་དང་། རྒོད་པ་དང་བཅས་པ་མཆོག་ཏུ་དགའ་བའི་ཡིད་ཀྱིས་བདག་རྒྱུའོ། །དེ་བཞིན་དུ་ཡང་བདག་གལ་ཏེ། དགའ་བ་བརྒྱས་རྩེ་བའི་དབང་དུ་བྱས་ནས་བདག་ཉིད་རང་ཐང་གི་གཤོང་ན་ལེགས་པར་གནས་པར་གྱུར་པ་ལ་ལྷ་བརྒྱ་སྟོང་གིས་ཡོངས་སུ་བསྐོར་ནས་བདག་རྩེ་སྟེ། རི་ནས་རི། རི་བོའི་རྩེ་ནས་རི་བོའི་རྩེ། ཕུག་ནས་ཕུག་ཏུ། སྐྱེད་མོས་ཚལ་ནས་སྐྱེད་མོས་ཚལ། རི་ཁྲོད་ནས་རི་ཁྲོད་དུའོ། །དེ་ཁོ་ན་བཞིན་དུ་ང་ཐམས་ཅད་དུ་ཐོགས་པ་མེད་པར་འགྲོ་བས་རྣམ་པར་སྤྱོད་པ་ཡིན་ནོ། །དེ་བཞིན་དུ་ནམ་མཁའ་ལ་ཡང་ཁང་པ་བརྒྱ་སྟོང་གིས་ཡོངས་སུ་བསྐོར་བར་གྱུར་ནས་ལྷ་བརྒྱ་སྟོང་གིས་གང་བས་རོལ་མོའི་སྒྲ་དང་། གར་དང་། གླུ་དང་། དགོད་པ་དང་། འགྱིང་བ་དང་། ལྷན་ཅིག་ཏུ་ལྷའི་འཇིག་རྟེན་འདི་མ་ལུས་པར་རྩེ་བར་གྱུར་པས་མཐོང་སྟེ། ཡུལ་གྱི་ཆ་དཔེ་མེད་པར་གྱུར་པ་རིན་པོ་ཆེ་བདུན་དང་ལྡན་པ་དེའི་འོད་ཀྱིས་ཉེ་བར་མཛེས་པར་གྱུར་པའི་ཡུལ་གྱི་ཆ་དང་། དེ་བཞིན་དུ་རིའི་རྩེ་མོ་རྣམས་ལས་གཞན་དུ་ཡང་མཐོང་བ་པད་མ་བརྒྱ་སྟོང་དུ་མ་སྐྱེས་པའི་ཀླུང་རྣམས་ཀྱིས་ལེགས་པར་རྣམ་པར་ཕྱེ་བའི་ཕྱོགས་ཀྱི་ཆ་དང་། དེ་ཁོ་ན་བཞིན་དུ་ངས་ཡང་མཐོང་བ་ལྷའི་ཚོགས་ཀྱིས་ཡོངས་སུ་བསྐོར་བར་གྱུར་ནས་ནམ་མཁའི་དཀྱིལ་ན་ལེགས་པར་གནས་པ། འདོད་པའི་ཡོན་ཏན་ཐམས་ཅད་དང་ལྡན་པ། ལྷའི་འཇིག་རྟེན་འདི་རྒྱ་ཆེན་པོར་ཁང་བུ་བརྒྱ་སྟོང་གིས་ཡོངས་སུ་བསྐོར་བར་གྱུར་ནས་ཐམས་ཅད་ལ་ཀུན་ཏུ་ཐོགས་པ་མེད་པར་ང་འགྲོ་བར་བྱེད་དེ། ཆུ་དང་ཐང་དང་། དེ་བཞིན་དུ་ནམ་མཁའ་དང་གསུམ་ལ་ཡང་དེ་ལྟར་རྩེ་བར་གྱུར་པ་ན་འགའ་ཞིག་ན་བདག་གིས་རིང་བ་ནས་མཐོང་བར་གྱུར་པ་ལ་འོད་ཟེར་དེ་དག་རྣམས་ཐམས་ཅད་ཟིལ་གྱིས་གནོན་པར་བྱེད་པའི་འོད་ཟེར་དྲུག་གི་རང་བཞིན་གྱི་རིར་གྱུར་པ། ནམ་མཁའི་དཀྱིལ་བརྟོལ་བར་གྱུར་ནས་རབ་ཏུ་འབར་བར་བྱེད་དེ། དེ་ལས་ངའི་ངོ་མཚར་བ་འཕངས་པའི་ཡིད་མཉམ་པར་མ་བཞག་པར་གྱུར་པས་འདི་སྙམ་དུ་སེམས་པར་གྱུར་ཏེ། རྨད་དུ་བྱུང་

70-191b

བ་གཞན་འདི་དག་རྣམས་ཅི་ཞིག་མཐོང་བར་གྱུར་ན་ང་རང་ཁང་བུའི་ཕྲེང་བ་རྣམས་ཀྱིས་ཡོངས་སུ་བསྐོར་བར་གྱུར་པས་རིངས་པ་ཉིད་དུ་ནམ་མཁའ་ལས་གང་ནས་འོད་ཟེར་དྲུག་པོ་དེ་དག་མཐོང་བར་གྱུར་པ་དང་དེར་ཕྱིན་པར་འགྱུར་རོ། །ཕྱིན་པར་གྱུར་ནས་ཀྱང་འོད་དེ་དག་རྣམས་ཀྱི་དྲུང་དུ་བདག་ཅག་ཁང་པ་ཐམས་ཅད་དང་བཅས་པ་རྣམས་ལྷན་ཅིག་ཏུ་ནམ་མཁའི་དབྱིངས་ལས་ལྟུང་བར་གྱུར་ནས་ས་གཞི་ལ་རབ་ཏུ་ལྟུང་ངོ་། །འོད་ཀྱང་ཉམས་པར་གྱུར་ནས་དེ་ལ་ང་འདི་སྙམ་དུ་སེམས་པར་གྱུར་ཏེ། འདི་ཅི་ཞིག་ཡིན་པར་གྱུར་ན། ཅི་རང་ཉིད་ཀྱི་གཟི་བརྗིད་ཡིན་པར་འགྱུར་རམ། གང་གིས་བདག་ཅག་ལྷའི་ཚོགས་རྣམས་ཐམས་ཅད་དང་བཅས་པ་ནམ་མཁའི་དཀྱིལ་ནས་ལྟུང་བར་གྱུར་ཅིང་འོད་ཀྱང་ཀུན་ནས་ཉམས་པར་བྱས་པར་གྱུར་ཏོ། །དེ་ལ་བདག་གིས་དེ་ལྟར་བསམས་པ་དང་། འདུལ་བར་གྱུར་པ་ཡང་རྣམ་པར་ཡངས་པ་ཞེས་བྱ་བའི་མིང་ཅན་གྱི་ལྷ་ཤིན་ཏུ་སྔ་བ་ན་སྐྱེས་པར་གྱུར་པ་དེ་ལ་ཡང་དོན་འདི་དག་རྣམས་དྲིས་སོ། །དེས་བརྗོད་པར་གྱུར་པ་འདི་དག་ནི་ལྷའི་ཞལ་སྔ་ནས་ཀྱང་མ་ཡིན་ལ་འདི་དག་ནི་ཡུལ་གྱི་སྐྱོན་ཡང་མ་ཡིན་ཞིང་བར་ཆད་རྣམས་འབྱུང་བར་འགྱུར་བ་ཡང་མ་ཡིན་གྱི། གང་གིས་ཁྱོད་ལྷའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་བ་རྣམས་ནམ་མཁའི་དཀྱིལ་ནས་ལྷུང་བར་གྱུར་པ་གང་ཡིན་པ་དེ་དག་གི་རྒྱུ་མཚན་རྣམས་ཉོན་མཛོད་དང་། གཞན་ཡང་སྔོན་ལྷ་རྣམས་ཀྱི་བདག་པོར་གྱུར་པ་གང་ཡིན་པ་དེ་དག་རྣམས་ཀྱང་གནས་འདིར་ཆུད་ཟོས་པར་གྱུར་ཏེ། ཤིན་ཏུ་ཡང་ནམ་མཁའི་དཀྱིལ་ནས་ལྷུང་བར་གྱུར་ཏོ། །ཁྱོད་ཀྱང་ཐོས་པ་དང་མི་ལྡན་པའི་རྒྱུས་ཁྱོད་ཀྱིས་མི་ཤེས་པས་ཡུལ་ཕྱོགས་འདི་དག་ཏུ་འོད་ཟེར་དེ་དག་རྣམས་ལས་རྒྱལ་བར་མི་ནུས་པས་ལྷུང་བར་གྱུར་པ་ཡིན་ནོ། །དེ་ཉིད་ཀྱི་རྒྱུ་མཚན་དེ་དག་རྣམས་བདག་གིས་མངོན་པར་བརྗོད་པར་བྱའོ། །དེ་དག་རྣམས་ཀྱི་རྒྱུ་གང་ཡིན་པ་དང་གནས་དེ་དག་ནི་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་གང་དག་ལྷ་རྣམས་ཀྱི་ཡང་ལྷར་གྱུར་པ་འཇིག་རྟེན་ཐམས་ཅད་ཀྱི་དེ་ཁོ་ན་རིག་པར་གྱུར་པ་དེ་དག་རྣམས་ཀྱིས་ཚོགས་པ་རྒྱུ་བ་ན། རྣམ་པར་རྒྱུ་བའི་ལྷ་རྣམས་ཀྱིས་འདིར་ལྷ་དང་མི་

70-192a

རྣམས་ལ་ཕན་པར་འགྱུར་བའི་མཆོད་རྟེན་དྲུག་མཛད་པ་ཡིན་ལ། མཆོད་རྟེན་དགེ་སྦྱོང་རྣམས་ཀྱིས་བསྒྲུབ་པར་མི་ནུས་པ་དེ་དག་རྣམས་ཀྱི་རིམ་པ་བསྒྲུབ་པ་དེ་དག་ནི་རྒྱུ་གང་གི་ཕྱིར་དེ་དག་རྣམས་ཀྱི་དྲུང་ན་ཆེས་ཁྱད་པར་དུ་འཕགས་པར་གྱུར་པ་གཞན་ནི་འགའ་ཞིག་ཀྱང་མེད་པའི་ཕྱིར་ན། དེ་དག་རྣམས་ཀྱི་མཆོད་རྟེན་འདི་དག་རྣམས་ནི་འགོང་བར་བྱར་མི་ནུས་སོ། །རྒྱུ་འདིས་ན་ཁྱོད་ཀྱང་ལྷུང་བར་འགྱུར་བ་ཡིན་ཞེས་ང་ལ་རབ་ཏུ་རྣམ་པར་ཡངས་པ་དེས་བརྗོད་དོ། །དེ་ན་ཅི་ཞིག་ཀུན་ཏུ་གནས་པར་གྱུར་པ་ཡིན། དེས་ང་ལ་ཡང་བརྗོད་པ་དེ་དག་རྣམས་དང་མཚུངས་པར་གྱུར་པའི་དཀའ་ཐུབ་ནི་འཁོར་བ་ན་འགའ་ཞིག་ཀྱང་ཡོད་པ་མ་ཡིན་ཏེ། དེ་དག་རྣམས་ནི་ཐམས་ཅད་མཁྱེན་པ་ཐམས་ཅད་གཟིགས་པར་གྱུར་པ་དེ་དག་གིས་འདོད་པ་རྣམས་ཀྱི་ཉེས་དམིགས་མངོན་པར་མཁྱེན་ཅིང་། འཁོར་བའི་སྡུག་བསྔལ་རྣམས་ཀྱང་མཁྱེན་པར་གྱུར་ནས་བསྐལ་པ་གྲངས་མེད་པ་གསུམ་དུ་ཕ་རོལ་ཏུ་ཕྱིན་པ་དྲུག་པོ་རྣམས་ལ་དཀའ་ཐུབ་སྤྱད་པས། ཐམས་ཅད་མཁྱེན་པ་ཐོབ་པར་གྱུར་ནས་ཡོངས་སུ་མྱ་ངན་ལས་འདས་པར་གྱུར་པ་ནི་ཤིན་ཏུ་མདོར་བསྡུས་པ་ཡིན་ནོ། །གལ་ཏེ་ཁྱེད་རྣམས་ཉན་པར་འདོད་ན་ཚོགས་པ་རྒྱུ་བ་ན་རྒྱུ་བའི་ས་ན་གནས་པའི་མཆོད་རྟེན་དེ་དག་ལ་བལྟ་བར་གྱིས། དེ་ནས་རྣམ་པར་ཡངས་པ་དེའི་དྲུང་ནས་ཚིག་འདི་དག་རྣམས་ཐོས་པར་གྱུར་ནས་ང་ངོ་མཚར་བས་ཆད་ཆེ་བར་གྱུར་པ་ལ་མ་མཐོང་བ་དང་། ཟིལ་གྱིས་མནན་པར་ཡང་གྱུར་ནས་རྣམ་པར་ཡངས་པ་དེ་དང་ལྷན་ཅིག་ཏུ་དང་། ལྷ་གཞན་རྣམས་དང་ཡང་མཆོད་རྟེན་དེ་དག་རྣམས་སུ་རབ་ཏུ་བརྒྱུས་པར་གྱུར་ཅིང་གང་གིས་བདག་ཅག་འཁོར་བ་ལས་སྒྲོལ་བའི་ཆོས་ཀྱང་ཐོས་སོ། །ཐབས་འདི་དག་རྣམས་ཀྱིས་མཆོད་རྟེན་འདི་མཐོང་བར་གྱུར་པ་དང་། གང་བཅོམ་ལྡན་འདས་དེ་དག་གིས་བསྟན་པའི་ལྷ་དང་མི་རྣམས་ལ་ཕན་པར་གྱུར་པ་འདི་དག་རྣམས་ཀྱང་ཐོས་སོ། །དེ་ནས་ལྷ་དེ་དག་རྣམས་ཀྱིས་འཐབ་བྲལ་བའི་མངའ་བདག་དེའི་ཚིག་རྣམས་ཐོས་པར་གྱུར་ནས་གང་ཡང་ས་གཞན་དག་པ་རྣམས་ནི་དེ་དག་རྣམས་སུ་ལེགས་པར་ཉེ་བར་སོང་ངོ་། །མུ་སུ་ལུན་དྷ་ཡང་རང་གི་ས་ལ་རབ་ཏུ་ཞུགས་པར་གྱུར་ཏོ། །མཆོད་རྟེན་རྟོགས་པ་རྫོགས་སོ།། །།

70-192b

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བ་རྣམས་ཀྱི་ལས་ལ་ཀུན་ཏུ་ལྟ་བར་བྱེད་དོ། །དེས་འཐབ་བྲལ་བ་རྣམས་ཀྱི་ས་རབ་ཏུ་རྣམ་པར་འདྲེས་པའི་ཁོར་ཡུག་ན་རྒྱུ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་ཐོས་པ་ལས་བྱུང་བའི་ཤེས་རབ་ཀྱིས་མཐོང་བར་གྱུར་ཏེ་དེར་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་ཇི་ལྟར་གང་དག་གིས་ཤེས་རབ་ཀྱིས་དགེ་བ་རྣམས་ལ་སྤྱོད་པ་དགེ་ཞིང་བདེ་ལེགས་སུ་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡང་སྤངས་པར་གྱུར་པ་རྣམས་ནི་སྔར་བཞིན་ཏེ། འདོད་པ་ལས་ལོག་པར་གཡེམ་པ་ཡང་རྣམ་པ་ཐམས་ཅད་དུ་ཡོངས་སུ་སྤངས་པར་གྱུར་པ་ལ་འདི་ལྟ་སྟེ། ནགས་སུ་སོང་བར་གྱུར་པ་ན་ཡང་གང་གི་ཚེ་བྱ་རྣམས་འདོད་པ་གསལ་བར་བྱེད་པ་སྙན་པར་སྒྲོགས་པ་པོ་སྒྲ་སྙན་པ་དང་ལྡན་པ་རྣམས་མཐོང་བར་གྱུར་ལ། དེ་ཡང་མཆོག་ཏུ་འདོད་པ་སྐྱེད་པར་བྱེད་པའི་ཚིག་རྣམས་འདོན་པར་བྱེད་པ་དང་ཕྱི་བཞིན་འབྲང་བར་ཡང་ངང་མོ་དག་རྣམ་པར་རྒྱུའོ། །རྣམ་པ་སྣ་ཚོགས་པའི་ཁ་དོག་གི་སྒྲོ་དང་ལྡན་པ་སྐྱེ་བོ་ཐམས་ཅད་ཀྱི་ཡིད་འཕྲོག་པར་གྱུར་པའི་འདོད་པ་སྐྱེད་པར་བྱེད་པ་དེ་དག་རྣམས་ཀུན་ཏུ་མཐོང་བར་གྱུར་ནས་ཀྱང་ཡིད་ལ་སྒོམ་པར་མི་བྱེད་དོ། །རྣམ་པར་རྟོག་པར་མི་བྱེད་དོ། །དེ་རྣམ་པ་དེ་སྲིད་དུ་ཚུལ་ཁྲིམས་རྣམ་པར་དག་པར་གྱུར་པ་ཡིན་ན། འདོད་པ་ལ་ལོག་པར་གཡེམ་པ་ཉིད་ཅིའི་ཕྱིར་ན་བྱེད་པར་འགྱུར། འདོད་པ་ལ་ལོག་པར་གཡེམ་པ་རྣམས་རྣམ་པར་སྤོང་བར་བྱེད་པ་པོ་ཡོངས་སུ་དག་པའི་ཚུལ་ཁྲིམས་དང་ལྡན་པ་རྣམས་ནི་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་རྣམ་པར་འདྲེས་པའི་ཁོར་ཡུག་ན་རྒྱུ་བའི་ས་འདིར་སྐྱེའོ། །དེར་སྐྱེས་པ་ཡང་འདོད་པའི་ཡོན་ཏན་ཐམས་ཅད་ཀྱིས་ཆེས་སྟོབ་པར་གྱུར་པ་བདེ་བའི་ཆུ་བོ་རྒྱ་ཆེན་པོ་རྣམས་འཇུག་པར་གྱུར་པ་གང་ཡང་དགའ་བར་འགྱུར་བའི་གསེར་དང་རིན་པོ་ཆེ་བཻ་ཌཱུརྱ་དང་དུང་དང་ཨིན་དྲ་ནཱི་ལ་དང་། པད་མ་དམར་པོའི་ལྗོན་ཤིང་གིས་ཉེ་བར་མཛེས་པ། འབབ་ཆུ་དང་ཆུ་ཀླུང་དང་རྫིང་བུ་སྣ་ཚོགས་པས་ཀུན་ཏུ་གང་བར་གྱུར་པ་གང་གིས་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་འདི་སྟེན་པར་བྱེད་པ། ནགས་དམར་པོ་ཞེས་བྱ་བའི་

70-193a

ནགས་ཡིན་ཏེ་ནགས་གང་ལ་ལྷ་རྣམས་རབ་ཏུ་དགའ་བར་འགྱུར་བའོ། །དེའི་ཚེ་ལྗོན་ཤིང་དེ་དག་རྣམས་ཀྱི་འོད་ཀྱིས་སྣ་ཚོགས་པའི་ཁ་དོག་ཏུ་གྱུར་ཅིང་རིན་པོ་ཆེ་སྣ་ཚོགས་པ་རྣམས་ཀྱི་འོད་ཀྱིས་བརྒྱན་པ་དང་ཆ་བྱད་སྣ་ཚོགས་འཛིན་པར་ཡང་གྱུར་ནས་གང་གི་ཚེ་ནགས་དེ་ན་རབ་ཏུ་དགའ་བར་འགྱུར་རོ། །ཤིང་དེ་དག་རྣམས་ཀྱི་འོད་དེ་དག་གིས་ཀྱང་ཉེ་འཁོར་དུ་རིན་པོ་ཆེ་མཆོག་རྣམས་དང་ལྡན་པར་འགྱུར་རོ། །ནགས་དེ་ཡང་པད་མ་རཱ་གའི་ནགས་དང་ཀར་ཀེ་ཏའི་ནགས་སུ་གྱུར་པ་ཁ་དོག་དང་རེག་བྱ་ཡང་བདེ་བར་གྱུར་པ་དང་ཁ་དོག་དེ་དག་དང་ལྡན་པའི་ཤིང་དེ་དག་རྣམས་ལ་དྲིལ་བུ་གཡེར་ཁའི་སྒྲ་སྒྲོགས་པ་དང་མུ་ཏིག་གི་དྲ་བས་གཡོགས་པར་གྱུར་པ་ཤིང་དེ་དག་རྣམས་ལ་ཇི་ལྟར་འདོད་པའི་འབྲས་བུ་དང་ལྡན་པ་ཇི་ལྟར་འདོད་པའི་བཏུང་བ་འབབ་པ་ཇི་ལྟར་འདོད་པས་འགྲོ་བར་འགྱུར་རོ། །གང་ལ་ལྷ་དེ་དག་རྣམས་དགའ་བར་འགྱུར་བ་དེ་ལ་སེམས་བསྐྱེད་པ་དང་ལྷན་ཅིག་ཉིད་དུ་ཤིང་དེ་དག་རྣམས་ཉིད་ལས་འབྱུང་བར་འགྱུར་ཏེ་སྣ་ཚོགས་པའི་རྔ་དང་རོལ་མོའི་སྒྲ་ཀུན་ཏུ་སྒྲོགས་པའི་ཡལ་ག་རྣམས་ལ་འགྲོའོ། །ཉེ་འཁོར་ཀུན་ཏུ་སྣང་བར་བྱེད་པའི་འདབ་མ་དང་ཡལ་ག་དང་ལོ་མ་དང་ཚིའུ་པ་རྣམས་ལ་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བར་གྱུར་ནས་དེ་དག་རྣམས་ནམ་མཁའ་ལ་ཉེ་བར་འཕགས་པའི་ཤིང་དེ་དག་རྣམས་ཉི་མ་མང་པོ་རྣམས་བཞིན་དུ་ནམ་མཁའ་ཐམས་ཅད་དེ་དག་གིས་རྣམ་པར་སྣང་བར་བྱེད་དོ། །གཞན་ཡང་མདོག་དམར་པོར་གྱུར་པའི་ཤིང་དེ་དག་རྣམས་ཉིད་ལས་བཞོན་པ་འབབ་པའི་ཆར་རྣམས་ཀྱིས་དེ་དག་ཆར་བཞིན་དུ་ནམ་མཁའི་ཡུལ་མ་ལུས་པ་རྣམ་པར་མཛེས་པར་བྱེད་དོ། །དྲིལ་བུ་གཡེར་ཁའི་སྒྲ་སྒྲོགས་པ་དང་མཐོ་རིས་ཀྱི་བྱ་ཡང་རྒྱུ་ཞིང་སྒྲ་འདོན་པར་གྱུར་པ་རྣམས་དང་འཇོ་སྒེག་པའི་རྨ་བྱའི་སྒྲས་ཉེ་བར་བསྒོས་པ་རྣམས་ཀྱིས་ལེགས་པར་རྟོགས་པ་བཞིན་དུ་ནམ་མཁའ་མ་ལུས་པ་རྣམས་རྣམ་པར་མཛེས་པར་བྱེད་དོ། །དེ་ནས་ལྷ་དེ་དག་རྣམས་ཤིང་དེ་དག་རྣམས་མངོན་དུ་བྱས་པ་ལ་ལེགས་པར་བརྟེན་པར་གྱུར་ནས་མངོན་དུ་ལེགས་པར་མཐོང་བ་སྣ་ཚོགས་ཀྱིས་ཡོངས་སུ་བསྐོར་བ་ཕན་ཚུན་དུ་གྲོགས་ཀྱི་བྱ་བ་དང་ལྡན་པ་རྒྱགས་པ་ལ་དོན་གཅིག་པར་གྱུར་པ་ཇི་ལྟར་ཕན་པར་འགྱུར་བའི་ལས་རྣམས་ལ་ལོངས་སྤྱོད་པར་བྱེད་དོ། །

70-193b

རྒྱགས་པར་གྱུར་པའི་བུ་མོ་བརྒྱ་སྟོང་དུ་མའི་ཚོགས་ཀྱིས་ཡོངས་སུ་བསྐོར་ནས་གླུ་དང་རྔ་སྒྲ་དང་རོལ་ཆ་དང་ལྷན་ཅིག་རང་དབང་དུ་ལྷ་དེ་ནམ་མཁའི་དཀྱིལ་དུ་འཕགས་པར་གྱུར་པ་ན། དེ་དག་གི་སྔོན་ན་ལྗོན་ཤིང་དེ་དག་རྣམས་ལམ་སྟོན་པར་བྱེད་པ་པོ་བཞིན་དུ་འགྲོའོ། །དེ་ནས་ལྷ་དེ་དག་འདི་སྙམ་དུ་སེམས་ཏེ་ལྗོན་ཤིང་དེ་དག་རྣམས་གང་ལ་ཡང་བདག་གིས་ཞོན་པར་ནི་མ་གྱུར་ཏོ། །སེམས་སྐྱེས་པར་གྱུར་པ་ཙམ་ཉིད་ན་ལྗོན་ཤིང་དེ་དག་རྣམས་ལྷ་རྣམས་ཞོན་པའི་དབང་དུ་བྱས་ནས་ལྗོན་ཤིང་དེ་དག་རྣམས་སྡོད་པར་གྱུར་ཏོ། །དེ་ནས་ལྷ་དེ་དག་རྣམས་ལྗོན་ཤིང་དེ་དག་རྣམས་ལ་ཞོན་པར་བྱེད་དེ་ཁ་ཅིག་ནི་ཡལ་ག་ལ་ལེགས་པར་གནས་ནས་དགའ་བར་བྱེད་ལ་དེ་དག་ཇི་ལྟར་འདོད་པ་བཞིན་དུ་འགྱུར་རོ། །ཇི་ལྟར་ཡང་ཡལ་ག་དག་ལ་པད་མའི་རྫིང་བུ་རབ་ཏུ་འབྱུང་བར་འགྱུར་ཏེ་དེ་དག་སེམས་བསྐྱེད་པ་ཙམ་ཉིད་ན་པད་མའི་རྫིང་བུ་དེ་དག་རྣམས་རབ་ཏུ་འབྱུང་བར་འགྱུར་བ་གང་ལ་ལྷ་དེ་དག་རྣམས་འཁོར་དང་བཅས་པ་དགའ་བར་བྱེད་པ་དང་། ཀུན་ཏུ་སྤྱོད་པར་ཡང་བྱེད་དོ། །དེ་དག་འཁོར་དང་བཅས་པ་རྣམས་རྒྱགས་ཤིང་འདོད་པ་ཐམས་ཅད་ཀྱིས་བདེ་བར་གྱུར་པས་ལྷ་རྣམས་ཡལ་ག་ལ་སོང་བར་གྱུར་ནས་ནགས་དམར་པོ་ན་དགའ་བར་བྱེད་དོ། །གཞན་ཡང་ལྷ་གང་དག་གང་ལ་གསེབ་ཏུ་སོང་བར་གྱུར་པ་དེ་དག་རྣམས་ཀྱང་གང་དེ་ཁོ་ན་བཞིན་དུ་འགྱུར་རོ། །དེ་བཞིན་དུ་ཁ་དོག་དེ་དག་རྣམས་ལ་ཁྱིམ་དང་ཁང་བུ་འདི་དག་རབ་ཏུ་འབྱུང་བར་གྱུར་ཏོ། །དེས་སེམས་བསྐྱེད་པ་ཙམ་ཉིད་ན་ཁྱིམ་དེ་དག་ཏུ་རབ་ཏུ་འབྱུང་བ་ཡིན་ཏེ། རིན་པོ་ཆེ་སྣ་ཚོགས་པ་རྣམས་ཀྱིས་རྣམ་པར་བཀྲ་བར་གྱུར་པའི་ཆ་ཤས་དགའ་བར་གྱུར་པའི་དྲིལ་བུ་གཡེར་ཁའི་དྲ་བ་རྣམས་ཀྱིས་ཁྱབ་པར་གྱུར་པ་ཐམས་ཅད་དུ་ཡང་པད་མའི་རྫིང་བུ་རྣམས་ཀྱིས་ཉེ་བར་མཛེས་པར་གྱུར་པ་མུ་ཏིག་གི་དྲ་བ་རྣམས་ཀྱིས་མཐོངས་གཡོགས་པ་དང་ནོར་བུའི་རྟ་བབས་ཀྱིས་མཛེས་པར་གྱུར་པ་དང་རིན་པོ་ཆེ་སྣ་ཚོགས་པ་རྣམས་ཀྱི་སྒོས་མཛེས་པར་གྱུར་པ་རྣམ་པ་སྣ་ཚོགས་པའི་སྟན་རྣམས་དང་ནང་གི་ཉེ་བར་མཁོ་བ་རྣམས་ཀྱིས་ཉེ་བར་མཛེས་པ་ཁྱིམ་གྱི་ནང་རྣམས་སེམས་གང་ལ་མཛེས་པར་གྱུར་པ་དེ་དག་ལ་ལྷ་རྣམས་དགའ་བར་བྱེད་པ་དང་ཕན་ཚུན་གཡོག་ཏུ་གྱུར་པས་རྩེ་བར་ཡང་བྱེད་དོ། །ཕན་ཚུན་གནོན་པ་མེད་པར་གྱུར་

70-194a

པའི་ལྷ་རྣམས་ཉིད་ཀྱི་ཕུང་པོ་འདི་ལྟ་སྟེ་མཛའ་བོའི་ཕུང་པོ་ཉིད་དང་ཁ་ཅིག་ནི་འགའ་ཞིག་དང་མཛའ་བོ་མ་ཡིན་པར་འགྱུར་བའམ་བར་མར་གནས་པར་ཡང་འགྱུར་ཏེ་ལས་རྣམས་ཤིན་ཏུ་ངན་པའི་ཕྱིར་རོ། །ལས་ཆེན་པོ་དག་རྣམས་ཉིད་ནི་མེད་ལ་ལེགས་པར་བྱས་པའི་ལས་ཀྱི་འབྲས་བུ་འདི་ལྟ་སྟེ་ཐམས་ཅད་དུ་མང་བ་ཞེས་བྱ་བའོ། །དེས་ན་ལྷ་དེ་དག་ཕན་ཚུན་དུ་ཕུང་པོ་གཅིག་ཏུ་གྱུར་ནས་དགའ་བར་བྱེད་དོ། །ནགས་དམར་པོར་རྩེ་བར་བྱེད་དོ། །ལས་རྣམས་མཆོག་ཏུ་རྒྱ་ཆེ་བར་གྱུར་པས་འདོད་པ་ཐམས་ཅད་ཕུན་སུམ་ཚོགས་པ་ལ་རང་ཇི་ལྟར་འདོད་པར་སྤྱོད་པར་གྱུར་པས་ནམ་མཁའི་དཀྱིལ་ཀུན་ཏུ་རྒྱུ་བར་གྱུར་པ་ན་བདེ་བ་མང་པོ་དུ་མ་རྣམས་ཀྱིས་མངོན་པར་དགའ་བ་དེ་དེ་ལྟར་གནོད་པ་མེད་པར་གྱུར་པ་རྣམས་ནམ་མཁའི་དཀྱིལ་དུ་མངོན་པར་དགའོ། །གཞན་ཡང་གང་དག་ནམ་མཁའི་ཕྱོགས་གཅིག་ཏུ་འོངས་པར་གྱུར་ནས་དེ་ཉིད་གཞན་ཡང་གནས་དེ་ཉིད་དུ་འགྲོ་བར་བྱེད་དོ། །འབབ་ཆུ་དང་རྫིང་བུ་སྣ་ཚོགས་པས་ཀུན་ཏུ་གང་བར་གྱུར་པ་དེ་བཞིན་དུ་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་བའོ། །གཞན་ཡང་དགའ་བར་གྱུར་པས་གང་ན་ལྗོན་ཤིང་ཀུན་ཏུ་འཁྲིལ་བའི་ནགས་ཞེས་བྱ་བ་གཞན་དེར་འགྲོ་བར་བྱེད་དོ། །ནགས་དེའི་ཉེ་འཁོར་རྣམས་ན་ཡང་མཆོག་ཏུ་དགའ་བར་གྱུར་པའི་འབབ་ཆུ་དང་འོ་མའི་ཀླུང་རྣམས་ཀྱིས་ཉེ་བར་མཛེས་པར་གྱུར་པའོ། །འོ་མ་དེའི་ཡང་གཟི་བརྗིད་འདི་དག་ཡིན་ཏེ་ལྷ་གང་དག་གལ་ཏེ་ཤེད་ན་འཐུང་བར་བྱེད་པ་རྣམས་དེས་སྐྱེ་བ་གཞན་དྲན་པར་འགྱུར་རོ། །ཇི་ལྟར་བདག་ཅག་སྐྱེ་བ་གཞན་དག་ནས་ཤི་འཕོས་པར་གྱུར་ནས་དེ་དག་ལ་སྐྱེས་པ་དེ་གལ་ཏེ་བག་མེད་པར་གྱུར་ན་དེའི་སྡུག་བསྔལ་རྣམས་ཀྱང་རྣམ་པ་དུ་མར་འགྱུར་བར་ཐོས་ནས་མཆོག་ཏུ་ཉམ་ང་བར་འགྱུར་རོ། །དེ་ཉམ་ང་བར་གྱུར་པས་བག་མེད་པ་རྣམས་སྤངས་ནས་ཆོས་རྗེས་སུ་སྒྲུབ་པར་བྱེད་པར་འགྱུར་ཏེ། འོ་མ་དེ་མྱངས་པར་གྱུར་པ་ལས་དེ་དག་རྣམས་ཀྱི་དོན་ཆེན་པོ་རྫོགས་པར་འགྱུར་རོ། །དེ་ལྟར་འོ་མ་དེ་འཐུངས་ནས་སླར་ཡང་ཤིང་འཁྲིལ་བའི་ནགས་དེ་ཉིད་དུ་འཇུག་པ་ན། འབབ་ཆུ་དང་རྫིང་བུ་རྣམས་དང་པད་མའི་ཚལ་སྣ་ཚོགས་པ་ཕུན་སུམ་ཚོགས་པ་བྱའི་ཚོགས་དུ་

70-194b

མས་ཡོངས་སུ་གང་བར་གྱུར་པ་མེ་ཏོག་གི་ཚོགས་རྣམས་དང་ཉེ་བར་དུད་པར་གྱུར་པའི་འཁྲིལ་ཤིང་རྣམས་ཀྱིས་ཉེ་བར་མཛེས་པ་དང་བུང་བ་རྣམས་ཀྱང་རིན་པོ་ཆེ་སྣ་བདུན་གྱི་རང་བཞིན་དང་ལྡན་པའི་མཆོག་ཏུ་གྱུར་པ་རྣམས་ཕན་ཚུན་གྱི་ཉེ་འཁོར་རྣམས་ཀྱི་པད་མའི་ཚལ་ནས་པད་མའི་ཚལ་རྣམས་དང་ལྗོན་ཤིང་གི་གསེབ་ནས་ལྗོན་ཤིང་གི་གསེབ་ཏུའོ། །ཤིང་དེ་དག་རྣམས་ཀྱང་མཆོག་ཏུ་ལེགས་པར་གནས་པར་གྱུར་པ་བཻ་ཌཱུརྱའི་སྡོང་བུ་དང་པད་མ་རཱ་གའི་འདབ་མ་འབྲས་བུ་རྣམས་ནི་གསེར་བཙོ་མའི་མདོག་དང་མཚུངས་པར་གྱུར་པ་རོ་རྣམས་ཀྱང་རྣམ་པ་དེ་སྲིད་ཉིད་དེ། འབྲས་བུ་དེ་དག་རྣམས་ཀྱི་རོ་གང་ཡིན་པ་ནི་གཞན་རྣམས་ཐམས་ཅད་ཀྱི་དྲུང་ན་བླ་ལྷག་པར་གྱུར་པ་ཡིན་ནོ། །རོ་རྣམས་ཇི་ལྟར་འདོད་པ་བཞིན་དུ་ཡང་འབྲས་བུ་དེ་དག་རྣམས་ལས་འབྱུང་ངོ་། །རོ་གང་དང་གང་ལ་སྲེད་པར་གྱུར་པ་དེ་ཁོ་ན་བཞིན་དུ་རྣམ་པ་དེ་སྲིད་དུ་རོ་རྣམས་འབྱུང་བར་འགྱུར་རོ། །དེ་དག་མིད་པར་གྱུར་ནས་སླར་ཡང་དེ་དག་གར་བྱེད་པར་འགྱུར་ཞིང་མཆོག་ཏུ་དགའ་བར་གྱུར་པའི་ཡིད་ཀྱིས་གང་ན་བཏུང་བའི་ནགས་ཞེས་བྱ་བའི་ནགས་ཡོད་པ་དེར་ཀུན་ཏུ་འགྲོའོ། །ཤིང་དེ་དག་རྣམས་ལས་ཀྱང་ལྷ་རྫས་ཀྱི་རོ་དང་དྲི་དང་ཁ་དོག་མཆོག་ཏུ་ཡིད་དུ་འོང་ཞིང་མཆོག་ཏུ་ཕན་པར་གྱུར་པ་གང་བརྗོད་པ་དེ་དག་རྣམས་ཡོངས་སུ་འབབ་པར་འགྱུར་རོ། །ཇི་ལྟར་གང་དང་གང་དག་ལ་ཆར་རྣམས་ཡོངས་སུ་སྨིན་པར་བྱེད་པ་དེ་བཞིན་དུ་བཏུང་བ་རྣམས་ཀྱང་ཤིང་དེ་དག་ལས་འབབ་པའོ། །བཏུང་བ་དེ་འཐུངས་ནས་སླར་ཡང་རབ་ཏུ་རངས་པ་ཆེས་ལྷག་པའི་ཡིད་དུ་འགྱུར་རོ། །བཏུང་བས་རྒྱགས་པར་གྱུར་པའི་ལྷ་སྣ་ཚོགས་པའི་རྔ་དང་གླུ་སྒྲོགས་པར་བྱེད་དོ། །གཞན་དང་རང་ཉིད་ཀྱི་འོད་དང་ལྡན་པ་འོད་དང་ཆ་བྱད་དུ་མ་རྣམས་ཀྱིས་རྒྱན་དུ་བྱས་པའི་ལུས་ཅན་གྱི་ལྷའི་བུ་མོ་དག་གིས་ཕྱི་བཞིན་འབྲང་བར་གྱུར་པས་འགྱིང་བར་གྱུར་པ་རྒོད་པར་གྱུར་ན་གང་ན་པད་མ་རཱ་གའི་ནགས་ཡོད་པ་དེར་ཉེ་བར་ལེགས་པར་འགྲོའོ། །ནགས་དེ་ཡང་དཔག་ཚད་ལྔ་བརྒྱར་རིན་པོ་ཆེ་ལྔ་རྣམ་པ་སྣ་ཚོགས་པའི་རང་བཞིན་གྱི་དྲི་ཤིན་ཏུ་ཞིམ་པའི་པད་མས་ཉེ་བར་མཛེས་པར་གྱུར་པ། པད་མ་གླང་པོའི་ནགས་དེ་ན་ཡང་གཞན་ནི་ཅུང་ཟད་ཀྱང་ཡོད་པ་མ་ཡིན་གྱི་པད་མ་དེ་དག་

70-195a

རྣམས་ལས་མ་གཏོགས་པ་སྟེ། དེ་དག་རྣམས་ལས་སེམས་ཤིན་ཏུ་ཆགས་པར་གྱུར་པའི་གླང་པོ་རྣམས་པད་མ་ཟ་བར་གྱུར་པ་དེ་དག་རྣམས་ཕན་ཚུན་དུ་ལྷན་ཅིག་པར་གླང་མོ་རྣམས་ཀྱིས་ཡོངས་སུ་བསྐོར་ནས་ཤིན་ཏུ་གཙང་བར་གྱུར་པའི་ཆུ་ཡང་ཡོན་ཏན་བདུན་དང་ལྡན་པ་ཆུ་བལ་གྱི་སྐྱོན་རྣམས་དང་བྲལ་བ་འདམ་གྱི་དྲི་མའི་སྐྱོན་རྣམས་དང་བྲལ་བ་རིང་བ་དང་ཐུང་བའི་སྐྱོན་དང་བྲལ་བ་དང་བར་གྱུར་པ་རེག་ན་བདེ་བར་གྱུར་པ་སྟེ། ཇི་ལྟ་ཇི་ལྟར་གླང་པོ་དེ་དག་འདོད་པར་འགྱུར་བའི་རྣམ་པ་དེ་ལྟ་བུའི་རེག་བྱར་འགྱུར་རོ། །གང་ལ་གླང་པོ་དེ་དག་རྣམས་དེ་ལྟར་གླང་མོ་རྣམས་དང་བཅས་ནས་རྩེ་བར་གྱུར་པ་ན་ལྷ་དང་ལྷ་མོ་འདི་དག་རྣམས་ཀྱིས་ཀྱང་རྩེ་བར་གྱུར་པའི་གླང་པོ་དེ་དག་རྣམས་མངོན་པར་མཐོང་ནས། གཞན་ཡང་ལྷ་དེ་དག་རྣམས་རབ་ཏུ་རངས་པར་གྱུར་པའི་ཡིད་ཀྱིས་ནམ་མཁའི་དཀྱིལ་ནས་གླང་པོའི་ནགས་དང་པད་མའི་ནགས་སུ་ཡང་འཇུག་གོ། །པད་མའི་ནགས་དེ་ན་ལྷ་མོ་རྣམས་ཀྱི་གླུ་དང་ལྷ་དེ་དག་རྣམས་ཀྱི་གླུའི་སྒྲ་རྣམས་ཀྱང་རྣམ་པར་སུན་འདོན་པར་བྱེད་པའི་སྒྲ་གླང་པོ་རྣམས་ཀྱི་ནང་ན་ངར་བ་སྐྱིམ་པ་ལྟ་བུར་གྱུར་པའི་སྒྲས་ཉེ་འཁོར་ཀུན་ན་ལེགས་པར་གླུ་ལེན་པ་བཞིན་དུ་མཐོ་རིས་ཉེ་བར་རྙེད་པར་གྱུར་ཏེ་རི་དང་ཚང་ཚིང་རྣམས་ལས་ཀྱང་སྒྲ་བརྙན་གྱི་སྒྲ་རྣམས་ཐོས་པར་གྱུར་ནས་ལྷ་དེ་དག་རྣམས་ཡང་གང་ན་པད་མའི་ནགས་ཞེས་བྱ་བའི་ནགས་ཡོད་པ་དེར་རྣམ་པ་སྣ་ཚོགས་པའི་རྒྱན་གྱིས་རྣམ་པར་འབར་བར་གྱུར་པའི་ལུས་ཅན་རྣམས་ཉེ་བར་འགྲོའོ། །ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་དེ་ཁོ་ན་བཞིན་དུ་ལྷ་དེ་དག་རྣམས་པད་མའི་ནགས་སུ་རྩེ་བར་བྱེད་དོ། །གང་ཡང་གཞན་དག་རིའི་ཕུག་དང་ཚང་ཚིང་རྣམས་ལས་འོངས་པ་དེ་དག་རྣམས་ཐམས་ཅད་ཕན་ཚུན་དུ་མངོན་པར་མཐོང་ནས་རབ་ཏུ་ཆེས་དགའ་བར་གྱུར་པའི་ཡིད་ཅན་རྣམས་ལྷ་དང་ལྷ་མོའི་ཚོགས་ཀྱིས་གང་བར་གྱུར་པ་རྣམས་གླང་པོ་ཆེ་རྣམས་དང་ལྷན་ཅིག་ཏུ་ཆུའི་རྩེད་མོ་ལ་དགའ་བར་བྱེད་དོ། །དེ་དག་དེ་ལྟར་དགའ་བར་གྱུར་པའི་ལྷ་དང་ལྷ་མོའི་ཚོགས་ཀྱིས་གང་བ་རྣམས་དུས་ཡུན་རིང་བར་དགའ་བར་བྱེད་ཅིང་གར་ཡང་བྱེད་དོ། །དེ་ལྟར་དེ་དག་རྣམས་བག་མེད་པར་གྱུར་པས་ལེགས་པར་བྱས་པའི་ལས་རྣམས་ཟད་པར་འགྱུར་རོ། །ཤིན་ཏུ་མྱུར་བར་

70-195b

ཚེ་ཟད་པར་འགྱུར་བའི་ཇི་ལྟར་གང་དག་ལྷའམ་ལྷ་མོ་ཡང་ལེགས་པར་བྱས་པའི་བསོད་ནམས་རྣམས་ཤིན་ཏུ་ཟད་པར་གྱུར་པ་ན་དེ་གང་གི་ཚེ་པད་མ་ལ་ཞོན་པར་བྱེད་པ་དེའི་ཚེ་པད་མའི་ནགས་དེ་ཆུར་འབྱིང་བར་འགྱུར་ཞིང་འཆགས་པར་ཡང་འགྱུར་བ་ནི་ལྷའམ་ལྷ་མོའི་ཡང་བསོད་ནམས་ཟད་པའི་མཚན་ཉིད་གཅིག་ཡིན་ནོ། །ལྷའམ་ལྷ་མོ་ཡང་རུང་སྟེ་བསོད་ནམས་ཟད་པར་གྱུར་པའི་མཚན་ཉིད་གཞན་ཡང་ཡོད་དེ་གང་ཞེ་ན་དེ་འདི་ལྟ་སྟེ་ལྷའམ་ལྷ་མོ་ཡང་རུང་སྟེ་གར་བྱེད་པར་གྱུར་པའི་གླང་པོ་ཆེའི་རྒྱབ་དུ་ཞོན་པར་བྱེད་དོ། །དེའི་ཚེ་གླང་པོ་ཆེ་དེས་མི་བཟོད་པར་འགྱུར་བའམ་དེའི་རྒྱབ་ལས་ལྷུང་བར་འགྱུར་རོ། །དེ་དག་ནི་ལྷ་དང་ལྷ་མོ་རྣམས་ཀྱང་རུང་སྟེ་བསོད་ནམས་ཟད་པའི་རྒྱུ་མཚན་གཞན་ཡིན་ནོ། །དེ་ལ་ལྷའམ་ལྷ་མོ་ཡང་རུང་སྟེ་བསོད་ནམས་ཟད་པའི་རྒྱུ་མཚན་བྱུང་བར་གྱུར་ཅིང་དེ་ལ་བག་མེད་པའི་རྒྱུ་མཚན་གྱི་སྐྱོན་གྱིས་གླང་པོ་ཆེ་རྣམས་འགྲོར་མི་ཉན་ནོ། །དེ་ནས་གང་དག་ཆེས་བག་མེད་པར་གྱུར་པ་དེ་དག་གི་ཡིད་ལྷ་རྣམས་ཀྱིས་རྟོགས་པར་གྱུར་ཏོ། །རྒྱུ་མཚན་དག་བྱུང་བར་གྱུར་ནས་ཚིགས་སུ་བཅད་པ་བརྗོད་པ། ཇི་ལྟར། རབ་ཏུ་ལྟུང་ངོ་དུས་ཆེན་པོ། །གསོན་པ་ཡང་ནི་རྣམ་པར་བཟློག །ཚེ་ཡང་ཡོངས་སུ་ཟད་བྱེད་པ། །བྱིས་པས་ཀྱང་ནི་གོ་བ་མིན། །ཡུལ་རྣམས་སྒྲུབ་པར་བྱེད་པ་ལ། །ཡིད་ནི་ངོམས་པ་མ་ཡིན་ནོ། །དབང་པོ་ཡང་མིན་ཡུལ་གྱིས་ནི། །འདོད་པའི་འཆིང་བས་གདུང་བར་བྱེད། །དབང་པོ་ལྔ་ནི་རྣམ་པར་ཆགས། །སེམས་ནི་འདོད་པས་ཉེ་བར་བཅོམ། །བསོད་ནམས་ཡོངས་སུ་ཟད་པ་ཡང་། །བྱིས་པས་གོ་བ་མ་ཡིན་ནོ། །མི་རྣམས་གསོན་པའི་བར་ཆད་ནི། །རྗེས་ཚོལ་དུས་འཁོར་ཆེན་པོ་ཡིན། །དེ་འདིར་རིངས་པར་འགྲོ་བ་ཡང་། །བྱིས་པས་ཤེས་པ་མ་ཡིན་ནོ། །ལས་ཀྱི་རླུང་གིས་ཀུན་སྦྱར་བའི། །འཆི་བའི་མེ་འདི་སྡུག་བསྔལ་ཡིན། །གང་གི་ཚེ་ན་སྲོག་འཇོམས་འདིས། །བྱིས་པས་ཤིན་ཏུ་མ་གོ་འོ། །འཁོར་བ་ན་ནི་སེམས་ལྡན་པའི། །འཆི་བདག་ཕྱིར་རྒོལ་འཇིགས་སོགས་ཀྱིས། །ཞགས་པ་གལ་ཏེ་རྣམ་གྲོལ་བར། །བྱེད་ནུས་སྐྱེས་བུ་འགའ་ཡོད་མིན། །ཇི་ལྟར་འཆི་བ་མ་བྱུང་ཞིང་། །ཇི་སྲིད་ཚེ་ནི་མ་བཅོམ་པ། །བག་མེད་པ་ནི་སྤང་བྱས་ཏེ། །དེ་སྲིད་བདེ་ལེགས་མཆོག་ཏུ་སོམས། །མི་རྣམས་

70-196a

གསོན་པའི་བར་གཅོད་པའི། །འཆི་བདག་དབྱུག་པ་འདི་རིང་མིན། །གསོན་པ་རྣམས་ནི་འཇོམས་བྱེད་པའི། །ཤུགས་ཀྱིས་ཉེ་བར་གནས་པར་འགྱུར། །དམུས་ལོང་ཡུལ་གྱིས་ཀུན་རྨོངས་པ། །ཆོས་ཀྱི་མར་མེ་རྣམ་པར་སྤངས། །འཆི་བདག་སྒྲོན་ཆེན་མི་བཟད་པ། །འདི་མིན་པར་ནི་ཅི་ཞིག་ཤེས། །གང་འདི་འཇིགས་གང་འཆི་བདག་དུས། །ཤེས་པར་གྱིས་དང་བྱིས་པ་གང་། །ཡུལ་རྣམས་ཀྱིས་ནི་དྲངས་པའི་ཡིད། །མུན་པ་མ་ལུས་པ་ཡིས་རྨོངས། །འཆི་འཕོས་འཆི་འཕོས་སྐྱེ་བ་ཡིན། །འགྲོ་གཞན་འགྲོ་གཞན་ཡང་དང་ཡང་། །རང་གི་ལས་འབྲས་སྤྱོད་པ་ལ། །སྲོག་ཆགས་རྣམས་ནི་རྨོངས་པས་བཅོམ། །རབ་གཏུམ་ཤིན་ཏུ་མྱུར་བ་ཡིས། །འཇིག་རྟེན་ཐམས་ཅད་འཕྲོག་པ་པོ། །འཆི་བདག་དུས་ནི་ཐམས་ཅད་ཀྱི། །ཅི་ཕྱིར་སྐྱེ་བོས་རྣམ་མི་ཕྱེད། །ཐ་ན་སྙིང་གིས་ཡང་མི་རིག །སེམས་ཀྱིས་ཀྱང་ནི་མི་དམིགས་སོ། །ཀུན་རྨོངས་གང་ཞིག་མི་རྟོགས་པ། །འཆི་བདག་དུས་ཀྱི་འཇིགས་པས་འཇིགས། །འཆི་འཕོའི་ཡང་ནི་རྒྱུ་མཚན་རྣམས། །ཇི་ལྟ་བར་ནི་རྟག་ཏུ་མཐོང་། །ངེས་པར་དུས་ནི་ཐུང་ངུ་ན། །ལྷ་ཡི་གནས་ནས་ལྟུང་བར་འགྱུར། །དེ་ལྟར་འཆི་འཕོའི་རྒྱུ་མཚན་མངོན་པར་ལེགས་པར་མཐོང་བར་གྱུར་ནས་ལྷ་དེ། འཆི་འཕོ་བར་འགྱུར་བའི་རྒྱུ་མཚན་གྱི་དེ་ཉིད་རིག་པའི་ཡིད་ཡོངས་སུ་སྐྱོ་བ་སྐྱེ་བར་འགྱུར་རོ། །འདིས་ཅུང་ཟད་རྟོགས་པར་འགྱུར་བ་ཡང་མ་ཡིན་ཏེ་ཇི་ལྟར་བག་མེད་པར་རྒྱུ་བ་དེ་དག་ཡུལ་ལྔ་ལ་རྣམ་པར་ཆགས་པ་རྣམས་ཀྱིས་མི་རྟོགས་སོ། །ཇི་ལྟར་འཆི་འཕོ་བར་འགྱུར་བ་ལ་དད་པ་དང་ལྡན་པར་འགྱུར་བ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། བག་མེད་པར་གྱུར་པས་ཡུལ་ལ་ཀུན་ཏུ་རྨོངས་པའི་ཕྱིར་དང་བྱིས་པའི་བློ་ཡིན་པའི་ཡང་ཕྱིར་ཏེ། དེ་ལ་དེ་དག་རྣམས་ཀྱི་སོ་སོར་བསྟན་པར་བྱ་བ་ཡང་བརྗོད་པར་མི་བྱའོ། །དེ་ནས་ལྷ་དང་བཅས་པ་རྣམས་ཉིད་ཀྱི་ཡིད་ཀྱིས་ཤེས་པར་གྱུར་ནས་ཅང་མི་སྨྲ་བར་གྱུར་ཏེ་པད་མའི་ནགས་དེ་ལས་ཕྱིར་སོང་ངོ་། །ལྷ་དེ་དག་རྣམས་ཀྱང་སླར་ཡང་ཡུལ་གྱི་བདེ་བ་རྣམས་ལ་དོན་དམ་དུ་བྱེད་པས་ཕན་ཚུན་དུ་རྩེ་བར་བྱེད་དེ་ཤིན་ཏུ་མི་བཟད་པ་མཆོག་ཏུ་འཇིགས་པར་གྱུར་པ་དེ་དག་རྣམས་འབྱུང་བར་འགྱུར་བ་ནི་དེ་རྨོངས་པའི་ཕྱིར་དེ་

70-196b

དག་གིས་རྟོགས་པ་ཡང་མ་ཡིན་ནོ། །ཇི་སྲིད་དུས་རྩིས་སུ་ཡང་འཇུག་པར་མི་བྱེད་པར་རྨོངས་པར་འགྱུར་བའི་ཕྱིར་ན་འཇིགས་པ་དང་བྲལ་བས་དགའ་བར་བྱ་སྟེ་གླང་པོའི་གསེབ་ཏུ་སོང་ཞིང་། པད་མའི་གསེབ་ཏུ་སོང་ནས་ལྷན་ཅིག་སྤྱོད་པ་དང་བཅས་པ་དེ་དག་རྣམས་ཡུལ་དེར་དུས་ཤིན་ཏུ་རིང་བར་རྩེ་བར་གྱུར་ནས། གཞན་ཡང་དེ་ཁོ་ན་བཞིན་དུ་གཟུགས་བརྒྱ་སྟོང་དུ་མར་གྱུར་པའི་ལྷ་རྫས་ཀྱི་གསེར་དང་བཻ་ཌཱུརྱ་དང་དངུལ་དང་པད་མ་རཱ་ག་རྣམས་ཀྱིས་ལེགས་པར་རྣམ་པར་ཕྱེ་བར་གྱུར་པའི་ཆ་ཤས་དང་རྟ་བབས་དང་ཁང་བུ་བརྒྱ་སྟོང་དང་ལྡན་པ་པད་མ་བརྒྱ་སྟོང་གིས་ཉེ་བར་མཛེས་པར་གྱུར་པ་རྒྱ་ཆེན་པོའི་བདེ་བ་ལ་དམིགས་པ་ཞེས་བྱ་བའི་རི་ལ་འཛེག་པར་བྱེད་དོ། །རི་ཐམས་ཅད་ལ་ཡང་མཆོག་ཏུ་བདེ་བར་གྱུར་པའི་འདོད་པ་རྣམས་ཀྱིས་ཡོངས་སུ་ཁྱབ་པ་རྔ་སྐད་བརྒྱ་སྟོང་སྒྲོགས་པར་གྱུར་པས་གང་བ་སྒྲ་འབྱིན་པའི་སྒྲ་རྣམ་པ་སྣ་ཚོགས་པ་རྣམས་དང་ཁ་དོག་སྣ་ཚོགས་པ་ནང་དུ་རེག་བྱར་སྣང་བའི་གཟི་བརྗིད་ཅན་དེ་དག་གིས་སྟོད་གཡོགས་བགོས་པར་གྱུར་པ་ཕན་ཚུན་དུ་བཞིན་ཀུན་ཏུ་ལྟ་བ་ལ་ཆེད་ཆེར་བྱེད་པ། སྒྲ་དང་། རེག་བྱ་དང་། རོ་དང་། གཟུགས་དང་། དྲིའི་ཡུལ་རྣམས་ཇི་ལྟར་འདོད་པ་བཞིན་དུ་རྗེས་སུ་མྱོང་བར་བྱེད་པ་རང་འདོད་པ་བཞིན་དུ་འགྲོ་ཞིང་རབ་ཏུ་རྣམ་པར་རྒྱུ་བར་བྱེད་པ་དཔེ་མེད་པའི་བདེ་བ་རྣམས་ལ་ཆགས་པར་གྱུར་པས། སྤྱོད་པ་རྣམ་པ་སྣ་ཚོགས་པའི་ཆུ་ཀླུང་དང་འབབ་ཆུ་དང་ནགས་དང་ཉེ་བའི་ནགས་རྣམས་ལེགས་པར་ལྟ་བར་བྱེད་ཅིང་བདེ་བར་རྒྱུ་བར་གྱུར་པས། ཁ་ཅིག་ནི་ཁྱོགས་ཀྱི་ཁང་བུའི་སྟེང་ནས་ཁ་ཅིག་ནི་ངང་པའི་རྒྱབ་ནས་ཁ་ཅིག་ནི་པད་མའི་ནང་དུ་ཞུགས་ནས། ཁ་ཅིག་ལ་ནི་སྙིང་པོ་ལ་ལྷ་མོ་རྣམས་དང་བཅས་པར་ཉེ་བར་གནས་ནས་ཁ་ཅིག་ནི་མེ་ཏོག་ཀུ་བ་ལ་ཡའི་འདབ་མའི་ནང་དུ་སོང་ནས་དགའ་བར་བྱེད་ཅིང་། གླུ་ལེན་པར་གྱུར་པས་མཆོག་ཏུ་སྙན་པའི་རྔ་སྐད་ཡན་ལག་ལྔ་པ་རྣམས་ཀྱིས་བདེ་བར་ཉེ་བར་གནས་པར་གྱུར་ནས། ནམ་མཁའི་དཀྱིལ་ནས་འགྲོ་བར་བྱེད་པ་ལ་སྤྲོ་བར་གྱུར་པས་བདེ་བའི་ཕྲེང་བ་རྒྱ་ཆེ་བའི་རི་ལ་འཁོད་པར་གྱུར་ནས་ལྷ་ཡུལ་གྱི་གནས་དཔེ་མེད་པར་གྱུར་པ་རྣམས་ལ་ལྟ་བར་བྱེད་དེ། མཆོག་ཏུ་དགའ་བར་གྱུར་པའི་མཐོ་རིས་ཀྱི་ཡུལ་ཕྱོགས་ཁ་ཅིག་ནི་རབ་ཏུ་འབར་བ་བཞིན་དུ་འབར་བར་གྱུར་པའི་གསེར་མདོག་

70-197a

བཟང་པོ་དང་པད་མ་རཱ་གའི་འོད་དང་ལྡན་པ་དང་། ཡུལ་ཕྱོགས་ཁ་ཅིག་ནི་ཨུད་པ་ལའི་འདབ་མ་སྔོན་པོའི་གྲིབ་མ་སྣུམ་པར་གྱུར་པས་མཆོག་ཏུ་ཡིད་འཕྲོག་པར་བྱེད་པའི་བཻ་ཌཱུརྱ་དང་ཨིན་དྲ་ནཱི་ལའི་འོད་དང་ལྡན་པའོ། །ཡུལ་ཕྱོགས་ཁ་ཅིག་ནི་དངུལ་དང་ཤེལ་དང་མུ་ཏིག་གི་འོད་རྣམས་ཀྱི་མཆོག་ཏུ་ཡིད་དུ་འོང་བར་གྱུར་པ་དེ་དག་རྣམས་ཀྱི་འོད་ཀྱིས་ཤིན་ཏུ་དགའ་བར་སྣང་ངོ་། །རིའི་རྩེ་མོ་རྣམས་དང་འབབ་ཆུ་རྣམས་ཀྱང་མཆོག་ཏུ་གཙང་བ་དྲི་མ་མེད་པར་གྱུར་པ་ཡོན་ཏན་བདུན་དང་ལྡན་པའི་ཆུ་གྲང་མོ་རྣམས་རབ་ཏུ་འབབ་པར་བྱེད་པ་རྣམས་མཐོང་ངོ་། །རྩེ་མོ་མུ་ཏིག་གི་ཚོགས་དང་ལྡན་པར་གྱུར་པ་དེ་བཞིན་དུ་ཡུལ་ཕྱོགས་དེ་ན་མངོན་པར་མཐོང་ངོ་། །གཞན་ཡང་ལྷ་དེ་དག་རྣམས་ནམ་མཁའི་དཀྱིལ་ན་ལེགས་པར་གནས་པར་གྱུར་ནས་ལྟ་བར་བྱེད་པ་རིན་པོ་ཆེ་བདུན་གྱིས་ཉེ་བར་མཛེས་པར་གྱུར་པའི་པད་མའི་རྫིང་བུ་རྣམས་ལ་བུང་བའི་ཚོགས་རྣམས་ཀྱིས་ཉེ་བར་བསྒྲགས་པར་གྱུར་པས་མཆོག་ཏུ་ཡིད་འཕྲོག་པར་གྱུར་པའི་སྒྲ་རབ་ཏུ་སྙན་པ་རྣམས་ཀྱི་གླུས་པད་མའི་ཚལ་དུ་ཉེ་བར་མཚོན་པར་བྱེད་དོ། །ཕལ་ཆེ་བར་གྱུར་པ་ཉིད་དུ་ཡང་ཉེ་བར་རྟོགས་པར་བྱེད་དོ། །ཤིན་ཏུ་རིང་བར་མ་ཡིན་པ་ནས་བུང་བའི་ཚོགས་དེ་དག་མངོན་པར་མཐོང་ནས། ཡུལ་ཕྱོགས་གཞན་དང་གཞན་རྣམས་ཉེ་བར་མཚོན་པར་བྱེད་དེ་ནགས་དང་ཉེ་བའི་ནགས་དང་རྫིང་བུ་དག་དགའ་བར་གྱུར་པ་རྣམས་སོ། །དེ་ལ་དགའ་བར་གྱུར་པའི་ནགས་དེ་དག་རྣམས་ལ་རི་དགས་དང་བྱ་རྣམས་རབ་ཏུ་མཐོང་བར་གྱུར་པ། འདི་ལྟ་སྟེ་རྣམ་པ་སྣ་ཚོགས་པའི་རི་དགས་ཀྱི་ཚོགས་ཁ་དོག་མི་འདྲ་བར་གྱུར་པ་རྣམས་ལ་འགའ་ཞིག་ནི་བལྟ་བར་སྡུག་པའི་དངུལ་གྱི་རང་བཞིན་གྱི་མདོག་ལ་རྭ་དང་མིག་དག་ནི་པད་མ་རཱ་གའོ། །ཁ་ཅིག་ནི་རྒྱབ་གསེར་གྱི་རང་བཞིན་དུ་གྱུར་པ་ལ་ལོགས་དག་དངུལ་ལོ། །རིན་པོ་ཆེ་ཀར་ཀེ་ཏ་ནའི་རྭ་ཤེལ་གྱི་རང་བཞིན་གྱི་མདོག་གི་རྨིག་པའོ། །ཁ་ཅིག་གི་གཞུང་ནི་ལེགས་པར་རྣམ་པར་ཕྱེ་བར་གྱུར་པ་ལ་འཕོངས་དང་རྐང་པ་རྣམས་རིན་པོ་ཆེ་བདུན་གྱི་རང་བཞིན་མདོག་དང་ལྡན་པའི་ཚོགས་རྣམས་འཇིགས་པ་དང་ངལ་དུབ་དང་བྲལ་བར་གྱུར་པའི་ཚོགས་རྣམས་ལ་དགའ་བར་བྱེད་དོ། །ཁ་ཅིག་ནི་མཆོག་ཏུ་མཛེས་པར་གྱུར་པ་མཆོག་གི་ལས་བྱས་པའི་ཟས་རྣམས་ཉེ་བར་ཟ་བར་བྱེད་དོ། །

70-197b

གཞན་ཡང་ནགས་དང་ཉེ་བའི་ནགས་དེ་དག་རྣམས་མཐོང་བར་གྱུར་ནས་ཕྱོགས་ཀྱི་ཆ་གཞན་དག་རྣམས་སུ་ངེས་པར་སོང་ནས་རབ་ཏུ་མཐོང་བར་གྱུར་པ་ལས་རྨ་བྱ་དང་ཤང་ཤང་ཏེའུ་དང་ནི་ཏཱ་ན་ཏཱ་དང་པྲ་བན་ཛུ་ཌ་དང་མིག་དྲུག་དང་ལྡན་པ་དང་། རབ་ཏུ་གཡོ་བའི་སྒྲོས་ཅན་གྱི་བྱའི་ཚོགས་ཀྱིས་ཁྱབ་པ་རྣམས་རིའི་རྩེ་མོ་དང་ནགས་དང་ཉེ་བའི་ནགས་དག་ལས་འབྱུང་བ་རྣམས་མཐོང་སྟེ། བདེ་བའི་ཕྲེང་བ་རྒྱ་ཆེན་པོའི་རི་ལ་ལྷ་རྣམས་འཁོད་པར་གྱུར་པ་ནི་རི་དེའི་ཡང་ངོས་གཅིག་ནི་ཨིན་དྲ་ནཱི་ལའི་རང་བཞིན་ཡིན་ནོ། །གཞན་ནི་པད་མ་རཱ་གའི་རང་བཞིན་ནོ། །གཞན་ནི་གསེར་བཙོ་མའི་རང་བཞིན་ནོ། །གཞན་ནི་དངུལ་གྱི་རང་བཞིན་ནོ། །དེ་ལ་གཅིག་ཨིན་དྲ་ནཱི་ལའི་རང་བཞིན་གང་ཡིན་པའི་ལོགས་དེ་ལ་གྲིབ་མ་མེད་པ་ཞེས་བྱ་བའི་ནགས་ཡོད་དོ། །ནགས་དེ་ན་བཻ་ཌཱུརྱའི་རང་བཞིན་གྱི་ལྗོན་ཤིང་རྣམས་ལ་མེ་ཏོག་གི་ཚན་ཀ་རྣམས་ཀྱིས་རྒུ་བར་གྱུར་ནས་རྣམ་པར་བཀོད་པས་ཉེ་བར་མཛེས་པར་གྱུར་པ་འབབ་ཆུ་དང་ཆུ་ཀླུང་དང་རྫིང་བུ་རྣམས་བརྒྱ་སྟོང་དང་ལྡན་པ། པད་མའི་ནགས་བརྒྱ་ཕྲག་རྣམས་ན་ནགས་ན་རྒྱུ་བའི་བྱ་རྣམས་ཀྱི་གསུང་བསལ་གྱི་སྒྲ་རྣམས་རྣམ་པ་སྣ་ཚོགས་པ་དང་ཉེ་འཁོར་ཀུན་ནས་མངོན་པར་དགའ་བ་རྣམས་ན་ལྷ་དག་གིས་གང་བར་གྱུར་པས་ཉེ་བར་མཛེས་པ་ཡིན་ནོ། །ལོགས་གཉིས་པ་ནི་པད་མ་རཱ་གའི་རང་བཞིན་ཏེ། ལོགས་དེ་ལ་ནི་རབ་ཏུ་དགོད་པར་གྱུར་པའི་ནགས་ཡོད་དོ། །ནགས་གང་དག་གི་དངུལ་གྱི་རང་བཞིན་གྱི་ལྗོན་ཤིང་རྣམས་ལ་གསེར་བཙོ་མའི་རང་བཞིན་གྱི་འཁྲི་ཤིང་གིས་ཡོངས་སུ་འཁྲིལ་བ་བུང་བ་བརྒྱའི་ཚོགས་ཀྱིས་ཡོངས་སུ་བསྐོར་བ་བྱའི་ཚོགས་ཀུན་ནས་སྒྲོགས་པར་བྱེད་པ། མེ་ཏོག་དྲི་ཞིམ་པ་རྣམས་རླུང་འཇམ་པོས་སྐྱོད་པར་བྱེད་པ་ཉེ་འཁོར་རྣམས་ན་ཡང་འབབ་ཆུ་བརྒྱ་སྟོང་དང་ལྡན་པར་གྱུར་པ་དེ་ནི་རབ་ཏུ་དགོད་པར་གྱུར་པའི་ནགས་ཡིན་ནོ། །གང་ཡང་དེའི་ངོས་གསུམ་པ་གསེར་བཙོ་མའི་རང་བཞིན་ཡིན་པ་ལ། ལོགས་དེ་ན་ཡང་བདེ་བ་རིན་པོ་ཆེའི་རང་བཞིན་ཞེས་བྱ་བའི་ནགས་ཡོད་དེ། ཤེལ་གྱི་རང་བཞིན་གྱི་ལྗོན་ཤིང་རྣམས་ཀྱིས་མཛེས་པར་གྱུར་པ་འཁྲི་ཤིང་གི་དྲ་བས་ཀུན་ནས་སྦྲེལ་བ་ཉེ་འཁོར་ཀུན་ནས་གསེར་འབར་བའི་འཁྲི་ཤིང་གིས་ཡོངས་སུ་གང་བ། བྱ་བརྒྱ་སྟོང་གིས་དེ་ན་རྩེ་བར་གྱུར་ཅིང་སྒྲ་

70-198a

སྒྲོགས་པར་གྱུར་པ་འབབ་ཆུ་དང་ཆུ་ཀླུང་དང་པད་མའི་ནགས་རྣམས་ཀྱིས་ཉེ་བར་མཛེས་པ། ཉེ་འཁོར་ན་ཡང་རབ་ཏུ་དགའ་བའི་ལྷ་དང་ལྷ་མོའི་ཚོགས་རྣམས་ཀྱིས་གང་བས་རབ་ཏུ་གླུ་ལེན་པར་གྱུར་པ་འདོད་པ་ཐམས་ཅད་ཕུན་སུམ་ཚོགས་པ་རྣམས་ཀྱིས་ཉེ་བར་མཛེས་པར་གྱུར་པའོ། །ལོགས་བཞི་པ་ནི་དངུལ་གྱི་རང་བཞིན་ཡིན་ཏེ། དེ་ལ་ནི་པད་མ་རཱ་གའི་མདོག་གི་ལྗོན་ཤིང་རྣམས་ལ་ཨིན་དྲ་ནཱི་ལའི་ཁ་དོག་གི་འཁྲི་ཤིང་གིས་ཉེ་བར་མཛེས་པར་གྱུར་པ། སྐད་དབྱངས་སྣ་ཚོགས་པ་གདང་ཞིང་སྙན་པའི་སྒྲ་ཡིས་ཀུན་ཏུ་སྒྲོགས་པའི་རིགས་རྣམས་ཀྱིས་ངེས་པར་སྒྲོགས་པར་གྱུར་པའི་ནགས་རྣམས་ན། ལྷ་དང་ལྷ་མོའི་ཚོགས་ཀྱིས་གང་བ་པད་མའི་ནགས་བརྒྱ་སྟོང་གིས་མཛེས་པར་བྱས་པ་རྣམ་པར་རྟོག་པ་དུ་མ་རྣམས་དང་བལྟ་ན་དགའ་བ་དུ་མ་དེ་དག་རྣམས་དང་ལྗོན་ཤིང་དེ་དག་དང་ཆུ་ཀླུང་དེ་དག་དང་འཁྲི་ཤིང་དེ་དག་དང་། མཚོ་དང་རི་དགས་དང་བྱའི་ཚོགས་དེ་དག་རྣམས་དང་དྲི་དང་དབྱིབས་སྣ་ཚོགས་པར་གྱུར་པའི་མེ་ཏོག་དེ་དག་རྣམས་ཀྱིས་བདེ་བའི་ཕྲེང་བ་རྒྱ་ཆེན་པོར་གྱུར་པའི་རིའི་ཉེ་འཁོར་རྣམས་ན་རབ་ཏུ་འབར་བར་གྱུར་པས་གསལ་བར་སྣང་ངོ་། །དེ་ལྟར་ལྷ་དེ་དག་རྣམས་ནམ་མཁའི་དཀྱིལ་ན་ཀུན་ཏུ་གནས་པར་གྱུར་ཅིང་བདེ་བའི་ཕྲེང་བ་རྒྱ་ཆེན་པོའི་རི་ལ་གནས་པར་གྱུར་ནས་ལྟ་བར་བྱེད་དོ། །ཉེ་འཁོར་རྣམས་ཐམས་ཅད་ལས་ཀྱང་ཀུན་ཏུ་རྟོགས་པ་ཤིན་ཏུ་ལྷག་པར་གྱུར་པའི་རྣམ་པར་བཀྲ་བ་རྣམས་ཀུན་ཏུ་གསལ་བར་བྱེད་དོ། །མིག་རྒྱུ་བ་སྒྱུར་བ་དང་ལྡན་པས་ལྷ་དེ་དག་རྣམས་དེ་ལྟར་ངེས་པར་རྟོག་པར་བྱེད་དོ། །ཉེ་འཁོར་ཀུན་ཏུ་ཡང་དེ་ཁོ་ན་བཞིན་དུ་མངོན་པར་འཁོར་བར་གྱུར་ཅིང་རིའི་མཆོག་དེ་ལ་གནས་པར་བྱེད་དེ་ལྷན་ཅིག་སྤྱོད་པའི་འཁོར་དང་བཅས་པ་རྣམས་རྔ་སྐད་ཡན་ལག་ལྔ་དང་ལྡན་པ་ཉེ་བར་བསྒྲགས་པར་གྱུར་པས། འདོད་པའི་ཡོན་ཏན་ལྔ་ལ་ལོངས་སྤྱོད་པ་དང་ལྡན་པ་ནི་ལེགས་པར་བྱས་པ་རྣམས་བསྟེན་ཅིང་བསྒོམས་ལ་ལན་མང་དུ་བྱས་པ། འདོད་པ་སྡུག་པ་ཡིད་དུ་འོང་བའི་ཚུལ་ཁྲིམས་འཕགས་པའི་སྐྱེ་བོ་རྣམས་ཀྱིས་བསྟེན་པའི་རྣམ་པར་སྨིན་པའི་འབྲས་བུ་རྣམས་ཉེ་བར་ལོངས་སྤྱོད་པར་གྱུར་པས་རི་བདེ་བའི་ཕྲེང་བ་དེ་ལ་འཁོད་པར་བྱེད་དོ། །དེ་དག་རྣམས་འཁོད་པར་གྱུར་པ་དང་དེ་ནི་བདེན་པ་ལ་འཇུག་པ་

70-198b

ཞེས་བྱ་བའི་བྱ་དེས་ཚིགས་སུ་བཅད་པ་བརྗོད་པ། ཇི་ལྟར། ལེགས་པར་བྱས་འབྲས་ཚོར་བར་བཅས། །མྱུར་བར་འགྲོ་ཞིང་རབ་ཏུ་འགྲོ། །ཡུལ་རྣམས་ཀྱིས་ནི་རབ་བཅོམ་པའི། །ཀུན་ཏུ་རྨོངས་པས་གོ་བའང་ཡིན། །དུས་གང་ཉིད་ནི་ལྟུང་གྱུར་པ། །དེ་ཉིད་འཆི་བའི་མཐའ་ཡིན་ནོ། །བདེ་ལ་རྨོངས་པའི་རྒྱགས་པ་ཡིས། །ལྷ་རྣམས་ཀྱིས་ནི་དེ་མི་གོ། །གསོན་པར་མྱུར་བར་འགྲོ་བ་ཡང་། །རྣམ་པར་རྨོངས་པས་མི་གོའོ། །ལེགས་བྱས་རྣམས་ནི་མཐོང་བའང་ཡིན། །སྲེད་པ་རྣམ་པར་འཇོམས་པའང་མིན། །སྲིད་ནས་སྲིད་པར་ལུས་ཅན་གྱི། །སྲེད་པ་ཕྱི་བཞིན་འབྲང་བ་ཡིན། །སེམས་ཅན་རྣམ་པར་རྨོངས་པ་ཡིས། །དགེ་དང་མི་དགེ་དེ་མི་རིག །དགེ་བའི་འབྲས་ཉིད་ཡིད་འོང་བ། །གང་གིས་སྔོན་དུ་ཉེར་ལོངས་སྤྱོད། །མི་དགེ་བ་ཡང་དེ་བཞིན་མཐོང་། །མི་དགེ་ལོག་པར་ལྟུང་བར་སྐྱེ། །དགེ་དང་མི་དགེ་རབ་ཏུ་བྲལ། །གང་གིས་འདུ་འཛིའི་སྐྱོན་རྣམས་སྤངས། །རྒ་ཤི་སྤངས་པར་གྱུར་པ་དེ། །དེ་ནི་ནགས་ཀྱི་མཆོག་ཏུ་སོང་། །དེ་ནི་རྣམ་གྲོལ་བདེ་བར་འགྲོ། །འདོད་ལས་བདེ་བ་སྲིད་མ་ཡིན། །ལྷ་གང་དེ་བཞིན་གཞན་ཡང་རུང་། །ལས་ཟད་པས་ནི་གྲོལ་བར་འགྱུར། །མི་རྟག་འགྱུར་བར་དེ་དག་ཀྱང་། །རྟག་པ་མཛེས་པར་འགྱུར་བ་ཡིན། །སྲེད་པ་མངོན་ཞེན་ལས་སྐྱེས་བདེ། །ལོག་པར་ལྟུང་མཐས་དམད་པ་ཡིན། །དེ་ལྟར་བདེན་པར་སྨྲ་བར་བྱེད་པའི་བྱ་དེ་དག་གིས་འཁོད་པར་གྱུར་པའི་ལྷ་དེ་དག་རྣམས་ལ་རྗོད་པར་བྱེད་དོ། །དེ་དག་གི་དྲུང་ནས་ཐོས་པར་གྱུར་ནས་ཀྱང་ལྷ་གང་དག་ཤིན་ཏུ་བག་མེད་པས་རྒྱུ་བ་མ་ཡིན་པ་དེ་དག་རྣམས་ཀྱིས་ནི་ཐོས་པར་འགྱུར་རོ། །གང་ཡང་བག་མེད་པར་རྒྱུ་བ་དེ་དག་རྣམས་ནི་བག་མེད་པའི་སྐྱོན་གྱིས་ཐོས་པར་མི་འགྱུར་བ་ཉིད་དོ། །ལྷ་དེ་དག་རྣམས་ཀྱི་ཡིད་ཡུལ་གྱིས་ཉེ་བར་འཕྲོགས་པར་གྱུར་པའི་ཕྱིར་ནི་ཕན་པར་གྱུར་པ་དང་དེ་ཁོ་ན་ཉིད་དུ་གྱུར་པའི་བྱ་རྣམས་ཀྱིས་བརྗོད་པ་དེ་དག་རྣམས་ཐམས་ཅད་ལ་བརྩི་བགྲང་དུ་མི་བྱེད་པར་སླར་ཡང་དེ་ཁོ་ན་བཞིན་དུ་ཆེས་རབ་ཏུ་དགའ་བར་གྱུར་པས། གང་ན་རིའི་མཆོག་དེའི་རྩེ་མོ་མཐོ་བ་ཡོད་པ་དེས་མཐོང་བ་ལ་ལེགས་པར་བརྟེན་

70-199a

ནས་ཁང་བུའི་ཕྲེང་བ་ལ་ཞོན་ཏེ་སྔ་མ་བཞིན་ནོ། །རི་དེའི་རྩེ་མོ་ལ་ཡང་ཀུན་ནས་མཐོང་ན་དགའ་བ་ཞེས་བྱ་བའི་རི་ཡོད་དེ། གང་གི་ཕྱིར་སྟོང་ཕྲག་དུ་མའི་རི་འདི་དག་ཐམས་ཅད་ཀྱི་ནང་ན་ཉེ་འཁོར་ཀུན་ལས་ཀྱང་ཆེས་མཐོ་བ་ནི་རིའི་རྩེ་མོ་དེ་ཡིན་པར་འདོད་དེ་ཀུན་ལས་ལེགས་པར་མཐོང་ངོ་། །ལྷན་ཅིག་སྤྱོད་པའི་འཁོར་དང་བཅས་པའི་ལྷ་རྣམས་ཀྱིས་སྣ་ཚོགས་པའི་གླུ་དང་རོལ་མོའི་སྒྲ་དང་གར་དང་བཅས་པ་དེ་ལ་འཁོད་པར་གྱུར་ཏོ། །ལྷ་དང་ལྷ་མོའི་ཚོགས་རྣམས་རི་དེའི་རྩེ་མོ་ལ་འཁོད་པས་ཀྱང་མཐོང་བར་གྱུར་པ་རྣམས་ལ་ལེགས་པར་བྱས་པའི་ལས་དུ་མ་རྣམས་ཀྱིས་སྤྲུལ་པར་གྱུར་པ་ཆེ་ཞིང་ཁ་དོག་དུ་མ་དང་ལྡན་པའི་མཚོ་གསལ་བར་སྣང་བ་ཞེས་བྱ་བའི་མཚོ་དེ་གསལ་བར་གྱུར་པས་མཆོག་ཏུ་དགའ་བར་གྱུར་པ། རབ་ཏུ་དང་བར་གྱུར་ཅིང་གཙང་བའི་ཆུ་ན་གསེར་གྱི་ཉ་རྣམས་ཀྱིས་གང་བར་གྱུར་པ་རླབས་ཀྱི་འགྲམ་ན་མཆོག་ཏུ་ཡིད་འཕྲོག་པའི་ངང་པ་དང་། ཀཱ་རཎ་ཌ་བ་དང་ངང་ངུར་གྱི་ཚོགས་ཀྱིས་ཀུན་ཏུ་གང་བ་བྱའི་སྐད་རྣམ་པ་སྣ་ཚོགས་པ་རྣམས་ཐོས་པར་བྲེལ་བའི་སྒྲ་སྙན་པས་གང་བ་པད་མ་དང་ཨུད་པ་ལ་དང་ཀུ་མུ་ད་དང་ནི་ན་ད་དང་པད་མ་དམར་པོའི་མེ་ཏོག་གི་དབྱིབས་ལེགས་པ་རྣམས་ལ་རྣམ་པ་སྣ་ཚོགས་པའི་བུང་བའི་ཚོགས་རྣམས་ཀྱིས་སྦེར་བར་བྱེད་པའི་སྒྲ་ཡིད་འཕྲོག་པར་གྱུར་པ་རྣམས་དང་མན་དཱ་ར་བའི་ཤིང་གིས་ཡོངས་སུ་ཁྱབ་པ་གསེར་དང་ནོར་བུའི་སྟེགས་བུ་རྣམས་ཀྱིས་ཡོངས་སུ་གང་བར་གྱུར་པ་སྟེ། རྣམ་པ་དེ་ལྟར་གྱུར་པའི་རབ་ཏུ་དང་བའི་ཆུ་མཆོག་ཏུ་དགའ་བར་གྱུར་པ་དེ་དག་ན་མཚོའི་དབུ་བ་ཞེས་བྱ་བའི་པད་མ་འདབ་མ་སྟོང་ཕྲག་བརྒྱ་དང་ལྡན་པ་འདབ་མ་དེ་དག་རྣམས་ཀྱང་ཁ་དོག་དུ་མ་སྟེ། ཁ་ཅིག་ནི་ཨིན་དྲ་ནཱི་ལ་དང་མཚུངས་པའི་ཁ་དོག་གོ། །ཁ་ཅིག་ནི་ཤེལ་དང་མཚུངས་པའི་ཁ་དོག་གོ། །ཁ་ཅིག་ནི་གསེར་གྱི་རང་བཞིན་ནོ། །ཁ་ཅིག་ནི་དངུལ་གྱི་རང་བཞིན་ནོ། །ཁ་ཅིག་ནི་མུ་སཱ་རའི་རང་བཞིན་ནོ། །ཁ་ཅིག་ནི་ཀར་ཀེ་ཏ་ནའི་རང་བཞིན་ནོ། །ཁ་ཅིག་ནི་རྡོ་རྗེའི་རང་བཞིན་ནོ། །འདབ་མ་དེ་དག་རྣམས་ནི་མཆོག་གི་དྲི་དང་ཡང་ལྡན་ནོ། །མདོག་དུ་མར་གྱུར་པའི་འདབ་མ་དེ་དག་རྣམས་ཀྱི་དབུས་ཀྱི་སྙིང་པོ་ནི་

70-199b

ཉི་མ་དམར་པོ་དང་མཚུངས་པའི་ཁ་དོག་དུ་རྣམ་པར་སྣང་ངོ་། །དེ་ཡང་རྣམ་པ་སྣ་ཚོགས་པ་ཉིད་ཀྱིས་རྣམ་པ་སྣ་ཚོགས་པའི་ཁ་དོག་གིས་སྙིང་པོའི་གོང་བུ་ལ་ཁྱབ་པའོ། །འདི་ལྟ་སྟེ་སྔོན་པོ་དང་སེར་པོ་དང་དམར་པོ་དང་དཀར་པོ་དང་སྐྱ་བོ་དང་ནག་པོ་དང་སྐྱ་རེངས་ཀྱི་མདོག་རྣམས་སོ། །ཟེའུ་འབྲུའི་དབུས་ཀྱི་སྙིང་པོ་ལ་ནི་ཡིད་དུ་འོང་བར་གྱུར་པའི་དྲི་རྣམས་ཀྱིས་ལེགས་པར་གང་བ་ཡིན་ནོ། །དེ་ནས་ལྷ་དེ་དག་རྣམས་ནམ་མཁའི་དཀྱིལ་དུ་མངོན་པར་འཕགས་ནས་མཚོ་གསལ་བར་དེར་འཇུག་གོ། །ཞུགས་ནས་ཀྱང་དེ་དག་རྣམས་ལས་ཁ་ཅིག་ནི་གསེར་གྱི་སྟེང་དུ་སྡོད་དོ། །ཁ་ཅིག་ནི་པད་མ་ལ་འདུག་པར་གྱུར་ནས་ལྷ་མོ་དང་བཅས་པས་ཡོངས་སུ་བསྐོར་ནས་རྩེ་བར་བྱེད་དོ། །ཁ་ཅིག་ནི་ཨུད་པལ་ལ་ལྷག་པར་གནས་ཏེ་ལྷ་མོའི་ཚོགས་རྣམས་དང་བཅས་པས་རྩེ་བར་བྱེད་དོ། །ཁ་ཅིག་ནི་ཨུད་པལ་ལ་གནས་པར་གྱུར་ནས་ཆུ་དེ་ཉིད་ཀྱི་ནང་དུ་རྩེ་བར་བྱེད་དོ། །ཁ་ཅིག་ནི་ངང་པའི་རྒྱབ་ཏུ་ཞོན་ནས་ཆུའི་རླབས་རྣམས་ལ་རྩེ་བར་བྱེད་དོ། །ཁ་ཅིག་ནི་ཐང་ལ་གནས་པའི་ཕུག་མཆོག་རྣམས་སུ་སོང་ནས་རྗེས་སུ་སྤྱོད་པ་དང་བཅས་པ་འདོད་པའི་ཡོན་ཏན་ལྔ་ཕུན་སུམ་ཚོགས་པ་རྣམས་ལ་གླུ་དང་རྒོད་པ་དང་འགྱིང་བར་གྱུར་པས་ཁང་བུ་རྣམས་སུ་དགའ་བར་བྱེད་དོ། །ཁ་ཅིག་ནི་ཡུལ་ཕྱོགས་གཞན་དུ་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ར་རོ་བའི་སྐྱོན་དང་བྲལ་བའི་བཏུང་བ་ཕལ་པོ་ཆེ་རྣམས་འཐུང་བར་བྱེད་དེ། རྒྱགས་པའི་ཡོན་ཏན་རྣམས་རབ་ཏུ་ཉེ་བར་གནས་པའི་མདོག་དང་རོ་དང་རེག་བྱ་ཕུན་སུམ་ཚོགས་པའོ། །ཁ་ཅིག་ནི་ནོར་བུའི་རང་བཞིན་གྱི་སྣོད་རྣམས་སུ་འཐུང་བར་བྱེད་པ་ལ་འདི་ལྟ་སྟེ། ཨིན་དྲ་ནཱི་ལ་དང་། དངུལ་དང་། གསེར་དང་། བཻ་ཌཱུརྱ་དང་། པད་མ་རཱ་ག་དང་། ཤེལ་གྱི་རང་བཞིན་རྣམས་སུའོ། །ཁ་ཅིག་ནི་ཡང་འཁོར་གཞན་རྣམས་ཀྱིས་ཡོངས་སུ་བསྐོར་ནས་པད་མའི་འདབ་མར་གསེར་གྱི་རང་བཞིན་གྱི་རྩི་འཐུང་ངོ་། །ཁ་ཅིག་ནི་ཨུད་པ་ལ་ཁ་ཟུམ་པར་གྱུར་པ་རྣམས་ཕན་ཚུན་དུ་ལེགས་པར་བརྟེན་ནས་འདབ་མ་མ་རྡོལ་བ་རྣམས་སུ་རྩི་འཐུང་སྟེ། གླུ་ལེན་པར་གྱུར་ཅིང་རོལ་མོའི་སྒྲ་རྣམས་

70-200a

ཀྱིས་ཀྱང་རབ་ཏུ་དགའ་བའི་ཡིད་ཅན་ནོ། །ཁ་ཅིག་ནི་ཡང་གཞན་དག་དང་བདུད་རྩིའི་རང་བཞིན་གྱི་ཟས་རྣམས་མིད་པར་བྱེད་དེ། དེ་རང་གི་སྐྱེ་བོའི་ཚོགས་དང་བཅས་པས་མདོག་དང་དྲི་དང་རོ་དང་རེག་བྱ་ཕུན་སུམ་ཚོགས་པ་ལའོ། །ཁ་ཅིག་ནི་གཞན་ན་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་རྗེས་སུ་འགྲོགས་པར་གྱུར་པའི་ལྷ་མོའི་ཚོགས་དང་བཅས་པས་དགའ་བར་བྱེད་པ་དང་། རྩེ་བར་ཡང་བྱེད་གླུ་ཡང་ལེན་པར་བྱེད་ཅིང་གར་ཡང་བྱེད་དེ་གསལ་བར་བྱེད་པའི་མཚོ་དེ་ཡོངས་སུ་བསྐོར་ནས་སོ། །ཁ་ཅིག་ནི་མཚོ་དེ་ཉིད་ལ་ལྷན་ཅིག་སྤྱོད་པ་རྣམས་དང་བཅས་ནས་ཆུའི་རྩེད་མོ་བྱེད་དོ། །ཆུ་དེ་ལ་ཡང་ཇི་ལྟར་འདོད་པ་རྣམས་འབྱུང་ངོ་། །གང་དག་ལྷ་རྣམས་འདོད་པར་གྱུར་ན། ཇི་ལྟ་བར་ཆུ་འདི་དེ་ལྟར་མདོག་དང་རོ་དང་དྲི་དང་རེག་བྱ་དང་ལྡན་པར་འགྱུར་རོ། །ཇི་ལྟར་འདོད་པ་བཞིན་དུ་བསིལ་བ་དང་དྲོ་བའི་རེག་བྱ་དེའི་སེམས་བསྐྱེད་པ་དང་དུས་གཅིག་ཉིད་དུ་ཆུ་དེ་རྣམ་པ་དེ་ལྟ་བུ་ཉིད་རབ་ཏུ་གསལ་བར་བྱེད་པར་འགྱུར་བ་ནི་ལས་ཀྱི་རང་བཞིན་གྱིས་ཡིན་ཏེ། ལེགས་པར་བྱས་པ་རྣམས་ཀྱང་རུང་སྟེ་ལས་རྣམས་ཀྱིས་མི་བྱེད་པ་ནི་མེད་པས་དེ་དག་རྣམས་ཀྱང་དེ་ལྟར་འགྱུར་རོ། །གཞན་ཡང་ཇི་ལྟར་ཆུ་འདི་མྱོས་བྱེད་ཉིད་དུ་གྱུར་པར་བདག་ཅག་རྣམས་ཀྱིས་མཐོང་ན་རུང་ངོ་། །དེ་དག་གི་སེམས་བསྐྱེད་པ་དང་ལྷན་ཅིག་ཉིད་དུ་མདོག་དང་རོ་དང་རེག་བྱ་དང་དྲི་དང་ལྡན་པར་འགྱུར་ཏེ་མྱོས་པར་བྱེད་པའི་སྐྱོན་དང་བྲལ་བ་དང་ཡིད་ཤིན་ཏུ་རབ་ཏུ་དགའ་བ་དང་བདེ་བ་ཡང་རྒྱ་ཆེན་པོ་བྱེད་པར་འགྱུར་རོ། །གཞན་ཡང་ལེགས་པར་བྱས་པའི་ལས་རྣམས་ཀྱིས་ལྷ་རྣམས་རབ་ཏུ་དགའ་བར་བྱེད་པར་འགྱུར་རོ། །རང་ལེགས་པར་བྱས་པའི་ལས་ཀྱིས་རྣམ་པར་སྤྲུལ་པ་ལ་དེ་ལྟར་ལྷ་དགའ་བ་དང་རྩེ་བར་ཡང་བྱེད་དོ། །ལེགས་པར་བྱས་པ་དེ་དག་རྣམས་ཐམས་ཅད་ཀྱང་ལེགས་པར་བྱས་པའི་ལས་ལ་ལོངས་སྤྱོད་པར་བྱེད་ཀྱི་མ་བྱས་པ་ནི་ཉེ་བར་ལོངས་སྤྱོད་པར་མི་བྱེད་དོ། །ལེགས་པར་བྱས་པའི་ལས་རྣམས་ལ་ནི་རྣམ་པར་ཆུད་ཟ་བ་ཡང་ཡོད་པ་མ་ཡིན་ནོ། །ཇི་ལྟར། ལས་ཀྱི་འཁྲུལ་འཁོར་ཕུང་པོ་ཁམས། །སྦྱིན་པ་མི་འགྲན་ཁམས་གསུམ་འདི། །མ་ལུས་ཐམས་

70-200b

ཅད་འཐུང་བར་བྱེད། །འོན་ཀྱང་འཇིག་རྟེན་གྱིས་མ་རིག །ལྷ་དེ་དེ་བཞིན་འདོད་ཡོན་ལྔའི། །ཀུན་ཏུ་བདེ་བར་འབྱུང་བར་འགྱུར། །བདེ་བར་གནས་པ་རྣམས་མཐོང་བར་གྱུར་ནས་བྱ་དེ་ཁོ་ན་ཉིད་བརྗོད་པས་སླར་ཉིད་ཚིགས་སུ་བཅད་པ་བརྗོད་པ། ཇི་ལྟར། མར་ནག་འཇུག་པ་རབ་འཇིག་པས། །ཇི་ལྟར་མར་མེ་རྟག་འཇིག་པ། །དེ་བཞིན་ལས་ཟད་དབང་གིས་ནི། །ལྷ་ཡི་གནས་ནས་ལོག་པར་ལྟུང་། །རྩིག་པ་ཞིག་པའི་དབང་གིས་ནི། །ཇི་ལྟར་རི་མོ་རྟག་གནས་འཇིག །དེ་བཞིན་ལས་ཞིག་བདེ་བ་ཡང་། །ངེས་པར་ལོག་པར་ལྟུང་བ་ཡིན། །ལྷ་གནས་ལྷ་ནི་ཐམས་ཅད་ཀྱང་། །བསོད་ནམས་ཟད་ནས་རྒུད་པའི་མཐའ། །སེམས་ཅན་དེ་དག་ལྟུང་བ་པོ། །དེ་དག་ཐམས་ཅད་མི་རྟག་གོ། །མི་རྟག་མི་བརྟན་ཐམས་ཅད་ཀྱང་། །གསོན་པ་ཡུད་ཀྱིས་འགྲོ་བ་ཡིན། །བདུད་ཀྱི་སྟོབས་ནི་ཆེན་པོ་འདི། །འཇིག་རྟེན་འདིས་ཀྱང་གོ་བ་མིན། །དེ་ལྟར་གཞན་ཡང་བྱ་དེ་ཁོ་ན་ཉིད་སྨྲ་བ་དེས་ལྷ་དེ་དག་རྣམས་ཉིད་ལ་ཕན་པར་འདོད་པས་ལེགས་པར་བྱས་པའི་ལས་ཀྱང་བསྐུལ་ལ། དེ་དག་དེ་ལྟར་རྟག་ཏུ་བརྗོད་ཀྱང་ལྷ་གང་དག་ཤིན་ཏུ་བག་མེད་པ་མ་ཡིན་པ་དེ་དག་རྣམས་ཉན་པར་བྱེད་ཅིང་ཉེ་བར་འཛིན་པར་ཡང་བྱེད་དོ། །ཡུད་ཙམ་ཞིག་ཀྱང་ཡིད་ཤིན་ཏུ་མཉམ་པར་བཞག་པར་ཡང་འགྱུར་རོ། །གང་ཡང་བག་མེད་པར་སྤྱོད་པ་དེ་དག་རྣམས་ཀྱིས་ནི་མི་ཐོས་པ་སྟེ་རྣམ་པར་གཡེང་བར་གྱུར་པའི་ཡིད་ཀྱིས་དེ་དུས་ཡུན་རིང་དུ་མཚོ་དེར་རྩེད་མོ་བྱེད་པར་འགྱུར་ལ། ཡུལ་གྱི་བདེ་བ་ལ་སྲེད་པ་ཆེས་ངོམས་པ་མེད་པར་གྱུར་ནས་རྣམ་པར་རྒྱུ་བར་གྱུར་པས། སླར་ཡང་གང་ན་རི་དེ་ལ་སྔར་བཞིན་དུ་དེ་ཁོ་ན་ལྟར་བཞོན་པ་ལ་མངོན་པར་ཞོན་ཏེ་ནམ་མཁའ་ལ་སླར་ཡང་འཕགས་སོ། །ཐམས་ཅད་དང་བཅས་པའི་ལྷན་ཅིག་སྤྱོད་པའི་འཁོར་རྣམས་དང་བཅས་པར་གྱུར་པས་བར་སྣང་གི་ནམ་མཁའ་ལ་འཕགས་ནས་ཀྱང་ལྷ་དེ་དག་རྣམས་ཀྱིས་རི་གཞན་མཐོང་བར་གྱུར་པ་ལ་རྣམ་པ་དུ་མའི་ནོར་བུའི་རང་བཞིན་དུ་མར་གྱུར་པའི་དབྱིངས་དུ་མར་ནམ་མཁའི་དབྱིངས་ནས་འཕྱར་བ་དེ་དག་ཐམས་ཅད་ཀྱི་སྟེང་ན་དེ་དག་ཐམས་ཅད་ལས་ལྷག་པར་གྱུར་པའི་བདེ་བའི་ཕྲེང་བ་རྒྱ་ཆེན་

70-201a

པོ་འདི་དག་ཀུན་ཏུ་བརྩེགས་པ་དང་ཉེ་འཁོར་མཐོང་ན་དགའ་བ་རྣམས་ལྟ་བར་བྱེད་དོ། །དེ་གསུམ་ནི་འཐབ་བྲལ་གྱི་རི་རྣམས་ཀྱི་ཚད་ལས་ཀྱང་ཆེས་ལྷག་པ་ཡིན་ནོ། །དེ་བཞིན་དུ་ལྷ་རྣམས་རི་དེ་དག་ཀུན་ཏུ་ལྟ་བར་བྱེད་དོ། །རི་གང་དག་གི་འོད་ཟེར་གྱིས་ཡན་ལག་ཉེ་བར་རྒྱས་པ་བཞིན་དུ་ནམ་མཁའ་ཐམས་ཅད་རྣམ་པར་སྣང་བར་བྱེད་པས་ཆེས་ལྷག་པར་ཡང་དགའ་བར་གྱུར་པ་རྣམས་མཐོང་བར་གྱུར་ཅིང་གཞན་རྣམས་སུ་དེ་ལྟར་ཀུན་ཏུ་བལྟས་པར་གྱུར་ནས་བདེ་བའི་ཕྲེང་བ་རྒྱ་ཆེན་པོའི་རིའི་རྒྱབ་ཏུ་ངང་པ་ལས་འཁོད་པར་གྱུར་ཏོ། །རྣམ་པར་འཁོད་པར་གྱུར་པ། དེའི་རྗེས་ལ་ལྷ་དེ་དག་རྣམས་ཀྱིས་མཐོང་བར་གྱུར་པ་རྣམས་ལ་རི་དེའི་སྟེང་ནི་རྣམ་པར་བཀྲ་བའི་ཆ་ཤས་རྣམ་པ་སྣ་ཚོགས་པའི་རིན་པོ་ཆེའི་འོད་རྣམས་ཀྱིས་ཀུན་ནས་བརྒྱན་པ་ལ་བཻ་ཌཱུརྱའི་རང་བཞིན་ལ་གསེར་གྱི་རང་བཞིན་གྱི་ལོ་མ་དང་ལྡན་པའི་ལྗོན་ཤིང་རྣམས་ཀྱིས་ཉེ་བར་མཛེས་པར་བྱས་པ། དེ་བཞིན་དུ་གསེར་གྱི་རང་བཞིན་དང་བཻ་ཌཱུརྱའི་རང་བཞིན་ལ་གསེར་གྱི་རང་བཞིན་གྱི་འདབ་མས་ཉེ་བར་མཛེས་པར་བྱས་པ་དེ་བཞིན་དུ་སྡོང་པོའི་ཤིང་གཞན་རྣམས་ཀྱིས་ཉེ་བར་མཛེས་པར་གྱུར་པ་སྟེ། རི་དེའི་རྒྱབ་ན་སྡོང་བུའི་ཤིང་ཞེས་བྱ་བ་གང་དག་གི་རྩ་བ་དང་སྡོང་པོ་དང་ཡལ་ག་དང་ལོ་མ་དང་རྩེ་མོ་རྣམས་སྡོང་བུ་དང་སྡོང་བུར་གྱུར་པ་རྣམས་ཀྱང་རིན་པོ་ཆེ་ཆེན་པོ་བདུན་གྱིས་རབ་ཏུ་རྣམ་པར་ཕྱེ་བས་ཀུན་ཏུ་བརྒྱན་པར་གྱུར་པ་དང་རྩ་བ་ལ་སོགས་པ་རྣམས་ཀྱང་དེ་དག་གི་རང་བཞིན་དུ་གྱུར་པའི་སྡོང་བུ་ཡིན་ནོ། །ཤིང་དེ་དག་རྣམས་ཀྱི་སྡོང་བུ་གཅིག་ནི་བཻ་ཌཱུརྱའིའོ། །གཞན་ནི་པད་མ་རཱ་གའིའོ། །གཞན་ནི་གསེར་གྱིའོ། །གཞན་ནི་ཤེལ་གྱིའོ། །གཞན་ནི་མུ་སཱ་རའིའོ། །གཞན་ནི་ཀར་ཀེ་ཏ་ནའི་སྟེ། དེ་ལྟར་ཤིང་དེ་དག་རྣམས་ནི་སྡོང་བུ་དང་སྡོང་བུར་ཆ་ཤས་རྣམ་པར་ཕྱེ་བས་མཛེས་པ་ཡིན་ནོ། །རྩ་བ་ནས་བཟུང་ནས་ཇི་སྲིད་དུ་ཡལ་ག་དང་ལོ་མ་དང་རྩེ་མོ་དེ་དག་རྣམས་དང་འདབ་མ་ཡང་དེ་ཁོ་ན་བཞིན་དུ་རིན་པོ་ཆེ་བདུན་གྱི་རང་བཞིན་གྱིས་རྣམ་པར་གསལ་བར་གྱུར་པའོ། །སྡོང་བུའི་ཤིང་དེ་དག་རྣམས་མངོན་པར་ལེགས་པར་མཐོང་བར་གྱུར་པ་དང་ལྷ་དེ་དག་རྣམས་རྩེ་བར་གྱུར་པས་འཇུག་པར་བྱེད་དོ། །

70-201b

ཤིང་དེ་དག་ལས་ཧ་ཅང་མི་རིང་བ་ན་ཁང་བུའི་ཕྲེང་བ་ཡོད་པ་ནི་མིའི་འཇིག་རྟེན་ན་ཉི་མས་ཀུན་དུ་གསལ་བར་བྱེད་པ་དང་ཁ་དོག་མཚུངས་པའོ། །དེ་ནས་ལྷ་དེ་དག་རྣམས་གང་ན་ཁང་བུའི་ཕྲེང་བ་ཡོད་པ་དེར་ཉེ་བར་འགྲོ་བར་བྱེད་དོ། །ཁང་བུ་དེ་དག་རྣམས་ཀྱི་གྲངས་ནི་འབུམ་ཕྲག་ཏུ་བརྗོད་པ་ཡིན་ནོ། །ཇི་ལྟར་འདོད་པས་འགྲོ་བར་གྱུར་པ་རྣམས་ཀྱི་ཇི་ལྟར་འདོད་པའི་ཚད་དང་ཇི་ལྟར་འདོད་པར་འགྱུར་བ་ཡིན་ནོ། །ཁང་བུ་དེ་དག་རྣམས་ཀྱིས་ལྷ་དེ་དག་རྣམས་ལ་འདོད་པ་རྣམས་ཇི་ལྟར་འདོད་པ་བཞིན་དུ་བྱེད་པར་འགྱུར་རོ། །པད་མའི་རྫིང་བུ་རྣམས་ཀྱང་དེ་ཁོ་ན་བཞིན་དུ་སྡོང་བུ་ཅན་གྱི་པད་མ་རྣམས་རིན་པོ་ཆེས་ཉེ་བར་བརྒྱན་པའི་པད་མའི་རྫིང་བུ་རྣམས་རྣམ་པར་གསལ་བར་བྱེད་དོ། །དེ་ཁོ་ན་བཞིན་དུ་སྡོང་བུ་ཅན་གྱི་རང་བཞིན་དང་དེ་ཁོ་ན་བཞིན་དུ་རིན་པོ་ཆེ་བདུན་གྱིས་ཉེ་བར་མཛེས་པར་གྱུར་པའི་ལུས་ཅན་གྱི་བུང་བ་རྣམས་དང་བྱ་རྣམས་ཀྱང་རྣམ་པ་གསུམ་དུ་ཡོན་ཏན་དང་ལྡན་པར་རྣམ་པར་རྒྱུ་བ་ནི་འདི་ལྟ་སྟེ། ཆུ་ལ་རྒྱུ་བ་ངང་པ་དང་ཀཱ་རཎྜ་བ་དང་ངང་ངུར་དང་ནི་ལུན་ཏན་དང་། མ་ཀུ་ལ་དང་ཧ་ཤུན་ད་ལ་སོགས་པ་རྣམས་ནི་ཆུ་ལ་རྒྱུ་བའོ། །ཐང་ལ་རྒྱུ་བ་ལ་བྱ་དེ་དག་རྣམས་ཀྱང་རི་དེའི་རྒྱབ་ན་རྩེ་བར་བྱེད་པ་རྣམས་ལ་འདི་ལྟ་སྟེ། བི་ཤཱ་ཁ་དང་། ཀུན་དགའ་བར་བརྗོད་པ་དང་། བྱ་ཐམས་ཅད་དང་ལྷན་ཅིག་ཏུ་ཀུན་སྒྲོགས་པ་དང་དུས་ཐམས་ཅད་དུ་དགའ་བར་འཇུག་པ་དང་། རྣམ་པ་དེ་ལྟ་བུ་རྣམས་ནི་ཐང་ལ་རྒྱུ་བར་གྱུར་པའི་བྱ་མཐོ་རིས་སུ་སྐྱེས་པ་རྣམས་ཀུན་ཏུ་སྒྲ་འབྱིན་པར་བྱེད་དོ། །རྨ་བྱ་ཡང་སྒྲ་སྙན་པར་འབྱིན་པར་བྱེད་དོ། །ནགས་ན་རྒྱུ་བའི་བྱ་མཐོ་རིས་ན་ཡོད་པ་རྣམས་ཀྱང་འདི་ལྟ་སྟེ། ཤང་ཤང་ཏེའུ་དང་རྨ་བྱ་དང་ཡཥྚི་དང་ཀུན་ཏུ་མིག་དང་མིག་མི་འཛུམས་པ་དང་ཉེ་འཁོར་ན་རྒྱུ་བ་དང་། དེ་ཁོ་ན་ཉིད་བརྗོད་པ་དང་དུས་ཀུན་ཏུ་བརྗོད་པ་ལ་སོགས་པ་རྣམས་མི་དང་མཐོ་རིས་འདྲེས་པར་གྱུར་པའི་བྱ་དག་སྒྲ་ཀུན་ཏུ་འདོན་པར་བྱེད་དོ། །མཉན་པར་འོས་པའི་རྣམ་པ་དུ་མ་དང་ནགས་ན་རྒྱུ་བའི་བྱ་རྣམས་རྩེ་བར་ཡང་བྱེད་དོ། །དེ་བཞིན་དུ་རིའི་བྱ་རྣམས་ཀྱིས་ཀྱང་མཆོག་ཏུ་མཛེས་པར་རྗོད་པར་བྱེད་དོ། །གཞན་ཡང་བདེ་བའི་ཕྲེང་བའི་རྒྱ་ཆེན་པོའི་རིའི་རྩེ་མོའི་ནམ་མཁའ་ལ་རྣམ་པར་

70-202a

རྒྱུ་བའི་བྱ་རྣམས་ཀྱིས། རིན་པོ་ཆེ་བདུན་གྱི་རང་བཞིན་རྣམ་པ་སྣ་ཚོགས་པའི་ཚིག་གིས་རྣམ་པར་རྟོག་པ་རབ་ཏུ་བཅོམ་པའི་ལྷ་རྣམས་ལ་རྗོད་པར་བྱེད་དེ། ཇི་ལྟར། རྣམ་པར་རྟོག་པས་ཉེར་བཅོམ་དང་། །འདི་ནི་ཡུལ་གྱིས་བསླུས་པའང་ཡིན། །སྲིད་པ་ཡིས་ནི་རྨོངས་འདི་དག །འཆི་བདག་རྒྱལ་པོ་ཤིན་ཏུ་གནས། །འདོད་ལོངས་སྤྱོད་ལ་ཀུན་ཏུ་ཆགས། །ལམ་དང་ལམ་མིན་རིག་མིན་པའི། །འདོད་པའི་མིང་ཅན་ཡུལ་རྣམས་ཀྱིས། །སྐྱེ་བོ་རྣམ་པར་རྨོངས་ཐམས་ཅད། །སྣ་ཚོགས་འགྲོ་ཀུན་དུ་འགྱུར་བ། །སྣ་ཚོགས་ལས་ཀྱི་རྗེས་སུ་འགྲོ། །སྣ་ཚོགས་སེམས་ཀྱི་དབང་གིས་ནི། །སེམས་ཅན་འགྲོ་བ་ལྔ་ན་འཁྱམ། །དེ་ལྟར་བྱ་དེས་མཆོག་ཏུ་བག་མེད་པའི་ལྷ་རྣམས་མཐོང་ནས་རྗེས་སུ་འདོམས་པར་བྱེད་དེ་སྔ་མ་བཞིན་ནོ། །དེ་ནས་ལྷ་དེ་དག་གིས་དེ་མ་བརྩིས་པར་སླར་ཡང་དེ་ཁོ་ན་བཞིན་དུ་ཡུལ་རྣམས་ལ་བག་མེད་པར་གྱུར་ཅིང་འདོད་པ་ལྔས་ཡིད་འཕྲོག་པས་དེ་ཁོ་ན་བཞིན་དུ་དགའ་བར་བྱེད་པ་དང་རྩེ་བར་ཡང་བྱེད་དོ། །དུས་དེ་སྲིད་དུ་སྟེ། ཇི་སྲིད་དུ་དགེ་བའི་ལས་རྣམས་བྱས་ཤིང་བསགས་པ་ཟད་པར་མ་གྱུར་གྱི་བར་དུའོ། །དེའི་གཏིང་ལ་ནམ་ཞིག་ན་ལྷའི་འཇིག་རྟེན་ནས་འཆི་འཕོ་བར་འགྱུར་རོ། །ཤི་འཕོས་ནས་ཀྱང་ཇི་ལྟར་ལས་རྣམས་ཀྱིས་ཉེ་བར་འགྲོ་བར་གྱུར་པའི་དམྱལ་བ་དང་ཡི་དགས་དང་དུད་འགྲོའི་འགྲོ་བར་སྐྱེ་བར་འགྱུར་རོ། །གལ་ཏེ་མི་རྣམས་དང་སྐལ་བ་འཐུན་པར་མིར་སྐྱེ་བར་གྱུར་ན་ཡང་ལན་གྲངས་གཞན་ལ་མྱོང་བར་འགྱུར་བའི་ལས་རྣམས་ཀྱིས་དེ་མཆོག་ཏུ་སྐྱིད་པ་དང་མཆོག་ཏུ་བློ་རྒྱ་ཆེ་བར་འགྱུར་རོ། །མཆོག་ཏུ་རབ་ཏུ་དགའ་བའི་ཡིད་ཀྱིས་རྩེ་བ་ལ་ཆེད་ཆེར་བྱེད་པའམ་རབ་ཏུ་དགའ་བར་གྱུར་པའི་ལྷ་རྣམས་སུའམ། དེ་ཡང་ན་གསེར་གླིང་དུའམ་དེ་ཡང་ན་སིང་ཧ་ལའི་གླིང་དུ་ལོངས་སྤྱོད་དང་ལྡན་པར་འགྱུར་རོ། །ཁྱིམ་བདག་ཏུ་ཡང་ལས་དེའི་རྒྱུ་འཐུན་པར་འགྱུར་རོ། །རྣམ་པར་འདྲེས་པའི་ཁོར་ཡུག་ན་རྒྱུ་བའི་ལྷ་རྣམས་ཀྱི་ས་སྟེ་ལྔ་པ་རྗོགས་སོ།། །།གཞན་ཡང་དགེ་སློང་ལས་དང་འབྲས་བུའི་རྣམ་པར་སྨིན་པ་ཤེས་པ་དེ་འཐབ་བྲལ་བ་རྣམས་ཀྱི་ས་ལ་ཀུན་ཏུ་ལྟ་བར་བྱེད་དོ། །དེས་ཐོས་པ་ལས་

70-202b

བྱུང་བའི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱི་ས་ཡང་དག་པར་ལྡན་པ་ཞེས་བྱ་བ་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་། དེས་མཐོང་བ་གང་ཚུལ་ཁྲིམས་དག་ཅིང་ཤིན་ཏུ་རྣམ་པར་དག་པ་དགེ་བའི་བསམ་པ་དང་ལྡན་པའི་སེམས་ཅན་དུ་གྱུར་ནས་སྲོག་གཅོད་པ་དང་མ་བྱིན་པར་ལེན་པ་ཡོངས་སུ་སྤངས་པར་གྱུར་པ་རྣམས་ནི་སྔ་མ་བཞིན་ནོ། །འདོད་པ་ལ་ལོག་པར་གཡེམ་པ་ཡང་ཡོངས་སུ་སྤངས་པར་གྱུར་པ་ཡང་། ཇི་ལྟར་སྔོན་གྱི་བུད་མེད་ཀྱི་སྐྱེ་བོ་རྣམས་ལྟ་བ་རྗེས་སུ་དྲན་པར་མི་བྱེད་དོ། །དེ་ནི་དགེ་བ་དང་ལྡན་པའི་སྐྱེས་བུ་ཚུལ་ཁྲིམས་དང་ལྡན་པ་ཡོངས་སུ་དག་པའི་བློ་ཡོངས་སུ་བསྒོམས་པའི་སེམས་དང་ལྡན་པ་རྣམས་ལུས་ཞིག་པ་ན་མཐོ་རིས་བདེ་འགྲོའི་འཇིག་རྟེན་པ་འཐབ་བྲལ་གྱི་ལྷ་རྣམས་ཀྱི་ནང་ནས་འགྲོ་བ་དང་ཡང་དག་པར་ལྡན་པ་ཞེས་བྱ་བའི་སར་སྐྱེ་བར་འགྱུར་རོ། །དེ་ལ་འདི་སྐྱེས་པར་གྱུར་པ་ན་ཡང་རང་ཉིད་ཀྱིས་ལེགས་པར་བྱས་པའི་ལས་དང་འདྲ་བའི་འབྲས་བུར་འགྱུར་ཏེ། འདི་ལྟ་སྟེ་ནགས་དང་ཉེ་བའི་ནགས་དང་རྫིང་བུ་དང་པད་མའི་ནགས་རྣམས་ལ་བྱ་སྣ་ཚོགས་པ་རྣམས་རྩེ་བར་གྱུར་པའི་སྒྲ་གདངས་སྙན་པ་ཀུན་ནས་སྒྲོགས་པ་རྣམས་ནི། གཟུགས་དང་རྒྱན་དང་ཆ་བྱད་མཆོག་དང་ལྡན་པ་རྣམས་ཀྱིས་ཡོངས་སུ་བསྐོར་བའི་ལྷ་རྫས་ཀྱི་བདེ་བ་དང་ལྡན་པས་རྔ་སྐད་ཡན་ལག་ལྔ་དང་ལྡན་པར་གྱུར་ནས། རྩེད་མོ་རྩེ་བར་འགྱུར་ཞིང་དགའ་བར་འགྱུར་བ་དཔེ་མེད་པའི་སྒྲ་དང་རེག་བྱ་དང་རོ་དང་གཟུགས་དང་དྲིས་རྒྱགས་པ་ལ། འདི་ལྟ་སྟེ། ལྔ་འབྱུང་བར་འགྱུར་བའི་སྦུབས་མཚོའི་བུ་གར་མངོན་པར་ཞུགས་པ་ལས་བར་ཆད་མེད་པར་ཆུ་ལྔར་འཛག་ཅིང་ལྟུང་ངོ་། །དེ་བཞིན་དུ་དབང་པོ་ལྔ་ལས་སྲེད་པ་དང་ལྡན་པ་རྣམས་ཀྱི་སྲེད་པ་ལྔ་པོ་རྣམས་ཉི་མ་རེ་རེ་ཞིང་ལོག་པར་ལྟུང་བར་འགྱུར་རོ། །འོན་ཀྱང་དབང་པོ་ལྔ་པོ་འདི་དག་རྣམས་ལ་ཚིམ་པ་སྐྱེ་བ་ཡང་མ་ཡིན་ནོ། །ཡང་འདི་ལྟ་སྟེ་མེ་ལྔ་འབར་བ་ལ་རླུང་གིས་བསྐྱོད་པར་གྱུར་པས་རི་རབ་ཏུ་འབར་བར་བྱེད་པས་མཆོག་ཏུ་སྲེག་པར་བྱེད་པའི་ཤུགས་དང་ལྡན་པ་ལ་ཤིང་སྐམ་པོ་ཅི་ལྟ་ཅི་ལྟར་རབ་ཏུ་བཅུག་པ་དེ་ལྟ་དེ་ལྟར་མེ་ཆེས་ཕལ་ཆེ་བར་འགྱུར་

70-203a

ཏེ་བུད་ཤིང་རྣམས་སྲེག་པར་འགྱུར་བའི་ཕྱིར་རོ། །དེ་བཞིན་དུ་དབང་པོ་འདི་དག་རྣམས་ཀྱང་རྟག་ཏུ་སྲེད་པ་དང་ལྡན་པ་རྣམས་ནི་མེ་དང་མཚུངས་པ་ཡིན་ལ་རྣམ་པར་རྟོག་པའི་རླུང་གིས་བསྐྱོད་པར་གྱུར་ཅིང་། ཚུལ་བཞིན་མ་ཡིན་པ་ཡིད་ལ་བྱེད་པའི་རིའི་རྩེ་མོ་རྣམས་སུ་ཡུལ་གྱི་བུད་ཤིང་རྣམས་རབ་ཏུ་འབར་བར་གྱུར་པས། དབང་པོ་ལྔའི་འདོད་པའི་མེ་རྣམས་རབ་ཏུ་འབར་བར་འགྱུར་རོ། །དེ་བཞིན་དུ་དབང་པོ་འདི་དག་རྣམས་ཀྱི་ཡུལ་གྱི་ཤིང་རྣམས་དང་ཕྲད་པར་གྱུར་ན། དེ་ལྟ་དེ་ལྟར་མེ་བཞིན་དུ་རབ་ཏུ་འབར་བར་འགྱུར་རོ། །ཇི་ལྟ་ཇི་ལྟར་ཡང་མེ་དང་མར་མེར་ཕྱེ་མ་ལེབ་རབ་ཏུ་ལྷུང་བར་འགྱུར་ན་དེ་ལྟ་དེ་ལྟར་སྲེག་པར་བྱེད་དོ། །དེ་ཁོ་ན་བཞིན་དུ་སྲེད་པ་དང་ལྡན་པ་རྣམས་ཡུལ་གྱི་མེས་རབ་ཏུ་ལྟུང་བར་གྱུར་པས་ཀྱང་འཆི་བར་འགྱུར་བ་ཡིན་ནོ། །དེའི་ཕྱིར་ན་ཕྱེ་མ་ལེབ་ལྟ་བུར་གྱུར་པ་ནི་སྲེད་པ་དང་ལྡན་པ་རྣམས་ཐམས་ཅད་ཡིན་ནོ། །དེའི་བདག་ཉིད་དུ་གྱུར་པ་དེ་གོ་བར་གྱུར་པ་ཡང་མ་ཡིན་ནོ། །ཕྱེ་མ་ལེབ་ལྟ་བུར་གྱུར་པའི་ལྷ་དེ་དག་རྣམས་རབ་ཏུ་སྲེག་པར་གྱུར་པས་ཡུལ་ལྔའི་མེར་རབ་ཏུ་ལྷུང་བར་གྱུར་ནས་ནགས་དང་ཉེ་བའི་ནགས་རྣམས་སུ་ཡང་འགྲོ་བར་བྱེད་དེ། ལྷའི་བུ་མོའི་ཚོགས་དང་བཅས་པས་བསྐོར་བར་གྱུར་ནས་པད་མའི་ཚལ་ནས་པད་མའི་ཚལ་རྣམས་དང་། དེ་བཞིན་དུ་བདུད་རྩིའི་ཡུལ་ཕྱོགས་ནས་གཞན་བདུད་རྩིའི་ཡུལ་ཕྱོགས་རྣམས་སུ་དང་། དེ་བཞིན་དུ་བཏུང་བའི་བུམ་པ་ནས་ཡུལ་ཕྱོགས་གཞན་བཏུང་བའི་བུམ་པ་རྣམས་སུ་དང་། མར་གྱིས་ཀུན་ཏུ་བཏབ་པར་གྱུར་པའི་མེ་བཞིན་དུ་ཡུལ་གྱི་མེ་རྣམས་ཀྱིས། དེ་བཞིན་དུ་དེ་ཁོ་ན་ལྟར་རབ་ཏུ་འབར་བར་འགྱུར་རོ། །ལྷ་དེ་སྐྱེས་པ་ནས་ཡུལ་ཕྱོགས་དེ་རིན་པོ་ཆེ་བདུན་གྱིས་རྣམ་པར་བརྒྱན་པར་གྱུར་པ་གང་ཡིན་པ་རྣམས་རྣམ་པ་དུ་མར་ཤིན་ཏུ་ཡིད་འཕྲོག་པར་བྱེད་པའི་ལྷ་དང་ལྷ་མོའི་ཚོགས་བརྒྱ་སྟོང་དུ་མས་གང་བ་མཐོང་ངོ་། །རབ་ཏུ་དགའ་བར་གྱུར་པའི་རྒྱན་དང་ཆ་བྱད་དུ་མའི་གཟུགས་འཛིན་པ་གང་ཡིན་པ་རྣམས་ཀྱིས་ཡོངས་སུ་གང་བར་མ་གྱུར་པ་ནི། ཡུལ་ཕྱོགས་འདི་ན་ཡོད་པ་ནི་མ་ཡིན་ནོ། །ཡུལ་ཕྱོགས་དེ་ཡང་གང་རྒྱུན་མི་འཆད་

70-203b

པར་ལྷའི་ཚོགས་དང་ལྡན་པར་མི་འགྱུར་བ་ཡང་ནི་མ་ཡིན་ཏེ། དེ་ལྟར་ཕན་ཚུན་ལྷན་ཅིག་ཏུ་དགའ་བར་བྱེད་པ་དང་རྩེ་བར་ཡང་བྱེད་དོ། །རབ་ཏུ་འདྲེས་པར་གྱུར་པ་སྣ་ཚོགས་པའི་རྒྱན་དང་ཆ་བྱད་དང་ལྡན་པར་རྒྱན་དང་མངོན་པར་དགའ་བ་ཡང་ཡིན་ནོ། །ལྷ་རྣམས་ལྷའི་གནས་རྣམས་ནས་རྔ་སྐད་ཡན་ལག་ལྔ་དང་ལྡན་པས་ཉེ་བར་བསྒྲགས་པར་གྱུར་པའི་ལྷ་གང་ཡིན་པ་འདི་དག་རྣམས་ལས། ཤིན་ཏུ་ཉུང་བའི་ལས་གང་ཡིན་པ་ལ་ནི་རྒྱན་དང་ཆ་བྱད་ཐམས་ཅད་འཛིན་པར་གྱུར་པས་ལྷའི་རྗེས་སུ་འབྲང་བར་བྱེད་པའི་འཁོར་སྟོང་ཕྲག་བཅུར་འགྱུར་རོ། །དེ་ལྟ་བུའི་རིམ་པས་ཁ་ཅིག་ལ་ནི་སྟོང་ཕྲག་སུམ་ཅུ་གཉིས་སོ། །དེ་བཞིན་དུ་ཇི་སྲིད་དུ་སྟོང་ཕྲག་བཞི་བཅུ་དང་། དེ་བཞིན་དུ་ཇི་སྲིད་དུ་སྟོང་ཕྲག་ལྔ་བཅུ་དང་། དེ་བཞིན་དུ་རྗེས་སུ་འཇུག་པའི་རིམ་པས་ལྷ་རྣམས་ཀྱི་འཁོར་ཇི་སྲིད་དུ་སྟོང་ཕྲག་བརྒྱར་འགྱུར་རོ། །གལ་ཏེ་དེའི་འཁོར་དེ་དག་རྣམས་ཀྱང་ཡོངས་སུ་སྐྱོ་བར་ཡང་མི་འགྱུར་ཏེ། ལྷ་དེ་དེ་དག་རྣམས་དང་ལྷན་ཅིག་ཀུན་ཏུ་སྦྱོར་བར་བྱེད་པ་ན་ལྷ་མོ་རྣམས་ཐམས་ཅད་ཀྱང་འདི་ལྟར་སེམས་པར་འགྱུར་ཏེ། ལྷ་དང་ང་གཅིག་པུ་ཁོ་ནར་ཀུན་དགའ་བར་བྱའོ་གཞན་རྣམས་དང་ནི་ལྷན་ཅིག་ཏུ་མ་ཡིན་ནོ། །དེ་ལྟར་ངོམས་པ་མེད་པའི་ལྷ་རྣམས་འདོད་པའི་སྲེད་པ་དང་ལྡན་བཞིན་དུས་བྱེད་དོ། །དེ་དག་ལ་ངོམས་པ་སྐྱེ་བ་ཡང་མ་ཡིན་ནོ། །འདི་དག་ནི་གཅུགས་པར་གྱུར་བཞིན་དུ་འབར་བར་གྱུར་པ་ཡིན་ནོ། །དེ་ནས་དེ་ལྟར་བག་མེད་པར་གྱུར་པ་རྣམས་རྣམ་པར་འཕྱོ་བར་བྱེད་པས་ནགས་དང་ཉེ་བའི་ནགས་དང་རྫིང་བུ་དང་ཤིང་དང་ཚང་ཚིང་དང་ཆུ་ཀླུང་དང་རྫིང་བུ་རྣམས་སུ་ལྷན་ཅིག་དགའ་བར་བྱེད་དེ། ལྷ་མོ་མེད་པར་ལྷའི་ཚོགས་ཀྱིས་ནི་མ་ཡིན་ནོ། །དེ་ལྟར་རྒྱུ་བར་གྱུར་པ་ལས་དེ་དག་རྣམས་གལ་ཏེ་ཤེད་ན་ངང་པའི་ནགས་ཞེས་བྱ་བའི་ནགས་རྗེས་སུ་སླེབ་པར་འགྱུར་རོ། །དེ་ན་ཡང་དེ་སྲིད་ཁོ་ནར་ལྷ་མོ་དང་བཅས་ནས་ཏེ། ནགས་དེ་ནི་དགའ་བ་ཆེན་པོ་དང་ལྡན་པས་ལྷ་རྣམས་ཀྱང་ངོ་མཚར་བར་གྱུར་པའི་དགའ་བ་ཡིན་ནོ། །དེའི་དགའ་བ་རྣམས་ནི་འདི་ལྟ་བུར་གྱུར་པ་ཡིན་ཏེ། འདི་ལྟར་ནགས་དེའི་ཉེ་འཁོར་རྣམས་ན་ངང་པ་དེ་དག་གིས་རྣམ་པར་གསལ་བར་བྱེད་དོ། །

70-204a

ཀུན་ཏུ་གནས་པར་གྱུར་པ་རྣམས་ཀྱང་ཁ་ཅིག་ནི་དངུལ་གྱི་རང་བཞིན་གྱི་སྒྲོ་དང་གསེར་འབབ་པའི་རང་བཞིན་གྱི་སྒྲོ་དང་པད་མ་རཱ་གའི་མདོག་གི་རྐང་པ་དང་པད་མ་རཱ་ག་དང་མདོག་མཚུངས་པའི་ཁ་དོག་དང་གསུས་པ་ཤིན་ཏུ་བཀྲ་བར་འབར་བ་གང་ཡིན་པ་རྣམས་སོ། །ཁ་ཅིག་གསེར་འབར་བའི་རང་བཞིན་གྱི་རྒྱབ་དངུལ་གྱི་མདོག་དང་ལྡན་པའི་ལོགས་ཀར་ཀེ་ཏ་ནའི་རྐང་པ་སྟེ་ཕུག་རྣམས་ཀྱང་དེ་བཞིན་ནོ། །ཁ་ཅིག་ནི་ཤེལ་གྱི་རང་བཞིན་གྱི་རྒྱབ་མུ་སཱ་རའི་རང་བཞིན་གྱི་ལོགས་གསེར་བཙོ་མའི་མིག་དེ་དང་འདྲ་བའི་མཆུ་ཨིན་དྲ་ནཱི་ལའི་རང་བཞིན་གྱི་རྐང་པའོ། །ཁ་ཅིག་ནི་རྣམ་པར་འདྲེས་པའི་ཆ་ཤས་ཀྱི་སྒྲོ་རྣམ་པར་བཀྲ་བར་འགྱུར་བའི་རིན་པོ་ཆེ་བདུན་གྱི་རང་བཞིན་རྣམ་པར་བཀྲ་བའོ། །ཁ་དོག་གཅིག་པ་རྣམས་ནི་འདི་ལྟ་སྟེ་དངུལ་གྱི་མདོག་དང་ཤེལ་གྱི་མདོག་དང་གསེར་འབར་བའི་ཁ་དོག་དང་མུ་སཱ་རའི་ཁ་དོག་དང་ཀར་ཀེ་ཏ་ནའི་ཁ་དོག་རྣམས་ཏེ། ཇི་ལྟ་བུའི་ལས་སེམས་དང་སེམས་ཀྱིས་རྣམ་པར་བཀྲ་བར་གྱུར་པ་རྣམས་དགའ་བར་བྱེད་པ་དང་། རྣམ་པར་དཔྱོད་པར་ཡང་བྱེད་དོ། །དེ་དག་རྣམས་ཀྱང་ཇི་ལྟར་རྗེས་སུ་འཐུན་པར་མཆོག་ཏུ་རྣམ་པར་བཀྲ་བར་བྱས་པའི་སྒྲོའི་ཆ་ཤས་རྣམ་པར་བཀྲ་བར་གྱུར་པའི་ངང་མོ་རྣམས་དང་ལྷན་ཅིག་ཏུ་རྩེ་བར་བྱེད་དོ། །མཚོ་དག་དང་རྫིང་བུ་རྣམས་དང་ཇི་ལྟར་པད་མའི་ནགས་རྣམས་ལ་ཡང་ངོ་ལེགས་པར་འབབ་པའི་རི་ཆུ་ཀླུང་གི་རླབས་རྣམས་ལ་དང་དེ་བཞིན་དུ་པད་མའི་ཚལ་རྣམས་ལ་དང་དེ་བཞིན་དུ་ཡང་འཇམ་པ་མནན་ན་ནེམས་པའི་ས་གཞི་ཆ་ཀུན་ལ་དང་མེ་ཏོག་དང་ལྡན་པ་རྣམས་ལ་ཡང་དགའ་བར་བྱེད་དོ། །ཡོངས་སུ་སྤྱོད་པར་བྱེད་དོ། །ངང་པ་རྣམས་ཀྱང་ལྷ་བཞིན་དུ་ལྷན་ཅིག་སྤྱོད་པ་རྣམ་པ་དུ་མ་དང་ལྡན་པ་ཡིན་ནོ། །དེ་ནས་སྣ་ཚོགས་པའི་ལྷ་མོའི་ཚོགས་རྣམས་ཀྱིས་ཡོངས་སུ་སྐོར་བའི་ལྷ་དེ་དག་དང་ངང་པ་དེ་དག་ནི་ནགས་དེར་ཞུགས་པར་གྱུར་པ་ཉིད་ན་ངང་པ་དེ་དག་རྣམས་མངོན་པར་མཐོང་བར་གྱུར་ནས་སླར་ཉིད་ཀྱང་ངོ་མཚར་བར་གྱུར་ཅིང་ཡིད་ཆེས་རབ་ཏུ་དགའ་བར་གྱུར་ཏེ་མིག་གི་རྒྱུ་བ་གཡོ་བ་དང་ལྡན་པས་ནགས་དེའི་ཡུལ་ཕྱོགས་ཀྱི་ཉེ་འཁོར་ཀུན་ལ་རྣམ་པར་ལྟ་བར་བྱེད་དེ། དེ་དག་རྣམས་ཀྱིས་ཀྱང་ལྷ་མོ་དེ་དག་

70-204b

རྣམས་ཀྱི་ཡིད་ཀྱི་རྗེས་སུ་འཐུན་པར་གྱུར་ནས་ཡིད་ཆེས་རབ་ཏུ་དགའ་བར་གྱུར་པས་འདི་ལྟར་རྟོག་པར་བྱེད་དེ་ཇི་ལྟར་ལྷ་རྣམས་འདི་ན་ངང་པའི་ནགས་ཞེས་བྱ་བའི་ངང་པ་རྣམས་ཀྱི་ནགས་མཆོག་ཏུ་དགའ་བར་གྱུར་པ་ཇི་ལྟ་བ་ཁོ་ན་བཞིན་དུ་རྣམ་པར་མཛེས་པར་གྱུར་པ་རྣམས་ལ། ཇི་ལྟར་འདི་ན་ལྷའི་ངང་པའི་ནགས་ཞེས་བྱ་བ་ནགས་ཆེན་པོ་མཆོག་ཏུ་དགའ་བར་གྱུར་པ་ཇི་ལྟ་བ་བཞིན་དུ་དེ་དག་གིས་རབ་ཏུ་མཛེས་ཏེ། རྣམ་པ་སྣ་ཚོགས་པའི་ལྗོན་ཤིང་གི་ཚོགས་རྣམས་ཀྱིས་དེ་དག་ཡོངས་སུ་ཁྱབ་པར་གྱུར་པ་རིན་པོ་ཆེ་ཁམས་དུ་མ་རྣམས་ཀྱི་འབྱུང་ཁུངས་དང་ལྡན་པ་དེ་དག་ནི་ཤིན་ཏུ་བར་ཡང་ཡོན་ཏན་རྣམས་ཕུན་སུམ་ཚོགས་པ། རྣམ་པ་སྣ་ཚོགས་པའི་པད་མའི་རྫིང་བུ་དང་ལྡན་པའི་རིའི་རྩེ་མོ་ཉེ་བར་དུད་པར་གྱུར་པ་རྣམ་པ་བརྒྱ་སྟོང་དུ་མར་མིང་བཏགས་པར་གྱུར་ཀྱང་གང་དག་རྣམས་ཀྱི་མིང་ཡང་ཤེས་པར་མི་འགྱུར་བའི་མེ་ཏོག་རྣམས་དང་ཉེ་བར་ལྡན་པ་པད་མའི་འབྱུང་གནས་བརྒྱ་སྟོང་དུ་མ་རྣམས་དང་ལྡན་པ་ཡིན་ཏེ། ནགས་དེ་ན་ནི་ངང་པའི་རྒྱལ་པོ་དུས་བཟངས་ཞེས་བྱ་བ་གནས་སོ། །དེ་ནི་ཇི་ལྟར་བདག་ཅག་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷ་ཡིན། དེ་བཞིན་དུ་ངང་པ་རྣམས་ཐམས་ཅད་ཀྱི་ཡང་དུས་བཟངས་འདི་ཡིན་ཏེ། ཤིན་ཏུ་ཡངས་པ་ཞེས་བྱ་བའི་པད་མའི་རྫིང་བུ་དེ་ན་འདི་རྩེ་བར་བྱེད་པ་དང་དགའ་བར་བྱེད་པ་དང་ཀུན་ཏུ་སྤྱོད་པར་ཡང་བྱེད་དོ། །དྲུང་དུ་ཡང་འཐབ་བྲལ་གྱི་མངའ་བདག་མུ་སུ་ལུན་དྷ་འོང་ངོ་། །དེ་དང་ལྷན་ཅིག་ཏུ་བྱ་ཆེན་པོ་དགའ་བར་བྱེད་ཀུན་ཏུ་སྤྱོད་པར་ཡང་བྱེད་པ་ནི་ཇི་ལྟར་ལྷའི་ཚོགས་གཞན་དག་རྣམས་ཀྱིས་དེ་ཡོངས་སུ་ཤེས་པར་འགྱུར་བ་ཡང་མ་ཡིན་པ་དེ་ལྟར་དགའ་བར་བྱེད་དོ། །དུས་བཟངས་གང་ཡིན་པ་དེ་དང་འཐབ་བྲལ་བའི་བདག་པོ་ལྷན་ཅིག་ཏུ་དགའ་བར་བྱེད་པའི་རྒྱུ་དེ་ཅི་ཡིན་པའི་རྒྱུ་དེ་ཡང་ལྷའི་ཚོགས་རྣམས་ཐམས་ཅད་ཀྱིས་ཀྱང་མི་ཤེས་སོ། །དེ་ལ་རྒྱུ་མཚན་དེ་དག་རྣམས་ཡིད་ལ་གྱིས་ལ་ལྷ་ཁྱོད་ཉིད་ཀྱང་བདག་ཅག་རྣམས་ཀྱིས་ཡོངས་སུ་བསྐོར་ནས་འགྲོ་བར་གྱིས་དང་། དེ་ལ་ཚིག་དེ་དག་རྣམས་ལྷག་མ་མ་ལུས་པར་མཐོང་བར་འགྱུར་གྱིས་ལྷ་དེ་དག་དང་། བྱའི་རྒྱལ་པོ་ཡང་ཇི་ལྟ་བ་བཞིན་དུ་ཐོས་པར་གྱུར་ནས་ལྷ་གསར་དུ་སྐྱེས་པ་དེས་ལྷ་དེ་དག་རྣམས་ཀྱི་ནང་ནས་ཞབས་འབྲིང་

70-205a

བྱེད་པ་ལ་འདི་སྐད་ཅེས་བརྗོད་དེ། གང་ན་ངང་པའི་རྒྱལ་པོ་དེ་དང་འཐབ་བྲལ་གྱི་བདག་པོ་མུ་སུ་ལུན་དྷ་ཡང་ཡོད་པ་དེར་བདག་ཅག་རྣམས་ཇི་ལྟ་བ་བཞིན་དུ་འགྲོ་བར་བྱའོ། །དེ་ནས་དེ་བཞིན་དུ་ལྷ་མོ་དེ་དག་རྣམས་དང་ལྷ་དེ་དག་གང་ན་ང་ནགས་དེའི་ནང་ན་ཡོད་པ་དེར་ཉེ་བར་ལེགས་པར་ཕྱིན་ནོ། །ཞུགས་པར་གྱུར་པ་ན་མཐོང་བ་རྣམས་ལ་ལྗོན་ཤིང་གི་ཚལ་རྣམ་པ་སྣ་ཚོགས་པ་རྣམ་པ་དུ་མ་དང་རྣམ་པ་སྣ་ཚོགས་པའི་རི་དགས་རྣམས་དང་། བྱ་རྣམས་ཀྱིས་ཀུན་ཏུ་གང་བར་གྱུར་ཅིང་རི་དགས་ཀྱི་ཁྱུ་རྣམས་ཀུན་ཏུ་རྒྱུ་བ་རྣམས་ལ་ཁ་དོག་རྣམ་པ་དུ་མ་རྣམས་དང་རིགས་སྣ་ཚོགས་པ་རྣམས་ལྷན་ཅིག་སྤྱོད་པ་རྣམས་དང་བཅས་ནས་དེ་དག་ལ་སྤྱོད་པར་བྱེད་དོ། །སྤྱད་པར་འོས་པའི་ཟས་རྣམས་ལྷན་ཅིག་ཏུ་ཟ་བར་བྱེད་ཅིང་ལྷ་རྫས་ཀྱི་ནགས་རྣམས་ཀྱི་རྩ་བའི་ཟས་ཀྱང་སྟེ། རིན་པོ་ཆེ་བདུན་གྱིས་སྤྲས་པའི་ལུས་ཅན་རྣམས་ནགས་རྣམས་ཀྱི་ནང་དུ་དང་། ནགས་ཀྱི་ཚང་ཚིང་རྣམས་སུ་དང་ཆུ་ཀླུང་གི་ངོགས་རྣམས་སུ་དང་། པད་མའི་ཚལ་གྱི་འགྲམ་རྣམས་ལ་དང་། མཚེའུ་གཞན་རྣམས་ལ་དང་། སྨན་ལྗོངས་རྣམས་སུ་དང་། རིའི་ཁོང་སེང་རྣམས་ལ་ཡང་། ཁྱུ་རྣམས་དགའ་བར་བྱེད་ཅིང་ཀུན་རྗོད་པར་ཡང་བྱེད་དོ། །དེ་དག་རྣམས་མངོན་ཏུ་ལེགས་པར་མཐོང་བས་ཀྱང་ལྷ་རྣམས་ཀྱི་མིག་དང་ཡིད་མཆོག་ཏུ་འཕྲོག་པར་འགྱུར་ཞིང་རྣམ་པ་དུ་མར་ཡང་རབ་ཀྱི་མཆོག་ཏུ་དགའ་བར་གྱུར་ནས། གཞན་ཡང་ངོ་མཚར་བས་མིག་ཀུན་ཏུ་བསྐྱོད་པར་འགྱུར་ཞིང་དེ་དང་དེ་དག་རྣམས་མིག་གཏོད་པར་བྱེད་ཅིང་ལྷའི་བུ་མོའི་ཚོགས་རྣམས་ཀྱིས་ཡོངས་སུ་བསྐོར་བར་གྱུར་ནས་ཀྱང་ཉེ་བར་ལེན་པར་བྱེད་ཅིང་སླར་ཡང་ངང་པའི་ནགས་དེ་ཉིད་དུ་རབ་ཏུ་འཇུག་གོ། །རབ་ཏུ་ཞུགས་པར་གྱུར་པ་ཉིད་ན་ཀུན་ཏུ་ལྟ་བར་བྱེད་དོ། །བརྒྱ་ཕྲག་དུ་མར་གྱུར་པའི་རྨ་བྱའི་ཁྱུ་རྣམས་ཀྱང་ལྗོན་ཤིང་གི་ཚང་ཚིང་དང་ཉེ་བར་གྱུར་པ་རྣམས་ན་ཉེ་བར་རྟོག་སྟེ། ཁ་ཅིག་ནི་མགྲིན་པ་ནས་དབྱངས་སྒྲོགས་པའོ། །ཁ་ཅིག་ནི་ཕན་ཚུན་དུ་མདོངས་ཕྱི་རོལ་ཏུ་བྱས་ནས་ཀྱང་རྩེ་བར་བྱེད་པས་ལྷན་ཅིག་སྤྱོད་པ་རྣམས་ཀྱི་སྔོན་དུ་གར་བྱེད་དོ། །ཁ་ཅིག་ནི་གཅིག་པུ་ཞིག་ཏུ་གྱུར་ནས་ཤིང་འཐུག་པོ་རྣམས་ཀྱི་ནང་དུ་ནོར་བུ་བདུན་གྱིས་སྤྲས་

70-205b

པའི་ཐིག་ལེས་རྣམ་པར་བཀྲ་བ་རྣམས་ལྗོན་ཤིང་གི་འདབ་མ་རྣམས་དང་ལྷན་ཅིག་ཏུ་རྩེ་བར་བྱེད་དོ། །ལྷན་ཅིག་སྤྱོད་པ་རྣམས་ཀྱིས་རྗེས་སུ་འབྲང་བར་གྱུར་པས་ནགས་དེའི་ཕྱི་རོལ་ན་ཡང་མཐོ་རིས་ཀྱི་རྗེས་སུ་འཐུན་པ་རྣམ་པ་དུ་མ་དང་ལྡན་པར་མཐོང་བ་ཉིད་དོ། །ངང་པའི་ནགས་དེར་དགའ་བར་གྱུར་པའི་ལྷ་བརྒྱ་སྟོང་བྱེ་བ་རྣམས་དེ་ལྟར་ལེགས་པར་འཇུག་པར་བྱེད་དོ། །གཞན་ཡང་ལྷ་རྣམས་ཀྱི་ནགས་གཞན་དག་རྣམས་ལྷ་གསར་དུ་སྐྱེས་པ་དེས་མཐོང་བར་གྱུར་པའི་ནགས་དེ་དག་རྣམས་ཀྱི་དགའ་བར་གྱུར་པ་ནི་འདི་ལྟ་སྟེ། ཆུ་ཀླུང་མཆོག་ཏུ་དང་བར་གྱུར་པ་ཤིས་པའི་ཆུ་བོའི་ངོས་གཉི་གའི་ཉེ་འཁོར་ན་ལྷ་རྣམས་ཀྱིས་ཡོངས་སུ་བསྐོར་བར་གྱུར་པས་རྣམ་པར་གསལ་བ་དང་། ཆུ་ཀླུང་དེ་དག་རྣམས་ཀྱང་ཡོན་ཏན་བདུན་དང་ལྡན་པའི་འོ་མས་ཡོངས་སུ་གང་བ་རྣམས་ཀྱི་མིང་དུ་གྱུར་པ་ལ་འདི་ལྟ་སྟེ། འདོད་པའི་ཆུ་དང་ཤིས་པའི་ཆུ་དང་ཀུན་དགའ་བར་འབབ་པ་དང་མྱོས་པ་མེད་པ་ཞེས་བྱ་བའི་ཆུ་དང་མངར་གྱུར་པ་དང་འདོད་པ་ཐམས་ཅད་ཀྱི་ཆུ་དང་བྱ་དང་ལྡན་པས་མངོན་པར་དགའ་བའོ། །རྣམ་པ་དེ་ལྟ་བུར་གྱུར་པའི་ཆུ་ཀླུང་རྣམས་འབབ་པའོ། །དགའ་བར་གྱུར་པའི་ནགས་ཆེན་པོ་དེའི་ཆུ་ཀླུང་དེ་དག་རྣམས་ལ་ཡང་ཆུ་ལ་རྒྱུ་བར་གྱུར་པའི་བྱ་རྣམས་གྲང་མོར་གྱུར་པའི་ཆུ་འཐུང་བར་བྱེད་དོ། །འཐུངས་ནས་ཀྱང་ཚིགས་སུ་བཅད་པ་རྗོད་པར་བྱེད་པ། ཇི་ལྟར། ལེགས་པར་སྔོན་གྱི་ཐར་བ་ཡི། །ལམ་རྟོགས་ནས་ནི་གསར་པ་ཡང་། །རྨ་བྱ་ཟད་ནས་སྐྱེ་བ་ནི། །ལྷ་ཡི་འཇིག་རྟེན་དུ་འབབ་འགྱུར། །གྱིས་དང་གང་ཡང་གསར་པའི་ལས། །རྣམ་གསུམ་རྣམ་པ་གསུམ་འབྱུང་བ། །རྙིང་བཅས་གསར་པ་རྗེས་སུ་ཚོལ། །འཐབ་བྲལ་དག་ཏུ་སྐྱེ་བར་འགྱུར། །མ་འོངས་པ་ཡི་འཇིག་ཤེས་དང་། །ད་ལྟར་བ་ལ་འཆུམས་མེད་གང་། །འདས་པ་ལ་ཡང་ཆགས་པ་མེད། །རིང་མིན་པ་ན་དེ་ཆགས་བྲལ། །བདེ་དང་སྡུག་བསྔལ་དག་གིས་ཀྱང་། །གང་གི་ཡིད་ནི་རྣམ་མི་འགྱུར། །བློ་གྲོས་བཟང་ལྡན་ལྷ་ཡི་ནི། །འཇིག་རྟེན་བདག་ཅག་འབབ་པ་བདེ། །གང་ཡང་རྙིང་བ་ཟོས་ནས་ནི། །གསར་པ་ཡང་ནི་མི་བྱེད་པ། །སྔོན་གྱི་ལེགས་བྱས་ཟད་པ་ནི། །འཆི་བའི་དུས་སུ་

70-206a

རྣམ་པར་རིག །ཡུལ་རྣམས་ཀྱིས་ནི་འཁྲིད་བྱེད་པ། །ལྷ་གང་སེམས་ནི་རྨོངས་པ་ཡིན། །གང་གི་བློ་ནི་ཡོན་ཏན་ལྡན། །འདོད་པའི་དབང་རྗེས་དེ་མི་འགྲོ། །ད་ལྟར་བ་ཡི་འདོད་པ་ལ། །ཁྱད་པར་དུ་ནི་སྐྱོན་ཅན་ལ། །གང་ཞིག་བདེ་བས་མི་རྨོངས་པ། །དེ་ནི་བརྟན་པ་ཞེས་བརྗོད་དོ། །སྐྱོན་གྱིས་འཇིགས་པས་བརྐམ་ཆགས་མེད། །འདོད་རྣམས་དབང་དུ་འདི་མི་འགྲོ། །དེས་ནི་སྡིག་ཀྱང་རྣམ་འཇིག་བྱེད། །དེ་ནི་བརྟན་པ་ཞེས་བརྗོད་དོ། །བདེ་བ་ཡིས་ནི་འཕངས་པའི་ཡིད། །སྡིག་པའི་འཇིགས་པ་མ་མཐོང་བ། །དགའ་བ་ཤིན་ཏུ་དེས་སྟེན་པ། །རྨོངས་པ་གང་ནི་རབ་ཏུ་འཇོམས། །དགའ་བ་རྙེད་ནུས་ཐོབ་གྱུར་ནས། །ཅི་ཕྱིར་འདོད་པས་ཉམས་པར་བྱེད། །རྟེན་པ་དེ་དག་ཤིས་པ་མིན། །ངན་སོང་ཤིན་ཏུ་ཆེན་པོར་འགྱུར། །འཇིག་རྟེན་གློག་དང་སྨིག་རྒྱུ་བཞིན། །དྲི་ཟའི་གྲོང་ཁྱེར་དང་མཚུངས་པར། །ཐམས་ཅད་སླུ་བའི་བདག་ཉིད་ཅན། །འདོད་པ་མི་བཟད་པར་རབ་བརྗོད། །དེ་ལྟར་ངོས་ན་སྤྱོད་པའི་བྱས་ཤིན་ཏུ་བག་མེད་པར་གྱུར་པའི་ལྷ་གསར་དུ་སྐྱེས་པ་དེ་དག་མངོན་པར་མཐོང་ནས་ཚིགས་སུ་བཅད་པ་དེ་དག་བརྗོད་དོ། །གསར་པ་དེ་ཡང་ཡུལ་གྱིས་ཀུན་ནས་ཕྲོགས་པར་གྱུར་པའི་ཕྱིར་ན་བྱ་དེ་དག་གིས་ཅི་བརྗོད་ཅེས་ཟེར་ནས་གོ་བར་མི་འགྱུར་རོ། །དེ་ནས་ཕན་པ་དེ་དག་རྣམས་མ་བགྲངས་པར་སླར་ཡང་དེ་ཁོ་ན་བཞིན་དུ་ངང་པའི་ནགས་ཀྱི་ཆེས་ནང་དུ་ཞུགས་པར་གྱུར་པ་ན། ཡུལ་གཞན་མང་པོ་རྣམས་ལས་འདོད་པའི་རྒྱགས་པས་ཟིན་པ་རྣམས་ཀྱིས་ངང་པའི་ནགས་སུ་ཆེས་མཆོག་ཏུ་དགའ་བར་གྱུར་པའི་ཁྱད་པར་གྱི་དངོས་པོ་ཕལ་ཆེ་བ་ཉིད་ལས་དང་པོར་འཁྲི་ཤིང་གི་དྲ་བས་གཡོགས་པར་གྱུར་པ་རྣམས་རྟོགས་སོ། །དེ་ལྟ་དེ་ལྟར་མཆོག་ཏུ་བླ་ན་མེད་པ་རྣམས་དང་ལེགས་པར་ལྡན་པ་ལས་དེས་རྒྱང་རིང་བ་ཉིད་ནས་ནོར་བུའི་ནགས་ཞེས་བྱ་བ་མཐོང་སྟེ། ངང་པའི་ནགས་དེ་ཉིད་ཀྱི་འོད་ཟེར་གྱི་ཕྲེང་བ་བརྒྱ་སྟོང་དང་ལྡན་པའི་ནོར་བུ་རྣམས་གང་ཡིན་པའི་ཁྱད་པར་གྱིས་ལྷ་རྣམས་ཉིད་ཀྱིས་ངེས་པར་བལྟ་བར་ནུས་པ་ཡང་མ་ཡིན་ཏེ། འོག་གི་ས་ན་གནས་པར་གྱུར་པའི་ལྷ་སུམ་ཅུ་རྩ་གསུམ་པའམ་རྒྱལ་ཆེན་རིས་བཞི་པ་རྣམས་

70-206b

ཀྱང་རུང་སྟེ་གཞན་འགའ་ཞིག་ན་ཡང་རྣམ་པ་དེ་སྲིད་ཀྱི་གཟི་བརྗིད་ཅན་ནི་ཡོད་པ་མ་ཡིན་ནོ། །ནོར་བུ་དེ་དག་རྣམས་ཇི་ལྟར་འདོད་པའི་དབང་གིས་འགྲོ་བར་གྱུར་པ་གང་ཡིན་པའི་ལྷ་རྣམས་འདོད་པར་གྱུར་ན་དེས་ནོར་བུ་དེ་དག་རྣམས་ཁང་བུར་གྱུར་ནས་ནམ་མཁའ་ལ་འཕགས་པར་བྱེད་དེ། ཁོང་སེང་ཅན་དུ་གྱུར་ཅིང་དེ་དག་གི་ཡང་ནང་དུ་སོང་ནས་ཀྱང་ལྷ་རྣམས་རབ་ཏུ་རྩེ་བར་འདོད་པས་ནམ་མཁའ་ལ་འཕགས་པར་བྱེད་ལ། ནོར་བུ་དེ་དག་རྣམས་ཀྱང་སེམས་བསྐྱེད་པ་དང་ལྷན་ཅིག་ཉིད་དུ་ཁང་བུར་གྱུར་ནས་ནམ་མཁའ་ལ་འཕགས་པར་གྱུར་ཏོ། །ལེགས་པར་བྱས་པའི་ལས་རྣམས་ཀྱིས་ནོར་བུ་དེ་དག་རྣམས་ཀྱི་ནང་དུ་ཡང་ཆུ་ཀླུང་དང་འབབ་ཆུ་དང་རྫིང་བུ་དང་ནགས་དང་སྐྱེད་མོས་ཚལ་དང་པད་མའི་རྫིང་བུ་དང་ལྗོན་ཤིང་གི་ཚོགས་དང་ནགས་ཚང་ཚིང་དང་ས་གཞི་ཆ་ཤས་རྣམས་དང་ལྡན་པ་དང་རིའི་རྩེ་མོ་རྣམས་དང་བྱའི་སྒྲ་དགའ་བ་རྣམས་དང་ལྡན་པར་གྱུར་པ་ཡིན་ནོ། །ཇི་ལྟར་ཡང་བདེ་བར་གྱུར་པས་ལྷ་དེ་དག་རྣམས་ནམ་མཁའ་ལ་བདེ་བར་རབ་ཏུ་རྒྱུ་བ་རྔ་སྐད་ཡན་ལག་ལྔ་དང་ལྡན་པ་དང་འདོད་པའི་ཡོན་ཏན་དྲུག་དང་ལྡན་པས་དགའ་བར་བྱེད་དོ། །ཇི་ལྟར་གཞན་ཡང་ལྷ་དེ་དག་རྣམས་ཉིད་འདོད་པར་འགྱུར་ན། ཇི་ལྟར་ལྷའི་འཇིག་རྟེན་དེ་དག་རྣམས་ཉིད་ཁོ་ནར་རྟག་ཏུ་བདག་ཅག་རྣམས་འཁོད་པར་བྱ་ན་ཞེས་དེ་དག་རྣམས་ཀྱི་སེམས་བསྐྱེད་པ་ཙམ་ཉིད་ན་ནོར་བུ་དེ་དག་རྣམས་ཉིད་འཐབ་བྲལ་བའི་ལྷའི་རིས་དེ་དག་རྣམས་ཉིད་དུ་འགྱུར་རོ། །སླར་ཉིད་ཀྱང་དེ་དག་རྣམས་ཉིད་ཡིད་བཞིན་དུ་གྱུར་ནས་འོད་ཟེར་གྱི་ཕུང་པོ་རྣམས་རབ་ཏུ་འབར་བར་བྱེད་དོ། །རང་གི་འོད་ཟེར་རྣམས་ཉིད་ལྷ་མོ་དེ་དག་གིས་ལྷ་གསར་དུ་སྐྱེས་པ་དེ་ལ་རྗོད་པར་བྱེད་དོ། །དེ་ནས་དེ་དག་རྣམས་མཆོག་ཏུ་དགའ་བར་གྱུར་པའི་ངང་པའི་ནགས་དེ་ལས་ཀྱང་འདོད་པའི་ཞགས་པ་གཞན་རྣམས་ཀྱིས་ཀུན་ནས་དྲངས་པར་གྱུར་ཏོ། །སླར་ཡང་ཡུལ་གྱིས་དྲངས་པར་གྱུར་ནས་ནོར་བུའི་ནགས་དེར་གླུ་ཉེ་བར་ལེན་པར་གྱུར་ཅིང་རབ་ཏུ་བརྟེན་ནས་དེ་དག་རྣམས་ཀྱིས་ཧ་ཅང་མི་རིང་བ་ནས་ལྟ་བར་བྱེད་དོ། །སྔོན་པོ་དང་། སེར་པོ་དང་། དམར་པོ་དང་། དཀར་པོ་དག་གི་འོད་ཟེར་བརྒྱ་སྟོང་གིས་བསྐོར་ནས་ནགས་དང་བཅས་པའི་ཡུལ་གྱི་ནོར་བུའི་

70-207a

ནགས་དེ་དང་། ཧ་ཅང་མི་རིང་བའི་ངང་པའི་ནགས་ཀྱི་ཉེ་འཁོར་ཀུན་ཏུ་སྣང་བར་བྱེད་དོ། །དེ་ནས་ལྷ་དེ་དག་ལྷ་དེ་དག་རྣམས་ཀྱི་དྲུང་ནས་ནགས་དེ་དག་ཉེ་བར་བསྐོར་བར་གྱུར་ནས། ནོར་བུའི་ཁང་བུར་གནས་ཏེ། གང་ན་ནོར་བུའི་ནགས་དེ་ཡོད་པར་གྱུར་པ་དེར་ཉེ་བར་འགྲོའོ། །ལྷ་མོ་དེ་དག་ཉིད་དང་ལྷན་ཅིག་ཏུ་དེར་ཉེ་བར་ལེགས་པར་ཕྱིན་ནས། ནོར་བུ་དུ་མ་རྣམས་འབར་བའི་ཕྲེང་བ་དང་རྣམ་པར་སྣང་བར་གྱུར་པའི་ནོར་བུའི་འོད་རྣམས་ལ་ཡང་ལྟ་བར་བྱེད་དོ། །དེ་ནས་ལྷ་དེ་དག་རྣམས་འདི་སྙམ་དུ་སེམས་སོ། །ཅི་སྟེ་ཡང་བདག་ཅག་རྣམས་ལྷའི་ནོར་བུ་གཞན་རྣམས་གང་ཡིན་པའི་ནང་དུ་ཇི་ལྟ་བར་སོང་ལ་ནམ་མཁའི་དཀྱིལ་དུ་འཁོད་ནས་རྣམ་པར་རྒྱུ་བར་བྱ་སྟེ་མཐོ་རིས་ལ་བལྟ་བའི་དོན་དུ་དེ་བཞིན་དུ་བདག་ཉེ་བར་འགྲོ་བར་བྱའོ། །དེ་ནས་ལྷ་གསར་དུ་སྐྱེས་པ་དེའི་སེམས་བསྐྱེད་པ་དང་ལྷན་ཅིག་ཏུ་གང་ཡིད་ལ་བསམས་པའི་ནོར་བུ་འདི་ལྷ་དེ་ཁང་བུར་དེར་གྱུར་ཏོ། །གྱུར་ནས་ཀྱང་ནམ་མཁའི་ཁམས་སུ་འཕགས་སོ་དེ་འཕགས་པར་གྱུར་པ་ཡང་ལེགས་པར་མངོན་པར་མཐོང་ནས་ལྷ་དེ་ལྷན་ཅིག་སྤྱོད་པའི་འཁོར་དེ་དག་རྣམས་ཉིད་ཀུན་ནས་ནོར་བུའི་རང་བཞིན་གྱི་ཁང་བུ་དེར་མངོན་པར་ཞུགས་པ་དེ་དག་གིས་མཐོང་བར་གྱུར་ཏེ། ཇི་ལྟར་རང་གིས་བྱས་པའི་ལས་དང་འདྲ་བར་དགའ་བ་དེའི་ནང་དེ་ན་འདི་དག་ཡོད་དེ། ཆུ་ཀླུང་དང་འབབ་ཆུ་དང་རྫིང་བུ་དང་ནགས་སྐྱེད་མོས་ཚལ་དང་པད་མའི་ཚལ་དང་དགའ་ཚལ་དང་རི་དང་རིའི་རྩེ་མོ་དང་ཚང་ཚིང་དག་གིས་ལེགས་པར་གང་བར་གྱུར་པ་མཐོང་ན་དགའ་བ་དུ་མ་རྣམས་ཕྱོགས་གཞན་དང་གཞན་ན་མཐོང་བར་གྱུར་པ་རྣམས་ལ། བྱ་རྣམས་དགའ་བར་འགྱུར་བའི་ཀྲ་ཀྲིའི་སྒྲ་རྗོད་པར་བྱེད་པ་དང་། ཁ་དོག་དང་དབྱིབས་སྣ་ཚོགས་པའི་སའི་ཆ་རྣམས་དང་དྲི་དང་ལྡན་པར་གྱུར་པའི་མེ་ཏོག་གིས་ཀུན་ཏུ་ཁེབས་པས་ཆགས་པར་བྱེད་དོ། །དེ་བཞིན་དུ་ཡུལ་གཞན་རྣམས་ན་ཡང་མཐོང་བར་གྱུར་པ་ལ་རི་དགས་དང་བྱ་རྣམས་ཆུ་ཀླུང་མཉམ་པ་དང་མི་མཉམ་པའི་དགའ་བར་གྱུར་པའོ། །གཞན་ཡང་ལྷས་ཡུལ་ཕྱོགས་གཞན་རྣམས་སུ་མཐོང་བར་གྱུར་པ་ལ་གང་དག་ཇི་ལྟར་འདོད་པ་བཞིན་དུ་ལྷ་དང་ལྷ་མོའི་ཚོགས་རྣམས་ཀྱིས་ལེགས་པར་གང་བས་རྒོད་པ་དང་འགྱིང་བ་དང་རྩེ་འཇོ་བས་

70-207b

རྣམ་པ་སྣ་ཚོགས་པའི་བདེ་བ་བལྟ་བར་དགའ་བ་རྣམས་སོ། །ཇི་སྐད་དུ་བཤད་པའི་ཡུལ་ཕྱོགས་དེ་དག་རྣམས་ཐམས་ཅད་ལ་གསར་དུ་སྐྱེས་པའི་ལྷ་དེས་དང་པོ་མཐོང་བ་ཡིན་པས་ལྷ་མོ་དེ་དག་རྣམས་དང་ལྷན་ཅིག་ཏུ་རྩེ་བར་བྱེད་ཅིང་བག་མེད་པས་རྒྱུ་བར་བྱེད་དོ། །གཞན་ཡང་ཡུལ་ཕྱོགས་གཞན་དག་རྣམས་སུ་ཡང་མི་ངོམས་པའི་འདོད་པའི་སྲེད་པ་རྣམས་ཀྱིས་ཉེ་བར་འགྲོ་སྟེ། གང་ན་བདུད་རྩིའི་རང་བཞིན་གྱི་ས་ཕྱོགས་ཡོད་པ་དེར་ཟས་དོན་དུ་གཉེར་བར་བྱ་བའི་ཕྱིར་ཉེ་བར་འགྲོ་བར་བྱེད་དོ། །དེ་དེར་ཇི་ལྟར་ལེགས་པར་བྱས་པའི་ལས་དང་འདྲ་བར་ཟ་བར་བྱེད་དོ། །དེ་ཉེ་བར་ཟོས་ནས་ཀྱང་ཡུལ་གྱི་མེས་བསྲེགས་པར་གྱུར་པས་གང་ན་བཏུང་བའི་ཆུ་ཀླུང་ཡོད་པ་དེར་ལྷན་ཅིག་སྤྱོད་པའི་འཁོར་དང་བཅས་ནས་ཉེ་བར་འགྲོའོ། །དེའི་འཁོར་དེ་དག་རྣམས་ཉིད་དང་རྒྱ་ཆེན་པོའི་སྲེད་པའི་རླབས་རྣམས་ཀྱིས་ཁྱེར་བར་གྱུར་པ་ན་བདུད་རྩི་འདི་དག་རྣམས་དང་ཕྲད་པར་གྱུར་ཏེ། དེ་ནས་དེ་དག་བཏུང་བའི་ས་གཞིར་སོང་ནས་རྣམ་པ་སྣ་ཚོགས་པའི་ནོར་བུའི་སྣོད་རྣམས་སུ་མྱོས་བྱེད་དེ་དག་འཐུང་བར་བྱེད་དོ། །དེ་ཕྱིར་ཞིང་ཉིད་ཀྱང་མྱོས་བྱེད་ཀྱིས་རངས་པར་གྱུར་པ་ནི་མར་ཀུན་ཏུ་བླུགས་པར་གྱུར་པ་ཉིད་ཀྱི་མེ་འགྲན་ཟླ་མེད་པར་གྱུར་པ་བཞིན་དུ་འདིའི་ཡུལ་གྱི་སྲེད་པ་རྣམས་ཀྱང་རབ་ཏུ་འབར་བར་འགྱུར་རོ། །དེ་ཡང་ཡུལ་དེ་དག་རྣམས་ཀྱིས་ཀུན་ཏུ་རྨོངས་པར་གྱུར་ནས་ཕྱིར་ཞིང་ཉིད་ཀྱང་ལྷའི་བུ་མོ་དེ་དག་ཉིད་དང་ལྷན་ཅིག་ཏུ་གར་དང་རབ་ཏུ་དགའ་བར་ཡང་བྱེད་དོ། །དེ་དག་དེ་བཞིན་དུ་གནས་དེར་རྩེད་མོ་རྣམས་བྱས་ནས། སླར་ཡང་གང་ན་པད་མའི་རྫིང་བུ་ཡོད་པར་གྱུར་པ་དེར་ཉེ་བར་འགྲོ་བར་བྱེད་དོ། །ཆུ་ལ་རྩེ་བར་བྱ་བར་འདོད་པའི་དབང་དུ་བྱས་ནས་ཐམས་ཅད་ལ་ཡང་རིག་པར་བྱས་ཏེ། གང་ན་པད་མའི་རྫིང་བུ་དེ་ཡོད་པ་དེར་ཀུན་ཏུ་ཉེ་བར་འགྲོའོ། །གཞན་ཡང་དེ་ཡུལ་རྣམས་ཀྱིས་རྒྱགས་པར་གྱུར་ནས་དེ་དག་རྣམས་དང་ལྷན་ཅིག་ཏུ་ཆུའི་རྩེད་མོ་བྱེད་པར་འགྱུར་རོ། །ལྷའི་བུ་མོ་དེ་དག་རྣམས་ཉིད་དང་ལྷའི་བདེ་བ་མཆོག་ཏུ་དཔེ་མེད་པ་རྣམས་མངོན་སུམ་དུ་ཉེ་བར་ལོངས་སྤྱོད་པ་བྱེད་དོ། །དེ་གཞན་ཡང་དེ་ཁོ་ན་བཞིན་དུ་རྒྱགས་པས་རྒྱགས་པར་གྱུར་ནས་རྣ་བ་ཚིམ་པར་བྱ་འདོད་པས་འགྲན་གྱི་དོ་མེད་པའི་ཡུལ་གྱིས་ཀུན་ཏུ་ཁྲིད་པའི་ཕྱིར་རྔ་སྐད་ཡན་ལག་ལྔ་པ་ཉན་པར་འདོད་དོ། །དེ་ནས་གཞན་ཡང་དེ་དག་རྣམས་ཉིད་ཀྱི་དཀྱིལ་དུ་སོང་ནས་ལྷ་དེ་

70-208a

གཅིག་པུ་གླུ་ལེན་ནོ། །གླུ་ཉན་པར་ཡང་བྱེད་དོ། །རྔ་སྐད་ཡན་ལག་ལྔ་དང་ལྡན་པ་ཐམས་ཅད་ཀྱི་རྣ་བ་དང་ཡིད་འཕྲོག་པར་བྱེད་པ་གང་ཡིན་པ་ནི་དངོས་པོ་གཞན་རྣམས་ཀྱི་དཔེ་བྱ་བར་ཡང་སླ་བ་མ་ཡིན་ནོ། །དེ་དེ་ལྟར་འདོད་པའི་ཡོན་ཏན་ལྔ་ལ་ཉེ་བར་ལོངས་སྤྱོད་པར་འགྱུར་བས་ཀྱང་ངོམས་པར་འགྱུར་བ་ཡང་མ་ཡིན་ནོ། །སྲིད་པས་རྣམ་པར་གདུངས་པར་གྱུར་པའི་བསམ་པ་ཅན་རྣམས་ནི་སྲིད་པས་རྣམ་པར་ངོམས་པར་འགྱུར་བ་ཡང་མ་ཡིན་ཏེ། ཇི་ལྟར་མེ་ནི་བུད་ཤིང་རྣམས་ཀྱིས་ངོམས་པར་མི་འགྱུར་ལ་དེ་བཞིན་དུ་འདོད་པ་དང་བཅས་པས་འདོད་པ་དང་ལྡན་པ་རྣམས་རྣམ་པར་ངོམས་པ་མི་སྐྱེའོ། །དེ་དེ་ན་རྣམ་པ་དུ་མ་དང་རྣམ་པར་རྟོག་པ་དུ་མའི་བདེ་བ་རྣམས་ཉེ་བར་ལོངས་སྤྱོད་པར་གྱུར་པས་དུས་རིང་དུ་རྩེ་འཇོ་བྱས་ནས། གཞན་ཡང་ནོར་བུའི་རང་བཞིན་གྱི་ཁང་བུ་དེ་ཉིད་ཀྱིས་ངང་པའི་ནགས་དེ་ཉིད་དུ་སླར་ཡང་རབ་ཏུ་འཇུག་པར་བྱེད་དེ། ཕྱིར་བཞིན་འབྲང་བར་གྱུར་པའི་འཁོར་རྣམས་ཐམས་ཅད་དང་དེ་སོང་ནས་ཕྱིར་ཞིང་ཉིད་ཀྱང་སྔ་ན་མ་མཐོང་བའི་ཡུལ་ཕྱོགས་གཞན་རྣམས་སུ་འཇུག་པར་བྱེད་དོ། །ནགས་དེའི་དགའ་བར་གྱུར་པ་ཡང་འདི་དག་ཡིན་ཏེ། ཇི་ལྟར་བལྟས་པར་གྱུར་པ་དེ་ལྟར་ནགས་དེ་ནི་ཆེས་དགའ་བར་གྱུར་པ་ཡིན་ནོ། །དབང་པོ་རྣམས་ཀྱང་ཡུལ་རྣམས་ཀྱིས་ངོམས་པ་ཡང་མེད་དོ། །དེ་ལྟར་བྱས་པས་ནགས་དེ་དག་ནི་བལྟ་བར་ནུས་པ་ཡང་མ་ཡིན་ནོ། །དེ་བཞིན་དུ་འབབ་ཆུ་དང་རྫིང་བུ་དང་ནགས་དང་ཉེ་བའི་ནགས་དང་ཤིང་གི་ཚོགས་རྣམས་དང་ལྷ་དང་ལྷ་མོའི་ཚོགས་རྣམ་པ་དུ་མ་རྣམས་ཀྱང་དེ་ན་མཐོང་ངོ་། །དེ་ཁོ་ན་བཞིན་དུ་རྔ་སྐད་ཡན་ལག་ལྔ་དང་ལྡན་པས་རྩེ་བར་གྱུར་པས་གཞན་ཡང་མཁའ་ལྡིང་གི་རྒྱལ་པོ་དུས་བཟངས་དེ་རྣམ་པར་ཡངས་པའི་པད་མའི་རྫིང་བུ་གང་ན་གནས་པར་གྱུར་པ་དེར་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བ་དང་བཅས་ནས་དེ་དག་རྣམས་ལེགས་པར་ཉེ་བར་འགྲོ་བར་བྱེད་དོ། །དེ་ལྟར་དེས་མང་དུ་མཐོང་ངོ་། །དེ་ལྟར་དེས་ལྷའི་ཚོགས་བརྒྱ་སྟོང་དུ་མ་རྣམས་གླུ་ལེན་པར་གྱུར་པ་དང་། ལྷ་རྫས་ཀྱི་རིམ་པས་བདེ་བ་དང་། ཡང་དག་པར་ལྡན་པར་གྱུར་པ་རྣམས་མཐོང་བར་འགྱུར་རོ། །གང་དག་ལ་དཔེས་གཞལ་བར་བྱ་བ་རྣམས་ནི་ཅུང་ཟད་ཀྱང་ཡོད་པ་མ་ཡིན་ལ། གང་གིས་དཔེར་བྱེད་པར་གྱུར་པའི་འཇིག་རྟེན་ཀུན་ཏུ་གསལ་བར་བྱེད་པའི་ཉི་མ་ཡང་གང་དག་གིས་ཁྱད་པར་གྱིས་སྲིན་

70-208b

བུ་མེ་ཁྱེར་ཙམ་དུ་ཡང་མ་ཡིན་ནོ། །འོད་ཟེར་གྱི་དབང་དུ་བྱས་ནས་དེ་ལས་གཞན་པ་རྣམས་གང་དག་གིས་དཔེར་བྱེད་པ་ཡིན། དེ་ལྟར་ལྷ་རྣམས་ནི་དཔེ་མེད་པའི་ཡུལ་རྣམས་ཀྱིས་ཉེ་བར་འཚོ་བ་ཡིན་ནོ། །རོ་རྣམས་ཀྱི་ཡང་དཔེ་བྱ་བར་ནུས་པ་མ་ཡིན་ཏེ། མི་རྣམས་ཀྱི་ཡང་གང་གི་ཕྱིར་རོའི་མཆོག་ཏུ་གྱུར་པ་རྣམས་ལ་འདི་ལྟ་སྟེ། སྦྲང་རྩི་དང་བཅོས་པའི་ཆང་དང་བུ་རམ་ཤིང་དང་ཤའི་རིགས་སུ་གྱུར་པ་རྣམས་དང་སྟེ། ཤིན་ཏུ་ལེགས་པར་སྦྱར་བའི་རོ་དེ་རྣམས་ཐམས་ཅད་དང་ཡང་དག་པར་ལྡན་པས་ཀྱང་། བདུད་རྩི་དམར་པོ་དག་གི་ཁྱད་པར་གྱིས་བིམ་པའི་འབྲས་བུ་ཙམ་དང་ཡང་འདྲ་བ་མ་ཡིན་ནོ། །མི་རྣམས་ཀྱི་རོ་ཐམས་ཅད་དང་ཡང་དག་པར་ལྡན་པ་དེ་གང་གིས་དཔེར་བྱེད་པར་འགྱུར། རོའི་དབང་དུ་བྱས་ནས་ལྷ་རྣམས་ཀྱི་བཅུ་དྲུག་ཆར་ཡང་མི་ཕོད་དོ། །དྲི་རྣམས་ཀྱི་ཡང་དཔེར་བྱ་བ་ནུས་པ་མ་ཡིན་ཏེ། འདི་ན་མི་རྣམས་ཀྱི་དྲི་ཞིམ་པར་གྱུར་པ་རྣམས་ཐམས་ཅད་ལ་འདི་ལྟ་སྟེ། ཙན་དན་དང་། ཨ་ག་རུ་དང་། ཕྱེ་མ་དང་། བྱུག་པ་དང་། ནི་ཁུ་སྟི་དང་། ཙམ་པ་ཀ་དང་། ཀེ་ཏ་ཀ་དང་། ཡིད་བདེ་བའི་མེ་ཏོག་དང་། ཛཱ་ཏིའི་དྲི་དང་། དབྱར་གྱི་དུས་པ་དང་། ཨུད་པ་ལ་དང་། ཀུ་སུ་མཱ་དང་། ནི་ཙུ་ལ་ལ་སོགས་པའིའོ། །དེ་དག་རྣམས་བསྡོམས་ནས་གཅིག་ཏུ་བྱས་པས་ཀྱང་ལྷ་རྣམས་ཀྱི་མེ་ཏོག་ཐམས་ཅད་ཀྱི་ཐ་མར་གྱུར་པ་ནིམ་པའི་ལོ་མའི་བཅུ་དྲུག་གི་ཆར་ཡང་མི་ཆོག་གོ། །དེ་ལྟར་བྱས་ནས་དྲི་རྣམས་ཀྱི་དཔེར་བྱ་བར་ཡང་མི་ནུས་སོ། །ལྷ་རྣམས་ཀྱི་རེག་བྱ་ནི་དཔེ་མེད་པ་དང་ཡང་དག་པར་ལྡན་པ་ཡིན་ཏེ་ལྷ་རྣམས་ཀྱི་གང་ཡིན་པ་ལ་ནི་མི་རྣམས་ཀྱིས་རྟོགས་པའི་ཡུལ་མ་ཡིན་ནོ། །མི་རྣམས་ཀྱི་རེག་བྱ་རྣམས་ཐམས་ཅད་ཀྱི་མཆོག་ཏུ་གྱུར་པ་རྣམས་ཀྱང་འདི་ལྟ་སྟེ། སྲིན་བལ་དང་། མོན་དར་དང་། དུ་ཀུ་ལ་དང་། བལ་དང་། རས་བལ་ལ་སོགས་པ་དང་གཞན་ཡང་མི་རྣམས་ཀྱི་གང་དག་རྣམ་པ་དེ་ལྟ་བུར་གྱུར་པ་དེ་དག་ཐམས་ཅད་བསྡོམས་པར་གྱུར་པས་ཀྱང་། ལྷ་རྣམས་ཀྱི་རེག་བྱ་ཐམས་ཅད་ལས་ཐ་མར་གྱུར་པ་འདི་ལྟ་སྟེ། ལྷ་རྫས་ཀྱི་རྡོ་རྗེར་གྱུར་པའི་སྲིད་པའི་སྡུག་བསྔལ་བྱེད་པ་རྣམས་ཀྱི་ཡང་བཅུ་དྲུག་ཆར་ཕྱེ་བ་ཙམ་དུ་ཡང་མི་ཆོག་པར་འདོད་དོ། །རྒྱུ་དེས་ན་ལྷ་རྣམས་ཀྱི་རེག་བྱ་ཡང་དཔེ་མེད་པ་ཡིན་ལ་དེ་དག་ལ་ཡང་དཔེ་བྱ་བར་ནུས་པ་མ་ཡིན་ནོ། །སྒྲ་རྣམས་ཀྱང་དཔེ་མེད་པ་དང་ཡང་དག་པར་ལྡན་པས་ལྷ་

70-209a

རྣམས་རྒྱུ་བ་ཡིན་ནོ། །འདི་ན་མི་རྣམས་ཀྱི་མཆོག་ཏུ་གྱུར་པའི་སྒྲ་ནི་འདི་ལྟ་སྟེ། པི་བང་དང་། ས་ཀཱ་ཤ་དང་། གླིང་བུ་དང་། རྫ་རྔ་དང་། གླུ་ལ་སོགས་པ་རྣམས་ཡིན་ནོ། །ཆགས་པར་གྱུར་པ་དེ་དག་རྣམས་ཐམས་ཅད་བསྡོམས་པས་ཀྱང་ལྷ་རྣམས་ཀྱི་རྒྱན་གྱི་མཆོག་གི་བཅུ་དྲུག་ཆར་ཡང་མི་ཆོག་པར་འདོད་དེ། ལྷ་རྣམས་ཀྱི་སྒྲ་རྣམས་ཀྱང་དཔེ་མེད་པ་དང་ཡང་དག་པར་ལྡན་པ་ཡིན་ནོ། །དཔེར་བྱ་བ་ནི་འདི་དག་རྣམས་ཡིན་ཏེ། རྒྱལ་ཆེན་རིས་བཞིའི་ལྷ་རྣམས་དང་མིའོ། །སུམ་ཅུ་རྩ་གསུམ་པ་རྣམས་ཀྱིས་ནི་འཐབ་བྲལ་བ་ལ་མ་ཡིན་ནོ། །དེའི་ཁྱད་པར་ཡང་མི་རྣམས་ཀྱི་འདོད་པ་དང་རྒྱལ་ཆེན་རིས་བཞིའོ། །དེའི་ཁྱད་པར་གྱིས་སུམ་ཅུ་རྩ་གསུམ་པ་དང་རྒྱལ་ཆེན་རིས་བཞིའོ། །རྒྱལ་ཆེན་རིས་བཞིའི་ཡུལ་དང་སུམ་ཅུ་རྩ་གསུམ་པའི་ཁྱད་པར་གང་ཡིན་པའི་ཁྱད་པར་འདི་དག་གིས་ཀྱང་། སུམ་ཅུ་རྩ་གསུམ་པ་རྣམས་ཀྱི་འདོད་པའི་རིམ་པ་རྣམས་དང་ལས་ཀྱི་ཁྱད་པར་རྣམས་ཀྱིས་འདོད་པ་ན་སྤྱོད་པའི་ལྷ་དྲུག་པོ་རྣམས་ཀྱི་ཡང་ལྷ་རྫས་ཀྱི་ཡུལ་རྣམས་ཀྱི་ཡོན་ཏན་ཁྱད་པར་དུ་འཕགས་པ་ཡིན་ནོ། །དེའི་ཕྱིར་ཡང་ལྷ་རྣམས་ནི་བདེ་བ་དཔེ་མེད་པ་དུ་མ་རྣམས་དང་ཡང་དག་པར་ལྡན་པ་ཡིན་ནོ། །ལྷ་དེ་དག་ངང་པའི་ནགས་དེ་ན་རྩེད་མོ་རྩེ་བར་གྱུར་པ་ལས་བར་སྣང་ལ་འགྲོ་བའི་རྒྱལ་པོ་དེ་དང་ཉེ་བར་ཕྱིན་པར་གྱུར་ཏེ། གང་ལ་འདི་རྩེ་བར་གྱུར་པ་རྣམ་པར་ཡངས་པའི་པད་མའི་རྫིང་བུར་ལྷན་ཅིག་རྗེས་སུ་སྤྱོད་པ་རྣམས་ཀྱིས་ཡོངས་སུ་བསྐོར་ཞིང་པད་མའི་ནགས་ལ་ལེགས་པར་གནས་ཏེ་ཉེ་འཁོར་ན་ལྷའི་ཚོགས་ཀྱིས་ཡོངས་སུ་བསྐོར་ཏོ། །དེ་དག་རྣམས་གང་ཡིན་པ་དེའི་པད་མ་གཅིག་པོ་གང་ལ་འདི་རྩེ་བར་བྱེད་པ་དེ་ནི་ཚད་དཔག་ཚད་ཙམ་མོ། །རིན་པོ་ཆེ་སྣ་བདུན་གྱི་དཔེར་བྱ་བར་གྱུར་པ། རྡོ་རྗེའི་ཟེའུ་འབྲུ་རྣམས་ཀྱིས་རེག་ན་བཟོད་པར་གྱུར་པ་བླ་ན་མེད་པའི་དྲི་དང་ཁ་དོག་རྣམས་དང་ལྡན་པ་དཔེ་མེད་པར་གྱུར་པ་འོད་ཟེར་དུ་མ་རྣམས་ཀྱིས་རྣམ་པར་སྣང་བར་བྱས་པ་འདབ་མ་སྟོང་ཕྲག་བརྒྱ་པ་གང་ཡིན་པ་འདིའི་དབུས་སུ་གནས་པར་གྱུར་ནས་པད་མའི་རྫིང་བུར་མུ་སུ་ལུན་དྷ་ལ་སོགས་པ་རྣམས་ལ་ཆོས་སྟོན་པར་བྱེད་དོ། །དེ་ཡང་སྨོན་ལམ་གྱི་དབང་གིས་འཐབ་བྲལ་བའི་ལྷ་རྣམས་ཀྱི་ནང་དུ་སྐྱེ་བོ་རྣམས་ལ་ཕན་པའི་དོན་དང་བདེ་ལེགས་སུ་འགྱུར་བའི་དོན་དུ་སྟེ་ཕན་

70-209b

པར་འདོད་པ་དག་གིས་དེར་སྐྱེས་སོ། །དེ་དག་རྣམས་ལ་ཆོས་སྟོན་པར་བྱེད་དེ། བག་མེད་པ་སྤང་བའི་དོན་དུའོ། །ལྷ་གསར་དུ་སྐྱེས་པ་དེ་མཐར་གྱིས་རྣམ་པར་ཡངས་པའི་པད་མའི་རྫིང་དེར་སླེབ་པར་གྱུར་ཏོ། །དེ་མངོན་པར་མཐོང་ནས་ཀྱང་དུས་བཟངས་དེས་ཚིགས་སུ་བཅད་པ་རྗོད་པར་བྱེད་པ། ཇི་ལྟར། འདོད་པས་ངོམས་པ་མེད་པ་དང་། །སྲེད་པས་ཀྱང་ནི་གདུངས་པ་ཡི། །སེམས་དང་དབང་པོ་གཡོ་བ་ཡི། །དུས་འདི་ཡོངས་སུ་འདའ་བ་ཡིན། །འཆིང་བ་ལྔ་ཡིས་བཅིངས་འགྱུར་ཞིང་། །དྲུག་གིས་རྣམ་པར་རྨོངས་པ་ཡང་། །དུས་གསུམ་ལ་ཡང་རྣམ་རྨོངས་པའི། །དུས་འདི་ཡོངས་སུ་འདའ་བ་ཡིན། །འགྲོ་བའི་བཙོན་རར་བཅིངས་ན་ཡང་། །སྐྱོ་བའི་དབང་དུ་འགྲོ་མིན་པ། །བག་མེད་ཡུལ་གྱིས་རྨོངས་པས་ཀྱང་། །དུས་འདི་ཡོངས་སུ་སྐྱེལ་བ་ཡིན། །རྒོད་དང་ཁྲེལ་མེད་ཆགས་པ་དང་། །ལུས་ཀྱི་མཛེས་པ་ལ་དགའ་ཞིང་། །འདོད་པས་ཡིད་ནི་ངོམས་མེད་པའི། །དུས་འདི་ཀུན་ནི་འགག་པ་ཡིན། །མི་རྟག་བསྒྲུབ་པར་མི་ནུས་པའི། །བདེ་ལ་ཆགས་པའི་ལུས་ཅན་རྣམས། །བུད་མེད་མཐོང་བས་བརྒྱལ་བ་ཡི། །དུས་འདི་ཡོངས་སུ་འདའ་བ་ཡིན། །སྐྱེ་དང་འཆི་བའི་དབང་ཉིད་དང་། །སྲེད་པས་ཀྱང་ནི་རྨོངས་པ་ཡི། །བྱིས་པའི་སྐྱེ་བོ་རྣམས་ཀྱི་ཡང་། །དུས་འདི་ཡོངས་སུ་འདའ་བ་ཡིན། །གཏི་མུག་མུན་པར་བྱིང་བ་དང་། །ཀུན་ནས་འདོད་ཆགས་ཀྱིས་ཕྲོགས་པའི། །སྲེད་པས་ངོམས་པ་མེད་འདི་ཡི། །ཞེ་སྡང་འཆིང་བས་བཅིངས་ནས་ནི། །དུས་འདི་ཡོངས་སུ་འདའ་བར་བྱེད། །ལོག་པར་ལྟུང་བ་མངོན་མི་ཤེས། །རྣམ་པར་རྟོག་པས་ཉེར་བཅོམ་པའི། །སྐྱེ་བོ་ཆགས་པའི་ཡིད་ཅན་རྣམས། །དུས་འདི་ཡོངས་སུ་འགག་པ་ཡིན། །དུས་དེ་ཙམ་དུ་དགའ་འགྱུར་ཡང་། །ཡོངས་སུ་སྨིན་ནས་ཕན་མིན་པའི། །འདོད་པ་ལ་ནི་ཆགས་པའི་ཡིད། །དུས་འདི་ཡོངས་སུ་སྐྱེལ་བ་ཡིན། །སྔོན་གྱི་སྡུག་བསྔལ་མངོན་མི་ཤེས། །ལྷ་ཡི་བདེ་ལ་དགའ་བ་ཡང་། །རྣམ་བྲལ་དེ་ནི་མི་ཤེས་པར། །དུས་འདི་ཡོངས་སུ་འདའ་བ་ཡིན། །ལས་ཀྱི་དྲ་བས་ཀུན་ནས་བཅིངས། །བཀྲེན་པ་ཉིད་ཀྱི་བྱེད་པ་ཡིས། །དམ་པའི་ལམ་ལས་ཡོངས་ཉམས་ནས། །དུས་འདི་ཡོངས་སུ་འདའ་བར་བྱེད། །རྣམ་རྨོངས་སེམས་དང་བྲལ་བས་ནི། །སྲིད་པའི་སྐྱོན་ནི་ཤེས་པ་མིན། །གཏི་མུག་མུན་པར་ནུབ་པ་ཡིས། །དུས་འདི་ཡོངས་སུ་འདའ་བར་བྱེད། །ལས་ཞགས་གཅིག་གིས་བཅིངས་ནས་ནི། །གྲོགས་མེད་གཅིག་པུའི་ལུས་ཅན་རྣམས། །ལྷ་མོའི་ཚོགས་ཀྱིས་

70-210a

རྣམ་རྨོངས་པས། །དུས་འདི་ཡོངས་སུ་འགག་པར་བྱེད། །དབང་པོ་རྣམས་ཀྱིས་ཁྲིད་པ་དང་། །དམ་པའི་ལམ་ལ་འཁྲུལ་བས་ཀྱང་། །བུད་མེད་དེ་ནི་ཤེས་མིན་པས། །དུས་འདི་ཡོངས་སུ་འདའ་བར་བྱེད། །སྡོམ་དང་སྡོམ་མིན་ཤེས་མིན་དང་། །གནོད་སེམས་མང་པོར་གྱུར་པ་དང་། །ལེགས་པར་བསྡམས་པའི་ལམ་ཞིག་པ། །དུས་འདི་ཡོངས་སུ་སྐྱེལ་བར་བྱེད། །ཕན་དང་ཕན་མིན་ཕྱི་རོལ་དང་། །དོན་དང་དོན་མིན་ལ་རྨོངས་པའི། །རྩེད་མོས་བྱིས་པ་དང་མཚུངས་པའི། །དུས་འདི་ཡོངས་སུ་འདའ་བར་འགྱུར། །ཆུ་ཀླུང་འབབ་ཆུ་ལྟེང་ཀ་དང་། །ནགས་དང་སྐྱེད་ཚལ་ས་གཞི་ལ། །རྩེ་དགའ་ལ་ནི་ཆེད་ཆེ་འདིའི། །དུས་འདི་ཡོངས་སུ་ཟད་པ་ཡིན། །ཁང་བུ་དང་ནི་རི་སྟེང་དང་། །པད་མའི་ཚལ་གྱི་རྫིང་བུར་ཡང་། །དགའ་བར་འདོད་པའི་ལོངས་སྤྱོད་ལ། །དུས་འདི་ཡོངས་སུ་འདའ་བར་བྱེད། །ལས་དང་ལས་ཀྱི་རྣམ་སྨིན་ལ། །སྣང་བ་མེད་པའི་ལུས་ཅན་རྣམས། །ཟས་ལ་ཆགས་པ་འབའ་ཞིག་གིས། །དུས་འདི་ཡོངས་སུ་ཟད་པར་བྱེད། །ཁམས་གསུམ་འདི་ན་རྟག་ཏུ་ཡང་། །ལས་ཀྱི་རླུང་གིས་ཡོངས་སུ་བསྐོར། །འཁྲུལ་འཁོར་བཞིན་དུ་རྟག་ཏུ་འཁོར། །བྱིས་པ་རྣམས་ཀྱིས་གོ་བའང་མིན། །མཐོན་པོའི་རང་བཞིན་འཕྱང་མོ་ཞོན། །སྐྱེས་བུ་ལོག་པར་ལྟུང་བ་ཡིན། །རྣམ་པར་རྨོངས་པས་སྐྱོན་རྣམས་ནི། །བཟློག་ལ་རབ་ཏུ་འབད་མི་བྱེད། །དེ་དག་དང་ནི་དེ་ལས་གཞན། །འདོད་པའི་བདེ་བ་ཡོངས་སྤོང་བ། །འདོད་དང་བྲལ་བ་བརྟན་པ་ཡི། །སྐྱོབ་པ་མྱ་ངན་འདས་པ་ཡི། །དེ་ནི་ཐོག་མ་བར་ཐ་མར། །དགེ་བའི་བདེ་ལེགས་བླ་ན་མེད། །གང་ཞིག་ཐོབ་ནས་ཐུབ་པ་རྣམས། །ཡམས་དང་བྲལ་བའི་ཞི་བར་རྒྱུ། །འདོད་སྐྱེས་སྲིད་བདེ་དམ་པ་ནི། །དེ་ནི་ལོག་ལྟུང་ནང་དུ་ཆུད། །སྡུག་བསྔལ་རྣམ་སྨིན་སྐྱེས་མིན་པའི། །འདོད་པའི་ཁྱད་པར་འགའ་ཞིག་མེད། །དེ་ཕྱིར་འདོད་པ་ཞེས་བྱའི་བློ། །ནམ་ཡང་བསྐྱེད་པར་མི་བྱའོ། །དེ་ཡང་སྡུག་བསྔལ་རྣམ་འཁོར་བའི། །རྒྱུར་གྱུར་ཤིན་ཏུ་མི་བཟད་པའོ། །དེ་ལྟར་ངང་པ་དེས་ལྷ་གསར་དུ་སྐྱེས་པ་དེ་མངོན་པར་ལེགས་པར་མཐོང་ནས་ཚིགས་སུ་བཅད་པ་བརྗོད་ལ། ཡུལ་རྣམས་ལ་སྨད་ར་ཡང་བྱས་སོ། །དེས་དེ་ལྟ་བུ་རྣམས་ཁོ་ན་བཤད་པར་གྱུར་པ་ན་ལྷ་དེ་མཐའ་མ་ཉིད་ཐོབ་པར་འགྱུར་རོ། །ལྷ་དེས་ལེགས་པར་བཤད་པ་དེ་དག་རྣམས་ལ་བརྩི་བགྲང་མ་བྱས་པས་དེ་བཞིན་དུ་ཡུལ་གྱིས་ཀུན་ཏུ་རྨོངས་པར་གྱུར་ནས་སླར་ཡང་དེ་ཉིད་ཀྱི་མདུན་དུ་རྩེ་

70-210b

བ་དང་དགའ་བ་དང་ཡོངས་སུ་སྤྱོད་པར་ཡང་བྱེད་ཅིང་། ཆུ་ལ་རྩེ་བར་བྱེད་དོ། །པད་མའི་རྫིང་བུར་ཞུགས་པར་གྱུར་ནས་པད་མ་དག་བཅད་དེ་ལྷའི་བུ་མོ་དེ་དག་དང་ལྷན་ཅིག་ཏུ་རྩེད་མོ་ཡང་རྩེ་བར་བྱེད་དེ་ལྷ་རྫས་ཀྱི་བདེ་བ་དང་ལྡན་པའི་ཡུལ་གྱིས་རྣམ་པར་རྨོངས་པའི་ཕྱིར་རོ། །ཕན་པའི་ཚིག་དེ་དག་རྣམས་ཉེ་བར་ཐོས་པར་གྱུར་ནས་ཀྱང་དགའ་བར་བྱེད་པ་ཉིད་ནི་འདོད་པའི་དབང་དུ་སོང་བའི་ཕྱིར་རོ། །དེ་ནས་ཡང་ནམ་མཁའ་ལྡིང་གི་རྒྱལ་པོ་དེ་མུན་པའི་སྣོད་ཀྱི་ལྷ་དེ་དག་རྣམས་ལ་གཞན་ཡང་རྗོད་པར་བྱེད་པ། ཇི་ལྟར་ཡུལ་འདི་དག་གིས་རྣམ་པར་རྨོངས་པར་གྱུར་པ་དེས་ན་ཕན་པའི་ཚིག་འདི་དག་རྣམས་མི་ཐོས་སོ། །མ་ཐོས་པར་གྱུར་ཡང་སོང་དང་དེ་ཤེས་པར་བྱེད་པ་འབྱུང་བར་འགྱུར་གྱིས། དེ་ལྟར་ནམ་མཁའ་ལྡིང་གི་རྒྱལ་པོ་དེས་རྗོད་པ་དང་། ལྷ་རྫས་ཀྱི་ཆེས་གཙོ་བོར་གྱུར་པ་མཆོག་ཏུ་ཡང་རྣ་བ་དང་ཡིད་འཕྲོག་པར་བྱེད་པའི་སྒྲ་དག་རིང་བ་ནས་ཐོས་པར་གྱུར་ཏོ། །ལེགས་པར་བྱས་པའི་ལས་ཆེས་ལྷག་པར་གྱུར་པའི་སྒྲ་གང་ཡིན་པ་དེས་པ་ཊ་ཧ་དང་། གླིང་བུ་དང་། པི་བང་དང་། རྔ་མུ་ར་བའི་ཚོགས་དང་ཆགས་པར་འགྱུར་བའི་གླུ་དང་རོལ་མོའི་སྒྲ་ཐམས་ཅད་ཉམས་པར་བྱེད་དོ། །དེ་ནས་ལྷ་གང་དག་རྣམ་པར་ཡངས་པའི་པད་མའི་རྫིང་བུ་ན་རྩེད་མོ་རྩེ་བར་བྱེད་པ་དེ་དག་ལས་དེ་རྣམས་ཐམས་ཅད་ཀྱང་གང་ནས་སྒྲ་ཐོས་པར་གྱུར་པ་དེར་ཁ་ཕྱོགས་ཏེ་གནས་སོ། །དེ་ནས་རིང་བ་ཉིད་ནས་འོངས་པར་གྱུར་པ་ནི་ཁང་བུ་བརྒྱ་སྟོང་གིས་ཡོངས་སུ་བསྐོར་ཅིང་ལྷ་རྫས་ཀྱི་གླུ་མཁན་གྱི་སྒྲས་ཆགས་པ་སྐྱེད་པར་བྱེད་པའི་སྒྲ་རྣམས་ཉེ་བར་བསྒྲགས་པར་གྱུར་པ་སྟེ། ཇི་ལྟར་གཟའ་དང་སྐར་མ་དང་རྒྱུན་སྐར་རྣམས་ཀྱིས་ཡོངས་སུ་བསྐོར་བའི་ཟླ་བ་རྣམ་པར་མཛེས་པ་བཞིན་དུ། དེ་ལྟར་རྣམ་པར་མཛེས་ཤིང་གསལ་བ་ཡིན་ནོ། །དེ་ལྟར་ཡང་ཁང་བུའི་ཕྲེང་བ་བརྒྱ་སྟོང་གིས་ཡོངས་སུ་བསྐོར་བར་གྱུར་པ་དང་དེའི་ལུས་ལས་ཀུན་ནས་འཕྲོ་བའི་འོད་ཟེར་གྱི་ཕྲེང་བ་རྣམས་ཀྱིས་ལྷའི་ཚོགས་ཐམས་ཅད་ཀྱི་ཡིད་འཕྲོག་པར་གྱུར་པས། མཆོག་ཏུ་གསལ་བར་བྱེད་པ་དང་ལྷ་མོ་བརྒྱ་སྟོང་གིས་ཀྱང་ཉེ་བར་གླུ་ལེན་པར་གྱུར་པས་ཤིན་ཏུ་འཐབ་བྲལ་བ་རྣམས་ཀྱི་བདག་པོ་འོངས་པར་གྱུར་ཏེ། འདབ་མ་སྟོང་ཕྲག་བརྒྱ་པ་རིན་པོ་ཆེ་སྣ་བདུན་གྱིས་ཉེ་བར་སྣང་བར་བྱེད་པ་མཆོག་ཏུ་མཛེས་པར་གྱུར་ཅིང་། དགའ་བའི་པད་མའི་དབུས་ཀྱི་སྙིང་པོ་གང་ཡིན་པ་དེ་

70-211a

ལ་ཉེ་བར་གནས་ཤིང་ཆོས་ཉན་པར་འདོད་པས་ལྷན་ཅིག་སྤྱོད་པས་ཡོངས་སུ་བསྐོར་ནས་གང་ནས་བྱང་ཆུབ་སེམས་དཔའ་དུས་བཟངས་ནམ་མཁའ་ལྡིང་གི་རྒྱལ་པོ་ཡོད་པ་དེར་འོངས་པ་ཡིན་ནོ། །དེ་ནས་ནམ་མཁའ་ལྡིང་གི་རྒྱལ་པོ་བྱང་ཆུབ་སེམས་དཔའ་དེས་དེ་དག་ཉེ་བར་མཐོང་བར་གྱུར་ནས་རྩོམ་པ་ཆེན་པོས་དེ་རིངས་པར་འགྲོ་བར་བྱེད་དེ་དེ་ཡང་ངང་མོ་གཞན་དག་རྣམས་ཀྱིས་ཡོངས་སུ་བསྐོར་ཞིང་། ངང་པ་ཡང་རིན་པོ་ཆེ་བདུན་གྱི་ནོར་བུའི་ཐིག་ལེ་རྣམས་ཀྱིས་རྣམ་པར་བཀྲ་བར་གྱུར་པ་བརྒྱ་སྟོང་དུ་མས་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་པར་གྱུར་ནས། གང་ན་འཐབ་བྲལ་གྱི་མངའ་བདག་ཡོད་པ་དེར་ཉེ་བར་ཕྱིན་ཏོ། །ངང་པ་དེ་དག་གིས་ཀྱང་དགའ་བའི་དབྱངས་དག་ཀྱང་ཉེ་བར་བསྒྲགས་སོ། །དེ་བཞིན་དུ་ལྷ་དང་བྱའི་རྒྱལ་པོ་དག་ཕན་ཚུན་དུ་གུས་པ་དང་བཅས་པ་དང་རབ་ཏུ་འདུད་པས་ཕྱག་བྱས་ནས། སྨོན་ལམ་གྱི་དབང་གིས་འཐབ་བྲལ་གྱི་ལྷ་རྣམས་ཀྱི་བག་མེད་པ་གདུལ་བའི་དོན་དུ་སྐྱེས་པར་གྱུར་པའི་བྱང་ཆུབ་སེམས་དཔའ་དུས་བཟངས་དེས་ལྷ་རྣམས་ཀྱི་མངའ་བདག་དེ་ལ་བརྗོད་པ། རྣམ་པར་ཡངས་པའི་པད་མའི་རྫིང་བུ་གང་ཡིན་པ་འདིར་འཐབ་བྲལ་གྱི་བདག་པོ་དུས་ཤིན་ཏུ་རིང་བ་ནས་ཅི་ལ་འོངས་པ་ལགས། ངས་ཀྱང་ལྷ་གཞན་གྱི་དྲུང་ནས་ཐོས་པ་ཡང་ཇི་ལྟར། མུ་སུ་ལུན་དྷ་ནི་བག་མེད་པས་བག་མེད་པར་མི་རྒྱུ་བ་དང་ཚོགས་པ་རྒྱུ་བ་རྣམ་པར་རྒྱུ་བའི་ས་དག་ཏུ་དེ་བཞིན་གཤེགས་པ་དྲུག་གི་མཆོད་རྟེན་དེ་དག་རྣམས་ལ་འདིས་ཕྱག་བྱས་ཤིང་ལྷའི་ཚོགས་དང་བཅས་པ་རྣམས་ཀྱིས་གང་རྫུ་འཕྲུལ་གྱི་སྟོབས་ཀྱིས་མངོན་པར་བྲིས་པར་གྱུར་པའི་མདོ་དེ་དག་ཀྱང་བཀླགས་ཤིང་ལྷ་རྣམས་ལ་ཡང་ཉེ་བར་བསྟན་ནོ། །ལྷ་རྣམས་ཀྱང་ངེས་པར་བདེན་པ་ཡིན་པའི་རྒྱུ་འདིས་ང་ཁྱེད་ཀྱི་དྲུང་དུ་མ་འོངས་སོ། །ངས་རྣམ་པར་ཡངས་པའི་པད་མའི་རྫིང་དུ་འོངས་ནས་རྩེད་མོ་རྩེ་བར་བྱེད་པའི་ལྷ་གཞན་དག་རྣམས་ལ་ཆོས་བསྟན་ཏེ། དོན་དམ་པར་གྱུར་པ་ཉེ་བར་འཕེལ་བར་བྱེད་པ་དགེ་བར་གྱུར་པ་བག་མེད་པ་དང་བྲལ་བར་བྱེད་པ་པོ་ཐམས་ཅད་ལ་མཐར་ཐུག་པར་ཕན་པར་བྱེད་པར་གྱུར་པའོ། །དེ་ལ་རྒྱུ་འདི་དག་གིས་ཀྱང་ང་ལྷ་ཁྱོད་ཉིད་ཀྱི་རྩར་ང་མ་འོངས་པ་ཡིན་པར་ཤེས་པར་གྱིས་ལ་མི་དགའ་བར་མི་བྱ་བ་དང་རྗེས་སུ་མཐུན་པར་བྱ་བ་དང་ཆོས་ལ་

70-211b

གུས་པར་བྱ་བ་རྣམས་བྱའོ། །དེ་ནས་དེའི་ཚིག་འདི་དག་རྣམས་ཐོས་ནས་མུ་སུ་ལུན་དྷས་འདི་སྐད་ཅེས་སྨྲས་སོ། །དམ་པ་ཁྱོད་ཀྱི་ཡོན་ཏན་འདི་དག་ཀྱང་ཤེས་ལགས་ཀྱི་འཇིགས་པར་མ་མཛད་ཅིག །ཁྱོད་ཉིད་ནི་འཐབ་བྲལ་ན་གནས་པའི་ལྷ་འདི་རྣམས་ཐམས་ཅད་ཀྱི་ཉེ་བར་གནས་པའི་དགེ་བའི་བཤེས་གཉེན་བཅོམ་ལྡན་འདས་ལགས་ཀྱིས་མཁའ་ལྡིང་ལ་མངའ་མཛད་པའི་རྒྱལ་པོ་གཤེགས་མཛོད། གང་ན་རྣམ་པར་ཡངས་པའི་རྫིང་བུ་ཡོད་པ་དེར་བདག་ཅག་གཤེགས་སོ། །འདིར་དེ་སྐད་ཅེས་ཕན་ཚུན་དུ་བརྗོད་ནས་མཁའ་ལྡིང་གི་རྒྱལ་པོ་དེ་ཡང་འཐབ་བྲལ་གྱི་བདག་པོ་དང་ལྷ་བརྒྱ་སྟོང་དུ་མས་ཁང་བུ་རྣམས་དང་ངང་པ་དུ་མ་རྣམས་ཀྱིས་ཀྱང་ཡོངས་སུ་བསྐོར་བར་གྱུར་ནས་གང་ན་རྣམ་པར་ཡངས་པའི་པད་མའི་རྫིང་བུ་དེར་ཉེ་བར་ལེགས་པར་འགྲོ་སྟེ། ནམ་མཁའི་དཀྱིལ་ནས་རོལ་མོའི་སྒྲ་དང་རྔ་སྒྲ་དང་གླུ་དང་བཅས་པས་མཆོག་ཏུ་དགེ་བར་གྱུར་པའི་སེམས་ཀྱིས་ཀུན་ནས་བདེ་བར་གཏོགས་པའི་ཡིད་དྲི་མ་མེད་པར་གྱུར་པས། བག་དང་ལྡན་པར་རྒྱུ་བ་དང་། དེ་བཞིན་དུ་རྣམ་པ་དེ་སྲིད་ཀྱི་བག་མེད་པའི་ས་རྣམས་ལ་འཇུག་པར་འགྱུར་བའི་འོད་ཟེར་གྱི་མཆོག་དང་ལྡན་པར་གྱུར་པ་རྣམས་རྔ་སྒྲ་དང་ལྡན་པར་སོང་ནས་རྣམ་པར་ཡངས་པའི་མིང་ཅན་གྱི་རྫིང་འདིར་ཞུགས་པར་གྱུར་ཏོ། །དེ་ནས་ཕྱིན་པར་གྱུར་པ་དང་ལྷ་གཞན་ཆེས་རབ་ཏུ་དགའ་བའི་ཡིད་ཀྱིས་པད་མའི་རྫིང་བུ་དེར་རྩེད་མོ་རྩེ་བ་རྣམས་ཀུན་ནས་ལེགས་པར་མཐོང་བར་གྱུར་པས་རྩེད་མོ་རབ་ཏུ་རྩེ་བར་རྩོམ་མོ། །རྩེ་བར་གྱུར་པའི་ལྷ་དེ་དག་རྣམས་ཐམས་ཅད་ཀྱིས་ཀྱང་སྒྲ་འཐུག་པོའི་སྒྲ་ཀུན་ནས་སྒྲོགས་པར་བྱེད་པ་བཞིན་དུ་ནམ་མཁའི་དཀྱིལ་དེ་དག་རྣམས་ཐམས་ཅད་ནས་ཐོས་པར་གྱུར་ཏེ། ཐོས་ནས་ཡིད་འཕྲོག་པར་བྱེད་པ་དང་དེས་ཁྲོ་བ་མེད་པར་བྱེད་པ་དང་རྣ་བ་དང་ཡིད་འཕྲོག་པར་བྱེད་པ་རྣམས་སོ། །དེ་ནས་ཕྱིན་པར་གྱུར་པ་དེ་དག་རྣམས་ཐམས་ཅད་པད་མའི་རྫིང་བུའི་བདེ་བ་འདོད་པ་དང་ཡང་ཡུད་ཙམ་ཅིག་ཉེ་བར་བྲལ་ཞིང་དེ་དག་རྣམས་ཐམས་ཅད་སྒྲ་ཡང་མེད་པར་གྱུར་པ་དང་། རྣམ་པ་དེ་སྲིད་ཀྱི་ལྷ་རྫས་ཀྱི་ཡུལ་རྣམས་ཀྱིས་ཀྱང་ཁྲིད་པར་མ་གྱུར་ཅིང་གཡོ་བར་གྱུར་པའི་སེམས་ཀྱང་ཆོས་ལ་གུས་པས་ཀུན་ཏུ་གནས་པས་གཡོ་བ་མེད་པའི་སེམས་སུ་གྱུར་ཅིང་། ཆུའི་

70-212a

རྩེད་མོ་ལ་རྣམ་པར་དགའ་བ་དང་པད་མའི་རྩེ་མོ་ལ་རྣམ་པར་དགའ་བ་རྣམས་དང་ཡང་བྲལ་བར་གྱུར་པ་དང་བྱས་པར་གྱུར་པའི་ལས་རྣམས་ཆུད་མི་འཛའ་བ་ལ་ཀུན་ཏུ་བལྟས་ནས་ནམ་མཁའ་ལ་འགྲོ་བའི་རྒྱལ་པོ་དེ་ལ་འཐབ་བྲལ་གྱི་བདག་པོ་དེས་འདི་སྐད་ཅེས་སྨྲས་སོ། །ཇི་ལྟར་དུས་བཟངས་ལེགས་པར་ཆོས་བསྟན་པར་བྱ་བའི་དུས་འདི་ཡང་བཟང་པོ་ཡིན་ཏེ། ལྷ་འདི་དག་རྣམས་རྒྱགས་པ་དང་བྲལ་བར་གྱུར་པས་འདིར་ལྷ་དང་བཅས་པ་འདི་དག་རྣམས་ལ་ཆོས་བསྟན་པར་བྱ་བའི་དུས་འདི་ནི་བཟང་པོ་ལགས་སོ། །དེ་ནས་མཁའ་ལྡིང་གི་རྒྱལ་པོ་སྐྱེ་བ་གཞན་དྲན་པར་གྱུར་པ་དེས་བཅོམ་ལྡན་འདས་འཁོར་བ་འཇིག་གང་ཡིན་པ་དེའི་སྤྱན་སྔར་ཐོས་པར་གྱུར་པའི་མདོ་དེ་བསྟན་པའི་དོན་དུ་དམིགས་ཤིང་། ཡུད་ཙམ་ཅིག་སྒྲ་མེད་པར་བྱས་ཏེ། དེ་ནས་དེ་ལྟར་མདོ་སྟོན་པར་རྩོམ་མོ། །ལྷ་རྣམས་ཉོན་དང་ཆོས་ལྔ་པོ་འདི་དག་རྣམས་ནི་རྣམ་པར་སྨད་པར་བྱ་བ་ཡིན་ཏེ་བག་མེད་པར་སྟེན་པར་བྱེད་པ་གང་ཡིན་པའི་ལྷ་རྣམས་སམ་མི་ཡང་རུང་སྟེ། མི་རིགས་པར་གྱུར་པའི་སྐྱོན་ཡིན་ནོ། །ལྔ་གང་ཞེ་ན་འདི་ལྟ་སྟེ། བག་མེད་པར་གྱུར་པས་བག་མེད་པར་སྤྱོད་པ། རྣམ་པར་གཡེང་བའི་ཡིད་ཀྱིས་གཞན་ཉིད་བསམ་པ་ན་གཞན་ཉིད་རྗོད་པར་བྱེད་དོ། །དེ་ཡང་སྙིང་པོ་མེད་པ་དོན་མེད་པར་བྱེད་པ་པོ་སྔ་མ་དང་ཕྱི་མ་འགལ་བ་ཡེ་ཡེའོ་གཞན་རྣམས་ལ་ཡང་སེམས་འཛིན་པར་འགྱུར་བ་མ་ཡིན་ནོ། །དེ་ཅིའི་ཕྱིར་ཞེ་ན། བག་མེད་པས་རྣམ་པར་གཡེངས་པར་གྱུར་པའི་བློས་རིག་པ་མ་ཡིན་ནོ། །བདག་གིས་གཏམ་འདི་ཅི་སྨྲས་པ་དང་རྣམ་པ་ཇི་ལྟ་བུ་ཅིག་ཀྱང་བདག་གིས་སྨྲས་བྱ་བ་དང་བདག་གིས་གང་ལ་སྨྲ་བར་བྱ་བ་ཡང་སྟེ། དེའི་བློ་རྣམ་པར་གཡེངས་པར་འགྱུར་ཞིང་རྣམ་པར་མི་གནས་པས་གང་རུང་བ་ལ་དེ་སྨྲ་བར་བྱེད་དོ། །དེ་དེ་ལྟར་ཡང་མོར་འགྱུར་རོ། །ཡོངས་ལས་ཁ་ཉན་པར་འགྱུར་རོ། །ཡིད་དུ་མི་འོང་བར་འགྱུར་རོ། །གཞན་དག་རྣམས་ཀྱིས་ཀྱང་རྣམ་པར་གཤེ་བར་བྱེད་དོ། །དེ་ཐམས་ཅད་ལ་རྩྭ་བཞིན་དུ་བདག་ཉིད་འདུད་པར་བྱེད་དོ། །འདི་དག་ནི་སྐྱོན་དང་པོ་ཡིན་ཏེ། བག་མེད་པས་ཀུན་ཏུ་བཅིངས་པའི་སྐྱོན་རྣམས་ཀྱིས་ཀྱང་ལོག་པར་ལྟུང་བ་རྣམས་སུ་སྐྱེ་བར་འགྱུར་བ་ནི་འགྲོ་བ་གསུམ་པོ་རྣམས་ཕན་ཚུན་དུ་གང་ཡང་རུང་བ་རྣམས་སུའོ། །འདི་ནི་བག་མེད་པ་རྣམས་ཀྱི་སྐྱོན་གྱི་དང་པོ་ཡིན་ནོ། །གཞན་ཡང་བག་མེད་

70-212b

པ་རྣམས་ལ་སྐྱོན་གཉིས་པ་ཡོད་དེ། གང་ཞེ་ན་འདི་ལྟ་སྟེ། དགོས་པ་དང་དགོས་པ་མ་ཡིན་པ་རྣམས་ཀྱང་མི་ཤེས་པའོ། །བག་མེད་པས་ཉམས་པར་གྱུར་པའི་བློས་རྟོགས་པར་མི་འགྱུར་ཏེ། བདག་གི་ལེགས་པར་བྱས་པའི་དོན་རྣམས་ནི་ཅི་ཡིན། ཅི་ནི་བྱ་བ་མ་ཡིན་པ་ཡིན། དེའི་ལས་དེ་དག་རྣམས་ཀྱི་འབྲས་བུ་ནི་རྣམ་པ་ཅི་འདྲ་བ་ཅིག་ཏུ་འགྱུར། དེ་ཇི་ལྟར་ལས་རྣམས་ཤེས་པ་མ་ཡིན་པ་དེ་དེ་ལྟར་རྣམ་པར་སྨིན་པ་རྣམས་ཡང་མི་ཤེས་སོ། །དེ་ལས་དང་འབྲས་བུ་རྣམས་ལ་རྣམ་པར་རྨོངས་པར་གྱུར་ཅིང་རྨོངས་པ་ནི་ལུས་ཞིག་པར་གྱུར་ནས་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བར་གྱུར་པ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་གསུམ་པ་བག་མེད་པ་ལ་ཡོད་དེ། བག་མེད་པ་ལ་ཀུན་ཏུ་འཁྲིད་པར་གྱུར་པའི་ལྷའམ་མི་རྣམས་ཀྱང་རུང་སྟེ་གྲོགས་པོ་དམ་པ་མ་ཡིན་པ་སྟེན་པར་བྱེད་ལ། དཀོན་མཆོག་གསུམ་ལ་སྙེན་པར་མི་བྱེད་པ་དང་། ཤེས་རབ་དང་ཚུལ་ཁྲིམས་ལ་ཡང་མ་ཡིན། བླ་མ་རྣམས་ལ་ཡང་སྟེན་པར་མི་བྱེད་དོ། །སྐྱོན་དང་ཡོན་ཏན་གྱི་ཁྱད་པར་རྣམས་ཀྱང་ཀུན་ཏུ་མི་ཤེས་སོ། །འཁོར་བའི་སྡུག་བསྔལ་རྣམས་ཀྱང་ཤེས་པར་མི་འགྱུར་རོ། །ལས་རྣམ་པ་སྣ་ཚོགས་པ་རྣམས་ཀྱང་ཀུན་ཏུ་མི་རྟོགས་སོ། །སྲོད་དང་ཐོ་རངས་མི་ཉལ་བར་བརྩོན་པར་གནས་པའི་རང་བཞིན་ཅན་མ་ཡིན་ནོ། །དེ་ཤི་བར་གྱུར་པའི་འོག་ཏུ་བག་མེད་པ་དེའི་སྐྱོན་གྱིས་ངན་སོང་ལོག་པར་ལྟུང་བ་དམྱལ་བར་སྐྱེའོ། །གཞན་ཡང་སྐྱོན་བཞི་པ་བག་མེད་པ་ལ་ཡོད་དེ། དེ་གང་ཞེ་ན། འདི་ལྟ་སྟེ། དེ་ཁོ་ནར་སྐྱེས་པར་གྱུར་པའི་སྐྱེས་བུ་རྣམས་དང་ལྷ་རྣམས་ཀྱང་དེ་ཁོ་ན་བཞིན་དུ་ཚེའི་འདུ་བྱེད་རྣམས་ཟད་པར་འགྱུར་ཞིང་ལེགས་པར་བྱས་པའི་ལས་རྣམས་ཟད་པར་གྱུར་ནས་ནི་འཆི་བདག་གི་རྒྱལ་པོ་འོང་བར་འགྱུར་ལ། གང་དང་ལྷན་ཅིག་ཏུ་སྐྱེས་པར་གྱུར་པའི་བག་མེད་པ་སྟེན་པར་བྱེད་པ་རྣམས་ལ་དེ་དང་ལྷན་ཅིག་ཏུ་རྣམ་པར་འབྲལ་བ་འབྱུང་བར་འགྱུར་རོ། །བཞི་པོ་འདི་དག་རྣམས་གང་ཡིན་པ་དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་འབྱུང་བར་འགྱུར་རོ། །བཞི་གང་ཞེ་ན། འདི་ལྟ་སྟེ། ལང་ཚོ་དང་ནད་མེད་པ་དང་སྲོག་དང་ཕུན་སུམ་ཚོགས་པ་རྣམས་སོ། །བཞི་པོ་འདི་དག་རྣམས་

70-213a

དང་ནི་ངེས་པ་ཁོ་ནར་ལྷན་ཅིག་ཏུ་འབྲལ་བར་བྱ་དགོས་སོ། །དེ་དག་རྣམས་ལ་ཡང་མཁས་པ་རྣམས་ཀྱིས་སྐབས་དབྱེ་བར་མི་བྱ་བ་དང་བག་མེད་པ་དེ་ཡང་འདིར་བསྟེན་པར་མི་བྱའོ། །ཇི་ལྟར་བག་མེད་པ་དེས་ཀྱང་འདིར་དགྲ་བཞིན་དུ་འབྱུང་བར་འགྱུར་བས། འདི་ནི་བསྟེན་པར་མི་བྱའོ། །བག་མེད་པས་ཟིལ་གྱིས་མནན་པར་གྱུར་པ་རྣམས་ནི་ལྷའམ་མི་རྣམས་ཀྱང་རུང་སྟེ་བརླག་པར་འགྱུར་རོ། །དེའི་ཕྱིར་ན་འདི་ཡོངས་སུ་སྤང་བར་བྱའོ། །གཞན་ཡང་བག་མེད་པར་གྱུར་པ་རྣམས་ཀྱི་སྐྱོན་ལྔ་པའོ། །འདི་གང་ཞེ་ན། འདི་ལྟ་སྟེ། གང་ལ་འཇིགས་པའི་གནས་སུ་གྱུར་པ་དེ་དག་ཁོ་ན་ལ་ཡིད་ཆེས་པར་བྱེད་དེ། འཇིགས་པའི་གནས་སུ་གྱུར་ཅིང་ཡིད་མི་ཆེས་པ་ཇི་ལྟར་བུད་མེད་རྣམས་དང་མཚུངས་པ་གཞན་ཉིད་ནི་ཡོད་པ་མ་ཡིན་ནོ། །བག་མེད་པའི་དབང་དུ་གྱུར་པའི་སྐྱེས་བུ་ངན་པ་རྣམས་ནི་དེ་དག་རྣམས་ཉིད་ལ་ཡིད་ཆེས་པ་སྐྱེད་པར་བྱེད་ཅིང་གང་འགའ་ཞིག་ལ་ཡིད་ཆེས་པར་མི་བྱེད་པ་རྣམས་ཀྱང་དེ་ཇི་སྲིད་ཤི་བར་མ་གྱུར་གྱི་བར་དུ་སྙིང་ལ་འགེབས་པར་བྱེད་དེ། ཅི་ལྟར་མེའི་ལྷན་ཅིག་སྐྱེས་པ་ཚ་བ་ཡིན་པ་དེ་བཞིན་དུ་བུད་མེད་རྣམས་ཀྱི་ཡང་གཡོ་དང་འདོད་པ་ཅན་དང་། སྒྱུ་དང་། ཕྲག་དོག་དང་། མངོན་པར་འཁུ་བར་འགྱུར་བ་དང་། ང་རྒྱལ་དང་མི་སྙན་པར་བྱེད་པ་དང་ལོག་པར་བསྒྲུབ་པ་དང་ཀུན་དུ་འདྲེས་པའི་སེམས་དང་སྐྱོན་དེ་རྣམས་བུད་མེད་དང་ལྷན་ཅིག་སྐྱེས་པ་ཡིན་ཏེ། བག་མེད་པས་ཀུན་ནས་འཁྲིད་པར་གྱུར་པའི་སྐྱེས་བུ་ངན་པ་དེ་ཚིག་ཙམ་འབའ་ཞིག་གིས་རབ་ཏུ་རྣམ་པར་བཅོམ་པར་གྱུར་ནས་དེ་དག་ཉིད་ལ་ཡིད་ཆེས་པར་བྱེད་དོ། །དེ་དག་ཉིད་ཀྱིས་ཀུན་ནས་འཆུམས་པར་གྱུར་ཅིང་བློ་རབ་ཏུ་སད་པར་བྱེད་དོ། །དེ་ལྟར་མདོར་བསྡུས་པར་གྱུར་ན་བག་མེད་པ་རྗེས་སུ་འབྲང་བ་དང་བཅས་པ་རྣམས་ལ་སྐྱོན་ཆེན་པོ་ལྔ་ཡོད་དོ། །རབ་ཏུ་དབྱེ་བ་ལས་ནི་ཚད་མེད་པར་འགྱུར་རོ། །དེའི་ཕྱིར་ལྷའམ་མི་རྣམས་ཀྱིས་ཀྱང་རུང་སྟེ་རབ་ཏུ་བརྩོན་པ་མཆོག་གིས་བག་མེད་པ་ཡོངས་སུ་སྤང་བར་གྱིས་ཤིག་དེ་དག་ནི་མྱ་ངན་ལས་འདས་པའི་སྒོ་གཏན་ཡིན་ནོ། །འདི་ལྟ་སྟེ།

70-213b

བག་མེད་པ་སྟེན་ཅིང་བསྒོམས་ལ་ལན་མང་དུ་བྱས་པས་ནི་དམྱལ་བར་འགྱུར་རོ། །བག་མེད་པ་སྟེན་པ་རྣམས་ནི་ཡི་དགས་སམ་དུད་འགྲོ་རྣམས་སུ་ཡང་སྐྱེ་བར་འགྱུར་རོ། །བག་ཡོད་པས་གནས་པ་རྣམས་ལ་ནི་ཡོན་ཏན་ལྔ་པོ་འདི་དག་རྣམས་ཡོད་དེ། བག་ཡོད་པ་རྣམས་ཀྱིས་བསྔགས་པའོ། །ལྔ་གང་ཞེ་ན། འདི་ལྟ་སྟེ། སྤྱོད་པ་ཀུན་ནས་བསྡམས་པར་འགྱུར་བ་དང་། བློ་ཀུན་དུ་ལེགས་པར་གནས་པ་དང་། བྱ་བ་བྱེད་པ་དང་བློ་མཉམ་པར་བཞག་པ་དང་གཅིག་ཏུ་ཕན་པ་བྱེད་པ་དང་། དུག་རྣམས་བཞིན་དུ་བག་མེད་པ་ཡོངས་སུ་སྤོང་བར་བྱེད་དོ། །དེས་རྣམ་པ་གསུམ་ཀུན་དུ་རིག་གོ། །འདི་ནི་བག་ཡོད་པ་ལ་མངོན་པར་དགའ་བར་གྱུར་པ་རྣམས་ཀྱི་ཡོན་ཏན་དང་པོའོ། །གཞན་ཡང་བག་ཡོད་པ་ལ་མངོན་པར་དགའ་བར་གྱུར་པའི་ཡོན་ཏན་གཉིས་པ་ཡོད་པ་ལ། འདི་གང་ཞེ་ན། འདི་ལྟ་སྟེ། ལས་རྣམས་ཀྱི་ལྕི་བ་ཉིད་ཀུན་དུ་ཤེས་པའོ། །དེ་སྐྱེས་བུ་དམ་པ་ལ་རྟེན་པར་གྱུར་པས་ལས་དང་བཅས་པའི་འབྲས་བུ་རིག་ནས་བྱ་བ་དག་བྱེད་དོ། །སྐྱེས་བུ་དམ་པ་མ་ཡིན་པ་ལ་མི་རྟེན་ནོ། །དམན་པའི་ལས་རྣམས་མི་བྱེད་དོ། །གང་ལ་ཡང་རྟག་ཏུ་རྣམ་པར་སྨོད་པར་འགྱུར་བ་དང་གང་ལས་སྐྱོན་མཐོང་བ་དེ་དག་རྣམས་ཡོངས་སུ་སྤོང་བར་བྱེད་དོ། །གང་ལ་ཡོན་ཏན་མཐོང་བར་གྱུར་པ་དེ་དག་ལ་ཉེ་བར་བསྟེན་ནོ། །ཡོན་ཏན་དང་ལྡན་པ་དང་ཡོན་ཏན་ཤེས་པར་གྱུར་པའི་བློ་གྲོས་བཟང་པོ་རྣམས་ལ་སྡིག་པ་མི་འབྱུང་ངོ་། །གཞན་ཡང་བག་མེད་པ་སྤངས་པར་གྱུར་པ་དང་བག་ཡོད་པ་སྟེན་པར་བྱེད་པའི་ཡོན་ཏན་གསུམ་པ་ཡོད་དེ། གང་ཞེ་ན། དེ་བཞིན་དུ་སྲོག་གི་མཐར་ཐུག་པར་གྱུར་ཀྱང་བུད་མེད་རྣམས་ཀྱི་དབང་དུ་འགྲོ་བ་མ་ཡིན་ནོ། །ཚིག་རྣམས་ལ་ཡང་དད་པར་མི་བྱེད་དོ། །རྟག་ཏུ་དེའི་རང་བཞིན་ལ་རྗེས་སུ་རྟོག་གོ། །འཇིག་རྟེན་གཉིས་སུ་འཆིང་བར་བྱེད་པ་ཡང་གང་གི་ཕྱིར་བུད་མེད་དག་ཡིན་པར་གྱུར་པ་དེ་བཞིན་དུ་ཡང་རིག་ལ་གཟུགས་ཀྱི་འཁྲུལ་བར་ཡང་མི་འགྱུར་རོ། །ཚིག་ལ་ཡང་དད་པར་མི་བྱེད་དོ། །དེ་དེ་བཞིན་དུ་ཡང་དག་པ་ཇི་ལྟ་བ་ཁོ་ན་བཞིན་དུ་སོ་སོར་རྟོག་པར་བྱེད་དོ། །དེའི་གར་དང་གླུ་དང་རྒོད་པ་དང་འགྱིང་བག་དང་རྒྱན་ཆས་ཀྱང་ཀུན་ནས་འཁྲིད་པར་མི་བྱེད་དོ། །བག་ཡོད་པ་དང་བག་ཡོད་པར་གྱུར་པའི་སྐྱེས་བུ་དེ་རྣམས་ཀྱིས་ཀྱང་གཞན་རྣམ་

70-214a

པ་དེ་ལྟ་བུའི་བག་མེད་པའི་གནས་རྣམས་མི་བྱེད་དོ། །དེའི་འཁོར་ཡང་བསྲབས་པར་འགྱུར་ཏེ། གང་དག་བུད་མེད་ཀྱི་བག་མེད་པས་ཀུན་དུ་ཁྲིད་པར་མི་འགྱུར་བ་རྣམས་སོ། །དེ་ཡང་དེས་སྤོང་དུ་འཇུག་ལ་བག་ཡོད་པ་ཡང་རྗོད་པར་བྱེད་དོ། །གཞན་ཡང་བག་ཡོད་པའི་ཡོན་ཏན་བཞི་པ་ཡོད་དེ། འདི་ཡང་གང་ཞེ་ན། འདི་ལྟ་སྟེ། བག་ཡོད་པ་ནི་ལོངས་སྤྱོད་རྣམས་ལ་མ་ཡིན། འདོད་པ་རྣམས་ལ་མ་ཡིན་ནོ། །བརྒྱ་ལ་ན་དབུགས་འབྱིན་པར་བྱེད་ཀྱི་རྟག་ཏུ་བློ་ལ་མི་བྱེད་དོ། །སེམས་ཀྱིས་རབ་ཏུ་རྟོག་པར་མི་བྱེད་དོ། །ཅི་ལྟར་འདོད་པ་དེ་དག་རྣམས་ནི་རྟག་པ་དང་བརྟན་པ་དང་ཡིད་ཆེས་པའི་ས་ཡང་མ་ཡིན་ལ་འདི་དག་རྣམས་ནི་རྒུད་པའི་མཐར་ཐུག་པར་འགྱུར་བ་དང་ཤིན་ཏུ་མྱུར་བར་རབ་ཏུ་འཇིག་པར་འགྱུར་བའི་ཆོས་ཅན་ནོ། །དེ་བཞིན་དུ་ནད་མེད་པ་ལ་ཡང་བག་ཡོད་པ་རྣམས་ཀྱིས་ནམ་ཡང་ཡིད་ཆེས་པ་བསྐྱེད་པར་ནི་མི་བྱེད་དེ། ནད་མེད་པ་རྣམས་ཐམས་ཅད་ཀྱང་ནད་ཀྱིས་ཟིལ་གྱིས་གནོན་ནོ། །དེ་བཞིན་དུ་ལང་ཚོ་ལ་ནམ་ཡང་ཡིད་ཆེས་པ་བསྐྱེད་པར་མི་བྱེད་དེ། ལང་ཚོ་འདི་དག་རྣམས་ཐམས་ཅད་ཀྱང་རྒ་བས་ཉེ་བར་ཟིལ་གྱིས་གནོན་པར་འགྱུར་བས་དེ་ལང་ཚོས་སྒྲུབ་པར་མི་བྱེད་དོ། །ཁེངས་པར་མི་འགྱུར་རོ། །ཇི་ལྟར་གསོན་པས་ཀྱང་སྒྲུབ་པར་མི་བྱེད་དོ། །རངས་པར་མི་བྱེད་དོ། །དཀའ་ལས་རྣམས་ཀྱང་མི་བྱེད་དོ། །དེ་ཅིའི་ཕྱིར་ཞེ་ན། ནམས་ཀྱང་འཆི་བདག་གི་རྒྱལ་པོས་འཕྲོག་པར་བྱེད་པར་འགྱུར་བའི་ཕྱིར་རོ། །དེ་ལྟར་བག་ཡོད་པར་སྤྱོད་པ་རྣམས་ཡིད་ཆེས་པར་མི་བྱེད་དོ། །འདུས་བྱས་ཀྱི་ཆོས་རྣམས་ལ་བག་མེད་པར་སྤྱོད་པར་གྱུར་ཏ་རེ། བག་ཡོད་པར་འགྱུར་བས་བག་ཡོད་པ་སྤྱད་པ་ལ་ཡོན་ཏན་གཞན་ཡང་ལྔ་པ་ཡོད་པ་ནི། འདི་ལྟ་སྟེ། ཐོས་པ་དང་ལྡན་པར་འགྱུར་རོ། །འཕགས་པ་རྣམས་ལ་རྗེས་སུ་སྟེན་པར་བྱེད་དོ། །ཡེ་ཤེས་ལ་མངོན་པར་དགའ་བར་འགྱུར་རོ། །དཀོན་མཆོག་གསུམ་ཁྱད་པར་དུ་བྱེད་པའི་རང་བཞིན་ཅན་དུ་འགྱུར་རོ། །མ་ཐོས་པ་དང་ལྡན་པའི་དོན་རྣམས་རྣམ་པར་དཔྱད་པ་ལ་མཁས་པར་འགྱུར་རོ། །དེས་འཆི་བདག་གི་དུས་ཀུན་དུ་ཤེས་སོ། །སྡུག་བསྔལ་དང་འཆི་བའི་རྒྱུ་མཚན་རྣམས་རྣམ་པར་ཤེས་སོ། །དེ་ལ་ལྷ་རྣམས་ཀྱི་འཆི་འཕོ་བའི་རྒྱུ་མཚན་རྣམས་ནི་ཐོས་པའི་དོན་གྱིས་ཤེས་སོ། །སྐྱེས་བུ་འཆི་བའི་རྒྱུ་

70-214b

མཚན་དང་དེ་ངན་སོང་དུ་འགྲོ་བའི་རྒྱུ་མཚན་རབ་ཏུ་འོང་བ་རྣམས་ཀྱང་ཤེས་ཏེ། ཇི་ལྟར་བདག་ངན་སོང་དུ་འགྲོ་བར་འགྱུར་རོ། །དེའི་རབ་ཏུ་བྱ་བ་རྣམས་ཀྱང་ཀུན་དུ་རིག་གོ། །དེ་ལ་ཡང་སེམས་རབ་ཏུ་དང་ངོ་། །དེའི་སེམས་བསྐྱེད་པར་གྱུར་པ་ཙམ་གྱིས་ངན་སོང་དུ་འགྲོ་བའི་རྒྱུ་མཚན་དེ་དག་ནུབ་པར་འགྱུར་རོ། །བདེ་འགྲོའི་རྒྱུ་མཚན་ཡང་རབ་ཏུ་འབྱུང་བར་འགྱུར་རོ། །མཆོག་ཏུ་གྱུར་པའི་འབྲས་བུ་དེ་དག་རྣམས་ནི་བག་ཡོད་པ་ཡིན་ནོ། །མཆོག་ཏུ་སྡུག་བསྔལ་བར་གྱུར་པའི་འཆིང་བ་རྣམས་ཐམས་ཅད་ཀྱི་དྲུང་ན་ཡང་ལྷག་པར་གྱུར་པའི་འབྲས་བུ་ཡིན་ནོ། །དེ་དག་ནི་བག་མེད་པའི་སྐྱོན་ལྔ་དང་བག་ཡོད་པའི་ཡོན་ཏན་ལྔ་ཡིན་ནོ། །དེ་ནས་དེའི་ཚེ་དུས་བཟངས་དེས། འཁོར་བ་འཇིག་གིས་གསུངས་པའི་ཚིགས་སུ་བཅད་པ་རྗོད་པར་བྱེད་པ། འདོད་པ་རྣམ་པར་སྤངས་པ་ཡི། །བག་ཡོད་སངས་རྒྱས་བསྔགས་པར་མཛད། །རྒ་དང་འཆི་བའི་ཁོག་ཙེ་ཡི། །བག་མེད་པ་ནི་བཙོག་པ་ཡིན། །བག་མེད་སྐྱེ་བོ་གྲོལ་བ་མིན། །བག་མེད་སྡུག་བསྔལ་སྐལ་ལྡན་ཡིན། །བག་མེད་འཆི་བ་དེ་དག་གི། །བློ་དམན་རྣམས་ནི་གཅོད་པར་བྱེད། །བག་ཡོད་པས་ནི་དགེ་རྣམས་ཀྱི། །ལྷ་རྣམས་ཀྱི་ནི་གནས་སུ་འགྲོ། །དེ་ཕྱིར་གང་ཞིག་བག་མེད་པ། །རྗེས་སྟེན་སླར་ཡང་ལྟུང་བ་ཡིན། །བག་མེད་སྐྱེས་བུ་ཐམས་ཅད་ནི། །དེ་ལྟར་འཁོར་བ་ལས་སྒྲོལ་མིན། །གང་གིས་ལུས་ཅན་རྣམ་བསྡམས་པའི། །བག་མེད་ཞགས་པས་ཉེར་འགྲོ་རྣམས། །དོན་མིན་དོན་དང་འདྲ་བ་དང་། །དོན་ཡང་རྟག་ཏུ་དོན་མིན་བཞིན། །བག་མེད་པ་ཡི་སྐྱེས་བུ་ནི། །ཐམས་ཅད་ཕྱིན་ཅི་ལོག་ཏུ་མཐོང་། །འཇིག་རྟེན་དོན་ཡང་མེད་པ་ལ། །ངེས་པར་ལེགས་པ་ག་ལ་ཡོད། །མཁས་པ་བློ་ཡི་ཕ་རོལ་འགྲོས། །བག་མེད་ཀུན་དུ་རབ་མི་བསྔགས། །དེ་ཕྱིར་བག་མེད་པ་ནི་མི་ཡིས་སྟེན་མི་བྱ། །དེ་ནི་ངན་སོང་རྣམས་ཀྱི་དང་པོའི་རྩེ་མོ་ཡིན། །སྐྱེ་གནས་སྟོང་དུ་འགྲོ་བར་བྱེད་པའི་སྡུག་བསྔལ་དེ། །བརྟན་པ་སྲིད་པའི་ཕ་རོལ་མཆོག་ཏུ་འགྲོ་བས་སྤོངས། །དེ་ལྟར་དུས་བཟངས་འདིས་ལྷ་བརྒྱ་སྟོང་དུ་མ་རྣམས་ཀྱིས་ཡོངས་སུ་བསྐོར་བར་གྱུར་པའི་མུ་སུ་ལུན་དྷ་དེའི་མདུན་དུ་ཆོས་བཤད་པར་གྱུར་ཏེ། གཞན་ཡང་ཕན་པ་ལ་རབ་ཏུ་ཞུགས་པར་གྱུར་ཅིང་ལྷ་དང་མི་རྣམས་ལ་ཕན་པར་འདོད་པའི་ཕྱིར་རོ། །གཞན་ཡང་མཁའ་ལྡིང་གི་རྒྱལ་པོ་དེ་ཉིད་ཀྱིས་མུ་སུ་ལུན་དྷ་ལ་ཆོས་ཀྱི་

70-215a

མཆོག་རྣམས་སྟོན་པར་བྱེད་དོ། །ཇི་ལྟར་ལྔ་པོ་འདི་དག་རྣམས་ནི་བག་མེད་པ་སྐྱེས་པའི་གཉེན་པོར་གྱུར་པ་ལ་འདི་ལྟ་སྟེ། འདི་ན་བག་མེད་པའི་སྐྱེས་བུ་རྣམས་ནི་ཐམས་ཅད་ལས་ཁྱད་པར་དུ་སྡུག་བསྔལ་བར་འགྱུར་རོ། །དེ་བག་མེད་པའི་སྐྱོན་རྣམས་གང་དང་གང་གིས་སྡུག་བསྔལ་དང་ལྡན་པར་འགྱུར་རོ། །དེ་སྐྱོན་དང་བཅས་པ་ཡིན་པར་ཤེས་པར་གྱུར་ནས་ཡོངས་སུ་སྤང་བར་བྱ་སྟེ། ཡོན་ཏན་དང་སྐྱོན་དག་ཤེས་པར་གྱུར་ཅིང་ཡོན་ཏན་དང་སྐྱོན་དག་མཐོང་བར་གྱུར་པ་རྣམས་ཀྱིས་དེ་ཡོངས་སུ་སྤངས་པར་གྱུར་པ་ལས་ནི་འདི་དག་དོན་མ་ཡིན་པར་མི་འགྱུར་རོ། །སྡུག་བསྔལ་བར་ཡང་མི་འགྱུར་རོ། །མི་དགེ་བ་མངོན་པར་འཕེལ་བར་ཡང་མི་འགྱུར་རོ། །ཤེས་བཞིན་དུ་ཡང་རྒྱུ་བར་འགྱུར་རོ། །འདི་ནི་བག་མེད་པའི་གཉེན་པོར་གྱུར་པ་གཅིག་ཡིན་ནོ། །གཞན་ཡང་བག་མེད་པའི་གཉེན་པོར་གྱུར་པ་གཉིས་པ་གང་ཞེ་ན། ཡང་དག་པ་ཇི་ལྟ་བའི་དོན་མཐོང་བའོ། །ཡང་དག་པ་མཐོང་བར་གྱུར་པས་ཀྱང་སྐྱེས་བུ་རྣམས་ཀྱིས་ཐམས་ཅད་ངེས་པར་ལེགས་པར་རྟོགས་པར་འགྱུར་ཏེ་དེ་ཁོ་ན་ཉིད་བཞིན་ཁོ་ནར་མཐོང་བར་འགྱུར་རོ། །དེ་ཁོ་ན་ཉིད་རིག་པ་དེ་ནི་བག་མེད་པའི་སྐྱོན་རྣམས་ཤེས་པར་གྱུར་ནས་བག་མེད་པས་ཀུན་དུ་བཀྲི་བར་མི་ནུས་སོ། །གཞན་ཡང་བག་མེད་པའི་གཉེན་པོ་གསུམ་པར་གྱུར་པ་རྣམས་འདི་ལྟ་སྟེ། བག་ཡོད་པ་སྟེན་པར་བྱེད་པ་གང་ཡིན་པ་དེ་དག་རྣམས་ལ་སྟེན་པར་བྱེད་དོ། །དེ་དག་རྣམས་ཀྱི་དྲུང་ནས་ཚུལ་ཁྲིམས་སྲུང་བར་བྱེད་དོ། །སྤྱོད་པ་རྣམས་རྣམ་པར་འགྲང་བར་བྱེད་དོ། །ལུས་ངག་གི་བྱ་བ་རྣམས་ཀྱང་སློབ་པར་བྱེད་དོ། །ཚུལ་ཁྲིམས་དེ་དང་མཉམ་པ་ཡོད་པ་རྣམས་དང་ལྷན་ཅིག་ཏུ་གནས་པར་བྱེད་དོ། །བག་མེད་པ་དེ་དག་ཉིད་ཀྱི་སྐྱོན་རྣམས་ཤེས་པར་གྱུར་ནས་ཡོངས་སུ་སྤོང་བར་བྱེད་པ་རྣམས་ཀྱི་ནི་མཐར་འབྲལ་བར་འགྱུར་རོ། །གཞན་ཡང་བག་མེད་པའི་གཉེན་པོར་གྱུར་པ་བཞི་པ་འདི་དག་ཀྱང་གང་ཞེ་ན་འདི་ལྟ་སྟེ། ཡེ་ཤེས་དང་ཚུལ་ཁྲིམས་དང་ལྡན་པར་གྱུར་པའི་སྐྱེས་བུ་རྣམས་ནི་རྟག་ཏུ་ཡང་དེ་ཉིད་ལ་མངོན་པར་དགའ་བར་གྱུར་པས་བག་མེད་པ་རབ་ཏུ་འཇོམས་སོ། །བག་ཡོད་པ་རབ་ཏུ་སྟེན་པར་བྱེད་དོ། །བག་མེད་པ་རབ་ཏུ་བཅོམ་པར་གྱུར་པ་དེའི་བདེ་བ་རྣམས་ཉེ་བར་འགྱུར་རོ། །སྡུག་བསྔལ་རིང་དུ་བྱས་པར་འགྱུར་རོ། །གཞན་ཡང་དེས་བག་མེད་པའི་སྐྱོན་རྣམས་མཐོང་བར་གྱུར་ཅིང་དེ་དེ་ཁོ་ན་

70-215b

བཞིན་དུ་བག་མེད་པ་རྣམས་སྤོང་བར་བྱེད་དོ། །འདི་ནི་བག་མེད་པའི་གཉེན་པོ་བཞི་པ་ཡིན་ནོ། །གཞན་ཡང་བག་མེད་པའི་གཉེན་པོ་ལྔ་པ་འདི་ལྟ་སྟེ། སྐྱེས་བུ་བག་མེད་པའི་ཉེས་དམིགས་ཅན་རྣམས་ལ་རྒྱལ་པོའམ་རྒྱལ་པོའི་བློན་པོ་རྣམས་ཀྱིས་ཀྱང་རུང་སྟེ་ཆད་པས་གཅོད་པར་བྱེད་པ་རྣམས་ཇི་ལྟ་བ་བཞིན་དུ་མཐོང་བའོ། །དེའི་སྲོག་གི་ཆད་པའམ་དེའི་རང་གི་ཐམས་ཅད་འཕྲོག་པར་བྱེད་པའི་ཆད་པའམ་དེའི་ལུས་སྒྱུར་བར་བྱེད་པའམ་དེའི་ལག་པ་གཅོད་པར་བྱེད་པའམ་རྣམ་པ་དེ་ལྟ་བུའི་ཆད་པ་རྣམས་བག་མེད་པ་ལས་འབྱུང་བར་གྱུར་པ་གང་གི་ཚེ་མཐོང་བ་དེའི་ཚེ་དེ་ལས་གཞན་པའི་བག་མེད་པ་རྣམས་ལ་ཡང་འཇིགས་པར་འགྱུར་རོ། །དེ་འཇིགས་པ་དང་བཅས་པར་གྱུར་པ་ཉིད་ཀྱིས་དྲི་མ་ཅན་བག་མེད་པ་རྣམས་ཡོངས་སུ་སྤོང་བར་བྱེད་དོ། །དེ་བཞིན་དུ་བག་མེད་པ་རྣམས་རབ་ཏུ་འཇོམས་པར་ཡང་བྱེད་དོ། །བག་ཡོད་པ་ཡང་ཀུན་ནས་སྟེན་པར་བྱེད་དོ། །དེ་ལས་རྗེས་སུ་དཔགས་ནས་དེ་སྡིག་པ་རྣམས་མི་བྱེད་དེ་བདག་དམྱལ་བར་སྐྱེ་བར་མ་གྱུར་ཅིག་སྙམ་དུ་བསམས་པའི་ཕྱིར་རོ། །བག་མེད་པ་སྟེན་པར་གྱུར་པའི་ལྷ་དེ་དག་རྣམས་ནི་སྡིག་པ་བྱེད་དོ། །འདི་ནི་བག་མེད་པའི་གཉེན་པོ་ལྔ་པའོ། །དེ་ལྟར་བག་མེད་པ་དེ་དག་རྣམས་ནི་ལྷ་རྣམས་ལ་མཛེས་པ་མ་ཡིན་ལ་མི་རྣམས་ལ་ཡང་མ་ཡིན་ནོ། །མདོ་དེ་དག་ཐོས་ནས་ཀྱང་ལྷ་མང་པོ་རྣམས་མཆོག་ཏུ་ཡིད་བྱུང་བར་གྱུར་ནས་བག་མེད་པ་ཡོངས་སུ་སྤོང་བར་བྱེད་དོ། །མུ་སུ་ལུན་དྷས་ཀྱང་མཁའ་ལྡིང་གི་རྒྱལ་པོ་དེས་བཤད་པ་དེ་རྣམས་ལ་མངོན་པར་དགའ་ཞིང་རྗེས་སུ་ཡི་རང་བར་ཡང་གྱུར་ནས་སླར་ཡང་ལྷའི་ཚོགས་དེ་དག་རྣམས་ཉིད་དང་ཇི་ལྟར་འོངས་པར་གྱུར་པ་ལྟར་ནམ་མཁའ་ལ་འཕགས་ཏེ་དོང་ངོ་། །དེ་དག་རྣམས་ལས་ཀྱང་གཞན་དུ་གྱུར་པའི་ལྷ་ལྷག་མ་རྣམས་ཁ་ཅིག་ནི་རྣམ་པར་ཡངས་པ་དེ་ཉིད་ཀྱི་ནང་ན་རྩེད་མོ་རྩེ་བར་བྱེད་དོ། །ཁ་ཅིག་ནི་ཇི་ལྟར་འོངས་པར་གྱུར་པ་དེ་བཞིན་དུ་སླར་ཡང་ནགས་དང་ཉེ་བའི་ནགས་རྣམས་སུ་ཞུགས་པར་གྱུར་ཅིང་ལྷ་དག་རབ་ཏུ་རྩེ་བར་ཡང་བྱེད་དེ། དེ་སྲིད་དུ་འདོད་པ་སྡུག་པ་ཡིད་དུ་འོང་བ་བྱས་ཤིང་བསགས་པར་གྱུར་པའི་ལེགས་པར་བྱས་པའི་ལས་རྣམས་ཟད་པར་མ་གྱུར་པའི་དུས་དེ་སྲིད་དུ་ལྷའི་རིགས་དེར་རྩེ་བར་བྱེད་ཅིང་དགའ་བར་ཡང་བྱེད་དོ། །དེ་དེ་དག་རྣམས་ཟད་པར་གྱུར་ཅིང་ལྷའི་རིགས་དེ་ལས་ཤི་འཕོས་

70-216a

པར་གྱུར་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བ་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །གལ་ཏེ་ན་འགའ་ཞིག་མི་རྣམས་དང་སྐལ་བ་འཐུན་པར་གྱུར་པ་མིར་སྐྱེས་ན། དེ་མཆོག་ཏུ་སྐྱིད་པ་ཉིད་དུ་འགྱུར་ཏེ། ལས་དེའི་རྒྱུ་འཐུན་པས་ཡིད་གཞུངས་པ་དང་ཤེས་རབ་ཀྱིས་འཚོ་བ་དང་རྒྱལ་པོ་མངོན་པར་འདོད་པ་དང་ཤིན་ཏུ་ཕུན་སུམ་ཚོགས་པར་འགྱུར་རོ། །འགྲོ་བ་དང་ཡང་དག་པར་ལྡན་པའི་ས་རྫོགས་སོ།། །།

གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་དོ། །ཇི་ལྟར་ཡོད་པའི་འཐབ་བྲལ་བ་རྣམས་ཀྱིས་འོད་ཟེར་འཕྲོ་བ་ཞེས་བྱ་བ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་ངོ་། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བར་གྱུར་པ་ནི་སྐྱེས་བུ་དམ་པ་གང་གིས་ཐོས་པའི་དོན་དང་ལྡན་ཞིང་ཚུལ་ཁྲིམས་དང་ལྡན་པར་འགྱུར་ཏེ། མཆོག་ཏུ་གྱུར་པའི་ཡང་དག་པའི་ལྟ་བ་དང་ལྡན་པ་གང་གིས་ཕ་རོལ་ལ་ཡིད་གདུང་བར་མི་བྱེད་པ་དང་དྲང་པོ་དང་ཡིད་དྲང་པོར་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡང་སྤངས་པར་གྱུར་པ་རྣམས་ནི་སྔར་བཞིན་ནོ། །འདོད་པ་ལ་ལོག་པར་གཡེམ་པ་ཡང་རྣམ་པར་སྤངས་པར་གྱུར་པའོ། །དེ་ལྟར་ཡང་ཅུང་ཟད་ཅིག་ཀྱང་བུད་མེད་དག་ལ་ཚུལ་བཞིན་མ་ཡིན་པ་ཡིད་ལ་བྱེད་པར་གྱུར་པས་ལྟ་བར་མི་བྱེད་དེ། འདོད་པ་ལ་ལོག་པར་གཡེམ་པར་གྱུར་པའི་འཇིགས་པ་རྣམས་ཀྱིས་འཇིགས་པའི་ཕྱིར་རོ། །ཤིན་ཏུ་རྣམ་པར་དག་པའི་ལས་ཤིན་ཏུ་རྣམ་པར་དག་པའི་འཚོ་བ་ལས་ཀྱི་མཐའ་རྣམས་ཤིན་ཏུ་རྣམ་པར་དག་པར་གྱུར་པ། དེ་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འོད་ཟེར་འཕྲོ་བ་ཅན་གྱི་སར་སྐྱེ་བར་འགྱུར་རོ། །དེ་ལ་སྐྱེས་པར་གྱུར་པ་ནི་ལྷ་རྫས་ཀྱི་ཡུལ་རྣམས་ལ་ལོངས་སྤྱོད་པར་གྱུར་པའི་བུད་མེད་བརྒྱ་སྟོང་གིས་ཡོངས་སུ་བསྐོར་བ་ལས་ཀྱི་མཐའ་རྣམས་ཡོངས་སུ་དག་པ། འདོད་པའི་ཡོན་ཏན་ལྔའི་རྒྱགས་པས་དབང་པོ་དྲུག་གི་དབང་དུ་སོང་བར་གྱུར་ནས་དེ་ནགས་དང་ཉེ་བའི་ནགས་ཀུན་དུ་བལྟ་བ་ལ་བག་མེད་པ་རྣམས་ཇི་ལྟ་ཇི་ལྟར་ལྷ་དེས་ལྷ་རྫས་ཀྱི་སྲེད་པ་དུ་མ་རྣམས་རྣམ་པ་དུ་མར་མཐོང་བར་གྱུར་པ་དེ་ལྟར་བག་མེད་པར་རྒྱུ་བར་འགྱུར་རོ། །འདི་ལྟར་གྱུར་པ་ཡིན་ཏེ་ལྷ་དེ་ལྷ་རྫས་ཀྱི་ཡུལ་དེ་དག་རྣམས་ཉིད་སྒྲུབ་པ་ལ་ཆེད་ཆེ་བ་ཡོངས་སུ་སྒྲུབ་པ་ལྷག་

70-216b

པར་འགྱུར་རོ། །དེ་དགའ་བར་གྱུར་པའི་ས་གཞི་མཉམ་པ་མནན་ན་ནེམ་པ་བཏེག་ན་འཕར་བ་འཇམ་པོར་གྱུར་པ་རིན་པོ་ཆེ་བདུན་དང་ལྡན་པས་ཤིན་ཏུ་རྣམ་པར་ཕྱེ་བའི་ས་གཞི་ཆ་མཆོག་ཏུ་དགའ་བར་གྱུར་པ་ལ་རབ་ཏུ་འཇུག་པར་བྱེད་དོ། །ས་གཞི་དེ་ནི་རྣམ་པ་དེ་ལྟ་བུ་རྣམས་ཡིན་ཏེ། ཤིང་གང་དག་ལ་ཞོན་པར་གྱུར་པ་དེ་དག་རྣམས་ཀྱང་དེ་ཁོ་ན་བཞིན་དུ་རེག་པར་བཟོད་པར་འགྱུར་རོ། །མཆོག་ཏུ་མཉེན་པར་གྱུར་པ་སྦྱངས་པ་འཇམ་པོའི་གསེར་གྱི་འདབ་མ་དང་འབྲས་བུ་རྣམས་ཇི་ལྟར་འདོད་པར་གྱུར་པའི་རོ་དང་དྲི་དང་ཁ་དོག་དང་ལྡན་པས་ཤིན་ཏུ་ཡང་ལྷ་རྣམས་ཀྱི་ཟས་ཀྱི་རྒྱུར་འགྱུར་རོ། །དེ་ལྟར་ལྷ་དེ་དག་རྣམས་ཉིད་འདི་ལྟར་འགྱུར་ཏེ། གང་གི་ཚེ་བདག་ཅག་རྣམས་འབྲས་བུ་འདི་དག་རྣམས་ལས་མཆོག་ཏུ་རོ་དང་དྲི་དང་ཁ་དོག་དང་རེག་བྱ་རྣམས་ཕུན་སུམ་ཚོགས་པའི་བཏུང་བ་འབྲས་བུ་དེ་དག་ལས་འབབ་པར་གྱུར་མོད། དེ་ནས་སེམས་བསྐྱེད་པ་ཙམ་ཉིད་ན་ལྷ་དེ་རྣམས་ཉིད་ཀྱི་དྲུང་དུ་འབྲས་བུ་བཟང་པོ་དེ་དག་ལས་བཏུང་བ་སྔ་ན་མེད་པ་རོ་དང་ཁ་དོག་གི་ཡོན་ཏན་དང་ལྡན་པ་རབ་ཏུ་འབབ་པའོ། །དེ་ཡང་ལྷས་ནོར་བུའི་རང་བཞིན་གྱི་སྣོད་ལེགས་པར་བཞག་ནས་ལྷ་མོ་དང་བཅས་པ་རྣམས་འཐུང་བར་བྱེད་དོ། །དེ་དག་རྣམས་ཀྱི་བཏུང་བ་དེ་ཡང་དམན་པ་དང་བར་མ་དང་མཆོག་ཏུ་གྱུར་པའི་ཁ་དོག་དང་རོ་དང་དྲིར་འགྱུར་ཏེ། ལས་དུ་མ་རྣམས་དང་འདྲ་བ་ཡིན་པས་ཇི་ལྟར་ལེགས་པར་བྱས་པར་གྱུར་པའི་ལས་རྣམས་ནི་རོས་ཀྱང་སོ་སོར་སྟོན་པར་བྱེད་པ་ལྟ་བུར་འགྱུར་རོ། །དེ་ནས་ལྷ་དེ་དག་རྣམས་བཏུང་བ་དེ་འཐུངས་པར་གྱུར་ནས་གཞན་ཡང་རྒྱགས་པ་དུ་མས་རྒྱུ་བར་བྱེད་ཅིང་བག་མེད་པར་རྒྱུ་བས་བསྲེགས་ནས་ནགས་དང་ཉེ་བའི་ནགས་རྣམས་ལྟ་བའི་གཡོ་འགུལ་གྱིས་བསྲེགས་པས་རབ་ཏུ་གར་བྱེད་པ་དང་གླུ་དང་གར་དང་དགོད་པ་དང་ཕན་ཚུན་དུ་ལྷན་ཅིག་ཏུ་སྐྱོད་པར་བྱེད་པས་གང་ན་ནགས་དང་ཉེ་བའི་ནགས་རྣམས་ཡོད་པ་དེར་ཉེ་བར་འགྲོ་བར་བྱེད་དེ་བལྟ་བར་བྱ་བའི་དོན་དུའོ། །དེ་གང་ཁོ་ན་ནས་ཇི་ལྟར་འགྲོ་བར་བྱེད་པ་དེས་དེ་དེ་ཁོ་ན་ནས་རྣམ་པ་དུ་མར་དཔེ་མེད་པའི་ལྷ་རྫས་ཀྱི་གཟུགས་རྣམས་མཐོང་བར་འགྱུར་རོ། །སོ་སོར་སྟོན་པར་བྱེད་པ་ལྟ་བུར་གྱུར་པའི་རོ་ཡང་མྱོང་བར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་རྟོག་པ་དུ་མར་གྱུར་པའི་རོ་རྣམས་མྱོང་བར་བྱེད་དོ། །དེ་བཞིན་དུ་ཡིད་འཕྲོག་པར་བྱེད་པ་གང་ཡིན་པ་ཁོ་ནའི་དྲི་རྣམས་སྣོམ་པར་བྱེད་དོ། །དེ་ལ་དེས་རྣམ་པ་དུ་མ་དང་རྣམ་པར་

70-217a

རྟོག་པ་དུ་མར་གྱུར་པ་རྣམས་སྣོམ་པར་བྱེད་དོ། །ཡིད་ཀྱི་རྗེས་སུ་འཐུན་པའི་རེག་བྱ་འདོད་པར་གྱུར་པ་རྣམས་གང་དག་ཁོ་ན་ཡིན་པ་ལྷ་རྣམས་ཀྱིས་རེག་བྱ་རེག་པར་འདོད་པ་དེ་ཉིད་རྣམ་པ་དུ་མ་དང་མཆོག་ཏུ་བདེ་བའི་རྗེས་སུ་འཐུན་པ་རྣམས་ལ་རིག་པར་བྱེད་དོ། །ལྷ་སྒྲ་གང་དང་གང་དག་ཉན་པར་འདོད་པ་དེ་ཉིད་རྣམ་པར་རྟོག་པ་དུ་མ་དང་མཉམ་པར་དགའ་བའི་སྒྲ་དུ་མ་རྣམས་ཀྱིས་ཡིད་ཀྱི་རྗེས་སུ་འཐུན་པར་གྱུར་པའི་རྣམ་པར་རྟོག་པ་དུ་མས་ཉན་པར་བྱེད་དོ། །ལྷ་མཆོག་ཏུ་དགེ་བའི་ཚུལ་ཁྲིམས་ཀྱི་འབྲས་བུ་ལ་ཉེ་བར་ལོངས་སྤྱོད་པར་གྱུར་པས། ཡོན་ཏན་རྣམས་ཕུན་སུམ་ཚོགས་པར་གྱུར་པའི་ཡུལ་ལྔ་པོ་རྣམས་ལ་རྣམ་པར་སྤྱོད་དོ། །དེ་དག་དེ་ལྟར་རྣམ་པར་རྒྱུ་ཞིང་རྩེད་མོ་རྩེ་བ་ལ་བློས་ལྷུང་བར་གྱུར་པས་དུས་ཡུན་རིང་པོར་ཡུལ་གྱི་བདེ་བས་ངོམས་པ་མེད་པ་རྣམས་ཀྱིས། དེ་ནས་མངོན་པར་དགའ་བའི་ནགས་ཞེས་བྱ་བའི་ནགས་མཐོང་བར་གྱུར་པ་ལ་ཤིང་ལྗོན་པ་བརྒྱ་སྟོང་དུ་མ་དང་ལྡན་པ་ཉེ་འཁོར་ན་ཡང་ཉེ་བའི་ནགས་ཀྱིས་ཀུན་དུ་བརྒྱན་པའོ། །མངོན་པར་དགའ་བའི་ནགས་དེ་ན་ཡང་དགའ་བ་འདི་དག་རྣམས་ཡོད་དེ། དེ་དག་རྣམས་ནི་ཇི་ལྟར་སོ་སོ་ཐ་དད་པར་རྩ་བ་དང་ཡལ་ག་དང་ཡལ་ག་ཕྲ་མོ་དག་དང་ལྡན་པར་གྱུར་པ་ཡིན་ལ་དེ་ལ་ངོས་གཅིག་གི་ཉེ་འཁོར་ཀུན་ནས་མཆོག་ཏུ་དཀར་བ་དང་། མཆོག་ཏུ་དཀར་བར་སྣང་བར་འགྱུར་བས་གངས་ཀྱི་མདོག་དང་ཞད་འདྲ་བའི་ནགས་ནི་དངུལ་གྱི་ལྗོན་ཤིང་གི་ནགས་ཞེས་བྱ་བ་ཡིན་ཏེ། ཉེ་འཁོར་དེ་ནི་དེ་བཞིན་དུ་ཀུན་ཏུ་སྣང་བར་བྱེད་དོ། །ཇི་ལྟར་འཛམ་བུའི་གླིང་དུ་ཟླ་བ་རྒྱས་པར་གྱུར་པ་དེ་བཞིན་དུ་འོད་ཟེར་རྣམས་ཡིན་ནོ། །ནགས་དེར་གཏོགས་པའི་ཤིང་རེ་རེའི་འོད་ཀྱང་དེ་བཞིན་དུ་འགྱུར་ཏེ། ཡུལ་ཐམས་ཅད་ལས་ཀྱང་མཆོག་ཏུ་དགའ་བར་གྱུར་པ་དེས་མིག་སྔར་དགའ་བར་གྱུར་པའི་འོད་ཀྱིས་སྡུག་པ་འཛིན་པ་སྐྱེད་པའོ། །གཞན་ཡང་ལོགས་གཞན་ནི་ཀར་ཀེ་ཏ་ན་བཞིན་དུ་ཉེ་བར་མཛེས་པར་གྱུར་པ་སྟེ། མཆོག་ཏུ་དམར་བའི་ཚོགས་སུ་གྱུར་པ་འོད་དམར་པོ་རྣམས་ཀྱིས་རྣམ་པར་བརྒྱན་པ་འདབ་མ་དམར་པོ་རྣམས་ལ་བྱ་དམར་པོའི་ཚོགས་ཀྱིས་ཀུན་དུ་བརྗོད་པར་གྱུར་པས་མངོན་པར་དགའ་ཞིང་རྣམ་པར་སྣང་སྟེ་རྣམ་པར་རྟོག་པ་དུ་མར་གྱུར་པ་རྣམས་ཐམས་ཅད་ལས་མཆོག་ཏུ་དམར་བར་སྣང་བས་དམར་བར་གྱུར་པའི་ནགས་དེས་ནམ་མཁའ་རྣམ་པར་གསལ་བར་བྱེད་དོ། །རྟག་ཏུ་མངོན་པར་དགའ་

70-217b

བའི་ལོགས་གཞན་གསུམ་པ་དེའི་ལོགས་ཀྱི་ཉེ་འཁོར་ན་ཉེ་བའི་ནགས་དག་དང་ལྡན་པ་ཁ་དོག་གཅིག་ཏུ་གྱུར་པས་ཀྱང་ཤིན་ཏུ་ཁྱད་པར་དུ་འབར་བར་བྱེད་པར་གྱུར་པ་ནི་མཐིང་ག་རབ་ཏུ་དང་བའི་མདོག་དང་ལྡན་པས་ཉེ་འཁོར་ཀུན་དུ་འོད་ཟེར་གྱིས་སྣང་བར་བྱེད་དོ། །དེའི་འོད་རྣམས་ཀྱིས་ཀྱང་དེ་ལས་གཞན་པའི་ནམ་མཁའི་དཀྱིལ་རྣམས་ཀྱང་དེ་བཞིན་དུ་སྔོན་པོས་ཤིན་ཏུ་བར་ཡང་མཛེས་སོ། །འཛམ་བུ་གླིང་པའི་ནམ་མཁར་ཇི་ལྟ་བ་བཞིན་དུ་བཻ་ཌཱུརྱ་དེའི་འོད་རྣམས་ཀྱིས་དེ་དག་རྣམས་མཛེས་པར་བྱེད་དོ། །རྟག་ཏུ་མངོན་པར་དགའ་བའི་ནགས་དེ་ན་ཕལ་ཆེ་བ་ཉིད་དུ་གཞན་ཡོད་པ་ནི་མ་ཡིན་གྱི་ཉེ་བའི་ནགས་ཤེལ་གྱི་རང་བཞིན་དུ་གྱུར་པ་ཉེ་འཁོར་ན་མཆོག་ཏུ་དང་བར་གྱུར་པའི་འོད་རྣམས་ཀྱིས་རྣམ་པར་སྣང་བར་བྱེད་དོ། །རྩ་བ་དང་འདབ་མ་དང་ཡལ་ག་དང་ཡལ་ག་ཕྲ་མོ་དང་ལྡན་པས་ཆེན་པོར་གྱུར་པ་ཆུ་ཀླུང་དང་འབབ་ཆུ་དང་རྫིང་བུ་ཕུན་སུམ་ཚོགས་པ་དུ་མ་དང་ལྡན་པར་གྱུར་པའོ། །ནགས་ཆེན་པོ་དེ་ཉིད་ཀྱི་ལོགས་གཞན་ལ་ཡང་ནགས་རྣམ་པར་སྣང་བར་བྱེད་པ་ནི་ཨིན་དྲ་ནཱི་ལའི་ལྗོན་ཤིང་གི་ནགས་ཡིན་ཏེ། རྩ་བ་དང་ཡལ་ག་དང་འདབ་མ་དང་ཟེ་བ་དང་ལྡན་པར་གྱུར་པ་ཉེ་འཁོར་རྣམས་ནི་མཆོག་ཏུ་སྔོ་བ་དང་ལྡན་པས་ཡིད་འཕྲོག་པར་གྱུར་པའི་འཁྲི་ཤིང་གི་ཤིང་རྣམས་དང་ལྡན་པ་ལ་རྣམ་པ་སྣ་ཚོགས་པར་ཡིད་འཕྲོག་པར་བྱེད་པའི་བདེ་བའི་སྒྲ་དང་ལྡན་པར་གྱུར་པའི་བྱ་རྣམས་ཀྱིས་གང་བ། པད་མའི་རྫིང་བུ་རྣམ་པ་དུ་མ་དག་གིས་ཀྱང་ཉེ་བར་མཛེས་པར་གྱུར་པའི་ཉེ་བའི་ནགས་རྣམས་ཀྱི་རྣམ་པར་སྣང་བར་བྱེད་དོ། །དེ་ན་འོད་ཟེར་འཕྲོ་བའི་ལྷ་དེ་རང་གིས་ལས་རྣམ་པར་འཕྲོ་བའི་འོད་ཀྱིས་ཀུན་ནས་བརྒྱན་པའི་ལུས་ཅན་རྣམས་གང་ན་རྟག་ཏུ་མངོན་པར་དགའ་བའི་ནགས་ཡོད་པ་དེར་ཉེ་བར་ལེགས་པར་འགྲོ་བར་བྱེད་ལ། བལྟ་བར་འདོད་པས་དང་རྩེ་བར་འདོད་པའི་ཕྱིར་ཏེ། ནགས་དང་ཉེ་བའི་ནགས་དེ་དག་རྣམས་སུ་རྩེད་མོས་རྒྱུ་བར་འདོད་པ་རྣམས་སྲེད་པའི་རྒྱན་རྒྱུན་གྱིས་ཀུན་ནས་བཅིངས་ཤིང་འདོད་པའི་ཡོན་ཏན་ལྔས་ངོམས་པ་མེད་པས་ཀུན་ནས་དྲངས་ནས་ལྷ་དེ་སླར་ཡང་ཀུན་དུ་དགའ་བར་གྱུར་པ་དང་རྩེ་བར་གྱུར་པས་གང་ན་རྟག་ཏུ་མངོན་པར་དགའ་བའི་ནགས་ཞེས་བྱ་བའི་མིང་ཅན་དེར་དེ་ཉེ་བར་འགྲོ་བར་བྱེད་དོ། །ནགས་དེའི་ནང་ན་ཡང་ཐམས་ཅད་རྣམ་པར་བཀྲ་བར་གྱུར་པ་སྟེ། རྣམ་པ་སྣ་ཚོགས་པའི་ཁ་དོག་གི་མེ་ཏོག་དུ་མ་རྣམས་

70-218a

དང་ལྡན་པ་དང་འབྲས་བུས་གང་བར་གྱུར་པའི་ནགས་དེ་ཡང་ལྗོན་ཤིང་མཆོག་ཏུ་དྲི་ཞིམ་པ་དང་ལྡན་པ་རྣམས་ཀྱིས་ཁྱབ་པར་གྱུར་པའོ། །བུང་བ་རྣམས་འབབ་པར་གྱུར་པས་ཀྱང་མེ་ཏོག་གི་འཁྲི་ཤིང་རྣམས་མངོན་པར་ཁྱབ་པ་དང་རྟག་ཏུ་ཡིད་འཕྲོག་པར་བྱེད་པའི་བྱའི་ཚོགས་དག་གིས་ཀྱང་བསྟེན་པར་གྱུར་པའི་འཁྲི་ཤིང་ཀུན་ནས་དུད་པ་རྣམས་ཀྱིས་ཉེ་བར་མཛེས་པ་དང་འོད་ཟེར་གྱི་ཕྲེང་བ་ཀུན་དུ་འདྲེས་པར་གྱུར་པ་འབབ་ཆུ་དང་ཆུ་གཤོར་དང་རྫིང་བུ་དང་ཁང་བུ་དང་ཆུ་ཚག་ཚིག་དང་ཤིང་གི་ཚང་ཚིང་དང་འཁྲི་ཤིང་གི་ཁང་པ་དང་མེ་ཏོག་གི་འབྱུང་གནས་རྣམས་ཀྱིས་ཉེ་བར་མཛེས་པར་གྱུར་པ་སྟེ། རྣམ་པར་རྟོག་པ་དུ་མས་ནགས་ཀྱི་རྒྱལ་པོ་རྣམ་པར་བཀྲ་བ་འཁྲི་ཤིང་ཀུན་ནས་འཁྲིས་པས་དགའ་བའི་ས་གཞི་ཤིན་ཏུ་དགའ་བར་གྱུར་པས་ཤིན་ཏུ་ཡང་རྣམ་པར་སྣང་ངོ་། །ལྷའི་ཚོགས་གཞན་དག་བརྒྱ་ཕྲག་རྣམས་ཀྱིས་ཀྱང་ལན་ཅིག་མ་ཡིན་པར་བསྟེན་པར་གྱུར་པ་འཁྲི་ཤིང་གི་ཁང་པ་དང་པད་མའི་རྫིང་བུ་དང་། ཆུ་ཀླུང་གི་ངོས་དང་། འབབ་ཆུ་དང་སྨན་དང་ལྗོངས་དང་། ལྗོན་ཤིང་གི་ཚང་ཚིང་རྣམས་སྟེན་པར་གྱུར་པས་ཆེས་དགའ་བར་གྱུར་པ་གླུ་དང་། གར་དང་དགོད་པ་དང་འགྱིང་བ་དང་། རྒྱན་ཆའི་སྒྲས་ཡིད་འཕྲོག་པར་གྱུར་པས་རབ་ཏུ་གླུ་ལེན་པ་བཞིན་དུ་ནགས་དེ་ཉེ་བར་རྣམ་པར་སྣང་ངོ་། །བདེ་བའི་དོན་དུ་ནགས་ཀྱི་མེ་ཏོག་རྣམས་རབ་ཏུ་གཡོ་བར་གྱུར་པ་ནི་རླུང་ལེགས་པར་རབ་ཏུ་གཡོ་བས་མེ་ཏོག་གི་རྒྱན་རྒྱུན་རྣམས་འཕྱང་ཞིང་རབ་ཏུ་སྐྱོད་པར་བྱེད་པར་གྱུར་པ་རྣམས་ནི་རབ་ཏུ་གར་བྱེད་པ་བཞིན་དུ་ནགས་དེ་དག་རྣམས་ཐམས་ཅད་ཆེས་ལྷག་པར་རྣམ་པར་སྣང་བར་གྱུར་པས་ལྷམ་མེའོ། །དེ་ནས་ལྷ་དེ་དག་རྣམས་ནགས་དེར་ཞུགས་པར་གྱུར་པ་དང་། ཡིད་ཤིན་ཏུ་ངོ་མཚར་ཞིང་ཡིད་ཆེས་རབ་ཏུ་རངས་པར་ཡང་གྱུར་ནས་ཕྱིར་ཞིང་ཉིད་ཀྱང་ཀུན་དུ་རྩོམ་པ་ལྟ་བུར་གྱུར་པའི་ཡིད་ཀྱིས་ཕན་ཚུན་གྲོགས་བྱས་པར་གྱུར་ནས་རྒྱགས་པ་ལ་དོན་གཅིག་པ་རྣམས་གར་བྱེད་དོ། །དགོད་པར་བྱེད་དོ། །གླུ་ལེན་པར་བྱེད་དོ། །རྟག་ཏུ་ཡང་ཡུལ་རྣམས་ལ་ཕྱོགས་པར་གྱུར་པའི་ཡིད་དང་བག་མེད་པ་ལ་འགྲོ་བར་བྱེད་པའི་ཡིད་ཀྱིས་ནགས་ཀྱི་གསེབ་རྣམས་སུ་རྟག་ཏུ་ལྷ་མོ་རྣམས་དང་རྩེ་བར་བྱེད་དོ། །དེ་དེ་ལྟར་རྩེ་བར་གྱུར་པས་ནགས་ནས་ནགས་རྣམས་སུ་དགའ་

70-218b

བར་གྱུར་པ་ལས་གལ་ཏེ་ཤེད་ན་མན་དཱ་ར་བའི་ཚལ་དུ་ཕྱིན་ཏེ། རིན་པོ་ཆེ་བདུན་གྱིས་ཉེ་བར་སྤྲས་པར་གྱུར་པའི་བཅུད་དུ་གྱུར་ཅིང་སྙིང་པོར་གྱུར་པ་ནགས་དེའི་རྒྱལ་པོ་ལྟ་བུར་གྱུར་པ། ཉི་མ་བརྒྱ་བས་ལྷག་པའི་འོད་ཟེར་རྣམས་ཀྱིས་རྣམ་པར་མཛེས་པར་གྱུར་པའི་པད་མའི་རྫིང་བུའི་དབུས་སུ་འགྲོ་བར་བྱེད་དེ། དེ་ནས་ཡང་མན་དཱ་ར་བའི་ཤིང་ལྗོན་པ་ལ་རྣམ་པར་བཀྲ་བ་ཞེས་བྱ་བའི་རྨ་བྱའི་རྒྱལ་པོ་རབ་ཏུ་གནས་སོ། །ཐིག་ལེ་བདུན་གྱིས་རྣམ་པར་བཀྲ་བར་གྱུར་པའི་སྒྲོ་མགྲིན་པའི་དབྱངས་ཤིན་ཏུ་སྙན་པ་དང་ལྡན་པས་ནགས་མ་ལུས་པ་རྣམས་གང་བར་བྱེད་དེ། བག་མེད་པའི་ལྷ་རྣམས་ཀྱི་བག་མེད་པ་གདུལ་བར་བྱ་བའི་དོན་དུ་སྨོན་ལམ་གྱི་དབང་གིས་བྱང་ཆུབ་སེམས་དཔའ་དེར་སྐྱེས་པ་ཡིན་ཏེ། ལྷ་དེ་དག་རྣམས་ནི་ཡུལ་ལྔའི་མེ་རྣམས་ཀྱི་དབུས་སུ་སོང་བའི་ཕྱིར་ན་འདོད་ཆགས་ཀྱི་མེས་འདི་ན་སྲེག་པར་གྱུར་པ་རྣམས་ཀུན་དུ་མངོན་པར་མཐོང་ནས། ལྗོན་ཤིང་གི་ཡལ་གའི་བར་དུ་སོང་ནས་རབ་ཏུ་བརྟན་པའི་འགྲོས་ཀྱིས་རྗེས་སུ་ཐུགས་བརྩེ་བར་གྱུར་པས་ལྷ་དེ་དག་ལ་འདི་སྐད་ཅེས་སྨྲས་སོ། །ལྷ་འདི་དག་རྣམས་ནི་ངེས་པ་ཁོ་ནར་ཤིན་ཏུ་བག་མེད་པ་རྣམས་ཀྱི་ཡང་མཆོག་ཏུ་གྱུར་པས་ལྟུང་བར་འགྱུར་བ་ནི་ཤིན་ཏུ་མ་གོ་བ་ཡིན་ནོ། །དེ་དག་རྣམས་ཀྱིས་བདེ་བ་འདི་དག་རྣམས་ལས་ཤིན་ཏུ་འདའ་བར་འགྱུར་ཏེ། འདི་དག་རྣམས་སྐད་ཅིག་པ་ཡིན་ཞིང་བརྟན་པ་མ་ཡིན་པའི་ལྷ་རྣམས་ཀྱི་བདེ་བ་ཐམས་ཅད་ནི་རབ་ཏུ་ལྟུང་བར་འགྱུར་ཏེ། རི་གཟར་པོའི་ཆུའི་བང་དང་འདྲ་བར་ཤིན་ཏུ་འཇུག་པར་འགྱུར་བ་ཡིན་ནོ། །དེ་དག་རྣམས་རྣམ་པ་ཐམས་ཅད་དུ་ཡང་མི་གོ་བར་བག་མེད་པའི་ཕྱིར་ན་ཆེས་ལྷག་པར་སྲེད་པ་རྣམས་དོན་དུ་གཉེར་བར་བྱེད་དོ། །དེ་ནས་དེའི་ཚེ་རྣམ་པར་བཀྲ་བའི་རྨ་བྱའི་རྒྱལ་པོ་དེས་ཚིགས་སུ་བཅད་པ་བརྗོད་པ། ཇི་ལྟར། རྣམ་པ་སྣ་ཚོགས་རྨི་ལམ་དོན། །ཆུ་ཡི་ཆུ་བུར་དང་འདྲ་བ། །དྲི་ཟའི་གྲོང་ཁྱེར་དང་མཚུངས་པའི། །ལས་ལ་ལྷ་རྣམས་ལྟུང་བ་ཡིན། །སྲེད་པ་སྐྱེད་བྱེད་ལྟར་གྱུར་པ། །མཐར་ནི་རྣམ་པར་འཇོམས་བྱེད་དང་། །འོད་བྱེད་རྣམ་པར་ཡངས་པ་ཡིན། །འདོད་པ་ལ་ནི་ལྷ་ལྟུང་ངོ་། །ཤིན་ཏུ་མྱུར་བར་བྲག་བར་ཆུ། །ཤུགས་ཀྱིས་འབབ་པར་གྱུར་ལྟ་བུའི། །ངན་སོང་རྣམ་པ་ལྔ་པོར་ཡང་། །ལྷ་ནི་འདོད་པས་སྒྱུར་བ་ཡིན། །ཤིན་ཏུ་གཡོ་བའི་རླུང་ཤུགས་ཀྱིས། །གཡོ་བའི་རླབས་ཀྱི་ཆུ་ཟླ་དང་། །ཟོ་ཆུན་

70-219a

འཁོར་མོའི་ལིམ་ལོག་ལྟའི། །འདོད་པ་ལ་ནི་ལྷ་རྣམས་ལྟུང་། །གློག་དང་ཟོ་ཆུན་འཁོར་མོ་མཚུངས། །སྨིག་རྒྱུ་དང་ཡང་མཚུངས་པ་དང་། །དབུ་བ་བཞིན་ཡང་སྙིང་པོ་མེད། །འདོད་པ་ལ་ནི་ལྷ་རྣམས་ལྟུང་། །གླང་ཆེན་རྣ་བ་གཡོ་བ་དང་། །ཆུ་ཤིང་ལོ་མ་མཚུངས་པ་ཡི། །འཕགས་མིན་སྐྱེ་བོ་ཀུན་དགའ་བའི། །རྔ་སྒྲ་ལ་ནི་ལྷ་རྣམས་ལྟུང་། །ཀིམ་པ་ཀ་ཡི་འབྲས་བུ་མཚུངས། །ཉ་མཆིལ་ཟས་ཀྱི་རིགས་ཅན་དང་། །སྒྱུ་མ་བཞིན་དང་མི་རྟག་པའི། །འདོད་པ་ལ་ནི་ལྷ་རྣམས་ཞུགས། །དགའ་བར་གྱུར་པའི་བུད་མེད་ཀྱང་། །འཇིགས་བཅས་ཉེ་བར་འཚེ་བ་དང་། །ལྔ་རྣམས་ཤིན་ཏུ་སྟོང་པ་དང་། །གཡོ་བར་བྱེད་པའི་ཁྱད་པར་ཅན། །བཏུང་བ་མངར་པོ་དེ་དག་གི། །འདོད་པ་ལ་ནི་ལྷ་རྣམས་ལྟུང་། །སྲིད་པའི་འཆིང་བའི་རྒྱུར་གྱུར་པའི། །བག་མེད་གཅིག་པུའི་རོ་ཤེས་པའི། །ངན་སོང་མྱུར་དང་མི་བཟད་པའི། །འདོད་པ་ལ་ནི་ལྷ་རྣམས་ལྟུང་། །དགའ་བར་གྱུར་པའི་བུད་མེད་ནི། །འཇིགས་བཅས་ཉེ་བར་འཚེ་བ་དང་། །དུག་དང་མེ་དང་མཚོན་འདྲ་བའི། །འདོད་པ་ལ་ནི་ལྷ་རྣམས་ལྟུང་། །དེ་རྟག་ཏུ་མངོན་པར་དགའ་བའི་ནགས་སུ་ཞུགས་པར་གྱུར་པའི་ལྷ་དེ་དག་རྣམས་ལ་དེས་རྗེས་སུ་སྟོན་པར་བྱེད་དོ། །རྣམ་པར་བཀྲ་བའི་རྨ་བྱའི་རྒྱལ་པོ་དེ་མཆོག་ཏུ་དགེ་བའི་ཀུན་ཏུ་རྟོག་པ་དང་ཡང་དག་པར་ལྡན་པར་གྱུར་པའི་སྨོན་ལམ་གྱི་དབང་གིས་ལྷའི་རིས་དེ་ཉིད་དུ་སྐྱེས་པར་གྱུར་ལ། དེས་དེ་དག་རྣམས་མིར་གྱུར་པ་གང་ཡིན་པ་ན་དེ་དག་གིས་མཐོང་བའི་དངོས་པོ་འདྲ་བ་དེ་རྣམས་ཀྱི་དཔེས་འཇལ་བར་བྱེད་ཀྱི། ལྷ་རྫས་རྣམས་ཀྱིས་ནི་མ་ཡིན་ཏེ། རྒྱུ་གང་གིས་ལྷ་དེ་དག་རྣམས་ཀྱིས་ཅུང་ཟད་ཐོས་པར་གྱུར་པས་སྐྱེ་བ་གཞན་རྣམས་རྗེས་སུ་དྲན་པར་གྱུར་ཅིང་། དེ་ལས་ཀྱི་འབྲས་བུ་དེ་དག་རྣམས་རྗེས་སུ་དྲན་པར་གྱུར་ནས་རྟག་ཏུ་སྒོམ་པར་བྱེད་པ་དང་། དེ་ཤིན་ཏུ་ལྷག་པར་ཡང་འདོད་པ་རྣམས་ལ་སྒྲུབ་པར་མི་བྱེད་པ་དང་། དེ་ལྟར་བྱས་པས་ཀྱང་མི་བཞིན་དུ་རྟག་ཏུ་སོ་སོར་འགྱོད་པ་དང་ལྡན་པ་དང་། འདོད་པའི་ཉེས་དམིགས་རྣམས་ཀྱང་སྟེ། ལེགས་པར་བཤད་པ་རྣམས་ལྷ་དེ་དག་ཁ་ཅིག་གིས་ཐོས་པར་གྱུར་ནས་སྐྱེ་བ་

70-219b

གཞན་དག་དྲན་པ་དང་ལྡན་པར་གྱུར་ཏོ། །དེ་ལས་དེས་ལས་རྣམས་ཀྱི་འབྲས་བུ་རྗེས་སུ་དྲན་པར་གྱུར་ནས་ཡུད་ཙམ་ཞིག་འདོད་པ་རྣམས་ལ་བག་མེད་པ་དང་ལྡན་པར་མི་བྱེད་དོ། །དགེ་བ་རྗེས་སུ་དྲན་པ་ཡང་ཀུན་ཏུ་སྐྱེས་པར་འགྱུར་རོ་དེ་དག་རྣམས་ཀྱིས་འདིར་ཡུད་ཙམ་ཅིག་ཕན་པར་འགྱུར་བ་དང་བདེ་བར་འགྱུར་བ་དང་སྐྱེ་བ་གཞན་བརྒྱ་སྟོང་འཕེན་པར་བྱེད་པ་རྣམས་ཀྱང་ཀུན་ཏུ་བྱུང་བར་གྱུར་པ་ནི་གཞན་ལ་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་རྣམ་པར་བཀྲ་བ་དེས་ཚིགས་སུ་བཅད་པ་དེ་དག་རྣམས་བཤད་པའི་རྒྱུས་བྱས་པ་ཡིན་ནོ། །དེ་ནས་སླར་ཡང་དབང་པོ་དེ་ཉིད་ཀྱིས་ཀུན་ནས་ཁྲིད་པར་གྱུར་ནས་ནགས་དེ་ཉིད་ཀུན་ཏུ་ལྟ་བར་རྩོམ་པར་བྱེད་དེ། དེ་དག་རྣམས་ཀྱི་མགོ་བོ་ལ་པད་མའི་ཕྲེང་བ་ཅན་རང་གི་འོད་དང་ལྡན་པ་ལྷ་རྫས་ཀྱི་རྒྱན་གྱིས་ཀུན་ནས་བརྒྱན་པ་རྔ་སྐད་ཡན་ལག་ལྔ་དང་ལྡན་པས་ཀུན་ནས་བསྒྲགས་པའི་སྒྲའི་རྒྱགས་པས་རྒྱགས་པ་རྣམས་སོ། །ནགས་དེ་ན་ནི་རབ་ཏུ་ཕལ་ཆེ་བར་གྱུར་པའི་ཤིང་ལྗོན་པ་དང་། འབྲས་བུ་དང་ཆུ་ཀླུང་དང་འབབ་ཆུ་དང་རྫིང་བུ་དང་ཆུ་མིག་རྣམས་ཕུན་སུམ་ཚོགས་པར་གྱུར་པ་རྣམས་ཤིན་ཏུ་ཁྱད་པར་དུ་འཕགས་པར་ཡིད་དགའ་བར་གྱུར་པ་རྣམས་མཐོང་ངོ་། །ལྷ་རྣམས་བག་མེད་པར་གྱུར་པ་ལ་རོ་གཅིག་ཏུ་བྱས་ནས་སྐྱེ་བ་དང་རྒ་བ་དང་འཆི་བའི་འཇིགས་པ་དང་རྣམ་པར་བྲལ་བར་གྱུར་པས། དེ་དག་རྣམས་དེ་ལྟར་གར་བྱེད་པར་གྱུར་ཅིང་། མེ་ཏོག་གི་ཕྲེང་བའི་ནགས་ཞེས་བྱ་བའི་ནགས་གཞན་དུ་ལེགས་པར་རྗེས་སུ་ཕྱིན་པར་གྱུར་ཏོ། །ནགས་དེ་ན་ཡང་ཤིང་ཤཱ་ལིའི་འཁྲི་ཤིང་བརྒྱ་སྟོང་དུ་མ་དང་ལྡན་པ་ཤིང་དང་མེ་ཏོག་དུ་མ་ཀུན་ཏུ་འབྱུང་བར་འགྱུར་བ་རྣམས་ཀྱི་མདོག་དང་དྲི་དང་དབྱིབས་དང་འདབ་མ་དང་མྱུ་གུ་དང་ཟེའུ་འབྲུར་གྱུར་པའི་མེ་ཏོག་རྣམས་ཀྱིས་ཉེ་བར་མཛེས་པར་བྱས་པ། མེ་ཏོག་དེ་དག་རྣམས་ཐམས་ཅད་ནི། འཁྲི་ཤིང་ལ་ལེགས་པར་རབ་ཏུ་བརྒྱུས་པ་རྣམས་ཡིན་ནོ། །དེ་དག་རྣམས་ཀྱི་ནགས་དག་ཅིག་ན་ཡོད་པ་རྣམས་ནི་རིན་པོ་ཆེ་བདུན་གྱི་རང་བཞིན་དུ་གྱུར་པའི་རྣམ་པར་བཀྲ་བའི་གཟུགས་དང་སྒྲ་མཆོག་ཏུ་སྙན་པར་གྱུར་པའི་དབྱངས་རྣམ་པ་དུ་མ་དང་ལྡན་པའི་བུང་བ་རྣམས་ཀྱིས་ཉེ་བར་མཛེས་པ་དང་། མེ་ཏོག་གི་ཕྲེང་བའི་ནགས་དེ་ན་རྣམ་པར་

70-220a

འགྱུར་བ་དུ་མའི་མེ་ཏོག་གི་ཕྲེང་བ་རྣམས་ཀྱིས་ལྷ་དེ་དག་རྣམས་རྣམ་པ་སྣ་ཚོགས་པའི་རྩེད་མོ་རྩེ་བར་བྱེད་དོ། །དེ་དེ་ལྟར་མཛེས་པར་གྱུར་པ་ལས་ཀྱང་སླར་ཡང་བཅུ་འགྱུར་བས་ཀྱང་ཆེས་ལྷག་པར་མཚུངས་པའི་ལྷ་མོ་རྣམས་ཀྱིས་མཛེས་པར་གྱུར་ཏོ། །ལྷ་མོ་རྣམས་ཀྱང་མེ་ཏོག་གི་ཕྲེང་བའི་ནགས་ན་ཆེད་ཆེར་གྱུར་པས་ཕན་ཚུན་དུ་གནོད་པ་དང་བྲལ་བར་གྱུར་ནས་དོན་གཅིག་ཏུ་གྱུར་པའི་ནགས་དང་ཉེ་བའི་ནགས་ཀྱི་འོད་ཀྱི་རང་བཞིན་སྒྲོན་མའི་ཤིང་གི་གསེབ་རྣམས་ཀྱི་མེ་ཏོག་འཐོག་པར་བྱེད་དོ། །རྣམ་པ་དུ་མར་གྱུར་པའི་མེ་ཏོག་རྣམས་ཀྱིས་གང་འགའ་ཞིག་གི་དྲི་ནི་དཔག་ཚད་ལྔར་འགྲོའོ། །ཁ་ཅིག་གི་བཅུར་རོ། །ཁ་ཅིག་གི་ནི་ཉི་ཤུར་རོ། །ཁ་ཅིག་གི་ནི་དཔག་ཚད་སུམ་ཅུ་རྩ་གཉིས་སུ་དྲི་རབ་ཏུ་རྒྱུའོ། །དེ་ལྟར་ནགས་དེ་ན་མཆོག་ཏུ་དྲི་ཕུན་སུམ་ཚོགས་པར་གྱུར་པའི་རྣམ་པ་དུ་མའི་མེ་ཏོག་རྣམས་དང་ཡང་ཉེ་བར་ལྡན་པས་ལྷ་མོ་དང་ལྷ་དག་རྒྱགས་པས་ཐམས་ཅད་རྩེ་བར་གྱུར་ཅིང་དགོད་པར་གྱུར་པས་གང་ན་བག་མེད་པའི་ཆུ་ཞེས་བྱ་བའི་ཆུ་ཀླུང་དེར་འགྲོའོ། །བཏུང་བ་དེ་ཡང་སྒྲ་དང་རེག་བྱ་དང་རོ་དང་གཟུགས་ཕུན་སུམ་ཚོགས་པར་འབབ་བོ། །དེ་མཐོང་བར་གྱུར་ནས་ལྷ་དེ་དག་རབ་ཏུ་དགའ་བའི་ཡིད་ཀྱིས་འཐུང་བར་འདོད་པར་གྱུར་ནས་ཆུ་ཀླུང་གི་འགྲམ་དུ་འཁོད་དོ། །སྐོམ་པར་གྱུར་ནས་ཀྱང་དེ་དག་རྣམས་ཀྱིས་འཐུངས་པར་ཡང་གྱུར་ཏོ། །རྟག་པར་རྒྱགས་པ་ཞེས་བྱ་བའི་བྱ་བག་མེད་པའི་ཆུ་ཀླུང་དེ་ཉིད་ཀྱི་འགྲམ་ན་རབ་ཏུ་གནས་སོ། །དེས་ཚིགས་སུ་བཅད་པ་བརྗོད་པ། ཇི་ལྟར། བག་མེད་ཆུ་བོར་ཀུན་ཏུ་ནུབ། །ཡུལ་རྣམས་ཀྱིས་ནི་ཀུན་ཏུ་ཁྲིད། །ཡིད་ནི་རྣམ་པར་རྨོངས་བྱེད་པ། །མྱོས་བྱེད་བཏུང་བས་ཡང་ཅི་བྱ། །ཡུལ་གྱི་མེ་ཡིས་བསྲེགས་པ་ཡིས། །དོན་དང་དོན་མིན་མི་ཤེས་ཕྱིར། །ནགས་དང་ཉེ་ནགས་སུ་བརྐམ་པ། །མྱོས་བྱེད་བཏུང་བས་ཀྱང་ཅི་བྱས། །དེ་ལྟར་རྟག་པར་རྒྱགས་པའི་བྱ་དེས་མཆོག་ཏུ་མྱོས་བྱེད་ཀྱི་བཏུང་བ་ལ་ཀུན་ཏུ་ཆགས་པར་གྱུར་པ་རྣམས་མངོན་པར་མཐོང་ནས་རྗེས་སུ་འདོམས་པར་བྱེད་པའི་ཚིགས་སུ་བཅད་པ་བརྗོད་དེ། དེ་དག་རྣམས་ཀྱིས་མ་ཐོས་ནས་སླར་ཡང་མྱོས་བྱེད་དེ་ཉིད་འཐུང་བར་བྱེད་དོ། །མཆོག་

70-220b

ཏུ་རངས་པའི་ཡིད་ཅན་འོད་ཀྱི་ཕྲེང་བ་མཆོག་དང་ལྡན་པ་རྣམས་དེ་མེ་ཏོག་གི་ཕྲེང་བའི་ནགས་དེར་ཡང་དུས་རིང་དུ་རྣམ་པ་དུ་མ་རྣམས་དང་གཞན་དང་མི་འདྲ་བ་རྣམས་ཀྱི་མྱོས་བྱེད་ཀྱི་བྱ་བ་དག་བྱས་ནས། སླར་ཉིད་ཀྱང་ཡུལ་གྱིས་ངོམས་པ་མེད་པས་འདོད་པའི་ཡོན་ཏན་ལྔ་པོ་དེས་ཀྱང་བག་མེད་པར་གྱུར་ནས་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་གར་བྱེད་པར་གྱུར་ཅིང་། གང་ན་མེ་ཏོག་གི་ཁང་པ་ཞེས་བྱ་བ་ཡོད་པ་དེར་ཉེ་བར་ལེགས་པར་འགྲོ་བར་བྱེད་དེ། བྲོ་གར་དང་གླུ་དང་རོལ་མོའི་སྒྲ་དང་བཅས་ནས་རྒྱགས་པས་རྣམ་པར་རྒྱུ་བ་རྣམས་འགྱིང་བག་གིས་འགྲོ་བར་བྱེད་དོ། །དེ་ནས་མེ་ཏོག་ཆེན་པོ་ཕུན་སུམ་ཚོགས་པའི་ནགས་དེ་ཀུན་ནས་ལྷག་པར་ལྟ་བ་བྱེད་དེ། ལྷ་རྣམས་སྔ་ན་མེད་པའི་ལྟ་བས་གདུངས་པའི་ཕྱིར་རོ། །ལྷ་དེ་དག་རྣམས་ཀྱང་དེ་ལྟར་དགའ་བའི་ནགས་དང་ཉེ་བའི་ནགས་དང་པད་མའི་ཚལ་དང་རིན་པོ་ཆེ་བདུན་གྱི་རིའི་རྩེ་མོ་དང་ལྡན་པའི་ལྷའི་རིས་དེ་དག་རྣམས་མངོན་པར་མཐོང་ནས་མཆོག་ཏུ་ངོ་མཚར་བ་སྐྱེས་པར་གྱུར་ཏེ་ཅ་ཅོ་དང་མིག་ཀྱང་རིག་རིག་པོར་གྱུར་ཅིང་ཉེ་འཁོར་ཀུན་ཏུ་མིག་སྒྱུར་བར་བྱེད་པས་ཀྱང་ངོམས་པར་འགྱུར་བ་ནི་མ་ཡིན་ནོ། །ལྷ་དེ་དག་དང་ལྷ་མོ་རྣམས་ཀྱང་དེ་ཁོ་ན་བཞིན་དུ་སྔ་ན་མེད་པ་མཐོང་བས་གཡོ་ཞིང་ཞེན་པས་དེ་རིམ་གྱིས་རྣམ་པར་རྟོག་པ་བརྒྱ་སྟོང་དུ་མས་མེ་ཏོག་དང་ཉེ་བར་ལྡན་པའི་མེ་ཏོག་གི་ཁང་པ་ཀུན་ཏུ་མངོན་པར་མཐོང་བར་གྱུར་པ་དེས་སླར་ཉིད་ཀྱང་ཡིད་ཆེས་པ་རྩོམ་པ་དང་ལྡན་པ་བཞིན་དུ་གར་བྱེད་པ་དང་དགོད་པར་བྱེད་པ་དང་གླུ་ལེན་པར་ཡང་བྱེད་དེ། དེ་དག་རྣམས་དེ་ཁོ་ན་བཞིན་དུ་བག་མེད་པས་མཆོག་ཏུ་སྡུག་པར་གྱུར་པས། འཁྲི་ཤིང་གི་ཁང་བུ་རྣམས་སུ་ཞུགས་སོ། །ཁྱིམ་དེ་དག་རྣམས་ཀྱང་། འཁྲི་ཤིང་གི་ཤིང་ལྗོན་པ་རྣམས་ཉེ་བར་དུད་པར་གྱུར་པ་འདབ་མ་རྣམ་པར་བཀྲ་བར་མཛེས་པར་གྱུར་པའི་རིན་པོ་ཆེའི་རང་བཞིན་རྣམ་པ་སྣ་ཚོགས་པའི་འཁྲི་ཤིང་གིས་ཉེ་བར་སྒུ་བ་རྣམས་ལ་འདི་ལྟ་སྟེ། བཻ་ཌཱུརྱའི་འཁྲི་ཤིང་གི་ཁང་བུ་གང་ཡིན་པ་དེ་ལ་ནི་གསེར་འབར་བའི་མདོག་གི་འདབ་མས་ཀུན་ཏུ་ཁྱབ་པར་གྱུར་པའོ། །གང་ཡང་གསེར་གྱི་འཁྲི་ཤིང་ཉེ་བར་སྒུ་བའི་ཁང་བུ་གང་ཡིན་པ་དེ་དག་རྣམས་ལ་ནི་བཻ་ཌཱུརྱའི་འདབ་མ་

70-221a

རྣམས་ཀྱིས་གང་བར་གྱུར་ཅིང་ཀར་ཀེ་ཏ་ནའི་མདོག་གི་འབྲས་བུས་ཉེ་བར་མཛེས་པར་བྱས་པའོ། །ཨིན་དྲ་ནཱི་ལའི་རང་བཞིན་གྱི་འཁྲི་ཤིང་གིས་མཛེས་པར་བྱས་པའི་འཁྲི་ཤིང་གི་ཁྱིམ་གང་ཡིན་པ་དེ་ལ་ནི་དངུལ་གྱི་རང་བཞིན་གྱི་འདབ་མ་རྣམས་ཀྱིས་ཕུབས་སུ་གྱུར་པར་བྱས་ཤིང་། ཤེལ་གྱི་རང་བཞིན་ཅན་རྣམས་ལ་ནི་གསེར་གྱི་འབྲས་བུ་དང་ལྡན་པའོ། །ཀར་ཀེ་ཏ་ནའི་ཤིང་འཁྲིལ་བ་རྣམས་གང་ཡིན་པ་དེ་ལ་ནི་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་ཅིང་གསེར་གྱི་རང་བཞིན་གྱི་འབྲས་བུས་མཛེས་པར་བྱས་པའོ། །ཤེལ་གྱི་འཁྲི་ཤིང་རྣམ་པར་བརྒྱངས་པ་ཉེ་བར་ཕུབ་པར་གྱུར་པའི་འཁྲི་ཤིང་གི་ཁང་པ་གང་ཡིན་པ་དེའི་ཚེ་ནི་དེ་ལ་གསེར་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་པ་དང་། སྔོན་པོ་ཆེན་པོའི་ཁ་དོག་གི་འབྲས་བུས་མཛེས་པར་གྱུར་པའོ། །དེ་ན་ཡང་རྣམ་པར་རྟག་པར་མཛེས་པའི་བུང་བའི་ཚོགས་རྣམས་ཀྱིས་ཡིད་འཕྲོག་པར་བྱེད་པའི་སྒྲའི་མཆོག་རྣམས་ཉེ་བར་སྒྲོགས་པར་བྱེད་པ་མེ་ཏོག་ཆེན་པོའི་ཁང་པ་ཞེས་བྱ་བའི་ནགས་དེ་ན་ནི་ནང་རྣམས་ཀྱང་དེ་ལྟར་མཆོག་ཏུ་དགའ་བར་གྱུར་པ་ཡིན་ཏེ། གང་ན་ལྷ་དག་མྱོས་པ་ལ་དོན་གཅིག་པས་དགའ་བར་བྱེད་པའོ། །ནགས་དེའི་ཕྱི་རོལ་རྣམས་ན་ཡང་མཆོག་ཏུ་དགའ་བར་གྱུར་པ་རྣམས་ཡོད་པ་ལ་འདི་ལྟ་སྟེ། པད་མའི་རྫིང་བུ་དག་ན་གསེར་གྱི་འདབ་མ་རྣམས་དང་བཻ་ཌཱུརྱ་སྔོན་པོ་རྣམས་དང་ཨིན་དྲ་ནཱི་ལའི་ཟེའུ་འབྲུ་དང་། དངུལ་གྱི་རང་བཞིན་གྱི་སྙིང་པོ་ཅན་གྱི་ཉེ་འཁོར་རྣམས་ཁྱབ་པར་གྱུར་པ་དང་། བུང་བའི་ཚོགས་རྣམས་ཀྱིས་ཀྱང་ནགས་དེ་ཉེ་བར་མཛེས་པར་བྱས་པ་ངང་པ་དང་ཀཱ་རཎྜ་བ་དང་། ངང་ངུར་དང་། ཀ་དམྤའི་སྒྲ་ཀུན་ཏུ་སྒྲོགས་པར་བྱེད་པས་སྒྲ་ཡིད་འཕྲོག་པར་གྱུར་པ་རྣམས་ཀྱིས་ཉེ་བར་མཛེས་པར་གྱུར་ཅིང་ཡོངས་སུ་བསྐོར་ནས་ནགས་དེ་ཆེས་ལྷག་པར་རྣམ་པར་མཛེས་སོ། །མེ་ཏོག་གི་ཕྲེང་བ་རྣམས་ཉིད་ཀྱི་པད་མའི་ནགས་དེའི་ཉེ་འཁོར་ཀུན་ནས་འཁོར་བར་གྱུར་པ་ལ་དེས་ཀྱང་མེ་ཏོག་གི་ཁང་པའི་ནགས་ཆེན་པོ་ཡོངས་སུ་བསྐོར་ནས་མཛེས་སོ། །པད་མའི་ཕྲེང་བ་དེ་དག་རྣམས་ཀྱི་ཕྱི་རོལ་གྱི་ཤིང་གི་ནགས་

70-221b

གང་དག་ལ་རི་དགས་དང་བྱའི་ཚོགས་རྣམས་མཆོག་གི་རབ་ཏུ་དགའ་བར་གྱུར་པས་ཁ་ཅིག་ནི་ཤིང་གི་རྩ་བ་ནས་བྱུང་ནས་སྡོད་དོ། །ཁ་ཅིག་ནི་པད་མ་དང་ཉེ་བ་ན་ཟ་བར་བྱེད་དེ། ལྷ་རྫས་ཀྱི་ནགས་ཀྱི་འབྲས་བུ་དང་མེ་ཏོག་དང་རྩ་བ་རྣམས་མཆོག་ཏུ་དྲི་ཞིམ་པའི་མདོག་དང་རོ་དང་དྲི་དང་ཡང་དག་པར་ལྡན་པ་རྣམས་ལ་སྟེ། ལྷན་ཅིག་སྤྱོད་པའི་འཁོར་དང་བཅས་པ་རྣམས་སོང་ནས་ལྷའི་མཆོག་དེ་དག་དགའ་བར་བྱེད་དོ། །རི་དགས་དང་བྱ་དེ་དག་རྣམས་ཁ་ཅིག་ནི་མཆོག་ཏུ་དགའ་བར་གྱུར་པའི་ལྷ་རྫས་ཀྱི་སྒྲ་ཐོས་པས་ཡིད་འཕྲོག་པར་འགྱུར་ཞིང་ཆགས་པ་དང་མཚུངས་པ་དང་དཔེ་མེད་པའི་ལྷ་རྫས་ཀྱི་གླུ་རྣམས་ཉན་པར་བྱེད་དོ། །རྣ་བ་དང་མིག་གདངས་པ་ངོ་མཚར་ཞིང་རྒྱགས་པའི་རི་དགས་རྣམས་དགའ་བར་བྱེད་དོ། །ཁ་ཅིག་ནི་གཞན་རི་དགས་མོ་དང་ཕན་ཚུན་ལྷན་ཅིག་མངོན་དུ་ཕྱོགས་པ་ཉིད་ཀྱིས་ཤིང་གི་རྩ་བར་བྱུང་ཞིང་གནས་ནས་སྐྱུགས་ལྡད་བྱེད་པར་གྱུར་པས་མནན་ན་ནེམ་པ་བཏེག་ན་འཕར་བའི་ས་གཞི་དགའ་བར་གྱུར་པ་རྣམས་སུ་ཉེ་བར་གནས་ནས་ཕན་ཚུན་དུ་ལྟ་བར་བྱེད་དོ། །ཀུན་རྗོད་པར་ཡང་བྱེད་དོ། །རི་དགས་རི་དགས་མོ་དང་ལྷན་ཅིག་ཏུ་རིན་པོ་ཆེ་སྣ་བདུན་གྱིས་རྣམ་པར་བཀྲ་ཞིང་ཉེ་བར་འབར་བར་གྱུར་པའི་ཐིག་ལེས་ཉེ་བར་བཀྲ་བར་བྱས་པའི་ལུས་ཅན་གྱི་ནགས་ཀྱི་ནང་རྣམས་སུ་དགའ་བར་བྱེད་དོ། །བྱ་རྣམས་དང་རི་དགས་རྣམས་ཀྱང་རྣམ་པ་སྣ་ཚོགས་པའི་ཁ་དོག་དང་དབྱིབས་དང་རིགས་རྣམས་སོ། །མཆོག་ཏུ་ཞི་བར་གྱུར་པ་རྣམ་པར་རྟོག་པ་སྣ་ཚོགས་པ་རྣམས་ཀྱིས་དགའ་བར་བྱེད་པ་རྣམས་ལ་འདི་ལྟ་སྟེ། ཁ་ཅིག་ནི་པད་མ་ཁས་བླངས་ནས་གླུའི་སྒྲ་རྣམས་ཉན་ནོ། །ཡོངས་སུ་འཆམ་པར་བྱེད་དེ་འཁོར་ལོའི་འགྲོས་ཀྱིས་རྩེད་མོ་རྩེ་བར་བྱེད་པའི་འགྲོས་ཅན་རྣམས་ལྷན་ཅིག་སྤྱོད་པ་དང་བཅས་ནས་བཞད་གད་བྱེད་པ་ཡིན་ནོ། །ཁ་ཅིག་ནི་ཁྱུར་གྱུར་པར་ཉེ་བར་གནས་ནས་སྒྲོ་དག་ཀུན་ཏུ་གྱོན་པས་ལུས་གོང་བུར་བྱས་ཤིང་ཀུན་བློ་འཐུན་པར་གྱུར་པས་དེ་དག་རྣམས་སོང་སྟེ། ནགས་ཀྱི་གསེབ་ལ་བརྟེན་ནས་སྒྲ་ཉན་པར་བྱེད་དོ། །ཁ་ཅིག་ནི་རིན་པོ་ཆེ་གཞན་དག་རྣམས་ཁ་ན་བཟུང་ནས་འོད་ཟེར་གྱི་ཕྲེང་བ་དང་ལྡན་པའི་ཡུལ་ཕྱོགས་གཞན་དང་

70-222a

གཞན་རྣམས་སུ་ཉེ་བར་འདྲེ་བར་བྱེད་དོ། །ཁ་ཅིག་ནི་གཞན་རི་རྣམས་ཀྱི་རྩེ་མོ་རིན་པོ་ཆེ་བདུན་གྱི་འོད་ཀྱིས་སྣང་བར་བྱས་པ་ལ་བསྙེང་ཞིང་སྤྲུགས་ཏེ་སྒྲོའི་ཕྲེང་བ་སྟེང་དུ་རྣམ་པར་བརྐྱང་ནས་གླུ་ལེན་པར་གྱུར་པ་དེས་ཐོས་པས་ཀུན་ཏུ་ཁྲིད་དེ། གང་ན་གླུའི་སྒྲ་དེ་ཡོད་པར་གྱུར་པའི་མེ་ཏོག་གི་ཁང་པ་དེར་འགྲོ་སྟེ། ནམ་མཁའ་ལ་མཛེས་པར་གྱུར་པའི་སྒྲོའི་སྒྲ་རྣམས་ཀྱིས་མཆོག་ཏུ་ཡིད་རབ་ཏུ་དགའ་བར་གྱུར་པར་རོ། །ལྗོན་པའི་ནགས་ཀྱི་ནགས་གཞན་རྣམས་ནས་ཀྱང་སྣ་ཚོགས་པའི་སྒྲོ་རྣམ་པར་བཀྲ་བའི་ལུས་ཅན་གྱི་བྱ་གང་དག་གིས། མེ་ཏོག་རབ་ཏུ་རྒྱས་པའི་འཁྲི་ཤིང་དག་ཁ་ནས་ཁྱེར་ནས་གང་ན་དེ་མེ་ཏོག་གི་ཁང་པའི་ནགས་ཡོད་པ་དེར་བསྙེན་ཏེ་འོང་བར་བྱེད་དོ། །གཞན་ཡང་ཕྱོགས་ཀྱི་ཆ་གཞན་རྣམས་ནས་ཀྱང་གླུ་ལེན་པ་དེ་མངོན་པར་ཐོས་པར་གྱུར་ནས། ངང་པ་དང་ངང་མོ་རྣམས་ཕན་ཚུན་དུ་ཕན་པར་གྱུར་པ་དང་ཕན་ཚུན་དུ་ཁ་ནས་རིན་པོ་ཆེའི་ཕྲེང་བ་རྣམས་ཡོངས་སུ་ཁྱེར་བ། ཁ་དོག་སྣ་ཚོགས་པའི་འོད་ཀྱིས་རྒྱན་དུ་བྱས་པ་རྣམས་གང་ན་མེ་ཏོག་གི་ཁང་པ་ཡོད་པར་ནམ་མཁའི་དཀྱིལ་ན་མཛེས་པར་གྱུར་པས་དེར་འབབས་པར་བྱེད་དོ། །དེ་ལྟར་ན་ནང་དང་ཕྱི་རོལ་རྣམས་ན་རྣམ་པ་དུ་མར་གྱུར་པའི་རི་དགས་དང་བྱ་སྣ་ཚོགས་པའི་གཟུགས་དང་ཆ་བྱད་དང་དབྱིབས་མཆོག་ཏུ་མཛེས་པ་དང་ཡང་དག་པར་ལྡན་པའོ། །ནགས་དེ་ན་ཡང་རྣམ་པ་དེ་སྲིད་ཀྱི་ལྷའི་རིགས་དེ་དག་རྣམས་ཀྱིས་ཀྱང་མཛེས་པར་བྱེད་པར་འགྱུར་རོ། །དེ་ནས་ལྷ་དེ་དག་རྔ་སྐད་ཡན་ལག་ལྔ་དང་ལྡན་པས་ནགས་དེར་ཞེན་པར་བྱས་ནས་སླར་ཡང་དེའི་སྲེད་པས་བསྲེགས་པར་གྱུར་པ་དང་རྣམ་པར་ངོམས་པ་མེད་པར་གྱུར་པས་ཀྱང་གང་ན་དེ་བྱའི་སྒྲ་མངོན་པར་དགའ་བ་ཞེས་བྱ་བའི་ནགས་དེར་ཉེ་བར་འགྲོ་བར་བྱེད་དེ། ལྷན་ཅིག་སྤྱོད་པ་དུ་མས་ཡོངས་སུ་བསྐོར་བར་གྱུར་ནས་དེ་དེ་ཁོ་ན་བཞིན་དུ་གར་བྱེད་པར་གྱུར་ཅིང་ངོ་། །ཁ་ཅིག་ནི་ནམ་མཁའི་ཁམས་གཞན་དུ་གྲོགས་མེད་པར་འགྲོ་བར་བྱེད་དོ། །གཞན་དག་རྣམས་ནི་ངང་པ་རྣམས་ཀྱི་རྒྱབ་ཏུ་ཀུན་ནས་ཞོན་ནས་སོ། །གཞན་དག་རྣམས་ནི་རྨ་བྱ་དག་གི་རྒྱབ་ཏུ་ཞོན་ནས་སོ། །གཞན་དག་རྣམས་ནི་

70-222b

པད་མའི་ནང་ཉིད་ཀྱི་སྙིང་པོ་ལ་ཉེ་བར་གནས་པར་གྱུར་ཅིང་ནམ་མཁའི་དཀྱིལ་དུ་འཕགས་ནས་སོ། །གཞན་དག་རྣམས་ནི་རིན་པོ་ཆེ་བདུན་གྱི་རང་བཞིན་གྱི་བྱའི་རྒྱབ་ཏུ་ལེགས་པར་ཞོན་པར་གྱུར་ནས་ནམ་མཁའི་དབྱིངས་ན་མཛེས་པར་གྱུར་པས་གང་ན་བྱའི་ནགས་ཡོད་པ་དེར་ཉེ་བར་ལེགས་པར་འགྲོའོ། །དེ་ལྟར་རྣམ་པར་འགྱུར་བ་དུ་མར་གྱུར་པའི་རྣམ་པར་རྟོག་པའི་དོན་དུ་མཛེས་པ་དང་ཡང་དག་པར་ལྡན་པས་ལེགས་པར་འོངས་པའི་ལྷ་དེ་དག་རྣམས་ལ་ཇི་ལྟ་བ་བཞིན་དུ་དེ་ཁོ་ན་ཉིད་བརྗོད་པ་ཞེས་བྱ་བའི་བྱ་དེ་དག་གིས་ཚིགས་སུ་བཅད་པ་བརྗོད་པ་ཇི་ལྟར། ལས་ཀྱི་རང་བཞིན་བཞོན་པ་ལས། །བཞོན་པས་ཁྱད་པར་བྱེད་གཞན་མེད། །ལས་ཀྱི་བཞོན་པས་སྐྱེས་བུ་རྣམས། །ཁམས་གསུམ་དུ་ནི་རྣམ་པར་རྒྱུ། །གང་གིས་གང་ལ་ཇི་ལྟ་བཞིན། །མཛེས་པ་བྱས་པར་གྱུར་པས་ནི། །དེ་ཡི་དེ་ལ་དེ་བཞིན་ལས། །ལུས་ཅན་རྣམས་ལ་སྨིན་པར་འགྱུར། །ལས་ཀྱི་བློ་ཡི་རི་མོ་ནི། །སེམས་ཀྱི་རྒྱུ་ཡིས་རབ་ཏུ་བཅུག །དུས་རིང་བར་ཡང་ཞུགས་རྣམས་ཀྱི། །བསྒྲུབ་བྱ་ཅུང་ཟད་དམིགས་པ་མིན། །ལས་ཀྱི་རྒྱུ་ཡིས་ཀུན་བསླང་བའི། །བདེ་བ་རྣམ་པ་སྣ་ཚོགས་རྣམས། །བདེ་བའང་རྣམ་པ་སྣ་ཚོགས་ཀྱང་། །ལས་ཟད་པ་ཡིས་རབ་ཏུ་འཇིག །དེ་ཕྱིར་ལས་ཀྱི་བདེ་བ་ནི། །ཇི་སྲིད་ཟད་པ་མ་མཐོང་བ། །དེ་སྲིད་བདེ་བའི་སྐལ་ལྡན་པའི། །ལས་གཞན་དག་ནི་ཁྱེད་ཀྱིས་གྱིས། །ལེ་ལོ་དང་ནི་ལྡན་པའི་ཡིད། །བག་མེད་པས་ནི་རྣམ་པར་བརྒྱལ། །སླུ་བ་མེད་པའི་ཞབས་ཀྱིས་ནི། །རབ་ཏུ་ལྟུང་བར་རབ་ཉམས་འགྱུར། །འདས་པའི་བདེ་རྣམས་ཐམས་ཅད་དབྲལ། །སྡུག་བསྔལ་ཆེན་པོའི་འབྱུང་གནས་རྣམས། །ཁམས་དང་ཕུང་པོ་འགག་པ་ལ། །འཆི་བདག་ཞེས་ནི་དེ་ལ་བརྗོད། །དེ་འདིར་མྱུར་དུ་འོང་འགྱུར་ཏེ། །གསོན་པའི་བར་ཆད་ཆེར་བྱེད་དོ། །འདི་ཡང་ལེགས་པར་མཐོང་མིན་ཏེ། །ཡུལ་གྱིས་ཤིན་ཏུ་རྨོངས་པས་སོ། །དེ་ལྟར་བྱ་དེ་ལེགས་པར་བྱས་པའི་ལས་དང་རབ་ཏུ་འབྲེལ་པ་ལྷ་དེ་དག་རྣམས་ལ་རྗེས་སུ་འདོམས་སོ། །དེ་ནས་དེ་དག་ལ་མ་དཔྱད་པ་དང་དེ་ཁོ་ནའི་ཚིག་ཀྱང་སྤངས་པར་གྱུར་ཏེ། སླར་ཡང་ཡུལ་གྱི་སྲེད་པས་གདུངས་པར་

70-223a

གྱུར་ནས་ནགས་དང་ཉེ་བའི་ནགས་རྣམས་སུ་རྣམ་པར་རྒྱུ་བ་རྣམས་རབ་ཀྱི་མཆོག་ཏུ་རངས་པར་གྱུར་པའི་ཡིད་ཅན། ཕྱིར་ཡང་བྱའི་སྒྲས་མངོན་པར་དགའ་བར་གྱུར་པའི་ནགས་དེ་ཉིད་དུ་རབ་ཏུ་ཞུགས་པར་འདོད་པར་གྱུར་ཅིང་ཐམས་ཅད་ཀྱང་ལྟ་བ་ལ་མཆོག་ཏུ་བྱེད་པས་ནགས་དེ་རབ་ཏུ་ལྟའོ། །དེ་ནས་ཞུགས་པར་གྱུར་པ་ན་ནགས་དེའི་རང་བཞིན་ཉིད་ཀྱིས་བྱའི་ཀུན་ནས་བརྗོད་པ་རྣམས་ཀྱིས་མངོན་པར་དགའ་བ། ལྗོན་ཤིང་ཐམས་ཅད་གསེར་གྱི་རང་བཞིན་དང་བཻ་ཌཱུརྱའི་རང་བཞིན་དང་དངུལ་གྱི་རང་བཞིན་དང་ཤེལ་གྱི་རང་བཞིན་དང་། ཨིན་དྲ་ནཱི་ལའི་རང་བཞིན་དང་པད་མའི་སྡོང་པོའི་རང་བཞིན་གྱི་ཤིང་རྣམས་ཀྱིས་མར་མེ་དང་འདྲ་བར་ཐམས་ཅད་རྣམ་པ་སྣ་ཚོགས་པར་མཛེས་པར་གྱུར་པ་དང་ལྡན་པའི་ཁ་དོག་དང་དབྱིབས་དུ་མ་ཅན་གྱི་བྱའི་སྒྲོ་རྣམ་པར་བཀྲ་བར་བྱས་པ་རྣམས་ལ་གང་དག་གི་མདོག་དང་དབྱིབས་བརྗོད་པར་སླ་བ་ཡང་མ་ཡིན་པ་རྣམས་སོ། །དེ་ཅིའི་ཕྱིར་ཞེ་ན། ལས་དུ་མ་སྣ་ཚོགས་པ་རྣམས་ཀྱིས་རྣམ་པར་བཀྲ་བར་བྱས་པའི་རྣམ་པར་བཀྲ་བ་ཡང་རྣམ་པ་སྣ་ཚོགས་པའི་ལས་ཀྱིས་བྱས་པ་ཡིན་ལ། ལས་དེའི་འབྲས་བུ་རྣམས་རྣམ་པ་དུ་མར་རྣམ་པར་བཀྲ་བ་ཡིན་ནོ། །དེ་དག་རྣམས་ནི་བརྗོད་པར་སླ་བ་མ་ཡིན་ནོ། །སེམས་ཡང་མོར་ཡོངས་སུ་འཇུག་པའི་རྒྱུར་འགྱུར་བའི་རྒྱུ་འདིས་དེ་འདིར་རྣམ་པར་བཀྲ་བ་ཉིད་བརྗོད་པར་བྱ་བར་ཡང་མི་ནུས་སོ། །མཐོ་རིས་ཀྱི་སྲིད་པ་རྣམས་ཐམས་ཅད་དུ་ཅུང་ཟད་ཅིག་རྗེས་སུ་དཔགས་པར་གྱུར་པས་ཀྱང་ལས་དང་འབྲས་བུ་རྣམས་ཀུན་ཏུ་བསྟན་པའི་དོན་དུ་འདི་དག་བརྗོད་པར་ཟད་དོ། །ཇི་ལྟར་མཆོག་ཏུ་བག་མེད་པས་ནགས་དང་ཉེ་བའི་ནགས་དང་འབབ་ཆུ་དང་རྫིང་བུ་དང་རི་དང་རི་བོའི་རྩེ་མོ་དང་། པད་མའི་ཚལ་དང་བྱ་དང་རིན་པོ་ཆེ་སྣ་ཚོགས་དང་བུད་མེད་ཀྱི་ཚོགས་ཡིད་འཕྲོག་པའི་ཡུལ་རྣམས་ལ་ལེགས་པར་བྱས་པའི་ལས་རྣམས་ཀྱིས་བྱས་པའི་འབྲས་བུ་ཉེ་བར་སྤྲུལ་པའི་ལྷའི་འཇིག་རྟེན་དེ་ཡིན་པའི་རྒྱུ་འདིས་ན་དགའ་བར་བརྗོད་དོ། །ཇི་ལྟར་ལེགས་པར་བྱས་པའི་ལས་རྣམས་ཀྱི་འབྲས་བུ་རྣམ་པར་སྨིན་པ་རབ་ཏུ་མ་བསྟན་ན། བྱས་པའི་འབྲས་བུ་རྣམ་པར་སྨིན་པ་རྣམས་ཀྱང་ཐོབ་པ་མ་ཡིན་པར་འགྱུར་རོ། །འདི་ནི་

70-223b

འདིར་བདེ་བ་སྟེན་པར་བྱེད་པའི་རྒྱུ་གཞན་གཉིས་པ་ཡིན་ནོ། །སླར་ཡང་དེ་ཁོ་ན་བཞིན་དུ་ལྷ་དེ་དག་རྣམས་སྣ་ཚོགས་པའི་མེ་ཏོག་གི་ཕྲེང་བ་དང་། ཕྱེ་མ་དང་བྱུག་པས་བྱུགས་པའི་ལུས་ཅན་རང་ལས་འོད་འབྱུང་བས་གཏད་པས་མཆོག་ཏུ་དགའ་བའི་ཡིད་ཀྱིས་ལྷ་དེ་བྱའི་སྒྲས་མངོན་པར་དགའ་བའི་ནགས་ལྟ་བར་བྱེད་དོ། །ཇི་ལྟར་བལྟས་པར་གྱུར་པ་ན་རིན་པོ་ཆེ་བདུན་གྱི་རང་བཞིན་གྱིས་རྣམ་པར་བརྒྱན་པར་གྱུར་པའི་ཤིང་ལྗོན་པའི་འོད་འབར་བ་དང་འདྲ་བའི་ནགས་དེའི་ཉེ་འཁོར་རྣམས་ན་རྣམ་པ་སྣ་ཚོགས་པའི་བྱ་དང་ལྡན་པ་ལ་བྱ་དེ་དག་རྣམས་ཀྱི་བྱས་ཀུན་ཏུ་བསྒྲགས་པ་སྡུག་པ་དང་ལྡན་པའི་རྣམ་པ་རྣམས་ཐོས་སོ། །ལྷ་དེས་གལ་ཏེ་ཤེད་ན་ཐོས་པ་གང་ཡིན་པ་དེ་དག་ནི་དེ་སྲིད་ཀྱི་སྙན་པ་མཉམ་པའི་ཆ་ཤས་རྒྱ་ཆེ་བ་ཉམས་པ་མེད་པ་གྱུར་པ་ཐོས་ན་ཡིད་འཕྲོག་པར་བྱེད་པ་རྣམ་པར་རྟོག་པ་དུ་མ་དང་ལྡན་པ་སླུ་བར་མི་བྱེད་པ་ལྷའི་ཚོགས་ཐམས་ཅད་རབ་ཏུ་ཚིམ་པར་བྱེད་པའི་བྱ་དེ་ཤིང་རྣམས་ཀྱི་གསེབ་ཏུ་འགྲོ་བ་དང་། པད་མའི་རྫིང་བུའི་གསེབ་ཏུ་འགྲོ་བ་དང་། མེ་ཏོག་གི་ནགས་རྣམས་ཀྱི་ནང་དུ་འགྲོ་བ་དང་། རྫིང་བུའི་གསེབ་རྣམས་སུ་ཡང་སོང་བར་གྱུར་ནས་ཀྱང་ལྷན་ཅིག་ཏུ་གླུ་ལེན་ནོ། །རྣམ་པ་སྣ་ཚོགས་པའི་སྒྲ་རྣམས་ཐོས་པས་ཡིད་འཕྲོག་པར་བྱེད་པ་གང་ཡང་དེས་ལྷ་མོ་དེ་དག་གི་གླུ་ལེན་པར་བྱེད་པ་རྣམས་བོར་ནས་ལངས་ཏེ་བྱ་དེའི་རྣམ་པར་ལེགས་པ་རྣམས་ཉན་པར་བྱེད་དོ། །གླུ་ལེན་པར་བྱེད་པ་དེ་ནི་རྣམ་པ་དེ་སྲིད་དུ་ཡིད་འཕྲོག་པར་བྱེད་པ་ཡིན་ཏེ། གང་གིས་རིའི་རྩེ་མོ་རྣམས་ཐམས་ཅད་ཀུན་ཏུ་བསྒྲགས་པར་གྱུར་པ་དེས་ཀུན་ཏུ་གང་བར་བྱེད་པ་བཞིན་དུའོ། །དེ་ཐོས་ནས་རི་གཞན་དག་རྣམས་ཀྱི་རྩེ་མོའི་རི་དགས་དེ་དག་རྣམས་ནི་རང་བཞིན་ཁོ་ནས་གླུ་ལ་དགའ་བས་དེས་གླུ་དེ་ཐོས་པར་གྱུར་ནས་བརྒྱ་ཕྲག་རྣམས་དང་གལ་ཏེ་ན་སྟོང་ཕྲག་རྣམས་སུ་ཡང་ངོ་། །འོངས་པར་གྱུར་ནས་ཀྱང་དེ་ལས་ཁ་ཅིག་ནི་འོངས་པ་དང་རྣ་བ་དང་མིག་མི་གཡོ་བར་ཉན་ནོ། །ཁ་ཅིག་ནི་ཤིང་གཞན་གྱི་གསེབ་ཏུ་སོང་ནས་ཉན། རྣམ་པར་བསྒྲགས་པ་དེས་ཁ་ཅིག་ནི་ལེགས་པར་བྱེད་པའི་པད་མ་དུ་མ་རྣམས་ཡོངས་སུ་བཏང་ན་གླུ་དེ་ལ་ཉན་པར་བྱེད་དོ། །བྱ་རྣམས་ཀྱི་སྒྲ་དེ་ལྟར་དགའ་བ་དེ་ནི་བྱའི་སྒྲས་མངོན་པར་

70-224a

དགའ་བའི་ནགས་ན་ཡིན་ནོ། །སྣའི་བློ་འཕྲོག་པར་བྱེད་པ་ཡང་ནགས་དེ་ན་རྣམ་པ་སྣ་ཚོགས་པའི་མེ་ཏོག་གི་ཉེ་བར་མཁོ་བ་རྣམས་མཐོང་བས་རྣམ་པར་མཛེས་སོ། །ནགས་དེ་གཟུགས་རྣམ་པར་བཀྲ་བར་གྱུར་པ་རྣམས་དང་། དྲི་ཡང་རྣམ་པ་སྣ་ཚོགས་པའི་རྣམ་པར་རྟོག་པ་དང་ལྷན་ཅིག་ཏུ་སྒྲའི་ཚོགས་ཀྱིས་རྣམ་པར་བརྗོད་པས་ཏེ། དེ་ལྟར་ཡང་ནགས་དེ་མཛེས་པར་གྱུར་པའི་དྲི་དང་གཟུགས་དང་སྒྲ་རྣམས་ཀྱང་སྟེ། གླིང་བུ་དང་རྫ་རྔ་དང་པི་བང་གི་སྒྲ་དང་གླུ་སྙན་པའི་སྒྲ་དང་བྱ་རྣམས་ཀྱི་ཡང་སྒྲ་དང་སྒྲ་རྒྱ་ཆེན་པོར་གྱུར་པ་ཡིད་འཕྲོག་པ་རྣམས་སོ། །དབང་པོ་གཅིག་གི་ཡུལ་རྣམས་ཀྱིས་ཀྱང་ནགས་དེ་ནི་ཤིན་ཏུ་རྣམ་པར་མཛེས་པ་ཡིན་ནོ། །གཞན་ཡང་དབང་པོ་གཞན་རྣམས་ཀྱི་དོན་རྣམས་དང་ཡང་དག་པར་ལྡན་པས་ཀྱང་ནགས་དེ་ཤིན་ཏུ་རྣམ་པར་མཛེས་པར་བྱེད་པ་ལ་འདི་ལྟ་སྟེ། རྣམ་པ་སྣ་ཚོགས་པའི་རོ་མངོན་པར་འདོད་པར་གྱུར་པ་རྣམས་ལ་ཡང་དཔེར་ན་འབྲས་བུའི་རོ་དང་བཏུང་བའི་རོ་དང་ལྷ་རྫས་ཀྱི་སྨན་གྱི་རོ་རྣམས་ཀྱིས་ཀྱང་ཇི་ལྟར་འདོད་པ་ཉིད་ཀྱི་ལྷ་རྫས་ཀྱི་རོ་རྣམས་དང་ཡང་དག་པར་ལྡན་ནོ། །དགའ་བ་དུ་མ་དང་ལྡན་པའི་ནགས་དེ་ནི་ཆེས་ལྷག་པར་གྱུར་པའི་གཟི་བརྗིད་དང་ལྡན་པས་དགའོ། །གཞན་ཡང་དེ་ཉིད་ན་རྣམ་པ་གཞན་གྱི་ཆེས་ལྷག་པར་མངོན་པར་སྣང་བར་བྱེད་དོ། །འདི་ལྟ་སྟེ་རྩེད་མོའི་རི་དག་ལ་འཁྲི་ཤིང་གི་དྲ་བ་རྣམས་ཀྱིས་ཀུན་ནས་འདུད་པ་དང་། ཉེ་འཁོར་ཀུན་ན་ཡང་རིན་པོ་ཆེ་བདུན་གྱི་ཁང་བཟངས་རྣམ་པ་དུ་མ་རྣམས་ཀུན་ནས་འབར་བར་གྱུར་པའི་རྩིག་ལོགས་ལ་ཡོན་ཏན་དུ་མ་བྲིས་པ་རྣམས་ཀྱིས་སྤྲས་པས་ལེགས་པར་གང་བར་གྱུར་པས་གཉི་གར་སྡུག་པར་གྱུར་པ་རྣམས་ཀྱིས་ཀུན་ནས་བརྒྱན་པ་ཐམས་ཅད་དུ་ཡང་རབ་ཏུ་དགོད་པར་གྱུར་པ་བཞིན་དུ་ཆེས་ལྷག་པའི་དཔལ་རྣམ་པ་སྣ་ཚོགས་པས་ནགས་དེ་ན་ལྷམ་མེ་བར་གྱུར་ཏོ། །གཞན་ཡང་ནགས་དང་ཉེ་བའི་ནགས་རྣམས་དང་ལྡན་པར་གྱུར་པ་ཡིན་ལ། དེ་ལ་ཡོན་ཏན་རྣམས་ཀྱིས་ཡོན་ཏན་ཕུན་སུམ་ཚོགས་པར་གྱུར་པ་ནི་བརྗོད་ཟིན་ནོ། །རི་དེའི་དགའ་བར་གྱུར་པ་ནི་འདི་དག་རྣམས་ཡིན་ཏེ། བཻ་ཌཱུརྱའི་འབྱུང་གནས་རྣམས་དང་ལྡན་པར་གྱུར་པ་ལ།

70-224b

འདི་ལྟ་སྟེ་ཡོན་ཏན་ཆེན་པོ་རྣམས་ཕུན་སུམ་ཚོགས་པར་གྱུར་པའི་ཡོན་ཏན་བདུན་དང་ལྡན་པའི་སྒྲ་དང་རེག་བྱ་དང་རོ་རྣམས་འདོད་པར་གྱུར་པ་ཀུན་ཏུ་རྟོག་པའི་ཡོན་ཏན་རྣམས་ཕུན་སུམ་ཚོགས་པ་རྣམས་དང་སྒྲའི་ཡོན་ཏན་ཕུན་སུམ་ཚོགས་པ་རྣམས་ཀྱང་ཀུན་ཏུ་མཐོང་ངོ་། །ཤིན་ཏུ་ཡིད་དུ་འོང་བའི་རི་དེའི་ཡོན་ཏན་དེ་དག་རྣམས་སྐྱེ་བོ་དག་གཏི་མུག་གིས་ལྷན་ཅིག་ཏུ་ཟིན་པར་གྱུར་པས་ཀྱང་ལྷ་དེ་དག་གིས་མཐོང་བ་ཡིན་ནོ། །དེ་ལྟར་ལྷ་དེ་དག་རྣམས་ལ་མ་དང་ཕ་དང་མཚུངས་པར་གྱུར་པའི་བྱ་དེ་དག་རྣམས་ཀྱིས་དེ་ཁོ་ན་དང་ཕན་པར་འགྱུར་བ་ཡང་མཐོང་ནས་བརྟགས་པར་གྱུར་པའི་ཚིག་རྣམས་སྟོན་པར་བྱེད་དོ། །ལྷ་དེ་དག་རྣམས་ཡུལ་གྱིས་ཁྲིད་པར་གྱུར་པས་ཀུན་ཏུ་རྟོག་པར་འགྱུར་བ་ཡང་མ་ཡིན་ནོ། །དེ་ལྟར་དེ་ཡུལ་རྣམས་ཀྱིས་རྣམ་པར་རྨོངས་པར་གྱུར་ནས་དེས་དེ་དག་རྣམས་མ་བརྩིས་པར་སླར་ཡང་ཡུལ་གྱི་དགའ་བ་རྣམས་སུ་བྱིང་བར་གྱུར་པས་སྲེད་པའི་དགོན་པ་རྒལ་བར་མི་ནུས་པ་གཞན་རྣམས་རྗེས་སུ་ཐོབ་པར་གྱུར་ནས་མཚོན་ཆ་རྣམས་ཀྱིས་བསྲེགས་པར་གྱུར་ཅིང་། དགའ་བའི་འདོད་ཆགས་ཀྱི་དགྲ་བོ་བརྒྱ་ཕྲག་ལྔས་རབ་ཏུ་རྣམ་པར་ཉམས་པར་འགྱུར་བ། དམ་པའི་ལམ་རྣམས་ལས་ཉམས་པ་བདེ་བ་དང་རྗེས་སུ་མི་འཐུན་པར་གྱུར་པའི་བདེ་བ་གང་ཡིན་པ་རྣམས་འབའ་ཞིག་གིས་ཀྱང་ཀུན་ཏུ་འཁྲིད་པར་གྱུར་པ་རྣམས་ཀྱིས་ཀུན་ནས་རིག་པ་ཡང་མ་ཡིན་ནོ། །དེ་ལ་ཕན་པར་གྱུར་པ་རྣམ་པ་དུ་མ་རྣམས་བརྗོད་པར་གྱུར་ཀྱང་། དེ་སླར་ཡང་གནས་གསུམ་དུ་གཏོགས་པའི་བྱ་གཞན་དག་རྣམས་ཀྱི་ཤིན་ཏུ་སྙན་པར་གྱུར་པའི་གླུ་དེ་དག་རྣམས་ཉན་པར་བྱེད་དོ། །འདི་ལྟ་སྟེ། ཆུ་ལ་ནི་ཆུ་ལ་རྒྱུ་བ་རྣམས་ལྷ་རྫས་ཀྱི་མདོག་དང་དབྱིབས་ལྡན་པ་རྣམས་རིན་པོ་ཆེ་བདུན་གྱིས་སྤྲས་པར་གྱུར་པའི་ལུས་ཐིག་ལེ་བཀྲ་བས་བྱས་པ་རྣམས་ལ་ངང་པ་དང་ཀཱ་རཎྜ་བ་དང་། ངང་ངུར་ལ་སོགས་པ་རྣམས་ལྷན་ཅིག་ཏུ་ཆུ་ལ་སྒྲ་ཀུན་ནས་གཅོད་པར་གྱུར་པས་འདྲེས་པ་རྣམས་ཉན་པར་བྱེད་དོ། །མཆོག་ཏུ་སྙན་པའི་གླུའི་སྒྲས་རྟག་ཏུ་གར་བྱེད་པར་གྱུར་ཅིང་དུས་ཐམས་ཅད་དུ་རྒྱགས་པའི་བདེ་བ་ཤིན་ཏུ་རྒྱ་ཆེན་པོ་དང་ལྡན་པས་

70-225a

ཐམས་ཅད་ཉིད་ལས་ཀྱང་དགའ་བར་གྱུར་པར་མཐོང་བ་རྣམས་ཀྱི་བྱ་འདི་དག་དང་དེ་དག་དང་གཞན་དག་རྣམས་ཀྱི་སྙན་པ་ཀུན་ནས་བརྗོད་པའི་རྣར་སྙན་པའི་གླུ་རྣམས་ཉན་པར་བྱེད་དོ། །དེ་བཞིན་དུ་ནགས་ཀྱི་ནང་ན་རྒྱུ་བ་རྣམས་ལ་རྨ་བྱ་དང་པཱ་རཱ་བ་ད་དང་ཤིང་གི་རྒྱན་དང་རི་ཁྲོད་ཀྱི་གསེབ་དང་ཚང་ཚིང་ན་གནས་པ་རྣམས་ཀྱང་ཤིན་ཏུ་སྙན་པར་གྱུར་པའི་གྲེ་བར་བྱ་རྣམས་ཐམས་ཅད་ཀྱང་འདྲ་བར་གྱུར་པའི་སྒྲའི་སྤྲིན་ཚོགས་རྣམས་ཚང་ཚིང་དང་རིའི་རྒྱན་དང་རིན་པོ་ཆེ་བདུན་གྱིས་རྣམ་པར་བཀྲ་བར་བྱས་པའི་ལུས་མཐོང་ན་ཤིན་ཏུ་ཚད་མེད་པར་ལྷ་རྣམས་ཀྱི་ཡིད་དུ་འོང་བ་ཐོས་ན་ཤིན་ཏུ་དགའ་བར་འགྱུར་བའི་སྒྲ་རྒྱན་གྱི་འོད་ཟེར་གྱི་རྒྱུན་རྣམས་སྐྱེད་པར་བྱེད་པ་སོ་སོར་མཛེས་པ་རྣམས་སྐྱེད་པར་བྱེད་པས་མཐོང་ན་དགའ་བར་གྱུར་པའི་རྟག་པར་རྒྱགས་པ་ལ་སོགས་པའི་མཐོང་བར་གྱུར་པ་དང་ཐོས་པར་གྱུར་པ་ལས་མཆོག་ཏུ་དགའ་བར་འགྱུར་བ་རྒྱན་གསར་པ་རྣམས་ཀྱིས་བརྒྱན་པ་རྣམས་ལས། ཇི་ལྟར་གཙོ་བོར་གྱུར་པའི་བྱ་རྣམས་དག་གི་སྒྲ་འགའ་ཞིག་ཙམ་ཉན་པར་བྱེད་དོ། །ཁ་ཅིག་ནི་ཅ་ཅོ་འདོན་ནོ། །ཁ་ཅིག་ནི་གླུ་ལེན། ཁ་ཅིག་ནི་གནས་པར་བྱེད་དོ། །ཁ་ཅིག་ནི་སྒྲའི་སྤྲིན་རྣམས་ཉིད་དེ། དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མ་དང་ལྡན་པར་རྟག་ཏུ་རྒྱུན་མི་འཆད་པར་ཡང་བརྗོད་པ་དང་དབྱངས་དང་ལྡན་པས་ཀུན་ཏུ་རྗོད་པར་བྱེད་དོ། །བྱ་དེ་དག་རྣམས་ཀྱིས་མཆོག་ཏུ་དགའ་བར་གྱུར་པའི་བརྗོད་པ་རྣམས་འབྱིན་པར་བྱེད་དོ། །ལྷ་དེ་དག་ཆགས་པའི་སེམས་ཀྱིས་ཐམས་ཅད་ཉན་པར་བྱེད་དོ། །ལྷ་དག་གིས་ཡོངས་སུ་བསྐོར་བར་གྱུར་ནས་ཆེས་རབ་ཏུ་དགའ་བར་གྱུར་པའི་ཡིད་ཀྱིས་ཏེ། དེ་རྣམས་ཀྱིས་དེ་ལྟར་ཐོས་ནས་དུས་ཤིན་ཏུ་རིང་བར་ཡང་ཆེས་ཕལ་ཆེ་བར་གྱུར་པའི་སྲེད་པ་རྣམས་ཀྱིས་ནོན་པར་གྱུར་པས་རྩི་དག་འཐུང་བ་རྩོམ་པར་བྱེད་དོ། །རོ་དང་དྲི་མཆོག་ཏུ་ཕུན་སུམ་ཚོགས་པར་གྱུར་པ་ལྷའི་འཇིག་རྟེན་དང་འདྲ་བར་གྱུར་པ་རི་ཁྲོད་ཀྱི་ཕུག་གི་གསེབ་ནས་འབབ་པ་རྣམས་ལ་བུང་བའི་ཚོགས་ཀྱིས་ཉེ་བར་མཛེས་པར་གྱུར་པ་རྣམས་འཐུང་བར་རྩོམ་མོ། །ལྷ་དེ་དག་ཕན་ཚུན་དུ་རྒྱགས་པ་ལ་དོན་གཅིག་ཏུ་གྱུར་

70-225b

པས་པད་མའི་བདུད་རྩིའི་ནགས་གཞན་རྣམས་སུ་ཉེ་བར་འགྲོ་བར་བྱེད་དོ། །པད་མའི་ཁ་ཟུམ་པ་ཉིད་ལས་ཀུན་ཏུ་བྱུང་བར་གྱུར་པའི་བདུད་རྩི་གང་དག་ནི་མཆོག་ཏུ་ལྷ་རྫས་ཀྱི་རོ་དང་དྲི་དང་རེག་བྱ་ཕུན་སུམ་ཚོགས་པ་ཟད་པ་མེད་པ་ཇི་ཙམ་འདོད་པར་གྱུར་པའི་རོ་རྣམས་ཡོད་དེ། དེ་ལྟར་ལྷ་དེ་ལྷ་མོའི་ཚོགས་ཀྱིས་ཡོངས་སུ་བསྐོར་ནས་དགའ་བར་བྱེད་པ་དང་གླུ་ཡང་ལེན་པར་བྱེད། དགོད་པར་ཡང་བྱེད་དོ། །འགྱིང་བར་ཡང་བྱེད་དོ། །ཚོགས་པ་ཕན་ཚུན་དུ་གྲོགས་བྱེད་པར་གྱུར་ནས་རྒྱགས་པ་ལ་དོན་གཅིག་པས་དེ་དེ་ལྟར་དེ་ཉིད་ཁོ་ནའི་གཞིས་ནགས་རྣམས་ན་རབ་ཏུ་རྒྱུ་ཞིང་རྣམ་པ་སྣ་ཚོགས་པའི་རྩེད་མོ་རྣམས་བྱས་ནས། སླར་ཡང་ཡུལ་དེ་ཉིད་ཀྱིས་ངོམས་པ་མེད་པས་གང་ན་བཻ་ཌཱུརྱ་དང་ལྡན་པར་གྱུར་པའི་རི་དེར་ཉེ་བར་འགྲོ་བར་བྱེད་དོ། །རི་དེ་ཡང་རིན་པོ་ཆེ་རྣམས་དང་ལྡན་པར་གྱུར་པ་ཉེ་འཁོར་ཀུན་ན་སྔོན་པོ་རབ་ཏུ་དང་བའི་མདོག་ཏུ་གྱུར་པ་ནགས་དང་ཉེ་བའི་ནགས་རྣམས་ཀྱང་ཉེ་འཁོར་དུ་དཔག་ཚད་སྟོང་ཕྲག་བཅུར་གྲིབ་མ་རྣམས་ཀྱི་ཁ་དོག་སྔོན་པོར་རབ་ཏུ་བྱེད་དོ། །ཉེ་འཁོར་དཔག་ཚད་སུམ་བརྒྱར་འཕང་དུ་མཐོ་བའོ། །ནགས་དང་ཉེ་བའི་ནགས་རྫིང་བུ་དང་འབབ་ཆུ་རབ་ཏུ་གང་བར་གྱུར་པ་རྣམས་ཐམས་ཅད་ཀྱང་མཐོང་ན་ཤིན་ཏུ་ཡིད་འཕྲོག་པར་བྱེད་པའོ། །བྱ་རྣམས་ཀྱི་གནས་མཆོག་ཏུ་དགའ་བར་གྱུར་པ་རྣམས་ལ་རིའི་བང་རིམ་དང་རི་ཁྲོད་དང་ཕུག་དང་རི་རོང་དང་ཚང་ཚིང་དང་མཛེས་པའི་ནགས་དང་མཚོ་དང་པད་མའི་ཚལ་དང་མེ་ཏོག་གི་ཐང་ཕུན་སུམ་ཚོགས་པ་རྣམས་ལ་རྣམ་པ་གསུམ་གྱི་ངང་པ་ཀུན་ནས་སྒྲ་འབྱིན་པར་བྱེད་པའི་ངོས་རྣམས་ལ། འདི་ལྟ་སྟེ། རིན་པོ་ཆེ་ཤེལ་དང་། མཚུངས་པའི་མདོག་རིན་པོ་ཆེ་བདུན་གྱི་ཐིག་ལེས་སྤྲས་པར་གྱུར་པ་རྣམས་རང་བཞིན་གྱིས་ཀྱང་དཀར་བར་གྱུར་པའི་ངང་པའི་རིགས་དེ་དག་གིས་བརྒྱན་པ་དང་། བཻ་ཌཱུརྱའི་མདོག་དང་ལྡན་པའི་རིའི་ཉེ་འཁོར་རྣམས་ན་རབ་ཏུ་འབབ་པར་གྱུར་པས་རབ་ཏུ་འབབ་པའི་འབབ་ཆུ་རྣམས་ལ་ནོར་བུའི་འོད་འབྱུང་བར་གྱུར་པས་ཁྱབ་པར་གྱུར་ཅིང་ཡོངས་སུ་བསྐོར་བ་དང་། རབ་ཏུ་ཁ་བྱེ་བར་གྱུར་པའི་མེ་ཏོག་དྲི་མཆོག་དང་ལྡན་པ་རྣམས་ཀྱིས་ཀྱང་ཐམས་ཅད་ནས་ཡོངས་སུ་བསྐོར་ནས་གསལ་བར་སྣང་ངོ་། །བྱ་བརྒྱ་

70-226a

ཕྲག་སྟོང་རྣམས་ཀྱིས་རྩེ་བར་བྱེད་པ་སྒྲ་འཁྲོལ་བར་གྱུར་པ་གསེར་གྱི་མདོག་དང་ལྡན་པ་པད་མའི་ནགས་རྣམས་ཀྱིས་ཀྱང་ཉེ་བར་མཛེས་པར་གྱུར་པ་རྣམས་སུ་མཆོག་ཏུ་རྣམ་པར་རྒྱུ་བ་ན་ངོ་མཚར་བ་སྐྱེ་བར་བྱེད་པ་གོང་ནས་གོང་དུ་དགའ་བར་གྱུར་པ་མཆོག་གི་གཟུགས་རྣམས་དང་ལྡན་པར་གྱུར་ཅིང་ལྡན་པ་ལས་ཀྱང་རྣམ་པར་སྣང་བར་བྱེད་དོ། །སྒྲ་དང་རོ་དང་གཟུགས་དང་དྲི་རྣམས་ཀྱང་དངོས་པོ་དུ་མ་རྣམས་དང་ལྡན་པར་གྱུར་པས་རྣམ་པར་གསལ་བར་སྣང་ངོ་། །དབང་པོ་དྲུག་གི་བདེ་བ་རྣམས་དང་ཉེ་འཁོར་ན་ལྡན་པས་རིའི་མཆོག་དེ་རྣམ་པར་གསལ་བར་གྱུར་ཏོ། །ལྷ་དེ་དགའ་བའི་འདོད་སྲེད་ཀྱིས་གདུངས་པར་གྱུར་ནས་དེ་དག་ཏུ་ཉེ་བར་ལེགས་པར་འགྲོའོ། །ཉེ་འཁོར་ཀུན་ཏུ་ཡང་གླུ་དང་གར་དང་ལྡན་པར་གྱུར་པ་པད་མའི་ཕྲེང་བས་ཀུན་ཏུ་བཅིངས་པས་ཆེས་ལྷག་པར་དགའ་བར་གྱུར་པ་རྟག་ཏུ་རྒྱགས་པར་གྱུར་པ་རྟག་པར་ཡང་རབ་ཏུ་རངས་པ་ཡུལ་ལྔ་ལ་རྣམ་པར་ཆགས་པས་འདོད་པ་རྣམས་ལ་དགའ་བར་གྱུར་པས། མེ་ལྔ་བཞིན་དུ་སྲེག་པར་གྱུར་པས་རྣམ་པར་རྒྱུ་བར་བྱེད་པ། སྲེད་པའི་རྡུལ་རྣམས་ཀྱིས་ཀུན་ནས་བཅིངས་པར་གྱུར་ནས་གང་ན་རི་དེའི་མཐོ་བ་པོ་ཡོད་པ་དེར་ཉེ་བར་འགྲོའོ། །ཡུལ་ལ་འཆུམས་པར་གྱུར་པས་ལྟ་བ་ལ་ཆེད་ཆེར་བྱེད་པའི་ཡིད་ཀྱིས་ཀྱང་རི་དེ་མཐོང་བར་གྱུར་ཏོ། །ཀུན་ཏུ་རྟོག་པ་རྣམ་པ་སྣ་ཚོགས་རྣམ་པ་དུ་མར་དགའ་བར་གྱུར་པའི་རི་དེའི་ཅུང་ཟད་མཐོ་བ་ལ་ཀུན་ཏུ་འཛེགས་པར་གྱུར་ནས་ལྟ་བར་བྱེད་དོ། །ཐོ་འཁོར་ཀུན་ན་ཡང་བཻ་ཌཱུརྱའི་རང་བཞིན་གྱི་ཕུག་མཆོག་ཏུ་དགའ་བར་གྱུར་པ་རྣམས་སོ། །དེ་དག་གི་གྲངས་ནི་འདི་ཡིན་ཏེ། འདི་ལྟར་སྟོང་ཕྲག་བཅུའོ། །འོད་སྔོན་པོ་རྣམས་ཀྱིས་བརྒྱན་པར་གྱུར་པ་ཉེ་འཁོར་རྣམས་ན་བདེ་བ་མཆོག་གི་སྒྲོན་མ་རྣམས་ནི་མཆོད་པ་ལྟ་བུར་གྱུར་པའི་འོད་རྣམས་མཆོག་ཏུ་དགའ་བར་གྱུར་པ་ནི་ཕུག་དེ་དག་རྣམས་ནའོ། །གང་ན་རིའི་མཆོག་དེ་ལ་ཀུན་ཏུ་གནས་པའི་ལྷ་དེ་དག་ཕུག་དེ་དག་ཏུ་ཞུགས་ནས་དགའ་བར་བྱེད་དོ། །ཇི་ལྟ་ཇི་ལྟར་ལྷ་དེ་དག་རབ་ཏུ་ཞུགས་པ་དེ་ལྟ་དེ་ལྟར་ཡང་ཕུག་དེ་དག་གཡོ་བར་འགྱུར་རོ། །ཇི་ལྟར་ཡང་ལྷ་དེ་དག་ཡིད་ཀྱིས་སྒོམ་པར་

70-226b

བྱེད་པར་གྱུར་པ་དེ་བཞིན་དུ་བསམ་པ་དེ་དག་ཐམས་ཅད་ཕུག་དེ་དག་རྣམས་ཉིད་ལས་ཐོབ་པར་འགྱུར་རོ། །ཕུག་དེ་དག་ཡང་གང་འདོད་པར་གྱུར་པ་རྣམས་བྱེད་པ་ཡིན་ནོ། །དེ་དག་རྣམས་ཀྱི་མིང་གིས་ཀྱང་ལྷ་དེ་དག་འདོད་པའི་ཡོན་ཏན་གྱིས་ངོམས་པ་མེད་པར་དགའ་བར་བྱེད་པར་འགྱུར་ཏེ་ལྷན་ཅིག་སྤྱོད་པ་དང་བཅས་པ་རྣམས་དགའ་བའི་རྒྱན་དང་ཆ་བྱད་ཀྱི་མཆོག་འཛིན་པར་གྱུར་པ་ལ་གཅིག་ཏུ་དགེ་བའི་ལས་ཀྱིས་ཁ་ཅིག་ནི་ཤིན་ཏུ་བར་ཡང་ཡིད་འཕྲོག་པར་བྱེད་པའི་རྒྱན་དང་ཆ་བྱད་དང་ལང་ཚོ་དང་འགྱིང་བ་དང་དགོད་པ་དང་གླུ་དང་གར་རྣམས་ཀྱིས་རྣམ་པར་ཆགས་པར་གྱུར་པས་ལྷན་ཅིག་ཏུ་དགའ་བར་བྱེད་དོ། །ཇི་སྲིད་དུ་དགའ་བར་གྱུར་པའི་ཕུག་དེ་དག་རྣམས་ཐམས་ཅད་ཀྱི་སྒོ་ན་ཡང་ལྷ་རྣམས་ལ་ཕན་པར་འདོད་པས་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷས་གཙུག་ལག་གི་ཚིགས་སུ་བཅད་པ་མངོན་པར་བྲིས་པ་ཇི་ལྟར། འཆི་བདག་གིས་ནི་སྐྱེ་བ་འཐུང་། །རྒ་བ་ཡིས་ནི་ལང་ཚོ་འཐུང་། །ནད་རྣམས་ཀྱིས་ནི་ནད་མེད་འཐུང་། །འཇིག་རྟེན་པས་ཀྱང་མི་གོའོ། །སྐྱེས་པ་ཡང་ནི་དུ་མ་རྣམས། །ལྟུང་བ་ཡང་ནི་དུ་མ་ཡིན། །འདི་ཉིད་སྐྱེ་འབྱུང་རྒན་འགྱུར་དང་། །འཆི་འཕོ་དང་ནི་སྐྱེ་བར་འགྱུར། །སྐྱེས་བུ་ཐམས་ཅད་བསྟན་པ་ཡང་། །འཇིག་རྟེན་གྱིས་ནི་མི་གོའོ། །བརྗེ་བསོར་ཇི་ལྟ་བ་ཡི་ཡང་། །སྐད་ཅིག་ཡུད་ཙམ་སྐབས་ཡོད་མིན། །ངག་གིས་གྲོལ་བ་དེར་མནར་བ། །འཇིག་རྟེན་གྱིས་ནི་གོ་བའང་མིན། །སྐྱེ་བ་ཡང་ནི་རྣམ་མང་པོ། །ལྷ་ནི་ཡུལ་གྱིས་རྣམ་རྨོངས་པ། །འཇིག་རྟེན་གྱིས་ནི་མི་གོའོ། །སྲིད་པའི་འཁོར་ལོའི་ཁོག་ཙེ་འདི། །སྲེད་པ་ཡིས་ནི་སྔོན་དུ་བཅུག །དགའ་བའི་འདོད་ཆགས་ཀྱིས་ཡོངས་བསྐོར། །འོན་ཀྱང་འཇིག་རྟེན་པས་མི་གོ། །རྣམ་རྟོག་མཁའ་ལྡིང་གིས་གང་བའི། །སྐྱོན་རྣམས་ཆེས་འཇུག་ཤེས་པར་གྱིས། །སྲེད་པའི་ཆུ་ཀླུང་རྣམ་ཡངས་འདི། །འཇིག་རྟེན་པས་ཀྱང་གོ་བ་མིན། །དེ་ལྟར་ཕུག་གི་སྒོ་དེ་དག་རྣམས་ལ་ལྷ་རྣམས་ལ་ཕན་པར་འདོད་པའི་ཕྱིར་ན་དེ་བཞིན་དུ་བྲིས་པར་གྱུར་ཏོ། །དེ་ལ་ལྷ་ཁ་ཅིག་གིས་མངོན་པར་བརྗོད་ནས་སྔོན་གྱི་སྐྱེ་བ་དྲན་པར་བྱས་པར་གྱུར་ནས་ཡིད་བྱུང་བས་ཡུད་ཙམ་ཅིག་ཏུ་བག་མེད་པས་རྣམ་པར་མི་རྒྱུ་

70-227a

བར་འགྱུར་རོ། །ལེགས་པར་བྱས་པའི་ལས་ཀྱིས་ལེགས་པར་བསྒོས་པར་གྱུར་པའི་སེམས་ཡུད་ཙམ་དེས་ཀྱང་སྐྱེ་བ་གཞན་བརྒྱ་སྟོང་དུ་བདེ་བར་གྱུར་པའི་སྐལ་བ་ཅན་དུ་འགྱུར་རོ། །གང་གི་ཕྱིར་སྟོབས་དང་ལྡན་པ་རྣམས་ནི་དཀར་པོའི་ཕྱོགས་ཡིན་ལ། སྟོབས་ཆུང་བ་ནི་ནག་པོའི་ཕྱོགས་ཡིན་ནོ། །དེ་དག་གི་དེ་ལྟར་ཡུད་ཙམ་དེས་ཀྱང་སྐྱེ་བ་གཞན་བརྒྱ་སྟོང་རྣམས་ཆུད་གཟན་པར་མ་གྱུར་ཏོ། །ཕུག་གང་དག་གི་སྒོ་ལ་ཚིགས་སུ་བཅད་པ་མཐོང་ཞིང་ཡིད་བྱུང་བར་གྱུར་ནས་བག་མེད་པས་རྣམ་པར་མི་རྒྱུ་བར་གྱུར་པ་རྣམས་དང་། ལྷ་གང་དག་གིས་ན་དེ་མ་མཐོང་བ་ཉིད་དུ་ཞུགས་པར་ཡང་གྱུར་ཏེ། དེ་ནས་གང་དག་གིས་ཚིགས་སུ་བཅད་པ་དེ་མཐོང་བ་རྣམས་དང་ཡང་གང་དག་གིས་མ་མཐོང་བ་དེ་དག་རྣམས་ཐམས་ཅད་ཀྱང་སྒོ་དེ་ནས་ཞུགས་ཏེ། ནང་དུ་གྱུར་པའི་དགའ་བའི་ཡན་ལག་རྣམས་ཕྱིར་ཞིང་ཉིད་ཀྱང་བག་མེད་པས་ཟིན་པར་གྱུར་ནས་རབ་ཏུ་ལྟ་བར་བྱེད་དོ། །རྣམ་པ་ཇི་ལྟ་བུའི་ནོར་བུའི་ཕུང་པོ་རྣམས་ལ་འདི་ལྟ་སྟེ། རྡོ་རྗེའི་ཕུང་པོ་དང་ཨིན་དྲ་ནཱི་ལའི་ཕུང་པོ་དང་ནཱི་ལ་ཆེན་པོའི་ཕུང་པོ་དང་ནོར་བུའི་ཕུང་པོ་རྣམས་དང་རྣམ་པ་དུ་མར་ཉེ་འཁོར་ན་ཀུན་ཏུ་སྣང་བར་བྱེད་དོ། །རྣམ་པ་དེ་དག་རྣམས་ཀྱིས་རྣམ་པ་དུ་མར་ཡང་ཕུག་དེ་དག་རང་བཞིན་ཉིད་ཀྱིས་གཟི་བརྗིད་དང་ལྡན་པར་གྱུར་པ་ལས་ཕྱིར་ཞིང་ཉིད་ཀྱང་དེ་དག་ཤིན་ཏུ་ཡང་འབར་བར་འགྱུར་བ་ཡིན་ནོ། །འོད་གསུམ་པར་གྱུར་པ་ན་ལྷ་རྣམས་རང་ཉིད་ཀྱི་ལུས་ལས་ཀུན་ཏུ་བྱུང་བའི་འོད་ཟེར་རྣམས་ཀྱིས་ཏེ། དེ་ལྟར་ཕུག་དེ་ཆེས་དགའ་བར་གྱུར་པ་ཡིན་ནོ། །དེ་དག་ལ་ཡང་ལྷ་དེ་དག་རྣམས་རངས་པར་གྱུར་ནས་དགའ་བར་བྱེད་ཅིང་གར་བྱེད་དོ། །དགོད་པར་བྱེད་དོ། །ཕ་རོལ་རྒྱ་ཆེན་པོས་ཟིན་པར་གྱུར་པའི་འཇིགས་པ་དང་མྱ་ངན་དང་བྲལ་བ། ལྷ་རྣམས་ཀྱི་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པར་གྱུར་ནས་དེ་དགའ་བར་བྱེད་དེ་ལྷན་ཅིག་སྤྱོད་པའི་འཁོར་དང་བཅས་པ་རྣམས་གཟེར་ཟུག་དང་རྣམ་པར་བྲལ་རིམས་ནད་མེད་པ་མྱ་ངན་མེད་པ་རང་གི་ལས་ཀྱི་བགོ་སྐལ་ལ་སྤྱོད་པ་རྣམས་རྣམ་པ་དུ་མར་དགའ་བར་བྱེད་དེ། དེས་རིན་པོ་ཆེའི་ས་གཞི་དེ་ཉིད་མངོན་པར་མཐོང་ནས་རབ་

70-227b

ཏུ་རངས་པ་མཆོག་གི་ཡིད་ཀྱིས་རབ་ཏུ་གར་བྱེད་པ་དང་གླུ་དང་ཅ་ཅོའི་སྒྲ་དང་རྔ་སྒྲ་རྣམས་ཀྱིས་སྨྱོས་པར་གྱུར་པའི་ཡིད་ཀྱིས་སླར་ཡང་ཕུག་དེ་དག་ཉིད་ཀྱི་ནང་དུ་ཞུགས་པར་གྱུར་ཏོ། །ཞུགས་ནས་ཀྱང་མཐོང་བར་གྱུར་པ་རྣམས་ལ་ཆུ་ཀླུང་ཤིན་ཏུ་དྲི་ཞིམ་པ་རེག་བྱས་ཡོངས་སུ་གང་བ་མྱོས་བྱེད་ཀྱིས་ཡོངས་སུ་གང་བར་གྱུར་པ་དེ་ལ་སྟེན་པར་བྱེད་པའི་བྱས་ཉེ་བར་མཛེས་པའོ། །དེ་ལ་བྱའི་རིགས་ནི་འདི་དག་རྣམས་ཡོད་དེ་རབ་ཏུ་དགའ་བ་པོ་དེ་རྟག་ཏུ་མྱོས་པ་དང་། ཀུན་ཏུ་དགའ་བ་དང་། གཞན་དུ་མ་ཡིན་པ་དང་རོ་ལ་དགའ་བར་བྱེད་པ་དང་རང་བཞིན་གྱིས་ང་རྒྱལ་ཅན་དང་གཞན་ལ་མི་དགའ་བ་དང་དྲིའི་བཏུང་བས་མྱོས་པ་སྟེ། དེ་དག་དང་བྱ་གཞན་དག་རྣམས་ཀྱང་མཆོག་ཏུ་རབ་ཏུ་རངས་པར་གྱུར་ནས་མྱོས་བྱེད་ཀྱི་ཆུ་ཀླུང་དེར་དགའ་བར་བྱེད་ཅིང་དེ་ལེགས་པར་བྱས་པའི་ལས་ཀྱིས་ཀྱང་བསྐུལ་ནས་ཚིགས་སུ་བཅད་པ་རྣམས་རྗོད་པར་བྱེད་པ། ཇི་ལྟར། རོ་ཡིས་མཛེས་པའི་མྱོས་བྱེད་ནི། །ཡོངས་སུ་སྨིན་ནས་ཤིན་ཏུ་གདུག །ཡོངས་སུ་སྨིན་པའི་སྡིག་པ་ཡིས། །དམྱལ་བར་སྐྱེ་བར་འགྱུར་བ་ཡིན། །འཐུངས་པས་རྨོངས་པ་སྐྱེད་པར་བྱེད། །རྨོངས་པས་སྡིག་ལ་དགའ་བར་འགྱུར། །སྙིང་ལ་ཀུན་ནས་ཆགས་ལྡན་པའི། །བྱིས་རྣམས་དམྱལ་བའི་རྗེས་སུ་རྒྱུག །དང་པོར་རབ་ཏུ་དགའ་བ་སྐྱེད། །རྣམ་སྨིན་བཀྲེན་པ་བླ་ན་མེད། །སྲེད་པས་དང་པོར་འཁོལ་བར་བྱེད། །ཕྱི་ནས་མི་བཟོད་པར་ནི་སྲེག །དང་པོར་ངག་དང་བློ་ཉམས་བྱེད། །ཕྱི་ནས་བདེ་བ་ཉམས་པར་བྱེད། །དེ་ཕྱིར་སྐྱེས་བུ་བརྟན་ལྡན་པ། །གང་ཞིག་མྱོས་བྱེད་བསྟེན་མི་བྱ། །སྐྱེས་བུ་མྱོས་བྱེད་སྟེན་རྣམས་ནི། །མཁའ་ལྡིང་དང་ནི་མཚུངས་འཕྱོ་བའི། །མཚུངས་པར་རྣམ་པར་རྨོངས་སྐྱེད་པ། །ཆང་ནི་སྤོངས་དང་དུག་ཆེན་པོ། །གང་གིས་ཆང་ནི་དུག་མཚུངས་མཐོང་། །དེས་ནི་བླ་མེད་གོ་འཕང་མཐོང་། །གང་ཡང་དེ་ནི་རྣམ་ཆགས་འཐུང་། །ཟངས་ཞུའི་ཁུ་བ་དམར་པོ་འཐུངས། །གཅིག་ལས་སྡིག་པ་ཐམས་ཅད་པ། །གཅིག་པོ་ཆང་འཐུང་བ་འདི་ཡིན། །དེ་ཡིས་སེམས་ནི་སུན་འབྱིན་བྱེད། །སྡོམ་པས་སེམས་ཀྱི་རྩ་བ་ཅན། །གང་ཕྱིར་

70-228a

སེམས་ནི་རྩེ་གཅིག་མིན། །ཆོས་རྣམས་དཔྱོད་བྱེད་པ་ཡང་མིན། །དགེ་སློང་ཆང་ནི་སྟེན་པ་ན། །དགོན་པར་དགའ་བར་འགྱུར་མ་ཡིན། །ཆང་གིས་ཡིད་ནི་གཡེང་བར་བྱེད། །སྙིང་ཡང་རྒོད་བག་དང་བཅས་འགྱུར། །ཆོས་ལའང་དགའ་བར་འགྱུར་མ་ཡིན། །འཇིག་རྟེན་འདི་མེད་ཕ་རོལ་མེད། །སྤྱོད་ལམ་ཤེས་པ་མ་ཡིན་ལ། །སྟོན་པའི་དུས་ཀྱང་ཤེས་མ་ཡིན། །དམ་པའི་ཆོས་ཉིད་དང་འགལ་ཞིང་། །སྟོན་པས་ཀྱང་ནི་ཅི་ཞིག་བཤད། །རེ་ཞིག་རང་གིས་མི་ཤེས་ན། །བདག་གིས་འདིར་ནི་ཅི་ཞིག་སྨྲ། །མཛེས་མིན་ངག་གི་སྤུ་གྲིའི་མཚོན། །གཞན་གྱིས་ཇི་ལྟར་ཡོངས་སུ་ཤེས། །འཇིག་རྟེན་དོན་ལ་ཡང་འགྱུར་ཞིང་། །ཆོས་ལས་ཀྱང་ནི་ཡོངས་སུ་ཉམས། །འབར་བའི་ཆང་ནི་བསྟེན་པ་ན། །སྐྱེས་བུ་ནོར་མེད་མཐོང་བ་ཡིན། །འདས་པའི་དོན་ཀུན་དྲན་མིན་དང་། །ད་ལྟར་བ་ལ་རྨོངས་པར་འགྱུར། །མ་འོངས་བསམ་པ་ཅི་ལ་ཡོད། །ཆང་གིས་དུས་གསུམ་ཆུད་གཟོན་བྱེད། །སྣ་ཚོགས་གཟུགས་ཀྱང་རྣམ་པར་འཇོམས། །ལུས་ཅན་རྣམས་ཀྱིས་སེམས་ཀྱང་འཇོམས། །སྐྱེས་པའི་སྐྱོན་ནི་སྐྱེད་བྱེད་པའི། །ཆང་གིས་ཆོས་ནི་རབ་སུན་འདོན། །དེ་ལྟར་ཕུག་གི་ནང་ན་གནས་པར་གྱུར་པའི་བྱ་དེ་དག་རྣམས་རྟག་པར་རབ་ཏུ་དགའ་བ་དང་ལྡན་ཞིང་། སྟོན་པར་བྱེད་པའི་རྩ་བར་གྱུར་པ་ལས་དམ་པ་རྣམས་ཀྱིས་ལེགས་པར་བསྐུལ་བས་ལྷ་རྣམས་ལ་འཆད་དོ། །དེ་ཐོས་ནས་ཀྱང་ལྷ་གང་དག་ལེགས་པར་བྱས་པའི་ལས་རྣམས་ཆེས་ལྷག་པར་གྱུར་པ་དེ་དག་རྣམས་ཀྱིས་སྐྱེ་བ་གཞན་རྗེས་སུ་དྲན་པར་འགྱུར་བ་དང་། ཆང་གི་སྐྱོན་རྣམས་ཀྱང་ཤེས་སོ། །རྒྱུ་དེས་ཀྱང་ཆང་མི་འཐུང་ངོ་། །དེ་དག་རྣམས་འདིར་བག་མེད་པར་ཡང་མི་འགྱུར་རོ། །དེ་ལྟ་དེ་ལྟར་མྱོས་བྱེད་འཐུང་བར་བྱེད་པ་དེ་དག་རྣམས་སླར་ཡང་ལྷ་དེ་དག་རབ་ཏུ་དགའ་བའི་ཡིད་ཀྱིས་རབ་ཏུ་རྩེ་བར་བྱེད་དེ་རྔ་སྐད་ཡན་ལག་ལྔ་དང་ལྡན་པ་ཤིན་ཏུ་ཆགས་པ་དང་ཤིན་ཏུ་སྙན་པ་དང་རྒྱུན་དུ་དགའ་བར་གྱུར་པ་དག་གིས་དགའ་བར་བྱེད་དོ། །དེ་དག་རྣམས་དུས་ཡུན་རིང་པོ་ཕུག་དེ་དག་ཏུ་ལྷ་རྫས་ཀྱི་མཆོག་རྣམས་སྣ་ཚོགས་པ་ཡིད་

70-228b

འཕྲོག་པར་བྱེད་པ་རྣམས་ཀྱིས་རྩེད་མོ་རྩེས་པར་གྱུར་ནས་གང་ཁོ་ནས་ཇི་ལྟར་ཞུགས་པར་གྱུར་པ་དེ་ཁོ་ན་བཞིན་དུ་ཕྱིར་འགྲོའོ། །ཕྱིར་སོང་ནས་ཀྱང་གཞན་ཡང་ཡུལ་རྣམས་ལ་སྲེད་པར་གྱུར་པས་བག་མེད་པར་རྣམ་པར་རྒྱུ་བ་རྣམས་ནགས་དང་ཉེ་བའི་ནགས་དག་ལྟ་བ་ལ་དགའ་བའི་ཡིད་ཀྱིས་ལྷན་ཅིག་སྤྱོད་པ་དང་བཅས་པས་པད་མའི་ཚལ་གྱི་ནང་དང་ཆུ་ཀླུང་དང་ཚང་ཚིང་དག་ཏུ་དགའ་བར་བྱེད་དོ། །ལྷ་དེ་དག་ལེགས་པར་བྱས་པའི་ལས་ཀྱི་འབྲས་བུ་ལ་ལོངས་སྤྱོད་པས་དེ་དག་རྣམ་པ་དེ་སྲིད་ཀྱི་དཔེ་མེད་པའི་ལྷ་རྫས་ཀྱི་བདེ་བ་རྣམས་ཕུན་སུམ་ཚོགས་པར་འགྱུར་བ་རྣམས་ལ་ཡུལ་གྱིས་ངོམས་པ་སྐྱེ་བ་མེད་དེ། རྣམ་པར་གཡེངས་པའི་སྐྱོན་གྱིས་རྣམ་པར་གཡེངས་པའི་མུན་པའི་རང་བཞིན་ཁོ་ནས་ཏེ། དེ་དག་གིས་རང་བཞིན་ནི་ནམ་ཡང་ཀུན་ནས་འཁུམ་པར་མི་འགྱུར་རོ། །ཡུལ་གྱི་བདེ་བ་རྣམས་ཀྱིས་ངོམས་པར་འགྱུར་བའམ་རྣམ་པར་གཡེངས་པར་གྱུར་པའི་ངོ་བོས་ཀྱང་དབང་པོ་རྣམས་ནི་ནམ་ཡང་སྲེད་པ་དང་བྲལ་བར་མི་འགྱུར་རོ། །ལྷ་རྣམས་ལྷ་རྫས་ཀྱི་འདོད་པའི་ཡོན་ཏན་ལྔ་ཡིས་ཉི་མ་རེ་རེ་ཞིང་རབ་ཏུ་འཕེལ་བར་གྱུར་པའི་སྔ་ཕྱི་རིམ་པས་ངོ་མཚར་བ་རྣམས་སྐྱེད་པར་བྱེད་པ་དང་ཡིད་ཀྱི་རྗེས་སུ་འཐུན་པར་བྱེད་པ་དང་དཔེ་མེད་པ་དང་ཡོན་ཏན་དང་ལྡན་པར་གྱུར་པས་ཀྱང་དེས་དེ་དག་ནམ་ཡང་ངོམས་པ་སྐྱེ་བ་མ་ཡིན་ནོ། །ཇི་ལྟར་ཆུ་རྣམས་ཀྱིས་ནི་རྒྱ་མཚོ་ངོམས་པ་ཡོད་པ་མ་ཡིན་ནོ། །དེ་བཞིན་དུ་ལྷ་རྣམས་ཀྱང་སྟེ་དེ་དག་དུས་དེ་སྲིད་དུ་རིགས་དེ་ཉིད་ལ་དགའ་བར་ཡང་བྱེད་ཅིང་རྣམ་པ་སྣ་ཚོགས་པའི་བདེ་བ་རྣམས་ཀྱིས་རྒྱུ་བ་རྒྱགས་པས་ནགས་དང་ཉེ་བའི་ནགས་རྣམས་ལ་རྣམ་པར་རྒྱུ་བར་བྱེད་པས་འདོད་པའི་ཆུ་བོས་ཀུན་ནས་ཁྱེར་བར་གྱུར་པ་རྣམས་ལྷན་ཅིག་སྤྱོད་པ་དང་བཅས་ནས་དགའ་བར་བྱེད་དེ། ཇི་སྲིད་དུ་འདོད་པ་སྡུག་པའི་ལས་བྱས་ཤིང་བསགས་པར་གྱུར་པ་དེ་དག་རྣམས་ཟད་པར་མ་གྱུར་གྱི་བར་དུའོ། །དེ་ཟད་ནས་ལྷའི་རིགས་དེ་ལས་འཆི་འཕོ་བར་འགྱུར་རོ། །འཕོས་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བར་བྱེད་པ་ཇི་ལྟར་ལས་ཀྱི་ཐག་པ་དག་གིས་ཀུན་ནས་ལྷ་དེ་བཅིངས་པར་གྱུར་ཅིང་རྣམ་པ་དེ་ལྟ་

70-229a

བུའི་བདེ་བ་ལས་ཀྱང་ཡོངས་སུ་ཉམས་ནས་སླར་ཡང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ། །དེ་དག་གི་གལ་ཏེ་ལེགས་པར་བྱས་པའི་ལས་སུ་གྱུར་པ་ལན་གྲངས་གཞན་ལ་མྱོང་བར་འགྱུར་བའི་ལས་ཀྱིས་མི་རྣམས་སུ་སྐྱེས་ནས་དེ་འཛམ་བུའི་གླིང་དུ་མཆོག་ཏུ་སྐྱིད་དེ་བར་འགྱུར་ཏེ་ཤིན་ཏུ་མཐོ་བའི་རིགས་སུ་གར་དང་གླུ་དང་དགོད་པ་དང་འགྱིང་བག་དང་བཅས་པར་སྐྱེའོ། །མཆོག་ཏུ་སྐྱིད་དེ་བར་འགྱུར་ཏེ། སྐྱེས་བུ་ཡང་མེ་ཏོག་ཕྲེང་དང་པི་བང་དང་རྒྱན་དང་ཆ་བྱད་བཟང་པོ་དང་མཆོག་ཏུ་འཕགས་པའི་གཟུགས་དང་ལྡན་པ་ཕུན་སུམ་ཚོགས་པ་མཆོག་དང་ལྡན་པ་ཡུལ་ལྗོངས་ཀྱི་མཆོག་དག་ཏུ་ཉེ་བར་སྐྱེ་བར་འགྱུར་ཏེ་རྒྱལ་པོའམ་རྒྱལ་པོའི་བློན་པོ་ཡང་རུང་སྟེ་ཡུལ་ཀཱ་ཤིའམ་ཀཽ་ཤ་ལའམ་གླིང་ཕྲན་དག་ཏུ་ཡང་ལས་དེའི་རྒྱུ་འཐུན་པའི་འབྲས་བུ་དག་གིས་སོ། །འོད་ཟེར་འཕྲོ་བ་ཅན་གྱི་ལྷ་རྣམས་ཀྱི་ལྷའི་རིགས་ཇི་སྲིད་པ་རྣམས་ཡོངས་སུ་བསྡུས་པ་སྟེ་ས་བདུན་པ་རྫོགས་སྷོ།། །།

ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བའི་ལྷ་རྣམས་ཀྱི་ས་གཞན་ལ་ཀུན་ཏུ་ལྟ་བར་བྱེད་དོ། །དེ་ཐོས་པ་ལས་བྱུང་བའི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱི་ས་ཇི་ལྟར་ཡོད་པ་བསྡམས་པར་རྒྱུ་བ་ཞེས་བྱ་བ་མཐོང་ངོ་། །ས་དེ་ལ་ལས་གང་གིས་སེམས་ཅན་རྣམས་སྐྱེ་བར་འགྱུར་བ་དེས་མཐོང་བ་མཆོག་ཏུ་རྣམ་པར་དག་པར་གྱུར་པའི་རྣམ་པར་སྨིན་པ་དཀར་བ་བདེ་བ་སྐྱེད་པར་བྱེད་པའི་ལས་དེའི་འབྲས་བུ་ལ་སླུ་བ་མེད་པ། འཕགས་པ་དགྱེས་པའི་སྦྱིན་པ་དང་ཤེས་རབ་ལྷག་པ་དེས་འདོད་པ་སྡུག་པ་ཡིད་དུ་འོང་བའི་འབྲས་བུར་འགྱུར་བ་ལ་འདི་ལྟ་སྟེ། ལྷར་སྐྱེ་བར་བྱེད་པའོ། །རྣམ་པ་ཇི་ལྟ་བུའི་འདོད་པ་སྡུག་པ་ཡིད་དུ་འོང་བས་ལྷར་སྐྱེ་བའི་འབྲས་བུ་ཡིན་ན་འདི་ལྟ་སྟེ། གང་གིས་མཆོག་ཏུ་དགེ་བའི་སེམས་སུ་གྱུར་ནས་ཤིན་ཏུ་རྣམ་པར་དག་པར་སྤྱོད་པར་གྱུར་ཏེ། གུས་པ་ལེགས་པར་སྐྱེས་པའི་ཡིད་ཞུ་བར་གྱུར་པས་སྲོག་གཅོད་པ་དང་མ་བྱིན་པར་ལེན་པ་དག་རྣམ་པར་སྤངས་པར་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་རྣམ་པར་སྤོང་བར་བྱེད་པ་ལ་འདི་ལྟ་སྟེ། གང་གིས་སྔོན་སྐྱེ་བ་གཞན་དུ་ཉམས་སུ་མྱོང་བར་གྱུར་

70-229b

པའི་འཁྲིག་པ་ཐོས་ནས་ཆགས་པར་བྱེད་པ་དང་། འདོད་ཆགས་ལ་སྤྱད་པའི་ཡིད་ཀྱིས་ཀྱང་རབ་ཏུ་ཉམས་པར་གྱུར་ནས་ཡུལ་གྱི་སྲེད་པས་འཁྲིད་པར་གྱུར་པའི་འདོད་པ་རྣམས་ཀྱང་མྱོང་བར་མི་བྱེད་དོ། །དེ་དག་རྣམས་ལ་སེམས་པར་ཡང་མི་བྱེད་དོ། །རབ་ཏུ་རྟོག་པར་མི་བྱེད་དོ། །གཞན་རྣམས་ཀུན་དུ་རྟོག་པར་བྱེད་པ་ན་རབ་ཏུ་འགོག་པར་བྱེད་དོ། །དེ་ལྟར་ཡོངས་སུ་དག་པའི་ལས་བྱེད་པ་དེ་ལུས་ཞིག་པར་གྱུར་པ་ན་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱིས་བསྡམས་པར་རྒྱུ་བའི་སར་སྐྱེའོ། །དགེ་བའི་ལས་དེ་དག་གི་འབྲས་བུས་དེ་ལས་སྐྱེས་པར་གྱུར་པ་ན་ཡང་འདིའི་རྣམ་པ་སྣ་ཚོགས་པའི་དྲི་དང་རོ་དང་རེག་བྱ་རྣམས་དང་དེ་ཡུལ་དུ་མ་རྣམས་ལ་དགའ་བར་གྱུར་པས་ནགས་ཀྱི་ནང་རྣམས་སུ་རྒྱུ་བར་བྱེད་ཅིང་ལྷ་རྫས་ཀྱི་ལྟི་ལྟོ་ཅན་རྣམས་འགྱིང་བར་གྱུར་པ་ལྷ་མོ་བརྒྱ་སྟོང་གིས་ཉེ་བར་སྒྱུར་ཟློག་བྱེད་པས་ནགས་དང་ཉེ་བའི་ནགས་དང་རྫིང་བུ་དང་འབབ་ཆུ་དག་ལ་སྟེན་པར་བྱེད་པ་ཡུད་ཙམ་ཅིག་ཀྱང་གནས་གཅིག་ན་དགའ་བར་མི་བྱེད་པར་དེ་སྔ་ན་མ་མཐོང་བའི་བདེ་བ་དཔེ་མེད་པ་རྣམས་ལ་ལོངས་སྤྱོད་པར་གྱུར་པ། བདེ་བ་དུ་མ་པ་དུ་མ་རྣམས་ཀྱིས་དེའི་དབང་པོ་རྣམས་དང་ཡིད་ཀྱང་ངོམས་པ་མེད་པར་དེ་ཡང་ནགས་དང་ཉེ་བའི་ནགས་སུ་ཡིད་ལ་སྨོན་པའི་ལྷ་མོའི་ཚོགས་ཀྱིས་ཡོངས་སུ་བསྐོར་བར་གྱུར་ནས་ལྷ་གཞན་དག་རྣམས་ནགས་རྣམས་ཀྱི་ནང་དུ་རྩེ་བར་གྱུར་པ་རྣམས་མངོན་པར་མཐོང་ལ་དེ་དག་རྣམས་ཀྱིས་ཀྱང་ལྷ་གསར་དུ་སྐྱེས་པ་དེ་མངོན་པར་མཐོང་བར་གྱུར་ཏེ་འདོད་ཆགས་ཀྱིས་གཟིར་བའི་རྒྱགས་པས་རྩེ་བའི་འགྲོས་དང་ལྡན་པ་ལྷ་རྫས་ཀྱི་ཕྲེང་བའི་རྒྱན་ཅན་དེ་དག་རྣམས་ལ་གསར་དུ་སྐྱེས་པར་གྱུར་པ་ལ་ཉེ་བར་རྟེན་པར་བྱེད་དོ། །དེས་ཀྱང་དེ་དག་རྣམས་མངོན་པར་མཐོང་བར་གྱུར་ནས་ཡོན་ཏན་དང་ལྡན་པའི་འདོད་པ་ལྔས་རྣམ་པར་ཟིན་པར་གྱུར་པས་དེ་དག་རྣམས་ཉིད་ཀྱང་ཐག་ཉེ་བར་གྱུར་པར་ལེགས་པར་ཉེ་བར་བསྙེན་ནས་འགྲོ་བར་བྱེད་དོ། །ལྷ་མོ་དེ་དག་རྣམས་དང་ལྷ་གསར་དུ་སྐྱེས་པར་གྱུར་པ་དེ་ཡང་ཕན་ཚུན་དུ་ལྷན་ཅིག་ཏུ་རྒྱགས་པ་ལ་དོན་གཅིག་པར་གྱུར་པས་དེ་ཐམས་ཅད་གར་བྱེད་པར་གྱུར་པ་དང་དགོད་པར་གྱུར་པ་ལས་

70-230a

དེ་དག་རྣམས་འདི་བཞིན་དུ་སེམས་པར་གྱུར་ཏེ་འདི་དག་ནི་བདག་ཅག་རྒྱས་པར་བྱེད་པར་བྱེད་པ་པོའོ་ཞེས་དེ་བཞིན་དུ་བསམས་ནས་ཇི་ལྟར་དེ་དག་དང་བདག་ཏུ་འཛིན་པར་གྱུར་པས་དེ་དག་རྣམས་ཕན་ཚུན་དུ་མངོན་པར་ཆགས་ཤིང་ཞེན་པས་ངལ་སོས་པ་སྐྱེད་པར་བྱེད་པ་ཕན་ཚུན་དུ་གནོན་པ་མེད་པར་གྱུར་ནས་རྒོད་པ་དང་བསྐྱོད་པ་དང་རྩེ་དགའ་བ་ལ་དོན་དམ་དུ་བྱེད་པར་གྱུར་པས་ནགས་ནས་ནགས་གཞན་རྣམས་སུ་དང་རིའི་རྩེ་མོ་ནས་རིའི་རྩེ་མོ་རྣམས་སུ་དང་རྫིང་བུ་ནས་རྫིང་བུ་རྣམས་དང་པད་མའི་རྫིང་བུ་ནས་པད་མའི་རྫིང་བུ་རྣམས་དང་འཁྲི་ཤིང་གི་ཁང་པ་ནས་འཁྲི་ཤིང་གི་ཁང་པར་དང་ཤིང་ལྗོན་པའི་ཚལ་ནས་ཤིང་ལྗོན་པའི་ཚལ་དག་དང་མཚོ་གཞན་ནས་མཚོ་གཞན་རྣམས་སུ་སྟེ་དེ་དག་ན་རྣམ་པ་དུ་མར་གྱུར་པའི་བཻ་ཌཱུརྱ་སྔོན་པོ་དང་འདྲ་བར་གྱུར་པའི་ངང་པ་དང་ངང་ངུར་གཞལ་དུ་མེད་པའི་བྱ་དུ་མས་སྒྲ་ཀུན་ནས་བསྒྲགས་པར་གྱུར་པས་རྣ་བར་སྙན་པར་བྱེད་པ་ཀུན་བསམས་པས་འདོད་པ་རྣམས་འབྱུང་བའི་ཆུ་ཡིན་ཏེ་ཇི་ལྟར་ལྷ་དེ་དག་རྣམས་ཀྱི་སེམས་མངོན་པར་རྒྱན་པར་བྱེད་པའི་རྣམ་པ་དེ་སྲིད་དུ་འགྱུར་རོ། །དེ་ལྟར་གྱུར་པའི་ཆུ་གང་ཡིན་པ་ནི་རྣམ་པ་དུ་མར་རོ་དང་དྲི་དང་ལྡན་པ་ཡིན་ནོ། །དེ་མཚོ་དེ་དག་ཏུ་རྩེད་མོ་བྱས་ནས་སླར་ཉིད་ཀྱང་གང་ན་ལྷ་གཞན་དག་རྣམས་མཆོག་ཏུ་དགའ་བའི་ཡིད་ཀྱིས་འགྲོ་བར་བྱེད་པ་དེར་ལྷ་གསར་དུ་སྐྱེས་པ་དེ་ལྷ་མོའི་ཚོགས་དེ་དག་རྣམས་ཀྱིས་ཡོངས་སུ་བསྐོར་ནས་གར་དང་གླུ་དང་རོལ་མོའི་སྒྲ་དང་བཅས་ནས་འགྲོ་བར་བྱེད་དོ། །ལྷ་དེ་དག་གིས་ཀྱང་ལྷ་གསར་དུ་སྐྱེས་པ་དེ་ཀུན་ནས་མངོན་པར་མཐོང་ནས་ཚིགས་སུ་བཅད་པ་བརྗོད་པ། ཇི་ལྟར། གསར་དུ་སྐྱེས་པའི་བྲག་རྣམས་དང་། །རྫིང་བུའི་པད་མའི་ཚལ་དང་ནི། །ཁང་བཟངས་རྩེ་མོ་དགའ་བ་ལས། །རང་འཁོར་ལྷ་དང་བཅས་ནས་དགའ། །གསེར་ལས་གྱུར་པའི་བྲག་དང་ནི། །བཻ་ཌཱུརྱ་ཡི་རྩེ་མོ་ལ། །ནགས་ཀྱི་ཚལ་དང་གཞན་རྣམས་ཡང་། །རང་གི་ལྷ་འཁོར་བཅས་ཏེ་དགའ། །དགའ་བའི་དཔག་བསམ་ཤིང་དག་དང་། །ཆུ་ཀླུང་དང་ནི་འབབ་ཆུ་དང་། །མཚོ་བྲན་ཡང་ནི་རྣམ་སྤངས་པ། །ལྷ་རང་འཁོར་

70-230b

དང་བཅས་ཏེ་དགའ། །རིན་ཆེན་བདུན་གྱིས་རྣམ་བཀྲ་བའི། །རི་རྣམས་དག་དང་ཆུ་ཀླུང་དང་། །རི་ལོགས་དང་ནི་ཆེར་འོས་ལ། །དགའ་བོ་རང་བཅས་ལྷ་རྣམས་དང་། །མན་དཱ་ར་ཤིང་ཚང་ཚིང་དང་། །ཨུད་པལ་སྔོན་པོའི་ཚལ་རྣམས་ལ། །བྱ་ཡི་དབྱངས་སྙན་དགའ་བ་ན། །རང་འཁོར་ལྷ་དང་བཅས་ནས་དགའ། །ས་གཞིའི་ཆ་ནི་གཞན་དག་དང་། །རིན་ཆེན་འབྱུང་གནས་ཚལ་རྣམས་དང་། །ཁྱོགས་ཀྱི་ཁང་བུ་དགའ་བར་ནི། །ལྷ་ནི་རང་འཁོར་བཅས་ཏེ་དགའ། །ཡིད་ནི་མཉེན་ཞིང་རླན་བྱེད་པའི། །རྔ་སྐད་ཡན་ལག་ལྔ་པ་ཡིས། །གར་དང་ལྡན་པ་རྟག་བདེ་བས། །ལྷ་ནི་རང་འཁོར་བཅས་ཏེ་དགའ། །དེ་ལྟར་ལྷ་དེ་དག་གིས་གསར་དུ་སྐྱེས་པའི་ལྷ་དེ་ལ་འགྲོ་བར་བྱེད་དོ། །དེ་དག་གི་ཚིགས་སུ་བཅད་པ་རྣམས་ཀུན་དུ་ཞི་བར་གྱུར་ནས། དེ་ཁོ་ན་ཉིད་རྗོད་པར་བྱེད་པའི་བྱ་དེ་དག་རྣམས་ཀྱིས་ཀྱང་ཚིགས་སུ་བཅད་པའི་དབྱངས་དང་ཞད་འདྲ་བའི་ཀུན་བརྗོད་པ་དག་བསྙད་པ། ཇི་ལྟར། ནགས་དང་ཉེ་བའི་ནགས་རྣམས་དང་། །པད་མའི་འབྱུང་གནས་ནགས་རྣམས་ལ། །བྱིས་པ་སྲེད་པས་རྣམ་པར་འཁྲུལ། །རང་གི་ལྷ་འཁོར་བཅས་ཏེ་ལྟུང་། །གསེར་ལས་གྱུར་པའི་བྲག་རྣམས་ཀྱི། །རྩེ་མོ་བཻ་ཌཱུརྱ་རྣམས་ལ། །དགེ་བའི་ལས་ཀྱིས་འཕངས་པ་དེ། །རང་གི་འཁོར་གྱི་ལྷར་བཅས་ལྟུང་། །དཔག་བསམ་ཤིང་ནི་དགར་འགྱུར་དང་། །ཆུ་ཀླུང་དང་ནི་འབབ་ཆུ་ལ། །སྤྱོད་པ་དེ་ཡིས་དགེ་ཟད་ནས། །རང་འཁོར་ལྷ་དང་བཅས་ནས་ལྟུང་། །ས་གཞིའི་ཆ་ནི་གཞན་དག་དང་། །རིན་ཆེན་འབྱུང་གནས་ནགས་ལ་ཡང་། །རྟག་ཏུ་དགེ་མིན་ཞུགས་པ་ལ། །རང་འཁོར་ལྷ་དང་བཅས་པ་ལྟུང་། །ཡིད་ནི་ཀུན་ནས་ཚིམ་བྱེད་པའི། །རྔ་སྐད་ཡན་ལག་ལྔ་པ་ཡིས། །ཕྲོགས་པས་དེ་ཡི་དུས་འདས་ནས། །རང་འཁོར་ལྷ་དང་བཅས་རྣམས་འབབ། །དེ་ལྟར་ཡང་བྱ་དེ་དག་གིས་ཕན་པར་འགྱུར་བ་དང་། ཀུན་དུ་སྐྱོ་བར་བྱེད་པ་དང་འདྲ་བའི་ཚིགས་སུ་བཅད་པ་ཇི་ལྟ་བར་བརྗོད་དོ། །རབ་ཏུ་བཤད་པའི་རྗེས་ལ་རྣ་བ་ལ་ལམ་བྱུང་བར་གྱུར་ནས་

70-231a

བག་མེད་པས་ཀུན་དུ་ཁྲིད་པའི་ཕྱིར་ལྷ་སྐྱེས་ནས་ཡུན་རིང་དུ་ལོན་པ་རྣམས་ཀྱིས་ཀྱང་ཚིགས་སུ་བཅད་པའི་མིང་ཙམ་ཡང་ཐོས་པར་མི་འགྱུར་ན། གང་དག་སྐྱེས་པར་གྱུར་ནས་དུས་ཐུང་དུ་ལོན་པ་ཤིན་ཏུ་བག་མེད་པས་རྣམ་པར་རྒྱུ་བར་བྱེད་པའི་ལྷ་དེ་དག་རྣམས་ཀྱིས་དེ་བརྩི་བགྲང་མི་བྱེད་པ་ལ་ལྟ་ཅི་སྨོས། ཆེས་བག་མེད་པས་རྣམ་པར་རྒྱུ་བའི་ལྷ་དེ་དག་རྣམས་ཀྱིས་དེ་ལ་བརྩི་བགྲང་མ་བྱས་པར་བག་མེད་པའི་དུག་གི་ཤུགས་ཀྱིས་ཀུན་ཏུ་རྨོངས་པར་གྱུར་ནས་ཉེ་འཁོར་ཀུན་ན་རབ་ཏུ་གར་བྱེད་པར་གྱུར་པ་དང་ཆེས་རབ་ཏུ་དགའ་བར་གྱུར་པའི་ཡིད་ཀྱིས་ནགས་གཞན་དག་གི་ས་གཞི་རྣམས་ལ་རབ་ཏུ་གར་དང་གླུ་དང་རྔ་སྒྲ་ལྷན་ཅིག་ཏུ་ཡུལ་རྣམས་ཀྱིས་རྒྱགས་པས་རྒྱགས་པར་གྱུར་པའི་ཡིད་ཅན་རྣམས་རང་གི་འོད་དང་ལྡན་པ་ཐམས་ཅད་ཀྱང་དགའ་བར་གྱུར་ནས་ལྷ་རྫས་ཀྱི་བདེ་བ་ལ་ལོངས་སྤྱོད་པ་གང་ན་རིའི་ཕྲེང་བ་ཞེས་བྱ་བའི་རི་བོ་དེར་ཉེ་བར་ལེགས་པར་འགྲོའོ། །རིའི་ཕྲེང་བ་ཞེས་བྱ་བའི་རི་བོ་དེ་ཡང་ཁམས་དུ་མ་དང་ལྡན་པར་རྣམ་པ་སྣ་ཚོགས་པའི་རིན་པོ་ཆེའི་འབྱུང་ཁུངས་རྣམས་ཀྱིས་རྣམ་པར་བརྒྱན་པར་གྱུར་པས་ཉེ་འཁོར་ཀུན་ཏུ་ཤིན་ཏུ་མཛེས་པར་བྱེད་དོ། །ཉི་མ་དམར་སེར་དང་འདྲ་བའི་པད་མ་བརྒྱ་སྟོང་གིས་ཉེ་བར་མཛེས་པར་གྱུར་པའོ། །འབབ་ཆུ་བརྒྱ་སྟོང་བྱེ་བ་རྣམས་ཀྱིས་ཀྱང་ཉེ་བར་མཛེས་པར་གྱུར་པ་སྟེ། དགའ་བར་གྱུར་པའི་རི་བོ་རིའི་ཕྲེང་བ་དེའི་ལོགས་བཞི་ལ་གནས་པ་བཞི་ཡོད་དོ། །འདི་ལྟ་སྟེ་མཚོ་བརྒྱ་རབ་ཏུ་འབབ་པ་དང་། རབ་ཏུ་དང་བར་སྣང་བ་ཆེན་པོ་དང་རི་མཛེས་པ་དང་། རིའི་ཉེ་འཁོར་ཞེས་བྱ་བ་དང་ནགས་ཆེན་པོ་བཞི་པོ་དེ་དག་རྣམས་རིའི་ཕྲེང་བ་རི་བོའི་མཆོག་དེ་ལ་ཡོད་དོ། །མཚོ་བརྒྱ་འབབ་པ་ནི་དཔག་བསམ་གྱི་ཤིང་རྣམས་ཀྱིས་ཉེ་བར་མཛེས་པར་གྱུར་པའི་མཚོ་བྲན་བརྒྱ་སྟོང་ཡོད་དེ། གསེར་དང་དངུལ་དང་ཨིན་དྲ་ནཱི་ལ་དང་ཀར་ཀེ་ཏ་ན་རྣམས་དང་མདོག་མཚུངས་པའི་ནོར་བུས་ཉེ་འཁོར་ཀུན་ཏུ་ཁྱབ་པར་གྱུར་པས་མཚོ་དེ་དག་རྣམས་རབ་ཏུ་གསལ་བར་གྱུར་པ་དང་རབ་ཏུ་དང་བར་གྱུར་པ་དང་ཆུ་གྲང་བར་གྱུར་པ་དང་ཇི་ལྟར་འདོད་པའི་ཆུ་ཡང་མཚོ་དེ་དག་འགྱུར་བ་

70-231b

ཡིན་ནོ། །མཆོག་ཏུ་མཛེས་པར་གྱུར་པའི་ནགས་དང་ཉེ་བའི་ནགས་རྣམས་ཀྱི་ཚོགས་པ་དང་ལེགས་པར་ལྡན་པ་སྔོ་ཞིང་རབ་ཏུ་དང་བའི་ཆུ་ལ་ངང་པ་དང་ངང་ངུར་དང་ཀཱ་རཎྜ་བ་དང་ཀ་དམྤ་རྣམས་ཀྱི་སྒྲ་ཐོས་ན་དགའ་བར་འགྱུར་བ་ཡིན་ཏེ། བྱིས་པ་ཐམས་ཅད་རབ་ཏུ་དགའ་བར་བྱེད་པའི་བྱས་ཀྱང་ལྷ་དེ་དག་ཀུན་ཏུ་མངོན་པར་མཐོང་ནས་ཚིགས་སུ་བཅད་པ་བརྗོད་པ། ཇི་ལྟར། གསོན་ཚེ་ཐམས་ཅད་རྟག་པ་མིན། །ལང་ཚོ་ཡང་ནི་འགོར་བ་མིན། །འཇིག་རྟེན་ཐམས་ཅད་མི་རྟག་པ། །འཇིག་རྟེན་འདི་ཡིས་གོ་བ་མིན། །ལས་ཀྱི་སྐུད་པས་སྦྲེལ་བྱས་པའི། །དངོས་པོ་སྐད་ཅིག་ཙམ་འགོར་བ། །སྔ་མའི་རིམ་གྱིས་འཇིག་འགྱུར་བ། །འཇིག་རྟེན་པས་ཀྱང་གོ་བ་མིན། །ནགས་དང་ཉེ་ནགས་སྟེན་པ་ཡི། །ལྷ་རྣམས་བྱེ་བ་ཕྲག་སྟོང་ཡང་། །མིག་བཙུམས་ཙམ་གྱི་དུས་ཡིན་པ། །འཇིག་རྟེན་པས་ཀྱང་མི་རྟོགས་སོ། །འདོད་ན་སྤྱོད་པའི་ལྷ་རིས་དྲུག །བག་མེད་ལོངས་སྤྱོད་སྲེད་པ་ཡིས། །ཐམས་ཅད་བརླག་པར་འགྲོ་བ་ཡང་། །འཇིག་རྟེན་པས་ནི་མི་གོའོ། །དབུ་བ་རྡོས་པ་དང་འདྲ་བའི། །བདེ་བ་རྨི་ལམ་རྫས་དང་མཚུངས། །མྱུར་དུ་ཟད་པར་འགྱུར་བ་སྟེ། །འཇིག་རྟེན་པས་ཀྱང་མི་རྟོགས་སོ། །དེ་ལྟར་རིའི་མཆོག་དེ་ལ་མཛེས་པར་གྱུར་པའི་ལྷ་དེ་དག་རྣམས་ལ་ཕན་པ་བྱེད་པར་གྱུར་པའི་བྱ་དེས་ལེགས་པར་བྱས་པའི་ལས་ཀྱིས་བསྐུལ་བར་གྱུར་ནས་རྗོད་པར་བྱེད་དོ། །གཞན་དུ་ན་ལྷ་ཡུལ་རྣམས་ལ་ཆེད་ཆེར་བྱེད་པར་གྱུར་པས་དེ་བློ་ལ་བྱེད་པར་མི་འགྱུར་རོ། །དམ་པའི་ལམ་རྣམས་ལ་དམུས་ལོང་བཞིན་དུ་གྱུར་པ་དང་དེ་ཁོ་ན་ཉིད་ཀྱང་མི་མཐོང་ངོ་། །དེ་ནས་གཞན་ཡང་ནགས་ཆེན་པོ་གཉིས་པར་གྱུར་པ་རབ་ཏུ་དང་བར་སྣང་བ་ཆེན་པོ་ཞེས་བྱ་བའི་ནགས་སུ་ལྷ་དེ་དག་རྣམས་རྩེད་མོ་དང་བཅས་ནས་སོ། །རབ་ཏུ་དང་བར་སྣང་བ་ཆེན་པོའི་ནགས་དེ་དག་ནི་རྣམ་པ་འདི་ལྟ་བུ་ཡིན་ཏེ། ཉི་མ་བརྒྱ་དང་ཡང་དག་པར་ལྡན་པ་རྣམས་པས་ཀྱང་ཆེས་ལྷག་པར་གྱུར་པ་དཔག་བསམ་གྱི་ཤིང་རྣམས་དང་རིན་པོ་ཆེ་རྣམས་དང་དེ་དག་རྣམས་ཀྱི་འོད་ཟེར་གྱི་འོད་རྣམས་ཀྱིས་ཀྱང་ནགས་དེར་ཤིན་ཏུ་ལྷག་པར་ཡང་ཡོན་ཏན་རྣམས་ཕུན་སུམ་

70-232a

ཚོགས་པར་གྱུར་ཅིང་རབ་ཏུ་འབར་བར་གྱུར་ནས་རྣམ་པར་སྣང་ངོ་། །རབ་ཏུ་དང་བ་ཆེན་པོ་སྣང་བའི་ནགས་ཀྱི་ཉེ་འཁོར་རྣམས་ནི་འོད་ཟེར་རྣམ་པ་གསུམ་གྱིས་ཤིན་ཏུ་གསལ་ཞིང་རྣམ་པར་མཛེས་སོ། །དེ་ན་རྣམ་པ་དེ་སྲིད་ཀྱི་ཐམས་ཅད་ལས་ཀྱང་མངོན་པར་དགའ་བར་གྱུར་པའི་ཆུ་ཀླུང་དང་འབབ་ཆུ་དང་མཚོ་བྲན་རྣམས་ཀྱིས་རྣམ་པར་བརྒྱན་པར་གྱུར་པ་དང་དཔག་བསམ་གྱི་ཤིང་རྣམས་དང་ལྡན་པར་གྱུར་པའི་རྣམ་པ་དེ་སྲིད་རྣམས་ཀྱི་ནགས་ཀྱི་མཆོག་དེར་ལྷ་དེ་དག་རྣམས་འདུས་པ་རྣམས་དང་ཇི་སྟེ་ན་ཕུང་པོ་རྣམས་དང་ཚོགས་པ་རྣམས་ཀྱིས་སྒྲ་དང་རོལ་མོའི་སྒྲ་དང་གར་དང་གླུ་དང་བཅས་པས་དགའ་བར་བྱེད་པ་དང་རྩེད་མོ་རྩེ་བར་ཡང་བྱེད་པར་གྱུར་པས་ནི་ལེགས་པར་བྱས་པའི་ལས་རྣམས་ཀྱང་ཟད་པར་འགྱུར་རོ། །རི་བོའི་མཆོག་དེ་ཉིད་ཀྱི་སའི་ཆ་རྣམས་ལ་ཡུལ་གྱི་རྒྱགས་པས་མྱོས་པར་གྱུར་པ་གླང་པོ་ཆེན་པོ་བཞིན་དུ་དེ་དག་རྣམས་ནགས་དེ་ན་དུས་རིང་དུ་རྩེད་མོ་རྩེས་ནས། གཞན་ཡང་རང་བཞིན་གྱིས་ཡིད་རྩབ་ཧྲལ་ཅན་དུ་གྱུར་པས་རིའི་ཕྲེང་བའི་རི་བོ་དེ་ཉིད་ཀྱི་ནགས་གཞན་རི་མཛེས་པ་ཞེས་བྱ་བའི་ནགས་གང་ཡིན་པ་དེར་ཉེ་བར་འགྲོའོ། །ཡུལ་ལྔའི་རྒྱགས་པས་རྒྱགས་པར་གྱུར་པ་རྣམས་བག་མེད་པའི་དགྲས་ཤིན་ཏུ་རྨོངས་པར་བྱས་པའི་ལྷ་རྣམས་ཀྱིས་ནི་བཟློག་པར་མི་ནུས་པའི་འཇིགས་པ་ཆེན་པོར་གྱུར་པའི་འཆི་འཕོ་བའི་འཇིགས་པ་ཀུན་ཏུ་གོ་བར་འགྱུར་བ་མ་ཡིན་གྱི། དགའ་བ་རྒྱ་ཆེན་པོའི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་འབའ་ཞིག་གིས་བག་མེད་པར་གྱུར་ནས་གང་དང་དེས་ཀྱང་ཀུན་ཏུ་འཁྲིད་པར་བྱེད་དོ། །སྲེད་པར་ཡོངས་སུ་ཆུད་པར་གྱུར་པའི་ཡིད་ཅན་དེས་དེ་ན་ནགས་གཞན་དག་མཐོང་བར་གྱུར་པ་ལ་ཉེ་འཁོར་ན་པད་མའི་ཚལ་གྱིས་བསྐོར་བར་གྱུར་པ་དཔག་བསམ་གྱི་ཤིང་རྣམས་ཀྱིས་རྣམ་པར་བརྒྱན་པ་མེ་ཏོག་བརྒྱ་སྟོང་གིས་ཉེ་བར་མཛེས་པར་གྱུར་པ། ལྗོན་ཤིང་དྲི་དང་ལྡན་པར་གྱུར་པའི་ཤིང་གཞན་རྣམས་ཀྱིས་ཀྱང་ཉེ་བར་མཛེས་པ། ཆུ་ཀླུང་དང་འབབ་ཆུས་རྣམ་པར་བརྒྱན་པ་ལྗོན་ཤིང་གི་ནགས་དུ་མས་ཉེ་བར་རྒྱས་པ་རྣམས་ལ་རི་དགས་

70-232b

དང་བྱའི་ཚོགས་རྣམ་པ་སྣ་ཚོགས་པ་རྣམ་པར་བཀྲ་བར་གྱུར་པས་སྤྲས་པའི་རིན་པོ་ཆེ་བདུན་གྱི་རང་བཞིན་གྱི་ཤིང་འཁྱིལ་པ་བརྒྱངས་པའི་ཁང་པ་རྣམས་ཀྱིས་ཉེ་བར་མཛེས་པར་གྱུར་པ། ཀུ་ཧ་ར་དང་སྐད་སྙན་པ་དང་བྱའི་ཚོགས་གཞན་རྣམས་ཀྱི་སྐད་རྣམས་ཀྱིས་ཀྱང་ཐོས་ན་དགའ་བར་འགྱུར་བ་དང་རིན་པོ་ཆེའི་བཞོན་པས་ཀྱང་ཆུ་ཀླུང་བརྒྱན་པར་གྱུར་པ་སྟེ་དེས་རྣམ་པ་དེ་ལྟ་བུའི་ནགས་ལེགས་པར་རྗེས་སུ་ཐོབ་ནས། ལྷ་དེ་དག་རི་དེ་ལ་ལན་བརྒྱ་ཕྲག་རྣམས་དང་གལ་ཏེ་ན་ལན་སྟོང་ཕྲག་དུ་ཡང་གར་བྱེད་པར་གྱུར་པ་དང་གླུ་ལེན་པར་གྱུར་པ་ཕན་ཚུན་ལྷན་ཅིག་ཏུ་དེ་དག་གིས་ནགས་དེར་མཐར་གྱིས་སླེབ་པར་གྱུར་ནས་དུས་ཡུན་རིང་པོར་དགའ་བར་བྱེད་དོ། །ལྷན་ཅིག་སྤྱོད་པ་དང་བཅས་པ་དང་ཕན་ཚུན་གཡོག་བྱེད་པར་གྱུར་པས་ཀྱང་ཡུལ་རྣམས་ཀྱི་འདོད་པ་ལས་ཕྱིར་ཞིང་ངོམས་པ་མེད་པར་གྱུར་ནས་ལྷ་དེ་དག་རྣམས་རིའི་ཕྲེང་བའི་རི་བོ་དེ་ཉིད་ལ་ལན་གྲངས་དུ་མར་རྣམ་པར་སྤྱོད་པར་བྱེད་དོ། །བག་མེད་པར་གྱུར་པས་དེ་དག་གི་གཞན་ཡང་མཐོང་བར་གྱུར་པ། མཆོག་ཏུ་དགའ་བར་གྱུར་པའི་རི་བོ་དེ་ཉིད་ཀྱི་ནགས་རིའི་ཉེ་འཁོར་ཞེས་བྱ་བའོ། །ནགས་དེ་ན་དྲི་ཞིམ་པོ་འདི་དག་རྣམས་ཡོད་དེ། ཤིང་འཁྲིལ་པ་དུད་པ་རྣམས་ཀྱི་མེ་ཏོག་དང་གསེར་གྱི་ཤིང་འཁྲིལ་པ་རྣམ་པར་བརྒྱངས་པ་ལས་ཀུན་ཏུ་བྱུང་བ་དང་པད་མའི་བཞོན་པ་རྣམས་དང་མཆོག་ཏུ་དྲི་ཞིམ་པ་རྣམས་དང་མན་དཱ་ར་བའི་ལྗོན་ཤིང་རྣམས་དང་ལྷ་རྫས་ཀྱི་མེ་ཏོག་གཞན་རྣམས་ཀྱང་སྟེ་དྲི་རྣམས་ནི་ཉེ་འཁོར་ཁོར་ཡུག་ཏུ་དཔག་ཚད་བརྒྱར་རླུང་གིས་འདེབས་སོ། །ལྷ་རྣམས་ཀྱང་ངོ་མཚར་བར་བྱེད་པའི་དྲི་བླ་ན་མེད་པ་རྣམས་དང་མཆོག་ཏུ་དྲི་ཞིམ་པར་གྱུར་པ་ཡང་རྣམ་པ་དུ་མ་རྣམས་སོ། །དེ་དག་རྣམས་སྣོམ་པར་བྱེད་པས་ལྷ་དེ་དག་ནགས་དེར་རབ་ཏུ་འཇུག་པར་བྱེད་དེ། མཆོག་ཏུ་མཛེས་པར་གྱུར་པ་རྣམས་ཕན་ཚུན་ལྷན་ཅིག་ཏུ་རྒྱགས་པ་ལ་དོན་གཅིག་པ་ཡུལ་གྱི་བདེ་བས་ངོམས་པ་མེད་པར་གྱུར་པས་ཡོངས་སུ་སྐོར་བར་བྱེད་དོ། །རྣམ་གྲངས་དུ་མར་དེ་དག་རྣམས་དེ་ལྟར་རྣམ་པར་རྒྱུ་བར་གྱུར་པ་དང་རྩེ་བར་གྱུར་པས་གང་ན་རིའི་ཕྲེང་བའི་རི་བོ་དེ་ཉིད་ཀྱི་མགོ་བོ་ཡོད་པ་དེ་

70-233a

ལ་ཉེ་བར་འགྲོ་བར་བྱེད་དོ། །ལན་བརྒྱ་དང་ཡང་ན་ལན་སྟོང་ཕྲག་ཏུ་དེ་དག་དེའི་སྟེང་དུ་ལྟ་བར་བྱེད་པ་ན་ཤིན་ཏུ་ཆེན་པོར་གྱུར་པའི་གནས་པར་བྱ་བའི་གཞི་རྣམས་ཏེ། རྒྱར་ནི་དཔག་ཚད་ལྔ་བརྒྱ་པ་ཉེ་འཁོར་ཀུན་ན་ཁང་བཟངས་ཀྱིས་ཡོངས་སུ་གང་བར་གྱུར་པ་ལ་གསེར་གྱི་རང་བཞིན་གྱི་ཁང་པ་དང་། དངུལ་གྱི་རང་བཞིན་གྱི་ཁང་པ་དང་། བཻ་ཌཱུརྱའི་རང་བཞིན་གྱི་ཁང་པ་དང་། གསེར་བཙོ་མའི་རང་བཞིན་གྱི་ཁང་པ་དང་། མུ་སཱ་རའི་རང་བཞིན་གྱི་ཁང་པ་དང་། དེ་ན་རྣམ་པ་དེ་ལྟ་བུའི་མཆོག་ཏུ་དགའ་བར་གྱུར་པའི་ཁང་པ་རྣམས་ཀྱིས་ཉེ་བར་མཛེས་པར་བྱས་པ་དང་དེའི་ལམ་སྲང་དང་བཅས་པའི་བཞི་མདོའི་སྟེང་ཁང་གི་ཆ་ཤས་རྣམ་པར་མཛེས་པ་དང་རབ་ཏུ་རྣམ་པར་ཕྱེ་བའི་ཆ་ཤས་དང་ལྡན་པའི་ཁང་པའི་རྟ་བབས་དགའ་བར་གྱུར་པ་དང་། ཉེ་འཁོར་ན་ཡང་པད་མའི་ཚལ་གྱིས་ཡོངས་སུ་བསྐོར་བ་སྟེ། རྣམ་པ་དེ་ལྟ་བུའི་གྲོང་ཁྱེར་དེ་ལ་ལྷ་རྣམས་རབ་ཏུ་ཞུགས་ནས་ཤིན་ཏུ་རབ་ཏུ་དགའ་བར་གྱུར་པའི་ཡིད་ཀྱིས་རྣམ་པ་སྣ་ཚོགས་པའི་འདོད་པའི་ཡོན་ཏན་རྣམས་ཕུན་སུམ་ཚོགས་པའི་ཕུག་དང་ཉེ་བའི་ནགས་དང་རྫིང་བུ་དང་ལྡན་པ་ཤིང་འཁྲིལ་པ་ཀུན་དུ་དུད་པའི་ཁང་པ་དང་མེ་ཏོག་གི་ནགས་དང་པད་མའི་ནགས་དང་ས་གཞིའི་རྣམ་པར་མཛེས་པའི་ཆ་ཤས་དང་མེ་ཏོག་གི་ཚལ་གྱི་ས་གཞི་དང་ཕུག་དང་རིའི་ཁྲོད་དང་ཚང་ཚིང་དང་རིའི་ཁོང་སེང་རྣམས་ལ་དགའ་བར་བྱེད་དོ། །དེ་ལྟར་རི་དེའི་གྲོང་ཁྱེར་གང་ཡིན་པ་དེ་དག་ནི་ནགས་སུ་གྱུར་པ་ཡིན་ནོ། །དེའི་རྒྱབ་ལ་རྣམ་པ་དུ་མར་ཡོངས་སུ་བསྐོར་ནས་ལྷ་རྣམས་དགའ་བར་བྱེད་དོ། །རྔ་སྐད་ཡན་ལག་ལྔ་དང་ལྡན་པས་ཡོངས་སུ་བསྐོར་ཅིང་རྔ་སྐད་ཡན་ལག་ལྔ་དང་ལྡན་པ་ཐོས་པར་གྱུར་ནས་སྒྲ་ཡོན་ཏན་ཕུན་སུམ་ཚོགས་པ་དེ་དང་ལྷན་ཅིག་ཏུ་དགའ་བར་བྱེད་དོ། །ཁྱིམ་ལ་མངོན་པར་དགའ་བར་གྱུར་པ་དེ་དག་རྣམས་ལ་བྱས་ཚིགས་སུ་བཅད་པ་བརྗོད་པ། ཇི་ལྟར། གང་ཚེ་ལྷ་རྣམས་དགེ་བ་ནི། །ཡོངས་སུ་ཟད་པར་འགྱུར་བ་ན། །དེ་ཚེ་བག་མེད་པ་ཡི་འབྲས། །རྩུབ་མོ་སྟེན་པ་ཤེས་པར་འགྱུར། །འདོད་ལ་ཀུན་ཏུ་ཆགས་པའི་ཡིད། །དེ་ཙམ་གྱི་ནི་བདེ་སྟེན་པ། །

70-233b

བདེ་ལས་ཉམས་པ་འབྱུང་འགྱུར་ཏེ། །ལོག་པར་ལྟུང་བའི་འཇིགས་ཆེན་པོ། །ཡུལ་གྱི་བདེ་ལ་བདེ་དོན་གཉེར། །རྟག་ཏུ་བསམ་པ་སོང་བདག་རྣམས། །བུད་མེད་ལྟ་བས་མྱོས་པ་རྣམས། །ལོག་པར་ལྟུང་བར་འབྱུང་འགྱུར་གྱི། །ལོག་པར་ལྟུང་བྱས་སྡུག་བསྔལ་ནི། །དེ་ཚེ་རིག་འགྱུར་མི་བཟད་པ། །གང་དང་ལྷན་ཅིག་བསྟེན་བྱས་པ། །བག་མེད་འདོད་ཆགས་བསྟེན་པ་རྣམས། །བུད་མེད་དེ་དག་ཐམས་ཅད་ཀྱིས། །འཆི་བའི་དུས་ན་ཡོངས་སུ་འདོར། །འཆི་འགྱུར་ལྷ་རྣམས་ཐམས་ཅད་ལ། །འགའ་ཞིག་རྗེས་སུ་འགྲོ་བ་མིན། །ལས་རྣམས་ཉིད་ནི་རྒྱབ་ནས་ཀྱང་། །འགྲོ་ཞིང་རྗེས་སུ་འགྲོ་བར་འགྱུར། །ལེགས་བྱས་རྟག་ཏུ་སྟེན་པར་གྱིས། །སྤང་བར་གྱིས་དང་ཉེས་བྱས་རྣམས། །བག་མེད་རྟག་ཏུ་བསལ་བ་དང་། །བག་ཡོད་ལ་ཡང་དགའ་བར་གྱིས། །སྲིད་པའི་རྩ་བ་བག་མེད་འདི། །བག་ཡོད་པས་ནི་ཞི་བར་འགྱུར། །བག་མེད་པ་དང་བག་ཡོད་པའི། །འདིས་ནི་རང་གི་མཚན་ཉིད་བརྗོད། །རྟག་ཏུ་བསྟེན་པས་དེ་རྣམས་སོ། །བདེ་བ་ལེགས་པར་སྤྱད་པ་སྤྱོད། །ཆོས་ལ་སྤྱོད་པའི་སྐྱེས་བུ་ནི། །སྡུག་བསྔལ་ནམ་ཡང་འབྱུང་བ་མིན། །དེ་ལྟར་བྱ་དེས་ལྷ་དེ་དག་རྣམས་ལ་རྟག་པར་རྒྱུན་དུ་ཡང་ཕན་པར་གྱུར་པ་བཤད་དེ། ཇི་ལྟར་བག་མེད་པར་གྱུར་པས་རྣམ་པར་ཕྲོགས་ནས་ལྷ་རྣམས་ཀྱིས་མི་ཐོས་པར་གཞན་ཡང་ཡུལ་གྱི་དམུས་ལོང་དུ་གྱུར་པས་ན་གས་དང་ཉེ་བའི་ནགས་རྣམས་ཉིད་ལ་སྙེན་པར་བྱེད་དོ། །གྲོང་ཁྱེར་གྱི་མཆོག་དེ་ལ་དགའ་བར་བྱེད་དོ། །རིའི་ཕྲེང་བ་དེ་ལ་དུས་ཡུན་རིང་དུ་རྩེད་མོ་བྱས་ནས། གཞན་ཡང་གང་ན་རིའི་རྩེ་མོ་སྟོང་ཡོད་པ་དེར་ཉེ་བར་འགྲོ་བར་བྱེད་དོ། །ལྟ་བར་འདོད་པའི་ཕྱིར་དང་ལྷ་རྫས་ཀྱི་ཡུལ་རྣམས་ལ་དགའ་བར་གྱུར་པ་དང་ལྷ་རྫས་ཀྱི་ལས་རྣམས་བྱས་པའི་རྒྱུས་ལྷ་རྫས་ཀྱི་བདེ་བ་ལ་ཉེ་བར་ལོངས་སྤྱོད་པར་གྱུར་པས། འདོད་པ་ཐམས་ཅད་ཕུན་སུམ་ཚོགས་པ་དུས་ཐམས་ཅད་དུ་མེ་ཏོག་དང་འབྲས་བུ་དང་འབབ་ཆུ་དང་ཆུ་ཀླུང་དང་རྫིང་བུ་དང་པད་མའི་ནགས་ཕུན་སུམ་ཚོགས་པར་གྱུར་པའི་རི་དེའི་

70-234a

དགའ་བའི་ཁྱད་པར་གོང་མ་གོང་མ་རྣམས་ལ་དེ་ལྟར་ལྟ་བར་བྱེད་དོ། །དགའ་བར་གྱུར་པ་དུ་མ་ལ་ལྟ་བར་བྱེད་པས་རྣམ་པར་རྒྱུ་བའི་ལྷ་དེ་དག་རྣམས་ཐམས་ཅད་ཀྱང་ངོ་མཚར་བར་བྱེད་པའི་རི་བླ་ན་མེད་པ་མཐོང་བར་གྱུར་ཏོ། །རིའི་ཕྲེང་བར་གྱུར་པའི་རི་ཆེན་པོ་དེ་ནི་གང་གི་ཕྱིར་རང་བཞིན་ཁོ་ནས་རིའི་ཕྲེང་བ་པའི་ཉེ་འཁོར་ཀུན་ན། རིན་པོ་ཆེ་སྣ་ཚོགས་པའི་རང་བཞིན་གྱི་རི་རྣམས་ལ་སྣ་ཚོགས་པའི་ནགས་དང་ཉེ་བའི་ནགས་དང་རྫིང་བུ་དང་། པད་མའི་ནགས་དང་ཆུ་ཀླུང་དང་བཏུང་བའི་ཀླུང་དང་བཏུང་བ་ལ་དགའ་བར་གྱུར་པ་རྣམས་ཡོད་པ་ཡིན་ནོ། །རིན་པོ་ཆེའི་རང་བཞིན་གྱི་རྩེ་མོ་རྣམས་ལ་བྱའི་ཚོགས་རྣམས་ཀྱི་སྒྲས་ཀུན་ནས་བསྒྲགས་པར་གྱུར་པ་དང་། སྣ་ཚོགས་པའི་སྒྲ་དང་ཆ་བྱད་དང་དབྱིབས་འཛིན་པའི་མཆོག་ཏུ་ཡིད་འཕྲོག་པར་བྱེད་པའི་བྱས་ཉེ་བར་མཛེས་པར་བྱས་པའི་རི་དེ་དག་རྣམས་ཀྱི་ཉེ་འཁོར་ཀུན་ན་རིན་པོ་ཆེའི་འོད་བརྒྱ་སྟོང་གི་འོད་ཟེར་རྣམས་ཀྱིས་ཀྱང་རྣམ་པར་སྣང་བར་བྱེད་ཅིང་མཆོག་ཏུ་གསལ་བར་འབར་བར་གྱུར་པས་ལྷམ་མེ་བར་གྱུར་ཏོ། །རིན་པོ་ཆེ་སྣ་ཚོགས་པའི་རང་བཞིན་གྱི་རི་དེ་དག་རྣམས་ཀྱི་དཀྱིལ་ན་ཡང་རི་ཆེན་པོ་ཉིད་རྣམ་པར་གསལ་བ་ཡིན་ཏེ། ནམ་མཁའ་བརྟོལ་ཞིང་བྲིས་པ་བཞིན་དུ་དེ་ལྟར་རྣམ་པར་སྣང་ངོ་། །འོད་ཟེར་གྱིས་རྣམ་པར་གསལ་བར་གྱུར་པའི་དཔལ་དང་ལྡན་པའི་རི་དེའི་གཞི་ལ་ལྷ་རྣམས་གནས་པར་གྱུར་ནས་རྩེ་བས་རྒྱུའོ། །མཆོག་ཏུ་སྐྱིད་པར་གྱུར་པ་དལ་བུས་རྩེ་བར་བྱེད་པའི་འགྲོ་བ་དང་ལྡན་པ་རྣམས་ཕན་ཚུན་ལྷན་ཅིག་ཏུ་རྒྱགས་པ་ལ་དོན་གཅིག་པར་གྱུར་ཅིང་། རྔ་སྐད་ཡན་ལག་ལྔ་དང་ལྡན་པའི་རྒྱགས་པས་སྨྱོས་པར་དགའ་བར་བྱེད་དེ། ལྷ་མོ་དག་ཀྱང་ལྷ་དང་ལྷན་ཅིག་ཏུ་རྒྱགས་པས་རབ་ཏུ་དགའ་བའི་ཡིད་ཀྱིས་དེ་ལ་འཁོད་པར་བྱེད་དོ། །ཇི་ལྟར་འདོད་པས་འགྲོ་བར་བྱེད་པ་རྣམས་ཁ་ཅིག་ནི་ནམ་མཁའ་ལས་སོ། །ཁ་ཅིག་ནི་བུད་མེད་ཀྱི་འཁོར་ནང་གི་བཙུན་མོའི་འཁོར་གྱིས་ཡོངས་སུ་བསྐོར་ཅིང་། ཡིད་དེ་ལ་སོང་བར་གྱུར་པས་ཡུལ་ལྔ་ལ་རྣམ་པར་ཆགས་པའི་སེམས་ངན་པར་གྱུར་པ་རྣམས་སྲེད་པའི་ཆུ་ཀླུང་གིས་ཁྱེར་བར་གྱུར་པ་ན།

70-234b

ཡུད་ཙམ་ཅིག་ཀྱང་བཟློག་པར་འགྱུར་བ་ནི་མ་ཡིན་ནོ། །སྙོམས་པར་བདེ་བ་དང་གཅིག་ཏུ་བདེ་བར་གྱུར་པ་གང་ཡིན་པ་དེ་ཡང་འཇིག་རྟེན་ཕ་རོལ་ཏུ་འགྲོ་བ་ན་བདེ་བར་འགྱུར་བ་དང་ཕན་པའི་དོན་དུ་འགྱུར་བ་ཡིན་ནོ། །དེ་ཡང་དེས་ཡོངས་སུ་སྤངས་ནས། བདེ་བ་གཞན་ཉིད་ལ་ཀུན་ཏུ་ཆགས་པའི་ཡིད་ཅན་ནི་སྦྲང་རྩི་དང་འདྲེས་པའི་དུག་དང་འདྲ་བ་རྣམས་ལ་ཀུན་ཏུ་ཆགས་པ་ཡིན་ཏེ། ལྟུང་བར་བྱེད་པ་བཟང་པོའི་བདེ་བའི་གཟུགས་བརྙན་དུ་གྱུར་པའི་བདེ་བ་རྣམས་ལ། ཀུན་ནས་འདོད་ཆགས་པར་གྱུར་པས་དགའ་བར་བྱེད་པ་སྟེ། རྔ་སྐད་ཡན་ལག་ལྔ་དང་ལྡན་པར་ལྷན་ཅིག་ཏུ་རྩེ་བར་གྱུར་པས་དེ་ལ་འཁོད་དོ། །ཇི་ལྟ་ཇི་ལྟར་འཁོད་པར་གྱུར་པ་དེ་ལྟ་དེ་ལྟར་དགའ་བ་ལྷག་པར་གྱུར་པར་རིའི་མཆོག་དེ་མཐོང་ངོ་། །ཉེ་འཁོར་ཀུན་ན་ཡང་མཆོག་ཏུ་རྒྱ་ཆེ་བ་མཆོག་ཏུ་དགའ་བར་གྱུར་པའི་ལྗོན་ཤིང་དང་ཆུ་ཀླུང་དང་བྱ་དང་མཚོ་དང་ནགས་དང་ཉེ་བའི་ནགས་དང་རྫིང་བུ་རྣམས་ཀྱིས་ཡོངས་སུ་གང་བ་དང་ནགས་བརྒྱ་སྟོང་དུ་མ་རྣམས་དང་ལྡན་པ་རིན་པོ་ཆེ་བདུན་གྱིས་རབ་ཏུ་ཀུན་ནས་གསལ་བར་བྱས་པའི་ཕྲེང་བར་འོད་ཀྱི་ཕྲེང་བས་ཀྱང་ཁྱབ་པར་བྱས་པ། དེའི་ཉེ་འཁོར་ན་ལྷ་དེ་དག་ལྷ་མོའི་ཚོགས་དང་ལྷན་ཅིག་ཏུ་དགའ་བར་གྱུར་ཅིང་རྩེ་བར་བྱེད་པས་འགྲོ་བར་བྱེད་དོ། །རྒྱན་དང་ཆ་བྱད་སྣ་ཚོགས་པ་དང་ཕྲེང་བ་འཛིན་པར་གྱུར་པས་བསམ་པ་གཞན་མེད་པར་བག་མེད་པས་བྲེལ་བར་གྱུར་པའི་ཡིད་ཅན་བག་མེད་པ་མ་སྤངས་པའི་སེམས་རང་གི་འོད་དང་ལྡན་ཞིང་རང་གི་འོད་ཀྱིས་རྒྱན་དང་ཆ་བྱད་དུ་མ་དང་ལྡན་པའི་བུད་མེད་ཀྱི་མཆོག་རྣམས་ཀྱིས་ཡོངས་སུ་བསྐོར་ནས་དལ་བུ་དལ་བུས་ཇི་ལྟ་ཇི་ལྟར་འདོད་པར་འདོད་པའི་ཡིད་ཀྱིས་རིའི་མཆོག་དེ་ལ་གནས་པར་བྱེད་དོ། །རང་གིས་བྱས་པར་གྱུར་པའི་ལེགས་པར་བྱས་པའི་ལས་ཐུན་མོང་མ་ཡིན་པའི་ཚུལ་ཁྲིམས་ཀྱི་རྣམ་པར་སྨིན་པར་གྱུར་པ་ངེས་པར་མྱོང་བར་འགྱུར་བས་ཁ་བསྒྱུར་བས་དགའ་བར་བྱེད་ཅིང་རྩེ་བར་ཡང་བྱེད་དེ། ནགས་དང་ཉེ་བའི་ནགས་དང་རྫིང་བུ་དང་ཆུ་ཀླུང་དང་འབབ་ཆུ་རྣམས་ཀྱང་རྣམ་པ་དུ་མར་སྟེན་པར་བྱེད་དོ། །དེ་ལྟར་རིའི་

70-235a

ཕྲེང་བའི་རི་བོའི་རྩེ་མོ་དེ་ལ་འཁོད་པར་གྱུར་ནས། རིའི་མཆོག་དེ་ལ་རྣམ་པར་རྒྱུ་བར་བྱེད་པ་ན་མཆོག་ཏུ་སྲེད་པས་གདུངས་པས་རྔ་སྐད་ཡན་ལག་ལྔ་པ་ཉན་པར་གྱུར་ཅིང་ནད་རྣམས་དང་བྲལ་བ་དང་འཇིགས་པ་རྣམས་དང་བྲལ་བ་མཆོག་ཏུ་རྒྱགས་པས་ཡིད་ཀུན་ནས་བཅིངས་པར་གྱུར་པས་ལྷ་དག་རྩེ་བར་བྱེད་དོ། །དེ་དག་རྣམས་དེ་ལྟར་རྒྱུ་བར་གྱུར་པ་ན་དེ་དག་གིས་ལན་མང་དུ་རིའི་མཆོག་ལ་ཀུན་ཏུ་བལྟས་ནས། སོ་སོ་སོ་སོར་རང་གི་འདུན་པས་རྒྱུ་བར་གྱུར་པ་དང་རང་གི་འདུན་པས་འགྲོ་བར་བྱེད་པ་རྣམས་གང་དུ་འདོད་པར་ལུས་ངག་གི་སྤྱོད་པ་ངལ་སོ་བར་གྱུར་པས་རྣམ་པར་རྒྱུ་ཞིང་གནས་པར་བྱེད་དོ། །དེ་ནས་རིན་པོ་ཆེའི་འོད་ཀྱི་དཔལ་ཐམས་ཅད་ལས་རབ་ཏུ་རྒོད་པར་གྱུར་པའི་རིའི་ཕྲེང་བའི་རི་བོའི་མཆོག་དེ་ན་ལྷ་རྣམས་བསམ་པར་བྱེད་ཅིང་དེ་ལྟར་བག་མེད་པར་གྱུར་པ་རྣམས། ཀུན་ནས་མངོན་པར་མཐོང་བར་གྱུར་པས་ལེགས་པར་བྱས་པའི་ལས་རྣམས་ཀྱི་ལྷག་མ་ནི་མྱུར་དུ་འགོད་པའི་གསོན་པའི་ཐ་མར་གྱུར་པའི་འཇིགས་པའི་དུས་རབ་ཏུ་རྒོད་པར་གྱུར་པ་ན་ལྷའི་ཚོགས་ཐམས་ཅད་ཕན་པ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་དགེ་ལེགས་མཆོག་དང་ལྡན་ཞིང་དགེ་བའི་ལས་ཀྱི་མཐའ་ལ་སྤྱོད་པ་དེ་རི་བོའི་རྩེ་མོ་ལ་གནས་ནས་བརྟན་ཞིང་རྒྱ་ཆེ་ལ་གསལ་བར་གྱུར་པ་དང་། ལྷའི་ཚོགས་ཐམས་ཅད་ཀྱི་ཡིད་འཕྲོག་པར་གྱུར་པའི་ཡིད་ཀྱི་མུན་པ་རྣམས་ཤིན་ཏུ་འཕྲོག་པར་བྱེད་པས་རིའི་རྩེ་མོའི་སྒྲ་དེ་དག་རྣམས་ཐམས་ཅད་ཉེ་བར་བཅོམ་ནས། བག་མེད་པའི་སྙིང་ཅན་གྱི་ལྷ་རྣམས་ཀྱི་བག་མེད་པ་སྤང་བར་བྱ་བའི་དོན་དུ་ངང་པ་དུས་བཟངས་དེས་ཚིགས་སུ་བཅད་པ་བརྗོད་པ། ཇི་ལྟར། སྙིང་ནི་འདོད་ལ་ཀུན་ཏུ་ཆགས། །རྟག་ཏུ་ཡུལ་ལ་དོན་དམ་དུ། །གང་ཞིག་མཐར་ཐུག་ཕན་གྱུར་པའི། །ཕན་པའི་ལྷ་ཡིས་མི་ཤེས་སོ། །བསོད་ནམས་ལྷག་མ་འདི་ཅུང་ཟད། །འཆི་འཕོ་ཀུན་ཏུ་ཉེ་བར་གནས། །རང་གི་ལས་འབྲས་སྤྱད་ནས་ནི། །ལྷ་ནི་གཞན་དུ་འགྲོ་བ་ཡིན། །སྐྱེ་བ་གཞན་དང་སྟོང་ཕྲག་ནི། །ཐིག་འདེབས་ལམ་གྱི་འཁྲུལ་འཁོར་ཡིན། །ལུས་

70-235b

ཅན་རྟག་ཏུ་ལས་བཅིངས་པ། །ཕན་པའི་ཟས་ཟ་ཤེས་པར་གྱིས། །གང་ཞིག་བདེ་ལ་རྟག་ཀུན་ཆགས། །དགེ་བའི་ལས་ཀྱང་རྟག་ཏུ་བྱེད། །མི་འཐུན་པ་ཡི་རྒྱུ་དེ་དག །རྨོངས་པ་རྣམས་ཀྱི་སྙིང་ལ་འཇུག །སྐྱེ་བོ་འདོད་པས་རྨོངས་དེ་དག །ལོངས་སྤྱོད་འཆི་བདག་རབ་ཏུ་ལྟ། །གང་དག་ཚུལ་ཁྲིམས་དཀའ་ཐུབ་ཤེས། །བདེན་དང་སྦྱིན་ལ་མི་ཕྱོགས་པ། །སྤྱད་ནས་འཆི་བདག་གིས་རྟོག་པའི། །སྐྱེ་བོ་དེ་ནི་འདོད་པས་རྨོངས། །ལས་ཀྱི་རྣམ་སྨིན་མི་ཤེས་གང་། །སྐྱོན་ཡང་འགོག་ལ་མི་དགའ་བ། །ལོངས་སྤྱོད་ནས་ནི་འཆི་བདག་དཔྱོད། །སྐྱེ་བོ་དེ་ནི་འདོད་པས་རྨོངས། །འབྲལ་བས་བྱས་པའི་སྡུག་བསྔལ་ནི། །མི་བཟད་པ་གང་མ་མཐོང་བ། །ཟོས་ནས་འཆི་བདག་གིས་རྟོགས་ཏེ། །སྐྱེ་བོ་དེ་ནི་འདོད་པས་རྨོངས། །སྙིང་ནི་བུད་མེད་འགྲོ་ལ་ཆགས། །ཡང་སྲིད་པ་ནི་ཤེས་མིན་པའི། །ཟོས་ནས་འཆི་བདག་གིས་རྟོག་པའི། །སྐྱེ་བོ་དེ་ནི་འདོད་པས་རྨོངས། །རྒུད་དང་མྱ་ངན་ནད་རྣམས་ལ། །ནམ་ཡང་སྐྱོ་བ་སྐྱེ་མིན་པའི། །ཟོས་ནས་འཆི་བདག་གིས་རྟོག་པ། །སྐྱེ་བོ་དེ་ནི་འདོད་པས་རྨོངས། །གང་ཞིག་སྡིག་པའི་གྲོགས་པོ་དང་། །སྟེན་པའི་འཇིགས་པ་ཆེ་བྱེད་པ། །སྤྱད་ནས་འཆི་བདག་གིས་རྟོག་པའི། །སྐྱེ་བོ་དེ་ནི་འདོད་པས་རྨོངས། །གང་གི་སེམས་ནི་སྒོམ་མིན་དང་། །དེ་ཉིད་དོན་ལ་མི་སེམས་པ། །ལོངས་སྤྱད་ནས་ནི་འཆི་བདག་དཔྱོད། །སྐྱེ་བོ་དེ་ནི་འདོད་པས་རྨོངས། །གང་ཞིག་གནས་སྐབས་ཐམས་ཅད་དུ། །འཁོར་བའི་འཇིགས་པས་འཇིགས་མིན་པ། །སྤྱད་ནས་འཆི་བདག་གིས་ལྟ་བའི། །སྐྱེ་བོ་དེ་ནི་འདོད་པས་རྨོངས། །དོན་དང་དོན་མིན་ལ་རྟག་ཏུ། །སེམས་ཀྱིས་སེམས་པར་སེམས་མིན་པ། །ལོངས་སྤྱད་ནས་ནི་འཆི་བདག་དཔྱོད། །སྐྱེ་བོ་དེ་ནི་འདོད་པས་རྨོངས། །གང་ཞིག་དེ་ཉིད་བློ་དང་རྟག་པར་ནི། །འབྱུང་པོ་ཀུན་ལ་ཕན་པར་དགའ་མིན་པ། །ལོངས་སྤྱད་ནས་ནི་འཆི་བདག་རབ་རྟོག་པའི། །སྐྱེ་བོ་དེ་ནི་འདོད་པས་རྨོངས་པ་ཡིན། །གང་ཞིག་ལུས་བདེའི་དོན་དུ་ནི། །

70-236a

རྨོངས་པ་ཡིས་ནི་ཆོས་ཉམས་བྱེད། །ཡིད་ནི་རྟག་ཏུ་རྩེ་གཅིག་པས། །རབ་ཏུ་བརྩོན་པས་དགེ་བ་གྱིས། །མི་དགེ་བ་ཡང་རྟག་ཏུ་སྤོངས། །དེ་དག་མཁས་པའི་མཚན་ཉིད་ཡིན། །སྦྱིན་དང་ཚུལ་ཁྲིམས་དཀའ་ཐུབ་བྲལ། །ལས་ལ་ཆེད་ཆེར་བྱེད་པ་མེད། །བག་མེད་པས་ནི་ཡོངས་བསླུས་པ། །རིང་པོ་མིན་པར་ལོག་པར་ལྟུང་། །དེ་ནི་ཕྱི་ནས་དུས་རིང་ཡིད། །དུས་ཀྱི་དབང་གིས་ཀུན་འགྲོ་བའི། །ཕྱི་ནས་བཟློག་ཏུ་མེད་པ་ཡི། །གདུང་བའི་རང་བཞིན་མེ་ཡིས་སྲེག །མི་བཟད་བཟློག་པར་བྱར་མེད་པ། །ངེས་པར་མྱོང་བའི་ལུས་ཅན་རྣམས། །འཆི་བའི་དུས་ཀྱི་དབང་དུ་འགྲོ། །དེ་རིག་གྱིས་ལ་ལེགས་པར་སྤྱོད། །དེ་ལྟར་ངང་པ་དེས་རིང་བ་མི་དམན་ཞིང་རྒྱ་ཆེ་བའི་རང་བཞིན་གྱིས་མཆོག་ཏུ་སྙན་པར་གྱུར་པས་ལྷ་དེ་དག་རྣམས་ལ་སྟོན་པར་བྱེད་དེ། བྱང་ཆུབ་སེམས་དཔའ་དེ་ནི་དབྱངས་སྙན་པ་ཡིན་ལ་ལྷ་དེ་དག་རྣམས་ཐམས་ཅད་ལ་དེས་རྣམ་པ་མང་པོ་དང་ལྡན་པའི་དབྱངས་དུ་མ་རྣམས་བརྗོད་པ་དང་ལྡན་པའི་ལྷ་རྫས་ཀྱི་སྒྲ་རྣམས་ཉེ་བར་བཅོམ་ནས་རྣམ་པར་གསལ་ཞིང་མཛེས་པར་བྱེད་པ་ཡིན་ཏེ། སྙན་པར་གྱུར་པ་དང་ཕལ་ཆེ་བར་གྱུར་པ་དང་། བརྟན་པར་གྱུར་པ་དང་རྒྱ་ཆེ་བར་གྱུར་པའི་ཕྱིར་ཡང་སྟེ། རི་བོ་དེ་ལ་ཐོས་པར་གྱུར་ནས་ལྷའི་ཚོགས་དུ་མ་རྣམས་ཀྱིས་ཡོངས་སུ་བསྐོར་བ་དུས་ཐམས་ཅད་དུ་མེ་ཏོག་དང་འབྲས་བུ་རྣམས་ཕུན་སུམ་ཚོགས་པ་པད་མའི་ཚལ་དུ་མས་ཀུན་དུ་ཁྱབ་པར་གྱུར་པ་ལྷའི་བུ་མོའི་ཚོགས་ཕལ་པོ་ཆེས་རབ་ཏུ་དགའ་བར་གྱུར་པའི་གླུ་ལེགས་པར་ལེན་པ་རིན་པོ་ཆེའི་ཕྲེང་བའི་འོད་ཀྱིས་ཉེ་བར་མཛེས་པར་གྱུར་པ་རིན་པོ་ཆེ་སྣ་བདུན་གྱིས་རྣམ་པར་བཀྲ་བར་བྱས་པའི་ཆ་ཤས་ཀྱིས་མཛེས་པ་རིན་པོ་ཆེ་སྣ་བདུན་གྱི་ནགས་དང་ཉེ་བའི་ནགས་དང་རྫིང་བུ་དགའ་བ་རྒྱལ་མཚན་གྱི་འདུག་པའི་སྟེགས་བུ་རྣམས་ཀྱིས་རྣམ་པར་བརྒྱན་པ་ན་ལྷ་དང་ལྷ་མོ་བརྒྱ་སྟོང་གིས་ཉེ་བར་དབྱངས་སྒྲོགས་པར་གྱུར་པ་རྣམས་ནི་སྙན་པ་དང་མཉན་པར་འོས་པའི་རྔ་སྐད་ཡན་ལག་ལྔ་པ་ཀུན་དུ་སྒྲོགས་པར་གྱུར་པ་ཐོས་ན་དགའ་བ་བཻ་ཌཱུརྱ་དང་ཨིན་དྲ་ནཱི་ལ་དང་དངུལ་དང་གསེར་གྱི་ཀ་བ་བརྒྱ་སྟོང་

70-236b

གིས་ཉེ་བར་མཛེས་པར་གྱུར་པ་ཆེན་པོ་ལ་འོས་པའི་སེང་གེའི་ཁྲིས་ཉེ་བར་མཛེས་པ། ནམ་མཁའ་ལ་རྒྱུ་བར་བྱེད་པའི་གཞལ་ཡས་ཁང་དཔེ་མེད་པ་ལ་གནས་ནས་འཐབ་བྲལ་གྱི་མངའ་བདག་རྣམ་པར་མཛེས་པར་གྱུར་ཅིང་བླ་ན་མེད་པའི་དཔལ་དང་ལྡན་པར་ལྷ་བརྒྱ་སྟོང་གིས་ཀྱང་གླུ་ཉེ་བར་བླངས་པར་གྱུར་ཅིང་ཐལ་མོ་སྦྱར་བ་སྟོང་ཕྲག་བརྒྱས་མཆོད་པར་གྱུར་པ་དང་བསྟོད་པར་ཡང་གྱུར་པས་རྣམ་པར་བརྟོལ་བ་བཞིན་དུ་ནམ་མཁའ་ལས་གང་ན་རིའི་ཕྲེང་བའི་རི་བོ་དེར་ཉེ་བར་ལེགས་པར་འོངས་ཏེ། མཆོག་ཏུ་རངས་པར་གྱུར་པས་ངང་པའི་རྒྱལ་པོ་དུས་བཟངས་བལྟ་བར་འདོད་པའི་ཕྱིར་རོ། །སྨོན་ལམ་གྱི་དབང་གིས་དང་ལྷ་རྣམས་ལ་ཡང་ཕན་པར་འདོད་པས་ཀྱང་དེར་སྐྱེས་པ་ཡིན་ལ་སྐྱེ་བ་དྲན་པའི་དབང་དུ་བྱས་ནས་ཀྱང་གུས་པ་ལེགས་པར་སྐྱེས་པར་གྱུར་པས་དེ་ལྷ་འཐབ་བྲལ་གྱི་མངའ་བདག་ལེགས་པར་ཉེ་བར་འོང་ངོ་། །ཇི་ལྟར་འོས་པ་བཞིན་དུ་འདིའི་དྲུང་ནས་ངས་དམ་པའི་ཆོས་མཉན་པར་བྱེད་དེ། ལྷ་རྣམས་དང་བདག་ཉིད་ལ་ཕན་པ་དང་བདེ་བའི་དོན་དུ་དང་། བག་མེད་པས་ལོག་པར་ལྟུང་བར་འགྱུར་བ་རྣམས་རྣམ་པར་ཞི་བར་བྱ་བའི་དོན་དུ་ཡང་ངོ་། །དེ་ནས་རིའི་ཕྲེང་བའི་རི་བོ་གང་ཡིན་པ་དེའི་རྣམ་པ་སྣ་ཚོགས་པའི་གནས་དང་ཀུན་དགའ་ར་བ་དང་སྐྱེད་མོས་ཚལ་དང་ནགས་དང་ཉེ་བའི་ནགས་དང་རི་ལོགས་དང་སྨན་ལྗོངས་དང་། པད་མའི་ཚལ་དང་མཚོ་བྲན་དང་ཡང་ཐོག་གི་རྩེ་མོ་དང་ཁང་བུའི་རྒྱབ་དང་རིན་པོ་ཆེའི་ཁང་པ་དང་། རིའི་རྩེ་མོ་དང་ཆུ་ཀླུང་དང་ཚང་ཚིང་དང་རིའི་རྒྱབ་དང་མེ་ཏོག་གི་ནགས་དང་འབྲས་བུའི་ནགས་དང་སྐྱེད་མོས་ཚལ་དང་དཔག་བསམ་གྱི་ཤིང་དང་དངུལ་དང་བཻ་ཌཱུརྱའི་རང་བཞིན་དང་གསེར་བཙོ་མའི་རང་བཞིན་གྱི་རྣམ་པ་དུ་མར་མཐོང་ན་དགའ་བར་གྱུར་པ་ལྗོན་ཤིང་རྣམས་ལ་ཡང་ལྷན་ཅིག་སྤྱོད་པ་རྣམས་དང་བཅས་པའི་ལྷ་དེ་རྣམས་དགའ་བར་བྱེད་ཅིང་རྩེ་བར་ཡང་བྱེད་པ་ལས། ཡུལ་ལྗོངས་མང་པོས་ཀུན་དུ་གང་བར་གྱུར་པའི་ལྷའི་ཚོགས་དེ་དག་ཐམས་ཅད་རབ་ཏུ་རིངས་པ་དང་བཅས་པས་ཆེས་རབ་ཏུ་དགའ་བའི་ཡིད་ཀྱིས་གར་བྱེད་པར་འགྱུར། བསྐྱོད་པར་གྱུར་དགོད་པ་དང་ཆེས་རབ་ཏུ་དགོད་པའི་ཡིད་ཀྱིས་

70-237a

ཁང་བཟངས་ཀྱི་མཆོག་ན་བཞུགས་པར་གྱུར་པའི་ལྷའི་མངའ་བདག་དེ་ཀུན་དུ་ལེགས་པར་མཐོང་བར་གྱུར་ཏེ། ལྷ་རྫས་ཀྱི་དཔེ་མེད་པའི་བདེ་བ་རྣམས་དང་ཡང་དག་པར་ལྡན་པར་གྱུར་པ་མངོན་པར་མཐོང་ཞིང་ཐམས་ཅད་ཀྱིས་ཀྱང་བདག་ཉིད་ཐམས་ཅད་ཀྱིས་མུ་སུ་ལུན་དྷ་དེ་ཉིད་མངོན་པར་མཐོང་བར་གྱུར་ནས་རབ་ཏུ་དགའ་བས་ལྟ་བ་ལ་ཆེད་ཆེར་གྱུར་པའི་ཡིད་ཀྱིས་དེ་ཉིད་མཐོང་བར་གྱུར་པ་ན། བརྗོད་པར་གྱུར་པ་ཇི་ལྟར་འཐབ་བྲལ་བའི་མངའ་བདག་མུ་སུ་ལུན་དྷ་ཡིན་ལ། དམ་པའི་ཆོས་ཉན་འདོད་པ་ཡིན་ཏེ་ངང་པའི་མངའ་བདག་དུས་བཟངས་ཀྱི་དྲུང་དུ་དམ་པའི་ཆོས་ཉན་འདོད་པ་ཡིན་ན་ངང་པའི་རྒྱལ་པོ་དུས་བཟངས་མ་མཐོང་བས་དེའི་དྲུང་དུ་བདག་ཅག་རྣམས་ཀྱིས་མངོན་པར་བལྟ་བར་བྱ་བ་དང་མཆོད་པ་ཡང་དོན་དུ་གཉེར་བར་བྱའོ། །ལྷ་དེ་དག་རྣམས་ཀྱིས་དེ་ལྟར་རིག་པར་གྱུར་ནས་འདོད་པའི་ཡོན་ཏན་ལྔ་དང་ལྡན་པའི་བདེ་བ་ཡང་དག་པར་ལྡན་པ་ལྷ་རྫས་ཀྱི་ཕྲེང་བའི་རྒྱན་དང་ལྡན་པ་རྣམས་ཐམས་ཅད་ཀྱིས་ལྷའི་མངའ་བདག་ལ་རབ་ཏུ་བསྙེན་པར་གྱུར་ཏོ། །དེ་ནས་གང་ཡང་མུ་སུ་ལུན་དྷ་དང་ལྷན་ཅིག་ཏུ་ནམ་མཁའི་དཀྱིལ་ནས་འོངས་པའི་ལྷ་དེ་དག་ཐམས་ཅད་དང་གང་ཡང་རིའི་ཕྲེང་བའི་རྩེ་མོ་སྟོང་པ་ན་དགའ་ཞིང་རྩེ་བར་བྱེད་པའི་ལྷ་རྫས་ཀྱི་ཕྲེང་བའི་རྒྱན་དང་ཡང་དག་པར་ལྡན་པ་དེ་དག་རྣམས་ཐམས་ཅད་ཀྱིས་ཀྱང་འཐབ་བྲལ་གྱི་བདག་པོའི་དྲུང་དུ་མཆོད་པ་བྱས་ནས་རབ་ཏུ་དགའ་བའི་ཡིད་ཀྱིས་མདུན་དུ་གར་བྱེད་པར་གྱུར་ཅིང་གླུ་ལེན་པར་ཡང་བྱེད་དོ། །ཐམས་ཅད་དང་ཡང་དག་པར་ལྡན་པར་གྱུར་པ་དེ་དག་རྣམས་འཐབ་བྲལ་གྱི་བདག་པོ་དང་ལྷན་ཅིག་ཏུ་གྱུར་པས་གང་ན་བྱང་ཆུབ་སེམས་དཔའ་མཆོག་ཏུ་རྣོ་བའི་ཤེས་རབ་དང་ལྡན་པ་སྨོན་ལམ་གྱི་དབང་གིས་ལྷ་རྣམས་ཀྱི་བག་མེད་པ་བསལ་བར་བྱ་བའི་དོན་དུ་འཐབ་བྲལ་དུ་སྐྱེས་པར་གྱུར་པ་དེར་ཐམས་ཅད་ཉིད་ཉེ་བར་ལེགས་པར་སོང་ངོ་། །དེ་ནས་རིང་བ་ཉིད་ནས་འཐབ་བྲལ་གྱི་བདག་པོ་མཐོང་བའི་ཆོས་ལ་གུས་པས་གུས་པ་ལེགས་པར་སྐྱེས་པ་དང་ཁང་བཟངས་དེ་ལས་བབས་ནས་དེ་ལྷའི་ཚོགས་དང་ལྷན་ཅིག་ཏུ་ཆོས་ཆེན་པོ་རབ་ཏུ་འཆད་པ་པོའི་ཆོས་ལ་སྒྲ་འབྱིན་པའི་

70-237b

མངོན་སུམ་དུ་དེར་བསྙེན་པའི་ངང་པའི་གཟི་བརྗིད་ཀྱིས་ལྷ་རྣམས་ཐམས་ཅད་ཀྱི་དྲུང་ན་ཆེས་ལྷག་པར་ཆོས་ཀྱི་དཔལ་རྣམ་པར་མཛེས་སོ། །དེ་ནས་དེ་རིང་བ་ཉིད་ནས་མཐོང་བར་གྱུར་པས་འཐབ་བྲལ་གྱི་མངའ་བདག་གུས་པ་ཤིན་ཏུ་ལེགས་པར་སྐྱེས་པར་གྱུར་ཅིང་། ཆོས་ལ་ཡང་གུས་པར་གྱུར་པས། ཁང་བཟངས་དེ་ལས། ཀུན་ནས་བབས་པར་གྱུར་ཏེ། ལྷའི་ཚོགས་དེ་དག་རྣམས་དང་བཅས་པ་རྣམས་ཆོས་རབ་ཏུ་སྨྲ་བར་བྱེད་པ་ཆོས་ཀྱི་སྒྲ་སྒྲོགས་པར་བྱེད་པ་དེ་ལ་ཁ་མངོན་དུ་ཕྱོགས་པར་བྱེད་པ་ལ་ཉེ་བར་རྟེན་པར་གྱུར་ཏོ། །ངང་པ་དེ་ཡང་ཆོས་ཀྱི་གཟི་བརྗིད་དེ་དག་གིས་ལྷ་རྣམས་ཐམས་ཅད་ཀྱི་དྲུང་ན་ཆོས་ཀྱི་དཔལ་གྱིས་ཤིན་ཏུ་བླ་ལྷག་པར་མཛེས་པར་གྱུར་ཏོ། །དེ་ནས་མུ་སུ་ལུན་དྷ་མངོན་པར་མཐོང་ནས་བྱང་ཆུབ་སེམས་དཔའ་ངང་པ་དེས་ལེགས་པར་འོངས་སམ་གྱི་ཚིག་གིས་མངོན་པར་མཆོད་དེ། འཐབ་བྲལ་གྱི་བདག་པོ་གང་དང་དེ་དག་དེ་ལྟར་བདེ་བར་འོངས་སམ། དེ་ལྟར་བག་མེད་པས་ཁྱོད་བག་མེད་པར་མ་གྱུར་རམ། བདེ་བའི་ས་གཞི་རྣམས་ཀྱི་མཆོག་འདི་ཐོབ་པར་གྱུར་ནས་ཀྱང་གང་ཞིག་ཕྲོགས་པར་མི་འགྱུར་བ་དེ་ནི་ཤིན་ཏུ་ངོ་མཚར་ཏོ། །ཕྱིར་ཞིང་ཁོ་ན་ལྷ་རྣམས་ཀྱི་མངའ་བདག་བྱེད་པར་གྱུར་པ་གང་གི་ཕྱིར་ལྷ་རྣམས་ལས་ཀྱང་བརྒྱ་འགྱུར་དུ་བདེ་བ་རྣམས་ལ་ཉེ་བར་ལོངས་སྤྱོད་པར་གྱུར་པའི་རྣམ་པ་དེ་ལྟ་བུའི་བདེ་བ་གང་ཡིན་པ་རྣམས་ཀྱིས་ཀྱང་འཁྲིད་པར་མི་བྱེད་པ་དེ་དག་ནི་ཤིན་ཏུ་ངོ་མཚར་བ་གཞན་ཡིན་ནོ། །གང་གི་ཕྱིར་ལེགས་པར་བྱེད་པའི་རྐྱེན་རྣམས་དང་སྡུག་བསྔལ་གྱི་རྐྱེན་གྱི་ཤུགས་རྣམས་ཀྱིས་ཀྱང་འཛིན་པར་བྱེད་པ་ཡིན་ནོ། །དེ་དེ་ལྟར་སྐྱེ་བ་གཞན་རྗེས་སུ་དྲན་པར་བྱེད་དེ། སངས་རྒྱས་གཙུག་ཏོར་ཅན་གང་གི་སྤྱན་སྔ་ནས་དེས་ཆོས་འདུལ་བ་ཐོས་པར་གྱུར་པའི་མདོ་སྡེ་དྲན་པར་བྱས་ནས་མུ་སུ་ལུན་དྷ་དེ་ལ་འཆད་དོ། །ངང་པ་རྣམས་ཀྱི་མངའ་བདག་དུས་བཟངས་འདིས་མུ་སུ་ལུན་དྷ་དེ་ལ་འདི་སྐད་ཅེས་སྨྲས་སོ། །ཇི་ལྟར་མུ་སུ་ལུན་དྷ་ཁྱོད་ནི་རྙེད་པ་དང་ལྡན་ཏེ་གང་བག་མེད་པར་གྱུར་པས་ཁྱོད་ནི་རྒྱུ་བ་དང་ངའི་ཡང་ཆོས་ཀྱི་སྒྲ་ཐོས་པར་གྱུར་ནས་འདིར་འོངས་པ་དེ་དག་ནི་

70-238a

འདིར་ངོ་མཚར་ཆེ་བ་ཡིན་ནོ། །དེ་ལྟར་ཡིན་པ་དེའི་ཕྱིར་འཐབ་བྲལ་གྱི་བདག་པོ་མཉན་པར་གྱིས་དང་། བཅོམ་ལྡན་འདས་གཙུག་ཏོར་ཅན་དེས་ང་མིར་གྱུར་པའི་རྒྱལ་པོར་གྱུར་པ་ན་བསྟན་པ་རྒྱལ་པོ་ཆོས་ལ་སྤྱོད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་མདོ་གང་ཡིན་པ་དེ་ལེགས་པར་རབ་ཏུ་ཡིད་ལ་གྱིས་ལ་ཉོན་ཅིག་དང་བཤད་པར་བྱའོ། །རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བས་ཡང་དག་པར་སྐྱེ་དགུ་རྣམས་སྐྱོང་བར་བྱེད་པ་གང་གིས་ཕན་པ་དང་བདེ་བ་ལ་སྦྱར་བར་འགྱུར་རོ། །དེ་ཡང་དེས་རབ་ཏུ་བསྔགས་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གང་དག་དང་ཡང་དག་པར་ལྡན་པར་གྱུར་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བས་སྐྱེ་དགུ་རྣམས་སྐྱོང་བར་བྱེད་པ་ཡིན་ཞེ་ན། མཐོང་བའི་ཆོས་ཉིད་ལ་ཡང་དེ་དེས་རབ་ཏུ་བསྔགས་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་ཏེ། རྫུ་འཕྲུལ་ཆེ་བ་དང་སྟོབས་ཆེ་བ་དང་ནོར་ཆེ་བར་ཡང་འགྱུར་རོ། །འདི་ན་རྒྱལ་པོ་ཆོས་སུམ་ཅུ་རྩ་ལྔ་དང་ཡང་དག་པར་ལྡན་པའི་རྒྱལ་པོས་སྐྱེ་དགུ་རྣམས་སྐྱོང་བར་བྱེད་ལ། སྐྱོང་བར་བྱེད་པར་གྱུར་པས་ཀྱང་ནོར་ཆེན་པོར་འགྱུར་རོ། །སྟོབས་ཆེ་བ་དང་། ཕས་ཀྱི་རྒོལ་བའི་དཔུང་ཐམས་ཅད་ཀྱིས་མི་ཐུབ་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོ་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་རོ། །སུམ་ཅུ་རྩ་ལྔ་པོ་གང་དག་ཞེ་ན་འདི་ལྟ་སྟེ། འདིའི་རང་གི་སྐྱེ་བོ་གཙང་བར་གྱུར་པ་དང་དཔྱ་རྣམས་ངེས་པར་བྱས་ནས་ཟ་བར་བྱེད་པ་དང་བཟོད་པ་དང་ལྡན་པ་དང་ལུགས་ལས་ཕྱོགས་འཛིན་མེད་པ་དང་བླ་མ་མཆོད་པར་བྱེད་པ་དང་སྔར་ཉིད་སྟེར་བར་བྱེད་པ་ཡིན་སྔར་བྱིན་པར་གྱུར་ནས་ཕྱིས་ཀྱང་སྟེར་བར་བྱེད་པ་ཡིན་ཆོས་མ་ཡིན་པ་འཛིན་པར་མི་བྱེད་པ་ཡིན། སྡིག་པའི་གྲོགས་པོ་དང་སྟེན་པར་བྱེད་པ་མ་ཡིན་བུད་མེད་ཀྱི་དབང་དུ་འགྲོ་བ་མ་ཡིན་ཐམས་ཅད་ཀྱི་ཚིག་ལ་དད་པར་བྱེད་པ་མ་ཡིན་སྙན་པར་གྲགས་པ་ལ་

70-238b

འདོད་པ་སྐྱེད་པ་ཡིན་གྱི་ནོར་ལ་འདོད་པ་ཅན་མ་ཡིན་ནོ། །ལོག་པར་ལྟ་བ་དང་ལྡན་པ་མ་ཡིན་གཏོང་བ་ཅན་ཡིན་འཐུན་པར་བྱེད་པ་དང་ངག་སྙན་པར་འགྱུར་བ་ཡིན་བདེན་པར་སྨྲ་བ་ཡིན་ནོར་གཞིས་རྣམས་འཕེལ་བ་དང་འགྲིབ་པར་གློ་བུར་དུ་མི་བྱེད་པ་ཡིན་མིའི་ཁྱད་པར་ཤེས་པ་ཡིན་དུས་ངེས་པར་ལེགས་པར་སྟོན་པར་བྱེད་པ་པོ་ཡིན། གཉིད་ཆེ་བ་མ་ཡིན་ལེ་ལོ་མེད་པ་ཡིན་གྲོགས་པོ་བརྟན་པ་ཡིན་མི་ཕན་པ་རྗེས་སུ་སྟེན་པར་བྱེད་པ་མ་ཡིན། ཁྲོ་བའི་ཤུགས་དང་དགའ་བ་ཡ་ཡ་བོ་སྡོམ་པར་བྱེད་པ་ཡིན་ཟས་དང་སྐོམ་ལ་ཤིན་ཏུ་ཀུན་ནས་ཆགས་པའི་རང་བཞིན་ཅན་མ་ཡིན། ལེགས་པར་བསམ་པར་བྱ་བ་རྣམས་སེམས་པ་པོ་ཡིན་དོན་དུས་རིང་དུ་སྐོར་བར་བྱེད་པ་མ་ཡིན་ཆོས་ལ་སྐྱེ་དགུ་རབ་ཏུ་འགོད་པར་བྱེད་པ་ཡིན་དགེ་བ་བཅུའི་ལས་ཀྱི་ལམ་གྱི་དགེ་བ་རྣམས་བྱེད་པར་འགྱུར་བ་ཡིན། རྒྱུ་དང་རྐྱེན་ལེགས་པར་སྟོན་པར་བྱེད་པ་ཡིན། ལྷ་དག་མཆོད་པར་བྱེད་པ་ཡིན། བུ་དང་བུ་མོ་ཡང་དག་པར་བདེ་བར་ཡོངས་སུ་སྐྱོང་བར་བྱེད་པ་ཡིན། རྟག་པར་ཡང་ཤེས་རབ་གོམས་པར་བྱེད་པའི་རང་བཞིན་ཅན་ཡིན་ཡུལ་གྱིས་བཀྲི་བར་འགྱུར་བ་མ་ཡིན་རིགས་པ་དང་ལྡན་པའི་རང་བཞིན་རྣམས་ཀྱི་རིགས་ཀྱི་ས་གཞི་སྦྱིན་པར་གཏོང་ངོ་། །དེ་ལྟ་བུའི་ཆོས་སུམ་ཅུ་རྩ་ལྔ་དང་ཡང་དག་པར་ལྡན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་དེ་དེས་རབ་ཏུ་བསྔགས་པར་འགྱུར་རོ། །ཤིན་ཏུ་ནོར་ཆེ་བ་དང་རབ་ཏུ་ཕལ་ཆེ་བའི་དཀོར་དང་ཉེ་བར་མཁོ་བ་དང་ལྡན་པར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་ལྷའི་མངའ་བདག་ཏུ་འགྱུར་ཏེ་ལེགས་པར་བྱས་པར་གྱུར་པ་དེའི་རྒྱུ་ལས་སོ། །དེ་ལ་གཙང་བའི་རང་གི་སྐྱེ་བོ་དང་ཡང་དག་པར་ལྡན་པའི་རྒྱལ་པོ་ཉུང་ཟད་ཀྱི་རང་བཞིན་ཅན་མ་ཡིན་པར་འགྱུར་བའི་རྣམ་པ་ཅི་ལྟ་བུས་སྐྱེ་བོ་དེ་གཙང་བ་ལ་སྦྱོར་བས་གཞན་ལ་ཕན་པ་ལ་རབ་ཏུ་ཞུགས་པ་ཡིན་ཞེ་ན། ཆོས་ལུགས་རྣམ་པར་གཞག་པ་ལ་ཤིན་ཏུ་བར་ཡང་ས་མཚམས་སྲུང་བར་འགྱུར་རོ། །དམ་ཚིག་སྲུང་བར་འགྱུར་བ་དང་རྩབ་ཧྲལ་ཅན་དུ་མ་གྱུར་པ་དང་།

70-239a

རྗེ་དཔོན་ལ་ཕན་པ་མ་ཡིན་པ་རབ་ཏུ་འགོགས་པར་བྱེད་པར་འགྱུར་རོ། །འདིས་ཕན་པར་གྱུར་པ་དག་ལ་ཀུན་ཏུ་སྦྱོར་བར་བྱེད་པ་དང་། རྒྱལ་སྲིད་ཀྱང་ཆོས་ཀྱིས་ལེགས་པར་སྲུང་ངོ་། །ཕན་པ་དང་གྲོགས་སུ་འགྱུར་བ་རྣམས་སྨྲ་བར་བྱེད་པ་དང་། དུས་སུ་ཉེ་བར་གནས་པ་དང་དྲང་པོའི་རང་བཞིན་ཅན་གཞན་ལ་བཞད་བགད་དུ་བྱེད་པ་མ་ཡིན་པ་དང་། ཞབས་འབྲིང་བྱེད་པའི་དབང་གིས་ཕན་པ་མ་ཡིན་པ་རྣམས་རྗེ་བོ་ལ་བྱེད་པར་མི་འགྱུར་བ་དང་། འདོད་པ་དང་ང་རྒྱལ་དག་གིས་ཀྱང་འཁྲིད་པར་འགྱུར་བ་མ་ཡིན་པ་དང་། གནས་སྐབས་ཐམས་ཅད་དུ་ཆོས་རྣམས་ལས་ཉམས་པར་གྱུར་པ་ཡོད་པ་མ་ཡིན་པ་དང་། འཇིག་རྟེན་ཕ་རོལ་གྱི་དོན་ཀུན་ནས་གླེང་སློང་བར་བྱེད་པ་དང་ལྡན་པའོ། །འཁོར་བ་ལ་འཇིགས་པར་འགྱུར་བ་དང་། ལས་ཀྱི་འབྲས་བུ་རྣམ་པར་སྨིན་པ་ལ་སྐུར་བ་མི་འདེབས་པ་དང་། ཉེས་པར་སྤྱོད་པ་རྣམ་པ་གསུམ་ཡང་ཡོངས་སུ་སྤོང་བར་བྱེད་དོ། །གོམས་པར་ཡང་མི་བྱེད་དོ། །ཆད་པ་ལ་དགའ་བ་མ་ཡིན་ནོ། །བློ་གཞན་དང་ལྡན་པ་མ་ཡིན་པ་དང་སྟེ། དེ་རྣམ་པ་དེ་ལྟ་བུ་དག་གིས་སྐྱེ་བོ་གཞན་དང་བདག་ཉིད་ཀྱང་ལེགས་པར་འཇུག་པར་བྱེད་དེ་རྒྱས་པར་ཡང་བྱེད་དོ། །འཇིག་རྟེན་གཉིས་སུ་ཕན་པ་བྱེད་པར་གྱུར་པའི་སྐྱེ་བོ་རྣམ་པ་དེ་ལྟ་བུ་དེ་དག་གི་སྐྱེ་བོ་དང་ལྡན་པའི་རྒྱལ་པོས་རྒྱལ་ཁམས་ཀྱང་སྐྱོང་བར་བྱེད་ཅིང་རང་དང་གཞན་ཡང་འཛིན་པར་བྱེད་པ་རྣམས་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་དང་ཡང་དག་པར་ལྡན་པར་གྱུར་པའི་རྒྱལ་པོས་རྒྱལ་ཁམས་ལེགས་པར་སྐྱོང་བར་བྱེད་པ་ནི། ལུས་ཞིག་ནས་ཀྱང་མཐོ་རིས་བདེ་འགྲོའི་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གང་དག་ཞེ་ན། འདི་ལྟ་སྟེ། ངེས་པ་དང་ལྡན་པས་འབྲས་བུ་རྣམས་ཟ་བར་འགྱུར་བའོ། །ངེས་པ་མེད་པ་ཞེས་བྱ་བ་ནི་དེའི་ཡུལ་ལམ་གྲོང་ཁྱེར་རམ་གྲོང་ངམ་ཚོང་འདུས་རྣམས་ཀྱང་རུང་སྟེ། དུས་ཐམས་ཅད་དང་གནས་སྐབས་ཐམས་ཅད་དུ་ངེས་

70-239b

པར་བྱས་པའི་དཔྱ་རྣམས་ཡོད་པར་གྱུར་པ་ལས་དེ་དག་རྣམས་དེ་ཁོ་ན་བཞིན་དུ་རྒྱལ་པོ་འདིས་ཉམས་པར་མ་གྱུར་པ་ཡང་དུས་ཀྱི་སྐྱོན་གྱིས་སམ། མནར་བར་གྱུར་ནས་རིམ་གྱིས་འཕེལ་བར་གྱུར་པའི་རང་གི་དངོས་པོ་རྣམས་རིགས་པ་མ་ཡིན་པས་འཕྲོག་པར་བྱེད་ན། འཇལ་བྱེད་ལ་འཇལ་བར་མི་བྱེད་པ་དང་། གཡོས་བདེན་པར་འགྱུར་བ་ཡོད་དམ་ཅི། དེ་ལྟར་རྒྱལ་པོ་ངེས་པའི་འབྲས་བུ་ཟ་བར་བྱེད་པ་ཡིན་ནོ། །དེས་སྐྱེ་དགུ་རྣམས་འཚེ་བར་མི་བྱེད་དོ། །ཡུལ་འཁོར་ཡང་ཡོངས་སུ་སྲུང་བར་བྱེད་དོ། །སྐྱེ་བོ་ཐམས་ཅད་ལ་རྗེས་སུ་བརྩེ་བ་པོ་དེ་ལུས་ཞིག་པར་གྱུར་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་བདག་པོར་འགྱུར་རོ། །ཡང་ཆོས་གཞན་དང་ཡང་དག་པར་ལྡན་པའི་རྒྱལ་པོས་ཡུལ་འཁོར་ཡོངས་སུ་སྐྱོང་བར་བྱེད་དོ། །སྐྱེ་དགུ་ཀུན་ཏུ་དགའ་བར་ཡང་བྱེད་དོ། །གང་དག་ཞེ་ན། འདི་ལྟ་སྟེ། བཟོད་པ་དང་ལྡན་པར་གྱུར་པའོ། །འདི་ལ་རྐྱེན་གྱི་དབང་གིས་ཁྲོ་བ་འབྱུང་བར་གྱུར་ན་ཡང་ཡོངས་སུ་སྤོང་བར་བྱེད་དོ། །རྗེད་དཔོན་ཡིན་པར་གྱུར་ནས་ཀྱང་གནང་ལ་སྒོ་བར་མི་བྱེད་དོ། །གཞན་གྱི་འབྱོར་པས་མི་བཟོད་པར་མི་བྱེད་དོ། །གྲོང་ཁྱེར་ཉེས་པ་ཅན་རྣམས་ལ་ཡང་གཙེ་བ་སྐྱེད་པར་ཡང་མི་བྱེད་དོ། །གྲོགས་པོའི་དྲུང་དུ་ཚིག་རྩུབ་མོ་རྣམས་སྨྲ་བར་ཡང་མི་བྱེད་དོ། །ཁྲོ་བ་སྐྱེས་པར་གྱུར་ན་ཡང་བཟོད་པས་རབ་ཏུ་ཞི་བར་བྱེད་དོ། །འདིས་སྙན་པ་རྗོད་པར་བྱེད་དོ། །བརྗོད་པར་གྱུར་པ་ན་ཡང་ཇི་ལྟར་འདིས་གྲོང་ཁྱེར་པ་འདི་རྣམས་མི་བདེ་བར་གྱུར་ཅིང་འཁྲུག་པར་བྱེད་པ་མ་ཡིན་ནོ། །དེ་ལྟར་གནས་སྐབས་ཐམས་ཅད་དང་རྣམ་པ་ཐམས་ཅད་དང་དུས་ཐམས་ཅད་དུ་སྙིང་རྗེ་དང་ལྡན་པར་འགྱུར་ཏེ། རང་བཞིན་གྱིས་ཡིན་གྱི་དགོས་པ་རྣམས་ཀྱི་རྒྱུ་གང་ལས་ཀྱང་ནི་མ་ཡིན་ནོ། །རྒྱལ་པོ་དེ་བཟོད་པ་དང་ལྡན་པར་གྱུར་པའི་རྒྱུ་དེ་དག་དང་རྐྱེན་དེ་དག་གིས་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བར་གྱུར་པ་འཇིག་རྟེན་འདི་དང་ཕ་རོལ་དུ་ཡང་ཕན་པར་འགྱུར་བའི་ཕྱོགས་འཛིན་

70-240a

མེད་པར་ལུགས་ལེགས་པར་སྐྱོང་བར་བྱེད་པ་འདི་ཡང་གང་ཞེ་ན། བླ་ན་མེད་པའི་དགེ་བའི་བསམ་པ་མཚུངས་པས་རྒྱལ་པོ་ཡུལ་ལྗོངས་པ་རྣམས་ཐམས་ཅད་ཀྱི་མ་དང་ཕ་དང་འདྲ་བར་འགྱུར་རོ། །གཅིག་ཏུ་ནོར་གྱི་རྒྱུས་དང་ཕན་འདོགས་པའི་རྒྱུས་དང་རང་གི་སྐྱེ་བོ་ཡིན་པའི་རྒྱུས་དང་སྔོན་ཕན་བཏགས་པའི་རྒྱུས་དང་། འབྲེལ་བར་གྱུར་པའི་རྒྱུས་དང་སྐྱེ་དགུའི་བདག་པོར་གྱུར་པ་དང་དམག་གི་དཔོན་པོ་ཡིན་པའི་རྒྱུས་ཀྱང་མ་ཡིན་ཏེ། གནས་སྐབས་ཐམས་ཅད་དུ་ཡང་ཕྱོགས་འཛིན་པར་མི་བྱེད་དོ། །དེ་ལུགས་རྣམ་པར་གཞག་པ་བྱེད་པའི་དུས་ན་གྲོགས་པོ་དང་གྲོགས་པོ་མ་ཡིན་པ་ལ་བློ་མཉམ་པར་འགྱུར་རོ། །དེ་དག་རྣམས་བྱེད་པར་གྱུར་པ་ན་རྒྱལ་པོ་དེའི་ཡུལ་ལྗོངས་ཡོངས་སུ་ཉམས་པར་མི་འགྱུར་རོ། །སྙན་གྲགས་ཀྱང་ཡོངས་སུ་ཉམས་པར་མི་འགྱུར་རོ། །རྒྱལ་པོ་མེད་པའི་གྲོང་ཁྱེར་དུ་མི་འགྱུར་རོ། །གཞན་གྱི་དཔུང་གིས་འཇིགས་པར་མི་འགྱུར་རོ། །རྒྱལ་པོ་གཞན་ཁ་དྲག་པར་མི་འགྱུར་རོ། །དེ་དུས་ཡུན་རིང་དུ་རྒྱལ་པོ་བྱེད་པར་འགྱུར་རོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་ཡོད་པ་ནི། འཇིག་རྟེན་གཉིས་ལ་ཕན་པ་དང་མྱ་ངན་ལས་འདས་པའི་མཐར་ཐུག་པར་ཡང་བྱེད་དོ། །འདི་ཡང་གང་ཞེ་ན། འདི་ལྟ་སྟེ། བླ་མ་མཆོད་པར་བྱེད་པའོ། །བླ་མ་ཞེས་བྱ་བའང་ཇི་ལྟ་བ་བཞིན་དུ་དེ་ཁོ་ན་སྟོན་པར་བྱེད་པའོ། །དེ་ཡང་ཚུལ་ཁྲིམས་དང་ཤེས་རབ་དང་དཀའ་ཐུབ་དང་ལྡན་ཞིང་སེམས་ཅན་རྣམས་ལ་ཕན་པ་ལ་ལེགས་པར་ཞུགས་པར་གྱུར་པ་གཅིག་ཏུ་ངེས་པར་དགེ་བ་བྱེད་པ་པོ་ལུས་དང་ངག་གིས་ལས་ཀྱི་མཐའ་རབ་ཏུ་ཞི་བ་དྲི་མ་རྣམས་དང་བྲལ་བར་གྱུར་པ་དེ་གཞན་རྗེས་སུ་འཛིན་པ་ལ་ཞུགས་པ་དེ་ལ་རྗེས་སུ་རྟེན་པར་བྱེད་དོ། །དེ་དག་གི་དྲུང་ནས་ངག་འཛིན་པར་བྱེད་དོ། །དེ་ཇི་ལྟར་སྤྱོད་པར་བྱེད་པ་དེ་ལྟར་དེ་ཡང་སྤྱོད་པར་བྱེད་དོ། །རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་དག་དེ་མཆོད་པར་བྱེད་པས་འདི་ལ་རྟག་ཏུ་ཕན་

70-240b

པར་འགྱུར་བ་དང་། ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་འགྱུར་ཏེ། དགེ་བའི་ལས་དེའི་རྐྱེན་རྣམས་དང་དགེ་བ་དེ་དག་གི་རྒྱུ་ལས་སོ། །གཞན་ཡང་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་སུ་གྱུར་པ་དག་གིས་འཇིག་རྟེན་གཉིས་སུ་ཕན་པར་གྱུར་པ་ནི་འདི་ལྟ་སྟེ། སྔར་བྱིན་ནས་ཕྱིས་ཀྱང་སྟེར་བར་གྱུར་པའོ། །གང་ཡང་ཕས་སམ་མེས་པོས་སམ་ཡང་མེས་པོས་སམ་གཞན་གྱིས་སམ་དེ་དག་དང་དེ་ལས་གཞན་པ་རྣམས་ཀྱིས་ཀྱང་རུང་སྟེ་རྟག་ཏུ་གང་བྱིན་པར་གྱུར་པ་ལས་གཞིའམ་དབྱིག་ལ་སོགས་པ་རྣམས་འདྲེན་མ་དང་རྙོག་མ་ཅན་དུ་གྱུར་པའི་སེམས་མ་ཡིན་པས་དང་ཕན་པ་དང་མཆོག་ཏུ་དང་བས་དེ་དག་ལ་རྗེས་སུ་ཡི་རང་བར་བྱེད་ཅིང་དེ་དག་ཉིད་ལ་དགའ་བ་དང་། སླར་ཉིད་ཡང་སྦྱིན་པ་བསྔགས་པར་བྱེད་དོ། །གཞན་ཡང་སྦྱིན་པ་རྗེས་སུ་གཏོང་བ་ལ་རབ་ཏུ་འཇུག་པར་བྱེད་དོ། །དེ་ཉིད་ཀྱང་དེ་བཞིན་དུ་རབ་ཏུ་གནས་པ་དང་རབ་ཏུ་འཇུག་པར་བྱེད་པ་གང་ཡིན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་འདིའི་ལུས་ཞིག་ནས་ལས་དེ་དག་རྣམས་ཀྱི་རྒྱུ་དང་། རྐྱེན་དེ་དག་གིས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་མངའ་བདག་ཏུ་སྐྱེ་བར་འགྱུར་རོ། །ཆོས་གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་འཇིག་རྟེན་གཉིས་སུ་དོན་དང་། ཕན་པ་དང་། བདེ་བར་འགྱུར་བ་འདི་ཡང་གང་ཞེ་ན། འདི་ལྟ་སྟེ། སྦྱིན་པའོ། །སྦྱིན་པ་ཞེས་བྱ་བ་ཡང་གནས་སྐབས་ཐམས་ཅད་དང་། ཐམས་ཅད་ཉིད་ལ་དང་། རྣམ་པ་ཐམས་ཅད་དུ་དང་། དུས་ཐམས་ཅད་དུ་དང་། བློ་གྲོས་ཐམས་ཅད་ལ་ཡང་ཕན་པར་འགྱུར་བ་དང་། བདེ་བར་འགྱུར་བ་དང་། ཐམས་ཅད་ནས་འགྲོ་བ་ཐམས་ཅད་དུ་ཡང་དམྱལ་བ་དང་། ཡི་དགས་དང་། དུད་འགྲོར་སྐྱེས་པ་རྣམས་ལ་ཡང་བཀྲེས་པ་རྣམ་པར་འཇོམས་པ་དང་། སྐོམ་པ་རྣམ་པར་འཇོམས་པར་བྱེད་པ་ཡིན་ན་ལྷ་དང་མི་རྣམས་ལ་འབྱུང་བར་འགྱུར་བ་ལ་ལྟ་སྨོས་ཀྱང་ཅི་དགོས། གཏོང་བ་ཅན་གྱི་རྒྱལ་པོ་ནི་མཐོང་བའི་ཚེ་འབྲས་བུ་དང་ཡང་ལྡན་པ་ཡིན་

70-241a

ནོ། །གང་དག་ཞེ་ན། འདི་ལྟ་སྟེ། གྲགས་པས་རྗེས་སུ་དགའ་བར་གྱུར་ནས་གྲོང་ཁྱེར་དང་ཡུལ་ལྗོངས་ཕུན་སུམ་ཚོགས་པར་འགྱུར་བ་དང་། དེ་དག་རྣམས་ཀྱིས་ཡོངས་སུ་སྤོང་བར་ཡང་མི་འགྱུར་རོ། །དེས་ཡུལ་ལྗོངས་གཞན་གྱི་མཆོད་པ་ཡང་བླ་ན་མེད་པ་དུ་མ་འཐོབ་བོ། །དེ་ཉིད་མངོན་པར་ཀུན་དུ་མཐོང་ནས་ཀྱང་ཕས་ཀྱི་དཔུང་རྣམས་ཀྱིས་ཀྱང་ཟིལ་གྱིས་མི་ནོན་ནོ། །འདི་ལ་དགྲ་རྣམས་ཀྱིས་བར་དུ་གཅོད་པ་ཕྲ་མོ་ཙམ་ཡང་བྱ་བར་གླགས་མི་ཐོད་དོ། །དེ་ཡུལ་དང་གྲོང་ཁྱེར་གྱི་མཆོག་རྣམས་དང་ལྡན་པར་འགྱུར་བ་ནི་གོམས་པར་མ་གྱུར་པ་རྣམས་ལ་ཡང་མཐོང་བའི་ཆོས་ཀྱི་སྦྱིན་པའི་འབྲས་བུ་ཡིན་ནོ། །གང་ཡང་ཞིང་དང་། དངོས་པོ་དང་། བསམ་པ་ཕུན་སུམ་ཚོགས་པས་སྦྱིན་པ་བྱིན་པར་གྱུར་པ་རྣམས་ལ་ལྟ་ཅི་སྨོས། དེས་ནི་གཅིག་ཏུ་དགའ་བར་གྱུར་པ་དང་། གཅིག་ཏུ་ངན་སོང་གི་སྒོ་རྣམ་པར་སྡོམ་པ་དང་། གཅིག་ཏུ་རྣམ་པར་སྨིན་པ་བདེ་བར་འགྱུར་རོ། །དེ་ལ་སྦྱིན་པ་སྦྱིན་པར་བྱ་བ་རྣམས་ནི་རྣམ་པ་དུ་མ་ཡོད་དོ། །རྣམ་པ་དུ་མ་དེ་ཡང་གང་ཞེ་ན། འདི་ལྟ་སྟེ། ཟང་ཟིང་གི་སྦྱིན་པ་དང་། མི་འཇིགས་པའི་སྦྱིན་པ་དང་། ཆོས་ཀྱི་སྦྱིན་པའོ། །རྣམ་པ་དེ་ལྟ་བུའི་སྦྱིན་པ་རྣམས་གང་གི་ཚེ་རྒྱལ་པོ་དེས་དགེ་སྦྱོང་དང་བྲམ་ཟེ་རྣམས་ལ་གཏོང་བར་བྱེད་པ་དེ་ཡང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་བདག་པོར་ལས་དེའི་རྒྱུ་དང་རྐྱེན་རྣམས་ཀྱིས་འགྱུར་རོ། །གཞན་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ལ་གཅེས་པར་འགྱུར་བའི་ཆོས་འཇིག་རྟེན་གཉིས་ལ་ཕན་པར་བྱེད་པ་ཡོད་དེ། འདི་ཡང་གང་ཞེ་ན། ཆོས་བྱེད་པ་མ་ཡིན་པ་རྣམས་མི་འཛིན་པའོ། །རྒྱལ་པོ་རྒྱལ་རིགས་རྣམས་ཀྱང་གང་གི་ཕྱིར་ཆོས་དང་ལྡན་པ་དང་། ཆོས་ཀྱི་རྗེས་སུ་འཇུག་པ་ཡིན་ནོ། །ཆོས་བྱེད་པ་མ་ཡིན་པའི་སྐྱེ་བོ་རྣམས་ངེས་པར་འགེགས་པར་མི་བྱེད་པ་དང་། འཛིན་པར་བྱེད་པ་དང་། ཆོས་བྱེད་པ་མ་ཡིན་པ་རྣམས་ཀྱིས་མགྲིན་པ་མི་གཙང་བར་བྱེད་པ་པོ་ལོག་པར་ལྟ་བས་རི་དགས་ཀྱི་འཁོར་བ་འགྲོལ་བར་བྱེད་པ། མཆོད་

70-241b

སྦྱིན་དང་ཕྱུགས་གསོད་པར་བྱེད་པ། སྐྱེས་བུ་ཐ་ཆད་དུ་གྱུར་པ། སྐྱེས་བུ་ཕྱིན་ཅི་ལོག་འཛིན་པ། ཕ་མ་ལ་གུས་པ་མེད་པ་དང་རྣམ་པ་དེ་ལྟ་བུར་གྱུར་པ་རྣམས་ཡུལ་དུ་འཛིན་པར་མི་བྱེད་དོ། །དེ་དང་བསྟེན་འགྲོགས་བྱས་པར་གྱུར་པའི་སྐྱོན་གྱིས་སྐྱེས་བུ་གཞན་དག་དགེ་བའི་སེམས་དང་ལྡན་པ་རྣམས་ཀྱང་རབ་ཏུ་ཆུད་གཟོན་པར་བྱེད་དོ། །དེ་དག་རྣམས་ལ་བསྟེན་པའི་སྐྱོན་གྱིས་དེ་དག་ཆུད་གཟན་པས་འདིའི་མངའ་བྱེད་པ་རྣམས་ཡོངས་སུ་ཉམས་པར་འགྱུར་རོ། །དུས་མ་ཡིན་པར་ཆར་འབབ་པར་འགྱུར་རོ། །དུས་མ་ཡིན་པར་ལྷས་ཤིན་ཏུ་ཚ་བར་བྱེད་དོ། །དུས་མ་ཡིན་པར་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་འགྱུར་ཏེ། སྡིག་པ་བྱེད་པ་པོ་དེ་རྣམས་ཀྱི་ཉེས་དམིགས་ཆེན་པོས་སོ། །རྒྱུ་དེས་ན་ཆོས་བྱེད་པ་རྣམས་འཛིན་པ་ཡིན་ནོ། །སྐྱེས་བུ་ཆོས་བྱེད་པ་ཀུན་དུ་བཟུང་བས་ཀྱང་ལྷས་དུས་སུ་ཆར་འབེབས་སོ། །དུས་སུ་རླུང་རྒྱུའོ། །དུས་སུ་ལོ་ཏོག་རྫོགས་པར་བྱེད་དོ། །ཡུལ་ལྗོངས་བརླག་པར་ཡང་མི་འགྱུར་རོ། །འཇིགས་པ་དང་། མྱ་ངན་དང་། ཡ་ང་བ་དང་སྐྱེ་དགུ་རྣམས་བྲལ་བར་འགྱུར་རོ། །སྐྱེས་བུ་ཆོས་བྱེད་དེ་དག་མངའ་བྱེད་པར་གྱུར་པས་འདུ་བྱེད་རྣམས་ཐམས་ཅད་ཀྱི་སྡུག་བསྔལ་རྣམ་པར་ཆད་པར་བྱེད་དོ། །སྐྱེས་བུ་ཆོས་བྱེད་ལེགས་པར་འཛིན་ཅིང་སྟེན་པར་བྱེད་པ་འདིའི་སྙིང་པོའི་མཆོག་ནི་ཚངས་པར་སྤྱོད་པའོ། །འདི་ལྟ་སྟེ། སྐྱེས་བུ་ཆོས་བྱེད་རྣམས་སྟེན་པའམ། ལེགས་པར་འཛིན་པར་བྱེད་པའོ། །དེའི་ཕྱིར་ན་བློ་དང་ལྡན་པར་གྱུར་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བས་སྐྱེས་བུ་ཆོས་བྱེད་པ་ལ་ཀུན་དུ་བསྟེན་པར་བྱའོ། །དེ་ལས་ཀྱང་འཇིག་རྟེན་གཉིས་སུ་ཕན་པར་འགྱུར་རོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། ལས་དེའི་རྒྱུ་དང་རྐྱེན་གྱིས་སོ། །གང་གིས་སྡིག་པའི་གྲོགས་པོ་དང་སྟེན་པར་མི་འགྱུར་བ་ལ་སྡིག་པའི་གྲོགས་པོ་ཡང་རྣམ་པ་བརྒྱད་སྤང་བར་བྱ་སྟེ། འདི་ལྟ་སྟེ། མེད་པར་སྨྲ་བར་གྱུར་པ་གང་གིས་སྦྱིན་སྲེག་མེད་དོ། །

70-242a

སྦྱིན་པ་མེད་དོ། །འཇིག་རྟེན་འདི་མེད་དོ། །ཕ་རོལ་མེད་དོ་ཞེས་ཟེར་བ་འདི་ནི་སྡིག་པའི་གྲོགས་པོ་གཅིག་ཡིན་ནོ། །སྡིག་པའི་གྲོགས་པོ་གཉིས་པ་ཡོད་དེ། འདི་ལྟར་བགྲོད་པར་བྱ་བ་མ་ཡིན་པ་ཡོད་པ་ནི་མ་ཡིན་ནོ། །ཚངས་པར་སྤྱོད་པ་མེད་དོ། །ནམ་ཟླ་དང་དུས་ཀྱིས་བུད་མེད་དག་ལ་ཐམས་ཅད་ཀྱིས་བགྲོད་པར་བྱ་བའོ། །སྐྱེས་བུ་གསུམ་པ་སྡིག་པའི་གྲོགས་པོར་གྱུར་པ་ནི་འདི་ལྟ་སྟེ། ཇི་ལྟར་གང་དག་སེམས་ཅན་རྣམས་ལ་བྱིན་པ་དང་མེར་བཅུག་པ་དེ་དག་རྣམས་ཀྱི་བཅུག་པར་གྱུར་པ་ནི་མ་བཅུག་པ་ཡིན་ནོ། །སྡིག་པའི་གྲོགས་པོ་བཞི་པ་ནི་འདི་ན་ཇི་སྲིད་འཚོ་བའི་བར་དེ་སྲིད་ཅིག་ཁོ་ནར་སྐྱེས་བུ་དག་འགྱུར་གྱི་དེ་ཤི་བར་གྱུར་ན། དེའི་ཕྱིར་དེའི་ལེགས་པར་བྱས་པ་དང་ཉེས་པར་བྱས་པ་དེ་དག་རྣམས་ཐམས་ཅད་ཀྱང་ཇི་ལྟར་སྤྲིན་དང་ཁུག་རྣ་རྣམས་རྣམ་པར་ཉམས་ནས་སླར་ཡང་མི་འཇུག་པ་དེ་བཞིན་དུ། ལུས་ཅན་དེ་དག་རྣམས་ཀྱི་བསོད་ནམས་དང་སྡིག་པ་ཡང་ཡིན་ནོ། །སྡིག་པའི་གྲོགས་པོ་ལྔ་པར་གྱུར་པ་ནི་ཕ་དང་མའི་རྩ་ནས་འབྱེད་པར་བྱེད་དོ། །གུས་པ་དང་རྣམ་པར་འབྲེལ་བར་བྱེད་དོ། །སྡིག་པའི་གྲོགས་པོ་དྲུག་པ་ཡོད་དོ། །འདི་ལྟ་སྟེ། སྲོག་གཅོད་པ་བྱ་བར་བྱས་ཏེ་རྒན་པོ་དང་། ལོང་བ་དང་། མགོན་མེད་པ་དང་། བཀྲེན་པ་རྣམས་སོ། །དེ་དག་ཀྱང་ཤི་ནས་འཇིག་རྟེན་གཞན་དུ་བདེ་བར་འགྱུར་རོ། །སྡིག་པའི་གྲོགས་པོ་བདུན་པ་ནི་འདི་ལྟ་སྟེ། གང་དག་རླུང་གིས་སམ་དེའི་ཚེ་མེས་སྲེག་པ་དང་། རླུང་ཟ་བ་དང་། གདུང་བ་ལྔས་དུས་བྱེད་པ་ནི་དེ་དག་གི་འཇིག་རྟེན་ཟད་པར་འགྱུར་ཏེ། གཞན་དག་ཏུ་རྗེ་བར་འགྱུར་བས་སོ། །སྡིག་པའི་གྲོགས་པོ་བརྒྱད་པ་ནི་འདི་དག་ཐམས་ཅད་ནི་ལྷས་བྱས་ཀྱི་ལས་དང་འབྲས་བུའི་མཚན་ཉིད་ནི་མ་ཡིན་ནོ། །སྡིག་པའི་གྲོགས་པོ་བརྒྱད་པོ་དེ་དག་རྣམས་ལེགས་པར་ཡོངས་སུ་སྤང་བར་བྱའོ། །ཀུན་ཏུ་སྤང་བར་བྱའོ། །ཡུལ་དུ་འཇོག་པར་མི་བྱེད་དོ། །ཕྲད་པར་ཡང་མི་བྱེད་དོ། །གང་དག་གིས་རྒྱུ་དང་འབྲས་བུ་ཡང་དག་པ་ཇི་ལྟ་བར་བརྗོད་པ་དེ་དག་རྗེས་སུ་འཛིན་པར་བྱེད་དོ། །དེ་དག་རྣམས་ཀྱི་དྲུང་ནས་

70-242b

དམ་པའི་ཆོས་རྗེས་སུ་འཛིན་པར་བྱེད་དོ། །འཇིག་རྟེན་གཉིས་ལ་ཕན་པ་ལ་རབ་ཏུ་ཞུགས་པའི་རྒྱལ་པོ་འདི་ནི་ལུས་ཞིག་ནས་ཤི་བའི་འོག་ཏུ་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་རྒྱལ་པོས་ཆོས་རབ་ཏུ་གཞོལ་བར་བྱ་བ་འདི་ཡང་གང་ཞེ་ན། འདི་ལྟ་སྟེ། བུད་མེད་ཀྱི་དབང་དུ་འགྲོ་བར་མི་འགྱུར་བའོ། །སྐྱེས་བུ་ཐ་མལ་པ་རྣམས་བུད་མེད་ཀྱི་དབང་དུ་འགྲོ་བ་ཐམས་ཅད་ལ་ཡང་འཇིག་རྟེན་པ་རྣམས་ཐམས་ཅད་ཀྱིས་གཤེ་བར་འགྱུར་རོ། །ཅི་ཡང་མཆོག་ཏུ་རྒྱ་ཆེ་བའི་རིགས་རྒྱུད་དུ་ལེགས་པར་སྐྱེས་པའི་རྒྱལ་པོ་ལྟ་ཅི་སྨོས། བུད་མེད་ཐམས་ཅད་ནི་རྣམ་པར་འབྱེད་པའི་རང་བཞིན་ཅན་ཡིན་ནོ། །དེས་ཡུལ་འཁོར་དང་། ཡུལ་ལྗོངས་རྒྱ་ཆེན་པོ་རྣམས་ཐམས་ཅད་ལས་རྒྱལ་པོ་རྣམ་པར་འབྱེད་པར་བྱེད་དོ། །འདོད་པས་ཟིལ་གྱིས་མནན་པར་གྱུར་པས་ལྷན་ཅིག་ཏུ་འགྲོགས་པ་རྣམས་སུན་འདོན་པར་བྱེད་པར་འགྱུར་རོ། །ནོར་གྱི་ཆོས་ཀྱི་རྗེས་སུ་འཇུག་པར་བྱེད་ལ་སྦྱིན་པ་འགོགས་པར་བྱེད་དོ། །འདོད་པས་ཟིལ་གྱིས་མནན་པར་གྱུར་པ་གང་གི་ཕྱིར་ལེ་ལོ་ཅན་རྣམས་ཐམས་ཅད་ཀྱང་བུད་མེད་འཛིན་པར་བྱེད་དོ། །འདོད་ཆགས་ཀྱི་བསམ་པས་གློར་ཀུན་ནས་སྐོར་བར་བྱེད་དོ། །སྐྱེས་བུ་རང་གི་དོན་རྣམས་ལས་ཡོངས་སུ་ཉམས་པར་བྱེད་དོ། །སྐྱེས་པ་ཆོས་ཀྱི་བསམ་པ་ཡང་དག་པར་བྱུང་བ་ཡང་བུད་མེད་ཐམས་ཅད་ཀྱིས་རྣམ་པར་འབྱེད་པར་བྱེད་པ་དང་། ཕྲ་མའི་བསམ་པ་དང་། ང་རྒྱལ་དང་། ཕྲག་དོག་གི་སྐྱེ་གནས་ཅན་དེ་དག་རྣམས་ཀྱིས་སྐྱེས་པ་རྣམས་རང་བཞིན་མཚུངས་པར་བྱེད་དོ། །བུད་མེད་ཀྱིས་འཚོ་བར་གྱུར་པ་དེ་དག་ནི་སྦྲུལ་ནག་པོ་མཐོང་བ་དུག་ཅན་དེ་དག་གིས་ཡོངས་སུ་ཉམས་པར་བྱེད་དོ། །དེའི་ཕྱིར་བུད་མེད་ཀྱིས་འཚོ་བར་གྱུར་པའི་རྒྱལ་པོ་ཞེ་ལྡོག་གོ།། དེ་དག་གི་གཞི་ཡང་འདི་ལྟ་སྟེ། བུད་མེད་ཅེས་བྱ་བའོ། །གཞི་དེས་འཚོ་བར་གྱུར་པས་དེ་ཆེས་བཙོག་པར་འགྱུར་རོ། །ཀུན་གྱི་ལམ་དུ་གྱུར་པ་ཆོས་ཀྱི་དུས་ལས་ལྷུང་ནས་ཡོངས་སུ་ཉམས་པར་འགྱུར་རོ། །སྐྱེས་བུ་བུད་མེད་ལ་གཙོར་བྱེད་པ་རྣམས་ནི་སྡུག་བསྔལ་དང་

70-243a

ལང་ཚོ་དག་ཀྱང་ཀུན་དུ་འཇིག་པར་འགྱུར་རོ། །འདོད་ཆགས་ལ་མཆོག་ཏུ་འཛིན་པའི་སྐྱོན་གྱིས་རྟག་ཏུ་ཡང་ཐམས་ཅད་ཀྱིས་དེ་ཡོངས་སུ་སྤོང་བར་འགྱུར་རོ། །དེ་ཡང་བུད་མེད་དེ་ཉིད་རང་གི་སླུ་བར་བྱེད་དེ། དཀྲིག་མ་འདི་དག་རྣམས་ཐམས་ཅད་ནི་རང་བཞིན་ཁོ་ནས་འདི་ལྟ་སྟེ། གསར་པ་ལ་ཞོན་པར་བྱེད་པ་དང་། བྱས་པ་ཆུད་གཟོན་པ་དང་། སྡུག་བསྔལ་བར་གྱུར་ན་ཡོངས་སུ་སྤོང་བ་ལ་མཁས་པ་དང་། འདོད་པ་དང་ཕྲག་དོག་ཕལ་ཆེ་བར་གནས་པས་ཀྱང་དེ་དག་རྣམས་ནི་སྐྱེས་པ་ལ་ངལ་སོས་པར་འགྱུར་བ་མེད་དོ། །གང་ཡང་བུད་མེད་ཀྱི་དབང་གིས་འགྲོ་བར་གྱུར་པ་ནི་གྲོང་དང་། གྲོང་ཁྱེར་དང་། གྲོང་རྡལ་དང་། ལྗོངས་དང་། ཚོང་འདུས་རྣམས་ཐམས་ཅད་དུ་ཡང་འདི་ལ་སྐྱེ་བོ་དག་གིས་ཤིན་ཏུ་བར་ཡང་གཤེ་བར་འགྱུར་རོ། །ཁྱད་པར་དུ་ཡང་རྒྱལ་པོ་ལའོ། །དེའི་ཕྱིར་བུད་མེད་བསྒྲུབ་པར་མི་བྱའོ། །བུད་མེད་ཀྱིས་འཇིགས་ཤིང་སྐྱོན་དུ་ལྟ་བ་དེ་ནི་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་རྒྱལ་པོས་མི་བྱའོ། །འདི་ཡང་གང་ཞེ་ན། འདི་ལྟ་སྟེ། ཐམས་ཅད་ཀྱི་ཚིག་ལ་དད་པར་མི་བྱའོ། །གསོན་པའི་འཇིག་རྟེན་པ་འདི་དག་ཐམས་ཅད་ནི་རྒྱུད་ཐ་དད་པར་གནས་པ་ཕལ་ཆེར་ཡང་ཕན་ཚུན་དུ་སེམས་ཀུན་ནས་ཐ་དད་པ་དང་། རང་བཞིན་རྣམ་པ་ཐ་དད་པ་དང་། དགོས་པ་རྣམས་རྣམ་པར་ཐ་དད་པ་དང་། རྒྱུ་རྣམ་པར་ཐ་དད་པ་དང་། རང་བཞིན་གྱི་གཤིས་ཀྱིས་དྲི་མའི་དངོས་པོ་རྣམས་རྣམ་པར་ཐ་དད་པ། རྟག་ཏུ་འཐབ་པ་དང་། རྩོད་པ་དང་། རྒྱུ་འཐུན་པའི་སེམས་ཐ་དད་པ་དང་། བསྟེན་གྲོགས་རྣམ་པར་ཐ་དད་པ་དང་། རང་བཞིན་རྣམ་པར་ཐ་དད་པ་དང་། ཡུལ་ལྗོངས་ལ་སྐྱོན་བྱེད་པ་རྣམ་པར་ཐ་དད་པ་རྐྱེན་དང་བཅས་པའི་སེམས་ཡང་མོར་གྱུར་པས་ཀྱང་ཕན་ཚུན་དུ་རྒྱབ་ཀྱི་ཤ་ཟ་བར་བྱེད་དོ། །ཕན་ཚུན་མངོན་སུམ་དུ་ཐུལ་འོག་ཏུ་འཇུག་གོ། །དེ་དག་རྣམས་ཐམས་ཅད་ཀྱི་ཚིག་ལ་རྒྱལ་པོས་ཐ་དད་པར་མི་བྱ་སྟེ། དེ་ལྟར་གང་དག་རིགས་པ་དང་། རྣམ་པར་ཐ་དད་

70-243b

པར་གྱུར་པ་དང་། སྔ་ཕྱི་རྣམ་པར་འགལ་བ་དང་། བསམ་པ་ཕན་ཚུན་མ་རུངས་པར་སོང་བར་གྱུར་པ་དང་། ཕྱོགས་ཆ་འཛིན་པར་གྱུར་པས་ཀྱང་སྨྲས་པར་གྱུར་པ་དང་། ཉེ་བར་བསྐྱེད་འདོད་པའི་དངོས་པོས་སྨྲས་པར་གྱུར་པ་དང་། སྔོན་ཕན་པར་བྱས་པ་དང་། གནོད་པར་བྱས་པར་གྱུར་པས་སྨྲ་བར་འགྱུར་བ་དང་། ཕན་ཚུན་དུ་ནོར་དང་དབྲལ་བར་འདོད་པས་རྒྱལ་པོ་ལ་རྗོད་པར་བྱེད་པ་དེ་དག་སྔར་བརྗོད་པར་གྱུར་པའི་རྒྱུས་ཕན་ཚུན་དུ་རབ་ཏུ་སྡང་བར་ཞུགས་པས་རྗོད་པར་བྱེད་དོ། །དེ་དག་ལ་རྒྱལ་པོས་དད་པར་མི་བྱའོ། །དེ་ལྟར་ན་འདིའི་ཡུལ་ལྗོངས་རྣམས་འཇིག་པར་མི་འགྱུར་རོ། །རང་བཞིན་གྱིས་ཀྱང་མི་སྐྱེ་ལ་གནས་མ་ཡིན་པ་ལ་ཡང་ཁྲོ་བར་མི་བྱེད་དོ། །འབྱེད་པར་བྱེད་པ་རྣམས་ལ་དད་པར་བྱེད་པ་ཡང་མ་ཡིན་ནོ། །རྒྱལ་པོ་དེ་ནི་ཡོན་ཏན་དང་ལྡན་པར་གྱུར་པ་གཞན་གྱི་རྐྱེན་གྱིས་མི་འགྲོ་བར་རང་གི་འདུན་པར་གྱུར་པ། འཇུག་པར་གྱུར་པ། ཁྲོ་བ་ཤས་ཆུང་བ་སྐྱེ་བོ་རྣམས་ཐམས་ཅད་དང་ལྷ་རྣམས་ཀྱང་བློ་འཐུན་པ་སྟེ། ལེགས་པར་དཔྱད་ནས་བྱེད་པ་པོ་ཆོས་བྱེད་དྲང་པོར་གྱུར་པ་གྲོང་ཁྱེར་ལ་གཅེས་ཤིང་འདོད་པ་ནི་ལུས་ཞིག་པ་ན་མཐོ་རིས་འཐབ་བྲལ་བའི་ལྷ་རྣམས་ཀྱི་ན་ནང་དུ་སྐྱེའོ། །གཞན་ཡང་ཆོས་གཞན་དང་ཡང་དག་པར་ལྡན་པའི་རྒྱལ་རིགས་རྒྱལ་པོ་སྤྱི་བོ་ནས་དབང་བསྐུར་བ་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །འདི་ཡང་གང་ཞེ་ན། འདི་ལྟ་སྟེ། སྙན་གྲགས་ལ་སྲེད་པ་སྐྱེད་པར་བྱེད་པའོ། །རྒྱལ་པོ་གང་རྫས་ཀྱིས་ནི་མ་ཡིན་ལ་བརྐམ་ཆགས་ཅན་དུ་གྱུར་པ་ཡང་མ་ཡིན་ཏེ། ལག་པ་རབ་ཏུ་འཁུམས་པ་ནི་མ་ཡིན་ལ་བཞིན་རྣམ་པར་བསྡུས་པར་འགྱུར་བ་ཡང་མ་ཡིན་ཞིང་མིག་ཆུང་བ་ཡང་མ་ཡིན་ནོ། །གདོང་ཆུང་བ་མ་ཡིན་ནོ། །གློ་བུར་དུ་ཁྲོ་བ་མ་ཡིན་པ་དང་། གློ་བུར་དུ་དང་བར་འགྱུར་བ་ཡང་མ་ཡིན་པ་དང་། ཤིན་ཏུ་བརྟན་པའི་བློར་གྱུར་པ་དང་། དེ་ནི་སྙན་གྲགས་དང་ཡང་དག་པར་ལྡན་པར་འགྱུར་ལ། ནོར་རྫས་རྣམས་དང་ཡང་ལྡན་པར་འགྱུར་རོ། །འོན་ཀྱང་

70-244a

དེ་བཞིན་དུ་ནོར་ལ་འདོད་པ་མི་སྐྱེད་དེ་ཇི་ལྟར་སྐྱེ་དགུ་རྣམས་ལ་སྙན་གྲགས་སུ་འགྱུར་བར་རྒྱལ་པོ་དེས་སྒྱུར་བར་བྱེད་དོ། །དགྲ་རྣམས་ཀྱིས་ཀྱང་མི་ཐུབ་པ་དང་འཇུ་བར་ཡང་འགྱུར་རོ། །རྒྱུ་བཅུས་སྙན་གྲགས་ཅན་འཐོབ་པར་འགྱུར་ཏེ། བཅུ་པོ་གང་ཞེ་ན། འདི་ལྟ་སྟེ། ཚིག་སྙན་པར་གྱུར་པ་དང་། རྒྱལ་པོ་ཡང་ཀུན་འགྱེད་པའི་རང་བཞིན་ཅན་དང་། རྐོ་ཏྲོག་ཅན་མ་ཡིན་པ་དང་། ཤིན་ཏུ་རིང་དུ་རྟོགས་པར་གྱུར་པའི་བདེ་བར་སྟེན་པ་དང་། དུས་སུ་རབ་ཏུ་སྦྱིན་པ་གཏོང་བ་དང་། བྲན་དང་ནོར་བླ་མ་དང་། སྐྱེ་བོ་བཟང་པོ་དང་མགོན་མེད་པ་རྣམས་ལ་ཆ་ཤས་འགོད་པར་བྱེད་པ་དང་། གཙང་མའི་རབ་ཏུ་སྤྱོད་པ་དང་ལྡན་པ་དང་། གནོད་པར་མི་བྱེད་པ་དང་། ལོག་ལྟ་ཅན་མ་ཡིན་པ་དང་། རྒྱུ་བཅུ་པོ་དེས་སྙན་པ་ཐོབ་པར་འགྱུར་རོ། །རྒྱུ་དེ་དག་ཐམས་ཅད་འདིས་རབ་ཏུ་བྱེད་པར་འགྱུར་ཞིང་གཞན་ཡང་བྱེད་དུ་འཇུག་པ་དང་། དེས་རྒྱུ་དེ་དག་བྱེད་པར་གྱུར་པ་ན་སྙན་པ་ཡང་འཐོབ་བོ། །རྒྱལ་འབངས་ཀྱང་ཡང་དག་པར་སྐྱོང་བར་བྱེད་དོ། །ཆོས་བྱེད་དུ་ཡང་འགྱུར་རོ། །གཞན་གྱིས་ཀྱང་གདུལ་བར་མི་ནུས་སོ། །བདེ་བར་སྟེན་པར་ཡང་འགྱུར་རོ། །མིའི་འཇིག་རྟེན་དུ་དུས་ཤིན་ཏུ་རིང་བར་རྒྱལ་པོ་བྱས་ནས་རྒྱུ་དེ་དང་རྐྱེན་དེས་ལུས་ཞིག་པར་གྱུར་པ་ན་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རབ་ཏུ་སྤངས་པར་གྱུར་པ་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡང་དག་པར་སྐྱེ་དགུ་སྐྱོང་བར་འགྱུར་ལ། དེ་བཞིན་དུ་མཐོང་བའི་ཆོས་ལ་རྟག་པར་རབ་ཏུ་བསྔགས་པར་ཡང་འགྱུར་རོ། །ལུས་ཞིག་ནས་ཀྱང་ཤི་བའི་འོག་ཏུ་མཐོ་རིས་ཀྱི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་འདི་ཡང་གང་ཞེ་ན། འདི་ལྟ་སྟེ། ལོག་པར་ལྟ་བའོ། །ལོག་པར་ལྟ་བ་ཞེས་བྱ་བ་ཉེས་པ་ཐམས་ཅད་ཀྱི་གཞིར་གྱུར་པ་ཡང་དག་པ་མ་ཡིན་པ་ཕྱིན་ཅི་ལོག་གི་ལྟ་བ་རྒྱུ་དང་རྐྱེན་ཐམས་ཅད་ལ་གཤེ་བར་བྱེད་པ། མི་དད་པར་བྱེད་པའོ། །དེ་གཞི་དེ་ལ་རབ་ཏུ་གནས་པར་

70-244b

མི་བྱེད་པ་དང་། དེ་ལ་རབ་ཏུ་ཞེ་སྡང་བར་བྱེད་པ་དང་། དེ་ལ་རྣམ་པར་གཤེ་བར་བྱེད་པ་དང་། དེ་ཡོངས་སུ་སྤོང་བར་འགྱུར་རོ། །ལོག་པར་ལྟ་བ་དང་ལྡན་པར་གྱུར་པའི་རྒྱལ་པོ་ནི་སྐྱེ་བོ་ཐམས་ཅད་ཀྱི་རྗེས་སུ་མི་འཐུན་པར་འགྱུར་རོ། །མི་འཐུན་པས་དུས་ཐམས་ཅད་དུ་ཡུལ་ལྗོངས་པ་རྣམས་ཐམས་ཅད་ཀྱིས་ཡོངས་སུ་སྤོང་བར་བྱེད་དེ་འདི་མི་བཟོད་དོ། །ཆོས་དང་ལྡན་པའི་ལྷ་དག་གིས་ཀྱང་ཡོངས་སུ་སྤོང་བར་འགྱུར་རོ། །ཡོངས་སུ་སྤངས་པར་གྱུར་པ་དེ་མོས་པ་མང་པོ་དང་མི་ལྡན་པར་འགྱུར་རོ། །དེའི་ཕྱིར་རྒྱལ་པོ་ལོག་པར་ལྟ་བ་ཅན་མ་ཡིན་པ་ཡང་དག་པར་ལྟ་བ་ཅན་གྱི་རྒྱལ་པོ་ནི་ཡང་དག་པར་སྐྱེ་དགུ་ལ་ཕན་པར་གནས་པར་འགྱུར་རོ། །ཡུལ་བ་རྣམས་ཐམས་ཅད་ཀྱིས་མཆོད་པར་འགྱུར་རོ། །ལྷ་ཆོས་པ་དག་གིས་ཀྱང་ཡོངས་སུ་མི་གཏོང་ངོ་། །ཡུལ་ལྗོངས་ཐམས་ཅད་ཀྱི་རྗེས་སུ་མི་འཐུན་པ་མ་ཡིན་པར་འགྱུར་རོ། །འདིས་ཀུན་དུ་བརྟགས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །འདིའི་ཡིད་ལ་བསམས་པ་ཐམས་ཅད་ཀྱང་ཕུན་སུམ་ཚོགས་པར་འགྱུར་རོ། །རང་བཞིན་གྱིས་ཀྱང་ཕྱིས་འགྱོད་པ་ཅན་དུ་མི་འགྱུར་རོ། །དེ་དུས་རིང་བར་ཉེས་པ་མེད་པའི་རྒྱལ་སྲིད་བྱས་པར་གྱུར་ནས་ལུས་ཞིག་སྟེ། མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་རྒྱུ་དེ་དག་དང་རྐྱེན་དེས་འགྱུར་རོ། །ཡང་གཞན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བྱ་བར་བྱ་སྟེ། འདི་ཡང་གང་ཞེ་ན། འདི་ལྟ་སྟེ། གཏོང་བ་ཅན་དུ་གྱུར་པའོ། །རྒྱལ་པོ་འདིའི་མཆོག་ཏུ་ཁྲེལ་ཡོད་པའི་རྩ་བ་དེ་ནི་གང་སྦྱིན་པ་ཞེས་བྱ་བ་དེས་འཇིག་རྟེན་པའི་ཕན་པའི་ལམ་རབ་ཏུ་སྒྲུབ་བོ། །འཇིག་རྟེན་ལས་འདས་པ་དང་འཇིག་རྟེན་པ་ཡང་རེ་ཞིག་སྦྱིན་པ་ལས་ཡིན་ཏེ། གཏོང་བར་བྱེད་པ་ན་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། སྟེར་བའི་སྐྱེ་བོ་དེ་ལ་ཡུལ་ལྗོངས་པ་ཐམས་ཅད་རང་བཞིན་གྱིས་མཆོག་ཏུ་དགའ་བར་འགྱུར་རོ། །ཡོངས་སུ་སྤོང་བར་མི་བྱེད་དོ། །གཤེ་བ་དང་། སྨོད་པར་ཡང་མི་བྱེད་དེ། ཡུལ་འཁོར་གཞན་

70-245a

དུ་ཉེ་བར་འཕོས་ནས་མི་འགྲོའོ། །གང་ལུས་གཞན་ནས་སོང་བར་གྱུར་པ་དེ་དག་ཡང་གཏོང་བ་ཅན་གྱི་རྒྱལ་པོ་ཞེས་བྱས་ནས་འོང་བར་འགྱུར་རོ། །དེའི་ཡུལ་ལྗོངས་ཀྱི་ཚོགས་ཀུན་ཏུ་འཕེལ་བར་འགྱུར་རོ། །ཡུལ་ལྗོངས་ཀྱི་ཚོགས་དེས་ཀྱང་རྒྱལ་པོ་བསྲུངས་པར་གྱུར་པས་གཞན་གྱིས་མི་ཐུབ་པར་འགྱུར་རོ། །གང་རང་བཞིན་གྱིས་ཀྱང་འདི་རྣམ་པར་འཕེལ་བ་དང་ལྡན་པར་འགྱུར་རོ། །དེ་རང་བཞིན་གྱིས་རྣམ་པར་འཕེལ་བར་གྱུར་པས་འཛིན་པ་དང་། སོ་སོར་སྐྱོབ་པ་ལ་ནུས་པ་མཆོག་དང་ལྡན་པར་འགྱུར་རོ། །དེ་ལྟར་འཇིག་རྟེན་པའི་དོན་ལ་ཡང་སྦྱིན་པ་རབ་ཏུ་བསྔགས་སོ། །སྦྱིན་པ་ནི་འཇིག་རྟེན་ལས་འདས་པའི་དོན་ལ་ཡང་རབ་ཏུ་བསྔགས་ཏེ། དེ་ལྟར་སྦྱིན་པ་པོ་དང་སྦྱིན་བདག་གི་སྦྱིན་པ་གཏོང་བར་གྱུར་པ་ན་ལྷ་རྣམས་ཀྱིས་ཡོངས་སུ་འཛིན་ནོ། །གཟི་བརྗིད་ཆེ་བར་འགྱུར་རོ། །བཙན་ཕྱུག་ཆེན་པོ་དང་ལྡན་པ་དང་། མཐུ་སྟོབས་ཆེ་བར་འགྱུར་རོ། །དགེ་སྦྱོང་དང་། བྲམ་ཟེ་དང་། ཉོན་མོངས་པར་གྱུར་པ་དང་། ལོང་བ་དག་རྣམས་ལ་སྦྱིན་པ་དག་གཏོང་བས་འཇིག་རྟེན་ཕ་རོལ་དུ་ཁྱད་པར་དུ་བྱེད་པར་འགྱུར་ལ་མཐོང་བའི་ཚེ་ལ་ཡང་ཁ་དོག་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། གང་གི་ཕྱིར་སེམས་རབ་ཏུ་དད་པ་དང་ལྡན་པར་གྱུར་པས་འགྲོ་བ་ཡང་རབ་ཏུ་དང་བར་འགྱུར་རོ། །རྗེས་སུ་རབ་ཏུ་དང་བས་ཀྱང་བཞིན་གྱི་ཁ་དོག་རབ་ཏུ་དང་བར་འགྱུར་རོ། །དེ་རབ་ཏུ་དང་བར་གྱུར་པས་དེའི་གཟུགས་ཤིན་ཏུ་བཟང་བ་ཉིད་དང་ལྡན་པར་འགྱུར་རོ། །སྦྱིན་བདག་རྣམས་ཀྱིས་སྦྱིན་པ་གཏོང་བར་བྱེད་པ་ན་འདི་ནི་གཟི་བརྗིད་གཅིག་ཡིན་ནོ། །ཡང་མཐོང་བའི་ཆོས་ལ་སྦྱིན་པ་ལས་བྱུང་བའི་ཆོས་གཞན་ཡོད་དོ། །འདི་ཡང་གང་ཞེ་ན། འདི་ལྟ་སྟེ། སྦྱིན་པ་གཏོང་བ་ན་ང་རྒྱལ་རབ་ཏུ་འཇོམས་པར་བྱེད་དོ། །འདོད་སྲེད་རབ་ཏུ་འཇོམས་སོ། །ཕྲག་དོག་རབ་ཏུ་འཇོམས་སོ། །མ་རིག་པ་རབ་ཏུ་འཇོམས་པར་བྱེད་དོ། །རྒྱུ་དང་རྐྱེན་དག་ལ་དད་པ་དང་ལྡན་པར་འགྱུར་རོ། །རྣམ་པར་སྨིན་པ་ལ་ཡིད་ཆེས་པ་ཅན་དུ་འགྱུར་རོ། །

70-245b

འཇིག་རྟེན་ཕ་རོལ་ལ་སྐུར་པ་མི་འདེབས་སོ། །བླ་མ་རྣམས་མཆོད་པར་བྱེད་དོ། །སེམས་འཇམ་པོར་འགྱུར་རོ། །བློ་གྲོས་མཉམ་པར་བཞག་པར་འགྱུར་རོ། །སེམས་ཀྱིས་ཀུན་དུ་སྒོམ་པར་བྱེད་དོ། །དངོས་པོ་རྣམས་ཡོངས་སུ་གཏོང་བར་བྱེད་དོ། །ལོངས་སྤྱོད་ཆེན་པོར་འགྱུར་བའི་རྒྱུ་རྣམས་ཀུན་དུ་འཕེན་པར་བྱེད་དོ། །སེར་སྣ་རྣམས་རབ་ཏུ་འཇོམས་པར་བྱེད་དོ། །ཞིང་རྣམ་པ་གསུམ་པོ་ཡོན་ཏན་དང་། ཚུལ་ཁྲིམས་དང་། གཉི་ག་སྲིད་པ་རྣམས་ལ་སྦྱིན་པའི་ས་བོན་ཆང་བས་འདེབས་པར་བྱེད་དོ། །དེ་དེ་ལྟར་ལེགས་པར་བསྒོམས་པར་གྱུར་པའི་ཡིད་ཅན་མཆོག་ཏུ་རྣམ་པར་དག་པའི་ཡིད་དང་ལྡན་པ་ནི་དུས་རིང་དུ་མངའ་བདག་བྱེད་པར་འགྱུར་རོ། །དུས་རིང་དུ་འཚེ་བ་མེད་པ་དང་སྐྱོན་མེད་པར་གྱུར་པའི་ལོངས་སྤྱོད་རྣམས་དང་ལྡན་ཞིང་འཇིགས་པ་དང་མྱ་ངན་དང་རྣམ་པར་བྲལ་བ་དང་ལུས་ཞིག་པར་གྱུར་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་ཏེ། དེས་སྔོན་བྱས་པར་གྱུར་པའི་ལས་རྣམས་ཀྱི་རྒྱུ་དང་རྐྱེན་གྱིས་སོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པར་བྱའོ། །འདི་ཡང་གང་ཞེ་ན། འདི་ལྟ་སྟེ། འཐུན་པར་བྱེད་པ་དང་སྙན་པའི་ངག་གོ། །རྒྱལ་པོ་འཐུན་པར་སྙན་པར་སྨྲ་བ་ནི། གང་གི་ཕྱིར་ཆོས་ལུགས་ལེགས་པ་དང་ལྡན་པར་འགྱུར་རོ། །རང་བཞིན་གྱིས་ཐམས་ཅད་ཀྱང་ཤིན་ཏུ་སྡུག་པར་འཛིན་པར་འགྱུར་རོ། །གང་འཐུན་པར་འཛིན་པའི་སྙན་པའི་ངག་གིས་བྱེད་པ་ལྟར་ནི་ཡོ་བྱད་ཀྱིས་ཀྱང་བྱ་བར་ནུས་པ་མ་ཡིན་ནོ། །ཇི་ལྟར་སྙན་པའི་ཚིག་གིས་ཡུལ་ལྗོངས་པ་དེ་དག་རྣམས་ཐམས་ཅད་དགའ་བར་འགྱུར་བ་ལྟར་རྣམ་པ་དེ་ལྟ་བུར་རབ་ཏུ་དགའ་བར་བྱེད་པ་དང་། ཡུལ་ལྗོངས་ཀྱི་སྐྱེ་བོ་རྣམས་ཐམས་ཅད་ཤིན་ཏུ་མྱུར་བར་ཡིད་རབ་ཏུ་ཚིམ་པར་བྱེད་པ་ནི་ཡོད་པ་མ་ཡིན་ནོ། །རྒྱུ་མཚན་འདི་དག་གི་ཕྱིར་ན་སྙན་པའི་ཚིག་དེ་བྱའོ། །ཡང་ན་འཐུན་པར་སྨྲ་བ་སྔོན་དུ་བཏང་བས་ནི་སེམས་རབ་ཏུ་དང་བར་གྱུར་ནས་སྐྱེ་བོ་རྣམས་ཀྱིས་གཞན་རྣམས་ལ་

70-246a

གོ་བར་བྱེད་པར་འགྱུར་རོ། །སྙན་པར་སྨྲ་བའི་ཚིག་གི་རྒྱུ་དེས་དེ་ལ་དགའ་བར་འགྱུར་རོ། །སྙན་པར་སྨྲ་བའི་རྒྱུ་དེ་དང་ཡང་དག་པར་ལྡན་པའི་རྒྱལ་རིགས་རྒྱལ་པོར་སྤྱི་བོ་ནས་དབང་བསྐུར་བ་གཞན་གྱི་མདུན་དུ་རྣམ་པར་རྒྱལ་བར་འགྱུར་རོ། །རང་བཞིན་གྱིས་ཀྱང་དགའ་བར་འགྱུར་བ་ལ། བདེན་པ་དང་སྦྱིན་པ་དང་བསྲེས་པའི་སྙན་པའི་ཚིག་གིས་ཕྱིར་ཡང་དགའ་བར་བྱེད་དོ། །སྙན་པར་སྨྲ་བར་བྱེད་པའི་རང་བཞིན་ཅན་གྱི་རྒྱལ་པོ་ལ་ནི་དགྲ་རྣམས་ཀྱང་གྲོགས་པོར་འདུད་པར་བྱེད་ན་བར་མར་གནས་པ་དང་། གྲོགས་པོ་རྣམས་ལྟ་སྨོས་ཀྱང་ཅི་དགོས། དེ་ལྟར་སྙན་པར་སྨྲ་བར་གྱུར་པའི་རང་བཞིན་ཅན་དེ་ལ་ཚོམས་གཅིག་ཏུ་འགྱུར་རོ། །འདི་ལྟ་སྟེ་གྲོགས་པོ་ཉིད་ཀྱི་ཚོམས་སུ་འགྱུར་གྱི། བར་མར་གནས་པ་ནི་མ་ཡིན་ཏེ། རང་བཞིན་གྱིས་སྐྱེ་བོ་ཐམས་ཅད་དགའ་བ་དང་མཆོག་ཏུ་མཆོད་པ་དང་། དུས་རིང་དུ་ཡང་རྒྱལ་པོ་བྱེད་པར་འགྱུར་རོ། །སྙན་པར་སྨྲས་པའི་རྒྱུ་དང་རྐྱེན་གྱིས་ལུས་ཞིག་པར་གྱུར་ནས་ཤི་བའི་འོག་ཏུ་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པ་མང་པོས་ཆོས་རྣམས་ཤིན་ཏུ་བསྟེན་པར་བྱའོ། །འདི་ཡང་གང་ཞེ་ན། འདི་ལྟ་སྟེ། བདེན་པར་སྨྲ་བ་ཞེས་བྱ་བ་འཁོར་བ་ན་ཀུན་ནས་བཅིངས་པའི་སྐྱེ་བོ་རྣམས་ཐམས་ཅད་ངེས་པར་འབྱིན་པའི་རྒྱུ་ངེས་པར་འབྱུང་བའི་རྒྱུར་གྱུར་པ་ཉོ་བའི་རིན་ཐང་བྱར་མེད་པའི་ཟད་པ་མེད་པའི་ནོར་གཏེར་དུ་བརྡུངས་ནས་བསྐྱེད་པ་ཐུན་མོང་མ་ཡིན་པའི་ནོར་སྙིང་གི་རྒྱུར་གྱུར་པར་གནས་པ། མཆོག་ཏུ་ལྟ་བར་མཛེས་པའི་རིན་པོ་ཆེ་ཆེན་པོ་དམ་པའི་སྐྱེ་བོ་ཐམས་ཅད་ཀྱིས་བསྟེན་པའི་འཇིག་རྟེན་ཕ་རོལ་དང་འཇིག་རྟེན་འདིར་ཡང་སྐྱབས་སུ་གྱུར་པ་མྱ་ངན་ལས་འདས་པ་ལ་བརྩོན་པ་དང་ལྡན་པ་རྣམས་ཀྱི་སྒོ་གཉེར་བར་གྱུར་པ་ཡོན་ཏན་དང་ཀུན་ཏུ་འབྲེལ་བ་རྣམས་ཟད་པར་མི་འགྲོ་བ་སྐྱོན་རྣམས་འཇིགས་པར་བྱེད་པ་པོ་ཡིད་ཆེས་པ་སྐྱེད་པར་བྱེད་པ་པོ་དབུལ་བ་འཇིག་པར་བྱེད་པ་པོ་བདེན་པར་སྨྲ་བ་ནི། གཟུགས་ཐམས་ཅད་དང་བྲལ་བ་ཡིན་ཡང་གཟུགས་དང་ལྡན་པ་ཐམས་

70-246b

ཅད་ལས་ལྷག་པ་ཡིན་ཏེ། བདེན་པའི་འོད་ཟེར་གྱིས་ཀུན་ནས་སྣང་བར་བྱས་པའི་ཕྱིར་རོ། །རིགས་ཐམས་ཅད་ལས་དམན་པ་ཡིན་ན་ཡང་རིགས་རྒྱུད་ཐམས་ཅད་ཀྱི་གཙོ་བོར་གྱུར་པ་རྣམས་ཀྱི་དྲུང་ན་ལྷག་པར་འགྱུར་ཏེ། བདེན་པའི་དགེ་བ་དེས་ཀུན་ནས་གསལ་བར་བྱས་པའི་རིགས་ཅན་རྣམས་ལ་ནི་ཡུལ་ལྗོངས་པ་ཐམས་ཅད་ཀྱི་རྗེས་སུ་འཇུག་པར་འགྱུར་བ་ཡིན་ནོ། །སྐྱེ་བོ་ཐམས་ཅད་ཀྱིས་གཉེན་བཞིན་དུ་མཐོང་བར་འགྱུར་རོ། །གང་དང་གང་དུ་འགྲོ་བ་དེ་དང་དེ་ཉིད་དུ་རྒྱལ་པོ་བཞིན་དང་མ་བཞིན་དུ་མཆོད་པ་བྱེད་དོ། །ངམ་གྲོག་ཐམས་ཅད་དུ་རབ་ཏུ་ཞུགས་ན་མཆོག་ཏུ་སྐྱིད་པར་འགྱུར་རོ། །རྒྱལ་པོས་ཀྱང་ས་གཞིར་མཆོག་གིས་ཕན་པར་བྱེད་པ་བཞིན་དུ་མཆོད་པར་བྱེད་དོ། །གྲོང་དང་གྲོང་ཁྱེར་དང་གྲོང་རྡལ་དང་ཚོང་འདུས་དག་ཏུ་སོང་ན་ཡང་གྲོང་པ་དང་གྲོང་ཁྱེར་པ་དག་གིས་མཆོད་པ་བྱེད་དོ། །གྲོང་ཆུང་བ་དག་གིས་མཆོག་ཏུ་ཡང་མཆོད་པར་བྱེད་དོ། །མ་མཐོང་བ་དག་ཏུ་ཡང་ལྷ་དག་གིས་སྙན་གྲགས་རབ་ཏུ་སྒྲོགས་པར་བྱེད་དོ། །ཇི་ལྟར་ཡུལ་འདིར་རྒྱལ་པོ་དང་རྒྱལ་པོའི་བློན་པོ་ཡང་རུང་སྟེ་བདེན་པར་སྨྲ་བ་དགེ་བ་བྱེད་པར་གྱུར་པ་དེའི་སྙན་པའི་བ་དན་ཡུལ་རྣམས་སུ་དམ་པར་བྱས་ནས་འཛིན་པར་བྱེད་དོ། །དགེ་བ་བྱེད་པ་པོ་ལ་ནི་ལྷ་དག་གིས་ཀྱང་རྟག་ཏུ་ཕྱི་བཞིན་རྗེས་སུ་འབྲང་ཞིང་མཆོད་པར་བྱེད་དོ། །རྨི་ལམ་ངན་པ་ཡང་འཇིག་པར་བྱེད་དོ། །ལྷ་རྣམས་ཀྱི་གཙོ་བོར་གྱུར་པ་རྣམས་ཀྱིས་ཀྱང་ལྷ་བཞིན་དུ་མཆོད་པར་བྱེད་དོ། །བདེན་པར་སྨྲ་བ་དེ་ཉིད་ཀྱི་གནས་སྐབས་དེར་ཡང་མཆོག་ཏུ་རྗེས་སུ་འཇུག་པ་དང་སླར་ཡང་ལེགས་པར་ལངས་ནས་འགྲོའོ། །འདིའི་ཡིད་ལ་བསམས་པ་ཐམས་ཅད་ཕུན་སུམ་ཚོགས་པར་འགྱུར་རོ། །དལ་བུས་ཀྱང་རིམས་ནད་དེ་དག་རྣམས་ལེགས་པར་ཞི་བ་སྐྱེད་པར་འགྱུར་ཏེ། བདེན་པའི་བཅུད་ཀྱིས་ལེན་གྱིས་དབང་པོ་རྣམས་ཚིམ་པར་ཡང་བྱེད་པར་འགྱུར་རོ། །རྫུ་འཕྲུལ་ཆེ་བར་ཡང་འགྱུར་རོ། །མཐུ་སྟོབས་ཆེ་བ་དང་ཚེ་རིང་བ་ཀུན་ཏུ་འཕེལ་བར་བྱེད་པའི་ལས་རྣམས་ཀྱང་འཕེན་པར་བྱེད་དོ། །སྐྱེ་བོ་རྣམས་ཐམས་ཅད་ཀྱིས་ཀྱང་ཆོས་ལུགས་རྣམ་པར་

70-247a

གཞག་པ་ལ་གཅིག་ཏུ་ཚད་མར་བྱེད་དོ། །རྣམ་པར་མ་གཙེས་པའི་སྐྱེས་བུ་རྣམས་ཀྱིས་ཀྱང་ནོར་ཆེན་པོའི་སྦས་དང་སྦས་པ་ཡང་རྒྱལ་པོ་ལ་སྟོན་པར་བྱེད་དོ། །བདེན་པར་སྨྲ་བ་ཞེས་ཟེར་ནས་ཐམས་ཅད་ལས་མི་གཡོ་བ་བཞིན་དུའོ། །ཐམས་ཅད་ལས་ཀྱང་གཡོ་བ་མེད་པར་འགྱུར་རོ། །གྲོགས་པོས་འཁྲིད་པར་མི་བྱེད་དོ། །གྲོགས་པོ་མ་ཡིན་པས་འཁྲིད་པར་མི་བྱེད་དོ། །རྣམ་པར་གཡོ་བར་མི་བྱེད་དོ། །གང་བདེན་པར་སྨྲ་བའི་མགྲིན་པ་རབ་ཏུ་རྩེ་དགའ་བར་གྱུར་ཏེ་བདེན་པའི་ཚིག་གིས་བློ་དེ་ཚིམ་པར་བྱས་པ་ལྟ་བུར་གྱུར་ནས་དགའ་བར་འགྱུར་རོ། །བདེན་པའི་ནོར་དེ་ལ་དགའ་བར་གྱུར་པའི་རྒྱུས་ཡང་དང་ཡང་དུ་བསམ་པར་བྱེད་པ་ན་ཡིད་ཁྲོ་བ་དང་དགའ་བ་ཡ་ཡ་པོས་མི་ཁྲིད་དོ། །དྲང་སྲོང་གི་མཆོག་འཇིག་རྟེན་གཉིས་སུ་ཕན་པར་བྱེད་པ་རྣམས་ཀྱི་བཅུད་དུ་གྱུར་པའི་བདེན་པའི་མཚམས་དེ་ལས་ནམ་ཡང་འདའ་བར་མི་འགྱུར་རོ། །ཆུ་མེད་པར་ཡང་བདེན་པའི་རང་བཞིན་གྱིས་མཆོག་ཏུ་གཙང་བའི་བདེན་པའི་འཇུག་ངོས་སུ་འཁྲུ་བ་རྣམས་ནི་མཆོག་ཏུ་གཙང་བར་འགྱུར་རོ། །གོས་མེད་པར་གྱུར་ཡང་མཆོག་ཏུ་དཀར་བ་མ་བཏགས་པ་བདེན་པའི་གོས་མཆོག་ཏུ་རྒྱ་ཆེ་བ་སྐད་ཅིག་མ་ཡིན་པར་རྟག་ཏུ་ལེགས་པར་གྱོན་པར་འགྱུར་རོ། །དྲི་མེད་པར་གྱུར་ན་ཡང་འདིའི་སྙན་པའི་ཚུལ་ཁྲིམས་ཀྱི་དྲིས་ཕྱོགས་དང་ཕྱོགས་མཚམས་རྣམས་སུ་རབ་ཏུ་འགྲོའོ། །འདི་མ་མཐོང་བར་གྱུར་པའི་སྐྱེ་བོ་ཐམས་ཅད་ཀྱང་གྲོགས་པོ་ཉིད་དུ་འགྱུར་རོ། །མཐོང་བ་རྣམས་ནི་དང་པོར་ཡིན་ནོ། །རི་རབ་ལྷུན་པོའི་རྩེ་མོ་ཡང་འདིས་ངེས་པར་རྒལ་ནས་འགྲོ་བར་འགྱུར་ཏེ། ཇི་ལྟར་འོད་ཟེར་མཆོག་གིས་བརྟོལ་ཞིང་ཕུག་པར་འགྱུར་བ་བཞིན་དུ་རབ་ཏུ་འཕྲོ་བར་འགྱུར་རོ། །རྒན་པོ་རྣམས་ཀྱིས་ཕ་བཞིན་དུ་མཆོད་པར་བྱེད་དེ་བདེན་པས་རྒན་པར་གྱུར་པ་ཞེས་བྱས་སོ། །ཚེ་རིང་བར་གྱུར་འཕེན་པར་བྱེད་པའི་ལས་རྣམས་ཀྱང་འཕེན་པར་བྱེད་དོ། །ཇི་སྲིད་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་ཡེ་ཤེས་ཀྱི་ལས་འཕེན་པར་བྱེད་ན་འཐབ་བྲལ་གྱི་མངའ་བདག་ལ་

70-247b

ལྟ་སྨོས་ཀྱང་ཅི་དགོས། བདེན་པར་སྨྲ་བ་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བ་དེ་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོ་འཐབ་བྲལ་བ་རྣམས་ཀྱི་མངའ་བདག་ཏུ་འགྱུར་རོ། །ཡང་ཆོས་གཞན་དང་ལྡན་པ་རྒྱལ་རིགས་སྤྱི་བོ་ནས་དབང་བསྐུར་བ་དེ་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །གང་དག་ཞེ་ན། འདི་ལྟ་སྟེ། ནོར་གཞིས་རྣམས་གློ་བུར་དུ་འཕེལ་འགྲིབ་མི་བྱེད་པའོ། །རྒྱལ་པོ་འདི་ནི་བློ་བརྟན་པར་གྱུར་པ་སྟེ། དེས་དེ་ཤེས་པར་གྱུར་ནས་ངང་ཚུལ་དང་ཆོས་ལུགས་རྣམ་པར་གཞག་པ་ཡང་བློ་གྲོས་ངལ་སོས་པ་དང་ལྡན་པར་འགྱུར་རོ། །ཤིན་ཏུ་རྣམ་པར་དཔྱད་ནས་བྱེད་པ་རྣམས་ནི་རྒྱལ་པོར་འགྱུར་རོ། །མ་བརྟགས་པར་བྱེད་པ་ནི་མ་ཡིན་ནོ། །གང་ཡང་རྒྱལ་པོས་རྣམ་པར་དཔྱད་ནས་ནོར་གཞིས་རྣམས་འཕེལ་བ་དང་འགྲིབ་པར་བྱེད་པའི་རྒྱལ་པོ་དེ་ནི་རྒྱལ་པོར་མི་འགྱུར་རོ། །གལ་ཏེ་གྱུར་ན་ཡང་དེ་ཡང་ཡུན་རིང་པོར་མི་འགྱུར་རོ། །རྒྱལ་པོའི་མིང་ཙམ་དུ་འགྱུར་རོ། །ལེགས་པར་རབ་ཏུ་བརྟགས་ནས་བྱེད་པ་མ་ཡིན་ནོ། །བློ་ཆུང་ཞིང་རྩབ་ཧྲལ་ཅན་དུ་གྱུར་པ་དང་བློ་རྣམ་པར་གནས་པ་མེད་པའི་ཡང་མོར་འགྱུར་རོ། །གང་ཡང་སྔ་རབས་དག་གིས་བརྗོད་པ་ན་དེ་ལ་ཡང་དད་པར་མི་བྱེད་དོ། །ཅི་དགའ་བའི་རྒྱལ་པོ་བརྫུན་དུ་སྨྲ་བ་དེ་ལ་འདོད་ཆགས་དང་བྲལ་བར་གྱུར་ནས་ཀྱང་རྒྱལ་པོ་གཞན་ཡང་ཉེ་བར་འཇོག་པར་བྱེད་དོ། །དེའི་ཕྱིར་སྐྱོན་དེ་དག་རྣམས་གོ་བར་བྱས་ལ་བརྫུན་དུ་སྨྲ་བར་མི་བྱའོ། །བརྫུན་དུ་སྨྲ་བ་ནི་འཇིག་རྟེན་འདིར་ཕན་པ་མ་ཡིན་ལ་འཇིག་རྟེན་ཕ་རོལ་ཏུ་ཡང་མ་ཡིན་ནོ། །དེའི་ཕྱིར་ན་མཐོང་བའི་ཚེ་ལ་ཡང་སྐྱོན་གྱི་རྣམ་པ་མང་པོ་དེ་དག་རྣམས་གོ་བར་བྱས་ལ་བརྫུན་དུ་སྨྲ་བར་མི་བྱའོ། །ཐམས་ཅད་ལས་ཀྱང་དང་པོ་ཁོ་ནར་ཇི་ལྟ་ཇི་ལྟར་རྒྱལ་པོ་ཆོས་ལ་རབ་ཏུ་གཞོལ་བར་གྱུར་པའི་རྒྱུ་གང་གིས་དེ་ལྟ་དེ་ལྟར་སྐྱེ་དགུ་འཕེལ་བར་འགྱུར་རོ། །སྐྱེ་དགུ་རྣམས་ལ་ནི་རྒྱལ་པོ་གཙོ་བོར་གྱུར་པའི་ཕྱིར་རོ། །གང་ཡང་རྒྱལ་པོ་གཅིག་ཏུ་རྟག་པ་ཁོ་ནར་བདེན་པ་སྨྲ་བར་གྱུར་པ་དེས་ནི་སྐྱེ་དགུ་བསྒོས་ནས་ངེས་པར་གྱུར་པའི་རྒྱལ་པོའི་བརྒྱུད་པ་དག་གིས་ཡང་

70-248a

དག་པའི་བདེ་བས་ཡོངས་སུ་སྐྱོང་བར་བྱེད་དོ། །བདེན་པའི་རྩ་བ་ལས་ཆོས་ཡིན་ནོ། །དེ་ཡང་གང་གི་ཚེ་བདེན་པར་སྨྲ་བར་མི་བྱེད་པ་དེའི་ཚེ་དེས་གློ་བུར་དུ་ནོར་གཞིས་རྣམས་ལ་འཕེལ་བ་དང་འགྲིབ་པ་བྱེད་པར་འགྱུར་རོ། །གང་ཡང་བདེན་པར་སྨྲ་བར་བྱེད་པ་རྟག་ཏུ་དུལ་བར་གྱུར་པ་དེ་ནི་ནམ་ཡང་ནོར་གཞིས་རྣམས་ལ་གློ་བུར་དུ་འཕེལ་བ་དང་འགྲིབ་པར་མི་བྱེད་དོ། །གནས་རྣམས་གཡོ་བར་མི་བྱེད་པ་དེའི་དྲུང་ནས་ནམ་ཡང་གཞན་དག་ཏུ་འགྲོ་བར་མི་འགྱུར་རོ། །མི་དགའ་བར་མི་འགྱུར་རོ། །དེ་འདི་མ་དང་འདྲ་བ་དང་ཕ་དང་འདྲ་བར་ཡང་རྗེས་སུ་ཆགས་པར་འགྱུར་རོ། །རྟག་ཏུ་ཡང་ཡིད་བདེ་བ་དང་ལྡན་པ་དང་རྟག་ཏུ་ཡང་བདེ་སྐྱིད་ཅན་དུ་འགྱུར་རོ། །རྒྱལ་པོ་དེ་ཡང་བློ་བརྟན་པར་འགྱུར་བ་དང་འགྱུར་བ་མེད་པའི་བློ་དང་བློ་གཅིག་ཏུ་ངེས་པ་དང་བདེ་བ་སྟེར་བར་བྱེད་པས་ལུས་ཞིག་ནས། མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་རྒྱུ་འདི་དང་རྐྱེན་འདིས་འགྱུར་རོ། །ཆོས་གཞན་ཡང་གང་ལན་ཅིག་དང་ལན་ཅིག་མ་ཡིན་པར་རྣམ་པ་དུ་མར་རྒྱལ་པོས་རབ་ཏུ་བརྩོན་པ་ཤེས་པར་བྱ་ཞིང་བྱ་བར་ཡང་བྱའོ། །འདི་ཡང་གང་ཞེ་ན། འདི་ལྟ་སྟེ། མིའི་ཁྱད་པར་ཤེས་པར་བྱ་བའོ། །མིའི་ཁྱད་པར་ཤེས་པར་བྱ་བར་གྱུར་པ་དེ་ཡང་ཤེས་པ་ཆེན་པོ་ཡིན་ཏེ། གང་ཡང་རྒྱལ་པོ་མིའི་ཁྱད་པར་རིག་པར་གྱུར་པ་དེ་ནི་ས་གཞི་ཐམས་ཅད་ཀྱི་སྣོད་དུ་འགྱུར་རོ། །གཞན་རྣམས་ཀྱིས་མི་ཐུབ་པར་ཡང་འགྱུར་རོ། །ལས་རྣམས་ཀྱང་ཇི་ལྟར་རིག་པ་ལ་འཇུག་པར་བྱེད་དོ། །འདིའི་ལས་ཀྱི་མཐའ་དག་ཡང་ཡོངས་སུ་ཉམས་པར་མི་འགྱུར་རོ། །ནོར་ལས་ཀྱང་ཡོངས་སུ་མི་ཉམས་སོ། །རྟག་པར་ཡང་ཆོས་གོང་ནས་གོང་དུ་བྱེད་པར་འགྱུར་རོ། །མིའི་ཁྱད་པར་ཤེས་པར་གྱུར་པའི་རྒྱལ་པོ་ཡང་སྐྱེས་བུ་ཆོས་བྱེད་མ་ཡིན་པ་རྣམས་མི་འཛིན་ཏོ། །ལས་ལ་དགའ་བའི་རང་བཞིན་ཅན་མ་ཡིན། སྟན་ལ་དད་ཆེ་བ་མ་ཡིན། བྱས་པ་ཆུད་གཟོན་པ་མ་ཡིན། འཇིག་རྟེན་པ་ལ་ཞེ་སྡང་བ་མ་ཡིན། ལོག་པར་ལྟ་བ་ཅན་མ་ཡིན། གཡོ་སྒྱུ་ཅན་དང་མ་ཡིན། གཞན་གྱི་ཡོན་ཏན་དང་ཀུན་དུ་སོ་སོར་འབྲེལ་བས་དོན་བྱེད་པ་དང་

70-248b

མ་ཡིན་ཏེ། དེ་ནི་རྒྱལ་པོ་གཞན་གྱིས་ཉེ་བར་འཚོ་བར་འགྱུར་རོ། །འདྲ་བ་མ་ཡིན་པ་མ་ཡིན། ཡུལ་དུས་མི་ཤེས་པ་མ་ཡིན། བསྒྲུབ་པར་དཀའ་བ་མ་ཡིན། རྟག་ཏུ་སྡིག་པ་དྲག་པོ་བྱེད་པ་མ་ཡིན། ཡུལ་གྱིས་རབ་ཏུ་དཀྲུགས་པ་རྣམས་ཀྱང་མ་ཡིན། གཡོ་སྒྱུའི་རྒྱུ་སྨྲ་བ་ཡང་མ་ཡིན། ངོ་བོ་ཉིད་ཀྱི་བཤེས་ཀྱིས་ཆོག་ཤེས་པ་མ་ཡིན། འཇིག་རྟེན་ལ་མི་ཕན་པ་མ་ཡིན། གཞན་དུ་སྡིག་པ་བྱས་པ་མ་ཡིན། མངོན་པའི་ང་རྒྱལ་ཅན་མ་ཡིན། དགྲ་བོ་མ་ཡིན། སྡུག་བསྔལ་ཅན་མ་ཡིན། ངག་རྩབ་ཧྲལ་ཅན་མ་ཡིན། ཡིད་རྩབ་ཧྲལ་ཅན་མ་ཡིན་པ་སྟེ། རྣམ་པ་དེ་ལྟ་བུའི་སྐྱེས་བུ་ངན་པ་འཛིན་པར་མི་བྱེད་དོ། །རྒྱལ་པོས་རྣམ་པ་ཇི་ལྟ་བུ་རྣམས་འཛིན་པར་བྱེད་ན་འདི་ལྟ་སྟེ། ཆོས་པ་དང་ཚུལ་འཆོས་ཅན་མ་ཡིན་པ་དང་། ང་རྒྱལ་ཅན་མ་ཡིན་པ་དང་། བདེན་པར་སྨྲ་བ་དང་། ཤེས་རབ་ཅན་དང་། ཡིད་གཞུངས་པ་དང་། བརྟན་པ་དང་གཞན་ལ་གདུང་བར་མི་བྱེད་པ་དང་། དྲང་པོ་དང་གཡོ་རྣམས་སྤངས་པ་དང་། ཆེས་མཆོག་ཏུ་དཀོན་མཆོག་གསུམ་མཆོད་པར་བྱེད་པ་དང་། སེམས་ཆོག་ཤེས་པ་ཐོབ་པ་དང་། དབང་དུ་གྱུར་པ་དང་། རྒྱུན་དུ་ལས་ཀྱི་རང་བཞིན་ཅན་དང་། འཇིག་རྟེན་པ་རྣམས་བློ་འཐུན་པ་དང་། སྙིང་རྗེ་དང་ལྡན་པ་དང་། མི་རྣམས་ཀྱིས་བསྔགས་པ་ལ་རྗེས་སུ་ཆགས་པར་འགྱུར་བ་དང་། ཡང་དག་པའི་ལྟ་བ་ཅན་དང་ཤེས་ཉེན་ཅན་དང་། དུལ་བ་དང་སྐྱེས་པ་ནས་བཟུང་ནས། ལུས་དང་། ངག་དང་། ཡིད་དག་པར་བྱེད་པ་པོ་མེད་པར་སྨྲ་བ་མ་ཡིན་པ་དང་། རྒྱུ་རྐྱེན་ལ་ཤིན་ཏུ་བར་ཡང་རྟེན་པ་དང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དང་། བག་མེད་པ་མ་ཡིན་པ་དང་། གཉིད་ཀྱི་དབང་དུ་སོང་བའི་རང་བཞིན་ཅན་མ་ཡིན་པ་དང་། དགེ་བའི་བཤེས་གཉེན་ལ་སྟེན་པར་བྱེད་པ་པོ་དང་། གཏོང་བ་ཅན་དང་། ཚུལ་ཁྲིམས་དང་ལྡན་པ་དང་། ཤེས་རབ་དང་ལྡན་པ་དང་། རྣམ་པ་དེ་ལྟ་བུའི་སྐྱེས་བུ་རྣམས་རྟག་པ་ཁོ་ནར་རྒྱལ་པོ་གང་དག་གིས་འཛིན་པར་བྱེད་པ་དེ་དག་ནི་ཁྱད་པར་ཤེས་པ་ཡིན་ནོ། །གང་ལས་གང་ལ་ངེས་པར་སྦྱོར་བར་བྱེད་པའི་རྒྱལ་པོ་དེ་

70-249a

ནི་གཞན་དག་གིས་རྒྱལ་སྲིད་ལས་ཉམས་པར་བྱ་བར་མི་ནུས་སོ། །གདུལ་བར་མི་ཐུབ་པར་ཡང་འགྱུར་རོ། །ནོར་དང་ལྡན་པར་ཡང་འགྱུར་རོ། །དེ་ནོར་དང་ལྡན་པར་འགྱུར་ཞིང་ཆོས་པ་ཆོས་ཀྱི་རྗེས་སུ་འཇུག་པར་གྱུར་ནས་སྦྱིན་པ་དག་གཏོང་བར་བྱེད་དོ། །བསོད་ནམས་དག་བྱེད་དོ། །དཀོན་མཆོག་གསུམ་མཆོད་པར་བྱེད་དོ། །དེའི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། ལས་དེ་དག་གི་རྒྱུ་དང་རྐྱེན་གྱིས་སོ། །ཡང་ཆོས་གཞན་རྒྱལ་པོ་ཐམས་ཅད་ཀྱིས་བྱ་བར་བྱ་བ་འདི་ཡང་གང་ཞེ་ན། འདི་ལྟ་སྟེ། དུས་ངེས་པར་ལེགས་པར་སྟོན་པར་གྱུར་པའོ། །རྒྱལ་པོ་གང་དག་དུས་ངེས་པར་སྟོན་པར་བྱེད་པ་དེ་ནི་དུས་ཡུན་རིང་དུ་རྒྱལ་སྲིད་བྱེད་པར་འགྱུར་རོ། །འདིའི་རང་བཞིན་ལ་སྐྱོ་བ་སྐྱེ་བར་མི་འགྱུར་རོ། །དེས་མིའི་ཁྱད་པར་རིག་པར་འགྱུར་རོ། །འདི་ཆོས་མ་ཡིན་པ་རྣམས་ལ་མི་འཇུག་གོ། །ཡུལ་ཇི་སྲིད་དུ་སྟོབས་དང་ལྡན་པར་གྱུར་ནས་རྒུད་པ་ཟིལ་གྱིས་གནོན་པར་བྱེད་དོ། །དེ་དེའི་རྒྱུར་ལྟ་བ་ལ་ཆེད་ཆེར་བྱེད་པའི་རྒྱལ་པོ་རྫས་དང་ལྡན་པར་འགྱུར་རོ། །ནོར་གྱི་ཐབས་ཀྱིས་ཕུན་སུམ་ཚོགས་པར་འགྱུར་རོ། །དེ་ཚུལ་དང་ནོར་དང་ལྡན་པར་གྱུར་ནས་གཞན་རྣམས་ཀྱི་དབང་དུ་འགྱུར་བ་མ་ཡིན་ནོ། །ཆོས་པར་ཡང་འགྱུར་རོ། །ཆོས་ཀྱི་རྗེས་སུ་འཇུག་པར་བྱེད་པ་དང་དགེ་སྦྱོང་དང་བྲམ་ཟེ་རྣམས་མཆོད་པར་བྱེད་དོ། །དེ་དག་རྣམས་ཀྱི་དྲུང་ནས་ཆོས་ཉན་པར་བྱེད་པས་དེ་ལྟ་དེ་ལྟར་ཆེས་ལྷག་པར་ཆོས་བྱེད་དུ་འགྱུར་རོ། །ངེས་པར་ལེགས་པར་སྟོན་པར་བྱེད་པས་དེ་ཇི་ལྟ་ཇི་ལྟར་ཆོས་བྱེད་དུ་འགྱུར་བ་དེ་ལྟ་དེ་ལྟར་ལོངས་སྤྱོད་ཆེན་པོ་དང་ལྡན་པར་འགྱུར་རོ། །དེ་ལོངས་སྤྱོད་ཆེན་པོ་དང་ལྡན་པར་གྱུར་ནས་ཕྱིར་ཞིང་ཉིད་དུ་སྦྱིན་པ་དག་གཏོང་བར་བྱེད་དོ། །བསོད་ནམས་དག་བྱེད་དོ། །ཚུལ་ཁྲིམས་དང་ལྡན་པར་འགྱུར་རོ། །གང་གིས་ཀྱང་གདུལ་བར་མི་ནུས་པར་འགྱུར་རོ། །དེ་ལ་ཡོན་ཏན་དེ་དག་རྣམས་སྲིད་པར་འགྱུར་རོ། །དེའི་ཕྱིར་རྒྱལ་པོས་རྟག་ཏུ་ངེས་པར་ལེགས་པར་

70-249b

སྟོན་པར་འགྱུར་བར་བྱའོ། །ངེས་པར་ལེགས་པར་སྟོན་པར་བྱེད་པའི་རྒྱལ་པོ་ཆོས་པ་གང་གིས་ཕྱིར་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་ལས་དེའི་རྒྱུ་དང་རྐྱེན་གྱིས་འགྱུར་རོ། །ཡང་ཆོས་གཞན་རྒྱལ་པོས་ཅིས་ཀྱང་བསྟེན་པར་བྱ་བ་ལ་འདི་ལྟ་སྟེ། གཉིད་ལ་དགའ་བར་མི་བྱ་བའོ། །གཉིད་ཀྱི་དབང་དུ་མི་འགྲོ་བའི་རྒྱལ་པོ་ནི་ལེགས་པར་བསམ་པར་བྱ་བ་རྣམས་སེམས་པར་འགྱུར་རོ། །བློ་ཤིན་ཏུ་རྣམ་པར་ཆགས་པ་དང་ལྡན་པར་མི་འགྱུར་རོ། །ཀུན་ཏུ་རྨོངས་པའི་བློར་ཡང་མི་འགྱུར་རོ། །དགྲ་བོས་བརྒལ་བར་མི་ནུས་སོ། །བློ་རྩེ་གཅིག་པར་འགྱུར་རོ། །དོན་ངེས་པར་ལྡན་པ་དང་དོན་ངེས་པ་དང་ལྡན་པར་གྱུར་ནས་ལེགས་པར་རྣམ་པར་དཔྱད་པའི་དོན་དག་བྱེད་པར་འགྱུར་རོ། །དེ་ལ་ལེགས་པར་རྣམ་པར་དཔྱད་ནས་བྱེད་པ་པོ་འདིའི་ལེགས་པར་དོན་རྣམས་སྨིན་པར་འགྱུར་རོ། །ལེགས་པར་འགྲུབ་པར་དུས་ཡུན་རིང་པོ་མ་ཡིན་པ་ན་འགྱུར་ཞིང་དུས་སྔ་བར་རྫོགས་པར་འགྱུར་བ་ཡིན་ནོ། །བག་དང་ལྡན་པར་འགྱུར་རོ། །བག་ཡོད་པས་རྒྱུ་བ་དང་དེའི་ཚེ་རིང་བར་འགྱུར་རོ། །ལེགས་པར་བསམ་པ་རྣམས་སེམས་པར་གྱུར་པས་ལེགས་པར་སེམས་པ་པོ་དེའི་རང་བཞིན་གྱིས་ཡིད་བྱུང་བར་མི་འགྱུར་རོ། །དེ་སྐྱེ་བོ་རྣམས་དང་གྲོང་ཁྱེར་རྣམས་དང་བློན་པོ་དག་གིས་ཡོངས་སུ་བསྐོར་བར་འགྱུར་རོ། །ནོར་དང་ལྡན་པར་ཡང་འགྱུར་རོ། །སྐྱེ་བོ་མང་པོ་ལ་ཡང་རྒྱལ་པོའི་ནོར་གནས་པ་ཉིད་ཀྱིས་ནོར་དང་ལྡན་པའི་དཔལ་ཀུན་ཏུ་གནས་པས་དཔལ་དང་ལྡན་པར་གྱུར་ནས་སྦྱིན་པ་གཏོང་བར་ཡང་བྱེད་དོ། །ཚུལ་ཁྲིམས་ཀྱང་སྲུང་བར་བྱེད་དོ། །དེ་ལུས་ཞིག་པར་གྱུར་ནས་ཤི་བའི་འོག་ཏུ་དེའི་རྒྱུ་དང་རྐྱེན་གྱིས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། ལེ་ལོ་མེད་པའོ། །ལེ་ལོ་མེད་པར་གྱུར་པའི་རྒྱལ་པོ་ནི་བརྩོན་འགྲུས་བརྟན་པར་གྱུར་པའི་རིགས་པས་བརྩམས་པའི་ཕྱིར་ན་ལས་ཐམས་ཅད་ཀྱང་རྒྱས་

70-250a

པར་བྱེད་དོ། །ངེས་པར་རྫོགས་པར་བྱེད་ཅིང་སྒྲུབ་པར་བྱེད་དོ། །དབང་དུ་འགྱུར་བར་བྱེད་དོ། །ཐུབ་པར་མི་ནུས་པར་འགྱུར་བ་དང་ཐམས་ཅད་དུ་རང་བཞིན་གྱིས་དགའ་ཞིང་རྗེས་སུ་ཆགས་པ་དང་གཅེས་པའི་བློར་འགྱུར་རོ། །འདིའི་ཡུལ་འཁོར་དང་གྲོང་ཁྱེར་དང་གྲོང་དང་གྲོང་རྡལ་དང་ཚོང་འདུས་རྣམས་ཀྱང་ཤིན་ཏུ་ཕུན་སུམ་ཚོགས་པར་འགྱུར་རོ། །ལེ་ལོ་མེད་པར་གྱུར་པའི་རྒྱལ་པོ་ཡང་བརྩོན་འགྲུས་བརྟན་པ་དང་ལྡན་ཞིང་ཕ་རོལ་གནོན་པར་གྱུར་པ་ནི་ལས་རྣམས་གང་ཁོ་ན་རྩོམ་པར་བྱེད་པ་དེ་དག་ཉིད་ཐམས་ཅད་སྒྲུབ་པར་བྱེད་དོ། །དེ་ཅིའི་ཕྱིར་ཞེ་ན། ལེ་ལོ་མེད་པར་གྱུར་པ་དག་ནི་རིགས་པས་ཡུལ་དང་དུས་རྣམས་ལ་ལེགས་པར་འདྲེ་བར་གནས་པའི་ཕྱིར་ན་ལེ་ལོ་མེད་པ་དག་ནི་འཇིག་རྟེན་པ་དང་འཇིག་རྟེན་ལས་འདས་པའི་ཇི་སྲིད་དུ་མྱ་ངན་ལས་འདས་པའི་མཐར་ཐུག་པར་དགོས་པ་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །གལ་ཏེ་ཡང་དེས་བརྩམས་པར་གྱུར་པའི་དོན་གཞན་ཡུལ་དང་དུས་གཉི་ག་ལ་ཆགས་པ་དང་བྲལ་བར་བྱེད་པར་གྱུར་པ་རྣམས་ལྟ་ཅི་སྨོས། དེས་ཐམས་ཅད་ཀྱང་གཞན་རྣམས་དང་ཐུན་མོང་མ་ཡིན་པར་འགྲུབ་པར་འགྱུར་རོ། །དེ་ཇི་ལྟར་འཇིག་རྟེན་པའི་དོན་བྱེད་པར་འགྱུར་བའི་དོན་དེ་ཡང་ཕུན་སུམ་ཚོགས་པར་འགྱུར་བ་དང་། དེ་བཞིན་དུ་ཤེས་རབ་དང་ལྷན་ཅིག་ཏུ་གང་གིས་འཇིག་རྟེན་ལས་འདས་པ་ཡང་བྱེད་པ་ཡིན་ཏེ། སྦྱིན་པ་དང་ཚུལ་ཁྲིམས་དང་ཤེས་རབ་རྣམས་སོ། །འདི་དེ་དག་གི་དྲི་ཙམ་གྱིས་ཀྱང་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། རྒྱུ་དེ་དང་རྐྱེན་དེས་སོ། །ཆོས་གཞན་ཡང་རྒྱལ་པོས་བྱའོ། །འདི་ཡང་གང་ཞེ་ན། འདི་ལྟ་སྟེ། གྲོགས་པོ་བརྟན་པའོ། །རྒྱལ་པོ་གྲོགས་པོ་བརྟན་པོར་གྱུར་པ་ནི་ཤིན་ཏུ་ལེགས་པར་མཐོང་བར་བྱེད་པས་རྒྱལ་སྲིད་དུས་རིང་དུ་ལོངས་སྤྱོད་པར་བྱེད་དོ། །གོས་པ་མེད་པ་དང་གཞན་གྱིས་མི་རྫི་བ་ཡིན་ཏེ། ཤིང་བཞིན་དུ་གང་དག་ཆེས་མང་དུ་ལེགས་པར་རབ་ཏུ་གནས་པས་གཡོ་བར་མི་འགྱུར་ཞིང་ངན་པ་རྣམས་ཀྱིས་ཀྱང་མི་

70-250b

གཡོ་བ། རླུང་གིས་ཀྱང་ནགས་ཀྱི་ཚལ་འདི་ལ་ཇི་ལྟ་བ་དེ་བཞིན་དུ་རྒྱལ་པོ་འདིའི་གྲོགས་པོ་ནི་ཤིན་ཏུ་བརྟན་པོ་ཡིན་ནོ། །རང་བཞིན་ཤིན་ཏུ་བཟང་བར་གྱུར་པས་སྐྱེ་བོ་ཐམས་ཅད་ཀྱིས་མངོན་པར་བགྲོད་པར་བྱ་བར་གྱུར་པ་མཆོག་ཏུ་དགའ་བར་གྱུར་པ་ཡིན་ནོ། །ཤིན་ཏུ་གྲོགས་པོ་བརྟན་པར་གྱུར་པའི་ཡོན་ཏན་དང་ལྡན་པ་ལ་ཡང་འཇིག་རྟེན་པའི་ཡོན་ཏན་བཅུ་གསུམ་དང་ལྡན་པར་འགྱུར་བ་རྣམས་འདི་ལྟ་སྟེ། གང་དུ་འདི་ལ་བུག་རྡོལ་བྱུང་བར་གྱུར་པ་ན་དེའི་ཚེ་འདིས་རབ་ཏུ་འགེབས་པར་བྱེད་པ་ཡིན་ཏེ། དཀའ་བར་སྤྱད་པ་ཐམས་ཅད་དང་མཆོག་ཏུ་རྒུད་པའི་དོན་དག་ལའོ། །དེ་ཅིའི་ཕྱིར་བྱེད་པ་ཡིན་ཞེ་ན། གྲོགས་པོ་གང་ཡིན་པའི་གྲོགས་པོ་གཞན་ཡང་དེའི་གྲོགས་པོར་འགྱུར་ཏེ་དེས་ཀྱང་ངའི་གྲོགས་པོ་འདིའི་གྲོགས་པོ་ཡིན་ཞེས་བྱས་ནས་དེ་དང་ལྷན་ཅིག་ཏུ་མཛའ་བར་འགྱུར་རོ། །ཁྱིམ་ན་ནོར་གྱི་རིགས་གང་དག་ཡོད་པ་འདི་ལ་ཤེས་པར་བྱེད་དོ། །གང་དང་གང་ཡང་ཕན་པའི་ལྷག་མ་གཞན་དུ་གྱུར་པ་ཡང་། དེ་དག་རྣམས་འདིས་བདག་ཉིད་ཐམས་ཅད་ཀྱིས་བྱེད་དེ། རྣམ་པ་ཐམས་ཅད་དང་བདག་ཉིད་ཐམས་ཅད་ཀྱིས་ཀྱང་སྟེན་པར་བྱེད་དོ། །གལ་ཏེ་ཡང་འདི་གང་དག་གིས་དཀའ་བར་གྱུར་པ་ཐམས་ཅད་དུ་གྱུར་པ་དང་སྲོག་འཆད་པར་གྱུར་ཀྱང་དེས་བརྒྱ་ལ་ཡང་ཡོངས་སུ་མི་གཏོང་ངོ་། །འདི་ཡང་ཇི་ལྟ་ཇི་ལྟར་དོན་གྱི་རིགས་རྣམས་ལ་བཟོད་པར་འགྱུར་བ་དེ་ལྟར་བྱེད་དོ། །གང་ཡང་འདིའི་ཁྱིམ་ན་ཅུང་ཟད་ཡོད་པ་དེ་རྣམས་ཐམས་ཅད་སྔོ་བར་བྱེད་དོ། །གང་གི་ཚེ་འདི་ཕུན་སུམ་ཚོགས་པར་གྱུར་པ་དེའི་ཚེ་ཤིན་ཏུ་དགའ་བར་འགྱུར་རོ། །གང་གི་ཚེ་འདི་ལ་སྡུག་བསྔལ་དག་བྱུང་བར་གྱུར་པ་དེའི་ཚེ་མཉམ་པོར་སྡུག་བསྔལ་བར་འགྱུར་རོ། །ཐམས་ཅད་ནས་ཁྲོས་པ་སྐྱེས་པར་གྱུར་ཀྱང་རྣམ་པར་འགྱུར་བར་མི་འགྱུར་རོ། །དེ་དང་ཡང་གང་ལྷན་ཅིག་ཏུ་གྱུར་པ་དེ་དག་བཟའ་ཟ་བས་ཀྱང་དེ་དང་ལྷན་ཅིག་ཏུ་དགའ་བར་འགྱུར་རོ། །གང་འདིའི་ཁྱིམ་ན་ཡོད་པར་གྱུར་པ་དེ་དག་ཀྱང་དབང་པོ་ལ་གནོད་པ་མེད་པར་དོན་དུ་གཉེར་བར་བྱེད་པ་དང་། གང་ཡང་བདག་རང་གི་ཁྱིམ་ན་ཡོད་པར་དེ་ཐམས་ཅད་སྐྱོ་བ་མེད་པར་ཡང་འདི་ལ་སྟེར་བར་བྱེད་དོ། །གང་ཡང་ཅུང་ཟད་ཁྱིམ་ན་ཡོད་པ་དེ་ཐམས་ཅད་གྲོགས་པོ་ལ་རྗོད་

70-251a

པར་བྱེད་དོ། །རང་གི་གཏམ་རྣམས་དག་ཀྱང་རང་གིས་རྗོད་པར་བྱེད་དོ། །རྣམ་པ་བཅུ་གསུམ་པོ་དེ་དག་རྣམས་དང་ལྡན་པ་ནི་གྲོགས་པོ་ཡིན་ནོ། །འཇིག་རྟེན་པའི་གྲོགས་པོ་ཡོན་ཏན་རྣམ་པ་དེ་ལྟ་བུ་དང་ལྡན་པ་དང་རྒྱལ་པོ་ཡང་དག་པར་ལྡན་པས་ནི་གཅིག་གིས་ཀྱང་སྟོབས་དང་ལྡན་པ་དང་ཡང་དག་པར་ལྡན་པའི་རྒྱལ་པོ་ནི་སྟོབས་ཆེན་པོ་དང་ལྡན་པར་འགྱུར་རོ། །ཅི་ཡང་མང་པོ་དང་ལྡན་པར་གྱུར་པ་མི་རྫི་བ་ལ་ལྟ་ཅི་སྨོས། དེའི་ཕྱིར་རབ་ཏུ་བརྩོན་པས་རྒྱལ་པོས་སྨྱུག་མའི་གྲོགས་པོ་བྱའོ། །འཇིག་རྟེན་ལས་འདས་པའི་ལམ་དགའ་བར་གྱུར་པས་དོན་སྒྲུབ་པར་བྱེད་པའོ། །དེ་གྲོགས་པོའི་ཡོན་ཏན་མདོར་བསྡུ་ན་བཅུ་ཡིན་ནོ། །འདི་ལྟ་སྟེ་གང་གིས་ཆོས་མ་ཡིན་པ་བྱེད་པར་འགྱུར་བ་ན། དེ་འགོག་པར་བྱེད་པ་དང་། སྦྱིན་པ་གཏོང་དུ་འཇུག་པ་དང་། ཚུལ་ཁྲིམས་ལ་གོམས་པར་བྱེད་དུ་འཇུག་གོ། །གྲོགས་པོ་ངན་པ་ལས་རབ་ཏུ་ཟློག་པར་བྱེད་དོ། །ལས་ཀྱི་འབྲས་བུ་རྣམ་པར་སྨིན་པ་ལེགས་པར་སྟོན་པར་བྱེད་དོ། །ལམ་ངན་པར་ཞུགས་པར་གྱུར་པ་ལམ་ལ་རབ་ཏུ་འགོད་པར་བྱེད་དོ། །གང་ཡང་འདི་ལས་ཚུལ་ཁྲིམས་འཆལ་པ་ཆུང་ཟད་ཡོད་པ་དེ་དང་བྲལ་བར་བྱེད་དོ། །ཕ་དང་མ་དག་གི་ངག་ཉན་པར་བྱེད་དུ་འཇུག་གོ། །དུས་ཐམས་ཅད་བར་རབ་ཏུ་བརྩོན་པས་ངེས་པར་ལེགས་པ་ལ་ཀུན་ནས་སྦྱོར་བར་བྱེད་དོ། །བྱེད་དུ་འཇུག་པ་དང་རྣམ་པ་དེ་ལྟ་བུའི་གྲོགས་པོ་ནི་འཇིག་རྟེན་ལས་འདས་པའི་ཡིན་ནོ། །ཐབས་མ་ཡིན་པ་ཐམས་ཅད་ལས་ཀྱང་སྐྱོབ་པར་འགྱུར་རོ། །ཕ་དང་མ་དང་འདྲ་བར་འགྱུར་རོ། །བརྟན་པོ་ཁོ་ནར་གྲོགས་པོ་འདི་དག་རྣམས་ནི་ཐམས་ཅད་ཁོ་ནར་ཡང་སྡིག་པ་ཟད་པར་བྱེད་པར་འགྱུར་རོ། །དེ་དང་ཉེ་བ་ལས་ཉེས་པ་འབྱུང་བར་ཡང་མི་འགྱུར་རོ། །ཕ་རོལ་གྱི་གྲོགས་པོའི་མཆོག་ཡིན་གྱི་འདིའི་ནི་མ་ཡིན་ནོ། །དེའི་ཕྱིར་རྒྱལ་པོས་གྲོགས་པོ་བརྟན་པོ་བྱའོ། །གང་དག་དགེ་བའི་བཤེས་གཉེན་ལ་ཉེ་བར་སྟེན་པར་བྱེད་ཅིང་དགེ་བའི་རྣམས་ཀྱང་བྱེད་པ་དེ་ནི་ལུས་ཞིག་ནས་ཤི་བར་གྱུར་པའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་གྲོགས་པོ་མ་ཡིན་པ་བདེ་

70-251b

ལེགས་སུ་འགྱུར་བར་མི་བྱེད་པ་ཀུན་ཏུ་བསྟེན་པར་མི་བྱའོ། །དཔེར་ན་སྐྱེ་བོ་ཐམས་ཅད་སླུ་བར་བྱེད་པ་འབའ་ཞིག་པ་ཤིན་ཏུ་ལམ་ལོག་པ་སྟོན་པར་བྱེད་པ་དང་བསམ་པ་ངན་པ་སེམས་པར་བྱེད་པ་ཉེ་བར་སྟེན་པར་བྱེད་པ་ཡང་དེས་ནི་དོན་མ་ཡིན་པ་ཆེན་པོ་དང་ཀུན་ཏུ་སྦྱོར་རོ། །རླག་པར་བྱེད་པའི་རྩ་བ་དེ་ཡང་རྣམ་པ་གཉིས་ཡིན་ཏེ། རབ་ཏུ་འགེབས་པར་བྱེད་པ་དང་ངེས་པར་སྦེད་པར་བྱེད་པའོ། །དེ་ལ་རབ་ཏུ་འགེབས་པར་བྱེད་པ་ཞེས་བྱ་བ་ནི་འཇིག་རྟེན་པ་སླུ་བར་བྱེད་པ་རབ་ཏུ་དང་བ་མ་ཡིན་པར་གྱུར་པ་ཚུལ་འཆོས་པའི་རྟགས་འཛིན་པར་བྱེད་པ་ལས་ཅི་ཡང་མེད་པ་ཟོང་བཅོས་མ་དང་འདྲ་བའི་མུ་སྟེགས་ཀྱི་ཚེར་མས་རང་དང་གཞན་སླུ་བར་བྱེད་པ་འཇིག་རྟེན་ཕ་རོལ་སྤངས་པ་བཟང་པོའི་ཆ་བྱད་ཆེས་འཛིན་པར་བྱེད་པ་དོན་མ་ཡིན་པ་རྣམས་བྱེད་པར་འགྱུར་བ་པོ་རྐུན་མ་དེ་དག་རྣམས་ལ་ལེགས་པར་ཕྲད་པར་བྱ་བ་དང་ཀུན་བརྗོད་པར་ཡང་སླ་བར་སྦྱིན་པར་མི་བྱ་ན། ལྷན་ཅིག་ཏུ་འགྲོགས་པར་བྱ་བ་ལྟ་སྨོས་ཀྱང་ཅི་དགོས། དེ་དག་དང་ལྷན་ཅིག་པར་གྱུར་པ་ནི་དེས་ཤིན་ཏུ་བར་ཡང་སྤང་བར་བྱའོ། །དེ་དག་ལ་ནི་བདག་ཉིད་ལ་ཡང་ཡོད་པ་མ་ཡིན་ན་གཞན་དག་ལ་ཅི་ལ་འབྱུང་བར་འགྱུར། གང་སྡིག་པའི་གྲོགས་པོ་སྤོང་བར་གྱུར་པ་རྣམས་ཀྱིས་ནི། སྒྱུ་ཅན་ལ་རྗེས་སུ་བསྟེན་པར་མི་བྱའོ། །ཚུལ་འཆོས་པར་བྱེད་པ་དང་ཡང་མ་ཡིན་ལ་དེ་དག་དང་གྲོགས་པོ་མི་བྱེད་པས་ཡང་དག་པའི་ལེགས་པར་གཞིགས་ནས་བྱེད་པར་འགྱུར་རོ། །དེས་གྲོགས་པོ་རྩབ་ཧྲལ་ཅན་ལ་བསྟེན་པར་མི་བྱའོ། །དེ་དེ་ཉིད་ཀྱིས་བག་ཆགས་ཀྱིས་བསྒོས་པར་གྱུར་པ་ནི་ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་རྒྱུ་རྐྱེན་དེས་བྱེད་པར་འགྱུར་རོ། །གཞན་ཡང་ཆོས་གཉིས་རྒྱལ་པོས་ཅི་ནས་ཀྱང་སྤང་བར་བྱ་སྟེ། གཉིས་པོ་གང་ཞེ་ན། འདི་ལྟ་སྟེ། ཁྲོ་བ་དང་རྒོད་པ་ཆེས་སྡོམ་པར་བྱེད་པའོ། །ཁྲོ་བ་དང་རྒོད་པའི་ཡང་གང་དག་ཤུགས་སྡོམ་པར་བྱེད་པའི་རྒྱལ་པོ་དེ་ནི་རྒྱལ་སྲིད་བརྟན་པར་འགྱུར་ཞིང་རང་བཞིན་བསྒོ་བར་བྱེད་པ་ཡིན་པས་ཕན་ཚུན་གྱིས་ཀྱང་མངོན་པར་གདུལ་བར་མི་ནུས་སོ། །འདི་ལ་འགའ་ཞིག་གིས་ཀྱང་གླགས་མི་རྙེད་དོ། །ཁྲོ་བ་སྡོམ་པར་བྱེད་པའི་རྒྱལ་པོ་དེ་དག་ནི་

70-252a

མ་བསམས་པར་བྱ་བ་རྣམས་བྱེད་པར་མི་འགྱུར་རོ། །གློ་བུར་དུ་གནས་ནས་འཕོ་བར་མི་བྱེད་དོ། །བྲན་ལ་གློ་བུར་དུ་རྡེག་པར་མི་བྱེད་དོ། །གསང་བར་བྱ་བ་རྣམས་ནི་ཕྱི་རོལ་དུ་མི་བྱེད་དོ། །གློ་བུར་དུ་འཕེལ་བ་དང་འགྲིབ་པ་དག་སྐྱེད་པར་མི་བྱེད་དོ། །དགའ་བའི་གནས་སུ་འཕར་བར་མི་འགྱུར་རོ། །འདིའི་སེམས་དམའ་བར་གྱུར་པས་ཀྱང་དོན་དག་བྱེད་པར་འགྱུར་བ་ནི་མ་ཡིན་ནོ། །སྐྱེས་བུ་དམ་པ་མ་ཡིན་པ་དག་རྗེས་སུ་འཛིན་པར་མི་བྱེད་དོ། །དེ་ནི་བློ་བརྟན་པར་འགྱུར་རོ། །དེ་ལྟར་རྒྱལ་པོ་དེ་ཁྲོ་བ་དང་རྒོད་པའི་ཚན་ཀ་སྡོམ་པར་བྱེད་པ་ཉིད་ནི་འཇིག་རྟེན་པའི་དོན་ལ་ཡང་རབ་ཏུ་བསྔགས་པར་འགྱུར་རོ། །ཇི་ལྟར་འཇིག་རྟེན་ལས་འདས་པའི་ལམ་ལ་རྒོད་པའི་ཤུགས་སྡོམ་པ་དང་གང་ཁྲོ་བ་སྡོམ་པར་བྱེད་པ་དག་འདིར་བསྔགས་པ་ཡིན་ཞེ་ན། ཁྲོ་བ་སྡོམ་པར་བྱེད་པ་དེས་ནི། འཁོར་བའི་དྲི་མ་གཅིག་བསྡམས་པ་ཡིན་ནོ། །གང་གིས་ཡང་རྒོད་པའི་ཤུགས་མཛེས་པས་རྣམ་པར་སྡོམ་པར་བྱེད་པར་གྱུར་པ་དེས་ནི་འདོད་ཆགས་ཀྱི་ཤུགས་རྣམ་པར་བསྡམས་པ་ཡིན་ནོ། །གང་གིས་ཤུགས་དང་ལྡན་པའི་དྲི་མ་གཉིས་པོ་དག་སྡོམ་པར་བྱེད་པ་ཉིད་དུ་འགྱུར་བ་དེས་གཏི་མུག་གི་ཤུགས་བསྡམས་པར་འགྱུར་རོ། །དྲི་མ་གསུམ་གྱི་ཤུགས་རྣམས་སྡོམ་པར་བྱེད་པ་པོ་དེ་ནི་ཤེས་པ་དང་ལྡན་པ་དང་བཟོད་པ་དང་ལྡན་པ་དང་བློ་གྲོས་བརྟན་པ་དང་གཅིག་ཏུ་ངེས་པར་གྱུར་པའི་བློ་གྲོས་ཅན་དག་ནི་སྔོན་གྱི་རྒྱུ་རྐྱེན་དེ་དག་གིས་རྣམ་པར་སྨིན་པས་ལུས་ཞིག་པར་གྱུར་པ་ན་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་རོ། །གཞན་ཡང་ཆོས་གཉིས་ཤིན་ཏུ་ཡང་དགག་པར་བྱའོ། །གཉིས་པོ་གང་དག་ཞེ་ན། འདི་ལྟ་སྟེ་རྒྱལ་པོ་ཤིན་ཏུ་ཡང་ཟས་དང་སྐོམ་རྣམས་ལ་སྲེད་པའི་རང་བཞིན་ཅན་དུ་མི་བྱའོ། །དེ་ཅིའི་ཕྱིར་ཞེ་ན། རྒྱལ་པོ་ཤིན་ཏུ་ཟས་སྐོམ་གྱི་རང་བཞིན་ཅན་ནི་འཆུམས་ནས་གཡེང་བར་འགྱུར་རོ། །གསུས་པ་འགེངས་པར་བྱེད་པ་ལ་ཤིན་ཏུ་ཕྱོགས་པར་འགྱུར་རོ། །དེ་རང་བཞིན་གྱིས་ཉེ་བར་ཆགས་པར་གྱུར་ནས་ཕྱུགས་བཞིན་དུ་བློ་གཅིག་ཏུ་འགྱུར་རོ། །ཟས་དང་སྐོམ་གཉིས་ལས་མ་གཏོགས་པ་དོན་གཞན་རྣམས་ལ་དེའི་བློ་འཇུག་པར་མི་འགྱུར་རོ། །དེ་ལྟར་ཀུན་དུ་

70-252b

ཆགས་པར་གྱུར་པའི་བློ་དང་སྤྱོད་པ་དང་ལྡན་པ་བློ་དེ་ལ་སོང་བར་གྱུར་པས་ཆོས་དང་ཆོས་མ་ཡིན་པ་དཔྱོད་པར་མི་བྱེད་དོ། །ཡུལ་འཁོར་རྗེས་སུ་སྒྲུབ་པར་མི་བྱེད་དོ། །ཡུལ་ལྗོངས་ཀྱི་དོན་དག་དཔྱོད་པར་མི་བྱེད་དོ། །རང་བཞིན་ལེགས་པར་བསྒོ་བར་མི་བྱེད་དོ། །བཀའ་བློན་པ་རྣམས་ཁུར་ལ་སྦྱོར་བར་མི་བྱེད་དོ། །དོན་དག་ལྕི་མོ་དང་ཡང་མོ་རྣམས་རྟོགས་པ་མ་ཡིན་ནོ། །དེ་རྟག་པར་ཡང་དོན་རྣམས་ལས་ཉམས་པར་འགྱུར་རོ། །དེ་ཡོངས་སུ་ཉམས་པ་ལས་ཀྱང་འབྱོར་བ་དམན་པར་འགྱུར་ལ་དེས་ཀྱང་ཟས་དང་སྐོམ་མིང་མེད་པར་འགྱུར་རོ། །དེ་དེ་ལས་ཡོངས་སུ་ཉམས་པར་གྱུར་པས་ཀྱང་འཇིག་རྟེན་པ་རྣམས་ཐམས་ཅད་ཀྱི་སྐྱུག་བྲོ་བའི་གནས་སུ་གྱུར་པ་མཆོག་ཏུ་དབུལ་བར་འགྱུར་རོ། །སྲེད་པའི་རྣམ་པར་གཡེང་བ་དེས་འཇིག་རྟེན་པའི་དོན་རྣམས་ཀྱི་ཡང་བར་དུ་གཅོད་པར་བྱེད་པར་འགྱུར་བ་ཡིན་པ་དང་། ཟས་དང་སྐོམ་ཉེ་བར་སྟེན་པར་གྱུར་པས་ཇི་ལྟར་འཇིག་རྟེན་ལས་འདས་པ་རྣམས་ལ་ཡང་རྣམ་པར་གཤེ་བར་གྱུར་པ་ཡིན་ནོ། །འདི་ལྟ་སྟེ་ཤིན་ཏུ་ཁོ་ན་ཡང་ཟས་སྐོམ་ལ་སྲེད་པར་གྱུར་པའི་རང་བཞིན་དང་ལྡན་པ་དེ་ལ་ཡིད་སོང་བར་གྱུར་པ་དེའི་ངང་ཚུལ་ཅན་དག་ནི་རྟག་པར་ཡང་རོའི་སྲེད་པས་ཀུན་ཏུ་ཁྲིད་པར་བྱེད་པས་ཡིད་མཉམ་པར་བཞག་པ་མ་ཡིན་པར་འགྱུར་རོ། །ལུས་སུ་གཏོགས་པའི་དྲན་པ་དག་མེད་པར་འགྱུར་རོ། །ཚོར་བར་གཏོགས་པ་ཡང་མེད་དོ། །སེམས་སུ་གཏོགས་པ་དག་ཀྱང་མེད་དོ། །ཆོས་སུ་གཏོགས་པ་དག་ཀྱང་མེད་དོ། །སྡུག་བསྔལ་དང་ཀུན་འབྱུང་དང་འགོག་པ་དང་ལམ་གྱིས་བསྡུས་པ་རྣམས་ཀྱང་མེད་དོ། །ཟས་དང་སྐོམ་ལ་གུས་པར་འགྱུར་བ་ལས་མ་གཏོགས་པ་འདི་དག་དོན་གཞན་རྣམས་འགའ་ཞིག་ལ་ཡང་བློ་ལས་སུ་རུང་བར་མི་འགྱུར་རོ། །དེ་ནི་དུད་འགྲོ་དང་རང་བཞིན་མཚུངས་པར་འགྱུར་བ་ཡིན་ནོ། །དེ་ཟས་དང་སྐོམ་གྱི་སྤྱོད་ཡུལ་རྣམས་ལས་ཟས་ལ་རྣམ་པར་སྤྱོད་པའི་བརྩོན་པ་དེ་དག་ལས་གྲོལ་བ་ནི་ལུས་ངག་གི་སྤྱོད་པས་བསྡུས་པ་དང་དབང་པོ་རྣམས་ཀྱང་ཡང་དག་པར་ཡོངས་སུ་སྨིན་པར་འགྱུར་རོ། །ཡང་དག་པའི་ལམ་རྣམས་སྤྱོད་པར་བྱེད་དོ། །དེའི་སེམས་ལས་སུ་རུང་བར་འགྱུར་

70-253a

རོ། །ལུས་དང་སེམས་དང་ཚོར་བ་དང་ཆོས་རྣམས་དང་སྡུག་བསྔལ་དང་ཀུན་འབྱུང་དང་འགོག་པ་དང་ལམ་རྣམས་མ་ལུས་པ་ཤེས་པ་དང་ལྡན་པར་འགྱུར་རོ། །དེའི་ཡིད་ཤིན་ཏུ་མཉམ་པར་བཞག་པར་འགྱུར་བ་དང་སེམས་དང་དབང་པོ་རྣམས་ཀྱང་རབ་ཏུ་དང་བར་འགྱུར་རོ། །ཟས་དང་སྐོམ་དང་ལྡན་པའི་ལུས་ནི་ཡང་དག་པར་འགྱུར་ཏེ། ལུས་རང་བཞིན་དུ་གནས་པ་དང་སེམས་རང་བཞིན་དུ་གནས་པ་དང་། སེམས་རང་བཞིན་དུ་གནས་པར་གྱུར་པ་ཡིན་པ་གང་གི་ཕྱིར་ཡང་དགེ་བའི་ཆོས་རྣམས་བསམ་པར་ནུས་པ་ཡིན་ནོ། །དེའི་ཕྱིར་ན་རོ་ལ་སྲེད་པ་ལ་ཆེད་ཆེར་འགྱུར་བར་མི་བྱའོ། །གལ་ཏེ་ཟས་སམ་སྐོམ་མམ་ལུས་ལ་འཇུག་པར་བྱེད་པ་དེའི་ཚེ་འགྲངས་པ་ཙམ་དང་ཕན་པ་ཙམ་ཞིག་གོམས་པར་བྱས་པས་དེ་ལྟར་འདིའི་ཡིད་ལས་སུ་རུང་བ་དང་སེམས་མཉམ་པར་གཞག་པར་ཡང་འགྱུར་རོ། །སེམས་ཤིན་ཏུ་མཉམ་པར་བཞག་པར་གྱུར་པ་རྣམས་ནི་དགེ་བའི་ལས་ལ་དཔྱོད་པར་བྱེད་དོ། །དགེ་བའི་ལས་རྣམས་ཀྱི་མཐའ་ལ་སྤྱོད་པ་ནི་ལུས་ཞིག་པར་གྱུར་ནས་ཤི་བའི་འོག་ཏུ་ལས་དེ་དང་དེ་དག་གི་དྲི་ཙམ་གྱིས་ཀྱང་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་ཏེ་ལས་དེའི་རྒྱུ་དང་རྐྱེན་གྱིས་སོ། །ཆོས་གཞན་ཡང་རྒྱལ་པོས་བྱས་པར་བྱའོ། །འདི་ཡང་གང་ཞེ་ན། འདི་ལྟ་སྟེ་ལེགས་པར་སྤྱོད་པར་བྱ་བ་རྣམས་སེམས་པར་བྱེད་པའོ། །ལེགས་པར་བསམ་པར་བྱ་བ་རྣམས་སེམས་པར་བྱེད་པ་ཡང་གང་གི་ཕྱིར་འཇིག་རྟེན་འདི་དང་ཕྱི་མ་མ་ཡིན་ཡང་སེམས་ཅན་རྣམས་ཀྱི་དོན་སྒྲུབ་པར་བྱེད་དོ། །དེ་ཅིའི་ཕྱིར་ཞེ་ན། སེམས་ཀྱི་ཡོན་ཏན་ཡིན་པའི་ཕྱིར་ཏེ། གང་དག་གི་ས་འདི་དང་ཕ་རོལ་དུ་ཡང་ལེགས་པར་བསམ་པར་བྱ་བ་རྣམས་སེམས་པ་པོ་ནི་མཆོག་ཏུ་བདེ་བར་འགྱུར་རོ། །འོན་ཀྱང་སྐྱོན་རྣམས་རབ་ཏུ་གཞོམ་པར་བྱ་ཞིང་དེས་ལེགས་པར་བསམ་པར་བྱ་བ་རྣམས་བསམ་པར་བྱའོ། །ཡིད་ལ་ཡང་གཞག་པར་བྱའོ། །འདོད་ཆགས་ལ་སོགས་པའི་དྲི་མ་རྣམས་ཀྱང་རྟག་པར་ངན་སོང་དུ་རྣམ་པར་འཇུག་པར་བྱེད་པ་ཡིན་པར་བརྗོད་པར་བྱའོ། །འདོད་ཆགས་ལ་ནི་མི་སྡུག་པས་སོ། །ཞེ་སྡང་ལ་ནི་བྱམས་པས་སོ། །གཏི་

70-253b

མུག་ལ་ནི་ཤེས་རབ་ཀྱིས་སོ། །དེ་ལ་དྲི་མ་རྣམ་པ་གསུམ་པོ་དེ་དག་རྣམས་ནི་ལེགས་པར་བསམ་པ་སེམས་པས་ཟད་པར་བྱ་བར་ནུས་སོ། །ངན་པར་བསམ་པ་སེམས་པར་བྱེད་པ་དེ་དག་རྣམས་ཀྱིས་ནི་མ་ཡིན་ནོ། །འཇིག་རྟེན་གྱི་ཆོས་རྣམས་ཀྱང་དེ་ཁོ་ན་བཞིན་དུ་ལེགས་པར་བསམ་པར་སེམས་པར་བྱེད་པ་རྣམས་ཀྱིས་འགྲུབ་པར་འགྱུར་རོ། །ངན་པར་བསམ་པ་སེམས་པར་བྱེད་པས་ནི་མ་ཡིན་ནོ། །དེའི་ཕྱིར་ཐམས་ཅད་ཀྱིས་གནས་སྐབས་ཐམས་ཅད་དུ་དོན་ཐམས་ཅད་ལེགས་པར་བསམས་ལ་བྱའོ། །དེ་ལས་འདིའི་དོན་ཀུན་འགྲུབ་པར་འགྱུར་བ་དང་། ཆོས་པའི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་བདག་པོར་འགྱུར་ཏེ། ལས་བཟང་པོ་བྱས་པ་དེའི་རྒྱུ་དང་རྐྱེན་རྣམས་ཀྱིས་སོ། །ཆོས་གཞན་ཡང་རྒྱལ་པོས་མི་བྱའོ། །འདི་ཡང་གང་ཞེ་ན། འདི་ལྟ་སྟེ། དོན་ཐག་རིང་བར་གྱུར་པ་ཞེས་བྱ་བ་འཇིག་རྟེན་པའི་དོན་རྣམས་བསྒྲུབ་པ་དང་། འཇིག་རྟེན་ལས་འདས་པའི་ཡང་སྟེ་ཕན་པའི་དོན་གང་བྱེད་པར་གྱུར་པ་དང་། གཞན་དག་རྣམས་ཀྱང་བྱེད་པར་གྱུར་པ་ན་དུས་རིང་པོས་ཀྱང་བྱ་བར་མི་ནུས་པའོ། །དེ་དག་ལ་མི་བཟོད་པར་འགྱུར་རོ། །འདི་ལྟ་སྟེ་ནད་ཀྱིས་ཀྱང་མྱུར་བར་ཀུན་ཏུ་བཅོམ་པར་གྱུར་པ་ན། དོན་ཐག་རིང་བར་གྱུར་པའི་སྐྱོན་གྱིས་བསྒྲུབ་བྱར་གྱུར་པ་རྣམས་ཡང་བསྒྲུབ་བྱ་མ་ཡིན་པར་བྱས་ནས་ཆུད་གཟོན་པར་བྱེད་དོ། །དེ་བཞིན་དུ་དོན་གཞན་དག་དུ་མ་རྣམས་ཀྱང་མྱུར་བར་མ་བྱས་པས་དུས་གཞན་དུ་ཤིན་ཏུ་ཡང་བཟོད་པར་མི་ནུས་པར་འགྱུར་རོ། །དེ་ལྟར་ངེས་པར་ལེགས་པའི་ལམ་ཅུང་ཟད་ཙམ་ཡང་མེད་དེ། ནད་ལྟ་བུར་གྱུར་པའི་ཉོན་མོངས་པས་རྗེས་སུ་བཅོམ་པར་གྱུར་པས་ངན་སོང་དུ་འགྲོ་བར་འགྱུར་ཏེ། དོན་ཐག་རིང་བར་འགྱུར་བའི་སྐྱོན་གྱིས་ཡིན་ཏེ། དེའི་ཚེ་འཇིག་རྟེན་ལས་འདས་པའི་ལམ་ཅུང་ཟད་ཙམ་ཡང་མེད་དོ། །ལམ་རྣམས་རྗེས་སུ་ཉེ་བར་འཇོམས་པར་འགྱུར་བས་དུག་གི་མྱུག་གུ་དང་ཆ་འདྲ་བར་གྱུར་པ་རྣམ་པར་འཕེལ་བར་གྱུར་ནས་དུས་གཞན་དུ་རབ་ཏུ་འཕེལ་བར་ཞུགས་ནས་རྒྱུད་མ་རུངས་པར་སྲེག་པར་བྱེད་དེ། གང་གིས་སྲོག་ཆགས་

70-254a

རྣམས་དམྱལ་བ་དང་ཡི་དགས་དང་དུད་འགྲོའི་སྐྱེ་བར་འགྱུར་བར་བྱེད་དོ། །དེའི་ཕྱིར་དོན་ཐག་རིང་བ་ནི་རྒྱལ་པོའམ་དེ་མ་ཡིན་པ་དགེ་སློང་རྣམས་སམ། ནོར་ཅན་རྣམས་སམ་འགའ་ཞིག་ལ་ཡང་སྙན་པ་མ་ཡིན་ནོ། །ཐམས་ཅད་ལ་ཤིན་ཏུ་བར་ཡང་བསྔགས་པ་མ་ཡིན་ནོ། །གང་ཡང་དོན་ཐག་རིང་བར་གྱུར་པ་མ་ཡིན་པ་དེ་དག་ནི་སྐྱོན་སྐྱེས་པར་གྱུར་པ་དག་སྐད་ཅིག་གི་དུས་དེར་སྒྱུར་བར་བྱེད་དོ། །གཏོང་བར་བྱེད་དོ། །ཀུན་ནས་འཇོམས་པར་བྱེད་དོ། །རབ་ཏུ་འཇོམས་པར་བྱེད་དོ། །རྩ་བ་ནས་རླག་པར་བྱེད་དོ། །དེས་སྐྱོན་དེ་དག་རྣམས་ཀུན་ནས་བཅོམ་པར་གྱུར་པས་མཐར་ཐུག་པར་བདེ་བར་འགྱུར་རོ། །སྐྱེས་བུ་འཇིག་རྟེན་པའི་འམ་འཇིག་རྟེན་ལས་འདས་པའི་ལམ་ལ་ཡང་གནས་ནས་ཀུན་ཏུ་སྐྱེས་པའི་སྐྱོན་རྣམས་འཇོམས་པར་བྱེད་དོ། །དུག་གི་མྱུག་གུ་དང་འདྲ་བའི་སྐྱོན་ཡང་དུས་གཞན་དུ་འཕེལ་ནས་སྐྱོན་མང་པོར་འགྱུར་རོ། །དེའི་ཕྱིར་གང་དག་གིས་སྐད་ཅིག་དེ་ལ་སྐྱོན་རྣམས་གཞོམ་པར་བྱས་ལ་རིངས་པར་བྱས་ཏེ་ཡང་བདེ་ལེགས་ཀྱི་གནས་ལ་ལེགས་པར་སྦྱར་བར་བྱའོ། །མངོན་སུམ་དུ་འགྱུར་བའི་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་བ་རྣམས་ལ་དབང་བར་འགྱུར་བ་ཡིན་ཏེ། དེས་སྔོན་བྱས་པའི་ལེགས་པར་བྱས་པའི་ལས་དེ་ཉིད་ཀྱི་རྒྱུ་དང་རྐྱེན་རྣམས་ལས་ཡིན་ནོ། །ཆོས་གཞན་ཡང་རྒྱལ་པོས་བྱ་བར་བྱའོ། །འདི་ཡང་གང་དག་ཞེ་ན། འདི་ལྟ་སྟེ་ཆོས་ཀྱིས་སྐྱེ་དགུ་རྣམས་བསྐྱང་བར་བྱའོ། །གང་གི་ཕྱིར་རྒྱལ་པོ་གང་དག་ཆོས་ཀྱིས་སྐྱེ་དགུ་རྣམས་བསྐྱང་བར་བྱའི་ཆོས་མ་ཡིན་པས་ནི་མ་ཡིན་ནོ། །ཆོས་ཀྱིས་ལྷག་པའི་རྒྱལ་པོའི་ཡང་བདག་དང་གཞན་ལ་ཕན་པར་བྱེད་པར་འགྱུར་རོ། །བདག་ལ་ཕན་པ་མ་ཡིན་པ་མི་བྱེད་དོ། །ཇི་སྲིད་དུ་ཚུལ་ཁྲིམས་དང་ལྡན་པར་འགྱུར་རོ། །ཚུལ་ཁྲིམས་དང་ལྡན་པར་གྱུར་པ་རྣམས་ནི་ཆོས་མ་ཡིན་པས་ནམ་ཡང་སྐྱེ་དགུ་སྐྱོང་བར་མི་བྱེད་དོ། །དེ་ལྟར་བདག་ལ་ཕན་པ་བྱེད་དོ། །ཇི་ལྟར་ཡང་གཞན་ལ་ཕན་པ་བྱེད་པ་ཡིན་ན། སྲོག་ཆགས་སུ་གྱུར་པ་གང་

70-254b

དག་ཡང་ཆོས་པ་མ་ཡིན་ཞིང་ཆོས་ཀྱི་རྗེས་སུ་ཡོངས་སུ་འཇུག་པ་ཡང་མ་ཡིན་པ། དེ་དག་རྣམས་འདིས་བདེ་ལེགས་ལ་རབ་ཏུ་སྦྱོར་བར་བྱེད་དོ། །དེ་ལྟར་ཡང་དག་པར་སྐྱེ་དགུ་སྐྱོང་བར་བྱེད་པ་ཉིད་དུ་འགྱུར་རོ། །བསྐྱངས་པར་གྱུར་པ་ལས་ཀྱང་ཆོས་དང་དོན་དང་སྙན་པ་རྣམས་དང་ཡང་དག་པར་ལྡན་པར་འགྱུར་རོ། །རེ་ཞིག་དང་པོར་ཆོས་ཀྱིས་ནི་མཆོག་ཏུ་ངེས་པར་ལེགས་པ་ལ་ཡང་དག་པར་སྦྱོར་བར་གྱུར་པ་ཡིན་ན་ཇི་ལྟར་ན་ཆོས་མ་ཡིན་པ་དང་ཀུན་ནས་ལྡན་པར་གྱུར། རྒྱལ་པོ་དོན་དང་ཡང་དག་པར་ལྡན་པར་འགྱུར་ཏེ། ཇི་ལྟ་བུའི་དོན་གྱིས་ཞེ་ན། འདི་ལྟ་སྟེ། གང་གི་ཚེ་འབྲས་བུ་ངེས་པར་བྱས་ནས་ཟ་བའི་རྒྱལ་པོར་གྱུར་པ་ན་དྲུག་ཆ་ལེན་པར་བྱེད་པ་ཡིན་ལ་དེའི་ཚེ་སྐྱེ་དགུ་རྣམས་ཕུན་སུམ་ཚོགས་པར་བྱེད་པར་འགྱུར་རོ། །ལེགས་པར་ཡོངས་སུ་བསྐྱངས་པས་ཏེ་སྐྱེ་དགུ་ཕུན་སུམ་ཚོགས་པ་དེ་ཡང་རྒྱལ་པོའི་སེམས་དགའ་བའི་དབང་གིས་རྗེས་སུ་ཆགས་པར་གྱུར་ནས་སྒྲོལ་བར་བྱེད་པ་ཡིན་ནོ། །དེ་ལས་ཡོན་ཏན་གཉིས་པ་དང་ཡང་དག་པར་ལྡན་པ་ཕུན་སུམ་ཚོགས་པར་འགྱུར་བ་ནི་རྒྱལ་པོ་སྙན་གྲགས་དང་ཡང་དག་པར་ལྡན་པར་འགྱུར་རོ། །རྒྱལ་པོས་ཡང་དག་པར་སྐྱེ་དགུ་བསྐྱངས་པར་གྱུར་པ་ན་གྲོང་ཁྱེར་པ་གང་དག་རྗེས་སུ་ཆགས་པར་གྱུར་པ་དེས་ཕྱོགས་ཐམས་ཅད་དུ་སྙན་པ་སྒྲོགས་པར་བྱེད་པར་འགྱུར་རོ། །དེ་ལྟར་ཆོས་དང་དོན་དང་སྙན་པ་རྣམས་དང་ཡང་ལེགས་པར་ལྡན་པར་འགྱུར་རོ། །རྒྱལ་པོ་ལེགས་པར་སྐྱེ་དགུ་རྣམས་བསྐྱངས་པར་གྱུར་པ་ལས་ལུས་ཞིག་པར་གྱུར་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་བདག་པོར་འགྱུར་རོ། །དེས་སྔོན་བྱས་པའི་རྒྱུ་ལས་ཀྱི་རྣམ་པར་སྨིན་པ་ལས་ཡིན་ནོ། །ཡང་ཆོས་གཞན་རྒྱལ་པོའམ་གཞན་གྱིས་ཀྱང་རབ་ཏུ་བརྩོན་པ་མང་པོ་རྣམས་ཀྱིས་བྱ་བར་བྱ་སྟེ། འདི་ཡང་གང་ཞེ་ན། འདི་ལྟ་སྟེ་དགེ་བ་བཅུའི་ལས་ཀྱི་ལམ་རྣམས་བྱ་བའོ། །དེ་མ་ལུས་པ་རྣམས་ཀྱིས་ཀྱང་མཆོག་ཏུ་བདེ་བའི་རྣམ་པར་སྨིན་པ་དང་ལྡན་པར་འགྱུར་རོ། །དེ་ལ་དགེ་བའི་ལས་ཀྱི་ལམ་དེ་ཉིད་ཀྱང་རྣམ་པ་གསུམ་སྟེ། ལུས་ཀྱི་དང་ངག་གི་དང་ཡིད་ཀྱིའོ། །ལུས་

70-255a

ཀྱི་རྣམས་ནི་སྲོག་གཅོད་པ་དང་མ་བྱིན་པར་ལེན་པ་དང་འདོད་པ་ལོག་པར་གཡེམ་པ་སྤོང་བའོ། །ངག་གི་རྣམས་ནི་རྫུན་དང་ཕྲ་མ་དང་ཚིག་རྩུབ་པོ་དང་འབྲེལ་བ་མེད་པར་བརྗོད་པ་སྤོང་བའོ། །ཡིད་ཀྱི་རྣམས་ནི་བརྣབ་སེམས་དང་གནོད་སེམས་དང་ལོག་པར་ལྟ་བ་རྣམས་སོ། །དེ་ལ་དེ་དག་ནི་ཇི་ལྟར་ལས་ཀྱི་ལམ་སྣ་ཚོགས་པ་རྣམས་སུ་གྱུར་པའི་མི་དགེ་བ་བཅུ་པོ་དེ་དག་རྣམས་ནི་མི་དགེ་བའི་ལས་ཀྱི་ལམ་ཞེས་བྱའོ། །ཤེས་རབ་ཇི་ལྟར་ཕྱིན་ཅི་མ་ལོག་པར་གྱུར་པའི་ཡང་དག་པའི་དགེ་བའི་ལམ་ཞེས་བྱ་བའི་མིང་ནི་ཤེས་རབ་དེ་ལ་བརྗོད་པ་ཡིན་ནོ། །ཤེས་རབ་དེ་དག་གང་ཡིན་པ་དེ་དག་གིས་ཀྱང་ཇི་ལྟ་བ་བཞིན་དུ་མྱ་ངན་ལས་འདས་པའི་མཐར་ཐུག་པར་འགྱུར་བ་ཡིན་ནོ། །མི་དང་ལྷ་རྣམས་འབྱུང་བར་འགྱུར་བ་གང་དག་ཇི་ལྟར་འདོད་པ་བཞིན་འགྱུར་ཏེ། དེ་དག་རྒྱལ་པོ་འདི་རང་ཉིད་ཀྱིས་འཛིན་པར་ནུས་པ་དང་། གྲོང་ཁྱེར་བ་རྣམས་ལ་ཡང་རྒྱལ་པོ་དེས་ཕ་དང་མ་དང་འདྲ་བར་འགྱུར་ཞིང་མྱ་ངན་ལས་འདས་པ་རབ་ཏུ་འཐོབ་པར་བྱེད་པ་དང་མཐོ་རིས་རབ་ཏུ་འཐོབ་པར་བྱེད་པ་ཡིན་ནོ། །དེའི་བསམ་པ་རྣམས་ཐམས་ཅད་མངོན་པར་འགྲུབ་པར་འགྱུར་རོ། །ལྷ་རྣམས་ཀྱིས་ཀྱང་འདི་དག་ལ་སྲུང་བར་འགྱུར་རོ། །འདི་ལ་མཚོན་ཆ་དང་མུ་གེས་བྱས་པའི་འཇིགས་པ་རྣམས་དང་ཡུལ་འཇིག་པར་འགྱུར་བ་ནམ་ཡང་འབྱུང་བར་མི་འགྱུར་རོ། །འདིའི་ཡུལ་དུ་དུས་སུ་ལོ་ཏོག་རྣམས་ཕུན་སུམ་ཚོགས་པར་འགྱུར་རོ། །འདིའི་ཡུལ་དུ་ཡང་དུས་སུ་ཟླ་བ་དང་ཉི་མ་དག་རབ་ཏུ་འོད་འབྱིན་པར་བྱེད་པ་དང་། དགོས་པ་ཐམས་ཅད་ཕུན་སུམ་ཚོགས་པར་འགྱུར་བ་དང་ཡུལ་ལྗོངས་རྣམས་ཕུན་སུམ་ཚོགས་པར་ཡང་འགྱུར་རོ། །རྒྱལ་པོ་དེ་ལེགས་པར་སྐྱེ་དགུ་རྣམས་བསྐྱངས་པར་གྱུར་ནས་དུས་རྣམས་ཡོངས་སུ་སྨིན་པར་གྱུར་ཏེ། མི་རྟག་པའི་རང་བཞིན་ཡིན་པས་གལ་ཏེ་རྣམ་པར་བྲལ་བར་གྱུར་ན་གང་གི་ཚེ་ལྷ་རྣམས་ཀྱི་ནང་དུ་སྐྱེ་བར་འགྱུར་བ་དེའི་ཚེ་དགེ་བའི་ལས་ཀྱི་རྣམ་པར་སྨིན་པ་གང་གིས་བདེ་བ་གང་དག་ལ་ཉེ་བར་ལོངས་སྤྱོད་པར་འགྱུར་བ་ཡིན་ན། དེ་ལ་མདོར་བསྡུ་ན་འཐབ་བྲལ་གྱི་ལྷར་སྐྱེ་བར་འགྱུར་བ་རྣམས་ལས། སྲོག་

70-255b

གཅོད་པ་རྣམ་པར་སྤངས་པས་ནི་དམན་པ་དང་བར་མ་དང་ཁྱད་པར་དུ་འཕགས་པའི་ལྷ་རྣམས་ཚེ་རིང་བར་འགྱུར་རོ། །གཞན་ཡང་དེ་ཁོ་ན་བཞིན་དུ་ལྷའི་རིས་དྲུག་ཏུ་མ་བྱིན་པར་ལེན་པ་རྣམ་པར་སྤངས་པས་ནི་ནོར་བརྟན་པར་འགྱུར་ཏེ། རིན་པོ་ཆེ་བདུན་གྱི་རང་བཞིན་ཕུན་སུམ་ཚོགས་པར་འགྱུར་བའི་ནགས་དང་ཉེ་བའི་ནགས་དང་རིའི་རྩེ་མོ་སྣ་ཚོགས་པར་དགའ་བར་གྱུར་པ་རྣམས་ལའོ། །འདོད་པས་ལོག་པར་གཡེམ་པ་རྣམ་པར་སྤངས་པས་ནི་ཇི་སྲིད་དུ་འདི་ཤི་འཕོས་པར་མ་གྱུར་གྱི་བར་གྱི་དུས་དེ་སྲིད་དུ་ལྷ་མོ་རྣམས་ལྷའི་བུ་གཞན་དག་རྣམས་ལ་འཕོ་བར་མི་འགྱུར་རོ། །གསོན་བཞིན་དུ་ཡང་ལྷའི་བུ་གཞན་དག་རྣམས་ལ་ནམ་ཡང་ཀུན་ཏུ་འཕོ་བར་མི་འགྱུར་ཞིང་ཁྱུད་འཕྱང་ཡང་མི་བྱེད་ཀྱི་དེ་ཉིད་ཁོ་ན་ལ་གཟུགས་བཟང་བ་ཐམས་ཅད་ཀྱིས་གཟི་བརྗིད་ཐམས་ཅད་ཀྱིས་ཀྱང་ལྟ་བར་བྱེད་དོ། །གང་ཡང་འདོད་པ་ལོག་པར་གཡེམ་པ་ལེགས་པར་བསྲུངས་པ་མ་ཡིན་པ་དེ་དག་རྣམས་ཀྱི་ལྷ་མོ་རྣམས་ནི་གཞན་དག་ལ་འཕོ་བར་འགྱུར་ཏེ། སོ་སོ་དང་སོ་སོར་ལས་ཀྱི་རྣམ་པར་སྨིན་པ་རྣམས་རབ་ཏུ་སྟེར་བར་བྱེད་པ་ཡིན་ནོ། །དེ་ལྟར་ལུས་ཀྱིས་ལེགས་པར་སྤྱོད་པ་རྣམས་བསྲུངས་ཤིང་བསྟེན་ལ་བསྒོམས་ལ་ལན་མང་དུ་བྱས་པས་ནི་ལྷ་རྣམས་ཀྱི་ནང་དུ་སྐྱེ་བར་འགྱུར་བ་ཡིན་ནོ། །རྣམ་པར་སྨིན་པ་བདེ་བ་དང་ལྡན་པ་གཉིས་པར་གྱུར་པ་ངག་གི་རྣམ་པ་བཞིས་བསྟེན་ཅིང་བསྒོམས་ལ་ལན་མང་དུ་བྱས་པས་ལྷ་རྣམས་ཀྱི་ནང་དུ་སྐྱེའོ། །ལས་གང་གི་རྣམ་པར་སྨིན་པས་ལྷ་རྣམས་ཀྱི་ནང་དུ་སྐྱེས་ནས་བདེ་བ་གང་ལ་ལོངས་སྤྱོད་པ་ཡིན་ན། ངག་ལེགས་པར་བསྡམས་པ་རྣམས་ཀྱང་བཞིའོ། །དེ་ལ་རྫུན་རྣམ་པར་སྤངས་པས་ནི་གསལ་ཞིང་སྙན་ལ་ཟུར་ཐོན་པའི་ངག་ཏུ་འགྱུར་རོ། །རྟག་ཏུ་ཡང་ལེགས་པར་སྦྱར་བའི་མཆོག་གི་སྨྲ་བ་པོར་འགྱུར་ཏེ། གང་དང་གང་ཉིད་སྨྲ་བར་བྱེད་པ་ན་བདེ་བས་དེ་དང་དེ་ཁོ་ན་འདིས་ལྷན་ཅིག་ཏུ་རྗོད་པར་བྱེད་པ་ནི་ལྷ་འདི་དག་ལ་ཉེ་བར་གནས་པ་ཡིན་ཏེ། དེ་དག་གིས་རྫུན་ལེགས་པར་སྤངས་པ་ཡིན་པའི་ཕྱིར་རོ། །ཕྲ་མ་རྣམ་པར་སྤངས་པས་ནི་ཡུལ་ལྗོངས་རྣམས་འཇིག་པར་མི་འགྱུར་

70-256a

རོ། །རྟག་ཏུ་ཡང་ཚིག་རྩུབ་པོ་དེ་དང་དེ་ཉིད་རྣམ་པར་སྤངས་པས་ནི་རྟག་ཏུ་སྙན་པའི་གླུ་དང་གར་དང་དགོད་པ་དང་འགྱིང་བག་དག་གི་སྒྲ་མཆོག་ཏུ་རྣ་བ་དང་ཡིད་འཕྲོག་པར་བྱེད་པ་རྣམས་ཐོས་སོ། །འབྲེལ་བ་མེད་པར་བརྗོད་པ་རྣམ་པར་སྤངས་པས་ནི་རྟག་ཏུ་ལྕེ་གཞལ་ཞིང་ལྗགས་ཕྱིན་པར་འགྱུར་རོ། །ལྷ་རྣམས་ཐམས་ཅད་ཀྱི་ཡིད་དུ་འོང་བར་འགྱུར་རོ། །དེ་ལྟར་ངག་གི་ལེགས་པར་སྤྱད་པའི་འབྲས་བུ་རྣམས་ལ་ལོངས་སྤྱོད་པར་བྱེད་དོ། །ལྷ་རྣམས་སུ་ལྷ་རྣམས་ཀྱི་ཡིད་ཀྱི་རྣམས་ཀྱང་གང་དག་གིས་འབྲས་བུ་རྣམས་གང་དག་ལ་ལོངས་སྤྱོད་པར་བྱེད་ན། བརྣབ་སེམས་རྣམ་པར་སྤངས་པས་ནི་འདིའི་འདོད་པ་རྣམས་ཐམས་ཅད་སེམས་བསྐྱེད་པ་ཙམ་ཉིད་ན་ཉེ་བར་འདུ་བར་འགྱུར་རོ། །དེས་ཐོབ་པ་རྣམས་ཀྱང་ངེས་པར་ཉམས་པར་མི་འགྱུར་རོ། །ལྷ་གཞན་འགའ་ཞིག་གིས་ཀྱང་དང་དུ་ལེན་པར་བྱེད་པར་འདོད་པ་ཡང་མ་ཡིན་ཏེ། དེས་ན་བརྣབ་སེམས་རྣམ་པར་སྤངས་པ་དེ་དག་རྣམས་ཀྱི་དེ་ལྟར་འགྱུར་བ་ཡིན་གྱི་རྣམ་པར་སྨིན་པ་འདི་གཞན་རྣམས་ཀྱི་ནི་མ་ཡིན་ནོ། །གནོད་སེམས་རྣམ་པར་སྤངས་པ་རྣམས་ཀྱི་ཡང་གནོད་སེམས་སྤངས་པས་ནི་ལྷའི་སྐྱེ་བོ་རྣམས་ཐམས་ཅད་དང་འཐུན་པར་འགྱུར་རོ། །གཟུགས་མཆོག་དང་ཡང་ལྡན་པར་འགྱུར་རོ། །ལོག་པར་ལྟ་བ་རྣམ་པར་སྤངས་པས་ནི་འདི་ལ་ཅུང་ཟད་ཅིག་ཀྱང་གཞན་མུ་སྟེགས་པ་རྣམས་ཀྱིས་རྩོད་པ་དོན་དུ་གཉེར་བར་མི་བྱེད་དོ། །ཇི་ལྟ་བ་ཉིད་དུ་རབ་ཏུ་སེམས་པ་དེ་ཁོ་ན་བཞིན་དུ་ཕུན་སུམ་ཚོགས་པར་འགྱུར་རོ། །གཞན་དུ་འགྱུར་བ་ནི་མེད་དོ། །འདོད་བཞིན་དུ་ཡང་འདོད་པ་རྣམས་ཀྱིས་སྟོང་པར་ནི་ནམ་ཡང་ཅུང་ཟད་ཅིག་ཀྱང་མི་འགྱུར་རོ། །དེ་ལ་མདོར་བསྡུས་ནས་དེ་ལྟར་དགེ་བ་བཅུའི་ལས་ཀྱི་ལམ་རྣམས་ཀྱིས་རྣམ་པར་སྨིན་པ་རྣམས་སོ་སོར་བཤད་པ་ཡིན་ནོ། །སྦྱིན་པའི་ཁྱད་པར་གྱིས་ནི་ལོངས་སྤྱོད་ཀྱི་ཁྱད་པར་རྣམས་འབྱུང་བར་འགྱུར་རོ། །ཤེས་རབ་ཀྱི་ཁྱད་པར་གྱིས་ནི་ཐམས་ཅད་ཀྱང་ཆེས་ཁྱད་པར་དུ་འཕགས་པར་འགྱུར་ཏེ། གང་གི་ཕྱིར་བདེ་བ་རྣམས་ཐམས་ཅད་ནི་ཤེས་རབ་ཀྱི་རྩ་བ་ལས་ཡིན་ནོ། །བདེ་བ་མ་ཡིན་པ་རྣམས་ནི་སྲིད་པའི་རྨོངས་པ་སྔོན་དུ་འགྲོ་བ་ཅན་ཡིན་

70-256b

ནོ། །སེམས་ཀྱི་དབང་གིས་དང་དུས་ཀྱི་དབང་གིས་དང་དངོས་པོའི་དབང་གིས་དང་ལྷག་པར་མོས་པའི་དབང་གིས་ཀྱང་རུང་སྟེ། དགེ་བའི་ལས་ཀྱི་ལམ་རྣམས་ལས་གལ་ཏེ་ཤེད་ན་གཅིག་གིས་ཀྱང་ལྷར་སྐྱེ་བར་འགྱུར་རོ། །མྱ་ངན་ལས་འདས་པ་ཡང་འཕེན་པར་བྱེད་ན་སེམས་ཅན་རྣམས་ལྷ་རྣམས་སུ་སྐྱེ་བར་འགྱུར་བ་ལ་ལྟ་ཅི་སྨོས། དེ་ལ་དེ་ལྟར་ལས་ཀྱི་རྣམ་པར་སྨིན་པ་འདི་ནི་མཆོག་ཏུ་ཕྲ་བར་གྱུར་པ་ཡིན་ཏེ། དེ་གང་གིས་མི་ཤེས་པ་དེ་དག་རྣམས་ནི་ལས་རྣམ་པར་སྨིན་པ་རྣམས་ལ་ཡང་ཀུན་ཏུ་རྨོངས་པར་འགྱུར་ལ། དེ་ཀུན་ཏུ་རྨོངས་པས་ཀྱང་དམྱལ་བར་ཉེ་བར་རྒྱུག་པར་འགྱུར་རོ། །དེ་ལ་ཇི་སྐད་དུ་བཤད་པའི་དགེ་བ་བཅུའི་ལས་ཀྱི་ལམ་དེ་དག་རྣམས་ལ། རྒྱལ་པོ་གང་ཞིག་གིས་ཇི་སྐད་བཤད་པ་བཞིན་དུ་སྤྱོད་པར་བྱེད་པ་ནི། འདིའི་ཡུལ་འཁོར་རྣམས་དང་གྲོང་ཁྱེར་རྣམས་དེས་དབང་དུ་བྱེད་པར་འགྱུར་བ་ཡིན་ནོ། །རྒྱལ་པོ་དེ་ལུས་ཞིག་ནས་ཤི་བའི་འོག་ཏུ་ཡང་ལས་དེ་དག་རྣམས་ཀྱི་རྣམ་པར་སྨིན་པས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །ཆོས་གཞན་ཡང་རྒྱལ་པོས་རྗེས་སུ་བསྒྲུབ་པར་བྱའོ། །འདི་ཡང་གང་ཞེ་ན། འདི་ལྟ་སྟེ། རྒྱུ་དང་འབྲས་བུ་ལ་ལེགས་པར་བལྟའོ། །རྒྱུ་དང་འབྲས་བུ་རྣམས་ལ་ལེགས་པར་ལྟ་བར་བྱེད་པའི་རྒྱལ་པོའམ་བློན་པོ་རྣམས་ཀྱང་རུང་སྟེ། ཀུན་ཏུ་རྨོངས་པར་མི་འགྱུར་རོ། །ལས་རྣམས་དང་ལས་ཀྱི་རྣམ་པར་སྨིན་པ་རྣམས་ལ་ཡང་རྟག་ཏུ་མཉམ་པར་བཞག་པའི་བློར་འགྱུར་ཞིང་། ཡུལ་རྣམས་ལ་བག་མེད་པས་འཇུག་པར་ཡང་མི་འགྱུར་རོ། །དེ་ལ་རྒྱུ་བྱ་བའི་མིང་ནི་འབྲས་བུའི་ས་བོན་ནོ། །རྐྱེན་ནི་ནམ་ཟླའི་དུས་ཚོད་དང་ས་གཞི་ཚོགས་པའོ། །དེ་གལ་ཏེ་དེ་རྒྱུ་རྣམས་ལ་སྐུར་པ་མི་འདེབས་པ་དང་རྐྱེན་རྣམས་ལ་སྐུར་པ་མི་འདེབས་པ་དེ་ནི་རྒྱུ་དང་འབྲས་བུ་དག་གི་དེ་ཁོ་ན་ཉིད་མཐོང་བ། སྡིག་པའི་ལས་རྣམས་ལ་སྤྱོད་པར་མི་བྱེད་དོ། །ཇི་ལྟ་བ་དེ་ཁོ་ནས་ས་བོན་དང་། མྱུག་གུ་དག་རྒྱུ་རྐྱེན་དུ་གཏོགས་པ་གང་ཡིན་པ་དེ་ཁོ་ན་བཞིན་དུ་ལས་དང་ལས་ཀྱི་འབྲས་བུ་རྣམ་པར་སྨིན་པ་རྣམས་ལ་ཡང་ཀུན་དུ་རྨོངས་པར་མི་འགྱུར་རོ། །དེ་ལ་

70-257a

སྐྱེ་བའི་ལམ་དུ་གྱུར་པའི་དགེ་བ་དང་མི་དགེ་བའི་ལས་རྣམས་ཀྱིས་ནི་རྣམ་པ་སྣ་ཚོགས་པའི་བདེ་བ་དང་སྡུག་བསྔལ་རྣམས་འཁོར་བ་ནས་འཁོར་བར་རབ་ཏུ་འབབ་པར་འགྱུར་བ་ཡིན་ཏེ། སྲོག་ཆགས་རྣམས་ཀྱི་རྒྱུད་དེས་བསྡུས་པ་ནས་བཟུང་ནས་དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་དང་ལྷ་དང་མི་རྣམས་སུ་ཁམས་གསུམ་དུ་གཏོགས་པ་རྣམས་ཀྱི་འདུ་བྱེད་དུ་འགྱུར་བ་རྣམ་པ་གསུམ་པོ་དགེ་བ་རྣམས་དང་མི་དགེ་བ་རྣམས་དང་མི་གཡོ་བ་རྣམས་ཀྱིས་སོ། །དེ་ཡང་དགེ་བའི་ལས་ཀྱི་འདུ་བྱེད་ཀྱི་རྒྱུ་རྣམས་ཀྱིས་ནི་ལྷ་རྣམས་དང་མི་རྣམས་སུའོ། །མི་དགེ་བ་ལས་ནི་དམྱལ་བ་རྣམས་སུའོ། །མི་གཡོ་བ་རྣམས་ཀྱིས་ནི་གཟུགས་དང་གཟུགས་མེད་པའི་ཁམས་དག་ཏུའོ། །ཁམས་རྣམ་པ་གསུམ་དུ་གཏོགས་པ་དེ་དག་རྣམས་ལ་ཡང་རྒྱལ་པོ་གང་ཞིག་རྒྱུ་ཙམ་དེ་ཁོ་ན་ཉིད་དུ་མཐོང་བ་དེ་ནི་འཁོར་བའི་འབྲོག་དགོན་པ་རྣམས་སུ་རྨོངས་པར་མི་འགྱུར་རོ། །དེ་ལྟར་རེ་ཞིག་འདུས་བྱས་འདི་དག་རྣམས་ཐམས་ཅད་མདོར་བསྡུས་པ་ནི་འདི་ལྟ་སྟེ་རྒྱུ་དང་འབྲས་བུའོ། །རྒྱུ་དང་འབྲས་བུ་ཀུན་ནས་མཐོང་བའི་རྒྱལ་པོ་ནི་སྐྱོན་རྣམས་ཀྱིས་མི་འཇོམས་སོ། །ཉེས་པའི་འཇིགས་པ་རྣམས་ཀྱིས་འཇིགས་པས་མི་དགེ་བའི་ལས་དག་མི་བྱེད་དོ། །དགེ་བ་ཡང་རྟག་ཏུ་བྱེད་པར་འགྱུར་རོ། །དེ་ནི་ལུས་ཞིག་པར་གྱུར་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ཀྱི་ལྷར་སྐྱེ་བར་འགྱུར་རོ། །དེ་ལ་ཡིད་ལ་འཇུག་པར་བྱེད་པ་རྣམས་ཐམས་ཅད་ཀྱི་མཆོག་ནི་འདི་ལྟ་སྟེ། རྐྱེན་ལེགས་པར་མཐོང་བ་ཞེས་བྱ་བའོ། །དེའི་ཕྱིར་ན་ཆོས་འདི་དག་རབ་ཏུ་བརྩོན་པས་རྒྱལ་པོས་གཟུང་བར་བྱ་བ་ཡིན་ནོ། །འདི་ལྟ་སྟེ་རྒྱུ་དང་རྐྱེན་རྣམས་ལ་ལེགས་པར་བལྟ་བའོ། །ཆོས་གཞན་ཡང་རབ་ཏུ་བརྩོན་པ་དུ་མས་རྒྱལ་པོས་བྱའོ། །འདི་ཡང་གང་ཞེ་ན། འདི་ལྟ་སྟེ་ལྷ་དག་མཆོད་པར་བྱའོ། །འདིར་ལེགས་པར་བྱས་པའི་ལས་ཀྱི་མཐའ་ལ་སྤྱད་པའི་ལྷ་རྣམས་ནི་ལེགས་པར་བྱ་བའི་ལས་རྣམས་ལ་གྲོགས་སུ་རང་དབང་དུ་འགྲོ་བར་འགྱུར་རོ། །དགེ་བའི་ཆོས་རྣམས་ལ་ཡང་བར་ཆད་བྱེད་པར་མི་འགྱུར་རོ། །ཉིན་མོ་དང་མཚན་མོར་ཡང་འདི་

70-257b

དག་མཆོད་པས་མཆོད་པར་བྱེད་པ་རྣམས་ལ་ནི། ལས་རྣམས་ཐམས་ཅད་ལ་ཡང་ལྷན་ཅིག་རང་དབང་དུ་འགྱུར་རོ། །རྨི་ལམ་ཡང་བཟང་པོ་དང་ངན་པ་མྱོང་བར་འགྱུར་བ་རྣམས་ངེས་པར་ལེགས་པར་སྟོན་པར་འགྱུར་རོ། །ཡུལ་ལྗོངས་འཇིག་པར་འགྱུར་བ་ཡང་འདི་དག་གིས་སྲུང་བར་བྱེད་དོ། །དགེ་བའི་ལས་རྣམས་རྟག་ཏུ་སྐུལ་བར་བྱེད་དོ། །འདི་ལྟ་སྟེ། དགེ་བ་དག་ལ་སོ་སོར་ངེས་པར་འཇུག་པར་བྱེད་པ་ན་འདི་དག་གིས་ཉིན་མོ་དང་མཚན་མོར་ཡང་སྲུང་བར་བྱེད་དོ། །ཕ་དང་མ་བཞིན་དུ་ཐབས་དུ་མས་དགེ་བར་བྱེད་པའི་ལྷ་མཆོད་པར་བྱ་བར་འོས་པ་ཡང་ཡིན་ནོ། །དེའི་ཕྱིར་ན་རྒྱལ་པོས་རྟག་ཏུ་ལྷ་དག་མཆོད་པར་བྱ་བ་ཡིན་ཏེ། ཆོས་དང་ལྡན་པའི་ཆོ་ག་དག་གིས་དང་མངོན་པར་འདོད་པ་རྣམས་དང་དམ་ཚིག་གིས་དང་སྡིག་པའི་ལས་རྣམས་དང་རྣམ་པར་བྲལ་བས་དེང་འཚེ་བ་མེད་པ་དང་ལོག་པར་ལྟ་བ་ཅན་གྱི་ཡི་དམ་གྱིས་མ་ཡིན་པ་དང་། འགྲོ་བ་ཐམས་ཅད་ཀྱི་ལས་དང་སྡུག་བསྔལ་བྱེད་པ་པོར་གྱུར་པའི་རྒྱུ་དེ་དང་བློ་དེ་དག་དང་ཇི་ལྟ་བར་བྲལ་བར་གྱུར་པ་དེ་ལྟར་ལྷ་དག་མཆོད་པར་བྱའོ། །གྲོགས་བྱེད་པའི་ཡོན་ཏན་རྣམས་ཀྱིས་དེ་ལྟར་མཆོད་པར་བྱེད་པའི་རྒྱལ་པོ་ནི་དོན་དག་ལས་ཡོངས་སུ་ཉམས་པར་མི་འགྱུར་རོ། །རྒྱུ་དང་འབྲས་བུ་ལ་སྐུར་པ་མི་འདེབས་སོ། །ལོག་པར་ལྟ་བ་དང་ལྡན་པར་མི་འགྱུར་རོ། །རྟག་ཏུ་ཡང་མཆོད་པར་བྱ་བར་འགྱུར་རོ། །ལུས་ཞིག་ནས་ཀྱང་ལས་དེའི་རྒྱུ་དང་རྐྱེན་དག་གིས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་ལས་འཐབ་བྲལ་གྱི་ནང་དུ་སྐྱེས་ནས་འཐབ་བྲལ་གྱི་ལྷ་རྣམས་ཀྱི་རྒྱལ་པོར་འགྱུར་རོ། །ཆོས་གཞན་ཡང་རྒྱལ་པོས་བྱ་བར་བྱའོ། །འདི་ཡང་གང་ཞེ་ན་འདི་ལྟ་སྟེ། ལེགས་པར་སྐྱེ་དགུ་རྣམས་བསྐྱང་བར་བྱའོ། །རྒྱལ་པོས་ཡང་དག་པར་སྐྱེ་དགུ་སྐྱོང་བར་བྱེད་པ་ནི་ཆོས་བྱེད་ཆོས་ཀྱི་རྗེས་སུ་འཇུག་པར་གྱུར་པ་མ་དང་ཕ་དང་མཚུངས་པར་མི་འཇིགས་པ་སྦྱིན་པར་བྱེད་པ་ཡིན་ནོ། །འཇིགས་པ་རྣམས་ཐམས་ཅད་ལས་དེས་མི་འཇིགས་པ་སྦྱིན་པར་བྱེད་པས་ཉིན་དང་མཚན་དུ་ཡང་དགེ་བའི་ཆོས་རྣམས་ཀྱི་ཆུ་ཀླུང་རབ་ཏུ་འཇུག་པར་འགྱུར་བའི་ཕྱིར་

70-258a

རབ་ཏུ་རྒྱས་པར་འགྱུར་རོ། །འདི་ལ་གྲོང་ཁྱེར་པ་རྣམས་ཐམས་ཅད་རྗེས་སུ་ཆགས་པར་འགྱུར་བ་དང་རྗེས་སུ་ཆགས་པའི་ཡིད་ཅན་དེ་དག་རྣམས་ལས་དེར་ནོར་རྣམས་རྙེད་པར་འགྱུར་བ་དང་སྙན་པ་ལ་ཡང་སྦྱོར་བར་བྱེད་དོ། །ཉིན་དང་མཚན་དུ་ཡང་འདིའི་བདེ་བ་སེམས་པར་བྱེད་དོ། །དེ་དེ་ལྟར་ཞུགས་པར་གྱུར་པའི་རྒྱལ་པོ་ནི་སེམས་ཅན་རྣམས་ཐམས་ཅད་ལ་ཕན་པར་རབ་ཏུ་ཞུགས་པས་ན་དབང་སྒྱུར་བ་ཡང་རབ་ཏུ་འཕེལ་བར་འགྱུར་ཏེ། མངའ་ཐང་འཕེལ་བར་གྱུར་པ་གང་ཡིན་པ་དེ་དག་གིས་ཡང་དག་པ་ཇི་ལྟ་བ་བཞིན་དུ་ལོ་ཏོག་རྣམས་སྐྱེ་བར་འགྱུར་རོ། །ལེགས་པ་ཉིད་དུ་སྐྱེ་དགུ་རྣམས་ཀྱང་འཕེལ་བར་འགྱུར་རོ། །གྲོང་ཁྱེར་དེ་འཕེལ་བར་གྱུར་པས་ཀྱང་ཕྱིར་ཞིང་ཡང་རྒྱལ་པོ་དེ་ཉིད་མངོན་པར་འཕེལ་བར་བྱེད་དོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་དག་པར་ལྡན་པར་འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་། བརྣབ་སེམས་མེད་པར་འགྱུར་བས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ། དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །རྒྱལ་པོ་ཆོས་བྱེད་ཆོས་ཀྱི་རྗེས་སུ་ཀུན་ནས་འཇུག་པས་ཆོས་གཞན་ཡང་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། བུ་དང་བུ་མོ་ཡང་དག་པ་ཇི་ལྟ་བའི་བདེ་བས་འཛིན་པའོ། །བུ་དང་བུ་མོ་ཡང་ཡང་དག་པའི་བདེ་བས་འཛིན་པར་བྱེད་པར་འགྱུར་བའི་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། རྣམ་པ་དུ་མའི་བསོད་ནམས་ཆེན་པོ་རྒྱུན་མི་འཆད་པར་རབ་ཏུ་འཕེལ་བར་འགྱུར་རོ། །གང་འདི་ལ་གྱུར་པ་རྣམས་དེ་དག་ལ་འགྱུར་བར་བྱེད་པ་དང་། རྣམ་པ་གང་དག་གིས་ཡིན་པ་དང་། ཡོད་པ་རྣམས་ཀྱང་ཇི་སྲིད་ཀྱི་བར་དུ་དང་། དུས་གང་གི་ཚེ་ན་ཡོད་པ་དེ་དག་རྣམས་ཀྱང་དེ་བཞིན་དུ་དེས་དེ་ལ་ཐམས་ཅད་ནས་སྟེར་བར་བྱེད་པ་སྟེ། རྫས་དང་ཟས་དང་སྐོམ་དང་གོས་དང་ཡོངས་སུ་འཁྱུད་པ་དང་སྙན་པར་སྨྲ་བ་

70-258b

དང་ཡིད་ཆེས་པར་བྱ་བ་དང་དགའ་བར་བྱ་བ་དང་མི་འཇིགས་པ་སྦྱིན་པ་རྣམས་ཀྱང་ཤུགས་བཏོན་ནས་རབ་ཏུ་སྦྱིན་པར་བྱེད་དོ། །བུ་རྣམས་དང་བུ་མོ་རྣམས་ལས་གང་དག་བསོད་ནམས་ཆེན་པོ་འབྱུང་བར་འགྱུར་ཏེ། རྣམ་པ་དུ་མར་བསོད་ནམས་ཆེན་པོར་ཁྱིམ་ནས་ཀུན་ཏུ་འབྱུང་བར་འགྱུར་བ་འདི་ནི་བུ་དང་བུ་མོ་ལེགས་པར་འཛིན་པ་ཞེས་བྱ་བ་གང་ཡིན་པ། བཀྲེན་པས་ཟིལ་གྱིས་མནན་པར་མ་གྱུར་པ་དང་། འདོད་པས་གཟིར་བར་མ་ཡིན་པས་ཀྱང་བུ་དང་བུ་མོ་རྣམས་ལ་སྙིང་རྗེ་དང་ལྡན་པར་གྱུར་པའོ། །དེའི་རྫས་བྱིན་པར་གྱུར་ནས་གསོད་པ་ལས་བསྲུངས་པ་རྣམས་ཀྱི་དྲུང་ན་ཡང་ཆེས་ལྷག་པར་འགྱུར་རོ། །དེའི་ཕྱིར་ན་གང་དག་དད་པས་རབ་ཏུ་འབྱུང་བར་མི་ནུས་པ་དེ་དག་རྣམས་ཀྱིས་བུ་དང་བུ་མོ་རྣམས་ཡང་དག་པར་བདེན་པས་གཟུང་བར་བྱའོ། །གང་ཡང་ནུས་པ་དང་ལྡན་པར་གྱུར་ཀྱང་བཀྲེན་པར་གྱུར་པས་ནུས་པ་ཇི་ལྟ་བ་བཞིན་དུ་བུ་དང་བུ་མོ་རྣམས་འཛིན་པར་མི་བྱེད་པ་དེ་ནི་ཁྱིམ་པ་ཡང་མ་ཡིན་ལ་དགེ་སློང་ཡང་མ་ཡིན་ནོ། །དེའི་ཕྱིར་ན་ཟང་ཟིང་གི་སྦྱིན་པས་སྦྱིན་པ་ལ་ལེགས་པར་སྦྱར་བར་བྱ་བ་དང་། ཚུལ་ཁྲིམས་ལ་ཀུན་ནས་གོམས་པར་བྱ་བས་ཀྱང་རྒྱལ་པོའམ་རྒྱལ་པོའི་བློན་པོ་རྣམས་ཀྱིས་ཀྱང་རུང་སྟེ། བུ་དང་བུ་མོ་ཚུལ་ཁྲིམས་ལ་རབ་ཏུ་དགོད་པར་བྱའོ། །སྦྱིན་པ་དག་གཏོང་དུ་གཞུག་པར་བྱའོ། །ཤེས་རབ་ལ་གོམས་པར་བྱེད་དུ་གཞུག་གོ། །ཡང་དག་པའི་བདེ་བས་ཡོངས་སུ་བསྐྱང་བར་བྱ་བ་དང་། རྗེས་སུ་བསྐྱངས་པའི་དབང་དུ་བྱས་ནས་ལྷག་མ་རྣམས་ཀྱིས་རིམ་གྱིས་ནུས་པ་ཇི་ལྟ་བ་བཞིན་དུ་སྟེ། དེ་ལྟར་བྱེད་པར་གྱུར་པའི་རྒྱལ་པོའམ་རྒྱལ་པོའི་བློན་པོ་དེ་དག་རྣམས་ཀྱང་རུང་སྟེ། ཤིན་ཏུ་རིང་དུ་བདེ་བར་འཚོའོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། དགེ་བའི་ལས་དེ་དག་གི་རྒྱུ་དང་རྐྱེན་རྣམས་ཀྱིས་སོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པ་དུ་མར་བྱ་བ་རྣམས་ལ་འདི་ལྟ་སྟེ། ཤེས་རབ་ལ་ཅི་ནས་ཀྱང་གོམས་པར་བྱ་བའི་རང་བཞིན་ཅན་ཉིད་དོ། །ཤེས་རབ་ལ་གོམས་པར་བྱ་བ་ཞེས་བྱ་བ་ནི་སྡུག་བསྔལ་

70-259a

ཐམས་ཅད་ཀུན་ནས་འཇོམས་པར་བྱེད་པ་འཁོར་བ་ཐམས་ཅད་ལས་ངེས་པར་འབྱུང་བའི་རྒྱུར་གྱུར་པའི་ཕྱིར་ན། དེ་ལ་ཅི་ནས་ཀྱང་རྒྱལ་པོས་གོམས་པར་བྱ་བ་ཡིན། ཤེས་རབ་ཞེས་བྱ་བ་ཡང་། གང་གི་ཕྱིར་མུན་པ་ཆེན་པོར་ཀུན་ནས་ལྟུང་བའི་སྡུག་བསྔལ་དུ་མའི་མུན་པར་འཐོམས་པར་གྱུར་པ་རྣམས་ལ་རབ་ཏུ་གསལ་བར་བྱེད་པའི་མར་མེ། འཁོར་བའི་དབུལ་པོ་རྣམས་ཀྱི་ནོར། མིག་མེད་པར་གྱུར་པ་རྣམས་ཀྱི་མིག །སྟོབས་མེད་པ་རྣམས་ཀྱི་སྟོབས་དང་། གྲོགས་མེད་པ་རྣམས་ཀྱི་གྲོགས་དང་། སྐྱོབ་པ་དང་མི་ལྡན་པ་རྣམས་ཀྱི་སྐྱོབ་པར་བྱེད་པ་དང་། ནད་ཀྱིས་ཤིན་ཏུ་གཟིར་བའི་སྲོག་ཆགས་འདི་དག་རྣམས་ཀྱི་ནི་སྨན་ནོ། །ལམ་མེད་པ་ལ་རབ་ཏུ་གནས་པ་རྣམས་ཀྱི་ནི་ལམ་སྟོན་པར་བྱེད་པའོ། །འཁོར་བའི་དགོན་པར་རབ་ཏུ་ཞུགས་པར་གྱུར་པས་སྲེད་པས་ཀུན་ནས་གདུངས་པ་རྣམས་ཀྱི་ནི་ཤིན་ཏུ་བར་ཡང་བསིལ་བར་གྱུར་པའི་ཆུ་རྣམ་པ་དུ་མ་རྣམས་སོ། །འཁོར་བའི་བཙོན་རར་ཀུན་ནས་བསྡམས་པ་རྣམས་ཀྱི་ངེས་པར་འབྱིན་པའི་རྒྱུར་གྱུར་པའོ། །གཉེན་བཤེས་མེད་པ་རྣམས་ཀྱི་ཕན་པར་བྱེད་པའི་གཉེན་ནོ། །མིག་ལྡོངས་པ་རྣམས་ཀྱི་རབ་རིབ་དང་རྣམ་པར་བྲལ་བར་བྱེད་པའི་མིག་གོ། །གསོད་པར་བྱེད་པའི་ཡུལ་དང་དུས་རྣམས་སུ་སྟོབས་དང་ལྡན་པའི་གྲོགས་པོའོ། །གཤིན་རྗེའི་ཕོ་ཉ་རྣམས་ཉེ་བར་གནས་པའི་འཆི་བའི་དུས་ན་སྟོབས་དང་ལྡན་པའི་གྲོགས་པོ་རྣམས་གང་གིས་ངན་འགྲོའི་འཇིགས་པ་རྣམས་ཐམས་ཅད་ལས་ཀུན་ཏུ་འདྲེན་པར་བྱེད་པའོ། །བགྲོད་དཀའ་བ་རྣམས་དང་ངམ་གྲོག་རྣམས་དང་གཡང་ས་རྣམས་ལས་ལག་པས་འདོན་པར་བྱེད་པའི་སྟོབས་དང་ལྡན་པའི་གྲོགས་པོ་རྣམས་གང་གིས་བདེ་བ་རྣམས་ཐམས་ཅད་འཐོབ་པར་བྱེད་པའོ། །ཀུན་ནས་ཚིག་པར་གྱུར་པའི་སྐྱེས་བུ་རྣམས་ཀྱི་རིན་ཐང་མེད་པའི་གོས་རྣམས་སོ། །ཚུལ་ཁྲིམས་འཆལ་པའི་མེའི་འཇིགས་པའི་ཚ་བས་གདུངས་པ་རྣམས་ཀྱི་ཤིན་ཏུ་ཆེ་བའི་ཡལ་ག་དུ་མ་རྣམས་ཀྱིས་ཀུན་ནས་ཁྱབ་པར་གྱུར་པའི་བསིལ་བའི་གྲིབ་མ་འཇིགས་པ་མེད་པ་དང་ལྡན་པ་ལ་ཡལ་ག་དུ་མ་སྟུག་པོར་གྱུར་པ་ཡལ་ག་ཕྲེའུ་དང་། ཆིའུ་གཞོན་ནུ་དང་འདབ་མ་དང་ཟེ་བ་དང་ལྡན་པའི་ལྗོན་ཤིང་སྐྱེ་

70-259b

བོ་རྣམས་ཐམས་ཅད་ཀྱི་མིག་དང་རེག་པ་ན་ཤིན་ཏུ་དགའ་བར་འགྱུར་བ་ཡིན་ནོ། །དེའི་ཕྱིར་ན་ཡང་ཤེས་རབ་ནི་ཆེས་ཤིན་ཏུ་ལྷག་པར་གྱུར་པ་ཡིན་ནོ། །ཀྱེ་ཧོ་འཇིག་རྟེན་ཕ་རོལ་དང་འདི་དང་གཞན་ལ་ཡང་རུང་སྟེ། སྐྱེ་དགུ་རྣམས་ལ་ཐོག་མ་མེད་པའི་དུས་ནས་རབ་ཏུ་འཇུག་པར་གྱུར་པའི་རྒྱུར་གྱུར་པ་རྣམ་པ་དེ་ལྟ་བུ་གཞན་ནི་ཡོད་པ་མ་ཡིན་ནོ། །ཤེས་རབ་ཀྱིས་ནི་ཇི་ལྟ་བ་བཞིན་དུ་གཅིག་ཏུ་ཡོན་ཏན་དང་ལྡན་པ་དང་དེ་ཡོངས་སུ་ཤེས་པར་བྱ་བའི་ཚུལ་ཇི་ལྟ་བར་གོམས་པར་བྱ་བ་ལས་ལམ་དམ་པ་རྟོགས་པར་འགྱུར་ཞིང་། ལེགས་པར་རྣམ་པར་སྤྱད་ནས་སེམས་ལ་རབ་ཏུ་བཞག་སྟེ། མཐའ་མར་ལྷན་ཅིག་ཀུན་དུ་བསྐྱོད་པ་དང་། གཅིག་ཏུ་ངེས་པ་དང་དེ་རྣམ་པ་དུ་མར་རྣམ་པར་ཤེས་པར་བྱ་བ་ཡིན་པ་དང་། དང་པོ་དང་བར་དང་ཐ་མར་ཆེས་མཛེས་པར་གྱུར་པ་བྲིས་པ། ངོ་བོ་ཉིད་ཀྱི་ལམ་ལེགས་པར་སྟོན་པར་བྱེད་པའོ། །དེ་དག་ཉིད་ནི་མངོན་པར་འདོད་པའི་དོན་ཐམས་ཅད་ལ་གཅིག་ཏུ་ཆགས་པ་མེད་པར་མྱ་ངན་ལས་འདས་པའི་གྲོང་ཁྱེར་ལེགས་པར་སྟོན་པ་པོ་དེ་ནི་རྟག་ཏུ་གོམས་པར་བྱའོ། །དེ་ནི་ཡུན་རིང་དུ་རྒྱལ་སྲིད་ལ་ལོངས་སྤྱོད་པར་གྱུར་པ་དང་གྲོང་ཁྱེར་པ་རྣམས་ཀྱང་འདི་ལ་རྗེས་སུ་དགའ་བར་འགྱུར་རོ། །ཡུལ་གཞན་རྣམས་ཀྱི་རྒྱལ་པོས་ཀྱང་གཞོམ་པར་མི་ནུས་སོ། །དུས་ཡུན་རིང་དུ་འཚོ་བར་འགྱུར་བ་དང་སྡུག་བསྔལ་ཡང་འབྱུང་བར་མི་འགྱུར་རོ། །བདེ་བ་རྣམས་ལ་ཡང་དུས་རིང་དུ་ཉེ་བར་ལོངས་སྤྱོད་པར་བྱེད་པ་དེས་བདེ་བ་ནས་བདེ་བ་འཐོབ་པར་འགྱུར་རོ། །ལུས་ཀྱང་ཞིག་པར་གྱུར་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་ཏེ། དེས་སྔོན་བྱས་པའི་ལས་རྣམས་ཀྱི་རྒྱུའི་རྣམ་པར་སྨིན་པའི་རྐྱེན་གྱིས་སོ། །ཡང་ཆོས་གཞན་དག་རྒྱལ་པོས་རབ་ཏུ་བརྩོན་པ་ཐམས་ཅད་ཀྱིས་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། ཡུལ་གྱིས་འཁྲིད་པར་འགྱུར་བ་དེ་ལྟར་མི་བྱའོ། །རྒྱལ་པོ་གང་ཞིག་ཡུལ་རྣམས་མཆོག་ཏུ་བྱེད་པར་གྱུར་པ་རྣམ་པ་ཐམས་ཅད་དུ་དགེ་ལེགས་སུ་འོས་པའི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ཏུ་ཕྲོགས་པའི་རྒྱལ་པོ་ནི་ཐབས་རྣམས་

70-260a

ཐམས་ཅད་ཀྱིས་ཀྱང་དགེ་བར་བྱ་མི་ནུས་སོ། །རྣམ་པ་དེ་ལྟ་བུ་དག་གིས་ཡུལ་རྣམས་ཀྱང་དག་པའི་བདེ་བས་ཡོངས་སུ་སྐྱོང་བར་མི་འགྱུར་རོ། །བདག་ཉིད་ཀྱང་ཡུལ་དེ་དག་རྣམས་ལ་མཆོག་ཏུ་བྱེད་པར་ཡང་མི་འགྱུར་ཞིང་བློ་དེ་ལ་སོང་བར་གྱུར་པས་ཀྱང་ཆོས་དང་ནོར་དང་སྙན་པ་རྣམས་ལས་ཀྱང་ཡོངས་སུ་ཉམས་པར་འགྱུར་རོ། །ཡོངས་སུ་ཉམས་པ་ལས་ནི་མི་འཐུན་པའི་རྒྱལ་པོ་གཞན་གྱིས་མངོན་པར་འཚེ་བར་བྱེད་དོ། །དེ་དེས་མངོན་པར་གཙེས་པ་ལས་ནི་དེའི་གྲོང་ཁྱེར་བ་རྣམས་དགའ་བ་དང་རྣམ་པར་བྲལ་བར་གྱུར་ནས་རྒྱལ་སྲིད་འཆོར་བར་འགྱུར་རོ། །སྡུག་བསྔལ་ཆེན་པོ་རྣམས་སུ་ཡང་ལྷུང་ནས་སྲོག་ཀྱང་ངམ་བརྒྱ་ལ་ན་སྟེ་མེད་པར་འགྱུར་རོ། །དེའི་ཕྱིར་ན་ཡུལ་རྣམས་ལ་ཆེད་ཆེར་འགྱུར་བར་མི་བྱའོ། །གང་ཡང་རྒྱལ་པོ་ཡུལ་རྣམས་ལ་ཆེད་ཆེར་བྱེད་པ་མ་ཡིན་པ་དང་རང་གི་ཆོས་ཡོངས་སུ་སྐྱོང་བར་བྱེད་པ་དང་། སེམས་ཀྱང་ཤིན་ཏུ་མཉམ་པར་བཞག་པ་དག་ནི་སྒྲ་དང་རེག་བྱ་དང་རོ་དང་གཟུགས་དང་དྲི་རྣམས་ཀྱིས་ཀུན་ནས་འཁྲིད་པར་མི་འགྱུར་རོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་དག་པར་ལྡན་པར་འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་བརྣབ་སེམས་མེད་པར་གྱུར་པས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ་དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །ཡང་ཆོས་གཞན་ཡང་རྒྱལ་པོས་མི་བྱ་བར་གྱུར་པ་འདི་ཡང་གང་ཞེ་ན། འདི་ལྟ་སྟེ་གདུལ་དཀའ་བ་རྣམས་ཡུལ་དུ་འཛིན་པར་མི་བྱེད་དོ། །གང་ཡང་རྒྱལ་པོར་གྱུར་ནས་གདུལ་དཀའ་བའི་སྡིག་པའི་ལས་ཅན་ཚུལ་ཁྲིམས་འཆལ་པ་རྣམས་ཡུལ་དུ་འཛིན་པར་བྱེད་པ་ན་དེ་ནི་དུས་མི་རིང་བ་ཉིད་ན་དེས་བྱས་པར་གྱུར་པའི་སྐྱོན་ཆེན་པོ་ཀུན་ཏུ་ལྟུང་བར་འགྱུར་རོ། །སྐྱོན་ཆེན་པོ་དེ་དག་རྣམས་ཀྱིས་ཀྱང་ཡུལ་ལྗོངས་འཇིགས་པར་འགྱུར་བ་དང་། མངའ་བྱེད་རྣམས་ལས་ཡང་

70-260b

ཡོངས་སུ་ཉམས་པར་འགྱུར་རོ། །ལོ་ཏོག་རྣམས་ཀྱང་སྨིན་པར་མི་འགྱུར་རོ། །ལས་ཀྱི་མཐའ་དག་མེད་པར་འགྱུར་རོ། །ལེགས་པར་སྐྱེ་དགུ་རྣམས་སྐྱོང་བར་ཡང་མི་བྱེད་དོ། །དེ་ལ་སྐྱེ་དགུ་འདོད་ཆགས་དང་བྲལ་བར་འགྱུར་རོ། །གདུལ་དཀའ་བ་རྣམས་ཡུལ་དུ་འཛིན་པར་བྱེད་པ་ཡིན་པའི་ཕྱིར་ན་ཡུལ་ན་གནས་པའི་ལྷ་དག་ཀྱང་རྗེས་སུ་བརྩེ་བར་མི་འགྱུར་རོ། །གདུལ་དཀའ་བ་རྣམས་ཀྱིས་ནི་གང་གི་ཕྱིར་སྐྱེ་བོ་མཆོག་ཏུ་དུལ་བ་རྣམས་ཀྱང་གདུལ་དཀའ་བར་བྱེད་པ་ཡིན་ཏེ། ཐམས་ཅད་ཀྱང་བསྟེན་གྲོགས་ཀྱི་དབང་གིས་ཡིན་པའི་ཕྱིར་ན་ཡོན་ཏན་དང་ལྡན་པར་གྱུར་པ་རྣམས་ཐམས་ཅད་དང་གཞན་དང་སྟེན་གྲོགས་བྱས་པར་གྱུར་པ་ལས་ཆུད་འཛའ་བར་འགྱུར་རོ། །དེའི་ཕྱིར་ན་རྒྱལ་པོས་གདུལ་དཀའ་བ་རྣམས་ཀུན་ཏུ་གཟུང་བར་མི་བྱའོ། །གང་ཡང་སྐྱེས་བུ་ངན་པ་གདུལ་བར་དཀའ་བ་སྡིག་པ་ཀུན་ཏུ་སྤྱོད་པ་འཛིན་པར་མི་བྱེད་པ་དེ་དག་ལ་ནི་སྐྱོན་ཇི་ལྟར་བཤད་པ་དེ་དག་རྣམས་མི་འབྱུང་ངོ་། །ཡང་དག་པར་སྐྱེ་དགུ་རྣམས་སྐྱོང་བར་བྱེད་དོ། །སྐྱེས་བུ་ཆོས་བྱེད་མ་ཡིན་པ་རྣམས་ནི་འདིའི་ཡུལ་ན་གནས་པར་ཡང་མི་བྱེད་དོ། །དེ་སྐྱེས་བུ་ཆོས་པ་རྣམས་དང་ལྡན་པས་ཆོས་མ་ཡིན་པ་རྣམས་ལ་དགའ་བར་ཡང་མི་བྱེད་དོ། །ཆོས་པ་ཆོས་ཀྱི་རྗེས་སུ་འཇུག་པར་དེའི་ཡིད་ལ་བསམས་པ་འདི་དག་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འདིའི་ཡུལ་ཡང་འཇིག་པར་མི་འགྱུར་རོ། །དོན་མ་ཡིན་པ་གཞན་ཡང་འབྱུང་བར་མི་འགྱུར་རོ། །རྒྱལ་པོ་དེ་ཆོས་ཁོ་ནའི་སྐྱབས་དང་ཆོས་ཁོ་ནའི་གྲོགས་དང་གཞི་དེ་ཉིད་ཀྱིས་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་ལས་དེའི་རྒྱུ་དང་རྐྱེན་རྣམས་ཀྱིས་འགྱུར་རོ། །ཆོས་གཞན་ཡང་རྒྱལ་པོས་རབ་ཏུ་བརྩོན་པར་གྱུར་པས་བྱེད་པ་ན་ཆོས་དང་ལེགས་པར་ལྡན་པས་ཡིན་གྱི་འདི་ལ་ཡང་རང་བཞིན་ཆགས་པ་དང་ལྡན་པས་ནི་མ་ཡིན་ནོ། །འདི་ཡང་གང་ཞེ་ན་འདི་ལྟ་སྟེ། བྲན་རྣམས་ལ་རང་གི་ཁྱིམ་དུ་ལོངས་སྤྱོད་པར་བྱེད་པ་ད་ལྟར་གྱུར་པའི་ས་གཞི་དང་ནོར་སྦྱིན་པར་སྦྱིན་པ་རྣམས་རྒྱལ་པོ་གང་གིས་བྲན་གང་ལ་

70-261a

འདིའི་ཁྱིམ་དུ་རིགས་པ་ཡིན་པ་རྣམས་དེས་དེ་རང་ལ་སྟེར་བར་བྱེད་དོ། །དེ་ལ་རང་བཞིན་གྱིས་མི་དགའ་བར་མི་བྱེད་དོ། །བྲན་རྣམས་དང་ཕན་ཚུན་དུ་དགའ་རངས་པར་བྱེད་པ་ཡང་མ་ཡིན་ནོ། །འདི་དག་རྣམས་ལ་ཡིད་འབྱུང་བར་མི་བྱེད་དོ། །བགོ་བཤའ་བྱེད་པའི་དབང་དུ་བྱས་ནས་གནས་ནས་གཡོ་བར་ཡང་མི་འགྱུར་རོ། །རྟོག་པར་ཡང་མི་བྱེད་པའི་རྒྱལ་པོ་ནི་ཤིན་ཏུ་ལེགས་པར་གནས་པ་རྣམས་ཀྱིས་ཀྱང་གནས་པ་ཡིན་ནོ། །འདི་ནི་ཉོ་ཚོང་གི་བྱ་བའི་ཡུལ་རྣམས་ལ་ཡང་འཇུག་པར་མི་བྱེད་དོ། །སྟོབས་དང་ལྡན་པར་གྱུར་ན་ཡང་སྟོབས་ཆུང་བ་རྣམས་ཅི་ནས་ཀྱང་འཚེ་བར་མི་བྱེད་དོ། །ཆོས་རྣམས་ལ་འདོད་པ་ཅན་ཡང་མ་ཡིན་ནོ། །ཆོག་ཤེས་ཅན་ཡིན་པ་ཡང་ཇི་ལྟར་རང་གི་ལས་ཀྱིས་བྱས་པ་རྣམས་ཀྱིས་ཆོག་ཤེས་སོ། །ཡུལ་ལྗོངས་རྣམས་སུ་ཡང་དུས་མ་ཡིན་པར་ལྷས་ཆར་མི་འབེབས་སོ། །དུས་མ་ཡིན་པར་ཉི་མ་རབ་ཏུ་ཚ་བར་མི་འགྱུར་རོ། །མུ་གེ་འབྱུང་བར་མི་འགྱུར་རོ། །མཚོན་ཆ་འཁྲུག་པར་མི་འགྱུར་རོ། །ཀླུ་རྣམས་ཀུན་ནས་འཁྲུག་པར་མི་འགྱུར་རོ། །ལྷ་དག་གིས་ཡུལ་དེ་ཡོངས་སུ་སྤངས་པར་གྱུར་ནས་ཡུལ་གཞན་རྣམས་སུ་ཉེ་བར་འགྲོ་བར་མི་འགྱུར་རོ། །ཡུལ་དེ་ཡང་ལྷ་གཞན་དག་གིས་སྟོངས་པར་བྱས་ནས་རླག་པར་མི་བྱེད་དོ། །མི་རྣམས་དང་ལྷ་རྣམས་ཀྱང་མི་རྣམས་ཀྱི་སྟོབས་ཀྱིས་འཕེལ་བར་བྱེད་པ་ཡིན་ནོ། །དེ་ལ་དེ་ལྟར་སྐྱོན་དག་རྗེས་སུ་རྟོགས་པར་བྱས་ལ་རྒྱལ་པོས་མི་སྡིག་ཅན་རྣམས་གཟུང་བར་མི་བྱའོ། །གང་ཡང་དགེ་བ་སྤྱོད་པར་བྱེད་པ་སྤྱོད་པ་རྣམས་ཀྱི་མཆོག་ཆོས་བྱེད་ཀྱི་མཆོག་ཏུ་གྱུར་པ་རྣམས་ཡུལ་དུ་འཛིན་པར་བྱེད་པའི་ཡུལ་དེ་དག་རྣམས་ཐམས་ཅད་ནི་ལྷས་ཡོངས་སུ་སྐྱོང་བར་བྱེད་དོ། །འཛིན་པར་བྱེད་དོ། །འཛིན་པར་བྱེད་པའི་རྒྱུ་མཚན་གྱིས་ཀྱང་ལྷའི་ཚོགས་དང་ཉེ་བའི་ཡུལ་ལ་ལྷ་གཞན་རྣམས་ཀྱིས་དེར་བར་ཆད་བྱ་བར་མི་ནུས་སོ། །ཡུལ་དེ་ལ་ཡང་སྲུང་བར་འགྱུར་རོ། །རྒྱལ་པོ་དེ་ཡང་རྒྱས་པར་འགྱུར་བ་དེའི་ཕྱིར་ཡུལ་དུ་སྦྱིན་པ་དག་ནི་གཏོང་བར་བྱེད་ལ། བསོད་ནམས་དག་ཀྱང་བྱེད་དོ། །ཚུལ་ཁྲིམས་སྲུང་བར་བྱེད་དོ། །ཤེས་པ་དང་

70-261b

ལྡན་པར་འགྱུར་རོ། །དེ་དེ་ལྟར་ཤིན་ཏུ་ལེགས་པ་དང་ཡང་དག་པར་ལྡན་པར་གྱུར་པའི་རྒྱལ་པོ་ཆོས་བྱེད་ཀྱི་མཆོག་ནི་འཇིག་རྟེན་འདིར་ཡང་མཆོག་ཏུ་མཛེས་པར་འགྱུར་ལ་ལུས་ཞིག་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་ལས་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །རྒྱལ་པོ་གང་དག་ཆོས་སུམ་ཅུ་རྩ་ལྔ་པོ་དེ་དག་རྣམས་འཛིན་པར་བྱེད་པ་ནི། དེ་དག་གིས་ཀྱང་ལེགས་པར་གཟུང་བར་འགྱུར་རོ། །དེ་ནི་ཡོན་ཏན་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །དེ་ལ་འདི་ནི་བདེ་བ་ནས་ཀྱང་ཆེས་བདེ་བའི་གནས་སུ་འགྱུར་རོ། །དེ་ནས་དེའི་ཚེ་ནམ་མཁའ་ལྡིང་གི་རྒྱལ་པོ་དུས་བཟངས་དེ་གཙུག་ཏོར་ཅན་གྱིས་གསུངས་པའི་ཚིགས་སུ་བཅད་པ་རྣམས་བརྗོད་པ་ཇི་ལྟར། གང་གི་སྐྱེ་བོ་གཙང་མའི་འཁོར། །ཆོས་ལ་སྤྱོད་པ་དབང་པོ་ཐུལ། །རྒྱལ་པོ་ཆོས་བྱེད་བློ་ལྡན་དེ། །མཐོ་རིས་འཇིག་རྟེན་སྐྱེ་བ་ཡིན། །དུས་ནི་ངེས་པར་བྱེད་པ་གང་། །ཆོས་ཀྱིས་ཡོངས་སུ་ལོངས་སྤྱོད་ཅིང་། །འདོད་པ་ལས་གྲོལ་རྒྱལ་པོ་དེ། །འཐབ་བྲལ་རྣམས་ལས་ལྷག་པར་འགྱུར། །བཟོད་ལྡན་སྙན་པའི་ངག་ཅན་གང་། །ཁྲོ་དང་རྒོད་པའང་རྣམ་སྡོམ་པ། །དེས་ནི་ས་ཆེན་བསྐྱང་བྱས་ནས། །ལྷ་འདི་རྣམས་ཀྱི་གཙོ་བོར་འགྱུར། །དག་པ་ཕྱོགས་སུ་ལྷུང་མིན་པ། །གྲོགས་དང་གྲོགས་མིན་གྱིས་མི་འཇོམས། །རྒྱལ་པོ་ཤིན་ཏུ་མཉམ་རྒྱལ་ཕྱིར། །ལྷ་ཡི་འཇིག་རྟེན་དག་ཏུ་རུང་། །རྒན་པོ་ལྷ་ལ་སྤྲོ་བ་ཆེ། །བླ་མ་མཆོད་པ་པོ་ཉིད་དང་། །བརྐམ་ཆགས་མེད་དང་བརྟན་པོའི་བློ། །ལྷ་རྣམས་ནང་ན་ལྷང་ངེའོ། །ཕ་ཡིས་སྔོན་ནི་བྱིན་པ་དང་། །དེ་ཉིད་སླར་ཡང་སྟེར་བ་གང་། །འབྱུང་པོ་རྣམས་ཀྱང་མི་འཚེ་བ། །དེ་ནི་ལྷར་ནི་སྐྱེ་བར་འགྱུར། །སྦྱིན་དང་ཚུལ་ཁྲིམས་རྟག་ཏུ་བསྒྲིན། །ཆོས་སྨྲ་བ་དང་དབང་པོ་ཐུལ། །རྒྱལ་དེས་ས་འདི་ལེགས་བཟུང་ནས། །ལྷ་ཡི་འཇིག་རྟེན་ས་བདག་འགྱུར། །ཆོས་པ་མིན་པ་འཛིན་མི་བྱེད། །ཆོས་པ་ལ་ཡང་དགའ་བར་བྱེད། །དེ་ནི་ཆོས་ཚུལ་ཀུན་དག་པས། །ལྷ་རྣམས་ཀྱི་ནི་མངའ་བདག་འགྱུར། །རྒྱལ་པོ་བུད་མེད་དབང་མི་འགྲོ། །རྟག་ཏུའང་བཟང་པོ་

70-262a

རྣམས་ཀྱི་དབང་། །དྲི་མེད་བློ་གྲོས་སྦྱངས་པ་སྟེ། །ལྷ་ཡི་འཇིག་རྟེན་དག་ཏུ་སྐྱེ། །ཐམས་ཅད་ཚིག་ནི་འཛིན་མི་བྱེད། །འཛིན་བྱེད་བཟང་པོ་རྣམས་ཀྱི་ཚིག །བདུད་རྩི་དེ་ཉིད་ལེགས་འཐུང་བ། །ལྷ་ཡི་རྒྱབ་ཏུ་གནས་པ་པོ། །སྙན་གྲགས་ལ་ནི་འདོད་བྱེད་ཅིང་། །རྫས་ཉིད་ལ་ནི་འདོད་ལྡན་མིན། །འདོད་པའི་དྲི་མ་ལས་གྲོལ་ཏེ། །འཐབ་བྲལ་རྣམས་ཀྱི་མངའ་བདག་འགྱུར། །ལོག་པར་ལྟ་བའི་བློ་མིན་ཞིང་། །དེ་ཉིད་ཀུན་དུ་ལྟ་ལ་དགའ། །ཤིན་ཏུ་ལྟ་དག་མི་གཡོ་བ། །འཐབ་བྲལ་རྣམས་ལས་ལྷག་པར་འགྱུར། །སྦྱིན་དང་ཚུལ་ཁྲིམས་རྟག་ཏུ་ལྡན། །ཤེས་རབ་ཀྱིས་ཀྱང་རྟག་དེ་འགྲོ། །མ་ལུས་ས་ཆེན་རྣམ་རྒྱལ་དེ། །ཕྱི་མར་ལྷ་ཡི་མངའ་བདག་འགྱུར། །རྣ་བ་སྤྲོ་བ་བྱེད་པའི་མཆོག །ངག་ནི་སྙན་པར་གྱུར་པ་ཡིས། །རབ་ཏུ་ཚིམ་བྱེད་ས་བདག་ནི། །ཐ་མར་ལྷ་རྣམས་དག་ཏུ་སྐྱེ། །ངག་གི་སླུ་བ་མེད་པ་གང་། །ལྷུན་པོ་བཞིན་དུ་མི་གཡོ་བ། །བདེན་པའི་ཐེམ་སྐས་ལ་འཛེགས་ནས། །ཐ་མར་དེ་ནི་ལྷ་རྣམས་ནང་། །གཞིས་རྣམས་ལ་ནི་འཕེལ་འགྲིབ་ཏུ། །གློ་བུར་དུ་ནི་མི་བྱེད་གང་། །མཆོག་ཏུ་སྒོ་བྱེད་རྒྱལ་པོ་དེ། །ངེས་པར་ལྷ་ཡི་འཇིག་རྟེན་གནས། །མི་ཡི་ཁྱད་པར་དེ་ཉིད་ཤེས། །སྟོབས་དང་སྟོབས་མིན་ཤེས་པ་གང་། །དེ་ནི་བློ་སྟོབས་ལེགས་ལྡན་པས། །འཐབ་བྲལ་རྣམས་ཀྱི་བདག་པོར་འགྱུར། །གང་ཡང་ཁམས་གསུམ་ཕ་རོལ་གྱུར། །འདིར་ནི་དཀོན་མཆོག་གསུམ་ཞེས་བརྗོད། །མི་བདག་གང་གིས་དེ་མཆོད་པ། །དེ་ནི་ལྷ་ཡི་ནང་དུ་སྐྱེ། །དུས་ངེས་པ་ནི་ལེགས་པར་སྟོན། །སྐྱེ་དགུ་རྣམས་ལ་ཕན་པར་དགའ། །རྒྱགས་དང་ཉམ་ང་བྲལ་བ་ཡི། །དེ་ནི་ལྷ་རྣམས་བདག་པོར་དྲན། །གཉིད་ཀྱི་དྲི་མ་ལས་རྣམས་གྲོལ། །འདུ་འཛིའི་སྐྱོན་ནི་ཡོངས་སུ་སྤངས། །ཤེས་རབ་སྤྱོད་ཡུལ་ཡང་དག་ལྡན། །ངེས་པ་ཁོ་ནར་ལྷ་ཉིད་ཡིན། །ལེ་ལོའི་སྐྱོན་དང་བྲལ་བ་དང་། །རྟག་ཏུ་བརྟན་པ་ཕ་རོལ་གནོན། །དེས་ནི་ཉེས་པའི་ཚོགས་བཅོམ་ནས། །ཕ་རོལ་ཏུ་དེ་མཐོ་རིས་འགྲོ། །གང་ཞིག་གྲོགས་

70-262b

པོ་བརྟན་པ་དང་། །རྟག་ཏུ་ལས་ནི་བྱེད་རྣམས་ཀྱི། །དམ་པའི་གྲོགས་ཀྱིས་ལེགས་ཡོངས་བསྐོར། །རྒྱལ་པོ་ལྷ་ཡི་བདག་པོར་འགྱུར། །གང་གིས་གཡོ་སྒྱུ་ཅན་མི་སྟེན། །གཡོ་སྒྱུ་ཅན་ནི་སྤངས་པས་ཀྱང་། །དེ་ནི་བསྒྲུབ་བྱའི་ཡུལ་ལས་གྲོལ། །ལྷ་རྣམས་ལས་ནི་ལྷག་པར་འགྱུར། །ཁྲོ་དང་རྒོད་བག་རྣམ་པར་སྤངས། །གང་ཡང་སྡིག་ལ་དགའ་མི་འགྱུར། །དེས་ནི་སྡིག་རྫབ་ལེགས་བཀྲུས་ནས། །རྟག་ཏུ་ལྷ་ཡི་བདག་པོར་འགྱུར། །ཟས་དང་སྐོམ་ལ་ཆགས་པ་མིན། །དགེ་བ་རྣམས་ལ་རྟག་ཏུ་ཆགས། །དམ་པ་ཆོས་ལེགས་མཐོང་བ་དེ། །བློ་རབ་རྒྱལ་ནས་ལྷག་པར་མཛེས། །ལེགས་པར་བསམས་པ་སེམས་པར་བྱེད། །དམ་པའི་ཆོས་ལ་འཇུག་པར་བྱེད། །དམ་པའི་ཆོས་ཀྱི་གདམས་ངག་གིས། །ཇི་བཞིན་ལྷ་ཡི་ནང་དུ་འགྲོ། །དོན་སྐོར་མིན་དང་མྱུར་བར་ཡང་། །གང་ཞིག་ཆོས་ཀྱི་རྗེས་སུ་འཇུག །སྡུག་བསྔལ་དེ་ནི་མྱུར་གྲོལ་ནས། །ལྷ་ཡི་འཇིག་རྟེན་དུ་ཉེར་འགྲོ། །མི་བདག་གང་ཡང་ཆོས་ཀྱིས་ནི། །རྟག་ཏུ་སྐྱེ་དགུ་ཡོངས་སྐྱོང་བ། །རབ་ཏུ་བསྔགས་པའི་ཆོས་བྱེད་བདག །ལྷ་ཡི་འཇིག་རྟེན་ས་བདག་འགྱུར། །དགེ་བའི་ཆོས་བཅུ་བདག་གིས་ནི། །གང་བཤད་དེ་ཉིད་མཐོང་བ་ཡིས། །གང་དེ་བྱེད་པའི་བློ་ལྡན་ནི། །ལྷ་ལས་ལྷག་པར་མཛེས་པ་ཡིན། །རྒྱུ་དང་རྐྱེན་ནི་ལེགས་པར་མཐོང་། །ལམ་དང་ལམ་མིན་དེ་བཞིན་ཏེ། །དེ་ནི་ལྟ་བའི་དྲི་བྲལ་ནས། །དེ་བློ་ལྷག་པར་ཁྱད་པར་འགྲོ། །ཇི་ལྟར་འོས་པར་ས་བདག་གི། །ལྷ་གང་དག་ནི་མཆོད་བྱེད་པ། །ལྷ་རྣམས་མཆོད་པས་དེ་ལྟར་ཡང་། །ལྷ་རྣམས་ལས་ནི་ལྷག་པར་འགྱུར། །རྙོག་པ་མེད་པའི་ཡིད་ཀྱིས་ནི། །བུ་དང་བུ་མོ་འཛིན་བྱེད་པ། །རང་གི་ཆུང་མས་ཆོག་ཤེས་དེ། །ལྷ་རྣམས་ཀྱི་ནི་བདག་པོར་འགྱུར། །བྱིས་པ་ཐམས་ཅད་འཕྲོག་བྱེད་པའི། །ཡུལ་རྣམས་གྱིས་ནི་འཕྲོག་མི་འགྱུར། །རྟག་ཏུ་ཚུལ་ཁྲིམས་ཀྱིས་བསྲུངས་པའི། །ཚུལ་ཁྲིམས་ལྡན་དེ་ལྷ་ཡུལ་འགྲོ། །གདུལ་བར་མི་ནུས་རྟག་ཏུ་སྤངས། །སྟེན་པ་གང་ཡང་ཆོས་བྱེད་ལ། །དམ་པའི་ཆོས་སེམས་གཙང་མ་ནི། །ལྷར་འོས་པ་ཡི་ཕུན་ཚོགས་ལྡན། །རིགས་པས་བརྩམས་

70-263a

པའི་ཆོས་ཀྱིས་འདི། །ས་སྐྱོང་བ་ཡི་བདག་པོ་འདི། །ས་གཞི་མ་ལུས་ཀུན་བསྔགས་ནས། །འཐབ་བྲལ་གྱི་ཡང་བདག་པོར་འགྱུར། །དེ་ལྟར་འཐབ་བྲལ་གྱི་མངའ་བདག་དེ་མངོན་པར་མཐོང་ནས་ངང་པའི་རྒྱལ་པོས་དུས་བཟངས་ཀྱིས་སྐྱེ་བ་གཞན་དྲན་པར་གྱུར་པས་དང་སྨོན་ལམ་གྱིས་ཀྱང་དེར་སྐྱེས་པས་ན། གཙུག་ཏོར་ཅན་གྱིས་གསུངས་པ་རྣམས་མུ་སུ་ལུན་དྷ་དེ་ཀུན་ཏུ་དགའ་བར་བྱ་བའི་དོན་དུ་བསྟན་པ་ཡིན་ནོ། །གནས་འདི་ནི་དེ་ལྟར་རྙེད་པ་མ་ཡིན་གྱི་ཆོས་ཆེན་པོའི་ཁྱད་པར་གྱིས་གནས་འདི་འཐོབ་པར་འགྱུར་བ་ཡིན་ནོ། །དེ་ཐོབ་ནས་ཀྱང་གང་དག་བག་མེད་པས་མི་ཕྲོགས་པ་དེ་ནི་ཕྱིས་འགྱོད་པས་གདུང་བར་མི་འགྱུར་རོ། །འཆི་བའི་དུས་ན་ཡང་དམྱལ་བའི་ཕོ་ཉ་བཞིན་རྣམ་པར་སྒྱུར་བར་བྱེད་པ་རྣམས་འདིའི་སྔུན་ན་ངེས་པར་གནས་པར་མི་འགྱུར་རོ། །དེ་འཐབ་བྲལ་གྱི་བདག་པོ་ཁྱོད་ནི་བག་མེད་པ་མ་ཡིན་ཞིང་བག་མེད་པས་རྒྱུ་བ་མ་ཡིན་པས་ཁྱོད་ངའི་སྒྲ་གང་ཐོས་པར་གྱུར་ནས་ཡུལ་རྣམས་ཐམས་ཅད་ཡོངས་སུ་སྤངས་ཏེ། ཆོས་ཉན་འདོད་པས་གདུངས་ནས་འདིར་འོངས་སོ། །གང་དག་སྡུག་བསྔལ་བས་ཆོས་ལ་སྤྱོད་པ་དེ་དག་ནི་བདེ་བར་སྒྲུབ་པ་ཡིན་ལ། གང་དག་བག་མེད་པས་ཡོངས་སུ་ཕྲོགས་པས་ན། ལྷའི་ཡུལ་རྣམས་ལ་ལོངས་སྤྱོད་པར་བྱེད་པ་དེ་དག་ནི་སྡུག་བསྔལ་བ་ཡིན་ནོ། །དེ་ལ་མུ་སུ་ལུན་དྷ་ཁྱོད་འདོད་པའི་དབང་གིས་མི་འགྲོ་བ་གང་ཡིན་པ་དེ་ནི་འདིར་བདེ་བ་ཡིན་ལ། ལྷ་གཞན་ཡང་གང་དག་ཁྱོད་ལ་འཐུན་པས་རྗེས་སུ་འབྲེལ་བ་རྣམས་ནི་མུ་སུ་ལུན་དྷ་དེ་དག་རྣམས་ཀྱང་སྐྱེ་བ་འདི་ལ་དགེ་བའི་བཤེས་གཉེན་བསྟེན་པ་ལས་ན་རྟག་ཏུ་བདེ་བར་འགྱུར་བ་ཡིན་ནོ། །སྡིག་པའི་གྲོགས་པོ་རྣམས་སྟེན་པར་མི་བྱེད་པ་ཡང་སྟེ། དེ་ལ་མུ་སུ་ལུན་དྷ་ཁྱོད་ནི་དེ་དག་ཉིད་བྱེད་པ་ཡིན་པས་ལྷ་འདི་དག་རྣམས་ལ་གཅེས་པར་བྱ་བ་ཡིན་ནོ། །དེས་དེ་དག་རྣམས་གཉི་ག་ཡང་ཇི་ལྟ་བ་བཞིན་དུ་མྱ་ངན་ལས་འདས་པའི་མཐར་ཐུག་པའི་བདེ་བ་རྣམས་འབྱུང་བར་འགྱུར་རོ། །གང་གི་ཕྱིར་ཁྱེད་རྣམས་ཐམས་ཅད་ཀྱང་རང་གི་ས་ལ་འགྲོ་བར་གྱིས་ཤིག །ཁོ་བོ་ཡང་ལྷ་གཞན་གང་དག་བག་མེད་པར་འགྱུར་བ་དེ་དག་རྣམས་ཀྱི་བག་མེད་པ་གདུལ་བའི་དོན་དུ་བདག་གིས་བརྩོན་པ་གང་དག་བྱའོ། །དེ་སྐད་

70-263b

ཅེས་བརྗོད་ནས་རིའི་ཕྲེང་བ་དེའི་ནམ་མཁའ་ལ་འཕགས་པར་གྱུར་ཏོ། །མུ་སུ་ལུན་དྷ་ཡང་དེས་བཤད་པ་ལ་མངོན་པར་དགའ་བར་གྱུར་ནས། ལྷ་རྫས་ཀྱི་ཁང་བཟངས་དེ་ཉིད་ལ་མངོན་པར་ཞོན་ཞིང་། ལྷ་དེ་དག་རྣམས་ཀྱིས་དེ་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །ལྷ་གཞན་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་ལྷ་དེ་དག་རྣམས་ཉིད་ཀྱིས་ཡོངས་སུ་བསྐོར་ནས་རྩེ་མོ་སྟོང་པའི་རིའི་ཕྲེང་བའི་རི་གང་ཡིན་པའི་རི་ལ་རྩེ་བར་བྱེད་དེ། དེ་དག་ཁོ་ན་བཞིན་དུ་བག་མེད་པའི་དུག་གིས་ཀུན་དུ་རྨོངས་པར་གྱུར་ཅིང་། ཡུལ་སྲེད་པས་ཉེ་བར་བཅོམ་པས་ནགས་དང་ཉེ་བའི་ནགས་དང་རྫིང་བུ་དང་པད་མའི་ནགས་དང་། མཚོ་ཆེན་པོ་རྣམས་དང་དེ་ཡང་དཔག་བསམ་གྱི་ཤིང་གི་ནགས་རྣམས་ལ་ཡང་དེ་ཁོ་ན་བཞིན་དུ་ཕན་ཚུན་དུ་གྲོགས་ཀྱི་བྱ་བ་དང་ལྡན་པས་དགའ་བར་བྱེད་དོ། །རྩེ་བར་ཡང་བྱེད་པ་ནི་ལྷ་རྫས་རྔ་སྐད་ཡན་ལག་ལྔ་དང་ལྡན་པ་དཔེ་མེད་པས་ཟས་སྐོམ་གྱི་ཆུ་ཀླུང་རྣམས་ལ་དགའ་བར་བྱེད་དོ། །ལྷ་རྣམས་རྩེ་བ་ཡང་དུས་ཐམས་ཅད་ཀྱི་མེ་ཏོག་དང་། འབྲས་བུ་དང་བྱ་དག་སྒྲ་ཀུན་ནས་སྒྲོགས་པ་ཕུན་སུམ་ཚོགས་པ་རྣམས་ལ་རང་གི་ལས་ཀྱིས་སྤྲུལ་པའི་བདེ་བ་མཆོག་ལ་ཉེ་བར་ལོངས་སྤྱོད་པར་བྱེད་དེ། ཡིད་དུ་འོང་བར་འགྱུར་བ་བྱས་ཤིང་བསགས་པའི་ལས་རྣམས་ཇི་སྲིད་དུ་ཟད་པར་མ་གྱུར་གྱི་བར་གྱི་དུས་དེ་སྲིད་དུའོ། །གང་གི་ཚེ་ཟད་པར་གྱུར་པ་དེའི་ཚེ་ཇི་ལྟར་བྱས་པའི་རང་གི་ལས་རྣམས་ཀྱིས་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་རོ། །གང་ཡང་མི་རྣམས་དང་སྐལ་བ་འཐུན་པར་གྱུར་པ་མི་རྣམས་ཀྱི་ནང་དུ་སྐྱེས་ན། དེ་མཆོག་ཏུ་སྐྱིད་དེ་བར་འགྱུར་རོ། །རྒྱ་མཚོའི་ངོས་རྣམས་སུའམ་འབབ་ཆུ་རྣམས་ཀྱིའམ་ཚོང་པའམ་སེམས་སྟོབས་དང་ལྡན་པ་དང་རྒྱལ་པོ་རྣམས་ཐམས་ཅད་ཀྱིས་ཀྱང་རྒྱ་མཚོའི་ངོས་དེ་ཉིད་ལ་རབ་ཏུ་རྒྱུ་བར་མི་བྱེད་པ་དང་ལོངས་སྤྱོད་ཆེ་བའི་མཆོག་དང་ལྡན་པ་དང་སྐྱེ་བོ་ཐམས་ཅད་ཕུན་སུམ་ཚོགས་པར་འགྱུར་ཞིང་འཐུན་པ་དང་ཡིད་དུ་འོང་བ་དང་ལྡན་པར་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་པ་ན། འཐབ་བྲལ་གྱི་ལྷ་རྣམས་ཀྱི་ས་རྟག་ཏུ་

70-264a

བདེ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་ཤེས་སོ། །དེར་ལས་གང་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་མཐོང་བ་ནི། གང་གིས་སྲོག་གཅོད་པ་དང་མ་བྱིན་པར་ལེན་པ་དག་བྱེད་པར་མ་གྱུར་པ་ནི་སྔ་མ་བཞིན་ཏེ། འདོད་པ་ལ་ལོག་པར་གཡེམ་པ་ཡང་ཐམས་ཅད་དུ་སྤངས་པར་གྱུར་པས་ཅུང་ཟད་ཅིག་ཀྱང་བུད་མེད་ཀྱི་གཟུགས་ལ་མངོན་དུ་ལྟ་བ་དང་སེམས་པར་མི་བྱེད་དོ། །ཡིད་ཀྱིས་ཀུན་དུ་རྟོག་པར་མི་བྱེད་དོ། །ཀྱེ་གཟུགས་འདི་ནི་ཇི་ལྟར་འདོད་ཆགས་དང་བཅས་པ་རྣམས་ལ་མཆོག་ཏུ་སྡུག་པ་ཡིན་ཞིང་། བུད་མེད་ཆེ་གེ་མོ་ནི་མཆོག་ཏུ་བསྟེན་པར་མཛེས་པར་གྱུར་པ་སྟེ། གཟུགས་འདི་ནི་མཆོག་ཏུ་དགའ་བ་ཡིན་ཞེས་པ་འདི་ནི་ཚུལ་བཞིན་མ་ཡིན་པ་ཡིད་ལ་བྱེད་པས་རབ་ཏུ་རྣམ་པར་རྟོག་པར་བྱེད་པ་ཡིན་པ་དང་ཡིད་འདོད་ཆགས་དང་ལྷན་ཅིག་ཏུ་འགྲོགས་པར་གྱུར་པས་དང་། སེམས་ཀུན་དུ་བཅོམ་པས་དང་ལམ་དེར་ཞུགས་པ་ཡིན་པའི་ཡིད་ལ་བྱེད་པ་དེ་ལྟ་བུ་རྣམས་ཀྱི་འདོད་ཆགས་དང་ལྷན་ཅིག་འགྲོགས་པའི་སྡུག་བསྔལ་ཡོང་ཡོངས་སུ་སྤོང་བར་བྱེད་དོ། །བདག་ཉིད་ཀྱི་རྣམས་ཀྱང་ཡོངས་སུ་སྤོང་བར་བྱེད་དེ་སྐྱུག་བྲོ་བ་ཡིན་པར་ལྟ་བར་བྱེད་དོ། །དགའ་བ་སྐྱེད་པར་མི་བྱེད་དོ། །ས་རྣམས་སྐྱེད་པར་མི་བྱེད་པའི་བློ་སྲེད་པར་བྱེད་དོ། །གཞན་དག་རྣམས་ལ་ཡང་དེ་ལྟར་འདོད་པ་ལོག་པར་གཡེམ་པ་ཉེ་བར་སྟོན་པར་བྱེད་དོ། །ལམ་ལ་རབ་ཏུ་འགོད་པར་བྱེད་དོ། །འདོད་པ་རྣམས་ཀྱི་ཉེས་དམིགས་རབ་ཏུ་སྟོན་པར་བྱེད་དོ། །སྲེད་པ་རྣམས་ལ་ཡང་ཀུན་དུ་འདོད་ཆགས་པར་མི་བྱེད་དོ། །དེ་ལྟར་འདོད་པ་ལ་ལོག་པར་གཡེམ་པ་རྣམ་པར་སྤོང་བར་བྱེད་པ་དེ་ནི་ལུས་ཀྱི་ལས་ཀྱི་མཐའ་རྣམས་མཆོག་ཏུ་དག་པ་ཡང་དག་པའི་ལྟ་བ་ཅན་བརྐམ་ཆགས་མེད་པར་འགྱུར་བ་དེའི་ལུས་ཞིག་ནས་ཤི་བའི་འོག་ཏུ་ཡང་མཐོ་རིས་བདེ་འགྲོའི་འཇིག་རྟེན་པ་འཐབ་བྲལ་གྱི་ལྷ་རྣམས་ཀྱི་ས་རྟག་ཏུ་བདེ་བར་སྐྱེའོ། །དེ་ལ་སྐྱེས་པར་གྱུར་པ་དེ་ཡང་སྲིད་པ་བར་མ་དོ་ནས་བཟུང་ནས་དབང་པོ་ལྔ་པོ་རྣམས་སྒྲ་དང་རེག་བྱ་དང་རོ་དང་གཟུགས་དང་དྲི་ཕུན་སུམ་ཚོགས་པས་ཚིམ་པར་བྱེད་དེ། དགེ་བའི་ལས་རྒྱ་ཆེན་པོ་དང་ལས་རྒྱུན་མི་འཆད་པར་བྱས་པས་ལེགས་པར་སྐྱེ་བ་ཡིན་ཏེ། དེའི་རྗེས་

70-264b

ཐོགས་ལ་འདི་སྐྱེ་བའི་གནས་རྣམས་ཀྱང་གསུམ་དུ་སྐྱེ་བར་འགྱུར་བ་ཡིན་ཏེ་རྫུས་ཏེ་སྐྱེ་བ་ལ་འདི་ལྟ་སྟེ། པད་མའི་སྙིང་པོ་ལ་ཡང་སྐྱེ་བར་འགྱུར་བ་དང་ཨུད་པ་ལའི་ཟེ་བའི་དབུས་སུ་དང་མན་དཱ་རའི་མེ་ཏོག་དག་གི་ཡང་དབུས་སུའོ། །དེ་ལ་གང་ཡང་ཨུད་པ་ལའི་ཟེ་བའི་དབུས་སུའམ། མན་དཱ་ར་བའི་མེ་ཏོག་གི་དབུས་སུ་ཡང་སྐྱེས་པར་གྱུར་པ་རྣམས་ནི་དེ་དག་གི་གཟི་བརྗིད་ཀྱིས་དེ་དག་གི་ཁ་དོག་རྣམས་དེ་དག་དང་ཞད་འདྲ་བར་འགྱུར་བ་ཡིན་པ་ལ་གལ་ཏེ་ན་ལེ་བརྒན་ནོ། །གལ་ཏེ་ན་སྔོན་པོའི་འོད་དང་ལྡན་པར་འགྱུར་བ་ཡིན་ནོ། །དེ་བཞིན་དུ་ཁ་དོག་སྣ་ཚོགས་པ་རྣམས་སུ་འགྱུར་རོ། །ཨུད་པ་ལ་དེ་ཇི་ལྟ་བ་ཁོ་ན་བཞིན་དུ་རིན་པོ་ཆེ་བདུན་གྱིས་རྣམ་པར་བཀྲ་བར་གྱུར་པའི་ལུས་སུའོ། །དེ་ལ་ཇི་ལྟར་ན་རིན་པོ་ཆེ་བདུན་གྱིས་རྣམ་པར་བཀྲ་བར་གྱུར་པ་ཡིན་ན། གང་དག་ནི་བཻ་ཌཱུརྱའི་མདོག་གི་སྤུ་དང་དེ་བཞིན་དུ་མིག་འབྲས་དག་ཀྱང་ངོ་། །དངུལ་གྱི་མདོག་གི་སེན་མོ་དང་དམར་པོ་དང་ལྡན་པའི་མདོག་ཅན་མུ་ཏིག་གི་སོ་དང་འཛམ་བུ་ཆུ་བོ་དག་པའི་གསེར་གྱི་མདོག་གི་ལུས་དང་། ཨིན་དྲ་ནཱི་ལའི་མདོག་དང་མཚུངས་པར་གྱུར་པའི་སྤུའི་ཕྲེང་བ་དང་ས་ར་ཀ་འདྲ་བའི་བྱུག་པ་དང་ལྡན་པར་རྣམ་པ་དུ་མར་འདི་ལུས་རྣམ་པར་བཀྲ་བར་བྱས་པ་ནི་ལས་གང་ཡིན་པ་དེས་པད་མའི་སྙིང་པོ་ལས་སྐྱེའོ། །དེ་ལ་དེ་དག་རྣམས་ཕལ་ཆེར་ནི་དེ་དག་དང་མཚུངས་པའི་ཁ་དོག་འཛམ་བུའི་ཆུ་བོའི་གསེར་སྦྱངས་པ་ཡིན་ནོ། །སྐྲ་རྣམས་ནི་ཨིན་དྲ་ནཱི་ལ་དང་མཚུངས་པའི་མདོག་དང་པད་མ་རཱ་ག་དང་ཆ་འདྲ་བའི་མཆུ་དང་མུ་ས་ར་དང་འདྲ་བའི་མིག་འབྲས་དང་། པད་མ་རཱ་ག་དང་ཞད་འདྲ་བའི་སེན་མོ་དང་མཆོག་ཏུ་གནག་པའི་སྤུའི་ཕྲེང་བར་གྱུར་པ་མུ་ས་ར་དང་འདྲ་བ་རྣམས་སོ། །དེ་ལ་ཅུང་ཟད་ཀྱང་མ་མཐོང་བ་རྣམས་དཔེས་གཞལ་བ་ཡིན་ནོ། །གཞན་གང་དག་མན་དཱ་ར་བའི་མེ་ཏོག་གི་ནང་དུ་སྐྱེ་བར་འགྱུར་བ་དེ་དག་རྣམས་ནི་སྣ་ཚོགས་པའི་གཟུགས་དང་ཆ་བྱད་དག་གིས་རྣམ་པར་བཀྲ་བར་བྱས་པར་གྱུར་པ་ཡང་དེ་དག་ལ་བསྟེན་པའི་དབང་གིས་སོ། །དཔེར་ན་ཅུང་ཟད་ཙམ་ཞིག་འདྲ་བར་གྱུར་པ་ནི་གང་ཞིག་མངོན་དུ་ཇི་ལྟ་བ་བཞིན་གྱི་རྣམ་པས་སྲིན་བུ་དག་ཇི་ལྟར་སྙིང་པོར་བརྗོད་པ་ལས་སྐྱེ་བར་འགྱུར་བ་ན་དེ་རྣམ་པ་དེ་ལྟ་བུ་ཉིད་ཀྱི་ཁ་དོག་ཏུ་འགྱུར་རོ། །འདིའི་

70-265a

ཡོན་ཏན་ཡང་བསྟེན་གྲོགས་ཀྱིས་བྱས་པ་ཁོ་ན་ཡིན་ལ། བསྟེན་གྲོགས་ཀྱང་དགེ་བ་དང་མི་དགེ་བར་ཡིན་ནོ། །དེའི་ཕྱིར་ཐམས་ཅད་དུ་བསྟེན་གྲོགས་བྱས་པ་ལས་ཐམས་ཅད་འགྱུར་རོ། །དེ་ལས་སྐྱེས་པའི་ལྷ་དེ་དག་རྣམས་ནི་བདེ་བ་རྒྱ་ཆེན་པོ་རྣམས་ཀྱིས་ཡོངས་སུ་གང་བའི་མཐོ་རིས་ཀྱི་བདེ་བས་འཕེལ་བར་འགྱུར་བ་ན། རབ་ཏུ་རྒྱ་ཆེ་བར་གྱུར་པའི་ལྷ་རྫས་ཕལ་ཆེ་བ་རྣམས་ཀྱིས་ཡུད་ཙམ་ཡུད་ཙམ་ལ་ཡང་དུ་མར་ཤིན་ཏུ་མང་བའི་ལྷ་རྫས་ཀྱི་བྱེ་བྲག་རྣམས་ཀྱི་དེ་དག་རྣམས་ཀྱི་བདེ་བ་རྣམས་ནི་རྣམ་པ་ཐམས་ཅད་ཀྱི་ཐམས་ཅད་དུ་ཕྱོགས་གཅིག་ཀྱང་རྟོགས་པར་བྱེད་པའི་དཔེས་གཞལ་བར་བྱ་བ་དང་བྲལ་བ་ཡིན་ནོ། །དེ་དག་རྣམས་ལས་ཅུང་ཟད་ཅིག་མངོན་པར་བརྗོད་པ་ཡིན་ནོ། །དེ་ཡང་དཔེར་ན་རྒྱ་མཚོའི་ཆུ་རྣམས་ལས་ཐིགས་པ་གཅིག་ཉིད་ཡིན་པ་དེ་བཞིན་དུ་འདི་ཡང་ཡིན་ནོ། །གང་དག་གིས་ལེགས་པར་བྱས་པའི་ལས་རྣམས་བྱས་པར་གྱུར་པ་རྣམས་དགེ་བའི་ལས་རྣམས་ལ་དེ་རྟག་པ་ཁོ་ནར་རབ་ཏུ་སྤྲོ་བར་འགྱུར་བའི་རྒྱུ་གང་གིས་ལེགས་པར་བྱས་པའི་ལས་དང་འབྲས་བུ་དག་རྟོགས་པར་འགྱུར་བ་ཡིན་ནོ། །ཉེ་བར་ལོངས་སྤྱད་པར་བྱ་བ་རྣམས་ལ་མངོན་པར་ཞེན་པས་ཀྱང་ལེགས་པར་བྱས་པའི་ལས་རྣམས་བྱེད་པ་ཡིན་ནོ། །དེ་བཞིན་དུ་ཐར་པ་ལ་ཡང་བརྩོན་པའི་བློ་ཡང་ཡིན་ཏེ། སྲིད་པ་རྣམས་ན་སྡུག་བསྔལ་དུ་མས་མངོན་པར་བཅོམ་པ་རྣམས་དང་སྲེད་པའི་ཡུལ་དག་གིས་ཉེ་བར་བཅོམ་པ་རྣམས་ལ་སྲིད་པ་ན་བདེ་བ་ཅུང་ཟད་ཅིག་ཙམ་ཡང་ཡོད་པ་ཡིན་ནམ། དེ་ལ་རྒྱུ་འདི་དག་གིས་ལེགས་པར་བྱས་པའི་ལས་རྣམས་ཀྱི་འབྲས་བུ་བསྟན་པ་ཡིན་གྱི། འདིར་སྲིད་པ་ལ་མངོན་པར་ཞེན་པར་གྱུར་པ་འདི་ལས་ནི་ལྷ་རྣམས་ཀྱི་བདེ་བ་མངོན་པར་བསྔགས་པ་མ་ཡིན་ནོ། །དེ་ནས་ལྷའི་ས་དེ་དག་ཏུ་སྐྱེས་པའི་ལྷ་རྣམས་ནི་རྟག་པ་ཉིད་དུ་ལྷ་རྫས་ཀྱི་འདོད་པའི་ཡོན་ཏན་ལྔས་རྩེ་བར་གྱུར་པ་དང་། ལྷ་མོའི་འགྲོ་བ་པ་བརྒྱ་སྟོང་རྣམས་ཀྱིས་གླུ་ཉེ་བར་བླངས་པར་གྱུར་པ་རྣམས་ནི་ལྷ་རྫས་ཀྱི་ནགས་དང་ཉེ་བའི་ནགས་དང་མཚོ་དང་མཚོ་བྲན་དག་ཏུ་ཡང་ཉེ་བར་ལེན་པར་བྱེད་དོ། །ཕན་ཚུན་དུ་གྲོགས་སུ་གྱུར་པ་རྣམས་རང་གི་ལས་ལ་ལོངས་སྤྱོད་པ་དང་ལྡན་པས་རི་ངོས་རྣམས་དང་རི་བོ་དང་། མཚོ་

70-265b

བྲན་དང་པད་མའི་རྫིང་བུ་དང་ནགས་དེ་དག་རྣམས་ཀྱི་བདེ་བ་རྒྱ་ཆེན་པོ་རྣམས་ལ་ལོངས་སྤྱོད་པར་བྱེད་པས་ལྷ་དང་ལྷ་མོའི་ཚོགས་ཀྱི་བདེ་བ་དང་ཉེ་བར་ལྡན་པ། རང་གི་འོད་དང་ལྡན་པའི་ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་བ་དེ་དག་རྣམས་དང་དགའ་བར་བྱེད་དོ། །ཡུལ་ནས་ཡུལ་དང་ཉེ་བའི་ནགས་ནས་ཉེ་བའི་ནགས་དང་ཆེས་དགའ་བར་གྱུར་པ་ནས་ཆེས་དགའ་བར་གྱུར་པ་དག་དང་རིན་པོ་ཆེ་བདུན་གྱི་རང་བཞིན་གྱི་རྩེ་མོ་རྣམས་ནས་རིན་པོ་ཆེ་བདུན་གྱི་རང་བཞིན་གྱི་རྩེ་མོ་རྣམས་སུ་འདོད་པའི་སྲེད་པ་རྣམ་པར་ངོམས་པ་མེད་པ་རྣམས་ཀྱིས་རྣམ་པར་རྒྱུ་བར་བྱེད་དོ། །དེ་དག་གིས་སྔ་ན་མེད་པའི་པད་མའི་རྫིང་བུ་མཛེས་པ་རྣམས་རྟག་ཏུ་ལེགས་པར་མཐོང་བ་དང་གླུའི་སྒྲ་རྣམས་ལ་ཡང་ཤིན་ཏུ་ཆགས་པ་དང་། ལྷ་རྫས་ཀྱི་རོ་ལ་མྱོང་བར་བྱེད་པ་དང་ལྷ་རྫས་ཀྱི་གོས་དང་སྨད་གཡོགས་དག་གིས་ཁྱབ་པར་བྱས་པ་དང་། ལྷ་རྫས་ཀྱི་དྲི་ཡིད་ཀྱི་རྗེས་སུ་འཐུན་པ་རྣམས་སྣོམ་པར་བྱེད་པས་ཀྱང་དུས་ཡུན་རིང་བ་ལས་ཀྱང་རིང་བར་འགྲོ་བར་བྱེད་དོ། །འདོད་པ་ཀུན་ནས་སད་པ་དེ་དག་རྣམས་ནི་ཕན་ཚུན་དུ་སྙིང་ཀུན་ནས་ཆགས་པ་རྣམས་ཡིན་ནོ། །ཕན་ཚུན་དུ་སྙིང་ཀུན་ནས་ཆགས་པ་དེ་དག་རྣམས་ལ་འདོད་པ་ལས་ལེགས་པར་སད་པར་བྱེད་པ་ཞེས་བྱ་བའི་བྱ་དག་གིས་ཚིགས་སུ་བཅད་པ་བརྗོད་པ་ཇི་ལྟར། ཐམས་ཅད་ཐམས་ཅད་འབྱུང་ཐམས་ཅད། །ཕུང་པོ་གསུམ་དུ་ངེས་པར་འགྱུར། །བྱིས་པ་རྣམས་ཀྱང་འཁོར་བ་ལ། །ཀུན་ནས་སྐྱོ་བ་སྐྱེ་བའང་མིན། །ཐམས་ཅད་ཐམས་ཅད་དུ་ཐམས་ཅད། །དུ་མའི་ཐབས་ཀྱིས་རབ་བརྩོན་པས། །འཆི་བདག་དུས་ནི་མི་བཟད་པ། །བྱུང་བ་ལ་ནི་སྐྱབས་ཡོད་མིན། །རྒྱུན་ཆད་བདེ་བ་ཐམས་ཅད་རྣམས། །སྡུག་བསྔལ་འབྱུང་གནས་ཆེན་པོ་རྣམས། །འབྲེལ་བ་ཐམས་ཅད་འབྲལ་བྱེད་པ། །འཆི་བདག་ཞེས་ནི་མངོན་པར་བརྗོད། །འབྱུང་གནས་འཇིགས་པར་ཉེར་ཁྲིད་པའི། །སྡུག་བསྔལ་རྣམས་ནི་རྒྱ་མཚོ་མཚུངས། །བློ་རྣམས་རྣམ་པར་རྨོངས་བྱེད་པ། །འཆི་བདག་ཅེས་ནི་འདི་ལ་བརྗོད། །སྲོག་དང་རེ་ཐག་ཀུན་ནས་གཅོད། །དབང་པོ་རྣམས་ཀྱང་འཇིགས་བྱེད་པ། །སེམས་ཅན་ཀུན་གྱིས་བཟློག་མི་ནུས། །

70-266a

འཆི་བདག་ཅེས་ནི་མངོན་པར་བརྗོད། །འབྱུང་པོ་ཀུན་གྱིས་ཐུབ་མིན་དང་། །ལས་རྣམས་ཀུན་གྱིས་རྒྱལ་མིན་པས། །སེམས་ཅན་ཐམས་ཅད་རྣམ་འཇོམས་པ། །འཆི་བདག་ཅེས་ནི་འདི་ལ་བརྗོད། །ངེས་པ་ཁོ་ནར་མྱོང་འགྱུར་དང་། །ལུས་ཅན་ཐམས་ཅད་ལྟུང་བའི་མཐའ། །རིགས་འཐུན་འཇིག་པར་བྱེད་པ་འདི། །འཆི་བདག་ཅེས་ནི་མངོན་པར་བརྗོད། །ལྷར་བཅས་གནོད་སྦྱིན་དྲི་ཟ་དང་། །ཤ་ཟ་ཀླུ་དང་སྲིན་པོ་ཡང་། །དུས་ཀྱི་འཁོར་ལོས་རྣམ་འཇོམས་པ། །འཆི་བདག་ཅེས་ནི་བརྗོད་པ་ཡིན། །མ་བསྡམས་པ་དང་བག་མེད་པ། །ལུས་ཅན་ཀུན་ལ་མེ་དང་འདྲ། །ཁྲོ་བ་ཡང་ནི་ཕྱིར་མི་ཟློག །འཆི་བདག་ཅེས་ནི་འདི་ལ་བརྗོད། །ཕུང་པོ་སྐྱེ་མཆེད་འཇིག་པ་དང་། །ཚེ་དང་དྲོད་དང་ཅི་སྟེ་སེམས། །དུས་ཀྱི་ཆོས་ནི་ཤུགས་པོ་ཆེ། །འཆི་བདག་ཅེས་ནི་བརྗོད་པ་ཡིན། །དེ་ལ་འདི་དག་མྱུར་རྒྱུག་པས། །ལུས་ཅན་རྣམས་ནི་ལོག་པར་འཁྲིད། །དགེ་ལེགས་དག་ནི་འབད་པར་གྱིས། །ཡིད་ནི་བག་མེད་པར་མ་བྱེད། །དེ་ལྟར་དུས་སུ་ལེགས་པར་འབོད་པ་ཞེས་བྱ་བའི་བྱས་བག་མེད་པ་བག་མེད་པར་སྤྱོད་པར་བྱེད་པའི་ལྷ་དེ་དག་རྣམས་ལ་འཆི་བདག་གི་འཇིགས་པ་བདེན་པ་གྱུར་པ་ངེས་པར་མྱོང་བར་བྱ་བ་རྣམས་སྟོན་པར་བྱེད་དོ། །དེ་དག་རྣམས་དེ་ལྟར་ཐོས་པར་གྱུར་ཡང་ལྷ་བག་མེད་པར་སྤྱོད་པ་དེ་དག་རྣམས་ཇི་ལྟར་མ་ཐོས་པ་ཁོ་ན་བཞིན་དུ་སྐྱོ་བར་ཡང་མི་འགྱུར་ཏེ་རང་བཞིན་གྱིས་ཀྱང་དབང་པོ་རྣམས་ནི་གཡོ་བ་ཡིན་ལ། ཁྱད་པར་དུ་ཡང་གང་དག་བདེ་སྐྱིད་ཅན་དེ་དག་རྣམས་ནི་ཆེས་ཀྱང་གཡོ་འགྱུར་ཅན་ཡིན་པའི་ཕྱིར་དང་། ཁྱད་པར་དུ་ཡང་ལྷ་རྣམས་ནི་རྟག་ཏུ་བདེ་བས་རྒྱུ་བ་ཡིན་པའི་ཕྱིར་རོ། །དེ་ལ་རྒྱུ་འདི་དག་གིས་ན་ལྷ་དེ་རྣམས་ལ་ཡང་དག་པ་དང་། དེ་ཁོ་ན་དང་ཕན་པ་དང་སྙིང་པོ་དང་ཇི་ལྟ་བའི་དོན་རྣམས་བརྗོད་པར་གྱུར་པ་ན་ཡང་ཀུན་དུ་རྟོགས་པ་མ་ཡིན་ནོ། །དེ་དག་རྣམས་ལས་ངེས་པར་རྟོགས་པ་དེ་དག་རྣམས་ཀྱང་མི་འཛིན་ཏེ། ཡུལ་གྱི་སྲེད་པའི་དུག་གིས་རྣམ་པར་འཁྲུལ་བར་བྱས་པའི་ཕྱིར་རོ། །དེ་ལ་རྒྱུ་འདིས་ཀྱང་ལྷ་དག་ཡང་དག་པར་གྱུར་པ་རྣམས་མི་འཛིན་ཏོ། །དེ་ལྟར་རྩིས་བཏབ་

70-266b

མ་བྱས་པར་སླར་ཡང་དེ་ཁོ་ན་བཞིན་དུ་རྒྱ་ཆེན་པོ་མངར་མོའི་ཡུལ་གྱི་བདེ་བ་རྣམས་ལ་དགའ་བར་བྱེད་དེ། རྣམ་པ་སྣ་ཚོགས་པའི་བདེ་བའི་ཆུ་བོ་རྣམས་ལ་རྒྱུ་བས་དེ་དེ་བཞིན་དུ་སླར་ཡང་རྔ་སྐད་ཡན་ལག་ལྔ་དང་ལྡན་པའི་འགྱིང་བས་དགོད་ལ་གླུ་དང་རོལ་མོའི་སྒྲ་རྣམས་ཀྱིས་རབ་ཏུ་དགའ་བས་ནགས་དང་ཉེ་བའི་ནགས་ཀྱི་ས་གཞི་རྣམས་ལ་དང་རྫིང་བུ་དང་ཚང་ཚིང་གི་ནགས་རྣམས་ལ་ལྷ་དང་བཅས་ནས་དགའ་བར་བྱེད་དོ། །ལེགས་པར་བྱས་པའི་ལས་རྣམས་ཀྱིས་ཀྱང་འདིར་དགའ་བར་བྱེད་དོ། །དེ་དག་རྣམས་རིན་པོ་ཆེ་རྣམས་ཀྱི་ཡུལ་དུ་མ་རྣམས་ལ་དང་། རིའི་རྒྱབ་རིན་པོ་ཆེ་བདུན་གྱིས་རྣམ་པར་བརྒྱན་པ་རྣམས་ལ་དང་། རྟག་ཏུ་ཁྱད་པར་དུ་དགའ་བའི་བདེ་བས་རྣམ་པར་རྒྱུ་བ་རྣམས་ལ་དང་། འདོད་པ་ཐམས་ཅད་ཕུན་སུམ་ཚོགས་པས་བསྐྱེད་པ་རྣམས་ལ་དང་། མཆོག་ཏུ་སྐྱིད་པ་རྣམས་ལ་ཡང་རྣམ་པ་སྣ་ཚོགས་པར་རྣམ་པར་བཀྲ་བར་བྱས་པའི་ས་གཞིའི་ཆ་དགའ་བར་གྱུར་པ་རྣམས་ལ་དང་། ས་གཞིའི་ཆ་རྣམས་ལ་ཡང་རྟག་ཏུ་སྐྱེད་མོས་ཚལ་དུ་རབ་ཏུ་དགའ་བའི་ཡིད་དང་ལྡན་པ་ཡིན་ནོ། །ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ལྷ་དེ་དག་རྣམས་ཀྱང་ཟས་དང་སྐོམ་གྱིས་རྣམས་སུ་དགའ་བར་བྱེད་པར་འགྱུར་རོ། །འདོད་པ་ཐམས་ཅད་ཕུན་སུམ་ཚོགས་པ་དེ་དེ་ཁོ་ན་བཞིན་དུ་རྣམ་པར་རོལ་བར་གྱུར་པ་ན། སྐྱེད་མོས་ཚལ་གྱི་ལྟད་མོའི་དབང་དུ་བྱས་ནས་ཕན་ཚུན་ལྷན་ཅིག་ཏུ་གྱུར་ནས། གནོད་པ་མེད་པར་དོན་གཅིག་པ་རྣམས་རྟག་ཏུ་ཡང་ཕན་ཚུན་གྱི་རྗེས་སུ་འཐུན་པར་བྱེད་པ་དེ་ལ་སོང་བའི་ཡིད་ཅན་རྣམས་རྔ་སྐད་ཡན་ལག་ལྔ་དང་ལེགས་པར་ལྡན་པར་གྱུར་ནས། ཀུན་དགའ་བར་བྱེད་དོ། །དེ་དག་དགའ་བར་གྱུར་པ་ལས་ནམ་ཞིག་ན་རྣམ་པར་རྒྱས་པ་ཞེས་བྱ་བའི་འཇུག་ངོས་སུ་ཉེ་བར་འགྲོ་བར་བྱེད་དེ། འཇུག་ངོས་དེའི་ཡང་ཉེ་འཁོར་ནི་དཔག་ཚད་བརྒྱ་པའོ། །དེ་དག་ཐམས་ཅད་ཀྱང་རིན་པོ་ཆེ་བདུན་གྱི་རང་བཞིན་གྱི་རྣམ་པར་བཀྲ་བའི་ཆ་ཤས་ཀྱིས་རྣམ་པར་བཀྲ་བས་རེག་པར་བཟོད་པའི་བཻ་ཌཱུརྱའི་ཡུ་བ་ཞེས་རྡོ་རྗེ་ཤིན་ཏུ་ཕྲ་བ་རྣམས་ཀྱི་ཟེ་འབྲུ་ཅན་གྱི་རབ་ཏུ་ཁ་བྱེ་བའི་པད་མ་ཆེན་པོ་རྣམས་ཀྱིས་ཀུན་ཏུ་ཁྱབ་པར་གྱུར་པ་སྟེ། དེ་ཡང་སྔ་ན་མ་མཐོང་བ་དེས་མངོན་པར་མཐོང་ནས་ལྷས་

70-267a

མཆོག་ཏུ་ངོ་མཚར་བར་གྱུར་པའི་ཆེས་དགའ་བའི་མཐོ་རིས་དེ་དག་ལ་ལྷ་དེ་དག་གིས་སྔ་ན་མ་མཐོང་བར་མངོན་པར་མཐོང་ཞིང་དེ་ལས་གཞན་པའི་ངོ་མཚར་བ་རྣམས་དང་མཐོང་ན་མཆོག་ཏུ་དགའ་བ་རྣམས་ཀྱང་མངོན་པར་མཐོང་ནས་ལྷ་དེ་ཕྱིར་ཞིང་ཉིད་དུ་བརྒྱ་འགྱུར་གྱིས་ཀྱང་ཆེས་རབ་ཏུ་དགའ་བའི་ཡིད་ཀྱིས་ཕན་ཚུན་དུ་མངོན་པར་ལྟ་བར་བྱེད་ཅིང་གཡོག་ཡང་བྱེད་པ་ན། ཡུལ་ཅིག་ན་དགའ་བར་གྱུར་པ་དང་། རྣམ་པར་དགའ་བར་གྱུར་པ་ཤིན་ཏུ་ཁ་བྱེ་བར་གྱུར་པའི་པད་མ་ཆེན་པོ་དེ་དག་རྣམས་ཀྱིས་མཐོང་བར་གྱུར་ནས་ཕན་ཚུན་དུ་བརྗོད་པར་ཡང་བྱེད་དེ། ལྷ་དག་ཇི་ལྟ་བ་བཞིན་དུ་འདི་ལ་ལྟ་བར་གྱིས་དང་མཐོ་རིས་མ་ལུས་པ་རྣམས་ལ་འདི་ངོ་མཚར་བར་གྱུར་པ་དང་མཆོག་ཏུ་དགའ་བར་གྱུར་པ་ཡང་ཡིན་ལ། གང་དག་སྔར་ནམ་ཡང་མཐོང་མ་མྱོང་བ་རྣམས་ཀྱི་རྣམ་པ་དེ་སྲིད་དུ་མཐོང་ན་ངོ་མཚར་བར་གྱུར་པ་འོད་ཀྱི་མཆོག་དང་ལྡན་པ་དེ་ན། བུང་བ་རྣམ་པ་དུ་མའི་རིན་པོ་ཆེ་བདུན་གྱིས་རྣམ་པར་བཀྲ་བའི་ལུས་ཅན་རྣམས་ཀྱིས་ཉེ་བར་མཛེས་པར་བྱས་པའོ། །ཁ་བྱེ་བར་གྱུར་པའི་པད་མ་ཆེན་པོ་དེ་ལ་ཡང་ཕན་ཚུན་དུ་བལྟ་བར་སྡུག་པས་ན་པད་མ་ཆེན་པོ་ལ་རྩེད་མོ་རྩེ་བར་བྱེད་དོ། །མཚོ་དེའི་ཉེ་འཁོར་རྣམས་ན་རབ་ཏུ་ཁྱབ་པ་ནི་ཇི་ལྟར་ཅུང་ཟད་ཙམ་པ་རྣམས་ཀྱང་དགེ་ལེགས་སུ་གྱུར་པ་རྣམས་ཡིན་ཏེ། རྣམ་པར་རྒྱས་པའི་མཚོ་ཆེན་པོ་དེའི་ཆུར་ནི་ཅུང་ཟད་ཅིག་མཐོང་ངོ་། །འགྲམ་གྱི་ཉེ་འཁོར་རྣམས་ན་ཡང་མུ་ཏིག་གི་རང་བཞིན་གྱིས་ཁའི་མཚམས་རྣམས་བསྒྲོན་པ་དང་། ཨིན་དྲ་ནཱི་ལ་དང་པད་མ་རཱ་ག་དང་དངུལ་གྱི་རང་བཞིན་གྱི་ཁ་ཁྱེར་དང་ཁ་ཁྱེར་རྣམས་ཀྱི་ཆ་ཤས་རབ་ཏུ་རྣམ་པར་ཕྱེ་བ་ཤིན་ཏུ་བལྟ་བར་སྡུག་པ་དང་ལྡན་པ་ཡིན་ནོ། །འདི་དག་གི་དབུས་ན་ཡང་པད་མ་ཆེན་པོ་གང་ཡིན་པའི་སྙིང་པོ་དང་བཅས་པའི་འཕང་དུ་ནི་དཔག་ཚད་ལྔའོ། །རྒྱར་ནི་དཔག་ཚད་བཅུ་ཡིན་ལ་ལེགས་པར་བྱས་པའི་ལས་བྱས་པའི་ལྷ་རྣམས་ཀྱི་ཇི་ལྟ་བ་འདོད་པ་བཞིན་དུ་རྒྱ་ཆེ་བར་འགྱུར་བ་ནི་མ་གཏོགས་ཏེ། རྒྱ་ཆེ་བའི་དབང་དུ་བྱས་ནས་ནི་ཇི་ལྟར་འདོད་པར་ལྷ་དེ་དག་རྩེ་བར་འགྱུར་བ་དེ་བཞིན་དུ་ཡང་པད་མ་ཆེན་པོ་དེ་ཁ་དབྱེ་

70-267b

བ་དང་འཁུམ་པར་ཡང་འགྱུར་རོ། །ལྷ་རྣམས་ཀྱིས་ཀྱང་ཇི་ལྟར་ཀུན་ཏུ་རྟོག་པར་བྱེད་པ་དང་། གང་ཡང་ཀུན་ཏུ་རྟོག་པར་བྱེད་པ་དང་རྣམ་པ་གང་དག་གིས་ཀྱང་ཀུན་ཏུ་རྟོག་པར་བྱེད་པ་ན་དེ་དག་རྣམས་ཐམས་ཅད་ཀྱང་མཚོ་ཆེན་པོ་དེ་དང་པད་མ་ཆེན་པོ་དག་ལས་རྙེད་པར་འགྱུར་རོ། །དེ་ལྟར་ན་ཡང་མཚོ་ཆེན་པོ་དེ་ནི་ཀུན་བརྟགས་པར་དགའ་བ་ཞེས་བྱ་བ་ཡིན་པ་དང་པད་མ་དེ་ཡང་ཀུན་བརྟགས་པའི་པད་མ་ཞེས་བྱ་བ་ཡིན་ཏེ། དེ་དག་གཉིས་ཀྱི་མིང་ཡིན་ནོ། །དེས་ན་ལྷ་དེ་དག་རྣམས་གང་དང་པོ་ཉིད་ཁོ་ནར་མཚོ་དེ་དང་པད་མ་འདི་ཞེས་དེ་དག་གཉིས་ཀའི་མིང་དུ་བྱེད་པ་ཡིན་ནོ། །དེ་ནས་ལྷ་དེ་དག་རྣམས་ཐོག་མ་ཉིད་ཁོ་ནར་མཚོ་དེ་གང་ཡིན་པ་དེ་མཐོང་བར་གྱུར་ནས། དེ་བརྒྱ་འགྱུར་གྱིས་ལྷག་པར་ཆེས་རབ་ཏུ་དགའ་བར་འགྱུར་བའི་ཡིད་ཀྱིས་མཚོ་དེའི་འགྲམ་དུ་གར་བྱེད་པ་དང་འགྱིང་བག་ཀྱང་བྱེད་དོ། །གླུ་ཡང་ལེན་པར་བྱེད་དོ། །ཕན་ཚུན་གཡོག་བྱེད་པར་གྱུར་ཅིང་རྔ་སྐད་ཡན་ལག་ལྔ་དང་ལྡན་པས་དེ་ལྟར་ལྷ་རྫས་ཀྱི་འདོད་པ་རྣམས་ལ་ཉེ་བར་ལོངས་སྤྱོད་པར་བྱེད་དོ། །རང་གི་ལེགས་པར་བྱས་པའི་ལས་བྱས་པ་དེ་དག་རྣམས་མཚོ་ལ་དུས་དེ་སྙེད་དུ་རྩེད་མོ་བྱས་ནས་ཕྱིས་ཉིད་ཀྱང་མྱོས་པའི་སྐྱོན་རྣམས་དང་བྲལ་བ་དང་མྱོས་པའི་ཡོན་ཏན་རྣམས་དང་ལྡན་པའི་བཏུང་བ་དག་འཐུང་བར་བྱེད་པ་རྣམས་ལ་ཇི་ལྟར་འདོད་པ་བཞིན་དུ་བསིལ་བ་དང་ཇི་ལྟར་འདོད་པའི་དྲི་རྣམས་དང་། ཇི་ལྟར་འདོད་པའི་ཁ་དོག་རྣམས་དང་ཇི་ལྟར་འདོད་པ་བཞིན་གྱི་སྣོད་ཀྱི་དབྱིབས་དང་རིན་པོ་ཆེའི་རང་བཞིན་གྱི་ཡོན་ཏན་རབ་ཀྱི་མཆོག་གིས་ཀུན་ནས་གང་བའི་བཏུང་བའི་མཚོ་ཆེན་པོ་དེ་ཉིད་ཀྱི་དྲུང་ནས་བྱུང་ནས། མ་ལུས་པ་རྣམས་ལ་འགྲོ་བར་བྱེད་པ་དང་གང་དག་ཡིན་པའི་ལྷ་དེ་དག་རྣམས་འཐུང་བར་བྱེད་དོ། །གཞན་ཡང་ཐག་ཉེ་བ་ན་གནས་པའི་ལྷ་གཞན་དག་རྣམས་ཀྱང་མཚོ་ཆེན་པོ་དེ་ཉིད་དུ་སོང་ནས་གར་བྱེད་པར་གྱུར་པ་ན། བདུད་རྩིའི་ཁུ་བ་དག་ལྷ་རྫས་ཀྱི་དྲི་དང་རོ་དང་རེག་བྱ་དང་ཁ་དོག་མཆོག་དང་ལྡན་པ་རྣམས་དེ་དག་གིས་མཐོང་བར་གྱུར་ནས། དེ་དེ་དག་རྣམས་ལ་དགའ་བའི་ཡིད་ཀྱིས་རྩེ་བར་བྱེད་དེ། ཟས་བཟའ་བར་འདོད་པས་དེ་དེ་དག་རྣམས་ཀྱི་དྲུང་དུ་ཉེ་

70-268a

བར་ཕྱིན་ནས་བདུད་རྩི་དེ་དག་མིད་པར་བྱེད་དོ། །དེ་ཡང་ལག་ཏུ་བླངས་ནས་སམ་སྣོད་དུ་བཅུག་ནས་ཀྱང་རུང་སྟེ། ཇི་ལྟར་ལས་ཀྱི་རྗེས་སུ་འཐུན་པའི་ཆ་འདྲ་བ་རྣམས་ཡིན་ནོ། །དེ་དག་མིད་པར་གྱུར་ནས་སླར་ཡང་གང་ཁོ་ན་མཚོ་དེ་ཉིད་ཡིན་པ་དེར་ཉེ་བར་ལེགས་པར་ཕྱིན་པ་ན། དེས་མཐོང་བ་ནི་པད་མ་ཆེན་པོ་དེའི་འོད་ཟེར་རྣམས་དང་ལྡན་པ་ཡང་ཉི་མ་བརྒྱ་སྟོང་རྣམས་པས་ཆེས་ལྷག་པར་འབར་བར་གྱུར་པ་གང་ལ་མཐོ་རིས་ཀྱི་རིན་པོ་ཆེའི་འོད་རྣམས་ཐམས་ཅད་ཀྱིས་བཅུ་དྲུག་ཆར་ཡང་མི་ཕོད་པ་ཡིན་ནོ། །དེ་ནས་ལྷ་དེ་དག་གིས་པད་མ་ཆེན་པོ་དེ་ཀུན་ནས་མངོན་པར་མཐོང་བས། མཆོག་གི་རབ་ཏུ་དགའ་བའི་ཡིད་ཀྱིས་ལྷའི་ཚོགས་རྣམས་ཀྱིས་ཡོངས་སུ་བསྐོར་ནས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་ཅིང་མཚོ་ཆེན་པོ་རྣམ་པར་རྒྱས་པ་དེའི་ཉེ་འཁོར་རྣམས་ཀུན་དུ་ཡོངས་སུ་འཆག་གོ། །དེ་དག་རྣམས་ཇི་ལྟ་ཇི་ལྟར་ཡོངས་སུ་འཆག་པར་བྱེད་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་མཆོག་ཏུ་བལྟ་ན་སྡུག་པ་རྨད་དུ་བྱུང་བའི་ཁྱད་པར་གཞན་རྣམ་པ་སྣ་ཚོགས་པ་རྣམས་མཚོ་དེ་དག་ཏུ་ལེགས་པར་མཐོང་ངོ་། །པད་མ་ཆེན་པོ་དེའི་རྣམ་པ་དེ་ལྟ་བུ་རྣམས་གང་ཞེ་ན། འདི་ལྟ་སྟེ་དགའ་བར་གྱུར་པ་དང་། ངོ་མཚར་བར་གྱུར་པ་རྣམས་ལ། ཁ་ཅིག་ནི་པད་མ་ཆེན་པོ་འདིའི་སྟེང་ན་མདོག་དང་དབྱིབས་སྣ་ཚོགས་པའི་བུང་བ་རྣམས་ཏེ། རིན་པོ་ཆེ་བདུན་གྱི་རང་བཞིན་གྱི་གཤོག་པ་ཅན་གྱི་བུང་བ་དང་བུང་བ་མོ་དག་ལྷན་ཅིག་ཏུ་དགའ་བར་སྤྱོད་དོ། །དེ་ཁོ་ན་བཞིན་དུ་རིན་པོ་ཆེ་བདུན་གྱི་རང་བཞིན་གྱི་བུང་བ་མོ་དེ་དག་དང་བུང་བ་དེ་དག་རྣམས་ལྷན་ཅིག་ཏུ་མེ་ཏོག་གི་རྩི་དཔེ་མེད་པའི་རང་བཞིན་གྱི་པད་མའི་རྩི་རྣམས་འཐུངས་པར་གྱུར་པ་ན་དེ་ཚིགས་སུ་བཅད་པ་བརྗོད་པ། ཇི་ལྟར། རྣམ་པ་སྣ་ཚོགས་ལས་བསྐྱེད་པའི། །སྣ་ཚོགས་འབྲས་དང་ཡང་དག་ལྡན། །གང་འདི་བཀྲ་བར་འགྲོ་བ་ཡི། །སེམས་ཀྱིས་ཇི་ལྟར་ལེགས་འདོད་བཞིན། །ཐམས་ཅད་སེམས་ཀྱིས་བཀྲ་བར་བྱས། །རྣམ་པར་བཀྲ་བར་རྟེན་པར་བྱེད། །ལས་ཞིག་ནས་ནི་རྣམ་འཇིགས་པ། །རིང་པོ་མིན་པར་འབྱུང་བར་འགྱུར། །

70-268b

དཔེ་མེད་པ་ཡི་བདེ་བ་འདི། །གལ་ཏེ་ལྷ་རྣམས་ཀྱིས་མཐོང་བ། །མི་རྟག་ཐབས་འོག་ཉིད་དུ་ནི། །རིང་པོ་མིན་པར་ཚུད་པར་འགྱུར། །དབུ་བ་དང་ནི་ཆུའི་ཆུ་བུར། །འདི་ནི་སྨིག་རྒྱུའི་མདོག་མཚུངས་པའོ། །རབ་ཏུ་རྣམ་འཇིག་བདེ་བ་ཀུན། །ལོག་ལྟུང་མཐར་ནི་འགྲོ་བར་འདོད། །བཟློག་ཐབས་མེད་དང་མི་བཟད་པའི། །འབྱུང་པོ་ཐམས་ཅད་འཇིག་བྱེད་པ། །བཟློག་པར་མི་ནུས་ཤུགས་ཅན་འདིར། །འཆི་བདག་རྒྱལ་པོ་རྒྱུག་པར་བྱེད། །བདེ་བ་ཐམས་ཅད་འཇོམས་པ་དང་། །གསོན་པ་ཡང་ནི་བཅོམ་ནས་ནི། །ཀུན་རྟོག་ལས་ཀྱིས་བཅིངས་པ་ཡི། །འཇིག་རྟེན་གཞན་དུ་འཁྲིད་པར་འགྱུར། །མི་རྣམས་ཀྱི་ནི་འདས་དེ་གང་། །དེ་ནི་བདེ་བར་རྟོག་པ་མེད། །གང་ཡང་བདེ་བ་འདོད་གྱུར་པ། །དེ་ཡང་ཅུང་ཟད་བགྲང་མི་བྱེད། །སྲེད་པའི་དུག་དང་འདྲེས་པ་ཡི། །དེ་ལྟ་བ་ཡི་བདེ་བ་གང་། །དེ་ཀུན་ལོག་པར་ལྟུང་བའི་མཐས། །འདུས་བྱས་མི་རྟག་གཡོ་བ་ཡིན། །འཇིག་རྟེན་གསུམ་གྱི་བདེ་བ་གང་། །དེ་ཉིད་གཟིགས་པས་བསྔགས་མི་མཛད། །དེ་ཡིས་ཇི་ལྟར་ལྷ་རྒྱགས་འགྱུར། །དོན་མེད་པ་དང་བྲལ་བར་གྱིས། །ལུས་འདི་རིང་མིན་ན་ཉམས་པར། །འདི་ནི་མྱུར་བར་རྒྱུག་པར་འགྱུར། །ཤིང་སྐོམ་ལ་ནི་མེ་བཞིན་དུ། །ལྷ་གང་གིས་ནི་ཆོས་སྲེག་པ། །བདེ་བ་ཐམས་ཅད་ཤིན་ཏུ་ལྟུང་། །དགེ་ལེགས་ཡིད་ནི་བྱ་བར་གྱིས། །འཆི་བདག་དུས་ནི་བྱུང་གྱུར་ན། །ཕྱི་ནས་འགྱོད་པར་མ་བྱེད་ཅིག །སྐྱེ་བ་གཞན་ཡང་སྟོང་ཕྲག་ལ། །ལས་ཀྱིས་བདེ་བ་གང་བྱུང་བ། །དེ་དག་གར་སོང་རྨི་ལམ་བཞིན། །བདག་ཅག་འཇིག་པའི་མཐའ་མིན་ནམ། །ཤིང་སྐོམ་མེ་ནི་ཇི་ལྟ་བར། །བྱིས་རྣམས་བདེ་བས་ཚིམ་པ་མིན། །དེ་ཕྱིར་བདེ་ལ་ཆགས་པ་ཡིས། །བདེ་བ་མཐར་ཐུག་འགྱུར་མ་ཡིན། །སྐོམ་པའི་སྐྱོན་ལ་ཆགས་པ་ནི། །འདོད་པའི་སྐྱོན་རྣམས་རྗེས་སུ་འདྲེན། །བསམ་གཏན་པ་ཡང་བག་ཡོད་པའི། །དེ་ཡི་བདེ་གང་རྙོག་པ་མེད། །དེ་ཐོབ་ཤིན་ཏུ་བདེར་འགྱུར་གྱི། །སྲིད་པ་ལས་སྐྱེས་བདེར་མི་འདོད། །སྦྲང་རྩི་དང་བསྲེས་

70-269a

སྲེད་ཇི་ལྟར། །དེ་ལྟར་བདེ་བ་སྲིད་བདེ་ཡིན། །དེ་ཕྱིར་བདེ་ལ་ཆགས་པ་དང་། །རྟག་ཏུ་འདོད་པ་བཙལ་མི་བྱ། །བདེ་བ་ཤིན་ཏུ་མཐར་ཐུག་ཡིན། །དེ་ཕྱིར་འདོད་པ་ཞི་བ་མིན་ཞེས་བྱའོ། །དེ་ལྟར་བུང་བ་དེ་དག་རྣམས་ཀྱིས་མངོན་དུ་ཕྱོགས་ནས་ལེགས་པར་གནས་པའི་ལྷ་དེ་དག་རྣམས་ལ་ལེགས་པར་བྱས་པའི་ལས་ཀྱིས་ཀུན་ནས་བསྐུལ་བ་བརྗོད་པ་ཡིན་ནོ། །ལྷ་དེ་དག་རྣམས་ཀྱིས་དེ་དག་གིས་བཤད་པ་དེ་ལ་རྩིས་བགྲང་མ་བྱས་པར་སླར་ཡང་མཚོ་དེ་ལྟ་བར་བྱེད་པ་ལ་ཤིན་ཏུ་སྤྲོ་བ་དང་། དེ་ལ་སོང་བའི་ཡིད་ཀྱིས་ལྷན་ཅིག་སྤྱོད་པའི་འཁོར་རྣམས་དང་བཅས་ནས་དགའ་བར་གྱུར་པ་དང་རྩེ་དགའ་བར་གྱུར་པ་དང་དགོད་པར་གྱུར་པ་དང་གླུ་ལེན་པར་གྱུར་པས་ཀྱང་ཡོངས་སུ་སྤྱོད་པར་བྱེད་དོ། །དེ་དག་རྣམས་ཀྱིས་དེའི་ཚེ་དུས་རིང་དུ་རྩེད་མོ་རྩེས་ནས། གཞན་ཡང་མཚོ་དེ་ལྟ་བར་བྱེད་པ་ལ་ཀུན་ནས་མངོན་དུ་ཕྱོགས་པས་ཕན་ཚུན་གྲོགས་སུ་གྱུར་པས། མཚོ་དེ་རྒལ་བར་བྱེད་དོ། །པད་མ་ཆེན་པོ་དེ་གཙང་མར་གྱུར་པ་དང་། འབྱུང་བ་ཆེན་པོ་ཡང་བའི་དབང་གིས་དང་ལས་རྣམས་ཀྱི་མཐུས་ཀྱང་ཡོངས་སུ་རྣམ་པར་རྒྱུ་བ་ཡིན་ནོ། །རང་གི་ལས་ཀྱིས་འགྲོ་བར་བྱེད་པ་དེ་དག་རྣམས་པད་མའི་འདབ་མ་གཞན་ལ་འཆེལ་ཞིང་ཆགས་པར་གྱུར་པའི་ཁ་དོག་དུ་མ་རྣམ་པར་བཀྲ་བའི་ཆ་ཤས་དུ་མས་རྣམ་པར་བཀྲ་བར་བྱས་པ་རྣམས་ལ་ཞེན་པར་གྱུར་ཅིང་ལྷ་རྣམས་དགའ་བར་བྱེད་དེ། ལྷན་ཅིག་སྤྱོད་པ་རྣམས་དང་བཅས་པས་པད་མའི་འདབ་མ་གཞན་དག་གི་ནགས་རྣམས་སུ་ཡང་ལྷན་ཅིག་རྩེ་བར་བྱེད་དོ། །ཀུན་དུ་འཆེལ་བའི་ལྷ་དེ་དག་རྣམས་ཉིད་དང་འདབ་མ་རྣམས་ལ་ཀུན་ཏུ་འཛེག་པར་བྱེད་པའི་ལྷ་དེ་དག་རྣམས་དང་ལྷ་དེ་དག་རྣམས་ཇི་ལྟ་བ་བཞིན་དུ་དེ་ལྟར་ཡང་པད་མའི་འདབ་མ་དེ་དག་ཁ་འབྱེ་བར་འགྱུར་རོ། །དགེ་བའི་ལས་རྣམས་ཀྱི་རྐྱེན་གྱིས་པད་མ་ཆེན་པོ་དེ་ཡང་དེ་ཁོ་ན་བཞིན་དུ་ཁ་འབྱེའོ། །སྙིང་པོ་ཡང་དེ་བཞིན་དུ་ཇི་སྲིད་དཔག་ཚད་ཉིས་བརྒྱར་འགྱུར་བ་དང་། དེ་བཞིན་དུ་གསུམ་དང་དེ་བཞིན་དུ་བཞི་དང་དེ་བཞིན་དུ་ལྔ་དང་དེ་བཞིན་དུ་དྲུག་ཏུ་ཡང་འགྱུར་ཏེ། དེ་བཞིན་དུ་དགུ་དང་དེ་

70-269b

ལྟར་ཇི་སྲིད་དུ་དཔག་ཚད་སྟོང་གི་བར་དུ་ཡང་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་འགྱུར་རོ། །སྙིང་པོ་དེ་ཡང་དེ་ཁོ་ན་བཞིན་དུ་ཁ་འབྱེ་སྟེ། ཇི་སྲིད་དུ་དཔག་ཚད་བརྒྱའི་བར་དུ་ཁ་འབྱེའོ། །མཐུ་སྟོབས་འདི་དག་ནི་པད་མ་ཆེན་པོ་དེའི་ཡིན་ནོ། །འདི་ལ་ལྷན་ཅིག་སྤྱོད་པ་དང་བཅས་པའི་ལྷ་དེ་དག་རྣམས་ཐམས་ཅད་སོ་སོ་སོ་སོར་འདབ་མ་གཞན་ལ་སོང་ནས་དགའ་བར་བྱེད་པ་དང་རྩེ་བར་ཡང་བྱེད་པ་ན་དེ་དག་རྣམས་ཀྱང་ཁ་འབྱེའོ། །དེ་ནས་རྩེ་བར་བྱེད་པའི་ལྷ་དེ་དག་རྣམས་ཉིད་འདི་སྙམ་དུ་སེམས་ཏེ། བདག་ཅག་རྣམས་རྩེ་བར་བྱེད་པས་འདི་ལྟར་རྣམ་པར་རྒྱུ་བ་ཉིད་ལ་གཞན་ཡང་གནས་འདི་ཉིད་ན་བཟའ་བའི་ཀླུང་དང་བཏུང་བའི་ཀླུང་རོ་བཟང་པོ་དང་ལྡན་པ་རྣམས་འབྱུང་བར་འགྱུར་མོད། དེ་ནས་སེམས་བསྐྱེད་པ་ཙམ་ཉིད་ན་དེ་དག་རྣམས་ཉིད་གནས་པའི་སར་བཟའ་བའི་ཀླུང་དང་བཏུང་བའི་ཀླུང་དེ་དག་ཀྱང་པད་མའི་ནང་གི་འདབ་མ་དེ་ཉིད་ལ་རབ་ཏུ་འབྱུང་བར་འགྱུར་རོ། །དེ་དག་ཉིད་འདི་སྙམ་དུ་སེམས་པར་གྱུར་ཏེ། བདག་ཅག་གི་བཏུང་བ་དང་ཁ་ཟས་འདི་དག་ལ་ལྟོས་དང་ཟེར་ནས་དེ་དག་ལྷ་དག་དང་ལྷན་ཅིག་ཏུ་བདུད་རྩི་ཟ་བར་བྱེད་དོ། །དེ་ནས་ལྷ་དེ་དག་རྣམས་དུས་རིང་དུ་འདའ་བར་བྱེད་དོ། །འདས་ནས་ནི་འདི་ཉིད་དུ་རྣམ་པར་གནས་པའི་བདག་ཅག་རྣམས་ལ་ཡང་འདབ་མའི་བར་རྣམས་ཉིད་ལས་རྩེད་མོའི་ནགས་འདི་དག་རྣམས་ཀྱང་ལེགས་པར་འབྱུང་བར་གྱུར་ཅིག །དེ་ནས་སེམས་བསྐྱེད་པ་ཙམ་ཉིད་ན་ལེགས་པར་བྱས་པའི་ལས་རྣམས་ཀྱི་ནགས་དེ་དག་རབ་ཏུ་འབྱུང་བར་གྱུར་པ་ནི། རིན་པོ་ཆེ་བདུན་གྱིས་རྣམ་པར་སྤྲས་པའི་ལྗོན་ཤིང་རྣམས་ལ་སྣ་ཚོགས་པའི་བྱ་རྣམས་ཀྱིས་སྒྲའི་ཁྱད་པར་བརྗོད་པས་དགའ་བར་གྱུར་པ་འཁྲི་ཤིང་ཀུན་ནས་དུད་པའི་ཁང་པ་རྣམ་པར་རྒྱས་པ་དང་། མེ་ཏོག་དང་འབྲས་བུ་དང་ལོ་ཏོག་རྣམས་ཕུན་སུམ་ཚོགས་པས་དུས་དང་ནམ་ཟླ་ཐམས་ཅད་དུ་དགའ་བར་གྱུར་པ་དང་། ཁྱད་པར་དུ་རྣམ་པ་སྣ་ཚོགས་པ་དགའ་བར་གྱུར་པའི་ཆུ་ཀླུང་དང་འབབ་ཆུ་དང་། ཤིན་ཏུ་བལྟ་བར་མཛེས་པའི་ཆུ་ཚག་ཚིག་དང་རྣམ་པ་སྣ་ཚོགས་པའི་འབབ་ཆུ་དང་ཆུ་བཤལ་དག་གི་སྒྲ་འུར་འུར་

70-270a

ཟེར་བ་རྣམས་ཆེས་དགའ་བར་གྱུར་པ་རྣམས་དང་། ཤིན་ཏུ་རྣམ་པར་ཕྱེ་བའི་ས་གཞིའི་ཆ་ཤས་རྣམས་ལ་རྣམ་པ་དུ་མ་སྣ་ཚོགས་པའི་དྲི་དང་ཚད་དང་དབྱིབས་དང་ལྡན་པའི་མེ་ཏོག་རྣམས་ཉེ་བར་སྐྱེས་པར་གྱུར་པ་ལ། འདི་ལྟ་སྟེ་ཆུ་ལས་གྱུར་པའི་མེ་ཏོག་དེར་སྐྱེས་པ་ན། འདི་ལྟ་སྟེ། ཨུད་པ་ལ་སྔོན་པོ་དང་ཀུ་མུ་ད་དང་། ཨ་མ་ལཱ་ནཱ་དང་ནཱི་ཏཱ་ན་དང་ལེགས་པར་སྤྲས་པ་དང་འདབ་མ་བརྒྱ་པ་དང་གཡོ་བ་མེད་པ་དང་ཕུན་སུམ་ཚོགས་པ་དང་། ལ་བ་ལ་དང་ཁོར་ཡུག་དང་འདྲ་བ་དང་འོད་སྣང་བ་དང་བུང་བའི་མིག་དང་མཚུངས་པ་རྟག་པར་རྣམ་པར་བཀྲ་བ་དང་། ཨིན་དྲ་ནཱི་ལའི་མདོག་དང་མེ་ཏོག་རྣམས་ཐམས་ཅད་ཐམས་ཅད་དུ་སྐྱེས་པ་དེ་ལྟ་བུ་རྣམས་ལ་སོགས་པའི་ཆུ་ལས་སྐྱེས་པར་གྱུར་པའི་ལྷ་རྫས་ཀྱི་མེ་ཏོག་རྣམས་ཀྱིས་ཉེ་བར་མཛེས་པར་བྱས་པའི་ནགས་རྣམས་རབ་ཏུ་འབྱུང་ངོ་། །དེ་བཞིན་དུ་ཐང་ལས་སྐྱེས་པར་གྱུར་པའི་མེ་ཏོག་རྣམས་མདོག་དང་དབྱིབས་སྣ་ཚོགས་པར་དགའ་བར་གྱུར་པའི་མེ་ཏོག་གིས་ཉེ་བར་མཛེས་པར་བྱས་པ་རྣམས་པད་མ་ཆེན་པོའི་འདབ་མའི་གསེབ་ཏུ་ཞུགས་པའི་ལྷ་རྣམས་ལ། པད་མ་ཆེན་པོ་ཉིད་ཀྱི་ནགས་ལས་ལེགས་པར་སྐྱེས་པའི་མེ་ཏོག་རྣམས་ཁ་ཅིག་ནི་འདི་ལྟ་སྟེ། བདེ་བའི་འོད་ཟེར་འཐབ་བྲལ་བ་རྣམས་ཀྱིས། བོས་པར་གྱུར་པ་ན་འོང་བ་གང་གི་ཚེ་བོས་པ་ཉིད་ན་ལྷ་མོ་རྣམས་ཀྱི་དྲུང་དུའམ། ལྷ་རྣམས་ལ་ཡང་རྟག་པར་རབ་ཏུ་དྲངས་པས་ཁ་བྱེ་བར་གྱུར་པའི་མདོག་གིས་འོང་བར་གྱུར་ཏེ། དཔག་ཚད་བརྒྱར་དྲི་འབྱུང་བར་བལྟ་ན་སྡུག་ཅིང་དགའ་བར་གྱུར་པ། ཁ་དོག་སྣ་ཚོགས་པ་རྣམས་ལེགས་པར་ཁ་བྱེ་བ་དུས་ཐམས་ཅད་དུ་རབ་ཏུ་རངས་ཤིང་གང་བར་རྒྱས་པ། འདབ་མ་དང་ཟེ་བ་རྣམས་འཇོམ་པས་རེག་ན་ཤིན་ཏུ་བདེ་བ་འོད་ཟེར་ཐམས་ཅད་ཀྱིས་རྣམ་པར་བརྒྱན་པ། ས་གཞི་ལ་བལྟ་བས་ངོམས་པ་མེད་པ་འདོད་པ་བཞིན་དུ་དགའ་བ་རྣམ་པ་དེ་ལྟ་བུའི་ཐང་ལས་སྐྱེས་པའི་མེ་ཏོག་རྣམས་རབ་ཏུ་འབྱུང་ངོ་། །ཡང་ནགས་རྣམས་ལ་ལྗོན་ཤིང་ལས་གྱུར་པའི་མེ་ཏོག་རྣམས་ནི། འདི་ལྟ་སྟེ་མན་དཱ་ར་བའི་མེ་ཏོག་ཀྱང་བཏོག་པར་སླ་བ་དང་རེག་བྱ་དང་རོ་དང་དྲི་དང་ཁ་དོག་ཀྱང་དགའ་བར་གྱུར་པ་དང་ཀེ་ཏ་ཀ་དང་

70-270b

ཙམ་པ་ཀའི་མེ་ཏོག་དང་ཀླུ་གཞོན་ནུའི་ལྕེ་དང་རྙིང་པ་དང་གསར་པའི་མ་ལི་ཀ་དང་ཡིད་བདེ་བ་དང་འོད་བྱེད་པ་དང་། དྲིས་ཚིམ་པར་བྱེད་པ་དང་ཐམས་ཅད་ལས་དགའ་བར་གྱུར་པའི་རིའི་ཕྲེང་བ་དང་རྩེ་མོ་དགའ་བར་གྱུར་པ་རྣམས་ལས། རྣམ་པ་དེ་ལྟ་བུའི་མེ་ཏོག་དང་ཤིང་ལྗོན་པ་དང་འཁྲི་ཤིང་དང་ཤིང་གེལ་པ་རྣམས་ལས་རབ་ཏུ་སྐྱེས་ཤིང་ལེགས་པར་བྱུང་བར་གྱུར་པ་ནི། པད་མའི་ནང་གི་འདབ་མ་རྣམས་ལ་ཞུགས་ནས་རྩེ་བར་གྱུར་པའི་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱི་མཐུ་ལས་ཡིན་ནོ། །དེ་ནས་ལྷ་དེ་དག་ལྷན་ཅིག་སྤྱོད་པའི་འཁོར་དང་བཅས་པ་རྣམས་ནགས་དེ་དག་རྣམས་དང་པད་མའི་ཚལ་གྱི་འདབ་མའི་ནང་དུ་སོང་ནས་དེ་ལྟར་དགའ་བར་བྱེད་པ་དང་རྩེ་བར་ཡང་བྱེད་པའི་མཐུ་སྟོབས་འདི་ནི། པད་མ་ཆེན་པོའི་ནགས་དེ་དང་པད་མའི་ནགས་དེ་དང་རྣམ་པར་རྒྱས་པའི་མཚོ་དེའི་ཡང་ཡིན་ཏེ། ཀུན་བརྟག་པར་རྣམ་པར་ཁ་བྱེ་བ་དེའི་ཡིན་ནོ། །དེ་ལྟར་ལྷ་དེ་དག་རྣམས་པད་མ་ཆེན་པོའི་འདབ་མའི་ནང་དུ་སོང་ནས་དུས་རིང་དུ་དགའ་བར་བྱེད་པ་དང་ལྷ་རྫས་ཀྱི་འདོད་པའི་ཡོན་ཏན་ལྔ་དང་ཉེ་བར་ལྡན་པས་རྩེ་བར་ཡང་བྱེད་དོ། །དེ་ནས་དེ་ལྟར་རྩེ་བར་བྱེད་པ་དེ་དག་རྣམས་དེ་ལྟར་པད་མ་ཆེན་པོའི་འདབ་མའི་ནང་དུ་སོང་བ་རྣམས་འདི་སྙམ་དུ་སེམས་ཏེ། གང་མ་ཐང་ཡང་བདག་ཅག་འདི་ན་གནས་ནས་རྩེད་མོས་རྒྱུ་བ་རྣམས་ལ་རི་དག་འབྱུང་བར་འགྱུར་ན་རུང་སྟེ། རིན་པོ་ཆེ་སྣ་ཚོགས་པའི་རྩེ་མོ་ཅན་འོད་ཟེར་གྱིས་སྣང་བར་བྱས་པ་དང་བྱའི་ཚོགས་ཀྱི་སྒྲ་རྣམ་པར་བརྗོད་པས་མངོན་པར་དགའ་བ་དང་རི་ཕུག་དང་ཁྲོད་དང་ཆུ་ཀླུང་དང་ངོས་དང་ལྗོངས་དག་གིས་དགའ་བར་གྱུར་པའི་ས་གཞི་ཆ་ཤས་རྣམས་ལེགས་པར་རྣམ་པར་ཕྱེ་བ་ཐམས་ཅད་ནས་རྩེད་མོ་རྩེ་བར་འོང་བ་ལྷ་བདག་ཅག་རྣམས་ལ་བདག་ཅག་ལྷ་རྣམས་ཀྱི་ཡང་ལྷ་བདག་ཅག་པད་མ་ཆེན་པོའི་འདབ་མའི་གསེབ་ཏུ་ཞུགས་པ་རྣམས་ལ་དེ་ལྟ་བུའི་རི་དག་ལེགས་པར་འབྱུང་བར་གྱུར་ན་རུང་ངོ་། །དེ་ནས་སེམས་བསྐྱེད་པ་དང་ལྷན་ཅིག་ཁོ་ནར་ལྷ་དེ་དག་རྣམས་ལ་འབྱུང་བར་འགྱུར་ཏེ། ལྷ་དེ་དག་གི་ལེགས་པར་བྱས་པའི་ལས་ཀྱི་རྐྱེན་གྱི་དབང་དང་རྐྱེན་གྱི་དབང་གིས་རབ་ཏུ་ཕལ་ཆེ་བར་གྱུར་པའི་ནགས་དང་

70-271a

ཉེ་བའི་ནགས་དང་རྫིང་བུ་དང་རིའི་རྩེ་མོ་དང་ཁོང་གསེང་གི་གསེབ་དང་དགའ་བར་གྱུར་པའི་རི་ངོས་རྣམས་དང་ཚང་ཚིང་དང་ཕུག་དགའ་བར་གྱུར་པ་རིན་པོ་ཆེ་བདུན་གྱིས་རྣམ་པར་སྤྲས་པས་ཀུན་ཏུ་འབར་བ་འོད་ཟེར་དང་ལྡན་པས་དགའ་བར་བྱེད་པ་དེ་འཁྲི་ཤིང་ཀུན་ནས་འཕྱང་བ་དང་སྨན་ལྗོངས་དང་རི་ཁྲོད་རྣམས་ཡིད་ཀྱི་རྗེས་སུ་འཐུན་པ་རྟག་ཏུ་མཐོང་བ་ན་དགའ་བར་འགྱུར་བའི་རི་བརྒྱ་ཕྲག་རབ་ཏུ་བྱུང་བར་གྱུར་པ་རྣམས་ལ་ལྷ་རྫས་ཀྱི་མེ་ཏོག་དང་འབྲས་བུ་དང་འཁྲི་ཤིང་ཀུན་ཏུ་འཕྱང་བས་ལེགས་པར་འཁྲིལ་བ་རྣམས་ཀྱིས་དགའ་བར་གྱུར་པའི་ཕུག་དང་ངོས་དང་ལྗོངས་བརྒྱ་སྟོང་དང་ལྡན་པ་རྣམས་འབྱུང་བར་གྱུར་ཏོ། །དེ་ནས་ལྷ་དེ་དག་རྣམས་འདབ་མའི་གོང་བུ་དེ་ཡོངས་སུ་སྤངས་ནས། དེ་ཁོ་ན་བཞིན་དུ་ལྷ་བརྒྱ་སྟོང་གིས་ཡོངས་སུ་བསྐོར་བས་ལྷ་རྫས་ཀྱི་མདོག་དང་དྲི་དང་རེག་བྱ་དང་ལྡན་པ་རྣམས་ཀྱི་རྙིང་པ་མེད་པའི་མེ་ཏོག་གི་ཕྲེང་བ་རྣམས་ཀྱིས་ཉེ་བར་ཁྱབ་པ། ལྷའི་གླུ་མཁན་གྱི་སྐད་སྙན་པ་རྣམས་དང་བཅས་པའི་དལ་ཞིང་བརྒྱུད་པས་ཡིད་འཕྲོག་པའི་སྒྲ་མཛེས་པ་རྣམས་ཀྱིས་རིང་དུ་ཡང་རྣ་བའི་བུ་ག་ཚིམ་པ་མེད་པར་ལྷ་རྫས་ཀྱི་འདོད་པའི་ཡོན་ཏན་ལྔ་དང་ལྡན་པའི་རི་དེ་ལ་དལ་བུས་དལ་བུས་འགྲིམ་པར་བྱེད་དོ། །ཐོ་ཕྱི་ཀུན་ཏུ་རྒྱ་བསྐྱེད་ནས་མིག་ལེགས་པར་བསྒྱུར་ཞིང་ལྟ་བར་བྱེད་པའི་མིག་སྔ་ན་མངོན་པར་དགའ་བ་རྣམས་ལྷ་དེ་དག་རྣམས་དགའ་བར་བྱེད་ཅིང་གཡོག་གི་བྱ་བ་རྣམས་ཀྱང་བྱེད་དོ། །ཟས་དང་སྐོམ་གྱི་ཀླུང་རྣམས་ལ་ཡང་བཏུང་བ་དང་བཟའ་བ་དགའ་བར་གྱུར་པ་དག་ལ་ཟ་བ་དང་འཐུང་བར་བྱེད་དོ། །དེ་རྣམ་པ་སྣ་ཚོགས་པ་རྣམ་པ་དུ་མ་དང་ལྡན་པའི་བཏུང་བ་དང་བཟའ་བའི་བྱ་བ་རྣམས་བྱས་ནས་རི་ཁྲོད་ཀྱི་གསེབ་རྣམས་སུ་མན་དཱ་ར་བ་དང་པད་མ་ཀུ་ཤེ་ཥ་ཡཱ་མཆོག་གིས་རང་གི་ལུས་ལ་ཡང་བཅིངས་པ་དང་། དེ་བཞིན་དུ་ལྷ་མོ་རྣམས་ཀྱིས་ཀྱང་ལྷ་རྫས་ཀྱི་ཕྲེང་བ་མཆོག་གིས་བྱས་ནས་གར་བྱེད་པ་དང་། གླུ་ལེན་པས་ཀྱང་དུས་རིང་དུ། ལྷ་རྫས་ཉིད་ཀྱི་འདོད་པའི་ཡོན་ཏན་ལྔ་དང་བཅས་ཤིང་ཡང་དག་པར་ལྡན་པར་གྱུར་པས། སླར་ཡང་དེ་ཁོ་ན་བཞིན་དུ་ཡུལ་རྣམས་ལ་ཆགས་པའི་ཡིད་ཀྱིས་ཐམས་ཅད་ཉིད་དུ་ངོམས་པར་མ་གྱུར་ནས། སྲེད་པའི་གཙང་

70-271b

པོས་ངེས་པར་ཁྱེར་བར་གྱུར་པས། གཟུགས་དང་རྒྱན་དང་ཆ་ལུགས་སྣ་ཚོགས་པ་ཅན་གྱི་ལྷ་དེ་དག་རྣམས་ལྷ་མོའི་ཚོགས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་རྣམས་སུ་དང་། ཡང་ན་ལན་སྟོང་ཕྲག་རྣམས་སུ་སླར་ཉིད་ཀྱང་གང་ན་རྣམ་པར་རྒྱས་པའི་མཚོ་ཆེན་པོ་ལ་པད་མ་ཆེན་པོས་ལེགས་པར་རྒྱས་པ་དེར་ཉེ་བར་འགྲོའོ། །ཕྱིར་ཞིང་ཡང་མཚོ་ཆེན་པོ་དེ་ཉིད་དུ་ཀུན་ནས་ཉེ་བར་འཇུག་པར་བྱེད་པ་དང་ཀུན་ཏུ་ཉེ་བར་བགྲོད་པར་ཡང་བྱེད་ལ། སླར་ཡང་དེ་ཁོ་ན་བཞིན་དུ་དེ་ཁོ་ན་ཉིད་ཀྱི་པད་མའི་འདབ་མ་རྣམས་ལ་དེ་བཞིན་ཉིད་དུ་སོ་སོ་སོ་སོར་ཆེས་དགའ་བར་གྱུར་པའི་རྩེད་མོ་རྣམས་ཉམས་སུ་མྱོང་བར་བྱེད་དེ། རང་གི་ལས་རྣམས་དང་ཆ་འདྲ་བ་རྒྱས་བཏབ་པའི་རྗེས་དོད་པ་བཞིན་ནོ། །དེ་ནས་གཞན་ཡང་ལྷ་དེ་དག་རྣམས་ཉིད་འདི་སྙམ་དུ་སེམས་ཏེ། ཐ་མར་ན་ཡང་བདག་ཅག་རྣམས་ཀྱི་རི་སུལ་སྣ་ཚོགས་པ་རྣམས་ནས་རྣམ་པ་དུ་མ་རྣམ་པ་སྣ་ཚོགས་པའི་བྱ་གཟུགས་དང་། ཆ་བྱད་དང་རྩེད་འཇོ་དང་དབྱིབས་དང་ཟས་དང་གནས་དང་སྤྱོད་ལམ་རྣམས་མཐོང་ན་དགའ་བ་སྙན་པར་གྱུར་པའི་སྒྲ་དུ་མ་རྣམས་ཀྱིས་རྩེ་སྒྲོགས་པས་ལྷག་པར་དགའ་བར་གྱུར་པ། རིན་པོ་ཆེ་བདུན་གྱི་ཐིག་ལེས་རྣམ་པར་སྤྲས་པའི་རིན་པོ་ཆེ་བདུན་རྣམ་པར་བཀྲ་བའི་ཐིག་ལེ་རྣམས་སྐྱེས་པའི་ལུས་རྒྱ་ཆེན་པོ་ཐམས་ཅད་དུ་ཐོགས་པ་མེད་པའི་འགྲོས་ཀྱིས་ལེགས་པར་སྤྱོད་པ། ཆུ་དང་ཐང་དང་བར་སྣང་རྣམས་ལ་ཡང་བདེ་བའི་འགྲོས་ཀྱིས་འགྲོ་བར་བྱེད་པ་གང་དག་གིས་བདག་ཅག་རྣམས་ནུས་པར་འགྱུར་བ་བལྟ་ན་སྡུག་པའི་བྱ་དེ་དག་རྣམས་བྱུང་ན་རུང་ན། ངེད་རང་རྣམས་ཀྱིས་ཀྱང་ནམ་མཁའི་དཀྱིལ་དུ་འགྲོ་བར་ནི་ནུས་ན། འོན་ཀྱང་བདག་ཅག་རྣམས་འདོད་པ་ནི་ཐ་མར་ན་ཡང་བདག་ཅག་བྱ་དེ་དག་རྣམས་ཀྱི་རྒྱབ་ཏུ་ཞོན་ལ་ལྷ་མོའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་ནས་ཤིན་ཏུ་བདེ་བས་ནམ་མཁའི་དཀྱིལ་དུ་རབ་ཏུ་བགྲོད་པས་བདེ་བ་རྒྱ་ཆེན་པོའི་ས་མ་ལུས་པ་འདི་དག་རྣམས་ཀུན་ནས་གནོད་པ་མེད་པའི་འགྲོས་ཀྱིས་ཀུན་དུ་བལྟ་བར་བྱའོ། །ཉེ་འཁོར་ཀུན་ལ་རྣམ་པར་བལྟས་ཤིང་རྣམ་པར་བལྟས་ནས་སླར་ཉིད་ཀྱང་ཆེས་ལྷག་པར་ལྷན་

70-272a

ཅིག་སྤྱོད་པའི་འཁོར་དང་བཅས་ནས་རྩེད་མོ་བྱེད་པར་གྱུར་པ་ན། དེ་ལྟར་ལྷ་དེ་དག་རྣམས་ཀྱི་སེམས་བསྐྱེད་པ་དང་ལྷན་ཅིག་ཁོ་ནར་སྣ་ཚོགས་པའི་རིའི་ཁྲོད་དང་ཕུག་དང་འཁྲི་ཤིང་འཕྱང་བ་རྣམས་དང་རིའི་རྩེ་མོ་རྣམས་དང་རྣམ་པ་སྣ་ཚོགས་པའི་ཚང་ཚིང་དང་རི་སུལ་དང་ལྗོན་ཤིང་རྣམས་ལ་གནས་པའི་བྱ་རྣམས་ལེགས་པའི་ལས་ཀྱིས་བོས་པར་གྱུར་པ་ན་འོང་བར་འགྱུར་བ་ནི། སྣ་ཚོགས་པའི་གཟུགས་དང་ཆ་བྱད་དང་སྣ་ཚོགས་པའི་མདོག་དང་སྐད་ཀྱི་དབྱངས་རྣམས་དང་ལྡན་པ་དང་། རིན་པོ་ཆེ་བདུན་གྱི་ཐིག་ལེ་རྣམས་ཀྱིས་སྤྲས་པས་རྣམ་པར་བཀྲ་བ། ལྷ་མོ་རྣམས་ཐམས་ཅད་ཀྱང་ངོ་མཚར་བསྐྱེད་པ་དང་། ཡིད་མངོན་པར་དགའ་བ་དང་ནམ་མཁའི་དཀྱིལ་མ་ལུས་པ་དེ་དག་རྣམས་ཀུན་ནས་ཁྱབ་པར་གྱུར་པ་དང་། རྩེ་སྒྲོགས་པས་ཀྱང་གང་བར་བྱས་ནས་པད་མ་ཆེན་པོའི་འདབ་མའི་གོང་བུ་རྣམས་གང་ན་ལྷ་དེ་དག་རྣམས་རྩེ་བ་དེར་ཀུན་ཀྱང་འོང་བར་འགྱུར་རོ། །དེ་དག་རྣམས་ནི་ནམ་མཁའ་ལ་འགྲོ་བ་ཡིན་པས་ནམ་མཁའ་མ་ལུས་པ་རྣམས་ཐམས་ཅད་དུ་ཁྱབ་པར་བྱེད་དོ། །དེ་ནས་ལྷ་དེ་དག་གིས་བྱ་དེ་དག་མངོན་པར་མཐོང་ནས་ལྷ་མོ་དང་བཅས་པ་རྣམས་སླར་ཉིད་ཀྱང་ཆེས་རབ་ཏུ་རངས་པར་གྱུར་པའི་ཡིད་ཀྱིས་ལྷན་ཅིག་སྤྱོད་པ་དང་བཅས་པ་རྣམས་ནམ་མཁའི་དཀྱིལ་དུ་འཕགས་པར་འདོད་པར་གྱུར་ཏོ། །དེ་ནས་བྱ་དེ་དག་རྣམས་གང་གི་ཚེ་ཉེ་བར་འོངས་པ་དེའི་ཚེ་ལྷན་ཅིག་སྤྱོད་པ་རྣམས་དང་བཅས་པ་དེ་དག་ཉིད་ཀྱི་རྒྱབ་ཏུ་ངེས་པར་ཞོན་ཏེ། ནམ་མཁའི་དབྱིངས་ཀུན་ཏུ་འཕགས་པར་གྱུར་ནས་ཉེ་འཁོར་དུ་ཡང་དེ་དག་གིས་ཁྱབ་པར་བྱས་སོ། །དེ་ནས་གླུ་ལེན་པར་གྱུར་པས་ལག་ན་པི་བང་དང་གསེར་གྱི་དགུ་པོ་རྒྱུད་མངས་དང་། གླིང་བུ་དང་རྔ་མུ་ར་བ་དང་ལྷ་རྫས་ཀྱི་རོལ་མོ་མཁན་དགའ་བར་གྱུར་པ་རྣམས་ཀྱིས་རྣ་བའི་བུ་གར་གཏད་པར་གྱུར་པ་ཕན་ཚུན་ལྷན་ཅིག་ཏུ་བདེ་བའི་ས་དེ་དག་རྣམས་ལ་ཀུན་དུ་ལྟ་བར་བྱེད་དོ། །དགའ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ། །ལྷ་དེ་དག་རྣམས་བདེ་བའི་འདོད་ཆགས་ཀྱིས་ཆགས་པར་གྱུར་པ་དགའ་བའི་འདོད་ཆགས་ཀྱིས་རབ་ཏུ་རྣམ་པར་ཉམས་

70-272b

པའི་ཡིད་ཅན་རྣམས་ཀྱིས་ཕ་རོལ་ཏུ་ཡང་ལོག་པར་ལྟུང་བར་འགྱུར་བ་ནི་མཐོང་བ་མ་ཡིན་ནོ། །དེ་ནས་དེའི་དུས་ན་ལེགས་པར་བྱས་པའི་ལས་རྣམས་ཀྱིས་ལེགས་པར་བསྐུལ་བས། དེ་ཁོ་ན་ཉིད་བརྗོད་པ་ཞེས་བྱ་བའི་བྱས་ལྷ་བག་མེད་པ་དེ་དག་རྣམས་ལ་རྗེས་སུ་འདོམས་པར་བྱེད་པའི་ཚིགས་སུ་བཅད་པ་བཤད་པ། ཇི་ལྟར། ཇི་ལྟར་ལུས་ཅན་རྣམས་ཀྱི་ནི། །སྲོག་ནི་ཤིན་ཏུ་མྱུར་འགྲོ་བ། །བྱ་རྣམས་འགྲོས་དང་རླུང་པོ་ཡང་། །དེ་བཞིན་མྱུར་དུ་འགྲོ་བ་མིན། །རླུང་དེ་ལས་ནི་ཕྱིར་ཟློགས་ཤིང་། །བྱ་དེ་རྣམས་ཀྱང་ཕྱིར་ལ་ཟློགས། །འགག་པར་འགྱུར་བའི་སྲོག་ཀྱང་ནི། །དེ་ནི་སླར་ཡང་འོངས་པ་མེད། །ལས་ནི་མྱུར་བར་ཟད་པ་དང་། ཐ་མ་ཡང་ནི་མྱུར་བར་འབྱུང་། །ཅིས་ཀྱང་འབྱུང་བའི་འདུ་འབྲལ་བ། །ལྷ་རྣམས་ཀྱིས་ཀྱང་གོ་བ་མིན། །བཟློག་པར་མི་ནུས་ཤུགས་ཆེན་པོ། །གཏུམ་པོ་ཐམས་ཅད་བརླག་པར་ནུས། །ངེས་པར་མྱོང་བའི་སྟོབས་ལྡན་པ། །འཆི་བདག་འདི་ཡང་མ་རིག་གོ། །ཤིན་ཏུ་བག་མེད་པ་ཡི་ལྷ། །བདེ་བས་ཡོངས་སུ་བསླུས་པ་ཡིན། །གང་ཞིག་ངེས་པར་འབྱུང་བ་ཡི། །སྡུག་བསྔལ་ཆེན་པོ་མ་རིག་གོ། །འདུས་བྱས་ཀྱང་ནི་ཐམས་ཅད་ཀྱང་། །འཇིགས་དང་བཅས་པའི་ཁྱད་པར་གྱིས། །འདི་ནི་རྣམ་པར་འཇིག་པར་འགྱུར། །སྲིད་ནས་སྲིད་པར་ཆོས་ཉིད་ཀྱང་། །འདི་ནི་རྒ་བས་ལང་ཚོ་འཇོམས། །སྲོག་ནི་འཆི་བའི་ཐ་མ་སྟེ། །རྒུད་པར་གྱུར་པའི་འཇིགས་བྱེད་ཀྱིས། །གནས་པ་རྣམས་ནི་འཇིག་པའི་རྒྱུ། །འཇིགས་ཆེན་རྣམ་པ་དེ་ལྟ་བུ། །སྡུག་བསྔལ་གྱིས་ཀྱང་འཇིགས་པ་ཆེ། །བག་མེད་པ་ཡི་ལྷ་གང་ཡང་། །བསམ་པ་དེ་དག་ཅུང་ཟད་མེད། །གང་ཡང་བློ་ཡི་མིག་གིས་ནི། །མ་འོངས་པ་ཡི་འཇིགས་པ་མཐོང་། །དེ་ནི་མཁས་པ་ཡིན་ཞེས་བྱ། །བྱིས་པ་རྣམས་ནི་བཟློག་པ་ཡིན། །རྣམ་རྨོངས་ཡིད་ཅན་ཐམས་ཅད་ནི། །རང་གི་སེམས་ནི་བསླུས་པ་ཡིན། །མར་མེའི་སྣུམ་ནི་ཟད་ལྟ་བུའི། །ལས་ཟད་པ་ནི་མ་མཐོང་ངོ་། །དགའ་བའི་ཡུལ་ནི་དུ་མ་རྣམས། །བདེ་བ་བླ་ན་མེད་པ་འདི། །

70-273a

ལོངས་སྤྱོད་ནས་ནི་ལས་ཟད་པས། །སླར་ཡང་ལོག་པར་ལྟུང་བར་འགྱུར། །དེ་ལྟར་བྱ་དེས་ལེགས་པར་བྱས་པའི་ལས་ཀྱི་ཚིག་གིས་ལྷ་དེ་དག་རྣམས་ལ་རྗེས་སུ་སྟོན་པར་བྱེད་དོ། །བག་མེད་པའི་ཡུལ་གྱིས་ཀུན་ནས་རྨོངས་པའི་ལྷ་དེ་དག་རྣམས་ཀྱིས་གོ་བར་མི་འགྱུར་ཞིང་། བརྗོད་པ་དེ་དག་རྣམས་ལ་ཡང་རྩིས་བཏབ་མ་བྱས་པར་ཕྱིར་ཉིད་ཀྱང་། བདེ་བ་རྒྱ་ཆེན་པོའི་ས་གཞི་མ་ལུས་པ་དེ་དག་རྣམས་ཀུན་ཏུ་ལྟ་བར་བྱེད་དེ། ཐམས་ཅད་ལས་མངོན་པར་དགའ་བར་གྱུར་པའི་རི་རྣམས་དང་ཆུ་ཀླུང་དང་། སྨན་ལྗོངས་དང་འབབ་ཆུ་དང་རྫིང་བུ་དང་ལྗོན་ཤིང་དང་ནགས་དང་ཉེ་བའི་ནགས་དང་ལེགས་པར་འབྲེལ་པ་རྣམས་དང་། དེ་ལྟ་དེ་ལྟར་པད་མའི་ཚལ་རྣམས་དང་རི་བོའི་མཆོག་རྣམས་ཀྱིས་ཡོངས་སུ་གང་བ་རྣམས་ན་ལྷའི་ཚོགས་རྩེ་དགའ་བ་རྣམས་ཀྱིས་ལེགས་པར་འབྲེལ་བ་རྣམས་དང་ཡང་གཞན་རྣམས་ལ་བྱ་རྣམས་ཀྱིས་བརྗོད་པའི་ཁྱད་པར་དགའ་བར་འགྱུར་བའི་བར་དུ་གླུ་བླངས་པ་ལྟ་བུར་ཐམས་ཅད་ནས་རྣ་བས་དང་དུ་ལེན་པར་བྱེད་པའི་སྒྲ་རྣམས་དང་། གཞན་ཡང་དེ་མ་ཡིན་པ་རྣམས་མཐོང་བར་གྱུར་པ་ལ། ལྷ་དང་ལྷ་མོའི་ཚོགས་ཀྱིས་ཡོངས་སུ་བསྐོར་ནས། པད་མའི་བར་མཚམས་རྣམས་ནས་རིན་པོ་ཆེའི་རྩི་དག་འཐུང་བར་བྱེད་དོ། །དཔག་བསམ་གྱི་ཤིང་གི་ནགས་རྣམས་ལ་ཡང་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་དགའ་བར་བྱེད་དོ། །གཞན་ཡང་གཞན་དག་རྣམས་སུ་རྒྱུ་བར་གྱུར་པ་ན། ཁང་བུ་ནམ་མཁའི་དཀྱིལ་དང་འདྲ་བ་རྣམས་ལ་ཞོན་པའི་ལྷ་དང་ལྷ་མོ་རྣམས་ལྷན་ཅིག་ཏུ་ལྷ་རྫས་ཀྱི་མེ་ཏོག་གི་ཕྲེང་བའི་རྒྱན་དང་ལྷ་རྫས་ཀྱི་ཡུལ་ལྔ་པོ་རྣམས་ཉིད་ལྷ་རྫས་ཀྱི་རྔ་རྣམས་ཉིད་ཀྱིས་རྩེ་བར་གྱུར་པ་རྣམས་མཐོང་ངོ་། །ལྷ་དང་ལྷ་མོ་དེ་དག་རྣམས་ཉིད་ཀྱིས་ཀྱང་མཐོང་ནས་ཕན་ཚུན་ལྷན་ཅིག་ཏུ་ཚོགས་པར་གྱུར་ཏེ་རྩེ་བར་བྱེད་དོ། །རིན་པོ་ཆེ་བདུན་དང་རིན་པོ་ཆེ་མ་ར་ཀ་ཏ་ཡིས་རྣམ་པར་བཀྲ་ཞིང་འཚེར་བག་དང་ལྡན་པར་ནམ་མཁའི་དཀྱིལ་ནས་འོངས་པའི་བྱ་དེ་དག་རྣམས་ཀྱི་རྒྱབ་ཏུ་ལེགས་པར་ཞོན་པ་རྣམས་དང་ལྷ་གཞན་གང་

70-273b

དག་དགའ་བའི་ཚལ་ན་ཀུན་དུ་གནས་པའི་དེ་དག་རྣམས་ཁང་བུའི་སྟེང་དུ་ལེགས་པར་ཞོན་པ་རྣམས་དང་དེ་དག་ཐམས་ཅད་དང་ཡང་དག་པར་ལྡན་པར་གྱུར་ནས་ནམ་མཁའ་ཉིད་ལ་རྩེ་དགའ་བར་བྱེད་པ་དང་། ཕན་ཚུན་དུ་གྲོགས་ཀྱི་བྱ་བ་དང་ལྡན་པས་དགའ་བར་ཡང་བྱེད་དོ། །དུས་ཤིན་ཏུ་རིང་བར་འདོད་པའི་མཆོག་རྣམས་ལ་དེ་དག་རྣམས་ཀྱིས་ལྷན་ཅིག་ཏུ་རྩེ་དགའ་བར་བྱས་ནས་སླར་ཡང་རིའི་རྩེ་མོ་དག་ལ་འཁོད་པར་བྱེད་དོ། །ནགས་དང་ཉེ་བའི་ནགས་རྣམས་ལ་དེ་དག་རྣམས་ཀྱིས་རྣམ་པ་སྣ་ཚོགས་པའི་རྩེད་འཇོ་རྣམས་བྱས་ནས་སླར་ཡང་རྣམ་པར་རྒྱས་པའི་མཚོ་ཆེན་པོ་དེར་འགྲོའོ། །བྱ་དེ་དག་རྣམས་ཉིད་ཀྱི་རྒྱབ་ཏུ་ལེགས་པར་ཞོན་ནས་ནམ་མཁའ་བཞིན་དུ་ཁྱབ་པར་བྱས་པས། ལྷ་རྫས་ཀྱི་རོལ་མོ་རྣམས་ལ་ཆགས་པར་གྱུར་པའི་ཡིད་ཀྱིས་ནགས་དང་ཉེ་བའི་ནགས་རྣམས་ལས་སླར་ཡང་རྣམ་པར་རྒྱས་པའི་མཚོ་ཆེན་པོ་དེ་ཉིད་དུ་ལེགས་པར་འགྲོ་བར་བྱེད་དོ། །གཞན་ཡང་རྣམ་པར་རྒྱས་པའི་མཚོ་དེ་ཉིད་ཐམས་ཅད་ལས་དགའ་བར་གྱུར་པར་གོ་ནས། གཞན་ཡང་དེ་དག་རྣམས་བྱ་དེ་དག་གི་རྒྱབ་དག་ལས་མུ་ཏིག་གི་སྟན་རྣམས་ལ་ལེགས་པར་བབས་སོ། །དེ་ནས་ཡང་ཐམས་ཅད་དང་ལྡན་པར་གྱུར་པ་རྣམས་ཕྱིར་ཞིང་ཉིད་དུ་དེ་དག་རྣམས་པད་མའི་འདབ་མ་ལ་རབ་ཏུ་འདུག་ནས་དགའ་བར་བྱེད་པ་རྣམས་ནི་སྔ་མ་བཞིན་ནོ། །དེ་ནས་པད་མའི་འདབ་མ་དེ་ལ་དུས་རིང་དུ་དགའ་བར་གྱུར་ནས། དུས་གཞན་ན་འདི་ལྟ་བུའི་བློ་སྐྱེས་པར་གྱུར་ཏེ། གང་བདག་ཅག་རྣམས་འདི་ཁོ་ན་ལྟར་གནས་བཞིན་དུ་མ་ཐང་ཡང་འཁྲི་ཤིང་གི་ཁང་བུ་རྣམས་ལ་རྒྱགས་པའི་ཁུ་བྱུག་གི་སྒྲ་དགའ་བར་གྱུར་པ་རྣམས་དང་། མེ་ཏོག་གི་ཚར་ཀ་ཀུན་དུ་འཕྱང་བ་རྣམས་དང་རིན་པོ་ཆེ་སྣ་ཚོགས་པ་རྣམ་པར་བཀྲ་བ་ཆེས་རབ་ཏུ་ཕལ་ཆེ་བ་སྣ་ཚོགས་པའི་ལོ་མ་དང་འདབ་མ་ཆགས་པར་འགྱུར་བ་རྣམས་དང་ཡང་དག་པར་ལྡན་པས་ཉེ་བར་བཀོད་པའི་འཁྲི་ཤིང་གི་ཁང་བུ་དག་བདག་ཅག་རྣམས་ཀྱི་རྩེད་མོའི་དོན་དུ་རབ་ཏུ་འབྱུང་བར་གྱུར་མོད། དེ་ནས་སེམས་བསྐྱེད་པ་དང་ལྷན་ཅིག་ཉིད་དུ་ལྷ་དེ་དག་རྣམས་ཀྱི་

70-274a

ལེགས་པར་བྱས་པའི་ལས་ཀྱིས་དེ་དག་གི་འཁྲི་ཤིང་གི་ཁང་བུ་རྣམས་རིན་པོ་ཆེ་སྣ་ཚོགས་པའི་འོད་དང་ལྡན་པ། མེ་ཏོག་གི་མཆོག་གིས་ཀུན་ཏུ་སྤུད་པ་གསེར་བཟང་པོའི་རང་བཞིན་དང་དངུལ་གྱི་རང་བཞིན་དང་བཻ་ཌཱུརྱའི་རང་བཞིན་དང་སྔོན་པོ་ཆེན་པོའི་རང་བཞིན་དང་། པད་མ་རཱ་གའི་རང་བཞིན་དང་དེ་བཞིན་དུ་ཤེལ་གྱི་རང་བཞིན་དང་དེ་བཞིན་དུ་གསེར་བཙོ་མའི་རང་བཞིན་གྱི་མཆོག་ཏུ་མཐོང་ནས་དགའ་བར་འགྱུར་བ་རྣམས་དང་། དེ་བཞིན་དུ་རྣམ་པར་འདྲེས་པ་པོའི་རྣམ་པར་བཀྲ་བའི་འཁྲི་ཤིང་གི་ཁང་པ་དེ་རང་འབྱུང་བར་འགྱུར་ཏེ། ལེགས་པར་བྱས་པའི་ལས་རྣམས་ཀྱིས་དུས་མི་རིང་བ་ཉིད་ན་འབྱུང་བར་འགྱུར་བ་ཡིན་ནོ། །དེ་ནས་ལྷ་དེ་དག་རྣམས་ཀྱིས་འཁྲི་ཤིང་གི་ཁང་པ་དེ་དག་མངོན་པར་ཀུན་ནས་ལེགས་པར་མཐོང་བས་མཆོག་ཏུ་རབ་ཏུ་དགའ་བའི་ཡིད་ཀྱིས་སླར་ཡང་དེ་ཁོ་ན་བཞིན་དུ་རྩེ་བར་བྱེད་ཅིང་དགའ་བར་ཡང་བྱེད་དོ། །ལྷ་མོའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་བ་དང་བཅས་ནས། ལྷ་རྫས་ཀྱི་ཕྲེང་བས་བརྒྱན་པ་འདོད་པ་ཐམས་ཅད་ཕུན་སུམ་ཚོགས་པ་གནོད་པ་མེད་པ་དང་ལྡན་པའི་ཡིད་ཀྱིས་ཕྲག་དོག་དང་སེར་སྣ་དང་བྲལ་བ། འཐབ་མོ་དང་ཡིད་མི་བདེ་བའི་སྐྱོན་རྣམས་དང་བྲལ་བ། བདེ་ལེགས་སུ་རྣམ་པར་རྒྱུ་བ་ལེགས་པར་བྱས་པའི་ལས་རྣམས་ཀྱིས་དེ་དག་རྣམས་ལ་དགའ་བར་བྱེད་པའི་རྔ་སྐད་ཡན་ལག་ལྔ་དང་ལྡན་པའི་རྣམས་ལ་མ་ཉམས་པ་དང་སྙན་པ་དང་། དལ་ཞིང་རྒྱུན་ཆགས་པའི་དབྱངས་ཀྱིས་བརྒྱན་དུ་བྱས་པ་འཁྲི་ཤིང་གི་ཁང་བུ་དེ་དག་རྣམས་སུ་ལྷན་ཅིག་སྤྱོད་པ་དེ་དག་ཉིད་དང་ངོམས་པ་མེད་པའི་ཡིད་ཀྱིས་ལྷན་ཅིག་ཏུ་དགའ་བར་བྱེད་པ་རྣམས་ཐམས་ཅད་ཀྱང་སྲེད་པའི་དུག་གིས་བསྲེགས་པར་གྱུར་པས་འདོད་པའི་ཡོན་ཏན་ལྔ་མཚུངས་པ་མེད་པ་རྣམས་ཀྱིས་རྣམ་པར་ངོམས་པ་མེད་པར་གྱུར་པ། མི་རྟག་པ་དང་ཆ་འདྲ་བའི་དཔེ་མེད་པའི་འཁྲི་ཤིང་གི་ཁང་པར་དགའ་བར་གྱུར་པས་ཆེས་ལྷག་པར་ཆགས་པས་བསྒོས་པར་གྱུར་པའི་དགའ་བ་རྣམས་ཉམས་སུ་མྱོང་བར་བྱེད་དོ། །འཁྲི་ཤིང་གི་ཁང་པ་དེ་དག་ཀུན་ཡང་རྣམ་པ་སྣ་ཚོགས་པའི་འཁྲི་

70-274b

ཤིང་འཕྱང་བས་དགའ་བར་གྱུར་པ་རྣམས་ལ། འདི་ལྟ་སྟེ་བཻ་ཌཱུརྱའི་རང་བཞིན་གྱི་འཁྲི་ཤིང་རྣམས་ལ་ནི་གསེར་གྱི་འདབ་མ་རྣམས་དང་པད་མ་རཱ་ག་དང་མཚུངས་པའི་མདོག་གི་འབྲས་བུ་རྣམས་སོ། །ཨིན་དྲ་ནཱི་ལའི་འཁྲི་ཤིང་རྣམས་ལ་ནི་དངུལ་གྱི་རང་བཞིན་གྱི་ཁ་དོག་གི་འདབ་མ་རྣམས་དང་ཤེལ་དང་ཁ་དོག་མཚུངས་པའི་འབྲས་བུ་རྣམས་སོ། །གསེར་གྱི་འཁྲི་ཤིང་རྣམས་ལ་ནི་ཨིན་དྲ་ནཱི་ལ་དང་མདོག་མཚུངས་པའི་ལོ་མ་རྣམས་དང་། པད་མ་རཱ་ག་དང་མདོག་མཉམ་པའི་འབྲས་བུ་རྣམས་སོ། །རིན་པོ་ཆེ་བདུན་རྣམ་པར་འདྲེས་པའི་འཁྲི་ཤིང་རྣམས་ལ་ནི་འདབ་མ་དང་འབྲས་བུ་རྣམས་ཀྱང་རྣམ་པར་འདྲེས་པའོ། །གསེར་གྱི་འཁྲི་ཤིང་རྣམས་ལ་ནི་དངུལ་གྱི་རང་བཞིན་གྱི་འདབ་མ་དང་། དངུལ་གྱི་ཁ་དོག་གི་འབྲས་བུ་རྣམས་སོ། །རྣམ་པ་དེ་སྲིད་ཀྱི་འདབ་མ་རྣམས་ཉིད་ཡིན་ཏེ། གསེར་དེ་དག་དང་མཚུངས་པའི་ཁ་དོག་རྣམས་ལ་དེ་དང་མཚུངས་པའི་འདབ་མ་དང་དེ་དང་མཚུངས་པའི་འབྲས་བུའོ། །དེ་ལྟར་ལྷ་དེ་དག་རྣམས་ཀྱི་འཁྲི་ཤིང་གི་ཁང་པ་རྣམས་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་སེམས་བསྐྱེད་པ་དང་ལྷན་ཅིག་ཉིད་དུ་འབྱུང་བར་འགྱུར་རོ། །དེ་ནས་ལྷ་དེ་དག་རབ་ཏུ་དགའ་བའི་བདེ་བས་འཁྲི་ཤིང་གི་ཁང་བུ་དེ་དག་ཏུ་ལེགས་པར་ཞུགས་ནས་ལྷ་མོ་རྣམས་དང་ལྷན་ཅིག་ཏུ་རྩེ་བར་བྱེད་པ་དང་། དགའ་བར་ཡང་བྱེད་ཅིང་གཡོག་གི་བྱ་བ་རྣམས་ཀྱང་བྱེད་དེ། རྣམ་པ་སྣ་ཚོགས་པའི་ལྷ་ཡུལ་གྱི་བདེ་བ་རྣམས་ཀྱིས་མྱོས་ཤིང་ངོམས་པ་ཡང་མེད་ལ་བདེ་བས་ཆུ་ལ་ཉ་བཞིན་དུའོ། །དེ་དེ་ལྟར་ལྷ་དེ་དག་རྣམས་ཉིད་ཀྱང་ཤིན་ཏུ་ངོ་མཚར་བར་སྐྱེད་པར་བྱེད་པའི་རྒྱུར་གྱུར་པའི་འཁྲི་ཤིང་གི་རྣམ་པར་འཕྱང་བས་ཀུན་ནས་གཡོགས་པ་རྣམས་སུ་ལེགས་པར་ཞུགས་ནས་དགའ་བར་བྱེད་ཅིང་གླུ་ཡང་ལེན་པར་བྱེད་ལ་རྔ་སྐད་ཡན་ལག་ལྔ་པས་དེ་ལྟར་ཡང་དགའ་བར་གྱུར་པ་ན། འདི་ལྟར་སེམས་པར་བྱེད་དེ། ཇི་ལྟར་ཆུང་ངུ་ན་འཁྲི་ཤིང་གི་ཁང་བུ་འདི་ཉིད་དུ་རབ་ཏུ་བདེ་བར་ཞུགས་པའི་བདག་ཅག་འདི་དག་རྣམས་ཉིད་ལ་རབ་ཀྱི་མཆོག་གི་མདོག་དང་དྲི་དང་། རོ་དང་བདེ་བའི་རེག་བྱ་ཕུན་སུམ་ཚོགས་པའི་ཆུ་ཀླུང་གང་ཞིག་འདབ་

70-275a

མའི་གསེབ་དག་ནས་བབ་པར་གྱུར་ན་ཅི་མ་རུང་། ཞུ་གསོལ་བྱེད་པའི་ལྷན་ཅིག་རྗེས་སུ་སྤྱོད་པ་དང་བཅས་པ་རྣམས་ཕྱིར་ཞིང་ཆེས་ལྷག་པ་ཉིད་དུ་ཞུ་བར་བྱ་བའི་དོན་དུ་དེ་བཞིན་དུ་སེམས་པར་བྱེད་དོ། །དེ་དག་རྣམས་སེམས་བསྐྱེད་པ་ཙམ་ཉིད་ན། ཆུ་ཀླུང་དེ་དག་རོ་དང་དྲི་དང་རེག་བྱ་རབ་ཀྱི་མཆོག་དང་ལྡན་པར་ཡང་ལེགས་པར་བྱས་པའི་ལས་རྣམས་ཀྱིས་བྱུང་བར་གྱུར་པ་རྣམས་ནི་འདབ་མའི་གསེབ་དག་ནས་རྒྱུན་འབབ་པར་གྱུར་པས། རབ་ཏུ་རྡོལ་བར་གྱུར་པ་ན། དེ་དེ་ལྟར་ལྷན་ཅིག་རྗེས་སུ་སྤྱོད་པ་རྣམས་དང་བཅས་པ་རྨད་དུ་གྱུར་པས་རྒྱགས་ཤིང་མྱོས་ནས་འདོད་པའི་སྲེད་པ་རྣམས་ཀྱིས་རྣམ་པར་ངོམས་པ་མེད་པས་དུས་ཡུན་རིང་དུ་གླུ་ལེན་པའི་རྒྱགས་པས་རྒྱགས་པའི་སེམས་ཀྱིས་དགའ་བར་བྱེད་པ་དང་རྩེ་འཇོ་བར་ཡང་བྱེད་དེ། བག་མེད་པའི་ས་རྣམས་སུ་སྐྱེས་པར་གྱུར་པ་དེ་དག་རྣམས་ནི་རང་བཞིན་གྱིས་ལེགས་པར་བྱས་པའི་ལས་རྣམས་ཟད་པར་བྱེད་པ་ཡིན་ལ་འཆི་འཕོ་བའི་དུས་ན་ནི་ལེགས་པར་མཐོང་བར་འགྱུར་རོ། །ཡུལ་གྱི་སྲེད་པ་རྣམས་ཀྱིས་ངོམས་པ་མེད་པར་དེ་ལྟར་རྩེ་རབ་ཏུ་འཇོ་བར་བྱེད་པ་རྣམས་ནི་འདི་ལྟར་འགྱུར་བ་ཡིན་ཏེ། གང་ཆུང་ངུ་ན་བདག་ཅག་རྣམས་ལ་དྲི་དང་རོ་དང་མདོག་དང་རེག་བྱ་རབ་ཀྱི་མཆོག་དང་ལྡན་པའི་བདུད་རྩི་དག་འདབ་མའི་གསེབ་རྣམས་ནས་བར་དུ་གཟགས་པར་གྱུར་མོད། དེ་ནས་ལྷ་དེ་དག་རྣམས་ཀྱི་ལེགས་པར་བྱས་པའི་ལས་དག་གིས་སེམས་བསྐྱེད་པ་ཙམ་ཉིད་ཀྱིས་རོ་དང་མདོག་དང་དྲི་དང་རེག་བྱ་མཆོག་གི་རབ་ཏུ་གྱུར་པའི་བདུད་རྩི་དེ་དག་ཇི་ལྟར་ལས་དང་མཁོས་འདྲ་ཞིང་། རྗེས་སུ་འཐུན་པ་རྣམས་རབ་ཏུ་བབ་པར་གྱུར་པ་ན། དེ་ལྟར་དེ་དག་རྣམས་ཉིད་དུས་ཡུན་རིང་པོར་མིད་པར་བྱེད་དོ། །དེ་ནས་ལྷ་དེ་དག་རྣམས་འདི་ལྟར་ཡང་སེམས་པར་བྱེད་དེ། གང་མ་ཐང་ཡང་བདག་ཅག་རྣམས་ལ་དོ་ཤལ་དང་ཅོད་པན་ནོར་བུས་སྤྲས་པ་རྣམས་དང་། དཔུང་རྒྱན་དང་མེ་ཏོག་གི་ཕྲེང་བ་དང་ལྷ་རྫས་རྣམས་ཇི་ལྟར་མཐོ་རིས་ཀྱི་རྗེས་སུ་འཐུན་པ་ཆེས་ལྷག་པར་དགའ་བར་གྱུར་པ་རྣམས་འཁྲི་ཤིང་གི་གསེབ་དག་ནས་རྙེད་ན་ཅི་མ་རུང་སྙམ་ན། དེ་ལྟར་

70-275b

ལྷ་དེ་དག་རྣམས་ཀྱི་སེམས་བསྐྱེད་པ་དང་དུས་གཅིག་ཉིད་དུ་ལེགས་པར་བྱས་པའི་ལས་རྣམས་ཀྱིས་མཐོ་རིས་ཀྱི་རྗེས་སུ་འཐུན་པར་དགའ་བར་གྱུར་པའི་རྒྱན་དེ་དག་རྣམས་རབ་ཏུ་བྱུང་བར་གྱུར་ཏོ། །དེ་ནས་ལྷ་དེ་དག་རྒྱན་དེ་དག་རྣམས་ཀྱིས་རྒྱན་དུ་བྱས་ནས། འདོད་པའི་བདེ་བ་རྣམས་ཀྱིས་དུས་རིང་དུ་ཡང་ངོམས་པ་མེད་པར་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་བ་དང་བཅས་པས་དུས་རིང་པོར་དགའ་བར་བྱས་ཀྱང་། ཡུལ་གྱི་སྲེད་པ་རྣམས་ཀྱིས་རྣམ་པར་ངོམས་པ་ནི་མེད་པ་ཡིན་ནོ། །དེ་དག་དེ་ལྟར་རྣམ་པར་གནས་པ་རྣམས་འདི་ལྟར་སེམས་པར་འགྱུར་ཏེ། གང་ཆུང་ངུ་ན་རོལ་མོ་མཁན་རྣམས་ལས་ཀྱང་ལྷག་པའི་དབྱངས་གཞན་དུ་གྱུར་པ་རྣམ་པ་སྣ་ཚོགས་པའི་མེ་ཏོག་གི་དྲི་རྣམས་དང་ཡང་དག་པར་ལྡན་པའི་ཡོན་ཏན་དེ་ལྟ་བུ་དང་ལྡན་པར་འདབ་མ་རླུང་གིས་བསྐྱོད་པར་བྱེད་ན་རུང་ངོ་སྙམ་ན། དེ་ནས་ལྷ་དེ་དག་རྣམས་ཀྱི་ལེགས་པར་བྱས་པའི་ལས་དག་གིས། སེམས་བསྐྱེད་པ་ཙམ་ཉིད་ན་རྣམ་པ་དེ་ཙམ་ཉིད་ཀྱི་རླུང་རྣམས་ཀྱི་ཁམས་ལེགས་པ་དལ་བུས་འབྱུང་བ་རྩོམ་སྟེ། གང་གིས་དེ་དག་རྣམས་ལ་རབ་ཏུ་བསྐྱོད་ཅིང་ཕན་ཚུན་དུ་དཀྲོལ་བས་བྱས་པའི་རྣམ་པ་དེ་ལྟ་བུའི་དབྱངས་འདི་དག་རབ་ཏུ་འབྱུང་བའི་ཁྱད་པར་གང་གིས། གླུ་མཁན་གྱི་གླུ་དེ་དག་ནི་བཅུ་དྲུག་ཆར་ཡང་ཆོག་པ་མ་ཡིན་ནོ། །དེ་ནས་ལྷ་དེ་དག་རྣམས་ལྷ་མོ་དེ་དག་དང་སྟབས་ཅིག་ཏུ་དུས་ཡུན་རིང་པོར་དགའ་བར་བྱེད་པ་དང་། འགྱིང་བར་ཡང་བྱེད་ལ་གླུ་ལེན་པ་དང་དགོད་པར་ཡང་བྱེད་དེ། འོན་ཀྱང་འདོད་པ་རྣམས་ཀྱིས་ནི་ངོམས་པར་འགྱུར་བ་ལྟ་ག་ལ་ཡོད། དེ་དག་རྣམས་ནི་གཞན་ཡང་འདི་སྙམ་དུ་སེམས་པར་བྱེད་དོ། །གང་ཆུང་ངུ་ན་ཡང་བདག་ཅག་རྣམ་པར་གནས་པ་རྣམས་ཉིད་ལ་རྣམ་པ་སྣ་ཚོགས་པའི་ཁ་དོག་ཅན་རིན་པོ་ཆེ་སྣ་བདུན་གྱིས་རྣམ་པར་སྤྲས་པ་འདོད་པ་ཐམས་ཅད་ཕུན་སུམ་ཚོགས་པར་གྱུར་པའི་ཁང་བུ་དག་རབ་ཏུ་བྱུང་བར་གྱུར་ན་རུང་སྟེ། གང་གིས་སླར་ཡང་བདག་ཅག་རྣམས་མཚོ་ཆེན་པོ་འདིའི་ཉེ་འཁོར་རྣམས་སུ་ཡོངས་སུ་བསྐོར་ནས་ནམ་མཁའ་ལ་གནས་པས་དེ་ལྟར་རྩེད་འཇོ་དག་བྱེད་པར་འགྱུར་བ་དང་། བདག་ཅག་རྣམས་ཡོངས་སུ་སྤྱོད་པར་ཡང་བྱ་བ་དང་དགོད་

70-276a

པར་འགྱུར་བ་དང་འགྱིང་བར་འགྱུར་བ་དང་གླུ་ལེན་པར་གྱུར་པར་ཡང་ངོ་སྙམ་ན། དེ་ལྟར་དེ་དག་གིས་སེམས་བསྐྱེད་པ་ཙམ་ཉིད་ན་ལྷ་རྣམས་ཀྱི་དྲུང་དུ་ཁང་བུ་དག་རབ་ཏུ་འབྱུང་བར་འགྱུར་བ་རྣམས་ལ། རིན་པོ་ཆེ་བདུན་གྱི་རང་བཞིན་ལས་རྣམ་པ་སྣ་ཚོགས་པའི་རིན་པོ་ཆེའི་ཆ་ཤས་རྣམས་ཀྱིས་རྣམ་པར་བཀྲ་བར་གྱུར་པ། མུ་ཏིག་གི་ཕྲེང་བ་དང་བཅས་པ་ལན་ཀན་དགའ་བར་གྱུར་པ་རྣམས་ཆེས་མཆོག་ཏུ་མཐོང་ན་དགའ་བར་གྱུར་པ་ཡིན་ཏེ། ཁ་ཅིག་ནི་ངང་པས་འདྲེན་པ། ཁ་ཅིག་ནི་རྨ་བྱས་འདྲེན་པ། ཁ་ཅིག་ནི་ཤང་ཤང་ཏེའུ་ཡིས་འདྲེན་པ་དང་། ལ་ལ་ནི་རྣམ་པར་བཀྲ་བའི་བྱ་རྣམས་ཐམས་ཅད་ཀྱིས་འདྲེན་པ་ཡིན་ཞིང་། ལྷ་དེ་དག་རྣམས་ཀྱི་མདུན་ཉིད་ན་ཇི་ལྟར་འདོད་པའི་བཞོན་པ་དེ་དག་རྣམས་ཡིན་པར་དེ་ལྟར་ལེགས་པར་ཤེས་སོ། །དེ་དག་རྣམས་མཐོང་བར་གྱུར་ནས་གཞན་ཡང་ལྷ་དེ་དག་ཁོ་ན་བཞིན་དུ་མཉམ་པོར་ཞོན་པར་གྱུར་ནས་དེ་ཁོ་ན་བཞིན་དུ་འགྱིང་བར་ཡང་གྱུར་པ་དང་། རྩེ་བར་གྱུར་པས་ཀྱང་དེ་དག་ཐམས་ཅད་གང་ན་རྣམ་པར་རྒྱས་པའི་མཚོ་ཡོད་པ་དེར་ལེགས་པར་འགྲོ་བར་བྱེད་དོ། །དེ་དག་རྣམས་ཀྱིས་མཚོ་དེ་མཐའ་དག་དང་། པད་མ་ཆེན་པོ་དེ་ཡང་མཐོང་བར་གྱུར་ནས་དེ་དག་རྣམས་རྒྱུ་བར་བྱེད་པ་ན། པད་མ་ཆེན་པོ་དེ་མ་ལུས་པ་མཐོང་ན་ཤིན་ཏུ་ངོ་མཚར་བར་གྱུར་པ་ཡིན་ཏེ། དེ་ཡང་རྣམ་པ་སྣ་ཚོགས་པའི་རིན་པོ་ཆེའི་རང་བཞིན་གྱི་འདབ་མ་རྣམས་རྣམ་པར་བཀྲ་བའི་འོད་ཟེར་འཕྲོ་བར་གྱུར་པས་རྣམ་པར་གསལ་བར་བྱས་པ་དེའི་ཁ་དོག་སྣ་ཚོགས་པ་རྣམས་ལ་འདི་ལྟ་སྟེ། རྡོ་རྗེ་དང་། ཨིན་དྲ་ནཱི་ལ་དང་། མ་ར་ཀ་ཏ་དང་། པད་མ་རཱ་ག་དང་། བཻ་ཌཱུརྱ་དང་། སྔོན་པོ་ཆེན་པོ་དང་། དངུལ་དང་། གསེར་དང་མཚུངས་པའི་ཁ་དོག་རྣམས་དང་དེ་དག་རྣམས་ཀྱི་འོད་ཀྱིས་ཀུན་ནས་གསལ་བར་བྱེད་པ་དང་འདབ་མ་རྣམས་མཚུངས་པ་དང་། མཆོག་ཏུ་བལྟ་ན་སྡུག་པར་གྱུར་པ་དག་མཐོང་ངོ་། །ནམ་མཁའི་དཀྱིལ་ན་ཁང་བུ་རྣམས་ལ་ལེགས་པར་གནས་པའི་ལྷ་དེ་དག་རྣམས་དང་། པད་མའི་འདབ་མ་དེ་དག་ལ་ལྷ་གཞན་དག་ལྷན་ཅིག་སྤྱོད་པའི་འཁོར་

70-276b

དང་བཅས་པ་གནས་པ་རྣམས་རྩེ་བར་བྱེད་པ་དང་། ཕན་ཚུན་གྲོགས་སུ་གྱུར་པས་མྱོས་པ་ལ་དོན་གཅིག་པ་རྣམས་མཚོ་དེའི་པད་མའི་འདབ་མ་རྣམས་ཀྱི་གསེབ་ཏུ་སོང་ནས། གླུ་ལེན་པ་དང་གར་ཡང་བྱེད་དོ། །དེ་ནས་ནམ་མཁའི་དཀྱིལ་ན་རྒྱུ་བར་བྱེད་པའི་ལྷ་དེ་དག་རྣམས་དང་གང་ཡང་པད་མ་ཆེན་པོའི་འདབ་མའི་ནང་ན་གནས་པ་དེ་དག་དང་དེ་དག་རྣམས་ཐམས་ཅད་ཀྱང་རྣམ་པ་དུ་མར་རྩེ་དགའ་བ་ཆེན་པོ་ཉིད་ཀྱིས་རྣམ་པར་རྒྱུ་ཞིང་རྩེད་འཇོས་རྣམ་པར་རྒྱུ་བར་བྱེད་པ་གང་ཡིན་པ་ལ་ནི་དཔེ་རྣམས་ཀྱིས་ཉེ་བར་འཇལ་བར་བྱ་བར་སླ་བ་ཡང་མ་ཡིན་ནོ། །དེ་དག་རྣམས་དེ་ལྟར་རྩེ་བར་གྱུར་པའི་གླུ་དང་རོལ་མོའི་སྒྲ་དབྱངས་རྣམས་ནི་དཔག་ཚད་ལྔ་བརྒྱར་རྣམ་པར་གནས་པར་གྱུར་པ་དང་། དེ་དག་ནི་འདོད་པའི་ཡོན་ཏན་ལྔ་ཕུན་སུམ་ཚོགས་པར་གྱུར་པའི་རྔ་སྐད་ཡན་ལག་ལྔ་དང་ལྡན་པའི་ཆེན་པོ་རྣམས་རྣམ་པ་དུ་མར་ཉེ་བར་ལོངས་སྤྱོད་པར་བྱེད་དོ། །དེ་དག་རྣམས་ནི་རང་གི་ལས་ཀྱི་ཁྱད་པར་གང་ཡིན་པ་རྣམས་སྤྱད་ཅིང་བྱས་ལ་ཡོངས་སུ་བསགས་པ་དེ་སྐྱེལ་བར་བྱེད་ལ། འོན་ཀྱང་དྲན་པར་འགྱུར་བ་ཡང་མ་ཡིན་ནོ། །ཇི་ལྟར་ན་ལས་རྣམས་ཟད་པར་འགྱུར་བ་ཡིན་པ་དང་ལེགས་པར་བྱས་པ་རྣམས་ནི་གཏུགས་པར་འགྱུར་བ་ཡིན་པ་དང་། འཆི་འཕོ་བའི་དུས་ན་གང་དུ་འགྲོ་བར་བྱ་དགོས་པ་ཡིན་པ་དང་། འགྲོ་བ་གང་རྗེས་སུ་བསྒྲུབ་པ་འབྱུང་བ་ཡིན་པ་དང་རྣམ་པ་ཇི་ལྟ་བུའི་བདེ་བ་དང་སྡུག་བསྔལ་རྣམས་ལ་ཉེ་བར་ལོངས་སྤྱད་པར་བྱ་བ་འབྱུང་བ་དང་འབྱུང་བར་མི་འགྱུར་བ་ནི་གང་ཡིན་པ་དང་། ལེགས་པར་བྱས་པ་དང་ཉེས་པར་བྱས་པའི་ལས་རྣམས་ཀྱི་ལམ་ལེགས་པར་སྟོན་པ་པོ། དམྱལ་བ་དང་ཡི་དགས་དང་དུད་འགྲོ་དང་མིའི་གནས་རྣམས་སུ་འཇིགས་པ་དང་བཅས་པ་དང་། འཇིགས་པ་མེད་པར་སྒྲུབ་པའི་འཇིགས་པ་མེད་པའི་དབང་དུ་བྱས་ནས་སྐྱེ་བ་གཞན་གྱི་གནས་རྣམས་ལ་དེ་ལྟར་ཀུན་ཏུ་གོ་བར་མ་ཡིན་ཏེ། མུན་པར་བྱེད་པའི་བག་མེད་པར་ནུབ་པར་གྱུར་པ་དེའི་ཚེ་གོ་བ་མ་ཡིན་ནོ། །གང་གི་ཚེ་ལེགས་པར་བྱས་པའི་ལས་རྣམས་ཡོངས་སུ་ཟད་པར་གྱུར་ནས། མི་རྟག་པ་ཉིད་ཀྱི་རླུང་གིས་ངེས་པར་ལྟུང་བར་བྱེད་པ་དེའི་ཚེ། བག་མེད་པ་དེ་

70-277a

བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་རྣམས་གྲོགས་པོ་མ་ཡིན་པ་གྲོགས་པོའི་གཟུགས་ཅན་དང་། ཕན་པ་མ་ཡིན་པར་ཕན་པའི་གཟུགས་འཛིན་པ་རྣམས་ཀྱིས། རིམ་པ་ཕྱིན་ཅི་ལོག་ཏུ་བྱེད་པའི་འབྲས་བུ་ཉེ་བར་རིག་པར་འགྱུར་རོ། །གང་བདག་ཅག་གིས་བག་མེད་པ་རྣམས་ཀུན་ནས་བསྟེན་ཅིང་བསྒོམས་ལ་ལན་མང་དུ་བྱས་པ་གང་ཡིན་པ་རྣམས་ནི། ལེགས་པར་བསྒྲུབས་པ་ཡང་མ་ཡིན་པར་དེ་ལྟར་འབྲས་བུ་རྣམས་ཤེས་པར་འགྱུར་ན། བག་མེད་པའི་དགྲ་བོས་ཇི་ལྟར་བྱས་པ་དེ་དག་རྣམས་ལ་བརྩི་བགྲང་མེད་པར་ལྷ་དེ་དག་རྣམས་ཕྱིར་ཞིང་ཉིད་ཀྱང་དགའ་བར་བྱེད་ཅིང་། གླུ་ལེན་པར་བྱེད་ལ་མཚོ་དེ་ཡང་ལེགས་པར་བྱས་པའི་ལས་རྣམས་ཐམས་ཅད་ཀྱི་སྙིང་པོ་དང་འདྲ་བས་ཆེས་དགའ་བར་གྱུར་པར་པད་མའི་རྒྱལ་པོའི་འདབ་མ་རྣམས་ལ་རྩེ་དགའ་བར་བྱེད་པ་དེ་དག་རྣམས་དང་གང་ཡང་ནམ་མཁའི་དཀྱིལ་ན་ཁང་བུ་རྣམས་ཀྱིས་འགྲོ་བ་དག་གི་མཚོ་དེ་མཚུངས་པར་མཐོང་ངོ་། །དེ་ནས་དེ་ལྟར་བག་མེད་པ་རྣམས་ལ་ཆུའི་རླབས་ལ་རྩེ་བ་ཞེས་བྱ་བའི་བྱས་ལྷ་དེ་དག་རྣམས་ཀྱི་ལེགས་པར་བྱས་པའི་ལས་ཀྱིས་ཚིགས་སུ་བཅད་པ་རྗོད་པར་བྱེད་པ་རྣམས་ལ། ཇི་ལྟར། ལུས་ཅན་རྣམས་ཀྱི་གསོན་པ་ནི། །ཆུ་ཡི་རླབས་ལྟར་གཡོ་བ་ཡིན། །སྙིང་པོ་མེད་པའི་ཆུའི་ཆུ་བུར། །ལྷ་རྣམས་ཀྱིས་ནི་གོ་བའང་མིན། །དབུ་བའི་ཕུང་པོ་རིང་གནས་ཀྱི། །ཚེ་འདི་ཡང་ནི་མདོར་སྡུད་པའི། །ལྷ་ཡི་ཡུན་རིང་གནས་མིན་ཏེ། །མི་རྟག་པ་ཡིས་སྐལ་བ་སྤངས། །ཇི་ལྟར་མར་མེ་རྣམས་ཞིག་པས། །འོད་རྣམས་ཞིག་པར་འདོད་པ་ཡིན། །དེ་བཞིན་ལས་ནི་རྣམ་ཟད་པས། །ལྷ་རྣམས་ཀྱི་ནི་བདེ་བ་འཇིག །བྱས་པའི་ལས་གང་མི་འཇིག་པ། །ཅུང་ཟད་ཡོད་པ་མ་ཡིན་ནོ། །དེ་ལྟར་ན་ཡང་རྨོངས་པའི་རྣམས། །སྐྱེ་འདི་རྣམས་ནི་རྟག་ཉིད་མིན། །དངོས་གང་འགའ་ཞིག་སྐྱེ་བ་ནི། །དེ་ཡི་འཇིག་པ་རྟག་པར་གནས། །འདུས་བྱས་ཀྱང་ནི་ཐམས་ཅད་ཀྱི། །ཆོས་ཉིད་འདིར་ནི་རྣམ་པར་གནས། །གལ་ཏེ་འཁོར་བའི་སྲོག་ཆགས་རྣམས། །རང་གི་ལས་ཀྱིས་འཁོར་བྱེད་ན། །

70-277b

འཇིག་རྟེན་འདི་ཅིའི་དོན་དུ་རྨོངས། །བག་མེད་པས་ནི་རྣམ་པར་བཅོམ། །བག་མེད་པས་ནི་བདེ་ལེགས་འཇོམས། །བག་མེད་པས་ནི་འཆིང་བའི་མཆོག །བག་མེད་ལོག་པར་ལྟུང་བ་དང་། །བག་མེད་པས་ནི་དམྱལ་བར་འཚེད། །སྡུག་བསྔལ་འདི་ཡི་རྒྱུ་གཅིག་པུ། །བག་མེད་ཡིན་པར་ཡོངས་སུ་བསྒྲགས། །དེ་ཕྱིར་བདེ་དོན་གཉེར་སྐྱེས་བུས། །བག་མེད་ཡོངས་སུ་སྤང་བར་གྱིས། །གང་གིས་བག་མེད་ཡོངས་སྤངས་པ། །དེ་ཡིས་གོ་འཕང་འཕོ་མེད་འཐོབ། །གང་ཡང་བག་ཡོད་ལ་དགའ་བ། །དེ་ནི་མྱ་ངན་འདས་མཐའ་ཉིད། །བག་ཡོད་གོ་འཕང་དེ་དག་ཀྱང་། །མྱ་ངན་འདས་མཆོག་འགྲོ་བ་ཡིན། །བག་མེད་ལོག་པར་ལྟུང་བ་ཡི། །རྒྱུ་དེ་དག་ཏུ་རབ་ཏུ་བསྒྲགས། །སྐྱེས་བུ་བག་མེད་ཐམས་ཅད་ནི། །དེ་ནི་སྨྱོན་པ་བཞིན་དུ་སྣང་། །འཇིག་རྟེན་འདིར་ནི་སླད་སླ་ཞིང་། །ཕྱི་མ་ལ་ནི་སྡིག་པས་འཚེད། །བག་མེད་པ་ཡི་སྐྱེས་བུ་ཀུན། །ཕྱིན་ཅི་ལོག་ལ་འཇུག་པར་བྱེད། །རྒྱུ་རྣམས་ལས་ཀྱི་རྣམ་སྨིན་དང་། །འཆི་འཕོ་སྐྱེ་བ་དེ་བཞིན་ཏེ། །བག་མེད་མེ་ནི་གདུག་པ་འདིས། །དམྱལ་བར་རྗེས་སུ་འཁྲིད་པར་བྱེད། །དེ་ཕྱིར་དམྱལ་ལས་གྲོལ་དོན་དུ། །བག་མེད་རྣམ་པར་སྤང་བར་གྱིས། །གང་གིས་བག་མེད་ངེས་རྣམ་རྒྱལ། །རྟག་ཏུ་ཤེས་རབ་ལ་དགའི་མི། །དེ་ནི་ཉོན་མོངས་འཆིང་བཅད་ནས། །བདེ་བའི་གོ་འཕང་འཆར་བར་འགྲོ། །སྒོ་ལྔ་ནས་ནི་དྲི་མ་གསུམ། །སྐྱེ་བས་ཁམས་གསུམ་རྟག་འཇུག་པ། །བག་མེད་ལས་ནི་རྣམ་རྒྱལ་བའི། །སངས་རྒྱས་རྣམས་ཀྱིས་བག་མེད་གསུངས། །བག་མེད་མུན་པའི་སྐྱེ་གནས་ཡིན། །བག་ཡོད་པ་ནི་བདེ་བ་ཡིན། །དེ་ཕྱིར་བདེ་དོན་གཉེར་སྐྱེས་བུས། །བག་མེད་རྣམ་པར་སྤང་བར་གྱིས། །དེ་ལྟར་ཆུའི་རླབས་ལ་རྩེད་མོ་རྩེ་བ་ཞེས་བྱ་བའི་བྱས་ལྷ་བག་མེད་པར་གྱུར་པ་དེ་དག་རྣམས་ཀྱི་བག་མེད་པ་ཀུན་དུ་ཞི་བར་བྱ་བའི་དོན་དུ་རྗེས་སུ་སྟོན་པའི་ཚིགས་སུ་བཅད་པ་རྣམས་བཤད་དོ། །ལྷ་དེ་དག་རྣམས་ཀྱང་ཀུན་དུ་རྨོངས་པར་གྱུར་པའི་ཕྱིར་ན་ཇི་ལྟར་དེ་ཁོ་ན་ཉིད་དེ་དག་རྣམས་བརྗོད་

70-278a

པར་གྱུར་པ་ན། དེ་ལྟར་ཀུན་དུ་མི་རྟོགས་སོ། །སླར་ཡང་དེ་ཁོ་ན་བཞིན་དུ་གང་དག་ནམ་མཁའི་དཀྱིལ་དུ་སོང་བ་རྣམས་དང་། མཚོ་ཆེན་པོ་རྣམ་པར་རྒྱས་པའི་པད་མའི་འདབ་མ་རྣམས་ལ་ལྟ་བ་གང་ཡིན་པ་དེ་དག་རྣམས་ཕན་ཚུན་ཀུན་དུ་ལྟ་བ་ལ་ཆེད་ཆེར་བྱེད་པས། རྩེ་འཇོ་བར་བྱེད་ཅིང་དགའ་བར་ཡང་བྱེད་དེ། མཆོག་ཏུ་སྙན་པར་གྱུར་པའི་ལྷ་རྫས་ཀྱི་རྔ་སྐད་ཡན་ལག་ལྔ་པ་རྣམས་ཀྱིས་སོ། །ཡུལ་གཞན་རྣམས་ཀྱི་གཟུགས་དང་དྲིས་ཀྱང་ཕན་ཚུན་དུ་ཡིད་འཕྲོག་པར་གྱུར་པའི་བདེ་བ་རྣམས་ཀྱིས་ཀྱང་རྣམ་པར་ངོམས་པ་མེད་པའི་ཡུལ་རྣམས་ནི་ལན་ཚྭའི་ཆུ་བཞིན་དུ་ལན་ཅིག་མ་ཡིན་པ་དང་ལན་ཅིག་མ་ཡིན་པར་ཡང་ནགས་རྣམས་ཉིད་དུ་རྣམ་པར་ངོམས་པ་མེད་པར་འགྱུར་ཏེ། ལྷ་དེ་དག་རྣམས་དེ་ཁོ་ན་བཞིན་དུ་རྣམ་པ་དུ་མར་དགའ་བར་བྱེད་ཅིང་བདེ་བ་ཡང་ཉམས་སུ་མྱོང་བར་བྱེད་དོ། །དེ་ནས་དུས་ཤིན་ཏུ་རིང་བར་ལྷ་དེ་དག་གིས་ནམ་མཁའི་དཀྱིལ་དུ་རྩེད་སྒྲོགས་དག་བྱས་ནས། སླར་ཡང་གང་ན་རྣམ་པར་རྒྱས་པའི་མཚོ་དེ་དང་པད་མ་ཆེན་པོའི་ནགས་ཡོད་པ་དེར་ལེགས་པར་འབབས་པར་བྱེད་དོ། །ལྷ་གང་ཡང་པད་མ་ཆེན་པོ་དེའི་འདབ་མ་རྣམས་ལ་ལྷན་ཅིག་རྗེས་སུ་སྤྱོད་པ་དང་བཅས་ནས། རྔ་སྐད་ཡན་ལག་ལྔ་དང་ལྡན་པས་གླུ་ལེན་པར་བྱེད་པ་དང་དགའ་བར་བྱེད་པ་དང་། ཀུན་དུ་གཡོག་བྱེད་པ་དེ་དག་རྣམས་ནི་ཕན་ཚུན་དུ་གཡོག་གི་བྱ་བས་བགྲོད་ཅིང་འཐུན་པར་འཇུག་པས་རྒྱགས་པ་ལ་དོན་གཅིག་པ་འདོད་པ་དྲུག་ལ་རྣམ་པར་ཆགས་པའི་ཡིད་ཀྱིས། དུས་རིང་དུ་གླུ་ལེན་པར་བྱེད་པ་དང་མཆོག་ཏུ་རྩེད་མོ་རྩེ་བར་ཡང་བྱེད་དེ། དེ་དག་རྣམས་རྣམ་པ་དུ་མ་དང་རྣམ་པར་རྟོག་པ་དུ་མས་བདེ་བ་རྣམས་ཉམས་སུ་མྱོང་བར་བྱེད་དོ། །དེ་དག་གི་བདེ་བ་དེ་དག་རྣམས་ཀྱང་སེམས་བསྐྱེད་པ་དང་། ལྷན་ཅིག་ཏུ་སྐྱེ་བ་དང་། ཀུན་དུ་རྟོག་པ་ཙམ་གྱིས་རབ་ཏུ་འགྲུབ་པར་འགྱུར་བ་ནི། དགེ་བའི་ལས་རྣམས་ཀྱིས་དེ་ལྟར་ཡང་ཕུན་སུམ་ཚོགས་པར་འགྱུར་རོ། །ལྷ་དེ་དག་དེ་ལྟར་ཀུན་དུ་རྟོག་པའི་ཆུའི་ཤུགས་ལ་རྣམ་པར་རྟོག་པའི་རླབས་ཀྱི་ཕྲེང་བ་དང་ལྡན་པའི་ཆུ་

70-278b

ཀླུང་ཆེན་པོས་ཀུན་དུ་ཁྱེར་བར་གྱུར་པ་དེ་དག་རྣམས་ནི། མཆོག་ཏུ་བག་མེད་པའི་ཡིད་ཀྱིས་དུས་རིང་དུ་འདའ་བར་བྱེད་དོ། །མཚོ་ཆེན་པོ་དེའི་པད་མའི་འདབ་མ་རྣམས་ལ་སོང་བའི་ལྷུ་རྣམས་ལ་ནི། ལྷ་རྫས་ཀྱི་བདེ་བ་རྣམ་པ་དུ་མ་རྣམས་དང་རྣམ་པར་འདྲེས་པ་དུ་མ་རྣམས་ཉམས་སུ་མྱོང་བར་བྱེད་དོ། །དེ་དག་དེ་ལྟར་རྣམ་པར་འཕྱན་པས་བག་མེད་པར་སྤྱོད་པ་དེ་དག་རྣམས་ལ་རྗེས་སུ་བརྩེ་བའི་དོན་དང་། བག་མེད་པ་ཀུན་དུ་སྤང་བར་བྱ་བའི་དོན་དུ་ཡང་འཐབ་བྲལ་གྱི་བདག་པོ་མུ་སུ་ལུན་དྷ་དེས། སྤྲུལ་པ་འདི་དག་རྣམས་བྱེད་པ་ཡིན་ཏེ། གཟུགས་དང་ལང་ཚོའི་རྒྱགས་པ་རྣམས་ཀུན་དུ་ཞི་བར་བྱ་བའི་དོན་དུ་ཡང་ཡིན་ནོ། །དེ་བཞིན་དུ་ཡང་མཚོ་ཆེན་པོ་རྣམ་པར་རྒྱས་པ་དེའི་དྲུང་དེ་ན་གྲིབ་མ་སྔོན་པོ་ཞེས་བྱ་བའི་རི་ཐམས་ཅད་ནས་ཀྱང་ཤིན་ཏུ་རབ་ཏུ་དང་བའི་བཻ་ཌཱུརྱའི་རང་བཞིན་ལ་གསེར་དང་དངུལ་གྱི་ཁམས་ཀྱི་འབྱུང་ཁུངས་རྣམས་དང་ལྡན་པ་ཐམས་ཅད་དུ་བཀྲ་ཞིང་བཀྲ་བར་གྱུར་པའི་ནགས་འབར་བའི་ཕྲེང་བ་རྣམས་དང་ལྡན་པ། འབབ་ཆུ་སྟོང་ཕྲག་བརྒྱ་གསེར་ཤིན་ཏུ་བསིལ་བ་དང་རིན་པོ་ཆེའི་འོད་ཀྱིས་ཀུན་ཏུ་སྣང་བར་གྱུར་པའི་རྩེ་མོ་ཐམས་ཅད་ལ་ཡང་ལྗོན་ཤིང་གི་ཚལ་དང་ལྡན་པ་དང་པད་མའི་རྫིང་བུ་རྣམས་ཀྱིས་ཉེ་བར་མཛེས་པ་དང་། མེ་ཏོག་གི་འབྱུང་གནས་རྣམ་པ་དུ་མ་སྣ་ཚོགས་པ་རྣམས་ཀྱིས་ཉེ་བར་མཛེས་པ། འཁྲི་ཤིང་གི་ཁང་པ་སྟོང་གིས་རྣམ་པར་བརྒྱན་པ། ཉེ་འཁོར་རྣམ་པ་དེ་ལྟ་བུར་རྣམ་པར་མཛེས་པའི་རིའི་མཆོག་དེ་ལ། འཐབ་བྲལ་བའི་མངའ་བདག་དེས་བདེ་བ་རྒྱ་ཆེན་པོའི་ས་ན་གནས་པའི་ལྷ་རྣམས་དང་། ལྷ་གཞན་རྣམས་ལ་ཡང་ཕན་པར་བྱ་བའི་དོན་དུ་རྫུ་འཕྲུལ་བྱས་པ་རྣམས་ནི་ལྷ་རྫས་ཀྱི་བསམ་གྱིས་མི་ཁྱབ་པའི་ངོ་བོའི་སྤྲུལ་པ་རྣམས་ཡིན་ཏེ། བདེ་བ་རྒྱ་ཆེན་པོའི་ས་ལ་གནས་པའི་ལྷ་དེ་དག་རྣམས་ལས། ཐབས་ཐམས་ཅད་ནས་བཅུ་འགྱུར་གྱིས་གཟུགས་དང་ལང་ཚོ་དང་མདངས་དང་མགྱོགས་པ་དང་སྤྲོ་བ་དང་གར་དང་གླུ་དང་རྒོད་པ་དང་འགྱིང་བག་དང་རྩེད་འཇོ་ལ་སྤྲོ་བ་ལ་སོགས་པ་རྣམས་ཀྱིས་ཆེས་ལྷག་པའི་ལྷ་རྫས་ཀྱི་ཡུལ་གྱི་རྣམ་པ་དེ་སྲིད་པ་རྣམས་སྤྲུལ་པ་གང་ཡིན་པ་འདི་དག་གི་

70-279a

ཁྱད་པར་གྱིས་ལྷ་གཞན་དེ་དག་རྣམས་ནི་བཅུར་བྱས་པའི་ཆ་ཙམ་དུ་ཡང་འགྱུར་བ་མ་ཡིན་ནོ། །རིམ་པ་ཐམས་ཅད་ཀྱིས་གཟུགས་དང་ལང་ཚོ་དང་ཚད་དང་མདོག་དང་དབྱིབས་དང་དགོད་པ་དང་འགྱིང་བག་དང་གླུ་དང་གར་དང་རྩེད་མོའི་ཡང་རིམ་པ་རྣམས་ཀྱི་རིམ་པ་རྣམས་ཐམས་ཅད་ཀྱིས་ཀྱང་ཅུང་ཟད་མཛེས་པ་མ་ཡིན་ནོ། །རྣམ་པ་དེ་སྲིད་དུ་སྤྲུལ་པ་དེ་དག་རྣམས་ཕལ་ཆེར་ནི་གྲིབ་མ་སྔོན་པོའི་རི་དེ་ལ་སྟེ། ཉེ་འཁོར་ཀུན་ནས་བཻ་ཌཱུརྱའི་རང་བཞིན་ཡིན་པ་རྣམས་ནི་སྔ་མ་བཞིན་ནོ། །དེ་ནས་རིའི་མཆོག་གང་ཡིན་པ་དེའི་རྩེ་མོ་དང་། ཐམས་ཅད་མཆོག་ཏུ་གྱུར་པ་དེ་དག་རྣམས་ལས་སྤྲུལ་པའི་ལྷ་དེ་དག་རྣམས་དང་། ལྷ་མོ་དག་ཀྱང་གླུ་ལེན་པར་གྱུར་པས་ཡན་ལག་ལྔ་དང་ལྡན་པར་གྱུར་པའི་རོལ་མོ་རྣམས་ཀྱང་མཉམ་པ་དང་ཆགས་པར་བྱེད་པ་དང་། སྙན་པར་གྱུར་པ་རྣམས་བྱེད་ཅིང་། གང་ན་རང་བཞིན་གྱི་ལྷ་དེ་དག་རྣམས་གར་བྱེད་པ་དང་། འགྱིང་བར་བྱེད་པས་སྐྱེད་མོས་ཚལ་གྱི་ལྟད་མོ་བྱེད་པ་དེར་ལྷ་མོ་དེ་དག་རྣམས་དང་ལྷ་དེ་དག་རྣམས་རིམ་གྱིས་འཇུག་གོ། །དེ་ནས་ལྷ་དེ་དག་རྣམས་ཀྱིས་སྤྲུལ་པ་དེ་དག་གི་གླུའི་སྒྲ་རྣམས་ཐོས་པར་གྱུར་པ་དང་། བཅུ་འགྱུར་གྱིས་ཤིན་ཏུ་སྙན་པར་གྱུར་པ་ནི། སྔ་མ་བཞིན་ཏེ་རང་བཞིན་གྱི་ལྷ་དེ་དག་རྣམས་རྩེ་དགའ་བ་ལ་མཆོག་ཏུ་ཡང་ཞུགས་པ་དང་། ལྷ་མོ་དེ་དག་རྣམས་ཀྱིས་ཀྱང་དེ་ཁོ་ན་བཞིན་དུ་རྩེས་པར་གྱུར་ཏོ། །དེ་ནས་སྤྲུལ་པའི་ལྷ་དེ་དག་རྣམས་ཀྱིས་དལ་བུ་དལ་བུས་ལེགས་པར་བབས་ཏེ། དེ་ནས་ཕན་ཚུན་དུ་གང་གི་ཚེ་ཁྱད་པར་ཞུགས་པར་མཐོང་བར་གྱུར་པ་དེའི་ཚེ་རང་བཞིན་གྱི་ལྷ་དེ་དག་རྣམས་ནི་སྤྲུལ་པ་དེ་དག་རྣམས་ཀྱི་ཁྱད་པར་གྱིས་ཚུལ་ཐམས་ཅད་ཀྱིས་མི་མཛེས་སོ། །གཟུགས་ལྷག་པས་ནི་གཟུགས་ཀྱི་རྒྱགས་པ་ཉེ་བར་བཅོམ་མོ། །དེ་དག་རྣམས་ཀྱིས་བྱས་པའི་ཆ་བྱད་དུ་བྱས་པ་རྣམས་བཅོམ་མོ། །འོད་རྣམས་ཀྱིས་ནི་རང་གི་ལུས་ལས་ཀུན་དུ་འབྱུང་བའི་འོད་རྣམས་བཅོམ་མོ། །སྤྲུལ་པའི་གླུའི་དབྱངས་རྣམས་ཀྱིས་ནི་ངོ་བོ་ཉིད་ཀྱི་གླུའི་གདངས་རྣམས་ཉེ་བར་བཅོམ་མོ། །དྲི་རྣམས་ཀྱིས་ནི་དྲི་རྣམས་བཅོམ་མོ། །སྤྲུལ་པའི་ཚད་དང་ཁ་དོག་དང་དབྱིབས་རྣམས་ཀྱིས་

70-279b

ནི་ལྷ་དེ་དག་རྣམས་ལྷ་མོ་དང་ལྷན་ཅིག་ཏུ་བཅས་པ་རྣམས་ཀྱི་ཚད་དང་ཁ་དོག་དང་དབྱིབས་རྣམས་ཉེ་བར་བཅོམ་མོ། །དེ་བཞིན་དུ་ཡན་ལག་ལྔ་དང་ལྡན་པའི་ཡུལ་གྱི་བདེ་བ་རྣམས་ཀྱིས་ནི་ཡན་ལག་ལྔ་དང་ལྡན་པའི་ཡུལ་གྱི་བདེ་བ་རྣམས་ཉེ་བར་བཅོམ་མོ། །ཇི་ལྟ་ཇི་ལྟར་ངོ་བོ་ཉིད་ཀྱི་ལྷ་རྣམས་ཀྱི་རྒྱགས་པ་ཆེན་པོ་ཐམས་ཅད་ཆུང་ངུན་དུ་བྱས་པར་འགྱུར་ཏེ། ཐབས་རྣམས་ཐམས་ཅད་ཀྱིས་གང་གི་ཚེ་ལྷ་དེ་དག་དང་ངོ་བོ་ཉིད་ཀྱི་ལྷ་དེ་དག་རྣམས་རྣམ་པར་འདྲེ་བར་འགྱུར་བ་དེའི་ཚེ་ནའོ། །དེ་ལྟར་དེ་དག་རྣམས་ཀྱིས་ངོ་བོ་ཉིད་ཀྱི་ལྷ་རྣམས་ཀྱི་གཟི་བརྗིད་དེ་དག་དེ་བཞིན་དུ་ཟིལ་གྱིས་གནོན་ཏེ། ཇི་ལྟར་འཛམ་བུའི་གླིང་དུ་ཉི་མ་ཤར་བར་གྱུར་ན། གཟའ་དང་སྐར་མ་དང་རྒྱུ་སྐར་རྣམས་ཀྱི་གཟི་བརྗིད་ཉམས་པར་བྱེད་དོ། །དེ་བཞིན་དུ་སྤྲུལ་པའི་ལྷ་དེ་དག་རྣམས་ཀྱིས་ལྷ་རྣམས་ཐམས་ཅད་ཀྱི་འོད་ཟེར་ཟིལ་གྱིས་གནོན་ནོ། །ཇི་ལྟར་ལྷ་རྫས་ཀྱི་རོལ་མོ་རྣམས་ཀྱིས་མི་རྣམས་ཟིལ་གྱིས་གནོན་པར་བྱེད་པ་དེ་བཞིན་དུ་རོལ་མོ་རྣམས་ཀྱང་མངོན་པར་ཟིལ་གྱིས་གནོན་ནོ། །གླུ་རྣམས་ཀྱང་དེ་བཞིན་དུ་ཟིལ་གྱིས་གནོན་ནོ། །ཚད་དང་མདོག་དང་དབྱིབས་རྣམས་ཀྱང་དེ་བཞིན་དུ་ཟིལ་གྱིས་གནོན་ཏེ། ཇི་ལྟར་འཐབ་བྲལ་བས་མི་རྣམས་ཟིལ་གྱིས་གནོན་པ་བཞིན་ནོ། །དེ་ནས་ངོ་བོ་ཉིད་ཀྱི་ལྷ་དེ་དག་རྣམས་ངོ་ཚ་བ་དང་བཅས་པས་གང་ན་དེ་མཚོ་ཆེན་པོ་དེ་ཡོད་པའི་འགྲམ་དེར་ཉེ་བར་འགྲོ་བར་བྱེད་དེ། ངོ་ཚ་བ་དང་ངོ་མཚར་བར་གྱུར་པ་དང་བཅས་པའི་ཡིད་ཀྱིས་སོ། །དེ་ནས་སྤྲུལ་པའི་ལྷ་དེ་དག་རྣམས་མཚོ་དེའི་གང་ན་པད་མ་ཆེན་པོ་ཡོད་པ་ཡིན་པ་དེ་དང་ཉེ་བར་མངོན་པར་གནས་ནས་གླུ་ལེན་པར་བྱེད་པར་གྱུར། གར་བྱེད་པར་གྱུར། དགོད་པར་གྱུར་པས་ཀྱང་ལྷ་རྫས་ཀྱི་འདོད་པའི་ཡོན་ཏན་ལྔ་ཕུན་སུམ་ཚོགས་པར་གྱུར་པའི་བདེ་བ་རྣམས་དང་ཡང་དག་པར་ལྡན་པས་མཚོ་དེའི་སྟེང་གི་པད་མ་ཆེན་པོའི་འདབ་མ་རྣམས་ཀྱི་བར་དུ་སོང་ནས་གར་བྱེད་པ་དང་། དགོད་པར་བྱེད་པ་དང་། འགྱིང་བར་བྱེད་པ་དང་། ཕན་ཚུན་གྲོགས་བྱེད་པས་ཀྱང་རྒྱགས་པ་ལ་དོན་གཅིག་པ་རྣམས་ཡིན་ཏེ། འཐབ་བྲལ་བ་རྣམས་ལས་ཆེས་ལྷག་པའི་ལུས་ཅན་དེ་དག་རྣམས་ཀྱིས་རང་བཞིན་གྱི་

70-280a

ལྷ་རྣམས་ལ་ཕན་པར་བྱ་བའི་དོན་དུ་དེའི་ཚེ། ཚིགས་སུ་བཅད་པ་མངོན་པར་བསྙད་པ་གླུ་དང་ལེགས་པར་འདྲེས་པ་རྣམས་བཤད་པ། ཇི་ལྟར། ལྷ་ཡི་བདེ་བ་ཐམས་ཅད་ནི། །ལས་དང་ཆ་འདྲ་མཐོང་བ་ཡིན། །གསོན་པ་དང་ནི་བདེ་བ་ཡང་། །ལས་ཟད་པས་ནི་འཇིག་པ་ཡིན། །དེ་ཕྱིར་རྣམ་པ་དུ་མའི་བདེ། །ཇི་སྲིད་ཟད་པར་མ་གྱུར་པ། །དེ་སྲིད་དུ་ནི་བསོད་ནམས་ཀྱིས། །བསོད་ནམས་མ་བྱས་ལས་སྡུག་བསྔལ། །གསོན་ཚེ་མྱུར་བ་ཉིད་དུ་འགྲོ། །ལང་ཚོ་མྱུར་བར་འགྲོ་བ་ཡིན། །འཆི་བདག་མྱུར་བ་ཉིད་འོང་གིས། །བག་མེད་པ་ལ་དགའ་མ་བྱེད། །ལུས་ཅན་ཀུན་གྱི་བདེ་བ་ཀུན། །འཇིག་པའི་རྒུད་པར་འགྱུར་བ་ཡིན། །གསོན་པ་ཡང་ནི་མཐར་འཇོམས་ན། །བག་མེད་ལ་ནི་དགའ་མ་བྱེད། །དབང་པོ་རྣམས་ཀྱི་སྤྱོད་ཡུལ་ལ། །མི་སྐྱེ་བར་ནི་བྱ་མི་ནུས། །དབང་རྣམས་རང་གི་སྤྱོད་ཡུལ་ལས། །གང་ཕྱིར་ཤེས་པས་ཟློག་པར་བྱེད། །དེ་ཕྱིར་རྟག་ཏུ་ཤེས་པ་བསྟེན། །ཤེས་པ་ཡོངས་སུ་སྤོང་བ་དང་། །སྐྱོན་རྣམས་རྟག་ཏུ་སྤོང་མི་འགྱུར། །དེ་ནི་དོན་མིན་མྱུ་གུ་ཡིན། །བག་མེད་པ་ལས་འདོད་ཆགས་སྐྱེ། །འདོད་ཆགས་ལས་ནི་སྡུག་བསྔལ་འབྱུང་། །སྡུག་བསྔལ་གྱིས་བསྒྲུབས་སྐྱེ་བ་འདི། །དེ་དག་འཁོར་བའི་ལམ་ཡིན་ནོ། །བག་མེད་ཡོངས་སུ་སྤངས་པ་གང་། །ཡུལ་འདི་སྟེན་པར་མི་བྱེད་པ། །དེ་ལ་སྐྱོན་ནི་མི་དམིགས་ལ། །སྐྱོན་གྱི་དངོས་པོ་གྲོལ་བ་ཡིན། །སྡུག་བསྔལ་ལྗོན་ཤིང་རྩ་བར་ནི། །བག་མེད་འདི་གཅིག་རྣམ་པར་གནས། །བག་མེད་པ་ལ་མཆོག་གྱུར་པས། །སྐྱེ་འདི་ལམ་ནི་ཐམས་ཅད་འཇོམས། །གཟུགས་ནི་རྟག་པ་མཐོང་བ་མེད། །མཉམ་དུ་འགྲོ་བའི་བདེ་བ་མེད། །སྲིད་ནས་སྲིད་པར་དངོས་པོ་འདིའི། །ཀུན་ཐོབ་པ་ཡང་རྣམ་འཇིག་འགྱུར། །ཡུལ་ནི་འཆིང་བ་རྣམས་ཀྱི་རྒྱུ། །ཇི་ལྟ་ཇི་ལྟར་བསྟེན་བྱས་པ། །དེ་ལྟ་དེ་ལྟར་རྣམ་འཕེལ་ཏེ། །བུད་ཤིང་ལས་ནི་མེ་ཇི་བཞིན། །ངོམས་པ་མེད་པའི་སྡུག་བསྔལ་འདི། །འདི་ནི་བདེ་བར་འདིར་མི་བརྗོད། །འཁོར་བ་ལས་ནི་ཁ་ལོག་པའི། །གང་ཞིག་སྲེད་བྲལ་དེ་བདེ་ཡིན། །

70-280b

དེ་ཕྱིར་གང་ཞིག་མཐར་ཐུག་བདེ། །བདེ་བ་དེ་ནི་བདེ་བར་བརྗོད། །འདོད་པ་འབྱུང་མིན་བདེ་བ་ནི། །མཐར་ཐུག་པ་ཡི་བདེ་བ་ཡིན། །དེ་ལྟར་བག་མེད་པ་རྣམས་ཀྱིས་ཤིན་ཏུ་བཅོམ་པར་མ་གྱུར་པའི་མུ་སུ་ལུན་དྷ་ཡིས་སྤྲུལ་པའི་ལྷ་དེ་དག་རྣམས་ཀྱིས་ལྷ་དེ་དག་རྣམས་ལ་གླུ་བསྙད་ནས་མཆོག་ཏུ་སྙན་པ། སྔ་ན་མ་ཐོས་པའི་གླུ་རྣམས་ལེན་པར་བྱེད་ལ། ཇི་ལྟར་བསྟན་པ་དང་ཀུན་ཏུ་བསྲེས་པའི་སྤྲུལ་པའི་དེ་ཁོ་ན་ཉིད་རྣམས་ངོ་བོ་ཉིད་ཀྱི་ལྷ་དག་གིས་ཐོས་ནས་ཉན་པར་བྱེད་དོ། །དེ་ནས་ལྷ་དེ་དག་གིས་ཚིགས་སུ་བཅད་པའི་དབྱངས་ཀྱིས་བསྙད་པ་ཐོས་ནས། སྲེད་པ་སྔ་མ་ལ་གོམས་པར་བྱས་པར་གྱུར་པ་ཡོངས་སུ་དག་པའི་རྒྱུད་གང་ཡིན་པ་ཇི་ལྟར་ལྷ་དེ་དག་གིས་ཆེས་གཙོ་བོར་གྱུར་པ་རྣམས་ཀྱིས་གླུ་དབྱངས་ཀྱི་དོན་ཀུན་དུ་རྟོགས་ནས་སྐྱོ་བ་སྐྱེ་བར་འགྱུར་རོ། །དེ་ནས་ཡང་བདག་ཅག་རྣམས་ཀྱི་དྲུང་ན་རིམ་པ་རྣམས་ཐམས་ཅད་ཀྱིས་ཁྱད་པར་དུ་འཕགས་པར་གྱུར་པ་དེ་དག་གང་གིས་ཚིགས་སུ་བཅད་པའི་དབྱངས་འདི་དག་རྣམས་ལེགས་པར་བཤད་པ་ཡིན་ཡང་དེ་དག་རྣམས་གང་ཡིན་པའི་དྲུང་ན། བདག་ཅག་རྣམས་ཅིའི་ཕྱིར་ཐམས་ཅད་དུ་ཤིན་ཏུ་དམན་པར་གྱུར་ཞེས། དེ་ལྟར་ཐབས་དེ་དག་རྣམས་ཀྱིས་འཐབ་བྲལ་གྱི་བདག་པོས་སྙིང་ལ་ལེགས་པར་གོ་བར་བྱས་ཏེ། བག་མེད་པ་རྣམས་དང་བྲལ་བར་ཡང་བྱས་སོ། །ཐབས་གཞན་རྣམས་ཀྱིས་ཀྱང་ཕན་པར་བྱས་པ་ཡིན་ལ། དེ་ལྟར་ལྷ་དེ་དག་རྣམས་གཟུགས་ལ་སོགས་པའི་བདེ་བའི་རྒྱགས་པ་དག་གིས་རྒྱགས་པར་གྱུར་ནས། ལོག་པར་ལྟུང་བར་འགྱུར་བ་རབ་ཏུ་མ་མཐོང་བ་དེ། ཕྱིས་འཆི་འཕོ་བའི་དུས་ན་འགྱོད་པའི་མེས་བསྲེགས་ནས་ཕྱི་ནས་ཡང་དམྱལ་བའི་མེས་སྲེག་པར་འགྱུར་བ་ཡིན་ནོ། །དེ་ལ་ཐབས་འདི་དག་གིས་རང་བཞིན་པའི་ལྷ་དེ་དག་རྣམས་ལ་ཕན་པར་འདོད་པས་མུ་སུ་ལུན་དྷ་དེས་ཀུན་སྐྱོ་བ་སྐྱེད་དོ། །དེ་ནས་ལྷ་དེ་དག་རྣམས་ཡིད་བྱུང་བར་གྱུར་པ་རྟོགས་ནས། ཡང་སྤྲུལ་པ་གཞན་ཡང་ཤིན་ཏུ་ཡིད་འབྱུང་བའི་རྒྱུར་གྱུར་པའི་སྤྲུལ་པ་རྣམས་བྱེད་དེ། ཇི་ལྟར་པད་མའི་འདབ་མ་རྣམས་ཉིད་ལ་རྣམ་གྲངས་དུ་མ་རྣམས་ཀྱིས་དགའ་བར་བྱེད་པ་དང་། ཡོངས་སུ་གླུ་ལེན་པར་བྱེད་པ་དང་། རྣམ་གྲངས་དུ་མར་འགྱིང་བར་

70-281a

ཡང་བྱེད་པ་དེ་ལྟར་བྱེད་དོ། །ཇི་ལྟར་རང་བཞིན་གྱི་ལྷ་དེ་དག་རྣམས་ཀྱིས་ནམ་ཡང་འགའ་ཞིག་ཏུ་ཡང་མཐོང་མ་མྱོང་བའི་རྩེད་མོ་དེ་དག་རྣམས་དེ་ལྟར་རྣམ་པ་དུ་མ་རྣམས་སུ་དང་རྣམ་པར་རྟོག་པ་དུ་མ་རྣམས་སུ་དང་ཆེས་དགའ་བ་དུ་མ་རྣམས་སུ་ངོ་བོ་ཉིད་ཀྱི་ལྷ་དེ་དག་རྣམས་ཀྱི་བག་མེད་པ་དང་ངེས་པར་བྲལ་བར་བྱ་བའི་དོན་དུ་དང་། ཇི་ལྟར་དེ་དག་རྣམས་ཀྱི་རྒྱགས་པ་ཀུན་ནས་སྤངས་པར་འགྱུར་བར་རོ། །ངོ་བོ་ཉིད་ཀྱི་ལྷ་དེ་དག་རྣམས་ཀྱིས་སྤྲུལ་པའི་ལྷ་དེ་དག་རྣམས་ཀྱི་གླུ་ཤིན་ཏུ་སྙན་པར་གྱུར་པ་རྣམས་ཇི་ལྟ་བ་བཞིན་དུ་ཐོས་པས་ངོ་ཚ་བར་གྱུར་ནས། གླུ་ལེན་པར་མི་བྱེད་པ་དང་གར་ཡང་མི་བྱེད་འགྱིང་བར་ཡང་མི་བྱེད་དགའ་བར་ཡང་མི་བྱེད་ཀུན་ཏུ་སྤྱོད་པར་ཡང་ནི་མི་བྱེད་ཀྱི་སྤྲུལ་པ་དེ་དག་རྣམས་ཀྱི་ལ་ལྟ་བར་འདོད་པའི་ཡིད་རྩེ་གཅིག་པས་ཐམས་ཅད་ཉིད་གནས་པར་གྱུར་ཏོ། །དེ་དག་རྣམས་ཀྱིས་ཀྱང་རྣམ་པ་དུ་མར་གར་དང་གླུ་དང་དགོད་པ་དང་འགྱིང་བག་དང་རྣམ་པར་རྟོག་པ་དུ་མར་དང་། དགའ་བར་འགྱུར་བ་དུ་མར་གཞན་རྣམས་དང་འདྲ་བ་མ་ཡིན་པའི་རྣམ་པ་དུ་མ་རྣམས་ཀྱང་པད་མའི་འདབ་མ་རྣམས་ལ་སོང་ནས་ལྷ་དེ་དག་རྣམས་གླུ་ལེན་པར་བྱེད་པ་དང་གར་ཡང་བྱེད་དོ། །དེ་ནས་གང་གི་ཚེ་རང་བཞིན་གྱི་ལྷ་དེ་དག་རྣམས་ཀྱིས་ཡིད་ལས་སུ་རུང་བར་བྱས་པར་གོ་ནས། མུ་སུ་ལུན་དྷ་དེས་སྤྲུལ་པ་གཉིས་པ་བྱེད་པ་རྣམས་ནི་ཇི་ལྟར་པད་མའི་འདབ་མ་རྣམས་ལ་གནས་ནས་གླུ་ལེན་པར་བྱེད་པའི་ལྷ་དེ་དག་རྣམས་ཉིད་ཀྱི་པད་མའི་འདབ་མ་གཅིག་སྤྲུལ་པའི་ལྷ་རྣམས་ཀྱིས་ལེགས་པར་གང་བ་རབ་ཏུ་ལྟུང་ངོ་། །དེ་ནས་མཚོ་དེ་ལ་ལྷ་དེ་དག་རྣམས་ལས་ཁ་ཅིག་ནི་ནུབ་པར་གྱུར་ཏོ། །ཁ་ཅིག་ནི་བྱུང་ནས་ཡང་ནུབ་བོ། །ལ་ལ་དག་ནི་ལུས་རྣམས་ཆུ་ལ་བརྟེན་ནས་རྐྱལ་བར་བྱེད་དོ། །ཁ་ཅིག་ནི་ཕན་ཚུན་ཀུན་དུ་འཁྱུད་པར་བྱེད་པ་དང་ནུབ་པར་ཡང་གྱུར་ནས། ཇི་ལྟ་བ་བཞིན་དུ་སྐྱོབས་དང་བསྐྱབ་པར་གྱིས་དང་ཞེས་དེ་ལྟར་ཕན་ཚུན་དུ་འབོད་པར་བྱེད་ཅིང་། འབོད་པར་བྱེད་པས་ཀྱང་ཕན་ཚུན་དུ་རྟེན་པར་བྱེད་པ་དང་། ངུ་བར་ཡང་བྱེད་པ་དང་ལྟུང་བ་དང་བྱིང་བར་ཡང་གྱུར་པའི་ཉམ་ང་བ་ཆེན་པོ་དང་འཇིགས་པ་ཆེན་པོ་དང་སྡུག་

70-281b

བསྔལ་ཆེན་པོ་རྣམ་པ་དུ་མ་དེ་དག་རྣམས་མཚོ་ཆེན་པོ་དེའི་འགྲམ་དུ་སོང་བར་གྱུར་པའི་ལྷ་དེ་དག་རྣམས་ཀྱིས་ཁྱད་པར་དུ་མཐོང་ངོ་། །དེ་ནས་འདབ་མ་གཅིག་དེ་དག་ཏུ་ཟགས་པ་དང་མཉམ་པ་ཐབས་ཀྱི་རྗེས་ཐོགས་སུ་འདབ་མ་གཞན་སྤྲུལ་པའི་ལྷ་རྣམས་ཀྱིས་ཀུན་དུ་གང་བར་གྱུར་པའི་འདབ་མ་དེ་དང་དེ་དག་རྣམས་ཟགས་ཤིང་ཟགས་ཤིང་རྣམ་པར་རྒྱས་པའི་མཚོ་ཆེན་པོར་ལྷུང་ལ། སྤྲུལ་པའི་ལྷ་དེ་དག་གང་ཡིན་པ་དེ་དག་རྣམས་ཐམས་ཅད་ཀྱང་འཇིགས་པ་ཆེན་པོ་རྣམས་སུ་ལྷུང་བར་གྱུར་ཏེ་ཁ་ཅིག་ནི་ཆུར་ནུབ་བོ། །ཁ་ཅིག་འགྱུར་ལྡོག་བྱས་པས་ཤེད་སྨད་པར་གྱུར་ནས་རྣམ་པར་ཁྲོ་བར་བྱེད་དོ། །ཁ་ཅིག་ནི་དེ་ན་གར་སོང་བ་མཐོང་བར་གྱུར་པ་ཉིད་ཀྱང་མ་ཡིན་ནོ། །ཁ་ཅིག་ནི་ཆུར་འགྱུར་ལྡོག་བྱས་པས་ཤི་བར་གྱུར་ཏོ། །ཁ་ཅིག་ནི་རྣམ་པར་ཁྲོ་འཚིག་གོ། །དེ་བཞིན་དུ་ལྷའི་བུ་མོ་རྣམས་ཀྱང་ཤིན་ཏུ་རྣམ་པར་ཉམས་པར་གྱུར་ཅིང་རྣམ་པར་ཁྲོས། འཁྲུགས་པ་དང་བྱིང་བར་གྱུར་པས་ལྷ་དེ་དག་རྣམས་ལ་འཇུས་འཕྱངས་ནས་ནུབ་པར་འགྱུར་རོ། །ཇི་ལྟར་གང་གི་ཚེ་གྲུ་ཞིག་པར་གྱུར་ན་དེའི་ཚེ་གང་དག་དེར་ཞུགས་པ་དེ་དག་རྣམས་མེད་པ་དང་བྱིང་བར་འགྱུར་རོ། །དེ་བཞིན་དུ་མི་དགེ་བའི་ཆུ་རྣམས་ཀུན་དུ་རྒལ་བར་བྱེད་པ་ན། སྤྲུལ་པའི་ལྷ་དེ་དག་རྣམས་ཀྱང་འདབ་མ་རྣམས་ལས་ལྷུང་བས་ངེས་པར་ནུབ་པར་འགྱུར་རོ། །དེའི་རྗེས་ལ་རྣམ་པར་རྒྱས་པའི་མཚོ་ཆེན་པོར་པད་མའི་འདབ་མ་གསུམ་པ་ལྷུང་བར་གྱུར་པས་དེ་ན་ཡང་ལྷ་གང་དག་གནས་པ་དེ་དག་རྣམས་ཐམས་ཅད་ཀྱང་། རྡོ་བ་བཞིན་དུ་འོག་ཏུ་བྱིང་ཞིང་ནུབ་ནས་ཐམས་ཅད་ཀྱང་མ་མཐོང་བར་སོང་ངོ་། །དེའི་རྗེས་ཐོགས་ལ་སྤྲུལ་པའི་ལྷས་ཀུན་ནས་གང་བའི་འདབ་མ་གཞན་དག་ཀྱང་རབ་ཏུ་ལྷུང་བར་གྱུར་ཏེ། དེ་དག་ན་ཡང་དེའི་ལྷ་གང་དག་དེ་ལ་ཀུན་ཏུ་འདུས་ཤིང་ལེགས་པར་ཚོགས་པ་དེ་དག་རྣམས་ཀྱང་མཚོ་རྣམ་པར་རྒྱས་པ་དེ་དག་ཏུ་ངེས་པར་ལྷུང་བར་གྱུར་ཏོ། །ལྷུང་བར་གྱུར་ནས་ཀྱང་ཕན་ཚུན་ཀུན་དུ་ཆགས་པར་གྱུར་ཅིང་རྣམ་པར་ཁྲོས་པས་ཀྱང་ཕན་ཚུན་དུ་འབོད་པར་བྱེད་ཅིང་ཀུན་དུ་འབྱིང་བར་གྱུར་པས་ཀྱང་། དུས་རིང་དུ་རྣམ་པར་རྗོད་པར་བྱེད་ཅིང་རྣམ་པར་བརྗོད་པས་ཀྱང་མཚོ་དེའི་ནང་དུ་ལྷུང་བར་འགྱུར་བ་ནི། དེ་

70-282a

ལྟར་ལན་བརྒྱ་ཕྲག་རྣམས་སུ་དང་ཇི་སྟེ་ན་ལན་སྟོང་ཕྲག་རྣམས་སུ་ཡང་བྱེ་བྲག་མང་དུ་རྣམ་པར་བརྗོད་ཅིང་། མཚོ་དེའི་ནང་དུ་ངེས་པར་ལྷུང་ཞིང་ངེས་པར་བྱིང་བ་ནི་རྡོ་བ་བཞིན་ཏེ། ལན་དུ་མར་ཡང་འོག་གི་ཡང་སྲིད་པ་རྣམས་སུ་འགྲོ་བར་འགྱུར་རོ། །དེའི་རྗེས་ཐོགས་ལ་ལྷ་རྣམས་ཉིད་ཀྱིས་ཀུན་ནས་གང་བའི་པད་མའི་འདབ་མ་གཞན་རྣམས་ཀུན་ཏུ་ལྷུང་བར་གྱུར་ཏོ། །དེ་དག་རྣམས་ལྷུང་བར་གྱུར་པ་དེའི་རྩ་བ་ལས་ཀྱང་སྒྲ་ཆེན་པོ་རྣམ་པ་དུ་མར་ཀུན་ཏུ་བྱུང་བར་གྱུར་པ་རྣམས་ནི། དཔེར་ན་རིའི་རྩེ་མོ་ཀུན་ཏུ་ཉིལ་བའམ་ས་གཞི་གཡོས་པའམ་རྒྱ་མཚོ་འཁྱོམས་པར་གྱུར་པ་རྣམས་ཀྱང་ཀུན་ཏུ་འབྱུང་བར་གྱུར་ཏེ། དེ་ལྟར་འདིར་ཏུག་ཅོམ་གྱི་སྒྲ་དེ་དག་རྣམས་རབ་ཏུ་བྱུང་བར་གྱུར་ཏོ། །སྒྲ་དེ་དག་རྣམས་ཐོས་ནས་ཀྱང་གང་དག་རང་བཞིན་དུ་གནས་པའི་ལྷ་དེ་དག་རྩ་བ་ནས་འགྱེལ་ཞིང་གནས་པར་གྱུར་ཏེ། རྣམ་པ་དུ་མར་ཁྱད་པར་དུ་མི་རིགས་པ་དེ་དག་རྣམས་དེ་དག་གིས་མཐོང་བར་གྱུར་ནས། ཤིན་ཏུ་ཡི་མུག་ཅིང་འཇིགས་པ་དང་མཆོག་ཏུ་སྐྱོ་བའི་ཡིད་དུ་གྱུར་ཏོ། །གཞན་ཡང་གང་ན་མཚོར་སོང་བའི་སྤྲུལ་པའི་ལྷ་དེ་དག་རྣམས་རབ་ཏུ་ལྷུང་བར་གྱུར་པའི་དེ་དག་འཁོར་རྣམས་ཀྱིས་ཡོངས་སུ་བསྐོར་ནས་ཤིན་ཏུ་སྡུག་བསྔལ་བའི་ཡིད་ཀྱི་གནས་པས་གནས་ཏེ། སྔ་ན་མ་མཐོང་བ་འདི་རྣམས་ཅི་ཡིན་ལྷ་རྣམས་ཐམས་ཅད་ཀྱིས་ཀྱང་སྔར་ནམ་ཡང་དེ་ལྟར་ཉམས་སུ་མྱོང་བར་མ་གྱུར་པ། ཤིན་ཏུ་མི་བཟད་པའི་སྡུག་བསྔལ་བའི་གོ་འཕང་ལྷ་རྣམས་ཀྱིས་ཉམས་སུ་མྱོང་བ་ཡིན་ནོ་ཞེས་རྣམ་པ་དེ་ལྟ་བུའི་མཆོག་ཏུ་འཇིགས་པར་གྱུར་པའི་ཤིན་ཏུ་མི་རིགས་པ་རྣམས་དེ་སྐད་དུ་རྗོད་པར་ཡང་བྱེད་དོ། །དེ་ལྟར་དེ་དག་རྣམས་སེམས་པར་བྱེད་པ་ཉིད་དང་ཕན་ཚུན་དུ་གླེང་བར་ཡང་བྱེད་པ་དང་མཆོག་ཏུ་སྐྱོ་བའི་ཡིད་དུ་ཡང་འགྱུར་རོ། །འདབ་མ་གཞན་ཉིད་ཀྱང་རབ་ཏུ་ལྷུང་བར་གྱུར་པས་ལྷ་མོ་རྣམས་ཐམས་ཅད་ཀྱང་ཤིན་ཏུ་ཉམས་སྨས་པར་གྱུར་ནས་ཕན་ཚུན་དུ་རྣམ་པར་ཁྲོ་བར་བྱེད་པ་དང་། ཧཱ་ཡོངས་སུ་སྐྱོབས་དང་ཞེས་བྱ་བ་དེ་ལྟར་ཕན་ཚུན་དུ་རྗོད་པར་ཡང་བྱེད་དོ། །ཇི་ལྟར་གང་དག་བག་མེད་པར་གྱུར་པས་བག་མེད་པར་རྒྱུ་

70-282b

བར་བྱེད་པ་དེ་དག་རྣམས་ཀྱི་ནི་གནས་སྐབས་འདི་ཡིན་ལ། རྣམ་པར་ལྷུང་བའི་རྣམ་པ་རྣམས་ཀྱང་འདི་འདྲ་བ་ཡིན་ནོ། །དེ་ལྟར་ཕན་ཚུན་རྣམ་པར་ཁྲོ་བ་རྣམས་ལས་རང་བཞིན་པའི་ལྷ་དེ་དག་རྣམས་ཀྱི་ཡིད་ལས་སུ་རུང་བར་བྱས་ཏེ། བག་མེད་པ་ཉམས་དམའ་བར་གྱུར་པ་རྣམས་ནི་མྱ་ངན་ལས་འདས་པའི་ཆོས་རྣམས་བསྒྲུབ་པ་ལ་ལས་སུ་རུང་བ་ཡིན་པར་མཐོང་ནས། མཆོག་ཏུ་གཞན་ལ་ཕན་པ་ལ་རབ་ཏུ་ཞུགས་པའི་མུ་སུ་ལུན་དྷ་དེས་དེ་དག་རྣམས་ལ་ཡང་ཕན་པའི་དོན་དུ་ཡང་ལྷ་དེ་དག་དང་བཅས་པའི་པད་མའི་སྙིང་པོ་དེ་ཉིད་མི་མཐོང་བར་བསྒྱུར་རོ། །དེ་ཡིས་འགྲོ་བའི་ཚོགས་ཆེན་པོ་བག་མེད་པས་ན་བག་མེད་པར་རྣམ་པར་སྤྱོད་པར་བྱེད་པ་གང་ཡིན་པ་དེ་དག་རྣམས་ཀྱི་ཡིད་དགེ་ལེགས་དང་ལྡན་པར་གྱུར་ཏོ། །དེ་ལྟར་ལེགས་པར་སྐྱེས་པར་གྱུར་ནས་དུས་འདི་ཉིད་དུ་ནི་འདི་དག་རྣམས་དམ་པའི་ཆོས་བསྒྲགས་པ་རབ་ཏུ་འཛིན་པར་འགྱུར་ཏེ་དམ་པའི་ཆོས་བསྒྲག་པར་བྱའོ། །དེ་ནས་དེར་དེ་ལྟར་རིག་ནས་མཚོ་དེར་འཇིགས་པ་ཆེན་པོའི་རིམ་པ་དུ་མ་གཞན་ཉིད་ཀྱང་སྤྲུལ་པར་བྱེད་པ་ཡིན་ཏེ། འདབ་མ་བརྒྱ་ཡང་འཇིག་པ་དང་སྤྲུལ་པའི་ལྷ་རྣམས་ཀྱང་འཇིགས་པ་ཆེན་པོ་རྣམ་པ་དུ་མ་དང་། ཕུང་ཉེས་རྣམས་དང་མཚོ་ལ་ཡང་འབྱིང་བར་འགྱུར་བ་དང་། དེ་བཞིན་དུ་རྣམ་པ་དུ་མར་ཀུན་དུ་རྗོད་པར་བྱེད་པ་དང་ཡིད་ཉམས་སྨས་པ་ཀུན་དུ་འབྱུང་བ་དང་། འཆི་བར་འགྱུར་བ་དུ་མ་ཡང་སྤྲུལ་པར་གྱུར་ཏོ། །དེ་དུས་རིང་དུ་རྟོགས་པར་བྱེད་དེ། དེ་དག་གིས་ཀྱང་རང་བཞིན་གྱིས་ལྷ་དེ་དག་གི་འགྲོས་བཅོམ་ཞིང་། ཇི་ལྟ་བ་བཞིན་དུ་ཡིད་ཉམས་སྨད་ནས་གཞན་དུ་འགྲོ་བར་བྱེད་པ་ན་ཡང་དེ་ལྟར་བྱུང་བའི་འགྲོས་བཅོམ་ནས་ཇི་ལྟར་དེ་དག་གིས་མཐོང་བར་འགྱུར་བར་བྱེད་དོ། །མཐོང་བའི་རྗེས་ཐོགས་ཉིད་ལ་ཡིད་ཤིན་ཏུ་ཉམས་དམས་ཤིང་སྐྱོ་བ་སྐྱེ་བ་འབྱུང་བར་འགྱུར་རོ། །དེ་ལྟར་ཐམས་ཅད་བྱས་ནས་པད་མའི་ནང་གི་སྙིང་པོ་ལ་རྗེས་སུ་ཞུགས་ཏེ། བག་མེད་པའི་ལྷ་དེ་དག་རྣམས་ཉིད་དང་ལྷན་ཅིག་ཏུ་ལྟ་བར་བྱེད་པ་དང་ལྷན་ཅིག་ཏུ་སྤྱོད་པར་ཡང་གྱུར་པ་ན་ཡང་། ཤར་བར་གྱུར་པ་ལེགས་པར་མངོན་པར་མཐོང་བ་དང་གཞན་

70-283a

ལ་ཕན་པ་དང་རྗེས་སུ་འཛིན་པ་ལ་རབ་ཏུ་ཞུགས་པ་དང་། མཆོག་ཏུ་སྙིང་རྗེ་ཆེ་བ་དང་གཞན་རྣམས་ལ་ཕན་པ་དང་རབ་ཏུ་ལྡན་པས་ལེགས་པར་ཞུགས་པས་ཀྱང་ལྷ་དེ་དག་རྣམས་ཀྱིས་རྗེས་སུ་འབྲང་བ་དང་བཅས་པས་པད་མའི་སྙིང་པོ་དེ་ཀུན་དུ་བཏང་བར་གྱུར་ཏོ། །སྤྲུལ་པ་དེ་དག་རྣམས་ཀྱང་མི་སྣང་བར་བྱས་ནས་དབུགས་འབྱིན་པར་བྱེད་དོ། །ཇི་ལྟར་ཤིན་ཏུ་བར་ཡང་འཇིགས་པའི་གནས་རྣམས་སུ་ལྷ་དག་འགྲོ་བར་བྱེད་པ། ཤིན་ཏུ་འཇིགས་པར་གྱུར་པའི་གནས་རྣམས་སུ་རབ་ཏུ་འགྲོ་བ་ན་བག་མེད་པས་འཇིགས་པའི་གནས་རྣམས་སུ་འགྲོ་བར་མ་བྱེད་ཅིག །བག་མེད་པས་རྣམ་པར་རྒྱུ་བ་རྣམས་ཀྱི་གནས་སྐབས་ནི་འདི་དག་ཡིན་ནོ། །བག་མེད་པས་རྒྱུ་བར་བྱེད་པ་རྣམས་ནི་བག་མེད་པའི་རྩ་བ་ལས་ཤིན་ཏུ་འཇིགས་པར་འགྱུར་བ་ཡིན་ཏེ། བག་མེད་པ་ལ་སྡུག་བསྔལ་རྣམས་མི་འབྱུང་བ་ནི་འགའ་ཡང་མེད་དོ། །དེ་ནས་དུས་དེ་དག་ཏུ་མུ་སུ་ལུན་དྷས་ཚིགས་སུ་བཅད་པའི་དབྱངས་རྣམས་བརྗོད་པ། ཇི་ལྟར། བག་མེད་ལ་ནི་མངོན་དགའི་བྱིས། །རྟག་ཏུ་སྡུག་བསྔལ་སྐལ་ལྡན་ཡིན། །གང་ཡང་བག་མེད་རྣམ་པར་སྤངས། །རྟག་ཏུ་བདེ་བའི་སྐལ་ལྡན་དེ། །སྡུག་བསྔལ་ལྗོན་ཤིང་ཐམས་ཅད་ཀྱི། །རྩ་བ་བག་མེད་པར་བརྗོད་དོ། །དེ་ཕྱིར་སྡུག་བསྔལ་ཡོངས་སྤོང་བས། །བག་མེད་པ་ནི་རྣམ་པར་སྤོངས། །དེ་ནས་ལྷ་རང་བཞིན་པ་དེ་དག་གིས་ཀྱང་མུ་སུ་ལུན་དྷ་དེ་མངོན་པར་མཐོང་ནས། དེ་དག་རྣམས་ཡིད་རྣལ་དུ་ཕེབས་པ་དང་ཆེས་རབ་ཏུ་དགའ་བར་གྱུར་ནས། གང་ན་འཐབ་བྲལ་གྱི་མངའ་བདག་དེ་ཡོད་པ་དེར་ཐམས་ཅད་ཉིད་ཉེ་བར་བརྒྱུགས་སོ། །ཇི་ལྟར་ལྷ་བདག་ཅག་རྣམས་ཀྱི་མགོན་པོ་དེ་བདག་ཅག་རྣམས་ཀྱི་མགོན་པོ་བདག་ཅག་འཐབ་བྲལ་བ་རྣམས་ཀྱི་མངའ་བདག་དེ་ནི་པད་མའི་སྙིང་པོ་ལ་ལྷའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་ནས་ལེགས་པར་གནས་ཏེ། བདག་ཅག་རྣམས་རྗེས་སུ་འཛིན་པར་བྱེད་པའི་རྒྱུ་མཚན་དུ་འདིར་བྱོན་ནོ། །དེ་ལྟར་ཕན་ཚུན་དུ་རིག་པར་གྱུར་ནས་གང་ན་པད་མའི་སྙིང་པོ་ཡོད་པ་དེར་ཐམས་ཅད་ཉིད་ཉེ་བར་འགྲོ་བར་བྱེད། དེ་ནས་ཉེ་བར་སོང་བ་དང་པད་མའི་སྙིང་པོ་ལ་རང་ཉིད་ལེགས་པར་

70-283b

གནས་པ་གང་ཡིན་པ་འདི་ནི་མུ་སུ་ལུན་དྷ་ཀུན་དུ་གནས་པ་ཡིན་ནོ། །པད་མའི་སྙིང་པོའི་སེང་གེའི་ཁྲི་ལ་ཁ་དོག་མཚུངས་པའི་གཟུགས་དང་ལྡན་པ་རྣམས་ཀྱི་ལྷ་གཞན་གྱིས་ཞབས་འབྲིང་བྱས་ནས་ཉེ་བར་འགྲོ་བ་ན་ལྷ་དེ་དག་གིས་མུ་སུ་ལུན་དྷ་དེ་ལ་འདི་སྐད་ཅེས་བརྗོད་དེ། ལྷ་ལགས་ལྷ་འདི་དག་རྣམས་གང་ཡིན་པ་ལ་དེ་ལྟར་མཐོ་འཚམ་པར་བྱེད་པ་འདི་དག་ཅི་ལགས། འཆིང་བར་བྱེད་པ་དང་ཀུན་དུ་སྐོར་བར་བྱེད་པ་དང་། ཆུ་རྣམས་ལ་ཡང་ཀུན་དུ་ནུབ་པར་བྱེད་པར་གྱུར་པ་དང་རྣམ་པར་ཁྲོ་བར་ཡང་བྱེད་པ་དང་རྣམ་པ་མང་པོའི་གནས་སྐབས་རྣམས་ཀྱང་བྱེད་དུ་འཇུག་ལགས་ན། དེ་ནས་མུ་སུ་ལུན་དྷ་དེས་ལྷ་དེ་དག་རྣམས་ལ་འདི་སྐད་ཅེས་བརྗོད་དེ། ཇི་ལྟར་སྲོག་ཆགས་སུ་གྱུར་པ་རྣམས་ཐམས་ཅད་ཀྱིས་ནི་ཅི་ནས་ཀྱང་མྱོང་བར་བྱ་བ་གང་ཡིན་པ་ནི་བག་མེད་པའི་སྐྱོན་འདི་དག་རྣམས་ཡིན་པར་ཁྱེད་རྣམས་ཀྱིས་ལེགས་པར་མ་གོའོ། །དེ་ནས་དེའི་དུས་ན་མུ་སུ་ལུན་དྷས། ཚིགས་སུ་བཅད་པའི་དབྱངས་ཀྱིས་བསྙད་པ། ཇི་ལྟར། འབྱུང་པོ་ཐམས་ཅད་ཀྱིས་མི་མཐོང་། །ལས་རྣམས་ཀུན་གྱིས་རྒྱལ་བ་མིན། །འཇིག་རྟེན་ཐམས་ཅད་རྣམ་འཇིག་པ། །འཆི་བདག་ཅེས་ནི་མངོན་པར་བརྗོད། །དེ་ཡིས་སྐྱེ་བོ་འདི་དག་འཇོམས། །ཕུང་པོ་སྐྱེ་མཆེད་འཇོམས་བྱེད་པོ། །འཇིག་རྟེན་འདི་ནས་ཕ་རོལ་ཏུ། །འཆི་བདག་རྒྱལ་པོས་ཀུན་ཏུ་འཁྲིད། །འདི་ཡིས་འཁྲིད་པར་གྱུར་པ་ན། །དེ་འགའ་ཞིག་ལའང་སྟོབས་མི་དམིགས། །ཆོས་མ་གཏོགས་པ་དེ་ཡི་ཕྱིར། །ཆོས་ནི་སྐྱོབ་པའི་མཆོག་ཏུ་བརྗོད། །གསོན་པ་ཡང་ནི་མྱུར་བར་འགྲོ། །མྱུར་བར་ལང་ཚོ་འགྲོ་བ་ཡིན། །འཆི་བདག་མྱུར་བར་འོང་བ་ཡིན། །བག་མེད་པ་ཡིས་དགའ་མ་བྱེད། །ལུས་ཅན་རྣམས་ཀྱི་བདེར་གྱུར་པ། །ཐམས་ཅད་འཇིག་པའི་རྒུད་པ་ཡིན། །གསོན་པ་ཡང་ནི་མཐར་འཇོམས་ཀྱི། །བག་མེད་པ་ལ་དགའ་མ་བྱེད། །དམྱལ་བ་ཡི་དགས་དུད་འགྲོར་ནི། །ལས་ཀུན་ཟད་ནས་འགྲོ་དགོས་ཀྱི། །ཤེས་ཀྱིས་སྡུག་བསྔལ་མི་བཟད་འདི། །དགའ་བར་མ་བྱེད་བག་མེད་ལ། །སྲིད་གསུམ་ངམ་གྲོག་སྲིད་འདི་གང་། །མི་རྟག་པ་ཡི་ཐབས་འོག་ཡིན། །སྐྱེ་ཞིང་འཆི་བ་དེ་ལྟ་ལ། །བག་

70-284a

མེད་པ་ལ་དགའ་མ་བྱེད། །འཆི་བདག་གིས་ནི་ལུས་འཇོམས་ལ། །རྒས་པ་ཡིས་ནི་གཞོན་པ་འཇོམས། །སོ་གསོད་པ་ནི་ནད་ཀྱིས་འཇོམས། །བག་མེད་པས་ནི་དགའ་མ་བྱེད། །ལས་ཀྱི་ཐག་པས་རྣམ་བཅིངས་ནས། །སེམས་ཀྱི་འཕྱང་མོ་ལ་ལེགས་རྟེན། །སེམས་ཅན་སྲིད་པ་གསུམ་ན་འཁྱམ། །དགའ་བར་མ་བྱེད་བག་མེད་ལ། །སྐྱིད་དེ་བ་ཡང་སྡུག་བསྔལ་འགྱུར། །སྡུག་བསྔལ་ཅན་ཡང་རྣལ་ཕེབས་གནས། །རྗེ་དཔོན་ཡང་ནི་བྲན་འགྱུར་གྱི། །བག་མེད་པ་ལ་དགའ་མ་བྱེད། །མ་ཡང་ཆུང་མར་འགྱུར་བ་དང་། །ཆུང་མ་ཡང་ནི་དགྲ་འདི་ཉིད། །འགྱུར་ལྡོག་ཆེན་པོ་འདི་འདྲ་ལ། །བག་མེད་པ་ལ་དགའ་མ་བྱེད། །ནགས་དང་ཉེ་ནགས་བྲག་རྣམས་ལ། །ལྷ་ཡི་ཚོགས་ཀྱིས་བརྒྱན་པ་ཡི། །འཇིག་རྟེན་འདི་ནི་མེད་འགྱུར་གྱི། །བག་མེད་པ་ལ་དགའ་མ་བྱེད། །ལུས་ཅན་རྣམས་ཀྱི་བདེ་བ་ནི། །གཡོ་ཞིང་འཚེ་དང་བཅས་པ་ཡིན། །ཡིད་ཆེས་མེད་དང་སྟོང་པ་ལ། །བག་མེད་པ་ལ་དགའ་མ་བྱེད། །སྡུག་བསྔལ་གྱིས་གཟིར་སྐྱེ་འདི་ཡང་། །རྒ་དང་ནད་ཀྱི་སྣོད་ཡིན་ནོ། །སྐྱེ་བ་ངེས་པར་འཆི་བ་ཡང་། །གང་གིས་ཐམས་ཅད་དུ་ནུས་མིན། །སྐྱེ་བ་ཐམས་ཅད་འཆི་བའི་མཐའ། །དེ་བཞིན་ལང་ཚོ་རྒས་པའི་མཐའ། །རྨི་ལམ་ལྟ་བུའི་འདོད་པ་ལ། །བག་མེད་པས་ནི་དགའ་མི་བྱ། །ཆུ་ཤིང་ལོ་མ་དང་མཚུངས་དང་། །གློག་རྣམས་དང་ཡང་རབ་ཏུ་མཚུངས། །སླུ་བར་བྱེད་པ་ཐམས་ཅད་ལ། །བག་མེད་པས་ནི་དགའ་མ་བྱེད། །ཡུལ་གྱི་སྤྱོད་ཡུལ་ཅན་དབང་པོ། །རྒྱལ་བར་བྱ་བར་ནུས་མ་ཡིན། །དབང་པོ་རྣམས་ཀྱི་རང་ཡུལ་ལས། །གང་ཕྱིར་ཤེས་པས་ཟློག་པར་བྱེད། །དེ་ལྟར་མུ་སུ་ལུན་དྷ་དེས་ལྷ་དེ་དག་རྣམས་ཀྱི་ཡིད་སྐྱོ་བར་གྱུར་པ་ལ་གཞན་ལ་ཕན་པའི་དོན་དུ་ཚིགས་སུ་བཅད་པ་རྣམས་ཇི་ལྟ་བར་རྗོད་དོ། །གཞན་ཡང་འཐབ་བྲལ་བའི་བདག་པོ་དེ་ཉིད་ཀྱིས་ལྷ་རྣམས་ཀྱི་བག་མེད་པ་ལ་རྣམ་པར་གཤེའོ། །ཇི་ལྟར་བག་མེད་པའི་མུན་པར་འོག་ཏུ་ནུབ་པ་དེ་དག་མ་མཐོང་བ་རྣམས་ནི་སྡུག་

70-284b

བསྔལ་ཆེན་པོར་གྱུར་པ་དང་རྒས་པ་དང་འཆི་བ་རྣམས་འབྱུང་བར་གྱུར་ཏོ། །ཇི་ལྟར་ལྷ་དེ་དག་ནི་ཁྱེད་རྣམས་ཉིད་དང་མཚུངས་པ་ཡིན་ཏེ། ཕྱིན་ཅི་ལོག་རྣམས་ལ་ཇི་ལྟ་བར་ཞུགས་ནས་བག་མེད་པ་ལ་མངོན་པར་དགའ་བ་རྣམས་ཡིན་ཏེ། ཕྱིན་ཅི་ལོག་ཉིད་ལ་ཞུགས་པ་རྣམས་ཐམས་ཅད་ལ་ཡོངས་སུ་སྐྱོབ་པར་བྱེད་པ་ནི་འགའ་ཡང་མེད་དོ། །གང་ཁྱེད་རྣམས་ཀྱི་ཁྱད་པར་ལས་ཚུལ་ཐམས་ཅད་ཀྱིས་ཁྱད་པར་དུ་འཕགས་པ་རྣམས་བག་མེད་པས་བརླག་པར་གྱུར་ནས། ཚད་དང་། མདོག་དང་། དབྱིབས་དང་། ཉེ་བར་ལོངས་སྤྱོད་པ་དང་། ཁང་བུ་དང་། འོད་ཟེར་དང་། ལྷ་མོ་དང་། སྐྱེ་བོ་རྣམས་ཀྱིས་ཡོངས་སུ་སྤངས་པ་དེ་དག་རྣམས་ཁྱེད་རྣམས་ཀྱིས་མངོན་སུམ་དུ་འགྱུར་བ་ཡིན་ན། ཇི་ལྟར་ན་ཡོངས་སུ་སྤྱད་པར་འགྱུར་བ་ཡིན། ཇི་ལྟར་ནི་འཁོར་རྣམས་དང་བཅས་པ་ཡིན། ཕྱིན་ཅི་ལོག་ལ་ཞུགས་པ་དེའི་ཚེ། དེ་དག་ནི་བག་མེད་པའི་སྐྱོན་གྱིས་ཡིན་པར་མངོན་པར་མཐོང་བའི་ཕྱིར་ན། ཐམས་ཅད་ལ་དུས་ཐམས་ཅད་དུ་ཐབས་རྣམས་ཐམས་ཅད་ཀྱིས་བག་མེད་པ་ཡོངས་སུ་སྤང་བར་བྱའོ། །གང་ཅུང་ཟད་ཅིག་འཚོ་བ་འདི་འཛིན་པ་དང་བཅས་པའི་བག་མེད་པའི་འཚོ་བ་དེ་དག་རྣམས་ནི་དུག་གིས་ཟིན་པ་རྣམས་ལས་ཀྱང་ཤིན་ཏུ་ཁྱད་པར་དུ་འཕགས་པ་ཡིན་ནོ། །གང་འགའ་ཞིག་མེ་རླུང་དང་བཅས་པར་གྱུར་པ་དེ་དག་རྣམས་ཀྱི་དྲུང་ན་བག་མེད་པའི་མེ་ཀུན་དུ་རྟོག་པའི་རླུང་དང་བཅས་པ་ནི་ཤིན་ཏུ་བར་ཡང་ལྷག་པ་ཡིན་ནོ། །གང་ཅུང་ཟད་ཅིག་མུན་པ་དུས་རིང་དུ་འཐིབས་པ་རྣམས་ལས་བག་མེད་པའི་རང་བཞིན་གྱི་མུན་པ་ནི་དེ་དག་རྣམས་ལས་ཟླ་མེད་པར་ཁྱད་པར་དུ་གྱུར་པ་ཡིན་ཏེ། ཐོག་མ་མེད་པའི་དུས་ནས་ཀུན་ལ་རིང་དུ་འབྱུང་བ་ཡིན་པའི་ཕྱིར་རོ། །གང་འགའ་ཞིག་དགྲ་བོ་གླགས་གཅོད་པར་བྱེད་པ་རྣམས་ཀྱི་ནང་ནས། བག་མེད་པའི་དགྲ་ནི་དེ་དག་རྣམས་ཀྱི་དྲུང་ན་ཁྱད་པར་དུ་འཕགས་པ་ཡིན་ཏེ། ཡུལ་གྱི་གྲོགས་རྣམས་ཀྱིས་ཀུན་ནས་གླགས་གཅོད་པ་ཡིན་པའི་ཕྱིར་རོ། །གང་ཅུང་ཟད་མཚོན་ཆར་བརྗོད་པར་བྱ་བ་སོ་རྣོན་པོ་དེ་དག་རྣམས་ཀྱི་ནང་ནས་བག་མེད་པའི་མཚོན་གྱི་སོ་རྣམས་ནི་ལྷག་པར་རྣོ་བ་ཡིན་ཏེ་ངན་སོང་དུ་ལོག་པར་ལྟུང་

70-285a

བའི་རྩེ་མོ་རྣོན་པོ་རྣམས་ཡོད་པའི་ཕྱིར་རོ། །གང་འགའ་ཞིག་སྦྲུལ་དུག་ཅན་དུ་གྱུར་པ་དེ་དག་རྣམས་ཀྱི་དྲུང་ནས་བག་མེད་པའི་སྦྲུལ་གྱི་དུག་གིས་སེམས་ཅན་ཐམས་ཅད་ཀྱི་སྲོག་ངེས་པར་འཕྲོག་པར་བྱེད་པའི་དུག་ཆེན་པོ་དེ་ནི་ཁྱད་པར་དུ་འཕགས་པ་ཡིན་ཏེ་བྱིས་པའི་སྐྱེ་བོ་རྣམས་ཐམས་ཅད་ཀྱི་སེམས་སྟོབས་ངེས་པར་འཇོམས་པའི་ཕྱིར་རོ། །གང་ཅུང་ཟད་གྲོགས་པོའི་གཟུགས་ཅན་གྲོགས་པོ་མ་ཡིན་པ་རྣམས་ལས་བག་མེད་པ་ནི་དེ་དག་རྣམས་ཀྱི་ནང་ན་བླ་ལྷག་པ་ཡིན་ཏེ་དགའ་བའི་འདོད་ཆགས་དང་ཀུན་དུ་འདྲེས་པའི་ཕྱིར་རོ། །གང་ཅུང་ཟད་འཆིང་བར་གྱུར་པ་ལྕགས་སྒྲོག་གམ་ཤིང་གདོས་སམ། ཐག་པ་ལས་བྱས་པ་དེ་དག་རྣམས་ཀྱི་ནང་ནས་བག་མེད་པ་ནི་བླ་ལྷག་པ་ཡིན་ཏེ་ཞེ་སྡང་འཐུག་པོ་དང་ཀུན་དུ་འདྲེས་པའི་ཕྱིར་རོ། །གང་འགའ་ཞིག་པས་བླ་ལྷག་པར་གྱུར་པ་ནི་དགོན་པར་རྣམ་པར་འཁྱམས་པར་གྱུར་པ་རྣམས་ལ་ཆུ་དག་དང་། ཤིང་ལྗོན་པ་དང་། འབྲས་བུ་དང་། གྲིབ་མ་དང་བཞོན་པ་ཡང་མེད་པས་སེམས་ཅན་རྣམས་ཐམས་ཅད་སྡུག་བསྔལ་བར་བྱེད་པ་པོ་དེ་དག་རྣམས་ཀྱི་ནང་ནས་བག་མེད་པའི་དགོན་པ་ནི་ཤིན་ཏུ་བླ་ལྷག་པ་ཡིན་ཏེ། བདེ་བའི་ཆུ་དག་དང་། སྐྱེས་བུ་དམ་པ་རྣམས་ཀྱི་ཚུལ་ཁྲིམས་ཀྱི་ལྗོན་ཤིང་གི་གྲིབ་མ་རྣམས་ལས་ཐ་མར་སེམས་ཅན་རྣམས་ཐམས་ཅད་སྡུག་བསྔལ་བར་བྱེད་པའི་ཕྱིར་རོ། །གང་འགའ་ཞིག་རྣམ་པར་སླུ་བར་བྱེད་པ་པོའི་ངོ་བོ་དོན་མེད་པར་གྱུར་པ་མཐོང་བ་རྣམས་ལས། འདི་དག་གི་ཇི་ལྟ་བའི་དོན་ནི་འདི་ལྟ་སྟེ། ཟོ་ཆུན་འཁོར་མོ་དང་། དྲི་ཟའི་གྲོང་ཁྱེར་དང་། སྨིག་རྒྱུ་རྣམས་སོ། །དེ་དག་རྣམས་ཀྱི་དྲུང་ན་ཡང་བག་མེད་པ་ནི་ཤིན་ཏུ་ལྷག་པ་ཡིན་ཏེ། ཡུལ་གྱི་ཉེ་བར་ལོངས་སྤྱོད་པ་རྣམས་ནི་གཡོ་བར་གྱུར་པ་ཇི་ལྟ་བའི་དོན་དང་བྲལ་བས་ན་ཟོ་ཆུན་འཁོར་མོ་དང་། དྲི་ཟའི་གྲོང་ཁྱེར་དང་། སྨིག་རྒྱུ་རྣམས་ལས་ཀྱང་བླ་ལྷག་པར་སྟོང་པ་ཡིན་ནོ། །གཞན་ཡང་ཅུང་ཟད་རབ་ཏུ་ལྟུང་བར་བྱེད་པ་གང་ཡིན་པའི་ཡུལ་དུ་གྱུར་པ་རྣམས་ཅུང་ཟད་ཡོད་པའི་ངམ་གྲོག་དང་གཡང་ས་དང་འདྲ་བ་དེ་དག་རྣམས་ཀྱི་དྲུང་ན་ཡང་བག་མེད་པ་ཤིན་ཏུ་ལྷག་པ་ཡིན་ཏེ། ངན་སོང་དུ་ལོག་པར་ལྟུང་བ་རྣམས་ངེས་པར་ཡང་ཉམས་སུ་

70-285b

མྱོང་བར་བྱེད་པའི་ཕྱིར་རོ། །དེ་ལྟར་བག་མེད་པ་འདིས་ནི་ལྷ་རྣམས་དང་། སྲོག་ཆགས་སུ་གྱུར་པའི་རྣམས་ཐམས་ཅད་དང་། འགྲོ་བ་ལྔར་སྐྱེས་པར་གྱུར་པ་རྣམས་དང་། ཁམས་གསུམ་དུ་གཏོགས་པ་རྣམས་ཀྱང་ལོག་པར་ལྟུང་བར་བྱེད་པའི་ཕྱིར་རོ། །དེའི་ཕྱིར་ཐམས་ཅད་ཀྱིས་ཐམས་ཅད་ཀྱང་རབ་ཏུ་བརྩོན་པ་ཐམས་ཅད་ཀྱིས། གནས་སྐབས་ཐམས་ཅད་དུ་སྡུག་བསྔལ་གྱི་འཇིགས་པ་རྣམས་དང་། བདེ་བ་འདོད་པ་རྣམས་ཀྱིས་ཀྱང་སྡུག་བསྔལ་རྣམས་ཀྱི་རྩ་བ་འདི་ཡོངས་སུ་སྤང་བར་གྱིས་དང་། འདི་ལྟ་སྟེ་བག་མེད་པའོ། །དེ་ནས་ཡང་དེའི་ཚེ་ན་མུ་སུ་ལུན་དྷ་དེས་ཚིགས་སུ་བཅད་པ་བརྗོད་པ། ཇི་ལྟར། བག་ཡོད་པ་ནི་དགའ་བར་བརྗོད། །བག་མེད་སྡུག་བསྔལ་སྐལ་ལྡན་ཡིན། །བག་ཡོད་བག་མེད་པ་དག་གི། །འདི་ནི་རང་གི་མཚན་ཉིད་བརྗོད། །དེ་ལྟར་ལྷ་རྣམས་ཀྱི་མངའ་བདག་དམ་པའི་ལམ་ཇི་ལྟ་བ་བཞིན་དུ་སྟོན་པར་བྱེད་པ་པོ་དེས་ལྷ་དེ་དག་རྣམས་ལ་རྗེས་སུ་འདོམས་པར་བྱེད་དོ། །དེ་ལ་ལྷ་དེ་དག་རྣམས་ཐམས་ཅད་ཀྱང་ཡིད་ལས་སུ་རུང་བར་བྱས་པ་དང་། དབང་པོ་རྣམས་རྒྱས་པ་དང་། དབང་པོ་རྣམས་རབ་ཏུ་དང་བ་དང་། ཡིད་རྩེ་གཅིག་ཏུ་གྱུར་པས་ཉན་པར་བྱེད་ཅིང་། མུ་སུ་ལུན་དྷ་པད་མའི་སྙིང་པོ་ལ་སེང་གེའི་ཁྲི་ལ་གནས་པ་དེ་ལ་འདི་ལྟར་ཡང་རྗོད་པར་བྱེད་དེ། བདག་ཅག་རྣམས་ལ་ཤིན་ཏུ་ཕན་པར་གྱུར་པ་དང་མཐར་ཐུག་པར་བདེ་བ་གང་ཡིན་པ་དེ་དག་ཀྱང་འདིར་བརྗོད་ལགས་ན། བདག་ཅག་རྣམས་ལ་ཕན་པ་དང་བདེ་བ་རྣམས་ཀྱང་ཁྱེད་ཉིད་ཀྱིས་བཀའ་སྩལ་དུ་གསོལ། བདག་ཅག་རྣམས་ཀྱིས་ཅི་བགྱི་བ་ཡང་ལྷ་ཉིད་ཀྱི་ཞལ་སྔ་ནས་བཀའ་སྩལ་དུ་གསོལ། ཇི་ལྟར་ཚིག་འདི་དག་རྣམས་བརྗོད་པ་དང་འཐབ་བྲལ་གྱི་བདག་པོ་དེས་འདི་སྐད་ཅེས་བརྗོད་དོ། །ཇི་ལྟར་བཅོམ་ལྡན་འདས་གང་ཡིན་པ་འདི་ནི་ཐར་པའི་སྤྱོད་པ་རྣམས་རིག་ཅིང་རྟོགས་ལ་མཁྱེན་པ། སྐྱོན་རྣམས་ཐམས་ཅད་ལས་རྣམ་པར་གྲོལ་བ། ཡོན་ཏན་རྣམས་ཐམས་ཅད་དང་ལྡན་པ་སེམས་ཅན་རྣམས་ཐམས་ཅད་ཀྱི་ཡང་གཙོ་བོར་གྱུར་པའི་སངས་རྒྱས་དེ་ལ་སྐྱབས་སུ་སོང་དང་། སྡུག་བསྔལ་རྣམས་ཐམས་ཅད་དང་བྲལ་བར་འགྱུར་གྱིས། དེ་ནི་བག་མེད་པ་རྣམས་དང་བྲལ་བ་ཡིན་པས་དེ་ལ་སྐྱབས་

70-286a

སུ་སོང་ན་གོང་ན་མེད་པའི་འཁོར་བའི་འཇིགས་པ་རྣམས་ཐམས་ཅད་ལས་ཡོངས་སུ་སྐྱོབ་པར་འགྱུར་རོ། །དེ་ནས་ཡང་ངེས་པར་མུ་སུ་ལུན་དྷའི་དྲུང་ནས་ལྷ་དེ་དག་རྣམས་ཀྱིས་ཚིག་འདི་དག་ཐོས་པ་དང་། ཐམས་ཅད་ཉིད་ཀྱིས་པུས་མོ་རྣམས་ས་གཞི་ལ་བཙུགས་ཏེ། འཁོར་དང་བཅས་པ་རྣམས་གུས་པ་ལེགས་པར་སྐྱེས་པ་དང་དོན་ལ་དབང་པོ་རྣམས་རྒྱས་ཤིང་། སངས་རྒྱས་བཅོམ་ལྡན་འདས་ལ་ལེགས་པར་གུས་པ་སྐྱེས་པས་མགོ་བོ་ཀུན་ཏུ་བཏུད་པར་གྱུར་པས་རབ་ཏུ་ཕྱག་འཚལ་ཏེ། གསུམ་ལ་སྐྱབས་སུ་འགྲོ་བར་བྱེད་པས་ཀྱང་སྐྱབས་སུ་སོང་ངོ་། །ཐམས་ཅད་ཀྱང་སངས་རྒྱས་དང་ཆོས་དང་དགེ་འདུན་རྣམས་ལ་ཡང་ལེགས་པར་སྐྱབས་སུ་འགྲོ་བར་བྱེད་དོ། །ཡིད་ཤིན་ཏུ་རབ་ཏུ་དང་བ་དང་། བག་མེད་པ་རྣམས་ལ་ཡང་རྣམ་པར་སྨོད་པར་བྱེད་ཅིང་བཤགས་པར་བྱེད་དེ། གང་དག་བག་མེད་པའི་ལྷ་དེ་དག་རྣམས་ཀྱིས་བཟོད་པར་མི་ནུས་པ་རྣམ་པ་མང་པོར་མི་བཟད་པ་རྣམ་པ་དུ་མ་རྣམས་ཐམས་ཅད་ཀྱིས་ཤིན་ཏུ་སྡུག་བསྔལ་བ་རྣམས་མཐོང་བའི་ཕྱིར་རོ། །དེ་ནས་མུ་སུ་ལུན་དྷ་ཡང་ལྷ་དེ་དག་རྣམས་ཀྱི་ཡིད་ཀུན་དུ་སྐྱོ་བར་གྱུར་པ་དེ་དག་རྣམས་ལེགས་པར་མཐོང་ནས། སླར་ཉིད་ཀྱང་ཆོ་འཕྲུལ་རྣམ་པ་དུ་མ་རྣམས་བྱེད་དེ། ཡུད་ཙམ་ཅིག་ལ་ཡང་རྣམ་པ་དུ་མར་གཅིག་ཏུ་གྱུར་ནས་བརྒྱར་འགྱུར་རོ། །སྟོང་དུ་འགྱུར་རོ། །སྟོང་ཕྲག་བརྒྱར་ཡང་འགྱུར་རོ། །ཡུད་ཙམ་ལ་ཡང་ཆ་བྱད་དུ་མ་དག་ཏུ་བྱས་པའི་དབྱིབས་རྣམས་སུ་འགྱུར་རོ། །ཡུད་ཙམ་ཅིག་ལ་རྣམ་པ་དུ་མའི་ཆ་བྱད་དག་གིས་མཚུངས་པར་བྱས་པའི་དབྱིབས་རྣམས་སུ་འགྱུར་རོ། །ཡུད་ཙམ་ཉིད་ལ་ནམ་མཁའི་དཀྱིལ་དུ་འཕགས་ནས་རིན་པོ་ཆེའི་ཁང་བུ་སྣ་ཚོགས་པ་རྣམས་ཀྱིས་ཀུན་ཏུ་གང་བ་རྣམས་ན་གཟུགས་དང་ཆ་བྱད་སྣ་ཚོགས་པ་རྣམས་འཛིན་པར་བྱེད་པར་འགྱུར་རོ། །ཡུད་ཙམ་ལ་ཡང་ཆུར་འབྱིང་བར་འགྱུར་རོ། །མགོ་བོ་སྟོང་དུ་གྱུར་ནས་ཀྱང་རིན་པོ་ཆེ་སྣ་ཚོགས་པའི་དབུ་རྒྱན་དང་དཔུང་རྒྱན་འབར་བ་རྣམས་ཀྱིས་བརྒྱན་པ་དང་། ཉི་མ་སྟོང་བས་ལྷག་པའི་གཟི་བརྗིད་ཅན་ལྷའི་ཚོགས་རྣམས་ཐམས་ཅད་ཀྱིས་ཡོངས་སུ་བསྐོར་ནས། ཉེ་བའི་ནགས་རྣམས་ཐམས་ཅད་དུ་ལེགས་པར་མཐོང་ངོ་། །སྟོང་

70-286b

ཕྲག་བརྒྱར་གསལ་བར་བྱེད་པའི་གཟི་བརྗིད་དང་ལྡན་པའི་ལྷ་རྣམས་ཀྱི་ཚོགས་ཐམས་ཅད་ཀྱིས་ཡོངས་སུ་བསྐོར་ནས། པད་མ་ཆེན་པོ་དེ་ཉིད་ཀྱི་སྟེང་དུ་འབྱུང་བར་བྱེད་པ་དང་། རང་གི་གཟི་བརྗིད་རྣམས་ཀྱིས་ལམ་མེར་གྱུར་པར་ལྷ་དེ་དག་རྣམས་ཀྱིས་ལུས་ཤིན་ཏུ་བལྟ་བར་དཀའ་བ་ཡིན་ནོ། །གཞན་ཡང་མུ་སུ་ལུན་དྷ་དེ་ཉིད་ཀྱིས་རྫུ་འཕྲུལ་གཞན་ཡང་བྱེད་པར་གྱུར་པ་ནི། ལྷ་དེ་དག་རྣམས་ཉིད་ཀྱི་བག་མེད་པ་ཀུན་ནས་བསྙུངས་པར་བྱ་བའི་དོན་དུ་འདི་ལྟ་སྟེ། ཁ་ནས་ལྷ་བརྒྱ་སྟོང་ཀུན་དུ་འབྱུང་བར་བྱེད་དོ། །ཁ་ཅིག་ནི་ཁང་བུའི་སྟེང་དུ་ཞོན་ནས་རིན་པོ་ཆེ་སྣ་ཚོགས་པའི་འོད་རྣམས་ཀྱིས་ལུས་ཤིན་ཏུ་གསལ་བར་གྱུར་པ་རྣམས་སོ། །ཁ་ཅིག་ནི་རྣམ་པ་སྣ་ཚོགས་པའི་ཆ་བྱད་འཛིན་པར་གྱུར་པས་གླུའི་རོལ་མོ་རྣམས་ཉེ་བར་ལེན་པར་བྱེད་པ་རྣམས་ལྷ་རྫས་ཀྱི་རྒྱན་དང་། ཆ་བྱད་དང་། མཆོག་ཏུ་ལང་ཚོ་ལ་བབ་པའི་ལྷ་མོ་རྣམས་ཀྱིས་ཡོངས་སུ་བསྐོར་ནས་གླུ་ཉེ་བར་ལེན་པས་མུ་སུ་ལུན་དྷའི་ཁ་ནས་བྱུང་ནས་འགྲོའོ། །ཁ་ཅིག་ནི་རིན་པོ་ཆེ་བདུན་གྱི་རང་བཞིན་གྱི་པད་མ་གཞན་དག་རྣམས་ལ་ནང་དུ་ཞེན་ནས་སྙན་པའི་གླུ་རྣམས་ལེན་པར་བྱེད་པ་དང་། རྩི་ཡང་ལྷ་རྫས་ཀྱི་རོ་དང་དྲི་དང་ཡང་དག་པར་ལྡན་པ་དག་འཐུང་བར་བྱེད་དེ། ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་རྣམས་སུ་དང་། གལ་ཏེ་ན་ལན་སྟོང་ཕྲག་ཏུ་ཡང་མཛེས་པར་གྱུར་པ་དང་ལྡན་པའི་ལྷ་རྫས་ཀྱི་ཕྲེང་བའི་མཆོག་རྣམས་ཀྱིས་བརྒྱན་པ། རང་གི་འོད་ཀྱི་དཔལ་འབར་བ་དང་ལྡན་པ་རྣམས་ཡིན་ནོ། །གཞན་ཡང་ལྷ་གཞན་དག་རྣམས་རྣམ་པ་གཞན་གྱིས་མུ་སུ་ལུན་དྷ་དེའི་ཁ་ནས་ཀུན་ཏུ་བྱུང་ནས་འགྲོ་ན། རྫུ་འཕྲུལ་གྱིས་སྤྲུལ་པ་རྣམས་ལ་འདི་ལྟ་སྟེ། བྱའི་རྒྱབ་ཏུ་ཞོན་པ་རྣམས་ནི་རིན་པོ་ཆེ་བདུན་གྱི་རང་བཞིན་གྱི་བྱ་རྣམས་ལ་མངོན་པར་ཞོན་ནས་དགའ་བར་བྱེད་པ་དང་། གླུ་ཡང་ལེན་པར་བྱེད་པ་དང་ལྷན་ཅིག་སྤྱོད་པ་རྣམས་ཀྱིས་ཡོངས་སུ་བསྐོར་ནས། རབ་ཀྱི་མཆོག་ཏུ་རངས་པའི་ཡིད་ཀྱིས་རྔ་སྐད་ཡན་ལག་ལྔ་དང་ལྡན་པ་ཉན་པར་བྱེད་ཅིང་། བག་མེད་པས་ཉེ་བར་འཚོ་བ་རྣམས་མུ་སུ་ལུན་དྷའི་ཁ་ནས་ཀུན་ཏུ་འགྲོའོ། །ལྷ་ངོ་མཚར་བར་གྱུར་པ་མཚུངས་པ་མེད་པའི་གཟུགས་གསལ་ཞིང་སྡུག་པའི་ཡོན་ཏན་དང་ལྡན་པ་

70-287a

གཞན་ཡང་རྣམ་པ་གཞན་གྱིས་ལྷ་རྣམས་སྤྲུལ་པར་བྱེད་པ་ན། ཇི་ལྟར་མུ་སུ་ལུན་དྷའི་ཁ་ནས་དེ་དག་ཉིད་འགྲོ་བ་ནི་ཨུད་པ་ལའི་ཟེ་བའི་ནང་དུ་ཞོན་ཞིང་རྒྱན་རྒྱུན་བར་འབྲེལ་པའི་དབུས་སུ་སོང་ནས། ལྷ་རྫས་ཀྱི་རྔ་སྐད་ཡན་ལག་ལྔ་པ་ཉན་པར་བྱེད་ཅིང་ལྷ་མོའི་ཚོགས་རྣམས་ཀྱིས་ཡོངས་སུ་བསྐོར་ནས་ལྷ་རྫས་ཀྱི་བཏུང་བ་དག་འཐུང་བར་བྱེད་དོ། །གླུ་ཡང་ལེན་པར་བྱེད་ལ་ལྷན་ཅིག་སྤྱོད་པའི་འཁོར་རྣམས་ཀྱིས་ཡོངས་སུ་བསྐོར་ནས་ལན་བརྒྱ་ཕྲག་དང་། ཅི་སྟེ་ལན་སྟོང་ཕྲག་དང་ལན་བྱེ་བ་ཕྲག་རྣམས་སུ་ཡང་གཟུགས་དང་། ཁ་དོག་དང་། དབྱིབས་དཔེ་མེད་པའི་ལྷའི་བུ་མོ་མཆོག་རྣམས་ཀྱིས་ཡོངས་སུ་བསྐོར་ནས་དགའ་བར་བྱེད་པ་ལྷ་རྫས་ཀྱི་ནགས་དང་ཉེ་བའི་ནགས་སུ་ཐབས་དུ་མས་རབ་ཏུ་སྒྲུབ་པར་བྱེད་དོ། །ནམ་མཁའི་དཀྱིལ་དུ་མངོན་པར་འཕགས་ནས་ས་གཞི་དག་བཞིན་དུ་འགྲོ་བར་བྱེད་ལ། རང་བཞིན་པའི་ལྷ་དེ་དག་ཀྱང་གླུ་དེ་དག་རྣམས་ཉན་པར་བྱེད་དོ། །དེ་དག་གི་དྲུང་ན་ཡོན་ཏན་བརྒྱས་ལྷག་པར་སྙན་པར་གྱུར་པ། དེ་དག་གི་གླུ་དང་། དེ་དག་གི་གཟུགས་དང་། དེ་དག་གི་བདེ་བ་ཡང་རྣམ་པ་སྣ་ཚོགས་པའི་ཡོན་ཏན་དང་ལྡན་པ་ཡིན་ནོ། །དེ་ནས་རང་བཞིན་དུ་གནས་པའི་ལྷ་དེ་དག་སྔ་ན་མ་མཐོང་བའི་ངོ་མཚར་ཆེ་བ་དེ་དག་རྣམས་ཀུན་ཏུ་མངོན་པར་མཐོང་ནས། ཁ་ཅིག་ནི་ངོ་མཚར་བའི་མཆོག་དང་ལྡན་པར་གྱུར་ཏོ། །ཁ་ཅིག་ནི་རབ་ཏུ་དགའ་བར་གྱུར་ལ། ཁ་ཅིག་ནི་རྨད་དུ་བྱུང་བར་གྱུར་ནས་ཅིའི་ཕྱིར་ལྷ་དེ་དག་རྣམས་ཇི་ལྟར་ན་འཐབ་བྲལ་གྱི་བདག་པོ་མུ་སུ་ལུན་ངྷའི་ཁ་ནས་འགྲོ་བར་འགྱུར། འདི་དག་ནི་ཤིན་ཏུ་ཡང་ཡ་མཚན་ཆེའོ། །དེ་ལྟར་རང་བཞིན་གྱི་ལྷ་དེ་དག་རྣམས་སེམས་པར་བྱེད་པ་དང་ཕན་ཚུན་རྗོད་པར་ཡང་བྱེད་དེ། དེ་ལྟར་ཡང་རང་བཞིན་གྱི་ལྷ་དེ་དག་རྣམས་བྱེད་དོ། །གཞན་ཡང་མུ་སུ་ལུན་དྷས་མཆོག་ཏུ་གྱུར་པའི་རྫུ་འཕྲུལ་གཞན་དག་བྱེད་པ་ནི་འདི་ལྟ་སྟེ། ཁ་ནས་བྱུང་བའི་ལྷ་དེ་དག་ལས་སྣ་ཚོགས་པའི་ཆ་བྱད་འཛིན་པ་རལ་པ་རིང་པོ་དང་ཅོད་པན་དང་ལྡན་པ་ཤིང་ཤུན་གྱི་གོས་ཅན་ལག་ན་རིལ་བ་སྤྱི་བླུགས་ཐོགས་པ། ལྷ་རྫས་ཀྱི་ཕྲེང་བའི་རྒྱན་ཅན། གཟི་བརྗིད་ཀྱི་དཔལ་

70-287b

འབར་བའི་རི་དགས་ཀྱི་པགས་པ་འཛིན་པའི་རྣམ་པ་སྣ་ཚོགས་པའི་དྲང་སྲོང་དག་ཀུན་ཏུ་འབྱུང་སྟེ། བརྒྱ་ཕྲག་རྣམས་དང་དེ་ནས་ལན་སྟོང་ཕྲག་ཀྱང་ཀུན་ཏུ་བྱུང་ནས། ནམ་མཁའི་དཀྱིལ་དུ་འཁོད་ནས་ཚིགས་སུ་བཅད་པ་རྣམས་ཀྱང་བག་མེད་པ་རྣམས་དང་ཀུན་ནས་བྲལ་བར་བྱ་བའི་དོན་དུ་རྗོད་པར་བྱེད་པ། ཇི་ལྟར། སྒྱུ་མ་ལྟ་བུའི་སྲིད་པ་ལས། །གཡོ་བའི་སེམས་ཅན་འདི་དག་ཀྱང་། །ཐམས་ཅད་འཆི་བའི་མཐའ་ཅན་གྱི། །དངོས་པོས་བག་མེད་པར་མ་བྱེད། །སྲེད་པ་ཀུན་ནས་འཕེལ་བ་ཡི། །དགའ་བར་འགྱུར་བ་ཐམས་ཅད་ལ། །ཐ་མར་སྨད་པའི་གནས་ཀྱི་ནི། །དངོས་པོས་བག་མེད་པར་མ་བྱེད། །གང་ཞིག་སྐྱེས་པ་མི་འཇིག་པའི། །གནས་ནི་ཡོད་པ་མ་ཡིན་ནོ། །གང་ཕྱིར་བདེ་ཀུན་འཇིག་བཅས་ཀྱིས། །བག་མེད་མ་བྱེད་དངོས་རྣམས་ལ། །གལ་ཏེ་ཡོན་ཏན་ལྡན་པ་ཡི། །དགའ་བར་མཐོང་བ་འདི་ཐམས་ཅད། །ཐམས་ཅད་རྨི་ལམ་འདྲ་བ་ཡི། །སྲིད་པས་བག་མེད་པར་མ་བྱེད། །བག་མེད་དགྲ་བོ་སྡིག་ཅན་འདི། །དགའ་བའི་འདོད་ཆགས་གདུལ་དཀའ་བ། །དམྱལ་བར་མྱུར་དུ་འབབ་འགྱུར་བའི། །དངོས་པོར་བག་མེད་པར་མ་བྱེད། །བདེ་བ་འདི་ནི་ཡང་དང་ཡང་། །ཡོངས་སུ་ཉམས་པ་ཀུན་དུ་འབྱུང་། །ཡང་ནི་ཐམས་ཅད་འཇིག་འགྱུར་བའི། །སྲིད་པས་བག་མེད་པར་མ་བྱེད། །འོག་ཏུ་བར་གྱི་བསྐལ་པར་ནི། །སྐྱེ་དགུ་སྐྱོན་གྱིས་ཉེ་བར་བཅོམ། །ལས་ཀྱི་ལྕགས་སྒྲོག་གིས་བཅིངས་ནས། །ཇི་ལྟར་མཆིལ་པས་ཉ་བཞིན་དུ། །ཐབས་ཀྱི་རྣམ་པ་ཐ་དད་ཀྱིས། །ལྕགས་སྒྲོག་གཅོད་པར་ནུས་མོད་ཀྱི། །ལྷ་དང་ལྷ་མིན་ཐམས་ཅད་ཀྱིས། །ལས་ཀྱི་སྒྲོག་ནི་གཅོད་མི་ནུས། །མཐོང་བ་མེད་དང་ཤིན་ཏུ་རིང་། །སྐྱེས་པ་རྒྱ་ཆེ་བ་ཡི་སྒྲོག །སྲེད་པའི་རྒྱུད་ནི་དམ་པོ་འདིས། །གང་ཡང་འཆིང་བ་བྱིས་པ་རྣམས། །བདག་ཅག་ལྷ་རྣམས་ཐམས་ཅད་དང་། །མི་དང་དེ་བཞིན་ལྷ་མིན་མེད། །མི་རྟག་ཉིད་ལས་རྣམ་གྲོལ་མིན། །མིག་མེད་པས་ཀྱང་མཐོང་བ་མིན། །ལས་རྒྱ་ཆེན་པོའི་རྒྱུན་རྣམས་ནི། །ཤིན་ཏུ་རིང་བར་རབ་ཏུ་འཇུག །ཇི་སྲིད་ཤེས་

70-288a

པས་རྣམ་མ་བཅོམ། །དེ་སྲིད་དུ་ནི་སྲེད་པ་ཡིན། །ལྔ་ཡི་གཙུབ་ཤིང་ལས་གྱུར་པའི། །སྲེད་པའི་བུད་ཤིང་ལས་བྱུང་བ། །རྣམ་རྟོག་རླུང་ནི་སྟོབས་པོ་ཆེས། །དུས་ཀྱི་མེས་ནི་ཤིན་ཏུ་སྲེག །བྱིས་པ་བློ་གྲོས་ཆུང་རྟག་ཏུ། །སྡུག་བསྔལ་དེས་ཀྱང་ཀུན་དུ་ལྡན། །ཕྱིན་ཅི་ལོག་གིས་ཡོངས་འཁྲུལ་པས། །དེ་ནི་འགྲོ་བ་ལྔར་འཁོར་རོ། །ལོངས་སྤྱོད་རྣམ་པ་སྣ་ཚོགས་དང་། །ཆུང་མ་བུ་ལ་ཀུན་ཏུ་ཆགས། །མི་ལུས་ནད་ཀྱིས་རྣམ་བཅོམ་ནས། །འཆི་བདག་རྒྱལ་པོས་ཀུན་དུ་འདྲེན། །སྤྱང་ཁུས་ཇི་ལྟར་རི་དགས་ཀུན། །རབ་དང་མིན་པས་མངོན་པར་འཇོམས། །དེ་བཞིན་འཆི་བདག་དཔུང་ཚོགས་ཀྱིས། །དང་བ་མིན་པས་མི་རྣམས་འཇོམས། །མཉམ་པ་མེད་དང་ཁྱད་འཕགས་པའི། །སྡུག་བསྔལ་སྲིད་དང་སྲིད་པར་མཐོང་། །གཏི་མུག་གིས་ནི་ཡོངས་བསླུས་པས། །འཇིག་རྟེན་འདི་ནི་སྐྱོ་བའང་མེད། །ཤིན་ཏུ་བདག་ལ་བྱམས་པ་གང་། །དེ་ཀུན་སྡིག་ལ་རྟེན་པའི་མི། །གང་དག་བདག་ལ་བྱམས་མིན་པ། །དེ་ལ་འཇིག་རྟེན་སུ་མི་བྱམས། །དེ་ལྟར་ལྷ་དེ་དག་རྣམས་ཀྱི་བག་མེད་པ་ཀུན་ནས་ཞི་བར་བྱ་བའི་དོན་དུ་མུ་སུ་ལུན་དྷའི་ཁ་ནས་འབྱུང་བཞིན་པའི་དྲང་སྲོང་རྣམས་རྫུ་འཕྲུལ་གྱིས་སྤྲུལ་ནས་རང་བཞིན་གྱི་ལྷ་རྣམས་ལ་སྟོན་པར་བྱེད་དེ། དེ་དག་ནི་མཐར་ཐུག་པར་ཕན་པ་རྣམས་ཡིན་ནོ། །གཞན་ཡང་འཐབ་བྲལ་བའི་མངའ་བདག་དེས་ཕན་པ་གཞན་གྱི་སྤྲུལ་པ་གཞན་རྣམས་བྱེད་པ་ནི་འདི་ལྟ་སྟེ། བྲང་དུ་ཆེས་མཆོག་ཏུ་དགའ་བར་གྱུར་པའི་ངང་པ་དང་། ཀཱ་རཎྜ་བ་དང་། ངང་ངུར་དག་གིས་ཉེ་བར་མཛེས་པར་གྱུར་པ་ཡན་ལག་བརྒྱད་དང་ལྡན་པ་རབ་ཏུ་དང་བ་མཆོག་གི་ཆུ་དང་ཡང་དག་པར་ལྡན་པའི་པད་མའི་རྫིང་བུ་སྤྲུལ་པར་བྱེད་དོ། །དེའི་པད་མའི་རྫིང་བུ་དེ་ན་བརྒྱ་སྟོང་བྱེ་བའི་པད་མ་རྣམས་ལེགས་པར་སྐྱེས་པ་འདི་དག་རྣམས་ནི་མཚོ་ཆེན་པོར་གྱུར་པ་རྣམས་ཡིན་ཏེ། རིན་པོ་ཆེ་བདུན་གྱི་རང་བཞིན་དུ་གྱུར་པ་དང་དཔག་ཚད་བརྒྱར་དྲི་ཞིམ་པོ་རྣམས་འབྱུང་བ་ཡིན་ནོ། །པད་མ་དེ་དག་རྣམས་ཀྱི་ནང་དུ་སོན་པའི་སྙིང་པོ་རྣམས་ལ། ཅོད་པན་དང་ལྡན་པའི་མགོ་བོ་རྣམས་རྣམ་པ་སྣ་ཚོགས་

70-288b

པའི་འདབ་མ་རྣམས་ཀྱི་འོད་ཀྱིས་རབ་ཏུ་སྣང་བར་བྱས་པ། རིན་པོ་ཆེ་རབ་ཀྱི་མཆོག་གིས་རྒྱན་དུ་བྱས་པའི་དཔུང་རྒྱན་ཅན་རྣམས་འདུག་པ་ལ། རྣམ་པ་དུ་མར་སྣ་ཚོགས་པར་རབ་ཀྱི་མཆོག་ཏུ་ལང་ཚོ་ལ་བབ་པར་མང་པོ་རྣམས་ཀྱིས་ཉེ་བར་གླུ་ལེན་པར་བྱེད་ཅིང་། སེང་གེའི་ཁྲི་ལ་ཉེ་བར་གནས་པ་ལ་རྔ་ཡབ་དཀར་པོ་ཉེ་བར་གཡོབ་པར་བྱེད་པ་དང་། མགོ་བོ་ལ་མེ་ཏོག་གི་མཆོག་རྣམས་དང་ལྡན་པའི་རྗེས་སུ་སྤྱོད་པ་གཞན་རྣམས་ཀྱིས་མངོན་པར་སྟོད་པར་བྱེད་པར་གྱུར་པས་རྒྱལ་བར་གྱུར་ཅིག་རྒྱལ་བར་གྱུར་ཅིག་ཅེས་ཀུན་ནས་དགའ་བ་འཕེལ་བར་བྱེད་པ་རྣམས་ཀྱིས་མངོན་པར་བསྟོད་པར་གྱུར་པ་ན། བརྒྱ་བྱིན་ལ་རབ་ཏུ་འགྲན་པར་བྱེད་པའི་རྒྱལ་པོ་བརྒྱ་སྟོང་སྤྲུལ་པར་བྱེད་དོ། །གཞན་ལ་ཕན་པ་ལ་རབ་ཏུ་ཞུགས་པར་གྱུར་པའི་འཐབ་བྲལ་གྱི་མངའ་བདག་དེས་རང་བཞིན་པའི་ལྷ་རྣམས་ལ་གོ་བར་བྱ་བའི་དོན་དུ་འཁོར་ལོས་སྒྱུར་བ་བརྒྱ་ཕྲག་ལ་འགྲན་པར་བྱེད་པའི་རྒྱལ་པོ་བརྒྱ་ཕྲག་སྟོང་ཡང་ཡོངས་སུ་སྤྲུལ་པར་བྱེད་དོ། །གཞན་ཡང་གཞན་ལ་ཕན་པ་རྣམས་ལ་ཞུགས་པས་རྫུ་འཕྲུལ་གཞན་བྱེད་པ་ནི། མུ་སུ་ལུན་དྷ་དེས་རང་གི་ལུས་རྣམས་ལ་སྤྲུལ་པར་བྱེད་པ་རྣམས་ལ་དཔག་ཚད་བརྒྱ་པའི་པད་མ་དེ་དག་རྣམས་ནི་བརྒྱ་སྟོང་བྱེ་བའི་འདབ་མ་དང་ལྡན་པ། རིན་པོ་ཆེ་བདུན་གྱི་རང་བཞིན་གྱིས་རྣམ་པར་བཀྲ་བའི་འདབ་མ་རྣམས་ལ་ལྷའི་བུང་བ་རྣམས་གླུ་ཉེ་བར་ལེན་པར་གྱུར་པའི་སྒྲ་རྣམས་ཀུན་དུ་བརྗོད་པ། དགའ་བར་གྱུར་ཅིང་མཉན་པར་འོས་པ་མཐོང་ན་ཆེས་དགའ་བར་གྱུར་པ་ལྷ་རྣམས་ཀྱི་པད་མ་ཆེན་པོ་དེའི་སྒྲ་དག་ནི་དཔག་ཚད་ལྔ་བརྒྱར་འགྲོ་བ་ཡིན་ནོ། །ཡུ་བ་རྣམས་སྤྲུལ་པར་བྱེད་པ་ནི་བཻ་ཌཱུརྱའི་རང་བཞིན་རྡོ་རྗེས་ལེགས་པར་གནས་པ། ཨིན་དྲ་ནཱི་ལའི་རིན་པོ་ཆེ་དང་ལྡན་པ་མཛེས་པས་འཇའ་ཚོན་རྣམས་པས་ཀྱང་ཆེས་ལྷག་པར་དགའ་བ་ཡིན་ནོ། །པད་མ་ཆེན་པོ་དེའི་ནང་དུ་ཞུགས་པ་ན་མིའི་རྒྱན་དང་ཆ་བྱད་སྣ་ཚོགས་པས། རྣམ་པ་དུ་མར་བརྒྱན་པའི་ལུས་མཆོག་ཏུ་སྐྱིད་པ་རྣམས་ཐོང་གཤོལ་གྱིས་ཞིང་ལས་ཀྱང་བྱེད་ཅིང་། ཞིང་གི་རྣང་ལ་ཚིགས་སུ་བཅད་པའི་དབྱངས་བརྗོད་པ། ཇི་ལྟར། འབྲས་འདོད་

70-289a

མི་རྣམས་ཐམས་ཅད་ཀྱིས། །ས་གཞི་འདི་ལ་ཞིང་ལས་བྱེད། །འདོད་ལ་ཆགས་པའི་མཁས་མིན་རྣམས། །འཆི་བ་ལེགས་པར་མཐོང་བ་མིན། །སྐད་ཅིག་སྐད་ཅིག་ལ་འགྲིབ་པ། །སྐྱེ་བོ་འདོད་པའི་བསམ་པས་རྨོངས། །སྐད་ཅིག་སྐད་ཅིག་ལ་ཟད་པའི། །འདུ་བྱེད་གོ་བ་ཡང་མ་ཡིན། །མི་རྣམས་ལང་ཚོ་མཐར་བྱེད་པའི། །རྒས་པའི་དབྱུག་པ་འདི་འབྱུང་ངོ་། །ནད་མེད་ལོ་ཐོག་འཇོམས་པ་ཡི། །ནད་ཀྱི་དབྱུག་པ་འདི་འབྱུང་ངོ་། །འཇིགས་པའི་དབྱུག་པ་འདི་གསུམ་གྱིས། །ལྷར་བཅས་ལྷ་མིན་འཇོམས་བྱེད་པ། །བྱིས་པའི་འཇིག་རྟེན་བླུན་པོ་འདིས། །འོང་བ་མཐོང་བ་ཡང་མ་ཡིན། །ལྷ་དང་ལྷ་མིན་དྲི་ཟ་དང་། །ཤ་ཟ་ཀླུ་དང་སྲིན་པོ་ལའང་། །གསོན་པ་མཐར་ནི་བྱེད་པའི་མཆོག །དུས་ཀྱི་དབྱུག་པ་འདི་འབྱུང་འགྱུར། །སྐྱེ་བོ་གཞན་ཡང་རབ་བཅོམ་ནས། །རང་གི་སྐྱེ་ལ་ཆགས་ཤིང་འཆུམས། །སྲིད་གཞན་འགྲོ་བས་སྐྱེ་གཏོང་ཡང་། །རྨོངས་པས་བཅིངས་པའི་སྐྱེ་བོ་རྣམས། །བུ་དང་ཚ་བོ་ཡང་ཚ་དང་། །མི་གང་དེ་ཡི་རིགས་གནས་པ། །དེ་དག་ཐམས་ཅད་མེད་གྱུར་ཀྱང་། །ཁྱོད་ནི་ཆགས་པས་འཆིང་བར་བྱེད། །དེ་ལྟར་སྤྲུལ་པ་དེ་དག་གིས་གཞན་ལ་ཕན་པ་བསྒྲུབ་པའི་ཕྱིར་དོན་དུ་ཚིགས་སུ་བཅད་པ་བརྗོད་པ་ཡིན་ནོ། །རང་བཞིན་གྱི་ལྷ་རྣམས་ཀྱིས་ཀྱང་ཐོས་ཤིང་ཐོས་པར་གྱུར་ནས་ཀྱང་ཡིད་ཀྱིས་འཐུན་པར་བྱེད་དོ། །ཡུལ་རྣམས་ལ་ཡང་ཤིན་ཏུ་བག་མེད་པར་ཡང་མི་འགྱུར་རོ། །དེ་ནས་གཞན་ཡང་རྫུ་འཕྲུལ་གཞན་ཤིན་ཏུ་དཀའ་བ་རྣམས་གཞན་ལ་ཕན་པ་ལ་རབ་ཏུ་ཞུགས་པའི་འཐབ་བྲལ་གྱི་མངའ་བདག་དེས་སྤྲུལ་པར་བྱེད་པ་རྣམས་ནི་འདི་ལྟ་སྟེ། ཡན་ལག་དང་ཉིང་ལག་རྣམས་ཐམས་ཅད་ལས་རྒྱན་དང་ཆ་བྱད་སྣ་ཚོགས་པ་དང་། རྣམ་པ་སྣ་ཚོགས་པའི་དབུ་རྒྱན་གྱིས་བརྒྱན་པ་རྣམས་ནི་ཁ་ཅིག་ཡིན་ནོ། །ཁ་ཅིག་ནི་ཁ་དོག་དུ་མ་རྣམས་དང་དབྱིབས་དུ་མ་རྣམས་དང་འགྲོ་བ་དུ་མ་རྣམས་དང་ལྡན་པའི་ལྷ་དང་དྲི་ཟ་དང་མི་དང་ཀླུ་དང་ལྷ་མ་ཡིན་དང་གཞན་དག་རྣམས་ཀྱང་སྟེ། རང་གི་སྐྱེ་བ་གཉུག་མར་གནས་པར་གྱུར་པའི་རྒྱན་དང་ཆ་བྱད་ཅན་རྣམས་ཀུན་དུ་འབྱུང་སྟེ། འཐབ་

70-289b

བྲལ་གྱི་མངའ་བདག་དེའི་བ་སྤུའི་ཁུང་བུ་རྣམས་ཐམས་ཅད་ལས་དང་། ལུས་ཀྱི་མཐའ་རྣམས་མ་ལུས་པ་ནས་འབྱུང་བ་ནི་ཇི་ལྟར་རྗེས་སུ་འཐུན་པ་དང་གནས་སྐབས་ཇི་ལྟ་བ་དང་། དེ་དག་གི་རིགས་རྣམས་དང་རྗེས་སུ་སྤྱོད་པ་རྣམས་ཇི་ལྟ་བའི་འཁོར་གྱིས་གླུ་ལེན་པར་བྱེད་པ་དང་གར་བྱེད་པ་དང་དགོད་པར་བྱེད་པ་ཡིན་ནོ། །མི་རྣམས་ནི་མི་རྣམས་དང་རྗེས་སུ་འཚམ་པར་གྱུར་པའི་ལོངས་སྤྱོད་མཆོག་ཏུ་ཡིད་འཕྲོག་པར་བྱེད་པ་རྣམས་དང་། ཡང་དག་པར་ལྡན་པས་གར་བྱེད་པ་དང་དགོད་པར་བྱེད་པས་ཀྱང་མི་རྣམས་ཀྱི་རྒྱལ་པོ་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་པ་ཡིན་ནོ། །དེ་བཞིན་དུ་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་གྱི་ཀླུ་རྣམས་ཀྱང་ཁ་ཅིག་ནི་མགོ་གཅིག་པ། ཁ་ཅིག་ནི་མགོ་གཉིས་པ། ཁ་ཅིག་ནི་མགོ་གསུམ་པ། ཁ་ཅིག་ནི་མགོ་བཞི་པ། ཁ་ཅིག་ནི་མགོ་ལྔ་པ། ཁ་ཅིག་ནི་མགོ་དྲུག་པ། ཁ་ཅིག་ནི་མགོ་བདུན་པ་རྣམས་ཡིན་ཏེ། མདོག་དང་དབྱིབས་སྣ་ཚོགས་པའི་ཅོད་པན་བཅིངས་པའི་མགོ་བོ་རྣམས་ཡིན་ནོ། །རིན་པོ་ཆེ་སྣ་ཚོགས་པའི་འོད་ཟེར་གྱིས་མཆོག་ཏུ་གསལ་བར་བྱས་པའི་མགོ་བོ་ཅན་རྣམས་སྣ་ཚོགས་པའི་རོལ་མོའི་སྒྲ་དང་། གླུ་དང་། དགོད་པ་དང་། འགྱིང་བ་དང་། རྩེ་དགའ་བས་རྗེས་སུ་ཆགས་པའི་ཡིད་ཀྱིས་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེ་བཞིན་དུ་ལྷ་མ་ཡིན་ཡང་བརྟན་པ་ལ་སོགས་པ་སྒྲ་གཅན་འཛིན་གྱི་མཐར་ཐུག་པས་གཞིར་གཏོགས་པ་རྣམས་སྤྲུལ་པར་བྱེད་དོ། །འཐབ་བྲལ་གྱི་བདག་པོ་དེས་བསྐལ་པ་གཞན་གྱི་བརྒྱ་བྱིན་གྱི་རྩ་ལག་ལྷན་ཅིག་རྗེས་སུ་སྤྱོད་པ་རྣམས་ཀྱི་རྗེས་སུ་འབྲང་བར་གྱུར་པ། མཆོག་ཏུ་གཟུགས་དང་རྒྱན་དང་ཆ་བྱད་དང་རབ་ཏུ་དང་བའི་ལྷ་མ་ཡིན་གྱི་བུ་མོས་རྗེས་སུ་འབྲང་བར་གྱུར་པས། རྔ་སྐད་ཡན་ལག་ལྔ་པ་རྣམས་ཐོས་ནས་དགའ་བར་འགྱུར་བས་ཡིད་ཆེས་སུ་འབྲེལ་བས་མཆོག་ཏུ་སྐྱིད་པ་རྣམས་དང་། ལྷ་མ་ཡིན་གྱི་མངའ་བདག་རྣམས་ཀྱང་ཁང་བུ་ན་ལེགས་པར་གནས་ནས་མུ་སུ་ལུན་དྷའི་ལུས་དང་ཁ་ནས་ཀུན་ཏུ་འབྱུང་སྟེ། སྤྲུལ་པ་རྣམས་ཐམས་ཅད་ཀྱང་རྩེ་བར་བྱེད་བཞིན་པས་མཆོག་ཏུ་ཡང་དཔེ་མེད་པའི་བདེ་བ་རྣམས་ལ་ཉེ་བར་ལོངས་

70-290a

སྤྱོད་པར་བྱེད་དོ། །དེ་བཞིན་དུ་བྱང་ཕྱོགས་སྒྲ་མི་སྙན་པའི་མི་རྣམས་ཀྱང་སྤྲུལ་པར་བྱེད་དེ། སྤྲིན་དང་འདྲེས་པ་ལ་སོགས་པའི་རི་ཆེན་པོ་བཅུ་ལ་སོ་སོར་གནས་པ་རྣམས། སུམ་ཅུ་རྩ་གསུམ་པའི་ལྷ་རྣམས་ལས་ཉེ་བར་ལོངས་སྤྱོད་པར་བྱ་བ་རྣམས་ཅུང་ཟད་ཀྱིས་ཆུང་བར་གྱུར་པའི་ནགས་དང་ཉེ་བའི་ནགས་དང་། རྫིང་བུ་དང་། པད་མའི་ཚལ་རྣམས་དང་། རྣམ་པ་སྣ་ཚོགས་པའི་བཟའ་བའི་ཀླུང་དང་བཏུང་བ་རྣམས་དང་། རྣམ་པ་སྣ་ཚོགས་པའི་བདེ་བ་རྣམ་པ་དུ་མ་རྣམས་ཉམས་སུ་མྱོང་བར་གྱུར་པས་རྩེ་བར་བྱེད་པ་དང་། གར་བྱེད་པ་རྣམས་ཀྱང་མུ་སུ་ལུན་དྷའི་ལུས་པོ་ཉིད་ལས་ཀུན་དུ་འབྱུང་ངོ་། །དེ་བཞིན་དུ་བ་ལང་སྤྱོད་པ་རྣམས་ཀྱི་མི་རྣམས་ཀྱང་རང་གི་བདེ་བ་དག་དང་ཡང་དག་པར་ལྡན་པར་གྱུར་པས་མཆོག་གི་རབ་ཏུ་དགའ་བའི་ཡིད་ཀྱིས་གར་བྱེད་པར་གྱུར་པ་དང་། གླུ་ལེན་པར་གྱུར་པ་དང་དགོད་པར་གྱུར་པས་མུ་སུ་ལུན་དྷའི་ལུས་ཉིད་ལས་ཀུན་དུ་འབྱུང་ངོ་། །དེ་བཞིན་དུ་ཤར་ཕྱོགས་ལུས་འཕགས་པའི་མི་རྣམས་ཀྱི་རང་གི་བདེ་བ་དང་ཡང་དག་པར་ལྡན་པ་དང་། རབ་ཀྱི་མཆོག་ཏུ་རངས་པའི་ཡིད་ཀྱིས་རྩེ་བར་གྱུར་པ་རྣམས་ཀྱང་རང་བཞིན་གྱི་ལྷ་རྣམས་ཀྱིས་མཐོང་ངོ་། །ཆོ་འཕྲུལ་གྱི་མཆོག་རྣམས་དང་ཡང་དག་པར་ལྡན་པར་གྱུར་པའི་འཐབ་བྲལ་བ་རྣམས་ཀྱི་བདག་པོ་དེས། དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མས་བག་མེད་པ་རྣམས་ཀུན་ནས་ཞི་བར་བྱ་བའི་དོན་དང་། གཞན་རྣམས་ལ་ཕན་པར་བྱ་བའི་དོན་དུ་ཡང་སྤྲུལ་པ་དེ་དག་རྣམས་བྱེད་དོ། །བག་མེད་པས་རྣམ་པར་རྒྱུ་བར་བྱེད་པའི་ལྷ་དེ་དག་རྣམས་ཇི་ལྟར་ན་མི་རྟག་པ་མངོན་སུམ་དུ་གྱུར་པས་སེམས་ཀྱི་རྒྱུད་འཇམ་པོར་འགྱུར་བ་ཡིན་ཞེས། རྒྱུ་འདིའི་ཕྱིར་ན་ཕུན་སུམ་ཚོགས་པ་རྣམས་སྟོན་པར་བྱེད་དེ། འདོད་པ་རྣམས་ཀྱི་ཀུན་ནས་རོ་མྱང་བའི་དོན་དང་ཕྱི་ནས་ནི་ཉེས་དམིགས་རྣམས་བསྟན་པར་བྱའོ། །རྣམ་པ་ཇི་སྲིད་ཀྱིས་འདོད་པ་རྣམས་ལས་ངེས་པར་འབྱུང་བ་ཡིན་པའི་རྒྱུ་འདི་དག་གིས་ལྷ་རྣམས་སྤྲུལ་པ་བྱས་སོ། །དེ་ལ་ཀུན་ནས་རོ་མྱང་བར་གྱུར་པ་རྣམས་ནི་ཇི་ལྟར་ཐོས་པར་གྱུར་པ་བཞིན་དུ་རྣམ་པ་སྣ་ཚོགས་པའི་འདོད་པའི་ལོངས་སྤྱོད་པ་

70-290b

རྣམས་ཀྱི་གར་དང་། དགོད་པ་དང་། འགྱིང་བག་དང་། གླུ་དང་། གོས་རྣམས་དང་ཉེ་བར་ལོངས་སྤྱོད་པར་བྱ་བའི་བཟའ་བ་དང་། བཏུང་བ་རྣམས་མིད་པར་བྱེད་པ་དང་། བུད་མེད་རྣམས་ཀྱིས་ཡོངས་སུ་བསྙེན་བཀུར་བ་དང་འཁྱུད་འཕྱང་བྱེད་པ་རྣམས་ཏེ། དབང་པོ་ལྔ་ཀའི་ཉེ་བར་ལོངས་སྤྱོད་པ་རྣམས་ཐམས་ཅད་ཇི་ལྟར་འདོད་པ་བཞིན་དུ་མངོན་པར་ཆགས་པ་ཕུན་སུམ་ཚོགས་པ་འདི་ནི་འདོད་པ་རྣམས་ཀྱི་རོ་མྱོང་བ་ཞེས་བརྗོད་དོ། །དེ་ལ་ཉེས་དམིགས་རྣམས་གང་དག་ཞེ་ན། ཐོབ་པར་གྱུར་པའི་འདོད་པ་གང་དག་ཡིན་པ་རྣམས་མངོན་པར་འཆུམས་པ་སྔོན་དུ་འགྲོ་བས་དོན་དུ་གཉེར་བར་བྱེད་པ་ན་ཉམས་པར་འགྱུར་བ་དང་། ཐུན་མོང་བ་རྣམས་ཀྱིས་དབང་བྱས་ནས་རླག་པར་གྱུར་པའི་བྲལ་བས་བསྐྱེད་པའི་སྡུག་བསྔལ་རྣམ་པ་དུ་མ་རྣམས་དང་། གཞན་དག་གིས་ཕྲོགས་པར་གྱུར་པའམ། རྫས་དང་ལྡན་པ་ལས་འཇིག་པ་ལྔས་ངེས་པར་འཇོམས་པ་རྣམས་ཀྱང་འདི་ལྟ་སྟེ། རྒྱལ་པོ་དང་ཆུ་དང་ཆོམ་རྐུན་པ་དང་མེ་ལ་སོགས་པ་རྣམས་སོ། །སྡུག་བསྔལ་གཞན་དག་རྣམས་ཀྱི་ཡང་གཞི་པོར་འགྱུར་བ་ཡིན་ཏེ། རྟག་ཏུ་ཡང་དགྲ་རྣམས་ཀྱིས་མངོན་པར་འཚེ་བར་འགྱུར་བ་དང་། རླག་གིས་དོགས་པ་བསྲུང་བའི་འཇིགས་པ་རྒྱུན་མི་འཆད་པ་རྣམས་ཀྱིས་འཇིགས་པར་ཡང་འགྱུར་རོ། །མངོན་པར་ཞེན་པ་སྔོན་དུ་སོང་བས་གང་དག་གི་ཡིད་ཀྱང་མྱ་ངན་གྱིས་རྟག་ཏུ་གཟེར་ཟུག་དང་ལྡན་པར་འགྱུར་རོ། །དེ་ནི་ལུས་དང་ཡིད་ཀྱི་འདོད་པའི་ཉེས་དམིགས་རྣམས་ཡིན་ནོ། །འདོད་པ་རྣམས་ཀྱི་ཉེས་དམིགས་དེས་ནི་འཆི་བའི་མཐར་ཐུག་པ་ན་ཡང་བྱིས་པ་བློ་དམན་པ་རྣམས་ལ་ཡི་མུག་པས་བསྐྱེད་པའི་སྡུག་བསྔལ་བ་རྣམ་པ་དུ་མ་རྣམས་སྐྱེ་བར་བྱེད་དེ། ཟུག་གཟེར་འདི་དག་རྣམས་ཀྱང་འདོད་པ་རྣམས་ཀྱི་ཉེས་དམིགས་ཡིན་ལ། གཞན་ཡང་འདོད་པ་རྣམས་ཀྱི་ཉེས་དམིགས་ཡོད་དོ། །འདི་ཡང་གང་དག་ཞེ་ན། འདི་ལྟ་སྟེ་དེས་མ་དང་བུ་དག་ཀྱང་ལྷན་ཅིག་ཏུ་འཐབ་ཅིང་རྩོད་པར་བྱེད་དོ། །དཀའ་བླས་ཀྱིས་འཚོ་བར་འགྱུར་རོ། །འདོད་པ་དེའི་རྒྱུས་གང་དག་ལ་སྤུན་དང་སྤུན་རྣམས་ལྷན་ཅིག་ཏུ་འཐབ་རྩོད་བྱེད་དོ། །གསོད་པ་དང་

70-291a

འཆིང་བ་རྣམས་ཀྱང་ཕུལ་དུ་ཕྱིན་པར་བྱེད་དོ། །དེ་དག་ཀྱང་འདོད་པའི་རྒྱུ་ལས་ཡིན་ལ། འདོད་པ་རྣམས་ཀྱི་དོན་གྱིས་དེ་བཞིན་དུ་རྒྱལ་པོ་དང་རྒྱལ་པོ་ཡང་ལྷན་ཅིག་ཏུ་འཐབ་ཅིང་རྩོད་པར་བྱེད་དོ། །གཡུལ་འགྱེད་པར་བྱེད་དོ། །ཡུལ་ལྗོངས་རྣམས་འཇོམས་པར་བྱེད་དོ། །ཕན་ཚུན་དུ་གསོད་པ་དང་འཆིང་བའི་སྡུག་བསྔལ་རྣམ་པ་སྣ་ཚོགས་པ་རྣམས་ཀྱི་རྩེ་མོར་ཕྱིན་པར་བྱེད་དོ། །དེ་ལ་དེ་དག་ཉིད་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་པས་ན། འདོད་པ་རྣམས་ཀྱི་ཉེས་དམིགས་འདི་དག་རྣམས་ཀྱང་སོ་སོར་ཤེས་པར་བྱའོ། །གང་གི་ཕྱིར་འཁོར་བ་རྣམས་ཐམས་ཅད་ཀྱི་འཆིང་བ་ཡིན་པའི་ཕྱིར་འདོད་པ་འདི་དག་རྣམས་བྱེ་བྲག་ཏུ་རྟོགས་པར་བྱ་བ་ཡིན་ནོ། །དེ་ལ་རྒྱུ་འདི་དག་གིས་ནི་འཐབ་བྲལ་བ་རྣམས་ཀྱི་བདག་པོ་དེས་ལྷ་དེ་དག་རྣམས་ལ་རྣམ་པ་དུ་མ་དང་། རྣམ་པར་རྟོག་པ་དུ་མས་ཀྱང་རྫུ་འཕྲུལ་དེ་དག་རྣམས་བྱས་སོ། །དེ་ལྟ་བུ་དག་ནི་མི་རྣམས་ཀྱི་འདོད་པའི་ཉེས་དམིགས་རྣམས་ཡིན་ཏེ། གང་གཞན་དག་རྣམས་ལྟ་ཕར་ཞོག་གི་རྒྱལ་པོ་ཡང་རྣམ་པ་དུ་མ་དང་བཅས་པའི་ཐབས་རྣམས་བྱེད་དོ། །གང་ཡང་མི་གཞན་དག་འདོད་པའི་དོན་དུ་རྒྱ་མཚོར་འཇུག་པར་བྱེད་པ་དང་། འཁྲུག་པ་ལ་ལྷན་ཅིག་ཏུ་འཇུག་པར་བྱེད་པ་དང་། འཆིང་བ་དང་མྱ་ངན་དང་། ངལ་དུབ་དང་སེམས་ཁྲལ་དང་། འཐབ་རྩོད་དང་འཇིག་པ་ལ་སོགས་པའི་དོན་མེད་པ་རྣམས་ཀུན་བཟོད་པར་བྱེད་དོ། །དེ་དག་རྣམས་ཐམས་ཅད་ཀྱང་འདོད་པའི་དོན་དུ་ཡིན་ལ། དེ་ལྟར་མི་རྣམས་ཐམས་ཅད་འདོད་པ་རྣམས་ཀྱི་དོན་དུ་ཉེས་དམིགས་རྣམས་ཀུན་ནས་བཟོད་པར་བྱེད་དོ། །ཇི་ལྟར་ན་ཡང་ལྷ་རྣམས་འདོད་པའི་དོན་དུ་ཉེས་དམིགས་རྣམས་ཀུན་ཀྱང་བཟོད་པར་བྱེད་པ་ཡིན་ན་འདི་ལྟ་སྟེ། གང་དག་ལྷ་མ་ཡིན་རྣམས་དང་ལྷན་ཅིག་ཏུ་གཡུལ་འགྱེད་པར་བྱེད་པ་དང་། རྩོད་པར་བྱེད་པ་དང་དེ་དག་གི་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །དེ་བཞིན་དུ་ལྷ་མ་ཡིན་རྣམས་ཀྱང་ལྷ་རྣམས་དང་ལྷན་ཅིག་ཏུ་རྩོད་པར་བྱེད་པ་དང་། གཡུལ་འགྱེད་པར་བྱེད་པ་གང་ཡིན་པ་འདི་དག་ཡང་འདོད་

70-291b

པ་རྣམས་ཀྱི་ཉེས་དམིགས་ཡིན་ནོ། །དངོས་པོ་རྣམས་ཁོ་ནའི་རྒྱགས་པ་གང་ཡིན་པ་དེ་དག་རྣམས་ནི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་འདི་རྣམས་ཀྱིས་ཀྱང་སྤྲུལ་པ་རྣམས་བྱས་སོ། །གང་ཡང་ཀླུ་རྣམས་ཀླུ་རྣམས་དང་ལྷན་ཅིག་གཡུལ་འགྱེད་པར་བྱེད་ཅིང་ཡུལ་གཞན་དག་རྣམས་ཀྱང་འཇིག་པར་བྱེད་པ་དང་། གློག་དང་ཐོག་ལ་སོགས་པ་ཡང་གཏོང་བར་བྱེད་པ་གང་ཡིན་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །ཡང་གང་དག་དུད་འགྲོ་རྣམས་ཀྱང་ཕན་ཚུན་དུ་ཟ་བར་བྱེད་པ་དང་། གསོད་པ་དང་འཆིང་བ་ལ་སོགས་པར་བྱེད་པ་རྣམས་དང་། འཐབ་པར་ཡང་བྱེད་པ་དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ཏེ། འདི་ཡང་འདོད་པའི་ཉེས་དམིགས་ཡིན་ནོ། །དེ་བཞིན་དུ་ཡི་དགས་རྣམས་ཀྱང་ཟས་ཀྱི་རྒྱུ་མཚན་གྱིས་སམ། འཁྲིག་པའི་རྒྱུ་མཚན་གྱིས་ཀྱང་ཕན་ཚུན་དུ་རལ་གྲིས་གཅོད་པར་བྱེད་པ་དང་། དེ་དག་རྣམས་ཐམས་ཅད་ཀྱང་འདོད་པ་རྣམས་ཀྱི་དོན་དུ་ཡིན་ནོ། །གང་ཡང་འདོད་པ་རྣམས་ཀྱིས་ཉེས་དམིགས་དེ་དག་རྣམས་ཡིན་པའི་རྒྱུ་མཚན་འདི་དག་གིས་ནི་འཐབ་བྲལ་གྱི་མངའ་བདག་དེས་བག་མེད་པ་དང་བྲལ་བར་བྱ་བའི་དོན་དུ་ལྷ་རྣམས་ལ་སྤྲུལ་པར་བྱེད་དོ། །དེ་བཞིན་དུ་དམྱལ་བ་རྣམས་ཀྱང་ཕན་ཚུན་དུ་མངོན་པར་འཇོམས་པར་བྱེད་དེ། ཉེས་པར་བྱེད་པའི་ལས་རྣམས་ཀྱིས་སྐྱེས་པ་གཞན་རྣམས་སུ་གང་དག་དང་ཞེ་འགྲས་པར་གྱུར་པ་དེ་དག་རྣམས་རྗེས་སུ་དྲན་པར་འགྱུར་ལ། རྗེས་སུ་དྲན་ནས་ཀྱང་འཁོན་དེ་དག་རྣམས་ནི་རལ་གྲི་རྣམས་ཀྱིས་ཕན་ཚུན་དུ་ལས་བྱེད་པར་འགྱུར་བ་ཁོ་ན་ཉེ་བར་གནས་པས་བདག་ཉིད་དང་གཞན་དག་རྣམས་ཀྱང་གཤོག་པར་བྱེད་དོ། །དེ་ལྟར་ཡང་དམྱལ་བ་རྣམས་ཀྱི་འདོད་པ་རྣམས་ཀྱི་ཉེས་དམིགས་ཡིན་ནོ། །དེ་ལ་རྒྱུ་མཚན་འདི་དག་གིས་ཀྱང་འདོད་པ་རྣམས་ཡོངས་སུ་སྤོང་བའི་རྒྱུར་འཐབ་བྲལ་བ་རྣམས་ཀྱི་མངའ་བདག་དེ་སྤྲུལ་པ་གཞན་རྣམས་བྱེད་པ་ཡིན་ནོ། །འགྲོ་བ་ལྔ་པོ་འདི་དག་རྣམས་ཐམས་ཅད་ན་ནི་འདོད་པ་རྣམས་ཀྱི་ཉེས་དམིགས་ཡོད་པ་ཡིན་ནོ། །གང་ཡང་འཁོར་བ་ལས་ཁ་ཕྱིར་ཕྱོགས་པར་གྱུར་པ་དེ་དག་རྣམས་

70-292a

ཐམས་ཅད་ནི་གནས་སྐབས་ཐམས་ཅད་དུ་འདོད་པ་རྣམས་ལས་ངེས་པར་འབྱུང་བར་སྟོན་པར་བྱེད་པ་དང་འཆད་པར་ཡང་བྱེད་དོ། །དེ་ལ་འཐབ་བྲལ་གྱི་བདག་པོ་དེས་འདོད་པ་རྣམས་ཀྱི་རོ་མྱང་བ་རྣམས་བསྟན་པ་ཡིན་ཞིང་། ཉེས་དམིགས་རྣམས་ཀྱང་པད་མའི་འདབ་མ་བརྒྱ་པོ་དང་ལྷ་རྣམས་རབ་ཏུ་ལྷུང་བར་གྱུར་པ་རང་བཞིན་པའི་ལྷ་རྣམས་ལ་ཅུང་ཟད་ཅིག་བསྟན་པ་ཡིན་ནོ། །རྒྱས་པར་ཡང་ལྷ་དང་མི་རྣམས་ཀྱི་ཉེས་དམིགས་གཞན་དག་ཀྱང་བདག་གིས་བསྟན་པར་བྱ་ཡིས། ཉེས་དམིགས་རྣམས་ལེགས་པར་བསྟན་ནས་ངེས་པར་འབྱུང་བ་ཡང་བདག་གིས་བཤད་པར་བྱ་སྟེ། ཐར་པའི་ས་བོན་གྱི་རྒྱུར་གྱུར་པ་རང་བཞིན་གྱི་ལྷ་རྣམས་ལ་ཕན་པའི་དོན་དུ་དང་བདེ་བའི་དོན་དུའོ། །གཞན་ཡང་ལྷ་དེ་དག་རྣམས་ལ་ཕན་པའི་དོན་དུ་མུ་སུ་ལུན་དྷ་དེས་འདོད་པ་རྣམས་ཀྱི་ཉེས་དམིགས་རྣམས་མངོན་སུམ་དུ་བྱེད་དེ། འདོད་པ་རྣམས་ཀྱི་ཉེས་དམིགས་རྣམས་གཞན་རྣམས་སུ་མཐོང་བར་གྱུར་པ་དང་། གཞན་དུ་ཡང་ཐོས་པར་གྱུར་པའི་རྒྱུ་མཚན་གྱིས་ཀྱང་འཁོར་བ་ལ་ཡིད་འབྱུང་བར་འགྱུར་བ་ཡིན་ནོ། །དེ་ལ་རྒྱུ་མཚན་འདིས་ལྷ་དེ་དག་རྣམས་ལ་འདོད་པ་རྣམས་ཀྱི་ཉེས་དམིགས་རྣམས་སོ་སོར་སྤྲུལ་པར་བྱེད་དོ། །དེ་ནས་ལྷ་དེ་དག་དང་ལྷ་མ་ཡིན་དང་ཀླུ་རྣམས་ཀྱི་འདོད་པ་རྣམས་ལ་རོ་མྱོང་བར་བྱེད་པ་དེ་དག་རྣམས་བསྟན་ནས་ཉེས་དམིགས་ཀུན་དུ་སྟོན་པར་བྱེད་དེ། ལྷ་དང་། མི་དང་། ཀླུ་དང་། ལྷ་མ་ཡིན་དེ་དག་རྣམས་ཉིད་ཀྱང་དུས་རྣམས་མདོར་བསྡུ་བ་ཇི་ལྟ་བ་བཞིན་དུ་ཡིན་པས་སོ། །དེ་ལ་ལྷ་རྣམས་ནི་རྣམ་པ་སྣ་ཚོགས་པའི་འདོད་པ་རྣམ་པ་དུ་མ་རྣམས་ལ་ལོངས་སྤྱོད་ནས། འཆི་འཕོ་བའི་དུས་བྱུང་བར་གྱུར་པ་ན་དེ་དག་རྣམས་ཇི་ལྟར་ཡིན་པ་དེ་བཞིན་དུ་སྟོན་པར་བྱེད་དེ། རྣམ་པ་དུ་མ་སྣ་ཚོགས་པའི་ཚུལ་གྱིས་འཆི་འཕོ་བར་འགྱུར་བ་རྣམས་ལ་འདི་ལྟ་སྟེ། རིའི་དྲུང་དག་ནས་རྣམ་པ་དུ་མར་གྱུར་པ་བྱི་ལ་དང་། གུང་དང་། གཟིག་དང་། སེར་བ་ཅག་ཅག་དང་། ཅེ་སྤྱང་དང་། རི་བོང་དང་། སེང་གེ་དང་། ཕག་པ་དང་། ཀླུ་དང་། དོམ་དང་། སྟག་དང་། སྲིན་བྱ་དང་། རྟ་དང་། སྟོ་མ་ར་དང་། གླང་པོ་དང་། ཁྭ་ཏ་དང་། སུ་སུ་ཀ་དང་།

70-292b

ཆུ་སྲིན་དང་། རུས་སྦལ་དང་། རྔ་མོ་རྣམས་ཀྱི་གདོང་གཅིག་པ་དང་། གདོང་གཉིས་པ་དང་། གདོང་གསུམ་པ་དང་། གདོང་མང་པོར་གྱུར་པ་དེ་དག་རྣམས། ཁ་ཅིག་གི་ལག་ན་ནི་ཐལ་བ་དང་སོལ་མེ་ཐོགས་པའོ། །ཁ་ཅིག་གི་ནི་ཐམས་ཅད་རབ་ཏུ་འབར་བར་གྱུར་པའོ། །ཁ་ཅིག་གིས་ནི་མེའི་ཆར་འབེབས་པར་བྱེད་པ་དང་། རྡོ་རྗེ་དང་བཅས་པའི་རལ་གྲི་ཀུན་ནས་འཕེན་པར་བྱེད་དོ། །ཐོན་ཀོར་ཀུན་ནས་འཇིགས་སུ་རུང་བའི་སྒྲ་མང་པོ་རྣམས་མངོན་པར་འདོན་པར་གྱུར་པ་ནི་རི་དང་ཐོག་འབབ་པ་དང་མཚུངས་པའི་འཇིགས་པ་ཆེན་པོ་རྣམ་པ་དུ་མ་རྣམས་ཡིན་ཏེ། ཆར་འབྱུང་བའི་སྤྲིན་མཐིང་ནག་དང་མདོག་འདྲ་བར་འཇིགས་པ་ཆེན་པོར་གྱུར་པའི་གཟུགས་དང་ལྡན་པ་དེའི་མགོ་བོ་ནི་རི་དང་མཉམ་པར་སྐྲ་རྣམས་དང་། ལུས་རབ་ཏུ་འབར་བར་གྱུར་པ་བརྒྱ་ཕྲག་མང་པོ་རྣམས་དང་། དེ་བཞིན་དུ་སྟོང་ཕྲག་མང་པོ་རྣམས་ཀྱིས་ཀུན་ནས་བསྐོར་ནས་ལག་ན་ཞགས་པ་ཐོགས་པ་དང་། རལ་གྲི་དང་། མདུང་དང་། རྡོ་རྗེ་དང་། རྫོགས་ལག་ན་ཐོགས་པ། འཇིགས་བྱེད་ཆེན་པོའི་གཟུགས་སུ་སྟོན་པར་བྱེད་པ་རྣམས་རི་དེ་དག་གི་ཁྲོད་རྣམས་ནས་བྱུང་བ་ནས་ངེས་པར་འོང་བར་བྱེད་དོ། །གང་ན་སྤྲུལ་པའི་ལྷ་དེ་དག་རྣམས་ཡོད་པ་དེར་ཉེ་བར་རྒྱུག་པར་བྱེད་དོ། །ཁྲོས་པས་བཞིན་དམར་པོ་རྣམ་པར་རོལ་བ་ཉེ་བར་སྒྱུར་བར་བྱེད་པས་སྔོན་པོ་དང་སེར་པོ་དང་དམར་པོ་རྣམས་ཀྱི་མདོག་གི་མེ་འབར་བ་རྣམ་པ་དུ་མར་ཆར་འབྱུང་བའི་སྤྲིན་མཐིང་ནག་གི་གསེབ་རྣམས་ལས་བཞིན་དུ་གློག་རྣམ་པར་འབྱིན་པས་ངེས་པར་རྒྱུག་པར་བྱེད་དོ། །སྤྲུལ་པ་གཞན་རྣམས་ཁ་ཅིག་ནི་འཆི་བདག་ལྟ་བུར་གྱུར་པས་མཆོག་ཏུ་འཇིགས་སུ་རུང་བའི་གཟུགས་རྣམས་ཀྱིས་གང་ན་སྤྲུལ་པ་དེ་དག་རྣམས་ཡོད་པར་རྒྱུག་པར་བྱེད་པ་ནི་སྣ་ཚོགས་པའི་ཞགས་པ་དང་། ལག་ཆ་ཐོགས་པ་རྣམས་ལ་འདི་ལྟ་སྟེ། ལྕགས་ཀྱི་རང་བཞིན་ལས་ལག་པ་གྱེན་དུ་རབ་ཏུ་འབར་བར་གྱུར་པ་འབྲུག་བཞིན་དུ་སྒྲ་ཀུན་ནས་སྒྲོག་པར་བྱེད་པ་ལུས་རབ་ཏུ་འབར་བར་གྱུར་པ་དཔག་ཚད་བཅུའི་ཚད་ཙམ་གྱི་གཟུགས་ཅན་རྣམས་སོ། །ཁ་ཅིག་ནི་མིག་བརྒྱ་པ་རྣམས་སོ། །ཁ་ཅིག་ནི་མིག་བཞི་བརྒྱ་པ་རྣམས་སོ། །

70-293a

དེ་བཞིན་དུ་ལྔ་པ་དང་དྲུག་དང་བདུན་དང་བརྒྱད་དང་དགུ་དང་མིག་བརྒྱ་ཕྲག་བཅུ་པ་རྣམས་ཏེ། མིག་རབ་ཏུ་འབར་བར་གྱུར་པ་རྒྱང་གྲགས་ཀྱི་ཚད་ཙམ་པ་རྣམས་རབ་ཏུ་འོང་བར་བྱེད་དོ། །ཁ་དོག་སྔོན་པོ་དང་། སེར་པོ་དང་། དམར་པོ་དང་། སྔོ་སྐྱ་རྣམས་དང་དབྱིབས་རྣམ་པ་སྣ་ཚོགས་པར་གྱུར་པ། འབྱུང་པོ་རྣམས་ཐམས་ཅད་འཇིགས་པར་བྱེད་པ། ཧཱ་ཧཱ་ཞེས་སྒྲོགས་པར་བྱེད་པས་ཀྱང་དེ་དག་ཐམས་ཅད་རིའི་རྩེ་མོ་འདུད་པའི་སྒྲ་དང་འདྲ་བར་སོ་སོར་གསུས་པ་འཕྱང་བ་དང་། གསུས་པ་གཞན་དག་རྣམས་ནི་རི་དང་མཚུངས་པར་གྱུར་པའི་གསུས་པ་དང་། རི་དང་མཚུངས་པའི་མགོ་བོ་ཅན་རྣམས་ཡིན་ནོ། །མགོ་བོ་ཐུང་ངུ་དང་ལྡན་པ་དང་། གཞན་རྣམས་ནི་རིང་བར་རབ་ཏུ་འབར་བར་གྱུར་པའི་སྐྲ་དང་ལག་པ་རིང་པོར་གྱུར་པ་དང་། སེན་མོ་རྣམས་རབ་ཏུ་འབར་བ་དང་། དེ་བཞིན་དུ་ལུས་ལ་སྐྱེས་པའི་བ་སྤུ་རྣམས་ཀྱང་སྟེ། ཉེ་འཁོར་ཀུན་ནས་རབ་ཏུ་འབར་བར་གྱུར་པའི་རི་དང་མཉམ་པ་རྣམས་དུས་ཀྱི་རི་ཆེན་པོ་དེ་ལས་སྤྲུལ་པ་བྱས་པ་རྣམས་ངེས་པར་འོང་བ་ཡིན་ཏེ། རྡོ་རྗེའི་ཐོག་འབབ་པར་བྱེད་པ་ཉེ་འཁོར་ཀུན་ནས་འབེབས་པར་བྱེད་པ་ཡིན་ནོ། །ཡང་རྣམ་པ་གཞན་དག་རྣམས་ཀྱིས་དེ་བཞིན་དུ་འཆི་བདག་གི་ཕོ་ཉ་ཉེ་བར་རྒྱུག་པར་བྱེད་པ་རྣམས་ནི་ཉེ་འཁོར་རྣམས་ན་བྱ་རྒོད་དང་། ཁྭ་ཏ་དང་། ཀང་ཀ་དང་། ཅེ་སྤྱང་དང་། རྔ་མོའི་གདོང་ཅན་རྣམས་ལུས་པོ་ཁྲག་གིས་རྣམ་པར་བྱུགས་པ་དང་། གྲོག་མ་འཕུངས་པའི་ལུས་ཅན་གྱི་ལྷ་དེ་དག་རྣམས་མངོན་པར་མི་དགའ་བ་རྣམས་ངེས་པར་ཡོད་པར་བྱེད་པ་ཡིན་ནོ། །དུས་ཀྱི་རི་ཆེན་པོ་དེ་དག་ལས་སྤྲུལ་པ་བྱས་པ་དེ་དག་རྣམས་ཐམས་ཅད་ཀྱང་གང་ན་ལྷ་སྤྲུལ་པའི་ལྷ་དེ་རྣམས་ཡོད་པར་དེར་རླུང་གི་ཤུགས་ཆེན་པོས་བཏབ་པ་བཞིན་དུ་སྤྲིན་ནག་པོ་གློག་དང་བཅས་པས་མྱུར་བར་རྒྱུག་པར་བྱེད་དོ། །དེ་ནས་འཆི་བདག་ལྟ་བུར་བྱེད་པར་གྱུར་པ་དེ་དག་རྣམས་ཀྱིས་ལྷ་དེ་དག་རྣམས་དང་ཉེ་བར་འོངས་པར་གྱུར་ནས་སྤྲུལ་པའི་ལྷ་དེ་དག་རྣམས་མངོན་པར་འཛིན་པར་བྱེད་དོ། །དེའི་གཏིང་ལ་ཁ་ཅིག་ནི་རབ་ཏུ་འབར་བར་གྱུར་པའི་ལྕགས་ཀྱི་ཐག་པ་རྣམས་ཀྱིས་དཔུང་པ་བཅིངས་ནས་

70-293b

འདྲེན་པར་བྱེད་དོ། །དེ་བཞིན་དུ་སྤྲུལ་པའི་ལྷ་གཞན་དེ་དག་རྣམས་ཀྱིས་དེ་དག་རྣམས་ཉིད་འཁྲིད་པར་གྱུར་པ་མངོན་པར་མཐོང་ནས། ཤིན་ཏུ་འཇིགས་པར་གྱུར་པས་ཕན་ཚུན་ཀུན་དུ་རྒྱུག་པར་བྱེད་དོ། །དེ་དག་རྣམས་ཀྱང་འཛིན་པར་བྱེད་དེ། འཆི་བདག་གི་ཕོ་ཉ་ནི་མགོ་ལ་མངོན་པར་དམིགས་ནས། དེ་དག་ནམ་མཁའ་ལ་མངོན་པར་འཕགས་ཏེ་འཇིགས་པར་བྱེད་པའི་ང་རོ་དག་ཀུན་དུ་བཏོན་པས་མིག་གི་ཡུལ་ངེས་པར་འཕྱོང་བར་བྱེད་དོ། །ཁ་ཅིག་ནི་ལྷ་གཞན་མ་དེ་དག་རྣམས་ཉིད་བཟུང་ནས་ལྕགས་ཀྱི་རང་བཞིན་གྱི་རབ་ཏུ་འབར་བའི་ཐག་པ་རྣམས་ཀྱིས་མགྲིན་པ་བཅིངས་ཤིང་ཁྱེར་ཏེ། ས་གཞིའི་གསེབ་ཏུ་རྗེས་སུ་ཐིམ་ནས་མི་མཐོང་བར་འགྲོ་བར་བྱེད་དོ། །འཆི་བདག་གི་ཕོ་ཉ་སྤྲུལ་པ་བྱས་པ་གཞན་དེ་དག་རྣམས་ཁ་ཅིག་གིས་ཀྱང་སྤྲུལ་པའི་ལྷ་རྣམས་ཁྱེར་ནས་ཆུར་སྤྱིང་བར་བྱེད་དེ། རབ་ཏུ་ཁྲོས་པར་གྱུར་པས་ནང་དུ་ནུབ་པར་གྱུར་ཏོ། །དེ་ལྟར་རྣམ་པ་དུ་མ་དང་རྣམ་པར་རྟོག་པ་དུ་མ་རྣམས་སུ་སྤྲུལ་པ་དེ་དག་རྣམས་ནི་འཇིགས་པ་ཆེན་པོར་གྱུར་པ་རྣམས་ཡིན་ནོ། །རང་བཞིན་གྱི་ལྷ་དེ་དག་རྣམས་ཀྱིས་ཀྱང་དེ་དག་རྣམས་ཐམས་ཅད་རྨི་ལམ་གྱི་སྣང་བ་བཞིན་དུ་མཐོང་བར་གྱུར་ཏེ། འདི་དང་འདི་དག་རྣམས་ནི་ཅི་ཡིན་ཞེས་གོ་བར་འགྱུར་བ་ཡིན་ནོ། །དེ་ནས་དེ་དག་གང་གི་ཚེ་སྤྲུལ་པར་གྱུར་པའི་ལྷ་རྣམས་ལ་དམིགས་པ་ན་དེའི་ཚེ། སྤྲུལ་པའི་སྐྱེས་བུ་དེ་དག་རྣམས་ཀྱིས་རྗེས་སུ་གདམས་པར་བྱེད་པའི་ཚིགས་སུ་བཅད་པ་བརྗོད་པ་རྣམས་ནི། ཇི་ལྟར། ལོངས་སྤྱོད་རྒྱགས་པས་རྒྱགས་པ་ཡི། །བག་མེད་དབང་གིས་འཇུག་པ་རྣམས། །རྨོངས་པ་རྣམས་ཀྱི་དུས་སོང་ནས། །འཆི་བདག་དུས་སུ་འོངས་པ་ཡིན། །ནགས་ཀྱི་དུས་འདི་མཐའ་ཡས་པ། །དུག་གིས་གང་བ་ཇི་བཞིན་ནགས། །སྲེད་པའི་མྱུ་གུ་རྣམ་སྤངས་པ། །དགེ་བ་དོན་གཉེར་ཀུན་ནས་སྤངས། །མཛེས་པའི་ལས་ནི་མ་བྱས་པར། །བག་མེད་པས་ཀྱང་བག་མེད་འགྱུར། །འཆི་བདག་འཇིགས་པའི་དུས་བྱུང་ན། །བློ་གྲོས་ངན་པ་ཅི་བྱར་ཡོད། །སྲེད་པའི་ཆུར་ནི་ནུབ་པ་གང་། །སྡུག་བསྔལ་ཕ་རོལ་ཏུ་ཕྱིན་མིན། །རྒ་དང་འཆི་བར་བྱིང་བ་གང་། །

70-294a

བདེ་བ་དེ་དག་རྣམས་ལ་མེད། །སྐྱེས་པ་ཙམ་གྱིས་ཐམས་ཅད་ཀྱི། །རྒྱབ་ན་འཆི་བདག་ངེས་པར་གནས། །ཅི་ཡི་དོན་དུ་འཇིག་རྟེན་འདི། །བག་མེད་པས་ནི་བག་མེད་བྱེད། །ཉམས་པ་མེད་དང་རྣམ་མི་ཤེས། །རྟག་ཏུ་གླགས་གཅོད་སྟོབས་པོ་ཆེ། །འཆི་བདག་དམག་དཔུང་ཤུགས་པོ་ཆེ། །འཇིག་རྟེན་པས་ཀྱང་གོ་བ་མིན། །རྟག་ཏུ་རྣམ་པར་འགལ་འགྱུར་དང་། །བཟློག་ཐབས་མེད་པ་ཉིད་ཀྱང་ཡིན། །སེམས་ཅན་ཐམས་ཅད་འཆི་བ་ཡང་། །བག་མེད་པས་ནི་མ་གོ་འོ། །འཆི་བདག་གིར་གྱུར་འཇིག་རྟེན་གསུམ། །ཉེ་འཁོར་ཀུན་དུ་རྣམ་པར་དཔྱོད། །རྒ་དང་ན་དང་རྒུད་པ་ཡང་། །བྱིས་པ་རྣམས་ཀྱིས་རིག་པ་མིན། །དེ་ལྟར་སྤྲུལ་པའི་འཆི་བདག་གི་ཕོ་ཉར་གྱུར་པ་དེ་དག་གིས་སྤྲུལ་པའི་ལྷ་དེ་དག་རྣམས་ལ་རྗེས་སུ་གདམས་པར་བྱེད་པའི་ཚིགས་སུ་བཅད་པ་རྣམས་བརྗོད་ནས། ལན་བརྒྱ་ཕྲག་རྣམས་སུ་དང་ལན་སྟོང་ཕྲག་རྣམས་སུ་ཡང་སྲིད་པ་རྣམས་སུ་འཁྲིད་པར་བྱེད་ཅིང་དེ་བཞིན་དུ་འདྲེན་པར་བྱེད་དོ། །སྡུག་བསྔལ་ཆེན་པོ་དེ་དག་རྣམས་མཐོང་བར་གྱུར་པས་ཀྱང་རང་བཞིན་གྱི་ལྷ་དེ་དག་གིས་བག་མེད་པ་ལས་ཤིན་ཏུ་སྡུག་བསྔལ་བར་འགྱུར་བ་སྤངས་ནས། ཡིད་འབྱུང་བར་འགྱུར་ཞིང་ཐམས་ཅད་ཀྱང་རབ་ཏུ་དང་བའི་ཡིད་ཀྱིས་དཀོན་མཆོག་གསུམ་ལ་སྐྱབས་སུ་སོང་བར་གྱུར་ཏོ། །དེ་དག་རྟོགས་ནས་གཞན་ཡང་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཀྱི་ཡིད་གཞན་ཡང་ཇི་ལྟ་བ་བཞིན་དུ་ལས་སུ་རུང་བར་བྱ་བའི་ཕྱིར་སླར་ཉིད་ཀྱང་སྤྲུལ་པ་གཞན་རྣམས་སྤྲུལ་པར་བྱེད་པ་ནི། ལྷ་དེ་དག་རྣམས་ཉིད་ཀྱི་ཕྱིར་ཞིང་ཉིད་ཀྱང་ཁྱད་པར་དུ་རྟོགས་ནས་དགའ་བར་འགྱུར་བ་རྣམས་ལ། འདི་ལྟ་སྟེ་དབུ་རྒྱན་གྱིས་བརྒྱན་པ་འདོད་པ་རྣམས་ཐམས་ཅད་ཕུན་སུམ་ཚོགས་པའི་རྒྱལ་པོ་གང་ཡིན་པ་དེ་དག་རྣམས་མུ་སུ་ལུན་དྷའི་ལུས་ལས་ངེས་པར་འབྱུང་སྟེ། ལྷན་ཅིག་སྤྱོད་པར་བྱེད་པའི་མཆོག་ཏུ་ལང་ཚོ་ལ་བབ་པ་རྣམས་ཀྱིས་ཕྱི་བཞིན་འབྲང་བར་གྱུར་པ་རྣམས་ནི་སྔར་ཁོ་ན་བཞིན་ནོ། །དེ་དག་ཐམས་ཅད་ཀྱང་རྣམ་པ་དེ་སྲིད་ཀྱི་གཟུགས་དང་ཕུན་སུམ་ཚོགས་པ་རྣམས་ཀྱིས་ཀྱང་ཕུན་སུམ་

70-294b

ཚོགས་པར་གྱུར་ནས་ཕྱི་ནས་ཡང་རྒྱལ་པོ་རྣམས་ལུས་གོག་པོར་སོང་བ། མགོ་བོ་ཀུན་སྐྲ་དཀར་རྣམས་ཀྱིས་གཡོགས་པར་གྱུར་པ། ལུས་པོ་རྣམས་ཀུན་ནས་འཁུམས་པ། ལུས་ལ་གཉེར་མ་དང་སྐྲ་དཀར་རྣམས་ཀྱིས་ཀུན་དུ་གང་བ་ལུས་དབྱུག་པ་ལ་ཀུན་ནས་རྟེན་པ་མཆོག་ཏུ་རྗུད་པར་གྱུར་པའི་ལུས་པོ་ཅན་རྣམས་ལས་རྣམ་པ་ཐམས་ཅད་ལ་ནུས་པ་མེད་པར་གྱུར་པ། གཞན་ལ་ཀུན་ནས་རྟེན་ནས་འགྲོ་བར་བྱེད་པ། སྐྱེ་བོ་རྣམས་ཐམས་ཅད་བཞད་གད་དུ་གྱུར་པ་སྒྲ་ངར་ངར་པོར་གྱུར་པའི་དབུགས་ཕྱིར་འབྱུང་བ་ལུས་ཀུན་ལ་བསྙེ་བས་ཉམས་པར་བྱས་པ། དབང་པོ་རྣམས་ཤིན་ཏུ་རྙིངས་པར་གྱུར་པ་ཐམས་ཅད་ལ་ཡང་སྤྲོ་བ་མེད་པ། སྐྱེ་བོ་རྣམས་ཐམས་ཅད་སྐྱུག་ཟློག་པར་བྱེད་པ། འཁྱོར་ཞིང་འགྲོ་བར་གྱུར་པ་དུས་ཤིན་ཏུ་ཉེ་བར་གྱུར་པ་དེ་དག་རྣམས་མཚོ་འདི་ཉིད་ན་རྒྱུ་བར་བྱེད་དེ། སྟོབས་ཤིན་ཏུ་ཡང་ཆུང་བར་གྱུར་པ་གཞན་དག་གི་ལག་པ་ལ་འཕྱངས་ནས་གོམ་པ་རྣམས་འབོར་བར་བྱེད་པ་ཤིན་ཏུ་ཡང་འཇིགས་སུ་རུང་བའི་གཟུགས་དང་ལྡན་པ་རྣམས་ཡིན་ནོ། །དེ་དང་དེ་ལྟར་རྒྱུ་བར་བྱེད་པ་རྣམས་ཀྱི་ལུས་རྣམས་ལ་དུས་གཞན་འགའ་ཞིག་གི་ཚེ་ན། གཟུགས་མང་པོ་རྣམ་པ་སྣ་ཚོགས་པའི་ནད་རྣམས་ཀུན་དུ་སྐྱེ་བ་ནི། རིམས་ཚ་བ་དང་། ཧ་ཅང་ཐལ་ཆེས་པར་འཁྲུ་བ་དང་། གློ་ལུ་བ་དང་། དབུགས་མི་བདེ་བ་དང་། སྐྱིགས་བུ་དང་། སྐྲང་གློ་དང་། མཛེ་སྔོན་དུ་འགྲོ་བར་གྱུར་པ་རྣམས་ཀྱིས་ཤིན་ཏུ་མི་བཟད་པར་གྱུར་པ། ཉེ་བར་འཚེ་བ་རྣམས་དང་བཅས་པ། འཆི་བའི་མཐར་ཐུག་པར་བྱེད་པ། ཤིན་ཏུ་སྐྱུག་བྲོ་བར་གྱུར་པའི་ནད་ཁྱད་པར་དུ་དྲག་པོ་དེ་དག་རྣམས་ཀུན་དུ་འབྱུང་བར་གྱུར་པའི་སྟོབས་ཀྱིས། གསོ་དཔྱད་མེད་པ་དང་མི་འདོད་པ་རྣམས་མཐར་ཐུག་པར་བྱས་པས་རྒྱལ་པོ་དེ་དག་རྣམས་ཐམས་ཅད་ཉིད་ཁྲིད་པར་གྱུར་ནས་ཤིན་ཏུ་སྡུག་བསྔལ་བ་ཁོ་ནར་འཆི་བར་བྱེད་དོ། །ཤི་བ་དེ་དག་རྣམས་ཀྱི་ལུས་དེ་དག་རྣམས་ཟགས་ཤིང་དྲི་མི་ཞིམ་པར་གྱུར་པ་ལ་སྲིན་བུ་བརྒྱ་སྟོང་གིས་ཁྱབ་པར་གྱུར་པས་ཟ་བར་བྱེད་བཞིན་པའི་ལུས་དེ་དག་རྣམས་རང་བཞིན་པའི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །དེ་ནས་གང་

70-295a

དག་གིས་དེ་དག་གི་ལུས་རྣམས་འཛིན་པར་བྱེད་པའི་སྤྲུལ་པའི་བྱ་རྣམས་ཀྱང་ཀུན་དུ་འོངས་པར་གྱུར་ནས་ཁ་ཅིག་གིས་ནི་ཟ་བར་བྱེད་དོ། །ཁ་ཅིག་གིས་ནི་བཟུང་བར་གྱུར་པ་མཐོང་ནས་འབྲོས་པར་བྱེད་དེ། དེ་དག་རྣམས་ཀྱང་མཆོག་ཏུ་སྐྱོ་བ་སྐྱེ་བར་འགྱུར་བའི་གནས་སུ་ལེགས་པར་མཐོང་བས་ལྷ་རང་བཞིན་པ་དེ་དག་རྣམས་ཤིན་ཏུ་ལེགས་པར་མཉམ་པར་བཞག་པའི་ཡིད་དུ་འགྱུར་རོ། །གཞན་ཡང་ལྷ་དེ་དག་རྣམས་ཉིད་ལ་ཕན་པར་བྱ་བའི་དོན་དུ་འཐབ་བྲལ་གྱི་བདག་པོ་བརྟན་པས་མགོ་དྲངས་པའི་ལྷ་མ་ཡིན་གྱི་རྒྱལ་པོ་གང་ཡིན་པ་དེ་དག་རྣམས་སྒྲ་གཅན་འཛིན་གྱི་མཐར་ཐུག་པར་གྱུར་པའི་ས་འོག་ན་གནས་པ་དེ་དག་རྣམས་གང་གི་ཚེ་མུ་སུ་ལུན་དྷ་ལས་མི་རིང་བ་ན་ཀུན་ནས་གནས་པར་གྱུར་ལ། དེའི་ཚེ་རྣམ་པར་ཁྲོས་པར་གྱུར་པས་ཀྱང་ཐམས་ཅད་ཀྱི་སྐད་ཆེན་པོ་ཀུན་དུ་བཏོན་ཞིང་ཕན་ཚུན་དུ་ཡང་བོས་པར་གྱུར་ནས་ས་གཞི་ལ་ཀུན་ནས་འགྱེལ་བ་ནི་སྟ་རེས་ཤིང་ཀར་ཎི་ཀཱ་ར་སྟ་རེས་རྩ་བ་ནས་བཅད་པ་བཞིན་དུ་ས་གཞི་ལ་འགྱེལ་བར་གྱུར་ཏོ། །འགྱེལ་ནས་ཀྱང་ཤི་བར་གྱུར་པས་ཐམས་ཅད་ཤིང་དང་རྡོ་བ་རྣམས་བཞིན་དུ་རྣམ་པར་འགྱུར་བ་དང་བྲལ་བར་འགྱུར་རོ། །དེ་དག་རྣམས་མངོན་པར་མཐོང་ནས་ལྷ་མ་ཡིན་གྱི་བུ་མོ་དེ་དག་རྣམས་ཤིན་ཏུ་སྡུག་བསྔལ་གྱིས་གཟིར་ནས་ཀྱང་རྣམ་པར་ཁྲོ་བར་བྱེད་པ་དང་ངུ་བར་ཡང་བྱེད་དོ། །ཡོངས་སུ་བསྐོར་བར་གྱུར་ནས་དེ་དག་རྣམས་ཐམས་ཅད་ཀྱང་དེ་ལྟར་ངུ་བར་བྱེད་པ་རྣམས་ལ་བྱ་དག་ཀུན་དུ་འོང་བར་གྱུར་ནས་དེ་དག་གིས་དེ་དག་རྣམས་ཀྱི་ལུས་ཤིང་སྐམ་དང་རྡོ་བ་དང་ཤིང་བུ་དང་མཚུངས་པར་བྱེད་པ་མེད་པ་རྣམས་ཀུན་ནས་འདྲེན་པར་བྱེད་དོ། །སྙིང་རྗེ་རྣམ་པར་འཁྲུགས་པར་གྱུར་པའི་ལྷ་མ་ཡིན་གྱི་བུ་མོ་དེ་དག་རྣམས་དེ་ནས་དེ་ལྟར་རྣམ་པར་འཁྲུགས་པའི་རྟིང་ཐོགས་ཉིད་ལ་དེ་དག་རྣམས་ཐམས་ཅད་ཀྱང་ཤི་བར་གྱུར་ཏོ། །དེ་དག་རྣམས་ཀྱི་རོ་དེ་དག་རྣམས་ཀྱང་བྱ་རྣམས་ཉིད་ཀྱིས་འཛིན་པར་བྱེད་དོ། །བཟུང་བར་གྱུར་ནས་ཀྱང་ཁྭ་ཏ་དང་འུག་པ་དང་བྱ་རྒོད་རྣམས་ནམ་མཁའ་ལ་འཕུར་བར་འགྱུར་ཏེ། མཐོང་བའི་ཡུལ་

70-295b

ལས་འདས་ནས་འགྲོ་བར་བྱེད་དོ། །དེ་ལྟར་ཡང་འཐབ་བྲལ་བ་རྣམས་ཀྱི་བདག་པོ་དེས་རང་བཞིན་གྱི་ལྷ་རྣམས་ལ་ཕན་པར་བྱ་བའི་དོན་དུ་སྤྲུལ་པ་གཞན་རྣམས་ཀྱང་ཕུལ་དུ་ཕྱིན་པར་བྱས་སོ། །དེའི་རྗེས་ཐོགས་ལ་སྤྲུལ་པ་གཞན་དག་བྱེད་པ་རྣམས་ལ་ཇི་ལྟར་གང་དེ་ཀླུའི་རྒྱལ་པོ་རྣམས་གང་ཡིན་པ་དེ་དག་གི་སྤྲུལ་པ་རྣམས་ནི་སྔ་མ་བཞིན་ནོ། །ཡང་དེ་དག་རྣམས་ཀྱི་མི་རྟག་པ་འདི་དག་སྟོན་པར་བྱེད་པ་ལས་དེ་ལྟར་ཡང་ཀླུ་རྣམས་ཁ་ཅིག་ནི་བྱེ་ཚན་དག་གིས་སྲེག་པར་བྱེད་དོ། །སོལ་བའི་མེ་ཚ་བ་རྣམས་ཀུན་དུ་འབབ་པར་འགྱུར་ཞིང་དེ་དག་རྣམས་བབ་པར་གྱུར་པས་ཀྱང་དེ་ལྟར་སྲེག་པར་བྱེད་དོ། །ཇི་ལྟར་སེང་ལྡེང་གི་མེ་ཤིན་ཏུ་ཆེན་པོ་རྣམས་སུ་རྩྭ་འཇག་སྐམ་པོ་ཅིག་ལྷུང་བ་སྲེག་པར་བྱེད་པ་དེ་བཞིན་དུ་ལྷུང་བར་གྱུར་པ་ཙམ་ཉིད་ན་ཀླུ་དེ་དག་རྣམས་བྱེ་ཚན་གྱིས་སྲེག་པར་བྱེད་དོ། །དེ་དག་རྣམས་ལས་གཞན་པའི་ཀླུ་རྣམས་ཀྱང་འཆི་བདག་གིས་འཁྲིད་པར་འགྱུར་ཏེ། ལྷན་ཅིག་སྤྱོད་པར་བྱེད་པ་རྣམས་ཀྱི་ནང་ན་གནས་པ་ལས་རྣམ་པར་ཁྲོས་པར་གྱུར་བཞིན་དུ་དེ་དག་རྣམས་དུས་ཀྱི་འཁོར་ལོས་སྡུད་པར་བྱེད་དོ། །གཞན་རྣམས་ཁ་ཅིག་ནི་ཕན་ཚུན་དུ་འགྱེད་པར་གྱུར་པས་ཕན་ཚུན་དུ་བཅིངས་ནས་སྙིང་ཕན་ཚུན་དུ་འཇོམས་པར་བྱེད་དོ། །དེ་ལྟར་འཆི་བདག་རྣམས་ཀྱིས་ཀུན་དུ་ཁྲིད་པར་གྱུར་པའི་སྤྲུལ་པ་པའི་ཀླུ་དེ་དག་རྣམས་ཀྱང་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །མཐོང་ནས་ཀྱང་ཕྱིར་ཞིང་ཁོ་ན་ཤིན་ཏུ་ངེས་པར་ཡིད་འབྱུང་བར་འགྱུར་རོ། །གཞན་ཡང་འཐབ་བྲལ་བ་རྣམས་ཀྱི་བདག་པོ་དེ་ཉིད་ཀྱིས་སྤྲུལ་པ་གཞན་དག་བྱེད་པ་ནི་ཇི་ལྟར་ཤར་གྱི་ལུས་འཕགས་པོ་རྣམས་དང་། བ་ལང་སྤྱོད་པ་རྣམས་ཀྱི་མི་རྣམས་ཀྱང་རྒས་པ་རྣམ་པ་སྣ་ཚོགས་པ་རྣམས་ཀྱིས་ཟིལ་གྱིས་གནོན་པར་བྱེད་དོ། །ལྷན་ཅིག་རྗེས་སུ་སྤྱོད་པའི་འཁོར་དང་བཅས་པ་རྣམས་ལན་བརྒྱ་དང་སྟོང་དུ་ཡང་བྱེད་དོ། །ཤི་བ་དེ་དག་རྣམས་ཉིད་ཀྱི་ལུས་དེ་དག་རྣམས་ལས་སྲིན་བུ་རྣམས་ཀྱིས་གང་བར་གྱུར་པར་ཤིན་ཏུ་འཇིགས་སུ་རུང་བར་ས་གཞི་ལ་འགྱེལ་བར་གྱུར་པ་དག་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །རྣམ་པ་

70-296a

དུ་མ་དང་རྣམ་པར་རྟོག་པ་དུ་མར་ཡང་སྲིན་བུའི་སྐྱོན་ཕུལ་དུ་ཕྱིན་པའི་སྡུག་བསྔལ་གྱིས་འཆི་བ་མངོན་པར་མཐོང་ནས། རང་བཞིན་གྱི་ལྷ་དེ་དག་མཆོག་ཏུ་ཡིད་བྱུང་བ་དང་ལྡན་པར་གྱུར་ནས། འཆི་བའི་སྡུག་བསྔལ་འདི་ནི་ངེས་པར་བསླང་བ་ཡིན་ཏེ། དེ་ལྟར་ཡང་སྲོག་ཆགས་སུ་གྱུར་པ་གང་ཡིན་པ་འདི་དག་རྣམས་ཐམས་ཅད་ཀྱང་རྒ་བ་དང་ནད་དང་འཆི་བ་རྣམས་ཀྱིས་མཐར་ཐུག་པར་བྱེད་པ་ཡིན་པ་རབ་ཏུ་མི་ཤེས་ན། དེ་དག་རྣམས་ཀྱང་གང་དུ་སོང་གང་གིས་ཁྲིད་པར་གྱུར་པ་ཡིན། ཕུན་སུམ་ཚོགས་པ་རྣམས་ཐམས་ཅད་ནི་མི་རྟག་པ་ཡིན་པ་དང་། བདེ་བ་རྣམས་ཐམས་ཅད་ཀྱང་སྲིད་པའི་སྐྱོན་དང་ཀུན་དུ་འདྲེས་པའི་འདུས་བྱས་ཞེས་བྱ་བ་གཡོ་བ་མཐར་འཇིག་པར་འགྱུར་བ་འདི་ལ་བློ་དང་ལྡན་པའི་སྐྱེས་བུ་རྣམས་ཀྱིས་ཡིད་ཆེས་པར་མི་བྱའོ། །རབ་ཏུ་རྣམ་པར་འཇིག་པར་འགྱུར་བའི་ཆོས་ཅན་འདི་དག་རྣམས་ཐམས་ཅད་ལ་འདི་དང་སྲིད་པ་གཞན་དུ་ཡང་བདེ་བ་ཡོད་པ་མ་ཡིན་ནོ། །མཆོག་ཏུ་སྐྱོ་བ་སྐྱེས་པའི་ཡིད་དང་ལྡན་པའི་ལེགས་པར་སྐྱོ་བ་སྐྱེས་པའི་བློ་དང་ལྡན་པའི་རང་བཞིན་གྱི་ལྷ་དེ་དག་རྣམས་དེ་ལྟར་ཕན་ཚུན་དུ་རྗོད་པར་བྱེད་དོ། །དེ་ནས་འཐབ་བྲལ་གྱི་བདག་པོ་དེས་དེ་དག་རྣམས་ཀྱི་སེམས་དང་སེམས་ལས་བྱུང་བ་དེ་དག་རིག་པར་གྱུར་ནས་སྤྲུལ་པ་གཞན་ཡང་བྱེད་པར་གྱུར་པ་ལས། དེ་ནས་སྐྱེས་བུ་གང་དག་ང་མེད་པ་ངའི་བ་མེད་པར་གྱུར་པ། ངེས་པར་གོང་དུ་འགྲོ་བ་དེ་དག་རྣམས་ནི། འདི་ལྟ་སྟེ་གང་བྱང་ཕྱོགས་སྒྲ་མི་སྙན་པ་གང་ཡིན་པ་རྣམས་ཏེ། དེ་དག་རྣམས་ནི་ལྷ་རྣམས་ཀྱི་དྲུང་ན་ཅུང་ཟད་པ་ཅིག་གིས་ཆུང་བའི་མཆོག་ཏུ་སྐྱིད་པར་གྱུར་པའོ། །དེ་དག་རྣམས་ཀྱང་རྒས་པ་དང་ནད་ཀྱིས་གཟིར་བར་གྱུར་ནས་འཆི་བདག་གི་ཞགས་པས་འདྲེན་པར་བྱེད་དོ། །ཤིན་ཏུ་འཇིགས་སུ་རུང་བའི་ལུས་རྣམས་ལ་སྲིན་བུ་བརྒྱ་སྟོང་གིས་ཀུན་ནས་གཡོགས་པར་གྱུར་པ། ལུས་པོ་འདི་དག་ལ་སྐྱེ་བོ་རྣམས་ཐམས་ཅད་ཀྱིས་བལྟ་བར་རྗེས་སུ་མི་འཐུན་པ། བཤང་བའི་ཕུང་པོ་རྣམས་ཀྱིས་ཀུན་དུ་གང་བར་གྱུར་པའི་བྱང་ཕྱོགས་སྒྲ་མི་སྙན་པ་འདི་དག་རྣམས་སོ། །

70-296b

དེ་ལྟར་བདེ་བ་རྒྱ་ཆེན་པོའི་ས་ན་གནས་པའི་འཐབ་བྲལ་བའི་ལྷ་རྣམས་ལ་ཕན་པར་བྱ་བའི་དོན་དུ་ལྷ་དང་མི་དང་ལྷ་མ་ཡིན་རྣམས་ཀྱི་མི་རྟག་པ་ཉིད་འཐབ་བྲལ་གྱི་བདག་པོ་འདིས་བསྟན་པ་ཡིན་ནོ། །དེའི་རྗེས་ཐོགས་ལ་གང་དག་རང་བཞིན་གྱི་ལྷ་དེ་དག་རྣམས་ཀྱིས་མཐོང་བར་སྤྲུལ་པ་གཞན་དག་རྣམས་བྱེད་པ་ནི་འདི་ལྟ་སྟེ། སྲིད་པ་བར་མ་དོ་པའི་ཚོགས་རྣམ་པ་དུ་མ་རྣམས་སོ། །ཇི་ལྟར་ཤི་བར་གྱུར་ནས་སེམས་ཅན་རྣམས་ལས་སྣ་ཚོགས་པ་རྣམས་ཀྱི་དབང་གིས་དམྱལ་བ་དང་ཡི་དགས་དང་དུད་འགྲོ་དང་ལྷ་དང་མི་རྣམས་སུ་སྐྱེ་བ་དེ་བཞིན་དུ་སྲིད་པ་བར་མ་དོ་པ་རྣམས་སྤྲུལ་པ་བྱེད་དེ། ཇི་ལྟར་འགྲོ་བ་ལྔ་པོ་རྣམས་ཀུན་དུ་རྒྱུ་བར་བྱེད་པ་རྣམས་ལྷ་རང་བཞིན་པས་མངོན་སུམ་ཉིད་དུ་མཐོང་བར་འགྱུར་རོ། །དེ་ལ་ལས་དུ་མ་རྣམས་ལས་སེམས་ཀྱི་ཐ་མའི་བསམ་པའི་དབང་གིས་སྐྱེ་བར་འགྱུར་རོ། །དེ་ལས་རང་བཞིན་གྱི་ལྷ་དེ་དག་རྣམས་ཉིད་ངེས་པར་སྐྱོ་བར་བྱ་བའི་དོན་དུ་རྣམ་པ་དུ་མར་ལན་བརྒྱ་སྟོང་དུ་སྐྱེ་དགུ་རྣམས་འགྲོ་བ་ལྔར་སྐྱེ་བ་སྤྲུལ་པར་བྱེད་དོ། །མཚོ་དེ་ཉིད་དུ་བསམ་གྱིས་མི་ཁྱབ་པ་ཤིན་ཏུ་ངོ་མཚར་བ་གཞན་རྣམས་དང་མི་འདྲ་བ་དེ་དག་རྣམས་མངོན་པར་མཐོང་ཞིང་རང་བཞིན་གྱིས་ལྷ་དེ་དག་གིས་མངོན་སུམ་ཁོ་ནར་མཐོང་བར་འགྱུར་རོ། །དེ་ལ་ཡང་འགྲོ་བ་ལྔར་ཀུན་དུ་རྒྱུ་བར་བྱེད་པའི་འབྱུང་པོ་རྣམས་ཐམས་ཅད་ལས་དང་ཉོན་མོངས་པ་རྣམས་ཀྱི་དབང་གིས་དྲངས་པར་གྱུར་པས་འགྲོ་བ་གཞན་ནས་འགྲོ་བ་གཞན་རྣམས་སུ་དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་མིའི་འགྲོ་བ་རྣམས་ལ་ཡོངས་སུ་འཁྱམ་པར་གྱུར་པ་ལ་ནི་སྐྱབས་མེད་པ་དང་གྲོགས་མེད་པར་གྱུར་པས་སྲིད་པ་གཞན་རྣམས་བརྗེ་བསོར་བྱེད་པ། དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་མི་རྣམས་ཀྱི་ནང་དུ་བརྗེ་བསོར་བྱེད་པ་རྣམས་མཐོང་ངོ་། །དེ་ལ་སྲིད་པ་བར་མ་དོ་པ་རྣམས་ཀྱི་ཡ་མཚན་ཆེ་བར་གྱུར་པ་ཤིན་ཏུ་འཇིགས་སུ་རུང་བ། ཀུན་ནས་ཤིན་ཏུ་འཇིགས་པར་བྱེད་པ་མཆོག་ཏུ་སྐྱོ་བ་སྐྱེ་བར་བྱེད་པ་ཐམས་ཅད་ལ་རབ་ཏུ་འཇིགས་པར་བྱེད་པར་གྱུར་པ་དེ་དག་རྣམས་རང་བཞིན་གྱི་

70-297a

ལྷ་རྣམས་ཀྱིས་མཐོང་བར་འགྱུར་རོ། །དེ་ལ་ལྷ་རྣམས་ཉིད་ཀྱི་དེ་ལྟ་བུའི་སྲིད་པ་བར་མ་དོ་པ་མཐོང་བ་ལས། འཐབ་བྲལ་བའི་ལྷའི་རིགས་རྣམས་ལས་ལས་ཟད་པར་གྱུར་ནས་རབ་ཏུ་ལྷུང་བར་གྱུར་པ་ན། འགྱོད་པའི་མེས་སྲེག་པར་བྱེད་པ་བག་མེད་པ་རྣམས་ཀྱིས་དེ་དེ་ལྟར་ཤིན་ཏུ་བསླུས་ནས་མགོ་བོ་ཐུར་ལ་དཔྱངས་པས་རབ་ཏུ་ལྷུང་བར་འགྱུར་རོ། །དེ་དག་འཆི་འཕོ་བར་གྱུར་པ་ན་ལྷ་གང་ཡིན་པའི་རྒྱུད་དེས་ཡོངས་སུ་བཟུང་བའི་ཕུང་པོ་དེ་དག་རྣམས་ནི་ཉེ་བར་ནུབ་པར་འགྱུར་རོ། །རྒྱའི་རྗེས་དང་ཆ་འདྲ་བར་སྲིད་པ་བར་མ་དོ་པ་དེའི་འགྲོ་བ་རྣམས་ཀྱི་ཕུང་པོ་རབ་ཏུ་འབྱུང་བར་འགྱུར་རོ། །དམྱལ་བ་རྣམས་ཀྱི་ལས་བྱས་པར་གྱུར་པ་དེ་དང་འཁོར་བས་བྱས་པའི་ལས་ཀྱི་རྣམ་པར་སྨིན་པ་ཀུན་ནས་སློང་བའི་འཇིགས་པ་ཆེན་པོ་དང་གཟེར་ཟུག་ཆེན་པོར་ཡང་གྱུར་པ་རྣམས་མངོན་པར་མཐོང་ནས། འཐབ་བྲལ་གྱི་རང་བཞིན་པ་དེ་དག་རྣམས་མཆོག་ཏུ་སྐྱོ་བ་དང་ལྡན་པར་འགྱུར་རོ། །དེ་ལྟར་དམྱལ་བ་པ་རྣམས་ཀྱི་སྲིད་པ་བར་མ་དོ་ནི་མཐོང་བར་འགྱུར་ལ། སྐྱེ་བའི་སྲིད་པ་རྣམས་ནི་མུ་སུ་ལུན་དྷ་འདིས་ལེགས་པར་སྟོན་པར་མི་བྱེད་དོ། །རྒྱུ་གང་གི་ཕྱིར་ན་ལྷ་དེ་དག་རྣམས་ཀྱིས་བཟོད་པར་མི་ནུས་པའི་ཕྱིར་ཏེ། སེམས་ཤིན་ཏུ་འཇམ་པ་ཡིན་པས་སྐད་ཅིག་ཉིད་ལ་དུས་བྱེད་པར་འགྱུར་བའི་ཕྱིར་རོ། །ལྷ་དེ་དག་གིས་དཔེ་མེད་པའི་སྡུག་བསྔལ་འདི་རྣམས་མངོན་པར་མཐོང་བར་བྱེད་པ་ཡིན་ནོ། །རྒྱུ་འདི་དག་གིས་སྤྲུལ་པ་བྱས་པས་འཐབ་བྲལ་གྱི་བདག་པོ་དེ་ལེགས་པར་སྟོན་པར་བྱེད་དོ། །དེ་ལྟར་ལྷ་དེ་དག་རྣམས་དམྱལ་བར་རབ་ཏུ་ལྷུང་བར་གྱུར་པ་ལྷ་གཞན་རང་བཞིན་པ་དེ་དག་རྣམས་ཀྱིས་རྣམ་པར་ལྟ་བར་བྱེད་དོ། །གཞན་ཡང་མུ་སུ་ལུན་དྷ་དེས་ངོ་མཚར་རྨད་དུ་བྱུང་བའི་སྤྲུལ་པ་འདི་དག་རྣམས་བྱས་པས་སྲིད་པ་བར་མ་དོ་པ་རྣམས་སྟོན་པར་བྱེད་པ་ནི་ཇི་ལྟར་བག་མེད་པ་གང་ཁོ་ནའི་སྐྱོན་གྱིས། ཉེ་བར་བཅོམ་པའི་འཐབ་བྲལ་བ་རྣམས་ལས་ཟད་ནས་འཆི་འཕོ་བ་ནི་ཡི་དགས་རྣམས་སུ་སྐྱེའོ། །དེ་དག་གི་སྲིད་པ་བར་མ་དེ་དག་རྣམས་ནི་ལས་བྱས་པ་དེ་དག་དང་འདྲ་བའི་

70-297b

གཟུགས་བརྙན་དུ་འགྱུར་ཏེ། ལས་ཀྱིས་ཐག་པ་རིང་པོ་རྣམས་ཀྱིས་དྲངས་པར་གྱུར་པས་མགོ་ཐུར་དུ་དཔྱངས་ནས་ལྟུང་བར་འགྱུར་བས་གང་ལ་དེས་བྱས་པའི་ལས་ཀྱིས་འཚེད་པར་བྱེད་པ་དེ་ལ་དེ་དག་ཀུན་ནས་འཁྲིད་དོ། །རང་བཞིན་གྱི་ལྷ་དེ་དག་རྣམས་ཀྱིས་དེ་ལྟར་སྲིད་པ་བར་མ་དོ་པ་གཉིས་པ་རྣམས་མཐོང་ངོ་། །གཞན་ཡང་སྤྲུལ་པ་པའི་སྲིད་པ་བར་མ་དོ་པ་གསུམ་པ་རྣམས་མཐོང་བ་ནི་ཇི་ལྟ་བ་ཁོ་ནར་འཐབ་བྲལ་བ་རྣམས་གཞན་ཡང་ལས་ཟད་པ་ཉིད་བག་མེད་པས་ཉེ་བར་བཅོམ་ནས་མགོ་ཐུར་དུ་བལྟས་ཤིང་རབ་ཏུ་ལྷུང་བར་གྱུར་པ་དང་། ཤིན་ཏུ་ཉམ་ཉེས་པ་དང་ཀུན་ནས་བཅིངས་པས་ཀྱང་དུད་འགྲོ་རྣམས་སུ་སྐྱེའོ། །དེ་དག་གི་སྲིད་པ་བར་མ་དོ་པ་རྣམས་ནི་དེ་དག་གི་འགྲོ་བའི་རྒྱའི་རྗེས་དང་ཆ་འདྲ་བ་ཉིད་དུ་སྐྱེ་བར་གྱུར་པ་ཡིན་ཏེ། དུད་འགྲོ་རྣམས་ཀྱི་རྣམ་པ་མཐའ་ཡས་པ་དང་རྣམ་པ་དུ་མར་གྱུར་པ་དེ་དག་རྣམས་དང་འདྲ་བའི་སྲིད་པ་བར་མ་དོ་པ་རྣམས་སུ་འགྱུར་རོ། །རྒྱའི་རྗེས་དང་ཆ་འདྲ་བར་གྱུར་པ་དེ་ཡང་འགྲོ་བ་གསུམ་པ་རྣམས་ཀྱིས་ཀུན་ནས་བསྡུས་པའི་སྲིད་པ་བར་མ་དོ་པ་ཤིན་ཏུ་སྐྲག་པར་བྱེད་པ་དེ་དག་རྣམས་མངོན་པར་མཐོང་ནས། སླར་ཡང་ལྷ་དེ་དག་རྣམས་ཆེས་ཕལ་ཆེ་བར་སྐྱོ་བར་གྱུར་ཅིང་མཆོག་ཏུ་ཀུན་ནས་སྐྲག་པར་གྱུར་པས་ཉེ་འཁོར་ཀུན་ན་འཇིགས་པ་དེས་ཁོང་དངངས་པར་གྱུར་པའི་བཞིན་གྱིས་ཕན་ཚུན་རྣམས་སུ་མངོན་པར་མཐོང་ནས་ཚིགས་སུ་བཅད་པ་བརྗོད་པ། ཇི་ལྟར། རྣམ་པར་ཤེས་དཀའ་ཤིན་ཏུ་ཕྲ། །ཐམས་ཅད་དུ་ནི་རྒྱུག་པ་པོ། །སེམས་ཅན་ལས་ཀྱི་དབང་འགྲོ་བ། །ཐམས་ཅད་དུ་ནི་ཡོངས་སུ་རྒྱུག །གང་དག་འཕགས་པ་ལ་སྐུར་འདེབས། །གང་ཡང་ལས་འབྲས་ལ་སྡང་བ། །དེ་དག་ཤི་ནས་དམྱལ་བར་འགྲོ། །གང་ཡང་ལོག་པར་འདུལ་བ་པོ། །གང་ཞིག་ནང་དུ་སྡིག་སྦས་ནས། །གང་ཡང་ཆོས་གཞན་གྱིས་སླུ་བ། །ཤིན་ཏུ་སྡིག་ཅན་འཇིག་རྟེན་དེ། །དམྱལ་བའི་རྩེ་མོའི་སྐལ་ལྡན་ཡིན། །བདེ་བ་ཀུན་ཆགས་གཞན་གང་དང་། །སྐྱེ་བོ་རྟག་ཏུ་སྡིག་དགའ་བ། །རང་གི་སེམས་ཀྱིས་བསླུས་

70-298a

ནས་ནི། །དེ་ནི་བདེ་ནས་སྡུག་བསྔལ་འགྲོ། །གང་ཞིག་མཐར་ཐུག་བདེར་མཐོང་བ། །བདེ་དེ་མཚོན་ཆར་བརྗོད་པ་ཡིན། །གང་ཡང་སྡུག་བསྔལ་རྣམ་སྨིན་འགྱུར། །བདེ་དེ་སྡུག་བསྔལ་ཁོ་ན་ཉིད། །བག་མེད་པ་ཡི་ལྷ་རྣམས་ནི། །འཐབ་བྲལ་སྲིད་པ་ནས་འཆི་འཕོ། །དེ་ཕྱིར་ཆོས་སྲོག་གང་གི་ཕྱིར། །མཁས་པས་རབ་ཏུ་བསྔགས་པར་བྱེད། །ཁང་བུ་སྐྱེད་མོས་ཚལ་དགའ་ཞིང་། །ཆེད་ཆེར་བུད་མེད་རྣམས་ལ་ལྟ། །འདོད་པའི་ཡུལ་གྱིས་ངོམས་མེད་པར། །ལྷ་ནི་ས་ལ་ལྟུང་བ་ཡིན། །ཇི་ལྟར་བདེ་བ་འཕེལ་བ་ནི། །སྐོམ་པ་འཕེལ་བ་དེ་བཞིན་ནོ། །སྐོམ་པ་ལས་ནི་མཆོག་ཏུ་ནི། །མཁས་པ་ལས་ནི་རབ་ཏུ་བརྗོད། །འཇིག་རྟེན་སྐྱེ་དང་འཆི་མཐོང་ནས། །མཆོག་ཏུ་སྐྱོ་བ་མི་སྐྱེ་བ། །དེ་ལ་བདེ་ལེགས་སྐྱབས་གང་ཡོད། །གང་ཡང་སྐྱོབ་པར་མི་འགྱུར་རོ། །དེ་ལྟར་རང་བཞིན་གྱི་ལྷ་དེ་དག་རྣམས་ཀྱིས་རྣམ་པ་དུ་མའི་སྲིད་པ་བར་མ་དོ་པ་དེ་དག་རྣམས་མངོན་པར་མཐོང་བར་གྱུར་པ་དང་རབ་ཏུ་སྐྱོ་བའི་ཡིད་ཀུན་དུ་སྐྱེས་སོ། །དེ་དག་རྣམས་ཀྱི་སེམས་དེ་དག་མངོན་པར་མཐོང་ནས་འཐབ་བྲལ་གྱི་མངའ་བདག་མུ་སུ་ལུན་དྷ་དེས་སྤྲུལ་པའི་ལྷ་དེ་དག་རྣམས་ཐམས་ཅད་ཀྱིས་སྣང་བར་བྱས་ནས། ལེགས་པར་ཕྲད་པར་བྱེད་དོ། །ཞི་བ་རྒྱས་པའི་ཆ་བྱད་དེ་མངོན་པར་མཐོང་ནས་ལྷ་དེ་དག་རྣམས་དབུགས་ཕྱིན་ཅིང་ཡིད་ཕེབས་པར་གྱུར་ནས། འཐབ་བྲལ་བ་རྣམས་ཀྱི་མངའ་བདག་མགོན་པོ་དེ་གང་ན་ཡོད་པ་དེར་ཡོངས་སུ་བསྐོར་ནས་ཀུན་དུ་གནས་ཏེ། གུས་པ་ལེགས་པར་སྐྱེས་པས་ཁྱབ་པར་ཚིམ་པའི་ཡིད་ཀྱིས་ཐམས་ཅད་ཉིད་དེ་ན་གནས་སོ། །སྐྱོ་བའི་ཡིད་ཀྱིས་བདག་ཉིད་མགོན་དང་བཅས་པ་དེ་བཞིན་དུ་དེ་དག་རྣམས་ཀྱིས་རྟོགས་སོ། །དེ་ལ་རྣམ་པ་དུ་མ་དང་རྣམ་པར་རྟོག་པ་དུ་མར་མཐོང་ན་ངོ་མཚར་བར་གྱུར་པ་རྣམས་རང་གིས་མཐོང་བས་ཚིམ་པ་མེད་པའི་ཡིད་ཀྱིས་ཀུན་དགའ་བ་མཐོང་བ་ལྟ་བུར་གྱུར་པ་དེ་ཡོངས་སུ་བསྐོར་ནས་རང་བཞིན་གྱི་ལྷ་དེ་དག་རྣམས་གནས་སོ། །དེ་ནས་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ལ་འདི་སྐད་ཅེས་བརྗོད་དེ། ཁྱེད་ཅག་རྣམས་ནགས་དང་ཉེ་བའི་ནགས་དང་པད་མའི་རྫིང་བུ་དང་རིན་པོ་ཆེའི་ཁམས་རྣམས་དང་ལྡན་པས་རྣམ་པར་བརྒྱན་པའི་རིའི་རྩེ་མོ་རྣམས་ཉིད་ལ་ཡང་གར་གྱིས་ཤིག་ཅེས་

70-298b

ཉམས་སུ་བླང་བར་བྱ་བའི་དོན་དུ་རྗོད་པར་བྱེད་ཀྱང་། ཅི་ཡང་ལྷ་དེ་དག་རྣམས་སྐྱོ་བར་གྱུར་པའི་ཡིད་ལེགས་པར་སྐྱེས་པའི་ཕྱིར་དང་བག་མེད་པ་རྣམས་བསྙུངས་པར་བྱ་བའི་ཡིད་ཅན་རྣམས་བྱེད་པ་ཡིན་ནམ། དེ་ནས་རང་བཞིན་གྱི་ལྷ་དེ་དག་རྣམས་ཀྱི་འཐབ་བྲལ་གྱི་བདག་པོའི་དྲུང་ནས་ཚིག་དེ་དག་ཐོས་ནས་རང་བཞིན་གྱི་ལྷ་དེ་དག་སེམས་རབ་ཏུ་སྐྱོ་བར་གྱུར་པས་འདི་སྐད་ཅེས་བརྗོད་དེ། ལྷ་ལགས་ནགས་དང་ཉེ་བའི་ནགས་དང་རིན་པོ་ཆེའི་ཁམས་དང་ལྡན་པས་བརྒྱན་པ་རྣམས་ལ་བདག་ཅག་ཇི་ལྟར་ཅིའི་ཕྱིར་དགའ་བར་འགྱུར། ལྷ་རྣམས་མཚོར་བྱིང་བ་བཞིན་དུ་བདག་གིས་འཁོར་བའི་བྲེལ་ཏོག་རྣམས་རྣམ་པར་རྟོག་པ་དུ་མས་ཀྱང་བསྲན་པར་མི་ཚུགས་པ་རྣམས་རང་གི་མིག་སྔར་མཐོང་སྟེ། འདོད་པ་རྣམས་ཐམས་ཅད་ནི་མི་རྟག་པ། སྡུག་བསྔལ་གྱི་མཐར་གཏུགས་པར་བྱེད་པ་བདག་ཅག་རྣམས་རྟག་པ་མ་ཡིན་བརྟན་པ་མ་ཡིན་ཐེར་ཟུག་མ་ཡིན་ཏེ། དེ་དག་རྣམས་ལ་སྙིང་པོ་ཅུང་ཟད་ཀྱང་མེད་དོ། །དེ་ནས་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཀྱི་དྲུང་ནས་ཚིག་གི་ཆ་འདི་དག་རྣམས་ཐོས་ནས་འདི་སྐད་ཅེས་བརྗོད་དོ། །བཅོམ་ལྡན་འདས་ཀྱིས་ཇི་ལྟ་བར་འདི་དག་རྣམས་ཐམས་ཅད་སྡུག་བསྔལ་གྱི་མཐར་ཐུག་པ་ཡིན་པར་གསུངས་སོ། །དེ་ནས་ལྷ་དེ་དག་ཐམས་ཅད་ཀྱིས་ཀྱང་འདི་སྐད་ཅེས་བརྗོད་དེ། བདག་ཅག་རྣམས་ཐམས་ཅད་ནི་ཇི་ལྟ་བ་བཞིན་དུ་དེ་ལ་ཡིད་སོང་བ་ལགས་ན། ཇི་ལྟར་ཤིན་ཏུ་སྡུག་བསྔལ་བ་རྣམས་ལྷའི་ཞལ་སྔ་ནས་ཤེས་པར་འཚལ་ལོ། །དེ་ནས་དེ་དག་གི་དྲུང་ནས་འཐབ་བྲལ་བ་རྣམས་ཀྱི་མངའ་བདག་དེས་ཚིག་དེ་དག་རྣམས་ཐོས་ནས་འདི་སྐད་ཅེས་བརྗོད་དེ། ཇི་ལྟར་འཁོར་བའི་སྡུག་བསྔལ་མ་ལུས་པ་དེ་དག་རྣམས་ངས་བརྗོད་པར་ནུས་མོད་ཀྱིས་ཀྱང་རེ་ཞིག་ངས་ཁྱེད་རྣམས་ལ་ཕྱོགས་གཅིག་ཙམ་མངོན་པར་བརྗོད་པར་བྱ་སྟེ། འཁོར་བ་རྣམས་སུ་ཇི་ལྟ་བར་བག་མེད་པའི་དབང་གིས་འགྲོ་བར་མ་གྱུར་ན་ནི། བསྐལ་པ་བྱེ་བ་སྟོང་ཕྲག་དུ་མ་རྣམས་ན། ཀྱེ་མ་དཀའ་བླས་ཀྱིས་བདེ་འགྲོའི་འགྲོ་བར་འབྱུང་བར་འགྱུར་བ་ཡིན་ཏེ། འགྲོ་བ་གཉིས་པོ་ལྷ་དང་མི་དང་རྙེད་པ་ནི་ཤིན་ཏུ་དཀའ་བ་ཡིན་ཞིང་། གང་དག་བག་མེད་པའི་དབང་དུ་འགྲོ་བར་མི་འགྱུར་བ་དེ་དག་རྣམས་ནི་མཁས་པ་ཡིན་ནོ། །རྐྱེན་གྱི་དབང་གིས་བྱུང་བ་རྣམས་ཀྱང་ཡོངས་སུ་སྤོང་

70-299a

བར་བྱེད་དོ། །དེ་དག་གི་དབང་དུ་འགྲོ་བར་མི་འགྱུར་རོ། །དམྱལ་བ་དང་ཡི་དགས་དང་བྱོལ་སོང་རྣམས་སུ་དེ་དག་སྐྱེའོ། །དེ་ལ་ཀྱེ་ཧོ་ལྷ་རྣམས་འགྲོ་བ་གསུམ་པོ་རྣམས་ངན་སོང་ཞེས་མངོན་པར་བརྗོད་དོ། །ལྷ་དང་མིའི་འགྲོ་བ་གཉིས་པོ་ནི་བདེ་འགྲོ་ཞེས་མངོན་པར་བརྗོད་དོ། །དེ་དག་རྣམས་ཉིད་རེ་ཞིག་ཇི་ལྟར་རབ་ཏུ་སྟོབས་ཆེ་བར་གྱུར་པའི་སྡུག་བསྔལ་དག་མངོན་པར་བརྗོད་པར་མི་ནུས་སོ། །རྒྱས་པར་ནི་སྟོན་པས་མངོན་པར་བརྗོད་པར་སྤྱོད་དོ། །མདོར་བསྡུ་བར་གྱུར་ན་ལྷ་དང་མི་རྣམས་ཀྱི་སྡུག་བསྔལ་རྣམས་ནི་རྣམ་པ་བཅུ་དྲུག་གོ། །ཡང་ལྷ་དང་མི་རྣམས་ཀྱི་དེ་ཡང་གང་དག་ཡིན་ན། བདེ་འགྲོའི་འགྲོ་བས་བསྡུས་པའི་སྡུག་བསྔལ་དུ་གྱུར་པ་རྣམས་ལ། འདི་ལྟ་སྟེ་སྲིད་པ་བར་མ་དོའི་སྡུག་བསྔལ་དང་མངལ་ན་གནས་པའི་ཡ་ང་བའི་སྡུག་བསྔལ་དང་མངལ་ནས་ཀུན་དུ་འབྱུང་བའི་སྡུག་བསྔལ་དང་ཟས་ཀྱི་སྡུག་བསྔལ་དང་འདོད་པའི་སྡུག་བསྔལ་དང་མི་འཐུན་པ་རྣམས་དང་ཀུན་དུ་ཕྲད་པའི་སྡུག་བསྔལ་དང་སྡུག་པ་རྣམས་དང་བྲལ་བའི་སྡུག་བསྔལ་དང་གྲང་བ་དང་ཚ་བ་ལ་སོགས་པས་བཅིངས་པའི་སྡུག་བསྔལ་དང་ནད་ཀྱི་སྡུག་བསྔལ་དང་གཞན་གྱི་དབང་དུ་གྱུར་པའི་སྡུག་བསྔལ་དང་ཚོལ་ཁྲོའི་སྡུག་བསྔལ་དང་སྡིག་པའི་གྲོགས་པོ་དང་འདྲེ་བར་བྱེད་པའི་སྡུག་བསྔལ་དང་བུ་དང་བུ་མོ་དང་གཉེན་འདུན་རྣམས་ཀྱི་བྲེལ་དོག་གི་སྡུག་བསྔལ་དང་བཀྲེས་པ་དང་སྐོམ་པའི་སྡུག་བསྔལ་དང་དབང་ཆུང་བའི་སྡུག་བསྔལ་དང་རྒ་བའི་སྡུག་བསྔལ་དང་ལྷག་པར་གྱུར་པའི་སྡུག་བསྔལ་ཤིན་ཏུ་སྡུག་བསྔལ་བས་ཤིན་ཏུ་སྡུག་བསྔལ་བ་ནི་འཆི་བའི་སྡུག་བསྔལ་ལོ། །ཇི་ལྟར་རབ་ཏུ་སྟོབས་ཆེ་བའི་སྡུག་བསྔལ་ཆེན་པོ་བཅུ་དྲུག་པོ་དེ་དག་རྣམས་ནི་མིའི་འཇིག་རྟེན་པ་རྣམས་ཀྱི་ཡིན་ཏེ་འཆི་བའི་མཐར་ཐུག་པ་རྣམས་མིའི་འཇིག་རྟེན་དུ་སྐྱེས་པ་རྣམས་ཀྱི་ཡིན་ནོ། །གང་སེམས་ཅན་གཞན་དག་རྣམས་ལ་ནི་རྣམ་པ་སྣ་ཚོགས་པའི་སྡུག་བསྔལ་གཞན་དག་རྣམས་འབྱུང་བར་འགྱུར་བ་ཡིན་ཏེ། ཤིན་ཏུ་ཡང་བསྲན་པར་མི་བཟོད་པ་རྣམས་ཡིན་ནོ། །གང་ཡང་མཐར་

70-299b

ཐུག་པ་ཁོ་ནར་ཟད་པར་མི་འགྱུར་བའི་ཆོས་ཅན་དང་རབ་ཏུ་འཇིག་པར་མི་འགྱུར་བའི་ཆོས་ཅན་གྱི་བདེ་བ་ནི་འདི་དང་སྲིད་པ་གཞན་རྣམས་ན་ཡང་མེད་དོ། །དེ་ལ་རེ་ཞིག་དང་པོ་ཁོ་ནར་སྲིད་པ་བར་མ་དོར་སྐྱེས་པའི་དྲི་ཟ་སྲིད་པ་བར་མ་དོ་པའི་ཐ་སྙད་ཅན་རྣམས་ཀྱི་རྣམ་པ་ཇི་ལྟ་བུའི་སྡུག་བསྔལ་ཡིན་ན་འདི་ལྟ་སྟེ། ལས་ཀྱི་རླུང་གིས་བཏབ་པར་གྱུར་པ་རྣམས་ཤའི་མིག་གིས་མངོན་སུམ་དུ་བལྟ་བར་བྱར་མེད་པར་ལྷའི་མིག་གིས་མཐོང་བར་གྱུར་པ་དང་། ཐོགས་པ་མེད་པར་གྱུར་པའི་རང་བཞིན་ཅན་དེ་ཡང་གང་གི་ཚེ་མིར་སྐྱེ་བར་འགྱུར་བ་ཡིན་པ་དེའི་ཚེ། ཇི་ལྟ་བུའི་རྣམ་པར་འདི་སྐྱེ་བར་འགྱུར་བ་རྣམས་དང་རྣམ་པ་ཇི་ལྟ་བུའི་ཁྱིམ་དུ་འདི་སྐྱེ་བར་འགྱུར་བ་རྣམས་ཀྱང་སྟེ། དམན་པ་དང་བར་མ་དང་ཁྱད་པར་དུ་འཕགས་པའི་ཁྱིམ་རྣམས་སུ་སྦྱིན་པ་དང་ཚུལ་ཁྲིམས་དང་ཤེས་རབ་ཀྱི་འབྲས་བུ་ཅན་རྣམས་ལ་སྐྱེ་བར་འགྱུར་བ་ན། དྲི་ཟ་དེ་ཡང་རྣམ་པ་དེ་ལྟ་བུར་འགྱུར་བ་ཡིན་ནོ། །སྲིད་པ་བར་མ་དོ་པ་འདིའི་ཟས་ཀྱི་རིགས་སུ་གྱུར་པ་རྣམས་ནི། གལ་ཏེ་དབུལ་པོའི་ཁྱིམ་རྣམས་སུ་སྐྱེ་བར་འགྱུར་ན་དེའི་ཟས་རྣམས་ཧྲུད་ཧྲུད་པོ་དང་། མདོག་ངན་པ་དང་དྲི་དང་རོ་དང་རེག་དང་ཚད་རྣམས་ཀྱང་དམན་པར་འགྱུར་ཏེ། སྦྱིན་པའི་མཐུ་ཆུང་བར་གྱུར་པའི་ཕྱིར་ན་སྐྱེ་བ་ན་ཡང་འཐོབ་པར་མི་འགྱུར་རོ། །དེ་ལ་འདི་ནི་མིར་སྐྱེ་བར་གྱུར་པ་རྣམས་ཀྱི་སྡུག་བསྔལ་གྱི་དང་པོ་ཡིན་ནོ། །དེ་ནས་སྐྱེས་པར་གྱུར་ནས་ལས་དང་ཉོན་མོངས་པའི་དབང་གིས་མངལ་ན་གནས་པར་གྱུར་ཏེ། དབུལ་པོའི་ཁྱིམ་དུ་སྐྱེ་བར་འགྱུར་ན་མའི་ཟས་ངན་པ་དང་། གྱོང་པོ་དང་སྐྱུར་མོའི་ཟས་རྣམས་དང་ཟས་ཆུངས་པར་གྱུར་ན་ཡང་ཤ་མ་ལ་རབ་ཏུ་བརྟེན་པས་ལྟེ་བའི་སྦུབས་ནས་རབ་ཏུ་སྤེལ་བར་བྱེད་པའི་སྲོག་ཆགས་མངལ་ན་གནས་པ་ཁ་དོག་ངན་པ་དང་ལུས་རིད་པར་འགྱུར་བ་ཡིན་ནོ། །མའི་ལུས་གཡོ་བར་གྱུར་པའི་སྐྱོན་གྱིས་ཤིན་ཏུ་སྡུག་བསྔལ་བར་གྱུར་པས་གསུས་པའི་གསེབ་ན་རྒྱུག་པར་བྱེད་དོ། །ཟས་སུ་གྱུར་པ་གྲང་བ་དང་དྲོ་བ་དག་གིས་བྱས་པས་ཀྱང་སྟེ། དེ་ལྟར་གཟིར་བར་བྱེད་པ་མནར་བའི་མཆོག་ཏུ་ཕྱིན་པ་ལ་ཡང་གོ་སྐབས་ཡེ་མེད་པ་སྐབས་

70-300a

མེད་པ་རྣམ་པར་ཁྲོ་བར་བྱེད་པ་ན་ཡང་སྤུངས་མེད་པ། གཅིན་དང་རྟུག་པའི་ཕུང་པོ་ཆེན་པོའི་ནང་དུ་བྱིང་བར་གྱུར་པ་རྣམས་ཀྱི་སྡུག་བསྔལ་ཆེན་པོ་རྣམ་པ་དུ་མ་རྣམས་ཡོད་དོ། །དེ་ལ་འདི་ནི་གཞན་གཉིས་པ་ཡིན་ཏེ། བདེ་འགྲོ་བ་རྣམས་ཀྱང་དེ་འདྲ་ན་དམྱལ་བ་དང་ཡི་དགས་དང་དུད་འགྲོ་རྣམས་ལྟ་སྨོས་ཀྱང་ཅི་དགོས། གཞན་ཡང་སྡུག་བསྔལ་གསུམ་པ་ཡོད་དེ། དེའི་རྗེས་ཐོགས་ལ་གལ་ཏེ་མངལ་ནས་འབྱུང་བར་འགྱུར་བ་ན་མའི་སྐྱེ་གནས་ཀྱི་བུག་པའི་ཟུར་མ་མིག་ནས་གཟིར་བར་གྱུར་པ་ནི། ཇི་ལྟར་བུ་རམ་གྱི་ཤིང་འཁྲུལ་མིག་གི་བུ་གུ་ནས་འབྱུང་བ་ན་བཙིར་བར་གྱུར་པས་འབྱུང་བར་འགྱུར་བ་དེ་བཞིན་དུ་མངལ་གྱི་དེ་ཡང་མའི་སྐྱེ་གནས་ཀྱི་བུ་ག་ནས་ཀུན་དུ་འབྱུང་བ་ཡིན་ནོ། །དེ་ལ་འདི་ནི་མངལ་ནས་སྐྱེ་བ་སྟེ་སྡུག་བསྔལ་གཞན་ཡིན་ནོ། །དེ་དག་གི་རྗེས་ཐོགས་ལ་སྡུག་བསྔལ་བཞི་པ་ཡོད་དེ། མར་སར་པ་དང་ཆུ་ཤིང་གི་ལོ་མ་ལྟར་ཤིན་ཏུ་འཇམ་པར་གྱུར་པའི་ལུས་རབ་ཏུ་སྨིན་པ་གཞོན་ཤ་ཅན་གྱི་དཔེར་གྱུར་པའི་ལུས་དང་ལྡན་པ་རྣམས་གང་གི་ཚེ་བཙས་པ་ན་མ་མས་རྩུབ་པ་དང་རོད་རོད་པོ་དང་རྡོལ་བ་དང་མདོག་ངན་པ་དང་ལས་སུ་མི་རུང་བ་དང་རིད་པ་དང་། བར་མིག་ཅན་མཐུག་པ་དང་རྩེ་མོ་དང་སྒྲ་མི་སྙན་པ་དག་གི་ལག་པ་གཉིས་ཀྱིས་ལེན་པར་བྱེད་པ་དེའི་ཚེ་ཇི་ལྟར་མེས་སྲེག་པར་བྱེད་པའམ། རལ་གྲིས་གཏུབ་པར་བྱེད་པ་དེ་བཞིན་དུ་ཤིན་ཏུ་འཇམ་པའི་ཕྱིར་ན་འདི་ལ་ཡང་ཟུག་གཟེར་སྐྱེད་དོ། །དེའི་ལུས་ཤིན་ཏུ་འཇམ་པོར་གྱུར་པ་འདི་གལ་ཏེ་དང་པོར་གོས་འཇམ་པོ་རྣམས་བསྐོན་པར་གྱུར་ཀྱང་དེ་དག་རྣམས་ནི་ཇི་ལྟར་བསླངས་པ་དང་མཐུག་པ་དང་རྩུབ་པ་དང་རྡོལ་བ་དང་རབ་ཏུ་རྙིངས་པ་དང་བཙེམས་པ་དང་བསྐུམས་པ་རྣམས་ཀྱི་ནང་དུ་ལུས་བཅུག་པ་བཞིན་དུ་འགྱུར་རོ། །གྲང་བའི་དུས་སུ་འདི་ཡང་ཤིན་ཏུ་གྲང་བར་འགྱུར་ཏེ། བཙས་པ་ན་ཁྱིམ་གང་ཡིན་པར་ནི་གྲང་བས་ཤིན་ཏུ་ཡང་ཉེན་པར་འགྱུར་རོ། །དེ་བཞིན་དུ་ཚད་པའི་དུས་སུ་ཚད་པ་ཤིན་ཏུ་སྟོབས་ཆེ་བར་འགྱུར་ཏེ། གང་གིས་ཤིན་ཏུ་སྲེག་པར་བྱེད་པ་སྦྱིན་པ་དམན་པ་ཉིད་ཀྱི་ཕྱིར་ན་མནར་བར་འགྱུར་རོ། །ནང་དུ་ཡང་

70-300b

བསྲེགས་པས་སྡུག་བསྔལ་གྱིས་མའི་སྐྱེ་གནས་ནས་འབྱུང་བར་འགྱུར་རོ། །འདིའི་སྦྱིན་པ་དམན་པ་ཡིན་པའི་ཕྱིར་ན་དེའི་རྗེས་ཐོགས་ལ་ཟས་ཀྱིས་སྡུག་བསྔལ་བར་འགྱུར་ཏེ། ནུ་མ་དག་གི་དང་ཟས་ཟ་བར་བྱེད་པ་ན་ཡང་སྡུག་བསྔལ་བར་འགྱུར་རོ། །རེ་ཞིག་ནུ་མ་དག་ནི་མ་ཟས་ཉུང་བར་གྱུར་པས་དེའི་ནུ་ཞོ་རྣམས་ཀྱང་ཉུང་བར་འགྱུར་ཏེ། གང་གིས་ཤིན་ཏུ་རིད་པ་དང་མདོག་ཉམས་པ་དང་མདོག་ངན་པ་དང་རྗུད་པར་གྱུར་པ་དང་རྒྱུས་པ་དང་རུས་པ་དང་པགས་པ་རྣམས་ཀྱི་ལྷག་མ་ཙམ་དུ་གྱུར་པའི་ལུས་བཀྲེས་པར་གྱུར་པ་ནད་རྣམས་འདྲེན་པར་བྱེད་པའི་ལུས་སུ་འགྱུར་རོ། །རྟག་ཏུ་རྟེན་དུ་མི་བཟོད་པའི་ལུས་སུ་འགྱུར་རོ། །དེ་ནས་དུས་གཞན་ན་ཟས་དང་སྐོམ་བག་ཙམ་ཡོད་པར་གྱུར་ན་ཡང་། དེ་དེ་ཁོ་ན་བཞིན་དུ་ཡོངས་སུ་འཛིན་པར་བྱེད་པའི་རྣམ་པར་རྟོག་པས་ཡོངས་སུ་བཅོམ་པའི་ཕྱིར་དྲི་དང་རོ་དང་རེག་བྱ་རྣམས་ཆུང་ཞིང་དམན་པ་དང་གཞན་རྣམས་ཀྱི་ཟས་ཀྱིས་ཏེ། གལ་ཏེ་ཤེད་ན་སྲོག་ཀུན་ནས་གཏོང་བའམ་ཤིན་ཏུ་རིད་པས་འཛིན་པར་འགྱུར་རོ། །དེ་ལྟར་ཡིན་པས་ཡང་གལ་ཏེ་ན་ནུ་མ་ཟས་སུ་ཟ་བར་འགྱུར་ཏེ། ཇི་ལྟ་བར་མཛེས་པ་ནི་ལུས་ལྟད་མོར་ཆེ་བས་སྲོག་འཛིན་པར་བྱེད་པ་ཡིན་ནོ། །དེ་ལྟར་འདིའི་སྦྱིན་པ་ངན་པ་ཡིན་པའི་ཕྱིར་ན་འདིའི་མ་ལུས་པ་ཀུན་ཡང་རབ་ཏུ་ཟད་པར་འགྱུར་བ་ཡིན་ནོ། །དེས་ན་ཡང་ཟས་བསོད་པར་འགྱུར་བ་རྣམས་ཀྱིས་འདིའི་གསུས་པ་ལེགས་པར་ཚིམ་པར་གྱུར་པ་ཡིན་ན་ཡང་། དེ་ལྟར་ན་ཡང་ཟས་ཀྱིས་བྱས་པའི་སྡུག་བསྔལ་ཆེན་པོར་འབྱུང་བར་འགྱུར་རོ། །དེའི་རྗེས་ཐོགས་ལ་འདིའི་སྡུག་བསྔལ་ལྔ་པ་ཡོད་པ་རྣམས་ནི་འདི་ལྟ་སྟེ། འདོད་པས་བྱས་པ་རྣམས་སོ། །དེ་དེ་ལྟར་ཟས་ཀྱིས་བྱས་པའི་སྡུག་བསྔལ་རྣམས་ཀྱིས་གཟིར་བར་གྱུར་པ་ན་འདི་ལ་རྣམ་པ་སྣ་ཚོགས་པ་རྣམས་སུ་རྒྱུ་བར་བྱ་བའི་འདོད་པ་འབྱུང་བར་འགྱུར་ཏེ། ལྟོ་བཀྲེས་པས་ཉེ་བར་བཅོམ་པ་ཡིན་པའི་ཕྱིར་རོ། །དེ་དེས་གཟིར་བར་གྱུར་པའི་ཕྱིར་གལ་ཏེ་ན་རྐུ་བར་བྱེད་དོ། །གལ་ཏེ་ན་ཕན་པ་མ་ཡིན་པའི་ལས་གཞན་ཅུང་ཟད་ཙམ་ཡང་བྱེད་པར་འགྱུར་ཏེ། ལྷན་ཅིག་ཏུ་

70-301a

གནས་པ་དེ་གསོད་པར་བྱེད་པས་འཆི་བའམ་འཆི་བ་ལ་ཐུག་པའི་སྡུག་བསྔལ་ལྷག་པར་འབྱུང་བར་འགྱུར་རོ། །སྡུག་བསྔལ་འདི་དག་རྣམས་ཐམས་ཅད་ཀྱི་ཡང་རྩེ་མོར་ཕྱིན་པར་སྡུག་བསྔལ་ནི་འདི་ལྟ་སྟེ། བཀྲེས་པ་དང་སྐོམ་པས་བྱས་པའི་སྡུག་བསྔལ་ལོ། །དེ་ལ་དུས་དེའི་ཚེ་ན་མུ་སུ་ལུན་དྷ་དེས་འཐབ་བྲལ་བ་དེ་དག་རྣམས་ལ་ཚིགས་སུ་བཅད་པ་བརྗོད་པ། ཇི་ལྟར། ཕལ་ཆེར་འཁོར་བའི་སྡུག་བསྔལ་ལ། །བཀྲེས་པའི་སྡུག་དང་མཚུངས་མེད་པ། །གང་གིས་སེམས་ཅན་འདི་དག་གཟིར། །མི་དགེའི་བདག་ཉིད་བྱས་པ་ལས། །རང་གི་ལུས་ལས་ལངས་པའི་མེ། །བཀྲེས་པ་ཞེས་ནི་མངོན་པར་བརྗོད། །རྣམ་རྟོག་མེས་ནི་ལྗོན་ཤིང་བཞིན། །འཇིག་རྟེན་གསུམ་གྱི་ལྷག་མ་སྲེག །འཇིག་རྟེན་གཞན་དུ་མེ་འདི་ནི། །འགྲོ་ཞིང་རྗེས་སུ་འགྲོ་བར་འགྱུར། །བསྐལ་པ་བརྒྱ་ཡི་བར་དུ་ཡང་། །འཆི་བར་གྱུར་པ་མཐོང་བ་མེད། །གང་ཡང་བྱིས་རྣམས་མི་དགེ་བྱེད། །གང་ཡང་འགྲོ་བ་ངན་སོང་དུ། །དེ་ནི་ཟས་རྣམས་དག་གི་ནི། །གཞི་ལས་ཡིན་པར་མཁས་རྣམས་བརྗོད། །ལྟོགས་པའི་འབྲས་བུ་ཇི་བཞིན་དུ། །མི་ནི་རང་དོན་ལ་བརྩོན་མིན། །ཁམས་གསུམ་མ་ལུས་འདི་དག་རྣམས། །ཟས་ཀྱི་དབང་གིས་འཇུག་པ་ཡིན། །དེ་དག་གང་ཕྱིར་རྣམ་སྣ་ཚོགས། །འཇིག་རྟེན་འདི་དག་མི་ལས་བྱུང་། །སྲིད་གསུམ་ཆུ་བོ་དེ་ཐམས་ཅད། །ཟས་དོན་གཉེར་བ་བྱེད་ལས་ཡིན། །དེ་ལྟར་མུ་སུ་ལུན་དྷ་དེས་རང་བཞིན་གྱི་ལྷ་དེ་དག་རྣམས་ལ་རྗོད་པར་བྱེད་དོ། །གཞན་ཡང་ལྷ་དག་མིའི་འཇིག་རྟེན་དུ་མི་རྣམས་ཀྱི་སྡུག་བསྔལ་གང་དག་ཅེ་ན། འདི་ལྟ་སྟེ་མི་སྡུག་པ་དང་ཕྲད་པ་ཞེས་བྱ་བའོ། །དེ་ལ་དྲུག་པོ་འདི་དག་རྣམས་ནི་མི་སྡུག་པ་དང་ཀུན་དུ་ཕྲད་པ་ཡིན་ནོ། །དེ་ལ་དེ་དག་རྣམས་ཀྱང་གང་ཞེ་ན། འདི་ལྟ་སྟེ་མིག་གིས་གཟུགས་རྣམས་གང་དག་མཐོང་བ་ནས་མཛའ་བོ་མ་ཡིན་པ་ལ་སོགས་པ་དེ་དག་རྣམས་ནི་འདོད་པ་མ་ཡིན་པ་དང་སྡུག་པ་མ་ཡིན་པ་རྣམས་མཐོང་བ་ཡིན་ནོ། །གཟུགས་འདི་མཐོང་བར་གྱུར་པ་ལས་ཀྱང་ཡིད་ཀྱི་རྗེས་སུ་མི་འཐུན་ཞིང་དང་བ་མ་ཡིན་པར་འགྱུར་རོ། །

70-301b

སེམས་དང་སེམས་ལས་བྱུང་བ་རྣམས་རྙོག་པ་ཅན་དུ་བྱས་པ་ལས་ཀྱང་འཇིགས་པ་དང་བཅས་པར་འགྱུར་བ་དང་། ཉེ་བར་འཚེ་བ་དང་བཅས་པའི་སྡུག་བསྔལ་རྣམས་སེམས་དང་སེམས་ལས་བྱུང་བ་རྣམས་ལ་སྐྱེད་པར་བྱེད་དོ། །དེ་ལ་གཟུགས་ཀྱི་ཚོགས་དེ་དག་རྣམས་ཀུན་ལ་དང་པོར་འདི་འཇུག་པར་འགྱུར་བ་ནི། འདི་ལྟ་སྟེ་དགྲ་བོ་དང་ཕྲད་པའམ་སྡིག་པའི་གྲོགས་པོའི་སྐྱེས་བུ་དང་ཕྲད་པའོ། །དེ་བཞིན་དུ་རྣ་བས་ཀྱང་སྒྲ་རྣམས་ཐོས་པ་ན་མི་ཕན་པ་དང་མི་སྡུག་པ་དང་ཡིད་དུ་མི་འོང་ཞིང་རྗེས་སུ་མི་འཐུན་པ་རྣམས་འདི་ལ་སྐྱེད་པར་བྱེད་པ་དང་། ཡིད་ཀྱི་རྒྱུན་ཀྱང་རྙོག་པ་ཅན་དུ་བྱེད་པ་འདི་ནི་མི་སྡུག་པ་དང་ཕྲད་པའི་སྡུག་བསྔལ་གཞན་ཡིན་ནོ། །དེ་ལ་མི་འཐུན་པའི་སྒྲ་རྣམས་ཀྱི་ཕུལ་དུ་ཕྱིན་པ་ནི་འདི་ཡིན་ཏེ། འདི་ལྟར་དམ་པ་མ་ཡིན་པའི་ཆོས་སྒྲོགས་པ་ན་ཡང་དེ་ཉན་པར་བྱེད་པའོ། །འདི་ཐོས་ནས་ལུས་ཞིག་པ་ན་ཡང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གང་ཡང་གཞན་ཅུང་ཟད་སྒྲ་མི་སྙན་པ་དང་མི་སྡུག་པ་དང་མི་འཐུན་པ་དང་ཀུན་ནས་ཉོན་མོངས་པ་ཅན་རྣམས་གང་དག་ཐོས་ནས་འདི་དག་རྣམས་ཀྱི་ཡིད་མི་བདེ་བ་སྐྱེད་པར་བྱེད་པ་དང་། སེམས་ཀྱི་རྒྱུད་ཀྱང་རྙོག་པ་ཅན་དུ་བྱེད་པར་འགྱུར་བ་དང་། མི་འདོད་པ་མི་སྡུག་པ་ཡིད་དུ་མི་འོང་བ་འདི་ནི་མིའི་འཇིག་རྟེན་པའི་མི་རྣམས་ཀྱི་མི་སྡུག་པ་དང་ཕྲད་པ་ལས་སྐྱེས་པའི་སྡུག་བསྔལ་ཞེས་བརྗོད་དོ། །ལྷ་དག་གང་མི་རྣམས་ཀྱི་མིའི་འཇིག་རྟེན་དུ་མི་འཐུན་པ་དང་ཕྲད་པ་ལས་སྐྱེས་པའི་སྡུག་བསྔལ་གསུམ་པ་གཞན་གང་ཞེ་ན། འདི་ལྟ་སྟེ་སྣས་ཇི་སྲིད་དུ་དྲི་རྣམས་སྣོམ་པར་བྱེད་པ་ན་མི་འདོད་པ། མི་སྡུག་པ། ཡིད་དུ་མི་འོང་བ་རྣམས་དང་། གང་ཡང་འདིས་བསྣམས་པར་གྱུར་པས་སེམས་ཀྱི་རྒྱུད་རྙོག་པ་ཅན་དུ་སྐྱེད་པར་བྱེད་པ་དང་། ཡང་ཡིད་ཀྱི་རྗེས་སུ་མི་འཐུན་པར་གྱུར་པ་གང་གིས་འདི་ཀུན་ནས་ཉོན་མོངས་པ་ཅན་གྱི་སྡུག་བསྔལ་རྣམས་སྐྱེད་པར་བྱེད་པའོ། །ཀྱེ་ཧོ་ལྷ་དག་དེ་ལ་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་དང་ཕྲད་པ་རྣམས་ཀྱི་ཕུལ་དུ་ཕྱིན་པ་ཡིན་ཏེ། དགེ་ལེགས་སུ་གྱུར་པའི་སྐྱེས་བུ་གཞན་དག་གང་ཡང་རུང་བ་རྣམས་ཀྱིས་ཆོས་

70-302a

ལ་མཆོད་པར་བྱ་བའི་རྒྱུ་མཚན་དུའམ་དགེ་འདུན་ལ་ཡང་རུང་སྟེ། བདུག་སྤོས་ཕུལ་བར་གྱུར་པ་ལས་བློ་གྲོས་དམན་པར་གྱུར་པ་དང་ཡིད་མོང་རྟུལ་བར་གྱུར་པ་གང་དག་གིས་ཇི་ལྟར་འགྲོ་བར་གྱུར་པ་ནའམ་འདུག་པར་གྱུར་པ་ན་ཡང་རུང་སྟེ། འདུན་པའི་འདོད་ཆགས་སྔོན་དུ་འགྲོ་བས་དང་། མངོན་པར་གཙེ་བ་སྔོན་དུ་འགྲོ་བས་དང་། གུས་པ་མེད་པ་སྔོན་དུ་བཏང་བས་དང་། ཐུལ་འོག་ཏུ་འཇུག་པ་སྔོན་དུ་བཏང་བས་ཀྱང་རུང་སྟེ། ཀུན་ནས་ཆགས་པ་སྣ་ཕྱོགས་སུ་བཏང་བས་དེ་ཡང་སྣོམ་པར་བྱེད་དོ། །དེའི་རྒྱུ་ལས་ལུས་ཞིག་པར་གྱུར་ནས་ངན་སོང་ལོག་པར་ལྟུང་བར་དམྱལ་བར་སྐྱེའོ། །སྐྱེས་བུ་ངན་པ་རྣམས་སྣའི་རྒྱུ་དང་སྣ་དང་ཀུན་དུ་འབྲེལ་པ་ལས་མི་དགེ་བའི་བློ་དང་ལྡན་པ་རྣམས་ནི་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །ཀྱེ་ལྷ་དག་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་རྣམས་དང་ཕྲད་པ་ལས་ཀུན་དུ་སྐྱེས་པའི་སྡུག་བསྔལ་ཞེས་བརྗོད་དོ། །གཞན་ཡང་མི་སྡུག་པ་དང་ཕྲད་པ་ལས་སྐྱེས་པའི་ཤིན་ཏུ་སྡུག་བསྔལ་བ་རྣམས་ཡོད་དོ། །དེ་ཡང་གང་ཞེ་ན། འདི་ལྟ་སྟེ་མི་རྣམས་ཀྱི་མིའི་འཇིག་རྟེན་ན་བློ་གྲོས་ངན་པ་དང་ལྡན་པའི་སྐྱེས་བུ་ངན་པ་རྣམས་རོའི་དོན་དུ་ཉེས་པ་བྱེད་པའི་ལས་རྣམས་བྱེད་པ་རྣམས་ཡིན་ལ། གང་དག་གི་རྒྱུས་ལུས་ཞིག་པ་ན་ངན་སོང་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །གང་ཡང་དགེ་སྦྱོང་མ་ཡིན་པར་དགེ་སྦྱོང་གི་ཆ་བྱད་འཛིན་པ་ནང་རུལ་པར་གྱུར་པ་ཐོས་པ་དང་མི་ལྡན་པ་དུང་གི་སྒྲ་དང་མཚུངས་པར་སྤྱོད་པ་རྣམས། དགེ་འདུན་གྱི་ནང་དུ་ཞུགས་པར་གྱུར་པའམ་སྦྱིན་བདག་གི་ཁྱིམ་དུ་སོང་བར་གྱུར་པ་ན་ཡང་རུང་སྟེ། ལྕེ་དང་རབ་ཏུ་འབྲེལ་བ་དང་དེ་ལ་སོང་བའི་བློས་དགེ་སློང་གི་ཆ་བྱད་འཛིན་པས་རོ་དག་མྱོང་བར་བྱེད་པ་ནི། རྒྱུ་དེ་དང་རྐྱེན་དེ་དག་གིས་ལུས་ཞིག་པ་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །གང་ཡང་ལེ་ལོ་ཅན་གྱི་དགེ་སློང་གཞན་རྣམས་ནི་བསམ་གཏན་གྱིས་བསམ་གཏན་དུ་བྱེད་པའི་བྱ་བ་ཡོངས་སུ་བཏང་ནས། ཡིད་དེ་ལ་སོང་བ་དང་རང་གི་འདུན་

70-302b

པའི་འདོད་ཆགས་སྔོན་དུ་འགྲོ་བས་ཟས་ཀྱི་དོན་དུ་གནས་ན་གནས་རྣམས་སུ་ཉེ་བར་འགྲོ་བར་བྱེད་དོ། །རྒྱུ་དེ་ལས་ལེ་ལོ་ཅན་དེ་ལུས་ཞིག་པ་ན་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །ཀྱེ་ཡེའི་ལྷ་དག་དེ་ལ་འདི་ནི་མིའི་འཇིག་རྟེན་དུ་མི་རྣམས་ལ་ལྕེ་རོ་དང་ཀུན་དུ་འབྲེལ་པའི་མི་སྡུག་པ་དང་ཕྲད་པ་ལས་བྱུང་བའི་སྡུག་བསྔལ་ཡིན་ནོ། །གཞན་ཡང་ཀྱེ་ལྷ་དག་མི་རྣམས་ཕན་པ་འདོད་པས་བྱས་པའི་མིའི་འཇིག་རྟེན་དུ་མི་སྡུག་པ་དང་ཕྲད་པ་ལས་བྱུང་བའི་སྡུག་བསྔལ་གང་ཞེ་ན། དེ་འདི་ལྟ་སྟེ་ལུས་ཀྱིས་རེག་བྱ་ལ་རེག་པར་བྱེད་དེ། དེ་དང་རབ་ཏུ་འབྲེལ་བའི་བློར་གྱུར་པ་དགེ་བ་རྣམས་སེམས་པར་མི་བྱེད་དོ། །ཆོས་ཀྱིས་ལམ་དུ་ངེས་པར་འཇུག་པར་མི་བྱེད་དོ། །བློ་མཉམ་པར་བཞག་པར་མི་འགྱུར་རོ། །འདི་ནི་སྐྱེས་བུ་ངན་པ་ཡུལ་ངན་པ་དང་རབ་ཏུ་འབྲེལ་བའི་བློ་དང་ལྡན་པ་ཞེས་བརྗོད་དེ། ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །ཀྱེ་ལྷ་དག་འདི་ནི་མི་རྣམས་ལ་མིའི་འཇིག་རྟེན་དུ་མི་སྡུག་པ་དང་ཀུན་ནས་ཕྲད་པའི་སྡུག་བསྔལ་ཞེས་བརྗོད་དོ། །ཀྱེ་ཡེའི་ལྷ་དག་གཞན་ཡང་མི་རྣམས་ལ་མིའི་འཇིག་རྟེན་དུ་མི་སྡུག་པ་དང་ཀུན་ནས་ཕྲད་པ་ལས་སྐྱེས་པའི་སྡུག་བསྔལ་རྣམས་གང་ཞེ་ན། འདི་ལྟ་སྟེ་གང་འགའ་ཞིག་བློ་གཡོ་བ་དང་བློ་རྣམ་པར་གནས་པ་མེད་པ་དང་གཅིག་ཏུ་མ་ངེས་པའི་བློ་དང་བློ་རྣམ་པར་གཡེངས་པར་གྱུར་པས་རྟག་ཏུ་ཡང་ཆོས་ངན་པ་ཡིད་ཀྱིས་སེམས་པར་བྱེད་པ་ཡིན་ནོ། །གལ་ཏེ་ཆོས་ལ་དགའ་བ་དང་དགེ་བ་སྟེན་པར་བྱེད་པ་དང་བདག་ལ་ཕན་པར་བྱེད་པ་མ་ཡིན་པ་དེ་དག་ནི། གང་དག་གི་རྒྱུས་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །ཀྭའི་ལྷ་དག་འདི་ནི་མི་རྣམས་ཀྱི་མིའི་འཇིག་རྟེན་ན་མི་སྡུག་པ་དང་ཀུན་ཏུ་ཕྲད་པ་ལས་སྐྱེས་པའི་སྡུག་བསྔལ་ཞེས་བརྗོད་དོ། །རིགས་དུ་མ་དང་ཚུལ་ལུགས་དུ་མར་རྣམ་པ་སྣ་ཚོགས་པའི་སྡུག་བསྔལ་གཞན་དང་གཞན་རྣམས་ཀྱང་ཉམས་སུ་མྱོང་བར་འགྱུར་རོ། །དེ་ལ་རྣམ་པ་གསུམ་པོ་འདི་ནི་ངེས་པར་མི་སྡུག་པ་དང་ཕྲད་པ་ཡིན་ཏེ། འདི་ལྟར་སྲོག་གཅོད་པར་བྱེད་པ་མིག་གི་ཚེར་མར་གྱུར་པ་རྟག་ཏུ་མི་

70-303a

འཐུན་པའི་དགྲ་རྣམས་དང་ལྷན་ཅིག་ཀུན་ཏུ་ཕྲད་པ་འདི་ནི་མི་སྡུག་པ་དང་ཀུན་ཏུ་ཕྲད་པ་གཅིག་ཡིན་ནོ། །གཞན་ཡང་མི་སྡུག་པ་དང་ཀུན་ཏུ་ཕྲད་པར་གྱུར་པ་ལ་འདི་ལྟ་སྟེ། སྡིག་པའི་གྲོགས་པོ་དང་ལས་ལྷན་ཅིག་སྤྱོད་པར་བྱེད་པའོ། །ངེས་པར་འདིར་མི་སྡུག་པ་དང་ཕྲད་པ་གསུམ་པ་འདི་ལྟ་སྟེ་འགྲས་པར་གྱུར་པ་ནང་དུ་སྦས་ནས་དུས་གཞན་དུ་ཀུན་ནས་འཇོམས་པར་བྱེད་པའོ། །འདི་དག་རྣམས་ནི་ངེས་པར་མི་སྡུག་པ་དང་ཕྲད་པ་གཞན་རྣམ་པ་གསུམ་ཞེས་བརྗོད་དོ། །ཀྱེའི་ལྷ་དག་དེ་དག་རྣམས་ནི་མིའི་འཇིག་རྟེན་པའི་མི་རྣམས་ཀྱི་སྡུག་བསྔལ་ཆེན་པོ་རྣམ་པ་དུ་མ་གཞན་རྣམས་ཡིན་ནོ། །གཞན་ཡང་མུ་སུ་ལུན་དྷ་དེས་སྡུག་བསྔལ་ལས་ལྷ་དེ་དག་རྣམས་ཀྱི་ཡིད་སྐྱོ་བ་བསྐྱེད་པར་བྱ་བའི་དོན་དུ་སྟོན་པར་བྱེད་པ་ལས། འདི་ལྟ་སྟེ་སྡུག་པ་དང་བྲལ་བའོ། །སྡུག་པ་ཞེས་བྱ་བའི་མིང་ཡང་གང་དག་གིས་འཇིག་རྟེན་གཉིས་སུ་ཕན་པར་བྱེད་པ་ཡིན་ནོ། །རྟག་ཏུ་ཕན་པར་འདོད་པའི་དགེ་བའི་གྲོགས་པོ་དེ་དང་ལྷན་ཅིག་ཏུ་བྲལ་བར་གྱུར་པའོ། །དེ་ལ་འདི་ནི་སྡུག་བསྔལ་ཆེན་པོ་ཡིན་ནོ། །ཡང་དེ་མ་དང་ཕ་དང་སྤུན་དང་སྲིང་མོ་དང་བུ་དང་བུ་མོ་དང་འབྲེལ་པ་རྣམས་དང་གཞན་ཡང་སྲེད་པའི་གནས་སུ་གྱུར་པ་རྣམས་ཀྱེ་མ་གནོད་པར་བྱེད་པ་ཚ་བ་རྩུབ་པ། མཚོན་ཆ་དང་མེར་ལྷུང་བ་ལས་ལྷག་པར་སེམས་སྲེག་པ་སྐྱེ་བར་འགྱུར་རོ། །འདི་དག་ནི་སྡུག་པ་རྣམས་དང་བྲལ་བ་ལས་གྱུར་པའི་སྡུག་བསྔལ་ཞེས་བརྗོད་དོ། །གཞན་ཡང་འཐབ་བྲལ་བའི་མངའ་བདག་དེས་ལྷ་དེ་དག་རྣམས་ལ་ཕན་པར་བྱ་བའི་དོན་དུ་ཆོས་སྟོན་པར་བྱེད་པ་ནི། འདི་ལྟ་སྟེ་གྲང་བ་དང་ཚ་བ་གཉིས་པོ་དག་གིས་སྡུག་བསྔལ་ལོ། །གཞན་ཡང་འཐབ་བྲལ་གྱི་བདག་པོ་དེས་ལྷ་དེ་དག་རྣམས་ཉིད་ལ་མངོན་པར་བརྗོད་པ། ལྷ་དག་མི་རྣམས་ཀྱི་མིའི་འཇིག་རྟེན་འདི་ན་སྡུག་བསྔལ་དེ་དག་རྣམས་གང་དག་ཅེ་ན། འདི་ལྟ་སྟེ་གྲང་བ་དང་ཚ་བ་ལ་སོགས་པ་གཉིས་དག་གིས་སྡུག་བསྔལ་ལོ། །དེ་ལ་ཤིན་ཏུ་སྟེན་པས་ཀྱང་སྟེ། ལྷ་དག་གྲང་བ་ཧ་ཅང་སྟེན་པར་བྱེད་པའི་མི་རྣམས་ནི་མིའི་འཇིག་རྟེན་དུ་སྡུག་བསྔལ་དེ་ལ་ཡང་ལོངས་སྤྱད་ནས་གང་ཡང་ཚ་བ་རྣམས་ལ་སྟེན་པར་བྱེད་པས། མིའི་འཇིག་རྟེན་པ་རྣམས་དེ་ལས་ཀྱང་སྡུག་བསྔལ་བར་

70-303b

འགྱུར་རོ། །དེ་བཞིན་དུ་ཁ་ཟས་ཧ་ཅང་བསྟེན་པས་ཀྱང་སྡུག་བསྔལ་བར་འགྱུར་རོ། །དུས་ཡུན་རིང་དུ་འདུག་པ་བསྟེན་པས་ཀྱང་སྡུག་བསྔལ་ལོ། །དུས་རིང་དུ་ལངས་པ་དང་འགྲོ་བ་ཡང་སྡུག་བསྔལ་ཉིད་དོ། །དེ་བཞིན་དུ་བཏུང་བ་ཤིན་ཏུ་བསྟེན་པའི་སྡུག་བསྔལ་དང་། རྨི་ལམ་གྱི་སྡུག་བསྔལ་ཉིད་དང་མཚན་མོ་མལ་སྟན་ལ་གཞོགས་ངོས་གཅིག་གིས་སྟན་ལ་ཉལ་བས་ཀྱང་ཤིན་ཏུ་སྡུག་བསྔལ་བར་འགྱུར་རོ། །དེ་བཞིན་དུ་གཞོགས་གཉིས་པས་ཀྱང་ཤིན་ཏུ་དུས་རིང་དུ་ཉལ་བར་གྱུར་ན་ཤིན་ཏུ་སྡུག་བསྔལ་བ་སྐྱེ་བར་འགྱུར་རོ། །གཉིས་གཉིས་ལས་སྐྱེས་པའི་བདེ་བ་ལྟར་སྣང་བ་རྣམས་ཀྱིས་མི་རྣམས་མིའི་འཇིག་རྟེན་དུ་བསླུས་པའི་ཕྱིར་ན་སེམས་ཅན་རྣམས་ལེགས་པར་བྱ་བའི་ལས་རྣམས་ནི་མི་བྱེད་དོ། །བདེ་བས་ཤིན་ཏུ་རྣམ་པར་བཅོམ་པ་དེས་དམྱལ་བར་རྒྱུག་པར་འགྱུར་རོ། །ལྷ་དག་མི་རྣམས་ཀྱི་མིའི་འཇིག་རྟེན་ན་ཤིན་ཏུ་སྡུག་བསྔལ་བ་དེ་ཡང་བདེ་བའི་གཟུགས་བརྙན་གྱི་སྡུག་བསྔལ་བ་རྣམས་ཡིན་ནོ། །ལྷ་རྣམས་དེ་བཞིན་དུ་མ་གྱུར་ཅིག་ཅེས་ཕན་པར་བྱ་བའི་དོན་དུ་དེ་ལྟར་མུ་སུ་ལུན་དྷ་དེས་འཐབ་བྲལ་གྱི་ལྷ་རྣམས་ལ་ཆོས་སྟོན་པར་བྱེད་དེ་མིའི་འཇིག་རྟེན་དེ་ལ་སྐྱེས་པ་རྣམས་ཀྱི་བདེ་བ་ཇི་ལྟ་བ་བཞིན་དུ་བདག་ཅག་རྣམས་ཀྱི་བདེ་བ་ཡང་འགྱུར་བ་དེ་དགག་པར་བྱ་བའི་དོན་དང་། དེ་དག་ལ་སྐྱོ་བ་བསྐྱེད་པར་བྱ་བའི་དོན་དུ་འཁོར་བ་ལས་ཁ་ཕྱིར་ཕྱོགས་པར་འགྱུར་བའི་ཆོས་སྟོན་པར་བྱེད་དོ། །འཐབ་བྲལ་གྱི་བདག་པོ་དེ་འཁོར་བ་ལས་ཁ་ཕྱིར་ཕྱོགས་པས་ཕན་པར་བྱ་བའི་དོན་དུ་བག་མེད་པས་བག་མེད་པ་རྣམས་འདུལ་བར་བྱ་བའི་ཕྱིར་རོ། །གཞན་ཡང་འཐབ་བྲལ་གྱི་བདག་པོ་དེ་ལྷ་དེ་དག་རྣམས་ཉིད་ལ་མི་རྣམས་ཀྱི་སྡུག་བསྔལ་གཞན་དག་སྟོན་པར་བྱེད་དོ། །ཇི་ལྟར་མི་རྣམས་ཀྱི་མིའི་འཇིག་རྟེན་དུ་ནད་རྣམས་འབྱུང་བར་འགྱུར་བ་དེ་ལ། རྣམ་པ་དུ་མ་དང་རྣམ་པར་རྟོག་པ་མང་པོ་དང་ཀུན་ནས་སློང་བ་དུ་མ་རྣམས་ཀྱིས་རིམས་ནད་དང་ཤིན་ཏུ་འཁྲུ་བ་དང་དབུགས་མི་བདེ་བ་དང་གློ་ལུ་བ་ལ་སོགས་པའི་ནད་རྣམས་ཏེ། ནད་བཞི་བརྒྱ་རྩ་བཞིར་འགྱུར་བ་ཡིན་ནོ། །གཉིས་གཉིས་ཀྱི་སྡུག་བསྔལ་གང་དག་གིས་མངོན་པར་བཅོམ་པར་གྱུར་པའི་སེམས་ཅན་རྣམས་ནི་ཕྱི་ནས་ཡང་ནད་ཀྱིས་ཉེ་བར་

70-304a

འཇོམས་པར་འགྱུར་རོ། །དེ་ནས་གཞན་ཡང་གང་དག་དེའི་རྗེས་ཐོགས་ལ་མི་རྣམས་མིའི་འཇིག་རྟེན་དུ་གང་གིས་འཇོམས་པར་བྱེད་པ་དེ་ལ་ཡང་འདི་ནི་ལུས་ཀྱི་ནད་ཅེས་བརྗོད་དོ། །མི་རྣམས་ཀྱང་ཕལ་ཆེར་མྱ་ངན་དང་ཡིད་མི་བདེ་བ་ལ་སོགས་པ་རྣམས་ནི་མི་རྣམས་ཀྱི་ནད་ཡིན་ཏེ། འཇིག་རྟེན་པས་ཀྱང་དེ་སྐད་ཅེས་བརྗོད་དོ། །གཞན་ཡང་མུ་སུ་ལུན་དྷ་དེས་ལྷ་དེ་དག་རྣམས་ཉིད་ལ་ཕན་པར་བྱ་བའི་དོན་དུ་ཆོས་སྟོན་པར་བྱེད་པ་ནི། འཁོར་བ་བྲི་བར་བྱ་བའི་དོན་དུ་དང་མིའི་འཇིག་རྟེན་རྣམས་སྡུག་བསྔལ་གྱིས་ཀུན་ཏུ་འབར་བར་སྟོན་པར་བྱེད་པ་ལ། འདི་ལྟ་སྟེ་གཞན་གྱི་དབང་དུ་གྱུར་པ་ཉིད་ཅེས་བྱ་བ་ནི་མིའི་འཇིག་རྟེན་ན་མི་རྣམས་ཀྱི་སྡུག་བསྔལ་ཡིན་ནོ། །ཀྭའི་ལྷ་རྣམས་མིའི་འཇིག་རྟེན་འདི་ན་སྐྱེ་བ་མཉམ་པར་གྱུར་ཅིང་རིགས་མཚུངས་པ་དང་དབང་པོ་རྣམས་མཚུངས་པ་དང་ན་ཚོད་མཚུངས་པ་དང་དཔའ་བརྟན་མཚུངས་པར་གྱུར་པ་རྣམས་ཀྱང་ལས་དམན་པར་གྱུར་པས་གཞན་གྱི་དབང་ཉིད་དུ་ཉེ་བར་འགྱུར་རོ། །དེ་ཉིན་མོ་དང་མཚན་མོ་མེད་པར་རང་དབང་དུ་འགྱུར་བ་མ་ཡིན་ནོ། །རྟག་པར་ཡང་ཤིན་ཏུ་སྡུག་བསྔལ་གྱི་ཁུར་ཁྱེར་བར་བྱེད་དོ། །འདི་ནི་གཞན་གྱི་དབང་གིས་སྡུག་བསྔལ་བ་ཡིན་ནོ། །གཞན་ཡང་ཆེས་བཟོད་པར་དཀའ་བ་གཞན་གྱི་དབང་དུ་གྱུར་པའི་སྡུག་བསྔལ་རྣམས་ནི་རིགས་དང་གཟུགས་དང་བརྩོན་འགྲུས་དང་སྤྲོ་བ་རྣམས་དང་རིག་པ་དང་ཤེས་པ་དང་རྣམ་པར་ཤེས་པ་རྣམས་ཀྱང་ཕུན་སུམ་ཚོགས་པར་གྱུར་པ་གང་ཞིག་དབུལ་བར་གྱུར་པས་ཟིལ་གྱིས་མནན་པའི་ཕྱིར་ན་རིམ་པ་རྣམས་ཐམས་ཅད་ཀྱིས་དམན་པ་རྣམས་ཀྱི་བྲན་གྱི་དངོས་པོར་འགྱུར་རོ། །གཞན་ཡང་མུ་སུ་ལུན་དྷ་དེས་ལྷ་དེ་དག་རྣམས་ཀྱི་ལས་དམན་པ་ཡིན་པའི་ཕྱིར་དང་། སྦྱིན་པ་སྤངས་པ་ཡིན་པའི་ཕྱིར་ཡང་སྟེ། འཐབ་བྲལ་ན་སྤྱོད་པ་རྣམས་ན་ཐུལ་འོག་ཏུ་གཞུག་པའི་གླགས་ཐོད་པ་ཡིན་ལ། ཉིན་མོ་དང་མཚན་མོ་རང་དབང་ཅན་དུ་ནི་འགྱུར་རོ། །སྦྱིན་པའི་སྟོབས་དམན་པར་གྱུར་པ་རྣམས་ནི་རྟག་ཏུ་ཡང་སྡུག་ཕོངས་སུ་གྱུར་ནས་ལག་པ་དང་རྐང་པ་དག་རྣམ་པར་རྡོལ་བ་ཟད་ཅིང་རྡོལ་ལ་རྙིང་པ་དྲི་མ་ཅན་གྱི་གོས་གྱོན་པ་རྟག་པར་ཡང་ལྟོགས་པ་དང་སྐོམ་པས་ཉེ་བར་བཅོམ་པ་གྲང་བ་དང་

70-304b

ཚ་བའི་སྡུག་བསྔལ་གྱི་ཁུར་ཁྱེར་བ་བྱེད་དོ། །དེ་ལ་རྣམ་པ་དུ་མར་བཟོད་དཀའ་བ་འདི་དག་རྣམས་ནི་གཞན་གྱི་དབང་དུ་གྱུར་པའི་སྡུག་བསྔལ་ཡིན་ཏེ། ཉིན་མོ་དང་མཚན་མོ་མེད་པར་ཡང་ཉེ་བར་དགའ་བ་མ་ཡིན་ནོ། །དེ་བཞིན་དུ་གཞན་དག་རིགས་དང་གཟུགས་དང་ན་ཚོད་དང་སྤྲོ་བ་དང་ཕ་རོལ་གནོན་པ་ལ་སོགས་པ་རྣམས་དམན་པ་ལ་ཚུལ་ཐམས་ཅད་ཀྱིས་ཀྱང་རིགས་དང་གཟུགས་དང་ཤེས་པ་དང་རྣམ་པར་ཤེས་པ་ཆེས་ལྷག་པ་རྣམས་རྗེས་སུ་སྟེན་པར་བྱེད་དོ། །དེ་ཐམས་ཅད་དུ་ངང་ཚུལ་ཐམས་ཅད་ཀྱིས་ཀྱང་ཟིལ་གྱིས་གནོན་ཏེ། དབུལ་བ་དང་ལས་ཀྱིས་ཐོ་བཙམས་པའི་ཕྱིར་ན་སྡུག་བསྔལ་གྱི་མཆོག་རྣམས་ཁྱེར་བར་བྱེད་དོ། །དེ་ལ་འདི་དག་ནི་ལྷ་དང་མི་རྣམས་ཀྱི་སྡུག་བསྔལ་གྱི་མཆོག་གཞན་ཡིན་ནོ། །གཞན་ཡང་གཞན་གྱི་དབང་དུ་གྱུར་པའི་སྡུག་བསྔལ་རྣམས་ནི་ཇི་ལྟར་དབུལ་ཕོངས་ཀྱིས་མངོན་པར་གཙེས་པའི་སྐྱེས་བུ་ཆོས་བྱེད་པ་རྣམས་ཀྱང་སྡིག་པ་བྱེད་པ་ལ་ཉེ་བར་སྟེན་པར་བྱེད་དོ། །དེ་ཞབས་འབྲིང་གི་དོན་དུ་དེ་དང་སྟེན་གྲོགས་བྱས་པས་དེ་ཁོ་ན་བཞིན་དུ་འགྱུར་ཏེ། མི་འདོད་པ་མི་སྡུག་པ་ཡིད་དུ་མི་འོང་བའི་སྡིག་པ་རྣམས་རྗེ་དཔོན་གྱི་དབང་གིས་དེ་ཁོ་ན་བཞིན་དུ་ལས་རྣམས་བྱེད་དོ། །དེ་དག་ནི་ལུས་ཞིག་པར་གྱུར་ནས་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །དེ་ལ་ཡང་འཇིག་རྟེན་གཉིས་སླུ་བར་བྱེད་པ་ཤིན་ཏུ་ཡང་མི་དགེ་བར་གྱུར་པ་ནི་གཞན་གྱི་དབང་དུ་གྱུར་པའི་སྡུག་བསྔལ་ཡིན་ནོ། །ཀྭའི་ལྷ་དག་གཞན་ཡང་མི་རྣམས་ལ་མིའི་འཇིག་རྟེན་རྣམས་སུ་ཤིན་ཏུ་བཟོད་པར་དཀའ་བའི་ཆེས་སྡུག་བསྔལ་བར་གྱུར་པ་རྣམས་ནི་འདི་ལྟ་སྟེ། ཚོལ་ཁྲོའི་སྡུག་བསྔལ་རྣམས་སོ། །ཀུན་ཏུ་ཚོལ་བ་ཞེས་བྱ་བའི་སྡུག་བསྔལ་དེ་རྣམ་པ་དུ་མ་རྣམས་ཡོད་པ་ལ་འདི་ལྟ་སྟེ། རྫས་རྣམས་ཀྱི་དོན་དུ་རྒྱ་མཚོ་དང་གཡང་ས་དང་གཡུལ་འགྱེད་པ་རྣམས་ལ་འཇུག་པར་བྱེད་པ་དང་། དགོས་པ་དང་རྒྱུ་མཚན་གྱི་དབང་གིས་གཞན་རྣམས་དང་ཀུན་ནས་འབྲེལ་བྱེད་པ་དང་། དམན་པ་རྣམས་ཀྱི་ཞབས་འབྲིང་བྱེད་པ་དང་། ཞིང་གི་ལས་དང་། ཚོང་བྱེད་པ་དང་། བ་ལང་གི་འཚོ་སྐྱོང་དང་། བྱེས་ན་གནས་པ་དང་། གཞན་གྱི་དབང་དུ་འགྱུར་བ་དང་།

70-305a

རིའི་མཆོག་ལ་ཀུན་ཏུ་འཛེག་པ་དང་བྱེས་སུ་འགྲོ་བ་དང་འགྲོ་བ་ན་གཡོག་བྱེད་པ་ལ་སོགས་པ་ཀུན་ཏུ་དུབ་པ་རྣམས། གང་ཞིག་འདི་དག་རྣམས་བྱེད་པ་དེ་དག་གི་ཚོལ་ཁྲོ་འདི་དག་རྣམས་ཐམས་ཅད་ཕལ་ཆེར་ནི་ནོར་རྫས་དང་བཟའ་རྒྱུ་དང་གོས་རྣམས་ཀྱི་དོན་དུ་ཡིན་ཏེ། དབུལ་ཞིང་ཕོངས་པས་དངོས་སུ་མནར་བའི་ཕྱིར་དང་། སྲེད་པས་ཟིལ་གྱིས་མནན་པར་གྱུར་པའི་མི་རྣམས་ཀྱིས་བྱས་སོ། །དང་པོ་སྐྱེས་པར་གྱུར་པ་ནས་བཟུང་ནས་ཇི་སྲིད་དུ་འཆི་བདག་གི་སྲེད་པའི་ཞགས་པས་ཟིལ་གྱིས་མ་མནན་གྱི་བར་དུ་བྱ་བ་མ་ཡིན་པ་གཞན་རྣམས་ཀྱང་བྱེད་དོ། །དེ་གཞན་གྱི་བསམ་པ་རྗེས་སུ་ཚོལ་བ་དང་མངོན་པར་འཚེ་བ་དང་འཇལ་བ་ལ་གཡོ་བྱེད་པ་དང་ཁྱིམ་ལ་གཡོ་བྱེད་པ་དང་། ཆང་འཚོང་བ་དང་ཏིལ་འཚོང་བ་དང་མི་རིགས་པའི་སྦྱོར་བ་རྣམས་ཀྱི་སྙེད་པ་ཡུལ་འཁོར་འཇིག་པར་བྱེད་པ་དང་། རྒྱལ་སྲིད་རླག་པར་བྱེད་པའི་ཡུལ་རྣམས་འཇོམས་པར་བྱེད་པ་དང་། ཡུལ་ལྗོངས་རྣམས་འཇོམས་པ་དང་འདི་དག་དང་གཞན་ཡང་གང་དག་རྣམ་པ་སྣ་ཚོགས་པའི་བྱ་བ་མ་ཡིན་པ་རྣམས་མིའི་འཇིག་རྟེན་པའི་མི་རྣམས་ཀྱིས་བྱེད་པ་ནི་བུ་དང་བུ་མོ་དང་བགོ་བར་བྱ་བ་དང་བཟའ་བར་བྱ་བ་དང་སྐོམ་རྣམས་ཀྱི་དོན་དུ་ཡིན་ནོ། །འདི་ནི་ཡོངས་སུ་ཚོལ་བའི་སྡུག་བསྔལ་ཞེས་བརྗོད་དོ། །གང་དག་བརྒྱ་ཕྲག་སྟོང་དུ་གྱུར་པའི་རྣམ་པ་དུ་མ་རྣམས་སུ་ཡང་ལོ་སྟོང་གིས་ཀྱང་བརྗོད་པར་ཡང་སླ་བ་མ་ཡིན་ནོ། །ལྷ་དག་དེ་ལ་དེ་དག་རྣམས་ནི་མི་རྣམས་ཀྱི་སྡུག་བསྔལ་གྱི་ཕུལ་དུ་ཕྱིན་པ་ཡིན་ནོ། །དེ་ལྟར་འཐབ་བྲལ་གྱི་བདག་པོ་དེ་ལྷ་དེ་དག་རྣམས་ལ་ཕན་པར་བྱ་བའི་དོན་དུ་སྲིད་པ་ལ་ངེས་པར་སྐྱོ་བར་བྱེད་པ་དང་ངེས་པར་འབྱུང་བར་འགྱུར་བའི་ཆོས་སྟོན་པར་བྱེད་དོ། །ཇི་ལྟར་ལྷ་འདི་དག་རྣམས་ནི་མི་དག་འདོད་པའི་བློ་སྐྱེ་བར་འགྱུར་ཏེ། དེས་ན་སྲིད་པ་ལ་མངོན་པར་སྲེད་པའི་བློ་ཅན་རྣམས་ལ་ཕན་པར་བྱ་བ་གང་གི་ཕྱིར་མངོན་པར་འཇུག་པར་བྱེད་པ་ཡིན་ནོ། །དེ་ལ་རྒྱུ་མཚན་འདི་དག་གིས་མི་རྣམས་ཀྱི་ཉེ་བར་འཚོ་བ་ཐམས་ཅད་སྟོན་པར་བྱེད་པ་ཡིན་ཏེ། ཇི་ལྟར་དེ་ལ་དེ་དག་རྣམས་སུ་སྐྱེ་བར་མ་བྱེད་ཅིག །དེ་དག་རྣམས་ནི་སྡིག་པའི་ཚོལ་ཁྲོས་ཟིལ་གྱིས་མནན་པ་རྣམས་ཀྱི་ཡིན་གྱི། དེ་

70-305b

གཅིག་པུ་མངོན་པར་དགའ་བའི་ཡིད་ནི་འབྱུང་བར་མི་འགྱུར་རོ། །རྒྱུ་དེ་དག་གིས་དམྱལ་བ་རྣམས་དང་ཡི་དགས་ཀྱི་ཡུལ་རྣམས་དང་། དུད་འགྲོ་རྣམས་སུ་ཡང་སྐྱེ་བར་འགྱུར་རོ། །དེ་ལ་སྐྱེས་པ་ན་ཡང་རྣམ་པ་སྣ་ཚོགས་པའི་སྡུག་བསྔལ་རྣམས་མྱོང་བར་འགྱུར་རོ། །གཞན་ཡང་འཐབ་བྲལ་གྱི་བདག་པོ་དེ་ཉིད་ཀྱིས་ལྷ་དེ་དག་རྣམས་ཉིད་ལ་སྡུག་བསྔལ་གཞན་དག་འཆད་པ་བྱེད་པ་ནི། འདི་ལྟ་སྟེ། ཀྱེ་ཧེ་ལྷ་དག་མི་རྣམས་ཀྱི་མིའི་འཇིག་རྟེན་ན་སྡུག་བསྔལ་གཞན་རྣམས་ལས་སྡུག་བསྔལ་དུ་གྱུར་པའོ། །འདི་ལྟ་སྟེ་སྡིག་པའི་གྲོགས་པོ་ལ་སྟེན་པ་ཞེས་བྱ་བ་སྐྱེས་བུ་ངན་པ་རྣམས་ཀྱིས་བྱས་པ། དོན་མ་ཡིན་པ་རྣམས་ཐམས་ཅད་བྱེད་པར་འགྱུར་བ་དང་སྡུག་བསྔལ་རྣམས་ཐམས་ཅད་ཀྱི་རྒྱུ་ཡང་ཡིན་ཏེ། སྡིག་པའི་གྲོགས་པོ་ལ་བསྟེན་པའི་སྐྱེས་བུ་རྣམས་ནི་བདག་ཉིད་ལ་དོན་མ་ཡིན་པ་རྣམས་ཅུང་ཟད་ཀྱང་མི་སྒྲུབ་པ་མ་ཡིན་གྱི་སྡིག་པ་རྣམས་ནི་ཐམས་ཅད་བྱེད་དོ། །ལུས་དང་ངག་དང་ཡིད་ཀྱིས་ཉེས་པར་སྤྱོད་པ་རྣམས་བྱེད་པར་འགྱུར་རོ། །དེ་དག་རྒྱུ་དེ་དང་རྐྱེན་དེ་དག་གིས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་རྣམས་ལས་དམྱལ་བ་རྣམས་སུ་སྐྱེའོ། །གཞན་དག་དང་གསུམ་གར་ཡང་མང་པོ་ཁོ་ནར་རྣམ་པ་དུ་མའི་སྡུག་བསྔལ་རྣམས་ཀུན་ཏུ་ཁྱེར་བར་བྱེད་དེ། ཡི་དགས་དང་དུད་འགྲོའི་འགྲོ་བ་རྣམས་སུ་ཡང་འགྱུར་རོ། །ལྷ་རྣམས་གཞི་དེ་དག་ལས་སྐྱོན་ཆེན་པོ་འདི་དག་རྣམས་མིའི་འཇིག་རྟེན་པ་རྣམས་ལ་འབྱུང་ངོ་། །ལྷ་རྣམས་ནི་ཡི་དགས་དང་དུད་འགྲོ་རྣམས་སུ་མ་ཡིན་ནོ། །སྐྱོན་རྣམས་མངོན་པར་མཐོང་བ་དེའི་རྗེས་ལ་མི་རྣམས་ཀྱི་སྲིད་པ་ལ་མངོན་པར་དགའ་བ་རབ་ཏུ་འགོག་པར་བྱེད་དེ། མྱ་ངན་ལས་འདས་པ་གཅིག་པུ་ཞི་བ་ཡིན་པའི་གོ་འཕང་ཉེ་བར་བསྟན་པར་བྱ་བའི་དོན་གྱི་ཕྱིར་རོ། །གཞན་ཡང་འཐབ་བྲལ་གྱི་བདག་པོ་དེས་ལྷ་དེ་དག་ཉིད་ལ་ཕན་པར་བྱ་བའི་དོན་དུ་ཆོས་སྟོན་པར་བྱེད་དོ། །མི་རྣམས་ཀྱི་སྡུག་བསྔལ་གང་དག་ཅེ་ན། འདི་ལྟ་སྟེ་བུ་དང་བུ་མོ་དང་རང་གི་སྐྱེ་བོ་དང་གཉེན་བཤེས་རྣམས་ཀྱི་སྡུག་བསྔལ་ལོ། །ཀྱེ་ལྷ་དག་མིའི་འཇིག་རྟེན་ན་མི་རྣམས་ཤིན་ཏུ་ཡང་སྡུག་བསྔལ་བ་རྣམས་ནི་འདི་ལྟ་སྟེ་བུ་དང་རང་གི་སྐྱེ་བོ་ལ་སོགས་པ་རྣམས་

70-306a

ཀྱི་སྟེ། མི་རྣམས་ཀྱི་མིའི་འཇིག་རྟེན་ན་རང་གི་སྐྱེ་བོ་རྣམས་སམ་བུ་དང་བུ་མོ་རྣམས་ཀྱང་རུང་སྟེ། གསོད་པ་དང་འཆིང་བ་ལ་སོགས་པ་རྣམས་ཀྱིས་བྱས་པའམ། བཀྲེས་པ་དང་སྐོམ་པ་དང་དབུལ་བ་ལ་སོགས་པ་རྣམས་ཀྱིས་བྱས་པའི་ཟུག་གཟེར་རྣམས་འབྱུང་ངོ་། །དེའི་ཚེ་དེ་དག་རྣམས་ཀྱི་ཟུག་གཟེར་གྱི་རྒྱུ་མཚན་གྱིས་གང་དག་ལ་དེ་དག་དགའ་བ་དང་རྗེས་སུ་འཐུན་པར་གྱུར་པའི་ཕྱིར་ན་དེའི་ཚེ་དེ་ལ་ཡང་ཟུག་གཟེར་ཤིན་ཏུ་ཆེ་བར་འགྱུར་རོ། །དེ་ལ་འཐུན་པར་བྱས་པས་བྱིས་པ་འདི་ཡང་གཞན་གྱི་བྲེལ་དོག་གིས་བྱས་པའི་སྡུག་བསྔལ་གཞན་ཡིན་ནོ། །མི་རྣམས་ཉིད་ལ་ཡིན་གྱི་བདེ་འགྲོ་གཞན་རྣམས་ལ་ནི་མ་ཡིན་ནོ། །དེ་ལ་བུ་དང་བུ་མོ་དང་རང་གི་སྐྱེ་བོ་རྣམས་ཀྱིས་བྱས་པའི་སྡུག་བསྔལ་དེ་དག་རྣམས་ཀྱིས། བར་བར་མི་རྣམས་སུ་སྐྱེ་བར་བྱེད་པའི་བློས་བྱས་པར་གྱུར་ཏ་རེ། གང་གི་ཕྱིར་རིག་པ་རྣམས་ཐམས་ཅད་ཀྱང་ལས་བྱ་དགོས་པའི་མཐར་ཐུག་པ་དང་། ཡང་གང་དུ་འཆི་བར་འགྱུར་བ་དེ་དག་རྣམས་ཐམས་ཅད་ཀྱང་ལེགས་པ་མ་ཡིན་ནོ། །འཁོར་བ་ན་ཡང་སྡུག་བསྔལ་ཆེ་བ་རྣམས་ཀྱི་ཕུལ་དུ་ཕྱིན་པ་ནི་འདི་དག་ཡིན་ཏེ། འདི་ལྟར་སྐྱེ་བ་དང་རྒ་བ་དང་འཆི་བ་རྣམས་སོ། །དེ་ཡང་ཐམས་ཅད་མིའི་འཇིག་རྟེན་རྣམས་ན་དམིགས་སོ། །ལྷ་རྣམས་དེའི་ཕྱིར་བཟོད་པར་དཀའ་བ་དེ་དག་རྣམས་གོ་བར་གྱིས་ལ་མི་རྣམས་ཀྱི་བློ་མ་བྱེད་ཅིག །དེ་ལྟར་རྣམ་པ་དུ་མ་རྣམས་སུ་ཤིས་པའི་ལམ་དུ་གྱུར་པ་བླ་ན་མེད་པའི་དོན་དེ་ཉིད་ལེགས་པར་སྟོན་པར་བྱེད་དོ། །གང་ལ་ཡང་ཉེ་བར་ལེན་པ་མེད་པར་མིའི་འཇིག་རྟེན་འདིར་དོན་གྱི་དྲ་བ་རྣམ་པ་སྣ་ཚོགས་པ་རྣམས་འབྱུང་ངོ་། །ཡང་དེ་ལ་ཅི་ཞིག་ཡོད་པ་ཡིན་ཞེ་ན། ངན་སོང་གསུམ་གྱི་ས་གཞི་ཞེས་བྱ་བར་བརྒྱ་སྟོང་བྱེ་བ་ཕྲག་དུ་མ་རྣམས་དང་བྱེ་བ་ལས་འདས་པ་རྣམས་སུ་ཡང་སྡུག་བསྔལ་དཔེ་མེད་པ་རྣམས་སྔོན་དུ་སོང་བར་གྱུར་པའི་མིའི་འཇིག་རྟེན་པ་རྣམས་སོ། །ཡང་འགྲང་བར་བྱེད་ཇི་ལྟར་བདེ་འགྲོ་ལྷའི་གོ་འཕང་ལས་འཆི་འཕོ་བར་གྱུར་པ་ན། དེ་ལ་ལྷ་འགའ་ཞིག་བག་མེད་པ་ཤས་ཆུང་བར་གྱུར་པ་རྣམས་ལ་དེ་བཞིན་དུ་འགྲོ་བར་བྱེད་དེ། ཀྱེ་ཧེ་ལྷ་དག་བདེ་འགྲོ་ལས་ཀྱི་ས་པ་མི་རྣམས་སུ་

70-306b

ཇི་ལྟར་འགྱུར་བ་དེ་ལྟར་འགྲོ་བར་གྱིས་དང་། གང་གི་ཚེ་མི་རྣམས་ནས་ཡང་དུས་བྱེད་པར་གྱུར་པ་དེའི་ཚེ་གཉེན་བཤེས་དང་གྲོགས་པོའི་ཚན་པ་རྣམས་ཀྱིས་ཤིས་པ་བརྗོད་པ་ལེགས་པར་སྦྱིན་པར་བྱེད་དེ། བདེ་འགྲོ་ལྷ་རྣམས་ཀྱི་འཇིག་རྟེན་དུ་སོང་ཤིག་ཅེས་བྱས་སོ། །དེ་ལྟར་ན་གཉི་ག་ལྟར་ཡང་བདེ་འགྲོར་འགྱུར་བ་ཡིན་ནོ། །དེ་དག་ནི་འགྲོ་བ་གཉིས་ཡིན་ནོ། །གཞན་མ་འགྲོ་བ་གསུམ་པོ་རྣམས་ཀྱང་མཚུངས་པར་ཡང་སྡུག་བསྔལ་བ་ཡིན་ནོ། །དེ་ལྟར་འདི་ནི་ཕན་པ་རྣམས་རྗེས་སུ་ཚོལ་བར་བྱེད་པ་གཞན་རྗེས་སུ་འཛིན་པར་བྱེད་པ་ལ་རབ་ཏུ་ཞུགས་པར་གྱུར་པ་རྟག་ཏུ་ཡང་བག་ཡོད་པས་རྣམ་པར་རྒྱུ་བའི་འཐབ་བྲལ་བ་རྣམས་ཀྱི་བདག་པོས་རྣམ་པ་དུ་མ་རྣམས་དང་རྣམ་པར་རྟོག་པ་མང་པོ་རྣམས་དང་། ཐབས་དུ་མ་རྣམས་ཀྱིས་ཀྱང་རྣམ་པ་སྣ་ཚོགས་པ་རྣམས་དང་མཐར་ཐུག་པ་དང་བླ་ན་མེད་པར་གྱུར་པའི་ཆོས་སྟོན་པར་བྱེད་དོ། །དེས་བུ་དང་བུ་མོའི་སྡུག་བསྔལ་འདི་དག་རྣམས་བསྟན་ནས། གཞན་ཡང་ལྷ་དེ་དག་རྣམས་ཉིད་ལ་མིའི་སྡུག་བསྔལ་རྣམས་སྟོན་པར་བྱེད་དོ། །གང་དག་ཅེ་ན་དེ་ནི་འདི་ལྟ་སྟེ། བཀྲེས་པ་དང་སྐོམ་པས་བྱས་པ་ཞེས་བྱ་བ་སྡུག་བསྔལ་བ་རྣམས་ཀྱི་ཕུལ་དུ་ཕྱིན་པ་ཡིན་ནོ། །དེ་ལ་ཡང་མི་རྣམས་ཀྱིས་མི་རིགས་པ་རྣམ་པ་དུ་མ་གང་དག་ཡིན་པ་དེ་དག་རྣམས་ཐམས་ཅད་ཀྱང་བཀྲེས་པ་དང་སྐོམ་པའི་རང་བཞིན་གྱི་སྡུག་བསྔལ་རྣམས་ཀྱིས་མནར་བས་ཡིན་ནོ། །གཞན་ནི་དེ་ལྟ་བུར་རྣམ་པ་སྣ་ཚོགས་པའི་སྡུག་བསྔལ་དེ་བཞིན་གཤེགས་པ་མི་གསུང་ངོ་། །སྡུག་བསྔལ་ཇི་ལྟར་བཀྲེས་པ་དང་སྐོམ་པས་བྱས་པ་ཞེས་བྱ་བ་དེས་འཇིགས་པས་ཀྱང་མི་རྣམས་རྣམ་པ་སྣ་ཚོགས་པའི་ཡ་ང་བ་རྣམས་སྒྲུབ་པར་བྱེད་དོ། །འདི་ལྟ་སྟེ་གང་ཞིག་དམན་པར་གྱུར་པ་རྣམས་ལ་ཆེན་པོའི་རིགས་སུ་ལེགས་པར་སྐྱེས་པ་རྣམས་ཀྱང་། བཀྲེན་པར་གྱུར་པས་ཐལ་མོ་སྦྱོར་བར་བྱེད་ཅིང་མིག་གི་མཆི་མས་གདོང་པ་ཀུན་ཏུ་གཡོགས་པ་ཤུགས་ནར་ནར་བའི་སྒྲ་འབྱིན་པར་འགྱུར་རོ། །ཡང་གང་དག་བརྫུན་དུ་སྨྲ་བར་བྱེད་པ་དེ་དག་རྣམས་ཐམས་ཅད་ཀྱང་དབུལ་བས་ཟིལ་གྱིས་མནན་པར་གྱུར་པས་བཀྲེས་པ་དང་སྐོམ་པའི་མིའི་འཇིགས་པ་རྣམས་ཀྱིས་གཟིར་བ་རྣམས་ཀྱིས་ཡིན་ནོ། །གང་ཡང་གཞན་དུ་ནི་གསོན་པ་

70-307a

ལ་ཡང་ཐེ་ཚོམ་ཟ་བར་འགྱུར་བ་རྣམས་ཀྱང་སྐྱེས་བུ་དག་གིས་བགྲང་བར་མི་བྱེད་དེ། མཚོན་ཆའི་ཚོགས་རྣམས་ཀུན་ཏུ་འཁྲུག་པ་དང་གླང་པོ་ཆེའི་མཆེ་བའི་དཀྲིགས་ཀ་ཡ་ང་བའི་ས་རྣམས་སུ་གཡུལ་འགྱེད་པ་ལ་འཇུག་པར་བྱེད་པ་དེ་དག་རྣམས་ཀྱི། དེ་ཐམས་ཅད་ཀྱང་བཀྲེས་པ་དང་སྐོམ་པའི་འཇིགས་པས་མནར་བ་རྣམས་ཡིན་ནོ། །དེ་ཡང་གཞན་དག་རྣམས་སུ་དཔག་ཚད་བརྒྱ་སྟོང་ཕྲག་དུ་མ་རྣམས་ཀྱི་ཆུ་སྲིན་ཏི་མི་ཏི་མིང་ག་དང་། ཆུ་སྲིན་ན་ཀྲ་དང་། ཆུ་སྲིན་མ་ཀ་ར་དང་། རི་ར་ཥོ་དང་། རླབས་ཀྱི་ངམ་གྲོག་རྣམས་སུ་སྲོག་དང་འབྲལ་བ་དང་། མཚུངས་པ་དུ་མ་རྣམས་ལ་ཡང་ཞུགས་ནས་སྐྱེས་བུ་དག་རྒྱ་མཚོར་རབ་ཏུ་འཇུག་པར་བྱེད་དོ། །དེ་དག་རྣམས་ཐམས་ཅད་ཀྱང་བཀྲེས་པ་དང་སྐོམ་པས་བྱས་པའི་སྡུག་བསྔལ་གྱིས་ཡིན་ནོ། །གང་ཡང་གཞན་དག་རྣམས་ལ་ཡང་རྣམ་པ་སྣ་ཚོགས་པ་དང་རྣམ་པར་རྟོག་པ་དུ་མ་རྣམས་ཀྱིས་ཀྱང་གང་དག་བརྗོད་པར་མི་ནུས་པའི་རྣམ་པ་དེ་སྲིད་ཀྱི་སྡུག་བསྔལ་རྣམས་ལ་མི་དག་རབ་ཏུ་འཇུག་པར་བྱེད་པ་ཡིན་ནོ། །དེ་དག་རྣམས་ཐམས་ཅད་ཀྱང་གསོད་པའི་དོན་དུ་སྟེ། གསོད་དུ་ཁྲིད་པར་གྱུར་པ་རྣམས་གསོད་པའི་རྔ་པ་ཊ་ཧ་བརྡུངས་པར་གྱུར་ཅིང་མེ་ཏོག་ཀ་ར་བཱི་རའི་ཕྲེང་བས་མགོ་ལ་བཏགས་ནས་གསལ་ཤིང་གི་མདུན་དུ་ཁྲིད་པར་གྱུར་པའི་སྡུག་བསྔལ་གྱི་འཇིགས་པ་རྣམས་ཀྱིས་སེམས་དངངས་པར་གྱུར་པའི་བཞིན་ཅན་རྣམས་སྲོག་གི་ཐ་མར་གྱུར་པའི་འཇིག་རྟེན་དུ་འཁྲིད་པར་བྱེད་པ་རྣམས་ལས་གཞན་ལ་ནི་རྣམ་པ་དེ་ལྟ་བུའི་སྡུག་བསྔལ་རྣམས་ཡོད་པ་མ་ཡིན་ནོ། །ཇི་ལྟར་བཀྲེས་པ་དང་སྐོམ་པས་བྱས་པ་ལས་གཞན་རྣམས་ནི་རྣམ་པ་དེ་ལྟ་བུའི་སྡུག་བསྔལ་ཉིད་ཡོད་པ་མ་ཡིན་ནོ། །དེའི་ཕྱིར་སོ་སོར་གཞོམ་པར་བྱ་བའི་དོན་དུ་སྦྱིན་པ་སྦྱིན་པར་བྱ་སྟེ། སེམས་དང་ཞིང་དང་། དངོས་པོ་རྣམས་ཕུན་སུམ་ཚོགས་པ་དང་། དུས་སུ་རིགས་པ་དང་། ཡུལ་དུ་མཁོ་བ་རྣམས་ཀྱང་རབ་ཏུ་བརྩོན་པ་དང་། རྣམ་པར་འགྱུར་བ་མེད་པར་བྱས་ལ་གཏང་བར་བྱའོ། །འཁོར་བའི་འཇིགས་པ་རྣམས་ཀྱིས་འཇིགས་པ་དང་རྣམ་པར་རྟོག་པའི་སྡུག་བསྔལ་གང་ཡིན་པ་དེ་དག་ལྷ་རྣམས་ལ་ཡང་ཡོད་མོད་ཀྱི་འཁོར་བ་ན་ཟས་ཀྱིས་

70-307b

བྱས་པ་རྣམས་ནི་ཤིན་ཏུ་ཉུང་ཟད་ཅིག་ཡིན་ནོ། །བཀྲེས་པ་དང་སྐོམ་པ་དང་ཀུན་ནས་བྲལ་བར་བྱ་བའི་དོན་དུ་སྦྱིན་པ་དག་ནི་གཏོང་བར་གྱིས་ཤིག །ཀྱེ་ཧེ་ལྷ་དག་དེ་ལ་འདི་ནི་མི་རྣམས་ཀྱི་མིའི་འཇིག་རྟེན་གྱི་བཀྲེས་པ་དང་སྐོམ་པའི་རང་བཞིན་གྱི་རྣམ་པར་རྟོག་པ་དུ་མའི་སྡུག་བསྔལ་གཞན་རྣམས་ཡིན་ཏེ། གང་ཡང་དེ་དག་རྣམས་ནི་ཤིན་ཏུ་འཇམ་པར་གྱུར་པའི་ལྷ་རྫས་ཀྱི་བདེ་བ་ཤིན་ཏུ་ཆུང་བས་ཀྱང་ཟིལ་གྱིས་གནོན། ཕལ་ཆེ་བར་གྱུར་པའི་ལྷ་རྫས་ཀྱི་ཟས་དང་སྐོམ་གྱི་དངོས་པོ་རྙེད་པར་སླ་བར་གྱུར་པ་རྣམས་ཀྱང་ལྷ་དག་གིས་རིག་པ་ཡང་མ་ཡིན་ནོ། །འདོད་པའི་ཁམས་འདི་ནི་ཉེ་འཁོར་རྣམས་ཐམས་ཅད་ན་ཡང་བཀྲེས་པ་དང་སྐོམ་པར་གྱུར་པའི་རང་བཞིན་གྱི་འཇིགས་པ་རྣམས་ཀྱི་སྡུག་བསྔལ་གྱི་རླུང་གིས་བཏབ་པས་ཀུན་ཏུ་འབར་བར་གྱུར་པ་ཡིན་གྱིས་དེ་ལ་ལྷ་དག་རིངས་པ་རིངས་པས་མི་རྣམས་སུ་སྐྱེ་བར་མ་བྱེད་ཅིག །ཕྱིར་ཞིང་ཉིད་ཀྱང་ཡིད་ལ་བྱས་པར་གྱུར་ཏ་རེ། མིའི་འཇིག་རྟེན་པ་རྣམས་ནི་སྐྱེ་བ་དང་རྒ་བ་དང་ནད་རྣམས་ཀྱིས་ཕལ་ཆེ་བར་གནས་པ་ཡིན་ནོ། །གཞན་ཡང་འཐབ་བྲལ་གྱི་བདག་པོ་མུ་སུ་ལུན་དྷ་དེ་ཉིད་ཀྱིས་ལྷ་དེ་དག་རྣམས་ཉིད་ཀྱི་ཡིད་དེ་དག་ལ་ཀུན་ཏུ་བལྟས་ནས་ཕྱིར་ཞིང་ཉིད་ཀྱང་ཤིན་ཏུ་ལས་སུ་རུང་བ་དང་འཇམ་པོར་གྱུར་པས་བྱེད་པ་གཞན་ཡང་མི་དེ་དག་རྣམས་ཉིད་ཀྱི་སྡུག་བསྔལ་རྗོད་པར་བྱེད་དེ། རབ་ཏུ་བརྩོན་པ་དུ་མས་གཞན་རྣམས་ལ་ཕན་པར་བྱེད་པ་ཡིན་ལ་བདག་ལ་ཕན་པར་བྱེད་པ་ནི་སླ་བ་ཡིན་ལ་གཞན་ལ་ཕན་པར་བྱེད་པ་ནི་དཀའ་བ་ཡིན་ནོ། །དེ་ཡང་གཞན་གྱི་དོན་འཛིན་པ་ནི་ཕན་ཚུན་དུ་ཕན་པར་བྱེད་པས་ཡང་དང་ཡང་དུ་དང་རྣམ་པ་དུ་མར་ཡང་འཐབ་བྲལ་གྱི་ལྷ་རྣམས་ལ་ཆོས་སྟོན་པར་བྱེད་དོ། །གཞན་ཡང་མུ་སུ་ལུན་དྷ་དེས་ཉམས་པ་མེད་པར་གཞན་གྱི་ལ་སྤྲོ་བར་གྱུར་ཅིང་འདོད་པའི་འཇིགས་པས་འཇིགས་པའི་ལྷ་དེ་དག་རྣམས་ལ་མིའི་སྡུག་བསྔལ་གཞན་རྣམས་ཀྱང་སྟོན་པར་བྱེད་པ་ལ་འདི་ལྟ་སྟེ། ཀྱེ་ཧེ་ལྷ་དག་མཆོག་ཏུ་མིའི་འཇིག་རྟེན་གྱི་མི་རྣམས་ཆེས་སྡུག་བསྔལ་བར་གྱུར་པ་དེ་དག་རྣམས་ཀྱང་འདི་ལྟ་སྟེ། ཁ་ཉེན་པའི་སྡུག་བསྔལ་ལ་མི་རྣམས་ལ་མིའི་འཇིག་རྟེན་དུ་ཡིད་ཀྱིས་བསྲན་པར་དཀའ་བ་ཡིད་སྟོབས་མེད་པར་བྱེད་པ་གཞན་པོ་

70-308a

དེ་དག་རྣམས་ལ་ཡང་དབང་ཆུང་བའི་སྡུག་བསྔལ་འཆད་པར་བྱེད་པ་ཡིན་ནོ། །འདི་ལྟ་སྟེ། ཀྱེ་ཧེ་ལྷ་དག་མི་རྣམས་ནི་རྣམ་པ་སྣ་ཚོགས་པ་དང་། རྣམ་པར་རྟོག་པ་སྣ་ཚོགས་པ་དང་། ཤིན་ཏུ་གཟེར་ཟུག་ཆེ་བར་གྱུར་པ་དེ་དང་དེ་རྣམས་ལ་ཕལ་ཆེར་ནི་དབུལ་པོར་གྱུར་པ་རྣམས། ཁ་ཉེན་པའི་སྡུག་བསྔལ་འབྱུང་བར་འགྱུར་ཏེ། གཉེན་བཤེས་དང་། རང་གི་སྐྱེ་བོ་རྣམས་དང་། གྲོགས་པོ་དང་། རྩ་འབྲེལ་ཕུན་སུམ་ཚོགས་པར་གྱུར་པ་རྣམས་ཀྱི་དྲུང་ན། དབང་ཆུང་བའི་སྐྱོན་གྱིས་གཡོག་པོར་འགྱུར་རོ། །ཕུན་སུམ་ཚོགས་པ་དག་གི་དྲུང་ན། ཁ་ཉེན་པའི་སྐྱོན་གཉིས་པ་རྣམས་ནི་དབུལ་བར་གྱུར་པ་ཉིད་ཀྱིས། གཞན་རྣམས་ཀྱི་ཁྱིམ་དུ་ཟས་ལ་རྟག་ཏུ་མངོན་པར་དགའ་བའོ། །གསུམ་པ་ནི་ཀུན་ནས་འབྲེལ་བ་མེད་པ་རྣམས་རབ་ཏུ་མང་བར་སྨྲ་བར་བྱེད་པའོ། །བཞི་པ་ནི་རྨོངས་པ་སྟེ། གཉེན་བཤེས་རྣམས་ཀྱི་མདུན་དུ་ཤིན་ཏུ་བརྫུན་པར་སྨྲས་པའི་སྐྱོན་གྱིས་དང་། ཇི་ལྟ་བ་བཞིན་མ་ཡིན་པ་དོན་རྣམས་སྨྲས་པས་དང་འདུག་པ་དང་། ཟས་ངན་པ་དྲི་མ་ཅན་རྣམས་ཀྱིས་ཟིལ་གྱིས་མནན་པའི་ཕྱིར་དང་། འདི་དག་རྣམས་ནི་སྤྲོ་བར་འགྱུར་བའི་རྐང་རྒྱན་དང་བཅས་ནས་མ་འོངས་པའི་སྐྱོན་གྱིས་ཡིན་ཏེ། ཀྱེ་ཧེ་ལྷ་དག་མི་རྣམས་ལ་མིའི་འཇིག་རྟེན་དུ་དེ་ལྟ་བུ་ལ་སོགས་པ་མང་པོ་རྣམས་ཀྱི། ཁ་ཉེན་པའི་སྡུག་བསྔལ་དང་འབྲེལ་བ་དག་ནི་མེ་སྙིང་ལ་གནས་པ་ཡིན་ཏེ། མི་རྣམས་ལ་མིའི་འཇིག་རྟེན་དུ་འདི་ལྟ་སྟེ། ཆེས་གཞན་ཁ་དྲག་པར་གྱུར་པའི་མེ་ཕལ་པོ་ཆེ་རང་གི་སྐྱེ་བོ་དང་། གྲོགས་པོ་དང་འབྲེལ་པ་གདུང་བ་རྣམས་ཀྱི་ནང་བཅུ་འགྱུར་གྱི་སྐྱོན་གྱི་ཆ་དང་ལྡན་ན་ཡང་། དེས་ནི་ལུས་ཐམས་ཅད་སྲེག་པར་བྱེད་པ་ཡིན། ཡན་ལག་ཐམས་ཅད་སྲེག་པར་བྱེད་པ་ཡིན་པ་དང་། འཇིགས་པ་ཆེན་པོ་དང་། འཇིགས་སུ་རུང་བར་གྱུར་པ་ལུས་སྐེམས་པར་བྱེད་ཅིང་སྲེག་པར་བྱེད་པའི་མེ་ཡིན་གྱིས། དབུགས་རྔུབ་པའི་དུ་བ་དེ་ལ། ཀྭའི་ལྷ་དག་རིངས་པ་རིངས་པས་མིར་སྐྱེས་པར་གྱུར་ཏ་རེ། མི་རྣམས་ནི་སྡུག་བསྔལ་མང་བ་དང་། མནོག་ཆུང་བ་

70-308b

དང་། ཉེ་བར་འཚེ་བ་དང་བཅས་པ་དང་། ཚེ་ཐུང་བ་དང་། ཁ་ཉེན་པར་གྱུར་པའི་སྐྱོན་རྣམས་ཀྱིས་དྲི་མ་ཅན་ཡང་ཡིན་ཏེ། ཁ་དྲག་པ་ཡང་མིར་སྐྱེས་པའི་སྐྱེས་བུ་རྣམས་ཉིད་འབའ་ཞིག་ལ་བླ་ལྷག་ཏུ་ཡིན་གྱི། དེ་བཞིན་དུ་འགྲོ་བ་གཞན་བཞི་པོ་རྣམས་ན་ནི་མ་མཐོང་ངོ་། །དེ་ལ་འདི་ནི་བླ་ལྷག་ཏུ་མི་རྣམས་ཀྱི། མིའི་འཇིག་རྟེན་པ་རྣམས་ལ་ཡིན་ནོ། །གཞན་དག་ལས་བྱུང་བའི་ང་རྒྱལ་དང་། ཀུན་ཏུ་ང་རྒྱལ་ལུས་རྣམས་ཐམས་ཅད་ལ། ནད་མི་བཟད་པ་དང་འདྲ་བར་གྱུར་པའི་ཀུན་ཏུ་ང་རྒྱལ་བ་རྣམས་ལ། ཁ་དྲག་པ་ནི་སྡུག་བསྔལ་ཡིན་ཏེ། གང་གི་ཕྱིར་སྔར་མཉམ་པར་ཐོབ་པར་གྱུར་པ་ལས། དེའི་རྟིང་ཉིད་ལ་དོན་ཕྱིན་ཅི་ལོག་ཏུ་གྱུར་པ་བཅུ་ཆར་འགྱུར་ཏེ། དེ་ལྟར་སྔར་མ་བྱུང་བའི་ཁ་ཉེན་པ་རྣམས་འབྱུང་བར་འགྱུར་རོ། །དེ་ལ་གང་དག་ལན་ཅིག་རྙེད་པར་གྱུར་པ་དེ་ཡང་། ཀུན་ང་རྒྱལ་བས་ཐུང་ངུན་གྱི་དུས་སུ་འགྱུར་རོ། །སྔོན་གྱི་ཉིད་ཡང་དང་ཡང་དུ་རབ་ཏུ་སྤེལ་ནས། རིང་པོའི་དུས་ན་ཐོབ་པ་ཡང་སྔར་གྱི་ཉིད་དུ་འགྱུར་རོ། །ཡོངས་སུ་ཁ་དྲག་པར་བྱེད་པ་དེ་ནི། འཆི་བར་གྱུར་པ་བས་ཀྱང་། ཤིན་ཏུ་སྡུག་བསྔལ་བ་ཡིན་ཏེ། རིགས་ཀྱི་བུ་རྣམས་སེམས་ཀྱི་རྒྱུད་བརྒྱལ་བར་འགྱུར་བ་ཡིན་པའི་ཕྱིར་རོ། །ཀྱེ་ཧེ་ལྷ་རྣམས་དེ་དག་རྣམས་མིའི་འཇིག་རྟེན་དུ། མི་རྣམས་ཀྱི་བཟོད་པར་མི་ནུས་པ་གཞན་ཡིན་ཏེ། སྡུག་བསྔལ་རྣམས་རྣམ་པ་དུ་མར་བཤད་པ་ཡིན་ནོ། །བདག་གིས་ཁྱེད་རྣམས་ལ་གཞན་ཡང་བཤད་པར་བྱ་སྟེ། ཁྱེད་ཅག་རྣམས་གང་དག་ཞེ་ན། འདི་ལྟ་སྟེ། རྒས་པའི་སྡུག་བསྔལ་ལོ། །རྒས་པ་ཞེས་བྱ་བ་ཡང་། འདུ་བྱེད་རྣམས་ཐམས་ཅད་སྟོབས་ཉམས་པར་འགྱུར་བའོ། །དེས་ནི་དབང་པོ་རྣམས་ཡོངས་སུ་རྙིངས་པར་བྱེད་པ། ལང་ཚོ་ལ་བབ་པ་རྣམས་ཀྱི་འགྲན་ཟླར་གྱུར་པ། དབྱུག་པ་ལ་བཏུད་ནས། ལྷག་པར་གནས་པ། འགྲོ་བར་བྱེད་མི་ནུས་པ་མིང་དང་། གཟུགས་དག་སྟོབས་

70-309a

ཉམས་པར་བྱེད་པ་པོ་ཁ་དྲག་པའི་སྐྱེས་གནས་ལུས་ཀྱི་རྒྱབ་ཀྱི་སྒལ་ཚིགས་སྒུ་བར་བྱེད་པ། སྐྲ་རྣམས་གཟུགས་མི་འདྲ་བར་བྱེད་པ། འཆི་བར་འགྱུར་བའི་དང་པོའི་ཕོ་ཉ་བཀྲེན་པའི་སྐྱེས་གནས་ལུས་དང་། དབང་པོ་དང་། ཡིད་རྣམས་རྒུད་པར་བྱེད་པ་སྟེ། མི་རྣམས་གསོན་པ་ཉིད་ན། དེ་དག་གིས་སྐྱེ་བ་གཞན་ཉིད་དུ་ཁྲིད་པར་བྱེད་པ་ཡིན་ནོ། །ཀྱེ་ལྷ་དག་དེ་ལ་འདི་ནི་མིའི་འཇིག་རྟེན་དུ་མི་རྣམས་ལ་མིང་དང་གཟུགས་གཉིས་ལ་ཅོ་འདྲི་བར་བྱེད་པར་གྱུར་པ་ཡིན་ཏེ། ངེས་པར་མྱོང་བར་འགྱུར་བ་ཡིན་གྱིས་དུས་རིང་དུ་ཁྱེད་ཀྱིས་ཡོངས་སུ་གཞིགས་དང་། ཁྱེད་ཅག་གིས་རྟོགས་པར་གྱུར་ནས་སྡུག་བསྔལ་བར་མི་འགྱུར་བ་དེ་དག་རྣམས་ནི་ངེས་པར་སེམས་མེད་པ་ཡིན་ཏེ། ཤིང་དང་རྡོ་བ་དང་མཚུངས་པ་ཡིད་དང་བྲལ་བར་གྱུར་པ་དང་མིའི་གཟུགས་བརྙན་གྱི་དུད་འགྲོ་རྣམས་ཡིན་ནོ། །ཀྱེ་ཧེ་ལྷ་དག་དེ་ལས་གཞན་མི་རྣམས་ཀྱི་མིའི་འཇིག་རྟེན་ན་སྡུག་བསྔལ་ཆེན་པོར་གྱུར་པ་ནི་སྐྱེ་བའི་སྡུག་བསྔལ་ཞེས་བྱ་བ་ཡིན་ཏེ། སྐྱེ་བ་ཉིད་ལས་རྒས་པར་འགྱུར་བའི་སྡུག་བསྔལ་འདི་ཡིན་པར་རིག་པར་གྱིས་ལ་ཁྱེད་རྣམས་སྲིད་པ་ལ་མངོན་པར་ཞེན་པར་མ་བྱེད་དང་། ཀྱེ་ཧེ་ལྷ་དག་གཞན་ཡང་རྣམ་པ་མང་པོ་རྣམས་སུ་དང་བཟོད་པར་དཀའ་བ་དུ་མ་རྣམས་སུ་ཡང་ཤིན་ཏུ་སྡུག་བསྔལ་སྐྱེ་བ་ནས་སྐྱེ་བ་རྣམས་སུ་འགྱུར་རོ། །དེ་དག་ཀྱང་གང་ཞེ་ན་འདི་ལྟ་སྟེ། འཆི་བའི་སྡུག་བསྔལ་ཞེས་བྱ་བ་སྐྱེ་བ་དེ་དག་ཏུ་སླར་མི་ལྡོག་པ། ལུས་དང་དབང་པོ་དང་སྐྱེ་མཆེད་རྣམས་འགག་པར་བྱེད་པ་སྲོག་གི་དབང་པོ་དང་སྐྱེ་མཆེད་རྣམས་རྣམ་པར་འཇིག་པ་རང་གི་སྐྱེ་བོ་དང་གྲོགས་པོ་དང་གཉེན་འབྲེལ་རྣམས་དང་ཕྱིས་མི་འཕྲད་པར་འགྱུར་བ་སྐལ་བ་འཐུན་པ་རྣམས་རླག་པར་བྱེད་པ། སྐྱེ་བ་གཞན་དུ་འགྲོ་བར་གྱུར་པས་རང་གི་ལས་ཀྱི་འབྲས་བུའི་ལམ་རྣམས་ཟ་བར་བྱེད་པའི་སྐྱེས་བུ་ཚེ་མཐར་ཐུག་པ་ན་ལུས་གཏོང་བ་ནི་སེམས་ཅན་རྣམས་ཀྱིས་ངེས་པར་མྱོང་བར་གྱུར་པ་ཡིན་ནོ། །དེའི་རྗེས་ཐོགས་ལ་སྲིད་པ་བར་མ་དོ་བར་སྐྱེ་བར་འགྱུར་བ་འདི་ནི་འཆི་བ་ཞེས་བརྗོད་དེ། ཀྱེ་ལྷ་དག་དེ་ལ་དེ་དག་ནི་ཅི་ནས་ཀྱང་ཉམས་སུ་མྱོང་བར་འགྱུར་བ་ནི་སྐྱེ་བ་ཡིན་པ་གང་གི་ཕྱིར་ཐམས་ཅད་ལ་འཆི་

70-309b

བ་ངེས་པར་འབྱུང་བ་ཡིན་ནོ། །གལ་ཏེ་ཤེད་ན་མཐར་ཐུག་པར་གྱུར་ནས་འཆི་བར་འགྱུར་བ་དང་ཤི་ནས་ཀྱང་མིར་སྐྱེ་བར་འགྱུར་བ་དང་། སྐྱེས་པ་ཡང་མི་འཆི་བར་འགྱུར་བ་དེ་དག་རྣམས་ནི་གནས་མེད་དོ། །དེའི་ཕྱིར་མྱུར་ཞིང་རིངས་པས་ཀྱང་མིར་སྐྱེ་བར་འགྱུར་བའི་ཡིད་བྱས་པར་གྱུར་ཏ་རེ། དེ་ནས་ཡང་དེའི་དུས་ན་འཐབ་བྲལ་བ་རྣམས་ཀྱི་བདག་པོ་མུ་སུ་ལུན་དྷ་དེས་ཚིགས་སུ་བཅད་པའི་དབྱངས་རྣམས་བརྗོད་པ། ཇི་ལྟར། ཇི་སྐད་བཤད་པའི་མིའི་སྡུག་བསྔལ། །སྲིད་པ་བར་མ་དོར་ཡང་ནི། །སྐྱེས་པ་རྣམས་ནི་ཕྱི་ནས་ཀྱང་། །ངེས་པར་འཆི་བར་འགྱུར་བ་ཡིན། །སྲིད་པ་བར་མར་ཀུན་གནས་ནས། །ལས་རྣམས་ཀྱིས་ནི་དྲངས་གྱུར་པ། །ལམ་རིང་འགྲོ་བའི་སྡུག་བསྔལ་གང་། །དེ་ནི་བརྗོད་པར་མི་བཟོད་དོ། །བཤང་དང་གཅི་བར་ནུབ་གྱུར་པའི། །ཚ་བས་ཀྱང་ནི་མནར་གྱུར་པའི། །མངལ་ན་གནས་པའི་སྡུག་བསྔལ་གང་། །སྨྲ་བར་བཟོད་པ་མ་ཡིན་ནོ། །ཟས་ཀྱི་རོ་ལ་བརྐམ་པ་དང་། །རྟག་ཏུ་དེ་ལ་སོད་པའི་སེམས། །རོ་ལ་སྲེད་པའི་སྡུག་བསྔལ་གང་། །དེ་ནི་བརྗོད་པར་མི་བཟོད་དོ། །ཡིད་ནི་འདོད་པས་བསྲེགས་པ་དང་། །འདོད་པ་ལ་ནི་སྲེད་པའི་སེམས། །གང་གིས་སྡུག་བསྔལ་ལྷག་གྱུར་པ། །དེ་ནི་བརྗོད་པར་མི་བཟོད་དོ། །མི་རྣམས་དུག་དང་མེ་འདྲ་བའི། །མི་སྡུག་པ་དང་ལྷན་ཅིག་ཕྲད། །དེ་ལས་སྡུག་བསྔལ་སྐྱེ་འགྱུར་གང་། །དེ་ནི་སྨྲ་བར་བཟོད་མ་ཡིན། །སྡུག་པ་དང་བྲལ་སྡུག་བསྔལ་གང་། །ཆེས་ཆེ་མི་རྣམས་ལ་སྐྱེ་བ། །བཟོད་པར་དཀའ་དང་ཤིན་ཏུ་དྲག །དེ་ནི་བརྗོད་པར་བཟོད་མ་ཡིན། །ཚ་གྲང་ལ་སོགས་འཇིགས་ཆེན་པོ། །ཆེན་པོ་རྣམ་པ་དུ་མ་རྣམས། །སྡུག་བསྔལ་དྲག་པོ་ཀུན་ཏུ་སྐྱེ། །དེ་དག་བརྗོད་པར་བཟོད་པ་མིན། །ནད་སྐྱེས་སྲོག་ནི་གཅོད་བྱེད་པོ། །དུས་ཀྱི་ཕོ་ཉ་ལྟ་བུ་གཞན། །གང་སྡུག་སྲོག་ཆགས་རྣམས་མཐོང་ནས། །དེ་བརྗོད་པར་ནི་བཟོད་མ་ཡིན། །རང་དབང་མེད་པར་བཀྲེན་པ་ཡི། །རྟག་ཏུ་གཞན་གྱི་དབང་འགྲོ་རྣམས། །ཕན་པ་རབ་ཉམས་སྡུག་བསྔལ་གང་། །དེ་ནི་བརྗོད་པར་བཟོད་མ་ཡིན། །རྟག་ཏུ་ཚོལ་ཁྲོས་བྱས་པ་ཡི། །སྲེད་པའི་དུག་གིས་བསྲེགས་པ་ཡི། །ལྷ་རྣམས་གང་གི་སྡུག་

70-310a

བསྔལ་ནི། །དེ་བརྗོད་བྱ་བར་བཟོད་པ་མིན། །རྒྱུན་མི་འཆད་པར་རྣམ་མང་དུ། །སྡིག་གྲོགས་བསྐྱེད་པའི་སྡུག་བསྔལ་གང་། །ངན་སོང་སྐྱེད་པར་བྱེད་པའི་གང་། །དེ་ནི་བརྗོད་པར་བཟོད་མ་ཡིན། །བྲེལ་དོག་བུ་དང་བུ་མོ་ཡི། །སྙིང་ལ་ཇི་ལྟ་བུར་སྐྱེ་བ། །དམྱལ་བ་རྣམས་ཀྱི་རྩེད་མོ་འདི། །བརྗོད་པར་བཟོད་པ་དེ་མ་ཡིན། །བཀྲེས་དང་སྐོམ་པའི་མེ་དག་གིས། །ཤིན་ཏུ་བསྲེགས་དང་སྲེག་འགྱུར་བའི། །ཆུད་ཟོས་ཡིད་ཀྱི་སྡུག་བསྔལ་གང་། །དེ་ནི་བརྗོད་པར་བཟོད་པ་མིན། །རྟག་པ་ཉིད་དུ་ཁ་དྲག་པ། །གཉེན་གྲོགས་སྐྱེ་བོའི་སྙིང་བྱམས་པའི། །མྱ་ངན་ལས་སྐྱེས་སྡུག་བསྔལ་གང་། །དེ་ནི་སྨྲ་བར་བཟོད་མ་ཡིན། །འཁར་བ་ལ་བརྟེན་སྒུར་བར་འགྲོ། །སེམས་དང་དབང་པོ་སྟོབས་ཆུང་བའི། །ལུས་རྙིངས་པ་ཡི་སྡུག་བསྔལ་གང་། །དེ་ནི་བརྗོད་པར་བཟོད་མ་ཡིན། །ཡིད་དགའི་འཇིག་རྟེན་འདི་ནས་ནི། །འཆི་བདག་གིས་ནི་ཁྲིད་གྱུར་པའི། །འགྲོ་ལ་སྡུག་བསྔལ་གང་སྐྱེ་བ། །དེ་བརྗོད་པར་ནི་བཟོད་མ་ཡིན། །འབྱུང་པོ་ཀུན་གྱིས་མི་མཐོང་ཞིང་། །ལས་རྣམས་ཀུན་གྱིས་རྒྱལ་མིན་པར། །སེམས་ཅན་ཐམས་ཅད་རྣམ་འཇོམས་པ། །འཆི་བདག་ཅེས་ནི་བརྗོད་པ་ཡིན། །བཟོད་པར་དཀའ་བའི་སྟོབས་པོ་ཆེ། །སེམས་སྟོབས་གཏུམ་པས་ཀུན་རྒྱུ་བ། །སོ་སོའི་འཇིགས་ཆེན་དུ་མ་ནི། །འཆི་བདག་ཅེས་ནི་བརྗོད་པ་ཡིན། །བཟློག་ཐབས་མེད་པའི་དུས་ཀྱི་མེ། །སེམས་ཅན་རྣམས་ཀྱི་ངེས་མྱོང་བ། །མི་རྣམས་གསོན་པའི་བར་ཆད་བྱེད། །འཆི་བདག་ཅེས་འདི་བརྗོད་པ་ཡིན། །ཇི་བཞིན་དུས་ཀྱིས་རབ་འཇོམས་པ། །གསོན་པ་ཡང་ནི་རྣམ་པར་འཇོམས། །ཕུང་པོ་ཁམས་རྣམས་ལེགས་འཛད་པ། །འདི་ནི་འཆི་བདག་ཏུ་བརྗོད་དོ། །སྐྱེས་ནས་ཡོད་པ་ཡང་རྟག་པར། །གཉེན་བཤེས་གྲོགས་དང་འབྲལ་བ་ཡིན། །སླར་ཡང་དེ་དག་དང་ཕྲད་མེད། །འདི་ནི་འཆི་བདག་ཅེས་བརྗོད་དོ། །བསྲན་པར་མི་བཟོད་མི་བཟོད་པའི། །འཆི་བ་ཇི་སྲིད་མ་བྱུང་བ། །དེ་སྲིད་ཆོས་ནི་ཡིད་ལ་གྱིས། །དེས་ནི་སྙིང་པོ་ལྷ་ཡི་གནས། །ལེགས་པར་གསོན་

70-310b

པ་དེ་ཡིན་ཏེ། །གང་གི་ཡིད་ལ་ཆོས་གནས་པའོ། །ཆོས་དང་རྣམ་པར་བྲལ་བ་ཡི། །གསོན་པ་གསོན་པར་འདོད་པ་མིན། །གང་གིས་ཡིད་ལ་སངས་རྒྱས་གནས། །དེ་ནི་ལེགས་པར་གསོན་པ་ཡིན། །སངས་རྒྱས་དང་ནི་རྣམ་བྲལ་བའི། །གསོན་པ་གསོན་པ་མིན་པར་འདོད། །གང་གི་ཡིད་ལ་ཆོས་གནས་པ། །དེ་ནི་ལེགས་པར་གསོན་པ་ཡིན། །ཆོས་དང་རྣམ་པར་བྲལ་བ་ཡི། །གསོན་པ་གསོན་པ་མིན་པར་འདོད། །གང་གི་ཡིད་ལ་དགེ་འདུན་གནས། །དེ་ནི་ལེགས་པར་གསོན་པ་ཡིན། །དགེ་འདུན་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །གང་ཞིག་བདེན་པ་ལ་གནས་ཡིད། །དེ་ནི་ལེགས་པར་གསོན་པ་ཡིན། །བདེན་པ་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །གང་ཞིག་ཡིད་ནི་ལམ་ལ་གནས། །དེ་ནི་བདེ་བར་འཚོ་བ་ཡིན། །ལམ་ནི་རྣམ་པར་སྤངས་པ་ཡི། །གསོན་པ་གསོན་པ་མིན་པར་འདོད། །མྱ་ངན་འདས་པར་འགྲོ་བ་ལ། །གང་གི་བློ་ནི་རྟག་ཏུ་གནས། །དེ་ནི་ལྷ་ཡི་ལྷ་ཞེས་བརྗོད། །འདི་ན་གང་རྩེ་ལྷ་མ་ཡིན། །རྟག་ཏུ་སེམས་ནི་རྩེ་གཅིག་པས། །བསམ་གཏན་བྱེད་པས་རྩེ་འགྱུར་གང་། །དེ་ནི་བདེ་ལྡན་ཆགས་བྱེད་པའི། །སྲིད་པའི་རྩེད་མོ་རྩེད་མོ་མིན། །རྨོངས་ཆགས་མང་དུ་ཉེར་རྩེ་བའི། །སྲིད་སྐྱོན་འདི་རྣམས་གོ་གྱིས་ལ། །མྱ་ངན་འདས་ལ་བརྩོན་པར་གྱིས། །དེ་དག་སྙིང་པོ་དམ་པར་འདོད། །དེ་ལྟར་འཐབ་བྲལ་གྱི་བདག་པོ་དེས་རྣམ་པ་དུ་མར་གཞན་རྣམས་ལ་ཕན་པ་སྒྲུབ་པར་བྱེད་དེ། ལྷ་དེ་དག་རྣམས་ཀྱི་ཡིད་དེ་དག་རླན་པར་བྱེད་དོ། །ཇི་ལྟར་འཐབ་བྲལ་གྱི་ལྷ་དེ་དག་རྣམས་ངན་སོང་དུ་འགྲོ་བར་མི་འགྱུར་བར་བྱེད་དོ། །དེ་ནས་འཐབ་བྲལ་གྱི་ལྷ་དེ་དག་རྣམས་ཀྱིས་མུ་སུ་ལུན་དྷ་ལ་འདི་སྐད་ཅེས་བརྗོད་དོ། །ཀྱེ་འཐབ་བྲལ་བ་རྣམས་ཀྱི་བདག་པོ་ཇི་ལྟ་བ་བཞིན་གོ་ལགས་ཀྱིས། ཇི་ལྟར་ཁྱོད་ཀྱིས་བཤད་པ་དེ་དག་རྣམས་ཐམས་ཅད་ནི་བདེན་པ་ལགས་ཏེ། བདག་ཅག་གིས་འདིར་མངོན་སུམ་དུ་བགྱིས་སོ། །ཇི་ལྟར་བདག་ཅག་རྣམས་ཀྱི་དྲུང་ན་རིམ་པ་རྣམས་ཐམས་ཅད་ཀྱིས་

70-311a

གླགས་པར་གྱུར་པའི་ལྷ་རྣམས་བཟོད་པར་དཀའ་བའི་ཤིན་ཏུ་སྡུག་བསྔལ་བར་གྱུར་ཏོ། །དེ་དག་རྣམས་ཀྱི་ཚད་དང་། མདོག་དང་། དབྱིབས་དང་། རྒྱ་ཆེ་བར་གྱུར་པའི་རིམ་པ་གང་དག་གི་ཁྱད་པར་རྣམས་ནི་བདག་ཅག་རྣམས་ཀྱིས་བཅུའི་ཆ་ཡང་། ཅུང་ཟད་ཙམ་དུ་ཡང་མི་ཆོག་པ་དེ་དག་རྣམས་ཐམས་ཅད་ཀྱང་བར་དུ་གཅོད་པ་འབྱུང་བར་འགྱུར་ན། ཅིའི་ཕྱིར་ན་བདག་ཅག་རྣམས་ལ་འབྱུང་བར་མི་འགྱུར་ལགས། དེ་དག་རྣམས་ཀྱི་དྲུང་དུ་འཐབ་བྲལ་གྱི་བདག་པོ་དེ་ཚིག་རྣམས་རྗོད་པར་བྱེད་པ། ཇི་ལྟར་ལྷ་དེ་དག་རྣམས་ཀྱི་སྡུག་བསྔལ་ཁྱེད་ཀྱིས་མཐོང་བ་དེ་རྣམས་ནི་ཅུང་ཟད་ཙམ་ཡིན་ལ། ཁྱེད་རྣམས་ལ་ནི་དེ་ལས་བརྒྱ་འགྱུར་འབྱུང་བར་འགྱུར་ཏེ། བག་མེད་པས་ཀུན་ནས་ཁྲིད་པར་གྱུར་ནས། གལ་ཏེ་ཆོས་མ་ཡིན་པའི་རྗེས་སུ་འཇུག་པར་གྱུར་ཏེ། དམྱལ་བ་དང་། ཡི་དགས་དང་། དུད་འགྲོར་སྐྱེས་པར་གྱུར་ནའོ། །ཅི་སྟེ་ཆོས་ཀྱི་རྗེས་སུ་འཇུག་པར་གྱུར་ན་ནི། དེའི་ཚེ་ངན་སོང་གི་སྒོ་རྣམས་ནི་བཀག་པར་གྱུར་ཅིང་། ལྷ་དང་མི་རྣམས་ཀྱི་རྣམ་པ་སྣ་ཚོགས་པའི་བདེ་བ་རྣམས་ལ་ཉེ་བར་ལོངས་སྤྱོད་ནས། ཕྱི་ནས་ནི་དེ་རྒས་པ་མེད་པར་འགྱུར་བ་དང་། གཞན་ཡང་མྱ་ངན་མེད་པར་གྱུར་པའི་རྟག་པའི་གོ་འཕང་ཀུན་ནས་འཐོབ་པར་འགྱུར་ཏེ། གང་ལ་ཇི་སྐད་དུ་བཤད་པའི་སྡུག་བསྔལ་དེ་དག་རྣམས་འབྱུང་བར་མི་འགྱུར་བ་ཡིན་ནོ། །དེ་ལ་རྒྱུ་དེ་དག་གི་ཕྱིར་ན་བག་མེད་པ་རྣམས་ལ་ཀུན་ཏུ་འཇུག་པར་མ་བྱེད་དང་། འདོད་པ་དེ་དག་རྣམས་ནི་བདེ་བ་མ་ཡིན་ནོ། །རྟག་པ་ཡང་མ་ཡིན་ཏེ། འདི་དག་གིས་ནི་ཟག་པ་མེད་པའི་ཡེ་ཤེས་ཀྱི་བསམ་གཏན་གྱི་བདེ་བ་བླ་ན་མེད་པ་རྣམས་ཀྱི་བཅུ་དྲུག་གི་ཆར་ཡང་མི་ཕོད་དོ། །དེ་ནས་དེ་དག་གི་དྲུང་ནས་འཐབ་བྲལ་བ་རྣམས་ཀྱི་བདག་པོ་དེས་ཚིག་དེ་དག་རྣམས་ཐོས་ནས། གཞན་ཡང་ལྷ་དེ་དག་རྣམས་ཉིད་ཀྱི་མངོན་སུམ་དུ་ཉེས་དམིགས་རྣམས་བྱེད་དོ། །ཡང་གཞན་བརྗོད་པ་ཇི་ལྟར་ཁྱོད་ཀྱི་བདག་ཅག་རྣམས་ལ་སྟོན་པར་བགྱིད་པ་དེ་དག་རྣམས་ནི་ཕན་པར་འདོད་པ་ལགས་པས། དེ་ལྟར་བདག་ཅག་

70-311b

རྣམས་ཀྱིས་བགྱི་ལགས་སོ། །ལྷ་ལགས་གཞན་ཡང་ཇི་ལྟར་ན་བདག་ཅག་རྣམས་ཀྱིས་ཀུན་ཏུ་འདོད་ཆགས་པས་བྱས་པའི་སྡུག་བསྔལ་དེ་དག་གིས་བདག་ཅག་གིས་འཐོབ་པར་མི་འགྱུར་བ་ལགས། དེ་ནས་དུས་དེའི་ཚེ་ན་མུ་སུ་ལུན་དྷ་དེས་ཚིགས་སུ་བཅད་པའི་དབྱངས་བརྗོད་པ། ཇི་ལྟར། བདག་ཉིད་བདག་གི་མགོན་པོ་ཡིན། །གཞན་གང་རྗེས་སུ་མགོན་པོར་གྱུར། །གང་ཕྱིར་བདག་ཉིད་ལེགས་བཏུལ་བས། །རྟག་པའི་གོ་འཕང་འཐོབ་པར་འགྱུར། །ལེགས་པའི་ལས་བྱས་མཛེས་འགྱུར་ལྟར། །མགོན་པོ་གཞན་ནི་མ་ཡིན་ནོ། །སྐྱེ་བ་གཞན་ནི་སྟོང་དུ་ཡང་། །དེ་ལ་དེ་དག་རྗེས་སུ་འཇུག །རྒ་དང་འཆི་བ་སྤངས་པ་ཡི། །གནས་ཀྱི་མཆོག་ཏུ་འབབ་པར་བྱེད། །ཤིན་ཏུ་དགེ་བའི་རང་ལས་འདི། །བསམ་པ་ཡིས་ནི་ལྷ་ཡི་མཆོག །ལེགས་པའི་ལས་ལ་སྤྱོད་པར་གྱིས། །ཕན་ཆེར་ཟས་ནི་དེ་ལས་ཟ། །དེ་ལྟར་མུ་སུ་ལུན་དྷ་དེས་ལྷ་དེ་དག་རྣམས་ལ་བསྟན་ནས། གཞན་ཡང་བརྗོད་པ། སོང་ལ་ནགས་དང་ཉེ་བའི་ནགས་རྣམས་སུ་བརྒྱུས་ནས། འདོད་པར་གྱུར་པའི་སྒྲ་དང་། རོ་དང་། གཟུགས་དང་། དྲི་རྣམས་ཀྱིས་ཁྲིད་པར་གྱུར་ཡང་། གང་གི་ཕྱིར་ཁྱེད་རྣམས་ཇི་ལྟ་བ་བཞིན་དུ་བག་ཡོད་པར་གྱིས། དེ་ནས་དེ་ལྟར་གྱུར་པ་དང་། དེ་ནས་ལྷ་དེ་དག་གིས་ཚིག་དེ་དག་རྣམས་ཐོས་པར་གྱུར་པ་དང་འདི་སྐད་ཅེས་བརྗོད་དོ། །ཇི་ལྟ་བ་བཞིན་དུ་བདག་ཅག་རྣམས་ཀྱིས་སྨོན་ལམ་གདབ་པར་བྱ་སྟེ། ཇི་ལྟར་མ་འོངས་པའི་དུས་ན་འདི་འབྱུང་བར་འགྱུར་བ་ཡང་དག་པར་རྫོགས་པའི་སངས་རྒྱས་བླ་ན་མེད་པའི་སྐྱེས་བུ་འདུལ་བ། ཁ་ལོ་སྒྱུར་བ། མཚན་བྱམས་པ་ཞེས་བྱ་བ་དེའི་གསུང་རབ་ལ་བདག་ཅག་རྣམས་མིའི་འཇིག་རྟེན་དུ་སྐྱེ་བར་གྱུར་ཅིག །ཇི་ལྟར་འདི་མ་འོངས་པའི་དུས་ན་འབྱུང་བར་འགྱུར་བའི་འདུས་པ་དང་པོ་དེ་བདག་ཅག་རྣམས་བྱེད་པ་དང་། ཆོས་རྣམས་མཉན་ནས་ཟག་པ་ཟད་པར་བྱེད་པར་ཡང་བདག་ཅག་གྱུར་ཅིག །དེ་ལྟར་ཁ་ཅིག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པར་གྱུར་ཏོ། །

70-312a

སྨོན་ལམ་བཏབ་ནས་ཀྱང་སངས་རྒྱས་དང་། ཆོས་དང་། དགེ་འདུན་རྣམས་ལ་ཉེ་བར་སྐྱབས་སུ་ཡང་སོང་བར་གྱུར་ཏོ། །དེ་དག་རྣམས་ནི་ངེས་པར་ཡང་བྱམས་པའི་གསུང་རབ་ལ་མིའི་འཇིག་རྟེན་དུ་སྐྱེ་བར་འགྱུར་རོ། །ལྷ་གཞན་སྟོང་ཕྲག་བདུན་ཅུ་པོ་རྣམས་ནི་ལྷན་ཅིག་ཏུ་དམ་པའི་ཆོས་ཐོས་ནས། ཟག་པ་རྣམས་ནི་ཟད་པར་བྱེད་དོ། །གང་ཡང་གཞན་དེ་དག་རྣམས་ཀྱིས་ནི་དེ་བཞིན་གཤེགས་པ་དེའི་སྐུ་གདུང་ནི་མཐོང་བར་འགྱུར་ལ། སྔོན་དང་པོར་དེ་དག་རྣམས་ཀྱིས་གྱ་ནོམ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སྨོན་ལམ་བཏབ་པ་ཡིན་ནོ། །གཞན་ཡང་ལྷ་བརྒྱ་ཕྲག་གིས་རང་སངས་རྒྱས་ཀྱིས་སེམས་སུ་ཡོངས་སུ་བསྔོས་སོ། །དེ་དག་རྣམས་ཐམས་ཅད་ཀྱི་ཡང་སྨོན་ལམ་རྣམས་འབྲས་བུ་དང་བཅས་པར་འགྱུར་བ་ཡིན་ནོ། །དེ་ནས་འཐབ་བྲལ་བ་རྣམས་ཀྱི་བདག་པོ་དེས་ཡིད་ཀྱིས་རྟོགས་པར་གྱུར་ནས། བདག་གིས་གཞན་ལ་ཕན་པ་ཤིན་ཏུ་མང་བ་བྱས་ཏེ། དེ་དག་རྣམས་སླར་ཡང་བག་མེད་པས་ཕྲོགས་པར་མི་འགྱུར་བར་འཐབ་བྲལ་གྱི་བདག་པོ་དེས་རྗེས་སུ་གནང་ངོ་། །ལྷ་དེ་དག་རྣམས་ཡིད་ལས་སུ་རུང་བར་བྱས་པ་དང་། ཡིད་ལེགས་པར་དུལ་བར་བྱས་པས། མུ་སུ་ལུན་དྷ་དེ་ལ་གཡས་ཕྱོགས་ནས་བསྐོར་བ་བྱས་ནས། མཚོ་དེའི་དྲུང་དུ་སོང་བར་གྱུར་ཏོ། ། མུ་སུ་ལུན་དྷ་ཡང་གཞན་ལ་ཕན་པ་དེ་དག་རྣམས་བྱས་ནས། ཕྱིར་ཡང་ས་གཞན་རྣམས་ཀྱི་ལྷ་གཞན་རྣམས་ལ་ཕན་པར་བྱ་བའི་དོན་དུ། ལེགས་པར་སོང་བར་གྱུར་ཏོ།། །།འཐབ་བྲལ་གྱི་ལྷ་རྣམས་ཀྱི་ས་ལས་རྟག་ཏུ་བདེ་བའི་ས་སྟེ་བརྒྱད་པ་རྫོགས་སོ།། །།མུ་སུ་ལུན་དྷའི་རྫུ་འཕྲུལ་ཆེན་པོ་ཞེས་བྱ་བ་ཡང་རྫོགས་སོ།། །།

70-312b

empty page

Ātman - Though it can simply be used as the expression "I" or "me", in Indian thought the notion of self refers to a permanent, unchanging entity, such as that which passes from life to life in the case of people, or the innate essence (svabhāva) of phenomena. Skt आत्मन्  Tib བདག་  Ch 我;灵魂  

Go to the page with the definition of 'བདག་'