Jo bo'i blo sbyong don bdun ma/Full text

ཇོ་བོའི་བློ་སྦྱོང་དོན་བདུན་མ།

jo bo'i blo sbyong don bdun ma

Atisa's Seven-Point Mind Training

FULL TEXT

Descriptionངོ་སྤྲོད།

Curiously, in the lineage of its transmission, the impression is given that this particular instruction was conferred by Atiśa on Gönpawa, with no mention of Dromtönpa as an intermediary, as is the case for most of the mind training instructions. Without further textual sources, especially works attributed to Gönpawa, it is extremely difficult to determine the earliest source of this particular instruction. As for its authorship, my own guess is that Könchok Gyaltsen himself may have penned it, at least in its present form as found in [the Blo sbyong brgya rtsa, Mind Training: The Great Collection]. (Thupten Jinpa, Mind Training: The Great Collection, 608n373)No Tibetan description!

Reference	jo bo'i blo sbyong don bdun ma [ཇོ་བོའི་བློ་སྦྱོང་དོན་བདུན་མ།]. [Atisa's Seven-Point Mind Training].
People

Tibetan

[edit]

Source	Theg pa chen po blo sbyong brgya rtsa (Tibetan Classics)
Date	2025-10-15
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

༄༅། །ཇོ་བོའི་བློ་སྦྱོང་དོན་བདུན་མ་ལགས་སོ།།

༄༅། །ན་མོ་གུ་རུ། དུས་གསུམ་སངས་རྒྱས་ཀུན་གྱི་ལམ་གྱི་མཆོག །བྱམས་དང་སྙིང་རྗེ་སྟོང་ པ་ཟུང་འཇུག་པ། །བདག་གཞན་མཉམ་ཉིད་བདེ་སྡུག་བརྗེ་ནུས་པའི། །ཐུགས་རྗེ་བྱང་ཆུབ་སེམས་ ལ་ཕྱག་འཚལ་ལོ། །དོན་དམ་སྟོང་ཉིད་བདག་གཞན་མཉམ་པ་ཉིད། །དགྲ་གཉེན་མེད་པར་ མཉམ་ཉིད་བྱང་ཆུབ་སེམས། །གང་ལ་སྐྱེས་ན་བྱང་ཆུབ་ཐོབ་བྱེད་པ། །འབྲི་བསྣན་མེད་པར་བླ་ མའི་གསུང་བཞིན་བྲི།། དེ་ལ་འདིར་ཡིད་ཆེས་ཤིང་ཁུངས་བཙུན་པ་བླ་མ་བརྒྱུད་པའི་ལོ་རྒྱུས་དང༌། བྱིན་རླབས་ འཇུག་པར་བྱ་བའི་ཕྱིར་བླ་མའི་རྣལ་འབྱོར་བསྒོམ་པ་དང་། སེམས་ཅན་ལ་བྱམས་པ་བསྒོམ་པ་དང་། འཁྲུལ་འཁོར་གསུམ་གྱི་སྒོ་ནས་སྙིང་རྗེ་བསྒོམ་པ་དང་། སྨོན་འཇུག་གི་སེམས་གཉིས་ལ་ངོ་སྤྲོད་པ་དང་། འགལ་རྐྱེན་ལམ་དུ་བྱ་བ་དང་། དམིགས་པ་ཅན་ལ་ཕུར་ཚུགས་སུ་བསྒོམ་པ་དང་བདུན་ལས། དང་པོ་བླ་མ་བརྒྱུད་པའི་ལོ་རྒྱུས། དང་པོ་ནི། ཇོ་བོ་ལ་བླ་མ་མང་དུ་ཡོད་ཀྱང་འདིའི་བརྒྱུད་པ་ནི། རྡོ་རྗེ་འཆང་། ཏེ་ལོ་པ། ནཱ་ རོ་པ། ཌོམྦཔ། ཇོ་བོ་རྗེ། འཚེང་དབང་ཕྱུག་རྒྱལ་མཚན།༦ པོ་ཏོ་བ། རྒྱ་ལྕགས་རི་པ། ལྷ་རི་རྩ་བརྒྱད་ པ༑ དྭགས་པོ་ལྷ་རྗེ། ཕག་གྲུ རྒྱ་སྒོམ་རི་བ་ཞིག་པོ།༑ རྒྱ་མཁར་རིས། རིན་ཆེན་བྲག་དམར་བ། ཞང་བྲག་དཀར་བ། བླ་མ་དཀོན་མཆོག་བྱང་ཆུབ་དཔལ། གཞོན་ནུ་གྲགས། སློབ་དཔོན་ཞང༌། དེས་ ཤེས་རབ་བསོད་ནམས། དེས་བརྩོན་འགྲུས་ལ། དེས་སློབ་དཔོན་ཆོས་མཆོག་ལ། དེས་སློབ་དཔོན་ ཚུལ་ཁྲིམས་དཔལ་ལ། དེས་བུདྡྷ་རཏྣ་ལ། དེས་ཀཱི རྟི་ཤཱི་ལ་ལ། དེས་ཆོས་རྗེ་རྒྱལ་བ་བཟང་པོ་ལ། དེས་ ཆེས་རྗེ་བསོད་ནམས་རིན་ཆེན་ལ། དེས་གཞོན་ནུ་རྒྱལ་མཆོག་ལ། དེས་བདག་ལའོ།། གཉིས་པ་བླ་མའི་རྣལ་འབྱོར་བསྒོམ་པ། གཉིས་པ་བྱིན་གྱིས་བརླབས་པའི་ཕྱིར་བླ་མའི་རྣལ་འབྱོར་བསྒོམ་པ་ནི། སེམས་ཅན་ཐམས་ ཅད་ཀྱི་དོན་དུ་བྱང་ཆུབ་ཀྱི་སེམས་བསྒོམ་སྙམ་དུ་སེམས་བསྐྱེད་པའི་ངང་ནས་རང་གི་རྩ་བའི་བླ་མ་པད་ ཟླའི་སྟེང་དུ་བསྒོམས་ལ། དེའི་ཐུགས་ཀ་ནས་འོད་ཟེར་འཕྲོས་ཏེ། ཆོས་འབྲེལ་ཡོད་ཚད་ལ་འཕྲོས་ཚུར་ འདུས་བླ་མ་ལ་ཐིམ། དེ་བཞིན་བརྒྱུད་པའི་བླ་མ་དང་ཡི་དམ་གྱི་ལྷ་ཚོགས་དང༌། སངས་རྒྱས་དང་བྱང་ ཆུབ་སེམས་དཔའ་ཐམས་ཅད་བསྡུས་ལ་བླ་མ་ལ་བསྟིམ། དེ་ནས་ལུས་ལོངས་སྤྱོད་དུས་གསུམ་གྱི་དགེ་ བ་ཐམས་ཅད་བླ་མ་ལ་ཕུལ་ལ་མོས་གུས་དུང་བ་བྱ། བྱམས་སྙིང་རྗེ་བྱང་ཆུབ་ཀྱི་སེམས་ཁྱད་པར་ཅན་ རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ་བོ། །བླ་མའི་རྣལ་འབྱོར་ བསྒོམས་པ་ཚར་བའི་སྐབས་ཤིག། གསུམ་པ་བྱམས་པ་བསྒོམ་པ། དེ་རྣམས་ལ་བྱམས་པ་བསྒོམས་པ་གསུམ་པ་ནི། དང་པོ་རང་གི་རྩ་བའི་ཕ་མ་མདུན་དུ་ བསམས་ལ། མ་འདིས་བདག་དང་ཕུང་པོ་ཉིང་མཚམས་སྦྱོར་བའི་ཚེ་འགྲོ་བ་མིའི་ས་ལ་བཞག་པས་ ཤིན་ཏུ་དྲིན་ཆེ་སྟེ། དེ་ཡང་ཟླ་བ་དགུ་ངོ་བཅུར་ལྟོ་ན་གནས་པའི་ཚེ་བརྩེ་བའི་བསམ་པས་བསྐྱངས་ཏེ། ངའི་བུ་འདི་གཞན་སུ་དང་མི་མཉམ་པ་གཅིག་བྱུང་ན་ཅི་མ་རུང་སྙམ་དུ་བུའི་ཆེད་དུ་མོ་འདེབས། ཕྲུ་ གོགé ཚྭ་ཚྭ་འདེབས།། ཆུ་གཏོར་བཏང་། ཀློག་འདོན་ལ་སོགས་པ་བྱེད། སྦྱོར་བས་ཀྱང་བུ་ལ་གནོད་ པའི་སྤྱོད་ལམ་ཐམས་ཅད་སྤོང་། བཙས་ནས་ཀྱང་སྤུ་ཚོགས་གཅིག་དང་གཉེན་མ་སྦར་གང་" ལས་མེད་ ཅིང་སེ་གོལ་གཅིག་བཞག་ན་འཆི་བ་ལས་སྦྱོང་སྟེ། ཤའི་དྲོད་ལ་རླན། མི་གཙང་པ་ལག་པས་ཕྱིས། ཁའི་ཟས་སྙོད། སྣབས་ལྕེས་ཕྱིས་ཏེ་ཅུང་ཟད་ཆེར་སོང་སྟེ། ཟས་རང་གིས་ཟ་ཤེས་པ་དང་། ཕ་མའི་ མིང་ནས་འབོད་ཤེས་པ་དང་། འགྲོ་ག་ལི་ཙམ་ཤེས་པ་ལ་དགའ་བ་བྱས་ཤིང༌། མ་རང་གི་ལུས་པས་ ཀྱང་གཅེས་པར་བཟུང་། བུའི་ཆེད་དུ་སྐྱིད་སྡུག་གཏམ་གསུམ་ལ་མ་བལྟས་པར་བསྐྱངས། སྙན་པའི་ མིང་ནས་བོས། བྱམས་པའི་མིག་གིས་བལྟས། ཆེར་སྐྱེས་ནས་གཞན་ལ་བྲེ་ཁ་ཕུལ་ཁ་རྩམ་ལ་ངོ་ནག་ ལོག་ལོག་བརྩེགས་ནས་བསགས་པ་ཐམས་ཅད་བུ་ལ་ཕངས་པ་མེད་པར་བྱིན། བུའི་ཆེད་དུ་བདེ་སྡུག་ གཏམ་གསུམ་རང་གིས་བླངས། རང་ལ་ནུས་པ་ཡོད་ན་འཇིག་རྟེན་པའི་ཕུན་སུམ་ཚོགས་པ་ལ་འཁོར་ ལོས་བསྒྱུར་བའི་ལུས་ལ་བཀོད་ཀྱང་ཆེས་སྙམ་པ་མི་སྐྱེ། འཇིག་རྟེན་ལས་འདས་པའི་དབང་དུ་བྱས་ན་ སངས་རྒྱས་ཀྱི་བདེ་བ་ལ་བཀོད་ཀྱང་བུ་ལ་ཆེས་སྙམ་པ་མེད་པར་བྱས། དེ་ལྟར་བརྩེ་བའི་སེམས་ཀྱིས་བསྐྱངས། བྱམས་པའི་མིག་གིས་བལྟས། སྙན་པའི་ཚིག་གིས་ བོས། སྙིང་གི་དུམ་བུ་ཕྱིར་ལུས་པ་ལྟ་བུར་བསྐྱངས། རང་གིས་སྤྱད་དུ་རུང་བའི་ཟས་གོས་ནོར་ཐམས་ ཅད་བུ་ལ་བོག་ཅིང་རང་བས་གཅེས་པར་བཟུང་། ཞག་གཅིག་མེད་ཀྱང་བློ་མི་བདེ་བར་བྱས། ཕན་སྣ་ ཚོགས་ནས་བཏགས། གནོད་པ་སྣ་ཚོགས་ནས་བསལ་བའི་དྲིན་ཅན་འདི་བདག་ལ་འདི་ཙམ་དྲིན་ཆེ་ ན་སྙམ་དུ་མིག་ནས་འཆི་མ་ཕྱུང་བའམ། ལུས་ཀྱི་བ་སྤུ་ལྡང་བ་ཙམ་དུ་བའམ། མ་འདི་ལ་བདག་གིས་ ཇི་ལྟར་བྱས་ནས་ཕན་བཏགས་སྙམ་དུ་བསམས་ལ་འདི་ལྟར་བྱས་ན་བདེ་བ་དང་ལྡན་པར་གྱུར་སྙམ་ དུ་བསམ། དེ་བཞིན་དུ་མཆེད་གྲོགས་བཟའ་ཚང་ལ་བསམ། དེ་ནས་ཡུལ་མི་ཁྱིམ་མཚེས་ལ་བསམ། དེ་བཞིན་དུ་མིག་གིས་མཐོང་བའི་སེམས་ཅན་ལ་བསམ། དེ་ནས་ནམ་མཁའ་ཁྱབ་ཚད་ཀྱིས་སེམས་ ཅན་འགྲོ་བ་རིགས་དྲུག་ཐམས་ཅད་ལ་བསྒོམ། བྱམས་པའི་ཤུགས་ཆུང་ན་རིགས་དྲུག་རེ་རེ་ལ་མ་སྐྱེས་ ཀྱི་བར་དུ་བསྒོམ་དུ་གཞུག བདག་འཁོར་བ་ཐོག་མ་མེད་པ་ནས་ད་ལྟའི་བར་དུ་འཁྱམས་པས་ སེམས་ཅན་གྱི་མ་བྱས་པ་ཡང་གྲངས་མེད་ལ། མདོ་མྱང་འདས་ལས། མ་ཡི་ཐུགས་མཐའ་རྒྱ་ཤུག་ ཚིག་གུ་ཙམ། །རིལ་བུར་བགྲང་ཀྱང་ས་ཡི་ལང་མི་འགྱུར།” །ཞེས་གསུངས་སོ། །མ་མིན་པ་ལ་ཡིན་ པར་བསྒོམ་པ་མིན་པས། སེམས་ཅན་ཐམས་ཅད་ལ་རྩ་བའི་མ་བཞིན་དུ་མ་སྐྱེས་བར་དུ་བསྒོམ། བཞི་པ་སྙིང་རྗེ་བསྒོམ་པ། བཞི་པ་ནི། ལུས་ངག་ཡིད་གསུམ་གྱིས་འཕྲུལ་འཁོར་བཅས་ཏེ་སྙིང་རྗེ་བསྒོམ། དེ་ཡང་ཡིད་ ཀྱི་འཕྲུལ་འཁོར་ནི་རིགས་དྲུག་རེ་རེ་ལ་མ་སྐྱེས་བར་དུ་བསྒོམ་སྟེ། ཚ་དམྱལ་བརྒྱད་ནི། ཡང་སོས། ཐིག་ནག བསྡུས་འཇོམས། ངུ་འབོད། ངུ་འབོད་ཆེན་པོ། ཚ་བ། རབ་ཏུ་ཚ་བ། མནར་མེད་དོ། །དེ་ རྣམས་ནི་དང་པོ་རྣམས་ལ་མཚོན་ཆའི་ཚ་བ། ཕྱི་མ་དག་ལ་ནི་ལྕགས་བསྲེགས་ཀྱི་ཁང་པ་མེ་འབར་བ་ སུམ་རིམས་སུ་བཅུག་ནས་ཡུན་དཔག་ཏུ་མེད་པར་མེས་བསྲེགས་པ་ལ་སོགས་པའི་སྡུག་བསྔལ་དཔག་ ཏུ་མེད་པ་ཡོད་ཅིང་། གྲང་དམྱལ་བརྒྱད་ནི། ཆུ་བུར་ཅན། ཆུ་བུར་རྡོལ་བ་ཅན། ཨ་ཆུ་ཟེར་བ། སོ་ ཐམ་པ། ཀྱི་ཧུད་ཟེར་བ། ཨུཏྤལ་ལྟར་གས་པ། པདྨ་ལྟར་གས་པ་སྟེ། པདྨ་ཆེན་པོ་ལྟར་གས་པ། གྲང་ བའི་དམྱལ་བ་ལ་སྡུག་བསྔལ་དཔག་ཏུ་མེད་པ་ཡོད་པས། དེ་རྣམས་ཀྱི་ཚེ་ཚད་དང༌། ལུས་ཚད་རྣམས་ མངོན་པ་དང་མདོ་དྲན་པ་ཉེར་བཞག་ལ་སོགས་པ་ནས་བཤད་པ་བཞིན་བསམ་ལ་རང་གི་རྩ་བའི་མ་ བཞིན་དུ་མ་འདིས་སྡུག་བསྔལ་བཟོད་གླགས་མེད་པ་མྱོང་ན་སྙིང་རྗེ་སྙམ་དུ་བསམ། མ་འདི་རྣམས་ ལས་ངན་བསགས་པས་སྡུག་བསྔལ་འདི་ལྟ་བུ་དཔག་མེད་མྱོང་བ་སྙིང་རེ་རྗེ། སྡུག་བསྔལ་ལས་ཇི་ ལྟར་བྱས་ན་གྲོལ་བར་འགྱུར་སྙམ་དུ་བསམས་ཞིང་། མཆི་མ་ཉིལ་ཉིལ་ལ་བསྒོམ། ལུས་ཀྱི་འཕྲུལ་ འཁོར་ནི་ཐལ་མོ་གཉིས་འགྲམ་པ་ལ་སྦྱར། གྲུ་མོ་གཉིས་བརླ་ལ་བཙུགས། ལུས་ཙོག་བུར་མགོ་བོ་ བཀུག་ངོ་འཛུམ་བསྡུས་ལ་ངག་ཏུ་ངའི་ཨ་མ་ཨ་མ་ཞེས་འདོན་པ་ངག་གི་འཕྲུལ་འཁོར་རོ།། དེ་བཞིན་དུ་ཡི་དྭགས་ལ་ཡང་ཕྱིའི་སྒྲིབ་པ་ཅན་ལོ་མང་པོའི་བར་དུ་ཟས་སྐོམ་མིག་གིས་ ཀྱང་མི་མཐོང༌། མཐོང་ཡང་རྣག་ཁྲག་དང་གྲེ་ཕུབ་མེ་མདག་ལ་སོགས་པར་སོང་ནས་བཟར་མི་ བཏུབ་པའོ། །ནང་གི་སྒྲིབ་པ་ཅན་ནི་ལྟོ་བ་ལུང་པའི་ལྟོས་ཙམ། ཁ་ཁབ་མིག་ཙམ། མགྲིན་པ་འཇིག་ སྦུག་ཙམ། རྐང་ལག་འཇག་མ་ཙམ་དུ་གྱུར་པས་ཟས་ཁར་མི་ཤོང་། ཤོངས་ཀྱང་མགྲིན་པ་ནས་མི་ཐར་ ལྟོ་ཁངས་ན་རྐང་ལག་གིས་མི་ཐེག་པ་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད། ཟས་སྐོམ་ ཉིད་སྒྲིབ་པར་གྱུར་པ་ནི། བཟའ་བཏུང་ཟོས་པས་གྲེ་ཕུབ་མེ་མ་མུར་དང་ལྕགས་ཀྱི་ཐོ་ལུམ་འབར་བ་ དང༌། ཐལ་བར་སོང་ནས་སྡུག་བསྔལ་བ་ལ་དམིགས་པ་སྔར་བཞིན་སྙིང་རྗེ་བསྒོམ། དུད་འགྲོ་བྱིངས་ ན་གནས་པ་རྣམས་ལ་སྡུག་བསྔལ་བསམ་གྱིས་མི་ཁྱབ་པ་ཡོད་པར་གསུ ངས་ལ་རང་གི་མཐོང་བ་ རྣམས་ལ་ཡང་མ་ཤི་བར་ཁོག་པར་ལག་པ་འཇུག་པ། བྱ་ཡེ་དང་གཅན་གཟན་༩ གཅིག་གིས་གཅིག་ མ་ཤི་བར་ཟ་བ་དང་། སྟོན་ཀའི་ཕྱུགས་ལུག་གསོད་པ་དང་། ཧོར་ལ་སོགས་པས་དུད་འགྲོ་གསོད་པ་ དང༌། མི་ཐེག་བཞིན་དུ་འཁུར་དགོས་པ་དང༌། མི་འབྲུད་བཞིན་དུ་རྨོས་རྨོ་དགོས་པ་དང་། གཞན་ཡང་ གླེན་ཞིང་གཏི་མུག་པ་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་པས། དེ་རྣམས་ལ་དམིགས་ལ་ སྙིང་རྗེ་སྔར་བཞིན་དུ་སྒོམ་མོ།། མི་ལ་ཡང་སྐྱེ་རྒ་ན་འཆིའི་སྡུག་བསྔལ་དང༌། མེད་པ་ཙལ་གྱིས་མི་རྙེད། ཡོད་པ་བསྲུངས་ ཀྱིས་མི་ཐུབ། བྱམས་པ་དང་བྲལ་བའི་དུ ཁ། སྡང་བ་དང་ཕྲད་པའི་སྡུག་བསྔལ། སྐྱིད་མི་སྟེར་བ་ཚིག་ ངན་དྲག་འདུལ་ལ་སོགས་པ་མེད་ཐབས་མེད་པའི་བུ་དང་། ཁྱོ་དང་། ཆུང་མ་དང་། གྲོགས་དང་། དཔོན་ཤི་བ་ལ་སོགས་པའི་སྡུག་བསྔལ་དཔག་ཏུ་མེད་པ་དང༌། གཞན་ཡང་ཚེ་འདིར་སྡིག་པ་ཤ་དག་ སྤྱོད་པ་བཟང་སེམས་སྐད་ཅིག་ཀྱང་མི་རྒྱུ་བ་ཤི་མ་ཐག་ངན་སོང་མིན་པ་འགྲོ་ས་མེད་པ་འདི་རྣམས་ སྙིང་རེ་རྗེ་སྙམ་དུ་སྔར་བཞིན་བསྒོམ། ལྷ་མ་ཡིན་རྣམས་ལ་འཐབ་རྩོད་དང་གསོད་ཤིའི་སྡུག་བསྔལ་ དཔག་ཏུ་མེད་པ་ཡོད་སྙམ་དུ་བསམ། ལྷ་ལ་ཡང་འཆི་ལྟས་ཀྱི་སྡུག་བསྔལ་དཔག་ཏུ་མེད་པ་དང་། གྲོགས་རྣམས་ཀྱི་ཕ་རོལ་བོར་བའི་སྡུག་བསྔལ་དང་། ལྷ་འགའ་ཞིག་ལ་ཏམ་བུར་རེ་ཙམ་ལས་ལོངས་ སྤྱོད་གཞན་མེད་པ་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་པས། དེ་རྣམས་ལ་དམིགས་ བསལ་སྔར་བཞིན་སྙིང་རྗེ་བསྒོམ་མོ། །དེ་རྣམས་ཀྱི་ཚེ་ཚད་ལུས་ཚད་རྣམས་མངོན་པ་ནས་བཤད་པ་ ལྟར་ཤེས་པར་བྱའོ། །མདོར་ན་སེམས་ཅན་འདི་རྣམས་མ་དྲིན་ཅན་ཡིན་པས་མ་འདི་རྣམས་སྡུག་ བསྔལ་འདི་འདྲ་བ་ལ་སྤྱོད་པ་སྙིང་རེ་རྗེ་བསམ་ཞིང་། བདག་གི་མ་འདི་རྣམས་ཀྱི་ཤེས་རབ་ཀྱི་མིག་ ལོང་། ཐབས་ཀྱི་རྐང་པ་ཆག བླ་མའི་ལོང་ཁྲིད་པ་དང་བྲལ། གྲོགས་བཟང་པོ་ཆོས་ལ་སྦྱོར་བའི་འཁོར་ དང་བྲལ་བ་འདི་རྣམས་སྡུག་བསྔལ་དང་བྲལ་བར་གྱུར་ཅིག་སྙམ་དུ་མཆི་མ་ཉིལ་ཉིལ་བསྒོམ་མོ།། ལྔ་པ་གཏོང་ལེན་བསྒོམ་པ།༡༠ ལྔ་པ་ལ་གཉིས་ལས། དང་པོ་སྨོན་པ་ནི། རང་གི་ལུས་ལ་ན་ཚ་བྱུང་ངམ་མི་བདེ་བ་ཅི་ བྱུང་ཡང་དེའི་དུས་སུ་བདག་གི་མི་བདེ་བ་འདིའི་སྟེང་དུ་སེམས་ཅན་ཐམས་ཅད་ཀྱི་སྡུག་བསྔལ་ ཐམས་ཅད་སྨིན་པར་གྱུར་ཅིག སེམས་ཅན་ཐམས་ཅད་ཀྱི་སྡུག་བསྔལ་བདག་ལ་སྨིན་ནས་སེམས་ ཅན་རྣམས་ལ་སྡུག་བསྔལ་གྱི་སྒྲ་ཙམ་ཡང་མི་གྲག་པར་གྱུར་ཅིག སྙམ་དུ་བསམ། ཡང་རང་གི་ ལུས་ངག་ཡིད་གསུམ་ལ་བདེ་བ་དང༌། སྐྱིད་པ་དང༌། དགེ་སྦྱོར་འཕེལ་བ་དང་། བློ་དགེ་ཕྱོགས་ སུ་བསྐུལ་དུ་བཏུབ་པ་དང༌། ཆོས་སྒྲུབ་པའི་མཐུན་རྐྱེན་ཚང་བ་རྣམས་སངས་རྒྱས་ཀྱི་བདེ་བ་དང་ དགེ་བ་ཙམ་དུ་བསམ་ལ། བདག་གི་འདི་སེམས་ཅན་ཐམས་ཅད་ལ་སྨིན་པར་གྱུར་ཅིག སེམས་ ཅན་ཐམས་ཅད་བདེ་བ་དང་དགེ་བ་རྒྱས་པར་གྱུར་ཅིག་སྙམ་དུ་བསམ། གཉིས་པ་འཇུག་པ་ནི། མ་རྒན་སེམས་ཅན་རྣམས་ལ་གང་གནོད་ན་སྡུག་བསྔལ་དང་ཀུན་ འབྱུང་གི་གནོད་པས། དེ་རྣམས་ཀྱི་ལུས་ཀྱི་ན་ཚ་དང་། སེམས་ཀྱི་སྡུག་བསྔལ་དང་། ཉོན་མོངས་པ་ དང༌། སྡིག་པ་དང་། སྒྲིབ་པ་ཐམས་ཅད་གྲིས་བཞར་བ་ལྟར་བློས་འུབས་ཀྱིས་བསྡུས་ལ་སྣ་བུག་གཡོན་ པ་ནས་རླུང་ཚུར་འོང་བ་དང་སྡོངས་ལ་རང་གི་སྙིང་གི་དཀྱིལ་དུ་ཞུགས། མཆོག་ཏུ་ན་ཚ་དང་སྡུག་ བསྔལ་གང་བྱུང་ཡང་དེ་བཞིན་དུ་སྙིང་གི་དཀྱིལ་དུ་བཞུགས་སོ། །སེམས་ཅན་རྣམས་ལ་གཅིག་ ཀྱང་མ་ལུས་པར་བསམ་མོ།༡༡ །སེམས་ཅན་རྣམས་ལ་གང་གི་ཕན་ན་གནས་སྐབས་སུ་ཆོས་ཀྱི་ མཐུན་རྐྱེན་དང་། མཐར་ཐུག་སངས་རྒྱས་ཀྱི་བདེ་བས་ཕན་པས་བདག་གི་ལུས་ངག་ཡིད་གསུམ་ལ་ བདེ་བ་དང་དགེ་བ་ཅི་ཡོད་པ་ཐམས་ཅད་གནས་སྐབས་སུ་མཐུན་རྐྱེན་དང་མཐར་ཐུག་སངས་རྒྱས་ཀྱི་ བདེ་བ་དཔག་ཏུ་མེད་པར་བསམ། དེ་རྣམས་རང་ལ་གཅིག་ཀྱང་མ་ལུས་པར་སྣ་བུག་གཡས་ནས་རླུང་ ཕར་འགྲོ་བ་དང་སྡོངས་ནས་སེམས་ཅན་རྣམས་ལ་སྨིན་པར་བསམ། སེམས་ཅན་རྣམས་གནས་ སྐབས་དང་མཐར་ཐུག་གི་བདེ་བ་རྒྱས་པར་བསམ། སྟོང་པ་དང་སྙིང་རྗེ་རྒྱུད་ལ་སྐྱེས་ནས་བསམ་ངན་ གདུག་སེམས་ཐམས་ཅད་ཞི་བར་བསམ་གསུང་ངོ༌།། དྲུག་པ་སྣང་བ་ཐམས་ཅད་རང་སེམས་སུ་ཐག་བཅད་པ།༧༢ དྲུག་པ་མདོར་ན་རང་ལ་ན་ཚ་དང་སྡུག་བསྔལ་བློ་དང་མི་མཐུན་པའི་རྐྱེན་མ་ཉེས་པའི་ཁ་ ཡོགས་དང་། ཁ་སྨྲས་དང་། བདག་ལ་འཆར་ཀ་གཏོང་བ་དང་།༡༣ དགྲས་གཏིབས་པ་དང་། གནོད་ ཀྱི་བར་ཆད་གཏོང་བ་དང་། ཆ་རྐྱེན་མ་འཛོམས་པ་དང་། སེམས་རྒྱུད་ལ་ཉོན་མོངས་པ་དྲག་པོ་སྐྱེས་ པ་དང་། བློ་དགེ་ཕྱོགས་སུ་བཀོལ་དུ་མི་བཏུབ་པ་དང་བླ་མ་དང་དཀོན་མཆོག་ལ་དད་གུས་གཡེལ་དུ་ སོང་བ་དང༌། སྒྲུབ་པ་དང་དགེ་སྦྱོར་བྱེད་སྙིང་མི་འདོད་པ་དང༌། བློ་སྣ་མང་པོས་སེམས་ཚོལ་ཁྲོས་ ཁྱེར་བ།༡༤ སྙིང་མི་དགའ་བ། ང་རྒྱལ་དང་། རློམ་སེམས་སྐྱེས་པ། དམ་ཚིག་ཉམས་ཆག་ལ་སོགས་ པ་ཆོས་དང་མི་མཐུན་པ་ཐམས་ཅད་བདུད་ཀྱི་བར་ཆད་ཡིན་པས་བདུད་དུ་ཤེས་པར་བྱས་ལ་རིགས་པ་ ལ་ངར་བསྐྱེད་པ་འདི་ཀའི་དུས་སུ་དགོས་པ་ཡིན་སྙམ་དུ་བསམས་ལ། ནམ་མཁའ་དང་མཉམ་པའི་ སེམས་ཅན་ཐམས་ཅད་ལ་བྱམས་སྙིང་རྗེ་བྱང་ཆུབ་ཀྱི་སེམས་དུ ང་དུ ང་བ་མཆི་མ་འཆོར་བར་བྱ་བ་ བསྒོམ། དགྲ་བགེགས་གནོད་པར་བྱེད་པ་ལ་ལྷག་པར་བསྒོམ། དེ་ནས་ས་ལ་གནས་པའི་བྱང་ཆུབ་སེམས་དཔའ་ནས་མནར་མེད་པའི་སེམས་ཅན་དམྱལ་ བ་ཡན་ཆད་ཀྱིས་བར་དུ་གཅོད་པ་མི་མཐུན་པའི་ཕྱོགས་ཐམས་ཅད་རང་ལ་གང་བྱུང་བ་དེའི་སྟེང་དུ་ ཤུགས་བསྐྱེད་ལ་བླངས་ལ་དེ་ནས་བླངས་པའི་ཡུལ་དང་སྡུག་བསྔལ་དང་བླངས་རྒྱུའི་དངོས་པོ་ཐམས་ ཅད་ཀྱང་རང་སེམས་འཁྲུལ་པའི་རང་སྣང་དུ་ཐག་བཅད་ལ་སེམས་སྐྱེ་འགག་གནས་གསུམ་དང་བྲལ་ བའི་ངང་ལ་བློད་ལ་བཞག་གོ༡༥ །དེ་སྐྱར་ཞིང་ཡང་ཡང་བསྒོམ་པས་བདུད་ཀྱི་བར་ཆད་དང་སྡུག་ བསྔལ་ཐམས་ཅད་དགེ་སྦྱོར་གྱི་བོགས་འདོན་དུ་འགྲོ་ཞིང་བར་ཆད་ཐམས་ཅད་བླ་མ་དཀོན་མཆོག་གི་ བྱིན་རླབས་སུ་ཤེས་ཤིང་བློ་ངེས་པའི་ཤེས་པ་གཏིང་ནས་སྐྱེ་གསུང་ངོ༌། །དེ་ལྟར་བྱུང་ན་ལྟས་ངན་གཡང་ དུ་ལེན། བདུད་ཆོས་ཉིད་དུ་གོ །རྐྱེན་ངན་གྲོགས་སུ་ཤར་ནས་སྣང་བ་གང་ཤར་ཐམས་ཅད་ལམ་དུ་ འགྲོ་བ་ཅིག་འོང་གསུང་ངོ༌། །དེ་ལྟར་བྱུང་ཡང་རློམ་སེམས་མི་བྱ། བྱས་ན་བདུད་ཡིན། ཡང་རང་གི་ དགེ་བ་དང་། ལུས་སེམས་ཀྱི་དགེ་བ་ཐམས་ཅད་སྔ་མ་ལྟར་ཤེས་པ་བྱའོ། །དེ་ལྟར་སྣང་བ་ཐམས་ཅད་ རང་སེམས་སུ་ཐག་བཅད་ལ་དུས་རྟག་ཏུ་དྲན་པས་ཟིན་པར་བྱའོ།། བདུན་པ་དམིགས་བསལ་ཅན་ལ་ཕུར་ཚུགས་སུ་བསྒོམ་པ། བདུན་པ་དམིགས་བསལ་ཅན་ལ་ཕུར་ཚུགས་སུ་བསྒོམ་པ་ནི། རང་ལ་གནོད་པའི་ གདོན་བགེགས་སམ། སྡང་བའི་དགྲ་ལ་སོགས་པ་བསྒོམ་སྟེ། དེ་ཡང་རང་ལ་སྔར་ནས་ཁ་ ཟུག་པའི་གདོན་ནམ། བློ་བུར་དུ་གནོད་པའི་གདོན་གང་ཡང་རུང་སྟེ། གདོན་དེ་རྨི་ལམ་ལ་ སོགས་པར་ཁོའི་གཟུགས་དང༌། ཆོ་འཕྲུལ་གང་སྟོན་བརྟགས་ལ་དེ་ངོས་བཟུང་ངོ༌། །དགྲའམ་ གདོན་དེ་རང་གི་མདུན་དུ་བཀུག་ལ་གསལ་བར་བསྒོམ་ལ། གཞན་ཡང་སེམས་ཅན་ལ་གནོད་ ཅིང་འཚེ་བའི་འབྱུང་པོའི་རིགས་ཐམས་ཅད་ཀྱང་བསམ། རིགས་དྲུག་གི་སེམས་ཅན་ཐམས་ ཅད་ཀྱང་བསམས་ལ། གནོད་བྱེད་ཀྱི་གཙོ་བྱས་པའི་སེམས་ཅན་རྣམས་བདག་གི་མ་དྲིན་ཅན་ ཡིན། འདི་རྣམས་བདེ་བ་དང་ལྡན་པར་བྱ། སྡུག་བསྔལ་དང་བྲལ་བར་བྱ། འདི་རྣམས་ཀྱི་དོན་ དུ་སངས་རྒྱས་ཐོབ་པར་བྱ་སྙམ་དུ་སེམས་བསྐྱེད་པར་བྱའོ། །དེའི་ཆེད་དུ་བྱང་ཆུབ་ཀྱི་སེམས་ བསྒོམ་སྙམ་དུ་བསམས་ལ། འདི་བདག་གི་མ་དྲིན་ཅན་ཡིན། འདི་ཚེ་སྔ་མ་མང་པོར་ཕ་མ་ ཡང་ཡང་བྱས་པས་ལན་ཆགས་འོང་བ་ཡིན། མ་དྲིན་ཅན་འདིས་ལས་ངན་པ་བསགས་ས་པས་ ལུས་འདི་འདྲ་བ་བླངས། ལུས་འདི་འདྲ་བ་བརྟེན་ནས་ང་མེད་པ་ལ་ངར་བཟུང་། བདག་མེད་ པ་ལ་བདག་ཏུ་བཟུང་། ད་ལྟ་སེམས་ཅན་ལ་གནོད་ཅིང་འཚེ་བ་ཤ་སྟག་བྱས་པས་འཁོར་བ་ དང་ངན་སོང་གི་སྡུག་བསྔལ་ཆེན་པོ་ལས་ཐར་དུས་མེད་པ་སྙིང་རེ་རྗེ་སྙམ་དུ་བསམ། རང་གི་རྩ་བའི་མ་ལྟ་བུར་བསམ་ཞིང་ངའི་ཨ་མ་ཞེས་ངག་ཏུ་ཡང་བརྗོད་ཅིང་སྙིང་རྗེ་ དྲག་པོ་མིག་ནས་མཆི་མ་ཉིལ་ཉིལ་པའམ་ལུས་ཀྱི་བ་སྤུ་ལྡང་བ་ཙམ་བསྒོམ་ལ། ཁོས་གཙོ་བྱས་ པའི་སེམས་ཅན་རྣམས་ལུས་ཀྱི་ན་ཚ་བ་སྡུག་བསྔལ་ཐམས་ཅད་རང་གི་སེམས་ཀྱི་མི་བདེ་བ་གང་ ཡོད་པ་དེའི་སྟེང་དུ་འུབས་ཀྱིས་བསྡུས་ལ་རང་གི་དེ་དང་གཉིས་མེད་དུ་བསྡུས་ལ་ཁོ་ལ་གཅིག་ ཀྱང་མ་ལུས་པར་བསམ་མོ། །རང་གི་ལུས་ངག་ཡིད་གསུམ་གྱི་བདེ་བ་དང་དང་དགེ་བ་ཐམས་ཅད་ ཁོ་ལ་བཏང་བས། ཁོའི་བསམ་ངན་དང༌། གདུག་སེམས་ཐམས་ཅད་ཞི་ནས་བྱང་ཆུབ་ཀྱི་སེམས་ རྒྱུད་ལ་སྐྱེས་པར་བསམ། དེ་ཡང་ཡང་བྱའོ། །ཡང་ནད་གདོན་ཐམས་ཅད་བཀའ་དྲིན་དུ་བསྒོམ། དགེ་སྦྱོར་གྱི་བསྐུ ལ་མ་བྱས་པས་དྲིན་ཆེ་བས་དུ ས་འདི་ནས་སངས་རྒྱས་མ་ཐོབ་ཀྱི་བར་དུ་མི་ འབྲལ་བར་བྱ་སྙམ་དུ་བསམ། གཞན་ཡང་ལུས་སེམས་ཀྱི་སྟེང་དུ་སྡུག་བསྔལ་མི་འཚམས་པ་བྱུང་ བའི་ཚེ་ཡིད་མ་ཤི་བར་བྱས། རིག་པ་ངར་བསྐྱེད་ལ་འདི་ཀའི་དུས་སུ་དགོས་པ་ཡིན་སྙམ་པ་ བྱས་ལ། གནོད་བྱེད་ཀྱིས་གཙོ་བྱས་པའི་སེམས་ཅན་ཐམས་ཅད་ཀྱི་སྡུག་བསྔལ་དངོས་རྒྱུ་དང་ བཅས་པ་རྣམས་བསམ། རང་གི་རྩ་བའི་མ་ལྟ་བུར་དྲིན་ཆེ་བ་འདི་རྣམས་སྡུག་བསྔལ་འདི་འདྲ་ལ་ སྤྱོད་པ་སྙིང་རེ་རྗེ་ན་བདག་ལ་ནི་ད་ལྟ་སྡུག་བསྔལ་ལས་གྲོལ་བར་བྱེད་པའི་ནུས་པ་མེད་ན་མ་ འདི་རྣམས་ཇི་ལྟར་བྱས་ན་སྡུག་བསྔལ་ལས་གྲོལ་བར་འགྱུར་སྙམ་དུ་སེམས་ཀྱི་འཕྲུལ་འཁོར་ སེམས་ཅན་ཐམས་ཅད་ཀྱི་སྡུག་བསྔལ་བསམ། ལུས་ཀྱི་འཕྲུལ་འཁོར་ནི། ལུས་ཙོག་པུར་འདུག་ལ་ལག་པ་གཡས་པའི་ཐལ་མོས་འགྲམ་ པ་སྦྱོར། གྲུ་མོ་བརླའི་སྟེང་དུ་བཞག བཞིན་གྱི་མདོག་སྨིན་མཚམས་སུ་བསྡུས་ལ་མཆི་མ་འདོན་ པའི་ཚུལ་དུ་བྱའོ། །ངག་གི་འཕྲུལ་འཁོར་ནི་ངའི་ཨ་མ་ཞེས་བརྒྱ་དང་སྟོང་ལ་སོགས་པ་བགྲང་ངོ༌།། དེ་ལྟར་བྱམས་པ་བསྒོམས་པས་སྙིང་རྗེ་དབང་མེད་དུ་སྐྱེ་བ་འབྱུང་ངོ༌། །དུ་སྙིང་འདོད་པ་དང༌། སྙིང་གྲང་བ་དང༌། སྡུག་བསྔལ་ཅན་མཐོང་བ་དང༌། ཐོས་པ་དང་དྲན་པ་ཙམ་གྱི་སྙིང་རྗེ་རང་ དབང་དུ་སྐྱེ་བ་འབྱུང་ངོ༌། །དེ་ལྟར་བྱུང་བ་དང་སེམས་ཅན་གྱི་སྡུག་བསྔལ་ཐམས་ཅད་སྐྲ་གྲིས་ བཞར་བ་བཞིན་དུ་སྣ་བུག་གཡས་གཡོན་ནས་རླུང་ནང་དུ་འོང་བ་དང་སྡོངས་ནས་རང་གི་སྙིང་ དུ ་ཞུ གས་སེམས་ཅན་ལ་སྡུག་བསྔལ་གཅིག་ཀྱང་མ་ལུ ས་པར་བསམ། ཉོན་མོངས་པ་ལ་ སོགས་པ་གང་སྐྱེས་ཀྱང་དེ་ལྟར་ཡང་ཡང་བྱའོ། །ཡང་དག་པའི་དོན་ལ་འདི་ཡིན་འདི་མིན་མེད་ པའི་ལྟ་བའི་སྟེང་དུ་བཞག་གོ །རང་གི་བདེ་བ་དགེ་བ་ཐམས་ཅད་ལྟོས་པ་མེད་པར་སེམས་ཅན་ ཐམས་ཅད་ལ་ཕར་བཏང་བས་སེམས་ཅན་ཐམས་ཅད་ཀྱི་གནོད་སེམས་གདུ ག་ཅུ བ་ཐམས་ ཅད་ཞི་བར་བསམ་མོ། །དེ་ལྟར་བྱས་པས་ནད་གདོན་ཐམས་ཅད་གྲོགས་སུ་འཆར་རོ། །ཕན་ ཡོན་བསམ་གྱིས་མི་ཁྱབ་བོ། །གནས་སྐབས་སུ་ནད་གདོན་ཐམས་ཅད་རང་གྲོལ་དུ་འགྲོ་བའི་ ཤེས་བྱེད་མང་དུ་ཡོད་དེ་འདིར་མ་བྲིས་སོ། །བྱ་བ་གང་བྱེད་ཀྱང་འདིས་ཟིན་ན་སངས་རྒྱས་ ཀྱི་ལམ་དུ་འགྲོ་གསུངས། འདི་དང་མི་ལྡན་ན་གསང་སྔགས་ཟབ་མོའི་བཟླས་པ་བྱས་ཀྱང་མུ་ སྟེགས་ཀྱི་དྲག་སྔགས་བཟླས་པ་དང་ཁྱད་མེད་དུ་འགྲོ་གསུང་ངོ༌། །གཞན་ཡང་ཐེག་པ་ཆེན་

པོའི་མདོ་དང་བསྟན་བཅོས་རྣམས་སུ་ལེགས་པར་བལྟ་བའོ།།