Shes ldan yid kyi gdung sel rigs lam ga bur chu rgyun Tsadra version
༄༅། །ཤེས་ལྡན་ཡིད་ཀྱི་གདུང་སེལ་རིགས་ལམ་ག་བུར་ཆུ་རྒྱུན་ཞེས་བྱ་བ་བཞུགས་སོ།།
རྟེན་འབྱུང་འགོག་པ་མེད་པའི་དབྱིངས།།
སྣ་ཚོགས་ཁམས་བཞིན་རྗེས་འགྲོ་བས།།
རྣམ་བཀྲ་དྲི་མེད་ཡེ་ཤེས་སྐུས།།
ས་གསུམ་འགྲོ་འདི་ཤིས་པས་སྐྱོངས།།
རྒྱལ་ཀུན་མཁྱེན་བརྩེའི་ཕུང་པོ་བཅུ་དྲུག་ཆར།།
རྫོགས་པའི་ཡིད་འཕྲོག་མཚན་དཔེའི་ལང་ཚོ་ཅན།།
མགྲིན་པའི་འོ་མཚོར་རོལ་བའི་དགྱེས་འཛུམ་གྱིས།།
ལེགས་བཤད་སྟན་པའི་གླུ་དབྱངས་དེང་འདིར་སྒྲོགས།།
གང་གིས་རིང་ནས་བསྙེན་པའི་ངག་གི་ལྷས།།
འདི་ནི་དབུ་མའི་ལམ་ལས་རིང་དུ་གྲོལ།།
རྣོ་ངར་གཟི་འོད་འབར་བའི་མཚོན་ཆ་འདི།།
ཁྱོད་ཀྱིས་ཟུངས་ཞེས་བདག་ལ་བཀའི་དབང་བསྐུར།།
གངས་ཅན་ལུམ་བིའི་སྐྱེད་ཚལ་སུམ་རྩེན་གནས།།
མཁྱེན་གཏེར་རང་གཟུགས་སྲིད་ཞིའི་མཆོད་སྡོང་ཆེ།།
བྱིན་རླབས་འོད་སྟོང་འབར་བའི་ཉིན་མོར་བྱེད།།
མཚན་དཔེའི་རི་དྭགས་བཀྲ་བའི་འོད་དཀར་ཅན།།
འཕྲིན་ལས་དྲི་བསུང་སྤྲོ་བའི་དཔག་བསམ་ལྗོན།།
སྡེ་བཞིའི་འབྱོར་བ་རྫོགས་པའི་ཀ་ལཱ་པ།།
ཕན་བདེའི་རིན་ཆེན་གཏེར་གྱུར་ནོར་བུའི་གླིང་།།
དགེ་མཚན་ཆུ་བོ་འབུམ་འཁྱིལ་མ་དྲོས་མཚོ།།
ཁྲིམས་ལྡན་ཞི་དུལ་ངང་མོ་བྱེ་བའི་ཚོགས།།
ཟབ་རྒྱས་སྙན་པའི་དབྱངས་ཀྱིས་ཅིར་ཡང་རྩེན།།
ཆོས་སྲིད་ལུགས་བརྒྱའི་རི་མོ་མ་ཉམས་པས།།
བགྲང་ཡས་སྐྱེ་བོ་བག་ཕེབས་བདེ་བར་སྤྱོད།།
མཐའ་དབུས་དཔལ་དང་འབྱོར་བའི་གཡང་གི་ཚོགས།།
སྲེད་པའི་ཞགས་པ་མེད་པར་ངང་གིས་འདུ།།
ཡིད་སྲུབས་ལས་ཀྱི་དྲི་མ་དང་བྲལ་བས།།
དྭངས་པའི་མཚོ་བཞིན་ཀུན་གྱི་ཡི་གར་མཐུན།།
འཇམ་དཔལ་རྡོ་རྗེའི་ཡེ་ཤེས་ཕོ་བྲང་མཆོག།
ངུར་སྨྲིག་འཆང་བའི་སྡེ་ཆེན་རྣམ་པར་འཕྲུལ།།
དེ་ལྟའི་ངོ་མཚར་ཞིང་གི་ཆུ་ལྷའི་ཕྱོགས།།
ཁམས་སུ་གྲགས་པའི་ཡུལ་ལྗོངས་ཁྱོན་ཡངས་པ།།
དགེ་མཚན་ཕྱོགས་ཀྱི་འདབ་མ་རབ་རྒྱས་ཤིང་།།
སྲིད་ན་གྲགས་པའི་ངོ་མཚར་བཟོ་རིག་དང་།།
རྨོངས་པའི་མུན་སེལ་ནང་དོན་རིག་པའི་བཟོ།།
མདོ་སྔགས་བཤད་སྒྲུབ་ལས་ཀྱིས་ཐུབ་པའི་བསྟན།།
སྤེལ་བའི་ས་དགེ་ཕྱག་རྫོགས་དྲན་དབང་བརྒྱས།།
ཡོངས་སུ་བཟུང་བས་ཆོས་ཀྱི་ལོངས་སྤྱོད་རྫོགས།།
ཁྱད་པར་རྣམ་དཔྱོད་བརྩོན་པའི་མཐུ་ལྡན་ཞིང་།།
མང་ཐོས་ཉམས་སུ་ལེན་པའི་ཀུ་ས་ལི།།
ཟབ་དོན་ཚོལ་བའི་ངལ་བ་མང་བསྟེན་པ།།
ང་ཡི་མཛའ་ཆེན་མི་ཕམ་བཤེས་གཉེན་བཞུགས།།
གང་གི་ཤེར་ཊིཀ་ཡང་ལན་ནམ་མཁའི་དབྱིངས།།
ཉེ་བར་སྡུད་པའི་ལུང་རིགས་ལྷ་རྫས་དར།།
འདྲིལ་བའི་ཡིད་འཕྲོག་དགུ་ཚིགས་ཞགས་པ་འདི།།
འདིར་སྨྲས་པ།
ཡིད་འོང་ཤེལ་དཀར་ས་འཛིན་ཕྲེང་བ་ཡི།།
མུ་ཁྱུད་མཛེས་པའི་གངས་ཅན་མ་ག་དྷ།།
མཆོག་ཏུ་བསྔགས་པའི་ཆུ་གཏེར་བདེ་འབྱུང་མེ།།
བཤད་སྒྲུབ་འབྲི་ཤིང་རྩེན་པར་སུ་ཞིག་འགྲན།།
རྣམ་འདྲེན་པདྨ་དཀར་པོའི་འཕྲིན་ལས་ཀྱི།།
རྣམ་རོལ་སྐུ་ཡི་སྣང་བརྙན་ཉི་ཟླ་ཟུང་།།
ཆོས་ཀྱི་རྒྱ་མཚོ་མི་ཟད་ཀླུ་ཡི་དབང་།།
ཆོས་སྤྲིན་དོ་ཤལ་བཀྲ་བ་ནམ་མཁའི་རྒྱན།།
རྫོགས་ལྡན་ཆོས་ཀྱི་ལང་ཚོ་འབར་བ་ཡི།།
དག་པའི་ཞིང་མཆོག་སྟུག་པོ་བཀོད་པའི་གནས།།
བས་མཐའི་སྐལ་དམན་ལོང་བས་མ་མྱོང་བ།།
སྙིང་ལ་གདུངས་པའི་མེ་འབར་བཅིལ་མ་ནུས།།
དེ་ལྟ་ནའང་འཇམ་མགོན་རིང་ལུགས་ལ།།
གཞན་དྲིང་མི་འཇོག་སྤོབས་པ་ཆེས་དཀའ་ཡང་།།
རྙེད་བཀུར་ཕྱིར་དུ་རང་ལུགས་གཏོང་བ་དང་།།
ཟབ་ཆོས་གཞན་དུ་ཚོལ་བའི་ཟོག་པོ་མིན།།
སྨྲས་པ།
ཆོས་ཚུལ་དྲི་མ་མེད་པའི་འོ་མཚོ་ཡང་།།
ལྟ་སྤྱོད་མི་མཐུན་ཁྲག་གིས་སྦགས་གྱུར་ཀྱང་།།
བརྐམ་ཆགས་ཅན་དག་བཀུར་སྟིའི་གདུངས་པ་ཡིས།།
ཟོན་མེད་དབེན་པའི་དགའ་ཚལ་ཀུན་ཏུ་ཉུལ།།
རང་མཐོང་འུད་ཀྱིས་ཁེངས་པའི་ཟོག་པོ་དང་།།
དྲེགས་པའི་ས་འཛིན་དགུང་དུ་བསྙེགས་པ་རྣམས།།
ཕས་རྒོལ་ཚིག་གི་མཚོན་ཆ་གདེངས་པ་འདིས།།
རྒུད་པའི་ས་འོག་མུན་པའི་ཁུང་དུ་བྲོས།།
རྒོལ་བ་མཛེས་པའི་རྒྱན་གྱི་ཆས་རྫོགས་པའི།།
རུ་འདྲེན་དཔའ་བོས་དཔུང་གི་གཡུལ་བཤམས་ཏེ།།
ལུང་རིགས་མཚོན་ཆ་འབུམ་ཕྲག་བརྟུལ་བ་ན།།
གཏོལ་མེད་སྙོམས་ལས་བསྟེན་པའི་སྡར་མ་མང་།།
ཧེ་ཧེ་མ་འཇིགས་མི་སྐྱོན་གྲོགས་པོ་དག།
ལུང་རིགས་དཔའ་རྩལ་རྫོགས་པའི་ཕས་རྒོལ་དང་།།
ལྷན་ཅིག་རལ་ག་བྱས་པའི་ཉམས་མྱོང་དང་།།
དཔའ་ལ་སྐྱོང་བའི་མན་ངག་ཞལ་ཤེས་ཡོད།།
དེ་སླད་ཕ་རོལ་སྦྱིན་སྐྱེས་དཔུང་གི་ཚོགས།།
འཇོམས་པའི་ཞོ་འཐུང་རུས་པ་ལས་གྲུབ་པའི།།
ཐོགས་མེད་ལུང་རིགས་རྡོ་རྗེ་རྩེ་བརྒྱ་བ།།
དྲན་པས་ལྷ་མིན་ལོག་རྟོག་མངལ་ཀུན་འཇིག།
ཏིང་འཛིན་མལ་དུ་ཏིང་འཛིན་འཇའ་ཚོན་ཡལ།།
ཀུན་རྟོག་པིར་གྱིས་ཡིད་ཀྱི་མེ་ལོང་ངལ།།
རྗེས་སུ་སུག་ལས་ངན་པས་ལུས་ཀྱང་ངལ།།
ལས་དེས་མཐའ་ཡས་འགྲོ་ལ་ཇི་ལྟར་འགྱུར།།
བསྔགས་བརྗོད་ཚིག་གི་པདྨོའི་དོ་ཤལ་གྱིས། །
གང་གི་རྣལ་འབྱོར་མགུལ་བ་མཛེས་གྱུར་པ།།
ཆགས་སྡང་མེ་ཆུ་འཐབ་པའི་དཀྱིལ་འཁོར་དུ།།
རྗེས་མེད་སྐལ་བ་དམན་པ་འདི་ཀོ་ཅི།།
ངེས་དོན་རྣལ་འབྱོར་དབང་པོར་རེ་ཐག་ཆད།།
མཚམས་ཀྱི་ཟོལ་བསྟེན་དཔེ་ཀློག་རྩོད་ཡིག་བྲིས།།
ཐུན་དང་ཐུན་གསེང་ཁ་ཕོ་ཆེར་སྒྲོག་ཀྱང་།།
སྨྲས་པ།
ཡིད་འོང་ནགས་ཚལ་འཁྲིགས་པའི་མཱ་ལ་ཡའི།།
ཕུག་ཏུ་འཚོ་བའི་དགེ་སྦྱོང་སྤོང་བ་པའི།།
མཁྱེན་དཔྱོད་ས་འཛིན་ལྟེ་བ་ལས་འཁྲུང་བའི།།
ཚིག་གི་ལོ་འདབ་རྒྱས་པའི་ལྗོན་པ་མཐོང་།།
མཚམས་བཅད་བསྙེན་པའི་ཞལ་བཞེས་འུད་ཆེ་བས།།
ཉམས་ཚོད་འགམ་པའི་ཀུ་རེ་ཚིག་སྨྲས་པ།།
བཟོད་མེད་ཐུགས་ཀྱི་ཚེར་མ་བཞིན་གྱུར་ཏེ།།
ཟས་སྐོམ་བསྙུང་ཞིང་གཉིད་ཀྱང་ཡལ་བ་སྙམ།།
ཕྱོགས་སྔའི་ཚིག་དང་རིགས་པའི་འགྲོས་ཙམ་གྱིས།།
དགག་པའི་ལམ་གྱི་ངལ་དུབ་མཐར་ཡང་ལྷུང་།།
ཚིག་རྣམས་ཇི་བཞིན་ཕྱིར་ཡང་ཟློས་བྱས་པས།།
བདེ་འཇམ་ཐུགས་ནི་ཏིང་འཛིན་གཉིད་དུ་སོང་།།
སྔོན་དུས་ཧྭ་ཤང་ཐེག་པ་ཆེན་པོ་བས།།
ཅང་མེད་ཤེས་བྱེད་དྲངས་པ་མཁའ་ཀླུར་སླེབ།།
དེ་བཞིན་འདིར་ཡང་ཚིག་ལ་རྟོན་པའི་ཕྱིར།།
མདོ་རྒྱུད་ལུང་གིས་ཚིག་གི་ཚོགས་ཀྱང་བསྐྱེད།།
གང་གིས་སྨྱོས་གནང་བཀའ་རྒྱ་དེང་གྲོལ་བས།།
མ་དུལ་རྟོག་གེ་གླང་ཆེན་བག་མེད་ངས།།
ཟབ་སྣང་རྒྱ་མཚོ་དཀྲུག་པའི་འདམ་རྫབ་ཀྱིས།།
ས་སྟེང་བཀང་ཡང་ཤེས་ལྡན་སུ་ཞིག་ཁྲོ།།
སྨྲས་པ།
རྫོགས་ཆེན་མཁས་དབང་དམ་པ་དཔལ་སྤྲུལ་དང་།།
མང་ཐོས་ཀོང་སྤྲུལ་ཡོན་ཏན་རྒྱ་མཚོ་སོགས།།
དག་སྣང་ཕྱོགས་མེད་བག་ཡོད་ཞི་དུལ་གྱིས།།
རང་གཞན་ཀུན་གྱིས་བསྟོད་ཅིང་མཐོང་སྨོན་བྱེད།།
ཁྱོད་ནི་མཁས་པའི་ཡོན་ཏན་མི་དམན་མོད།།
ཕྱོགས་རྣམས་ཀུན་ནས་ཕས་རྒོལ་དགྲ་ལྡང་བ།།
དེ་ནི་ངན་ལྟས་ལས་གཞན་ཇི་ག་ཞིག།
བཟོད་པའི་ཞིང་ནི་དཀོན་པའི་རྒྱུ་མཚན་གཟིགས།།
ཤེར་ལེར་རྩོད་ལན་མང་བ་གཟིགས་ལེགས་ཏེ།།
བག་ཡོད་ཤེས་བཞིན་ལེའུ་ཅིས་མ་གཟིགས།།
སྣ་ཚོགས་གྲུབ་མཐའི་ལྟ་སྤྱོད་སྐྱོན་མཁས་པས།།
སྨྲས་པ།
གཅམ་པུའི་ཚིག་གི་དྲག་ཆར་སུ་ཡིད་རྟོན།།
ལྟར་སྣང་དམ་བཅའི་ན་བུན་བཏུད་པས་འཇིག།
དོན་ཆེན་ལྷུན་པོ་འདྲེན་བྱེད་ཡུལ་ལས་འགོང་།།
ཚད་དུ་མ་ཕབ་བབ་ཅོལ་ཆུ་ཤིང་སྟོང་།།
ཕྱི་རོལ་རྩོད་པའི་ལས་ལ་ཞུམ་མེད་ཀྱང་།།
རང་སེམས་ལས་སུ་རུང་བའི་སྐལ་བ་ཕྲ།།
ཆོས་ཀྱི་དོན་པོ་སེམས་ཀྱི་གསང་མ་ཤེས།།
དོན་མེད་དལ་བས་དལ་འབྱོར་ནོར་བུ་བརླག།
སྨྲས་པ།
རིགས་ལམ་མ་སྦྱངས་མི་ཕམ་དགོན་པ་བ།།
རིགས་པའི་མེ་གྲོགས་རླུང་གིས་མ་ཟིན་པས།།
རིགས་པ་བཀོད་དེ་རང་གིས་སུན་ཕྱུང་བ།།
རིགས་པ་སྨྲ་བའི་ཚོགས་ཀྱིས་ག་ཞར་མཛོད།།
རྒྱལ་བའི་མདུན་སར་རྒྱལ་སྲས་ཉན་ཐོས་བཅས།།
བརྒལ་ལན་རིགས་པའི་འཕྲུལ་གྱིས་དུ་མར་རྩེན།།
དེ་བཞིན་རྒྱ་བོད་མཁས་གྲུབ་བྱེ་བ་ཡང་།།
རིགས་པའི་གསང་ཚིག་སླ་བའི་སྤོབས་པ་འཛིན།།
ཚུལ་གནས་ཐོས་བསམ་སྒོམ་པའི་ལམ་གྱི་སྲོལ།།
དུས་གསུམ་སྲས་བཅས་རྒྱལ་བའི་བགྲོད་གཅིག་ལམ།།
ཚད་ལ་མ་ནོར་འཇམ་མགོན་ལུགས་བཟང་ཞེས།།
བསྔགས་པའི་སྒྲ་བརྒྱ་སྐལ་བཟང་རྣ་བར་འཇེབ།།
རིགས་པ་སོང་ཞེས་རློམ་པའི་རྐྱལ་སྟོང་བུས།།
ཁ་ཕོ་མེད་ཟེར་ནུས་པ་ཆེ་སྐད་ལོ།།
ནང་འགལ་གྱ་གྱུའི་རི་མོ་མང་བཀྲ་བ།།
ཕྲ་ཞིབ་རིགས་པའི་མན་ངག་མེད་པས་ནོངས།།
རིགས་པ་རྣོ་ཞིང་སྤོབས་པ་བརྟན་གསུང་བ།།
ཆོས་བརྒྱད་རོ་སྙོམས་གདམས་པ་མེད་པས་ནོངས།།
ཅ་ཅོར་སྣང་བ་ཇི་བཞིན་རྗེས་བཟླས་པས།།
ཅ་ཅོ་མི་སྨྲ་གསུང་བ་ཁྱོད་རེ་ལོང་།།
རྩོད་པའི་འཁྲུག་ལོང་བརྒྱ་ཡི་སྒོ་ཕྱེ་ནས།།
ད་དུང་ཡ་རབས་ཡིན་སྙམ་ཁྱོད་རེ་གླེན།།
མ་དྲངས་དྲོལ་བ་བདག་དང་འགྲོ་བ་ཡིས།།
སྒོ་གསུམ་བསྲུང་མེད་སྒོམ་ཆེན་ཁྱོད་རེ་མཁས།།
རང་ལ་འབད་པར་དོན་སྨྲ་ལ་འཁྲུལ་བས།།
ཁོར་གསུམ་འཕང་ས་ནོར་རོ་ཧེ་ནུས་ཞིས།།
ཚིག་གསུམ་ཙམ་ལ་ནང་འགལ་འདི་མཐོང་བས།།
སྨྲས་པ།
འཇམ་མགོན་གསུང་གི་འོད་སྟོང་འགྱེད་པ་ལས།།
སྣ་ཚོགས་གྲུབ་མཐའི་དགག་སྒྲུབ་སྤུ་རིས་ཕྱེ།།
ལག་རྡུམ་བྲག་ལ་འཇུ་བའི་བློ་གྲོས་ཀྱིས།།
བཀའ་པོད་གཞུང་བརྒྱའི་གནད་དོན་ཇི་ལྟར་གཞལ།།
འོན་ཀྱང་རང་སྣང་འཁྲུལ་བའི་སྲིན་བུ་དང་།།
ཁྲོན་པའི་རུས་སྦལ་མོ་ཡི་ངང་ཚུལ་བཞིན།།
དབུ་ཚད་རིགས་པའི་སྨན་མཆོག་བདུད་རྩི་ཡིས།།
ཡང་འདི་ལྟར། མཐའ་བཞིའི་སྤྲོས་བྲལ་གནས་ལུགས་མཐར་ཐུག་ཡིན་ན། མཐའ་བཞིའི་སྤྲོས་པར་འཛིན་པའི་བློ་འཁོར་རྩ་མཐར་ཐུག་ཡིན་ནམ། ཁྱེད་ཅག་བདེན་མེད་ནི་སྟོང་ཉིད་ཉི་ཚེ་བར་འདོད་པས་དེ་ལྟ་ན་བདག་འཛིན་ཀྱང་འཁོར་རྩ་ཉི་ཚེ་བ་དང་། འཁོར་རྩ་མཐར་ཐུག་ལ་དེའི་སྟེང་དུ་སྣང་ཕྱོགས་དང་སྦྲེལ་བའི་སྒེར་ཆོས་ཤིག་བསྣན་དགོས་པའི་ཕྱིར། ཞི་སྒོ་ལ་དེའི་ཕྱིར། ཁྱེད་ཅག་ལྟར་ན། བདེན་མེད་ནི་མེད་པའི་སྤྲོས་པ་དང་། ཐ་སྙད་དུ་ཡོད་པ་ནི་ཡོད་པའི་སྤྲོས་པར་འདོད་པས་མི་རྟོག་ཡེ་ཤེས་ཀྱི་ངོར་མེད་པར་འགྱུར་ཏེ། དེ་དག་སྤྲོས་པ་ཡིན་པའི་ཕྱིར། འདོད་མི་ནུས་ཏེ། བདེན་མེད་དེའི་ངོར་ཡོད་པར་ཡང་བཤད་པའི་ཕྱིར། ཁོ་བོ་ཅག་སྔ་མ་སྤྲོས་བྲལ་དང་། ཕྱི་མ་སྤྲོས་པར་འདོད་ལ། ཁྱེད་ཅག་སྤྲོས་པ་གཉིས་བསྡོམས་པ་སྤྲོས་བྲལ་དུ་འདོད་པ་ཤིན་ཏུ་འགལ་བའོ།། སྟོང་ཉིད་ཅེས་པའི་མིང་དོན་ཡང་མ་གོ་བར་ཟད་དེ། ཆོས་ཐམས་ཅད་བདེན་གྲུབ་ཀྱིས་སྟོང་ཡང་སྟོང་པ་ཙམ་དེ་ལ་དངོས་པོའི་རྐྱེན་གྱི་དོན་ཉིད་སྦྱར་བ་གནད་ཆེན་པོར་སྣང་ངོ་།། ཁྱེད་ཅག་བདེན་མེད་དང་། ཐ་སྙད་དུ་ཡོད་པའི་འདུ་ཤེས་ཐམས་ཅད་མི་རྟོག་ཡེ་ཤེས་ཀྱི་དགག་བྱར་འདོད་པས་དེ་ལྟ་ན་ཧྭ་ཤང་ལྟར་སོང་ཞེས་བཀག་པའི་ཕྱིར། བློ་དེའི་ངོར་མེད་ཀྱང་དེའི་དགག་བྱ་ཡིན་མི་དགོས་པའི་ཕྱིར། གཞན་དུ་ན་སྒྲ་མིག་ཤེས་ཀྱི་དགག་བྱར་འགྱུར་པ་སོགས་གནོད་བྱེད་མང་ངོ་།། མདོར་ན་བདག་འཛིན་གྱི་མ་རིག་པས་གཞི་བྱས་ཏེ་ཉོན་མོངས་དང་ལས་སྣ་ཚོགས་པའི་དབང་གིས་མ་དག་པའི་སྣོད་བཅུད་ཀྱི་སྲིད་པའི་འཕྲུལ་འཁོར་འབྱུང་བ་ནི། བཅོམ་ལྡན་འདས་ཀྱིས། སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ།། དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས།། རྐྱེན་རྣམས་འཚོགས་ནས་སྡུག་བསྔལ་འཕྲུལ་འཁོར་རབ་ཏུ་འབྱུང་།། ཞེས་དང་། དེ་བཞིན་དུ་བདེན་གྲུབ་བམ་རང་བཞིན་གྱིས་མེད་པར་རྟོགས་པའི་ཤེས་རབ་གཙོ་བོ་བྱས་ཏེ། རྒྱུ་རྐྱེན་ཚོགས་པ་དང་བཅས་པས་དག་པའི་སྣོད་བཅུད་ཡེ་ཤེས་ཀྱི་འཕྲུལ་འཁོར་འབྱུང་བ་ནི། མདོ་ལས། ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ།། དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་།། རྐྱེན་རྣམས་འཚོགས་ནས་ཡེ་ཤེས་འཕྲུལ་འཁོར་རབ་ཏུ་འབྱུང་།། ཞེས་གསུངས། ཚུལ་དེ་ཉིད་བཅོམ་ལྡན་འདས་ཉིད་ཀྱིས་དམར་ཁྲིད་དུ་སྟོན་པ་ནི། པད་ས་ལའི་རྒྱལ་བོ་ལ་གདམས་པ་ལས། བཅོམ་ལྡན་འདས་ཀྱིས་བཀའ་བསྩལ་པ། རྣམ་རྟོག་བདག་ཏུ་འཛིན་པའི་དགྲ་ཆེན་པོ།། འདི་ནི་རྒྱུ་བཞིན་དངོས་པོ་མེད་བཞིན་དུ།། ཐོག་མ་མེད་ནས་བདག་ལ་གནས་ནས་ནི།། བདག་གི་ཆོས་སྐུ་ཡིད་བཞིན་རིན་ཆེན་དེ།། གདོད་མའི་མུ་ནས་དགྲ་ཡིས་བརྐུས་ནས་ནི།། མཚན་མའི་ཚང་ཚིང་གནས་སུ་སྦས་ནས་བཞག། ད་དུང་འཆིང་ཞིང་འཁོར་བར་འཁྱམ་དུ་འདུག། འཇིག་རྟེན་དགྲས་ནི་བསད་ནས་ནོར་འཕྲོག་ཙམ།། དེ་ལ་བཟོད་བྱས་བསོད་ནམས་ཚོགས་ཀྱང་རྫོགས།། དགྲ་འདིས་ཞི་བདེ་ཐར་བའི་སྲོག་ཀྱང་གཅོད།། དེ་བསྟེན་སེམས་ཅན་༢ལོར་བར་འདམ་དུ་འཆིང་།། རྒྱལ་བོས་གསོལ་བ། དགྲ་ཆེན་དེ་དང་ཇི་ལྟར་འཐབ་པར་བགྱི།། བཅོམ་ལྡན་འདས་ཀྱིས་བཀའ་བསྩལ་པ། རྣམ་རྟོག་དགྲ་ལ་རྒོལ་བའི་ཤོམ་ར་ཡང་།། དད་པས་སྦྱིན་དང་ཚུལ་ཁྲིམས་མཁར་བརྩིགས་ཏེ།། དགེ་བས་དཔུང་བྱས་བཟོད་པའི་གོ་གྱོན་ལ།། བརྩོན་འགྲུས་ལྕག་ཐོགས་བསམ་གཏན་གཞུ་བརྡུང་སྟེ།། བདག་མེད་སྟོང་བའི་མདའ་ཡིས་བདག་འཛིན་བསད།། ཅེས་གསུང་སྟེ། ཡང་བཅོམ་ལྡན་འདས་ཀྱིས། བློ་དང་ལྡན་ན་ཚིག་གཅིག་གིས།། ཆིག་བརྒྱ་དག་ནི་ཤེས་པར་འགྱུར།། ཞེས་སོགས་གསུངས་པ་ལྟར། སྔར་དྲངས་པའི་ལུང་གིས་མདོ་རྒྱུད་རྒྱ་མཚོའི་གནད་དོན་ཟིན་པར་འགྱུར་མོད། མིན་ནའང་ཅི་དགྱེས་མཛོད། སྨྲས་པ། འཇམ་དབྱངས་མཁྱེན་པའི་འོད་ཟེར་འབུམ་ཕྲག་གིས།། ཡོངས་སུ་འཁྱུད་པའི་བློ་གྲོས་ཉིན་བྱེད་ཀྱིས།། རེག་པས་དཀའ་གནད་འདབ་སྟོང་པདྨོའི་རྒྱ།། ཅི་དགར་གྲོལ་བའི་བསུང་ཞིམ་ཀུན་ཏུ་ལྡང་།། ཕྲ་ཞིབ་མཛངས་པའི་རྣམ་དཔྱོད་འཕྲུལ་སྤྱད་ཀྱིས།། བློ་ཆེན་ཡིད་ལ་འཛིང་བའི་རྒྱ་མདུད་གསང་།། བདེ་བླག་ཉིད་དུ་གསལ་བར་མཚོན་པའི་དཔལ།། བལྟ་ཕྱིར་མཆོད་སྦྱིན་བརྒྱ་པས་སྤྱན་སྟོང་བགྲད།། བླང་དོར་ཕྱེད་པའི་གོ་རིགས་མཐུ་དམན་ཀྱང་།། རང་ཚོད་བསྙལ་ཞིང་རང་མཐོང་ཆེ་བ་དག། ལེགས་བཤད་ཡིད་བཞིན་དབང་གི་རྒྱལ་པོ་ཡང་།། ཉེས་བཤད་འདམ་དུ་བསྒྱུར་བ་དེང་འདིར་ཕྱུངས།། རིགས་ལམ་དྲི་མེད་བདུད་རྩིའི་ཆུ་ཡིས་བཀྲུས།། རྣམ་དག་ལུང་གི་དར་གྱིས་བྱི་དོར་བསྒྲུབ།། འབེལ་གཏམ་བང་རིམ་མཛེས་པའི་རྩེ་མོ་རུ།། ལེགས་པར་བཀོད་དོ་དཔྱོད་ལྡན་མིག་གིས་སྒྲིམས།། ཞེས་བྱ་བ་ནི་འཕྲོས་དོན་བསྡུས་པའོ།། ཤེར་ཊིཀ་ཏུ་༼མི་ཕམ་གྱིས་༽དོན་དམ་བདེན་པ་སྒྲ་དང་བློའི་ཡུལ་མིན་པར་བཤད། འདིར་སྒྲ་དང་བློའི་ཡུལ་ཡིན་ཞེས་དངོས་འགལ་དུ་བུད། འབད་འབད་ནས་བོད་སྔ་མའི་གྲུབ་མཐའ་བསྐྱངས་མ་ནུས། གཉིས་སྣང་ཅན་གྱི་བློའི་ཡུལ་མིན་ཞེས་བོད་ཕྱི་མའི་རྗེས་སུ་འབྲང་ངོ་།། སྤྱིར་བློའི་ཡུལ་ཡིན་པ་རིགས་པར་མ་ཟད་ལུང་ཤིན་ཏུ་གསལ་བ། རྒྱུད་ལས། རྣམ་པར་མི་རྟོག་བློ་ཅན་གྱི།། ཞེས་དང་། སྟོང་པ་ཉིད་དགའ་མཆོག་གི་བློ།། ཞེས་སོགས་ཤིན་ཏུ་མང་བ་ཡིག་ཚོགས་ཆེ་བས་སུ་ཞིག་འབྲི། ཁྱེད་ཅག་གིས་དམ་བཅའ་སྔ་མའི་དོན་དུ་བརྗོད་མེད་སྤྲོས་མེད་ཅེས་པའི་ལུང་མང་དུ་དྲངས་པ་རང་ངལ་བ་ཙམ་དུ་ཟད་དོ།། ཡང་ཁོ་བོས་༼མི་ཕམ་གྱིས་༽ཀུན་གསལ་ཆུ་སྐྱེར་སོན་ཞེས་ས་བསྡུས་ནས་ར་གོང་དུ་སྦྱར་བ་མི་རིགས་ཟེར། ངོ་ཚ་བོར་བ་སྟེ། ཁྱེད་ཀྱིས་རབ་སྣང་འདིའི་མགོར་ཤེར་འགྲེལ་ཞེས་པ་བསྡུས་ནས་ར་ཤེ་ལ་སྦྱར་བ་དེ། ཁྱེད་རང་གིས་རང་ལ་ལན་བཏབ་པར་ངོ་སྤྲད་པ་ཡིན་ནོ།། ཁོ་བོ་ཅག་ནམ་མཁར་སྤྱན་དྲངས་ཞེས་འ་བསྡུས་ནས་ལ་དོན་གྱི་ར་སྦྱར་ཏེ་འདོན་ལ། སུམ་ཅུ་པར་མཚམས་སྦྱོར་བསྡུ་བ་དང་། བླ་མའི་མན་ངག་སྦྱཪ་གསུང་བའི་དོན་ཡིན་མོད། བརྡོལ་གཏམ་སྨྲ་བ་དག་སའི་ཡང་འཇུག་ཀྱང་མི་དགོས་ཟེར་བ་རང་གིས་ཡི་གེའི་ནོར་སོ་མང་དུ་བཤད་པ་དང་འགལ་ལ་ད་དྲག་བསྡུས་པ་དང་ཇི་ལྟར་འདྲ། རྫོགས་སོ་ཞེས་པའི་སླར་བསྡུ་ཡང་མེད་པར་འགྱུར་ཞིང་། ཉི་ཤུ་སུམ་ཅུ་སོགས་གྲངས་ཀྱི་སྐབས་ཡི་གེ་ཕྲི་སྣོན་མང་དུ་བྱུང་བས་ཅི་དགར་བྱ་བ་ལ་རིངས་པར་མི་རིགས་ཤིང་མདོ་ཙམ་གཞན་དུ་བཤད་ཟིན་ཏོ།། སྡེ་ཚན་གྱི་མཇུག་བསྡུ་བ། ཀུན་གསལ་མེ་ལོང་དག་པའི་དཀྱིལ་འཁོར་མཛེས།། འོད་སྟོང་འབར་བ་པདྨོའི་ཚལ་ལ་རོལ།། ལང་ལོང་གཡོ་བའི་སྤྲིན་སྔོན་འཕྲེང་བ་དཀྲིག། ལྷང་ལྷང་དལ་གྱིས་བཞད་པའི་འབྲུག་སྒྲ་རྒོད།། རིགས་འཕྲུལ་རྡོ་རྗེ་རྩེ་བརྒྱ་མེ་དཔུང་འབར།། ལྷ་ལས་རྒན་པས་ལྷ་དབང་ཞབས་སྐྱེས་མཆོད།། ཕྱོགས་སུ་རྣམ་པར་རྒྱལ་བའི་རྒྱལ་མཚན་བསྒྲེང་།། དྲི་ཟའི་ན་ཆུང་འགྱུར་ཁུག་གླུ་དབྱངས་ལེན།། འཆི་མེད་བུ་མོས་བསྟོད་བསྔགས་ཤིས་པ་བརྗོད།། རང་བྱུང་ལྷ་ཡི་རྔ་ཆེན་དགུང་དུ་ལྡིར།། ཆོས་དུང་སྙན་པའི་པི་ཝང་རྒྱུད་མངས་བརྡུང་།། འཇམ་མགོན་རིང་ལུགས་རྫོགས་ལྡན་མགྲོན་དུ་བསྟར།། ཞེས་བྱ་བ་ནི་ཁས་བླངས་འགལ་བའི་ཚུལ་ཆེ་ལོང་ཙམ་བཤད་པའི་སྐབས་སོ།། །།
གཉིས་པ་མ་རྟོག་འཁྲུལ་བའི་ཉེས་པ་བརྗོད་པ་ལ་གསུམ་ལས། དང་པོ་ནི། བྱེ་སྨྲས་འཇིག་ལྟའི་རྒྱུ་དང་རྒྱུ་ཅན་གཉིས་ཀ་ཡིན་པའི་ཕྲ་རྒྱས་བཞི་བཅུ་འདོད་ཅེས་ཁོ་བོས་བྲིས་པ། ཁོང་ལ་ཐུགས་རྒྱུས་མེད་པས་བབ་ཅོལ་འདི་ལྟར་སྨྲས་ཏེ། ༼མི་ཕམ་གྱིས་༽འཇིག་ལྟའི་རྒྱུ་དང་རྒྱུ་ཅན་གྱི་ཕྲ་རྒྱས་ལོས་ཡོད། ༼མཛོད་༽རྩབར། རང་གི་ས་པའི་ཉོན་མོངས་ཀུན།། ཞེས་དང་། རྨོངས་ལས་ཐེ་ཚོམ་ཞེས་སོགས་དྲངས། བཞི་བཅུའི་གྲངས་སྨོས་པ་འབྲི་ཡང་མ་ཕོད་མོད། ཐུགས་འཚུབ་ལངས་ག་ལ་དགོས། གྲངས་འདྲེན་ངན་བསྙོག་མི་བྱེད་དེ། ངའི་ཆོས་ཀྱི་ཟླ་བོ་མཆོག་གི་དྲིན་ཇི་ལྟར་བརྗེད། འོན་ཀྱང་ལུགས་དེར་འཇིག་ལྟ་མ་དྲངས་པའི་སྲེད་པ་མེད་ཅེས་ཁྱེད་ཀྱིས་བྲིས་པས་དེ་འགོག་ཕྱིར་གཉིས་ཡིན་གྱི་གྲངས་སྨོས་ཤིང་། ཁྱེད་ཀྱིས་དྲངས་པའི་ལུང་སྔ་མ་དེས་འཇིག་ལྟས་དྲངས་པའི་སྲེད་པ་ཇི་ལྟར་སྟོན། ལུང་དེ་དང་འབྲེལ་བར་ཆིག་རྐྱང་ཐུབ་པ་སྔ་མས་གཞན་ཞེས་དང་། དངོས་གཞི་ལྡན་པར་ལོག་ལྟ་མངོན་དུ་རྒྱུད་ཚུལ་སོགས་དཔྱད་འོས་མང་བ་སུ་ཞིག་འབྲི། ལུང་ཕྱི་མས་བརྒྱུད་ནས་སྐྱེས་ཚུལ་སྟོན་ནའང་། རྒྱུ་བཞི་འབྲས་བུ་གཉིས་མུ་གསུམ་གསུང་བའི་སྐབས་དོན་དང་ག་ལ་འབྲེལ་ཤར་ནུབ་བཞིན་ནོ། །འཇིག་ལྟའི་སྔ་རོལ་དུ་བྱུང་བའི་འཇིག་ལྟ་འདིའི་སྐབས་ཀྱི་འབྲས་བུ་མིན་ལ། འཇིག་ལྟའི་འཇིག་ལྟ་དང་གཅིག་ཡིན་མོད་ཞེས་ཀྱང་རྒོལ་ལོ། ། སྨྲས་པ། དབུས་མེད་དབུ་མར་སྨྲ་བ་དབུ་འཁོར་ནས།། ཆོས་མངོན་མཛོད་ཀྱི་ཐང་ཆེན་ཉུལ་བས་དལ།། ཀཱ་ཡེ་ཉོན་དང་མི་ཕམ་དགེ་བའི་བཤེས།། ད་ནི་ཆོས་མངོན་སྨྲ་བའི་བཤེས་གཉེན་བསྟེན།། དེ་ཡི་དགྱེས་འཛུམ་ཞལ་གྱི་བདུད་རྩི་ཡིས།། ཁྱོད་ཐུགས་གདུངས་པའི་མེ་ཆེན་གཞིལ་བར་འགྱུར།། འོན་ཀྱང་ལོང་བའི་མུན་མདའ་འཕངས་པའི་ཚུལ།། དྲན་པས་ཕྱིར་ཞིང་ཡིད་མུག་གྱུར་ན་འང་།། དེ་ཚེ་དགག་སྒྲུབ་ལས་ལ་ཐུགས་སྐྱོ་ནས།། ཏིང་འཛིན་བསྒོམ་པའི་བློ་ཞིག་འོང་ཡང་མཆི།། ལུས་མེད་མདའ་ཡིས་རྨས་པའི་ཉེས་དམིགས་ཀྱང་།། མཐོང་བར་ངེས་ཏེ་དེ་ནས་རྟག་ཏུ་སྒྲིམས།། ཞེས་བྱ་བ་ནི་གསོང་པོར་སྨྲས་པའོ།། གཉིས་པ་ནི། ༼མི་ཕམ་གྱིས་༽རབ་སྣང་དུ་སངས་རྒྱས་ཚེ་སེམས་མེད་པར་ཐལ། སེམས་གནས་གྱུར་པའི་ཕྱིར། ས་བོན་མྱུ་གུར་གནས་གྱུར་ཚེ་ས་བོན་མེད་པ་བཞིན་ཞེས་སྨྲས་སོ། །འོ་ན་འདི་ལྟར། རྟོག་གེ་དྲེགས་ལྡན་སེང་ཆེན་འཇིགས་པའི་གདོང་།། ལས་ཀྱིས་བསྙེགས་པའི་ཀླག་ཅོར་མཁན་འདི་སུ།། རབ་འཇིགས་རྔམས་པའི་སྦར་མོས་བཅིང་བ་ལས།། རྣོ་ངར་མཆེ་བའི་ཕྲག་པར་འདྲེན་ལ་ལྟོས།། སངས་རྒྱས་ས་ན་དབང་པོ་ལྔ་མེད་པར་ཐལ། སངས་རྒྱས་ཚེ་དབང་པོ་ལྔ་གནས་གྱུར་པའི་ཕྱིར། རྟགས་གྲུབ་སྟེ། མགོན་པོ་བྱམས་པས། དབང་པོ་ལྔ་རྣམས་གནས་གྱུར་ན།། དོན་ཀུན་འཇུག་དང་ཐམས་ཅད་ཀྱི།། ཡོན་ཏན་བརྒྱ་ཕྲག་བཅུ་གཉིས་འབྱུང་།། ཞེས་གསུངས་པའི་ཕྱིར། ཡ་ཚ་ལ་ལ། སངས་རྒྱས་ས་ན་ནམ་མཁའི་འདུ་ཤེས་མེད་པར་ཐལ། རྒྱན་ལས། ནམ་མཁའི་འདུ་ཤེས་གཞན་གྱུར་ན།། ཞེས་སོགས་གསུངས་པའི་ཕྱིར། མ་ཚ་ལ་ལ། སངས་རྒྱས་ས་ན་མིག་ཤེས་སོགས་མེད་པར་ཐལ། དབང་ཤེས་ལྔ་གནས་གྱུར་པའི་ཕྱིར། ཙན་དྲ་གོ་མིས། དབང་པོ་ལྔ་ཡི་རྣམ་ཤེས་གང་།། ཞེས་སོགས་གསུངས་པའི་ཕྱིར། ཕ་ཚ་ལ་ལ། སངས་རྒྱས་ས་ན་གཟུགས་མེད་པར་ཐལ། གཟུགས་ཕུང་སོགས་གནས་གྱུར་པའི་ཕྱིར། རྟགས་གྲུབ་སྟེ། གཞུང་དུ་མར། གཟུགས་ཀྱི་ཕུང་པོ་གནས་གྱུར། མེ་ལོང་ལྟ་བུའི་ཡེ་ཤེས་མངོན་དུ་བྱས། ཞེས་སོགས་གསུངས་པའི་ཕྱིར། ཨ་བ་ལེ་བ། མདོར་ན་གནས་གྱུར་གྱི་དོན་མ་གོ་བ་སྟེ། གནས་སྐབས་ཅན་དེ་རྣམས་གནས་སྐབས་ཁྱད་པར་བར་སོན་པའི་དོན་ཡིན་ལ། གནས་སྐབས་ཅན་སྤྱི་དེ་མེད་མི་དགོས། གནས་སྐབས་ཀྱང་དེ་བཞིན་འཇོག་ཅིང་། དེ་གཉིས་ཀྱི་སྔ་ཕྱིའི་སྐད་ཅིག་སོ་སོ་བ་རྣམས་སྤྱི་དེ་དག་དང་སྐྱེ་འགག་མི་མཉམ་པ་སོགས་དཔྱད་བྱ་མང་མོད་ཡི་གེས་འཇིགས་སོ།། སྨྲས་པ། དགག་སྒྲུབ་ལས་སུ་གནང་བ་དཀྲོལ་ན་ཡང་།། མི་འདོད་ཕྱིར་ཞིང་སྤྲོ་བ་འཕེལ་ཞེས་མོལ།། འོ་ན་རྨོངས་འཁྲུལ་མི་སྡུག་རང་མཚང་འདིར།། སྒྲིམས་ནས་ལྟོས་དང་རང་ཡང་ཡིད་འབྱུང་འགྱུར།། སྒོམ་པའི་ཏིང་འཛིན་རྩོད་པའི་ཤེས་རབ་སྟེ།། གཉིས་ཀས་བཏང་བའི་མི་ཕམ་ཇི་ལྟར་ཕམ།། ལྟོས་ཤིག་འཛམ་གླིང་ཡངས་པའི་མཁས་པ་རྣམས།། ཁྱབ་བ་ལོག་པའི་ཉེས་མཚུངས་རི་མོ་བཀྲ། ཧ་ཧ་ཀུ་རེ་བྱས་སོ་མཁས་པའི་དབང་།། ཁྱོད་ཐུགས་འགྱེད་ཆེ་བརྟན་བརྗིད་ལྷུན་པོ་བཞིན།། ཚིག་གི་བསེར་བུ་ཕྲ་མོས་གཡོ་མ་ཡིན།། ཤིང་བལ་རེག་པའི་ཁང་བཟང་ཇི་བཞིན་ནོ།། མི་བརྟན་ཚེ་ནི་གློག་བཞིན་གཡོ།། དལ་འབྱོར་གྲུ་གཟིངས་ཀུན་ནས་ཟག། ལས་ངན་སྡུག་བསྔལ་ཁང་བུ་རུ།། ཇི་ལྟར་འཇུག་སྙམ་བློ་མ་བདེ།། བག་མེད་ལང་ལ་ཤོར་བའི་རོ་འཛིན་འདི།། མི་བཟད་སྡིག་པའི་ལས་ཀྱི་ཕྱག་མ་སྟེ།། ཇི་སྲིད་དུར་སར་མེ་ཡིས་མ་རེག་བར།། དེ་སྲིད་དོན་མེད་ངལ་ལོ་ཨ་ཙ་མ།། ཞེས་ཀྱང་འཚེར་རོ།།
གསུམ་པ་ནི། ཁོ་བོས་བརྗོད་མེད་ཀྱི་བདག་བཀག་པ་དང་། མདོ་ལས་ཤེས་བྱ་ལྔ་གསུང་བ་མི་འགལ་ཚུལ་ཞེས་བྲིས་པ། ཁོང་ལ་རྒྱུས་མ་བྱུང་བས་༼མི་ཕམ་གྱིས་༽ལང་གཤེགས་ལས་བྱུང་བའི་ཆོས་ལྔ་དང་། མདོ་རྒྱན་ལས་གསུང་བའི་ཡོངས་ཤེས་ལྔ་ཡིན་ནམ། ཤེས་བྱ་གྲངས་ལྔ་བ་མང་བས་བརྟག་གཞིར་སོང་ཞེས་བྲིས་འདུག ཀྱེ་མ་མི་ཤེས་སྨྲས་ན་ཆོག་སྟེ། འུ་ཅག་སོ་སྐྱེ་ཡིན་པ་སུ་ལ་གསང་། མི་ཤེས་པ་མཐའ་མེད་ཅིང་ཤེས་པ་རྡུལ་ཙམ་ལས་མེད་མོད། ཚུལ་འདི་ལ་དཔག་ན། མཁས་པའི་ཟོབ་ཀྱང་ཆེ་བར་སྣང་། ལེགས་པར་དཔྱད་མ་ནུས་པའི་སྐྱོན་དུ་མཐོང་སྟེ། མི་འགལ་ཚུལ་སྨོས་པས་ཤེས་དགོས་ཏེ། བློ་ལྡན་ལ་འགལ་ལམ་སྙམ་པའི་དོགས་པ་སྐྱེ་རིགས་པའི་གནད་ཡོད་པའི་ཕྱིར། དེས་ན་འདི་ལྟར། ཁོ་བོའི་ཡབ་རྗེ་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་ངག་དབང་བརྩོན་འགྲུས་གྲགས་པའི་སྡེའི་གྲུབ་མཐའ་ཆེན་མོར་མཛོད་འགྲེལ་གྱི་གནས་དགུ་པ་དྲངས་པར། གལ་ཏེ་འདི་ཕུང་པོ་རྣམས་ལས་གཞན་དུ་བརྗོད་པར་བྱ་བ་མིན་ན། ཤེས་བྱ་ནི་རྣམ་པ་ལྔ་སྟེ། འདས་པ་དང་། མ་འོངས་པ་དང་། ད་ལྟར་བྱུང་བ་དང་། འདུ་མ་བྱས་དང་། བརྗོད་པར་བྱ་བ་མིན་པའོ། །ཞེས་ཤེས་བྱ་ལྔ་འདོད་པ་དང་འགལ་བ་བརྗོད་པས་སོ། །ཞེས་བྱུང་ཞིང་གཞན་དུའང་ཤེས་བྱ་ལྔའི་རྒྱ་མཚོའི་ཕ་རོལ་དུ་ཕྱིན་པར་གྱུར་ཏོ་ཞེས་གསུང་སྟེ། བརྗོད་མེད་ཀྱི་ཤེས་བྱ་ནི་སྦྲོས་བྲལ་སྟོང་པ་ཉིད་ཡིན་ལ། ཁྱེད་ཅག་སྔོན་མ་རྣམས་དང་བཅས་པས་ལུང་འདི་དག་མ་མཐོང་བར་ངེས་ཏེ། མཐོང་ན་བརྗོད་མེད་སྨོས་པས་དགའ་ཞིང་། ཤེས་བྱ་སྨོས་པས་ཡིད་མི་བདེ་བར་སེམས་སོ།། བརྗོད་མེད་ཅེས་བྱུང་ཚད་སྒྲ་རྟོག་གི་ཡུལ་མ་ཡིན་པར་འདོད་ན། ད་དུང་མང་པོ་ལུས་འདུག་པ་ཁྱེད་ཅག་ལ་སྦྲན་པར་བྱ་སྟེ། མཐོང་སྒོམ་སོགས་ཆོས་དཀོན་མཆོག་སྒྲ་རྟོག་གི་ཡུལ་མ་ཡིན་པར་ཐལ། རྒྱུད་བླ་མར། བརྟག་མིན་ཕྱིར་དང་བརྗོད་མིན་ཕྱིར།། ཞེས་སོགས་གསུངས་པའི་ཕྱིར། གཞན་དབང་སྒྲ་རྟོག་གི་ཡུལ་མ་ཡིན་པར་ཐལ། བྱང་སར། བརྗོད་དུ་མེད་པའི་བདག་ཉིད་ཀྱིས་ཡོད་པ། ཞེས་དང་། འཇུག་པར། སྤྲོས་ཀུན་ཡུལ་མིན། ཞེས་གསུངས་པའི་ཕྱིར། ཡང་རྟོག་པའི་ཡུལ་ཡིན་པར་ཐལ། དགོངས་འགྲེལ་ལས། རྣམ་པར་རྟོག་པའི་སྤྱོད་ཡུལ། ཞེས་སོགས་ཁྱད་པར་གསུམ་ལྡན་དུ་བཤད་པའི་ཕྱིར། གཞན་ཡང་གྲངས་ཀྱི་གནས་བརྒྱ་དང་ཉེར་གསུམ་གྱི་ནང་དུ་བརྗོད་དུ་མེད་པ་སོགས་གསུམ་བྱུང་བ་ཡང་སྒྲའི་ཡུལ་མ་ཡིན་པར་ཁས་ལོངས་ཤིག འཇིག་རྟེན་གྲགས་ཚོད་དང་ཡང་འགལ་ཏེ། བརྗོད་དུ་མེད། བསམ་དུ་མེད། གྲངས་མེད་ཅེས་གྲགས་པ་དུ་མ་ཡོད་པའི་ཕྱིར། རབ་སྣང་འདིར་སྟོང་ཉིད་སྒྲའི་བརྗོད་བྱ་ཡིན་པར་ཡང་བཤད་མོད། རྣམ་འགྲེལ་གྱི་ལུང་དྲངས་ནས་རང་མཚན་སྒྲའི་བརྗོད་བྱ་མིན་པར་བཤད་པས་གཏད་ས་ཅི་ཡང་མེད་དེ། སྟོང་ཉིད་སྒྲའི་བརྗོད་བྱ་ཡིན་དགོས་པའི་རྒྱུ་མཚན་དེས་འདུ་བྱས་རྣམས་སྒྲའི་བརྗོད་བྱར་མི་འགྲུབ་བམ། རྒྱུ་འབྲས་ཆེ་ཆུང་ཡིན་གྱུར་མིན་གྱུར་ཡིན་ལོག་མིན་ལོག་སོགས་དོན་མེད་ཟེར་བ་ནི། དབུ་མ་རིགས་པའི་ཚོགས་སུ་རྐྱེན་བརྟག་པ་སྔ་རོལ་ན་གནས་པ་བརྟག་པ་དང་། ཡིན་པར་གྱུར་ལ་བྱ་བ་མེད།། ཅེས་སོགས་དང་། རང་བཞིན་མེད་པ་ཉིད་ལོག་ན།། ཞེས་སོགས་རྒྱ་ཆེར་གསུང་བ་རྣམས་སྐབས་དོན་ལས་ཉམས་པའི་སྐྱོན་ཅན་དུ་བྱོས་ཤིག འཕགས་བོད་ཀྱི་རིགས་པའི་དབང་ཕྱུག་རྣམས་ཀྱི་གཞུང་རང་གིས་མི་ཤེས་པའི་ཉེས་དམིགས་སུ་བལྟས་པའི་རྣམ་སྨིན་འདིར་མངོན་དུ་གྱུར་འདུག་པས་དེས་ན། སྤྱོད་འཇུག་ལས། རྒྱལ་སྲས་རྣམས་ཀྱིས་མི་སློབ་པའི།། དངོས་དེ་གང་ཡང་ཡོད་མ་ཡིན།། དེ་ལྟར་གནས་པའི་མཁས་པ་ལ།། བསོད་ནམས་མི་འགྱུར་གང་ཡང་མེད།། ཅེས་སོགས་གསུང་བ་དག་འབྲེལ་མེད་དུ་མི་དགོངས་པར་གསོལ་བ་འདེབས་སོ། ། སྨྲས་པ། ཤེས་བྱ་རིགས་པའི་གནས་ནི་མཁའ་ལྟར་ཡངས།། ཚུར་རོལ་བྱིས་པའི་བློ་མིག་རྨོངས་པས་ལོང་།། དབང་མེད་བྱུང་རྒྱལ་སྨྲ་བའི་བཀའ་ཁྲིམས་དེ།། རང་མཐོང་ཆེ་བའི་དྲེགས་ལྡན་སེམས་ཀྱིས་བསྒྲག། དྲི་མེད་རིགས་ལམ་འཕྲུལ་གྱི་མན་དྷ་རས།། རབ་འབྱམས་གཞུང་ལུགས་རྒྱ་མཚོ་བསྲུབས་པ་ལས།། ལེགས་འོངས་ས་འཛིན་ཡངས་པའི་དཀྱིལ་འཁོར་ན།། མི་སྙན་དགུ་སྙན་དགའ་བ་བསྐྱེད་པའི་རྫས།། མི་ཟེར་དགུ་ཟེར་རྣམ་རྟོག་མཆེད་པའི་རྫས།། མི་མཐུན་གཅོང་ནད་ཞི་བའི་སྨན་གྱི་རིགས།། མི་ཕམ་བླ་མར་མི་དམན་འབུལ་བ་ཡོད།། སྤྲུལ་བའི་སྐུ་མཆོག་གཉིས་ལ་ཕྱེད་ཀ་རེ།། གཞན་དག་ལ་ཡང་ངལ་བ་ཆུད་མ་གཟོན།། བསམ་གཏན་བཏང་ནས་དགག་སྒྲུབ་ལ་ཞུགས་པའི།། ལས་ཀྱི་རྣམ་སྨིན་མཁྱེན་པའི་རྟེན་དུ་འབུལ།། གཤིས་བཟང་ཐོས་འཛིན་ལྷག་བསམ་དག་པ་ཡིས།། རབ་སྣང་སྤྲོས་པ་དགའ་བའི་འཕྲིན་བཞིན་སྤྱོད།། བླ་མའི་ཐུགས་ཀྱི་བསྙུང་གཞི་ཐོན་པའི་ཕྱིར།། ལེགས་པར་བྱས་པ་ལ་ཡང་གློ་བ་དགའ།། ད་དུང་འགལ་འཁྲུལ་ཚབས་ཆེན་ནད་ཡོད་ན།། གསོ་བའི་རྟོག་གེ་སྨན་པ་ང་ཡིན་ཏེ།། རྩུབ་དཔྱད་འགའ་ཞིག་བཙན་ཡང་ཁོང་སྐྲན་འདོན།། མ་རིག་རྨོངས་པས་སྨྲས་པ་མཐོལ་ལོ་བཤགས།། མ་རྟོག་འཁྲུལ་བས་འཁྱམ་པ་གནོང་ཞིང་འགྱོད།། མ་དད་ལོག་པའི་ཚིག་གི་མཚོན་ཆ་ཡིས།། མ་གཟས་རེག་པའི་ཉེས་པ་བྱུང་ན་བཟོད།། ཅེས་བྱ་བ་ནི་བག་མེད་འཆོལ་བའི་གཏམ་གྱི་རིམ་པའོ།།
གསུམ་པ་ལོག་རྟོག་བསལ་བ་ནི། ༼མི་ཕམ་གྱིས་༽དངོས་སྨྲས་སྟོང་ཉིད་མ་ཡིན་དགག་ཏུ་འདོད་ཅེས་བྱེ་སྨྲ་དང་ཁྱད་མེད་པར་འཁྲུལ། བདེན་གྲུབ་ཀྱིས་སྟོང་པར་བྱས་ན་སྟོང་ཉིད་མ་ཡིན་དགག་ཏུ་སོང་ཟེར། བདེན་མེད་མེད་དགག་དེ། སྟོང་ཉིད་དུ་མི་རིགས་ཞེས་འགོག་པ་དང་རང་གིས་ཀྱང་སྐབས་འགར་སྟོང་ཉིད་དུ་བཤད་པ་འཁྲུལ་ལོ། །དངོས་སྨྲ་བ་ཞེས་སྦྱར་བས་ངོ་བོ་ཉིད་མེད་པར་སྨྲ་བས་སྟོང་ཉིད་མེད་དགག་ཏུ་འདོད་པར་ཡང་ཁས་བླང་ངོ་།། གཟུགས་བདེན་གྲུབ་ཀྱིས་སྟོང་པ་མེད་དགག་མིན་ན་མེད་དགག་མེད་ཅིང་། འབྲེལ་ཟླ་མི་དམིགས་པ་སོགས་དགག་རྟགས་མེད་པས་རྣམ་འགྲེལ་གྱི་ཊིཀྐ་གནང་བ་ཡ་མཚན་ཆེའོ། །ཙམ་གྱི་སྒྲ་ནི་ཚད་གཟུང་བའི་དོན་དུ་གསུང་མོད། མཁས་པ་ཉིད་ནས་ཁྱད་ཅི་ཡང་མི་བྱེད་པར་སྣང་། སེམས་ཙམ་གྱི་སྒྲའི་ཚུལ་གཉིས་གཞུང་ཆེན་མོ་དག་ཏུ་གསུང་ལ། ཁོང་ནས་༼མི་ཕམ་གྱིས་༽སེམས་མ་ཡིན་པ་བཅད་ནས་ཡིན་པ་སྟོན་ཟེར། འོ་ན་སྔོན་གྱི་བསྟན་པ་རྫོགས་ལྡན་གྱི་དུས་དེ། རྟགས་ཙམ་འཛིན་པའི་དུས་ཡིན་པར་ཐལ། མི་འཛིན་པ་མ་ཡིན་ཞིང་འཛིན་པའི་དུས་ཡིན་པའི་ཕྱིར། རྟགས་དངོས་དང་ཁྱབ་པ་དོན་གྱིས་ཁས། དེང་དུས་རབ་བྱུང་ཡིན་ཟེར་ཀྱང་རྟགས་ཙམ་ཡང་འཛིན་པའི་ལེའུ་བཅུ་གཅིག་པ་ཞིག་སྣང་ལ། ཕྱི་པའི་དྲང་སྲོང་བསམ་གཏན་པའི་སྲོལ་སྐྲ་རིང་པོར་འཇོག་པ་བཅོམ་ལྡན་འདས་ཉིད་ཀྱིས་ཤིན་ཏུ་སྨད་པ། བློ་ངན་ཁྱོད་ཀྱི་རལ་བ་ཅི།། ཞེས་པའི་གསུང་སུན་འབྱིན་པ་རབ་བྱུང་དང་ཁྱིམ་པའི་ཆས་བསྲེས་པའི་རྟགས་གཉིས་ལྡན་གྱི་ལེའུ་བཅུ་གཉིས་པའང་བཟོས་པ་སྟོན་པ་ཉིད་ལ་བརྙས་པར་འདོད་པ་སྟེ། རྒྱུད་ལས་སྔགས་པ་ཁྱིམ་པར་རབ་བྱུང་གི་རྟགས་མི་དགོས་གསུངས་པས་རབ་བྱུང་སྔགས་པས་ཁྱིམ་པའི་རྟགས་རྣམས་ཀྱང་འཛིན་མི་དགོས་པར་རིགས་པ་སྔ་མ་དེས་ཤེས་པའི་ཕྱིར། གལ་ཏེ་ཁྱད་མེད་ན་གོས་མེད་པར་གཅེར་བུར་ཕྱུང་ལ་སྣང་མཛད་དང་མི་བསྐྱོད་པར་ཅི་དགར་སྤྱོད་ཅིག། འདོད་པས་གདུངས་པས་ཆང་དང་རིག་མར་སྤྱོད་ཅིང་རྡོ་རྗེ་འཆང་གི་དགོངས་པ་རྫོགས་སྙམ་པ་ཤིན་ཏུ་འཁྲུལ་བ་སྟེ། གཞན་དུ་ན་རྒྱལ་བུ་དོན་གྲུབ་ཀྱིས་བཙུན་མོ་དྲུག་ཁྲི་བཏང་བ་དང་། བུང་བ་ལྟར་གནག་ཅིང་སྣུམ་ལ་ཡིད་འཕྲོག་པའི་དབུ་སྐྲ་བྲེག་པ་དེ་ནོངས་སམ། ལེགས་པར་མ་བརྟགས་པ་སྟེ་ཆོས་བརྒྱད་ཀྱི་གདོན་དེ་གཟོ་མཁས་པས་ཆོས་པ་མང་པོ་ཞིག་བསླུས་སོ།། ཡང༼མི་ཕམ་གྱིས་༽རང་བཞིན་གྱིས་གྲུབ་པ་སོ་སྐྱེའི་ངོར་སྣང་བ་ལ་ཞེས་པའི་ལ་སྒྲ་འོག་གི་བསྒྲུབ་པའི་ཚིག་དང་འབྲེལ་བས་སྤྱིར་ལས་ལ་གཉིས་དང་བཞིར་ཡང་བཤད་པའི་ལས་དང་བྱ་བ་གཉིས་སུ་ཕྱེ་ནས་ལས་ལ་ཉེ་བའི་རྣམ་དབྱེ་ཡིན་དགོས་རྒྱུ་ལ་དེ་མིན་རྟེན་གནས་ཀྱི་སྒྲ་ཡིན་གསུང་། དེ་ལྟ་ན་སྣང་བ་གཞི་བྱས་ཏེ། དེའི་སྟེང་དུ་གནས་པ་ཞིག་སྟོན་དགོས། གཏན་ཚིགས་སྟོན་ནའང་སྣང་བར་བསྒྲུབ་པའི་རྟགས་དེར་མ་བསྟན་པའི་ཕྱིར་དང་། གནས་དང་གནས་པ་གཉིས་སུ་ཕྱེ་སྟེ་གཙོ་བོ་གནས་ལ་ཉེ་བ་རྣམ་དབྱེ་བདུན་པའི་དོན་དུ་བཤད་པའི་ཕྱིར། ཡང་༼མི་ཕམ་གྱིས་༽སྡེབ་སྦྱོར་བྱས་ན་གཞན་དང་མི་མཉམ་པ་ནུས་ཞེས་བསམ་གཏན་པ་ང་རྒྱལ་ཅན་ཞིག་འདུག་སྟེ་སྔོན་དུས་ཡང་དེ་འདྲ་མང་པོ་བྱུང་བ་མདོ་དྲངས་པ་ལྟར་རོ།། ཁོ་བོ་ནི་དེ་འདྲ་མིན་ཞིང་ཚིག་དོན་གང་ལའང་འཁྲུལ་སྙམ་དུ་སེམས་ཁོང་དུ་ཆུད་པ་ལ་མེད་མོད། ཇི་སྐད་དུ། ཐུབ་བསྟན་ལང་ཚོ་ཡོལ་བའི་བསྐལ་བཟང་གིས།། ཆོས་སྨྲའི་གཡར་ཁྲལ་ཕོག་པ་བདག་འདྲ་ཡང་།། ཞེས་གསུང་བ་ལྟར་ཉམས་དང་འུད་བསྒྲག་པ་ཙམ་མོ།། ཡང་ཁྱེད་ཀྱིས་༼མི་ཕམ་གྱིས་༽ཕུང་འདི་སྟོང་ཞེས་རྟོགས་ན་ཞེས་ས་མཐའ་ཅན་དུ་བྲིས་པ་ཡི་གེ་བས་ནོར་ཞེས་ངོ་སོ་མེད་པར་མ་ཉེས་པའི་ཁ་ཡོག་ཅིག་མགོ་བོར་བསྐྱོན་སྣང་སྟེ། ཉམ་ཆུང་ཡི་གེ་བ་དེ་སྙིང་མ་རྗེ། ཁོ་བོས་ཡི་གེ་དག་མོ་མི་ཤེས་ལ་གཞན་ལ་ངན་ཁེགས་འགེལ་ཡང་མི་ཕོད། གསུང་དེ་དག་རྩོམ་ཆོས་མང་པོ་སྤེལ་བ་ལ་ངན་གཡོའི་ཚིག་བཞིན་གསང་བའི་མན་ངག་ཅིག་ཡིན་མཆི། ཡང་༼མི་ཕམ་གྱིས་༽བདག་ཏུ་འཛིན་པའི་ང་རྒྱལ་དང་བདག་འཛིན་འགལ་སྙམ་པ་དང་། དེ་གཉིས་འབྲེལ་བ་གཉིས་ཀར་རུང་གསུངས་པས་ངོ་བོ་གཅིག་དང་ངོ་བོ་ཐ་དད་གཉིས་ཀར་ཐལ་ལོ། །བློ་ནུས་ཡོད་ན་འཆད་པའི་སྒོ་དོག་མི་དགོས་གསུང་བ་སྤྱི་བརྡོལ་ཤིན་ཏུ་ཆེ་བའི་རང་བཞིན་ཡ་ང་བ་ཞིག་སྟེ། བཀའ་གདམས་པའི་གསུང་གྲོས་ལ་སེམས་ཀྱི་དཔངས་དམའ་དགོས་པར་འདུག་པ་དགོངས་འཚལ། ཉོན་མོངས་ཀྱི་ཆོས་ཉིད་དང་། རྣམ་མཁྱེན་གྱི་ཆོས་ཉིད་ངོ་བོ་གཅིག་ཡིན་གསུང་བའི་དཔེ་མེ་ལ་སྦྱོར་བ་ཧ་ཅང་ཕུང་ངོ་། །ཁྱེད་ངན་སོང་ལ་རྒྱུས་མེད་པ་སངས་རྒྱས་ས་ནས་མར་རིམ་གྱིས་བྱོན་པ་ཞིག་ཡིན་སྟབས་བདེན་ངེས། ད་ཁས་ལེན་མེད་པའི་ལྟ་བ་དེ་སྐྱོང་ལ་མཐོ་རིས་སུ་འགྲོ་ན་འབྲས་བུ་ཆེ་བའི་ཕྱོགས་ཤིག་ན་དབེན་པའི་རི་ཁྲོད་ཉམས་དགའ་བ་ཞིག་ཡོད་འདུག་པས་དེར་བསྐལ་ཆེན་ལྔ་བརྒྱར་མཚམས་སུ་བཞུགས་པར་ཞུ། ཧ་ཧ་ཀུ་རེ་ཙམ་མོ།། ཡང་༼མི་ཕམ་གྱིས་༽གཟུང་འཛིན་གྱི་སེམས་སངས་རྒྱས་ཀྱི་ས་ན་མེད་ཟེར། དེ་ལྟ་ནའང་གཟུང་བ་དང་འཛིན་པ་གང་ཡིན་ཞེས་བརྟག་པར་རིགས་ནའང་ཡི་གེས་འཇིགས་སོ།། ༼མི་ཕམ་གྱིས་༽སེམས་སངས་རྒྱས་ས་ན་ཡོད་ན་དེ་སེམས་ཅན་དུ་ཐལ་ཟེར། སྙིང་རྗེ་པད་དཀར་སོགས་སུ་སེམས་ཅན་ཆེན་པོ་ཞེས་གསུངས་མོད། གྲགས་ཚོད་དང་བསྟུན་ན་ཉི་སྣང་དུ་ཞུམ་པའི་བདག་ཉིད་ཅན་ཡིན་པས་སེམས་ཅན་ཞེས་བྱུང་བ་ལྟར་ཤེས་དགོས་ལ། ཁྱེད་རང་ལྟར་ན་སྲོག་དང་ལྡན་ན་སྲོག་ཆགས་དང་། མཚོ་ལས་སྐྱེས་ན་མཚོ་སྐྱེས་དང་། འགྲོ་བའི་བྱ་བ་ཡོད་ན་འགྲོ་བ་ཡིན་པའི་ཁྱབ་པ་ཁས་ལོངས་ཤིག ༼མི་ཕམ་གྱིས་༽གཉུག་སེམས་ཡོད་ན་ཡང་སེམས་མི་ཟེར་ཡེ་ཤེས་ཞེས་མིང་འདོགས་པས་མིང་ལ་མི་རྩོད་ཞེས་ཀྱང་གསུང་། ཡེ་ཤེས་ཡིན་ན་ཡོད་པར་ཁས་བླངས་པས་སེམས་ཅན་དུ་ཐལ་བ་ཁྱེད་ཀྱིས་ཕྱིར་མནོས་པ་ལེགས་སོ། །ལུང་ལས། སེམས་ཀྱི་སྐད་ཅིག་གཅིག་ལ་ཐུགས་ཆུད་ནས།། ཞེས་དང་། སེམས་ཀྱི་སྐད་ཅིག་དོན་ཀུན་རིག། ཅེས་གསུངས་ལ། ཀུན་རྫོབ་དང་དོན་དམ་པའི་སེམས་བསྐྱེད་སངས་རྒྱས་ས་ན་ཡོད་དགོས། སེམས་མེད་ན་མུ་ལ་ངེས་ལྔ་དང་། དགེ་བ་བཅུ་གཅིག་འདོད་པ་འགལ་ཞིང་། སེམས་སེམས་བྱུང་དུས་མཚུངས་པ་སོགས་མི་རིགས་པ་དང་། གནོད་བྱེད་ཤིན་ཏུ་མང་བ་སུ་ཞིག་འབྲི། འོན་ཀྱང་གོང་འོག་དུ་མར་སེམས་ཡོད་པར་ཡང་བཤད་དོ།། ཡང་༼མི་ཕམ་གྱིས་༽ཟླས་དྲངས་ཞེས་པའི་དོན་མ་དགོངས་པར་སྣང་སྟེ། སྤྱིར་ཟླས་དབྱེ་ཞེས་པ་དང་། ཟླས་བསྡུས་ཞེས་འགལ་ཟླ་དང་འབྲེལ་ཟླར་གོ་ཚུལ་མང་མོད། སྲེད་པ་འདི་ཞེས་སྨོས་པས་ཐལ་འགྱུར་བའི་ལུགས་ཀྱི་སྦེད་པ་པོ། འདི་ཞེས་པས་སྲེད་པ་དེ་ཟེར་བ་ཞིག་ཟླས་དྲངས་པ་ཕ་རོལ་བས་འདོད་པའི་སྲེད་པ་སྟེ། དེ་ཕ་རོལ་བས་འདོད་པ་ལྟར་གྱི་ཉོན་མོངས་ཅན་ཡིན། ཕ་རོལ་བས་འདོད་པ་ལྟར་གྱི་ཉོན་མོངས་ཅན་ཡིན་མིན་གཉིས་གཞི་ཐ་དད་ཀྱང་གོ་སྟོབས་ཆེ་བས་མ་ཤེས་པར་སྣང་ལ། ༼མི་ཕམ་གྱིས་༽ཉན་ཐོས་སྡེ་བས་འདོད་པ་ལྟར་གྱི་ཉོན་མོངས་ཅན་དང་། ཉོན་མོངས་ཅན་མ་ཡིན་པའི་གཞི་མཐུན་འདོད་དམ་ཟེར། སྔ་མ་ལ་ཁྱད་པར་སྦྱར་ཡང་། ཕྱི་མ་ལ་མ་སྦྱར་བས་རིགས་པའི་འགྲོས་མི་འདྲ་བ་ཡོད་དེ། ཉན་ཐོས་སྡེ་བས་འདོད་པ་ལྟར་གྱི་ཉོན་མོངས་ཅན་ཡིན་ཀྱང་། ལུགས་འདིར་བློ་དོན་མཐུན་ཡིན་པ་ཡོད་པའི་ཕྱིར། གཟུགས་རང་བཞིན་གྱིས་མེད་པར་འཛིན་པའི་བློ་དེ། སྔ་མ་ཡིན་ལ། ཕྱི་མ་ཡང་ཡིན་པའི་ཕྱིར། འོན་ཀྱང་དབེན་པར་གབ་པ་ལ་ཅི་ཆ་ཡོད། སྨྲས་པ། ཀུན་རྟོག་ངན་པའི་ཤ་འོད་བརྡོལ་བ་ལས།། མི་གཙང་རྩ་བར་བཀྲམས་པའི་མྱ་ངམ་ཐང་།། ཤེས་ལྡན་ཡི་གར་མི་འོང་སྐྱོ་བའི་ཡིད།། ལ་གོལ་བཞུད་ལས་མིག་གིས་འཚོ་མ་ཡིན།། རྩོད་རིགས་འཕུལ་གྱིས་རྩེན་པའི་དཀྱིལ་འཁོར་ཆེ།། ཆོས་ཀྱི་ཚོང་བརྡལ་རིན་ཆེན་གླིང་མཆོག་ནས།། འོང་བའི་དེད་དཔོན་རིགས་པའི་གཏེར་མཛོད་ལ།། འཁུ་བའི་ད་རི་དྲ་ཡི་རྨོངས་ཚབས་ལྟོས།། མི་མཉམ་བསམ་གཏན་བདེ་བ་དབེན་པར་འོས།། རིགས་ལམ་འཕྲུལ་གྱི་གསང་ཚིག་ཆོས་ཀྱི་གྲྭར།། རང་རང་ལས་ཀྱི་བགོ་སྐལ་མི་བསྣོལ་བ།། དེ་ནི་དོན་ཆེན་ནོར་གྱིས་དབུལ་མ་ཡིན།། ཞེས་བྱ་བ་ནི་ངེས་པའི་ཚིག་གོ། ཡང་༼མི་ཕམ་གྱིས་༽བདེན་འཛིན་དགྲ་བཅོམ་རྒྱུད་ལ་སླར་སྐྱེ་བར་འགྱུར་ཞེས་རྫུན་ལྷངས་བྱས་ཟེར། ལེགས་པར་ཉོན་ཅིག། བྱས་ན་མི་རྟག་པར་འགྱུར་ཞེས་པའི་ན་རྒྱུ་མཚན་སྟོན་པ་སྟེ། སྨྲ་སྒོར་ན་ཡིག་དོན་བཅུ་གསུམ་ལ་འཇུག་པར་བཤད་པའི་གསུམ་པར་བཤད། དེས་བྱས་ན་མི་རྟག་པས་ཁྱབ་པ་བསྟན་པར་འགྱུར་བས་རྒྱུ་མཚན་སྟོན་པ་དེ་བཞིན་དུ། ཁྱོད་ཀྱིས་༼མི་ཕམ་གྱིས་༽བག་ཆགས་མ་སྤངས་ན་སླར་སྐྱེ་བར་འགྱུར་ཞེས་སྨྲས་པས་དེ་ལྟ་ན་ཉན་ཐོས་དགྲ་བཅོམ་ལ་སླར་བདེན་འཛིན་སྐྱེ་བར་འགྱུར་བར་ཐལ། དེའི་བག་ཆགས་མ་སྤང་བའི་གང་ཟག་ཡིན་པའི་ཕྱིར། ཁྱབ་པ་ཁས་བླངས་ཟེར་བ་ཡིན། རིགས་པའི་འགྲོས་དང་འབྲེལ་ཅི་ཡང་མེད་པར་ཐལ་བ་འཕེན་པ་ག་ལ་རིགས། རྣམ་དབྱེ་དང་ཚིག་ཕྲད་ཀྱི་རིགས་པའི་རྣམ་གཞག་ཀྱང་མི་ཤེས་པར་འགྲེལ་བ་མང་པོ་བརྩམས་ཟེར་མོད། ལོང་བས་མུན་མདའ་འཕེན་པར་ཟད་དོ།། དེ་བཞིན་དུ་༼མི་ཕམ་གྱིས་༽བདེན་གཉིས་མེད་ཅེས་སུས་སྨྲས་ཟེར་ཡང་། དེ་ཡང་འདི་ལྟར། དོན་དམ་བདེན་པ་བློའི་ཡུལ་མིན་ཞེས་སྨྲས་པས་དེ་ལྟར་ན་ཤེས་བྱར་མི་རིགས་པས་ཡོད་པ་ག་ལ་ཡིན། ཀུན་རྫོབ་ཏུ་ཡོད་པས་ཡོད་པར་ཁས་ལེན་པའི་ལུགས་མ་ཡིན་པས་ཀུན་རྫོབ་བདེན་པ་ཇི་ལྟར་ཡོད། འདིར་ཡང་འོག་ཏུ་༼མི་ཕམ་གྱིས་༽ལུགས་དེ་གཉིས་ཀ་ལྟར་མི་སྨྲ་ཞེས་མ་བྲིས་སམ། རྗེ་ཉིད་ནས་ཧྭ་ཤང་གི་གཞུང་ཡོད་ཚུལ་གསུང་བར་ཡིད་མི་ཆེས་ནའང་། ཀུན་མཁྱེན་བུའི་ཆོས་འབྱུང་དུ།བསམ་གཏན་ཉལ་བའི་འཁོར་ལོ། རྩོད་སྤོང་ལོན་དང་ཡང་ལོན། རིགས་པས་བསྒྲུབ་པ་ལྟ་བུའི་རྒྱབ་ཤ། ལུང་གིས་བསྒྲུབ་པ་མདོ་སྡེ་བརྒྱད་ཅུ་ཁུངས་སུ་དྲངས་གསུང་བར་ཡིད་ཆེས་མོད། ཆོས་རྒྱལ་ཆེན་པོའི་བཀའ་ཁྲིམས་བཙན་པས་ཀྱང་ཕལ་ཆེར་ནུབ་པར་ངེས་ལ། གཞན་ཡང་རྩ་བའི་སྡུད་པར་མ་ཚང་བས་ཞེས་པའམ། ཡང་དག་བསྡུས་པའི་གཞི་ཉམས་ཕྱིར་ཞེས་སོགས་དང་། བོ་དོང་བས། པོད་བརྒྱ་མཛད་པར་གྲགས་པ་སོགས་ཀྱིས་ད་ལྟ་དཔེ་མེད་པའི་རྒྱུ་མཚན་དེ་ཤིན་ཏུ་འཁྲུལ་ལོ།། ཡང་༼མི་ཕམ་གྱིས་༽རྒྱལ་བས་གསུངས་པར་ཤེས་ན་སུན་མི་འབྱིན།། ཟེར། སེམས་ཙམ་པས་གཞན་དབང་བདེན་གྲུབ་ཏུ་འདོད་པ་འདིར་སུན་མི་འབྱིན་པར་ཐལ། དེ་དགོངས་འགྲེལ་དུ་གསུང་བའི་ཕྱིར། འོ་ན་རྒྱལ་བའི་གསུང་སུན་འབྱིན་པར་ཐལ། སྒྲ་ཇི་བཞིན་མིན་པ་སུན་འབྱིན་པའི་ཕྱིར་ན་མ་ཁྱབ་བོ། །རྟགས་གྲུབ་སྟེ། སྒྲས་ཟིན་ལ་གནོད་བྱེད་སྟོན་པའི་ཕྱིར། ཡང་༼མི་ཕམ་གྱིས་༽སྟོང་ཉིད་རྟོགས་པའི་བློ་ཤེས་རབ་ཡིན་ཟེར། དེ་ཡིན་པ་བྱིས་པ་གསར་བུ་དག་གིས་ཤེས་མོད། འདི་ལྟར། ཤེས་རབ་ནི་ཡུལ་ངེས་ལྔའི་ནང་ཚན་ཡིན་ལ། བློ་དེ་ལ་རྣམ་ཤེས་ཚོགས་དྲུག། སེམས་བྱུང་ཉེར་གསུམ་ཡོད་པས་ངོ་ཚ་བོར་བའོ།། ཁོ་བོས། སྟོང་ཉིད་ཆོས་ཅན། རྗེས་དཔག་གི་གཞལ་བྱ་ཡིན་པར་ཐལ། ལྐོག་གྱུར་ཡིན་པའི་ཕྱིར། ཁྱབ་པ་རྒྱང་ཕེན་པས་ཤེས་སྨྲས་པ་ལ། ༼མི་ཕམ་གྱིས་༽བསྒྲུབ་བྱ་རྟགས་ཕ་རོལ་བས་ཁས་མི་ལེན་པ་ལ། རྗེས་སུ་འགྲོ་ལྡོག་གི་ཁྱབ་པ་ངེས་ཚུལ་མེད་པས་ཁྱོད་མཆོང་དྲགས་པས་རྐང་བ་སྣད་པའི་དཔེར་སོང་གསུང་། ཁོང་ལ་ལམ་རྒྱུས་མེད་སྟབས་འཇིགས་ཞུམ་ཞིང་བག་འཁུམ་པ་སྟེ། བྱེ་སྨྲ་ལ། བདེན་གྲུབ་ཆོས་ཅན། མེད་པ་ཡིན་པར་ཐལ། ཚད་མས་མི་དམིགས་པ་ཡིན་པའི་ཕྱིར། ཞེས་བཀོད་པའི་རྗེས་ལྡོག་གི་ཁྱབ་པ་བྱེ་སྨྲས་ངེས་པའི་ཕྱིར། སྤྱིར་ཐལ་འགྱུར་གྱི་རྩོད་གཞི་དང་། དམ་བཅའ། སྦྱོར་བའི་ཤེས་འདོད་ཆོས་ཅན་དང་། བསྒྲུབ་བྱ་ཞེས་ཐ་སྙད་སོ་སོར་དགོས་ཀྱང་ཁྱེད་ཆ་མེད་པས་མ་མཁྱེན་པའོ།། ཡང་གདགས་གཞི་ཕུང་པོའི་རྣམ་པ་མ་ཤར་བར་གདགས་ཆོས་གང་ཟག་གི་རྣམ་པ་མི་འཆར་བ་ནི། ཕུང་པོ་མ་གཏོགས་དེ་འཛིན་མ་གྲུབ་ཕྱིར། །ཞེས་དང་། རྣམ་འགྲེལ་དུ། རྟེན་མཐོང་མེད་པར་གང་ལས་རྟོགས།། ཞེས་དང་། དོན་གསལ་དུ། ཁྱད་པར་མ་བཟུང་བར་ཁྱད་པར་ཅན་གྱི་བློ་མི་སྐྱེའོ་ཞེས་སོགས་སྐབས་དུ་མའི་དགོངས་པ་མ་རྟོགས་པའི་བབ་ཅོལ་ལོ།། རྣམ་པ་བརྒྱ་དོན་གསུམ་གྲངས་ཙམ་སྨོས་མོད། འདོད་ཆགས་དང་བྲལ་བ་དང་། ངོ་བོ་མེད་པའི་ངོ་བོ་ཉིད་སྟོང་པ་ཉིད་དོན་རྣམ་སོ་དྲུག་གི་གྲངས་སུ་བགྲང་བ་མིན་ན་ལེགས་སོ། །དོན་རྣམ་དང་། ཤེས་རྣམ། སྦྱོར་རྣམ། དེའི་མི་མཐུན་ཕྱོགས་ཏེ་རེ་རེ་ལ་བརྒྱ་དང་དོན་གསུམ་རེ་ཡོད། དང་པོ་ལ་དོན་དམ་དང་། ཀུན་རྫོབ་ཇི་ལྟར་ཡོད་ཚུལ། གཉིས་པ་དང་། གསུམ་པར་རྟོགས་རིགས་དྲུག། སེམས་རྟེན་ས་བཅུ་གཅིག། མཚན་ཉིད་གོ་གཅིག་ལ། སྦྱོར་བ་ཉི་ཤུ་སོགས་ལས་ཇི་ལྟར་ཡོད་པའི་ཁྱད་པར་དང་། བཞི་བ་བརྒྱ་དང་དོན་གསུམ་ལ་ཉོན་སྒྲིབ་དང་། ཐུན་མོང་དང་ཐུན་མོང་མ་ཡིན་པའི་ཤེས་སྒྲིབ་འབྱེད་ཚུལ། བྱང་སེམས་ལ་སྦྱོར་རྣམ་དེ་དག་དང་། མཚན་ཉིད་གོ་གཅིག་ལས་ལྡན་པར་ངེས་མ་ངེས་ཀྱི་ཁྱད་པར་དང་། རྒྱུན་མཐའི་བར་ཆད་མེད་ལམ་ལ་སྦྱོར་རྣམ་དང་། མཚན་ཉིད་དེ་དག་ལས་ཇི་ཙམ་ཡོད་དང་། ཡོད་པར་ངེས་པའི་ཞིབ་ཆ་སྨྲས་ན་རིགས་ལམ་ལ་སྦྱངས་པ་དོན་དང་ལྡན་ལ། གཞན་དུ་འཕགས་སེང་དང་མཉམ་པའི་སྐད་ནི་འུད་སྒྲོགས་པ་ལ་དགའ་བ་ཙམ་མོ། །མཚམས་པ་ཚང་ཁོང་ལ་གྲངས་ཙམ་ཡོད་པའང་ངོ་མཚར་ཆེ། ༼མི་ཕམ་གྱིས་༽ཡོད་མེད་སོགས་ཀྱི་མཐའ་ལ་དགག་བྱའི་ཁྱད་པར་མི་སྦྱོར་ཟེར་བ་དང་། ཡོད་པ་མི་འགོག་ཟེར་བ་སོགས་ནང་འགལ་ནི། དཔལ་ལྡན་ཟླ་བས། བཤད་ཟིན་ཉེས་པ་དེ་དག་ཐོག་ཏུ་འབབ་པ་ཞེས་དང་། རེ་རེ་ལས་ནི་སྐྱེ་བ་འགྲུབ་པ་ཡོད་མིན་པ།། ཞེས་གསུང་བ་དག་ལ་གཏོལ་ཅི་ཡང་མ་བྱུང་བར་སྣང་ལ། གཉིས་ཀ་མིན་པ་མིན་ན། གཉིས་ཀ་ཡིན་དགོས་ཞེས་རང་ལ་ཉེས་པ་མཚུངས་པ་དང་། བསྡུ་བར་ངོ་བོ་ཉིད་མེད་པ་དང་རྩོད་ཚུལ་གྱི་གནད་དང་། དབུས་མཐར། ཡོད་པས་མེད་པས་ཡོད་པས་ན།། དེ་ནི་དབུ་མའི་ལམ་ཡིན་ནོ།། ཞེས་སོགས་གསུང་བའི་ཕྱོགས་སྔ་ཕྱིའི་ཁྱད་པར་ཅི་ཡང་མ་ཕྱེད་པས་འཇམ་མགོན་ས་པན་གྱིས། ངན་སྐྱུག་ཁྲོམ་པ་སུ་ཞིག་སློང་།། ཞེས་གསུང་བ་ཁོ་ན་ལྟར་ཟད་དོ།། སྨྲས་པ། རྫོགས་ཆེན་ལྟ་བ་བོར་བས་འཁྲུལ་ཞིག་པས།། འཁྲུལ་བ་མ་ཞིག་དབྱར་དུས་ཆུ་བཞིན་བརྡོལ།། འཇམ་མགོན་གསང་མཛོད་གནས་ལ་སྤྱན་གདངས་ཀྱང་།། དམ་བཅའ་བཞི་ལྡན་རིགས་པའི་མདའ་ཡིས་འཇིགས།། རབ་འབྱམས་གཞུང་ལུགས་ནགས་ཀྱི་ཚང་ཚིང་དུ།། ཚུལ་བཞིན་དྲང་ངེས་ཕྱེད་པའི་བློ་གྲོས་མིག། དྲི་མེད་རིགས་ལམ་བདུད་རྩིས་འདྲོངས་པ་ཡིས།། ངོ་མཚར་དོན་གྱི་ཁྱད་པར་ཅི་ཡང་མཐོང་།། ཞེས་ཀྱང་སྨྲས་སོ།། འཇམ་མགོན་བླ་མས་ཀྱང་འཁྲུལ་བ་ཡེ་ཤེས་སུ་འཆར་བ་སོགས་དམ་པ་སྔ་མའི་གསུང་བགྲོས་བསྐྱར་བ་དང་། གདུལ་བྱའི་བསམ་ངོར་བསྟུན་པའི་གསུང་ངག་ཅི་རིགས་ཡོད་ནའང་། བཅོམ་ལྡན་འདས་ཀྱིས། ཕ་དང་མ་ནི་བསད་བྱས་ཤིང་།། མི་བཟད་པ་ཡི་སྟག་བསད་པ།། ཞེས་སོགས་ལྡེམ་དགོངས་མཛད་པ་ལྟར་ལ། ཁོ་བོ་ཅག༧རྗེ་ཉིད་ནས་བསྟན་པ་སྤྱིའི་གཞུང་ལམ་དུ་བཀའ་བསྩལ་པའི་ལམ་རིམ་གཉིས་དང་། རྣམ་བཤད་ཆེན་མོ་རྣམས་རྟག་ཏུ་དཔང་པོར་བྱེད་པས་ལུང་ཙམ་སྐྱབས་སུ་གྱུར་པ་མ་ཡིན་ནོ།། ཁོ་བོས། སྟོང་ཉིད་ཀུན་རྫོབ་ཏུ་སྤྲོས་བྲལ་དང་། སྒྲ་རྟོག་གི་ཡུལ་ཡིན་པ་མི་འགལ་ན། སྤྱིར་ཡང་དེ་གཉིས་མི་འགལ་བར་རུང་ངོ་ཞེས་སྨྲས་པ་ལ་ལན་རྣལ་མ་ཞིག་མ་བྱུང་མོད། འོན་ཀྱང་ཞལ་ཕོ་དང་བཅས་འདི་སྐད་དུ། ༼མི་ཕམ་གྱིས་༽དེ་ལ་དྲི་མ་མེད་པའི་ལན་སྨྲས་པ། སྔ་རབས་པ་ཕལ་མོ་ཆེས་ཐ་སྙད་དུ་ཡོད་པས་ཡོད་གོ་མི་ཆོད། དོན་དམ་པར་མེད་པས་མེད་གོ་ཆོད་ཅེས་འཛེར། ཕྱི་རབས་པ་ཕལ་གྱིས་ཀུན་རྫོབ་ཏུ་ཡོད་པས་ཡོད་གོ་ཆོད། དོན་དམ་དུ་མེད་པས་མེད་གོ་མི་ཆོད་ཟེར། བདག་ཅག་གིས་ནི་དེ་གཉིས་ཀ་མི་སྨྲ་སྟེ། ཐ་སྙད་དུ་ཡོད་པས་ཐ་སྙད་དུ་ཡོད་པའི་གོ་ཆོད་ལ་དོན་དམ་པར་ཡོད་པའི་གོ་མི་ཆོད། དོན་དམ་པར་མེད་པས་དོན་དམ་པར་མེད་པའི་གོ་ཆོད་ལ་ཐ་སྙད་དུ་ཡོད་པའི་གོ་མི་ཆོད། ཅེས་སོགས་ངེས་པར་འབྲེལ་མེད་ཀྱི་རྟོག་བཟོ་འབའ་ཞིག་སྨྲས་སོ། །འདི་སྐད་དུ། རིས་མེད་མཁས་པའི་ཚོགས་རྣམས་དེང་འདིར་གཟིགས།། ང་ཡི་གྲོགས་པོ་སྒོམ་ཆེན་རྟོག་གེ་བའི།། ལན་འདི་དྲི་མེད་རིགས་པའི་ཐབ་ཏུ་གཞུག། སུན་འབྱིན་རྡོ་རྗེ་ཐོ་བས་བརྡུང་ཞིང་བརྟག། ཕན་དེ་ནི་ལྷག་ཆད་ནོར་བ་གྲགས་པ་དང་འགལ་བ་ཁས་བླངས་དང་འགལ་བའི་ཉེས་པ་ལྔ་ཕྲུགས་སུ་སྦྱར་བས་འགོག་པར་བྱ་སྟེ། ཉེས་པ་དང་པོ་ནི། བདེན་གཉིས་ཀྱི་ཁྱད་པར་སྦྱར་བའི་ཡོད་མེད་ཀྱིས་དེ་ཉིད་ཀྱི་གོ་ཆོད་པ་དང་། དེ་དག་གི་སྟེང་དུ་སླར་ཡང་དོན་དམ་དང་ཐ་སྙད་དུ་ཡོད་པ་དང་མེད་པའི་ཁྱད་པར་སྦྱར་བ་ལྷག་པའི་ཕྱིར། གཉིས་པ་ནི། ཁྱད་པར་སྦྱར་བའི་ཡོད་མེད་ཀྱིས་མ་སྦྱར་བའི་ཡོད་མེད་སྤྱིའི་གོ་ཆོད་མི་ཆོད་དཔྱད་དོན་གཙོ་བོ་ཡིན་པ་ལ། ཁྱོད་ཀྱིས་དེ་མ་བཤད་པའི་ཕྱིར། གསུམ་པ་ནི། སྐབས་དོན་བོར་ནས་རང་གི་གོ་ཆོད་ཟེར་བ་ནོར་བའི་ཕྱིར། བཞི་པ་ནི། ཁ་ཅིག་གིས་བོད་ན་ཡོད་པས་ཡོད་པའི་གོ་ཆོད། བོད་ན་མེད་པས་མེད་པའི་གོ་ཆོད་ཅེས་པ་ལ། གཞན་ཞིག་གིས་རང་རང་གི་གོ་ཆོད་ཅེས་སྨྲས་ན། འབྲེལ་མེད་སྨྲ་བར་བརྩི་བ་དང་འདྲ་བའི་ཕྱིར། ལྔ་པ་ནི། ལུགས་གཉིས་པ་ཁྱོད་ཀྱིས་ཁས་བླངས་པར་ཐལ། ཟུར་སྔ་མ་ཁས་བླངས། ཕྱི་མའང་ཁས་བླངས་པའི་ཕྱིར། ཕྱི་མ་སླ། སྔ་མ་གྲུབ་སྟེ། ༼མི་ཕམ་གྱིས་༽རང་རིག་དང་ཀུན་གཞི་ཡོད་པ་ཀུན་རྫོབ་ཏུ་ཡོད་པས་ཡིན་ཞེས་བྲིས་པའི་ཕྱིར། ལུགས་གཉིས་ཀས་ཁྱོད་ཀྱིས་སྨྲས་པའི་ཚུལ་དེ་གཉིས་ཀ་ཁས་བླངས་པས་མུ་གསུམ་པར་མ་སོང་བའི་ཕྱིར། ཁྱོད་ཀྱིས་སྨྲས་པའི་རྟོག་བཟོ་དེ་ལྟར་ན་ཁོ་བོས་མུ་བཞི་པ་དང་ལྔ་པ་ཞིག་ཀྱང་བཟོས་ཆོག་མོད། དེ་འདྲ་བྲིས་ཀྱང་དོན་མེད་པའི་ཕྱིར། ཁོ་བོས་གང་གི་མིང་ཡིན་པ་སྨྲོས་དང་ཞེས་པར་སྔ་ཕྱིར་མ་བརྟགས་པར་གོ་ལོག་བྱས་ཏེ། བརྗོད་བྲལ་བརྗོད་བཅས་སུ་བྱས་པ་ངོ་མཚར་ཆེ། ལྟ་མགུར་དུ། འོན་ཀྱང་གཞུང་ལུགས་ལ་སྦྱངས་པ་ཆུང་རྣམས།། ཐ་སྙད་སྦྱོར་ཚུལ་ཞིག་མ་མཁྱེན་ཡིན་སྲིད།། ཅེས་གསུང་བ་ཤིན་ཏུ་མད། རྩོད་ལན་འདིར་རིགས་པ་དང་གོ་བ་དམན་པའི་ངང་ཚུལ་མང་དུ་འདུག་པས་མཁས་པ་ཉིད་ནས་མཛད་པ་མིན་ནམ་གང་ལྟར། རྒྱལ་པོ་ལྐོག་ཏུ་འདུག་ན་མཛེས།། ཞེས་གསུང་བ་ཉིད་མན་ངག་གོ། སྨྲས་པ། དབེན་པའི་ནགས་སུ་ཤོར་བའི་ཁ་ཡན་པོ།། སུན་འབྱིན་འབར་བའི་ལྕགས་ཀྱུ་རྣོན་པོ་ཡིས།། ཁས་བླངས་བསལ་བའི་འཆོར་མེད་ར་བ་རུ།། བཅུག་སྟེ་ལུང་རིགས་མཚོན་ཆས་བསྣུན་པར་ལྟོས།། དགག་སྒྲུབ་རིགས་པའི་གཡུལ་ངོར་ཞུགས་པ་ན།། འཆི་རྨས་སྣང་བའི་འཇིགས་པ་ཡོང་ཐང་ཡོད།། འགལ་རྐྱེན་རྒོད་པའི་མཛའ་བོ་རྙེད་པ་ཡི།། དྲི་མ་མེད་པའི་སྒོམ་གྱི་དོན་རྟགས་མཐོང་།། ཀུན་རྟོག་ཡངས་པའི་ཞིང་ས་གཤིན་པོ་ལ།། ཆགས་སྡང་རྐྱེན་གྱིས་སྨིན་པ་འབྲས་བུའི་ཚོགས།། ཕྲ་ཞིབ་རིགས་པས་ཕྱེ་མར་བཏག་པ་ལས།། འགལ་འཁྲུལ་ནོར་བ་རོ་བརྒྱའི་བ་ལིང་ཏ།། དགའ་མའི་བདག་པོའི་དཔུང་ཚོགས་ལ་འབུལ་གྱི།། བཞེས་ལ་ང་ཡི་སྨོན་འདྲིན་སྤོང་བ་བར།། དེང་ནས་མེ་ཏོག་མདའ་ཡིས་བསྣུན་ན་རེ།། བསམ་གཏན་ཚེར་མས་མནར་བའི་དུ་ཁར་རྟོག། ད་ནི་གཏིང་ནས་འགྱོད་པས་སྒོམ་སྲན་འཛུག། མ་སྨད་ཏིང་འཛིན་ཡར་ངོའི་ཟླ་བ་བཞིན།། འཕེལ་ཞིང་སྤངས་རྟོགས་བཅུ་དྲུག་ཆ་རྫོགས་ཚེ།། བདུད་རྩིའི་བགོ་སྐལ་སྦྱིན་ནོ་ལུས་མེད་བདག། ཤེར་ཊིཀ་ཀེ་ཏ་ཀ་ཡི་འཕྲིན་ལས་ཀྱི།། རང་གཞན་སྡིག་ལྟུང་ཕུང་པོ་ཇི་སྙེད་པ།། མི་བཟད་སྡིག་པའི་གཟུགས་སུ་སྨིན་པ་རྣམས།། དཔལ་ལྡན་རྡོ་རྗེ་མཁའ་འགྲོའི་ཞལ་དུ་བསྟབ།། ཨོཾ་སརྦ་པཱ་པཾ་ཁཱ་ཧི་ད་ཧ་ན་ཀུ་རུ་ཧཱུཾ། དྲི་མེད་རིགས་ལམ་རྡོ་རྗེ་ཕུར་བུ་ནི།། རྒྱབ་རྟེན་ལུང་གི་ཐོ་བས་བརྡེག་པ་ལས།། འཁྲུལ་འབྱམས་བུད་ཤིང་དུམ་བརྒྱར་བཀས་པའི་ཚོགས།། རྡོ་རྗེ་མེ་དཔུང་འབར་བའི་ཐབ་ཏུ་བསྲེག། ཟུངས་ཟད་ནད་པ་ལྟ་བུའི་ཆོས་ཀྱི་ཚུལ།། མི་རྟོག་རང་དོན་རྩྭ་རྩེའི་ཟིལ་པ་དང་།། སྲིད་འབྱོར་ཧུབ་ཀྱིས་དྲངས་པའི་མི་ངོམས་པ།། མི་ཕམ་ཚིག་གིས་ཕམ་པ་བཞིན་དུ་མནར།། ཆོས་སྲིད་འབྱོར་བའི་ཁམས་ཀྱི་ལྷུན་པོའི་རྩེར།། མཁྱེན་པའི་སྤྱན་སྟོང་གཡོ་བའི་བཤེས་གཉེན་ཁྱོད།། ཆེར་བསྙིགས་རྒུད་པའི་མུན་ཚོགས་མཐར་བྱས་ཏེ།། སྐལ་བཟང་ལྷ་བརྒྱའི་ཆོས་ཀྱི་འདུན་ས་མཛེས།། རྟོག་གེ་གླང་སྨྱོན་ལོག་པའི་སྦྱོར་བ་བརྒྱས།། ཁྱོད་ཐུགས་ཤེས་བྱའི་གཟུགས་བརྙན་གསལ་བའི་མཚོ།། ཡང་ཡང་རྙོག་ཅིང་དཀྲུག་པའི་ཉེས་ཚོགས་ཀུན།། ཞུམ་ཞུམ་ཡིད་ལ་གཅགས་པས་མཐོལ་ཞིང་བཤགས།། ཞེས་བྱ་བ་ནི་ངང་ཚུལ་གསོང་བོར་བརྗོད་པའོ།།
བཞི་པ་ནི། ཐུབ་དབང་བསྟན་པའི་གངས་ཀྱི་རི་སུལ་ནས།། འོང་བའི་སྣ་ཚོགས་གྲུབ་མཐའི་ཆུ་ཀླུང་འབུམ།། ཀུན་གཟིགས་རྒྱལ་བའི་རིན་ཆེན་གླིང་མཆོག་ཏུ།། འདྲེས་པའི་སྤངས་རྟོགས་དབྱེར་མེད་ཆོས་སྐུ་རྨད།། སྣ་ཚོགས་རྐྱེན་དང་འཇུག་ངོགས་དེ་སྙེད་ཀྱིས།། དྲི་རོ་ནུས་པའི་བྱེ་བྲག་ཐ་དད་ལྟར།། ཁམས་དང་བསམ་པས་ཐ་སྙད་དུ་མ་ཡང་།། མི་འགལ་རིས་མེད་མཁས་རྣམས་ཅི་དགྱེས་མཛོད།། འདི་སྣང་ཆོས་བརྒྱད་སྦུན་པ་འཕྱར་བར་མཉམ།། སྲིད་པའི་ཕུན་ཚོགས་གདུག་པའི་སྦྲུལ་གྱི་ཚང་།། ཞི་བའི་སྒོ་མཆོག་ཟབ་མོ་དབུ་མའི་ལྟ།། མ་རྒན་དྲིན་ལན་འཁོར་ཕྱིར་བྱམས་སེམས་བསྐྱེད།། རིམ་གཉིས་ཟབ་ལམ་མྱུར་བས་བོགས་ཀྱང་འདོན།། ས་ལམ་རིན་ཆེན་གསེར་གྱི་ཐེམ་སྐས་ལས།། དོན་གཉིས་ལྷུན་གྲུབ་འཕྲིན་ལས་རྒྱུན་མི་འཆད།། ཨེ་མ་ཚང་ལ་མ་ནོར་ལུགས་བཟང་གི། ཆུ་གཏེར་གཞུང་ལམ་བགྲོད་གཅིག་བླ་ན་མེད།། འདི་ཀོ་རིགས་པའི་རྗེས་འབྲང་དགའ་བའི་དཔྱིད།། ཅེས་བྱ་བ་ནི་དོན་དམ་པ་ངེས་པའི་དོན་ནོ།། འདིར་འབེལ་གཏམ་རྣམ་པར་དཀར་བའི་བྱ་བ་རྣམས་མཐར་ཕྱིན་པའི་ཚུལ་ཚིགས་སུ་བཅད་པའི་དབྱངས་ཀྱིས་བསྒྲག་པ་དྲི་ཟའི་ན་ཆུང་སྒེག་པའི་གར་གྱིས་རོལ་བ་ནི། འཇམ་དབྱངས་སྲས་མཆོག་མཁྱེན་གཏེར་ངག་གི་དབང་།། ཟླ་བྲལ་ལེགས་པར་བཤད་པའི་འོད་སྟོང་ཅན།། བློ་གྲོས་པདྨོའི་གྲོགས་སུ་རྩེན་པ་ལས།། ཤེས་ལྡན་བུང་བ་དགའ་བའི་དབྱངས་ཀྱིས་བྲེལ།། བྱམས་བརྩེའི་ཐུགས་ཀྱིས་མ་ཡིས་བུ་ལ་བཞིན།། ཕངས་མེད་ཡོན་ཏན་ནོར་གྱི་མཆོག་སྦྱིན་པ།། མཚན་ལྡན་དམ་པའི་ལེགས་བྱས་དྲན་པའི་ཡིད།། དད་གུས་འཁྲི་ཤིང་གར་གྱི་མཆོད་སྤྲིན་སྤྲོས།།
ཡིད་ཆེས་དད་པའི་འོ་མཚོ་འཁྱིལ་བའི་ལྷག་བསམ་ལྗོན་པའི་དོ་ར་ན།། བརྩེ་ཆེན་པད་དཀར་འདབ་སྟོང་བཞད་པའི་ལྟེ་བར་ཆགས་པའི་ཉ་རྒྱས་ཟླར།། རྒྱལ་ཀུན་མཁྱེན་བརྩེའི་ཤེལ་དཀར་ཕུང་པོ་བཅུ་དྲུག་ལང་ཚོར་འབར་བའི་སྐུས།། ཤེས་རབ་མཚོན་ཆའི་འཕྲུལ་འཁོར་བསྐྱོད་པས་ཀུན་རྟོག་དྲ་བའི་འཆིང་བ་ཞིག། འཇམ་དཔལ་རྡོ་རྗེ་རྣོན་པོའི་སྒྱུ་འཕྲུལ་གར།། འཇམ་མགོན་རང་ལུགས་ཆོས་ཀྱི་རྒྱལ་མཚན་མཆོག། འཇམ་དབྱངས་སྤྲུལ་བའི་མྱུ་གུ་སྐྱེད་ཚལ་དུ།། འཇམ་དཔལ་སྙིང་པོས་བསྒྲེང་ཞེས་དབང་བསྐུར་བཞིན།། དྲི་མེད་ཡན་ལག་བརྒྱད་ལྡན་ལྷ་ཡི་ཆབ།། བྱིན་རླབས་རིན་ཆེན་མཛེས་པའི་བུམ་བཟང་ནས།། སྲས་བཅས་རྒྱལ་ཀུན་ཤིས་བརྗོད་གླུ་དབྱངས་ཀྱིས།། ལྔ་རིག་འོད་འབར་རིན་ཆེན་ཅོད་པན་བཅིང་།། ཚིག་དོན་དྲན་པའི་རྩིབས་སྟོང་སུ་ལྭར་ནས།། རབ་རྨོངས་བདུད་ཀྱི་དཔུང་ཚོགས་ལས་རྒྱལ་ཏེ།། ཕུན་ཚོགས་སྡེ་བཞིའི་གླིང་ལ་དབང་བསྒྱུར་བའི།། ཆོས་ཀྱི་རྒྱལ་སྲིད་སྐྱོང་བའི་དཔལ་ཐོབ་ཤོག། ཀུན་བྱང་ཕྲ་ཞིབ་ཁྱད་པར་མ་འདྲེས་པའི།། ངོ་མཚར་ཟ་འོག་རི་མོ་གསལ་བའི་ཡིད།། རབ་ཏུ་དགའ་བའི་རིན་ཆེན་དབང་གི་རྒྱལ།། ཆོས་ཚུལ་རྒྱལ་མཚན་ཏོག་ཏུ་མཛེས་གྱུར་ཅིག། ལུས་སེམས་ལས་སུ་རུང་བའི་བདེ་ཆེན་གྱིས།། དགའ་བའི་མཆོག་སྟེར་ཤིན་སྦྱངས་མཛའ་ན་མོ།། ཟག་མེད་བདེ་ཆེན་དཔལ་ལ་རྣམ་རོལ་ནས།། ཞི་བ་གཡུང་དྲུང་དམ་པའི་གནས་ཐོབ་ཤོག། ཕན་བདེའི་དགེ་མཚན་འདོད་དགུའི་ནོར་གྱི་གཡང་།། འཛིན་པའི་བསམ་གཏན་གུར་ཁྱིམ་མཛེས་པའི་བདག། གཟུངས་སྔགས་རྫུ་འཕྲུལ་ནམ་མཁའ་མཛོད་ཀྱི་སྒོ།། འབུམ་ཕྲག་གྲོལ་བས་དབུལ་བ་སེལ་གྱུར་ཅིག། ལྷག་བསམ་ལུས་སྟོབས་རྫོགས་པའི་ཤེས་རབ་ཀྱི།། ས་སྲུང་དབང་པོ་རིགས་པའི་སྣ་ཞགས་ཀྱི།། མཚོན་ཆ་རབ་ཏུ་འབར་བའི་འཁོར་ལོ་ཡིས།། བདུད་བཞིའི་དཔུང་ཚོགས་མྱུར་དུ་མཐར་བྱེད་ཤོག། གུས་རྟག་བརྩོན་པའི་མྱུར་མགྱོགས་ཅང་ཤེས་ཀྱིས།། སྲིད་པ་ཉམ་ངའི་ཐང་ཆེན་རབ་བརྒལ་ཏེ།། འཕགས་ཆེན་དམ་པའི་ས་ལམ་གནོན་པའི་འགྲོས།། བདེ་ལེགས་གྲོང་ཁྱེར་མཆོག་ཏུ་ཕྱིན་གྱུར་ཅིག། ཐེག་མཆོག་ལམ་བཟང་བགྲོད་པ་དབང་བོའི་ཐབས།། བླང་དོར་མན་ངག་རིག་པའི་བློ་ཡི་གྲོགས།། ཚུལ་བཞིན་བསྟེན་པའི་བཏང་སྙོམས་རྒྱུ་མཚན་གྱིས།། ཆོས་འབྱོར་དཔལ་ལ་དབང་བའི་མཐུ་ཐོབ་ཤོག། ཆོས་ཚུལ་ཡངས་པའི་ཁྱོན་ལ་དབང་བྱེད་པའི།། བྱང་ཆུབ་ཡན་ལག་རིན་ཆེན་རྣམ་བདུན་གྱིས།། བསམ་སྦྱོར་བདེར་གཤེགས་གཞན་དོན་སྐྱོབ་པ་ཡི།། ཕུན་ཚོགས་སྡེ་བཞིའི་བང་མཛོད་འཛིན་པར་ཤོག། ཟབ་རྒྱས་གསང་བའི་གཏེར་ཆེན་མཛོད་ཀྱི་གཏམ།། བཀྲེན་པས་ཕོངས་པ་བདག་ལ་ཅི་ཆ་ཡང་།། མི་ཕམ་བཤེས་གཉེན་ཚིག་གི་ཕོ་ཉ་ཡིས།། བསྐུལ་བའི་འཕྲིན་ལན་ཇི་བཞིན་དེང་འདིར་བསྒྲག། སྐྱོན་བྲལ་པདྨ་དཀར་པོའི་ཕྲེང་བསྟར་བས།། རབ་འབྱམས་རྒྱལ་བའི་དཀྱིལ་འཁོར་མི་བཟད་པར། ཟབ་རྒྱས་གདམས་པའི་དེ་ཉིད་སྟོན་མཁས་པའི།། མི་ཕམ་འཇམ་དབྱངས་མཆེད་དུ་གྱུར་ཅིག་གུ། དེ་ལྟར་རང་གཞན་དུས་གསུམ་དགེ་ཚོགས་དགེ་ལེགས་ཆུ་གཏེར་ཀློང་ཡངས་སུ།། དབྱེར་མེད་འཕྱུར་བའི་རྦ་རླབས་ཕྲེང་བ་ཕྲེང་བར་དཀྲིག་པའི་སྤྲིན་གྱི་ཚོགས།། སྲིད་པར་རིང་ནས་འཁྱམ་པའི་ཡིད་ཅན་ཡིད་ཀྱི་དགེ་བའི་ལོ་ཏོག་ཀུན།། རབ་རྒྱས་འབྲས་བུ་དུས་སུ་སྨིན་པ་སྨིན་དང་གྲོལ་བའི་དཔལ་ཐོབ་ཤོག། ཅེས་དགག་ལན་ཤེས་ལྡན་ཡིད་ཀྱི་གདུང་སེལ་རིགས་ལམ་ག་བུར་ཆུ་རྒྱུན་ཞེས་བྱ་བ་འདི་ནི། རྩོམ་དུས་འཚུབ་ལྟས་མང་བས་གསེར་སྡོང་ཆེན་མོ་དང་། བཀའ་སྡོད་ཆོས་ཀྱི་རྒྱལ་བོའི་དྲུང་དུ་བརྟགས་པས་གནང་བའི་ཡིད་ཆེས་ཀྱི་དད་པའི་མཚན་མ་ཐོབ་སྟེ། རབ་ཚེས་ཆུ་ཡོས་ཉིན་བྱེད་དབང་པོ་ཆུ་སྲིན་གྱི་ཁྱིམ་དུ་སྤྱོད་པའི་དཀར་ཕྱོགས་ཀྱི་རྒྱལ་བ་དང་པོར། མདོ་སྨད་ཆོས་ཀྱི་འབྱུང་གནས་གངས་ཅན་ལུམ་བིའི་སྐྱེད་ཚལ་དཔལ་ལྡན་བཤད་སྒྲུབ་གླིང་གི་དཀའ་བཞི་པ། བློ་བཟང་རབ་གསལ་གྱིས་སྦྱར་བའི་ཡི་གེ་པ་ནི་རྣམ་དཔྱོད་ཡངས་པ་བསོད་ནམས་བཟང་བོས་བགྱིས་པ་འདི་ཡང་། །རིས་མེད་བསྟན་དང་འགྲོ་ལ་ཕན་པའི་རྒྱུར་གྱུར་ཅིག། །། གངས་ཅན་བོད་ཀྱི་དྭངས་མ་ཨ་རིག་གི། དགོན་ཆེན་ཁྲིམས་ལྡན་འདུས་པའི་རྒྱ་མཚོ་ཆེར།། བདོག་པའི་དངོས་པོ་སྤྲིན་ཚོགས་འཁྲིགས་པ་ལས།། འཛད་མེད་ཆོས་ཀྱི་ལོངས་སྤྱོད་འབྱམས་སུ་ཀླས།། །། སརྦ་ཛ་ག་ཏཱཾ་མངྒ་ལཾ།།
