Bla ma dam pa rong ston chos kyi rje'i rnam par thar pa 'phrin las rgyas shing rgyun mi chad pa'i rten 'brel bzang po/Full text

བླ་མ་དམ་པ་རོང་སྟོན་ཆོས་ཀྱི་རྗེའི་རྣམ་པར་ཐར་པ་འཕྲིན་ལས་རྒྱས་ཤིང་རྒྱུན་མི་ཆད་པའི་རྟེན་འབྲེལ་བཟང་པོ།

bla ma dam pa rong ston chos kyi rje'i rnam par thar pa 'phrin las rgyas shing rgyun mi chad pa'i rten 'brel bzang po

FULL TEXT

Description

Reference

bla ma dam pa rong ston chos kyi rje'i rnam par thar pa 'phrin las rgyas shing rgyun mi chad pa'i rten 'brel bzang po [བླ་མ་དམ་པ་རོང་སྟོན་ཆོས་ཀྱི་རྗེའི་རྣམ་པར་ཐར་པ་འཕྲིན་ལས་རྒྱས་ཤིང་རྒྱུན་མི་ཆད་པའི་རྟེན་འབྲེལ་བཟང་པོ།].

People

Rongtön Sheja Kunrik, Chogye Trichen Rinpoche

[edit]

Input by Khenpo Tamphel for Tsadra Foundation
Source	BDRC WA1KG17599
Date	2026-02-17
Read this text with translation by adding the Dharmamitra Chrome extension to your browser:

Legend	Headers Root Commentary Quotes

༄༅། །བླ་མ་དམ་པ་རོང་སྟོན་ཆོས་ཀྱི་རྗེའི་རྣམ་པར་ཐར་པ་འཕྲིན་ལས་རྒྱས་ཤིང་རྒྱུན་མི་ཆད་པའི་རྟེན་འབྲེལ་བཟང་པོ་ཞེས་བྱ་བ་བཞུགས་སོ།།

༈ བླ་མ་དམ་པ་རོང་སྟོན་ཆོས་ཀྱི་རྗེའི་རྣམ་པར་ཐར་པ། འཕྲིན་ལས་རྒྱས་ཤིང་རྒྱུན་མི་ཆད་པའི་རྟེན་འབྲེལ་བཟང་པོ་ཞེས་བྱ་བ། བླ་མ་དམ་པ་རྒྱུད་པ་དང་བཅས་པ་ལ་ཕྱག་འཚལ་ལོ། །བདག་ཅག་གི་འདྲེན་པ་དམ་པ་ཁམས་གསུམ་གྱི་ཆོས་ཀྱི་རྒྱལ་པོ་རོང་སྟོན་པ་ཤེས་བྱ་ཀུན་རིག་ཅེས་གྲགས་ཤིང་། མཁན་པོས་གསོལ་གྱི་མཚན་ཤཱཀྱ་རྒྱལ་མཚན་དཔལ་བཟང་པོ་འདི་ཉིད་ངེས་པའི་དོན་དུ་སྟོབས་བཅུ་ལ་སོགས་ཀྱི་གོ་འཕང་བརྙེས་ཀྱང་གདུལ་བྱ་སོ་སོའི་སྣང་བ་དང་མཐུན་པར་སེམས་ཅན་གྱི་དོན་མཛད་པའི་ཚུལ་ནི། དམ་པ་རྒྱ་གར་ལ་སོགས་གྲུབ་པ་ཐོབ་པ་དང་། པཎྜི་ཏ་ལ་སོགས་པ་དཔག་ཏུ་མེད་པའི་སྐྱེ་བ་བཞེས་པའི་ཚུལ་བསྟན་ནས་རྒྱ་གར་ལ་སོགས་པར་སེམས་ཅན་གྱི་དོན་དཔག་ཏུ་མེད་པ་མཛད་ནས་འཕགས་པ་སྤྱན་རས་གཟིགས་ཀྱིས་བྱིན་གྱིས་བརླབ་པའི་གནས་བོད་ཁ་བ་ཅན་གྱི་ཞིང་ཁམས་འདིར་ཐུབ་པའི་བསྟན་པ་གསལ་བར་བྱེད་པ་དང་། སྐལ་བ་དང་ལྡན་པའི་འགྲོ་བ་རྣམས་ཀྱི་དོན་དུ་སྐྱེ་བ་བཞེས་པའི་ཚུལ་ནི། མདོ་ཁམས་ཀྱི་ཕྱོགས་སུ་རིགས་ཆེ་ཞིང་ཆེས་མཐོ་བར་མཐོ་རིས་ཀྱི་ཡོན་ཏན་དུ་མ་དང་། དལ་འབྱོར་གྱི་རྒྱན་དུ་མས་མཛེས་པར་སྐུ་འཁྲུངས་ཤིང་། ཚོགས་གཉིས་རླབས་པོ་ཆེ་དང་། སྨོན་ལམ་རྣམ་པར་དག་པའི་མཐུས་བོད་ཀྱི་རྡོ་རྗེ་གདན་ཆོས་གྲྭ་ཆེན་པོ་དཔལ་ལྡན་གསང་ཕུ་ནེའུ་ཐོག་ཏུ་ཕྱག་ཕེབས་ཏེ་ཀོང་སྟོན་བློ་གྲོས་དབང་ཕྱུག་ལ་སོགས་པ་རྣམས་ལ་ཐུགས་སྦྱོང་མཛད་པས། ཚེ་འདིར་ལན་རེ་ཟུང་རེ་ཐོས་པ་ཙམ་གྱིས། །གཞུང་ལུགས་ཀུན་ཤེས། ཞེས་པ་དང་ཚུལ་མཚུངས་པར་ཕར་ཚད་ལ་སོགས་པ་དཀའ་ཚེགས་མེད་པར་ལེགས་པར་མཁྱེན་ནས་དགུང་ལོ་ཉི་ཤུ་རྩ་གཉིས་བཞེས་པའི་དུས་སུ་ཚད་མ་རྣམ་ངེས་ཀྱི་ཊཱིཀྐ་མཛད། བློ་གསལ་མང་པོའི་ཡོངས་སུ་འཛིན་པ་ཆེན་པོར་གྱུར་ཏེ་ཆོས་བར་ལ་ཕྱོགས་ཕྱོགས་སུ་བྱོན་པའི་ཚེ་ཡར་ལུང་བྱ་སའི་གཙུག་ལག་ཁང་དུ་གཡག་མི་ཕམ་ཆོས་ཀྱི་རྗེ་ཕེབས་པ་གསན་པས་སྔོན་གྱི་བག་ཆགས་བཟང་བའི་སྟོབས་ཀྱིས་ཐུགས་ལ་དགའ་བ་དང་སྤྲོ་བ་ཁྱད་པར་ཅན་སྐྱེས་ཏེ་དེར་བྱོན་པས་ཡུམ་ལས་འདི་དག་གང་གི་རྣ་ལམ་དུ་གྲགས་པ་དེ་དག་ཀྱང་སྔོན་གྱི་རྒྱལ་བ་ལ་བྱ་བ་བྱས་ཞེས་པའི་མདོ་དང་།

སངས་རྒྱས་རྣམས་ལ་ལྷག་པར་བྱས། ། དེ་ལས་དགེ་བའི་རྩ་བ་སྐྲུན། ། དགེ་བའི་བཤེས་ཀྱིས་མགོན་བྱས་པ། །

འདི་མཉན་པ་ཡི་སྣོད་ཡིན་ནོ། །

ཞེས་པའི་ཆོས་མཚམས་སུ་ཕེབས། རྟེན་འབྲེལ་ལེགས་པར་འགྲིག་སྟེ་མདོ་བསྟན་བཅོས་ཐམས་ཅད་ལ་ཐོགས་པ་མེད་པའི་མཁྱེན་རབ་ལེགས་པར་རྒྱས།

སྡེ་སྣོད་འཛིན་པ་མང་པོའི་འཁོར་གྱིས་བསྐོར་ཏེ། ། མཐའ་ཡས་ཡུལ་ཕྱོགས་ཆོས་ཀྱི་འཁོར་ལོ་བསྐོར། ། ལུང་རིགས་སྨྲ་བའི་སློབ་མ་ཁྲི་ཕྲག་བཞི། །

ཡོངས་སུ་སྨིན་པར་མཛད་ལ་ཕྱག་འཚལ་ལོ། །

ཞེས་པ་ལྟར་སྦྱིན་བདག་ལ་སོགས་པ་སོ་སོའི་བསམ་པ་དང་མཐུན་པར། མཐུན་རྐྱེན་དང་ཡོ་བྱད་གང་འཛོམས་པར་ཆོས་ཀྱི་འཁོར་ལོ་བསྐོར་ཞིང་དེའི་ཚེ་རྒྱས་པ་འབུམ་ལ་སོགས་པའི་རྣམ་བཤད་མང་དུ་མཛད་པ་དང་། རྩོད་པ་སེང་གེའི་ང་རོས་ཕས་རྒོལ་གྱི་གླང་པོ་ཕམ་པར་མཛད་པ་ལ་སོགས་པ་ནི། མཁས་པ་ཆེན་པོ་རྣམས་ཀྱིས་མཛད་པའི་རྣམ་ཐར་དུ་གསལ་ཞིང་། དེ་ལྟར་དགུང་ལོ་བདུན་ཅུ་ལ་ཉེ་བའི་བར་དུ་འཇིག་རྟེན་ཆོས་བརྒྱད་ཀྱི་གཡེང་བ་ཐམས་ཅད་སྤངས་ཏེ། འཆད་རྩོད་རྩོམ་པའི་བྱ་བ་ཡིས། །ཉིན་པར་དགེ་འདུན་ལེགས་བསྡུས་ནས། །མཚན་མོ་བརྩོན་པས་གྲོལ་བརྙེས་པ། །ཞེས་གསུངས་པ་ལྟར་རྩེ་གཅིག་ཏུ་མཛད་པས། གངས་ཅན་གྱི་བློ་གསལ་བ་དང་། ཡིད་གཞུངས་པའི་སྡེ་སྣོད་འཛིན་པ་ཕལ་མོ་ཆེ་འཁོར་དུ་བསྡུས་ཤིང་། ཁ་ཅིག་ནི་གྲུབ་པའི་ས་ལ་བཞག ལ་ལ་ནི་མཁས་པའི་གོ་འཕང་ལ་བཀོད། གཞན་དག་ནི་ཆོས་སྡེ་ཆེན་པོ་ལ་སོགས་པའི་མཁན་པོ་དང་སློབ་དཔོན་དུ་གྱུར་ཏེ་ཆོས་ཆེ་བའི་གོ་འཕང་ལ་བཀོད། ཁྱད་པར་དུ་སྔོན་གྱི་ལས་དང་། སྨོན་ལམ་རྣམ་དག་གི་སྟོབས་ཀྱིས་ཤེལ་གྲོང་པ་དྲུང་རྡོར་བ་ཁུ་དབོན་གྱིས་ཉེ་བར་མཁོ་བའི་སྦྱིན་བདག་མཛད། གོང་མ་གྲགས་པ་རྒྱལ་མཚན་པས་གཞིས་ཀ་གོང་དཀར་ནས་ས་ཕྱོགས་དང་ཡུལ་ཕྱོགས་གང་དུ་བཞུགས་ཀྱང་། དཔོན་སློབ་ཉི་ཤུའི་ཕོགས་བཟའ་མ་དུས་རྒྱུན་དུ་འབུལ་བ་ལ་སོགས་པའི་སྦྱིན་བདག་མཛད་པ་ལ་བརྟེན་ནས་གྲུབ་ཐོབ་ཆེན་པོ་གྱེར་སྒོམ་ཞིག་པོས་བྱིན་གྱིས་བརླབས་པའི་གནས་སྙི་ཕུ་ཤུག་བསེ་བ་དང་། མངའ་བདག་ཁྲི་རལ་པ་ཅན་གྱི་ཕོ་བྲང་འུ་ཤང་དོ་དང་། སློབ་དཔོན་ཆེན་པོ་པདྨས་བྱིན་གྱིས་བརླབས་པའི་གནས་རི་བོ་རྩེ་ལྔ་ལ་སོགས་པ་དེ་རྣམས་འཇིག་རྟེན་ལ་ལྟོས་མེད་ཀྱི་ཆོས་པ་རྣམ་དག་བཞུགས་པའི་མཐུན་རྐྱེན་ཚང་ཞིང་འགལ་རྐྱེན་ཉུང་བར་གཟིགས་ནས་ཕལ་ཆེར་བཞུགས་ཤིང་ཆོས་ཀྱི་འཁོར་ལོ་བསྐོར། དེ་ནས་སྟག་ལོའི་ཀེ་གསར་གྱི་སྟོབས་ཀྱིས་ས་ཕྱོགས་དེ་རྣམས་འཁྲུག་ལོང་མང་ཞིང་མི་བདེ་བར་གྱུར་པ་དང་། སྔོན་གྱི་ཚོགས་གཉིས་རླབས་པོ་ཆེས་བསྐྲུན་པའི་མཐུ་དང་། མཁའ་འགྲོ་ཆོས་སྐྱོང་རྣམས་ཀྱི་རྟེན་འབྲེལ་བསྒྲིགས་པ་ཡིན་ནམ་སྙམ་སྟེ། དཔལ་གྲོ་ས་པའི་མཁན་པོ་ཆེན་པོ་འོད་ཟེར་རྒྱལ་པོ་བས་གཙོ་མཛད། དཔོན་སློབ་ཐམས་ཅད་ཞལ་མཐུན་པར་འཕན་ཡུལ་ཕྱོགས་ལ་སྤྱན་དྲངས། གྲོ་ས་དགོན་པར་ཟླ་བ་གཉིས་བཞུགས། སྡེ་སྣོད་འཛིན་པ་དང་། མི་ཆེན་དང་། དད་པ་ཅན་མང་དུ་འདུས། བསྙེན་བསྐུར་དང་ཞབས་ཏོག་ཕུན་སུམ་ཚོགས། ཆོས་ཀྱི་འཁོར་ལོ་རྒྱ་ཆེན་པོ་བསྐོར། དེ་རྗེས་སྤྱན་སྔ་རིན་པོ་ཆེ་ཕུན་ཚོགས་དཔལ་བཟང་པོས་དབུ་མཛད་རྒྱལ་ལྷ་ཁང་བ་རྣམས་ཀྱིས་སྤྱན་དྲངས། ཟླ་བ་གཅིག་བཞུགས་ཆོས་ཀྱི་འཁོར་ལོ་བསྐོར། ཞབས་ཏོག་ཕུན་སུམ་ཚོགས། དེ་རྗེས་ཉན་པོ་དགོན་པར། རིན་པོ་ཆེ་ཀུན་དགའ་རྒྱལ་མཚན་པ་དཔོན་སློབ་ཀྱིས་སྤྱན་དྲངས། ཟླ་བ་གཅིག་བཞུགས། ཆོས་ཀྱི་འཁོར་ལོ་རྒྱ་ཆེན་པོ་བསྐོར། ཞབས་ཏོག་ཕུན་སུམ་ཚོགས། དེ་ནས་ཐེག་ཆེན་ཆོས་ཀྱི་རྒྱལ་པོ་གོང་ལ་ཕེབས་པའི་དུས། ཆོས་རྗེ་སྒོ་ལ་ལ་འབྱོན་པའི་བསུ་བ་ལ་གྲོ་ས་ཚོགས་པས་བྱོན་པའི་ཚེ། དགོན་པ་འདིར་ཚོགས་པས་བཞུགས་ཤིང་གཟིམ་ཁང་མཛད་པ་འདིར་གཟིམ་ཐེར་ཕུབ། ཆོས་རྗེས་བཞུགས། ཞེས་ཆོས་རྗེ་རིན་པོ་ཆེ་རྒྱལ་རིན་པ་གསུང་ཞིང་། དེ་དུས་གཞི་བདག་གིས་དགོན་པ་ཕུལ་ཞིང་རྟེན་འབྲེལ་བསྒྲིགས་པ་ཡིན་ནམ་སྙམ། གཞན་ཡང་སྐྱིད་སྨད་རི་བོ་རྩེ་ལྔར་བཞུགས་དུས་དགོན་པ་མནལ་ལམ་དུ་ཤར་བ་སོགས་བསམ་གྱིས་མི་ཁྱབ་པར་འདུག་ནའང་འཕྲལ་གསུང་ཚུལ་དང་སྣང་ཚུལ་དང་བསྟུན་ན། མི་སྡེ་དང་ལྷ་སྡེ་ཐམས་ཅད་སྦྱིན་བདག་དང་གྲྭ་བུ་སློབ་ཏུ་གྱུར་པ་དང་། བསྟན་པའི་རྒྱུན་ལ་ཡང་ཕན་པ་དང་། ས་ཕྱོགས་འདི་འདོད་ཡོན་ཚང་བ་སོགས་གང་ས་ནས་ལེགས་པ་ལ་དགོངས་ནས་དགོན་པ་གཅིག་མཛད་པར་བཞེད་དེ་ཆོས་རྗེ་བཀྲ་ཤིས་རྣམ་རྒྱལ་བ་ལ་སོགས་པ་རྣམས་ཀྱིས་དགོན་པ་གཟིགས་པ་ལ་བྱོན་པས་འདི་ཉིད་དུ་རྟེན་འབྲེལ་འགྲིག་ཅིང་། ནང་སོ་མཁར་རྩེ་ནས་དགོན་པ་དང་ས་ཞིང་ཕུལ་ཞིང་། གཟིམ་ཁང་གཙང་མར་བརྩིགས་ནས་ཕུལ་བ་སོགས་མཛད། སྤྱན་སྔ་རིན་པོ་ཆེ་ཀུན་དགའ་རྒྱལ་མཚན་པས་ཀྱང་དཔལ་ལྡན་ས་སྐྱ་པའི་དགོན་པ་འདེབས་པ་ལ་ངེད་ཀྱིས་གྲོགས་བྱེད་གསུངས། མཁར་རྩེར་བཀའ་ལུང་སྙན་བསྐུལ་ཡང་དག་མཛད། ཡོས་ལོའི་མཇུག་དེ་ཉིད་ལ་གཟིམ་ཁང་གི་རྨང་བཏིང་། དགོན་པ་བཏབ་པའི་ཚེ་ངོ་མཚར་བའི་ལྟས་མང་དུ་བྱུང་བ་དང་། ཆོས་རྗེས་རྟེན་འབྲེལ་བསྒྲིགས་པའི་ཚུལ་ལ་སོགས་པ་ནི་མཁས་པ་ཆེན་པོས་མཛད་པའི་རྣམ་ཐར་དུ་གསལ། ཡོས་ལོའི་ནང་དེ་ཉིད་དུ་གཟིམ་ཁང་དང་། རྒྱལ་རོང་པར་རྒོལ་བའི་སྤྱི་ཁང་གི་ཐད་འདིར་ཁང་ཆུང་གཅིག རོང་པ་ཚ་འཕྲང་པའི་སྤྱི་ཁང་གི་ཐད་འདིར་ཁང་ཆུང་གཅིག་དང་གསུམ་གྱི་ཐོག་ཕུབ། གཞན་རྨང་མང་དུ་ཐིངས། དེ་རྗེས་འཕན་ཡུལ་མདར་ཆོས་རྗེ་བ་གཞོན་ནུ་ལེགས་གྲུབ་པས་དབུ་མཛད་དཔོན་སློབ་རྣམས་ཀྱིས་སྲས་ཁང་དུ་སྤྱན་དྲངས་ཏེ་ཟླ་བ་གཅིག་གི་ཕོགས་ཕུལ། དེ་རྗེས་དེའུ་གོང་ནས་ཟླ་བ་གཅིག་གི་ཕོགས་ཕུལ། ཟླ་བ་གཉིས་བཞུགས། ཆོས་ཀྱི་འཁོར་ལོ་རྒྱ་ཆེན་པོ་བསྐོར། རྙེད་པ་དང་བཀུར་སྟིའི་ཞབས་ཏོག་ཕུན་སུམ་ཚོགས། དེ་རྗེས་ཕར་ཕྱིན་རང་ལས་མཁས་པ་ལོ་པ་ཚུལ་དར་ཞེས་གྲགས་པའི་མཁས་པ་ཆེན་པོ་དེས་ལོ་དགོན་པར་སྤྱན་དྲངས་ཏེ་ཕོགས་ཕུལ། ཟླ་བ་གཅིག་བཞུགས། བདག་ཅག་ཕྱག་ཕྱིར་ཡོད་པ་དྲག་ཞན་ཐམས་ཅད་ཀྱིས་ཆོས་རྗེ་ལོ་པ་ལ་བྱམས་ཆོས་ལྔའི་ལུང་ཞུས། འབྲུག་ལོའི་འགོ་ལ་འདི་ཉིད་དུ་ཕེབས་ཏེ་རྗེ་རིན་པོ་ཆེས་རིན་སྡིངས་སུ་བཞུགས། མཁར་རྩེ་བས་གཟིམ་ཁང་བརྩིགས་པ་ལ་སོགས་པ་ཐམས་ཅད་ཀྱིས་མཁར་ལས་ལ་འབད། འབྲུག་ལོ་ཟླ་བ་བཅུ་པའི་འགོ་ལ་གཟིམ་ཁང་ཀ་བརྒྱད་མའི་ཉིས་ཐོག་ལེགས་པར་གྲུབ། གཞན་ཡང་མང་དུ་གྲུབ། ཚེས་གསུམ་མཆོད་པ་གཅིག་དང་བསྟུན་ནས་གཟིམ་ཁང་ནས་མང་ཇ་དང་ཚ་ར་གཟབ་པ་གཅིག་གནང་། ཆོས་རྗེ་ས་སྐྱ་པཎྜི་ཏའི་སྐུ་གཅིག་དང་། དཔལ་གུར་གྱི་མགོན་པོའི་སྐུ་གཅིག་དང་གཉིས་ནང་སོ་ནས་བཞེངས་པ་ལ་རབ་གནས་མཛད། དེ་ནས་ཆོས་རྗེ་རིན་པོ་ཆེ་དང་། སློབ་དཔོན་བཟོད་ཆེན་པས་གཙོ་མཛད་དཔོན་སློབ་རྣམས་ཀྱིས་དགུན་ཆོས་ཤིན་ཏུ་དམར་བར་མཛད། དཔྱིད་ཆོས་དེ་ལ་ཤེལ་གྲོང་དུ་གདན་དྲངས། ཟླ་གཅིག་བཞུགས། ཧོར་ཟངས་སྤུག་མོ་གཅིག་དང་། ལྟར་མོ་དང་། ཕྱི་སྒོ་དབུས་འབྱེད་འདི་ལ་སོགས་པ་ཉེ་བར་མཁོ་བ་མང་དུ་ཕུལ། ཐུགས་ཤིན་ཏུ་མཉེས། ཀུན་དགའ་རྭ་བ་ལ་སོགས་པ་བརྩིགས་པའི་ཚུལ་ནི། ལོ་ནས་ཕེབས་པའི་མོད་དེ་ཉིད་ལ་བླ་མ་ཐུགས་རྗེ་ཆེ་བ་དང་གྲྭ་བུ་སློབ་རྒྱ་ཆེ་བའི་སྟོབས་ཀྱིས་ཆུང་ན་མི་ཤོང་དགོངས་ནས་ཀ་བ་བརྒྱ་ཉི་ཤུ་ཙམ་གྱི་རྨང་བཏིང་། བྱང་ཕྱོགས་ཉན་པོ་བས་བརྩིགས། ནུབ་ཕྱོགས་གྲོ་ས་ཚོགས་པས་བྱོན་ནས་བརྩིགས། ཤར་ཕྱོགས་ཁྲི་དཔོན་མཚོ་སྐྱེས་པ་ཚོང་འདུས་ན་བཞུགས་དུས་ཚོང་འདུས་པས་བརྩིགས། ལྷོ་ཕྱོགས་ཞོལ་ཆར་རྗེ་བས་བརྩིགས། གཙང་ཁང་བར་སྐོར་དང་བཅས་པ་རྒྱལ་མོ་རོང་པ་དགེ་བཤེས་ཤེས་རིན་ཞེས་བྱ་བ་བླ་མ་ལ་དད་པ་ཆེ་ཞིང་། སྤྱི་སེམས་ཆེ་བ་གཅིག་ཡོད་པ་དེས་དོ་དམ་བྱས་བླ་བྲང་ནས་ཞལ་བཞུགས་ཐོག་ཏུ་ལེགས་པར་གྲུབ། ཕྱིས་ལྷ་མོ་ཆེ་བཞེངས་དུས་གཙང་ཁང་གི་ཐོག་དཔང་གཏོད། གླང་ཐང་ཚོགས་པས་མཛོ་མོ་ར་བ་ཡོད་པའི་ཐད་འདིར་ཚོགས་པ་ཉིས་བརྒྱ་ཤོང་པའི་ཁང་པ་བརྩིགས་ནས་ཕུལ། ལྷ་ཁང་ནས་གོས་ཆེན་སྐབས་མངས་ལེགས་པ་གཅིག་ཕུལ། གཞན་ཡང་སྲས་ཁང་། ཐང་སག་ལོ་དགོན་པ་སོགས་ནས་ཇི་ལྟར་འོས་པའི་ཡོ་བྱད་ཕུལ་ཏེ་སྤྱི་ལ་དགོས་པ་ཐམས་ཅད་གཟིམ་ཁང་ནས་ཐུགས་ཁུར་མཛད་པས་བླ་མའི་ཐུགས་རྗེས་འབད་མེད་ལྷུན་གྲུབ་ཏུ་བྱུང་བ་ཡིན་ནོ། །རྗེ་བཙུན་བླ་མ་དམ་པ་འདིའི་རྣམ་ཐར་རྒྱས་པ་ནི། མཁས་པ་ཆེན་པོ་གཞན་དག་གིས་མཛད་པ་ལས་ཤེས་ཤིང་། བདག་གིས་ཅུང་ཟད་ཐོས་པ་ནི། སྐྱེ་འཆི་ལ་དབང་ཐོབ་པར་ཞལ་གྱིས་བཞེས་ཏེ་བདེ་བར་གཤེགས་པའི་ལོ་དེ་བདག་ཆོས་མགོ་ལ་བསྙེན་རྫོགས་བྱེད་པར་འདོད་ཀྱང་རེ་ཞིག་འགྱངས་པ་ལ་དགེ་བཤེས་བསོད་ནམས་དཔལ་འཕེལ་ཞེས་པ་གཅིག་བདག་གི་རྩར་གནང་ནས་བསྙེན་རྫོགས་བྱེད་ན་རན་ནས་ཡོད་མྱུར་བར་ཤོག་གསུངས་ཏེ་བདག་གིས་ཚེས་བརྒྱད་ལ་འདིར་འོངས་བསྙེན་རྫོགས་བྱས། བཅུ་བཞི་ལ་བདེ་བར་གཤེགས། ཆོས་ཁྲི་སྟེང་དུ་ཆོས་གསུང་བའི་ཚེ་བཞེངས་ནས་ད་ནི་འདི་འདྲ་ཡང་ཡང་མི་ཡོང་ངོ་ཞེས་ཡང་དང་ཡང་དུ་གསུངས་པ་དང་། ཆོས་བར་ལ་བྱོན་པ་རྣམས་ལ་བཅུ་བཞིའི་བར་སྡོད། མང་ཇ་མང་པོ་འོང་གསུངས་པ་སོགས་ནི་རྣམ་ཐར་རྒྱས་པར་གསལ། གཞན་ཡང་དེང་སང་གྲོག་པོའི་ནུབ་ན་མྱང་རལ་དུ་སོང་བའི་སློབ་དཔོན་ལེགས་རྒྱམ་པའི་ཁང་པ་རྙིང་པ་དེར། གྲངས་གཅིག་གིར་ཚ་བཞེས་ལ་གདན་དྲངས། གྲལ་དེར་ཡར་ལུང་ལ་སོགས་པར་ལྟས་ངན་བྱུང་བའི་ལོ་རྒྱུས་གླེང་བས་ལྟས་ངན་གྱིས་ལུང་པ་ཁེངས་ཀྱང་ང་ནི་ལོ་བརྒྱད་ཅུ་གྱ་ལྔ་སྡོད། དེ་ནས་བལྟས་ནས་བྱེད་གསུང་། བལྟས་ནས་བྱེད་ཅེས་པ་དེ་ཆོས་རྗེ་གཟད་པ་བློ་རྒྱམ་པས་གྱ་བདུན་བཞུགས་པར་ཞལ་གྱིས་བཞེས་ཞེས་གསུངས་པ་ལྟར་ན་དགོས་པ་ཁྱད་པར་ཅན་དང་གསོལ་བ་དང་དྲག་ཏུ་བཏབ་ན་གྱ་བདུན་བཞུགས་པ་ཡིན་ནམ་སྙམ། དམ་པ་རྒྱ་གར་གྱི་སྤྲུལ་པ་ཡིན་པ་ནི། དིང་རི་གླང་འཁོར་དུ་བྱོན་པའི་ཚེ། སྒྲུབ་པ་པོ་མཚམས་ལ་ཡོད་པ་གཅིག་ཉམས་འུར་ནས། དམ་པ་རྒྱ་གར་ཚེས་བརྒྱད་ལ་འབྱོན་པར་ཡོད་བསུ་བ་ལ་སོགས་པའི་གྲབས་མི་བྱེད་པ་ཨེ་ཡིན་གསུངས། ཚེས་བརྒྱད་ལ་ཆོས་རྗེ་བྱོན་པ་ཡིན་པར་འདུག་ཅེས་པ་ཆོས་ཀྱི་རྗེ་རྡོ་རྗེ་འཆང་གི་གསུང་ལས་ཐོས་ཤིང་དྲུང་ཆེན་དཔལ་འབྱོར་བ་གསུང་གི་འདུག་པ་ཡང་དྲན། ཆོས་རྗེ་བློ་རྒྱམ་པས་མཛད་པའི་བསྟོད་པ་ན། ལྷོ་བྲག་ཕྱག་རྡོར་གྲུབ་ཆེན་རྣམས་ཀྱིས་ནི། །མ་འོངས་སེམས་ཅན་ཀུན་གྱི་དོན་སླད་དུ། །དམ་པ་རྒྱ་གར་སྐུ་སྐྱེར་ལུང་བསྟན་པ། །ཞེས་པ་དང་མཐུན། ཡང་རོང་ངུར་སྨྲིག་ཏུ། བྱང་ཆུབ་སེམས་འགྲེལ་གསུངས་པའི་ཚེ། ཁ་ཆེ་པཎ་ཆེན་གྱིས་ཞབས་སྤྱི་བོར་བཞག་ནས་བྱིན་གྱིས་བརླབས་པའི་སྣང་བ་བྱུང་ཞེས་པ་རྗེ་ཉིད་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཊཱིཀྐའི་མཆན་ལ་བྲིས་འདུག་པ་བཀའ་འབུམ་ཐོར་བུ་བའི་ཞུ་དག་བདག་གིས་སྙན་དུ་འབུལ་བའི་ཚེ་འདི་འདྲ་ཞིག་འདུག་ཞུས་པས་དེ་འདྲ་ཞིག་བྱུང་གསུངས། སངས་རྒྱས་འོད་སྲུངས་ཀྱི་དུས་ཀྱི་དགེ་སློང་ཡིན་ཟེར་བའི་དགེ་སློང་དབུ་དཀར་བ་ཞིག་དང་རྣམ་པ་གཉིས་ཀྱིས་གཙུག་ལག་ཁང་ཆེན་པོ་གཅིག་ན་གསུང་རབ་མང་པོ་བཞུགས་འདུག་པའི་འཁྲུགས་པ་རྣམས་བསྒྲིགས་པའི་སྣང་བ་བྱུང་གསུངས། མངོན་ཤེས་གསུང་པ་ནི་མང་དུ་ཡོད། གཞན་ཡང་ཆོས་རྗེ་ལྷ་བྲིས་བདག་ལ་གྲུབ་རྟགས་ཤིག་བསྟན་དུ་གསོལ་ཞེས་ཞུས་པས། སེམས་ཅན་གསོན་པོ་གཅིག་དང་རོ་གཅིག་འཁྱེར་ཤོག་གསུང་། ཕྱེ་མ་ལེབ་ཀྱི་རོ་གཅིག་དང་། བྱི་བ་གསོན་པོ་གཅིག་ཕུལ་བས་དམིགས་པ་གཅིག་མཛད་པས། ཕྱེ་མ་ལེབ་འཕུར། བྱི་བ་ཤི། ཡང་དམིགས་པ་གཅིག་མཛད་པས་སྔར་བཞིན་དུ་གྱུར། ཡང་ཞབས་པུས་ཀྱི་འོག་ཏུ་འཇུག་པའི་ཁྱིའི་ཕྲུ་གུ་གཅིག་ཡོད་པ། ཐུགས་འུར་ཏེ་ཕྱག་འཁར་བསྣུན་པས་རེ་ཞིག་ཤི། གསུང་ཆོས་ཐོན་པ་ན་ལོངས་གསུངས་པས་ལངས་སོ། །གཞན་ཡང་དུས་འཁོར་རྒྱུད་འགྲེལ་ལས། རྣལ་འབྱོར་པ་རྣམས་ཀྱི་རུས་པ་ནི་མུ་ཏིག་ཏུ་འགྱུར་རོ་ཞེས་པ་ལྟར། ཞབས་སེན་མུ་ཏིག་གི་མདོག་ཅན་ཉ་ཕྱིས་སུ་གྱུར་པ་ལ་རིང་བསྲེལ་དུ་མའི་ཕྲེང་བས་མཛེས་ཤིང་། སྐུ་གདུང་རིན་པོ་ཆེར་གྱུར་ཏེ་མི་མང་པོས་ཀྱང་ཐེག་པར་དཀའ་བ་དང་། ཐོག་གཉིས་རིམ་པ་དིབ་པའི་ཚེ་དངུལ་གདུང་ལ་གནོད་པ་གང་ཡང་མེད་པར་གྱུར་པ་ནི། རྭ་སྒྲེང་གི་རྟེན་མེ་ཐུབ་ཅན་རྣམས་དང་། ར་མོ་ཆེའི་ཇོ་བོ་ལ་མེས་མ་གནོད་པ་དང་། སྲིན་པོ་རིའི་ཐོག་དིབ་པའི་ཚེ་བདེ་མཆོག་གི་སྐུ་ལ་གནོད་པ་མེད་པར་གྱུར་པ་དང་ཚུལ་མཚུངས་ཏེ་ཤིན་ཏུ་ངོ་མཚར་བའི་རྣམ་པར་ཐར་པ་ཡིན་ནོ། །ཡི་དམ་གྱི་གཞལ་གཟིགས་པའི་ཚུལ་ནི། རྣམ་ཐར་རྒྱས་པ་ན་གསལ་ཞིང་། མངོན་པ་རང་ལས་མཁས་པ་གཟད་པ་བློ་རྒྱམ་དུ་གྲགས་པ་དེས་ལོ་གསུམ་གསོལ་ཇ། གསོལ་ཐུག་སྐོལ་བ་ལ་སོགས་པའི་ཕྱག་ཕྱིར་བཞུགས། དེས་མཛད་པའི་བསྟོད་པ་ལས། ཡི་དམ་ལྷ་ཡིས་དངོས་སུ་བྱིན་གྱིས་བརླབས། །ཞེས་པས་མདོར་བསྟན་ནས། རྒྱས་པར་བཤད་པ་ནི། དགའ་ལྡན་གནས་སུ་མི་ཕམ་བྱམས་པ་ཡིས། །ཐུགས་ཀྱིས་རྗེས་བཟུང་ཡང་དག་དོན་སྟོན་པའི། །ཞེས་དང་། བཅོམ་ལྡན་མི་གཡོའི་སྒྲུབ་པ་མཛད་པའི་ཚེ། །ལྷག་པའི་ལྷ་དང་རྒྱལ་བ་སྲས་བཅས་ཀྱིས། །དངོས་སུ་བྱོན་ནས་ཡང་དང་ཡང་དུ་གཟིགས། །ཞེས་དང་། གཞོན་ནུ་ཉིད་ནས་དཔའ་བོ་མཁའ་འགྲོ་དང་། །གུར་གྱི་མགོན་དང་བསྟན་སྲུང་རྣམས་ཀྱིས་ནི། །རྗེས་སུ་བཟུང་ནས་ཡང་དག་དོན་སྟོན་པའི། །ཞེས་དང་། རི་བོ་རྩེ་ལྔར་བཅོམ་ལྡན་སྒྲོལ་མ་དང་། །རིགས་གསུམ་མགོན་དང་ཡེ་ཤེས་ཅན་ཟུང་གིས། །དངོས་སུ་བྱོན་ནས་བསྟན་པའི་སྒྲོན་མེར་བསྟན། །ཞེས་པ་རྣམས་ལས་ཤེས་སོ། །སངས་རྒྱས་ཀྱི་བསྟན་པ་གསལ་བར་མཛད་པ་དང་། སྐལ་ལྡན་གྱི་གདུལ་བྱ་རྣམས་ལ་ཕན་པ་རྒྱ་ཆེན་པོ་འབྱུང་བའི་ལྟས་ནི། ཆོས་རྗེ་བློ་རྒྱམ་པའི་མནལ་ལམ་དུ། ཆོས་རྗེ་རིན་པོ་ཆེ་ནམ་མཁའ་ལ་འཕགས་ནས་འཁོར་མང་པོ་ལ་ཆོས་སྟོན་པའི་རྨི་ལམ་བྱུང་ཞུས་པས་དེ་བས་ལྷག་པར་རང་གི་རྨི་ལམ་དུ། རི་རབ་ཀྱི་བང་རིམ་གྱི་སྟེང་ནས་སྐོར་བ་བྱས་ཏེ་གླིང་བཞིའི་སེམས་ཅན་ལ་ཆོས་སྟོན་པ་བྱུང་གསུང་བ་དང་། རྒྱ་ནག་རྒྱལ་པོས་མཆོད་གནས་སུ་སྤྱན་དྲངས་པའི་ཚེ། དབུས་གཙང་དུ་བཞུགས་ནས་བཤད་སྙན་མཛད་ན་ཇི་ལྟར་འགྱུར་དགོངས་ནས་མནལ་ལམ་བརྟག་པ་མཛད་པས་མཆོད་རྟེན་ཆེན་པོ་གཅིག་གི་སྲོག་ཤིང་ལས་འོད་ཟེར་འཕྲོས་པས་འཇིག་རྟེན་གྱི་ཁམས་ཐམས་ཅད་གསལ་བར་བྱས་པ་བྱུང་གསུངས། དེ་རྣམས་ནི་དགུང་ལོ་ཉི་ཤུ་རྩ་གཉིས་ལ་རྣམ་ངེས་ཀྱི་ཊཱིཀྐ་མཛད་པ་ནས་བཟུང་སྟེ་དགུང་ལོ་བརྒྱད་ཅུ་གྱ་ལྔའི་བར་དུ་འདུལ་བ་མེ་ཏོག་འཕྲེང་རྒྱུད་ཀྱི་ཊཱིཀྐ་ཚིག་དོན་རབ་གསལ་གྱི་གཤམ་ན། བདག་གིས་སྡེ་སྣོད་གསུམ་ལ་མཁས་པར་སྦྱངས། །སྡོམ་གསུམ་མིག་འབྲས་བཞིན་དུ་གཅེས་པར་བསྲུངས། །སྒོ་གསུམ་བྱ་བས་ཐུབ་པའི་བསྟན་པ་སྤེལ། །དུས་གསུམ་རྒྱལ་བ་སྲས་བཅས་དགྱེས་པར་མཛོད། །ཅེས་པའི་ཚུལ་དུ་སངས་རྒྱས་ཀྱི་བསྟན་པ་གསལ་བར་མཛད་ཅིང་། ཆོས་གྲྭ་ཆེན་པོ་འདི་ཉིད་དུ་སྐུ་གསུང་ཐུགས་ཀྱི་རྟེན་ཁྱད་པར་ཅན་བཞུགས་པ་ལ་སོགས་པའི་སྟོབས་ཀྱིས་སང་རྒྱས་ཀྱི་བསྟན་པ་རྒྱུན་མི་ཆད་པར་ཡུན་རིང་དུ་གནས་པའི་རྟེན་འབྲེལ་ཡིན་ནོ། །དགོན་པ་བཏབ་ནས་ལོ་བརྒྱད་ཙམ་སོང་བའི་ཁྱི་ལོ་དེ་ལ་འཕགས་པ་འཇམ་དཔལ་དབྱངས་ཀྱིས་རྗེས་སུ་བཟུང་ཞིང་། མཁས་པ་དང་གྲུབ་པའི་དབང་ཕྱུག་ཆོས་ཀྱི་རྗེ་རིན་པོ་ཆེ་བཀྲ་ཤིས་རྣམ་པར་རྒྱལ་བ་གདན་སར་བསྐོས་ཏེ་ལོ་བཅུ་བདུན་བཞུགས། ལྷ་མོ་ཆེ་དང་དངུལ་གདུང་བཞེངས་པ་སོགས་བཀའ་དྲིན་ཆེ། རྗེ་འདི་པ་གདན་སར་ཕེབས་དུས་ཆོས་རྒྱལ་གྲགས་པ་འབྱུང་གནས་པས་སྔར་ཞུ་རྟེན་ཕུལ་བའི་ཞལ་བཞེས་གཅིག་ཡོད་པས་དབྱར་གྱི་རྩམ་ཚུལ་ལ་པ་ཚབ་ནས་བགོས་ཁལ་ཉིས་བརྒྱ་དང་། གཟིམ་ཁང་གོང་འོག་གཉིས་ལ་ལྔ་བཅུ་ལྔ་བཅུ་རེ། ལྷག་གང་ཡོད་གོང་མ་ངག་དབང་པས་ཆོས་རྗེ་ལ་ཆོས་ཞུ་བའི་ཡོན་དུ་ཕུལ་བ་ཡིན། དེ་ནས་དཔལ་རྡོ་རྗེ་འཇིགས་བྱེད་ཀྱིས་བྱིན་གྱིས་བརླབས་པས་མཐུ་སྟོབས་ཀྱི་དབང་ཕྱུག་ཏུ་གྱུར་པ། རིགས་པར་སྨྲ་མ་རྣམས་ཀྱི་གཙུག་གི་རྒྱན་ཆོས་རྗེ་དགེ་བ་རྒྱལ་མཚན་པས་ཡོས་ལོ་ལ་གདན་སར་ཕེབས། རྟ་ལོ་ལ་ཞི་བར་གཤེགས། དེ་རྗེས་དཔལ་ལྡན་ས་སྐྱ་པའི་གདུང་རྒྱུད་དྲི་མ་མེད་པ་བདག་ཆེན་རྒྱ་གར་བས་རྟ་ལོ་ལ་གདན་སར་ཕེབས། བྱ་ལོ་ལ་གཙང་ལ་ཐེགས། དེ་རྗེས་ཆོས་ཀྱི་རྗེ་ཀུན་དགའ་རྡོ་རྗེའི་ཞལ་སྔ་ནས་བྱ་ལོའི་མཇུག་ལ་འདིར་ཕེབས། བཅུ་བཞི་མཆོད་པའི་ཟླ་མཆོད་མ་ཆག་པར་འཛིན་པ་དང་། གསུང་ངག་དབྱར་ཆོས་དགུན་ཆོས་ལ་གསུང་བ་སོགས་ཐུགས་རྗེ་ཆེན་པོས་ཁྱབ་པར་མཛད་པས་གྲྭ་པ་ཐམས་ཅད་ཤིན་ཏུ་དད་ཅིང་འདུན་ཏེ་གདན་སར་བཞུགས་པར་གསོལ་བ་བཏབ། སྐྱེས་བུ་ཆེན་པོ་འདི་ནི་སྐུ་བསོད་ཀྱི་ཚོགས་གཞན་ལས་ཕུལ་དུ་ཕྱིན་པ་ཞིག་སྟེ་རྒྱལ་བུ་དོན་གྲུབ་སྐུ་བལྟམས་པ་ན། བང་མཛོད་འཕེལ་བ་དང་། གཏེར་ཁ་བྱེ་བ་ལ་སོགས་པ་དགེ་མཚན་གྱི་རྟགས་མང་པོ་བྱུང་བ་དང་ཆ་འདྲ་བར་སྐུ་བལྟམས་པའི་ཚེ་གསོལ་མར་ཞོ་ཁྲུ་བ་གང་དཀྲོགས་པ་ན་མར་ཁྲུ་བ་གང་དུ་གྱུར་པ་ལ་སོགས་པ་མང་དུ་བྱུང་ཞེས་གྲགས་སོ། །དེ་ནས་ཆོས་རྗེ་ཐམས་ཅད་མཁྱེན་པ་ཉིད་ཀྱིས་ཁྱོད་དགོན་པ་གསུམ་གྱི་གདན་ས་བྱེད་དགོས་སོ་ཞེས་ལུང་བསྟན་པ་ལྟར་ཁྱི་ལོ་ཟླ་བ་བདུན་པའི་ཚེས་གསུམ་ལ་གདན་སར་མངའ་གསོལ་ཏེ་སྟག་ལོ་ཟླ་བ་བཅུ་གཉིས་པའི་བར་ལོ་ལྔ་བཞུགས། དེའི་བར་ལ་དང་པོ་ཀུན་དགའ་ར་བ་ལ་ཝ་བད་དང་། དེ་རྗེས་གཙུག་ལག་ཁང་ལ་ཐིགས་ཁང་སྤེན་བད་སོགས་རྒྱ་ཆེ་ཞིང་དཔངས་མཐོ་བ་མཛད། དེ་རྗེས་ཡབ་ཡུམ་བདེ་བར་གཤེགས་པའི་རྗེས་སུ། དང་པོར་གསེར་དངུལ་ཇ་གོས་དར་སོགས་ལེགས་པར་བཏང་ཞིང་། དེ་རྗེས་ན་བཟའ་བེར་ཐུལ་ལྔ་ཡོད་པ་བཏང་། དེ་རྗེས་དངུལ་གྱི་མཆོད་ཆས་མ་གཏོགས་པ་ཕལ་ཆེར་བཏང་ཟིན་ཀྱང་། དངུལ་གྱི་མཆོད་ཆས་སོགས་ཐམས་ཅད་བཤིག་དགོས་པ་བྱུང་ཡང་། དངུལ་གདུང་འདིའི་ཞབས་ཏོག་གཅིག་མི་སྒྲུབ་པའི་ཐབས་མེད་དགོངས་ཏེ་ཐུགས་སྟོབས་བསྐྱེད་པས། སྐུ་ཆེ་བ་དང་ཐུགས་ཉེ་བ་རྣམས་ཀྱི་ཐུགས་ཡུལ་དུ་མི་ཤོང་བ་ལྟ་བུ་བྱུང་ཡང་། བྱུང་ཚད་གཏོང་བའི་ལོངས་སྤྱོད་དེ་འཛད་འཛད་འདྲ་ཡང་མི་འཛད་དོ་ཞེས་གསུངས་པ་ལྟར། བཟོ་རིག་པའི་ཞབས་ཏོག་རྒྱུ་གསེར་དངུལ་ལ་སོགས་པ་ཟས་ནོར་གྱི་ཕུང་པོ་ཆེན་པོ་དགོས་པ་འདུག་ནའང་། ཆེས་ལྷག་པ་དང་བཅས་པ་གྲུབ། གཞན་ཡང་དུས་ཆེན་གྱི་སྒྲུབ་མཆོད་ཞག་ལྔ་གསར་དུ་བཙུགས་པ་སོགས་བཀའ་དྲིན་ཤིན་ཏུ་ཆེ། དེའི་རྗེས་དབུར་སྟོད་སོགས་ཀྱི་སྡེ་དགོན་ཚོར་གསུང་ངག་སོགས་ཀྱིས་བསྟན་པ་སྤེལ། གདན་སའི་ཁུར་གཞན་ལ་གཏང་དགོས་དགོངས་ནས་འོས་བཙལ་བ་ན། ཆོས་རྗེ་གུང་རུ་བ། ཆོས་རྗེ་རྡོ་རྗེ་འཆང་དང་། ཆོས་རྗེ་ཐམས་ཅད་མཁྱེན་པ་ལ་སྔགས་དང་མཚན་ཉིད་ལེགས་པར་སྦྱངས་པའི་སྟོབས་ཀྱིས་འོས་པ་ཡིན་ནའང་། བཅུ་བཞི་མཆོད་པའི་ཟླ་ཇ་ནང་སོ་ནས་འཛིན་དགོས་པ་སོགས་ཁུར་ཆེས་པས་ཐུགས་སུ་མ་ཆུད་པ་ལ་ཟླ་ཇ་ལས་ཚན་ཁ་དགུ་དང་། ནང་སོ་མཁར་རྩེ་བ་རྣམས་ལ་འགྲེམས་པ་སོགས་མཛད་ནས་ཆོས་རྗེ་གུང་རུ་ཡོས་ལོ་ཟླ་བ་བདུན་པ་ལ་གདན་སར་བསྐོས་ཏེ་དགུན་ཆོས་ཀྱི་ལམ་འབྲས་དང་དུས་ཆེན་གཏོང་བ་སོགས་མཛད་ནམ་ཟླ་དྲོས་ནས་ཆོས་རྗེ་གུང་རུ་བ་གནས་གང་སྤྲོར་གསུང་ཆོས་གསུང་བ་སོགས་ཇི་ལྟར་འོས་པ་མཛད། ཆོས་རྗེ་རིན་པོ་ཆེ་ཀུན་དགའ་རྡོ་རྗེས་དབྱར་ཆོས་ཀྱི་ལམ་འབྲས་གསུངས། གསུང་ངག་ཐོན་པ་དང་ལྷ་ཁང་སོགས་གང་འོས་སུ་ཐུགས་དམ་མཛད། ཆོས་རྗེ་གུང་རུ་བ་ཕེབས་ནས་འབུལ་བ་བཞག སྒྲུབ་མཆོད་དང་དུས་མཆོད་གཏོང་བ་སོགས་ཐུགས་མཐུན་ཞིང་། གསུང་ཆོས་འཕེལ་བ་བྱུང་ནའང་། ལུག་ལོ་ཟླ་བ་དྲུག་པའི་ཚེས་གསུམ་ལ་བདེ་བར་གཤེགས། དེ་རྗེས་བྱི་བ་ལོ་བར་ལོ་བདུན་ཙམ་བླ་བྲང་ན་གདན་ས་བ་མེད། འོན་ཀྱང་གྲྭ་པ་གཞན་ལས་ཕུལ་དུ་ཕྱིན་པ་དང་། བླ་མ་ཐུགས་རྗེ་ཆེ་བས་ཆོས་ཀྱི་སྲོལ་ཉམས་པ་ནི་མེད་དེ། གྲྭ་ཚང་སོ་སོའི་སློབ་དཔོན་རྣམས་ཀྱིས་རང་རང་གི་ཁུར་འཁུར་ཞིང་། ཆོས་རྫོང་ནས་ཆོས་ཀྱི་རྗེ་རིན་པོ་ཆེ་བློ་གྲོས་པས་གསུང་ངག་ལ་སོགས་པ་གསུངས། སློབ་དཔོན་ནམ་མཁའ་སྙིང་པོ་བ་དང་། སློབ་དཔོན་འདུལ་བ་བཟང་པོ་བ་ལ་སོགས་པས་གསུང་ངག་ལ་སོགས་པ་ཇི་ལྟར་འོས་པའི་ཆོས་དང་། རབ་འབྱམས་པ་རིན་ཆེན་རྒྱལ་མཚན་པས་རྒྱུད་གསུམ་ཀྱི་བཤད་པ། ལག་ལེན། སྒྲིག་ལ་སོགས་པ་རྗེ་བཙུན་གོང་མའི་གསུང་རབ་དང་ཕྱག་ལེན་བཞིན་གང་ལ་གང་འདོད་ཀྱིས་རེ་བ་སྐོང་བར་མཛད། ཆོས་རྗེ་གུང་རུ་བ་བདེ་བར་གཤེགས་ནས་ཆོས་རྗེ་ཀུན་དགའ་རྡོ་རྗེ་བ་ཆོས་རྫོང་དུ་བཞུགས་ནས་ཆོས་འཇིག་རྟེན་གཉིས་ཀྱི་སྒོ་ནས་གདན་ས་ལ་བཞུགས་པ་དང་ཁྱད་མེད་པ་མཛད་ནའང་། སྤྲེལ་ལོའི་མཇུག་བྱ་ལོའི་མགོ་ལ་བདེ་བར་གཤེགས། བྱ་ལོའི་དགུན་ཆོས་ནས་ཆོས་རྗེ་བློ་གྲོས་པ་ཆོས་རྫོང་དུ་ཕྱག་ཕེབས་ཏེ་ཆོས་རྗེ་ཀུན་དགའ་རྡོ་རྗེ་བས། ཇི་ལྟར་མཛད་པ་ལྟར་མཛད་པས་གྲྭ་པ་རྣམས་དད་ཅིང་འདུན་པར་གྱུར་ཅིང་། ནང་སོ་རིན་སྤུངས་པ་དབུས་ཕྱོགས་ལ་ཕེབས་པ་དང་སྟབས་འགྲིག་སྟེ། གླང་ལོ་ལ་དྲུང་དོན་ཡོད་པ་འདིར་ཕེབས་ནས་ཆོས་རྗེ་བློ་གྲོས་པ་གདན་སར་མངའ་གསོལ་ཏེ་དགའ་སྟོན་ལ་སོགས་པ་ཕུན་སུམ་ཚོགས་པར་མཛད། ཆོས་རྗེ་ཉིད་ཀྱང་སྤྱིར་བསྟན་པའི་ཁུར་དང་བླ་མ་ལ་དད་གུས་བསམ་གྱིས་མི་ཁྱབ་པའི་སྟོབས་ཀྱིས་རྗེ་རིན་པོ་ཆེའི་ཆོས་ཁྲིའི་སྟོང་ནས་དབྱར་ཆོས་དགུན་ཆོས་ཤེས་རབ་ཀྱི་ཕ་རོལ་ཏུ་ཕྱིན་པ་རྒྱུན་མ་ཆད་པར་གསུང་བ་དང་། གསུང་ངག་ལམ་འབྲས་དང་། རྡོ་རྗེ་ཕྲེང་བ་ལ་སོགས་པ་གདུལ་བྱ་རྣམས་ཀྱི་བློའི་རིམ་པ་དང་འཚམས་པར་ཆོས་ཀྱི་འཁོར་ལོ་རྒྱ་ཆེན་པོ་བསྐོར་ཞིང་གཟིམ་ཁང་གི་མཁར་ལས། སྐུ་འདྲ་རིན་པོ་ཆེའི་ཞབས་ཏོག བཅུ་བཞི་མཆོད་པའི་དུས་མཆོད། སྒྲུབ་མཆོད་སོགས་ཕུན་སུམ་ཚོགས་པའི་སྒོ་ནས་བཀའ་དྲིན་ཆེ་བར་ཡོད་ནའང་། སྤྲེལ་ལོ་ཟླ་བ་དགུ་པའི་ཚེས་བཅུ་ལ་བདེ་བར་གཤེགས། བར་སྐབས་དེར་བསྟན་པ་སྤྱི་སྒོས་ཀྱི་ཆག་སྒོ་ལ་བརྟེན་ནས་གཙུག་ལག་ཁང་ལ་ཞིག་རལ། བླ་མ་སློབ་དཔོན་རྣམས་སྐུ་གཤེགས་པ་སོགས་ཅི་བྱ་གཏོལ་མེད་པ་ལྟ་བུ་བྱུང་ནའང་རྗེ་བཙུན་བླ་མ་དམ་པ་དེའི་ཐུགས་རྗེ་དང་། བཀའ་སྲུང་ཆོས་སྐྱོང་གཞན་ལས་ཁྱད་པར་དུ་འཕགས་པས་གཙུག་ལག་ཁང་དང་། ལྷ་ཆེན་གྱི་ཞིག་གསོས་ལ་སོགས་པ་ལེགས་པར་གྲུབ། དེའི་ཐད་དུ་བདག་ཉིད་ཀྱིས་ཀྱང་འཁོས་ཁ་གང་ཡོད་ཀྱིས་ཁུར་འཁུར། མི་སྣ་ཆོས་ཁྲིམས་ལ་སོགས་པ་སོ་སོས་ཀྱང་ཐུགས་བསམ་རྣམ་དག་གི་སྒོ་ནས་དགེ་བསྐུལ་འབུལ་སྡུད་ལ་སོགས་པ་ལ་འབད་པ་ཆེར་མཛད་པས་ནང་སོ་ཡར་མར་ནས་ཀ་གདུང་གི་ཤིང་ཁྱད་པར་ཅན་འབུལ་བ་སོགས་ཀྱི་སྦྱིན་བདག་དང་། གྲྭ་བུ་སློབ་རྣམས་ཀྱིས་ཀྱང་རེ་བ་བཞིན་ཐམས་ཅད་ཀྱིས་མཛད་པས་དུས་ཆེན་སྒྲུབ་མཆོད་སོགས་དགོན་པའི་སྲོལ་མ་ཉམས་པ་བྱུང་ངོ་། །དེ་རྗེས་ཡོན་མཆོད་ཐམས་ཅད་བཀའ་བགྲོས་ཏེ། བདག་ཆེན་ཆོས་ཀྱི་རྗེ་སྤྱན་འདྲེན་པའི་བརྩམ་པ་བྱས་པས་གེགས་དང་བར་ཆད་གང་གི་ཡང་དབང་དུ་མ་ཤོར་བར་ལེགས་པར་སྤྱན་འདྲོངས་ཏེ་ལྷ་མོ་ཆེས་ཐོག་དྲངས་རྟེན་རྣམས་ཞིག་གསོས་བྱས་པས་སྔར་ལས་ཕུལ་དུ་བྱུང་བ་གྲུབ་པ་དང་། ལོགས་བྲིས་གསར་དུ་གྲུབ་པ་རྣམས་ལ་རབ་གནས་ལེགས་པར་གྲུབ། གསུང་ངག་ལ་སོགས་པའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར། སྡེ་སྣོད་འཛིན་པ་དང་མི་ཆེ་དགུ་མང་དུ་འདུས། བཀྲ་ཤིས་དང་དགེ་མཚན་གྱིས་ནམ་མཁའ་གང་བ་ལྟ་བུ་བྱུང་། དེ་ནས་རིགས་རུས་ཆོ་འབྲང་ཕུན་སུམ་ཚོགས་ཤིང་། ལུང་དང་རྟོགས་པའི་ཡོན་ཏན་དུ་མའི་དཔལ་གྱིས་མངོན་པར་མཐོ་བའི་ཆོས་ཀྱི་རྗེ་རིན་པོ་ཆེ་མཁྱེན་རབ་མཆོག་གྲུབ་དཔལ་བཟང་པོ་ལ་བདག་ཆེན་ཆོས་ཀྱི་རྗེས་ཐུགས་དམ་བརྟག་པ་ལན་གསུམ་གྱི་རབ་དུ་མཛད་པས་མཁའ་འགྲོ་ཆོས་སྐྱོང་རྣམས་ཀྱིས་ཀྱང་ལུང་བསྟན་ཏེ་ཕག་ལོ་ཟླ་བ་བདུན་པའི་ཚེས་བཅུ་གསུམ་ཉིན་གདན་སར་མངའ་གསོལ་ལོ། །གདན་སར་བྱོན་པ་ལ་གྲྭ་པ་སྦྱིན་བདག་འདུན་པ་དང་། བསུ་བ་སེར་ཕྲེང་གདུགས་རྒྱལ་མཚན་རོལ་མོ་ལ་སོགས་པའི་བཀོད་པ་འདི་བས་ཕུལ་དུ་བྱུང་བ་སྔར་མ་བྱུང་ཞེས་གྲགས་སོ། །མདོར་ན་ཆོས་གྲྭ་ཆེན་པོ་འདིའི་རྨང་བཏིང་ནས་བཟུང་སྟེ་ཆོས་ཀྱི་རྗེ་རིན་པོ་མཁྱེན་རབ་མཆོག་གྲུབ་དཔལ་བཟང་པོ་གདན་ས་ལ་ཕེབས་པའི་ཕག་ལོ་འདིའི་བར་ལ་ལོ་ལྔ་བཅུ་རྩ་བདུན་སོང་། དེའི་བར་ལ་གདན་ས་བ་བདུན། རྗེ་རིན་པོ་ཆེ་ཉིད་དང་བླ་མའི་གཙོ་བོ་བརྒྱད། དེ་ལ་ཆོས་ཀྱི་རྗེ་ཐམས་ཅད་མཁྱེན་པ་ནི། དགུང་ལོ་བརྒྱད་ཅུ་གྱ་ལྔ་བཞུགས། ཅུང་ཟད་ཞལ་གྱི་མཐུན་པ་ནི། དགག་དགོས་ཀྱིས་དགུང་སྙིང་གསང་བ་ཡིན་གྱི་དོན་ལ་གྱ་ལྔ་ཡིན་པར་སྐྱེས་བུ་ཆེན་པོ་ཆོས་ཀྱི་རྗེ་གཞོན་ནུ་སེང་གེ་བ་དང་། ཆོས་རྗེ་གཞོན་ནུ་ལེགས་གྲུབ་པ་གཉིས་ཀྱི་གསུང་ལས་འཐད་པ་དང་བཅས་ཏེ་ལེགས་པར་ཐོས། ཆོས་རྗེ་བཀྲ་ཤིས་རྣམ་རྒྱལ་བ་ནི་ཡོས་ལོ་པ་སྟག་གི་ལོ་དྲུག་ཅུ་ཐམ་པའི་སྟེང་དུ་བདེ་བར་གཤེགས། ཆོས་རྗེ་དགེ་བ་རྒྱལ་མཚན་པ་ནི་ཡོས་ལོ་པ་རྟ་ལོ་ལ་བདུན་ཅུ་དོན་དྲུག་གི་སྟེང་དུ་བདེ་བར་གཤེགས། བདག་ཆེན་རྒྱ་གར་བ་ནི་ད་ལྟ་ཡང་བཞུགས། ཆོས་ཀྱི་རྗེ་ཀུན་དགའ་རྡོ་རྗེ་བ་ནི་འབྲུག་ལོ་པ་འདུལ་བ་པའི་ལུགས་ཀྱི་བྱ་ལོ་ལ་ལྔ་བཅུ་རྩ་བཞིའི་སྟེང་དུ་བདེ་བར་གཤེགས། ཆོས་ཀྱི་རྗེ་གུང་རུ་བ་ནི་ཡོས་ལོ་པ་ལུག་གི་ལོ་ལ་དྲུག་ཅུ་རེ་ལྔའི་སྟེང་དུ་བདེ་བར་གཤེགས། ཆོས་རྗེ་བློ་གྲོས་རྒྱལ་མཚན་དཔལ་བཟང་པོ་ནི་བྱི་བ་ལོ་པ་སྤྲེལ་ལོ་ལྔ་བཅུ་ང་བདུན་གྱི་སྟེང་དུ་བདེ་བར་གཤེགས། ཆོས་ཀྱི་རྗེ་རིན་པོ་ཆེ་མཁྱེན་རབ་མཆོག་གྲུབ་དཔལ་བཟང་པོ་ནི། རོང་སྟོན་ཐམས་ཅད་མཁྱེན་པ་དང་ཚུལ་མཚུངས་པར་སྤྱིར་སངས་རྒྱས་ཀྱི་བསྟན་པ་དང་། སྒོས་ཆོས་གྲྭ་ཆེན་པོ་འདིའི་འཛིན་སྐྱོང་སྤེལ་གསུམ་གྱི་སླད་དུ་བརྒྱད་ཅུ་གྱ་ལྔའི་བར་དུ་བཞུགས་པར་གསོལ་བ་འདེབས། སྤྱིར་ཆོས་གྲྭ་ཆེན་པོ་ཤྲཱི་ན་ལེནྡྲ་འདི་བཏབ་པས་སངས་རྒྱས་ཀྱི་བསྟན་པ་སྤྱི་དང་། ཁྱད་པར་དུ་དཔལ་ལྡན་ས་སྐྱ་པའི་བསྟན་པ་དར་ཞིང་རྒྱས་པ་དང་། ཡུན་རིང་དུ་གནས་པ་ལ་ཕན་པ་སྔར་ཡང་བྱུང་ཞིང་། ད་དུང་ཡང་འབྱུང་བར་སྨོན་ལམ་འདེབས། ཁྱད་པར་ཡུལ་ཕྱོགས་འདི་ཉིད་དུ་ཡང་སྔགས་འདོད་པ་རྣམས་ལ་སྔགས། མཚན་ཉིད་འདོད་པ་རྣམས་ལ་མཚན་ཉིད། ཐོས་བསམ་འདོད་པ་རྣམས་ལ་ཐོས་བསམ། སྒོམ་འདོད་པ་རྣམས་ལ་སྒོམ། དབང་བསྐུར་འདོད་པ་རྣམས་ལ་དབང་བསྐུར། རྗེས་གནང་འདོད་པ་རྣམས་ལ་རྗེས་གནང་། ལུང་འདོད་པ་རྣམས་ལ་ལུང་ལ་སོགས་པ་ཐམས་ཅད་དཔལ་ལྡན་ས་སྐྱ་པའི་ཆོས་ལུགས་གཙོ་བོར་གྱུར་ཅིང་། གཞན་ཡང་རྒྱུད་པ་རྣམ་པར་དག་པ་ཇོ་བོ་རྗེ་ནས་བརྒྱུད་པའི་བཀའ་གདམས་པའི་ཆོས་སྐོར། རྗེ་བཙུན་མར་པ་ནས་བརྒྱུད་པ་དྭགས་པོ་བཀའ་བརྒྱུད་པའི་ཆོས་སྐོར། ཁྱུང་པོ་རྣལ་འབྱོར་ནས་བརྒྱུད་པ་ཤངས་པའི་ཆོས་སྐོར། ཕ་དམ་པ་ནས་བརྒྱུད་པ་ཞི་བྱེད་ཀྱི་ཆོས་སྐོར་ལ་སོགས་པ་ཆོས་འདོད་པ་རྣམས་ལ་ཆོས་འབྱུང་ཞིང་། རྒྱ་མཚོ་ཆེན་པོ་ལ་ཆུ་ཕྲན་ཐམས་ཅད་ངང་གིས་འདུ་བ་བཞིན་དུ་སྡེ་སྣོད་འཛིན་པ་ཐམས་ཅད་དང་། ཕྱོགས་རིགས་ཀྱི་མི་ཆེན་ཐམས་ཅད་དང་། དད་པ་དང་ལྡན་པ་དང་། འབྱོར་པ་དང་ལྡན་པ་དང་། བློ་གྲོས་དང་ལྡན་པ་ཕྱོགས་མཐའ་དག་ནས་འདུ་བས་འཇིག་རྟེན་གྱི་ཟས་ནོར་གསེར་དངུལ་ལ་སོགས་པའི་རིན་པོ་ཆེ་དང་། ཇ་གོས་དར་རྟ་ཕྱུགས་ལ་སོགས་པ་ཐམས་ཅད། དཔག་བསམ་གྱི་ཤིང་ལས་འདོད་དགུ་ཐམས་ཅད་འབྱུང་བའམ། གཏེར་ཆེན་པོའི་བུམ་པ་ལས་འདོད་དགུ་ཐམས་ཅད་འབྱུང་བའམ། ཡིད་བཞིན་གྱི་ནོར་བུ་རིན་པོ་ཆེ་ལས་ཅི་འདོད་པ་ཐམས་ཅད་འབྱུང་བ་བཞིན་ནོ། །

ཞེས་པ་འདི་ནི་རྗེ་དེ་ཉིད་ཀྱི་ཞབས་རྡུལ་སྤྱི་བོས་བླངས་པ། ས་སྐྱའི་དགེ་སློང་ནམ་མཁའ་དཔལ་བཟང་གིས་དགེ་བཤེས་ལེགས་པའི་བློ་གྲོས་ཀྱིས་བསྐུལ་བ་དང་རྗེ་ཉིད་ལ་མི་ཕྱེད་པའི་དད་པ་དང་ལྡན་ཞིང་། གྲྭ་པ་འདི་ལ་ཐུགས་ཞེན་ཆེ་བ་རྣམས་ལ་ཕན་པའི་ལྷག་བསམ་རྣམ་པར་དག་པས་སྒྲོ་བཀུར་མེད་པར་བྲིས་པའོ། །

དུས་གསུམ་རྒྱལ་བ་ཀུན་གྱི་མཁྱེན་བརྩེའི་གཏེར། ། དཔལ་ལྡན་བླ་མ་རྗེ་བཙུན་ཐུགས་རྗེ་ཅན། ། དེང་ནས་སངས་རྒྱས་གོ་འཕང་མ་ཐོབ་བར། ། བདག་ལ་ཐུགས་རྗེ་ཆེན་པོས་བསྐྱབ་ཏུ་གསོལ། །

གང་གི་ཐུགས་རྗེ་ཉི་མའི་འོད་ཟེར་གྱིས། ། ཆོས་གྲྭ་ཆེན་པོ་དཔལ་ལྡན་ནཱ་ལེནྡྲའི། ། དམ་ཆོས་པད་ཚལ་རྒྱས་པར་མཛད་པ་དང་། ། གང་ཐུགས་ཡིད་བཞིན་ནོར་བུ་ཆེན་པོ་ཡིས། །

གདུལ་བྱའི་རེ་འདོད་སྐོང་བར་མཛད་དུ་གསོལ། ། དཔལ་ལྡན་བླ་མའི་རྣམ་ཐར་པདྨོའི་ཚལ། ། བློ་གྲོས་ཉིན་མོའི་ཟེར་གྱིས་མཛེས་བྱས་པས། ། མི་ཟད་པར་དུ་སྒྲུབ་པའི་བརྐོས་བྱེད་ནི། །

སློབ་དཔོན་འཇམ་དཔལ་སེང་གེའི་ཤེས་བྱ་ལགས། ། ཡི་གེ་པ་ནི་བློ་གསལ་བཟོ་རིག་མཁན། ། དཔོན་ཡིག་སྲི་བསམ་ཞེས་བྱ་དད་པས་བསྒྲུབས། ། པར་ཤིང་འཇམ་གཉེན་ལེགས་པའི་དཔེ་ལོ་འདི། །

བཤེས་གཉེན་དགེ་བའི་བཤེས་དེའི་འབད་པས་སོང་། ། སྐྱོན་བྲལ་ཞུས་དག་སྒྱུ་མའི་ཟློས་གར་འདི། ། ས་སྐྱའི་དགེ་སློང་ཡེ་གྲུབ་བདག་གིས་བགྱིས། ། དེ་ལྟར་སྒྲུབ་པའི་རྒྱུ་སྦྱོར་སྦྱིན་བདག་ནི། །

མཁས་གྲུབ་འགྲོ་བའི་བླ་མ་ནམ་མཁའི་མཚན། ། ཡོངས་འཛིན་གང་དེའི་དྲི་མེད་བཀས་བསྐུལ་ནས། ། དད་ལྡན་རྣམས་ཀྱིས་གུས་པའི་བློ་ཡིས་བསྒྲུབས། ། འདི་བགྱིས་ལས་འབྱུང་རྣམ་མང་དགེ་བའི་ཚོགས། །

རབ་དཀར་སྟོན་ཀའི་ཟླ་ཟེར་ལྟ་བུ་དེ། ། མཐའ་ཡས་འགྲོ་བ་ཀུན་ཀྱང་དུས་ཀུན་ཏུ། ། བཤེས་གཉེན་དམ་པས་འཛིན་པའི་རྒྱུར་བསྔོ་འོ། །

གསུང་རབ་རྒྱ་མཚོའི་ཕ་རོལ་མཐར་སོན་ཅིང་། །

ཞེས་སོགས་ཆོས་སྤྱོད་ནང་ལྟར་སྨོན་ལམ་འདོན་ནོ།། །།