Mi pham rnam rgyal gyis rtsod pa'i yang lan log lta'i khong khrag 'don pa'i skyug sman Tsadra version

༄༅། །མི་ཕམ་རྣམ་རྒྱལ་གྱིས་རྩོད་པའི་ཡང་ལན་ལོག་ལྟའི་ཁོང་ཁྲག་འདོན་པའི་སྐྱུག་སྨན་ཞེས་བྱ་བ་བཞུགས་སོ།།

ན་མོ་གུ་རུ་མཉཛུ་གྷོ་ཥཱ་ཡ།

རྒྱལ་བའི་མདོ་རྒྱུད་ཆོས་ཚུལ་མ་ལུས་པའི།།
གསང་མཛོད་སྒོ་བརྒྱའི་ལྡེའུ་མིག་འཛིན་ལ།།
རྒྱལ་སྲས་ཀུན་གྱི་དབུས་ན་རྒྱལ་མཚན་གྱི།།

རྩེ་མོའི་ཏོག་ལྟར་མངོན་པར་མཐོ་བ་ཡི།།

འཇམ་མགོན་མི་ཡི་གར་བསྒྱུར་བློ་བཟང་གྲགས།།

མགོན་ཁྱོད་མཁྱེན་པའི་ལུས་ཀྱི་རྩལ་རྫོགས་ཤིང་།།
བརྩེ་བའི་གཡུ་རལ་སིང་སིང་སྤྲུགས་བཞིན་དུ།།

འཆད་རྩོད་རྩོམ་པའི་གད་རྒྱངས་མཐོན་པོ་ཡིས།།

སྨྲ་ངན་གཉིས་འཐུང་སྤོབས་པ་གཞོམས་པ་དང་།།

ལྷན་ཅིག་མཁས་གྲུབ་ཡོངས་ཀྱི་རལ་པའི་རྩེར།།
རྣམ་དཔྱོད་སྡེར་མོའི་ཕྲེང་བ་ཉེར་བཀོད་པའི།།

ངོ་མཚར་དྲན་གྱིན་ལག་པད་སྙིང་ཁར་ཟླུམ།།

དེང་སང་འདི་ན་གཞུང་ལུགས་ཕལ་མོ་ཆེ།།

མཁས་རློམ་འགའ་རེས་འཁྱོགས་བཤད་ཚིག་ཕྲེང་གིས།།
བླུན་རྨོངས་མགོ་བསྐོར་བྱས་པ་མང་མཐོང་བའི།།

ཚུལ་དེར་ཡང་དག་ལམ་ལས་ཕྱིར་ཕྱོགས་པའི།།

ལོག་ལྟའི་ཁོང་ཁྲག་འདོན་པའི་སྐྱུགས་སྨན་ཞིག།།

སྙིང་ནས་བརྩེ་བས་བསྐུལ་ཏེ་རྩོམ་པ་ལ།།
ཕྱོགས་འཛིན་གདོན་གྱིས་ཡིད་ནི་མ་དཀྲུགས་པར།།

གཟུ་བོའི་བློ་ཡིས་ལུང་རིགས་རོ་འདི་མྱོང་།།

དེ་ལ་འདིར་སྡེ་དགེ་བ་མི་ཕམ་རྣམ་རྒྱལ་གྱིས་སྤྱོད་འཇུག་ཤེར་ལེའི་འགྲེལ་པ་ནོར་བུ་ཀེ་ཏ་ཀ་ཞེས་བྱ་བ་ཞིག་རྩོམ་འདུག་པ་དེ་ལ་གཞུང་ལུགས་དྲི་མ་མེད་པ་རྣམས་ཀྱི་དགོངས་པ་དང་ལྟག་སྤྲོད་དུ་གྱུར་པའི་བཤད་པ་མང་ཙམ་ཡོད་པར་མཐོང་ནས་དེ་དག་ལ་ཁོ་བོས་ལུང་རིགས་ཉུང་ངུས་ཟུར་ཟ་འགའ་རེ་དང་བཅས་པའི་ཟབ་མོ་དབུ་མའི་གནད་ཅུང་ཟད་བརྗོད་པ་བློ་གསལ་དགའ་བའི་གཏམ་ཞེས་བྱ་བ་ཞིག་རྩོམ་ཡོད་པ་དེ་ཁོའི་ལག་ཏུ་འབྱོར་ནས་སླར་ཡང་ཁོ་བོ་ལ་བརྒལ་ལན་ཉིན་བྱེད་སྣང་བ་ཞེས་བྱ་བ་རང་གཞན་གྱི་རྩོད་པའི་གོ་སྐབས་མ་ཕྱེད་པའི་ཚིག་གི་ཕྲེང་བ་ཉག་ཉོག་མང་ཙམ་ཞིག་འབྱོར་བྱུང་བ་དེ་ལ་ཡང་ཡང་བལྟས་ཀྱིན་ཕན་ཚུན་རྩོད་བྱེད་ཀྱི་ལུང་དང་རིགས་པའི་འཕྱལ་མཚམས་ཅི་ཡང་མ་ཕྱེད་པར་རང་གར་སྣ་ཟིན་སྤུ་ཟིན་ཅི་དྲན་གྱི་བཤད་པ་ཙམ་ལས་དོན་གྱི་སྙིང་པོ་མེད་པར་མཐོང་ནས་སླར་བརྒལ་ལན་རྩོམ་པའི་འདུན་པ་ཡང་མ་བྱས་ཤིང་། ཁོ་བོས་སྔར་གྱི་བརྒལ་བའི་ཡི་གེ་སྔོན་མ་དང་། ཡང་དེའི་བར་སྐབས་སུ་དེ་དང་ཕྱོགས་མཐུན་པ་སྔར་རང་གི་བརྒལ་ལན་ལས་ལུང་རིགས་ཀྱི་སྙིང་པོའི་གནད་ཟུར་དུ་ཕྱུང་བ་ཟབ་མོའི་གཏམ་ཞེས་བྱ་བ་ཞིག་རྩོམ་ཡོད་པ་དེ་དག་སྔ་ཕྱི་གཉིས་ཀའི་ལུང་རིགས་ཀྱི་གནད་ལ་ལན་ཕྱོགས་མཐུན་པ་ཙམ་ཡང་མ་བྱུང་འདུག་པ་དང་། བློ་གཟུ་བོར་གནས་ཤིང་རྣམ་དཔྱོད་དང་ལྡན་པ་ཞིག་གིས་དཔྱད་ན་ཁོ་བོའི་བརྒལ་ལན་སྔ་ཕྱི་གཉིས་པོ་དེས་ལན་གྱི་སྒོ་མཐའ་དག་བསྟན་འདུག་པའི་ཕྱིར་སླར་ཡང་བརྒལ་ལན་བརྩམ་པའི་འབད་པ་ཡང་མ་བྱས་སོ།།

      

འོན་ཀྱང་དོན་གཉེར་ཅན་གྱི་ལུང་རིགས་སྨྲ་བ་འགའ་རེས་སྐྱེ་བོ་བློ་གྲོས་ཀྱི་མཐུ་མེད་པ་རྣམས་ལ་ལུང་རིགས་ཀྱི་སྒོ་ཙམ་སྟོན་པའི་བརྒལ་ལན་རེ་ཅིས་ཀྱང་གྱིས་དང་། དེ་དག་ལམ་ཡང་དག་པ་ལས་ཕྱིར་ཕྱོགས་པའི་ལོག་རྟོག་ཟློག་པ་དང་། དེང་སང་བསྟན་པ་ཉམས་དམས་པའི་སྐབས་འདིར་གཞུང་ཟབ་མོ་ལ་བརྒལ་བརྟགས་ཀྱི་སྲོལ་སྤེལ་བའི་རྟེན་འབྲེལ་དུའང་འགྱུར་བ་འདུག་ཅེས་བསྐུལ་མ་ཡང་ཡང་བྱུང་བ་ལ་བརྟེན་ནས་སླར་ཡང་བརྒལ་ལན་ཚིག་ཚོགས་དགོས་མེད་ཀྱི་སྤྲོས་པ་བསྐྱུངས་ཤིང་ལུང་རིགས་ཁུང་ཐུབ་ཀྱི་རོ་དང་ལྡན་པ་ཞིག་རྩོམ་པར་བྱའོ།།

༼༡ དགག་བྱ་ངོས་འཛིན་ལ་བརྒལ་བའི་ལན་བརྗོད་པ།༽

དེས་ན་འདི་ལ་གསུམ། དགག་བྱ་ངོས་འཛིན་ལ་བརྒལ་བའི་ལན་བརྗོད་པ། སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པ། བདེན་གཉིས་འདོད་ཚུལ་ལ་བརྒལ་བའི་ལན་བརྗོད་པའོ།། དང་པོ་ནི།

ཁོ་བོའི་དབུ་མའི་གནད་ཅུང་ཟད་བརྗོད་པ་བློ་གསལ་དགའ་བའི་གཏམ་དུ་ཐོ་མར་དགག་བྱ་ངོས་འཛིན་བཤད་པའི་སྐབས་ཀྱི་དོན་ལ་ཁོང་གིས་སྐྱོན་བརྗོད་པ་༼མི་ཕམ་གྱིས་༽ཆོས་ཐམས་ཅད་རྟོག་པས་བཏགས་པ་ཙམ་དུ་འདོད་པ་ནི་ཐལ་རང་གི་མཁས་པ་ཀུན་གྱི་བཞེད་པ་ཐུན་མོང་བ་ཡིན་གྱི། ཐལ་འགྱུར་ཐུན་མོང་མ་ཡིན་པའི་ལུགས་སུ་འདོད་པ་ནི་ཆེས་ནོར་བ་སྟེ། འདི་ལྟར་དོན་དམ་དཔྱོད་བྱེད་ཀྱི་རིགས་པས་དཔྱད་ན་ཆོས་གང་ཡང་དཔྱད་བཟོད་དུ་མི་གྲུབ་ལ། དེའི་ཕྱིར་རྟོག་པས་བཏགས་པ་ཙམ་ཞིག་ཏུ་གྲུབ་པར་འགྱུར་པའི་ཕྱིར་རོ།། ཞེས་སོགས་རིགས་པ་ཉམས་ཆུང་བ་འགའ་རེས་རྒོལ་བ་ལ་ལན་འདི་སྐད་ཅེས་བརྗོད་པར་བྱ་སྟེ། ཁྱོད་ཀྱིས་ཆོས་ཐམས་ཅད་རྟོག་པས་བཏགས་ཙམ་དུ་འདོད་པ་ཐལ་རང་གི་བཞེད་པ་ཐུན་མོང་བ་ཡིན་ཞེས་པའི་རྟོག་པ་འདི་ཡུལ་གྱི་སྡོད་ལུགས་ལ་མ་འཁྲུལ་པའི་བློ་ཞིག་ལ་ཟེར་རམ། འཁྲུལ་བའི་བློ་ཞིག་ལ་ཟེར། དང་པོ་ལྟར་ན་ཆོས་ཐམས་ཅད་རྟོག་པས་ཕར་བཏགས་པ་ཙམ་གྱིས་མ་ཆོག་པར་ཡུལ་རང་གི་སྡོད་ལུགས་ཀྱི་ངོས་ནས་གྲུབ་པ་ཞིག་ཡིན་དགོས་པས་དེ་ཐལ་འགྱུར་བ་ལ་མི་འཐད་པའི་ཕྱིར་ཏེ། ཐལ་འགྱུར་བས་ཡུལ་རང་མཚན་གྱིས་གྲུབ་པ་ཐ་སྙད་དུའང་ཞལ་གྱིས་མི་བཞེས་པའི་ཕྱིར།

      

དེ་སླར་ཡང་གསལ་བར་བཤད་ན། དཔེར་ན་གཞི་བུམ་པ་ལྟ་བུ་དེ་རྟོག་པས་བཏགས་པ་ཙམ་ཡིན་ཞེས་པའི་རྟོག་པ་དེ་མ་འཁྲུལ་བའི་བློ་ཞིག་ལ་བྱེད་ན། བུམ་པ་དེ་རང་འདོགས་བྱེད་ཀྱི་རྟོག་པ་དེ་ལ་སྣང་བ་ལྟར་དུ་གྲུབ་དགོས། དེ་མ་གྲུབ་ན་བློ་དེ་འཁྲུལ་བར་ཐལ་བའི་སྐྱོན་ཡོད། དེ་གྲུབ་ན་བུམ་པ་དེ་ཕར་རྟོག་པས་བཏགས་པ་ཙམ་གྱིས་མ་ཆོག་པར་བུམ་པ་རང་གི་སྡོད་ལུགས་སམ་རང་གི་ངོ་བོས་ཀྱང་གྲུབ་པ་ཞིག་ཡིན་དགོས་པར་འདུག་པ་དེའི་ཕྱིར་བུམ་པ་རང་མཚན་གྱིས་གྲུབ་པར་སོང་ལ། འདི་ཐལ་འགྱུར་བས་ཐ་སྙད་དུའང་ཞལ་གྱིས་མི་བཞེས་པའི་ཕྱིར་ད་དུང་སྤྲོས་པས་ཀྱང་ཆོག་གོ།

      

འདི་ལ་ཁྱོད་ཀྱིས་དོགས་པ་རང་བསུ་བྱས་ནས། ༼མི་ཕམ་གྱིས་༽དེ་མ་ཡིན་ཏེ་རང་རྒྱུད་པའི་ལུགས་ལ་ཡུལ་རང་བཞིན་གྱིས་གྲུབ་པར་ཁས་ལེན་ལ། ཐལ་འགྱུར་བས་ཐ་སྙད་དུ་ཡང་རང་མཚན་གྱིས་གྲུབ་པ་ཞལ་གྱིས་མི་བཞེས་པའི་ཁྱད་པར་འདི་ཡོངས་སུ་གྲགས་པའི་ཕྱིར་རོ་སྙམ་ན་དེ་ལྟར་ཡིན་མོད་ཀྱི་ཞེས་སྨྲས་ནས། ཐལ་འགྱུར་བས་རྣམ་གྲངས་མ་ཡིན་པའི་དོན་དམ་རྩལ་དུ་བཏོན་ནས་འཆད་པའི་གནད་ཀྱིས་རང་མཚན་མི་བཞེད་པ་མཉམ་བཞག་གི་སྤྱོད་ཡུལ་དང་མཐུན་པ་གཏན་ལ་ཕབས་པ་ཡིན་ཞེས་པ་སོགས་དངོས་བཏགས་མ་ཕྱེད་པའི་གཏམ་མང་ཙམ་སྨྲས་ནས་དོན་དུ་རིགས་པས་གནོད་བྱེད་ཀྱི་ལན་འདི་ཡིན་ཞེས་བསྟན་རྒྱུ་ཅི་ཡང་མེད་པ་རྨོངས་པ་མགོ་བསྐོར་བའི་གཏམ་མང་དུ་འཆིས་ཀྱང་། མདོར་དྲིལ་ན་རང་རེ་གཉིས་ཐལ་འགྱུར་བས་ཐ་སྙད་དུའང་རང་མཚན་བཞེད་པ་དང་མི་བཞེད་པའི་རྩོད་པ་འདི་ལ་ཐུག་འདུག་ཕྱིར། ཁྱོད་ཀྱིས་གོང་དུ་དེ་ལྟར་ཡིན་མོད་ཀྱི་ཞེས་ཐལ་འགྱུར་བའི་རང་མཚན་ཐ་སྙད་དུ་ཡང་ཞལ་གྱིས་མི་བཞེས་པ་ཡིན་པར་བཤད་ན་ཁྱོད་ཀྱིས་ཆོས་ཐམས་ཅད་རྟོག་པས་བཏགས་ཙམ་ཡིན་ཞེས་པའི་རྟོག་པ་དེ་མ་འཁྲུལ་བའི་ཤེས་པ་ལ་བྱེད་པའི་དམ་བཅའ་བུད། སྒྲུབ་བྱེད་གོང་དུ་སོང།

      

ཡང་ཁྱོད་ཀྱིས་དེ་ལྟར་ཡིན་མོད་ཀྱི་ཞེས་ཐལ་འགྱུར་བས་རང་མཚན་ཐ་སྙད་དུའང་མི་བཞེད་པ་དེ་གཞིར་བཞག་ནས་སྒྲུབ་བྱེད་ཟུར་པ་ཞིག་སྟོན་ན་དེ་ལ་ཐལ་འགྱུར་བས་ཐ་སྙད་དུའང་རང་མཚན་མི་བཞེད་པའི་སྒྲུབ་བྱེད་གཅིག་སྟོན་ནམ་མ་བཞེད་པའི་སྒྲུབ་བྱེད་ཅིག་སྟོན། དང་པོ་ལྟར་ན་དེ་ལྟར་ཡིན་མོད་ཀྱི་ཞེས་ཚིག་གི་རྗེས་འཇོག་བྱས་པ་དང་། འོག་ནས་ཐལ་འགྱུར་བས་དེ་ལྟར་མི་བཞེད་པའི་སྒྲུབ་བྱེད་སྟོན་པ་རྣམས་ཉམས་པར་འགྱུར་ལ། ཕྱི་མ་ལྟར་ན་དེ་ལྟར་ཡིན་མོད་ཀྱི་ཞེས་ཡིན་པར་གཞིར་བཅས་འདུག་པའི་དམ་བཅའ་དེ་རང་གིས་བཤིག་ནས་རང་གིས་རང་ངོ་ཚ་བའི་གནས་ལ་བཀོད་པར་ཟད་དོ།།

      

ད་གོང་གི་རྩ་བའི་དྲི་བ་གཉིས་པ་༼མི་ཕམ་གྱིས་༽ཆོས་ཐམས་ཅད་རྟོག་བཏགས་ཙམ་དུ་འདོད་པ་ཐལ་རང་གི་མཁས་པ་ཀུན་གྱི་བཞེད་པ་ཐུན་མོང་བ་ཡིན་ཞེས་པའི་རྟོག་པ་དེ་འཁྲུལ་བའི་བློ་ཞིག་ལ་བྱེད་ན་རྟོག་པ་དེ་ལ་ཆོས་དེ་སྣང་བ་ལྟར་དུ་མ་གྲུབ་དགོས། དེ་མ་གྲུབ་ན་ཆོས་དེ་ཡུལ་རང་ངོས་ནས་མ་གྲུབ་པ་རྟོག་པས་ཕར་བཏགས་ཙམ་དུ་འགྱུར་བ་སྟེ་དེ་ཁྱོད་ཀྱིས་དུག་དང་འདྲེས་པའི་ཟན་ལྟར་མི་བཞེད་པར་ཤེས་པའི་སྒྲུབ་བྱེད་དམིགས་ཕུག་ནས་སྟོན་པར་འགྱུར་རོ།།

      

ད་རང་རེ་གཉིས་གོང་དུ་སྨྲོས་པ་ལྟར་ཐལ་འགྱུར་བའི་རང་མཚན་ཐ་སྙད་དུ་བཞེད་མི་བཞེད་འདི་རྩོད་པ་མཐར་ཐུག་པ་བྱ་བ་དེའི་གནད་ཀྱིས་རྟོག་པས་བཏགས་ཙམ་གྱིས་བཞེད་ལུགས་རྣམས་ཤུགས་ཀྱིས་གསལ་བར་འགྱུར་བས་དེ་ལ་ཁྱོད་ཀྱིས་དངོས་བཏགས་མ་ཕྱེད་པའི་གཏམ་མང་དུ་འཆིས་པའི་ནང་ནས་༼མི་ཕམ་གྱིས་༽གལ་ཏེ་འདི་སྙམ་དུ་རང་མཚན་གྱིས་གྲུབ་པའམ་རང་གི་ངོ་བོས་གྲུབ་པ་འདི་ནི་རྟོག་པས་ཕར་བཏགས་ཙམ་མ་ཡིན་པར་རང་གི་ངོ་བོས་གྲུབ་པ་ལ་བརྗོད་ཅིང་། དེ་ལྟར་ན་མཐའ་གཅིག་ཏུ་བདེན་གྲུབ་ཏུ་འགྱུར་སྙམ་ན། དོན་དམ་དཔྱོད་པས་དཔྱད་པའི་ཚེ་ཡུལ་རང་ངོས་ནས་གྲུབ་པ་རྡུལ་ཙམ་རྙེད་ནའང་དེ་བདེན་གྲུབ་ཏུ་འགྱུར་མོད། དོན་དམ་དཔྱོད་པའི་ངོར་རང་ངོས་ནས་གྲུབ་པ་ནི་རང་རྒྱུད་པས་ཀྱང་ཁས་མི་ལེན། ལེན་ན་དབུ་མ་པ་མི་རུང་ཞིང་ཐར་པའི་ལམ་ཡང་དེ་ལ་མེད་པར་འགྱུར་རོ།།

      

ཐ་སྙད་དཔྱོད་པའི་ངོར་ཡུལ་རང་གི་ངོ་བོས་གྲུབ་པར་སྣང་ཡང་དེའི་ཡུལ་དེ་བདེན་གྲུབ་ཏུ་ག་ལ་འགྱུར། ཐ་སྙད་ཚད་མས་གྲུབ་པ་འཐད་དགོས་ལ་དེ་ཐ་སྙད་དཔྱོད་བྱེད་ཀྱི་ངོར་ཡང་མ་གྲུབ་ན་གང་དུའང་གྲུབ་པར་མི་འགྱུར་རོ།། ཞེས་པ་འདི་ཙམ་ཕྱོགས་སྔར་བཀོད་ན་གོ་བར་འགྱུར་བས་དེ་ཡང་གནད་དྲིལ་ན་ཐལ་འགྱུར་བས་རང་མཚན་མི་བཞེད་ཅེས་པ་དེ་དོན་དམ་པར་རང་མཚན་མི་བཞེད་པ་ལ་བྱེད་པ་ཡིན་གྱི་ཐ་སྙད་དུའང་རང་མཚན་མི་བཞེད་པ་མ་ཡིན་ཏེ། ཆོས་དེ་ཐ་སྙད་དུའང་རང་མཚན་གྱིས་མ་གྲུབ་ན་གཏན་མེད་དུ་འགྱུར་རོ་ཞེས་སྨྲ་བ་འདི་འདུག་པ་དེས་ན་ཁྱོད་ལ་འདི་སྐད་ཅེས་བྱ་བ་སྟེ། རང་མཚན་ཞལ་གྱིས་བཞེས་མ་བཞེས་ལ་ཐལ་རང་གཉིས་བཞེད་པ་མཐུན་མི་མཐུན་ཅུང་ཟད་ཀྱང་མེད་པར་ཐལ། རང་རྒྱུད་པས་རང་མཚན་ཐ་སྙད་དུ་ཡོད་ཀྱང་དོན་དམ་པར་མེད་ཟེར་བ་བཞིན་དུ་ཐལ་གྱུར་བས་ཀྱང་དེ་སྐད་སྨྲ་ན་རང་མཚན་ཐ་སྙད་དུ་ཡོད་མཉམ་དོན་དམ་དུ་མེད་མཉམ་དུ་སོང་འདུག་པས་ཁྱད་པར་ཅི་ཡང་སྟོན་རྒྱུ་མ་བྱུང་འདུག་པའི་ཕྱིར། དེས་ན་ཐལ་རང་གཉིས་རང་མཚན་ཞལ་གྱིས་བཞེས་མི་བཞེས་འདིའི་སྒོ་ནས་གྲུབ་མཐའི་ཁྱད་པར་མི་འཇོག་ན་གྲུབ་མཐའི་ཁྱད་པར་གང་གི་སྒོ་ནས་ཀྱང་འཇོག་ས་མེད་དེ་གལ་ཏེ་ཡོད་སྨྲ་བ་གྱིས་དང་ཁོ་བོས་ཀྱང་རིགས་པའི་དཔའ་མི་ཞུམ་པར་བྱའོ།།

      

གལ་ཏེ་ཁྱད་པར་འདིའི་སྒོ་ནས་འཇོག་ཀྱང་ཐལ་འགྱུར་བས་རང་མཚན་ཐ་སྙད་དུའང་མི་བཞེད་ཅེས་པ་དེ་དོན་དམ་དཔྱད་པ་གཞིར་བཞག་གི་དབང་དུ་བྱས་པ་ལས་དོན་ལ་རང་མཚན་ཐ་སྙད་དུ་བཞེད་དགོས་པ་ཡིན་ཞེས་མ་སྨྲས་སམ་སྙམ་ན། དེས་ན་ཐལ་འགྱུར་བས་རང་མཚན་ཞལ་གྱིས་མི་བཞེས་པ་དེ་ཚིག་ཙམ་དུ་ཟད་པས་ཐལ་འགྱུར་བ་རང་གི་ཞེ་ཕུགས་ནས་རང་མཚན་ཐ་སྙད་དུ་ཡོད་པ་འདོད་བཞིན་དུ་ཁ་སྒོར་རང་མཚན་མི་བཞེད་ཅེས་ཟེར་བ་ལས་བཞེད་ཅེས་ཟེར་མི་ཆོག་པ་འདི་ཐལ་འགྱུར་པ་ལ་སྨྲ་བ་རང་དབང་མེད་པའི་བཀའ་བཀྱོན་པ་ཞིག་ཕོག་འདུག་པས་དེ་དཔོན་པོ་སུ་ཞིག་གིས་བྱས་པ་དང་། རང་རྒྱུད་པས་རང་མཚན་ཐ་སྙད་དུ་བཞེད་པ་ཡིན་ཞེས་ཞེ་ནས་འདོད་ལ་ཞལ་ནས་ཀྱང་སྨྲས་ཆོག་པ་འདིའི་ཐོབ་ཐང་དེད་དཔོན་སུས་སྤྲོད་པ་ཡང་ཁྱོད་ཀྱིས་སྨྲོས་ཤིག།

      

ཁྱོད་ཀྱིས་རྣམམ་གྲངས་པའི་དོན་དམ་དང་རྣམ་གྲངས་མ་ཡིན་དོན་དམ་ཞེས་མང་དུ་བཤད་པ་རྣམས་ཀྱང་མདོར་བསྡུ་ན་ཐལ་འགྱུར་བས་རྣམ་གྲངས་མ་ཡིན་པའི་དོན་དམ་རྩལ་དུ་བཏོན་ནས་འཆད་པའི་དབང་དུ་བྱས་ནས་རང་མཚན་ཐ་སྙད་དུ་ཡང་མི་བཞེད་ཅེས་སྨྲས་པ་ལས་དོན་ལ་རང་མཚན་མ་བཞེད་ན་ཆོས་དེ་གཏན་མེད་དུ་ཐལ་བའི་སྐྱོན་ཡོད་ཅེས་སྨྲ་བ་འདི་ཙམ་དུ་ཟད་པས་དེ་ཡང་ད་ལྟར་རིགས་པ་ཡང་དག་གིས་བཞད་གད་བྱས་ཟིན་པ་དེས་བཅོམ་པར་བྱས་སོ།།

      

གཞན་ཡང་ཁྱེད་ཀྱི་ཐལ་འགྱུར་བའི་ལུགས་ལའང་ཐ་སྙད་དུ་རང་མཚན་ཞལ་གྱིས་བཞེས་པ་ཡིན་ཟེར་ན། ཐལ་འགྱུར་བ་ཆོས་ཅན། ཁྱོད་ཀྱིས་ཆོས་ཐམས་ཅད་རྟེན་འབྲེལ་ཡིན་པ་ཁས་མི་ལེན་པར་ཐལ། ཆོས་ཐམས་ཅད་རང་ངོས་ནས་གྲུབ་པ་ཁལ་ལེན་པའི་ཕྱིར། ཁྱབ་པ་ཡོད་དེ་རང་ངོས་ནས་གྲུབ་པ་ཁས་ལེན་ན་རྟེན་འབྲེལ་ཁས་ལེན་པའི་གནས་མེད་པའི་ཕྱིར་ཏེ། རང་ངོས་ནས་གྲུབ་ན་རང་དབང་དུ་གྲུབ་དགོས། རང་དབང་དུ་གྲུབ་ན་རྒྱུ་རྐྱེན་ལ་མ་ལྟོས་པར་གྲུབ་དགོས་པའི་ཕྱིར། དེ་ལྟར་ཡང་འཕགས་པ་ལྷས།

འདི་ཀུན་རང་དབང་མེད་པ་སྟེ།།
དེས་ན་བདག་ནི་ཡོད་མ་ཡིན།།

ཞེས་དང་།

      

དེའི་འགྲེལ་པ་ལས་ཀྱང་། འདི་ན་གང་རང་གི་ངོ་བོ་དང་རང་བཞིན་དང་རང་དབང་དང་གཞན་ལ་རག་མ་ལས་པ་ཉིད་ཡིན་དེ་ལ་ནི། ཞེས་རང་མཚན་གྱིས་གྲུབ་པའམ་རང་གི་ངོ་བོས་གྲུབ་པ་དང་རང་བཞིན་དང་རང་དབང་དང་གཞན་ལ་རག་མ་ལས་པ་སོགས་མིང་གི་རྣམ་གྲངས་སུ་གསལ་བར་གསུངས་པ་དེའི་ཕྱིར། གཞན་ཡང་ལས་བཟང་ངན་གཉིས་བསགས་པ་ལ་བརྟེན་ནས་འབྲས་བུ་བདེ་སྡུག་སོ་སོར་འབྱུང་བ་མེད་པར་ཐལ། ལས་བཟང་ངན་གཉིས་ཀ་རང་དབང་ཅན་ཡིན་པའི་ཕྱིར་ཏེ། དེ་རང་ངོས་ནས་གྲུབ་པའི་ཕྱིར། རྟགས་ལུང་དྲངས་མ་ཐག་པ་དེས་གྲུབ། ཁྱབ་པ་ཡོད་པར་ཐལ། ལས་བཟང་ངན་དེ་རང་དབང་ཅན་ཡིན་དེ་སྐྱེ་འཇིག་ཅན་མ་ཡིན་དགོས། དེ་མ་ཡིན་ན་རྒྱུ་ལས་བཟང་ངན་གཉིས་འགག་ནས་འབྲས་བུ་བདེ་སྡུག་སོ་སོར་གྲུབ་པ་མི་འཐད་པའི་ཕྱིར་ཏེ། ལས་རང་བཞིན་གྱིས་གྲུབ་པ་ལ་རྒྱུ་རྐྱེན་གྱིས་གསོས་བཏབ་ནས་འབྲས་བུའི་ངོ་བོར་འགྱུར་བ་སོགས་བཅོས་སུ་མི་རུང་བའི་ཕྱིར་ཏེ། དེ་རང་ངོས་ནས་གྲུབ་པའི་ཕྱིར། ཁྱབ་སྟེ། རྩ་ཤེས་ལས།

རང་བཞིན་དག་ནི་བཅོས་མིན་དང་།།
གཞན་ལ་ལྟོས་པ་འཐད་མ་ཡིན།།

ཞེས་རང་བཞིན་གྱིས་གྲུབ་པ་རྒྱུ་རྐྱེན་ལ་ལྟོས་པ་དང་། རྒྱུ་དང་རྐྱེན་གྱིས་རྣམ་པར་ངོ་བོ་གཞན་དུ་བཅོས་སུ་མེད་པར་གསུངས་པའི་ཕྱིར། གཞན་ཡང་ཚིག་གསལ་ལས། རང་བཞིན་དང་བཅས་པ་ཁོ་ན་ལ་བྱ་བ་མ་མཐོང་བའི་ཕྱིར། རང་བཞིན་མེད་པ་རྣམས་ཁོ་ན་ལ་བྱ་བ་མཐོང་བའི་ཕྱིར། ཞེས་རང་བཞིན་གྱིས་གྲུབ་པ་ལ་འབྲས་བུ་བསྐྱེད་པ་སོགས་ཀྱི་བྱ་བྱེད་ཅི་ཡང་མི་འཐད་པ་གསུངས་པའི་ཕྱིར། ད་ཕྱིན་ཆད་ཁྱོད་ཀྱི་རྗེས་འཇུག་རྣམས་ལ་ལས་བཟང་ངན་ཅི་ཙམ་བསགས་ཀྱང་འབྲས་བུ་བདེ་སྡུག་འབྱུང་བ་མེད་དོ་ཞེས་འདོམས་པར་གྱིས་ཤིག།

      

གཞན་ཡང་འཕགས་རྒྱུད་ཀྱི་བདག་མེད་རྟོགས་པའི་ཡེ་ཤེས་དེ་ལོག་ཤེས་ཡིན་པར་ཐལ། དེ་རང་ཡུལ་བདག་ཡོད་བཞིན་དུ་མེད་པར་རྟོགས་པའི་བློ་ཡིན་པའི་ཕྱིར། མ་གྲུབ་ན། བདག་ཡོད་པ་འདོད་དགོས་ཏེ། རང་ངོས་ནས་གྲུབ་པ་འདོད་པའི་ཕྱིར། ཁྱབ་པར་ཐལ། འཕགས་པ་ལྷས། དེ་ལ་བདག་ཅེས་བྱ་བ་ནི་གང་ཞིག་དངོས་པོ་རྣམས་ཀྱི་གཞན་ལ་རག་མ་ལས་པའི་ངོ་བོ་རང་བཞིན་ཏེ་དེ་མེད་པ་ནི་བདག་མེད་པའོ་ཞེས་རང་ངོས་ནས་གྲུབ་པ་ལ་བདག་ཅེས་གསུངས་པའི་ཕྱིར་ལུང་འདི་ཡང་མི་འཐད། འཕགས་པའི་མཉམ་བཞག་ཀྱང་ལོག་ཤེས་ཡིན་ཞེས་སྨྲ་བ་གྱིས་ཤིག གཞན་ཡང་དཔལ་ལྡན་ཟླ་བས།

གང་ཕྱིར་རྟེན་འབྱུང་རིགས་པ་འདི་ཡིས་ནི།།
ལྟ་ངན་དྲ་བ་མཐའ་དག་གཅོད་པར་བྱེད།།

གསུངས་པ་ཡང་མི་འཐད་པར་ཐལ། ཁྱོད་ལ་རྟེན་འབྱུང་གི་རིགས་པ་མི་འཐད་པའི་ཕྱིར་ཏེ། རྟེན་འབྱུང་མི་འཐད་པའི་ཕྱིར་ཏེ། ཁྱོད་ལ་ཡོད་ན་རང་དབང་ཅན་ཡིན་དགོས་པའི་ཕྱིར། དེར་མ་ཟད་འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བ་དང་། འཕགས་པའི་མཉམ་བཞག་ཡེ་ཤེས་དེ་དངོས་པོ་ལ་སྐུར་བ་བཏབ་པའི་ཚུལ་གྱིས་སྟོང་ཉིད་རྟོགས་པར་ཐལ་བ་སོགས་དཔལ་ལྡན་ཟླ་བས་ཇི་སྐད་གསུངས་པས་ཐལ་བ་རྣམས་ཀྱང་ལྡོག་ཏུ་མེད་དེ་མང་བས་མ་སྤྲོས་སོ།།

      

གལ་ཏེ་དོན་དམ་ལ་དཔྱོད་པའི་ཚེ་རང་ངོས་ནས་མ་གྲུབ་པ་གཏན་ལ་ཕབས་ནས་རྟོགས་ཀྱང་དེས་ཐ་སྙད་དུ་དཔྱད་པ་མ་ཡིན་པས་ཐ་སྙད་དུ་རང་མཚན་ཁས་ལེན་པ་ལ་མི་གནོད་སྙམ་ན། འོ་ན་དོན་དམ་ལ་དཔྱོད་པའི་ཚེ་དེ་རིགས་པའམ་རྒྱུ་མཚན་ཡང་དག་ལ་བརྟེན་ནས་དཔྱད་དགོས་སམ་མི་དགོས། དེ་མི་དགོས་ན་རྩ་ཤེས་དང་འཇུག་པ་སོགས་ལས་སྟོང་ཉིད་གཏན་ལ་ཕབས་པའི་རིགས་པ་རྣམས་དོན་མེད་དུ་འགྱུར་ལ། དགོས་ན། དཔེར་རྟེན་འབྱུང་གི་རིགས་པ་ལྟ་བུ་ཞིག་ལ་མཚོན་ན། བུམ་པ་ཆོས་ཅན། རང་བཞིན་མེད་དེ་རྟེན་འབྲེལ་ཡིན་པའི་ཕྱིར། ཞེས་པས་རིགས་པ་འདི་ལྟ་བུ་ཞིག་གིས་སྟོང་ཉིད་གཏན་ལ་ཕབས་པའི་ཚེ། གང་རྟེན་འབྲེལ་ཡིན་ན་ནི་རང་བཞིན་མེད་པས་ཁྱབ། དེས་ན་བུམ་པ་ཡང་རྟེན་འབྲེལ་ཡིན་པས་རང་བཞིན་མེད་པ་ཡིན་སྙམ་དུ་ངེས་ཤེས་འདྲེན་པ་ཞིག་ཨེ་དགོས་དང་མི་དགོས། མི་དགོས་ན་རིགས་པ་དེས་བསྒྲུབ་བྱ་བསྒྲུབ་མི་ནུས་པར་འགྱུར་ལ། དགོས་ན་གང་རྟེན་འབྲེལ་ཡིན་ན་རང་བཞིན་མེད་པས་ཁྱབ། ཅེས་པའི་ཁྱབ་པ་དེ་ཐ་སྙད་ཀྱི་དབང་དུ་བྱས་ནས་ཁྱབ་པ་བཀོད་པར་ཡིན་ཕྱིར་ཐ་སྙད་དུ་ཡང་རང་ངོས་ནས་གྲུབ་པ་ཡིན་ཞེས་སྨྲ་ལུགས་དེ་ཨེ་འདུག་སོགས་དང་། ཁྱོད་ཀྱིས་བསམ་ཤེས་ན་རིགས་པའི་འཕུལ་མཚམས་ཟུར་ཙམ་སྟོན་པ་འདིས་ཀྱང་ཁྱོད་ཀྱི་ལོག་རྟོག་དེ་བཟློག་པར་འགྱུར་ལ། གལ་ཏེ་རིགས་པའི་འགྲོས་ལ་དཔྱད་མི་ཤེས་པའམ་ལུང་རིགས་ཀྱིས་གནོད་པ་མཐོང་བཞིན་ཏུ་ཁོ་བོས་ཡིད་ལ་འདི་འདྲ་ཞིག་ཤར་ཞེས་ཚིག་ཆལ་ཆོལ་མང་པོ་སྨྲ་ན་ཁྱོད་ནི་སྨྱོན་པ་སྟེ་ཁོ་བོ་ནི་ཁྱོད་དང་ལྷན་ཅིག་རྩོད་པའང་མི་བྱའོ་ཞེས་སྨྲ་དགོས་པའི་ཡུལ་དུ་ཟད་དོ།།

      

དེ་ལྟར་རྟེན་འབྲེལ་ཡིན་པའི་རྒྱུ་མཚན་ཡང་དག་པ་དེ་ལ་བརྟེན་ནས་རང་བཞིན་གྱིས་མ་གྲུབ་པ་རྙེད་པ་ལས་རང་བཞིན་གྱིས་གྲུབ་པ་མ་རྙེད་ན་རྒྱུ་མཚན་ཡང་དག་ལ་བརྟེན་ནས་མ་རྙེད་པ་དེས་ཁུངས་བཙན་ནམ་ཁོ་བོས་ཡིད་ལ་འདི་འདྲ་དྲན་ཞེས་པ་ཙམ་གྱིས་ཁུངས་གང་བཙན་ལྟོས་ཤིག། གལ་ཏེ་གོང་དུ་སྨྲོས་པའི་རྟེན་འབྲེལ་ཡིན་ན་རང་བཞིན་གྱིས་མེད་པས་ཁྱབ་ཅེས་པའི་ཁྱབ་པ་དེ་ཡང་དོན་དམ་གྱི་དབང་དུ་ཡིན་ཞེས་སྨྲས་ནས་གལ་བཙུགས་ཉེན་ཆེ་བའི་རིགས་སུ་འདུག་པས་དེ་ཙུག་ཡིན་ན། འོ་ན་རྟེན་འབྲེལ་ཡིན་ན་རང་བཞིན་མེད་པས་མ་ཁྱབ་པར་ཐལ། ཞེས་སྨྲ་ན་ཅི་ཟེར། དེ་ཡང་དོན་དམ་དུ་ཁྱབ་ཀྱང་ཐ་སྙད་དུ་མ་ཁྱབ་ཟེར་རམ། དེ་ཟེར་ན། ཁྱབ་པའི་ཟུར་དུ་རྟེན་འབྲེལ་ཡིན་ན་ཞེས་སྨྲ་མི་རིགས་ཏེ། རྟེན་འབྲེལ་ཡིན་ན་ཞེས་པའི་ཚིག་དེས་འདུས་བྱས་དང་འདུས་མ་བྱས་ཀྱི་ཆོས་ཐམས་ཅད་བསྡུ་འགྲོ་བ་ཡིན་པའི་ཕྱིར་ཏེ། རྟེན་འབྲེལ་མ་ཡིན་ཆོས་འགའ་ཡང་མེད་པའི་ཕྱིར་ཏེ། འཕགས་པ་ཀླུས།

དེ་ཕྱིར་རྟེན་འབྲེལ་མ་ཡིན་པའི།།
ཆོས་འགའ་ཡོད་པ་མ་ཡིན་ནོ།།

ཞེས་གསུངས་པའི་ཕྱིར་རོ།། མ་ཁྱབ་ཟེར་མཚམས་སུ་ཁྱབ་ཟེར་ན་དམ་བཅའ་བུད། ད་ལན་ཅི་སྨྲ་རྒྱུ་འདུག་སོམས་ཤིག། དེ་ལྟ་བུའི་རྟེན་འབྲེལ་གྱི་རྟགས་ལ་བརྟེན་ནས་རང་བཞིན་གྱིས་མ་གྲུབ་པ་བསྒྲུབ་པའི་རྟགས་དེ་རྟགས་སམ་རྒྱུ་མཚན་ཡང་དག་པ་ཡིན་པ་ཡང་འཕགས་པ་ཀླུས་རྩོད་ཟློག་རང་འགྲེལ་ལས། འདི་ནི་དངོས་པོ་རྣམས་རྟེན་ནས་འབྱུང་བ་གང་ཡིན་པ་དེ་ནི་སྟོད་པ་ཉིད་ཡིན་ནོ།། ཅིའི་ཕྱིར་ཞེ་ན། རྒྱུ་དང་རྐྱེན་ལ་ལྟོས་པ་དང་བཅས་པའི་ཕྱིར་རོ།། ཞེས་རྒྱུ་རྐྱེན་སོགས་ལ་ལྟོས་པ་དང་བཅས་པའི་རྟེན་འབྲེལ་རྟགས་སུ་བྱས་ནས་ཆོས་ཐམས་ཅད་རང་བཞིན་མེད་པ་སྟོང་པ་ཉིད་དུ་བསྒྲུབ་པ་དང་། འཇུག་པ་ལས་ཀྱང་། གང་ཕྱིར་རྟེན་འབྱུང་རིགས་པ་འདི་ཡིས་ནི།། ཞེས་སོགས་ལུང་དྲངས་མ་ཐག་པ་དེའི་ཕྱིར། ཁྱོད་ཀྱིས་ལྟར་ན་རང་མཚན་ཐ་སྙད་དུ་ཡོད་བཞིན་དུ་དོན་དམ་ལ་དཔྱད་པའི་ཚེ་མེད་སྙམ་དུ་སྒོམ་དགོས་པ་ཞིག་ཏུ་འགྱུར་བས། དེ་ལྟར་ན་སྟོང་ཉིད་བསྒོམ་པ་དེའང་མི་སྡུག་པ་བསྒོམ་ཚེ་ས་གཞི་ཀེང་རུས་ཀྱིས་གང་བ་བསྒོམ་པ་བཞིན་དུ་ལོག་པ་ཡིད་བྱེད་དམ་མོས་པ་ཡིད་བྱེད་ཙམ་དུ་ཟད་ལ། དེས་ན་གཞུང་ཆེན་པོ་རྣམས་ལས་སྟོང་ཉིད་སྒྲུབ་བྱེད་ཀྱི་རིགས་པ་ཡང་དག་ཇི་སྐད་གསུངས་པ་རྣམས་དོན་མེད་པར་ཟད་དེ། སྟོང་ཉིད་སྒྲུབ་བྱེད་ཀྱི་རིགས་པ་ཡང་དག་ཇི་སྐད་གསུངས་པ་རྣམས་སྟོང་ཉིད་བསྒོམ་པ་པོས་གང་ཟག་གི་རྒྱུད་ལ་རྗེས་དཔག་པའི་ཚད་མ་སྐྱེད་བྱེད་ཡིན་ཀྱང་ཁྱོད་ལ་མོས་པ་ཡིན་བྱེད་ཙམ་གྱིས་ཆོག་པའི་ཕྱིར་རྒྱུ་མཚན་བཀོད་པ་དོན་མེད་དོ།། དེ་ལྟ་བུའི་རིགས་པ་ཡང་དག་ཇི་སྙེད་གསུངས་པ་རྣམས་ཕྱིའི་གོ་རྒྱ་གཅོད་ཐབས་ཙམ་ལས་བསྒོམ་པའི་ཚེ་རིགས་པའི་དཔྱད་པ་མི་དགོས་སྙམ་ན་དེ་དགོས་པའི་ཕྱིར་ཏེ། འཇུག་པ་ལས།

བསྟན་བཅོས་ལས་དཔྱད་རྩོད་ལ་ཆགས་པའི་ཕྱིར།།
མ་མཛད་རྣམ་གྲོལ་ཕྱིར་ན་དེ་ཉིད་བསྟན།།

ཞེས་ཇི་སྐད་གསུངས་པའི་རིགས་པ་རྣམས་རྩོད་པ་ལ་ཆགས་པའི་ཕྱིར་མ་ཡིན་པར་རྣམ་པར་གྲོལ་བའི་ཕྱིར་དུ་གསུངས་པའི་ཕྱིར་རོ།།

      

ལར་བདག་མེད་བསྒོམ་པའི་ཚེ་བདག་འཛིན་གྱི་ཞེན་ཡུལ་དེ་སུན་ཕྱུང་དགོས་སམ་མི་དགོས། དེ་མི་དགོས་ཟེར་ན་མི་འཐད་དེ།

འདི་ཡུལ་སུན་ཕྱུང་མེད་པ་ནི།།
དེ་སྤོང་བ་ནི་ནུས་མ་ཡིན།།

ཞེས་གསུངས། དགོས་ན་དེ་དགོས་པའི་དོན་དེ་བདག་འཛིན་གྱི་འཛིན་སྟངས་ཕྱིན་ཅི་ལོག་ཡིན་པ་དང་། དེ་དང་འཛིན་སྟངས་དངོས་འགལ་གྱི་བདག་མེད་རྟོག་པའི་ལྟ་བ་དེའི་འཛིན་སྟངས་ཕྱིན་ཅི་མ་ལོག་པའི་དོན་གྱིས་ཨེ་ཡིན། མ་ཡིན་ན་བདག་མེད་བསྒོམ་པ་དོན་མེད་ལ། ཡིན་དགོས་པའི་ཕྱིར་ཏེ། འཇུག་འགྲེལ་ལས། མ་རིག་པ་དང་དངོས་པོའི་རང་གི་ངོ་བོ་ཡོད་པ་མ་ཡིན་པར་སྒྲོ་འདོགས་པར་བྱེད་པ་རང་བཞིན་མཐོང་བ་ལ་སྒྲིབ་པས་བདག་ཉིད་ཅན་ནི་ཀུན་རྫོབ་བོ།།

      

ཀུན་རྫོབ་དེས་གང་ཞིག་བདེན་པར་སྣང་ཞིང་རང་བཞིན་མེད་བཞིན་སོ་སོར་སྣང་བ་དེ་ཉིད་འཇིག་རྟེན་ཕྱིན་ཅི་ལོག་ཏུ་གྱུར་པའི་ཀུན་རྫོབ་བདེན་པ་སྟེ། ཞེས་ཚིག་སྔ་མས་མ་རིག་པའམ་གཏི་མུག་ལ་ཀུན་རྫོབ་ཏུ་བྱས་ནས། ཕྱི་མས་དེའི་འཛིན་སྟངས་ཕྱིན་ཅི་ལོག་ཡིན་པར་གསལ་བར་གསུངས་པ་དེའི་ཕྱིར། བདག་འཛིན་མ་རིག་པས་འཛིན་སྟངས་དེ་ཆོས་རྣམས་ལ་རང་བཞིན་མེད་བཞིན་དུ་རང་བཞིན་གྱིས་ཡོད་དོ་ཞེས་ཕྱིན་ཅི་ལོག་ཏུ་འཛིན་པ་ཡིན་པའི་ཕྱིར་རོ།། དེ་ཡིན་ན་ཆོས་ཐམས་ཅད་རང་བཞིན་གྱིས་གྲུབ་པར་འཛིན་པའི་བློ་ཕྱིན་ཅི་ལོག་གི་བློ་ཡིན་ན་ཆོས་ཐམས་ཅད་རང་བཞིན་གྱིས་མ་གྲུབ་པར་འཛིན་པའི་བློ་ཆོས་རྣམས་ཀྱི་ཡིན་ལུགས་ལ་ཞུགས་པའི་བློ་ཕྱིན་ཅི་མ་ལོག་པ་ཡིན་པ་ཤུགས་ཀྱིས་གྲུབ་པའི་ཕྱིར། དེས་ན་ཆོས་ཐམས་ཅད་རང་མཚན་གྱིས་གྲུབ་པ་མ་ཡིན་པའང་དོན་གྱིས་གྲུབ་པའི་ཕྱིར་ད་ཕྱིན་ཆད་ལུང་ཡང་དག་པ་འདི་ལ་གུས་ན་ཆོས་ཐམས་ཅད་རང་མཚན་གྱིས་གྲུབ་པ་ཡིན་ཞེས་མ་སྨྲ་ཞིག

      

ལུང་དྲངས་མ་ཐག་པ་འདིའི་དངོས་པོའི་རང་གི་ངོ་བོ་ཡོད་པ་མ་ཡིན་པར་སྒྲོ་འདོགས་པར་བྱེད་བཞེས་དང་། རང་བཞིན་མེད་བཞིན་སོ་སོར་སྣང་བ་དེ་ཉིད་འཇིག་རྟེན་ཕྱིན་ཅི་ལོག་ཏུ་གྱུར་པའི་ཞེས་ཚིག་གསལ་ཁར་ཐོན་པ་འདི་ཙམ་ལ་དཔག་ན་གཞུང་ལུགས་ལ་གོ་བ་ཐན་ཐུན་ཆགས་པ་ཡན་ཆད་ཀྱིས་ཀྱང་ཆོས་རྣམས་ནི་རང་བཞིན་གྱིས་མ་གྲུབ་པར་གསུངས་པ་ཤེས་ནུས་པ་དེའི་ཕྱིར་ལུང་ཡང་དག་པའི་གནོད་བྱེད་མཐོང་བཞིན་དུའང་རང་གི་འདོད་ཐོག་ཁུར་ནས་གཞུང་རྙོག་པ་ལ་མ་ཞུགས་ན་མཛེས་སོ།།

      

ཡང་གལ་ཏེ་འདིའི་བློ་ཕྱིན་ཅི་ལོག་ཡིན་མིན་དང་། རང་གི་ངོ་བོ་ཡོད་པ་མ་ཡིན་པ་ལ་སྒྲོ་འདོགས་གསུངས་པ་རྣམས་ཀྱང་དོན་དམ་གྱི་དབང་དུ་བྱས་པ་ཡིན་གྱི་ཐ་སྙད་དུ་དེ་ལྟར་མ་ཡིན་ནོ་སྙམ་ན། འོ་ན་བདག་འཛིན་མ་རིག་པ་ལྷན་སྐྱེས་དེ་དོན་དམ་གྱི་དབང་དུ་བྱས་པའི་བློ་ཕྱིན་ཅི་ལོག་ཡིན་གྱི་ཐ་སྙད་ཀྱི་དབང་དུ་བྱས་ན་དེ་བློ་ཕྱིན་ཅི་ལོག་མ་ཡིན་ཞེས་ཀྱང་སྨྲ་དགོས་ཏེ། དོན་དམ་གྱི་དབང་དུ་བྱས་ན་བློ་དེའི་འཛིན་ཚུལ་དེ་མ་འགྲིགས་ཙམ་ལས་ཐ་སྙད་ཀྱི་དབང་དུ་བྱས་ན་བློ་དེའི་འཛིན་སྟངས་ཡིན་ཚུལ་ལྟར་དུ་རེད་འདུག་པའི་ཕྱིར་ཏེ། བློ་དེའི་འཛིན་ཚུལ་རང་མཚན་གྱིས་གྲུབ་པར་འཛིན་པ་གང་ཞིག། དེ་ལྟར་དུ་འཐད་འདུག་པའི་ཕྱིར། འཁོར་གསུམ་མཁས། བདག་འཛིན་མ་རིག་པ་ལྷན་སྐྱེས་དེ་དོན་དམ་གྱི་དབང་དུ་བྱས་ན་བློ་ཕྱིན་ཅི་ལོག་ཡིན་གྱི་ཐ་སྙད་ཀྱི་དབང་དུ་བྱས་པའི་བློ་ཕྱིན་ཅི་མ་ལོག་པ་ཡིན་ཟེར་ན། འོ་ན་བདག་འཛིན་མ་རིག་པ་ལྷན་སྐྱེས་དེ་དོན་དམ་དུ་སྤང་བྱ་ཡིན་ཀྱང་ཐ་སྙད་དུ་སྤང་བྱ་བ་མ་ཡིན་ཟེར་རྒྱུ་ཡིན་པར་ཐལ། འདོད་པའི་ཕྱིར། འདོད་ན་དེ་འདྲའི་བདག་འཛིན་དེ་སྤང་བའི་དགྲ་བཅོམ་པའང་དོན་དམ་དུ་དགྲ་བཅོམ་པ་ཡིན་གྱི་ཐ་སྙད་དུ་དགྲ་བཅོམ་པའང་མ་ཡིན་ཟེར་རྒྱུ་ཡིན་པར་ཐལ། དེ་ཡིན་ན་སངས་རྒྱས་འཕགས་པའང་དོན་དམ་དུ་སངས་འཕགས་ཡིན་གྱི་ཐ་སྙད་དུ་སངས་འཕགས་མ་ཡིན་པ་དང་། དེས་སྒྲིབ་གཉིས་སྤང་པའང་དོན་དམ་དུ་སྤངས་པ་ཡིན་གྱི་ཐ་སྙད་དུ་སྤང་བ་མ་ཡིན་པ་དང་། ཐ་སྙད་དུ་སངས་རྒྱས་འཕགས་པའི་རྒྱུད་ལ་འདོད་ཆགས་ཡོད་ཞེ་སྡང་ཡོད་གཏི་མུག་ཡོད་སོགས་ཀྱང་སྨྲ་བ་མི་འདོད་བཞིན་དུ་རང་དབང་མེད་པར་སྨྲ་དགོས་པར་འགྱུར་རོ།།

      

ཡང་བདག་འཛི་མ་རིག་པ་ལྷན་སྐྱེས་དེ་དོན་དམ་གྱི་དབང་དུ་བྱས་ན་བློ་ཕྱིན་ཅི་ལོག་ཡིན་གྱི། ཐ་སྙད་ཀྱི་དབང་དུ་བྱས་པའི་བློ་ཕྱིན་ཅི་མ་ལོག་པ་ཡིན་མི་ཟེར་ན། འོ་ན་བདག་འཛིན་དེ་ཐ་སྙད་དུ་ཡང་བློ་ཕྱིན་ཅི་ལོག་ཡིན་པར་ཐལ། འདོད་པའི་ཕྱིར། འདོད་ན། ཆོས་ཐམས་ཅད་ཐ་སྙད་དུ་ཡང་རང་མཚན་གྱིས་མ་གྲུབ་པར་ཐལ། ཆོས་ཐམས་ཅད་ཐ་སྙད་དུ་རང་མཚན་གྱིས་གྲུབ་པ་དེ་བདག་འཛིན་མ་རིག་པ་ལྷན་སྐྱེས་ཀྱིས་འཛིན་ཚུལ་ཡིན་པ་གང་ཞིག། དེའི་འཛིན་ཚུལ་དེ་འཛིན་ཚུལ་ཕྱིན་ཅི་ལོག་ཡིན་པར་འདོད་པ་གང་ཞིག་ལུང་གིས་ཀྱང་གྲུབ་པའི་ཕྱིར། གལ་ཏེ་བདག་འཛིན་མ་རིག་པ་ལྷན་སྐྱེས་འཛིན་ཚུལ་དེ་ལྟར་མ་ཡིན་ཟེར་ན་དེ་ཡིན་པ་ལུང་དྲངས་མ་ཐག་པས་རང་བཞིན་མེད་བཞིན་སོ་སོར་སྣང་བ་དེ་ཉིད་འཇིག་རྟེན་ཕྱིན་ཅི་ལོག་ཏུ་གྱུར་པའི་ཅེས་གསལ་བར་གསུངས་པའི་ཕྱིར་ཟེར་ན་ཅི་སྨྲ་རྒྱུ་ཡོད།

      

གལ་ཏེ་ཁོ་བོ་ལ་སྐྱོན་དེ་དག་མི་འཇུག་སྟེ། ཁྱོད་ཀྱིས་མིག་ལེགས་པར་ལྟོས་ཤིང་དང་། ཁོ་བོས་རང་རྒྱུད་པས་རྣམ་གྲངས་པའི་དོན་དམ་རྩལ་དུ་བཏོན་ནས་འཆད་པའི་སྐབས་སུ་དོན་དམ་བདེན་སྟོང་ཙམ་ལ་བཞེད་པ་དང་། ཐ་སྙད་ཚད་གྲུབ་བཞེད་པའི་གནད་ཀྱིས་ཁས་ལེན་དང་བཅས་པའི་དབུ་མ་རྗེས་ཀྱི་ངེས་པ་དང་མཐུན་པར་གཏན་ལ་ཕབས་པ་ཡིན་ལ། ཐལ་འགྱུར་པའི་རྣམ་གྲངས་མིན་པ་ཁས་ལེན་ཐམས་ཅད་དང་བྲལ་བའི་དབུ་མ་ཆེན་པོ་རྩལ་དུ་བཏོན་ནས་འཆད་པའི་ཚེ་དོན་དམ་དཔྱད་པ་གཞིར་བཞག་གི་དབང་དུ་བྱས་ཏེ། ཐ་སྙད་དུ་ཡང་རང་མཚན་གྱིས་གྲུབ་པ་མི་འདོད་པ་ཇི་ལྟར་སྣང་བ་ཐམས་ཅད་སྤྲོས་བྲལ་དམིགས་པ་མེད་པ་མཉམ་བཞག་དམ་པའི་སྤྱོད་ཡུལ་དང་མཐུན་པར་གཏན་ལ་ཕབས་པ་ཡིན་ཏེ། ཞེས་སོགས་གསལ་བར་སྨྲོས་ཟིན་པས་ཕྱིར་སྙམ་ན།

      

དེ་ལ་དང་པོར་འདི་དྲི་བར་བྱ་སྟེ། ༼མི་ཕམ་གྱིས་༽རང་རྒྱུད་པས་དོན་དམ་ལ་དཔྱད་པ་བྱས་པའི་སྐབས་སུ་དོན་དམ་བདེན་སྟོང་ཙམ་གཏན་ལ་ཕབས་ནས། ཐ་སྙད་ཚད་གྲུབ་བཞེད་པའི་གནད་ཀྱིས་དབུ་མ་རྗེས་ཀྱི་ངེས་ཤེས་དང་མཐུན་པར་གཏན་ལ་ཕབས་པ་འདི་ཞེས་པའི་རྗེས་ཀྱི་ངེས་ཤེས་དང་མཐུན་པ་ཟེར་བ་འདི་གང་ཞིག་ཡིན། དབུ་མ་ཐལ་འགྱུར་བའི་འཕགས་པའི་རྗེས་ཐོབ་ཀྱི་ངེས་ཤེས་ལ་ཟེར་རམ། རང་རྒྱུད་པ་རང་ལུགས་ཀྱི་རྗེས་ཐོབ་ཀྱི་ངེས་ཤེས་ལ་ཟེར་བ་གང་ཡིན། ཕྱི་མ་ལྟར་ན་མི་འཐད་དེ། རང་རྒྱུད་པ་རང་ལུགས་ཀྱི་མཉམ་བཞག་གི་ལྟ་བ་རང་རྒྱུད་པ་རང་ལུགས་ཀྱི་རྗེས་ཐོབ་ཀྱི་ངེས་ཤེས་དང་མཐུན་ལུགས་མེད་པའི་ཕྱིར་ཏེ། དེ་ཡིན་ན་དེའི་ལུགས་ལ་མཉམ་རྗེས་ཁྱད་མེད་ཀྱི་སྐྱོན་དུ་འགྱུར། དང་པོ་ལྟར་ན་མི་འཐད་དེ། དབུ་མ་ཐལ་འགྱུར་བའི་རྗེས་ཐོབ་ཀྱི་ངེས་ཤེས་ཀྱི་ཡུལ་ལ་འཇུག་པ་དང་མི་མཐུན་པའི་ཕྱིར་ཏེ། དབུ་མ་ཐལ་འགྱུར་བའི་རྗེས་ཐོབ་ཡེ་ཤེས་ཀྱིས་ཆོས་ཐམས་ཅད་སྣང་ཡང་སྣང་ལ་རང་བཞིན་མེད་པར་རྟོགས་པ་གང་ཞིག། རང་རྒྱུད་པ་རང་ལུགས་ཀྱི་མཉམ་བཞག་ཏུ་དེ་ཙམ་ཡང་མ་རྟོགས་པའི་ཕྱིར་ཏེ། དེ་ལ་ཆོས་ཐམས་ཅད་རང་ངོས་ནས་གྲུབ་པར་འཛིན་པའི་འཛིན་སྟངས་མ་ཞིག་པའི་ཕྱིར་ཏེ། དེས་རང་ངོས་ནས་གྲུབ་པར་འཛིན་པའི་བདག་འཛིན་གྱི་ཞེན་ཡུལ་སུན་མ་ཕྱུང་བའི་ཕྱིར། གཞན་ཡང་དེའི་ཁོ་རང་ལུགས་ཀྱི་ཆོས་ཐམས་ཅད་བདེན་སྟོང་ཡིན་པ་ཙམ་ལ་མཉམ་པར་བཞག་ཀྱང་། དེ་བདེན་སྟོང་དངོས་གནས་པ་མ་ཡིན་པའི་ཕྱིར་ཏེ། བདེན་སྟོང་ཡིན་ན་རང་ངོས་ནས་གྲུབ་པས་སྟོང་པ་ཡིན་དགོས་པ་གང་ཞིག། རང་རྒྱུད་པ་རང་ལུགས་ཀྱི་བདེན་སྟོང་ལ་ཅི་ཙམ་མཉམ་པར་བཞག་ཁུལ་བྱས་ཀྱང་དབུ་མ་ཐལ་འགྱུར་བའི་ལུགས་ཀྱི་ཐ་སྙད་དངོས་ཡུལ་དུ་བྱས་པར་ཟད་ཀྱི་དོན་དམ་དངོས་ཡུལ་དུ་བྱས་པ་མ་ཡིན་པའི་ཕྱིར། རྟགས་ཕྱི་མ་འདི་བཞིན་ཁྱོད་ཀྱིས་ཀྱང་འདོད་པར་མངོན་ཏེ། ཁྱོད་ཀྱིས་༼མི་ཕམ་གྱིས་༽དོན་དམ་བཏགས་པ་བ་དང་མཚན་ཉིད་པ་གཉིས་མཉམ་རྗེས་སྦྱར་རྒྱུ་འདི་ཞེས་རང་རྒྱུད་པའི་དོན་དམ་དོན་དམ་བཏགས་པ་བ་བྱས་འདུག་པའི་ཕྱིར། དེས་ན་རང་རྒྱུད་པའི་དོན་དམ་བཏགས་པ་བ་ཞེས་པ་འདི་ཁྱོད་ཀྱིས་ཐལ་འགྱུར་བའི་ལུགས་གཞིར་བཞག་ནས་རང་རྒྱུད་པ་ལ་ཁྱོད་ཀྱིས་དོན་དམ་བཏགས་པ་བ་ཟེར་རམ། རང་རྒྱུད་པའི་ལུགས་གཞིར་བཞག་ནས་རང་རྒྱུད་པའི་དོན་དམ་བཏགས་པ་བ་ཟེར། དང་པོ་ལྟར་ན་རང་རྒྱུད་པའི་དོན་དམ་བཏགས་པ་བ་དེ་ཐལ་འགྱུར་ལུགས་ཀྱི་མཉམ་རྗེས་གང་ལ་སྦྱར་ཀྱང་གྲ་མི་འགྲིགས་པ་གོང་དུ་བཤད་ཟིན་ལ། གཉིས་པ་ལྟར་ན་མི་འཐད་དེ་རང་རྒྱུད་པ་རང་གིས་རང་ལུགས་ཀྱི་དོན་དམ་དོན་དམ་མཚན་ཉིད་པ་ལས་བཏགས་པ་བ་ཞལ་གྱིས་མི་བཞེས་པའི་ཕྱིར་ཏེ། གྲུབ་མཐའ་སྨྲ་བ་སུའི་ལུགས་ལའང་རང་རང་གི་དོན་དམ་དོན་དམ་མཚན་ཉིད་པ་ལས་བཏགས་པ་བ་ཞལ་གྱིས་མི་བཞེས་པ་སྤྱི་ལུགས་ཡིན་པའི་ཕྱིར།

      

ཡང་ཁྱོད་ཀྱིས་༼མི་ཕམ་གྱིས་༽ཐལ་འགྱུར་བའི་དོན་དམ་དཔྱད་པ་གཞིར་བཞག་སྐབས་སུ་ཐ་སྙད་དུ་ཡང་རང་མཚན་གྱིས་གྲུབ་པ་མི་བཞེད་ཅེས་པ་འདི་མཚར་ཏེ། སྤྱིར་ཐལ་འགྱུར་བས་རང་མཚན་གྱིས་གྲུབ་པ་ཐ་སྙད་དུ་བཞེད་པ་དང་། དོན་དམ་ལ་དཔྱད་ཚེ་མི་བཞེད་པ་འདི་བཞིན་ཁྱོད་ཀྱིས་ཁས་ལེན་ན། འོ་ན་ཐལ་འགྱུར་བའི་ཐ་སྙད་དུ་རང་མཚན་གྱིས་གྲུབ་པ་ཁས་ལེན་པ་དེ། དོན་དམ་ལ་དཔྱད་ཚེ་དོན་དམ་དཔྱད་པའི་རིགས་ཤེས་ཀྱིས་སུན་དབྱུང་བྱའམ་དགག་པར་བྱས་པ་ཡིན་པར་ཐལ། འདོད་པའི་ཕྱིར། འདོད་ན་ཐལ་འགྱུར་བའི་ཐ་སྙད་དུ་གང་བཞེད་པ་རྣམས་དོན་དམ་དུ་དཔྱད་ཚེ་སུན་དབྱུང་བྱའམ་དགག་བྱ་ཡིན་པར་ཐལ། འདོད་པའི་ཕྱིར། འདོད་ན། ཐལ་འགྱུར་བའི་ཐ་སྙད་དུ་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པ་དེ་རང་མཚན་གྱིས་གྲུབ་པའི་དབང་དུ་བྱས་པ་ཡིན་ཕྱིར་དོན་དམ་ལ་དཔྱད་ཚེ་དེ་དགག་བྱ་བྱས་ནས་སུན་དབྱུང་བའམ་དགག་དགོས་པར་ཐལ། འདོད་པའི་ཕྱིར། འདོད་ན། དེ་བཞིན་དུ་ལས་དགེ་སྡིག་དང་འབྲས་བུ་བདེ་སྡུག་སོགས་ཀྱང་དེ་བཞིན་དུ་ཐ་སྙད་དུ་རང་མཚན་གྱིས་གྲུབ་པའི་དབང་དུ་བྱས་པ་ཡིན་ཕྱིར། དོན་དམ་ལ་དཔྱད་ཚེ་ཐ་སྙད་དུའང་རང་མཚན་གྱིས་གྲུབ་པ་དེ་དགག་བྱ་བྱས་ནས་དགག་དགོས་པར་ཐལ། འདོད་པའི་ཕྱིར། འདོད་ན། སྟོང་ཉིད་མངོན་སུམ་དུ་རྟོགས་པའི་འཕགས་པ་ཆོས་ཅན། ཁྱོད་སྐྱབས་གནས་དཀོན་མཆོག་གསུམ་དང་ལས་རྒྱུ་འབྲས་སོགས་མེད་པར་ལྟ་བའི་ལོག་ལྟ་ཅན་ཡིན་པར་ཐལ། སྐྱབས་གནས་དཀོན་མཆོག་གསུམ་དང་ལས་རྒྱུ་འབྲས་སོགས་ཡོད་ན་རང་ངོས་ནས་གྲུབ་དགོས། རང་ངོས་ནས་མ་གྲུབ་ན་གཏན་མེད་ཡིན་དགོས་པ་གང་ཞིག དོན་དམ་ལ་དཔྱད་པའི་ཚེ་དཀོན་མཆོག་རྒྱུ་འབྲས་སོགས་ཐ་སྙད་དུའང་གཏན་ནས་མེད་པ་ལ་ངེས་ཤེས་རྙེད་དགོས་པར་འདོད་པ་དེའི་ཕྱིར། སར་གནས་ཀྱི་བྱང་སེམས་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་འཕགས་པ་རྣམས་མུ་སྟེགས་རྒྱང་འཕེན་པ་དང་ཆད་ལྟ་སྨྲ་བ་པོ་ཡིན་ཞེས་རྗེས་འཇུག་རྣམས་ལ་སྐད་གསང་མཐོན་པོས་སྒྲོགས་ཤིག

      

ཡང་༼མི་ཕམ་གྱིས་༽གལ་ཏེ་དོན་དམ་ལ་དཔྱད་ཚེ་ཐ་སྙད་དུའང་རང་མཚན་མ་གྲུབ་ཅེས་པ་དེ་དོན་དམ་ལ་དཔྱད་ཚེ་ཁས་ལེན་ཅི་ཡང་མེད་པ་ལ་བྱ་བ་ཡིན་ཟེར་ཚོད་འདུག་པས། དེས་ན་དོན་དམ་ལ་དཔྱད་ཚེ་ཐ་སྙད་དུའང་རང་མཚན་གྱིས་གྲུབ་བམ་མ་གྲུབ་ཅེས་དཔྱད་པ་ཡང་བྱེད་པ་དོན་མེད་པར་ཐལ། དེའི་ཚེ་རང་མཚན་གྱིས་གྲུབ་མ་གྲུབ་ཀྱི་ཁས་ལེན་དང་རྣམ་བཞག་ཅི་ཡང་མེད་པའི་ཕྱིར། འདོད་ན་ཁྱོད་ཀྱིས་རང་མཚན་ཐ་སྙད་དུ་ཡོད་མེད་ཀྱི་རྣམ་བཞག་གང་བྱས་པ་རྣམས་རང་གིས་རང་ཉིད་ལ་ངལ་བ་སྟེར་བར་ཟད་དོ།།

      

གལ་ཏེ་དེ་འདྲའི་རྣམ་བཞག་བྱས་ཀྱང་ཁས་མི་ལེན་མ་ཡིན་ནོ་ཟེར་ན། རྣམ་པར་བཞག་ལ་རྣམ་བཞག་དེ་ཁས་ནི་མི་ལེན་ཞེས་སྨྲ་བ་རིགས་ལམ་ལས་འདས་པ་ངོ་ཚ་བའི་གཏམ་ཡང་དག་པ་ལ་མ་འཛེམ་པར་ཟད་དོ།།

      

གཞན་ཡང་དོན་དམ་དཔྱོད་བྱེད་ཀྱི་ཤེས་རབ་ཀྱིས་ཐ་སྙད་དུའང་རང་མཚན་གྱིས་གྲུབ་པ་ཁེགས་ན། འཕགས་པའི་མཉམ་བཞག་ཡེ་ཤེས་ཆོས་ཅན། ཁྱོད་དངོས་པོ་འཇིག་པའི་འཇིག་རྒྱུ་ཡིན་པར་ཐལ། དེས་དངོས་པོ་ལ་སྐུར་བ་བཏབ་པའི་ཚུལ་གྱིས་སྟོང་ཉིད་རྟོགས་པའི་ཕྱིར་ཏེ། དངོས་པོ་རྣམས་རང་མཚན་གྱིད་ཡོད་བཞིན་དུ། འདི་རྣམས་རང་མཚན་གྱིས་ཐ་སྙད་དུ་ཡང་མེད་དོ་ཞེས་སུན་འབྱིན་པ་དང་བཅས་པའི་ཕྱིར། གལ་ཏེ་དོན་དམ་གྱི་དབང་དུ་ཡིན་པའི་སྐྱོན་མེད་དོ་སྙམ་ན། དེ་དོན་དམ་གྱི་དབང་ཡིན་ན་དོན་དམ་དུ་རང་མཚན་གྱིས་གྲུབ་པ་མེད་ཅེས་སྨྲ་བ་ལས། དོན་དམ་ལ་དཔྱད་ཚེ་ཐ་སྙད་དུའང་རང་མཚན་གྱིས་གྲུབ་པ་མེད་ཅེས་སྨྲ་ན་གོ་རྒྱུ་མེད་པར་ཟད་དེ། ཐ་སྙད་དུ་ཡོད་ཟིན་པ་ཞིག་དོན་དམ་དཔྱད་པས་མེད་པར་བྱེད་དུའང་མི་རུང་བའི་ཕྱིར། དེས་ན་བྱང་སེམས་འཕགས་པའི་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པའི་ཚེ་རང་གི་མཚན་ལྡན་དགེ་བའི་བཤེས་གཉེན་བསྟེན་པ་ནས་བཟུང་སྟེ་ལམ་ཐམས་ཅད་གཏན་མེད་ཡིན་ཏེ། རང་མཚན་གྱིས་མ་གྲུབ་པའི་ཕྱིར། ཞེས་པ་འདི་རྒྱུ་མཚན་ཡང་དག་ཏུ་བྱས་ནས་རིགས་པས་དཔྱད་པ་དེ་དག་གིས་ཚུལ་བཞིན་དུ་དཔྱད་པས་མཐར་ལམ་གྱི་ལུས་ཡོངས་རྫོགས་གཏན་ནས་མེད་པ་དེ་ཁའི་ངང་ལ་མཉམ་པར་བཞག་རྒྱུ་ཡིན་དགོས་པའི་ཕྱིར། དེ་ཡིན་ན་སར་གནས་ཀྱི་སེམས་དཔའ་ཆེན་པོ་རྣམས་དང་སངས་རྒྱས་འཕགས་པ་ལ་བྱམས་དང་སྙིང་རྗེ་བྱང་ཆུབ་ཀྱི་སེམས། སྤྱན་ལྔ་མངོན་ཤེས་སྟོབས་མི་འཇིགས་མ་འདྲེས་པའི་ཆོས་སོགས་ཅི་ཡང་མེད་པར་ཐལ་ལོ།།

      

གཞན་ཡང་སངས་རྒྱས་འཕགས་པ་དུས་རྒྱུན་དུ་སྟོང་པ་ཉིད་ལ་རྩེ་གཅིག་ཏུ་མཉམ་པར་བཞག་པ་ལས་གཡོ་བ་མི་མངའ་བའི་ཕྱིར་ཁྱོད་ལྟར་ན་སངས་རྒྱས་འཕགས་པས་སྟོང་ཉིད་ལ་རྩེ་གཅིག་ཏུ་མཉམ་པར་བཞག་པ་དེ་ཐ་སྙད་ཀྱི་ཆོས་ཐམས་ཅད་གཏན་མེད་ཀྱི་ངང་དུ་མཉམ་པར་བཞག་པ་ཡིན་པར་ཐལ་བའི་ཐལ་བ་བཟློག་ཏུ་མེད་ལ། དེས་ན་སངས་རྒྱས་འཕགས་པས་སྟོང་ཉིད་ལས་གཞན་པའི་ཆོས་ཅི་ཡང་མ་གཟིགས་པ་ཁས་ལེན་དགོས། དེ་ལྟར་ན་སྟོང་ཉིད་ལས་གཞན་པའི་ཆོས་ཅི་ཡང་མེད་པར་ཐལ། ཡོད་ན་སངས་རྒྱས་འཕགས་པས་མངོན་སུམ་དུ་གཟིགས་དགོས་པ་ལ་མ་གཟིགས་པའི་ཕྱིར། དེ་འདོད་ན་མདུན་གྱི་དམ་བཅའ་བ་མི་ཕམ་རྣམ་རྒྱལ་ལ་མགོ་མེད་ལག་མེད་རྐང་པ་མེད་པ་སོགས་ནས་མི་ཕམ་ལ་ཟ་རྒྱུ་མེད་འཐུང་རྒྱུ་མེད་གྱོན་རྒྱུ་མེད་མནའ་མེད་གཏམ་མེད་སྡོམ་པ་དམ་ཚིག་སོགས་གཏན་ནས་མེད་པ་ཡིན་ཏེ། ཡོད་ན་སངས་རྒྱས་ཀྱིས་གཟིགས་དགོས་པ་ལ་མ་གཟིགས་པའི་ཕྱིར་ཞེས་ངོ་ཚ་བའི་ཁས་ལེན་ཚད་མེད་པ་ཞིག་བྱེད་དགོས་པར་འགྱུར་རོ།།

      

གལ་ཏེ་ཁྱོད་ཀྱིས་སྐྱོན་འཕེན་ཚུལ་དེ་ལྟར་ཡིན་ན་ཤེར་སྙིང་དང་ཡུམ་གྱི་མདོ་ལ་སོགས་ལས་མིག་མེད་རྣ་བ་མེད་ནས་ཀུན་བྱུང་གི་ཆོས་ཐམས་ཅད་མེད་ཅེས་གསུངས་པ་ལའང་སྐྱོན་དེ་བཞིན་དུ་འཇུག་པར་འགྱུར་བར་ཐལ་ལོ་སྙམ་ན། དེ་མི་འདྲ་སྟེ། ཡུམ་གྱི་མདོ་དེ་དག་ལས་མིག་རྣ་བ་སྣ་སོགས་ནས་ཀུན་བྱུང་གི་ཆོས་ཐམས་ཅད་རང་མཚན་གྱིས་གྲུབ་པ་ལ་དགག་བྱར་བྱས་ནས་དེ་མེད་ཅེས་གསུངས་པ་ལས་ཐ་སྙད་རྟོག་བཏགས་ཙམ་གྱི་ཆོས་ཐམས་ཅད་མེད་ཅེས་མ་གསུངས་པའི་ཕྱིར། འཕགས་པ་ཀླུས།

ང་ལ་ཁས་ལེན་མེད་པས་ན།།
ང་ནི་སྐྱོན་མེད་ཁོ་ན་ཡིན།།

ཞེས་དགག་བྱ་རང་མཚན་གྱིས་གྲུབ་པ་ཁས་ལེན་པར་མེད་པས་ན་ཐ་སྙད་རྟོག་བཏགས་ཙམ་གྱི་རྟེན་འབྲེལ་དེ་ལ་མི་འཐད་པའི་སྐྱོན་དེ་མེད་ཅེས་གསུངས་པ་ལྟར་ཡིན་ལ། ཁྱོད་ཀྱིས་རང་མཚན་གྱིས་གྲུབ་པ་དང་ཡོད་པ་དོན་གཅིག་ཏུ་བྱས་ནས་ཆོས་ཐམས་ཅད་ཐ་སྙད་དུའང་རང་མཚན་གྱིས་གྲུབ་དགོས་ཀྱང་དོན་དམ་ལ་དཔྱད་ཚེ་གཏན་མེད་དེ་རང་མཚན་གྱིས་གྲུབ་པ་མེད་དོ་ཞེས་ཐ་སྙད་ཀྱི་ཆོས་ཐམས་ཅད་ལ་སྐུར་བ་བཏབ་པ་ཡིན་པས་སྐྱོན་འདི་དག་དུས་ནམ་ཡང་སྤོང་བའི་གོ་སྐབས་མེད་དོ།། གཞན་ཡང་།

མཁྱེན་པའི་སྐད་ཅིག་གཅིག་གིས་ཀྱང་།།
ཤེས་བྱའི་དཀྱིལ་འཁོར་ཀུན་ཁྱབ་ཅན།།

ཞེས་པ་མི་འཐད་པར་ཐལ། མཁྱེན་པའི་སྐད་ཅིག་གཅིག་གིས་ཤེས་བྱའི་དཀྱིལ་འཁོར་ཀུན་ལ་མ་ཁྱབ་པའི་ཕྱིར་ཏེ། དོན་དམ་མཁྱེན་པའི་མཁྱེན་པ་སྐད་ཅིག་མ་དེས་ཐ་སྙད་པའི་ཆོས་ལ་མ་ཁྱབ། ཐ་སྙད་མཁྱེན་པའི་མཁྱེན་པ་སྐད་ཅིག་མ་དེས་དོན་དམ་ལ་མ་ཁྱབ་པའི་ཕྱིར། གལ་ཏ་སྐྱོན་དེ་མེད་དེ། ཐ་སྙད་མཁྱེན་པའི་རྣམ་མཁྱེན་གྱིས་ཐ་སྙད་མཁྱེན། དོན་དམ་མཁྱེན་པའི་རྣམ་མཁྱེན་གྱིས་དོན་དམ་མཁྱེན་པ་སྟེ། བདེན་གཉིས་སོ་སོ་ནས་མཁྱེན་མོད་ཀྱང་མཁྱེན་པ་གཉིས་པོ་དེ་སངས་རྒྱས་འཕགས་པ་གཅིག་གིས་ཐུགས་རྒྱུད་ཀྱིས་བསྡུས་ཕྱིར་མཁྱེན་པའི་སྐད་ཅིག་གཅིག་གིས་ཤེས་བྱ་ཀུན་མི་མཁྱེན་པའི་སྐྱོན་མེད་སྙམ་ན། འོ་ན་སངས་རྒྱས་འཕགས་པའི་ཐུགས་རྒྱུད་ཀྱི་དོན་དམ་མཁྱེན་པའི་རྣམ་མཁྱེན་ཆོས་ཅན། ཁྱོད་རྣམ་མཁྱེན་མ་ཡིན་པར་ཐལ། ཁྱོད་ཀྱིས་དོན་དམ་ལས་གཞན་པའི་ཆོས་ཅི་ཡང་མ་མཁྱེན་པའི་ཕྱིར། དེ་བཞིན་དུ་ཐ་སྙད་མཁྱེན་པའི་རྣམ་མཁྱེན་ཡང་། དེར་ཐལ། དེའི་ཕྱིར། འདི་ལ་ལན་ཅི་འདེབས་སོམས་ཤིག ཁྱོད་ཀྱང་རྣམ་པ་ཐམས་ཅད་མཁྱེན་པའི་རྣམ་མཁྱེན་ཞིག་ཁས་ལོངས་དང་མཛེས་སོ།།

      

ཡང་གལ་ཏེ་འདིའི་དོན་དམ་དང་ཐ་སྙད་ལ་དཔྱད་མི་དཔྱད་བྱ་བ་འདི་སངས་རྒྱས་འཕགས་པའི་མཁྱེན་ཚུལ་ལ་སྦྱར་རྒྱུ་མ་ཡིན། སེམས་ཅན་གྱི་རྒྱུད་ཀྱི་བདེན་གཉིས་གཞལ་ཚུལ་ལ་བྱ་དགོས་བསམ་ན། འོ་ན་སེམས་ཅན་གྱི་རྒྱུད་ཀྱི་བདེན་གཉིས་གཞལ་བའི་ཚད་མ་དང་། སངས་རྒྱས་འཕགས་པའི་རྒྱུད་ཀྱི་བདེན་གཉིས་གཞལ་བའི་ཚད་མ་གཉིས་བདེན་གཉིས་འཇལ་ཚུལ་ལ་མ་འཁྲུལ་བ་དེ་གང་ཡིན་ཞེས་དྲི་ན། སངས་རྒྱས་འཕགས་པ་མ་འཁྲུལ་བ་ཡིན་ན་ནི་བདེན་གཉིས་གཅིག་གིས་གཅིག་སུན་འབྱིན་པའི་སྐྱོན་སྔ་མ་དེ་སྤོང་མི་ནུས། སེམས་ཅན་གྱིས་དེ་ཚད་མ་ཡིན་ན་སངས་རྒྱས་འཕགས་པ་བདེན་གཉིས་གཞལ་ཚུལ་ལ་འཁྲུལ་བ་ཁས་ལེན་དགོས་པར་འགྱུར་བས་སྐྱོན་གྱི་འདམ་རྫབ་ཆེན་པོ་ལས་དུས་ནམ་ཡང་ལྡང་མི་ནུས་སོ།།

      

གལ་ཏེ་སངས་རྒྱས་འཕགས་པས་བདེན་གཉིས་གཞལ་ཚུལ་ལྟར་བདེན་པ་གཉིས་ཀྱི་གནས་ཚུལ་ཡང་དེ་ལྟར་ན། སངས་རྒྱས་འཕགས་པས་བདེན་པ་གཉིས་ཀ་མི་གཟིགས་པའི་དུས་མེད་པའི་ཕྱིར། གཞི་བུམ་པ་ལྟ་བུ་གཅིག་མ་གཟིགས་ཚེ་རང་མཚན་གྱིས་གྲུབ་མ་གྲུབ་གཉིས་ཀ་གཟིགས་པར་ཐལ། ཐ་སྙད་མཁྱེན་པའི་ལུགས་ཀྱིས་རང་མཚན་གྱིས་གྲུབ་པ་དང་། དོན་དམ་མཁྱེན་པའི་ལུགས་ཀྱི་རང་མཚན་གྱིས་མ་གྲུབ་པ་གཟིགས་པའི་ཕྱིར། འདོད་ན། བུམ་པ་དེ་སངས་རྒྱས་འཕགས་པས་ཡོད་མེད་གཉིས་ཀར་གཟིགས་པར་ཐལ། རང་མཚན་གྱིས་གྲུབ་མ་གྲུབ་གཉིས་ཀར་གཟིགས་པའི་ཕྱིར། འདོད་ན། བུམ་པ་དེ་ཡོད་མེད་གཉིས་ཀྱི་གཞི་མཐུན་ཡིན་པར་ཐལ། རང་མཚན་གྱིས་གྲུབ་མ་གྲུབ་གཉིས་ཀྱི་གཞི་མཐུན་ཡིན་པའི་ཕྱིར། རྟགས་རིམ་བཞིན་ཁས། འདི་ནི་རིགས་ལམ་སྨྲ་བ་གསར་བུ་ཡན་ཆད་ཀྱིས་ཀྱེ་མ་མ་ལ་ཡོད་མེད་གཉིས་ཀྱི་གཞི་མཐུན་བཞག་པའི་སྔོན་མེད་ཀྱི་བན་བཙུན་ཉམས་མཚར་བ་ཞིག་བྱུང་ཞེས་བཞད་གད་རྒྱུན་མི་ཆད་པའི་དགའ་སྟོན་ཞིག་ལགས་སོ།།

      

རྩ་བར་མི་འདོད་ན་བུམ་པ་དེ་ཡོད་མེད་གཉིས་ལས་གང་མ་གཟིགས། ཡོད་པར་གཟིགས་ན་བུམ་པ་དེ་དོན་དམ་ལ་དཔྱད་པའི་རྣམ་མཁྱེན་གྱིས་གཞལ་ཚེ་རང་མཚན་གྱིས་མ་གྲུབ་པའི་དམ་བཅའ་ཉམས། མེད་པར་གཟིགས་ན་ཐ་སྙད་ལ་དཔྱད་པའི་རྣམ་མཁྱེན་གྱིས་གཟིགས་ཚེ་རང་མཚན་གྱིས་གྲུབ་དགོས་མ་གྲུབ་ན་གཏན་མེད་དུ་གྱུར་བའི་དམ་བཅའ་རྣམས་བྱེ་མའི་ཆང་བུ་ལྟར་ཞིག་པ་འདིའང་ཁོ་བོ་ཅག་རིགས་ལམ་སྨྲ་བ་རྣམས་བཞད་གད་ཀྱི་དགའ་སྟོན་ཆེན་པོ་འདི་འདྲ་ལ་མགྲོན་དུ་བོས་པ་ནི་བཀའ་དྲིན་ཆེའོ།།

      

གཞན་ཡང་འཇིག་རྟེན་པའི་དགེ་སྡིག་གི་ལས་བསོག་པ་དེ་ཆོས་ཅན། དེ་དོན་དམ་དུ་བསགས་པ་ཡིན་ནམ་ཐ་སྙད་དུ་བསགས་པ་ཡིན། དང་པོ་ལྟར་ན། བསགས་པའི་ལས་དེ་དོན་དམ་དུ་རང་ངོས་ནས་མ་གྲུབ་དགོས་པས་མེད་པར་ཐལ། ཡོད་ན་རང་ངོས་ནས་གྲུབ་དགོས་པ་ཁྱོད་ཀྱིས་འདོད་པ་དེའི་ཕྱིར། དེས་ན་ལས་བཟང་ངན་ཡང་མེད། འབྲས་བུ་བདེ་སྡུག་མྱོང་བ་ཡང་མེད་ཅེས་སྨྲོས་ཤིག ཐ་སྙད་དུ་ལས་བསགས་པ་ཡིན་ཟེར་ན། ཁྱོད་ཀྱིས་ཐ་སྙད་དུ་རང་ངོས་ནས་གྲུབ་པའི་ལས་བསགས་དགོས་པར་འདོད་ལ། དེ་དགོས་ན་རང་ངོས་ནས་གྲུབ་པའི་ལས་དང་འབྲས་བུ་མི་འཐད་པ་དབུ་མའི་བསྟན་བཅོས་རྣམས་སུ་རྒྱས་པ་བཀག་ཟིན་པའི་ཕྱིར་ཏེ། རྩ་ཤེས་ལས། རང་སྡེ་འོག་མ་དག་གིས།

གལ་ཏེ་འདི་དག་ཀུན་སྟོང་ན།།

འབྱུང་བ་མེད་ཅིང་འཇིག་པ་མེད།།
འཕགས་པའི་བདེན་པ་བཞི་པོ་རྣམས།།

ཁྱོད་ལ་མེད་པར་ཐལ་བར་འགྱུར།།

ཞེས་ཚུར་རྩོད་པའི་ལན་དུ། གལ་ཏེ་འདི་ཀུན་མི་སྟོང་ན།། འབྱུང་བ་མེད་ཅིང་འཇིག་པ་མེད།། འཕགས་པའི་བདེན་པ་བཞི་པོ་རྣམས།། ཁྱོད་ལ་མེད་པར་ཐལ་བར་འགྱུར།། ཅེས་རང་བཞིན་གྱིས་མེད་པ་ལ་ལས་རྒྱུ་འབྲས་བདེན་བཞིའི་རྣམ་བཞག་སོགས་འཐད་པར་གསུངས་པའི་ཕྱིར།

      

ད་མི་ཕམ་རང་གིས་དགག་བྱ་རང་མཚན་གྱིས་གྲུབ་ངོས་འཛིན་པའི་ཚེ། ༼མི་ཕམ་གྱིས་༽དེའི་ཕྱིར་ཆོས་གང་ཡང་རུང་སྟེ་ཇི་ལྟར་སྣང་བའི་ངོ་བོའམ་དེའི་མཚན་ཉིད་དམ། སྡོད་ལུགས་ཐུན་མོང་མིན་པ་མེའི་ཚ་བའམ་ཆུའི་གཤེར་བ་ལྟ་བུ་སོགས་དེ་དོན་དམ་དཔྱོད་པས་དཔྱད་བཟོད་དུ་གྲུབ་ན་ངོ་བོའམ་རང་མཚན་དོན་དམ་དུ་གྲུབ་པར་འགྱུར་ལ། དཔྱད་བཟོད་མེད་ཀྱང་སྣང་བ་བསླུ་མེད་ནི་ཐ་སྙད་དུ་གྲུབ་ཚུལ་ལོ།། ཞེས་རང་མཚན་འདོད་ཚུལ་འདི་ལ་ཐལ་འགྱུར་ཉུང་ངུས་བཞད་གད་འདི་བྱ་སྟེ། ཁྱོད་ཀྱིས་ལྟར་ན། དོན་དམ་དཔྱད་པས་དཔྱད་ཚེ། མེའི་རང་བཞིན་ཚ་བ་དང་ཆུའི་རང་བཞིན་གཤེར་བ་སོགས་ཐ་སྙད་ཀྱི་གནས་ཚུལ་དེ་ག་རང་ཡོད་མེད་དཔྱོད་པ་ཡིན་པར་ཐལ། འདོད་པའི་ཕྱིར། འདོད་ན། དོན་དམ་དཔྱོད་བྱེད་ཀྱི་རིགས་པས་དགག་བྱ་འགོག་པ་ལ་དང་པོར་དགག་བྱ་དེ་ངོས་མ་ཟིན་པར་དགག་ལུགས་མེད་དེ། དཔེར་ན་མདའ་བརྡེག་པ་ལ་དང་པོ་འབེན་རྩད་གཅོད་པ་བཞིན་ཡིན་པའི་ཕྱིར། དེས་ན་དོན་དམ་དཔྱད་པའི་རིགས་ཤེས་ཀྱིས་དགག་བྱ་ངོས་འཛིན་པའི་ཚེ། དཔེར་ན་གཞི་མེ་ལྟ་བུ་ལ་མཚོན་ན། མེའི་རང་བཞིན་ཚ་བ་དེ་ཉིད་དགག་བྱར་འགྱུར་བའི་དེ་ལ་གཏན་ཚིགས་ཀྱང་འདི་ལྟར་འབྱུང་བ་ལས་འོས་མེད་དེ། མེའི་རང་བཞིན་ཚ་བ་ཆོས་ཅན། ཁྱོད་མེད་པར་ཐལ། ཁྱོད་དོན་དམ་དཔྱད་པས་དཔྱད་བཟོད་དུ་མ་གྲུབ་པའི་ཕྱིར། ཞེས་བཀོད་པའི་ཚེ་ན། དོན་དམ་དཔྱད་པས་དཔྱད་མི་བཟོད་པའི་རྟགས་ཀྱིས། མེའི་རང་བཞིན་ཚ་བ་གཏན་མེད་དུ་སྒྲུབ་པའི་གཏན་ཚིག་འགོད་པར་སྐབས་སུ་བབས་པའི་ཕྱིར་རྒོལ་ཡང་དག་དེས་སྒྲུབ་བྱ་ངེས་པའི་ཚེ་མེའི་རང་བཞིན་ཚ་བ་གཏན་མེད་ངེས་པའི་རྗེས་དཔག་སྐྱེ་དགོས་པར་འགྱུར་བ་དེ་འདོད་པའི་ཕྱིར། འདོད་ན། མེའི་རང་བཞིན་ཚ་བ་གཏན་མེད་སྒྲུབ་པའི་གཏན་ཚིགས་ཀྱང་ཡོད། དེ་གཏན་མེད་ངེས་པའི་རྗེས་དཔག་སྐྱེ་བ་ཡོད་ན། ཚ་བ་དང་རང་བཞིན་གཅིག་པའི་མེ་རང་ལའང་དེ་བཞིན་དུ་འགྱུར་ལ། དེས་ན་ཐ་སྙད་དུ་ཡོད་པའི་ཆོས་ཡིན་ན་དོན་དམ་དཔྱད་པའི་རིགས་ཤེས་ཀྱིས་དགག་བྱ་ཡིན་པས་ཁྱབ་པར་ཐལ། འདོད་པའི་ཕྱིར། འདོད་ན། སྐྱབས་གནས་དཀོན་མཆོག་དང་ལས་རྒྱུ་འབྲས་རྣམས་ལ་དཔྱད་པའི་ཚེ་ཡང་། སྐྱབས་གནས་དཀོན་མཆོག་དང་ལས་རྒྱུ་འབྲས་སྐྱེ་བ་སྔ་ཕྱི་རྣམས་ཆོས་ཅན། གཏན་མེད་ཡིན་ཏེ། དོན་དམ་དཔྱད་པས་དཔྱད་བཟོད་དུ་མ་གྲུབ་པའི་ཕྱིར་ཞེས་འགོད་དེ་དེས་སྒྲུབ་བྱ་ངེས་པའི་རྗེས་དཔག་བསྐྱེད། རྗེས་དཔག་དེས་དྲངས་པའི་སྒོམ་བྱུང་གི་རྟོགས་པ་སྐྱེ་བ་ན། དེ་རྒྱུད་ལྡན་གྱི་གང་ཟག་དེ་རྒྱང་འཕེན་པར་གྱུར་པ་ཡིན་པར་ཐལ། དཀོན་མཆོག་རྒྱུ་འབྲས་སྐྱེ་བ་སྔ་ཕྱི་སོགས་མེད་ཅེས་དམ་བཅའ་དེ་རྒྱང་འཕེན་པའི་གྲུབ་མཐའ་ཡིན་པའི་ཕྱིར། འདི་ཙམ་ཡང་ཞལ་གྱིས་བཞེས་པ་སྙིང་ཁམས་ཆེས་དྲག་པ་མ་ལགས་སམ། དེ་ལ་སྐྱོན་མེད་དེ། དོན་དམ་དཔྱད་པས་དཔྱད་ཚེ་དེ་ལྟར་ཡིན་ཀྱང་ཐ་སྙད་དུ་དེ་ལྟར་མ་ཡིན་པས་རྒྱང་འཕེན་པ་དང་ཁྱད་པར་ཡོད་ཟེར་ན། འོ་ན་ཐེག་ཆེན་འཕགས་པ་རྣམས་ཆོས་ཅན། རྗེས་ཐོབ་ཏུ་ནང་པ་སངས་རྒྱས་པ་ཡིན་ཀྱང་། མཉམ་བཞག་ཏུ་རྒྱང་འཕེན་པའི་གྲུབ་མཐའ་ལ་གནས་པ་ཡིན་ཞེས་དམ་བཅའ་དགོས་པར་ཐལ་བའི་ཐལ་བ་འདི་བཟློག་དཀའ་བས་སྔར་གྱི་ཉེས་པ་སོ་ན་གནས་སོ།།

      

འོ་ན་མེའི་རང་བཞིན་ཚ་བ་དེ་ལྟ་བུ་དེ་དོན་དམ་དཔྱད་པའི་ཚེ་མ་རྙེད་པ་ཡིན་གྱི་མེད་པ་རྙེད་པ་མ་ཡིན་པས་མི་སྐྱོན་ཟེར་ན། དེ་སྐད་དུ་སྨྲ་རུང་ཡང་། ཁྱོད་ཀྱིས་དོན་དམ་དཔྱད་པའི་དཔྱད་བཟོད་དུ་གྲུབ་ན་ངོ་བོའམ་རང་མཚན་དོན་དམ་པར་གྲུབ་པར་འགྱུར་ལ་ཞེས་དང་། དེའི་གོང་དུ་གང་གྲུབ་བམ་མ་གྲུབ་དཔྱད་རྒྱུའི་རང་མཚན་ནི་ཆོས་དེའི་ངོ་བོ་ལས་གཞན་དུ་མེད་ལ་ཞེས་སྨྲ་འདུག་པའི་ཕྱིར་ཐ་སྙད་པའི་ཆོས་ཀྱི་རང་བཞིན་ནམ་རང་མཚན་དགག་བྱ་དང་དེ་འཛིན་པའི་བློ་བདེན་འཛིན་ཡིན་འདུག་པའི་ཕྱིར་འགལ་བ་སྤོང་མི་ནུས་སོ།།

      

གཞན་ཡང་དེ་མི་འཐད་དེ། གང་གྲུབ་གང་མ་གྲུབ་དཔྱད་རྒྱུའི་དགག་བྱ་དེ་ཐ་སྙད་པའི་སྡོད་ལུགས་སམ་རང་མཚན་ནམ་རང་གི་ངོ་བོ་མེའི་ཚ་བ་ལྟ་བུ་ལ་བྱེད། དེ་དོན་དམ་དུ་དཔྱད་ཚེ་མེད་ཐ་སྙད་དུ་ཡོད་ཅེས་སྨྲ་ན། བདག་མེད་རྟོགས་པའི་ཤེས་རབ་ཀྱིས་དགག་བྱའི་བདག་དེ་དོན་དམ་པར་མེད་ཐ་སྙད་དུ་ཡོད་ཟེར་དགོས། དེ་ལྟར་ན་བདག་མེད་རྟོགས་པའི་ཡེ་ཤེ་དེ་དོན་དམ་དུ་བློ་དོན་མཐུན་ཡིན་ཀྱང་ཐ་སྙད་ལྟར་ན་ལོག་ཤེས་ཡིན། བདག་འཛིན་དེ་དོན་དམ་ལྟར་ན་བློ་ལོག་ཤེས་ཡིན་ཀྱང་། ཐ་སྙད་ལྟར་ན་བློ་དོན་མཐུན་ཡིན་ཟེར་དགོས་པར་འགྱུར་ཏེ། ཐ་སྙད་ལྟར་ན་དོན་དམ་རྟོགས་པའི་ཡེ་ཤེས་ཀྱིས་བདག་ཡོད་བཞིན་དུ་མེད་པར་བཟུང་བས་དེ་ལོག་ཤེས་སུ་སོང་། དོན་དམ་ལྟར་ན་ཐ་སྙད་རྟོགས་པའི་བློས་བདག་མེད་བཞིན་དུ་ཡོད་པར་འཛིན་པས་དེ་ལོག་ཤེས་སུ་སོང་འདུག་པའི་ཕྱིར། འདི་ལྟར་ཁྱོད་ཀྱིས་འཇུག་པའི་ལུང་དྲངས་པར། ཐ་སྙད་བདེན་པ་ཐབས་སུ་གྱུར་པ་དང་།། ཞེས་དང་། འཇུག་འགྲེལ་ལས། ཀུན་རྫོབ་ཀྱི་བདེན་པ་གང་ཡིན་པ་དེ་ནི་དོན་དམ་པའི་བདེན་པ་ལ་འཇུག་པར་བྱ་བའི་ཐབས་ཡིན་པའི་ཕྱིར་བདག་དང་གཞན་ལས་སྐྱེ་བ་སོགས་མ་དཔྱད་པར་འཇིག་རྟེན་ལུགས་ཀྱིས་ཁས་ལེན་པར་བྱེད་པ་ཡིན་ནོ།། ཞེས་པ་རྣམས་ཀྱང་མི་འཐད་པར་ཐལ། ཐ་སྙད་བདེན་པ་དོན་དམ་རྟོགས་བྱེད་ཀྱི་ཐབས་མ་ཡིན་པའི་ཕྱིར་ཏེ། དེ་དེའི་གེགས་སུ་གྱུར་འདུག་པའི་ཕྱིར་ཏེ། དེ་དེའི་གེགས་བྱེད་ཡིན་འདུག་པའི་ཕྱིར། རྟགས་གྲུབ་སྟེ། ཐ་སྙད་ནི་རང་མཚན་གྱིས་གྲུབ་པ་གང་ཞིག དོན་དམ་དཔྱད་པའི་རིགས་ཤེས་ཀྱིས་གང་གྲུབ་བམ་མ་གྲུབ་དཔྱད་རྒྱུའི་ཆོས་དེ་ཡིན་འདུག་པའི་ཕྱིར། རྟགས་གསལ་རིམ་བཞིན་ཁས།

      

ཡང་བློས་ཕར་བཏགས་ཙམ་གྱིས་གྲུབ་པར་འཇོག་པ་འདི་ནི་དོན་དམ་དཔྱོད་པ་སྔོན་དུ་སོང་བ་ལ་མ་ལྟོས་པར་ནམ་ཡང་གྲུབ་མི་ནུས་ཏེ། ནུས་ན་ཐམས་ཅད་ཡེ་ནས་དབུ་མ་པར་གྱུར་རོ།། ཞེས་པ་འདི་ཡང་མཚར་ཏེ། སྤྱིར་རྣལ་འབྱོར་པའི་བློ་ངོར་ཆོས་ཐམས་ཅད་རྟེན་འབྲེལ་རྟོག་བཏགས་ཙམ་དུ་འཆར་བ་ནི་སྟོང་ཉིད་རྟོགས་པ་སྔོན་སོང་གི་ལག་རྗེས་ཡིན་ཡང་། དེ་གང་ཟག་གི་བློ་ངོར་དུས་ཇི་ཙམ་ནས་ཤར་མི་ཤར་ཡིན་ལ། ཆོས་ཐམས་ཅད་རྟོག་པས་བཏགས་ཙམ་ཡིན་མིན་ནི་སྤྱིར་ཆོས་རྣམས་ཀྱི་ཐ་སྙད་འཇོག་ཚུལ་ཇི་ལྟ་བུ་ཡིན་མ་ཡིན་དཔྱད་པ་ཡིན་པས་དེ་གཉིས་ཕྱེ་ནས་མ་བཤད་ན་གོ་བ་ཕན་ཚུན་གཏན་ནས་འཛིངས་པར་འགྱུར་རོ།།

      

དེས་ན་སྟོང་ཉིད་རྟོགས་པ་སྔོན་དུ་མ་སོང་བར་ཆོས་ཐམས་ཅད་རྟེན་འབྲེལ་རྟོག་བཏགས་ཙམ་དུ་འཆར་མི་ནུས་ཀྱང་། སྤྱིར་ཆོས་ཐམས་ཅད་རྟོག་པས་བཏགས་ཙམ་ཡིན་ཞེས་གཏན་ལ་ཕབས་དགོས་པའི་ཕྱིར་ཏེ། ཆོས་ཐམས་ཅད་རྟོག་པས་བཏགས་ཙམ་ཡིན་པའི་ཕྱིར་ཏེ། དེ་མ་ཡིན་ན་སྟོང་ཉིད་རྟོགས་པ་སྔོན་སོང་གི་རྣལ་འབྱོར་པས་ཆོས་ཐམས་ཅད་རྟོག་པས་བཏགས་པ་ཙམ་དུ་འཆར་དུ་མི་རུང་བའི་ཕྱིར་ཏེ། རྣལ་འབྱོར་པ་དེས་ཆོས་ཐམས་ཅད་རྟོག་བཏགས་ཙམ་དུ་འཆར་བ་དེ་སྤྱིར་ཆོས་ཐམས་ཅད་རྟོག་པས་ཕར་བཏགས་ཙམ་ཡིན་པའི་སྒྲུབ་བྱེད་བླ་ན་མེད་པ་ཡིན་པའི་ཕྱིར། དེ་མ་ཡིན་ཏེ། རྣལ་འབྱོར་པ་དེ་ལ་དེ་ལྟར་དུ་གྲུབ་ཀྱང་། སྤྱིར་ཐ་སྙད་བཞག་ལུགས་འཇིག་རྟེན་རྒན་པོ་ལྟར་བློ་གནོད་མེད་ལ་སྣང་བའི་དབང་གིས་རང་མཚན་གྱིས་གྲུབ་པའི་ཐ་སྙད་དེ་མ་བཞག་ན་ཐ་སྙད་གཏན་ནས་མ་གྲུབ་པར་འགྱུར་བའི་ཕྱིར་མི་འཐད་ཅེས་སྨྲ་ན། དེ་ཡང་བཞད་གད་ཀྱི་གནས་ཏེ། ད་ཁྱོད་ལྟར་ན་འཕགས་པའི་རྗེས་ཐོབ་ཏུ་ཆོས་ཐམས་ཅད་སྣང་ལ་རང་བཞིན་མེད་པ་རྟེན་འབྲེལ་རྟོགས་བཏགས་ཙམ་དུ་འཆར་བ་ཡིན་ཀྱང་དེའི་སྒོ་ནས་ཐ་སྙད་རྣམས་བཞག་ཏུ་མི་རུང་། འཇིག་རྟེན་པ་རྣམས་ཀྱི་བློ་གནོད་མེད་ཀྱི་དབང་གིས་བཞག་པའི་ཐ་སྙད་རང་ངོས་ནས་གྲུབ་པ་དེ་ཐལ་འགྱུར་བའི་ཐ་སྙད་བཞག་ལུགས་ཆོག་ཡིན་ཞེས་སྨྲ་བ་འདི་ལགས་པས། དེས་ན་དོན་དམ་པ་ལ་འཕགས་པ་རྣམས་མ་འཁྲུལ་པ་བདེན་ཡང་། ཐ་སྙད་འཇོག་ཚུལ་ལ་འཕགས་པ་རྣམས་ཕྱིན་ཅི་ལོག་ཏུ་ཞུགས་པ་ཡིན་པར་ཐལ། འཕགས་པ་རྣམས་ཐ་སྙད་རང་མཚན་གྱིས་གྲུབ་བཞིན་དུ་རྟོག་བཏགས་ཙམ་ལས་རང་བཞིན་གྱིས་མ་གྲུབ་ཅེས་སྐུར་བ་འདེབས་པ་ཡིན་པའི་ཕྱིར། རྟགས་ཁས། འོ་ན་སངས་རྒྱས་འཕགས་པ་ཆོས་ཅན། བདེན་པ་གཉིས་ཀ་ཕྱིན་ཅི་མ་ལོག་པ་མཁྱེན་པ་མ་ཡིན་པར་ཐལ། ཐ་སྙད་བདེན་པ་ཕྱིན་ཅི་ལོག་ཏུ་མཁྱེན་པའི་ཕྱིར་ཏེ། ཁྱོད་ཀྱིས་ཐ་སྙད་འཇོག་ཚུལ་འཇིག་རྟེན་རྒན་པོ་ལྟར་མི་བྱེད་པའི་ཕྱིར། རྟགས་གསལ་རིམ་བཞིན་འོས་མེད་ཀྱིས་ཁས་སོ།།

      

སྤྱིར་ཐལ་འགྱུར་བའི་རྟོག་བཏགས་ཙམ་ཞེས་པའི་རྟོག་པ་ལ་གནོད་པ་ཡོད་མེད་གང་ཡིན་ཡང་རུང་། བྱེ་བྲག་བདེན་པ་གཉིས་ཀྱི་ཡ་གྱལ་ཀུན་རྫོབ་བདེན་པ་ལ་ཡང་ལོག་གཉིས་སུ་མི་ཕྱེ་བའི་ཕྱིར་ཏེ། ཀུན་རྫོབ་བདེན་པ་ཡིན་ན་ལོག་པའི་ཀུན་རྫོབ་ཡིན་དགོས་པའི་ཕྱིར་ཏེ། ཡང་དག་ཀུན་རྫོབ་མེད་པའི་ཕྱིར་ཏེ། ཡང་དག་ཡིན་ན་ཀུན་རྫོབ་མ་ཡིན་དགོས་པའི་ཕྱིར། སྤྱིར་ཀུན་རྫོབ་བདེན་པ་ལ་ཡང་ལོག་གཉིས་སུ་མི་ཕྱེ་ཡང་། འཇིག་རྟེན་ཤེས་ངོ་ལ་ལྟོས་ཏེ་ཀུན་རྫོབ་བདེན་པ་ལ་ཡང་ལོག་གཉིས་སུ་ཕྱེ་བ་ཁྱོད་རང་ལུང་ཚུར་དྲངས་པ་དེས་སྒྲུབ་པར་བྱ་སྟེ། འཇུག་པ་ལས།

གནོད་པ་མེད་པའི་དབང་པོ་དྲུག་རྣམས་ཀྱིས།།

གཟུང་བ་གང་ཞིག་འཇིག་རྟེན་གྱིས་རྟོག་ཏེ།།
འཇིག་རྟེན་ཉིད་ལས་བདེན་ཡིན་ལྷག་མ་ནི།།

འཇིག་རྟེན་ཉིད་ལས་ལོག་པར་རྣམ་པར་བཞག།

ཅེས་གསུངས་པ་འདི་ཁྱོད་ཀྱིས་བློ་གནོད་མེད་ལ་སྣང་བའི་དབང་གིས་བཞག་པའི་རང་ངོས་ནས་གྲུབ་པ་མ་བརྟག་མ་དཔྱད་པར་འཇིག་རྟེན་རྒན་པོ་ལ་སྣང་བ་ལྟར་ཐ་སྙད་བྱེད་པའི་སྒྲུབ་བྱེད་དུ་གོ་ན། དེ་མི་འཐད་པའི་ཕྱིར་ཏེ། ལུང་དེས་བློ་གནོད་མེད་ལ་སྣང་མི་སྣང་གི་སྒོ་ནས་ཡང་ལོག་ཕྱེ་བ་དེ་འཇིག་རྟེན་ཤེས་ངོ་ལ་ལྟོས་ནས་ཀུན་རྫོབ་བདེན་པ་ལ་ཡང་ལོག་བཞག་ལུགས་ཡིན་གྱི། སྤྱིར་ཀུན་རྫོབ་བདེན་པ་བཞག་ལུགས་མ་ཡིན་པའི་ཕྱིར་ཏེ། དེའི་ཚིག་ཟུར་དུ།

འཇིག་རྟེན་ཉིད་ལས་བདེན་ཡིན་ལྷག་མ་ནི།།
འཇིག་རྟེན་ཉིད་ལས་ལོག་པ་རྣམ་པར་བཞག།

ཅེས་འཇིག་རྟེན་ཉིད་ཀྱིས་ཁྱད་པར་སྦྱར་བ་དེ་ལ་དགོས་པ་ཞིག་ཡོད་པའི་ཕྱིར་ཏེ། དེའི་གོང་དེ་མ་ཐག་ནས། མཐོང་བ་རྫུན་པ་རྣམ་པ་གཉིས་འདོད་དེ། ཞེས་པ་ནས། དབང་པོ་ལེགས་གྱུར་ཤེས་ལྟོས་ལོག་པར་འདོད།། ཅེས་གསུངས་པའི་ཕྱིར། འདིའི་འཇིག་རྟེན་ཉིད་ལས་ཞེས་པ་དང་། དབང་པོ་ལེགས་གྱུར་ཤེས་ལྟོས་ཞེས། དབང་པོ་ལེགས་གྱུར་ཤེས་པ་ལ་ལྟོས་པར་འདོད་པ་བཞག་པའི་ཕྱིར། དེས་ན་ཐལ་འགྱུར་བའི་རྟོག་པས་བཏགས་ཙམ་ཞེས་པའི་རྟོག་པ་དེ་འཇིག་རྟེན་ཤེས་ངོ་ལ་ལྟོས་ཏེ་ཡང་དག་དང་ཡང་དག་མ་ཡིན་པ་གཉིས་སུ་བྱེད་ཀྱང་། སྤྱིར་ཐ་སྙད་འཇོག་བྱེད་ཀྱི་རྟོག་པ་ལ་ཡང་ལོག་གཉིས་སུ་མི་ཕྱེ་བའི་ཕྱིར་རོ།།

      

ད་རུང་གལ་ཏེ་འཇིག་རྟེན་ཤེས་ངོ་ལ་ལྟོས་ཏེ་ཡང་ལོག་གཉིས་ཞེས་རྣམ་བཞག་ཟུར་པ་བྱེད་མི་དགོས། སྤྱིར་ཀུན་རྫོབ་བདེན་པ་འཇལ་བྱེད་ཀྱི་ཚད་མ་ལ་ཡང་ལོག་གཉིས་སུ་ཕྱེ་བ་ཡིན་ཟེར་ནས་གལ་བཙུག་ན། འོ་ན་འཇུག་པ་ལས།

ཡང་དག་མཐོང་ཡུལ་གང་དེ་དེ་ཉིད་དེ།།
མཐོང་བ་རྫུན་པ་ཀུན་རྫོབ་བདེན་པར་གསུང།།

ཞེས་པའི་གཞུང་འདི་མི་འཐད་པར་ཐལ། ཡང་དག་པའི་ཤེས་པས་མཐོང་ཡུལ་དོན་དམ་པ་དང་ལོག་པའམ་རྫུན་པའི་མཐོང་ཡུལ་ཀུན་རྫོབ་བདེན་པར་མི་འཐད་པའི་ཕྱིར་ཏེ། ཡང་དག་པའི་མཐོང་ཡུལ་ཡིན་ན་དོན་དམ་བདེན་པ་ཡིན་པས་མ་ཁྱབ་པའི་ཕྱིར། རྟགས་ཁས། འདོད་ན། ཀུན་རྫོབ་བདེན་པ་ལ་གནས་ཚུལ་དང་སྣང་ཚུལ་མཐུན་པའི་ཆོས་ཤིག་དང་། དེ་མ་ཡིན་པ་གཉིས་ཡོད་པར་ཐལ། འདོད་པའི་ཕྱིར། ཡང་བློ་གནོད་མེད་ལ་སྣང་བའི་དངོས་པོ་རྣམས་ལ་མ་བརྟག་མ་དཔྱད་པར་ཇི་ལྟར་སྣང་བ་ལྟར་ཐ་སྙད་བྱེད་པ་སྟེ་འཇིག་རྟེན་རྒན་པོའི་རྗེས་སུ་མཐུན་པར་ཁས་ལེན་གྱི་བརྟག་ཅིང་དཔྱད་ན་འཇིག་རྟེན་གྲགས་པའི་རྣམ་བཞག་རྣམས་འཇིག་པར་འགྱུར་ཏེ། འཇུག་པའི་༼མི་ཕམ་གྱིས་༽དེ་ནི་དེ་ཉིད་དུའམ་ཞེས་སོགས་དྲངས་ནས། དེས་ན་ཐ་སྙད་ཚད་མས་གྲུབ་ཚུལ་ཡང་མ་དཔྱད་མ་བརྟག་པའི་འཇིག་རྟེན་གྱི་ངོར་གྲུབ་ཀྱི་བརྟག་ཅིང་དཔྱད་ན་གྲུབ་པར་མི་འགྱུར་རོ།། ཞེས་པ་འདི་ལ་བཞད་གད་ཅིག་བྱ་སྟེ། ཁྱོད་ཀྱིས་ཆོས་རྣམས་ལ་མ་དཔྱད་པར་འཇིག་རྟེན་རྒན་པོའི་རྗེས་མཐུན་དུ་ཐ་སྙད་བྱེད་ཟེར་ན། དེ་ལ་འདི་འདྲི་བར་བྱ་སྟེ། འཇིག་རྟེན་རྒན་པོས་འདི་ནི་བུམ་པའོ་འདི་ནི་ཀ་བའོ་ཞེས་པ་ཙམ་གྱི་ཐ་སྙད་བྱེད་པ་འདི་ཙམ་གྱིས་རྗེས་སུ་མཐུན་པ་ཐལ་འགྱུར་བས་ཀྱང་ཐ་སྙད་བྱེད་ཟེར་རམ། འཇིག་རྟེན་རྒན་པོས་འདི་ནི་བུམ་པའོ་འདི་ནི་ཀ་བའོ་ཞེས་བློ་ལྷན་སྐྱེས་ལ་སྣང་ཙམ་ནས་རང་ངོས་ནས་གྲུབ་པར་སྣང་ཞིང་དེའི་རྗེས་སུ་ཞེན་པ་ཡིན་པས་ཞེན་ཚུལ་དེ་ལྟར་དུ་ཐ་སྙད་བྱེད་གང་ཡིན།

      

དང་པོ་ལྟར་ན་འཐད་པ་ཡིན་ཀྱང་ཁྱོད་ཀྱིས་ཡོད་ན་རང་མཚན་ནམ་རང་ངོས་ནས་ཡོད་པར་ཁས་ལེན་པའི་ཕྱིར་གཉིས་པ་ལྟར་ཁས་ལེན་པར་ངེས་ཏེ། ཐ་སྙད་ཚད་མས་གྲུབ་ཚུལ་ཡང་མ་བརྟག་མ་དཔྱད་པས་གྲུབ་ཀྱི་བརྟག་ཅིང་དཔྱད་ན་གང་དུའང་གྲུབ་པར་མི་འགྱུར་རོ་ཞེས་སྨྲ་ན། འཇིག་རྟེན་གྱི་ཐ་སྙད་ལ་དོན་དམ་དཔྱོད་བྱེད་ཀྱིས་དཔྱད་ནས་གང་དུའང་མ་གྲུབ་པར་གྱུར་སོང་ན། དོན་དམ་དཔྱད་པ་དེས་ཐ་སྙད་ཀྱི་ཆོས་རྣམས་ཡོད་བཞིན་དུ་མེད་པར་བྱས་པ་ཡིན་པས་འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བ་བཟློག་ཏུ་མེད་པ་དང་། སྟོང་ཉིད་ལ་མཉམ་པར་བཞག་ཚེ་ཐ་སྙད་ཀྱི་ཆོས་ཀུན་རི་བོང་གི་རྭ་དང་ཡིན་ཁྱབ་མཉམ་དུ་གཏན་ལ་ཕབས་ནས་མཉམ་པར་བཞག་པར་ཐལ་བ་དང་། ཐ་སྙད་ཀྱི་ཆོས་ཀུན་དོན་དམ་དཔྱོད་བྱེད་ཀྱི་རིགས་པའི་དགག་བྱ་ཡིན་པར་ཐལ། དོན་དམ་དཔྱོད་བྱེད་ཀྱི་རིགས་པས་ཁྱོད་དགག་ནས་ཁྱོད་མེད་པར་གཏན་ལ་ཕབས་ཏེ་དེ་ལ་རྗེས་སུ་དཔག་པའི་ངེས་ཤེས་འདྲེན་པར་བྱེད་པའི་ཕྱིར། ཁྱབ་པ་ཁས། འདོད་ན། ཐ་སྙད་ཀྱི་ཆོས་དཀོན་མཆོག་གསུམ་ལ་སྐྱབས་འགྲོ་དང་དད་པ་དང་ངེས་འབྱུང་དང་བྱང་ཆུབ་ཀྱི་སེམས་སོགས་འཁོར་བར་འཁྱམས་བྱེད་ཀྱི་བདག་འཛིན་ཡིན་པར་ཐལ། གང་བསྒོམ་བྱའི་ཆོས་དེ་རྣམས་ལ་དམིགས་པའི་བློ་རྣམས་དང་། དོན་དམ་དཔྱད་པའི་ཤེས་རབ་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་སོང་བའི་ཕྱིར། ཁྱབ་པ་ཁས་ལེན་གྱི་སྟེང་དུ་དངོས།

      

འདི་ལ་ད་རུང་གསལ་བ་ཞིག་མ་བཤད་ན་རིགས་པའི་ལམ་ལ་མ་བྱང་བ་རྣམས་ཀྱིས་རིགས་པའི་འཕུལ་མཚམས་མི་ཤེས་ནས་མགོ་རྨོངས་པར་འགྱུར་བས་ཅུང་སྤྲོ་ན། སྐྱབས་འགྲོ་དང་ལས་འབྲས། ཐར་པ་དང་ཐམས་ཅད་མཁྱེན་པ་སོགས་འཁོར་བར་འཁྱམས་བྱེད་ཀྱི་རྩ་བ་བདག་འཛིན་ཉིད་དུ་ཐལ་ལོ།།

      

འདི་ཁྱོད་རང་གི་ཁས་ལེན་སྔ་མའི་ཤུགས་ཀྱིས་འདོད་པ་མེད་བཞིན་དུ་ཁས་མི་ལེན་འོས་མེད་དུ་གྱུར་བ་ཡིན་ཏེ། ཁྱོད་ཀྱི་ཐལ་འགྱུར་བའི་ལུགས་ལ་རང་མཚན་གྱིས་གྲུབ་པ་དོན་དམ་དཔྱད་པའི་རིགས་ཤེས་ཀྱིས་དགག་བྱ་ཡིན་པར་ནི་ཁས་བླངས། གང་གྲུབ་མ་གྲུབ་དཔྱད་རྒྱུའི་རང་མཚན་དེ་ཡང་མེའི་རང་བཞིན་ཚ་བ་དང་ཆུའི་རང་བཞིན་གཤེར་བ་སོགས་ཆོས་གང་དང་གང་ཡིན་ཀྱང་དེ་དང་དེའི་ངོ་བོའམ་རང་གི་མཚན་ཉིད་འཛིན་པར་འདོད། དེ་འདོད་ན་ཆོས་ཐམས་ཅད་ལ་རིགས་པ་དེ་བཞིན་སྦྱར་བས་སྐྱབས་དཀོན་མཆོག་སོགས་དགག་བྱའི་བདག་དང་། སྐྱབས་འགྲོ་སོགས་འཁོར་བར་འཁྱམས་བྱེད་ཀྱི་རྩ་བ་བདག་འཛིན་དུ་ཐལ་བར་འགྱུར་ཏེ་བདག་མེད་རྟོགས་པའི་ཤེས་རབ་དང་དམིགས་པ་གཅིག་ལ་དམིགས་ནས་འཛིན་སྟངས་དངོས་འགལ་དུ་སོང་བ་ཞིག་ལ་བདག་འཛིན་དུ་འཇོག་དགོས་པ་གང་ཞིག་བདག་མེད་རྟོགས་པའི་ཤེས་རབ་དང་སྐྱབས་འགྲོ་སོགས་དམིགས་པ་ གཅིག་ལ་དམིགས་ནས་འཛིན་སྟངས་དངོས་འགལ་དུ་སོང་འདུག་པའི་ཕྱིར།

      

ཡང་གལ་ཏེ་གར་གྲུབ་བམ་མ་གྲུབ་དཔྱད་རྒྱུའི་རང་མཚན་ཆོས་གང་གི་ངོ་བོ་འམ་རང་མཚན་མེའི་ཚ་བ་ལྟ་བུ་དེ་ལ་བྱེད་ཀྱང་མེའི་རང་བཞིན་ཚ་བ་ཡིན་པ་འཛིན་པ་ཙམ་བདེན་འཛིན་ནམ་རང་མཚན་གྱིས་གྲུབ་འཛིན་མི་འཇོག མེའི་རང་བཞིན་ཚ་བ་དོན་དམ་དཔྱད་པས་དཔྱད་བཟོད་དུ་གྲུབ་པར་འཛིན་པ་ལ་བདག་འཛིན་དུ་བཞག་རྒྱུ་ཡིན་པས་མི་སྐྱོན་སྙམ་ན། དེའང་རིགས་པ་མཚུངས་པས་རྩོད་པ་སྤོང་མི་ནུས་ཏེ། རིགས་ཤེས་ཀྱིས་སྤྱད་བཟོད་དུ་གྲུབ་མ་གྲུབ་ཅེས་དཔྱད་གཞི་ནི་ཆོས་དེ་དང་དེའི་ངོ་བོའམ་མཚན་ཉིད་ནི་གཏན་ནས་གྲུབ་པར་མེད་དེ་མེད་པའི་རྒྱུ་མཚན་རིགས་ཤེས་ཀྱིས་དཔྱད་མི་བཟོད་པ་དེའི་དབང་གིས་ཡིན། དེས་ན་ཡོད་པ་ཡིན་ན་རིགས་པས་དཔྱད་བཟོད་དུ་གྲུབ་དགོས་པ་གང་ཞིག་རིགས་པས་དཔྱད་བཟོད་དུ་གྲུབ་པའི་ཆོས་ཤེས་བྱ་ལ་མི་སྲིད་པའི་ཕྱིར་རྟགས་ཀྱི་ཁྱབ་པ་སྔར་བཞིན་ཁས་བླངས་དགོས་སོ།།

      

དེས་ན་ཆགས་སོགས་ཉོན་མོངས་པའི་ཕྱོགས་དང་། སྐྱབས་འགྲོ་ལས་འབྲས་སོགས་རྣམ་བྱང་ཕྱོག་ཀྱི་ཆོས་ཐམས་ཅད་རིགས་པས་དཔྱད་བཟོད་པ་ནི་རྡུལ་ཙམ་ཡང་མེད། རིགས་པས་དཔྱད་མ་བཟོད་ན་ནི་རང་གི་མཚན་ཉིད་ཀྱིས་མ་གྲུབ་དགོས། ཁྱོད་ཀྱིས་དམ་བཅའ་ལ་གང་ཡོད་ན་ནི་རང་ངོས་ནས་སམ་རང་གི་མཚན་ཉིད་ཀྱིས་གྲུབ་དགོས། རང་གི་མཚན་ཉིད་ཀྱིས་མ་གྲུབ་ན་ནི་གཏན་མེད་ཡིན་དགོས་པའི་ཕྱིར་ཆོས་ཅི་ཡང་མེད་ཅེས་སྐུར་འདེབས་ཀྱི་ལྟ་བའི་གཡང་ས་ཆེན་པོ་ལ་རྒྱ་ནག་གི་མཁན་པོ་ཧྭ་ཤང་དང་ལྷན་ཅིག་བྱོན་པར་མཛོད་ཅིག

      

ཡང་ཁྱོད་ཀྱིས་༼མི་ཕམ་གྱིས་༽དོན་དམ་དཔྱད་པས་དཔྱད་ཚེ་ཡུལ་རང་ངོས་ནས་གྲུབ་པ་རྡུལ་ཙམ་རྙེད་ནའང་དེ་བདེན་གྲུབ་ཏུ་འགྱུར་མོད། ཐ་སྙད་དཔྱད་པའི་ངོར་ཡུལ་རང་ངོས་ནས་གྲུབ་པ་སྣང་ཡང་དེས་ཡུལ་དེ་བདེན་གྲུབ་ཏུ་ག་ལ་འགྱུར་ཏེ། ཐ་སྙད་ཚད་མས་གྲུབ་པ་འཐད་དགོས་ལ། དེ་ཐ་སྙད་དཔྱོད་བྱེད་ཀྱི་ངོར་ཡང་མ་གྲུབ་ན་གང་དུའང་གྲུབ་པར་མི་འགྱུར་རོ།། དེའི་ཕྱིར་ཆོས་གང་ཡང་རུང་སྟེ་ཇི་ལྟར་སྣང་བའི་ངོ་བོའམ་དེའི་མཚན་ཉིད་སྡོད་ལུགས་ཐུན་མོང་མ་ཡིན་པ་མེའི་ཚ་བ་ཆུའི་གཤེར་བ་སོགས་ལྟ་བུ་དེ་དོན་དམ་དཔྱད་པས་དཔྱད་བཟོད་དུ་གྲུབ་ན་ངོ་བོའམ་རང་མཚན་དོན་དམ་པར་གྲུབ་པར་འགྱུར་ལ། དཔྱད་བཟོད་མེད་ཀྱང་སྣང་བ་བསླུ་མེད་ནི་ཐ་སྙད་དུ་གྲུབ་ཚུལ་ལོ།། ཞེས་པ་འདི་རྣམས་ཡུལ་དང་ཡུལ་ཅན་གྱི་སྟེང་གི་དགག་བྱ་གཉིས་ཀྱི་དབྱེ་བ་མ་ཕྱེད་པར་རང་མཚན་ཞེས་བརྗོད་པ་ཡུལ་གྱི་ངོ་བོ་ལ་གོ་ནས་ཡུལ་རང་མཚན་གྱིས་མ་གྲུབ་ཅེས་བརྗོད་པ་ན། ཡུལ་བུམ་པ་ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པའི་ངོ་བོའམ་རང་མཚན་དེ་མ་གྲུབ་ཟེར་བ་ཡིན་སྙམ་ན་ཧ་ཅང་འཁྲུལ་བའི་མུན་པ་ཆེན་པོར་འཁྱམས་ནས་འཁྲུལ་བའི་རང་མཚང་ངོམས་པའི་ཅ་ཅོ་ཆེན་པོ་སྒྲོགས་པར་ཟད་དེ། ལུགས་འདིར་སློབ་དཔོན་ཀླུ་གྲུབ་ཡབ་སྲས་སོགས་ཀྱི་གཞུང་ལས་ཡུལ་རང་མཚན་གྱིས་མ་གྲུབ་གསུངས་པ་དང་། རང་ངོས་ནས་མ་གྲུབ་གསུངས་པ་ནི་ཡུལ་བུམ་པ་ཀ་བ་སོགས་རང་འཛིན་གྱི་ཚད་མས་གྲུབ་པ་གཞིར་བཅས་ནས། ཚད་མས་གྲུབ་ལུགས་ལ་རྟོག་བཏགས་ཙམ་དུ་ཚད་མས་གྲུབ་བམ། གཞན་ལ་རག་མ་ལས་པ་ཡུལ་རང་སྟེང་ནས་ཚུགས་ཐུབ་ཏུ་གྲུབ་པ་གང་ཡིན་བརྟགས་པ་ན། རྟོགས་པས་ཕར་བཏགས་ཙམ་ལས་ཡུལ་རང་གྱི་ངོས་ནས་ཚུར་གཞན་ལ་རག་མ་ལས་པ་ཚུགས་ཐུབ་ཏུ་གྲུབ་པར་མེད་པ་དེ་ཡུལ་བུམ་པ་ཀ་བ་སོགས་ཀྱི་གནས་ལུགས་སམ་སྡོད་ལུགས་ཡིན་ལ། དེ་ལྟར་དུ་གྲུབ་པ་ཞིག་བྱུང་ན་དེ་རང་མཚན་གྱིས་གྲུབ་པའི་དོན་ཡིན། དེ་བློ་ལྷན་སྐྱེས་ཀྱི་ཞེན་ཡུལ་དགག་བྱའི་བདག་དེ་ཡིན། དེ་འདྲའི་རང་མཚན་གྱིས་གྲུབ་པ་དེ་གཏན་ནས་ཡོད་པ་མ་ཡིན་ཏེ། ཡོད་ན་དགག་ཀྱང་མི་ནུས་པའི་ཕྱིར། འདིའི་རང་མཚན་གྱིས་གྲུབ་པ་ཞེས་པ་དེ་ཤེས་བྱ་ལ་གཏན་ནས་མི་སྲིད་པའི་ཆོས་ཤིག་དགོས་པ་ལ། ཁྱོད་ཀྱི་རང་མཚན་ངོས་འཛིན་རྒྱུའི་རང་མཚན་དེ་མེའི་རང་བཞིན་ཚ་བ་ལྟ་བུའི་ཐ་སྙད་པའི་ངོ་བོ་དེ་ཀ་རང་ལ་ངོས་འཛིན་པས་དེ་དོན་དམ་ལ་དཔྱད་ཚེ་རིགས་ཤེས་ཀྱིས་དགག་བྱ་ཡིན་དགོས། དེ་ཡིན་ན་དེ་འདྲའི་དགག་བྱ་དེ་ཤེས་བྱ་ལ་སྲིད་པའི་དགག་བྱ་ཡིན་འདུག་པས། དེ་ལྟར་ན་གཞི་བུམ་པ་ལྟ་བུ་དེའི་མཚན་ཉིད་ལྟོ་ལྡིར་ཞབས་ཞུམ་ཆུ་སྐྱོར་གྱི་དོན་བྱེད་ནུས་པ་དེ་ལ་དོན་དམ་དཔྱད་པས་དཔྱད་པ་བཏང་ལུགས་ཅི་འདྲ་ཡིན་ཞེས་དྲིའོ།།

      

དེ་ལ་ཁྱེད་ཅག་བོད་སྔ་རབས་པ་དག་གིས་དགག་གཞི་དང་དགག་བྱའི་དབྱེ་བ་མ་ཕྱེད་པའི་གཏམ་རྭ་ཅོ་འདྲ་བའི་གྱོང་ངེ་བ་འདི་འོང་ངེས་ཏེ། དེ་ལ་དཔྱད་ལུགས་གཞི་བུམ་པ་ཟེར་བ་དེ་གང་ལ་ཟེར་བ་ཡིན། ལྟོ་ལྡིར་བའང་བུམ་པ་མ་ཡིན། ཞབས་ཞུམ་པའང་བུམ་པ་མ་ཡིན། ཆུ་སྐྱོར་གྱི་དོན་བྱེད་ནུས་པའང་བུམ་པ་མ་ཡིན། དེ་བཞིན་དུ་བུམ་པ་རྡུལ་ཕྲན་དུ་བཏང་ཚེ་བུམ་པའི་རྡུལ་ཕྲ་མོ་རེ་རེ་ནས་ཀྱང་བུམ་པ་མ་ཡིན། དེས་ན་བུམ་པ་ནི་གཏན་ནས་མ་གྲུབ་སྟེ་རིགས་པས་དཔྱད་བཟོད་དུ་མ་གྲུབ་པའི་ཕྱིར་སྙམ་དུ་ཟེར་བ་ངེས་པས། དེ་ལྟར་ན་ཁྱོད་ཅག་རྣམས་ཀྱི་བུམ་པའི་སྟེང་གི་དགག་བྱའི་བདག་གང་དུ་སོང་དཔྱད་རྒྱུ་དེ་ཕར་བསྐྱུར་ནས། བུམ་པ་ཁོ་རང་ཡོད་མེད་དཔྱད་ནས་དེ་རིགས་ཤེས་ཀྱིས་དཔྱད་མ་བཟོད་ནས་བུམ་པ་མ་གྲུབ་པ་དེ་བུམ་པའི་གནས་ལུགས་སུ་གོ་འདུག་པའི་ཕྱིར། དེས་ན་བུམ་པས་དག་པའི་ས་ཕྱོགས་དེའང་བུམ་པའི་གནས་ལུགས་ཡིན་པར་ཐལ། གཞི་དེར་བུམ་པ་རིགས་པས་དཔྱད་ནས་དཔྱད་བཟོད་དུ་མ་གྲུབ་པའི་ཕྱིར། གཞན་ཡང་གཟུགས་མེད་ཁམས་དེ་ཆོས་ཅན། གཟུགས་ཀྱི་གནས་ལུགས་ཡིན་པར་ཐལ། གཞི་དེར་གཟུགས་རིགས་པས་དཔྱད་ན་དཔྱད་བཟོད་དུ་མ་གྲུབ་པའི་ཕྱིར། ཁྱབ་རྟགས་ཁས། དེ་བཞིན་དུ་གནོད་བྱེད་ཀྱི་རིགས་པ་དེ་ལྟ་བུས་འཕུལ་ཚེ། དཀོན་མཆོག་གསུམ་མེད་པ་དཀོན་མཆོག་གསུམ་གྱི་གནས་ལུགས། ལས་རྒྱུ་འབྲས་མེད་པ་ལས་འབྲས་ཀྱི་གནས་ལུགས་སུ་འགྱུར་བ་སོགས་རྟེན་འབྲེལ་མཐའ་དག་ལ་སྐུར་བ་འདེབས་པའི་ཆད་ལྟའི་འདམ་རྫབ་ཆེན་པོ་ལས་ནམ་ཡང་ལྡང་བའི་གོ་སྐབས་མེད་པར་འགྱུར་རོ།།

      

ཡང་འདི་སྐད་ཅེས་བྱ་སྟེ། ཁྱོད་ཀྱིས་དོན་དམ་དཔྱད་པས་དཔྱད་ཚེ་ཡུལ་རང་ངོས་ནས་གྲུབ་ན་བདེན་གྲུབ་ཏུ་འགྱུར། ཐ་སྙད་དཔྱད་པའི་ཚེ་ཡུལ་རང་ངོས་ནས་གྲུབ་དགོས། མ་གྲུབ་ན་གཏན་མེད་དུ་འགྱུར་ཟིན་པ་འདི་དག་བདེན་པ་གཉིས་གཅིག་གིས་གཅིག་བཀག་ནས་བདེན་གཉིས་མི་འགལ་བར་གཅིག་གྲོགས་སུ་གཅིག་འགྲོ་བའི་ཤིང་རྟ་ཆེན་པོ་རྣམས་ཀྱིས་ལུགས་བཟང་ལས་ཕྱི་རོལ་ཏུ་གྱུར་བའི་གཏམ་ཡང་དག་སྟེ། སྤྱིར་དོན་དམ་བདེན་པ་རྣམ་པར་བཞག་པའི་ཚེ་དོན་དམ་ལ་དཔྱད་པའི་རིགས་ཤེས་དབང་བཙན། ཐ་སྙད་བདེན་པ་རྣམ་པར་བཞག་པའི་ཚེ་ཐ་སྙད་པའི་བློ་དབང་བཙན་པ་ཡིན་ཀྱང་། དོན་དམ་དཔྱད་པའི་རིགས་ཤེས་ཀྱིས་དོན་དམ་ལ་དཔྱད་ཚེ་ཐ་སྙད་པའི་ཆོས་དེ་དགག་མི་དགོས་པར་དོན་དམ་རྣམ་པར་འཇོག་པས་ཆོག། ཐ་སྙད་ལ་དཔྱད་ཚེ་དོན་དམ་པའི་གནས་ལུགས་དགག་མི་དགོས་པར་ཐ་སྙད་རྟོག་བཏགས་ཙམ་དུ་བཞག་པས་ཆོག་པ་ཞིག་དགོས་ཤིང་། དེ་བྱུང་ན་བདེན་གཉིས་མི་འགལ་བ་ཡིན་ཀྱང་། ཁྱོད་ལྟར་ན་དོན་དམ་དཔྱད་ཚེ་ཐ་སྙད་འགོག། ཐ་སྙད་དཔྱད་ཚེ་དོན་དམ་འགོག་པ་འདི་བྱུང་སྟེ། ཐ་སྙད་དུ་གཞི་བུམ་པ་ལྟ་བུ་ཞིག་རང་མཚན་གྱིས་གྲུབ་ནས་ཡོད་པ་དེ་དོན་དམ་ལ་དཔྱད་པའི་རིགས་ཤེས་ཀྱིས་དགག་བྱ་བྱེད། རང་མཚན་གྱིས་གྲུབ་པའི་དོན་ཡང་བུམ་པ་རང་གི་ཐ་སྙད་སྡོད་ལུགས་ལྟོ་ལྡིར་བ་སོགས་ཀྱི་མཚན་ཉིད་དེ་ག་རང་ལ་དཔྱད་ནས་དེ་དགག་ན་བུམ་པའི་གནས་ལུགས་ཀྱི་དོན་ལ་དཔྱད་ཚེ་བུམ་པ་ཁོ་རང་གི་ཐ་སྙད་པའི་སྡོད་ལུགས་དེ་ཡོད་མེད་དཔྱད་ནས་མེད་པ་ཞིག་གཏན་ལ་ཕབ་འདུག་པས། དེས་ན་བུམ་པའི་གནས་ལུགས་ཀྱི་དོན་ལ་དཔྱད་པས་དཔྱད་པ་དེས་བུམ་པ་གཏན་ནས་མེད་པར་བྱས་པའི་ཕྱིར། དེ་བཞིན་དུ་ཆོས་ཐམས་ཅད་ཀྱི་གནས་ལུགས་དོན་དམ་པ་གཏན་ལ་ཕབ་པའི་དོན་དམ་དཔྱད་པའི་རིགས་ཤེས་དེས་ཆོས་ཐམས་ཅད་ཀྱི་ཐ་སྙད་རྣམ་པར་བཞག་པ་དེ་དགག་ནས་མེད་པ་བྱ་བར་འདུག་པའི་ཕྱིར་དོན་དམ་པའི་དཔྱད་པ་ཐ་སྙད་འཇིག་པའི་འཇིག་རྒྱུར་སོང་བ་སོགས་སྔར་སྨྲས་པ་ལྟར་དང་། བུམ་པ་ལྟ་བུ་ཐ་སྙད་པའི་བློས་རྣམ་པར་འཇོག་ཚེ་རང་མཚན་གྱིས་གྲུབ་པར་རྣམ་པར་འཇོག་ན་དོན་དམ་དཔྱད་པས་རང་མཚན་གྱིས་མ་གྲུབ་པར་རྣམ་པར་འཇོག་པའི་གོ་སྐབས་དེ་གཏན་ནས་བཅོམ་པར་བྱས་འདུག་པའི་ཕྱིར་བདེན་གཉིས་འགལ་འདུ་ཅན་གྱི་གྲུབ་མཐའ་འཆའ་བའི་དབུ་མ་པ་དེ་ཆེས་མཚར་བ་ཞིག་གོ།

      

ཡང་ཁྱོད་ཀྱིས་༼མི་ཕམ་གྱིས་༽དེས་ན་དོན་དམ་དཔྱད་པ་སྔོན་དུ་སོང་བའི་ལག་རྗེས་ལ་ཆོས་ཐམས་ཅད་རྟོག་པས་ཕར་བཏགས་ཙམ་དུ་འཆར་ཏེ། དབུ་མ་པ་ཡིན་ན་ཆོས་ཐམས་ཅད་བཏགས་ཡོད་ཙམ་དུ་སྨྲ་དགོས་པ་ཡང་ཡང་གསུངས་པའི་ཕྱིར་རོ།།

དེའི་ཕྱིར་འདི་དབུ་མ་པ་ཀུན་གྱི་ཐ་སྙད་ཀྱི་ཆོས་རྣམས་ལ་རྗེས་ཀྱི་ངེས་པ་སྐྱེ་ཚུལ་ཡིན་གྱི། ཐལ་འགྱུར་བའི་ཐ་སྙད་འཇོག་ཚུལ་ཐུན་མོང་མ་ཡིན་པ་མ་ཡིན་ཏེ། ཇི་ལྟར་ཐ་སྙད་རྣམ་པར་འཇོག་པའི་ཚེ་དོན་དམ་དཔྱད་པ་ལ་ལྟོས་མི་དགོས་པར་ཐ་སྙད་དཔྱོད་བྱེད་ཀྱི་ཚད་མའི་སྒོ་ནས་འཇོག་པ་ཡིན་ལ། དེ་ལ་བརྟེན་ནས་དོན་དམ་གཟོད་རྟོགས་དགོས་ཏེ། ཐ་སྙད་བདེན་པ་ཐབས་སུ་གྱུར་པ་དང་།། ཞེས་སོགས་གསུངས་པ་དང་། ཡང་བློས་ཕར་བཏགས་ཙམ་གྱིས་གྲུབ་པར་འཇོག་པ་འདི་ནི་དོན་དམ་དཔྱད་པ་སྔོན་དུ་སོང་བ་ལ་མ་ལྟོས་པར་ནམ་ཡང་གྲུབ་མི་ནུས་ཏེ། ནུས་ན་ཐམས་ཅད་ཡེ་ནས་དབུ་མ་པར་འགྱུར་རོ།། དེའི་ཕྱིར་ཐལ་འགྱུར་བའི་ལུགས་ལའང་བློ་གནོད་མེད་ལ་སྣང་བའི་དབང་གིས་བཞག་པ་ཙམ་ལ་ཐ་སྙད་དུ་འདོད་དེ། ཞེས་སོགས་སྤྱི་གསལ་གྱི་དབྱེ་བ་མ་བྱེད་པ་རྣམས་ལ་ཚིག་ལན་ཉུང་ངུ་ཞིག་སྤྲོ་ན། སྤྱིར་ཐལ་འགྱུར་བས་ཐ་སྙད་རྣམ་པར་འཇོག་ཚུལ་དང་། ཐལ་འགྱུར་བས་སྟོང་ཉིད་ལ་མཉམ་པར་བཞག་པའི་མཉམ་བཞག་ལས་ལངས་རྗེས་སུ་ཆོས་ཐམས་ཅད་རྟེན་འབྲེལ་རྟོག་པས་བཏགས་ཙམ་དུ་འཆར་བ་གཉིས་ལ་མི་འདྲ་བའི་ཁྱད་པར་ཆེན་པོ་ཞིག་ཡོད་སྐད་དང་། དེའི་སྒྲུབ་བྱེད་བློས་ཕར་བཏགས་ཙམ་གྱིས་གྲུབ་པར་འཇོག་པ་འདི་ནི་དོན་དམ་དཔྱད་པ་སྔོན་དུ་སོང་བ་ལ་མ་ལྟོས་པར་ནམ་ཡང་གྲུབ་པར་མི་ནུས། ནུས་ན་ཐམས་ཅད་ཡེ་ནས་དབུ་མ་པར་འགྱུར་རོ་ཞེས་པ་ནི། རང་ཉིད་ཐལ་འགྱུར་བའི་ཐ་སྙད་འཇོག་ཚུལ་ལ་རྒྱུས་ཆུང་བའི་ནང་རྟགས་ངོམས་པར་ཟད་དེ། གང་ཟག་གང་ལ་ཆོས་ཐམས་ཅད་རྟོག་པས་བཏགས་ཙམ་དུ་ཤར་མི་ཤར་དང་། སྤྱིར་ཆོས་ཐམས་ཅད་རྟོག་པས་བཏགས་ཙམ་ཡིན་མིན་གྱི་རྣམ་པར་བཞག་པ་གཉིས་གཅིག་ཏུ་འཁྲུལ་ནས་མགོ་བོ་རྨོངས་པར་ཟད་དེ། དོན་དམ་པ་དཔྱད་པ་སྔོན་དུ་མ་སོང་བའི་གང་ཟག་ཐམས་ཅད་ལ་ཆོས་ཐམས་ཅད་རྟེན་འབྲེལ་རྟོག་བཏགས་ཙམ་དུ་མ་འཆར་བས། ཆོས་ཐམས་ཅད་རྟེན་འབྲེལ་རྟོག་བཏགས་ཙམ་མ་ཡིན་མི་དགོས་པའི་ཕྱིར་ཏེ། གཞི་གྲུབ་ན་རྟོག་པས་ཕར་བཏགས་ཙམ་གྱིས་རྟེན་འབྲེལ་ཡིན་དགོས་པའི་ཕྱིར་ཏེ། འཕགས་པ་ཀླུས།

གང་ཕྱིར་རྟེན་འབྱུང་མ་ཡིན་པའི།།
ཆོས་འགའ་ཡོད་པ་མ་ཡིན་ནོ།།

ཞེས་རྟེན་ཅིང་འབྲེལ་འབྱུང་མ་ཡིན་པའི་ཆོས་འགའ་ཡང་མེད་ཅིང་། རྟེན་འབྲེལ་ཡིན་ན་རྟོག་པས་ཕར་བཏགས་ཙམ་ཡིན་དགོས་པའང་གསུངས་ཏེ། ཡང་འཕགས་པས།

རྟེན་ཅིང་འབྲེལ་བར་འབྱུང་བ་གང་།།

དེ་ནི་སྟོང་པ་ཉིད་དུ་བཤད།།
དེ་ནི་རྟེན་ནས་གདགས་པ་སྟེ།།

དེ་ནི་དབུ་མའི་ལམ་ཡིན་ནོ།།

ཞེས་གཞི་གྲུབ་ན་རྟེན་འབྲེལ་ཡིན་པས་ཁྱབ། རྟེན་འབྲེལ་ཡིན་ན་རྟོག་པས་ཕར་བཏགས་པ་ཙམ་ཡིན་པས་ཁྱབ་པ་གསལ་པོ་འདི་བཞིན་གསུངས་ན་ཆོས་ཐམས་ཅད་རྟེན་འབྲེལ་རྟོག་བཏགས་མ་ཡིན་པ། དོན་དམ་རྟོགས་པ་སྔོན་དུ་མ་སོང་བའི་གང་ཟག་གི་བློ་ངོར་མ་ཤར་བ་ཙམ་གྱིས་རྟེན་འབྲེལ་རྟོག་བཏགས་ཙམ་མ་ཡིན་པར་འགྱུར་མི་དགོས་པའི་ཕྱིར། ཁྱོད་ཁ་ནང་དུ་ཕྱོགས་ནས་སོམས་དང་འཁྲུལ་རྟོག་གི་མགོ་བོ་འདི་ཙམ་འཁོར་མི་དགོས་པ་གདའ་སྟེ། ཆོས་ཐམས་ཅད་རྟེན་འབྲེལ་རྟོག་བཏགས་ཙམ་ཡིན་དང་མ་ཡིན་བཤད་པ་ནི་ཡུལ་གྱི་གནས་ཚུལ་ཇི་ལྟར་ཡིན་བཤད་པ་ཡིན་ལ། དོན་དམ་དཔྱད་པ་སྔོན་སོང་གི་བློ་ལ་རྟོག་བཏགས་ཙམ་དུ་ཤར་མི་ཤར་ནི་ཡུལ་ཅན་གང་ཟག་གི་རྟོགས་ཚུལ་ཡིན་པས་དེ་གཉིས་གཏན་ནས་མི་འདྲ་བའི་ཕྱིར་ཏེ། གང་ཟག་བྱེ་བྲག་པ་འགའ་ཞིག་གིས་གསེར་གྱི་བུམ་པ་མ་མཐོང་བས་སྤྱིར་གསེར་གྱི་བུམ་པ་མེད་མི་དགོས་པ་དང་འདྲ་བའི་ཕྱིར་རོ།།

      

གཞན་ཡང་ཁྱོད་དྲི་བའི་སྒོ་ནས་ལོག་རྟོག་སུན་འབྱིན་པ་འདི་བྱ་སྟེ། ཁྱོད་ཀྱིས་དོན་དམ་དཔྱད་པ་སྔོན་དུ་སོང་བ་ལ་ཆོས་ཐམས་ཅད་རྟེན་འབྲེལ་རྟོག་བཏགས་ཙམ་དུ་འཆར་ནས་ཐ་སྙད་བྱེད་པ་དང་། དོན་དམ་དཔྱད་པ་སྔོན་དུ་མ་སོང་བ་ལ་རྟེན་འབྲེལ་རྟོག་བཏགས་ཙམ་དུ་མི་འཆར་ནས་ཐ་སྙད་འཇོག་པ་འདི་གཉིས་ལས། ཐ་སྙད་རྟེན་འབྲེལ་གྱི་རྣམ་བཞག་འཇོག་ཚུལ་དངོས་གནས་པ་དེ་གང་ལ་བྱེད་པ་ཡིན་ཞེས་དྲིའོ།།

      

དང་པོ་ལྟར་ན་གཞི་གྲུབ་ན་རྟེན་འབྲེལ་ཡིན་པས་ཁྱབ། རྟེན་འབྲེལ་ཡིན་ན་རྟོག་པས་ཕར་བཏགས་ཙམ་ཡིན་པས་ཁྱབ་པ་ཁས་ལེན་པར་སོང་བས། དོན་དམ་དཔྱད་པ་སྔོན་དུ་མ་སོང་བ་རྣམས་ཀྱི་བློ་ལ་རྟེན་འབྲེལ་རྟོག་བཏགས་ཙམ་དུ་མི་འཆར་བས་དེ་ལྟར་དུ་ཐ་སྙད་མི་བྱེད་ཀྱང་། སྤྱིར་ཐ་སྙད་འཇོག་ཚུལ་ཆོས་ཐམས་ཅད་རྟོག་པས་བཏགས་པ་ཙམ་དུ་འཆར་ཚུལ་དེ་བཞིན་ཡིན་ཞེས་ཁས་བླང་དུ་སོང་བས་ཐ་སྙད་རྟོག་བཏགས་ཙམ་དུ་གྲུབ་པ་ཐལ་འགྱུར་པའི་ཐ་སྙད་འཇོག་ཚུལ་ཐུན་མོང་མ་ཡིན་པ་མ་ཡིན་ཞེས་པའི་དམ་བཅའ་དེ་བུད།

      

དྲི་བ་གཉིས་པ། དོན་དམ་དཔྱད་པ་སྔོན་དུ་མ་སོང་བ་ལ་བརྟེན་ནས་ཐ་སྙད་རྟོག་བཏགས་ཙམ་དུ་མི་འཆར་བ་དེ་བཞིན་དུ་ཐ་སྙད་འཇོག་པ་ཡིན་ཟེར་ན། དོན་དམ་དཔྱད་པ་སྔོན་སོང་གི་གང་ཟག་ལ་རྟེན་འབྲེལ་རྟོག་བཏགས་ཙམ་དུ་འཆར་བའི་བློ་དེ་ལོག་ཤེས་ཡིན་པར་ཐལ། དེ་ལ་འཆར་བའི་ཐ་སྙད་དེ་ཐ་སྙད་ཀྱི་གནས་ཚུལ་ཇི་ལྟ་བ་བཞིན་མ་ཡིན་པའི་ཕྱིར་ཏེ། ཐ་སྙད་ཀྱི་སྡོད་ལུགས་དོན་དམ་དཔྱད་པ་སྔོན་དུ་མ་སོང་བའི་བློ་ལ་འཆར་ཚུལ་དེ་བཞིན་ཡིན་པའི་ཕྱིར། རྟགས་རིམ་པ་བཞིན་ཁས་བླངས་དགོས་པ་དེས་ན་ས་བཅུའི་རྗེས་ཐོབ་པའི་བྱང་ཆུབ་སེམས་དཔའ་རྣམས་དང་སངས་རྒྱས་འཕགས་པ་རྣམས་ཐ་སྙད་ཀྱི་སྡོད་ལུགས་ལ་ལོག་པར་རྟོགས་པའི་ལོག་ཤེས་རྒྱུད་ལྡན་གྱི་གང་ཟག་ཡིན་ཅེས་འཛེམ་མེད་དུ་སྨྲ་བ་གྱིས་ཤིག།

      

ཐ་སྙད་ཀྱི་སྡོད་ལུགས་དངོས་གནས་པ་དོན་དམ་དཔྱད་པ་སྔོན་དུ་མ་སོང་བ་རྣམས་ཀྱིས་བློ་ལ་འཆར་ཚུལ་བཞིན་ཡིན་ན། སངས་རྒྱས་དང་བྱང་སེམས་ཉན་རང་འཕགས་པ་རྣམས་ཀྱི་རྗེས་ཐོབ་ཏུ་རྟེན་འབྲེལ་འཆར་ཚུལ་རྣམས་ལོག་པར་རྟོགས་པ་ཐ་སྙད་ཀྱི་ཆོས་ལ་སྐུར་བ་བཏབ་པའི་ཆད་ལྟ་རུ་འགྱུར་ཏེ། ཐ་སྙད་ཀྱི་ཆོས་བདེན་པའམ་རང་མཚན་གྱིས་གྲུབ་བཞིན་དུ། དེ་རང་མཚན་གྱིས་མ་གྲུབ། རྟོག་པས་བཏགས་ཙམ་ཡིན་ཞེས་སྐུར་བ་བཏབ་འདུག་པའི་ཕྱིར་རོ།།

      

ཡང་དེ་ལྟར་རྗེས་ཐོབ་རྟེན་འབྲེལ་རྟོག་བཏགས་ཙམ་དུ་འཆར་བའི་བློ་དེ་ཐ་སྙད་ལ་དེ་ལྟར་དུ་ལོག་ཤེས་སུ་མི་འགྱུར་ཏེ། དེ་ཐ་སྙད་ལ་འཇུག་པའི་བློ་མ་ཡིན་ཟེར་ན། དེ་དོན་དམ་ལ་འཇུག་པའི་བློ་ཡིན་དགོས་ཕྱིར་མཉམ་རྗེས་ཁྱད་མེད་དུ་སོང་། གཞི་བུམ་ལྟ་བུའི་ཐ་སྙད་ལ་འཇུག་པའི་བློ་ཡིན་ན་ནི་བུམ་པ་དེ་དེ་ལ་རྟེན་འབྲེལ་རྟོག་བཏགས་ཙམ་དུ་འཆར་བའི་ཕྱིར་ཁྱོད་ལྟར་ན་བུམ་པ་ལྟ་བུའི་ཐ་སྙད་དངོས་གནས་པ་ནི་དེ་མ་ཡིན་པས་རྗེས་ཐོབ་ཀྱི་མཁྱེན་པ་དེ་རྣམས་ལོག་ཤེས་སུ་ཐལ་བའི་གནོད་བྱེད་སྔ་མ་དེ་སྤོང་མི་ནུས་སོ།།

      

ཡང་ཁྱོད་ཀྱིས་དེ་ལྟ་བུའི་རྗེས་ཐོབ་ཀྱི་མཁྱེན་པ་དེ་བུམ་པ་ལྟ་བུའི་རྟེན་འབྲེལ་ལ་ཚད་མ་ཡིན་ཀྱང་བུམ་པ་ལྟ་བུའི་ཐ་སྙད་ལ་ཚད་མ་མ་ཡིན་ཟེར་བའི་ཁྱད་པར་བཞག་སྙམ་ན། བུམ་པ་རྟེན་འབྲེལ་རྟོག་བཏགས་ཙམ་གྱི་ཐ་སྙད་དེ་ལས་གཞན་པའི་ཐ་སྙད་ཟུར་བ་ཞིག་བུམ་པ་སོགས་ཆོས་གང་ལའང་འཇོག་རྒྱུ་མེད་པ་སྔར་རྩ་ཤེས་ལུང་དེ་དག་གིས་གྲུབ་པའི་ཕྱིར་ཏེ། རྟེན་འབྲེལ་རྟོག་བཏགས་ཙམ་ལས་གཞན་པའི་ཆོས་འགའ་ཡང་མེད་པར་གསུངས་པའི་ཕྱིར། ཡང་ཁྱོད་ཀྱིས་གོང་དུ་དཔྱད་བཟོད་མེད་ཀྱང་སྣང་བ་བསླུ་མེད་ནི་ཐ་སྙད་དུ་གྲུབ་ཚུལ་ལོ་ཟེར་འདུག་པ་ལྟར་ན་དོན་དམ་དཔྱོད་བྱེད་ཀྱི་རིགས་པས་དཔྱད་བཟོད་མེད་ཀྱང་རྟོག་བཏགས་ཙམ་དུ་སྣང་བ་བསླུ་མེད་དུ་འཆར་བ་ནི་རྟེན་འབྲེལ་ལས་མ་འདས་པས་དེ་ཐ་སྙད་གྲུབ་ཚུལ་ཡིན་ན། དེ་དོན་དམ་དཔྱད་པ་སྔོན་སོང་གི་མཁྱེན་པ་ལས་གཞན་ལ་མི་འཆར་བས་འཇིག་རྟེན་པ་དོན་དམ་དཔྱད་པ་སྔོན་དུ་མ་སོང་བ་རྣམས་ལ་བུམ་པ་ཀ་བ་རི་དང་ནགས་ཚལ་སོགས་ཅིང་ཡང་མི་འཆར་བར་ཐལ། བུམ་པ་ཀ་བ་རི་ནགས་ཚལ་སོགས་ཀྱི་ཐ་སྙད་ནི་དཔྱད་བཟོད་མེད་ཀྱང་སྣང་བ་བསླུ་མེད་དེ་ཡིན། དེ་ནི་རྟེན་འབྲེལ་ཡིན་པས་དེ་དག་ལ་འཆར་དུ་མི་རུང་བའི་ཕྱིར། འདོད་ན། དོན་དམ་དཔྱད་པ་སྔོན་མ་སོང་གི་སོ་སྐྱེ་རྣམས་ཀྱིས་ཐ་སྙད་པའི་ཆོས་བུམ་པ་ཀ་བ་རི་དང་ནགས་ཚལ་སོགས་གང་ཡང་ངོ་མ་ཤེས་དེ་བཞིན་དུ་ཟ་རྒྱུ་འཐུང་རྒྱུ་གྱོན་རྒྱུ་སོགས་གང་ཡང་ངོ་མ་ཤེས་པས་ཟ་ཡང་མི་ཟ་གྱོན་ཡང་མི་གྱོན་པ་རྡོ་བ་བཞིན་དུ་རང་གར་གནས་པ་དང་། དེས་ན་ལས་དགེ་བ་ཡང་མི་སྒྲུབ་སྡིག་པ་ཡང་མི་བསགས་པས་བདེ་འགྲོ་དང་ངན་འགྲོ་གང་དུའང་སྐྱེ་བར་མི་འགྱུར་བས་ལས་རྒྱུ་འབྲས་ཡང་མེད་ཅེས་སྨྲ་དགོས་པ་ལ་ཐུག་གོ།

      

ད་ཁྱོད་ལ་འཁྲུལ་རྟོག་རྣམ་པར་གྲོལ་བའི་མན་ངག་འདི་བསྟན་པར་བྱ་སྟེ། གཞི་བུམ་ལྟ་བུ་དེ་རྟེན་འབྲེལ་རྟོག་བཏགས་ཙམ་ཡིན་ནམ་མ་ཡིན་ཞེས་ཁྱོད་ལ་དྲིས་ན། ཁྱོད་ཀྱིས་སྤྱིར་དེ་རྟོག་བཏགས་ཙམ་ཡིན་ཟེར་མི་གཏུབ་པར་དོན་དམ་དཔྱད་པ་སྔོན་སོང་ལ་རྟེན་འབྲེལ་རྟོག་བཏགས་ཙམ་ཡིན། དེ་མ་ཡིན་པ་ལ་རྟེན་འབྲེལ་རྟོག་བཏགས་ཙམ་མ་ཡིན་ཟེར་འདོད་པ་འདི་སྣང་སྟེ། དེ་ཙམ་གྱིས་མགོ་བོ་རྨོངས་ཅི་དགོས་ཏེ། སྤྱིར་དོན་དམ་དཔྱད་པ་སྔོན་དུ་སོང་མ་སོང་གང་ཡང་མ་སྦྱར་བ་སྤྱིར་བུམ་པ་རྟེན་འབྲེལ་རྟོག་བཏགས་ཙམ་ཡིན་བྱས་ཀྱང་ཅི་ཞིག་ནོངས་ཏེ། བུམ་པ་རྟེན་འབྲེལ་རྟོག་བཏགས་ཙམ་ཡིན་བྱས་པ་དེ་སྤྱིར་བུམ་པ་ཐ་སྙད་པའི་སྡོད་ལུགས་ཀྱི་དོན་བཤད་པ་ལས་གང་ཟག་གང་གིས་རྟོགས་ཚུལ་གང་ཡིན་བཤད་པར་མ་སོང་བའི་ཕྱིར་བུམ་པ་ཐ་སྙད་པའི་སྡོད་ལུགས་དེ་ཇི་ལྟ་བ་བཞིན་དོན་དམ་དཔྱད་པ་སྔོན་དུ་མ་སོང་གི་བར་དུ་མི་རྟོགས་ཀྱང་། རྟེན་འབྲེལ་རྟོག་བཏགས་ཙམ་གྱི་བུམ་པ་དེ་དོན་དམ་དཔྱད་པ་སྔོན་དུ་མ་སོང་བའི་འཇིག་རྟེན་པ་རྣམས་ཀྱིས་ཀྱང་རྟོགས་པའི་ཕྱིར། དེས་ན་དོན་དམ་དཔྱད་པ་སྔོན་དུ་སོང་བའི་འཕགས་པ་རྣམས་དང་། མ་སོང་བའི་འཇིག་རྟེན་པ་རྣམས་རྟེན་འབྲེལ་རྟོག་པས་བཏགས་ཙམ་གྱི་བུམ་སོགས་རྟོགས་པར་མཚུངས་ཀྱང་། བུམ་སོགས་རྟེན་འབྲེལ་རྟོག་བཏགས་ཙམ་དུ་མཐོང་བ་དང་མ་མཐོང་བའི་ཁྱད་པར་འདི་བྱུང་བ་ཡིན་པའི་ཕྱིར། གལ་ཏེ་དེ་ནི་ཁྱེད་ཅག་རྟོག་གེའི་རིགས་པ་ལ་གོམས་ཆེས་པ་རྣམས་ཀྱིས་ཚིགས་ཀྱི་འཛིན་འཚམས་བྱས་པ་ཙམ་ལས་དོན་དུ་སྙིང་པོ་མ་མཐོང་སྙམ་ན། འདི་ནི་ཚིགས་ཀྱི་འཛིན་འཚམས་ཙམ་དུ་མ་ཟད་དོན་གྱི་གནས་ཚོད་ལ་འདི་བཞིན་ཡིན་ཏེ། རྟོག་བཏགས་ཙམ་གྱི་བུམ་པ་འཇིག་རྟེན་རྒན་པོ་རྣམས་ཀྱིས་ཀྱང་མཐོང་དགོས་ཏེ། དེ་མ་མཐོང་ན་འཇིག་རྟེན་རྒན་པོ་རྣམས་ཀྱིས་ཀྱང་བུམ་པ་ཞིག་ནི་མཐོང་དགོས། མཐོང་བྱའི་བུམ་པ་དེ་ཡང་རྟོག་པས་བཏགས་ཙམ་གྱི་བུམ་པ་ཞིག་དང་རྟོག་པས་བཏགས་ཙམ་མ་ཡིན་པའི་བུམ་གཉིས་གང་མཐོང་ན། རྟོག་པས་བཏགས་ཙམ་མ་ཡིན་པའི་བུམ་པ་ནི་རི་བོང་གི་རྭ་བཞིན་ཤེས་བྱ་ལ་གཏན་ནས་མི་སྲིད་པའི་པའི་ཕྱིར་མཐོང་དུ་མི་རུང་ལ། དེས་ན་རྟོག་པས་བཏགས་ཙམ་གྱིས་བུམ་པ་ལས་གཞན་པའི་བུམ་པ་ཞིག་མཐོང་དུ་མི་རུང་བའི་ཕྱིར་རོ།།

      

ཐལ་འགྱུར་བའི་ལུགས་འདིར་རང་རྒྱུད་པ་དང་མི་འདྲ་བ་བུམ་པའི་སྡོད་ལུགས་ལ་འཁྲུལ་བའི་བློས་ཀྱང་བུམ་པ་ཡོད་པ་འཇོག་ཐུབ་པའི་ཕྱིར། ཚུར་མཐོང་གི་རྒྱུད་ལ་བུམ་པ་ལ་མ་འཁྲུལ་བའི་བུམ་འཛིན་ཚད་མ་ཞིག་གཏན་ནས་བཞག་རྒྱུ་མི་རྙེད་དེ། འཇུག་པ་ལས། གནོད་པ་མེད་པའི་དབང་པོ་དྲུག་རྣམས་ཀྱིས།། ཞེས་སོགས་དྲངས་འདུག་ཀྱང་དེ་གནད་ཧ་ཀྱང་མ་ཤེས་པ་སྟེ། རང་རྒྱུད་པས་རྟོག་པས་བཏགས་ཙམ་ཞེས་པའི་རྟོག་པ་དེ་བློ་གནོད་མེད་གཅིག་ལ་བྱེད་དགོས་པའི་རྒྱུ་མཚན་དེ། རང་རྒྱུད་པའི་བུམ་འཛིན་རྟོག་པ་ལྟ་བུ་དེ་ཡུལ་བུམ་པ་རང་གི་ཐུན་མོང་མ་ཡིན་པའི་སྡོད་ལུགས་ལ་མ་འཁྲུལ་བའི་བློ་ཞིག་ཏུ་འདོད་པའི་དབང་གིས་ཡིན་ལ། ཁྱོད་ཀྱིས་ཀྱང་༼མི་ཕམ་གྱིས་༽གང་གྲུབ་བམ་མ་གྲུབ་དཔྱད་རྒྱུའི་རང་མཚན་ནི་ཆོས་དེའི་ངོ་བོ་ལས་གཞན་མེད་ཅེས་སྨྲས་འདུག་པ་དང་རང་རྒྱུད་པས་ཀྱང་དེ་ལྟར་བསམ་པ་ཡིན་ལ། དེ་ཐལ་འགྱུར་པས་དགག་པར་བྱ་བའི་གནད་དམ་པ་གཅིག་སྟེ། ཚུར་མཐོང་གི་རྒྱུད་ཀྱི་བུམ་འཛིན་རྟོག་པ་ཆོས་ཅན། ཁྱོད་རང་ཡུལ་བུམ་པ་རང་གི་ཐུན་མོང་མ་ཡིན་པའི་སྡོད་ལུགས་ལ་མ་འཁྲུལ་བའི་བློ་ཡིན་པར་ཐལ། འདོད་པའི་ཕྱིར། འདོད་ན། བུམ་པ་ཆོས་ཅན། རང་གི་ཐུན་མོང་མ་ཡིན་པའི་སྡོད་ལུགས་ཀྱི་ངོས་ནས་གྲུབ་པའི་ཆོས་ཡིན་པར་ཐལ། ཁྱོད་འཛིན་པའི་བུམ་འཛིན་རྟོག་པ་དེ་ཁྱོད་ཀྱི་རང་གི་ཐུན་མོང་མ་ཡིན་སྡོད་ལུགས་ལ་མ་འཁྲུལ་བའི་བློ་ཡིན་པའི་ཕྱིར། འདོད་ན་བུམ་པ་དེ་རང་ངོས་ནས་གྲུབ་པའི་ཆོས་སུ་ཐལ། འདོད་པའི་ཕྱིར། འདོད་ན་བུམ་པ་རྟེན་འབྲེལ་དང་ལྟོས་གྲུབ་མ་ཡིན་པར་ཐལ་བ་སོགས་སྔར་གྱི་རིགས་པ་ཇི་སྐད་བསྟན་པ་རྣམས་ཀྱིས་གནོད་པ་འདིར་འབབས་སོ།། གོང་གི་ཁྱབ་རྟགས་རྣམས་ནི་ཁྱོད་ཀྱིས་འདོད་ཚུལ་གྱི་དབང་གིས་ལུང་རིགས་ཀྱིས་བསྒྲུབ་མི་དགོས་པ་དང་རང་གི་མགོ་ཐོག་ཏུ་རང་འཁོར་ལགས་པས་སྤྲོས་པ་སྐྱུང་ངོ་།།

      

འཇུག་པ་ལས། གནོད་པ་མེད་པའི་སོགས་གསུངས་པའི་ལུང་གིས་ཀྱང་ཁྱོད་ཀྱི་ཞེ་འདོད་ལ་མི་ཕན་ཏེ། དེ་ནི་ཐལ་འགྱུར་པའི་ལུགས་འདིར་རང་རྒྱུད་པའི་འདོད་པ་ལྟར་སྤྱིར་ཀུན་རྫོབ་བདེན་པ་ལ་ཡང་ལོག་གཉིས་སུ་མི་འབྱེད་པར་འཇིག་རྟེན་ཤེས་ངོ་ལ་ལྟོས་ཏེ་ཡང་ལོག་གཉིས་སུ་འབྱེད་པའི་དོན་སྟོན་པ་ཡིན་ཏེ། འཕྲལ་གྱི་འཁྲུལ་རྒྱུས་གནོད་པ་མེད་པའི་དབང་པོ་དྲུག་པོ་རྣམས་ཀྱིས་གཟུང་བ་གང་ཞིག་འཇིག་རྟེན་གྱིས་རྟོགས་པ་དེ་ནི་འཇིག་རྟེན་ཉིད་དེ་ཁོ་ན་ལས་བདེན་པ་སྟེ་ཡང་དག་པ་ཡིན་གྱི། འཕགས་པ་ལ་ལྟོས་ནས་ནི་ཡང་དག་པར་འཇོག་པ་མ་ཡིན་ནོ་ཞེས་པའི་དོན་ཡིན་པའི་ཕྱིར། ཐལ་འགྱུར་པའི་ལུགས་འདིར་སྤྱིར་ཀུན་རྫོབ་བདེན་པ་ལ་ཡང་ལོག་གཉིས་སུ་འབྱེད་དུ་མེད་དེ། ཀུན་རྫོབ་ཡིན་ན་རྫུན་པ་སྟེ་ཡང་དག་མ་ཡིན་དགོས་པའི་ཕྱིར། རང་རྒྱུད་པའི་ལུགས་ལྟར་སྤྱིར་ཀུན་རྫོབ་ལ་ཡང་ལོག་གཉིས་སུ་འབྱེད་ན། འཇིག་རྟེན་ཉིད་ལས་བདེན་ཡིན་ཞེས་པ་དང་། འཇིག་རྟེན་ཉིད་ལྟོས་ལོག་པ་རྣམ་པར་བཞག་ཅེས་གང་དུ་ལྟོས་པ་འཇིག་རྟེན་ལ་ལྟོས་ནས་ཡང་དག་དང་ལོག་པར་འཇོག་པར་གསུངས་པའི་དོན་མེད་པའི་ཕྱིར་དང་། འདིའི་ཐད་ཀྱི་རང་འགྲེལ་ལས་ཀྱང་། དེའི་ཕྱིར་དེ་ལྟར་འཇིག་རྟེན་གྱི་དབང་པོ་ལ་གནོད་པའི་རྐྱེན་ཇི་སྐད་སུ་བཤད་པ་མེད་པར་དབང་པོ་དྲུག་ཅར་གྱིས་བཟུང་བར་བྱ་བའི་དོན་རྟོགས་པ་དེ་ནི་འཇིག་རྟེན་ཉིད་ལས་བདེན་པ་ཡིན་གྱི་འཕགས་པ་ལ་ལྟོས་ནས་ནི་མ་ཡིན་ནོ།། གཟུགས་བརྙན་ལ་སོགས་པ་གང་ཞིག་དབང་པོ་རྣམས་ལ་གནོད་པ་ཡོད་པ་ན་ཡུལ་གྱི་ངོ་བོ་ཉིད་དུ་སྣང་བ་དེ་ནི་འཇིག་རྟེན་ཉིད་ལ་ལྟོས་ནས་ལོག་པ་ཡིན་ནོ་ཞེས་འཇིག་རྟེན་ཉིད་ལ་ལྟོས་ནས་དང་། འཕགས་པ་ལ་ལ་ལྟོས་ནས་ནི་མ་ཡིན་པ་གསུངས་པས། སྤྱིར་ཀུན་རྫོབ་བདེན་པ་ལ་ཡང་ལོག་མི་འབྱེད་པ་ཤིན་ཏུ་གསལ་བའི་ཕྱིར། གལ་ཏེ་འཇིག་རྟེན་ཤེས་ངོ་ལ་ལྟོས་ནས་ཡང་དག་མི་འཇོག། སྤྱིར་ཀུན་རྫོབ་ལ་ཡང་ལོག་གཉིས་འཇོག་ན་དེའི་ནང་ཚན་གྱི་ཡང་དག་ཀུན་རྫོབ་དེ་འཇིག་རྟེན་རྒན་པོ་རྣམས་ཀྱིས་གཟུགས་བརྙན་སོགས་མི་བདེན་པའི་ཆོ་འགའ་ཞིག་མཐོང་བ་དེ་ལས་ལོགས་སུ་གྱུར་པའི་བློ་གནོད་མེད་ལ་སྣང་བའི་བུམ་པ་དང་ཀ་བ་ལྟ་བུ་རྣམས་ཡིན་དགོས། དེ་ཡིན་ན་དེ་དག་ལ་ཡང་དག་ཅེས་པའི་ཡང་དག་གི་དོན་རང་བཞིན་གྱིས་གྲུབ་པ་ལ་བྱེད་དགོས་ན་དེ་མི་འཐད་པའི་ཕྱིར། བུམ་པ་ཀ་བ་སོགས་ཀུན་རྫོབ་བདེན་པའི་ཆོས་ཡིན་པ་གང་ཞིག་ཀུན་རྫོབ་བདེན་པ་ཞེས་པའི་ཀུན་རྫོབ་བུམ་སོགས་ཀྱི་རང་བཞིན་མཐོང་བ་ལ་སྒྲིབ་པའི་གཏི་མུག་མ་རིག་པ་ལ་བྱེད་ལ། བུམ་སོགས་ཀྱི་རང་བཞིན་མ་མཐོང་བའི་བློ་དེའི་ངོར་བདེན་པ་ཙམ་ལ་ཡང་དག་པ། མ་ཡིན་པ་བརྫུན་པའི་ཆོས་ལ་བྱེད་ན་བརྫུན་པ་དང་ཡང་དག་གི་གཞི་མཐུན་བཞག་རིགས་སམ་དཔྱོད་ཅིག འཇུག་འགྲེལ་ལས་ཀྱང་མཐོང་བ་རྫུན་པའི་ཡུལ་གང་ཡིན་པ་དེ་ནི་ཀུན་རྫོབ་བོ་ཤེས་གསུངས་པའི་ཕྱིར་དང་། དངོས་ཀུན་ཡང་དག་རྫུན་པར་མཐོང་ཡིས།། ཞེས་དོན་དམ་བདེན་པ་ལ་ཡང་དག་དང་། ཀུན་རྫོབ་བདེན་པ་ལ་རྫུན་པ་རྣམ་པར་བཞག་པའི་ཕྱིར།

      

སྤྱིར་ཀུན་རྫོབ་བདེན་པ་ལ་ཡང་དག་གཞག་ལུགས་ག་ལ་ཡོད། འཇིག་རྟེན་ཤེས་ངོ་ལ་ལྟོས་ནས་དབང་པོ་ལ་སྐྱོན་ཡོད་མེད་ཀྱི་སྒོ་ནས་ཡང་ལོག་གཉིས་སུ་བཞག་པའི་ནང་ཚན་གྱི་ཡང་དག་དེ་ཡང་འཇིག་རྟེན་གྱི་ཤེས་ངོ་ཙམ་ལ་ལྟོས་ནས་ཡང་དག་ཏུ་འཇོག་པ་ལས་སྤྱིར་ཡང་དག་གི་གོ་ག་ལ་ཆོད། དེ་ཆོད་ན་ཀུན་རྫོབ་བདེན་པ་ཡང་དག་པའི་ཆོས་སུ་གྱུར་ན་བདེན་པ་གཉིས་ལ་ཡང་དག་དང་རྫུན་པའི་ཐ་སྙད་མཛད་པ་དེ་ཟླ་བའི་ཞབས་འཁྲུལ་བ་ཡིན་ཞེས་སྨྲོས་ཤིག གཞན་ཡང་འཇུག་འགྲེལ་ལས་ཀུན་རྫོབ་བདེན་པ་ནི་བསླུ་བར་བྱེད་པ་ཉིད་ཀྱི་ཕྱིར་དོན་དམ་བདེན་པ་མ་ཡིན་ནོ་ཞེས་དོན་དམ་བདེན་པ་མ་ཡིན་པའི་ཆོས་ནི་ཡང་དག་མ་ཡིན་ཏེ། བསླུ་བར་བྱེད་པའི་ཕྱིར་གསུངས་ཏེ་བསླུ་བར་བྱེད་པ་དོན་དམ་བདེན་པ་མ་ཡིན་པའི་སྒྲུབ་བྱེད་དུ་མཛད་པས། ཡང་དག་པའི་ཀུན་རྫོབ་དེ་ཇི་ལྟར་འཇོག་སོམས་ཤིག།

      

ཁྱོད་ཀྱིས་ཀུན་རྫོབ་བདེན་པ་བསླུ་བའི་ཆོས་ཡིན་ཟེར་རམ་ཡང་དག་པའི་ཆོས་ཡིན་ཟེར། ཕྱི་མ་ལྟར་ན་གནོད་བྱེད་འཕེན་མ་ཐག་པ་རྣམས་དང་། ཀུན་རྫོབ་བདེན་པའང་དོན་དམ་བདེན་པར་ཐལ་ལ་། དང་པོ་ལྟར་ན་བུམ་སོགས་ཀུན་རྫོབ་བདེན་པའི་ཆོས་རྣམས་རང་ངོས་ནས་གྲུབ་པར་དམ་བཅས་པའི་དམ་བཅའ་དེ་ཉམས་པའི་ཕྱིར། མ་གྲུབ་ན་དེར་ཐལ་བུམ་སོགས་ཀུན་རྫོབ་པའི་ཆོས་རྣམས་རྫུན་པ་ཡིན་པ་གང་ཞིག། རྫུན་པའི་དོན་ཡུལ་གྱི་གནས་ཚུལ་དང་ཡུལ་ཅན་གྱི་སྣང་ཚུལ་མི་མཐུན་པ་ལ་བྱེད་པའི་ཕྱིར་ཏེ། འཇུག་འགྲེལ་ལས། གཞན་ནི་སོ་སོ་སྐྱེ་བོ་མ་རིག་པའི་རབ་རིབ་ཀྱི་ལིང་ཐོག་གིས་བློའི་མིག་མ་ལུས་པར་ཁེབས་པ་རྣམས་ཀྱིས་མཐོང་བ་བརྫུན་པའི་སྟོབས་ལས་བདག་གི་བ་ཡོད་པ་རྙེད་པ་ཡིན་ཏེ། བྱིས་པ་རྣམས་ཀྱིས་མཐོང་བའི་ཡུལ་དུ་འགྱུར་པ་ཇི་ལྟ་བ་དེ་ལྟ་བུའི་རང་བཞིན་དུ་རང་གོ་ངོ་བོས་གྲུབ་པ་ནི་མ་ཡིན་ནོ།། ཞེས་བྱིས་པ་རྣམས་ཀྱིས་མཐོང་བའི་ཡུལ་དུ་འགྱུར་བའམ་གང་སྣང་བ་ཇི་ལྟ་བ་དེ་བཞིན་དུ། བུམ་སོགས་ཀྱི་གནས་ཚུལ་རང་གི་ངོ་བོས་མ་གྲུབ་པར་གསུངས་པའི་ཕྱིར། གནས་ཚུལ་དང་སྣང་ཚུལ་མི་མཐུན་པ་ཞིག་བརྫུན་པའི་དོན་དུ་འཇོག་ན། འཇིག་རྟེན་ཀུན་རྫོབ་པའི་བློ་ལ་བུམ་སོགས་རང་ངོས་ནས་གྲུབ་པར་སྣང་བ་གང་ཞིག། དེ་སྣང་བ་ལྟར་མ་གྲུབ་པའི་ཕྱིར། རྟགས་ཟུར་དང་པོ་ཁྱོད་རང་གིས་ཁས་ལེན་བཞིན་པ་དང་། ཕྱི་མ་མ་གྲུབ་ན། དེ་ཆོས་ཅན། དེར་ཐལ། བུམ་སོགས་ཀུན་རྫོབ་པའི་ཆོས་ཀུན་རང་ངོས་ནས་སམ་རང་བཞིན་གྱིས་གྲུབ་པ་གཏན་ནས་མི་སྲིད་པའི་ཕྱིར་ཏེ། འཇུག་འགྲེལ་ལས། མ་རིག་པ་དངོས་པོའི་རང་གི་ངོ་བོ་ཡོད་པ་མ་ཡིན་པ་སྒྲོ་འདོགས་པར་བྱེད་པ། རང་བཞིན་མཐོང་བ་ལ་སྒྲིབ་པའི་བདག་ཉིད་ཅན་ནི་ཀུན་རྫོབ་བོ།། ཀུན་རྫོབ་དེ་གང་ཞིག་བདེན་པར་སྣང་ཞིང་རང་བཞིན་མེད་བཞིན་དུ་སོ་སོར་སྣང་བ་དེ་ནི་འཇིག་རྟེན་ཕྱིན་ཅི་ལོག་ཏུ་གྱུར་པའི་ཀུན་རྫོབ་ཏུ་བདེན་པས་འཇིག་རྟེན་གྱི་ཀུན་རྫོབ་ཀྱི་བདེན་པ་སྟེ་ཞེས་གསུངས་པའི་ཕྱིར། ཀུན་རྫོབ་བདེན་འཛིན་ལ་བྱས་ནས་དེས་རང་བཞིན་མེད་བཞིན་དུ་རང་བཞིན་གྱིས་གྲུབ་པར་སྣང་བའི་ཀུན་རྫོབ་བདེན་པ་གསུང་པ་འདི་མི་ཐད་པར་ཐལ། ཀུན་རྫོབ་བདེན་པའི་ཆོས་རྣམས་རང་བཞིན་གྱིས་མེད་བཞིན་པ་མ་ཡིན་པའི་ཕྱིར་ཏེ། རང་བཞིན་གྱིས་ཡོད་བཞིན་པ་ཡིན་པའི་ཕྱིར། འཁོར་གསུམ། གཞན་ཡང་མ་རིག་པ་དངོས་པོའི་རང་གི་ངོ་བོ་ཡོད་པ་མ་ཡིན་པ་ལ་སྒྲོ་འདོགས་གསུང་བ་དང་རང་བཞིན་མཐོང་བ་ལ་སྒྲིབ་གསུང་བ་ཡང་མི་འཐད་པར་ཐལ། དངོས་པོ་རྣམས་རང་གི་ངོ་བོ་ཡོད་པ་མ་ཡིན་པ་ལ་སྒྲོ་འདོགས་པ་མ་ཡིན་པའི་ཕྱིར་ཏེ། དངོས་པོ་རྣམས་རང་གི་ངོ་བོས་ཡོད་པ་ཡིན་པའི་ཕྱིར། རྟགས་ཁྱབ་རྣམས་རིམ་བཞིན་ཁས། དེ་ལ་གལ་ཏེ་ཀུན་རྫོབ་པའི་ཆོས་རྣམས་རང་བཞིན་མེད་བཞིན་རང་བཞིན་སྣང་བ་གསུང་བ་སོགས་དེ་ལྟར་མ་ཡིན་ཏེ། བརྟག་ཅིང་དཔྱད་ན་རང་བཞིན་གྱིས་གྲུབ་པ་མི་རྙེད་པའི་དོན་དུ་དེ་ལྟར་གསུངས་ཀྱི། མ་བརྟག་མ་དཔྱད་པར་རང་ངོས་ནས་གྲུབ་དགོས། དེ་མ་གྲུབ་ན་གཏན་མེད་དུ་འགྲོ་བ་ཁོ་བོའི་ཡང་ཡང་བྱས་མོད་སྙམ་པ་འདི་ཁྱོད་ཀྱི་ཁོང་ནད་ཆེ་བ་ཞིག་ཏེ། དེ་ལ་ལུང་རིགས་ཡང་དག་པ་འདི་རྣམས་ཁྱོད་ཀྱིས་སྐྱུག་སྨན་དུ་བསྟེན་དང་། ལུང་འདི་དག་མ་བརྟག་མ་དཔྱད་པའི་ཀུན་རྫོབ་བདེན་པ་རྩལ་དུ་བཏོན་ནས་ཐུན་མོང་མ་ཡིན་པའི་ངོ་བོ་ངོས་བཟུང་ནས་འཆད་པའི་གཞུང་ཡིན་པའི་ཕྱིར་དང་། རང་བཞིན་གྱིས་གྲུབ་པ་དང་བརྟག་ཅིང་དཔྱད་ན་མ་གྲུབ་པ་གཉིས་འགལ་བ་ཡང་དག་སྟེ། རང་བཞིན་གྱིས་གྲུབ་ན། དེ་ནི་བརྟག་ཅིང་དཔྱད་པས་མ་གྲུབ་པའི་ངོ་བོ་གཞན་དུ་བཅོས་སུ་མི་རུང་བའི་ཕྱིར་ཏེ། འཕགས་པ་ཀླུས། རང་བཞིན་དག་ནི་བཅོས་མིན་དང་།། ཞེས་པ་རྩ་འགྲེལ་སོགས་ལས་རྒྱ་ཆེར་གསུང་བ་སོགས་ཀྱིས་གནོད་བྱེད་མཐའ་ཡས་ཀྱང་གོང་དུ་བཀག་ཟིན་པས་ཤི་ཟིན་པའི་རོ་ལ་སླར་རྡོ་བརྡུང་བྱེད་མི་དགོས་སོ།།

      

ཡང་ཁྱོད་ཀྱིས་༼མི་ཕམ་གྱིས་༽དེ་ནི་དེ་ཉིད་དུའམ་འཇིག་རྟེན་དུ། ཞེས་སོགས་དྲངས་པའང་རང་མགོ་བཅག་པའི་ཐོ་བ་སྟེ། དེ་ནི་དེ་ཉིད་དུའམ་འཇིག་རྟེན་དུ།། རྣམ་པ་བདུན་གྱིས་འགྲུབ་འགྱུར་མིན་ཞེས་པ་དེ་གང་ཡིན། ཕྱི་ནང་གི་དངོས་པོ་རྣམས་དེ་ཉིད་དེ་དོན་དམ་བདེན་པ་དང་། འཇིག་རྟེན་དུ་སྟེ་ཀུན་རྫོབ་བདེན་པ་གང་གི་དབང་དུ་བྱས་ཀྱང་ཚད་མས་མ་འགྲུབ་པའམ་མི་གྲུབ་ཟེར་རམ་ཕྱི་ནང་གི་དངོས་པོ་རྣམས་བདེན་གཉིས་གང་གི་དབང་དུ་བྱས་ཀྱང་རང་ངོས་ནས་མ་གྲུབ་ཟེར། དང་པོ་ལྟར་ན་ཕྱི་ནང་གི་དངོས་པོ་རྣམས་རྣམ་བདུན་གྱི་རིགས་པ་ལྟ་བུའི་རིགས་པ་ཡང་དག་གིས་ཁེགས་ནས་མ་གྲུབ་པར་གྱུར་ན་གཏན་མེད་དུ་སོང་བ་ཡིན་ཏེ། བདེན་གཉིས་གང་རུང་ལས་གཞན་པའི་ཆོས་ཤིག་གཏན་ནས་མི་སྲིད་པའི་ཕྱིར། ཕྱི་མ་ལྟར་ན་ཕྱི་ནང་གི་དངོས་པོ་རྣམས་བདེན་གཉིས་གང་གི་དབང་དུ་བྱས་ཀྱང་རང་ངོས་ནས་གྲུབ་པ་རྣམ་བདུན་གྱི་རིགས་པ་ལྟ་བུའི་རིགས་པ་ཡང་དག་གིས་བཀག་པས་ཁེགས་ན་བདེན་པ་གཉིས་ལས་གཞན་པའི་ཆོས་ཤིག་ལ་རང་ངོས་ནས་གྲུབ་རྒྱུ་ཅི་འདུག་སོམས་ཤིག ཁྱོད་ཀྱིས་༼མི་ཕམ་གྱིས་༽བློ་གནོད་མེད་ལ་སྣང་བའི་དངོས་པོ་རྣམས་ལ་མ་བརྟག་མ་དཔྱད་པ་ཇི་ལྟར་སྣང་བ་ལྟར་ཐ་སྙད་བྱེད་པ་སྟེ། འཇིག་རྟེན་རྒན་པོའི་རྗེས་སུ་མཐུན་པ་ཁས་ལེན་གྱི། བརྟག་ཅིང་དཔྱད་ན་འཇིག་རྟེན་གྲགས་པའི་རྣམ་བཞག་རྣམས་འཇིག་པར་འགྱུར་ཏེ། ཞེས་སྨྲས་འདུག་པ་ལྟར་ན། དབུ་མ་ཐལ་འགྱུར་པའི་ཐ་སྙད་རྣམ་པར་བཞག་ཚུལ་འཇིག་རྟེན་རྒན་པོ་ལྟར་བྱེད་གསུངས་པ་དེ་རྣ་ཐོས་ཙམ་ལས་དངོས་པོ་རྣམས་ཀྱི་ཐ་སྙད་ཇི་ཙམ་ཞིག་ཁས་ལེན་པ་འདི་ཙམ་འཇིག་རྟེན་རྒན་པོ་རྣམས་དང་བསྟུན་མི་བསྟུན་གྱི་འཚམས་གཏན་ནས་མ་ཟིན་པ་སྟེ། ཕྱི་ནང་གི་དངོས་པོ་རྣམས་འཇིག་རྟེན་རྒན་པོ་ལ་ཇི་ལྟར་སྣང་བ་ལྟར་ཐ་སྙད་བྱེད་ན། འཇིག་རྟེན་རྒན་པོ་ལ་དེ་དག་རང་ངོས་ནས་གྲུབ་པར་སྣང་བ་གང་ཞིག དེ་ལྟར་དུ་གྲུབ་ན་དེ་ནི་དེ་དེ་ཉིད་དུའམ་འཇིག་རྟེན་དུ་གསུང་བ་སོགས་དང་འགལ་བ་སྤྲོས་ཟིན་པ་ལྟར་ཡིན་པའི་ཕྱིར། དེས་ན་རྣམ་བདུན་རིགས་པ་ལྟ་བུའི་རྣམ་དཔྱོད་མེད་པར་གྲུབ་དགོས་ན་རྟོག་བཏགས་ཙམ་མ་ཡིན་པས་གྲུབ་ལུགས་ཟུར་པ་ཞིག་ད་ཅི་འདུག་སོམས་ཤིག།

      

ད་རུང་ཅུང་ཟད་སྤྲོས་ན་གཞི་ཤིང་རྟ་ལྟ་བུ་གཅིག་ལ་རྣམ་པ་བདུན་གྱིས་དཔྱད་ཚེ་མི་འགྲུབ་རྒྱུ་ཞིག་དང་། རྣམ་དཔྱད་མེད་པ་འཇིག་རྟེན་ཉིད་ལས་འདིས་རང་གི་ཡན་ལག་ལ་བརྟེན་ནས་མིང་དང་རྟོག་པས་ཕར་འདོགས་པ་ཙམ་དུ་གྲུབ་རྒྱུ་ཞིག་ཀྱང་དགོས་པ་ལ། ཁོ་བོ་ཅག་རྗེ་བླ་མ་ཙོང་ཁ་པ་ཆེན་པོའི་ཞབས་ཀྱི་རྗེས་སུ་འབྲངས་པ་རྣམས་ཀྱི་ལུགས་ལ། དེ་གཉིས་ཤིང་རྟ་ལྟ་བུའི་གཞི་གཅིག་གི་སྟེང་དུ་དུས་གཅིག་ལ་མི་འགལ་བར་གྲུབ་ཏུ་ཆོག་ལ། ཁྱོད་ཅག་གི་ལུགས་ལ་ཤིང་རྟ་རྣམ་པ་བདུན་གྱིས་མི་འགྲུབ་པ་དེ་ཤིང་རྟ་ཡོད་པ་མི་འགྲུབ་པར་ཤིང་རྟ་གཏན་མེད་ཀྱི་དོན་དུ་སོང་བས། རྣམ་བདུན་རིགས་པས་དཔྱོད་ན་ཤིང་རྟ་ཡོད་པ་མ་འགྲུབ་ནས་མེད་པར་སོང་བའི་ཤུལ་དུ་འཇིག་རྟེན་རྒན་པོ་ལྟར་ཐ་སྙད་དུ་བཞག་རྒྱུའི་ཤིང་རྟ་ཞིག་ག་ལ་ཡོད་དེ་མེད་པ་དཔེར་ན་མོ་གཤམ་ཀྱི་བུ་ལྟ་བུ་ཞིག་ལ་ཐ་སྙད་གཟུགས་བཟང་ངན་གྱི་རྣམ་པར་བཞག་པ་བཞད་གད་ཀྱི་གནས་ཡིན་པ་དང་མཚུངས་པའི་ཕྱིར། གལ་ཏེ་དེ་ལ་རྣམ་བདུན་རིགས་པས་ཤིང་རྟ་གཏན་མེད་བྱས་ནའང་དེས་ཤིང་རྟ་མེད་གོ་མི་ཆོད། ཐ་སྙད་དུ་ཤིང་རྟ་འཇིག་རྟེན་རྒན་པོ་ལ་ཇི་ལྟར་སྣང་བ་ལྟར་རྣམ་པར་བཞག་ཆོག་དེས་ཤིང་རྟ་ཡོད་གོ་ཆོད་པས་མི་སྐྱོན་སྙམ་ན། རིགས་པ་ཡང་དག་གིས་ཁེགས་ནས་གཏན་མེད་བྱས་ཟིན་པས་མེད་གོ་མི་ཆོད་ན་དེ་བས་ལྷག་པའི་མེད་ལུགས་ཅི་ཞིག་ཡོད་དེ་ཚད་མས་མ་གྲུབ་པ་ལས་ལྷག་པའི་མེད་ལུགས་ཞིག་ཡོད་ན་ཉམས་རེ་མཚར། ཤིང་རྟ་ཐ་སྙད་དུ་འཇིག་རྟེན་རྒན་པོ་ལ་ཇི་ལྟར་སྣང་བ་ལྟར་རྣམ་པར་བཞག་ན་འཇིག་རྟེན་རྒན་པོ་ལ་ཤིང་རྟ་རང་ངོས་ནས་གྲུབ་པར་སྣང་བ་གང་ཞིག་སྣང་བ་དེ་ཇི་ལྟ་བ་བཞིན་ཤིང་རྟ་རྣམ་པར་བཞག་དགོས་ན་ཤིང་རྟ་རང་ངོས་གྲུབ་དགོས། དེ་གྲུབ་པར་མི་འཐད་པ་ཟླ་བས། དེ་ནི་དེ་ཉིད་དུའམ་འཇིག་རྟེན་དུ་ཞེས་པས་བདེན་པ་གཉིས་ཆར་དུའང་རང་ངོས་ནས་གྲུབ་པ་བཀག་པའི་ཕྱིར་དང་། གཞན་ཡང་ཟླ་བས། བདེན་པ་གཉིས་སུའང་རང་བཞིན་མེད་པའི་ཕྱིར་གསུངས་པ་སོགས་མཐའ་ཡས་པས་གནོད་པའི་ཕྱིར། འཇིག་རྟེན་རྒན་པོ་ལ་ཇི་ལྟར་སྣང་བ་ལྟར་གྱི་ཤིང་རྟ་ཡོད་ན་ཤིང་རྟ་རང་ངོས་གྲུབ་པའི་ཡོད་པ་ཡིན་དགོས། རང་ངོས་ནས་གྲུབ་པ་དང་ཡོད་པ་འགལ་བའི་ཕྱིར། རང་ངོས་ནས་གྲུབ་པ་ནི་བདེན་གཉིས་གང་དུའང་འཐད་པའི་གནས་མེད་དོ།།

      

གཞན་ཡང་ཁྱོད་འདི་ཙམ་མགོ་བོ་རྨོངས་འདུག་པ་དེ། དཔྱད་གཞི་ཤིང་རྟ་གཅིག་ལ་རྣམ་པར་དཔྱད་ཚེ་འགྲུབ་པར་མི་འགྱུར་བ་དང་། རྣམ་དཔྱད་མེད་པ་རང་གི་ཡན་ལག་སོགས་ལ་བརྟེན་ནས་འདོགས་པ་ཙམ་གྱི་འགྲུབ་རྒྱུ་གཉིས་བྱུང་བ་འདི་གཉིས་འགལ་མེད་དུ་འཛིན་མ་ཤེས་པའི་སྐྱོན་དང་། གཞི་ཤིང་རྟ་གཅིག་ཉིད་རྣམ་བདུན་རིགས་པ་སོགས་ཀྱིས་རྣམ་པར་དཔྱད་ན་མི་འགྲུབ་པ་དེ་ཤིང་རྟ་ལ་དཔྱད་ཚུལ་གང་ཡིན་ངོ་མ་ཤེས་པའི་སྐྱོན་དང་། རྣམ་བདུན་རིགས་པས་དཔྱད་ཚེ་ཤིང་རྟ་ཡོད་མེད་དཔྱད་པ་ལ་ཤིང་རྟ་རང་ངོས་ནས་ཡོད་མེད་དཔྱད་པར་མ་གོ་བར། ཤིང་རྟ་ཡོད་མེད་དཔྱད་པར་གོ་སོང་བའི་སྐྱོན་དང་། རྣམ་དཔྱད་མེད་པ་འཇིག་རྟེན་རྒན་པོ་ལྟར་ཐ་སྙད་བཞག་ཚེ་རྣམ་པར་དཔྱད་མ་དཔྱད་ཀྱི་འཚམས་གང་ཡིན་ངོས་མ་ཟིན་ནས་ཤིང་རྟའི་ཡན་ལག་སོགས་ལ་བརྟེན་ནས་འཇིག་རྟེན་རྒན་པོས་ཤིང་རྟའི་ཐ་སྙད་བཞག་པ་ཙམ་གྱིས་རྗེས་སུ་འབྲངས་ནས་ཤིང་རྟའི་ཐ་སྙད་མི་བྱེད་པ་འཇིག་རྟེན་རྒན་པོ་ལ་ཇི་ལྟར་སྣང་བ་ལྟར་གྱི་ཐ་སྙད་བྱེད་པ་འདི་རྣམས་ཀྱིས་འཁྲུལ་གཞི་བྱས་པ་སྟེ། སྤྱིར་དབུ་མ་ཐལ་འགྱུར་བས་ཐ་སྙད་རྣམ་པར་འཇོག་ཚུལ་འདི་ཧ་ཅང་ཞིབ་པས་རྗེ་བླ་མ་ཙོང་ཁ་པ་ཆེན་པོ་རང་གི་རྗེས་འཇུག་གསུང་གི་བདུད་རྩི་མྱོང་བཞིན་པ་རྣམས་ཀྱིས་ཀྱང་ཡུལ་དུ་བྱ་དཀའ་ན། ཁྱོད་ཅག་རིགས་པ་ཡང་དག་ལ་གོམས་འདྲིས་ཆུང་ཞིང་ཐལ་འགྱུར་བའི་བཞེད་ཚུལ་ཇི་ལྟ་བའི་རིགས་པའི་རྣམ་འགྱུར་ཕྲ་མོ་སྟོན་པའི་དགེ་བའི་བཤེས་གཉེན་དང་མ་འཕྲད་པ་རྣམས་ཐུགས་ཁག་ཅི་ཞིག་ཡོད།

སྨྲས་པ།

རིགས་ལམ་གོམས་པའི་གྲུ་གཟིངས་མ་རྙེད་ཅིང་།།

ཡང་དག་བཤེས་གཉེན་དེད་དཔོན་མ་འཛོམ་པར།།
ངེས་དོན་རྒྱ་མཚོར་བགྲོད་འདོད་རང་ཉིད་ལ།།
ལོག་རྟོག་འཁུར་གྱིས་ངལ་བ་བྱིན་པར་ཟད།།
ཀླུ་སྒྲུབ་ཟླ་གྲགས་ཐ་སྙད་རྟེན་འབྲེལ་གྱི།།
བཞེད་གཞུང་དྲང་ཐིག་རིགས་ལམ་ཕྲ་ཞིབ་ལ།།
འཇམ་མགོན་བླ་མས་མུན་ཁུང་གསལ་སྒྲོན་དུ།།
མཛད་ཀྱང་རྗེས་འཇུག་ཕལ་གྱིས་རྟོགས་དཀའ་ན།།
ཁྱོད་ཅག་འདི་རིགས་གཞུང་ལུགས་ཟབ་མོ་ལ།།
དཔྱད་བྱེད་རིགས་པའི་ལམ་ལ་གོམས་པ་ཞན།།
ཚུལ་བཞིན་སྟོན་པའི་བཤེས་གཉེན་དང་བྲལ་ན།།

ཐུགས་ཁག་མེད་ཀྱང་ལམ་འདིར་སྨོན་པ་འཐད།།

ཅེས་ཀྱང་བྱས་སོ།།

ཡང་ཁྱོད་ཀྱིས་དེའི་འོག་ཏུ། ༼མི་ཕམ་གྱིས་༽ དེ་ལྟར་འཇིག་རྟེན་ན་གནོད་མེད་ཀྱི་དབང་པོ་ལ་སྣང་བའི་དབང་གིས་བཞག་པའི་ཐ་སྙད་བྱེད་ཚུལ་དེ་བོར་ནས་རྟོག་པས་ཕར་བཏགས་པ་ཙམ་གྱི་ཚད་གྲུབ་ཁས་ལེན་ན། རྟོག་པས་བཏགས་པ་ཙམ་གྱི་དབང་ཕྱུག་བྱེད་པ་པོ་དང་། གཙོ་བོ་དང་རྟག་པའི་སྒྲ་ལ་སོགས་པ་ཡང་གྲུབ་པར་འགྱུར་ཏེ། དེ་དང་བུམ་པ་སོགས་ལ་ཐ་སྙད་དུ་ཡང་ཡུལ་རང་ངོས་ནས་མ་གྲུབ་པ་ལ་ཁྱད་མེད་ཅིང་། རྟོག་པས་ཕར་བཏགས་པ་ལའང་ཁྱད་མེད་པའི་ཕྱིར་རོ།།

      

གཞན་ཡང་རྟོག་པས་ཕར་བཏགས་པ་དེ་ཐ་སྙད་དུ་ཡུལ་གྱི་ངོས་ནས་མེད་པ་ལ་སྒྲོ་བཏགས་པ་འཁྲུལ་བའི་བློ་ཞིག་ཡིན་ནམ། ཡུལ་ལ་ཡོད་པ་ལ་ཡོད་པར་བཏགས་པ་མ་འཁྲུལ་བ་གང་ཡིན། དང་པོ་ལྟར་ན་སངས་རྒྱས་ཀྱིས་ཐ་སྙད་ཀྱི་ཆོས་གང་ཡང་གཟིགས་པར་མི་འགྱུར་ཏེ། དེ་ལ་འཁྲུལ་བས་སྒྲོ་བཏགས་པའི་བློ་མི་མངའ་བའི་ཕྱིར་རོ།། གཉིས་པ་ལྟར་ན་ཐ་སྙད་དེ་བློས་ཕར་བཏགས་ཙམ་མིན་པར་ཐ་སྙད་དུ་ཆོས་དེ་དག་རང་ངོས་ནས་ཀྱང་ཡོད་པར་འགྱུར་རོ།། ཞེས་སྨྲས་འདུག་པ་འདི་ཙམ་ཕྱོགས་སྔར་བཀོད་ནས་ཅུང་ཞིག་བརྒལ་ན།

      

རྟོག་བཏགས་ཙམ་གྱི་ཚད་གྲུབ་ཁས་ལེན་པས་དབང་ཕྱུག་བྱེད་པོ་དང་གཙོ་བོ་སྒྲ་རྟག་པ་སོགས་ཐ་སྙད་དུ་ཡོད་པ་ཁས་ལེན་དགོས་པར་འགྱུར་བའི་སྐྱོན་མེད་དེ། ཁོ་བོས་གཞི་གྲུབ་ན་རྟོག་པས་བཏགས་ཙམ་ཡིན་པའི་ཁྱབ་པ་ཁས་བླངས་ཀྱི། རྟོག་པས་བཏགས་ཙམ་ཡིན་ན་གཞི་གྲུབ་པའི་ཁྱབ་པ་ཁས་མི་ལེན་པའི་ཕྱིར། རྒྱུ་མཚན་འདིའི་གནད་ཀྱིས་དཔལ་ལྡན་ཟླ་བས་སྤྱིར་ཀུན་རྫོབ་བདེན་པ་ལ་ཡང་ལོག་མ་ཕྱེས། འཇིག་རྟེན་ཤེས་ངོ་ལ་ལྟོས་ནས་ཡང་ལོག་ཕྱེས་པ་དེ་བྱུང་བ་ཡིན་ཏེ། སྤྱིར་ཀུན་རྫོབ་ལ་ཡང་ལོག་ཕྱེས་ན་གཞི་གྲུབ་ན་རྟོག་པས་བཏགས་ཙམ་ཡིན་པས་མ་ཁྱབ་པར་འགྱུར་ལ། དེས་ན་ཉེ་བ་འཁོར་གྱིས་ཞུས་པ་ལས།

སྣ་ཚོགས་ཡིད་དགའ་མེ་ཏོག་ཁ་ཕྱེ་ཞིང་།།

གསེར་གྱི་ཁང་མཆོག་འབར་བ་ཡིད་འོང་བ།།
འདི་ན་དེ་ལའང་བྱེད་པོ་འགའ་མེད་དེ།།
དེ་དག་རྟོག་པའི་དབང་གིས་བཞག་པ་ཡིན།།

རྟོག་པའི་དབང་གིས་འཇིག་རྟེན་རྣམ་བརྟག་སྟེ།།

ཞེས་གསུངས་པ་སོགས་ལུང་མཐའ་ཡས་པ་དང་འགལ་ཏེ། གཞི་གྲུབ་ན་རྟོག་པའི་དབང་གིས་བཞག་པ་དང་། རྟོག་པའི་དབང་གིས་རྣམ་པར་བརྟག་པས་མ་ཁྱབ་པའི་ཕྱིར། དེ་ལ་གཞི་གྲུབ་ན་རྟོག་པས་བཏགས་པས་ཁྱབ་ཀྱང་། དེ་གནོད་མེད་ཀྱི་བློའི་དབང་གིས་བཞག་པའི་དོན་ཡིན་ཟེར་ན། འདིར་རང་རྒྱུད་པའི་ལུགས་ལྟར་ཁྱོད་ཅག་གི་བློ་གནོད་མེད་ཅེས་སྨྲ་འདུག་དགོས་པའི་གནད་ནི། གནོད་མེད་ནི་དོན་དེ་ལ་མ་འཁྲུལ་བ་ཞིག་ཡིན། དེ་ཡང་བུམ་འཛིན་མངོན་སུམ་ལྟ་བུ་བུམ་པ་ལ་མ་འཁྲུལ་བ་ནི་ཡིན་ཏེ། བློ་དེ་མ་འཁྲུལ་བ་སོང་སའི་གཞི་བུམ་པ་རང་ངོས་ནས་གྲུབ་པའམ་རང་མཚན་གྱིས་གྲུབ་པ་དེ་ལ་བྱེད་པ་དང་། མདོར་ན་བློ་གནོད་མེད་ལ་སྣང་བའི་དབང་གིས་བཞག་པ་དང་། ཡུལ་རང་ངོས་ནས་གྲུབ་པ་གཉིས་ཚོགས་མ་བྱུང་བར་དུ་ཐ་སྙད་བཞག་ས་མེད་པར་འདོད་པ་འདི་འདུག་པས། དེ་ནི་ཐལ་འགྱུར་བའི་ལུགས་ཀྱི་ཐ་སྙད་རྣམ་པར་འཇོག་པའི་ལྡོག་ཕྱོགས་གཙོ་བོ་ཡིན་ཏེ། དེ་ཡང་ཅུང་ཟད་སྤྲོས་ན་སྤྱིར་ཐལ་འགྱུར་བས་ཀྱང་བུམ་པ་བློ་ཞིག་ལ་སྣང་བའི་དབང་གིས་ཡོད་པར་འཇོག་ཀྱང་རང་རྒྱུད་པ་ལྟར་བུམ་པ་རང་གི་སྡོད་ལུགས་ལ་མ་འཁྲུལ་བའི་བློ་གནོད་མེད་ཁོ་ནས་ཡོད་པ་འཇོག་མི་དགོས། བུམ་པའི་སྡོད་ལུགས་ལ་འཁྲུལ་པའི་བློས་ཀྱང་བུམ་པ་ཡོད་པར་འཇོག་ནུས་པའི་ཕྱིར། ཁོ་བོ་ཅག་རྣམ་པ་ཀུན་ཏུ་དབང་ཕྱུག་བྱེད་པ་པོ་དང་གཙོ་བོ་དང་སྒྲ་རྟག་པ་སོགས་ལ་འདོད་དགོས་པའི་སྐྱོན་མེད་དེ། དེ་དག་ནི་བློ་ལོག་ཤེས་ཀྱིས་དབང་ཕྱུག་བྱེད་པ་པོ་སོགས་ཐ་སྙད་དུ་ཡང་མེད་བཞིན་དུ་ཡོད་པར་སྒྲོ་འདོགས་པ་ཡིན་པ་དང་། དེ་དག་ལ་སྒྲ་མི་རྟག་རྟོགས་ཀྱི་རྗེས་དཔག་སོགས་ཐ་སྙད་པའི་ཚད་མ་གཞན་གྱིས་གནོད་པའི་ཕྱིར། བུམ་འཛིན་རྟོག་པ་བུམ་པའི་སྡོད་ལུགས་ལ་འཁྲུལ་ཀྱང་། དེས་བུམ་པ་རྣམ་པར་བཞག་པ་ལ་འཇིག་རྟེན་པའི་ཐ་སྙད་པའི་ཚད་མ་གཞན་གང་གིས་ཀྱང་མི་གནོད་པའི་ཕྱིར། དེ་ལྟར་ཡང་རིགས་པ་དྲུག་ཅུ་པའི་འགྲེལ་པ་ལས། དེ་ཡང་ཕྱིན་ཅི་ལོག་ནི་བདེ་བ་ལ་སོགས་པ་ཉིད་དུ་འཛིན་པ་གང་ཡིན་པ་སྟེ། ཀུན་རྫོབ་ཏུ་ཡང་བདག་ཉིད་དེར་དངོས་པོ་དེ་རྣམ་པར་མི་གནས་པ་ཡིན་པ་ཉིད་ཀྱི་ཕྱིར་རོ།། ཕྱིན་ཅི་མ་ལོག་པ་ནི་སྡུག་བསྔལ་ལ་སོགས་པ་ཉིད་དུ་འཛིན་པ་སྟེ་དངོས་པོ་དེ་ཀུན་རྫོབ་ཏུ་བདག་ཉིད་དེར་ཡོད་པ་ཉིད་ཀྱི་ཕྱིར་རོ།། ཞེས་བདེ་བ་དང་རྟག་པ་སོགས་སུ་འཛིན་པ་ཀུན་རྫོབ་ཕྱིན་ཅི་ལོག་ཏུ་བཤད་ལ། སྡུག་བསྔལ་བ་དང་མི་རྟག་པ་སོགས་འཇིག་རྟེན་རྒན་པོ་སོགས་ཀུན་ལ་མ་གྲགས་ཀྱང་དེར་འཛིན་པ་ཕྱིན་ཅི་མ་ལོག་པ་ཀུན་རྫོབ་ཐ་སྙད་དུ་ཡོད་པའི་ཆོས་སུ་བཞག་པར་གསུངས་པས། ཐ་སྙད་པའི་ཆོས་ཡིན་ན་འཇིག་རྟེན་ཀུན་ལ་གྲགས་པས་ཁྱབ་པའང་ཡོད་མི་དགོས་ལ། ཐ་སྙད་པའི་ཆོས་སྡུག་བསྔལ་བ་སོགས་དེ་ལྟར་དུ་གྲུབ་པ་ལ་ཐ་སྙད་པའི་ཚད་མ་གཞན་གྱིས་གནོད་པ་མེད་པས་འཇིག་རྟེན་གྱི་ཐ་སྙད་ཕྱིན་ཅི་མ་ལོག་པ་ཉིད་དུ་རྣམ་པར་བཞག་པར་མཛད་པའི་ཕྱིར་རོ།།

      

འོ་ན་ཁྱོད་ཀྱིས་གོང་དུ་བུམ་པའི་སྡོད་ལུགས་ལ་འཁྲུལ་བའི་བློས་བུམ་པ་འཇོག་པར་བཤད་ན། བློ་འཁྲུལ་ན་ནི་རང་ཡུལ་ལ་འཁྲུལ་དགོས། དེ་ཡིན་ན་དེ་འཁྲུལ་བཞིན་དུ་ཡུལ་དེ་ཐ་སྙད་དུ་ཡོད་པར་འཇོག་དགོས་ན་ཐ་སྙད་བདེན་པ་པའང་འཁྲུལ་ངོ་ཙམ་ལས་དོན་གྱི་སྡོད་ལུགས་འཇོག་ས་མ་རྙེད་པས་ངེད་ཅག་བོད་སྔ་རབས་པའི་འདོད་ཚུལ་ལྟར་ལས་ལོགས་སུ་ཁྱད་ཆོས་འདོན་རྒྱུ་ཅི་ཡང་མི་འདུག་པས་རང་གིས་རང་ལ་ངལ་བ་མ་བྱེད་ཅེས་སྨྲ་ན། འདི་ཙམ་དཔྱད་པ་ཅུང་ཟད་ཕྲ་བའི་དོགས་པ་ཡིན་པས་ཁྱོད་ཅག་གི་བློ་ཡུལ་དུ་དེ་རིགས་དྲན་པ་དཀའ་ཡང་རང་གིས་དོགས་པ་དེ་ལྟ་བུ་སློང་ནས་ལན་འདེབས་ན། འདི་ནི་བློ་གང་ནས་འཁྲུལ་བ་དང་གང་ནས་མ་འཁྲུལ་བའི་ས་འཚམས་ཕྱེད་མ་ཤེས་པའི་སྐྱོན་ཡིན་ཏེ། བུམ་འཛིན་རྟོག་པ་ལྟ་བུ་བུམ་པའི་སྡོད་ལུགས་ལ་འཁྲུལ་བའི་བློས་བུམ་པ་འཇོག་ཅེས་པའི་བུམ་འཛིན་རྟོག་པ་འཁྲུལ་བ་སོང་སར་བུམ་པའི་སྡོད་ལུགས་ལ་འཁྲུལ་པར་སོང་ལ། དེ་སོང་ཡང་བློ་དེ་བུམ་པ་ལ་མ་འཁྲུལ་བ་ཡིན་པའི་ཕྱིར། དང་པོ་གྲུབ་སྟེ། བུམ་འཛིན་རྟོག་པ་བུམ་པའི་སྡོད་ལུགས་ལ་འཁྲུལ་བ་ཡིན་ཏེ། བུམ་པའི་སྡོད་ལུགས་རང་མཚན་གྱིས་གྲུབ་པས་སྟོང་པ་ཡིན་པ་གང་ཞིག། བུམ་འཛིན་རྟོག་པ་ལ་བུམ་པ་རང་མཚན་གྱིས་གྲུབ་པར་སྣང་བའི་ཕྱིར། གཉིས་པ་གྲུབ་སྟེ། བུམ་འཛིན་རྟོག་པ་བུམ་པ་ཙམ་ལ་མ་འཁྲུལ་ཏེ། བློ་དེས་བུམ་པ་ཡོད་ཙམ་དུ་ངེས་པའི་ངེས་ཤེས་ཀྱི་ཡུལ་ལ་ནི་རིགས་པས་གནོད་པ་མེད་པའི་ཕྱིར། དེས་ན་བུམ་འཛིན་རྟོག་པ་དེ་བུམ་པ་སྣང་ཚུལ་གྱི་སྒོ་ནས་འཁྲུལ་ཀྱང་། ངེས་པའི་ཚུལ་ལ་མ་འཁྲུལ་བའི་ཕྱིར། ཞེས་ཁྱད་པར་ཕྱེ་དགོས་སོ།།

      

དེས་ན་བུམ་པ་ལྟ་བུའི་འཛིན་ཚུལ་ལའང་རང་བཞིན་གྱིས་ཡོད་པར་འཛིན་པའི་འཛིན་ཚུལ་གཅིག་དང་། རང་ངོས་ནས་མེད་ཀྱང་སྒྱུ་མ་ལྟར་བརྫུན་པར་ཡོད་པར་འཛིན་ཚུལ་གཅིག་དང་། དེ་གཉིས་གང་གིས་ཀྱང་ཁྱད་པར་མ་བྱས་པར་འཛིན་ཚུལ་གཅིག་དང་གསུམ་ཡོད་པ་ལས་འཛིན་ཚུལ་བར་མ་ནི་རང་བཞིན་མེད་པར་རྟོགས་པའི་ལྟ་བ་རྒྱུད་ལ་སྐྱེས་ཟིན་པའི་གང་ཟག་ལས་གཞན་ལ་མི་འབྱུང་ཞིང་། བདེན་པར་རམ་རང་ངོས་ནས་ཡོད་པར་འཛིན་པ་དང་ཡོད་ཙམ་དུ་འཛིན་པ་ནི་རང་བཞིན་མེད་པར་རྟོགས་པའི་ལྟ་བ་རྒྱུད་ལ་མ་སྐྱེས་པའི་སེམས་ཅན་རྣམས་ལ་འབྱུང་བའི་ཕྱིར། ལྟ་བ་མ་རྙེད་པའི་སེམས་ཅན་རྣམས་ཀྱི་རྒྱུད་ཀྱི་རྟོག་པས་ཡོད་པར་གང་བཟུང་བདེན་འཛིན་དུ་བྱེད་ན། ཐ་སྙད་པའི་བློ་ཐམས་ཅད་དགག་བྱར་བྱེད་པའི་ལོག་རྟོག་མ་རུང་བ་ཆེན་པོ་འབྱུང་བ་ཡིན་ནོ།།

      

དེས་ན་རྟོག་པས་བཏགས་ཙམ་གང་ཡིན་འཁྲུལ་ངོ་ཙམ་ལས་མེད་པ་ཡིན་སྙམ་པའི་ལོག་རྟོག་དེ་ཉིད་ཀྱིས་ཐ་སྙད་པའི་ཆོས་ཐམས་ཅད་འཁྲུལ་ངོ་ཙམ་ལས་ཚད་མས་གྲུབ་པ་མ་ཡིན་ཞེས་སྐུར་བ་བཏབ་པའི་ཆད་ལྟ་ལ་གནས་ནས། ཐལ་འགྱུར་བའི་བཞེད་ཚུལ་ཐུན་མོང་མ་ཡིན་པ་རྟོག་པས་བཏགས་ཙམ་གྱི་ཡོད་པར་ཁས་ལེན་པའི་གནད་འདི་རྒྱུད་ལ་མ་ཤོངས་ནས། རྟོག་པས་བཏགས་ཙམ་ལས་མ་གྲུབ་ན་ཡོད་པ་ཡིན་པར་འགལ་བསམ་ནས། དབང་ཕྱུག་བྱེད་པོ་དང་། གཙོ་བོ་དང་། སྒྲ་རྟག་པ་སོགས་རྟོག་བཏགས་ཙམ་ཡིན་ན་རང་ངོས་མ་གྲུབ་པ་ནི་འདྲ་བས། བུམ་པ་ཀ་བ་སོགས་དང་ཡོད་མེད་མགོ་མཚུངས་སུ་འགྱུར་སྙམ་པའི་འཁྲུལ་གཞི་འདི་ཅི་ཞིག་གིས་འབྱུང་དགོས་ཏེ། འཇུག་པ་ལས།

མི་ཤེས་གཉིད་ཀྱིས་རབ་བསྐྱོད་མུ་སྟེགས་ཅན།།

རྣམས་ཀྱི་བདག་ཉིད་ཇི་བཞིན་བརྟག་པ་དང་།།
སྒྱུ་མ་སྨིག་རྒྱུ་སོགས་ལ་བརྟག་པ་གང་།།

དེ་དག་འཇིག་རྟེན་ལས་ཀྱང་ཡོད་མིན་ཉིད།།

ཞེས་ཤིན་ཏུ་གསལ་བར་གསུང་འདུག་པའི་ཕྱིར། འདིའི་ཚིག་རྐང་དང་པོ་གཉིས་ཀྱི་མཐའི་བརྟག་པ་དང་ཞེས་པ་དང་། ཚིག་རྐང་གསུམ་པའི་མཐའི་བརྟག་པ་ཞེས་པ་དག་རྟོག་པས་བཏགས་པ་ལ་གསུངས་པ་ཡིན་ཞིང་། དེ་དག་འཇིག་རྟེན་ཐ་སྙད་དུའང་མེད་པར་གསུངས་པ་ནི་རྟོག་པས་བཏགས་པ་ཡིན་ལ་ཐ་སྙད་དུ་མེད་པ་དང་། གོང་དུ་དྲང་བའི་རྟོག་པའི་དབང་གིས་འཇིག་རྟེན་རྣམ་བརྟག་སྟེ་ཞེས་འཇིག་རྟེན་གྱི་ཐ་སྙད་རྣམས་རྟོག་པས་བཏགས་པར་གསུངས་པ་དང་།

བུམ་སོགས་འདི་དག་དེ་ཉིད་དུ་མེད་ཅིང་།།

འཇིག་རྟེན་རབ་ཏུ་གྲགས་པ་ཡོད་ཅེས་དང་།།
དེ་ནི་དེ་ཉིད་དུའམ་འཇིག་རྟེན་དུ།།
རྣམ་པ་བདུན་གྱིས་འགྲུབ་འགྱུར་མིན་མོད་ཀྱི།།
རྣམ་དཔྱད་མེད་པར་འཇིག་རྟེན་ཉིད་ལས་འདི།།

རང་གི་ཡན་ལག་བརྟེན་ནས་འདོགས་པ་ཡིན།།

ཞེས་ཤིང་རྟ་རྣམ་བདུན་རིགས་པས་བཙལ་བའི་ཚེ། ཤིང་རྟ་རང་ངོས་ནས་གྲུབ་པར་མི་འགྲུབ་ཀྱང་། རྣམ་པར་མ་དཔྱད་པ་འཇིག་རྟེན་ཉིད་ལས་འདི་སྟེ། ཤིང་རྟ་ཡོད་ཙམ་གྱི་ཐ་སྙད་ནི་ཤིང་རྟ་རང་གི་ཡན་ལག་རྣམས་ལ་བརྟེན་ནས་རྟོག་པས་བཏགས་པ་ཡིན་གསུངས་པས་འདི་དག་ལ་ཞིབ་ཏུ་ལྟོས་དང་། སྔ་མ་མི་ཤེས་གཉིད་ཀྱིས་བསྐྱོད་པའི་མུ་སྟེགས་ཅན་གྱིས་བརྟག་པའི་བདག་སོགས་དང་། སྒྱུ་མ་དང་སྨིག་རྒྱུ་སོགས་ལ་རྟོག་པས་ཕར་བརྟག་པ་གང་ཡིན་པ་ནི་དེ་ཉིད་ལྟ་ཞོག་འཇིག་རྟེན་ཐ་སྙད་དུའང་མེད་ཅེས་དང་། ཤིང་རྟ་སོགས་འཇིག་རྟེན་ཉིད་ལས་ཏེ་འཇིག་རྟེན་གྱི་ཐ་སྙད་དུ་ཡོད་པ་དང་རྟོག་པས་ཕར་བཏགས་པ་གཉིས་ཚོགས་སུ་གསུངས་པའི་ཕྱིར། ཁྱོད་ལྟར་རྟོག་བཏགས་ཙམ་གྱིས་ཐ་སྙད་ཚད་གྲུབ་ཁས་ལེན་མི་རུང་ན་གོ་བདེ་བའི་སྦྱོར་བ་འདི་བྱ་སྟེ། བུམ་པ་ཆོས་ཅན། ཐ་སྙད་དུ་ཚད་མས་གྲུབ་པར་ཐལ། ཐ་སྙད་དུ་ཡོད་པའི་ཕྱིར། རྟགས་གྲུབ་སྟེ།

བུམ་སོགས་འདི་དག་དེ་ཉིད་དུ་མེད་ཅིང་།།
འཇིག་རྟེན་རབ་ཏུ་གྲགས་པས་ཡོད་

ཅེས་གསུངས་པའི་ཕྱིར། ཐ་སྙད་དུ་ཡོད་ལུགས་ཀྱང་རང་ངོས་མ་གྲུབ་པའི་ཚུལ་གྱིས་ཡོད་དགོས་པ་ལུང་འདིས་གསལ་བར་མཛད་པ་ཡིན་ཏེ། ཚིག་རྐང་སྔ་མས་བུམ་སོགས་དེ་ཉིད་དུ་མེད་གསུངས་པ་གང་ཞིག། དེ་ཉིད་དུ་མེད་པ་ནི་རང་བཞིན་མེད་པའི་དོན་ཡིན་པའི་ཕྱིར་དང་། དེ་ལྟར་རང་བཞིན་གྱིས་གྲུབ་པ་མེད་བཞིན་དུའང་། འཇིག་རྟེན་རབ་ཏུ་གྲགས་པའི་ཐ་སྙད་དུ་ཡོད་པ་ཚིག་རྐང་ཕྱི་མས་སྟོན་པའི་ཕྱིར། རང་ངོས་ནས་མ་གྲུབ་བཞིན་དུ་རྟོག་བཏགས་ཙམ་གྱིས་ཐ་སྙད་ཚད་མས་གྲུབ་པ་ཕྱི་ནང་གི་དངོས་པོ་མཐའ་དག་ལ་རིགས་འགྲེ་དགོས་པ་ལུང་སྔ་མའི་མཇུག་ཐོགས་དེ་མ་ཐག་ཏུ། དེ་བཞིན་དངོས་པོ་ཐམས་ཅད་འགྱུར་བས་ན།། ཞེས་གསུངས་པ་ལུང་སྔ་ཕྱི་དེ་དག་རྒྱུ་མཚན་དུ་བྱས་ཏེ། དངོས་སྨྲ་བས་གོང་དུ།

གལ་ཏེ་དངོས་རྣམས་དེ་ཉིད་དུ་མེད་ན།།

ཐ་སྙད་དུ་ཡང་མོ་གཤམ་བུ་ཇི་བཞིན།།

དེ་དག་མེད་པར་ཉིད་འགྱུར་དེ་ཡི་ཕྱིར།།

ཞེས་ཁྱོད་ཅག་གིས་སྨྲས་པ་བཞིན། ཕྱི་ནང་གི་དངོས་པོ་རྣམས་རང་བཞིན་ནམ་རང་ངོས་ནས་མ་གྲུབ་ན་ཐ་སྙད་དུ་གྲུབ་པ་མེད་པར་གཏན་མེད་དུ་འགྱུར་བ་མོ་གཤམ་ཀྱི་བུ་དང་མཚུངས་པར་ཐལ་བའི་རྩོད་པ་བྱུང་བའི་ལན་དུ།

མོ་གཤམ་བུ་ལྟར་གང་ཕྱིར་འཇིག་རྟེན་གྱིས།།

མཐོང་བའི་ཡུལ་དུ་མི་འགྱུར་མ་ཡིན་པ།།

དེ་ཡི་ཕྱིར་ན་སྨྲ་འདི་མ་ངེསཔའོ།།

ཞེས་མོ་གཤམ་གྱི་བུ་ཞེས་མིང་དུ་བརྗོད་ཅིང་རྟོག་པས་བཏགས་ཙམ་ཡིན་ཀྱང་འཇིག་རྟེན་པ་རྣམས་ཀྱིས་མཐོང་བའི་ཡུལ་དུ་མི་འགྱུར་ཁྱད་པར་དང་། ཕྱི་ནང་གི་དངོས་པོ་རྣམས་རྟོག་བཏགས་ཙམ་ལ་འཇིག་རྟེན་པ་རྣམས་ཀྱིས་མཐོང་བའི་ཡུལ་དུ་མི་འགྱུར་བ་མ་ཡིན་པའི་ཁྱད་པར་འདི་གཉིས་ཀྱི་སྒོ་ནས། དངོས་པོ་རང་བཞིན་གྱིས་མེད་ཀྱང་མོ་གཤམ་གྱི་བུ་ལྟར་གཏན་མེད་དུ་ཐལ་བའི་སྐྱོན་མེད་པའི་རྩོད་སྤོང་དང་། གོང་དུ་དྲངས་ཟིན་པའི་ལུང་ཚིག་རྐང་གསུམ་དང་ཚིག་རྐང་བཞི་པས་རྒྱུ་མཚན་དེ་དག་ལ་བརྟེན་ནས།

མོ་གཤམ་བུ་དང་མཚུངས་པར་ཐལ་མི་འགྱུར།།

ཞེས་རྩོད་སྤོང་མཛད་ཚུལ་གསལ་པོ་འདི་རྣམས་ལ་ལེགས་པར་དཔྱད་དང་། མོ་གཤམ་གྱི་བུ་དང་ཕྱི་ནང་གི་དངོས་པོ་རྣམས་རང་བཞིན་མེད་པ་གཞིར་བཅས་ནས་འཇིག་རྟེན་གྱི་ཐ་སྙད་དུ་ཡོད་པར་མཐོང་མི་མཐོང་གི་ཁྱད་པར་དང་། འཇིག་རྟེན་གྲགས་པའི་སྒོ་ནས་ཡོད་པ་ཡིན་མིན་གྱི་ཁྱད་པར་ཕྱེ་བ་འདི་ཁྱོད་ལྟར་ན་དོན་མེད་འབའ་ཞིག་བྱས་པར་ཐལ་ཏེ། རང་ངོས་ནས་མ་གྲུབ་པ་ནི་གཏན་མེད་ཀྱི་དོན་དུ་སོང་བས་བུམ་སོགས་དེ་ཉིད་དུ་མེད་ཟིན་ནས་ཐ་སྙད་དུ་ཡོད་མེད་མོ་གཤམ་གྱི་བུ་དང་ཁྱད་པར་ཕྱེ་རྒྱུ་ཅི་ཡང་མི་འདུག་པས་དཔལ་ལྡན་ཟླ་བའི་ཞབས་ལ་དོན་མེད་ཀྱི་འོ་བརྒྱལ་མ་མཛད་ཅེས་སྙིང་ཁམ་བསྐྱེད་ནས་ཞུ་ཕོད་པར་གྱིས་ཤིག དེས་ན་ངེད་ཅག་གིས་ཀླུ་སྒྲུབ་ཡབ་སྲས་ཀྱི་དགོངས་དོན་ཙོང་ཁ་པ་ཆེན་པོས་འཁྲུལ་མེད་དུ་གཏན་ལ་ཕབས་པའི་ལུགས་ལ་བརྟེན་ནས་རང་བཞིན་གྱིས་མེད་པས་མེད་གོ་མི་ཆོད་དེ། ཆོས་གང་ཞིག་རང་བཞིན་མེད་པ་དེ་ནི་ཆོས་དེ་རྟེན་འབྲེལ་གྱི་དོན་གོ། རྟོག་པས་བཏགས་ཙམ་གྱིས་ཡོད་གོ་ཆོད་དེ། ཆོས་དེ་རྟོག་བཏགས་ཙམ་ཡིན་པ་ཆོས་དེའི་རང་བཞིན་སྟོང་པ་ཉིད་ཡིན་པའི་དོན་དུ་གོ་ནས་རང་བཞིན་གྱིས་མ་གྲུབ་པ་དང་། རྟོག་པས་བཏགས་ཙམ་པ་གཉིས་འགལ་བ་མེད་པར་ཁས་བླངས་ཆོག་པའི་གུ་ཡངས་བློ་བདེ་བདེ་བྱུང་བ་ལགས་སོ།།

      

ཁྱོད་ཅག་ཀྱང་དེ་ཙམ་གྱིས་འཁྲུལ་པའི་མུན་ནག་ཏུ་འཁྱམས་པར་མ་བྱེད་པར་ཤིང་རྟ་རྟོག་པས་བཏགས་ཙམ་ཡིན་ཞེས་པའི་ཚིག་འདི་རྐྱང་པའི་གོ་བ་ཞིག་ལོངས་དང་། གསལ་བྱེད་ཀྱི་སྒྲོན་མེ་ཅུང་ཟད་ཅིག་རྙེད་དུ་འོང་སྟེ། ཤིང་རྟ་རྟོག་པས་བཏགས་ཙམ་ཞེས་པའི་ཙམ་སྒྲས་གཅད་བྱ་ཞིག་ནི་ཡོད་པ་དེ་གང་ཞིག ཙམ་སྒྲ་དེས་གང་གཅད་ན་ཤིང་རྟ་རང་ངོས་ནས་གྲུབ་པ་དེ་གཅོད་པ་ཡིན་པའི་ཕྱིར་ཏེ། རྣམ་པ་བདུན་གྱིས་འགྲུབ་འགྱུར་མིན་མོད་ཀྱི།། ཞེས་རང་བཞིན་གྱིས་མ་གྲུབ་པ་དང་། རང་གི་ཡན་ལག་བརྟེན་ནས་འདོགས་པ་ཡིན།། ཞེས་རྟོག་པས་བཏགས་ཙམ་དུ་སྟོན་པ་ལྟར་ཡིན་པའི་ཕྱིར། དེས་ན་འཁྲུལ་བའི་བློས་ཐ་སྙད་འཇོག་ན། སངས་རྒྱས་ཀྱིས་ཐ་སྙད་པའི་ཆོས་གང་ཡང་མི་གཟིགས་པར་ཐལ། དེ་ལ་འཁྲུལ་བའི་བློ་མི་མངའ་བའི་ཕྱིར། ཞེས་པའི་ཐལ་བ་ཡང་ཐ་སྙད་འཁྲུལ་བློས་འཇོག་ཚུལ་མི་ཤེས་པ་ལ་དེ་འདྲའི་ཐལ་བ་འབྱུང་གི། ཐ་སྙད་འཁྲུལ་བློས་འཇོག་ཚུལ་ཤེས་མཁན་ལ་དེ་འདྲའི་ཐལ་བ་མི་འབྱུང་སྟེ། ཐ་སྙད་འཁྲུལ་བའི་བློས་འཇོག་ཚུལ་མ་ཤེས་ན། ཐ་སྙད་ཡུལ་གྱི་སྡོད་ལུགས་ལ་མ་འཁྲུལ་བའི་བློས་འཇོག་དགོས། དེ་འཇོག་ན་ཐ་སྙད་རང་ངོས་ནས་གྲུབ་པར་འགྱུར་བས་སངས་རྒྱས་འཕགས་པས་རང་ངོས་ནས་གྲུབ་པའི་ཐ་སྙད་མཁྱེན་དགོས། དེ་མཁྱེན་ན་ཐ་སྙད་རང་ངོས་ནས་མ་གྲུབ་བཞིན་དུ་རང་ངོས་ནས་གྲུབ་པར་མཁྱེན་པར་སོང་བས་སངས་རྒྱས་འཕགས་པ་ལ་འཁྲུལ་བའི་བློ་མངའ་བར་ཐལ་བའི་སྐྱོན་དང་། ཡང་ན་འཇུག་འགྲེལ་ལས་དངོས་པོ་བྱས་པ་ཅན་ལ་མ་རིག་པ་རང་བཞིན་འབའ་ཞིག་མངོན་དུ་མཛད་པར་གསུངས་པས། ཐ་སྙད་རང་ངོས་ནས་གྲུབ་པ་གང་ཞིག། རང་ངོས་ནས་གྲུབ་པའི་ཆོས་ཅི་ཡང་མི་མཁྱེན་པར་རང་བཞིན་གྱིས་སྟོང་བའི་ཆོས་འབའ་ཞིག་མཁྱེན་པས་ཐ་སྙད་ཀྱི་ཆོས་ཅི་ཡང་མི་གཟིགས་པར་ཐལ་བ་དང་། ཡང་ན་ཐ་སྙད་རང་ངོས་ནས་ཡོད་པར་མི་སྲིད་པ་ཞིག་སངས་འཕགས་ཀྱིས་མཁྱེན་ན་རི་བོང་རྭ་དང་ནམ་མཁའི་མེ་ཏོག་ཀྱང་མཁྱེན་པར་ཐལ་བའི་སྐྱོན་མཐའ་ཡས་པ་ཞིག་འབྱུང་བའི་ཕྱིར། གོང་འོག་གི་ཁྱབ་རྟགས་རྣམས་ཁྱོད་རང་གིས་ཁས་ལེན་ལ་དཔྱད་པས་གྲུབ་པར་འགྱུར་རོ།། ཅི་སྟེ་རང་བཞིན་གྱིས་སྟོང་ཟིན་ན་བློས་མཐོང་དུ་མི་རུང་བསམ་ནའང་དེ་ལྟར་དོགས་པ་ག་ལ་དགོས་ཏེ། འཇུག་འགྲེལ་ལས། དཔེར་ན་རང་བཞིན་གྱིས་སྟོང་པ་ཡིན་དུ་ཟིན་ཀྱང་། དེ་དག་མཐོང་གི་མོ་གཤམ་གྱི་བུ་ནི་མ་ཡིན་ནོ།། དེའི་ཕྱིར་དེ་བདག་ཉིད་ལ་བརྒལ་ཞིང་བརྟགས་པར་གྱིས་དང་། དེ་ན་ཕྱིས་ང་ལ་བརྒལ་ཞིང་བརྟག་པར་འགྱུར་རོ།། ཞེས་རང་བཞིན་གྱིས་སྟོང་པ་དང་མོ་གཤམ་གྱི་བུ་གཉིས་ལ་ཡོད་མེད་ཀྱི་ཁྱད་པར་ཕྱེས་པའི་ཚུལ་འདི་ལ་སེམས་ནས་ཡིད་ཀྱི་ལོག་པའི་མྱ་ངན་བསལ་བར་གྱིས་ཤིག།

      

འོ་ན་ཐ་སྙད་རང་ངོས་ནས་མ་གྲུབ་བཞིན་དུ་སངས་རྒྱས་འཕགས་པས་མཁྱེན་ཚུལ་ཇི་ལྟར་ཡིན་ཞེ་ན། བཤད་དུ་ཡོད་དེ་འཇིག་རྟེན་པ་རྣམས་ཀྱིས་བློ་བདེན་འཛིན་གྱི་འཁྲུལ་པ་དང་བཅས་པས་བུམ་པ་ཀ་བ་སོགས་ཀྱི་ཐ་སྙད་གང་བཞག་པ་དེ་དག་སངས་རྒྱས་འཕགས་པས་མཁྱེན་རིགས་ཏེ། འཇིག་རྟེན་འཁྲུལ་བློས་གང་བཞག་པའི་བུམ་པ་ཀ་བ་སོགས་ཡོད་པ་ཡིན་པའི་ཕྱིར། འཇིག་རྟེན་འཁྲུལ་བའི་བློ་ལ་བུམ་པ་ཀ་བ་སོགས་རང་ངོས་ནས་གྲུབ་པར་སྣང་ཡང་། དེ་ལ་སྣང་བ་ཇི་ལྟ་བ་བཞིན་དུ་སངས་རྒྱས་ཀྱིས་གཟིགས་མི་དགོས་ཏེ། འཁྲུལ་བའི་བློ་ལ་གང་སྣང་བ་ལྟར་དུ་མ་གྲུབ་པའི་ཕྱིར། འཇིག་རྟེན་པ་རྣམས་ཀྱིས་རང་ངོས་ནས་གྲུབ་པར་འཛིན་ཚུལ་དང་། དེ་ལ་རང་ངོས་ནས་གྲུབ་པར་སྣང་བའི་ཚུལ་རྣམས་ནི་སངས་རྒྱས་ཀྱིས་མཁྱེན་ཏེ། དེ་དག་ཡོད་པའི་ཕྱིར། ས་ལམ་དང་སངས་རྒྱས་ཀྱི་སྐུ་ལྔ་ཡེ་ཤེས་ལྔ་སོགས་འཇིག་རྟེན་རྒན་པོ་རྣམས་ཀྱིས་བཞག་མི་ཤེས་པའི་ཐ་སྙད་རྣམས་ནི། འཇིག་རྟེན་པ་རྣམས་ཀྱིས་རྟོག་པ་འཁྲུལ་བས་ཐ་སྙད་འཇོག་ཚུལ་དང་མཐུན་པར་གདུལ་བྱ་རྣམས་ཁ་དྲངས་པའི་ཆེད་དུ་དེ་དང་དེའི་ཐ་སྙད་རྣམ་པར་འཇོག་པར་མཛད་པས་ན། དེ་དག་ཀྱང་འཇིག་རྟེན་གྲགས་པས་བཞག་པ་ཞེས་བྱ་སྟེ། དང་པོ་སངས་རྒྱས་ཀྱིས་དེ་ལྟར་འཇིག་རྟེན་གྲགས་ཚོད་དང་བསྟུན་ནས་ཐ་སྙད་མཛད་པ་བཞིན། ཕྱིས་འཇིག་རྟེན་པའི་རྟོག་ཡུལ་ནའང་དེ་ལྟར་གྲགས་ཤིང་གྲུབ་པའི་ཕྱིར། འཇིག་རྟེན་པ་རྣམས་ཀྱིས་ཀྱང་ས་ལམ་གྱི་རྣམ་བཞག་གང་གྲགས་པ་དེ་ལྟར་དུ་ཉམས་སུ་ལེན་པ་ལ་བརྟེན་ནས་དེ་བཞིན་ཉིད་མངོན་སུམ་དུ་རྟོགས་པ་དང་། མཐར་མྱང་འདས་ཐོབ་པ་སོགས་འབྱུང་བའི་ཕྱིར། རྒྱུ་མཚན་འདི་རིགས་ལ་བརྟེན། སློབ་དཔོན་ཀླུས།

ཐ་སྙད་ལ་ནི་མ་བརྟེན་པར།།

དམ་པའི་དོན་ནི་རྟོགས་མི་འགྱུར།།
དམ་པའི་དོན་ནི་མི་རྟོགས་པར།།

མྱ་ངན་འདས་པ་འཐོབ་མི་འགྱུར།།

ཞེས་ཐ་སྙད་ལ་མ་བརྟེན་པར་དམ་པའི་དོན་མི་རྟོགས་ལུགས། ཐ་སྙད་འཇིག་རྟེན་གྲགས་ཚོད་དང་མཐུན་པའི་ས་ལམ་སོགས་རྣམ་པར་བཞག་པས་གདུལ་བྱ་རིམ་གྱིས་ཁ་དྲངས་ནས་དམ་པའི་དོན་རྟོགས་པར་མཛད་པ་ཡིན་ལ། གཞན་ཡང་ཆོས་ཐམས་ཅད་མཐར་དེ་བཞིན་ཉིད་ལ་འབབ་ཅིང་གཞོལ་བ་སོགས་གང་གསུང་བ་རྣམས་ཀྱང་དགོངས་པའི་གཏད་སོ་དངོས་གནས་པ་དེ་འདི་རང་ལ་ཐུག་པར་ཤེས་དགོས་སོ།།

      

གནད་འདི་དག་ལས་འཕྲོས་པའི་དབུ་མ་ཐལ་འགྱུར་བའི་གྲུབ་མཐའི་གནད་གསང་ཤིན་ཏུ་དབྱེ་དཀའ་བ་དུ་མ་བཤད་རྒྱུ་མཆིས་ཀྱང་འདིར་བརྒལ་ལན་ཙམ་ལ་ཡི་གེའི་ཚོགས་ཧ་ཀྱང་ལྕི་བ་ལ་འཛེམ་ནས་དེ་ཙམ་ལས་མ་སྤྲོས་སོ།།

འདིར་སྨྲས་པ།

གང་ནས་རྩོད་ཀྱང་རིགས་ལམ་གནམ་ལྕགས་ཐོག།།

ལོག་པར་དམ་བཅའི་བྲག་རི་བཤིག་པ་འདི།།
འཇུག་པ་བཅུ་པའི་མཐུ་རྩལ་ངོམས་པའམ།།

ཡང་ན་རྩོད་ངག་རིགས་ལམ་འབར་བའི་མཐུ།།

ཚད་ལྡན་ལུང་གི་དམག་དཔུང་འཕྱུར་བ་ལ།།

ཐལ་ངག་གནད་དུ་གཟེར་བའི་དམག་དཔོན་གྱིས།།
རྣོ་ངར་མཚོན་གྱིས་དཔུང་ཤེད་མངོམས་པ་ལ།།

རྩོད་ངག་དེ་ཡང་དགྲ་དཔུང་གཏེགས་པའི་གྲོགས།།

ཐ་སྙད་དུ་ཡང་རང་མཚན་མེད་པ་དང་།།

རྟོག་བཏགས་ཙམ་གྱིས་ཐ་སྙད་རྣམ་འཇོག་པས།།
དཀའ་གནད་ཁུར་ཆེན་བློ་ཡིས་མ་ཐེག་པས།།

ལོག་པའི་ཀུ་ཅོ་སྒྲོག་པའི་ཐལ་ངག་རྣམས།།

དྲང་ཐིག་དངོས་སྟོབས་རིགས་པས་མཐར་ཆགས་སུ།།

བཅོམ་ནས་ཤིང་རྟ་བགྲོད་པའི་བཤུལ་ལམ་ཞིག།།
ལེགས་པའི་ལམ་ལ་གདུལ་བྱ་བདེ་གླག་ཏུ།།

འགོད་པ་ཐུབ་པའི་ཆོ་འཕྲུལ་ལྟ་བུར་བྱས།།

གངས་རིའི་སུལ་འདིར་འཆད་རྩོད་རྩོམ་གསུམ་གྱི།།

གཡུ་རལ་སྤྲུག་པའི་མཁས་མང་འདས་ཟིན་ཀྱང་།།
སླར་ཡང་མཁས་མཆོག་གདོང་ལྔའི་ཕྲུག་གུ་ངས།།

རིགས་པའི་ང་རོས་ས་ཆེན་འདར་སྙམ་བགྱིད།།

དེང་འདིར་རྒྱལ་བ་གཉིས་པ་ཙོང་ཁ་པའི།།

དྲི་མེད་བཞེད་གཞུང་པདྨོའི་ཚལ་ཆེན་པོ།།
བརྫི་འདོད་རྒོལ་རན་གཉིས་མཐུང་ཚོགས་རྣམས་ཀྱང་།།

ལུང་རིགས་སྦར་མོའི་ངར་ལ་བག་ཟོན་གྱིས།།

བསམ་བཞིན་ཙིག་ངན་དུག་གི་མདའ།།

རྒོལ་བའི་སྙིང་ལ་མ་གཏད་ཀྱང་།།
རིགས་པས་རྦབ་རྒོད་འདྲིལ་བ་ཡིས།།

ཁས་ལེན་མཁར་རྫོང་བཤིག་པ་དང་།།

ལྷན་ཅིག་ངོ་ཚའི་ཁས་ལེན་བརྒྱའི།།

རྡུལ་འཚུབ་དྲག་ཏུ་འཕྱུར་བའང་།།
རྒོལ་ངན་རང་གིས་བརྩམ་པའི་ལས།།

ཡིན་ཕྱིར་འགྱོད་པ་མི་མཛད་འཚལ།།

ཞེས་བྱ་བའང་བར་སྐབས་ཀྱི་གཏམ་དུ་བྱས་པའོ།།

      མི་ཕམ་རྣམ་རྒྱལ་གྱིས་བརྒལ་བའི་ཡང་ལན་ལོག་ལྟའི་ཁོང་ཁྲག་འདོན་པའི་སྐྱུག་སྨན་ཞེས་བྱ་བ་ལས་དགག་བྱ་ངོས་འཛིན་ལ་བརྒལ་བའི་ལན་བརྗོད་པའི་སྐབས་ཏེ་དང་པོའོ།། །།

༼༢ སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པ།༽

གཉིས་པ་སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པ་ལ་གཉིས། བདག་མེད་པ་གང་གིས་བདག་འཛིན་གང་སྤང་བ་ལ་དཔྱད་པའི་བརྒལ་ལན་དང་། ཉན་ཐོས་སྡེ་གཉིས་ཀྱིས་འདོད་ཚུལ་དགག་པ་ལ་བརྒལ་བའི་ལན་བརྗོད་པའོ།། དང་པོ་ནི།

༼མི་ཕམ་གྱིས་༽དེ་ལ་ཁོ་བོས་ཀྱང་ལན་བརྗོད་པར་བྱ་སྟེ། སྤྱི་ཙམ་དུ་ཆོས་ཀྱི་བདག་འཛིན་ལ་བརྟེན་ནས་གང་ཟག་གི་བདག་འཛིན་ལྷན་སྐྱེས་འབྱུང་བ་དང་། འཇིག་ལྟ་ལྷན་སྐྱེས་སྤོང་བ་ལ་ཕུང་པོ་བདེན་འཛིན་སྤངས་དགོས་པ་དང་། འཇིག་ལྟ་ལྷན་སྐྱེས་མ་སྤང་ན་འཁོར་བར་སྐྱེ་བའི་ལས་འགྲུབ་པར་ལུང་དེའི་དོན་ཡིན་ཡང་། ཁྱོད་འདོད་པ་ལྟར་མ་ཡིན་ཏེ། གདགས་གཞི་ཕུང་པོ་ལ་བདེན་པར་བཟུང་བའི་དབང་གིས་ངར་འཛིན་ལྷན་སྐྱེས་འབྱུང་ན་ཡང་། ཕུང་པོ་དུ་མ་དང་མི་རྟག་པའི་རང་བཞིན་ཆ་མེད་པའི་བར་དུ་རྟོགས་པས། ཕུང་པོ་བདེན་མེད་དམ་ཆོས་བདག་མེད་རགས་པ་ཙམ་རྟོགས་པ་དེས་གང་ཟག་གི་བདག་མེད་ཕྲ་བ་རྟོགས་པར་ནུས་ཏེ། རྒྱུ་མཚན་ཆ་མེད་ཙམ་གྱི་ཆོས་དུ་མ་གྲུབ་ཏུ་ཆུག་ཀྱང་། དེ་ལ་ངར་འཛིན་པར་མི་བྱེད་དེ། དེ་རྣམས་དུ་མ་དང་མི་རྟག་པར་མངོན་སུམ་དུ་མཐོང་ཚེ། དེ་ལ་བརྟེན་ནས་ང་ཞེས་བློས་བཏགས་པ་ཙམ་ལས་རང་ངོས་ནས་མ་གྲུབ་པར་མངོན་སུམ་དུ་མཐོང་སྟེ་གདགས་གཞིའི་ཆོས་དེ་དག་བདག་ཏུ་འཛིན་པའི་དམིགས་རྣམས་དང་མི་མཐུན་པའི་ཕྱིར་རོ།། དཔེར་ན་ཐག་པ་མེད་པར་མ་ཤེས་ཀྱང་སྦྲུལ་འཛིན་ལྡོག་པར་སྲིད་པ་བཞིན་ནོ།། ཞེས་པ་འདི་ཙམ་ཕྱོགས་སྔར་བཀོད་ནས་བརྒལ་བར་བྱ་སྟེ། དེ་ཡང་ཁྱོད་ཀྱིས་ཕུང་པོ་བདེན་མེད་དམ་ཆོས་བདག་མེད་རགས་པ་ཙམ་ཞེས་ཕུང་པོ་བདེན་མེད་དང་ཆོས་བདག་མེད་རགས་པ་གཉིས་དོན་གཅིག་ཏུ་བྱས་པ་འདི་ནས་སྤང་བྱ་སྤོང་ཚུལ་གྱི་རྣམ་བཞག་ལ་འཁྲུལ་བའི་འཚངས་ཆེན་ཐམས་ཅད་བྱུང་བར་འདུག་སྟེ། ཕུང་པོ་བདེན་མེད་ནི་ཆོས་ཀྱི་བདག་མེད་ཕྲ་མོ་ཡིན་ལ། ཕུང་པོ་དུ་མ་དང་མི་རྟག་པའི་རང་བཞིན་ཆ་མེད་པའི་བར་དུ་རྟོགས་པ་ཞེས་པའི་བདག་དེ་གཉིས་དོན་གཅིག་པར་འོང་ལུགས་མེད་པའི་ཕྱིར་ཏེ། སྔ་མ་ནི་ཆོས་ཀྱི་བདག་འཛིན་ལྷན་སྐྱེས་ཀྱིས་འཛིན་པའི་བདག་ཡིན་ལ། ཕྱི་མ་ནི་གྲུབ་མཐའི་ཀུན་བཏགས་པའི་བདག་ཙམ་ཡིན་པའི་ཕྱིར། བདག་འཛིན་ཀུན་བཏགས་དང་ལྷན་སྐྱེས་ཀྱང་དོན་གཅིག་ཏུ་འགྱུར་བའི་སྐྱོན་ཡོད་པའི་ཕྱིར། རྟགས་སླ། ཡང་ཕུང་པོ་བདེན་མེད་དམ་ཆོས་བདག་མེད་རགས་པ་རྟོགས་པ་དེས་གང་ཟག་གི་བདག་མེད་ཕྲ་བ་རྟོགས་ནུས་ཟེར་ན། དེ་ཤིན་ཏུ་མི་འཐད་པའི་ཕྱིར་ཏེ། གང་ཟག་གི་བདག་མེད་ཕྲ་མོ་ལུགས་འདིར་གཞི་གང་ཟག་གི་སྟེང་གི་སྟོང་ཉིད་ཡིན་པའི་ཕྱིར། ཕུང་པོ་དུ་མ་དང་མི་རྟག་པའི་རང་བཞིན་ཆ་མེད་པའི་བར་གང་རྟོགས་ཀྱང་དེ་ཀུན་རྫོབ་དངོས་ཡུལ་དུ་བྱས་པའི་བློ་ཙམ་ལས། དོན་དམ་དངོས་ཡུལ་དུ་བྱས་པའི་བློ་མ་ཡིན་ཕྱིར། དེ་ལ་ཁྱོད་ཀྱིས་རྒྱུ་མཚན་ལྟར་སྣང་འདི་བྱས་འདུག་སྟེ། ཆ་མེད་ཙམ་གྱི་ཆོས་དུ་མར་གྲུབ་ཏུ་ཆུག་ཀྱང་དེ་ལ་ངར་འཛིན་པར་མི་བྱེད་དེ། དེ་རྣམས་དུ་མ་དང་མི་རྟག་པ་མངོན་སུམ་དུ་མཐོང་ཚེ་དེ་ལ་བརྟེན་ནས་ང་ཞེས་བློས་བཏགས་པ་ཙམ་ལས་རང་ངོས་ནས་མ་གྲུབ་པ་མངོན་སུམ་དུ་མཐོང་སྟེ། གདགས་གཞིའི་ཆོས་དེ་དག་བདག་ཏུ་འཛིན་པའི་དམིགས་རྣམ་དང་མི་མཐུན་པའི་ཕྱིར་ཟེར་བ་འདི་འདུག་པས། འདི་ལ་དཔྱད་ན་ཧ་ཀྱང་སྨྱོ་བའི་གཏམ་ཞིག་སྟེ། བློས་བཏགས་པ་ཙམ་ལས་རང་ངོས་ནས་མ་གྲུབ་པ་ནི་གནས་ལུགས་མཐར་ཐུག་ཡིན་ལ། དེ་དུ་མ་དང་མི་རྟག་པ་མངོན་སུམ་དུ་རྟོགས་པ་ཙམ་གྱིས་རྟོགས་ནུས་ན། ཆོས་གང་དུ་མ་དང་མི་རྟག་པ་གཏན་ལ་ཕབས་པ་དེ་གནས་ལུགས་དེ་བཞིན་ཉིད་གཏན་ལ་ཕབས་པ་ཡིན་པར་ཐལ། འདོད་པའི་ཕྱིར། འདོད་ན། དཔལ་ལྡན་ཟླ་བས།

དེའི་ཕྱིར་བདག་མེད་ཤེས་པས་བདག་ལྟ་བ།།
དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར།།

ཞེས་གསུངས་པ་མི་འཐད་པར་ཐལ། གྲུབ་མཐས་ཀུན་བཏགས་པའི་བདག་མེད་རགས་པ་ཙམ་ཤེས་པས་བདག་ཏུ་ལྟ་བ་ཕྲ་མོ་སུན་འབྱིན་ཞེས་བྱ་བ་དེ་ཅི་ཡང་མི་མཚར་བའི་ཕྱིར་ཏེ། ཁྱོད་ཀྱི་འདོད་པ་དེའི་ཕྱིར་དཔལ་ལྡན་ཟླ་བའི་ཞབས་ལ་མཚར་བའི་གནས་མ་ཡིན་པ་ལ་མཚར་དུ་འཛིན་ནས་མགོ་རྨོངས་པ་བྱེད་ཅེས་ཞུས་ཤིག དེར་མ་ཟད་འདིའི་དཔེ་ལས་ཀྱང་།

རང་ཁྱིམ་རྩིག་ཕུག་སྦྲུལ་གནས་མཐོང་བཞིན་དུ།།

འདི་ན་གླང་ཆེན་མེད་ཅེས་དོགས་བསལ་ཏེ།།
སྦྲུལ་གྱི་འཇིགས་པའང་སྤོང་བར་བྱེད་པ་ནི།།

ཀྱེ་མ་གཞན་གྱི་གནམ་པོར་འགྱུར་ཉིད་དོ།།

ཞེས་པའི་སྔ་འགྲེལ་དུ། ཕན་ཚུན་འབྲེལ་བ་མེད་པའི་དོན་འདི་ཉིད་དཔེའི་སྒོ་ནས་བསལ་བར་བྱ་བའི་ཕྱིར་བཤད་པ། ཞེས་རྟག་པའི་བདག་སྤོང་བས་ངར་འཛིན་ལྷན་སྐྱེས་སྤོང་བའི་འབྲེལ་མེད་དུ་གསུངས་ཀྱང་ཁྱོད་ལྟར་ན། དེ་གཉིས་འབྲེལ་བ་ཅན་ཡིན་པས་ཟླ་བའི་ཞབས་དང་ལྟག་སྤྲོད་དུ་སྡོད་ལ་སྨྲ་བར་གྱིས་ཤིག།

      

དེར་མ་ཟད་དེའི་ཕྱི་འགྲེལ་ལས་ཀྱང་། གང་གི་ཕྱིར་གླང་པོ་ཆེ་མེད་པས་ནི་དེའི་སྦྲུལ་གྱི་འཇིགས་པ་སེལ་བར་མི་ནུས་སོ།། དེ་བཞིན་དུ་ཕུང་པོ་དག་དང་རྣམ་པར་ཤེས་པ་བདག་ཏུ་སྨྲ་བ་འདིའི་ལྟར་ན་ཡང་། རྟག་པའི་བདག་མེད་པས་ཕུར་པོའི་ཡུལ་ཅན་གྱི་ངར་འཛིན་པ་བསལ་བར་མི་ནུས་ཏེ། ཞེས་གསུངས་པའི་ཕྱིར། ཁྱོད་ལྟར་ཁྱིམ་གྱི་རྩིག་ཕུག་སྦྲུལ་དངོས་སུ་མཐོང་ནས་འཇིགས་པ་དེ། འདི་ན་གླང་ཆེན་མེད་པར་ཤེས་པ་ཙམ་གྱིས་སེལ་ནུས་པར་ཐལ། ཕུང་པོ་དུ་མ་དང་མི་རྟག་པ་མངོན་སུམ་དུ་མཐོང་བས་རྟག་གཅིག་རང་དབང་ཅན་གྱིས་བདག་འཛིན་ལྡོག་པས། གང་ཟག་གི་བདག་རང་ངོས་ནས་གྲུབ་པར་འཛིན་པའི་བདག་འཛིན་གྱི་ཞེན་ཡུལ་སུན་ཕྱུང་ནུས་པར་འདོད་པའི་ཕྱིར། རྟགས་དཔེ་དོན་སྦྱོར་ཚུལ་གྱིས་དངོས།

      

ཡང་ཁྱོད་ཀྱིས་༼མི་ཕམ་གྱིས་༽གལ་ཏེ་ཕུང་པོ་དུ་མ་དང་མི་རྟག་པར་མངོན་སུམ་དུ་རྟོགས་ཀྱང་གང་ཟག་གི་བདག་མེད་མངོན་སུམ་དུ་མི་རྟོགས་ན། གཅིག་དུ་བྲལ་གྱི་རིགས་པ་དང་། རྣམ་བདུན་ཤིང་རྟའི་རིགས་པ་ཁོ་ནས་ངར་འཛིན་ལྷན་སྐྱེས་ཀྱི་ཞེན་ཡུལ་རྩ་བ་དྲུང་ནས་ཕྱུང་མི་སྲིད་པར་འགྱུར་ཞེས་སྨྲས་པའང་རིགས་པ་སྔ་མ་དེ་དག་གིས་འགོག་ནུས་པ་ཡིན་ཏེ། གཅིག་དུ་བྲལ་དང་རྣམ་བདུན་རིགས་པས་གང་ཟག་གི་བདེན་པ་མེད་པར་གཏན་ལ་ཕབ་ན་ངར་འཛིན་ལྷན་སྐྱེས་ཀྱི་ཞེན་ཡུལ་སུན་ཕྱུང་ནུས་ཀྱང་། གང་ཟག་རྟག་གཅིག་རང་དབང་ཅན་དུ་གྲུབ་པས་སྟོང་པ་རྟོགས་པ་ཙམ་གྱིས་ངར་འཛིན་ལྷན་སྐྱེས་ཀྱི་ཞེན་ཡུལ་སུན་ཕྱུང་མི་ནུས་པའི་ཕྱིར་ཏེ། ཅི་སྟེ་ནུས་ན་རང་ཁྱིམ་རྩིག་ཕུག་སོགས་ཀྱི་དཔེ་དང་བཅས་པའི་གཏན་ཚིག་དེ་དག་གི་ཕྱོགས་སྔར་བསམ་བཞིན་དུ་སྡོད་པར་ཡིན་པས་སོ།། དེས་ན་ཇི་སྲིད་ཕུང་པོ་འཛིན་ཡོད་པ།། དེ་སྲིད་དེ་ལ་རང་འཛིན་ཡོད།། ཅེས་པའི་ལུང་དང་། གང་ཕྱིར་བདག་མེད་ཤེས་པའི་ཞེས་སོགས་ཀྱི་ལུང་གཉིས་ལུང་དོན་གཅིག་ཏུ་སྨྲ་བའང་མི་རིགས་ཏེ། ལུང་སྔ་མས་ཕུང་པོ་བདེན་འཛིན་མ་བཟློག་པ་དེ་སྲིད་དུ་རང་འཛིན་མི་ལྡོག་པར་གསུང་ཞིང་། ལུང་ཕྱི་མས་བདག་འཛིན་ཀུན་བཏགས་ཀྱི་ཞེན་ཡུལ་སུན་ཕྱུང་བས། བདག་འཛིན་ལྷན་སྐྱེས་ཀྱི་ཞེན་ཡུལ་སུན་ཕྱུང་བར་འདོད་པའི་འཐད་པ་ཧ་ཀྱང་མཚར་བའི་གནས་སུ་རྩིས་ནས། རང་ཁྱིམ་རྩིག་ཕུག་སོགས་ཀྱི་དཔེ་དང་བཅས་པས་དགག་པར་མཛད་ལ། ལུང་སྔ་མས། ཇི་སྲིད་ཕུང་པོ་འཛིན་པ་ཡོད་པ་དེ་སྲིད་དུ་ངར་འཛིན་ཡོད་ཅེས་ཚུར་སྒྲུབ་པ་ལས་ཕར་དགག་པ་མ་མཛད་པ་འདི་ཙམ་གྱིས་ཀྱང་ཤེས་ནུས་པའི་ཕྱིར། ལུང་རིགས་ཀྱིས་སྤྲོས་པ་མང་པོ་བསྐྱེད་ག་ལ་དགོས།

ཕྲ་ཞིབ་ལུང་རིགས་མདའ་རྣོན་པོ།།

ཕས་རྒོལ་སྙིང་ལ་བཏབ་པ་ཡིས།།
ལོག་ལྟའི་སྲོག་རྩ་དྲེགས་པའི་ཚེ།།

མཁས་མཆོག་དཔའ་བོའི་གྲགས་པ་འབར།།

ཞེས་ཀྱང་བྱས་སོ།།

༼༣ ཉན་ཐོས་སྡེ་གཉིས་ཀྱིས་འདོད་ཚུལ་དགག་པ་ལ་བརྒལ་བའི་ལན་བརྗོད་པ།༽

གཉིས་པ་ཉན་ཐོས་སྡེ་གཉིས་ཀྱིས་འདོད་ཚུལ་དགག་པ་ལ་བརྒལ་བའི་ལན་བརྗོད་པ་ལ་གཉིས། དངོས་དང་། ཆོས་ཀྱི་བདག་འཛིན་ཉོན་སྒྲིབ་ཏུ་བཞེད་མི་བཞེད་ལ་རྩོད་པའོ།། དང་པོ་ནི།

ཉོན་མོངས་སྤངས་པས་གྲོལ་ན་ཞེས་པའི་ཐད་ལ་༼མི་ཕམ་གྱིས་༽ཁྱོད་ཀྱིས་འཆད་ཚུལ་མ་འགྲིགས་ཚུལ་མདོ་ཙམ་ལས་མ་སྨྲས་ཀྱང་ཞེས་པ་ནས་ལགས་སོ།། ཞེས་པའི་བར་གྱི་ལན་ཞིག་བརྗོད་པར་བྱ་སྟེ། ཁྱོད་ཀྱིས་ཀྱང་སྔར་མཚོན་ཙམ་ལས་མ་སྤྲོས་པར་ཕྱིས་སྤྲོས་པ་ཡིན་ན་ཁོ་བོས་ཀྱང་སྔར་རྩོད་པའི་བརྒལ་ལན་དེ་ཉིད་ཀྱིས་ཁྱོད་ཀྱི་དམ་བཅའ་ཉམས་པར་བྱས་ཟིན་ངོ་མ་ཤེས་པ་དེ་དག་སླར་ཡང་ཚིག་ཉུང་ངུས་ངོ་སྤྲོད་པར་བྱ་སྟེ། ཡང་ཁྱོད་ཀྱིས་༼མི་ཕམ་གྱིས་༽སྐབས་འདིར་འཁོར་བ་ལས་གྲོལ་མི་གྲོལ་དཔྱད་པའི་སྐབས་ཡིན་ཀྱང་། དེ་དག་གོང་དུ། གང་ཕྱིར་ལུང་ལས་ཞེས་སོགས་ཀྱིས་བཤད་ལ། འཁོར་བ་ལས་གྲོལ་ཀྱང་མཐར་ཐུག་གི་གྲོལ་བ་མིན་པའི་ཚུལ་འཆད་པར་བཞེད་ནས་ཉོན་མོངས་པ་སྤངས་པས་གྲོལ་ན་ཞེས་སོགས་བཀོད་པ་སྟེ། ཞེས་སོགས་སྨྲས་པ་མི་འཐད་དེ། ཉོན་མོངས་སྤངས་པས་ཞེས་སོགས་ཀྱིས་སྟོང་ཉིད་རྟོགས་པའི་ལམ་དང་བྲལ་བ་ལ་འཁོར་བ་ལས་གྲོལ་བ་ཡོད་མེད་རྩོད་པ་ཆེས་སྐབས་སུ་བབས་པ་ཡིན་ཏེ། གོང་དུ་། བདེན་པ་མཐོང་བས་གྲོལ་འགྱུར་གྱིས།། སྟོང་ཉིད་མཐོང་བས་ཅི་ཞིག་བྱ།། ཞེས་ཕྱོགས་སྔར་བཀོད་ནས། དེ་ལ་སྟོང་ཉིད་རྟོགས་པའི་ལམ་དང་བྲལ་བ་འཁོར་བ་ལས་མི་གྲོལ་བའི་ཚུལ་དང་པོར་ལུང་ལས་གསུངས་ཚུལ་བསྟན་བཞེད་ནས། གང་ཕྱིར་ལུང་ལས་ཞེས་ཚིག་རྐང་གཉིས་བྱུང།

      

དེ་ནས་ཐེག་ཆེན་གྱི་ལུང་དེ་ལུང་ཚད་མར་སྒྲུབ་བཞེད་ནས། གལ་ཏེ་ཐེག་ཆེན་ཞེས་པ་ནས་དོར་བྱར་འགྱུར།། ཞེས་པའི་བར་གསུང་སྟེ། སྒྲུབ་བྱེད་ཀྱི་ལུང་དེ་ཙམ་དུ་མ་ཟད། རིགས་པས་གནོད་བྱེད་ཀྱང་སྟོན་བཞེད་ནས། བསྟན་རྩ་དགེ་སློང་ཞེས་སོགས་ཚིགས་བཅད་གཅིག་གིས་སེམས་བདེན་འཛིན་གྱི་དམིགས་པ་དང་བཅས་པས་མྱ་ངན་ལས་འདས་པ་དཀའ་བར་གནས་ཞེས་གསུང་ནས་དེ་ལ་སྟོང་ཉིད་མ་རྟོགས་པར་མི་རྟག་སོགས་བཅུ་དྲུག་རྟོགས་པའི་ལམ་ཙམ་གྱིས་གྲོལ་བ་མྱང་འདས་དེ་ཐོབ་མི་ནུས་པའི་སྒྲུབ་བྱེད་རྒྱས་པ་བསྟན་བཞེད་ནས། ཉོན་མོངས་སྤངས་པས་ཞེས་སོགས་གསུང་བ་ཡིན་ཏེ། དེ་ཡང་སྟོང་ཉིད་མ་རྟོགས་པ་སེམས་བདེན་འཛིན་གྱི་དམིགས་པ་དང་བཅས་པས་མྱང་འདས་ཐོབ་པར་དཀའ་བ་སྟེ་འཐོབ་མི་ནུས་པའི་ཕྱིར། ཉོན་མོངས་པ་མངོན་གྱུར་ཙམ་སྤངས་པས་དེ་མ་ཐག་ཏུ་གྲོལ་བ་ཐོབ་པ་ཡིན་པར་ཐལ། ཁྱོད་འདོད་པའི་བདེན་བཞི་མི་རྟག་སོགས་རྟོགས་པའི་ལམ་ཙམ་གྱིས་ནི་ཉོན་མོངས་མངོན་གྱུར་རེ་ཞིག་སྤངས་པ་ཙམ་བྱས་པ་དེས་ལས་དང་ཉོན་མོངས་པའི་ས་བོན་ནི་ཅུང་ཟད་ཀྱང་སྤོང་མི་ནུས་གང་ཞིག། ཁྱོད་ཀྱི་བདེན་པ་མཐོང་བའམ་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པའི་ལམ་གྱིས་ཉོན་མོངས་སྤོང་ནས་དགྲ་བཅོམ་འཐོབ་ནུས་པར་འདོད་པའི་ཕྱིར་ཞེས་འཕེན་འདོད་ནས་ཉོན་མོངས་སྤངས་པས་ཞེས་ཚིག་རྐང་གཉིས་གསུང་། དེ་ལ་ཕ་རོལ་པོའི་གསལ་བ་ལ་ཐེ་ཚོམ་གྱུར་ནས་ལན་མི་གདབ་ཀྱང་རྟགས་ལ་དོན་གྱིས་འདོད་ལན་ཐེབས་པ་ཡིན་པ་གཞིར་བཅས་ནས་རྟགས་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པའི་ལམ་ཙམ་གྱིས་འཁོར་བ་ལས་གྲོལ་བ་དེ་ཁྱོད་འདོད་ཀྱང་འདོད་མི་ནུས་ཏེ། ཁྱོད་ཀྱི་དགྲ་བཅོམ་པར་ཁས་ལེན་རྒྱུའི་གང་ཟག་དེ་ཉོན་མོངས་མངོན་གྱུར་མེད་ཀྱང་ལས་ཀྱི་དབང་གིས་འཁོར་བར་སྐྱེ་བ་ལེན་པར་མཐོང་བའི་ཕྱིར། ཞེས་འཕེན་པ་ལ་ཉོན་མོངས་མེད་ཀྱང་ཞེས་ཚིག་རྐང་གཉིས་གསུངས་ཏེ་ཕ་རོལ་པོས་ཡང་སྲིད་ཕྱི་མར་འཕེན་པའི་ལས་ཀྱི་ནུས་པ་མཐོང་བ་རྟགས་མ་གྲུབ་སྟེ། ངེད་ཅག་འདོད་པའི་དགྲ་བཅོམ་དེ་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པའི་ལམ་གོམས་པར་བྱས་པ་ལ་བརྟེན་ནས་ཡང་སྲིད་ཕྱི་མར་འཕེན་པའི་ལས་ཀྱི་ཉེར་ལེན་གྱི་རྒྱུ་སྲེད་པ་ཟད་པར་བྱེད་ནུས་པའི་ཕྱིར་ཟེར་བ་ལ། སྲེད་འདི་ཞེས་ཚིག་རྐང་གཉིས་ཀྱིས་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པའི་ལམ་བསྒོམ་པ་ཙམ་གྱིས་ཡང་སྲིད་ཕྱི་མའི་ཉེར་ལེན་གྱི་རྒྱུ་སྲེད་པ་དེ་སྤོང་ནུས་པ་མ་ཡིན་ཏེ། སྲེད་པ་ལ་མངོན་པ་ནས་བཤད་པའི་གང་ཟག་རང་རྐྱ་ཐུབ་པའི་རྫས་ཡོད་དུ་འཛིན་པའི་འཇིག་ལྟས་དྲངས་པའི་སྲེད་པ་ཉོན་མོངས་ཅན་གཅིག་དང་། ཤེར་མདོ་ནས་བཤད་པའི་རང་མཚན་གྱིས་གྲུབ་པར་འཛིན་པའི་འཇིག་ལྟས་དྲངས་པའི་སྲེད་པ་ཉོན་མོངས་པ་ཅན་མ་ཡིན་པའི་སྲེད་པ་གཉིས་སུ་ཡོད་པ་གང་ཞིག། དེའི་ནང་ནས་སྲེད་པ་སྔ་མ་ནི་ཁྱོད་འདོད་པའི་གང་ཟག་དེའི་རྒྱུད་ལ་མེད་ཀྱང་། ཕྱི་མ་ནི་ཅི་སྟེ་མེད་དེ་མངོན་པ་ནས་བཤད་པའི་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པ་རྟོགས་ཟིན་གོམས་པར་བྱས་པ་ཙམ་གྱིས་ཕྱི་མ་འཇིག་ལྟ་མ་རིག་པ་ལྷན་སྐྱེས་ཀྱིས་དྲངས་པའི་སྲེད་པ་ཟད་པར་བྱེད་མི་ནུས་པའི་ཕྱིར། སྲེད་པ་ལ་ཉོན་མོངས་ཅན་ཡིན་མིན་གཉིས་སུ་འབྱེད་རིགས་པ་ཡང་ཡིན་ཏེ། སྲེད་པའི་རྩ་བ་མ་རིག་པ་ལ་ཉོན་མོངས་ཅན་ཡིན་མིན་གཉིས་སུ་འབྱེད་རིགས་པའི་ཕྱིར། དེ་ནས་ཚོར་བའི་རྐྱེན་གྱིས་སྲེད་པ་ཡིན།། ཚོར་བ་དེ་དག་ལ་ཡང་ཡོད།། ཅེས་ཚོར་བ་བདེན་པར་འཛིན་པའི་བདེན་འཛིན་མ་བཟློག་པས་ཚོར་བའི་རྐྱེན་གྱིས་ཚོར་བ་བདེ་བ་དང་འཕྲད་འདོད། སྡུག་བསྔལ་དང་བྲལ་འདོད་ཀྱི་སྲེད་པ་བཟློག་ཏུ་མེད་པའི་ཕྱིར་ཏེ། འགལ་རྐྱེན་མེད་ཅིང་མཐུན་རྐྱེན་ཚང་བའི་རྒྱུ་ལས་རང་འབྲས་སྐྱེ་བར་ངེས་པའི་ཕྱིར། དེ་ཡིན་པར་ཐལ། དམིགས་པ་དང་ནི་བཅས་པའི་སེམས།། འགའ་ཞིག་ལ་ནི་གནས་པར་འགྱུར།། ཞེས་སྟོང་ཉིད་མ་རྟོགས་པར་སྲེད་པ་སྤོང་མི་ནུས་ཏེ། སྟོང་ཉིད་མ་རྟོགས་ན་སེམས་བདེན་འཛིན་གྱི་དམིགས་པ་དང་བཅས་པས་ན། བདེན་འཛིན་དེས་དྲངས་པའི་སྲེད་པ་མངོན་འགྱུར་བ་དེ་བཟློག་མི་ནུས་པའི་ཕྱིར་ཞེས་སྟོན་པ་ཡིན་ལ། འདི་དག་ནི་ཁོ་བོ་ཅག་གི་གཞུང་དོན་འགྲེལ་ཚུལ་ཟུར་ཙམ་སྨྲོས་པ་སྟེ། དེ་ཡང་བརྒལ་ལན་འདི་ཀློག་པ་པོ་རྣམས་ཀྱིས་དཔྱད་པ་འགྲོ་བར་སླ་བའི་ཕྱིར་དུ་བཀོད་པ་ཡིན་ནོ།།

      

དེ་དག་ལ་ཁྱོད་ཀྱིས་དགག་པའི་ཚིག་གང་སྨྲས་པ་རྣམས་མཐར་ཆགས་སུ་བཀོད་ནས་དགག་ན་ཡི་གེའི་ཚོགས་ཧ་ཀྱང་མང་ཞིང་སྙིང་པོ་ཡང་དེ་ཙམ་མ་འཆིས་པས་འདི་ན་སྙིང་པོའི་གནད་བསྡུས་ནས་རིགས་པ་ཡང་དག་གིས་དགག་པ་འདི་ལྟར་བསྟན་པར་བྱ་སྟེ། དེ་ལ་ཁྱོད་ཀྱིས་༼མི་ཕམ་གྱིས་༽ཉོན་མོངས་མངོན་འགྱུར་ཞེས་པའི་ཁྱད་པར་འདི་གཏན་ནས་མ་སྦྱར་ན་སྐབས་ཀྱི་ཞེ་འདོད་ལ་འབྲེལ་མེད་ཀྱི་ངག་ཏུ་འགྱུར་ཏེ། སྤྱིར་ཉོན་མོངས་སྤངས་པས་གྲོལ་ན། དེ་མ་ཐག་ཏུ་གྲོལ་བར་འགྱུར་རིགས་ལ། དེ་ལྷག་བཅས་དགྲ་བཅོམ་ལ་སྦྱར་ནས་འཆད་ཚུལ་ལྟར་མི་བྱེད་དེ། དེ་ལྟར་སྨྲས་པས་ཕྱིར་རྒོལ་ལ་ཐལ་བ་གང་ཡང་མི་འཇུག མངོན་གྱུར་ཞེས་པའི་ཁྱད་པར་འདི་དོན་གྱིས་གོ་བའི་དབང་དུ་བྱས་ནས། དེ་མ་ཐག་པའི་མགོར་སྦྱར་ན། ཚིགས་ཟིན་ལ་ཉོན་མོངས་ཟད་པར་སྤངས་པས་གྲོལ་བར་འདོད་ན། ཉོན་མོངས་མངོན་འགྱུར་སྤངས་པའི་དེ་མ་ཐག་ཏུ་གྲོལ་བར་འགྱུར་ཞེས་སྨྲས་ཚེ། ཟད་པར་སྤངས་པས་གྲོལ་བར་ཁས་ལེན་པ་ལ་མངོན་འགྱུར་སྤངས་པས་གྲོལ་བར་ཐལ་ཞེས་ཟེར་བའི་སྤྱོད་འཇུག་གི་གཞུང་ཚིག་ལ་དངོས་འགལ་འབྲེལ་མེད་ཀྱི་སྐྱོན་ཡོད་པར་བསྟན་པས་འགྲེལ་ཚུལ་དེ་ལེགས་སམ་དཔྱོད་ཅིག། ཅེས་སྨྲས་འདུག་པ་འདི་ཁྱོད་ཀྱི་ལོག་པར་རྟོག་པའི་གནད་ཀྱི་རྩ་བ་འདུག་སྟེ། ཁྱོད་ཀྱིས་བསམ་ཚུལ་ལ་མི་རྟག་སོགས་བཅུ་དྲུག་རྟོགས་པའི་ལམ་གྱིས་ཉོན་མོངས་པ་ནི་སྤང་ནུས། དེས་ན་ཉོན་མོངས་སྤངས་ཞེས་པའི་ཉོན་མོངས་པའང་ཉོན་མོངས་མངོན་འགྱུར་ཙམ་མ་ཡིན་པ་ཉོན་མོངས་རྩ་བ་ནས་སྤངས་པ་དེ་ཡིན། དེ་བཞིན་ངེད་ཅག་གིས་ཀྱང་མི་འདོད་ཀ་མེད་ཡིན་བསམ་ནས། ཉོན་མོངས་ཟད་པར་སྤངས་པས་གྲོལ་བར་འདོད་ན་ཞེས་ཕ་རོལ་པོས་ཉོན་མོངས་ཟད་པར་སྤངས་པའི་དགྲ་བཅོམ་དེ་སྡུག་བསྔལ་ལས་ཀྱང་གྲོལ་བ་གཏན་དུ་བ་ཡིན་པར་འདོད་པ་དེ་དགག་དགོས་རྒྱུ་ལ་ཉོན་མོངས་མངོན་འགྱུར་སྤངས་པས་གྲོལ་བར་ཐལ་ཞེས་སྦྱར་བ་མི་འཐད་ཅེས་སྨྲས་པ་ཕྱོགས་སྔའི་ནམ་མ་ལངས་པར་དགག་པའི་ཉི་མ་ཤར་བའི་དཔེ་དང་མཚུངས་ཏེ། ངེད་ཅག་གིས་ཉོན་མོངས་སྤངས་པའི་ཞེས་སོགས་ཀྱི་ཐལ་བ་འཕེན་པའི་ཕྱིར་རྒོལ་དེས་འདོད་པའི་ཉོན་མོངས་སྤངས་པ་དེ་ཉོན་མོངས་རྩ་བ་ནས་སྤངས་པ་དང་། དེ་ལྟར་སྤངས་པའི་དགྲ་བཅོམ་དེའང་དགྲ་བཅོམ་མཚན་ཉིད་པ་རྨི་ལམ་དུ་ཡང་མི་འདོད་པའི་ཕྱིར། ཉོན་མོངས་ཟད་ནས་གྲོལ་བ་ཕ་རོལ་པའི་ཁས་བླང་རྒྱུའི་དགྲ་བཅོམ་དེ། དགྲ་བཅོམ་མཚན་ཉིད་པ་མ་ཡིན་པ་སྒྲུབ་པ་ལ་དེ་ཆོས་ཅན། ཉོན་མོངས་མངོན་གྱུར་ཙམ་སྤངས་པ་དེ་མ་ཐག་ནས་གྲོལ་བ་དགྲ་བཅོམ་ཐོབ་པར་ཐལ། སྟོང་ཉིད་རྟོགས་པ་དང་བྲལ་ཞིང་མི་རྟག་སོགས་རྟོགས་པའི་ལམ་ཙམ་གྱིས་གྲོལ་བ་ཐོབ་ནུས་པའི་ཕྱིར། ཞེས་པའི་རིགས་པ་ཡང་དག་གི་སྒྲུབ་བྱེད་ཀྱིས་འཕུལ་ཚེ། ཕ་རོལ་པོས་མི་འདོད་བཞིན་དུ་དགྲ་བཅོམ་དེ་དག་ཉོན་མོངས་མངོན་འགྱུར་ཙམ་ལས་མ་སྤངས་པའི་དགྲ་བཅོམ་ཞིག་མི་འདོད་ཀ་མེད་བྱུང་བ་ཡིན་པའི་ཕྱིར། འབྲེལ་བ་ཅན་གྱི་ཐལ་འགྱུར་ཡང་དག་པ་འདི་ལས་ལྷག་པ་ཅི་ཞིག་དགོས།

      

ཡང་ཁྱོད་ཀྱིས་༼མི་ཕམ་གྱིས་༽མི་རྟག་སོགས་རྟོགས་པའི་ལམ་གྱིས་གྲོལ་བ་རྟགས་སུ་བཀོད་ཀྱི། ཉོན་མོངས་སྤངས་པས་གྲོལ་ན་ཞེས་བརྟགས་སུ་མི་བྱེད་སྙམ་ན། མི་རྟག་སོགས་གོམས་པའི་ལམ་གྱིས་གྲོལ་ན། ཉོན་མོངས་མངོན་འགྱུར་སྤངས་དུས་ནས་གྲོལ་བར་ཐལ་ཞེས་ཞེ་འདོད་ལ་ཡོད་བཞིན་དེ་འདྲའི་རྟགས་ཁྱབ་དངོས་ཤུགས་གང་དུའང་མི་སྟོན་པར་དེ་ལྟར་འགྲེལ་བ་ནི་རྩོམ་པ་པོ་མི་མཁས་པར་འགྱུར་ན་བརྗོད་པ་ངན་པ་དེ་འདྲ་ཞི་བ་ལྷ་ལྟ་བུ་ལ་ག་ལ་མངའ་ཞེས་སྨྲས་འདུག་ཀྱང་སྐྱོན་ཡོན་གྱི་ཚུལ་རྣམ་པར་མ་ཕྱེས་པའི་རང་མཚངས་ལགས་ཏེ། འགྲེལ་ཚུལ་འདིས་རྟགས་ཁྱབ་དོན་གྱིས་གསལ་པོར་གོ་བར་བྱས་པའི་ཕྱིར། རྟགས་གྲུབ་སྟེ། ཉོན་མོངས་སྤངས་པས་གྲོལ་ན་ཞེས་ཉོན་མོངས་མངོན་འགྱུར་ཙམ་སྤངས་པས་གྲོལ་བར་ཐལ་ཞེས་གང་གྲོལ་རྒྱུའི་གང་ཟག་དེས་ཉོན་མོངས་མཐའ་དག་སྤངས་པའི་གཉེན་པོ་མི་རྙེད་པ་དང་། ཉོན་མོངས་མངོན་འགྱུར་མགོ་གནོན་ནུས་ཙམ་གྱིས་ལམ་ཞིག་རྙེད་པ་དོན་གྱིས་སྟོན་པར་འགྱུར་ལ། དེ་ནི་མི་རྟག་སོགས་རྟོགས་པའི་ལམ་དེ་ལས་མ་འདས་པ་དོན་གྱིས་གོ་ནུས་པའི་ཕྱིར། དེར་མ་ཟད་རྩོད་པ་མཐར་ཆགས་སུ་བྱུང་བའི་དབང་དུ་བྱས་ཀྱང་དོན་གྱིས་གོ་བར་འགྱུར་ཏེ། གོང་དུ་བདེན་པ་མཐོང་བས་ཞེས་སོགས་རྩོད་པའི་སྐབས་ཀྱི་རྟགས་དེས་འདིར་ཡང་སྒྲུབ་པར་བྱེད་དགོས་ཏེ། འདི་རྩོད་པ་དེ་དག་གི་འཕྲོ་ཡིན་པའི་ཕྱིར། ཉོན་མོངས་སྤངས་པས་ཞེས་སོགས་ཀྱི་སྐབས་ནས་སྟོན་པའི་རྟགས་དོན་གྱིས་གོ་བར་བྱ་རྒྱུ་ཡང་། གོང་གི་བདེན་པ་མཐོང་བས་ཞེས་སོགས་རྩོད་པའི་སྐབས་ཀྱི་རྟགས་དེ་ཡིན་པའི་ཕྱིར། ཞེ་འདོད་ལ་ཡོད་བཞིན་དུ་རྟགས་དོན་གྱིས་གོ་བར་བྱས་པའི་ཕྱིར་མི་འགྲིག་རྒྱུ་ཅི་ཡང་མེད་ལ། ཁྱོད་ཀྱིས་༼མི་ཕམ་གྱིས་༽མདོར་ན་མངོན་འགྱུར་ཙམ་ཞེས་པའི་ཁྱད་པར་དེ་ཉོན་མོངས་སྤངས་པས་ཞེས་པ་ལ་སྦྱར་ནས་ཁས་བླངས་ཀྱི་རྟགས་བྱས་ནའང་མི་བདེ་ལ། དམ་བཅའ་ཁོ་ནར་སྦྱར་ཡང་མི་བདེ་བས་ཚིག་འབྲེལ་འགྲིགས་དཀའ་ཞེས་བརྗོད་ཀྱང་གསལ་བ་ལ་སྦྱར་ནས་མི་འདོད་པ་ཐལ་བར་འཕངས་པས་ཕ་རོལ་པའི་ཞེ་འདོད་ལ་གནོད་པ་སྟོན་པའི་འབྲེལ་པ་ཅན་གྱི་ཐལ་ངག་ཡང་དག་ཡིན་པའི་ཕྱིར། ཚིག་གི་འབྲེལ་ཧ་ཅང་བདེ་ཞིང་དོན་གྱི་གནད་ཁྱད་པར་ཅན་དང་ལྡན་པ་ད་རུང་རིམ་གྱིས་སྤྲོས་པས་གསལ་བར་འགྱུར་རོ།།

      

ཡང་ཁྱོད་ཀྱིས་༼མི་ཕམ་གྱིས་༽དོན་བསྡུས་ན་མི་རྟག་སོགས་བཅུ་དྲུག་གོམས་པའི་ལམ་གྱིས་མི་གྲོལ་བར་སྒྲུབ་འདོད་ན་མི་གྲོལ་བའི་རྒྱུ་མཚན་དེ་ཐོག་མ་ནས་བརྗོད་རིགས་ཀྱི། ཁར་འགྲོ་བ་ལ་ལྟག་པ་བསྐོར་བའི་དཔེ་ལྟར་འབྲེལ་མེད་དུ་འགྱུར་རོ།། ཞེས་བྱས་འདུག་ཀྱང་མི་རྟག་སོགས་གོམས་པའི་ལམ་གྱིས་གྲོལ་བར་སྒྲུབ་འདོད་ན། རྒྱུ་མཚན་དེ་སྔར་བདེན་པ་མཐོང་བས་ཞེས་སོགས་ཀྱི་རྩོད་ལན་སྐབས་ནས་འདིར་མཐར་ཆགས་སུ་བྱུང་བས་བསྟན་བསྟན་པ་ཡིན་བཞིན། འདི་ནི་ཁར་འགྲོ་བ་ལ་གདོང་ངོས་སུ་སྟོན་པའི་དཔེ་ལྟར་འབྲེལ་པ་ཅན་དུ་ཤེས་པར་གྱིས་ཤིག

      

ཅི་སྟེ་ཉོན་མོངས་མངོན་འགྱུར་ཞེས་པ་སོགས་ཀྱི་ཁྱད་པར་སྦྱར་ནས་གཞུང་དོན་དང་བསྟུན་ནས་འགྲེལ་མི་རིགས་ན། ཁྱོད་ལའང་མཚུངས་ཏེ། ཉོན་མོངས་སྤངས་པས་ཞེས་པ་ཉོན་མོངས་མཚན་ཉིད་པ་ལ་བྱེད་ནས། གྲོལ་ན་དེ་མ་ཐག་ཏུ་ཞེས་པ་སོགས་ལ་གཏན་དུ་བའི་གྲོལ་བ་ཞེས་ཁྱད་པར་མ་སྦྱར་ན་ཁྱོད་ཀྱི་ཞེ་འདོད་དེའང་མི་འགྲུབ་པར་འགྱུར་ཏེ། དེ་མ་སྦྱར་ན་ཉོན་མོངས་མཚན་ཉིད་པ་སྤངས་པས་གྲོལ་བ་ཐོབ་པ་ནི་རྒོལ་སྔ་ཕྱི་གཉིས་ཀས་འདོད་པ་གང་ཞིག། གྲོལ་བ་ཐོབ་ཀྱང་གྲོལ་བ་གཏན་དུ་བ་ཡིན་མིན་མ་རྩོད་ན་རྩོད་རྒྱུ་གཞན་མི་འདུག་པའི་ཕྱིར། ཚིགས་ཀྱི་ཁྱད་པར་དེ་ཙམ་སྦྱོར་དགོས་པ་རང་རེ་གཉིས་འདྲ་ཡང་། ཁོའི་ལུགས་ལ་ཉོན་མོངས་སྤངས་པས་ཞེས་པའི་རྒྱུ་མཚན་དངོས་སུ་བསྟན་པའི་ཕྱིར་ཁྱད་པར་འཕགས་སོ་སྙམ་ན། སྤྱིར་རྒྱུ་མཚན་དངོས་ཤུགས་གང་ནས་བསྟན་པ་ལ་ཁྱད་པ་བཟང་ཞན་མེད་ལ། ལྷག་ཏུ་ཁྱོད་རང་གི་རྒྱུ་མཚན་ལྟར་སྣང་དེ་ཙམ་སྟོན་པ་དེ་བས་ཀྱང་ཁྱད་པར་མི་འཕགས་པ་ལྟ་ཞོག་འཚངས་ཆེ་བ་ངེས་ཏེ། ཕ་རོལ་པོས་འདོད་པའི་དགྲ་བཅོམ་ཆོས་ཅན། དེ་མ་ཐག་ནས་གཏན་དུ་གྲོལ་བར་འགྱུར་བར་ཐལ། ཉོན་མོངས་སྤངས་པས་གྲོལ་བའི་ཕྱིར། ཞེས་བཀོད་ན་ཐལ་འགྱུར་འདིའི་བཟློག་དོན་འཕེན་ནམ་མི་འཕེན། བཟློག་དོན་འཕེན་ན། དེ་ཆོས་ཅན། ཉོན་མོངས་མ་སྤངས་ཏེ། གཏན་གྱི་གྲོལ་བ་མ་ཐོབ་པའི་ཕྱིར་ཞེས་པ་འདི་འབྱུང་དགོས་པས། དེས་གཞན་གྱི་འདོད་པ་སུན་འབྱིན་པ་ལྟ་ཞོག་རང་ལུགས་འགལ་ཁྱབ་ཏུ་སོང་བའི་རང་མཚངས་ཡང་དག་པ་སྟོན་པར་འགྱུར་རོ།།

      

བཟློག་དོན་མི་འཕེན་ན། ཕྱིར་རྒོལ་གྱིས་འདོད་པའི་དགྲ་བཅོམ་དེ་རང་ལུགས་ཀྱིས་ཀྱང་ཉོན་མོངས་སྤངས་པའི་དགྲ་བཅོམ་མཚན་ཉིད་པར་འདོད་དགོས་པ་དེ་མི་འཐད་པ་ད་རུང་སྟོན་པར་འགྱུར་བས། ཁྱོད་ཀྱིས་འགྲེལ་ཚུལ་དེ་ཅི་བྱས་ཀྱང་གཞན་གྱིས་འདོད་པ་སུན་འབྱིན་མི་ནུས་ཤིང་། རང་ཉིད་ཐལ་འགྱུར་གྱི་རྣམ་བཞག་ལ་རྨོངས་པའི་འཚངས་ཆེན་པོ་སྟོན་བྱེད་ལས་མ་འདས་པ་ཤེས་པར་གྱིས་ལ། ངེད་ཅག་འཇམ་མགོན་བླ་མའི་གཞུང་འགྲེལ་ཡང་དག་པ་ལ་ས་པཎ་གྱིས།

སྤྲེའུ་རྣམས་ཀྱིས་མི་བཟུང་ནས།།
མཇུག་མ་མེད་ཅེས་བཞད་གད་བྱེད།།

ཅེས་པའི་དཔེ་ལྟར་མ་དག་པས་དག་པ་སུན་འབྱིན་འདོད་ཀྱི་བློ་ངན་དེ་དོར་བ་གྱིས་ཤིག་ཅེས་གདམས་སོ།།

      

ཉོན་མོངས་སྤངས་པས་གྲོལ་ན་ཞེས་པ་འདི། དེ་མ་ཐག་ཏུ་དེར་འགྱུར་རོ་ཞེས་པའི་རྒྱུ་མཚན་དུ་བཀོད་དགོས་ཞེས་པ་དང་། གོང་དུ་ལྷག་བཅས་དགྲ་བཅོམ་དང་སྦྱོར་ཚུལ་ལྟར་བྱེད་དགོས་ཟེར་ན། འདི་དག་ལ་སྦྱོར་བ་ལྷག་བཅས་དགྲ་བཅོམ་ཆོས་ཅན། དེ་མ་ཐག་ཏུ་སྡུག་བསྔལ་ཐམས་ཅད་ལས་གྲོལ་བ་དེར་འགྱུར་བར་ཐལ། སྟོང་ཉིད་མ་རྟོགས་ཀྱང་མི་རྟག་སོགས་བཅུ་དྲུག་རྟོགས་པའི་ལམ་གྱིས་ཉོན་མོངས་པ་མ་ལུས་པ་སྤོང་བའི་ཕྱིར། ཞེས་པ་འདི་འབྱུང་བས། དེས་ན་ཕ་རོལ་པོས་འདོད་པའི་དགྲ་བཅོམ་དེས་ཉོན་མོངས་མཐའ་དག་སྤོང་བ་དང་། དགྲ་བཅོམ་མཚན་ཉིད་པ་ཡིན་པ་རང་ལུགས་ཀྱིས་ཀྱང་འདོད་པ་གཞིར་བཞག་ནས་རྩོད་པར་འགྱུར་ན། གོང་གི་ཕྱོགས་སྔས་རྩོད་པ་ཚུར་བཀོད་པའི་བདེན་པ་མཐོང་བས་གྲོལ་འགྱུར་གྱི།། སྟོང་ཉིད་མཐོང་བས་ཅི་ཞིག་བྱ།། ཟེར་བ་ལ། རང་ལུགས་ཀྱིས་འདོད་ལན་བཏབ་རིགས་པར་ཐལ། བདེན་པ་མཐོང་བས་འཁོར་བ་ལས་གྲོལ་བ་རང་ལུགས་ཀྱིས་ཀྱང་འདོད་པ་ལ། འཁོར་བ་ལས་ཐར་པའི་ཆེད་དུ་སྟོང་ཉིད་མཐོང་བས་ཅི་ཞིག་བྱ་སྟེ། དོན་མེད་པ་ཉིད་དུ་ཕྱིར་རྒོལ་གྱི་འདོད་པ་དང་རྣམ་པ་ཀུན་ཏུ་མཚུངས་འདུག་པའི་ཕྱིར། རྒྱུ་མཚན་དེ་བས་ན། གང་ཕྱིར་ལུང་ལས་ལམ་འདི་ནི།། མེད་པར་བྱང་ཆུབ་མེད་པར་གསུངས།། ཞེས་པ་འདིའང་མི་འཐད་པར་ཐལ། སྟོང་ཉིད་རྟོགས་པའི་ལམ་མེད་པར་བྱང་ཆུབ་ཡོད་པའི་ཕྱིར་ཏེ། སྟོང་ཉིད་རྟོགས་པ་མེད་ཀྱང་ཉན་རང་དགྲ་བཅོམ་འཐོབ་པ་ཡོད་པའི་ཕྱིར། རྟགས་ཁས་བླངས་ཀྱི་སྟེང་དུ་སོང་། དེ་བཞིན་དུ་སེམས་ནི་དམིགས་དང་བཅས་རྣམས་ཀྱིས།། མྱ་ངན་འདས་པའང་དཀའ་བར་གནས།། ཞེས་གསུངས་པའང་མི་འཐད་པར་ཐལ། བདེན་པར་གྲུབ་པའམ་རང་ངོས་ནས་གྲུབ་པར་འཛིན་པའི་བདག་འཛིན་གྱི་དམིགས་པ་དང་བཅས་པའི་སེམས་ལྡན་ལའང་མྱ་ངན་ལས་འདས་པ་མི་དཀའ་བའི་ཕྱིར། རང་ངོས་གྲུབ་པར་འཛིན་པ་དང་བཅས་པའི་སེམས་མ་སྤངས་བཞིན་དུ་ཡང་ཉན་རང་དགྲ་བཅོམ་ཐོབ་པ་ཡོད་པའི་ཕྱིར། རྟགས་ཁས་ལེན་གྱིས་དངོས། དེ་བཞིན་དུ་བསྟན་རྩ་དགེ་སློང་ཉིད་ཡིན་ན།། དགེ་སློང་ཉིད་ཀྱང་དཀའ་བར་གནས།། གསུངས་པ་མི་འཐད་པར་ཐལ། བསྟན་པའི་རྩ་བ་དགེ་སློང་དགྲ་བཅོམ་ཉིད་ཡིན་ཀྱང་འདི་དཀའ་བ་མ་ཡིན་པའི་ཕྱིར་ཏེ། རང་ངོས་ནས་གྲུབ་པར་འཛིན་པའི་བདག་འཛིན་མ་སྤངས་བཞིན་དུ་དགྲ་བཅོམ་འཐོབ་པ་ཡོད་པའི་ཕྱིར། ཞེས་པས་མཚོན་ནས་གནོད་བྱེད་མཐའ་ཡས་པ་འབྱུང་བའི་ཕྱིར། རྒྱལ་སྲས་ཆེན་པོའི་གཞུང་དམ་བཅའ་སྔ་མ་ཕྱི་མའི་ཁས་བླངས་ཀྱི་སྒོ་ནས་རིམ་པ་བཞིན་དུ་བཤིག་པའི་འབྲེལ་མེད་ཀྱི་རྩོད་ཚུལ་འདི་ལྟར་མ་བྱས་ན་འཛེས་སོ།།

      

རྒྱུ་མཚན་དེ་ལྟ་བས་ན་གཞུང་འགྲེལ་ཚུལ་ལ་འབྲེལ་བ་མེད་པ་དེ་རང་རེ་རྒོལ་སྔ་ཕྱི་སུའི་ལུགས་ལ་བྱུང་འདུག་ཁ་ནང་དུ་ཕྱོགས་ལ་སོམས་དང་ཤེས་པར་སླའོ།། ནང་འགལ་གྱི་ཁུར་ཆེན་པོ་འདི་ལྟར་ཐོག་ཏུ་བབས་པ་ད་རུང་ཡང་བསྟན་ཏེ། ཁྱོད་ཀྱིས་གོང་དུ་༼མི་ཕམ་གྱིས་༽ལན་ཅུང་ཟད་སྤྲོས་ན། སྐབས་འདིར་འཁོར་བ་ལས་གྲོལ་མི་གྲོལ་དཔྱད་པའི་སྐབས་ཡིན་ཡང་དེ་དག་གོང་དུ། གང་ཕྱིར་ལུང་ལས་སོགས་ཀྱིས་བཤད་ལ། ཞེས་བཤད་ནས། འོག་ནས་ཕ་རོལ་འདོད་པའི་དགྲ་བཅོམ་དེ་ཉིད་བདག་འཛིན་སྤོང་བའི་ལྷག་བཅས་དགྲ་བཅོམ་མཚན་ཉིད་པར་ཁས་ལེན་པའི་ནང་འགལ་ཆེན་པོ་ངོ་མ་ཤེས་པ་འདུག་སྟེ། ཕྱིར་རྒོལ་གྱིས་འདོད་པའི་དགྲ་བཅོམ་དེ་ལྷག་བཅས་དགྲ་བཅོམ་མཚན་ཉིད་པ་ཡིན་ན། གང་ཕྱིར་ལུང་ལས་སོགས་ཀྱིས་སྟོང་ཉིད་རྟོགས་པའི་ལམ་མེད་པར་བྱང་ཆུབ་ཡོད་མེད་རྩོད་པ་དོན་མེད་དུ་སོང་འདུག་པའི་ཕྱིར་ཏེ། རྩོད་གཞིའི་སྟེང་ནས་རྩོད་བྱའི་དངོས་པོ་རང་བརླག་ཏུ་སོང་འདུག་པའི་ཕྱིར། ངོ་ཚ་བའི་བརྒལ་བརྟག་འདི་ལྟ་བུ་རྒྱལ་སྲས་ཞི་བ་ལྷའི་གཞུང་ལ་ཡོད་སྐད་ཀྱི་རྐང་འདྲེན་པ་མ་མཛོད་ཅིག

      

གཞན་ཡང་ཁྱོད་ཀྱིས་༼མི་ཕམ་གྱིས་༽འདི་ནས་ཕ་རོལ་པོས་འདོད་པའི་ལྷག་བཅས་དགྲ་བཅོམ་དེ་དགྲ་བཅོམ་མཚན་ཉིད་པ་གཞིར་བཅས་ནས་གོང་དུ་སྤྱིར་སྟོང་ཉིད་མ་རྟོགས་པར་འཁོར་བ་ལས་གྲོལ་བ་ཡོད་མེད་དང་། དེ་ཙམ་གྲོལ་བ་མཐར་ཐུག་ཡིན་མིན་ཀྱང་དཔྱད་པ་སྐབས་སུ་ཆེས་བབས་པ་ཡིན་ལ། ཅིས་ཀྱང་སྐབས་སུ་མ་བབས་པའི་དོན་མེད་ཀྱི་ངག་ཞིག་ཡིན་ན་གཞུང་འདིར་སྐབས་འདིའི་མཇུག་ཐོག་དེ་མ་ཐག་ཏུ་ཡང་། ཉོན་མོངས་ཤེས་བྱའི་སྒྲིབ་པ་ཡི།། མུན་པའི་གཉེན་པོ་སྟོང་པ་ཉིད།། མྱུར་དུ་ཐམས་ཅད་མཁྱེན་འདོད་པས།། དེ་ནི་ཇི་ལྟར་སྒོམ་མི་བྱེད།། ཅེས་སྟོང་པ་ཉིད་རྟོགས་པའི་ཤེས་རབ་རྣམ་གྲོལ་མཐར་ཐུག་པའི་ལམ་དུ་གསུང་བའང་དོན་ལ་མི་གནས་པ་ཡིན་ནམ་དཔྱད་པར་ཞུ་བྱས་འདུག་པ་རྣམས་ལ་དཔྱད་ན་ཤིན་ཏུ་ནང་འགལ་གྱི་ངག་སྟེ། སྤྱིར་སྟོང་ཉིད་མ་རྟོགས་པར་འཁོར་བ་ལས་གྲོལ་བ་ཡོད་མེད་རྩོད་པ་སྐབས་སུ་བབས་པ་དང་། རང་ལུགས་ཕ་རོལ་པོས་འདོད་པའི་ལྷག་བཅས་དགྲ་བཅོམ་མཚན་ཉིད་པར་འདོད་པ་ནང་འགལ་གྱི་ཁུར་ཆེན་ཡིན་ཏེ། ཕ་རོལ་པོས་འདོད་པའི་ལྷག་བཅས་དགྲ་བཅོམ་དེ་དགྲ་བཅོམ་མཚན་ཉིད་པ་ཡིན་ན་སྟོང་ཉིད་མ་རྟོགས་པར་འཁོར་བ་ལས་གྲོལ་བ་ཡོད་མེད་ཅི་ཞིག་རྩོད་དེ། སྟོང་ཉིད་མ་རྟོགས་ཀྱང་འཁོར་བ་ལས་གྲོལ་བ་ཡོད་པ་རང་ལུགས་ཀྱིས་ཀྱང་འདོད་པའི་ཕྱིར། ཕ་རོལ་པོས་འདོད་པའི་དགྲ་བཅོམ་དེ་དེ་ཡིན་པའི་ཕྱིར། རྟགས་རིམ་པར་གྲུབ་སྟེ། དེ་འདྲ་བའི་དགྲ་བཅོམ་དེ་སྟོང་ཉིད་མ་རྟོགས་བཞིན་དུ་འཁོར་བ་ལས་གྲོལ་བའི་གང་ཟག་ཡིན་པའི་ཕྱིར། ཁྱབ་པ་ཁས་བླངས་ཀྱིས་དངོས། དེས་ན་སྟོང་ཉིད་མ་རྟོགས་ཀྱང་འཁོར་བ་ལས་གྲོལ་བ་འདོད་བཞིན་དུ་སྟོང་ཉིད་མ་རྟོགས་པར་འཁོར་བ་ལས་གྲོལ་བ་ཡོད་མེད་རྩོད་པའི་ནང་འགལ་ཆེན་པོ་དེ་འདྲ་ཞི་བ་ལྷས་མཛད་ཅེས་རྒྱལ་སྲས་བདག་ཉིད་ཆེན་པོ་ལ་བསྔགས་པ་མ་ཡིན་པའི་ཉེས་ཚོགས་ཆེན་པོ་དེ་འདྲ་བ་མ་བསོག་ཅིག དེས་ན་ཉོན་མོངས་ཤེས་བྱའི་སྒྲིབ་པ་ཡི།། མུན་པའི་གཉེན་པོ་སྟོང་པ་ཉིད།། གསུངས་པའང་མི་འཐད་པར་ཐལ། ཉོན་སྒྲིབ་ཀྱི་གཉེན་པོ་སྟོང་པ་ཉིད་རྟོགས་པའི་ཤེས་རབ་མ་ཡིན་པའི་ཕྱིར་ཏེ། བདེན་པ་མཐོང་བ་ཙམ་གྱིས་ཉོན་མོངས་མཐའ་དག་སྤངས་ནས་གྲོལ་བ་དགྲ་བཅོམ་འཐོབ་ནུས་པའི་ཕྱིར། རྟགས་ཁས་བླངས་ཀྱིས་མི་འདོད་ཀ་མེད་དུ་སོང་། དེས་ན། རྒྱལ་སྲས་ཞི་བ་ལྷས་ཕྱིར་རྒོལ་ལ་དང་པོ་བདེན་པ་མཐོང་བ་ཙམ་གྱིས་མི་གྲོལ་བ་ལུང་རིགས་ཀྱིས་སྒྲུབ་སྒྲུབ་ནས་ཕྱིར་རྒོལ་གྱིས་གང་འདོད་པའི་ལྷག་བཅས་དགྲ་བཅོམ་དེ་བདེན་བཞི་མི་རྟག་སོགས་མཐོང་བ་ཙམ་གྱིས་གྲོལ་བ་ཐོབ་པ་གཞིར་བཅས་ནས་གྲོལ་བ་གཏན་དུ་བ་ཡིན་མིན་རྩོད་པ་ནང་འགལ་དུ་བྱས། ཡང་ཉོན་མོངས་པ་དང་ཤེས་བྱའི་སྒྲིབ་པའི་གཉེན་པོ་སྟོང་པ་ཉིད་སྒོམ་པ་ལས་གཞན་མེད་ཅེས་གསུང་པ་དང་། བདེན་བཞི་མི་རྟག་སོགས་རྟོགས་པའི་ལམ་ཙམ་གྱིས་གྲོལ་བ་ཐོབ་པ་གཞིར་བཅས་པ་སོགས་འགལ་འདུའི་འཚངས་ཆེན་པོ་འདི་འདྲ་ཞི་བ་ལྷ་ལ་མང་ལ་ཞེས་བསམ་བཞིན་སྨད་པའི་ཚིག་གི་དུག་རླངས་འཕྱུར་བ་མ་བྱེད་ཅིག ངེད་ཅག་གི་འགྲེལ་ཚུལ་རྒོལ་བའི་ཁས་ལེན་གྱི་བྲག་རི་གཞོམས་ངེས་སུ་འཕངས་པ་ཤིང་རྟ་ཆེན་པོ་དག་གིས་དགོངས་པ་ལས་ཕྱི་རོལ་དུ་མ་གྱུར་པར་འགྲེལ་པ་དག་གི་རྗེས་སུ་ཁྱོད་ཅག་ཞི་བ་ལྷ་ལ་ནང་འགལ་གྱི་སྐྱོན་གྱི་མི་གཙང་བ་འཛེམ་མེད་དུ་བསྐུས་པ་དག་གིས་འབྲེལ་མེད་དངོས་འགལ་གྱི་ཚིག་དུ་མ་སྨྲས་ནས་མཐར་དམྱལ་བའི་གནས་སུ་འཆོངས་པ་སངས་རྒྱས་འཕགས་པ་ཡིས་ཀྱང་བཅོས་སུ་མེད་ན། ཁྱོད་ཀྱིས་༼མི་ཕམ་གྱིས་༽འགའ་ཞིག་ཁྱོད་ཁོ་ནའི་རྗེས་སུ་སྨྲ་བ་མི་བྱེད་ཀྱང་ཁྲོ་བར་མི་མཛད་པ་ཞུ་ཞེས་གསུང་མ་དགོས་སོ།། ཡང་ཁྱོད་འདོད་པའང་གལ་ཆེ་བ་ལོས་ཡིན་ཏེ། དེ་བས་ཤིང་རྟ་ཆེན་པོའི་གཞུང་ཉམས་པ་འཕངས་པས་ཞེས་བརྗོད་ན་ཤིང་རྟ་ཆེན་པོའི་གཞུང་སུས་ཉམས་པར་བྱས་འདུག་སྔར་གྱི་རིགས་པ་གང་སྤྲོས་པ་དག་གིས་གསལ་ཞིང་ད་རུང་སྤྲོས་པས་ཀྱང་ཆོག་གོ།

      

ཡང་༼མི་ཕམ་གྱིས་༽ཤེར་འབྱུང་བ་སོགས་རྒྱ་གར་གྱི་པཎ་ཆེན་ཡོངས་གྲགས་དུ་མ་ཞལ་འཆམས་ཚེ་ཞི་བ་ལྷ་ནས་བརྒྱུད་པའི་བཤད་རྒྱུན་མ་ཉམས་པའང་དེ་རྣམས་ལ་ཡོད་དགོས་ཤིང་རྣམ་དཔྱོད་ཀྱང་བོད་ཕལ་ལས་མི་དམན་ཙམ་བཞུགས་ཚོད་འདྲ་བས་བོད་ཀྱིས་ཇི་བདེར་འཆད་པ་ལས་དམན་དགོས་པ་མིན་པ་འདྲ་སྙམ་ཟེར་བ་ཡང་མ་ངེས་པ་སྟེ། སྤྱིར་རྒྱ་གར་གྱི་པཎ་ཆེན་ཤེར་འབྱུང་བ་སོགས་འགྲན་ཟླ་དང་བྲལ་བའི་པཎ་ཆེན་ཡིན་ཀྱང་། ཟབ་མོའི་ལྟ་བ་ཀླུ་སྒྲུབ་སངས་རྒྱས་བསྐྱངས་ཟླ་གྲགས་སོགས་ཀྱི་དགོངས་པ་ཇི་ལྟ་བཞིན་དུ་འཆད་པར་མི་མཛད་ལ། ཞི་བ་ལྷའི་གཞུང་ནི་ཀླུ་སྒྲུབ་ཟླ་གྲགས་སོགས་ཀྱི་དགོངས་པ་དང་བསྟུན་དགོས་པ་ལ་དེ་དག་དང་མི་མཐུན་པའི་འགྲེལ་ཚུལ་ཇི་རིགས་བྱུང་བ་ཀླུ་སྒྲུབ་ཡབ་སྲས་ཀྱི་གཞུང་དང་བསྟུན་ནས་འཁྱོག་པོའི་ཤིང་དྲང་པོར་བསྲངས་ནས་རྗེ་ཡབ་སྲས་ཀྱིས་བཀྲལ་བ་ལ་ཡང་སྡང་བར་མ་བྱེད་དང་། ཤེར་འབྱུང་བ་སོགས་ཀྱིས་ཞི་བ་ལྷའི་གཞུང་ཀླུ་སྒྲུབ་ཡབ་སྲས་ཀྱི་དགོངས་པ་དང་ཅུང་མི་མཐུན་པར་འགྲེལ་ཀྱང་། དེ་ཙམ་གྱིས་ཞི་བ་ལྷ་ནས་བརྒྱུད་པའི་གདམས་པ་མེད་པའི་སྐྱོན་དུ་མི་འགྱུར་ཏེ། དཔེར་ན་ཐུབ་པ་སངས་རྒྱས་བཅོམ་ལྡན་འདས་ཀྱི་དགོངས་པ་མཐར་ཐུག་ཐལ་འགྱུར་གྱི་ལུགས་སུ་གནས་ཀྱང་། གྲུབ་མཐའ་འོག་མ་པའི་ལུགས་འཛིན་པ་དག་ལའང་དེའི་གདམས་ངག་གི་རྒྱུན་མ་ཉམས་པ་ཡོད་ཅེས་ཁས་བླངས་དགོས་པ་དང་འདྲ་བའི་ཕྱིར། པཎ་ཆེན་ཤེར་འབྱུང་བ་སོགས་རང་རང་གི་གྲུབ་མཐའ་གང་ལ་ཞུགས་པ་དེའི་སྲོལ་འཛིན་ནས་སྤྱོད་འཇུག་གི་དགོངས་པ་འགྲེལ་བའི་བཀའ་དྲིན་མཛད་པ་ལྟ་བའི་ཕྱོགས་ནས་ཅུང་དགོངས་པ་ལྟར་མ་གྱུར་ཀྱང་སྤྱོད་པའི་ཕྱོགས་དགོངས་པ་ཇི་ལྟ་བ་བཞིན་འགྲེལ་པ་དགོས་པ་ཆེ་བ་ཡིན་ལ། གཞུང་འདིའི་སྐོར་འགྲེལ་ཚུལ་ཡང་ཁྱོད་ཅག་ལྟར་ག་ལ་མཛད་དེ། མཐར་ཐུག་གི་གྲོལ་བ་ཡིན་མིན་རྩོད་ཀྱང་ཉན་ཐོས་སྡེ་གཉིས་འདོད་པའི་དགྲ་བཅོམ་དགྲ་བཅོམ་མཚན་ཉིད་པའང་མི་མཛད། ཉན་ཐོས་སྡེ་གཉིས་དང་ཉན་རང་གཉིས་ཀྱི་ནང་ཚན་གྱི་ཉན་ཐོས་གཅིག་ཏུ་འཁྲུལ་བ་སོགས་ཕྱིན་ཅི་ལོག་གི་འཛིན་སྟངས་དེ་འདྲ་ཞལ་གྱིས་མི་བཞེས་པས། འགྲེལ་ཚུལ་གཞན་ཡིན་ཀྱང་དེ་ནང་པའི་གྲུབ་མཐའ་སྨྲ་བ་འདིའི་ལུགས་བཟུང་བ་ཡིན་ཞེས་ངོས་འཛིན་རྒྱུ་ཞིག་ཡོད་ལ། ཁྱོད་ཅག་གྲུབ་མཐའ་སྨྲ་བ་སུའི་ལུགས་ལས་ཀྱང་ཕྱི་རོལ་ཏུ་གྱུར་པ་དག་དང་འདྲ་སྙམ་ནས་མངོན་པའི་ང་རྒྱལ་མ་བྱེད་ཅིག

      

པཎ་ཆེན་དེ་དག་གིས་འགྲེལ་ཚུལ་ཡང་ལུགས་འདི་དང་མི་མཐུན་ཏེ། དེ་དག་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་བཞེད་ཀྱང་། ཉན་རང་དགྲ་བཅོམ་ཐོབ་པ་ལ་ཆོས་ཀྱི་བདག་མེད་ངེས་པར་རྟོགས་དགོས་པས་ཁྱབ་པ་མི་བཞེད་པའི་ཕྱིར། འཕགས་པའི་དགོངས་པ་ཐལ་འགྱུར་པའི་ལུགས་འདི་ནི་ཐུན་མོང་མ་ཡིན་པ་སྟེ། དཔལ་ལྡན་ཟླ་བས་ལུགས་འདི་ནི་ཐུན་མོང་མ་ཡིན་པའོ་ཞེས་མཁས་པ་རྣམས་ཀྱིས་ངེས་པར་མཛད་དུ་གསོལ་ཞེས་གསུངས་པའི་ཕྱིར།

འདིར་སྨྲས་པ།

མ་དག་འཆལ་བའི་གཏམ་ངན་དུག་རླངས་ཀྱིས།།

རྒྱལ་སྲས་ཆེན་པོའི་གཞུང་བཟང་གསེར་བཙོ་མ།།
མཆོད་སྡོང་རིན་ཆེན་གཡའ་ཡིས་བགོས་འདོད་པ།།

དེ་དག་རིགས་ལམ་དྲང་པོའི་རྩི་སྨན་གྱིས།།

གསལ་བར་བྱས་ཚེ་ཤིང་རྟ་ཆེན་པོ་ཡི།།

དགོངས་དོན་ཉི་མ་གཞོན་ནུའི་འོད་སྟོང་གིས།།
རྒྱལ་སྲས་ཞི་བ་ལྷ་ཡི་དགོངས་པའི་དོན།།

གསེར་གྱི་མཆོད་སྡོང་འཁྱུད་པ་བཞིན་དུ་བྱས།།

ཞེས་ཀྱང་སྨྲས་སོ།།

      

ཡང་སྲེད་འདི་ཞེས་སོགས་ཀྱི་སྐབས་སུ་མི་ཕམ་ནས་དེ་ལ་ཁོ་བོས་ལན་ཅུང་ཟད་བརྗོད་པར་བྱ་སྟེ། ཞེས་པ་ནས། མི་འགྲིགས་པར་མཐོང་ངོ་ཞེས་པའི་བར་གྱི་ལན་ཉུང་ངུ་བརྗོད་ན། སྲེད་པ་ལ་རྒྱུ་བདག་འཛིན་གཉིས་པོས་དྲངས་པའི་ཁྱད་པར་དང་། ཚོར་བ་ལ་རང་མཚན་གྱིས་གྲུབ་པར་འཛིན་པའི་ཁྱད་པར་སྦྱར་དགོས་པ་འདི་གཞུང་རྩོམ་པ་པོས་དགོངས་པ་ཡིན་ན་དངོས་སུ་གསལ་བར་སྦྱར་རིགས་ཤིང་ཚིག་ཀྱང་། འདི་ལྟར་རྩོམ་པ་མི་རིགས་ཏེ། ཞེ་འདོད་ལ་ཡོད་པ་ཁ་ནས་མ་འཁྱོལ་བ་ལྟ་བུ། ཞེས་སྨྲས་ཀྱང་། ཁྱོད་ཀྱིས་ནི་སྤྱོད་འཇུག་གི་གཞུང་ཚིག་དེ་རྣམས་གཏན་ནས་མ་མཐོང་བར་ཟད་དེ། འདིའི་སྐབས་ཀྱི་སྲེད་པ་ལ་བདག་འཛིན་གཉིས་སོ་སོར་དྲངས་པའི་ཁྱད་པར་བསྟན་ཏེ། སྲེད་འདི་ཞེས་པའི་ཉེ་ཚིག་གིས་ཕྱིར་རྒོལ་ཁོ་རང་འདོད་པ་ལྟར་གྱི་སྲེད་པ་འདི་ཉོན་མོངས་ཅན་མིན་ཡང་། ཞེས་པའི་ཤུགས་ཀྱིས་དེ་ལས་གཞན་པའི་སྲེད་པ་ཉོན་མོངས་ཅན་ཞིག་ཡོད་པ་གོ་ནུས་པས། འོ་ན་སྲེད་པ་འདི་ཉོན་མོངས་ཅན་མིན་ན་འདི་ལས་གཞན་པའི་ཉོན་མོངས་ཅན་གྱིས་སྲེད་པ་ཞིག་ཅི་སྟེ་ཡོད་ན། ཡོད་དེ་ཀུན་རྨོངས་ལ་ཉོན་མོངས་ཅན་ཡིན་མིན་གཉིས་བཤད་པ་ལྟར་དུ། སྲེད་པ་ལའང་ཉོན་མོངས་ཅན་ཡིན་མིན་གཉིས་སུ་ཅི་སྟེ་མེད་དེ། ཀུན་རྨོངས་ལ་མངོན་པ་ནས་བཤད་པའི་ཉོན་མོངས་ཅན་ཡིན་མིན་གཉིས་ཡོད་པ་བཞིན་དུ། སྲེད་པ་ལའང་མངོན་པ་ནས་བཤད་པའི་ཉོན་མོངས་ཅན་མ་ཡིན་པ་ཞིག་དང་། ཤེར་མདོ་ནས་བཤད་པའི་འཇིག་ལྟས་དྲངས་པའི་སྲེད་པ་ཉོན་མོངས་པ་ཅན་ཞིག་སྟེ་གཉིས་ཅི་སྟེ་མེད་དེ་ཡོད་པའི་ཕྱིར། ཞེས་སྲེད་འདི་ཞེས་པའི་ཉེ་ཚིག་གིས་འདི་ཉོན་མོངས་ཅན་མིན་ཡང་འདི་ལས་གཞན་པའི་ཉོན་མོངས་ཅན་ཞིག་ཡོད་པ་དོན་གྱིས་གོ་བས། ཞེ་འདོད་ལ་ཡང་སྲིད་ཕྱི་མར་འཕེན་པའི་ལས་ཀྱི་ཉེར་ལེན་སྲེད་པ་ཉོན་མོངས་ཅན་ཞིག་ཡོད་པ་དེ་སྒྲུབ་འདོད་པ་དེ། སྲེད་འདི་ཉོན་མོངས་ཅན་མིན་ཡང་ཞེས་པའི་ཚིག་གི་གསལ་ཁ་ཞལ་ནས་འདི་བཞིན་དུ་ཐོན་པ་ཡིན་པ་ལ་ཞེ་འདོད་ལ་ཡོད་པ་ཁ་ནས་མ་འཁྱོལ་ཞེས་སྡུག་ཡུས་དེ་ཙམ་མི་དགོས་སོ།།

      

ཡང་ཁྱོད་ཀྱིས་༼མི་ཕམ་གྱིས་༽རྩ་བའི་ཚིག་ལ་ཉོན་མོངས་ཅན་མིན་ཡང་ཞེས་པ་དང་། ཀུན་རྨོངས་བཞིན་དུ་ཞེས་སྨྲོས་པས་སྤྱིར་ཉོན་མོངས་ཅན་མིན་པའི་སྲེད་པ་ཡོད་པ་གོ་ནུས་ཀྱི། སྐབས་ཀྱི་ཞེ་འདོད་ཀྱི་ཉོན་མོངས་ཅན་དེ་ལ་ཇི་ལྟར་གོ་སྟེ། ཅི་སྟེ་མེད་ཅེས་པའི་ཚིག་གོང་གི་ཉོན་མོངས་ཅན་མ་ཡིན་ཡང་ཞེས་པ་ལ་འབྲེལ་ནས་དོན་སྟོན་དགོས་པ་ལ། དེ་ཡང་དགྲ་བཅོམ་པའི་རྒྱུད་ཀྱི་སྲེད་པ་འདི་ཉོན་མོངས་ཅན་མིན་ཡང་ཞེས་དམིགས་བསལ་ནས་དེའི་དཔེར་ཀུན་རྨོངས་བཀོད་དེ། དེ་ནས་ཅི་སྟེ་མེད་ཅེས་བརྗོད་ན་སྲེད་པ་ཉོན་མོངས་ཅན་མིན་པ་ཞིག་ཅི་སྟེ་མེད་ཅེས་གོ་ནུས་ཀྱི་ཞེས་སོགས་སྨྲས་འདུག་པ་དང་། ཡང་ཁྱོད་ཀྱིས་གཞུང་དེ་དག་གིས་༼མི་ཕམ་གྱིས་༽ཕ་རོལ་པོས་འདོད་པའི་གང་ཟག་དེའི་རྒྱུད་ལ་ཡང་སྲིད་ཉེར་ལེན་གྱི་སྲེད་པ་ཡོད་པ་མ་གསུངས་སྙམ་པ་དང་། གཞུང་དེ་དག་གིས་སྲེད་པ་ཉོན་མོངས་ཅན་ཕ་རོལ་པོའི་གྲོལ་བ་འདོད་པ་དེའི་རྒྱུད་ལ་མེད་པ་གཞིར་བཞག་མཛད་ནས་ཉོན་མོངས་ཅན་མིན་ཡང་ཞེས་སོགས་ལན་གསུངས་པས་ཤེས་ལ་ཞེས་པ་འདི་རྣམས་མི་འཐད་དེ། ཉོན་མོངས་མེད་ཀྱང་ཞེས་པའི་གཞུང་འདིས་ཡང་སྲིད་ཉེར་ལེན་གྱི་སྲེད་པ་ཉོན་མོངས་ཅན་ཆེད་དུ་གཉེར་ནས་སྟོན་པ་ཡིན་པའི་ཕྱིར་ཏེ། གོང་དུ་བཤད་པ་ལྟར་སྲེད་འདི་ཞེས་པའི་ཉེ་ཚིག་དང་། མིན་ཡང་ཞེས་པའི་ཡང་སྒྲས་ཕ་རོལ་པོས་གྲོལ་བར་འདོད་པའི་གང་ཟག་དེའི་རྒྱུད་ཀྱི་སྲེད་པ་འདི་ཉོན་མོངས་ཅན་མིན་ཡང་ཟེར་ན་འདི་ལས་གཞན་ཞིག་ཡོད་པ་ཞིག་དོན་གྱིས་གོ་བར་བྱས་པ་ཡིན་པའི་ཕྱིར། དཔེར་ན་མདུན་དུ་ཡོད་པའི་སྲོག་ཆགས་འདི་རྟ་མིན་ཀྱང་ཟེར་ན། འདི་ལས་གཞན་པའི་སྲོག་ཆགས་འདི་རྟ་རེད་ཟེར་རྒྱུ་ཞིག་དོན་གྱིས་འོང་བ་བཞིན་ཡིན་པའི་ཕྱིར། སྲེད་འདི་ཞེས་པས་སྲེད་པ། ཉོན་མོངས་ཅན་མིན་ཡང་ཞེས་པས་སྲེད་པ་ཉོན་མོངས་ཅན་མིན་པ་ཞིག་བསྟན་ན། འདི་མིན་ཡང་ཞེས་པ་དོན་མེད་དུ་ཐལ་ཏེ། འདི་དེ་མིན་ཡང་འདི་དེ་རེད་ཟེར་རྒྱུ་ཅི་ཡང་མེད་པ་སྲེད་པ་འདི་ཉོན་མོངས་ཅན་མིན་ཡང་ཀུན་རྨོངས་བཞིན་དུ་ཉོན་མོངས་ཅན་མ་ཡིན་པ་ཅི་སྟེ་མེད་ཅེས་འདི་ཉོན་མོངས་ཅན་མ་ཡིན་ཡང་ཉོན་མོངས་ཅན་མ་ཡིན་པ་ཞིག་ཅི་སྟེ་མེད་ཟེར་ན། དཔེར་ན་སྲོག་ཆགས་འདི་རྟ་མིན་ཀྱང་འདི་ལས་གཞན་པའི་སྲོག་ཆགས་རྟ་མ་ཡིན་པ་ཞིག་ཅི་སྟེ་མེད་ཟེར། སྲོག་ཆགས་འདི་རྟ་མིན་ཀྱང་ཟེར་ལུགས་ཀྱིས་རྟ་ཡིན་པ་ཞིག་ངེས་པར་སྟོན་དགོས་པ་ལ། འདི་རྟ་མིན་ཀྱང་རྟ་མིན་པ་ཞིག་ཅི་སྟེ་མེད་ཟེར་ན་སྨྱོན་པའི་སྐད་ཆ་ལྟར་ཚིག་སྔ་ཕྱིའི་འབྲེལ་ཕྱིན་ཅི་ལོག་ཏུ་གྱུར་པ་དེ་བས་ཅི་ཞིག་ཡོད་ཁ་ནང་དུ་ཕྱོགས་ནས་སོམས་ཤིག དེ་ལྟར་ཚིག་གི་འབྲེལ་མི་འགྲིགས་པ་དེ་ཙམ་དུ་མ་ཟད་དོན་གྱི་གནད་ལའང་ཅི་ཞིག་འགྲིགས་ཏེ། ཕ་རོལ་པོས་འདོད་པའི་དགྲ་བཅོམ་དེ་དགྲ་བཅོམ་མཚན་ཉིད་པ་ཡིན་པ་གཞིར་བཅས་ནས་དེའི་རྒྱུད་ལ་ཡང་སྲིད་ཉེ་བར་ལེན་པའི་རྐྱེན་སྲེད་པ་ཉོན་མོངས་ཅན་མེད་ཀྱང་ཟེར་ན། ཕ་རོལ་ཉན་ཐོས་སྡེ་གཉིས་ཀྱིས་ངེད་ཅག་འདོད་པ་ལྟར་གྱི་དགྲ་བཅོམ་དེའི་རྒྱུད་ལ་སྲིད་པ་ཉེ་བར་ལེན་པའི་རྐྱེན་སྲེད་པ་ཉོན་མོངས་ཅན་མེད་དེ། དེས་སྤངས་ཟིན་པའི་ཕྱིར་ཏེ། དེ་དགྲ་བཅོམ་པ་ཡིན་པའི་ཕྱིར་ཞེས་ཚུར་རྒོལ་བ་ལ། རང་ལུགས་ཀྱིས་དེ་ལ་ཁྱོད་ཀྱི་དེའི་རྒྱུད་ལ་སྲེད་པ་ཉོན་མོངས་ཅན་སྲིད་པ་ཉེ་བར་ལེན་ནུས་མེད་པར་བདེན་ཡང་། ཉོན་མོངས་ཅན་མ་ཡིན་པའི་སྲེད་པ་ཡོད་པའི་ཕྱིར་ཞེས་རྟགས་ལྟར་སྣང་བ་ཞིག་ཕར་འཕངས་ན། ཕ་རོལ་པོས་སྲིད་པ་ཉེར་ལེན་གྱི་རྐྱེན་སྲེད་པ་མེད་ན། སྲིད་པར་ཉེར་ལེན་གྱི་རྐྱེན་དུ་མ་གྱུར་པའི་ཉོན་མོངས་ཅན་མིན་པའི་སྲེད་པ་ཡོད་ཀྱང་ཡོད་དུ་ཆུགས། འུ་བུ་ཅག་གཉིས་སྲིད་པ་ཉེ་བར་ལེན་ནུས་ཀྱི་རྐྱེན་སྲེད་པ་ཉོན་མོངས་ཅན་ཡོད་མེད་རྩོད་པ་ཡིན་ན། ངེད་ཅག་འདོད་པའི་དགྲ་བཅོམ་དེའི་རྒྱུད་ལ་སྲེད་པ་ཉོན་མོངས་ཅན་དེ་ལྡོག་ཟིན་ལ་གྲོལ་བ་མ་ཡིན་པའི་འཁོར་གསུམ་དེ་ཕར་ལོངས་ཤིག་ཟེར་བ་ལས་མ་འདས་པའི་རྩོད་ཚུལ་ཉམ་ཐག་པ་འདི་འདྲ་ཞི་བ་ལྷའི་ལུགས་ལ་ཡོད་ཅེས་མ་སྨྲ་ཞིག།

      

ཁྱོད་ཀྱིས་དེ་མི་སྐྱོན་ཏེ་སྐབས་འདིར་གྲོལ་བ་གཏན་དུ་བ་ཡིན་མིན་རྩོད་པ་ལས་ཕ་རོལ་པོས་འདོད་པའི་དགྲ་བཅོམ་འཁོར་བ་ལས་གྲོལ་བ་ཡིན་མིན་རྩོད་པ་མ་ཡིན་པའི་ཕྱིར་ཏེ། མྱ་ངན་འདས་པའང་དཀའ་བར་གནས་ཞེས་པ་ཡན་ཆད་ཀྱིས་འཁོར་བ་ལས་གྲོལ་བ་ལ་སྟོང་ཉིད་རྟོགས་དགོས་མི་དགོས་རྩོད་ནས། ཉོན་མོངས་སྤངས་པས་ཞེས་པ་མན་ཆད་ནས་ཚོར་བ་དེ་དག་ལ་ཡང་ཡོད་ཅེས་པ་ཡན་ཆད་ཀྱིས་མཐར་ཐུག་ཐེག་པ་གཅིག་ཏུ་བསྟན་པ་ཡིན་ཟེར་བ་འདི་འདུག་པས། འོ་ན་མྱ་ངན་འདས་པའང་དཀའ་བར་གནས་ཞེས་པ་ཡན་ཆད་ཀྱིས་ཕ་རོལ་ཉན་ཐོས་སྡེ་གཉིས་འདོད་པའི་བདེན་པ་མཐོང་ཙམ་གྱིས་གྲོལ་བའི་དགྲ་བཅོམ་དེ་དགྲ་བཅོམ་མཚན་ཉིད་པར་མི་འགྱུར་བ་གྲུབ་ཟིན་ནས། ཉོན་མོངས་སྤངས་པས་གྲོལ་ན་ཞེས་སོགས་ཀྱིས་གྲོལ་བ་གཏན་དུ་བ་ཡིན་མིན་རྩོད་པ་ཡིན་ན། དེའི་སྐབས་ཀྱི་རྩོད་གཞིའི་དགྲ་བཅོམ་དེ་ཕ་རོལ་ཉན་ཐོས་སྡེ་གཉིས་ཁོ་རང་གིས་འདོད་པ་ལྟར་གྱི་དགྲ་བཅོམ་དེ་ཡིན་ནམ། ཐལ་འགྱུར་པས་འདོད་པ་ལྟར་གྱི་དགྲ་བཅོམ་དེ་ཡིན་ནམ། ཕན་ཚུན་གཉིས་ཀའི་འདོད་པ་ལ་མ་རེག་པའི་དགྲ་བཅོམ་ཞེས་པ་ཙམ་ཆོས་ཅན་དུ་བཟུང་བ་གང་ཡིན་ཞེས་གྲངས།

      

གསུམ་པ་ལྟར་ན་མི་འཐད་དེ། སྤྱིར་དགྲ་བཅོམ་ཙམ་ཆོས་ཅན་བཟུང་བ་དེས་འཁོར་བ་ལས་གྲོལ་མི་གྲོལ་དང་གྲོལ་བ་གཏན་དུ་བ་ཡིན་མིན་གྱི་སྒྲོ་འདོགས་གང་ཡང་གཅོད་མི་ནུས་པའི་ཕྱིར་ཏེ། རྩོད་གཞི་འདི་ལྟ་བུ་དེ་འཁོར་བ་ལས་གྲོལ་མ་གྲོལ་དང་། གྲོལ་བ་གཏན་དུ་བ་ཡིན་མིན་དམིགས་ཕུག་ནས་རྩོད་དགོས་པ་ལ་དེ་མེད་པའི་ཕྱིར། གཉིས་ལ་ལྟར་ན་ཡང་མི་འཐད་དེ། ཐལ་འགྱུར་བའི་བཞེད་པ་ལྟར་གྱི་དགྲ་བཅོམ་དེ་ཕ་རོལ་པོ་ལ་མ་གྲུབ་པའི་ཕྱིར། དེ་འཁོར་བ་ལས་གྲོལ་མི་གྲོལ་དང་། གྲོལ་བ་གཏན་དུ་བ་ཡིན་མིན་རྩོད་པའི་སྐབས་མི་རྙེད་པའི་ཕྱིར། དང་པོ་ལྟར་ན་ཕ་རོལ་འདོད་པའི་དགྲ་བཅོམ་དེ་གྲོལ་བ་གཏན་དུ་བ་ཡིན་མིན་རྩོད་ན་རང་གིས་རང་ལ་ངལ་བ་སྟེར་བར་ཟད་དེ། དེ་འདྲའི་དགྲ་བཅོམ་དེ་གྲོལ་བ་ཐོབ་པའི་གང་ཟག་མ་ཡིན་ཞིང་། གྲོལ་བ་གཏན་ནས་མ་ཐོབ་པ་ཞིག་གི་རྒྱུད་ཀྱི་གྲོལ་བ་དེ་གྲོལ་བ་གཏན་དུ་བ་ཡིན་མིན་རྩོད་པ་ཆེས་མཚར་ཏེ། དཔེར་ན་མིག་དང་མི་ལྡན་པའི་མི་ཞིག་གིས་མིག་དེ་གསལ་བ་དང་མི་གསལ་བ་ཇི་ལྟར་ཡིན་ཞེས་རྩོད་པ་ལྟར་སོང་བའི་ཕྱིར། གལ་ཏེ་དེ་ནི་དེ་ལྟར་མ་ཡིན་ཏེ་ཕ་རོལ་པོས་འདོད་པ་ལྟར་གྱི་དགྲ་བཅོམ་དེ་རང་ལུགས་ཀྱིས་ཀྱང་དགྲ་བཅོམ་དུ་ཁས་བླངས་ནས་གྲོལ་བ་གཏན་དུ་བ་ཡིན་མིན་རྩོད་པ་ཡིན་པས་མི་སྐྱོན་སྙམ་ན། དེ་བས་ཀྱང་མི་འཐད་དེ། ཕ་རོལ་པོས་འདོད་པ་ལྟར་གྱི་དགྲ་བཅོམ་དེ་རང་ལུགས་ལའང་འཁོར་བ་ལས་གྲོལ་བ་འཐོབ་པའི་དགྲ་བཅོམ་ཡིན་པ་གཞིར་བཅས་ནས་རྩོད་ན། ཕ་རོལ་འདོད་པ་ལྟར་གྱི་དགྲ་བཅོམ་ཆོས་ཅན། འཁོར་བ་ལས་གྲོལ་བ་ཐོབ་པའི་གང་ཟག་ཡིན་པར་ཐལ། དགྲ་བཅོམ་པ་ཡིན་པའི་ཕྱིར། རྟགས་ཁས། གསལ་བར་འདོད་ན། འཁོར་བ་ལས་གྲོལ་བའི་གྲོལ་བ་ཐོབ་པ་ལ་སྟོང་ཉིད་རྟོགས་མི་དགོས་པར་ཐལ། སྟོང་ཉིད་མ་རྟོགས་ཀྱང་བདེན་པ་མཐོང་བ་ཙམ་གྱིས་གྲོལ་བ་འཐོབ་ནུས་པའི་ཕྱིར། མ་གྲུབ་ན་དེར་ཐལ། རང་ལུགས་དང་ཉན་ཐོས་སྡེ་གཉིས་གྲོལ་བ་གཏན་དུ་བ་ཡིན་མིན་རྩོད་གཞིར་གྱུར་པའི་དགྲ་བཅོམ་དེ་དེ་ཡིན་པའི་ཕྱིར། འཁོར་གསུམ་ཁས། མདོར་ན་ཕ་རོལ་པོས་འདོད་པའི་དགྲ་བཅོམ་དེ་རང་ལུགས་ལའང་དགྲ་བཅོམ་མཚན་ཉིད་པ་ཡིན་པ་གཞིར་བཅས་ནས་གྲོལ་བ་གཏན་དུ་བ་ཡིན་མིན་རྩོད་ན། དེ་ལ་ཤིན་ཏུ་འགལ་བའི་ཐལ་བ་མི་བཟོད་པ་ཆེན་པོ་གཉིས་འབྱུང་སྟེ། ཕ་རོལ་འདོད་པའི་དགྲ་བཅོམ་དགྲ་བཅོམ་མཚན་ཉིད་པ་ཡིན་ན། གོང་གི་བདེན་པ་མཐོང་བས་གྲོལ་འགྱུར་གྱི་ཞེས་སོགས་ཀྱི་རྩོད་ལན་བསྟན་རྩ་དགེ་སློང་སོགས་དང་། གང་ཕྱིར་ལུང་ལས་སོགས་ཀྱིས་སྟོང་ཉིད་མ་རྟོགས་ན་འཁོར་བ་ལས་མི་གྲོལ་བའི་སྒྲུབ་བྱེད་གང་བྱས་པ་ཐམས་ཅད་ཞིག་ནས་རང་ལུགས་ཀྱིས་བདེན་པར་མཐོང་བས་གྲོལ་གྱུར་གྱི།། སྟོང་ཉིད་མཐོང་བས་ཅི་ཞིབ་བྱ།། ཟེར་བ་ལ་འདོད་ལན་ཐེབས་པར་ཐལ་བ་སྟོང་ཉིད་མ་རྟོགས་ཀྱང་བདེན་པ་མཐོང་བ་ཙམ་གྱིས་དགྲ་བཅོམ་འཐད་པའི་ཕྱིར་ཞེས་དམ་བཅའ་སྔ་མ་བཞིག་པའི་ཐལ་བ་ཆེན་པོ་འདི་དང་ཕ་རོལ་པོ་ལ་འདོད་པའི་དགྲ་བཅོམ་དགྲ་བཅོམ་མཚན་ཉིད་པ་འདོད་བཞིན་དུ་གྲོལ་བ་གཏན་དུ་བ་ཡིན་མིན་རྩོད་པར་མི་འཐད་པར་ཐལ། གྲོལ་གཏན་དུ་བ་མ་ཡིན་པའི་སྒྲུབ་བྱེད་ལ་ཐེག་པ་གསུམ་པོ་རང་རང་གི་དགྲ་བཅོམ་མངོན་དུ་བྱེད་པ་ལ་ཆོས་ཐམས་ཅད་བདེན་པར་མེད་པ་རྟོགས་པའི་ཡེ་ཤེས་རང་རྒྱུད་ལ་ལྡན་དགོས་པ་ལ་མི་འདྲ་བའི་ཁྱད་པར་མེད་པའི་ཕྱིར་ཞེས་པའི་རྒྱུ་མཚན་འདི་འོང་དགོས་པའི་ཕྱིར། དེ་ལྟར་རྒྱུ་མཚན་འོང་དགོས་པ་འཇུག་པ་ལས། གང་ཕྱིར་འདི་ན་དེ་ཉིད་ཤེས་ལས་ཞེས་སོགས་ཀྱིས་གྲུབ་པའི་ཕྱིར། དེས་ན་ཟླ་བའི་ཞབས་ཀྱིས་འཇུག་པ་ལས་མཐར་ཐུག་ཐེག་པ་གཅིག་ཏུ་སྒྲུབ་པའི་སྒྲུབ་བྱེད་ཀྱི་རྒྱུ་མཚན་གང་གསུངས་པ་དེ་དག་མི་འཐད་པར་ཐལ། ཁྱོད་ཀྱིས་རྩོད་གཞིར་བཟུང་བའི་ཕ་རོལ་འདོད་པའི་དགྲ་བཅོམ་དེ་སྟོང་ཉིད་མ་རྟོགས་བཞིན་དུ་དགྲ་བཅོམ་ཐོབ་པའི་གང་ཟག་ཡིན་པའི་ཕྱིར། ཁྱབ་རྟགས་ཁས་བླངས་ཀྱིས་དངོས། དེས་ན་ཉོན་མོངས་སྤངས་པ་ཞེས་པ་ཉོན་མོངས་མཚན་ཉིད་པ་ལ་བྱེད་ནས། དེ་རྩོད་གཞི་ཕ་རོལ་པོས་འདོད་པའི་དགྲ་བཅོམ་དེས་སྤངས་ཟིན་པ་གཞིར་བཅས་ནས་གྲོལ་བ་གཏན་དུ་བ་ཡིན་མིན་རྩོད་པས། གང་ཟག་དེས་ཉོན་མོངས་སྤངས་ཟིན་གཞིར་བཅས་པ་ལ་ཉོན་མོངས་པའི་གཉེན་པོ་སྟོང་ཉིད་རྟོགས་མི་དགོས་པར་ཐལ་བའི་ཐལ་བ་དེ་བཟློག་མི་ནུས་ཤིང་། ཉོན་མོངས་ཤེས་བྱའི་སྒྲིབ་པ་ཡི།། མུན་པའི་གཉེན་པོ་སྟོང་པ་ཉིད།། གསུངས་པའང་མི་འཐད་པར་ཐལ་བ་སོགས་རྒྱལ་སྲས་ཆེན་པོའི་གཞུང་ཐམས་ཅད་ལྡོག་པས་དྲིལ་བར་འགྱུར་ལ། དེ་འདྲའི་གང་ཟག་དེ་ཉོན་མོངས་སྤངས་ཟིན་གཞིར་མ་བཅས་ན་ནི། ལྷག་བཅས་དགྲ་བཅོམ་ཆོས་ཅན་དུ་བཟུང་བ་དང་། དགྲ་བཅོམ་མོའུ་འགལ་བུ་ལྟ་བུ་མཚན་གཞིར་བཟུང་བ་སོགས་དང་འདྲ་བས་ཁྱོད་ཅག་ཐལ་འགྱུར་གྱི་ལྕགས་སྒྲོག་དམ་པོ་འདི་དག་གིས་བསྡམས་ཟིན་པ་ལ་ད་བྲོས་པའི་ཁུངས་གང་དུ་བཙལ་སྙམ་སེམས་པ་ལ་ཞུགས་ཤིག།

      

ཡང་ཚོར་བའི་རྐྱེན་གྱིས་སྲེད་པ་ཡིན།། ཚོར་བ་དེ་དག་ལ་ཡང་ཡོད།། སྲེད་པ་ཡོད་པའི་སྒྲུབ་བྱེད་ལ་ཚོར་བ་ཡོད་པ་འཕེན་ན། འདི་ཡི་ཚོར་བ་དེ་ཚོར་བ་རང་དངོས་ནས་གྲུབ་པར་འཛིན་པ་དང་བཅས་པའི་ཚོར་བ་ཡིན་ནམ། དེ་ལས་གཞན་པའི་ཚོར་བ་ཙམ་གང་ཡིན། ཕྱི་མ་ལྟར་ན་ཚོར་བ་ཡོད་ཙམ་གྱིས་སྲེད་པ་འབྱུང་བའང་མ་ངེས་པའི་ཕྱིར་མི་འཐད་ལ། དང་པོ་ལྟར་འདོད་ན་རང་མཚན་གྱིས་གྲུབ་པར་འཛིན་པའི་འཛིན་པ་དང་བཅས་པའི་ཚོར་བ་ཡོད་པ་འཕེན་ན་དེ་འདྲ་བའི་ཚོར་བ་མ་སྤང་བའི་གང་ཟག་ཡིན་ན་དགྲ་བཅོམ་མ་ཡིན་དགོས་པའི་ཕྱིར་ཏེ། དགྲ་བཅོམ་པ་ཡིན་ན་མཚན་འཛིན་དང་བཅས་པའི་ཚོར་བ་སྤངས་ཟིན་པས་ཁྱབ་པའི་ཕྱིར། དེ་ལྟར་བྱས་པ་ལ་ཁྱོད་ཅག་གིས་ཐལ་འགྱུར་པའི་ལུགས་འདིར་ཡང་བདེན་འཛིན་ནམ་རང་མཚན་གྱིས་གྲུབ་པར་འཛིན་པ་ཤེས་སྒྲིབ་ཡིན་འོང་སྙམ་པ་འདི་འདུག་པས་དགྲ་བཅོམ་ཡིན་ཀྱང་བདེན་འཛིན་སྤང་མི་དགོས་སྙམ་ན། ཕ་རོལ་འདོད་པའི་དགྲ་བཅོམ་དགྲ་བཅོམ་མཚན་ཉིད་པར་འདོད་ནས་གཞུང་དོན་ཕྱིན་ཅི་ལོག་འབའ་ཞིག་ཏུ་འགྲེལ་བ་འདི་འབྱུང་བས། དེ་ལ་བདེན་འཛིན་ཤེས་སྒྲིབ་ཏུ་འདོད་མི་རིགས་ཤིང་ཉོན་སྒྲིབ་ཏུ་འདོད་དགོས་པའི་སྒྲུབ་བྱེད་རྗེ་ཡབ་སྲས་ཀྱི་གསུང་རབ་དུ་མ་ལས་ཤིན་ཏུ་གསལ་བར་མཛད་ཟིན་པ་དག་ལས་ཡང་ནས་ཡང་དུ་སྨྲ་བ་ཅི་ཞིག་དགོས། འོང་ཀྱང་ད་རུང་འོག་ཏུ་སྟོན་པར་ཡང་འགྱུར་རོ།།

      

ཉོན་མོངས་པ་སྤངས་པས་སོགས་ཀྱིས་མཐར་ཐུག་ཐེག་པ་གཅིག་ཏུ་དངོས་སུ་བསྟན་པ་མ་ཡིན་ཏེ། གོང་གི་བདེན་པ་མཐོང་བས་སོགས་ཀྱི་རྩོད་པ་འོང་ཚུལ་དང་། འདིའི་འོག་ནས་ཀྱང་དམིགས་པ་དང་ནི་བཅས་པའི་སེམས།། འགའ་ཞིག་ལ་ནི་གནས་པར་འགྱུར།། སྟོང་ཉིད་དང་ནི་བྲལ་བའི་སེམས།། འགག་པ་སླར་ཡང་སྐྱེ་བར་འགྱུར་ཏེ།། འདུ་ཤེས་མེད་པའི་སྙོམ་འཇུག་བཞིན།། ཞེས་བདེན་འཛིན་གྱི་དམིགས་པ་དང་བཅས་པའི་སེམས་གནས་པའི་ས་ཕ་རོལ་འདོད་པའི་དགྲ་བཅོམ་དེའི་རྒྱུད་ལ་བྱེད་དགོས་པ་གང་ཞིག། སྟོང་ཉིད་དང་བྲལ་བའི་སེམས་ཀྱི་ཉོན་མོངས་མངོན་འགྱུར་རེ་ཞིག་འགག་ཀྱང་། སླར་ཡང་བདེན་འཛིན་མ་སྤངས་པའི་སྟོབས་ཀྱིས་ཉོན་མོངས་རེ་ཞིག་སྤངས་པ་ལྟར་སྣང་ཡང་སླར་ཉོན་མོངས་མངོན་དུ་འགྱུར་ཏེ། འདུ་ཤེས་མེད་པའི་སྙོམ་འཇུག་དཔེར་མཛད་པ་ཡིན་པའི་ཕྱིར། གཞུང་འདི་དག་སྔར་གྱི་རྩོད་པའི་འཕྲོ་ཡིན་པ་དངོས་སུ་གསལ་བའི་ཕྱིར། དེའི་བར་གྱིས་ཉོན་མོངས་སྤངས་པས་ཞེས་སོགས་ཚིག་རྐང་ཁ་ཤས་དེས་གྲོལ་བ་གཏན་དུ་བ་མ་ཡིན་པར་སྒྲུབ་ནས་ཡང་དེ་མ་ཐག་ཏུ་དེ་ལྟ་བུའི་གང་ཟག་དེ་འཁོར་བ་ལས་གྲོལ་བ་མ་ཡིན་པ་རྩོད་ན་སྨྱོན་པའི་ངག་སྒྲོས་ལྟར་གང་ཟིན་ཟིན་ནས་རྩོད་པའི་འབྲེལ་མེད་ཀྱི་ངག་ཏུ་འགྱུར་བ་དང་། མཐར་ཐུག་ཐེག་པ་གཅིག་ཏུ་སྒྲུབ་པ་ལ་དེ་སྒྲུབ་བྱེད་ཀྱི་རྒྱུ་མཚན་མཐར་ཐུག་པ་ཤིང་རྟ་ཆེན་པོ་དག་གི་གཞུང་ལས་ཇི་ལྟར་འབྱུང་བ་ལྟར་སྟོན་རིགས་པ་ལ་ཅི་ཡང་མ་བསྟན་འདུག་པའི་ཕྱིར། གལ་སྲིད་གཞུང་དེ་དག་གིས་མཐར་ཐུག་ཐེག་པ་གཅིག་ཏུ་སྒྲུབ་འདོད་ནའང་གྲུབ་མཐའ་འོག་མའི་སྒྲུབ་ཚུལ་ཙམ་གྱིས་མི་ཆོག་པ། ཐལ་འགྱུར་བའི་ལུགས་འདི་ལ་མཐར་ཐུག་ཐེག་པ་གཅིག་ཏུ་སྒྲུབ་ཚུལ་ཐུན་མོང་མ་ཡིན་པ་ཞིག་དགོས་ཏེ། འཇུག་པ་ལས།

གང་ཕྱིར་འདི་ན་དེ་ཉིད་ཤེས་ལས་དྲི་མ་མཐའ་དག་སེལ་བ་ནི།།

ལྷུར་བྱེད་གཞན་མེད་ཆོས་རྣམས་རྣམ་འགྱུར་དབྱེ་ལའང་བསྟེན་མིན་ཞིང་།།
དེ་ཉིད་ཡུལ་ཅན་བློ་གྲོས་འདི་ཡང་ཐ་དད་འགྱུར་པ་མ་ཡིན་པ།།

དེ་ཡི་ཕྱིར་ན་ཁྱོད་ཀྱིས་འགྲོ་ལ་ཐེག་པ་མི་མཉམ་དབྱེར་མེད་བསྟན།།

ཞེས་གསུངས་པ་ལྟར། ཆོས་རྣམས་ཀྱི་དེ་ཁོ་ན་ཉིད་རྟོགས་པ་ལས་གཞན་པའི་ཉོན་མོངས་པ་དང་ཤེས་བྱའི་སྒྲིབ་པའི་གཉེན་པོ་མེད་ལ། ཆོས་རྣམས་ཀྱི་དེ་ཁོ་ན་ཉིད་ཀྱང་མི་འདྲ་བའི་དབྱེ་བ་མེད་ཅིང། དེ་ཉིད་རྟོགས་པའི་ཡུལ་ཅན་ཡེ་ཤེས་ལའང་མི་འདྲ་བ་མེད་པའི་ཕྱིར། ཐུབ་པ་སངས་རྒྱས་བཅོམ་ལྡན་འདས་ཀྱིས་གདུལ་བྱ་ལ་ཐེག་པ་གཞན་གང་དང་ཡང་མི་མཉམ་པར་དབྱེར་མེད་པའི་ཐེག་པ་གཅིག་བསྟན་པ་གསུངས་ཏེ། མདོ་ལས། ཆོས་ཐམས་ཅད་མཉམ་པར་ཉིད་དུ་རྟོགས་ན་མྱ་ངན་ལས་འདའ་བ་ཡིན་ལ། དེ་ཡང་གཅིག་ཡིན་གྱི་གཉིས་དང་གསུམ་ནི་མ་ཡིན་ནོ།། ཞེས་གསུངས་པའི་ཕྱིར། མཐར་ཐུག་ཐེག་པ་གཅིག་ཏུ་སྒྲུབ་པའི་སྒྲུབ་བྱེད་གཙོ་བོ་ནི། ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའི་ཐེག་པ་གསུམ་པོ་གང་གི་མྱང་ངན་ལས་འདས་པའི་གོ་འཕངས་འཐོབ་པའི་གེགས་བྱེད་ཀྱི་དྲི་མ་ཉོན་མོངས་པའི་སྒྲིབ་པ་དང་། དེའི་བག་ཆགས་ཤེས་བྱའི་སྒྲིབ་པ་གང་སྦྱངས་པ་ལའང་དེ་སྦྱོང་བྱེད་ཀྱི་གཉེན་པོ། ཡུལ་ཆོས་ཐམས་ཅད་བདེན་པའི་སྐྱེ་བ་མེད་པ་ལ་དམིགས་ནས། ཡུལ་ཅན་དེ་རྟོགས་པའི་ཡེ་ཤེས་འདི་མ་གཏོགས་པའི་ལམ་གཞན་མེད་པ་ཡིན་པའི་ཕྱིར། རྒྱུ་མཚན་དེ་ལ་བརྟེན་ནས་མཐར་ཐུག་ཐེག་པ་གཅིག་ཡིན་པ་སྒྲུབ་ནུས་ཏེ། འཕགས་པ་ཀླུས་ཀྱང་།

ཆོས་ཀྱི་དབྱིངས་ལ་དབྱེར་མེད་ཕྱིར།།

ཁྱོད་ལ་ཐེག་པའི་དབྱེ་བ་མེད།།
ཐེག་པ་གསུམ་དུ་བསྟན་པ་ནི།།

སེམས་ཅན་རྣམས་ནི་གཞུག་ཕྱིར་རོ།།

ཞེས་དང་མངོན་རྟོགས་རྒྱན་ལས་ཀྱང་།

ཆོས་ཀྱི་དབྱིངས་ལ་དབྱེར་མེད་ཕྱིར།།
རིགས་ནི་ཐ་དད་རུང་མ་ཡིན།།

ཞེས་གསུངས་པའི་ཕྱིར། རྒྱུ་མཚན་འདི་རྣམས་ཀྱིས་ན། ཉན་རང་རྣམས་ཀྱིས་ཀྱང་ཆོས་ཐམས་ཅད་བདེན་མེད་དུ་མ་རྟོགས་ན་རང་རང་གི་དགྲ་བཅོམ་པའི་གོ་འཕངས་མི་འཐོབ། དེས་ན་དགྲ་བཅོམ་པའི་གོ་འཕངས་འཐོབ་པ་ལ་བདེན་འཛིན་ངེས་པར་སྤངས་དགོས་པ་འགྲུབ། དེ་འགྲུབ་པས་བདེན་འཛིན་ཉོན་སྒྲིབ་ཡིན་པ་འགྲུབ། དེས་ན་ཐེག་དམན་གྱི་ཉོན་སྒྲིབ་སྤངས་པའི་གཉེན་པོའང་བདེན་མེད་རྟོགས་པའི་ཡེ་ཤེས་ལས་གཞན་མེད། ཐེག་ཆེན་གྱིས་བདེན་འཛིན་གྱི་བག་ཆགས་ཤེས་སྒྲིབ་སྤོང་བྱེད་ཀྱི་གཉེན་པོའང་བདེན་མེད་རྟོགས་པའི་ཡེ་ཤེས་ལས་གཞན་མེད་པ་ཤེས་ནུས། དེས་ན་བདེན་མེད་རྟོགས་པའི་ཡེ་ཤེས་ནི་ཐེག་པ་གསུམ་པོ་གང་གིའང་མྱ་ངན་ལས་འདས་པའི་སར་ཕྱིན་པར་བྱེད་པའི་ལམ་མེད་དུ་མི་རུང་བ་ཡིན་ཏེ། ཇི་སྐད་དུ།

སངས་རྣམས་དང་རང་སངས་རྒྱས།།

ཉན་ཐོས་རྣམས་ཀྱིས་ངེས་བསྟེན་པའི།།
ཐར་ལམ་གཅིག་ཁྱོད་ལགས་ཏེ།།

གཞན་དུ་ངེས་པ་མ་འཆིས་སོ།།

ཞེས་གསུངས་པ་ལྟར་ཤེས་ནས་མཐར་ཐུག་ཐེག་པ་གཅིག་ཏུ་གྲུབ་པ་ཡིན་པའི་ཕྱིར། དེས་ན་བདེན་འཛིན་ས་བོན་དང་བཅས་པ་སྤོང་བྱེད་དང་། དེའི་བག་ཆགས་ཤེས་སྒྲིབ་སྤོང་བྱེད་ཀྱི་ལམ་བདེན་མེད་རྟོགས་པའི་ཡེ་ཤེས་ཡིན་པ་ལ་མི་འདྲ་བའི་ཁྱད་པར་མེད་ཀྱང་། དེ་ལ་གོམས་པ་ཤས་ཆེ་ཆུང་དང་རིགས་པའི་རྣམ་གྲངས་མཐའ་ཡས་པའི་སྒོ་ནས་དཔྱད་པ་བྱས་མ་བྱས་དང་། བསོད་ནམས་ཀྱི་ཚོགས་ཆེན་པོའི་གྲོགས་བྱས་མ་བྱས་ཀྱི་ཁྱད་པར་ཡོད་དེ། བདེན་འཛིན་ས་བོན་དང་བཅས་པ་སྤངས་ཀྱང་དེ་ཙམ་གྱིས་སྟོང་ཉིད་ལ་རིགས་པའི་རྣམ་གྲངས་རྒྱས་མི་དགོས་པ་དང་། བསོད་ནམས་ཀྱི་ཚོགས་ཆུང་ངུ་ཙམ་གྱིས་གྲོགས་བྱས་པས་ཆོག་ལ། བདེན་འཛིན་གྱི་བག་ཆགས་ཤེས་སྒྲིབ་སྤངས་པ་ལ་དེ་བཞིན་ཉིད་རིགས་པའི་རྣམ་གྲངས་མཐའ་ཡས་པའི་སྒོ་ནས་རྟོགས་དགོས་པ་དང་། བསོད་ནམས་ཀྱི་ཚོགས་ཀྱང་རྒྱ་ཆེན་པོས་གྲོགས་བྱེད་དགོས་པ་ནི་ཐེག་པ་མཆོག་དམན་གྱི་ཁྱད་པར་མི་འདྲ་བའི་སྒོ་ནས་ཡིན་པའི་ཕྱིར་རྒྱུ་མཚན་དེ་དག་དང་མཐུན་པར་གཞུང་འདི་ལས།

ཉོན་མོངས་ཤེས་བྱའི་སྒྲིབ་པ་ཡི།།

མུན་པའི་གཉེན་པོ་སྟོང་པ་ཉིད།།
མྱུར་དུ་ཐམས་ཅད་མཁྱེན་འདོད་པས།།

དེ་ནི་ཇི་ལྟར་སྒོམ་མི་བྱེད།།

ཅེས་ཉོན་སྒྲིབ་སྤངས་ནས་དགྲ་བཅོམ་ཐོབ་པ་དང་། ཤེས་སྒྲིབ་སྤངས་ནས་སངས་རྒྱས་ཀྱི་གོ་འཕངས་འཐོབ་པ་གཉིས་ཀ་ལ་ཆོས་ཐམས་ཅད་བདེན་པའི་སྐྱེ་བ་མེད་པའི་སྟོང་པ་ཉིད་སྒོམ་དགོས་པར་གསུངས་ཀྱང་མཐར་ཐུག་ཐེག་པ་གཅིག་ཡིན་པ་ཆེད་དུ་སྒྲུབ་པ་མིན་ཀྱང་ཤུགས་ཀྱིས་འགྲུབ་པའི་ཕྱིར་རོ།། དེས་ན་གཞུང་འདི་དག་ཐམས་ཅད་ཀྱིས་དངོས་སུ་མཐར་ཐུག་ཐེག་པ་གཅིག་ཏུ་སྒྲུབ་པ་མ་ཡིན་ཏེ། ཉོན་མོངས་སྤངས་པས་ཞེས་སོགས་ཀྱི་གསུང་གིས། སྟོང་ཉིད་མ་རྟོགས་པའི་ལམ་གྱིས་ཡང་སྲིད་ཕྱི་མར་འཕེན་བྱེད་ཀྱི་ལས་ཀྱི་ནུས་པ་ཟད་མི་ནུས་པ་དང་། དེའི་སྒྲུབ་བྱེད་ཡང་སྲིད་འཕེན་བྱེད་ཀྱི་ལས་ཀྱི་ཉེར་ལེན་བདེན་འཛིན་གྱིས་དྲངས་པའི་སྲེད་པ་མ་སྤངས་པ་སོགས་བསྟན་པའི་ཕྱིར། དངོས་སུ་དེ་དག་བསྟན་ཀྱང་གོ་སྟོབས་ཅན་ཀྱི་བློ་ཡིས་དཔྱད་ན་གཞུང་དེ་དག་གིས་ཤུགས་བསྟན་ལ་བདེན་འཛིན་མ་སྤངས་པ་འཁོར་བ་ལས་མི་གྲོལ་བས་བདེན་འཛིན་ཉོན་སྒྲིབ་ཡིན་པར་འགྲུབ། བདེན་འཛིན་ཉོན་སྒྲིབ་ཡིན་པ་ལ་བརྟེན་ནས་དེའི་བག་ཆགས་ཤེས་སྒྲིབ་ཡིན་པའང་དོན་གྱིས་འགྲུབ། དེ་འགྲུབ་ན་སྒྲིབ་གཉིས་གང་གིའང་དངོས་ཀྱི་གཉེན་པོ་བདེན་མེད་རྟོགས་པའི་ཡེ་ཤེས་ལས་གཞན་མེད་པ་འགྲུབ་པའི་ཕྱིར། འོན་ཀྱང་གཞུང་དེ་དག་མཐར་ཐུག་ཐེག་པ་གཅིག་ཏུ་སྒྲུབ་བྱེད་ཀྱི་གཞུང་མ་ཡིན་ཏེ། དེས་དེ་ལྟར་ཆེད་དུ་གཉེར་ནས་མི་སྒྲུབ་པའི་ཕྱིར་རོ། །གལ་ཏེ་ཆེད་དུ་གཉེར་ནས་མ་སྒྲུབ་ཀྱང་ཤུགས་ཀྱིས་གྲུབ་པའི་ཕྱིར་ཟེར་ན་ཁྱབ་པ་མེད་དོ།། དེ་ལྟར་མཐར་ཐུག་ཐེག་པ་གཅིག་པའི་དོན། ཉན་རང་དགྲ་བཅོམ་རྣམས་མཐར་ཐེག་ཆེན་དུ་ཞུགས་ནས་མི་གནས་པའི་མྱང་འདས་འཐོབ་དགོས་པ་ཙམ་གྱིས་མི་ཆོག་གི། ཉན་རང་བྱང་སེམས་ཀུན་གྱིས་ཆོས་ཐམས་ཅད་བདེན་པར་མེད་པ་རྟོགས་པའི་ཡེ་ཤེས་ལ་བརྟེན་ནས་ཐེག་པ་གསུམ་གྱི་མྱང་འདས་མངོན་དུ་བྱེད་དགོས་པ་དང་། མཐར་ཐུག་མི་གནས་པའི་མྱ་ངན་ལས་འདས་པའི་གྲོང་ཁྱེར་དུ་བགྲོད་དགོས་པ་གཉིས་ཀྱི་སྒོ་ནས་མཐར་ཐུག་ཐེག་པ་གཅིག་ཏུ་གྲུབ་དགོས་ཤིང་། དེའི་སྒྲུབ་བྱེད་དང་སྒྲུབ་ཚུལ་རྣམས་ལྔར་ཇི་སྐད་བསྟན་པ་ལྟར་ཤེས་དགོས་སོ།། ཁྱོད་ཀྱིས་༼མི་ཕམ་གྱིས་༽ཉོན་མོངས་སྤངས་པས་གྲོལ་ན་ཞེས་པ་ནས། ཚོར་བ་དེ་དག་ལ་ཡང་ཡོད་ཅེས་པའི་བར་གྱིས་མདོ་སྡེ་པད་དཀར་སོགས་ལས་གསུངས་པ་བཞིན་ཀླུ་སྒྲུབ་ཡབ་སྲས་ཀྱིས་མཐར་ཐུག་ཐེག་པ་གཅིག་ཏུ་སྒྲུབ་ཅིང་། ཇི་ལྟར་ན་དེ་ཁོ་ན་ཉིད་རྟོགས་པའི་ཤེས་རབ་ཁོ་ནའི་སྒོ་ནས་སྒྲུབ་དགོས་ཟེར་འདུག་མོད་ཀྱང་། དེ་ཁོ་ན་ཟེར་ཤེས་པ་ཙམ་ལས་དོན་དུ་དེ་ཉིད་རྟོགས་པའི་ཤེས་རབ་མེད་དུ་མི་རུང་བའི་སྒོ་ནས་སྒྲུབ་ཚུལ་ཇི་བཞིན་མ་ཤེས་འདུག་པ་ལ་ཁོ་བོས་གསལ་སྒྲོན་བྱས་པ་སྟེ། ཁྱོད་ཀྱིས་མདོ་དང་བསྟན་བཅོས་ཆེན་པོ་རྣམས་ཀྱི་དགོངས་པ་དྲི་མ་མེད་པ་ལྟར་མཐའ་ཀུན་གྱིས་སྟོང་པའི་རྣམ་གྲངས་མིན་པའི་དོན་དམ་མཉམ་པ་ཉིད་རྟོགས་པས་སངས་རྒྱ་ཞིང་། དེ་མ་རྟོགས་ན་མཐར་ཐུག་གི་མྱང་འདས་མི་འཐོབ་པའི་ཚུལ་རྒྱ་ཆེར་གསུངས་པ་བཞིན་དུ་གཞུང་འདིར་ཡང་དེ་ལྟར་གསུངས་པ་ཁྱེད་རང་ཁོ་ནས་བསྟན་པ་ལ་ཕན་སེམས་ཀྱིས་བཤད་པ་ལས་གཞན་གྱིས་མ་ཐོན་པ་འདྲ་བ་བཤད་འདུག་ཀྱང་། སྟོང་ཉིད་རྟོགས་པའི་སེམས་མཐར་ཐུག་གི་ཐེག་པ་མི་གནས་པའི་མྱང་འདས་འཐོབ་བྱེད་ཙམ་མ་ཟད། ཉན་རང་གི་དགྲ་བཅོམ་པའི་གོ་འཕངས་འཐོབ་པ་ལའང་མེད་དུ་མི་རུང་བ་ཡིན་ཚུལ་དང་། ཉན་ཐོས་དང་། རང་རྒྱལ་དང་། བྱང་སེམས་ཏེ་ཐེག་པ་གསུམ་པོ་གང་གིའང་། གང་ཟག་བདེན་པའི་སྐྱེ་བ་མེད་པ་དང་། ཆོས་ཐམས་ཅད་བདེན་པའི་སྐྱེ་བ་མེད་པ་རྟོགས་པ་ཙམ་ལས་མི་འདྲ་བའི་ཁྱད་པར་མེད་པའི་གནད་འདིའི་སྒོ་ནས་སྒྲུབ་ཚུལ་མི་ཤེས་པ། ད་རུང་ཁྱོད་ཁོ་ནས་བཤད་པའི་ཁྱད་ཆོས་ཡིན་བསམ་པའི་མངོན་པའི་ང་རྒྱལ་གྱི་ཤུགས་དེ་ཙམ་མ་བསྐྱེད་ཅིག།

ཕྲ་ཞིབ་རིག་པའི་རལ་གྲི་རྣོན་པོ་ཡིས།།

ལོག་རྟོག་ལྗོན་པ་དྲུང་ནས་ཕྱུང་གྱུར་ཀྱང་།།
གཞུང་དོན་ཡིན་ལུགས་ཀུ་ཤའི་རྩེ་མོ་ལྟར།།
མ་འདྲེས་གསལ་བར་འབྱེད་འདི་རྒྱལ་བའི་མཐུ།།
བདག་ཉིད་གཞུང་དོན་བལྟ་བའི་མིག་ལོང་ཞིང་།།
ཧམ་ཚོད་ལག་པས་ནོམ་ཉུག་བྱས་བྱས་པས།།
དཀའ་གནས་ནོར་བུ་ལག་ཏུ་ཐོབ་འདོད་པ།།
དམུས་ལོང་རང་གི་བཤིས་འདི་སུ་ཡི་འཆོས།།

ཞེས་པའང་བར་སྐབས་ཀྱི་གཏམ་དུ་བྱས་སོ།།

༼༤ སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པ།༽

གཉིས་པ་སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པ་ལ་གཉིས། འདོད་པ་བརྗོད་པ་དང་། དེ་དགག་པའོ།། དང་པོ་ནི།

      

༼མི་ཕམ་གྱིས་༽ ཡང་སྤྲུལ་པའི་སྐུ་ལགས་ཀྱི་ཞལ་ནས་ཞེས་པ་ནས་ཆོས་ཀྱི་བདག་འཛིན་བདེན་འཛིན་གང་ཞིག་ཉོན་སྒྲིབ་ཏུ་བཞེད་པའི་ཕྱིར་རོ།། ཞེས་པའི་བར་གྱིས་ཁོ་བོས་བརྒལ་ལན་སྔ་མའི་འདོད་ཚུལ་སྐྱོར་ནས། འདི་ལ་ལན་བརྗོད་པར་བྱ་སྟེ་གོང་གི་ཐལ་བ་དེ་ལ་བོད་སྔ་རབས་པའི་ལུགས་འཛིན་པ་དག་གིས་འདོད་ལན་དོན་མཐུན་ཐེབས་པའི་ཕྱིར་ཏེ། དེ་དག་གི་ལུགས་ལ་ཉན་རང་དགྲ་བཅོམ་ཆོས་ཀྱི་བདག་འཛིན་མཐའ་དག་སྤངས་པའི་གང་ཟག་མ་ཡིན་པའི་ཕྱིར་རོ།། དེས་ན་༼མི་ཕམ་གྱིས་༽ཉན་རང་དགྲ་བཅོམ་པ་རྣམས་སངས་རྒྱས་ཉིད་དུ་ཐལ། དེ་དག་གིས་ཉོན་མོངས་པ་ཆོས་ཀྱི་བདག་འཛིན་སྤངས་པའི་ཕྱིར། སོགས་ནས་ལུགས་འདིར་ཆོས་ཀྱི་བདག་འཛིན་ཉོན་སྒྲིབ་ཏུ་བཞེད་པའི་ཕྱིར་རོ་ཞེས་འཕེན་པ་ནི་འབེན་རྩད་མ་ཆོད་པའི་མདའ་འཕེན་པ་དང་དངོས་དུ་འདྲ་བར་ཟད་དེ། བོད་སྔ་རབས་པའི་ལུགས་ཀྱི་དབུ་མ་ཐལ་འགྱུར་སྨྲ་བ་རྣམས་ཀྱིས་ཐལ་འགྱུར་བའི་ལུགས་ལ་ཆོས་ཀྱི་བདེན་འཛིན་ཉོན་སྒྲིབ་ཡིན་ནོ་ཞེས་ཞལ་བཞེས་ཡོད་ན་དེ་འདྲའི་ཐལ་བ་འཕེན་རིགས་ཀྱི། འོན་ཀྱང་ཐལ་འགྱུར་སྨྲ་བ་སྔ་རབས་པའི་ལུགས་ལ་བདག་འཛིན་ལ་གཉིས་སུ་ཕྱེ་བའི་ཆོས་ཀྱི་བདག་འཛིན་ནམ་བདེན་འཛིན་ཡིན་ཚད་སྒྲིབ་གཉིས་ཀྱི་ཟླས་ཕྱེ་བའི་ཉོན་སྒྲིབ་འབའ་ཞིག་ཏུ་གཏན་ནས་མི་འདོད་པའི་ཕྱིར་རོ་ཞེས་འདི་ཙམ་རེ་ཞིག་ཕྱོགས་སྔར་བཀོད་ནས།

གཉིས་པ།

དེ་ལ་འདི་སྐད་ཅེས་བྱ་སྟེ། ཁོ་བོས་ཐལ་བ་དེ་བཞིན་འཕངས་པ་ལ་འབེན་རྩད་མ་ཆོད་པར་མདའ་བརྡེག་པ་དང་དངོས་སུ་འདྲ་བར་ཟད་དེ་ཅེས་པ་འདི་རིགས་སམ་སྨྲ་བ་ཆེན་པོ་ཞིག་ལྟ་ཞོག་གསར་བུ་བ་ཞིག་གིས་ཀྱང་མཐོང་ན་བཞད་གད་ཀྱི་གནས་ཡིན་ཏེ། རིགས་ལམ་སྨྲ་བའི་རྟགས་དང་ཐལ་འགྱུར་གང་བཀོད་མཐའ་དག་ཕ་རོལ་པོས་ཁས་ལེན་པ་གཞིར་བཞག་རེ་ངེས་པར་འཕེན་དགོས་བསམ་པའི་གུ་དོགས་ཤིང་ཧུ་ཐུག་པ་འདི་འདྲ་བདག་ཉིད་རིགས་ལམ་ལ་གཏན་ནས་ཞུགས་མ་མྱོང་བའི་ནང་མཚངས་ཡང་དག་པ་སྟོན་པའི་ཕྱིར་རོ།།

      

དེའི་ཚུལ་སྤྱིར་ངེད་ཅག་རིགས་ལམ་ལ་བྱང་བའི་ལུགས་ཀྱི་ཐལ་འགྱུར་དྲང་རྟགས་ཀྱི་འཕེན་ཚུལ་བརྗོད་ན་ཁྱོད་ཅག་རིགས་ལམ་ལ་མ་ཞུགས་པ་རྣམས་མགོ་འཁོར་བ་ད་ལྟ་འདི་བཞིན་ཡིན་པས་བརྗོད་པའང་མི་གོ་མོད། ད་རེས་ཀྱི་ཐལ་ངག་འདི་འབེན་རྩད་མ་ཆོད་པ་དང་འདྲ་བའི་ལོག་རྟོག་ཤར་འདུག་པ་འདི་ཙམ་ལ་འཁྲིས་ནས་ཅུང་ཟད་བརྗོད་ན། ཁོ་བོས་འཕེན་པའི་ཐལ་ངག་གི་འགྲོ་ལུགས་འདི་ཡིན་ཏེ། ཆོས་ཀྱི་བདག་འཛིན་སྤོང་བའི་གང་ཟག་ཡིན་ན་ཤེས་སྒྲིབ་སྤོང་བའི་གང་ཟག་ཡིན་པས་ཁྱབ་པར་ཐལ་ཞེས་འཕེན་ཚེ་ཐལ་བ་དེ་ལ་ཁྱོད་ཅག་རྣམས་ཀྱིས་འདོད་ལན་བཏབ་པ་ཤེས་ནས་འདོད་པའི་ཕྱིར་ཞེས་རྟགས་བཀོད། དེ་ཁྱོད་ཅག་རྣམས་ཀྱིས་ཁས་ལེན་གྱི་འབེན་གང་ཡིན་པ་རྩད་ཆོད་ནས་ངོས་བཟུང་གསལ་བར་བཀོད་པ་ཡིན་ལ། འབེན་དེ་ལ་འཕེན་རྒྱུའི་ཐལ་འགྱུར་གྱི་མདའ་དེ་གང་ཡིན་ན། ཉན་རང་དགྲ་བཅོམ་སངས་རྒྱས་ཉིད་དུ་ཐལ་བའི་ཐལ་བ་འདི་འབྱུང་སྟེ། ཅིའི་ཕྱིར་ན། དེ་དག་ཆོས་ཀྱི་བདག་འཛིན་སྤངས་པའི་ཕྱིར་ཏེ། དེ་དག་གིས་ཉོན་མོངས་མཐའ་དག་སྤངས་པའི་ཕྱིར་ཏེ། ལུགས་འདིར་ཆོས་ཀྱི་བདག་འཛིན་ཉོན་སྒྲིབ་ཏུ་བཞེད་པའི་ཕྱིར་ཞེས་རྟགས་རྒོལ་བའི་ངོར་བཀོད་ནས། དེའི་ཚུལ་ཐལ་འགྱུར་བའི་ལུགས་འདིར་ཆོས་ཀྱི་བདག་འཛིན་ཉོན་སྒྲིབ་ཏུ་བཞེད་པ་ལུང་རིགས་ཀྱིས་རིམ་པ་བཞིན་དུ་སྒྲུབ་པར་འདོད་པའི་དབང་དུ་བྱས་པ་ཡིན་པའི་ཕྱིར་ཏེ། རྟགས་འགོད་པ་དང་། ཚུལ་སྒྲུབ་པ་གཉིས་ཀྱི་སྒོ་ནས་རྩོད་པའི་སྒོ་བརྩམས་པ་མཁས་པ་ཆེན་པོ་རྣམས་ཀྱི་གསུང་སྒྲོས་ལ་བལྟས་པས་ཀྱང་གསལ་ལོ།། རིགས་པ་ཡང་དག་གིས་མདའ་འཕེན་ལོང་མེད་པར་རིགས་ལམ་མི་ཤེས་པའི་ཧུ་ཐུག་པའི་ཚིག་གིས་མགོ་སྐྱོར་སྔ་བ་མ་མཛོད་ཅིག གོང་གི་ཐལ་འགྱུར་གྱི་རྟགས་དེ་ལྟར་འགོད་ནས། དེའི་ཚུལ་ཉན་རང་དགྲ་བཅོམ་གྱིས་ཆོས་ཀྱི་བདག་འཛིན་སྤངས་པ་དང་། ཆོས་ཀྱི་བདག་འཛིན་བདེན་འཛིན་གང་ཞིག། ཉོན་སྒྲིབ་ཡིན་ཚུལ་རྣམས་ཚད་ལྡན་གྱི་ལུང་དང་བསྟུན་ནས་རིགས་པ་ཡང་དག་གིས་སྒྲུབ་པ་ལ་ཁྱོད་ཅག་བོད་སྔ་རབས་པ་རྗེས་འབྲངས་དང་བཅས་པ་དག་གིས་འདོད་པ་དེ་ལྟར་ན། འཇུག་པ་ལས། དེ་ནས་རིང་དུ་སོང་བར་བློ་ཡང་ལྷག་པར་འགྱུར་ཞེས་པའི་ཐད་ཀྱི་རང་འགྲེལ་ལས་མདོ་སྡེ་ས་བཅུ་པའི་ལུང་དང་འགལ་བ་སོགས་ཀྱི་གནོད་བྱེད་ཀྱི་རིགས་པ་གསུམ་བསྟན་པ་རྣམས་མི་འཐད་པར་ཐལ། འདོད་པའི་ཕྱིར། དེ་ལ་རིགས་པ་གསུམ་ཇི་ལྟར་བསྟན་ཞེ་ན། རང་འགྲེལ་ལས། ལུང་འདི་ལས་ནི་ཉན་ཐོང་རང་སངས་རྒྱས་རྣམས་ལ་ཡང་ཆོས་ཐམས་ཅད་རང་བཞིན་མེད་པར་ཤེས་པ་ཡང་ཡོད་དོ་ཞེས་བྱ་བ་གསལ་བར་ངེས་ཏེ། དེ་ལྟར་མ་ཡིན་ན་དངོས་པོ་རང་བཞིན་མེད་པ་ཡོངས་སུ་ཤེས་པ་དང་བྲལ་ཕྱིར། འཇིག་རྟེན་པའི་འདོད་ཆགས་དང་བྲལ་བ་ལྟར་དེ་དག་ཀྱང་སེམས་དང་པོ་བསྐྱེད་པའི་བྱང་ཆུབ་སེམས་དཔས་ཀྱང་རང་གི་བློས་རྣམ་པར་དཔྱད་པས་ཀྱང་ཟིལ་གྱིས་གནོན་པར་འགྱུར་ལ། ཕྱི་རོལ་པ་བཞིན་དུ་འདི་དག་གིས་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤང་བར་ཡང་མི་འགྱུར་རོ།། གཟུགས་ལ་སོགས་པའི་རང་གི་ངོ་བོ་ལ་དམིགས་པས་ཕྱིན་ཅི་ལོག་ཏུ་འགྱུར་བའི་ཕྱིར། གང་ཟག་གི་བདག་མེད་པ་རྟོགས་པ་ཡང་མི་འགྱུར་ཏེ། བདག་ཏུ་བཏགས་པའི་རྒྱུ་ཕུང་པོ་ལ་དམིགས་པའི་ཕྱིར། ཞེས་གསུངས་པ་དེའི་ཤེས་བྱེད་དུ་རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ།། ཞེས་སོགས་ཀྱི་ཁུངས་དང་བཅས་ཏེ་གསལ་བར་གསུངས་པའི་ཕྱིར།

འོ་ན་རིགས་པ་གསུམ་པོ་དེ་འགོད་ཚུལ་ཇི་ལྟར་ཡིན་ཞེ་ན། རིགས་པ་དང་པོ་ཡོད་དེ། ས་དང་པོ་ལ་གནས་པའི་བྱང་སེམས་ཆོས་ཅན། ཁྱོད་ཀྱིས་འཇིག་རྟེན་པའི་ཆགས་བྲལ་རྣམས་བློས་ཟིལ་གྱིས་གནོན་མི་ནུས་པའི་ཁྱད་པར་མི་འཐད་པར་ཐལ། ཁྱོད་ཀྱིས་ཆོས་ཐམས་ཅད་ཀྱི་གནས་ལུགས་མངོན་སུམ་དུ་རྟོགས་པ་གང་ཞིག། དེ་གཉིས་ཀའང་དངོས་པོའི་གནས་ལུགས་གཏན་ནས་མ་རྟོགས་པར་མཚུངས་པའི་ཕྱིར་ཞེས་པ་སྟེ་ཟིལ་གྱིས་གནོན་པར་འགྱུར་ལ་ཞེས་པ་ཡན་ཆད་ཀྱི་དོན་ནོ།།

རིགས་པ་གཉིས་པ་ནི། ཉན་རང་དགྲ་བཅོམ་འདི་དག་ཆོས་ཅན། ཁྱོད་ཀྱིས་ཁམས་གསུམ་གྱི་ཉོན་མོངས་མ་ལུས་པ་སྤངས་པ་མི་འཐད་པར་ཐལ། ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་དང་འཛིན་སྟངས་དངོས་སུ་འགལ་བའི་གཉེན་པོ་རྒྱུད་ལ་མ་སྐྱེས་པའི་ཕྱིར། དཔེར་ན་ཕྱི་རོལ་པའི་དྲང་སྲོང་བཞིན་ཞེས་པ་སྟེ་ཕྱི་རོལ་པ་བཞིན་དུ་ཞེས་སོགས་ཀྱི་དོན་ནོ།།

རིགས་པ་གསུམ་པ་ནི། ཉན་ཐོས་དགྲ་བཅོམ་ཆོས་ཅན། ཁྱོད་ཀྱིས་གང་ཟག་གི་བདག་མེད་མཚན་ཉིད་རྫོགས་པར་མ་རྟོགས་པར་ཐལ། གང་ཟག་དང་གང་ཟག་ཏུ་གདགས་པའི་གཞི་ཕུང་པོའི་ངོ་བོ་ལ་ལོག་པར་ཞུགས་པའི་བློ་དང་འཛིན་སྟངས་དངོས་སུ་འགལ་བའི་གཉེན་པོ་རྒྱུད་ལ་མ་སྐྱེས་པའི་ཕྱིར། ཞེས་པ་གཞུང་ལྷག་མ་རྣམས་ཀྱིས་བསྟན་པའི་ཕྱིར། ཞེས་གསུངས་པ་ཡིན་ལ། དཔལ་ལྡན་ཟླ་བས་ཇི་སྐད་གསུངས་པའི་རིགས་པ་འདི་རྣམས་ཁྱོད་བོད་སྔ་རབས་པ་རྗེས་འབྲངས་དང་བཅས་པ་རྣམས་ཀྱིས་སློབ་དཔོན་ཟླ་བ་རང་ཉིད་ཕྱིན་ཅི་ལོག་གི་གཏམ་འབའ་ཞིག་སྨྲ་བ་ལ་ཞུགས་པ་ཡིན་ཟེར་དགོས་པ་ལ་ཐུག་སྟེ། ཟླ་བས་ཇི་སྐད་གསུངས་པ་རྣམས་ཁྱེད་ཅག་རྣམས་ཀྱིས་སྨྲ་བ་དང་དངོས་འགལ་འབའ་ཞིག་ཏུ་གྱུར་འདུག་པའི་ཕྱིར། དེ་ཡང་ཅུང་ཟད་སྤྲོས་ཏེ་མ་བཤད་ན་མི་གོ་བས། འདི་ལྟར་ཡིན་ཏེ། ཁྱོད་ཅག་གིས་ཉན་རང་དགྲ་བཅོམ་གྱིས་ཆོས་ཐམས་ཅད་རང་བཞིན་མེད་པ་མ་རྟོགས་ཅེས་འདོད་པ་དང་། དཔལ་ལྡན་ཟླ་བས་ཉན་རང་ལ་ཆོས་ཐམས་ཅད་བདེན་མེད་དམ་བདེན་པར་མ་གྲུབ་པ་ངེས་པར་རྟོགས་དགོས་ལ། གལ་ཏེ་དེ་མ་རྟོགས་ན། ས་དང་པོའི་བྱང་སེམས་ཀྱིས་འཇིག་རྟེན་པའི་ཆགས་བྲལ་རྣམས་ཟིལ་གྱིས་གནོན་པ་བཞིན་ཉན་རང་དགྲ་བཅོམ་བློས་སྟོབས་ཀྱིས་ཟིལ་གྱིས་གནོན་ནུས་པར་ཐལ་བའི་སྐྱོན་ཡོད་གསུངས་པ་འདི་དག་ཕན་ཚུན་དངོས་སུ་འགལ་འདུག་པའི་ཕྱིར་ཏེ། ཁྱོད་ཅག་ལྟར་ན་ཉན་རང་དགྲ་བཅོམ་རྣམས་ཀྱིས་གང་ཟག་གི་བདག་མེད་ཙམ་མ་གཏོགས་ཆོས་ཐམས་ཅད་བདེན་མེད་མ་རྟོགས། བྱང་སེམས་ས་དང་པོ་བས་ཆོས་དང་གང་ཟག་ཐམས་ཅད་བདེན་མེད་དུ་རྟོགས་པའི་སྒོ་ནས་ཉན་རང་རྣམས་བློ་ཡིས་སྟོབས་ཀྱིས་ཀྱང་ཟིལ་གྱིས་གནོན་ནུས་འདུག་པའི་ཕྱིར། ཟླ་བའི་ཞབས་དང་ཚ་གྲང་ལྟར་འགལ་བའི་ལམ་དུ་ཅི་བདེར་བཞུད་ཅིག།

ཡང་དེ་ལ་མི་སྐྱོན་ཏེ། ཁོ་བོས་ཆོས་བདག་རྨོངས་པ་སྤྱི་དང་གང་ཟག་གི་བདག་དེའི་བྱེ་བྲག་ཤིང་དང་པ་ལ་ཤ་བཞིན་ཞེས་སྨྲོས་ཡོད་པ་ལྟར། འཇུག་པ་རང་འགྲེལ་གྱི་ལུང་རིགས་འདི་དག་གི་དགོངས་དོན་ཡང་ཉན་རང་དགྲ་བཅོམ་གྱིས་ཆོས་ཀྱི་བདག་འཛིན་གྱི་བྱེ་བྲག་ཏུ་གྱུར་པའི་གང་ཟག་གི་བདག་འཛིན་དེ་སྤོང་བྱེད་ཀྱི་བདག་མེད་ཀྱང་ཆོས་ཀྱི་བདག་མེད་པའི་བྱེ་བྲག་ཏུ་གྱུར་པའི་གང་ཟག་གི་བདག་མེད་པ་ཙམ་རྟོགས་པར་ཡོད་པ་ལ་དགོངས་པ་ཡིན་གྱི། ཁྱོད་ཅག་འདོད་པ་ལྟར་ཉན་རང་དགྲ་བཅོམ་གྱིས་ཆོས་ཐམས་ཅད་བདེན་མེད་དུ་རྟོགས་པ་ཡོད་ཅེས་ཁས་ལེན་མི་རིགས་སོ་ཞེས་པ་འདི་སྨྲ་བའི་ཚད་དུ་འདུག་པས། དེ་ལ་འདི་སྐད་ཅེས་བྱ་སྟེ། ཁྱོད་ཅག་འདོད་པ་ལྟར་ཉན་རང་དགྲ་བཅོམ་གྱིས་ཆོས་ཐམས་ཅད་བདེན་མེད་དུ་མ་རྟོགས་པ་འདི་མི་འཐད་པ་དཔལ་ལྡན་ཟླ་བས་ལུང་འདི་ལས་དངོས་སུ་གསུངས་སྟེ། བྱང་སེམས་ས་དང་པོ་བས་ཉན་རང་དགྲ་བཅོམ་བློའི་སྟོབས་ཀྱིས་ཟིལ་གྱིས་གནོན་མི་ནུས་པའི་ལུང་ས་བཅུ་པའི་མདོ་དྲངས་ནས། ལུང་འདི་ལས་ནི་ཉན་ཐོས་དང་རང་སངས་རྒྱས་རྣམས་ལ་ཡང་ཆོས་ཐམས་ཅད་རང་བཞིན་མེད་པ་ཤེས་པ་ཡང་ཡོད་དོ་ཞེས་བྱ་བ་གསལ་བར་ངེས་ཏེ་ཞེས་ཆོས་ཐམས་ཅད་རང་བཞིན་མེད་པ་ཤེས་པར་ཡོད་དོ།། ཞེས་ཐམས་ཅད་ཀྱིས་ཚིག་གི་གསལ་ཁ་འདི་མཐོང་བཞིན་དུ་ཆོས་བྱེ་བྲག་པ་གང་ཟག་གི་བདག་ཙམ་མེད་པར་མཐོང་བ་ལས་ཆོས་ཐམས་ཅད་བདག་མེད་མ་མཐོང་ཞེས་མངོན་སུམ་དུ་བསྙོན་འདིང་བས་ཅི་ཞིག་བྱ།

གཞན་ཡང་བྱང་སེམས་ས་དང་པོ་པས་ཉན་རང་དགྲ་བཅོམ་བློ་སྟོབས་ཀྱིས་ཟིལ་གྱིས་གནོན་ནུས་མི་ནུས་ཞེས་བཤད་པའི་བློ་དེ་བདེན་མེད་རྟོགས་པའི་ཤེས་རབ་ལ་བྱེད་དམ་མི་བྱེད། མི་བྱེད་ཟེར་ན་ཟླ་བའི་འཇུག་པ་ལས།

བསོད་ནམས་དག་གི་དབང་གིས་ཕམ་བྱས་རྣམ་པར་འཕེལ།།
དེ་ནས་རིང་དུ་སོང་བར་བློ་ཡང་ལྷག་པར་འགྱུར།།

ཞེས་བྱང་སེམས་ས་དང་པོ་བས་ཉན་རང་དགྲ་བཅོམ་བསོད་ནམས་སམ་རིགས་ཀྱི་སྒོ་ནས་ཟིལ་གྱིས་གནོན་ནུས་ལ། བློའི་སྒོ་ནས་ཟིལ་གྱིས་གནོན་མི་ནུས་པའི་ཁྱད་པར་ཕྱེད་དོན་མེད་ཅིང་དེའི་ཐད་ཀྱི་རང་འགྲེལ་ལས་ཀྱང་ཉན་རང་དགྲ་བཅོམ་ལ་ཆོས་ཐམས་ཅད་བདེན་མེད་དུ་རྟོགས་པ་ཡོད་དགོས། དེ་མེད་ན་ས་དང་པོ་བས་ཉན་རང་དགྲ་བཅོམ་བློས་སྟོབས་ཀྱིས་ཟིལ་གྱིས་གནོན་ནུས་པར་ཐལ་བའི་ཐལ་བ་འདི་འཕེན་དོན་མི་འདུག་པའི་ཕྱིར།

བདེན་མེད་རྟོགས་པའི་ཤེས་རབ་ལ་བྱེད་ན། བྱང་སེམས་ས་དང་པོ་བ་ལ་ཉན་རང་དགྲ་བཅོམ་ཟིལ་གྱིས་གནོན་ནུས་པའི་བདེན་མེད་རྟོགས་པའི་བློ་མེད་པ་དེ། བྱང་སེམས་ས་དང་པོ་བ་དང་ཉན་རང་དགྲ་བཅོམ་གཉིས་ཆོས་ཐམས་ཅད་བདེན་མེད་དུ་མངོན་སུམ་རྟོགས་པའི་ཡེ་ཤེས་ཡོད་པ་འདྲ་བའི་དབང་གིས་ཡིན་དགོས་ཏེ། དེ་མ་འདྲ་ན་བྱང་སེམས་ས་དང་པོ་བས་ཉན་རང་དགྲ་བཅོམ་རྣམས་ཟིལ་གྱིས་གནོན་མི་ཐུབ་པའི་དོན་མི་འདུག་པའི་ཕྱིར། དེ་འདྲ་ན་ཉན་རང་དགྲ་བཅོམ་ལ་ཆོས་ཐམས་ཅད་བདེན་མེད་དུ་རྟོགས་པ་ཡོད་ཅེས་མི་འདོད་བཞིན་དུ་ཁས་ལེན་པར་དགོས་པ་འདུག་གོ།

འོ་ན་དེ་མ་ཡིན་ཏེ་ཉན་རང་དགྲ་བཅོམ་ལ་ཆོས་ཀྱི་བདག་མེད་རྟོགས་པ་ཡོད་ཅེས་གསུངས་པ་ལས་མིན་ཞེས་གསུང་མི་འདུག་པའི་ཕྱིར། ཉན་རང་འཕགས་པ་ལ་གཉིས་ལས། ཐེག་ཆེན་ལམ་དུ་ཞུགས་ཏེ་སླར་དེ་ལས་ཉམས་ནས་ཉན་རང་གི་ལམ་དུ་ཞུགས་ནས་ཉན་རང་གི་འཕགས་པའི་ལམ་ཐོབ་མཁན་ཅིག་དང་། དེ་མ་ཡིན་པ་གཉིས་ལས། འདི་སྔ་མའི་དབང་དུ་བྱས་ནས་ཉན་རང་དགྲ་བཅོམ་ལ་ཆོས་ཐམས་ཅད་བདག་མེད་དུ་རྟོགས་པ་ཡོད་ཅེས་གསུང་པ་ཡིན་གྱི། ཉན་རང་དགྲ་བཅོམ་ཡིན་ན་ཆོས་ཐམས་ཅད་བདེན་མེད་དུ་རྟོགས་པའི་ཁྱབ་པ་བཞེད་པ་མ་ཡིན་པས་མི་སྐྱོན་སྙམ་ན། དེ་ཡང་མི་འཐད་པར་ཐལ། རང་འགྲེལ་ལས། ལུང་འདི་ལས་ནི་ཉན་ཐོས་དང་རང་སངས་རྒྱས་རྣམས་ལ་ཡང་ཆོས་ཐམས་ཅད་རང་བཞིན་མེད་པར་ཤེས་པ་ཡང་ཡོད་དོ་གསུངས་པ་འདི་ཉན་རང་ལ་ཆོས་བདག་མེད་རྟོགས་པ་ཡོད་པ་ཙམ་ལ་མི་ཟེར་གྱི། ཐེག་ཆེན་གྱི་ལམ་གྱི་རྟོགས་པ་སྔོན་དུ་སོང་མ་སོང་གང་ཡིན་ཀྱང་ཆོས་ཐམས་ཅད་བདེན་མེད་དུ་རྟོགས་པ་ངེས་པར་དགོས་པའི་ཕྱིར་ཏེ། དེ་ལྟར་མ་ཡིན་ན། འཇུག་འགྲེལ་གྱི་རིགས་པ་གཉིས་པ། ཕྱི་རོལ་པ་བཞིན་དུ་འདི་དག་གིས་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤངས་པར་ཡང་མི་འགྱུར་རོ།། ཞེས་ཉན་རང་དགྲ་བཅོམ་གྱིས་ཁམས་གསུམ་ན་སྤྱོད་པའི་ཕྲ་རྒྱས་མཐའ་དག་སྤངས་མི་ནུས་པའི་སྒྲུབ་བྱེད་ཀྱང་གོང་གི་དངོས་པོ་རང་བཞིན་མེད་པ་ཡོངས་སུ་ཤེས་པ་དང་བྲལ་བའི་ཕྱིར། ཞེས་པ་འདི་ཡིན་པའི་ཕྱིར་ཏེ། དེ་ལྟར་ཡིན་པ་གོང་གི་ལུང་དྲངས་ཟིན་པ་དེ་དག་ལས་གྲུབ་པའི་ཕྱིར། དེས་ན་དངོས་པོ་རང་བཞིན་མེད་པ་ཡོངས་སུ་ཤེས་པ་དང་བྲལ་ན་ཁམས་གསུམ་ན་སྤྱོད་པའི་ཕྲ་རྒྱས་ཐམས་ཅད་སྤང་མི་ནུས་པར་ཐལ་བའི་ཐལ་ངག་འདི་ཡང་ཁྱོད་ལྟར་ན་མི་འཐད་པར་ཐལ། དངོས་པོ་རང་བཞིན་མེད་པ་ཡོངས་སུ་ཤེས་པ་མེད་ཀྱང་ཁམས་གསུམ་ན་སྦྱོད་པའི་ཕྲ་རྒྱས་སྤངས་པ་སྲིད་པའི་ཕྱིར་ཏེ། ཐེག་ཆེན་ལམ་གྱི་རྟོགས་པ་སྔོན་དུ་མ་སོང་བའི་ཉན་རང་དགྲ་བཅོམ་དེ་དེ་ཡིན་པའི་ཕྱིར། འཁོར་གསུམ།

ཡང་གལ་ཏེ་ཁོ་བོ་ལ་དེ་ལྟ་བུའི་སྐྱོན་མེད་དེ། ཉན་རང་དེ་དག་གིས་ཆོས་རང་བཞིན་མེད་པ་རྟོགས་པ་ཡོད་པ་དེ་ཆོས་ཐམས་ཅད་རང་བཞིན་མེད་པར་རྟོགས་པ་ཡོད་པ་ལ་མི་ཟེར་གྱི། གལ་ཏེ་རང་འགྲེལ་གྱི་ལུང་ལས་ཆོས་ཐམས་ཅད་རང་བཞིན་མེད་པ་ཤེས་པ་ཡོད་དོ་ཞེས་ཐམས་ཅད་ཅེས་པའི་ཚིགས་དངོས་སུ་བྱུང་ཡང་། དེ་གང་ཟག་གི་བདག་མེད་དེ་ཆོས་ཀྱི་བདག་མེད་ཀྱི་བྱེ་བྲག་ཡིན་པས། ཆོས་ཀྱི་བདག་མེད་ཀྱི་བྱེ་བྲག་ཏུ་གྱུར་པའི་གང་ཟག་གི་བདག་མེད་དེའི་ཕྱོགས་ཐམས་ཅད་རྟོགས་པ་ལ་དགོངས་པ་ཡིན་པས་མི་སྐྱོན་སྙམ་པའང་མ་འོང་བའི་ངེས་པ་མེད་པས་དེ་ལྟར་ནའང་གཏན་ནས་མི་འཐད་དེ། གང་ཟག་གི་བདག་མེད་དེ་ཆོས་ཀྱི་བདག་མེད་ཀྱི་བྱེ་བྲག་མ་ཡིན་པའི་ཕྱིར་ཏེ། གང་ཟག་གི་བདག་མེད་ཆོས་ཀྱི་བདག་མེད་ཀྱི་བྱེ་བྲག་ཡིན་ན། གང་ཟག་གི་བདག་མེད་ཆོས་ཅན། ཁྱོད་ཆོས་ཀྱི་བདག་མེད་ཡིན། ཁྱོད་ཆོས་ཀྱི་བདག་མེད་དང་བདག་གཅིག་ཏུ་འབྲེལ། ཁྱོད་མ་ཡིན་ཞིང་ཆོས་ཀྱི་བདག་མེད་ཀྱང་ཡིན་པའི་གཞི་མཐུན་པ་དུ་མ་གྲུབ་དགོས་ཞེས་སྤྱི་དང་བྱེ་བྲག་གི་འབྲེལ་པ་སྒྲུབ་དགོས་པ་ལ། གང་ཟག་གི་བདག་མེད་ཆོས་ཀྱི་བདག་མེད་ཡིན་པ་མི་འཐད་པའི་ཕྱིར། དེ་གཉིས་སྟོང་ཚུལ་འདྲ་ཡང་སྟོང་གཞི་ཆོས་ཅན་གྱི་སྒོ་ནས་འགལ་བའི་ཕྱིར། མ་གྲུབ་ན། དེར་ཐལ། སྟོང་གཞི་ཆོས་ཅན་ཆོས་དང་གང་ཟག་གཉིས་འགལ་བ་ཡིན་པའི་ཕྱིར། ཆོས་ཀྱི་བདག་མེད་དང་གང་ཟག་གི་བདག་མེད་གཉིས་སྟོང་ཚུལ་གྱི་སྒོ་ནས་མི་དབྱེ་བར་སྟོང་གཞི་ཆོས་ཅན་གྱི་སྒོ་ནས་དབྱེ་བ་ཡིན་པའང། འཇུག་པ་ལས་གསུངས་ཏེ།

བདག་མེད་འདིས་ནི་འགྲོ་བ་རྣམ་གྲོལ་ཕྱིར།།
ཆོས་དང་གང་ཟག་དབྱེ་བས་རྣམ་གཉིས་གསུང་།།

ཞེས་ཆོས་དང་གང་ཟག་གི་དབྱེ་བས་སྟོང་གཞི་ཆོས་ཅན་གཟུགས་ལ་སོགས་པའི་རང་བཞིན་གྱིས་སྟོང་པ་ཆོས་ཀྱི་བདག་མེད་དང་། གང་ཟག་རང་བཞིན་གྱིས་གྲུབ་པས་སྟོང་པ་གང་ཟག་གི་བདག་མེད་དུ་བཞེད་པ་ཡིན་པའི་ཕྱིར། ད་རུང་འདི་ལ་ཁྱོད་ཅག་གཏན་ཚིགས་ལ་མ་བྱང་བ་དག་གིས་འདི་སྐད་སྨྲ་བའང་འབྱུང་བའི་རིགས་སུ་འདུག་སྟེ། གང་ཟག་གི་བདག་མེད་ཅེས་པའི་གང་ཟག་དེ་ཆོས་ཀྱི་བདག་མེད་ཅེས་པའི་སྐབས་ཀྱི་ཆོས་དེའི་བྱེ་བྲག་ཡིན་ཏེ། དེའི་སྐབས་ཀྱི་གང་ཟག་དེ་ཆོས་ཀྱི་བྱེ་བྲག་ཡིན་པའི་ཕྱིར་ཏེ། དེ་ཆོས་ཡིན་པའི་ཕྱིར་བསམ་ཚོད་དུ་འདུག་པས། དེ་ལྟར་ན་དེ་བས་ཀྱང་གཏན་ཚིགས་ཀྱི་རྣམ་བཞག་ལ་རྒྱུས་མེད་པའི་རང་གི་ནང་ཆ་ཤིན་ཏུ་གསལ་བར་བྱས་པ་ཡིན་ཏེ། གཞི་གྲུབ་ན་ཆོས་ཡིན་པས་ཁྱབ་ཅེས་པའི་ཆོས་དང་ཆོས་ཀྱི་བདག་མེད་ཅེས་པའི་ཆོས་གཉིས་ཀྱི་དབྱེ་བ་གཏན་ནས་མ་ཕྱེད་ནས་མགོ་རྨོངས་པ་ཡིན་པའི་ཕྱིར། གཞི་གྲུབ་ན་ཆོས་ཡིན་པས་ཁྱབ་ཅེས་པའི་ཆོས་དེ་ཡིན་ན་ཆོས་ཀྱི་བདག་མེད་ཅེས་པའི་ཆོས་དེ་ཡིན་མི་དགོས་པའི་ཕྱིར་ཏེ། གང་ཟག་གི་བདག་མེད་ཅེས་པའི་གང་ཟག་དེ་ཆོས་དང་གང་ཟག་གཉིས་སུ་ཕྱེ་བའི་ཆོས་མ་ཡིན་པའི་ཕྱིར་ཏེ། སྤྱིར་གཞི་གྲུབ་ན་ཆོས་ཡིན་པས་ཁྱབ་ཀྱང་། བྱེ་བྲག་ཏུ་བདག་མེད་གཏན་ལ་ཕབ་པའི་ཚེ་ཆོས་དང་གང་ཟག་གཉིས་སུ་ཕྱེ་བ་ལ་དགོས་པ་ཞིག་ཡོད་པའི་ཕྱིར། དེ་འདྲའི་རྣམ་དབྱེ་མི་འཐད་ན། འོ་ན་ཆོས་དང་ཆོས་མ་ཡིན་པ་གཉིས་སུ་དབྱེ་བའང་མི་འཐད་པར་ཐལ། གཞི་གྲུབ་ན་ཆོས་ཡིན་པའི་ཁྱབ་པའི་ཕྱིར། འདོད་མི་ནུས་ཤིང་། འདོད་ན་སྒྲུབ་བྱེད་སླ། མི་འདོད་ན་སྔ་མའི་རིགས་པ་ཡང་དེ་དང་མགོ་མཚུངས་པའི་ཕྱིར་རོ།།

ཡང་དེ་ལ་སུན་འབྱིན་སྨྲ་བ་པོ་ན་རེ། ༼མི་ཕམ་གྱིས་༽དེ་ཅིས་ཀྱང་འདོད་དགོས་ཏེ་རིགས་པ་དང་ལུང་གིས་གྲུབ་པའི་ཕྱིར་རོ་ཟེར་ན། རིགས་པས་མ་གྲུབ་ཚུལ་འོག་ཏུ་འཆད་པར་འགྱུར་ལ། འདིར་ཕ་རོལ་པའི་སྒྲུབ་བྱེད་ལུང་གི་ཕྱོགས་ལ་བརྟག་པ་ཅུང་ཟད་བྱ་ན་ཞེས་པ་ནས། ཞེས་གསུངས་པའི་ལུང་འདི་རྣམས་ཀྱིས་དངོས་པོ་ལ་བདེན་པར་ཞེན་པ་དེ་འཁོར་བའི་རྩ་བར་བསྟན་པ་དང་། དེ་ལས་ཆགས་སྡང་སོགས་སྐྱེ་བ་དང་། རྟེན་འབྱུང་གི་དེ་ཉིད་ཤེས་པས་དེ་སྤོང་བར་གསུངས་པས་ན། བདེན་འཛིན་ཉོན་སྒྲིབ་ཏུ་བཞེད་པ་ཡིན་ཞེ་ན། སྤྱིར་དངོས་པོ་ལ་བདེན་པར་མངོན་པར་ཞེན་པའི་རྨོངས་པ་ལས་འཁོར་བ་འབྱུང་བ་དང་། རྨོངས་པ་དེ་ལ་ཉོན་མོངས་པ་ཞེས་བྱ་བ་དང་། མ་རིག་པ་ལས་ཆགས་སོགས་འབྱུང་བ་དང་། རྟེན་འབྱུང་དང་དེ་ཁོ་ན་ཉིད་ཤེས་པས་དེ་ལྡོག་པ་ཙམ་ནི་སངས་རྒྱས་པ་སྤྱིའི་ལུགས་ལ་གྲུབ་པས། སྤྱིར་དེ་ཙམ་ཞིག་སྟོན་པའི་ལུང་དེས་བདེན་འཛིན་དེ་ཉོན་ཤེས་གཉིས་ཀྱི་ཟླས་ཕྱེ་བའི་ཉོན་སྒྲིབ་ཁོ་ན་སྟོན་པར་མི་འགྲུབ་སྟེ་ཞེས་པའི་བར་སྨྲས་པ་སོགས་ཀྱིས་བདེན་འཛིན་ཉོན་སྒྲིབ་མ་ཡིན་པའི་སྒྲུབ་བྱེད་ཅི་རིགས་སྨྲས་འདུག་ཀྱང་། དེ་ལ་ལན་གྱི་སྒོ་རྒྱ་ཆེར་སྟོན་པར་ཡང་མི་བྱའོ།། དེ་ཅིའི་ཕྱིར་ཞེ་ན། ལུང་འདིར་བདེན་འཛིན་ཉོན་སྒྲིབ་ཡིན་པའི་སྒྲུབ་བྱེད་ཤིང་རྟ་ཆེན་པོ་རྣམས་ཀྱིས་ལུང་ཁུངས་སུ་དྲངས་ནས་རྗེ་ཡབ་སྲས་རྗེས་འབྲང་དང་བཅས་པས་ལན་གཅིག་མིན་པར་ཡང་ཡང་སྒྲུབ་ཟིན་པས་སྐབས་སུ་བབས་པའི་རྒོལ་བ་བློ་མིག་དང་ལྡན་པ་རྣམས་ལ་ནི་དེ་བས་ལྷག་པར་མི་དགོས་ལ། ལུང་རིགས་ཡང་དག་གིས་གནོད་པ་མཐོང་བཞིན་དུ་ད་རུང་རང་གིས་ལོག་པར་སྨྲས་པའི་གྲུབ་མཐའ་འདོད་ཞེན་གྱི་སྒོ་ནས་དོར་མི་འདོད་པའི་རྒོལ་བ་བློ་གྲོས་ཀྱི་མི་ལོང་བ་རྣམས་ལ་ལུང་རིགས་ཀྱི་སྒྲུབ་པ་ལས། གཟུགས་དངོས་སུ་བསྟན་ཀྱང་མཐོང་བའི་གོ་སྐབས་ག་ལ་ཡོད། འོན་ཀྱང་འདི་ན་གང་སྨྲས་པ་རྣམས་ལ་ཐལ་འཕྲེང་ཉུང་ངུས་བཞད་གད་རེ་མ་བྱས་ན་བླུན་པོ་དག་གིས་འདི་ལ་ལན་མ་བྱུང་འདུག་པས་གཞན་གྱིས་གང་སྨྲོས་པ་ལྟར་འཐད་དོ་སྙམ་དུ་སེམས་པར་འགྱུར་བའི་ཕྱིར་འདི་སྐད་ཅེས་སྨྲ་སྟེ། ཁྱོད་ཀྱིས་སྤྱིར་དངོས་པོ་བདེན་པར་མངོན་པར་ཞེན་པའི་རྨོངས་པ་ལས་འཁོར་བ་འབྱུང་བ་དང་། རྨོངས་པ་དེ་ལས་ཉོན་མོངས་པ་ཞེས་བྱ་བ་དང་། མ་རིག་པ་ལས་ཆགས་སོགས་འབྱུང་བ་དང་། རྟེན་འབྱུང་དང་དེ་ཁོ་ན་ཉིད་ཤེས་པས་དེ་ལྡོག་པ་ཙམ་སངས་རྒྱས་པ་སྤྱིའི་ལུགས་ཡིན་ཞེས་སྨྲས་པ་འདི་ནི་རང་གིས་རང་ངོ་ཚ་བའི་གནས་ལ་འགོད་པའི་ཐལ་བ་བཞི་འབྱུང་སྟེ། གོང་གི་ཁས་ལེན་དེ་དག་སངས་རྒྱས་པ་སྤྱིའི་ལུགས་ཡིན་ན། རང་སྡེ་སེམས་ཙམ་པ་མན་ཆད་ཀྱིས་ཆོས་ཐམས་ཅད་བདེན་པར་མ་གྲུབ་པར་ཁས་ལེན་པར་ཐལ། དེ་དག་གིས་དངོས་པོར་བདེན་པར་མངོན་པར་ཞེན་པའི་རྨོངས་པ་དེ་འཁོར་བ་བསྐྱེད་བྱེད་དུ་ཁས་ལེན་པའི་ཕྱིར། རྟགས་ཁས་ལེན་གྱིས་དངོས་མ་ཁྱབ་ན། ཁྱབ་པ་ཡོད་པར་ཐལ། ཆོས་ཐམས་ཅད་བདེན་པར་མངོན་པར་ཞེན་པའི་བདེན་འཛིན་འཁོར་བ་སྐྱེད་བྱེད་ཡིན་ན། ཆོས་ཐམས་ཅད་བདེན་པ་མེད་པ་ཆོས་རྣམས་ཀྱི་གནས་ལུགས་མཐར་ཐུག་ཡིན་པ་དོན་གྱིས་གྲུབ་པའི་ཕྱིར། མ་གྲུབ་ན། དེར་ཐལ། བདེན་མེད་རྟོགས་པའི་ཤེས་རབ་དང་བདེན་འཛིན་གཉིས་འཛིན་སྟངས་དངོས་སུ་འགལ་བའི་དབང་གིས་ཕན་ཚུན་གནོད་བྱ་གནོད་བྱེད་དང་སྤང་གཉེན་དུ་སོང་བའི་ཕྱིར། རྩ་བར་འདོད་ན། རང་སྡེ་སེམས་ཙམ་པ་མན་ཆད་ཀྱི་ལྟ་བ་དང་དབུ་མ་པའི་ལྟ་བ་ལ་མཆོག་དམན་གྱི་ཁྱད་པར་མེད་པར་ཐལ། དེ་དག་གིས་དབུམ་མ་པས་ཇི་ལྟར་བཞེད་པ་ལྟར་གྱི་ལྟ་བ་ཁས་ལེན་པའི་ཕྱིར། མ་གྲུབ་ན། དེར་ཐལ། དེ་དག་གིས་ཆོས་ཐམས་ཅད་བདེན་མེད་དུ་ལྟ་བའི་ལྟ་བ་ཁས་ལེན་པའི་ཕྱིར་ཏེ། ཆོས་ཐམས་ཅད་བདེན་པར་གྲུབ་པར་འཛིན་པའི་བདེན་འཛིན་ལས་འཁོར་བ་འབྱུང་བར་ཁས་ལེན་པ་གང་ཞིག དེ་ཡིན་ན་བདེན་མེད་རྟོགས་པའི་ཤེས་རབ་དེའི་གཉེན་པོ་ལས་འོས་མ་འཆིས་པའི་ཕྱིར་ཆོས་ཐམས་ཅད་བདེན་མེད་དུ་ལྟ་བའི་ལྟ་བ་ཁས་མི་ལེན་ཀ་མེད་དུ་སོང་བའི་ཕྱིར། རྟགས་ཁྱབ་རྣམས་རང་གི་ཁས་ལེན་གྱི་སྟེང་ནས་དངོས། དེས་ན་ནང་པ་སངས་རྒྱས་པའི་གྲུབ་མཐའ་སྨྲ་བ་པོ་ཡིན་ན་དབུ་མ་པ་ཡིན་པས་ཁྱབ་པར་ཐལ། སེམས་ཙམ་པ་མན་ཆད་ལ་དེས་ཁྱབ་པ་བསྒྲུབས་ཟིན་མ་ཐག་པ་གང་ཞིག ཐལ་རང་གཉིས་ལ་དེ་བས་ཀྱང་ཁྱབ་པའི་ཕྱིར། འདོད་ན་ཤིང་རྟ་ཆེན་པོ་དག་གིས་གྲུབ་མཐའ་སྨྲ་བ་བཞིའི་ཁྱད་པར་མཛད་པ་རྣམས་རང་གིས་རང་ལ་ངལ་བ་བྱས་པར་ཟད་དོ་ཞེས་སྨྲ་བར་གྱིས་ཤིག།

དེ་ནས་ཐལ་བ་གཉིས་པ། རྨོངས་པ་དེ་ལ་ཉོན་མོངས་པ་ཞེས་བྱ་བ་དང་ཞེས་སྨྲས་འདུག་པ་ལྟར་ན་རང་སྡེ་སེམས་ཙམ་པ་མན་ཆད་ཀྱིས་བདེན་པར་མངོན་པར་ཞེན་པའི་རྨོངས་པ་དེ་ཉོན་མོངས་པར་འདོད་པར་ཐལ། འདོད་པ་དེའི་ཕྱིར། འདོད་ན། རང་སྡེ་སེམས་ཙམ་པ་མན་ཆད་ཀྱིས་ཡོད་ན་བདེན་པར་གྲུབ་པར་ཡོད་དགོས་པ་མི་འདོད་པར་ཐལ། འདོད་པ་དེའི་ཕྱིར། འདོད་ན། སློབ་དཔོན་ཞི་བ་མཚོས།

བདག་དང་གཞན་སྨྲས་དངོས་འདི་དག།

ཡང་དག་པ་ནི་གཅིག་པ་དང་།།
དུ་མའི་དངོས་དང་བྲལ་བའི་ཕྱིར།།

རང་བཞིན་མེད་དེ་གཟུགས་བརྙན་བཞིན།།

ཞེས་གཅིག་དུ་བྲལ་གྱི་གཏན་ཚིག་ལ་བརྟེན་ནས་དངོས་པོ་བདེན་མེད་དུ་བསྒྲུབ་པ་མི་འཐད་པར་ཐལ། རང་སྡེ་དེ་དག་ལ་བདེན་མེད་དུ་བསྒྲུབ་པ་ལ་དགོས་པ་མེད་པའི་ཕྱིར་ཏེ། དེ་དག་ལ་བདེན་མེད་མ་བསྒྲུབ་ཀྱང་གྲུབ་ཟིན་པའི་ཕྱིར། འདོད་ན་སློབ་དཔོན་ཞི་བ་མཚོ་ལ་གྲུབ་ཟིན་བསྒྲུབ་པར་ཐལ་བའི་སྐྱོན་བྱུང་ཞིང་། མི་འདོད་ན་ཁྱོད་ཀྱི་དམ་བཅའ་ཞིག་པར་འགྱུར་བས་བསམ་མནོ་ཞིབ་ཏུ་ཐོངས་ཤིག། གཞན་དུ་དབུ་མ་སྙིང་པོ་ལས།

འདིར་བཤད་དེ་བཞིན་གཤེགས་བཀའ་ཀུན།།

ཁོ་བོ་ཅག་གི་ཚད་མ་ཡིན།།
ཚད་མ་ཡིད་ཆེས་ལུང་ཡིན་ཕྱིར།།

བཟང་པོ་དག་ནི་སྒྲུབ་པར་བྱེད།།

ལུང་བཤད་དག་གི་ཐེ་ཚོམ་དང་།།

ལོག་པའི་བློ་ཅན་གཞན་མི་བྱེད།།
དེ་ཕྱིར་དེ་དག་སྒྲུབ་གཞུག་ཕྱིར།།

རིགས་པ་ལྡན་པའི་ཚུལ་བཙལ་བྱ།།

ཞེས་རྣམ་རིགས་པས་དབུ་མ་པ་ལ་སྨྲས་པའི་ཉེས་པ་རྣམས་ཚད་མ་མིན་པ་དང་། རང་ལུགས་ཚད་མ་དང་ལྡན་པའི་ཕྱིར་རྣམ་རིག་པས་ཚུར་རྒོལ་བ་མཐའ་དག་སུན་དབྱུང་བར་བྱ་བར་གསུངས་ལ། ཡང་དི་ཉིད་ལས། གཉིས་མེད་པ་ཡོད་དངོས་པོ་ནི་ཞེས་པས་རྣམ་རིག་པས་འདོད་པའི་ཤེས་པ་བདེན་གྲུབ་བཀག་ཅིང་། ཕྱི་དོན་བཀག་པ་མི་འཐད་པར་བསྟན། ཀུན་བཏགས་ཡོད་པ་མ་ཡིན་ཏེ་ཞེས་སོགས་ཀྱིས་རྣམ་རིག་པའི་མཚན་ཉིད་གསུམ་གྱི་རྣམ་གཞག་རྣམས་མི་འཐད་པར་བསྟན་ཏེ་རྣམ་རིག་པའི་དངོས་པོ་བདེན་གྲུབ་གཞིར་བཅས་ནས་གང་རྩོད་པ་རྣམས་དབུ་མ་པས་བདེན་པ་མེད་པའི་རྒྱུ་མཚན་ཡང་དག་གི་སྒོ་ནས་སུན་དབྱུང་བ་དེ་དག་མི་འཐད་པར་ཐལ། རྣམ་རིག་པ་མན་ཆད་ཀྱིས་ཀྱང་བདེན་པ་མེད་པ་བཞེད་པའི་ཕྱིར་ཏེ། བདེན་འཛིན་ཉོན་མོངས་པར་བཞེད་པ་སངས་རྒྱས་པ་སྤྱིའི་ལུགས་ཡིན་པའི་ཕྱིར། རྟགས་ཁས་ལེན་གྱིས་དངོས། དེ་བཞིན་དུ་དབུ་མ་འཇུག་པ་ལས་ཀྱང་། བཟུང་བ་མེད་པར་འཛིན་པ་མ་ཐོང་ཞིང་།། ཞེས་པ་ནས། སྟོང་ཉིད་དོན་ཅན་ངེས་དོན་ཤེས་པར་གྱིས།། ཞེས་པའི་བར་གྱིས་རྣམ་རིག་པས་རང་བཞིན་གྱིས་གྲུབ་པའི་རྒྱུ་གཞན་ལས་རང་བཞིན་གྱིས་གྲུབ་པའི་འབྲས་བུ་གཞན་སྐྱེ་བ་བཀག་པའི་རིགས་པའི་རྣམ་འགྱུར་ཇི་སྐད་བསྟན་པ་རྣམས་ཀྱང་མི་འཐད་པར་ཐལ། རྟགས་སྔ་མ་དེའི་ཕྱིར། གཞན་ཡང་ཞི་བ་ལྷས། སྤྱོད་འཇུག་གི་གཞུང་འདི་ལས་ཀྱང་།། རྣལ་འབྱོར་པ་ཡང་བློ་ཁྱད་ཀྱིས།། གོང་མ་གོང་མ་རྣམས་ཀྱིས་གནོད།། ཅེས་གྲུབ་མཐའ་འོག་མའི་འདོད་ཚུལ་ལ་གོང་མའི་རིགས་པ་ཡང་དག་གིས་གནོད་པ་སྟོན་པར་གསུངས་པའང་མི་འཐད་པར་ཐལ་བ་སོགས་གནོད་བྱེད་མཐའ་ཡས་སོ།།

ཐལ་བ་གསུམ་པ་༼མི་ཕམ་གྱིས་༽མ་རིག་པ་ལས་ཆགས་སོགས་བྱུང་བ་དང་། ཞེས་ཁྱོད་ཀྱིས་སྨྲ་ན། བདེན་འཛིན་མ་རིག་པ་ལས་ཆགས་སོགས་ཉོན་མོངས་ཐམས་ཅད་འབྱུང་བ་དངོས་སྨྲ་བ་མན་ཆད་ཀྱིས་འདོད་པར་ཐལ། འདོད་པའི་ཕྱིར། འདོད་ན། དངོས་སྨྲ་བ་མན་ཆད་ཀྱིས་བདེན་འཛིན་འཁོར་བའི་རྩ་བར་འདོད་པར་ཐལ། འཁོར་བའི་རྒྱུར་གྱུར་པའི་ཆགས་སོགས་ཉོན་མོངས་ཐམས་ཅད་ཀྱི་རྩ་བ་བདེན་འཛིན་ཡིན་པར་འདོད་པའི་ཕྱིར། འདོད་ན། བདེན་འཛིན་ཆོས་ཅན། འཁོར་བའི་རྩ་བ་ཡིན་པར་ཐལ། དེ་འཁོར་བའི་རྩ་བ་ཡིན་པ་སངས་རྒྱས་པ་སྤྱིའི་ལུགས་ཡིན་པའི་ཕྱིར། རྟགས་ཁས་ལེན་གྱིས་དངོས། འདོད་ན། བདེན་འཛིན་ཆོས་ཅན། ཉོན་སྒྲིབ་ཡིན་པར་ཐལ། འཁོར་བའི་རྩ་བ་ཡིན་པའི་ཕྱིར། རྟགས་གྲུབ་སྟེ། བདེན་འཛིན་ཉོན་མོངས་གང་ཞིག་དེ་ཆགས་སོགས་ཐམས་ཅད་ཀྱི་རྩ་བ་ཡིན་པ་ཁྱོད་འདོད་པའི་ཕྱིར། ཁྱབ་པ་ཡོད་དེ། ཆགས་སོགས་ཉོན་མོངས་ཐམས་ཅད་འབྱུང་བའི་རྩ་བ་ཡིན་ན་ཆགས་སོགས་ལས་འཁོར་བར་འཕེན་བྱེད་ཀྱི་ལས་འབྱུང་། ལས་ལས་སྐྱེ་བ་འབྱུང་བ་སོགས་རྟེན་འབྲེལ་ཡན་ལག་བཅུ་གཉིས་འཁོར་ཚུལ་གྱིས་ཤེས་པའི་ཕྱིར་ཏེ། སློབ་དཔོན་ཀླུས། མ་རིག་པ་ལས་ལས་ཏེ་དེ་ལས་ནི།། རྣམ་ཤེས་དེ་ལས་མིང་དང་གཟུགས་རབ་འབྱུང་།། ཞེས་སོགས་གསུངས་པའི་ཕྱིར། རྩ་བར་འདོད་ན་བདེན་འཛིན་ཉོན་སྒྲིབ་མ་ཡིན་པའི་དམ་བཅའ་ཉམས་ལ། མི་འདོད་ན་བཤད་མ་ཐག་པའི་འཁོར་གསུམ་འདི་རྣམས་ཇི་ལྟར་སྤོང་བར་བྱེད་སོམས་ཤིག།

ཐལ་བ་བཞི་པ་༼མི་ཕམ་གྱིས་༽རྟེན་འབྱུང་དང་དེ་ཁོ་ཉིད་ཤེས་པས་དེ་ལྡོག་པ་ཙམ་ནི་ཞེས་བཤད་ན། འདིའི་སྐབས་ཀྱི་རྟེན་འབྱུང་དང་དེ་ཁོ་ན་ཉིད་ཅེས་པའི་དེ་ཉིད་དེ་ཆོས་ཐམས་ཅད་བདེན་པ་མེད་པ་ལ་ཟེར་བར་མངོན་ཏེ། ཁྱོད་ཀྱིས་བདེན་འཛིན་ཆགས་སོགས་ཀྱི་རྩ་བ་བཤད་པ་དང་། སྤྱིར་དངོས་པོ་ལ་བདེན་པ་མངོན་པར་ཞེན་པ་ཞེས་སྨྲོས་འདུག་པས་གསལ་ལ། དེས་ན་དེ་ཁོ་ན་ཉིད་བདེན་མེད་ལ་བྱེད་ན་སེམས་ཙམ་པ་མན་ཆད་ཀྱིས་ཀྱང་ཆོས་ཐམས་ཅད་བདེན་མེད་དུ་ལྟ་བའི་ལྟ་བ་ཁས་ལེན་པར་ཐལ་ཞིང་། དེ་དག་ལ་དབུ་མ་པས་བདེན་མེད་དུ་སྒྲུབ་པའི་རིགས་པ་གང་སྨྲས་པ་རྣམས་རིགས་པ་ལྟར་སྣང་དུ་ཐལ་བ་སོགས་སྔར་སྨྲོས་ཟིན་པ་ལྟར་ཟློག་ཏུ་མེད་ལ། དེའི་སྟེང་དུ་ཆོས་ཐམས་ཅད་བདེན་མེད་དུ་ལྟ་བའི་ལྟ་བ་དེ་ཆོས་ཐམས་ཅད་བདེན་པར་འཛིན་པའི་བདེན་འཛིན་ལྡོག་བྱེད་ཀྱི་གཉེན་པོ་ཡིན་པ་དང་། བདེན་འཛིན་མ་ལྡོག་ན་ཆགས་སོགས་ཉོན་མོངས་མི་ལྡོག དེ་མ་ལྡོག་ན་འཁོར་བ་མི་བཟློག་པ་ཁྱོད་ཀྱིས་ཁས་ལེན་གོང་མ་རྣམས་ཀྱིས་རིམ་པར་ངེས་ན། དེ་དག་ལ་བདེན་འཛིན་འཁོར་བའི་རྩ་བར་གྱུར་བའི་ཉོན་སྒྲིབ་ཡིན་པ་ཤུགས་ཀྱིས་འགྲུབ་པས་རང་གིས་ཁས་ལེན་ལ་རང་གི་རྩོད་ཟླས་གནོད་བྱེད་སྟོན་མ་དགོས་པར་རང་གིས་རང་ཚར་གཅོད་པ་འདི་སྐུ་དྲིན་ཆེའོ།།

རྩོད་མི་ཤེས་པའི་རྒོལ་བ་ལ།།

རིགས་པའི་རལ་གྲི་འཕྱར་ཙམ་ནས།།
དམ་བཅའི་རྩ་ཕུང་མ་ལུས་པ།།

རང་ཚིག་མེ་ཡིས་ཐལ་བར་བྱས།།

རང་འཚངས་སྤྲིན་གྱི་བླ་བྲེ་བྲེས།།

མཁས་རྣམས་གད་མོའི་འབྲུག་ལྡིར་ཚེ།།
བླུན་རྣམས་ཐེ་ཚོམ་གློག་ཞགས་འཁྱུག།

བལྟ་འདོད་རྨ་བྱའི་གར་ཡང་བསྒྱུར།།

ཞེས་ཀྱང་བྱས་སོ།།

ཡང་ཁྱོད་ཀྱིས་སྨྲས་པའི་རང་ཚིག་སྔ་ཕྱི་འགལ་བ་དེ་དག་ལུང་ཡང་དག་པ་དུ་མ་བཀོད་ནས་དེ་དག་གི་དགོངས་པ་ལེན་ཚུལ་གྱི་སྒོ་ནས་ཀྱང་རང་གིས་རང་ཚར་གཅད་པ་བྱས་འདུག་སྟེ། ཁྱོད་ཀྱིས་གོང་དུ་༼མི་ཕམ་གྱིས་༽འདིར་ཕ་རོལ་གྱིས་སྒྲུབ་བྱེད་དུ་འདོད་པའི་ལུང་གི་ཕྱོགས་ལ་བརྟག་པ་ཅུང་ཟད་བྱ་ན། སློབ་དཔོན་སངས་རྒྱས་བསྐྱངས་ཀྱིས། སེམས་ཅན་སྡུག་བསྔལ་གྱིས་ཉེན་པ་གཟིགས་ནས་ཞེས་སོགས་ནས། ཞེས་གསུངས་པའི་ལུང་འདི་རྣམས་ལས་དངོས་པོ་ལ་བདེན་པར་འཛིན་པ་ཉོན་མོངས་པར་བཤད་པའི་ཕྱིར་རོ་སྙམ་ན། བདེན་འཛིན་ལ་ཉོན་མོངས་པའི་མིང་གིས་བཏགས་པ་ནི་བདེན་ཏེ། རྨོངས་པ་ཐམས་ཅད་ལ་ཉོན་མོངས་པའི་མིང་འཇུག་པ་དགག་ཏུ་མེད་ཅིང་མདོ་བསྟན་བཅོས་ཀུན་ནས་ཀྱང་དངོས་པོའི་དེ་ཁོ་ན་ཉིད་མི་ཤེས་པའི་མ་རིག་པ་ལ་ཉོན་མོངས་ཞེས་མིང་བཏགས་པ་ཡང་ཡང་འབྱུང་མོད། དེ་ཙམ་གྱིས་ཉོན་ཤེས་ཀྱི་སྒྲིབ་པ་གཉིས་སུ་དབྱེ་བའི་ཉོན་སྒྲིབ་ཏུ་བཞེད་པ་ཡིན་ན་དཔལ་ཕྲེང་གི་མདོ་སོགས་ནས་མ་རིག་བག་ཆགས་ཀྱི་ས་ལའང་ཉོན་མོངས་པའི་མིང་གིས་བསྟན་ཅིང་ཞེས་པ་ནས་ཤེས་སྒྲིབ་གཏན་མེད་དུ་འགྱུར་རོ་ཞེས་སོགས་སྨྲས་པ་དང་། གཞུང་ཆེན་པོ་རྣམས་སུ་བདེན་འཛིན་ཉོན་སྒྲིབ་ཡིན་གྱི་ཤེས་སྒྲིབ་མིན་པའི་ཁུངས་མེད་བཞིན་དུ་ཚིག་གི་མཐེན་ཕྱོགས་ཙམ་གྱིས་མི་འགྲུབ་ཅེས་སོགས་སྨྲས་ནས་རྒོལ་བ་ལ་ལན་ཞིབ་ཏུ་སྨྲོས་པ་དགོས་པ་མེད་དེ། བདེན་འཛིན་ཉོན་སྒྲིབ་ཡིན་པ་སོགས་ཀྱི་སྒྲུབ་བྱེད་རྗེ་ཡབ་སྲས་རྗེས་འབྲངས་དང་བཅས་པ་རྣམས་ཀྱིས་དྲི་མ་མེད་པའི་ལུང་དང་རིགས་པ་ཡང་དག་གིས་གནོད་བྱེད་གསུང་རབ་རྣམས་སུ་ཁྲ་ལམ་མེར་གསལ་བ་ད་ལྟའི་བར་དུ་མ་ཉམས་པ་ཡོད་བཞིན་པ་ལ་སྔོན་བྱོན་གྱི་མཁས་པ་ལུང་དང་རིགས་པའི་བློ་གྲོས་མི་དམན་པ་མཐའ་དག་གིས་རྗེ་བླ་མའི་རིང་ལུགས་ཉིན་བྱེད་ཀྱི་དཀྱིལ་འཁོར་ཤར་བ་ལ། ལྟར་སྣང་རིགས་པའི་ལག་མཐིལ་གྱིས་སྒྲིབ་མ་ནུས་ལ། ད་རུང་ཡང་འདི་བསྐོར་རྗེ་བླ་མའི་བསྟན་པ་མ་ནུབ་བར་དུ་བསྟན་འཛིན་ཀྱི་སྐྱེས་བུ་དམན་པ་བདག་ལྟ་བུའི་རྗེས་འཇུག། ལུང་རིགས་ཕྲན་བུ་སྨྲ་བ་རྣམས་ཀྱིས་ཀྱང་འདི་ཙམ་འགོག་བྱེད་ཀྱི་རིགས་པའི་རྣམ་འགྱུར་སྟོན་པ་ནི་ཤིན་ཏུ་སླ་བ་ཡིན་ཏེ། རྗེ་ཡབ་སྲས་ཀྱི་གསུང་རབ་ཉི་མིའི་དཀྱིལ་འཁོར་ལྟར་ཤར་བ་ལ་གསལ་བྱེད་ཀྱི་ལུང་རིགས་གཞན་ནས་འཚོལ་བའི་ངལ་བ་གཏན་ནས་མི་དགོས་པའི་ཕྱིར། འོན་ཀྱང་སྐབས་འདིར་ལན་གྱི་ས་བཅད་མི་སྟོང་ཙམ་ལ་ལུང་རིགས་ཀྱི་བཞད་གད་ཕྲན་བུ་ཞིག་བྱས་ན། ཁྱོད་ཀྱིས་བུདྷ་པ་ལི་ཏ་དང་། རིགས་པ་དྲུག་ཅུ་པ་དང་། བཞི་བརྒྱ་པ་སོགས་གཞུང་གང་ཆེ་བ་ལས་བདེན་འཛིན་ཉོན་སྒྲིབ་ཡིན་པའི་ཁུངས་རྣམས་དྲངས་ནས་དེ་དག་ནི་ཉོན་མོངས་པའི་སྒྲས་བསྟན་པ་ཡིན་གྱི། ཉོན་ཤེས་གཉིས་ཀྱི་ཟླས་ཕྱེ་བའི་ཉོན་སྒྲིབ་མ་ཡིན་ཟེར་བ་རྣམས་བདེན་འཛིན་ཉོན་སྒྲིབ་ཡིན་པ་རྒྱུ་མཚན་དང་བཅས་ཏེ་གསལ་བར་གསུངས་ཆེས་དྲག་པ་རྣམས་རང་ཉིད་ཀྱི་དམ་བཅའ་ལ་དངོས་སུ་གནོད་པ་ཤེས་ནས་དེ་དག་སྒྲ་ཇི་བཞིན་དུ་ཁས་བླང་དུ་མི་རུང་བ་དགོངས་པ་གཞན་དུ་དྲངས་ཁུལ་བྱས་པ་ནི། དཔེར་ན་ཉི་མའི་དཀྱིལ་འཁོར་ཤར་བ་ན། འདི་ཉིད་ཀྱི་ལམ་ཡིན་ཞེས་དམ་བཅས་པ་ལ། རང་གི་དམ་བཅས་པ་ཉམས་པ་མ་བཟོད་ནས་འདི་ནི་ཉི་མའི་དཀྱིལ་འཁོར་མ་ཡིན་ཟླ་བའི་དཀྱིལ་འཁོར་ལ་ཉི་མ་ཞེས་མིང་གིས་འདོགས་པ་ཡིན་ཞེས་མིག་གིས་མངོན་སུམ་མཐོང་བའི་དངོས་པོ་ལ་གོ་ལྡོག་པའི་ཚིག་གིས་བསྙོན་འདིངས་པ་དང་འདྲ་བར་ཟད་དེ། དེ་དག་ལས་བཤད་པའི་བདེན་འཛིན་མ་རིག་པ་ལ་ཉོན་མོངས་པའི་སྒྲས་བསྟན་པ་ཙམ་ཡིན་ན། བུདྡྷ་པ་ལི་ཏ་ལས། སེམས་ཅན་སྡུག་བསྔལ་གྱིས་ཉེན་པར་གཟིགས་ནས་དེ་གྲོལ་བའི་ཕྱིར་དངོས་པོ་ཡང་དག་པར་སྟོན་པའི་སླད་དུ་ཞེས་དང་། དངོས་པོའི་ངོ་བོ་ཉིད་དུ་རྟོགས་པས་ཆགས་སྡང་སྐྱེ་བར་གསུངས་པ་དང་། བཞི་བརྒྱ་པ་ལས། ཡུལ་ལ་བདག་མེད་མཐོང་ན་ནི།། སྲིད་པའི་ས་བོན་འགག་པར་འགྱུར།། ཞེས་དང་། འགྲེལ་པ་ལས། མི་ཤེས་པའི་དབང་གིས་དངོས་པོ་རྣམས་ལ་ཆགས་པ་དང་ལྡན་ཞིང་། འཁོར་བར་འཇུག་པའི་ས་བོན་དུ་གྱུར་པ་འགག་པས་འཁོར་བ་ལྡོག། ཅེས་སོགས་ཀྱི་སྐབས་ནས་བསྟན་པའི་སྡུག་བསྔལ་དང་། ཆགས་སྡང་དང་། འཁོར་བར་འཇུག་པའི་ས་བོན་དུ་གྱུར་པ་རྣམས་ཀྱང་དེ་དང་དེ་བཞེས་བྱ་བའི་སྒྲས་བསྟན་པ་ཙམ་ཡིན་པར་ཐལ། དེ་དང་དེ་དག་ལྡོག་བྱེད་ཀྱི་གཉེན་པོ་བདག་མེད་རྟོགས་པའི་ཤེས་རབ་ཀྱང་ཉོན་མོངས་པའི་གཉེན་པོར་སྒྲས་བསྟན་པ་ཙམ་ཡིན་དགོས་པའི་ཕྱིར་ཏེ། གཉེན་པོ་དེའི་མི་མཐུན་ཕྱོགས་བདེན་འཛིན་ནམ་ངོ་བོ་ཉིད་དུ་གྲུབ་པར་འཛིན་པ་ལ་ཉོན་མོངས་པའི་སྒྲས་བསྟན་པ་ཙམ་ཡིན་པའི་ཕྱིར། རྟགས་སྔ་ཕྱི་གཉིས་ལ་ཁྱབ་པ་ཡོད་དེ། མི་མཐུན་ཕྱོགས་ལ་ཉོན་མོངས་པའི་སྒྲས་བསྟན་པ་ཙམ་ཡིན་ན་དེའི་ལྡོག་བྱེད་གཉེན་པོ་ཡང་གང་གི་གཉེན་པོའི་སྒྲས་བསྟན་པ་ཙམ་ཡིན་དགོས་པའི་ཕྱིར་ཏེ། ལྡོག་བྱ་ལྡོག་བྱེད་མི་མཐུན་པར་བསྟན་མི་རིགས་པའི་ཕྱིར། གཞན་ཡང་། དེར་ཐལ། ཁྱོད་ཀྱིས་སྤང་བྱ་བདེན་འཛིན་ཤེས་སྒྲིབ་ཏུ་འདོད་པ་གང་ཞིག དེ་འདོད་ན་དེའི་གཉེན་པོ་བདེན་པ་མེད་པར་རྟོགས་པའི་ཤེས་རབ་ཀྱང་ཤེས་སྒྲིབ་ཀྱི་དངོས་གཉེན་དུ་འདོད་དགོས་པས་ལུང་དེ་དག་ལས་བདེན་མེད་རྟོགས་པའི་ཤེས་རབ་སྡུག་བསྔལ་དང་ཆགས་སོགས་ཀྱི་གཉེན་པོར་གསུངས་པ་དགོས་མེད་དུ་ཐལ་ལོ།།

དེ་མི་སྐྱོན་ཏེ། བདེན་མེད་རྟོགས་པའི་ཤེས་རབ་དེ་སྐབས་འདིར་སྡུག་བསྔལ་དང་ཉོན་མོངས་པ་ཆགས་སོགས་འཁོར་བ་འབྱུང་བའི་ས་བོན་སོགས་ཀྱི་གཉེན་པོ་ཡིན་པ་འདྲ་བར་བཤད་ཀྱང་། དོན་དུ་འདི་དག་གིས་བཤད་པའི་སྡུག་བསྔལ་སོགས་ཀྱང་མཚན་ཉིད་པ་མ་ཡིན་པས་མི་སྐྱོན་ཟེར་ན། འོ་ན་ལུང་འདི་དག་གི་སྐབས་ནས་བསྟན་པའི་སྒྲས་དངོས་ཟིན་གྱི་སྡུག་བསྔལ་དང་ཆགས་སོགས་འཁོར་བ་འབྱུང་བའི་ས་བོན་བཅས་ཀྱི་གཉེན་པོ་བདེན་མེད་རྟོགས་པའི་ཤེས་རབ་ཡིན་པར་སྟོན་པ་དེ་གྲུབ་མཐའ་སྨྲ་བ་སུ་ཞིག་གི་གདུལ་བྱ་ལ་དགོངས་ནས་གསུངས་པ་ཡིན་ཞེས་གསལ་པོར་སྨྲ་དགོས་ཀྱང་། ཐལ་འགྱུར་བའི་ཐུན་མོངས་མ་ཡིན་པའི་རང་གཞུང་རྩོད་མེད་འདི་དག་ལས་གང་གསུངས་པ་རྣམས་ཐལ་འགྱུར་བས་སྒྲ་ཇི་བཞིན་དུ་ཁས་བླང་དུ་མི་རུང་བ་དགོངས་པ་གཞན་དུ་དྲང་དགོས་ཞེས་རང་འཚངས་དེ་ཙམ་གསལ་བར་མ་བྱས་ན་ལེགས་སོ།།

ཡང་ན་ཡུལ་ལ་བདག་མེད་མཐོང་བ་སྲིད་པའི་ས་བོན་འགོག་བྱེད་དུ་གསུངས་པས། རྟེན་འབྱུང་ཤེས་པས་གཏི་མུག་གི་མུན་པ་བསལ་ནས་ཆགས་སྡང་མི་སྐྱེ་བ་སོགས་གསུངས་པས་བདེན་མེད་རྟོགས་པའི་ཤེས་རབ་སྡུག་བསྔལ་དང་ཆགས་སོགས་ཀྱི་གཉེན་པོ་བསྟན་པ་སྒྲ་ཇི་བཞིན་པ་མ་ཡིན། དེ་བཞིན་དུ་བདེན་པར་འཛིན་པའི་བདེན་འཛིན་ཀྱང་ཉོན་མོངས་སུ་བཤད་པའང་སྒྲ་ཇི་བཞིན་པ་མ་ཡིན་ཀྱང་། སྡུག་བསྔལ་དང་ཆགས་སོགས་འཁོར་བ་འབྱུང་བའི་ས་བོན་ཞེས་བཤད་པ་རྣམས་སྒྲ་ཇི་བཞིན་པ་ཡིན་ཟེར་ན། སྡུག་བསྔལ་སོགས་སྤང་བྱ་རྣམས་སྒྲ་ཇི་བཞིན་པ་བསྟན་ན་དེ་སྤོང་བྱེད་ཀྱི་གཉེན་པོའང་སྒྲ་ཇི་བཞིན་པར་བསྟན་དགོས་ཏེ། གདུལ་བྱ་ལ་གང་སྤང་རྒྱུའི་སྤང་བྱ་རྣམས་བསྟན་དགོས་པའི་རྒྱུ་མཚན་སྤང་བྱའི་ཉེས་དམིགས་རིག་ནས་དེ་སྤོང་བྱེད་ཀྱི་གཉེན་པོ་ཉམས་སུ་ལེན་པའི་ཆེད་དུ་ཡིན་པའི་ཕྱིར། ཁ་ནང་དུ་ཕྱོགས་ནས་སོམས་ཤིག ཡང་ན་གལ་ཏེ་ཉོན་མོངས་ཤེས་བྱའི་སྒྲིབ་པ་ཡི།། མུན་པའི་གཉེན་པོ་སྟོང་པ་ཉིད།། ཅེས་གསུངས་པ་ཡིན་པས་བདེན་མེད་རྟོགས་པའི་ཤེས་རབ་ཉོན་སྒྲིབ་ཤེས་སྒྲིབ་གཉིས་ཀའི་དངོས་གཉེན་ཡིན་པས་མི་སྐྱོན་ཟེར་ན། འོ་ན་ཆོས་ཐམས་ཅད་བདེན་མེད་རྟོགས་པའི་ཡེ་ཤེས་ཆོས་ཅན། ཁྱོད་ཉོན་སྒྲིབ་ས་བོན་དང་བཅས་པའི་གཉེན་པོ་ཡིན་པར་ཐལ། འདོད་པའི་ཕྱིར། འདོད་ན། འཁོར་བའི་རྩ་བར་གྱུར་པའི་ཉོན་སྒྲིབ་ཆོས་ཅན། ཁྱོད་ཆོས་ཐམས་ཅད་བདེན་པར་འཛིན་པའི་བདེན་འཛིན་ཡིན་པར་ཐལ། ཁྱོད་སྤོང་བྱེད་ཀྱི་དངོས་ཀྱི་གཉེན་པོ་བདེན་མེད་རྟོགས་པའི་ཡེ་ཤེས་ཡིན་གང་ཞིག ཁྱོད་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་སུ་འགལ་དགོས་པའི་ཕྱིར། རྟགས་གྲུབ་སྟེ། དེ་གཉིས་དམིགས་པ་གཅིག་ལ་དམིགས་ནས་འཛིན་སྟངས་དངོས་སུ་མ་འགལ་ན་བདེན་མེད་རྟོགས་པའི་ཤེས་རབ་ཀྱིས་བདེན་འཛིན་གྱི་ཞེན་ཡུལ་སུན་ཕྱུང་མི་ནུས་དེ། མ་ནུས་ན་དེའི་དེ་སྤོང་མི་ནུས་པའི་ཕྱིར་ཏེ། ཆོས་ཀྱི་གྲགས་པས་འདི་ཡུལ་སུན་ཕྱུང་མེད་པར་ནི།། དེ་སྤོང་བར་ནི་ནུས་མ་ཡིན།། ཞེས་གསུངས་པའི་ཕྱིར། ཅི་སྟེ་དེ་མི་སྨྲ་བ། འཁོར་བའི་རྩ་བར་གྱུར་པའི་ཉོན་སྒྲིབ་སྤོང་བྱེད་ཀྱི་གཉེན་པོ་བདེན་མེད་རྟོགས་པའི་ཤེས་རབ་ཡིན་ཀྱང་། སྤང་བྱ་འཁོར་བའི་རྩ་བ་དེ་བདེན་འཛིན་ཡིན་མི་དགོས་བསམ་ན། དེ་དགོས་པར་ཐལ། སློབ་དཔོན་ཀླུས་བདེན་པ་མིན་ལ་བདེན་འཛིན་པའི།། ཡོངས་སུ་འཛིན་དང་རྩོད་སོགས་ཀྱི།། རིམ་པ་ཆགས་ལས་འབྱུང་བར་འགྱུར།། ཞེས་འཁོར་བའི་རྩ་བ་ནི་དངོས་པོ་གང་བདེན་པར་གྲུབ་པ་མ་ཡིན་པ་ལ་བདེན་པར་གྲུབ་པར་འཛིན་པ་དང་། དེ་ལས་ཆགས་སོགས་འབྱུང་བ་གསུངས་ན། གཉེན་པོ་བདེན་པ་མེད་བསམ་མཁན་གྱི་ཤེས་པ་དེས་གང་ལ་གནོད་དགོས་ན། སྤང་བྱ་བདེན་པ་མེད་པ་ལ་བདེན་གྲུབ་ཏུ་འཛིན་མཁན་ཞིག་ལ་གནོད་དགོས་པའི་ཕྱིར་ཏེ། སྤང་བྱ་མ་རིག་པས་བདེན་པར་མི་འཛིན་བཞིན་དུ། གཉེན་པོ་ཤེས་རབ་ཀྱིས་བདེན་པར་འཛིན་པ་མི་འཐད་ཅེས་སུན་ཕྱུང་ནས་བདེན་མེད་དུ་འཛིན་པ་ནི་རྐུན་མ་ནགས་ལ་སོང་རྗེས་སྤང་ལ་རྩད་གཅོད་པ་བཞིན་བཞད་གད་རྒྱུན་མི་འཆད་པའི་གནས་སོ།།

ཡང་འདིའི་སྐབས་ཀྱི་སྤང་གཉེན་གཉིས་ཀ་སྒྲ་ཇི་བཞིན་པ་ཡིན་ཀྱང་། སྤང་བྱ་བདེན་འཛིན་གྱི་ཕྱོགས་གཅིག་གང་ཟག་བདེན་པར་འཛིན་པའི་བདེན་འཛིན་དང་། གཉེན་པོའི་ཕྱོགས་གཅིག་གང་ཟག་བདེན་མེད་རྟོགས་པའི་ཤེས་རབ་ཙམ་བསྟན་བྱ་ཡིན་གྱི། ཆོས་ཐམས་ཅད་བདེན་པར་འཛིན་པའི་བདེན་འཛིན་དང་། ཆོས་ཐམས་ཅད་བདེན་མེད་རྟོགས་པའི་ཤེས་རབ་གཉིས་བསྟན་བྱ་མ་ཡིན་པས་མི་སྐྱོན་བསམ་ན། དེ་ཡང་མི་འཐད་དེ། སྐབས་འདིའི་གང་ཟག་བདེན་པར་འཛིན་པའི་བདེན་འཛིན་གྱིས་འཁོར་བའི་རྩ་བ་བྱེད་ལ། ཕུང་སོགས་བདེན་པར་འཛིན་པའི་བདེན་འཛིན་གྱིས་འཁོར་བའི་རྩ་བ་མི་བྱེད་པའི་རྒྱུ་མཚན་ཅི་ཡང་མེད་དེ། བདེན་འཛིན་དེ་གཉིས་ཀྱིས་ཡུལ་བདེན་པར་འཛིན་པའི་འཛིན་སྟངས་མི་འདྲ་བའི་ཁྱད་པར་མེད་ཅིང་། ཆོས་ཐམས་ཅད་ཀྱི་གནས་ལུགས་རང་ངོས་ནས་མ་གྲུབ་པའམ་བདེན་པ་མེད་པ་མཐོང་བའི་གེགས་ཀྱི་གཙོ་བོ་བྱེད་པ་ལའང་མི་འདྲ་བའི་ཁྱད་པར་མེད་པའི་ཕྱིར། རྟགས་གཉིས་ཀ་གྲུབ་སྟེ། འཇུག་པ་ལས།

བདག་མེད་འདིས་ནི་འགྲོ་བ་རྣམ་སྒྲོལ་ཕྱིར།།
ཆོས་དང་གང་ཟག་དབྱེ་བའི་རྣམ་གཉིས་གསུངས།།

ཞེས་བདག་མེད་རྟོགས་པའི་ཤེས་རབ་གཉིས་འཛིན་སྟངས་ཀྱི་སྒོ་ནས་མི་འབྱེད་པར། དམིགས་པའི་སྒོ་ནས་འབྱེད་པར་གསུངས་ཏེ། དམིགས་པ་ཆོས་ལ་དམིགས་ནས་དེ་བདེན་པར་འཛིན་པ་ཆོས་ཀྱི་བདག་འཛིན་དང་། དམིགས་པ་གང་ཟག་ལ་དམིགས་ནས་དེ་བདེན་པར་འཛིན་པ་གང་ཟག་གི་བདག་འཛིན་དང་། གཞི་དེ་གཉིས་བདག་ཏུ་མ་གྲུབ་པར་འཛིན་པ་གཉིས་སོ་སོ་ནས་ཆོས་ཀྱི་བདག་མེད་དང་གང་ཟག་བདག་མེད་རྟོགས་པའི་ཤེས་རབ་ཏུ་འཇོག་པར་གསུངས་པའི་ཕྱིར། དེ་དག་ལ་ཁྱོད་ཅག་ཁ་ནང་དུ་ཕྱོགས་ནས་སོམས་དང་། འཁོར་བའི་རྩ་བ་བྱེད་པའི་མ་རིག་པ་ཡིན་ན། དེ་ཕྱི་ནང་གི་ཆོས་ཐམས་ཅད་ཀྱི་གནས་ལུགས་ཇི་ལྟ་བ་བཞིན་མི་ཤེས་ཤིང་། ཤེས་བྱའི་གནས་ལུགས་ཇི་ལྟ་བ་བཞིན་མ་ཡིན་པ་ལ་ཡིན་པར་སྒྲོ་འདོགས་པའི་བློ་ཞིག་ཡིན་དགོས་ཏེ། འཇུག་པ་ལས། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ།། ཞེས་གཏི་མུག་ལ་ཀུན་རྫོབ་ཅེས་བྱ་སྟེ། དེས་ཆོས་རྣམས་ཀྱི་རང་བཞིན་མཐོང་བ་ལ་སྒྲིབ་པའི་ཕྱིར། ཞེས་པའི་རྒྱུ་མཚན་དང་བཅས་པ་གསུངས་ལ། ཆོས་རྣམས་ཀྱི་རང་བཞིན་ནམ་གནས་ལུགས་སྟོང་ཉིད་མ་མཐོང་ན་འཁོར་བ་ལས་གྲོལ་བ་མེད་པ་ནི། མདོ་ལས།

གལ་ཏེ་ཆོས་ལ་བདག་མེད་སོ་སོར་རྟོག།

སོ་སོར་དེ་བརྟགས་གལ་ཏེ་སྒོམ་བྱེད་ན།།
དེ་ནི་མྱ་ངན་འདས་ཐོབ་འབྲས་བུའི་རྒྱུ།།

རྒྱུ་གཞན་གང་ཡིན་དེས་ནི་ཞི་མི་འགྱུར།།

ཞེས་གསུངས་པ་ལྟར་ཐེག་ཆེན་གྱི་མྱང་འདས་འཐོབ་པ་ལ་བདེན་མེད་སྒོམ་དགོས་པ་མ་ཟད་ཐེག་དམན་གྱི་མྱང་འདས་འཐོབ་པ་ལའང་ཆོས་ཐམས་ཅད་བདེན་མེད་སྒོམ་དགོས་ཏེ། རྡོ་རྗེ་གཅོད་པ་ལས། རབ་འབྱོར་འདི་ཇི་སྙམ་དུ་སེམས། རྒྱུན་དུ་ཞུགས་པ་དེས་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་སམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ།། དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ནི་གང་ལའང་ཞུགས་པ་མ་མཆིས་པའི་སླད་དུ་སྟེ། དེས་ན་རྒྱུན་དུ་ཞུགས་པ་ཞེས་བགྱིའོ།། ཞེས་དང་ཡང་བཅོམ་ལྡན་འདས་གལ་ཏེ་རྒྱུན་དུ་ཞུགས་པ་དེ་འདི་སྙམ་དུ། བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་པར་གྱུར་ན་དེ་ཉིད་དེའི་བདག་ཏུ་འཛིན་པར་འགྱུར་བ་ལགས་སོ།། སེམས་ཅན་དུ་འཛིན་པ་དང་། སྲོག་ཏུ་འཛིན་པ་དང་། གང་ཟག་ཏུ་འཛིན་པར་འགྱུར་བ་ལགས་སོ།། ཞེས་གསུངས་ཤིང་། འབྲས་གནས་ཕྱི་མ་གསུམ་ལའང་དེ་བཞིན་དུ་སྦྱར་ནས་གསུངས་པའི་ཕྱིར། རྒྱུན་ཞུགས་ནས་དགྲ་བཅོམ་པའི་བར་གྱི་འབྲས་གནས་གང་ཐོབ་པ་ལ་ཆོས་ཐམས་ཅད་བདེན་པར་མེད་པ་རྟོགས་དགོས་པར་གསུངས་ན། འཁོར་བ་ལས་ཐར་དུ་མི་བཅུག་པའི་རྒྱུ་ཆོས་ཐམས་ཅད་བདེན་པར་འཛིན་པའི་བདེན་འཛིན་ཡིན་པར་གསལ་ཞིང་། དེ་ཡང་གང་ཟག་གི་བདག་མེད་ཙམ་ལ་མ་གསུངས་པར་སྟོང་གཞི་ཆོས་ཅན་འབྲས་གནས་བཞི་སོགས་ཆོས་ལ་དམིགས་ནས་ཆོས་བདག་ཏུ་གྲུབ་པར་འཛིན་པའི་བདེན་འཛིན་ལ་གསུངས་འདུག་པ་འདི་བཞིན་ཡིན་པས་བདེན་འཛིན་འཁོར་བའི་རྩ་བ་དང་ཉོན་སྒྲིབ་ཡིན་པ་དོན་གྱིས་གྲུབ་འདུག་པའི་ཕྱིར། དེ་བས་ན་ངེད་ཅག་གིས་བདེན་འཛིན་འཁོར་བའི་རྩ་བ་ཡིན་པ་དང་ཉོན་སྒྲིབ་ཡིན་པའི་ཁུངས་ཡོད་ནས་དེ་ལྟར་སྨྲས་འདུག་གམ་ཁུངས་མེད་ནས་སྨྲས་འདུག་ཁྱོད་ཅག་སེམས་རྣལ་དུ་ཞོག་ལ་སོམས་དང་ད་དུང་སྤྲོས་པས་ཆོག་གོ།

ཡང་ཁྱོད་ཀྱིས་༼མི་ཕམ་གྱིས་༽ཉོན་མོངས་སྐྱོན་རྣམས་མ་ལུས་འཇིག་ཚོགས་ལ།། ལྟ་ལས་བྱུང་བ་ཞེས་སོགས་གསུངས་པས་གང་ཟག་གི་བདག་འཛིན་འཇིག་ལྟ་ལྷན་སྐྱེས་དེ་ཉིད་འཁོར་བའི་རྩ་བ་བཤད་པ་ཡིན་གྱི། ཆོས་ཐམས་ཅད་བདེན་པར་འཛིན་པའི་བདེན་འཛིན་འཁོར་བའི་རྩ་བར་མ་བཤད་བསམ་འདུག་པ་རྣམས་ཀྱང་གོང་དུ་ལུང་རིགས་ཀྱི་གནོད་བྱེད་བསྟན་ཟིན་པ་དེ་དག་གིས་བཀག་ཟིན་མོད་ཀྱང་ད་རུང་ཅུང་ཟད་སྤྲོས་ན། ཁྱོད་ལྟར་གང་ཟག་གི་བདག་འཛིན་འཇིག་ལྟ་ལྷན་སྐྱེས་དེས་འཁོར་བར་འཁྱམས་པ་པོ་གང་ཟག་བདེན་པར་འཛིན་པའི་དབང་གིས་འཁོར་བའི་རྩ་བར་བྱེད་ན། འཁོར་བར་འཁོར་བའི་རྒྱུ་ཀུན་འབྱུང་ལས་དང་ཉོན་མོངས་རྣམས་དང་དེའི་འབྲས་བུ་སྡུག་བསྔལ་བ་རྣམས་དང་། དེ་དག་འགོག་པའི་འགོག་བདེན། དེ་ཐོབ་བྱེད་ཀྱི་ལམ་བདེན་སོགས་བདེན་པར་འཛིན་པའི་བདེན་འཛིན་དེས་ཀྱང་འཁོར་བའི་རྩ་བ་བྱེད་དགོས་པའི་ཕྱིར་ཏེ། སྡུག་བསྔལ་བདེན་པར་འཛིན་བཞིན་དུ་སྡུག་བསྔལ་སྤོང་བ་དང་། ཀུན་འབྱུང་བདེན་པར་འཛིན་བཞིན་དུ་ཀུན་འབྱུང་སྤོང་བ་དང་། འགོག་པ་བདེན་པར་འཛིན་བཞིན་དུ་འགོག་བདེན་འཐོབ་པ་དང་། ལམ་བདེན་པར་འཛིན་བཞིན་དུ་ལམ་བདེན་འཐོབ་པ་མེད་པའི་ཕྱིར་ཏེ། འཕགས་པའི་བདེན་པ་བཞི་ཇི་ལྟ་བ་བཞིན་རྟོགས་པ་ལ་གང་ཟག་ཙམ་དུ་མ་ཟད་ཆོས་ཐམས་ཅད་བདེན་པས་སྟོང་པའི་སྟོང་ཉིད་མངོན་སུམ་དུ་རྟོགས་དགོས་པའི་ཕྱིར། དེ་ལྟར་ཡང་མདོ་ལས། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ།། བཅོམ་ལྡན་འདས་འཕགས་པའི་བདེན་པ་བཞི་པོ་རྣམས་ལ་ཇི་ལྟར་འཁུམས་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་གང་གིས་ཆོས་ཐམས་ཅད་མ་སྐྱེས་པར་མཐོང་བ་དེས་ནི། སྡུག་བསྔལ་ཡོངས་སུ་ཤེས་པ་ཡིན་ནོ།། གང་གིས་ཆོས་ཐམས་ཅད་འགྱུར་བ་མེད་པར་མཐོང་བ་དེས་ནི་ཀུན་འབྱུང་བ་སྤངས་པ་ཡིན་ནོ།། གང་གིས་ཆོས་ཐམས་ཅད་གཏན་མྱ་ངན་ལས་འདས་པར་མཐོང་བ་དེས་ནི་འགོག་པ་མངོན་དུ་བྱས་པ་ཡིན་ནོ།། གང་གིས་ཆོས་ཐམས་ཅད་ཤིན་ཏུ་མ་སྐྱེས་པར་མཐོང་བ་དེས་ནི་ལམ་བསྒོམས་པ་ཡིན་ནོ།། འཇམ་དཔལ་གང་གིས་དེ་ལྟར་འཕགས་པའི་བདེན་པ་བཞི་པོ་མཐོང་བ་དེས་ནི་ཆོས་འདི་དག་ནི་དགེ་བའོ།། ཆོས་འདི་དག་ནི་མི་དགེ་བའོ།། ཆོས་འདི་དག་ནི་སྤང་བར་བྱའོ།། ཆོས་འདི་དག་ནི་མངོན་དུ་བྱའོ།། སྡུག་བསྔལ་ཡོངས་སུ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་བསྒོམ་པར་བྱའོ་ཞེས་མི་རྟོག རྣམ་པར་རྟོག་པར་མི་བྱེད་དེ། འདི་ལྟར་གང་བརྟག་པར་བྱ་བའི་ཆོས་དེ་དེས་མ་མཐོང་བའི་ཕྱིར་རོ།། བྱིས་པ་སོ་སོའི་སྐྱེ་བོ་རྣམས་ནི་ཆོས་དེ་དག་ལ་རྟོག་པ་ན་ཆགས་པར་འགྱུར་རོ།། སྡང་བར་འགྱུར་རོ།། རྨོངས་པར་འགྱུར་རོ།། ཞེས་གསུངས་པའི་ཕྱིར། ཁྱོད་ལྟར་ན་ཉན་རང་དགྲ་བཅོམ་རྣམས་ཆགས་པར་འགྱུར་བ་དང་། སྡང་བར་འགྱུར་བ་དང་། རྨོངས་པར་འགྱུར་བ་ཡིན་པར་ཐལ། བདེན་པ་བཞི་ལ་བདེན་པར་འཛིན་པའི་བདེན་འཛིན་གྱི་རྟོག་པ་དང་བཅས་པའི་ཕྱིར། བཅོམ་ལྡན་འདས་རང་གིས་གསུངས་པའི་གཏན་ཚིགས་འདི་ལ་ལན་ཅི་གདབ། རྟགས་མ་གྲུབ་ཟེར་ན། བཅོམ་ལྡན་འདས་འཁྲུལ་བ་ཡིན་ཞེས་སྨྲ་དགོས་ལ། འདོད་ལན་བཏབ་ན་ཆགས་སོགས་མ་སྤངས་པའི་དགྲ་བཅོམ་པ་ཞིག་ཁས་ལེན་དགོས་པར་འགྱུར་བས་ཁྱོད་ཅག་སྔ་རབས་པ་གསུང་རབ་ཀྱི་དོན་ཕྱིན་ཅི་ལོག་ཏུ་འགྲེལ་བ་རྣམས་རིགས་པའི་འཕྲང་དོགས་པོ་འདི་འདྲ་ལ་ཐུག་དུས་བྲོས་པའི་ས་ཁུངས་ཇི་ལྟར་འཚོལ་སྙམ་དུ་མྱ་ངན་གྱི་སྨྲེ་སྔགས་འདོན་པ་ལས་འོས་ཅི་ཡོད།

གཞན་ཡང་ཁྱོད་འདོད་པའི་དགྲ་བཅོམ་དེ་ཆོས་ཅན། བདེན་པ་བཞིའི་དོན་མ་རྟོགས་ནས་དགྲ་བཅོམ་ཐོབ་པ་ཡིན་པར་ཐལ། བདེན་པ་བཞི་བདེན་མེད་དུ་མ་རྟོགས་ནས་དགྲ་བཅོམ་ཐོབ་པ་དེ་ཡིན་པའི་ཕྱིར། རྟགས་ཁྱབ་མ་གྲུབ་ན་བཅོམ་ལྡན་འདས་ལ་ཁྱོད་འཁྲུལ་བ་མ་བྱེད་ཅེས་ཞུས་ཤིག

གཞན་ཡང་ཁྱོད་ཅག་འདོད་པ་ལྟར་གྱི་དགྲ་བཅོམ་པ་དེ་ཆོས་ཅན། ཁྱོད་ཀྱིས་བདེན་པ་བཞི་མ་མཐོང་བར་ཐལ། བདེན་པ་བཞི་ལ་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། ལམ་སྒོམ་པར་བྱ། འགོག་པ་མངོན་དུ་བྱ་སྙམ་དུ་རྣམ་པར་རྟོག་པར་བྱེད་པའི་ཕྱིར། རྟགས་མ་གྲུབ་ན། དེ་དག་གིས་བདེན་བཞི་ལ་བདེན་པར་རྣམ་པར་རྟོག་པ་མ་སྤངས་པའི་དམ་བཅའ་བུད། ཁྱབ་པ་མ་གྲུབ་ན་བཅོམ་ལྡན་འདས་ཀྱི་བཀའ་ལུང་ཚད་མ་རྡོག་པས་རྫིས་པར་ཟད་དོ།། དེ་དག་དུ། ཁྱེད་འདོད་པའི་ཉན་རང་དགྲ་བཅོམ་པ་དེ་དག་ཆོས་ཅན། སྡུག་བསྔལ་ཡོངས་སུ་མ་ཤེས་པར་ཐལ། ཆོས་ཐམས་ཅད་མ་སྐྱེས་པ་མ་མཐོང་བའི་ཕྱིར། དེ་ཆོས་ཅན། ཀུན་འབྱུང་མ་སྤངས་པར་ཐལ། ཆོས་ཐམས་ཅད་འབྱུང་བ་མེད་པ་མ་མཐོང་བའི་ཕྱིར། དེ་ཆོས་ཅན། འགོག་པ་མངོན་དུ་མ་བྱས་པར་ཐལ། ཆོས་ཐམས་ཅད་གཏན་ཡོངས་སུ་མྱ་ངན་ལས་འདས་པ་མ་མཐོང་བའི་ཕྱིར། དེ་ཆོས་ཅན། ལམ་མ་བསྒོམ་པར་ཐལ། ཆོས་ཐམས་ཅད་ཤིན་ཏུ་མ་སྐྱེས་པ་མ་མཐོང་བའི་ཕྱིར། ཞེས་པའི་གཏན་ཚིགས་བཞི་པོ་འདི་དག་གོང་གི་ལུང་དྲངས་མ་ཐག་པ་དེ་ལས་བྱུང་བའི་ཕྱིར། འདི་དག་ལ་ཁྱོད་ཅག་གིས་འདོད་ལན་བཏབ་བམ། ཁྱབ་མེད་ཀྱི་ལན་འདེབས། དང་པོ་ལྟར་ན། ཁྱོད་ཅག་འདོད་པ་ལྟར་གྱི་ཉན་རང་དགྲ་བཅོམ་རྣམས་ཆོས་ཅན། ཆོས་ཐམས་ཅད་སྐྱེ་བ་མེད་པ་དང་། འབྱུང་བ་མེད་པ་དང་། གཏན་ཡོངས་སུ་མྱ་ངན་ལས་འདས་པ་དང་། ཤིན་ཏུ་མ་སྐྱེས་པ་རྟོགས་པའི་གང་ཟག་ཡིན་པར་ཐལ། གོང་གི་རྟགས་མ་གྲུབ་པའི་ཕྱིར། འདོད་ན་དེ་དག་ཆོས་ཅན། བདེན་འཛིན་སྤངས་པའི་གང་ཟག་ཡིན་པར་ཐལ། ཆོས་ཐམས་ཅད་བདེན་པར་མེད་པ་རྟོགས་པའི་གང་ཟག་ཡིན་པའི་ཕྱིར། འདོད་ན་བདེན་འཛིན་ཆོས་ཅན། ཉོན་སྒྲིབ་ཡིན་པར་ཐལ། ཉན་རང་རྣམས་ཀྱིས་ཐར་པ་མྱང་འདས་འཐོབ་པའི་གེགས་ཀྱི་གཙོ་བོ་ཡིན་པའི་ཕྱིར། རྟགས་ལུང་གིས་གྲུབ། འདོད་ན་སྔར་བདེན་འཛིན་ཉོན་སྒྲིབ་ཡིན་པའི་ཁུངས་སངས་རྒྱས་བསྐྱངས་དང་འཕགས་པ་ལྷ་སོགས་ཀྱི་གཞུང་ལས་གང་བྱུང་བ་རྣམས་ཀྱང་སྒྲ་ཇི་བཞིན་དུ་ཁས་བླངས་སུ་རུང་བར་ཐལ། དེ་དག་ལས་བསྟན་པའི་ཆོས་ཐམས་ཅད་བདེན་པ་མེད་པ་དང་། དེའི་ལྡོག་ཕྱོགས་ཆོས་ཐམས་ཅད་བདེན་པར་གྲུབ་པར་འཛིན་པའི་བདེན་འཛིན་འཁོར་བའི་རྩ་བ་གསུངས་པ་རྣམས་མདོ་ལུང་འདི་ལས་གསུངས་པ་དང་མི་མཐུན་པ་མེད་པ་གང་ཞིག དེ་ཇི་ལྟ་བ་བབཞིན་དུ་ཁས་བླངས་སུ་རུང་བའི་ཕྱིར། གཉིས་པ་གཏན་ཚིགས་དེ་དག་ལ་ཁྱབ་མེད་ཀྱི་ལན་བཏབ་ན། ཆོས་ཐམས་ཅད་སྐྱེ་བ་མེད་པ་དང་། འབྱུང་བ་མེད་པ་དང་། གཏན་ཡོངས་སུ་མྱ་ངན་ལས་འདས་པ་དང་། ཤིན་ཏུ་མ་སྐྱེས་པ་མ་མཐོང་ན། བདེན་བཞི་ཡོངས་སུ་མ་ཤེས་པདང་། མཐོང་ན་ཤེས་པའི་ཁྱད་པར་གྱི་སྒོ་ནས་སྐྱེ་འཕགས་ཀྱི་རྣམ་དབྱེ་མཛད་པ་མི་འཐད་པར་ཐལ། འདོད་པའི་ཕྱིར། འདོད་ན། ཁྱོད་ཅག་གིས་བཅོམ་ལྡན་འདས་ལ་འཁྲུལ་བའི་གཏན་ཚིགས་དེ་ལྟ་བུ་གདུལ་བྱ་ལ་མ་བསྟན་ཅིག་ཅེས་སྙིང་ཁམས་རི་རབ་ཙམ་བསྐྱེད་ལ་ཞུས་ཤིག།

ཡང་དེ་ནི་ཁྱོད་ཅག་གིས་མདོ་ཡི་དོན་མ་རྟོགས་པ་ཡིན་ཏེ། མདོ་དོན་ནི། སྡུག་བསྔལ་ཤེས་པར་བྱ་བ་དང་། ཀུན་འབྱུང་སྤངས་པར་བྱ་བ་དང་།། ལམ་སྒོམ་པར་བྱ་བ་སོགས་ལ་སྐྱེ་བ་མེད་པ། འབྱུང་བ་མེད་པ། གཏན་ཡོངས་སུ་མྱ་ངན་ལས་འདས་པ། ཤིན་ཏུ་མ་སྐྱེས་པར་གསུང་བ་སོགས་བདེན་པའམ་རང་བཞིན་གྱིས་གྲུབ་པའི་སྐྱེ་བ་མེད་པ་སོགས་ལ་མི་ཟེར་གྱི། གང་ཟག་རྟག་གཅིག་རང་དབང་ཅན་དུ་སྐྱེ་བ་སོགས་མེད་པ་དང་། གཟུང་བ་དང་། འཛིན་པ་རྫས་གཞན་དུ་སྐྱེ་བ་མེད་པ་སོགས་ཀྱི་དོན་ཡིན་ཟེར་ན་དེ་མ་ཡིན་པར་ཐལ། དཔལ་ལྡན་ཟླ་བའི་འགྲེལ་པ་ཚིག་གསལ་ལས་མདོ་འདི་ཁུངས་སུ་དྲངས་པའི་ཐད་ཀྱི་རྩ་ཤེས་ལས།

གལ་ཏེ་སྟོང་པ་ཡོད་མིན་ན།།

མ་ཐོབ་ཐོབ་པར་བྱ་བ་དང་།།
སྡུག་བསྔལ་མཐར་བྱེད་ལས་དང་ནི།།

ཉོན་མོངས་ཐམས་ཅད་སྤོང་བའང་མེད།།

ཅེས་པའི་སྔ་འགྲེལ་དུ། དངོས་པོ་རང་བཞིན་དང་བཅས་པར་ཁས་ལེན་ན་འཇིག་རྟེན་པའི་ཐ་སྙད་དག་མི་འཐད་པ་འབའ་ཞིག་ཏུ་མ་ཟད་ཀྱི། འོ་ན་ཅི་ཞེ་ན་འཇིག་རྟེན་ལས་འདས་པ་དག་ཀྱང་ཡིན་ནོ་ཞེས་བསྟན་པའི་ཕྱིར། ཞེས་གལ་ཏེ་སྟོང་པ་ཡོད་མིན་ན་ཞེས་པའི་སྟོང་པ་དེ་གང་ཡིན་ན་ཆོས་ཐམས་ཅད་བདེན་པར་གྲུབ་པའམ་རང་བཞིན་གྱིས་གྲུབ་པས་སྟོང་པར་གསལ་བར་གསུངས་པ་དང་། དེའི་ཕྱི་འགྲེལ་ལས་ཀྱང་། གལ་ཏེ་སྟོང་པ་ཡོད་པ་མ་ཡིན་ཞིང་འདི་དག་ཐམས་ཅད་རང་བཞིན་དང་བཅས་པར་འགྱུར་ན། དེའི་ཚེ་གང་མ་ཐོབ་པ་དེ་ནི་མི་ཐོབ་པ་ཁོ་ན་ཡིན་པས་འབྲས་བུ་མ་ཐོབ་པ་འཐོབ་པར་མི་འགྱུར་རོ།། དེ་བཞིན་དུ་སྡུག་བསྔལ་མཐར་བྱེད་པར་མ་གྱུར་པས་དེ་ལྟར་ཡང་མི་འགྱུར་རོ།། སླར་ཉོན་མོངས་པ་ཐམས་ཅད་སྤོང་བར་མ་གྱུར་བས་ཕྱིས་ཀྱང་སྤོང་བར་མི་འགྱུར་རོ།། དེ་ལྟར་ན་གང་གི་ཕྱིར་དངོས་པོ་རང་བཞིན་དང་བཅས་པར་སྨྲ་བར་ཁས་བླངས་པར་གྱུར་ན། ཐམས་ཅད་མི་རུང་བ་དེའི་ཕྱིར། ཞེས་གལ་ཏེ་སྟོང་པ་ཡོད་པ་མ་ཡིན་ཞིང་འདི་དག་ཐམས་ཅད་རང་བཞིན་དང་བཅས་པར་འགྱུར་ན་ཞེས་འདི་དག་ཐམས་ཅད་ཞེས་པའི་སྟོང་གཞི་ཆོས་ཅན་ཆོས་ཐམས་ཅད་ལ་བྱས་ནས་དེ་གང་གིས་སྟོང་ན་རང་བཞིན་གྱིས་གྲུབ་པའམ་བདེན་པར་གྲུབ་པས་སྟོང་པ་ལ་གསལ་བར་གསུངས་འདུག་པའི་ཕྱིར་སྟོང་ཚུལ་གཞན་ལ་གོ་རྒྱུ་མེད་པ་ཐག་བཅད་པ་མཛད་འདུག་པའི་ཕྱིར། ཁྱོད་ཅག་ཚབ་ཚུབ་ཅི་བྱས་ཀྱང་གབ་པས་ཁུངས་མི་རྙེད་འདུག་གོ།

དེར་མ་ཟད་ཁྱོད་ཅག་འདོད་པའི་དགྲ་བཅོམ་དེ་ཆོས་ཅན། འཕགས་པའི་ལམ་མ་ཐོབ་པའི་དགྲ་བཅོམ་པ་ཡིན་པར་ཐལ། འཕགས་ལམ་ཐོབ་པ་ལ་ཆོས་ཐམས་ཅད་རང་བཞིན་གྱིས་མ་གྲུབ་པ་མཐོང་དགོས་པ་ལ་དེ་མ་མཐོང་བའི་ཕྱིར། དེ་ལྟར་ཡང་རྩ་ཤེས་ལས།

གང་ཚེ་སྡུག་བསྔལ་ཀུན་འབྱུང་དག།

འགོག་པ་ཡོད་པ་མ་ཡིན་ན།།
ལམ་གྱིས་སྡུག་བསྔལ་འགོག་པ་ནི།།

གང་ཞིག་འཐོབ་པར་འགྱུར་བར་འདོད།།

ཅེས་དང་། དེའི་འགྲེལ་པ་ཚིག་གསལ་ལས་ཀྱང་། ལམ་བསྒོམས་པས་འགོག་པ་གང་ཞིག་འཐོབ་པར་འགྱུར་བ་སྡུག་བསྔལ་འགོག་པ་དེ་ནི་ཡོད་པ་མ་ཡིན་ནོ།། དེའི་ཕྱིར་དེ་ལྟར་ན་འཕགས་པའི་ལམ་ཡང་མི་འཐད་དོ།། དེ་ལྟར་ན་དངོས་པོ་རང་བཞིན་དང་བཅས་པར་སྨྲ་བ་ལ་འཕགས་པའི་བདེན་པ་བཞི་པོ་རྣམས་མེད་པར་འགྱུར་རོ།། ཞེས་དངོས་པོ་རྣམས་རང་བཞིན་གྱིས་གྲུབ་པར་སྨྲ་བ་ལ་འཕགས་པའི་ལམ་འཐོབ་པ་མི་འཐད་པར་གསུང་ན། ཁྱོད་ཅག་འདོད་པའི་དགྲ་བཅོམ་དེ་འཕགས་ལམ་མ་ཐོབ་པའི་དགྲ་བཅོམ་དུ་ཐལ་བ་བཟློག་ཏུ་མེད་དེ། དེ་དག་དངོས་པོ་རྣམས་རང་བཞིན་གྱིས་གྲུབ་པ་སྨྲ་བའི་གང་ཟག་ཡིན་པའི་ཕྱིར། རྟགས་ཁྱབ་ལུང་གིས་གྲུབ། ཡང་འཇུག་པ་རང་འགྲེལ་ལས། དེ་ཡང་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ཉོན་མོངས་ཅན་གྱི་མ་རིག་པ་འདུ་བྱེད་གཟུགས་བརྙན་ལ་སོགས་པའི་ཡོད་པ་ཉིད་དང་འདྲ་བར་གཟིགས་པ་རྣམས་ལ་ནི་བཅོས་མའི་རང་བཞིན་ཡིན་གྱི་བདེན་པ་ནི་མ་ཡིན་ཏེ། བདེན་པར་མངོན་པར་རློམ་པ་མེད་པའི་ཕྱིར་རོ།། ཞེས་ཉན་རང་འཕགས་པ་དང་བྱང་སེམས་འཕགས་པ་རྣམས་ཆོས་ཐམས་ཅད་བདེན་མེད་དུ་རྟོགས་པའི་གང་ཟག་ཏུ་བཞེད་འདུག་པའི་ཕྱིར། ཉན་རང་འཕགས་པས་ཆོས་ཀྱི་བདག་མེད་མ་རྟོགས་པ་དང་། བདེན་འཛིན་ཉོན་སྒྲིབ་མ་ཡིན་པའི་གབ་ཁུང་བཙལ་ས་ཅི་ཞིག་ཡོད། དེ་ལ་འདིས་བདེན་པར་མངོན་པར་རློམ་པ་མེད་པའི་ཕྱིར་ཞེས་ཤིན་ཏུ་གསལ་བ་གསུངས་འདུག་པའི་ཕྱིར། དེས་ན་ཕྱི་ནང་གི་ཆོས་ཐམས་ཅད་བཅོས་མའི་རང་བཞིན་ལས་བདེན་པར་གྲུབ་པ་མ་གཟིགས་པའི་གང་ཟག་ལ་ཉན་རང་དགྲ་བཅོམ་དང་། དག་ས་ན་བཞུགས་པའི་བྱང་ཆུབ་སེམས་དཔའ་རྣམས་ཟླ་བའི་ཞབས་ཀྱིས་བགྲངས་པ་ལས། ཁྱོད་ཀྱི་ཉན་རང་དགྲ་བཅོམ་གཉིས་དེའི་སྐྱིད་སྡུག་ལས་ཕུད་དགོས་པའི་ནག་ཉེས་ཅི་བྱས་པའང་སྨྲ་བར་རིགས་སོ།།

ཡང་ཁྱོད་ཀྱིས་༼མི་ཕམ་གྱིས་༽དེའི་ཕྱིར་ན་སྒྲིབ་པ་གཉིས་པོ་འདི་ནི་ཐར་པ་དང་ཐམས་ཅད་མཁྱེན་པ་ལ་གེགས་བྱེད་པའི་གཙོ་བོའི་རིགས་སུ་གནས་པའི་ཆ་ནས་བཞག་པ་སྟེ། འཇིག་ལྟ་ལས་བྱུང་བའི་ཉོན་མོངས་པ་རྣམས་ལ་ཉོན་སྒྲིབ་དང། འཁོར་གསུམ་དུ་རྟོག་པ་ལས་བྱུང་བའི་ཉོན་མོངས་པ་རྣམས་ལ་ཤེས་སྒྲིབ་ཅེས་གསུངས་ཤིང་། ཞེས་སོགས་སྨྲས་འདུག་པ་ལ། ཁྱོད་ཅག་གིས་འཁོར་གསུམ་རྣམ་པར་རྟོག་པ་གང་ཞེས་པའི་འཁོར་གསུམ་དུ་རྟོག་ཚུལ་དེ་ཇི་ལྟ་བུ་ཞིག་ལ་བརྩི་བ་ཡིན། འཁོར་གསུམ་རང་ངོས་ནས་གྲུབ་པའམ་བདེན་པར་གྲུབ་པར་རྣམ་པར་རྟོག་པ་ལ་བརྩི་བ་ཡིན་ནམ། གཞི་གང་གི་འཁོར་གསུམ་བདེན་པར་གྲུབ་པའམ་རང་ངོས་ནས་གྲུབ་པར་རྣམ་པར་རྟོག་པའི་བག་ཆགས་གཉིས་སྣང་འཁྲུལ་བའི་ཆ་ཙམ་ལ་བྱེད། དང་པོ་ལྟར་ན། འཁོར་གསུམ་རྣམ་པར་རྟོག་པ་གང་།། དེ་ནི་ཤེས་བྱའི་སྒྲིབ་པ་གསུང་བ་མི་འཐད་པར་ཐལ། འཁོར་གསུམ་རང་ངོས་ནས་གྲུབ་པར་རྣམ་པར་རྟོག་པ་དེ་ཉོན་སྒྲིབ་ཡིན་པའི་ཕྱིར། མ་གྲུབ་ན། དེར་ཐལ། གཞི་ཆོས་དང་གང་ཟག་གང་རུང་ལ་དམིགས་ནས་དེ་བདེན་པའམ་རང་ངོས་ནས་གྲུབ་པར་འཛིན་པ་དེ་ཉོན་སྒྲིབ་ཡིན་པ་གོང་དུ་མང་དུ་སྒྲུབ་ཟིན་པས་གྲུབ་པའི་ཕྱིར། གཞན་ཡང་དེ་ལྟ་བུ་ཉོན་སྒྲིབ་མ་ཡིན་ན་གཞི་གང་ཟག་ལ་དམིགས་ནས་དེའི་འཁོར་གསུམ་རང་ངོས་ནས་གྲུབ་པ་རྣམ་པར་རྟོག་པ་དང་། གཞི་ཆོས་ལ་དམིགས་ནས་དེ་ལྟར་རྣམ་པར་རྟོག་པ་གཉིས་ལས་ཉོན་སྒྲིབ་མ་ཡིན་པ་དེ་གང་ཡིན། གཉིས་ཀ་མ་ཡིན་ཟེར་རམ་ཅི། གཉིས་ཀ་མ་ཡིན་ཟེར་ན་ཁྱོད་ཀྱིས་གང་ཟག་རང་ངོས་ནས་གྲུབ་པར་འཛིན་པའི་འཇིག་ལྟ་ལྷན་སྐྱེས་འཁོར་བའི་རྩ་བ་འདོད་པའང་ཉམས་སོ།། དང་པོ་ལས། གང་ཟག་ལ་དམིགས་ནས་རང་ངོས་ནས་གྲུབ་པར་རྟོག་པ་དེ་ཉོན་སྒྲིབ་ཡིན་ཀྱང་། གཞི་ཆོས་ལ་དམིགས་ནས་དེ་ལྟར་རྣམ་པར་རྟོག་པ་དེ་ཉོན་སྒྲིབ་མ་ཡིན་པ་གོང་དུ་མང་དུ་མ་སྨྲས་སམ་སྙམ་ན། དེ་ལ་ཁྱོད་ཀྱིས་གང་ཟག་བདེན་པར་གྲུབ་པ་འཛིན་པ་ཉོན་སྒྲིབ་ཏུ་བྱས་ནས་དེ་ཉན་རང་གིས་སྤངས་ཀྱང་། ཕུང་སོགས་བདེན་འཛིན་ཤེས་སྒྲིབ་ཡིན་པས་དེ་སྤང་མི་ནུས་སྙམ་པའི་འཚངས་འདི་བརྟོལ་བར་བྱ་སྟེ། ཁས་ལེན་དེ་ལྟར་ན། ཁྱོད་ཀྱིས་དྲངས་པའི་རྩ་ཤེས་རབ་བྱེད་བཅོ་བརྒྱད་པ་ལས།

ནང་དང་ཕྱི་རོལ་ཉིད་དག་ལ།།

བདག་དང་བདག་གི་སྙམ་ཟད་ན།།
ཉེ་བར་ལེན་པ་འགག་འགྱུར་ཞིང་།།
དེ་ཟད་པས་ན་སྐྱེ་བ་ཟད།།

ལས་དང་ཉོན་མོངས་ཟད་པས་ཐར།།

ཞེས་གསུངས་པ་འདིས་ཁྱོད་ལ་གནོད་པར་འགྱུར་ཏེ། རྩ་ཤེས་ལུང་འདིའི་ནང་དང་ཞེས་པས་ནང་གི་དངོས་པོ་མིག་སོགས་དང་། ཕྱི་རོལ་གྱི་དངོས་པོ་གཟུགས་སྒྲ་ལ་སོགས་པ་དག་ལ་དམིགས་ནས་བདག་རང་བཞིན་གྱིས་གྲུབ་པ་དང་། བདག་གི་བ་རང་བཞིན་གྱིས་གྲུབ་པོ་སྙམ་པའི་འཛིན་པ་དེ་ཟད་ན་ཉེར་ལེན་འགག་པ་དང་། སྐྱེ་བ་ཟད་པ་གསུང་པ་ཡིན་པའི་ཕྱིར། ཁྱོད་ལ་ལུང་འདིས་ངར་འཛིན་ལྷན་སྐྱེས་ཀྱིས་འཁོར་བ་འགྲུབ་པ་ཙམ་ལས་ཆོས་ཀྱི་བདག་འཛིན་གྱིས་འཁོར་བའི་སྐྱེ་བ་འགྲུབ་པ་མ་བསྟན་ན་དགའ་བ་འདུག་ཀྱང་། ལུང་འདིས་ནང་དང་ཕྱི་རོལ་ཞེས་གསལ་བར་གསུང་འདུག་པའི་ཕྱིར་སེམས་ལ་འཕྲད་པར་མ་བྱུང་ཡང་ཕྱི་ནང་གི་ཆོས་ཐམས་ཅད་བདེན་པར་རམ་རང་ངོས་ནས་གྲུབ་པར་འཛིན་པ་དེ་འཁོར་བའི་རྩ་བར་ཁས་མི་ལེན་ཀ་མེད་ཨེ་རེད་ད་ཁ་ནང་དུ་ཕྱོགས་ལ་སོམས་ཤིག།

བདག་དང་བདག་གིར་འཛིན་པ་ཞེས་གསུངས་པའི་དོན་ཡང་སྔར་བསྟན་པ་ལྟར་ནང་དང་ཕྱི་རོལ་གྱི་དངོས་པོ་རྣམས་ལ་དམིགས་པ་ཡིན་པ་ནི། ཚིག་གསལ་ལས།

བདག་དང་བདག་གིར་ཞི་བའི་ཕྱིར།།
ངར་འཛིན་ང་ཡིར་འཛིན་མེད་འགྱུར།།

ཞེས་པའི་ཐད་ཀྱི་འགྲེལ་པར། བདག་ལ་ཕན་པ་ནི་བདག་གི་སྟེ། བདག་གི་བའི་ཕུང་པོ་ལྔ་ཞེས་བྱ་བའི་དོན་ནོ།། བདག་སྟེ་ངར་འཛིན་པའི་ཡུལ་དང་ང་ཡིར་འཛིན་པའི་ཡུལ་བདག་གི་བ་ཕུང་པོ་ལ་སོགས་པའི་དངོས་པོ་ཞིག་སྟེ་ཞེས་དང་། བུདྡྷ་པ་ལི་ཏ་ལས་ཀྱང་།

བདག་ཉིད་ཡོད་པ་མ་ཡིན་ན།།
བདག་གི་ཡོད་པར་ག་ལ་འགྱུར།།

ཞེས་པའི་འགྲེལ་པར། བདག་དེ་ཡང་མེད་དེ་དེ་མེད་ན་དེའི་འདི་ཡིན་ནོ་ཞེས་བྱ་བ་ཇི་ལྟར་འཐད་པར་འགྱུར། དེ་ལྟ་བས་ན་བདག་གི་ཡང་མི་འཐད་དོ།། དེ་ལྟར་ཕྱི་དང་ནང་ལ་བདག་དང་བདག་གིར་མི་ལྟ་བ་དེ་ནི་དེ་ཁོ་ན་མཐོང་བ་ཡིན་ཏེ། ཞེས་བདག་བདེན་པར་གྲུབ་པ་མེད་ན། བདག་དེའི་མིག་སྣ་སོགས་གང་བདག་གིར་འཛིན་རྒྱུའི་དངོས་པོ་རྣམས་ཀྱང་བདེན་པར་གྲུབ་པ་མི་འཐད་པ་གསུང་པས་རྩ་འགྲེལ་ཐམས་ཅད་ཀྱིས་བདག་གི་བ་ཕུང་པོ་ལྔ་དང་གཟུགས་སྒྲ་སོགས་ཡིན་པར་གྲུབ། དེ་གྲུབ་ན་ཕུང་པོ་དང་གཟུགས་སོགས་བདེན་པར་གྲུབ་པར་འཛིན་པ་མ་བཟློག་ན། འདོད་པ་ཉེར་ལེན་དང་ལྟ་བ་ཉེར་ལེན་ཚུལ་ཁྲིམས་བརྟུལ་ཞུགས་མཆོག་འཛིན་ཉེར་ལེན་བདག་ཏུ་སྨྲ་བ་ཉེ་བར་ལེན་པ་རྣམས་སྤང་མི་ནུས་ལ། དེ་མ་ནུས་ན་དེའི་རྐྱེན་གྱིས་ཡང་སྲིད་པའི་མཚན་ཉིད་ཅན་གྱིས་སྐྱེ་བ་ཟད་པར་མི་འགྱུར་བ་ལུང་རིགས་ཀྱིས་ཆེས་ཆེར་གསལ་བར་གྲུབ་ལ། དེ་གྲུབ་པས་བདེན་འཛིན་ཉོན་སྒྲིབ་ཡིན་པ་དང་། ཆོས་ཀྱི་བདག་འཛིན་འཁོར་བའི་རྩ་བ་ཡིན་པ་དང་། ཉན་རང་དགྲ་བཅོམ་གྱིས་ཆོས་ཀྱི་བདག་མེད་ངེས་པར་རྟོགས་དགོས་པ་འབད་མེད་དུ་གྲུབ་པའི་ཕྱིར་རོ།།

གལ་ཏེ་འཁོར་བ་ལས་མ་ཐར་བའི་རིང་ལ་བདེན་འཛིན་ཤེས་སྒྲིབ་དེས་ཀྱང་ཐར་པ་ཐོབ་པ་ལ་གེགས་མི་བྱེད་པ་མ་ཡིན་ཀྱང་ཞེས་ཁོ་བོས་གོང་དུ་སྨྲས་པ་མ་ཚོར་རམ། ལུང་འདི་རྣམས་ལས་བདག་གི་བ་ཕྱི་ནང་གི་དངོས་པོ་རྣམས་བདེན་པར་འཛིན་པ་དེས་འཁོར་བ་འགྲུབ་པའི་གྲོགས་ཙམ་བྱེད་པའི་དོན་ཡིན་གྱི་དེས་འཁོར་བའི་རྩ་བ་བྱེད་པའི་དོན་མ་ཡིན་སྙམ་ན། བདག་གི་བ་ཕྱི་ནང་གི་དངོས་པོ་རྣམས་བདེན་པར་འཛིན་པའི་བདེན་འཛིན་དེ་འཁོར་བའི་རྩ་བ་ཡིན་པའི་ཕྱིར་ཏེ། བུདྡྷ་པ་ལི་ཏ་ལས། འདི་ལ་ཉེ་བར་ལེན་པ་གཏན་དུ་ཉེ་བར་ཞི་བ་གང་ཡིན་པ་དེ་མྱ་ངན་ལས་འདས་པ་ཞེས་བྱ་ན། ཉེ་བར་ལེན་པ་ཐམས་ཅད་ཀྱི་རྩ་བ་ནི་བདག་དང་བདག་གིར་འཛིན་པ་ཡིན་པས་ཞེས་བདག་དང་བདག་གིར་འཛིན་པ་གཉིས་ཀ་ཉེ་བར་ལེན་པའི་རྩ་བ་ཡིན་པ་དངོས་སུ་གསུང་འདུག་པའི་ཕྱིར་ལུང་གིས་གནོད་བྱེད་འདི་རྣམས་ལས་ཁྱོད་ཀྱིས་གབ་ཁུང་འཚོལ་ས་མི་རྙེད་འདུག་གོ།

གཞན་ཡང་གང་ཟག་རང་ངོས་ནས་མ་གྲུབ་པ་རྟོགས་ན་གང་ཟག་དེའི་ཕུང་སོགས་ཀྱང་རང་ངོས་ནས་མ་གྲུབ་པ་རྟོགས་དགོས་པའི་ཕྱིར་ཏེ། གོང་གི་བུདྡྷ་པ་ལི་ཏའི་ལུང་ལས། བདག་དེ་ཡང་མེད་དེ་དེ་མེད་ན་དེའི་འདི་ཡིན་ནོ་ཞེས་བྱ་བ་ཇི་ལྟར་འཐད་པར་འགྱུར་གསུངས་པ་ལྟར་ཡིན་པའི་ཕྱིར་ཏེ། དཔེར་ན་ཁྱོད་མི་ཕམ་བདེན་པར་མ་གྲུབ་ན། བདེན་པར་མ་གྲུབ་པའི་མི་ཕམ་དེའི་བརྟེན་གཞི་ཕུང་པོ་བདེན་གྲུབ་དུ་ཇི་ལྟར་འཐད་པར་འགྱུར་ཏེ། ཁྱོད་ལ་ནང་དུ་ཕྱོགས་ནས་སོམས་དང་། རྟེན་པ་མི་ཕམ་ཉིད་བདེན་པར་མ་གྲུབ་ཀྱང་། མི་ཕམ་གྱི་རྟེན་དུ་གྱུར་པའི་ཕུང་པོ་ལྔ་པོ་འདི་བདེན་པ་གྲུབ་པོ་སྙམ་དུ་བསམ་ལུགས་མེད་པའི་ཕྱིར། མ་གྲུབ་ན། དེར་ཐལ། མི་ཕམ་རང་རྒྱུད་ཀྱི་བདག་བདེན་པའམ་རང་ངོས་ནས་མ་གྲུབ་པ་སྒོམ་པའི་ཚེ་རིགས་པ་ཡང་དག་གཅིག་ལ་བརྟེན་ནས་སྒོམ་དགོས་པ་ནི་གང་ཞིག དཔེར་ན་རྟེན་འབྲེལ་གྱི་གཏན་ཚིག་ལྟ་བུ་ཞིག་གིས་བསྒོམ་ན། མི་ཕམ་རང་རྒྱུད་ཀྱི་བདག་ཆོས་ཅན། བདེན་པ་མེད་དེ། རྟེན་འབྲེལ་ཡིན་པའི་ཕྱིར། ཞེས་བཀོད་པའི་ཚེ་གང་རྟེན་འབྲེལ་ཡིན་ན་བདེན་པ་མེད་པའི་ཁྱབ། དཔེར་ན་གཟུགས་བརྙན་བཞིན་མི་ཕམ་རང་རྒྱུད་ཀྱི་བདག་ཀྱང་བདེན་པ་མེད་དོ་སྙམ་དུ་ངེས་པ་འདྲེན་དགོས་སམ་མི་དགོས། མི་དགོས་ན་སྦྱོར་བ་དེ་བསྐོར་ལ་ངེས་པ་འདྲེན་ཚུལ་ཇི་ལྟར་ཡིན། དགོས་ན་མི་ཕམ་རང་རྒྱུད་ཀྱི་བདག་བདེན་མེད་དུ་ངེས་པ་ལ། གང་རྟེན་འབྲེལ་ཡིན་ན་བདེན་མེད་ཡིན་པས་ཁྱབ་པ་ངེས་པ་དེ་སྔོན་དུ་འགྲོ་དགོས། དེ་དགོས་ན་རྟེན་འབྲེལ་གྱི་རྟགས་ཀྱིས། མི་ཕམ་རང་རྒྱུད་ཀྱི་བདག་བདེན་མེད་དུ་ངེས་པའི་རྗེས་དཔག་སྐྱེས་ཚར་བའི་རྗེས་སུ་སྔར་གྱི་རྟགས་སྦྱོར་དེ་དྲན་པར་འགྱུར་རམ་མི་འགྱུར། དེ་མི་དྲན་པ་མི་འཐད་པས་དྲན་ན། གང་རྟེན་འབྲེལ་ཡིན་ན་བདེན་མེད་ཡིན་པས་ཁྱབ་པ་དེ་དྲན་པའི་ཚེ། རྟེན་འབྲེལ་ཡིན་ན་བདེན་མེད་ཡིན་པས་ཁྱབ་ཀྱང་། མི་ཕམ་བདག་གི་ཕུང་པོ་འདི་དག་ནི་རྟེན་འབྲེལ་མ་ཡིན་ནོ་སྙམ་དུ་བསམ་ལུགས་དེ་འདུག་གམ་མི་འདུག་སོམས་ཤིག། དེ་ལྟར་བསམ་ལུགས་ཡོད་ན་རྟེན་འབྲེལ་ཡིན་ན་བདེན་མེད་ཡིན་པས་ཁྱབ་པ་མ་ངེས་པར་ཐལ་ཏེ། མི་ཕམ་གྱི་གཟུགས་ཀྱི་ཕུང་པོ་སོགས་ཀྱིས་མ་ངེས་པའི་ཕྱིར། དེ་ལྟར་བསམ་ལུགས་མེད་ན་མི་ཕམ་གྱི་ཕུང་པོ་རྟེན་འབྲེལ་གང་ཞིག་བདེན་མེད་དུ་སོང་འདུག་པའི་ཕྱིར། སྔར་གྱི་སྦྱོར་བ་དེའི་ཕྱོགས་ཁྱབ་དྲན་པའི་ཚེ། མི་ཕམ་རང་རྒྱུད་ཀྱི་བདག་བདེན་མེད་ཡིན་པ་ཙམ་དུ་མ་ཟད་གཟུགས་ཀྱི་ཕུང་པོ་ལ་སོགས་པའི་ཕུང་པོ་ལྔ་པོ་འདི་ཡང་བདེན་པ་མེད་དོ་སྙམ་དུ་ངེས་པར་འགྱུར་ན། གཟུགས་ཕུང་སོགས་བདེན་མེད་ངེས་པ་དེ་ཆོས་ཀྱི་བདག་མེད་ཡིན་པའི་ཕྱིར། གང་ཟག་བདེན་མེད་དུ་རྟོགས་ཟིན་ན་ཆོས་ཀྱི་བདག་མེད་ཀྱང་མྱུར་དུ་མི་རྟོགས་པ་མི་སྲིད་པའི་ཕྱིར། དེ་ལྟར་ཡང་བཞི་བརྒྱ་པ་ལས།

དངོས་པོ་གཅིག་གི་ལྟ་པོ་གང་།།

དེ་ནི་ཀུན་གྱི་ལྟ་པོ་ཡིན།།
གཅིག་གི་སྟོང་ཉིད་གང་ཡིན་པ།།

དེ་ནི་ཀུན་གྱི་སྟོང་པ་ཡིན།།

ཞེས་དང་། མདོ་ལས།

གང་གི་དངོས་གཅིག་དེ་བཞིན་ཉིད་མཐོང་བ།།
དེ་ཡི་དངོས་ཀུན་དེ་བཞིན་ཉིད་དུ་མཐོང་།།

ཞེས་དངོས་པོ་གང་ཟག་ལྟ་བུ་གཅིག་རང་བཞིན་གྱིས་གྲུབ་པས་སྟོང་ལུགས་དང་། དེ་ལས་གཞན་ཕུང་སོགས་རང་བཞིན་གྱིས་གྲུབ་པས་སྟོང་ལུགས་གཉིས་ལ་སྟོང་ཚུལ་མི་འདྲ་བའི་ཁྱད་པར་ཅུང་ཟད་ཀྱང་མེད་ལ། དེ་ལྟར་ཡུལ་རྣམས་ལ་སྟོང་ཚུལ་མི་འདྲ་བའི་ཁྱད་པར་མེད་པ་དེ་བཞིན་དུ། ཡུལ་ཅན་བདག་ཏུ་མ་གྲུབ་པར་ལྟ་བའི་ལྟ་བ་ལའང་དགག་བྱ་རང་བཞིན་གྱིས་གྲུབ་པ་བཀག་ཙམ་དུ་རྟོགས་པ་ལ་མི་འདྲ་བའི་ཁྱད་པར་མེད་ཅིང་། ཕུང་སོགས་ཕྱི་རོལ་གྱི་དངོས་པོ་མཐའ་དག་རང་བཞིན་གྱིས་མ་གྲུབ་པར་རྟོགས་པ་ལ་རྒྱུ་མཚན་ཟུར་པ་བཀོད་མི་དགོས་པར་སྔར་གང་ཟག་བདེན་མེད་དུ་སྒྲུབ་པའི་སྦྱོར་བ་དེས་ཕྱོགས་ཀྱང་དྲན་པ་ཙམ་ནས་དེ་དག་རང་ངོས་ནས་མ་གྲུབ་པར་རྟོགས་ནུས་པ་གསུངས་པའི་ཕྱིར། དེ་ལྟར་ཡིན་པ་ནི་བཞི་བརྒྱ་པའི་འགྲེལ་པ་ལས་ཀྱང་། གཟུགས་ཀྱི་རང་བཞིན་སྟོང་པ་ཉིད་གང་ཡིན་པ་དེ་ཉིད་ཚོར་བ་ལ་སོགས་པ་ཕུང་པོ་རྣམས་ཀྱི་རང་བཞིན་སྟོང་པ་ཉིད་དོ།། ཞེས་སོགས་དང་། གཟུགས་ལ་སོགས་པའི་དངོས་པོ་ཐ་དད་ཀྱང་གཟུགས་ལ་སོགས་པ་རྣམས་ཀྱི་རང་བཞིན་གྱིས་མ་སྐྱེས་པ་ལ་ཐ་དད་པ་མེད་པའི་ཕྱིར། ཆོས་གཅིག་ཁོ་ནས་རང་བཞིན་གྱིས་མ་སྐྱེས་པ་ཡོང་སུ་ཤེས་ན་ཆོས་ཐམས་ཅད་ཀྱི་རང་བཞིན་གྱིས་མ་སྐྱེས་པ་ཡང་ཡོངས་སུ་ཤེས་པར་འགྱུར་ཏེ། དེ་བཞིན་དུ་སྤང་བ་ལ་སོགས་པ་དག་ལའང་སྦྱར་བར་བྱའོ།། ཞེས་ཕྱི་ནང་གི་དངོས་པོ་རྣམས་ཆོས་ཅན་ཐ་དད་ཀྱང་ཆོས་ཉིད་ཐ་མི་དད་པ་རྒྱུ་མཚན་དུ་བྱས་ནས་ཆོས་གཅིག་གི་རང་བཞིན་བདེན་མེད་ཤེས་ན་ཆོས་ཐམས་ཅད་ཀྱི་རང་བཞིན་བདེན་མེད་ཡོངས་སུ་ཤེས་པའམ་བདེ་བླག་ཏུ་ཤེས་པར་གསུངས་པའི་ཕྱིར་དང་། ཡང་དེ་དག་དཔེ་དང་བཅས་པས་ཀྱང་གསུངས་ཏེ། རྒྱ་མཚོའི་ཆུའི་ཐིག་པ་འཐུང་བ་བཞིན་ནོ།། ཇི་ལྟར་རོ་མཚུངས་པའི་ཕྱིར་གཅིག་ཏུ་རྒྱ་མཚོའི་རོ་མྱངས་ན་ཐམས་ཅད་དུ་རོ་མྱང་བར་འགྱུར་བ་དེ་བཞིན་དུ་དངོས་པོ་རྣམས་ཀྱི་འདུས་བྱས་སྟོང་པ་ཉིད་ཀྱང་ཡིན་ཏེ། མཚན་ཉིད་མཚུངས་པའི་ཕྱིར་རོ།། ཞེས་རྒྱ་མཚོའི་ནང་ནས་ཐིག་པ་གཅིག་འཐུང་བའི་རོ་ཇི་ལྟ་བུ་ཡིན་པ་དེ་རྒྱུ་མཚན་དུ་བྱས་ནས་རྒྱ་མཚོའི་ཆུ་ཐམས་ཅད་ཀྱི་རོ་ཡང་དེ་དང་མཚུངས་སོ་སྙམ་དུ་རྟོགས་ནུས་པ་དེ་བཞིན་དུ། དངོས་པོ་རྣམས་ཀྱི་སྟོང་ཉིད་ཀྱང་གང་ཟག་བདེན་མེད་ལྟ་བུ་གཅིག་ངེས་པ་རྒྱ་མཚོའི་ཆུ་ཐིག་འཐུང་བ་ལྟ་བུ་དེས། གཟུགས་སྒྲ་སོགས་དངོས་པོ་ཐམས་ཅད་ཀྱི་ཆོས་ཉིད་བདེན་པའི་སྐྱེ་བ་མེད་པའི་ཚུལ་ཡང་དེ་བཞིན་ཡིན་ནོ་སྙམ་དུ་རྟོགས་པར་འགྱུར་ཏེ། དེ་དག་གི་མཚན་ཉིད་ལ་མི་མཚུངས་པ་མེད་པའི་ཕྱིར་རོ་ཞེས་པའི་དོན་ཡིན་པའི་ཕྱིར། དེས་ན་ཆོས་གཅིག་གིས་རང་བཞིན་སྟོང་པ་ཉིད་མཐོང་བས་ཆོས་ཐམས་ཅད་ཀྱི་རང་བཞིན་སྟོང་པ་ཉིད་མཐོང་བ་ལ་རྒྱུ་མཚན་ཟུར་པ་བཀོད་མི་དགོས་པ། དཔེར་ན་རྒྱ་མཚོའི་ཆུ་ཐིག་གཅིག་འཐུང་བའི་རོ་གང་ཡིན་པ་རྟོགས་ནས་རྒྱ་མཚོ་མཐའ་དག་གི་རོ་རྟོགས་པར་བྱེད་པའི་རྒྱུ་མཚན་ཟུར་པ་བཀོད་མི་དགོས་པ་རྟོགས་ནུས་པའི་མཐུན་དཔེ་དང་བཅས་པའི་རིགས་ཡང་དག་པ་ལུང་གི་རྒྱབ་བརྟེན་དང་བཅས་པ་འདི་དག་ཁྱོད་ཅག་གི་ཡིད་ཆེས་པའི་གནས་སུ་ཟུངས་ལ་ཉན་རང་དགྲ་བཅོམ་གྱིས་གང་ཟག་རང་བཞིན་གྱིས་མ་གྲུབ་པ་རྟོགས། ཆོས་རང་བཞིན་གྱིས་མ་གྲུབ་པ་མ་རྟོགས་ཅེས་སྨྲ་བའི་ཁུངས་མེད་བཞིན་དུ་མ་སྨྲ་ཞིག དེ་ལྟར་གང་ཟག་གི་བདག་བདེན་མེད་དུ་རྟོགས་ཟིན་ནས་ཆོས་ཀྱི་བདག་མེད་ཀྱང་བདེ་བླག་ཏུ་རྟོགས་ནུས་པ་ལུང་རིགས་ཀྱིས་གྲུབ་པ་དེ་ལྟར་ན། ཆོས་ཀྱི་བདག་འཛིན་ཉོན་སྒྲིབ་མ་ཡིན་པའི་དམ་བཅའ་རང་ཞིག་ཏུ་སོང་སྟེ། ཉན་རང་དགྲ་བཅོམ་གྱིས་ཉོན་སྒྲིབ་ལས་ཤེས་བྱའི་སྒྲིབ་པ་ཅུང་ཟད་ཀྱང་སྤོང་མི་ནུས་པ་གང་ཞིག། ཆོས་བདེན་པར་འཛིན་པའི་བདེན་འཛིན་དེ་ཉན་རང་དགྲ་བཅོམ་གྱིས་སྤོང་བ་དེ་ལྟར་ན་དེ་སྒྲིབ་གཉིས་གང་རུང་གང་ཞིག་ཉོན་མོངས་པའི་སྒྲིབ་པ་ལས་མ་འདས་པའི་ཕྱིར། དེ་ལྟར་ན་གཞི་གང་གི་འཁོར་གསུམ་བདེན་པར་གྲུབ་པར་འཛིན་པའི་བདེན་འཛིན་གྱི་རྣམ་པ་རྟོག་པའང་ཆོས་ཅན། ཤེས་སྒྲིབ་ཡིན་པར་ཐལ། ཁྱོད་ཉན་རང་དགྲ་བཅོམ་རྣམས་ཀྱིས་ཀྱང་སྤངས་ནུས་པའི་སྒྲིབ་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཉན་རང་འཕགས་པ་རྣམས་ཀྱིས་གང་ཟག་བདེན་མེད་དུ་ངེས་པར་བྱེད་པའི་རྟགས་ཡང་དག་གི་ཕྱོགས་ཁྱབ་དྲན་པ་ཙམ་གྱིས། ཆོས་ཐམས་ཅད་བདེན་མེད་དུ་རྟོགས་ནུས་པ་གང་ཞིག་རྟོགས་པ་དེ་ལ་གོམས་པ་ཡུན་སྲིངས་པས་ཆོས་ཐམས་ཅད་འཁོར་གསུམ་དུ་རྣམ་པར་རྟོག་པའི་བདེན་འཛིན་སྤངས་ནུས་པའི་ཕྱིར། འཁོར་གསུམ། དེས་ན་གྲུབ་མཐའ་འོག་མས་འདོད་པ་ལྟར་གྱི་འཁོར་གསུམ་རྣམ་པར་རྟོག་པ་ཤེས་སྒྲིབ་ཡིན་ཅེས་ལུགས་འདིར་རྣམ་པ་ཀུན་ཏུ་བཞེད་པ་མ་ཡིན་པའི་ཕྱིར་རོ།།

འོ་ན་ལུགས་འདིར། འཁོར་གསུམ་རྣམ་པར་རྟོག་པ་གང་།། དེ་ནི་ཤེས་བྱའི་སྒྲིབ་པ་འདོད།། ཅེས་པ་ཇི་ལྟར་དྲངས་སྙམ་ན། དེ་ཡང་ཡོད་དེ། སྐབས་འདིར་དེ་ལྟར་གསུངས་པ་འཁོར་གསུམ་དུ་བདེན་པར་འཛིན་པའི་བདེན་འཛིན་གྱི་རྣམ་རྟོག་དེའི་བག་ཆགས་མཐར་ཐུག་པ་ནི་ཤེས་སྒྲིབ་ཡིན་ཞེས་པའི་དོན་ཡིན་པའི་ཕྱིར། ལུང་དེའི་དོན་དེ་ལྟར་ཡིན་པའི་ཁུངས་གཞན་སྟོན་རྒྱུ་ཡོད་ཀྱང་། སྔར་གྱི་རིགས་པའི་འཕུལ་འཚམས་བསྟན་ཟིན་པ་དེ་དག་གིས་ཤེས་པར་སླ་བ་ཡིན་པའི་ཕྱིར་མ་བསྟན་ནོ།། རྒྱུ་མཚན་འདི་རྣམས་ཀྱིས་ན། ཁྱོད་ཀྱིས་༼མི་ཕམ་གྱིས་༽འཁོར་བའི་རྩ་བ་འཇིག་ལྟ་ལྷན་སྐྱེས་ལོག་ན་དེ་ལས་བྱུང་བའི་འཁོར་བ་འགྲུབ་བྱེད་ཀྱི་རྐྱེན་ཉོན་མོངས་པ་ཐམས་ཅད་ལྡོག་ངེས་པས་ཐར་པ་འཐོབ་ན་ཡང་། དེ་ཙམ་གྱིས་ཐམས་ཅད་མཁྱེན་པར་འགྱུར་བའི་སྒྲིབ་པ་སྤོང་མི་ནུས་ལ། ངར་འཛིན་ལྷན་སྐྱེས་སྤངས་པ་ན་འཁོར་གསུམ་དུ་བདེན་པར་རྟོག་ཀྱང་དེ་ཙམ་གྱིས་ཉོན་མོངས་པ་མི་སྐྱེ་སྟེ། རྐྱེན་མ་ཚང་བའི་ཕྱིར་རོ་ཞེས་སྨྲས་འདུག་པ་སོགས་མི་འཐད་པར་ཤེས་ནུས་ཏེ་ངར་འཛིན་ལྷན་སྐྱེས་ལོག་ནས་འཁོར་གསུམ་བདེན་པར་གྲུབ་པར་རྟོག་པ་མི་འཐད་པ་ལུང་རིགས་དེ་རྣམས་ཀྱིས་གྲུབ་པའི་ཕྱིར།

ཡང་ཁྱོད་ཀྱིས་༼མི་ཕམ་གྱིས་༽དེས་ན་གོང་གི་ཐལ་བ་འཕེན་པ་ལ་ལན་ཅུང་ཟད་བརྗོད་ན། བདག་འཛིན་གཉིས་ཀ་ས་བོན་དང་བཅས་པ་སྤངས་པའི་གང་ཟག་ཡིན་ན་ཤེས་སྒྲིབ་སྤོང་བས་མ་ཁྱབ་པར་ཐལ། འདོད་པའི་ཕྱིར། འདོད་ན། བདག་མེད་གཉིས་ཀ་མངོན་སུམ་དུ་རྟོགས་པའི་ཡེ་ཤེས་ཆོས་ཅན། ཁྱོད་དང་ཤེས་སྒྲིབ་སྤང་གཉེན་གྱི་ཚུལ་དུ་རྒྱུད་གཅིག་ལ་ལྷན་ཅིག་མི་གནས་པའི་འགལ་བ་མ་ཡིན་པར་ཐལ། ཁྱོད་དང་ཤེས་སྒྲིབ་མཐའ་དག་གང་ཟག་གཅིག་གི་རྒྱུད་ལ་བསྐལ་པ་གྲངས་མེད་གཅིག་སོགས་ཀྱི་ཡུན་དུ་འགྲོགས་པར་སྲིད་པའི་ཕྱིར། རྟགས་གྲུབ་སྟེ་མ་དག་ས་བདུན་པའི་རྒྱུད་ཀྱི་དེ་གཉིས་དེ་ལྟར་ཡིན་པར་འདོད་པའི་ཕྱིར། འདོད་མི་ནུས་ཏེ། སྤྱིར་བདག་མེད་གཉིས་རྟོགས་ཀྱི་མཁྱེན་པ་དང་། ཤེས་སྒྲིབ་འགལ་བར་མེད་ན། ཚོགས་མཐའ་ཡས་པས་ཟིན་ཀྱང་འགལ་བ་མེད་པའི་ཕྱིར། བྱང་སེམས་སྒྲིབ་གཉིས་སྤངས་པའི་ཐམས་ཅད་མཁྱེན་པ་ཐོབ་ཕྱིར་ཆོས་བདག་མེད་པ་བསྟན་ནོ་ཞེས་པའི་ལུང་དང་འགལ་བའི་ཕྱིར་རོ།། ཞེས་པའི་རིགས་པ་ཉམས་ང་བ་འདི་འདྲ་འཕེན་པས་ཅི་ཞིག་བྱ་སྟེ། རིགས་པ་འདི་ལ་གནོད་བྱེད་ཀྱི་ནུས་པ་ཅུང་ཟད་ཀྱང་མེད་པ་གང་ཞིག། རང་གི་ཁྱབ་པ་བཅད་ཚུལ་མ་ཤེས་པའི་སྐྱོན་ཡོད་པའི་ཕྱིར། རྟགས་ཟུར་ཕྱི་མ་གྲུབ་སྟེ། ཁྱོད་ཀྱི་རིགས་པའི་ཁྱབ་པ་བཅད་ཚུལ་དེ་ལྟར་ཡིན་ན། འོ་ན་གང་ཟག་གི་བདག་མེད་ཕྲ་མོ་རྟོགས་པའི་ཡེ་ཤེས་ཆོས་ཅན། ཁྱོད་དང་ཉོན་སྒྲིབ་སྤང་གཉེན་གྱི་ཚུལ་དུ་རྒྱུད་གཅིག་ལ་ལྷན་གཅིག་མི་གནས་འགལ་མ་ཡིན་པར་ཐལ། ཁྱོད་དང་ཉོན་སྒྲིབ་གང་ཟག་ཉན་ཐོས་འཕགས་པ་ལྟ་བུའི་རྒྱུད་ལ་དགྲ་བཅོམ་མ་ཐོབ་པའི་བར་ཀྱི་ཚེ་རབས་དུ་མར་འགྲོགས་པར་སྲིད་པའི་ཕྱིར། ཁྱབ་པ་འགྲིགས། རིགས་པ་ཉམས་ང་བ་དེ་ལྟ་བུ་ལ་དེ་ཙམ་ལས་ལན་སྨྲ་མི་དགོས་སོ།།

སྤྱིར་བདག་མེད་གཉིས་རྟོགས་ཀྱི་མཁྱེན་པ་དང་ཤེས་སྒྲིབ་སྤང་གཉེན་དུ་སོང་བའི་འགལ་བ་ཡིན་མོད་ཀྱང་། དེ་ལ་གྲོགས་བསོད་ནམས་ཀྱི་ཚོགས་རླབས་ཆེན་པོས་མ་ཟིན་ན་ཤེས་སྒྲིབ་སྤང་བ་ལ་མཐུ་ཤིན་ཏུ་ཆུང་བ་ཡིན་པའི་ཕྱིར། དེ་ལྟར་མ་ཡིན་ན་བྱང་ཆུབ་སེམས་དཔའ་རྣམས་ཀྱིས་བསྐལ་པ་མང་པོར་མགོ་རྐང་ལག་བཏང་བ་སོགས་བྱ་དཀའ་བའི་བསོད་ནམས་ཀྱི་ཚོགས་རྒྱ་ཆེན་པོ་བསོག་པ་ཐམས་ཅད་དོན་མེད་དུ་ཐལ། ཐམས་ཅད་མཁྱེན་པ་འཐོབ་ཏུ་མི་འཇུག་པའི་གེགས་ཀྱི་གཙོ་བོ་ནི་ཤེས་སྒྲིབ་ཡིན། དེ་སྤོང་བྱེད་ལ་ནི་བདག་མེད་གཉིས་རྟོགས་ཀྱི་མཁྱེན་པ་ཁོ་ནས་ཆོག་པའི་ཕྱིར། རྟགས་ཁས། དེ་ལྟར་མ་ཡིན་ཏེ་ཤེས་སྒྲིབ་སྤོང་བྱེད་ལ་བདག་མེད་གཉིས་རྟོགས་ཀྱི་མཁྱེན་པ་ཁོ་ནས་ཆོག་ཀྱང་། སངས་རྒྱས་གཟུགས་ཀྱི་སྐུ་འགྲུབ་བྱེད་ལ་བསོད་ནམས་ཀྱི་ཚོགས་ཆེན་པོ་བསོག་དགོས་པ་ཡིན་ཀྱང་། དེ་ཤེས་སྒྲིབ་ཀྱི་གཉེན་པོ་མ་ཡིན་པས་ཤེས་སྒྲིབ་ཀྱི་གཉེན་པོ་ལ་བདག་མེད་གཉིས་རྟོགས་ཀྱི་མཁྱེན་པ་ཁོ་ནས་ཆོག་པ་མི་འགལ་ལོ་ཞེས་སྨྲ་ན་དེ་ནི་ཤིན་ཏུ་མ་གོ་བའི་རྟགས་ཆེན་པོ་ཡིན་ཏེ། སྤྱིར་བདག་མེད་གཉིས་རྟོགས་ཀྱི་ཡེ་ཤེས་ཀྱི་ཚོགས་ལས་ཆོས་ཀྱི་སྐུ་དང་། བྱང་ཆུབ་ཀྱི་སེམས་ཀྱིས་དྲངས་པའི་སྦྱིན་སོགས་བསོད་ནམས་ཀྱི་ཚོགས་ལས་གཟུགས་ཀྱི་སྐུ་འགྲུབ་པ་ཡིན་ཀྱང་། ཡེ་ཤེས་ཀྱི་ཚོགས་དང་བྲལ་བའི་བསོད་ནམས་ཀྱི་ཚོགས་རྐྱང་པས་ཀྱང་ཆོས་སྐུ་ལྟ་ཞོག་གཟུགས་ཀྱི་སྐུ་ཡང་མི་འགྲུབ། བསོད་ནམས་ཀྱི་ཚོགས་ཀྱིས་མ་ཟིན་པའི་ཡེ་ཤེས་ཀྱི་ཚོགས་ཁོ་ནས་ཀྱང་གཟུགས་ཀྱི་སྐུ་ལྟ་ཞོག་ཆོས་ཀྱི་སྐུ་ཡང་འགྲུབ་མི་ནུས་ཏེ། ཆོས་གཟུགས་ཀྱི་སྐུ་གཉིས་གང་ཐོབ་ཀྱང་ཚོགས་གཉིས་ཟུང་དུ་འབྲེལ་བ་ལས་ཐོབ་དགོས་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་དོན་ཆོས་ཀྱི་སྐུ་ཐོབ་པའི་རྒྱུའི་གཙོ་བོ་ཡེ་ཤེས་ཀྱི་ཚོགས་ཡིན་ཀྱང་དེ་ལ་གྲོགས་བསོད་ནམས་ཀྱི་ཚོགས་རླབས་པོ་ཆེས་མ་ཟིན་ན་འབྲས་བུ་ཆོས་ཀྱི་སྐུ་ཐོབ་མི་ནུས། གཟུགས་སྐུ་འགྲུབ་པའི་རྒྱུའི་གཙོ་བོ་བསོད་ནམས་ཀྱི་ཚོགས་ཡིན་ཀྱང་། དེ་ལ་གྲོགས་ཡེ་ཤེས་ཀྱི་ཚོགས་ཀྱིས་མ་ཟིན་ན་གཞན་དོན་གཟུགས་སྐུ་ཐོབ་མི་ནུས་པའི་ཕྱིར། རྟགས་ཟུར་དང་པོ་གྲུབ་སྟེ། རང་དོན་ཆོས་སྐུ་འགྲུབ་པའི་རྒྱུའི་གཙོ་བོ་ཡེ་ཤེས་ཀྱི་ཚོགས་ཡིན་ན་ཡེ་ཤེས་ཀྱི་ཚོགས་དེ་རང་འབྲས་ཆོས་ཀྱི་སྐུ་འགྲུབ་བྱེད་དུ་འགྱུར་མི་འགྱུར་བྱང་ཆུབ་ཀྱི་སེམས་རིན་པོ་ཆེས་རྩིས་ཟིན་ཅིང་སྦྱིན་སོགས་ཀྱི་སྤྱོད་པ་རླབས་པོ་ཆེས་གྲོགས་དང་ལྡན་མི་ལྡན་ལ་རག་ལས་པའི་ཕྱིར། མ་གྲུབ་ན། དེར་ཐལ། འབྲས་བུ་སྐུ་གཉིས་ཟུང་འཇུག་ཐོབ་པ་རྒྱུ་ཚོགས་གཉིས་ཡ་མ་བྲལ་བར་ཟུང་དུ་འཇུག་དགོས་པ་ཧ་ཀྱང་གྲགས་ཆེ་བའི་ཕྱིར། དེ་ལྟར་ཚོགས་གཉིས་ཟུང་དུ་འཇུག་དགོས་ན་ཟུང་དུ་འཇུག་ལུགས་བསོད་ནམས་ཀྱི་ཚོགས་ལ་ཡེ་ཤེས་ཀྱི་ཚོག་ཀྱི་རྩིས་ཟིན་པ་དང་། ཡེ་ཤེས་ཀྱི་ཚོགས་ལ་བསོད་ནམས་ཀྱི་ཚོགས་ཀྱིས་རྩིས་ཟིན་པ་ལས་ལྷག་ཏུ་ཟུང་དུ་འཇུག་ཚུལ་མེད་པའི་ཕྱིར། དེ་མེད་ན་ཡེ་ཤེས་ཀྱི་ཚོགས་ལ་བསོད་ནམས་ཀྱི་ཚོགས་ཀྱིས་རྩིས་ཟིན་དགོས་པའི་དོན་ཡང་བསོད་ནམས་ཀྱི་ཚོགས་དེས་ཡེ་ཤེས་ཀྱི་ཚོགས་ཀྱི་རང་གི་ངོས་སྐལ་གྱི་སྤང་བྱ་འཇོམས་པའི་ནུས་པ་ཆེས་ཆེར་བསྐྱེད་པའི་ཆེད་དུ་ཡིན་པའི་ཕྱིར། དེ་མ་ཡིན་ན། ཡེ་ཤེས་ཀྱི་ཚོགས་ལ་བསོད་ནསམ་ཀྱི་ཚོགས་ཀྱིས་གྲོགས་བྱ་དགོས་པ་དེ་དེས་སྲུང་བྱ་འཇོམས་པའི་ནུས་པ་བསྐྱེད་བྱེད་མ་ཡིན་པར་འགྱུར་ལ། དེས་ན་བསོད་ནམས་ཀྱི་ཚོགས་དེ་ཡེ་ཤེས་ཀྱི་ཚོགས་ཀྱི་གྲོགས་སུ་འགྲོ་ལུགས་དང་དེས་རྩིས་ཟིན་ལུགས་ཀྱི་དོན་ཅི་ཡང་མ་ཚང་བའི་ཕྱིར། ཚོགས་གཉིས་ཕན་ཚུན་གཅིག་ལ་གཅིག་མི་མཁོ་བར་ཐལ་བ་དང་། ཚོགས་གཉིས་ཟུང་དུ་མི་འབྲེལ་བ་ཡ་བྲལ་གྱིས་སངས་རྒྱས་འགྲུབ་པར་ཐལ་བ་དང་། བསོད་ནམས་ཀྱི་ཚོགས་རྐྱང་པས་སངས་རྒྱས་པའི་སངས་འཕགས་དང་། ཡེ་ཤེས་ཀྱི་ཚོགས་རྐྱང་པས་སངས་རྒྱས་པའི་སངས་འཕགས་ཡོད་པར་ཐལ་ཞིང་། ཚོགས་གཉིས་མཐར་མ་ཕྱིན་པའི་སངས་འཕགས་གཞག་དགོས་པ་སོགས་གནོད་བྱེད་མཐའ་ཡས་པའི་ཕྱིར་མི་འཐད་དོ།།

གཞན་ཡང་བསོད་ནམས་ཀྱི་ཚོགས་ཀྱིས་གྲོགས་བྱས་ནས་ཡེ་ཤེས་ཀྱི་ཚོགས་ཀྱིས་ཤེས་སྒྲིབ་སྤོང་བའི་ནུས་པ་མཐུ་ཅན་དུ་བཏང་ནས་ཤེས་སྒྲིབ་སྤང་དགོས་པ་ཡིན་གྱི། བདག་མེད་གཉིས་རྟོགས་ཀྱི་མཁྱེན་པ་ཤེས་སྒྲིབ་དང་འགལ་བ་ཙམ་གྱིས་ཤེས་སྒྲིབ་སྤང་མི་ནུས་པའི་ཕྱིར། མ་གྲུབ་ན་དེར་ཐལ། ཤེས་སྒྲིབ་དངོས་སུ་སྤོང་བྱེད་བདག་མེད་གཉིས་རྟོགས་ཀྱི་མཁྱེན་པ་ཡིན་ཀྱང་། གཉེན་པོ་བདག་མེད་གཉིས་རྟོགས་ཀྱི་མཁྱེན་པ་ལ་སྤང་བྱ་འཇོམས་པའི་ནུས་པ་བསྐྱེད་པ་ལ་བསོད་ནམས་ཀྱི་ཚོགས་དགོས་པའི་ཕྱིར་ཏེ། དཔེར་ན་དཔའ་བོ་གཡུལ་དུ་ཞུགས་པ་ལ་མཚོན་གྱིས་མི་ཕིགས་པའི་གོ་ཆ་བཙན་པོ་གྱོན་ན་གཞན་གྱིས་མཚོན་ཆས་ཕོག་ཀྱང་འཇིགས་པ་མེད་པའི་སྤོབས་པ་བསྐྱེད་ནས་ཕྱིར་མི་ལྡོག་པ་དགྲ་བོ་འཇོམས་པ་བཞིན་ཡིན་པའི་ཕྱིར་ཏེ། མངོན་རྟོགས་རྒྱན་ལས།

གོ་ཆའི་སྒྲུབ་པ་གང་ཡིན་ཏེ།།
དྲུག་ཚན་དྲུག་གིས་འཇི་བཞིན་བཤད།།

ཅེས་བསམ་པ་རྒྱ་ཆེ་བ་གོ་ཆའི་སྒྲུབ་པ་སྦྱིན་སོགས་ཕར་ཕྱིན་དྲུག་གི་ཉམས་ལེན་ལ་བྱང་ཆུབ་སེམས་དཔའ་རྣམས་སྒྲིབ་གཉིས་དཔུང་དང་བཅས་པའི་གཡུལ་དུ་ཞུགས་པ་ལ་འཇིགས་པ་མེད་པའི་གོ་ཆ་གྱོན་པ་ལྟ་བུར་གསུངས་པའི་ཕྱིར། དེ་ཡང་སྦྱིན་སོགས་ཀྱི་ཉམས་ལེན་དེ་དག་ཀྱང་རང་གར་གཅིག་ལ་གཅིག་རག་མ་ལས་པ་སོ་སོར་ཉམས་སུ་ལེན་པ་ཙམ་གྱིས་མི་ཆོག་གོ། ཕར་ཕྱིན་རེ་རེའི་ཉམས་ལེན་ལ་ཕར་ཕྱིན་དྲུག་དྲུག་གི་ཉམས་ལེན་ཚང་བ་དགོས་པར་གསུངས་ཏེ། དྲུག་ཚན་དྲུག་གིས་ཞེས་དྲངས་མ་ཐག་པ་དེའི་ཕྱིར། དེར་མ་ཟད་སྦྱོར་བ་རྒྱ་ཆེན་འཇུག་སྒྲུབ་ཀྱི་སྐབས་སུའང་། བསམ་གཏན་གཟུགས་མེད་སྦྱིན་སོགས་དང་།། ཞེས་འཇིག་རྟེན་པ་དང་ཐུན་མོང་གི་ལམ་བསམ་གཟུགས་ཀྱི་སྙོམས་འཇུག་དང་། འཇིག་རྟེན་ལས་འདས་པའི་ལམ་སྦྱིན་སོགས་ཕར་ཕྱིན་དྲུག་ལ་འཇུག་དགོས་པ་དང་། ལམ་དང་བྱམས་ལ་སོགས་པ་དང་།། ཞེས་མཐོང་བ་ལ་སོགས་པའི་ལམ་དང་། གཞན་དོན་སྒྲུབ་བྱེད་ཚད་མེད་པ་བཞི་བསྒོམ་པ་སོགས་ལ་འཇུག་དགོས་པར་གསུངས་པ་དང་། དེ་ལྟར་བསམ་པ་རྒྱ་ཆེན་པོ་གོ་སྒྲུབ་ལ་བརྟེན་ནས་སྦྱོར་བ་རྒྱ་ཆེན་པོ་འཇུག་སྒྲུབ་ལ་འཇུག་ཅིང་། དེ་ལས་བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་འབྱུང་བར་གསུང་སྟེ།

བརྩེ་དང་སྦྱིན་ལ་སོགས་པ་དྲུག།

ཞི་གནས་དང་ནི་ལྷག་མཐོང་དང་།།
ཟུང་དུ་འབྲེལ་བའི་ལམ་གང་དང་།།

ཐབས་ལ་མཁས་པ་གང་ཡིན་དང་།།

ཡེ་ཤེས་དང་ནི་བསོད་ནམས་དང་།།

ལམ་དང་གཟུངས་དང་ས་བཅུ་དང་།།
གཉེན་པོ་ཚོགས་ཀྱི་སྒྲུབ་པ་ནི།།

རིམ་པ་ཡིན་པར་ཤེས་པར་བྱ།།

ཞེས་སྤྱོད་པའི་རྟེན་ཕར་ཕྱིན་དྲུག་དང་སྙིང་རྗེ་ཆེན་པོ་རྩ་བར་བཟུང་དགོས་པ་དང་། ཐབས་ལ་མཁས་པ་ཞེས་ཐབས་རྒྱ་ཆེན་པོ་དང་མ་བྲལ་བ་ཉམས་སུ་ལེན་དགོས་པ་དང་། མདོ་སྡུད་པ་ལས་ཀྱང་།

གང་ལ་བདེ་གཤེགས་བྱང་ཆུབ་སེམས་དཔའ་དད་བརྟན་ཡོད།།

ཤེས་རབ་ཕ་རོལ་ཕྱིན་པ་མཆོག་ལ་བསམ་སྦྱོར་བ།།
ཉན་ཐོས་རང་རྒྱལ་ས་གཉིས་ཤིན་ཏུ་འདས་བྱས་ནས།།

ཟིལ་གྱིས་མི་གནོན་རྒྱལ་བའི་བྱང་ཆུབ་མྱུར་དུ་འཐོབ།།

ཅེས་ཐབས་ཤེས་ཡ་མ་བྲལ་བའི་ལམ་གྱིས་སངས་རྒྱས་འཐོབ་དགོས་པ་གསུང་ཤིང་། དེ་ནི་མདོ་ཕྱོགས་ཙམ་མ་ཟད་སྔགས་ལས་ཀྱང་མཐུན་པར་གསུངས་ཏེ། མཚན་ཡང་དག་པར་བརྗོད་པ་ལས།

བྱམས་པའི་གོ་ཆ་ཆས་པ་སྟེ།།

སྙིང་རྗེ་ཡི་ནི་ཡ་ལད་དགོས།།
ཤེར་རབ་རལ་གྲི་མདའ་གཞུ་ཐོགས།།

ཉོན་མོངས་མི་ཤེས་ཡུལ་ངོ་སེལ།།

ཞེས་སྒྲིབ་གཉིས་ཀྱི་གཡུལ་ལས་རྒྱལ་བ་ལ་བྱམས་པའི་གོ་ཆ་དང་། སྙིང་རྗེའི་ཡ་ལད་བཙན་པོ་དང་མ་བྲལ་བའི་སྒོ་ནས་ཤེས་རབ་ཀྱི་མཚོན་གྱིས་སྒྲིབ་གཉིས་བཅོམ་དགོས་པ་གསུངས་པའི་ཕྱིར། དེ་ལྟར་ཐབས་ཤེས་ཟུང་འབྲེལ་དགོས་པའི་དོན་ཡང་ཐབས་དང་ཤེས་རབ་ཕན་ཚུན་གཅིག་གིས་གཅིག་རྩིས་ཟིན་པ་ལ་བྱེད་དགོས་ཏེ། སྡུད་པ་ལས།

དེ་དག་ཐབས་ཀྱི་ཡོན་ཏན་ཤེས་རབ་ཡོངས་ཟིན་ན།།
མཆོག་ཏུ་རྨད་བྱུང་བདེ་གཤེགས་བྱང་ཆུབ་མྱུར་དུ་རེག།

ཅེས་ཤེས་རབ་ཀྱིས་ཐབས་ལ་ཟིན་དགོས་པ་དང་།

གང་ལ་བདེ་གཤེགས་བྱང་ཆུབ་སེམས་དཔའ་དད་བརྟན་ཡོད།།
ཤེས་རབ་ཕ་རོལ་ཕྱིན་པ་མཆོག་ལ་བསམ་སྦྱོར་བ།།

ཞེས་དང་།

དད་པས་ཤེས་རབ་དེ་ནི་ཡོངས་སུ་ཟིམ་གྱུར་ན།།
ས་གཉིས་ཤིན་ཏུ་འདས་ནས་བྱང་ཆུབ་མཆོག་ཐོབ་འགྱུར།།

ཞེས་ཐབས་རྒྱ་ཆེན་པོས་ཤེས་རབ་ཟིན་དགོས་པར་གསུངས་པའི་ཕྱིར། ད་ཁྱོད་ཀྱིས་ལུང་རིགས་ཡང་དག་པ་འདི་རྣམས་ལ་བརྟེན་ནས་ཤེས་སྒྲིབ་སྤང་བ་ལ་བདག་མེད་གཉིས་རྟོགས་ཀྱི་མཁྱེན་པ་ཙམ་ཁོ་ནས་མི་ཆོག་པར་དེ་ལ་དཔུང་གྲོགས་བྱང་ཆུབ་ཀྱི་སེམས་དང་སྦྱིན་སོགས་ཐབས་ཀྱི་ཆ་རྒྱ་ཆེན་པོ་རྣམས་དགོས་པར་འདོད་དམ་མི་འདོད། མི་འདོད་ན་བཤད་མ་ཐག་པའི་ལུང་རིགས་འདི་རྣམས་དང་འགལ་ལ། འདོད་ན། ཁྱོད་ཅག་བྱང་སེམས་འཕགས་པས་ཤེས་སྒྲིབ་སྤོང་ནུས་མི་ནུས་དེ་ཐབས་བསོད་ནམས་ཀྱི་ཚོགས་རྒྱ་ཆེན་པོའི་མཐུ་དཔུང་དང་ལྡན་མི་ལྡན་ལ་རག་མ་ལུས་པར་འདོད་པའི་དམ་བཅའ་དེ་རྩ་བ་ནས་བུད་དོ།།

གཞན་ཡང་བསོད་ནམས་ཀྱི་ཚོགས་རྒྱ་ཆེན་པོའི་གྲོགས་མི་དགོས་པར་བདག་མེད་གཉིས་རྟོགས་ཀྱི་མཁྱེན་པ་ཤེས་སྒྲིབ་དང་འགལ་བ་ཙམ་གྱིས་ཤེས་སྒྲིབ་སྤངས་ནུས་ན་ཉན་རང་དགྲ་བཅོམ་རྣམས་ཀྱིས་ཤེས་སྒྲིབ་སྤངས་ནུས་པར་ཐལ། ཤེས་སྒྲིབ་དང་འགལ་བའི་བདག་མེད་གཉིས་རྟོགས་ཀྱི་མཁྱེན་པ་དེ་དག་ལ་ཡོད་པའི་ཕྱིར། གང་ཟག་གི་བདག་མེད་སྒོམ་པར་ཡོད་པ་ནི་ཁྱོད་འདོད། ཆོས་ཀྱི་བདག་མེད་སྒོམ་པར་ཡོད་པ་ནི་སྔར་གྱི་ལུང་རིགས་རྣམས་ཀྱིས་སྒྲུབ་ཟིན་པའི་ཕྱིར། ཉན་རང་དགྲ་བཅོམ་སངས་རྒྱས་སུ་ཐལ་བའི་ཐལ་བ་དེ་ད་རུང་ངེད་ཅག་གི་མགོར་བསྐོར་བསམ་པ་འདུག་ཀྱང་འཁོར་མི་ནུས་འདུག་གོ།

ཡང་ཁྱོད་ཀྱིས་དེ་མི་སྐྱོན་ཏེ། ཉན་རང་དགྲ་བཅོམ་ལ་བདག་མེད་གཉིས་རྟོགས་ཀྱི་མཁྱེན་པ་ཡོད་ཀྱང་ཆོས་ཀྱི་བདག་མེད་རྒྱས་པར་སྒོམ་པར་མེད་པས་ཤེས་སྒྲིབ་སྤངས་མི་ནུས་པ་ཡིན་ཟེར་ན། འོ་ན་ཉན་རང་དགྲ་བཅོམ་ཐེག་ཆེན་ལམ་དུ་ཞུགས་ནས་སངས་རྒྱས་ཀྱི་གོ་འཕངས་དོན་དུ་གཉེར་བའི་ཚེ། དང་པོ་ཉིད་ནས་བྱང་ཆུབ་ཏུ་སེམས་བསྐྱེད་ནས་ཞུགས་དགོས་པ་མ་ཡིན་པར་ཐལ། རྣམ་མཁྱེན་འཐོབ་ཏུ་མི་འཇུག་པའི་གེགས་མཐར་ཐུག་པ་ནི་ཤེས་སྒྲིབ་ཡིན་པ་གང་ཞིག དེ་སྤོང་བྱེད་ལ་ཆོས་ཀྱི་བདག་མེད་རྒྱས་པ་ཙམ་ཉན་ནས་སྒོམ་པས་ཆོག་གི། བྱང་ཆུབ་ཏུ་སེམས་བསྐྱེད་ནས་རྒྱལ་སྲས་ཀྱི་སྤྱོད་པ་བྱ་དཀའ་བ་རྣམས་སྒྲུབ་པ་ལ་དགོས་པ་ལྷག་པོ་ཅི་ཡང་མེད་པའི་ཕྱིར། མ་གྲུབ་ན། དེར་ཐལ། ཉན་རང་དགྲ་བཅོམ་གྱིས་ཉོན་སྒྲིབ་ནི་སྤངས་ཟིན། ཤེས་སྒྲིབ་སྤང་བ་ལ་ནི་ཆོས་ཀྱི་བདག་མེད་རྒྱས་པར་བསྒོམ་པས་ཆོག། ཤེས་སྒྲིབ་སྤངས་ཟིན་ནས་སངས་རྒྱས་མ་ཟིན་པ་ནི་མི་སྲིད་པའི་ཕྱིར་བྱང་ཆུབ་ཏུ་སེམས་བསྐྱེད་པ་དང་བསོད་ནམས་ཀྱི་ཚོགས་བསགས་པ་ལ་དགོས་པ་ལྷག་པོ་མ་བྱུང་བའི་ཕྱིར་ཏེ། བྱང་ཆུབ་ཏུ་སེམས་བསྐྱེད་པ་དང་། བསོད་ནམས་ཀྱི་ཚོགས་ཆེན་བསོག་པ་མེད་ཀྱང་ཤེས་སྒྲིབ་སྤང་ནུས། ཤེས་སྒྲིབ་སྤངས་ཟིན་པ་ལས་ལྷག་པའི་སངས་རྒྱས་ལུགས་མེད་པའི་ཕྱིར། ཁྱབ་རྟགས་རྣམས་རིམ་བཞིན་ཁས། ཉན་རང་དགྲ་བཅོམ་སངས་རྒྱས་པའི་སངས་རྒྱས་འཕགས་པ་དེ། དང་པོ་བྱང་ཆུབ་མཆོག་ཏུ་ཐུགས་མ་བསྐྱེད། བར་དུ་བསོད་ནམས་ཀྱི་ཚོགས་རྒྱ་ཆེན་པོ་མ་བསགས་ནས་སངས་རྒྱས་པ་དང་། ཚོགས་གཉིས་ཡོངས་སུ་མ་རྫོགས་པའི་སངས་རྒྱས་འཕགས་པ་ཡིན་ཞེས་སྨྲ་དགོས་པར་གྱུར་ཏོ།།

གཞན་ཡང་མི་འཐད་དེ། ཆོས་ཀྱི་བདག་མེད་རྒྱས་པ་བསྒོམ་པའི་འཕགས་པའི་གང་ཟག་ཡིན་ན་ཁྱོད་ཤེས་སྒྲིབ་སྤངས་པའི་གང་ཟག་ཡིན་པའི་ཁྱབ་པར་ཐལ། འདོད་པའི་ཕྱིར། འདོད་ན། བྱང་སེམས་དང་པོ་བ་ཆོས་ཅན། སངས་རྒྱས་འཕགས་པ་ཡིན་པར་ཐལ། ཤེས་སྒྲིབ་སྤོང་བའི་གང་ཟག་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ཤེས་སྒྲིབ་དང་འགལ་བའི་ལམ་བདག་མེད་གཉིས་རྟོགས་ཀྱི་མཁྱེན་པ་རྒྱུད་ལྡན་གྱི་གང་ཟག་ཡིན་པའི་ཕྱིར། དེས་ཤེས་སྒྲིབ་སྤངས་མ་ནུས་པའི་གནད་དེ་གང་ཡིན། གཉེན་པོ་བདག་མེད་རྟོགས་པའི་ཡེ་ཤེས་ཀྱིས་མཐུས་མ་བྱུང་བ་ཡིན་ནམ། དེ་ལ་གྲོགས་བསོད་ནམས་ཀྱི་ཚོགས་བསགས་སྟོབས་ཆུང་བས་མ་བྱུང་བ་གང་ཡིན། ཕྱི་མ་ནི་ཁྱོད་ཅག་གིས་ཐན་མཐོང་བ་ལྟར་བྱེད་པས་མི་འདོད། དང་པོ་ལྟར་ན་ཡང་མི་འཐད་དེ། ཁྱོད་ཀྱིས་༼མི་ཕམ་གྱིས་༽བདག་མེད་གཉིས་རྟོགས་ཙམ་ནི་དེ་དང་མི་འགལ་ན་དེ་ལས་གཞན་པའི་གཉེན་པོ་མི་རྙེད་པས་ཤེས་སྒྲིབ་སྤངས་པའི་གང་ཟག་ཀྱང་བཞག་དཀའ་བའི་ཕྱིར་རོ་ཞེས་རྒྱུ་མཚན་བཀོད་འདུག་པ་དང་། ཡང་སྤྱིར་བདག་མེད་གཉིས་རྟོགས་ཀྱི་མཁྱེན་པ་དང་ཤེས་སྒྲིབ་འགལ་བར་མེད་ན་ཚོགས་མཐའ་ཡས་པས་ཟིན་ཀྱང་འགལ་བར་མེད་པའི་ཕྱིར་དང་། བྱང་སེམས་ལ་སྒྲིབ་གཉིས་སྤངས་པའི་ཐམས་ཅད་མཁྱེན་པ་ཐོབ་ཕྱིར་ཆོས་བདག་མེད་པ་བསྟན་ནོ་ཞེས་པའི་ལུང་དང་འགལ་བའི་ཕྱིར་རོ།། ལུང་གི་དོན་ནི་བདག་མེད་རྟོགས་པའི་ཡེ་ཤེས་ཚོགས་མཐའ་ཡས་པས་ཟིན་པ་དེས་བདེན་འཛིན་གྱི་བག་ཆགས་འཇོམས་པའི་དོན་དུ་དགོངས་སོ་སྙམ་ན། དེ་མིན་པར་འོག་ཏུ་འཆད་པར་འགྱུར་རོ།། ཞེས་གང་སྨྲས་པ་འདི་དག་གིས་བསོད་ནམས་ཀྱི་ཚོགས་ལ་རག་མ་ལས་པར་བདག་མེད་གཉིས་རྟོགས་ཀྱི་མཁྱེན་པ་ཁོ་ནས་ཤེས་སྒྲིབ་སྤངས་པ་སྒྲུབ་འདུག་པའི་ཕྱིར། འདི་ཡང་ངེད་ཅག་གིས་བདག་མེད་གཉིས་རྟོགས་ཀྱི་མཁྱེན་པ་ཤེས་སྒྲིབ་དང་འགལ་ཡང་། དེ་ཙམ་གྱིས་ཤེས་སྒྲིབ་སྤོང་མི་ནུས། ཤེས་སྒྲིབ་སྤང་བར་བྱང་ཆུབ་ཀྱི་སེམས་དང་བསོད་ནམས་ཀྱི་ཚོགས་རླབས་པོ་ཆེའི་མཐུ་དཔུང་བསྐྱེད་མ་བསྐྱེད་ལ་རག་ལས་ཞེས་རྩོད་པ་ཡིན་ན། ཁྱོད་ཅག་བསོད་ནམས་ཀྱི་ཚོགས་ལ་རག་མ་ལས་པར་བདག་མེད་གཉིས་རྟོགས་ཀྱི་མཁྱེན་པ་ཁོ་ནས་ཤེས་སྒྲིབ་སྤང་ནུས་ན། ས་ནས་སར་གནོན་བྱེད་ཅིང་ས་གོང་མར་བགྲོད་པ་སོགས་དགོས་པ་མེད་པར་ཐལ། ས་རིམ་གྱིས་བགྲོད་པ་བསོད་ནམས་ཀྱི་ཚོགས་ཀྱིས་ཡེ་ཤེས་ཚོགས་མཐུ་བསྐྱེད་པའི་དོན་ཡིན་ན་ཤེས་སྒྲིབ་སྤངས་པ་བསོད་ནམས་ཀྱི་ཚོགས་ལ་ནི་མ་རག། ཡེ་ཤེས་ཀྱི་ཚོགས་བདག་མེད་གཉིས་རྟོགས་ཀྱི་མཁྱེན་པ་ནི་ཕུན་སུམ་ཚོགས་པ་དེའི་རྒྱུད་ལ་ཡོད་པའི་ཕྱིར། ས་དང་པོ་རྫོགས་པ་དང་སངས་རྒྱས་པ་དུས་མི་མཉམ་པའི་རྒྱུ་མཚན་ཅི་ཡང་མེད་པའི་ཕྱིར། ས་གཉིས་པ་ནས་རྒྱུན་མཐའི་བར་གྱི་ལམ་གང་བཤད་པ་རྣམས་ཀྱང་མི་འཐད་ཅེས་སྨྲ་དགོས་པར་འགྱུར་རོ།།

ཅི་སྟེ་ས་དང་པོ་ཐོབ་པ་ནས་སངས་རྒྱས་པ་ཁོ་བོ་ཅག་ཁས་མི་བླངས་ཏེ་སངས་རྒྱས་པ་ལ་ས་བཅུ་རིམ་གྱིས་བགྲོད་དགོས་པ་ཡོངས་སུ་གྲགས་པའི་ཕྱིར་སྙམ་ན། འོ་ན་ས་དང་པོ་རྫོགས་ནས་སངས་རྒྱས་མ་ཐོབ་པ་དེ་བསོད་ནམས་ཀྱི་ཚོགས་ཀྱི་མཐུ་མ་རྫོགས་པས་ནི་མ་ཡིན་ཏེ་ཤེས་སྒྲིབ་སྤངས་པ་བསོད་ནམས་ཀྱི་ཚོགས་ལ་རག་མ་ལས་པའི་ཕྱིར། ཡེ་ཤེས་ཀྱི་ཚོགས་ནི་བདག་མེད་གཉིས་རྟོགས་ཀྱི་མཁྱེན་པ་ཡིན་ལ། དེ་ལས་གཞན་པའི་ཤེས་སྒྲིབ་ཀྱི་དངོས་གཉེན་ནི་མི་རྙེད། ས་དང་པོ་ནས་ཤེས་སྒྲིབ་སྤོང་བའི་མགོ་བརྩམས་པ་ནི་ཁྱོད་ཅག་འདོད་པས་ས་དང་པོ་རྫོགས་པ་དང་ཤེས་སྒྲིབ་སྤངས་པ་ཡོངས་སུ་རྫོགས་ནས་སངས་མ་རྒྱས་པ་དེ་ཡེ་ཤེས་ཀྱི་ཚོགས་ཀྱི་མཐུས་མ་བྱུང་བ་ཡིན་ཞེས་ཀྱང་སྨྲ་མི་ནུས་པའི་ཕྱིར་རོ།།

ཅི་སྟེ་ཡེ་ཤེས་ཀྱི་ཚོགས་ལ་ད་རུང་ས་བཅུའི་བར་དུ་གོམས་པ་བསྲིངས་དགོས་པ་ཡིན་ཟེར་ན། ས་བཅུའི་བར་དུ་ཡེ་ཤེས་ཀྱི་ཚོགས་བདག་མེད་གཉིས་རྟོགས་ཀྱི་མཁྱེན་པ་ལ་གོམས་པ་བསྲིངས་དགོས་པ་འདི་མི་འཐད་པ་ཡང་ཁྱོད་རང་གིས་ཐལ་བ་བཀོད་པས་ཕྱིར་དགག་སྟེ། བདག་མེད་གཉིས་ཀ་རྟོགས་པའི་ཡེ་ཤེས་ཆོས་ཅན། ཁྱོད་དང་ཤེས་སྒྲིབ་སྤང་གཉེན་གྱི་ཚུལ་དུ་རྒྱུད་གཅིག་ལ་ལྷན་ཅིག་མི་གནས་པའི་འགལ་བ་མ་ཡིན་པར་ཐལ། ཁྱོད་དང་ཤེས་སྒྲིབ་མཐའ་དག་གང་ཟག་གཅིག་གི་རྒྱུད་ལ་བསྐལ་པ་གྲངས་མེད་གཅིག་སོགས་ཀྱི་ཡུན་དུ་འགྲོགས་པར་སྲིད་པའི་ཕྱིར། རྟགས་གྲུབ་སྟེ། མ་དག་ས་བདུན་པའི་རྒྱུད་ཀྱི་དེ་གཉིས་དེ་ལྟར་ཡིན་པར་འདོད་པའི་ཕྱིར། ཞེས་འཕངས་འདུག་པ་ལ་སོམས་དང་། བདག་མེད་གཉིས་རྟོགས་ཀྱི་མཁྱེན་པ་དང་ཤེས་སྒྲིབ་མཐའ་དག་བསྐལ་པ་གྲངས་མེད་ཀྱི་ཡུན་དུ་འགྲོགས་ན། གཉེན་པོ་དེ་སྤང་བྱ་ཤེས་སྒྲིབ་དང་སྤང་གཉེན་གྱི་ཚུལ་དུ་རྒྱུད་གཅིག་ལ་ལྷན་གཅིག་མི་གནས་པའི་འགལ་བ་མ་ཡིན་པར་ཐལ་བའི་ཐལ་བ་འཕེན་ནོ།། བདག་མེད་གཉིས་རྟོགས་ཀྱི་ཡེ་ཤེས་རྒྱུད་ལ་ལྡན་ཟིན་པ་ནས་སྤང་བྱ་ཤེས་སྒྲིབ་དང་ལྷན་གཅིག་མི་གནས་པ་ཉི་འོད་གསལ་བ་དང་མུན་པ་འཇོམས་པ་ལྷན་གཅིག་པ་བཞིན་དེ་མ་ཐག་ཏུ་སྤངས་བྱ་འཇོམས་དགོས་པའི་སྒྲུབ་བྱེད་བསྟན་འདུག་པའི་ཕྱིར། ས་དང་པོ་ནས་སྤང་གཉེན་དེ་ལྟ་བུ་དངོས་སུ་ཕྲད་ན་ས་དང་པོ་རྫོགས་ནས་དེ་མི་སྤོང་བ་མི་འཐད་པའི་ཕྱིར། རྟགས་ཁྱབ་རྣམས་རང་གི་བརྗོད་ཚུལ་ལ་དཔོག་ཅིག་དང་། ས་དང་པོ་རྫོགས་ནས་སངས་རྒྱས་སུ་ཐལ་བའི་ཐལ་བ་དེ་སྤོང་འདོད་ཀྱང་སྤང་ཐབས་མི་རྙེད་འདུག་གོ།

གལ་ཏེ་དེ་མི་སྐྱོན་ཏེ། ས་དང་པོ་ནས་ཤེས་སྒྲིབ་སྤང་བའི་འགོ་ཡང་བརྩམས། གཉེན་པོ་བདག་མེད་གཉིས་རྟོགས་ཀྱི་མཁྱེན་པའང་ཡོད་མོད་ཀྱང་། དེ་མ་ཐག་ཏུ་ཤེས་སྒྲིབ་མཐའ་དག་གི་དངོས་གཉེན་རྙེད་པ་མ་ཡིན་གྱི། ས་རེ་རེའི་སྐབས་སུ་རང་རང་གི་ངོས་སྐལ་གྱི་སྤང་བྱ་ཤེས་སྒྲིབ་དང་དེའི་གཉེན་པོ་རེ་ཐོད་བཏུགས་ནས་སྤང་བ་ཡིན་པའི་ཕྱིར། ས་དང་པོ་རྫོགས་པ་དང་སངས་རྒྱས་སུ་ཐལ་བའི་སྐྱོན་ཡང་མེད། ས་དང་པོ་ནས་ཤེས་སྒྲིབ་མཐའ་དག་གི་དངོས་གཉེན་མཐའ་དག་སྟབས་གཅིག་ཏུ་རྙེད་པའི་སྐྱོན་ཡང་མེད་པའི་ཕྱིར། ཞེས་སྨྲ་ན། ཁྱོད་ཀྱིས་བདག་མེད་གཉིས་རྟོགས་ཀྱི་མཁྱེན་པ་དང་ཤེས་སྒྲིབ་སྤང་གཉེན་གྱི་ཚུལ་དུ་རྒྱུད་གཅིག་ལ་ལྷན་ཅིག་མི་གནས་པ་མ་ཡིན་པར་ཐལ་བའི་ཐལ་བ་དེ་གར་སོང་སོམས་ཤིག དེར་མ་ཟད་ས་རེ་རེ་ནས་རང་གི་ངོས་སྐལ་གྱི་སྤང་བྱ་འཇོམས་པའི་ནུས་པ་རྙེད་དགོས་པ་དེ་བདག་མེད་གཉིས་རྟོགས་ཀྱི་ཡེ་ཤེས་ཙམ་རྒྱུད་ལ་སྐྱེས་པ་ཁོ་ནས་གོ་མ་ཆོད་པར་བསོད་ནམས་ཀྱི་ཚོགས་རླབས་པོ་ཆེ་དང་ཡེ་ཤེས་ཀྱི་ཚོགས་ཟུང་དུ་འབྲེལ་བ་ལས་ས་ནས་སར་འཕོ་བ་ལ་ལྟོས་དགོས་ན། ཁྱོད་ཀྱིས་ཤེས་སྒྲིབ་སྤང་བ་ལ་གྲོགས་༼མི་ཕམ་གྱིས་༽བསོད་ནམས་ཀྱི་ཚོགས་མཐའ་ཡས་པས་ཟིན་པ་དེས་བདེན་འཛིན་གྱི་བག་ཆགས་འཇོམས་པའི་དོན་དུ་དགོངས་སོ་སྙམ་ན་དེ་མིན་པར་འོག་ཏུ་འཆད་དོ་ཞེས་སྨྲས་ཀྱང་ད་འོག་ཏུ་འཆད་རྒྱུ་ཅི་ཡང་ལུས་མ་སོང་ངོ་།།

ཡང་༼མི་ཕམ་གྱིས་༽ཚོགས་མཐའ་ཡས་པས་ཟིན་པའི་བདག་མེད་རྟོགས་པ་དེས་ཤེས་སྒྲིབ་ཅིའི་ཕྱིར་མི་སྤོང་སྙམ་ན། ས་བདུན་པའི་བྱང་འཕགས་ཀྱི་ཐུགས་རྒྱུད་ན་ཡོད་པའི་བདག་མེད་གཉིས་རྟོགས་ཀྱི་མཁྱེན་པ་དེ་གྲངས་མེད་གཉིས་ཀྱི་ཚོགས་དམ་པས་ཟིན་ཀྱང་དེས་ཤེས་སྒྲིབ་ལ་ཅུང་ཟད་ཀྱང་མི་གནོད་པ་དེ་བཞིན་དུ་ད་རུང་གྲངས་མེད་གཅིག་གི་ཚོགས་བསགས་པས་ཟིན་ཀྱང་མི་གནོད་པ་སྲིད་པར་འགྱུར་རོ།། ཞེས་པའང་ལོག་པར་རྟོག་པའི་འཆོལ་གཏམ་ཡིན་ཏེ། དམན་ལམ་སྔོན་མ་སོང་གིས་བདུན་པ་བའི་རྒྱུད་ཀྱི་བདག་མེད་རྟོགས་པའི་ཡེ་ཤེས་གྲངས་མེད་གཉིས་ཀྱི་ཚོགས་ཀྱིས་ཟིན་པས་ཤེས་སྒྲིབ་ལ་ཅུང་ཟད་ཀྱང་མི་གནོད་པ་ག་ལ་ཡིན་ཏེ། ཤེས་སྒྲིབ་ལ་རྒྱུད་ནས་གནོད་པ་བྱས་པའི་ཕྱིར། མ་གྲུབ་ན། དེར་ཐལ། གྲངས་མེད་གཉིས་སུ་ཚོགས་གཉིས་ཟུང་འབྲེལ་དུ་བསགས་པས་བདག་མེད་རྟོགས་པའི་ཡེ་ཤེས་ལ་ཤེས་སྒྲིབ་སྤང་བའི་ནུས་པ་མཆོག་ཏུ་བསྐྱེད་ནས་ས་བདུན་པ་ནས་བརྒྱད་པར་འཕོས་མ་ཐག་ནས་ཤེས་སྒྲིབ་སྤོང་བའི་མཐུ་དང་ལྡན་པར་བྱས་པ་དེས་ཤེས་སྒྲིབ་ལ་རྒྱུད་ནས་གནོད་པ་བྱས་པ་ཡིན་པའི་ཕྱིར། གནོད་ན་དངོས་སུ་གནོད་དགོས་པས་ཀྱང་མ་ཁྱབ་པའི་ཕྱིར་རོ།།

ཡང་ཁྱོད་ཀྱིས་༼མི་ཕམ་གྱིས་༽ཉན་ཐོས་རྟོགས་པ་མྱུར་བས་ཚེ་གསུམ་གྱིས་ཉོན་སྒྲིབ་བདེན་འཛིན་ས་བོན་དང་བཅས་པ་སྤོང་ནུས་པ་དེ་བཞིན་དུ་ཚོགས་མཐའ་ཡས་པས་མ་ཟིན་ཀྱང་བདག་མེད་རྟོགས་པ་དེ་གོམས་པ་ཁོ་ནས་ཤེས་སྒྲིབ་དུས་ཐུང་ངུས་སྤོང་བའི་གང་ཟག་སྲིད་པ་ལ་དངོས་སྟོབས་རིགས་པས་གནོད་པ་མེད་ཕྱིར། ཉན་རང་དགྲ་བཅོམ་སངས་རྒྱས་སུ་ཐལ་བ་སླར་འཁོར་ཉེན་ཆེ་བས་བག་ཡོད་གྱིས་ཞེས་ངེད་ཅག་ལ་གདམས་བྱ་མ་ཡིན་གྱི་ཁྱོད་ཅག་ཤེས་སྒྲིབ་སྤངས་པ་གྲོགས་བསོད་ནམས་ཀྱི་ཚོགས་ལ་རག་མ་ལས་པར་བདག་མེད་རྟོགས་པ་ཁོ་ནས་ཆོག་པར་འདོད་པ་རྣམས་ལ་སྐྱོན་དེ་འཇུག་ཅེས་གདམས་དགོས་པའི་ཕྱིར་ཏེ། ཁྱོད་ཅག་གྲངས་མེད་གཉིས་ཀྱི་ཚོགས་ཀྱིས་ཟིན་པ་ལ་མ་ལྟོས་པར་བདག་མེད་རྟོགས་པ་ཁོ་ནས་ཤེས་སྒྲིབ་སྤང་ནུས་ན། ཉན་ཐོས་རྟོགས་པ་མྱུར་བས་ཚེ་གསུམ་ལ་ཉོན་སྒྲིབ་སྤོང་ནུས་པ་བཞིན་དུ་བདག་མེད་རྟོགས་པ་གོམས་པ་ཁོ་ནས་དུས་ཐུང་ངུས་ཤེས་སྒྲིབ་སྤོང་ནུས་པའི་གང་ཟག་ཅིག་སྲིད་པ་ལ་དངོས་སྟོབས་རིགས་པས་གནོད་པ་ཅུང་ཟད་ཀྱང་མེད་པར་ཐལ། གྲངས་མེད་གཉིས་ཀྱི་ཚོགས་དམ་པས་ཟིན་པ་ལ་མ་ལྟོས་པར་འཕགས་ལམ་ཐོབ་ཙམ་ནས་ཤེས་སྒྲིབ་སྤང་བའི་དངོས་གཉེན་ཐོབ་པ་ཡོད་པའི་ཕྱིར། མ་གྲུབ་ན། དེར་ཐལ། དམན་ལམ་སྔོན་མ་སོང་གི་ས་དང་པོ་བ་དེས་དེ་ལྟར་ཐོབ་པའི་ཕྱིར། རྟགས་ཁས་ལེན་གྱིས་དངོས། དེས་ན་དམན་ལམ་སྔོན་མ་སོང་གི་གྲངས་མེད་གཅིག་གི་ཡུན་དུ་འགོར་ནས་ཉོན་སྒྲིབ་སྤོང་ནུས་པ་ལྟ་ཞོག་འཕགས་པའི་ལམ་ཙམ་ལས་ཐོབ་མ་ནུས་པའི་རྟོགས་པ་ཧ་ཀྱང་བུལ་བ་དེ་ལྟར་ནའང་དེས་ཤེས་སྒྲིབ་ཀྱི་དངོས་གཉེན་ཐོབ་ནུས་ལ། ཉན་ཐོས་དགྲ་བཅོམ་ཚེ་གསུམ་ལས་མ་འགོར་བ་ཉོན་སྒྲིབ་ས་བོན་དང་བཅས་པ་སྤོང་ནུས་པའི་རྟོགས་པ་དེ་ཙམ་མྱུར་བ་དེས་ཤེས་སྒྲིབ་སྤང་མི་ནུས་པ་དེ་བས་ཀྱང་མི་འཐད་པའི་ཕྱིར། ཉན་ཐོས་དགྲ་བཅོམ་པས་དེ་མ་ཐག་ཏུ་ཤེས་སྒྲིབ་སྤོང་བའམ་ཡང་ན་སྔར་བདག་མེད་གཉིས་རྟོགས་ལ་སླར་ཡང་གོམས་པས་དུས་ཐུང་ངུས་ཤེས་སྒྲིབ་སྤོང་ནུས་པ་ལ་དངོས་སྟོབས་རིགས་པས་གནོད་པ་ཅུང་ཟད་ཀྱང་མེད་པའི་ཕྱིར། ཉན་རང་དགྲ་བཅོམ་སངས་རྒྱས་སུ་ཐལ་བའི་ཐལ་བ་དེ་ད་སུའི་མགོར་འཁོར་ས་འདུག་ལྟོས་ཤིག།

ཁོ་བོ་ཅག་ལ་དེ་ལྟ་བུའི་སྐྱོན་གྱི་གོ་སྐབས་མེད་དེ། བདག་མེད་རྟོགས་པའི་ཡེ་ཤེས་ལ་གྲངས་མེད་གཉིས་ཀྱི་ཚོགས་དམ་པས་མ་ཟིན་བར་དུ་ཤེས་སྒྲིབ་སྤང་བའི་འགོ་བརྩམས་པར་མི་འདོད་པ་དང་། མ་དག་ས་བདུན་མན་ཆད་དུ་གྲངས་མེད་གཉིས་ཀྱི་ཚོགས་བསགས་པས་ཤེས་སྒྲིབ་ལ་དངོས་སུ་མི་གནོད་ཀྱང་རྒྱུད་ནས་མཆོག་ཏུ་གནོད་པར་འདོད་པས། གྲངས་མེད་གཉིས་ཀྱི་ཚོགས་བསགས་པས་ཤེས་སྒྲིབ་ལ་ཅུང་ཟད་ཀྱང་མི་གནོད་པས་སླར་གྲངས་མེད་གཅིག་གི་ཚོགས་བསགས་པས་ཟིན་ཀྱང་མི་གནོད་པར་ཐལ་བའི་ཐལ་བ་འཇུག་པའི་གཞི་དེ་གང་ཡིན་པ་དང་། ཉན་ཐོས་རྟོགས་པ་མྱུར་བ་ཚེ་གསུམ་གྱིས་ཐར་པ་དཔེར་བྱས་ནས་གྲོགས་བསོད་ནམས་ཀྱི་ཚོགས་ལ་རག་མ་ལས་པར་བདག་མེད་རྟོགས་པ་ཙམ་ཁོ་ནར་གོམས་པ་བྱས་པས་ཤེས་སྒྲིབ་དུས་ཐུང་ངུས་སྤོང་བའི་གང་ཟག་གཅིག་སྲིད་པར་ཐལ་བའི་ཐལ་བ་འཇུག་པའི་གཞི་རི་བོང་རྭ་འཚོལ་བ་ལ་ཐུགས་ཀྱི་བརྩོན་པ་མ་ལྷོད་ཅིག།

༈ དེ་ལྟར་དབུ་མ་ཐལ་འགྱུར་བའི་ལུགས་ལ་ཉོན་སྒྲིབ་ཟད་པར་མ་སྤངས་པར་ཤེས་སྒྲིབ་སྤོང་བའི་འགོ་མི་རྩོམ་ལ། ཤེས་སྒྲིབ་སྤང་བའི་འགོ་ས་བརྒྱད་པ་ནས་རྩོམ་པ་ཡིན་པའི་ཕྱིར། རྟགས་ཟུར་དང་པོ་མ་གྲུབ་ན། དམན་ལམ་སྔོན་མ་སོང་གི་བྱང་སེམས་ས་བདུན་པ་བ་ཆོས་ཅན། ཁྱོད་ཀྱིས་ཉོན་སྒྲིབ་སྤོང་བ་མ་རྫོགས་ཀྱི་བར་དུ་ཤེས་སྒྲིབ་སྤང་བའི་འགོ་རྩོམ་མི་ནུས་པའི་ཕྱིར་ཏེ། དཔེར་ན་བུམ་པ་དང་སྣམ་བུ་སོགས་ལ་ཏིལ་མར་དང་མེ་ཏོག་ལ་སོགས་པའི་སྣུམ་བག་དང་དྲིས་ཡུན་རིང་པོར་བགོས་བགོས་པ་ཞིག དེ་དག་དང་ཕྲད་པའི་དྲི་མ་རགས་པ་ཕར་བསལ་དུ་ཟིན་ཀྱང་། དྲི་མ་ཕྲ་མོ་ཡུན་རིང་པོར་སེལ་མི་ནུས་པ་བཞིན་དུ་ཟག་པ་མེད་པའི་ལམ་གྱིས་ཉོན་མོངས་པའི་དྲི་མ་རགས་པ་སྤངས་ཟིན་ཀྱང་། ཉོན་མོངས་པའི་སྒྲིབ་པའི་དྲི་མ་ཕྲ་མོ་རྩ་བ་དང་བག་ཆགས་མཐར་ཐུག་པའི་ཤེས་བྱའི་སྒྲིབ་པ་དེ་ཅུང་ཟད་ཀྱང་སྤང་མི་ནུས་པའི་ཕྱིར་ཏེ། འཇུག་པ་རང་འགྲེལ་ལས། གང་གིས་སེམས་ཀྱི་རྒྱུད་འབག་པར་བྱེད་ཅིང་བསྒོ་བར་བྱེད་ལ། རྗེས་སུ་བགྲོད་པར་བྱེད་པ་དེ་ནི་བག་ཆགས་ཏེ། ཉོན་མོངས་པའི་མུར་ཐུག་པ་དང་། གོམས་པ་དང་། རྩ་བ་དང་། བག་ཆགས་ཞེས་བྱ་བ་ནི་རྣམ་གྲངས་དག་གོ། དེ་ནི་ཟག་པ་མེད་པའི་ལམ་གྱིས་ཉོན་མོངས་པ་སྤངས་སུ་ཟིན་ཀྱང་། ཉན་ཐོས་དང་རང་སངས་རྒྱས་ཀྱིས་སྤང་བར་མི་ནུས་ཏེ། ཏིལ་མར་དང་མེ་ཏོག་ལ་སོགས་པ་བསལ་དུ་ཟིན་ཀྱང་། བུམ་པ་དང་སྣམ་བུ་ལ་སོགས་པ་རྣམས་ལ་དེ་དང་ཕྲད་པའི་ཡོན་ཏན་ཕྲ་མོ་དམིགས་པ་བཞིན་ནོ་ཞེས་གསུངས་པའི་ཕྱིར། ལུང་ཡང་དག་པ་འདི་ལ་དཔྱོད་དང་། ཉོན་སྒྲིབ་སྤོང་བ་མ་རྫོགས་ཀྱི་བར་དུ་ཤེས་སྒྲིབ་སྤོང་བའི་འགོ་བརྩམས་པ་ཡོད་མེད་འདིའི་དཔེ་ཏིལ་མར་དང་མེ་ཏོག་སོགས་ཉོན་སྒྲིབ་དང་དཔེ་དོན་སྦྱར་ནས་དེ་ཕར་བསལ་དུ་ཟིན་ཀྱང་། དེའི་དྲི་མ་ཕྲ་མོ་ཤེས་སྒྲིབ་དང་སྦྱར་ནས་སེལ་མི་ནུས་པར་གསུངས་པའི་ཕྱིར་རོ།།

དེ་ལ་སྒྲིབ་གཉིས་མཉམ་དུ་སྤང་རྒྱུར་བྱས་ཀྱང་ཏིལ་མར་དང་མེ་ཏོག་སོགས་བསལ་ཟིན་པ་ནས་དེ་དང་ཕྲད་པའི་ཡོན་ཏན་ཕྲ་མོ་ཡང་དེ་མ་ཐག་ཏུ་སེལ་བ་ཁས་བླངས་དགོས་ན་དཔེ་དོན་མི་འགྲིགས་པས་དེ་ཡང་མི་འཐད་ལ། གལ་ཏེ་དམན་ལམ་སྔོན་མ་སོང་གི་ས་བརྒྱད་པའི་བར་དུ་ཉོན་ཤེས་མཉམ་དུ་སྤངས། དེ་ནས་ཉོན་སྒྲིབ་སྤང་བ་རྫོགས། དེ་ནས་ཤེས་སྒྲིབ་རྐྱང་པ་སྤང་བ་ལ་དགོངས་སམ་སྙམ་ན། དེ་ཡང་མི་འཐད་དེ། དེ་ལྟར་ན་དཔེ་དོན་མི་འགྲིགས་པའི་ཕྱིར་ཏེ། ཤེས་སྒྲིབ་ཀྱི་དཔེ་ལ་ཏིལ་མར་དང་མེ་ཏོག་སོགས་བསལ་ཟིན་པའི་རྗེས་ཀྱི་དེ་དང་ཕྲད་པའི་ཡོན་ཏན་ལྟ་བུ་གསུངས་པ་མི་འཐད་པར་འགྱུར་བའི་ཕྱིར་དང་། ཉོན་ཤེས་ལྷན་གཅིག་ཏུ་སྤངས་ན། ཏིལ་མར་དང་མེ་ཏོག་གཉིས་ཕར་བསལ་བ་དང་མཉམ་དུ་དེ་དང་ཕྲད་པའི་ཡོན་ཏན་ཕྲ་མོ་དེ་ཡང་མཉམ་དུ་བསལ་དགོས་པས་ས་བརྒྱད་པ་ཐོབ་པ་དང་མཉམ་དུ་ཏིལ་མར་དང་མེ་ཏོག་དང་འདྲ་བའི་ཉོན་སྒྲིབ་ཀྱང་སྤངས། དེ་དང་ཕྲད་པའི་ཡོན་ཏན་ཕྲ་མོ་དང་འདྲ་བའི་ཤེས་སྒྲིབ་ཀྱང་སྤངས་ན་ས་བརྒྱད་པ་ནས་ཤེས་སྒྲིབ་སྤངས་ཟིན་པས་སངས་རྒྱས་ཟིན་པར་ཐལ་བ་དང་། ས་ས་དགུ་པ་བཅུ་པ་སོགས་བགྲོད་པ་དོན་མེད་དུ་ཐལ་བ་སོགས་གནོད་བྱེད་མཐའ་ཡས་པའི་ཕྱིར།

དེ་མི་སྐྱོན་ཏེ་ཏིལ་མར་དང་མེ་ཏོག་སོགས་དང་འདྲ་བའི་ཉོན་སྒྲིབ་སྤངས་དུས་ནས་དེ་དང་ཕྲད་པའི་ཡོན་ཏན་ཕྲ་མོ་དང་འདྲ་བའི་ཤེས་སྒྲིབ་ཀྱང་རིམ་བཞིན་སྤངས་པ་ཡིན་ཀྱང་། ཤེས་སྒྲིབ་སྤང་དཀའ་བས་དག་ས་བ་རྣམས་ལ་སྤང་རྒྱུ་ཞིག་ལུས་སོང་བ་ཡིན་སྙམ་ན། དེ་ཡང་མི་འཐད་དེ། དཔེ་ཡི་སྐབས་སུ་ཡང་དེ་དང་ཕྲད་པའི་ཡོན་ཕྲ་མོ་དང་ཤེས་སྒྲིབ་དཔེ་དོན་སྦྱར་བ་དང་། དོན་གྱི་སྐབས་སུ་ཡང་གང་གིས་སེམས་ཀྱི་རྒྱུད་འབག་པར་བྱེད་ཅིང་བསྒོ་བར་བྱེད་ལ་ཞེས་ཏིལ་མར་གྱི་སྣུམ་བག་དང་། མེ་ཏོག་གི་དྲིས་བུམ་པ་དང་སྣམ་བུ་ལ་འབག་པར་བྱེད་ཅིང་བསྒོ་བར་བྱེད་པ་མཚུངས་པར་སྟོན་པའི་ཕྱིར་དང་། དེ་ནི་ཟག་པ་མེད་པའི་ལམ་གྱིས་ཉོན་མོངས་པ་སྤངས་སུ་ཟིན་ཀྱང་། ཉན་ཐོས་དང་རང་སངས་རྒྱས་ཀྱིས་སྤང་བར་མི་ནུས་ཏེ་ཞེས་ཉན་རང་གིས་སྤང་མི་ནུས་པའི་ཤེས་སྒྲིབ་ཟུར་དུ་ཕུད་ནས་གསལ་བར་སྟོན་འདུག་པའི་ཕྱིར་དང་། དེ་ལྟར་ཟུར་དུ་ཕུད་པའི་ཤེས་སྒྲིབ་དེ་དང་ཏིལ་མར་དང་མེ་ཏོག་སོགས་དང་ཕྲད་པའི་ཡོན་ཏན་ཕྲ་མོ་དཔེ་དོན་སྦྱར་འདུག་པའི་ཕྱིར། ས་བདུན་པ་མན་ཆད་དུ་ཉོན་ཤེས་མཉམ་དུ་སྤང་རྒྱུའི་དཔེ་དོན་སྦྱོར་ལུགས་ད་ཅི་འདུག་སོམས་ཤིག།

དེར་མ་ཟད་འཇུག་པའི་སེམས་བསྐྱེད་པ་བརྒྱད་པའི་སྐབས་སུ་ཡང་། ས་བརྒྱད་པ་ལ་དྲི་མ་དེ་དག་རྩ་བཅས་ཉེ་བར་ཞི་འགྱུར་ཞིང་།། ཉོན་མོངས་ཟད་ཅིང་ས་གསུམ་བླ་མར་གྱུར་ཀྱང་ཞེས་ཉོན་མོངས་པའི་དྲི་མ་རྩ་བ་བཅས་ཏེ་ས་བོན་དང་བཅས་པ་ཟད་དུ་ཟིན་ཀྱང་། སངས་རྒྱས་རྣམས་ཀྱི་འབྱོར་པ་ནམ་མཁའ་དང་འདྲ་བ་མཐའ་དང་བྲལ་བ་ཐོབ་མི་ནུས་པར་གསུང་སྟེ། སངས་རྒྱས་ཀྱི་འབྱོར་པ་ནི། སྟོབས་བཅུ་མི་འཇིགས་པ་བཞི་སངས་རྒྱས་ཀྱི་ཆོས་མ་འདྲེས་པ་རྣམ་པར་ཐམས་ཅད་མཁྱེན་པའི་ཡེ་ཤེས་རྣམས་ལ་བྱེད་པའི་ཕྱིར་ཏེ། རང་འགྲེལ་ལས། གོང་དུ་འོན་ཀྱང་རིགས་ཀྱི་བུ་གང་ངེད་ཀྱི་སྟོབས་བཅུ་དང་མི་འཇིགས་པ་བཞི་ལ་སོགས་པ་སངས་རྒྱས་ཀྱི་ཆོས་མ་འདྲེས་པ་ཕུན་སུམ་ཚོགས་པ་དེ་ཁྱོད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཡོངས་སུ་བཙལ་བའི་ཕྱིར་སྦྱོར་བ་བྱོས་ཤིག བརྩོན་འགྲུས་རྩོམས་ཤིག། ཞེས་སོགས་དང་། གལ་ཏེ་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་དེ་ལ་ཐམས་ཅད་མཁྱེན་པའི་ཡེ་ཤེས་མངོན་པར་སྒྲུབ་པའི་སྒོ་རྣམས་སུ་གཞུག་པར་མཛད་དུ་ཟིན་ན་ཞེས་སོགས་གསུངས་པས་ས་བརྒྱད་པ་བ་དེ་དག་ཉོན་མོངས་པ་ཟད་ནས་འཁོར་བ་ལས་ཐར་དུ་ཟིན་ཀྱང་ཤེས་བྱ་ཡོངས་སུ་གཅོད་པའི་གེགས་ཤེས་སྒྲིབ་ཅུང་ཟད་ཀྱང་མ་སྤངས་པའི་ཕྱིར། རྣམ་པ་ཐམས་ཅད་མཁྱེན་པའི་ཡེ་ཤེས་སྒྲུབ་པའི་སྒོ་ལ་གཞུག་པ་མཛད་པ་ཡིན་པའི་ཕྱིར། དེ་ལྟར་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱིས་འབྱོར་པ་མ་ཐོབ་པ་འཐོབ་པར་བྱེད་པ་དང་། ཐམས་ཅད་དུ་མཁྱེན་པའི་ཡེ་ཤེས་རྣམ་མཁྱེན་སྒྲུབ་པའི་སྒོ་ལ་གཞུག་པ་ལ། ཤེས་བྱ་ཡོངས་སུ་གཅོད་པའི་གེགས་ཤེས་སྒྲིབ་སྤོང་བ་ལ་བརྩོན་དགོས་པའི་ཕྱིར། བསྒྲུབ་བྱ་སངས་རྒྱས་ཀྱི་འབྱོར་པའམ་རྣམ་མཁྱེན་སྒྲུབ་པའི་སྒོ་ལ་ཆེད་དུ་གཞུག་པར་མཛད་པས། སངས་རྒྱས་ཀྱི་འབྱོར་པ་དང་རྣམ་མཁྱེན་འཐོབ་པའི་གེགས་ཤེས་སྒྲིབ་མ་སྤངས་པ་སྤོང་བ་ལ་གཞུག་པ་མཛད་པའང་དོན་གྱིས་འོང་བ་ཡིན་ཏེ། གང་བསྒྲུབ་བྱའི་གེགས་དང་མ་བྲལ་བར་བསྒྲུབ་བྱ་དེ་མི་འགྲུབ་པ་ཆོས་ཉིད་ཡིན་པའི་ཕྱིར། རྟགས་གྲུབ་སྟེ། རང་འགྲེལ་ས། དེ་དེ་སྤངས་པས་ས་གསུམ་གྱི་བླ་མར་གྱུར་ཀྱང་བྱང་ཆུབ་སེམས་དཔའ་འདིས་གནས་སྐབས་དེར་སངས་རྒྱས་བཅོམ་ལྡན་འདས་རྣམས་ཀྱི་འབྱོར་པ་ཐོབ་མི་ནུས་ཏེ། དེ་འཐོབ་པར་བྱ་བའི་ཕྱིར་འདིས་བསྒྲིམ་པར་བྱ་དགོས་སོ།། ཞེས་བསྒྲིམ་པར་བྱ་རྒྱུ་སྤང་བྱ་ཤེས་སྒྲིབ་མ་སྤོང་བ་སྤངས་ཕྱིར་དང་། རྟོགས་བྱའི་ཡོན་ཏན་མ་ཐོབ་པ་འཐོབ་པར་བྱ་བ་ལ་སྒྲིབ་པ་ལས་མ་འདས་པའི་ཕྱིར། དེ་ལྟར་དཔེ་དང་གཏན་ཚིགས་ལུང་གང་ལས་དཔྱད་ཀྱང་ཤེས་སྒྲིབ་སྤངས་པའི་འགོ་ས་བརྒྱད་པ་ནས་བརྩམས་དགོས་པ་ཡོངས་སུ་འགྲུབ་པའི་ཕྱིར། དངོས་སྟོབས་ཀྱི་རིགས་པ་ལུང་ཡང་དག་པའི་རྒྱབ་སྐྱོར་དང་བཅས་པའི་གནོད་པ་མཐོང་བཞིན་དུ་བསྙོན་འདིངས་པ་མ་བྱེད་ཅིག།

ཡང་ཁྱོད་ཀྱིས་༼མི་ཕམ་གྱིས་༽དེས་ན་ཙོང་ཁ་པ་ཆེན་པོ་ནས་བདེན་འཛིན་གྱི་བག་ཆགས་ལ་ཤེས་སྒྲིབ་ཏུ་མིང་བཏགས་པར་མཛད་པ་ནི། ས་བདུན་པ་མན་ཆད་དུ་ཤེས་སྒྲིབ་འབའ་ཞིག་སྤོང་བ་མིན་པས་བྱེད་པ་གཙོ་ཆེ་ཆུང་གི་དབང་གིས་བདེན་འཛིན་ལ་ཉོན་སྒྲིབ་དང་དེའི་བག་ཆགས་ལ་ཤེས་སྒྲིབ་ཅེས་མིང་འདོགས་ལུགས་ཙམ་ལས་དོན་སྔ་རབས་བའི་བཞེད་པ་དང་ཁྱད་མེད་པར་སེམས་སོ།། ཞེས་ཟེར་བ་ནི་ཁྱོད་ཅག་བོད་སྔ་རབས་པའི་འདོད་ཚུལ་ལུང་རིགས་ཡང་དག་པ་རྣམས་དང་ལྟག་སྤྲོད་དུ་གྱུར་པའི་མཚང་མཐོང་ནས་རྗེ་ཙོང་ཁ་པ་ཆེན་པོ་ཡང་དེ་ལྟར་བཞེད་ཅེས་བྱས་ན་མཁས་རློམ་རིགས་པའི་རྣམ་དཔྱོད་མ་ཐོབ་པ་འགའ་རེ་བསླུ་ཐུབ་པར་སྲིད་སྙམ་ནས་དེ་ལྟར་ཧམ་འགྲོས་སུ་སྨྲས་པ་ཡིན་འདུག་ཀྱང་། རྗེ་ཐམས་ཅད་མཁྱེན་པའི་གཞུང་ལུགས་དབུ་མའི་བསྟན་བཅོས་ཆེན་པོ་དག་ལས། ཁྱོད་ཅག་སྔ་རབས་པའི་འདོད་ཚུལ་དེ་རིགས་ཕྱོགས་སྔར་བླངས་ནས། དངོས་སུ་བཀག་ནས་དབུ་མ་ཐལ་འགྱུར་བའི་བཞེད་སྲོལ་དྲི་མ་མེད་པ་གསལ་བར་མཛད་འདུག་པའི་ཕྱིར། ངེད་ཅག་རིགས་པའི་གོམས་སྟབས་མི་དམན་པ་དག་གི་མདུན་སར་རྒྱུས་ཡོད་མདུན་རྒྱུས་བཤད་དང་། མཁས་པའི་མདུན་དུ་ཆོས་བཤད་བྱས་པ་ངོ་རེ་ཆེའོ།།

ཡང་ཁྱོད་ཀྱིས་༼མི་ཕམ་གྱིས་༽གཞན་ཡང་བག་ཆགས་གང་གིས་ཤེས་བྱ་ཐམས་ཅད་ཡོངས་སུ་གཅོད་པ་ལ་གེགས་བྱེད་ན་དེ་མངོན་དུ་གྱུར་བས་ཅིའི་ཕྱིར་གེགས་མི་བྱེད། མངོན་དུ་གྱུར་ཀྱང་གེགས་མི་བྱེད་ན་བག་ཆགས་ཀྱིས་དེ་བས་ཀྱང་མི་བྱེད་པར་འགྱུར་བའི་ཕྱིར། མ་དག་ས་བདུན་དུ་ཤེས་སྒྲིབ་སྤངས་པ་མེད་པའི་ལུགས་བཞག་དཀའ་བར་མཐོང་ནས་སྔ་རབས་པའི་ལུགས་ལྟར་བརྗོད་པ་ཡིན་གྱི་ཨ་ཕའི་ཁ་ཕོར་ལ་གཙང་ཞེན་ལྟར་ཞེན་ལྟས་འཇུས་པ་ཙམ་ནི་མ་ཡིན་ནོ། །ཞེས་སྨྲས་འདུག་པ་ལ་གཞད་གད་འདི་བྱ་སྟེ། ཁྱོད་ཅག་ལྟར་ན་སྒྲིབ་པའི་བག་ཆགས་ཤིན་ཏུ་སྤྱང་དཀའ་བ་དེས་གེགས་བྱེད་ན། སྦྱང་སླ་བ་སྲིད་པ་མངོན་གྱུར་ཙམ་དེས་ཅིའི་ཕྱིར་གེགས་མི་བྱེད་ཅེས་བྱུང་བས། དེ་ལྟར་ན་དཔེར་ན་དགྲ་སྡེ་དཔའ་བོའི་ཚོགས་ཀྱིས་ཚུར་དེ་ཙམ་གནོད་ནུས་ན། སྡར་མའི་ཚོགས་ཀྱིས་དེ་བས་ཀྱང་ཅིའི་ཕྱིར་མི་གནོད་ཅེས་སྨྲ་དགོས་པར་འགྱུར་ན། དགྲ་སྡེ་དཔའ་བོའི་ཚོགས་ལས་སྡར་མའི་ཚོགས་ལ་ཧ་ཅང་ཞེད་དགོས་པ་ཡིན་ཞེས་སྨྲ་བའི་བཞད་གད་ཆེན་པོ་སྟོན་པར་གྱིས་ཤིག ཡང་མ་དག་ས་བདུན་དུ་ཤེས་སྒྲིབ་སྤང་བའི་འགོ་རྩོམ་མི་ནུས་པ་བཞག་སླ་ཡི། ཤེས་སྒྲིབ་སྤོང་ནུས་པ་ཤིན་ཏུ་བཞག་དཀའ་བའི་ཕྱིར་ཏེ། དཔེར་ན། རས་ལ་སྣུམ་གྱིས་བགོས་པའི་དྲི་མ་རགས་པ་དེ་བསལ་བསླ་ཡི། དྲི་མ་ཕྲ་བ་མུར་ཐུག་པ་དེ་བསལ་བ་ཤིན་ཏུ་དཀའ་བའི་ཕྱིར། དཔེ་དེ་བཞིན་དུ་སེམས་ལ་བགོས་པའི་ཉོན་མོངས་པའི་དྲི་མ་རགས་པ་བསལ་བ་བསླ་ཞིང་། ཕྲ་བ་མུར་ཐུག་པའི་བག་ཆགས་དེ་ཤིན་ཏུ་སྦྱང་དཀའ་བའི་ཕྱིར། མངོན་རྟོགས་རྒྱན་ལས་ཀྱང་།

ས་དགུ་ལ་ནི་དྲི་མ་ཡི།།
གཉེན་པོ་ཆུང་ངུའི་ཆུང་ངུ་ལ།།

ཞེས་སོགས་སྤང་བྱ་ཆེ་རིམ་དང་། གཉེན་པོ་ཆུང་རིམ་ནས་སྤང་དགོས་བྱས་པ་ལ། གཞན་གྱིས་ཀླན་ཀ་བྱུང་བ་ལ། བཙོ་བླག་ཁན་གྱིས་དྲི་མ་རགས་པ་བསལ་བ་ལ་ཆེ་ཐད་དུ་འབད་མི་དགོས་ཤིང་། དྲི་མ་ཕྲ་བ་བསལ་བ་ལ་ཆེ་ཐད་དུ་འབད་དགོས་པའི་དཔེར་མཛད་པ་ལྟར། སྒྲིབ་པ་གཉིས་ལའང་དྲི་མ་ཕྲ་རགས་ཀྱི་ཁྱད་པས་སྦྱང་དཀའ་སླ་དེ་ལྟར་འགྱུར་བའི་ཕྱིར། དེ་ལྟར་མ་ཡིན་ན། རིགས་ལམ་སྨྲ་བ་ལྟ་ཞོག། འཇིག་རྟེན་གྱི་ཐ་སྙད་དང་ཡང་འགལ་བའི་ཕྱིར་ཏེ། རས་ལ་སྣུམ་གྱིས་བགོས་པའི་དྲི་མ་རགས་པ་བསལ་སླ་བ་དང་། དྲི་མ་ཕྲ་བ་གཏིང་དུ་སོང་བ་དེ་བསལ་དཀའ་བའི་ཐ་སྙད་འཇིག་རྟེན་རྒན་པོས་ཀྱང་བྱེད་པའི་ཕྱིར། འཇིག་རྟེན་རྒན་པོ་ཡན་ཆད་ཀྱིས་འཕྱ་བའི་གནས་དེ་ལྟ་བུ་ལ་འཛེམས་པར་བྱོས་ཤིག།

༈ ད་ནི་བློ་གྲོས་རྩིང་པོས་དཔྱད་པའི་དྲི་བ་ཞིག་བྱས་འདུག་པ་འདི་ལ་ལན་ཉུང་ཟད་གདབ་པར་བྱ་སྟེ། དེ་ལ་དང་པོ་དྲི་བ་ནི། ༼མི་ཕམ་གྱིས་༽འདི་ལྟར་ཉན་ཐོས་པ་དག་ཐེག་ཆེན་པ་ལས་དབང་པོ་ནི་རྟུལ། ཚོགས་ནི་དམན། དེ་དག་གི་གཞུང་ན་དེ་ཁོ་ན་ཉིད་རྟོགས་བྱེད་ཀྱི་རིགས་པའི་སྒོ་ནི་མི་རྒྱས། རང་ཉིད་འཁོར་བ་ལས་ཐར་བའི་ཐབས་སུ་གང་ཟག་གི་བདག་མེད་ཙམ་རྟོགས་པ་ལ་ནན་ཏན་བྱེད་ཀྱི། ཐེག་ཆེན་ནས་བསྟན་པའི་སྟོང་ཉིད་ལ་ནན་ཏན་ལྷུར་མི་བྱེད་པས་ཀྱང་། ཚེ་གཉིས་སམ་གསུམ་ལ་སོགས་པ་དུས་ཐུང་ངུས་ཆོས་ཉིད་ཀྱི་བདེན་པ་མཐར་ཐུག་པ་མངོན་སུམ་མཐོང་ནུས་ལ། སྔ་མ་ལས་བཟློག་པའི་ཡོན་ཏན་རབ་ཏུ་ཚང་བའི་ཐེག་ཆེན་གྱི་ལམ་དུ་ཞུགས་པའི་དབང་པོ་རྣོན་པོས་ཀྱང་བསྐལ་པ་གྲངས་མེད་གཅིག་གི་བར་དུ་བདེན་དོན་མཐོང་མི་ནུས་པ་ཅི་ཡིན་ཞེས་དྲི་ན། མགྲིན་པ་གཟེངས་བསྟོད་དེ་སྨྲ་དགོས་སོ་ཟེར་འདུག་པ་ལ་ལན་འདི་སྐད་སྨྲ་བར་བྱ་སྟེ། ཁྱོད་ཀྱི་སེམས་ལ་དེ་ཙམ་མ་བདེ་བའི་འཁྲུལ་གཞི་དེ། ཉན་ཐོས་རྣམས་ཀྱིས་གང་ཟག་གི་བདག་མེད་བསྒོམ་བྱའི་གཙོ་བོར་བྱེད་ཀྱི་སྟོང་ཉིད་སྒོམ་བྱའི་གཙོ་བོར་མི་བྱེད། གང་ཟག་གི་བདག་མེད་ཀྱང་གང་ཟག་རྟག་གཅིག་རང་དབང་ཅན་གྱིས་སྟོང་པའི་གང་ཟག་གི་བདག་མེད་རགས་པ་དང་། གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པའི་གང་ཟག་གི་བདག་མེད་ཕྲ་མོ་གཉིས་ཡིན་གྱི། གང་ཟག་གི་བདག་རང་ངོས་ནས་གྲུབ་པས་སྟོང་པ་བསྒོམ་བྱའི་གཙོ་བོ་མི་བྱེད་བསམ་འདུག་པ་འདི་དག་གིས་འཁྲུལ་བའི་ལིང་ཐོག་བློ་ཡི་མིག་ཏུ་བབས་འདུག་པ་ཐུགས་ལ་ཅི་ཁག་སྟེ། ཐལ་འགྱུར་བའི་ཐུན་མོང་མ་ཡིན་པའི་དགོངས་བཞེད་འདི་ཤིན་ཏུ་ཕྲ་ཞིང་རྟོགས་དཀའ་བའི་ཕྱིར། གང་ཟག་རྟག་གཅིག་རང་དབང་ཅན་གྱིས་སྟོང་པ་དང་། གང་ཟག་རང་རྐྱ་ཐུབ་པའི་རྫས་ཡོད་ཀྱིས་གྲུབ་པས་སྟོང་པའི་ཡེ་ཤེས་གཉིས་ཀྱིས་ཉན་ཐོས་ཀྱི་ཐར་པ་ཐོབ་པའི་གེགས་ཀྱི་གཙོ་བོ་གང་ཟག་རང་ངོས་ནས་གྲུབ་པར་འཛིན་པའི་བདག་འཛིན་དེ་འཁོར་བའི་རྩ་བ་གང་ཞིག་དེའི་དངོས་ཀྱི་གཉེན་པོ་བྱེད་མི་ནུས་ཏེ། བདག་མེད་སྔ་མ་གཉིས་རྟོགས་པའི་ཡེ་ཤེས་དེ་གཉིས་ཀ་འཁོར་བའི་རྩ་བ་བདག་འཛིན་མ་རིག་ལྷན་སྐྱེས་དང་འཛིན་སྟངས་དངོས་སུ་མི་འགལ་བའི་ཕྱིར། སྤང་གཉེན་གཉིས་འཛིན་སྟངས་དངོས་སུ་མ་འགལ་ན། དེ་དང་དེའི་དངོས་ཀྱི་གཉེན་པོ་བྱེད་མི་ནུས་པ། རིགས་པའི་དབང་ཕྱུག་གིས།

བྱམས་སོགས་རྨོངས་དང་འགལ་མེད་ཕྱིར།།
ཤིན་ཏུ་ཉེས་པ་ཚར་གཅོད་མིན།།

ཞེས་གསུངས་པ་ལྟར་ཡིན་པའི་ཕྱིར། གཞན་ཡང་སྔར་གྱི་བདག་འཛིན་གཉིས་པོ་འཁོར་བའི་རྩ་བའང་ག་ལ་ཡིན་ཏེ། འཁོར་བའི་རྩ་བ་ལ་བདག་འཛིན་མ་རིག་པ་ལྷན་སྐྱེས་དགོས་པ་གང་ཞིག། དེ་གཉིས་ཀ་གྲུབ་མཐས་ཀུན་བཏགས་པའི་བདག་འཛིན་ཡིན་པའི་ཕྱིར། ཁྱོད་ཀྱིས་གོང་དུ་༼མི་ཕམ་གྱིས་༽དེ་རྣམས་དུ་མ་དང་མི་རྟག་པར་མངོན་སུམ་དུ་མཐོང་ཚེ་དེ་ལ་བརྟེན་ནས་ང་ཞེས་བློས་བཏགས་པ་ཙམ་ལས་རང་ངོས་ནས་མ་གྲུབ་པ་མངོན་སུམ་མཐོང་སྟེ། གདགས་གཞིའི་ཆོས་དེ་དག་བདག་ཏུ་འཛིན་པའི་དམིགས་རྣམ་དང་མི་མཐུན་པའི་ཕྱིར་རོ་ཞེས་བརྗོད་འདུག་པ་ལྟར་བྱས་ན། བདག་དུ་མ་ཡིན་པ་དང་། བདག་མི་རྟག་པ་ཡིན་པ་མཐོང་བ་ཙམ་གྱིས་བདག་རང་ངོས་གྲུབ་པས་སྟོང་པར་མཐོང་ག་ལ་ནུས་ཏེ། བདག་རང་ངོས་ནས་གྲུབ་པར་འཛིན་པའི་བློ་དེ་ཐོག་མ་མེད་པ་ནས་སྲོག་ཆགས་ཕྲ་མོ་ཡན་ཆད་ལ་ངང་གིས་འབྱུང་བའི་བློ་ལྷན་སྐྱེས་ཞིག་ཡིན་གྱི་བློ་དེས་བདག་དུ་མ་ཡིན་མིན་དང་། རྟག་པ་ཡིན་མིན་དཔྱོད་པར་ཞུགས་ནས་དུ་མ་མ་ཡིན་གཅིག་ཡིན་སྙམ་པ་དང་། མི་རྟག་མ་ཡིན་རྟག་པ་ཡིན་སྙམ་དུ་འཛིན་ན་དེ་ཀུན་བཏགས་ལས་བློ་ལྷན་སྐྱེས་སུ་མི་འགྱུར་བའི་ཕྱིར། གལ་ཏེ་དེ་ལྟར་དཔྱད་པར་ཞུགས་པའི་བློ་དེ་ལྷན་སྐྱེས་ཡིན་ན། སྲོག་ཆགས་གྲོག་མས་ཀྱང་རང་རྒྱུད་ཀྱི་བདག་དེ་དུ་མ་མ་ཡིན་གཅིག་པུ་ཡིན། མི་རྟག་པ་མ་ཡིན་རྟག་པ་ཡིན་སྙམ་དུ་འཛིན་དགོས་ན། ཁྱེད་ཅག་སྲོག་ཆགས་གྲོག་མའང་གྲུབ་མཐའ་སྨྲ་བ་པོ་ཡིན་ཞེས་སྨྲོས་ཤིག།

དེ་བཞིན་གྲུབ་མཐའི་ཀུན་བཏགས་པའི་གང་ཟག་རང་རྐྱ་ཐུབ་པའི་རྫས་སུ་གྲུབ་པར་འཛིན་པའང་འཁོར་བའི་རྩ་བར་འདོད་ན་ཡང་དེ་གང་ཟག་གི་བདག་འཛིན་ལྷན་སྐྱེས་སུ་ཐལ་ཞིང་། དེས་ན་འབུ་གྲོག་མ་གྲུབ་མཐའ་སྨྲ་བ་པོར་ཁས་ལེན་དགོས་པའི་ཐལ་བ་ད་རུང་བཟློག་ཏུ་མེད་དོ།།

རྒྱུ་མཚན་དེ་བས་ན་ངེད་ཅག་དེ་ལྟ་བུ་བདག་འཛིན་གཉིས་པོ་དེ་འཁོར་བའི་རྩ་བར་ཁས་མ་བླངས་པས་དེ་གཉིས་དང་འཛིན་སྟངས་དངོས་འགལ་གྱི་བདག་མེད་རྟོགས་པའི་ཤེས་རབ་གཉིས་ཀྱང་ཉན་ཐོས་ཀྱི་བསྒོམ་བྱའི་གཙོ་བོ་མི་བྱེད་པར། འཁོར་བའི་རྩ་བ་གཅོད་བྱེད་གང་ཟག་རང་ངོས་ནས་གྲུབ་པས་སྟོང་པའི་གང་ཟག་གི་བདག་མེད་ཕྲ་མོ་དང་། ཆོས་ཀྱི་བདག་མེད་ཕྲ་མོ་གཉིས་བསྒོམ་བྱའི་གཙོ་བོར་བྱས་ནས་བསྒོམས་པས་ཉོན་སྒྲིབ་ས་བོན་དང་བཅས་པ་སྤངས་ནས་དགྲ་བཅོམ་པའི་གོ་འཕངས་ཐོབ་པ་ཡིན་ནོ།།

འོ་ན་ཉན་ཐོས་ཀྱིས་ཆོས་བདག་མེད་ཕྲ་མོ་རྟོགས་ན་ཐེག་པ་ཆེན་པོ་ལ་དངོས་ཀྱི་བདག་མེད་བསྟན་པར་གསུང་པ་མི་འཐད་པར་འགྱུར་སྙམ་དུ་ཁྱོད་ཅག་དོགས་འདུག་ཀྱང་། ཐེག་ཆེན་ལ་ཆོས་ཀྱི་བདག་མེད་རིགས་པའི་རྣམ་གྲངས་མཐའ་ཡས་པའི་སྒོ་ནས་སྒོམ་ཚུལ་བསྟན་པའི་དོན་ཡིན་གྱི། ཉན་ཐོས་ལ་ཆོས་ཀྱི་བདག་མེད་ཕྲ་མོ་མ་བསྟན་པའི་དོན་ཡིན་ན་ཀླུ་སྒྲུབ་ཡབ་སྲས་ཀྱི་གཞུང་ལས་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པ་སྒྲུབ་པ་རྣམས་མི་འཐད་པར་འགྱུར་བའི་ཕྱིར། དེས་ན་ཐེ་དམན་ལ་ཆོས་ཀྱི་བདག་མེད་རྫོགས་པར་སྒོམ་པ་ཡོད་ཀྱང་རྒྱས་པར་སྒོམ་པ་མེད་པའི་གནད་ཤེས་དགོས་སོ།།

འདི་ལ་རང་ལུགས་འགའ་ཞིག་ཀྱང་རྫོགས་པ་དང་རྒྱས་པ་ལ་ཁྱད་ཕྱེས་ནས་ཉན་རང་ལ་ཆོས་བདག་མེད་རྫོགས་པར་རྟོགས་པ་ཡོད་ཅེས་བྱས་ན་ཧ་ཀྱང་ནོར་བ་ཆེན་པོ་ཡིན་པ་ལྟ་བུ་བྱེད་འདུག་ཀྱང་། དེ་ནི་རང་གི་གཞུང་དོན་ལ་ཞིབ་ཏུ་མ་དཔྱད་པའི་ནང་ཆ་སྟོན་པར་ཟད་དེ། རྗེ་ཡབ་སྲས་ཀྱི་གསུང་ཕལ་ཆེ་ལས་རྒྱས་པ་དང་རྫོགས་པ་དོན་གཅིག་ཏུ་བྱས་ནས་གསུངས་པ་དེ། ཡོངས་སུ་རྫོགས་པའི་ཚིག་བསྡུས་ནས་རྫོགས་པ་སྨྲས་པ་ཡོང་སུ་རྫོགས་པའི་དོན་དུ་དོན་གྱིས་གོ་བའི་དབང་དུ་མཛད་པ་ཡིན་པའི་ཕྱིར་ཏེ། རྫོགས་པ་ཙམ་དང་ཡོངས་སུ་རྫོགས་པ་ལ་མི་འདྲ་བའི་ཁྱད་པར་ཆེན་པོ་ཡོད་པའི་ཕྱིར། ཉན་རང་གིས་ཀྱང་ཆོས་བདག་མེད་ཡོངས་སུ་རྫོགས་པའི་ཚུལ་གྱིས་སྒོམ་པ་མེད་ཀྱང་རྫོགས་པ་སྒོམ་པ་མེད་ན་རིགས་པ་དང་ཡང་འགལ་ཏེ། ཉན་རང་དགྲ་བཅོམ་ཆོས་ཅན། ཁྱོད་ཀྱིས་ཆོས་ཀྱི་བདག་འཛིན་རྫོགས་པར་མ་སྤངས་པར་ཐལ། ཆོས་ཀྱི་བདག་མེད་རྫོགས་པ་མ་རྟོགས་པའི་ཕྱིར། འདོད་ན། དེ་ཆོས་ཅན། ཁྱོད་ཀྱིས་ཆོས་ཐམས་ཅད་ཀྱི་སྟེང་གི་ཆོས་ཉིད་ཐམས་ཅད་མ་རྟོགས་པར་ཐལ། ཆོས་ཅན་རྫོགས་པའི་སྟེང་གི་ཆོས་ཉིད་རྫོགས་པ་མ་རྟོགས་པའི་ཕྱིར། མ་ཁྱབ་ན། ཁྱབ་པ་ཡོད་དེ། ཆོས་ཅན་རྫོགས་པའི་སྟེང་གི་ཆོས་ཉིད་རྫོགས་པ་རྟོགས་པདང་། ཆོས་ཅན་ཐམས་ཅད་ཀྱི་སྟེང་གི་ཆོས་ཉིད་ཐམས་ཅད་ཅེས་པ་དོན་གཅིག་ཡིན་པའི་ཕྱིར་ཏེ། ཐམས་ཅད་ཅེས་པའི་ཚིག་དེས་གཅིག་ཀྱང་མ་ལུས་པ་བསྡུས་པའི་ཕྱིར། གཅིག་ཀྱང་མ་ལུས་པ་ཡིན་ལ་མ་རྫོགས་པ་ཞིག་མི་སྲིད་པའི་ཕྱིར། ཀུན་དང་ཐམས་ཅད་དང་མ་ལུས་པ་དང་རྫོགས་པ་རྣམས་དོན་གཅིག་མིང་གི་གྲངས་སུ་གྲགས་ཀྱང་ཆེ་བའི་ཕྱིར། འདིའི་སྐབས་སུ་རྫོགས་པ་དང་ཡོངས་སུ་རྫོགས་པ་ཁྱད་ཕྱེ་བ་ཁྱོད་ཀྱི་རྟོག་བཟོ་ཡིན་གྱི་ཁུངས་མེད་དོ་སྙམ་ན། ཁུངས་ཡོད་དེ། ཟླ་བའི་འཇུག་འགྲེལ་ལས། ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་བར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟར་ནའང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པ་སྒོམ་པ་མེད་ཀྱང་ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཤིག་ནི་ཡོད་དོ་ཞེས་དེ་དག་ལ་ཆོས་ཀྱི་བདག་མེད་ཡོངས་སུ་རྫོགས་པ་སྒོམ་པ་མེད་ཅེས་ཡོངས་སུ་རྫོགས་པ་ཞེས་པའི་ཚིག་གི་གསལ་ཁ་ཆེས་ཆེར་གཏད་པ་མཛད་པ་ལ་དགོས་པ་ཞིག་ཡོད་པའི་ཕྱིར། ཅི་སྟེ་དགོས་པ་མེད་ན། ཟླ་བའི་ཞབས་ལ་དེ་ཙམ་དགོས་མེད་ཀྱི་གསལ་ཁ་གཏོད་ནས་འོ་བརྒྱལ་མ་ཛད་ཅེས་ཞུས་ཤིག འདི་ལ་མཁས་གྲུབ་ཐམས་ཅད་མཁྱེན་པས་ཀྱང་གནད་འདི་གཟིགས་ནས་སྟོང་ཐུན་ལས་རྒྱས་པར་ཕྱེ་བའི་སྒོ་ནས་རྫོགས་པ་སྒོམ་པ་མེད་པའི་ཕྱིར། ཞེས་གསུངས་ནས་རྫོགས་པ་ཙམ་གྱིས་མ་ཆོག་པར་རྒྱས་པར་ཕྱེ་བའི་སྒོ་ནས་ཞེས་ཚིག་གིས་གསལ་ཁ་ཆེར་གཏོད་པ་མཛད་པ་ལའང་དགོས་པ་མེད་པར་ཐལ། རྒྱས་པར་ཕྱེ་བའི་སྒོ་ནས་ཞེས་སྨྲོས་མ་དགོས་པར་རྫོགས་པ་སྒོམ་པ་མེད་ཅེས་རྫོགས་པ་རྐྱང་པ་སྨྲས་པས་ཆོག་པའི་ཕྱིར། འདིས་ཚིགས་གནད་ལ་དཔྱད་ན་རྫོགས་ཙམ་མ་ཡིན་པ་རྒྱས་པ་ཕྱེ་བའི་སྒོ་ནས་རྫོགས་པ་ཞིག་དགོས་པ་དངོས་སུ་སྟོན་ལ། རྒྱས་པར་ཕྱེ་བའི་སྒོ་ནས་རྫོགས་པ་ནི་ཡོངས་སུ་རྫོགས་པའི་དོན་དུ་གོ་དགོས་ཀྱི། དེ་འདྲའི་ཚིགས་ཀྱི་གོ་བ་ལ་ཁྱད་པར་ཕྱེ་རྒྱུ་མེད་ན། རྒྱས་པར་ཕྱེ་བའི་སྒོ་ནས་ཞེས་ཚིགས་རིས་བསྣན་ནས་དགོས་མེད་ཀྱི་འོ་བརྒྱལ་མ་མཛད་ཅེས་མཁས་གྲུབ་ཐམས་ཅད་མཁྱེན་པ་ལ་ཞུས་ཤིག། འདིའི་རྒྱས་པར་ཕྱེ་བའི་སྒོ་ནས་རྫོགས་པ་ཞེས་པ་དང་འཇུག་འགྲེལ་གྱིས་ཡོངས་སུ་རྫོགས་པ་ཞེས་པ་གནད་གཅིག་ཏུ་ཤེས་པ་དང་། རྫོགས་པ་ཙམ་རྟོགས་པ་ཉན་རང་ལ་ཡོད་པར་བྱ་དགོས་པའི་གནད་འདི་རྗེ་ཡབ་སྲས་ཀྱིས་གོ་སླ་བར་དགོངས་ནས་རྫོགས་པ་ཞེས་ཚིག་ཚོགས་སྐྱུངས་པ་རྗེས་འཇུག་བློ་དམན་པ་དག་གིས་མ་གོ་བས་མགོ་རྨོངས་པར་ཟད་ལ། ཚིགས་འདི་ལ་འཁྲུལ་ན་འཁྲུལ་གཞི་ཡང་ཆེ་བར་འགྲོ་བས་འདི་ན་འགོ་ཙམ་སྨྲོས་ཀྱི་རྒྱས་པ་གཞན་དུ་བཀྲལ་བར་བྱའོ།།

ད་ནི་དཀྱུས་ལ་འཇུག་པར་བྱ་སྟེ། དེ་ལྟར་ཐེག་དམན་གྱིས་བདག་མེད་གཉིས་ཤིན་ཏུ་ཕྲ་བ་སྒོམ་ནས་བསོད་ནམས་ཀྱི་ཚོགས་ཀྱང་དམན། དབང་པོ་ཡང་དམན་ཀྱང་ཚེ་གསུམ་ལ་དགྲ་བཅོམ་ཐོབ་པ་དང་། དུས་ཐུང་ངུས་སྟོང་ཉིད་མངོན་སུམ་དུ་མཐོང་ནུས་པ་ལ་ཧ་ལས་པ་ལྟ་བུ་བྱས་ནས། ཡོན་ཏན་རབ་ཏུ་ཚང་བའི་ཐེག་ཆེན་པས་གྲངས་མེད་གཅིག་གི་བར་དུ་སྟོང་ཉིད་མངོན་སུམ་དུ་རྟོགས་མི་ནུས་པ་ཅི་ཡིན་ཞེས་ཡི་ཆད་དེ་ཙམ་བྱུང་བའང་ཐེག་པ་ཆེན་པོ་བ་རྣམས་ལ་བསྒོམ་བྱའི་སྙིང་པོ་མཐར་ཐུག་པ་ནི་སྟོང་ཉིད་ལས་གཞན་མེད་ལ། སྟོང་ཉིད་རྟོགས་པའི་ཤེས་རབ་ནི་ཐེག་ཆེན་གྱི་ལམ་གྱི་རྩ་བ་ལྟ་བུ་ཡིན། སྙིང་རྗེ་བྱང་སེམས་སོགས་ཀྱང་སྟོང་ཉིད་རྟོགས་པ་ལས་ཤུགས་ཀྱིས་འབྱུང་བ་ཡིན་སྙམ་པའི་ལོག་རྟོག་དེ་ལྟ་བུའི་སྨྱོ་བྱེད་ཀྱི་རླུང་སྙིང་སྲོག་རྩ་ལ་ཞུགས་པའི་སྐྱོན་ཡིན་ཏེ། ཀྱེ་མ་ཀྱེ་ཧུད་དེང་སང་སངས་རྒྱས་ཀྱི་བསྟན་པ་ཉག་ཤིན་ཏུ་ཕྲ་བའི་དུས་སུ་གསར་རྙིང་གི་གྲུབ་མཐའ་སྨྲ་བ་ཕལ་མོ་ཆེ་དང་། ལྷག་ཏུ་བཀའ་རྫོགས་གཉིས་སེམས་ཀྱི་གནས་ལུགས་མཐོང་བ་ཁོ་ན་རྩིས་ཆེར་བྱེད་པ་རྣམས་ལ་ལམ་གྱི་གནད་ཡང་དག་མ་ཤེས་པའི་སྐྱོན་ཆེན་པོ་འདིས་རང་ཕྱི་མ་ཕན་ཆད་ཕན་པའི་ཉམས་ལེན་གྱི་རྩ་བ་གཏིང་ནས་རུལ་བ་བྱེད་པ་ལ་གཞན་ལ་ཆོས་འབྲེལསྤེལ་བའི་སྒོམ་ཆེན་དང་སྟོན་ཆེན་དུ་མས་ལམ་མ་དག་པ་འདི་རང་ལ་སྐྱེ་བོ་དམན་པ་རྣམས་ཅི་བདེར་ཁྲིད་པས་ས་ཡི་སྟེང་ཐམས་ཅད་ཁྱབ་འདུག་ན་རྒྱལ་བའི་བསྟན་པ་རིན་པོ་ཆེའི་སྙིང་པོ་དམ་པ་མི་ཉམས་པའི་ཐབས་ཅི་ཞིག་ཡོད།

སྤྱིར་གངས་རིའི་ལྗོངས་ཀྱི་ས་དགེ་ཀར་རྙིང་གི་གྲུབ་མཐའ་སྨྲ་བ་དག་རང་རང་གི་ཕྱག་རྫོགས་དབུ་གསུམ་གྱི་ལུགས་གང་བྱས་ཀྱང་ཐེག་ཆེན་གྱི་ཐོབ་བྱ་མཐར་ཐུག་དོན་དུ་གཉེར་བ་ལ་ཐོག་མ་ནས་ཆོས་རྣམས་ཀྱི་གནས་ལུགས་སྟོང་པ་ཉིད་ཙམ་སྒོམ་བྱའི་གཙོ་བོར་བྱས་ན། བྱམས་སྙིང་རྗེ་བྱང་ཆུབ་ཀྱི་སེམས་སོགས་དྲན་ཙམ་རེ་ལས་ཆེད་དུ་བསྒོམ་བྱའི་གཙོ་བོ་མ་བྱས་ཀྱང་སྟོང་ཉིད་རྟོགས་པའི་ཤེས་རབ་རྒྱུད་ལ་སྐྱེས་པ་དང་ངང་གིས་འབྱུང་བར་འགྱུར་ཞེས་སློབ་མ་བཀྲི་བའི་རིམ་པ་མ་དག་པ་འདི་བཞིན་མི་བྱེད་པར། དང་པོར་ཚེ་འདི་སྣང་གི་འཁྲི་བ་གཅོད་ནས་ཚེ་འདི་བློས་བཏང་། བར་དུ་འཁོར་བ་མཐའ་དག་ལ་སྐྱོ་ཤས་དང་ངེས་འབྱུང་ཤུགས་དྲག་བཟློག་ཏུ་མེད་པ་བསྐྱེད། ཐ་མར་བྱམས་སྙིང་རྗེས་དྲངས་པའི་བྱང་ཆུབ་ཀྱི་སེམས་རིན་པོ་ཆེ་བཅོས་མ་མ་ཡིན་པ་ཞིག་རྒྱུད་ལ་སྐྱེས་ན། བྱང་ཆུབ་ཀྱི་སེམས་རིན་པོ་ཆེ་དེས་དྲངས་ནས་བདག་མེད་པ་གཉིས་སྒོམ་པའི་ཡང་དག་པའི་ལྟ་བ་ཡང་ཐམས་ཅད་མཁྱེན་པ་འཐོབ་པའི་རྒྱུ་རུ་འགྲོ་ཡི། བྱང་ཆུབ་ཀྱི་སེམས་མེད་པར་བདག་མེད་ཀྱི་ལྟ་བ་ཇི་ཙམ་བསྒོམས་ཀྱང་སྲིད་པ་ལས་གྲོལ་བའི་རྒྱུ་ཙམ་ལས་ཐམས་ཅད་མཁྱེན་པའི་རྒྱུ་རུ་གཏན་ནས་མི་འགྲོ་བས་ཁྱབ་པའི་ཕྱིར་ཏེ། སངས་རྒྱས་ཀྱི་གོ་འཕངས་འགྲུབ་པའི་རྒྱུ་ཐུན་མོང་མ་ཡིན་པ་ས་བོན་ལྟ་བུ་དེ་བྱང་ཆུབ་ཀྱིས་སེམས་ཡིན་ཏེ། སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ།། ཞེས་གསུངས་པའི་ཕྱིར། དེར་མ་ཟད་སྟོང་ཉིད་རྟོགས་པའི་ཤེས་རབ་ནི་མ་ལྟ་བུ། སྲས་ཉན་རང་བྱང་སེམས་སངས་རྒྱས་ཏེ་འཕགས་པ་བཞི་བསྐྲུན་པའི་ཐུན་མོང་གི་རྒྱུ་ཡིན་པ་དང་། བྱང་ཆུབ་ཀྱི་སེམས་ནི་ཐུན་མོང་མ་ཡིན་པ་ཕ་ཡི་ས་བོན་ལྟ་བུ་ཡིན་པའི་ཕྱིར། རྒྱུད་བླ་མ་ལས།

ཐེག་མཆོག་ལ་མོས་ས་བོན་ཤེས་རབ་ནི།།

སངས་རྒྱས་ཆོས་བསྐྱེད་མ་དང་བསམ་གཏན་གྱི།།

བདེ་བའི་མངལ་གནས་སྙིང་རྗེའི་མ་མ་སྟེ།།

ཞེས་གསུངས་པའི་ཕྱིར། སྟོང་ཉིད་རྟོགས་པའི་ཤེས་རབ་སྲས་འཕགས་པ་བཞི་བསྐྲུན་པའི་ཐུན་མོང་གི་མ་ལྟ་བུ་ཡིན་པས་ན་དེ་ལ་མའམ་ཡུམ་གྱི་སྒྲས་བརྗོད་ཀྱང་། བྱང་ཆུབ་ཀྱི་སེམས་རིན་པོ་ཆེ་ནི་ཐེག་ཆེན་འཕགས་པའི་ཐུན་མོང་མ་ཡིན་པའི་རྒྱུ་ལས་སྲས་འཕགས་བཞི་བསྐྲུན་པའི་ཐུན་མོང་གི་རྒྱུ་རུ་བཤད་པ་མེད་པའི་ཕྱིར། དེས་ན་སྟོང་ཉིད་རྟོགས་པའི་ཤེས་རབ་འཕགས་བཞི་བསྐྲུན་པའི་ཐུན་མོང་གི་རྒྱུ་རུ་གསུང་ན་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པའང་དོན་གྱིས་གྲུབ་ལ། སྟོང་ཉིད་རྟོགས་པའི་ཤེས་རབ་རྣམ་མཁྱེན་འགྲུབ་པའི་ཡེ་ཤེས་ཀྱི་ཚོགས་སུ་འགྱུར་མི་འགྱུར་བྱང་ཆུབ་ཀྱི་སེམས་ཀྱིས་ཟིན་མ་ཟིན་ལ་རག་ལས་པའི་ཕྱིར་ཏེ། བྱང་ཆུབ་ཀྱི་སེམས་ཀྱིས་མ་ཟིན་པའི་བདག་མེད་གཉིས་ཀ་རྟོགས་པའི་ཡེ་ཤེས་ཀྱང་སངས་རྒྱས་འགྲུབ་བྱེད་ཀྱི་རྒྱུ་རུ་མི་འགྲོ་བའི་ཁྱབ་པ་ཡོད་པའི་ཕྱིར། དེས་ན་ཕྱག་རྫོགས་དབུ་གསུམ་གང་ལའང་། ལམ་ཡང་དག་པ་ཞིག་ཡིན་ཕྱིན་ཆད་རྣམ་པ་ཐམས་ཅད་མཁྱེན་པའི་རྒྱུ་རུ་འགྲོ་བ་ཞིག་ཡིན་དགོས། དེ་ཡིན་ན་སྟོང་ཉིད་རྟོགས་པའི་ཤེས་རབ་རྐྱང་པ་ལ་ཇི་ཙམ་འབད་ཀྱང་རྣམ་མཁྱེན་འགྲུབ་པའི་རྒྱུ་རུ་མི་འགྱུར་ཞིང་། དེས་རྩིས་ཟིན་པའི་དགེ་རྩའང་རྣམ་མཁྱེན་གྱི་རྒྱུ་རུ་མི་འགྲོ་ལ། བྱང་ཆུབ་ཀྱི་སེམས་རིན་པོ་ཆེ་རང་ཉིད་རྣམ་མཁྱེན་གྱི་རྒྱུ་ཐུན་མོང་མ་ཡིན་པ་ཡིན་ཞིང་། དེས་ཟིན་པའི་དགེ་རྩ་ཐམས་ཅད་ཀྱང་རྣམ་མཁྱེན་གྱི་རྒྱུ་རུ་འགྲོ་བ་ནི་ཞི་བ་ལྷས།

དགེ་བ་གཞན་ཀུན་ཆུ་ཤིང་བཞིན་དུ་ནི།།

འབྲས་བུ་བསྐྱེད་ནས་ཟད་པར་འགྱུར་པ་ཉིད།། བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་།།

འབྲས་བུ་འབྱིན་པ་མི་ཟད་འཕེལ་བར་འགྱུར།།

ཞེས་དགེ་བ་གཞན་སྟོང་ཉིད་རྟོགས་པའི་ཤེས་རབ་སོགས་ལ་བྱེད་དགོས་པའི་ཕྱིར་རོ།།

དེ་ལ་གལ་ཏེ་དབུ་མའི་ལམ་ནི་སྔགས་དང་མ་འབྲེལ་བའི་སྟོང་ཉིད་ཙམ་རྟོགས་པས་དེ་ལྟར་ཡིན་དུ་རུང་ཡང་། ཕྱག་ཆེན་དང་རྫོགས་ཆེན་དང་པོ་ནས་སྔགས་དང་འབྲེལ་བས་སེམས་ཀྱི་ངོ་བ་ཀ་དག་དང་མ་ཅོས་ལྷུན་གྲུབ་ཀྱི་ངོ་བོར་ངོ་སྤྲོད་པ་ནི་བྱང་ཆུབ་ཀྱི་སེམས་དང་མ་འབྲེལ་ཞིང་བྱང་ཆུབ་ཀྱི་སེམས་ལམ་གྱི་གཙོ་བོར་མ་བཟུང་ཡང་སེམས་ཀྱི་ངོ་བོ་མཐོང་བའི་སྟོས་ཀྱིས་བྱམས་སྙིང་རྗེ་བྱང་ཆུབ་ཀྱི་སེམས་སོགས་རང་ཤུགས་ཀྱིས་སྐྱེ་བ་ཡིན་ཞེས་སྨྲ་ན། དེ་ཡང་མི་འཐད་དེ། བྱང་ཆུབ་ཀྱི་སེམས་ཀྱིས་མ་ཟིན་པའི་ཕྱག་རྫོགས་གང་ཡིན་ཀྱང་ཐེག་པ་ཆེན་པོའི་ཆོས་སུ་མི་འགྲོ་ཞིང་རྣམ་མཁྱེན་འཐོབ་པའི་རྒྱུ་རུ་མི་འགྲོ། སྔགས་ལའང་བྱང་ཆུབ་ཀྱི་སེམས་བཅོས་མ་མ་ཡིན་པ་སྔོན་དུ་སོང་རྗེས་སུ་སྔགས་ལ་ཞུགས་དགོས་ཀྱི། བྱང་ཆུབ་ཀྱི་སེམས་མ་སྐྱེས་པ་ལ་གསང་སྔགས་ཀྱི་དཀྱིལ་འཁོར་དུ་ཞུགས་པ་ལྟ་ཞོག་དཀྱིལ་འཁོར་ལ་བལྟ་བ་ཙམ་ཡང་བྱེད་དུ་མི་བཞུག་པ་ལག་ན་རྡོ་རྗེ་དབང་བསྐུར་བའི་རྒྱུད་སོགས་རྒྱུད་སྡེ་དུ་མ་ལས་གསུང་པའི་ཕྱིར་རོ།།

གལ་ཏེ་བྱང་ཆུབ་ཀྱི་སེམས་དང་འབྲེལ་བ་ཞིག་ཅིས་ཀྱང་དགོས་མོད། ཕྱག་རྫོགས་སོགས་དང་པོ་མ་བསྒོམ་གོང་སེམས་བསྐྱེད་བཅོས་མ་མ་ཡིན་པ་མེད་ཀྱང་། ཡིད་ལ་དྲན་ཙམ་རེ་བྱས་ན་དེས་ཆོག་གམ་སྙམ་ན། དེ་ཡང་མི་ཆོག་སྟེ་ཕྱག་རྫོགས་ཀྱི་མན་ངག་ཁུངས་ཐུབ་ཕལ་མོ་ཆེ་ལས། བླ་མ་གོང་མ་དག་གིས་ཁྲིད་ཚུལ་ལ། ངེས་འབྱུང་གིས་བློ་སྦྱངས་རྗེས་སུ་བྱམས་དང་སྙིང་རྗེ་བྱང་ཆུབ་ཀྱི་སེམས་ཀྱི་བར་དུ་ཁྲིད་ནས་ཕྱག་རྫོགས་དངོས་གཞིའི་སྐབས་སུ་ཡང་དམ་པ་གསུམ་དང་མ་བྲལ་བར་ཉམས་སུ་ལེན་དགོས་ཚུལ་གསུངས་འདུག་པ་ལ་སོམས་དང་། དམ་པ་གསུམ་གྱི་མགོ་ནས་སེམས་བསྐྱེད་དམ་པ་ཞེས་པའི་དམ་པའི་སྒྲ་དེ་སེམས་བསྐྱེད་དྲན་ཙམ་གྱིས་མི་ཆོག་པར་སེམས་བསྐྱེད་བཅོས་མ་མ་ཡིན་པ་ལ་བྱེད་དགོས་པའི་ཕྱིར། དེང་སང་ཕྱག་རྫོགས་པ་རྣམས་ཀྱིས་དམ་པ་གསུམ་གྱི་གནད་ཅི་ཡང་མི་ཤེས་པར་རང་གར་སྟོང་སྟོང་པོ་མེད་མེད་པོའི་སྒྲ་ཅན་གྱི་ལྟ་བ་ལ་དགའ་བ་ཙམ་དང་། ཆོས་ཇི་བཞིན་པ་ལ་སྙིང་རུས་མི་མོས་པ་གཉིས་ཟུང་དུ་འབྲེལ་ནས་ས་སྟེང་ཐམས་ཅད་བྱང་ཆུབ་ཀྱི་སེམས་དོར་བའི་ལྟ་བ་ཧད་པོ་ཞེ་མི་ཞིམ་པ་གཅིག་ལ་བློ་རྩེ་གཏད་པས་ཁྱབ་འདུག་པ་འདི་རང་བསྟན་པ་ཧ་ཀྱང་ཉམས་པའི་རྟགས་མ་འཁྲུལ་བ་ཞིག་ལགས་པས་བསྟན་པ་ཁོ་ན་ཐུགས་ལ་བརྣག་པའི་བསྟན་འཛིན་གྱི་སྐྱེས་བུ་རྣམས་ཀྱིས་ཐུགས་བསྐྱེད་རླབས་མི་ཆུང་བ་མཛོད་འཚལ་ཅེས་ཐལ་མོ་སྦྱར་ཏེ་ཞུས་པ་ལགས། དེ་ལྟར་ཕྱག་རྫོགས་དབུ་མ་གང་གི་ལུགས་ལའང་ཐེག་པ་ཆེན་པོ་ཞིག་ཡིན་ཕྱིན་ཆད་ནས་ཐེག་ཆེན་ལམ་གྱི་འཇུག་སྒོ་ཡང་བྱང་ཆུབ་ཀྱི་སེམས་རིན་པོ་ཆེས་བྱེད། ཐེག་ཆེན་ལམ་གྱི་རྩ་བའང་བྱང་ཆུབ་ཀྱི་སེམས་ཀྱིས་བྱེད་དགོས་པ་གནད་ཅིག་པ་ཡིན་ལ། དེས་ན་ཐེག་པ་ཆེན་པོའི་ལམ་དང་ཐེག་དམན་གྱི་ལམ་ནི་ཆོས་ཀྱི་བདག་མེད་བསྟན་མ་བསྟན་ཙམ་གྱིས་དབྱེ་བ་མི་ཕྱེད་ལ་ཐེག་དམན་གྱི་སྡེ་སྣོད་ལས་སྟོང་ཉིད་བསྟན་པ་འདུས་བྱས་ཟད་པ་སྟོང་པ་ཉིད་དང་ཐེག་ཆེན་གྱི་སྡེ་སྣོད་ལས་འདུས་བྱས་རང་བཞིན་གྱིས་སྐྱེ་བ་མེད་པ་ཉིད་དུ་བསྟན་པ་དེ་གཉིས་ཀྱང་སྟོང་པ་ཉིད་དུ་དོན་གཅིག་པ་གསུངས་ཏེ། རིན་ཆེན་ཕྲེང་བ་ལས།

ཐེག་པ་ཆེ་ལས་སྐྱེ་མེད་བསྟན།།

གཞན་གྱི་ཟད་པ་སྟོང་པ་ཉིད།།
ཟད་དང་མི་སྐྱེ་དོན་དུ་ནི།།

གཅིག་པས་དེ་ཕྱིར་བཟོད་པར་གྱིས།།

ཞེས་གསུངས་པའི་ཕྱིར་རོ།།

དེས་ན་ཐེག་པ་མཆོག་དམན་སྟོང་ཉིད་ཕྲ་མོ་བསྟན་མི་བསྟན་གྱི་སྒོ་ནས་མ་ཕྱེ་བར། བྱང་ཆུབ་ཀྱི་སེམས་རིན་པོ་ཆེ་དང་། སྦྱིན་སོགས་ཀྱི་སྤྱོད་པ་དང་། སྨོན་ལམ་དང་། བསྔོ་བ་རླབས་ཆེན་པོ་རྣམས་ཀྱི་སྒོ་ནས་ཁྱད་པར་ཕྱེ་དགོས་པའི་ཕྱིར་ཏེ། རིན་ཆེན་ཕྲེང་བ་ལས།

ཉན་ཐོས་ཐེག་པ་དེ་ལས་ནི།།

བྱང་ཆུབ་སེམས་དཔའི་སྨོན་ལམ་དང་།།
སྤྱོད་པ་ཡོངས་བསྔོ་མ་བཤད་པ།།

བྱང་ཆུབ་སེམས་དཔའ་ག་ལ་འགྱུར།།

བྱང་ཆུབ་སྤྱོད་ལ་གནས་པའི་དོན།།

མདོ་སྡེ་ལས་ནི་བཀའ་མ་སྩལ།།
ཐེག་པ་ཆེ་ལས་བཀའ་སྩལ་པ།།

དེ་ཕྱིར་མཁས་པ་རྣམས་ཀྱིས་གསུངས།།

ཞེས་གསུངས་པའི་ཕྱིར།

འོ་ན་ཆོས་ཀྱི་བདག་མེད་རྒྱས་པ་རིགས་པའི་རྣམ་གྲངས་མཐའ་ཡས་པའི་སྒོ་ནས་བསྟན་པ་ཐེག་ཆེན་གྱི་ཐུན་མོང་མ་ཡིན་པའི་ཁྱད་ཆོས་སུ་བཤད་པ་དང་འགལ་ལམ་སྙམ་ན། དེ་ནི་ཁྱོད་ཅག་རྣམས་ལྟ་ཞོག་རང་ལུགས་ལའང་དེ་ཙམ་གྱིས་དོགས་སེལ་ཞེ་ཞི་བ་ཞིག་དཀོན་པ་བྱུང་སྟེ། ཐེག་ཆེན་ལ་ཆོས་བདག་མེད་རིགས་པའི་རྣམ་གྲངས་མཐའ་ཡས་པའི་སྒོ་ནས་རྒྱས་པ་སྒོམ་དགོས་པ་བསྟན་པ་དང་། ཐེག་དམན་ལ་དེ་ཙམ་མ་བསྟན་པའང་། ཐེག་དམན་ལ་ཉོན་སྒྲིབ་སྤང་པ་ཙམ་གྱི་དོན་དུ་སྟོང་ཉིད་མདོར་བསྟན་དང་། ཐེག་ཆེན་ལ་ཤེས་སྒྲིབ་སྤོང་བའི་དོན་དུ་སྟོང་ཉིད་རྒྱས་པ་བསྟན་ཞེས་བཤད་པ་འདི་ཤ་སྟག་རྗེས་སུ་ཟློ་འདུག་པར་སྣང་ཡང་། དེ་དག་སྤོམ་བཤད་ཙམ་ལས་མ་བྱུང་བ་ཡིན་ཏེ། དེ་ཙམ་ཁོ་ན་བཤད་ན་ཐེག་པ་མཆོག་དམན་སྟོང་ཉིད་རྒྱས་པ་བསྟན་མ་བསྟན་གྱི་སྒོ་ནས་ཕྱེ་བ་ལས་བྱང་ཆུབ་ཀྱི་སེམས་སོགས་དེ་ཙམ་དོ་གལ་མི་ཆེའམ་སྙམ་པའི་ལོག་རྟོག་ངན་པ་བཟློག་མི་ནུས་པའི་ཕྱིར། འོ་ན་ཇི་ལྟར་འཆད་ཅེ་ན། ཐེག་ཆེན་ལ་ཆོས་ཀྱི་བདག་མེད་རྒྱས་པ་སྒོམ་པ་ཡོད་པ་དང། ཐེག་དམན་ལ་ཆོས་ཀྱི་བདག་མེད་རྒྱས་པ་སྒོམ་པ་མེད་པ་གཉིས་དང་པོ་ནས་སེམས་བསྐྱེད་རྒྱ་ཆེ་ཆུང་གི་ཁྱད་པར་ཡིན་ཏེ། ཉན་རང་ལ་དང་པོ་ནས་རང་ཉིད་གཅིག་པུ་འཁོར་བ་ལས་ཐར་པ་འདོད་པའི་བསམ་པ་ཙམ་ལས་མེད་པས་ཐོབ་བྱའི་གོ་འཕངས་དོན་དུ་གཉེར་བྱ་ཡང་འཁོར་བ་ལས་ཐར་བའི་ཞི་བ་མྱང་འདས་ཙམ་ཡིན་ལ། དེ་ཙམ་དོན་དུ་གཉེར་བ་ལ། བསོད་ནམས་ཀྱི་ཚོགས་ཀྱང་རྒྱ་ཆེན་པོ་བསོག་མི་དགོས་ཤིང་། བདག་མེད་ཀྱང་རིགས་པ་མདོར་བསྡུས་པ་ཙམ་གྱིས་རྟོགས་པས་སྲིད་པའི་རྩ་བ་ཕྱུང་སྟེ་ཐར་པ་འཐོབ་ནུས་པའི་རྒྱུ་མཚན་གྱིས་བདེན་པ་མངོན་སུམ་དུ་མཐོང་བ་ལའང་དེ་ཙམ་མི་འགོར་བ་མྱུར་དུ་རྟོགས་པ་ཡིན་ཏེ། སྲིད་པ་ལས་གྲོལ་བའི་ཐབས་ཙམ་གྱིས་བསོད་ནམས་དང་། ཉོན་མོངས་པའི་དངོས་གཉེན་བྱེད་ནུས་པའི་བདག་མེད་རིགས་པ་མདོར་བསྡུས་པ་ཙམ་གྱིས་སྒོ་ནས་རྟོགས་པས་ཆོག་པ་ཡིན་ཏེ། དེ་དག་ལ་བྱང་ཆུབ་སེམས་དཔའ་ལྟར་ཡུན་རིང་པོ་འགོར་བའི་དགོས་དོན་རླབས་ཆེན་པོ་སྒྲུབ་ཏུ་མེད་པའི་ཕྱིར།

རྒྱལ་སྲས་བྱང་ཆུབ་སེམས་དཔའ་ནི་ཉན་རང་ལས་རིགས་དང་དབང་པོ་སེམས་བསྐྱེད་སོགས་ཆེས་ཁྱད་པར་དུ་འཕགས་པ་ཡིན་པའི་རྒྱུ་མཚན་གྱིས་དགོས་པའི་དོན་དུ་གཉེར་བྱའང་ཉན་རང་ལས་བརྒྱ་འགྱུར་སྟོང་འགྱུར་གྱིས་འགངས་ཆེ་བ་དང་། སྒྲུབ་དཀའ་བ་ཡིན་པའི་ཕྱིར། ཆོས་ཉིད་མངོན་སུམ་མཐོང་བ་ཙམ་ལའང་ཉན་རང་ལས་ཆེས་ཆེར་འགོར་བའི་རྒྱུ་མཚན་ཀྱང་དེ་ཡིན་པའི་ཕྱིར། ཉན་རང་གིས་ཆོས་ཉིད་མངོན་སུམ་དུ་མཐོང་བ་དང་། རྒྱལ་སྲས་བྱང་ཆུབ་སེམས་དཔས་ཆོས་ཉིད་མངོན་སུམ་དུ་མཐོང་བ་གཉིས་ཆོས་མངོན་སུམ་དུ་མཐོང་ཚུལ་ཙམ་གྱིས་ཁྱད་མེད་ཀྱང་། སེམས་བསྐྱེད་རླབས་ཆེ་ཆུང་གི་དབང་གིས་ཆོས་ཉིད་མངོན་སུམ་དུ་མཐོང་བའི་ཡེ་ཤེས་དེ་ཉིད་དོན་དམ་སེམས་བསྐྱེད་ཀྱི་གྲངས་སུ་འགྲོ་མི་འགྲོ་དང་། ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་རུ་འགྲོ་མི་འགྲོ་དང་། སྤྱོད་པ་ཕྱིན་དྲུག་གི་དཔུང་གྲོགས་ཚད་མེད་པ་དང་ལྡན་མི་ལྡན་སོགས་ཉན་རང་ལ་གཏན་ནས་མ་གྲགས་པའི་ཡོན་ཏན་གྱི་རྣམ་པ་མཐའ་ཡས་པ་ཞིག་སྒྲུབ་དགོས་པའི་ཕྱིར། ཆོས་ཉིད་མངོན་སུམ་དུ་མཐོང་བ་དང་མི་གནས་པའི་མྱང་འདས་འཐོབ་པ་སོགས་ལ་ཡུན་རིང་པོ་དེ་ཙམ་འགོར་དགོས་པ་ཅི་ཡིན་ཞེས་ཡི་མུག་པའི་སྨྲེ་སྔགས་དེ་ཙམ་མ་འདོན་ཅིག།

ཅི་སྟེ་ཉན་རང་ལས་བྱང་སེམས་རྣམས་རིགས་དང་དབང་པོ་སོགས་ཁྱད་པར་འཕགས་བཞིན་དུ་ཆོས་ཉིད་མངོན་སུམ་དུ་མཐོང་བ་ལ་དེ་ཙམ་འགོར་བ་དང་། ཉན་རང་རྣམས་དེ་ལས་ཆོས་ཉིད་མཐོང་བ་མྱུར་འགྲོ་བ་ཅི་ཡིན་ཞེས་ད་རུང་སྨྲེ་སྔགས་འདོན་པ་རྒྱུན་མ་བཅད་ན། འོ་ན་དགོས་དོན་ཆུང་ངུ་དོན་དུ་གཉེར་བའི་ཚོང་པ་ཞིག་ལམ་དུ་ཡང་མི་འགོར་ཚོང་དོན་ཀྱང་མྱུར་དུ་འགྲུབ་ལ། དགོས་དོན་ཆེན་པོ་ཡིད་བཞིན་གྱི་ནོར་བུ་རིན་པོ་ཆེ་དོན་དུ་གཉེར་བའི་ཚོང་པ་ཞིག་རྒྱ་མཚོར་ཞུགས་ནས་ལམ་དུ་ཡང་ཡུན་རིང་པོ་འགོར། དགོས་དོན་ཀྱང་ཡུན་རིང་པོར་འགྲུབ་མ་ནུས་པ་ལ། ཅི་ཞིག་དགོས་དོན་ཆེན་པོ་ཡིད་བཞིན་གྱི་ནོར་བུ་དོན་དུ་གཉེར་བའི་ཚོང་པ་འདི་དག་དགོས་དོན་ཆུང་ངུ་དོན་དུ་གཉེར་བའི་ཚོང་པ་རྣམས་ལས་བརྩོན་འགྲུས་དང་སྙིང་སྟོབས་ཆེས་ཁྱད་པར་དུ་འཕགས་པ་ཡིན་ན། དེ་དག་གིས་ལམ་དུའང་ཡུན་རིང་འགོར་དགོས་དོན་ཡིད་བཞིན་གྱི་ནོར་བུའང་མྱུར་དུ་མ་རྙེད་ལ། དགོས་དོན་ཆུང་ངུ་དོན་དུ་གཉེར་བའི་ཚོང་པ་འདི་དག་ནི་སྔ་མ་ལས་བརྩོན་འགྲུས་དང་སྙིང་སྟོབས་སོགས་ཆེས་ཆེར་ཞན་ནའང་ལམ་དུའང་མ་འགོར། རང་གི་དགོས་དོན་ཀྱང་མྱུར་དུ་འགྲུབ་པ་འདི་ཅི་ཡིན་སྨྲ་དགོས་སོ་ཞེས་སྨྲེ་སྔགས་འདོན་པའང་རིགས་ཏེ། དཔེ་དོན་ཀུན་ནས་མཚུངས་པའི་ཕྱིར། རྟགས་གྲུབ་སྟེ། དཔེ་ལའང་ཚོང་པ་གཉིས་དགོས་པའི་དོན་འཚོལ་ནས་ལམ་དུ་ཞུགས་པ་ཙམ་ལ་ཁྱད་མེད་ཀྱང་། དགོས་པའི་དོན་འཚོལ་བྱ་འགངས་ཆེ་ཆུང་གིས་ཁྱད་པར་ཤིན་ཏུ་ཆེ་བའི་ཕྱིར་དགོས་དོན་ཆུང་ངུ་སྒྲུབ་པའི་ཚོང་པ་དེ་ལམ་དང་ཚོང་དོན་གང་ལའང་མི་འགོར་ཞིང་ཤིན་ཏུ་མྱུར་བ་དེ། སྙིང་སྟོབས་ཆེས་ཁྱད་པར་འཕགས་པ་སོགས་ཀྱི་ཡོན་ཏན་ཡང་མ་ཡིན་ལ། དེ་ལས་གཞན་དགོས་དོན་ཆེན་པོ་དོན་དུ་གཉེར་བའི་ཚོང་པ་ལམ་དང་ཚོང་དོན་གང་ལའང་ཆེས་ཆེར་འགོར་བ་དེ་སྙིང་སྟོབས་ཆུང་བ་སོགས་ཀྱིས་སྐྱོན་ཡང་མིན་པ་འཇིག་རྟེན་པས་ཀྱང་མངོན་སུམ་གྱིས་མཐོང་བའི་དཔེ་དེ་བཞིན་དུ། བྱང་སེམས་དང་ཉན་རང་ལའང་ཆོས་ཉིད་མངོན་སུམ་དུ་མཐོང་བ་ཙམ་ལ་ཁྱད་པར་མེད་ཀྱང་། དེའི་ངོ་བོ་རྒྱུ་གྲོགས་སོགས་ཀྱི་ཁྱད་པར་ཤིན་ཏུ་ཆེ་ལ། དེའི་དབང་གིས་ཡུན་རིང་འགོར་མི་འགོར་གྱི་ཁྱད་པར་བྱུང་ཡང་ཡུན་རིང་འགོར་བ་དེ་སྐྱོན་ཡང་མ་ཡིན་པ་ལུང་རིགས་ཡང་དག་པའི་ལམ་ལ་བློ་གྲོས་ཀྱི་རྣམ་དཔྱོད་རགས་རིམ་ཞུགས་པ་ཙམ་གྱིས་ཀྱང་ཤེས་པར་ནུས་པའི་ཕྱིར།

ཡང་ཁྱོད་ཀྱིས་༼མི་ཕམ་གྱིས་༽རིགས་པའི་རྣམ་གྲངས་ཉུང་ངུས་རྟོགས་པས་རྟོགས་པ་དམན་ལ། རིགས་པའི་རྣམ་གྲངས་མང་པོས་རྟོགས་པའི་རྟོགས་པ་བཟང་ན། མགོ་སྨྲོས་པས་གོ་བ་རྣམས་ཀྱི་རྟོགས་པ་དམན་ལ། རྣམ་པར་སྤྲོས་པའི་གོ་བ་རྣམས་ཀྱི་རྟོགས་པ་བཟང་དགོས་ན་དེ་ནི་མི་རིགས་ཏེ་དབང་པོ་རྣོན་པོས་རྟོགས་པ་བཟང་དགོས་པའི་ཕྱིར་རོ།། དེ་ཡང་དབང་པོའི་སྒོ་ནས་ཡིན་གྱི་རྟོགས་བྱེད་དམ་རྟོགས་ཐབས་ཀྱི་སྒོ་ནས་ནི་མ་ཡིན་ཏེ། རྟོགས་བྱེད་ཀྱི་ཐབས་གང་གིས་སྒོ་ནས་རྟོགས་ཀྱང་དོན་འདྲ་བའི་ཕྱིར་རོ།། ཞེས་སྨྲས་འདུག་པའང་ཧ་ཀྱང་བློ་གྲོས་རྩིང་པོའི་རྩོད་པ་སྟེ། ཆོས་ཉིད་རིགས་པའི་རྣམ་གྲངས་རྒྱས་མི་རྒྱས་ཀྱི་སྒོ་ནས་རྟོགས་པ་གཉིས་ཆོས་ཐམས་ཅད་བདེན་མེད་དུ་མཐོང་བ་ཙམ་ལ་ཁྱད་པར་མེད་ཀྱང་། རིགས་པའི་རྣམ་གྲངས་མཐའ་ཡས་པའི་སྒོ་ནས་རྟོགས་པ་དེ་ཆོས་ཉིད་ལ་བློ་གྲོས་ཀྱི་འཇུག་པ་རྒྱས་པས་བློའི་མཐུ་ཁྱད་པར་དུ་འཕགས་པ་ཡིན་ལ། རིགས་པའི་རྣམ་གྲངས་ཉུང་བའི་སྒོ་ནས་རྟོགས་པ་ནི་བློ་ཡི་འཇུག་པ་མི་རྒྱས་པས་བློ་གྲོས་ཀྱི་མཐུ་ཡང་ཆུང་བའི་ཕྱིར། དཔེར་ན་བྱ་ཕྲན་དང་མཁའ་ལྡིང་དག་ནམ་མཁར་འཕུར་བ་ཙམ་ལ་ཁྱད་པར་མེད་ཀྱང་། གཤོག་པའི་རྩལ་ལམ་མཐུ་ཆེ་ཆུང་གི་སྒོ་ནས་ནམ་འཕངས་ཇི་ཙམ་གཅོད་ནུས་མི་ནུས་ཀྱི་ཁྱད་པར་ཆེན་པོ་ཡོད་པ་བཞིན་ཡིན་པའི་ཕྱིར། མགོ་སྨྲོས་པས་གོ་བ་ཙམ་ལ་རིགས་པའི་རྣམ་གྲངས་ཉུང་བའི་སྒོ་ནས་རྟོགས་པ་ལ་བྱེད་པ་དང་། རྣམ་པ་མ་སྤྲོས་པར་གོ་མི་ནུས་པ་ལ་རིགས་པའི་རྣམ་གྲངས་རྒྱས་པའི་སྒོ་ནས་རྟོགས་པ་ཞེས་མི་བཤད་ཀྱི། རིགས་པའི་རྣམ་གྲངས་རྒྱས་མི་རྒྱས་བློ་གྲོས་ཀྱི་དཔྱད་པ་ཞིབ་མི་ཞིབ་ལ་བྱེད་པ་ཡིན་པའི་ཕྱིར། བློ་གྲོས་ཀྱི་དཔྱད་པ་རགས་པ་ཙམ་དང་། ཧ་ཅང་ཕྲ་ཞིང་ཞིབ་པ་གཉིས་འགངས་ཆེ་བ་དེ་སུ་ཡིན་རྟོག་པར་གྱིས་ཤིག།

ཁྱོད་ལྟར་ན་ཆོས་ཉིད་ལ་བློ་ཡིས་དཔྱད་པ་ཕྲ་ཞིང་ཞིབ་པར་བྱེད་པའི་གང་ཟག་དེ། བློ་གྲོས་ཀྱི་དཔྱད་པ་རགས་པ་ཙམ་ལས་མ་ཞུགས་པའི་གང་ཟག་དེ་མཁས་པ་དང་བློའི་མཐུ་ཆེ་བ་ཡིན་ཞེས་སྨྲ་དགོས་པར་ཡང་འགྱུར་ཏེ། རིགས་པའི་རྣམ་གྲངས་རྒྱས་མི་རྒྱས་ཀྱི་ཁྱད་པར་འདོད་ཚུལ་དེའི་ཕྱིར།

ཡང་ཁྱོད་ཀྱིས་༼མི་ཕམ་གྱིས་༽གཞན་ཡང་ཉན་ཐོས་པ་དག་གིས་རིགས་པའི་སྒོ་ཉུང་ངུ་ལ་བརྟེན་ནས་ཤེས་བྱ་ཐམས་ཅད་བདེན་མེད་རྟོགས་ནུས་པའི་ཚེ་དེ་གཏན་ལ་འབེབས་བྱེད་རིགས་པའི་རྣམ་གྲངས་སྣ་ཚོགས་པ་ཤེས་པ་ཡང་རིགས་ཏེ། རྟོགས་བྱ་མཐའ་དག་མངོན་སུམ་དུ་ཁོང་དུ་ཆུད་ནུས་པའི་བློ་ལྡན་དེས་རྟོགས་བྱེད་ཀྱི་རིགས་པ་ཙམ་ཁོང་དུ་ཆུད་པ་ནི་སྔ་མ་ལས་སླ་བའི་ཕྱིར་རོ།། ཞེས་པ་ཡང་བློ་གྲོས་རྩིང་བའི་གཏམ་སྟེ། རྟོགས་བྱ་ཆོས་ཐམས་ཅད་བདེན་མེད་དུ་རྟོགས་པའི་གང་ཟག་ཡིན་ན། དེ་རིགས་པའི་རྣམ་གྲངས་རྒྱས་པའི་སྒོ་ནས་ཆོས་ཐམས་ཅད་བདེན་མེད་དུ་རྟོགས་པའི་གང་ཟག་ཡིན་མི་དགོས་པའི་ཕྱིར་ཏེ། ཆོས་ཐམས་ཅད་བདེན་མེད་དུ་རྟོགས་པ་ལ་རིགས་པའི་རྣམ་གྲངས་རྒྱས་པ་དང་བསྡུས་པའི་སྒོ་ནས་རྟོགས་པ་གཉིས་ཡོད་པ་ལུང་ལས་གསུངས་པའི་ཕྱིར། ཉན་རང་གི་ཆོས་ཐམས་ཅད་བདེན་མེད་མངོན་སུམ་དུ་མཐོང་བའི་ཚེ། དེ་གཏན་ལ་འབེབས་བྱེད་རིགས་པའི་སྒོ་རྒྱས་པ་ཡང་ཤེས་པར་རིགས་ཞེས་སྨྲས་པ་འདི་ཅུང་ཟད་མཁས་པ་ལ་སྐྱེ་བའི་དོགས་པ་ཞིག་ཡིན་པས་དེ་ལ་དཔྱད་པའི་སྒོ་འདི་ལྟར་བསྟན་པར་བྱ་སྟེ། ཉན་རང་གིས་ཆོས་ཐམས་ཅད་བདེན་མེད་དུ་རྟོགས་བྱེད་ཀྱི་རིགས་པ་གཅིག་ལས་གཉིས་སུ་སྤྲོས་ཏེ་ཕར་ཇེ་རྒྱས་སུ་བཏང་མི་ནུས་པའི་རྒྱུ་མཚན་ཅི་ཡང་མེད་དེ། དེ་རྣམས་ཀྱིས་ཆོས་ཉིད་མངོན་སུམ་དུ་ནི་མཐོང་བས་མཐོང་ཟིན་ལ་སླར་ཡང་རིགས་པའི་སྒོ་མཐའ་ཡས་པ་སྤྲོ་བ་ལ་ཇེ་མཁས་དང་བློ་ཡི་དཔྱད་པ་དེ་ཞིབ་ཏུ་འགྲོ་ཡང་དགོས་པའི་ཕྱིར། ཞེས་སྨྲ་ན། དེ་ཙམ་ནི་ངེས་པར་བདེན་མོད་ཀྱང་། དཔེར་ན་འབེན་ཐག་རིང་ཐུང་གང་དུ་བཙུགས་ས་དེ་ལ་གཏད་ནས་མདའ་འཕེན་གྱི། མདའ་རྒྱངས་ཅི་ནུས་ཀྱིས་སྒོ་ནས་འཕེན་པ་མི་བྱེད་པ་དེ་བཞིན་དུ། ཉན་རང་རྣམས་ཀྱིས་ཀྱང་རང་གིས་དོན་དུ་གཉེར་བྱ་ཞི་བ་མྱང་འདས་ཙམ་འཐོབ་པའི་ཐབས་དང་དེའི་གེགས་བྱེད་ཉོན་སྒྲིབ་ཙམ་སྤངས་པའི་དོན་དུ། བདག་མེད་པ་གཉིས་ཀྱི་དོན་ལ་རིགས་པའི་རྣམ་གྲངས་མདོར་བསྡུས་པ་ཙམ་གྱི་སྒོ་ནས་དཔྱད་པ་ཡིན་གྱི་རང་གི་ཉོན་སྒྲིབ་སྤང་ནུས་ཚོད་ལ་ཉེ་བ་མཁོ་བ་ཙམ་གྱིས་ཀྱང་མ་ཆོག་པ་རིགས་པའི་རྣམ་གྲངས་མང་པོས་དཔྱད་ནུས་པའི་དབང་དུ་བྱས་ཀྱང་དཔྱད་པ་མི་བྱེད་པའི་ཕྱིར་ཏེ། དེ་ལས་འདས་ནས་དཔྱད་པ་ལ་དགོས་པ་ཡང་མེད་པའི་ཕྱིར་ཏེ། རང་གི་དགོས་དོན་ཉོན་སྒྲིབ་སྤོང་བྱེད་ཀྱི་གཉེན་པོ་ནི་ཚང་། དེ་ལས་ཤེས་སྒྲིབ་སྤོང་བ་ནི་དོན་དུ་མི་གཉེར་བའི་ཕྱིར། དེ་ཡང་འདི་ལྟར་བརྟག་པ་བྱ་དགོས་ཏེ། ཉན་རང་འཕགས་པས་རང་གི་ཉོན་སྒྲིབ་སྤོང་བྱེད་ཀྱི་གཉེན་པོ་ཐོབ་ཟིན་པའི་འོག་ཏུ་བདག་མེད་གཉིས་ཀྱི་དོན་ལ་རིགས་པའི་རྣམ་གྲངས་གཅིག་ལས་གཉིས་སུ་སྤྲོས་ཏེ་རིགས་པའི་རྣམ་གྲངས་རྒྱས་པའི་སྒོ་ནས་སྒོམ་པ་ལ་བརྩོན་པར་བྱེད་ན། དེ་ལྟར་སྒོམ་ནུས་པའི་ཤེས་རབ་ཙམ་ཡོད་མོད་ཀྱང་། དེ་ལྟར་སྒོམ་པར་བྱའོ་སྙམ་དུ་བརྩོན་པའི་དོན་གཉེར་གྱི་བསམ་པ་མེད་པ་དང་། དེ་མེད་པས་བདག་མེད་ལ་རིགས་པའི་རྣམ་གྲངས་མཐའ་ཡས་པ་སྤྲོ་ནས་གཞན་དོན་དུ་ཤེས་སྒྲིབ་སྤོང་བ་ལ་སྤྲོ་བའི་བརྩོན་འགྲུས་དང་སྙིང་སྟོབས་ཆུང་བའི་རྒྱུ་མཚན་གཉིས་ཀྱི་སྒོ་ནས་རིགས་པའི་རྣམ་གྲངས་མཐའ་ཡས་པའི་སྒོ་ནས་བདག་མེད་སྒོམ་པ་ལ་མི་འཇུག་པ་ཡིན་པའི་ཕྱིར། དེའི་རྟགས་ཟུར་དང་པོ་མ་གྲུབ་ན། དེ་ཆོས་ཅན། དེར་ཐལ། རིགས་པའི་རྣམ་གྲངས་རྒྱས་པའི་སྒོ་ནས་བདག་མེད་བསྒོམ་ནས་གཞན་དོན་དུ་ཤེས་སྒྲིབ་སྤོང་སྟེ་རྣམ་མཁྱེན་དོན་དུ་གཉེར་བ་བྱའོ་སྙམ་པའི་དོན་གཉེར་གྱི་བསམ་པ་རྨི་ལམ་དུ་ཡང་མེད་པའི་ཕྱིར། རྟགས་ཟུར་གཉིས་པ་གྲུབ་སྟེ། དེ་ཆོས་ཅན། ཁྱོད་ལ་དེ་ལྟ་བུའི་དོན་གཉེར་གྱི་བསམ་པ་མེད་པས། གཞན་དོན་རྣམ་མཁྱེན་དོན་གཉེར་དང་དེའི་གེགས་བྱེད་ཤེས་སྒྲིབ་སྤང་བའི་དོན་དུ་བདག་མེད་རིགས་པའི་རྣམ་གྲངས་རྒྱས་པའི་སྒོ་ནས་བསྒོམ་པའི་སྙིང་སྟོབས་གཏན་ནས་མེད་པའི་ཕྱིར་ཏེ། ཁྱོད་རང་དོན་ཞི་བ་རྐྱང་པས་ཆོག་པར་འཛིན་པའི་སྐྱེས་བུ་ཡིན་པའི་ཕྱིར། དེ་ལྟར་རྣམ་མཁྱེན་དོན་གཉེར་མེད་པ་དང་། སྙིང་སྟོབས་ཆུང་བ་གཉིས་ཀྱི་སྒོ་ནས་བདག་མེད་རིགས་པ་རྒྱས་པའི་སྒོ་ནས་སྒོམ་པ་ལ་མི་འཇུག་པ་སྟེ་རེ་བ་ཙམ་ཡང་མི་བྱེད་དེ། དབུ་མ་སྙིང་པོ་ལས།

ཝ་ནི་གླང་ཆེན་དྲེགས་པ་ཡི།།

ཀླད་པ་བགམ་ཞིང་དབྱེ་མི་སེམས།།
གདོལ་པ་རྒྱ་མཚོའི་མཐའ་ཀླས་པའི།།
ས་ཡི་དཀྱིལ་འཁོར་བསྐྱང་མི་སེམས།།
དེ་བཞིན་སེམས་ཅན་དམན་པ་ཡང་།།
ཟབ་ཅིང་བླ་མེད་རྒྱ་ཆེ་བ།།
ཡོན་ཏན་བགྲངས་འདས་འབྱུང་བའི་གནས།།

སངས་རྒྱས་ཉིད་ལ་རེ་བའང་མེད།།

ཅེས་གསུངས་པ་ལྟར་ཡིན་པའི་ཕྱིར། འདིའི་སེམས་ཅན་དམན་པ་ཉན་ཐོས་དང་རང་སངས་རྒྱས་ལ་གོ་དགོས་པ་འདིའི་རང་འགྲེལ་ལས་གསལ་བར་གསུངས་སོ།།

ཡང་ཁྱོད་ཀྱིས་༼མི་ཕམ་གྱིས་༽གཞན་ཡང་དེ་བཞིན་གཤེགས་པའི་གསུང་གི་གསང་བའི་མཛོད་ཀྱི་སྙིང་པོར་གྱུར་པ་རིན་ཆེན་རིན་ཐང་མེད་པ་ལྟ་བུའི་ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་བྲལ་སྟོང་པ་ཉིད་ཀྱི་དོན་ལེགས་པར་ཁོང་དུ་ཆུད་ན། དེ་ཁོ་ནས་ཆོས་ཐམས་ཅད་ཀྱི་མདོ་དང་རྒྱས་པ་ཁོང་དུ་ཆུད་པར་འགྱུར་པ་དང་། གཟུངས་དང་ཏིང་ངེ་འཛིན་དང་། མངོན་པར་ཤེས་པ་དང་། སྙིང་རྗེ་ཆེན་པོ་དང་། ཕ་རོལ་ཏུ་ཕྱིན་པ་དང་། ས་དང་མཐའ་གཉིས་ལ་མི་གནས་པའི་ཐབས་མཁས་ལ་སོགས་པ་ལམ་དང་འབྲས་བུའི་ཡོན་ཏན་རྒྱ་མཚོ་ལྟ་བུ་སྡུད་པར་གསུངས་པས་ན། དེ་གང་གི་རྒྱུད་ལ་ལྡན་པ་ཙམ་གྱིས་དེ་དག་སྡུད་པར་རིགས་པས་ན། ཉན་ཐོས་པ་ལའང་དེ་འདྲའི་རྟོགས་པ་ཡོད་ན་ཡོན་ཏན་དེ་དག་ཀྱང་འབྱུང་བར་རིགས་ཏེ། དེ་ཁོ་ན་ཉིད་སྒྲུབ་བྱེད་ཀྱི་རིགས་པའི་རྣམ་གྲངས་སྣ་ཚོགས་ཤེས་པ་ཙམ་ལྟ་ཅི་སྨྲོས་པར་འགྱུར་རོ།། ཞེས་སྨྲས་པ་ནི་རང་ཉིད་གཞུང་ཆེན་པོ་ལ་ཡང་དག་པའི་དཔྱད་པ་མ་ཞུགས་པའི་ནང་རྟགས་ངོམས་པར་ཟད་དེ། སྟོང་ཉིད་རྟོགས་པའི་ཤེས་རབ་ཙམ་རྒྱུད་ལ་ལྡན་པས་སྙིང་རྗེ་དང་ཕར་ཕྱིན། ས་ཡི་ཡོན་ཏན་སོགས་སྡུད་པའི་ཁྱབ་པ་ག་ལ་ཡོད་དེ། ཉན་རང་གི་རྒྱུད་ལའང་སྟོང་ཉིད་རྟོགས་པའི་ཤེས་རབ་ཡོད་ཀྱང་། དེས་ཡོན་ཏན་དེ་དག་སྡུད་མི་ནུས་པའི་ཕྱིར། རྟགས་ཟུར་དང་པོ་གྲུབ་སྟེ། གོང་དུ། གང་ཕྱིར་ལུང་ལས་ལམ་འདི་ནི།། མེད་པར་བྱང་ཆུབ་མེད་པར་གསུང་ཞེས་སོགས་ལ་རྩོད་ལན་སྒྲུབ་བྱེད་བཀོད་པ་སོགས་ཀྱིས་གྲུབ་པའི་ཕྱིར། རྟགས་ཟུར་ཕྱི་མ་གྲུབ་སྟེ། ཉན་རང་གི་རྒྱུད་ལ་སྙིང་རྗེ་དང་ཕར་ཕྱིན་ས་ཡི་ཡོན་ཏན་སོགས་མེད་པ་ཁྱོད་ཀྱང་འདོད་པའི་ཕྱིར།

འོ་ན་མདོ་སྡེ་རྣམས་ལས་སྟོང་ཉིད་རྟོགས་པའི་ཤེས་རབ་ལས་ཡོན་ཏན་དེ་དག་འབྱུང་བར་གསུངས་པ་གང་གི་དོན་ཡིན་ཞེ་ན། བཤད་དུ་ཡོད་དེ། གང་རྒྱུད་ལ་ལྡན་པས་ས་དང་ཕ་རོལ་ཏུ་ཕྱིན་པའི་ཡོན་ཏན་རྒྱ་ཆེར་སྡུད་པར་ནུས་པའི་སྟོང་ཉིད་རྟོགས་པའི་ཤེས་རབ་དེ་ཐེག་ཆེན་ལམ་མ་ཞུགས་ནས་ཐེག་པ་ཆེན་པོའི་རྒྱུ་འབྲས་ཀྱི་ཆོས་ཅི་རིགས་པ་ཉམས་སུ་ལེན་པའི་གང་ཟག་གི་རྒྱུད་ཀྱི་སྟོང་ཉིད་རྟོགས་པའི་ཤེས་རབ་ཡན་ཆད་ལའང་བྱེད་མོད་ཀྱི། གཙོ་བོ་སྟོང་ཉིད་སྙིང་རྗེའི་སྙིང་པོ་ཅན་གྱི་ཤེས་རབ་གང་ཡིན་པ་དེས་ས་དང་ཕར་ཕྱིན་སོགས་ཐེག་པ་ཆེན་པོའི་ཡོན་ཏན་མཐའ་དག་སྡུད་ཅེས་པའི་དོན་ཡིན་པའི་ཕྱིར། སྙིང་རྗེའི་སྙིང་པོ་ཅན་མ་ཡིན་པའི་སྟོང་ཉིད་རྟོགས་པའི་ཤེས་རབ་ནི་ཐབས་དང་བྲལ་བའི་ཤེས་རབ་ཡིན་པའི་ཕྱིར། ཤེས་རབ་དེས་ས་དང་ཕ་རོལ་ཏུ་ཕྱིན་པའི་ཡོན་ཏན་རྒྱ་ཆེན་པོ་རྣམས་འདྲེན་མི་ནུས་པའི་ཕྱིར་ཏེ། མགོན་པོ་བྱམས་པས།

ཤེས་པས་སྲིད་ལ་མི་གནས་ཤིང་།།

སྙིང་རྗེས་ཞི་ལ་མི་གནས་དང་།།
ཐབས་མ་ཡིན་པས་རིང་བ་དང་།།

ཐབས་ཀྱིས་རིང་བ་མ་ཡིན་ཉིད།།

ཅེས་གསུངས་པས། ཤེས་རབ་ཀྱིས་འཁོར་བའི་མཐར་ལྟུང་བ་འགོག་པ་ཙམ་བྱེད་ཀྱི་ཞི་མཐའ་འགོག་པ་མི་བྱེད་ལ། ཞི་བའི་མཐའ་འགོག་བྱེད་ནི་ཐབས་སྙིང་རྗེ་ཆེན་པོ་ལ་གོམས་པར་བྱེད་དགོས་ལ། ཐབས་སྙིང་རྗེ་ཆེན་པོ་དང་བྲལ་བའི་སྟོང་ཉིད་རྟོགས་པའི་ཤེས་རབ་ལ་ཇི་ཙམ་གོམས་པར་བྱས་ཀྱང་ཞི་བའི་མཐའ་འགོག་མི་ནུས་ཤིང་། ཞི་བའི་མཐའ་དང་མ་བྲལ་བར་མི་གནས་པའི་མྱང་འདས་འཐོབ་པ་མེད་པའི་ཕྱིར། གཞན་ཡང་། འཕགས་པ་དད་པའི་སྟོབས་བསྐྱེད་པའི་མདོ་ལས། དེ་ལ་སྙིང་རྗེ་ཆེན་པོ་ནི་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་སྡུག་བསྔལ་གྱི་སྐྱེ་བ་མི་ལེན་པ་ཅི་ཡང་མེད་དོ།། དེས་བདེ་བའི་སྐྱེ་བ་མི་འདོར་བ་ཅི་ཡང་མེད་དོ་ཞེའོ།། དེ་ལྟར་ཤིན་ཏུ་བྱ་དཀའ་བ་ལ་ཞུགས་ན་རིང་པོ་མི་ཐོགས་པར་ཚོགས་ཡོངས་སུ་རྫོགས་སོ།། གདོན་མི་ཟ་བར་ཐམས་ཅད་མཁྱེན་པའི་གོ་འཕང་འཐོབ་པར་འགྱུར་རོ།། དེ་བས་ན་སངས་རྒྱས་ཀྱི་ཆོས་ཐམས་ཅད་ཀྱི་རྩ་བ་ནི་སྙིང་རྗེ་ཆེན་པོ་ཁོ་ན་ཡིན་ནོ།། ཞེས་གསུངས་པས་སངས་རྒྱས་ཀྱི་གོ་འཕང་འཐོབ་པ་ལ་ས་ལམ་རིམ་གྱིས་བགྲོད་དེ་ཚོགས་གཉིས་ཡོངས་སུ་རྫོགས་དགོས། ཚོགས་གཉིས་ཡོངས་སུ་རྫོགས་པའི་རྩ་བ་ནི་སྙིང་རྗེ་ཆེན་པོ་ཡིན་པ་གསུངས་པའི་ཕྱིར། ཚོགས་གཉིས་ཡོངས་སུ་རྫོགས་པའི་རྩ་བ་སྙིང་རྗེ་ཆེན་པོ་ཡིན་ན་ཡེ་ཤེས་ཀྱི་ཚོགས་ཀྱི་རྩ་བའང་སྙིང་རྗེ་ཆེན་པོ་ཡིན་པར་སོང་བའི་ཕྱིར། ཚོགས་གཉིས་རྫོགས་པའི་རྩ་བ་ལ་སྟོང་ཉིད་རྟོགས་པའི་ཤེས་རབ་རྐྱང་པས་མི་ཆོག་པར་སྟོང་ཉིད་སྙིང་རྗེའི་སྙིང་པོ་ཅན་ཞིག་དགོས་པ་དོན་གྱིས་གྲུབ་ལ། དེ་འགྲུབ་པས་སྙིང་རྗེའི་སྙིང་པོ་ཅན་མ་ཡིན་པའི་སྟོང་ཉིད་རྟོགས་པའི་ཤེས་རབ་རྐྱང་པ་དེས་ཐེག་པ་ཆེན་པོའི་ས་དང་ཕ་རོལ་ཏུ་ཕྱིན་པའི་ཡོན་ཏན་སྡུད་པའམ་འདྲེན་པར་བྱེད་མི་ནུས་པ་དོན་གྱིས་གྲུབ་པའི་ཕྱིར། དེ་ལྟར་སྟོང་ཉིད་རྟོགས་པའི་ཤེས་རབ་ཡིན་ན་ཐེག་པ་ཆེན་པོའི་ས་དང་ཕར་ཕྱིན་གྱི་ཡོན་ཏན་མཐའ་དག་སྡུད་པས་ཁྱབ་ན་ཉན་རང་འཕགས་པའི་ཚོགས་ཐེག་པ་ཆེན་པོ་བར་ཐལ་བ་དང་། དེ་དག་གི་རྒྱུད་ལ་ཐེག་པ་ཆེན་པོའི་ས་དང་ཕ་རོལ་ཏུ་ཕྱིན་པའི་ཡོན་ཏན་རླབས་ཆེན་པོ་རྣམས་ཡོད་པར་ཐལ་བ་སོགས་ལུང་རིགས་ཀྱི་གནོད་བྱེད་མཐའ་ཡས་པའི་ཕྱིར་སྟོང་ཉིད་རྟོགས་པའི་ཤེས་རབ་གང་ཡིན་གྱིས་ཐེག་པ་ཆེན་པོའི་ཡོན་ཏན་མཐའ་དག་སྡུད་ནུས་པའི་ལོག་རྟོག་ངན་པ་དེ་དག་དོར་བར་གྱིས་ཤིག།

གཞན་ཡང་བྱང་ཆུབ་ཀྱི་སེམས་དང་སྦྱིན་སོགས་ཀྱི་གྲོགས་གཞན་རྣམས་ལ་བསླབ་མི་དགོས་ཀྱི་སྟོང་ཉིད་རྟོགས་པའི་ཤེས་རབ་ཁོ་ན་ལ་བསླབ་པས་ཆོག་ཅེས་སྨྲ་ན་ནི། དེ་དག་ནི་སྤྱོད་པ་ཤིན་ཏུ་མ་དག་པ་ཡིན་པ་སངས་རྒྱས་རང་ཉིད་ཀྱིས་གསུངས་ཏེ། རྣམ་པར་འཐག་པ་བསྡུས་པའི་མདོ་ལས། བྱམས་པ་བྱང་ཆུབ་སེམས་དཔའ་རྣམས་ཀྱིས་ཕ་རོལ་ཏུ་ཕྱིན་པ་དྲུག་ཡང་དག་པར་བསྒྲུབ་པ་འདི་ནི་རྫོགས་པའི་བྱང་ཆུབ་ཀྱི་ཕྱིར་ཡིན་ན། དེ་ལ་མི་བླུན་པོ་དེ་དག་འདི་སྐད་དུ། བྱང་ཆུབ་སེམས་དཔས་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་ལ་བསླབ་པར་བྱ་ཡི། ཕ་རོལ་ཏུ་ཕྱིན་པ་ལྷག་མ་རྣམས་ཀྱིས་ཅི་ཞིག་བྱ་ཞེས་ཟེར་ཞིང་དེ་དག་ཕ་རོལ་ཏུ་ཕྱིན་པ་གཞན་དག་ལ་སུན་འབྱིན་པར་སེམས་སོ།། མ་ཕམ་པ། འདི་ཇི་སྙམ་དུ་སེམས་ཀ་ཤིའི་རྒྱལ་པོར་གྱུར་པ་གང་ཡིན་པ་དེས་ཕུག་རོན་གྱི་ཕྱིར་རང་གི་ཤ་ཁྲལ་བྱིན་པ་དེ་ཤེས་རབ་འཆལ་བ་ཡིན་ནམ། བྱམས་པས་གསོལ་པ། བཅོམ་ལྡན་འདས་དེ་ནི་མ་ལགས་སོ།། བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ང་བྱང་ཆུབ་སེམས་དཔའི་སྤྱོད་པ་སྤྱོད་པ་ན་ཕ་རོལ་ཏུ་ཕྱིན་པ་དྲུག་དང་ལྡན་པའི་དགེ་བའི་རྩ་བ་གང་དག་བསགས་པའི་དགེ་བའི་རྩ་བ་དེ་དག་གིས་ང་ལ་གནོད་པར་གྱུར་རམ། བྱམས་པས་གསོལ་པ། བཅོམ་ལྡན་འདས་དེ་ནི་མ་ལགས་སོ།། བཅོམ་ལྡན་འདས་ཀྱིས་བཀའ་སྩལ་པ། མ་ཕམ་པ། ཁྱོད་ཀྱིས་བསྐལ་པ་དྲུག་ཅུར་སྦྱིན་པའི་ཕ་རོལ་ཏུ་ཕྱིན་པ་ཡང་དག་པར་བསྒྲུབས། བསྐལ་པ་དྲུག་ཅུར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། བསྐལ་པ་དྲུག་ཅུར་བཟོད་པའི་ཕ་རོལ་ཏུ་ཕྱིན་པ། བསྐལ་པ་དྲུག་ཅུར་བརྩོན་འགྲུས་ཀྱི་ཕ་རོལ་ཏུ་ཕྱིན་པ། བསྐལ་པ་དྲུག་ཅུར་བསམ་གཏན་གྱི་ཕ་རོལ་ཏུ་ཕྱིན་པ། བསྐལ་པ་དྲུག་ཅུར་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བསྒྲུབས་ན། དེ་ལ་མི་བླུན་པོ་དེ་དག་འདི་སྐད་དུ། ཚུལ་གཅིག་ཁོ་ནས་བྱང་ཆུབ་སྟེ། འདི་ལྟ་སྟེ་སྟོང་པ་ཉིད་ཀྱི་ཚུལ་གྱིས་སོ་ཟེར་ཏེ་དེ་དག་ནི་སྤྱོད་པ་ཡོངས་སུ་མ་དག་པར་འགྱུར་རོ།། ཞེས་གསུངས་པ་འདིས་བྱང་ཆུབ་ཀྱི་ཕྱིར་ཡིན་ན་ཞེས་པ་ཡན་ཆད་ཀྱིས་རྫོགས་པའི་སངས་རྒྱས་བསྒྲུབ་པར་འདོད་པས་ཕར་ཕྱིན་རེ་རེ་ཙམ་ལ་བསླབ་པས་མི་ཆོག་གི། ཕར་ཕྱིན་དྲུག་ཀ་ལ་བསླབ་དགོས་པ་བསྟན། སུན་འབྱིན་པར་སེམས་སོ་ཞེས་པ་ཡན་ཆད་ཀྱིས་སྙིགས་མའི་དུས་འདིར་ཁྱོད་ཅག་སྔ་རབས་པའི་རྗེས་འབྲངས་ཕལ་ཆེར་ལྟ་བུའི་ཉམས་ལེན་གྱི་སྙིང་པོའི་གནད་མ་ཤེས་པ་བླུན་པོ་དག་གིས་སྟོང་ཉིད་རྟོགས་པའི་ཤེས་རབ་རྐྱང་པས་གྲོལ་བར་འདོད་པའི་ལོག་རྟོག་ལ་མི་འཐད་པ་བསྟན་ནས། སླར་ཡང་དེ་ལ་དམིགས་ཕུག་པས་དགག་པ་མཛད་བཞེད་ནས། མ་ཕམ་པ། འདི་ཇི་སྙམ་དུ་སེམས་ཞེས་པ་ནས་འདི་ལྟར་ཏེ་སྟོང་པ་ཉིད་ཀྱི་ཚུལ་གྱིས་སོ་ཞེས་པའི་བར་གསུངས་པ་ཡིན་པའི་ཕྱིར། དེ་ལ་སྟོང་ཉིད་རྟོགས་པའི་ཤེས་རབ་རྐྱང་པས་ས་ལམ་གྱི་ཡོན་ཏན་མཐའ་དག་སྡུད་ནུས་ན་ཕར་ཕྱིན་གཞན་གྱི་དགོས་པ་མེད་པར་འདོད་ཀྱང་འདོད་མོད། འདོད་དགོས་པ་དོན་གྱིས་སོང་ལ། དེ་སོང་ན་འདོད་པ་དེ་དག་གིས་ཕ་རོལ་ཏུ་ཕྱིན་པ་གཞན་དག་ལ་སུན་འབྱིན་པའམ་སྤོང་བར་བྱེད་པ་བཅོམ་ལྡན་འདས་རང་ཉིད་ཀྱིས་གསུངས་ན། དེ་འདྲ་བའི་ཆོས་སྤོང་གི་ལས་ངན་བསགས་པར་མ་མཛད་ཅིག། གལ་ཏེ་དེ་ལྟར་ན་བཅོམ་ལྡན་འདས་ཀ་ཤིའི་རྒྱལ་པོ་གྱུར་པའི་ཚེ་ཤ་ཁྲ་ལ་སྦྱིན་པ་སོགས་ཤེས་རབ་འཆལ་བར་ཐལ་བའི་ཐལ་བ་བཟློག་ཏུ་མེད་པར་གསུངས་ན་བཅོམ་ལྡན་འདས་ཀྱིས་བསྐལ་པ་གྲངས་མེད་པའི་བར་དུ་མགོ་རྐང་ལག་བཏང་བ་སོགས་བྱ་དཀའ་བའི་སྤྱོད་པ་མཐའ་དག་དགོས་མེད་དུ་འདོད་དགོས་ན། དེ་ཙམ་ཧ་ཀྱང་སྐུར་བ་འདེབས་ཚབས་ཆེ་དྲག་པ་མ་ལགས་སམ།

ཡང་བཅོམ་ལྡན་འདས་ཀྱིས་ཤེས་རབ་རྐྱང་བས་གྲོལ་ན། སྦྱིན་སོགས་ཕར་ཕྱིན་གཞན་རླབས་ཆེན་པོ་རྣམས་ལ་སློབ་པ་དེས་ང་ལ་གནོད་པར་ཐལ། ཤེས་རབ་རྐྱང་པས་གྲོལ་བའི་ཕྱིར། ཞེས་ཐལ་ངག་བསྟན་པར་མཛད་ན། སྦྱིན་སོགས་ཕར་ཕྱིན་གཞན་གྱིས་སངས་རྒྱས་པ་ལ་གནོད་པར་ཐལ་བའི་ཐལ་བ་འདི་ཅི་ལྟར་སྤངས། དེ་ལ་གལ་ཏེ་སྦྱིན་སོགས་ཕར་ཕྱིན་གཞན་གྱིས་སངས་རྒྱས་པ་ལ་གནོད་པ་མེད་ཀྱང་དེ་ཁོ་ན་ཉིད་རྟོགས་པའི་ཤེས་རབ་ལ་གཙོ་བོར་བསླབ་དགོས་པའི་དོན་ཡིན་ཟེར་ན། སྤྱིར་སྦྱིན་སོགས་ལ་བསླབ་པའི་གོ་རིམས་ཀྱི་དབང་དུ་བྱས་ན་རགས་ཕྲ་དང་མཆོག་དམན་གྱི་ཁྱད་བས་ཕར་ཕྱིན་སྔ་མ་སྔ་མ་ལས་ཕྱི་མ་ཕྱི་མ་ཕྲ་བ་དང་གཙོ་ཆེ་བ་མཛད་ཀྱང་། སངས་རྒྱས་སྒྲུབ་པ་ལ་བྱང་ཆུབ་ཀྱི་སེམས་དང་སྙིང་རྗེ་ཆེན་པོའི་རྩ་བར་བྱས་པའི་སྦྱིན་སོགས་བསོད་ནམས་ཀྱི་ཚོགས་གཙོ་མི་ཆེ་བ་དང་། སྟོང་ཉིད་རྟོགས་པའི་ཡེ་ཤེས་གཙོ་ཆེ་བ་བྱེད་དུ་མི་རུང་བའི་ཕྱིར་ཏེ། སངས་བསྒྲུབ་པ་ལ་དེ་གཉིས་ཀ་གཙོ་ཆེ་བའི་ཕྱིར། ཅི་སྟེ་སངས་རྒྱས་བསྒྲུབ་པ་ལ་བསོད་ནམས་ཀྱི་ཚོགས་གཙོ་མི་ཆེ་ན་འབྲས་བུ་སྐུ་གཉིས་ལས་སངས་རྒྱས་ཀྱི་གཟུགས་སྐུ་གཙོ་མི་ཆེ་བར་ཐལ། དེ་ལམ་དུས་ནས་གཙོ་ཆེར་སྒྲུབ་པ་མ་བྱས་པའི་ཕྱིར། དཔེར་ན་ནས་ཀྱི་སོག་མ་ནས་ཀྱི་འབྲུ་དོན་དུ་གཉེར་བའི་ཞོར་ལ་བྱུང་བ་བཞིན་དུ་གྱུར་པའི་ཕྱིར། དེས་ན་འབྲས་བུ་སྐུ་གཉིས་ལ་ཡོན་ཏན་རྒྱ་ཆེ་ཆུང་ཡང་ཡོད་པར་ཐལ། དེའི་རྒྱུ་ཚོགས་གཉིས་སྒྲུབ་པ་ལ་རྒྱ་ཆེ་ཆུང་ཡོད་པ་ཡིན་པའི་ཕྱིར། ད་ཅི་ཟེར། ཚོགས་གཉིས་བསགས་པ་ལ་གཙོ་ཆེ་ཆུང་ཡོད་ཀྱང་དེ་གཉིས་བསགས་པ་རྒྱ་ཆེ་ཆུང་བྱེད་མི་རུང་ཟེར་ན། ཚོགས་གཉིས་བསགས་པ་ལ་རྒྱ་ཆེ་ཆུང་མེད་པ་འདྲ་མཉམ་དུ་བསགས་དགོས་ན་དེ་གཉིས་གཙོ་ཆེ་ཆུང་ཡང་མེད་པར་འདྲ་མཉམ་དུ་བསག་དགོས་པར་སོང་བས་སྔར་གྱི་ཐལ་བ་སྤོང་ནུས་པ་མི་འདུག་གོ།

ཡང་ཡེ་ཤེས་ཀྱི་ཚོགས་འགངས་ཆེ་བས་དེ་ལ་གཙོ་བོར་འབད་པས་བསོད་ནམས་ཀྱི་ཚོགས་ལ་ཆེད་དུ་འབད་མི་དགོས་པ་དེ་དང་རྒྱ་ཆེ་ཆུང་མཉམ་པ་ཞིག་ཤུགས་ཀྱིས་འབྱུང་བ་ཡིན་པས་མི་སྐྱོན་སྙམ་ན། འོ་ན་སྔོན་བདག་ཅག་གི་སྟོན་པས་སློབ་པ་ལམ་གྱི་གནས་སྐབས་སུ་བསྐལ་པ་དྲུག་ཅུར་སྦྱིན་པའི་ཕར་ཕྱིན་ལ་བསླབ་པ་ནས། བསྐལ་པ་དྲུག་ཅུར་ཤེས་རབ་ཀྱི་ཕར་ཕྱིན་ལ་བསླབ་ནས་བསོད་ནམས་དང་ཡེ་ཤེས་ཀྱི་ཚོགས་གཉིས་ཆ་མཉམ་དུ་བསྒྲུབས་པ་དེ་སྤྱོད་པ་ཡོངས་སུ་མ་དག་པ་ཡིན་པར་ཐལ། ཡེ་ཤེས་ཀྱི་ཚོགས་རྐྱང་པ་ལ་འབད་ནས་བསོད་ནམས་ཀྱི་ཚོགས་ལ་འབད་མི་དགོས་པར་ངང་གིས་འབྱུང་བཞིན་དུ་སྦྱིན་སོགས་རེ་རེ་ནས་བསླབ་པའི་དགོས་མེད་ཀྱི་ངལ་བ་བྱས་འདུག་པའི་ཕྱིར། ཤེས་རབ་ཀྱི་ཕར་ཕྱིན་ཁོ་ན་ལ་བསླབས་པས་གྲོལ་གྱི། ཕར་ཕྱིན་གཞན་ལ་བསླབ་མི་དགོས་པར་སྨྲ་བ་པོ་ལ་སངས་རྒྱས་རང་ཉིད་ཀྱིས་དེ་ལ་མི་བླུན་པོ་དེ་དག་ཅེས་ཧ་ཅང་སྨད་པའི་གནས་སུ་མཛད་ན། ལོག་རྟོག་གི་དྲ་བ་ངན་པ་འདི་དག་མྱུར་དུ་གཅོད་ན་མི་ལེགས་སམ།

ཡང་གལ་ཏེ་དེ་ལྟར་ཡིན་མོད་ཀྱང་ཤེས་རབ་ཀྱི་ཕར་ཕྱིན་ནང་དུ་ཕར་ཕྱིན་གཞན་རྣམས་ཚང་འགྲོ་བའི་རྒྱུ་མཚན་གྱིས་ཕར་ཕྱིན་གཞན་ལ་བསླབ་མི་དགོས་པ་ཡིན་ཟེར་ན། འོ་ན། སྦྱིན་པའི་ཕར་ཕྱིན་ནང་དུའང་ཕར་ཕྱིན་དྲུག་ཀ་འདུས་འགྲོ་བའི་ཕྱིར། སངས་རྒྱས་པ་ལ་སྦྱིན་པའི་ཕར་ཕྱིན་རྐྱང་པ་ལས་གཞན་ཤེས་རབ་ཀྱི་ཕར་ཕྱིན་སོགས་ལ་བསླབ་མི་དགོས་པར་ཐལ། དམ་བཅའ་མཚུངས་པའི་ཕྱིར། འདོད་ན། རྣམ་པར་མི་རྟོག་པའི་ཤེས་རབ་རྐྱང་པ་ཆེད་དུ་བསྔགས་པ་དགོས་མེད་དུ་ཐལ། ཕར་ཕྱིན་གཞན་རྣམས་ཀྱང་རེ་རེ་ནས་གང་ལ་བསླབ་པས་ཕར་ཕྱིན་གཞན་རྣམས་སྡུད་པར་མཚུངས་པའི་ཕྱིར། དེས་ན་སངས་རྒྱས་བཅོམ་ལྡན་འདས་ཀྱིས་བླ་མེད་བྱང་ཆུབ་བསྒྲུབ་པ་ལ་ཕར་ཕྱིན་དྲུག་ཀའི་ཉམས་ལེན་མཐར་ཕྱིན་དགོས་པར་གསུངས་པ་རྣམས་དགོས་མེད་དུ་ཐལ་བ་སོགས་རིགས་པས་གནོད་བྱེད་མཐའ་ཡས་སོ།།

གཞན་ཡང་ཆོས་ཉིད་ལ་རྣམ་པར་མི་རྟོག་པའི་ཡེ་ཤེས་དེ་ལ་སྦྱིན་སོགས་ཀྱི་སྦྱིན་བྱ་སྦྱིན་བྱེད་སྦྱིན་རྫས་རྣམས་ལ་མི་ཞེན་པས་སྦྱིན་པ་ཚང་བ་ལྟར། ཚུལ་ཁྲིམས་སོགས་གཞན་རྣམས་ཀྱང་དེ་བཞིན་དུ་ཚང་བའི་རྒྱུ་མཚན་གྱིས་རྣམ་པར་མི་རྟོག་པའི་ཤེས་རབ་རྐྱང་བས་ཆོག་པ་ཡིན་ཟེར་ན། འོ་ན། ཉན་རང་ལའང་ཆོས་ཐམས་ཅད་ཀྱི་ཆོས་ཉིད་མཐོང་བའི་མི་རྟོག་ཡེ་ཤེས་ཡོད་པའི་ཕྱིར་བྱང་ཆུབ་སེམས་དཔའི་སྤྱོད་པ་ཐམས་ཅད་ཚང་བར་འགྱུར་བས་དེ་དག་ཀྱང་ཐེག་ཆེན་པ་ཡིན་ཞེས་སྨྲ་བ་གྱིས་ཤིག།

གཞན་ཡང་རྣམ་པར་མི་རྟོག་པའི་ཡེ་ཤེས་རྐྱང་པས་ཆོག་ན་བྱང་སེམས་ས་བརྒྱད་པ་བ་ཉོན་མོངས་ཐམས་ཅད་ཟད་པའི་སྤྲོས་པ་ཐམས་ཅད་ཞི་བའི་ཆོས་ཉིད་ལ་གནས་པའི་ཚེ། སངས་རྒྱས་རྣམས་ཀྱིས་དེ་ལ་སྟོང་པ་ཉིད་རྟོགས་པ་འདི་ཙམ་གྱིས་འཚང་རྒྱ་མི་ནུས་ཏེ། རྣམ་པར་མི་རྟོག་པའི་ཡེ་ཤེས་འདི་ཙམ་ཉན་ཐོས་དང་རང་སངས་རྒྱས་རྣམས་ལའང་ཡོད་པས་སོ།། ངེད་ཀྱི་སྐུ་དང་ཞིང་ཁམས་སོགས་ཚད་མེད་པ་འདི་དག་ལ་ལྟོས་ཤིག། ངེད་ཀྱི་སྟོབས་ལ་སོགས་པའང་ཁྱེད་ལ་མེད་ཀྱི་དེའི་ཕྱིར་བརྩོན་འགྲུས་རྩོམས་ཤིག། སེམས་ཅན་མ་ཞི་བ་ཉོན་མོངས་སྣ་ཚོགས་ཀྱིས་དཀྲུགས་པ་ལ་སེམས་ཤིག། བཟོད་པའི་སྒོ་འདི་ཡང་མ་འདོར་ཞིག། ཅེས་སོགས་གསུངས་ནས་བྱང་སེམས་ཀྱི་སྤྱོད་པ་ལ་སློབས་ཅེས་བསྐུལ་བ་ཡང་མི་འཐད་པར་ཐལ། སངས་རྒྱས་པ་ལ་སྟོང་ཉིད་རྟོགས་པའི་ཤེས་རབ་རྐྱང་པས་ཆོག་པ་གང་ཞིག། ས་བརྒྱད་པ་དེས་རྣམ་པ་མི་རྟོག་པའི་ཡེ་ཤེས་ནི་ཁྱད་པར་ཅན་ཐོབ་པའི་ཕྱིར། དེ་སྐད་དུ་ཡང་ས་བཅུ་པའི་མདོ་ལས། སངས་རྒྱས་ཀྱི་ཆོས་ཐམས་ཅད་རྗེས་སུ་རྟོགས་པར་བྱ་བ་ལ་འདི་ནི་དོན་དམ་པའི་བཟོད་པའང་ཡིན་ན་འོན་ཀྱང་ངེད་ཀྱི་སྟོབས་བཅུ་དང་མི་འཇིགས་པ་ལ་སོགས་པ་སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཁྱེད་ལ་མེད་ཀྱི། སངས་རྒྱས་ཀྱི་ཆོས་ཕུན་སུམ་ཚོགས་པ་དེ་ཡོངས་སུ་བཙལ་བར་བྱ་བའི་ཕྱིར་བརྩོན་གྲུས་རྩོམས་ཤིག། བཟོད་པའི་སྒོ་འདི་ཉིད་ཀྱང་མ་འདོར་ཞིག། རིགས་ཀྱི་བུ་ངེད་ཀྱིས་དེ་ལྟར་ཞི་བ་རྣམ་པར་ཐར་པ་ཐོབ་ཀྱང་བྱིས་པ་སོ་སོའི་སྐྱེ་བོ་མ་ཞི་བ་ཉོན་མོངས་པ་སྣ་ཚོགས་ཀུན་ཏུ་འབྱུང་བར་འགྱུར་བ་རྣམ་པ་སྣ་ཚོགས་ཀྱིས་གཡེན་སྤྱོ་བ་འདི་དག་ལ་སོམས་ཤིག། ཅེས་སོགས་གསུངས་པའང་མི་འཐད་པར་ཐལ། ས་བརྒྱད་པ་དེས་སངས་རྒྱས་ཀྱི་ཆོས་ཕུན་སུམ་ཚོགས་པ་སྟོབས་བཅུ་དང་མི་འཇིགས་པ་སོགས་བཟོད་བཙལ་དགོས་པ་དེ་མི་འཐད་པའི་ཕྱིར། རྟགས་གྲུབ་སྟེ། ས་བརྒྱད་པ་དེས་དོན་དམ་པའི་བཟོད་པ་སྟོང་ཉིད་རྟོགས་པའི་ཡེ་ཤེས་ཁྱད་པར་ཅན་ཐུགས་རྒྱུད་ལ་མངའ་བ་གང་ཞིག། དེ་ལས་སྟོབས་བཅུ་སོགས་རང་ཤུགས་ཀྱིས་འབྱུང་བ་ལས། དེ་ཡོངས་སུ་བཙལ་བར་བྱ་བའི་བརྩོན་འགྲུས་རྩོམ་མི་དགོས་པའི་ཕྱིར། ཁྱབ་རྟགས་ཁས། དེས་ན་སངས་རྒྱས་བཅོམ་ལྡན་འདས་ལ་ཁྱོད་ཀྱིས་ས་བརྒྱད་པ་ལ་དོན་མེད་ཀྱི་གདམས་ངག་དེ་ལྟར་འབོགས་མ་དགོས་སོ་ཞུས་ཤིག།

ཡང་དེ་ཉིད་ལས་ཉོན་མོངས་པ་སྣ་ཚོགས་ཀྱིས་གཡེན་སྤྱོ་བའི་སེམས་ཅན་ལ་ལྷག་ཏུ་སྙིང་རྗེ་བསྐྱེད་དགོས་པར་འདོམས་པ་དེའང་མི་འཐད་པར་ཐལ། འདིའི་སྐབས་སུ་སོ་སོ་སྐྱེ་བོ་རྣམས་ལ་སྙིང་རྗེ་ཆེད་དུ་བསྐྱེད་མི་དགོས་པའི་ཕྱིར་ཏེ། སྟོང་ཉིད་རྟོགས་པའི་ཡེ་ཤེས་རྐྱང་པ་ཡོད་པའི་ཁོང་ནས་སྙིང་རྗེ་རང་ཤུགས་ཀྱིས་འབྱུང་བ་ཁྱོད་འདོད་པའི་ཕྱིར། ཡང་ས་བཅུ་པ་ལས། འདིས་ནི་དེ་བཞིན་གཤེགས་པ་རྣམས་ཉི་ཚེ་རབ་ཏུ་དབྱེ་བར་བྱ་བ་མ་ཡིན་གྱི། ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་རྣམ་པར་མི་རྟོག་པའི་ཆོས་ཉིད་འདིའི་ཐོབ་བོ་ཞེས་དེ་བཞིན་གཤེགས་པ་རྣམས་ཉི་ཚེ་རབ་ཏུ་དབྱེ་བར་བྱ་བ་མ་ཡིན་པ་དེའང་མི་འཐད་པར་ཐལ། ཉི་ཚེ་མི་དབྱེ་བ་ཐབས་ཤེས་ཟུང་འབྲེལ་ལ་འབད་དགོས་པར་གསུང་པ་གང་ཞིག། ཁྱོད་ཅག་ཤེས་རབ་རྐྱང་པ་ལ་འབད་པས་ཆོག་པར་འདོད་པའི་ཕྱིར། ཉན་རང་རྣམས་ཀྱིས་ཀྱང་སྟོང་ཉིད་རྟོགས་པའི་ཡེ་ཤེས་འཐོབ་པར་གསུང་པ་མི་འཐད་པར་ཐལ། ཆོས་ཐམས་ཅད་སྟོང་ཉིད་རྟོགས་པའི་ཡེ་ཤེས་ཐོབ་ན་སྟོབས་བཅུ་མི་འཇིགས་པ་སངས་རྒྱས་ཀྱི་སྐུ་དང་ཡེ་ཤེས་སོགས་མཐའ་ཡས་པ་རང་ཤུགས་ཀྱིས་འབྱུང་དགོས་པ་གང་ཞིག། ཉན་རང་ལ་དེ་དག་མི་འབྱུང་བའི་ཕྱིར་ཏེ། དེ་འགྱུར་ན་ཉན་རང་དགྲ་བཅོམ་སངས་རྒྱས་སུ་ཐལ་བ་ལྡོག་ཏུ་མེད་དོ།།

དེས་ན་ཉན་རང་ལ་ཆོས་ཐམས་ཅད་རྣམ་པར་མི་རྟོག་པའི་ཡེ་ཤེས་ཡོད་པར་འདོད་ན། དེ་དག་ལ་སངས་རྒྱས་ཀྱི་སྟོབས་མི་འཇིགས་སྐུ་ཡེ་ཤེས་སོགས་འབྱུང་བར་ཐལ་བའི་ཐལ་བ་དང་། ཉན་རང་ལ་དེ་ལྟའི་ཡེ་ཤེས་མེད་པར་འདོད་ན་ས་བཅུ་པ་ལས་ཉན་ཐོས་དང་རང་སངས་རྒྱས་ཐམས་ཅད་ཀྱིས་ཀྱང་རྣམ་པར་མི་རྟོག་པའི་ཆོས་ཉིད་འདི་འཐོབ་བོ་ཞེས་གསུངས་པ་དེ་མི་འཐད་པས་སངས་རྒྱས་བཅོམ་ལྡན་འདས་ཀྱི་གསུང་ལ་འཁྲུལ་བ་མངའ་བར་ཐལ་བའི་གཡང་ས་ཆེན་པོ་འདི་གཉིས་ལས་གང་ནས་མཆོངས་ཀྱང་མཆོང་ས་དེ་གཉིས་གང་རུང་ལས་མ་འདས་པས་ཐུགས་ཀྱིས་གདམ་ཁ་མཛོད་ལ་ད་མྱུར་དུ་མཆོངས་ཤིག།

དེ་ལྟར་དེང་སང་སྙིགས་མ་ལྔ་པོ་ཆེས་ཆེར་བདོ་བའི་སྐབས་འདིར་གདུལ་བྱ་ལེགས་ཉེས་ཀྱི་བླང་དོར་འབྱེད་པའི་བློ་གྲོས་རྩལ་ཞན་པ་རྣམས་ཐབས་ཤེས་ཡ་བྲལ་གྱི་ལས་ངན་འདི་ལྟ་བུ་ལ་ཁྲིད་ནས། ཆོས་རྣམས་ཀྱི་གནས་ལུགས་སྟོང་པ་ཉིད་ཙམ་དང་པོ་ནས་ངོ་སྤྲོད་ནས། དེ་ལས་གཞན་བྱམས་སྙིང་རྗེ་བྱང་ཆུབ་ཀྱི་སེམས་སོགས་ལྟ་ཞོག། མི་རྟག་པ་དང་ངེས་འབྱུང་ཙམ་ཡང་ཆེད་དུ་གཉེར་ནས་འབད་མི་དགོས་སྟོང་ཉིད་ཁོ་ན་བསྒོམ་པས་ཆོག། དེ་ཐམས་ཅད་སྟོང་ཉིད་ཀྱི་རྩལ་ཡིན་པར་རང་ཤུགས་ཀྱིས་འོང་ཞེས་སྐད་སངས་མཐོན་པོས་གདམས་པར་བྱེད་ལ། དམན་པའི་གདུལ་བྱ་རྣམས་ཀྱང་། མི་རྟག་པ་དང་ངེས་འབྱུང་དང་། བྱམས་སྙིང་རྗེ་སོགས་སྒོམས་བྱས་ན་སེམས་ཧ་ཀྱང་མི་འཕྲོད་པ་དེ་ཙམ་ཟབ་དོན་མི་ཤེས་པ་དག་གིས་བསྒོམ་བྱ་ཡིན་ནོ་སྙམ་དུ་བཟུང་ཞིང་། སྟོང་ཉིད་རྐྱང་པ་བསྒོམ་རྒྱུ་དེ་སེམས་ལ་ཧ་ཀྱང་འཕྲོད་པར་སྣང་ཡང་མི་རྟག་པ་དང་འཁོར་བའི་ཉེས་དམིགས་ཚུལ་བཞིན་བསྒོམས་པ་ལ་མ་བརྟེན་པར་སྟོང་ཉིད་བསྒོམས་ཀྱང་དེ་རྒྱུད་ལ་སྐྱེ་མི་ནུས་པའི་ཕྱིར། འཁོར་བ་ལ་མཐའ་གཅིག་ཏུ་དོར་བྱ་མ་ཤེས་པར། དེ་འདོར་འདོད་ཀྱི་བློ་མི་སྐྱེ། དེ་ལ་འདོར་འདོད་མེད་ན་འཁོར་བ་གང་ལས་འབྱུང་བའི་རྩ་བ་བདག་འཛིན་གྱི་ཞེན་ཡུལ་སུན་ཕྱུང་འདོད་མི་སྐྱེ། དེ་མ་སྐྱེས་ན་དེའི་རྩ་བ་གཅོད་བྱེད་བདག་མེད་པའི་ཤེས་རབ་དོན་དུ་གཉེར་བ་མི་འབྱུང་བའི་ཕྱིར་ཏེ། ཇི་སྐད་དུ།

གང་ལ་འདི་སྐྱོ་ཡོད་མིན་པ།།
དེ་ལ་ཞི་གུས་ག་ལ་ཡོད།།

ཅེས་གསུངས་པ་ལྟར་ཡིན་པའི་ཕྱིར། མི་རྟག་པ་དང་། འཁོར་བ་ལ་ཞེན་པ་གཏིང་ནས་ལོག་པའི་ཞེན་ལོག་ལ་ཆེས་ཆེར་འབད་ནས་མི་བསྒོམ་པར་སྟོང་ཉིད་རྐྱང་པ་བསྒོམ་ནས་དེ་རྒྱུད་ལ་སྐྱེ་འདོད་ཀྱང་སྐྱེ་བ་མི་སྲིད་པའི་ཚུལ་སློབ་དཔོན་གྱིས་ཀྱང་མི་བསྟན། སློབ་མས་ཀྱང་མི་ཤེས་པས་མི་ཚེ་ཧྲིལ་པོ་དགེ་སྦྱོར་སྐྱོན་ཅན་དེས་ལམ་བཀག་ནས་འཆི་ཁར་མི་རྟག་པ་ཙམ་ལའང་ངེས་ཤེས་མ་འདྲོངས་པར་འཆི་དགོས་ན། དེ་ལས་བློ་འགྱོད་ཆེ་བ་ཅི་ཞིག་ཡོད། དེ་བཞིན་དུ་སྟོང་ཉིད་རྐྱང་པ་བསྒོམ་པས་ཆོག་ཅེས་པའི་གདམས་ངག་ངན་པ་དེས་ཐེག་པ་ཆེན་པོའི་ལམ་སྙིང་རྗེ་ཆེན་པོ་དང་བྱང་ཆུབ་ཀྱི་སེམས་སོགས་སྐྱེ་བའི་གོ་སྐབས་ཀྱང་བཅོམ་ནས། ཚེ་འདིར་བྱང་ཆུབ་སེམས་དཔའི་སྡེ་སྣོད་རིན་པོ་ཆེ་རྣམས་དང་འཕྲད་པའི་དོན་གོ་ཅུང་ཟད་ཀྱང་མ་ཆོད་པ་བྱས་ན་དེ་བས་ཕུང་ཚབས་ཆེ་བ་ཅི་ཞིག་དགོས། མདོར་ན་སྟོང་ཉིད་ཁོ་ན་བསྒོམ་པས་ཆོག་ཅེས་པའི་གདམས་ངག་ངན་པ་དེས་མི་རྟག་པ་དང་ངན་འགྲོའི་སྡུག་བསྔལ་སྐྱབས་འགྲོ་སོགས་ལ་ཆེད་དུ་འབད་པའི་གོ་བཀག་པས་ཕྱི་མ་མངོན་མཐོ་ལྷ་མིའི་རྟེན་བཟང་ཐོབ་པའི་གེགས་བྱེད། འཁོར་བ་ལ་ཞེན་པ་ལོག་པའི་ངེས་འབྱུང་ལ་ཆེད་དུ་འབད་པའི་གོ་བཀག་པས་ཐར་པ་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་གེགས་བྱེད། བྱམས་སྙིང་རྗེ་བྱང་ཆུབ་ཀྱི་སེམས་བསྒོམ་པ་དང་། སྦྱིན་པ་བཏང་བ་སོགས་ཀྱི་གོ་བཀག་པས་ཐམས་ཅད་མཁྱེན་པའི་གོ་འཕངས་འཐོབ་པའི་གེགས་བྱེད་པའི་ཕྱིར་ན་ལམ་ཕྱིན་ཅི་ལོག་མ་རུང་བ་དེ་ལས་གཞན་དུ་འཁྲིད་ཐབས་མེད་པར་ཤེས་པར་གྱིས་ལ། ལས་དང་པོ་བ་དང་པོ་མི་རྟག་པའི་སྐྱོ་ཤས་ཀྱིས་རྒྱུད་བསྐུལ་བ་ནས། ངེས་འབྱུང་དང་། བྱང་ཆུབ་ཀྱི་སེམས་དང་། སྤྱོད་པ་ཕ་རོལ་ཏུ་ཕྱིན་པ་དྲུག་སོགས་ཐབས་དང་ཤེས་རབ་ཡ་མ་བྲལ་བའི་ལམ་བཟང་པོ་ལ་རིམ་གྱིས་ཁྲིད་ནས་དལ་འབྱོར་དོན་དང་ལྡན་པ་བྱེད་དུ་ཆུག་ཅེས་རང་ངོས་ཀྱིས་བསྟན་འགྲོ་ལ་ཕན་པའི་བསམ་པས་ཚུལ་བཞིན་གུས་པ་དང་བཅས་ཏེ་གདམས་སོ།།

འདིར་སྨྲས་པ།

སྙན་འགྱུར་གསུང་གསང་དཔལ་གྱི་མགུར་ལས་ནི།།

མཐའ་གཅིག་སངས་རྒྱས་བགྲོད་པའི་ལམ་བཟང་ལ།།
ཆོས་ཀུན་སྟོང་པའི་ངང་ཚུལ་ཤེས་བཞིན་དུ།།

བྱ་དཀའི་སྤྱོད་པས་སྦྱིན་སོགས་ཡོན་ཏན་ཀུན།།

གྲངས་མེད་བསྐལ་པར་སྒྲུབ་པའི་བསོད་ནམས་དང་།།

ཡེ་ཤེས་ཚོགས་གཉིས་ཟུང་འབྲེལ་སྒྲུབ་དགོས་པའི།།
བསླུ་མེད་བདེན་པའི་ཚིགས་ལ་རྩིས་མེད་པ།།

རང་རང་གང་འདོད་ལོག་པའི་ལམ་ཡང་སྟོན།།

ཀྱེ་མ་དེང་སང་གངས་རིའི་རྭ་བའི་ནང་།།

གནས་པའི་གདུལ་བྱ་བློ་གྲོས་དམན་པ་རྣམས།།
ཐབས་ཤེས་ཡ་བྲལ་ལོག་པའི་གཡང་ས་རུ།།

བསམ་བཞིན་སྐྱུར་བར་བྱེད་པའི་སྟོན་ཆེན་མང་།།

བརྗོད་ཚུལ་ཙམ་ལ་ཐབས་ཤེས་ཟུང་འཇུག་གི།

ཉམས་ལེན་དགོས་ཞེས་སྙན་པར་སྨྲ་ནའང་།།
ལག་ལེན་སྙིང་པོར་དྲིལ་ཚེ་སྟོང་པ་ཉིད།།

ཡིད་ལ་བྱེད་ལས་ལམ་གཞན་རྩིས་མེད་སྟོན།།

དེ་ལྟར་གོལ་བའི་ལམ་ལ་ཡུན་རིང་དུ།།

འབད་ཀྱང་གཞུང་བཞིན་ཐབས་ཤེས་ལམ་བཟང་པོ།།
ཅི་སྟེ་རྙེད་འགྱུར་རྣམ་རྟོག་བཀག་ཙམ་ལ།།

སྒོམ་གྱི་སྙིང་པོར་བཟུང་བ་ཡི་རེ་མུག།

སེམས་ཉིད་སྟོང་པ་ཅི་ཡང་མི་རྟོག་པ།།

རྒྱུད་ལ་སྐྱེས་པར་རློམ་བཞིན་ཕ་ཡུལ་དང་།།
གཉེན་བཤེས་ནོར་རྫས་སྲོག་པས་གཅེས་པ་རུ།།

འཛིན་པའི་སྒོམ་ཆེན་དེ་ཡང་ངོ་ཚའི་གནས།།

དཔྱད་པས་ངེས་ཤེས་དྲངས་ནས་སྒོམ་ཚུལ་དང་།།

དམ་པའི་མན་ངག་ཇི་བཞིན་ངོ་སྤྲོད་ཚུལ།།
ཇི་ལྟར་བྱས་ཀྱང་ངེས་འབྱུང་བྱང་ཆུབ་སེམས།།

ལམ་གྱི་གཞི་རྩར་བཟུང་བ་གནད་དུ་གཅེས།།

ངེས་འབྱུང་བསམ་པས་འཁོར་བར་ཞེན་པ་ལོག།

སྙིང་རྗེའི་བསམ་པས་མིག་ནི་མཆི་མས་བརླན།།
བྱང་ཆུབ་སེམས་ཀྱིས་གཞི་རྩ་བརླིང་བྱས་པའི།།

གཉིས་མེད་ཡེ་ཤེས་སྒྲིབ་གཉིས་གཉེན་པོར་བསྔགས།།

འདི་རིགས་རྒྱལ་བ་དགྱེས་པའི་ལམ་བཟང་པོ།།

ཁོང་ནས་མྱོང་བའི་ཤུགས་ཀྱིས་བསྐལ་པའི་བར།།
བརྗོད་པར་སྤོབས་ཀྱང་དེང་སང་སྐལ་དམན་གྱི།།

ཡོན་པོའི་བློ་ཅན་དག་ལ་ཅི་བྱར་ཡོད།།

རྩོད་པའི་ཡང་ལན་ལོག་ལྟའི་ཁོང་ཁྲག་འདོན་པའི་སྐྱུགས་སྨན་ལས་སྤང་བྱ་སྤོང་ཚུལ་ལ་བརྒལ་བའི་ལན་བརྗོད་པའི་སྐབས་ཏེ་གཉིས་པའོ།།

༼༥ བདེན་གཉིས་འདོད་ཚུལ་ལ་བརྒལ་བའི་ལན་བརྗོད་པས།༽

༈ གསུམ་པ་བདེན་གཉིས་འདོད་ཚུལ་ལ་བརྒལ་བའི་ལན་བརྗོད་པ་ལ་གཉིས། ཡུལ་བདེན་གཉིས་ཀྱི་རྣམ་བཞག་ཕྱིན་ཅི་ལོག་ཏུ་སོང་བ་ལ་བརྒལ་བའི་ལན་ཡང་དག་པ་མ་བྱུང་ཚུལ་དང་། ཞར་བྱུང་རང་རིག་དང་ཀུན་གཞི་ཐ་སྙད་དུ་ཡང་འདོད་མི་རིགས་པའི་རྒལ་ལན་ཡང་དག་མ་བྱུང་བའི་ཚུལ་ལོ།། དང་པོ་ནི། མི་ཕམ་གྱིས་དེ་ལ་ཇི་སྐད་བཤད་པ་དེ་དག་གིས་གནོད་པ་མེད་པའི་ཚུལ་གྱིས་ལན་བརྗོད་པར་བྱ་སྟེ། དེ་ཡང་གཉིས་སྣང་ཡོད་མེད་ཀྱི་བློའི་ཡུལ་གྱི་ཁྱད་པར་ཕྱེས་ནས་འཆད་པ་ལ་སྐྱོན་མེད་མོད། གཞུང་ཚིགས་བཅོས་མེད་ལྟར་སྔ་རབས་པའི་འཆད་ཚུལ་ལྟར་བྱས་ཀྱང་འཆད་ཚུལ་གཅིག་ཤོས་དང་གནད་མཐུན་ལ་སོ་སོའི་ཞེ་འདོད་ཀྱི་བཞེད་པ་སྐྱོན་མེད་རེ་ཡོད་པས་གང་ཡང་རིགས་པ་རྣམ་དག་གིས་སུན་ཕྱུང་མི་ནུས་པར་མཐོང་ངོ་།། ཇི་ལྟར་གནད་མཐུན་ན་ཐ་སྙད་དུ་དོན་དམ་རྟོགས་པའི་བློ་ཞིག་སུའི་ལུགས་ལའང་ཡོད་པར་སྨྲོས་མ་དགོས་ལ། བློ་དེའང་གཉིས་སྣང་ཡོད་པའི་ཁྱད་པར་དང་བཅས་པ་སུའི་ལུགས་ལའང་ཡིན་པས་ན། དོན་དམ་མངོན་སུམ་དུ་རྟོགས་པའི་བློ་རང་གི་ཚུལ་ལ་གཞལ་ན་ཡུལ་གྱི་རྣམ་པར་སྣང་བ་དང་། དེ་ལ་ལྟོས་པའི་བློ་ཡི་རྣམ་པ་མེད་པར་སྤྲོས་པ་ཉེ་བར་ཞི་བ་གང་ཞིག་ཐ་སྙད་ཀྱིས་ཇི་བཞིན་དུ་བསམ་པར་དཀའ་བ་ཉིད་དུ་བསྟན་པ་ཡིན་པའི་ཕྱིར་རོ།། དེ་ལྟར་མིན་པར་གཉིས་སྣང་ནུབ་བཞིན་པའི་བློ་རང་ངོར་ཡང་ཡུལ་དང་བློའི་རྣམ་པ་ཡོད་པར་འདོད་ན་གཉིས་སྣང་མེད་པར་ཡང་ཇི་ལྟར་འགྱུར། དོན་ལ་གཉིས་སུ་ཡོད་ཀྱང་དེར་མ་སྣང་བ་ཙམ་ཡིན་ན་ནི་དོན་གྱི་གནས་ཚུལ་ཇི་ལྟ་བ་བཞིན་རྟོགས་པའི་བློར་མི་འགྱུར་ཏེ་གནས་སྣང་མི་མཐུན་པའི་ཕྱིར་རོ།། དེ་བས་ན་ཆོས་ཐམས་ཅད་ཡེ་ནས་དེ་བཞིན་ཉིད་བརྗོད་པ་དང་བྲལ་བའི་ངོ་བོར་གཉིས་སུ་མེད་པར་གནས་སུ་ཟིན་ཀྱང་འཁྲུལ་བའི་དབང་གིས་དེ་ལྟར་མ་རྟོགས་པ་ལམ་གོམས་སྟོབས་ཀྱིས་བསལ་ནས་ད་ལྟ་མངོན་དུ་མཐོང་བ་ཡིན་པར་རིག་པར་བྱའོ།། ཞེས་སྨྲས་འདུག་པ་ལ་ལན་ཅུང་ཟད་བརྗོད་ན། ཁྱོད་ཀྱིས་ དོན་དམ་བློ་ཡིས་སྤྱོད་ཡུལ་མིན།། བློ་ནི་ཀུན་རྫོབ་ཡིན་པར་འདོད།། ཅེས་པའི་ཚིག་རྐང་གཉིས་ཀྱིས་དོན་སྔ་རབས་པ་རྣམས་ཀྱིས་འགྲེལ་བ་ལྟར་ན་དོན་དམ་པ་ཆོས་ཅན། བློ་ཡི་སྤྱོད་ཡུལ་མ་ཡིན་ཏེ། བློ་དང་སྒྲ་ནི་ཀུན་རྫོབ་ཡིན་པའི་ཕྱིར། ཞེས་འགྲེལ་བ་འདི་ལ་བཞེད་པ་སྐྱོན་མེད་རེ་ཡོད་པས་རིགས་པ་རྣམ་དག་གིས་སུན་དབྱུང་མི་ནུས་པར་མཐོང་ཟེར་ན། འགྲེལ་ཚུལ་དེ་དག་སུན་དབྱུང་མི་ནུས་པའི་གནད་ཅི་མཐོང་། བློ་དང་སྒྲ་ཀུན་རྫོབ་ཡིན་པའི་རྟགས་ཀྱིས་དོན་དམ་བློ་ཡི་སྤྱོད་ཡུལ་མ་ཡིན་པར་སྒྲུབ་ནུས་པར་ཐལ། འདོད་པའི་ཕྱིར། འདོད་ན། དོན་དམ་མངོན་སུམ་དུ་མཁྱེན་པའི་རྣམ་མཁྱེན་དང་། དོན་དམ་བདེན་པ་བརྗོད་བྱར་བྱས་པའི་ཤེར་ཕྱོགས་ཀྱི་མདོ་སྡེ་རིན་པོ་ཆེ་རྣམས་ཀྱང་མེད་པར་ཐལ། དོན་དམ་བདེན་པ་བློ་ཡི་སྤྱོད་ཡུལ་དང་། སྒྲ་ཡིས་བརྗོད་བྱར་མི་རུང་བའི་ཕྱིར། རྟགས་ཁྱབ་མ་གྲུབ་ན་དམ་བཅའ་བུད། གྲུབ་ན། ཇི་ལྟ་བ་མཁྱེན་པའི་རྣམ་མཁྱེན་མེད་པ་དང་། ཤེར་ཕྱོགས་ཀྱི་མདོ་སྡེ་རིན་པོ་ཆེ་རྣམས་མེད་ཅེས་སྐུར་བ་བཏབ་པ་ལས་སྐུར་བ་འདེབས་ཚབས་ཆེ་བ་ཅི་ཞིག་དགོས། སྔ་རབས་པའི་བཞེད་ཚུལ་ལ་བཞེད་པ་སྐྱོན་མེད་ཡོད་རྒྱུ་དེ་དེ་ལྟ་བུའི་སྐུར་འདེབས་མ་རུང་བ་བྱས་པ་དེ་ཡིན་པར་ཐལ། འདོད་པའི་ཕྱིར། དེ་ལ་སྐྱོན་དེ་སྐད་སྨྲས་པ་རྣམས་མེད་དེ། དོན་དམ་མངོན་སུམ་དུ་རྟོགས་པའི་བློ་རང་གི་ཚུལ་ལ་གཞལ་ན། ཡུལ་གྱི་རྣམ་པར་སྣང་བ་དང་། དེ་ལ་ལྟོས་པའི་བློ་ཡི་རྣམ་པ་མེད་པར་སྤྲོས་པ་ཉེ་བར་ཞི་བ་གང་ཞིག། ཐ་སྙད་ཀྱིས་ཇི་བཞིན་དུ་བསམ་པ་དཀའ་བ་ཉིད་དུ་བསྟན་པའི་ཕྱིར། ཞེས་མ་སྨྲས་སམ་ཞེ་ན། འོ་ན་ཐ་སྙད་པའི་བློ་ཡིས་ཇི་བཞིན་དུ་བསམ་པར་མི་ནུས་ན། བློ་གང་གིས་ཀྱང་བསམ་པར་མི་ནུས་པས་ཁྱབ་པར་ཐལ། རྒྱུ་མཚན་དེ་ལ་བརྟེན་ནས་དོན་དམ་བློ་ཡི་ཡུལ་མ་ཡིན་པར་གྲུབ་པར་འདོད་པའི་ཕྱིར། འདོད་ན། དོན་དམ་བདེན་པ་ཆོས་ཅན། ཁྱོད་ཇི་ལྟ་བ་མཁྱེན་པའི་རྣམ་མཁྱེན་གྱིས་མ་མཁྱེན་པར་ཐལ། ཇི་ལྟ་བ་མཁྱེན་པའི་རྣམ་མཁྱེན་བློ་ཡིན་པ་གང་ཞིག བློ་གང་གིས་ཀྱང་དོན་དམ་པ་བསམ་མི་ནུས་པའི་ཕྱིར། ཁྱབ་སྟེ། དོན་དམ་པ་ཐ་སྙད་པའི་བློས་ཇི་བཞིན་དུ་བསམ་པར་མི་ནུས་པའི་ཕྱིར། ཁྱབ་འབྲེལ་སྔ་ཕྱི་རང་གི་ཁས་ལེན་གྱིས་དངོས། དེས་ན་ཇི་ལྟ་བ་མཁྱེན་པའི་རྣམ་མཁྱེན་མེད་པར་ཐལ། ཇི་ལྟ་བ་དོན་དམ་བདེན་པ་མཁྱེན་བྱ་མ་ཡིན་པའི་ཕྱིར། མཁྱེན་བྱའི་ཡུལ་ཇི་ལྟ་བ་མེད་པའི་ཇི་ལྟ་བ་མཁྱེན་པའི་རྣམ་མཁྱེན་མི་སྲིད་པའི་ཕྱིར་ཏེ། ཅི་སྟེ་སྲིད་ན་རི་བོང་རྭ་མཁྱེན་པའི་རྣམ་མཁྱེན་ཡང་སྲིད་པར་ཐལ་ལོ།། གལ་ཏེ་དོན་དམ་བདེན་པ་ཐ་སྙད་པའི་བློའི་ཡུལ་མ་ཡིན་པ་ལས་དོན་དམ་མཁྱེན་པའི་རྣམ་མཁྱེན་ལྟ་བུའི་ཡུལ་ཡིན་ཟེར་ན། ཐ་སྙད་པའི་བློས་ཇི་བཞིན་དུ་བསམ་པར་མ་ནུས་ན། བློ་གང་གིས་ཀྱང་བསམ་པར་མི་ནུས་པས་ཁྱབ་པར་འདོད་པའི་དམ་བཅའ་བུད། ཡང་གལ་ཏེ། དོན་དམ་པའི་བློ་ཇི་ལྟ་བ་མཁྱེན་པའི་རྣམ་མཁྱེན་ལྟ་བུས་དོན་དམ་མཁྱེན་ཀྱང་། དེ་དོན་དམ་མཁྱེན་པའི་བློ་ཡིན་ཞེས་བྱ་ མི་རུང་ཟེར་རམ། དེ་དོན་དམ་མཁྱེན་པའི་བློ་ཡིན་པའི་བློ་ཡིན་གོ་མི་ཆོད་ཟེར་རམ། ཅི་ཟེར། ཕྱོགས་དང་པོ་ལྟར་འདོད་དེ་ཇི་ལྟ་བ་མཁྱེན་པའི་རྣམ་མཁྱེན་ལ་ཇི་ལྟ་བ་དོན་དམ་བདེན་པ་མཁྱེན་ཀྱང་དེ་མཁྱེན་པའི་བློ་ཡིན་ཞེས་བྱ་མི་རུང་སྟེ། གསུངས་རབ་ཕལ་ཆེར་ལས་དོན་དམ་པ་སྨྲ་རྒྱུ་མེད། བསམ་རྒྱུ་མེད། བརྗོད་རྒྱུ་མེད་པར་གསུང་འདུག་པའི་ཕྱིར་ཟེར་ན། འོ་ན་དོན་དམ་པ་བསམ་དུ་མེད་པ་ཡིན་ན་བློ་གང་གིས་ཀྱང་བསམ་དུ་མེད་པས་ཁྱབ་པ་དང་། དེ་བརྗོད་དུ་མེད་པ་ཡིན་ན་སྒྲ་གང་གིས་ཀྱང་བརྗོད་དུ་མེད་པས་ཁྱབ་པར་ཐལ། འདོད་པའི་ཕྱིར། འདོད་ན། སངས་རྒྱས་འཕགས་པའི་ཐུགས་རྒྱུད་ཀྱི་ཇི་ལྟ་བ་མཁྱེན་པའི་རྣམ་མཁྱེན་གྱིས་བདག་རྐྱེན་བྱས་ནས་གསུང་ཚངས་པའི་དབྱངས་ཀྱིས་ཤེར་ཕྱོགས་ཀྱི་མདོ་སྡེ་རིན་པོ་ཆེ་མ་གསུངས་པར་ཐལ། དོན་དམ་བདེན་པ་བསམ་པ་དང་བརྗོད་བྱའི་ཡུལ་ལས་འདས་པའི་ཕྱིར། མ་ཁྱབ་ཟེར་ན། ཁྱབ་པར་ཐལ། དོན་དམ་བདེན་པ་བསམ་པ་དང་བརྗོད་བྱའི་ཡུལ་ལས་འདས་པས་རྣམ་པ་ཀུན་ཏུ་བསམ་པ་དང་བརྗོད་རྒྱུ་མེད་དགོས་པའི་ཕྱིར། ཡུལ་ཅན་རྣམ་མཁྱེན་ཡིན་ཀྱང་བསམ་མི་ནུས། གསུང་ཚངས་དབྱངས་ཡིན་ཀྱང་བརྗོད་མི་ནུས་དགོས་པའི་ཕྱིར། གལ་ཏེ་དེ་ཙམ་མི་དགོས་ཏེ། རྣམ་མཁྱེན་གྱིས་དོན་དམ་མཁྱེན། གསུང་ཚངས་དབྱངས་ཀྱིས་དོན་དམ་བདེན་པ་བརྗོད་ཟེར་བ་དེ་ཐ་སྙད་ཀྱི་དབང་གིས་རྣམ་པར་བཞག་པ་ཡིན་པའི་ཕྱིར། རྣམ་མཁྱེན་གྱིས་མ་བསམ་པ་དང་མ་བརྗོད་པའི་སྐྱོན་མེད་ཟེར་ན། འོ་ན་ཐ་སྙད་དུ་རྣམ་མཁྱེན་གྱིས་དོན་དམ་བསམ་པ་དང་གསུང་གིས་དོན་དམ་བརྗོད་པ་དེས་བསམ་པ་དང་བརྗོད་པ་དངོས་གནས་པའི་གོ་ཆོད་དམ་མི་ཆོད། གོ་ཆོད་ན་རྣམ་མཁྱེན་དང་གསུང་ཚངས་དབྱངས་ཀྱིས་དོན་དམ་པ་བསམ་པ་དང་བརྗོད་ཅེས་ཚིགས་ཙམ་ལས་དོན་ལ་རི་བོང་རྭའི་དབྱིབས་དང་ཁ་དོག་བརྗོད་པ་བཞིན་དུ་སོང་འདུག་པའི་ཕྱིར། ཐ་སྙད་དུ་དེ་ལྟ་བུའི་རྣམ་བཞག་བྱས་ཀྱང་དོན་དུ་རྣམ་པར་བཞག་རྒྱུ་ཅི་ཡང་མ་བྱུང་འདུག་པའི་ཕྱིར། ཡང་དེ་ལྟར་ཐ་སྙད་དུ་བསམ་བརྗོད་ཀྱི་རྣམ་པར་བཞག་པས་བཞག་གོ་ཆོད་ན། ཐ་སྙད་དུ་རྣམ་མཁྱེན་གྱིས་བསམ་པ་དང་ཚངས་དབྱངས་ཀྱིས་བརྗོད་ཅེས་རྣམ་པར་བཞག་པ་ལྟར་དོན་ན་གནས་པའི་ཕྱིར། དོན་དམ་བདེན་པ་སྨྲ་བསམ་བརྗོད་མེད་ཡིན་ན། བློ་དང་སྒྲ་གང་གིས་ཀྱང་མི་བསམ་པ་དང་མི་བརྗོད་པའི་ཁྱབ་པ་དམ་བཅས་པའི་དམ་བཅའ་ཉམས་སོ།། དེས་ན་ཐ་སྙད་དུ་རྣམ་མཁྱེན་དང་ཚངས་དབྱངས་ཀྱིས་དོན་དམ་བསམ་པ་དང་བརྗོད་པ་ཡིན་ན་ཐ་སྙད་དུ་ཇི་ལྟ་བ་མཁྱེན་པ་དང་། དེ་མཁྱེན་པའི་བློ་ཡིན་ཞེས་རྣམ་པར་བཞག་ཀྱང་འགལ་བ་མེད་པའི་ཕྱིར་རོ།། གལ་ཏེ་དེ་ལ་ཤིན་ཏུ་འགལ་བ་ཡོད་དེ་ཐ་སྙད་དུ་ཇི་ལྟ་བ་མཁྱེན་པའི་རྣམ་མཁྱེན་གྱིས་མཁྱེན་ཞིང་གསུང་གིས་བརྗོད་པས་ཆོག་མོད། དོན་དམ་པར་མཁྱེན་པ་དང་གསུང་བའི་རྣམ་བཞག་མི་འཐད་པས་དེ་ལྟར་བསམ་པ་དང་བརྗོད་ཅེས་བྱ་མི་རུང་བ་ཡིན་ཟེར་ན། དེ་ལ་བཞད་གད་འདི་བྱ་སྟེ། དོན་དམ་པར་བསམ་པ་དང་བརྗོད་རྒྱུ་མེད་པ་རྒྱུ་མཚན་དུ་བྱས་ནས་ཆོས་གང་ཡང་བསམ་པ་དང་བརྗོད་རྒྱུ་མེད་ན། མི་ཕམ་ཆོས་ཅན། ཁྱོད་ཀྱིས་ཀྱང་ཟན་ཟའོ།། གོས་གྱོན་ནོ།། འགྲོའོ།། འདུག་གོ་སོགས་གང་ཡང་མི་བསམ་པ་དང་། གང་ཡང་དེ་སྐད་མི་བརྗོད་པར་ཐལ། དེ་སྐད་གྱི་བསམ་པ་དང་བརྗོད་པའང་དོན་དམ་པར་མེད་པའི་ཕྱིར། དེ་མེད་ན་མི་ཕམ་གྱིས་ཅི་ཡང་མི་བསམ་ཅི་ཡང་མི་བརྗོད་པ་རྣམ་པ་ཀུན་ཏུ་རྡོ་དང་བོང་བ་བཞིན་དུ་གནས་པར་འགྱུར་བས། དེས་ན་མི་ཕམ་ལ་བསམ་པའི་སེམས་མེད། སྨྲ་བའི་ངག་མེད་པ་སོགས་སུ་འགྱུར་བའི་ཕྱིར་དེ་ཙམ་ཡང་མཚར་ཆེས་དྲག་པ་མ་ལགས་སམ། ད་རུང་དེ་ཕྱོགས་སྤྲོས་པས་ཆོག་ལ། རེ་ཞིག་དྲི་བའི་ཕྱོགས་ཕྱི་མ་ལྟར་ཇི་ལྟ་བ་མཁྱེན་པའི་རྣམ་མཁྱེན་དོན་དམ་མཁྱེན་པའི་བློ་ཡིན་ཀྱང་བློ་ཡིན་གོ་མི་ཆོད་ཟེར་ན། དེ་ཡང་བརྟག་པ་ཕྱོགས་གཉིས་ལས་མ་འདས་ཏེ། ཇི་ལྟ་བ་མཁྱེན་པའི་རྣམ་མཁྱེན་བློ་ཡིན་ཞེས་བྱ་བ་ཙམ་ལས་བློ་ཡིན་གོ་མ་ཆོད་པ་དེ་ཐ་སྙད་ཀྱི་དབང་དུ་ཡིན་ན་ནི། རྣམ་མཁྱེན་དེ་ཆོས་ཅན། ཁྱོད་མེད་པར་ཐལ། ཐ་སྙད་ཀྱི་དབང་དུ་ཁྱོད་བློ་མ་ཡིན། དོན་དམ་དུ་ནི་དེ་བས་ཀྱང་བློ་ཡིན་དུ་ག་ལ་རུང་སྟེ་མི་རུང་བའི་ཕྱིར། ཡང་དེ་ལྟ་བུའི་བློ་དེས་བློ་ཡིན་གོ་མ་ཆོད་པ་དེ་ཐ་སྙད་དུ་བློ་ཡིན་གོ་ཆོད་ཀྱང་དོན་དམ་དུ་མི་ཆོད་པ་ཡིན་པའི་རྒྱུ་མཚན་གྱིས་ཡིན་ན། དོན་དམ་པའི་དབང་དུ་བྱས་ནས་བློ་ཡིན་གོ་མ་ཆོད་པས་བློ་མ་ཡིན་དགོས་ན། སྤྱིར་གྱི་སེམས་སེམས་བྱུང་ཐམས་ཅད་ཆོས་ཅན། བློ་ཡིན་གོ་མི་ཆོད་པར་ཐལ། དོན་དམ་པའི་དབང་དུ་བྱས་ནས་བློ་ཡིན་གོ་མི་ཆོད་པའི་ཕྱིར། དེས་ན་དེ་དང་རིགས་འགྲེས་ཡུལ་ཡུལ་ཅན་གྱི་ཤེས་བྱ་ཐམས་ཅད་ཀྱིས་ཡོད་པའི་གོ་མི་ཆོད་པར་ཐལ། དོན་དམ་པའི་དབང་སུ་བྱས་ནས་ཡོད་གོ་མི་ཆོད་པའི་ཕྱིར། ཁྱབ་པ་སྔ་ཕྱི་ཁས་ལེན་གྱི་དངོས། དེས་ན་མི་ཕམ་ཉིད་ཅི་ཡང་མེད་པའི་བརྟུལ་ཞུགས་ལ་གནས་པར་མཛོད་ཅིག། དོན་གྱི་གནད་འདི་ལ་གཟིགས་ནས་དོན་དམ་དུ་མེད་པས་མེད་གོ་མི་ཆོད། ཐ་སྙད་དུ་ཡོད་པས་ཡོད་གོ་ཆོད་དགོས་པར་གསུངས་པ་ཡིན་ཏེ། དོན་དམ་དུ་མེད་པས་མེད་གོ་ཆོད་དགོས་ན། སྤྱིར་ཡོད་དང་མེད་ཅེས་པའི་རྣམ་བཞག་ཐམས་ཅད་དོན་དམ་གྱི་དབང་དུ་བྱས་ནས་རྣམ་པར་བཞག་དགོས་པས་དོན་དམ་པའི་དབང་དུ་ནི་ཡོད་མེད་དང་ཡིན་མིན་སོགས་ཀྱི་རྣམ་བཞག་ཅི་ཡང་མི་འཐད་པའི་ཕྱིར། ལས་རྒྱུ་འབྲས་སྐྱེ་བ་སྔ་ཕྱི་སོགས་ཅི་ཡང་མི་འཐད་པ་རྒྱངས་འཕེན་པའི་གྲུབ་མཐའ་ལྟར་ཁས་ལེན་དགོས་པར་འགྱུར་ལ། ཐ་སྙད་དུ་ཡོད་པས་ཡོད་གོ་ཆོད་དགོས་སྟེ། ཡོད་མེད་ཡིན་མིན་སོགས་ཆོས་གང་ཡང་ཐ་སྙད་དུ་ཡོད་པ་ཙམ་གྱིས་ཡོད་གོ་མ་ཆོད་ན། དོན་དམ་དུ་ནི་དེས་རྣམ་བཞག་མི་འཐད། བདེན་པ་གཉིས་ལས་གཞན་པའི་བདེན་པ་གསུམ་པའི་རྣམ་བཞག་ནི་མི་རུང་བའི་ཕྱིར། ཆོས་གང་གིའང་རྣམ་བཞག་བྱ་ས་མི་རྙེད་པའི་ཕྱིར་ཐམས་ཅད་མེད་ཅེས་སྐུར་བ་བཏབ་པ་ལས་མེད་དོ།། གལ་ཏེ་ཁྱོད་དེ་སྐད་སྨྲ་མི་དགོས་ཀྱི་ཁོ་བོས་ཀྱང་ཐ་སྙད་དུ་དོན་དམ་རྟོགས་པའི་བློ་ཞིག་སུའི་ལུགས་ལའང་ཡོད་པར་སྨྲོས་མ་དགོས་ལ། དོན་དམ་མངོན་སུམ་དུ་རྟོགས་པའི་བློ་རང་གི་ཚུལ་ལ་གཞལ་ན་ཡུལ་གྱི་རྣམ་པར་སྣང་བ་དང་དེ་ལ་ལྟོས་པའི་བློ་ཡི་རྣམ་པར་མེད་པ་སྤྲོས་པ་ཉེ་བར་ཞི་བ་གང་ཞིག་ཐ་སྙད་ཀྱི་བློས་ཇི་བཞིན་དུ་བསམ་པར་དཀའ་བར་བསྟན་པར་ཡིནཔའི་ཕྱིར་ཞེས་མ་སྨྲས་སམ་ཟེར་ན། དེ་ལ་འདི་ལྟར་བརྗོད་དེ། ཁྱོད་ཅག་དེ་སྐད་སྨྲས་པ་ལྟར། ཐ་སྙད་དུ་དོན་དམ་རྟོགས་པའི་བློ་ཡོད། དོན་དམ་རྟོགས་པའི་བློ་ངོར་ཡུལ་དང་ཡུལ་ཅན་གྱི་རྣམ་བཞག་མི་བྱ་ཞེས་སྨྲ་ཤེས་པ་ཙམ་ལས་ཞེ་ཕུགས་སུ་ཐ་སྙད་དུ་དོན་དམ་རྟོགས་པའི་བློ་ཞིག་ཡོད་མ་བྱས་ན་ནི་གཞུང་གང་ནས་ཀྱང་དོན་དམ་རྟོགས་པའི་བློ་ཡོད་ཚུལ་མང་པོར་གསུངས་ཡོད་པ་དེས་དོགས་ནས་ཐ་སྙད་དུ་དོན་དམ་རྟོགས་པའི་བློ་ཡོད་ཅེས་མི་སྨྲ་ཀ་མེད་དུ་གྱུར། འོ་ན་ཐ་སྙད་དུ་དོན་དམ་རྟོགས་པའི་བློ་ཡོད་རྒྱུ་དེས་དོན་དམ་རྟོགས་པའི་བློ་ཡོད་རྒྱུའི་གོ་ཆོད་དམ་མི་ཆོད་ཅེས་དྲི་བའི་ཚེ། ཡོད་གོ་ཆོད་ཟེར་ན་ནི། དོན་དམ་རྟོགས་པའི་བློ་ཡོད་པ་ཁས་ལེན་དགོས་པ་ལ་ཐུག། དེ་ཁས་ལེན་ན་དོན་དམ་བློ་ཡི་སྤྱོད་ཡུལ་མིན་ཏེ་བློ་དང་སྒྲ་ནི་ཀུན་རྫོབ་ཡིན་པའི་ཕྱིར་ཞེས་པའི་འགྲེལ་ཚུལ་དང་འགལ། ཕྱོགས་གཉིས་པ་ཡོད་གོ་མི་ཆོད་ཟེར་ན་ནི་དོན་དམ་རྟོགས་པའི་བློ་གཏན་ནས་མེད་པར་ཁས་བླངས་དགོས་པ་ལ་ཐུག་འགྲོ། དེ་སོང་ན་འཕགས་པའི་རྒྱུད་ཀྱི་དོན་དམ་རྟོགས་པའི་ཡེ་ཤེས་མཐའ་དག་མེད་པར་ཁས་བླངས་དགོས་པ་ལ་ཐུག། དེ་ཐུག་ན་གཞུང་ལུགས་ཕལ་མོ་ཆེ་ལས་དོན་དམ་དུ་མངོན་སུམ་དུ་རྟོགས་པའི་འཕགས་པའི་མཉམ་བཞག་ཡེ་ཤེས་ཡོད་ཅེས་གསུངས་འདུག་པ་སོགས་དང་འགལ་བར་མཐོང་ནས་ཐ་སྙད་དུ་དོན་དམ་རྟོགས་པའི་བློ་ཡོད་རྒྱུ་དེས་དོན་དམ་རྟོགས་པའི་བློ་ཡོད་གོ་ཆོད་ཅེས་ཟེར་ཐག་མ་ཆོད། ཡོད་གོ་མི་ཆོད་ཅེས་ཀྱང་ཟེར་ཐག་མ་ཆོད་པ་ཁས་ལེན་ཐམས་ཅད་འདམ་ལ་བཏབ་པའི་ཕུར་པ་བཞིན་དུ་གཏད་སོ་ཡེ་མ་རྙེད་པ་འདི་འབྱུང་འདུག་གོ། ཡང་དོན་དམ་རྟོགས་པའི་བློ་ངོར་ཡུལ་དང་ཡུལ་ཅན་གྱི་རྣམ་བཞག་མེད་པ་དེས་དོན་དམ་རྟོགས་པའི་བློ་མེད་པའི་གོ་ཆོད་དམ་མི་ཆོད་ཅེས་དྲི་ན། དེ་ལ་མེད་གོ་ཆོད་ཟེར་ན་དོན་དམ་དུ་དོན་དམ་རྟོགས་པའི་བློ་མེད་པས་དོན་དམ་རྟོགས་པའི་བློ་མེད་དགོས་ན། དོན་དམ་རྟོགས་བྱ་མ་ཡིན་པ་དང་ཇི་ལྟ་བ་མཁྱེན་པའི་རྣམ་མཁྱེན་མེད་པར་ཐལ་བ་སོགས་ཀྱིས་གནོད་ལ། དེ་ལ་དྲི་བའི་ཕྱོགས་གཉིས་པ་དེ་མེད་པས་མེད་གོ་མ་ཆོད་ན་དོན་དམ་རྟོགས་པའི་བློ་ཞིག་ཤེས་བྱ་ལ་སྲིད་པར་སོང་བས་དོན་དམ་བློ་ཡི་སྤྱོད་ཡུལ་མིན་པའི་འགྲེལ་ཚུལ་བྱེ་མའི་མཁར་ཐབས་ཆུ་ཡིས་བཤིག་པ་བཞིན་དུ་སོང་བ་འདི་ངེད་ཅག་རིགས་ལམ་སྨྲ་བ་ཀུན་གྱིས་ཉམས་མཚར་བའི་སྟོན་མོ་ཞིག་མཐོང་ངོ་།། དེ་ལྟར་ཀུན་རྫོབ་སྒོ་ཅན་གྱི་བརྟག་པ་ཕྱོགས་གཉིས། དོན་དམ་སྒོ་ཅན་གྱི་བརྟག་པ་ཕྱོགས་གཉིས་ཏེ་བརྟག་པའི་ཕྱོགས་བཞི་པོ་འདི་ལ་ལན་མ་ཐེབས་ན། སྔ་རབས་པའི་བཞེད་ཚུལ་རྩིས་ཆེ་བར་འཛིན་འདོད་ཀྱང་འཛིན་པར་མི་ནུས་སོ།། དེ་ལ་རྩོད་པ་སྤོང་འདོད་ནས་སྨྲ་ན། ཐ་སྙད་དུ་དོན་དམ་རྟོགས་པའི་བློ་ཞིག་ཡོད་ཀྱང་དེ་ཡོད་པས་ཐ་སྙད་དུ་དོན་དམ་རྟོགས་པའི་བློ་ཡོད་པར་སོང་བས་ཐ་སྙད་དུ་ཡོད་གོ་ཆོད། དོན་དམ་ལ་དཔྱད་པའི་ཚུལ་ཏེ་དོན་དམ་རྟོགས་པའི་ངོར་བློ་ཡི་རྣམ་པར་མེད་པ་སྤྲོས་ཀུན་ཉེར་ཞི་ཡིན་ཀྱང་དེས་དོན་དམ་དུ་མེད་གོ་ཆོད་པས། དོན་དམ་པའི་བློ་གང་བདེན་པ་གཉིས་ཀྱི་ངོར་གང་ལ་ཡོད་པས་ཡོད་གོ་ཆོད་པ་དང་། གང་ལ་མེད་པས་མེད་གོ་ཆོད་ཅེས་མཐའ་གཅིག་ཏུ་ཡོད་དང་མེད་ཅེས་ཁ་ཚོན་གཅོད་མི་དགོས་ཏེ། དོན་དམ་པའི་བློ་ངོར་དོན་དམ་འཇལ་བའི་བློ་མེད་པས་དོན་དམ་པའི་བློ་ངོར་མེད་གོ་ཆོད། སྤྱིར་མེད་གོ་མི་ཆོད། ཐ་སྙད་པའི་ངོར་དོན་དམ་འཇལ་བའི་བློ་ཡོད་པས་ཐ་སྙད་པའི་བློ་ངོར་ཡོད་གོ་ཆོད། སྤྱིར་ཡོད་གོ་ཆོད་མི་དགོས་ཟེར་བ་ལྟ་བུའང་མི་འོང་བའི་ངེས་པར་མི་འདུག་པས། དེ་ལྟར་ན་དོན་དམ་དུ་མེད་པའི་མེད་པ་དང་། ཐ་སྙད་དུ་ཡོད་པའི་ཡོད་པ་གཉིས་ཡོད་དང་མེད་ཅེས་པའི་རྣམ་བཞག་དེས་བདེན་པ་གཉིས་རང་རང་གི་ངོ་ལས་སྤྱིར་གྱི་ཡོད་གོ་མེད་གོ་ཅི་ཡང་མ་ཆོད་ན། དོན་དམ་འཇལ་བའི་བློ་ཐ་སྙད་དུ་ཡོད་པས་སྤྱིར་ཡོད་གོ་མ་ཆོད་པའི་རྒྱུ་མཚན་དེ་འདྲའི་བློ་དེ་དོན་དམ་པའི་བློ་ངོར་མེད་པའི་དབང་གིས་ཡིན་དགོས་སམ། དེ་ལས་རྒྱུ་མཚན་གཞན་ཞིག་ཡོད། དང་པོ་ལྟར་ན་དོན་དམ་འཇལ་བའི་བློ་དོན་དམ་པའི་ངོར་མེད་པས་ཐ་སྙད་དུ་དེ་ཡོད་ཀྱང་སྤྱིར་ཡོད་གོ་མ་ཆོད་པ་དེ་བཞིན་དུ་བུམ་པའང་ཐ་སྙད་དུ་ཡོད་ཀྱང་དོན་དམ་པའི་བློ་ངོར་མེད་པས་སྤྱིར་ཡོད་གོ་མ་ཆོད་པར་འགྱུར་དགོས་ལ། དེ་བཞིན་དུ་རི་རྭ་བ་ཁང་ཁྱིམ་སོགས་ཆོས་ཐམས་ཅད་ལ་དེས་རིགས་འགྲེས་ཀྱི་ཐ་སྙད་དུ་ཡོད་གོ་ཆོད་ཀྱང་སྤྱིར་གྱི་ཡོད་གོ་མ་ཆོད་པས་སྤྱིར་ཡོད་གོ་ཆོད་པའི་ཆོས་གཅིག་ཀྱང་བཞག་ཏུ་མི་རྙེད་པའི་ཕྱིར། དཔེར་ན་མཁྲིས་ནད་ཅན་གྱི་བློ་ངོར་གངས་རི་སེར་པོ་བཞིན་དུ་སོང་བའི་ཕྱིར། འདོད་ནུས་སམ། འདོད་ན། ཇི་སྙེད་མཁྱེན་པའི་རྣམ་མཁྱེན་ཆོས་ཅན། ཁྱོད་ལོག་ཤེས་ཡིན་པར་ཐལ། ཁྱོད་ཀྱིས་ཐ་སྙད་པའི་ཆོས་ཐམས་ཅད་མཁྱེན་པ་གང་ཞིག། ཐ་སྙད་པའི་ཆོས་ཐམས་ཅད་ཁྱོད་ཀྱི་ངོར་ཡོད་ཙམ་ལས་སྤྱིར་ཡོད་པ་མ་ཡིན་པའི་ཕྱིར། དཔེར་ན་སྤྱིར་གངས་རི་སེར་པོ་ཡོད་མི་སྲིད་པ་ལ་གངས་རི་སེར་པོ་འཛིན་པའི་ལོག་ཤེས་ཀྱིས་གངས་རི་སེར་པོ་འཛིན་པ་གང་ཞིག དེ་དེའི་བློ་ངོར་ཡོད་ཀྱང་སྤྱིར་གངས་རི་སེར་པོ་ཡོད་མི་སྲིད་པ་བཞིན་དུ་སོང་བའི་ཕྱིར། དེས་ན་ཁྱེད་ཅག་ཐ་སྙད་པའི་བློ་ཡིན་ན་ལོག་ཤེས་ཡིན་པས་ཁྱབ་ཅེས་ཁས་ལེན་དགོས་པ་དང་། ཇི་སྙེད་པ་མཁྱེན་པའི་རྣམ་མཁྱེན་ཀྱང་ལོག་ཤེས་སུ་སོང་བས་སངས་རྒྱས་འཕགས་པ་ལོག་ཤེས་རྒྱུད་ལྡན་གྱི་སྐྱེས་བུ་ཡིན་ཞེས་སྐུར་བ་ཚབས་པོ་ཆེ་ཐོབ་ལ་མནར་མེད་མེ་ལྕེ་འབར་བའི་ཁང་བཟང་དུ་ཡུན་རིང་པོར་ཞབས་པད་བརྟན་པ་མཛད་དུ་གསོལ། ཁྱོད་ཀྱི་བརྗོད་ཚུལ་གང་ལ་དཔག་ནའང་ཆད་པ་སྨྲ་བ་ལས་མ་འདས་ཏེ། ཁྱོད་ཀྱིས་༼མི་ཕམ་གྱིས་༽དེ་བས་ན་ཆོས་ཐམས་ཅད་ཡེ་ནས་དེ་བཞིན་ཉིད་བརྗོད་པ་ཐམས་ཅད་དང་བྲལ་བའི་ངོ་བོར་གཉིས་སུ་མེད་པར་གནས་སུ་ཟིན་ཀྱང་འཁྲུལ་བའི་དབང་གིས་དེ་ལྟར་མ་རྟོགས་པ་ལམ་གོམས་སྟོབས་ཀྱིས་བསལ་ནས་ཞེས་སྨྲས་འདུག་ན། ཆོས་ཐམས་ཅད་ཡེ་ནས་དེ་བཞིན་ཉིད་བརྗོད་པ་ཐམས་ཅད་དང་བྲལ་བ་ནི་ཡེ་ནས་མེད་པའི་དོན་དུ་སོང་། ཆོས་ཐམས་ཅད་ཡེ་ནས་མེད་པ་ལ་མེད་པ་ངོ་མ་ཤེས་ནས་འཁྲུལ་བར་སོང་བ་ལ་ལམ་གོམས་སྟོབས་ཀྱིས་ཇི་ལྟ་བ་དང་ཇི་སྙེད་པའི་ཆོས་ཐམས་ཅད་ནམ་མཁའ་ལ་འཇའ་ཡལ་བ་ལྟར་ཇེ་མེད་ཇེ་མེད་དུ་བཏང་ནས་སྟོང་ཉིད་མངོན་སུམ་དུ་རྟོགས་པའི་ཚེ་བསམ་བྱའི་ཆོས་མེད། བསམ་པའི་ཤེས་རབ་མེད་པར་འགྱུར་དགོས་པས་འཕགས་པའི་གོ་འཕངས་ཐོབ་པ་དང་འཕགས་པ་རྒྱུན་ཆད། དེའི་རྒྱུད་ཀྱི་རྟོགས་པའི་ཡོན་ཏན་ཀྱང་རྒྱུན་ཆད་སོང་བས་འཕགས་པའི་དགེ་འདུན་ངོས་བཟུང་དུ་མེད་ལ། དེ་མེད་ན་འཕགས་པ་སློབ་པ་ལས་བྱུང་བའི་མི་སློབ་པའང་མི་སྲིད་པས་སངས་རྒྱས་དཀོན་མཆོག་ཀྱང་མེད། དེ་མེད་ན་སངས་རྒྱས་དེ་ཐོབ་བྱེད་ཀྱི་ཆོས་ཀྱང་མེད་པའི་སྔ་རབས་པ་རྣམས་ཀྱི་སྐྱབས་གནས་དཀོན་མཆོག་ཀྱང་རི་བོང་རྭ་དང་ནམ་མཁའི་མེ་ཏོག་གི་སྤུན་ཟླར་གྱུར་པ་ལགས་སོ།། ཁྱོད་ཀྱིས་འདི་ནས་ངོ་བོར་གཉིས་སུ་མེད་པར་གནས་ཟེར་བ་དང་། འོག་ནས་རིམ་ལྔའི་ལུང་དྲངས་ནས་སྣང་སྟོང་ཟུང་དུ་འཇུག་དགོས་ཞེས་བཤད་པའང་ཆེས་བཞད་གད་ཀྱི་གནས་ཏེ། ཆོས་ཐམས་ཅད་ཡེ་ནས་མེད་པ་ལ་ཟུང་དུ་འཇུག་རྒྱུ་ཅི་ཞིག་ཡོད་དེ། གལ་ཏེ་ཡོད་ན་རི་བོང་རྭ་དང་ནམ་མཁའི་མེ་ཏོག་གཉིས་ཀྱང་ཟུང་དུ་འཇུག་པར་གྱིས་ཤིག། ཡང་ཁྱོད་ཀྱིས་༼མི་ཕམ་གྱིས་༽བློའི་སྤྱོད་ཡུལ་ཡིན་མིན་དཔྱད་པ་སོགས་ཀྱི་སྐབས་སུ་རྣམ་གྲངས་མིན་པ་ལ་བརྗོད་ཀྱི་རྣམ་གྲངས་པའི་དོན་དམ་ལ་བརྗོད་པའི་དོན་མེད་དེ། རྣམ་གྲངས་པའི་དོན་དམ་ནི་ལས་དང་པོ་པས་སྟོང་ཉིད་ལ་རིམ་གྱིས་འཇུག་པའི་སྐབས་སུ་རྟོག་ངོར་བྱས་པ་ཙམ་ལས་འཕགས་པའི་མཉམ་བཞག་ཡེ་ཤེས་རྟོག་བྲལ་ལྟ་བུ་གཉིས་སྣང་ནུབ་པའི་བློ་ལ་ཁོ་འདྲ་བ་རྒྱུ་བའི་ས་ག་ལ་ཡོད་དེ། འཁོར་ལོ་སྒྱུར་བའི་ཁྲི་ལ་མུ་ཏོ་བ་འདུག་པའི་དབང་མེད་པ་བཞིན་ནོ།། ཞེས་སྨྲས་འདུག་པ། དོན་དམ་བློའི་སྤྱོད་ཡུལ་ཡིན་མིན་དཔྱད་པའི་སྐབས་སུ་རྣམ་གྲངས་མིན་པའི་དོན་ལ་བརྗོད་ནས་དེ་བློས་ཡུལ་མིན་པར་སྟོན་པ་ཡིན་ན། འོ་ན་ཞི་བ་ལྷས་ཀྱང་། དོན་དམ་བློ་ཡིས་སྤྱོད་ཡུལ་མིན།། གསུངས་པ་ལས། དོན་དམ་གཏན་ནས་མེད་པ་ཡིན་ཞེས་གསུངས་ན་དེའི་གོ་བདེ་བར་འགྱུར་ཏེ། ཁྱོད་ཅག་འདོད་པ་ལྟར་དངོས་སུ་བརྗོད་པར་མཛད་པའི་ཕྱིར། དེས་ན་ཁྱོད་ཅག་གི་རྣམ་གྲངས་པ་དང་རྣམ་གྲངས་མ་ཡིན་པའི་དོན་དམ་ཞེས་ཆ་གཉིས་སུ་ཕྱེ་བ་ལ་དགོས་པ་ཅི་ཞིག་ཡོད་དེ། དེ་གཉིས་ཀ་མེད་པ་ཡིན་པའི་ཕྱིར། མ་གྲུབ་ན། རྣམ་གྲངས་པའི་དོན་དམ་ནི་རེ་ཞིག་བློ་འཁྲུལ་བའི་ངོ་ཙམ་ལས་དོན་དུ་མེད་པའི་མེད་པ་ཡིན། རྣམ་གྲངས་མ་ཡིན་པའི་དོན་དམ་ནི་སྨྲ་བསམ་བརྗོད་མེད་ཡིན་པའི་རྒྱུ་མཚན་གྱིས་མེད་པར་སོང་བའི་ཕྱིར། རྟགས་ཁྱབ་རང་གི་ཁས་ལེན་གྱི་སྟེང་དུ་སོང་བ་ཤེས་པར་གྱིས་ཤིག། རྣམ་གྲངས་མིན་པའི་དོན་དམ་འཕགས་པའི་མཉམ་བཞག་ཡེ་ཤེས་རྟོག་བྲལ་གྱི་བློའི་གོ་ས་ལ་རྒྱུ་བ་མེད་གསུངས་པ་ཁྱོད་ཐུགས་ལོས་བདེན་ཏེ། མཉམ་བཞག་ཡེ་ཤེས་རྟོག་བྲལ་གྱི་གོ་ས་ལ་རྣམ་གྲངས་པའི་དོན་དམ་དང་དེ་ཡུལ་དུ་བྱེད་པའི་བློ་རྒྱུ་བའི་གོ་སྐབས་ཕར་ཞོག་མཉམ་བཞག་ཡེ་ཤེས་ཁོ་རང་ཡང་རྒྱུ་བའི་གོ་སྐབས་མི་རྙེད་དེ། ཁྱོད་གཏན་མེད་ཡིན་པའི་ཕྱིར། འཁོར་ལོ་སྒྱུར་བའི་ཁྲི་ལ་མུ་ཏོ་བ་སྡོད་པའི་གོ་སྐབས་རྙེད་པ་ཕར་ཞོག་འཁོར་ལོའི་སྒྱུར་བའི་ཁྲི་ཡང་མེད། འཁོར་ལོ་སྒྱུར་བ་ཁོ་རང་ཡང་མེད་པ་ཡིན་ན་མེད་པའི་གོ་ས་ལ་འདུག་ནུས་པ་སུ་ཞིག་ཡོད། ནམ་མཁའི་མེ་ཏོག་གི་གདན་ལ་ཁྱོད་མི་ཕམ་བཞུགས་ནུས་སམ། ནུས་ན་ངས་བསྟོད་པ་འདི་བྱ་སྟེ། ཆོས་ཀུན་གཏན་མེད་ནམ་མཁའི་པད་གདན་ལ།། མོ་བཤམས་བུ་གཅིག་འཇམ་དབྱངས་རྣམ་རྒྱལ་བཞུགས།། རི་བོང་རྭ་ཡི་ཆབ་རིལ་ཕྱག་མཚན་དུ།། བཞེས་པ་སྔ་རབས་འགྲེལ་བྱེད་སྤྱི་ལུགས་ཡིན།། ཀྱེ་མ་ཡོད་པའི་རྫས་ལ་ལོངས་སྤྱོད་པ།། ཀུན་གྱི་གཤིས་ཏེ་ཅི་ཡང་མེད་པ་ལ།། དཔྱད་པས་རྣམ་བཞག་ཅི་བདེར་ལོངས་སྤྱོད་པ།། ཁྱོད་ལས་ལྷག་པའི་མིག་འཕྲུལ་མཁན་པོ་སུ།། ཞེས་བྱའོ།། ཡང་ཁྱོད་ཀྱིས། ༼མི་ཕམ་གྱིས་༽གཞན་ཡང་དོན་དམ་དཔྱོད་པའི་རྗེས་དཔག་གམ་དོན་དམ་མངོན་སུམ་དུ་རྟོགས་པའི་ཡེ་ཤེས་ཀྱིས་ཡུལ་གྱི་ངོ་བོ་འདི་ཞེས་རྙེད་པའམ། གཟིགས་སོ་ཞེས་ནན་གྱིས་ཁས་ལེན་ན་དེ་དག་གིས་གཞན་སྟོང་ཇི་ལྟར་བཀག་ཀྱང་རང་གི་ཞེ་ཕུག་གཞན་སྟོང་གིས་དབང་བྱས་པ་མ་ཚོར་བ་ཙམ་དུ་ཟད་དོ།། ཞེས་སྨྲས་འདུག་པ་ལ་ལན་འདི་བྱ་སྟེ། དོན་དམ་མངོན་སུམ་དུ་མཁྱེན་པའི་ཡེ་ཤེས་ཀྱིས་དོན་དམ་གཟིགས་སོ་ཞེས་ཁས་ལེན་ན་གཞན་སྟོང་གིས་དབང་བྱས་པ་མ་ཚོར་བའི་སྐྱོན་ཨེ་ཡོད་མི་ཤེས་ཀྱང་། དོན་དམ་མངོན་སུམ་དུ་མཁྱེན་པའི་ཡེ་ཤེས་ཀྱིས་དོན་དམ་མ་གཟིགས། དོན་དམ་དེའི་ཡུལ་མིན་བྱས་ན་དེའི་སེམས་ལ་རྒྱ་ནག་གི་མཁན་པོ་ཧ་ཤང་གི་ཅི་ཡང་ཡིད་ལ་མ་བྱས་པའི་ཆད་ལྟ་དང་རྒྱངས་འཕེན་པའི་གྲུབ་མཐའ་ངན་པ་དག་གིས་དབང་བྱས་པ་མ་ཚོར་བ་ཙམ་དུ་ཟད་པ་ནི་གསལ་བར་མཐོང་ངོ་།། དོན་དམ་མངོན་སུམ་དུ་གཟིགས་པའི་ཡེ་ཤེས་ཀྱིས་དོན་དམ་གཟིགས་པའམ་ཡུལ་དུ་བྱེད་ཅེས་སྨྲས་པ་ཙམ་ནས་དོན་དམ་བདེན་གྲུབ་ཏུ་འགྱུར་རོ་བསམ་པ་འདི་ཁྱོད་ལ་འདུག་སྟེ། དེ་ནི་ཇི་ཙམ་ནས་བདེན་པ་གྲུབ་པ་ཡིན་དང་ཇི་ཙམ་ནས་བདེན་པར་མ་གྲུབ་པ་ཡིན་གྱི་འཚམས་མ་ཟིན་པ་ཡིན་ཏེ། རྒྱུ་མཚན་འདི་ལ་དགོངས་ནས་རྗེ་བླ་མ་ཙོང་ཁ་པ་ཆེན་པོས་ཡོད་པ་དང་རང་བཞིན་གྱིས་ཡོད་པའི་ཁྱད་པར། མེད་པ་དང་རང་བཞིན་གྱིས་མེད་པའི་ཁྱད་པར་ཕྱེད་དགོས་པ་གསུང་པ་ལྟར་ཡིན་པས། ཡོད་པ་གང་ཡིན་ཐམས་ཅད་རང་བཞིན་གྱིས་ཡོད་པ་དང་དོན་གཅིག་ཏུ་བྱས་ནས་གཞི་བུམ་པ་ལྟ་བུའི་སྟེང་གི་དགག་བྱ་བདེན་གྲུབ་བཀག་པ་དང་བུམ་པ་ཡོད་པ་བཀག་པ་མཉམ་དུ་བྱས་ནས་སྟོང་ཉིད་དངོས་པོ་འཇིག་པའི་འཇིགས་རྒྱུར་མ་བྱས་ན་སྲན་མི་བཏུབ་པ་འདི་ཁྱེད་ཅག་སྔ་རབས་པའི་ལུགས་སྨྲ་བ་དག་གི་བཤིས་ལུགས་ལྟ་བུ་ཡིན་འདུག་གོ། ཡང་བུམ་པ་ཐ་སྙད་དུ་རྣམ་པར་བཞག་པ་དང་རང་ངོས་ནས་གྲུབ་པ་རྣམ་པར་བཞག་པ་མཉམ་དུ་བྱས་ནས་བུམ་པ་འཇོག་ན་རང་ངོས་གྲུབ་པའི་བུམ་པ་ཞིག་ལས་རང་ངོས་ནས་མ་གྲུབ་པའི་བུམ་པ་རྣམ་པ་ཀུན་ཏུ་འཇོག་ས་མི་རྙེད་པ་འདི་བྱུང་བས། ད་འོ་ན་མི་ཕམ་གྱིས་བུམ་པ་ལག་ཏུ་ཐོགས་པའི་ཚེ་རང་ངོས་ནས་གྲུབ་པའི་བུམ་པ་ཞིག་ལག་ཏུ་ཐོགས་པར་སོང་བས། རང་ངོས་ནས་གྲུབ་པ་ལ་རྒྱུ་རྐྱེན་གྱིས་འདུས་མ་བྱས་པའི་རྟག་པ་ལས་མ་འདས་པས། དེའི་ཚེ་རྟག་པར་གྱུར་བའི་བུམ་པའི་ནང་ཆུ་འཆུ་བ་སོགས་བྱེད་དགོས་པས་ཁྱོད་ནི་ངོ་མཚར་ཆེ་བ་ཞིག་སྟེ། དངོས་པོའི་བུམ་པ་ལ་ལོངས་སྤྱོད་པ་ཐམས་ཅད་ཡིན་ཀྱང་། རྟག་པའི་བུམ་པ་ལ་ལོངས་སྤྱོད་པར་མཛད་པ་ཁྱོད་ཉིད་ཁོ་ནའི་ཁྱད་ཆོས་ཡིན་འདུག་པའི་ཕྱིར། ཡང་རྟག་པར་གྱུར་པའི་བུམ་པ་དེ་ཡང་རང་གི་གནས་ལུགས་འཇལ་བའི་དོན་དམ་དཔྱོད་བྱེད་ཀྱི་ཚད་མས་དཔྱད་ཚེ་གཏན་ནས་མེད་པར་བྱེད་པར་འགྱུར་བའི་ཕྱིར། སྔར་ཡོད་ལ་ཕྱིས་མེད་པར་འགྱུར་བའི་རྟག་པ་ཞིག་ཀྱང་ཁས་ལེན་དགོས་པས་བུམ་པ་རྟག་པ་སྔར་ཡོད་མེད་པར་འགྱུར་པ་ཁས་ལེན་པའི་ཁྱད་ཆོས་འདི་ཡང་ཁྱོད་ལས་གཞན་པ་སུ་ལ་ཡོད། དེས་ན་ཁྱོད་ཀྱི་བུམ་པ་དེ་ཡང་ཁྱད་ཆོས་གཉིས་ལྡན་ཞིག་སྟེ། རྟག་པ་ཡིན་པ་དང་། རྟག་པ་ཡིན་ཀྱང་ཕྱིས་མེད་པར་འགྱུར་དུ་རུང་བའི་ཁྱད་ཆོས་གཉིས་དང་ལྡན་པའི་ཕྱིར། འཇིག་རྟེན་འདི་ན་མི་སྲིད་པའི་བུམ་པ་ཞིག་མི་ཕམ་གྱི་ཕྱག་ཏུ་བཞུགས་སོ་ཞེས་ཀུན་གྱིས་མཚར་དུ་བརྩི་བར་ཡང་འགྱུར་རོ།། ངེད་ཅག་བུམ་པའི་གནས་ལུགས་ལ་དོན་དམ་དཔྱོད་བྱེད་ཀྱི་ཚད་མས་དཔྱད་པའི་ཚེ་བུམ་པ་རང་ངོས་ནས་གྲུབ་པ་རྡུལ་ཙམ་ཡང་མི་རྙེད་ཀྱང་བུམ་པ་གཏན་ནས་མེད་པར་སོང་མི་དགོས། བུམ་པ་ཀུན་རྫོབ་པའི་སྡོད་ལུགས་ལ་དཔྱད་པའི་ཐ་སྙད་ཚད་མས་བུམ་པ་རྙེད་ཀྱང་བུམ་པ་རང་ངོས་ནས་གྲུབ་པ་རྙེད་མི་དགོས་པའི་ཕྱིར། རྟག་པར་གྱུར་བའི་བུམ་པ་ཁས་ལེན་དགོས་པ་སོགས་ཀྱི་སྐྱོན་གཏན་ནས་མེད་དོ།། ངེད་ཅག་དོན་དམ་དཔྱོད་བྱེད་ཀྱི་རིགས་པ་ཡང་དག་པས་དཔྱད་ནས་ཆོས་ཐམས་ཅད་རང་ངོས་ནས་གྲུབ་པ་རྡུལ་ཙམ་ཡང་མ་རྙེད་པའི་རིགས་པ་དེས་ཐ་སྙད་དུའང་ཆོས་ཐམས་ཅད་རང་ངོས་ནས་གྲུབ་པ་མི་རྙེད་པའི་ཕྱིར། ཐ་སྙད་དུའང་རང་ངོས་ནས་གྲུབ་པ་མི་སྨྲ་ན། དོན་དམ་པར་རང་ངོས་ནས་གྲུབ་པ་མི་སྨྲ་བ་བཤད་ཅི་དགོས་པས་དོན་དམ་བདེན་གྲུབ་ཏུ་སྨྲ་བའི་གཞན་སྟོང་གི་དབང་དུ་བྱ་བའི་གོ་སྐབས་ག་ལ་ཡོད། འཇུག་པ་ལས། བདག་དང་གཞན་ལས་སྐྱེ་བ་རིགས་མིན་པའི།། རིགས་དེས་ཐ་སྙད་དུའང་རིགས་མིན་ན།། ཞེས་ཇི་སྐད་གསུང་བའི་དགོངས་པ་འཁྲུལ་མེད་དུ་འཆད་པ་ལ། བུམ་པ་ཐ་སྙད་དུ་ཡོད། ཡོད་པས་མི་ཚད་རང་ངོས་ནས་གྲུབ་ཅེས་ཐ་སྙད་འཇོག་འཚམས་ལ་རྨོངས་པས། བུམ་པ་རྟག་པར་ཁས་ལེན་དགོས་པར་ཐལ་བའི་ཐལ་བ་ལྡོག་ཏུ་མེད་པ་དང་། བུམ་པ་དོན་དམ་པར་མེད་དེ་མེད་པས་གཏན་མེད་ཡིན་ཞེས་དོན་དམ་འཇོག་འཚམས་ལ་རྨོངས་པས། ཆོས་ཐམས་ཅད་གཏན་ནས་མེད་ཅེས་སྐུར་འདེབས་མ་རུང་བ་ཆེན་པོ་བྱེད་དགོས་པ་དེ་ལྟ་བུའི་སྐྱོན་ངེད་ཅག་ལ་རྣམ་པ་ཀུན་ཏུ་མི་སྲིད་དེ། རྩ་ཤེས་ལས། ང་ལ་ཁས་ལེན་མེད་པས་ན།། ང་ནི་སྐྱོན་མེད་ཁོ་ན་ཡིན།། ཞེས་རང་ལ་རང་ངོས་ནས་གྲུབ་པ་ཁས་ལེན་མེད་པས་རྟག་ཆད་ཀྱི་སྐྱོན་མེད་པ་ཁོ་ན་ཡིན་པའི་ཕྱིར་རོ།། ཡང་ངེད་ཅག་དོན་དམ་བདེན་པ་ཤེས་བྱ་ཡིན། ཤེས་པ་གང་གིས་ཤེས་བྱ་ཡིན་ན་དེ་ཁོ་ན་གཟིགས་པའི་འཕགས་པའི་མཉམ་བཞག་ཡེ་ཤེས་ཀྱིས་ཤེས་བྱ་ཡིན། ཚུལ་ཇི་ལྟར་མཐོང་ན། ཁྱོད་ཀྱིས་ངེད་ལ་ཚུར་དྲངས་པའི་ལུང། བྱང་ཆུབ་ཀྱི་ཕྱོགས་བསྟན་པ་ཞེས་པའི་མདོ་ལས། འཇམ་དཔལ་སུས་ཆོས་ཐམས་ཅད་མི་མཉམ་པ་མེད་ལ་གཉིས་སུ་མེད་ཅིང་གཉིས་སུ་དབྱེར་མེད་པར་མཐོང་བ་འདི་ནི་ཡང་དག་པའི་ལྟ་བའམ་ཞེས་གསུང་པ་ལྟར་བདེན་སྣང་གི་སྤྲོས་པ་ཕྲ་མོས་ཀྱང་མ་ཆོད་པ། གཉིས་སུ་མེད་པ། ཡུལ་དང་ཡུལ་ཅན་ཆུ་ལ་ཆུ་བཞག་པའི་ཚུལ་དུ་གཉིས་སུ་དབྱེར་མེད་པར་མཐོང་བ་ཡིན་ཞེས་གསུངས་པས་ན། གང་མཐོང་རྒྱུའི་ཆོས་ཞིག་མེད་ན་མཐོང་བ་ཡིན་ཞེས་ཅི་སྟེ་བརྗོད། མཐོང་བ་ཡོད་ན་ཡང་སྤྲོས་པ་ཅན་ཞིག་མཐོང་བས་ཁྱབ་མི་དགོས་པའི་ཕྱིར། མདོ་ལས་སྟོང་པ་ཉིད་རབ་ཏུ་གཟིགས་རབ་ཏུ་མཁྱེན་ཞེས་པའི་མཁྱེན་ཚུལ་དེ་ལྟར་ཡིན་པ་ནི་ངེད་ཅག་མགྲིན་པ་གཟེངས་བཏེགས་ནས་སྨྲ་བའི་སྤོབས་པ་འདི་ཐོབ་བོ།། སྤྱིར་དོན་དམ་གཟིགས་པའི་འཕགས་པའི་མཉམ་བཞག་ཡེ་ཤེས་དང་། དོན་དམ་པ་གཉིས་ཐ་དད་དུ་ཡོད། འཕགས་པའི་སྟོང་ཉིད་མངོན་སུམ་དུ་རྟོགས་པའི་མཉམ་བཞག་ཡེ་ཤེས་ཀྱི་ངོར་དེ་གཉིས་ཐ་དད་དུ་མེད་དོ།། དེ་ནི་དཔེ་ཡིས་ཀྱང་གསལ་ཏེ། མཉམ་བཞག་ཡེ་ཤེས་ཀྱིས་གཟིགས་ངོར་ཆུ་ལ་ཆུ་བཞག་པ་ལྟར་ཡིན་གསུངས་པས་ཆུ་ལ་ཆུ་བཞག་ན་ཆུ་སྔོན་མ་ནང་ཆུ་རྗེས་མ་བླུག་པས་དེ་གཉིས་འདྲེས་ནས་དབྱེར་མེད་པའི་ཚུལ་དུ་གནས་པ་དང་། འཕགས་པའི་ཡེ་ཤེས་ཀྱིས་གཟིགས་ངོར་ཡུལ་ཡུལ་ཅན་ཐ་དད་མེད་པ་མཚུངས། དོན་དུ་ཆུ་ལ་ཆུ་བཟག་ནས་ཆུ་སྔ་ཕྱི་བསྲེས་པས་དབྱེར་མི་ཕྱེད་པ་ལྟ་བུར་སྣང་ཡང་། དོན་ལ་དེ་གཉིས་ཐ་མི་དད་དུ་མི་འགྱུར་ཏེ། དེ་གྱུར་ན་ཆུ་སྔ་ཕྱི་གཉིས་ཀྱི་རྡུལ་གཅིག་ཏུ་གྱུར་དགོས་ལ། དེ་གྱུར་ན་ཆུ་ཕྱི་མ་བླུག་པས་སྔ་མ་ལས་མང་དུའང་མི་འགྲོ་བར་ཐལ། དེ་གཉིས་རྡུལ་གཅིག་ཏུ་སོང་བའི་ཕྱིར། དཔེ་དེ་བཞིན་དུ་དོན་དམ་པར་མཉམ་པར་བཞག་པའི་ཡེ་ཤེས་དང་དེའི་ཡུལ་སྟོང་པ་ཉིད་གཉིས་གཟིགས་ངོར་ཐ་མི་དད་པ་ལྟ་བུར་གྱུར་ཀྱང་། དོན་ལ་ཐ་དད་དགོས་ཏེ། དེ་མ་དད་ན་འཕགས་པའི་མཉམ་བཞག་ཡེ་ཤེས་མ་ཐོབ་གོང་ཡུལ་ཅན་ཤེས་པ་ཞིག་དང་། ཡུལ་འདུས་མ་བྱས་སྟོང་པ་ཉིད་གཉིས་སུ་གནས་པ་ལ། མཉམ་པར་བཞག་པ་དང་དེ་གཉིས་གཅིག་ཏུ་སོང་བ་ཡིན་ན། ཡུལ་ཅན་ཤེས་པ་དངོས་པོ་དེ་ཡུལ་སྟོང་པ་ཉིད་རྟག་པ་ལ་ཐིམ་ནས་རྟག་དངོས་གཉིས་གཅིག་ཏུ་སོང་བར་གྱུར་ན་དེ་ལས་བཞད་གད་ཆེ་བ་ཅི་ཞིག་ཡོད། ཡང་ན་མཉམ་པར་མ་བཞག་གོང་ཤེས་པ་ཡོད་ལ་མཉམ་པར་བཞག་པ་དང་རིགས་པ་རྒྱུན་ཆད་པ་རྒྱང་འཕེན་པའི་གྲུབ་མཐའ་བཞིན་འདོད་དགོས་ན་དེ་བས་ངོ་ཚ་བའི་ཁས་ལེན་ཅི་ཞིག་ཡོད། དེས་ན་འཕགས་པའི་མཉམ་བཞག་ཡེ་ཤེས་ཀྱི་གཟིགས་ངོར་དོན་དམ་མ་གཟིགས་པ་དེ་བདེན་སྣང་གི་སྤྲོས་པ་དང་གཉིས་སྣང་གི་སྤྲོས་པ་གཉིས་ཀ་དང་བྲལ་བའི་དོན་ཡིན་པས། སྤྱིར་དོན་དམ་ཤེས་བྱར་བྱས་ནས་ཤེས་པའམ་མཐོང་བ་ཡོད་ན་སྤྲོས་པ་ཅན་དུ་འགྱུར་རོ་སྙམ་དུ་རི་བོང་གནམ་རྡིབ་ཀྱི་དོགས་པ་དེ་འདྲ་ག་ལ་དགོས། ཁྱོད་ཅག་དོན་དམ་དུ་སྤྲོས་པ་དང་བྲལ་བར་བྱེད་འདོད་ཀྱང་བྱེད་མ་ཤེས་པས་མ་རྟོགས་པའི་ཚེ་དོན་དམ་མེད། རྟོགས་པའི་ཚེ་དོན་དམ་དང་བློ་གཉིས་ཀ་མེད་ཅེས་ཧ་ཀྱང་ཐལ་ཆེས་པའི་གཏམ་དེ་འདྲ་སྨྲས་ནས་དོན་དམ་སྤྲོས་བྲལ་བྱེད་འདོད་ཀྱང་། དེས་དོན་དམ་སྤྲོས་བྲལ་བྱས་པ་མ་ཡིན་གྱི། དོན་དམ་མེད་པར་བྱས་ཡིན་པའི་ཕྱིར། སྤྲོས་པ་དང་བྲལ་ཞེས་པ་དེ་ཡོད་པའི་དོན་ཡིན་གྱི་མེད་པའི་དོན་མ་ཡིན་པའི་ཕྱིར། དེ་ཅི་སྟེ་མེད་པའི་དོན་མ་ཡིན་ན། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན།། ཞེས་ཀྱང་བརྗོད་མི་རིགས་ཏེ། ཤེས་རབ་ཀྱི་ཕ་རོལ་ཏུ་ཕྱིན་རྒྱུ་ཅི་ཡང་མི་འདུག་པའི་ཕྱིར། ཤེས་རབ་ཀྱི་ཕ་རོལ་ཏུ་ཕྱིན་པ་སྤྲོས་བྲལ་གང་ཞིག་དེ་མེད་པ་ཡིན་པའི་ཕྱིར། མ་སྐྱེས་མ་འགག་ནམ་མཁའི་ངོ་བོ་ཉིད།། ཅེས་པའང་མི་འཐད་པར་ཐལ། ནམ་མཁའི་ངོ་བོར་གྱུར་པ་རི་བོང་རྭའི་ངོ་བོར་སོང་འདུག་པའི་ཕྱིར་ཏེ། རྟགས་སྔར་བཞིན་ཡིན་པའི་ཕྱིར། སོ་སོ་རང་རིག་ཡེ་ཤེས་སྤྱོད་ཡུལ་བ།། ཞེས་པའང་མི་འཐད་པར་ཐལ། ཡེ་ཤེས་ཀྱིས་སྤྱོད་ཡུལ་མ་ཡིན་པའི་ཕྱིར་ཏེ། བློའི་ཡུལ་མ་ཡིན་པའི་ཕྱིར་ཏེ་རྟགས་སྔར་བཞིན་ཡིན་པའི་ཕྱིར་རོ།། དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ།། ཞེས་པའང་མི་འཐད་པར་ཐལ། དུས་གསུམ་རྒྱལ་བའི་ཡུམ་བློའི་ཡུལ་དུ་བྱར་མི་རུང་བ་ཡིན་པའི་ཕྱིར། ད་ཕྱག་ཀྱང་ཅི་ལ་འཚལ་དགོས་པར་སོམས་ཤིག། འདི་རིགས་ཀྱི་དགག་བཞག་ལ་ཟད་པའི་མཐའ་མི་མངོན་ཀྱང་རེ་ཞིག་དེ་ཙམ་བྱས་ནས། ད་ནི་སྙིང་པོ་ཅུང་ཟད་བསྡུས་ནས་བཤད་ན། ཁྱོད་ཀྱི་ཞེ་འདོད་དངོས་མ་འདི་ལ་ཐུག་འདུག་སྟེ། ༼མི་ཕམ་གྱིས་༽དེ་ལྟར་མིན་པར་ཉི་སྣང་ནུབ་པའི་བློ་རང་ངོར་ཡང་ཡུལ་དང་བློའི་རྣམ་པ་ཡོད་པར་འདོད་ན་གཉིས་སྣང་མེད་པ་ཡང་ཇི་ལྟར་འགྱུར། དོན་ལ་གཉིས་སུ་ཡོད་ཀྱང་གཉིས་སུ་མི་སྣང་བ་ཙམ་ཡིན་ན་ནི་དོན་གྱི་གནས་ཚུལ་ཇི་ལྟ་བ་བཞིན་རྟོགས་པའི་བློར་མི་འགྱུར་ཏེ། གནས་སྣང་མི་མཐུན་པའི་ཕྱིར་རོ།། ཞེས་སྨྲས་འདུག་པ་འདིའི་དོན་ལ་གཉིས་སུ་ཡོད་ཀྱང་ཞེས་པའི་གཉིས་སུ་ཡོད་མེད་འདི་གང་ལ་བྱེད། བདེན་སྣང་གི་གཉིས་སུ་ཡོད་མེད་ཡིན་ནམ། གཉིས་སྣང་གི་གཉིས་སུ་ཡོད་མེད་ཡིན་ནམ། གཅིག་དང་ཐ་དད་ཀྱི་གཉིས་སྣང་ཡོད་མེད་གང་ལ་བྱེད། དང་པོ་གཉིས་ནི་དོན་ལ་ཡོད་པ་ངེད་ཀྱང་མི་འདོད། ཕྱི་མ་ལྟར་གྱི་གཅིག་དང་ཐ་དད་གཉིས་སུ་ཡོད་པ་ལས་ནི། ཐ་དད་དུ་གཉིས་སུ་ཡོད་པ་ཡིན་པར་འདོད། དེ་ཙམ་གྱིས་དོན་དམ་པར་གཉིས་སུ་ཡོད་མེད་ཅེས་པའི་གཉིས་སུ་ཡོད་པའི་གྲངས་སུ་མི་འགྲོ་སྟེ། དེ་འགྲོ་ན་ཐ་དད་དུ་གནས་པའི་ཆོས་ཐམས་ཅད་གཏན་མེད་དུ་ཐལ། དེ་ལྟ་བུའི་གཉིས་སྣང་གི་སྤྲོས་པ་མི་སྲིད་པའི་ཕྱིར། དེ་ལྟ་བུའི་འཕགས་པ་ལ་ཡུལ་ཡུལ་ཅན་ཐ་དད་དུ་མི་སྣང་བ་དེ་ཡུལ་ཡུལ་ཅན་ཐ་དད་དུ་དོན་ལ་མེད་ནས་མི་སྣང་བ་མ་ཡིན་གྱི། ཡུལ་དང་ཡུན་ཅན་ཐ་དད་པ་ཐ་སྙད་པའི་གནས་ཚུལ་ཡིན་པའི་ཕྱིར། མཉམ་བཞག་དེའི་ངོར་ཐ་སྙད་པའི་གནས་ཚུལ་སྣང་བ་མེད་དེ། དེ་ཡོད་ན། བདེན་གཉིས་གཅིག་ཆར་དུ་འཇལ་བའི་སེམས་ཅན་གྱི་རྒྱུད་ཀྱི་མཉམ་བཞག་ཡེ་ཤེས་བཞག་དགོས་ན་དེ་མི་འཐད་པའི་ཕྱིར། མཁྱེན་པའི་སྐད་ཅིག་གཅིག་གིས་བདེན་པ་གཉིས་ཀ་གཞལ་བ་སངས་རྒྱས་འཕགས་པ་ཁོ་ནའི་ཁྱད་ཆོས་ཡིན་པའི་ཕྱིར། དེ་ལ་མི་སྣང་བ་ཙམ་གྱིས་དེ་དོན་ལ་མེད་དགོས་ན། ཐ་སྙད་ཀྱི་ཆོས་ཐམས་ཅད་མེད་པར་ཐལ་བའི་ཐལ་བ་ལྡོག་ཏུ་མེད་པའི་ཕྱིར། དེ་ལྟར་ན་དོན་གྱི་གནས་ཚུལ་ཇི་ལྟ་བ་བཞིན་རྟོགས་པའི་བློར་མི་འགྱུར་བའི་སྐྱོན་མེད་དོ།། དོན་གྱི་གནས་ཚུལ་ཇི་ལྟ་བ་བཞིན་ཞེས་པ་དེ་ཐ་སྙད་པའི་ཆོས་རྣམས་ཀྱི་གནས་ཚུལ་འདི་ཙམ་ལ་མི་ཟེར་གྱི་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་སྤྲོས་པའི་མཐའ་ཐམས་ཅད་དང་བྲལ་བ་དེ་ལ་བྱེད་པའི་ཕྱིར། དེ་ཡུལ་དུ་བྱེད་པ་དེ་ཆོས་ཐམས་ཅད་ཀྱི་དོན་གྱི་གནས་ཚུལ་ཇི་ལྟ་བ་བཞིན་ཡུལ་དུ་བྱེད་པ་ཡིན་པའི་ཕྱིར། དེ་ལ་གནས་སྣང་མི་མཐུན་པའི་སྐྱོན་ག་ལ་ཡོད་དེ། དེ་ལྟ་བུའི་འཕགས་པའི་མཉམ་བཞག་ཡེ་ཤེས་ལ་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་དུ་གནས་པ་ལྟར་སྣང་བ་ཡིན་པའི་ཕྱིར། དོན་ལ་ཐ་སྙད་པའི་ཆོས་དང་དོན་དམ་པའི་ཆོས་གཉིས་སུ་མི་གནས་པའི་སྐྱོན་ཡང་མེད་དེ། སྤྱིར་ཤེས་བྱ་ལ་བདེན་པ་གཉིས་སུ་གནས། ཤེས་བྱ་ཐམས་ཅད་ཀྱི་དོན་གྱི་ཡིན་ལུགས་མཐར་ཐུག་པ་དེ་བཞིན་ཉིད་དུ་གནས་པའི་ཕྱིར། དེ་ལྟར་ཆོས་རྣམས་ཀྱི་གནས་ལུགས་དེ་བཞིན་ཉིད་དུ་གནས་ན་ཐ་སྙད་པའི་སྡོད་ལུགས་ཟུར་པ་ཞིག་མི་འཐད་དེ། གནས་ལུགས་ལ་གཅིག་ལས་གཉིས་སུ་མི་སྲིད་པའི་ཕྱིར་བསམ་པ་ནི་རྒྱ་ཤིན་ཏུ་ཆུང་བ་སྟེ། ཆོས་ཐམས་ཅད་ཀྱི་གནས་ལུགས་མཐར་ཐུག་པ་ལ་དེ་བཞིན་ཉིད་ལས་མེད་ཀྱང་། ཀུན་རྫོབ་པའི་གནས་ཚུལ་མིང་རྐྱང་བཏགས་ཡོད་ཙམ་ཞིག་དོན་ལ་ཡོད་པར་འདོད་དགོས་པའི་ཕྱིར་ཏེ། དེ་མ་འདོད་ན་ཆོས་དང་ཆོས་ཉིད་གཉིས་དབྱེར་མེད་པ་ཐམས་ཅད་ཆོས་འབའ་ཞིག་ཏུ་གྱུར་ལ། དེ་གྱུར་ན་མི་ཕམ་གྱིས་ཇ་འཐུང་བའི་ཚེ་ཡང་སྟོང་ཉིད་འཐུང་། ཟན་ཟ་བའི་ཚེ་སྟོང་ཉིད་ཟ། གོས་གྱོན་པའི་ཚེ་སྟོང་ཉིད་གྱོན་པ་སོགས་སུ་འགྱུར་བས་ཧ་ཀྱང་ཉམས་མཚར་བའི་ཕྱིར། ཆོས་གང་ལའང་ཐ་སྙད་པའི་གནས་ཚུལ་དང་། དོན་དམ་པའི་གནས་ ཚུལ་ཏེ་གཉིས་གཉིས་ཡོད་པའི་རྒྱུ་མཚན་གྱིས་བདེན་པ་གཉིས་སུ་ཕྱེ་བ་འདི་བྱུང་གི། དེ་ལྟར་གཉིས་གཉིས་སུ་ཕྱེ་བ་མེད་ན་བདེན་པ་གཉིས་སུ་དབྱེ་བ་ཅི་སྟེ་འབྱུང། དེ་ལྟར་གཉིས་སུ་ཕྱེས་པས་གནས་སྣང་མི་མཐུན་པའི་རྫུན་པ་སླུ་བའི་ཆོས་ཅན་ལ་ཀུན་རྫོབ་པའི་གནས་ཚུལ་དང་། གནས་སྣང་མི་མཐུན་པར་མེད་པའི་དེ་བཞིན་ཉིད་ལ་དོན་དམ་པའི་གནས་ལུགས་ཞེས་བརྗོད་པ་ཡིན་པའི་ཕྱིར། སྤྱིར་བདེན་པ་གཉིས་སུ་ཡོད་ཀྱང་། དེ་གཉིས་སུ་ཡོད་པ་འཕགས་པའི་མཉམ་བཞག་ཡེ་ཤེས་ལ་མ་སྣང་ཙམ་གྱིས་དོན་གྱི་གནས་ཚུལ་ཇི་ལྟ་བ་བཞིན་རྟོགས་པའི་བློར་མི་འགྱུར་བའི་སྐྱོན་ག་ལ་ཡོད་དེ། དེ་ལྟར་གཉིས་སུ་མ་སྣང་ཡང་བློ་དེ་ལ་སྣང་ཚུལ་དང་ཆོས་རྣམས་ཀྱི་གནས་ཚུལ་མཐུན་པའི་ཕྱིར། དེ་ཡིན་ཏེ། ཆོས་ཐམས་ཅད་ཀྱི་གནས་ལུགས་མཐར་ཐུག་པ་དེ་བཞིན་ཉིད་དུ་གནས་པ་གང་ཞིག། དེ་ལ་དེ་ལྟར་སྣང་ཡང་སྣང་བའི་ཕྱིར། དེ་ལ་དེ་ལྟར་གཉིས་སུ་མ་སྣང་བ་དེ་ཤེས་བྱ་ལ་གཉིས་སུ་དབྱེར་མེད་ནས་མ་སྣང་བ་མ་ཡིན་གྱི། ཀུན་རྫོབ་པའི་སྡོད་ལུགས་དེའི་ཡུལ་དུ་མ་གྱུར་བའི་དབང་གིས་ཡིན་པའི་ཕྱིར། དཔེར་ན་བུམ་འཛིན་རྟོག་པའི་ཡུལ་དུ་ཀ་བ་མེད་ཀྱང་། དེ་ཀ་བ་མེད་ནས་བུམ་འཛིན་རྟོག་པའི་ཡུལ་དུ་མ་གྱུར་པ་མ་ཡིན་གྱི། ཀ་བ་བུམ་འཛིན་གྱི་ཡུལ་མ་ཡིན་པའི་དབང་གིས་མ་སྣང་བ་བཞིན་ཡིན་པའི་ ཕྱིར། ཁྱོད་ཅག་གི་ཞེ་ཕུག་ཏུ་ཐ་སྙད་དུ་ཡོད་ན་རང་ངོས་ནས་གྲུབ་པ་ཡོད་དགོས་བསམ་པ་འདིས་སྐྱོན་བྱས་པ་ཡིན་ཏེ། ཐ་སྙད་དུ་ཡོད་པ་ཡིན་ན་དེ་དེ་བས་ཀྱང་རང་ངོས་ནས་མ་གྲུབ་པའི་རྟགས་ཁྱད་པར་ཅན་ཡིན་པའི་ཕྱིར་ཏེ། རང་ངོས་ནས་ཡོད་ན་ཐ་སྙད་དུ་ཡོད་དུ་མི་རུང་བའི་ཕྱིར། དེ་ཆོས་ཅན། དེར་ཐལ། ཐ་སྙད་དུ་ཡོད་པ་ཡིན་ན་རྟེན་འབྲེལ་ཡིན་དགོས། རྟེན་འབྲེལ་ཡིན་ན་རྒྱུ་རྐྱེན་ལས་བྱུང་དགོས། རྒྱུ་རྐྱེན་ལས་བྱུང་ན་རང་ངོས་ནས་གྲུབ་པར་མི་རུང་བའི་ཕྱིར། འདིའི་རྣམ་བཞག་གོང་དུ་མང་དུ་སྨྲས་ཟིན་པ་ལྟར་ཡིན་ལ། ཁྱོད་ཅག་དོན་དམ་རྟོགས་པའི་བློ་ངོར་གཉིས་སུ་མ་སྣང་བ་ཡུལ་ཡུལ་ཅན་རྣམ་པ་ཀུན་ཏུ་ཐ་དད་དུ་མེད་པར་བྱེད་འདུག་པ་འདིས་རྣམ་བཞག་ཐམས་ཅད་འཁྲུགས་པར་བྱས་འདུག་སྟེ། དོན་དམ་མངོན་སུམ་དུ་རྟོགས་པའི་བློ་ངོར་ཡུལ་དང་ཡུལ་ཅན་གཉིས་སུ་མེད་པ་དང་། སྤྱིར་དོན་དམ་པ་ཡུལ་དང་དེ་རྟོགས་པའི་ཤེས་རབ་ཡུལ་ཅན་དུ་བྱས་པ་གཉིས་གཏན་ནས་མི་འདྲ་བའི་ཕྱིར་ཏེ། སྔ་མར་དོན་དམ་མངོན་སུམ་དུ་རྟོགས་པའི་ཡེ་ཤེས་ཀྱིས་ཡུལ་ཇི་ལྟར་འཆར་བའི་ཚུལ་ཡིན་ལ། ཕྱི་མ་ནི་སྤྱིར་ཤེས་བྱ་ལ་བདེན་པ་གཉིས་སུ་དབྱེ་བའི་ཚུལ་ཡིན་པས་གཏན་ནས་མི་འདྲ་སྟེ། དཔེར་ན་བུམ་འཛིན་རྟོག་པས་བུམ་པ་ལས་གཞན་ཀ་བ་མ་རྟོགས་པས་བུམ་འཛིན་གྱི་ངོར་བ་མེད་ཀྱང་། སྤྱིར་ཀ་བ་དང་བུམ་པ་གཉིས་སུ་དབྱེར་ཡོད་པ་ལྟ་བུ་ཡིན་པའི་ཕྱིར། དེས་ན་སྤྱོད་འཇུག་གི་གཞུང་ཚིག། དོན་དམ་བློ་ཡི་སྤྱོད་ཡུལ་མིན།། བློ་ནི་ཀུན་རྫོབ་ཡིན་པར་འདོད།། ཅེས་པའང་ཚིག་རྐང་སྔ་མས་གཉིས་སྣང་གི་བློས་སྤྱོད་ཡུལ་དུ་མ་གྱུར་བའི་དོན་དམ་བདེན་པ་འཆད། ཕྱི་མས་ཀུན་རྫོབ་བདེན་པ་བསྟན་པ་སྟེ་སྤྱིར་ཤེས་བྱ་དབྱེ་གཞི་བྱས་ནས་དེ་ལ་བདེན་པ་གཉིས་སུ་གྲངས་ངེས་པ་སྟོན་པ་ཡིན་པའི་ཕྱིར། དེ་ལྟར་མིན་པ་བློ་ཀུན་རྫོབ་ཡིན་པའི་རྟགས་ཀྱིས་དོན་དམ་བློའི་ཡུལ་མིན་པར་སྒྲུབ་པའི་ཁྱབ་ལོག་དེ་འདྲ་ཞི་བ་ལྷ་ལྟ་བུའི་བདག་ཉིད་ཆེན་པོ་ཞིག་གིས་བསྒྲགས་པ་ཨེ་མཛད། ཁོ་བོ་ཅག་ནི་དེ་ཙམ་གྱི་སྐུར་བཏབ་མི་ཕོད་དོ།། ཁྱོད་ཀྱིས་༼མི་ཕམ་གྱིས་༽བདེན་གཉིས་འདོད་ཚུལ་ལ་ལུགས་གཉིས་བྱས་ནས། ཕྱོགས་སྨྲ་བ་དེ་དག་གིས་ལུགས་ཕྱི་མ་འདི་ཞལ་གྱིས་བཞེས་ཕྱིར། དེའི་ལུགས་ལ་ཀུན་རྫོབ་བདེན་པ་ཡིན་ན་དོན་དམ་མི་འཇལ་བས་ཁྱབ་ཀྱང་། དེ་འཇལ་གྱི་བློ་དང་། དོན་དམ་གཏན་མེད་དུ་མི་འགྱུར་ཏེ་དོན་དམ་པའི་ཡུལ་ཅན་ཡེ་ཤེས་གང་ཞིག་དོན་དམ་བདེན་པའི་མིང་ཅན་དེས་འཇལ་བའི་ཕྱིར་རོ།། ཞེས་གསུང་ན། དོན་དམ་བདེན་པའི་མིང་ཅན་གྱི་ཡེ་ཤེས་དེ་ཀུན་རྫོབ་བདེན་པ་ཡིན་ནམ། དོན་དམ་བདེན་པ་ཡིན་ནམ། བདེན་གཉིས་གང་ཡང་མ་ཡིན་པ་ཡིན་ཞེས་དྲིས་པའི་ཚེ་ཀུན་རྫོབ་བདེན་པ་ཡིན་ཟེར་ན། ཀུན་རྫོབ་བདེན་པ་ཡིན་ན་དོན་དམ་མི་འཇལ་བས་ཁྱབ་པ་འགལ། དོན་དམ་བདེན་པ་ཡིན་ན་དོན་དམ་བདེན་པའི་མིང་ཅན་ཡིན་པར་འགལ། བདེན་གཉིས་གང་ཡང་མ་ཡིན་པ་ཡིན་ན་ཤེས་བྱ་ཡིན་པར་འགལ་བ་སོགས་རིགས་ལམ་ལས་འདས་པའི་གཏམ་དེ་ཙམ་གྱིས་གཞུང་ཆེན་པོའི་གོ་དོན་སྟེར་ཟེར་ན་ཧ་ཀྱང་མཚར་རོ།། འདིར་སྨྲས་པ། བདེན་གཉིས་ཡིན་ལུགས་ཇི་བཞིན་འཆད་པའི་ཚེ།། ཀུན་རྫོབ་བདེན་པའི་ཐ་སྙད་རྟེན་འབྲེལ་ཆོས།། གྲ་ཡང་མ་ཉམས་དོན་དམ་ཡིན་ལུགས་ཀྱི།། རང་བཞིན་སྤྲོས་དང་བྲལ་བའི་རྣམ་བཞག་འཆད།། བདེན་གཉིས་འགལ་འདུ་སྤངས་པའི་ཡིན་ལུགས་ཀྱི།། དབྱེར་མེད་རྟེན་འབྲེལ་ཟབ་མོ་སྒྲོག་པའི་གཏམ།། འཁྲུལ་མེད་ཇི་བཞིན་སྨྲ་བའི་སྤོབས་པ་འདི།། འཇམ་མགོན་བླ་མའི་བཀའ་དྲིན་ཁོ་ནར་ཁུམས།། ཞེས་པའང་བར་སྐབས་ཀྱི་གཏམ་དུ་བྱས་སོ།། ༦༽ ཐལ་འགྱུར་བས་རང་རིག་དང་ཀུན་གཞི་ཐ་སྙད་དུ་བཞེད་མི་བཞེད་ཀྱི་རྣམ་བཞག། ༈ ད་ནི་ཐལ་འགྱུར་བས་རང་རིག་དང་ཀུན་གཞི་ཐ་སྙད་དུ་བཞེད་མི་བཞེད་ཀྱི་རྣམ་བཞག་ཉུང་ངུ་ཙམ་སྤྲོས་ནས་མཇུག་བསྡུ་བར་འདོད་པས། དང་པོ་ཐལ་འགྱུར་བས་རང་རིག་ཐ་སྙད་དུ་ཡང་བཞེད་མི་རིགས་པའི་ལུང་དང་རིགས་པའི་རྣམ་འགྱུར་གསལ་བར་སྟོན་ཀྱང་། ད་རུང་གལ་བཙུགས་ནས་བཤད་པར་སྣང་སྟེ། ཁྱོད་ཀྱིས་དེ་ལ་ལན་མདོར་ཙམ་བརྗོད་ན།༼མི་ཕམ་གྱིས་༽ སྤྱིར་དབུ་མ་ཐལ་འགྱུར་བའི་ལུགས་ལ་རྣམ་ཤེས་ཚོགས་དྲུག་ཏུ་བཞེད་པ་དང་། རང་རིག་གི་རྣམ་བཞག་སོགས་མ་མཛད་པ་ནི་རང་གཞུང་ན་གསལ་མོད། དེར་ཐ་སྙད་དུ་ཞལ་བཞེས་མེད་པ་ཙམ་ཞིག་གིས་ཐ་སྙད་དུ་མེད་ངེས་སུ་གོ་དགོས་པའི་ངེས་པ་ག་ལ་ཡོད། དཔེར་ན་ཐལ་འགྱུར་བའི་ལུགས་ལ་གཉུག་སེམས་དང་བདེ་བ་ཆེན་པོ་སོགས་ཀྱི་ཐ་སྙད་སྦྱར་དོན་མེད་ཀྱང་དེ་དག་ཐ་སྙད་དུ་མི་འཐད་པ་མ་ཡིན་པ་བཞིན་ནོ།། ཞེས་སྨྲས་འདུག་པ་ཙམ་ནས་སྨྱོན་པ་འུར་ལངས་པའི་གཏམ་བཞིན་གཏད་སོ་ཅི་ཡང་མེད་པའི་འཚངས་རྡོལ་བར་འདུག་སྟེ། སྤྱིར་དབུ་མ་ཐལ་འགྱུར་བས་རང་རིག་མི་བཞེད་པ་རང་གཞུང་ན་གསལ། དེ་ཡང་ཐ་སྙད་དུ་ཞལ་བཞེས་མེད་ཅེས་སྨྲས་ནས། ཡང་དེ་མ་ཐག་ཏུ་དེ་ཙམ་ཞིག་གིས་ཐ་སྙད་དུ་མེད་ངེས་སུ་གོ་དགོས་པའི་ངེས་པ་མེད་ཟེར་བ་འདི་ལས་བཞད་གད་ཆེ་བ་ཅི་ཞིག་ཡོད། འདི་ལ་དབུ་མ་ཐལ་འགྱུར་བ་ཆོས་ཅན། ཁྱོད་ཀྱིས་རང་རིག་ཐ་སྙད་དུ་ཞལ་གྱིས་བཞེས་རིགས་པར་ཐལ། རང་རིག་ཐ་སྙད་དུ་མེད་ངེས་མ་ཡིན་པའི་ཕྱིར། ཞེས་བཀོད་པའི་ཚེ་ན་འདོད་ལན་ཐེབས་པར་ཐལ། རང་རིག་ཐ་སྙད་དུ་མེད་ངེས་མ་ཡིན་ན། རང་རིག་ཐ་སྙད་དུ་ཡོད་པར་ཞལ་གྱིས་བཞེས་རིགས་པའི་ཕྱིར། དེ་ལ་མ་ཁྱབ་ཟེར་ན། ཁྱབ་པར་ཐལ། ཐ་སྙད་དུ་མེད་ངེས་མ་ཡིན་ན། ཐ་སྙད་དུ་ཡོད་པར་ཞལ་གྱིས་བཞེས་མི་རིགས་པའི་རྒྱུ་མཚན་ཅི་ཡང་མེད་པའི་ཕྱིར་ཏེ། བདག་མེད་གང་ཞིག་མེད་ངེས་མ་ཡིན་ན་ཡོད་པ་ཡིན་དགོས་པའི་ཕྱིར། གཞན་ཡང་དབུ་མ་ཐལ་འགྱུར་བ་ལ་རང་རིག་ཐ་སྙད་དུ་ཡོད་དམ་མེད་ཅེས་དྲིས་པའི་ཚེ། ལན་གང་གདབ། རང་རིག་ཐ་སྙད་དུ་ཡོད་ཟེར་ན། རང་རིག་ཐ་སྙད་དུ་ཞལ་བཞེས་མེད་ཅེས་པའི་དམ་བཅའ་ཉམས། མེད་ཟེར་ན་ཐ་སྙད་དུ་མེད་ངེས་སུ་གོ་དགོས་པའི་ངེས་པ་ག་ལ་ཡོད་ཅེས་པའི་དམ་བཅའ་ཉམས། རང་ཚིག་ལ་རང་གིས་འགལ་བར་སྟབས་པ་འདི་ལས་སྨྱོན་པའི་རྣམ་ཐར་གསལ་བར་སྟོན་ལུགས་ཅི་ཞིག་ཡོད། དེ་ལ་སྐྱོན་མེད་དེ། ཁོ་བོས་ཐ་སྙད་དུ་ཞལ་བཞེས་མེད་པ་ཙམ་ཞེས་ཙམ་སྒྲས་ཐ་སྙད་དུ་མེད་ངེས་ཡིན་པ་བཅད་པར་བྱས་མི་འདུག་གམ་བསམ་ན། འོ་ན་ཐལ་འགྱུར་བས་ཐ་སྙད་དུ་རང་རིག་ཞལ་གྱིས་མི་བཞེས་པ་དེ། རྒྱུ་མཚན་ཡང་དག་པ་ཞིག་མཐོང་ནས་ཡིན་ནམ། མ་མཐོང་ནས་ཡིན། རྒྱུ་མཚན་ཡང་དག་པ་མ་མཐོང་ཡང་ཐལ་འགྱུར་བས་དེ་འདྲ་ཁས་ལེན་པའི་ལུགས་སྲོལ་མེད་པ་ཙམ་གྱིས་ཡིན་ནམ། སེམས་ཙམ་པ་སོགས་ཀྱིས་ཁས་ལེན་པ་དེ་དང་མི་འདྲ་བ་ཙམ་ཞིག་བྱས་པ་ཡིན་ནམ། ཡང་ན་མ་བརྟག་ཉམས་མཚར་བ་ཙམ་དུའམ། སྐལ་པ་བཟང་བ་ཙམ་གྱིས་དེ་ལྟར་ཞལ་གྱིས་བཞེས་པར་ཟད་ལ། འདི་ལྟར་ན་ཐལ་འགྱུར་བའི་གྲུབ་མཐའ་འགངས་ཆེ་བྱ་བའང་། བྱིས་པའི་རྣམ་ཐར་ཙམ་དུ་ཟད་དོ།། རྒྱུ་མཚན་ཡང་དག་མཐོང་ནས་ཡིན་ན། རྒྱུ་མཚན་ཡང་དག་གང་མཐོང་ནས་ཡིན་པ་སྨྲ་དགོས་ལ། ཁྱོད་ཀྱིས་འོག་ཏུ་བརྗོད་ཚུལ་ལ་དཔྱད་ན། ཐལ་འགྱུར་བའི་ལུགས་ལ་རང་རིག་ཐ་སྙད་དུ་ཞལ་གྱིས་མི་བཞེས་པའི་རྒྱུ་མཚན་ལ་རང་རིག་དོན་དམ་དུ་རང་མཚན་གྱིས་མ་གྲུབ་པའི་ཕྱིར་ཟེར་ཚོད་འདུག་པས། དེས་ན་དོན་དམ་དུ་མེད་པས་ཐ་སྙད་དུ་ཞལ་གྱིས་བཞེས་མི་རིགས་ན། ཐལ་འགྱུར་བས་དཀོན་མཆོག་གསུམ་དང་ལས་རྒྱུ་འབྲས་ཡང་ཐ་སྙད་དུ་ཞལ་གྱིས་མི་བཞེས་པར་ཐལ། དེ་དག་དང་རང་རིག་དོན་དམ་དུ་མེད་པར་མཚུངས་པའི་ཕྱིར། ཁྱབ་པ་མ་ངེས་ན། རྒྱུ་མཚན་ཡང་དག་ཡིན་པ་ཉམས། ཁྱབ་པ་ངེས་ན། ཐལ་འགྱུར་བས་དཀོན་མཆོག་ལ་སྐྱབས་སུ་མི་འགྲོ། ལས་རྒྱུ་འབྲས་ཡང་ཁས་མི་ལེན་བྱས་ན། དེ་ཚབས་ཆེ་ཆུང་ཅི་འདྲར་འགྱུར་དཔྱོད་ཅིག། ཡང་ཁྱོད་ཀྱིས་མཐུན་དཔེ་བཀོད་པ་ལས་གཉུག་སེམས་དང་བདེ་བ་ཆེན་པོ་སོགས་ཀྱི་ཐ་སྙད་ཐལ་འགྱུར་བས་མི་སྦྱར་ཀྱང་དེ་དེའི་ལུགས་ལ་མི་འཐད་པ་མིན་པ་དང་འདྲ་ཟེར་ན། འོ་ན་རང་རིག་ཐལ་འགྱུར་བས་ཐ་སྙད་དུ་བཞེད་མི་བཞེད་སོགས་ལ་སེམས་ཙམ་པ་དང་དགག་བཞག་གི་སྤྲོས་པ་རྒྱ་ཆེར་དབུ་མའི་གཞུང་རྣམས་ལས་མཛད་པའང་མེད་པར་ཐལ། གཉུག་སེམས་དང་བདེ་བ་ཆེན་པོ་བཞིན་དུ་དགག་སྒྲུབ་གང་ཡང་མི་བྱེད་ནས་བཏང་སྙོམས་སུ་བཞག་པ་དཔེ་དོན་མཚུངས་པའི་ཕྱིར། འདོད་ན། དཔལ་ལྡན་ཟླ་བས། སེམས་ཙམ་པ་ལ། གལ་ཏེ་བཟུང་མེད་འཛིན་པ་ཉིད་བྲལ་ཞིང་།། གཉིས་ཀྱིས་སྟོང་པའི་གཞན་དབང་དངོས་ཡོད་ན།། འདི་ཡིས་ཡོད་པ་གང་གིས་ཤེས་པར་འགྱུར།། མ་བཟུང་བ་ཡང་ཡོད་ཅེས་བྱ་མི་རུང་།། ཞེས་གཞན་དབང་གི་སྒྲུབ་བྱེད་གང་ཡིན་ཞེས་དྲིས་པ་དང་། དེ་ལ་སེམས་ཙམ་པས་རང་རིག་གིས་གྲུབ་བོ་ཞེ་ན། དེ་ཉིད་ཀྱིས་དེ་མྱོང་བ་གྲུབ་པ་མ་ཡིན་ཞེས་རང་རིག་དེ་ཉིད་ཀྱིས་ཤེས་པ་མྱོང་བར་གྲུབ་པ་མ་ཡིན་པར་ཐལ། རང་རིག་མ་གྲུབ་པའི་ཕྱིར། ཞེས་དགག་པ་མཛད་པ་མི་འཐད་པར་ཐལ། ཐལ་འགྱུར་བས་རང་རིག་གཉུག་སེམས་དང་བདེ་བ་ཆེན་པོ་བཞིན་དུ་དགག་སྒྲུབ་གང་ཡང་མ་བྱས་པ་ཁྱོད་འདོད་པའི་ཕྱིར། དེས་ན་དཔལ་ལྡན་ཟླ་བའི་ཞབས་ལ་ཁྱོད་མ་འཁྲུལ་ཞིག་ཅེས་ཞུ་བར་གྱིས་ཤིག དེ་ལྟར་དགག་སྒྲུབ་བྱས་པར་འདོད་ན་ཁྱོད་ཀྱི་མཐུན་དཔེ་བཀོད་པར་ཉམས་སོ།། སེམས་ཙམ་པ་དང་ཐལ་འགྱུར་བ་གཉིས་རང་རིག་འཐད་མི་འཐད་ཀྱི་རྩོད་པ་བྱུང་བ་ཡིན་ཀྱང་དེ་དོན་དམ་དུ་རང་རིག་ཡོད་མེད་རྩོད་ཀྱི་ཐ་སྙད་དུ་རང་རིག་ཡོད་མེད་མི་རྩོད་ཟེར་ན། དེ་དག་གི་སྒྲུབ་བྱེད་འོག་ཏུ་བསྟན་པས་ཆོག་གོ། ཡང་ཁྱོད་ཀྱིས་རང་རིག་ངོས་བཟུང་བའི་ཚེ། ༼མི་ཕམ་གྱིས་༽རང་རིག་ལའང་བྱ་བྱེད་ལས་གསུམ་ཐ་དད་དུ་མེད་ཀྱང་། རང་བློ་ཉིད་སྐྱེས་ཙམ་ནས་ལྐོག་ཏུ་མ་གྱུར་པར་མྱོང་བ་གསལ་རིག་གི་ངོ་བོར་སྐྱེས་པ་ལ་རང་རིག་ཅེས་བརྗོད་ལ། དེ་འཇིག་རྟེན་གྱི་ཐ་སྙད་དུ་ཡོད་དེ། ཐ་སྙད་དུ་རང་རྒྱུད་ཀྱི་བློ་རང་གིས་དངོས་སུ་རིག་པའམ་མི་རིག་པ་གཉིས་སུ་ཁ་ཚོན་ཆོད་པ་ལས་མི་རིག་པར་འདོད་ན་རང་བློ་རང་ལ་ལྐོག་ཏུ་གྱུར་དུ་ཁས་ལེན་པ་ལས་འོས་མེད་དོ།། ཞེས་སྨྲོས་འདུག་པའང་རང་གར་ཧམ་འགྲོས་ཀྱི་གཏམ་ཞིག་སྟེ། གསལ་རིག་གི་ངོ་བོར་སྐྱེས་ཙམ་ནས་རང་རིག་ཡིན་ན། ཤེས་པ་ཐམས་ཅད་རང་རིག་ཏུ་ཐལ། ཤེས་པ་ཐམས་ཅད་གསལ་ཞིང་རིག་པ་ཤ་སྟག་ཡིན་པའི་ཕྱིར། འདོད་པའི་ཕྱིར། འདོད་ན། ཐལ་འགྱུར་བ་དང་སེམས་ཙམ་པ་གཉིས་རང་རིག་ཡོད་མིན་རྩོད་པའི་ཚེ་ཤེས་པ་ཐམས་ཅད་ཡོད་མེད་རྩོད་པ་ཡིན་པར་ཐལ། དེ་གཉིས་རང་རིག་ཡོད་མེད་རྩོད་པ་གང་ཞིག། གསལ་རིག་ཐམས་ཅད་རང་རིག་ཡིན་པའི་ཕྱིར། རྟགས་ཁས་ལེན་གྱི་སྟེང་དུ་སོང་། རང་བློ་རང་ལ་ལྐོག་ཏུ་མ་གྱུར་ན་བློ་རང་གིས་རང་ལ་བྱེད་པ་འཇུག་དགོས་པས་ཁྱབ་པར་ཐལ། འདོད་པའི་ཕྱིར། འདོད་ན། བློ་ཡིན་ན་རང་རིག་ཡིན་པས་ཁྱབ་པར་ཐལ། དེ་ཡིན་ན་རང་གིས་རང་ལ་བྱེད་པ་འཇུག་པ་ཡིན་པས་ཁྱབ་པའི་ཕྱིར། འདོད་ན། བློ་ཡིན་ན་རང་གི་བྱ་བྱེད་ལས་གསུམ་ཐ་མི་དད་པ་གཅིག་ཏུ་སོང་བས་ཁྱབ་པར་ཐལ། དེ་ཡིན་ན་རང་གིས་རང་ལྐོག་ཏུ་མ་གྱུར་པས་ཁྱབ་པའི་ཕྱིར། འདོད་ན་མར་མེ་རང་གིས་རང་གསལ་བ་དང་། རལ་གྲིའི་སོ་རང་གིས་རང་གཅོད་པར་ཐལ་བ་སོགས་རང་རིག་འགོག་པའི་རིགས་པ་ཇི་སྐད་གསུང་བས་གནོད་པའི་ཕྱིར། འདོད་མི་ནུས་སོ།། ཡང་༼མི་ཕམ་གྱིས་༽རང་རིག་པ་ནི་གྲུབ་ལ་རག་མོད་ཀྱི་ཞེས་སོགས་ཀྱིས་སྔ་ཕྱིའི་ཤེས་པ་རང་མཚན་གྱིས་གྲུབ་པའི་སོ་སོ་བ་ལ་སྔར་རང་གིས་རང་མྱོང་དུ་ཆུག་ཀྱང་ད་ལྟར་དྲན་མི་སྲིད་པ་སྟོན་པའི་རིགས་པ་འདུག་གིས། འཇིག་རྟེན་ཐ་སྙད་དུ་རང་རིག་ཡོད་པ་ལ་གནོད་ངེས་ཀྱི་རིགས་པ་གང་ཡང་མི་འདུག་ན། དེ་ཙམ་ཞིག་བརྗོད་པས་ཅི་ཡང་མི་འགྲུབ་བོ།། ཞེས་ཟེར་ན། འོ་ན་དཔལ་ལྡན་ཟླ་བས་རང་རིག་འགོག་པའི་རིགས་པ་མཛད་པ་དེ་དག་གིས་དོན་དམ་དུ་རང་རིག་ཡོད་པ་ལ་གནོད་ཀྱང་། ཐ་སྙད་དུ་རང་རིག་ཡོད་པར་འདོད་པ་ལ་མི་གནོད་ན། དེ་གནོད་པའི་ཕྱིར་ཏེ། རང་རིག་ནི་རང་གི་གཞལ་བྱ་ལ་མ་ལྟོས་པར་རང་དབང་དུ་གྲུབ་པ་ཞིག་ལ་འདོད་པ་གང་ཞིག། དེ་འདྲ་བའི་ཤེས་པ་ཐ་སྙད་དུའང་མི་འཐད་པའི་ཕྱིར། དང་པོ་རང་རིག་གཞལ་བྱ་ལ་མ་ལྟོས་པ་རང་དབང་ཅན་ཞིག་ནི་སེམས་ཙམ་པ་འདོད་དེ། རྣམ་འགྲེལ་ལས། རྟག་ཏུ་བདག་ལ་སྣང་མངོན་ཕྱོགས།། རིག་བྱ་རིག་བྱེད་རྣམ་པའང་མེད།། ཅེས་རང་རིག་ནི་རིག་བྱ་རིག་བྱེད་ཀྱི་རྣམ་པ་ཐ་དད་དུ་འཆར་རྒྱུ་མེད་པ་ཞིག་ལ་བཞེད་པ་དང་། སློབ་དཔོན་ཡེ་ཤེས་སྙིང་པོས་བདེན་གཉིས་རང་འགྲེལ་ལས་ཀྱང་། ཤེས་པ་ནི་གཉིས་ཀྱིས་དབེན་པའི་རང་གི་ངོ་བོ་རིག་པ་འབྱུང་བ་ཡིན་པ་དང་། དེ་མེད་པར་ཤེས་པར་འགྱུར་གྱི། དེ་ལྟར་མ་ཡིན་ན་མི་རིགས་པའི་ཕྱིར་རོ།། ཞེས་སེམས་ཙམ་པ་ཁྱོད་ཕྱི་དོན་མེད་པ་ཤེས་པ་བདེན་གྲུབ་འདོད་པ་མི་འཐད་པར་ཐལ། དེ་ཡོད་ན་ཁ་ནང་ཁོ་ནར་ཕྱོགས་ཤིང་། གཉིས་སྣང་ཐམས་ཅད་དང་བྲལ་བའི་འཛིན་རྣམ་ཡན་གར་བ་ཞིག་གིས་འགྲུབ་དགོས་པ་ལས། དེ་འདྲའི་འཛིན་རྣམ་མེད་པའི་ཕྱིར་ཞེས་གསུང་པ་ཡིན་པ་དང་། རྟོག་གེ་འབར་བ་ལས་ཀྱང་། སེམས་ཙམ་པའི་རྣམ་ཤེས་ནི་གཉིས་སུ་སྣང་སྟེ། རང་སྣང་བ་དང་ཡུལ་དུ་སྣང་བའོ།། ཡུལ་དུ་སྣང་བའི་རྣམ་ཤེས་ནི་ཕྱི་རོལ་གྱི་ཡུལ་གྱི་རྣམ་པར་གྱུར་ན། རང་སྣང་བའི་རྣམ་ཤེས་ཀྱི་ཡུལ་དུ་འགྱུར་རོ།། ཞེས་གསུང་པ་ལྟར་ཡིན་པའི་ཕྱིར། དེ་ལྟ་བུ་རིག་བྱ་རིག་བྱེད་ཐ་དད་དུ་འཆར་རྒྱུ་མེད་པའི་རང་རིག་དེ་ཆོས་ཅན། ཁྱོད་ཐ་སྙད་དུའང་མེད་པར་ཐལ། རྟེན་འབྲེལ་མ་ཡིན་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། ལྟོས་གྲུབ་མ་ཡིན་པའི་ཕྱིར། གཞལ་བྱ་ལ་མ་ལྟོས་པ་རང་དབང་དུ་གྲུབ་པའི་ཤེས་པ་ཡིན་པའི་ཕྱིར། དེས་ན་རང་དབང་དུ་གྲུབ་པའི་ཆོས་ཡིན་ན་རང་མཚན་གྱིས་གྲུབ་པའི་ཆོས་ཡིན་དགོས། རང་བཞིན་ནམ་རང་མཚན་གྱིས་གྲུབ་པའི་ཆོས་ནི་ཐ་སྙད་དུའང་མི་བཞེད་དེ། བདེན་པ་གཉིས་སུའང་རང་བཞིན་མེད་པའི་ཕྱིར་སོགས་སྒྲུབ་བྱེད་མང་ཙམ་གོང་དུ་བསྟན་ཟིན་པའི་ཕྱིར། དེ་ལྟར་དཔལ་ལྡན་ཟླ་བས། འཇུག་པ་རང་འགྲེལ་ལས། འོན་ཏེ་འཇིག་རྟེན་གྱི་ཐ་སྙད་ཀྱི་དབང་དུ་ཡིན་ན་ནི། དེ་ལྟར་ནའང་རང་རིག་པའི་རྒྱུ་ཅན་གྱིས་དྲན་པ་མི་སྲིད་པ་ཉིད་དོ་ཞེས་དང་། རང་རིག་པ་མེད་པར་ཡང་དྲན་པ་ཇི་ལྟར་འབྱུང་བ་དེ་ལྟར་སྟོན་པར་འགྱུར་རོ་ཞེས་གསུང་ན། འཇིག་རྟེན་ཐ་སྙད་ཀྱི་དབང་དུ་ཞེས་དང་། དེ་ལྟར་ནའང་ཞེས་དང་། རང་རིག་མེད་པར་ཡང་ཞེས་ཚིག་གི་གསལ་ཁ་མཛད་པ་འདི་ལ་དཔྱད་དང་རང་རིག་ཐ་སྙད་དུ་བཀག་མ་བཀག་གི་དོགས་པ་བྱེད་དགོས་པར་མི་འདུག་གོ། ལུགས་ཕྱི་མ་ལས་རང་རིག་པ་མེད་པར་ཡང་ཞེས་རང་རིག་ཐ་སྙད་དུ་མེད་པ་གཞིར་མཛད་ནས། དེ་མེད་ཀྱང་དྲན་པ་ཇི་ལྟར་འགྱུར་བ་ཞེས་དྲན་པ་ཡོད་པར་བསྒྲུབ་ན། དྲན་པ་ཐ་སྙད་དུ་ཡོད་པར་བསྒྲུབ་པ་ལས་དོན་དམ་བདེན་པ་ཡོད་ཅེས་བསྒྲུབ་དགོས་པའི་དོན་ཅི་འདུག་སོམས་ཤིག དེར་མ་ཟད་ཞི་བ་ལྷས་ཀྱང་། གལ་ཏེ་རང་རིག་ཡོད་མིན་ན།། རྣམ་ཤེས་དྲན་པར་ཇི་ལྟར་འགྱུར།། ཞེས་ཕྱོགས་སྔ་བཀོད་ལུགས་ལ་སོམས་དང་། ཁྱོད་ལྟར་ན་ཕྱོགས་སྔ་མ་རང་རིག་དོན་དམ་དུ་མེད་ན་ཐ་སྙད་དུ་རྣམ་ཤེས་ཇི་ལྟར་དྲན་པར་འགྱུར་ཞེས་རྩོད་པ་ཡིན་དགོས་ན། དེ་ཙམ་གྱིས་ཕྱོགས་གང་ནས་རྩོད་པ་མི་ཤེས་པའི་རྒོལ་བ་རྨོངས་པ་དེ་ཙམ་ལ་ཞི་བ་ལྷས་ཇི་ལྟར་རྩོད། དེས་ན་ཕྱིར་རྒོལ་བས་ཀྱང་རང་རིག་དོན་དམ་དུ་མ་ཟད་ཐ་སྙད་དུ་ཡང་བཀག་པར་མཐོང་ནས། རང་རིག་ཐ་སྙད་དུ་ཡང་མེད་ན་རྣམས་ཤེས་དྲན་པ་ཇི་ལྟ་བར་འགྱུར་ཞེས་རྩོད་པ་ཡིན་པའི་ཕྱིར། དེ་ལ་སློབ་དཔོན་ཞི་བ་ལྷས། གཞན་མྱོང་བ་དང་འབྲེལ་བ་ལས།། དྲན་འགྱུར་བྱི་བའི་དུག་བཞིན་ནོ།། ཞེས་དེ་ལ་ལན་མཛད་པ་ན། རང་རིག་མེད་ཀྱང་དྲན་པ་སྐྱེ་བ་མི་འཐད་པའི་སྐྱོན་མེད་དེ། གང་གི་ཚེ་སྔོན་པོ་དྲན་པ་སྐྱེ་བ་ན་ཡུལ་ཅན་སྤངས་ནས་དྲན་པ་མ་ཡིན་གྱི་ངས་སྔར་སྔོན་པོ་འདི་མཐོང་ངོ་ཞེས་ཡུལ་དང་ཡུལ་ཅན་གྱི་འབྲེལ་པ་དྲན་པའི་ཕྱིར། དེ་ལྟར་ཡུལ་དང་ཡུལ་ཅན་གྱི་འབྲེལ་བ་དྲན་པ་ལ། སྔར་ཡུལ་སྔོན་པོ་མྱོང་བའི་དུས་ན་ཡུལ་ཅན་མྱོང་དགོས་པས་མ་ཁྱབ་སྟེ། དཔེར་ན་དགུན་དུས་སུ་བྱི་བས་ལུས་ལ་རྨུགས་པ་ན་ལུས་ལ་བྱི་བའི་དུག་ཞུགས་ཡོད་ཀྱང་། སྔར་རྨུགས་པའི་ཚེ་རྨུགས་པ་མྱོང་གི་དུག་མ་མྱོང་ལ། དེ་ལས་དུས་ཕྱིས་འབྲུག་གི་སྒྲ་ཐོས་པ་ན་སྔར་རྨུགས་པ་དེའི་ཚེ་དུག་ཞུགས་པར་འདུག་སྙམ་དུ་དྲན་པ་སྐྱེ་བ་མི་འགལ་བ་བཞིན་ཡིན་པའི་ཕྱིར་ཞེས་མཐུན་དཔེ་དང་བཅས་ཏེ་གསལ་བར་བསྟན་པའི་ཕྱིར། དེ་ལྟར་ཡུལ་ཡུལ་ཅན་འབྲེལ་བ་དྲན་པ་ལས། སྔར་ཡུལ་མྱོང་དུས་སུ་ཡུལ་ཅན་མྱོང་དགོས་མི་དགོས་གསུངས་པ་འདི་དག་ཀྱང་ཐ་སྙད་ཀྱི་དབང་དུ་བྱས་ནས་དེ་ཐ་སྙད་ཀྱི་ཤེས་པས་ཡུལ་མྱོང་ཚུལ་གསུངས་པ་ཡིན་གྱི། དོན་དམ་པ་ལ་དེ་ལྟར་རྩོད་པ་དོན་མེད་པའི་ཕྱིར། ཐལ་འགྱུར་པས། རང་རིག་དོན་དམ་དུ་བཀག་ནས། ཐ་སྙད་དུ་རང་རིག་བཞེད་ན་སེམས་ཙམ་པ་ཁོ་རང་གི་འདོད་ཐོག་ཏུ་སོང་བའི་ཕྱིར་ཚུར་རང་རིག་ཡོད་མེད་ཀྱི་རྩོད་པ་རྩོམ་དགོས་པའི་དོན་མི་འདུག་པའི་ཕྱིར། དེ་ལ་ཅི་སྟེ་དོན་དམ་དཔྱད་པའི་དབང་དུ་བྱས་ནས་རང་རིག་རང་མཚན་གྱིས་ཡོད་མེད་རྩོད་པའི་ཕྱིར་ཚུར་རྩོད་པ་བཀོད་པའི་དོན་ཡོད་དོ་ཟེར་ན། འོ་ན་རང་རིག་རང་མཚན་གྱིས་གྲུབ་མ་གྲུབ་ཁོ་ན་རྩོད་པ་ལས་རང་རིག་ཡོད་མེད་རྩོད་མི་རིགས་པར་སོང་བའི་ཕྱིར། ཐལ་འགྱུར་བས་སེམས་ཙམ་པའི་ངོར་རང་རིག་མེད་ཀྱང་དྲན་པ་སྐྱེ་བ་ཡོད་དོ་ཞེས་ནན་གྱིས་རྩོད་པ་བཀོད་པའང་དོན་མེད་པ་ཁོ་ནར་ཟད་དེ། དེ་ལྟར་ན་རང་རིག་དོན་དམ་དུ་མེད་ཀྱང་། དྲན་པ་ཐ་སྙད་དུ་སྐྱེ་བ་ཡོད་པའི་ཕྱིར་ཞེས་བསྒྲུབ་པ་ཡིན་དགོས་ལ། དེ་ལྟར་ན་བུམ་པ་ནུབ་ཏུ་མེད་ཀྱང་ཀ་བ་ཤར་དུ་ཡོད་པའི་ཕྱིར་ཞེས་རྩོད་པ་ལྟར་འབྲེལ་མེད་དེ་འདྲ་ཐལ་འགྱུར་བས་བཞེད་པ་མི་སེམས་སོ།། ཐལ་རང་གཉིས་བུམ་པ་རང་ངོས་ནས་ཡོད་མེད་རྩོད་པའི་ཚེ། བུམ་པ་རང་ངོས་ནས་གྲུབ་དང་མ་གྲུབ་ཅེས་རྩོད་ཀྱི། བུམ་པ་ཡོད་མེད་རྩོད་པར་མི་མཛད་པ་དང་འདྲ་བསམ་ན། དེ་མི་འདྲ་སྟེ། བུམ་པ་ཐ་སྙད་ཙམ་དུ་ཡོད་པ་ལ་རིགས་པས་མི་གནོད། རང་རིག་ཐ་སྙད་དུ་བཞག་པ་ལ་རིགས་པས་གནོད་པའི་ཕྱིར། མ་གྲུབ་ན། དེ་ཆོས་ཅན། དེར་ཐལ། རང་རིག་ཡིན་ན་གཞལ་བྱ་ལ་མ་ལྟོས་པར་རང་དབང་གིས་རང་ལ་བྱེད་པ་འཇུག་པ་ཞིག་དགོས། དེ་ཡིན་ན་དེ་རང་ངོས་གྲུབ་པ་དང་། རྟེན་འབྲེལ་ལྟོས་གྲུབ་ཀྱི་ཆོས་མ་ཡིན་དགོས་པའི་ཕྱིར། རྣམ་པ་ཀུན་ཏུ་འཐད་པའི་གོ་སྐབས་མེད་པའི་ཕྱིར་རོ།། ད་སྙིང་པོ་བསྡུ་ན། ཁྱོད་ཀྱིས་དང་པོ་ཐལ་འགྱུར་བའི་ལུགས་ལ་རང་རིག་གཉུག་སེམས་དང་བདེ་བ་ཆེན་པོ་བཞིན་དགག་སྒྲུབ་གང་ཡང་མི་བྱེད་ཟེར། དེ་ལ་དབུ་མ་པ་ཆེན་པོ་རྣམས་ཀྱིས་རྣམ་རིག་པ་དང་རྩོད་ཚུལ་གྱི་དགག་བཞག་གི་ཉི་མ་ཆེན་པོ་ཤར་བ་ལག་པས་གཡོགས་མ་བཟོད་ནས་དེ་ལ་དགག་སྒྲུབ་ཙམ་བྱེད་མོད་ཀྱང་། རང་རིག་དོན་དམ་དུ་དགག་སྒྲུབ་བྱེད་པ་ཡིན་གྱི་ཐ་སྙད་དུ་མ་ཡིན་ཞེས་ཟེར་ནས་སྔར་དགག་སྒྲུབ་གང་ཡང་མ་བྱས་པའི་དམ་བཅའ་རང་གིས་ལེགས་པར་བཤིག་ནས་མཐར་ཅི་ཟེར་མེད་པར་རང་རིག་ཅེས་པ་ཤེས་པ་གསལ་རིག་ཙམ་ལ་ཟེར་བ་ཡིན། དེ་མེད་ན་རང་བློ་རང་ལ་ལྐོག་ཏུ་གྱུར་ཟེར་ནས་གག་ལ་བཏུགས་དུས་ཇི་འདྲ་བ་ཞིག་ལ་རང་རིག་ཟེར་བ་ཡིན་ཀྱང་མ་ངེས་པར་རྩོད་པར་རྩོམ་འདུག་པས་རེ་ཞིག་དགག་བཞག་གི་སྤྲོས་པ་དེ་ཙམ་གྱིས་ཆོག་པར་བྱས་སོ།། རྩོད་པའི་ཡང་ལན་ལོག་ལྟའི་ཁོང་ཁྲག་འདོན་པའི་སྐྱུག་སྨན་ལས་བདེན་གཉིས་འདོད་ཚུལ་ལ་བརྒལ་བའི་ལན་བརྗོད་པའི་སྐབས་ཏེ་གསུམ་པའོ།། འདི་རིགས་དགག་བཞག་གང་བྱས་པ་རྣམས་རྩོད་པའི་ཚེ་འཚངས་འབྲུ་བ་ལྟ་བུའི་ཚིག་ཇི་ཙམ་བྱུང་ཡང་དེ་དག་ནི་རིགས་ལམ་པའི་ཚིག་གི་ཁ་བཤིས་ལྟ་བུ་ལས་རང་ཉིད་སྒྲོགས་ཤིང་གཞན་ལ་སྐུར་བའི་ཆགས་སྡང་གི་བསམ་པས་ནི་མ་ཡིན་པས་ཐུགས་ལ་ཁྲོ་བ་ཡང་མི་མཛད་དུ་གསོལ། འདི་ལྟར་རྩོད་པ་ནི་དེང་སང་བསྟན་པ་རིན་པོ་ཆེ་བཤད་སྒྲུབ་གཉིས་ཀྱི་ཕྱོགས་ནས་ཧ་ཀྱང་ཉམས་དམས་པ་སྣུམ་ཟད་ཀྱི་མར་མེ་ལྟ་བུར་གྱུར་པས་ན། ཟབ་མོའི་ལམ་འདི་ལྟ་བུ་ལ་ཡིན་ལུགས་ཀྱི་རིགས་པའི་དཔྱད་བརྡར་བག་ཙམ་རེ་བྱས་པས་ཀྱང་བསྟན་པ་རིན་པོ་ཆེ་ལ་སྲི་ཞུ་དང་བཀུར་བསྟི་མཆོག་ཏུ་འགྱུར་པ་དང་། རང་རེ་རྒོལ་སྔ་ཕྱི་དང་སྐལ་བ་མཉམ་པའི་བློ་གསལ་དོན་གཉེར་ཅན་རྣམས་ཀྱིས་ཀྱང་ཟབ་མོའི་ལམ་འདི་གོ་ཙམ་ཤེས་ཙམ་གྱིས་ཚིམ་པར་མི་བྱེད་པ་རྒྱལ་བའི་གསུང་རབ་ཀྱི་དགོངས་དོན་ནི་ཤིན་ཏུ་རྟོགས་དཀའ་བ་ཡིན་ནོ་སྙམ་དུ་ཡང་དང་ཡང་དུ་དཔྱད་པའི་སྒོ་མཆོག་ཏུ་འགྱུར་པའི་དགོས་པ་ཡང་མཐོང་། ཉེ་ཆར་རང་གི་གམ་དུ་བཅར་བའི་རིགས་ལམ་སྨྲ་བ་དུ་མས་ཀྱང་གང་སྨྲོས་པའི་དགོས་པ་དེ་དག་ལ་བསམ་ནས་འདི་སྐད་སྨྲ་བར་གྱིས་ཞེས་ཡང་ཡང་བསྐུལ་བའི་རྐྱེན་གྱིས་ཅུང་ཟད་བྲིས་པ་ཡིན་ནོ།། སླར་ཡང་འདིར་སྨྲས་པ། གྲངས་མེད་བསྐལ་པར་ཚོགས་གཉིས་དཔུང་བསགས་ནས།། བདུད་བཞིའི་གཡུལ་ངོ་ཅི་ཡང་ཕམ་བྱས་པས།། རྒྱལ་བའི་མཚན་སྙན་གསེར་གྱི་རྔ་བོ་ཆེ།། ཕྱོགས་བཅུར་བརྡུང་མཛད་ཐུབ་དབང་ཤཀྱཱའི་ཏོག།། གང་གི་ལེགས་གསུང་འོ་མའི་རྒྱ་མཚོ་ལས།། ཟབ་དོན་མར་གྱི་ཉིང་ཁུ་རབ་ཕྱུང་ནས།། འཛམ་གླིང་གདུལ་བྱའི་བདག་འཛིན་གཅོང་ཆེན་ནད།། གསོ་མཛད་ཀླུ་སྒྲུབ་ཡབ་སྲས་ཕྱག་གིས་མཆོད།། ཤིང་རྟ་ཆེན་པོ་དག་གི་བཞེད་པའི་གཞུང་།། རྒྱུ་སྐར་གྲངས་ལ་འགྲན་བཟོད་མཁས་མང་གིས།། རང་རང་བསྟན་པའི་དོན་ཆེན་ལྷུར་བཞེས་ནས།། འཆད་པའི་ངོ་མཚར་སྤེལ་བ་བཀའ་དྲིན་འཁུམས།། འོན་ཀྱང་རྒྱལ་གསུང་དྲང་ངེས་ཡིན་ལུགས་དོན།། ཇི་བཞིན་འཆད་ལ་སྨྲ་བའི་སེངྒེ་གཅིག། བློ་བཟང་གངས་ཀྱི་རི་ལ་གནས་བཅས་ཏེ།། གྲགས་པའི་གད་རྒྱངས་མཐོན་པོར་སྒྲོགས་དེར་བསྔགས།། འཇམ་མགོན་ཡབ་སྲས་གཞུང་ལུགས་བདུད་རྩིའི་བཅུད།། སྙིང་ལ་སིམ་པའི་རྒྱལ་བའི་དགོངས་པའི་དོན།། ཡིན་ལུགས་འབྱེད་ལ་སྨྲ་བའི་རོ་འཛིན་འདི།། ཐུང་ངུར་མ་གྱུར་སྐལ་བ་བཟང་སྙམ་བགྱིད།། ལུང་རིགས་གཤོགས་རྩལ་རྫོགས་པའི་མཁས་པ་མང་།། དག་པའི་ཞིང་དུ་གཤེགས་ནས་དུས་མཐར་འདིར།། རྒྱལ་བའི་མདོ་རྒྱུད་རང་རང་གང་འདོད་ཀྱི།། ཕྱོགས་སུ་བཀྲལ་བའི་གཟུ་ལུམ་སྤྱོད་པ་དག། བྱིའུ་ཆུང་གཤོགས་རྩལ་ཅི་བདེར་ངོམས་པ་ལ།། རྨོངས་པ་ངོ་མཚར་བཟུང་བར་བྱེད་མོད་ཀྱང་།། བློ་གྲོས་གཤོག་རྩལ་མི་ཞན་བྱ་རྒོད་ཀྱི།། རིགས་པའི་ནམ་འཕངས་གཅོད་ཚེ་ཁྱད་པར་འབྱེད།། སྔ་རབས་མཁས་པའི་གཞུང་ལུགས་ཕལ་ཆེར་ལ།། རྣམ་དཔྱོད་མི་དམན་ངོ་མཚར་ཅན་དག་ཀྱང་།། འཕགས་པའི་དགོངས་པ་ཟླ་བས་ཚུལ་བཞིན་དུ།། བཀྲལ་བ་འཆད་ཚེ་ཕལ་ཆེར་གོལ་ཏེ་མཆིས།། དེང་སང་རྫོགས་ཆེན་བསྟན་འཛིན་མི་ཕམ་པ།། གཞུང་ལུགས་ཀུན་ལ་བློ་གྲོས་ཐོགས་མེད་དུ།། གྲགས་ཀྱང་ཐལ་འགྱུར་གྲུབ་མཐའའི་གནད་གསང་ལ།། མུན་པའི་ཁྲོད་དུ་མདའ་ཡི་ལག་ལེན་བཞིན།། ཕྱོགས་སུ་མ་སོང་འཁྲུལ་བ་གང་མཐོང་ལ།། དགག་པའི་ཚིག་གི་སྤྲོས་པ་ཉུང་ཙམ་བྱས།། དེ་ལ་ཁོང་གི་རྒལ་བའི་ལན་རྩོམ་པ།། ཉིན་བྱེད་སྣང་བ་ཞེས་པ་ཞིག་འབྱོར་ནས།། རིང་མོར་གྱུར་ཀྱང་འདི་རིགས་རྩོད་པའི་སྒོ།། བསྟན་པའི་སྲི་ཞུར་འགྱུར་བ་ཆེས་དཀའ་ཞིང་།། རྨོངས་པའི་ཡིད་ལ་ཕྱོགས་འཛིན་ཆགས་སྡང་གི།། མི་དགེ་འཕེལ་བའི་གཞི་རུ་འགྱུར་དོགས་ནས།། བརྒལ་ལན་མ་བརྩམ་ཅི་བདེར་གནས་པ་ལ།། རིགས་པ་སྨྲ་བ་དུ་མས་འདི་ལྟ་བུའི།། བརྒལ་ལན་བརྩམས་ན་བསྟན་ལ་སྲི་ཞུ་དང་།། ཕྱིས་འབྱུང་བློ་གསལ་ཕལ་ཆེར་གཞུང་ལུགས་ལ།། ཕྱོགས་ཙམ་ཤེས་པས་ཚིམ་པར་མི་བྱེད་པར།། ཞིབ་ཏུ་དཔྱད་པའི་སྒོ་རུ་འགྱུར་ཞེས་གླེང་།། དེ་དོན་འཐད་པར་བསམ་ནས་འདི་བརྩམས་སོ།། དེ་ཡང་ཕྱོགས་སྔའི་བསམ་ཚོད་མ་ཟིན་པ།། འབྲེལ་མེད་ལུང་རིགས་ཉག་ཕྲན་འཕེན་པ་དང་།། དེ་ཉིད་ལུང་དང་འབྲེལ་བར་མ་གྱུར་དང་།། ལུང་གིས་གནོད་བྱེད་ཅི་ཙམ་བསྟན་ན་ཡང་།། དེ་ལ་རིགས་པའི་གནོད་པ་མ་འབྲེལ་བ།། དགག་པའི་ཚིག་གི་གླེགས་བམ་ཆེར་བྱས་ཀྱང་།། དེ་དག་རང་གིས་རང་ལ་ངལ་བའི་སྒོ།། ཆེས་ཆེར་བྱས་པ་མཐོང་བས་ཡིད་ཕམ་ནས།། ཕྱོགས་སྔའི་ཞེ་འདོད་ཆུ་སྐྱེས་གསར་པའི་རྫིང་།། ལུང་རིགས་ཡ་མ་བྲལ་བའི་གཉིས་འཐུང་གི། ཡན་ལག་མཆོག་གིས་བརྫིས་པ་འདི་བྱས་སོ།། དགེ་ལེགས་ཆུ་ཤེལ་འབུམ་གྱི་བང་མཛོད་ལས།། ལྷག་བསམ་བསིལ་བའི་རག་བྱ་སྟེར་བྱེད་པའི།། ཕན་བདེའི་འོད་དཀར་འབྱེད་པས་རྒྱལ་བའི་བསྟན།། ཀུན་དའི་དགའ་ཚལ་མཆོག་ཏུ་བཞད་གྱུར་ཅིག། ཅེས་མི་ཕམ་རྣམ་རྒྱལ་གྱི་སྤྱོད་འཇུག་ཤེར་ལེའི་འགྲེལ་པ་ཞིག་རྩོམ་པ་ལ་དབུ་མ་ཐལ་འགྱུར་བའི་གྲུབ་མཐའི་གནད་གསང་ལས་ཕྱི་རོལ་དུ་གྱུར་པ་མང་ཙམ་མཐོང་བ་ལ་བརྒལ་བརྟག་ཉུང་ཙམ་བྱས་པ་དང་། དེ་ལ་རྒལ་ལན་ཉིན་བྱེད་སྣང་བ་ཞེས་བྱ་བ་ཞིག་འབྱོར་ནས་ལོ་དུ་མར་སོང་ཡང་། རང་གིས་དེ་ལ་ཡང་ལན་རྩོམ་པའི་འདུན་པ་མ་བྱས་པར་བཏང་སྙོམས་སུ་བཞག་པ་དང་། རང་གི་གམ་ནས་ལུང་རིགས་ཀྱི་དགའ་སྟོན་མཆོག་ཏུ་མྱོང་བའི་རིགས་པ་སྨྲ་བ་དུ་མས་འདི་ལྟ་བུ་ཞིག་རྩོམ་ན་སྙིགས་དུས་སུ་བསྟན་པ་ལ་སྲི་ཞུ་དང་། ལྷག་ཏུ་དེང་སང་སློབ་གཉེར་བ་ཕལ་ཆེར་གྱིས་རྒྱལ་བའི་གསུང་རབ་ཀྱི་དགོངས་དོན་ལས་སླ་བ་ཞིག་གིས་རྟོགས་པར་རློམ་ནས་འབྲུ་འགྲེལ་ཟུར་ཙམ་ཤེས་པ་དང་དེ་གས་ཡིད་མཚིམ་ནས་ང་རྒྱལ་དང་དྲེགས་པ་ནི་བྱེད། གཞུང་དོན་ལ་ཞིབ་མོའི་བློ་ཡིས་ཡང་ཡང་མ་དཔྱད་པས་མ་རྟོགས་པ་དང་། ལོག་པར་རྟོག་པ་དང་། ཐེ་ཚོམ་གྱི་དྲི་མས་འཆད་རྩོད་རྩོམ་གསུམ་གང་ལའང་ཡང་དག་པ་མཁས་པ་དགྱེས་པའི་ལམ་ནི་མ་རྙེད་པར་རང་གིས་རང་ཆེ་སར་བཏོན་ནས་སྡོད་པ་མང་བས་དེ་དག་གཞུང་དོན་ལ་ཡང་ཡང་དཔྱད་པ་ཞུགས་པའི་སྒོ་མཆོག་ཏུ་འགྱུར་བས་ཅིས་ཀྱང་རྩོམ་ཞེས་བསྐུལ་མ་བྱུང་བ་དང་། རང་གིས་ཀྱང་ཆགས་སྡང་གིས་ཡིད་མ་སྦགས་པར་བསྟན་པ་ལ་མཐའ་གཅིག་ཏུ་ཕན་འདོད་ཀྱི་བསམ་པས་ཀུན་ནས་སློང་སྟེ་བྲག་དཀར་སྤྲུལ་མིང་བློ་བཟང་དཔལ་ལྡན་བསྟན་འཛིན་སྙན་གྲགས་ཀྱིས་བསྟན་བཅོས་དུ་མ་རྩོམ་པ་དང་འཆད་པ་དང་ནང་གི་རྣལ་འབྱོར་ལའང་ཅུང་ཟད་རེ་བརྩོན་པ་དང་ཆོས་བརྒྱད་ཀྱི་འདུ་འཛི་སོགས་ཀྱིས་ཉིན་མཚན་ཀུན་ཏུ་བྲེལ་བར་བྱེད་པའི་བར་སྐབས་རྣམས་སུ་ཅུང་ཟད་རེ་བྲིས་ཏེ་རྫོགས་པར་བྱས་པའི་ཡི་གེ་བ་ནི་འབྲས་སྤུངས་བློ་གསལ་གླིང་གི་དགེ་བའི་བཤེས་གཉེན་ཚེ་དབང་བསྟན་འཛིན་གྱིས་བགྱིས་པའི་དགེ་བས་རྒྱལ་བའི་བསྟན་པ་བཤད་སྒྲུབ་གཉིས་ཀྱི་སྒོ་ནས་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག དགེའོ།། །།