Texts/Bdag gzhan mnyam brje sgom tshul/Full text

བདག་གཞན་མཉམ་བརྗེ་སྒོམ་ཚུལ།

bdag gzhan mnyam brje sgom tshul

FULL TEXT

Descriptionངོ་སྤྲོད།

Meditational instruction; written at the behest of Dkon mchog sangs rgyas, a monk of Urga. (Source: BDRC)བདག་གཞན་མཉམ་པ་དང་བརྗེ་བའི་བློ་སྦྱོང་གི་དམིགས་སྐོར་སྤྱོད་འཇུག་བསམ་གཏན་ལེའུ་སོགས་སུ་གསུངས་པ་དུ་མ་ཡོད་ཀྱང་། འདི་ནི་ཤར་སྒོམ་ཐུན་གཅིག་གི་སྐྱོང་ཚུལ་ཙམ་ཞིག་གྱུར་རུ་ལུགས་སུ་སྦྱར་བ་ཞིག་གོ།

Reference	bdag gzhan mnyam brje sgom tshul [བདག་གཞན་མཉམ་བརྗེ་སྒོམ་ཚུལ།].
People	Guntang Könchok Tenpai Drönme

Tibetan

[edit]

Input by Khenpo Tamphel for Tsadra Foundation
Source	BDRC
Date	2025-10-13
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

༄༅། །བདག་གཞན་མཉམ་བརྗེ་སྒོམ་ཚུལ་བཞུགས་སོ།།

༄༅། །ན་མོ་གུ་རུ་བྷྱེཿ བདག་གཞན་མཉམ་བརྗེ་བསྒོམ་པ་ལ།

མཉམ་པ་བསྒོམ་པ། བརྗེ་བ་བསྒོམ་པ་གཉིས། དང་པོ་ནི།

རང་གཅེས་པར་བཟུང་། གཞན་ཡལ་བར་དོར་ཏེ་རང་གཞན་གཉིས་གཅེས་མི་གཅེས་མི་མཉམ་པ་འདི་མི་རིགས་ཏེ། རང་དང་སེམས་ཅན་ཐམས་ཅད་རྨི་ལམ་ཚུན་ཆད་དུ་བདེ་བ་འདོད་པར་མཉམ། སྡུག་བསྔལ་མི་འདོད་པར་མཉམ་པའི་ཕྱིར།

བདག་འཛིན་ན་རེ། དེ་ལྟར་འདོད་པ་མཉམ་ནའང་སོ་སོའི་བདེ་བ་རང་རང་གིས་བསྒྲུབ་དགོས་ཀྱི། རྒྱུད་ཐ་དད་ཡིན་པས་རང་གིས་སེམས་ཅན་ཐམས་ཅད་ལ་ཕན་པ་བྱེད་དོན་མེད་ཟེར་ན། རྒྱུད་ཐ་དད་ཡིན་ཀྱང་གཞན་གྱི་གནོད་པ་སེལ་བ་དང་བདེ་བ་སྒྲུབ་དགོས་པ་ཡོད་དེ། མ་བུ་གཉིས་རྒྱུད་ཐ་དད་ཡིན་ཀྱང་གཅིག་གི་དོན་གཅིག་ཤོས་ཀྱིས་སྒྲུབ་དགོས་པ་བཞིན་ནོ།།

བདག་འཛིན་ན་རེ། དེ་གཉིས་ཕན་ཚུན་གཅེས་པའི་དབང་གིས་ཡིན་པས། སེམས་ཅན་གཞན་ལ་དེ་ལྟར་བྱེད་དོན་མེད་ཟེར་ན། སེམས་ཅན་ཐམས་ཅད་ཀྱིས་སྔོན་འཁོར་བ་ཐོག་མ་མེད་པར་སྐྱེ་བའི་ཡ་མཐའ་ཐུག་པ་མེད་པ་བླངས་པའི་དུས་སུ་མ་ལན་གྲངས་དཔག་ཏུ་མེད་པ་ཞིག་བྱས་ཏེ། ད་ལྟའི་མས་ཇི་ལྟར་དྲིན་གྱིས་བསྐྱངས་པ་བཞིན་དུ་ཕན་པ་ཐམས་ཅད་ལ་སྦྱར། གནོད་པ་ཐམས་ཅད་ལས་བསྐྱབས། རང་སྲོག་ལས་ཀྱང་གཅེས་པར་བྱས་ཏེ། ཐ་ན་ནུ་ཞོ་འཐུངས་པའང་རྒྱ་མཚོའི་ཆུ་ལས་ལྷག་པ་ཞིག་བཏུང་ཡོད་པས་ད་ལྟའི་མ་བཞིན་དུ་གཅེས་པར་བྱེད་དགོས་སོ།།

བདག་འཛིན་ན་རེ། དེའི་དུས་སུ་གཅེས་ཡོད་ཀྱང་ད་ལྟ་ཕན་ཚུན་ངོ་མི་ཤེས་ལ། དེར་མ་ཟད་འགའ་ཞིག་གིས་དགྲར་བཟུང་ནས་གནོད་པ་ཅི་འཁྱོལ་བྱེད་པས་གཅེས་པའི་འོས་མེད་དོ་ཟེར་ན། སྔོན་གྱི་དུས་རིང་པོ་མུ་མཐའ་ཡས་པ་ཞིག་ཏུ་གཅེས་པར་བསྐྱངས་པའི་རྩིས་མེད་པར་ད་ལྟའི་ཡུད་ཙམ་ཞིག་གི་དགའ་མི་དགའི་རྐྱེན་ཕྲན་ཚེགས་ལ་ཁོན་དུ་འཛིན་པ་མ་རབས་ཀྱི་སྤྱོད་པ་ཡིན་ཏེ། མ་བུ་ཚེ་ཧྲིལ་པོར་ཕན་ཚུན་ཤིན་ཏུ་གཅེས་ཀྱང་། རྒས་དུས་ཉིན་གཅིག་ནད་དང་གདོན་གྱིས་འཁྲུལ་ཏེ་ཚིག་ངན་སོགས་གནོད་འཚེ་བྱེད་ནའང་བུ་དེས་ལྷག་པར་གཅེས་སྤྲས་བྱེད་དགོས་ཀྱི། དེ་རིང་བདག་ལ་མི་གཅེས་པར་འདུག་ཅེས་ཡལ་བར་དོར་ན་འཇིག་རྟེན་ཐམས་ཅད་ཀྱིས་གལ་ཆེ་བའི་དུས་ཕན་མི་ཐོགས་པའི་བུ་ངན་ཞེས་ཁྲེལ་མེད་དུ་བརྩི་བ་བཞིན་ནོ།།

བདག་འཛིན་ན་རེ། གལ་ཏེ་གཅེས་པའི་དབང་དུ་བཏང་ཡང་དེས་ཕ་རོལ་ལ་ཕན་ཐོགས་རྒྱུ་མེད་པས་རང་གི་སེམས་ངལ་བ་ཙམ་དུ་ཟད་དོ་ཟེར་ན། ཕན་སེམས་བསྐྱེད་པ་ཙམ་གྱིས་ཆུས་སྐོམ་སོད་པ་བཞིན་འཕྲལ་དུ་ངོམས་རྒྱུ་མེད་ཀྱང་སྤྱིར་མི་ཕན་པ་མིན་ཏེ། སྔར་ཕན་སེམས་ཀྱི་སྒོ་མ་དོད་པས་སུ་ལའང་ཕན་མ་ཐོགས་པ་ཡིན། ཕན་སེམས་སྦྱོང་ཐུབ་ན་ལེགས་ཉེས་ཐམས་ཅད་སེམས་ཀྱི་རྗེས་སུ་འབྲང་ཡོང་བས། སེམས་དེའི་སྟོབས་ཀྱིས་ནུས་པའང་ཇེ་ཆེར་འགྲོ། བསམ་སྦྱོར་གཉིས་གཅིག་གྲོགས་སུ་གཅིག་སོང་ནས་སྟོབས་རྒྱས་ཏེ་ནམ་ཞིག་དུས་སྐད་ཅིག་མ་གཅིག་ལ་སྐུའི་འོད་ཟེར་རེ་རེས་ཀྱང་སེམས་ཅན་དཔག་ཏུ་མེད་པ་ལ་ཕན་འདོགས་ནུས་པ་ཞིག་འབྱུང་། ད་ལྟ་འགྲོ་བ་ཀུན་གྱི་སྐྱབས་གནས་སུ་གྱུར་པའི་སངས་རྒྱས་བཅོམ་ལྡན་འདས་རྣམས་ཀྱང་སྔོན་རང་ཅག་དང་སྐལ་བ་མཉམ་པ་འཆིང་བ་ཀུན་ལྡན་ནུས་པ་ཅི་ཡང་མེད་པ་རེས་བློ་སྦྱངས་ནས་དོན་གཉིས་ལྷུན་གྱིས་གྲུབ་པ་འདི་ལྟ་བུར་གྱུར་པ་ཡིན་ནོ།།

བདག་འཛིན་ན་རེ། དེ་ལྟར་སྦྱངས་ན་མཐའ་ཞིག་ཏུ་ཕན་རྒྱུ་ཡོད་སྲིད་ཀྱང་དེའི་བར་དུ་འགྲོ་ཐུབ་པའི་གདེང་མེད། གནས་སྐབས་ཕན་སེམས་བྱས་པ་ཙམ་གྱིས་ཕ་རོལ་པོའི་ལུས་སེམས་གང་ལའང་ཕན་ཐོགས་རྒྱུ་མེད་པས་བྱེད་མི་སྤྲོ་ཟེར་ན། གནས་སྐབས་སུའང་ཕན་རྒྱུ་ཡོད་དེ། རང་ལ་དཔལ་འབྱོར་ཕུན་སུམ་ཚོགས་པ་བྱུང་བར་མི་གཞན་ཞིག་དགའ་བར་བྱས་ན་རང་གི་སེམས་ལ་ཕན་པ་བཞིན། སེམས་ཅན་ཐམས་ཅད་བདེ་བ་ལ་རང་གིས་དགའ་བ་བསྒོམ་ན་དེས་སེམས་ཅན་ཐམས་ཅད་མགུ་བར་འགྱུར་ཞིང་། སེམས་དགའ་བ་དེའང་ཕན་བཏགས་པ་ཡིན་པའི་ཕྱིར།

བདག་འཛིན་ན་རེ། རང་གིས་ཕན་སེམས་བྱས་ཀྱང་སེམས་ཅན་གྱིས་དེ་མི་ཤེས་པས་དགའ་བའང་མི་སྐྱེའོ་ཟེར་ན། དཀར་ཕྱོགས་སྐྱོང་བའི་ལྷ་སོགས་དེ་ཤེས་མཁན་ཡང་གྲངས་མེད་པ་ཞིག་ཡོད་ལ། དངོས་སུ་མ་ཤེས་ཀྱང་རྟེན་འབྲེལ་གྱི་ཆེ་བས་བྱམས་པ་བསྒོམས་པའི་གང་ཟག་དེ་མཐོང་ཙམ་ཉིད་ནས་མི་མ་ཡིན་གདུག་པ་ཅན་རྣམས་ཀྱང་དགའ་བ་སྐྱེ་བའི་ལོ་རྒྱུས་མང་ལ། སྦྲུལ་གདུག་པས་གནོད་པ་མ་བྱས་ཀྱང་མཐོང་ཙམ་ནས་མི་དགའ་བ་ནང་གི་ཁོང་ཁྲོའི་སྟོབས་ཡིན་པ་བཞིན་ནོ།།

ཡང་བདག་འཛིན་ཁྱོད་ཀྱིས་ཕན་སེམས་དེས་ལུས་སེམས་གང་ལའང་ཕན་རྒྱུ་མེད་པས་བྱེད་དོན་མེད་ཟེར་བ་བདེན་ན། ཚིག་རྩུབ་ལ་སོགས་པས་ལུས་ལ་གནོད་རྒྱུ་མེད་ཅིང་། སེམས་གཟུགས་ཅན་མ་ཡིན་པ་ལ་དེ་ལས་ཀྱང་གནོད་རྒྱུ་མེད་པས་དེ་ལ་ཁོང་ཁྲོ་བྱ་དོན་མི་འདུག་སྙམ་དུ་སྔོན་ལ་བསམ་དགོས་སོ།།

བདག་འཛིན་ན་རེ། ཕན་སེམས་ཀྱིས་ལུས་སེམས་གང་ལའང་གནས་སྐབས་ཕན་རྒྱུ་མེད་པ་དང་། ཚིག་རྩུབ་ཀྱིས་གནོད་རྒྱུ་མེད་པ་གཉི་ག་མགོ་མཚུངས་པས་གཉི་ག་བཏང་སྙོམས་སུ་བྱོས་ཤིག་ཟེར་ན། དེ་གཉིས་མི་མཚུངས་ཏེ། གནོད་པ་ལ་ཁོན་དུ་བཟུང་བའི་རྣམ་སྨིན་དང་རྒྱུ་མཐུན་གྱིས་སྡུག་བསྔལ་ཁོ་ན་འདྲེན་ལ། ཕན་སེམས་ཀྱིས་དགའ་བ་བརྒྱུད་མར་འཕེལ་བས་བདེ་བ་འདོད་ཅིང་སྡུག་བསྔལ་མི་འདོད་ན་རང་གཅེས་པ་བཞིན་དུ་གཞན་ལ་གཅེས་པར་བཟུང་སྟེ་ཕན་སེམས་སྦྱོང་དགོས་སོ།།

༈ གཉིས་པ་བརྗེ་བ་བསྒོམ་པ་ནི།

རང་གཞན་གཉིས་གཅེས་པར་མཉམ་པ་ཙམ་གྱིས་མི་ཆོག་སྟེ། སྔར་རང་ཁོ་ན་གཅེས་པར་བཟུང་། གཞན་ཡལ་བར་དོར་བས་འཁོར་བའི་ཉེས་དམིགས་འདི་ཐམས་ཅད་བྱུང་བ་ཡིན། གཟོད་འཁོར་བ་ཕྲ་རགས་ཀྱི་ཉེས་དམིགས་ཟད་པར་སྤངས་པའི་བླ་མེད་བྱང་ཆུབ་འཐོབ་པ་ལ་སྲང་མདའི་མགོ་མཇུག་གཉིས་མཐོ་དམན་གོ་བཟློག་པ་བཞིན། སྔར་གཅེས་པར་འཛིན་རྒྱུ་དང་ཡལ་བར་འདོར་རྒྱུའི་བསམ་ཚུལ་དེ་གཉིས་གོ་ས་བརྗེས་ནས། རང་ཡལ་བར་དོར་ཞིང་གཞན་ཁོ་ན་གཅེས་པར་འཛིན་དགོས་སོ།།

རང་གཅེས་པར་བཟུང་ནས་རང་བདེ་བའི་ཐབས་སྒྲུབ་མོད། དེས་སྡུག་བསྔལ་ཐམས་ཅད་ཇི་ལྟར་སྐྱེད་སྙམ་ན། གཅེས་ཞིང་ཕན་པའི་ཟོལ་གྱིས། གནོད་པ་ཁོ་ན་སྒྲུབ་པ་ཡིན་ཏེ། རང་གཅེས་འཛིན་གྱི་དབང་གིས་རང་གི་ལུས་ལོངས་སྤྱོད། གཉེན་མཛའ་བཤེས། གཡོག་འཁོར་ཡུལ་ཁམས་སོགས་ཐམས་ཅད་ལ་ཞེན་ཆགས་སྐྱེད། དེ་ཇི་ཙམ་རྒྱ་ཆེ་བ་བཞིན་དེ་དག་ལ་གནོད་པ་དང་གནོད་ཀྱིས་དོགས་པའི་ཞེ་སྡང་ཕྲག་དོག་གཡོ་སྒྱུ་སོགས་ཉོན་མོངས་པ་མཐའ་དག་འདྲེན་ཞིང་། ལས་ངན་པ་སྣ་ཚོགས་བསགས་ཏེ་འཁོར་བའི་སྡུག་བསྔལ་ཐམས་ཅད་སྐྱེད་པ་ཡིན། སྟོང་གསུམ་གྱི་སྐྱེ་བོ་ཐམས་ཅད་དགྲར་ལངས་ཀྱང་དམྱལ་བའི་མེ་ནང་དུ་འཕེན་མི་ནུས། དམྱལ་བའི་མེ་ནང་དུ་འཁྲིད་མཁན་ཡང་རང་གཅེས་འཛིན་འདི་ཉིད་ཡིན་ཏེ། དང་པོར་དེའི་དབང་གིས་ལས་བསགས་པར་མ་ཟད། འཆི་ཁའི་ཚེའང་གྲང་བའི་སྣང་བ་བྱུང་སྟེ་རང་གཅེས་འཛིན་གྱིས་དྲོ་བར་འདོད་ནས་དམྱལ་བའི་མེ་ནང་དུ་འཇུག་ཚུལ་མདོ་སྡེ་ལས་གསུངས་པ་བཞིན་ནོ།།

དེར་མ་ཟད་རང་གཅེས་འཛིན་མངོན་གྱུར་ཤུགས་དྲག་པོ་ཞིག་སྐྱེས་ཕྱིན་ཕུང་ཁྲོལ་ཆེན་པོ་ཞིག་ངེས་པར་སྐྱེད་པས། བཀའ་གདམས་གོང་མ་རྣམས་རང་གཅེས་འཛིན་ལ་ཕུང་བྱེད་འུག་པའི་མགོ་ཅན་ཞེས་ལྟས་ངན་གྱི་མཐར་ཐུག་ཏུ་བརྩི་ཞིང་། བློ་སྦྱོང་མཚོན་ཆ་འཁོར་ལོ་ལས་ཀྱང་།

ཕུང་བྱེད་རྟོག་པའི་མགོ་ལ་ཆེམས་སེ་ཆེམ།། དགྲ་བདག་གཤེད་མའི་སྙིང་ལ་མཱ་ར་ཡ།།

ཞེས་ཕན་བདེའི་སྲོག་ལ་རྒོལ་བའི་བཤེད་མ་རང་གཅེས་འཛིན་ཡིན་པར་གསུངས་སོ།།

གཞན་གཅེས་འཛིན་གྱི་ཡོན་ཏན་བསམ་པ་ལ་སྔོན་དུ་ལས་འབྲས་ལ་ཡིད་ཆེས་རྙེད་དགོས་པས། དེའི་ཚུལ་ནི།

སྦྱིན་པས་ལོངས་སྤྱོད་ཁྲིམས་ཀྱིས་བདེ།།

ཞེས་སོགས་ལྟ་བུའི་ལུང་གིས་ཀྱང་སྒྲུབ་ཏུ་ཡོད་མོད། ལུང་ཙམ་མ་གཏོགས་དཔྱད་པས་ངེས་པ་མ་རྙེད་ན་ཡིད་ཆེས་བརྟན་པོ་མི་འབྱུང་བས། ད་ལྟ་མཐོང་བ་མངོན་གྱུར་ལའང་དཔྱིད་ས་བོན་ཕར་མ་བཏབ་ན་སྟོན་ལོ་ཏོག་ཚུར་སྡུད་རྒྱུ་མི་ཡོང་བ་དང་། ས་བོན་མ་ཚིག་མ་རུལ་བ་དགོས་ལ། དེའང་ནས་བཏབ་པ་ལས་ནས། གྲོ་བཏབ་པ་ལས་གྲོ་འབྱུང་བ་མ་གཏོགས་འཆོལ་ནས་མི་སྐྱེ་བ་བཞིན་དུ། གཞན་ལ་སྦྱིན་པ་བཏང་བ་ལས་ལོངས་སྤྱོད་འབྱུང་བ་དང་། ཚུལ་ཁྲིམས་བསྲུངས་ཏེ་རང་གི་སྒོ་གསུམ་གཙང་མར་བྱས་པས་བདེ་འགྲོའི་རྟེན་གཙང་མ་ཐོབ་པ་དང་། བཟོད་པ་བསྒོམས་ཏེ་སེམས་ཅན་ལ་གནོད་འཚེ་སྤངས་པས་སེམས་ཅན་གྱི་ཡིད་དུ་འོང་བའི་གཟུགས་མཛེས་པ་འགྲུབ་པ་སོགས་རྒྱུ་སྔོན་སོང་ལས་དེ་དང་རྗེས་སུ་མཐུན་པའི་འབྲས་བུ་འབྱུང་སྟེ། འདི་རང་སྡེ་ཐམས་ཅད་དང་། ཆད་སྨྲ་རྒྱང་འཕེན་པ་མ་གཏོགས་པའི་གཞན་སྡེ་རྣམས་ཀྱང་ཁ་མཐུན་ནོ།།

དེ་ལྟར་ན་སྦྱིན་པའི་ས་བོན་འདེབ་པ་ལ་ཞིང་ས་ལྟ་བུ་གཏོང་ཡུལ་གྱི་སེམས་ཅན་ལ་ལྟོས་ཤིང་། དེ་བཞིན་དུ་ཚུལ་ཁྲིམས་ཀྱིས་གཞན་གནོད་གཞི་བཅས་ལས་ལྡོག་པ་དང་། བཟོད་པས་དགེ་སྦྱོང་གི་ཆོས་བཞི་དང་དུ་ལེན་པ་སོགས་ཕྱིན་དྲུག་དང་ཚོགས་གཉིས་ཀྱི་སྤྱོད་པ་ཐམས་ཅད་གཞི་སེམས་ཅན་ལ་བརྟེན་ནས་འགྲུབ་དགོས་པས། འབྲས་བུ་ཆོས་གཟུགས་ཀྱི་སྐུ་གཉིས་ཀྱང་སེམས་ཅན་གྱི་བཀའ་དྲིན་ལ་བརྟེན་ནས་འཐོབ་དགོས་པར་ཤེས་སོ།།

མདོར་ན་སྟོན་པ་ཤཱཀྱའི་རྒྱལ་པོ་དང་རང་ཅག་རྣམས་གདོད་མ་ནས་མཆོག་དམན་དུ་གྲུབ་པ་ཞིག་མ་ཡིན་པར། སྔོན་འཁོར་བ་ཐོག་མ་མེད་པའི་དུས་ནས་ཁྱད་མེད་དུ་འཁོར་བར་འཁྱམས་ཏེ། རེས་འགའ་རང་ཅག་རྣམས་རྒྱལ་པོ་དང་ཁོང་དེའི་བྲན་བཞོན་པ་ཚུན་ཆད་དུ་གྱུར། རེས་འགའ་དེ་ལས་གོ་བཟློག་སྟེ་ཆུ་ཁོལ་བ་བཞིན་བླ་འོག་ཡང་ཡང་བརྗེས་པའི་མཚམས་ཤིག་ནས་ཁོང་ཐེག་པ་ཆེན་པོའི་རིགས་སད་དེ་གཞན་གཅེས་འཛིན་གྱི་བློ་སྐྱེས། ཁྱད་པར་དུ་རང་གི་ཟླ་བོས་དམྱལ་བར་མེའི་ཤིང་རྟ་འདྲེན་མ་ནུས་པར་ཡོད་པ་དེ་བརྩེ་བས་མ་བཟོད་པར་རང་གི་སྟེང་དུ་ལེན་པར་བརྩམས་པས་སྡིག་པ་ཟད་དེ་མཐོ་རིས་སུ་སྐྱེས། དེ་ནས་བཟུང་བདེ་ནས་བདེ་བར་འགྲོ་བའི་མགོ་ཚུགས་ཏེ་ད་ལྟ་དོན་གཉིས་ལྷུན་གྱིས་གྲུབ་པ་མ་ལུས་འགྲོ་བའི་མགོན་སྐྱབས་གཅིག་པུར་གྱུར་པ་འདི་བྱུང་ཡིན། རང་ཅག་རྣམས་རང་གཅེས་འཛིན་གྱི་དབང་དུ་གྱུར་ཏེ་འཇིག་རྟེན་ཁམས་ན་ཟས་ནོར་ལོངས་སྤྱོད་མངའ་ཐང་སྙན་གྲགས་སོགས་ཕུན་སུམ་ཚོགས་པ་མིག་གིས་མཐོང་ཚད་དང་རྣ་བས་ཐོས་ཚད་ཐམས་ཅད་རང་གཅིག་པུས་ཐོབ་ན་སྙམ་སྟེ་དེ་ཁོ་ན་འདོད་ཀྱང་། བདེ་སྐྱིད་ཐམས་ཅད་འཇའ་ཚོན་བསྙེགས་པ་བཞིན་ཇེ་རིང་དུ་སོང་། སྡིག་སྡུག་ཐམས་ཅད་ཉི་རྒས་ཀྱི་གྲིབ་སོ་བཞིན་ཚུར་འདུས། སྡུག་བསྔལ་མངོན་གྱུར་པ་དང་སྡུག་བསྔལ་གྱི་བག་ལ་ཉལ་སྣ་ཚོགས་པའི་ཁུར་གྱིས་ནོན་ཅིང་གར་འགྲོའི་གཏོལ་མེད་པ་འཁོར་བའི་གཏིང་རྡོར་གྱུར་ནས་ཤིན་ཏུ་ཉམ་ཐག་པ་འདི་བྱུང་བ་ཡིན། དེ་ལྟར་ན་རང་གཅེས་པར་བཟུང་བ་དང་གཞན་གཅེས་པར་བཟུང་བ་གཉིས་ཀྱི་གདམ་ག་མ་ནོར་བ་གང་ཡིན་དང་། སྐྱོན་ཡོན་གྱི་ཁྱད་པར་རྫོགས་པའི་སངས་རྒྱས་རྣམས་དང་རང་ཅག་ལ་མཆོག་དམན་གྱི་ཁྱད་ཅི་ཙམ་དོད་ཡོད་པ་འདིས་ཤེས་སོ།།

མངོན་པར་རྫོགས་པར་སངས་རྒྱས་ཞེས་པའང་ཉི་མའི་འོད་དང་འཇའ་ཚོན་བཞིན་གསལ་ལམ་མེ་བ། འོད་ལྷང་ངེ་བ་ཞིག་ཏུ་སོང་ནས་ནམ་མཁའི་དཀྱིལ་ན་འཇའ་གུར་འཁྱིལ་ལེ་བཞུགས་ཡོད་པ་ལྟ་བུ་ཞིག་ཏུ་ཕལ་ཆེར་གྱིས་གོ་འདུག་པ་དོན་མེད། གཞན་ཕན་གྱི་བསམ་པ་ཡོངས་སུ་རྫོགས་པ་རང་ལ་སངས་རྒྱས་སུ་བཞག་པ་ཡིན་ཏེ། སྡུད་པ་ལས།

དེ་བཞིན་བྱང་ཆུབ་ཆེད་དུ་བྱང་ཆུབ་མཆོག་ཞུགས་པ།། འགྲོ་བ་ཀུན་ལ་བྲན་གྱུར་བཞིན་དུ་གནས་པར་བྱ།།

ཞེས་འགྲོ་བའི་དོན་ཁོ་ནར་གཞོལ་བའི་རྒྱལ་སྲས་ཀྱི་སྤྱོད་པ་མཐར་ཐུག་པ་ལ་སྐད་ཅིག་མའི་སྦྱོར་བར་གསུངས་ཤིང་།

བདག་གི་བདེ་བ་བཏང་ནས་རེ་བ་མེད་སེམས་ཀྱིས།།

སེམས་ཅན་གཞན་གྱི་དགོས་ལ་ཉིན་མཚན་མངོན་པར་བརྩོན།། བུ་གཅིག་པ་ལ་མ་ནི་རིམ་གྲོ་བྱེད་པ་ལྟར།།

བསམ་པ་ཐག་པས་རྣམ་པར་སྐྱོ་མེད་གནས་པར་བྱ།།

ཞེས་བརྒྱད་པ་ཆོས་སྐུའི་དོན་ཡང་གཏོང་ལེན་མཐར་ཕྱིན་ཏེ་འཁོར་བ་མ་སྟོངས་བར་དུ་ལྷུན་གྱིས་གྲུབ་པའི་འཕྲིན་ལས་ཀྱི་སྒོ་ནས་འགྲོ་བའི་དོན་ལ་སྐྱོ་བ་མེད་པར་བཞུགས་པ་གཙང་བདེ་རྟག་བདག་དམ་པའི་ཕ་རོལ་ཏུ་ཕྱིན་པ་ལ་གསུངས་སོ། །སྡུད་འགྲེལ་གཞན་ལ་སྣ་ཚོགས་ཡོད་ཀྱང་། སྐབས་ཕྱི་མ་གཉིས་མཚམས་འབྱེད་ཚུལ་སློབ་དཔོན་གྱིས་འདི་ལྟར་མཛད་པ་ཤིན་ཏུ་ངོ་མཚར་ཆེའོ།།

དེ་ལྟར་རང་གཅེས་འཛིན་རྒུད་པ་ཀུན་གྱི་འབྱུང་གནས་དང་། གཞན་གཅེས་འཛིན་ཡོན་ཏན་ཀུན་གྱི་གཏེར་དུ་མཐོང་བཞིན་དུ་ཐར་པའི་དགའ་ཚལ་ལ་རྒྱབ་ཀྱིས་ཕྱོགས་ནས་དམྱལ་བའི་མེ་འོབས་སུ་མཆོང་ན་གདོན་གྱིས་བརླམས་ཏེ་སྨྱོས་པ་དང་སྙིང་ལ་བདུད་ཞུགས་པ་ཡིན་པས། རྒྱལ་བ་སྲས་དང་བཅས་པ་ལ་གདུང་དབྱངས་དྲག་པོས་འོ་དོད་ཀྱིས་བོས་ཏེ། བདག་རྣམས་ཀུན་ཏུ་ཕུང་བར་བྱེད་པའི་དགྲ་བོ་གདུག་པ་ཅན་འདི་ཐལ་བར་བརླག་པར་མཛོད་ཅིག་ཅེས་གསོལ་བ་བཏབ་པ་ན། དེ་དག་གི་མཁྱེན་བརྩེ་ནུས་གསུམ་གྱི་སྤྲིན་ཕུང་འཁྲིགས་པ་ལས་དོན་དམ་པ་བྱང་ཆུབ་ཀྱི་སེམས་སྟོང་ཉིད་རྟོགས་པའི་ཡེ་ཤེས་ཀྱི་ངོ་བོ་གནམ་ལྕགས་འབར་བའི་ཐོག་མདའ་བརྒྱུད་མར་སྤྲོས་ཏེ་བདག་འཛིན་འགོང་པོ་ཐལ་བའི་རྡུལ་ཕྲན་བཞིན་དུ་བརླག།

ཡང་ཀུན་རྫོབ་བྱང་ཆུབ་ཀྱི་སེམས་བྱམས་སྙིང་རྗེའི་རང་བཞིན་གྱི་བདུད་རྩིའི་རྒྱུན་བབ་སྟེ་རང་གི་ཤེས་རྒྱུད་ལ་ཞུགས་པས་བདག་གཞན་བརྗེ་བ་བྱང་ཆུབ་ཀྱི་སེམས་ཀྱི་ངོ་བོར་ལྷན་གྱིས་སོང་། དེ་དག་གི་ཐུགས་རྗེ་བྱིན་རླབས་དང་རང་གི་རླུང་སེམས་དབྱེར་མེད་དུ་འདྲེས་པས་གཏོང་ལེན་སོགས་ཇི་ལྟར་འདོད་པ་བཞིན་བྱེད་པ་ལ་ལས་སུ་རུང་ཞིང་། ནམ་མཁའི་མཐའ་ཁྱབ་ཏུ་སྤྲོས་ནས་སེམས་ཅན་ཐམས་ཅད་ཀྱི་དོན་སྒྲུབ་པའི་ནུས་པ་ཅན་དུ་གྱུར་ཏེ། རང་གི་བདེ་དགེ་ཐམས་ཅད་སེམས་ཅན་སོ་སོ་ལ་དོན་དུ་གང་འགྱུར་གྱིས་ཟས་གོས་གནས་མལ། གྲོགས་མཛའ་བཤེས། ཆོས་སྟོན་པའི་སློབ་དཔོན་སོགས་རྣམ་པ་སྣ་ཚོགས་སུ་གྱུར་ནས་མངོན་མཐོ་ངེས་ལེགས་ཀྱི་བདེ་བ་ལ་བཀོད། དེ་དག་གི་སྡིག་སྡུག་ལས་ཉོན་བག་ཆགས་དང་བཅས་པ་དབུགས་རྔུབ་པ་དང་ལྷན་དུ་ཚུར་དྲངས་ཏེ་རང་གི་སེམས་སྟེང་དུ་སྤུང་བའི་དམིགས་པ་སོགས་གཏོང་ལེན་གཉིས་པོ་སྤེལ་མར་བྱའོ།།

འདི་ནི་ཧལ་ཧ་ཁུ་རེ་ཆེན་མོའི་གྲྭ་པ་དད་བརྩོན་ལྡན་པ་དགེ་སློང་དཀོན་མཆོག་སངས་རྒྱས་ཀྱིས་བདག་གཞན་མཉམ་བརྗེ་སྒོམ་ཚུལ་ཞིག་དགོས་ཟེར་བར། སྤྱོད་འཇུག་གི་བསམ་གཏན་ལེའུ་བཞིན་ལུས་བྱ་ཁྱིའི་ཟས་ལ་གཅེས་པར་བྱེད་དོན་མེད་པས་གྲུའི་བློ་བཞག་སྟེ་སྙིང་པོ་ལེན་ཚུལ་དང་། རང་གི་ཕུན་ཚོགས་ལ་ཕྲག་དོག་འགྲན་སེམས་སྒོམ་ཚུལ་སོགས་དམིགས་སྐོར་མི་འདྲ་བ་མང་ཞིང་། སང་གི་སྡུག་བསྔལ་དེ་རིང་ལ་ལེན་པ་སོགས་བློ་སྦྱོང་བའི་མན་ངག་གི་སྐྱོང་ཚུལ་དུ་མ་ཡོད་ཀྱང་། འདི་ནི་ཤར་སྒོམ་ཐུན་གཅིག་གི་སྐྱོང་ཚུལ་ཙམ་ཞིག་གྱུ་རུ་ལུགས་སུ། ༧བཙུན་པ་དཀོན་མཆོག་བསྟན་པའི་སྒྲོན་མེས་འཕྲལ་དུ་སྦྱར་བའི་ཡི་གེ་པ་ནི་སྔགས་རམ་པ་དཀོན་མཆོག་ཀུན་དགའོ།། །།