Zhi ba lha'i sems bskyed/Full text

ཞི་བ་ལྷའི་སེམས་བསྐྱེད།

zhi ba lha'i sems bskyed

Śāntideva's Mind Generation

FULL TEXT

Descriptionངོ་སྤྲོད།

This text is the procedure for generating bodhicitta according to the tradition of Śāntideva, which comes from the lineage of Mañjuśrī. Particularly, it is based on Śāntideva's Bodhicaryāvatāra. The whole procedure is divided into two main topics: (1) preliminary, and (2) the actual procedure. Type of Commentary: How to generate bodhicitta according to Śāntideva's tradition as found in the Bodhicaryāvatāra.
Length: 8
Tradition: Kadam

བྱང་ཆུབ་ཏུ་སེམས་བསྐྱེད་པ་ལ་སྲོལ་གཉིས་ལས། འདི་ནི་འཕགས་པ་འཇམ་དཔལ་ནས་བརྒྱུད་པ་སློབ་དཔོན་ཞི་བ་ལྷའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་བཀའ་སྲོལ་ལྟར་གྱི་སེམས་བསྐྱེད་ཀྱི་ཆོ་ག་འཐུས་ཚང་ཞིག་སྟེ། དེ་ཡང་སྦྱོར་བ་དང་། དངོས་གཞི། མཇུག་སྟེ་ས་བཅད་རིམ་པ་གསུམ་དུ་བསྡུས་པ་ཞིག་གོ།

Reference	Skyo ston smon lam tshul khrims (སྐྱོ་སྟོན་སྨོན་ལམ་ཚུལ་ཁྲིམས་). zhi ba lha'i sems bskyed [ཞི་བ་ལྷའི་སེམས་བསྐྱེད།]. [Śāntideva's Mind Generation].
People	Kyotön Mönlam Tsultrim

Tibetan

[edit]

Source	Inputted by Khenpo Tamphel from BDRC MW1PD89084_FADE6B
Date	2024-06-10
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

༄༅༅། །ཞི་བ་ལྷའི་སེམས་བསྐྱེད་བཞུགས་སོ། །

བླ་མ་རྣམས་ལ་གུས་པས་ཕྱག་འཚལ་ལོ། །

བྱང་ཆུབ་ཏུ་སེམས་བསྐྱེད་པ་ལ་སྲོལ་གཉིས་ལས།འཕགས་པ་འཇམ་དཔལ་ནས་བརྒྱུད་པ་སློབ་དཔོན་ཞི་བ་ལྷའི་ལུགས། དེའི་ནང་ནས་གཞུང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ལུགས་འདི་ལ་

སྔོན་དུ་འགྲོ་བ་དང་ཆོ་ག་དངོས་གཉིས་

ལས། དང་པོ་བླ་མ་ལ་གསོལ་བ་གདབ་པ་དང་། སྐུ་གསུང་ཐུགས་ཀྱི་རྟེན་གྱི་བཀོད་པ་ལེགས་པ་དང་། ཅི་འབྱོར་པའི་མཆོད་པ་བཤམ་པ་དང་། བླ་མ་དང་དགེ་འདུན་ལ་བསྙེན་བཀུར་ཞིང་ཚོགས་བསག་པ་དང་། བྱམས་སྙིང་རྗེ་བྱང་ཆུབ་ཀྱི་སེམས་སྦྱང་བའོ། །

གཉིས་པ་མཆོ་ག་དངོས་ལ་སྦྱོར་དངོས་མཇུག་གསུམ་ལས་དང་པོ་

བླ་མ་ལ་མེ་ཏོག་ཕུལ་ཞིང་། བླ་མས་སེམས་བསྐྱེད་ཀྱི་ཕན་ཡོན་བརྗོད་པ་དང་། གགས་(བག་ཆགས་)ཀྱི་སྒྲིབ་པ་སྦྱང་པ་དང་། རྗེས་སུ་མཐུན་པའི་བློ་སྦྱང་པ་དང་གསུམ་བརྗོད་དགོས་པའི་

དང་པོ་ནི།

འོ་སྐོལ་རང་ཐམས་ཅད་དལ་འབྱོར་གྱི་སྙིང་པོ་ལོངས་པར་བྱེད་ཚལ། དེ་ཡང་དལ་འབྱོར་གྱི་ཞིང་ས་གཤིན་པ་ལ་རྫོགས་པའི་བྱང་ཆུབ་ཀྱི་ས་བོན་དྲུང་པོ་ཐེབས་ན་དལ་འབྱོར་དོན་ཡོད་པ་བྱ་བ་ལགས། དེ་ལས་གཞན་པ་མངོན་མཐོ་ཉན་རང་གི་བྱང་ཆུབ་ཐོབ་ཀྱང་དལ་འབྱོར་ཆུད་གསན་པ་བྱ་བ་ལགས་གསུང། དེས་ན་རྫོགས་པའི་བྱང་ཆུབ་ཀྱི་རྒྱུ་སེམས་བསྐྱེད་པ་འགལ་ཆེ། སེམས་མ་སྐྱེད་ན་རྩ་དང་རླུང་དང་འཁོར་ལོ་དང་ལྷ་སྐུ་ལ་སོགས་པ་གང་བསྒོམས་ཀྱང་སངས་རྒྱས་ཐོབ་པ་མི་སྲིད་ཏེ། འ་སྐོལ་རང་གི་སྟོན་པས་ཀྱང་ཐུབ་པ་ཆེན་པོའི་དྲུང་དུ།

གང་ཚེ་ང་ཉིད་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་ཆེན་ལ། །འཇམ་གང་ཞིག་ནི་དབུལ་བ་བྱས་ནས་ཀྱང་། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །

ཅེས་ཐུགས་བསྐྱེད་པ་ཡིན་ནོ། །

སེམས་དེ་སྐྱེས་ན་ཕན་ཡོན་ནི།

བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་ནི་དེ་བས་ལྷག་པར་འགྱུར། །

ཞེས་པ་དང་།

བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཤེས་བརྗོད་བྱ་ཞིང་། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །

ཞེས་གསུངས་པས་ཡིད་ཆེས་པར་བྱའོ། །

ཉིས་པ་

གགས་(བག་ཆགས་)ཀྱི་སྒྲིབ་པ་མ་སྦྱངས་ན་མི་སྐྱེ་སྟེ། གོས་དྲི་མ་ཅན་ལ་མཚོན་རྩིས་མི་འཆགས་པ་དང་འདྲ་བས་སྒྲིབ་པ་སྦྱང་དགོས་ལ། དེའི་གཉེན་པོར་ཡན་ལག་བདུན་པ་སྐྱབས་འགྲོ་དང་བཅས་པ་བྱེད་དགོས་པས།

དང་པོར་ཕྱག་བྱ་བ་ནི།

སངས་རྒྱས་ཐམས་ཅད་འདུས་པའི་སྐུ། །རྡོ་རྗེ་འཛིན་པའི་ངོ་བོ་ཉིད། །དཀོན་མཆོག་གསུམ་གྱི་རྩ་བ་སྟེ། །བླ་མ་རྣམས་ལ་ཕྱག་འཚལ་ལོ། །མགོན་པོ་ཐུགས་རྗེ་ཆེས་ལྡན་པ། །ཐམས་ཅད་མཁྱེན་པའི་སྟོན་པ་པོ། །བསོད་ནམས་རྒྱ་མཚོ་ཡོན་ཏན་གཞི། །དེ་བཞིན་གཤེགས་ལ་ཕྱག་འཚལ་ལོ། །དག་པ་འདོད་ཆགས་འབྲལ་བའི་རྒྱུ། །དགེ་བ་ངན་སོང་ལས་སྒྲོལ་ཞིང་། །གཅིག་ཏུ་དོན་དམ་མཆོག་གྱུར་པ། །ཞི་གྱུར་ཆོས་ལ་ཕྱག་འཚལ་ལོ། །གྲོལ་ནས་གྲོལ་བའི་ལམ་ཡང་སྟོན། །བསླབ་པ་དག་ལ་རབ་ཏུ་གུས། །ཞིང་གི་དམ་པ་ཡོན་ཏན་ལྡན། །དགེ་འདུན་ལ་ཡང་ཕྱག་འཚལ་ལོ། །

གཉིས་པ་མཆོད་པ་དབུལ་བ་ནི་

ལྔ་ལས་དང་པོ་རྫས་རིམ་པར་བཤམས་པའི་མཆོད་པ། ཡོན་ཆབ་མེ་ཏོག་བདུག་སྤོས་མར་མེ་བྱུག་པ་ཞལ་ཟས་རོལ་མོ་ལ་སོགས་བྱིན་གྱི་རླབས་ལ་དབུལ།

རིན་ཆེན་སེམས་དེ་གཟུང་བར་བྱ་བའི་ཕྱིར། །དེ་བཞིན་གཤེགས་པ་རྣམས་དང་དམ་པའི་ཆོས། །དཀོན་མཆོག་དྲི་མ་མེད་དང་སངས་རྒྱས་སྲས། །ཡོན་ཏན་རྒྱ་མཚོ་རྣམས་ལ་ལེགས་པར་མཆོད། །

ཅེས་དབུལ་ལོ། །

གཉིས་པ་བདག་པོས་མ་བཟུང་བའི་མཆོད་པ་ནི།

མེ་ཏོག་འབྲས་བུ་ཇི་སྙེད་ཡོད་པ་དང་། །སྨན་གྱི་རྣམ་པ་གང་དག་ཡོད་པ་དང་། །འཇིག་རྟེན་རིན་ཆེན་ཇི་སྙེད་ཡོད་པ་དང་། །ཆུ་གཙང་ཡིད་དུ་འོང་བ་ཅི་ཡོད་དང་། །རིན་ཆེན་རི་བོ་དང་ནི་དེ་བཞིན་དུ། །ནགས་ཚལ་ས་ཕྱོགས་དབེན་ཞིང་ཉམས་དགའ་དང་། །ལྗོན་ཤིང་མེ་ཏོག་རྒྱན་སྤྲས་སྤུད་པ་དང་། །ཤིང་གང་འབྲས་བཟང་ཡལ་ག་དུད་པ་དང་། །ལྷ་སོགས་འཇིག་རྟེན་ན་ཡང་དྲི་དང་ནི། །སྤོས་དང་དཔག་བསམ་ཤིང་དང་རིན་ཆེན་ཤིང་། །མཚོ་དང་རྫིང་བུ་པདྨས་བརྒྱན་པ་དག །ངང་པ་ཤིན་ཏུ་སྐད་སྙན་ཡིད་འོང་དང། །མ་རྨོས་འཁྲུངས་པའི་ལོ་ཏོག་རྣམ་པ་དང་། །གཞན་ཡང་མཆོད་པར་འོས་པའི་རྒྱན་རྣམས་ནི། །ནམ་མཁའ་རབ་འབྱམས་ཁམས་ཀྱི་མཐས་གཏུགས་པ། །ཡོངས་སུ་བཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་འབུལ་ན། །ཡོན་གནས་དམ་པ་ཐུགས་རྗེ་ཆེ་རྣམས་ཀྱིས། །བདག་ལ་བརྩེར་དགོངས་བདག་གི་དེ་དག་བཞེས། །བདག་ནི་བསོད་ནམས་མི་ལྡན་བཀྲེན་ཆེན་ཏེ། །མཆོད་པའི་ནོར་གཞན་བདག་ལ་ཅང་མ་མཆིས། །དེས་ན་གཞན་དོན་དགོངས་པའི་མགོན་གྱིས་ནི། །བདག་གི་དོན་སླད་ཉིད་ཀྱི་མཐུས་བཞེས་ཤིག །

གསུམ་པ་ཀུན་ཏུ་བཟང་པོ་ཡིད་ཀྱི་མཆོད་པ་ནི།

མདུན་གྱི་ནམ་མཁར་རིན་པོ་ཆེའི་གཞལ་ཡས་ཁང་ཆེན་པོ་ཅིག་དུ། རིན་པོ་ཆེའི་ཁྲིའི་གདན་བཟང་པོའི་སྟེང་དུ་བླ་མ་དང་སངས་རྒྱས་དང་བྱང་ཆུབ་སེམས་པ་དཔག་ཏུ་མེད་པ་བཞུགས་པ་ལ་མཆོད་པ་རྒྱ་ཆེ་ཞིང་བཟང་པས་ཞེན་པ་རྫོགས་པར་མཆོད་པར་བསམ་མོ། །

བཞི་པ་སྔགས་དང་ཏིང་ངེ་འཛིན་གྱི་མཆོད་པ་ནི།

སངས་རྒྱས་དང་བྱང་ཆུབ་སེམས་པའི་སྤྱན་སྔར་མཆོད་པའི་སྤྲིན་གྱི་ཆར་རྒྱུན་མི་ཆད་པར་བསམས་ལ།

ན་མོ་རཏ་ན་ཏྲ་ཡ་ཡཱ། ན་མོ་བ་ག་བ་ཏེ། བཛྲ་ས་ར་པྲ་མར་ཏ་ནི། ཏ་ཐ་ག་ཏ་ཡཱ། ཨ་ར་ཧ་ཏེ། སམྱག་སཾ་བུད་དྷ་ཡཱ། ཏད་ཡ་ཐཱ། ཨཱོཾ་བཛྲེ་བཛྲེ། མ་ཧ་བཛྲེ། མ་ཧ་ཏེ་ཙ་བཛྲེ། མ་ཧ་བཱིདྱ་བཛྲེ། མ་ཧ་བོ་དྷི་ཙི་ཏ་བཛྲེ། མ་ཧ་བོ་དྷི་མན་ཏྲོ་པ་སང་ཀྲ་ན་བཛྲེ། སརྦ་ཀརྨ་ཨ་བ་ར་ཎི་བོ་ཤོད་དྷ་ནི་བཛྲ་སྭ་ཧཱ།

ཞེས་ལན་གསུམ་བཟླའོ། །

ལྔ་པ་བདག་གི་ལུས་ཉེ་གཡོག་ཏུ་དབུལ་བ་ནི།

རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །སེམས་དཔའ་མཆོག་རྣམས་བདག་ནི་ཡོངས་བཞེས་ཤིག །གུས་པས་ཁྱེད་ཀྱི་འབངས་སུ་མཆི་བར་བགྱི། །བདག་ནི་ཁྱེད་ཀྱིས་ཡོངས་སུ་བཟུང་བས་ན། །སྲིད་ན་མི་འཇིགས་སེམས་ཅན་ཕན་པར་བགྱི། །སྔོན་གྱི་སྡིག་ལས་ཡང་དག་འདའ་བགྱིད་ཅིང་། །སྡིག་པ་གཞན་ཡང་སླན་ཆད་མི་བགྱིད་དོ། །

སྤྱིའི་གསུམ་པ་སྐྱབས་སུ་འགྲོ་བ་ནི།

སེམས་ཅན་ཐམས་ཅད་ཀྱི་དོན་དུ་དུས་འདི་ནས་བྱང་ཆུབ་སྙིང་པོར་མཆིས་ཀྱི་བར་དུ་ཐེག་པ་ཆེན་པོའི་དཀོན་མཆོག་སྐྱབས་སུ་འགྲོ་སྙམ་པ་བྱེད་ལ།

བྱང་ཆུབ་སྙིང་པོར་མཆིས་ཀྱི་བར། །སངས་རྒྱས་རྣམས་ལ་སྐྱབས་སུ་མཆི། །ཆོས་དང་བྱང་ཆུབ་སེམས་དཔའ་ཡི། །ཚོགས་ལའང་དེ་བཞིན་སྐྱབས་སུ་མཆི། །

ཅེས་ལན་གསུམ་བྱའོ། །

བཞི་པ་སྡིག་པ་བཤགས་པ་ནི།

བདག་དང་སེམས་ཅན་ཐམས་ཅད་ཀྱི་ཐོག་མ་མེད་པ་ནས་ཀྱི་སྡིག་པ་ཐམས་ཅད་སྙིང་ཐག་པ་ནས་བཤགས་པར་བྱ་སྙམ་དུ་བསམས་ལ།

ཐོག་མ་མེད་ལྡན་འཁོར་བ་ནས། །ཚེ་རབས་འདིའམ་གཞན་དག་ཏུ། །བདག་གིས་མ་འཚལ་སྡིག་བགྱིས་པའམ། །བགྱིད་དུ་སྩལ་བ་ཉིད་དང་ནི། །གཏི་མུག་འཁྲུལ་པས་བདག་ནོན་ཏེ། །རྗེས་སུ་ཡི་རང་གང་བགྱིས་པ། །ནོངས་པ་དེ་ནི་མཐོང་བགྱིས་ནས། །བསམ་པ་ཐག་པས་མགོན་ལ་བཤགས། །

ཅེས་བྱའོ། །

ལྔ་པ་རྗེས་སུ་ཡི་རང་བ་ནི།

དབུལ་པོས་གཏེར་རྙེད་པ་ལྟ་བུའི་བསམ་པས།

སྐྱོབ་པ་རྣམས་ཀྱི་བྱང་ཆུབ་དང་། །རྒྱལ་སྲས་ས་ལ་ཡི་རང་ངོ་། །སེམས་ཅན་ཐམས་ཅད་ཕན་མཛད་པའི། །ཐུགས་བསྐྱེད་དགེ་བ་རྒྱ་མཚོ་དང་། །སེམས་ཅན་ཕན་པར་མཛད་པ་ལ། །དགའ་བས་རྗེས་སུ་ཡི་རང་ངོ་། །

ཅེས་བྱའོ། །

དྲུག་པ་ཆོས་ཀྱི་འཁོར་ལོ་བསྐོར་བར་བསྐུལ་བ་ནི།

ཕྱོགས་བཅུའི་སངས་རྒྱས་ཆོས་མི་གསུང་པ་རྣམས་ལ་གསེར་གྱི་འཁོར་ལོ་རྩིབས་སྟོང་ལྡན་པ་ཕུལ་ལ་ཆོས་གསུང་བར་ཞུ་ཞེས་པ།

ཕྱོགས་རྣམས་ཀུན་གྱི་སངས་རྒྱས་ལ། །ཐལ་མོ་སྦྱར་ཏེ་གསོལ་བ་ནི། །སེམས་ཅན་སྡུག་བསྔལ་མུན་འཐོམས་ལ། །ཐལ་མོ་སྦྱར་ཏེ་གསོལ་བ་ན། །ཆོས་ཀྱི་སྒྲོན་མེ་སྤར་དུ་གསོལ། །

བདུན་པ་མྱ་ངན་ལས་མི་འདའ་བར་འཁོར་བ་མ་སྟོངས་བར་དུ་ཞུགས་པར་ཞུ་བ་ནི།

རྒྱལ་བ་མྱ་ངན་འདའ་བཞེད་ལ། །ཐལ་མོ་སྦྱར་ཏེ་གསོལ་བ་ནི། །འགྲོ་འདི་མདོངས་(ལྡོངས་)པར་མི་དགོད་ཅིང་། །བསྐལ་པ་གྲངས་མེད་བཞུགས་པར་གསོལ། །

ཞེས་པའོ། །

བརྒྱད་པ་བསྔོ་བ་ནི།

བདག་གིས་དུས་གསུམ་དུ་བསགས་པ་དགེ་བ་འདིས་འཁོར་བའི་རྒྱ་མཚོ་སྐམས་པར་གྱུར་ཅིག་སྙམ་དུ་བསམས་ལ།

དེ་ལྟར་འདི་དག་ཀུན་བྱས་ཏེ། །དགེ་བ་བདག་གིས་བསགས་པ་གང་། །དེས་ནི་སེམས་ཅན་ཐམས་ཅད་ཀྱི། །སྡུག་བསྔལ་ཐམས་ཅད་བསལ་བར་ཤོག།

ཅེས་ལན་གསུམ་བྱའོ། །

སྤྱིའི་གསུམ་པ་རྗེས་མཐུན་པའི་བློ་སྦྱང་བ་ནི།

བདག་གི་ལུས་ལོངས་སྤྱོད་དགེ་བ་ཐམས་ཅད་སེམས་ཅན་གྱི་དོན་དུ་བཏང་སྙམ་དུ་བསམས་ལ།

ལུས་དང་དེ་བཞིན་ལོངས་སྤྱོད་དང་། །དུས་གསུམ་དགེ་བ་ཐམས་ཅད་ཀྱང་། །སེམས་ཅན་ཀུན་གྱི་དོན་བསྒྲུབ་ཕྱིར། །ཕངས་པ་མེད་པར་གཏང་བར་བྱ། །

ཅེས་པ་དང་།

འཁོར་བ་མ་སྟོངས་ཀྱི་བར་དུ་དུས་རྟག་ཏུ་སེམས་ཅན་གྱི་དོན་མི་འཆད་པར་བྱ་སྙམ་དུ་བསམ་པ་ནི།

ས་སོགས་འབྱུང་བ་ཆེན་པོ་དང་། །ནམ་མཁའ་བཞིན་དུ་རྟག་པར་ཡང་། །སེམས་ཅན་དཔག་ཏུ་མེད་པ་ཡི། །རྣམ་མང་ཉེར་འཚོའི་གཞིར་ཡང་ཤོག །དེ་བཞིན་ནམ་མཁའི་མཐས་གཏུགས་པའི། །སེམས་ཅན་ཁམས་ལ་རྣམ་ཀུན་ཏུ། །ཐམས་ཅད་མྱ་ངན་འདས་བར་དུ། །བདག་ནི་ཉེར་འཚོའི་གཞིར་ཡང་ཤོག།

ཅེས་པ་དང་།

གཞན་ཡང་སེམས་ཅན་ཐམས་ཅད་ཀྱིས་ཕ་མགཉེན་བཤེས་བྱས་ཤིང་།བྱས་རེས་ཀྱིས་ཕན་བཏགས་གནོད་པ་ལས་སྐྱབས་པའི་དྲིན་ཅན་ཡིན་ཏེ།

གང་གི་ལྟོར་མ་ཉལ་བའི་སེམས་ཅན་དེ་ཡང་མེད། །གང་དུ་མ་གནས་ནམ་མཁའི་ཁམས་ཀྱང་མེད། །

ཅེས་པ་དང་།

མའི་ཐུག་མཐའ་རྒྱ་ཤུག་ཚིག་གུ་ཙམ། །རིལ་ལུ་བགྲངས་ཀྱང་ས་ཡིས་ལང་མི་འགྱུར། །

ཞེས་པས། དེས་ན་སེམས་ཅན་ཐམས་ཅད་བདེ་བ་དང་ཕྲད་པར་འདོད་པའི་བྱམས་པ། ་སྡུག་བསྔལ་དང་བྲལ་བར་འདོད་པའི་སྙིང་རྗེ་དེ་གཉིས་བདག་གིས་བྱ་སྙམ་པ་བྱམས་སྙིང་རྗེ་ཆེན་པོ། དེའི་ཆེད་དུ་སངས་རྒྱས་ཐོབ་པར་བྱ་སྙམ་པ་སྨོན་པ་སེམས་བསྐྱེད། དེའི་ཆེད་དུ་བྱང་ཆུབ་སེམས་པའི་བསླབ་པ་བླངས་ནས་ནན་ཏན་གྱིས་གྲུབ་སྙམ་པ་འཇུག་པ་སེམས་བསྐྱེད། སངས་རྒྱས་ཐོབ་ནས་ཀྱང་འཁོར་བ་མ་སྟོངས་ཀྱི་བར་དུ་སེམས་ཅན་གྱི་དོན་བྱ། དེའི་ཆེད་དུ་སྨོན་འཇུག་སེམས་བསྐྱེད་བླང་སྙམ་དུ་བསམ། དེཡང་བླ་མ་ལ་སངས་རྒྱས་ཀྱི་འདུ་ཤེས། སེམས་ཅན་ལ་སྙིང་རྗེའི་འདུ་ཤེས། རང་ལ་རྨི་ལམ་སྒྱུ་མ་ལྟ་བའི་འདུ་ཤེས་དྲག་པོས་བླང་བ་ནི།

ཇི་ལྟར་སྔོན་གྱི་བདེ་གཤེགས་ཀྱིས། །བྱང་ཆུབ་ཐུགས་ནི་བསྐྱེད་པ་དང་། །བྱང་ཆུབ་སེམས་པའི་བསླབ་པ་ལ། །དེ་དག་རིམ་བཞིན་གནས་པ་ལྟར། །དེ་བཞིན་འགྲོ་ལ་ཕན་དོན་དུ། །བྱང་ཆུབ་སེམས་ནི་བསྐྱེད་བགྱི་ཞིང་། །དེ་བཞིན་དུ་ནི་བསླབ་པ་ལའང་། །རིམ་པ་བཞིན་དུ་བསླབ་པར་གྱི། །

ཅེས་པ་བར་དུ་བློ་སྦྱང་ཞིང་ལན་གསུམ་གྱིས་བླང་ངོ་། །

གསུམ་པ་མཇུག་ཏུ་བརྗོད་པ་ནི། གཟེངས་སྟོད་པ་དང་། བསླབ་བྱ་རགས་པ་བརྗོད་པ་དང་། གཏང་རག་གི་ཕྱག་བྱ་བ་གསུམ་ལས། དང་པོ།

ལོང་བས་ཕྱག་དར་ཕུང་པོ་ལས་ནོར་བུ་རིན་བུ་རྙེད་པ་བས་ཀྱང་དཀའ་བའི་གནས་ནས་རྙེད་པ་ཡིན་པས་དགའ་བ་བསྒོམ་དགོས་ཏེ།

དེང་དུས་བདག་ཚེ་འབྲས་བུ་ཡོད། །མི་ཡི་སྲིད་པ་ལེགས་པར་ཐོབ། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དེང་བདག་གྱུར། །

ཞེས་བྱའོ། །

གཉིས་པ་

སྨོན་འཇུག་གི་བསླབ་བྱ་ལ་སྒྲུབ་པའི་སྒོ་ནས་བསླབ་ཅིང་དགག་པའི་སྒོ་ནས་(རྩ་བའི་ལྟུང་བར་གྱུ?)ར་པ་བཅོ་བརྒྱད་ཀྱིས་མ་གོས་ཤིང་། ཉེས་བྱས་རྣམས་ཀྱིས་མ་རེག་པར་བྱ་བའི་དོན་དུ་བསྒྲིམ་དགོས་ཏེ།

ད་ནི་བདག་གིས་ཅི་ནས་ཀྱང་། །རིགས་དང་མཐུན་པའི་ལས་བརྩམ་སྟེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ། །

ཅེས་གསུངས་སོ། །

གསུམ་པ་

བླ་མ་ཕྱག་ཕུལ་བཀའ་དྲིན་ཆེ་ལགས་སོ་ཞེས་བྱ་ཞིང་། དཀོན་མཆོག་ལ་མཆོད་པ་རྒྱ་ཆེན་པོ་བྱའོ།། །།

སློབ་དཔོན་ཞི་བ་ལྷའི་ལུགས་ཀྱི་སེམས་བསྐྱེད་ཀྱི་ཆོ་ག་མདོར་བསྡུས་པ། བཙུན་པ་སྨོན་ལམ་ཚུལ་གྱིས་ཡི་གེར་བཀོད་པ་རྫོགས་སོ། །དེ་ལ་བཙུན་པ་ཟེའུས་ཞུས་ཤིང་སྣར་ཐང་དུ་བྲིས་པའོ། །ཨཱི་ཐཱི། །ཞུས་དག་གོ།