Sgom rim bar pa'i 'grel pa gnad kyi zla zer/Full text

སྒོམ་རིམ་བར་པའི་འགྲེལ་པ་གནད་ཀྱི་ཟླ་ཟེར།

sgom rim bar pa'i 'grel pa gnad kyi zla zer

Commentary on the Middle Bhāvanākrama: Moonbeams on the Crucial Points

FULL TEXT

Descriptionངོ་སྤྲོད།

ཡོ་བྱད་འཐོན་གྲབས་ཡོད། ཐུགས་ལྷོད་མཛོད།
Add Tibetan Description to DRL

Reference	sgom rim bar pa'i 'grel pa gnad kyi zla zer [སྒོམ་རིམ་བར་པའི་འགྲེལ་པ་གནད་ཀྱི་ཟླ་ཟེར།]. [Commentary on the Middle Bhāvanākrama: Moonbeams on the Crucial Points].
People	Rongtön Sheja Kunrik

Tibetan

[edit]

Source	Adarshah
Date	2025-05-22
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

1-889

༄༅། །སྒོམ་རིམ་བར་པའི་འགྲེལ་པ་གནད་ཀྱི་ཟླ་ཟེར་ཞེས་བྱ་བ།

༄། །རྩོམ་པར་དམ་བཅའ་བ་དང་། སྒོམ་པ་ལྷུར་ལེན་པ་བསྟན་པ། ༄༅། །སྒོམ་རིམ་བར་པའི་འགྲེལ་པ་གནད་ཀྱི་ཟླ་ཟེར་ཞེས་བྱ་བ་བཞུགས་སོ།། ཞི་གནས་དང་ལྷག་མཐོང་གི་མན་ངག་གནད་ཀྱི་ཟླ་ཟེར་ཞེས་བྱ་བ། གཙུག་ན་ཟླ་བ་ཟླ་བའི་འོད་ཀྱིས་ཞབས་ཀྱི་འཁོར་ལོ་རབ་མཛེས་ཤིང་། །འཇིག་རྟེན་ལྷ་བརྒྱའི་གཙུག་གི་ནོར་བུའི་ཅོད་པན་དག་གིས་རབ་འདུད་པ། །མཁྱེན་པའི་ཉི་འོད་རབ་རྒྱས་མ་ལུས་ཤེས་བྱའི་དཀྱིལ་འཁོར་སྣང་བྱེད་ཅིང་། །བློ་གྲོས་སྤོབས་པ་སྦྱིན་མཛད་བློ་གཏེར་གངས་རིའི་མདོག་ཅན་ལ་ཕྱག་འཚལ། །རིགས་པའི་ཁྱབ་འཇུག་མདུང་ཐུང་འཁོར་ལོས་ཕས་རྒོལ་སྤོབས་པ་འཇོམས་མཛད་ཅིང་། །མཁྱེན་རབ་ཐུགས་རྗེའི་སྤྲིན་ལས་འགྲོ་ལ་ལེགས་བཤད་བདུད་རྩིའི་དགའ་ཆར་འབབ། །སྨྲ་བའི་གདོང་ལྔ་དངོས་སྨྲའི་རི་དྭགས་མ་ལུས་རབ་ཏུ་སྐྲག་མཛད་པ། །ཀུན་མཁྱེན་ངག་གི་དབང་པོ་འཕྲོག་བྱེད་པདྨའི་ངང་ཚུལ་ལ་ཕྱག་འཚལ། །རྨད་བྱུང་དོན་བཟང་སྣང་བྱེད་ངག་གི་འོ་མའི་ཆུ་མཚོ་མངོན་གྱུར་ཅིང་། །མཁས་པ་ངང་པའི་དེད་དཔོན་རྣམ་པར་རོལ་པའི་བཞིན་གྱི་མཚོ་སྐྱེས་དཔལ། །བསིལ་བྱེད་ཟླ་བའི་ལམ་ལ་བགྲོད་ལྡན་ཞི་བའི་གོ་འཕང་མཆོག་ཏུ་ཐོབ་མཛད་པ། །གསུང་རབ་ཀུན་གྱི་སྙིང་པོའི་དོན་ལྡན་རྣམ་པར་དབྱེ་ལ་འཇུག་པར་བྱ། །སྒོམ་པའི་རིམ་པ་བར་པ་ལ་དོན་གཉིས་ཏེ། མཚན་དོན་བཤད་པ་དང་། གཞུང་གི་དོན་དངོས་སོ། །དང་པོ་ནི། རྒྱ་གར་གྱི་སྐད་དུ།

1-890

བྷ་བ་ན། བོད་སྐད་དུ། སྒོམ་པའོ། །ཀྲ་མ་ནི་རིམ་པའོ། །ཨཱ་ཙཱཪྻ་ནི་སློབ་དཔོན་ནོ། །ཀ་མ་ལ་ཤཱི་ལ་ནི་པདྨ་ཚུལ་ཁྲིམས་སོ། །དེས་བར་དུ་མཛད་པ་སྟེ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ཞེས་པ་ནི་ལོ་ཙཱ་བས་བཀོད་པའོ། །གཉིས་པ་གཞུང་གི་དོན་ལ་ལྔ་སྟེ། རྩོམ་པར་དམ་བཅའ་བ་དང་། སྒོམ་པའི་རིམ་པ་བཤད་པ་དང་། བསྒོམས་པའི་འབྲས་བུ་དང་། དེ་བླང་བར་གདམས་པ། དེའི་བསོད་ནམས་བསྔོ་བའོ། །དང་པོ་ནི། ཐེག་དམན་ལས་ཁྱད་པར་དུ་འཕགས་པ་ཟབ་པ་དང་རྒྱ་ཆེ་བའི་དོན་ཅན་ཐེག་པ་ཆེན་པོའི་མདོ་སྡེའི་ཚུལ་ལ་འཇུག་པར་འདོད་པ་རྣམས་ཀྱི་ཉམས་སུ་བླང་བྱ་ཐེག་ཆེན་གྱི་ལམ་སྒོམ་པའི་རིམ་པ་མཐའ་ཡས་པ་ཡོད་ཀྱང་མདོར་བསྡུས་ཏེ་སྒོམ་པའི་ཡན་ལག་ཡོངས་སུ་ཚང་བ་རྨད་དུ་བྱུང་བ་བཤད་པར་བྱའོ། །གཉིས་པ་ལ་གསུམ་སྟེ། སྒོམ་པ་ལྷུར་ལེན་པ་བསྟན་པ། སྒོམ་པའི་ཐབས་བཤད་པ། དོན་ཉེ་བར་བསྡུ་བའོ། །དང་པོ་ལ་གསུམ་སྟེ། རྒྱུ་རྐྱེན་ཚོགས་པ་ལ་འཇུག་པར་གདམས་པ། རྒྱུ་རྐྱེན་སྟོན་པའི་ལུང་དང་། སྐབས་ལ་ཉེ་བར་སྦྱར་བའོ། །དང་པོ་ལ་གཉིས་ཏེ། གདམས་པ་མདོར་བསྟན་པ་དང་། འབྲས་བུ་རྒྱུ་རྐྱེན་ལ་ལྟོས་པར་བསྟན་པའོ། །དང་པོ་ནི། ཐེག་ཆེན་གྱི་ལམ་ལ་འཇུག་པ་འདི་ལ་ཇི་ལྟ་ཇི་སྙེད་ཀྱི་རྣམ་པ་ཐམས་ཅད་མཁྱེན་པ་ཉིད་ཉན་ཐོས་ལྟར་མ་ཡིན་པར་ཤིན་ཏུ་མྱུར་དུ་ཐོབ་པར་འདོད་པའི་རྟོག་པ་དང་ལྡན་པས་འབྲས་བུ་རྣམ་མཁྱེན་དེ་ཐོབ་པར་བྱེད་པའི་རྒྱུ་རྣམས་དང་རྐྱེན་རྣམས་ལ་ཐོས་པ་དང་བསམ་པ་དང་སྒོམ་པའི་རིམ་པས་མངོན་པར་བརྩོན་པར་བྱའོ། །

1-891

གཉིས་པ་འབྲས་བུ་རྒྱུ་རྐྱེན་ལ་ལྟོས་པར་བསྟན་པ་ལ་གཉིས་ཏེ། རྒྱུ་རྐྱེན་ལ་མི་ལྟོས་པ་ཐལ་འགྱུར་གྱིས་དགག་པ། བཟློག་པ་རང་རྒྱུད་ཀྱིས་བསྒྲུབ་པའོ། །དང་པོ་ནི། སངས་རྒྱས་འབྱུང་བའི་རྒྱུ་རྐྱེན་ལ་སློབ་དགོས་པ་འདི་ལྟར། འབྲས་བུ་རྣམ་པ་ཐམས་ཅད་མཁྱེན་པ་ཉིད་འདི་ནི་རྒྱུ་མེད་པ་ལས་འབྱུང་བར་མི་རུང་སྟེ། གལ་ཏེ་རྒྱུ་མེད་ལས་འབྱུང་ན་གང་ཟག་ཐམས་ཅད་ཀྱང་དུས་དང་གནས་སྐབས་ཐམས་ཅད་དུ་རྣམ་པ་ཐམས་ཅད་མཁྱེན་པ་ཉིད་དུ་འབྱུང་བར་ཐལ་བར་འགྱུར་བའི་ཕྱིར་རོ། །དེའི་ཁྱབ་པ་བསྟན་པ་ནི། རྒྱུ་ལ་ལྟོས་པ་མེད་པར་འབྱུང་ན་ནི་ཡུལ་དུས་གང་རུང་དུ་ཡང་འབྱུང་བའི་སྐྱེ་བ་ཐོགས་པར་མི་རུང་སྟེ། སྐྱེ་བ་རྒྱུ་རྐྱེན་ཚོགས་པ་ལ་ལྟོས་མི་དགོས་པས་སོ། །གཞན་ཡང་རྒྱུ་རྐྱེན་ལ་མི་ལྟོས་པར་འབྱུང་ན་གང་ཟག་ཐམས་ཅད་ཀྱང་གང་གིས་ན་ཐམས་ཅད་མཁྱེན་པ་ཉིད་དུ་མི་འགྱུར། རྒྱུ་ལ་མི་ལྟོས་ན་སྐྱེ་བ་ཐོགས་པ་མི་རུང་བ་དེ་བས་ན་དངོས་པོ་འགའ་ཞིག་ཡུལ་ལ་ལར་དུས་བརྒྱ་ལམ་ན་ལན་འགའ་ཞིག་འབྱུང་དུ་ཟད་པས་དངོས་པོ་ཐམས་ཅད་རྒྱུ་ལ་ལྟོས་པ་ཁོ་ན་ཡིན་ནོ་ཞེས་བྱ་བར་ངེས་སོ། །དཔེར་ན་མེ་གཅིག་བུད་ཤིང་ལས་སྐྱེ་བར་གྲུབ་ན་དེའི་རིགས་ཅན་གཞན་ཐམས་ཅད་ཀྱང་བུད་ཤིང་ལས་སྐྱེ་བར་གྲུབ་པ་བཞིན་ནོ། །

1-892

འདི་ནི་རང་བཞིན་ཁྱད་མེད་ཀྱི་རྟགས་ཀྱིས་དངོས་པོ་གཅིག་རྒྱུ་ལས་སྐྱེ་བར་གྲུབ་པ་ན་དངོས་པོ་གཞན་ཐམས་ཅད་ཀྱང་རྒྱུ་ལས་སྐྱེ་བར་གྲུབ་པའི་དོན་ནོ། །ཐམས་ཅད་མཁྱེན་པ་ཉིད་དེ་ཡང་ཡུལ་ལ་ལར་ཚོགས་གཉིས་ལ་ནན་ཏན་བྱེད་པའི་དུས་བརྒྱ་ལམ་ན་ལན་འགའ་ཞིག་འབྱུང་བར་འགྱུར་ཏེ། དུས་ཐམས་ཅད་དུ་འབྱུང་བ་མ་ཡིན། གནས་སྐབས་ཐམས་ཅད་དུ་ཡང་འབྱུང་བ་མ་ཡིན་པས་ན་རྒྱུ་ལས་རེས་འགའ་བར་གྲུབ་བོ། །གྲུབ་པ་དེའི་ཕྱིར། འབྲས་བུ་རྣམ་པ་ཐམས་ཅད་མཁྱེན་པ་ཉིད་དེ་ནི་རྒྱུ་དང་རྐྱེན་ལ་ལྟོས་པར་ངེས་སོ། །གལ་ཏེ་རྒྱུ་རྐྱེན་ཡོད་ཙམ་གྱིས་འབྱུང་ངམ་ཞེ་ན། རྒྱུ་དང་རྐྱེན་དེ་དག་གི་ནང་ནས་ཀྱང་ཐམས་ཅད་མཁྱེན་པའི་རྒྱུ་མ་ནོར་ཞིང་། རྒྱུ་རྐྱེན་མ་ཚང་བ་མེད་པ་རྣམས་རྒྱུད་ལ་བསྟེན་པར་བྱའོ། །ཐམས་ཅད་མཁྱེན་པའི་རྒྱུ་མ་ཡིན་པ་ལ་རྒྱུར་བསམས་ནས་རྒྱུ་ནོར་པ་ལ་ནན་ཏན་བྱས་ན་ནི་དུས་ཡུན་རིང་མོ་ཞིག་གིས་འབད་པས་དུས་འདའ་བར་བྱེད་ཀྱང་མངོན་པར་འདོད་པའི་འབྲས་བུ་རྣམ་པ་ཐམས་ཅད་མཁྱེན་པ་ཉིད་དེ་ཐོབ་པ་མེད་དེ། དཔེར་ན་འོ་མའི་རྒྱུ་མ་ཡིན་པ་རྭ་ལས་འོ་མ་བཞོ་བ་ལ་འབད་པ་བཞིན་ནོ། །རྒྱུ་མ་ནོར་བ་ལ་སྤྱད་པ་ཙམ་གྱིས་ཆོག་གམ་ཞེ་ན། རྒྱུ་མཐའ་དག་མ་སྤྱད་པ་ཁ་ཡར་བ་ཙམ་ལས་ཀྱང་འབྲས་བུ་འབྱུང་བ་མེད་དེ།

1-893

ཉེ་བར་ལེན་པའི་རྒྱུ་ས་བོན་དང་སོགས་པས་བསྡུས་པ་ལྷན་ཅིག་བྱེད་པའི་རྐྱེན་རྣམས་ལས་གང་ཡང་རུང་བ་ཞིག་མེད་ན་འབྲས་བུ་མྱུ་གུ་ལ་སོགས་པ་མི་འབྱུང་བའི་ཕྱིར། ཚུལ་དེ་དང་མཚུངས་སོ། །གཉིས་པ་ནི། རྒྱུ་ལས་འབྲས་བུ་འབྱུང་བ་ལ་རྒྱུ་དང་རྐྱེན་ཚང་ལ་མ་ནོར་བ་དགོས་པ་དེ་ལྟ་བས་ན་འབྲས་བུ་རྣམ་པ་ཐམས་ཅད་མཁྱེན་པ་ཉིད་དེ་ཐོབ་པར་འདོད་པས་རྒྱུ་དང་རྐྱེན་མ་ནོར་བ་དང་། རྒྱུ་རྐྱེན་མཐའ་དག་ལ་བརྟེན་པར་བྱའོ། །གཉིས་པ་རྒྱུ་རྐྱེན་སྟོན་པའི་ལུང་ནི། འབྲས་བུ་རྣམ་པ་ཐམས་ཅད་མཁྱེན་པ་ཉིད་རྒྱུ་རྐྱེན་ཚང་ལ་མ་ནོར་བ་ལས་ཐོབ་དགོས་ན། དེ་ཐོབ་བྱེད་ཀྱི་རྒྱུ་དང་། རྐྱེན་དེ་དག་གང་ཞེ་ན། སྨྲས་པ། པདྨའི་ངང་ཚུལ་བདག་ལྟ་བུ་སངས་རྒྱས་ལ་ལྟོས་ཏེ་ཡང་དག་པའི་དོན་ལ་དམུས་ལོང་དང་འདྲ་བས་སངས་རྒྱས་ཀྱི་རྒྱུ་རྐྱེན་དེ་དག་ལུང་ལ་མ་ལྟོས་པར་རང་སྟོབས་ཀྱིས་བསྟན་པར་མི་ནུས་མོད་ཀྱི། འོན་ཀྱང་སངས་རྒྱས་བཅོམ་ལྡན་འདས་ཀྱི་རྒྱུ་དང་རྐྱེན་མ་ནོར་བ་དང་མ་ཚང་བ་མེད་པ་བསྟེན་པར་བྱས་པ་ལས་མངོན་པར་རྫོགས་པར་སངས་རྒྱས་ནས་སླར་ཡང་གདུལ་བྱ་རྣམས་ལ་མདོ་སྡེ་ལས་ཇི་སྐད་བཤད་པ་དེ་བཞིན་དུ་བདག་གིས་ཁོང་དུ་ཆུད་ནས་བཤད་དོ། ། གང་ལ་བརྟེན་ནས་ཞེ་ན།

1-894

བཅོམ་ལྡན་འདས་ཉིད་ཀྱི་བཀའ་ཉིད་ཀྱིས་བཤད་དོ། །བཀའ་གང་ལས་བཤད་ཅེ་ན། བཅོམ་ལྡན་འདས་ཀྱིས་རྣམ་པར་སྣང་མཛད་མངོན་པར་བྱང་ཆུབ་པའི་རྒྱུད་དེར་བཀའ་སྩལ་པ། ཕྱག་ན་རྡོ་རྗེ་ལ་བོས་ནས། གསང་བའི་བདག་པོ་ཐམས་ཅད་མཁྱེན་པའི་ཡེ་ཤེས་དེ་ནི་སྙིང་རྗེའི་རྩ་བ་ལས་བྱུང་བ་ཡིན། བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་ཡིན། ཐབས་ཀྱིས་མཐར་ཕྱིན་པ་ཡིན་ནོ་ཞེས་འབྱུང་ངོ་། །གསུམ་པ་སྐབས་ལ་ཉེ་བར་སྦྱར་བ་ནི། སྙིང་རྗེ་སོགས་གསུམ་པོ་སངས་རྒྱས་ཀྱི་རྒྱུ་རྐྱེན་དུ་སངས་རྒྱས་ཀྱིས་བཀའ་སྩལ་པ་དེ་བས་ན་ཐམས་ཅད་མཁྱེན་པ་ཉིད་ཐོབ་པར་འདོད་པས་ཐོག་མའི་རྒྱུ་སྙིང་རྗེ་ཆེན་པོ་དང་། གཞན་དོན་དུ་རྫོགས་པའི་སངས་རྒྱས་ཐོབ་པར་འདུན་པ་བྱང་ཆུབ་ཀྱི་སེམས་དང་། སྦྱིན་སོགས་ཐབས་དང་གསུམ་པོ་འདི་དག་ལ་འབད་པར་བསླབ་པར་བྱའོ། །བྱང་ཆུབ་ཀྱི་སེམས་ནི་འཕགས་སེང་གཉིས་ཀྱིས་གཙོ་བོ་སེམས་ལ་འདོད་ལ། མདོ་དང་བསྟན་བཅོས་དང་། སྐུ་མཆེད་གཉིས་ཀྱིས་སེམས་བྱུང་དུ་བཤད་དོ། །

༄། །སྒོམ་པའི་ཐབས་བཤད་པ་ལ་གསུམ། སྙིང་རྗེ་སྒོམ་པའི་རིམ་པ། ༆ གཉིས་པ་སྒོམ་པའི་ཐབས་བཤད་པ་ལ་གསུམ་སྟེ། སྙིང་རྗེ་སྒོམ་པའི་རིམ་པ། བྱང་ཆུབ་ཀྱི་སེམས་སྒོམ་ཚུལ། ཐབས་སྒོམ་པའི་རིམ་པའོ། །དང་པོ་ལ་གསུམ་སྟེ། སྙིང་རྗེ་ཆོས་ཀྱི་རྩ་བ་ཉིད་དུ་སྒྲུབ་པ། དེ་ཇི་ལྟར་སྒོམ་པའི་རིམ་པ། སྒོམ་པའི་བྱེད་པ་བསྟན་པའོ། །

1-895

དང་པོ་ལ་གཉིས་ཏེ། རང་དོན་གྱི་ཆོས་ཀྱི་རྩ་བར་བསྟན་པ་དང་། གཞན་དོན་གྱི་ཆོས་ཀྱི་རྩ་བར་བསྟན་པའོ། །དང་པོ་ལ་གཉིས་ཏེ། ཆོས་ཀྱི་རྩ་བར་འགྱུར་བའི་ཚུལ། ཤེས་བྱེད་ཀྱི་ལུང་དང་སྦྱར་བའོ། །དང་པོ་ནི། བྱང་ཆུབ་སེམས་དཔའ་རྣམས་གཞན་གྱི་སྡུག་བསྔལ་མཐོང་བས་དེ་མི་བཟོད་པའི་བློ་སྐྱེས་ནས་གཞན་སྡུག་བསྔལ་ལས་བྲལ་འདོད་ཀྱི་སྙིང་རྗེས་སེམས་རྒྱུད་ཡོངས་སུ་བསྐྱོད་ན་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་འདོན་པར་བྱ་བའི་ཕྱིར་དུ་ངེས་པར་བླ་ན་མེད་པའི་བྱང་ཆུབ་ཐོབ་པར་བྱ་བར་དམ་འཆའ་བར་འགྱུར་རོ། །ཇི་སྐད་དུ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར་རོ། །གཞན་སྡུག་བསྔལ་ལས་ཐར་པའི་ཕྱིར་དུ་བྱང་ཆུབ་ཐོབ་པར་འདོད་པའི་བློའི་དམ་བཅའ་བྱས་པའི་རྗེས་དེ་ནས་བདག་ཉིད་ཀྱི་བདེ་བ་ལ་ལྟ་བ་བསལ་ནས་གཞན་གྱི་ཆེད་དུ་དམིགས་ཏེ་ཤིན་ཏུ་བྱ་དཀའ་ཞིང་དུས་རྒྱུན་མ་ཆད་ལ་ཡུན་རིང་པོ་བསྐལ་པ་དུ་མར་བསྒྲུབ་པར་བྱ་བའི་བསོད་ནམས་དང་ཡེ་ཤེས་ཀྱི་ཚོགས་སྒྲུབ་པ་ལ་གུས་པར་འཇུག་གོ །ཚོགས་སྒྲུབ་པ་ལ་གུས་པའི་རྗེས་དེ་ནས་སྦྱོར་བས་ཞུགས་ནས་ངེས་པར་གཞན་དོན་དུ་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པར་སྒྲུབ་བོ། །

1-896

དེ་ལ་དགོས་པ་ཅི་ཡོད་ཅེ་ན། ཚོགས་ལ་བརྟེན་ནས་ཚོགས་ཡོངས་སུ་རྫོགས་པར་འགྱུར་རོ། །ཚོགས་རྣམས་ཡོངས་སུ་རྫོགས་ནས་རྣམ་པ་ཐམས་ཅད་མཁྱེན་པ་ཉིད་ལག་ཏུ་ཐོབ་པ་དང་འདྲ་བར་འབད་མེད་དུ་ཐོབ་པར་འགྱུར་རོ། །དེ་ཐམས་ཅད་སྙིང་རྗེའི་མཐུ་ལས་བྱུང་བ་དེ་བས་ན་ཐམས་ཅད་མཁྱེན་པ་ཉིད་ཀྱི་རྩ་བ་སྟེ་དང་པོའི་རྒྱུ་ནི་སྙིང་རྗེ་ཆེན་པོ་ཁོ་ན་ཡིན་པས་སྙིང་རྗེ་དེ་ཉིད་ཐེག་པ་ཆེན་པོའི་ལམ་ལ་འཇུག་པའི་ཐོག་མ་ཁོ་ནར་གོམས་པར་བྱའོ། །གཉིས་པ་ཤེས་བྱེད་ཀྱི་ལུང་དང་སྦྱར་བ་ནི། ཆོས་ཡང་དག་པར་སྡུད་པའི་མདོ་ལས་ཀྱང་བཀའ་སྩལ་ཏེ། བཅོམ་ལྡན་འདས་ཞེས་པ་ནས་འབྱུང་ངོ་ཞེས་པའི་བར་ཏེ། སྙིང་རྗེ་ཆེན་པོ་དང་མི་ལྡན་པའམ་ཐོག་མར་ལམ་གྱི་རྩ་བ་སྙིང་རྗེ་ཆེན་པོ་ལ་མ་བསླབས་པར་ཆོས་རབ་ཏུ་མང་པོ་ལ་སློབ་པར་མི་བགྱིའོ། །བཅོམ་ལྡན་འདས་ཞེས་སྨོས་ཏེ་དཔང་པོར་བཞག་ནས་ཆོས་གཅིག་ཐོག་མར་ཐོས་པས་རབ་ཏུ་བཟུང་ཞིང་། བསམ་བྱུང་དང་སྒོམ་བྱུང་གི་ཤེས་རབ་ཀྱིས་རབ་ཏུ་རྟོགས་པར་བགྱིས་ན་སངས་རྒྱས་ཀྱི་སྟོབས་དང་། མི་འཇིགས་པ་ལ་སོགས་པའི་ཡོན་ཏན་ཐམས་ཅད་སྙིང་རྗེ་དང་ལྡན་པའི་གང་ཟག་དེས་བདེ་བླག་ཏུ་ཐོབ་པས་ན་དེའི་ལག་མཐིལ་དུ་མཆིས་པ་དང་འདྲ་བ་ལགས་སོ། །ཆོས་གཅིག་རབ་ཏུ་བཟུང་ན་ཞེས་སྨོས་ན།

1-897

ཆོས་གཅིག་པོ་གང་ཞེ་ན། འདི་ལྟ་སྟེ། ཉེ་རིང་མེད་པར་སེམས་ཅན་ཐམས་ཅད་སྡུག་བསྔལ་དང་བྲལ་འདོད་ཀྱི་སྙིང་རྗེ་ཆེན་པོའོ་ཞེས་སོ། །གཉིས་པ་གཞན་དོན་གྱི་ཆོས་ཀྱི་རྩ་བར་སྒྲུབ་པ་ནི། མི་གནས་པའི་མྱ་ངན་ལས་འདས་པའི་རྒྱུར་སྟོན་པས་བསྟན་ཏེ། བྱང་ཆུབ་སེམས་དཔའ་གང་ཐོག་མར་སྙིང་རྗེ་ཆེན་པོས་སེམས་རྒྱུད་ཡོངས་སུ་ཟིན་པས་སྒྲུབ་པ་ལ་འཇུག་ན་རྒྱུ་དེ་ལས་སངས་རྒྱས་བཅོམ་ལྡན་འདས་རྣམས་རང་གི་དོན་སྤངས་པ་དང་ཡེ་ཤེས་ཕུན་སུམ་ཚོགས་པ་མཐའ་དག་གྲུབ་པའི་ཆོས་ཀྱི་སྐུ་བརྙེས་ཀྱང་མྱ་ངན་ལས་འདས་པ་མངོན་དུ་མི་བྱེད་པར་སེམས་ཅན་གྱི་ཁམས་ཇི་སྲིད་ཟད་པར་མཐར་ཐུག་གི་བར་དུ་གཞན་དོན་ལ་ཞུགས་པར་མཛད་དོ། །གལ་ཏེ་འཁོར་བའི་ཉེས་པ་མཐོང་ནས་མྱ་ངན་ལས་འདས་པ་ལ་གཞོལ་བར་འགྱུར་རོ་ཞེ་ན། ཉན་ཐོས་བཞིན་དུ་འཁོར་བའི་སྡུག་བསྔལ་གྱིས་སྐྲག་ནས་མྱ་ངན་ལས་འདས་པའི་གྲོང་ཁྱེར་ཤིན་ཏུ་ཞི་བར་གཞན་དོན་རྒྱུན་ཆད་མེད་པ་དེར་འཇུག་པར་ཡང་མི་བཞེད་དོ། །སེམས་ཅན་སྡུག་བསྔལ་བ་ཅན་ལ་རབ་ཏུ་གཟིགས་ནས་དེ་དག་སྡུག་བསྔལ་གྱི་རྒྱ་མཚོ་ལས་སྒྲོལ་བའི་ཕྱིར་དུ་མྱ་ངན་ལས་འདས་པའི་གྲོང་ཁྱེར་ཞི་བ་གཞན་དོན་རྒྱུན་ཆད་པའི་མྱ་ངན་ལས་འདས་པ་དེ་ལྕགས་ཀྱི་ཁང་པ་མེ་འབར་བ་ལ་འཇུག་པ་སུས་ཀྱང་མི་འདོད་པ་བཞིན་དུ་དེ་ལ་ཉེས་དམིགས་ཆེན་པོར་བལྟས་ནས་ཐག་རིང་དུ་སྤོང་བར་བྱེད་པས་ན་སངས་རྒྱས་བཅོམ་ལྡན་འདས་རྣམས་ཀྱི་སྲིད་ཞི་ལ་མི་གནས་པའི་མྱ་ངན་ལས་འདས་པའི་རྒྱུ་ནི་ཇི་སྐད་བཤད་པའི་སྙིང་རྗེ་ཆེན་པོ་དེ་ཉིད་ཡིན་ནོ། །

1-898

གཉིས་པ་སྙིང་རྗེ་སྒོམ་པའི་རིམ་པ་ལ་བཞི་སྟེ། བཏང་སྙོམས་ཀྱིས་གཞི་སྒྲུབ་པ་དང་། བྱམས་པས་བརླན་པར་བྱ་བ་དང་། སྙིང་རྗེ་སྒོམ་པའི་ཚུལ་དང་། བྱམས་པ་སྒོམ་པའི་ཚུལ་ལོ། །དང་པོ་ནི། སྙིང་རྗེ་མི་གནས་པའི་མྱང་འདས་ཀྱི་རྒྱུར་བསྟན་པ་དེ་ལ་སྙིང་རྗེ་སྒོམ་པའི་རིམ་པ་སྟེ། དང་པོ་གཞི་གང་ནས་འཇུག་པ་ནས་བརྩམས་ཏེ་བརྗོད་པར་བྱའོ། །ཐོག་མར་འཇུག་པའི་སྒོ་གང་ཞེ་ན། ཞིང་ཤིན་ཏུ་གཤིན་པར་བྱས་པ་ལ་ས་བོན་འདེབས་པ་བཞིན་དུ་ཐོག་མར་རེ་ཤིག་བཏང་སྙོམས་བསྒོམས་པས་སེམས་ཅན་ཐམས་ཅད་ལས་འགའ་ཞིག་ལ་རྗེས་སུ་ཆགས་པ་དང་། འགའ་ཞིག་ལ་ཁོང་ཁྲོ་བ་བསལ་ཏེ་ཉེ་རིང་མེད་པར་སྙོམས་པའི་སེམས་ཉིད་བསྒྲུབ་པར་བྱའོ། །སྙོམས་པའི་སེམས་སྒྲུབ་དགོས་པའི་འཐད་པ་ཅི་ཡོད་ཅེ་ན། སེམས་ཅན་ཐམས་ཅད་ནི་བདེ་བ་འདོད་པར་ནི་མཚུངས། སྡུག་བསྔལ་མི་འདོད་པར་ནི་མཚུངས་ལ། ཐོག་མ་མེད་པའི་དུས་ཅན་གྱི་འཁོར་བ་ན་སེམས་ཅན་གང་དག་ཕན་ཚུན་ཚེ་འཕོས་པའི་རྣམ་གྲངས་ཀྱིས་ལན་བརྒྱ་ཕྲག་དུ་མར་དེ་དག་གི་གཉེན་དུ་མ་གྱུར་པ་དེ་འཇིག་རྟེན་ན་གང་ཡང་མེད་དོ་སྙམ་དུ་བཏང་སྙོམས་ཀྱི་སེམས་དེ་ཡོངས་སུ་བསམ་ཞིང་། སེམས་ཅན་འདི་དག་ལ་ཉེ་རིང་གི་བྱེ་བྲག་ཅི་ཡོད་པས་ན་གང་ཟག་ལ་ལ་ལ་ནི་རྗེས་སུ་ཆགས་པར་འགྱུར།

1-899

ལ་ལ་ལ་ནི་ཁོང་ཁྲོ་བར་འགྱུར་ཏེ་ཆགས་སྡང་མི་རིགས་སོ། །གལ་ཏེ་ཐམས་ཅད་ལ་བཏང་སྙོམས་ཀྱི་སེམས་བསྒོམ་དགོས་ན། སྒོམ་པའི་རིམ་པ་ཇི་ལྟར་བྱེད་ཅེ་ན། བཏང་སྙོམས་བསྒོམ་དགོས་པ་དེ་ལྟ་བས་ན། སྒོམ་ཚུལ་གྱི་རིམ་པ་ནི། བདག་གིས་སེམས་ཅན་ཐམས་ཅད་ལ་ཉེ་རིང་མེད་པར་སེམས་མཉམ་པ་ཉིད་དུ་བྱའོ་སྙམ་དུ་དེ་ལྟར་ཡིད་ལ་བྱ་ཞིང་སྒོམ་པའི་རིམ་པ་ནི་ཐོག་མར་དགྲ་གཉེན་གང་ཡང་མ་ཡིན་པའི་བར་མའི་ཕྱོགས་ནས་སྒོམ་པ་ལས་བརྩམས་ཏེ་མཛའ་བཤེས་དང་དགྲ་གཉིས་ལ་ཡང་བསྒོམ་མོ། །དགྲ་གཉེན་གཉིས་སྙོམས་པར་བསྒོམས་པའི་རྗེས་དེ་ནས་ཕྱོགས་བཅུའི་སེམས་ཅན་ཐམས་ཅད་ལ་ཡང་ཉེ་རིང་མེད་པས་སེམས་མཉམ་པ་ཉིད་དུ་བསྒྲུབ་བོ། །གཉིས་པ་བྱམས་པའི་སེམས་ཀྱིས་བརླན་པར་བྱ་བ་ནི། སེམས་སྙོམས་པར་བསྒྲུབས་ནས་སེམས་ཅན་བདེ་བ་དང་ཕྲད་པར་འདོད་པའི་བྱམས་པ་བསྒོམ་མོ། །བྱམས་པའི་ཆུས་སེམས་ཀྱི་རྒྱུད་སྙིང་རྗེའི་མྱུ་གུ་སྐྱེ་རུང་དུ་བརླན་པར་བྱས་ཏེ་གསེར་ཡོད་པའི་ས་བཞིན་དུ་བྱས་ལ་དེ་ལ་སྙིང་རྗེའི་ས་བོན་བཏབ་ན་སྙིང་རྗེའི་མྱུ་གུ་བདེ་བླག་ཏུ་ཤིན་ཏུ་ཡོངས་སུ་རྒྱས་པར་འགྱུར་རོ། །གསུམ་པ་སྙིང་རྗེ་སྒོམ་ཚུལ་ལ་གཉིས་ཏེ། སྤྱིར་བསྟན་པ་དང་། རྒྱས་པར་བཤད་པའོ། །དང་པོ་ནི། བྱམས་པ་བསྒོམས་པའི་རྗེས་དེ་ནས་སྙིང་རྗེ་བསྒོམ་པར་བྱའོ། །

1-900

ཇི་ལྟར་ཞེ་ན། སེམས་ཀྱི་རྒྱུད་ལ་བྱམས་པས་སྙིང་རྗེའི་ས་བོན་བསྒོམས་ནས་སོ། །སྙིང་རྗེའི་ངོ་བོ་ཇི་ལྟ་བུ་ཞེ་ན། སྙིང་རྗེ་དེ་ནི་དམིགས་ཡུལ་གྱི་སེམས་ཅན་སྡུག་བསྔལ་བ་རྣམ་པ་གསུམ་གྱིས་ཅི་རིགས་པར་སྡུག་བསྔལ་བ་རྣམས་སྡུག་བསྔལ་དེ་དང་བྲལ་བར་འདོད་པའི་སེམས་བྱུང་ངོ་། །འདོད་པའི་ཁམས་ལ་སོགས་པ་ཁམས་གསུམ་ན་གནས་པའི་སེམས་ཅན་ཐམས་ཅད་ནི་སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་བ་ཉིད་དེ། སྡུག་བསྔལ་རྣམ་པ་གསུམ་གྱིས་ཅི་རིགས་པར་ཤིན་ཏུ་སྡུག་བསྔལ་བ་དག་ཡིན་པས་དེའི་ཕྱིར་སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པའི་སྙིང་རྗེ་དེ་བསྒོམ་པར་བྱ་སྟེ། དང་པོར་བྱང་ཆུབ་ཏུ་སེམས་བསྐྱེད་པ་ཡང་སྙིང་རྗེ་ཆེན་པོའི་མཐུ་ཡིན། བར་དུ་བསྐལ་པ་གྲངས་མེད་གསུམ་དུ་ཚོགས་བསགས་པ་ཡང་སྙིང་རྗེ་ཆེན་པོའི་མཐུ་ཡིན། ཐ་མར་སངས་རྒྱས་ནས་གཞན་དོན་དུ་ཆོས་ཀྱི་འཁོར་ལོ་བསྐོར་བ་ཡང་སྙིང་རྗེ་ཆེན་པོའི་མཐུ་ཡིན་པའི་ཕྱིར་རོ། །གཉིས་པ་རྒྱས་པར་བཤད་པ་ལ་གསུམ་སྟེ། དམིགས་ཡུལ་གྱི་སྡུག་བསྔལ་གྱི་ཁྱད་པར། སྙིང་རྗེ་སྒོམ་པའི་རིམ་པ། སྙིང་རྗེ་གོམས་པའི་ཁྱད་པར་རོ། །དང་པོ་ལ་གསུམ་སྟེ། སྡུག་བསྔལ་གྱི་སྡུག་བསྔལ་དང་། འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་ཀྱི་ཁྱད་པར་རོ། །

1-901

དང་པོ་ལ་གཉིས་ཏེ། སྡུག་བསྔལ་གྱི་ངོ་བོ། སྡུག་བསྔལ་གྱི་རྒྱུའི་ཁྱད་པར་རོ། །དང་པོ་ལ་ཡང་གཉིས་ཏེ། ངན་སོང་གི་སྡུག་བསྔལ་དང་། མིའི་སྡུག་བསྔལ་ལོ། །དང་པོ་ནི། ངན་སོང་གསུམ་ན་སྡུག་བསྔལ་ཡོད་པའི་ཚུལ་འདི་ལྟར། རེ་ཤིག་སེམས་ཅན་དམྱལ་བ་ན་གནས་པའི་སེམས་ཅན་གང་དག་ཡིན་པ་དེ་དག་ནི་སྡུག་བསྔལ་རྒྱུན་མི་འཆད་ཅིང་ཚེ་རིང་བས་ན་སྡུག་བསྔལ་ཡང་ཡུན་རིང་ལ། ཚ་བའི་སྡུག་བསྔལ་དང་། གྲང་བའི་སྡུག་བསྔལ་ལ་སོགས་པའི་སྡུག་བསྔལ་རིགས་མི་འདྲ་བ་སྣ་ཚོགས་ཀྱི་ཆུ་བོར་རྒྱ་མཚོ་ལ་སེམས་ཅན་བྱིང་བ་བཞིན་དུ་བྱིང་བ་ཁོ་ན་ཡིན་ནོ་ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དམྱལ་བའི་སེམས་ཅན་གྱི་སྡུག་བསྔལ་ཡུན་རིང་དུ་མྱོང་བ་དེ་བཞིན་དུ་རྫོགས་བྱེད་དགེ་བས་བྱས་པ་མ་གཏོགས་པའི་ཡི་དྭགས་རྣམས་ཀྱང་ཕལ་ཆེར་ཤིན་ཏུ་མི་བཟད་པའི་བཀྲེས་པ་དང་སྐོམ་པའི་སྡུག་བསྔལ་གྱི་མེས་ཏ་ལའི་ཡ་ཐོག་བསྐམས་པ་ལྟར་བསྐམས་པའི་ལུས་རིད་ཅིང་ཤིན་ཏུ་སྡུག་བསྔལ་མང་པོ་མྱོང་ངོ་ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །མི་རྣམས་ཀྱིས་དམྱལ་བ་དང་ཡི་དྭགས་ཀྱི་སྡུག་བསྔལ་དངོས་སུ་མི་མཐོང་བས་ལུང་གི་ཁུངས་མ་བཀོད་དོ། །དུད་འགྲོ་རྣམས་ཀྱང་ཕན་ཚུན་གཅིག་ལ་གཅིག་ཟ་བ་དང་། ཕན་ཚུན་ཁྲོ་བ་དང་། གསོད་པ་དང་།

1-902

གཞན་གྱིས་རྣམ་པར་འཚེ་བ་ལ་སོགས་པའི་སྡུག་བསྔལ་རྣམ་པ་དུ་མ་མྱོང་བ་ཁོ་ནར་མངོན་སུམ་ལ་སྣང་ངོ་། །འདི་ནི་མི་རྣམས་ཀྱིས་ཀྱང་མཐོང་བས་སྣང་ངོ་ཞེས་པའི་སྒྲས་གསུངས་སོ། །གཉིས་པ་མིའི་སྡུག་བསྔལ་བཤད་པ་ནི། མི་རྣམས་ཀྱང་འདོད་པའི་ཡུལ་ཡོངས་སུ་ཚོལ་ཞིང་མ་རྙེད་པས་ཕོངས་ནས་དེའི་ཆེད་དུ་ཕན་ཚུན་གཅིག་ལ་གཅིག་འཁུ་བ་དང་། ལུས་ཀྱིས་གནོད་པ་བྱེད་པ་དང་། གཉེན་སྡུག་པ་དང་བྲལ་བ་དང་། དགྲ་མི་སྡུག་པ་དང་ཕྲད་པ་དང་། ནོར་ལ་སོགས་པས་དབུལ་ཞིང་ཕོངས་པ་ལས་གྱུར་པའི་ཚ་གྲང་ལ་སོགས་པའི་སྡུག་བསྔལ་དཔག་ཏུ་མེད་པ་ཉམས་སུ་མྱོང་བར་སྣང་ངོ་། །གཉིས་པ་སྡུག་བསྔལ་གྱི་རྒྱུས་གནོད་པ་ནི། གང་དག་ཁྱིམ་ན་གནས་པ་རྣམས་ནི་འདོད་ཆགས་ལ་སོགས་པའི་ཉོན་མོངས་པའི་ཀུན་ནས་དཀྲིས་པ་སྣ་ཚོགས་ཀྱིས་སེམས་དཀྲིས་པ་དག་དང་། གང་དག་རབ་ཏུ་བྱུང་བ་རྣམས་ནི་ལྟ་བ་ངན་པ་སྣ་ཚོགས་ཀྱིས་སེམས་ཟིང་ཟིང་བར་གྱུར་པ་དེ་དག་ཐམས་ཅད་སྡུག་བསྔལ་འབྱུང་བ་ཉིད་ཀྱི་རྒྱུ་ཡིན་པས་གད་ཁ་ན་འདུག་པའི་མི་དེ་མ་ཐག་ཏུ་ལྷུང་བ་བཞིན་དུ་ངན་སོང་དུ་མྱུར་དུ་ལྷུང་བས་ཤིན་ཏུ་སྡུག་བསྔལ་བ་ཁོ་ན་ཡིན་ནོ། །གཉིས་པ་འགྱུར་བའི་སྡུག་བསྔལ་བཤད་པ་ནི། གལ་ཏེ་ལྷ་ལ་སྡུག་བསྔལ་མེད་དོ་སྙམ་ན།

1-903

ལྷ་རྣམས་ཀྱང་སྡུག་བསྔལ་གྱི་སྡུག་བསྔལ་མེད་ན་ཡང་ཐམས་ཅད་འགྱུར་བའི་སྡུག་བསྔལ་གྱིས་སྡུག་བསྔལ་བ་དག་སྟེ། རྒྱལ་ཆེན་རིགས་བཞི་དང་། སུམ་ཅུ་རྩ་གསུམ་པ་ལ་སོགས་པ་འདོད་པ་ན་སྤྱོད་པའི་ལྷ་རིགས་དྲུག་པོ་གང་དག་ཡིན་པ་དེ་དག་ནི་རྟག་ཏུ་འཆི་འཕོ་བ་དང་། ངན་སོང་དུ་ལྷུང་བ་ལ་སོགས་པའི་འཇིགས་པའི་མྱ་ངན་གྱིས་སེམས་ལ་གནོད་ན་ཇི་ལྟར་བདེ་བར་འགྱུར། གསུམ་པ་འདུ་བྱེད་ཀྱི་སྡུག་བསྔལ་ནི། འདུ་བྱེད་ཀྱི་སྡུག་བསྔལ་ཉིད་ནི་ཟག་བཅས་ཀྱི་ལས་དང་། སེམས་རྒྱུད་རབ་ཏུ་མ་ཞི་བར་བྱེད་པའི་ཉོན་མོངས་པའི་མཚན་ཉིད་ཀྱི་རྒྱུའི་རྗེས་སུ་བྱེད་པའི་གཞན་གྱི་དབང་གི་ངོ་བོ་ཉིད་དང་། ཟག་བཅས་ཀྱི་བདེ་བ་ཡོད་ཀྱང་དེ་སྐད་ཅིག་རེ་རེ་ལ་འཇིག་པས་འགྲོ་བ་ཐམས་ཅད་ལ་ཁྱབ་པ་ཡིན་ནོ། །སྙིང་རྗེའི་དམིགས་པ་བསྟན་ཟིན་ཏོ། ། གཉིས་པ་དེ་ལ་སྙིང་རྗེ་སྒོམ་ཚུལ་ལ་གཉིས་ཏེ། རྣམ་པའི་སྒོ་ནས་སྤྱིར་བསྟན། སྒོམ་ཚུལ་གྱི་རིམ་པས་རྒྱས་པར་བསྟན་པའོ། །དང་པོ་ནི། ཁམས་གསུམ་གྱི་འགྲོ་བ་ཐམས་ཅད་སྡུག་བསྔལ་གསུམ་ཅི་རིགས་པ་དང་ལྡན་པ་དེ་བས་ན་འགྲོ་བ་མཐའ་དག་ནི་སྡུག་བསྔལ་གྱི་མེ་ལྕེ་རབ་ཏུ་འབར་བའི་ནང་ན་སྦྲང་བུ་ཞུགས་པ་ལྟ་བུ་ཡིན་པར་བལྟས་ལ། ཇི་ལྟར་བདག་ཉིད་སྡུག་བསྔལ་མི་འདོད་པ་ལྟར་དུ་སེམས་ཅན་གཞན་དག་ཀྱང་སྡུག་བསྔལ་མི་འདོད་པ་དེ་དང་འདྲའོ་སྙམ་དུ་བསམ་ཞིང་།

1-904

གཞན་གྱི་སྡུག་བསྔལ་མི་འདོད་པའི་བློས་ཀུན་ནས་བསླངས་ནས། ཀྱེ་མ་ཀྱི་ཧུད་བདག་ལ་སྙིང་དུ་སྡུག་པའི་སེམས་ཅན་དྲིན་ཅན་འདི་དག་སྡུག་བསྔལ་ན་སྡུག་བསྔལ་དེ་ལས་ཇི་ལྟར་ཐར་བར་བྱ་ཞེས་བདག་ཉིད་སྡུག་བསྔལ་ཉམས་སུ་མྱོང་བ་བཞིན་དུ་བྱེད་ཅིང་། སྡུག་བསྔལ་དེ་དང་བྲལ་བར་འདོད་པའི་རྣམ་པ་ཅན་གྱི་སྙིང་རྗེ་དེ་བསྒོམ་པར་བྱའོ། །ཡུལ་གང་ལ་ན། སེམས་ཅན་ཐམས་ཅད་ལའོ། །དུས་ནི་ཐམས་ཅད་དུའོ། །གནས་སྐབས་ནི་ཏིང་ངེ་འཛིན་ལ་འདུག་ཀྱང་རུང་། རྗེས་ཐོབ་ཏུ་འགྲོ་བ་དང་འཆག་པ་སོགས་ཀྱི་སྤྱོད་ལམ་ཐམས་ཅད་དུ་ཡང་རུང་སྟེ་གནས་སྐབས་ཐམས་ཅད་དུ་བསྒོམ་མོ། །གཉིས་པ་སྒོམ་ཚུལ་གྱི་རིམ་པ་རྒྱས་པར་བཤད་པ་ནི། ཐོག་མར་མཛའ་བཤེས་ལ་སྒོམ་ཚུལ་ནི། སྐྱེ་སླ་བས་ཐོག་མ་ཁོ་ནར་མཛའ་བཤེས་ཀྱི་ཕྱོགས་རྣམས་ལ་ཇི་སྐད་སྨོས་པའི་སྡུག་བསྔལ་སྣ་ཚོགས་པ་ཉམས་སུ་མྱོང་བར་དངོས་སུ་མཐོང་བའི་ཚུལ་དུ་བསྒོམ་པར་བྱའོ། །གཉིས་པ་བར་མའི་ཕྱོགས་ལ་སྒོམ་ཚུལ་ནི། མཛའ་བཤེས་ལ་བསྒོམས་པའི་རྗེས་དེ་ནས་མཛའ་བཤེས་དང་སེམས་ཅན་དུ་མཉམ་པ་ཉིད་ཀྱིས་ན་ཉེ་རིང་གི་བྱེ་བྲག་མེད་པར་མཐོང་བར་བྱས་ནས་སེམས་ཅན་ཐམས་ཅད་ནི་བདག་གི་གཉེན་དུ་གྱུར་པ་ཁོ་ནའོ་སྙམ་དུ་ཡོངས་སུ་བསམ་ཞིང་སེམས་ཅན་བར་མར་གནས་པའི་ཕྱོགས་རྣམས་ལའང་བསྒོམ་པར་བྱའོ། །

1-905

གསུམ་པ་ཐམས་ཅད་ལ་སྒོམ་པ་ནི། སྙིང་རྗེ་ཆེན་པོ་བར་མ་ལ་སྒོམ་པ་གང་གི་ཚེ་བར་མ་དེ་ལ་མཛའ་བཤེས་ཀྱི་ཕྱོགས་ལ་སྡུག་བསྔལ་བྲལ་འདོད་ཀྱི་བསམ་པ་འཇུག་པ་དེ་བཞིན་དུ་སྙིང་རྗེ་དེ་མཛའ་བཤེས་དང་མཉམ་པར་ཞུགས་པ་དེའི་ཚེ་གྲོང་མི་ནས་བརྩམས་ཏེ་སེམས་ཅན་ཐམས་ཅད་ལ་བསྒོམ་པར་བྱའོ། །གསུམ་པ་སྙིང་རྗེ་གོམས་པའི་རྣམ་པ་ནི། ཇི་ཙམ་གྱིས་སྙིང་རྗེ་སྒོམ་པ་ཡོངས་སུ་རྫོགས་པ་ཡིན་ཞེ་ན། གང་གི་ཚེ་བུ་ཆུང་ཤིན་ཏུ་སྙིང་དུ་སྡུག་པ་ནད་དྲག་པོས་ཐེབས་པས་སྡུག་བསྔལ་བར་གྱུར་པའི་མ་བཞིན་དུ་བྱང་ཆུབ་སེམས་དཔའ་བདག་ཉིད་ཀྱིས་དྲིན་ཅན་གྱི་སེམས་ཅན་ཤིན་ཏུ་སྡུག་བསྔལ་བ་ལས་འདོན་པར་འདོད་པའི་རྣམ་པ་ཆེད་དུ་བྱ་བ་ལ་མ་ལྟོས་པར་རང་གི་ངང་གིས་འཇུག་པའི་སྙིང་རྗེ་དེ་ཕྱོགས་བཅུའི་སེམས་ཅན་ཐམས་ཅད་ལ་ཉེ་རིང་མེད་པར་མཉམ་པ་ཉིད་དུ་ཞུགས་པ་དེའི་ཚེ་སྙིང་རྗེ་སྒོམ་པ་ཡོངས་སུ་རྫོགས་པ་ཞེས་བྱ་སྟེ། དེའི་ཚེ་སྙིང་རྗེ་ཆེན་པོའི་མིང་ཡང་ཐོབ་བོ། །བཞི་པ་བྱམས་པ་སྒོམ་པའི་ཚུལ་ནི། འགྲོ་བ་མཐའ་དག་ལ་བྱམས་པ་སྒོམ་པ་ནི། མཛའ་བཤེས་ཀྱི་ཕྱོགས་ལ་བདེ་བ་དང་ཕྲད་པར་འདོད་པའི་བྱམས་པ་ཐོག་མར་གོམས་པར་བྱས་ནས་ཕྱིས་བདེ་བ་དང་ཕྲད་པར་འདོད་པའི་རྣམ་པ་ཅན་གྱི་བྱམས་པ་དེ་རིམ་གྱིས་ཐ་མལ་པ་ལ་སྒོམ་པ་དང་།

1-906

དེ་ནས་ཕྱིས་ནས་དགྲ་ལ་ཡང་བསྒོམ་པར་བྱའོ། །ཚུལ་དེ་ལ་དགོས་པ་ཅི་ཡོད་ཅེ་ན། ཚུལ་དེ་ལྟར་བྱམས་པ་བསྒོམས་པ་དེ་རྒྱུ་དེ་ལས་སྙིང་རྗེ་གོམས་པར་བྱས་ནས་རིམ་གྱིས་ཁམས་གསུམ་གྱི་སེམས་ཅན་མཐའ་དག་འཁོར་བ་སྡུག་བསྔལ་གྱི་རྒྱ་མཚོ་ལས་མངོན་པར་འདོན་པར་འདོད་པ་རང་གི་ངང་གིས་འབྱུང་བ་ཉིད་དུ་འགྱུར་རོ། །སྙིང་རྗེ་སྒོམ་པའི་ཚུལ་བསྟན་ཟིན་ཏོ། །

༄། །བྱང་ཆུབ་ཀྱི་སེམས་སྒོམ་ཚུལ། ༆ གཉིས་པ་བྱང་ཆུབ་ཀྱི་སེམས་སྒོམ་པ་ལ་གཉིས་ཏེ། དབྱེ་བ་བསྟན་པ་དང་། སོ་སོར་བཤད་པའོ། །དང་པོ་ནི། བྱང་ཆུབ་ཀྱི་སེམས་དེ་ཡང་དབྱེ་ན་རྣམ་པ་གཉིས་ཏེ། བརྡ་ལས་ཐོབ་པ་ཀུན་རྫོབ་དང་། སྒོམ་སྟོབས་ཀྱིས་ཐོབ་པ་དོན་དམ་པའི་སེམས་བསྐྱེད་དོ། །གཉིས་པ་སོ་སོར་བཤད་པ་ལ་གཉིས་ཏེ། ཀུན་རྫོབ་བྱང་ཆུབ་ཀྱི་སེམས་དང་། དོན་དམ་བྱང་ཆུབ་ཀྱི་སེམས་བཤད་པའོ། །དང་པོ་ལ་གཉིས་ཏེ། རང་བཞིན་ངོས་བཟུང་བ་དང་། བླང་བའི་ཆོ་གའོ། །དང་པོ་ནི། བྱང་ཆུབ་ཀྱི་སེམས་གཉིས་ཡོད་པ་དེ་ལ་བྱང་ཆུབ་ཀྱི་སེམས་ཀུན་རྫོབ་པ་ནི་རྒྱུ་སྙིང་རྗེ་ཆེན་པོ་ལ་བརྟེན་ནས་ཁམས་གསུམ་གྱི་སེམས་ཅན་མཐའ་དག་སྡུག་བསྔལ་གྱི་རྒྱ་མཚོར་ནུབ་པ་འདོན་པར་བློས་བཅས་ནས་ཆོས་ཀྱི་འཁོར་ལོ་བསྐོར་བའི་སྒོ་ནས་འགྲོ་བ་མཐའ་དག་ལ་ཕན་པའི་ཕྱིར་དུ་སངས་རྒྱས་སུ་གྱུར་ཅིག་སྙམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་འདོད་པའི་རྣམ་པ་ཅན་གྱི་བྱང་ཆུབ་ཀྱི་སེམས་དང་པོ་སྐྱེ་བའོ། །

1-907

གཉིས་པ་ནི། གཞན་དོན་དུ་བྱང་ཆུབ་ཐོབ་འདོད་ཀྱི་སེམས་དང་པོར་སྐྱེས་པ་དེ་ཡང་བརྟན་པའི་ཡན་ལག་ཏུ་བྱང་ཆུབ་སེམས་དཔའི་སའི་ཚུལ་ཁྲིམས་ཀྱི་ལེའུ་ལས་བསྟན་པའི་ཆོ་ག་བཞིན་དུ་བྱས་ནས་བསྐྱེད་པར་བྱའོ། །གང་ལས་ན། ཆོ་ག་ལ་མཁས་པ་ཕ་རོལ་པོ་གཞན་ལས་སོ། །ཆོ་ག་ལ་མཁས་པ་ཙམ་གྱིས་མི་ཆོག་གི། བྱང་ཆུབ་སེམས་དཔའི་སྡོམ་པ་ལ་གནས་པ་དགོས་སོ། །གཉིས་པ་དོན་དམ་བྱང་ཆུབ་ཀྱི་སེམས་བཤད་པ་ལ་གཉིས་ཏེ། རང་བཞིན་ངོས་བཟུང་། དེ་འགྲུབ་པའི་རྒྱུའོ། །དང་པོ་ནི། ཇི་སྐད་བཤད་པ་དེ་ལྟར་ཀུན་རྫོབ་པའི་བྱང་ཆུབ་ཀྱི་སེམས་བསྐྱེད་ནས་སྒྲིབ་པ་རྩད་ནས་དབྱུང་བའི་དོན་དུ་དོན་དམ་པའི་བྱང་ཆུབ་ཀྱི་སེམས་བསྐྱེད་པའི་ཕྱིར། ངོ་བོ་ཇི་ལྟ་བུ་ཞེ་ན། དོན་དམ་པའི་བྱང་ཆུབ་ཀྱི་སེམས་དེ་ནི་སོ་སོ་སྐྱེ་བོའི་རྒྱུད་ལ་ཡོད་པ་མ་ཡིན་གྱི། འཇིག་རྟེན་པའི་རྣམ་རྟོག་གི་སྤྲོས་པ་ཐམས་ཅད་དང་བྲལ་བ། ཆོས་ཉིད་ཀྱི་དོན་སྤྱི་འཛིན་པ་ཙམ་མ་ཡིན་གྱི། རྟོག་པའི་སྒྲིབ་གཡོག་དང་བྲལ་ཞིང་། རྣམ་པ་ཤིན་ཏུ་གསལ་བ་དོན་དམ་པའི་ཡེ་ཤེས་ཀྱིས་ཉམས་སུ་མྱོང་བའི་ཚུལ་གྱི་སྤྱོད་ཡུལ་དུ་གྱུར་པ། ཉེ་བའི་ཉོན་མོངས་པའི་དྲི་མ་མེད་པ། ཏིང་ངེ་འཛིན་གྱི་སྐྱོན་གྱིས་མི་གཡོ་བ་སྟེ་རླུང་མེད་པའི་མར་མེའི་རྒྱུན་ལྟར་དུ་མི་གཡོས་པའོ། །

1-908

འདིས་ནི་དོན་དམ་བྱང་ཆུབ་ཀྱི་སེམས་ཁྱད་པར་དྲུག་ལྡན་དུ་བསྟན་པ་ཡིན་ནོ། །

༈ རྣལ་འབྱོར་གཉིས་རྒྱུ་ཉིད་དུ་སྒྲུབ་པ། ༆ གཉིས་པ་དེ་འགྲུབ་པའི་རྒྱུ་ནི་གཉིས་ཏེ། རྣལ་འབྱོར་གཉིས་རྒྱུ་ཉིད་དུ་སྒྲུབ་པ་དང་། གཉིས་པོ་རྗེས་སུ་སྒྲུབ་པའི་ཚུལ་ལོ། །དང་པོ་ལ་བཞི་སྟེ། ཞི་ལྷག་གཉིས་ཀའི་ཐུན་མོང་གི་དགོས་པ་དང་། ལྷག་མཐོང་གི་དགོས་པ་དང་། ཞི་གནས་ཀྱི་དགོས་པ་དང་། གཉིས་ཀའི་དོན་བསྡུ་བའོ། །དང་པོ་ལ་གཉིས་ཏེ། དགེ་བའི་ཆོས་ཐམས་ཅད་སྒྲུབ་པ། ཏིང་ངེ་འཛིན་ཐམས་ཅད་སྡུད་བྱེད་དོ། །དང་པོ་ནི། དེ་ཇི་ལྟར་བྱས་པས་འགྲུབ་ཞེ་ན། དོན་དམ་བྱང་ཆུབ་ཀྱི་སེམས་དེ་འགྲུབ་པ་ནི་རྟག་ཏུ་སྦྱོར་བའི་བརྩོན་འགྲུས་དང་གུས་པར་སྦྱོར་བའི་བརྩོན་འགྲུས་ཡུན་རིང་དུ་བརྩམས་པས་ཞི་གནས་དང་ལྷག་མཐོང་གི་རྣལ་འབྱོར་ཤིན་ཏུ་ཡང་ཡང་གོམས་པར་བྱས་པ་ལས་ཐོབ་པར་འགྱུར་ཏེ། འཕགས་པ་དགོངས་པ་ངེས་པར་འགྲེལ་བ་ལས་ཇི་སྐད་དུ། བྱམས་པ་ཡང་ཉན་ཐོས་རྣམས་ཀྱིའམ་ཞེས་སོགས་གསུངས་སོ། །དེའི་དོན་ནི། ཉན་ཐོས་རྣམས་ཀྱི་དགེ་བའི་ཆོས་སམ། བྱང་ཆུབ་སེམས་དཔའ་རྣམས་ཀྱི་དགེ་བའི་ཆོས་སམ། དེ་བཞིན་གཤེགས་པ་རྣམས་ཀྱི་དགེ་བའི་ཆོས་འཇིག་རྟེན་པ་རྗེས་ཐོབ་ཀྱིས་བསྡུས་པ་དང་། འཇིག་རྟེན་ལས་འདས་པ་ཟག་མེད་ཀྱི་ཆོས་ཐམས་ཅད་ཀྱང་ཞི་གནས་དང་ལྷག་མཐོང་གི་འབྲས་བུ་ཡིན་པར་རིག་པར་བྱའོ། །

1-909

ཞེས་གསུངས་པ་ལྟ་བུའོ། །གཉིས་པ་ནི། ཞི་གནས་དང་ལྷག་མཐོང་དེ་གཉིས་ཀྱིས་ཏིང་ངེ་འཛིན་ཐམས་ཅད་བསྡུས་པའི་ཕྱིར་ན། ལམ་ལ་འཇུག་པའི་རྣལ་འབྱོར་པ་ཐམས་ཅད་ཀྱིས་དུས་ཐམས་ཅད་དུ་ངེས་པར་ཞི་གནས་དང་ལྷག་མཐོང་བསྟེན་པར་བྱ་སྟེ། འཕགས་པ་དགོངས་པ་ངེས་པར་འགྲེལ་པ་དེ་ཉིད་ལས་བཅོམ་ལྡན་འདས་ཀྱིས་ཇི་སྐད་དུ། ངས་ཉན་ཐོས་རྣམས་དང་། བྱང་ཆུབ་སེམས་དཔའ་རྣམས་དང་། དེ་བཞིན་གཤེགས་པ་རྣམས་ཀྱི་ཏིང་ངེ་འཛིན་གྱི་རྣམ་པ་དུ་མ་བསྟན་པ་གང་ཡིན་པ་དེ་དག་ཐམས་ཅད་ཞི་གནས་དང་ལྷག་མཐོང་གིས་བསྡུས་པར་རིག་པར་བྱའོ། །ཞེས་གསུངས་པ་ལྟ་བུའོ། །གཉིས་པ་ལྷག་མཐོང་གི་དགོས་པ་ལ་བཞི་སྟེ། སྒྲིབ་པ་ཐམས་ཅད་སྤོང་བ། སྡུག་བསྔལ་ཐམས་ཅད་གཅོད་པ། ཡེ་ཤེས་རྣམ་པར་དག་པ་ཐོབ་པ། བསམ་པ་ཕུན་སུམ་ཚོགས་པ་འགྲུབ་པའོ། །དང་པོ་ལ་གཉིས་ཏེ། དངོས་ཀྱི་དོན་དང་། ཤེས་བྱེད་ཀྱི་ལུང་ངོ་། །དང་པོ་ནི། ཞི་གནས་དང་ལྷག་མཐོང་གཉིས་ཀ་དགོས་པ་མ་ཡིན་གྱི། ཞི་གནས་ཙམ་གྱིས་སྒྲིབ་པ་སྤོང་ངོ་སྙམ་ན། ཞི་གནས་ཙམ་འབའ་ཞིག་གོམས་པར་བྱས་པས་ནི་རྣལ་འབྱོར་པ་རྣམས་ཀྱིས་སྒྲིབ་པ་རྩ་བ་ནས་མི་སྤོང་གི འོ་ན་ཞི་གནས་ཀྱི་བྱེད་པ་ཅི་ཞེ་ན། ཉོན་མོངས་པ་མངོན་གྱུར་རྣམ་པར་གནོན་པ་ཙམ་དུ་ཟད་དེ།

1-910

ཉོན་མོངས་པའི་བག་ལ་ཉལ་ལེགས་པར་ཆོམས་པར་མི་འགྱུར་རོ། །དེ་ཅིའི་ཕྱིར་ཞེ་ན། བདག་མེད་རྟོགས་པའི་ཤེས་རབ་ཀྱི་སྣང་བ་བྱུང་བ་མེད་པར་ཉོན་མོངས་པའི་བག་ལ་ཉལ་མེད་པར་ཆོམས་མི་སྲིད་པའི་ཕྱིར། གཉིས་པ་ནི། ཞི་གནས་ཙམ་གྱིས་བག་ལ་ཉལ་མི་ཆོམས་པ་དེ་བས་ན་འཕགས་པ་དགོངས་པ་ངེས་པར་འགྲེལ་བ་དེ་ཉིད་ལས། བསམ་གཏན་གྱིས་ཉོན་མོངས་པ་རྣམས་རྣམ་པར་གནོན་ནོ། །ཤེས་རབ་ཀྱིས་ནི་བག་ལ་ཉལ་ལེགས་པར་འཇོམས་པར་བྱེད་དོ། །ཞེས་བཀའ་སྩལ་ཏོ། །གཉིས་པ་སྡུག་བསྔལ་ཐམས་ཅད་གཅོད་པ་ལ་གཉིས་ཏེ། ལྡོག་པའི་སྒོ་ནས་བསྟན་པ་དང་། །རྗེས་འགྲོའི་སྒོ་ནས་བསྟན་པའོ། །དང་པོ་ནི། འཕགས་པ་ཏིང་ངེ་འཛིན་རྒྱལ་པོ་ལས་ཀྱང་གསུངས་ཏེ། དེའི་དོན་ནི། སོ་སོ་སྐྱེ་བོས་ཀྱང་ཞི་གནས་ཀྱི་ཏིང་ངེ་འཛིན་དེ་སྒོམ་པར་བྱེད་མོད་ཀྱི། ཏིང་ངེ་འཛིན་ཙམ་སྒོམ་པ་དེ་ལ་ནི་ཏིང་ངེ་འཛིན་ཙམ་གྱིས་བདག་ཏུ་འཛིན་པའི་འདུ་ཤེས་བཟློག་པར་མི་བྱེད་པས་ན། གང་ཟག་དེ་ནི་སེམས་རྒྱུད་ལ་ཉོན་མོངས་པ་ཕྱིར་ཞིང་རབ་ཏུ་འཁྲུག་སྟེ། རང་སྤྱོད་ཀྱི་བུ་ལྷག་སྤྱོད་ཀྱིས་འཇིག་རྟེན་འདིར་ནི་ཏིང་ངེ་འཛིན་སྒོམ་པ་བཞིན། གལ་ཏེ་གཟུགས་སོགས་ཀྱི་ཆོས་ལ་གང་ཟག་གི་བདག་མེད་དང་ཆོས་ཀྱི་བདག་མེད་པར་ཐོས་བསམ་གྱི་ཤེས་རབ་ཀྱིས་སོ་སོར་རྟོག་ཅིང་ཆོས་ཅན་གཟུགས་སོགས་ལ་སོ་སོར་བརྟགས་ནས་གལ་ཏེ་བསྒོམ་པར་བྱེད་ན་ནི།

1-911

བདག་མེད་རྟོགས་པ་དང་ལྡན་པའི་ཏིང་ངེ་འཛིན་དེ་ནི་མྱ་ངན་ལས་འདས་པ་ཐོབ་པའི་འབྲས་བུའི་རྒྱུའོ། །བདག་མེད་རྟོགས་པའི་ཤེས་རབ་ལས་གཞན་ཞི་གནས་ཙམ་གང་ཡིན་པ་དེས་ནི་ཉོན་མོངས་པ་ཞི་བར་མི་འགྱུར་རོ་ཞེས་གསུངས་སོ། །གཉིས་པ་རྗེས་འགྲོའི་སྒོ་ནས་བསྟན་པ་ནི། བྱང་ཆུབ་སེམས་དཔའི་སྡེ་སྣོད་ལས་ཀྱང་བཀའ་སྩལ་ཏོ་ཞེས་གསུངས་སོ། །མདོ་དེའི་དོན་བཤད་པ་ནི། གང་ཟག་གང་དག་ཉོན་མོངས་པའི་ཆོས་འདུལ་བར་བྱེད་པའི་འཕགས་པའི་ཆོས་ལྷག་མཐོང་མ་ཐོབ་པར་ཏིང་ངེ་འཛིན་ཙམ་གྱིས་ཆོག་པར་འཛིན་པ་ནི་ངས་ཉོན་མོངས་པ་སྤངས་སོ་སྙམ་པའི་ང་རྒྱལ་གྱི་དབང་གིས་ཡོན་ཏན་མ་ཐོབ་པ་ཐོབ་བོ་སྙམ་པའི་མངོན་པའི་ང་རྒྱལ་དུ་ལྷུང་ཞིང་། དེའི་ཉེས་དམིགས་ཀྱང་མང་པོ་འབྱུང་སྟེ། ལས་ཀྱི་དབང་གིས་འཁོར་བར་སྐྱེ་བ་དང་། ན་ཚོད་ཡོངས་སུ་འགྱུར་པའི་རྒ་བ་དང་། ལུས་གདུང་བར་བྱེད་པའི་ན་བ་དང་། ཡིད་ཀྱི་གདུང་བའི་མྱ་ངན་དང་། ངག་གིས་སྨྲེ་སྔགས་འདོན་པ་དང་། ལུས་ལ་གནོད་པ་འབབ་པའི་སྡུག་བསྔལ་བ་དང་། ཡིད་ལ་གནོད་པ་འབབ་པའི་ཡིད་མི་བདེ་དང་། སེམས་རྣལ་དུ་མི་གནས་པ་ལོང་ལོང་པོའི་འཁྲུག་པ་ལས་ཡོངས་སུ་མི་གྲོལ་ལོ། །ལས་ཀྱི་དབང་གིས་སྐྱེ་གནས་སུ་འགྲོ་བ་རིས་དྲུག་གི་འཁོར་བ་ལས་མི་གྲོལ་ལོ། །

1-912

སྡུག་བསྔལ་གསུམ་གྱི་ཕུང་པོ་ལས་ཀྱང་ཡོངས་སུ་མི་གྲོལ་ཏེ། དོན་དེ་ལ་དགོངས་ནས་དེ་བཞིན་གཤེགས་པས་འདི་སྐད་དུ། བཤེས་གཉེན་གཞན་ལས་ཡང་དག་པ་མངོན་སུམ་དུ་རྟོགས་པ་དང་རྗེས་སུ་མཐུན་པའི་ལྷག་མཐོང་ཐོབ་པས་ནི་རྒ་ཤི་ལས་གྲོལ་བར་འགྱུར་རོ་ཞེས་བཤད་དོ། །གསུམ་པ་ཡེ་ཤེས་རྣམ་པར་དག་པ་ཐོབ་པ་ལ་གཉིས་ཏེ། དངོས་ཀྱི་དོན་དང་། ཤེས་བྱེད་ཀྱི་ལུང་ངོ་། །དང་པོ་ནི། ལྷག་མཐོང་མེད་པར་ཞི་གནས་ཙམ་གྱིས་སྒྲིབ་པ་མི་སྤོང་བ་དེ་བས་ན། སྒྲིབ་པ་མཐའ་དག་སྤངས་ནས་དྲི་མས་ཡོངས་སུ་དག་པའི་ཟག་མེད་ཀྱི་ཡེ་ཤེས་འབྱུང་བར་འདོད་པའི་རྣལ་འབྱོར་པས་ཞི་གནས་ལ་གནས་ནས་སྟོང་ཉིད་རྟོགས་པའི་ཤེས་རབ་བསྒོམ་པར་བྱའོ། །གཉིས་པ་ནི། ཡེ་ཤེས་རྣམ་པར་དག་པ་ཐོབ་པ་ལྷག་མཐོང་ལ་རག་ལས་པ། དེ་སྐད་དུ་འཕགས་པ་དཀོན་མཆོག་བརྩེགས་པ་ལས་ཀྱང་བཀའ་སྩལ་ཏེ། ཚུལ་ཁྲིམས་ལ་ཞེས་སོགས་བཀའ་སྩལ་ཏོ་ཞེས་པའོ། །ལུང་གི་དོན་ནི། ཚོགས་ཀྱི་གཙོ་བོ་ཚུལ་ཁྲིམས་ལ་གནས་ནས་འགྱོད་པ་མེད་པ་ཐོབ་ཅིང་། དེ་ལ་བརྟེན་ནས་ཏིང་ངེ་འཛིན་ཕུན་སུམ་ཚོགས་པ་ཐོབ་སྟེ། ཏིང་ངེ་འཛིན་ཕུན་སུམ་ཚོགས་པ་ཐོབ་ནས་ཀྱང་བསམ་བྱུང་གི་ཤེས་རབ་ཀྱིས་གཏན་ལ་ཕབ་པའི་སྟོང་པ་ཉིད་ཀྱི་དོན་སྒོམ་པར་བྱེད་དོ། །སྟོང་ཉིད་རྟོགས་པའི་ཤེས་རབ་བསྒོམས་པ་ཉིད་ཀྱིས་ནི་ཡེ་ཤེས་རྣམ་པར་དག་པ་འཐོབ་བོ། །

1-913

ཡེ་ཤེས་རྣམ་པར་དག་པ་ཐོབ་པས་ནི་འཕགས་པ་དགྱེས་པའི་ཚུལ་ཁྲིམས་ཕུན་སུམ་ཚོགས་སོ་ཞེས་པའི་དོན་ནོ། ། བཞི་པ་བསམ་པ་ཕུན་སུམ་ཚོགས་པ་འགྲུབ་པ་ལ་གཉིས་ཏེ། ལྡོག་པའི་སྒོ་ནས་བསྟན་པ་དང་། རྗེས་འགྲོའི་སྒོ་ནས་བསྟན་པའོ། །དང་པོ་ནི། འཕགས་པ་ཐེག་པ་ཆེན་པོ་ལ་དད་པ་སྒོམ་པའི་མདོ་ལས་ཀྱང་། རིགས་ཀྱི་བུ་ཞེས་པ་ནས་ང་མི་སྨྲའོ་ཞེས་པའི་བར་དུ་གསུངས་སོ། །འདིའི་དོན་ནི། སྟོང་ཉིད་རྟོགས་པའི་ཤེས་རབ་ལ་ཉེ་བར་མི་གནས་ན་ཞི་གནས་ཙམ་གྱིས་བྱང་ཆུབ་སེམས་དཔའ་རྣམས་ཀྱིས་ཐེག་པ་ཆེན་པོ་ལ་དད་པ་ཆེན་པོ་ལ་བསླབས་པས་ཇི་ལྟར་ཡང་སྒྲིབ་གཉིས་ལས་ངེས་པར་འབྱུང་བར་ང་མི་སྨྲའོ། །གཉིས་པ་རྗེས་འགྲོའི་སྒོ་ནས་བསྟན་པ་ནི། རིགས་ཀྱི་བུ་ཞི་གནས་ཙམ་གྱིས་མི་ཆོག་པའི་རྣམ་གྲངས་འདིས་ཀྱང་འདི་ལྟར་བྱང་ཆུབ་སེམས་དཔའ་རྣམས་ཀྱིས་ཐེག་པ་ཆེན་པོ་ལ་ཡིད་ཆེས་པའི་དད་པ་ལ་བརྟེན་ནས་ཐེག་པ་ཆེན་པོ་ལ་འཇུག་པ་ལས་ངེས་པར་འབྱུང་བ་གང་ཅི་ཡང་བྱུང་སྟེ། དེ་ཐེག་པ་ཆེན་པོ་ལ་བརྟེན་ནས་ངེས་པར་འབྱུང་བ་དེ་ཐམས་ཅད་ནི་གང་མཉམ་པར་གཞག་པར་བྱ་བའི་དོན་ལས་རྣམ་པར་མ་གཡེངས་པའི་ཞི་གནས་ཀྱི་སེམས་ཀྱིས་དམིགས་པ་མི་འཆོར་བར་བཟུང་ཞིང་། དོན་དང་ཆོས་ཡང་དག་པར་བསམས་པ་ལས་འབྱུང་བར་རིག་པར་བྱའོ། །

1-914

ཞེས་བཀའ་སྩལ་ཏོ་ཞེས་པའི་དོན་ནོ། །གཉིས་པ་ཞི་གནས་ཀྱི་དགོས་པ་ནི། ཞི་གནས་དང་བྲལ་བའི་ལྷག་མཐོང་འབའ་ཞིག་ནི་རྣལ་འབྱོར་པའི་སེམས་ཡུལ་རྣམས་ལ་རྩེ་གཅིག་ཏུ་མི་གནས་པར་རྣམ་པར་རྟོག་པའི་རླུང་གིས་བསྐྱོད་ནས་རྣམ་པར་གཡེང་བར་འགྱུར་གྱི། དམིགས་པ་ལ་སེམས་བརྟན་པར་གནས་པར་མི་འགྱུར་རོ། །དཔེར་ན་རླུང་གི་ནང་ན་འདུག་པའི་མར་མེ་བཞིན་དུའོ། །ཞི་གནས་མེད་ན་སེམས་མི་གནས་པ་དེ་བས་ན་ཡེ་ཤེས་ཀྱི་སྣང་བ་ཡུལ་གྱི་རྣམ་པ་ཤིན་ཏུ་གསལ་བ་མི་འབྱུང་ངོ་། བཞི་པ་གཉིས་ཀའི་དོན་བསྡུ་བ་ནི་བཞི་སྟེ། ལྡོག་པ་དང་། རྗེས་འགྲོ་དང་། དེའི་ཤེས་བྱེད་དང་། སྐབས་ཀྱི་དོན་བསྡུ་བའོ། །དང་པོ་ནི། དེ་ལྟ་བས་ན་ཞི་གནས་དང་ལྷག་མཐོང་གཉིས་ཀ་འདྲ་བར་བསྟན་པར་བྱའོ། །བཤེས་སྤྲིང་ལས་ཀྱང་། ཤེས་རབ་མེད་ན་བསམ་གཏན་ཡོད་མིན་ཏེ། །བསམ་གཏན་མེད་པར་ཡང་ནི་ཤེས་རབ་མེད། །གང་ལ་དེ་གཉིས་ཡོད་པ་སྲིད་པ་ཡི། །རྒྱ་མཚོ་གནག་རྗེས་ལྟ་བུར་སྩལ་བར་བགྱིད། །ཅེས་སོ། །ཞི་ལྷག་གང་རུང་མེད་ན་ཡང་ཡང་དག་པའི་དོན་མི་རྟོགས་པ་དེའི་ཕྱིར། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ལས་ཀྱང་། ཉན་ཐོས་རྣམས་ཀྱིས་ནི་དེ་བཞིན་གཤེགས་པའི་རིགས་ཆོས་ཉིད་དྲི་བྲལ་མཐའ་དག་མ་མཐོང་སྟེ། ཆོས་སྐུའི་ཆ་ཤས་མ་མཐོང་སྟེ།

1-915

ཏིང་ངེ་འཛིན་གྱིས་ཤས་ཆེ་བར་གནས་པའི་ཕྱིར་དང་། བདག་མེད་རྟོགས་པའི་ཤེས་རབ་ཤས་ཆུང་བའི་ཕྱིར་རོ། །བྱང་ཆུབ་སེམས་དཔའ་རྣམས་ཀྱིས་ནི་ཆོས་ཉིད་དྲི་མས་དག་པའི་ཆོས་སྐུའི་ཆ་ཤས་མཐོང་མོད་ཀྱི། དྲི་བྲལ་གྱི་ཆོས་སྐུའི་ཆ་ཤས་མཐའ་དག་མི་གསལ་ཏེ། ཤེས་རབ་ཤས་ཆེ་བའི་ཕྱིར་དང་། ཏིང་ངེ་འཛིན་ཤས་ཆུང་བའི་ཕྱིར་རོ། །གཉིས་པ་རྗེས་འགྲོའི་སྒོ་ནས་བསྟན་པ་ནི། དེ་བཞིན་གཤེགས་པས་ནི་དྲི་མ་མཐའ་དག་གིས་དག་པའི་ཆོས་སྐུའི་ཆ་ཤས་ཐམས་ཅད་གསལ་བར་གཟིགས་ཏེ། ཞི་གནས་དང་ལྷག་མཐོང་མཚུངས་པར་ལྡན་པའི་ཕྱིར་རོ། །ཞེས་བཀའ་སྩལ་ཏོ། །མདོ་ལས། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་མཆོག་གིས་ཀྱང་ཐམས་ཅད་མཐོང་མ་ལགས། །ཆོས་སྐུ་གང་དག་བཅོམ་ལྡན་འདས་ཁྱོད་བློ་གྲོས་མཐའ་ཡས་པ། །ཤེས་བྱ་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་པ་ལྟར་རོ། །འོ་ན་ཞི་གནས་ཀྱི་བྱེད་པ་ཇི་ལྟ་བུ་ཞེ་ན། ཞི་གནས་ཀྱི་སྟོབས་ཀྱིས་ནི་མར་མེ་རླུང་གིས་བསྐྱོད་པ་མེད་པར་ལེགས་པར་བཞག་པ་བཞིན་དུ། རྣམ་པར་རྟོག་པ་རབ་ཏུ་གཡོ་བའི་རླུང་དང་འདྲ་བ་རྣམས་ཀྱིས་སེམས་ཕྱིར་གཡོས་པར་མི་འགྱུར་རོ། །འོ་ན་ལྷག་མཐོང་གི་བྱེད་པ་ཇི་ལྟ་བུ་ཞེ་ན། ལྷག་མཐོང་གིས་ནི་ཡུལ་གྱི་གནས་ཚུལ་སྟོང་པ་ཉིད་ཀྱི་དོན་རིགས་པའི་སྟོབས་གྱིས་ངེས་པར་བྱས་པའི་དོན་ཤིན་ཏུ་གསལ་བའི་རྣམ་པས་རྟོགས་པས་ན་སྒྲོ་འདོགས་ཀྱི་ལྟ་བ་ངན་པའི་དྲྭ་བ་མཐའ་དག་སྟོང་པ་ཉིད་ཀྱི་དོན་ལ་རྒོལ་བ་བྱེད་པ་གཞན་དག་གིས་ཀླན་ཀ་ཇི་ཙམ་སྨྲས་ཀྱང་རང་གི་རྟོགས་པ་ལས་མི་ཕྱེད་དོ་ཞེས་བྱའོ། །

1-916

གསུམ་པ་ཤེས་བྱེད་ཀྱི་ལུང་ནི། ཟླ་བ་སྒྲོན་མེའི་མདོ་ལས་ཇི་སྐད་དུ་གསུངས་པ་ལྟ་བུའོ། །ཞེས་ཏེ། ལུང་དེའི་དོན་བཤད་པ་ནི། ཞི་གནས་ཀྱི་སྟོབས་ཀྱིས་ནི་སེམས་རྣམ་པར་རྟོག་པའི་རླུང་གིས་གཡོ་བ་མེད་པར་བརྟན་པར་འགྱུར། ལྷག་མཐོང་གིས་ནི་གཞན་གྱི་ཀླན་ཀས་མི་ཕྱེད་པས་རི་དང་འདྲ་བར་འགྱུར་རོ་ཞེས་པའོ། །བཞི་པ་སྐབས་ཀྱི་དོན་བསྡུ་བ་ནི། ཞི་ལྷག་ཟུང་འབྲེལ་དུ་དགོས་པ་དེ་ལྟ་བས་ན་ཞི་ལྷག་གཉིས་ཀ་ལ་རྣལ་འབྱོར་དུ་བྱ་བར་གནས་དགོས་སོ། །རྣལ་འབྱོར་གཉིས་རྒྱུ་ཉིད་དུ་སྒྲུབ་པ་བསྟན་ཟིན་ཏོ། །

༈ གཉིས་པོ་རྗེས་སུ་སྒྲུབ་པའི་ཚུལ་ལ། ཞི་གནས་སྒྲུབ་པའི་ཚུལ་བསྟན་པ། ༆ རྣལ་འབྱོར་རྗེས་སུ་སྒྲུབ་པ་ལ་གཉིས་ཏེ། སྤྱིའི་དོན་དང་། གཞུང་གི་དོན་ནོ། །དང་པོ་ལ་ཞི་གནས་སྒྲུབ་པའི་ཚུལ་དང་། ལྷག་མཐོང་སྒྲུབ་པའི་ཚུལ་ལོ། །དང་པོ་ལ་སྡོམ་ནི། རྣལ་འབྱོར་ཞི་གནས་རྒྱུ་དང་གྲོགས། །སྔོན་འགྲོ་དམིགས་པ་གཏད་པའི་ཐབས། །རྗེས་བྱ་ཁམས་ཚོད་བཟུང་དང་ཚད། །སྤྱོད་ལམ་སེམས་ཉམས་བཅོས་པའི་ཐབས། །ཡོན་ཏན་རྗེས་བྱ་གོ་རིམ་དང་། །རྣམ་གཡེང་དེའི་སྦྱོར་འབྲས་བུར་བཅས། །དེ་ལ་ཞི་གནས་ཀྱི་རྣལ་འབྱོར་གང་ཞེ་ན། གང་དུ་གཉིད་ཤས་ཆུང་བ་དང་། འདོད་ཆགས་ལ་སོགས་པ་ཉོན་མོངས་པ་ཆུང་བ་དང་། དགེ་བ་ལ་མོས་པ་དང་། འདོད་པ་ལ་འདུན་པ་དང་བྲལ་བ་དང་། ལུང་དང་མན་ངག་གི་རྗེས་སུ་འཇུག་པ་སྟེ།

1-917

ཇི་སྐད་དུ། ཉོན་མོངས་ཚོགས་བྲལ་སྡོམ་པ་བསྲུང་ལ་མོས། །དགེ་བའི་དོན་ལ་མོས་ཤིང་བརྗེད་པ་མེད། །བསྒོ་བའི་ཚིག་ལ་ཉན་ཅིང་སྙན་པ་སྨྲ། །མཁས་པ་ཞི་གནས་དོན་དང་ལྡན་པར་གྱུར། །ཞེས་འབྱུང་བ་དང་། གཞན་ཡང་། སེམས་མ་འཁྲུགས་དང་ནད་དང་བྲལ། །བསྒོ་བ་འཛིན་ཅིང་ཀུན་ཏུ་གསོང་། །ཞེས་འབྱུང་བ་ལྟ་བུའོ། །དེ་ལ་ཞི་གནས་དངོས་གང་ཞེ་ན། དམིགས་པ་ལ་འཛིན་པ་དང་། སེམས་ཀུན་ཏུ་གཏོད་པ་དང་། ཉོན་མོངས་པ་སྲུང་བ་དང་། བྱིང་བ་དང་རྒོད་པ་སྙོམ་པ་དང་། ལྷག་མཐོང་ལ་ཕན་པར་བྱེད་པ་དང་། སེམས་དལ་བར་གྱུར་པ་དང་། ཀུན་ཏུ་མི་གཡོ་བ་དང་། བརྟན་པ་དང་། རབ་ཏུ་ཞི་བར་གནས་པ་སྟེ། ལུང་གཞན་དག་ལས། སྡུད་པར་ཁྱོད་དང་གཡོ་བ་མེད། །དལ་འགྱུར་དེ་བཞིན་ཉོན་མོངས་བསྲུང་། །ཡོན་ཏན་ཀུན་གྱི་རྟེན་དུ་འགྱུར། །ཞི་གནས་ཡོན་ཏན་ཀུན་ཏུ་བདེ། །ཞེས་འབྱུང་བ་དང་། སེམས་དཔའ་ཆེན་པོ་ཞི་གནས་ནི་སེམས་འཕྲོ་བ་མེད་པའི་ཏིང་ངེ་འཛིན་དང་། སེམས་ལས་བྱུང་བ་རྣམས་སོ། །ཞེས་འབྱུང་བ་དང་། མདོ་ལས། ཉེས་པ་ལྔ་སྤོང་བ་ནི་སེམས་ལས་བྱུང་བའི་འདུ་བྱེད་བརྒྱད་དོ། །ཞེས་འབྱུང་བ་ལྟ་བུའོ། །སེམས་གནས་པའི་ཐབས་ནི་དགུ་གསུངས་ཏེ། དང་པོར་དམིགས་པ་དེ་ལ་སེམས་འཇོག་གོ །ཅུང་ཟད་ཙམ་ཞིག་འཇོག་གམ་ཞེ་ན། རྒྱུན་དུ་འཇོག་གོ །

1-918

གལ་ཏེ་དམིགས་པ་ལས་སེམས་གཞན་དུ་འཕྲོས་ན་ཇི་ལྟར་བྱེད་ཅེ་ན། སེམས་སླར་བཀུག་སྟེ་དམིགས་པ་ལ་བླན་ཏེ་འཇོག་གོ །དེ་ལས་ཀྱང་སླར་འཕྲོས་ན་ཇི་ལྟར་བྱེད་ཅེ་ན། མི་མཐུན་ཕྱོགས་ཀྱི་དབང་དུ་ཡུན་རིང་པོ་མ་སོང་བར་དམིགས་པ་ལ་སེམས་ཉེ་བར་འཇོག་གོ །དེ་ལྟར་དམིགས་པ་ལ་སེམས་ཡང་ཡང་ཉེ་བར་བཞག་པས་སེམས་རྟ་རྒོད་ལྟར་གཡོ་བ་དེ་དུལ་བར་བྱེད་དོ། །ཡང་མི་མཐུན་ཕྱོགས་བྱིང་རྒོད་སྐྱེས་ན་ཡང་ཤེས་བཞིན་གྱི་བྱ་ར་བས་རིག་པར་བྱས་ནས་ཞི་བར་བྱེད་དོ། །ཡང་སྐྱེས་ན་ཡང་ཏིང་ངེ་འཛིན་གྱི་རྒྱུན་བསྲིངས་ནས་རྣམ་པར་ཞི་བར་བྱེད་དོ། །དེ་ནས་ཚུལ་དེ་ལྟར་བྱས་པའི་ནུས་པས་སེམས་རྩེ་གཅིག་ཏུ་བྱེད་དོ། །དེ་ནས་ནུས་པ་དབང་དུ་གྱུར་བས་བྱིང་རྒོད་གཉིས་ཀྱི་ཕྱོགས་སུ་མ་ལྷུང་བར་སེམས་རྩོལ་མེད་དུ་མཉམ་པར་འཇོག་པ་ཐོབ་བོ། །ཞི་གནས་ཀྱི་རྒྱུ་གང་ཞེ་ན། གང་ཞིག་ཞི་གནས་བསྐྱེད་པར་བྱེད་ཅིང་ཞི་གནས་ལ་ཕན་པར་བྱེད་པ་རྣམས་སོ། །དེ་དག་ཀྱང་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་ལུང་དང་། དེ་ལ་བརྟེན་པ་དང་། དམིགས་པ་ཁྱད་པར་ཅན་དང་། སུན་འབྱིན་པ་དང་། གཉེན་པོ་དང་། མཐོང་བ་དང་། ཐོས་པ་དང་། རང་གིས་ཉམས་སུ་མྱོང་བ་དང་། གནས་དང་། དུས་དང་། ཁ་ཟས་དང་། སྐོམ་དང་།

1-919

གོས་དང་། རྟེན་དང་། ཕྲད་པ་དང་། བྲལ་བ་དང་། གཏོང་བ་དང་། འཛིན་པ་དང་། ཡོངས་སུ་སྡུད་པ་དང་། སེམས་ལས་བྱུང་བའོ། །དེ་ལ་ལུང་གིས་ཇི་ལྟར་འགྱུར་ཞེ་ན། ཐེག་པ་ཆེན་པོའི་མདོའམ་རྒྱུད་ལས། ཞི་གནས་དང་། དེའི་ཐབས་དང་། དེའི་ཡོན་ཏན་བརྗོད་པ་གང་གིས་གང་ཞིག་འཕེལ་བར་འགྱུར་བའི་ཕྱིར་རོ། །དེ་ལ་བརྟེན་པས་ཇི་ལྟར་ཞེ་ན། བཀའ་གང་ལ་གང་གིས་བརྟེན་ནས་གང་བསྟན་པ་དེས་དེ་འཕེལ་བར་འགྱུར་བའི་ཕྱིར་རོ། །དེའང་ལུང་ལས། སེམས་དཔའ་ཆེན་པོ་སྒྲ་གང་ལ་བརྟེན་ནས་སེམས་ཅན་དམན་པ་ལ་རྟོགས་པ་འབྱུང་ངོ་། །རྟོགས་པ་ལ་བརྟེན་ནས་ཞི་གནས་དང་ལྡན་པར་འགྱུར་རོ། །དེ་ལ་བརྟེན་ནས་ལྷག་མཐོང་འཕེལ་བར་འགྱུར་རོ། །དེ་ལས་ནི་ཟུང་དུ་འབྲེལ་བའི་ཡེ་ཤེས་འབྱུང་བར་འགྱུར་རོ། །སེམས་དཔའ་ཆེན་པོ་ང་སྔོན་བྱང་ཆུབ་སེམས་དཔའི་སྤྱོད་པ་སྤྱོད་པའི་ཚེ་སངས་རྒྱས་རྣམ་པར་གཟིགས་ཀྱི་སྒྲ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ་ཞེས་བྱ་བ་ལ་སོགས་པ་རྒྱས་པར་གསུངས་སོ། །དམིགས་པ་ཇི་ལྟ་བུ་ཞེ་ན། དམིགས་པ་ནི་སྣ་ཚོགས་པ་སྟེ་མཐའ་གཅིག་ཏུ་ངེས་པ་མེད་དོ་ཞེས་གསུངས་ཏེ། འདི་ལྟར་རྣམ་པར་བམ་པ་དང་། རྣམ་པར་སྔོས་པ་ལ་བརྟེན་ནས་མི་སྡུག་པའི་བསམ་གཏན་ཡོངས་སུ་རྫོགས་པར་འགྱུར་རོ། །

1-920

དུས་མཐའི་མེ་ལ་སོགས་པ་ལ་བརྟེན་ནས་ཟད་པར་གྱི་ཏིང་ངེ་འཛིན་ཡོངས་སུ་རྫོགས་པར་འགྱུར་རོ། །ཞེས་བྱ་བ་ལ་སོགས་པ་དང་། རིན་ཆེན་སྣ་ལྔའི་སྐུའི་སྣང་བའི་གཉེན་པོ་དང་བཅས་པས་སྐུའི་ཏིང་ངེ་འཛིན་ཡོངས་སུ་རྫོགས་པར་འགྱུར་རོ། །རྔུལ་བ་དང་། ཞུ་བའི་སྟོབས་ཀྱིས་ཐིག་ལེའི་བསམ་གཏན་ཕུན་སུམ་ཚོགས་པར་འགྱུར་རོ། །སྣང་བའི་འོད་ཅེས་བྱ་བས་ནི་འོད་ཀྱི་བསམ་གཏན་ཕུན་སུམ་ཚོགས་པར་འགྱུར་རོ། །ནམ་མཁའ་དང་བ་ལ་བརྟེན་ནས་འོད་གསལ་བའི་ཡེ་ཤེས་ཕུན་སུམ་ཚོགས་པར་འགྱུར་རོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །གང་འདོད་པའི་ཡུལ་དེ་མི་འཆོར་བར་འཛིན་པར་འགྱུར་རོ། །སུན་འབྱིན་པར་ཇི་ལྟར་འགྱུར་ཞེ་ན། འདི་ལྟར་འདོད་ཆགས་ཀྱི་ཡུལ་ལ་ཉེས་དམིགས་ཅན་དུ་བལྟ་བ་སྟེ། ཆགས་པའི་ཉེས་དམིགས་དང་པོའི་དུས་སུ་རྗེས་སུ་དྲན་པ་དང་། མཚུངས་པར་ལྡན་པ་དང་། ཟླ་གཞན་དང་། དུས་ཕྱིས་འབྱུང་བས་ཕྱིས་རྗེས་སུ་དྲན་པ་དང་། གཙང་བ་མེད་པ་དང་། བདག་མེད་པ་དང་། རྟག་པ་མེད་པ་དང་། རོ་བྲོ་བ་མེད་པས་གང་འདོད་པ་རྩེ་གཅིག་ཏུ་འགྱུར་རོ། ། ལུང་གཞན་ལས། དང་པོའི་དུས་དང་མཚུངས་ལྡན་དང་། །ཟླ་གཞན་ཕྱིས་འབྱུང་རྗེས་དྲན་པས། །ཆགས་དང་གཏི་མུག་ཉོན་མོངས་བྲལ། །ཏིང་འཛིན་ཡོན་ཏན་ཕུན་སུམ་ཚོགས། །ཞེས་འབྱུང་བ་དང་། གཞན་ལས།

1-921

རྟག་མིན་རང་དབང་ཡོད་མིན་དང་། །གཞན་སྐྱོན་བདག་ལ་ལྡན་འགྱུར་དང་། །རང་གིས་རང་གི་ཡོན་ཏན་ཉིད། །འབྱོར་པ་ཕུན་སུམ་ཚོགས་པར་འགྱུར། །ཞེས་འབྱུང་བ་ལྟ་བུའོ། །གཉེན་པོས་ཇི་ལྟ་བུ་ཞེ་ན། མ་ཆགས་པ་དང་། ཞེ་སྡང་མེད་པ་ལ་སོགས་པས་རང་གི་མི་མཐུན་པའི་ཕྱོགས་སེལ་བར་འགྱུར་རོ། །དེ་ཅིའི་ཕྱིར་ཞེ་ན། མི་མཐུན་པ་དང་གཉེན་པོ་ལྷན་ཅིག་མི་གནས་པའི་ཕྱིར་འགལ་བ་ཡིན་ནོ། །གལ་ཏེ་ན་དགེ་བར་འགྱུར་བ་གང་དག་ལྷན་ཅིག་གནས་པར་འགྱུར་བའི་ཕྱིར་ཐ་དད་པ་མེད་པར་འགྱུར་རོ་ཞེ་ན། མ་ཡིན་ཏེ། ཆོས་དགེ་བ་ནང་ཐ་དད་པས་གཅིག་ཏུ་མི་འགྱུར་རོ། །གཞན་མཐོང་བས་ཇི་ལྟར་འགྱུར་ཞེ་ན། དམིགས་པ་གསལ་བ་དང་། བསམ་གཏན་ལྡན་པ་མཐོང་ན་དད་པར་འགྱུར་རོ། །གང་ལ་དད་པར་འགྱུར་བ་དེ་ལ་སེམས་རྩེ་གཅིག་པར་འགྱུར་རོ་ཞེའོ། །ཐོས་པས་ཇི་ལྟར་འགྱུར་ཞེ་ན། སྔ་མ་དེ་ཉིད་བཞིན་ནོ། །རང་གིས་ཉམས་སུ་མྱོང་བས་ཇི་ལྟར་ཞེ་ན། རང་གིས་སྔ་མའི་དུས་སུ་དམིགས་པ་ཟིན་པ་དང་། སེམས་ཐུལ་བ་དང་། རབ་ཏུ་རྫོགས་པ་དང་། མངོན་དུ་གྱུར་པས་གང་དུ་གཏད་པ་དེ་འཕེལ་བར་འགྱུར་ཏེ། ཇི་སྐད་དུ། སེམས་དཔའ་ཆེན་པོ་གང་གིས་དེ་ཁོ་ན་ཉིད་བསམ་གཏན་ཡོངས་སུ་རྫོགས་པར་འདོད་པ་དེས་གང་ལ་བརྟེན་ཏེ་བསླབ་པར་བྱ་བའི་ཐབས་ཡོངས་སུ་རྫོགས་པ་ནི་འདི་ལྟ་སྟེ།

1-922

སྔ་མའི་དུས་ཀྱི་དམིགས་པ་རྣམ་པར་གསལ་བ་དང་། ཡོངས་སུ་རྫོགས་པ་ལ་བརྟེན་ནས་བླ་ན་མེད་པའི་ཐབས་ཆེན་པོ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། སྔ་མའི་དུས་ཀྱི་དམིགས་པ་དེས་ཕྱི་མའི་དུས་ཀྱི་རྐྱེན་བྱེད་པར་འགྱུར་ཏེ། དང་པོ་ནི། རང་གི་དམིགས་པ་ལ་དྲན་པ་སྐྱེའོ། །དེ་ནས་ཕྱི་མ་ལ་མངོན་དུ་བྱེད་དོ་ཞེས་འབྱུང་བ་ལྟ་བུའོ། །གནས་ཀྱིས་ཇི་ལྟར་འགྱུར་ཞེ་ན། ལུང་ལས་འདི་ནི་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་ཏིང་ངེ་འཛིན་ཉམས་པ་མེད་པར་འདོད་པ་དང་། ཤེས་རབ་ཉམས་པ་མེད་པ་དང་། རྣམ་པར་གྲོལ་བ་ཉམས་པ་མེད་པ་ཐོབ་པར་འདོད་པས་ཐོག་མ་ཉིད་དུ་ནི་ཡིད་དུ་འོང་བའི་གནས་ལ་བརྟེན་པར་བྱའོ། །དེ་ཅིའི་ཕྱིར་ཞེ་ན། གནས་ཡོངས་སུ་དག་པས་ཐོག་མ་ཉིད་དུ་དམིགས་པ་མ་དག་པ་སྤོང་བར་འགྱུར་རོ། །གང་གི་ཚེ་དམིགས་པ་མ་དག་པ་སྤངས་པས་འདོད་ཆགས་ལ་སོགས་པའི་ཉོན་མོངས་པ་སྤོང་བར་འགྱུར་རོ། །གང་གི་ཚེ་ཉོན་མོངས་པ་སྤངས་པར་འགྱུར་བ་དེའི་ཚེ་སེམས་རྩེ་གཅིག་པ་ཐོབ་པར་འགྱུར་རོ། །ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །ཡུལ་གྱིས་ཇི་ལྟ་བུ་ཞེ་ན། རིགས་ཀྱི་བུ་སེམས་ཅན་ཚ་བའི་ནད་དང་ལྡན་པ་རྣམས་ཀྱིས་ནི་རི་ཤིན་ཏུ་མཐོ་བར་འགྱུར་བ་དང་།

1-923

གྲང་བའི་གནས་ཡོད་པ་དང་། ཙནྡན་གོར་ཤིར་ཤ་དང་། ཙནྡན་སྦྲུལ་གྱི་སྙིང་པོ་ཅན་ལ་སོགས་པ་ཡོད་པ། གང་ཡུལ་ཁམས་སམ། འབྲོག་དགོན་པའམ། ཁམས་ཆེན་པོ་ལ་གནས་ན་དེའི་ནད་ཐམས་ཅད་ཞི་བར་འགྱུར་རོ། །དེ་བས་ན་དེའི་བསམ་གཏན་དང་། ཆོ་ག་ཕུན་སུམ་ཚོགས་པར་འགྱུར་ཏེ། འདི་ལྟར་རིན་པོ་ཆེའི་མཛོད་ཅེས་བྱ་བའི་ཏིང་ངེ་འཛིན་དང་། རིན་པོ་ཆེའི་ཏོག་བརྩེགས་པ་ཞེས་བྱ་བའི་ཏིང་ངེ་འཛིན་དང་། རིན་ཆེན་སྣང་བ་ཞེས་བྱ་བའི་ཏིང་ངེ་འཛིན་དང་། རིན་ཆེན་སྙིང་པོ་ཞེས་བྱ་བའི་ཏིང་ངེ་འཛིན་ལ་སོགས་པའི་ཏིང་ངེ་འཛིན་ཚད་མེད་གྲངས་མེད་དཔག་ཏུ་མེད་ཅིང་བགྲང་བ་ལས་འདས་པ་ཐོབ་པར་འགྱུར་རོ། །ཞེས་བྱ་བ་ལ་སོགས་པ་རྒྱས་པར་གསུངས་སོ། །དུས་ཕྱིས་ཇི་ལྟ་བུ་ཞེ་ན། འདི་ལྟ་སྟེ། འདི་ནས་ཡུན་རིང་པོ་མ་ལོན་པར་བསམ་གཏན་ཕུན་སུམ་ཚོགས་པར་འདོད་ན། ཉི་མ་ལྔའམ། གསུམ་མམ། གཅིག་གི་བར་དུ་ཡན་ལག་ཡོངས་སུ་སྦྱང་བ་དང་། ཕུང་པོ་རྒྱུན་རབ་ཏུ་འཕེལ་བ་ཞེས་བྱ་བའི་ཆོ་ག་ལ་གནས་པར་བྱའོ། །ཞེས་འབྱུང་བ་ལྟ་བུའོ། །ཟས་ཀྱིས་ཇི་ལྟར་འགྱུར་ཞེ་ན། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་ལ་ཟས་ཀྱི་ཚོད་ཤེས་པ་དང་། ཟས་ཀྱི་མཚན་ཉིད་ཤེས་པ་དང་། ཟས་དང་མཐུན་པའི་ལུས་ཤེས་པ་དེས་ཇི་ལྟར་ཟས་ལ་སྤྱད་པ་བཞིན་དུ་བསམ་གཏན་ཕུན་སུམ་ཚོགས་པར་འགྱུར་རོ། །

1-924

དེ་ཅིའི་ཕྱིར་ཞེ་ན། འདི་ལྟར་ཟས་ལ་ལེགས་པར་བརྟེན་པས་ནི་ལུས་བདེ་བར་གནས་པར་འགྱུར་རོ། །དེ་ནས་ནི་སེམས་བདེ་བར་འགྱུར་རོ། །དེ་ནས་ནི་བསམ་གཏན་ཕུན་སུམ་ཚོགས་པར་འགྱུར་རོ། །ཞེས་འབྱུང་བ་ལྟ་བུའོ། །གྲོགས་ཀྱིས་ཇི་ལྟར་འགྱུར་ཞེ་ན། སེམས་དཔའ་ཆེན་པོའི་བསམ་གཏན་དང་ལྡན་པའི་གང་ཟག་ལ་ལ་ཞིག་བསམ་གཏན་ལ་གནས་པར་འགྱུར་ཞིང་བསམ་གཏན་ལ་བསྔགས་པ་བརྗོད་ན། བསམ་གཏན་གཟུངས་སུ་འཛིན་པར་བྱེད་ན། བྱིས་པ་མ་རབས་ཀྱང་བསམ་གཏན་གྱི་རྗེས་སུ་འཇུག་པར་བྱེད་ན། བསམ་གཏན་དེ་རང་ལས་འབྱུང་སྙམ་མམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། གལ་ཏེ་བསམ་གཏན་དེ་གཞན་ལས་འབྱུང་སྙམ་མམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། སེམས་དཔའ་ཆེན་པོ་དེ་དེ་བཞིན་ནོ། །དེ་དེ་བཞིན་ཏེ། སེམས་ཅན་དེ་དག་གི་བསམ་གཏན་དེ་རང་ལས་འབྱུང་བ་མ་ཡིན་ཏེ། གཞན་ལས་ཀྱང་བྱུང་བ་མ་ཡིན་ཏེ། རྐྱེན་གཞན་ལ་ལྟོས་ཤིང་། རང་གི་ས་བོན་ལས་བྱུང་བར་རིག་པར་བྱའོ། །ཞེས་འབྱུང་བ་ལྟ་བུའོ། །གྲོགས་ཀྱིས་ཇི་ལྟར་བསྟེན་པའང་དེ་བཞིན་ནོ། །ཕྲད་པ་ཇི་ལྟར་འགྱུར་ཞེ་ན། འདི་ལྟར་ལུང་དང་ཕྲད་པ་དང་། རིགས་པ་དང་ཕྲད་པ་དང་། དགེ་བའི་གྲོགས་པོ་དང་ཕྲད་པས་ཀྱང་བསམ་གཏན་ཕུན་སུམ་ཚོགས་པར་འགྱུར་རོ། །

1-925

མི་མཐུན་ཕྱོགས་དང་བྲལ་བ་ཇི་ལྟར་ཞི་གནས་སྐྱེ་བའི་ཡན་ལག་ཏུ་འགྱུར་ཞེ་ན། ཇི་ལྟར་གང་ལ་ཞེན་ཅིང་ཆགས་པའི་ཡུལ་དང་བྲལ་བ་དང་། སྲིན་པོ་དང་བྲལ་བ་དང་། དགྲ་དང་། སྦྲུལ་གདུག་པ་དང་། སྟག་དང་སེང་གེ་ལ་སོགས་པ་བསམ་གཏན་གྱི་དགྲར་གྱུར་པ་དང་བྲལ་བར་འགྱུར་རོ། །གཏོང་བས་ཞི་གནས་སྐྱེ་བའི་ཡན་ལག་ཏུ་ཇི་ལྟར་འགྱུར་ཞེ་ན། སྦྱིན་པ་ལ་སོགས་པ་དགེ་བའི་སྟོབས་ཀྱིས་འགྱུར་བའོ། །འཛིན་པས་ཞི་གནས་སྐྱེ་བའི་ཡན་ལག་ཏུ་ཇི་ལྟར་འགྱུར་ཞེ་ན། གང་གིས་སྡོམ་པ་ཡོངས་སུ་འཛིན་པ་དང་། གྲོགས་བཟང་པོ་དང་། གནས་བཟང་པོ་དང་། སེམས་དང་མཐུན་པ་འཛིན་པས་སྐྱེ་བར་འགྱུར་བའོ། །སྡུད་པས་ཞི་གནས་སྐྱེ་བའི་ཡན་ལག་ཏུ་ཇི་ལྟར་འགྱུར་ཞེ་ན། བསྡུ་བའི་དངོས་པོ་བཞི་ལ་བརྟེན་ནས་བསམ་གཏན་ཕུན་སུམ་ཚོགས་པར་འགྱུར་བའོ། །སེམས་ལས་བྱུང་བ་ཇི་ལྟར་ཞི་གནས་སྐྱེ་བའི་ཡན་ལག་ཏུ་འགྱུར་བ་ཇི་ལྟ་བུ་ཞེ་ན། ཞི་གནས་ཀྱི་དམིགས་པ་དྲན་པ་དང་། ཞི་གནས་ལ་མོས་པ་ལ་སོགས་པ་དང་ལྡན་པས་བསམ་གཏན་ཕུན་སུམ་ཚོགས་པར་འགྱུར་རོ། །འདི་ལའང་འགའ་ཞིག་ནི། དངོས་སུ་སྐྱེ་བའི་ཡན་ལག་ཏུ་འགྱུར་རོ། །འགའ་ཞིག་ནི་རྒྱུད་ནས་སྐྱེ་བའི་ཡན་ལག་ཏུ་འགྱུར་ཏེ་ཅི་རིགས་སུ་སྦྱར་རོ། །དེ་ལ་ཞི་གནས་ཀྱི་གྲོགས་གང་ཞེ་ན།

1-926

དམིགས་པ་ལ་སེམས་འཛིན་པ་མངོན་དུ་བྱེད་པའི་དུས་ན་གང་གིས་ཞི་གནས་དེ་ལ་ཕན་པར་འགྱུར་བ་ཐམས་ཅད་དོ། ། སྔོན་དུ་འགྲོ་བ་གང་ཞེ་ན། གང་གིས་དང་པོ་སྟན་བདེ་བ་ལ་འདུག་སྟེ། སྐྱིལ་མོ་ཀྲུང་ལེགས་པར་བཅས་ནས་ལུས་བསྲང་སྟེ་སུན་འབྱིན་པ་དང་། སྤྲོ་བ་རྣམ་པ་གཉིས་བྱས་ཏེ། སུན་འབྱིན་པ་ནི། ཨེ་མའོ་ཁམས་གསུམ་ཀུན་གྱི་སེམས་ཅན་འདི་དག་ནི་ཚེ་རབས་ཐོག་མ་མེད་པ་ནས་ཉོན་མོངས་པའི་འཆིང་བ་དང་ལྡན་པ་སྟེ། དེའི་རྒྱུ་དེའི་རྐྱེན་གྱིས་མཚམས་མེད་པའི་སྡུག་བསྔལ་སྣ་ཚོགས་མྱོང་བར་འགྱུར་རོ་ཞེས་བྱ་བ་འདིའང་བསམ་པར་བྱའོ། །གཞན་ཡང་བདག་གིས་ཚེ་རབས་ཐོག་མ་མེད་པའི་དུས་ནས་དོན་མེད་པའི་ལས་ཀྱིས་བཅིངས་པ་སྟེ། ཇི་སྐད་དུ། མི་རྟག་ལུས་འདིའི་དོན་གྱི་ཕྱིར། །སྡིག་དང་དོན་མེད་རྣམས་ལས་བྱས། །ལུས་དང་སེམས་བྲལ་སོ་སོ་ན། །ཁྱོད་ཀྱིས་ཅི་སྟེ་ཐང་དུ་གསོ། །དགེ་བྲལ་ཐབས་ནི་སྣ་ཚོགས་པས། །ཕུང་པོའི་དོན་ཕྱིར་ལས་རྣམས་བྱས། །འབྲས་བུ་བྱ་དང་ཁྱི་སྤྱང་ཟས། །བདག་ལ་དགོས་པ་མེད་དུ་ཟད། །ཅེས་པ་འདི་དག་གི་དོན་ཡང་བསམ་པར་བྱའོ། །གཞན་ཡང་སྤྲོ་བ་ནི། བདག་ལུས་གཅིག་མིན་ཕྱི་ནང་གཉིས་དང་ལྡན། །ནང་རོལ་དོན་སྙིང་པགས་པ་གཟུགས་དང་མགོ །རེ་རེའི་ཆ་ཡི་དབྱེ་བས་སྙིང་པོ་མེད། །དེ་ཕྱིར་ལུས་ལ་མཁས་པ་སུ་ཞིག་ཆགས། །

1-927

ཞེས་པ་དང་། ཁམས་གསུམ་གཅིག་མིན་སྣོད་དང་བཅུད་དུ་ལྡན། །རེ་རེའི་ཆ་ཡི་དབྱེ་བས་བསམ་མི་ཁྱབ། །ཕྲ་རབ་རྡུལ་ལ་དངོས་པོ་ཅི་ཡང་མེད། །དེ་ཕྱིར་ཕྱི་རོལ་གཅིག་དང་དུ་མར་བྲལ། །ཞེས་པ་འདི་ཡང་བསམ་པར་བྱའོ། །གཞན་ཡང་། དེ་ནས་བདག་ནི་འབྲས་བུ་ཅན། །འཇིག་རྟེན་དགེ་བ་ཐམས་ཅད་ཀྱིས། །བསམ་གཏན་དགེ་བའི་ཆར་མི་འགྲོ། །དེ་ཕྱིར་བདག་ནི་དབུགས་ཕྱིན་འགྱུར། །ཞེས་པ་འདི་ཡང་བསམ་སྟེ། འདི་དག་ནི་སྔོན་དུ་འགྲོ་བའོ། །དེ་ལ་ཞི་གནས་ཀྱི་དམིགས་པ་གང་ཞེ་ན། ཡིད་ཀྱི་རྣམ་པར་ཤེས་པ་དང་། དབང་པོའི་རྣམ་པར་ཤེས་པའི་ཡུལ་དུ་གྱུར་པ་དང་། ཏིང་ངེ་འཛིན་དང་སེམས་ལས་བྱུང་བ་གཞན་ཇི་སྙེད་པའི་ཡུལ་དུ་གྱུར་པ་གང་ཡིན་པ་སྟེ། རྣམ་པར་རྟོག་པ་ལ་སྤྱོད་པ་རྣམས་ཀྱིས་དབུགས་དབྱུང་རྔུབ་དང་། འདོད་ཆགས་ལ་སྤྱོད་པ་རྣམས་ཀྱིས་ནི་མི་སྡུག་པ་དང་། གཏི་མུག་ལ་སྤྱོད་པ་རྣམས་ཀྱིས་ནི་རྟེན་ཅིང་འབྲེལ་པར་འབྱུང་བ་དང་། ང་རྒྱལ་ལ་སྤྱོད་པ་རྣམས་ཀྱིས་ནི་ཁམས་ཀྱི་རབ་ཏུ་དབྱེ་བ་དང་། ཞེ་སྡང་ལ་སྤྱོད་པ་རྣམས་ཀྱིས་ནི་ཚད་མེད་པ་བཞིའོ། །དམིགས་པ་ལ་སེམས་གཏད་པའི་ཐབས་གང་ཞེ་ན། དམིགས་པ་གང་གིས་རྣམ་པ་བཟུང་ནས་སེམས་བླན་ཏེ་འཇོག་པ་སྟེ་སེམས་གནས་པའི་ཐབས་དགུ་བསྟན་ཟིན་ཏོ། ། སྤྱིར་འཇོག་པའི་ཐབས་ལ་སྡོམ་ནི།

1-928

སྔོན་འགྲོ་གྲོགས་དང་དུས་དང་མཐོང་། །སྤྱི་དང་བྱེ་བྲག་དམིགས་པ་བཞིའི། །མཚན་མ་དམིགས་གཞན་མཐོང་དང་བསྟོད། །བཅིངས་དང་སུན་འབྱིན་ཚོགས་རྫོགས་པའོ། །དེ་ལ་སྔོན་དུ་འགྲོ་བ་དང་བཅས་པས་སེམས་བཟུང་བའང་ཡོད་དེ། གང་གིས་སྔོན་དུ་འགྲོ་བ་ལེགས་པར་སྤྱད་པས་འདི་ལ་རྩེ་གཅིག་ཏུ་འགྱུར་བའོ། །གྲོགས་ཀྱི་བྱེ་བྲག་གིས་སེམས་བཟུང་བའང་ཡོད་དེ། དམིགས་པ་གང་ཏིང་ངེ་འཛིན་གྱིས་ཡུལ་དུ་བྱེད་པའི་དུས་སུ་སེམས་ལས་བྱུང་བ་དྲན་པ་ལ་སོགས་པས་ལེགས་པར་གནས་པར་འགྱུར་བའོ། །དུས་ཀྱི་བྱེ་བྲག་གིས་སེམས་བཟུང་བའང་ཡོད་དེ། གང་དུ་དུས་མེད་པར་གནས་པ་སྟེ། ཇི་ལྟར་ཆུ་ཚོད་དྲུག་ཆ་ནས་བཟུང་བའོ། །གཞན་མཐོང་བའི་བྱེ་བྲག་གིས་སེམས་བཟུང་བའང་ཡོད་དེ། འདོད་པར་བྱ་བའི་ཡུལ་ལ་གང་ལེགས་པར་འགྱུར་བ་སྔར་མཐོང་བའི་སྟོབས་ཀྱིས་ཕྱིས་དམིགས་པར་འགྱུར་བའོ། །དམིགས་པ་སྤྱིས་སྤྱི་ལ་སེམས་བཟུང་བའང་ཡོད་དེ། ཏིང་ངེ་འཛིན་གང་གིས་སྐུ་ལ་སོགས་པ་ཐམས་ཅད་ཡུལ་དུ་བྱས་ནས་ཐམས་ཅད་ལ་གསལ་བར་འགྱུར་བའོ། །དམིགས་པ་སྤྱིས་བྱེ་བྲག་ལ་སེམས་བཟུང་བའང་ཡོད་དེ། སྤྱིར་གཏད་པས་གསལ་བ་གང་ལ་རྩེ་གཅིག་པར་འགྱུར་བའོ། །དམིགས་པ་བྱེ་བྲག་གིས་སྤྱི་ལ་སེམས་བཟུང་བའང་ཡོད་དེ། སླ་བར་གྱུར་པ་གཅིག་ལ་སེམས་བཟུང་བས་ཕྱིས་གཞན་གསལ་བར་འགྱུར་བའོ། །བྱེ་བྲག་གིས་བྱེ་བྲག་ལ་སེམས་བཟུང་བའང་ཡོད་དེ།

1-929

གང་ལ་གཏད་པ་དེ་ཉིད་གསལ་བར་འགྱུར་བའོ། །མཚན་མ་ལ་སེམས་བཟུང་བའང་ཡོད་དེ། གང་རྡོ་རྗེ་དང་། རིན་པོ་ཆེ་དང་། འཁོར་ལོ་ལ་སོགས་པའི་རྒྱན་གསལ་བས་དེར་འགྱུར་བའོ། །དམིགས་པ་གཞན་གྱིས་གཞན་ལ་སེམས་བཟུང་བའང་ཡོད་དེ། འདི་ལྟར་ཁམས་གསུམ་དག་པས་འགྱུར་བ་དང་། བདག་དག་པས་འགྱུར་བ་ནི། དག་པའི་སྟོབས་ཀྱིས་འགྱུར་བའོ། །འདོད་ཆགས་དང་ཞེ་སྡང་དང་བྲལ་བར་འགྱུར་བ་ནི་སྤངས་པས་འགྱུར་བའོ། །རླུང་གྱེན་དུ་འགྲོ་བ་དང་། ཐུར་དུ་འགྲོ་བ་དང་། སྣ་སྒོ་གཡས་སུ་འགྲོ་བ་དང་། སྣ་སྒོ་གཡོན་དུ་འགྲོ་བ་དག་ལས་འབྱུང་བ་ལ་སོགས་པའི་རིམ་པ་དང་། སྙིང་ཁ་དང་། ལྟེ་བ་དང་། གསང་བའི་གནས་སུ་སླེབས་ནས་འཛིན་པ་ནི་དུལ་ནས་འཛིན་པའོ། །གཏོང་བའི་བྱེ་བྲག་གིས་སེམས་བཟུང་བའང་ཡོད་དེ། སེམས་རྒོད་པར་གྱུར་ན་གང་གིས་བཅིངས་པས་གསལ་བར་འགྱུར་བའོ། །སུན་འབྱིན་པས་སེམས་བཟུང་བའང་ཡོད་དེ། འཇིག་རྟེན་གྱི་ལས་ལ་ཉེས་པར་ཤེས་པས་སྤངས་ཏེ་སེམས་རྩེ་གཅིག་པར་འགྱུར་བའོ། །ཚོགས་ཡོངས་སུ་རྫོགས་པས་སེམས་བཟུང་བའང་ཡོད་དེ། གང་གིས་སངས་རྒྱས་ཐམས་ཅད་ལ་ཕྱག་འཚལ་བ་དང་། མཆོད་པ་ལ་སོགས་པའི་དགེ་བའི་སྟོབས་ཀྱིས་གང་ལ་དམིགས་པ་དེ་གསལ་བར་འགྱུར་བའོ། །གཞན་ཡང་། ཁ་དོག་དབྱིབས་དང་གྲངས་དང་ཚད། །ཡོངས་རྫོགས་དེ་ཡིས་དེ་དག་འགྲུབ། །

1-930

ཅེས་སོ། །དེ་ནས་རྗེས་སུ་བྱ་བའི་ཆོ་ག་བཤད་པར་བྱ་སྟེ། སྡོམ་ནི། ཉམས་སུ་མྱོང་རྟོག་དེ་ལ་གང་དམིགས་དང་། །བྱིང་དང་རྒོད་རྟོག་དེ་ལ་གནས་བྱེད་དང་། །རང་ལ་རབ་སྤྲོ་བསྔོ་དང་ཡི་རང་དང་། །ལུས་ངག་ཉམས་ལྟ་འདི་དག་རྗེས་སུ་བྱེད། །དེ་ལ་ཉམས་སུ་མྱོང་བའི་རྟོག་པ་གང་ཞེ་ན། གང་གིས་བདག་གི་གསལ་བ་དང་ཡོངས་སུ་རྫོགས་པ་ཇི་ལྟར་གནས་པ་རྟོག་པའོ། །དེ་ལ་དམིགས་པ་གང་རྟོག་ཅེ་ན། འདི་ལྟར་ཉོན་མོངས་པ་དང་བཅས་པའི་སེམས་སམ། དེ་ལས་གཞན་པའི་སེམས་ཀྱིས་དམིགས་སམ་རྟོག་གོ །བྱིང་བ་ཇི་ལྟར་རྟོག་ཅེ་ན། སེམས་མྱལ་མྱལ་པོར་འདུག་པ་དང་། གཉིད་ཀྱིས་ནོན་པ་ལྟ་བུར་འདུག་པ་དང་། བསམ་གཏན་དང་གཉིད་དབྱེ་བ་མེད་པར་འདུག་པའོ། །རྒོད་པ་ཇི་ལྟར་རྟོག་ཅེ་ན། སེམས་གཉིས་འཛིན་དུ་གནས་པ་དང་། ཉོན་མོངས་པའི་ཡུལ་ལ་རབ་ཏུ་འཕྲོ་བའོ། །དེ་ལ་གནས་པ་གང་ཞེ་ན། རོ་མྱང་བ་དང་། ཞི་བར་ཤེས་པའོ། །རང་ལ་རབ་ཏུ་སྤྲོ་བ་ཇི་ལྟ་བུ་ཞེ་ན། རང་གི་བསམ་གཏན་འདི་མཆོག་ཏུ་འགྱུར་བའོ། །འདི་ནི་ཡང་དག་པའོ་སྙམ་དུ་འགྱུར་བའོ། །བསྔོ་བ་ཇི་ལྟ་བུ་ཞེ་ན། བསམ་གཏན་གྱི་དགེ་བའི་རྩ་བ་འདིས་འགྲོ་བ་ཐམས་ཅད་སངས་རྒྱས་པར་གྱུར་ཅིག་སྙམ་པའོ། །ཡི་རང་བ་ཇི་ལྟ་བུ་ཞེ་ན།

1-931

སེམས་ཅན་གཞན་བསམ་གཏན་དང་ལྡན་པ་ལ་ཡི་རང་བའོ། །ལུས་ཀྱི་ཉམས་ལྔ་ལྟ་བ་ཇི་ལྟ་བུ་ཞེ་ན། ལུས་ངག་ལ་བསམ་གཏན་ཕན་པའི་དེ་ལས་གཞན་དུ་ཕན་པར་གྱུར་པ་ཡོངས་སུ་རྟོག་པ་སྟེ། སྨྲ་བ་དང་སེམས་པའང་དེ་བཞིན་ནོ། །ཁམས་ཀྱི་ཚོད་བཟུང་བ་ཇི་ལྟ་བུ་ཞེ་ན། གང་དུ་བསམ་གཏན་གྱི་ཁམས་ལ་གནོད་པར་འགྱུར་བ་དེ་སྲིད་དུ་ཐུན་ཐུང་ངུ་གནས་པར་བྱའོ། །གང་དུ་ཁམས་ལ་གནོད་པ་མེད་པ་དེ་ནས་ཐུན་སྲང་ཞིང་ཉུང་ངུ་ཉུང་ངུ་གནས་པར་བྱའོ། །སྒོམ་པའི་ཚད་གང་ཞིག་ཅེ་ན། དེ་ལ་གཉིས་ཏེ། གོམས་པའི་ཚད་དང་། མཐར་ཕྱིན་པའི་ཚད་དོ། །གང་གིས་དམིགས་པ་རྩོལ་བས་གསལ་བ་དང་། རྣམ་པ་གཞན་དུ་བསྒྱུར་བར་ནུས་པའོ། །ཡང་ཇི་ལྟར་སྣང་བ་རང་གི་བསམ་གཏན་ལས་གཞན་དུ་མི་སྣང་བའོ། །སྤྱོད་ལམ་ཇི་ལྟ་བུ་ཞེ་ན། དེ་ནི་རྣམ་པ་གསུམ་སྟེ། ལས་དང་པོ་པའི་སྤྱོད་ལམ་དང་། བར་མའི་སྤྱོད་ལམ་དང་། ཚད་དུ་ཕྱིན་པའི་སྤྱོད་ལམ་མོ། །ལས་དང་པོ་པའི་སྤྱོད་ལམ་གང་ཞེ་ན། དང་པོའི་དུས་ཀྱི་རྣལ་འབྱོར་པས་ནངས་པར་ཉི་མ་རི་ལ་གནས་པའི་དུས་སུ་བསམ་གཏན་བྱ་སྟེ། དེ་ནས་ཟས་ལེགས་པར་བཟའ་བ་དང་། སྐོམ་ལེགས་པར་བཏུང་བ་དང་། ལས་དྲག་པོ་ལ་སོགས་པ་སྤང་བ་དང་། གཟུགས་ལ་སོགས་པ་ཡུན་རིང་དུ་ལྟ་བ་སོགས་སྤང་བར་བྱའོ། །

1-932

གཞན་ཡང་ཐ་མལ་པར་གནས་པར་བྱའོ། །གཞན་ཡང་བདག་ཉིད་ཀྱིས་ལུས་ངག་གི་སྤྱོད་པ་ཅི་བདེར་གནས་པར་བྱ་སྟེ། འདི་ནི་ལས་དང་པོ་པའི་སྤྱོད་ལམ་མོ། །རྣལ་འབྱོར་པའི་སྤྱོད་ལམ་གང་ཞེ་ན། གང་གིས་སྣང་བ་ཐམས་ཅད་ལྷའི་དཀྱིལ་འཁོར་དུ་གནས་པ་དང་། སྣང་བ་ཉིད་སྒྱུ་མ་ཙམ་དུ་གནས་པ་དང་། གོང་མ་ཙམ་ཉིད་སྒྱུ་མ་ཙམ་དུ་གནས་པ་སྟེ། ལུང་ལས། རྣལ་འབྱོར་མོས་པའི་ས་ལ་གནས། །གོང་དུ་གྱུར་པའི་སྤྱོད་ལམ་ནི། །སྣང་བའི་དངོས་པོ་བརྫུན་པར་འཛིན། །དེ་ཉིད་གཞན་དུ་བཟློག་པ་དང་། །གཞན་འགྱུར་དངོས་པོ་སྒྱུ་མར་བལྟ། །ཡོན་ཏན་དམ་པ་ཐོབ་པར་འགྱུར། །ཞེས་འབྱུང་བ་ལྟ་བུའོ། །རྣལ་འབྱོར་པ་མཆོག་གི་སྤྱོད་ལམ་གང་ཞེ་ན། གང་གིས་སྔོན་དུ་སྣང་བའི་ལོག་པ་སྒྱུ་མ་ཙམ་དང་། སྟོང་པ་ཉིད་དུ་ལྟ་སྟེ། སེམས་ཅན་གྱིས་བརྟག་པ་འཁྲུལ་པར་ཡང་ཤེས། འཁྲུལ་པ་དེ་ལའང་མ་ཆག་བཞིན་དུ་སྤྱོད་དོ། །དངོས་པོ་ལྷའི་དཀྱིལ་འཁོར་ཡང་སྣང་བ་ཙམ་དུ་ཤེས་ཏེ། དེ་ལའང་མ་ཆགས་བཞིན་དུ་སྤྱོད་དོ། །དེ་ནི་ལུང་ལས། རང་སྣང་གཞན་ལ་སྣང་བ་ཀུན། །སྣང་དང་འཁྲུལ་པ་ཙམ་དུ་གནས། །ཞེན་པ་མེད་བཞིན་ཀུན་ཏུ་སྤྱོད། །དེ་ལ་དངོས་གྲུབ་མཆོག་དང་ལྡན། །ཞེས་འབྱུང་བ་ལྟ་བུའོ། །དེའི་དུས་ཀྱི་སྤྱོད་ལམ་གཞན་ཡང་གསུངས་པ། ནང་གི་ཟས་དང་སྐོམ་དག་ནི། །

1-933

ཀུན་ཏུ་བདུད་རྩི་ལོངས་སྤྱོད་ཆེ། །འཆི་ཉལ་སྟོང་པ་ཉིད་དུ་གནས། །ལངས་པའི་དུས་སུ་རང་ལྷ་ཉིད། །ཀུན་ཏུ་བདེན་པ་ཉིད་ལ་གནས། །མཐོང་བའི་ཆོས་ལ་མྱ་ངན་འདས། །ཞེས་པ་ལ་སོགས་པ་གསུངས་པ་ལྟ་བུའོ། ། སེམས་ཉམས་དུ་ཞེ་ན། སྡོམ་ནི། མྱུར་དང་དལ་དང་བརྟན་པ་དང་། །སྲ་དང་རྙི་དང་ཐོགས་པ་དང་། །སྙམ་སེམས་པ་དང་རྒྱ་ཆེ་ཟབ། །དེ་བཞིན་རྟགས་ནི་རྣམ་པ་ལྔ། །དེ་ལ་མྱུར་ཞེས་བྱ་བ་ནི་ཤེས་པ་ཆུ་འབབ་པ་ལྟ་བུར་སྣང་བའོ། །དལ་བ་ཞེས་བྱ་བ་ནི་ཆུ་ཀླུང་བཞིན་ནོ། །བརྟན་པ་ཞེས་བྱ་བ་ནི་མཚོ་གཏིང་བཞིན་ནོ། །སྲ་བ་ཞེས་བྱ་བ་ནི་དམིགས་པ་ཐོགས་བརྡུགས་ཅན་དུ་གྱུར་པའོ། །རྙི་བ་ཞེས་བྱ་བ་ནི། དེ་ལས་བཟློག་པའོ། །དང་པོ་རྙི་ལ་དེ་ནས་སྲ་བ་ནི་ཐོགས་པའོ། །སྙམ་སེམས་པ་ནི་ཉེ་སྙམ་སེམས་པ་དང་། རིང་སྙམ་སེམས་པ་དང་། དལ་བ་སྙམ་སེམས་པ་དང་། བྲེལ་བ་སྙམ་སེམས་པ་དང་། ཟིན་པ་སྙམ་སེམས་པ་དང་། མ་ཟིན་སྙམ་སེམས་པ་དང་། སངས་རྒྱས་སྙམ་སེམས་པ་དང་། མི་ཉམས་སྙམ་སེམས་པ་དང་། གཞན་དུ་ཕྱིན་སྙམ་སེམས་པ་དང་། མ་ཕྱིན་སྙམ་སེམས་པ་དང་། ཀུན་བདེ་བ་སྙམ་སེམས་པ་དང་། མི་བདེ་བ་སྙམ་སེམས་པའོ། །རྒྱ་ཆེ་བ་ནི། ཤེས་པ་ནམ་མཁའ་ལྟ་བུར་གྱུར་པའོ། །ཟབ་པ་ནི་མཚོ་གཏིང་སྙམ་ལྟ་བུའོ། །

1-934

རྟགས་རྣམ་པ་ལྔ་ནི་སྨིག་རྒྱུ་དུ་བ་ལྟ་བུ་དང་། སྲིན་བུ་མེ་ཁྱེར་མར་མེ་བཞིན། །ལྟ་བ་ནམ་མཁའ་ལྟ་བུ་བཞིན། །འདི་ལ་དམིགས་པའི་བྱེ་བྲག་དང་། །དམིགས་པ་སོ་སོའི་བྱེ་བྲག་དང་། །དེ་ལས་གཞན་པའི་བྱེ་བྲག་གིས་བཞག་གོ །དེ་ལ་བཅོས་པའི་ཐབས་གང་ཞེ་ན། སྡོམ་ནི། ཟས་དང་སྐོམ་དང་གནས་ལ་སོགས། །དོར་བ་དང་ནི་བླང་བ་དང་། །རིང་ཐུང་རྩོལ་བཅས་རྩོལ་མེད་དང་། །རང་ལས་བཟློག་པའི་རྣམ་པའོ། །དེ་ལ་ཟས་སྐོམ་ལ་སོགས་པ་ཇི་ལྟ་བུ་ཞེ་ན། གོང་དུ་བཤད་པ་བཞིན་ནོ། །དོར་བས་ཇི་ལྟ་བུ་ཞེ་ན། སེམས་ཉམས་མི་བདེ་བའོ། །བླང་བས་ཇི་ལྟ་བུ་ཞེ་ན། བདེ་བ་དང་པོས་མཐའ་མ་བདེ། །རིང་བ་ཇི་ལྟ་བུ་ཞེ་ན། གང་ཤིན་ཏུ་གསལ་བ་བརྟན་པའོ། །ཐུང་བ་ཇི་ལྟ་བུ་ཞེ་ན། གསལ་བ་མི་བརྟན་པའི་དུས་སོ། །རྩོལ་བ་ཇི་ལྟ་བུ་ཞེ་ན། མ་ཡེངས་པར་གཏོང་བའོ། །དེ་ལས་བཟློག་པ་ནི། རྩོལ་བ་མེད་པའོ། །རང་ལས་བཟློག་པ་ཇི་ལྟ་བུ་ཞེ་ན། མྱུར་བར་གནས་པ་ནི་དལ་བར་བྱེད་པའོ། །སེམས་དལ་བ་ལས་བརྟན་པ་འབྱུང་ངོ་། །བརྟན་པ་དམན་པ་ནི་མྱུར་བར་བྱེད་པའོ། །སྲང་བ་ནི་སྙི་བར་བྱེད་དོ། །ཞེས་བྱ་བ་ལ་སོགས་པ་ཤེས་པར་བྱའོ། །དེ་ལ་བསམ་གཏན་གྱི་ཡོན་ཏན་གང་ཞེ་ན།

1-935

རང་གི་ངང་གིས་དམིགས་པ་གསལ་བར་གྱུར་པ་དང་། དེ་ལས་གཞན་པའི་དམིགས་པ་འཕེལ་བར་བྱེད་པ་དང་། མི་དགེ་བའི་རྒྱུ་སྔར་མ་སྐྱེས་པ་མི་བསྐྱེད་པ་དང་། སྐྱེས་པ་ཉམས་པར་བྱེད་པ་དང་། དགེ་བའི་རྒྱུ་སྔར་མ་སྐྱེས་པ་བསྐྱེད་པ་དང་། སྐྱེས་པ་འཕེལ་བ་དང་། ངན་སོང་གི་སྐྱེ་བ་དང་བྲལ་བ་དང་། དེའི་སྡུག་བསྔལ་དང་བྲལ་བ་དང་། བསྙེན་གནས་ཀྱི་ཡོན་ཏན་ཏེ། དགེ་སློང་གི་བར་གྱི་ཡོན་ཏན་དང་ལྡན་པ་དང་། སྦྱིན་པ་ལས་བྱུང་བའི་ཡོན་ཏན་དང་ལྡན་པ་དང་། ཡེ་ཤེས་ཀྱི་བར་གྱི་ཡོན་ཏན་དང་ལྡན་པ་དང་། ཕྱོགས་མཚམས་སུ་སྙན་པ་ཐོབ་པ་དང་། ཚོགས་ལ་བག་འཁུམས་པ་མེད་པ་དང་། མངོན་པར་ཤེས་པ་ཉམས་པ་མེད་པ་དང་། གཞན་དང་བ་འཇུག་པར་བྱེད་པ་དང་། མདོར་ན་བཅོམ་ལྡན་འདས་ཀྱིས་ཡོན་ཏན་གྱི་ཚོགས་དཔག་ཏུ་མེད་པ་གསུངས་པ་བསམ་གཏན་གྱི་ཡོན་ཏན་ཏེ། ཇི་སྐད་དུ། བསྐལ་པ་སྟོང་དུ་སྦྱིན་པའི་བསོད་ནམས་ཀྱིས། །སྐད་ཅིག་མཉམ་པར་བཞག་པའི་སར་མི་འགྲོ། །ཡེ་ཤེས་ཡོན་ཏན་དཔག་མེད་སོག་པའི་ཕྱིར། །དགོན་པར་སེམས་སྡུད་བླ་མེད་ཡོན་ཏན་བླང་། །ཞེས་འབྱུང་བ་ལྟ་བུའོ། །གོ་རིམ་གང་ཞེ་ན། དང་པོར་ནི་ཕྱི་རོལ་གྱི་དམིགས་པ་རགས་པ་ལ་འཇོག་པའོ། །དེ་ནས་ནི་ཕྲ་བ་དང་ཤིན་ཏུ་ཕྲ་བ་ལ་འཇོག་པའོ། །

1-936

དེ་ནས་སྟོང་པ་ཉིད་མངོན་དུ་བྱེད་དོ། །དེའི་རྗེས་སུ་བྱ་བའང་འདི་ལྟར་སྟོང་པ་ཉིད་ཀྱི་ཏིང་ངེ་འཛིན་སྒོམ་པའོ། །དེ་ལས་ལངས་ནས་བསམ་གཏན་དང་པོའི་ཏིང་ངེ་འཛིན་བསྒོམ་མོ། །ཞེས་བྱ་བ་ལ་སོགས་པ་གསུངས་སོ། །རྣམ་པར་དབྱེ་བ་གང་ཞེ་ན། འདི་ལྟར་ཞི་གནས་ནི་རྣམ་པ་གསུམ་སྟེ། སློབ་པའི་ཞི་གནས་དང་། གོམས་པའི་ཞི་གནས་དང་། མངོན་དུ་གྱུར་པའི་ཞི་གནས་དང་། རྩོལ་བ་བྱས་ཀྱང་མི་གསལ་མ་བྱས་ཀྱང་མི་གསལ་བ་དང་། བྱས་ན་གསལ་ཞིང་མ་བྱས་ན་མི་གསལ་བ་དང་། གཉིས་ཀར་གསལ་བ་དང་གོ་རིམ་བཞིན་ནོ། །དེའི་འབྲས་བུ་གང་ཞེ་ན། ཡོན་ཏན་གྱི་ཕྱོགས་གཅིག་པའོ། །གང་ཟག་ཞི་གནས་དང་ལྡན་པ་ལ་གང་གིས་ཇི་ལྟར་ཡོངས་སུ་བརྟག་ཅེ་ན། འདི་ལྟར་རྟགས་ལ་བརྟེན་ནས་ཡོངས་སུ་རྟོག་སྟེ། འདི་ལྟར་དེའི་རྟགས་ནི། གང་གིས་ཀུན་ཏུ་འགྲོ་བ་མེད་པ་དང་། ཞེ་སྡང་མེད་པ་དང་། ང་རྒྱལ་མེད་པ་དང་། རྫས་དང་། ཡུལ་དང་། གཉེན་འདུན་ལ་ཆགས་པ་མེད་པ་དང་། ཏིང་ངེ་འཛིན་དང་ལྡན་པ་གཞན་ལ་ཡི་རང་བའི་སེམས་དང་ལྡན་པ་དང་། དགོན་པ་དྭང་དུ་ལེན་པ་དང་། གཞན་ལ་དགོན་པའི་སྔགས་པ་བརྗོད་པ་དང་། དགོན་པ་དྭང་དུ་ལེན་པ་ལ་ཡོན་ཏན་བརྗོད་པ་དང་། ཚོགས་ཀྱི་ནང་ན་མི་གནས་ཤིང་དེ་ལ་སྐྱོན་དུ་ལྟ་བ་དང་།

1-937

སྡིག་པའི་གྲོགས་པོ་མི་བསྟེན་པ་དང་། དགེ་བའི་གྲོགས་དྭང་དུ་ལེན་པ་དང་། བསམ་གཏན་ཡུན་རིང་བ་དང་། ལུས་ལ་གནོད་པ་མེད་པ་དང་། ལུས་ཀྱི་སྤྱོད་ལམ་དྲག་པོ་མི་བྱེད་པ་དང་། ལུས་ཀྱི་མི་དགེ་བ་མི་བྱེད་པ་དང་། ངག་གི་སྨྲ་བ་དྲག་ཏུ་མི་བྱེད་པ་དང་། ངག་གི་མི་དགེ་བ་མི་བྱེད་པ་དང་། སེམས་མི་དགེ་བའི་བསམ་པ་མེད་པ་དང་། དོན་མེད་པའི་གཡེང་བ་ལ་མི་སེམས་པ་དང་། འདུས་བྱས་ཀྱི་དགེ་བ་ཆེད་དུ་མི་བྱེད་པ་དང་། གྲོགས་ཙམ་དུ་མི་འགོག་པ་དང་། ཟས་ལ་འདུན་པ་མེད་པ་ལ་སོགས་པ་དང་། བབ་བཅོལ་གྱི་ལས་མི་བྱེད་པ་དང་། ཁེ་དང་རེ་བ་མེད་པ་དང་། རྩོད་པ་མེད་པ་དང་། ལེ་ལོ་མེད་པ་དང་། བསམ་གཏན་གྱི་ལས་ལས་གཞན་པའི་ཡུལ་ལ་སྤྲོ་བ་དྭང་དུ་མི་ལེན་པ་དང་། ཚུལ་འཆོས་དང་། ཁ་བསག་དང་། སྒྱུ་དང་གཡོ་ལ་སོགས་པ་དང་བྲལ་བ་ནི་ཞི་གནས་ཀྱི་རྟགས་སུ་ཤེས་པར་བྱའོ། །འདི་ནི་འཕགས་པ་ཐོག་མེད་ཀྱིས་མཛད་པའི་བསམ་གཏན་གྱི་སྒྲོན་མེ་ཇི་ལྟ་བ་བཞིན་བཀོད་པས་ཡིད་ཆེས་པར་བྱའོ། །ཞི་གནས་སྒྲུབ་པའི་ཚུལ་བསྟན་ཟིན་ཏོ།། །།

༈ ལྷག་མཐོང་སྒྲུབ་པའི་ཚུལ་ལ། ལྷག་མཐོང་གི་སྤྱིའི་དོན། ༆ གཉིས་པ་ལྷག་མཐོང་སྒྲུབ་པའི་ཚུལ་ལ་སྡོམ་ནི། རྒྱུ་དང་རང་བཞིན་སློབ་ཚུལ་དང་། །ཕན་ཡོན་དང་ནི་དེ་ཡི་རྟགས། །ལྷག་མཐོང་གི་རྒྱུ་གང་ཞེ་ན།

1-938

སྐྱེས་བུ་དམ་པ་ལ་བསྟེན་ནས་མང་དུ་ཐོས་པ་བཙལ་བ་དང་། བཙལ་བའི་དོན་ལ་རིགས་པས་སེམས་པའོ། །མང་དུ་ཐོས་པ་བཙལ་བ་གང་ཞེ་ན། གསུང་རབ་ཡན་ལག་བཅུ་གཉིས་མཉན་པ་དང་། འཛིན་པ་དང་། ཁ་ཏོན་བྱེད་པ་དང་། བློ་ལ་བྱང་བར་བྱེད་པའོ། །དགོངས་འགྲེལ་ལས། འཕགས་པའི་གཏམ་འདོད་པ་བཞིན་མ་ཐོབ་པ་ནི། ལྷག་མཐོང་གི་གེགས་ཡིན་ནོ་ཞེས་འབྱུང་ངོ་། །ཚུལ་བཞིན་སེམས་པ་གང་ཞེ་ན། ཐོས་པའི་ཤེས་རབ་ཀྱིས་བཟུང་བའི་དོན་རིགས་པས་གཏན་ལ་འབེབས་པའོ། །དགོངས་འགྲེལ་ལས། ལྷག་མཐོང་ནི་ཐོས་པ་དང་བསམ་པ་ལས་བྱུང་བའི་ལྟ་བ་རྣམ་པར་དག་པའི་རྒྱུ་ལས་བྱུང་བ་ཡིན་ནོ། །ཞེས་གསུངས་སོ། །རང་བཞིན་གང་ཞེ་ན། གཏན་ལ་དབབ་པར་བྱ་བའི་དོན་རྣམ་པར་འབྱེད་པའི་ཤེས་རབ་སྟེ། མདོ་སྡེ་རྒྱན་ལས། ཆོས་རབ་རྣམ་པར་འབྱེད་པའི་ཕྱིར། །ལྷག་མཐོང་འདོད། ཅེས་གསུངས་པ་ལྟར་རོ། །སློབ་ཚུལ་ལ་སྡོམ་ནི། ཇི་སྙེད་པ་དང་ཇི་ལྟའི་དོན། །རྟོག་པ་དང་ནི་དཔྱོད་པ་དང་། །སོ་སོར་རྟོག་དང་མི་གཡོ་བ། །སློབ་དང་མངོན་གྱུར་བདག་ཉིད་དོ། །ཇི་སྙེད་པ་རྣམ་པར་འབྱེད་པའི་ལྷག་མཐོང་གང་ཞེ་ན། ཕུང་པོ་ལ་མཁས་པ་དང་། ཁམས་ལ་མཁས་པ་དང་། སྐྱེ་མཆེད་ལ་མཁས་པ་དང་། བདེན་པ་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པའོ། །

1-939

གནས་དང་གནས་མ་ཡིན་པ་ལ་མཁས་པ་དང་། དང་པོ་གསུམ་ནི་ཐུན་མོང་གི་ཤེས་བྱའི་གཞི་ལ་མཁས་པའོ། །བཞི་པ་ནི། ལམ་གྱི་དམིགས་པ་ལ་མཁས་པའོ། །ལྔ་པ་ནི། ཀུན་ནས་ཉོན་མོངས་པ་དང་རྣམ་པར་བྱང་བའི་ཚུལ་ལ་མཁས་པའོ། །དྲུག་པ་ནི། རྒྱུ་འབྲས་ཀྱི་ཚུལ་ལ་མཁས་པའོ། །དེ་དག་ལ་ཇི་ལྟར་མཁས་པར་བྱ་ཞེ་ན། ཕུང་པོ་སོགས་ཀྱི་མིང་གི་རྣམ་གྲངས་ལ་མཁས་པ་དང་། ངེས་པའི་ཚིག་ལ་མཁས་པ་དང་། དོན་ལ་མཁས་པ་དང་། རབ་ཏུ་དབྱེ་བའི་ཚུལ་ལ་མཁས་པའོ། །མིང་གི་རྣམ་གྲངས་ལ་མཁས་པ་ནི། ཕུང་པོ་སོགས་བཅོམ་ལྡན་འདས་ཀྱིས་མིང་གི་ཐ་སྙད་དུ་མ་རྣམ་པར་བཞག་པ་ཤེས་པའོ། །ངེས་པའི་ཚིག་ལ་མཁས་པ་ནི། སྒྲ་འཇུག་པའི་རྒྱུ་མཚན་དང་སྒྲ་དོན་ཤེས་པའོ། །དོན་ལ་མཁས་པ་ནི། ཕུང་པོའི་དོན་དུ་མ་སྤུངས་པ་དང་། ཁམས་ཀྱི་དོན་རང་གི་མཚན་ཉིད་འཛིན་པ་དང་། སྐྱེ་མཆེད་ཀྱི་དོན་སྐྱེ་བའི་སྒོ་འབྱེད་པ་དང་། གསལ་བ་སོ་སོ་རང་རང་གི་དོན་ཤེས་པའོ། །རབ་ཏུ་དབྱེ་བ་ལ་མཁས་པ་ནི། ཕུང་པོ་ལ་ལྔ་དང་། ཁམས་ལ་བཅོ་བརྒྱད་དང་། སྐྱེ་མཆེད་ལ་བཅུ་གཉིས་སོགས་ཀྱི་དབྱེ་བ་ཤེས་པ་དང་ཕུང་པོ་ལྔ་སོ་སོ་ལ་ཡང་ཐོགས་བཅས་ཀྱི་གཟུགས་དང་། ཐོགས་མེད་ཀྱི་གཟུགས་དང་། འབྱུང་བ་དང་འབྱུང་འགྱུར་གྱི་གཟུགས་དང་།

1-940

འབྱུང་བ་ལ་ཡང་བཞི་དང་། འབྱུང་འགྱུར་ལ་བཅུ་གཅིག་ལ་སོགས་པར་རྣམ་པར་འབྱེད་པ་ལ་མཁས་པ་དང་། ཚོར་བ་ལ་ཡང་བདེ་བ་དང་། སྡུག་བསྔལ་དང་། བཏང་སྙོམས་ལ་སོགས་པར་རྣམ་པར་འབྱེད་པ་ལ་མཁས་པ་སྟེ། ལྷག་མ་རྣམས་ཀྱི་ཡང་གསལ་བ་སོ་སོའི་རབ་ཏུ་དབྱེ་བ་ཤེས་པའོ། །འདི་དག་གིས་ནི་མ་འོངས་པ་ན་ཆོས་སོ་སོ་ཡང་དག་པར་རིག་པ་དང་། ངེས་པའི་ཚིག་དང་། དོན་དང་། སྤོབས་པ་སོ་སོ་ཡང་དག་པར་རིག་པ་ཐོབ་པར་འགྱུར་རོ། །བོད་འདིར་ཇི་སྙེད་པ་འབྱེད་པའི་ལྷག་མཐོང་གི་གཏམ་ཙམ་ཡང་མི་སྣང་ངོ་། །ཇི་ལྟ་བ་རྣམ་པར་འབྱེད་པ་གང་ཞེ་ན། དེ་ནི་གང་ཟག་གི་བདག་མེད་རྟོགས་པ་དང་། ཆོས་ཀྱི་བདག་མེད་རྟོགས་པའི་དབྱེ་བས་གཉིས་སོ། །གང་ཟག་གི་བདག་མེད་རྟོགས་པ་གང་ཞེ་ན། གང་ཟག་ནི་ཕུང་པོ་ལྔ་ལ་བརྟེན་ནས་ཐ་སྙད་དུ་གདགས་པ་ཙམ་དུ་ཟད་ཀྱི། རིགས་པས་སོ་སོར་བཙལ་ན་མི་རྙེད་པས་ན་གང་ཟག་ངོ་བོ་ཉིད་མེད་པར་ཁོང་དུ་ཆུད་པའོ། །གང་ཟག་ངོ་བོ་ཉིད་མེད་པར་གཏན་ལ་འབེབས་པའི་རིགས་པ་འདི་ལྟ་སྟེ། གལ་ཏེ་གང་ཟག་ནི་ཕུང་པོ་མེད་པ་ཞིག་ཕུང་པོ་དང་བཅས་པ་ཞིག་ཏུ་བརྟག་དྲང་། གལ་ཏེ་ཕུང་པོ་མེད་པ་ཞིག་ཡིན་ན་ནི་འཆིང་བྱེད་ཀྱི་ལུས་མེད་པས་འབད་མེད་དུ་ཐར་པ་ཐོབ་པ་ཉིད་དུ་འགྱུར་རོ། །

1-941

གལ་ཏེ་ཕུང་པོ་དང་བཅས་པ་ཞིག་ཡིན་ན་ཕུང་པོ་དེ་དང་གཅིག་གམ་ཐ་དད་དུ་གྲུབ། དང་པོ་ལྟར་ན་ཉེ་བར་བླང་བྱ་དང་ཉེ་བར་ལེན་པ་པོ་གཅིག་ཏུ་ཐལ་བར་འགྱུར་ཞིང་། བདག་སྐྱེ་འཇིག་ཅན་དུ་འགྱུར་རོ། །གཞན་ཡང་ཕུང་པོ་དང་མཚན་ཉིད་མི་མཐུན་པས་གཅིག་ཏུ་མི་འགྱུར་ཏེ། ཕུང་པོ་ནི་མི་རྟག་པ་དང་། དངོས་པོ་དུ་མ་དང་། རྒྱུ་རྐྱེན་དུ་མ་གཞན་དབང་དུ་གྱུར་པ་ཡིན་ལ། བདག་ནི་ལྷན་སྐྱེས་ཀྱི་ངར་འཛིན་གྱིས་ཕུང་པོ་ལ་བརྟེན་ནས་ཡོད་པར་ཡོངས་སུ་བཟུང་ཞིང་། དེའི་རྗེས་ཐོགས་སུ་སྔར་མཐོང་བ་ཕྱིས་ངོ་ཤེས་པར་རློམ་པའི་བློས་རྟག་པར་སྒྲོ་འདོགས་ཤིང་། འཇིག་རྟེན་སྐྱེ་བ་ན་གང་ཟག་ཉག་ཅིག་སྐྱེའོ་ཞེས་གཅིག་པུ་དང་། གཞན་ལ་རག་མ་ལས་པར་ངོ་བོ་ཉིད་ཀྱིས་ཡོད་པར་ཡོངས་སུ་འཛིན་པ་ཡིན་པས། ལྷན་སྐྱེས་ཀྱི་བདག་འཛིན་ལ་བརྟེན་ནས་མཚན་ཉིད་གསུམ་ལྡན་དུ་འཛིན་པས་མཚན་ཉིད་མི་མཐུན་པ་ཡིན་ནོ། །མཚན་ཉིད་མི་མཐུན་པའམ་ཕུང་པོ་བདག་གི་མཚན་ཉིད་ཅན་མ་ཡིན་པར་ཁོང་དུ་ཆུད་པ་ན་ཕུང་པོ་བདག་མེད་པར་རྟོགས་པར་འགྱུར་རོ། །གལ་ཏེ་ཕུང་པོ་ལས་དོན་གཞན་ཡིན་ནོ་ཞེ་ན། ལྷན་སྐྱེས་ཀྱི་ངར་འཛིན་གྱི་ཡུལ་ལ་བདག་ཅེས་བརྗོད་པ་ཡིན་ལ་ཕུང་པོ་ལས་གཞན་ན་ངར་འཛིན་འཇུག་པ་མ་མཐོང་བའི་ཕྱིར་མི་འཐད་དོ། །

1-942

དཔེར་ན་ཕྱི་རོལ་གྱི་དོན་ལ་བདག་ཏུ་འཛིན་པ་མི་འཇུག་པ་བཞིན་ནོ། །གང་དག་རྟག་པ་དང་གཅིག་པུ་དང་རང་དབང་ཅན་གྱི་བདག་མེད་པར་རྟོགས་པ་ཙམ་གྱིས་གང་ཟག་གི་བདག་མེད་རྟོགས་པར་མི་འགྱུར་ཞེས་སྨྲ་བ་ནི་མི་འཐད་དེ། གང་ཟག་རང་དབང་ཅན་མ་ཡིན་པར་རྟོགས་པས་གང་ཟག་ངོ་བོ་ཉིད་མེད་པར་རྟོགས་པར་འགྱུར་ལ། གང་ཟག་ངོ་བོ་ཉིད་མེད་པར་རྟོགས་པ་ནི་གང་ཟག་གི་བདག་མེད་རྟོགས་པའི་དོན་ཡིན་པའི་ཕྱིར་རོ། །གང་ཟག་ནི་ལྷན་སྐྱེས་ཀྱི་ངར་འཛིན་གྱིས་ཕུང་པོ་ལ་བརྟེན་ནས་བཏགས་པ་ཙམ་ཡིན་ལ། གང་ཟག་ངོ་བོ་ཉིད་མེད་པ་ལ་གང་ཟག་གི་བདག་མེད་པ་ཞེས་བརྗོད་པར་བྱ་བ་ཡིན་ཏེ། ཆོས་ངོ་བོ་ཉིད་མེད་པ་ལ་ཆོས་ཀྱི་བདག་མེད་པ་ཞེས་བརྗོད་པ་བཞིན་ནོ། །འདི་དག་ནི་གང་ཟག་གི་བདག་མེད་གཏན་ལ་འབེབས་པར་བྱེད་པའི་རིགས་པའོ། །རིགས་པ་འདི་ལ་བརྟེན་ནས་ཕུང་པོ་ལ་བདག་གདོད་མ་ནས་ཡོད་པ་མ་ཡིན་པར་རྟོགས་པའི་ཤེས་རབ་ནི་གང་ཟག་གི་བདག་མེད་རྟོགས་པའི་ལྷག་མཐོང་ངོ་། །ཆོས་ཀྱི་བདག་མེད་རྟོགས་པའི་ལྷག་མཐོང་གང་ཞེ་ན། རྒྱུ་ལ་དཔྱོད་པ་རྡོ་རྗེ་གཟེགས་མ་དང་། ངོ་བོ་ལ་དཔྱོད་པ་གཅིག་དང་དུ་བྲལ་དང་། འབྲས་བུ་ལ་དཔྱོད་པ་ཡོད་མེད་སྐྱེ་འགོག་གི་རིགས་པས་ཆོས་རྣམས་ཀྱི་རྒྱུ་དང་ངོ་བོ་དང་འབྲས་བུ་ལ་བདེན་འཛིན་གྱི་སྒྲོ་འདོགས་གཅོད་པར་བྱེད་པའི་རིགས་པ་ལ་བརྟེན་ནས་བསམ་བྱུང་གི་ཤེས་རབ་ཀྱིས་བདེན་མེད་རྟོགས་པའི་དོན་འཛིན་པ་དང་།

1-943

རྟེན་འབྲེལ་གྱི་རིག་པ་ལ་བརྟེན་ནས་རྟག་ཆད་གཉིས་ཀའི་སྐྱོན་དང་བྲལ་བར་བསམ་བྱུང་གི་ཤེས་རབ་ཀྱིས་རྟོགས་པའི་དོན་ཇི་ལྟ་བ་བཞིན་རྟོགས་པའི་ཤེས་རབ་བོ། ། རིགས་པ་གཞན་རྣམས་ཀྱིས་ནི་བདེན་པར་སྒྲོ་འདོགས་པའི་བདེན་འཛིན་གྱི་གཉེན་པོ་བྱེད་པ་ཡིན་ལ། རྟེན་འབྲེལ་གྱི་རིགས་པས་ནི་རྟག་ཆད་གཉིས་ཀའི་གཉེན་པོ་བྱེད་པས་རིགས་པ་གཞན་ལས་རྨད་དུ་བྱུང་བ་ཡིན་ནོ། །འཇུག་པ་ལས། དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲྭ་བ་མཐའ་དག་གཅོད་པར་བྱེད། །ཅེས་གསུངས་པ་ལྟར་རོ། །བོད་གཞན་དག་གིས་ནི་འདི་ཙམ་ཡང་ཁོང་དུ་མ་ཆུད་ན་གཞན་ལྟ་ཡང་ཅི་སྨོས། གལ་ཏེ་ཆོས་རྣམས་ངོ་བོ་ཉིད་མེད་པར་རྟོགས་པ་འཐད་པ་སྒྲུབ་པའི་རིགས་པ་ལ་བརྟེན་ནས་རྗེས་དཔག་གིས་ངོ་བོ་ཉིད་མེད་པར་རྟོགས་པ་ཁོ་ན་ལ་རག་ལས་སམ་ཞེ་ན། རྩོད་པ་བཟློག་པ་ལས། མངོན་སུམ་དང་། རྗེས་དཔག་དང་། ལུང་དང་། དཔེ་ཉེར་འཇལ་གྱི་ཚད་མ་བཞིའི་སྒོ་ནས་བླང་དོར་གྱི་ཐ་སྙད་ལ་འཇུག་པར་གསུངས་པ་ལྟར། ལུང་དང་དཔེ་ཉེར་འཇལ་གྱི་ཚད་མ་ལས་ཀྱང་རྟོགས་ཏེ། ལུང་ལས། རྟོགས་པ་ནི་ཡིད་ཆེས་པའི་རྗེས་དཔག་ཚད་མའོ། །དཔེ་ཉེར་འཇལ་གྱི་ཚད་མ་ནི་འདི་ལྟ་སྟེ། མདོ་ཏིང་ངེ་འཛིན་རྒྱལ་པོ་ལས། ཇི་ལྟར་ནམ་མཁའ་དྭང་བར་ཟླ་ཤར་བ། །

1-944

དེའི་གཟུགས་བརྙན་དྭངས་བའི་མཚོར་སྣང་ཡང་། །ཟླ་བ་ཆུ་ཡི་ནང་དུ་འཕོས་པ་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་པ་དང་། ཟླ་བ་སྒྲོན་མེའི་མདོ་ལས། སྒྱུ་མ་བྱེད་པ་དག་གིས་གཟུགས་སྤྲུལ་ནས། །རྟ་དང་གླང་པོ་ཤིང་རྟ་སྣ་ཚོགས་བྱས། །དེ་ལ་ཇི་བཞིན་སྣང་བ་གང་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་སོས་ཀའི་ཉི་མ་ཕྱེད་དུས་ཀྱི། །སྐྱེས་བུ་སྐོམ་པས་གདུངས་ཤིང་འགྲོ་བ་ཡིས། །སྨིག་རྒྱུ་དག་ལ་ཆུའི་ཕུང་པོར་སྣང་། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཇི་ལྟར་མི་དག་ནགས་རིའི་ཁྲོད་འདུག་སྟེ། །གླུ་ལེན་སྨྲ་དང་རྒོད་དང་ངུ་བ་ལས། །བྲག་ཆ་ཐོས་ཀྱང་སྣང་བ་འགའ་ཡང་མེད། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་གསུངས་པ་ལྟ་བུ་སྟེ། དཔེ་ལ་བརྟེན་ནས་དོན་རྟོགས་པ་དཔེ་ཉེར་འཇལ་གྱི་ཚད་མའོ། །གསུང་རབ་ལ་འདི་ཤིན་ཏུ་མང་བར་སྣང་ངོ་། །ཆུ་ཟླའི་དཔེས་རང་བཞིན་མེད་པའི་དོན་ཇི་ལྟར་བསྟན་ཞེ་ན། དྭང་བའི་མཚོར་ཟླ་བའི་གཟུགས་བརྙན་ཤར་བ་ན་ཟླ་བར་སྣང་ཙམ་མ་འགགས་པར་ཡོད་མོད་ཀྱི། འོན་ཀྱང་ཟླ་བར་སྣང་བའི་དུས་ཉིད་ན་སྡོད་ཚུལ་ལ་ཟླ་བར་གདོད་མ་ནས་ཡོད་མ་མྱོང་བ་སྟེ། དེ་ལ་ཀུན་རྫོབ་ནི་ཟླ་བར་སྣང་ཙམ་ལྟ་བུ་ཡིན་ལ། དོན་དམ་པའི་བདེན་པ་ནི་ཟླ་བར་གདོད་མ་ནས་ཡོད་མ་མྱོང་བ་ལྟ་བུའོ། །

1-945

གལ་ཏེ་ཟླ་བར་སྣང་བ་ཉིད་ཟླ་བའོ་སྙམ་ན། དེ་ལ་ནི་མུན་པ་སེལ་བ་དང་། འོད་ཟེར་འཕྲོ་བ་དང་། ཟླ་བའི་ཚད་གང་ཡང་མེད་པའི་ཕྱིར་ཟླ་བའི་རང་གི་མཚན་ཉིད་ཀྱིས་སྟོང་པའོ། །ཟླ་བར་སྣང་ཙམ་མ་དོར་ཞིང་ཟླ་བའི་རང་གི་མཚན་ཉིད་དུ་མེད་པས་ན་སྣང་ལ་རང་བཞིན་མེད་པ་ཞེས་བྱའོ། །ཟླ་བར་སྣང་བ་ཉིད་ཟླ་བའི་རང་གི་མཚན་ཉིད་ཀྱིས་སྟོང་པ་ཡིན་གྱི་དེ་ལས་གཞན་དུ་ཟླ་བ་རང་གི་མཚན་ཉིད་ཀྱིས་སྟོང་པ་ཙམ་དུ་མེད་དོ། །ཟླ་བར་སྣང་བ་དང་། ཟླ་བ་རང་གིས་སྟོང་པ་གཉིས་སོ་སོ་མ་ཡིན་པས་སྣང་སྟོང་ཐ་མི་དད་པ་ཉིད་དོ། །དཔེ་དེ་བཞིན་དུ་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་སྣང་ཙམ་གྱི་རང་གི་ངོ་བོ་མི་འདོར་བས་ཆད་པའི་མཐའ་སྤངས་ལ། སྣང་ཙམ་ཉིད་ནས་ཆུ་ཟླ་ལྟར་སྡོད་ཚུལ་དང་འདུག་ཚུལ་དང་། གནས་ཚུལ་ལ་གདོད་མ་ནས་ཡོད་པ་མ་ཡིན་པས་རྟག་པའི་མཐའ་སྤངས་སོ། །སྣང་ཚུལ་ནས་ཀུན་རྫོབ་ཞེས་བརྗོད་ཅིང་གནས་ཚུལ་ནས་དོན་དམ་ཞེས་བརྗོད་དོ། །སྣང་ཚུལ་དང་གནས་ཚུལ་གྱི་ཆ་ནས་གཉིས་སུ་སྨོས་ཀྱི། དོན་ལ་ཐ་དད་པ་གཉིས་ཡོད་པ་མ་ཡིན་ནོ། །ཆོས་ཅན་སྣང་བའི་ཆ་རང་གི་རང་བཞིན་གྱིས་སྟོང་པ་ལ་སྟོང་པ་ཉིད་ཞེས་བརྗོད་དོ། །

1-946

ཆོས་ཅན་སྣང་བ་དང་མ་འབྲེལ་བའི་མེད་ཙམ་ལ་ནི་སྟོང་པ་ཉིད་ཞེས་མི་བརྗོད་དེ། རྩ་བ་ཤེས་རབ་ལས། རྟེན་ཅིང་འབྲེལ་པར་འབྱུང་བ་གང་། །དེ་ནི་སྟོང་པ་ཉིད་དུ་བརྗོད། །ཅེས་གསུངས་པ་ལྟར་རོ། །གཞན་དག་གིས་ནི་དོན་འདི་ཁོང་དུ་མ་ཆུད་དོ། །ཟླ་བར་སྣང་ཡང་ཟླ་བའི་ངོ་བོར་མེད་པ་ནི་རང་བཞིན་མེད་པའི་དོན་ཡིན་པ་བཞིན་དུ་གཟུགས་སོགས་སུ་སྣང་ཡང་གནས་ཚུལ་ལ་མེད་པ་ནི་རང་བཞིན་མེད་པའི་དོན་ནོ། །འདིར་རང་བཞིན་མེད་པ་ཞེས་པའི་སྒྲ་ཙམ་དུ་ལུས་པར་མི་བྱའོ། །རང་བཞིན་མེད་པའི་དཔེ་ལ་བརྟེན་ནས་རང་བཞིན་མེད་པའི་དོན་རྟོགས་པ་ནི་དཔེ་ཉེར་འཇལ་གྱི་ཚད་མ་ཡིན་པར་སློབ་དཔོན་འཕགས་པ་ཀླུ་སྒྲུབ་ཀྱིས་བཤད་དོ། །དཔེ་དེ་བཞིན་དུ་སྒྱུ་མའི་དཔེ་དང་། སྨིག་རྒྱུའི་དཔེ་ལ་སོགས་པ་གཞན་ལ་བརྟེན་ནས་ཀྱང་རང་བཞིན་མེད་པའི་དོན་རྟོགས་པར་བྱའོ། །རྟོག་པ་དང་དཔྱོད་པ་གང་ཞེ་ན། ཕུང་པོ་དང་ཁམས་དང་སྐྱེ་མཆེད་ལ་སོགས་པ་རྣམས་ལ་དང་པོར་ངོ་བོ་ལ་རྟོག་ཅིང་། དེ་ནས་ཁྱད་པར་གཟུགས་དང་ཚོར་བ་སོགས་ལ་དཔྱོད་པ་ལྟ་བུའོ། །དེ་ཡང་ཐོག་མར་ཕུང་པོ་ཙམ་ཞིག་བློ་ཡུལ་དུ་བྱས་ནས་དེའི་དོན་ལ་རྟོག་པ་དང་། དེ་ནས་ཕུང་པོ་ལ་ལྔར་རྣམ་པར་འབྱེད་པ་དང་། དེ་ནས་གཟུགས་ཀྱི་ཕུང་པོའི་ངོ་བོ་ལ་རྟོག་པར་བྱེད་དོ། །

1-947

དེ་ནས་གཟུགས་ཉིད་ལ་ཡང་ཐོགས་བཅས་དང་ཐོགས་མེད་སོགས་སུ་འབྱེད་པའོ། །ཕུང་པོ་དང་ཁམས་དང་སྐྱེ་མཆེད་སོགས་ལྷག་མ་རྣམས་ལའང་རྟོག་པ་དང་དཔྱོད་པའི་ཚུལ་དེ་བཞིན་ནོ། །རགས་པ་དང་ཕྲ་བ་དང་ཤིན་ཏུ་ཕྲ་བ་རྣམ་པར་འབྱེད་པའི་དབྱེ་བས་རྟོག་པ་དང་དཔྱོད་པ་དང་རྣམ་པར་འབྱེད་པ་ཞེས་བྱ་བའི་ཚིག་གསུམ་གསུངས་སོ། །སོ་སོར་རྟོག་པའི་ལྷག་མཐོང་གང་ཞེ་ན། ཇི་སྙེད་པ་རྣམ་པར་འབྱེད་པའི་ལྷག་མཐོང་གིས་ནི་གང་ལ་སྒྲོ་འདོགས་དཔྱད་པར་བྱ་བའི་ཆོས་ཅན་སོ་སོ་ལ་མ་འདྲེས་པར་སོ་སོར་རྣམ་པར་འབྱེད་དོ། །ཇི་ལྟ་བ་རྣམ་པར་འབྱེད་པའི་ལྷག་མཐོང་གིས་ནི་བློ་སྔ་མས་སོ་སོར་རྣམ་པར་ཕྱེ་ནས་བཟུང་བའི་དོན་ལ་རེ་རེ་ཞིང་དེའི་གནས་ཚུལ་ལ་རིགས་པ་ལ་བརྟེན་ནས་སོ་སོར་རྟོག་ཅིང་དེའི་གནས་ཚུལ་འཛིན་པར་བྱེད་པའོ། །རྣམ་པར་མི་གཡོ་བའི་ལྷག་མཐོང་གང་ཞེ་ན། ཆོས་ཅན་སོ་སོ་ལ་རིགས་པས་བརྟགས་ནས་གནས་ཚུལ་ཇི་ལྟ་བ་བཞིན་དུ་རྙེད་པའི་དོན་ལ་ཏིང་ངེ་འཛིན་གྱི་སྟོབས་ཀྱིས་གནས་ཚུལ་གྱི་དོན་ཤེས་རབ་ཀྱིས་འཛིན་པའོ། །དེ་ལ་སྦྱོར་བའི་གནས་སྐབས་སུ་ནི་སོ་སོར་རྟོག་པའི་ཤེས་རབ་ཀྱིས་འཇུག་པར་བྱེད་ལ། མཉམ་གཞག་གི་དངོས་གཞིའི་གནས་སྐབས་སུ་ནི་རྣམ་པར་མི་གཡོ་བའི་ལྷག་མཐོང་གིས་འཇུག་པའོ། །

1-948

ཡང་སོ་སྐྱེ་དང་འཕགས་པ་གཉིས་ཀའི་རྗེས་ཐོབ་ཀྱི་གནས་སྐབས་སུ་ནི་སོ་སོར་རྟོག་པའི་ལྷག་མཐོང་ལ་འཇུག་གོ །མཉམ་གཞག་གི་གནས་སྐབས་སུ་ནི་རྣམ་པར་མི་གཡོ་བའི་ལྷག་མཐོང་ལ་འཇུག་གོ །ཇི་ལྟར་སློབ་པའི་ཚུལ་གྱི་རིམ་པ་གང་ཞེ་ན། ཐོག་མར་ཕྱི་རོལ་གྱི་དོན་རྣམ་པར་འཛིན་པ་བཟློག་པའི་དོན་དུ། དྲུག་གིས་གཅིག་ཆར་སྦྱར་བ་ན་ཞེས་སོགས་ཀྱི་རིགས་པ་ལ་བརྟེན་ནས་ཕྱི་རོལ་གྱི་དོན་རང་བཞིན་མེད་པའི་དོན་རྟོགས་པའམ། རྨི་ལམ་གྱི་དཔེས་ཤེས་པ་ལས་ཐ་དད་མེད་པར་རྟོགས་པར་བྱེད་དོ། །དེ་ནས་གཟུང་བའི་ཡུལ་མེད་ན་གཟུང་བའི་ཡུལ་རྟོགས་པའི་ཤེས་པ་མ་འཁྲུལ་བ་མེད་པར་སྒྲུབ་པའི་རིགས་པ་ལ་བརྟེན་ནས་ཕྱི་རོལ་གྱི་དོན་འཛིན་པའི་ཤེས་པ་ཡང་མེད་པར་རྟོགས་པར་བྱེད་དོ། ། གལ་ཏེ་གཟུང་འཛིན་ཐ་དད་པའི་སྣང་བ་ནུབ་པའི་གཟུང་འཛིན་གཉིས་མེད་ཀྱི་ཤེས་པ་རིག་ཙམ་ཡོད་དོ་ཞེ་ན། འོ་ན་ཤེས་པ་དེ་ལ་སྐྱེ་བ་དང་འགག་པ་དང་གནས་པའི་ཆ་གསུམ་མེད་ན་ནི་རྒྱུན་མེད་པར་ཐལ་བར་འགྱུར་རོ། །གལ་ཏེ་ཡོད་ན་ནི་ཆ་ཤས་ཅན་དུ་འགྱུར་ལ། གལ་ཏེ་ཆ་ཤས་ཅན་དུ་ཡོད་ན་ནི། རང་གི་ཆ་ཤས་དང་རྫས་གཅིག་གམ་ཐ་དད། གལ་ཏེ་རྫས་གཅིག་གོ་ཞེ་ན། འོ་ན་སྐད་ཅིག་མ་སྔ་མ་དང་རྫས་གཅིག་ཡིན་ན་སྐྱེ་འགག་ལྷན་ཅིག་ཏུ་བྱེད་པས་ཆ་ཤས་ཕྱི་མ་གཉིས་ཀྱི་དུས་ན་མེད་པའི་ཕྱིར།

1-949

དེ་དག་གི་ཆ་ཤས་ཅན་མ་ཡིན་པར་ཐལ་བར་འགྱུར་རོ། །རྫས་ཐ་དད་དུའང་མི་འཐད་དེ། ཆ་ཤས་ཅན་ནི་ཆ་ཤས་ལས་ལོགས་ཤིག་ཏུ་རྫས་སུ་མ་དམིགས་པའི་ཕྱིར་རོ། །ཡང་སྐྱེ་འགག་གནས་གསུམ་རེ་རེ་ལ་ཡང་སྐྱེ་འགག་གནས་གསུམ་གྱི་ཆ་མེད་ན་འདུས་བྱས་སུ་མི་འགྱུར་ལ། ཡོད་ན་དེ་དག་རེ་རེའི་ཆ་ལའང་ཆ་གསུམ་གསུམ་དུ་བརྟགས་པས་ཅུང་ཟད་ཀྱང་རྙེད་པར་མི་འགྱུར་རོ། །དེས་ན་གཟུང་འཛིན་གཉིས་ཀྱི་སྣང་བ་ནུབ་པའི་ཤེས་པ་རིག་ཙམ་ཡང་མི་དམིགས་པར་རྟོག་པར་བྱས་ནས་སྤྲོས་པ་མཐའ་དག་མ་དམིགས་པར་རྟོགས་པའི་ལྷག་མཐོང་ལ་བསླབ་པར་བྱའོ། །འདི་དག་ནི་ཇི་ལྟར་སློབ་པའི་རིམ་པའོ། །མངོན་དུ་གྱུར་པ་གང་ཞེ་ན། སོ་སོར་རྟོག་པའི་ལྷག་མཐོང་གིས་རྙེད་པའི་དོན་ཡང་དང་ཡང་དུ་གོམས་པར་བྱས་པ་ལས་ཡང་དག་པའི་དོན་མངོན་དུ་གྱུར་པའི་ལྷག་མཐོང་ངོ་། །སྔ་མ་རྣམས་ཀྱི་གནས་སྐབས་སུ་ནི་སློབ་པ་ཞེས་བྱ་ལ། སྐབས་འདིར་ནི་གོམས་པའི་མཐུ་ཐོབ་པ་ཞེས་བྱའོ། །ལྷག་མཐོང་གི་ཕན་ཡོན་གང་ཞེ་ན། ཆོས་རྣམས་ཀྱི་གནས་ཚུལ་ཇི་ལྟ་བ་བཞིན་རྟོགས་པ་དང་། དེ་ཁོ་ན་ཉིད་ལ་རྨོངས་པའི་མ་རིག་པའི་མུན་པ་སེལ་བ་དང་། ཟག་པ་མེད་པའི་མངོན་ཤེས་ཐོབ་པ་དང་། ཡེ་ཤེས་རྣམ་པར་དག་པ་ཐོབ་པ་དང་།

1-950

རྣམ་པར་གྲོལ་བའི་ཡེ་ཤེས་བརྙེས་པའོ། །ལྷག་མཐོང་གི་རྟགས་གང་ཞེ་ན། སྣང་བ་སྒྱུ་མ་ལྟ་བུར་འཆར་བ་དང་། དངོས་པོ་མ་མངོན་པར་ཞེན་པ་མེད་པ་དང་། གཟུང་འཛིན་ཐ་དད་མེད་པའི་རྣམ་པ་འཆར་བ་སྟེ་རྟགས་གཞན་ནི་ཞི་གནས་ཀྱི་སྐབས་སུ་བཤད་པ་ལྟར་རོ། །ཇི་སྙེད་པ་འབྱེད་པའི་ལྷག་མཐོང་མེད་པར་ནི་ཤེས་བྱའི་སྒྲིབ་པ་ཕྲ་ཞིང་ཕྲ་བ་སྤོང་བའི་ལྷག་མཐོང་མི་འབྱུང་སྟེ། གང་ལ་སྒྲོ་འདོགས་གཅད་པར་བྱ་བའི་དམིགས་པའི་ཡུལ་གྱི་ཁྱད་པར་ལ་མཁས་པའི་བློ་མ་ཐོབ་པའི་ཕྱིར་རོ། །ཆོས་ཅན་ནི་ཉི་ཚེ་བ་ཙམ་ལ་ཤེས་བྱའི་སྒྲིབ་པ་ཕྲ་ཞིང་ཕྲ་བ་མི་སྤོང་ངོ་། །དེ་ཉིད་ཀྱི་ཕྱིར་མངོན་རྟོགས་རྒྱན་ལས། དམིགས་པ་ཆོས་རྣམས་ཐམས་ཅད་དེ། །ཞེས་གསུངས་ཤིང་། སྒྲོ་འདོགས་གཅོད་པའི་རྣམ་པ་ཕྲ་ཞིང་ཕྲ་བ་ཡང་མཐའ་ཡས་པ་དགོས་པ་ལ་དགོངས་ནས་སྦྱོར་ལམ་བཅུ་གཉིས་ཀྱི་དམིགས་པ་དང་རྣམ་པའི་ཁྱད་པར་མི་འདྲ་བ་དུ་མ་དང་། རྣམ་པ་བརྒྱ་བདུན་ཅུ་རྩ་གསུམ་གསུངས་པ་ཡིན་ནོ། །ཆོས་ཅན་ཇི་སྙེད་པ་ལ་མཁས་པར་བྱས་ནས་ཆོས་ཅན་རེ་རེ་ཞིང་རྣམ་པ་མཐའ་ཡས་པས་སྒྲོ་འདོགས་གཅོད་པར་བྱེད་ན་ཇི་ལྟ་ཇི་སྙེད་ཀྱི་དོན་ལ་མཁས་པར་འགྱུར་རོ། །ནང་གི་སེམས་ལ་དཔྱོད་པ་ན་ཡང་ཉོན་མོངས་པའི་རྣམ་པར་རྟོག་པ་དང་།

1-951

མི་དགེ་བའི་རྣམ་པར་རྟོག་པ་དང་། དགེ་བའི་རྣམ་པར་རྟོག་པ་དང་། ལུང་མ་བསྟན་གྱི་རྣམ་པར་རྟོག་པ་རྣམས་ཀྱི་ངོ་བོ་གང་སྐྱེས་པ། གྲངས་ཇི་སྙེད་ཅིག་སྐྱེས་པ་རྣམས་དྲན་པ་དང་ཤེས་བཞིན་གྱིས་སོ་སོར་རིག་པར་བྱ་སྟེ། རྩ་ཉོན་དང་ཉེ་ཉོན་ཉི་ཤུ་སོགས་ལ་རྩ་བའི་ཉོན་མོངས་པ་ཁོང་ཁྲོ་སྐྱེས་སོ། །ང་རྒྱལ་སྐྱེས་སོ། །འདོད་ཆགས་སྐྱེས་སོ། །ཞེ་སྡང་སྐྱེས་སོ་ཞེས་པའི་ཚུལ་དུ་སོ་སོར་བརྟགས་ནས་རང་བཞིན་མེད་པའི་དོན་རྟོགས་པར་བྱའོ། །ལུང་མ་བསྟན་ལ་ཡང་འགྲོའོ་སྙམ་པ་དང་། འདུག་གོ་སྙམ་པ་དང་། གཟུགས་སོ་སྙམ་པའི་རྟོག་པ་སྐྱེ་ཚུལ་སོ་སོར་ངེས་པར་བྱས་ཤིང་། དགེ་བ་ལ་ཡང་རྣམ་བྱང་གི་ཕུང་པོ་དང་། ཁམས་དང་། སྐྱེ་མཆེད་དང་། རྣམ་བྱང་གི་རབ་དབྱེ་རྣམས་ལ་རྟོག་པ་གང་སྐྱེས་དྲན་པ་དང་ཤེས་བཞིན་གྱིས་བཟུང་ནས་རེ་རེ་ཞིང་རང་བཞིན་མེད་པར་རྟོགས་པར་བྱའོ། །དོན་འདི་ལ་དགོངས་ནས་མངོན་པར་རྟོགས་པའི་རྒྱན་ལས། ཀུན་ནས་ཉོན་མོངས་གཟུང་རྟོག་དང་། རྣམ་བྱང་གཟུང་རྟོག་དང་། རྫས་འཛིན་རྟོག་པ་དང་། བཏགས་འཛིན་རྟོག་པ་ལ་སོགས་པ་རྣམས་ཀྱི་རབ་དབྱེ་མང་དུ་གསུངས་པ་ཡིན་ནོ། །གང་ཟག་གི་བདག་མེད་པ་དང་། ཆོས་ཀྱི་བདག་མེད་པ་སྨོས་པ་ནི་མདོར་སྨོས་པ་ཙམ་མོ། །དངོས་པོ་དང་། དངོས་པོ་མེད་པ་དང་།

1-952

རང་གི་ངོ་བོ་དང་། གཞན་གྱི་ངོ་བོ་སྟོང་པ་ཉིད་བཞི་པོ་ནི་འབྲིང་ཙམ་དུ་སྨོས་པ་ཡིན་ནོ། །སྟོང་པ་ཉིད་བཅུ་དྲུག་ཏུ་བཤད་པ་ནི་རྒྱས་པར་བསྟན་པ་སྟེ། ཆོས་ཅན་རེ་རེ་ཞིང་སོ་སོར་བསིལ་ནས་སྒྲོ་འདོགས་གཅོད་པའི་རིམ་པས་ལྷག་མཐོང་ཡང་ཆོས་ཅན་དུ་མ་ལ་སྒྲོ་འདོགས་གཅོད་པའི་རིམ་པས་མང་དུ་སྤྲོས་ཏེ་སྒོམ་དགོས་པའི་དོན་ནོ། །རང་རྒྱུད་ལ་དགེ་བ་དང་མི་དགེ་བ་དང་ལུང་དུ་མ་བསྟན་པའི་རྣམ་པར་རྟོག་པ་ཞག་རེ་ལ་ཡང་གྲངས་དང་གང་སྐྱེས་ཀྱི་ངོ་བོ་ཡང་མ་རིག་པར་བསྒོམ་བྱ་མ་རྙེད་དོ་ཞེས་བྱ་བ་དང་། བསྒོམ་བྱ་དང་སྒོམ་བྱེད་སྟོར་ནས་ཐལ། ཞེས་སོགས་རྨོངས་པ་མཚར་སྐྱེད་ཀྱི་ཚིག་མང་དུ་སྨྲ་བར་སྣང་ངོ་། །གཞན་ཡང་གནད་ཀྱི་མན་ངག་མེད་པར་འཇིག་རྟེན་ཆོས་བརྒྱད་ཀྱིས་ཀུན་ནས་བསླངས་ནས་ཞི་གནས་ལྷག་མཐོང་གི་བསྟན་བཅོས་ཟེར་བ་རྩོམ་པའང་བཞད་གད་ཀྱི་གནས་སོ། །གཞན་ཡང་ཆོས་ཅན་སོ་སོ་ལ་རྟོག་པ་སྣ་ཚོགས་པ་འབྱུང་བ་སོ་སོ་ནས་དཔྱོད་པའི་རྣམ་པ་མཐའ་ཡས་པའི་སྒོམ་ཚུལ་མ་ཤེས་པར་སྟོང་ཉིད་སྒོམ་མོ་ཞེས་པའི་ཚིག་ཙམ་སྒྲོག་པ་དེ་ཡང་བཞད་གད་ཀྱི་གནས་སོ། །ལྷག་མཐོང་གི་ཕན་ཡོན་གང་ཞེ་ན། རང་གི་རྟོགས་པ་ལ་ཐེ་ཚོམ་མེད་པ་དང་། གཞན་གྱི་དྲི་བ་ཐོགས་མེད་དུ་ལུང་སྟོན་པ་དང་།

1-953

དེ་ཁོ་ན་ཉིད་ལ་རྨོངས་པའི་མ་རིག་པའི་མུན་པ་སེལ་བ་དང་། ཇི་ལྟ་བ་དང་ཇི་རྙེད་པ་མཁྱེན་པའི་ཡེ་ཤེས་ཐོབ་པ་དང་། སྒྲིབ་པ་གཉིས་ལས་རྣམ་པར་གྲོལ་བ་ཐོབ་པའོ། །རྟགས་གང་ཞེ་ན། སྣང་བ་རྣམས་སྨིག་རྒྱུ་དང་སྒྱུ་མ་བཞིན་དུ་མཐོང་བ་དང་། དངོས་པོ་ལ་ཞེན་པ་ཆུང་བ་དང་། གཟུང་འཛིན་གཉིས་སུ་ཞེན་པ་ཇེ་སྲབ་ཏུ་འགྲོ་བ་དང་། ལུང་པའི་སྲོལ་འགྱུར་བ་ལྟར་སྔར་རྒྱུད་རྩུབ་པ་རྣམས་ཀྱང་ཞི་ཞིང་དུལ་བར་འགྱུར་བ་དང་། གསུང་རབ་ཀྱི་དོན་ལ་ཡང་སྤོབས་པ་ཐོགས་མེད་དུ་འཇུག་པའོ། །ལྷག་མཐོང་གི་སྤྱིའི་དོན་བསྟན་ཟིན་ཏོ། །

༈ རྒྱུ་ཚོགས་ལ་བརྟེན་པ། ༆ གཉིས་པ་གཞུང་གི་དོན་ལ་གཉིས་ཏེ། རྒྱུ་ཚོགས་ལ་བརྟེན་པ་དང་། སྒོམ་པ་ལ་འཇུག་པའོ། །དང་པོ་ལ་གསུམ་སྟེ། ཞི་གནས་ཀྱི་རྒྱུ་ཚོགས། ལྷག་མཐོང་གི་རྒྱུ་ཚོགས། གཉིས་ཀའི་རྒྱུ་ཚོགས་སོ། །དང་པོ་ལ་གཉིས་ཏེ། ཡན་ལག་གི་དབྱེ་བ་མདོར་བསྟན། ཡན་ལག་སོ་སོར་བཤད་པའོ། །དང་པོ་ནི། ཞི་གནས་དང་ལྷག་མཐོང་གཉིས་ཡོད་པ་དེ་ལ་ཞི་གནས་ཀྱི་རྒྱུ་ཚོགས་གང་ཞེ་ན་མཐུན་རྐྱེན་ཚོགས་པའི་ཡན་ལག་མཐུན་པའི་ཡུལ་ན་གནས་པ་དང་། མི་གཡོ་བའི་རྒྱུ་འདོད་པ་ཆུང་བ་དང་ཆོག་ཤེས་པ་དང་། བྱ་བ་མང་པོ་ཡོངས་སུ་སྤངས་པ་དང་། རྣམ་པར་དག་པའི་རྒྱུ་ཚུལ་ཁྲིམས་རྣམ་པར་དག་པ་དང་།

1-954

མི་མཐུན་ཕྱོགས་དང་བྲལ་བའི་ཡན་ལག་འདོད་པ་ལ་སོགས་པའི་རྣམ་པར་རྟོག་པ་ཡོངས་སུ་སྤངས་པའོ། །གཉིས་པ་ཡན་ལག་སོ་སོར་བཤད་པ་ལ། ཡན་ལག་ལྔ་ཡོད་པ་དེ་ལ། ཡོན་ཏན་ལྔ་དང་ལྡན་པ་ནི་ཞི་གནས་སྒོམ་པ་དང་མཐུན་པའི་ཡུལ་ཡིན་པར་ཤེས་པར་བྱ་སྟེ། དེ་ལ་ཡོན་ཏན་ལྔ་ནི། མཐུན་པའི་རྐྱེན་གོས་དང་ཟས་ལ་སོགས་པ་ཚེགས་མེད་པར་རྙེད་པའི་ཕྱིར་མཐུན་རྐྱེན་རྙེད་སླ་བའི་ཡོན་ཏན་དང་། སྐྱེ་བོ་མི་སྲུན་པ་དགྲ་དང་མི་མ་ཡིན་ལ་སོགས་པ་མི་གནས་པའི་ཕྱིར་གནས་བཟང་བའི་ཡོན་ཏན་དང་། ནད་ལ་སོགས་པ་མི་འཇུག་པའི་ས་ཡིན་པས་ས་བཟང་བའི་ཡོན་ཏན་དང་། གྲོགས་ཚུལ་ཁྲིམས་རྣམ་པར་དག་པ་དང་ལྡན་པ་དང་། ལྟ་བ་བཟང་པོ་ཅན་དུ་མཚུངས་པ་དང་ལྡན་པ་ཡིན་པས་གྲོགས་བཟང་བའི་ཡོན་ཏན་དང་ལྡན་ལ། ཉིན་མོ་སྐྱེ་བོ་མང་པོ་དག་གིས་མ་གང་བའི་ཕྱིར་དང་། མཚན་མོ་སྒྲ་ཆུང་བའི་ཕྱིར་མཐུན་པའི་རྐྱེན་ལེགས་པར་ལྡན་པའོ། །འདོད་པ་ཆུང་བ་གང་ཞེ་ན། ཆོས་གོས་ལ་སོགས་པ་འཚོ་བའི་ཡོ་བྱད་དང་། ལྷག་པའི་ཡོ་བྱད་དང་། ཟས་ལ་སོགས་པ་བཟང་པོའམ་མང་པོ་སྔར་ཡོད་པ་ལ་མ་ཆགས་ཤིང་ཕྱི་མ་དོན་དུ་གཉེར་བ་མེད་པས་ལྷག་པར་ཆགས་པ་མེད་པའོ། །ཆོག་ཤེས་པ་གང་ཞེ་ན།

1-955

ཆོས་གོས་དང་གནས་མལ་ལ་སོགས་པ་ངན་ངོན་ཙམ་རྙེད་པས་རྟག་ཏུ་ཆོག་ཤེས་པ་གང་ཡིན་པའོ། །བཤེས་སྤྲིང་ལས། ནོར་རྣམས་ཀུན་གྱི་ནང་ནས་ཆོག་ཤེས་མཆོག །ཅེས་པ་ལྟར་རོ། །བྱ་བ་མང་པོ་ཡོངས་སུ་སྤངས་པ་གང་ཞེ་ན། ཉོ་ཚོང་དང་། ཞིང་ལས་ལ་སོགས་པ་ལས་ངན་པ་ཡོངས་སུ་སྤངས་པ་དང་། ཁྱིམ་པ་དང་གཞན་རབ་ཏུ་བྱུང་བ་མང་པོ་དག་དང་ཧ་ཅང་སྨོན་འདྲིས་བྱེད་པ་ཡོངས་སུ་སྤངས་པ་དང་། སྨན་བྱེད་པ་དང་། སྐར་མ་རྩི་བ་ལ་སོགས་པ་སྤྲོས་པ་མང་པོ་ཡོངས་སུ་སྤངས་པ་གང་ཡིན་པའོ། །ཚུལ་ཁྲིམས་རྣམ་པར་དག་པ་གང་ཞེ་ན། སོ་ཐར་དང་བྱང་སེམས་ཀྱི་སྡོམ་པ་གཉིས་ཀ་ལ་ཡང་བཅས་པ་ལ་མ་ལྟོས་པར་སྤྱད་པ་ཙམ་གྱིས་ཉེས་པར་འགྱུར་བ་རང་བཞིན་དང་། དེ་བཞིན་གཤེགས་པས་བསླབ་པ་བཅས་པའི་དབང་ལས་སྤྱད་ན་ཉེས་པར་འགྱུར་བ་བཅས་པའི་ཁ་ན་མ་ཐོ་བ་དང་བཅས་པའི་སྒོ་ནས་བསླབ་པའི་གཞི་མི་འདྲལ་བ་དང་། བསླབ་པའི་ཡན་ལག་ལ་བག་མེད་པས་འདས་ན་ཡང་སྐྱེན་པ་རྐྱེན་པར་འགྱོད་པས་ཆོས་བཞིན་དུ་སླར་འཆོས་པར་བྱེད་པ་དང་། ཉན་ཐོས་ཀྱི་སྡོམ་པ་ལ་ཡང་ཕམ་པ་འཆབ་བཅས་བཅོས་སུ་མི་རུང་བ་གསུངས་པ་དེ་ལ་ཡང་སྟོབས་བཞིའི་བཤགས་པ་སྔར་བྱས་པ་ལ་འགྱོད་པ་དང་ལྡན་པ་དང་།

1-956

ཕྱིས་མི་བྱེད་པའི་སེམས་དང་ལྡན་པ་དང་། ཕྱིས་མི་བྱ་བའི་སྡོམ་སེམས་དང་ལྡན་པ་གང་ཡིན་པ་དང་། སེམས་གང་གིས་མི་དགེ་བའི་ལས་བྱས་པའི་སེམས་དེ་ལ་ཡང་གཉེན་པོ་ངོ་བོ་ཉིད་མེད་པར་རྟོགས་པའི་ཕྱིར་རམ་ཆོས་ཐམས་ཅད་ངོ་བོ་ཉིད་མེད་པར་གོམས་པར་བྱས་པའི་ཕྱིར། ལས་ཀྱང་ངོ་བོ་ཉིད་མེད་པར་རྟོགས་པས་གང་ཟག་དེའི་ཚུལ་ཁྲིམས་རྣམ་པར་དག་པ་ཁོ་ན་ཡིན་པར་བརྗོད་པར་བྱའོ། །ལས་ངོ་བོ་ཉིད་མེད་པར་རྟོགས་པས་མི་དགེ་བའི་ལས་དག་པ་དེ་ནི་འཕགས་པ་མ་སྐྱེས་དགྲའི་འགྱོད་པ་བསལ་བ་ལས་ཁོང་དུ་ཆུད་པར་བྱའོ། །ཕམ་པ་འཆབ་བཅས་བྱུང་བ་དེས་ཀྱང་སྤྱིར་སྟོབས་བཞིའི་བཤགས་པ་དང་། ཁྱད་པར་དུ་ལས་ངོ་བོ་ཉིད་མེད་པར་རྟོགས་པ་དེ་བས་ན་གང་ཟག་དེས་ཀྱང་འགྱོད་པ་བྱས་ལ་ཏིང་ངེ་འཛིན་སྒོམ་པ་ལ་མངོན་པར་བརྩོན་པར་བྱའོ། །འདོད་པའི་ཡོན་ཏན་རྣམས་ལ་ཡང་མངོན་པར་ཞེན་པ་ནི་ཤིང་ཀིམ་པའི་འབྲས་བུ་ཟ་བ་བཞིན་དུ་ཟོས་པས་ཟ་བའི་དུས་སུ་ཞིམ་ཡང་ཕྱིས་ནད་བསྐྱེད་པ་བཞིན་དུ་ཚེ་འདི་ལ་གནོད་པ་དང་ཚེ་ཕྱི་མ་ལ་ངན་སོང་དུ་འགྲོ་བ་སོགས་ཀྱི་ཉེས་དམིགས་རྣམས་མང་པོར་འགྱུར་བར་ཡིད་ལ་བྱས་ལ། འདོད་པའི་ཡོན་ཏན་དེ་དག་ལ་མངོན་པར་ཞེན་པའི་རྟོག་པ་ཡང་སྤང་བར་བྱའོ། །

1-957

རྣམ་པར་རྟོག་པ་སྤོང་ཚུལ་ཡང་། རྣམ་པ་གཅིག་ཏུ་ན་འཁོར་བའི་དངོས་པོ་རྙེད་པ་དང་ནོར་ལ་སོགས་པ་སྡུག་པའམ། དགྲ་ལ་སོགས་པ་མི་སྡུག་པ་ཡང་རུང་སྟེ། སྡུག་མི་སྡུག་དེ་ཐམས་ཅད་ནི་སྐད་ཅིག་གིས་རྣམ་པར་འཇིག་པའི་ཆོས་ཅན་རྒྱུན་གྱིས་མི་བརྟན་པ་སྟེ། བདག་ཉིད་རིང་པོ་མི་ཐོགས་པར་འབྲལ་བར་འགྱུར་ན། བདག་དགྲ་གཉེན་དེ་དག་ལ་ལྷག་པར་ཆགས་པ་དང་སྡང་བ་ལ་སོགས་པར་འགྱུར་བ་ཅི་ཞིག་བྱ་སྙམ་དུ་བསྒོམས་པས་འཇིག་རྟེན་གྱི་རྣམ་པར་རྟོག་པ་ཐམས་ཅད་སྤང་བར་བྱའོ། །ཞི་གནས་ཀྱི་རྒྱུ་ཚོགས་བསྟན་ཟིན་ཏོ། ། གསུམ་པ་ལྷག་མཐོང་གི་རྒྱུ་ཚོགས་བསྟན་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། ལྷག་མཐོང་གི་རྒྱུ་ཚོགས་གང་ཞེ་ན། སྐྱེས་བུ་དམ་པ་ལ་བསྟེན་པ་དང་། ཡན་ལག་བཅུ་གཉིས་ཀྱི་གསུང་རབ་མང་དུ་ཐོས་པ་ཡོངས་སུ་བཙལ་བ་དང་། ཐོས་པའི་དོན་རིགས་པས་ཚུལ་བཞིན་དུ་སེམས་པའོ། །གཉིས་པ་ནི། གསུམ་པོ་རིམ་པ་བཞིན་དུ་སྟོན་པ་དེ་ལ་བསྟེན་པར་བྱ་བའི་སྐྱེས་བུ་དམ་པ་ཇི་ལྟ་བུ་ཞེ་ན། གང་གསུང་རབ་མང་དུ་ཐོས་པ་དང་། ཆོས་སྟོན་པའི་ཚིག་གསལ་བ་དང་། ཀུན་སློང་སྙིང་རྗེ་དང་ལྡན་པ་དང་། གཞན་དོན་ལ་སྐྱོ་བ་བཟོད་པའོ། །མདོ་སྡེ་རྒྱན་ལས། བཤེས་གཉེན་ཞི་བ་དུལ་བ་ཉེར་ཞི་བ། །

1-958

ཡོན་ཏན་ལྷག་པར་བརྩོན་བཅས་ལུང་གིས་ཕྱུག །དེ་ཉིད་རབ་ཏུ་རྟོགས་པས་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་གསུངས་པ་ལྟར་རོ། །རྒྱུ་ཚོགས་གསུམ་གསུངས་པ་དེ་ལ། གསུང་རབ་མང་དུ་ཐོས་པ་བཙལ་བ་ཇི་ལྟ་བུ་ཞེ་ན། གང་བཅོམ་ལྡན་འདས་ཀྱི་གསུང་རབ་མདོའི་སྡེ་དང་དབྱངས་ཀྱི་བསྙད་པའི་སྡེ་ལ་སོགས་པ་ཡན་ལག་བཅུ་གཉིས་པོ་ལུང་དང་རིགས་པའི་སྟོབས་ཀྱིས་གྲུབ་པས་གཞན་དུ་དཀྲི་བར་མི་ནུས་པའི་ངེས་པའི་དོན་དང་། ཡང་དག་པའི་དོན་ལ་དཀྲི་བའི་ཐབས་སུ་བསྟན་པ་དྲང་བའི་དོན་ཤེས་པ་ལ་གུས་པར་བྱས་ལ་ཤིན་ཏུ་སྟེ་མ་ནོར་བར་མཉན་པར་བྱ་སྟེ། མཉན་པའི་ཕན་ཡོན་འདི་ལྟར་འཕགས་པ་དགོངས་པ་ངེས་པར་འགྲེལ་བ་ལས་བཀའ་སྩལ་ཏོ། །ཇི་ལྟར་ཞེ་ན། འཕགས་པའི་གཏམ་སྟེ་གསུང་རབ་དང་། དེ་རྟོགས་པའི་རྒྱུ་མཐུན་བསྟན་བཅོས་འདོད་པ་བཞིན་མཉན་པ་དང་ཐོས་པ་མ་ཐོབ་པ་ནི་ལྷག་མཐོང་གི་གེགས་ཡིན་ནོ་ཞེས་སོ། །འདིས་ཤུགས་ལ་ཕན་ཡོན་བསྟན་ཏོ། །ཡང་གསུང་རབ་མང་དུ་ཐོས་པ་དང་། དེའི་དོན་བསམ་པའི་བསམ་བྱུང་གི་ཤེས་རབ་ལྷག་མཐོང་གི་རྒྱུ་ཡིན་པ་ཡང་མདོ་དེ་ཉིད་ལས་ལྷག་མཐོང་ནི་ཐོས་པ་དང་བསམ་པ་ལས་བྱུང་བའི་ལྟ་བ་རྣམ་པར་དག་པའི་རྒྱུ་ལས་བྱུང་བ་ཡིན་ནོ། །ཞེས་གསུངས་པ་ཡིན་ནོ། །

1-959

འཕགས་པ་སྲེད་མེད་ཀྱི་བུས་ཞུས་པ་ལས་ཀྱང་ཐོས་པ་དང་ལྡན་པས་ནི་ཤེས་རབ་འབྱུང་བར་འགྱུར་རོ། །ཐོས་བསམ་གྱི་ཤེས་རབ་བརྒྱུད་ནས་ཉོན་མོངས་པ་ཞི་བའི་རྒྱུར་འགྱུར་བ་ཡང་ཇི་སྐད་དུ། ཤེས་རབ་དང་ལྡན་པ་ནི་ཉོན་མོངས་པ་རབ་ཏུ་ཞི་བར་འགྱུར་རོ་ཞེས་བཀའ་སྩལ་ཏོ། །གསུང་རབ་ཀྱི་དོན་ཚུལ་བཞིན་བསམ་པ་གང་ཞེ་ན། གང་མདོ་སྡེ་ཏིང་ངེ་འཛིན་རྒྱལ་པོ་ལས། གང་ལས་སེམས་ཅན་གང་ཟག་སྐྱེས་བུ་བསྟན། །ཆོས་དེ་ཐམས་ཅད་དྲང་བའི་དོན་དུ་ཤེས། །སྟོང་པ་བདེ་བར་གཤེགས་པས་བསྟན་པ་ལྟར། །ངེས་དོན་མདོ་སྡེ་དག་གི་བྱེ་བྲག་ཤེས། །ཞེས་གསུངས་པ་ལྟར་ངེས་པའི་དོན་དང་དྲང་བའི་དོན་གྱི་མདོ་དང་བསྟན་བཅོས་ལ་སོགས་པ་རིགས་པས་ལེགས་པར་གཏན་ལ་འབེབས་པ་སྟེ། དེ་ལྟར་བྱང་ཆུབ་སེམས་དཔའ་ཡང་དག་པའི་དོན་རིགས་པས་གཏན་ལ་ཕབ་པའི་དོན་ལ་ཐེ་ཚོམ་མེད་ན་ཡང་དག་པའི་དོན་སྒོམ་པ་ལ་བསྒོམ་བྱ་མཐའ་གཅིག་ཏུ་ངེས་པར་འགྱུར་རོ། །ཐོག་མར་ཐོས་པའི་དོན་ཐོས་བསམ་གྱིས་སྒྲོ་འདོགས་བཅད་པ་དེ་ལྟར་མ་ཡིན་ན་བསྒོམ་བྱའི་དོན་ལ་ཐེ་ཚོམ་ཟ་བས་ཐེ་ཚོམ་འཕྱང་མོ་མྱུག་པའི་ཐག་པ་ལ་འཇུས་ནས་འདུག་པ་ནི་ལམ་ཁ་བྲག་གི་མདོར་ཕྱིན་པའི་མི་ལྟར་ཡང་དོགས་པ་མ་ཆོད་པས་ནང་དུ་ཡང་མཐའ་གཅིག་ཏུ་ངེས་པར་མི་འགྱུར་རོ། །

1-960

ལྷག་མཐོང་གི་རྒྱུ་ཚོགས་བསྟན་ཟིན་ཏོ། ། གསུམ་པ་གཉིས་ཀའི་རྒྱུ་ཚོགས་བསྟན་པ་ནི། ཞི་གནས་དང་ལྷག་མཐོང་གཉིས་ཀ་བསྒོམ་པའི་རྣལ་འབྱོར་པས་ནི་དུས་ཐམས་ཅད་དུ་གཞན་ལ་འཚེ་བའི་རྒྱུ་ཉ་དང་ཤ་སེམས་ཅན་གཞན་གྱི་ཤ་ལ་སོགས་པ་སྤང་ཞིང་། བད་ཀན་ལ་སོགས་པའི་ཁམས་དང་མི་མཐུན་པ་མ་ཡིན་པ་དང་། ཟས་མང་ཉུང་ཚོད་ཟིན་པར་བཟའ་བར་བྱའོ། །གོང་དུ་བསྟན་པའི་རྒྱུ་ཚོགས་དེ་ལྟར་བྱང་ཆུབ་སེམས་དཔའ་ཞི་གནས་དང་ལྷག་མཐོང་གི་རྒྱུ་ཚོགས་མཐའ་དག་བསགས་པས་ཞི་གནས་དང་ལྷག་མཐོང་དེ་བསྒོམ་པར་བྱའོ། །ཞི་གནས་དང་ལྷག་མཐོང་གི་རྒྱུ་ཚོགས་བསྟན་ཟིན་ཏོ། །

༈ སྒོམ་པའི་རིམ་པ་ལ་འཇུག་པ་ལ་གསུམ་སྟེ། སྦྱོར་བ་དང་། དངོས་གཞི། ༆ གཉིས་པ་སྒོམ་པའི་རིམ་པ་ལ་འཇུག་པ་ལ་གསུམ་སྟེ། སྦྱོར་བ་དང་། དངོས་གཞི་དང་། རྗེས་ཀྱི་བྱ་བའོ། །དང་པོ་ལ་ཡང་རྗེས་སུ་སྒྲུབ་པ་ནི། ཞི་གནས་དང་ལྷག་མཐོང་གི་རྒྱུ་ཚོགས་གོང་དུ་བསྟན་པ་དེ་ལྟར་བྱང་ཆུབ་སེམས་དཔའ་ཞི་གནས་དང་ལྷག་མཐོང་གི་རྒྱུ་ཚོགས་མཐའ་དག་བསགས་པས་ཞི་གནས་དང་ལྷག་མཐོང་དེ་སྒོམ་པ་ལ་འཇུག་པར་བྱའོ། །ཞི་གནས་དང་ལྷག་མཐོང་སྒོམ་པ་དེ་ལ་རྣལ་འབྱོར་པས་སྒོམ་པའི་དུས་ན་མཉམ་གཞག་ཐུན་གཅིག་ལ་འཇུག་པའི་དབང་དུ་བྱས་ཏེ། ཐོག་མར་བྱ་བ་ཅི་ཡོད་པ་ཐམས་ཅད་ཡོངས་སུ་རྫོགས་པར་བྱས་ལ་བཤང་གཅི་སོགས་བྱས་ནས་གནས་ཀྱི་ཁྱད་པར་དགྲའི་ཚེར་མ་མེད་པ་ཡིད་དུ་འོང་བའི་ས་ཕྱོགས་སུ་གནས་ཏེ།

1-961

བསམ་པའི་ཁྱད་པར་བདག་གིས་སེམས་ཅན་ཐམས་ཅད་བྱང་ཆུབ་ཀྱི་སྙིང་པོ་ལ་དགོད་པར་བྱའོ་སྙམ་དུ་བསམ་ཞིང་། འགྲོ་བ་མཐའ་དག་སྡུག་བསྔལ་གྱི་རྒྱ་མཚོ་ལས་མངོན་པར་འདོན་པའི་བསམ་པ་ཅན་གྱི་སྙིང་རྗེ་ཆེན་པོ་མངོན་དུ་བྱས་ལ། ཚོགས་ཀྱི་ཁྱད་པར་ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མདུན་དུ་སྤྱན་དྲངས་ལ། ཡན་ལག་ལྔ་དང་། བྱིན་པ་ནས་མཁྱུད་པའི་ཕྱག་གཉིས་ལས། འདིར་ཡན་ལག་ལྔའི་ཕྱག་བྱས་ནས་སངས་རྒྱས་དང་བྱང་ཆུབ་སེམས་དཔའི་སྐུ་གཟུགས་ཀྱི་རི་མོ་དང་གསེར་སྐུ་ལ་སོགས་པ་མདུན་དུ་བཞག་གམ། གཞན་ཡང་གསུང་དང་ཐུགས་ཀྱི་རྟེན་དག་ཏུ་ཡང་རུང་སྟེ། སྐུ་གསུང་ཐུགས་ཀྱི་རྟེན་དེ་དག་ལ་ཅི་ནུས་ཀྱིས་རྫས་ཀྱི་མཆོད་པ་ལ་སོགས་པ་དང་། ལུས་ངག་གི་བསྟོད་པ་སོགས་ཚོགས་རྫོགས་པའི་ཡན་ལག་དུ་མ་བྱས་ལ། ཏིང་ངེ་འཛིན་སྐྱེ་བའི་གེགས་བསལ་བའི་དོན་དུ་རང་གི་སྡིག་པ་བཤགས་ནས་འགྲོ་བ་མཐའ་དག་གི་བསོད་ནམས་ལ་རྗེས་སུ་ཡི་རང་བར་བྱས་ལ། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། བསྔོ་བ་སོགས་བྱས་ནས། སྤྱོད་ལམ་གྱི་ཁྱད་པར་སྟན་ཤིན་ཏུ་འཇམ་པོ་བདེ་བ་ལ་རྗེ་བཙུན་རྣམ་པར་སྣང་མཛད་ཀྱི་སྐྱིལ་མོ་ཀྲུང་ལྟ་བུའམ། སྒྲོལ་མ་ལྟ་བུ་སྐྱིལ་ཀྲུང་ཕྱེད་དུ་ཡང་རུང་སྟེ་གནས་པར་བྱའོ། །

1-962

རྣམ་པར་མི་གཡེང་བའི་དོན་དུ་མིག་ཧ་ཅང་མི་དབྱེ། སེམས་བྱིང་བར་མི་འགྱུར་བའི་དོན་དུ་ཧ་ཅང་ཟུམ་པར་ཡང་མི་བྱ་བར་སྣའི་རྩེ་མོར་གཏད་ཅིང་ལུས་ཀྱི་རྩ་དྲང་ཞིང་རླུང་ཐད་ཀར་རྒྱུ་བའི་དོན་དུ་ལུས་ཧ་ཅང་ཡང་མི་སྒྱུ། ཧ་ཅང་ཡང་མི་དགྱེ་བར་སྒལ་ཚིག་དོང་ཙེ་རྩེགས་པ་ལྟར་དྲང་པོར་སྲང་ལ་ཡིད་ཀྱི་དྲན་པ་ཕྱི་རོལ་དུ་ཧ་ཅང་མི་འཕྲོ་བར་ནང་དུ་བཞག་སྟེ་འདུག་པར་བྱའོ། །ནང་དུ་བཞག་པའི་རྗེས་དེ་ནས་འཕྲག་པ་མཐོ་དམན་མེད་པར་མཉམ་པར་བཞག་ལ་མགོ་འཕང་མི་མཐོ་མི་དམའ་ཞིང་གཡས་གཡོན་གྱི་ཕྱོགས་གཅིག་ཏུ་མ་གཡོ་བར་བཞག སྣ་ནས་ལྟེ་བའི་ཐད་ཀར་དྲང་པོར་བཞག་གོ །ཁ་ཆུ་མི་འཁྱིལ་བའི་དོན་དུ་སོ་དང་མཆུ་ཡང་ཐད་ཀར་བཞག་གོ །ལྕེ་ཡང་སོའི་དྲུང་དུ་གཞར་རོ། །རྩ་ལོག་གི་ནང་དུ་རླུང་ལོག་མི་རྒྱུ་བའི་དོན་དུ་དབུགས་ཕྱི་ནང་དུ་རྒྱུ་བ་ཡང་སྒྲ་ཅན་དང་། རྔམ་པ་དང་། དབུགས་རྒོད་པ་ཅན་དུ་མི་གཏང་གི ཅི་ནས་ཀྱང་རྒྱུ་བ་རྒོད་པ་ཅན་དུ་མི་ཚོར་བར་དལ་བུ་དལ་བུས་རང་གི་ངང་གིས་ལྷུན་གྱིས་གྲུབ་པའི་ཚུལ་གྱིས་དབུགས་ནང་དུ་རྔུབ་པ་དང་ཕྱིར་དབྱུང་བར་འགྱུར་བ་དེ་ལྟར་བྱའོ། །སྦྱོར་བ་བསྟན་ཟིན་ཏོ། །

༈ ཞི་གནས་སྒྲུབ་ཚུལ། ༆ གཉིས་པ་དངོས་གཞི་ལ་གསུམ་སྟེ། ཞི་ལྷག་གཉིས་ཀྱི་རང་བཞིན།

1-963

སྒྲུབ་ཚུལ་གྱི་རིམ་པ། དོན་བསྡུ་བའོ། །དང་པོ་ལ་གཉིས་ཏེ། སྤྱིར་བསྟན་པ་དང་། སོ་སོར་བཤད་པའོ། །དང་པོ་ནི། ཞི་གནས་དང་ལྷག་མཐོང་གཉིས་ཡོད་པ་དེ་ལ་ཐོག་མར་རེ་ཤིག་ཞི་གནས་བསྒྲུབ་པར་བྱ་སྟེ། བསྒྲུབ་བྱའི་ཞི་གནས་ཀྱི་རང་བཞིན་ནི་གང་མཉམ་པར་གཞག་པར་བྱ་བའི་ཡུལ་ལས་ཕྱི་རོལ་གྱི་ཡུལ་ལ་སེམས་ཤིན་ཏུ་རྣམ་པར་གཡེང་བ་རབ་ཏུ་ཞི་གནས་ནང་དུ་ཞི་གནས་ཀྱི་དམིགས་པ་ལ་རྒྱུན་དུ་རང་གི་ངང་གིས་འཇུག་ལ། དགའ་བ་དང་ལུས་ཤིན་ཏུ་སྦྱངས་པ་དང་ལྡན་པའི་སེམས་ཉིད་ལ་མི་གཡོ་བར་གནས་པ་ནི་ཞི་གནས་ཞེས་བྱའོ། །ལྷག་མཐོང་གི་རང་བཞིན་ནི་ཞི་གནས་དེ་ཉིད་དམིགས་པ་ལ་དམིགས་བཞིན་པའི་ཚེ་ན། དམིགས་པའི་དེ་ཁོ་ན་ཉིད་ལ་ཤེས་རབ་ཀྱིས་རྣམ་པར་དཔྱོད་པ་དེ་ནི་ལྷག་མཐོང་ཞེས་བྱ་བ་ཡིན་ཏེ། འཕགས་པ་དཀོན་མཆོག་སྤྲིན་ལས་དེ་སྐད་དུ། ཞི་གནས་ནི་སེམས་རྩེ་གཅིག་པ་ཉིད་དོ། །ལྷག་མཐོང་ནི་ཡང་དག་པར་སོ་སོར་རྟོག་པའོ། །ཞེས་གསུངས་པ་ལྟ་བུའོ། །འཕགས་པ་དགོངས་པ་ངེས་པར་འགྲེལ་པ་ལས་ཀྱང་། བཅོམ་ལྡན་འདས་ཇི་ལྟར་ན་ཞེས་པ་ནས་དེ་ལྟར་ན་བྱང་ཆུབ་སེམས་དཔའ་ལྷག་མཐོང་ལ་མཁས་པ་ཡིན་ནོ་ཞེས་པའི་བར་དུ་གསུངས་སོ། །ལུང་གི་དོན་བཤད་པ་ནི། ཇི་ལྟར་ན་ཞི་གནས་ཡོངས་སུ་ཚོལ་བར་བགྱིད་པ་དང་ལྷག་མཐོང་ལ་མཁས་པ་ལགས་ཞེས་པ་ནི་དྲི་བ་བཀོད་པའོ། །

1-964

ལན་བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ངས་ཆོས་གདགས་པ་རྣམ་པར་གཞག་པ་འདི་ལྟ་སྟེ། མདོ་སྡེ་ནི་ཚིག་དང་དོན་དུ་བསྡུས་ཏེ་ལྷུག་པར་གསུངས་པའོ། །དབྱངས་ཀྱི་བསྙད་པའི་སྡེ་ནི། མདོ་སྡེ་དེ་ཉིད་ལ་དབུས་དང་མཐའ་མར་ཚིགས་བཅད་ཀྱི་སྒོ་ནས་བསྙད་པའོ། །ལུང་དུ་བསྟན་པའི་སྡེ་ནི། ཉན་ཐོས་དང་བྱང་ཆུབ་སེམས་དཔའ་ལ་སོགས་པ་ལུང་བསྟན་པའོ། །ཚིགས་སུ་བཅད་པའི་སྡེ་ནི། ཚིགས་བཅད་དུ་བསྡེབས་ནས་གསུངས་པའོ། །ཆེད་དུ་བརྗོད་པའི་སྡེ་ནི། ཞུ་བ་པོ་ལ་མ་ལྟོས་པར་བསྟན་པ་གནས་པའི་ཆེད་དུ་གསུངས་པའོ། །གླེང་གཞིའི་སྡེ་ནི། གཞི་གང་ལ་བརྟེན་ནས་བསླབ་པ་བཅས་པར་སྟོན་པའོ། །རྟོག་པ་བརྗོད་པའི་སྡེ་ནི། དོན་གོ་བར་བྱ་བའི་ཕྱིར་དཔེ་དང་བཅས་ནས་སྟོན་པའོ། །དེ་ལྟ་བུ་བྱུང་བའི་སྡེ་ནི། སྔོན་བྱུང་བའི་གཏམ་བརྗོད་པའོ། །སྐྱེས་པ་རབས་ཀྱི་སྡེ་ནི། བཅོམ་ལྡན་འདས་ཀྱི་སྔོན་གྱི་སྐྱེས་རབས་སྟོན་པའོ། །ཤིན་ཏུ་རྒྱས་པའི་སྡེ་ནི། ཟབ་པ་དང་རྒྱ་ཆེ་བའི་དོན་སྟོན་པའི་སྡེ་སྣོད་དོ། །རྨད་དུ་བྱུང་བའི་སྡེ་ནི། སངས་རྒྱས་དང་བྱང་ཆུབ་སེམས་དཔའ་དང་ཉན་ཐོས་རྣམས་ཀྱི་ངོ་མཚར་བའི་ཡོན་ཏན་རྣམས་བརྗོད་པའོ། །གཏན་ལ་དབབ་པའི་སྡེ་ནི། ཆོས་རྣམས་ཀྱི་རང་སྤྱིའི་མཚན་ཉིད་གཏན་ལ་དབབ་པའོ། །དེ་ལ་མདོ་སྡེ་དང་དབྱངས་ཀྱི་བསྙད་པ་དང་།

1-965

ལུང་བསྟན་དང་། ཚིགས་བཅད་དང་། ཆེད་དུ་བརྗོད་པ་སྡེ་ལྔ་ནི་ཉན་ཐོས་ཀྱི་མདོ་སྡེའོ། །གླེང་གཞི་དང་། རྟོག་བརྗོད་དང་། དེ་ལྟ་བུ་བྱུང་བ་དང་། སྐྱེས་རབས་ཏེ་བཞི་ནི་འདུལ་བའི་སྡེ་སྣོད་དོ། །ཤིན་ཏུ་རྒྱས་པ་དང་། རྨད་དུ་བྱུང་བའི་སྡེ་ནི་བྱང་ཆུབ་སེམས་དཔའི་མདོ་སྡེའི་སྡེ་སྣོད་དོ། །གཏན་ལ་དབབ་པའི་སྡེ་ནི་ཐེག་པ་ཆེ་ཆུང་གཉིས་ཀའི་མངོན་པའི་སྡེ་སྣོད་དོ། །མངོན་པ་ཀུན་ལས་བཏུས་ཀྱི་བཤད་ཚུལ་ལོ། །གང་དག་གསུང་རབ་ཡན་ལག་བཅུ་གཉིས་བྱང་ཆུབ་སེམས་དཔའ་རྣམས་ལ་གསུངས་པ་དེ་དག་བྱང་ཆུབ་སེམས་དཔས་ཐོག་མར་ལེགས་པར་ཐོས་པ་དང་། དེ་ནས་ཚིག་ལེགས་པར་བཟུང་བ་དང་། ཁ་ཏོན་གྱི་སྒོ་ནས་བྱང་བར་བྱས་པ་དང་། ཚིག་དོན་བསམ་བྱུང་གི་ཡིད་ཀྱིས་ལེགས་པར་བརྟགས་པ་དང་། སྒོམ་བྱུང་གིས་མཐོང་བས་ཤིན་ཏུ་ངེས་པའི་ཚུལ་གྱིས་རྟོགས་པར་བྱས་ནས་ཞེས་པའོ། །གཉིས་པ་སོ་སོར་བཤད་པ་ལ་གཉིས་ཏེ། ཞི་གནས་ཚོལ་བ་དང་། ལྷག་མཐོང་ལ་མཁས་པའོ། །དང་པོ་ནི། རྣལ་འབྱོར་པ་དེ་གཅིག་པུ་དབེན་པར་འདུག་སྟེ་ནང་དུ་ཏིང་ངེ་འཛིན་ལ་ཡང་དག་པར་བཞག་ནས་སྦྱོར་བའི་དུས་སུ་ཇི་ལྟར་ལེགས་པར་བསམས་པའི་དོན་དེ་དག་ཉིད་ཡིད་ལ་བྱེད་ཅིང་། སེམས་གང་གིས་དམིགས་པ་ཡིད་ལ་བྱེད་པའི་སེམས་དེ་ནང་དུ་རྒྱུན་ཆགས་སུ་ཡིད་ལ་བྱེད་པས་རྩེ་གཅིག་ཏུ་ཡིད་ལ་བྱེད་དོ། །

1-966

དེ་ལྟར་ཡིད་ལ་བྱེད་པས་ཞུགས་ཤིང་དམིགས་པ་དེ་ལ་དམིགས་ཏེ་ལན་མང་དུ་གནས་པ་དེ་ལ་ལུས་ཤིན་ཏུ་སྦྱངས་པ་ཐོབ་པ་དང་། སེམས་ཤིན་ཏུ་སྦྱངས་པ་འབྱུང་བ་གང་ཡིན་པ་དེ་ནི་ཞི་གནས་ཞེས་བྱ་སྟེ། དེ་ལྟར་ན་བྱང་ཆུབ་སེམས་དཔའ་ཞི་གནས་ཡོངས་སུ་ཚོལ་བར་བྱེད་པ་ཡིན་ནོ། །གཉིས་པ་ལྷག་མཐོང་ལ་མཁས་པ་ནི། ཞི་གནས་ཀྱི་སྟོབས་ཀྱིས་རྣལ་འབྱོར་པ་དེ་ལུས་ཤིན་ཏུ་སྦྱངས་པ་ཏིང་ངེ་འཛིན་གྱི་མཐུས་རྩའི་ནང་དུ་རླུང་གི་རེག་བྱ་ཁྱད་པར་ཅན་རྒྱས་པས་ལུས་སིམ་པར་བྱེད་པ་དང་། སེམས་ཤིན་ཏུ་སྦྱངས་པ་སེམས་ཤིན་ཏུ་དུལ་བ་དེ་ཐོབ་ནས་ཞི་གནས་ཀྱི་དམིགས་པ་དེ་ཉིད་ལ་དམིགས་ཏེ། སེམས་ཀྱི་དགའ་བདེ་ལ་ཆགས་པའི་རྣམ་པ་སྤངས་ནས་སྦྱོར་བའི་དུས་སུ་ཐོས་པས་བཟུང་ཞིང་བསམ་བྱུང་གི་རིགས་པ་ལ་བརྟེན་ནས་ཇི་ལྟར་བསམས་པའི་ཆོས་དེ་ཉིད་ལ་ནང་དུ་གནས་བཞིན་པའི་སྤྱོད་པས་ཏིང་ངེ་འཛིན་གྱི་སྤྱོད་ཡུལ་དུ་གྱུར་པའི་ཆོས་ཅན་སོ་སོ་བ་གཟུགས་བརྙན་སྣང་བ་བཞིན་དུ་སྣང་བཞིན་པའི་དུས་ན་གདོད་མ་ནས་སྡོད་ཚུལ་ལམ་གནས་ཚུལ་ལམ་འདུག་ཚུལ་ལ་མེད་པར་ཤེས་རབ་ཀྱིས་སོ་སོར་རྟོག་པར་བྱེད་ལ། སྣང་ཚུལ་ལ་དམིགས་ནས་གནས་ཚུལ་ལ་མེད་པར་མོས་པར་བྱེད་དོ། །སྣང་ཚུལ་ལ་ཡོད་ཀྱང་གནས་ཚུལ་ལ་མེད་པ་དང་།

1-967

གནས་ཚུལ་ལ་མེད་ཀྱང་སྣང་ཚུལ་ལ་ཡོད་པ་དང་། གཉིས་པོ་ཡ་བྲལ་དུ་མི་སྲིད་པར་འཇུག་པ་འདི་ནི་གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ཀྱི་ཚུལ་ཉིད་དོ། །ཆོས་ཅན་དང་ཡ་བྲལ་བའི་ཆོས་ཉིད་མེད་ཅེས་པའི་དོན་ཡང་འདི་ཡིན་ཞིང་། སྣང་ལ་རང་བཞིན་མེད་པའི་དོན་ཡང་འདི་ཉིད་དོ། །དེ་ཡང་རིགས་པས་བརྟགས་ནས་སྔར་རང་བཞིན་གྱིས་ཡོད་པ་བཤིགས་པའི་ཚུལ་དུ་བྱས་ནས་མ་རྙེད་པ་མ་ཡིན་གྱི། གནས་ཚུལ་ལ་གདོད་མ་ནས་ཡོད་པའི་དོན་རིགས་པས་བརྟགས་ནས་རྙེད་པ་ཡིན་ནོ། །ཆུ་ཟླ་བཞིན་དུ་སྣང་བཞིན་པའི་དུས་ན་གདོད་མ་ནས་ཡོད་པ་མ་ཡིན་པ་འདི་ནི་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། ཆོས་རྣམས་ཀྱི་ཆོས་ཉིད་འདི་ནི་གནས་པ་ཉིད་དོ་ཞེས་གསུངས་པ་ཡིན་ནོ། །དེ་ལྟར་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བརྙན་སྣང་བ་དེ་དག་ལ་ཤེས་པར་བྱ་བའི་དོན་ཏེ། སྤུ་རིས་མ་འདྲེས་པར་རྣམ་པར་འབྱེད་པ་དང་། རབ་ཏུ་རྣམ་པར་ཕྱེ་བའི་ཁྱད་པར་གྱི་ཆོས་རབ་ཏུ་འབྱེད་པ་དང་། དེའི་གནས་ཚུལ་ལ་དང་པོར་ཡོངས་སུ་རྟོག་པ་དང་། དེ་ནས་སྔར་ལས་ཀྱང་ཞིབ་མོར་ཡོངས་སུ་དཔྱོད་པ་དང་། དེ་ནས་ཤིན་ཏུ་ངེས་པའི་ཚུལ་གྱིས་བཟོད་པ་སྟེ་ཁོང་དུ་ཆུད་པ་དང་། དེ་ནས་དེ་ལས་ཀྱང་ཞིབ་ཏུ་རྣམ་པར་དཔྱོད་པར་འདོད་པ་དང་།

1-968

ཇི་ལྟར་རང་བཞིན་མེད་པའི་ཚུལ་བྱེ་བྲག་འབྱེད་པ་དང་། དེའི་དོན་ལ་ཡང་དང་ཡང་དུ་ལྟ་བ་དང་། ཡང་དང་ཡང་དུ་གནས་ཚུལ་གྱི་དོན་ལ་རྟོག་པ་གང་ཡིན་པ་དེ་ནི་བློ་གཞན་ལས་ཡུལ་རྟོགས་ཚུལ་གྱི་ནུས་པ་ལྷག་པས་ན་ལྷག་མཐོང་ཞེས་བྱ་སྟེ། ཚུལ་དེ་ལྟར་བྱས་ན་བྱང་ཆུབ་སེམས་དཔའ་ལྷག་མཐོང་ལ་མཁས་པ་ཡིན་ནོ། །ཞི་གནས་དང་ལྷག་མཐོང་གི་རང་བཞིན་བསྟན་ཟིན་ཏོ། ། གཉིས་པ་ཞི་ལྷག་སྒྲུབ་ཚུལ་གྱི་རིམ་པ་ལ་གསུམ་སྟེ། ཞི་གནས་སྒྲུབ་ཚུལ་དང་། ལྷག་མཐོང་སྒྲུབ་ཚུལ་དང་། ཟུང་དང་འབྲེལ་བའི་ལམ་སྒྲུབ་ཚུལ་ལོ། །དང་པོ་ལ་གཉིས་ཏེ། ཞི་གནས་ཇི་ལྟར་སྒོམ་པའི་ཚུལ། ཞི་གནས་གྲུབ་པའི་རྣམ་པའོ། །དང་པོ་ལ་གཉིས་ཏེ། དམིགས་པ་གང་ལ་སེམས་བཞག་པ་དང་། དམིགས་པ་ལ་སེམས་གནས་པའི་ཐབས་སོ། །དང་པོ་ལ་གཉིས་ཏེ། རྒྱས་པར་བསྟན་པ་དང་། དོན་བསྡུ་བའོ། །དང་པོ་ལ་གཉིས་ཏེ། ཆོས་ཉིད་ལ་དམིགས་ཏེ་སེམས་བཞག་པ་དང་། ཆོས་ཅན་ལ་དམིགས་ཏེ་སེམས་བཞག་པའོ། །དང་པོ་ནི། ཞི་གནས་དང་ལྷག་མཐོང་གཉིས་ཡོད་པ་དེ་ལ་རྣལ་འབྱོར་པ་ཞི་གནས་མངོན་པར་སྒྲུབ་པར་འདོད་པས་ཐོག་མར་རེ་ཤིག་མདོ་སྡེ་དང་དབྱངས་ཀྱི་བསྙད་པའི་སྡེ་ལ་སོགས་པ་ཇི་སྐད་བརྗོད་པའི་གསུང་རབ་མཐའ་དག་ནི་དེ་བཞིན་ཉིད་ལ་དངོས་སུ་སེམས་གཞོལ་བར་བྱེད་པ།

1-969

མཐར་ཐུག་གི་དོན་ཡང་དེ་བཞིན་ཉིད་ལ་འབབ་པ། རིགས་པས་མཐར་ཐུག་གི་དོན་དེ་བཞིན་ཉིད་ལ་བབ་པའོ་ཞེས་མཐར་ཐུག་གི་བརྗོད་བྱ་ཐམས་ཅད་དེ་བཞིན་ཉིད་དུ་བསྡུས་ཏེ་དེ་ལ་སེམས་ཉེ་བར་གཞག་པར་བྱའོ། །ཡང་ན་རྗོད་བྱེད་བསྡུས་པར་བྱས་ནས་འདི་ལ་སེམས་དྲུག་གི་སྒོམ་ཚུལ་ཡོད་དེ། སྡོམ་ནི། རྩ་བ་དང་ནི་རྗེས་སུ་དཔྱོད། །རྣམ་པར་དཔྱོད་དང་ངེས་པར་འཛིན། །སྡོམ་པའི་སེམས་དང་སྨོན་པའི་སེམས། །སེམས་རྣམས་རྣམ་པ་དྲུག་ཏུ་འདོད། །རྩ་བའི་སེམས་གང་ཞེ་ན། མདོ་སྡེ་འདིའི་མིང་ནི་འདི་ཡིན་ནོ་ཞེས་མདོ་སྡེའི་མིང་ལ་སེམས་འཇོག་གོ །རྗེས་སུ་དཔྱོད་པའི་སེམས་གང་ཞེ་ན། མདོ་སྡེ་དེའི་རབ་ཏུ་བྱེད་པ་དང་། ལེའུ་དང་། ཚིགས་སུ་བཅད་པ་ཇི་ཙམ་ཞིག་ཡོད་པ་ལ་སེམས་འཇོག་གོ །རྣམ་པར་དཔྱོད་པའི་སེམས་གང་ཞེ་ན། དོན་དང་ཡི་གེ་ལ་དཔྱོད་པ་སྟེ། དོན་ལ་ནི་བགྲང་བ་དང་འཇལ་བ་དང་། རྟོག་པ་དང་སོ་སོར་རྟོག་པའོ། །དེ་ལ་བགྲང་བ་ནི། གཟུགས་དང་ཕུང་པོ་ལྔ་དང་དོན། །ཞེས་པ་ལྟ་བུ་བརྗོད་བྱའི་དོན་གྱི་གྲངས་བློས་འཛིན་པའོ། །འཇལ་བ་ནི། གྲངས་དང་ལྡན་པའི་ཆོས་ཀྱི་རབ་དབྱེ་འཛིན་པའོ། །རྟོག་པ་གང་ཞེ་ན། རབ་དབྱེ་དེ་དག་གི་དོན་ལ་ཚད་མས་རྟོག་པའོ། །སོ་སོར་རྟོག་པ་ནི། བགྲང་བ་དང་འཇལ་བ་དང་ཚད་མས་བརྟགས་པའི་དོན་དེ་དག་ལ་འདི་དང་འདི་ལྟ་བུའོ་ཞེས་ཞིབ་ཏུ་རྣམ་པར་འབྱེད་པའོ། །

1-970

ཡི་གེ་ལ་དཔྱོད་པ་ནི་མིང་ཚིག་ཡི་གེའི་ཚོགས་ལ་རྟོག་པའོ། །ངེས་པར་འཛིན་པའི་སེམས་གང་ཞེ་ན། སེམས་སྔ་མ་དེ་དག་གིས་དཔྱད་པའི་དོན་དེ་དག་གི་རྒྱུ་མཚན་འཛིན་པའོ། །སྡོམ་པའི་སེམས་གང་ཞེ་ན། གསུང་རབ་དེ་དག་གི་བརྗོད་བྱའི་དོན་ཚན་བསྡོམས་ནས་འཛིན་པར་བྱེད་པའོ། །སྨོན་པའི་སེམས་གང་ཞེ་ན། གསུང་རབ་དེ་དག་གི་དོན་རྟོགས་པར་འདུན་པའོ། །གཉིས་པ་ཆོས་ཅན་ལ་སེམས་བཞག་པ་ལ་གཉིས་ཏེ། ཕུང་པོ་སོགས་ལ་སེམས་བཞག་པ་དང་། གཟུགས་སྐུ་ལ་སེམས་བཞག་པའོ། །དང་པོ་ནི། དམིགས་པ་གང་ལ་སེམས་གཏད་པའི་ཚུལ་ལ། རྣམ་པ་གཅིག་ཏུ་ན། གསུང་རབ་ཀྱི་བརྗོད་བྱའི་རྣམ་པ་ཇི་ཙམ་གྱིས་ཆོས་ཐམས་ཅད་བསྡུས་པར་འགྱུར་བ་ཕུང་པོ་དང་ཁམས་དང་སྐྱེ་མཆེད་ལ་སོགས་པ་དེ་ལ་སེམས་མཉམ་པར་གཞག་པར་བྱའོ། །མངོན་པར་རྟོགས་པའི་རྒྱན་ལས། སྒྲུབ་པའི་དམིགས་པ་བཅུ་གཅིག་ཏུ་བཤད་པ་ལྟ་བུའོ། །གཉིས་པ་གཟུགས་སྐུ་ལ་དམིགས་པ་ནི། དམིགས་པའི་རྣམ་གྲངས་རྣམ་པ་གཅིག་ཏུ་ན་མིག་གིས་ཇི་ལྟར་མཐོང་བའི་སྐུ་གཟུགས་དང་། བླ་མས་དེ་བཞིན་གཤེགས་པའི་སྐུ་གཟུགས་ནི་འདི་དང་འདི་ལྟ་བུའོ་ཞེས་ངག་ཏུ་སྨྲས་པ་ཇི་ལྟར་ཐོས་པའི་སངས་རྒྱས་ཀྱི་སྐུ་གཟུགས་ལ་སེམས་གཞག་པར་བྱ་སྟེ། འཕགས་པ་ཏིང་ངེ་འཛིན་རྒྱལ་པོ་ལས་ཇི་སྐད་དུ།

1-971

གསེར་གྱི་ཁ་དོག་ལྟ་བུའི་སྐུ་ལུས་ཀྱིས། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། །དམིགས་པ་དེ་ལ་གང་གིས་སེམས་འཇུག་པ། །བྱང་ཆུབ་སེམས་དཔའ་དེ་མཉམ་བཞག་ཅེས་བྱ། །ཞེས་གསུངས་པ་ལྟ་བུའོ། །གཉིས་པ་དོན་བསྡུ་བ་ནི། དེ་ལྟར་དམིགས་པ་གསུམ་བཤད་པ་གང་ལ་འདོད་པའི་དམིགས་པ་དེ་ལ་སེམས་བཞག་ནས་དམིགས་པ་དེ་ཉིད་ལ་ཕྱིར་ཞིང་རྒྱུན་དུ་སེམས་བཞག་པར་བྱའོ། །གཉིས་པ་དམིགས་པ་ལ་སེམས་གནས་པའི་ཐབས་ལ་བཞི་སྟེ། བྱིང་རྒོད་ཀྱི་མཚན་མ་བརྟག་པ་དང་། བྱིང་བའི་གཉེན་པོ་ཡིད་ལ་བྱ་བ་དང་། རྒོད་པའི་གཉེན་པོ་ཡིད་ལ་བྱ་བ་དང་། མཉམ་ན་བཏང་སྙོམས་སུ་བྱ་བའོ། །དང་པོ་ནི། དམིགས་པ་དེ་ལ་སེམས་ཉེ་བར་བཞག་ནས་སྔར་ནས་ཤེས་བཞིན་གྱི་གོ་ཆ་སྲ་པོ་གྱོན་པས་སེམས་ལ་འདི་ལྟར་དཔྱད་པར་བྱ་སྟེ། ཅི་དམིགས་པ་ཤིན་ཏུ་གསལ་བར་ལེགས་པར་འཛིན་ནམ། འོན་ཏེ་བྱིང་ངམ་ཞེས་བྱིང་བ་ལ་རྟོག་པ་དང་། འོན་ཏེ་སེམས་དམིགས་པ་ལ་མི་གནས་པར་ཕྱི་རོལ་གྱི་ཡུལ་གཞན་ལ་སེམས་མ་དུལ་བར་རྣམ་པར་འཁྱར་བས་སེམས་རྣམ་པར་གཡེངས་སམ་སྙམ་དུ་རྒོད་པ་ལ་བརྟག་པར་བྱའོ། །གཉིས་པ་ནི། བྱིང་རྒོད་གཉིས་ཡོད་པ་དེ་ལ་གལ་ཏེ་སེམས་བྱུང་རྨུགས་པ་དང་། གཉིད་ཀྱིས་ནོན་ནས་སེམས་བྱིང་ངམ། བྱིང་དུ་དོགས་པར་མཐོང་ན་ཞི་གནས་ཀྱི་དམིགས་པ་མི་གསལ་བའམ་མི་གསལ་བར་འགྱུར་བས་དེའི་ཚེ་གཞན་ལས་མཆོག་ཏུ་དགའ་བའི་དངོས་པོ་སངས་རྒྱས་ཀྱི་སྐུ་གཟུགས་སམ།

1-972

གསུང་ཡིག་འབྲུ་ལ་སོགས་པ་ལ་དམིགས་པའམ། ཡུལ་ཤིན་ཏུ་གསལ་བའི་སྣང་བའི་འདུ་ཤེས་བྱིང་བ་མ་ཞིའི་བར་དུ་ཡིད་ལ་བྱའོ། །བྱིང་བའི་གཉེན་པོ་ཡིད་ལ་བྱས་པ་དེ་ནས་བྱིང་བ་ཞི་བར་བྱས་ནས་ཅི་ནས་ཀྱང་དམིགས་པ་དེ་ཉིད་སེམས་ཀྱིས་ཤིན་ཏུ་གསལ་བར་མཐོང་བར་འགྱུར་བ་དེ་ལྟར་བྱའོ། །ཡུལ་གྱི་རྣམ་པ་མི་གསལ་བ་བྱིང་བར་གྱུར་པ་ཡང་སྐྱོན་ཡིན་ན་ཅི་ཡང་ཡིད་ལ་མི་བྱེད་པ་ཙམ་ལ་ཞི་གནས་ཀྱི་ཡོན་ཏན་ཙམ་ཡང་མེད་ན་ལྷག་མཐོང་ལྟ་ག་ལ་ཞིག གལ་ཏེ་བྱིང་བ་སེལ་བའི་ཐབས་དེ་ཙམ་དུ་ཟད་དམ་ཞེ་ན། གཞན་ཡང་ཡོད་དེ། རྟེན་བསྒྱུར་བ་དང་། ཕྱིའི་ཡུལ་གང་གསལ་བ་བརྟེན་པ་དང་། རྗེས་སུ་དྲན་པ་བསྐྱེད་པ་དང་། འཇུག་པ་བསྟན་པའོ། །དང་པོ་ནི། ལྟ་སྟངས་སྟོད་ཅིང་ལུས་གནད་འཆོས་པའོ། །གཉིས་པ་ནི་ཕྱིའི་ཡུལ་གང་གསལ་བའི་རྣམ་པ་ཡིད་ལ་བྱ་བའོ། །གསུམ་པ་རྗེས་སུ་དྲན་པ་བསྐྱེད་པ་ནི། དྲན་པ་ཡིད་ལ་གནས་པར་བྱ་སྟེ་ཡུལ་དྲན་པས་གསལ་བའི་གྲོགས་བྱེད། གདམས་ངག་དྲན་པས་གཉེན་པོ་སྐྱེ་བའི་གྲོགས་བྱེད། རྣམ་པ་རྗེས་སུ་དྲན་པས་མི་མཐུན་ཕྱོགས་སེལ་བའི་གྲོགས་བྱེད་དོ། །འཇུག་པ་བསྟན་པ་ནི། འཕྲོ་བ་རྣམ་པ་གསུམ་བྱ་སྟེ། །ལུས་འཕྲོ་བ་ཡན་ལག་གི་འདུག་སྟངས་བཅོས། ངག་འཕྲོ་བ་དེ་བཞིན་གཤེགས་པའི་ཚིགས་སུ་བཅད་པ་ཟབ་མོ་ངག་ཏུ་འདོན།

1-973

སེམས་འཕྲོ་བ་སེམས་དབང་པོའི་སྒོ་ནས་ཕྱི་རོལ་ཏུ་སྤྲོ་བར་བྱའོ། །བྱིང་བ་དེ་ཉིད་ཇི་ལྟ་བུ་ཞེ་ན། གང་གི་ཚེ་ཡུལ་གྱི་དངོས་པོ་མི་མཐོང་བ་དམུས་ལོང་ལྟ་བུའམ་མི་འགའ་ཞིག་མུན་པར་ཞུགས་པ་ལྟ་བུའམ། མིག་བཙུམ་པ་ལྟ་བུར་སེམས་ཀྱི་དམིགས་པ་ཅུང་ཟད་མི་གསལ་བ་དང་། ཤིན་ཏུ་མི་གསལ་བར་གྱུར་པ་ཡུལ་མི་མཐོང་བ་དེའི་ཚེ་བྱིང་བར་གྱུར་པ་ཡིན་པར་རིག་པར་བྱའོ། ། གསུམ་པ་རྒོད་པའི་གཉེན་པོ་ཡིད་ལ་བྱ་བ་ནི། གང་གི་ཚེ་ཕྱི་རོལ་གྱི་གཟུགས་སྡུག་པ་ལ་སོགས་པ་ལ་དེ་དག་གི་ཡོན་ཏན་མཛེས་པ་ལ་སོགས་པར་རྟོག་པས་སེམས་དེ་ལ་རྒྱུག་པའི་ཕྱིར་རམ། རང་གི་དམིགས་པ་ལས་གཞན་ཡིད་ལ་བྱེད་པས་སམ། སྔོན་མྱོང་བའི་ཡུལ་ལ་འདོད་པས་སེམས་རྒོད་པའམ། རྒོད་དུ་དོགས་པར་མཐོང་བ་དེའི་ཚེ་འདུ་བྱེད་ཐམས་ཅད་ནི་མི་རྟག་པ་དང་། སྡུག་བསྔལ་བ་ལ་སོགས་པ་ཡིད་འབྱུང་བར་འགྱུར་བའི་དངོས་པོའི་རྣམ་པ་ཡིད་ལ་བྱས་ནས་འདོད་པའི་ཡོན་ཏན་ལ་མངོན་པར་ཞེན་པའི་འདོད་ཆགས་ཞི་བར་བྱའོ། །གལ་ཏེ་མི་རྟག་སོགས་སུ་ལྟ་བ་ཡང་རྒོད་པ་མ་ཡིན་ནམ་ཞེ་ན། རང་གི་དམིགས་པ་ལས་གཞན་དུ་འཕྲོས་པའི་ཆ་ནས་རྒོད་པ་ཡིན་ཡང་གཟུགས་སོགས་ལ་མངོན་པར་ཞེན་པའི་འདོད་ཆགས་ཞི་བའི་གཉེན་པོར་འགྱུར་པས་ལམ་གྱི་ཡན་ལག་ཏུ་གཏོགས་པ་ཡིན་པས་རྒོད་པར་མི་བགྲང་ངོ་། །

1-974

མི་རྟག་པ་སོགས་ཀྱི་རྣམ་པ་ཡིད་ལ་བྱས་པའི་རྗེས་དེ་ནས་འདོད་ཡོན་ལ་རྣམ་པར་གཡེང་བའི་རྒོད་པ་ཞི་བར་བྱས་ནས་དྲན་པ་དང་ཤེས་བཞིན་གྱི་ཐག་པ་མྱུར་བར་འཇུག་པས་ཡིད་ཀྱི་གླང་པོ་ཆེ་རབ་ཏུ་གཡོ་བ་དམིགས་པའི་སྡོང་པོ་དེ་ཉིད་ལ་གདགས་པར་བྱའོ། །བཞི་པ་མཉམ་ན་བཏང་སྙོམས་སུ་བྱ་བ་ནི། གང་གི་ཚེ་ཞི་གནས་ཀྱི་སྐྱོན་བྱིང་བ་དང་རྒོད་པ་མེད་པར་གྱུར་ཏེ་དམིགས་པ་དེ་ལ་སེམས་རྣལ་དུ་འཇུག་པར་མཐོང་བ་དེའི་ཚེ་བྱིང་རྒོད་སེལ་བའི་རྩོལ་བ་གློད་ལ་སེམས་གཏང་སྙོམས་སུ་བྱ་ཞིང་། དེའི་ཚེ་ཇི་སྲིད་འདོད་ཀྱི་བར་དུ་མཉམ་གཞག་ཏུ་འདུག་པར་བྱའོ། །གསུམ་པ་ཞི་གནས་གྲུབ་པའི་རྣམ་པ་ནི། དེ་ལྟར་ཞི་གནས་ལ་ཤིན་ཏུ་གོམས་པར་བྱས་ལ། དེའི་མཐུས་རྣལ་འབྱོར་པ་དེའི་ལུས་དང་སེམས་གང་གི་ཚེ་ཤིན་ཏུ་སྦྱངས་པར་གྱུར་པ་དང་། ཇི་ལྟར་འདོད་པ་བཞིན་དུ་དམིགས་པ་ལ་སེམས་དབང་དུ་གྱུར་པ་དེའི་ཚེ་ཞི་གནས་གྲུབ་པ་ཡིན་པར་རིག་པར་བྱའོ། །ཞི་གནས་སྒྲུབ་ཚུལ་བསྟན་ཟིན་ཏོ། །

༈ ལྷག་མཐོང་སྒྲུབ་པའི་ཚུལ། ༆ གཉིས་པ་ལྷག་མཐོང་སྒྲུབ་པའི་ཚུལ་ལ་གསུམ་སྟེ། ལྷག་མཐོང་གི་དགོས་པའི་ཁྱད་པར། དམིགས་པ་ལ་འཇུག་པའི་རིམ་པ། ཇི་ལྟར་བསྒོམ་པའི་ཚུལ་ལོ། །དང་པོ་ལ་གསུམ་སྟེ། དམིགས་པའི་ཁྱད་པར། ལྷག་མཐོང་གི་བྱེད་པ་བསྟན་པ་དང་།

1-975

ལྷག་མཐོང་ལ་འཇུག་པར་གདམས་པའོ། །དང་པོ་ནི། ཞི་གནས་ལ་བསླབས་པའི་རྗེས་དེ་ནས་ཞི་གནས་གྲུབ་པར་བྱས་ནས་ལྷག་མཐོང་བསྒོམ་པར་བྱ་སྟེ། འོག་ནས་འབྱུང་བ་འདི་སྙམ་དུ་བསམ་པར་བྱའོ། །བཅོམ་ལྡན་འདས་ཀྱི་བཀའ་ཐམས་ཅད་ནི་སྐྱོན་དང་བྲལ་བས་ན་ལེགས་པར་གསུངས་པ། དངོས་སམ་བརྒྱུད་པས་ཆོས་རྣམས་ཀྱི་གནས་ཚུལ་དེ་ཁོ་ན་ཉིད་མངོན་སུམ་དུ་གསལ་བར་བྱས་པ་དེ་ཁོ་ན་ཉིད་ལ་བློ་གཞོལ་བར་བྱེད་པ་ཉིད་དོ། །དེས་ན་ལྷག་མཐོང་སྒོམ་པར་འདོད་པས་དངོས་པོའི་གནས་ཚུལ་དེ་ཁོ་ན་ཉིད་ལ་སྒྲོ་འདོགས་གཅད་པར་བྱའོ། །གཉིས་པ་ནི། དངོས་པོའི་དེ་ཁོ་ན་ཉིད་ཤེས་ན་ཡེ་ཤེས་ཀྱི་སྣང་བ་བྱུང་བས་ཉི་མའི་འོད་ཟེར་གྱིས་མུན་པ་སེལ་བ་བཞིན་དུ་ལྟ་བ་ངན་པའི་འཆིང་བྱེད་ཀྱི་དྲྭ་བ་ཐམས་ཅད་དང་བྲལ་བར་འགྱུར་རོ། །གལ་ཏེ་ཞི་གནས་ཀྱིས་དེ་ཁོ་ན་ཉིད་རྟོགས་པས་ལྷག་མཐོང་ཅི་དགོས་ཅེ་ན། ཞི་གནས་ཙམ་གྱིས་ནི་དེ་ཁོ་ན་ཉིད་རྟོགས་པའི་ཡེ་ཤེས་དག་པར་མི་འགྱུར་ཞིང་དེ་ཁོ་ན་ཉིད་ལ་སྒྲིབ་པའི་མུན་པ་སེལ་བར་ཡང་མི་འགྱུར་གྱི། གལ་ཏེ་ཤེས་རབ་ཀྱིས་དེ་ཁོ་ན་ཉིད་ལེགས་པར་བསྒོམས་ན་ཡེ་ཤེས་རྣམ་པར་དག་པར་འགྱུར་ལ། ཡང་དག་པའི་དོན་ལ་དཔྱོད་པའི་ཤེས་རབ་ཁོ་ནས་དེ་ཁོ་ན་ཉིད་རྟོགས་པར་འགྱུར་ལ།

1-976

སྟོང་ཉིད་རྟོགས་པའི་ཤེས་རབ་ཁོ་ནས་སྒྲིབ་པ་ཡང་དག་པར་སྤོང་བར་འགྱུར་རོ། །གསུམ་པ་ནི། ཤེས་རབ་ཁོ་ནས་དེ་ཁོ་ན་ཉིད་རྟོགས་ཤིང་སྒྲིབ་པ་སྤོང་བ་དེ་ལྟ་བས་ན་རྣལ་འབྱོར་པ་དག་གིས་ཞི་གནས་ལ་གནས་ཏེ། རིགས་པ་ལ་བརྟེན་པའི་ཤེས་རབ་ཀྱིས་དེ་ཁོ་ན་ཉིད་ཡོངས་སུ་བཙལ་བར་བྱ་ཡི། ཐར་པ་ཐོབ་པར་འདོད་པའི་གང་ཟག་གིས་ཞི་གནས་ཙམ་གྱིས་ནི་ཆོག་པར་འཛིན་པར་མི་བྱའོ་སྙམ་དུ་བསམ་མོ། །གཉིས་པ་དམིགས་པ་ལ་འཇུག་པའི་ཁྱད་པར་ལ་གསུམ་སྟེ། ལྷག་མཐོང་གི་འཇུག་པ་དང་། འཇུག་པ་སྒྲུབ་པ་དང་། འཇུག་པའི་བསྔགས་པའོ། །དང་པོ་ལ་གཉིས་ཏེ། སོ་སོར་རྟོག་པའི་ཁྱད་པར་དང་། ཡུལ་སོ་སོར་དཔྱོད་པའི་ནུས་པའོ། །དང་པོ་ལ་གཉིས་ཏེ། སྤྱིར་བསྟན་པ་དང་། སོ་སོར་བཤད་པའོ། །དང་པོ་ནི། ཤེས་རབ་ཀྱིས་དེ་ཁོ་ན་ཉིད་བཙལ་བར་བྱའོ་ཞེས་གསུངས་ན། དེ་ཁོ་ན་ཉིད་ཇི་ལྟ་བུ་ཞེ་ན། གང་དོན་དམ་པར་དངོས་པོ་ཐམས་ཅད་གང་ཟག་དང་ཆོས་ཀྱི་བདག་གཉིས་ཀྱིས་སྟོང་པ་ཉིད་དེ་ནི་དེ་ཁོ་ན་ཉིད་དོ། །དེ་གང་གིས་རྟོགས་ཞེ་ན། དེ་ཁོ་ན་ཉིད་དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པས་རྟོགས་པར་འགྱུར་གྱི། ཕར་ཕྱིན་གཞན་གྱིས་ནི་མ་ཡིན་ནོ། །འཕགས་པ་དགོངས་པ་ངེས་པར་འགྲེལ་བ་ལས།

1-977

བཅོམ་ལྡན་འདས་བྱང་ཆུབ་སེམས་དཔས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ཕ་རོལ་ཏུ་ཕྱིན་པ་གང་གིས་འཛིན་ལགས། སྤྱན་རས་གཟིགས་དབང་ཕྱུག་ཤེས་རབ་ཀྱི་ཕ་རོལ་ཏུ་ཕྱིན་པས་འཛིན་ཏོ་ཞེས་ཇི་སྐད་གསུངས་པ་ལྟ་བུའོ། །གཉིས་པ་སོ་སོར་བཤད་པ་ལ་གཉིས་ཏེ། མཚམས་སྦྱར་བ་དང་། དོན་དངོས་སོ། །དང་པོ་ནི། སྒྲིབ་པ་སྤོང་བ་ལ་ལྷག་མཐོང་དགོས་པ་དེ་ལྟ་བས་ན་ཞི་གནས་ལ་གནས་ཏེ་སྟོང་ཉིད་རྟོགས་པའི་ཤེས་རབ་བསྒོམ་པར་བྱའོ། །གཉིས་པ་ལ་གཉིས་ཏེ། གང་ཟག་གི་བདག་མེད་ལ་སོ་སོར་རྟོག་པ་དང་། ཆོས་ཀྱི་བདག་མེད་ལ་སོ་སོར་རྟོག་པའོ། །དང་པོ་ལ་གསུམ་སྟེ། ཕུང་པོ་ལ་གཅིག་དང་ཐ་དད་དུ་བརྟགས་ཏེ་དགག བརྗོད་དུ་མེད་པའི་གང་ཟག་དགག ཚད་མས་གྲུབ་པའི་དོན་བསྡུ་བའོ། །དང་པོ་ནི། ལྷག་མཐོང་སྒོམ་པ་དེ་ལ་རྣལ་འབྱོར་པས་དམིགས་པ་ལ་འདི་ལྟར་དཔྱད་པར་བྱ་སྟེ་ཞེས་མཚམས་སྦྱར་ནས། ཐོག་མར་གང་ཟག་ལ་དཔྱད་པ་ནི་གང་ཟག་ངོ་བོ་ཉིད་ཀྱིས་ཡོད་ན་ཕུང་པོ་སོགས་དང་ཐ་དད་དུ་གྲུབ་བམ་གཅིག་ཏུ་གྲུབ། དང་པོ་ལྟར་ཡང་མི་འཐད་དེ། ཕུང་པོ་དང་ཁམས་དང་སྐྱེ་མཆེད་རྣམས་ལས་གུད་ན་ཚད་མས་མི་དམིགས་པའི་ཕྱིར་རོ། །གང་ངར་འཛིན་འཇུག་པའི་ཡུལ་ལ་བདག་ཅེས་བརྗོད་པ་ལས་ཕུང་པོ་ལས་ལོགས་ཤིག་པ་ལ་ངར་འཛིན་འཇུག་པ་མ་དམིགས་པས་ངེས་སོ། །

1-978

གཉིས་པ་ལྟར་ཡང་མི་འཐད་དེ། གང་ཟག་ནི་ཕུང་པོ་ལ་སོགས་པའི་ངོ་བོ་དང་གཅིག་ཀྱང་མ་ཡིན་པའི་ཕྱིར་ཏེ། ཕུང་པོ་ལ་སོགས་པ་དེ་དག་ནི་སྐད་ཅིག་གིས་མི་རྟག་པ་དང་། དུ་མ་འདུས་པའི་ངོ་བོ་ཉིད་ཡིན་པའི་ཕྱིར་དང་། གང་ཟག་ནི་རྟག་པ་དང་གཅིག་པུའི་ངོ་བོ་ཉིད་ཡིན་པར་གཞན་མུ་སྟེགས་པ་དག་གིས་བཏགས་པའི་ཕྱིར་རོ། །གལ་ཏེ་མུ་སྟེགས་པས་ཕུང་པོ་དང་མཚན་ཉིད་མི་མཐུན་པར་འདོད་པས་གཅིག་མ་ཡིན་པར་མི་འགྱུར་རོ་ཞེ་ན། གང་ཟག་ངོ་བོ་ཉིད་ཀྱིས་ཡོད་པར་འདོད་པ་ནི་མུ་སྟེགས་པ་ཡིན་ལ། གལ་ཏེ་གང་ཟག་ངོ་བོ་ཉིད་ཀྱིས་ཡོད་པར་འདོད་ན་ནི་གཅིག་དང་ཐ་དད་ལས་མི་འདའ་ལ། ཕུང་པོ་ལས་ལོགས་སུ་མི་དམིགས་པས་ཐ་དད་དུ་མི་འཐད་ལ། གཅིག་ཏུ་ཁས་བླངས་ན་ཡང་རང་གིས་གང་ཟག་གི་མཚན་ཉིད་བརྟགས་པ་དང་འགལ་ལོ་ཞེས་པའི་དོན་ནོ། །རང་གི་སྡེ་པས་ནི་གང་ཟག་རྫས་ཡོད་དུ་མི་འདོད་དེ། མཛོད་ལས། བདག་ཡོད་ཉིད་དུ་ཁས་བླངས་ན། །ལྟ་བའི་མཆེ་བས་རྨས་པར་འགྱུར། །ཞེས་གསུངས་པའོ། །མཛོད་ཀྱི་གྲུབ་མཐའ་ལ་ཡང་གང་ཟག་རྫས་ཡོད་མི་འདོད་ན་གཞན་གྱིས་ལྟ་ཡང་ཅི་དགོས། འོ་ན་གང་ཟག་དབང་པོ་རྣོ་རྟུལ་སོགས་ཀྱི་བྱེ་བྲག་མི་རུང་སྟེ། གང་ཟག་མི་འདོད་པས་སོ་ཞེ་ན།

1-979

རྫས་ཡོད་དུ་མི་འདོད་ཀྱི་བཏགས་ཡོད་ཙམ་མི་འདོད་པ་མ་ཡིན་པས་སྐྱོན་མེད་དོ། །བཏགས་པའང་མེད་དུ་འགྱུར་འོང་བས། །མེད་དོ་ཞེས་ཀྱང་མ་གསུངས་སོ། །ཞེས་པ་ལྟར་རོ། །གང་ཟག་དང་རྟག་པ་གཅིག་པུ་མཚན་ཉིད་དང་མཚོན་བྱ་དང་འབྲེལ་བར་འཛིན་པ་མེད་ཀྱང་གང་ཟག་ལ་དམིགས་ནས་རྟག་པ་དང་གཅིག་པུ་དང་རང་དབང་ཅན་གྱིས་ཁྱད་པར་དུ་བྱས་པར་འཛིན་པ་ལྷན་སྐྱེས་ཀྱི་འཛིན་པ་ཡང་ཡོད་དེ། སྔར་མཐོང་བའི་མི་དེ་ལྟར་ངོ་ཤེས་པར་འཛིན་པ་དང་སེམས་ཅན་གཅིག་སྐྱེ་བ་ན་གང་ཟག་གཅིག་སྐྱེས་སོ་ཞེས་འཛིན་གྱི་གང་ཟག་དུ་མ་སྐྱེས་སོ་ཞེས་མི་འཛིན་པའི་ཕྱིར་རོ། །གང་ཟག་རྫས་སུ་ཡོད་པ་བཀག་པ་ན་གང་ཟག་ངོ་བོ་ཉིད་ཀྱིས་ཡོད་པ་ཡང་དེ་ཉིད་ཀྱིས་ཁེགས་པ་ཡིན་པས་གང་ཟག་གི་བདག་མེད་པར་གྲུབ་བོ། །གང་དག་རྟག་པ་གཅིག་པུ་རང་དབང་ཅན་གྱི་མཚན་ཉིད་ཅན་གྱི་བདག་བཀག་པས་གང་ཟག་གི་བདག་མེད་པ་མི་འགྲུབ་ལ། དེ་ལྟ་བུའི་མཚན་ཉིད་ཅན་གྱི་བདག་མེད་པར་ཤེས་པས་ལྷན་སྐྱེས་ཀྱི་ངར་འཛིན་མི་ལྡོག་ཞེས་སྨྲ་བས་ནི་ཤེས་བྱ་བཀག་པས་བདག་མི་ཁེགས་ཞེས་སྨྲ་བ་དང་མཚུངས་སོ། ། གཉིས་པ་བརྗོད་དུ་མེད་པའི་གང་ཟག་དགག་པ་ནི། གང་ཟག་རྟག་པའི་ངོ་བོ་ཉིད་དང་། མི་རྟག་པར་ཡང་མི་འཐད་པས་ན་ཕུང་པོ་དང་དེ་ཉིད་དང་།

1-980

གཞན་དུ་བརྗོད་དུ་མེད་པའི་དངོས་པོའོ་ཞེ་ན། ཕུང་པོ་དང་དེ་ཉིད་དམ་གཞན་དུ་བརྗོད་དུ་མི་རུང་བའི་གང་ཟག་གི་དངོས་པོ་ཡོད་པར་མི་རུང་སྟེ། དངོས་པོར་ཡོད་པ་ལ་དེ་ཉིད་དང་གཞན་ལས་རྣམ་པ་གཞན་མེད་པའི་ཕྱིར་རོ། །གསུམ་པ་ནི། གང་ཟག་ངོ་བོ་ཉིད་ཀྱིས་གྲུབ་པ་མེད་ན་ངའོ་སྙམ་པའི་བློ་སྐྱེ་བ་མི་འཐད་དོ་ཞེ་ན། ཕུང་པོ་དང་གཅིག་དང་ཐ་དད་དུ་བརྟགས་པས་གང་ཟག་མི་རྙེད་པ་དེ་ལྟ་བས་ན་འཇིག་རྟེན་གྱི་ང་དང་ངའོ་སྙམ་ཞེས་བྱ་བའི་བློ་འཇུག་པ་འདི་ནི་ཐོ་ཡོར་ལ་མིར་འཛིན་པ་ལྟར་འཁྲུལ་པ་ཁོ་ནའོ། །ཞེས་རིགས་པས་དཔྱད་པར་བྱའོ། །དཔྱད་ནས་བདག་འཛིན་འཁྲུལ་པར་ཤེས་པས་བདག་མེད་པར་ཁོང་དུ་ཆུད་པར་བྱའོ། །འདིར་གང་ཟག་ནི་ལྷན་སྐྱེས་ཀྱི་ངར་འཛིན་གྱི་བློས་ཕུང་པོ་ལ་བརྟེན་ནས་ཐག་པ་ལ་སྦྲུལ་དུ་འཁྲུལ་བ་ལྟར་བརྟགས་པ་ཡིན་ལ། དེ་ཕུང་པོ་ལ་རིགས་པས་དཔྱད་ན་མི་རྙེད་པས་ངོ་བོ་ཉིད་མེད་ལ། གང་ཟག་གི་ངོ་བོ་ཉིད་མེད་པ་ལ་གང་ཟག་གི་བདག་མེད་པ་ཞེས་བསྟན་ཏོ། །གཉིས་པ་ཆོས་ལ་བདག་མེད་པར་རྟོག་པ་ལ་གསུམ་སྟེ། ཕྱི་རོལ་གྱི་དོན་ངོ་བོ་ཉིད་མེད་པར་བརྟག་པ་དང་། སེམས་ངོ་བོ་ཉིད་མེད་པར་བརྟག་པ་དང་། རིགས་པས་ངེས་པའི་དོན་བསྟན་པའོ། །

1-981

དང་པོ་ལ་གསུམ་སྟེ། བརྟག་པར་བྱ་བའི་ཆོས་ཀྱི་དངོས་པོ་བསྡུ་བ། ཕྲ་རགས་ཀྱི་གཟུགས་དགག་པ། སྣང་བ་རྣམ་ཤེས་སུ་བསྟན་པའོ། །དང་པོ་ནི། ཆོས་ནི་གཟུགས་སོགས་ཡིན་ལ་བདག་མེད་པ་ནི་དེ་ངོ་བོ་ཉིད་ཀྱིས་སྟོང་པ་ཡིན་པས། གང་ཟག་གི་བདག་མེད་དུ་མ་ཟད་ཆོས་ཀྱི་བདག་མེད་ཀྱང་འདི་ལྟར་བསྒོམ་པར་བྱ་སྟེ། ཆོས་ཞེས་བྱ་བ་མདོར་བསྡུ་ན། །གཟུགས་སོགས་ཕུང་པོ་ལྔ་དང་། ཡུལ་གྱི་སྐྱེ་མཆེད་དྲུག་དང་། ཡུལ་ཅན་གྱི་སྐྱེ་མཆེད་དྲུག་སྟེ་སྐྱེ་མཆེད་བཅུ་གཉིས་དང་། དམིགས་པ་ཡུལ་གྱི་ཁམས་དྲུག་དང་། རྟེན་དབང་པོའི་ཁམས་དྲུག་དང་། བརྟེན་པ་རྣམ་པར་ཤེས་པའི་ཁམས་དྲུག་སྟེ་ཁམས་བཅོ་བརྒྱད་དོ། །གཉིས་པ་ནི། འདི་དག་གཟུང་འཛིན་གཉིས་སུ་འདུས་པས་གཟུང་བའི་ཆ་དེ་ལ་ཕུང་པོ་དང་། སྐྱེ་མཆེད་དང་ཁམས་གཟུགས་ཅན་གང་དག་ཡིན་པ་དེ་དག་ནི་སྣང་ཚུལ་ལ་ཤེས་པ་ལས་ཕྱི་རོལ་དུ་གྱུར་པར་སྣང་ཡང་དོན་དམ་པར་ན་སེམས་ཀྱི་རྣམ་པ་ལས་གུད་ན་མེད་དོ། །གཟུགས་སུ་སྣང་བ་དེ་དག དྲུག་གིས་གཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་སོགས་ཀྱི་རིགས་པས་རྡུལ་ཕྲ་རབ་ཀྱི་བར་དུ་བཤིག་ལ། རྡུལ་ཕྲ་རབ་རྣམས་ཀྱང་རིགས་པས་ཆ་ཤས་ཀྱི་ངོ་བོ་ཉིད་ངེས་པར་གཟུང་དུ་མེད་པའི་ཕྱིར་རོ། །

1-982

གསུམ་པ་ནི། དོན་དུ་སྣང་བ་འདི་ཟླ་བ་གཉིས་སུ་སྣང་བ་ལྟར་མི་བདེན་པ་དེ་ལྟ་བས་ན་འཁྲུལ་པའི་ངོ་ན་སེམས་ལས་ཐ་དད་དུ་སྣང་ཡང་གནས་ཚུལ་ལ་ཐ་དད་དུ་མེད་དོ། །འོ་ན་རྒྱུ་གང་ལས་སྣང་ཞེ་ན། ཐོག་མ་མེད་པའི་དུས་ནས་གཟུགས་ལ་སོགས་པ་ཡང་དག་པ་མ་ཡིན་པ་ལ་ཕྱིན་ཅི་ལོག་ཏུ་མངོན་པར་ཞེན་པའི་བག་ཆགས་གཅིག་ནས་གཅིག་ཏུ་བརྒྱུད་པའི་བག་ཆགས་སད་པའི་དབང་གིས་སྣང་ངོ་། །དཔེར་ན་རྨི་ལམ་དུ་རྨིས་པའི་གཟུགས་ལ་སོགས་པ་སྣང་བ་བཞིན་དུ་འཁྲུལ་པའི་དབང་གིས་བྱིས་པ་རྣམས་ལ་རང་གི་སེམས་ཉིད་གཟུགས་ལ་སོགས་པར་ཕྱི་རོལ་དུ་ཆད་པ་བཞིན་དུ་སྣང་གི དོན་དམ་པར་ན་སྣང་བ་འདི་ལ་གཟུགས་ལ་སོགས་པ་ནི་སེམས་ཀྱི་སྣང་བ་ལས་གུད་ན་མེད་དོ་ཞེས་རིགས་པས་དཔྱད་པར་བྱའོ། །གསུམ་པ་སེམས་ངོ་བོ་ཉིད་མེད་པར་བསྟན་པ་ལ་གཉིས་ཏེ། སྤྱིར་བསྟན་པ་དང་། རྒྱས་པར་བཤད་པའོ། །དང་པོ་ནི། རིགས་པས་གཟུགས་སོགས་སུ་སྣང་བ་དོན་དམ་པར་སེམས་ལས་ཐ་དད་དུ་མེད་པར་རྟོགས་པའི་རྣལ་འབྱོར་པ་དེ་འདི་སྙམ་དུ། ཁམས་གསུམ་པོ་དེ་དག་ནི་སེམས་ཙམ་མོ་ཞེས་སྙམ་དུ་སེམས་ཤིང་། རྣལ་འབྱོར་པ་དེས་དེ་ལྟར་སྣོད་བཅུད་ཀྱི་ཆོས་གདགས་པ་མཐའ་དག་ནི་སེམས་ཀྱི་སྣང་བ་ཁོ་ན་ཡིན་པར་རྟོགས་པར་བྱས་ནས་སེམས་སུ་སྣང་བ་དེ་ལ་ཡང་སོ་སོར་བརྟགས་ནས་སེམས་ཀྱི་ངོ་བོ་ཉིད་ལ་ཡང་རང་བཞིན་མེད་པར་སོ་སོར་རྟོག་གོ །

1-983

མདོ་ལས་ཀྱང་། ཆོས་ཐམས་ཅད་ཀྱི་ངོ་བོ་ཉིད་སོ་སོར་བརྟགས་པ་ཡིན་ནོ་ཞེས་གསུངས་པས། ཐམས་ཅད་ཀྱི་སྒྲས་སེམས་ཀྱང་བརྟག་པར་བྱ་བ་ཉིད་དུ་བསྟན་ཏོ། །གཉིས་པ་རྒྱས་པར་བཤད་པ་ལ་བཞི་སྟེ། སེམས་བརྫུན་པ་ཉིད་དུ་བསྟན་པ་དང་། དེ་ཉིད་རིགས་པས་སྒྲུབ་པ་དང་། ཚད་མའི་འབྲས་བུ་བསྡུ་བ་དང་། ཆོས་གཞན་ལ་སྦྱར་བའོ། །དང་པོ་ནི། སེམས་ལ་རྟོག་པར་བྱ་དགོས་ན་ཇི་ལྟར་རྟོག་ཅེ་ན། རྣལ་འབྱོར་པས་འདི་ལྟར་དཔྱོད་དེ། དོན་དམ་པར་ན་སེམས་ཀྱང་བདེན་པར་མི་རུང་སྟེ། གང་གི་ཚེ་དོན་གྱི་རྣམ་པ་བརྫུན་པའི་ངོ་བོ་ཉིད་དེ་འཛིན་པའི་བློ་ཆོས་ཅན། བདེན་པ་ཉིད་དུ་གྲུབ་པར་ག་ལ་འགྱུར་ཏེ་མི་འགྱུར་བར་ཐལ། གཟུགས་ལ་སོགས་པ་བརྫུན་པའི་རྣམ་པ་འཛིན་པའི་སེམས་ཉིད་གཟུགས་སོགས་སྣ་ཚོགས་ཀྱི་རྣམ་པར་སྣང་བ་དེའི་ཚེའོ། །གལ་ཏེ་གཟུང་བའི་ཡུལ་བརྫུན་ཡང་སེམས་བདེན་ནོ་ཞེ་ན། ཇི་ལྟར་གཟུགས་ལ་སོགས་པའི་རྣམ་པ་བརྫུན་པ་དེ་བཞིན་དུ་སེམས་ཀྱང་རྣམ་པ་བརྫུན་པ་དེ་ལས་གུད་ན་མེད་པས་བརྫུན་པ་ཉིད་དོ། །འདི་ནི་རྣམ་པ་བརྫུན་པ་ལས་ཐ་མི་དད་དུ་གྲུབ་པའི་དོན་ནོ། །གཉིས་པ་དེ་ཉིད་རིགས་པས་སྒྲུབ་པ་ནི། གཟུགས་ལ་སོགས་པ་སྣ་ཚོགས་སུ་སྣང་བ་ཆོས་ཅན། ཇི་ལྟར་གཅིག་ཏུ་བདེན་པ་ཡིན་ཏེ་མ་ཡིན་པར་ཐལ།

1-984

སྣ་ཚོགས་པའི་རྣམ་པ་ཡིན་པས་སོ། །དུ་མའི་ངོ་བོ་ཉིད་དུ་བདེན་པ་མ་ཡིན་པར་ཐལ། ཡུལ་ཅན་ཤེས་པ་གཅིག་དང་ཐ་དད་པ་མ་ཡིན་པའི་ཕྱིར། དཔེ་དེ་བཞིན་དུ་སེམས་ཀྱང་དོན་དམ་པར་གཅིག་དང་དུ་མའི་ངོ་བོ་ཉིད་མ་ཡིན་ཏེ། དོན་དམ་པར་མ་གྲུབ་པའི་གཟུགས་སོགས་ལས་གུད་ན་མེད་པའི་ཕྱིར། གསུམ་པ་ནི། སེམས་ཀྱང་དོན་དམ་པར་གཅིག་དང་དུ་མའི་ངོ་བོ་ཉིད་མ་ཡིན་པ་དེ་ལྟ་བས་ན་སེམས་ནི་སྣང་བ་ཙམ་ཡོད་ཀྱང་གནས་ཚུལ་ལ་མེད་པས་སྒྱུ་མ་ལ་སོགས་པའི་ངོ་བོ་ཉིད་ཁོ་ནའོ། །བཞི་པ་ཆོས་གཞན་ལ་སྦྱར་བ་ནི། སེམས་སྒྱུ་མ་ལྟ་བུར་གྲུབ་པ་ཇི་ལྟ་བ་དེ་བཞིན་དུ་ཕྱི་ནང་གི་ཆོས་ཐམས་ཅད་ཀྱང་སྣང་ལ་རང་བཞིན་མེད་པ་སྒྱུ་མ་ལྟ་བུའི་ངོ་བོ་ཉིད་ལྟ་བུ་ཁོ་ནའོ་ཞེས་ཤེས་རབ་ཀྱིས་རྣམ་པར་དཔྱད་དོ། །གང་དག་ཆོས་རྣམས་སྒྱུ་མ་ལྟ་བུར་རིགས་པས་གྲུབ་ན་སྒྱུ་མ་རིགས་གྲུབ་ཏུ་འགྱུར་བས་སྒྱུ་མ་བདེན་དངོས་སུ་ཁས་བླངས་པར་འགྱུར་རོ། །གཟུགས་སོགས་ཀྱི་ཆོས་རྣམས་སྣང་ལ་རང་བཞིན་མེད་པར་གྲུབ་ན་སྒྱུ་མ་ལྟ་བུར་ཅིའི་ཕྱིར་རིགས་པས་མི་འགྲུབ། སྣང་བ་མ་དོར་ཞིང་གནས་ཚུལ་ལ་མ་གྲུབ་པའི་གཉིས་ཚོགས་ནི་སྒྱུ་མ་ལྟ་བུའི་དོན་ཡིན་ལ། བདེན་པ་མེད་པར་རིགས་པས་གྲུབ་ན་ཅིའི་ཕྱིར་བདེན་དངོས་སུ་འགྱུར།

1-985

དེས་ན་སྒྱུ་མ་རིགས་པས་གྲུབ་པ་ལ་སྐྱོན་བརྗོད་པ་ནི་སྒྱུ་མ་ལྟ་བུའི་དོན་ཁོང་དུ་མ་ཆུད་པར་ཟད་དོ། ། གསུམ་པ་རིགས་པས་ངེས་པའི་དོན་བསྟན་པ་ལ་གཉིས་ཏེ། ཆོས་ཅན་མ་དམིགས་པ་དང་། ཆོས་མ་དམིགས་པའོ། །དང་པོ་ལ་གསུམ་སྟེ། སེམས་མ་དམིགས་པ་དང་། དེའི་ཤེས་བྱེད་འགོད་པ་དང་། ལུང་རིགས་གཉིས་ཀྱིས་གྲུབ་པའི་དོན་ནོ། །དང་པོ་ནི་རྣལ་འབྱོར་པ་དེས་གོང་དུ་བསྟན་པ་དེ་ལྟར་གནས་ཚུལ་ལ་དཔྱོད་པའི་ཤེས་རབ་ཀྱིས་སེམས་ཀྱི་ངོ་བོ་ཉིད་ལ་སོ་སོར་བརྟགས་པ་ན་སེམས་མི་དམིགས་སོ། །ཇི་ལྟར་བརྟག་ཅེ་ན། དོན་དམ་པར་སེམས་ནི་ནང་དང་ཕྱི་རོལ་གང་དུ་གནས་ཞེས་བརྟགས་པ་ན་ནང་དུ་ཡང་མི་དམིགས་ཕྱི་རོལ་དུ་ཡང་མི་དམིགས་སོ། །ཕྱི་ནང་གཉིས་ཀ་མེད་པ་སྟེ་མ་ཡིན་པ་བར་ན་ཡང་མི་དམིགས་སོ། །དུས་གསུམ་གྱི་སྒོ་ནས་བརྟགས་ན་འདས་པའི་སེམས་ཀྱང་འགགས་ནས་མི་དམིགས། མ་འོངས་པ་ཡང་མ་སྐྱེས་ནས་མི་དམིགས། ད་ལྟར་བྱུང་བ་ཡང་སྐྱེ་འགག་གནས་གསུམ་གྱི་ཆ་སོ་སོར་བརྟགས་པས་མི་དམིགས་སོ། །འགྲོ་འོང་གི་སྒོ་ནས་བརྟགས་ན་སེམས་སྐྱེ་བར་སྣང་བའི་ཚེ་ཡང་བརྟགས་ན་གང་ནས་ཀྱང་མི་འོང་། མཐར་འགག་པའི་ཚེ་ཡང་ཡུལ་གང་དུ་ཡང་མི་འགྲོ། སོགས་པ་དུས་གང་དུ་ཡང་མི་འགྲོའོ། །སེམས་ནི་ངོ་བོ་ལ་བརྟགས་ན་ཆོས་གང་དུ་ཡང་བཟུང་དུ་མེད་པ་གཞན་ལ་བསྟན་དུ་མེད་པ།

1-986

གཟུགས་ཅན་དུ་གྲུབ་པ་མ་ཡིན་པའོ། །གཉིས་པ་ནི། གལ་ཏེ་གཞན་དུ་མེད་ཅིང་ཆོས་གང་དུ་ཡང་བཟུང་དུ་མེད་པའི་གཟུགས་ཅན་ཡང་མ་ཡིན་པ་གང་ཡིན་པ་དེའི་ངོ་བོ་ཉིད་ཅི་འདྲ་ཞེ་ན། འཕགས་པ་དཀོན་མཆོག་བརྩེགས་པ་ལས་ཇི་སྐད་དུ་གསུངས་པ་ལྟ་བུ་སྟེ། འོད་སྲུངས་སེམས་ནི་སོ་སོར་རྟོག་པའི་ཤེས་རབ་ཀྱིས་ཕྱི་ནང་གཉིས་སུ་བཙལ་ན་མི་རྙེད་དོ། །གང་སོ་སོར་བརྟགས་ན་མི་རྙེད་པ་དེ་ནི་ཆོས་ཅན་གང་གི་ངོ་བོར་ཡང་མི་དམིགས་སོ། །གང་བརྟགས་ན་ཆོས་གང་གི་ངོ་བོར་ཡང་མི་དམིགས་པ་དེ་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ་ཞེས་རྒྱ་ཆེར་འབྱུང་ངོ་། །གསུམ་པ་ལུང་རིགས་ཀྱིས་གྲུབ་པའི་དོན་ནི། རྣལ་འབྱོར་པ་དེས་གོང་དུ་བསྟན་པ་དེ་ལྟར་སེམས་ལ་ཤེས་རབ་ཀྱིས་སོ་སོར་བརྟགས་ན་སེམས་ཀྱི་དང་པོ་སྟེ་ཐོག་མ་ཡང་ཡང་དག་པར་རྗེས་སུ་མི་མཐོང་། ཐ་མ་ཡང་ཡང་དག་པར་རྗེས་སུ་མི་མཐོང་། བར་ཡང་ཡང་དག་པར་རྗེས་སུ་མི་མཐོང་སྟེ། ཁྱད་གཞིའི་སེམས་ཀྱི་ངོ་བོ་མི་མཐོང་ན་ཁྱད་པར་གྱི་ཆོས་མཐོང་བ་ག་ལ་འགྱུར། ཇི་ལྟར་སེམས་ལ་སྐྱེ་འགག་གི་མཐའ་དང་དབུས་མེད་པ་དེ་བཞིན་དུ་གཟུགས་ལ་སོགས་པའི་ཆོས་ཐམས་ཅད་ཀྱང་སེམས་ལས་ལོགས་ཤིག་ཏུ་གྲུབ་པ་མེད་པས་མཐའ་དང་དབུས་མེད་པར་ཁོང་དུ་ཆུད་པར་བྱའོ། །

1-987

རྣལ་འབྱོར་པ་དེས་དེ་ལྟར་བརྟགས་པས་སེམས་མཐའ་དང་དབུས་མེད་པར་ཁོང་དུ་ཆུད་ནས་སེམས་ཀྱི་ངོ་བོ་ཉིད་ཕྱི་ནང་གི་ཆོས་གང་དུ་ཡང་མི་དམིགས་སོ། །གལ་ཏེ་སེམས་ཀྱི་ངོ་བོ་ལ་རྟོག་པར་བྱེད་པའི་སེམས་དེ་བདེན་པར་ཡོད་དོ་ཞེ་ན། སེམས་ཀྱི་ངོ་བོ་ཇི་ལྟར་ཡོད་པའམ་མེད་པ་གང་གིས་ཡོངས་སུ་རྟོག་པར་བྱེད་པའི་ཡུལ་ཅན་གྱི་བློ་དེ་ཡང་བརྟག་པར་བྱ་བའི་སེམས་ལྟར་སྟོང་པར་རྟོགས་སོ། །བརྟག་བྱ་དང་རྟོག་བྱེད་ཀྱི་སེམས་དེ་དག་སྟོང་པ་ཉིད་དུ་རྟོགས་པས་གཟུགས་ལ་སོགས་པར་སྣང་བའི་ངོ་བོ་ཉིད་ཀྱང་ཡང་དག་པར་རྗེས་སུ་མི་མཐོང་ངོ་། །དེ་ཅིའི་ཕྱིར་ཞེ་ན། དེ་དག་ནི་སེམས་ཀྱིས་བསྒྲུབས་པའི་ངོ་བོ་ཉིད་ཀྱི་རྣམ་པ་ཡིན་པའི་ཕྱིར་ཏེ། སེམས་ཡུལ་ལ་འཇུག་ཚུལ་གྱིས་རྣམ་པར་འགྱུར་བ་ཙམ་ཡིན་པའི་ཕྱིར་རོ། །ཆོས་ཅན་མ་དམིགས་པའི་ཚུལ་བསྟན་ཟིན་ཏོ། ། གཉིས་པ་ཆོས་མ་དམིགས་པའི་ཚུལ་ལ་གཉིས་ཏེ། ཆོས་མ་དམིགས་པའི་ཚུལ་རྒྱས་པར་བསྟན་པ། དེའི་འཐད་པ་དགོད་པའོ། །དང་པོ་ནི། རྣལ་འབྱོར་པ་དེས་གོང་དུ་བསྟན་པ་དེ་ལྟར་གནས་ཚུལ་ལ་རྣམ་པར་དཔྱོད་པའི་ཤེས་རབ་ཀྱིས་གཟུང་འཛིན་གྱི་ཆོས་ཐམས་ཅད་ཀྱི་ངོ་བོ་ཉིད་ཡང་དག་པར་རྗེས་སུ་མ་མཐོང་ངོ་། །རྟེན་ཆོས་ཅན་ནམ་ཁྱད་གཞི་མ་མཐོང་བས་ཁྱད་པར་གྱི་ཆོས་གཟུགས་སོགས་རྟག་གོ་ཞེས་པའམ།

1-988

མི་རྟག་གོ་ཞེས་རྟོག་པར་མི་བྱེད་དོ། །ཡང་རྟེན་ཆོས་ཅན་མེད་པས་གཟུགས་སོགས་སྟོང་ངོ་ཞེས་པའམ། མི་སྟོང་ངོ་ཞེས་བྱ་བར་རྟོག་པར་མི་བྱེད་དོ། །ཡང་དག་པའི་དོན་ལ་སྒྲིབ་པར་བྱེད་པ་ཉོན་མོངས་པའི་ཟག་པ་དང་བཅས་པའམ། ཉོན་མོངས་པའི་ཟག་པ་མེད་པ་ཞེའམ། དུས་ཀྱི་སྒོ་ནས་བྱུང་བ་ཞེའམ། མ་བྱུང་བ་ཞེའམ། དམིགས་མ་དམིགས་ཀྱི་སྒོ་ནས་ཡོད་པ་ཞེའམ་མེད་པ་ཞེས་རྟོག་པར་མི་བྱེད་དོ། །ཕུང་པོ་ལྔ་ལས་ཇི་ལྟར་གཟུགས་ཀྱི་ཁྱད་པར་གྱི་ཆོས་རྟག་མི་རྟག་སོགས་སུ་རྟོག་པར་མི་བྱེད་པ་དེ་བཞིན་དུ་ཉམས་སུ་མྱོང་བའི་ཚོར་བ་དང་། མཚན་མར་འཛིན་པའི་འདུ་ཤེས་དང་། སེམས་ཡུལ་ལ་འདུ་བྱེད་པའི་སེམས་པ་གཙོ་བོར་གྱུར་པའི་ལྡན་པ་དང་ལྡན་པ་མ་ཡིན་པའི་འདུ་བྱེད་དང་། ཡུལ་གྱི་རྣམ་པ་སོ་སོར་རིག་པའི་རྣམ་པར་ཤེས་པ་རྣམས་ལ་ཡང་རྟག་མི་རྟག་དང་། སྟོང་མི་སྟོང་སོགས་སུ་རྟོག་པར་མི་བྱེད་དོ། །གཉིས་པ་དེའི་འཐད་པ་ནི། རྟེན་ཆོས་ཅན་མ་གྲུབ་ན་དེའི་བྱེ་བྲག་གི་ཆོས་རྟག་མི་རྟག་སོགས་ཀྱང་མི་འགྲུབ་པས་ཁྱད་གཞི་མེད་པའི་ཁྱད་ཆོས་དེ་ལ་རྣམ་དཔྱོད་ཀྱི་བློས་རྟོག་པར་ག་ལ་འགྱུར། སོ་སོར་རྟོག་པའི་ཁྱད་པར་བསྟན་ཟིན་ཏོ། ། གཉིས་པ་ཡུལ་སོ་སོར་དཔྱོད་ནུས་པའི་ནུས་པ་བསྟན་པ་ནི།

1-989

རྣལ་འབྱོར་པ་དེས་གོང་དུ་བསྟན་པ་དེ་ལྟར་ཤེས་རབ་ཀྱིས་གཟུགས་སོགས་ཕུང་པོ་ལྔའི་ངོ་བོ་དང་ཁྱད་པར་ལ་རྣམ་པར་དཔྱད་དེ། གང་གི་ཚེ་རྣལ་འབྱོར་པས་དངོས་པོ་གང་གི་ངོ་བོ་ཉིད་རིགས་པས་རྣམ་པར་དཔྱད་པས་མ་རྙེད་པ་ན་དོན་དམ་པར་མེད་པར་ཁོང་དུ་ཆུད་དེ་ངོ་བོ་དང་ཁྱད་པར་ངེས་པར་མི་འཛིན་པ་དེའི་ཚེ་རྣམ་པར་མི་རྟོག་པའི་ཏིང་ངེ་འཛིན་ལ་བདེ་བླག་ཏུ་འཇུག་གོ །གཟུགས་སོགས་ཆོས་ཐམས་ཅད་ཀྱི་ངོ་བོ་ཉིད་མེད་པ་ཉིད་ཀྱང་ཐེ་ཚོམ་ཆོད་ཅིང་ངེས་པའི་ཚུལ་གྱིས་རྟོགས་སོ། །གསུམ་པ་ལྷག་མཐོང་གི་འཇུག་པ་སྒྲུབ་པ་ལ་གསུམ་སྟེ། གཞན་གྱི་འདོད་པ་དགག་པ། རང་ཕྱོགས་ཀྱི་ཤེས་བྱེད་འགོད་པ། དེའི་དོན་རྒྱས་པར་བཤད་པའོ། །དང་པོ་ནི། ཧྭ་ཤང་ན་རེ། ཡང་རིགས་པས་སོ་སོར་བརྟགས་ནས་རྙེད་པའི་དོན་སྒོམ་པ་ལ་ལྟོས་པ་མ་ཡིན་གྱི་ཅི་ཡང་ཡིད་ལ་མི་བྱེད་པའི་ཚུལ་གྱིས་བསྒོམས་ན་འཁོར་བའི་རྩ་བ་རྣམ་པར་རྟོག་པ་ལྡོག་པས་ན་ཅི་ཡང་ཡིད་ལ་མི་བྱེད་པའི་སྒོམ་པ་ཉིད་མཆོག་ཏུ་གྱུར་པའོ་ཞེ་ན། རྣལ་འབྱོར་པ་གང་ཞིག་ཤེས་རབ་ཀྱིས་དངོས་པོའི་ངོ་བོ་ཉིད་ཡོད་མེད་སོ་སོར་བརྟགས་ནས་ཤེས་རབ་ཀྱིས་རྟོགས་པའི་དོན་མི་སྒོམ་གྱི། མན་ངག་གིས་ཡིད་ལ་བྱེད་པ་ཡོངས་སུ་སྤངས་པ་ཙམ་ཞིག་སྒོམ་པར་བྱེད་པར་འདོད་པ་དེ་ལྟར་ན།

1-990

རྣལ་འབྱོར་པའི་རྒྱུད་ལ་བདེན་འཛིན་གྱི་རྣམ་པར་རྟོག་པ་ནམ་ཡང་མི་ལྡོག་ཅིང་ཆོས་རྣམས་ཀྱི་གནས་ཚུལ་ངོ་བོ་ཉིད་མེད་པ་རྟོགས་པར་ཡང་མི་འགྱུར་ཏེ། བདེན་འཛིན་གྱི་སྒྲོ་འདོགས་ཆོད་པའི་ཤེས་རབ་གྱི་སྣང་བ་མེད་པའི་ཕྱིར་རོ། །གཉིས་པ་ནི། བཅོམ་ལྡན་འདས་ཀྱིས་བཀའ་སྩལ་ཏོ། །གང་ཞེ་ན། སོ་སོར་རྟོག་པའི་ཤེས་རབ་ཁོ་ནས་སྒྲིབ་པ་སྤོང་བར་རོ། །བཀའ་སྩལ་པའི་ཚུལ་འདི་ལྟར། དངོས་པོའི་གནས་ཚུལ་ལ་ཡང་དག་པར་སོ་སོར་རྟོག་པ་ཉིད་ལས་ཡང་དག་པ་ཇི་ལྟ་བ་བཞིན་དུ་ཤེས་པའི་ཡེ་ཤེས་ཀྱི་མེ་བྱུང་ན། ཙུབ་ཤིང་བཙུབས་པ་ལས་བྱུང་བའི་མེས་བུད་ཤིང་སྲེག་པར་བྱེད་པ་བཞིན་དུ་རྣམ་པར་རྟོག་པའི་བུད་ཤིང་སྲེག་གོ་ཞེས་པའོ། །སྒྲིབ་པ་སྤོང་བ་ལ་སོ་སོར་རྟོག་པའི་ཤེས་རབ་དགོས་པ་འཕགས་པ་དཀོན་མཆོག་སྤྲིན་ལས་ཀྱང་བཀའ་སྩལ་ཏེ། དེ་ལྟར་སྐྱོན་ལ་མཁས་པ་དེ་ཞེས་པ་ནས་འབྱུང་ངོ་ཞེས་པའི་བར་རོ། །དེའི་དོན་ནི། དེ་ལྟར་ཤེས་རབ་ཀྱིས་བདེན་འཛིན་གྱི་རྣམ་པར་རྟོག་པའི་སྐྱོན་ཉེས་པ་ཐམས་ཅད་ཀྱི་རྩ་བ་བྱེད་པའི་ཚུལ་ལ་མཁས་པ་དེ་བདེན་འཛིན་གྱི་རྣམ་པར་རྟོག་པའི་སྤྲོས་པ་དང་བྲལ་བར་བྱ་བའི་ཕྱིར་དུ་སྟོང་ཉིད་རྟོགས་པའི་ཤེས་རབ་ལ་ཡང་དང་ཡང་དུ་འདྲིས་པར་བྱས་པའི་ཚུལ་གྱིས་སྒོམ་པ་ལ་རྣལ་འབྱོར་དུ་བྱེད་དོ། །

1-991

རྣལ་འབྱོར་པ་དེ་སྟོང་པ་ཉིད་སྒོམ་པ་ཤིན་ཏུ་ཡུན་རིང་ཞིང་གྲངས་མང་བས་ཆགས་སྡང་སོགས་ཉོན་མོངས་སྐྱེ་བའི་གནས་གང་དང་གང་དུ་རྣམ་པར་རྟོག་པའི་སེམས་འཕྲོ་ཞིང་། ཡུལ་སྡུག་པ་ལ་སེམས་མངོན་པར་དགའ་བའི་གནས་དེ་དང་དེ་དག་གི་ཡུལ་གྱི་ངོ་བོ་ཉིད་ཤེས་རབ་ཀྱི་ཡོངས་སུ་བཙལ་ན་སྟོང་པར་རྟོགས་སོ། །ཡུལ་ཅན་ཆགས་སྡང་གི་སེམས་གང་ཡིན་པ་དེ་ཡང་སོ་སོར་རྟོག་པའི་ཤེས་རབ་ཀྱིས་བརྟགས་ན་སྟོང་པར་རྟོགས་སོ། །སེམས་གང་གིས་སོ་སོར་རྟོག་པར་བྱེད་པའི་བློ་དེ་ཡང་ངོ་བོ་ཉིད་ཕྱི་ནང་ཀུན་ཏུ་བཙལ་ན་སྟོང་པར་རྟོགས་ཏེ། ཡུལ་དང་ཡུལ་ཅན་གྱི་སེམས་དང་དེ་ལ་རྟོག་བྱེད་ཀྱི་བློ་དེ་དག་ཚུལ་དེ་ལྟར་དུ་རྟོག་པས་མཚན་མ་མེད་པའི་རྣལ་འབྱོར་ལ་འཇུག་གོ་ཞེས་འབྱུང་ངོ་། །ཡུལ་ལ་སོ་སོར་རྟོག་པ་དང་། ཡུལ་ཅན་ལ་སོ་སོར་རྟོག་པ་དང་། སོ་སོར་རྟོག་བྱེད་ཀྱི་བློ་ལ་རྟོག་པའི་རིམ་པ་གསུམ་བསྟན་པ་འདིས་ནི་རྣལ་འབྱོར་གྱི་ས་གསུམ་གསལ་བར་བྱས་སོ། །གསུམ་པ་དེའི་དོན་བཤད་པ་ནི། མདོ་འདིས་ནི་ཤིན་ཏུ་གསལ་བར་བསྟན་པ་ཡིན་ནོ་ཞེས་འགྲེལ་ལོ། །བསྟན་པའི་དོན་དེ་གང་ཞེ་ན། སོ་སོར་རྟོག་པའི་ཤེས་རབ་ཀྱིས་ཡུལ་ལ་ཡོངས་སུ་རྟོག་པ་སྔོན་དུ་གཏོང་བ་ཉིད་སྤྲོས་པའི་མཚན་མ་མེད་པའི་ཏིང་ངེ་འཛིན་ལ་འཇུག་པའི་རྒྱུར་བསྟན་པ་ཡིན་ནོ། །

1-992

དེ་དངོས་སུ་བསྟན་པས་ཤུགས་ལ་དེ་ཁོ་ན་ཉིད་ཡིད་ལ་བྱེད་པ་ཡོངས་སུ་སྤོང་བ་ཙམ་དང་། སྔར་ཐོས་བསམ་གྱི་ཤེས་རབ་ཀྱིས་དངོས་པོའི་ངོ་བོ་ཉིད་མི་དཔྱོད་པར་ཡིད་ལ་མི་བྱེད་པ་ཙམ་གྱི་སྒོམ་པ་དེས་རྣམ་པར་མི་རྟོག་པའི་ཡེ་ཤེས་ལ་འཇུག་པ་ཉིད་དུ་མི་སྲིད་པར་གསལ་བར་བྱས་སོ། །གསུམ་པ་འཇུག་པའི་བསྔགས་པ་ལ་གཉིས་ཏེ། བསྔགས་པ་བརྗོད་པ་དང་། ལུང་དང་སྦྱར་བའོ། །དང་པོ་ནི། རྣལ་འབྱོར་པ་དེ་གོང་དུ་བསྟན་པ་དེ་ལྟར་སོ་སོར་རྟོག་པའི་ཤེས་རབ་ཀྱིས་ཡུལ་གཟུགས་དང་ཚོར་བ་ལ་སོགས་པའི་ངོ་བོ་ཉིད་ལ་ཐོས་བསམ་གྱི་ཤེས་རབ་ཀྱིས་ཡང་དག་པར་ཇི་ལྟ་བ་བཞིན་དུ་བརྟགས་ནས་གནས་ཚུལ་གྱི་དོན་རྟོགས་པ་ལ་བསམ་གཏན་དུ་བྱེད་ཀྱི། གཟུགས་ལ་སོགས་པ་ལ་མཚན་མར་འཛིན་པའི་ཚུལ་གྱིས་གནས་ནས་བསམ་གཏན་དུ་མི་བྱེད་དོ། །འདིས་ནི་ཆོས་རྣམས་ཀྱི་གནས་ཚུལ་སྒོམ་གྱི། སྣང་ཚུལ་མི་སྒོམ་མོ་ཞེས་པའི་དོན་ནོ། །འཇིག་རྟེན་འདི་དང་འཇིག་རྟེན་ཕ་རོལ་གྱི་བར་གྱི་ཆོས་འགའ་ཞིག་ལ་མངོན་པར་ཞེན་པའི་ཚུལ་གྱིས་གནས་ནས་བསམ་གཏན་མི་བྱེད་དོ། །གང་ལ་གནས་པར་བྱ་བའི་གཟུགས་ལ་སོགས་པའི་ཆོས་དེ་དག་རིགས་པས་བརྟགས་ན་གང་ཡང་མི་དམིགས་པའི་ཕྱིར་རོ། །བརྟགས་ན་ཆོས་གང་ཡང་མི་དམིགས་པ་དེ་བས་ན་སྟོང་ཉིད་རྟོགས་པའི་ཏིང་ངེ་འཛིན་ལ་གནས་པ་ནི་མི་གནས་པའི་བསམ་གཏན་པ་ཞེས་བྱའོ། །

1-993

སོ་སོར་རྟོག་པའི་ཤེས་རབ་ཀྱིས་དངོས་པོ་ཉི་ཚེ་བ་ཙམ་མ་ཡིན་གྱི། དངོས་པོ་མཐའ་དག་གི་ངོ་བོ་ཉིད་ལ་དོན་དམ་པར་དཔྱོད་པའི་ཤེས་རབ་ཀྱིས་སོ་སོར་བརྟགས་ནས་གནས་ཚུལ་སྟོང་པ་ཉིད་ཀྱི་དོན་ཤེས་རབ་ཀྱིས་རྟོགས་པའི་ཏིང་ངེ་འཛིན་ལ་གནས་པས་ཤེས་རབ་མཆོག་གི་བསམ་གཏན་པ་ཞེས་ཀྱང་བྱ་སྟེ། གང་གི་ཕྱིར་ན་སྟོང་ཉིད་རྟོགས་པའི་བློས་ཆོས་གང་ཡང་མི་དམིགས་པར་ཁོང་དུ་ཆུད་པ་ལ་བསམ་གཏན་བྱེད་པ་དེའི་ཕྱིར་རོ། །གཉིས་པ་ལུང་དང་སྦྱར་བ་ནི། འཕགས་པ་ནམ་མཁའ་མཛོད་དང་། འཕགས་པ་གཙུག་ན་རིན་པོ་ཆེས་ཞུས་པ་ལ་སོགས་པའི་མདོ་ལས་བསྟན་པ་བཞིན་ནོ། །དམིགས་པ་ལ་འཇུག་པའི་ཁྱད་པར་བསྟན་ཟིན་ཏོ། ། གསུམ་པ་ལྷག་མཐོང་སྒོམ་པའི་ཚུལ་ལ་ལྔ་སྟེ། ཐོག་མར་བསྒྲིམས་ཏེ་འཇུག་པ་དང་། བར་ཆད་ཅིང་འཇུག་པ་དང་། བར་མ་ཆད་པར་འཇུག་པ་དང་། ལྷུན་གྱིས་གྲུབ་པར་འཇུག་པ་དང་། རྩོལ་མེད་དུ་འཇོག་པའི་དགོས་པའོ། །དང་པོ་ལ་ཡང་གཉིས་ཏེ། དང་པོར་སེམས་གཏོད་པ་དང་། དམིགས་པ་མི་འཆོར་བ་འཛིན་པའོ། །དང་པོ་ནི། དེ་ལྟར་གང་ཟག་ལ་བདག་མེད་པ་དང་ཆོས་ལ་བདག་མེད་པའི་དེ་ཁོ་ན་ཉིད་ཐོས་བསམ་གྱིས་རྟོགས་པ་ལ་ཞུགས་པ་དེ་གང་ཟག་གི་བདག་མེད་དང་ཆོས་ཀྱི་བདག་མེད་ལས་མ་གཏོགས་པ་ཡོངས་སུ་བརྟག་པར་བྱ་བ་དང་།

1-994

བལྟ་བར་བྱ་བ་གཞན་མེད་དེ། སྤྱོད་འཇུག་ལས། གང་ཚེ་དངོས་དང་དངོས་མེད་པ། །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས་པ་ལྟར་རོ། །གལ་ཏེ་སྟོང་པ་ཉིད་ཀྱང་བདེན་པས་སྟོང་པ་གང་གི་ནང་དུ་འདུ་ཞེ་ན། ཆོས་ཀྱི་བདག་མེད་པའི་ནང་དུ་འདུས་སོ། །ཐམས་ཅད་སྟོང་པ་ཉིད་དུ་རོ་གཅིག་པར་རྟོགས་པས་ཆོས་ཅན་གཟུགས་སོགས་ལ་རྟོག་པ་དང་དཔྱོད་པ་དང་བྲལ་བ་དང་། རྟོག་དཔྱོད་ཀྱིས་ཀུན་ནས་བསླངས་པའི་བརྗོད་པ་མེད་པར་རྟོགས་པའི་བློའི་ངོ་བོ་གཅིག་ཏུ་གྱུར་པའི་ཡིད་ལ་བྱེད་པ་འབད་པ་མེད་པ་རང་གི་ངང་གིས་འཇུག་པ་འབད་པའི་རྩོལ་བ་མངོན་པར་འདུ་བྱེད་པ་མེད་པས་དེ་ཁོ་ན་ཉིད་ཀྱི་དོན་ལ་རྣམ་པ་ཤིན་ཏུ་གསལ་བར་སྒོམ་ཞིང་འདུག་པར་བྱའོ། །དམིགས་པ་མི་འཆོར་བར་འཛིན་པ་ནི། རྣམ་པ་ཤིན་ཏུ་གསལ་བ་སྒོམ་པ་དེར་གནས་ནས་སེམས་ཀྱི་རྒྱུན་གང་ཡོངས་སུ་བཟུང་བ་དེ་ལས་གཞན་དུ་རྣམ་པར་མི་གཡེང་བར་བྱའོ། །གཉིས་པ་བར་ཆད་ཅིང་འཇུག་པ་ལ་དྲུག་སྟེ། དམིགས་པ་ཤོར་ན་སླར་ཡང་གཏོད་པ་དང་། གནས་པ་བརྟན་པར་བྱེད་པ་དང་། བརྟན་པ་མཐུ་བསྐྱེད་པ་དང་། གཡེང་བ་བཟློག་པ་དང་། བྱིང་བ་བཟློག་པ་དང་། རྒོད་པ་སེལ་བའི་ཐབས་སོ། །

1-995

དང་པོ་ནི། རྣལ་འབྱོར་པ་གང་གི་ཚེ་ལྷག་མཐོང་གི་ཏིང་ངེ་འཛིན་སྒོམ་པའི་བར་སྐབས་སུ་རྐྱེན་འགའ་ཞིག་ལས་འདོད་ཆགས་ལ་སོགས་པ་སྐྱེས་པས་སེམས་ཕྱི་རོལ་དུ་རྣམ་པར་གཡེང་བ་དེའི་ཚེ་དྲན་ཤེས་བཞིན་གྱིས་རྣམ་པར་གཡེངས་པ་ཚོར་བར་བྱས་ལ། དེ་ཞི་བའི་ཐབས་སུ་མྱུར་དུ་མི་སྡུག་པ་ལ་སོགས་པ་བསྒོམས་པས་འདོད་ཆགས་ཀྱི་སེམས་ཀྱི་རྣམ་པར་གཡེང་བ་ཞི་བར་བྱའོ། །གཉིས་པ་ནི། མྱུར་དུ་སྔར་གྱི་དམིགས་པ་དེ་ཉིད་ལ་སེམས་ཕྱིར་ཞིང་འཇུག་པར་བྱའོ། །གསུམ་པ་ནི། གང་གི་ཚེ་དམིགས་པ་དེ་ལ་ཡུན་རིང་དུ་བཞག་པས་སེམས་སྐྱོ་བས་ཡུལ་ལ་མངོན་པར་མི་དགའ་བར་མཐོང་བ་དེའི་ཚེ་ཏིང་ངེ་འཛིན་གྱི་ཡོན་ཏན་སྤྱན་དང་མངོན་པར་ཤེས་པ་ལ་སོགས་པ་ཐོབ་པ་མཐོང་བ་སྟེ་ཤེས་པར་བྱས་ནས་ཏིང་ངེ་འཛིན་དེ་སྒོམ་པ་ལ་མངོན་པར་དགའ་བ་སྒོམ་པར་བྱའོ། །བཞི་པ་ནི། ཏིང་ངེ་འཛིན་གྱི་དམིགས་པ་ཤོར་ནས་སེམས་གཞན་དུ་རྣམ་པར་གཡེང་བ་ལ་ཏིང་ངེ་འཛིན་གྱི་ཉེས་པར་མཐོང་བར་བྱས་ནས་ཀྱང་ཏིང་ངེ་འཛིན་སྒོམ་པ་ལ་མི་དགའ་བར་རབ་ཏུ་ཞི་བར་བྱའོ། །ལྔ་པ་ནི། ཅི་སྟེ་རྣལ་འབྱོར་པ་རྨུགས་པ་དང་། གཉིད་ཀྱིས་ནོན་ཏེ་སེམས་ཀྱི་རྒྱུ་བ་ཤིན་ཏུ་མི་གསལ་བས་ཏིང་ངེ་འཛིན་གྱི་དམིགས་པ་འཛིན་མི་ནུས་པར་སེམས་བྱིང་བའམ་བྱིང་དུ་དོགས་པར་དྲན་པ་དང་ཤེས་བཞིན་གྱི་བྱ་ར་བས་མཐོང་བ་དེའི་ཚེ་གོང་མ་ཞི་གནས་ཀྱི་སྐབས་སུ་གཟུགས་སྐུ་ལ་དམིགས་པར་བསྟན་པ་བཞིན་དུ་མཆོག་ཏུ་དགའ་བའི་དངོས་པོ་དེ་བཞིན་གཤེགས་པའི་སྐུ་གཟུགས་ལ་སོགས་པ་ཡིད་ལ་བྱེད་པས་མྱུར་དུ་བྱིང་བ་ཞི་བར་བྱས་ལ་སྔར་གྱི་དམིགས་པ་དེ་ཁོ་ན་ཉིད་ཀྱི་དོན་ཤིན་ཏུ་དམ་པོར་བཟུང་བར་བྱའོ། །

1-996

དྲུག་པ་རྒོད་པ་སེལ་བ་ནི། ཅི་སྟེ་ལྷག་མཐོང་གི་ཏིང་ངེ་འཛིན་སྒོམ་པ་གང་གི་ཚེ་རྣམ་རྟོག་གི་རྐུན་མ་སེམས་ལ་ཞུགས་ནས་སྔོན་མི་རྒོད་པ་དང་། རྩེས་པ་བློས་རྗེས་སུ་དྲན་པས་ཏིང་ངེ་འཛིན་སྒོམ་པའི་བར་སྐབས་སུ་སེམས་འཆོར་བའམ་རྒོད་དུ་དོགས་པར་ཤེས་བཞིན་གྱི་བྱ་ར་བས་མཐོང་བ་དེའི་ཚེ་གོང་མ་ཞི་གནས་ཀྱི་སྐབས་སུ་བསྟན་པ་བཞིན་དུ་མི་རྟག་པ་དང་འཁོར་བའི་སྡུག་བསྔལ་ལ་སོགས་པ་ཡིད་འབྱུང་བར་འགྱུར་བའི་དངོས་པོ་ཡིད་ལ་བྱས་ལ། བརྩོན་འགྲུས་ཀྱིས་བློ་བསྒྲིམས་ཏེ་གཡེང་བ་ཞི་བར་བྱའོ། །གསུམ་པ་བར་མ་ཆད་པར་འཇུག་པ་ནི། གཡེང་བ་ཞི་བའི་རྗེས་ཐོག་དེ་ནས་སླར་ཡང་ཆོས་རྣམས་ཀྱི་དེ་ཁོ་ན་ཉིད་སྟོང་པ་ཉིད་ལ་སེམས་རྩོལ་བ་ཆེན་པོ་མངོན་པར་འདུ་བྱ་བ་མེད་པར་རང་གི་ངང་གིས་འཇུག་པར་གྲུབ་པ་ལ་འབད་པར་བྱའོ། །བཞི་པ་ལྷུན་གྱིས་གྲུབ་པར་འཇུག་པ་ནི། ཅི་སྟེ་རྣལ་འབྱོར་སྒོམ་པ་གང་གི་ཚེ་ཤེས་བཞིན་གྱིས་བྱིང་རྒོད་ཡང་དང་ཡང་དུ་བསལ་བ་ན་བྱིང་རྒོད་དང་བྲལ་བར་གྱུར་ནས་ལྷག་མཐོང་གི་ཤེས་རབ་བྱིང་རྒོད་ཀྱི་ཕྱོགས་སུ་མ་ལྷུང་བར་མཉམ་པར་ཞུགས་ཏེ་ཆོས་རྣམས་ཀྱི་དེ་ཁོ་ན་ཉིད་ལ་མཉམ་པར་འཇོག་པའི་སེམས་རང་གི་ངང་གིས་འཇུག་པ་དེའི་ཚེ་བྱིང་རྒོད་སེལ་བའི་རྩོལ་བ་གློད་དེ་བཏང་སྙོམས་སུ་བྱའོ། །

1-997

ལྔ་པ་རྩོལ་མེད་དུ་འཇོག་པའི་དགོས་པ་ནི། གལ་ཏེ་སེམས་བྱིང་རྒོད་ཀྱི་ཕྱོགས་སུ་མ་ལྷུང་བར་དམིགས་པ་ལ་སེམས་མཉམ་པར་ཞུགས་པ་ལ་བྱིང་རྒོད་སེལ་བའི་རྩོལ་བ་བྱས་ན་དེའི་ཚེ་དེས་རི་དྭགས་དཀྲོག་པ་ལྟར་དེས་སེམས་དཀྲོགས་ནས་རྣམ་པར་གཡེང་བར་འགྱུར་རོ། །འོ་ན་རྩོལ་བ་ཏིང་ངེ་འཛིན་གྱི་སྐྱོན་ཁོ་ན་ཡིན་ནམ་ཞེ་ན། གལ་ཏེ་ཏིང་ངེ་འཛིན་སྒོམ་པས་སེམས་བྱིང་བར་གྱུར་པ་ལ་ནི་དྲན་པ་དང་ཤེས་བཞིན་གྱིས་བྱིང་རྒོད་སེལ་བའི་རྩོལ་བ་མ་བྱས་ན་དེའི་ཚེ་སེམས་ཤིན་ཏུ་བྱིང་བས་ལྷག་མཐོང་གི་དམིགས་རྣམ་གསལ་བ་མེད། སེམས་ཅིར་ཡང་མི་མཐོང་བ་དང་དམུས་ལོང་བཞིན་དུ་འགྱུར་རོ། །སེམས་བྱིང་ན་སྐྱོན་དུ་འགྱུར་བ་དེ་ལྟ་བས་ན་སེམས་བྱིང་བར་གྱུར་ན་སེལ་བའི་གཉེན་པོ་བཙལ་བར་བྱའོ། །འོ་ན་གོང་དུ་བྱིང་རྒོད་སེལ་བའི་གཉེན་པོ་ལ་རྩོལ་བ་བྱས་ནས་སེམས་གཡེང་བར་འགྱུར་བས་སྐྱོན་དུ་བཤད་པ་མ་ཡིན་ནམ་ཞེ་ན། བྱིང་རྒོད་ཀྱི་ཕྱོགས་སུ་མ་ལྷུང་བར་སེམས་ཆ་མཉམ་པར་གྱུར་ན་གཉེན་པོ་བཙལ་བར་མི་བྱའོ་ཞེས་པའི་དོན་ནོ། །ལྷག་མཐོང་སྒྲུབ་པའི་ཚུལ་བསྟན་ཟིན་ཏོ། །

༈ ཟུང་དང་འབྲེལ་བའི་ལམ་སྒྲུབ་ཚུལ་དང་། དོན་བསྡུ་བ། ༆ བཞི་པ་ཟུང་དུ་འབྲེལ་བའི་ལམ་སྒོམ་པ་ལ་བཞི་སྟེ། མི་མཉམ་པའི་ཉེས་པ་དང་། མཉམ་པར་སྒོམ་པ་དང་། ངལ་བ་སེལ་བའི་ཐབས་དང་།

1-998

སྐབས་བསྡུ་བའོ། །དང་པོ་ནི། རྣལ་འབྱོར་པ་གང་གི་ཚེ་ལྷག་མཐོང་བསྒོམས་པས་ཤེས་རབ་ཤིན་ཏུ་ཤས་ཆེ་བར་རྟོག་དཔྱོད་ཀྱི་དབང་དུ་གྱུར་པ་དེའི་ཚེ་ཞི་གནས་ཤས་ཆུང་བར་གྱུར་པས་རླུང་གཡོ་བའི་དབུས་ལ་མར་མེ་བཞག་པ་བཞིན་དུ་སེམས་ཤིན་ཏུ་གཡོ་བར་འགྱུར་ཏེ། རིག་པ་དབྱིངས་ཀྱི་ཐོག་ཏུ་མི་འཆགས་སོ། །མི་འཆགས་པ་དེའི་ཕྱིར་བློས་དེ་ཁོ་ན་ཉིད་ཀྱི་རྣམ་པ་ཤིན་ཏུ་གསལ་བར་མཐོང་བར་མི་འགྱུར་རོ། །ཞི་གནས་ཤས་ཆུང་ན་སྐྱོན་ཡོད་པ་དེ་བས་ན་དེའི་ཚེ་ཞི་གནས་བསྒོམ་པར་བྱའོ། །གལ་ཏེ་ཞི་གནས་ཤས་ཤིན་ཏུ་ཆེ་བར་གྱུར་ན་ཡང་ལྷག་མཐོང་གིས་ཆོས་ཅན་གྱི་ཁྱད་པར་ཤིན་ཏུ་ཕྲ་བ་ལ་ཡང་རྣམ་པར་དཔྱོད་དེ། ཤེས་རབ་ཀྱི་རྒྱུ་བ་མི་གསལ་བས་ལྷག་མཐོང་གི་ཤེས་རབ་བསྒོམ་པར་བྱའོ། །གཉིས་པ་མཉམ་པར་སྒོམ་པ་བསྟན་པ་ནི། ཏིང་ངེ་འཛིན་སྒོམ་པ་གང་གི་ཚེ་ཞི་གནས་ཀྱིས་དམིགས་པ་ལ་སེམས་གཏད་ཅིང་ཤེས་རབ་ཀྱིས་དམིགས་པ་དེ་ཉིད་རང་བཞིན་མེད་པའམ་སྟོང་པ་ཉིད་དུ་རྟོགས་ནས་ཞི་གནས་དང་ལྷག་མཐོང་གཉིས་ཀ་མཉམ་དུ་འཇུག་པ་དེའི་ཚེ་ལུས་དང་སེམས་ལ་ཏིང་ངེ་འཛིན་གྱི་འགལ་རྐྱེན་གྱིས་གནོད་པར་མ་གྱུར་གྱི་བར་དུ་འབད་རྩོལ་མངོན་པར་འདུ་བྱ་བ་མེད་པར་རང་གི་ངང་གིས་ལྷུན་གྱིས་གྲུབ་པའི་ཚུལ་དུ་གནས་པར་བྱའོ། །

1-999

གསུམ་པ་ངལ་བ་སེལ་བའི་ཐབས་ནི། ཏིང་ངེ་འཛིན་ཡུན་རིང་དུ་བསྒོམས་པས་ལུས་དང་སེམས་ལ་སོགས་པ་ལ་ནུས་པ་ཟད་ནས་ཤིན་ཏུ་སྐྱོ་བས་གནོད་པར་གྱུར་ན། ཏིང་ངེ་འཛིན་དེའི་བར་སྐབས་སུ་ངལ་བསོ་ཞིང་རྗེས་ཐོབ་ཀྱི་སེམས་ཀྱིས་སྣོད་བཅུད་ཀྱི་འཇིག་རྟེན་མཐའ་དག་སྒྱུ་མ་ལྟ་བུ་དང་། སྨིག་རྒྱུ་ལྟ་བུ་དང་། རྨི་ལམ་དང་། ཆུ་ཟླ་དང་། མིག་ཡོར་ལྟ་བུར་སྣང་ལ་རང་བཞིན་མེད་པར་ལྟ་ཞིང་། ཡང་འདི་སྙམ་དུ་བསམ་པར་བྱ་སྟེ། ཁམས་གསུམ་ན་གནས་པའི་སེམས་ཅན་འདི་དག་ནི་ཆོས་ཟབ་མོ་སྟོང་པ་ཉིད་ཀྱི་དོན་འདི་ལྟ་བུ་ཁོང་དུ་མ་ཆུད་པས་བདེན་འཛིན་གྱི་འཆིང་བ་ལས་མ་གྲོལ་ཞིང་། བདེན་འཛིན་ལ་བརྟེན་ནས་ཀུན་ནས་ཉོན་མོངས་པ་བྱུང་སྟེ། འཁོར་བ་ན་ཀུན་ནས་ཉོན་མོངས་པར་གྱུར་པ་ཉིད་ཀྱིས་ན་རྣལ་འབྱོར་པ་བདག་གིས་ཅི་ནས་ཀྱང་སེམས་ཅན་དེ་དག་ཆོས་ཉིད་ཟབ་མོ་དེ་ཁོང་དུ་ཆུད་པར་འགྱུར་བའི་ཐབས་སུ་ཆོས་བསྟན་པ་དེ་ལྟར་བྱའོ་སྙམ་དུ་བསམ་ཞིང་སྙིང་རྗེ་ཆེན་པོ་དང་ཀུན་རྫོབ་བྱང་ཆུབ་ཀྱི་སེམས་མངོན་དུ་བྱའོ། །སྙིང་རྗེ་དང་བྱང་ཆུབ་ཀྱི་སེམས་མངོན་དུ་བྱས་པའི་རྗེས་དེ་ནས་ངལ་བསོས་ལ། ཡང་སྔར་སྟོང་ཉིད་རྟོགས་པའི་ལྷག་མཐོང་ལ་མཉམ་པར་གཞག་པ་དེ་བཞིན་དུ་འཁོར་འདས་ཀྱི་ཆོས་ཐམས་ཅད་རང་བཞིན་མེད་པའི་དོན་རྟོགས་པར་བྱས་ནས་ལྷག་མཐོང་གི་ངོ་ན་སྣང་བ་ཙམ་ཡང་མེད་པའི་ཏིང་ངེ་འཛིན་ལ་མཉམ་པར་གཞག་པར་བྱའོ། །

1-1000

ཡང་ཏིང་ངེ་འཛིན་ཡུན་རིང་དུ་བསྒོམས་པས་སེམས་ཡོངས་སུ་སྐྱོ་བར་གྱུར་ན་སྔར་བཤད་པ་དེ་བཞིན་དུ་རྗེས་ཐོབ་དུ་སྒྱུ་མ་ལྟ་བུར་ལྟ་བ་དང་། སྙིང་རྗེ་དང་བྱང་ཆུབ་ཀྱི་སེམས་མངོན་དུ་བྱས་ནས་ངལ་བསོ་བར་བྱའོ། །བཞི་པ་སྐབས་ཀྱི་དོན་བསྡུ་བ་ནི། ཞི་གནས་ཀྱིས་དམིགས་པ་ལ་སེམས་གཏད་ཅིང་། ལྷག་མཐོང་གིས་དེ་ཉིད་རྣམ་པར་དཔྱོད་པ་ཡ་མ་བྲལ་བར་འཇུག་པ་ནི་ཞི་གནས་དང་ལྷག་མཐོང་ཟུང་དུ་འབྲེལ་བར་འཇུག་པའི་ལམ་སྟེ། ལྷག་མཐོང་གི་སྒོ་ནས་ཡུལ་ལ་རྣམ་པར་རྟོག་པ་དང་བཅས་པ་དང་། ཞི་གནས་ཀྱི་སྒོ་ནས་རྣམ་པར་མི་རྟོག་པའི་གཟུགས་བརྙན་ལ་དམིགས་པའོ། །ཟུང་དུ་འབྲེལ་བའི་ལམ་སྒོམ་པ་བསྟན་ཟིན་ཏོ། ། གསུམ་པ་དོན་བསྡུ་བ་ནི། གོང་དུ་བསྟན་པ་དེ་ལྟར་རྣལ་འབྱོར་པས་ཞི་གནས་དང་ལྷག་མཐོང་སྤེལ་མ་དང་། དེ་ནས་ཟུང་འཇུག་དུ་སྒོམ་པའི་རིམ་པ་འདིས་ཆུ་ཚོད་གཅིག་གམ། མེལ་ཚེ་ཡུན་ཕྱེད་དམ། མེལ་ཚེ་ཐུན་གཅིག་གི་ཡུན་གྱི་ཚད་དག་གམ་ཇི་སྲིད་སྐྱོ་བ་དང་དུབ་པར་མ་གྱུར་པ་ཇི་ཙམ་འདོད་ཀྱི་བར་དུ་སྒོམ་ཞིང་དེ་ལ་འདུག་པར་བྱའོ། །ཞི་གནས་དང་ལྷག་མཐོང་ཟུང་འཇུག་ཏུ་སྒོམ་པ་འདི་ནི་ཞི་གནས་ཀྱིས་དམིགས་པ་མི་འཆོར་བར་འཛིན་ཅིང་ལྷག་མཐོང་གིས་དེའི་གནས་ཚུལ་དོན་དམ་རབ་ཏུ་རྣམ་པར་འབྱེད་པས་དོན་དམ་རབ་ཏུ་རྣམ་པར་འབྱེད་པའི་བསམ་གཏན་ཏེ།

1-1001

ལང་ཀར་གཤེགས་པའི་མདོ་ལས། གཟུང་མེད་རྟོགས་པའི་རྣལ་འབྱོར་གྱི་སའི་རིམ་པ་གསུམ་བཤད་པས་བསྟན་ཏོ། །སྒོམ་པ་ལ་འཇུག་པའི་དངོས་གཞི་བསྟན་ཟིན་ཏོ། །

༈ སྒོམ་པའི་རྗེས་ཀྱི་བྱ་བ། ༆ གསུམ་པ་སྒོམ་པའི་རྗེས་ཀྱི་བྱ་བ་ལ་བཞི་སྟེ། ཆོས་ཐམས་ཅད་སྒྱུ་མ་ཙམ་དུ་ལྟ་བ། དེ་ཁོ་ན་ཉིད་མ་རྟོགས་པ་ལ་དམིགས་པའི་སྙིང་རྗེ། ཚོགས་རྗེས་སུ་སྒྲུབ་པའི་བྱ་བ། ཚོགས་ཀྱི་བྱེད་པ་བསྟན་པའོ། །དང་པོ་ནི། མཉམ་གཞག་ཏུ་ཟུང་འཇུག་སྒོམ་པའི་རྗེས་དེ་ནས་ཏིང་ངེ་འཛིན་གྱི་ཐུན་མཚམས་བྱེད་པར་འདོད་ན་ཏིང་ངེ་འཛིན་དེ་ལས་ལངས་ཏེ། སྐྱིལ་ཀྲུང་མ་བཤིག་པར་དེ་མ་ཐག་ཏུ་འདི་སྙམ་དུ་འཁོར་འདས་ཀྱི་ཆོས་འདི་དག་ཐམས་ཅད་དོན་དམ་པར་ཏེ་དོན་དམ་དཔྱོད་བྱེད་ཀྱི་རིགས་པས་རྣམ་པར་དཔྱད་ན་ངོ་བོ་ཉིད་མེད་པ་ཡིན་དུ་ཟིན་ཀྱང་། ཀུན་རྫོབ་སྣང་ཚོད་ཙམ་དུ་རྗེས་ཤེས་ཀྱི་ངོར་རྣམ་པར་གནས་པ་ཉིད་དོ། །ཀུན་རྫོབ་སྣང་ཚོད་ཙམ་དུ་ཡང་ཡོད་པ་དེ་ལྟ་མ་ཡིན་ན་ལས་བསགས་པ་དང་མཐུན་པར་ལས་ཀྱི་རྣམ་པར་སྨིན་པ་ཉམས་སུ་མྱོང་བའི་ལས་དང་འབྲས་བུའི་འབྲེལ་བ་ལ་སོགས་པ་ཐམས་ཅད་ཇི་ལྟར་རྣམ་པར་གནས་པར་འགྱུར་ཏེ། ལས་འབྲས་ཀྱི་འབྲེལ་པ་མེད་པ་ཉིད་དུ་འགྱུར་རོ། །དོན་དམ་པར་མེད་ཀྱང་ཀུན་རྫོབ་ཏུ་ཡོད་པའི་ཚུལ་བཅོམ་ལྡན་འདས་ཀྱིས་ཀྱང་བཀའ་སྩལ་ཏོ། །

1-1002

ཇི་སྐད་དུ། དངོས་པོ་སྐྱེ་བ་ཀུན་རྫོབ་ཏུ། །དམ་པའི་དོན་དུ་རང་བཞིན་མེད། །ཅེས་གསུངས་སོ། །ཀུན་རྫོབ་ཏུ་ཞེས་པ་ནི་འཁྲུལ་ངོར་རོ། །དམ་པའི་དོན་དུ་ཞེས་པ་ནི་རིགས་པས་དཔྱད་ནའོ་ཞེས་པའོ། །གཉིས་པ་དེ་ཁོ་ན་ཉིད་མ་རྟོགས་པ་ལ་དམིགས་པའི་སྙིང་རྗེ་ནི། ཁམས་གསུམ་གྱི་སེམས་ཅན་ཡང་དག་པའི་དོན་མ་རྟོགས་པས་བྱིས་པའི་བློ་ཅན་འདི་དག་ནི་གནས་ཚུལ་ལ་ངོ་བོ་ཉིད་མེད་པའི་ཕྱི་ནང་གི་དངོས་པོ་རྣམས་ལ་གནས་ཚུལ་ལ་ཡོད་པ་ལ་སོགས་པར་སྒྲོ་འདོགས་པས་སྐྱེས་བུ་ལམ་ལོག་པ་དགྲ་ཡུལ་དུ་སོང་བ་ལྟར་བློ་ཕྱིན་ཅི་ལོག་ཏུ་གྱུར་ཏེ། ཉོན་མོངས་པ་རབ་ཏུ་རྒྱས་ཏེ་ལས་བསགས་པའི་མཐུས་དུས་ཡུན་རིང་པོར་འཁོར་བའི་འཁོར་ལོ་གཅིག་ནས་གཅིག་ཏུ་བརྒྱུད་པའི་ཚུལ་གྱིས་སྲིད་པ་ན་ཡོངས་སུ་འཁྱམས་པས་སྡུག་བསྔལ་གྱི་རྒྱ་མཚོ་ལས་འདོན་པའི་དོན་དུ་བདག་གིས་ཅི་ནས་ཀྱང་བསོད་ནམས་དང་ཡེ་ཤེས་ཀྱི་ཚོགས་ཉན་ཐོས་དང་རང་སངས་རྒྱས་ཀྱི་དགེ་བ་ལས་ཡོངས་སུ་ལྷག་པས་བླ་ན་མེད་པ་ཡོངས་སུ་རྫོགས་པར་བྱ་སྟེ། རྫོགས་པའི་རྗེས་དེ་ནས་ཐམས་ཅད་མཁྱེན་པའི་གོ་འཕང་ཐོག་མར་རང་གིས་ཐོབ་པར་བྱས་ལ་ཆོས་ཀྱི་འཁོར་ལོ་བསྐོར་ནས་གདུལ་བྱ་དཔག་ཏུ་མེད་པ་དེ་དག་གིས་ཆོས་ཉིད་ཁོང་དུ་ཆུད་པར་བྱའོ་སྙམ་དུ་བསམས་ལ་ལྷག་པའི་བསམ་པས་ཉེ་བར་གནས་པར་བྱའོ། །

1-1003

གསུམ་པ་དགེ་བའི་ཚོགས་རྗེས་སུ་སྒྲུབ་པ་ལ་གསུམ་སྟེ། རྟེན་ལ་དམིགས་པའི་ཚོགས་ལ་འབད་པ། དགེ་བ་གཞན་ཇི་སྙེད་པའི་ཚོགས་ལ་འབད་པའོ། །དང་པོ་ནི། སྙིང་རྗེ་དང་ཀུན་རྫོབ་བྱང་ཆུབ་ཀྱི་སེམས་བསྐྱེད་པའི་རྗེས་དེ་ནས་དལ་བུས་སྐྱིལ་མོ་ཀྲུང་བཤིག་སྟེ་ཕྱོགས་བཅུ་ན་བཞུགས་པའི་སངས་རྒྱས་ཇི་སྙེད་པ་དང་བྱང་ཆུབ་སེམས་དཔའ་ཐམས་ཅད་ལ་གུས་པའི་ཡིད་ཀྱིས་ཀུན་ནས་བསྐུལ་བའི་ཕྱག་བྱས་ལ། སངས་རྒྱས་དང་བྱང་ཆུབ་སེམས་དཔའ་དེ་དག་ལ་ལུས་ངག་ཡིད་གསུམ་གྱི་མཆོད་པ་དང་། ངག་གིས་ཡོན་ཏན་ཕུན་སུམ་ཚོགས་པ་བརྗོད་པའི་བསྟོད་པ་བྱས་ནས་དགེ་བ་ཆུད་མི་ཟ་བའི་ཡན་ལག་འཕགས་པ་བཟང་པོ་སྤྱོད་པའི་སྨོན་ལམ་དང་། བྱམས་པའི་སྨོན་ལམ་ལ་སོགས་པ་སྨོན་ལམ་རྒྱ་ཆེན་པོ་གདབ་བོ། །གཉིས་པ་ནི། རྟེན་ལ་དམིགས་པའི་ཚོགས་བསགས་པའི་རྗེས་དེ་ནས་མཉམ་གཞག་ཏུ་སྟོང་པ་ཉིད་དང་རྗེས་ཐོབ་ཏུ་སྙིང་རྗེ་ཆེན་པོ་སྒོམ་པའི་སྙིང་པོ་ཅན་ཏེ་དེ་གཙོ་བོར་ལྷུར་ལེན་པར་བྱས་ནས་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དང་པོ་བཞི་བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་བསམ་གཏན་དང་ཤེས་རབ་ལ་སོགས་པ་དགེ་བའི་ཡན་ལག་མཐའ་དག་སྒྲུབ་པ་ལ་མངོན་པར་བརྩོན་པར་བྱའོ། །བཞི་པ་ཚོགས་ཀྱི་བྱེད་པ་བསྟན་པ་ནི།

1-1004

མཉམ་གཞག་ཏུ་ཡེ་ཤེས་ཀྱི་ཚོགས་བསགས་རྗེས་ཐོབ་ཏུ་བསོད་ནམས་ཀྱི་ཚོགས་བསགས་པ་དེ་ལྟར་གྱུར་ན་ཞི་གནས་དང་ལྷག་མཐོང་གི་བསམ་གཏན་དེ་སྦྱིན་སོགས་ཐབས་ཀྱི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་ཉིད་རྟོགས་པའི་ཡེ་ཤེས་མངོན་པར་སྒྲུབ་པ་ཡིན་ཏེ། འཕགས་པ་གཙུག་ན་རིན་པོ་ཆེའི་མདོ་ལས། ཇི་སྐད་དུ་རྒྱ་ཆེར་བཀའ་སྩལ་པ་ལྟ་བུའོ་ཞེས་ལུང་གི་ཁུངས་དགོད་དོ། །ལུང་གི་དོན་བཤད་པ་ནི། བྱང་ཆུབ་སེམས་དཔའ་དེ་བྱམས་པའི་གོ་ཆ་བགོས་ཤིང་སྙིང་རྗེ་ཆེན་པོའི་གནས་སེམས་ཅན་ལ་དམིགས་ཏེ་བརྩེ་བའི་རྣམ་པས་གནས་ནས་སྦྱིན་པ་ནས་མ་འདྲེས་པ་བཅོ་བརྒྱད་ཀྱི་བར་གྱི་ཐབས་ཀྱི་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་རྟོགས་པའི་ཡེ་ཤེས་མངོན་པར་བསྒྲུབས་པས་བསམ་གཏན་དུ་བྱེད་དོ། །རྣམ་པ་ཐམས་ཅད་ཀྱི་མཆོག་དང་ལྡན་པ་ཞེས་གསུངས་པ་དེ་ལ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་རྟོགས་པ་གང་ཞེ་ན། རྗེས་ཐོབ་ཀྱི་སྤྱོད་པ་གང་སྦྱིན་པ་དང་མ་བྲལ་བ་དང་། ཚུལ་ཁྲིམས་དང་མ་བྲལ་བ་དང་། བཟོད་པ་དང་མ་བྲལ་བ་དང་། མཉམ་རྗེས་གཉིས་ཀའི་གནས་སྐབས་སུ་བརྩོན་འགྲུས་དང་མ་བྲལ་བ་དང་། མཉམ་གཞག་ཏུ་བསམ་གཏན་དང་མ་བྲལ་བ་དང་། ཤེས་རབ་དང་མ་བྲལ་བ་དང་།

1-1005

སྦྱོར་བ་དང་འཇུག་པའི་དུས་སུ་ཐབས་དང་མ་བྲལ་བར་ཞེས་བྱ་བ་ལ་སོགས་པའོ། །བྱང་ཆུབ་ཀྱི་སེམས་སྒོམ་པའི་ཚུལ་བསྟན་ཟིན་ཏོ། །

༄། །ཐབས་སྒོམ་པའི་རིམ་པ། ༆ གསུམ་པ་ཐབས་སྒོམ་པ་ལ་བཞི་སྟེ། ཐབས་ལ་བརྟེན་པའི་དགོས་པ་དང་། དེ་ཤེས་རབ་ལ་ལྟོས་པར་བསྟན་པ་དང་། ཟུང་འཇུག་འགྲུབ་པའི་དོན་དང་། བྱང་ཆུབ་ཀྱི་སེམས་ཀྱི་སྟོབས་བསྐྱེད་པའོ། །དང་པོ་ལ་གཉིས་ཏེ། ཕུན་སུམ་ཚོགས་པ་ཐམས་ཅད་སྒྲུབ་པ་དང་། སངས་རྒྱས་ཀྱི་མཛད་པ་སྒྲུབ་པའོ། །དང་པོ་ལ་བཞི་སྟེ། སྤྱིར་བརྗོད་པ་དང་། དེ་ལུང་རིགས་ཀྱིས་སྒྲུབ་པ་དང་། ཐབས་ལ་འབད་པར་བྱ་བ་དང་། ཤེས་བྱེད་ཀྱི་ལུང་དགོད་པའོ། །དང་པོ་ནི། བྱང་ཆུབ་སེམས་དཔས་གཞན་དོན་དུ་གཟུགས་སྐུ་ཐོབ་པའི་རྒྱུ་ལ་འབད་དགོས་པས་སེམས་ཅན་ཡོངས་སུ་སྨིན་པར་བྱེད་པ་དང་། སྣོད་བཅུད་ཀྱི་ཞིང་སྦྱོང་བ་དང་། ལུས་མཚན་དང་དཔེ་བྱད་དང་ལྡན་པ་དང་། འདུན་པ་དང་ལྔ་སྟེ་བཟང་པོ་ལྟ་བུ་གཡོག་འཁོར་མང་པོ་ལ་སོགས་པ་གཟུགས་སྐུའི་ཡོན་ཏན་ཕུན་སུམ་ཚོགས་པར་འགྱུར་བའི་ཐབས་སྦྱིན་པ་དང་ཚུལ་ཁྲིམས་ལ་སོགས་པའི་དགེ་བ་ལ་ངེས་པར་བསྟེན་དགོས་སོ། །གཉིས་པ་ནི། སྦྱིན་པ་ལ་སོགས་པའི་ཐབས་སྣོད་བཅུད་ཀྱི་ཞིང་སྦྱོང་བ་དང་། ལུས་ཕུན་སུམ་ཚོགས་པ་ཐོབ་པའི་རྒྱུ་དེ་ལྟ་མ་ཡིན་ན་སངས་རྒྱས་ཀྱི་ཞིང་ལ་སོགས་པ་ཕུན་སུམ་ཚོགས་པ་གང་སྩལ་པ་དེ་རྒྱུ་གང་གི་འབྲས་བུ་ཡིན་པར་འགྱུར།

1-1006

སངས་རྒྱས་ཀྱི་ཞིང་ཕུན་སུམ་ཚོགས་པ་སོགས་སྦྱིན་སོགས་ཀྱི་འབྲས་བུ་ཡིན་པ་དེ་ལྟ་བས་ན། སྦྱིན་སོགས་ཐབས་ཀྱི་རྣམ་པ་ཀུན་གྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་དེ་ནི་སྦྱིན་པ་ལ་སོགས་པ་ཐབས་ཀྱིས་ཡོངས་སུ་རྫོགས་པར་འགྱུར་བ་ལ་དགོངས་ནས། མངོན་པར་བྱང་ཆུབ་པའི་རྒྱུད་ལས། བཅོམ་ལྡན་འདས་ཀྱི་ཐམས་ཅད་མཁྱེན་པའི་ཡེ་ཤེས་དེ་ནི་ཐབས་ཀྱི་མཐར་ཕྱིན་པ་ཡིན་ནོ་ཞེས་བཀའ་སྩལ་ཏོ། །རྣམ་འགྲེལ་ལས། རྣམ་པ་དུ་མར་ཐབས་མང་པོ། །ཡུན་རིང་དུ་ནི་གོམས་པ་ལས། །དེ་ལས་སྐྱོན་དང་ཡོན་ཏན་དག །རབ་ཏུ་གསལ་བ་ཉིད་དུ་འགྱུར། །ཅེས་སོ། །གསུམ་པ་ཐབས་ལ་འབད་པར་བྱ་བ་ནི། སངས་རྒྱས་ཀྱི་ཕུན་སུམ་ཚོགས་པའི་ཡོན་ཏན་ཐབས་ཀྱི་ཆ་ལས་འབྱུང་དགོས་པ་དེའི་ཕྱིར། བྱང་ཆུབ་སེམས་དཔས་ཤེས་རབ་ཏུ་མ་ཟད་སྦྱིན་པ་ལ་སོགས་པ་ཐབས་ལ་ཡང་བསྟེན་པར་བྱའོ། །སྟོང་པ་ཉིད་སྒོམ་པ་འབའ་ཞིག་ལྷུར་ལེན་པའི་བྱ་བ་ནི་མ་ཡིན་ནོ། །བཞི་པ་ཤེས་བྱེད་ཀྱི་ལུང་དགོད་པ་ནི། སྦྱིན་སོགས་ཐབས་ཀྱི་ཆ་གདོན་མི་ཟ་བར་དགོས་པ་དེ་སྐད་དུ་འཕགས་པ་ཆོས་ཐམས་ཅད་ཤིན་ཏུ་རྒྱས་པ་བསྡུ་བ་ལས་ཀྱང་བཀའ་སྩལ་ཏེ། བྱམས་པ་བྱང་ཆུབ་སེམས་དཔའ་རྣམས་ཀྱིས་ཞེས་སོགས་ནས་དེ་དག་ནི་སྤྱོད་པ་ཡོངས་སུ་མ་དག་པར་འགྱུར་རོ་ཞེས་བྱ་བ་ལ་སོགས་པ་འབྱུང་ངོ་། །

1-1007

ཞེས་པའི་བར་དུ་དྲངས་སོ། །ལུང་གི་དོན་བཤད་པ་ནི། བཅོམ་ལྡན་འདས་ཀྱི་བྱམས་པ་ཞེས་བོས་ནས། བྱང་ཆུབ་སེམས་དཔའ་རྣམས་ཀྱིས་ཕ་རོལ་ཏུ་ཕྱིན་པ་དྲུག་ཆར་ཡང་དག་པར་སྒྲུབ་པ་འདི་ནི་གཞན་དོན་དུ་རྫོགས་པའི་བྱང་ཆུབ་ཀྱི་ཕྱིར་དུ་སྒྲུབ་པ་ཡིན་ན། ཕར་ཕྱིན་དྲུག་རྫོགས་པར་བསྒྲུབ་དགོས་པར་བསྟན་པ་དེ་ལ་མ་འོངས་པ་ན་མི་བླུན་པོ་དེ་དག་འདི་སྐད་དུ། བྱང་ཆུབ་སེམས་དཔས་ཕ་རོལ་ཏུ་ཕྱིན་པ་དྲུག་གི་ནང་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཁོ་ན་ལ་བསླབ་པར་བྱ་ཡི། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་ལྷག་མ་རྣམས་ནི་མངོན་མཐོའི་རྒྱུ་ཙམ་ཡིན་པས་རྣམ་པར་སྨིན་པ་འཁོར་བ་ལས་མ་འདས་པས་གཞན་རྣམས་སྤྱད་པ་ཉིད་ཀྱིས་ཅི་ཞིག་བྱ་ཞེས་ཟེར་ཞིང་། མི་བླུན་པོ་དེ་དག་སྦྱིན་སོགས་ཕ་རོལ་ཏུ་ཕྱིན་པ་གཞན་དག་སྤྱོད་པ་ལ་སུན་འབྱིན་པར་སེམས་སོ། །མ་ཕམ་པ་ཤེར་ཕྱིན་ཁོ་ནས་ཆོག་པར་སེམས་པ་འདི་ལ་ཅི་སྙམ་དུ་སེམས། ང་སྔོན་ཀ་ཤི་ཀའི་རྒྱལ་པོར་གྱུར་པ་གང་ཡིན་པ་དེས་ཁྲས་ཕུག་རོན་གསོད་པར་བརྩམས་པ་ན་ཕུག་རོན་བསྐྱབ་པ་ཉིད་ཀྱི་ཕྱིར་དུ་རང་གི་ཤ་ཁྲ་ལ་སྦྱིན་པ་དེ་ཤེས་རབ་འཆལ་པར་གྱུར་པ་ཡིན་ནམ་ཞེས་བཀའ་སྩལ་ཏོ། །བྱམས་པས་ལན་གསོལ་པ།

1-1008

བཅོམ་ལྡན་འདས་དེ་ནི་ཤེས་རབ་འཆལ་པ་མ་ལགས་སོ་ཞེས་ལན་བཏབ་བོ། །ཡང་བཅོམ་ལྡན་འདས་ཀྱིས་བཀའ་སྩལ་པ། བྱམས་པ་ང་སྔོན་བྱང་ཆུབ་སེམས་དཔའི་སྤྱོད་པ་སྤྱད་པ་ན་ཕ་རོལ་ཏུ་ཕྱིན་པ་དྲུག་ཆར་དང་ལྡན་པའི་དགེ་བའི་རྩ་བ་དཔག་ཏུ་མེད་པ་གང་དག་བསགས་པའི་དགེ་བའི་རྩ་བ་དེ་དག་གིས་ངས་རྫོགས་པའི་བྱང་ཆུབ་ཐོབ་པ་ལ་གནོད་པར་འགྱུར་ཏམ། ཞེས་གསུངས་སོ། །བྱམས་པས་ལན་གསོལ་པ། བཅོམ་ལྡན་འདས་ཕར་ཕྱིན་དྲུག་དང་ལྡན་པའི་དགེ་རྩ་མང་པོ་བསགས་པ་དེས་ཚོགས་རྫོགས་ནས་སངས་རྒྱས་པ་ཡིན་གྱི། གནོད་པ་དེ་ནི་མ་ལགས་སོ། །བཅོམ་ལྡན་འདས་ཀྱིས་སླར་ཡང་བྱམས་པ་ལ་བཀའ་སྩལ་པ། བདུད་བཞི་ལས་རྒྱལ་བས་མ་ཕམ་པ་ཞེས་རབ་ཏུ་གྲགས་པ་ཁྱེད་ཀྱིས་ཀྱང་བསྐལ་པ་ཆེན་པོ་དྲུག་བཅུར་སྦྱིན་པའི་ཕ་རོལ་ཏུ་ཕྱིན་པ་ཡང་དག་པར་བསྒྲུབས་ཞེས་པ་སྟེ། སྦྱིན་པ་ནི་སྦྱིན་བྱ་ལ་འདོད་པ་ནི་མ་ཡིན་གྱི། སྦྱིན་བྱེད་ལ་བརྗོད་དེ། མཛོད་ལས། གང་གིས་སྦྱིན་བྱེད་དེས་སྦྱིན་པ། །ལུས་དང་ངག་ལས་སློང་དང་བཅས། །ཞེས་སོ། བསྐལ་པ་ཆེན་པོ་དྲུག་ཅུར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒྲུབས་ཞེས་པ་ལ་ཚུལ་ཁྲིམས་ནི། སྤྱོད་འཇུག་ལས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བརྗོད། །ཅེས་པ་ལྟར་རོ། །

1-1009

བསྐལ་པ་ཆེན་པོ་དྲུག་ཅུར་བཟོད་པའི་ཕ་རོལ་ཏུ་ཕྱིན་པ་བསྒྲུབས་ཞེས་པ་ལ་བཟོད་པ་ནི་གཞན་གྱི་གནོད་པས་མི་ཕྱེད་པའོ། །བསྐལ་པ་ཆེན་པོ་དྲུག་ཅུར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒྲུབས་ཞེས་པ་ལ་བརྩོན་འགྲུས་ནི་དགེ་བ་ལ་མངོན་པར་སྤྲོ་བའོ། །བསྐལ་པ་དྲུག་ཅུར་བསམ་གཏན་གྱི་ཕ་རོལ་ཏུ་ཕྱིན་པ་བསྒྲུབས་ཅེས་པ་ལ་བསམ་གཏན་ནི་བསམ་གཏན་གྱི་དངོས་གཞིས་བསྡུས་པའི་སེམས་ཀྱི་བསླབ་པ་ཏིང་ངེ་འཛིན་དང་བཅས་པའོ། །བསྐལ་པ་ཆེན་པོ་དྲུག་ཅུར་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དག་པར་བསྒྲུབས་ཞེས་པ་ལ་ཤེས་རབ་ནི་མདོར་ན་གང་ཟག་གི་བདག་མེད་རྟོགས་པ་དང་ཆོས་ཀྱི་བདག་མེད་རྟོགས་པ་དང་། རྒྱས་པར་ནི་སྟོང་ཉིད་ཉི་ཤུ་རྟོགས་པ་སྟེ། མངོན་པར་རྟོགས་པའི་རྒྱན་ལས་ཡེ་ཤེས་ཀྱི་ཚོགས་སུ་བསྟན་པ་དག་གོ །ཕ་རོལ་ཏུ་ཕྱིན་པ་དྲུག་ཆར་རྫོགས་པར་བསྒྲུབ་དགོས་པ་དེ་ལ་མི་བླུན་པོ་དེ་དག་འདི་སྐད་དུ། ཚུལ་ཁྲིམས་ཁོ་ནས་བྱང་ཆུབ་ཆེན་པོ་ཐོབ་སྟེ། འདི་ལྟ་སྟེ། སྟོང་པ་ཉིད་ཀྱི་དོན་རྟོགས་པའི་ཚུལ་གྱིས་སོ་ཞེས་ཟེར་ཏེ་གང་ཟག་དེ་དག་ནི་ཐབས་ལ་སྤྱོད་པའི་ཆ་དང་བྲལ་བས་སྤྱོད་པ་ཡོངས་སུ་མ་དག་པར་འགྱུར་རོ་ཞེས་གསུངས་སོ། །གཉིས་པ་སངས་རྒྱས་ཀྱི་མཛད་པ་སྒྲུབ་པ་ནི་སྦྱིན་སོགས་སྙིང་རྗེ་དང་།

1-1010

ཀུན་རྫོབ་བྱང་ཆུབ་ཀྱི་སེམས་དང་། སྦྱིན་པ་ལ་སོགས་པ་ཐབས་དང་བྲལ་ན་བྱང་ཆུབ་སེམས་དཔའི་སྟོང་ཉིད་རྟོགས་པའི་ཤེས་རབ་འབའ་ཞིག་གིས་ནི་ཉན་ཐོས་བཞིན་དུ་སངས་རྒྱས་ཀྱི་མཛད་པ་བྱེད་མི་ནུས་ཀྱི་ཐབས་ཀྱིས་སྟངས་པ་སྟེ་ཟིན་ན་ནུས་པར་འགྱུར་ཏེ། འཕགས་པ་དཀོན་མཆོག་བརྩེགས་པ་ལས་ཇི་སྐད་དུ། འོད་སྲུངས་འདི་ལྟ་སྟེ། དཔེར་ན་བློན་པོས་ཟིན་པའི་རྒྱལ་པོ་རྣམས་དགོས་པ་ཐམས་ཅད་བྱེད་པ་དེ་བཞིན་དུ་བྱང་ཆུབ་སེམས་དཔའི་ཤེས་རབ་ཐབས་མཁས་པས་ཟིན་པ་ཡང་སངས་རྒྱས་ཀྱི་མཛད་པ་ཐམས་ཅད་བྱེད་དོ། །ཞེས་གསུངས་པ་ལྟ་བུའོ། །གཉིས་པ་ཤེས་རབ་ལ་ལྟོས་པར་བསྟན་པ་ལ་བཞི་སྟེ། ཐབས་ཤེས་ཟུང་འཇུག་གི་བྱེད་པ། ཐབས་ཤེས་གཉིས་ཀ་ལ་ལྟོས་པའི་ལུང་། ཐབས་ཤེས་གཉིས་ལ་ལྟོས་པའི་དོན་སྒྲུབ་པ། སྐབས་ཀྱི་དོན་བསྡུ་བའོ། །དང་པོ་ནི། བྱང་ཆུབ་སེམས་དཔའ་རྣམས་ཀྱི་ལམ་གྱི་ལྟ་བ་ཡང་མུ་སྟེགས་པ་དང་ཉན་རང་ལས་གཞན་དུ་འགྱུར་ཏེ། ཐབས་ཤེས་ཟུང་དུ་འཇུག་པས་སོ། །མུ་སྟེགས་ཅན་དང་ཉན་ཐོས་རྣམས་ཀྱི་ལམ་གྱི་ལྟ་བ་ཡང་བྱང་སེམས་ཀྱི་ལམ་ལས་གཞན་དུ་གྱུར་ཏེ། འདི་ལྟར་མུ་སྟེགས་ཅན་རྣམས་ཀྱི་ལམ་གྱི་ལྟ་བ་ནི། དེ་དག་གི་ལམ་ཐམས་ཅད་ཀྱི་གནས་སྐབས་ཐམས་ཅད་དུས་ཐམས་ཅད་དུ་བདག་མེད་རྟོགས་པའི་ཤེས་རབ་དང་བྲལ་བའི་ལམ་ཡིན་ཏེ།

1-1011

བདག་དང་བདག་གིར་འཛིན་པ་ལ་སོགས་པས་ཕྱིན་ཅི་ལོག་ཏུ་གྱུར་པའི་ཕྱིར། བདག་མེད་རྟོགས་པའི་ཤེས་རབ་དང་བྲལ་བ་དེ་ལྟ་བས་ན་མུ་སྟེགས་ཅན་དེ་དག་གི་ལམ་གྱིས་ཐར་པ་མི་འཐོབ་བོ། །ཉན་ཐོས་རྣམས་ཀྱི་ལམ་ནི་རྫོགས་པའི་བྱང་ཆུབ་ཐོབ་པའི་ཐབས་དང་མི་ལྡན་པ་ཡིན་ཏེ། གཞན་དོན་དུ་འཁོར་བར་དངོས་སུ་འཇུག་ནུས་ཀྱི་སྙིང་རྗེ་ཆེན་པོ་དང་བྲལ་བས་སོ། །ཐབས་དང་མི་ལྡན་པ་དེ་ལྟ་བས་ན་ཉན་རང་དེ་དག་གཞན་དོན་གྱི་བསམ་པ་སྤངས་ནས་མཐའ་གཅིག་ཏུ་མྱ་ངན་ལས་འདས་པ་ལ་གཞོལ་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱི་ལམ་ནི་སྟོང་ཉིད་རྟོགས་པའི་ཤེས་རབ་དང་སྙིང་རྗེ་ཆེན་པོ་སོགས་ཀྱི་ཐབས་གཉིས་ཀ་དང་ལྡན་པར་འདོད་དེ། ཐབས་ཤེས་ཁྱད་པར་ཅན་ཟུང་དུ་འཇུག་པས་སོ། ཐབས་ཤེས་རབ་གཉིས་ཀ་དང་ལྡན་པ་དེ་བས་ན་སྲིད་ཞི་གཉིས་ལ་མི་གནས་པའི་མྱ་ངན་ལས་འདས་པ་འཐོབ་སྟེ། སྟོང་ཉིད་རྟོགས་པའི་ཤེས་རབ་ཀྱི་སྟོབས་ཀྱིས་ནི་འཁོར་བའི་རྩ་བ་བདག་འཛིན་བཅད་པས་འཁོར་བར་མི་ལྟུང་ལ། སྙིང་རྗེ་ཆེན་པོ་སོགས་ཐབས་ཀྱི་སྟོབས་ཀྱིས་ནི་གཞན་དོན་ལ་འཇུག་པས་མྱ་ངན་ལས་འདས་པར་མི་ལྟུང་བར་འགྱུར་རོ། །གཉིས་པ་ཐབས་ཤེས་རབ་གཉིས་ཀ་ལ་ལྟོས་པའི་ལུང་ནི། བྱང་ཆུབ་སེམས་དཔའི་ལམ་ཐབས་ཤེས་ཟུང་འཇུག་ཡིན་པ་དེ་ལྟ་བས་ན།

1-1012

འཕགས་པ་ག་ཡ་གོ་རིའི་མདོ་ལས། བྱང་ཆུབ་སེམས་དཔའ་རྣམས་ཀྱི་ལམ་ནི་མདོར་བསྡུ་ན་འདི་གཉིས་ཏེ། གཉིས་གང་ཞེ་ན། འདི་ལྟ་སྟེ། ཐབས་དང་ཤེས་རབ་བོ་ཞེས་བཀའ་སྩལ་ཏོ། འདིས་ནི་བྱང་སེམས་ཀྱི་ལམ་ཐབས་ཤེས་ཟུང་འཇུག་ཏུ་བསྟན་པ་ཡིན་ནོ། །འཕགས་པ་དཔལ་མཆོག་དང་པོ་ལས་ཀྱང་། ཤེས་རབ་ཀྱི་ཕ་རོལ་དུ་ཕྱིན་པ་ནི་མ་ཡིན་ནོ། །ཐབས་ལ་མཁས་ལ་མཁས་པ་ནི་ཕ་ཡིན་ནོ། །ཞེས་བཀའ་སྩལ་ཏོ། །འདིས་ནི་བུ་སྐྱེ་བ་ཕ་མ་གཉིས་ལ་ལྟོས་པ་བཞིན་དུ་རྫོགས་པའི་བྱང་ཆུབ་ཐོབ་པ་ཐབས་ཤེས་གཉིས་ཀ་ལ་ལྟོས་དགོས་པར་བསྟན་ཏོ། །གཉིས་ཀ་འཕགས་པ་དྲི་མ་མེད་པར་གྲགས་པས་བསྟན་པ་ལས་ཀྱང་། བྱང་ཆུབ་སེམས་དཔའ་རྣམས་ཀྱི་འཆིང་བ་ནི་གང་། ཐར་པ་ནི་གང་ཞེ་ན། ཞེས་པ་ནས་བཀའ་སྩལ་ཏོ་ཞེས་པའི་བར་རོ། །འདིའི་དོན་ནི། སྙིང་རྗེ་ཆེན་པོ་དང་ཀུན་རྫོབ་བྱང་ཆུབ་ཀྱི་སེམས་དང་། སྦྱིན་སོགས་ཐབས་ཀྱི་ཆ་མེད་པར་སྲིད་པར་ལྷ་དང་མིའི་འགྲོ་བའི་སྐྱེ་བ་ཡོངས་སུ་འཛིན་པ་ནི་བྱང་ཆུབ་སེམས་དཔའི་འཆིང་བའོ། །སྟོང་ཉིད་རྟོགས་པའི་ཤེས་རབ་ཐབས་ཀྱིས་ཟིན་པའི་སྒོ་ནས་སྙིང་རྗེས་སྲིད་པའི་འགྲོ་བར་འགྲོ་བ་ནི་ཐར་པའོ། །ཡང་ཐབས་སྙིང་རྗེ་ཉིད་ཀྱིས་མ་ཟིན་པའི་སྟོང་ཉིད་རྟོགས་པའི་ཤེས་རབ་ཙམ་ནི་བྱང་ཆུབ་སེམས་དཔའི་འཆིང་བའོ། །

1-1013

ཡང་སྙིང་རྗེ་དང་སྦྱིན་སོགས་ཐབས་ཀྱིས་ཟིན་པའི་ཤེས་རབ་ནི་འཆིང་བ་ལས་ཐར་པའོ། །སྟོང་ཉིད་རྟོགས་པའི་ཤེས་རབ་ཀྱིས་མ་ཟིན་པའི་ཐབས་ཀྱི་ཆ་འབའ་ཞིག་ནི་འཁོར་བའི་རྒྱུ་བྱེད་པས་འཆིང་བའོ། །སྟོང་ཉིད་རྟོགས་པའི་ཤེས་རབ་ཀྱིས་ཟིན་པའི་ཐབས་སྙིང་རྗེ་སོགས་ནི་བྱང་ཆུབ་སེམས་དཔའི་ཐར་པའོ་ཞེས་པའི་དོན་ནོ། །གསུམ་པ་གཉིས་ཀ་ལ་ལྟོས་པའི་དོན་སྒྲུབ་པ་ལ་གཉིས་ཏེ། ཐབས་དང་བྲལ་བ་འཆིང་བར་སྒྲུབ་པ་དང་། ཤེས་རབ་དང་བྲལ་བ་འཆིང་བར་སྒྲུབ་པའོ། །དང་པོ་ལ་གསུམ་སྟེ། འཆིང་བའི་དོན་དང་། དེའི་གཉེན་པོ་དང་། ཤེས་བྱེད་ཀྱི་ལུང་ངོ་། །དང་པོ་ནི། བྱང་ཆུབ་སེམས་དཔས་ཐབས་ལ་མ་བརྟེན་པར་སྟོང་ཉིད་རྟོགས་པའི་ཤེས་རབ་ཙམ་བསྟེན་ན་ནི་ཉན་ཐོས་རྣམས་ཀྱིས་ཐོབ་པར་འདོད་པའི་དམན་པའི་མྱ་ངན་ལས་འདས་པར་ལྟུང་བས་བྱང་སེམས་ལ་ལྟོས་ཏེ། ཐར་པ་ལ་ག ེགས་བྱེད་པའི་འཆིང་བ་བཞིན་དུ་འགྱུར་ཏེ། མི་གནས་པའི་མྱ་ངན་ལས་འདས་པའི་གོ་འཕང་ཐོབ་པའི་སྒོ་ནས་སྲིད་ཞི་ལས་གྲོལ་བར་མི་འགྱུར་རོ། །ཐབས་ཤེས་ཟུང་འཇུག་ཏུ་བསྟེན་པར་མ་བྱས་ན་མི་གནས་པའི་མྱང་འདས་མི་འཐོབ་པ་དེ་བས་ན་ཐབས་སྙིང་རྗེ་ཆེན་པོ་སོགས་དང་བྲལ་བའི་བདག་མེད་རྟོགས་པའི་ཤེས་རབ་ཙམ་གྱིས་ནི་མི་གནས་པའི་མྱང་འདས་མི་འཐོབ་པས་བྱང་ཆུབ་སེམས་དཔའ་རྣམས་ཀྱི་འཆིང་བའོ་ཞེས་བྱའོ། །

1-1014

ཞེས་བཤད་དོ། །གཉིས་པ་ནི། ཐབས་ཤེས་གཉིས་ཀ་བསྟེན་དགོས་པ་དེ་ལྟ་བས་ན་ལྷགས་པས་ཤིན་ཏུ་ཉེན་པའི་གང་ཟག་གིས་གྲང་བ་སེལ་བ་ལ་མེ་བསྟེན་དགོས་པ་བཞིན་དུ་བྱང་ཆུབ་སེམས་དཔས་ལྷགས་པས་ཉེན་པའི་གྲང་བ་སེལ་བའི་ཐབས་བཞིན་དུ་ཕྱིན་ཅི་ལོག་གི་ལྷགས་པ་ཙམ་སྤང་བར་བྱ་བའི་ཕྱིར་དུ་ཐབས་དང་བཅས་པའི་ཤེས་རབ་ཀྱིས་བདེན་འཛིན་གཅོད་པའི་དོན་དུ་སྟོང་ཉིད་རྟོགས་པ་ལ་བརྟེན་པར་བྱ་ཡི། ཉན་ཐོས་བཞིན་དུ་མཚན་མེད་འབའ་ཞིག་མངོན་དུ་ནི་མི་བྱ་སྟེ། དེས་མི་གནས་པའི་མྱང་འདས་མི་འཐོབ་པས་སོ། ། གསུམ་པ་ནི། འཕགས་པ་ཆོས་བཅུ་པའི་མདོ་ལས་ཇི་སྐད་དུ། རིགས་ཀྱི་བུ་ཞེས་པ་ནས་བཀའ་སྩལ་པ་ལྟ་བུའོ་ཞེས་པའི་བར་རོ། །ལུང་གི་དོན་བཤད་ན། འདི་ལྟ་སྟེ། དཔེར་ན་གྲང་བས་ཉེན་པའི་མི་ལ་ལ་ཞིག་མེ་ཡོངས་སུ་སྤྱོད་པར་འགྱུར་ཏེ། གང་ཟག་དེ་མེ་དེ་དོན་དུ་གཉེར་བས་མེ་ལ་བསྟི་སྟང་སྟེ་རྩིས་སུ་བྱེད། བླ་མར་བྱེད་ཀྱང་གང་ཟག་དེས་འདི་སྙམ་དུ་དེ་མེ་དེ་ལ་བསྟི་སྟང་བྱས་བླ་མར་བྱས། རི་མོར་བྱས་ཀྱི་མེ་འདི་ལ་གུས་པའི་ཆེད་དུ་ལག་པ་གཉིས་ཀྱིས་བཟུང་བར་བྱའོ་སྙམ་དུ་མི་སེམས་སོ། །དེ་མི་སེམས་པ་ཅིའི་ཕྱིར་ཞེ་ན། མེ་ལ་རེག་པའི་གཞི་དེ་ལས་བདག་ལུས་ཀྱི་སྡུག་བསྔལ་ལམ།

1-1015

སེམས་ཡིད་མི་བདེ་བར་འགྱུར་དུ་འོང་སྙམ་པའི་ཕྱིར་རོ། །དཔེ་དེ་བཞིན་དུ་བྱང་ཆུབ་སེམས་དཔའ་ཡང་ཕྱིན་ཅི་ལོག་བདེན་འཛིན་གྱི་རྩ་བ་ཅན་གྱི་ཉོན་མོངས་པ་སྤོང་བའི་གཉེན་པོ་སྒོམ་པས་མྱ་ངན་ལས་འདས་པའི་བསམ་པ་ཅན་ཡང་ཡིན་ལ། མྱ་ངན་ལས་འདས་པ་མངོན་དུ་ཡང་མི་བྱེད་དོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་མངོན་དུ་བྱས་པའི་གཞི་དེ་ལས་བདག་བླ་མེད་རྫོགས་པའི་བྱང་ཆུབ་ལས་ཕྱིར་ལྡོག་པར་འགྱུར་དུ་འོང་ངོ་སྙམ་པའི་ཕྱིར་རོ། །གཉིས་པ་ཤེས་རབ་དང་བྲལ་བས་འཆིང་བར་སྒྲུབ་པ་ལ་གསུམ་སྟེ། ཐབས་ཀྱིས་འཆིང་བའི་དོན་དང་། དེའི་གཉེན་པོ་དང་། ཤེས་བྱེད་ཀྱི་ལུང་ངོ་། །དང་པོ་ནི། ཤེས་རབ་ལ་མ་ལྟོས་པར་ཐབས་ཙམ་འབའ་ཞིག་བསྟེན་ན་ཡང་སྟོང་ཉིད་རྟོགས་པའི་ཤེས་རབ་མེད་པས་བྱང་ཆུབ་སེམས་དཔའ་སོ་སོ་སྐྱེ་བོའི་ས་ལས་མི་འདའ་བས་འཁོར་བ་ཉིད་དུ་ཤིན་ཏུ་བཅིངས་པ་ཁོ་ནར་འགྱུར་རོ། །གཉིས་པ་དེའི་གཉེན་པོ་ནི། བདག་མེད་རྟོགས་པའི་ཤེས་རབ་མེད་ན་སོ་སྐྱེའི་ས་ལས་འདའ་བར་མི་ནུས་པ་དེ་ལྟ་བས་ན་ཐབས་ཤེས་རབ་དང་བཅས་པ་བསྟེན་པར་བྱ་སྟེ། དེ་ཉིད་དཔེའི་སྒོ་ནས་སྟོན་པ་འདི་ལྟར་དུག་སྔགས་ཡོངས་སུ་འཛིན་པའི་དུག་བཞིན་དུ་བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་འདོད་པའི་ཟག་པ་དང་།

1-1016

སྲིད་པའི་ཟག་པ་ཡང་སྟོང་ཉིད་རྟོགས་པའི་ཤེས་རབ་ཡོངས་སུ་འཛིན་པའི་སྟོབས་ཀྱིས་ཉོན་མོངས་པ་ཡང་སྟོང་པ་ཉིད་དུ་བསྒོམས་ན་སྡུག་བསྔལ་གཅོད་པར་འགྱུར་བའི་བདུད་རྩིར་འགྱུར་ན་ཤེས་རབ་ཀྱིས་མ་ཟིན་ཡང་རང་བཞིན་གྱིས་མངོན་པར་མཐོ་བའི་འབྲས་བུ་འབྱིན་པར་བྱེད་པ་ཅན་སྦྱིན་པ་ལ་སོགས་པའི་དགེ་བ་གང་ཡིན་པ་སྟོང་ཉིད་རྟོགས་པའི་ཤེས་རབ་ཀྱིས་ཟིན་ན་བླ་ན་མེད་པའི་བྱང་ཆུབ་ཀྱི་རྒྱུ་བྱེད་པ་ལྟ་སྨོས་ཀྱང་ཅི་དགོས་ཏེ། གདོན་མི་ཟ་བར་བྱང་ཆུབ་ཆེན་པོའི་རྒྱུ་བྱེད་དོ། །གསུམ་པ་ཤེས་བྱེད་ཀྱི་ལུང་ནི། འཕགས་པ་དཀོན་མཆོག་བརྩེགས་པ་ལས་ཇི་སྐད་དུ། འོད་སྲུངས་འདི་ལྟ་སྟེ། དཔེར་ན་སྔགས་དང་སྨན་གྱིས་ཡོངས་སུ་ཟིན་པའི་དུག་གིས་ནི་འཆི་བར་བྱེད་མི་ནུས་སོ། །དེ་བཞིན་དུ་བྱང་ཆུབ་སེམས་དཔའ་རྣམས་ཀྱི་ཉོན་མོངས་པ་ཤེས་རབ་ཀྱི་ཡོངས་སུ་ཟིན་པས་ཀྱང་ལོག་པར་ལྟུང་བར་བྱེད་མི་ནུས་སོ། །ཞེས་བཀའ་སྩལ་ཏོ། །ཐབས་ཤེས་གཉིས་ཀ་ལ་ལྟོས་པའི་དོན་བསྒྲུབས་ཟིན་ཏོ། ། བཞི་པ་སྐབས་ཀྱི་དོན་བསྡུ་བ་ནི། ཚོགས་གཉིས་ཟུང་འབྲེལ་དུ་བསླབས་ན་བྱང་ཆུབ་ཆེན་པོའི་རྒྱུ་ཚོགས་སུ་འགྱུར་བ་དེ་ལྟ་བས་ན་གང་གི་ཕྱིར་བྱང་ཆུབ་སེམས་དཔའ་ཐབས་ཀྱི་སྟོབས་ཀྱིས་གཞན་དོན་དུ་འཁོར་བར་སྐྱེ་བ་ལེན་པ་ཡོངས་སུ་མི་འདོར་བ་དེའི་ཕྱིར་མྱ་ངན་ལས་འདས་པར་མི་ལྟུང་ངོ་། །

1-1017

གང་གི་ཕྱིར་སྟོང་ཉིད་རྟོགས་པའི་ཤེས་རབ་ཀྱི་སྟོབས་ཀྱིས་བདེན་པར་འཛིན་པའི་དམིགས་པ་མཐའ་དག་སྤོང་བ་དེའི་ཕྱིར། ལས་ཉོན་གྱི་དབང་གིས་འཁོར་བར་མི་ལྟུང་སྟེ། འཁོར་འདས་ཀྱི་མཐའ་གཉིས་སྤངས་པ་དེ་བས་ན་མི་གནས་པའི་མྱ་ངན་ལས་འདས་པ་སྤངས་རྟོགས་ཡོངས་སུ་རྫོགས་པའི་སངས་རྒྱས་ཉིད་འཐོབ་པའོ། །ཐབས་ཤེས་རབ་ཀྱིས་སྲིད་ཞི་ལ་མི་ལྟུང་བ་དེ་བས་ན་འཕགས་པ་ནམ་མཁའ་མཛོད་ལས་བཀའ་སྩལ་ཏོ་ཞེས་བྱའོ། །དེའི་དོན་ནི། བྱང་ཆུབ་སེམས་དཔའ་དེ་སྟོང་ཉིད་རྟོགས་པའི་ཤེས་རབ་ཀྱིས་ཡང་དག་པའི་དོན་བདག་མེད་རྟོགས་པའི་ཤེས་པས་ནི་ཉོན་མོངས་པ་ཐམས་ཅད་ཀྱི་ས་བོན་ཡོངས་སུ་འདོར་རོ། །ཐབས་ཀྱི་ཤེས་པས་ནི་སེམས་ཅན་ཐམས་ཅད་བསམ་སྦྱོར་གཉིས་ཀས་ཡོངས་སུ་མི་གཏོང་ངོ་ཞེས་པའོ། །འཕགས་པ་དགོངས་པ་ངེས་པར་འགྲེལ་བ་ལས་ཀྱང་ཐབས་ཀྱི་ཆ་མ་ཚང་བས་སངས་རྒྱས་མི་འཐོབ་པར་བཀའ་སྩལ་ཏོ། །ཇི་ལྟར་ཞེ་ན། གཞན་དོན་མཐོང་ན་རང་དོན་དོར་ནས་གཞན་དོན་དུ་སྐྱེ་བ་སྐྱེད་མོས་ཚལ་ལྟ་བུར་ལྟ་དགོས་པ་ལས། གང་དག་སེམས་ཅན་གྱི་དོན་ལ་ཡོངས་སུ་མི་ཕྱོགས་པ་དང་། སྙིང་རྗེས་གཞན་དོན་གྱི་ལས་ཀྱི་འདུ་བྱེད་མངོན་པར་འདུ་བྱ་བ་ཐམས་ཅད་ལ་ཤིན་ཏུ་མི་ཕྱོགས་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་ངས་ལུང་མ་བསྟན་ཏོ་ཞེས་པའོ། །

1-1018

ཐབས་ཤེས་ཡ་བྲལ་གྱིས་སངས་རྒྱས་མི་ཐོབ་པ་དེ་ལྟ་བས་ན་གང་དག་གཞན་དོན་སངས་རྒྱས་ཉིད་ཐོབ་པར་མངོན་པར་འདོད་པས་ཐབས་དང་ཤེས་རབ་གཉིས་ཀ་མཉམ་པར་བསྟེན་པར་བྱའོ། །གསུམ་པ་ཟུང་འཇུག་འགྲུབ་པའི་དོན་ལ་གསུམ་སྟེ། གནས་སྐབས་ཀྱིས་རབ་ཏུ་ཕྱེ་བ། མཚན་ཉིད་ཀྱིས་རབ་ཏུ་ཕྱེ་བ། དེ་དག་གི་ལུང་གི་ཁུངས་དགོད་པའོ། །དང་པོ་ནི། གལ་ཏེ་ཐབས་དང་ཤེས་རབ་གཉིས་གཅིག་ཡོད་པའི་དུས་སུ་གཅིག་མེད་པས་ཇི་ལྟར་ཟུང་འཇུག་ཏུ་འགྱུར་ཞེ་ན། ཐབས་དང་ཤེས་རབ་གཉིས་ཡོད་པ་དེ་ལ་འཇིག་རྟེན་ལས་འདས་པའི་མཐོང་ལམ་ཡན་ཆད་ཀྱི་མཉམ་པར་བཞག་པའི་སྟོང་ཉིད་རྟོགས་པའི་ཤེས་རབ་སྒོམ་པའི་གནས་སྐབས་སམ། སོ་སྐྱེའི་སྦྱོར་ལམ་དུ་ཤིན་ཏུ་མཉམ་པར་གཞག་བཞིན་པའི་གནས་སྐབས་ན་སྦྱིན་པ་ལ་སོགས་པ་དང་ཀུན་རྫོབ་བྱང་ཆུབ་ཀྱི་སེམས་ལ་སོགས་པ་ཐབས་ལ་དངོས་སུ་བསྟེན་པ་མི་འབྱུང་དུ་ཟིན་ཀྱང་། ཏིང་ངེ་འཛིན་སྒོམ་པ་དེ་ལ་སྦྱོར་བ་དང་དེའི་རྗེས་ལས་བྱུང་བའི་ཤེས་རབ་གང་འབྱུང་བ་དེའི་ཚེ་ཐབས་དང་ཤེས་རབ་དུས་གཅིག་ཏུ་རྒྱུད་ལ་བརྟེན་པར་འབྱུང་བ་ཉིད་དེ། དེའི་ཕྱིར་ཤེས་རབ་དང་ཐབས་གཉིས་སྦྱོར་བ་དང་རྗེས་ཀྱི་དུས་སུ་གཅིག་ཆར་འཇུག་གོ །གཉིས་པ་མཚན་ཉིད་ཀྱིས་རབ་ཏུ་ཕྱེ་བ་ནི། གཞན་ཡང་བྱང་ཆུབ་སེམས་དཔའ་རྣམས་ཀྱི་སྟོང་ཉིད་རྟོགས་པའི་ཤེས་རབ་དང་སྙིང་རྗེ་སོགས་ཀྱི་ཐབས་ཟུང་དུ་འབྲེལ་བར་འཇུག་པའི་ལམ་ནི་འདི་ཡིན་ཏེ།

1-1019

ཏིང་ངེ་འཛིན་སྒོམ་པ་ལ་འཇུག་པའི་སྦྱོར་བའི་དུས་སུ་སེམས་ཅན་ཐམས་ཅད་ལ་ལྟ་བའི་སྙིང་རྗེ་ཆེན་པོས་ཡོངས་སུ་ཟིན་པས་ཀུན་ནས་བསླངས་ནས་འཇིག་རྟེན་ལས་འདས་པའི་མཉམ་གཞག་གི་ལམ་ལ་བརྟེན་པས་རྒྱུད་གཅིག་ལ་འབྲེལ་བར་འཇུག་པ་དང་། མཉམ་གཞག་ལས་ལངས་པའི་ཐབས་ལ་འཇུག་པ་ཉིད་ཀྱི་དུས་ན་ཡང་སྒྱུ་མ་མཁན་སྒྱུ་མ་ལ་མངོན་པར་ཞེན་པ་མེད་པ་བཞིན་དུ་ཐམས་ཅད་སྣང་ལ་རང་བཞིན་མེད་པའི་ཚུལ་དུ་ཤེས་པས་ཟིན་པའི་ཕྱིན་ཅི་མ་ལོག་པ་ཁོ་ནའི་སྦྱིན་པ་ལ་སོགས་པ་ལ་བརྟེན་པས་ཟུང་དུ་འཇུག་པས་ན་ཟུང་འཇུག་མི་འགྲུབ་པའི་ཉེས་པ་མེད་དོ། །གསུམ་པ་དེ་དག་གི་ལུང་གི་ཁུངས་དགོད་པ་ལ་བཞི་ལས་དང་པོ་ནི། འཕགས་པ་བློ་གྲོས་མི་ཟད་པས་བསྟན་པ་ལས་ཇི་སྐད་དུ། རྒྱ་ཆེར་བཀའ་སྩལ་པ་ལྟ་བུའོ་ཞེས་སྦྱར་རོ། །ལུང་གི་དོན་ནི་ཐབས་དང་ཤེས་རབ་གཉིས་ཡོད་པ་དེ་ལ། བྱང་ཆུབ་སེམས་དཔའི་ཐབས་ནི་གང་། ཤེས་རབ་མངོན་པར་སྒྲུབ་པ་ནི་གང་ཞེ་ན། གང་གི་ཕྱིར་མཉམ་པར་བཞག་པའི་སྦྱོར་བའི་དུས་ན་མཐའ་ཡས་པའི་སེམས་ཅན་ལ་ལྟ་བས་སྙིང་རྗེ་ཆེན་པོའི་དམིགས་པ་ལ་སེམས་ཉེ་བར་འདོགས་པ་དེ་ནི་བྱང་ཆུབ་སེམས་དཔའ་དེའི་ཐབས་སོ། །གང་གི་ཕྱིར་མཉམ་པར་གཞག་པའི་དུས་ན་སྤྲོས་པ་ཞི་བ་དང་།

1-1020

རབ་ཏུ་ཞི་བར་སྙོམས་པར་འཇུག་པ་དེ་ནི་བྱང་ཆུབ་སེམས་དཔའ་དེའི་ཤེས་རབ་བོ་ཞེས་རྒྱ་ཆེར་གསུངས་པ་སྟེ་མཉམ་གཞག་གི་སྦྱོར་དངོས་རྗེས་གསུམ་གྱི་ཐུན་གཅིག་ལ་ཐབས་ཤེས་ཟུང་དུ་འཇུག་པར་བསྟན་ཏོ། །ལུང་གཉིས་པ་ནི། བདུད་བཏུལ་བའི་ལེའུ་ལས་ཀྱང་བཀའ་སྩལ་ཏེ། ཐབས་ཤེས་ཟུང་འབྲེལ་དུ་སྒྲུབ་པའི་ཚུལ་གཞན་ཡང་བྱང་ཆུབ་སེམས་དཔའ་རྣམས་ཀྱི་མཉམ་གཞག་གི་སྦྱོར་བ་ཡང་དག་ཕུལ་དུ་ཕྱིན་པ་ནི། སྟོང་ཉིད་རྟོགས་པའི་ཤེས་རབ་ཀྱི་ཤེས་པས་མངོན་པར་ཞེན་པའམ། བདེན་པར་འཛིན་པའི་ཚུལ་གྱིས་མངོན་པར་བརྩོན་པར་ཡང་མི་བྱེད་ལ། སྙིང་རྗེ་ཆེན་པོ་སོགས་ཀྱི་ཐབས་ཀྱི་ཤེས་པས་དགེ་བའི་ཆོས་ཐམས་ཅད་བརྩོན་འགྲུས་དྲག་པོས་སྡུད་པ་ཡང་སྦྱོར་བ་དང་། ཤེས་པ་དུ་མ་ཡོད་པ་ལས་བདག་མེད་པ་དང་། སེམས་ཅན་མེད་པ་དང་། གང་ཟག་གི་རྒྱུད་གནས་པར་བྱེད་པའི་སྲོག་མེད་པ་དང་། གཟུགས་སོགས་ལ་ལོངས་སྤྱོད་པའི་གསོ་བའི་བདག་མེད་པ་དང་། གང་ཟག་མེད་པར་ཆོས་རྣམས་རྟེན་ཅིང་འབྲེལ་པར་འབྱུང་བའི་ཙམ་དུ་ཟད་པར་ཡང་སྦྱོར་ལ། ཐབས་ཀྱི་བྱེད་པ་ཤེས་པས་གདུལ་བྱའི་སེམས་ཅན་ཐམས་ཅད་ཡོངས་སུ་སྨིན་པར་ཡང་སྦྱོར་བ་གང་ཡིན་པའོ་ཞེས་རྒྱ་ཆེར་འབྱུང་ངོ་ཞེས་བཤད་དོ། །འདིས་ནི་ཐབས་ཤེས་གཉིས་ཀྱི་བྱེད་པ་ཟུང་དུ་འཇུག་པར་བསྟན་ཏོ། །ལུང་གསུམ་པ།

1-1021

འཕགས་པ་ཆོས་ཐམས་ཅད་ཡང་དག་པར་སྡུད་པའི་མདོ་ལས་ཀྱང་། དཔེར་ན་སྒྱུ་མའི་མཁན་པོ་ཞིག་ཞེས་པ་ནས་འབྱུང་ངོ་ཞེས་པའི་བར་དུ་གསུངས་སོ། དེའི་དོན་ནི། དཔེར་ན་སྒྱུ་མའི་མཁན་པོ་ཞིག་གིས་སྤྲུལ་པ་བྱས་ནས་སྤྲུལ་པ་དེ་གཞན་གྱིས་བཅིང་བར་བྱ་བའི་ཚུལ་དུ་བསྟན་ནས། འཆིང་བ་ལས་ཐར་བར་བྱ་བའི་ཕྱིར་དུ་བརྩོན་པ་དེས་ནི་འཆིང་གྲོལ་གྱི་ཚུལ་སྔ་ནས་སྒྱུ་མ་དེ་ཤེས་པས་སྤྲུལ་པ་དེ་ལ་ཆགས་པ་མེད་པ་དེ་བཞིན་དུ་བྱང་ཆུབ་སེམས་དཔས་ཀྱང་འདོད་ཁམས་ལ་སོགས་པའི་སྲིད་གསུམ་སྤྲུལ་པ་དང་འདྲ་བར་ཤེས་སོ། །གང་གིས་ན་རྫོགས་པའི་བྱང་ཆུབ་སྒྲུབ་པའི་ཐབས་ལ་མཁས་པའི་བྱང་ཆུབ་སེམས་དཔས་སོ། །སྲིད་གསུམ་སྤྲུལ་པ་དང་འདྲ་བར་མ་ཤེས་པའི་འགྲོ་བའི་ཆེད་དུ་བརྩོན་པའི་གོ་བགོས་ཏེ། འགྲོ་བ་སྔ་ནས་སྤྲུལ་པ་དང་འདྲ་བར་ཤེས་ཏེ་འོན་ཀྱང་གང་གི་ཆེད་དུ་བརྩོན་པའི་གོ་བགོས་པའི་འགྲོ་བ་སྤྲུལ་པ་དེ་ལྟ་བུར་སྔར་ནས་ཤེས་ཞེས་པའོ། །འདིས་ནི་འགྲོ་བའི་ཆེད་དུ་གོ་བགོ་བའི་ཐབས་དང་། འགྲོ་བ་རང་བཞིན་མེད་པར་ཤེས་པའི་ཤེས་རབ་ཟུང་འཇུག་ཏུ་བསྟན་ཏོ། ། ལུང་བཞི་པ་ནི། བྱང་ཆུབ་སེམས་དཔའ་རྣམས་ཀྱི་ལམ་ཐབས་དང་ཤེས་རབ་གཉིས་སུ་འདུས་པས་བྱང་ཆུབ་སེམས་དཔས་ཤེས་རབ་དང་ཐབས་ཀྱི་ཚུལ་ཁོ་ན་བསྒྲུབ་པར་བྱ་བ་ཡིན་པའི་དབང་དུ་མཛད་ནས་བཅོམ་ལྡན་འདས་ཀྱིས་བཀའ་སྩལ་ཏོ། །

1-1022

གང་ན་བྱང་ཆུབ་སེམས་དཔའ་དེའི་སྦྱོར་བས་གཞན་དོན་ལ་འཇུག་པས་ན་འཁོར་བ་ན་གནས་པ་ཡང་ཡིན་ལ། ཤེས་རབ་ཀྱིས་སྟོང་ཉིད་རྟོགས་པ་ལ་སྦྱོར་བས་ན་མྱ་ངན་ལས་འདས་པ་ཡང་ཡིན་ནོ་ཞེས་སོ། །བཞི་པ་བྱང་ཆུབ་ཀྱི་སེམས་ཀྱི་སྟོབས་བསྐྱེད་པ་ནི། བྱང་ཆུབ་སེམས་དཔའི་ལམ་ཐབས་དང་ཤེས་རབ་ཟུང་འཇུག་ཁོ་ན་བསྒྲུབ་དགོས་པ་དེ་ལྟར་ན་སྟོང་པ་ཉིད་རྟོགས་པའི་ཤེས་རབ་དང་། སྙིང་རྗེ་ཆེན་པོའི་སྙིང་པོ་ཅན་གྱི་དགེ་བའི་རྩ་བ་དཔག་ཏུ་མེད་པ་བསགས་ནས་གཞན་དོན་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་པའི་སྦྱིན་པ་ལ་སོགས་པའི་ཐབས་གོམས་པར་བྱས་ལ་སྟོང་ཉིད་རྟོགས་པའི་མཉམ་གཞག་གི་ཡེ་ཤེས་དོན་དམ་པའི་བྱང་ཆུབ་ཀྱི་སེམས་བསྐྱེད་པའི་ཕྱིར་དུ་སྔ་མ་ཞི་གནས་དང་ལྷག་མཐོང་གི་སྒོམ་ཚུལ་བསྟན་པ་བཞིན་དུ་དུས་རྟག་པར་རང་གི་ཁམས་ཀྱི་ནུས་པ་དང་སྦྱར་ནས་དུས་དུས་སུ་ཞི་གནས་དང་ལྷག་མཐོང་གི་སྦྱོར་བ་ལ་ཅི་ནུས་སུ་བསྒོམ་པར་བྱ་སྟེ། འདི་གཉིས་ཀྱིས་རྣལ་འབྱོར་ཡོངས་སུ་རྫོགས་པར་འགྱུར་རོ། །མཉམ་རྗེས་གཉིས་ཀ་དོན་དང་ལྡན་པར་སྒྲུབ་དགོས་པ་ཡང་འཕགས་པ་སྤྱོད་ཡུལ་ཡོངས་སུ་དག་པའི་མདོ་ལས་གསུངས་ཏེ། གནས་སྐབས་ཐམས་ཅད་དུ་སྤྱོད་ཡུལ་ཡོངས་སུ་དག་པ་སྒོམ་པས་སེམས་ཅན་གྱི་དོན་བྱེད་པའི་བྱང་ཆུབ་སེམས་དཔའ་རྣམས་ཀྱིས་མདོ་དེ་ཉིད་ནས་ཕན་ཡོན་ཇི་སྐད་དུ་བསྟན་པ་དེ་བཞིན་དུ་སྤྱོད་ཡུལ་ཡོངས་སུ་དག་པ་སྒོམ་པ་ལ་ཉེ་བར་གནས་པའི་དྲན་པས་རྗེས་ཤེས་ཀྱི་དུས་ཐམས་ཅད་དུ་རྩོམ་པ་ཐམས་ཅད་ཚོགས་གཉིས་སུ་སློབ་པའི་ཐབས་ལ་མཁས་པ་གོམས་པར་བྱའོ། །

1-1023

སྤྱོད་ཡུལ་ཡོངས་སུ་དག་པའི་ཐབས་གང་ཞེ་ན། བྱང་ཆུབ་སེམས་དཔའ་ཁྱིམ་གྱི་ནང་དུ་འཇུག་པའི་ཚེ་ཐར་པ་ཆེན་པོའི་གྲོང་ཁྱེར་ཐོབ་པར་གྱུར་ཅིག་ཅེས་སེམས་བསྐྱེད་དོ། །ཉལ་བའི་ཚེ་སངས་རྒྱས་ཀྱི་ཆོས་ཀྱི་སྐུ་ཐོབ་པར་གྱུར་ཅིག་ཅེས་པ་དང་། རྨི་ལམ་བྱུང་ན་ཆོས་ཐམས་ཅད་རྨི་ལམ་ལྟ་བུར་རྟོགས་པར་གྱུར་ཅིག་ཅེས་པ་དང་། གཉིད་སད་པའི་ཚེ་མ་རིག་པ་ལས་སད་པར་གྱུར་ཅིག་ཅེས་པ་དང་། ལྡང་བའི་ཚེ་སངས་རྒྱས་ཀྱི་གཟུགས་ཀྱི་སྐུ་ཐོབ་པར་གྱུར་ཅིག་ཅེས་དང་། གོས་གྱོན་པ་ན་ངོ་ཚ་དང་ཁྲེལ་ཡོད་ཀྱི་གོས་གྱོན་པར་གྱུར་ཅིག་ཅེས་པ་དང་། སྐེ་རགས་འཆིང་བའི་ཚེ་དགེ་བའི་རྩ་བ་དང་འབྲེལ་བར་གྱུར་ཅིག་ཅེསཔ་དང་། སྟན་ལ་འདུག་པའི་ཚེ་བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པར་གྱུར་ཅིག་ཅེས་པ་དང་། རྒྱབ་རྟེན་པའི་ཚེ་བྱང་ཆུབ་ཀྱི་ཤིང་ཐོབ་པར་གྱུར་ཅིག་ཅེས་པ་དང་། མེ་གཏོང་བའི་ཚེ་ཉོན་མོངས་པའི་བུད་ཤིང་བསྲེག་པ་དང་། མེ་འབར་བའི་ཚེ་ཡེ་ཤེས་ཀྱི་མེ་འབར་བ་དང་། གཡོས་ཟིན་པའི་ཚེ་ཡེ་ཤེས་ཀྱི་བདུད་རྩི་ཐོབ་པ་དང་། ཟས་ཟ་བའི་ཚེ་བསམ་གཏན་གྱི་ཟས་ཐོབ་པ་དང་། ཕྱིར་འགྲོ་བའི་ཚེ་འཁོར་བའི་གྲོང་ཁྱེར་ལས་ཐར་བ་དང་། སྐས་ལ་འབབ་པའི་ཚེ་སེམས་ཅན་གྱི་དོན་ལ་འཁོར་བར་འཇུག་པ་དང་།

1-1024

སྒོ་འབྱེད་པའི་ཚེ་ཐར་པའི་གྲོང་ཁྱེར་གྱི་སྒོ་འབྱེད་པ་དང་། སྒོ་གཅོད་པའི་ཚེ་ངན་སོང་གསུམ་གྱི་སྒོ་གཅོད་པ་དང་། ལམ་དུ་འཇུག་པའི་ཚེ་འཕགས་པའི་ལམ་དུ་འཇུག་པ་དང་། གྱེན་ལ་འགྲོ་བའི་ཚེ་སེམས་ཅན་ཐམས་ཅད་མཐོ་རིས་ཀྱི་ས་ལ་འགོད་པ་དང་། ཐུར་ལ་འབབ་པའི་ཚེ་ངན་སོང་གསུམ་གྱི་རྒྱུན་གཅོད་པ་དང་། སེམས་ཅན་དང་ཕྲད་པའི་ཚེ་སངས་རྒྱས་མཇལ་བ་དང་། རྐང་པ་འཇོག་པའི་ཚེ་སེམས་ཅན་ཐམས་ཅད་ཀྱི་དོན་ལ་སྟོན་པ་དང་། རྐང་པ་འདེགས་པའི་ཚེ་སེམས་ཅན་འཁོར་བ་ལས་འདོན་པ་དང་། རྒྱན་དང་ལྡན་པར་མཐོང་ན་མཚན་དང་དཔེ་བྱད་ཀྱིས་བརྒྱན་པ་ཐོབ་པ་དང་། རྒྱན་མེད་པར་མཐོང་ན་སྦྱངས་པའི་ཡོན་ཏན་དང་ལྡན་པ་དང་། སྣོད་གང་བ་མཐོང་ན་ཡོན་ཏན་གྱིས་གང་བ་དང་། སྟོང་པ་མཐོང་ན་སྐྱོན་གྱིས་སྟོངས་པ་དང་། སེམས་ཅན་དགའ་བ་མཐོང་ན་ཆོས་ལ་དགའ་བ་དང་། མི་དགའ་བ་མཐོང་ན་འདུས་བྱས་ཀྱི་དངོས་པོ་ཐམས་ཅད་ལ་མི་དགའ་བ་དང་། སེམས་ཅན་བདེ་བ་མཐོང་ན་སངས་རྒྱས་ཀྱི་བདེ་བའི་ཡོ་བྱད་ཐོབ་པ་དང་། སྡུག་བསྔལ་བ་མཐོང་ན་སེམས་ཅན་གྱི་སྡུག་བསྔལ་ཞི་བར་བྱེད་པ་དང་། ནད་པ་མཐོང་ན་ནད་ལས་གྲོལ་བ་དང་། དྲིན་དུ་བཟོ་བར་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་དྲིན་ལན་ལྡོན་པ་དང་།

1-1025

དྲིན་དུ་མི་བཟོ་བ་མཐོང་ན་ལྟ་བ་ལ་སོགས་པ་དྲིན་དུ་མི་བཟོ་བ་དང་། རྒོལ་བ་མཐོང་ན་ཕས་ཀྱི་རྒོལ་བ་ཚར་གཅོད་ནུས་པ་དང་། བསྟོད་པ་མཐོང་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བསྟོད་པ་དང་། ཆོས་ཀྱི་གཏམ་བྱེད་པའི་ཚེ་སངས་རྒྱས་ཀྱི་སྤོབས་པ་ཐོབ་པ་དང་། སངས་རྒྱས་ཀྱི་སྐུ་གཟུགས་མཐོང་ན་སངས་རྒྱས་ཐམས་ཅད་མཐོང་བ་ལ་སྒྲིབ་པ་མེད་པ་དང་། མཆོད་རྟེན་མཐོང་ན་འགྲོ་བ་ཐམས་ཅད་ཀྱི་མཆོད་རྟེན་དུ་འགྱུར་བ་དང་། ཚོང་བྱེད་པ་མཐོང་ན་འཕགས་པའི་ནོར་བདུན་ཐོབ་པ་དང་། ཕྱག་འཚལ་བ་མཐོང་ན་ལྷ་དང་བཅས་པའི་འཇིག་རྟེན་གྱིས་སྤྱི་གཙུག་བལྟར་མི་མངོན་པ་ཐོབ་པར་གྱུར་ཅིག ཅེས་པ་ལ་སོགས་པ་གསུངས་སོ། །དེ་ལྟར་སྙིང་རྗེ་སྒོམ་པ་དང་། བྱང་ཆུབ་ཀྱི་སེམས་སྒོམ་པ་དང་། ཐབས་ཤེས་གཉིས་སྒོམ་པའི་ཚུལ་བསྟན་ཟིན་ཏོ། །

༄། །བསྒོམས་པའི་འབྲས་བུ། ༆ གསུམ་པ་བསྒོམས་པའི་འབྲས་བུ་ལ་གཉིས་ཏེ། སྤྱིར་བསྟན་པ་དང་། སོ་སོར་བཤད་པའོ། །དང་པོ་ནི། གོང་དུ་བསྟན་པ་དེ་ལྟར་སྙིང་རྗེ་དང་། སྦྱིན་སོགས་ཐབས་དང་བྱང་ཆུབ་ཀྱི་སེམས་གཉིས་གོམས་པར་བྱས་པ་དེའི་ཚེ་བྱང་ཆུབ་སེམས་དཔའ་འདི་ལ་གདོན་མི་ཟ་བར་འབྲས་བུ་ཁྱད་པར་དུ་གྱུར་པ་འཐོབ་པར་འགྱུར་ཏེ་ཞེས་པའོ། །གཉིས་པ་སོ་སོར་བཤད་པ་ལ་གཉིས་ཏེ། འཇིག་རྟེན་གྱིས་བསྡུས་པའི་འབྲས་བུ་དང་།

1-1026

འཇིག་རྟེན་ལས་འདས་པའི་འབྲས་བུའོ། །དང་པོ་ལ་གཉིས་ཏེ། ཚེ་འདིར་ཐོབ་པའི་འབྲས་བུ་དང་། སྐྱེ་བ་གཞན་དུ་ཐོབ་པའི་འབྲས་བུའོ། །དང་པོ་ལ་སྐྱེས་བུ་བྱེད་པའི་འབྲས་བུ་ནི། རྒྱུ་ཚོགས་གསུམ་པོ་ལ་འབད་པ་བྱས་པ་དེས་ན་རྨི་ལམ་ན་སངས་རྒྱས་དང་བྱང་ཆུབ་སེམས་དཔའ་མཐོང་བར་འགྱུར། རྨི་ལམ་བཟང་པོ་སངས་རྒྱས་ཀྱིས་རང་ལ་ཆོས་སྟོན་པ་སོགས་གཞན་དག་ཀྱང་རྨི་བར་འགྱུར་རོ། །མངོན་རྟོགས་རྒྱན་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྟ་ལ་སོགས། །ཞེས་གསུངས་པ་ལྟར་རོ། །དཀར་ཕྱོགས་ལ་དགའ་བའི་ལྷ་རྣམས་ཀྱང་རྗེས་སུ་ཡི་རང་ནས་ཕྱིའི་ཉེ་བར་འཚེ་བ་ལས་བསྲུང་བར་བྱེད་པར་འགྱུར་རོ། །རྒྱུ་མཐུན་གྱི་འབྲས་བུ་སྐད་ཅིག་རེ་རེ་ལ་ཡང་བསོད་ནམས་དང་ཡེ་ཤེས་ཀྱི་ཚོགས་རྒྱ་ཆེན་པོ་སོག་པར་འགྱུར་རོ། །བྲལ་བའི་འབྲས་བུ་ཉོན་མོངས་པའི་སྒྲིབ་པ་དང་། དེ་དག་གི་གནས་ངན་ལེན་ཤེས་བྱའི་སྒྲིབ་པ་ཡང་བྱང་བར་འགྱུར། རྒྱུད་བླ་མ་ལས། ཉེ་བའི་ཉོན་མོངས་པའི་བག་ཆགས་ལ་ཤེས་སྒྲིབ་ཏུ་བཤད་དེ། ཉེ་བའི་ཉོན་མོངས་བག་ཆགས་སོ་ཞེས་གསུངས་པ་ལྟར་རོ། །འོག་ཏུ་ལུས་ལ་ཡང་ནད་ཀྱིས་མི་ཐེབས་པར་འགྱུར་རོ་ཞེས་པ་ཡང་བྱེད་པའི་འབྲས་བུར་སྦྱར་རོ། །ཡང་སྐྱེས་བུ་བྱེད་པའི་འབྲས་བུ་དུས་ཐམས་ཅད་དུ་ཡང་ལུས་ལ་བདེ་བ་དང་ཡིད་ལ་བདེ་བ་ཤིན་ཏུ་མང་བར་འགྱུར་རོ། །

1-1027

སྐྱེ་བོ་མང་པོ་ལ་ཡིད་སྡུག་པར་འགྱུར་རོ། །ཡང་རྒྱུ་མཐུན་གྱི་འབྲས་བུ་སེམས་ལ་དབང་ཐོབ་པས་ན་སེམས་ལས་སུ་རུང་བའི་མཆོག་ཏིང་ངེ་འཛིན་ཕུན་སུམ་ཚོགས་པ་དག་ཀྱང་འཐོབ་པར་འགྱུར་རོ། །ཏིང་ངེ་འཛིན་མཆོག་ཐོབ་པ་དེས་ན་རྫུ་འཕྲུལ་གྱི་མངོན་པར་ཤེས་པ་དང་། ལྷའི་རྣ་བའི་མངོན་པར་ཤེས་པ་ལ་སོགས་པ་མངོན་པར་ཤེས་པ་དྲུག་དང་། ཤའི་སྤྱན་ལ་སོགས་པ་ཡོན་ཏན་ཁྱད་པར་ཅན་མང་པོ་འཐོབ་བོ། །སྤྱན་དང་མངོན་ཤེས་ཐོབ་པ་དེ་ནས་དེ་དག་གི་བྱེད་པས་རྫུ་འཕྲུལ་གྱི་སྟོབས་ཀྱིས་འཇིག་རྟེན་གྱི་ཁམས་མཐའ་ཡས་པ་དག་ཏུ་སོང་ནས་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་དོ། །སངས་རྒྱས་བཅོམ་ལྡན་འདས་དེ་དག་ལ་ཆོས་ཀྱང་ཉན་ཏོ། །འཆི་བའི་ཚེ་ཡང་གདོན་མི་ཟ་བར་སངས་རྒྱས་དང་བྱང་ཆུབ་སེམས་དཔའ་རྣམས་མཐོང་བར་འགྱུར་རོ། །གཉིས་པ་སྐྱེ་བ་གཞན་དུ་ཐོབ་པའི་འབྲས་བུ་ནི། ཡང་བདག་པོའི་འབྲས་བུ་སངས་རྒྱས་དང་བྱང་ཆུབ་སེམས་དཔའ་དང་མི་འབྲལ་བའི་ཡུལ་དུ་སྐྱེ་བར་འགྱུར་རོ། །རིགས་དང་འབྱོར་པ་ཁྱད་པར་དུ་འཕགས་པའི་ཁྱིམ་དུ་སྐྱེ་བར་འགྱུར་རོ། །རྒྱུ་དེས་ན་རྒྱུ་མཐུན་གྱི་འབྲས་བུ་འབད་རྩོལ་ཆེན་པོ་མི་དགོས་པར་བསོད་ནམས་དང་ཡེ་ཤེས་རྒྱ་ཆེན་པོ་ཡོངས་སུ་རྫོགས་པར་བྱེད་དོ། །བདག་པོའི་འབྲས་བུ་ལོངས་སྤྱོད་ཆེ་བ་དང་།

1-1028

གཡོག་འཁོར་ཤིན་ཏུ་མང་བར་འགྱུར་རོ། །སྐྱེས་བུ་བྱེད་པའི་འབྲས་བུ་ལུང་དང་མངོན་པར་རྟོགས་པ་ལ་ཤེས་རབ་རྣོ་བས་ཆོས་སྟོན་པའི་སྒོ་ནས་གདུལ་བྱའི་སྐྱེ་བོ་མང་པོ་ཡོངས་སུ་སྨིན་པར་བྱེད་པར་ཡང་འགྱུར་རོ། །ཚེ་རབས་ཐམས་ཅད་དུ་སྔོན་གྱི་ཚེ་རབས་དུ་མ་རྗེས་སུ་དྲན་པར་ཡང་འགྱུར་ཏེ། དེ་ལྟར་ན་ཚོགས་ལམ་དང་སྦྱོར་ལམ་གྱི་གནས་སྐབས་ན་ཡང་ཡོན་ཏན་ཚད་མེད་པ་ཐོབ་པ་མདོ་གཞན་དག་ལས་འབྱུང་བ་ལས་ཁོང་དུ་ཆུད་པར་བྱའོ། །གཉིས་པ་འཇིག་རྟེན་ལས་འདས་པའི་འབྲས་བུ་ལ་གཉིས་ཏེ། རྒྱས་པར་བཤད་པ་དང་། དོན་བསྡུ་བའོ། །དང་པོ་ལ་ལྔ་སྟེ། མཐོང་ལམ་ས་དང་པོ་ཐོབ་པ་དང་། སྒོམ་ལམ་ས་ལྷག་མ་དགུ་ཐོབ་པ་དང་། མཐར་ཐུག་གི་ས་སངས་རྒྱས་ཐོབ་པ་དང་། དེ་དག་གི་ཤེས་བྱེད་ཀྱི་ལུང་དྲང་བ་དང་། སངས་རྒྱས་ཐོབ་པའི་ཆེད་དུ་འབད་པར་གདམས་པའོ། །དང་པོ་ནི། ཚོགས་ལམ་དང་སྦྱོར་ལམ་ལ་རིམ་གྱིས་ཞུགས་ནས་དེ་དག་གི་ཡོན་ཏན་ཚད་མེད་པ་ཐོབ་པ་དེས་གོང་དུ་བསྟན་པ་དེ་ལྟར་སྙིང་རྗེ་ཆེན་པོ་དང་སྦྱིན་སོགས་ཐབས་དང་། ཀུན་རྫོབ་བྱང་ཆུབ་ཀྱི་སེམས་དང་སྟོང་ཉིད་རྟོགས་པའི་ལྟ་བ་སྤྱོད་ལམ་རྣམ་པ་བཞིའི་དུས་རྟག་ཏུ་སྒོམ་པ་དང་། གུས་པར་སྦྱོར་བའི་བརྩོན་འགྲུས་ཀྱིས་སྒོམ་པ་དང་། རྟག་པར་སྦྱོར་བའི་བརྩོན་འགྲུས་ཀྱིས་ཡུན་རིང་དུ་བསྒོམས་ན་རིམ་གྱིས་སེམས་ཀྱི་རྒྱུད་ཉོན་མོངས་པས་ཤིན་ཏུ་དག་པ་དང་།

1-1029

རབ་ཏུ་དག་པ་དང་། ཡོངས་སུ་དག་པའི་བློའི་སྐད་ཅིག་མ་གཅིག་ནས་གཅིག་ཏུ་བརྒྱུད་པ་འབྱུང་བས་རྣལ་འབྱོར་པའི་སེམས་རྒྱུད་ཡོངས་སུ་སྨིན་པར་འགྱུར་བའི་ཕྱིར། བཙུབས་ཤིང་བཙུབས་པ་ལས་བྱུང་བའི་མེས་ཤིང་རིམ་གྱིས་ཟད་པ་ན་གཉེན་པོ་སྲེག་བྱེད་ཀྱི་མེ་ཡང་ངང་གིས་འགག་པ་དེ་བཞིན་དུ་ཡང་དག་པ་སྟོང་པ་ཉིད་ཀྱི་དོན་ལ་མཉམ་པར་བཞག་ནས་སྒོམ་པ་རབ་ཀྱི་མཐར་ཕྱིན་པར་གྱུར་ན་གཉེན་པོ་ངེས་འབྱེད་ཆ་བཞིའི་དགག་རྟོག་གི་ཆ་ལ་སྟོང་ཉིད་རྟོགས་པའི་བློའི་རིག་མཐུན་འཇིག་རྟེན་ལས་འདས་པའི་ཡེ་ཤེས་ཀྱི་རྒྱུ་མཐུན་དུ་འགྱུར་ལ། སྟོང་པ་ཉིད་ཀྱི་དོན་ལ་བློ་ཇེ་གསལ་ཇེ་གསལ་དུ་སོང་བས་རྟོག་པའི་ཞེན་ཆ་རིམ་གྱིས་འགག་པ་ཉིད་དུ་འགྱུར་རོ། །དེ་ལྟར་གྱུར་པའི་ཚེ་འཇིག་རྟེན་ལས་འདས་པའི་ཡེ་ཤེས་སྔར་གྱི་རྟོག་པའི་རྒྱུན་གྱི་འཆིང་བྱེད་ཀྱི་དྲྭ་བ་མཐའ་དག་དང་བྲལ་བ་ཆོས་ཀྱི་དབྱིངས་རྟོག་པའི་སྤྲོས་པ་མེད་པ་ངོ་བོ་ཤིན་ཏུ་གསལ་བར་རྟོགས་པ་སྟེ། འདིའི་དུས་སུ་ཆོས་ཀྱི་དོན་སྤྱི་མ་བསྒྲིབས་པར་རང་གི་ངོ་བོ་ནམ་མཁའ་ལྟ་བུ་དངོས་སུ་སྣང་ངོ་། །འདིའི་དུས་སུ་མཐོང་སྤང་གི་དྲི་མ་མེད་ཅིང་རྣམ་རྟོག་གི་རླུང་གིས་མི་གཡོ་ལ། དཔེར་ན་མར་མེ་རླུང་མེད་པར་གྱུར་པའི་གནས་སུ་བཞག་པ་བཞིན་དུ་གསལ་ལ་མི་གཡོ་བ་དང་།

1-1030

རྣལ་འབྱོར་མངོན་སུམ་དུ་གྱུར་པས་ཆོས་ཉིད་ཀྱི་དོན་ལ་ཚད་མར་གྱུར་པ་དང་། ཆོས་ཐམས་ཅད་གང་ཟག་དང་ཆོས་ཀྱི་བདག་མེད་པའི་དེ་ཁོ་ན་ཉིད་མངོན་སུམ་དུ་བྱེད་པ་དང་། ཆོས་ཉིད་སྔར་མ་མཐོང་བ་གསར་དུ་མཐོང་བའི་ལམ་གྱིས་བསྡུས་པ་དོན་དམ་པའི་བྱང་ཆུབ་ཀྱི་སེམས་ཀྱི་ངོ་བོ་ཉིད་འབྱུང་ངོ་། །དོན་དམ་བྱང་ཆུབ་ཀྱི་སེམས་དེ་དངོས་སུ་བྱུང་བས་དངོས་པོའི་མཐའ་དེ་བཞིན་ཉིད་དངོས་སུ་དམིགས་པ་ལ་ཞུགས་པ་ཡིན་ཏེ། དངོས་པོ་ཐམས་ཅད་རིགས་པས་བརྟགས་ན་མཐར་སྟོང་པ་ཉིད་ལས་མ་འདས་པས་ན་དེ་བཞིན་ཉིད་ལ་དངོས་པོའི་མཐའ་ཞེས་བརྗོད་ལ། དེ་མངོན་སུམ་དུ་གྱུར་པའི་ཕྱིར་རོ། །དེ་ཐོབ་པ་དེའི་ཚེ་དེ་བཞིན་གཤེགས་པའི་རིགས་སུ་སྐྱེས་པ་ཡིན་ཏེ། སངས་རྒྱས་ཀྱི་ས་ལ་རྗེས་སུ་འགྲོ་བའི་ཡོན་ཏན་བརྙེས་པའི་ཕྱིར། བྱང་ཆུབ་སེམས་དཔའི་སྐྱོན་མེད་པ་ལ་ཞུགས་པ་ཡིན་ཏེ། མཐོང་སྤང་གི་སྒྲིབ་གཉིས་སྤངས་པའི་ཕྱིར་རོ། །འཇུག་པ་ལས། འདི་ནི་དེ་བཞིན་གཤེགས་པ་རྣམས་ཀྱི་རིགས་སུའང་སྐྱེས་པ་ཡིན་ཏེ། འདི་ཡིས་ཀུན་ཏུ་སྦྱོར་བ་གསུམ་པོ་ཐམས་ཅད་སྤངས་པར་འགྱུར། ཞེས་པ་ལྟར་རོ། ། ཁམས་གསུམ་དུ་མི་ལྡོག་པའི་འདེངས་ཐོབ་པས་འཇིག་རྟེན་གྱི་འགྲོ་བ་མཐའ་དག་ལས་ལྡོག་པ་ཡིན་ནོ། །ཇོ་བོ་ཨ་ཏི་ཤས་ཀྱང་། ཚོགས་ལམ་ཆེན་པོ་ཐོབ་ནས་ངན་སོང་དུ་ཕྱིར་མི་ལྡོག

1-1031

མཐོང་ལམ་ཐོབ་ནས་འཁོར་བར་ཕྱིར་མི་ལྡོག་ཅེས་བཤད་དོ། །ཚོགས་ལམ་ཆེན་པོ་ནི་འདིར་ཐེག་ཆེན་གྱི་ཚོགས་ལམ་ཆེན་པོ་ལ་དགོངས་པར་མངོན་ནོ། །བྱང་ཆུབ་སེམས་དཔའི་རང་རྒྱུད་ཀྱི་སེམས་ཀྱི་ཆོས་ཉིད་རྟོགས་པ་དང་། ཆོས་ཀྱི་དབྱིངས་ཀུན་ཏུ་འགྲོ་བའི་དོན་དུ་རྟོགས་པ་ལ་གནས་པ་ཡིན། འདི་ནི་མཉམ་གཞག་ཏུ་ཆོས་ཉིད་རྟོགས་པའི་བྱེད་པས་རྗེས་ཐོབ་ཏུ་ཆོས་ཅན་ཐམས་ཅད་རང་རང་གི་ངོ་བོས་སྟོང་པ་ཉིད་དུ་སོ་སོར་སྒྲོ་འདོགས་ཆོད་པ་ནི་ཆོས་དབྱིངས་ཀུན་ཏུ་འགྲོ་བ་རྟོགས་པའི་དོན་ནོ། །འདིའི་དུས་སུ་བྱང་ཆུབ་སེམས་དཔའི་ས་བཅུ་ལས་ས་དང་པོ་ཐོབ་པ་ཡིན་ནོ་ཞེས་བྱའོ། །དེ་དག་གི་ཕན་ཡོན་རྒྱས་པར་ནི་མདོ་སྡེ་ས་བཅུ་པ་ལ་སོགས་པ་ལས་ཁོང་དུ་ཆུད་པར་བྱའོ། །ཆོས་ཉིད་མངོན་སུམ་དུ་མཐོང་བའི་ཏིང་ངེ་འཛིན་འདི་ལ་ནི་དེ་བཞིན་ཉིད་ལ་དམིགས་པའི་བསམ་གཏན་ཞེས་བསྟན་ཏེ། གང་ལས་བསྟན་ན། འཕགས་པ་ལང་དཀར་གཤེགས་པའི་མདོ་ལས་བསྟན་ཏེ། ཇི་སྐད་དུ་བསྟན་ན། ས་དང་པོ་ཐོབ་པ་འདི་ནི་བྱང་ཆུབ་སེམས་དཔའ་རྣམས་ཀྱི་རྣམ་པར་རྟོག་པའི་སྤྲོས་པ་མེད་པ་རྣམ་པར་མི་རྟོག་པ་ཉིད་ལ་འཇུག་པའོ། །ཅི་ཙམ་གྱིས་རྣམ་པར་མི་རྟོག་པར་བརྗོད་ཅེ་ན། འཇིག་རྟེན་གྱི་ཐ་སྙད་ཀྱི་སྤྲོས་པ་ཡིད་ལ་མི་བྱེད་པས་ཀྱང་མི་རྟོག་ཡེ་ཤེས་སུ་འགྱུར་བ་མ་ཡིན་ཏེ།

1-1032

བྱིས་པ་ཆུང་ངུའི་ཤེས་པ་བཞིན་ནོ། །རྟོག་དཔྱོད་ལས་ཡང་དག་པར་འདས་པས་ཀྱང་མིན་ཏེ། བསམ་གཏན་གཉིས་པ་ཡན་ཆད་ཀྱི་ཤེས་པ་བཞིན་ནོ། །རྟོག་པ་ཉེ་བར་ཞི་བས་ཀྱང་མིན་ཏེ། མིག་སོགས་དབང་པོ་བཞིན་ནོ། །རྟོག་པའི་ངོ་བོ་མིན་པ་ཙམ་གྱིས་ཀྱང་མིན་ཏེ། གཟུགས་སྒྲ་ལ་སོགས་པ་བཞིན་ནོ། །རྣམ་པར་རྟོག་པར་མི་བྱའོ་སྙམ་པའི་མངོན་བཏགས་སུ་འཛིན་པ་ཙམ་གྱིས་ཀྱང་མ་ཡིན་ཏེ། དེ་ནི་མཚན་མར་འཛིན་པ་ཡིན་པའི་ཕྱིར་རོ། །ཁྱད་པར་ལྔ་པོ་དེའི་ཆ་ནས་རྣམ་པར་མི་རྟོག་པར་བརྗོད་པ་ཡང་མ་ཡིན་ནོ། །དེས་ན་དོན་དམ་དཔྱོད་བྱེད་ཀྱི་རིགས་པས་ཆོས་ཅན་སོ་སོ་ལ་རྣམ་པར་བརྟགས་ནས་གནས་ཚུལ་ལ་མ་རྙེད་པའི་དོན་ལེགས་པར་བསྒོམས་པས་མིང་དོན་གྱི་མཚན་མ་དང་མ་འདྲེས་པར་ནམ་མཁའ་ལྟ་བུའི་དོན་མངོན་དུ་གྱུར་པའི་ཡེ་ཤེས་ལ་བརྗོད་དོ། །འོ་ན་མོས་པའི་ས་དང་ས་དང་པོ་ལ་ཁྱད་པར་ཅི་ཡོད་ཅེ་ན། མོས་པས་སྤྱོད་པའི་ས་ལ་ནི་སྟོང་པ་ཉིད་དམ་བདག་མེད་ལ་མོས་པའི་དབང་གིས་འཇུག་པར་རྣམ་པར་གཞག་གི བདག་མེད་མངོན་སུམ་དུ་བྱེད་པས་ནི་མ་ཡིན་ནོ། །ས་དང་པོ་ཐོབ་ནས་མཐོང་ལམ་གྱི་ཡེ་ཤེས་དེ་བྱུང་བར་གྱུར་ན་ནི་བདག་མེད་པའི་དོན་ལ་མངོན་སུམ་དུ་ཞུགས་པ་ཡིན་ནོ། །

1-1033

དབུ་མའི་སྐབས་འདིར་ནི་རྟོག་གེ་པ་ལྟར་ཡུལ་ཅན་ལ་མངོན་སུམ་དུ་འདོད་པ་མིན་ནོ། །འོ་ན་ཅི་ཞེ་ན། མ་བསྒྲིབས་པའི་ཡུལ་ལ་མངོན་སུམ་དུ་བརྗོད་པ་ཡིན་ནོ། །འདི་ནི་སྟོང་པ་ཉིད་དོ། །འདི་ནི་བདག་མེད་པའོ་ཞེས་སྙམ་པ་ཙམ་ནི་མིང་སྤྱི་ཙམ་ཡུལ་དུ་བྱེད་པ་ཡིན་གྱི། སྟོང་པ་ཉིད་དང་བདག་མེད་ཀྱི་དོན་ཁོང་དུ་ཆུད་པའི་གྲངས་སུ་མི་འགྲོའོ། །གཉིས་པ་སྒོམ་ལམ་པས་ལྷག་མ་དགུ་ཐོབ་པར་བསྟན་པ་ནི། དེ་ལྟར་ས་དང་པོར་ཆུད་པའི་བྱང་ཆུབ་སེམས་དཔའ་དེ་ས་དང་པོ་ཐོབ་པ་ཙམ་གྱིས་ཆོག་པར་མི་འཛིན་པར་ཕྱིས་སྟོང་ཉིད་མངོན་སུམ་དུ་མཐོང་ཟིན་སྒོམ་པའི་ལམ་ལ་འཇིག་རྟེན་ལས་འདས་པའི་ཡེ་ཤེས་མཉམ་གཞག་གི་བསྡུས་པ་དང་། དེའི་རྗེས་ལ་ཐོབ་པ་དག་པ་འཇིག་རྟེན་པའི་ཡེ་ཤེས་གཉིས་ཀྱིས་ཤེས་རབ་དང་ཐབས་ཀྱི་ལམ་མཉམ་རྗེས་གཉིས་སུ་བསྒོམས་པས་རིམ་གྱིས་སྒོམ་པས་སྤང་བར་བྱ་བའི་སྒྲིབ་པ་ཐོག་མ་མེད་པ་ནས་སེམས་རྒྱུད་ལ་བསག་པ་སྤང་དཀའ་བ་དང་ཕྲ་བ་ལས་ཀྱང་ཆེས་ཕྲ་བ་རིམ་གྱིས་བྱང་བར་བྱ་བའི་ཕྱིར་དང་། ཡོན་ཏན་ཁྱད་པར་ཅན་བརྒྱ་ཕྲག་བཅུ་གཉིས་དང་། སྟོང་ཕྲག་བཅུ་གཉིས་དང་། འབུམ་ཕྲག་བཅུ་གཉིས་ལ་སོགས་པ་ཡོན་ཏན་གོང་མ་ཐོབ་པར་བྱ་བའི་ཕྱིར་དུ་ས་གོང་མ་གོང་མ་རྣམས་རིམ་གྱིས་ཡོངས་སུ་སྦྱོང་སྟེ།

1-1034

མངོན་པར་རྟོགས་པའི་རྒྱན་ལས། ས་དང་པོའི་ཡོངས་སྦྱོང་བཅུ་དང་། གཉིས་པའི་ཡོངས་སྦྱོང་བརྒྱད་དང་། ས་གསུམ་པའི་ཡོངས་སྦྱོང་ལྔ་ལ་སོགས་པ་བསྟན་པ་ལྟ་བུས་ཡོངས་སུ་སྦྱོང་བའོ། །གསུམ་པ་མཐར་ཐུག་གི་ས་སངས་རྒྱས་ཐོབ་པ་ནི། ས་བཅུ་རིམ་གྱིས་སྦྱོང་བས་འབྲས་བུ་དེ་བཞིན་གཤེགས་པའི་ཡེ་ཤེས་ཀྱི་ས་ཐོབ་ཀྱི་བར་ལ་ཞུགས་ནས་དཔག་ཏུ་མེད་པའི་ཡོན་ཏན་གྱི་འབྱུང་གནས་ཐམས་ཅད་མཁྱེན་པ་ཉིད་ཀྱི་རྒྱ་མཚོར་འཇུག་ཟིན་ཅིང་། སྔར་ལམ་ཉམས་སུ་བླངས་པའི་དགོས་པ་ཡོངས་སུ་གྲུབ་པ་སངས་རྒྱས་ལ་དམིགས་ནས་ལམ་ཉམས་སུ་བླངས་པའི་འབྲས་བུ་མཐར་ཐུག་པ་ཡང་ཐོབ་སྟེ། སངས་རྒྱས་ཐོབ་པའི་ཆེད་དུ་དམིགས་ནས་ལམ་ཉམས་སུ་བླངས་པའི་འབྲས་བུ་ཐོབ་ཟིན་པའི་ཕྱིར། བཞི་པ་དེ་དག་གི་ཤེས་བྱེད་ཀྱི་ལུང་དྲང་བ་ནི། སྙིང་རྗེ་ཆེན་པོ་དང་ཀུན་རྫོབ་བྱང་ཆུབ་ཀྱི་སེམས་དང་དོན་དམ་བྱང་ཆུབ་ཀྱི་སེམས་སྟོང་ཉིད་རྟོགས་པའི་ཤེས་རབ་དང་། སྦྱིན་སོགས་ཕ་རོལ་ཏུ་ཕྱིན་པ་གོང་དུ་བསྟན་པ་འདི་ལྟར་སྒོམ་པའི་རིམ་པ་འདི་ཁོ་ནས་བསྐལ་པ་དུ་མར་བསྒོམས་ན་སེམས་ཀྱི་རྒྱུད་སྒྲིབ་པས་ཡོངས་སུ་དག་པར་འཕགས་པ་ལང་དཀར་གཤེགས་པའི་མདོ་ལས་ཀྱང་བཀའ་སྩལ་ཏོ། །ཀྱང་ནི་མདོ་གཞན་བསྡུད་པའོ། །འཕགས་པ་དགོངས་པ་ངེས་པར་འགྲེལ་བ་ལས་ཀྱང་གསུངས་སོ་ཞེས་སྦྱར་རོ། །

1-1035

མདོ་དེ་བཤད་པ་ནི། རྣལ་འབྱོར་པས་རིམ་གྱིས་ས་འོག་མ་འོག་མ་རྣམས་ཐོབ་པར་བྱས་ནས་ས་གོང་མ་གོང་མ་རྣམས་སུ་གསེར་གྱི་གཡའ་རགས་པ་རགས་པ་རྣམས་སྔར་སྦྱངས་ལ། ཕྲ་བ་ཕྲ་བ་རྣམས་ཕྱི་མ་ཕྱི་མར་སྦྱོང་བ་ལྟ་བུར་སེམས་ཀྱི་དྲི་མ་རགས་པ་རྣམས་སྔ་མར་སྦྱོང་ལ། ཕྲ་བ་རྣམས་ཕྱི་མར་སྦྱོང་བའི་རིམ་པས་སྦྱོང་ལ། མཐར་གསེར་གཡའ་མཐའ་དག་གིས་དག་པས་དྲི་མ་མེད་པ་བཞིན་དུ་སེམས་རྒྱུད་དྲི་མ་མཐའ་དག་གིས་དག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་ཡོན་ཏན་རྣམས་རིམ་གྱིས་ཐོབ་སྟེ། ཤེས་བྱ་མ་ལུས་པ་མངོན་སུམ་དུ་ཐུགས་སུ་ཆུད་པས་མངོན་པར་རྫོགས་པར་འཚང་རྒྱ་ཞེས་བྱའོ། ། ལྔ་པ་སངས་རྒྱས་ཐོབ་པའི་ཆེད་དུ་འབད་པར་གདམས་པ་ནི། སངས་རྒྱས་བཅོམ་ལྡན་འདས་ཆོས་ཀྱི་འཁོར་ལོ་རབ་ཏུ་བསྐོར་བས་གདུལ་བྱ་མངོན་པར་མཐོ་བ་དང་ངེས་པར་ལེགས་པའི་ལམ་ལ་འགོད་པའི་ཕྲིན་ལས་སྒྲུབ་པས་ན་ཡོན་ཏན་མཐའ་དག་གི་འབྱུང་གནས་སུ་གྲུབ་པ་ཡིན་ལ། འདི་མོས་པའི་ཡུལ་དུ་བྱས་ནས་གུས་པའི་དད་པ་བསྐྱེད་ལ། སངས་རྒྱས་ཀྱི་ཡོན་ཏན་སྟོབས་བཅུ་དང་མི་འཇིགས་པ་བཞི་ལ་སོགས་པ་དེ་དག་ཡོངས་སུ་སྒྲུབ་པའི་ཕྱིར་དུ་མཉམ་རྗེས་གཉིས་ཀྱི་བདག་ཉིད་ཅན་གྱི་བྱང་ཆུབ་སེམས་དཔའི་ལམ་སྒོ་ཐམས་ཅད་ཀྱིས་སྒྲུབ་པ་ལ་འབད་པར་བྱའོ། །

1-1036

གང་དད་པ་བསྐྱེད་པར་བྱ་བའི་སངས་རྒྱས་བཅོམ་ལྡན་འདས་ཇི་ལྟ་བུ་ཞེ་ན། ཐམས་ཅད་མཁྱེན་པ་ཡོན་ཏན་ཚད་དང་གྲངས་ཀྱིས་དཔག་ཏུ་མེད་པ་ཉིད་ཀྱི་རྒྱ་མཚོ་དེར་ཞུགས་པའི་སངས་རྒྱས་བཅོམ་ལྡན་འདས་ནི། དགོས་འདོད་འབྱུང་བའི་ཡིད་བཞིན་གྱི་ནོར་བུ་ལྟ་བུར་འབད་པ་དང་རྣམ་རྟོག་མེད་བཞིན་དུ་སེམས་ཅན་མཐའ་དག་གི་ཉེ་བར་འཚོ་བའི་ཡོན་ཏན་ཟད་མི་ཤེས་པ་ཉིད་ཀྱི་ཕུང་པོ་དང་ལྡན་ཞིང་། བྱང་ཆུབ་ཐོབ་པར་འདུན་པའི་སྔོན་གྱི་སྨོན་ལམ་གྱི་འབྲས་བུ་གྲུབ་པས་ན་སྔོན་གྱི་སྨོན་པ་དོན་ཡོད་པར་མཛད་ལ། དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ཅན་དུ་ནི་གྱུར་ཅིང་། མཛད་པའི་ཕྲིན་ལས་ལྷུན་གྱིས་གྲུབ་པའི་ཚུལ་དུ་གང་ལ་གང་འདུལ་གྱི་ཐབས་སྣ་ཚོགས་པ་དག་དང་། སྐུའི་སྤྲུལ་པ་སྣ་ཚོགས་པ་དག་གིས་ཁམས་གསུམ་ན་གནས་པའི་འགྲོ་བ་མ་ལུས་པའི་དོན་རྣམ་པ་ཐམས་ཅད་གང་ལ་གང་འོས་སུ་མཛད་པ་དང་། ཐུན་མོང་མ་ཡིན་པའི་ཡོན་ཏན་ཕུན་སུམ་ཚོགས་པའི་ཆ་ཤས་མ་ལུས་པ་རབ་ཀྱི་མཐར་ཕྱིན་པར་གྱུར་ཅིང་། སྒྲིབ་གཉིས་བག་ཆགས་དང་བཅས་པའི་ཉེས་པའི་དྲྭ་བ་མཐའ་དག་ནི་གཉེན་པོ་ཡེ་ཤེས་རབ་ཏུ་བརྙེས་པས་བསལ་ནས། ནམ་མཁས་ཁྱབ་ཚད་ཀྱི་སེམས་ཅན་གྱི་ཁམས་ཀྱི་མཐའ་གཏུགས་པར་ཏེ་ཟད་ཀྱི་བར་དུ་གཞན་གྱི་དོན་ལ་བཞུགས་པ་ཡིན་པར་ཤེས་པར་བྱའོ། །

1-1037

གང་གིས་ན། རྣམ་པར་དཔྱོད་པ་རྟོག་པ་དང་ལྡན་པས་སོ། །གཉིས་པ་དོན་བསྡུ་བ་ནི། བླ་ན་མེད་པའི་བྱང་ཆུབ་ནི་སྙིང་རྗེ་ཆེན་པོ་དང་། ཀུན་རྫོབ་བྱང་ཆུབ་ཀྱི་སེམས་དང་། དོན་དམ་བྱང་ཆུབ་ཀྱི་སེམས་ལས་བྱུང་བ་ཡིན་པ་དེ་ལྟ་བས་ན། བཅོམ་ལྡན་འདས་ཀྱིས་འདི་སྐད་དུ་བཀའ་སྩལ་ཏོ། །གང་ཞེ་ན། ཐམས་ཅད་མཁྱེན་པའི་ཡེ་ཤེས་དེ་ནི་ཐབས་སྙིང་རྗེ་ཆེན་པོའི་རྩ་བ་ལས་བྱུང་བ་ཡིན། བྱང་ཆུབ་ཀྱི་སེམས་ཀྱི་རྒྱུ་ལས་བྱུང་བ་ཡིན། སྦྱིན་སོགས་ཐབས་ཀྱི་མཐར་ཕྱིན་པ་ཡིན་ནོ་ཞེས་གསུངས་སོ། །སློབ་དཔོན་ཀླུ་སྒྲུབ་ཀྱིས་ཀྱང་རིན་ཆེན་ཕྲེང་བ་ལས། དེ་ཡི་རྩ་བ་བྱང་ཆུབ་སེམས། །རི་དབང་ལྷུན་པོ་ལྟར་བརྟན་དང་། །ཕྱོགས་མཐའ་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཞེས་གསུངས་སོ། །

༄། །དེ་བླང་བར་གདམས་པ་དང་། དེའི་བསོད་ནམས་བསྔོ་བ། ༆ བཞི་པ་ཆོས་བླང་བར་གདམས་པ་ནི། གང་ཟག་དམ་པ་རྣམས་ཀྱི་ཚུལ་ནི། ཡོན་ཏན་གྱིས་མི་ངོམས་ཤིང་། ང་རྒྱལ་མེད་པ་གཞན་གྱི་ལེགས་བཤད་ལེན་པ་ཡིན་ནོ་ཞེས་སྟོན་པ་ནི། གང་ཟག་དམ་པ་ཕྲག་དོག་དང་ང་རྒྱལ་ལ་སོགས་པའི་དྲི་མ་རིང་དུ་སྤངས་པ་དང་། ཆུས་ཡོངས་སུ་གང་བའི་མཚོ་ཆུས་མི་ངོམས་པ་དག་དང་འདྲ་བར་གསུང་རབ་མང་དུ་ཐོས་པའི་ཡོན་ཏན་རྣམས་ཀྱིས་མི་ངོམས་ཤིང་། གསུང་རབ་ཀྱི་དོན་ལུང་དང་རིགས་པས་རྣམ་པར་ཕྱེ་ནས་ལེགས་པར་བཤད་པ་རྣམས་རབ་ཏུ་བརྩོན་པས་འཛིན་པར་བྱེད་དོ། །

1-1038

དཔེར་ན་བྱ་ངང་པ་རབ་ཏུ་དགའ་བའི་བློས་ཆུ་དང་འོ་མ་རབ་ཏུ་འདྲེས་པ་ལས་འོ་མ་ལེན་པ་བཞིན། གང་ཟག་དམ་པ་རྣམས་ཀྱི་ཚུལ་དེ་ལྟ་ཡིན་པ་དེ་བས་ན་རྣམ་དཔྱོད་དང་ལྡན་པའི་མཁས་པ་རྣམས་ཀྱིས་ཕྱོགས་སུ་ལྷུང་བའི་ཆགས་སྡང་གིས་སེམས་དཀྲུགས་པའི་ཡིད་རིང་དུ་སྤངས་ལ་གཟུ་བོའི་བློས་བྱིས་པ་སོ་སོ་སྐྱེ་བོ་མཁས་པས་ཀྱང་ལེགས་པར་བཤད་པ་ཐམས་ཅད་བླང་བར་བྱ་བ་ཡིན་པས་ཁོ་བོའི་ལེགས་བཤད་འདི་ཡང་གཟུ་བོའི་བློས་བླང་བར་བྱའོ་ཞེས་གདམས་སོ། ། ལྔ་པ་བཤད་པའི་བསོད་ནམས་བསྔོ་བ་ནི། ཞི་བ་མྱང་འདས་ཀྱི་མཐར་མི་ལྟུང་བའི་ཐབས་སྙིང་རྗེ་ཆེན་པོ་དང་ཀུན་རྫོབ་བྱང་ཆུབ་ཀྱི་སེམས་དང་། སྲིད་པ་འཁོར་བར་མི་ལྟུང་བའི་ཐབས་དོན་དམ་བྱང་ཆུབ་ཀྱི་སེམས་གོང་དུ་བཤད་པ་དེ་ལྟར་དབུ་མའི་ལམ་བཤད་པ་ལས་བྱུང་བའི་དགེ་བ་སྟོན་ཀའི་ཟླ་འོད་ལྟར་རབ་ཏུ་དཀར་བ་གང་ཐོབ་པའི་བསོད་ནམས་དེ་ཡིས་སྐྱེ་བོ་མ་ལུས་པ་དབུ་མའི་ལམ་འདིར་ཞུགས་ནས་ཆོས་སྐུ་ཐོབ་པར་ཤོག ཅེས་པའོ། །བླ་ན་མེད་པའི་བྱང་ཆུབ་ཀྱི་ལམ་སྒོམ་པའི་རིམ་པ་ཨ་ཙཱཪྻ་ནི་སློབ་དཔོན་ནོ། །ཀ་མ་ལ་ཤཱི་ལ་ནི་པདྨའི་ངང་ཚུལ་ལོ། །སློབ་དཔོན་དེས་བར་དུ་མཛད་པའོ། །སྒྱུར་བྱེད་གང་གིས་ན། རྒྱ་གར་གྱི་མཁན་པོ་པྲཛྙཱ་ཝརྨ་སྟེ་ཤེས་རབ་གོ་ཆ་དང་།

1-1039

ལོ་ཙཱ་བ་ནི་འཇིག་རྟེན་གྱི་མིག་ཅེས་པའོ། །བན་དྷེ་ཡེ་ཤེས་སྡེས་རྒྱ་སྐད་ལས་བོད་སྐད་དུ་བསྒྱུར་ཏེ་འཆད་ཉན་གྱིས་གཏན་ལ་ཕབ་པའོ། །ལྷ་དང་ལྷ་མིན་གྲུབ་པ་གདེངས་ཅན་དབང་། །གང་གི་ཡན་ལག་མཆོག་བརྒྱུད་བདེ་གཤེགས་ཀྱི། །གསུང་རབ་ཡན་ལག་བརྒྱད་ལྡན་ཟབ་མོའི་དོན། །རབ་གསལ་ཉི་མའི་དཀྱིལ་འཁོར་པདྨོའི་གཉེན། །སྐལ་ལྡན་འགྲོ་ལ་ཐར་ལམ་ཤིང་རྟའི་སྲོལ། །རབ་ཏུ་རྣམ་འབྱེད་མཁས་པའི་གསུང་རབ་དོན། །ལུང་རིགས་འོད་ཀྱིས་ཇི་བཞིན་གསལ་བྱས་པ། །ཡོངས་སུ་བརྗོད་པའི་དགེ་ཚོགས་གང་ཐོབ་དེས། །འགྲོ་བ་སྡུག་བསྔལ་ཆུ་བོར་བྱིང་བ་ཀུན། །བླ་མེད་ཐར་པའི་གླིང་དུ་གནས་གྱུར་ཅིག །ལུས་ཀྱི་དབང་པོ་སྐྱེད་བྱེད་འགྲོ་ཚོགས་བཅས། །མ་ལུས་དགེ་ཚོགས་པདྨོ་རབ་རྒྱས་ཏེ། །དབུ་མའི་ལམ་ལས་བྱང་ཆུབ་བགྲོད་ལྡན་ཞིང་། །ཕྲིན་ལས་འོད་བརྒྱ་འགྲོ་ལ་རྒྱས་གྱུར་ཅིག །བླ་ན་མེད་པའི་བྱང་ཆུབ་ཏུ་བགྲོད་པའི་ལམ་ཞི་གནས་དང་ལྷག་མཐོང་སྒོམ་པའི་རིམ་པ་འདི་ནི་ཧྭ་ཤང་མ་ཧཱ་ཡ་ན་ལ་སོགས་པའི་རྗེས་སུ་འཇུག་པའི་ལོག་རྟོག་བསལ་བའི་དོན་དུ་སའི་མངའ་བདག་རྒྱལ་པོ་ཁྲི་སྲོང་ལྡེའུ་བཙན་གྱིས་བསྐུལ་བའི་ངོར་སློབ་དཔོན་པདྨའི་ངང་ཚུལ་གྱིས་མཛད་པའི་སྒོམ་རིམ་བར་པ་ལུང་དང་རིགས་པས་ལེགས་པར་བཤད་པ་འདི་ཐར་འདོད་ཀྱི་སྐྱེ་བོ་རྣམས་ཀྱིས་ཡོངས་སུ་བླང་བར་རིགས་སོ་ཞེས་གདམས་སོ། །

1-1040

རྒྱ་གར་ཤར་ཕྱོགས་ཀྱི་གྲོང་ཁྱེར་དམ་པའི་པཎྜི་ཏ་ཆེན་པོ་ནགས་ཀྱི་རིན་ཆེན་ཞེས་བྱ་བའི་མན་ངག་ཐུན་མོང་མ་ཡིན་པ་རྣམས་ཀྱང་འདི་ན་ཡོད་པས་ཡིད་ཆེས་པར་གྱིས་ཤིག །ཤུ་བྷཾ། འདི་ནི་ཤྲཱི་པུ་ཎྱ་མ་ཏིའི་དཔེའོ།། །།ཞུས་དག །དགེའོ།། །། སྒོམ་རིམ་གསུམ་གྱི་བརྒྱུད་པ་ནི། གྲོ་ས་བ་བླ་མ་རིན་བསོད་པ། རྗེ་བཙུན་རོང་སྟོན་ཆེན་པོ། དེས་བདག་བསོད་ནམས་བློ་གྲོས་ལ། ཡང་སྒོམ་རིམ་གསུམ་གྱི་བརྒྱུད་པ་ནི། བླ་མ་རྒྱས་སྟེངས་པ་རིན་ཆེན་འཕེལ། རྗེ་བཙུན་རོང་སྟོན་ཆེན་པོ། དེས་བདག་ལའོ། །དེ་ལ་གཉིས་ཡན་གྱི་བརྒྱུད་ཡིག་གཞན་ནས་བཙལ་ལོ།། །།