Saṃvṛtiparamārthasatyanirdeśasūtra/Full text

From Bodhicitta
Texts/Saṃvṛtiparamārthasatyanirdeśasūtra/Full text


Description
In Teaching the Relative and Ultimate Truths, the bodhisattva Mañjuśrī is summoned by Buddha Śākyamuni from a faraway buddha realm to teach in a way that demolishes all dualistic experience. As Mañjuśrī begins to teach, the main message of the sūtra unfolds as an explanation of the two truths. The general theme of Mañjuśrī's discourse is centered on the particular circumstances in Ratnaketu's buddha realm, but the message is equally applicable to the experiences of beings here in this world. (Source: 84000) The sūtra survives in Chinese as well, notably in Kumārajīva's Qingjing pini fangguang jing 清淨毘尼方廣經 (T 1489), "Vaipulya Sūtra on the Pure Vinaya." Śāntideva cites it under this "pure Vinaya" title (Tib. 'dul ba yongs su dag pa'i mdo) in chapter 1 of the Śikṣāsamuccaya. He quotes Mañjuśrī’s teaching on the five deeds with immediate results (ānantarya), which Mañjuśrī recasts as five practices that carry a bodhisattva swiftly to awakening. Śāntideva’s version is closer to the Chinese (T 24: 1079a18–b01) than to the Tibetan (ff. 256b–257a), which suggests that the Kangyur text represents a later, expanded recension. The Tibetan is in the Sūtra section of the Kangyur (Derge vol. 60, ff. 244b–266b).
Referencesaṃvṛtiparamārthasatyanirdeśasūtra [संवृतिपरमार्थसत्यनिर्देशसूत्र]. 'phags pa kun rdzob dang don dam pa'i bden pa bstan pa zhes bya ba theg pa chen po'i mdo [འཕགས་པ་ཀུན་རྫོབ་དང་དོན་དམ་པའི་བདེན་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།]. [The Noble Mahāyāna Sūtra "Teaching the Relative and Ultimate Truths" (84000)]. Kangyur, RKTSK 179 http://www.rkts.org/cat.php?id=179&typ=1.
PeopleDharmatāśīla, Jinamitra, Kumārajīva






[edit]
Source Adarshah
Date 5 November 2026
Read this text with translation by adding the Dharmamitra Chrome extension to your browser:
Legend
Headers
Root
Commentary
Quotes
60-244b

The Sūtra Teaching the Relative and Ultimate Truths

༄༅༅། །རྒྱ་གར་སྐད་དུ། ཨཱརྱ་སཾ་བྲྀ་ཏི་པ་ར་མཱརྠ་སཏྱ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཀུན་རྫོབ་དང་དོན་དམ་པའི་བདེན་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།

བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་བརྒྱད་སྟོང་གི་དགེ་སློང་གི་དགེ་འདུན་ཆེན་པོ་དང་། བྱང་ཆུབ་སེམས་དཔའ་བདུན་ཁྲི་ཉིས་སྟོང་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་རྣམས་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེ་ནས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་ཅེས་བྱ་བ་འཁོར་དེར་འདུས་པར་གྱུར་ཏེ་འདུག་པ་དེས། བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་

60-245a

འཇམ་དཔལ་གཞོན་ནུར་གྱུར་པ་ད་ལྟར་གང་ན་མཆིས་བཅོམ་ལྡན་འདས་བདག་དང་འཁོར་མང་པོ་འདི་རྣམས་ཀྱང་སྐྱེས་བུ་དམ་པ་དེས་ཆོས་བསྟན་པར་རབ་ཏུ་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་སུ་སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་འདས་པ་ན། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་ཅེས་བྱ་བ་ད་ལྟར་བཞུགས་པ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འཇམ་དཔལ་གཞོན་ནུར་གྱུར་པའང་ད་ལྟར་དེ་ན་འདུག་གོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཅི་ནས་དེ་མཚན་མ་རིག་པས་འདིར་མཆི་བར་སེམས་པ་དེ་ལྟ་བུའི་མཚན་མ་ཞིག་མཛད་ན་ལེགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཇི་ལྟར་འཇམ་དཔལ་གཞོན་ནུར་གྱུར་པ་ལས་ཐོས་པ་ལྟ་བུར་ཉན་ཐོས་དང་རང་སངས་རྒྱས་ཐམས་ཅད་དང་། བྱང་ཆུབ་སེམས་དཔའ་དམིགས་པ་ཅན་རྣམས་ལས། དེ་ལྟ་བུའི་ཆོས་བསྟན་པ་མི་ཐོས་ཏེ། དེ་བཞིན་གཤེགས་པ་མ་གཏོགས་པར་གཞན་སུ་ཡང་དེ་ལྟ་བུར་ཆོས་སྟོན་མི་ནུས་སོ། །བཅོམ་ལྡན་འདས་ནམ་འཇམ་དཔལ་ཆོས་སྟོན་པ་དེ་ན་བདུད་ཀྱི་ཁང་པ་ཐམས་ཅད་མོག་མོག་པོར་འགྱུར་རོ། །བདུད་ཐམས་ཅད་ཀྱིས་ཀྱང་གླགས་མི་རྙེད་དོ། །ཕ་རོལ་རྒོལ་བ་ཐམས་ཅད་ཀྱང་ཤིན་ཏུ་ཚར་ཆོད་པར་འགྱུར་རོ། །དམིགས་པ་ཅན་རྣམས་ཀྱང་དམིགས་པ་མ་མཆིས་པར་འགྱུར་རོ། །དམ་པའི་ཆོས་ཀྱང་ཡུན་རིང་དུ་གནས་པར་འགྱུར་རོ། །དེ་བཞིན་གཤེགས་པ་ཡང་དེ་ལ་རྗེས་སུ་ཡི་རང་ཞིང་རབ་ཏུ་གཟུང་བ་མཛད་དོ། །དེ་ནས་བཅོམ་ལྡན་འདས་ཀྱིས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གསོལ་བ་འདེབས་པར་མཁྱེན་ནས། ཞལ་གྱི་མཛོད་སྤུ་ནས་འོད་ཟེར་གཅིག་བཏང་སྟེ། དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་སྣང་བར་བྱས་ནས། སངས་

60-245b

རྒྱས་ཀྱི་ཞིང་སྟོང་ཕྲག་བཅོ་བརྒྱད་པོ་དེ་དག་ལས་ཐལ་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་དེའི་སངས་རྒྱས་ཀྱི་ཞིང་། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་དེ་སྣང་བ་ཆེན་པོས་ཁྱབ་པར་བྱས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་བཞུགས་པ་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཁ་ཅིག་གིས་གསོལ་པ། བཅོམ་ལྡན་འདས་འདི་ལྟར་འོད་ཆེན་པོ་རབ་ཏུ་གདའ་བ་འདི་སུའི་ལྟས་སྔོན་དུ་བྱུང་བ་ལགས། བཅོམ་ལྡན་འདས་རིན་པོ་ཆེའི་ཏོག་གིས་བཀའ་སྩལ་པ། རིགས་ཀྱི་བུ་སངས་རྒྱས་ཀྱི་ཞིང་འདི་ནས་ནུབ་ཕྱོགས་སུ་སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ད་ལྟ་ན་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས་ཞལ་གྱི་མཛོད་སྤུ་ནས་འོད་ཟེར་གཅིག་བཏང་བས། འོད་ཟེར་གྱི་སྣང་བ་དེས་སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་ལས་ཐལ་ནས་འཇིག་རྟེན་གྱི་ཁམས་འདི་སྣང་བ་ཆེན་པོས་སྣང་བར་བྱས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་གསོལ་པ། བཅོམ་ལྡན་འདས་ཅིའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེས་འོད་ཟེར་འདི་བཏང་། བཅོམ་ལྡན་འདས་རིན་པོ་ཆེའི་ཏོག་གིས་བཀའ་སྩལ་པ། འཇམ་དཔལ་གཞོན་ནུར་གྱུར་པ་སྦྲན་པའི་ཕྱིར་རོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་དེར་འོང་བར་བྱ་བའི་ཕྱིར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་འདས་པ་རྣམས་དང་། ལྷ་དང་། ཀླུ་དང་། གནོད་སྦྱིན་དང་། དྲི་ཟ་མང་པོ་ལ་སོགས་པ་འཁོར་དེར་ཚོགས་པ་དེ་དག་འཇམ་དཔལ་གཞོན་ནུར་གྱུར་པ་ལ་བལྟ་བ་དང་།

60-246a

ཆོས་ཉན་པར་འདོད་དོ། །དེ་ནས་དེ་བཞིན་གཤེགས་པ་རིན་པོ་ཆེའི་ཏོག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དང་། འཁོར་དེ་དག་ཐམས་ཅད་ཁྱོད་ལ་ལྟ་འདོད་ཀྱིས། འཇིག་རྟེན་གྱི་ཁམས་མི་མཇེད་ཅེས་བྱ་བ་དེར་སོང་ཤིག །འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་ཀྱང་ལྟས་སྔོན་དུ་བྱུང་བ་འདི་འཚལ་ཏོ། །དེ་ནས་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔའ་སྟོང་ཕྲག་བཅུ་དང་ལྷན་ཅིག་ཏུ་དེ་བཞིན་གཤེགས་པ་རིན་པོ་ཆེའི་ཏོག་གི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་ལ་ལན་གསུམ་དུ་བསྐོར་བ་བྱས་ནས་འདི་ལྟ་སྟེ། སྐྱེས་བུ་སྟོབས་པོ་ཆེས་ལག་པ་བསྐུམ་པ་ལས་རྐྱོང་བའམ། ལག་པ་བརྐྱང་བ་ལས་སྐུམ་པ་བཞིན་དུ་སྐད་ཅིག་ཡུད་ཙམ་ཐང་ཅིག་དེ་ཉིད་ཀྱིས་འཇིག་རྟེན་གྱི་ཁམས་མི་མཇེད་འདིར་ཕྱིན་ཏེ། དེ་བར་སྣང་ལ་ལུས་མི་སྣང་བར་འདུག་ནས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་མཆོད་པ་བྱ་བའི་ཕྱིར། མེ་ཏོག་སྔོན་མ་མཐོང་མ་ཐོས་པ། དྲི་ཞིམ་པ་ཁ་དོག་དང་ལྡན་པ་ཡིད་དུ་འོང་བའི་ཆར་ཆེན་པོ་མངོན་པར་ཕབ་སྟེ། མེ་ཏོག་གི་ཆར་ཆེན་པོ་ཕབ་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་པུས་མོ་ནུབ་ཙམ་དུ་གང་བར་གྱུར་ཏོ། །དེ་ནས་འཁོར་དེ་ཐམས་ཅད་མེ་ཏོག་གི་ཆར་ཆེན་པོ་མཐོང་ནས་ངོ་མཚར་དུ་གྱུར་ཏེ། བཅོམ་ལྡན་འདས་ལ་གསོལ་པ། བཅོམ་ལྡན་འདས་སུའི་མཐུས་འདི་ལྟ་བུར་བལྟ་ན་སྡུག་པའི་མེ་ཏོག་གི་ཆར་ཆེན་པོ་མངོན་པར་ཕབ། བཅོམ་ལྡན་འདས་ཀྱིས་བཀའ་སྩལ་པ། འདི་ནི་འཇམ་དཔལ་གཞོན་ནུར་གྱུར་པ་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ནས་བྱང་ཆུབ་སེམས་དཔའ་སྟོང་ཕྲག་བཅུ་དང་འགྲོགས་ཏེ། འཇིག་རྟེན་གྱི་ཁམས་མི་མཇེད་འདིར་ཕྱིན་ནས་དེ་དག་གི་ལུས་མི་སྣང་བར་

60-246b

དེ་བཞིན་གཤེགས་པ་ལ་མཆོད་པའི་ཕྱིར་འདི་ལྟ་བུའི་མེ་ཏོག་གི་ཆར་ཆེན་པོ་མངོན་པར་ཕབ་པོ། །འཁོར་དེ་དག་གིས་གསོལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་དེ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བདག་ཅག་གིས་བལྟའོ། །དེ་ནས་འཇམ་དཔལ་གཞོན་ནུར་གྱུར་པ། བྱང་ཆུབ་སེམས་དཔའ་སྟོང་ཕྲག་བཅུ་དང་ལྷན་ཅིག་ཏུ་བར་སྣང་ལས་བབས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། འཇམ་དཔལ་གཞོན་ནུར་གྱུར་པ་རང་རང་གི་རྫུ་འཕྲུལ་གྱིས་སྤྲུལ་པའི་སྟན་ལ་འཁོད་དོ། །དེ་ནས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཁོར་འདི་དག་ཉན་འཚལ་ན། བཅོམ་ལྡན་འདས་ཀྱིས་བཀའ་མཆིད་ཀྱི་རྒྱུད་འགའ་ཞིག་འཇམ་དཔལ་གཞོན་ནུར་གྱུར་པ་ལ་སྨྲར་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་ཁྱོད་ཉིད་ཀྱིས་གང་འདོད་པ་དྲིས་ཤིག །ལྷའི་བུས་སྨྲས་པ། འཇམ་དཔལ་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་དེའི་སངས་རྒྱས་ཀྱི་ཞིང་ན་ཆོས་བསྟན་པ་ཇི་ལྟ་བུ་དག་འབྱུང་ན་དེར་མངོན་པར་དགའ། འཇམ་དཔལ་གྱིས་སྨྲས་པ། དོན་དམ་པར་ན་འདོད་ཆགས་བསྐྱེད་པའི་ཕྱིར་ཡང་མ་ཡིན། འདོད་ཆགས་ཟད་པར་བྱ་བའི་ཕྱིར་ཡང་མ་ཡིན་ནོ། །དོན་དམ་པར་ན་ཞེ་སྡང་བསྐྱེད་པའི་ཕྱིར་ཡང་མ་ཡིན། ཞེ་སྡང་ཟད་པར་བྱ་བའི་ཕྱིར་ཡང་མ་ཡིན་ནོ། །དོན་དམ་པར་ན་གཏི་མུག་བསྐྱེད་པའི་ཕྱིར་ཡང་མ་ཡིན། གཏི་མུག་ཟད་པར་བྱ་བའི་ཕྱིར་ཡང་མ་ཡིན་ནོ། །དོན་དམ་པར་ན་ཡེ་ཤེས་བསྐྱེད་པའི་ཕྱིར་ཡང་མ་ཡིན། ཡེ་ཤེས་ཟད་པར་བྱ་བའི་ཕྱིར་ཡང་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཅིའི་ཕྱིར། འཇམ་དཔལ་གྱིས་སྨྲས་པ། ལྷའི་བུ་མི་སྐྱེ་བ་ལ་སྐྱེ་བའམ། ཟད་པ་གང་ཡང་མེད་དོ། །ལྷའི་བུ་དོན་དམ་པར་ན་བྱང་ཆུབ་སེམས་དཔའ་

60-247a

སེམས་དཔའ་ཆེན་པོ་རྣམས་ལ་རྣམ་པར་རྟོག་པ་སྐྱེས་པའམ། སྐྱེ་བའམ། སྐྱེ་བར་འགྱུར་བ་གང་ཡང་མེད་དོ། །དེ་ཅིའི་ཕྱིར་ཞེ་ན། དོན་དམ་པར་ན་ཆོས་ཐམས་ཅད་རང་བཞིན་གྱིས་མ་སྐྱེས་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པ་དེ་ཅི་ཞིག་སྤང་བའི་ཕྱིར་ཆོས་སྟོན། འཇམ་དཔལ་གྱིས་སྨྲས་པ། དོན་དམ་པར་ན་རང་བཞིན་གྱིས་མི་སྐྱེ་མི་ཟད་པའི་ཕྱིར་དེ་བཞིན་གཤེགས་པ་དེ་ཆོས་སྟོན་ཏོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་དོན་དམ་པའི་བདེན་པ་ལ་ལྷུར་བྱེད་པ་ཡིན་གྱི་ཀུན་རྫོབ་ཀྱི་བདེན་པ་ལ་ཡང་ལྷུར་བྱེད་པ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་དོན་དམ་པའི་བདེན་པ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་གལ་ཏེ་དོན་དམ་པར་ན་དོན་དམ་པའི་བདེན་པ་ལུས་དང་། ངག་དང་། ཡིད་ཀྱི་ཡུལ་གྱི་རང་བཞིན་དུ་འགྱུར་ན་ནི་དོན་དམ་པའི་བདེན་པ་ཞེས་བྱ་བའི་གྲངས་སུ་མི་འགྲོ་སྟེ། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །འོན་ཀྱང་ལྷའི་བུ་དོན་དམ་པར་ན་དོན་དམ་པའི་བདེན་པ་ནི། ཐ་སྙད་ཐམས་ཅད་ལས་ཡང་དག་པར་འདས་པ། བྱེ་བྲག་མེད་པ། མ་སྐྱེས་པ། མ་འགགས་པ། སྨྲ་བར་བྱ་བ་དང་། སྨྲ་བ་དང་། ཤེས་པར་བྱ་བ་དང་། ཤེས་པ་དང་བྲལ་བའོ། །ལྷའི་བུ་དོན་དམ་པའི་བདེན་པ་ནི་རྣམ་པ་ཐམས་ཅད་ཀྱི་མཆོག་དང་ལྡན་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་ཡུལ་གྱི་བར་ལས་ཡང་དག་པར་འདས་པ་ཡིན་ཏེ། ལྷའི་བུ་དེ་ལ་རྟོག་པ་དང་རྣམ་པར་རྟོག་པ་ཐམས་ཅད་འཇུག་པའང་མེད། ལྡོག་པའང་མེད་དོ། །དོན་དམ་པར་ན་དེ་ལ་ཕ་རོལ་ཡང་མེད། ཚུ་རོལ་ཡང་མེད། དབུས་ཀྱང་མེད་དེ། ལྷའི་བུ་འདི་ནི་དོན་དམ་པའི་བདེན་པ་ཞེས་སྒྲོ་བཏགས་ཏེ་བརྗོད་མོད་ཀྱི། ཇི་ལྟར་དོན་དམ་པའི་བདེན་པའོ་ཞེས་བྱ་བ་ལྟར་ནི་མ་ཡིན་ནོ། །ལྷའི་བུ་དོན་ནི་དོན་དམ་པར་མི་སྐྱེ་བ་སྟེ། དེ་ལ་ཐ་སྙད་ཐམས་ཅད་མི་འཇུག་གོ། །དོན་དམ་པར་གང་ལ་ཐ་སྙད་ཐམས་ཅད་མི་འཇུག་པ་དེ་ནི་ལྷའི་བུ་དོན་དམ་པའི་བདེན་པ་སྟེ། ཇི་ལྟར་དོན་དམ་པའི་བདེན་པའོ། །

60-247b

ཞེས་བརྗོད་པ་ལྟར་ན་མ་ཡིན་ནོ། །ལྷའི་བུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཀྱང་དོན་དམ་པར་ན་ཆོས་ཐམས་ཅད་དང་། སྒྲ་ཐམས་ཅད་ནི་བརྫུན་ཏེ་སླུ་བའི་ཆོས་སོ་ཞེས་བཀའ་སྩལ་ཏོ། །ལྷའི་བུས་སྨྲས་པ། འཇམ་དཔལ་ཇི་ལྟར་དེ་བཞིན་གཤེགས་པས་ཆོས་བཤད་པ་དེ་བརྫུན་དུ་མི་འགྱུར་རམ། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པ་ནི་དོན་དམ་པར་ན་བརྫུན་དུའང་མི་འཆད། བདེན་པར་ཡང་མི་འཆད་དོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་དེ་བཞིན་གཤེགས་པ་ནི་མ་སྐྱེས་པ་སྟེ། དེ་དོན་དམ་པར་ན་བདེན་པ་དང་བརྫུན་པར་མི་འཆད་དོ། །ལྷའི་བུ་དེ་ཇི་སྙམ་དུ་སེམས། དེ་བཞིན་གཤེགས་པའི་སྤྲུལ་པས་བཤད་པ་དེ་བདེན་ནམ་འོན་ཏེ་བརྫུན། ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པ་སྤྲུལ་པས་བཤད་པ་ནི་བདེན་པའང་མ་ཡིན་བརྫུན་པའང་མ་ཡིན་ནོ། །དེ་ཅིའི་ཕྱིར་ཞེ་ན། འཇམ་དཔལ་དོན་དམ་པར་ན་དེ་བཞིན་གཤེགས་པས་སྤྲུལ་པ་ལ་ཡང་དག་པར་ཡོངས་སུ་གྲུབ་པ་གང་ཡང་མེད་དོ། །འཇམ་དཔལ་གྱིས་སྨྲས་པ། ལྷའི་བུ་དེ་དེ་བཞིན་ཏེ། དེ་བཞིན་གཤེགས་པས་དོན་དམ་པར་ཆོས་ཐམས་ཅད་ཡོངས་སུ་མ་གྲུབ་པར་མཁྱེན་ཏོ། །གང་དོན་དམ་པར་ཡོངས་སུ་མ་གྲུབ་པ་དེ་ནི་དོན་དམ་པར་ན་བདེན་པ་ཞེས་ཀྱང་མི་བྱ། བརྫུན་པ་ཞེས་ཀྱང་མི་བྱའོ། །དེ་ཅིའི་ཕྱིར་ཞེ་ན། དོན་དམ་པར་ན་ཆོས་ཐམས་ཅད་མ་སྐྱེས་པའི་ཕྱིར་རོ། །ལྷའི་བུས་སྨྲས་པ། ཅི་འཇམ་དཔལ་དེ་བཞིན་གཤེགས་པ་དོན་དམ་པའི་བདེན་པ་སྟོན་ཏམ། འཇམ་དཔལ་གྱིས་སྨྲས་པ། ལྷའི་བུ་དོན་དམ་པའི་བདེན་པ་ནི་བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། གང་སྟོན་པ་དང་གང་གིས་སྟོན་པ་དང་ཅི་སྟོན་པ་དང་། གང་ལ་སྟོན་པ་དང་། ཅིའི་ཕྱིར་སྟོན་པའི་ཆོས་དེ་དག་ཐམས་ཅད་དོན་དམ་པར་ན་རབ་ཏུ་མ་སྐྱེས་པའོ། །རབ་ཏུ་མ་སྐྱེས་པའི་ཆོས་རྣམས་ཀྱིས་ནི་རབ་ཏུ་མ་སྐྱེས་པའི་ཆོས་རྣམས་བཤད་མི་ནུས་སོ། །འཇམ་དཔལ་གཞོན་ནུར་གྱུར་པས་དོན་དམ་པའི་བདེན་པ་བསྟན་པ་འདི་མི་སྟོན་པའི་ཚུལ་གྱིས་བསྟན་པ་ན་དགེ་སློང་ལྔ་བརྒྱ་ལེན་པ་མེད་པར་

60-248a

ཟག་པ་རྣམས་ལས་སེམས་རྣམ་པར་གྲོལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་བགྲང་བ་ལས་འདས་པ་རྣམས་ནི་མི་སྐྱེ་བའི་ཆོས་ལ་བཟོད་པ་མ་སྐྱེས་པའི་ཚུལ་གྱིས་བཟོད་པ་སྐྱེས་སོ། །ལྷའི་བུས་སྨྲས་པ། འཇམ་དཔལ་དོན་དམ་པའི་བདེན་པ་ལ་མོས་པར་དཀའོ། །འཇམ་དཔལ་གྱིས་སྨྲས་པ། ལྷའི་བུ་དོན་དམ་པའི་བདེན་པ་ལ་ནི་དམིགས་པ་ཅན་ཐམས་ཅད་ཀྱིས་མོས་པར་དཀའོ། །ལྷའི་བུས་སྨྲས་པ། འཇམ་དཔལ་དོན་དམ་པའི་བདེན་པ་ཁོང་དུ་ཆུད་པར་དཀའོ། །འཇམ་དཔལ་གྱིས་སྨྲས་པ། ལྷའི་བུ་མི་བརྩོན་པས་དོན་དམ་པའི་བདེན་པ་ཁོང་དུ་ཆུད་པར་དཀའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་དགེ་སློང་མངོན་པར་བརྩོན་པ་ཡིན། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་ནམ་ཡོངས་སུ་ཤེས་པ་དང་། སྤང་བ་དང་། བསྒོམ་པ་དང་། མངོན་དུ་བྱ་བའི་ཕྱིར་བརྩོན་པར་མ་གྱུར་ན་ལྷའི་བུ་དེ་ལྟར་དགེ་སློང་མི་བརྩོན་པའི་ཚུལ་གྱིས་མངོན་པར་བརྩོན་པ་ཡིན་ནོ། །དེ་ཅིའི་ཕྱིར་ཞེ་ན། གང་འདི་སྙམ་དུ་དོན་དམ་པར་འདི་ཡོངས་སུ་ཤེས་པར་བྱའོ། །འདི་སྤང་བར་བྱའོ། །འདི་བསྒོམ་པར་བྱའོ། །འདི་མངོན་དུ་བྱའོ་སྙམ་དུ་སེམས་པའི་སྦྱོར་བ་དེ་ནི་མཚན་མ་དང་བཅས་པ། སྤྲོས་པ་དང་བཅས་པ། དམིགས་པ་དང་བཅས་པ། ཉོན་མོངས་པ་དང་བཅས་པ། འཁྲུག་པ་དང་བཅས་པ། འཇིགས་པ་དང་བཅས་པ། ནད་དང་བཅས་པ། སྡུག་བསྔལ་དང་བཅས་པ། ཟུག་རྔུ་དང་བཅས་པ། དུག་དང་བཅས་པ་སྟེ། དེའི་སྦྱོར་བ་དེ་ནི་ཡང་དག་པ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཡང་དག་པར་སྦྱོར་བ་ནི་གང་ཡིན། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་མཚམས་མེད་པ་ལྔ་པོ་དག་ཀྱང་དེ་དང་མཉམ་མོ། །དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་ལྟ་བར་གྱུར་པ་རྣམས་ཀྱང་དེ་དང་མཉམ་མོ། །དོན་དམ་

60-248b

པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་སོ་སོའི་སྐྱེ་བོའི་ཆོས་རྣམས་ཀྱང་དེ་དང་མཉམ་མོ། །དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་སློབ་པའི་ཆོས་རྣམས་ཀྱང་དེ་དང་མཉམ་མོ། །དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་མི་སློབ་པའི་ཆོས་རྣམས་ཀྱང་དེ་དང་མཉམ་མོ། །དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བ་གང་དང་མཉམ་པ། དོན་དམ་པར་ན་ཡང་དག་པར་རྫོགས་པའི་སངས་རྒྱས་ཀྱི་ཆོས་རྣམས་ཀྱང་དེ་དང་མཉམ་མོ། །དོན་དམ་པར་ན་ཡང་དག་པར་རྫོགས་པའི་སངས་རྒྱས་ཀྱི་ཆོས་རྣམས་གང་དང་མཉམ་པ། དོན་དམ་པར་ན་དེ་བཞིན་ཉིད་དང་། ཆོས་ཀྱི་དབྱིངས་དང་། ཤིན་ཏུ་མི་སྐྱེ་བའང་དེ་དང་མཉམ་མོ། །དོན་དམ་པར་ན་ཡང་དག་པར་རྫོགས་པའི་སངས་རྒྱས་ཀྱི་ཆོས་རྣམས་གང་དང་མཉམ་པ། དོན་དམ་པར་ན་མྱ་ངན་ལས་འདས་པ་ཡང་དེ་དང་མཉམ་མོ། །དོན་དམ་པར་ན་མྱ་ངན་ལས་འདས་པ་གང་དང་མཉམ་པ། དོན་དམ་པར་ན་འཁོར་བ་ཡང་དེ་དང་མཉམ་མོ། །དོན་དམ་པར་ན་འཁོར་བ་གང་དང་མཉམ་པ། དོན་དམ་པར་ན་ཀུན་ནས་ཉོན་མོངས་པ་ཡང་དེ་དང་མཉམ་མོ། །དོན་དམ་པར་ན་ཀུན་ནས་ཉོན་མོངས་པ་གང་དང་མཉམ་པ། དོན་དམ་པར་ན་རྣམ་པར་བྱང་བ་ཡང་དེ་དང་མཉམ་མོ། །དོན་དམ་པར་ན་རྣམ་པར་བྱང་བ་གང་དང་མཉམ་པ། དོན་དམ་པར་ན་ཆོས་ཐམས་ཅད་ཀྱང་དེ་དང་མཉམ་མོ། །དེ་ལྟར་དོན་དམ་པར་ན་ཆོས་ཐམས་ཅད་མཉམ་པ་ཉིད་ལ་ཡང་དག་པར་སྦྱོར་བའི་དགེ་སློང་ནི་ལྷའི་བུ་དོན་དམ་པར་ན་ཡང་དག་པར་སྦྱོར་བ་ཞེས་བྱ་སྟེ་ཇི་སྐད་བརྗོད་པ་བཞིན་དུ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་མཉམ་པ་ཉིད་གང་གིས་དོན་དམ་པར་ན་རྣམ་པར་བྱང་བའི་བར་དུ་གང་དང་མཉམ་པ་དོན་དམ་པར་ན་ཆོས་ཐམས་ཅད་ཀྱང་དེ་དང་མཉམ་ཞེས་བྱ། འཇམ་དཔལ་གྱིས་སྨྲས་པ། དོན་དམ་པར་ན་ཆོས་ཐམས་ཅད་ཤིན་ཏུ་མི་འབྱུང་བར་

60-249a

མཉམ་པ་དང་། དོན་དམ་པར་ན་ཆོས་ཐམས་ཅད་ཤིན་ཏུ་མི་སྐྱེ་བར་མཉམ་པ་དང་། དོན་དམ་པར་ན་ཆོས་ཐམས་ཅད་ཤིན་ཏུ་དངོས་པོ་མེད་པར་མཉམ་པས། ལྷའི་བུ་དོན་དམ་པར་ན་ཆོས་ཐམས་ཅད་མཉམ་མོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་ཤིན་ཏུ་མི་འབྱུང་བ་ཉིད་ཀྱི་ཕྱིར་ཆོས་ཐམས་ཅད་ནི་ཐ་དད་དུ་བྱ་བ་མེད་དོ། །ལྷའི་བུ་འདི་ལྟ་སྟེ་དཔེར་ན། ཁམ་པའི་སྣོད་ཀྱི་ནང་གི་ནམ་མཁའ་གང་ཡིན་པ་དང་། རིན་པོ་ཆེའི་སྣོད་ཀྱི་ནང་གི་ནམ་མཁའ་གང་ཡིན་པ་དེ་ནི་ནམ་མཁའི་ཁམས་ཉིད་ཡིན་ཏེ། དེ་ལ་དོན་དམ་པར་ན་ཆུང་ཟད་ཀྱང་ཐ་དད་དུ་བྱ་བ་མེད་དོ། །ལྷའི་བུ་དེ་བཞིན་ཉིད་དུ་ཉོན་མོངས་པ་གང་ཡིན་པ་དེ་དོན་དམ་པར་ན་ཤིན་ཏུ་མི་འབྱུང་བ་ཉིད་དོ། །རྣམ་པར་བྱང་བ་གང་ཡིན་པ་དེ་ཡང་དོན་དམ་པར་ན་ཤིན་ཏུ་མི་འབྱུང་བ་ཉིད་དོ། །དོན་དམ་པར་ན་འཁོར་བ་ཡང་ཤིན་ཏུ་མི་འབྱུང་བ་ཉིད་དོ། །དོན་དམ་པར་ན་མྱ་ངན་ལས་འདས་པའི་བར་དུ་ཡང་ཤིན་ཏུ་མི་འབྱུང་བ་ཉིད་དོ། །འདི་ལ་དོན་དམ་པར་ན་ཐ་དད་དུ་བྱ་བ་ཆུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། །དོན་དམ་པར་ན་ཆོས་ཐམས་ཅད་ཤིན་ཏུ་མི་འབྱུང་བའི་ཕྱིར་རོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོས་འཕགས་པའི་བདེན་པ་དག་ལ་ཇི་ལྟར་བརྩོན་པར་བྱ། འཇམ་དཔལ་གྱིས་སྨྲས་པ། །ལྷའི་བུ་གལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པའི་བདེན་པ་དག་ལ་བརྩོན་པར་མི་བྱེད་ན། ཇི་ལྟར་ཉན་ཐོས་རྣམས་ལ་མི་སྟོན་པའི་ཚུལ་གྱིས་ཆོས་སྟོན། །ལྷའི་བུ་དེ་ལྟ་མོད་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོའི་བདེན་པ་སྒོམ་པ་ནི་ལྟ་བ་དང་བཅས་པའོ། །ཉན་ཐོས་ཀྱི་བདེན་པ་སྒོམ་པ་ནི་མི་ལྟ་བའོ། །དེ་ཅིའི་ཕྱིར་ཞེ་ན། ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཀུན་རྫོབ་ཏུ་སེམས་ཅན་ཐམས་ཅད་ལ་ལྟ་བ་སྟེ། །བདེན་པ་རྣམས་མི་སྒོམ་པའི་ཚུལ་གྱིས་ཀྱང་སྒོམ་མོད་ཀྱི། དངོས་པོ་མེད་པར་དམིགས་པའི་རྣམ་པས་ཡང་དག་པ་ཉིད་ཀྱི་མཐའ་དེ་ཡང་མངོན་དུ་མི་བྱེད་དོ། །ཀུན་རྫོབ་ཏུ་ཐབས་མཁས་པ་བསྒྲུབ་པའི་ཕྱིར་བྱང་ཆུབ་

60-249b

སེམས་དཔའ་སེམས་དཔའ་ཆེན་པོ་དག་བདེན་པ་རྣམས་ལ་མི་སྒོམ་པའི་ཚུལ་གྱིས་སྒོམ་མོ། །ཀུན་རྫོབ་ཏུ་འཁོར་བ་དང་། མྱ་ངན་ལས་འདས་པའི་བདེན་པ་ཡང་མི་འདོར་ལ། ཀུན་རྫོབ་ཏུ་སངས་རྒྱས་ཀྱི་ཡེ་ཤེས་ལ་སོ་སོར་བརྟག་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དག་བདེན་པ་རྣམས་ལ་མི་སྒོམ་པའི་ཚུལ་གྱིས་ཀྱང་སྒོམ་མོ། །ལྷའི་བུ་འདི་ལྟ་སྟེ། དཔེར་ན་འདྲོན་པ་མང་པོ་བཅིངས་ནས་སྐྱེས་བུ་གཅིག་བྲོས་ཏེ། འདྲོན་པ་མང་པོའི་ནང་ནས་བྱུང་ནས། འབྲོག་དགོན་པར་ཞུགས་པ་དང་། དེ་ཡིད་འཇིགས་ཤིང་སྐྲག་ནས་ཕྱིར་མི་ལྡོག་པར་འབྲོག་དགོན་པ་ལས་འདས་སོ། །ལྷའི་བུ་དེ་བཞིན་དུ་ཉན་ཐོས་རྣམས་འཁོར་བས་འཇིགས་ཤིང་སྐྲག་ནས་འཁོར་བ་ལས་བྲོས་ཏེ། འཇིག་རྟེན་འདིར་ཕྱིར་མི་འོང་ཞིང་གཅིག་པུ་གཉིས་སུ་མེད་པར་བདེན་པ་སྒོམ་སྟེ། ཐབས་ཀྱི་རིགས་པ་དང་བྲལ་བས་སེམས་ཅན་ཐམས་ཅད་ལ་མི་ལྟ་བ་ནས་ཐམས་ཅད་མཁྱེན་པའི་ཡེ་ཤེས་ཀྱི་བར་ལ་མི་ལྟ་བའོ། །ལྷའི་བུ་འདི་ལྟ་སྟེ། དཔེར་ན་དེད་དཔོན་གཡོག་མང་པོ་ལམ་རྒྱགས་ཐམས་ཅད་འབྱོར་པ། ཟོང་ཆེན་པོ་བསྡུ་བའི་ཕྱིར་འགྲོའོ་སྙམ་ནས་སྐྱེ་བོ་མང་པོ་བསྡུས་ཏེ། དེ་འཇིགས་ཤིང་སྐྲག་པ་མེད་པར་འབྲོག་དགོན་པ་དེ་ལས་འདའོ། །ལྷའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་ཀུན་རྫོབ་ཏུ་དེད་དཔོན་ཆེན་པོ་ལྟར་འཇིག་རྟེན་གྱི་སྤྱོད་པས། སེམས་ཅན་ཐམས་ཅད་ཉེ་བར་འཚོ་བ། གཡོག་མང་པོ་སྙིང་རྗེ་ཆེན་པོའི་སྦྱོར་བ་ཅན། དགེ་བའི་རྩ་བ་ཐམས་ཅད་ཀྱི་ལམ་རྒྱགས་འབྱོར་པ། ཕ་རོལ་ཏུ་ཕྱིན་པ་དྲུག་དང་། བསྡུ་བའི་དངོས་པོས་ཡོངས་སུ་བཟུང་ཞིང་བླ་ན་མེད་པའི་བསོད་ནམས་དང་ཡེ་ཤེས་ཡང་དག་པར་བསྡུ་བའི་ཁེ་ཆེན་པོ་དང་ལྡན་པ་ཡང་སེམས་ཅན་གྱི་ཁམས་ཐམས་ཅད་ཀྱི་དོན་བྱེད་ཅིང་། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་སྟེ། སེམས་ཅན་ཐམས་ཅད་ཉེ་བར་འཚོ་བར་གྱུར་ཅིང་ཐབས་ལ་མཁས་པས་བདེན་པ་རྣམས་ལ་སྒོམ་མོ། །ལྷའི་བུ་འདི་ལྟ་སྟེ། དཔེར་ན་ཤ་ནའི་རས་ལ་མེ་ཏོག་ཙམ་པ་ཀ་དང་མེ་ཏོག་འབར་ཤི་ཀས་བསྒོས་ན་དེའི་དྲི་མྱུར་དུ་ཡལ་བར་འགྱུར་རོ། །

60-250a

ལྷའི་བུ་དེ་བཞིན་དུ་ཉན་ཐོས་ཀྱི་བདེན་པ་ལ་སྒོམ་པ་ནི་ཡུན་ཐུང་བར་བལྟ་སྟེ། དེ་མྱུར་དུ་མྱ་ངན་ལས་འདས་ནས་སངས་རྒྱས་ཀྱི་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་དང་། ཤེས་རབ་དང་ཡེ་ཤེས་ཀྱི་དྲི་ཡང་མི་འབྱིན། བག་ཆགས་ཀྱི་མཚམས་སྦྱོར་བའི་ཉོན་མོངས་པ་ཡང་སྤོང་མི་ནུས་སོ། །ལྷའི་བུ་འདི་ལྟ་སྟེ། དཔེར་ན་ཡུལ་ཀ་ཤི་ཀའི་གོས་རིན་པོ་ཆེ་ལ། མི་དང་ལྷའི་སྤོས་དང་། མེ་ཏོག་གི་དྲིས་བསྐལ་པ་ཆེན་པོ་བརྒྱ་སྟོང་དུ་བསྒོས་ན། དེའི་ལྷའི་དྲི་དེ་རྟག་ཏུ་བྲོ་ཞིང་། དྲི་གཙང་མས་ལྷ་དང་མི་ཟིལ་གྱིས་གནོན་ཏོ། །ལྷའི་བུ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོའི་བདེན་པ་སྒོམ་པ་མི་སྒོམ་པའི་ཚུལ་གྱིས་བསྐལ་པ་བརྒྱ་སྟོང་གྲངས་མེད་པར་བསྒོམས་པ་ནི། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་མ་ཐོབ་ཀྱི་བར་དུ་བར་མ་དོར་དེ་ཡོངས་སུ་མྱ་ངན་ལས་མི་འདའ་ཞིང་འདི་ལྟ་སྟེ། རྣམ་པ་ཐམས་ཅད་ཀྱི་མཆོག་དང་ལྡན་པ་ཐམས་ཅད་མཁྱེན་པའི་ཡེ་ཤེས་ཀྱི་དྲི་མི་དམིགས་པའི་ཚུལ་གྱིས་ཤིན་ཏུ་དྲི་ཞིམ་པར་འགྱུར་རོ། །འཇིག་རྟེན་གྱི་ཐ་སྙད་དུ་ཉོན་མོངས་པའི་བག་ཆགས་ཐམས་ཅད་ཀྱང་སྤོང་ཞིང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་རྣམས་ཀྱང་འདུ་བར་འགྱུར་རོ། །དེ་ནས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་དེའི་ཉན་ཐོས་ཀྱི་དགེ་འདུན་དེ་ཅི་འདྲ། འཇམ་དཔལ་གྱིས་སྨྲས་པ། དོན་དམ་པར་ན་དད་པའི་རྗེས་སུ་འགྲོ་བ་ཡང་མ་ཡིན། གཞན་ལ་དད་པས་འགྲོ་བ་ཡང་མ་ཡིན་ནོ། །དོན་དམ་པར་ན་རིགས་ཀྱི་རྗེས་སུ་འགྲོ་བ་ཡང་མ་ཡིན་ཏེ། དོན་དམ་པར་ན་དེ་བཞིན་གཤེགས་པའི་རིགས་ཀྱང་མི་གཏོང་ངོ་། །དོན་དམ་པར་ན་ཆོས་ཀྱི་རྗེས་སུ་འགྲོ་བ་ཡང་མ་ཡིན་ཏེ། དོན་དམ་པར་ན་ཆོས་གང་ཡང་མི་དམིགས་སོ། །དོན་དམ་པར་ན་བརྒྱད་པ་ཡང་མ་ཡིན་ཏེ། ཀུན་རྫོབ་ཏུ་ན་ལོག་པའི་ཆོས་བརྒྱད་དང་ཡང་

60-250b

བྲལ་ལོ། །དོན་དམ་པར་ན་རྒྱུན་དུ་ཞུགས་པ་ཡང་མ་ཡིན་ཏེ། འཇིག་རྟེན་གྱི་ཐ་སྙད་ཀྱི་བདེན་པར་ན་ངན་སོང་ཐམས་ཅད་ལས་ཀྱང་འདས་སོ། །དོན་དམ་པར་ན་ལན་ཅིག་ཕྱིར་འོང་བ་ཡང་མ་ཡིན་ཏེ། ཀུན་རྫོབ་ཏུ་ན་སེམས་ཅན་ཡོངས་སུ་སྨིན་པར་བྱ་བའི་ཕྱིར་ཡང་འོང་ངོ་། །དོན་དམ་པར་ན་ཕྱིར་མི་འོང་བ་ཡང་མ་ཡིན་ཏེ། ཀུན་རྫོབ་ཏུ་ན་ཆོས་ཐམས་ཅད་ལས་འོང་བ་མེད་དོ། །དོན་དམ་པར་ན་དགྲ་བཅོམ་པ་ཡང་མ་ཡིན་ཏེ། འཇིག་རྟེན་གྱི་ཐ་སྙད་དུ་ན་ལྷ་དང་བཅས་པའི་འཇིག་རྟེན་གྱིས་བླ་ན་མེད་པའི་མཆོད་པར་འོས་པ་ཡང་ཡིན་ནོ། །དོན་དམ་པར་ན་ཉན་ཐོས་ཀྱང་མ་ཡིན་ཏེ། མི་དམིགས་པའི་ཚུལ་གྱིས་སངས་རྒྱས་བཅོམ་ལྡན་འདས་ཐམས་ཅད་ལས་ཐོས་པ་ཡང་འཛིན་ཏོ། །དོན་དམ་པར་ན་འདོད་ཆགས་དང་བྲལ་བ་ཡང་མ་ཡིན་ཏེ། ཀུན་རྫོབ་ཏུ་ན་འདོད་ཆགས་ཀྱི་ཡོངས་སུ་གདུང་བས་ཀྱང་མི་གདུང་ངོ་། །དོན་དམ་པར་ན་ཞེ་སྡང་དང་བྲལ་བ་ཡང་མ་ཡིན་ཏེ། ཀུན་རྫོབ་ཏུ་ན་ཞེ་སྡང་གི་ཡོངས་སུ་གདུང་བས་ཀྱང་མི་གདུང་ངོ་། །དོན་དམ་པར་ན་གཏི་མུག་དང་བྲལ་བ་ཡང་མ་ཡིན་ཏེ། ཀུན་རྫོབ་ཏུ་ན་ཆོས་ཐམས་ཅད་མུན་པ་མུན་ནག་དང་བྲལ་བའོ། །དོན་དམ་པར་ན་ཉོན་མོངས་པ་དང་བྲལ་བ་ཡང་མ་ཡིན་ཏེ། ཀུན་རྫོབ་ཏུ་ན་སེམས་ཅན་ཐམས་ཅད་ཀྱི་ཉོན་མོངས་པ་གདུལ་བའི་ཕྱིར་ཡང་བརྩོན་ནོ། །དོན་དམ་པར་ན་ཐོག་མ་ནས་མ་སྐྱེས་པ་ངེས་པར་ཞུགས་ཀྱང་ཀུན་རྫོབ་ཏུ་ན་བསམས་བཞིན་དུ་སྲིད་པ་ལེན་ཏོ། །ཀུན་རྫོབ་ཏུ་ན་འཁོར་བ་ཡང་ཡོངས་སུ་འཛིན་མོད་ཀྱི། དོན་དམ་པར་ན་ཆོས་གང་ཡང་ཡོངས་སུ་འཛིན་པ་དང་གཏོང་བ་ཡང་མེད་དོ། །དེ་དོན་དམ་པར་ན་ཆོས་ཐམས་ཅད་ཤིན་ཏུ་དྲན་པ་དང་བྲལ་བར་མི་མཐོང་བས་མཐོང་བ་སྟེ། ཀུན་རྫོབ་ཏུ་ན་དྲན་པ་ཉེ་བར་གཞག་པ་རྣམས་ཀྱང་སྒོམ་མོ། །དེ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་མ་འགགས་པར་མི་ཤེས་པའི་ཚུལ་གྱིས་ཀྱང་རབ་ཏུ་ཤེས་ལ། འཇིག་རྟེན་གྱི་སྤྱོད་པར་ན་ཡང་དག་པར་སྤོང་བ་རྣམས་ཀྱང་སྒོམ་མོ། །དེ་དོན་དམ་པར་ན་ལུས་དང་སེམས་མེད་པ་ཡང་འཇིག་རྟེན་གྱི་ཀུན་རྫོབ་ཀྱི་བདེན་པར་ན་རྫུ་འཕྲུལ་གྱི་རྐང་པ་རྣམས་ཀྱང་སྒྲུབ་བོ། །དེ་དོན་དམ་པར་ན་

60-251a

དབང་པོ་ཐམས་ཅད་དང་བྲལ་ཡང་ཀུན་རྫོབ་ཏུ་ན་དབང་པོ་རྣམས་ཀྱང་སྒྲུབ་བོ། །དེ་དོན་དམ་པར་ན་ཆོས་ཐམས་ཅད་རབ་ཏུ་དངོས་པོ་མེད་པར་མི་མཐོང་བའི་ཚུལ་གྱིས་མཐོང་ཡང་ང་རྒྱལ་ཅན་དམིགས་པ་ཅན་ཐམས་ཅད་ཚར་གཅོད་པའི་ཕྱིར་མི་སྒོམ་པའི་ཚུལ་གྱིས་སྟོབས་ཀྱང་སྒོམ་མོ། །དེ་དོན་དམ་པར་ན་ཆོས་ཐམས་ཅད་ཤིན་ཏུ་དངོས་པོ་མེད་པར་ཁོང་དུ་ཆུད་པར་བྱ་བའི་ཕྱིར་མི་སྒོམ་པའི་ཚུལ་གྱིས་བྱང་ཆུབ་ཀྱི་ཡན་ལག་རྣམས་ཀྱང་སྒོམ་མོ། །དེ་དོན་དམ་པར་ན་ཤིན་ཏུ་དངོས་པོ་མེད་ཀྱང་ཀུན་རྫོབ་ཏུ་ན་སྒོམ་པའི་ཚུལ་གྱིས་ལམ་ཡང་སྒོམ་མོ། །དེ་དོན་དམ་པར་ན་ཡང་དག་པའི་མཐའ་ལ་ཞི་གནས་མངོན་པར་སྒྲུབ་བོ། །དེ་དོན་དམ་པར་ན་ལྷག་མཐོང་ཤིན་ཏུ་མི་སྐྱེ་བར་མི་སྒོམ་པའི་ཚུལ་གྱིས་མཐོང་ངོ་། །དེ་དོན་དམ་པར་ན་མ་རིག་པ་ཟད་པ་ཉིད་དུ་མི་དམིགས་པའི་ཚུལ་གྱིས་རིག་པ་སྐྱེད་དེ། དོན་དམ་པར་ན་ཟད་པའམ་སྐྱེ་བ་མི་དམིགས་སོ། །དེ་ཤའི་མིག་གིས་སེམས་ཅན་ཐམས་ཅད་དང་། སངས་རྒྱས་ཀྱི་ཞིང་ཐམས་ཅད་ཀྱང་མཐོང་ལ་དེ་དོན་དམ་པར་ན་ཅི་ཡང་མི་མཐོང་ངོ་། །དེ་ལྷའི་མིག་གིས་སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཡང་དག་པ་ཇི་ལྟ་བ་བཞིན་དུ་མཐོང་ཡང་དོན་དམ་པར་ན་ཅི་ཡང་མི་མཐོང་ངོ་། །དེ་ཤེས་རབ་ཀྱི་མིག་གིས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་། གཡོ་བ་རྣམས་ཡང་དག་པ་ཇི་ལྟ་བ་བཞིན་དུ་ཤེས་ཀྱང་དོན་དམ་པར་ན་ཅི་ཡང་མི་ཤེས་སོ། །དེ་ཆོས་ཀྱི་མིག་གིས་ཆོས་ཐམས་ཅད་ཡང་དག་པ་ཇི་ལྟ་བ་བཞིན་དུ་མཐོང་ཡང་དོན་དམ་པར་ན་ཆོས་ཅི་ཡང་མི་མཐོང་ངོ་། །དེ་སངས་རྒྱས་ཀྱི་སྤྱན་གྱིས་སངས་རྒྱས་ཀྱི་མཛད་པ་ཐམས་ཅད་བྱེད་ཀྱང་དོན་དམ་པར་ན་ཅི་ཡང་མི་བྱེད་དོ། །དེ་ལྷའི་རྣ་བས་སངས་རྒྱས་བཅོམ་ལྡན་འདས་ཐམས་ཅད་ཀྱིས་ཆོས་བསྟན་པ་ཐོས་ཀྱང་དོན་དམ་པར་ན་ཅི་ཡང་མི་ཐོས་སོ། །དེ་སེམས་གཅིག་གིས་སེམས་ཅན་ཐམས་ཅད་ཀྱི་སེམས་ལ་ལྟ་ཡང་དོན་དམ་པར་ན་ཅི་ཡང་མི་ལྟའོ། །དེ་རྗེས་སུ་དྲན་པའི་ཡེ་ཤེས་ཀྱིས་སྔོན་གྱི་མཐའ་ཡང་རྗེས་སུ་དྲན་མོད་ཀྱི་དོན་དམ་པར་ན་ཅི་ཡང་མི་དྲན་ནོ། །དེ་རྫུ་འཕྲུལ་གྱིས་སངས་རྒྱས་ཀྱི་ཞིང་བསམ་གྱིས་མི་ཁྱབ་པར་འགྲོ་ཡང་དོན་དམ་པར་ན། འོང་བའམ་འགྲོ་བ་མེད་དོ། །དེ་ནི་ཟག་པ་ཟད་ཀྱང་དོན་དམ་

60-251b

པར་ན་ཟད་པའི་ཆོས་ཅན་མ་ཡིན་ནོ། །སྣང་ཡང་སྣང་ལ་དོན་དམ་པར་ན་དེའི་ལུས་ཡོངས་སུ་གྲུབ་པ་ཡང་མེད་དོ། །སྨྲ་ཡང་སྨྲ་ལ་དོན་དམ་པར་ན་ཡི་གེར་ཡང་མི་བརྗོད་དོ། །སེམས་ཀྱང་སེམས་ལ་དོན་དམ་པར་ན་སེམས་དང་སེམས་ལས་བྱུང་བའི་ཆོས་སུ་བརྗོད་པར་བྱ་བ་མ་ཡིན་ནོ། །དོན་དམ་པར་ན་གཟུགས་སུ་ཡང་མི་སྣང་ལ་ཀུན་རྫོབ་ཏུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ནི་བརྒྱན། དཔེ་བྱད་བཟང་པོས་ནི་སྤྲས། བསོད་ནམས་དང་ཡེ་ཤེས་ཀྱི་ཚོགས་ཀྱིས་ནི་བརྒྱན། གཟི་བརྗིད་ནི་བསྙེན་པར་དཀའ། བརྗོད་པ་ནི་རྣམ་པར་བསྒྲགས། ཚུལ་ཁྲིམས་ཀྱི་བྱུག་པས་ནི་བྱུགས། ངན་དུ་སྨྲ་བའི་ཚིག་རྣམས་ཀྱིས་ནི་ཀུན་ནས་ཉོན་མོངས་པར་གྱུར་པ་མེད། མངོན་པར་ཤེས་པས་ནི་རྣམ་པར་རོལ། ཐོས་པས་ནི་རྣམ་པར་ཤིགས། སྤོབས་པས་ནི་རབ་ཏུ་སྒྲོག །ཀུན་རྫོབ་ཏུ་ན་ཡེ་ཤེས་ཀྱིས་ནི་རྣམ་པར་འཕྲུལ། ཡེ་ཤེས་ཀྱི་འོད་ཀྱིས་ནི་མུན་པ་མུན་ནག་སེལ། ཤེས་རབ་ཀྱིས་ནི་སྣང་བར་བྱེད། མཐའ་ཡས་པར་བསྟན་པ་ནི་རྟོགས་པར་ཁོང་དུ་ཆུད་དོ། །ཀུན་རྫོབ་ཏུ་ན་སེམས་ཅན་ཐམས་ཅད་ཀྱི་ནི་སྐྱབས། སངས་རྒྱས་བཅོམ་ལྡན་འདས་རྣམས་ཀྱིས་ནི་རྟག་ཏུ་གཟིགས། ཉན་ཐོས་དང་རང་སངས་རྒྱས་དང་། མུ་སྟེགས་ཅན་དམིགས་པ་ཅན་ཐམས་ཅད་ཀྱིས་ནི་མི་བལྟ་ཞིང་བྱང་ཆུབ་ཀྱི་ཕྱིར་ནི་རྟག་ཏུ་བལྟ་བ་སྟེ། ཀུན་རྫོབ་ཏུ་ན་བསྟན་པ་ནི་ཟད་མི་ཤེས། དྲན་པ་ནི་རྒྱ་མཚོ་དང་འདྲ། ཏིང་ངེ་འཛིན་ནི་རི་རབ་དང་མཚུངས། བཟོད་པ་ནི་ས་དང་འདྲའོ། །ཀུན་རྫོབ་ཏུ་ན་རྣམ་པར་རྟོག་པ་ཐམས་ཅད་སེལ་བའི་ཕྱིར་དཔའ་བའོ། །མི་ཤེས་པའི་མུན་པ་མུན་ནག་སེལ་བའི་ཕྱིར་ཉི་མ་ལྟ་བུའོ། །རབ་ཏུ་སྣང་བའི་ཕྱིར་ཟླ་བ་དང་འདྲའོ། །ཀུན་རྫོབ་ཏུ་ན་འདུ་བའི་ཕྱིར་དབང་པོ་དང་མཚུངས་སོ། །ཀུན་རྫོབ་ཏུ་ན་སེམས་ལ་དབང་བྱེད་པའི་ཕྱིར་ཚངས་པ་དང་འདྲའོ། །ཀུན་རྫོབ་ཏུ་ན་ནམ་མཁའ་ལ་དབང་བྱེད་པའི་ཕྱིར་མི་མཉམ་པ་དང་མཉམ་པའོ། །ཀུན་རྫོབ་ཏུ་ན་ཐམས་ཅད་རྗེས་སུ་སོང་ཡང་དོན་དམ་པར་ན་གང་དུ་སོང་བའམ་འོངས་པའམ། འདུག་པ་མེད་དོ། །དེ་ཅིའི་ཕྱིར་ཞེ་ན། དོན་དམ་པར་ན་ཆོས་ཐམས་ཅད་ཤིན་ཏུ་མ་བྱུང་བའི་ཕྱིར་རོ། །ལྷའི་བུ་བཅོམ་ལྡན་འདས་དེ་བཞིན་གཤེགས་པ་

60-252a

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་དེའི་ཉན་ཐོས་ཀྱི་དགེ་འདུན་ནི་དེ་དང་འདྲ་སྟེ། དེ་བས་ཀྱང་ལྷག་པར་བསམ་གྱིས་མི་ཁྱབ་པའི་ཆོས་དང་ཡང་ལྡན་ནོ། །འཇམ་དཔལ་གཞོན་ནུར་གྱུར་པས་མི་དམིགས་པའི་ཚུལ་གྱིས་བསྟན་པ་འདི་བཤད་པ་ན་དགེ་སློང་ལྔ་བརྒྱ་དང་། དགེ་བསྙེན་ལྔ་བརྒྱ་དང་། ལྷའི་བུ་ལྔ་སྟོང་དམིགས་པ་ཅན་དེ་དག་ཐམས་ཅད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་དེའི་ཉན་ཐོས་སུ་གྱུར་ཅིག །འཇམ་དཔལ་གྱིས་སྨྲས་པ། ཀྱེ་གྲོགས་པོ་དག་སངས་རྒྱས་ཀྱི་ཞིང་དེར་དམིགས་པ་ཅན་ཐམས་ཅད་མི་སྐྱེའོ། །ཀྱེ་གྲོགས་པོ་དག་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་མེད་པ་རྣམས་ནི་མི་སྐྱེ་བའི་ཚུལ་གྱིས་དེར་སྐྱེའོ། །ཀྱེ་གྲོགས་པོ་དག་གལ་ཏེ་ཁྱེད་ཀྱང་དེར་འདོད་ན་ཁྱེད་ཀྱིས་མི་དམིགས་པའི་ཚུལ་གྱིས། ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྩོན་པར་གྱིས་ཤིག །ཀྱེ་གྲོགས་པོ་དག་ཁྱེད་ནམ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་མི་དམིགས་པའི་ཚུལ་གྱིས་བརྩོན་པར་གྱུར་པ་དེའི་ཚེ། གྲོགས་པོ་དག་ཁྱེད་ལ་རྣམ་པའི་མཆོག་ཐམས་ཅད་དང་ལྡན་པ། ཐམས་ཅད་མཁྱེན་པའི་ཡེ་ཤེས་ཀྱང་རྙེད་པར་མི་དཀའ་ན། སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བ་ལྟ་སྨོས་ཀྱང་ཅི་དགོས། ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་ཡང་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཉན་ཐོས་ཀྱི་འདུལ་བ་ནི་ཇི་ལྟ་བུ། བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བ་ནི་ཇི་ལྟ་བུ། འཇམ་དཔལ་གྱིས་སྨྲས་པ། ལྷའི་བུ་ཁམས་གསུམ་གྱིས་སྐྲག་པས་བཏུལ་བ་ནི་ཉན་ཐོས་ཀྱི་འདུལ་བའོ། །དགེ་བའི་རྩ་བའི་ཚོགས་ཐམས་ཅད་བསགས་ཤིང་སེམས་ཅན་ཐམས་ཅད་དབུགས་འབྱིན་པ་དང་། ཁམས་གསུམ་དུ་བསམས་བཞིན་དུ་སྐྱེ་བས་བཏུལ་བ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །ཉོན་མོངས་པ་ཐམས་ཅད་ལ་སྡང་བ་ནི་ཉན་ཐོས་ཀྱི་འདུལ་བའོ། །སེམས་

60-252b

ཅན་ཐམས་ཅད་ཀྱི་ཉོན་མོངས་པ་སྤོང་བའི་ཕྱིར་རྗེས་སུ་བཏུལ་བ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །ཕྱོགས་གཅིག་རིག་པ་ནི་ཉན་ཐོས་ཀྱི་འདུལ་བའོ། །ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་ཐམས་ཅད་རིག་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །བདུད་ཐམས་ཅད་ལ་བཏང་སྙོམས་པ་ནི་ཉན་ཐོས་ཀྱི་འདུལ་བའོ། །ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་སུ་གཏོགས་པའི་བདུད་ཀྱི་རིགས་ཐམས་ཅད་དཀྲུགས་ཤིང་། ཕྱིར་རྒོལ་བ་ཐམས་ཅད་འཇོམས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །བདག་གི་རྒྱུད་གསལ་བར་བྱེད་པ་ནི་ཉན་ཐོས་ཀྱི་འདུལ་བའོ། །སེམས་ཅན་ཐམས་ཅད་ཀྱི་རྒྱུད་གསལ་བར་བྱེད་ཅིང་། ཐམས་ཅད་མཁྱེན་པའི་ཡེ་ཤེས་སྣང་བར་བྱེད་པ་དང་། ཆོས་ཐམས་ཅད་ལ་བསྒྲིབས་པ་མེད་པའི་ཡེ་ཤེས་མཐོང་བ་སྣང་བར་བྱེད་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །རང་གི་སེམས་ཀྱིས་བསམས་པ་ནི་ཉན་ཐོས་ཀྱི་འདུལ་བའོ། །འདས་པ་དང་། མ་བྱོན་པ་དང་། ད་ལྟར་གྱི་སངས་རྒྱས་ཐམས་ཅད་ཀྱི་དགོངས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །རྡོ་ཆག་པའི་འཕྲོ་མི་འབྱོར་པ་ལྟ་བུ་ནི་ཉན་ཐོས་ཀྱི་འདུལ་བའོ། །གསེར་དང་། དངུལ་ཆག་པའི་འཕྲོ་འབྱོར་པ་ལྟ་བུ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །སངས་རྒྱས་ཀྱི་ཆོས་ཐམས་ཅད་དང་། ཐབས་མཁས་པ་དང་བྲལ་བ་ནི་ཉན་ཐོས་ཀྱི་འདུལ་བའོ། །ཐབས་མཁས་པ་ཆེན་པོ་དང་། སངས་རྒྱས་ཀྱི་ཆོས་ཐམས་ཅད་དུ་བསྡུ་བས་བསྡུས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །སྟོབས་བཅུ་དང་། མི་འཇིགས་པ་དང་། མ་འདྲེས་པ་དང་། ཐམས་ཅད་མཁྱེན་པའི་ཡེ་ཤེས་དང་བྲལ་བ་ནི་ཉན་ཐོས་ཀྱི་འདུལ་བའོ། །སྟོབས་བཅུ་དང་། མི་འཇིགས་པ་དང་། མ་འདྲེས་པ་དང་། ཐམས་ཅད་མཁྱེན་པའི་ཡེ་ཤེས་སུ་བསྡུ་བས་བསྡུས་པ་ནི་ཀུན་རྫོབ་ཏུ་ན་བྱང་ཆུབ་

60-253a

སེམས་དཔའ་སེམས་དཔའ་ཆེན་པོའི་འདུལ་བའོ། །མེས་ཚིག་པ་ལས་འབྲོས་པ་ལྟ་བུ་ནི་ཉན་ཐོས་ཀྱི་འདུལ་བའོ། །སྐྱེད་མོས་ཚལ་དང་། གཞལ་མེད་ཁང་ལྟ་བུར་ཆོས་ཀྱི་དགའ་བས་དགའ་བ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །བག་ཆགས་ཀྱི་རྒྱུན་མ་ཆད་པ་ནི་ཉན་ཐོས་ཀྱི་འདུལ་བའོ། །བག་ཆགས་ཐམས་ཅད་ཡང་དག་པར་བཅོམ་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །ལྷའི་བུ་མདོར་ན་ཚད་དུ་གཏོགས་པ་ཚད་ཀྱི་ཆོས་ཀྱིས་དྲངས་པ་ནི་ཉན་ཐོས་ཀྱི་འདུལ་བའོ། །ཚད་དུ་གཏོགས་པ་མ་ཡིན་པ་ཚད་མེད་པའི་ཆོས་ཀྱིས་དྲངས་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བའོ། །ཚད་ཡོད་པའི་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ཐོབ་པར་བྱེད་པ་ནི་ཉན་ཐོས་ཀྱི་འདུལ་བའོ། །ཚད་ཡོད་པ་མ་ཡིན་པ། ཚད་མེད་པའི་ཡོན་ཏན་དང་ལྡན་ཞིང་། ཚད་མེད་པའི་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་ཐོབ་པར་བྱེད་པ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམ་པར་གྲོལ་བའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། འཇམ་དཔལ་ཁྱོད་ཀྱིས་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་འདུལ་བ་ལེགས་པར་བཤད་པ་ལེགས་སོ་ལེགས་སོ། །འཇམ་དཔལ་ཡང་འདི་ལྟར་དོན་དེ་ཉིད་བསྟན་པའི་ཕྱིར་ཁྱོད་ལ་དཔེ་བསྟན་ཏོ། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་གཉིས་ཤིག་ཡོད་ལ། དེ་ལས་སྐྱེས་བུ་གཅིག་ནི་བ་ལང་གི་རྗེས་ཀྱི་བསྔགས་པ་སྨྲ། སྐྱེས་བུ་གཅིག་ནི་རྒྱ་མཚོ་ཆེན་པོའི་བསྔགས་པ་སྨྲ་ན། འཇམ་དཔལ་དེ་ཇི་སྙམ་དུ་སེམས། སྐྱེས་བུ་དེས་བ་ལང་གི་རྗེས་ཀྱི་བསྔགས་པ་ཇི་སྙེད་ཅིག་བརྗོད་ནུས། འཇམ་དཔལ་གྱིས་གསོལ་པ། བཅོམ་ལྡན་འདས་བ་ལང་གི་རྗེས་

60-253b

ཐམས་ཅད་ཀྱང་ཆུང་ན། དེའི་བསྔགས་པ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་བ་ལང་གི་རྗེས་ཆུང་བ་ལྟར་ཉན་ཐོས་ཀྱི་འདུལ་བར་བལྟའོ། །འཇམ་དཔལ་འདི་ཇི་སྙམ་དུ་སེམས། སྐྱེས་བུ་ཅིག་ཤོས་དེས་རྒྱ་མཚོ་ཆེན་པོའི་བསྔགས་པ་ཇི་ཙམ་ཞིག་བརྗོད་ནུས། འཇམ་དཔལ་གྱིས་གསོལ་པ། བཅོམ་ལྡན་འདས་རྒྱ་མཚོ་ཆེན་པོའི་བསྔགས་པ་ནི་ཤིན་ཏུ་མང་སྟེ། དཔག་ཏུ་མ་མཆིས། བསམ་གྱིས་མི་ཁྱབ་བོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེ་བཞིན་དུ་རྒྱ་མཚོ་ཆེན་པོའི་བསྔགས་པ་དཔག་ཏུ་མེད་པ་ལྟར་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བར་བལྟའོ། །དེ་ནས་བསྟན་པ་འདི་མི་སྟོན་པའི་ཚུལ་གྱིས་བཤད་པ་ན་ལྷའི་བུ་ཁྲི་ཉིས་སྟོང་གིས་དོན་དམ་པར་ན་མ་སྐྱེས་པའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ནས་ཚིག་འདི་སྐད་ཅེས་ཀྱང་སྨྲ་སྟེ། བཅོམ་ལྡན་འདས་བདག་ཅག་ནི་བྱང་ཆུབ་སེམས་དཔའི་བསླབ་པ་འདི་ལ་མི་སློབ་པའི་ཚུལ་གྱིས་སློབ་བོ། །དེ་ནས་ལྷའི་བུ་རབ་ཏུ་ཞི་བ་རྣམ་པར་དུལ་བའི་དབང་ཕྱུག་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ཅི་འཇམ་དཔལ་ཁྱོད་ཉན་ཐོས་ཀྱི་འདུལ་བ་ལ་བསླབས་སམ། འོན་ཏེ་བྱང་ཆུབ་སེམས་དཔའི་འདུལ་བ་ལ་བསླབས། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། རྒྱ་མཚོ་ཆེན་པོར་མི་ཤོང་བའི་ཆུ་གང་ཡང་ཡོད་དམ། ལྷའི་བུས་སྨྲས་པ། འཇམ་དཔལ་རྒྱ་མཚོ་ཆེན་པོར་མི་ཤོང་བའི་ཆུ་གང་ཡང་མེད་དོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་འདུལ་བ་ནི་རྒྱ་མཚོ་ཆེན་པོ་དང་འདྲའོ། །ལྷའི་བུས་སྨྲས་པ། འཇམ་དཔལ་འདུལ་བ་འདུལ་བ་ཞེས་བྱ་བའི་ཚིག་གི་དོན་གང་ཡིན། འཇམ་དཔལ་གྱིས་སྨྲས་པ། ལྷའི་བུ་ཉོན་མོངས་པ་འདུལ་བ་ནི་ཀུན་རྫོབ་ཏུ་ན་འདུལ་བའོ། །ཉོན་མོངས་པ་ཡོངས་སུ་ཤེས་པའང་འདུལ་བའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་ཉོན་མོངས་པ་འདུལ་བར་འགྱུར། ཇི་ལྟར་ན་ཉོན་མོངས་པ་ཡོངས་སུ་ཤེས་པ་

60-254a

ཡིན། འཇམ་དཔལ་གྱིས་སྨྲས་པ། དོན་དམ་པར་ན་ཆོས་ཐམས་ཅད་མ་བྱུང་མ་སྐྱེས་དངོས་པོ་མེད་པ་ཡིན་ན་ཀུན་རྫོབ་ཏུ་མེད་པ་ལ་ཕྱིན་ཅི་ལོག་ཏུ་གྱུར་ཏེ། མེད་པ་ལས་ཕྱིན་ཅི་ལོག་ཏུ་གྱུར་པ་དེ་ལས་ཀུན་ཏུ་རྟོག་པ་དང་། རྣམ་པར་རྟོག་པའོ། །ཀུན་ཏུ་རྟོག་པ་དང་། རྣམ་པར་རྟོག་པ་དེ་ལས་ཚུལ་བཞིན་མ་ཡིན་པ་ཡིད་ལ་བྱེད་པའོ། །ཚུལ་བཞིན་མ་ཡིན་པ་ཡིད་ལ་བྱེད་པ་དེ་ལས་བདག་ཏུ་སྒྲོ་འདོགས་པའོ། །བདག་ཏུ་སྒྲོ་འདོགས་པ་དེ་ལས་ལྟ་བ་ཀུན་ནས་ལྡང་བའོ། །ལྟ་བ་ཀུན་ནས་ལྡང་བ་དེ་ལས་ཉོན་མོངས་པ་རྣམས་འབྱུང་ངོ་། །གང་ཡང་ལྷའི་བུ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་མ་བྱུང་དངོས་པོ་མེད་པར་མི་ཤེས་པའི་ཚུལ་གྱིས་རབ་ཏུ་ཤེས་པ་དེ་ནི་དོན་དམ་པར་ན་ཕྱིན་ཅི་མ་ལོག་པའོ། །གང་དོན་དམ་པར་ན་ཕྱིན་ཅི་མ་ལོག་པ་དེ་ནི་རྟོག་པ་མེད་ཅིང་རྣམ་པར་མི་རྟོག་པའོ། །གང་རྟོག་པ་མེད་ཅིང་རྣམ་པར་མི་རྟོག་པ་དེ་ནི་ཚུལ་བཞིན་རབ་ཏུ་སྦྱོར་བའོ། །གང་ཚུལ་བཞིན་རབ་ཏུ་སྦྱོར་བ་དེ་ལ་དོན་དམ་པར་ན་བདག་ཏུ་སྒྲོ་འདོགས་པ་མི་འབྱུང་ངོ་། །གང་ལ་དོན་དམ་པར་ན་བདག་ཏུ་སྒྲོ་འདོགས་པ་མི་འབྱུང་བ་དེ་ལ་ལྟ་བ་ཀུན་ནས་ལྡང་བར་མི་འགྱུར་བ་ནས་དོན་དམ་པར་ན་མྱ་ངན་ལས་འདས་པར་ལྟ་བ་ཀུན་ནས་ལྡང་བར་ཡང་མི་འགྱུར་ཏེ། དེ་ལྟར་མ་སྐྱེས་པ་ལ་སྤྱོད་པ་དེ་ནི་ཉོན་མོངས་པ་ཤིན་ཏུ་རྣམ་པར་དུལ་བར་མི་ལྟ་བའི་ཚུལ་གྱིས་བགྱི་སྟེ། ལྷའི་བུ་འདི་ནི་ཉོན་མོངས་པ་འདུལ་བ་ཞེས་བྱའོ། །ལྷའི་བུ་ནམ་ཉོན་མོངས་པ་རྣམས་ལ་སྣང་བ་མེད་པའི་ཤེས་རབ་དང་ཡེ་ཤེས་ཀྱིས་དོན་དམ་པར་ན་ཤིན་ཏུ་སྟོང་པ་དང་། ཤིན་ཏུ་མཚན་མ་མེད་པ་དང་། ཤིན་ཏུ་སྨོན་པ་མེད་དོ། །དོན་དམ་པར་ན་ཤིན་ཏུ་མ་སྐྱེས་མ་བྱུང་། དངོས་པོ་མེད་པར་མི་ཤེས་པའི་ཚུལ་གྱིས་རབ་ཏུ་ཤེས་ན། ལྷའི་བུ་དེའི་ཚེ་མི་ཤེས་པའི་ཚུལ་གྱིས་ཉོན་མོངས་པ་རྣམས་ཡོངས་སུ་ཤེས་པ་ཡིན་ནོ། །ལྷའི་བུ་འདི་ལྟ་སྟེ། དཔེར་ན་སྦྲུལ་ཁ་གདུག་པའི་རིག་སྔགས་འདོན་པ་དེས་ནི་སྦྲུལ་ཁ་གདུག་པའི་གདུག་པ་རབ་ཏུ་ཞི་བར་བྱེད་དོ། །ལྷའི་བུ་དེ་བཞིན་དུ་གང་ཉོན་མོངས་པ་རྣམས་ཀྱི་རིགས་རབ་ཏུ་ཤེས་པ་དེའི་ཉོན་མོངས་པ་

60-254b

རྣམས་ཤིན་ཏུ་མི་དམིགས་པའི་ཚུལ་གྱིས་རབ་ཏུ་ཞི་བར་འགྱུར་རོ། །ལྷའི་བུས་སྨྲས་པ། འཇམ་དཔལ་ཉོན་མོངས་པའི་རིགས་དེ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་མ་བྱུང་། དངོས་པོ་མེད་པ་ལ་གང་ཀུན་ཏུ་རྟོག་པ་དེ་ནི་ཉོན་མོངས་པ་རྣམས་ཀྱི་རིགས་སོ། །དོན་དམ་པར་ན་ཀུན་ཏུ་མི་རྟོག་པའི་ཕྱིར་ཀུན་ནས་ཉོན་མི་མོངས་སོ། །ལྷའི་བུ་ཀུན་ནས་ཉོན་མོངས་པས་ཀུན་གཞི་མེད་དོ། །ཀུན་གཞི་མེད་པས་དོན་དམ་པར་ན་མི་གནས་སོ། །མི་གནས་པས་དོན་དམ་པར་མི་འཚིག་གོ། མི་འཚིག་པས་དོན་དམ་པར་ན་ཉེ་བར་ཞི་བ་ཞེས་བྱའོ། །དོན་དམ་པར་ན་ཇི་སྐད་སྨྲས་པ་བཞིན་དུ་ནི་མ་ཡིན་ཏེ། ལྷའི་བུ་ཀུན་རྫོབ་ཏུ་ན་འདི་ནི་ཉོན་མོངས་པ་འདུལ་བའོ། །ལྷའི་བུས་སྨྲས་པ། འཇམ་དཔལ་ཇི་ལྟར་ན་ཉོན་མོངས་པ་རྣམས་འདུལ་བར་འགྱུར། ཅི་ཡོད་པ་ཞིག་གམ། འོན་ཏེ་མེད་པ་ཞིག །འཇམ་དཔལ་གྱིས་སྨྲས་པ་ལྷའི་བུ་འདི་ལྟ་སྟེ། དཔེར་ན་སྐྱེས་བུ་ཞིག་གཉིད་ཀྱིས་ལོག་པའི་རྨི་ལམ་ལ་སྦྲུལ་ཁ་གདུག་པས་ཟིན་ནས་དེ་སྡུག་བསྔལ་གྱིས་གཙེ་བ་ལས་ཡང་དུག་སྨན་བཏང་ནས། དེའི་གདུག་པ་མེད་པར་གྱུར་ཏེ། གདུག་པ་མེད་པར་གྱུར་པས་སྡུག་བསྔལ་ཡང་མེད་པར་གྱུར་ན། ལྷའི་བུ་དེ་ཇི་སྙམ་དུ་སེམས། སྐྱེས་བུ་དེ་ཡང་དག་པར་ཟིན་ཏམ་འོན་ཏེ་ཡང་དག་པ་མ་ཡིན། ལྷའི་བུས་སྨྲས་པ། འཇམ་དཔལ་དོན་དམ་པར་ན་ཤིན་ཏུ་ཡང་དག་པ་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་ཇི་ལྟར་དུག་དེ་མེད་པར་འགྱུར། ལྷའི་བུས་སྨྲས་པ། འཇམ་དཔལ་ཇི་ལྟར་ཟིན་པ་ཤིན་ཏུ་མི་བདེན་པ་དེ་བཞིན་དུ་དུག་མེད་པར་གྱུར་པ་ཡང་ཤིན་ཏུ་བདེན་པ་མ་ཡིན་ནོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་འཕགས་པ་རྣམས་ཀྱིས་ཉོན་མོངས་པ་ཐམས་ཅད་ཀྱང་དོན་དམ་པར་མི་བལྟ་བའི་ཚུལ་གྱིས་བལྟའོ། །ལྷའི་བུ་གང་ཡང་འདི་སྐད་དུ་ཇི་ལྟར་ན་ཉོན་མོངས་པ་རྣམས་འདུལ་བར་འགྱུར་ཞེས་ཟེར་བ་ནི་ལྷའི་བུ་ཇི་ལྟར་བདག་དོན་དམ་པར་ན་བདག་མེད་པ་དེ་བཞིན་དུ་ལྷའི་བུ་དོན་དམ་པར་ན་ཉོན་མོངས་པ་རྣམས་ཀྱང་ཉོན་མོངས་པ་རྣམས་མ་ཡིན་ནོ། །ལྷའི་བུ་དེ་སྟེ་དོན་དམ་པར་ན་བདག་དེ་བཞིན་ཉིད་ཡིན་ན་ནི་ལྷའི་བུ་དོན་དམ་པར་ན་ཉོན་མོངས་པ་ཡང་དེ་བཞིན་ཉིད་དུ་འགྱུར་རོ། །ལྷའི་བུ་འདི་ལྟར་བདག་དོན་དམ་པར་ན་

60-255a

བདག་མ་ཡིན་ཏེ། ལྷའི་བུ་དེ་བས་ན་ཉོན་མོངས་པ་རྣམས་ཀྱང་དོན་དམ་པར་ན་ཉོན་མོངས་པ་མ་ཡིན་ནོ། །ལྷའི་བུ་དེ་ལ་གང་གི་དོན་དམ་པར་ཉོན་མོངས་པ་འདུལ་བར་དམིགས་པར་འགྱུར་བ་ནི་དོན་དམ་པར་ན་གང་ཡང་མི་དམིགས་སོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་ཤིན་ཏུ་མ་བྱུང་བའི་ཕྱིར་ཆོས་ཐམས་ཅད་ནི་ཞི་བའོ། །ལྷའི་བུ་དོན་དམ་པར་ན་འཛིན་པ་མེད་པའི་ཕྱིར་ཆོས་ཐམས་ཅད་ནི་ཉེ་བར་ཞི་བའོ། །ལྷའི་བུ་དོན་དམ་པར་ན་ཆོས་ཐམས་ཅད་སྒྲོ་བཏགས་པ་མེད་པའི་ཕྱིར་ཆོས་ཐམས་ཅད་ནི་རབ་ཏུ་ཞི་བའོ། །ལྷའི་བུ་དོན་དམ་པར་ན་ཤིན་ཏུ་མ་སྐྱེས་པའི་ཕྱིར་ཆོས་ཐམས་ཅད་ནི་མི་ཟད་པའོ། །ལྷའི་བུ་དོན་དམ་པར་ན་ཤིན་ཏུ་དངོས་པོ་མེད་པའི་ཕྱིར་ཆོས་ཐམས་ཅད་ནི་ཤིན་ཏུ་མ་སྐྱེས་པའོ། །ལྷའི་བུས་སྨྲས་པ། འཇམ་དཔལ་ཆོས་ཐམས་ཅད་ཀྱི་སྒོ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་སྨྲ་བར་བྱ་བ་དང་། སྨྲ་བ་དང་ཤེས་པ་དང་། ཤེས་པར་བྱ་བ་དང་བྱ་བ་དང་ཐ་སྙད་དང་། བྱེད་པ་ཐམས་ཅད་འཇུག་པའི་ཀུན་རྫོབ་ཀྱི་བདེན་པ་ནི་ཆོས་ཐམས་ཅད་ཀྱི་སྒོའོ། །སྨྲ་བ་དང་། སྨྲ་བར་བྱ་བ་དང་། ཤེས་པ་དང་། ཤེས་པར་བྱ་བ་དང་། བྱ་བ་དང་། ཐ་སྙད་དང་། བྱེད་པ་ཐམས་ཅད་ལས་རྣམ་པར་ལོག་པའི་ཕྱིར་དོན་དམ་པའི་བདེན་པ་ནི་ཆོས་ཐམས་ཅད་ཀྱི་སྒོའོ། །ཡང་ལྷའི་བུ་ཀུན་རྫོབ་ཏུ་ན་ཚུལ་བཞིན་མ་ཡིན་པའི་ཡིད་ལ་བྱེད་པ་ནི་འཁོར་བའི་སྒོའོ། །ཀུན་རྫོབ་ཏུ་ན་ཚུལ་བཞིན་ཡིད་ལ་བྱེད་པ་ནི་མྱ་ངན་ལས་འདས་པའི་སྒོའོ། །ཀུན་རྫོབ་ཏུ་ན་ཐེ་ཙོམ་ནི་སྒྲིབ་པའི་སྒོའོ། །ཀུན་རྫོབ་ཏུ་ན་རྣམ་པར་གྲོལ་བ་ནི་སྒྲིབ་པ་མེད་པའི་སྒོའོ། །ཀུན་རྫོབ་ཏུ་ན་ཀུན་ཏུ་རྟོག་པ་ནི་ཉོན་མོངས་པ་རྣམས་ཀྱི་སྒོའོ། །ཀུན་རྫོབ་ཏུ་ན་ཀུན་ཏུ་མི་རྟོག་པ་ནི་ཉོན་མོངས་པ་མེད་པའི་སྒོའོ། །ཀུན་རྫོབ་ཏུ་ན་རྣམ་པར་གཡེང་བ་ནི་རྣམ་པར་རྟོག་པ་རྣམས་ཀྱི་སྒོའོ། །ཀུན་རྫོབ་ཏུ་ན་ཞི་གནས་ནི་ཉེ་བར་ཞི་བའི་སྒོའོ། །ཀུན་རྫོབ་ཏུ་ན་ལྟ་བར་གྱུར་པ་རྣམས་ནི་ང་རྒྱལ་གྱི་སྒོའོ། །ཀུན་རྫོབ་ཏུ་ན་སྟོང་པ་ཉིད་ནི་ང་རྒྱལ་མེད་པའི་སྒོའོ། །ཀུན་རྫོབ་ཏུ་ན་སྡིག་པའི་གྲོགས་པོ་དང་སྟེན་པ་ནི་མི་དགེ་བའི་རྩ་བ་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་དགེ་བའི་བཤེས་གཉེན་དང་སྟེན་པ་ནི་དགེ་བའི་རྩ་བ་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་ལོག་པར་ལྟ་བ་ནི་སྡུག་བསྔལ་ཐམས་ཅད་ཀྱི་སྒོའོ། །

60-255b

ཀུན་རྫོབ་ཏུ་ན་ཡང་དག་པར་ལྟ་བ་ནི་བདེ་བ་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་སེར་སྣ་ནི་དབུལ་བའི་སྒོའོ། །ཀུན་རྫོབ་ཏུ་ན་སྦྱིན་པ་ནི་ལོངས་སྤྱོད་ཆེན་པོའི་སྒོའོ། །ཀུན་རྫོབ་ཏུ་ན་ངང་ཚུལ་ངན་པ་ནི་ངན་འགྲོ་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་ཚུལ་ཁྲིམས་ནི་ལྷ་དང་མིར་སྐྱེ་བ་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་གནོད་སེམས་ནི་བྱད་གཟུགས་ངན་པའི་སྒོའོ། །ཀུན་རྫོབ་ཏུ་ན་བཟོད་པ་ནི་གཟུགས་ཕུན་སུམ་ཚོགས་པའི་སྒོའོ། །ཀུན་རྫོབ་ཏུ་ན་ལེ་ལོ་ནི་མི་རྟོགས་པའི་སྒོའོ། །ཀུན་རྫོབ་ཏུ་ན་བརྩོན་འགྲུས་ནི་རྟོགས་པའི་སྒོའོ། །ཀུན་རྫོབ་ཏུ་ན་རྣམ་པར་རྟོག་པ་ནི་རྒོད་པའི་སྒོའོ། །ཀུན་རྫོབ་ཏུ་ན་བསམ་གཏན་ནི་སེམས་ཤིན་ཏུ་སྦྱངས་པའི་སྒོའོ། །ཀུན་རྫོབ་ཏུ་ན་འཆལ་པའི་ཤེས་རབ་ནི་ཁོང་དུ་མི་ཆུད་པའི་སྒོའོ། །ཀུན་རྫོབ་ཏུ་ན་ཤེས་རབ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་སྒོའོ། །ཀུན་རྫོབ་ཏུ་ན་བྱམས་པ་ནི་ཁོང་མི་ཁྲོ་བའི་སྒོའོ། །ཀུན་རྫོབ་ཏུ་ན་སྙིང་རྗེ་ཆེན་པོ་ནི་ལྷག་པའི་བསམ་པའི་སྒོའོ། །ཀུན་རྫོབ་ཏུ་ན་ལྷག་པའི་བསམ་པ་ནི་གཡོ་མེད་པའི་སྒོའོ། །ཀུན་རྫོབ་ཏུ་ན་དགའ་བ་ནི་ཆོས་ལ་མོས་པའི་སྒོའོ། །ཀུན་རྫོབ་ཏུ་ན་བཏང་སྙོམས་ན་ཉེས་པ་ཐམས་ཅད་དང་བྲལ་བའི་སྒོའོ། །ཀུན་རྫོབ་ཏུ་ན་དྲན་པ་ཉེ་བར་གཞག་པ་རྣམས་ནི་དགེ་བའི་རྩ་བ་ཐམས་ཅད་ཡོངས་སུ་མི་འབྲི་བའི་སྒོའོ། །ཀུན་རྫོབ་ཏུ་ན་ཡང་དག་པར་སྤོང་བ་རྣམས་ནི་ཡང་དག་པའི་ནན་ཏན་གྱི་སྒོའོ། །ཀུན་རྫོབ་ཏུ་ན་རྫུ་འཕྲུལ་གྱི་རྐང་པ་རྣམས་ནི་ལུས་དང་སེམས་ལས་སུ་རུང་བའི་སྒོའོ། །ཀུན་རྫོབ་ཏུ་ན་དབང་པོ་རྣམས་ནི་དད་པ་ཐོབ་པའི་སྒོའོ། །ཀུན་རྫོབ་ཏུ་ན་སྟོབས་རྣམས་ནི་ཉོན་མོངས་པ་ཐམས་ཅད་འཇོམས་པའི་སྒོའོ། །ཀུན་རྫོབ་ཏུ་ན་བྱང་ཆུབ་ཀྱི་ཡན་ལག་རྣམས་ནི་ཐམས་ཅད་མཁྱེན་པ་ཁོང་དུ་ཆུད་པའི་སྒོའོ། །ཀུན་རྫོབ་ཏུ་ན་འཕགས་པའི་ལམ་ཡན་ལག་བརྒྱད་པ་ནི་ལམ་ངན་པ་ཐམས་ཅད་ལས་འདའ་བའི་སྒོའོ། །ལྷའི་བུ་གཞན་ཡང་ཀུན་རྫོབ་ཏུ་ན་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་སྒོའོ། །ཀུན་རྫོབ་ཏུ་ན་དམ་པའི་ཆོས་ཡོངས་སུ་འཛིན་པ་ནི་ཆོས་ཐམས་ཅད་ཀྱི་དབང་ཕྱུག་གི་སྒོའོ། །ཀུན་རྫོབ་ཏུ་ན་སེམས་ཅན་སྨིན་པར་བྱེད་པ་ནི་དམ་པའི་ཆོས་ཡོངས་སུ་འཛིན་པའི་སྒོའོ། །ཀུན་རྫོབ་ཏུ་ན་ཐབས་ནི་གནས་དང་གནས་མ་ཡིན་པ་ལ་

60-256a

མཁས་པའི་སྒོའོ། །ཀུན་རྫོབ་ཏུ་ན་ཤེས་རབ་ཀྱི་ཕ་རོལ་ཏུ་ཕྱིན་པ་ནི་མྱ་ངན་ལས་འདས་པའི་སྒོའོ། །དོན་དམ་པར་ན་ཤིན་ཏུ་མི་འབྱུང་བ་ནི་ཆོས་ཐམས་ཅད་ཀྱི་སྒོའོ།། །།

བམ་པོ་གཉིས་པ་སྟེ་ཐ་མ། ལྷའི་བུས་སྨྲས་པ། འཇམ་དཔལ་ཤིན་ཏུ་མི་སྐྱེ་བའི་སྒོ་གང་། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་ཤིན་ཏུ་མི་འབྱུང་བ་ནི་ཀུན་ནས་སྒོའོ། །ལྷའི་བུས་སྨྲས་པ། འཇམ་དཔལ་ཤིན་ཏུ་མི་འབྱུང་བའི་རང་བཞིན་གང་། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་ཤིན་ཏུ་དངོས་པོ་མེད་པ་ནི་ཤིན་ཏུ་མི་འབྱུང་བའི་རང་བཞིན་ནོ། །ལྷའི་བུས་སྨྲས་པ། འཇམ་དཔལ་ཤིན་ཏུ་མི་འབྱུང་བ་ལ་ཆ་ཤས་དབྱེ་བ་གང་ཡང་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་དེ་ཇི་སྙམ་དུ་སེམས། ནམ་མཁའ་ལ་ཆ་ཤས་དབྱེ་བ་གང་ཡང་ཡོད་དམ། ལྷའི་བུས་སྨྲས་པ། འཇམ་དཔལ་མེད་དོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་ཇི་ལྟར་ན་ནམ་མཁའ་ལ་ཆ་ཤས་དབྱེ་བ་མེད་པ་དེ་བཞིན་དུ་ལྷའི་བུ་ཤིན་ཏུ་མ་སྐྱེས་པ་ལ་ཡང་ཆ་ཤས་དབྱེ་བ་མེད་དོ། །ལྷའི་བུས་སྨྲས་པ། འཇམ་དཔལ་ཁྱོད་ཀྱིས་དོན་དམ་པར་ན་ཤིན་ཏུ་མི་འབྱུང་བ་ཡོངས་སུ་ཤེས་སམ། འཇམ་དཔལ་གྱིས་སྨྲས་པ། ལྷའི་བུ་ཤིན་ཏུ་མི་འབྱུང་བས་ཤིན་ཏུ་མི་འབྱུང་བ་ཡོངས་སུ་མི་ཤེས་སོ། །དེ་ཅིའི་ཕྱིར་ཞེ་ན། ལྷའི་བུ་ཆོས་ཐམས་ཅད་ནི་ཤིན་ཏུ་མ་སྐྱེས་ཤིང་མ་བྱུང་ལ། དངོས་པོ་མེད་པའི་ཕྱིར་རོ། །ལྷའི་བུས་སྨྲས་པ། འཇམ་དཔལ་ཁྱོད་ཀྱིས་ཆོས་གང་ཡང་ཡོངས་སུ་ཤེས་ཤིང་གང་ཁོང་དུ་ཆུད་པས་འདི་ལྟ་བུའི་སྤོབས་པར་གྱུར། འཇམ་དཔལ་གྱིས་སྨྲས་པ། ལྷའི་བུ་འདི་ཇི་སྙམ་དུ་སེམས། བྲག་ཅས་ཆོས་གང་ཡོངས་སུ་ཤེས་ན། གང་དེ་ལས་སྒྲ་འབྱུང་། ལྷའི་བུས་སྨྲས་པ། འཇམ་དཔལ་བྲག་ཅས་ཆོས་གང་ཡང་ཡོངས་སུ་ཤེས་པ་མེད་མོད་ཀྱི་ཀུན་རྫོབ་ཏུ་ན་རྐྱེན་ལས་སྒྲ་འབྱུང་ངོ་། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་སེམས་ཅན་ཐམས་ཅད་ལ་དམིགས་པའི་རྐྱེན་གྱིས་ཀུན་རྫོབ་ཏུ་ན། བྱང་ཆུབ་

60-256b

སེམས་དཔའ་སེམས་དཔའ་ཆེན་པོ་མི་སྨྲ་བའི་ཚུལ་གྱིས་སྨྲའོ། །ལྷའི་བུས་སྨྲས་པ། འཇམ་དཔལ་ཁྱོད་ཅི་ལ་གནས་ཏེ་དེ་སྟོན། འཇམ་དཔལ་གྱིས་སྨྲས་པ། ལྷའི་བུ་དེ་བཞིན་གཤེགས་པ་སྤྲུལ་པ་གང་ལ་གནས་ཏེ་དེ་སྟོན་པ་ལའོ། །ལྷའི་བུས་སྨྲས་པ། འཇམ་དཔལ་དེ་བཞིན་གཤེགས་པ་སྤྲུལ་པ་ནི་དོན་དམ་པ་ན་ཅི་ལའང་གནས་པ་མེད་དོ། །འཇམ་དཔལ་གྱིས་སྨྲས་པ། ལྷའི་བུ་དེ་བཞིན་དུ་དོན་དམ་པར་ན་ཆོས་ཐམས་ཅད་ལ་མི་གནས་པར་བདག་མི་སྟོན་པའི་ཚུལ་གྱིས་སྟོན་ཏོ། །ལྷའི་བུས་སྨྲས་པ། འཇམ་དཔལ་དེ་སྟེ་ཁྱོད་དོན་དམ་པར་ན་ཆོས་ཐམས་ཅད་ལ་མི་གནས་པར་མི་སྟོན་པའི་ཚུལ་གྱིས་སྟོན་ན་ཁྱོད་ཅི་ལ་གནས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར། འཇམ་དཔལ་གྱིས་སྨྲས་པ། ལྷའི་བུ་བདག་ནི་མཚམས་མེད་པ་རྣམས་ལ་གནས་ཏེ། མངོན་པར་རྫོགས་པར་འཚང་མི་རྒྱ་བའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ལྷའི་བུས་སྨྲས་པ། མཚམས་མེད་པ་རྣམས་ཅི་ལ་གནས། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་མཚམས་མེད་པ་རྣམས་ནི་ཤིན་ཏུ་མ་བྱུང་ཞིང་དངོས་པོ་མེད་པ་ལ་མི་གནས་པའི་ཚུལ་གྱིས་གནས་སོ། །ལྷའི་བུས་སྨྲས་པ། འཇམ་དཔལ་མཚམས་མེད་པ་རྣམས་བྱེད་པ་ནི་དེ་བཞིན་གཤེགས་པས་སེམས་ཅན་དམྱལ་བར་བཤད་དོ། །འཇམ་དཔལ་གྱིས་སྨྲས་པ། ལྷའི་བུ་ཇི་ལྟར་དེ་བཞིན་གཤེགས་པས་མཚམས་མེད་པ་བྱེད་པ་སེམས་ཅན་དམྱལ་བར་བཤད་པ་དེ་བཞིན་དུ། ལྷའི་བུ་དེ་བཞིན་གཤེགས་པས་མཚམས་མེད་པ་བྱེད་པ་མི་གནས་པའི་ཚུལ་གྱིས་མཚམས་མེད་པ་ལ་གནས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ་ཞེས་མི་སྟོན་པའི་ཚུལ་གྱིས་སྟོན་ཏོ། །ལྷའི་བུས་སྨྲས་པ། འཇམ་དཔལ་མཚམས་མེད་པ་དེ་གང་ཡིན། འཇམ་དཔལ་གྱིས་སྨྲས་པ། ལྷའི་བུ་མཚམས་མེད་པ་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་མི་རྒྱ་བའི་ཚུལ་གྱིས་མངོན་པར་རྫོགས་པར་འཚང་རྒྱ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མཚམས་མེད་པ་

60-257a

ནི་འདི་ལྟ་སྟེ། ལྷའི་བུ་མཚམས་མེད་པ་ལྔ་པོ་དེ་དག་གང་ཞེ་ན། ལྷའི་བུ་འདི་ལ་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མི་སྐྱེ་བའི་ཚུལ་གྱིས་སེམས་བསྐྱེད་ནས་བར་མ་དོར་ཉན་ཐོས་དང་། རང་སངས་རྒྱས་དང་། དམིགས་པ་ཅན་དང་། མུ་སྟེགས་ཅན་ཐམས་ཅད་ཀྱི་སར་སེམས་མི་སྐྱེད་པ་འདི་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཚམས་མེད་པ་དང་པོའོ། །ལྷའི་བུ་གཞན་ཡང་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་བདོག་པ་ཐམས་ཅད་གཏོང་བ་ལ་མི་སྐྱེ་བའི་ཚུལ་གྱིས་སེམས་བསྐྱེད་ནས། ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་སེར་སྣ་དང་ལྷན་ཅིག་མི་གནས་པ་འདི་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཚམས་མེད་པ་གཉིས་པའོ། །ལྷའི་བུ་གཞན་ཡང་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་བདག་གིས་རྣམ་པ་ཐམས་ཅད་ཀྱིས་ཡོངས་སུ་བསྐྱབ་བོ་སྙམ་དུ་སེམས་མི་སྐྱེད་པའི་ཚུལ་གྱིས་དེ་ལྟར་སེམས་བསྐྱེད་ནས་བར་མ་དོར་མི་ནུར་བ་དེ་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཚམས་མེད་པ་གསུམ་པའོ། །ལྷའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དོན་དམ་པར་ན་ཆོས་ཐམས་ཅད་རབ་ཏུ་མ་སྐྱེས་པ། མ་བྱུང་བ། དངོས་པོ་མེད་པའོ་ཞེས་བཟོད་པ་མ་ཐོབ་པའི་ཚུལ་གྱིས་བཟོད་པ་ཐོབ་ནས་བར་དུ་རྫས་དང་། ངོ་བོ་དང་། དངོས་པོར་འཛིན་པ་ལེན་པས་མ་ཟིན་པ་འདི་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཚམས་མེད་པ་བཞི་པའོ། །ལྷའི་བུ་གཞན་ཡང་ནམ་བྱང་ཆུབ་སེམས་དཔའ་སེམས་དཔའ་ཆེན་པོ་སྐད་ཅིག་གཅིག་དང་ལྡན་པའི་ཤེས་རབ་ཀྱིས་ཆོས་ཐམས་ཅད་རྣམ་པ་ཐམས་ཅད་དུ་མངོན་པར་རྫོགས་པར་བྱང་ཆུབ་པར་བྱའོ། །ཞེས་དེ་ལྟར་མ་སྐྱེས་པའི་ཚུལ་གྱིས་སེམས་བསྐྱེད་ནས། རྣམ་པའི་མཆོག་ཐམས་ཅད་དང་ལྡན་པའི་ཐམས་ཅད་མཁྱེན་པའི་ཡེ་ཤེས་མི་འཐོབ་པའི་ཚུལ་གྱིས་མ་ཐོབ་ཀྱི་བར་དུ་མི་འདུག །ཀུན་ཏུ་མི་འདུག་པ་དེ་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་མཚམས་མེད་པ་ལྔ་པའོ། །དེ་ལྟར་མི་གནས་པའི་ཚུལ་གྱིས་གནས་ན་བྱང་ཆུབ་སེམས་དཔའ་སེམས་དཔའ་ཆེན་པོ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དམ་པར་མངོན་པར་རྫོགས་

60-257b

པར་འཚང་མི་རྒྱ་བའི་ཚུལ་གྱིས་མངོན་པར་རྫོགས་པར་འཚང་རྒྱའོ། །ལྷའི་བུས་སྨྲས་པ། འཇམ་དཔལ་མཚམས་མེད་པ་གང་དག་གིས་བྱིས་པ་སོ་སོའི་སྐྱེ་བོ་རྣམས་སེམས་ཅན་དམྱལ་བར་འགྲོ་བར་འགྱུར་བའི་མཚམས་མེད་པ་དེ་ཉིད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གནས་ན་མངོན་པར་རྫོགས་པར་འཚང་མི་རྒྱ་བའི་ཚུལ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་ཡོད་དོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་སྟོང་པ་སྟེ། ལྷའི་བུ་ཤིན་ཏུ་སྟོང་པ་ཉིད་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་མཚན་མ་མེད་པ་སྟེ། ལྷའི་བུ་མཚན་མ་མེད་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་སྨོན་པ་མེད་པ་སྟེ། ལྷའི་བུ་སྨོན་པ་མེད་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་གཟུང་བར་བྱ་བ་མེད་པ་སྟེ། ལྷའི་བུ་ཤིན་ཏུ་གཟུང་བར་བྱ་བ་མེད་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་མངོན་པར་འདུ་མི་བྱེད་པ་སྟེ། ལྷའི་བུ་ཤིན་ཏུ་མངོན་པར་འདུ་མི་བྱེད་པའི་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་འདུས་མ་བྱས་པ་སྟེ། ལྷའི་བུ་ཤིན་ཏུ་འདུས་མ་བྱས་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་མི་མཐོང་བ་སྟེ། ལྷའི་བུ་ཤིན་ཏུ་མི་མཐོང་བ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་

60-258a

མ་སྐྱེས་པ་སྟེ། ལྷའི་བུ་ཤིན་ཏུ་མ་སྐྱེས་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་མ་བྱུང་བ་སྟེ། ལྷའི་བུ་ཤིན་ཏུ་མ་བྱུང་བ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུ་དོན་དམ་པར་ན་ཆོས་ཐམས་ཅད་ནི་ཤིན་ཏུ་དངོས་པོ་མེད་པ་སྟེ། ལྷའི་བུ་ཤིན་ཏུ་དངོས་པོ་མེད་པ་ཁོང་དུ་ཆུད་པ་ནི་བྱང་ཆུབ་སྟེ། དོན་དམ་པར་ན་བྱང་ཆུབ་ཅེས་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་ཆོས་ཀྱི་རྣམ་གྲངས་འདི་ལ་སུ་དད་པར་འགྱུར། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་དེ་བཞིན་གཤེགས་པ་ལ་ཡང་དད་པས་མི་འགྲོ་ན། གང་ཉན་ཐོས་དང་། རང་སངས་རྒྱས་དང་། མུ་སྟེགས་ཅན་དམིགས་པ་ཅན་ཐམས་ཅད་ལྟ་ཅི་སྨོས། ལྷའི་བུས་སྨྲས་པ། སུ་དག་མོས་པར་འགྱུར། འཇམ་དཔལ་གྱིས་སྨྲས་པ། གང་དོན་དམ་པར་ན་ཆོས་གང་ལ་ཡང་མངོན་པར་མི་ཆགས་པ་དེ་མོས་པར་འགྱུར་རོ། །ལྷའི་བུས་སྨྲས་པ། ཡང་སུ་དག་ནན་ཏན་བྱེད་པར་འགྱུར། འཇམ་དཔལ་གྱིས་སྨྲས་པ། གང་དོན་དམ་པར་ན་ཆོས་གང་ལ་ཡང་ནན་ཏན་མི་བྱེད་པའོ། །ལྷའི་བུས་སྨྲས་པ། སུ་དག་མངོན་པར་རྫོགས་པར་འཚང་རྒྱ་བར་འགྱུར། འཇམ་དཔལ་གྱིས་སྨྲས་པ། གང་དོན་དམ་པར་ན་ཆོས་ཐམས་ཅད་གང་ཡང་མངོན་པར་རྫོགས་པར་འཚང་མི་རྒྱའོ། །ལྷའི་བུས་སྨྲས་པ། འཇམ་དཔལ་དོན་དམ་པར་ན་སུ་དག་ཆོས་གང་ཡང་མངོན་པར་རྫོགས་པར་འཚང་མི་རྒྱ། འཇམ་དཔལ་གྱིས་སྨྲས་པ། ལྷའི་བུ་ཀུན་རྫོབ་ཏུ་ན་རྣམ་པའི་མཆོག་ཐམས་ཅད་དང་ལྡན་པ་ཐམས་ཅད་མཁྱེན་པའི་ཡེ་ཤེས་མངོན་པར་རྫོགས་པར་འཚང་རྒྱ་བ་དག་གོ། །ལྷའི་བུས་སྨྲས་པ། འཇམ་དཔལ་དེ་དག་ཇི་ལྟ་བུའི་རང་བཞིན་དུ་འགྱུར། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་དེ་དག་རབ་ཏུ་མ་སྐྱེས་པའི་རང་བཞིན་དུ་འགྱུར་རོ། །ལྷའི་བུས་སྨྲས་པ། འཇམ་དཔལ་མདོ་སྡེ་འདི་ལྟ་བུ་སུ་དག་གི་ལག་ཏུ་འགྲོ། འཇམ་དཔལ་གྱིས་སྨྲས་པ། ལྷའི་བུ་ཀུན་རྫོབ་ཏུ་ན་གང་སེམས་ཅན་ཐམས་ཅད་

60-258b

ལ་དམ་པའི་ཆོས་ཀྱི་ལག་སྦྱིན་པར་བྱེད་པ་རྣམས་ཀྱིའོ། །ལྷའི་བུས་སྨྲས་པ། འཇམ་དཔལ་དེ་དག་ཇི་ལྟ་བུར་གནས་པར་འགྱུར། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་ཤིན་ཏུ་མ་སྐྱེས། མ་བྱུང་དངོས་པོ་མེད་པ་ལ་དེ་དག་གནས་པར་འགྱུར་རོ། །ལྷའི་བུས་སྨྲས་པ། འཇམ་དཔལ་དེ་དག་ཅིས་འགྲོ་བར་འགྱུར། འཇམ་དཔལ་གྱིས་སྨྲས་པ། ལྷའི་བུ་དོན་དམ་པར་ན་མ་སྐྱེས། མ་བྱུང་དངོས་པོ་མེད་པར་དེ་དག་འགྲོ་བར་འགྱུར་རོ། །ལྷའི་བུས་སྨྲས་པ། འཇམ་དཔལ་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཅི་བྱང་ཆུབ་འཐོབ་བམ། འཇམ་དཔལ་གྱིས་སྨྲས་པ། ལྷའི་བུ་གང་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེས་བྱང་ཆུབ་མི་འཐོབ་པ་ནི་གནས་མ་ཡིན་ཏེ། གོ་སྐབས་མེད་དོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཅི་ལས་ལྡོག་པར་འགྱུར། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དོན་དམ་པར་ན་རྣམ་པར་རྟོག་པ་ཐམས་ཅད་ལས་ལྡོག་གོ། །ཉན་ཐོས་དང་། རང་སངས་རྒྱས་ཐམས་ཅད་དང་། མུ་སྟེགས་ཅན་དམིགས་པ་ཅན་གྱི་ས་ལས་ལྡོག་གོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་ཅི་ལས་མི་ལྡོག །འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་ཐམས་ཅད་ཤིན་ཏུ་མི་འབྱུང་བའི་མཉམ་པ་ཉིད་ལས་མི་ལྡོག་གོ། །དེ་ཅིའི་ཕྱིར་ཞེ་ན། དོན་དམ་པར་ན་ཆོས་ཐམས་ཅད་ཤིན་ཏུ་མི་འབྱུང་བར་མཉམ་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་དག་མཉམ་སྟེ། དེ་བས་ན་ཕྱིར་མི་ལྡོག་གོ། །ལྷའི་བུས་སྨྲས་པ། ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ཉིད་ཅེས་བྱ་བ་དེ་འཇམ་དཔལ་ཆོས་གང་གི་ཚིག་བླ་དགས། འཇམ་དཔལ་གྱིས་སྨྲས་པ། ཆོས་ཐམས་ཅད་ཤིན་ཏུ་མི་འབྱུང་བར་མཉམ་ཞེས་བྱ་བ་ནི་ལྷའི་བུ་དོན་དམ་པར་སྣ་ཚོགས་མེད་པའི་ཚིག་བླ་དགས་སོ། །ལྷའི་བུས་སྨྲས་པ། འཇམ་དཔལ་ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ལ་ཅིའི་ཕྱིར་སྣ་ཚོགས་སུ་སྣང་། འཇམ་དཔལ་གྱིས་སྨྲས་པ། གང་ལྷའི་བུ་ཆོས་

60-259a

ཐམས་ཅད་ཤིན་ཏུ་མི་འབྱུང་བར་མཉམ་པ་ལ་དོན་དམ་པར་རྫས་དང་། དངོས་པོ་དང་། ངོ་བོར་ཡོངས་སུ་རྟོག་པས་དེ་དག་དོན་དམ་པར་ན་སྣ་ཚོགས་སུ་སྤྱོད་དོ། །དེ་དག་དོན་དམ་པར་སྣ་ཚོགས་སུ་སྤྱོད་པ་ལ་དམིགས་པའི་ལྟ་བ་མང་དུ་འགྱུར་རོ། །དེ་དག་དམིགས་པའི་ལྟ་བ་མང་པོས་འགྲོ་བ་རྣམ་པ་ཐ་དད་པ་རྣམས་སུ་དབང་མེད་པར་འཁྱམ་མོ། །གང་ལྷའི་བུ་ཆོས་ཐམས་ཅད་ཤིན་ཏུ་མི་འབྱུང་བར་མཉམ་པ་ལ་དོན་དམ་པར་ངོ་བོ་དང་། རྫས་དང་། དངོས་པོ་ཡོངས་སུ་མི་རྟོག་ན། དེ་དག་དོན་དམ་པར་ན་སྣ་ཚོགས་སུ་མི་སྤྱོད་དོ། །དེ་དག་དོན་དམ་པར་སྣ་ཚོགས་སུ་མི་སྤྱོད་ན། དོན་དམ་པར་ཤིན་ཏུ་དངོས་པོ་མེད་པར་འགྲོ་བའི་ཚུལ་གྱིས་དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས་པའི་མཚན་ཉིད་དང་མཉམ་པར་ཁོང་དུ་ཆུད་པར་འགྱུར་རོ། །ལྷའི་བུས་སྨྲས་པ། རྣམ་གྲངས་གང་གིས་ཉོན་མོངས་པ་དང་བཅས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བྱང་ཆུབ་ཡོད་ཀྱི་ཉོན་མོངས་པ་མེད་པ་ལ་མ་ཡིན་པའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་ཡོད་དོ། །དེ་ཅིའི་ཕྱིར་ཞེ་ན། ལྷའི་བུ་ཆོས་ཐམས་ཅད་ནི་ཀུན་རྫོབ་ཏུ་འབྱུང་བ་ཡང་འབྱུང་ངོ་། །མི་འབྱུང་ཡང་མི་འབྱུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་ཀྱང་ཀུན་རྫོབ་ཏུ་འབྱུང་ངོ་། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་ཆོས་ཐམས་ཅད་ནི་ཉོན་མོངས་པ་མེད་ཅིང་མི་སྐྱེ་མི་འགག་སྟེ། ཆོས་གང་དོན་དམ་པར་མི་སྐྱེ་མི་འགག་པ་དེ་དོན་དམ་པར་གང་གིས་ཀྱང་མངོན་པར་རྫོགས་པར་སངས་མ་རྒྱས་སོ། །མངོན་པར་རྫོགས་པར་འཚང་རྒྱ་བར་མི་འགྱུར་རོ། །མངོན་པར་རྫོགས་པར་འཚང་མི་རྒྱའོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས་པའི་ཕྱིར་ཏེ། ལྷའི་བུ་རྣམ་གྲངས་དེ་ལྟ་བུས་བྱང་ཆུབ་སེམས་དཔའ་སེམས་དཔའ་ཆེན་པོ་ཉོན་མོངས་པ་དང་བཅས་པ་ལ་བྱང་ཆུབ་འབྱུང་སྟེ། ཉོན་མོངས་པ་མེད་པ་ལ་ནི་མ་ཡིན་ནོ། །ལྷའི་བུས་སྨྲས་པ། འཇམ་དཔལ་རྣམ་གྲངས་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སེར་སྣ་ཅན་ལ་སྦྱིན་པའི་ཕ་རོལ་ཏུ་ཕྱིན་པར་འགྱུར་ཏེ། གཏོང་བ་དང་ལྡན་པ་ལ་མ་ཡིན་པའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ཡོད་དེ་ལྷའི་བུ་རྣམ་གྲངས་གང་གིས་བྱང་ཆུབ་སེམས་དཔའ་སེམས་དཔའ་ཆེན་

60-259b

པོ་སེར་སྣ་ཅན་གྱི་སྦྱིན་པའི་ཕ་རོལ་ཏུ་ཕྱིན་པར་འགྱུར་གྱི་གཏོང་བ་དང་ལྡན་པ་ལ་མ་ཡིན་པའི་རྣམ་གྲངས་ཡོད་དོ། །དེ་ཅིའི་ཕྱིར་ཞེ་ན། གང་སེམས་ཅན་ཐམས་ཅད་དང་སངས་རྒྱས་ཀྱི་ཆོས་ཐམས་ཅད་ཀུན་རྫོབ་ཏུ་ཡོངས་སུ་མི་གཏོང་མི་འདོར་བ་དེ་ནི་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོའི་སེར་སྣའོ། །ལྷའི་བུས་སྨྲས་པ། འཇམ་དཔལ་གང་བྱང་ཆུབ་སེམས་དཔའ་སེམས་དཔའ་ཆེན་པོ་ངན་པའི་ངང་ཚུལ་ཅན་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་འགྱུར་གྱི་ཚུལ་ཁྲིམས་དང་ལྡན་པ་ལ་མ་ཡིན་པའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ཡོད་དེ་ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སེམས་ཅན་ལ་ལྟའི་ཚུལ་ཁྲིམས་ལ་མ་ཡིན་པ་དེ་ནི་ཀུན་རྫོབ་ཏུ་ན་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོས་གང་བཟོད་པ་བོར་ལ་བཟོད་པ་ཅན་གྱི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་ཡོད་དེ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་དོན་དམ་པར་ཆོས་ཐམས་ཅད་ལ་རྫས་དང་དངོས་པོ་དང་། ངོ་བོར་མི་བཟོད་པ་དེ་ནི་ཤིན་ཏུ་མ་སྨྲས་པའི་ཚུལ་གྱིས་བླ་ན་མེད་པའི་བཟོད་པ་དང་ལྡན་པར་འགྱུར་ཏེ། ལྷའི་བུ་དེ་ནི་མི་དམིགས་པའི་ཚུལ་གྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་བཟོད་པ་དམ་པའོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་ལེ་ལོ་ཅན་བརྩོན་འགྲུས་དང་ལྡན་པར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ་ལྷའི་བུ་ཡོད་དེ། ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ལེ་ལོ་ཅན་དུ་གྱུར་པ་ནི་བླའི་ཉན་ཐོས་དང་རང་སངས་རྒྱས་དང་། མུ་སྟེགས་ཅན་དམིགས་པའི་བརྩོན་འགྲུས་ཀྱིས་བརྩོན་འགྲུས་དང་ལྡན་པ་ནི་དེ་ལྟ་མ་ཡིན་ནོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་བརྗེད་ངས་པ་གང་མཉམ་པར་གཞག་པར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་ཡོད་དེ། ལྷའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ལ་རྨི་ལམ་དུ་ཡང་དོན་དམ་པར་རྫས་དང་། ངོ་བོ་དང་། དངོས་པོའི་སེམས་མི་སྐྱེ་བ་དེ་ནི་མི་དམིགས་པའི་ཚུལ་གྱིས་ཤིན་ཏུ་

60-260a

མཉམ་པར་གཞག་པར་འགྱུར་རོ། །ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཤེས་རབ་མེད་པ། ཤེས་རབ་ཆེན་པོར་འགྱུར་བའི་རྣམ་གྲངས་ཡོད་དམ། འཇམ་དཔལ་གྱིས་སྨྲས་པ། ལྷའི་བུ་ཡོད་དོ། །དེ་ཅིའི་ཕྱིར་ཞེ་ན། ལྷའི་བུ་དོན་དམ་པར་ན་ཆོས་ཐམས་ཅད་ལ་ཤེས་རབ་ཀྱིས་རྣམ་པར་དཔྱད་དེ། བཙལ་ན་ཤིན་ཏུ་མེད་ཅིང་མི་དམིགས་ཏེ། ཤེས་རབ་དེ་ཡང་དོན་དམ་པར་ན་ཤིན་ཏུ་མེད་ཅིང་མི་དམིགས་པས་ན། ཀུན་རྫོབ་ཏུ་ཤེས་རབ་ཅན་ཞེས་བྱ་སྟེ། ཤེས་རབ་དེ་ཡང་དོན་དམ་པར་ན་ཤིན་ཏུ་མ་སྐྱེས་པ་ཡིན་ནོ། །ལྷའི་བུ་རྣམ་གྲངས་དེས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་མེད་པ་ནི་ཤེས་རབ་ཆེན་པོ་ཅན་ཞེས་བྱའོ། །ཤེས་རབ་བྱེ་བྲག་ཏུ་འཕགས་པ་ཞེས་བྱའོ། །ཤེས་རབ་དམ་པ་དང་ལྡན་པ་ཞེས་བྱའོ། །ཤེས་རབ་གྱ་ནོམ་པ་ཞེས་བྱའོ། །མི་དམིགས་པའི་ཤེས་རབ་ཅན་ཞེས་བྱ་སྟེ། དོན་དམ་པར་ན་ཇི་སྐད་དུ་བརྗོད་པ་ལྟར་ནི་མ་ཡིན་ནོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། ལེགས་སོ། །ལེགས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱ་བ་དང་། མི་བྱ་བ་མི་བསྟན་པའི་ཚུལ་གྱིས་བསྟན་པ་ནི། ཚིག་འདི་ལེགས་པར་སྨྲས་སོ། །འཇམ་དཔལ་འདི་ལྟ་སྟེ། དཔེར་ན་སྐྱེས་བུ་བཀྲེས་པ་ལྟོགས་པས་ཉམ་ཆུང་བ་མནགས་པ་བླའི། མི་ཤེས་པས་ཁ་ཟས་དུག་ཅན་ཟོས་པ་དེ་ལྟ་མ་ཡིན་ནོ། །འཇམ་དཔལ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་མི་དམིགས་པའི་སེར་སྣ་ཅན་དང་། ངན་པའི་ངང་ཚུལ་ཅན་དང་། གནོད་སེམས་ཅན་དང་། ལེ་ལོ་ཅན་དང་། བརྗེད་ངས་པ་དང་། ཤེས་རབ་མེད་པ་བླའི་ཉན་ཐོས་དང་རང་སངས་རྒྱས་དམིགས་པ་ཅན་གྱི་སེམས་ཀྱི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་ཀྱི་སྦྱོར་བ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། དམིགས་པའི་དུག་གི་སྐྱོན་ཆགས་པའི་ཕྱིར་དེ་ལ་ཀུན་རྫོབ་ཏུ་འཇིགས་པར་ཤེས་པར་བྱའོ། །དེ་ནས་བཅོམ་ལྡན་འདས་ལ་ལྷའི་བུ་མཚམས་བཟངས་

60-260b

ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཉོན་མོངས་པ་རྣམས་ལ་འཇིགས་པར་མི་བགྱིའམ། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་ཀུན་རྫོབ་ཏུ་བྱང་ཆུབ་སེམས་དཔའ་སེམས་དཔའ་ཆེན་པོས་ཉོན་མོངས་པ་རྣམས་ལ་འཇིགས་པར་བྱའོ། །དེ་བས་ཀྱང་དེས་ཉན་ཐོས་དང་རང་སངས་རྒྱས་དམིགས་པ་ཅན་གྱི་སེམས་ལ་ཤིན་ཏུ་འཇིགས་པར་བྱ་སྟེ། ཉོན་མོངས་པ་རྣམས་ལ་ནི་དེ་ལྟ་མ་ཡིན་ནོ། །ལྷའི་བུས་གསོལ་པ། བཅོམ་ལྡན་འདས་དེ་ཅིའི་སླད་ནས། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་ཁྱོད་ཉིད་ལ་དྲིས་ཁྱོད་ཀྱིས་ཅི་ནུས་པ་དེ་བཞིན་དུ་ལུང་སྟོན་ཅིག །ལྷའི་བུ་འདི་ཡིད་ལ་ཇི་སྙམ། སྐྱེས་བུ་འཚོ་བར་འདོད་པར་གྱུར་པས་ཡན་ལག་གཅད་པ་ལ་འཇིགས་པར་བྱའམ། འོན་ཏེ་མགོ་གཅད་པ་ལ་རབ་ཏུ་འཇིགས་པར་བྱ། ལྷའི་བུས་གསོལ་པ། བཅོམ་ལྡན་འདས་ཡན་ལག་གཅད་པའི་སྐྱེས་བུ་ནི་འཚོ་སྟེ། བསོད་ནམས་འདོད་པ་བསོད་ནམས་ཀྱི་ལམ་ཡང་དག་པར་བླངས་ཤིང་གནས་པ་དེ་ནི་མཐོ་རིས་སུ་སྐྱེ་བའི་རྒྱུར་འགྱུར་གྱི། བཅོམ་ལྡན་འདས་མགོ་བཅད་པ་ནི་འཚོ་བ་ལས་ཡོངས་སུ་ཉམས་ཏེ། བསོད་ནམས་འཚལ་བ་བསོད་ནམས་ཀྱི་ལམ་ཡང་དག་པར་ལེན་ཅིང་སྤྱོད་མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དེ་བཞིན་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་མི་དམིགས་པ་ནི་སྤྱོད་པ་ཉམས་ཀྱང་བླའི། ཉན་ཐོས་དང་། རང་སངས་རྒྱས་དམིགས་པ་ཅན་གྱི་ལྟ་བར་ལྟུང་བ་རྣམས་ཀྱིས་བསླབ་པ་དང་། སྦྱངས་པའི་ཡོན་ཏན་ཐམས་ཅད་དང་ལྡན་པ་ནི་དེ་ལྟ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་སེར་སྣ་ཅན་ནི་བླའི། སེམས་ཅན་ཐམས་ཅད་ཡོངས་སུ་བཏང་སྟེ། སངས་རྒྱས་ཀྱི་ཆོས་ཐམས་ཅད་འདོར་བ་ནི་དེ་ལྟ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་ངན་པའི་ངང་ཚུལ་ཅན་དུ་གྱུར་པ་ནི་བླའི། སེམས་ཅན་ཐམས་ཅད་ཡོངས་སུ་སྨིན་པར་མི་བྱེད་པར་གྱུར་པ་ནི་དེ་ལྟ་མ་ཡིན་ནོ། །བྱང་ཆུབ་སེམས་དཔའ་སེམས་དཔའ་ཆེན་པོ་དད་པས་སྤྱོད་པའི་ས་ལ་སྤྱོད་པ། མི་དམིགས་པ་ལ་མོས་ཤིང་། ཉོན་མོངས་པ་དང་བཅས་པ་བླའི། ཉན་ཐོས་དང་། རང་སངས་རྒྱས་དམིགས་པ་ཅན་ངེས་པར་གྱུར་པ་ཐོབ་པ། ཉོན་མོངས་

60-261a

པ་མེད་པ་ནི་དེ་ལྟ་མ་ཡིན་ནོ། །ལྷའི་བུས་གསོལ་པ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་མི་སྤྱོད་པའི་ཚུལ་གྱིས་སྤྱོད་པ་ནི་འཇིག་རྟེན་ཐམས་ཅད་དང་མི་འཐུན་པ་ལགས་སོ། །བཅོམ་ལྡན་འདས་དམིགས་པའི་དུག་གི་སྐྱོན་ཆགས་པས་ན། གང་ཉན་ཐོས་དང་། རང་སངས་རྒྱས་དམིགས་པ་ཅན་རྣམས་ཀྱི་ཚུལ་ཁྲིམས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ངན་པའི་ངང་ཚུལ་ལགས་སོ། །ཇི་ཙམ་དུ་གང་ཉན་ཐོས་དང་། རང་སངས་རྒྱས་དམིགས་པ་ཅན་རྣམས་ཀྱི་བརྩོན་འགྲུས་དེ་ནི་དམིགས་པའི་དུག་གི་སྐྱོན་ཆགས་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོའི་ལེ་ལོའི་བར་དུའོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་འདི་ལྟ་སྟེ། དཔེར་ན་གང་མི་དབུལ་པོའི་ཁ་ཟས་དེ་ནི་འཁོར་ལོས་སྒྱུར་བའི་རྒྱལ་པོའི་དུག་གོ། །ལྷའི་བུ་དེ་བཞིན་དུ་གང་ཉན་ཐོས་དང་། རང་སངས་རྒྱས་དམིགས་པ་ཅན་རྣམས་ཀྱི་ཚུལ་ཁྲིམས་དང་། བརྩོན་འགྲུས་ཀྱི་བར་དུ་དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ངན་པའི་ངང་ཚུལ་དང་ལེ་ལོའི་བར་དུའོ། །དེ་ཅིའི་ཕྱིར་ཞེ་ན། དམིགས་པའི་དུག་གི་སྐྱོན་ཆགས་པའི་ཕྱིར་རོ། །ལྷའི་བུ་འདི་ལྟ་སྟེ། དཔེར་ན་གང་བདག་ཉིད་བསྒྲུབས་པའི་ལས་བྱེད་པའི་སྐྱེས་བུའི་ནོར་དེས་གྲོང་ཁྱེར་གྱི་སྐྱེ་བོ་ཐམས་ཅད་བདེ་བར་སྦྱོར་མི་ནུས་སོ། །ལྷའི་བུ་དེ་བཞིན་དུ་གང་ཉན་ཐོས་དང་། རང་སངས་རྒྱས་དམིགས་པ་ཅན་དབུལ་བའི་སེམས་དང་། དམན་པའི་སེམས་དང་། དམིགས་པའི་སེམས་དང་ལྡན་པ་རྣམས་ཀྱི་བརྩོན་འགྲུས་ཀྱི་བར་གྱིས་འཛམ་བུའི་གླིང་གི་སེམས་ཅན་ཡོངས་སུ་ཐར་བར་བྱེད་ཀྱང་མི་ནུས་ན་སེམས་ཅན་ཐམས་ཅད་ལྟ་ཅི་སྨོས། ལྷའི་བུ་འདི་ལྟ་སྟེ། དཔེར་ན་ནོར་ཆེན་པོ་ལོངས་སྤྱོད་ཆེན་པོ་གཏོང་བ་དང་ལྡན་པ། བྱམས་པ་ལ་གནས་པ། སྙིང་རྗེ་ཆེན་པོ་དང་ལྡན་པ་དེད་དཔོན་ཆེན་པོ་ནི། སེམས་ཅན་ཐམས་ཅད་བླ་ན་མེད་པའི་བདེ་བར་བྱེད་པ་ལ་ཞུགས་པའི་ནོར་དེས་གྲངས་མེད་དཔག་ཏུ་མེད་པའི་སེམས་ཅན་བདེ་བར་བྱེད་དོ། །ལྷའི་བུ་དེ་བཞིན་དུ་གང་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ལ་ཞུགས་པ། སེམས་ཅན་ཐམས་ཅད་ལ་ཤེས་རབ་དང་། ཐབས་དང་། སྙིང་

60-261b

བརྩེ་བ་ཆེན་པོས་བསྐུལ་བ། བསྐལ་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པར་བསོད་ནམས་དང་ཡེ་ཤེས་ཀྱི་ཚོགས་བསགས་པའི་ནོར་ཆེན་པོ་མི་དམིགས་པའི་བརྩོན་འགྲུས་ཀྱི་བར་དུ་དེ་དག་གིས་སེམས་ཅན་གྲངས་མེད། དཔག་ཏུ་མེད་པ་ཡོངས་སུ་སྨིན་པར་བྱེད་དོ། །མི་གཞོག་པའི་ཚུལ་གྱིས་རྣམ་པ་ཐམས་ཅད་མཁྱེན་པ་ཉིད་ལའང་རབ་ཏུ་འགོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཉན་ཐོས་ཀྱིས་འདུས་མ་བྱས་ཀྱི་ཆོས་རྣམས་མངོན་སུམ་དུ་བགྱིས་ལ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ནི་འདུས་བྱས་སུ་གཏོགས་པ་ལགས་ན། དེ་ཇི་ལྟར་འདུས་མ་བྱས་སུ་གཏོགས་པའི་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་ཟིལ་གྱིས་གནོན། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་དེའི་དོན་རབ་ཏུ་གྲུབ་པར་བྱ་བའི་ཕྱིར་དཔེར་བྱ་སྟེ། སྐྱེས་བུ་མཁས་པས་སྨྲས་པའི་དོན་རིག་པ་ལ་ལ་དཔེས་དེའི་དོན་གོ་བར་འགྱུར་རོ། །འདི་ལྟ་སྟེ། དཔེར་ན་རྒྱ་མཚོ་ཆེན་པོ་བཞི་མར་གྱིས་གང་བར་གྱུར་ལ། དེ་ནས་སྐྱེས་བུ་ལ་ལས་སྐྲ་བརྒྱར་གཤེགས་པའི་རྩེ་མོའི་ཐོག་མས་མར་གྱི་ཐིགས་པ་གཅིག་བླངས་ན། འོད་སྲུང་འདི་ཇི་སྙམ་དུ་སེམས། སྐྲར་བརྒྱར་གཤེགས་པའི་རྩེ་མོའི་ཐོག་མས་མར་གྱི་ཐིགས་པ་བཅུས་པས་རྒྱ་མཚོ་ཆེན་པོ་བཞི་མར་གྱིས་གང་བ་ཟིལ་གྱིས་གནོན་པར་ནུས་སམ། འོད་སྲུང་གིས་གསོལ་པ། བཅོམ་ལྡན་འདས་དེ་མ་ལགས་སོ། །བདེ་བར་གཤེགས་པ་དེ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཡང་འོད་སྲུང་དེ་དག་ལས་ཆེས་མང་བ་དང་། ཆེས་མཆོག་ཏུ་གྱུར་པ་དང་། ཆེས་དམ་པ་དང་། ཆེས་རིན་ཆེ་བ་གང་ཡིན། འོད་སྲུང་གིས་གསོལ་པ། བཅོམ་ལྡན་འདས་འདི་ལྟར་རྒྱ་མཚོ་ཆེན་པོ་གཅིག་གི་བྱེ་བ་བརྒྱ་སྟོང་གི་ཆ་ཤས་དེའང་། བཅོམ་ལྡན་འདས་ཤིན་ཏུ་མང་། ཤིན་ཏུ་མཆོག །ཤིན་ཏུ་དམ་པ། ཤིན་ཏུ་རིན་ཆེ་བ་ལགས་ཏེ། བཅོམ་ལྡན་འདས་བརྒྱར་གཤེགས་པའི་སྐྲའི་རྩེ་མོའི་ཐོག་མས་མར་གྱི་ཐིགས་པ་བླངས་པ་དེ་ལྟ་མ་ལགས་ན། བཅོམ་ལྡན་འདས་རྒྱ་མཚོ་ཆེན་པོ་བཞི་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ།

60-262a

དཔེར་ན་བརྒྱར་གཤེགས་པའི་སྐྲའི་རྩེ་མོའི་ཐོག་མས་མར་གྱི་ཐིགས་པ་བླངས་པ་ཚད་ཡོད་པ་དེ་བཞིན་དུ་ཉན་ཐོས་དང་། རང་སངས་རྒྱས་དམིགས་པ་ཅན་གྱི་འདུས་མ་བྱས་ཀྱི་ཡེ་ཤེས་ནི་ཆུང་ངོ་། །དམིགས་པ་དང་བཅས་པའོ། །འོད་སྲུང་འདི་ལྟ་སྟེ། དཔེར་ན་རྒྱ་མཚོ་ཆེན་པོ་བཞི་མར་གྱིས་གང་བ་དེ་ཙམ་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པ་མེད་པ། དད་པ་སྤྱོད་པའི་ས་ལ་མི་སྤྱོད་པའི་ཚུལ་གྱིས་སྤྱོད་པའི་རྣམ་པའི་མཆོག་ཐམས་ཅད་དང་ལྡན་པ། བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་བསྡུས་པ། འདུས་བྱས་ཀྱི་ཡེ་ཤེས་སུ་མི་བལྟ་བའི་ཚུལ་གྱིས་བལྟའོ། །དེ་ཡང་དོན་དམ་པའི་མེ་འབར་བས་ཡོངས་སུ་སྨིན་པར་བྱས་པས་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་སུ་མི་དམིགས་པའི་ཚུལ་གྱིས་འགྱུར་རོ། །འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཡང་འདུས་མ་བྱས་ཐོབ་པའི་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་མི་དམིགས་པའི་ཚུལ་གྱིས་ཟིལ་གྱིས་གནོན་ཏོ། །འོད་སྲུང་འདི་ལྟ་སྟེ། དཔེར་ན་གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུ་ཁུར་བརྒྱ་སྟོང་དུ་གྱུར་པ་དང་། རྒྱ་མཚོ་ཆེན་པོའི་ནང་ན་ཡོད་པ་གྲུར་བཅུག་པ། རིན་ཆེ་བའི་བཻ་དཱུརྱ་ནོར་བུ་རིན་པོ་ཆེ་ཆེན་པོ་དེ་བདེ་ཞིང་ཉེ་ཞོ་མེད་པར་འཛམ་བུའི་གླིང་དུ་ཕྱིན་ན་དེ་ཇི་སྙམ་དུ་སེམས། གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུས་གྲུའི་ནང་དུ་བཅུག་པ་རིན་པོ་ཆེ་བཻ་དཱུརྱ་ནོར་བུ་རིན་པོ་ཆེ་ཟིལ་གྱིས་ནོན་པར་ནུས་སམ། འོད་སྲུང་གིས་གསོལ་པ། བཅོམ་ལྡན་འདས་དེ་མ་ལགས་སོ། །བདེ་བར་གཤེགས་པ་དེ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཇི་ལྟར་གྲོང་ཁྱེར་ཆེན་པོར་ཆུད་པའི་མཆིང་བུའི་ནོར་བུ་བཞིན་དུ། འདུས་མ་བྱས་ཐོབ་པའི་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་དུ་བལྟའོ། །འོད་སྲུང་ཇི་ལྟར་ནོར་བུ་རིན་པོ་ཆེ་ཆེན་པོའི་བཻ་དཱུརྱ་རྒྱ་མཚོ་ཆེན་པོའི་ནང་ན་ཡོད་པ་གྲུར་བཅུག་པ་བདེ་ཞིང་ཉེ་ཞོ་མེད་པར་ཚོང་ཁང་གི་བར་དུ་འོངས་པར་གྱུར་པ། འོད་སྲུང་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་འཁོར་བའི་གྲོང་ཁྱེར་གྱི་ཚོང་ཁང་གི་བར་དུ་འོངས་ན་སེམས་ཅན་ཐམས་ཅད་བླ་ན་མེད་པ་

60-262b

ཡང་དག་པར་རྫོགས་པའི་བྱང་ཆུབ་ཏུ་མི་འཇོག་པའི་ཚུལ་གྱིས་རབ་ཏུ་འགོད་པར་བལྟའོ། །འོད་སྲུང་འདི་ལྟ་སྟེ། དཔེར་ན་དཔྱིད་ཟླ་ཐ་ཆུངས་ཀྱི་ཟླ་བ་ལ་ས་ཆེན་པོ་ལོ་ཏོག་གིས་རབ་ཏུ་གང་བ་ལ་གྲོག་སྦུར་ཕྲ་མོས་ཟས་ཀྱི་འབྲུ་གཅིག་ཁྱེར་བ་དང་། ས་ཆེན་པོ་འདི་དེ་དག་གིས་གང་བ་གཉིས་གང་མང་བར་སེམས། འོད་སྲུང་གིས་གསོལ་པ། བཅོམ་ལྡན་འདས་ལོ་ཏོག་གིས་གང་བའི་ས་ཆེན་པོ་དེ་དཔག་ཏུ་མ་མཆིས་པའི་འབྲུའི་ཕུང་པོ་ཆེན་པོ་འབྱུང་བར་འགྱུར་ཏེ། དེས་སེམས་ཅན་གྲངས་མ་མཆིས་དཔག་ཏུ་མ་མཆིས་པ་རྣམས་ཚིམ་པར་འགྱུར་གྱི། བཅོམ་ལྡན་འདས་གྲོག་སྦུར་ཕྲ་མོས་འཚལ་བའི་ཟས་ཀྱི་འབྲས་བུས་ལྟ་ཅི་ཞིག་བགྱི་སྟེ། དེས་སེམས་ཅན་གང་ཡང་འཚོ་བར་མི་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང་ཇི་ལྟར་གྲོག་སྦུར་ཕྲ་མོས་ཁྱེར་བའི་ཟས་ཀྱི་འབྲུ་གཅིག་པོ་དེ་བཞིན་དུ་འོད་སྲུང་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་ཀྱི་ཟག་པ་མེད་པའི་རྣམ་པར་གྲོལ་བའི་འབྲས་བུར་བལྟའོ། །འོད་སྲུང་ཇི་ལྟར་ལོ་ཏོག་མང་པོས་རབ་ཏུ་གང་བའི་ས་ཆེན་པོ་དེ་བཞིན་དུ་འོད་སྲུང་བྱང་ཆུབ་སེམས་དཔའ་སེམས་དཔའ་ཆེན་པོ་མི་གནས་པའི་ཚུལ་གྱིས་ཀུན་རྫོབ་དང་དོན་དམ་པའི་བདེན་པ་ལ་གནས་པས། ཕ་རོལ་ཏུ་ཕྱིན་པ་དྲུག་ལ་སོགས་པ་སངས་རྒྱས་ཀྱི་ཆོས་ཐམས་ཅད་དང་། བླ་ན་མེད་པར་བསྡུས་པའི་བསོད་ནམས་དང་ཡེ་ཤེས་ཀྱི་ཚོགས་ཀྱི་དགེ་བའི་རྩ་བའི་ལོ་ཏོག་ཏུ་བལྟའོ། །དེ་ཡོངས་སུ་སྨིན་པར་གྱུར་ནས་འདི་ལྟ་སྟེ། བླ་ན་མེད་པ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཡེ་ཤེས་ཀྱི་བདེ་བ་མི་དམིགས་པའི་ཚུལ་གྱིས་སེམས་ཅན་ཐམས་ཅད་ཀྱི་འཚོ་བར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ངོ་མཚར་ཏོ། །བདེ་བར་གཤེགས་པ་ངོ་མཚར་ཏོ། །བཅོམ་ལྡན་འདས་ཀྱིས་མི་འཆད་པའི་ཚུལ་གྱིས་ཇི་ལྟར་བཤད་པ་དེ་དེ་བཞིན་ནོ། །བཅོམ་ལྡན་འདས་དེ་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པ། བླ་ན་མ་མཆིས་པ་མི་དམིགས་པའི་ཡེ་ཤེས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དད་པས་སྤྱོད་པའི་ས་ལ་མི་སྤྱོད་པའི་ཚུལ་གྱིས་སྤྱོད་པས་ཉན་ཐོས་དང་། རང་སངས་རྒྱས་དམིགས་པ་ཅན་ཐམས་ཅད་ཟིལ་གྱིས་ནོན་ཏོ། །དེ་ནས་བཅོམ་

60-263a

ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་གི་སངས་རྒྱས་ཀྱི་ཞིང་ནས་འཕགས་པ་འཇམ་དཔལ་གཞོན་ནུར་གྱུར་པ་དང་། ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་ཅེས་བྱ་བ་འདིར་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་གིས་བསྟན་པ་འདི་ཐོས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། ཉན་ཐོས་དང་། རང་སངས་རྒྱས་དམིགས་པ་ཅན་ཀུན་ནས་ཉོན་མོངས་པ་སྤོང་བའི་བཀའ་མཆིད་དང་། ལྟུང་བ་རྣམ་པར་གཞག་པའི་བར་གྱི་བཀའ་མཆིད་འདི་དག་ཐམས་ཅད་ནི་སྤྲོས་པའི་བཀའ་མཆིད་དོ། །རྣམ་པ་ཐ་དད་པའི་བཀའ་མཆིད་དོ། །དམིགས་པའི་བཀའ་མཆིད་དེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་གི་སངས་རྒྱས་ཀྱི་ཞིང་ན་དེ་ལྟ་བུའི་དམིགས་པ་ཅན་གྱི་བཀའ་མཆིད་མ་མཆིས་སོ། །དེ་ལྟ་བུའི་དམིགས་པ་ཅན་གྱི་བཀའ་མཆིད་མི་གདའ་སྟེ། བཅོམ་ལྡན་འདས་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དག་པའི་བཀའ་མཆིད་མི་ཐོས་པའི་ཚུལ་གྱིས་ཐོས་སོ། །ཕྱིར་མི་ལྡོག་པའི་བཀའ་མཆིད་མི་ཐོས་པའི་ཚུལ་གྱིས་ཐོས་སོ། །མི་དམིགས་པའི་བཀའ་མཆིད་མི་ཐོས་པའི་ཚུལ་གྱིས་ཐོས་སོ། །དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས་པའི་བཀའ་མཆིད་མི་ཐོས་པའི་ཚུལ་གྱིས་ཐོས་སོ། །དོན་དམ་པར་ཆོས་ཐམས་ཅད་ཤིན་ཏུ་མ་བྱུང་བའི་བཀའ་མཆིད་མི་ཐོས་པའི་ཚུལ་གྱིས་ཐོས་སོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ནི་ཤིན་ཏུ་དཀའ་བ་མཛད་དེ། གང་འདི་སྙེད་ཀྱི་ཉམ་ང་བ་བཟོད་ཅིང་གང་ཐམས་ཅད་དོན་དམ་པར་ཤིན་ཏུ་མ་སྐྱེས་པ་ལ། ཆོས་རྣམས་རབ་འབྲིང་ཐ་མར་སྟོན་པར་མཛད་དོ། །འདི་ལྟ་སྟེ། དོན་དམ་པར་ན་ཤིན་ཏུ་མ་སྐྱེས་པ་དང་། མ་བྱུང་བ་དང་། དངོས་པོ་མ་མཆིས་པའི་རྣམ་པ་སྟེ། བཅོམ་ལྡན་འདས་དེ་ལྟར་དོན་དམ་པར་ཆོས་ཐམས་ཅད་རྣམ་པ་གཅིག་ལས་སེམས་ཅན་རྣམས་ཀྱི་དམིགས་པ་གཞོམ་པའི་སླད་དུ་མི་སྟོན་པའི་ཚུལ་གྱིས་རྣམ་པ་དུ་མར་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཀྱིས། ལྷའི་མེ་ཏོག་དང་། སྤོས་དང་། བདུག་པ་དང་། ཕྲེང་

60-263b

བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དོན་དང་བཅས་པའི་བླ་རེས། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་བླ་ན་མེད་པའི་མཆོད་པ་བྱས་ནས། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བདག་ཅག་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བར་འདོང་ངོ་། །འཇམ་དཔལ་གྱིས་སྨྲས་པ། རིགས་ཀྱི་བུ་དག་ད་དེའི་དུས་ལ་བབ་པར་ཤེས་ན་དེང་ཤིག །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སྨྲས་པ། འཇམ་དཔལ་ཅི་ཁྱོད་ད་མི་འགྲོའམ། འཇམ་དཔལ་གྱིས་སྨྲས་པ། རིགས་ཀྱི་བུ་སངས་རྒྱས་ཀྱི་ཞིང་ཐམས་ཅད་ནི་སངས་རྒྱས་ཀྱི་ཞིང་གཅིག་གོ། །དེ་བཞིན་དུ་སངས་རྒྱས་ཐམས་ཅད་ནི་སངས་རྒྱས་གཅིག་གོ། །དེ་བཞིན་དུ་ཆོས་ཐམས་ཅད་ནི་ཆོས་གཅིག་གོ། །དེ་བཞིན་དུ་སེམས་ཅན་ཐམས་ཅད་ནི་སེམས་ཅན་གཅིག་གོ། །དེ་དག་འདི་ལས་ཁྱད་པར་ཅི་ཡོད་ན། རིགས་ཀྱི་བུ་བདག་དེར་འགྲོ། དེ་སྐད་ཅེས་སྨྲས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་སྨྲས་པ། འཇམ་དཔལ་ཇི་ལྟར་སངས་རྒྱས་ཀྱི་ཞིང་ཐམས་ཅད་སངས་རྒྱས་ཀྱི་ཞིང་གཅིག །འཇམ་དཔལ་ཇི་ལྟར་སངས་རྒྱས་ཐམས་ཅད་སངས་རྒྱས་གཅིག །འཇམ་དཔལ་ཇི་ལྟར་ཆོས་ཐམས་ཅད་ཆོས་གཅིག །འཇམ་དཔལ་ཇི་ལྟར་སེམས་ཅན་ཐམས་ཅད་སེམས་ཅན་གཅིག །འཇམ་དཔལ་གྱིས་སྨྲས་པ། རིགས་ཀྱི་བུ་དག་སངས་རྒྱས་ཀྱི་ཞིང་ཐམས་ཅད་ནི་ཞིང་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ཤིན་ཏུ་མ་སྐྱེས་པའི་ཕྱིར་རོ། །རིགས་ཀྱི་བུ་དག་སངས་རྒྱས་ཐམས་ཅད་ནི་སངས་རྒྱས་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ན་ཤིན་ཏུ་མ་བྱུང་བའི་ཕྱིར་རོ། །རིགས་ཀྱི་བུ་དག་ཆོས་ཐམས་ཅད་ནི་ཆོས་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ན་ཤིན་ཏུ་དངོས་པོ་མེད་པའི་ཕྱིར་རོ། །རིགས་ཀྱི་བུ་དག་སེམས་ཅན་ཐམས་ཅད་ནི་སེམས་ཅན་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ན་ཤིན་ཏུ་ཀུན་ནས་མ་བྱུང་བའི་ཕྱིར་རོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་

60-264a

པས་ཅི་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་གི་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་དེ་ཅི་འདྲ་བ་དེ་འདྲ་བར་ལྷག་ཆད་མེད་པར་སྣང་བ་དེ་ལྟ་བུར་བསམ་པ་རབ་ཏུ་རྫོགས་ནས་དེ་འདྲ་བར་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་ཏོག་དེ་དང་། འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་དེའང་མཐོང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་འདི་སྙམ་དུ་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བར་ཕྱིན་པར་སེམས་སོ། །དེ་དག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཡང་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་ཏོག་གི་ཁ་དོག་དང་དབྱིབས་ཅི་འདྲ་བ་བཞིན་དུ་མཐོང་ངོ་། །ཉན་ཐོས་ཆེན་པོ་དེ་དག་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན་སྙམ་དུ་སེམས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་རིན་པོ་ཆེའི་ཏོག་ཡིན་སྙམ་པ་བྱེད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བགྱི་བ་འདིར་སུས་ཕྱིན་པར་བགྱིས། བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ་དག་ཁྱེད་སུས་ཁྲིད། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་གསོལ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པས་བདག་ཅག་ཁྲིད་དོ། །བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རིགས་ཀྱི་བུ་ཁྱེད་ནི་འཇམ་དཔལ་གཞོན་ནུར་གྱུར་པས་མ་འོངས་མ་སོང་བའི་ཚུལ་གྱིས་ཕྱིན་པར་བྱས་སོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་འདི་སྐད་ཅེས་སྨྲས་སོ། །རིགས་ཀྱི་བུ་དག་ཁྱེད་གང་དུ་ཁྲིད། གང་ནས་ཁྲིད་པར་བྱས་པ་མཉམ་པར་ཞོག་ལ་ལྟོས་ཤིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་རང་རང་གི་ཏིང་ངེ་འཛིན་

60-264b

ལ་མཉམ་པར་གཞག་སྟེ་བལྟས་ན། འཇིག་རྟེན་གྱི་ཁམས་མི་མཇེད་དེ་ཉིད་ནས་བདག་ཉིད་གང་དུ་ཡང་མ་གཡོས་པར་མཐོང་སྟེ། ངོ་མཚར་དུ་གྱུར་རྨད་དུ་གྱུར་ནས། འདི་ལྟར་བདག་ཅག་སྟན་འདི་ཉིད་ལས་མ་འཕགས་པར་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བར་ཡང་ཕྱིན་པ་སྙམ་བྱེད་དེ། འཇམ་དཔལ་གཞོན་ནུར་གྱུར་པའི་བྱིན་གྱི་རླབས་མེད་པའི་ཚུལ་གྱིས་བྱིན་གྱི་རླབས་བསམ་གྱིས་མི་ཁྱབ་པོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་དག་གིས་ཡང་སྨྲས་པ། བཅོམ་ལྡན་འདས་སེམས་ཅན་ཐམས་ཅད་ཀྱིས་ཀྱང་མི་དམིགས་པའི་ཚུལ་གྱིས་བྱིན་གྱི་རླབས་འདི་ཐོབ་པར་གྱུར་ཅིག །དེ་ནས་བཅོམ་ལྡན་འདས་ཤཱཀྱ་ཐུབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ལ་བཀའ་སྩལ་པ། རིགས་ཀྱི་བུ་དག་འདི་ལྟ་སྟེ། དཔེར་ན་ནམ་མཁའ་ནི་སའི་སྣོད་དང་། ཤིང་གི་སྣོད་དང་། ཁར་བའི་སྣོད་དང་། ཟངས་ཀྱི་སྣོད་དང་། དངུལ་གྱི་སྣོད་དང་། གསེར་གྱི་སྣོད་དང་། ནོར་བུ་དང་། མུ་ཏིག་དང་། བཻ་དཱུརྱ་དང་། དུང་དང་། མན་ཤེལ་དང་། བྱི་རུ་དང་། ཨ་མྲ་གར་བ་དང་། སྤུག་དང་། དུང་གཡས་ཕྱོགས་སུ་འཁྱིལ་བ་དང་། མུ་ཏིག་དམར་པོའི་སྣོད་ལ་སོགས་པའི་ནང་དུ་ཞུགས་པར་གྱུར་པ་རིགས་ཀྱི་བུ་དག་ཀུན་རྫོབ་ཏུ་སྣོད་ལ་ཐ་དད་པ་ཡོད་མོད་ཀྱི་ནམ་མཁའ་ལ་ཐ་དད་ཡོད་པ་མ་ཡིན་ནོ། །དེ་ཅིའི་ཕྱིར་ཞེ་ན། དོན་དམ་པར་ན་ནམ་མཁའ་ཤིན་ཏུ་དངོས་པོ་མེད་པའི་ཕྱིར་ཏེ། དེ་བཞིན་དུ་རིགས་ཀྱི་བུ་དག་དོན་དམ་པར་ཆོས་ཐམས་ཅད་ཤིན་ཏུ་མ་སྐྱེས། མ་བྱུང་། དངོས་པོ་མེད་མོད་ཀྱི། འཇིག་རྟེན་ཀུན་རྫོབ་ཀྱི་ཐ་སྙད་ཀྱིས་ཐ་སྙད་དུ་འདོགས་ཤིང་རབ་ཏུ་འཇོག་སྟེ། འདི་ནི་གཟུགས་སོ། །འདི་ནི་ཚོར་བའོ། །འདི་ནི་འདུ་ཤེས་སོ། །འདི་དག་ནི་འདུ་བྱེད་རྣམས་སོ། །འདི་ནི་རྣམ་པར་ཤེས་པའོ། །འདི་དག་ནི་སྐྱེ་མཆེད་རྣམས་སོ། །འདི་དག་ནི་ཁམས་རྣམས་སོ། །འདི་ནི་སངས་རྒྱས་དཀོན་མཆོག་གོ། །འདི་ནི་ཆོས་དཀོན་མཆོག་གོ། །འདི་ནི་དགེ་འདུན་དཀོན་མཆོག་གོ། །འདི་ནི་ཉན་ཐོས་ཀྱི་ཐེག་པའོ། །འདི་ནི་རང་སངས་རྒྱས་ཀྱི་ཐེག་པའོ། །འདི་ནི་བླ་ན་མེད་པའི་ཐེག་པ་ཆེན་པོའོ། །འདི་དག་ནི་དགེ་བ་བཅུའི་ལས་ཀྱི་ལམ་རྣམས་སོ། །འདི་དག་ནི་མི་དགེ་བ་བཅུའི་ལས་ཀྱི་ལམ་རྣམས་སོ། །འདི་དག་ནི་སེམས་ཅན་དམྱལ་བའོ། །འདི་དག་ནི་དུད་འགྲོའི་སྐྱེ་གནས་སོ། །འདི་དག་ནི་

60-265a

ཡི་དགས་ཀྱི་ཡུལ་ལོ། །འདི་དག་ནི་ལྷ་མ་ཡིན་ནོ། །འདི་དག་ནི་མིའོ། །འདི་དག་ནི་ལྷའོ། །འདི་དག་ནི་འདོད་པ་ན་སྤྱོད་པའི་ལྷའོ། །འདི་དག་ནི་གཟུགས་ན་སྤྱོད་པའི་ལྷའོ། །འདི་དག་ནི་གཟུགས་མེད་པ་ན་སྤྱོད་པའི་ལྷའོ། །འདི་ནི་འདོད་པའི་ཁམས་སོ། །འདི་ནི་གཟུགས་ཀྱི་ཁམས་སོ། །འདི་ནི་གཟུགས་མེད་པའི་ཁམས་སོ། །འདི་ནི་ལུས་ཀྱིས་ལེགས་པར་སྤྱོད་པའོ། །འདི་ནི་ངག་གིས་ལེགས་པར་སྤྱོད་པའོ། །འདི་ནི་ཡིད་ཀྱིས་ལེགས་པར་སྤྱོད་པའོ། །འདི་ནི་སྦྱིན་པའི་ཕ་རོལ་ཏུ་ཕྱིན་པའོ། །འདི་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །འདི་ནི་བཟོད་པའི་ཕ་རོལ་ཏུ་ཕྱིན་པའོ། །འདི་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །འདི་ནི་བསམ་གཏན་གྱི་ཕ་རོལ་ཏུ་ཕྱིན་པའོ། །འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །འདི་ནི་ཐབས་ཀྱི་ཕ་རོལ་ཏུ་ཕྱིན་པའོ། །འདི་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། །འདི་ནི་སྟོབས་ཀྱི་ཕ་རོལ་ཏུ་ཕྱིན་པའོ། །འདི་ནི་ཡེ་ཤེས་ཀྱི་ཕ་རོལ་ཏུ་ཕྱིན་པའོ། །འདི་ནི་ས་བཅུ་དང་། དབང་བཅུ་དང་། བྱང་ཆུབ་སེམས་དཔའི་སྟོབས་བཅུ་དང་། དེ་བཞིན་གཤེགས་པའི་སྟོབས་བཅུ་དང་། མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། དབང་པོ་ལྔ་དང་། སྟོབས་ལྔ་དང་། ཇི་ཙམ་དུ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། ཇི་ཙམ་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་དང་། ཇི་ཙམ་དུ་སངས་རྒྱས་ཀྱི་བྱང་ཆུབ་དང་། ཇི་ཙམ་དུ་དེ་བཞིན་ཉིད་དང་། ཡང་དག་པའི་མཐའ་དང་། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། མངོན་པར་འདུས་མ་བྱས་པ་དང་། ཇི་ཙམ་དུ་འདུས་བྱས་དང་། འདུས་མ་བྱས་པའི་ཆོས་ཐམས་ཅད་དང་། ཇི་ཙམ་དུ་འཁོར་བ་དང་། མྱ་ངན་ལས་འདའ་བ་དང་། ཇི་ཙམ་དུ་སྨྲ་བ་དང་། སྨྲ་བར་བྱ་བ་དང་། ཤེས་པ་དང་། ཤེས་བྱར་ཐ་སྙད་འདོགས་པ་དང་། འབྲེལ་པར་འཇུག་པ་དེ་ཙམ་དུ་འཇིག་རྟེན་ཀུན་རྫོབ་ཀྱི་ཐ་སྙད་འཇུག་གོ། །དོན་དམ་པར་ན་སྤྱོད་པ་ཐམས་ཅད་མེད་པར་གྱུར་པ་སྟེ། དེ་ཅིའི་ཕྱིར་ཞེ་ན། རིགས་ཀྱི་བུ་དོན་དམ་པར་ན་ཆོས་ཐམས་ཅད་ཤིན་ཏུ་མ་སྐྱེས་པ། མ་བྱུང་བ། དངོས་པོ་མེད་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཤིན་ཏུ་ངོ་མཚར་དུ་གྱུར་ནས་སྟན་ལས་ལངས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་

60-265b

པའི་སངས་རྒྱས་ཤཱཀྱ་ཐུབ་པ་ལ་ཡང་ཤིན་ཏུ་རྒྱ་ཆེ་བ། ཤིན་ཏུ་ཁྱད་པར་དང་ལྡན་པའི་མཆོད་པ་བྱས་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་ཐམས་ཅད་འདི་ལྟ་བུའི་སེང་གེའི་སྒྲ། བྱེ་བྲག་ཏུ་འཕགས་པའི་སྒྲ། ཁྱུ་མཆོག་གི་སྒྲ། སྐྱེས་བུ་ཆེན་པོའི་སྒྲ། ཡང་དག་པའི་སྒྲ། དེ་ཁོ་ནའི་སྒྲ། མི་དམིགས་པའི་སྒྲ། དོན་དམ་པའི་སྒྲ། མི་དམིགས་པའི་ཚུལ་གྱིས་འབྱིན་པར་གྱུར་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དགའ་མགུ་རངས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་བརྒྱ་སྟོང་དུ་མར་བསྐོར་བ་བྱས་ནས། བཅོམ་ལྡན་འདས་ཀྱི་གན་ནས་སླར་དོང་སྟེ། དེ་དག་ཕྱོགས་བཅུར་སོང་ནས་མི་དམིགས་པའི་བརྩོན་འགྲུས་ཀྱི་གོ་ཆ་ཆེན་པོ་གོ་ཆ་མེད་པའི་ཚུལ་གྱིས་བགོས་ནས་དོན་དམ་པ་དང་། ཀུན་རྫོབ་ཀྱི་བདེན་པ་གཉིས་ལ་གནས་པའི་ཆོས་བསྟན་པ་འདི་ཉིད་མི་སྟོན་པའི་ཚུལ་གྱིས་སྟོན་ཏོ། །ཆོས་འདུལ་བ་འདི་ཉིད་ལ་སེམས་ཅན་ཐམས་ཅད་འདུལ་ཞིང་སྟོན་ཏོ། །མི་འཇོག་པའི་ཚུལ་གྱིས་རབ་ཏུ་འགོད་དོ། །འཇམ་དཔལ་གཞོན་ནུར་གྱུར་པ་སྟན་དེ་ལ་འདུག་སྟེ་མ་ལངས་པར་འདི་འདྲ་བའི་ཏིང་ངེ་འཛིན་ལ་མཉམ་པར་བཞག་སྟེ། ཏིང་ངེ་འཛིན་དེས་འཇམ་དཔལ་གཞོན་ནུར་གྱུར་པའི་གཙུག་ཏོར་གྱི་གསེབ་སྤྱི་བོའི་གཙུག་ནས་སེམས་ཅན་ཐམས་ཅད་ཀྱི་དམིགས་པ་དང་། མི་ཤེས་པ་སེལ་བ་ཞེས་བྱ་བའི་འོད་ཟེར་བྱུང་སྟེ། དེ་བྱུང་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་སངས་རྒྱས་ཀྱི་ཞིང་རབ་འབྱམ་ཐམས་ཅད་སྣང་བར་བྱས་སོ། །འོད་ཟེར་སྣང་བ་དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཆོས་བཤད་པ། ཀུན་རྫོབ་དང་དོན་དམ་པའི་བདེན་པ་གཉིས་ལ་བརྟེན་པ་མི་ཐོས་པའི་ཚུལ་གྱིས་ཐོས་སོ། །འདི་ལྟར་ཕྱོགས་བཅུ་མཐའ་ཡས་མུ་མེད་པའི་འཇིག་རྟེན་གྱི་ཁམས་ཐམས་ཅད་ན་བཞུགས་པའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ལ་མཆོད་པ་བྱ་བའི་ཕྱིར་འོད་ཟེར་གྱི་སྣང་བ་དེ་ལས་ལྷའི་མེ་ཏོག་གི་ཆར་འབེབས་པའི་སྤྲིན་བྱུང་ངོ་། །ལྷའི་བདུག་པའི་ཆར་འབེབས་པའི་སྤྲིན་བྱུང་ངོ་། །ལྷའི་སྤོས་ཀྱི་ཆར་འབེབས་པའི་སྤྲིན་བྱུང་ངོ་། །ལྷའི་ཕྲེང་

60-266a

བའི་ཆར་འབེབས་པའི་སྤྲིན་བྱུང་ངོ་། །ལྷའི་བྱུག་པའི་ཆར་འབེབས་པའི་སྤྲིན་བྱུང་ངོ་། །ལྷའི་ཕྱེ་མའི་ཆར་འབེབས་པའི་སྤྲིན་བྱུང་ངོ་། །ལྷའི་གོས་ཀྱི་ཆར་འབེབས་པའི་སྤྲིན་བྱུང་ངོ་། །ལྷའི་གདུགས་ཀྱི་ཆར་འབེབས་པའི་སྤྲིན་བྱུང་ངོ་། །ལྷའི་རྒྱལ་མཚན་གྱི་ཆར་འབེབས་པའི་སྤྲིན་བྱུང་ངོ་། །ལྷའི་བ་དན་གྱི་ཆར་འབེབས་པའི་སྤྲིན་བྱུང་ངོ་། །ལྷའི་རྣམ་པར་རྒྱལ་བའི་བ་དན་གྱི་ཆར་འབེབས་པའི་སྤྲིན་བྱུང་ངོ་། །ལྷའི་བླ་རེའི་ཆར་འབེབས་པའི་སྤྲིན་གྱི་བར་དུ་བྱུང་ངོ་། །ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། བླ་རེའི་ཆར་འབེབས་པའི་སྤྲིན་བྱུང་ངོ་། །རྣམ་པ་ཐམས་ཅད་ཀྱི་མཆོག་དང་ལྡན་པ། བླ་ན་མེད་པའི་བདེ་བ་ཆེན་པོ་ཐམས་ཅད་ཕུན་སུམ་ཚོགས་པའི་ལྷའི་མེ་ཏོག་དང་། བདུག་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། ཆོས་གོས་དང་། གདུགས་དང་། རྒྱལ་མཚན་དང་། བ་དན་དང་། རྣམ་པར་རྒྱལ་བའི་བ་དན་དང་། བླ་རེའི་ཆར་གྱི་སྤྲིན་རབ་ཏུ་གཏོང་ངོ་། །དེ་ནས་འཇམ་དཔལ་གཞོན་ནུར་གྱུར་པ་ཏིང་ངེ་འཛིན་དེ་ལས་ལངས་ཏེ། ལངས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་ལན་བརྒྱ་སྟོང་དུ་མར་མི་དམིགས་པའི་ཚུལ་གྱིས་བསྐོར་བ་བྱས་ནས་འཇིག་རྟེན་གྱི་ཁམས་མི་མཇེད་ཅེས་བྱ་བ་འདི་ནས་སླར་སོང་ངོ་། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་སངས་རྒྱས་དང་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཀྱི་འབྱུང་གནས་འདི་ཟུང་ཤིག །རྒྱས་པར་གྱིས་ཤིག །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་བདག་གིས་གཟུང་བ་ནི་ལགས་ན། རྒྱས་པར་བགྱིད་ནི་མི་ནུས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དོན་དམ་པར་དམིགས་པ་ལ་མངོན་པར་ཞེན་པའི་སེམས་ཅན་ཤིན་ཏུ་མང་སྟེ། རྫས་ལ་མངོན་པར་ཞེན་པ་ནས་དངོས་པོའི་བར་ལ་མངོན་པར་ཞེན་ཏེ། ལོག་པར་འཛིན་པ་

60-266b

དེ་ལས་དབྱེ་བ་ཤིན་ཏུ་དཀའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཆོས་ཀྱི་རྣམ་གྲངས་འདི་ནི་འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བྱིན་གྱིས་མི་རློབ་པའི་ཚུལ་གྱིས་བྱིན་གྱིས་བརླབས་སོ། །ཀུན་དགའ་བོ་ཁྱོད་རྐྱེན་ཙམ་གྱིས་ཤིག །ཀུན་དགའ་བོས་གསོལ་པ། བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་ཆུང་ངུ་ན་ཉན་པར་འགྱུར་བ་དེ་དག་ཅི་འདྲ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཆོས་ཀྱི་རྣམ་གྲངས་འདི་ལས་དེ་བཞིན་གཤེགས་པས་ཡང་དག་པར་བསྟན་པ། དེ་ཁོ་ན་བསྟན་པ། མི་དམིགས་པ་བསྟན་པ། དོན་དམ་པ་བསྟན་པ། མི་སྟོན་པའི་ཚུལ་གྱིས་བསྟན་ཏོ། །བསྟན་པ་དེ་ཡང་བསམ་གྱིས་མི་ཁྱབ། དཔག་ཏུ་མེད་དེ། ཀུན་དགའ་བོ་དེ་བཞིན་དུ་གང་ཆོས་ཀྱི་རྣམ་གྲངས་འདི་ལས་ཆུང་ངུ་ན་ཡི་གེ་འབྲུ་གཅིག་ཙམ་ཡང་མི་ཉན་པའི་ཚུལ་གྱིས་མཉན་ན་སངས་རྒྱས་ཀྱི་ཆོས་ཐམས་ཅད་བསམ་གྱིས་མི་ཁྱབ་ཅིང་དཔག་ཏུ་མེད་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་ཀུན་རྫོབ་དང་། དོན་དམ་པའི་བདེན་པ་བསྟན་པ་ཞེས་བྱ་བར་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། ཉན་ཐོས་ཆེན་པོ་དེ་དག་དང་། ཚེ་དང་ལྡན་པ་ཀུན་དགའ་བོ་དང་། འཁོར་དེ་དག་ཐམས་ཅད་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་བཤད་པ་ལ་མངོན་པར་བསྟོད་དོ། །འཕགས་པ་ཀུན་རྫོབ་དང་དོན་དམ་པའི་བདེན་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་པྲ་བྷཱ་དང་། ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བན་དེ་དྷརྨ་ཏཱ་ཤཱི་ལ་ལ་སོགས་པས་བསྒྱུར་ཅིང་ཞུས་ནས་གཏན་ལ་ཕབ་པ།། །།