Byams khrid kyi rtsa ba/Full text

བྱམས་ཁྲིད་ཀྱི་རྩ་བ།

byams khrid kyi rtsa ba

FULL TEXT

Descriptionངོ་སྤྲོད།

འདི་ནི་རང་གིས་རང་ལ་སྙིང་རྗེ་བསྒོམ་ན་རང་ཉིད་དགེ་སྦྱོར་ལ་བརྩོན་འགྲུས་ཆེ་བ་དང་། གཞན་ལ་སྙིང་རྗེ་སྐྱེ་བ་སོགས་དགོས་པ་ཁྱད་པར་ཅན་ཡོད་པ་དང་། བྱམས་སྙིང་ཐོག་མར་རང་ལ་བསྒོམ་པ་ཉིད་བྱམས་ཁྲིད་རྩ་གནད་འགལ་ཤིན་ཏུ་ཆེ་བར་བསྟན་པའི་གདམས་ཟབ་ཅིག་གོ།

Reference	byams khrid kyi rtsa ba [བྱམས་ཁྲིད་ཀྱི་རྩ་བ།].
People	Götsangpa Gönpo Dorje

Tibetan

[edit]

Source	BDRC MW23661_6D8DAAInput by Khenpo Tamphel
Date	2026-01-21
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

༄༅། །བྱམས་ཁྲིད་ཀྱི་རྩ་བ་རྗེ་རྒོད་ཚང་པ་ཆེན་པོས་མཛད་པ་བཞུགས་སོ། །

ན་མོ་གུ་རུ། སྐལ་ལྡན་ཀུན།

བྱམས་དང་སྙིང་རྗེའི་སེམས་མེད་ན། །ཇི་ལྟར་རྟོགས་ཀྱང་ཉན་ཐོས་ལམ། །

གསུངས་པས། སྙིང་རྗེ་བསྒོམ་པ་གལ་ཆེ། ཐོག་མར་རང་ལ་བསྒོམ། དེ་ཡང་འདི་ལྟར་བསྒོམ། ཁྱོད་ཆོས་སྒོར་ནི་ཞུགས། བླ་མ་དམ་པ་དང་མཇལ། གདམས་ངག་ཟབ་མོ་ནི་ཞུས་ནས། ད་རུང་ཉོན་མོངས་དང་དུཿཁ་ལས་མ་གྲོལ་བར་འདུག་པ་ཁྱོད་ཁོ་ན་སྙིང་རེ་རྗེ། ད་རུང་གཉེན་ཚན་དང་ཟས་ནོར་ལ་ཆགས་པ་སྐྱེ་བར་འདུག་པ། ཚིག་མི་སྙན་པ་རེ་ལ་ཁོང་ཁྲོ་སྐྱེ་བར་འདུག་པ། ཐ་ན་མཆེད་གྲོགས་ཡོན་ཏན་ཅན་འདུག་ཀྱང་ཕྲག་དོག་སྐྱེ་ཡི་འདུག་པ། རང་གི་ཡོན་ཏན་ཕྲ་མོ་ལ་ང་རྒྱལ་སྐྱེ་ཡིན་འདུག་པ། བླ་མའི་ཞབས་ཏོག་བག་རེ་བྱས་པ་ལ་ངོ་སོ་སྐྱེ་ཡིན་འདུག་པ། ཁྱོད་ཁོ་ན་སྙིང་རེ་རྗེ། ཆོས་བྱས་ཀྱི་རྟིང་ལ་འཇིག་རྟེན་བློས་གཏོང་པ་ཡིན་པ་ལ། ཁྱོད་ལྟོགས་ཀྱི་དོགས། འཁྱགས་ཀྱི་དོགས། ན་ཡི་དོགས། ཤི་ཡི་དོགས། རྒས་ཁར་སྡུག་གི་དོགས་ནས་སྡུག་བསྔལ་བྱེད་པར་འདུག་པ། བྱས་པ་ཆོས་བྱས་འཁྱམ་པ་འཁོར་བར་འཁྱམ་པར་འདུག་པ། ཁྱོད་ཁོ་ན་སྙིང་རེ་རྗེ། བཀའ་དྲིན་ཅན་གྱི་བླ་མ་ལ་མོས་གུས་ཆུང་། དམ་ཚིག་ཅན་གྱི་མཆེད་གྲོགས་ལ་རྩེ་དུང་ཆུང་། མ་རྒན་སེམས་ཅན་ལ་ཕན་སེམས་ཆུང་། ཁྱོད་ཁོ་ན་སྙིང་རེ་རྗེ། སྒྲུབ་པ་བྱེད་དུ་བཅུག་ན་ཉིན་མཚན་བཏང་སྙོམས་སུ་སྡོད། ཡོན་ཏན་འདི་ཡིན་བྱ་བ་མེད། ཁྱོད་ཁོ་ན་སྙིང་རེ་རྗེ་སྙམ་དུ་ཡང་ཡང་བསྒོམ། དེ་ལྟར་བསྒོམས་པ་ལ་ཡོན་ཏན་གཉིས་ཡོད། རང་དགེ་སྦྱོར་ལ་བརྩོན་འགྲུས་ཆེ་བ་དང་། གཞན་ལ་སྙིང་རྗེ་སྐྱེ་བའི་དགོས་པ་ཡོད། དེ་ནས་གཞན་ལ་བསྒོམ། དེ་ལྟར་འདི་ལྟར་བསྒོམ་པ་ཡིན་ཏེ། རང་ལ་སྐྱེས་ནས་གཞན་ལ་སྐྱེ་བ་ཚེགས་མེད། བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས། རང་རྒྱུད་སྡུག་བསྔལ་ཉོན་མོངས་སུ་སོང་བ་ལ་དཔགས་ན། གཞན་ལ་ཡང་སྐྱེ་བ་ལ་ཚེགས་མེད། དེ་ཡང་ཕ་མ་བྱས་པའི་སེམས་ཅན་ཚེ་ཐོག་མ་མེད་པ་ནས་ད་ལྟ་ཡན་ཆོད་དུ། རྒྱུད་ཉོན་མོངས་པ་སྣ་ཚོགས་ཀྱིས་མནར། འབྲས་བུ་རིགས་དྲུག་རང་རང་གི་སྡུག་བསྔལ་དཔག་ཏུ་མེད་པས་མནར་བ་སྙིང་རེ་རྗེ་སྙམ་པ་བསམ་པ་ཙམ་གྱི་དུང་བ་སྐྱེ། དེས་རང་གཞན་གཉིས་ཀ་འཁོར་བར་སྡུག་བསྔལ་ཞིང་འདུག་ཙ་ན་སྡུག་བསྔལ་ལས་ཐར་བར་བྱེད་པ་ལས་སངས་རྒྱས་ཐོབ་དགོས་པས། རང་གཞན་གྱི་དོན་དུ་དགེ་བ་ལ་ཉིན་མཚན་མེད་པར་འབད་པ་ཞིག་དགོས། སེམས་ཅན་གྱི་དོན་བྱེད་ཀྱང་སྐྱོ་དུབ་མེད་པ་འོང་། དེས་ན་སྙིང་རྗེ་དུངས་སྒོམས་མཛོད་ཅིག །དེ་ཡང་རང་ལ་བསྒོམ་པ་འདི་གནད་ཤིན་ཏུ་ཆེ་བ་ལགས་སོ།། །།