Byams khrid/Full text

བྱམས་ཁྲིད།

byams khrid

FULL TEXT

Descriptionངོ་སྤྲོད།

འདི་ནི་སྨོན་འཇུག་གཉིས་ཀྱི་རྩ་བ་སྙིང་རྗེའི་སེམས་ཀྱི་དངོས་རྒྱུ་བྱས་པ་ཤེས་ཤིང་དྲིན་དུ་གཟོ་བའི་བྱམས་སེམས་རིན་པོ་ཆེ་རང་རྒྱུད་ལ་སྐྱེ་བར་བྱེད་པའི་མན་ངག། བྱམས་པའི་ངོ་བོ་ངོས་བཟུང་བདང་། སྐྱེ་བའི་ཐབས་དང་། སྐྱོན་ཡོན་བརྟག་པ་སོགས་ས་བཅད་རྣམ་པ་བརྒྱད་ཀྱི་སྒོ་ནས་གསུངས་པ་ཤིན་ཏུ་ཟབ་པ་ཞིག་གོ།

Reference	byams khrid [བྱམས་ཁྲིད།].
People	Götsangpa Gönpo Dorje

Tibetan

[edit]

Source	BDRC MW23789_3F0524 Input by Khenpo Tamphel
Date	2026-01-21
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

བྱམས་ཁྲིད་བཞུགས་སོ། ། ཧེ་འཛུམ་མོ། །

ཨོཾ་སྭ་སྟི། བྱམས་དང་སྙིང་རྗེའི་ལྗོན་ཤིང་ལ། །སྨོན་འཇུག་མཛེས་པའི་མེ་ཏོག་འབར། །སྐུ་དང་ཡེ་ཤེས་འབྲས་བུ་སྨིན། །འགྲོ་ཀུན་བདེ་བཀོད་རྗེ་ལ་འདུད། །ཐེག་ཆེན་ཤིང་རྟའི་ལམ་སྲོལ་གྱིས། །ལམ་རིམ་སྐྱེ་ལུགས་འདི་ལྟ་སྟེ། །བྱས་པ་དྲིན་དུ་གཟོ་བ་ལ། །བྱམས་པ་ཆེན་པོའི་སེམས་སྐྱེའོ། །བྱམས་པའི་སེམས་ལ་སྙིང་རྗེ་སྐྱེ། །སྙིང་རྗེའི་སེམས་ལ་ལྷག་བསམ་སྐྱེ། །ལྷག་བསམ་རྣམ་པར་དག་པ་ལ། །སྨོན་པ་བྱང་ཆུབ་སེམས་སྐྱེའོ། །སྨོན་པའི་སེམས་ལས་འཇུག་པ་སྐྱེ། །སྨོན་འཇུག་གཉིས་ལས་རྫོགས་པ་ཡི། །བྱང་ཆུབ་བླ་མེད་ཐོབ་པའོ། །དང་པོ་བྱམས་པ་བསྒོམ་པ་ལ། །རྣམ་པ་བརྒྱད་དུ་ཤེས་པར་བྱ། །ངོ་བོ་ངོས་བཟུང་སྐྱེ་ཐབས་དང་། །སྐྱོན་ཡོན་དམ་ཚིག་བྱེད་ལས་དང་། །འགམ་སྤྱོ་མཐར་ཐུག་སྐྱེལ་བའོ། །ངོས་བཟུང་མདོར་བསྟན་རྒྱས་བཤད་གཉིས། །དང་པོ་རང་གཞན་སྣོད་བཅུད་དང་། །སྣང་སྲིད་འཁོར་འདས་ཡིད་འོང་བསྒོམ། །རྒྱས་བཤད་རང་གཞན་གཉིས་ལ་ནི། །དང་པོ་རང་ལ་བྱམས་པ་བསྒོམ། །དེ་ཡང་བསྒོམ་ལུགས་འདི་ལྟ་སྟེ། །དང་པོ་བྱང་ཆུབ་སེམས་བསྐྱེད་ལ། །རང་ལུས་ཐུགས་རྗེ་ཆེན་པོར་བསྒོམ། །སྙིང་དཀྱིལ་རྩ་བའི་བླ་མ་བསྒོམ། །བརྒྱུད་པའི་བླ་མ་རིན་ཆེན་རྣམས། །སྤྱི་གཙུག་ནས་ཡར་རིམ་པས་བསྒོམ། །ཕྱོགས་བཅུ་དུས་གསུམ་སངས་རྒྱས་རྣམས། །བྱང་ཆུབ་སེམས་དཔའ་མ་ལུས་པ། །མདུན་གྱི་ནམ་མཁར་བཞུགས་པར་བསྒོམ། །ཡན་ལག་བདུན་པ་རྒྱས་པར་དབུལ། །ཁྱད་པར་བྱང་སེམས་འབྱོངས་པ་ཡིས། །ཐུགས་རྗེ་ཅན་རྣམས་མཆོད་པར་འབུལ། །གསོལ་བ་འདི་བཞིན་གདབ་པར་བྱ། །སེམས་ཅན་ཐམས་ཅད་ཕ་མ་ཡིན། །ཕ་མའི་དྲིན་ལན་བསབ་དགོས་པས། །བྱང་སེམས་སྐྱེ་བར་བྱིན་གྱིས་རློབས། །ཕ་མ་ཁམས་གསུམ་འཁོར་བ་ན། །སྡུག་བསྔལ་རྒྱུ་འབྲས་མནར་བ་ལ། །ཕ་མའི་དྲིན་ལན་འཁུར་དགོས་པས། །བྱང་སེམས་སྐྱེ་བར་བྱིན་གྱིས་རློབས། །བླ་མ་དཀོན་མཆོག་ཁྱེད་ལ་ནི། །བསམ་དུ་སེམས་ཅན་དོན་ལས་མེད། །བདག་ལ་བྱང་སེམས་མེད་པ་འདི། །རྗེ་ཁྱེད་ཀྱི་ཐུགས་དགོངས་མ་རྫོགས་པས། །ངོ་རེ་ཚ་ལ་ཡི་རེ་མུག །བྱང་སེམས་འབྱོངས་པར་བྱིན་གྱིས་རློབས། །རྫོགས་པའི་སངས་རྒྱས་ཐོབ་པ་ལ། །བྱམས་སྙིང་རྗེ་མེད་ཐབས་མི་འདུག་པས། །བྱང་སེམས་འབྱོངས་པར་བྱིན་གྱིས་རློབས། །ཞེས་པའི་གསོལ་བ་ཡང་ཡང་བཏབ། །དེ་ཡི་རྗེས་ལ་འདི་ལྟར་བསྒོམ། །རང་གི་ལུས་ངག་ཡིད་གསུམ་འདི། །ཡི་དམ་ལྷ་ཡི་སྐུ་དང་གསུང་། །ཐུགས་སུ་ལྷུན་གྱིས་གྲུབ་པ་འདི། །རང་ལ་རང་དྲིན་ཆེ་སྙམ་པ། །ཡང་དང་ཡང་དུ་བསམ་པར་བྱ། །རང་ཡི་དམ་གྱི་ལྷ་རུ་འདུག་པ་ན། །རང་གི་ལུས་ངག་ཡིད་གསུམ་གྱིས། །དགེ་ལས་ཅི་བྱེད་ཡིད་འོང་བསྒོམ། །རང་གི་ལུས་ངག་ཡིད་གསུམ་པོ། །ཡི་དམ་ལྷ་ཡི་སྐུ་དང་གསུང་། །ཐུགས་སུ་གསལ་བར་བྱིན་གྱིས་རློབས། །ཞེས་གསོལ་བ་ཡང་དང་ཡང་དུ་གདབ། །དེ་ནི་རང་ལ་བྱམས་པ་བསྒོམ་པའོ། །གཞན་ལ་སྣོད་བཅུད་གཉིས་ལ་ནི། །དང་པོ་སྣོད་ལ་བསྒོམ་པར་བྱ། །དེ་ལ་བསྒོམ་ལུགས་འདི་ལྟ་སྟེ། །འབྱུང་བ་རྣམ་པ་ལྔ་པོ་འདི། །རིགས་ཀྱི་ཡུམ་ལྔར་བསྒོམ་པར་བྱ། །ས་ནི་སངས་རྒྱས་སྤྱན་དུ་བསྒོམ། །སྐུ་མདོག་སེར་མོ་རིན་པོ་ཆེའི། །རྒྱན་ལྡན་ཕྱག་གཡས་རིན་ཆེན་དང་། །གཡོན་པ་དྲིལ་བུས་མཚན་པ་བསྒོམ། །ཆུ་ནི་རྒྱལ་ཡུམ་མ་མ་ཀི །སྐུ་མདོག་སྔོན་མོ་རྡོ་རྗེ་དང་། །དྲིལ་བུས་མཚན་པ་བསྒོམ་པར་བྱ། །མེ་ནི་ལྷ་མོ་གོས་དཀར་མོ། །སྐུ་མདོག་དམར་མོ་པདྨ་དང་། །དྲིལ་བུས་མཚན་པ་བསྒོམ་པར་བྱ། །རླུང་གི་ལྷ་མོ་དམ་ཚིག་སྒྲོལ། །སྐུ་མདོག་ལྗང་ཁུ་རལ་གྲི་དང་། །དྲིལ་བུས་མཚན་པ་བསྒོམ་པར་བྱ། །ནམ་མཁའ་པདྨ་དྲ་བ་ཅན། །སྐུ་མདོག་དཀར་མོ་འཁོར་ལོ་དང་། །དྲིལ་བུས་མཚན་པ་བསྒོམ་པར་བྱ། །འབྱུང་བ་རྣམ་པ་ལྔ་པོ་འདི། །ཡུམ་ཆེན་ལྔ་ཡི་བདག་ཉིད་དུ། །ཡེ་ནས་ལྷུན་གྱིས་གྲུབ་པ་འདི། །དྲིན་རེ་ཆེ་ན་སྙམ་དུ་བསམ། །ལས་ལྔ་བྱེད་ཅིང་འདུག་པས་ཀྱང་། །དྲིན་རེ་ཆེ་ན་སྙམ་དུ་བསམ། །དྲིན་ཆེན་ཡུམ་ཆེན་ལྔ་པོ་ལ། །ཡིད་དུ་འོང་བར་ཡང་ཡང་བསྒོམ། །ཡུམ་ཆེན་ལྔ་ལ་སྐྱབས་སུ་མཆི། །སྙམ་དུ་ཡང་དང་ཡང་དུ་བསྒོམ། །ཡུམ་ཆེན་རྣམ་པ་ལྔ་པོ་ཡིས། །སྐུ་ནི་ཐོབ་པར་ཡང་དང་ཡང་། །གསོལ་བ་དྲག་ཏུ་གདབ་པར་བྱ། །དེ་ཚོ་རྣལ་འབྱོར་ལ་བསྒོམ་པའོ། །བཅུད་ལ་ཡར་མར་གཉིས་ལ་ནི། །དང་པོ་ཡར་ལ་བསྒོམ་པར་བྱ། །དེ་ཡང་བསྒོམ་ལུགས་འདི་ལྟ་སྟེ། །རྩ་བ་བརྒྱུད་པའི་བླ་མ་དང་། །ཡི་དམ་ལྷ་ཚོགས་ཕྱོགས་བཅུ་ཡི། །དུས་གསུམ་སངས་རྒྱས་བྱང་སེམས་ཀྱིས། །མཁའ་མཉམ་སེམས་ཅན་ཐམས་ཅད་ཀྱི། །དོན་དུ་དམ་པའི་ཆོས་ཕྱོགས་སུ། །དཀའ་བ་དཔག་མེད་སྤྱད་པ་ཡི། །མཛད་སྤྱོད་རྣམ་ཐར་དྲིན་རེ་ཆེ། །སྙམ་དུ་ཡང་དང་ཡང་དུ་བསམ། །སྐྱོན་དག་ཡོན་ཏན་རྫོགས་བྱས་ནས། །སེམས་ཅན་མ་ལུས་བུ་བཞིན་གཟིགས། །གཞན་དོན་རྒྱུན་ཆད་མེད་བྱེད་པ། །དྲིན་རེ་ཆེ་ན་སྙམ་དུ་བསམ། །སྐུ་མཆོག་མཚན་དང་དཔེ་བྱད་བརྒྱན། །གསུང་མཆོག་ཡན་ལག་དྲུག་ཅུར་ལྡན། །ཐུགས་ཤེས་བྱའི་དཀྱིལ་འཁོར་གསལ་བ་འདི། །ཡིད་དུ་འོང་བ་ཡང་ཡང་བསྒོམ། །ཡོན་ཏན་བསམ་གྱིས་མི་ཁྱབ་པ། །མོས་གུས་ཡང་དང་ཡང་དུ་བྱ། །སྐུ་གསུང་ཐུགས་ཀྱི་བྱིན་རླབས་རྣམས། །འཇུག་པར་བྱིན་གྱིས་བརླབ་ཏུ་གསོལ། །ཞེས་པའི་གསོལ་བ་ཡང་ཡང་གདབ། །མར་ལ་བྱམས་པ་བསྒོམ་པ་ནི། །རིགས་དྲུག་སེམས་ཅན་མ་ལུས་པ། །རང་གི་མདུན་དུ་བསམས་བྱས་ལ། །འགྲོ་བ་སེམས་ཅན་ཐམས་ཅད་ཀྱིས། །ཐོག་མེད་དུས་ནས་ཕ་མ་བྱས། །ཕ་མ་ཐམས་ཅད་དྲིན་ཅན་ཡིན། །དེ་ཡང་འགལ་རྐྱེན་ཐམས་ཅད་བསལ། །མཐུན་རྐྱེན་ཐམས་ཅད་བསྒྲུབ་གྱུར་པའི། །བཀའ་དྲིན་ཤིན་ཏུ་ཆེ་བ་ཡིན། །སྙམ་དུ་ཡང་དང་ཡང་དུ་བསམ། །བཀའ་དྲིན་ཅན་གྱི་ཕ་མ་དེ། །ལུས་ངག་ཡིད་གསུམ་ཅི་བྱེད་ཀྱང་། །ཤིན་ཏུ་ཡིད་དུ་འོང་བར་བསྒོམ། །ལུས་ཀྱིས་གསོད་སྤྱོད་བྱེད་པ་ཡང་། །དྲུད་ཤལ་བརྡེག་རྫོག་བྱེད་པ་དང་། །རྐུ་འཕྲོག་བྱེད་པར་གྱུར་ཀྱང་ནི། །ཤིན་ཏུ་ཡིད་དུ་འོང་བར་བསྒོམ། །ངག་གི་ངན་སྨྲས་ཕྱར་ཁ་གཏོང་། །སྐྱོན་གྱིས་མཚང་ནས་འབྲུ་གྱུར་ཀྱང་། །ཤིན་ཏུ་ཡིད་དུ་འོང་བར་བསྒོམ། །ཡིད་ཀྱིས་གནོད་སེམས་འཕྱ་གྱུར་ཀྱང་། །ཤིན་ཏུ་ཡིད་དུ་འོང་བར་བསྒོམ། །དྲིན་ཅན་འགྲོ་དྲུག་མ་རྒན་དང་། །ཐུགས་ཡིད་གཅིག་ཏུ་བསྲེ་བར་བྱ། །སྙམ་པའི་འདུན་པ་ཡང་ཡང་བཏང་། །རང་གི་ལུས་དང་ལོངས་སྤྱོད་དང་། །དགེ་བའི་རྩ་བ་ཇི་སྙེད་པས། །འགྲོ་བ་སེམས་ཅན་ཐམས་ཅད་ལ། །ཕན་པར་བྱིན་གྱིས་བརླབ་ཏུ་གསོལ། །ཞེས་པའི་གསོལ་བ་ཡང་ཡང་གདབ། །བྱམས་པ་རྒྱུད་ལ་མ་སྐྱེས་ན། །བསྐྱེད་ཐབས་རྣམ་པ་གསུམ་ཡོད་དེ། །ཐ་མ་ཡིད་འོང་གྲོགས་ལ་བརྟེན། །རང་ལ་ཕན་པར་བྱེད་པ་ཡིས། །སེམས་ཡིད་གཅིག་པའི་གྲོགས་པོ་དེས། །ཤིན་ཏུ་བཀའ་དྲིན་ཆེ་བར་འདུག །བཀའ་དྲིན་ཆེ་བས་ཡིད་དུ་འོང་། །ཡིད་དུ་འོང་བས་ཐུགས་ཡིད་འདྲེས། །ཐུགས་ཡིད་འདྲེས་པའི་གྲོགས་པོ་ལ། །ཕན་འདོགས་བྱེད་པ་ཤིན་ཏུ་སྤྲོ། །གྲོགས་ལ་སྐྱེས་པའི་བྱམས་པ་ཡིས། །ཉམས་ནི་སེམས་ཅན་ཐམས་ཅད་ལ། །དཔགས་ནས་ཡང་དང་ཡང་དུ་བསྒོམ། །འབྲིང་གི་ཡིད་འོང་མ་ལ་བརྟེན། །དེ་ཡང་ད་ལྟའི་རྩ་བ་ཡིན། །མ་དེ་ཤིན་ཏུ་བཀའ་དྲིན་ཆེ། །བཀའ་དྲིན་ཆེ་བས་ཡིད་དུ་འོང་། །ཡིད་དུ་འོང་བས་ཐུགས་ཡིད་བསྲེ། །མ་དྲིན་ཅན་ལན་དུ་འཇལ་བ་ལ། །རྩོལ་བ་མེད་པར་ཤིན་ཏུ་སྤྲོ། །མ་ལ་སྐྱེས་པའི་བྱམས་པ་ཡི། །ཉམས་དེ་གཞན་ལ་དཔགས་ཏེ་བསྒོམ། །རབ་ཀྱི་བླ་མ་ཡི་དམ་ལ། །བཀའ་དྲིན་བསམས་ལ་བྱམས་པ་བསྒོམ། །དེ་ལ་བླ་མ་དཀོན་མཆོག་ལ། །མ་རྒན་འགྲོ་དྲུག་སེམས་ཅན་གྱི། །དོན་དུ་ཆོས་ཀྱི་ཕྱོགས་སུ་ནི། །དཀའ་བ་དཔག་མེད་སྤྱད་པ་ཡིས། །མཛད་སྤྱོད་རྣམ་ཐར་དྲིན་རེ་ཆེ། །སྐྱོན་དག་ཡོན་ཏན་རྫོགས་བྱས་ནས། །འགྲོ་ལ་བུ་བཞིན་གཟིགས་པ་དང་། །ཤིན་ཏུ་བཀའ་དྲིན་ཆེ་བར་འདུག །སྐུ་མཆོག་མཚན་དང་དཔེ་བྱད་བརྒྱན། །གསུང་མཆོག་ཡན་ལག་དྲུག་ཅུར་ལྡན། །ཐུགས་ཤེས་བྱའི་དཀྱིལ་འཁོར་གསལ་བ་དང་། །ཤིན་ཏུ་ཡིད་དུ་འོང་བར་འདུག །ལུས་ངག་ཡིད་གསུམ་གུས་པ་ཡི། །རྟག་ཏུ་གསོལ་འདེབས་སྐྱབས་སུ་མཆིའོ། །སྐུ་གསུང་ཐུགས་ཀྱི་བྱིན་རླབས་རྣམས། །ད་ལྟ་ཉིད་དུ་འཇུག་ཏུ་གསོལ། །ཞེས་པའི་གསོལ་བ་ཡང་ཡང་གདབ། །ཡར་ལ་བྱམས་པ་སྐྱེས་པ་ཡིས། །ཉམས་དེ་གཞན་ལ་དཔགས་ཏེ་བསྒོམ། །བྱམས་པ་མ་སྐྱེས་སྐྱོན་ལ་ནི། །རང་གཞན་གཉིས་ལས་རང་ལ་ནི། །གནས་སྐབས་རྒྱུད་རྩུབ་མཐར་ཐུག་ནི། །གཞན་སྲོག་གཅོད་པའི་གཤེད་མར་འགྲོ། །གཞན་ལ་སྣོད་བཅུད་གཉིས་ལ་ནི། །སྣོད་ལ་བྱམས་པ་མ་སྐྱེས་ན། །གནས་སྐབས་འབྱུང་ལྔས་གནོད་པ་སྐྱེལ། །མཐར་ཐུག་ཡུམ་ཆེན་ལྔ་ཡི་སྐུ་མི་ཐོབ། །བཅུད་ལ་ཡར་མར་གཉིས་ལ་ནི། །ཡར་ལ་བྱམས་པ་མ་སྐྱེས་ན། །གནས་སྐབས་བྱིན་རླབས་མི་འཇུག་ཅིང་། །མཐར་ཐུག་སྐྱབས་གནས་མེད་པའོ། །མར་ལ་བྱམས་པ་མ་སྐྱེས་ཐམས་ཅད་སྡང་། །མཐར་ཐུག་རིགས་དྲུག་སྐྱེ་བ་ལེན། །བྱམས་པ་སྐྱེས་པའི་ཕན་ཡོན་ནི། །རང་གཞན་གཉིས་ལས་རང་ལ་ནི། །གནས་སྐབས་ལུས་ངག་ཡིད་དུ་འོང་། །མཐར་ཐུག་ཡི་དམ་ལྷ་རུ་གསལ། །གཞན་ལ་སྣོད་བཅུད་གཉིས་ལ་ནི། །སྣོད་ལ་བྱམས་པ་སྐྱེས་པ་ཡིས། །ཕན་ཡོན་འབྱུང་ཆེན་རྣམ་པ་ལྔ། །གནས་སྐབས་གནོད་སྤོངས་ཕན་བདེ་བསྒྲུབ། །མཐར་ཐུག་ཡུམ་ལྔའི་སྐུ་ཐོབ་བོ། །བཅུད་ལ་ཡར་མར་གཉིས་ལས་ནི། །ཡར་བྱམས་རྗེ་ཡི་བྱིན་རླབས་འཇུག །མཐར་ཐུག་ཐུགས་དགོངས་དབྱེར་མེད་འགྱུར། །མར་བྱམས་ཀུན་གྱིས་འཁུར་བ་དང་། །རིགས་དྲུག་སྐྱེ་སྒོ་ཁེགས་པའོ། །དམ་ཚིག་ལུས་ངག་ཡིད་གསུམ་ལས། །ལུས་ཀྱིས་ཐམས་ཅད་སྤྱི་བོར་ཁུར། །ངག་གི་གཞན་གྱི་སྐྱོན་སྦ་ཞིང་། །ཡོན་ཏན་ཐམས་ཅད་བརྗོད་ལེགས་བྱ། །ཡིད་ཀྱིས་ཀུན་དང་ཐུགས་ཡིད་བསྲེ། །བྱམས་པའི་བྱེད་ལས་ཕན་འདོགས་ཡིན། །དེ་ཡང་རང་ལ་ཕན་འདོགས་ལ། །དགེ་སྡིག་ཕྲ་ལ་འདོར་ལེན་བྱ། །སྣོད་ཡུམ་ཆེན་ལྔ་ལ་ཕན་འདོགས་ནི། །ཕྱི་ནང་གསང་བའི་མཆོད་པ་འབུལ། །རྗེ་དཀོན་མཆོག་གསུམ་ལ་ཕན་འདོགས་ནི། །ཞབས་ཏོག་གསུམ་གྱིས་མཉེས་པར་བྱ། །མར་རིགས་དྲུག་བཅུད་ལ་ཕན་འདོགས་ནི། །དངོས་དང་བརྒྱུད་དང་རྐུན་བུ་གསུམ། །དང་པོ་ཆོས་དང་ཟང་ཟིང་གིས། །ཀུན་ལ་ཅི་ཕན་བྱེད་པའོ། །བརྒྱུད་ནས་འགྲོན་ཁ་ལམ་འཕྲང་ཆོས། །ཟམ་པ་ལ་སོགས་དགེ་ལས་དང་། །ཆོས་ཟབ་བརྩམས་ནས་འཇོག་པའོ། །རྐུན་བུས་ཆོས་དང་ཟང་ཟིང་གིས། །གཞན་པོ་སུས་ཀྱང་མ་ཚོར་བར། །ལྐོག་ཏུ་ཕན་འདོགས་བྱེད་པའོ། །གྲུ་ཡིས་མཚམས་བཅད་ལོ་རྒྱུས་གསུངས། །འགམ་སྤྱོད་མཐར་ཐུག་དངོས་སུ་སྟོན། །དེ་ཡི་རྗེས་ལ་སྙིང་རྗེ་བསྒོམ། །དེ་ལ་ཡང་ནི་རྣམ་པ་བརྒྱད། །ངོ་བོ་ཟུང་འཇུག་བསྐྱེད་ཐབས་དང་། །སྐྱོན་ཡོན་དམ་ཚིག་བྱེད་ལས་དང་། །འགམ་སྤྱོད་མཐར་ཐུག་སྐྱེལ་སོ་ཡི། །སྙིང་རྗེ་ངོ་ཡིས་བཟུང་བ་ཡི། །མ་རྒན་འགྲོ་དྲུག་སེམས་ཅན་གྱིས། །སྡུག་བསྔལ་རྒྱུ་དང་འབྲས་བུ་ལ། །བརྩེ་བ་ཤས་མི་བཟོད་པ་སྐྱེ། །རྒྱུད་ལ་སྐྱེ་ཐབས་རྣམ་པ་བཞི། །མ་ལ་དཔེ་དྲངས་རང་དཔེ་དང་། །བླ་མ་ལ་བསམ་སྙིང་རྗེ་བསྐྱེད། །བྱང་ཆུབ་སེམས་ལ་རག་ལས་པས། །སྙིང་རྗེ་བསྒོམ་པ་དང་བཞིའོ། །སྡང་དགྲ་གདོན་བགེགས་ལ་སོགས་ཀྱིས། །གཙོ་བྱས་སེམས་ཅན་ཐམས་ཅད་ལ། །བདག་གི་དྲིན་ཆེན་ཕ་མ་ལ། །ཕ་མས་ཐོག་མེད་དུས་ནས་ནི། །ད་ལྟའི་དུས་འདི་ཐམས་ཅད་དུ། །དཔག་ཏུ་མེད་པར་འཁོར་འཁྱམས་ཤིང་། །རྒས་ཤིང་ཁོགས་པ་སྙིང་རེ་རྗེ། །ཐོས་པ་བསམ་པ་བསྒོམ་པ་ཡི། །ཤེས་རབ་མིག་ཀྱང་མི་ལྡོག་ཅིང་། །ཆུ་བུར་མིག་ལོང་སྙིང་རེ་རྗེ། །བསམ་གཏན་ཆོག་ཤེས་ཟད་མེད་ཀྱང་། །དབུལ་འཕོངས་བཀྲེས་པ་སྙིང་རེ་རྗེ། །རང་སེམས་འཁྲུལ་པ་ཆགས་སྡང་གིས། །རྒྱུན་ཆད་མེད་པར་དབང་དུ་ཤོར། །གཉེན་པོའི་སེམས་དང་བྲལ་གྱུར་ཅིང་། །ཉོན་མོངས་གདོན་གྱིས་རྟག་ཏུ་བརླབས། །རང་དབང་རང་གིས་མི་ཐོབ་ཅིང་། །སེམས་སྨྱོན་པར་སོང་བ་སྙིང་རེ་རྗེ། །ཕན་ཚུན་གཅིག་ལ་གཅིག་འཚེ་ཞིང་། །ཕན་འདོགས་མེད་པ་སྙིང་རེ་རྗེ། །འདི་ལྟར་རྒྱུ་མཚན་ལྔ་པོ་ལ། །བསམས་ལ་ཡང་དང་ཡང་དུ་བསྒོམ། །རང་ལ་དཔགས་པ་བསྒོམ་པ་ནི། །རྒྱུད་ལ་ཉོན་མོངས་རྣམ་རྟོག་དང་། །ན་ཚ་སྡུག་བསྔལ་བྱུང་དུས་སུ། །བདག་མཚན་ལྡན་བླ་མ་རྗེ་དང་མཇལ། །གདམས་ངག་ཟབ་མོ་ཉམས་ལེན་ཤེས། །རྗེ་དང་གྲོགས་ཀྱིས་སྐྱོང་བ་ལ། །རྣམ་རྟོག་ཉོན་མོངས་སྡུག་བསྔལ་སྐྱེ། །ཁྱོད་རང་ཁོ་ན་སྙིང་རེ་རྗེ། །སྙམ་པ་ཡང་ཡང་བསྒོམ་པར་བྱ། །རང་གི་ཉོན་མོངས་གཉེན་པོར་འགྲོ། །གཞན་ལ་བདེན་བསྟན་སྙིང་རྗེ་སྐྱེ། །བླ་མ་ལ་བསམས་བསྒོམ་པ་ནི། །དྲང་ལ་རེ་བ་རྗེ་ལས་མེད། །བླ་མ་དཀོན་མཆོག་གསུམ་པོ་ལ། །བསམ་དུ་སེམས་ཅན་དོན་ལས་མེད། །ཚིགས་སུ་བཅད་པ་བཅུ་གཅིག་ལས། །སེམས་ཅན་རྣམས་ལ་ཕན་པ་ཡི། །མཆོག་ནི་ང་ལ་མཆོད་མཆོག་ཡིན། །སེམས་ཅན་རྣམས་ལ་གནོད་པ་ཡི། །མཆོག་ནི་ང་ལ་གནོད་མཆོག་ཡིན། །ང་དང་སེམས་ཅན་རྣམས་ནི་བདེ་སྡུག་མཚུངས། །ང་ཡི་གཟུགས་ཀྱི་སྐུ་འདི་སེམས་ཅན་དོན་དུ་བསྒྲུབ་པ་ཡིན། །ཞེས་གསུངས་སོ། །དྲིན་ལན་བསབ་པའི་མདོ་ལས། ངའི་དྲིན་ལན་བསབ་པར་འདོད་ན། སེམས་ཅན་ཐམས་ཅད་ལ་བུ་གཅིག་པའི་མ་བཞིན། འདུ་ཤེས་བསྐྱེད་ཅིང་དྲན་པར་བྱའོ། །ཞེས་གསུངས་སོ། །བ་ཚ་ཅན་ཆུ་ཀླུང་གི་མདོ་ལས། སངས་རྒྱས་མྱ་ངན་ལས་འདའ་ཁར་ཉན་ཐོས་ཆེན་པོ་གནས་བརྟན་བཅུ་དྲུག་གི། ཆོས་ཞུས་པས། སངས་རྒྱས་ཀྱི་ཞལ་ནས། སེམས་ཅན་གྱི་དོན་བྱས་ན་ངའི་དོན་བྱས། སེམས་ཅན་བདེ་ན་ང་བདེ། སེམས་ཅན་སྡུག་ན་ང་སྡུག །སེམས་ཅན་མགུ་ན་ང་མགུ། སེམས་ཅན་མ་མགུ་ན་ང་མ་མགུ་ཞེས་སོ། །དེ་ལྟར་བླ་མ་དཀོན་མཆོག་ལ། །བསམ་དུ་སེམས་ཅན་དོན་ལས་མེད། །རང་ལ་སྙིང་རྗེ་མེད་པ་ན། །རྗེ་ཡི་ཐུགས་དགོངས་མ་རྫོགས་པས། །ངོ་རེ་ཚ་ན་ཤི་ན་སྐྱིད། །ཁྲེལ་མེད་གདོང་ཆུང་བྱ་བ་ཡིན། །དེ་ལྟར་བླ་མ་དཀོན་མཆོག་ལ། །བསམས་ནས་སྙིང་རྗེ་ཡང་ཡང་བསྒོམ། །ངེས་པར་སངས་རྒྱས་ཐོབ་པ་ལ། །སྙིང་རྗེ་མེད་ཐབས་མེད་པ་ནི། ཆོས་ཡང་དག་པ་བསྡུད་པའི་མདོ་ལས། སྤྱན་རས་གཟིགས་ཀྱིས་གསོལ་པ། བྱང་ཆུབ་སེམས་དཔའ་ཆོས་མང་པོ་ལ་བསླབ་པར་མི་བགྱི། གཅིག་ལ་བསླབ་པར་བགྱི། ཆོས་གཅིག་རྟོགས་ཤིང་ཁོང་དུ་ཆུད་ན། སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་ན་གནས་པ་ཡིན་ནོ། །གཅིག་པོ་གང་ཞེ་ན། སྙིང་རྗེ་ཆེན་པོའོ་ཞེས་གསུངས་སོ། །དེའི་ཕྱིར་སངས་རྒྱས་ཐོབ་པ་ལ། །སྙིང་རྗེ་མེད་ཐབས་མེད་པ་ཡིན། །སྙིང་རྗེའི་ཡུལ་ནི་སེམས་ཅན་ཡིན། །དེ་ཕྱིར་རྫོགས་པའི་སངས་རྒྱས་ཀྱང་། །སེམས་ཅན་ལ་ནི་རག་ལས་སོ། །དེ་ཚོ་རྒྱུད་ལ་སྐྱེ་ཐབས་ཡིན། །སྙིང་རྗེ་མ་སྐྱེས་སྐྱོན་ལ་ནི། །སྒྲིབ་པ་རྣམ་གཉིས་མི་བྱང་ཞིང་། །མཁྱེན་གཉིས་ཐོབ་པར་མི་འགྱུར་རོ། །སྙིང་རྗེ་སྐྱེས་པའི་ཕན་ཡོན་ནི། །གནས་སྐབས་མི་དགེ་བདུན་སྤངས་ཞིང་། །མཐར་ཐུག་སྒྲིབ་གཉིས་དག་པ་དང་། །སྐུ་དང་ཡེ་ཤེས་ཐོབ་པའོ། །སྙིང་རྗེའི་དམ་ཚིག་བསྲུང་ཐབས་ནི། །ཞེ་སྡང་རྒྱུད་སྐྱེས་སྤང་བ་དང་། །རང་འདོད་སྐད་ཅིག་མེད་པ་འཚལ། །ཁྱད་པར་སྡོམ་པ་ཉི་ཤུ་ལས། །ཇི་ལྟར་བཤད་བཞིན་ལག་ལེན་གདབ། །དེ་ཡང་འདི་ལྟར་སྟོན་པ་ཡིན། །སངས་རྒྱས་སྲས་དང་བཅས་རྣམས་ལ། །གུས་པས་ཕྱག་འཚལ་ཅི་ནུས་མཆོད། །ཕྱོགས་དུས་ཀུན་ན་བཞུགས་པ་ཡིས། །བྱང་ཆུབ་སེམས་དཔའ་རྣམས་ཀྱི་ཁྲིམས། །བསོད་ནམས་ཀུན་གྱི་གཏེར་གྱུར་གང་། །དེ་ནི་བསམ་པ་དམ་པ་ཡིན། །བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལ་བླང་བར་བྱ། །དེ་ཚེ་དེ་ལ་དགེ་བའི་ཕྱིར། །རྒྱལ་བ་སྲས་དང་བཅས་རྣམས་ཀྱིས། །དགའ་བའི་ཐུགས་ཀྱིས་རྟག་པར་ནི། །བུ་སྡུག་འདྲ་བར་དགོངས་པར་འགྱུར། །བདག་རྣམས་དང་ནི་གཞན་ལའང་རུང་། །སྡུག་བསྔལ་ཡིན་ཡང་གང་ཕན་བྱ། །ཕན་དང་བདེ་བར་རྣམས་བྱ་སྟེ། །བདེ་ཡང་མི་ཕན་མི་བྱའོ། །ཉོན་མོངས་དྲག་ལས་བྱུང་བ་ཡི། །སྡོམ་པ་ཞིག་པར་གང་གྱུར་པ། །དེ་ཡིས་ཉེས་པ་བཞི་པོ་དག །འཕམ་པ་འདྲ་བར་དགོངས་པ་ཡིན། །རྙེད་དང་བཀུར་སྟི་ཆགས་པ་ཡིས། །བདག་བསྟོད་གཞན་ལ་སྨོད་པ་དང་། །སྡུག་་་་་་་་་ཕ་རོལ་ཕྱིན་པ་དྲུག་ལ་སྦྱིན་པའི་བདུན། བསྔལ་མགོན་མེད་གྱུར་པ་ལ། །སེར་སྣ་ཆོས་ནོར་མི་སྟེར་དང་། །རྩ་བ་བཞི་སྟེ་སྡོམ་པའི་ཚུལ་ཁྲིམས་སོ། །དགེ་བ་ཆོས་བསྡུད་ལ། གཞན་གྱིས་བཤགས་ཀྱང་མ་ཉན་པར། །ཁྲོས་པས་གཞན་ལ་ཚིག་པ་དང་། །ཐེག་པ་ཆེན་པོ་སྤོང་བྱེད་ཅིང་། །དམ་ཆོས་འདྲར་སྣང་སྟོན་པའོ། །སྡོམ་པ་སླར་ཡང་བླང་བར་བྱ། །ཟག་པ་འབྲིང་ནི་གསུམ་ལ་བཤགས། །གཅིག་གི་མདུན་དུ་ལྷག་མ་རྣམས། །ཉོན་མོངས་མེ་ལོང་བདག་སེམས་གཞན། །དཀོན་མཆོག་གསུམ་ལ་གསུམ་མི་ཆོད། །འདོད་པའི་སེམས་ཀྱིས་རྗེས་སུ་འཇུག །རྒན་པ་རྣམས་ལ་གུས་མི་བྱེད། །དྲིས་པ་རྣམས་ལ་ལན་མི་འདེབས། །འགྲོན་པོས་བདག་གིར་མི་བྱེད་ཅིང་། །གསེར་ལ་སོགས་པ་ལན་མི་བྱེད། །ཚུལ་ཁྲིམས་འཆལ་རྣམས་ཡལ་བར་དོར། །ཕ་རོལ་དད་ཕྱིར་སློབ་མི་བྱེད། །སེམས་ཅན་དོན་ལ་བྱ་བ་ཆུང་། །སྙིང་བརྩེར་བྱས་ན་མི་དགེ་མེད། །འཚོ་བ་ལོག་པ་དང་དུ་ལེན། །འཆར་ནས་རབ་ཏུ་རྒོད་ལ་སོགས། །ཁོང་རང་གཅིག་པུ་བསྒྲོད་པར་སེམས། །གྲགས་པ་མ་ཡིན་མི་སྤོང་དང་། །ཉོན་མོངས་བཅས་དང་འཆོས་མི་བྱེད། །གཤེ་ལ་ལན་དུ་གཤེ་བར་བྱེད། །ཁྲོས་པ་རྣམས་ཀྱི་ཡལ་བར་འཇོག །ཕ་རོལ་བཤད་ཀྱི་ཆགས་པ་སྤོང་། །ཁྲོས་པའི་སེམས་ཀྱིས་རྗེས་སུ་འཇུག །བསྙེན་བཀུར་འདོད་ཕྱིར་འཁོར་རྣམས་བསྡུད། །ལེ་ལོ་ལ་སོགས་སེལ་མི་བྱེད། །ཆགས་པས་བྲེ་མོའི་གཏམ་ལ་བརྟེན། །ཏིང་ངེ་འཛིན་གྱི་དོན་མི་འཚོལ། །བསམ་གཏན་སྒྲིབ་པ་སྤོང་མི་བྱེད། །བསམ་གཏན་རོ་ལ་ཡོན་ཏན་ལྟ། །ཉན་ཐོས་ཐེག་པ་སྤོང་བར་བྱེད། །རང་ཚུལ་ཡོད་བཞིན་དེ་ལ་བརྩོན། །བརྩོན་མིན་ཕྱི་རོལ་བསྟན་བཅོས་བརྩོམ། །བརྩོན་པར་བྱས་ཀྱང་དེ་ལ་དགའ། །ཐེག་པ་ཆེན་པོ་སྤོང་བྱེད་ཅིང་། །བདག་ལ་བསྟོད་ཅིང་གཞན་ལ་སྨོད། །ཆོས་ཀྱི་དོན་དུ་འགྲོ་མི་བྱེད། །དེ་ལ་སྨོད་ཅིང་ཡི་གེ་སྟོན། །དགོངས་པའི་གྲོགས་སུ་འགྲོ་མི་བྱེད། །སྡུག་བསྔལ་སེལ་བར་མི་བྱེད་ཅིང་། །བག་མེད་རྣམས་ལ་རིགས་མི་སྟོན། །བྱམས་པ་ལན་དུ་ཕན་མི་འདོགས། །གཞན་གྱི་མྱ་ངན་སེལ་མི་བྱེད། །ནོར་འདོད་པ་ལ་སྦྱིན་མི་བྱེད། །འཁོར་འདོད་རྣམས་ཀྱི་དོན་མི་བྱེད། །འཇིགས་པ་ལས་ནི་བསྲུང་མི་བྱེད། །གཞན་གྱི་བློ་དང་མཐུན་མི་འཇུག །རྐྱེན་དང་འཚམ་པར་ཚར་མི་གཅོད། །ཡོན་ཏན་བསྔགས་པ་སྨྲ་མི་བྱེད། །རྫུ་འཕྲུལ་སོགས་ཀྱིས་སྡིགས་མི་བྱེད། །སྙིང་བརྩེར་ལྡན་ཞིང་བྱམས་ཕྱིར་དང་། །སེམས་དགེ་བ་ལ་ཉེས་པ་མེད། །ཅེས་པའི་དོན་རྣམས་ཉམས་སུ་བླང་། །བྱེད་པའི་ལག་ལེན་བདེ་སྡུག་རྗེ། །དེ་ལ་ཡིད་དང་དངོས་གཉིས་ལས། །དང་པོ་སྙིང་རྗེའི་བཟློག་བསྒོམ་གྱིས། །བདེ་སྡུག་ལམ་དུ་ཁྱེར་བར་བྱེད། །དེ་ལ་སྨོན་འཇུག་རྣམ་གཉིས་ཏེ། །དང་པོ་སྔོན་འགྲོ་སྙིང་རྗེ་བསྒོམ། །དངོས་གཞི་སྡུག་བསྔལ་བསྡུས་གྱུར་ནས། །བདེ་བ་ཆེན་པོར་སྨོན་ལམ་གདབ། །རྗེས་ལ་བླ་མེད་བྱང་ཆུབ་བསྔོ། །དང་པོ་ཡི་དམ་ལྷར་བསྒོམས་ལ། །རིགས་དྲུག་སེམས་ཅན་མ་ལུས་པ། །རང་གི་མདུན་དུ་བསམ་བྱས་ལ། །སྡུག་བསྔལ་རྒྱུ་འབྲས་མནར་བ་ཡི། །སེམས་ཅན་འདི་རྣམས་སྙིང་རེ་རྗེ། །སྙམ་དུ་ཡང་དང་ཡང་བསམས་ལ། །མ་རྒན་སེམས་ཅན་ཐམས་ཅད་ཀྱིས། །སྡུག་བསྔལ་མ་ལུས་ཐམས་ཅད་ནི། །བདག་གི་ལུས་ངག་ཡིད་གསུམ་གྱིས། །ཐོག་ཏུ་སྨིན་པར་བསམས་བྱས་ལ། །ཟག་མེད་བདེ་བར་ཤར་གྱུར་ཅིག །ཅེས་པའི་སྨོན་ལམ་གདབ་པར་བྱ། །ཐུགས་ཁ་ནས་ནི་འོད་ཟེར་འཕྲོས། །སེམས་ཅན་སྡུག་བསྔལ་མ་ལུས་པ། །འོད་ཟེར་གྱིས་ནི་འུབས་ཀྱིས་བསྡུས། །རང་གི་ཐོག་ཏུ་བྱུང་བ་དང་། །ཟག་མེད་བདེ་བ་ལྷུན་གྱིས་ཤར། །བདག་གི་དུས་གསུམ་བསགས་པ་ཡིས། །དགེ་བ་ཇི་སྙེད་ཡོད་པ་དེས། །མཁའ་མཉམ་སེམས་ཅན་མ་ལུས་པ། །བླ་མེད་བྱང་ཆུབ་ཐོབ་གྱུར་ཅིག །ཅེས་པས་རྫོགས་པའི་བྱང་ཆུབ་བསྔོ། །འཇུག་པ་ལ་ཡང་རྣམ་གསུམ་སྟེ། །སྔོན་འགྲོ་རང་འདོད་མེད་པ་ནི། །འཁོར་བའི་བདེ་འབྲས་ལ་སོགས་པའོ། །ཉན་ཐོས་རང་རྒྱལ་བྱང་ཆུབ་ཀྱིས། །བདག་ལ་དགོས་པ་མེད་སྙམ་པའི། །ཞེ་འདོད་གཏན་ནས་མེད་པར་བྱ། །དངོས་གཞི་སྙིང་རྗེ་བསྒོམ་པ་ནི། །ཨ་མ་སྡུག་བསྔལ་རྒྱུ་འབྲས་ཀྱིས། །རྟག་ཏུ་གཙེས་ཞིང་མནར་བ་རྣམས། །སྙིང་རེ་རྗེ་ན་སྙམ་དུ་སེམས། །རྗེས་ལ་བདེ་སྡུག་བརྗེ་བ་ནི། །སེམས་ཅན་ཐམས་ཅད་བདེ་བ་དང་། །ལྡན་ཞིང་སྡུག་བསྔལ་བྲལ་བའི་ཕྱིར། །དམྱལ་བ་ལ་སོགས་རིགས་དྲུག་གི། །གནས་སུ་སྐྱེ་བར་སྨོན་ལམ་གདབ། །སྐད་ཅིག་དེ་ལ་རིགས་དྲུག་གི། །སེམས་ཅན་རེ་རེའི་མདུན་དུ་ནི། །ཡི་དམ་ལྷ་རེ་སྣང་བར་བསྒོམ། །རིགས་དྲུག་གནས་དེ་དག་པ་ཡི། །གཞལ་ཡས་ཁང་དུ་གསལ་བར་བསྒོམ། །འཁོར་བའི་རྒྱ་མཚོ་སྟོངས་ཀྱི་བར། །སེམས་ཅན་རྣམས་ཀྱི་སྡུག་བསྔལ་ནི། །བདག་གིས་འཁུར་བར་གྱུར་ཅིག་ཅེས། །སྡུག་བསྔལ་རང་བཞིན་ཟག་མེད་ཀྱིས། །བདེ་བ་ཆེན་པོར་ཤར་གྱུར་ཅིག །ཅེས་པའི་སྨོན་ལམ་གདབ་པར་བྱ། །དངོས་དང་རྒྱུད་ལས་འབྲས་བུ་ལ། །དང་པོ་རྒྱུ་བརྗེ་འདི་ལྟ་སྟེ། །འདོད་ཆགས་བརྗེ་བ་ཕར་ལ་འདོད། །ཞེ་སྡང་ཚར་གཅོད་ལ་སོགས་པ། །ཕན་སེམས་དྲག་པོ་བྱེད་པའོ། །དེ་ཡང་སྨོན་ལམ་འདི་ལྟར་གདབ། །མ་རིག་གཏི་མུག་འཐིབས་པ་ཡིས། །མ་རྒན་སེམས་ཅན་སྙིང་རེ་རྗེ། །བདག་གི་འོད་གསལ་ཤེས་རབ་འདི། །གཏི་མུག་ཅན་གྱི་རྒྱུད་ལ་སྦྱིན། །ཨ་མའི་མ་རིག་གཏི་མུག་དེ། །བདག་གིས་ཚུར་ལ་བླང་བར་བྱ། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །འོད་གསལ་ཤེས་རབ་ལྡན་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །འདོད་ཆགས་སེར་སྣས་མནར་བ་ཡིས། །མ་རྒན་སེམས་ཅན་སྙིང་རེ་རྗེ། །བདག་གི་ཞེན་ལོག་དགོས་མེད་འདི། །མ་འདོད་ཆགས་ཅན་གྱི་རྒྱུད་ལ་སྦྱིན། །ཨ་མའི་འདོད་ཆགས་སེར་སྣ་དེ། །བདག་གིས་ཚུར་ལ་བླང་བར་བྱ། །བདག་གི་དགེ་རྩ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །ཞེན་ལོག་དགོས་མེད་དང་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །འཁོན་འཛིན་ཞེ་སྡང་མནར་བ་ཡིས། །མ་རྒན་སེམས་ཅན་སྙིང་རེ་རྗེ། །བདག་གི་གཉུག་མ་བྱམས་ཆེན་འདི། །ཞེ་སྡང་ཅན་གྱི་རྒྱུད་ལ་སྦྱིན། །ཨ་མའི་འཁོན་འཛིན་ཚུར་ལ་བླངས། །དགེ་བའི་རྩ་བ་རྒྱ་ཆེན་དེས། །མ་རྒན་སེམས་ཅན་མ་ལུས་པ། །གཉུག་མ་བྱམས་ཆེན་དང་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །ང་རྒྱལ་ཁེངས་སེམས་ལྡན་པ་ཡིས། །མ་རྒན་སེམས་ཅན་སྙིང་རེ་རྗེ། །བདག་གིས་བདག་མེད་སྤྱི་ཁུར་འདི། །ང་རྒྱལ་ཅན་གྱི་རྒྱུད་ལ་སྦྱིན། །ཨ་མའི་ང་རྒྱལ་ཚུར་ལ་བླང་། །དགེ་བའི་རྩ་བ་རྒྱ་ཆེན་དེས། །མ་རྒན་སེམས་ཅན་མ་ལུས་པ། །བདག་མེད་སྤྱི་ཁུར་དང་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །ཕྲག་དོག་འགྲན་སེམས་ཀྱིས་གཙེས་པའི། །ཨ་མ་སེམས་ཅན་སྙིང་རེ་རྗེ། །བདག་གི་སྒྱུ་མ་ངོ་མཚར་འདི། །མ་ཕྲག་དོག་ཅན་གྱི་རྒྱུད་ལ་སྦྱིན། །ཨ་མའི་ཕྲག་དོག་ཚུར་ལ་བླང་། །དགེ་བ་རྒྱ་ཆེན་དེ་ཡིས་ནི། །ཨ་མ་སེམས་ཅན་མ་ལུས་པ། །སྒྱུ་མ་ངོ་མཚར་དང་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །ལོག་ལྟ་ཐེ་ཚོམ་གྱིས་མནར་བའི། །ཨ་མ་སེམས་ཅན་སྙིང་རེ་རྗེ། །བདག་གི་དག་སྣང་ངེས་ཤེས་པའི། །ལོག་ལྟ་ཅན་གྱི་རྒྱུད་ལ་སྦྱིན། །ཨ་མའི་ལོག་ལྟ་བདག་གིས་བླངས། །དགེ་བ་རྒྱ་ཆེན་དེ་ཡིས་ནི། །ཨ་མ་སེམས་ཅན་མ་ལུས་པ། །ལོག་ལྟ་ཐེ་ཚོམ་དང་བྲལ་ཞིང་། །དག་སྣང་ངེས་ཤེས་དང་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །འབྲས་བུ་ན་ཚ་སྡུག་བསྔལ་ལ། །ལམ་དུ་འགྲོ་འམ་མི་འགྲོ་བའི། །དགེ་བའི་ཁེབས་ཆེན་རྩིས་ནས་ནི། །ལམ་དུ་འགྲོ་ན་སྲོག་ཀྱང་བཏང་། །ཁེབས་མེད་བཏང་བར་མི་བྱའོ། །དེ་ཡང་སྨོན་ལམ་འདི་ལྟར་བཏབ། །ཨ་མ་རང་སྲོག་གཅད་པ་ཡིས། །སྡུག་བསྔལ་ཅན་རྣམས་སྙིང་རེ་རྗེ། །བདག་གི་སྲོག་ནས་བདེ་བ་འདི། །མ་རང་སྲོག་ཆད་པའི་རྒྱུད་ལ་སྦྱིན། །མ་རང་སྲོག་ཆད་པའི་སྡུག་བསྔལ་རྣམས། །བདག་གིས་ཚུར་ལ་བླང་བར་བྱ། །དགེ་བ་རྒྱ་ཆེན་དེ་ཡིས་ནི། །ཨ་མ་སེམས་ཅན་མ་ལུས་པ། །ཚེ་ཡི་རིག་འཛིན་ཐོབ་པ་དང་། །སེམས་སྐྱེ་ཤི་མེད་པའི་དོན་ལྡན་ནས། །བླ་མེད་བྱང་ཆུབ་ཐོབ་གྱུར་ཅིག །ལུས་ན་ཚའི་སྡུག་བསྔལ་མནར་བ་ཡི། །མ་རྒན་སེམས་ཅན་སྙིང་རེ་རྗེ། །བདག་གི་ནད་ཞི་ཟག་མེད་འདི། །བདེ་བ་སེམས་ཅན་རྣམས་ལ་སྦྱིན། །ཨ་མའི་ན་ཚ་ཚུར་ལ་བླང་། །དགེ་བ་རྒྱ་ཆེན་དེ་ཡིས་ནི། །མ་རྒན་སེམས་ཅན་མ་ལུས་པ། །ནད་མེད་རྡོ་རྗེའི་སྐུ་ཐོབ་ནས། །བླ་མེད་བྱང་ཆུབ་ཐོབ་གྱུར་ཅིག །ལུས་གྲང་བའི་སྡུག་བསྔལ་མནར་བ་ཡིས། །ཨ་མ་སེམས་ཅན་སྙིང་རེ་རྗེ། །བདག་གི་མལ་ས་བདེ་མོ་དང་། །གོས་དྲོ་སྐྱིད་པའི་བདེ་བ་རྣམས། །ཨ་མ་གྲང་བའི་དུ་ཁཿཡིས། །མནར་བའི་རྒྱུད་ལ་སྦྱིན་པར་བྱ། །ཨ་མའི་གྲང་བའི་སྡུག་བསྔལ་རྣམས། །བདག་གི་ཚུར་ལ་བླང་བར་བྱ། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །ལྷ་རྫས་ན་བཟའ་ཕུན་སུམ་ཚོགས། །བདེ་དྲོད་གཏུམ་མོའི་གོས་ལྡན་ནས། །བླ་མེད་བྱང་ཆུབ་མྱུར་ཐོབ་ཤོག །བཀྲེས་ཤིང་སྐོམ་པས་མནར་བ་ཡི། །ཨ་མ་སེམས་ཅན་སྙིང་རེ་རྗེ། །བདག་གི་བཟའ་བཏུང་ཕུན་ཚོགས་ཀྱིས། །བདེ་བ་མ་རྒན་རྣམས་ལ་སྦྱིན། །ཨ་མའི་བཀྲེས་སྐོམ་དུཿཁ་རྣམས། །བདག་གིས་ཚུར་ལ་བླང་བར་བྱ། །དགེ་བ་མ་ལུས་རྒྱ་ཆེན་དེས། །ཨ་མ་སེམས་ཅན་མ་ལུས་པ། །ལྷ་ཡི་ཞལ་ཟས་ཕུན་སུམ་ཚོགས། །ཏིང་འཛིན་ཟས་ཀྱིས་འཚོ་གྱུར་ནས། །བླ་མེད་བྱང་ཆུབ་མྱུར་ཐོབ་ཤོག །དགྲ་སྡང་གཤེད་མས་གཙེས་པ་ཡི། །ཨ་མ་སེམས་ཅན་སྙིང་རེ་རྗེ། །བདག་གི་དགྲ་སྡང་དྲིན་ཅན་གྱི། །ཕ་མར་ཤེས་པའི་བདེ་བ་འདི། །ཨ་མའི་རྒྱུད་ལ་སྨིན་པར་བྱ། །ཨ་མ་དགྲ་སྡང་དུཿཁ་ཡིས། །མནར་བ་བདག་གིས་ཚུར་ལ་བླང་། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །གནོད་སྐྱེལ་ལན་དུ་ཕན་འདོགས་ནས། །བླ་མེད་བྱང་ཆུབ་ཐོབ་གྱུར་ཅིག །བགེགས་རིགས་སྟོང་ཕྲག་བརྒྱད་ཅུ་ཡིས། །གཙེས་པའི་མ་རྒན་སྙིང་རེ་རྗེ། །བདག་གིས་རང་སྣང་སྒྱུ་མ་རུ། །ཤེས་པའི་བདེ་བ་ཆེན་པོ་འདི། །ཨ་མའི་རྒྱུད་ལ་སྦྱིན་པར་བྱ། །ཨ་མ་སྡུག་བསྔལ་བཅོས་པ་འདི། །སྡུག་བསྔལ་བདག་གིས་ཚུར་ལ་བླང་། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །བདག་འཛིན་བློ་ཡིས་ཐོངས་འགྱུར་ཞིང་། །ཉམ་ང་བག་ཚ་བྲལ་བ་དང་། །དམིགས་མེད་ཐུགས་རྗེ་འབྱོངས་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །ཕ་མ་ལ་སོགས་བྱམས་པ་ཡིས། །གཉེན་དང་བྲལ་བར་གྱུར་པ་ཡིས། །དུཿཁས་གཙེས་པའི་མ་རྒན་རྣམས། །ཤིན་ཏུ་སྙིང་རེ་རྗེ་གྱུར་པའི། །བདག་གིས་འབྲེལ་མེད་ཤེས་པ་ཡིས། །ཞེན་པ་མེད་པའི་བདེ་བ་འདི། །གཉེན་བྱམས་དང་བྲལ་བའི་རྒྱུད་ལ་སྦྱིན། །ཨ་མའི་སྡང་སེམས་དུཿཁ་དེ། །བདག་གིས་ཚུར་ལ་བླང་བར་བྱ། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །ཆགས་ཞེན་འབྱར་རྩི་བྲལ་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །ངལ་ཞིང་དུབ་པའི་སྡུག་བསྔལ་གྱིས། །མནར་བའི་མ་རྒན་སྙིང་རེ་རྗེ། །བདག་གི་མགྱོགས་དང་ཞེན་པ་ཡིས། །བདེ་བ་མ་རྒན་རྒྱུད་ལ་སྦྱིན། །ཨ་མའི་ངལ་དུབ་ཚུར་ལ་ལེན། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །ལུས་དང་སེམས་ཉིད་བདེ་གྱུར་ནས། །བྱ་བ་ཐམས་ཅད་ཉམས་འོག་ཚུད། །རྫུ་འཕྲུལ་རྐང་པ་དང་ལྡན་ནས། །བླ་མེད་བྱང་ཆུབ་མྱུར་ཐོབ་ཤོག །སྡུག་བསྔལ་གཏམ་ངན་ལ་སོགས་ཀྱིས། །གཙེས་པའི་མ་རྒན་སེམས་ཅན་རྣམས། །ཤིན་ཏུ་སྙིང་རེ་རྗེ་གྱུར་པས། །བདག་གིས་གྲགས་སྟོང་ལྷན་སྐྱེས་སུ། །ཤེས་པའི་བདེ་བ་ཆེན་པོ་ཡིས། །མ་གཏམ་ངན་ཅན་གྱི་རྒྱུད་ལ་སྦྱིན། །ཨ་མའི་སྡུག་བསྔལ་ཚུར་ལ་བླངས། །དགེ་བའི་རྩ་བ་རྒྱ་ཆེན་དེས། །ཨ་མ་སེམས་ཅན་མ་ལུས་པ། །བསྟོད་སྨད་བྲག་ཆ་ལྟ་བུར་ཤེས། །སྙན་གྲགས་ཕུན་སུམ་ཚོགས་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །འཁོར་བའི་དུཿཁ་སྣ་ཚོགས་ཀྱིས། །མནར་བའི་སེམས་ཅན་སྙིང་རེ་རྗེ། །ཟག་མེད་བདེ་བ་ཕུན་ཚོགས་ཀྱིས། །བདེ་སྐྱིད་ཨ་མའི་རྒྱུད་ལ་སྦྱིན། །ཨ་མའི་དུཿཁ་ཚུར་ལ་བླང་། །དགེ་བ་རྒྱ་ཆེན་དེ་ཡིས་ནི། །ཨ་མ་སེམས་ཅན་མ་ལུས་པ། །བདེ་སྐྱིད་ཕུན་སུམ་ཚོགས་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །འགམ་སྤྱོད་མཐར་ཐུག་གཉིས་པོ་འདི། །བྱམས་པ་དང་ནི་སྙིང་རྗེ་གཉིས། །གཅིག་ཏུ་དྲིལ་ནས་སྟོན་པ་ཡིན། །དེ་ཡང་བྱམས་དང་སྙིང་རྗེ་ཡི། །འགམ་སྤྱོད་སེམས་བསྐྱེད་བསྔོ་བ་ཡིན། །ཁྱད་པར་སྨོན་ལམ་འདི་བཞིན་གདབ། །མཁའ་མཉམ་སེམས་ཅན་མ་ལུས་པ། །དུས་གསུམ་ལུས་ངག་ཡིད་གསུམ་གྱིས། །དུ་ཁ་བདག་ལ་སྨིན་གྱུར་ནས། །ཟག་མེད་བདེ་བ་ཤར་གྱུར་ནས། །བདག་གིས་དུས་གསུམ་བསགས་པ་ཡིས། །དགེ་བ་ཇི་སྙེད་ཡོད་པ་ཡི། །མཁའ་མཉམ་སེམས་ཅན་མ་ལུས་པ། །བདེ་སྐྱིད་ཕུན་སུམ་ཚོགས་གྱུར་ནས། །བླ་མེད་བྱང་ཆུབ་ཐོབ་གྱུར་ཅིག །བྱམས་དང་སྙིང་རྗེའི་མཐར་ཐུག་གིས། །སྐྱེལ་ས་རང་གཞན་འཁོར་འདས་ཀྱིས། །དུས་གསུམ་དག་ནི་ཐམས་ཅད་དུ། །ཕན་ཚུན་ཕན་བཏགས་གནོད་སྐྱེལ་རྣམས། །ལོག་པ་དང་ནི་བཏང་སྙོམས་སུ། །སྐད་ཅིག་ཙམ་ཡང་མ་སོང་པར། །རང་གཞན་བྱང་ཆུབ་ཐོབ་པ་ཡི། །དོན་དུ་གྱུར་ན་མཐར་ཐུག་ཡིན། །དེ་ལྟར་བྱམས་པ་སྙིང་རྗེ་དང་། །ལྡན་པའི་སྐྱེས་བུ་དེ་ལ་ནི། །ཕན་ཚུན་གནོད་པ་བསྐྱལ་ཀྱང་ནི། །བྱམས་པས་འབྲེལ་ཐོགས་སྙིང་རྗེས་འཛིན། །སྡུག་བསྔལ་བསལ་ནས་བདེ་ལ་འགོད། །དེ་ནི་མཐར་ཐུག་སྐྱེལ་བ་ཡིན། །དེ་ཡི་རྗེས་ལ་ལྷག་བསམ་བསྒོམ། །དེ་ལ་རྣམ་པ་གསུམ་ཡིན་ཏེ། །སྐྱེ་བའི་རྒྱུ་ནི་སྙིང་རྗེ་ཡིན། །ངོ་བོ་དགྲ་སྡང་གདོན་བགེགས་ཀྱིས། །གཙོ་བྱས་སེམས་ཅན་མ་ལུས་པ། །བདེ་སྐྱིད་ཕུན་སུམ་ཚོགས་ན་དགའ། །དུཿཁ་ཐམས་ཅད་བྲལ་ན་དགའ། །བླ་མེད་བྱང་ཆུབ་ཐོབ་ན་དགའ། །སྙམ་པ་ཡང་དང་ཡང་དུ་བསྒོམ། །ལག་རྗེས་ཕྲག་དོག་རྩ་བ་ཞི། །དེ་ལྟར་བདེ་སྐྱིད་ཕུན་སུམ་ཚོགས། །དུཿཁ་ཐམས་ཅད་བྲལ་བ་དང་། །སངས་རྒྱས་ཐོབ་འདོད་དགའ་བ་ལ། །སེམས་ཅན་དོན་ནི་བྱ་དགོས་པས། །གཞན་དོན་བྱེད་པར་གྱུར་པ་ལ། །དམ་ཆོས་བཤད་ནས་བྱེད་དགོས་པས། །ཆོས་གཅིག་ཁོ་ན་བཤད་གྱུར་ཀྱང་། །ལ་ལའི་དགེ་རྐྱེན་བྱེད་གྱུར་ཀྱང་། །ལ་ལའི་སྡིག་རྐྱེན་དག་ཏུ་འགྱུར། །འོ་སྐོལ་ཕུང་པོ་འདི་ཡིས་ནི། །སེམས་ཅན་ཀུན་དོན་ཡིན་པས་ནི། །རེ་རེ་གཉིས་གཉིས་དོན་མི་འབྱུང་། །དེ་བས་ལྷ་ཀླུ་མཐུ་ཆེན་གྱིས། །སེམས་ཅན་དོན་ཡང་མ་བྱུང་ལ། །མི་བདག་འཁོར་ལོས་བསྒྱུར་རྒྱལ་གྱི། །སེམས་ཅན་དོན་ཡང་མ་བྱུང་ལ། །འདོད་ཁམས་རྒྱལ་པོ་བརྒྱ་བྱིན་གྱིས། །སེམས་ཅན་དོན་ཡང་མ་བྱུང་ལ། །གཟུགས་ཁམས་བདག་པོ་ཚངས་པ་ཡིས། །སེམས་ཅན་དོན་ཡང་མ་བྱུང་ལ། །རྣམ་ཐར་གསུམ་ལ་གནས་གྱུར་ནས། །རྫུ་འཕྲུལ་སྟོན་པ་རྣམས་ཀྱིས་ཀྱང་། །སེམས་ཅན་དོན་ཡང་མ་བྱུང་ལ། །ས་གནས་བྱང་ཆུབ་སེམས་དཔའ་ཡིས། །འགྲོ་དོན་བྱེད་པ་བྱེད་གྱུར་ཀྱང་། །རྒྱ་དང་ཚད་ནི་ཡོད་པ་ཡིན། །འོ་ན་སེམས་ཅན་ཐམས་ཅད་ཀྱིས། །དོན་ཆེན་གང་གིས་འགྲུབ་སྙམ་ན། །རྣམ་པ་ཐམས་ཅད་མཁྱེན་པ་ཡིས། །རྫོགས་པའི་སངས་རྒྱས་ཞེས་བྱ་བ། །ཆོས་ཀྱི་སྐུ་ལས་མ་གཡོས་པར། །མཁའ་མཉམ་སེམས་ཅན་རེ་རེ་ཡི། །མདུན་དུ་སྤྲུལ་པ་རེ་རེ་བསྟན། །འཁོར་ལོ་རྣམ་གསུམ་དུས་གཅིག་ལ། །བསྐོར་བ་ཐོགས་པ་མི་མངའ་བའི། །དེ་ལྟ་བུ་ཡི་སངས་རྒྱས་གཅིག །ཐོབ་ན་སེམས་ཅན་དོན་བྱེད་ནུས། །མ་ཐོབ་མི་ནུས་སྙམ་པ་ཡི། །རྗེས་སུ་འགྲོ་བཟློག་ཤེས་བྱས་ལ། །སངས་རྒྱས་རྗེས་དྲན་བསྒོམ་པར་བྱ། །རྒྱུ་ལ་རྗེས་སུ་དྲན་པ་དང་། །འབྲས་བུ་རྗེས་སུ་དྲན་པ་དང་། །ཕྲིན་ལས་རྗེས་སུ་དྲན་པ་བསྒོམ། །དང་པོ་སངས་རྒྱས་ཐོབ་པའི་རྒྱུ། །བསྐལ་པ་བཟང་པོའི་མདོ་ལས་ཀྱང་། །ཕ་རོལ་ཕྱིན་པ་བརྒྱད་ཁྲི་དང་། །བཞི་སྟོང་དག་ཏུ་གསུང་པ་ནི། །སངས་རྒྱས་ཐོབ་པའི་རྒྱུར་བཤད་དོ། །དེ་ཚོ་ཐམས་ཅད་བསྡུ་ན་ཡང་། །བརྒྱ་རྩ་ཉི་ཤུ་གཅིག་ཏུ་འདུས། །དེ་ཚོ་ཐམས་ཅད་བསྡུ་ན་ཡང་། །ཕར་ཕྱིན་སུམ་ཅུ་དྲུག་ཏུ་འདུས། །དེ་བསྡུས་བཅོ་བརྒྱད་དག་ཏུ་འདུས། །བཅོ་བརྒྱད་འདུས་པ་ཕར་ཕྱིན་བཅུ། །དེ་བསྡུས་ཕ་རོལ་ཕྱིན་པ་དྲུག །དེ་བསྡུས་བསླབ་པ་གསུམ་དུ་འདུས། །དེ་བསྡུས་ཐབས་དང་ཤེས་རབ་གཉིས། །དེ་བསྡུས་སྟོང་ཉིད་སྙིང་རྗེ་དང་། །སྙིང་པོ་ཅན་དུ་འདུ་ཤེས་གསུངས། །སངས་རྒྱས་ཆོས་སྐུ་ཉེར་ལེན་པའི། །རྒྱུ་ནི་སྟོང་ཉིད་ཡིན་ཞེས་གསུངས། །སྙིང་རྗེ་ལྷན་ཅིག་བྱེད་པའི་རྐྱེན། །གཟུགས་སྐུ་ཉེ་བར་ལེན་པའི་རྒྱུ། །སྙིང་རྗེ་ཆེན་པོ་ཡིན་ཞེས་གསུངས། །སྟོང་ཉིད་ལྷན་ཅིག་བྱེད་པའི་རྐྱེན། །ཡང་ན་བསོད་ནམས་ཚོགས་ཆེན་པོ། །བསོད་ནམས་དག་ནི་རྒྱུར་གསུངས་པ། །བློ་གྲོས་མི་ཟད་མདོ་ལས་ཀྱང་། །འཇིག་རྟེན་ཁམས་ཀྱི་སོ་སོ་ཡི། །སྐྱེ་བོ་ཉན་ཐོས་རང་རྒྱལ་དང་། །སེམས་དཔའི་དགེ་བ་ཇི་སྙེད་རྣམས། །བཅུ་འགྱུར་དག་ཏུ་བསྒྱུར་བ་ཡིས། །སངས་རྒྱས་བ་སྤུའི་བུ་ག་འགྲུབ། །བ་སྤུ་འགྲུབ་པར་བྱེད་པ་ཡིས། །དགེ་བ་བརྒྱ་འགྱུར་བསྒྱུར་བ་ཡི། །དཔེ་བྱད་བརྒྱད་ཅུའི་གཅིག་འགྲུབ་བོ། །དེས་སྤྱད་འགྲུབ་པར་བྱེད་པ་ཡིས། །དགེ་བ་སྟོང་དུ་བསྒྱུར་བ་ཡི། །མཚན་མཆོག་བཟང་པོ་གཅིག་འགྲུབ་བོ། །མཚན་བཟང་འགྲུབ་པར་བྱེད་པ་ཡི། །དགེ་བ་སྟོང་ཕྲག་བརྒྱར་འགྱུར་བས། །སྤྱི་གཙུག་ལྟར་མི་མཐོང་བ་འགྲུབ། །གཙུག་ཏོར་འགྲུབ་པར་བྱེད་པ་ཡིས། །དགེ་བ་འབུམ་ཕྲག་བརྒྱ་འགྱུར་བས། །སྨིན་མཚམས་ཀྱིས་ནི་མཛོད་སྤུ་འགྲུབ། །མཛོད་སྤུ་འགྲུབ་པར་བྱེད་པོ་ཡི། །དགེ་བ་འབུམ་ཕྲག་སྟོང་འགྱུར་བས། །གསུང་མགུལ་ཆོས་ཀྱི་དུང་འགྲུབ་བོ། །འོ་ན་དེ་ཙམ་རྒྱ་ཆེ་བའི། །ཚོགས་ཆེན་བསོག་པ་མི་ནུས་སོ། །སྙམ་པའི་ཞུམ་སེམས་མི་དགོས་ཏེ། །མ་ཎི་པདྨེ་ཧཱུཾ་ཞེས་པ། །སེམས་ཅན་གཅིག་གི་དོན་དུ་ནི། །བྱས་ན་གང་ཞིག་དཔག་མེད་དུས་རྣམས་སུ། །སེམས་ཅན་དཔག་མེད་དོན་དུ་ནི། །བསོད་ནམས་དཔག་ཏུ་མེད་བྱས་པ། །བྱང་ཆུབ་དཔག་མེད་འགྲུབ་པར་འགྱུར། །དཔག་མེད་རྣམ་པ་བཞི་ཡིས་ནི། །དེ་དག་རིང་པོར་མི་ཐོགས་པར། །ཚོགས་ནི་མྱུར་དུ་རྫོགས་འགྱུར་གསུང་། །དེ་ཚོ་རྒྱུ་ཚོགས་རླབས་ཆེན་ལ། །འབྲས་བུ་རླབས་ཆེན་འབྱུང་སྙམ་པའི། །ཡིད་ཆེས་སྐྱེས་པའི་དད་པ་དང་། །དང་བ་ཡི་ནི་དད་པ་སྐྱེ། །དེ་ཚོ་རྒྱུ་ལ་རྗེས་དྲན་ཡིན། །འབྲས་བུ་རྗེས་དྲན་བསྒོམ་པ་ནི། །རྒྱལ་བའི་སྐུ་ཡི་ཆེ་ཆུང་དང་། །མང་ཉུང་དབྱིབས་དང་གསུམ་ལ་བསྒོམ། །དང་པོ་ལོངས་སྐུའི་ཆེ་ཆུང་ནི། །སངས་རྒྱས་རྣམ་པར་སྣང་མཛད་ཀྱི། །སྐུ་ལ་ཞིང་ཁམས་ཐམས་ཅད་སྣང་། །ཞིང་ཁམས་ཐམས་ཅད་སྐུས་ཁྱབ་བོ། །སྤྲུལ་པ་སྐུ་ཡི་ཆེ་བ་ནི། །རྒྱལ་བ་ཤཱཀྱ་ཐུབ་པ་ཡིས། །སྟོང་གསུམ་མི་མཇེད་འཇིག་རྟེན་དུ། །ཕ་རོལ་ཕྱིན་པ་གསུང་དུས་སུ། །སྐུ་གསུང་ཐུགས་ཀྱི་གསང་བའི་ཚད། །འཁོར་གྱིས་ལྟ་བར་ཞུས་པ་ལས། །བྱང་ཆུབ་སེམས་དཔའ་ཤུགས་འཆང་བའི། །སྟེང་གི་ཕྱོགས་ཀྱི་འཇིག་རྟེན་དུ། །བསྐལ་པ་དགུ་བཅུ་རྩ་གཅིག་ནི། །འདས་ཤིང་བྱོན་པར་གྱུར་ལགས་ཀྱང་། །སངས་རྒྱས་དབུ་ཡི་གཙུག་ཏོར་ནི། །ད་རུང་ནམ་མཁར་ལྷག་གེ་འདུག །སངས་རྒྱས་མ་ཆགས་པདྨ་ཡི། །ཅན་གྱི་ཞལ་ནས་རིགས་ཀྱི་བུ། །སངས་རྒྱས་ཞིང་ལ་ཐུག་པ་མེད། །དེ་བཞིན་དབུ་ཡི་གཙུག་ཏོར་ཀྱང་། །ཐུག་པ་མེད་པས་མི་མཐོང་གསུང་། །སྐུ་ཡི་ཚད་ནི་རྙེད་མ་གྱུར། །སངས་རྒྱས་སྤྱན་སྔར་ལོག་ནས་བྱོན། །ཡང་གསུང་གི་ཚད་ནི་བལྟ་སྙམ་པས། །འཕགས་པ་མོའུ་འགལ་གྱི་བུས། །ནུབ་ཀྱི་ཕྱོགས་ཀྱི་འཇིག་རྟེན་དུ། །རི་བོ་མཆོག་རབ་དེ་དེ་ཡི། །སྟེང་དུ་གོམ་པ་རེ་བཞག་ནས། །སྐྱེས་བུ་གཅིག་གིས་ལོ་བརྒྱ་ཡི། །བར་དུ་ཕྱིན་པའི་ཚད་དུ་བྱོན། །ད་དུང་གསུང་ལ་སྐྱེ་འབྲི་མེད། །འདོམ་གང་ཙམ་ན་ལྷང་ལྷང་འདུག །སངས་རྒྱས་སྣང་བ་མཐའ་ཡས་ཀྱིས། །ཞིང་ཁམས་དག་ཏུ་ཕྱིན་ནས་འདུག །དེ་ན་འདུག་པའི་བྱང་སེམས་ནི། །སྐུ་བོང་ཆེན་པོ་རྣམས་ཀྱིས་ནི། །ལྷུང་བཟེད་དག་ནི་འུར་བསྐོར་ལ། །སྐོར་ར་ད་ནི་བྱུང་བ་དང་། །དགེ་སློང་ཆ་བྱད་སྲོག་ཆགས་ནི། །ཕྲ་མོ་འདི་འདྲ་སུ་ཡིན་ཞེས། །ཕྱག་མཛུབ་རེག་རེག་བྱས་པ་ལས། །སངས་རྒྱས་ཞལ་ནས་འདི་ལ་ནི། །བརྙས་པར་མ་བྱེད་ཤར་ཕྱོགས་ཀྱི། །མི་མཇེད་ཞེས་པའི་འཇིག་རྟེན་ན། །རྒྱལ་བ་ཤཱཀ་ཐུབ་ཞེས་བྱ་བའི། །ཉན་ཐོས་རྣམས་ཀྱི་ནང་ནས་ཀྱང་། །རྫུ་འཕྲུལ་ཅན་གྱི་མཆོག་གྱུར་ཡིན། །རྫུ་འཕྲུལ་སྟོན་ཅིག་བྱས་པ་དང་། །སྣང་བ་མཐའ་ཡས་ཞིང་ཁམས་ནི། །དཀྱིལ་མོ་ཀྲུང་གི་འོག་ཏུ་བཅུག །དེ་ནས་རྫུ་འཕྲུལ་ཉམས་ནས་སུ། །གཤེགས་པ་དག་ནི་མ་བྱུང་ནས། །སྟོན་པ་ཤཱཀ་ཐུབ་གང་ན་བཞུགས། །སངས་རྒྱས་དག་ལ་ཞུས་པ་ལས། །འདི་ནས་ཤར་གྱི་ཕྱོགས་ལོ་གསུང་། །སངས་རྒྱས་གསུང་གི་འོད་ཟེར་ལ། །འཇུས་ལ་སོང་ཀྱང་བྱ་བ་གསུང་། །དེ་ལྟར་བགྱིས་ནས་སྤྱན་སྔར་བྱོན། །གསུང་ལ་ཚད་རྙེད་མ་གྱུར་ཏོ། །སངས་རྒྱས་འཁོར་རྣམས་བཀའ་སྒྲོས་ནས། །ཐུགས་ཀྱི་ཚད་ནི་བལྟ་བར་ཞུས། །འགྲོ་མགོན་ཐུབ་པའི་ཞལ་ནས་ཀྱང་། །ང་ཡི་ཐུགས་ཀྱི་ཚད་བལྟ་ན། །སེམས་ཅན་སེམས་ཉིད་ནམ་མཁའི་ཁམས། །སངས་རྒྱས་ཐུགས་དང་གསུམ་པོ་འདི། །དབྱེར་མེད་གཅིག་ཏུ་གྱུར་པ་ཡིན། །ནམ་མཁའི་མཐའ་ནི་ཚོལ་ཅིག་གསུང་། །ཕྱག་ན་རྡོ་རྗེས་ནམ་མཁའ་ལ། །ཡེ་ཤེས་རྡོ་རྗེ་འཕངས་ནས་ཀྱང་། །ནམ་མཁའི་མཐའ་ཡང་མ་རྙེད་པར། །ལོག་ལ་མ་ཡོང་ཞེས་ཀྱང་གསུང་། །ཉི་མ་རེ་ལ་དཔག་ཚད་ནི། །བརྒྱད་ཁྲི་བརྒྱད་ཁྲི་སྤྱོད་པར་གསུངས། །ད་དུང་ནམ་མཁའ་དག་པ་ནི། །འུ་རུ་རུ་ནི་འགྲོ་ཞེས་གསུངས། །ནམ་ཞིག་མཐའ་ནི་མ་རྙེད་ནས། །བྲམ་ཟེ་མ་ཡི་ལག་ཏུ་ནི། །ལོག་ནས་འོང་པར་གསུངས་པ་ཡིན། །ཡང་ན་དུས་གསུམ་ཤེས་བྱ་ཡི། །དཀྱིལ་འཁོར་མ་ལུས་ཐམས་ཅད་ཀུན། །སྐྱུ་རུ་ལག་མཐིལ་བཞག་པ་བཞིན། །སྒྲིབ་པ་མེད་པར་ས་ལེ་མཁྱེན། །དཔེར་ན་ནམ་མཁའ་དག་ལ་ནི། །ཟླ་བ་གཅིག་ལས་མི་བདོག་ཀྱང་། །སྣོད་རྣམས་ཐམས་ཅད་ཆུས་བཀང་ཞིང་། །རལ་གྲི་མེ་ལོང་ཐམས་ཅད་བཀྲམ། །དེ་དག་ཐམས་ཅད་རེ་རེ་ཡི། །ནང་དུ་ཟླ་བ་རེ་རེ་འོང་། །དེ་བཞིན་རྟོག་པ་མི་མངའ་ཡང་། །དུས་གསུམ་ཤེས་བྱའི་དཀྱིལ་འཁོར་མཁྱེན། །སེམས་ཅན་དོན་དུ་འགྱུར་བ་ན། །ཤིན་ཏུ་ཆུང་བའི་སྐུར་ཡང་སྟོན། །དེ་ཚོ་སྐུ་ཡི་ཆེ་ཆུང་ཡིན། །སྐུ་ཡི་མང་ཉུང་འདི་ལྟ་སྟེ། །ལོངས་སྐུ་རྣམ་པར་སྣང་མཛད་ཀྱི། །མདུན་དུ་སྤྲུལ་སྐུ་ཤཱཀ་ཐུབ་དང་། །རྒྱབ་ཏུ་གསང་བདག་ཕྱག་རྡོར་གསུམ། །སེམས་ཅན་ཐམས་ཅད་རེ་རེ་ཡི། །མདུན་དུ་གསལ་པོར་སྟོན་པ་དང་། །ནམ་མཁའ་རྟག་རྟག་འགེངས་པ་དང་། །མཐུ་སྟོབས་ཐོགས་པ་མི་མངའ་འོ། །སྤྲུལ་སྐུ་ཤཱཀྱ་ཐུབ་པ་ལ། །སྐུ་ཡི་སྤྲུལ་པ་གདུགས་དཀར་ཅན། །ཐུགས་སྤྲུལ་བཅོམ་ལྡན་མི་གཡོ་མགོན། །གསུང་སྤྲུལ་ཁྲོ་རྒྱལ་རྟ་མགྲིན་བཞི། །སེམས་ཅན་རེ་རེའི་མདུན་བསྟན་ནས། །ནམ་མཁའི་ཁམས་ནི་འགེངས་པ་ལ། །མཐུ་སྟོབས་ཐོགས་པ་མི་མངའོ། །བཅོམ་ལྡན་བདེ་མཆོག་འཁོར་ལོ་ཡི། །ལྷ་ཚོགས་དྲུག་ཅུ་རྩ་གཉིས་པོ། །སེམས་ཅན་རེ་རེའི་མདུན་བསྟན་ནས། །ནམ་མཁའི་ཁམས་ནི་འགེངས་པ་ལ། །མཐུ་སྟོབས་ཐོགས་པ་མི་མངའོ། །དེ་བཞིན་དཀྱིལ་འཁོར་གཙོ་བོ་ལ། །ལྷ་ཚོགས་དུ་མ་ཡོད་པ་རྣམས། །སེམས་ཅན་རེ་རེ་མདུན་བསྟན་ནས། །ནམ་མཁའི་ཁམས་ནི་འགེངས་པ་ལ། །མཐུ་སྟོབས་ཐོགས་པ་མི་མངའོ། །སེམས་ཅན་དོན་དུ་འགྱུར་བས་ན། །སྐུ་ཉུང་པ་དང་མེད་པར་སྟོན། །དེ་ཚོ་སྐུ་ཡི་མང་ཉུང་ཡིན། །སྐུ་ཡི་དབྱིབས་ཀྱི་བྱེ་བྲག་ནི། །ལྷ་མོར་མོས་པ་ལྷ་མོར་བསྒོམ། །ལྷ་ཕོར་མོས་པ་ལྷ་ཕོར་སྟོན། །ཞི་བར་མོས་པ་ཞི་བར་སྟོན། །ཁྲོ་བོར་མོས་པ་ཁྲོ་བོར་སྟོན། །ཁྲོ་མོར་མོས་པ་ཁྲོ་མོར་སྟོན། །སེམས་ཅན་དོན་དུ་གྱུར་པས་ན། །སྐྱེ་དང་གཞོན་དང་རྒས་པ་དང་། །འཆི་བ་དག་ཀྱང་སྟོན་པར་བྱེད། །དེ་ཚོ་འབྲས་བུ་རྗེས་དྲན་ཡིན། །འཕྲིན་ལས་རྗེས་སུ་དྲན་པ་ནི། །ཆོས་སྐུ་སྤྲོས་དང་བྲལ་བ་ལ། །འཕྲིན་ལས་ཉི་ཤུ་རྩ་བདུན་གསུངས། །དེ་དག་ཐམས་ཅད་བསྡུ་ན་ཡང་། །མཛད་པ་བཅུ་གཉིས་དག་ཏུ་འདུས། །དེ་བསྡུས་རྒྱལ་བ་རིན་ཆེན་བཀའ། །འཁོར་ལོ་རིན་ཆེན་རྣམ་གསུམ་གྱིས། །རིགས་ཅན་རྣམ་པ་གསུམ་པོ་འདི། །སྨིན་ཅིང་གྲོལ་བར་མཛད་པ་ཡིན། །དེ་ལྟ་བུ་ཡི་སངས་རྒྱས་དེ། །སེམས་ཅན་དོན་དུ་ཐོབ་འདོད་པས། །འདུན་པ་དྲག་པོའི་སེམས་འདི་ནི། །བཀྲེས་པའི་ཉེན་པས་ཟས་འདོད་དམ། །སྐོམ་པའི་ཉེན་པས་ཆུ་འདོད་དམ། །མ་ཡི་ལག་པ་ཞ་བ་ཡི། །བུ་ནི་ཆུ་ཡིས་ཁྱེར་བ་ལ། །ལག་པ་འདོད་པ་ལྟ་བུ་ཡི། །འདུན་པ་སེམས་ཅན་ཐམས་ཅད་ནི། །སངས་རྒྱས་ཐོབ་པར་འདོད་པ་ཡིས། །སེམས་ནི་སྐྱེ་བར་གྱུར་པ་ན། །སྨོན་པའི་སེམས་ནི་སྐྱེ་བའོ། །སྐབས་འདིར་སྨོན་པའི་ཆོ་ག་བྱ། །དེ་རྗེས་བསླབ་བྱ་འདི་ལྟ་སྟེ། །རྒྱུན་དུ་བྱང་ཆུབ་སེམས་ལ་སྦྱང་། །སྦྱོང་སྙིང་འདོད་པའི་ཡན་ལག་ཏུ། །ཕན་ཡོན་ཅན་གྱི་བྱང་སེམས་དེ། །ཚོགས་གཉིས་བསགས་ལས་སྐྱེ་བས་ན། །ཚོགས་གཉིས་རྒྱ་ཆེན་བསོག་ལ་བསླབ། །བྱང་ཆུབ་སེམས་དཔའ་སེམས་ཅན་ནི། །བློས་མི་སྤོང་བ་དག་ལ་བསླབ། །ནག་པོའི་ཆོས་བཞི་སྤང་བ་དང་། །དཀར་པོའི་ཆོས་བཞི་དག་ལ་བསླབ། །སྨོན་པའི་བསླབ་བྱ་བསླབ་པ་ཡིས། །མཇུག་ལ་སེམས་བསྐྱེད་ཆོ་ག་བྱ། །དེ་ལྟར་ཆོ་ག་བྱས་པ་ཡིས། །འཇུག་པའི་བསླབ་བྱ་བསླབ་པ་གསུམ། །ལྷག་པ་ཚུལ་ཁྲིམས་བསླབ་པ་དང་། །ལྷག་པ་ཏིང་འཛིན་བསླབ་པ་དང་། །ལྷག་པ་ཤེས་རབ་བསླབ་པའོ། །ལྷག་པ་ཚུལ་ཁྲིམས་བསླབ་པ་ལ། །སྡོམ་པ་ཡི་ནི་ཚུལ་ཁྲིམས་དང་། །དགེ་བ་ཆོས་བསྡུད་ཚུལ་ཁྲིམས་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སྡོམ་པ་ཡི་ནི་ཚུལ་ཁྲིམས་ལ། །ཐུན་མོང་མི་དགེ་བཅུ་པོ་སྤང་། །ཁྱད་པར་རྩ་ལྟུང་བཞི་པོ་དང་། །ཡན་ལག་བཞི་བཅུ་རྩ་དྲུག་སྤང་། །དེ་ཡང་ལག་ལེན་འདི་ལྟ་སྟེ། །འདས་པའི་འདོད་ལ་མི་བལྟ་ཞིང་། །མ་འོངས་འདོད་ལ་དགའ་བ་མེད། །ད་ལྟར་འདོད་ལ་མི་ཆགས་དང་། །ངག་དང་རྟོག་པ་ཡོངས་སུ་དག །དབེན་པའི་གནས་ལ་དགའ་བ་དང་། །བདག་ཉིད་ཁྱད་དུ་མི་བསོད་དང་། །གཞན་ལ་མི་གནོད་ངེས་པ་དང་། །ཚུར་ལ་གནོད་པ་བཟོད་པ་དང་། །བག་ཡོད་ལྔ་དང་ལྡན་པ་དང་། །ཆོ་ག་འཚོ་བ་དག་པའོ། །དེ་རྣམས་སྡོམ་པའི་ཚུལ་ཁྲིམས་ཡིན། །དགེ་བ་ཆོས་བསྡུད་ཚུལ་ཁྲིམས་ནི། །ཕ་རོལ་ཕྱིན་པ་རྣམ་དྲུག་ལ། །གསུམ་གསུམ་ཕྱེ་བས་བཅོ་བརྒྱད་ཡོད། །མི་འཇིགས་པ་ཡི་སྦྱིན་པ་དང་། །ཟང་ཟིང་ཆོས་ཀྱི་སྦྱིན་པའོ། །སོ་སོ་ཐར་པའི་ཚུལ་ཁྲིམས་དང་། །བསམ་གཏན་གྱི་ནི་ཚུལ་ཁྲིམས་དང་། །ཟག་པ་མེད་པའི་ཚུལ་ཁྲིམས་སོ། །བཤགས་པ་ཐམས་ཅད་བཤགས་པ་དང་། །སྡོམ་བྱ་མ་ལུས་སྡོམ་པ་དང་། །དགེ་བ་རྫོགས་སངས་རྒྱས་བསྔོའོ། །ཆོས་ལ་ངེས་པའི་སེམས་དཔའ་དང་། །སྡུག་བསྔལ་དང་ལེན་བཟོད་པ་དང་། །གནོད་པ་སྐྱེལ་ལ་ཇི་མི་སྙམ། །གོ་ཆ་ཡི་ནི་བརྩོན་འགྲུས་དང་། །སྦྱོར་བ་ཡི་ནི་བརྩོན་འགྲུས་དང་། །ཆོག་པར་མི་འཛིན་བརྩོན་འགྲུས་སོ། །དོན་རབ་བྱེད་པའི་བསམ་གཏན་དང་། །དེ་བཞིན་ཉིད་ལ་དམིགས་པ་དང་། །ཟག་པ་མེད་པའི་བསམ་གཏན་ནོ། །ཀུན་རྫོབ་ཤེས་དང་དོན་དམ་ཤེས། །ཐ་མི་དད་པའི་ཤེས་རབ་བོ། །སེམས་ཅན་དོན་བྱེད་ཚུལ་ཁྲིམས་ནི། །སྤྱིར་ནི་དོན་བྱེད་བཅུ་གཅིག་ཡིན། །ཁྱད་པར་བསྡུ་བ་རྣམ་བཞི་དང་། །ཕྲིན་ལས་རྣམ་པ་བཞི་པོ་ཡིས། །དངོས་སུ་གཞན་དོན་བྱེད་པ་ཡིན། །དེ་ནི་ཚུལ་ཁྲིམས་བསླབ་པ་ཡིན། །ལྷག་པ་ཏིང་འཛིན་བསླབ་པ་ནི། །རྣམ་པར་རྟོག་པ་ཞི་བ་ཡིས། །ཤེས་པ་རྩེ་གཅིག་གནས་པ་དང་། །དེ་ལ་རྒྱུད་ལས་སྐྱེ་བ་ཡི། །ཡན་ལག་རྣམ་བདུན་ཚང་བ་དང་། །ཉེས་པ་རྣམ་ལྔ་སྤངས་པ་དང་། །སྒྲིབ་པ་རྣམ་ལྔ་སྤང་པའོ། །དང་པོ་ཆོག་ཤེས་འདོད་པ་ཆུང་། །དབེན་པའི་གནས་ལ་དགའ་བ་དང་། །དབང་པོའི་སྒོ་རྣམས་བསྡམས་པ་དང་། །དོན་མི་བྱ་བ་སྤང་བ་དང་། །སྲོད་དང་ཐོ་རངས་དག་ལ་ནི། །མི་ཉལ་རྣལ་འབྱོར་བརྩོན་པ་དང་། །ཏིང་འཛིན་ཁ་ཟས་ཚོད་ཟིན་ཅིང་། །འཕྲོད་པའི་རྐྱེན་རྣམས་བརྟེན་པོའོ། །གཉིས་པ་ཉེས་པ་དོར་བ་ནི། །སྙོམས་ལས་ལེ་ལོ་མེད་པ་དང་། །གདམས་ངག་དམིགས་པ་མ་བརྗེད་དང་། །བྱིང་རྒོད་གཉིས་པོ་བསལ་བ་དང་། །རྩེ་གཅིག་ཤེས་པ་བཀོལ་བཏུབ་ནས། །དམིགས་པ་གཞན་ལ་སྤོ་མི་བྱ། །ཤེས་པ་ཨ་འཐས་སྐྱེད་མེད་ན། །གདམས་པའི་སྣ་ཁ་བསྒྱུར་བའོ། །གནོད་སེམས་མེད་ཅིང་ཕན་སེམས་བསྐྱེད། །གཉིད་རྨུགས་དབང་དུ་མི་ཤོར་བྱ། །རྒོད་དང་འགྱོད་པའི་སྐྱོན་སྤང་ཞིང་། །ཐེ་ཚོམ་མེད་ཅིང་ངེས་ཤེས་བསྐྱེད། །ཡན་ལག་ཚང་ཞིང་སྐྱོན་བསལ་བས། །ཏིང་འཛིན་རྒྱུན་ཆད་མེད་པ་འབྱུང་། །མངོན་ཤེས་རྫུ་འཕྲུལ་ལ་སོགས་པ། །ཡོན་ཏན་དཔག་ཏུ་མེད་པ་སྐྱེ། །དེ་ཚོ་ཏིང་འཛིན་བསླབ་པ་ཡིན། །ལྷག་པ་ཤེས་རབ་བསླབ་པ་ནི། །རྟོགས་ལྡན་བླ་མ་དམ་པ་ལ། །ཞབས་ཏོག་གསུམ་གྱི་མཉེས་པ་ཡིས། །རྒྱུད་ལ་བྱིན་རླབས་ཞུགས་ཙ་ན། །རྣམ་རྟོག་ཆོས་ཉིད་གཉིས་མེད་ཤེས། །ཉོན་མོངས་ཡེ་ཤེས་གཉིས་མེད་ཤེས། །འཁོར་བ་མྱང་འདས་གཉིས་མེད་ཤེས། །བདེ་དང་སྡུག་བསྔལ་གཉིས་མེད་ཤེས། །བསྐྱེད་རིམ་རྫོགས་རིམ་གཉིས་མེད་ཤེས། །བདེན་པ་གཉིས་པོ་གཉིས་མེད་ཤེས། །ཐབས་དང་ཤེས་རབ་གཉིས་མེད་ཤེས། །རྟེན་འབྲེལ་སྟོང་པ་གཉིས་མེད་ཤེས། །མཁྱེན་གཉིས་གཉིས་སུ་མེད་པར་ཤེས། །ཆོས་སྐུ་གཟུགས་སྐུ་གཉིས་མེད་ཤེས། །དེ་ཚོ་ཤེས་རབ་བསླབ་པ་ཡིན། །བསླབ་གསུམ་མཐའ་རུ་ཕྱིན་པ་ལས། །སངས་རྒྱས་སྐུ་གསུམ་ཐོབ་པ་ཡིན། །ལྷག་པ་ཚུལ་ཁྲིམས་བསླབ་པ་ལས། །སྤྲུལ་པའི་སྐུ་མཆོག་ཐོབ་པ་ཡིན། །ལྷག་པ་སེམས་ཀྱིས་བསླབ་པ་ལས། །ལོངས་སྤྱོད་རྫོགས་སྐུ་ཐོབ་པ་ཡིན། །ལྷག་པ་ཤེས་རབ་བསླབ་པ་ལས། །ཆོས་སྐུ་སྤྲོས་དང་བྲལ་བ་ཐོབ། །དོན་དམ་བྱང་ཆུབ་སེམས་ཀྱི་རྒྱུ། །མཚན་ལྡན་བླ་མའི་མོས་གུས་ཡིན། །ངོ་བོ་གཟུང་འཛིན་བྲལ་བ་ཡི། །འབྲས་བུ་ཆོས་སྐུ་ཐོབ་པ་ཡིན། །དེ་ལྟར་སྨོན་འཇུག་སེམས་བསྐྱེད་ནས། །བསླབ་བྱ་དག་ལ་བསླབ་པ་ཡིས། །ཕན་ཡོན་མདོར་བསྡུས་འདི་ལྟ་སྟེ། །སྡོང་པོ་བཀོད་པའི་མདོ་ལས་ཀྱང་། །ཚོང་དཔོན་གྱི་བུ་ནོར་བཟང་གིས། །གྲོང་ཁྱེར་སྐྱིད་པའི་འབྱུང་གནས་སུ། །རྩ་བའི་བླ་མ་འཕགས་པ་འཇམ་དཔལ་ལ། སྨོན་འཇུག་གི་སྡོམ་པ་བླངས། དེ་ནས་ལུང་བསྟན་མཛད་ནས། བླ་མ་བརྒྱ་དང་བཅུ་གཉིས་བསྟེན་པ་ལས། དེ་ཐམས་ཅད་ལྷོ་ཕྱོགས་ཀྱི་རྒྱུད་དུ་བསྟེན་ཏེ། འདི་ནས་ལྷོ་ཕྱོགས་ཀྱི་རྒྱུད་བཟའ་ཤིང་གི་ཀུན་དགའ་ར་བ་ཆེན་པོ་ན་བྱམས་པའི་ཁང་བཟང་རྣམ་པར་སྣང་མཛད་རྒྱན་གྱིས་བརྒྱན་པའི་སྙིང་པོ་ཅན། གྲོང་ཁྱེར་ཡིད་བཟང་པོ་ན་བཅོམ་ལྡན་འདས་མགོན་པོ་བྱམས་པ་ཡོད་ཀྱིས། དེ་ཁྱེད་ཀྱི་དགེ་བའི་བཤེས་གཉེན་ཡིན་གྱིས། དེའི་གམ་དུ་སོང་ཅིག་བྱས་ནས། དེ་ལྟར་བླ་མ་གོང་མ་རྣམས་ལ་ཆགས་བཞིན་དུ་དེ་རྣམས་ཀྱི་ཆོས་དང་ཡོན་ཏན་ཡིད་ལ་བྱེད་ཅིང་། དེར་བྱོན་ནས་ཁང་བཟང་གི་བསྟོད་པ་མཛད་དེ། རིགས་ཀྱི་བུ་བདག་གིས་དང་པོ་སྨོན་པ་དང་འཇུག་པ་བྱང་ཆུབ་མཆོག་ཏུ་སེམས་བསྐྱེད་པའི་སྡོམ་པ་བླངས་ཟིན་ན། བྱང་ཆུབ་སེམས་དཔའ་ཁྱོད་སེམས་ཅན་ལ་གདམས་པ་དང་རྗེས་སུ་སྟོན་པ་དང་། ཞེས་པ་བདག་གིས་ཐོས་ནས་བདག་གིས་བྱང་ཆུབ་སེམས་དཔའི་བསླབ་པ་ལ་ཇི་ལྟར་བསླབ་པར་བྱ་བ་དང་། ཇི་ལྟར་ནན་ཏན་དུ་བགྱི་བར་བདག་གིས་མ་འཚལ་ན། བྱང་ཆུབ་སེམས་དཔའི་བསླབ་པར་བགྱི་བ་དང་། ཇི་ལྟར་ནན་ཏན་དུ་བགྱི་བ་དང་། བྱང་ཆུབ་སེམས་དཔའ་ཁྱོད་ཀྱིས་བསྟན་དུ་གསོལ། ཞེས་ཞུས་པས། རིགས་ཀྱི་བུ་ཁྱོད་ལེགས་སོ་ལེགས་སོ། །ལེགས་པའི་རྒྱུ་མཚན་ཅིའི་ཕྱིར་ཞེ་ན། བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་དཀར་པོའི་ཆོས་རྣམ་པར་འཕེལ་བར་བྱེད་པས་ཞིང་ལྟ་བུའོ། །འཇིག་རྟེན་པ་ཐམས་ཅད་བརྟེན་པས་ས་ལྟ་བུའོ། །དབུལ་བ་ཐམས་ཅད་སེལ་བས་རྣམ་ཐོས་ཀྱི་བུ་ལྟ་བུའོ། །བྱང་ཆུབ་སེམས་དཔའ་ཐམས་ཅད་བསྐྲུན་པས་ཕ་ལྟ་བུའོ། །དོན་ཐམས་ཅད་འགྲུབ་པས་ཡིད་བཞིན་གྱི་ནོར་བུ་ལྟ་བུའོ། །བསམ་པ་ཐམས་ཅད་ཡོངས་སུ་རྫོགས་པས་བུམ་པ་བཟང་པོ་ལྟ་བུའོ། །ཉོན་མོངས་པའི་དགྲ་ཕམ་པར་བྱེད་པས་མདུང་ཐུང་ལྟ་བུའོ། །ཚུལ་བཞིན་མ་ཡིན་པའི་ཡིད་ལ་བྱེད་པ་འགེབས་པས་གོ་ཆ་ལྟ་བུའོ། །འཚེ་བ་ཐམས་ཅད་སྐྱོབ་པས་མཚོན་ཆ་ལྟ་བུའོ། །ཉོན་མོངས་པ་གཅོད་པའི་སྟ་རི་ལྟ་བུའོ། །ཉོན་མོངས་པའི་མགོ་བརྡུང་བའི་ཐོ་བ་ལྟ་བུའོ། །འཁོར་བའི་ཆུ་ནང་ན་གནས་པ་སྟེང་དུ་འབྱིན་པས་འཁྱིལ་བ་ལྟ་བུའོ། །སྒྲིབ་པས་ཁེབས་པའི་རྩ་ཐམས་ཅད་འཐོར་བས་རླུང་གི་དཀྱིལ་འཁོར་ལྟ་བུའོ། །བྱང་ཆུབ་སེམས་དཔའི་སྤྱོད་པ་དང་བསླབ་པ་ཐམས་ཅད་བསྡུས་མདོར་བསྟན་པ་ལྟ་བུའོ། །ལྷ་དང་མི་དང་ལྷ་མ་ཡིན་གྱིས་ལོ་ཀ་ལ་མཆོད་རྟེན་ལྟ་བུའོ། །རིགས་ཀྱི་བུ་བྱང་ཆུབ་སེམས་ནི་ཡོན་ཏན་གྱི་བྱེ་བྲག་ཚད་མེད་པ་གཞན་དག་དང་ཡང་ལྡན་ནོ། །ཞེས་གསུངས་སོ། །དཔལ་བྱིན་གྱིས་ཞུས་པའི་མདོ་ལས་ཀྱང་། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་ཚད་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་བས་ལྷག་པར་འགྱུར། །ཞེས་སོ། །སློབ་དཔོན་ཞི་བ་ལྷའི་ཞལ་ནས་ཀྱང་། སྡིག་པ་སྟོབས་ཆེན་ཤིན་ཏུ་མི་བཟད་པ། །དེ་ནི་རྫོགས་པའི་བྱང་ཆུབ་སེམས་མིན་པར། །དགེ་གཞན་གང་གི་ཟིལ་གྱིས་ནོན་མི་འགྱུར། །ཞེས་པ་དང་། ཡང་། དཔའ་ལ་རྟེན་ནས་འཇིགས་པ་ཆེན་པོ་ལྟར། །གང་ལ་བརྟེན་ནས་ཡུད་ཀྱིས་སྒྲོལ་བར་འགྱུར། །དེ་ལ་བག་ཅན་རྣམས་ཀྱིས་ཅིས་མི་བརྟེན། །དེས་ནི་དུས་མཐའི་མེ་བཞིན་སྡིག་ཆེན་རྣམས། །སྐད་གཅིག་ཅིག་གིས་ངེས་པར་བསྲེག་པར་འགྱུར། །ཡང་། བྱང་ཆུབ་སེམས་སྐྱེས་འགྱུར་བ་སྐད་ཅིག་གིས། །སྲིད་པའི་བརྩོན་རར་བསྡམས་པའི་ཉམས་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱས་ལ། །འཇིག་རྟེན་ལྷ་མིར་བཅས་པའི་ཕྱག་བྱར་འོས། །ཞེས་ཞུས་པ་དང་། ཡང་གསེར་འགྱུར་རྩི་ཡི་རྣམ་པ་མཆོག་ལྟ་བུ། །མི་གཙང་ལུས་འདི་བླངས་ན་རྒྱལ་བའི་སྐུ། །རིན་ཆེན་རིན་ཐང་མེད་པར་འགྱུར་པས་ན། །བྱང་ཆུབ་སེམས་ཞེས་བྱ་བ་ལེགས་བརྟན་བཟུང་། །ཞེས་པ་དང་། ཡང་། འགྲོ་བའི་དེད་དཔོན་གཅིག་པུ་ཚད་མེད་བློས། །ལེགས་པར་ཡོངས་སུ་བརྟགས་ན་རིན་ཆེ་བ། །འགྲོ་བ་གནས་དང་བྲལ་བར་འདོད་པས་ཀྱང་། །རིན་ཆེན་བྱང་ཆུབ་སེམས་ལེགས་བརྟན་པོར་བཟུང་། །ཞེས་པ་དང་། ཡང་། དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བྱུང་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་པ་དང་། ཡང་། སེམས་ཅན་རྣམས་ཀྱི་ཀླད་ནད་ཙམ། །བསལ་ལོ་སྙམ་དུ་བསམ་ན་ཡང་། །ཕན་འདོགས་བསམ་པ་དང་ལྡན་ནས། །དཔག་ཏུ་མེད་པ་བསམ་འདོད་ཅིང་། །རེ་རེའང་ཕན་འདོགས་དཔག་ཏུ་མེད། །ཅེས་པ་དང་། ཡང་བསྐལ་པ་དུ་མར་རབ་ཏུ་དགོངས་མཛད་པའི། །ཐུབ་དབང་རྣམས་ཀྱིས་འདི་ཉིད་ཕན་པར་གཟིགས། །འདིས་ནི་ཚད་མེད་སྐྱེ་བོའི་ཚོགས་རྣམས་ཀྱིས། །བདེ་མཆོག་བདེ་བླག་ཉིད་དུ་ཐོབ་པར་འགྱུར། །འཇིགས་དང་དུཿཁ་བརྒྱ་ཕྲག་མང་པོ་འཇོམས་འདོད་ཅིང་། །སེམས་ཅན་མི་བདེ་བསལ་བར་འདོད་པ་དང་། །བདེ་མང་བརྒྱ་ཕྲག་སྤྱོད་པར་འདོད་པས་ཀྱང་། །རིན་ཆེན་བྱང་ཆུབ་སེམས་ནི་བཏང་མི་བྱ། །ཞེས་པ་དང་། འགྲོ་མགོན་ཀླུ་སྒྲུབ་ཞལ་ནས་ཀྱང་། །བདག་རྣམས་དང་ནི་འཇིག་རྟེན་འདིས། །བླ་མེད་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐར་ཐུག་པའི་སྙིང་རྗེ་དང་། །གཉིས་ལ་བརྟེན་པའི་ཡེ་ཤེས་ཡིན། །ཡང་། ཇོ་བོ་ཆེན་པོ་རྗེའི་ཞལ་ནས་ཀྱང་། །གང་གི་བྱེ་མ་གྲངས་སྙེད་ཀྱིས། །སངས་རྒྱས་ཞིང་ཁམས་མི་གང་གིས། །རིན་ཆེན་དག་གིས་ཀུན་བཀང་སྟེ། །འཇིག་རྟེན་མགོན་ལ་ཕུལ་བ་ལས། །གང་གིས་ཐལ་མོ་སྦྱར་བྱས་ཏེ། །བྱང་ཆུབ་ཏུ་ནི་སེམས་བཏུད་ན། །མཆོད་པ་འདི་ནི་ཁྱད་པར་འཕགས། །དེ་ལ་མཐའ་ནི་མ་མཆིས་སོ། །ཞེས་པ་ལ་སོགས་པ་བྱང་ཆུབ་སེམས་ཀྱི་ཕན་ཡོན་བསམ་གྱིས་མི་ཁྱབ་པ་གསུངས་སོ། །འདི་བཀོད་དགེ་བའི་རྩ་བ་ཡིས། །མཁའ་མཉམ་སེམས་ཅན་མ་ལུས་པ། །བསོད་ནམས་ཚོགས་ནི་རབ་རྫོགས་ནས། །ཚེ་གཅིག་སངས་རྒྱས་ཐོབ་པར་ཤོག། །།

བྱམས་སྙིང་རྗེ་བྱང་ཆུབ་ཀྱི་ཁྲིད། རྗེ་རྒོད་ཚང་པས་བདེ་ཆེན་སྟེང་གི་དབེན་གནས་སུ་གསལ་བར་མཛད་པ་ལགས་སོ། །འདི་ལས་ཟབ་པའི་བྱམས་ཁྲིད་མེད་པ་ལགས་སོ།། །།མངྒ་ལམྦྷ་ཝནྟུ།། ཤུ་བྷཾ།།