Bslab btus kyi sdom tshig rin chen sil dag/Full text

བསླབ་བཏུས་ཀྱི་སྡོམ་ཚིག་རིན་ཆེན་སིལ་དག།

bslab btus kyi sdom tshig rin chen sil dag

A Rosary of Jewels: Summary Verses from the Śikṣāsamuccaya

FULL TEXT

Descriptionངོ་སྤྲོད།

རྒྱལ་སྲས་ཆེན་པོ་ཞི་བ་ལྷས་མཛད་པའི་བསྟན་བཅོས་ཆེན་པོ་<<བསླབ་པ་ཀུན་ལས་བཏུས་པའི་>>གཞུང་ཡོངས་སུ་རྫོགས་པའི་སྡོམ་ཚིག་ཚིགས་སུ་བཅད་པ་ཤིན་ཏུ་བསྡུས་པ་འདི་ནི། རིགས་པ་སྨྲ་བ་སྐལ་བཟང་དཀོན་མཆོག་རྒྱ་མཚོས་དངུལ་རའི་དགོན་དགེ་ལྡན་དམ་ཆོས་ཀུན་རྒྱས་གླིང་དུ་བྲིས་པའོ།།

Reference	Rgya zhabs drung skal bzang dkon mchog rgya mtsho (རྒྱ་ཞབས་དྲུང་སྐལ་བཟང་དཀོན་མཆོག་རྒྱ་མཚོ). bslab btus kyi sdom tshig rin chen sil dag [བསླབ་བཏུས་ཀྱི་སྡོམ་ཚིག་རིན་ཆེན་སིལ་དག།]. [A Rosary of Jewels: Summary Verses from the Śikṣāsamuccaya].
People	Skal bzang dkon mchog rgya mtsho

Tibetan

[edit]

Input by Khenpo Tamphel for Tsadra Foundation
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

༄༅། །བསླབ་བཏུས་ཀྱི་སྡོམ་ཚིག་རིན་ཆེན་སིལ་དག་ཅེས་བྱ་བ་བཞུགས་སོ།། ན་མོ་གུ་རུ་ཤིཀྵཱ་ས་མུཙྪ་ཡཱ་ཏ་ར། །སྔོན་འགྲོ་དངོས་གཞི་དེ་ཡི་ཐབས་གསུམ་མམ། །སྒྲུབ་རྟེན་སྦྱོང་རྟེན་སྦྱོང་བ་འགྲུབ་ཐབས་བཞི། །གཉིས་དང་གཅིག་གཅིག་གིས་ནི་བསྡུས་པ་སྟེ། །ཁྱད་མེད་བསླབ་ལ་འཇུག་པའི་སྤྱི་སྡོམ་མོ། །དངོས་གཞི་ཕར་ཕྱིན་དྲུག་གི་སྤྱོད་པ་སྒྲུབ། །དེ་ཡིས་ངོ་བོ་གོང་དུ་སྤེལ་པ་སྟེ། །ཐབས་བཅས་བཏང་བསྲུང་དག་སྤེལ་བཅུ་གཉིས་ཀྱིས། །སྐབས་འདིར་གཏན་ལ་ཕབས་པ་གནད་འགག་ཡིན། །ལེའུ་བཅུ་གཉིས་ཕྱིན་དྲུག་ངོ་བོ་བསྒྲུབ། །ལྷག་མས་ཕྱིན་དྲུག་སྤེལ་དང་ཐབས་བཅས་བསྟན། །སྔོན་འགྲོ་ཐོག་མའི་སྔོན་འགྲོར་བསྡུས་བསྟན་ཕྱིར། །སྐབས་འདིར་སརྒྷ་ཟུར་དུ་མ་མཛད་དོ། །སྒྲུབ་རྟེན་དལ་འབྱོཪ་ཆོས་སྐོར་ནས་ཁྲིད་དེ། །བསམ་པ་རིམ་སྦྱངས་སྦྱོང་རྟེན་སེམས་བསྐྱེད་ལ། །གནས་ནས་རྒྱལ་པའི་སྲས་ཀྱི་སྤྱོད་པ་ཀུན། །ཉམས་སུ་ལེན་པ་སྤྱོད་པའི་ལམ་རིམ་སྟེ། །བཏང་བས་སྦྱིན་དང་བསྲུང་བ་གསུམ་ཆར་གྱིས། །ཚུལ་འཆལ་གསར་དུ་འཇུག་པའི་སྒོ་སྡོམ་ལ། །ལུས་ཀྱི་ཕྱོགས་གཅིག་སྡིག་པ་དག་པ་ཡིས། །སྔར་བསགས་སྦྱངས་ཕྱིར་ཚུལ་ཁྲིམས་ངོ་བོ་བསྒྲུབ། །ཉོན་མོངས་དག་པས་གཉེན་པོ་མཐུན་རྐྱེན་ཚང་། །འགལ་སྐྱེན་སྤོང་པས་བསམ་ཤེས་བཟོད་བརྩོན་འགྲུབ། །བཏང་གསུམ་བསྲུང་གསུམ་དག་པའི་ཡ་གཅིག་གིས། །ཕྱིན་དྲུག་ངོ་བོ་བསྒྲུབ་ཚུལ་མདོ་ཙམ་སྟེ། །འཛིན་གཏོང་སྐྱོན་ཡོན་ཤེས་པས་སྤྲོ་བསྲིངས་ཏེ། །ལུས་དང་ལོངས་སྤྱོད་དགེ་རྩ་ཆད་མེད་དུ། །དངོས་དང་འདུ་བྱེད་བསམ་པ་གཏོང་པ་ཡིས། །སྦྱིན་པའི་ཕར་ཕྱིན་ལེའུ་དང་པོས་བསྟན། །གསུམ་ཆར་བསྲུང་དགོས་རྟགས་དང་བསྲུང་བྱེད་ཐབས། །འཆལ་ཚུལ་གསར་པའི་སྒོ་འགེགས་སྔར་ཡོད་སྦྱངས། །རྒྱུ་མཚན་སྒོ་གཉིས་དམ་ཆོས་བཟུང་པས་བསྟན། །གསུམ་པར་ལུས་དང་ལོངས་སྤྱོད་དགེ་རྩ་བསྲུང་། །ལུས་ལ་ཕྱི་མར་གནོད་བསྲུང་འདི་རྐྱེན་བརྟེན། །དེ་ཡང་རང་གཞན་གནོད་བསྲུང་དང་པོ་ལ། །དགག་བྱ་འགོག་བྱེད་ཐབས་བརྟེན་ཐབས་དེ་ཡིས། །གནོད་འགྱུར་སྤོངས་པའི་ཚུལ་དང་བཅས་པ་གསུམ། །གནོད་འགྱུར་ཆོས་སྨྲ་བསྲུང་པའི་ལེའུ་བསྟན། །གནོད་འགྱུར་ཆེན་པོའང་ལེའུ་གཅིག་གིས་བསྟན། །གནོད་འགྱུར་འགོག་བྱེད་ཐབས་དེས་འགྲུབ་པའི་ཚུལ། །གཅིག་དང་གཞན་དོན་མི་འགྱུར་བྱེད་སྤངས་པ། །གཞན་གནོད་སྤངས་པ་འདི་རྐྱེན་ལུས་བསྲུང་བསྟན། །བསྲུང་བ་ཕྱི་མ་གཉིས་ཀ་གཅིག་གིས་སོ། །དག་གསུམ་དང་པོར་སྡིག་དང་ཉོན་མོངས་ཀྱི། །ལྡོག་ཆས་གཉིས་ཏེ་དང་བོ་རྟེན་བཞིས་བསྒྲུབ། །དེས་ན་ཚུལ་ཁྲིམས་ཕར་ཕྱིན་ལེའུ་བདུན། །ལྡོག་ཆ་གཉིས་པའི་སྒོ་ནས་ཉོན་མོངས་ཀྱི། །གཉེན་པོའི་གནས་ལ་གེགས་དང་རྗེས་མཐུན་དུ། །སྤོངས་དང་སྦྱོར་པ་བཟོད་བརྩོན་རེ་རེས་སོ། །དབེན་པའི་དབེན་པའི་ཡོན་ཏན་སྐྱོན་གྱི་ཚུལ། །དེ་ཡི་མཚན་ཉིད་དེར་གནས་ཀུན་སྤྱོད་སོགས། །ཉོན་མོངས་གཉེན་པོ་བསམ་གཏན་ཡན་ལག་ཏུ། །དགོན་པར་གནས་པ་བརྗོད་ལེའུས་བསྟན། །བྱིང་རྒོད་དགག་དང་དབང་པོའི་སྒོ་བསྡམ་ནས། །མི་སྡུག་བྱམས་དང་རྟེན་འབྲེལ་བསྒོམ་པ་སོགས། །སེམས་ཀྱི་གནས་པ་སེམས་ཡོངས་སྦྱོངས་པས་བསྟན། །ལུས་ཚོར་སེམས་ཆོས་དྲན་པ་ཉེར་བཞག་དང་། །ཁམས་དྲུག་གིས་སྒོས་བདག་མེད་རྣམ་པ་གཉིས། །བསྒོམ་པའི་ཚུལ་རྣམས་སྔ་ཕྱི་གཉིས་ཀྱི་སོ། །ལོངས་སྤྱོད་དགེ་རྩ་དག་པས་སྦྱིན་ལ་སོགས། །དྲུག་ལྡན་ངོ་བོར་སྤེལ་བ་གཅིག་གིས་སོ། །ལུས་དང་ལོངས་སྤྱོད་དགེ་བའི་རྩ་བ་གསུམ། །སྤེལ་དགོས་རྒྱུ་དང་དེ་ནས་དང་པོ་རུ ། །བྱ་བ་སྟོབས་གཉིས་སྤེལ་བས་ཕྱིན་དྲུག་སྟེན། །ལོངས་སྤྱོད་ཀྱིས་ནི་གཏོང་པ་ཁྱད་པར་དུ། །སྦྱོར་བ་གང་ལ་གནས་ནས་བསོད་ནམས་ཀྱི། །ངོ་བོ་གོང་དུ་སྤེལ་བས་ཕྱིན་དྲུག་གོ །བརྩོན་བཅས་བསམ་པ་བསྟན་པས་སྙིང་རྗེ་ལ། །གནས་ནས་ཀུན་བཟང་རྗེས་སློབ་བཅུ་དྲུག་བས། །རྒྱུ་དང་དད་སོགས་བྱམས་པ་རྗེས་དྲན་གྱིས། །ཕྱིན་དྲུག་སྤེལ་བ་ཡང་ནི་གོ་རིམ་བཞིན། །སེམས་ཅན་དོན་བྱེད་ཆོས་སྦྱིན་ཉོན་མོངས་མེད། །བྱང་ཆུབ་སེམས་མཆོག་བསྒོམ་པ་བསོད་ནམས་རྒྱུ། །འགྲུབ་བྱེད་བསྲུང་དང་དག་པ་སྤེལ་བ་གསུམ། །འགྲུབ་པའི་རྩ་བ་བག་ཡོད་དྲན་ཤེས་ཏེ། །དེ་དག་རྣམས་ནི་ལེའུ་བཅུ་དགུ་བས། །བསྟན་དེ་འདི་ནི་གནད་འགག་བསྡུས་པའོ། །འདིས་མཚོན་དགེ་བ་རབ་དཀར་པད་རྩ་ལྟར། །དཀར་བའི་མཐུ་ལས་རྒྱལ་སྲས་སྤྱོད་པ་ཀུན། །མྱུར་དུ་རྫོགས་ནས་རྒྱལ་བའི་གྲོང་ཁྱེར་དུ། །རང་ཉིད་འདུག་བཞིན་སྐྱེ་རྒུ་འདྲེན་པར་ཤོག །ཅེས་རྒྱལ་སྲས་ཆེན་པོ་ཞི་བ་ལྷས་མཛད་པའི་བསྟན་བཅོས་ཆེན་པོ་བསླབ་པ་ཀུན་ལས་བཏུས་པའི་སྡོམ་ཚིག་ཤིན་ཏུ་བསྡུས་པ་འདི་ནི། རིགས་པ་སྨྲ་པ་སྐལ་བཟང་དཀོན་མཆོག་རྒྱ་མཚོས་ལྕགས་ལུག་ལོ་གསར་གྱི་ཚེས་གཅིག་གི་ཉིན། དངུལ་རའི་དགོན་དགེ་ལྡན་དམ་ཆོས་ཀུན་རྒྱས་གླིང་དུ་བྲིས་པའི་ཡི་གེ་བ་ནི། དད་ལྡན་དགེ་སློང་ཚུལ་ཁྲིམས་རྒྱ་མཚོས་བགྱིས་པ་ཛ་ཡནྟུ།། །།