Bodhyākarapraṇidhāna/Full text

Bodhyākarapraṇidhāna

བྱང་ཆུབ་འབྱུང་བའི་སྨོན་ལམ

byang chub 'byung ba'i smon lam

An Aspirational Prayer to the Source of Enlightenment (84000)

FULL TEXT

Descriptionངོ་སྤྲོད།

སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་<<བྱང་ཆུབ་འབྱུང་བའི་སྨོན་ལམ་>>ཞེས་པ་འདིར་ཡན་ལག་བདུན་པ་སྔོན་དུ་བཏང་ནས། དངོས་གཞིར་བདག་གཞན་གཉིས་ཀའི་ཉོན་མོངས་བསལ་ཏེ་རྒྱལ་བའི་གདུང་བསྐྱེད་པའི་ཕྱིར་དུ་བྱང་ཆུབ་ཀྱི་སེམས་བསྐྱེད་ཅིང། ཕྱོགས་དུས་ཀུན་གྱི་རྒྱལ་བ་སྲས་དང་བཅས་པ་ལས་བྱང་ཆུབ་སེམས་དཔའི་ཚུལ་ཁྲིམས་བསླབ་པ་གསུམ་བླངས་ཏེ་གཟུང་བར་དམ་བཅས་ནས། དེ་ལས་འབྱུང་བའི་བསོད་ནམས་ཀྱིས་སེམས་ཅན་ཐམས་ཅད་སྒྲིབ་བྲལ་ཡོན་ཏན་རྫོགས་པའི་ཀུན་མཁྱེན་དུ་འགྱུར་བ་དང་། རང་ཉིད་ཀྱང་ཀུན་ཏུ་སྙིང་རྗེ་དང་ལྡན་ཅིང་། ཏིང་ངེ་འཛིན་དང་ཤེས་རབ་ཀྱི་གཟུངས་ཀྱིས་འགྲོ་བ་ཀུན་ལ་ཕན་པའི་ཆོས་ཀྱི་མཚན་ཉིད་ཇི་བཞིན་དུ་རྟོགས་ནས། བསྡུ་བ་བཞིས་བསྡུས་ཀྱི་ཕ་རོལ་ཏུ་ཕྱིན་པ་རྫོགས་པས་ས་རྣམས་སྦྱངས་ཤིང་ཉོན་མོངས་པ་དང་ཤེས་བྱའི་སྒྲིབ་པ་སྤངས་ཤིང་། བསོད་ནམས་དང་ཡེ་ཤེས་ཀྱི་ཚོགས་རྫོགས་པའི་སངས་རྒྱས་གྱུར་ནས། རང་ཉིད་མཐོང་ཐོས་རེག་དྲན་ཙམ་གྱིས་འགྲོ་ཀུན་གྱི་སྡུག་བསྔལ་ཞི་བར་བྱེད་ནུས་པ་དང་། ལུས་ངག་ཡིད་གསུམ་གྱི་སྤྱོད་པ་ཐམས་ཅད་སྲོག་ཆགས་ཀུན་ལ་བདེ་བའི་རྒྱུར་འགྱུར་བར་སྨོན་ལམ་འདེབས་ཚུལ་བསྔོ་དང་བཅས་པ་གསལ་བར་བསྟན་ཡོད།

Reference	Nāgārjuna (slob dpon 'phags pa klu sgrub). bodhyākarapraṇidhāna. byang chub 'byung ba'i smon lam [བྱང་ཆུབ་འབྱུང་བའི་སྨོན་ལམ]. [An Aspirational Prayer to the Source of Enlightenment (84000)]. Tengyur, RKTST 3719 http://www.rkts.org/cat.php?id=3719&typ=2.
People	Nāgārjuna

Tibetan

[edit]

Source	Adarsha
Date	2025-05-27
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

207-316a

༄༅༅། །རྒྱ་གར་སྐད་དུ། བོ་དྷི་ཨཱ་ཀ་ར་པྲ་ཎི་དྷཱ་ན། བོད་སྐད་དུ། བྱང་ཆུབ་འབྱུང་བའི་སྨོན་ལམ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །ལོག་རྟོག་མུན་བསལ་མཁྱེན་རབ་འདབ་རྒྱས་ཤིང་། །བདུད་བཞིའི་དགྲ་བ་ཅོམ་ཡང་དག་ཇི་བཞིན་གཤེགས། །ཐུགས་རྗེའི་མཚོ་བསྐྱིལ་དོན་མཆོག་འབྱོར་པའི་གཏེར། །སངས་རྒྱས་བཅོམ་ལྡན་རྣམས་ལ་ཕྱག་འཚལ་ལོ། །མཁའ་ལྟར་མཚན་མེད་རབ་ཞི་རྟོག་ལས་འདས། །སྒྲིབ་པའི་སྐྱོན་བྲལ་ལེགས་ཚོགས་འབྱུང་བའི་གནས། །སྐྱེ་བོ་འགྲོ་མང་བྱང་ཆུབ་འབྱུང་བའི་གནས། །ཡང་དག་དམ་ཆོས་རྣམས་ལ་ཕྱག་འཚལ་ལོ། །ཉོན་མོངས་དགྲ་རྒྱལ་སྲིད་མཚོ་ལས་རྒལ་ཅིང་། །སྡུག་བསྔལ་མཚོན་སྤངས་ཡང་དག་ཐར་ལམ་མཁྱེན། །འགྲོ་ལ་ཕན་མཛད་ཡོན་ཏན་མང་པོའི་ཕུལ། །འཕགས་པའི་དགེ་འདུན་རྣམས་ལ་ཕྱག་འཚལ་ལོ། །ཆོས་དབྱིངས་མཁའ་དཀྱིལ་མཁྱེན་རབ་ཉི་ཤར་ནས། །རྨོངས་པའི་མུན་བསལ་ཡང་དག་ཆོས་ཉིད་རྟོགས། །ཐབས་ལྡན་ཐུགས་རྗེས་འགྲོ་ལ་ཕན་བརྩོན་པ། །བྱང་ཆུབ་སེམས་དཔའི་ཚོགས་ལ་ཕྱག་འཚལ་ལོ། །རིན་ཆེན་ས་གཞི་དཔག་བསམ་ནགས་ཚལ་བཅས། །ཡིད་བཞིན་གཞལ་ཡས་གདན་ཁྲི་རྒྱན་མཆོག་ལྡན། །ལྷ་མིའི་མཆོད་སྤྲིན་མང་པོ་གཏིབས་

207-316b

པ་རྣམས། །ཡོན་ཏན་གཏེར་མངའ་སྲས་བཅས་རྒྱལ་ལ་འབུལ། །དུས་ཀུན་བདག་གིས་དཀོན་མཆོག་གསུམ་སྤངས་ཤིང་། །དེ་ཡི་བསྐོར་ཕྱོགས་བྱང་ཆུབ་སེམས་བཏང་དང་། །མཚམས་མེད་ལ་སོགས་སྨད་པའི་ལས་བྱས་རྣམས། །བླ་མའི་སྤྱན་སྔར་དེ་བཤགས་སླན་ཆད་བསྡམས། །སངས་རྒྱས་རང་སངས་རྒྱས་དང་ཉན་ཐོས་དང་། །བྱང་ཆུབ་སེམས་དཔའ་སོ་སོའི་སྐྱེ་བོ་ཡི། །བསོད་ནམས་རྒྱུ་དང་འབྲས་བཅས་ཅི་མཆིས་པ། །དེ་དག་ཀུན་ལ་རྗེས་སུ་ཡི་རང་ངོ་། །ཕྱོགས་གང་འགྲོ་ལ་སྨན་སླད་བདེ་གཤེགས་རྣམས། །མྱ་ངན་འདར་བཞེད་ཆོས་བཤད་བསྐུལ་གཞེས་ལ། །འགྲོ་བའི་དོན་སླད་མྱ་ངན་མི་འདའ་ཞིང་། །ཆོས་ཀྱི་འཁོར་ལོ་དམ་པ་བསྐོར་བར་བསྐུལ། །སྐྱོན་ཀུན་བྱང་ཞིང་ཡོན་ཏན་ཀུན་རྫོགས་པ། །སངས་རྒྱས་དམ་ཆོས་དགེ་འདུན་དཀོན་མཆོག་ལ། །བདག་ནི་དུས་ཀུན་ལུས་འབུལ་སྐྱབས་གསོལ་གྱིས། །ཡོངས་བཞེས་ལོག་ལྟའི་ལམ་ལས་བསྐྱབ་ཏུ་གསོལ། །བདག་གིས་འགྲོ་བའི་ཉོན་མོངས་བསལ་སླད་དང་། །བྱང་ཆུབ་སྤྱད་པའི་བཅོམ་ལྡན་གདུང་བསབ་ཕྱིར། །བདག་མེད་རྟོག་བྲལ་མི་གནས་རྟག་པ་ཡི། །བླ་མེད་བྱང་ཆུབ་མཆོག་ཏུ་དུས་ཀུན་བསྐྱེད། །ཕྱོགས་དུས་བཞུགས་པའི་རྒྱལ་བ་སྲས་བཅས་དགོངས། །ཁྱོད་ལ་བདག་གི་སྡོམ་པའི་ཚུལ་ཁྲིམས་དང་། །དགེ་བ་ཆོས་སྡུད་སེམས་ཅན་དོན་བྱེད་པའི། །བསླབ་གསུམ་དེང་ནས་བརྩམས་ཏེ་གཟུང་བར་བགྱི། །བསོད་ནམས་སྟོབས་འདིས་ཆོས་གནས་ཐམས་ཅད་ལ། །བླ་མེད་མཆོད་སྤྲིན་འབྱུང་ཞིང་བགྱི་བགྱིས་ཤོག །སེམས་ཅན་རྣམས་ཀྱང་སྒྲིབ་ཚོགས་ཀུན་བྱང་ནས། །ཡོན་ཏན་ཚོགས་རྫོགས་ཀུན་མཁྱེན་མཆོག་གྱུར་ཅིག །བདག་ཀྱང་དུས་ཀུན་བློ་རྣམས་སྙིང་རྗེ་ལྡན། །ཏིང་འཛིན་ཤེས་རབ་གཟུངས་སྒོ་མཆོག་ཐོབ་ནས། །འགྲོ་ཀུན་བདེར་འགྱུར་སྤྱོད་མཆོག་རྣམས་བྱེད་ཅིང་། །ཆོས་རྣམས་མཚན་ཉིད་ཇི་བཞིན་རྟོགས་གྱུར་ཅིག །བསྡུ་བ་བཞིས་བསྡུས་ཕ་རོལ་ཕྱིན་རྫོགས་ཤིང་། །མོས་སྤྱོད་ལ་སོགས་ས་རྣམས་ཀུན་སྦྱངས་ནས། །ཉོན་མོངས་ཤེས་བྱའི་སྒྲིབ་ཚོགས་

207-317a

རྣམས་སྤངས་ཏེ། །བསོད་ནམས་ཡེ་ཤེས་ཚོགས་རྫོགས་སངས་རྒྱས་གྱུར། །བདག་ནི་མཐོང་ཐོས་རེག་པའམ་དྲན་ཙམ་གྱིས། །འགྲོ་ཀུན་ཉོན་མོངས་སྡུག་བསྔལ་ཞི་བྱེད་ཤོག །ལུས་སེམས་ངག་རྣམས་སྤྱོད་ཡུལ་ཅིར་འཇུག་པ། །སྲོག་ཆགས་རྣམས་ལ་བདེ་བའི་རྒྱུར་གྱུར་ཅིག །དུས་ཀུན་བདག་གིས་ལུས་ངག་ཡིད་ཀུན་ནས། །དགེ་བའི་རྩ་བ་ཅུང་ཟད་ཅི་བསགས་པ། །དུས་གསུམ་རྒྱལ་བས་ཇི་ལྟར་བསྔོས་པ་བཞིན། །ཐམས་ཅད་བླ་མེད་བྱང་ཆུབ་མྱུར་འགྲུབ་བསྔོ། །བྱང་ཆུབ་འབྱུང་བའི་སྨོན་ལམ་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་རྫོགས་སོ།། །།