Bodhicittamahāsukhāmnāya/Full text

Bodhicittamahāsukhāmnāya

བྱང་ཆུབ་ཀྱི་སེམས་བདེ་བའི་མན་ངག

byang chub kyi sems bde ba'i man ngag

Personal Instructions on the Great Bliss of Bodhicitta (84000)

FULL TEXT

Descriptionངོ་སྤྲོད།

རྒྱ་གར་གྱི་མཁན་པོ་དཱི་པཾ་ཀཱ་ར་ཤྲཱི་ཛྙཱ་ནས་མཛད་ཅིང་། དེ་ཉིད་དང་ལོ་ཙཱ་བ་དགེ་བའི་བློ་གྲོས་ཀྱིས་བསྒྱུར་བར་གྲགས་པའི་བསྟན་བཅོས་འདིར། གསང་སྔགས་ཀྱི་རྒྱུད་ཐ་དག་ལས་བཏུས་པའི་འདའ་ཀའི་དུས་ཀྱི་མན་ངག་སྟེ། འཆི་ཁའི་དུས་སུ་ད་ལྟ་རང་གི་ལུས་ལ་ཁྱབ་པར་གནས་པའི་སེམས་འདི་ཉིད་ཆུ་དང་འོ་མ་འདྲེས་པའི་ཚུལ་དུ་ཀུན་ཏུ་བཟང་པོ་དང་གཉིས་སུ་མེད་པར་ལྷང་ངེར་གནས་པར་བྱེད་པའི་མན་ངག་བསྟན་ཅིང་། དེ་ལྟར་གནས་པའི་ཚེ་དེའི་ངང་ལས་མི་འགྱུར་ལྷང་ངེར་གནས་པ་ནི་རྫོགས་པ་ཆེན་པོའི་ལྟ་བ་མཐར་ཕྱིན་པ། དེའི་ངང་ལ་ས་ལེར་གནས་པ་ནི་རྫོགས་པ་ཆེན་པོའི་བསྒོམ་པ་མཐར་ཕྱིན་པ། དེའི་ངང་ལས་ཡུད་ཙམ་ཡང་མི་འདའ་བ་ནི་རྫོགས་པ་ཆེན་པོའི་དམ་ཚིག་མཐར་ཕྱིན་པར་ངོ་སྤྲོད་མཛད་ཡོད།

Reference	Atīśa Dīpaṃkaraśrījñāna. bodhicittamahāsukhāmnāya. byang chub kyi sems bde ba'i man ngag [བྱང་ཆུབ་ཀྱི་སེམས་བདེ་བའི་མན་ངག]. [Personal Instructions on the Great Bliss of Bodhicitta (84000)]. Tengyur, RKTST 3079 http://www.rkts.org/cat.php?id=3079&typ=2.
People	Atiśa, Gewai Lodrö

Tibetan

[edit]

Source	Adarsha
Date	2025-05-27
Read this text with translation by adding the Dharmamitra Chrome extension to your browser: Dharmamitra
Legend	Headers Root Commentary Quotes

Bodhicittamahāsukhāmnāya

28-52b

༄༅༅། །རྒྱ་གར་སྐད་དུ། བོ་དྷི་ཙིཏྟ་མ་ཧཱ་སུ་ཁ་ཨཱཾ་ན་ཡ། བོད་སྐད་དུ། བྱང་ཆུབ་ཀྱི་སེམས་བདེ་བའི་མན་ངག ། བདེ་བ་ཆེན་པོ་བྱང་ཆུབ་ཀྱི་སེམས་ལ་ཕྱག་འཚལ་ལོ། །གསང་རྒྱུད་མཐའ་དག་ལས་མན་ངག་གང་བའི་དོན། བྱང་ཆུབ་ཀྱི་སེམས་འདའ་ཀ་མའི་མན་ངག་འདི་ལྟར་ལགས་ཏེ། འཆི་འཕོ་དུས་སུ་འདི་ལྟར་རོ། །ད་ལྟར་བདག་གི་ལུས་ཁྱབ་པར་གནས་པའི་སེམས་འདི་ནི་འུབས་ཀྱིས་འདུས་ནས། སྙིང་གའི་དཀྱིལ་ན་འོད་མཚོན་གང་བ་ཅིག་གནས་སོ། །ཡི་གེ་ཤེས་པས་འོད་དུ་མི་ལྟ་སྟེ། ཧཱུཾ་ཡུངས་འབྲུ་ཙམ་ཅིག་ལྷང་ངེར་གནས་སོ། །དེ་ནས་ཚོར་བ་དང་བྲལ་དྲོད་ཤོར་ཏེ། འཇིག་རྟེན་པའི་སྤྱོད་ཡུལ་དང་བྲལ་བའོ། །དེ་ཙམ་ན་འོད་མཐིང་ག་དེ་སྙིང་གི་དཀྱིལ་ནས། བྱང་ཆུབ་ཀྱི་སེམས་ཀྱི་གསང་བའི་ལམ་གཡས་ཀྱི་སྲོག་རྩ་དར་དཀར་གྱི་སྐུད་པ་འདྲ་བའི་ནང་ནས་ཡར་ཡེངས་ཀྱིས་བྱུང་སྟེ། སྨྲི་བོའི་གཙུག་ཏུ་བྱུང་། རིལ་གྱིས་དྲིལ་ནས། ལྷང་གིས་ཤར་ཙམ་ན། དེ་ནས་ཡར་འདོམ་གང་ཙམ་གྱིས་ཆོད་ནས་རྣམ་པར་དག་པ་ཆོས་ཀྱི་ཕོ་བྲང་། རང་བཞིན་ལྷུན་གྱིས་གྲུབ་པའི་གནས་ན། དཔལ་ཀུན་དུ་བཟང་པོ་བཞུགས་ཏེ། རང་གིས་ཁྱབ་གདལ་བ་དང་བཞིན་ལྷང་ངེ་བར་ཏེ། སྐུ་ལ་མདུན་དང་རྒྱབ་མི་མངའ་བར། བདེ་བ་ཆེན་པོའི་ནང་དུ་ལྷང་ངེར་བཞུགས་པ་དང་། བདག་གི་སེམས་ཧཱུཾ་ངམ་ཐིག་ལེ་ཡུངས་འབྲུ་སྤྱི་བོ་ནས་ཡར་བྱུང་བ་གཉིས་ཀར་སྤྱིན་ལ་སྦྲང་བུ་ཆགས་པའམ། ཆུ་དང་འོ་མ་འདྲེས་པའི་ཚུལ་དུ། ཀུན་དུ་བཟང་པོ་དང་གཉིས་གཅིག་ཏུ་ལྷང་ངེར་གནས་པར་གྱུར་ཏོ། །དེ་ལྟར་ཆོས་ཀྱི་དབྱིངས་ཀྱིས་གར་ཁྱབ་པར་ཀུན་དུ་བཟང་པོས་ཁྱབ། ཀུན་དུ་བཟང་པོས་གར་ཁྱབ་པར་བདག་གི་སེམས་ཀྱིས་ཁྱབ་སྟེ། གཟུང་འཛིན་གྱི་རྣམ་རྟོག་དང་བྲལ་ནས་ཆོས་ཀྱི་སྐུ་ཐོབ་སྟེ། སྐྱིད་པ་ཆེན་པོ་གཡུང་དྲུང་གི་གནས་སུ་ཁྱབ་གདལ་ལྷང་ངེ་བར་གནས་སོ། །དེའི་ངང་ལས་མི་འགྱུར་ལྷང་ངེར་གནས་པ་ནི། རྫོགས་པ་ཆེན་པོའི་ལྟ་བ་མུར་ཐུག་པའོ། །དེའི་ངང་ལས་ས་ལེར་གནས་པ་ནི། རྫོགས་པ་ཆེན་པོའི་བསྒོམ་པ་མཐར་ཕྱིན་པའོ། །དེའི་ངང་ལས་ཡུད་ཙམ་པར་

28-53a

མི་འདའ་བ་ནི། རྫོགས་པ་ཆེན་པོའི་དམ་ཚིག་མཐར་ཕྱིན་པའོ། །དེ་ལྟ་བུའི་དོན་ལ་སེམས་རྩེ་གཅིག་ཏུ་བསྒོམ་མོ། །བྱང་ཆུབ་ཀྱི་སེམས་བདེ་བ་ཆེན་པོའི་མན་ངག་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀཱ་ར་ཤྲཱི་ཛྙཱ་ན་ཉིད་དང་། ཞུ་ཆེན་གྱི་ལོ་ཙཱ་བ་དགེ་བའི་བློ་གྲོས་ཀྱིས་བསྒྱུར་ཅིང་གཏན་ལ་ཕབ་ཕོ་བྲང་བྱང་ཆུབ་འོད་ཀྱིས་ཞུས་པའོ།།