Ādikarmikabhūmipariṣkāra/Full text

Ādikarmikabhūmipariṣkāra

Cultivating the Grounds of a Beginner (84000)

FULL TEXT

Description

ཡོ་བྱད་འཐོན་གྲབས་ཡོད། ཐུགས་ལྷོད་མཛོད།

Reference	Guhya Jetāripāda (slob dpon mkhas pa chen po byang chub sems dpa' dgra las rgyal gsang ba). Ādikarmikabhūmipariṣkāra. las dang po pa'i sa sbyang ba [ལས་དང་པོ་པའི་ས་སྦྱང་བ]. [Cultivating the Grounds of a Beginner (84000)]. Tengyur, RKTST 3286 http://www.rkts.org/cat.php?id=3286&typ=2.
People	Jetāri, Kṛṣṇapaṇḍita, Gorub Lotsāwa Chokyi Sherab

[edit]

Source	Adarsha
Date	2025-05-28
Read this text with translation by adding the Dharmamitra Chrome extension to your browser:

Legend	Headers Root Commentary Quotes

Ādīkarmikabhūmipariṣkāra

111-235a

༄༅༅། །རྒྱ་གར་སྐད་དུ། ཡ་ཏི་ཀརྨི་བྷཱུ་མི་ཀ་རི་པ་རི། བོད་སྐད་དུ། ལས་དང་པོ་པའི་ས་སྦྱང་བ། སངས་རྒྱས་ལ་ཕྱག་འཚལ་ལོ། །ཉི་མ་ལྟ་བུར་གཟི་ལྡན་སྐུ། །སངས་རྒྱས་ཞབས་ལ་ཕྱག་འཚལ་ཏེ། །ལས་ནི་དང་པོ་པ་ཡི་ས། །སྦྱང་བ་འདིར་ནི་བཤད་པར་བྱ། །ལམ་མ་སྦྱངས་པའི་ཉེས་པ་དང་། །ལམ་གྱི་སྦྱང་བ་གང་ཞེ་ན། །ལམ་མ་སྦྱངས་པའི་སྐྱེ་བོ་དག །བྱེས་བགྲོད་ངལ་དུབ་ཚ་གྲང་དང་། །ལྕི་དང་རྩུབ་དང་སྐྱོ་བ་དང་། །བཀྲེས་སྐོམ་གདུང་ཤིང་བརྙས་པ་དང་། །འཇིག་དང་ཡི་མུག་ཉམས་སུ་མྱོང་། །མྱ་ངན་འཚོར་འགྲིབ་བཅས་པ་དང་། །ཁ་ཅིག་སྤྱིའུ་ཚུགས་དམྱལ་བ་

111-235b

དང་། །དུད་འགྲོ་ཡི་དགས་རྣམས་སུ་བསྟེན། །ནོར་དང་བཟའ་བཏུང་གྲགས་པ་དང་། །འདོད་པས་བྱེས་འགྲོད་སྡུག་བསྔལ་ཅན། །རེ་བ་འབྲས་བུ་མེད་པ་དང་། །སྡུག་དང་བྲལ་དང་མི་སྡུག་ཕྲད། །མི་བཟད་ན་རྒས་འཛོམས་བཞིན་དུ། །འཆི་བདག་དྲུང་དུ་མྱུར་འགྲོ་བ། །མ་ཚོར་ག་ཞར་བཅས་ཤིང་བརྩེ། །ཚེ་འདི་དོན་མེད་མྱུར་དུ་འདའ། །ཡང་དང་ཡང་དུ་སྐྱེ་བ་ཡི། །འཁོར་བའི་ཉེས་པ་གྲངས་མེད་བསྟེན། །ཀྱི་ཧུད་ལམ་ལས་ཉམས་པ་ཡི། །སྐྱེ་བོ་དག་ནི་ཉམ་ངར་གནས། །མི་བཟད་མྱ་ངན་འབྲོག་དགོན་དུ། །ལམ་གོལ་གྱུར་པ་དག་དང་མཚུངས། །མིག་ལྡན་ལམ་ལོག་འགྲོ་བ་ལྟར། །ལམ་ལས་ཉམས་པའི་སྐྱེ་བོ་སྨད། །དེ་ལ་ལམ་སྦྱངས་པ་གང་ཞེ་ན། འདིར་ལས་དང་པོ་པའི་ས་ནི་ལམ་གྱི་དང་པོ་སྟེ། དེ་སྦྱང་བ་ནི་དབྱེ་བ་རྣམ་པ་དུ་མ་དང་ལྡན་པའི་དཀོན་མཆོག་གསུམ་ལེགས་པར་ཤེས་ནས་ཕྱག་འཚལ་བ་དང་། རྒྱ་ཆེར་མཆོད་པ་དང་། ཡོན་ཏན་བརྗོད་པས་བསྟོད་པ་དང་། སྙིང་ཐག་པ་ནས་སྐྱབས་སུ་འགྲོ་བ་དང་། རྗེས་སུ་དྲན་པ་བསྒོམས་པས་བསླབ་པ་ལ་སློབ་པས་སྐྱབས་ཕུན་སུམ་ཚོགས་པ་ཡིན། མི་དགེ་བ་བཅུའི་ཉེས་པ་ཤེས་པ་དང་། དགེ་བ་བཅུའི་ཡོན་ཏན་ཤེས་པ་དང་། དགེ་བ་བཅུའི་སྡོམ་པ་ལེན་པ་དང་། བླངས་པ་སླར་མི་གཏོང་བ་དང་། ལན་འགའ་ཉམས་ན་ཡང་ཆོས་བཞིན་དུ་སླར་འཆོས་པས་སྡོམ་པ་ལ་གནས་པ་ཡིན། བྱང་ཆུབ་སེམས་ཀྱི་ཕན་ཡོན་ལེགས་པར་ཤེས་པ་དང་། དེ་སྐྱེ་བའི་རྒྱུ་ལ་གནས་པ་དང་། སེམས་དེ་ཡང་དག་པར་བསྐྱེད་པ་དང་། བསྐྱེད་པའི་མི་མཐུན་པའི་ཕྱོགས་རིང་དུ་སྤོང་བ་དང་། སེམས་དེ་འཕེལ་ཞིང་མི་བརྗེད་པའི་ཆོས་ལ་གནས་པས་བྱང་ཆུབ་ཀྱི་སེམས་ལ་གནས་པ་ཡིན་པས། དེ་ལྟར་ཆོས་རྣམ་པ་གསུམ་ལ་རྣམ་པ་བཅོ་ལྔར་ཕྱེ་བ་འདི་ནི་འདིར་ས་སྦྱང་བའི་གཞི་དང་། རྟེན་དང་། གནས་ཞེས་བྱའོ། །དེ་གཞི་དེ་ལྟ་བུ་ལ་བརྟེན་ནས། ལམ་གྱི་དངོས་གཞི་གང་། ཇི་ལྟར་སྦྱང་ཞེ་ན། གཞི་དེ་དག་ལ་ལེགས་པར་གནས་པས་འཇུག་པ་བྱང་ཆུབ་ཀྱི་སེམས་བླང་བ་བྱས་ནས། ཇི་ལྟར་བླངས་པའི་སྡོམ་པ་ལས་མི་འདའ་བར་བྱམས་པ་ཚད་མེད་པ་བསྒོམ་པ་དང་། དྲན་པ་ཉེ་བར་གཞག་པ་བཞི་བསྒོམ་ཞིང་།

111-236a

ཡང་དག་པར་སྤོང་བ་བཞི་ལ་གནས་པར་བྱ་སྟེ། འདི་ནི་ལས་དང་པོ་པའི་སའི་དངོས་གཞི་ཡིད་ལ་བྱ་བས། རིམ་གྱིས་འཕགས་པའི་བདེན་པ་ལ་འཇུག་པར་བྱའོ། །དེ་ཡང་དྲན་པ་ཉེ་བར་གཞག་པ་དང་། ཡང་དག་པར་སྤོང་བ་བཞི་གྲུབ་ནས། ཏིང་ངེ་འཛིན་གྱི་ངོ་བོ་རྫུ་འཕྲུལ་གྱི་རྐང་པ་བཞི་ལ་གནས་པ་ན། ས་དེ་ཉིད་ཀྱི་ཁྱད་པར་ཐར་པའི་ཆ་དང་མཐུན་པའི་དགེ་བའི་རྩ་བ་བསྐྱེད་པ་ཡིན་ཏེ། བདག་དང་གཞན་གྱི་འབྱོར་པ་དང་། །འདུན་དང་ཚུལ་ཁྲིམས་དབང་པོ་དང་། །དེ་བཞིན་ཟས་དང་མི་ཉལ་དང་། །ཤེས་བཞིན་དུ་ནི་མི་སྤྱོད་དང་། །དེ་བཞིན་དགེ་བའི་བཤེས་གཉེན་དང་། །དམ་ཆོས་ཉན་དང་སེམས་པ་དང་། །བར་ཆད་མེད་དང་གཏོང་བ་དང་། །དགེ་སྦྱོང་བརྒྱ་ནི་ཐ་མ་ཡིན། །དད་ལྡན་གཡོ་མེད་ནད་ཉུང་དང་། །བརྩོན་འགྲུས་ཤེས་རབ་འདོད་ཆུང་དང་། །ཆོག་ཤེས་གསོ་སླད་གང་སླ་དང་། །སྦྱངས་དང་མཛེས་དང་དྲོད་རིག་དང་། །སྐྱེས་བུ་དམ་ཆོས་མཁས་རྟགས་དང་། །བཟོད་དང་དེས་དང་གྱ་ནོམ་པའོ། །ཞེས་བྱ་བའི་ཡོན་ཏན་དང་ལྡན་ལ། དེ་ལས་གཞན་པ་ཐེག་པ་ཆེན་པོའི་ཚོགས་ལམ་གྱི་ཁྱད་པར་ལུས་ལ་དབང་བ་ལ་སོགས་པ་དང་། སྙིང་རྗེ་ཆེན་པོའི་སྒོ་སྔོན་དུ་གྱུར་པས་སྡུག་བསྔལ་བ་མཐོང་བ་ན་རང་དབང་མེད་པར་མཆི་མའི་རྒྱུན་འབབ་པ་ལ་སོགས་པ་འབྱུང་ངོ་། །དེ་ལྟར་བྱང་ཆུབ་སེམས་དཔའི་སྡོམ་པ་དང་། བྱམས་པའི་ཏིང་ངེ་འཛིན་དང་། དྲན་པ་ཉེ་བར་གཞག་པ་དང་། ཡང་དག་པར་སྤོང་བ་དང་། རྫུ་འཕྲུལ་གྱི་རྐང་པ་བཞི་པོ་སྔ་མའི་རྟེན་དང་བཅས་པ་འདི་ནི། ཚོགས་ཀྱི་ལམ་དང་། ལས་དང་པོ་པའི་ས་དང་། དད་པའི་ས་ཞེས་བྱའོ། །ད་ནི་འདིར་ཉིན་མཚན་གྱི་ཆ་ལས་ཡང་དག་པར་སྤོང་བ་བཞི་ལ་གནས་པས་ལམ་སྦྱང་བ་བརྗོད་པ། ཐོ་རངས་མལ་ནས་ལངས་ནས་ནི། །བཞི་གསུམ་དྲན་པས་བརྟུལ་ཞུགས་མཆོག །བདག་གཞན་བརྗེ་དང་འཇིག་རྟེན་གྱི། །ཆོས་བརྒྱད་མཉམ་པར་མོས་པ་བསྐྱེད། །དེ་ནས་ཡིད་ནི་བསྡུས་པ་ཡི། །ཀྱེ་མ་སེམས་ཅན་བདེ་འགྱུར་བསམ། །དེ་ནས་ལུས་དང་ཚོར་བ་དང་། །སེམས་དང་ཆོས་ནི་མི་གཙང་དང་། །སྡུག་བསྔལ་མི་རྟག་བདག་མེད་ཅེས། །ཕྱིན་ཅི་ལོག་བཞིའི་གཉེན་པོ་བསྒོམ། །རེ་རེའམ་ཡང་ན་རིམ་གྱིས་ཀྱང་། །ནམ་

111-236b

ལངས་བར་དུ་འབད་པས་བསྒོམ། །གང་ཞིག་ལུས་ཅན་གྲོལ་འགྱུར་བའི། །ལམ་གྱི་དང་པོ་འདི་ཉིད་ཡིན། །དེ་ནས་ནམ་ནི་ལངས་པ་དང་། །ཅི་རིགས་གཙང་སྦྲ་བྱས་ནས་ནི། །མཆོད་རྟེན་ཕྱག་འཚལ་མཎྜལ་བྱ། །སྡིག་བཤགས་ལ་སོགས་རྒྱས་བྱས་ཏེ། །ལྷག་པར་སྐྱབས་སུ་འགྲོ་བ་དང་། །བྱང་ཆུབ་སེམས་ནི་བརྟན་པོ་བསྐྱེད། །ཅི་རིགས་བསྐོར་བ་བྱས་ནས་ནི། །བླ་མ་དང་ནི་རྒན་པོ་དང་། །ཆོས་སྨྲ་བ་ལའང་ཕྱག་བྱས་ཏེ། །འཛུམ་ཞིང་སྙན་པར་སྨྲ་བ་དང་། །དེ་དག་དགོས་པ་འབད་དེ་བསྒྲུབ། །བར་དེར་དུས་ནི་ཉེར་གནས་ན། །ཆོས་བཤད་ལ་སོགས་སེམས་ཅན་དོན། །རང་བདེ་བཏང་ལ་འབད་པས་བསྒྲུབ། །ཁྱེའུ་སུས་ལ་སོགས་ཟས་ལ་སྤྱོད། །དཀོན་མཆོག་སྤྲིན་ལས་གསུངས་པ་བཞིན། །ཆ་བཞིར་བགོས་ཏེ་བཟའ་བར་བྱ། །ལྷག་པར་ཕོངས་ལ་བཟའ་བཏུང་བགོ། །སྔ་དྲོ་ཡི་ནི་དུས་དག་ཏུ། །བྲི་དང་ཀློག་པ་ལ་སོགས་པའི། །ཆོས་སྤྱོད་བཅུ་ལ་འབད་པའམ། །ཚ་ཚ་བྱའམ་འགྲོ་ཕན་གདགས། །དུས་ཀྱི་དམ་པ་སྔ་དྲོ་ནི། །དོན་མེད་འདའ་བར་མི་བྱའོ། །ཉི་མའི་གུང་ལ་བྱམས་པ་དང་། །དྲན་པ་ཉེར་གཞག་ཅུང་ཟད་བསྒོམ། །དེ་ནས་ཡང་ནི་ཕྱག་འཚལ་སོགས། །སྔ་མ་བཞིན་དུ་རྒྱས་པར་བྱ། །ཕྱི་དྲོ་སྐྱེ་བོ་དམ་པ་དང་། །འགྲོགས་ཤིང་ངལ་སོ་བདེན་དོན་ལ། །འགྲོ་ཞིང་སྲིད་ལས་ཡིད་འབྱུང་བའི། །ལེགས་བཤད་རོ་ནི་མྱང་བར་བྱ། །ཕྱི་འཕྲེད་སླར་ཡང་སྔ་མ་བཞིན། །ཞི་གནས་ལྷག་མཐོང་བསྒོམ་པ་དང་། །མཆོད་རྟེན་ཕྱག་འཚལ་ལ་སོགས་བྱ། །དམར་ཐག་ཆད་ནས་མཚན་མོ་ནི། །བླ་མའི་བསྙེན་བཀུར་ཚུལ་བཞིན་བྱ། །རང་གི་རྐང་པ་བཀྲུས་ནས་ནི། །ཞི་གནས་ལྷག་མཐོང་བསྒོམ་པའམ། །དོན་ཆེན་ལྡན་པའི་ཁ་ཏོན་བྱ། །ནམ་གྱི་ཆ་སྟོད་འདས་པ་དང་། །ཚུལ་བཞིན་ཡིད་ལ་བྱེད་པ་ཡིས། །རིགས་པ་བཞིན་དུ་ཉལ་བར་བྱ། །ཉིན་པར་དང་ནི་མཚན་མོ་ཡང་། །ལག་བཟངས་ཀྱིས་ནི་ཞུས་པ་དང་། །རིན་ཆེན་ཕྲེང་བ་ལས་བཤད་ལྟར། །སྣ་ཚོགས་དགེ་བའི་ཕྱོགས་ལ་འབད། །དེ་ནས་ཚེ་འདི་ཉིད་ལ་ཡང་། །དྲོད་ལ་སོགས་པ་ཐོབ་པར་འགྱུར། །དེ་ལྟར་ཐོས་པ་དང་བསམ་པ་ལ་གནས་པས་ཚོགས་ཀྱི་ལམ་ཕལ་པ་དང་ཁྱད་པར་ཅན་སྦྱང་

111-237a

ངོ་། །དེ་ལས་གོང་དུ་བསྒོམ་པ་ལ་བྱང་བས་མོས་པས་སྤྱོད་པའི་ས་དག་ལ་དབང་པོ་དང་སྟོབས་ཀྱི་བདེན་པ་དག་བསྒོམས་པའི་ས་སྦྱང་བ་ནི་དཀོན་མཆོག་སྤྲིན་ལ་སོགས་པར་བལྟ་ཞིང་། རབ་ཏུ་དགའ་བ་ལ་སོགས་པའི་ས་སྦྱང་བ་ནི་ས་བཅུའི་ལེའུ་ལས་བསྟན་ཏོ། །རྒྱལ་བའི་སྲས་ཀྱི་ས་ཡི་དང་པོ་པ། །ཚོགས་ཀྱི་ས་སྟེ་དེ་སྦྱངས་མདོར་བསྡུས་པ། །ཅུང་ཟད་བཤད་ལས་དགེ་བ་གང་ཐོབ་པ། །དེས་ནི་འགྲོ་རྣམས་དག་པའི་ས་ཐོབ་ཤོག །ལས་དང་པོ་པའི་ས་སྦྱང་བ་ཞེས་བྱ་བ་སློབ་དཔོན་མཁས་པ་ཆེན་པོ་བྱང་ཆུབ་སེམས་དཔའ་དགྲ་ལས་རྒྱལ་གསང་བའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་ཀྲྀཥྞ་པ་དང་། ཞུ་ཆེན་གྱི་ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ། །